ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠳᠣᠯᠣᠳᠤᠭᠠᠷ ᠪᠦᠯᠦᠭ>᠂ ᠲᠡᠭᠦᠰᠭᠡᠯ ᠦᠭᠡᠢ ᠦᠢᠮᠡᠭᠡᠨ - ᠨᠢᠭᠡ Бүргэд харьд үүрэлдэггүй – Ж᠂ Пүрэв <7-р бүлэг>. Төгсөглөгүй үймээн ~1
9ᠳᠣᠯᠣᠳᠤᠭᠠᠷ ᠪᠦᠯᠦᠭ᠂ ᠲᠡᠭᠦᠰᠭᠡᠯ ᠦᠭᠡᠢ ᠦᠢᠮᠡᠭᠡᠨ
ᠨᠢᠭᠡ - ᠶᠡᠬᠡ ᠵᠢᠩ ᠦᠨ ᠴᠤᠪᠤᠭᠠ ᠳᠠᠰᠤᠷᠠᠪᠠ
ᠪᠢᠯᠢᠭᠦᠨ ᠭᠡᠷ ᠲᠤ ᠪᠡᠨ ᠵᠦᠭᠡᠷ ᠬᠡᠪᠲᠡᠭᠡᠳ ᠪᠠᠢᠬᠤ ᠠᠷᠭᠠ ᠦᠭᠡᠢ ᠰᠠᠨᠠᠭᠳᠠᠨ᠂ ᠁ ᠠᠷᠢᠬᠪᠥᠶ᠋ᠬᠡ ᠶ᠋ᠢ ᠦᠷᠦ ᠡᠪᠡᠳᠴᠦ《ᠤᠭ ᠨᠢ ᠲᠩᠷᠢ ᠲᠡᠢ ᠪᠠᠢᠬᠤ ᠪᠠᠷ ᠰᠠᠢᠬᠠᠨ ᠡᠷᠡ ᠰᠠᠨ᠃ ᠠᠷᠢᠬᠪᠥᠶ᠋ᠬᠡ ᠮᠠᠨᠢ ᠮᠣᠩᠭᠣᠯ ᠢ᠋ᠶ᠋ᠠᠨ ᠯᠠ ᠭᠡᠵᠦ ᠤᠷᠭᠤᠮᠠᠯ ᠬᠤᠪᠢᠯᠠᠢ ᠲᠠᠢ ᠲᠡᠮᠡᠴᠡᠯᠳᠦᠵᠦ ᠶᠠᠪᠤᠭᠠ ᠡᠷᠡ᠃ ᠲᠡᠷᠡ ᠬᠥᠮᠦᠨ ᠵᠥᠪᠬᠡᠨ ᠥᠪᠡᠷ ᠢ᠋ ᠪᠡᠨ ᠪᠣᠳᠣᠭᠰᠠᠨ ᠪᠣᠯ ᠢᠩᠭᠢᠵᠦ ᠦᠢᠯᠡ ᠲᠠᠮᠤ ᠪᠠᠨ ᠡᠳ᠋ᠯᠡᠵᠦ ᠶᠠᠪᠤᠬᠤ ᠦᠭᠡᠢ᠂ ᠬᠤᠪᠢᠯᠠᠢ ᠰᠢᠭ᠋ ᠵᠠᠪᠬᠠᠭᠤᠯ ᠡᠮᠡᠰ ᠴᠤᠭᠯᠠᠭᠤᠯᠤᠭᠠᠳ᠂ ᠬᠣᠨᠢᠨ ᠤ᠋ ᠲᠠᠷᠭᠤᠨ ᠤᠭᠤᠴᠠ᠂ ᠭᠡᠭᠦᠦ ᠶ᠋ᠢᠨ ᠠᠢᠷᠠᠭ ᠬᠣᠶᠠᠷ ᠢ᠋ᠶ᠋ᠠᠷ ᠭᠡᠳᠡᠰᠦ ᠪᠡᠨ ᠪᠣᠷᠳᠣᠭᠠᠳ ᠬᠡᠪᠲᠡᠵᠦ ᠪᠠᠢᠵᠤ ᠪᠣᠯᠬᠤ ᠪᠠᠢᠭᠰᠠᠨ᠃ ᠬᠠᠷᠠᠬᠣᠷᠣᠮ ᠤ᠋ᠨ ᠲᠥᠯᠥᠭᠡ ᠯᠡ ᠡᠨᠡ ᠡᠷᠡ ᠪᠣᠰᠤᠭᠰᠠᠨ᠃ ᠤᠭ ᠬᠥᠮᠦᠨ ᠨᠢ ᠡᠷᠡᠯᠬᠡᠭ ᠵᠣᠯᠪᠣᠭᠠ ᠲᠠᠢ᠂ ᠨᠢᠷᠤᠭᠤ ᠲᠡᠭᠰᠢ᠂ ᠣᠯᠠᠨ ᠠᠷᠪᠢᠨ ᠠᠭᠠᠰᠢ ᠵᠠᠩ ᠦᠭᠡᠢ᠂ ᠨᠣᠮ ᠡᠷᠳᠡᠮ ᠢ᠋ ᠬᠦᠨᠳᠦᠯᠡᠨ ᠦᠵᠡᠳᠡᠭ᠂ ᠳᠣᠣᠷᠠᠲᠤ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠥᠮᠦᠰ ᠢ᠋ᠶ᠋ᠡᠨ ᠨᠣᠬᠠᠢ ᠠᠳᠠᠯᠢ ᠬᠠᠶᠠᠳᠠᠭ ᠦᠭᠡᠢ᠂ ᠡᠪᠦᠭᠡᠳ ᠨᠠᠰᠤᠲᠠᠨ ᠨᠤᠭᠤᠳ ᠢ᠋ᠶ᠋ᠠᠨ ᠳᠡᠭᠡᠳᠦᠯᠡᠳᠡᠭ ᠳᠡ᠃ ᠡᠢᠮᠦ ᠯᠡ ᠬᠥᠮᠦᠨ ᠮᠠᠨ ᠤ᠋ ᠬᠠᠭᠠᠨ ᠪᠠᠢᠭᠠᠰᠠᠢ ᠭᠡᠵᠦ ᠣᠯᠠᠨ ᠤ᠋ ᠬᠡᠯᠡᠳᠡᠭ ᠵᠥᠪ ᠭᠡᠮᠡᠨ ᠪᠣᠳᠣᠨ᠂ ᠮᠣᠳᠣ ᠲᠤᠯᠤᠭᠠᠳ ᠬᠠᠭᠠᠨ ᠤ᠋ ᠣᠷᠳᠣᠨ ᠤᠷᠤᠭᠤ ᠬᠡᠯᠲᠦᠷᠢᠯᠡ᠃
《ᠶᠡᠬᠡ ᠵᠣᠬᠢᠴᠠᠯ ᠳᠠᠭᠤᠨ ᠤ᠋ ᠣᠷᠳᠣᠨ》 ᠳ᠋ᠤ᠌ ᠬᠡᠳᠦᠨ ᠨᠣᠶᠠᠳ ᠲᠦᠰᠢᠮᠡᠳ ᠬᠤᠷᠠᠭᠰᠠᠨ ᠪᠠᠢᠪᠠ᠃ ᠪᠢᠯᠢᠭᠦᠨ ᠲᠡᠷᠡ ᠬᠤᠷᠠᠭᠰᠠᠨ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠣᠷᠣᠵᠤ ᠶᠠᠪᠤᠴᠢᠬᠠᠯᠠ᠃ ᠴᠡᠷᠢᠭ ᠦ᠋ᠨ ᠳᠠᠭᠠᠭᠠᠮᠠᠯ᠂ ᠪᠤᠰᠤᠳ ᠨᠣᠶᠠᠳ ᠲᠦᠰᠢᠮᠡᠳ ᠨᠠᠷ ᠱᠤᠤᠭᠢᠯᠳᠤᠨ ᠦᠭᠡ ᠶᠠᠷᠢᠵᠤ ᠪᠠᠢᠨᠠ᠃ ᠠᠷᠢᠬᠪᠥᠶ᠋ᠬᠡ ᠡᠩ ᠦ᠋ᠨ ᠳᠡᠪᠡᠯ ᠡᠮᠦᠰᠦᠨ ᠰᠠᠭᠤᠵᠤ ᠬᠥᠮᠦᠰ ᠦ᠋ᠨ ᠶᠠᠷᠢᠶᠠ ᠶ᠋ᠢ ᠴᠢᠩᠨᠠᠨ ᠪᠠᠢᠭᠠ ᠪᠣᠯᠤᠯᠲᠠᠢ᠃
— ᠬᠤᠪᠢᠯᠠᠢ ᠶ᠋ᠢᠨ ᠴᠢᠷᠴᠦ ᠢᠷᠡᠭᠰᠡᠨ ᠣᠯᠠᠨ ᠬᠢᠲᠠᠳ ᠴᠡᠷᠢᠭ ᠯᠡ ᠬᠥᠰᠢᠭᠡᠨ ᠬᠠᠭᠠᠯᠲᠠ ᠬᠢᠵᠦ᠂ ᠮᠥᠨᠳᠥᠷ ᠰᠢᠭ ᠰᠤᠮᠤ ᠬᠠᠷᠪᠤᠨ᠂ ᠬᠠᠮᠤᠭ ᠮᠣᠷᠢᠳ ᠢ᠋ ᠬᠢᠳᠤᠭᠰᠠᠨ᠃
— ᠡᠯᠡᠰᠦᠨ ᠰᠢᠭᠤᠷᠭᠠ ᠨᠦᠳᠦᠨ ᠬᠠᠮᠤᠭ ᠬᠥᠮᠦᠨ᠂ ᠮᠣᠷᠢ ᠶ᠋ᠢ ᠰᠣᠬᠣᠯᠤᠭᠠ ᠦᠭᠡᠢ ᠪᠣᠯ ᠪᠢᠳᠡ ᠰᠠᠢᠨ ᠲᠤᠯᠤᠯᠳᠤᠵᠤ ᠶᠠᠪᠤᠭᠰᠠᠨ᠃ ᠲᠩᠷᠢ ᠶ᠋ᠢ ᠠᠭᠤᠷᠯᠠᠭᠤᠯᠬᠤ ᠮᠠᠭᠤᠬᠠᠢ ᠶᠠᠪᠤᠳᠠᠯ ᠢ᠋ ᠬᠤᠪᠢᠯᠠᠢ ᠵᠣᠷᠢᠭᠤᠳᠠ ᠦᠢᠯᠡᠳᠦᠭᠰᠡᠨ ᠡᠴᠡ ᠡᠰᠡ ᠵᠠᠢᠯᠠᠯᠠ ᠭᠡᠵᠢ ᠤᠤ᠃
— ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠮᠠᠨ ᠤ᠋ ᠴᠡᠷᠢᠭ ᠲᠡᠷᠢᠭᠦᠯᠡᠨ ᠲᠠᠰᠤᠷᠠᠵᠤ ᠣᠷᠣᠭᠰᠠᠨ ᠠ᠋ᠴᠠ ᠡᠩᠨᠡᠭᠡ ᠡᠪᠳᠡᠷᠡᠭᠰᠡᠨ᠃ ᠪᠢᠳᠡ ᠲᠣᠭᠠ ᠪᠠᠷ ᠬᠤᠪᠢᠯᠠᠢ ᠠ᠋ᠴᠠ ᠴᠥᠭᠡᠨ ᠪᠠᠢᠬᠤ ᠳ᠋ᠤ᠌ ᠰᠤ᠂ ᠭᠡ ᠨᠠᠷ ᠤ᠋ᠨ ᠵᠠᠬᠢᠷᠤᠭᠴᠢᠳ ᠣᠩᠭᠢᠷᠠᠵᠤ ᠪᠣᠳᠣᠯᠭᠠ ᠦᠭᠡᠢ ᠪᠡᠷ ᠳᠠᠭᠠᠷᠢᠨ ᠳᠣᠪᠲᠣᠯᠵᠤ ᠴᠡᠷᠢᠭ ᠰᠦᠢᠳᠬᠡᠭᠰᠡᠨ᠃
— ᠪᠢᠳᠡ ᠲᠤᠯᠤᠯᠳᠤᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠪᠤᠷᠤᠭᠤ ᠰᠣᠩᠭᠣᠵᠤ ᠠᠪᠤᠭᠰᠠᠨ᠃ ᠡᠯᠡᠰᠦ ᠪᠠᠭᠠᠲᠠᠢ ᠪᠠᠢᠭᠰᠠᠨ ᠪᠣᠯ
— ᠡᠯᠡᠰᠦᠨ ᠡᠴᠡ ᠪᠣᠯᠤᠭᠠ ᠦᠭᠡᠢ᠂ ᠰᠢᠭᠤᠷᠭᠠᠨ ᠠ᠋ᠴᠠ ᠪᠣᠯᠤᠭᠰᠠᠨ᠃ ᠪᠢᠳᠡᠨ ᠦ᠌ ᠮᠣᠷᠢᠳ ᠴᠤᠴᠠᠭᠰᠠᠨ ᠪᠠᠢᠪᠠ᠃
— ᠳᠠᠭᠠᠭᠠᠮᠠᠯ ᠤ᠋ᠳ ᠬᠠᠭᠠᠨ ᠢ᠋ ᠠᠩᠬᠠᠷᠤᠭᠤᠯᠤᠨ ᠬᠡᠯᠡᠭᠰᠡᠭᠡᠷ ᠪᠠᠢᠲᠠᠯᠠ ᠡᠩᠨᠡᠭᠡ ᠪᠡᠨ ᠳᠠᠪᠬᠤᠷᠯᠠᠬᠤ ᠦᠭᠡᠢ ᠳᠠᠭᠠᠷᠢᠭᠰᠠᠨ᠃ ᠭᠡᠨᠡᠨ ᠵᠠᠩ ᠭᠠᠷᠭᠠᠵᠤ ᠶᠠᠪᠤᠭᠠᠳ ᠢᠯᠠᠭᠳᠠᠯᠠ ᠭᠡᠮᠡᠨ ᠮᠠᠷᠭᠤᠯᠳᠤᠵᠤ ᠪᠠᠢᠪᠠ᠃ ᠳᠣᠷᠭᠣᠨ ᠴᠢᠩᠰᠠᠩ ᠲᠡᠷᠲᠡᠭᠡ ᠬᠠᠵᠠᠭᠤᠨ ᠠ᠋ᠴᠠ ᠪᠣᠰᠴᠤ᠂ ᠶᠣᠰᠣᠷᠬᠠᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠷᠢᠬᠪᠥᠶ᠋ᠬᠡ ᠡᠴᠡ ᠦᠭᠡ ᠬᠡᠯᠡᠬᠦ ᠵᠥᠪᠰᠢᠶᠡᠷᠡᠯ ᠠᠪᠴᠤ ᠪᠥᠬᠥᠢᠨ ᠬᠦᠨᠳᠦᠯᠡᠯ ᠢᠯᠡᠷᠬᠡᠢᠯᠡᠭᠡᠳ᠄
— ᠲᠠ ᠮᠢᠨᠢ ᠠ᠋! ᠪᠢᠳᠡ ᠬᠣᠭᠣᠰᠣᠨ ᠱᠤᠤᠭᠢᠵᠤ ᠮᠠᠷᠭᠤᠯᠳᠤᠭᠠᠳ ᠶᠠᠭᠠᠬᠢᠬᠤ ᠪᠣᠢ᠃ ᠪᠢᠳᠡ ᠤᠯᠠᠢ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠬᠡᠷᠢᠶᠡ ᠪᠢᠰᠢ ᠳᠡ᠃ ᠪᠢᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠣᠢᠷᠠᠬᠠᠨ ᠵᠠᠢᠲᠠᠢ ᠪᠠᠷ ᠬᠣᠶᠠᠷ ᠲᠣᠮᠣ ᠲᠤᠯᠤᠯᠳᠤᠭᠠᠨ ᠬᠢᠵᠦ ᠲᠠᠮᠢᠷᠳᠠᠯᠠ᠃ ᠣᠳᠣ ᠲᠡᠩᠬᠡᠷᠡᠬᠦ ᠶ᠋ᠢ ᠪᠣᠳᠣᠬᠤ ᠶᠣᠰᠣᠲᠠᠢ᠃ ᠢᠯᠠᠭᠳᠠᠵᠤ ᠪᠣᠯᠤᠭᠰᠠᠨ ᠶᠠᠭᠤᠮᠠ᠂ ᠢᠯᠠᠵᠤ ᠪᠠᠰᠠ ᠪᠣᠯᠬᠤ ᠪᠣᠢ᠃ ᠪᠢᠳᠡ ᠤᠬᠠᠭᠠᠨ ᠢ᠋ᠶ᠋ᠠᠷ ᠯᠠ ᠳᠠᠢᠰᠤᠨ ᠢ᠋ ᠳᠡᠢᠯᠦᠨᠡ᠃ ᠰᠢᠷᠭᠤᠯᠵᠢ ᠰᠢᠭ᠋ ᠣᠯᠠᠨ ᠬᠢᠲᠠᠳ ᠲᠠᠢ ᠨᠥᠬᠥᠴᠡᠭᠰᠡᠨ ᠬᠤᠪᠢᠯᠠᠢ ᠶ᠋ᠢ ᠲᠡᠢᠮᠦ ᠠᠮᠠᠷ ᠨᠤᠭᠤᠰᠤᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠢ ᠯᠠᠪᠲᠠᠢ ᠬᠡᠷᠡᠭ᠃ ᠣᠳᠣ ᠨᠡᠢᠰᠯᠡᠯ ᠬᠣᠲᠠ ᠪᠠᠨ ᠰᠠᠢᠨ ᠪᠡᠬᠢᠯᠡᠬᠦ ᠶᠣᠰᠣᠲᠠᠢ ᠪᠣᠯᠪᠠ᠃ ᠬᠠᠭᠠᠨᠲᠠᠨ ᠢᠩᠭᠢᠵᠦ ᠵᠠᠷᠯᠢᠭᠯᠠᠭᠠᠰᠠᠢ! ᠬᠤᠪᠢᠯᠠᠢ ᠥᠭᠡᠳᠡᠯᠡᠬᠦ ᠦᠭᠡᠢ ᠳᠡ᠃ ᠲᠡᠷᠡ ᠬᠥᠮᠦᠨ ᠶᠠᠭᠠᠬᠢᠵᠤ ᠴᠤ᠌ ᠢᠯᠠᠨ ᠲᠠᠢᠯᠵᠤ ᠶᠠᠪᠤᠯᠠ ᠭᠡᠰᠡᠨ ᠵᠢᠷᠭᠠᠯ ᠦᠵᠡᠬᠦ ᠦᠭᠡᠢ ᠥᠩᠭᠡᠷᠡᠬᠦ ᠪᠢᠵᠡ᠃《ᠬᠠᠷᠠ ᠰᠠᠨᠠᠭᠠᠲᠤ ᠬᠠᠳᠠ ᠮᠥᠷᠭᠥᠳᠡᠭ》 ᠵᠢᠮᠡ ᠲᠡᠢ᠃ ᠬᠠᠮᠤᠭ ᠪᠠᠢᠳᠠᠭ ᠢ᠋ ᠬᠠᠭᠠᠯᠤᠨ ᠪᠤᠲᠠᠷᠠᠭᠠᠵᠤ ᠶᠠᠪᠤᠬᠤ ᠪᠤᠵᠠᠷ ᠦᠢᠯᠡ ᠪᠡᠨ ᠬᠤᠪᠢᠯᠠᠢ ᠡᠳ᠋ᠯᠡᠬᠦ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠪᠢᠳᠡ ᠡᠶᠡ ᠡᠪ ᠢ᠋ᠶ᠋ᠡᠨ ᠡᠷᠢᠶᠡ ᠴᠡᠭᠡᠷ ᠦᠭᠡᠢ ᠡᠪᠳᠡᠯᠡᠪᠡᠯ ᠡᠴᠦᠰ ᠲᠡᠭᠦᠰᠬᠡᠯ ᠳ᠋ᠦ᠍ ᠪᠡᠨ ᠬᠣᠣᠷᠲᠤ ᠮᠣᠭᠠᠢ ᠶ᠋ᠢᠨ ᠬᠣᠭᠣᠯᠠ ᠪᠣᠯᠤᠨᠠ ᠭᠡᠵᠦ ᠰᠠᠨᠠᠭᠠᠷᠠᠢ᠁ ᠭᠡᠮᠡᠨ ᠬᠡᠯᠡᠯᠡ᠃ ᠲᠣ᠊ ᠴᠢᠩᠰᠠᠩ ᠤ᠋ᠨ ᠡᠨᠡ ᠦᠭᠡ ᠶ᠋ᠢ ᠵᠠᠷᠢᠮ ᠨᠢᠭᠡ ᠲᠦᠰᠢᠮᠡᠯ《ᠵᠥᠨᠥᠭ ᠡᠪᠦᠭᠡᠨ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠣᠩᠭᠣᠰᠴᠤ ᠪᠠᠢᠨᠠ》 ᠭᠡᠵᠦ ᠦᠵᠡᠪᠡ ᠪᠣᠯᠤᠯᠲᠠᠢ᠃
ᠠᠷᠢᠬᠪᠥᠶ᠋ᠬᠡ ᠡᠪᠦᠭᠡᠨ ᠲᠦᠰᠢᠮᠡᠯ ᠦ᠋ᠨ ᠦᠭᠡ ᠶ᠋ᠢ ᠲᠠᠭᠠᠯᠠᠯᠲᠠᠢ ᠤᠭᠲᠤᠨ᠂ ᠲᠡᠭᠦᠨ ᠳ᠋ᠦ᠍ ᠲᠠᠯᠠ ᠥᠭᠴᠦ ᠮᠡᠬᠦᠢᠭᠡᠳ᠄
— ᠨᠣᠶᠠᠳ ᠮᠢᠨᠢ ᠠ᠋! ᠲᠡᠩᠬᠡᠷᠡᠬᠦ ᠶᠣᠰᠣᠲᠠᠢ ᠭᠡᠳᠡᠭ ᠦᠭᠡ ᠶ᠋ᠢ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠮᠤᠬᠤᠷ ᠲᠤ ᠰᠠᠨᠠᠵᠤ ᠶᠠᠪᠤᠶᠠ! ᠭᠡᠮᠡᠨ ᠥᠭᠦᠯᠡᠵᠦ ᠪᠠᠢᠪᠠ᠃ ᠡᠨᠡ ᠪᠦᠬᠦᠨ ᠢ᠋ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠪᠢᠯᠢᠭᠦᠨ
— ᠬᠠᠭᠠᠨᠲᠠᠨ ᠮᠢᠨᠢ ᠪᠣᠯᠭᠣᠭᠠ! ᠲᠣ᠊ ᠴᠢᠩᠰᠠᠩ ᠤ᠋ᠨ ᠦᠭᠡ ᠶ᠋ᠢ ᠰᠠᠨᠠᠵᠤ ᠡᠮᠦᠨᠡ ᠵᠦᠭ ᠲᠦ᠍ ᠣᠢᠷᠠ᠂ ᠬᠣᠯᠠ ᠬᠠᠷᠠᠭᠤᠯ ᠭᠠᠷᠭᠠᠶᠠ᠃ ᠪᠣᠭᠣᠯ ᠪᠢ ᠲᠡᠭᠦᠨ ᠳ᠋ᠦ᠍ ᠣᠷᠣᠯᠴᠠᠨ ᠶᠠᠪᠤᠶᠠ ᠭᠡᠯᠡ᠃ ᠪᠢᠯᠢᠭᠦᠨ ᠦ᠌ ᠡᠨᠡ ᠦᠭᠡ ᠣᠯᠠᠨ ᠤ᠋ ᠲᠠᠭᠠᠰᠢᠶᠠᠯ ᠢ᠋ ᠬᠦᠯᠢᠶᠡᠪᠡ᠃ ᠠᠷᠢᠬᠪᠥᠶ᠋ᠬᠡ ᠣᠩᠬᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠠᠳᠠᠭ᠂ ᠵᠡᠭᠦᠨ ᠪᠣᠭᠳᠠ ᠶ᠋ᠢᠨ ᠥᠪᠥᠷ᠂ ᠰᠤᠳᠠᠢ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠵᠡᠷᠭᠡ ᠭᠠᠵᠠᠷ ᠤ᠋ᠳ ᠲᠤ ᠴᠥᠭᠡᠪᠲᠦᠷ ᠬᠥᠮᠦᠨ ᠲᠡᠢ ᠬᠠᠷᠠᠭᠤᠯ ᠲᠠᠯᠪᠢᠨ᠂ ᠡᠮᠦᠨᠡ ᠵᠦᠭ ᠡᠴᠡ ᠰᠡᠷᠭᠡᠢᠯᠡᠬᠦ ᠰᠢᠢᠳ ᠭᠠᠷᠭᠠᠯᠠ᠃ ᠲᠡᠷᠡ ᠬᠠᠷᠠᠭᠤᠯ ᠤ᠋ᠳ ᠤ᠋ᠨ ᠳᠤᠮᠳᠠ ᠪᠢᠯᠢᠭᠦᠨ ᠡᠷᠭᠢᠭᠦᠯ ᠶᠠᠪᠤᠵᠤ᠂ ᠪᠠᠢᠳᠠᠯ ᠶᠠᠮᠠᠷ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ᠂ ᠠᠷᠢᠬᠪᠥᠶ᠋ᠬᠡ ᠪᠣᠯᠤᠨ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠶ᠋ᠢᠨ ᠵᠠᠩᠵᠤᠨ ᠳ᠋ᠤ᠌ ᠬᠡᠯᠡ ᠬᠦᠷᠭᠡᠵᠦ ᠪᠠᠢᠳᠠᠭ ᠪᠣᠯᠵᠠᠢ᠃
ᠴᠠᠭ ᠬᠤᠭᠤᠴᠠᠭᠠ ᠬᠠᠷᠪᠤᠭᠰᠠᠨ ᠰᠤᠮᠤ ᠭᠡᠭᠴᠢ ᠰᠢᠭ ᠥᠩᠭᠡᠷᠡᠵᠦ ᠪᠠᠢᠯᠠ᠃ ᠬᠤᠪᠢᠯᠠᠢ ᠶ᠋ᠢᠨ ᠵᠦᠭ ᠡᠴᠡ ᠴᠡᠷᠢᠭ ᠦ᠋ᠨ ᠲᠣᠮᠣ ᠳᠣᠪᠲᠣᠯᠭᠠᠨ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ᠂ ᠥᠭᠡᠷᠡ ᠠᠷᠭᠠ ᠪᠠᠷ ᠠᠷᠢᠬᠪᠥᠶ᠋ᠬᠡ ᠶ᠋ᠢ ᠪᠠᠭᠠᠯᠵᠠᠭᠤᠷᠳᠠᠨᠠ ᠭᠡᠵᠦ ᠲᠡᠷᠡ ᠪᠡᠷ ᠪᠣᠳᠣᠭᠰᠠᠨ ᠪᠣᠯᠤᠯᠲᠠᠢ᠃ ᠬᠠᠷᠢᠨ ᠡᠯᠳᠡᠪ ᠥᠩᠭᠡ ᠶ᠋ᠢᠨ ᠲᠤᠷᠰᠢᠭᠤᠯ ᠤ᠋ᠳ ᠲᠠᠰᠤᠷᠠᠯᠲᠠ ᠦᠭᠡᠢ ᠴᠤᠪᠤᠵᠤ ᠪᠠᠢᠪᠠ᠃ ᠡᠷᠢᠶᠡᠨ ᠣᠪᠣᠭᠠᠨ ᠤ᠋ ᠬᠠᠷᠠᠭᠤᠯ ᠳᠡᠭᠡᠷᠡ ᠪᠢᠯᠢᠭᠦᠨ ᠢ᠋ ᠣᠴᠢᠭᠠᠳ ᠪᠠᠢᠬᠤ ᠳ᠋ᠤ᠌ ᠰᠡᠵᠢᠭᠯᠡᠭᠳᠡᠭᠰᠡᠨ ᠨᠢᠭᠡ ᠲᠥᠪᠡᠳ ᠯᠠᠮᠠ ᠪᠠᠷᠢᠭᠳᠠᠨ ᠣᠴᠢᠭᠰᠠᠨ ᠳᠣᠣᠷᠠ ᠪᠠᠨ《ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠬᠡᠳᠦ ᠬᠡᠴᠢᠨᠡᠨ ᠴᠡᠷᠢᠭ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠶ᠋ᠢ ᠬᠢᠴᠢᠶᠡ᠂ ᠬᠥᠮᠦᠨ ᠣᠯᠠᠨ ᠶᠠᠭᠤ ᠶᠠᠷᠢᠵᠤ ᠪᠠᠢᠨᠠ ᠪᠣᠢ᠂ ᠲᠡᠭᠦᠨ ᠢ᠋ ᠰᠠᠢᠨ ᠰᠣᠨᠣᠰ᠂ ᠭᠠᠳᠠᠨᠠ ᠳᠣᠲᠣᠨᠠ ᠶ᠋ᠢᠨ ᠬᠥᠮᠦᠰ ᠬᠤᠪᠢᠯᠠᠢ ᠬᠠᠭᠠᠨ ᠳ᠋ᠤ᠌ ᠬᠢᠷᠢ ᠰᠦᠰᠦᠭ ᠲᠡᠢ ᠪᠠᠢᠨᠠ ᠪᠣᠢ? ᠠᠷᠢᠬᠪᠥᠶ᠋ᠬᠡ ᠳ᠋ᠦ᠍ ᠬᠥᠮᠦᠰ ᠦ᠋ᠨ ᠠᠮᠠ ᠶᠠᠮᠠᠷ ᠰᠢᠦ ᠪᠠᠢᠨᠠ? ᠲᠡᠷᠡ ᠪᠦᠬᠦᠨ ᠢ᠋ ᠮᠡᠳᠡᠵᠦ ᠠᠪ᠃ ᠰᠦᠮᠡ ᠳ᠋ᠦ᠍ ᠰᠠᠭᠤᠳᠠᠭ ᠯᠠᠮᠠ ᠨᠠᠷ ᠢ᠋〈ᠬᠤᠪᠢᠯᠠᠢ ᠬᠠᠭᠠᠨ ᠤ᠋ ᠲᠥᠯᠥᠭᠡ ᠵᠠᠯᠪᠠᠷᠢᠵᠤ ᠪᠠᠢᠬᠤ ᠨᠢ ᠠᠮᠢ ᠨᠠᠰᠤᠨ ᠳ᠋ᠤ᠌ ᠠᠪᠤᠷᠠᠯ ᠲᠠᠢ〉 ᠭᠡᠵᠦ ᠣᠯᠠᠨ ᠠᠮᠢᠲᠠᠨ ᠳ᠋ᠤ᠌ ᠬᠡᠯᠡᠵᠦ ᠪᠠᠢ ᠭᠡᠵᠦ ᠵᠥᠪᠯᠡᠨ᠂ ᠡᠨᠡ ᠬᠡᠷᠡᠭ ᠢ᠋ ᠭᠦᠢᠴᠡᠯᠳᠦᠭᠦᠯᠦᠭᠡᠳ ᠳᠠᠷᠤᠢ ᠨᠠᠭᠠᠰᠢ ᠪᠠᠨ ᠡᠷᠭᠢᠨ ᠢᠷᠡ! ᠱᠠᠩ ᠬᠦᠷᠲᠡᠭᠡᠨᠡ》 ᠭᠡᠰᠡᠨ ᠭᠡᠵᠦ ᠥᠴᠢᠯᠡ᠃
ᠪᠠᠰᠠ ᠨᠢᠭᠡ 《ᠠᠯᠳᠠᠭᠤᠯ ᠲᠡᠮᠡᠭᠡ ᠡᠷᠢᠵᠦ ᠶᠠᠪᠤᠭᠠ》 ᠭᠡᠰᠡᠨ ᠮᠣᠷᠢᠲᠠᠨ ᠡᠷᠡ ᠶ᠋ᠢ ᠰᠡᠵᠢᠭᠯᠡᠨ ᠪᠠᠷᠢᠵᠤ ᠪᠠᠢᠴᠠᠭᠠᠪᠠᠯ᠂ ᠲᠡᠷᠡ ᠪᠡᠷ ᠭᠣᠷᠯᠣᠰ ᠡᠷᠡ ᠲᠤᠷᠰᠢᠭᠤᠯ ᠢ᠋ᠶ᠋ᠠᠷ ᠱᠠᠩᠳᠤ ᠬᠣᠲᠠ ᠠ᠋ᠴᠠ ᠮᠣᠷᠳᠠᠭᠰᠠᠨ ᠢ᠋ᠶ᠋ᠠᠨ ᠬᠦᠯᠢᠶᠡᠵᠦ《ᠨᠠᠮᠠᠶ᠋ᠢ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠴᠡᠷᠢᠭ ᠬᠠᠮᠢᠭᠠ ᠶᠠᠮᠠᠷ ᠭᠠᠵᠠᠷ ᠰᠠᠭᠤᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡ᠂ ᠬᠠᠷᠠᠬᠣᠷᠣᠮ ᠣᠷᠣᠬᠤ ᠬᠡᠷᠡᠭ ᠦᠭᠡᠢ᠂ ᠲᠡᠭᠦᠨ ᠡᠴᠡ ᠨᠠᠭᠠᠭᠤᠷ ᠪᠠᠢᠭᠠ ᠴᠡᠷᠢᠭ ᠦ᠋ᠳ ᠢ᠋ ᠠᠵᠢᠭᠯᠠ》 ᠭᠡᠰᠡᠨ ᠭᠡᠵᠦ ᠥᠴᠢᠯᠡ᠃ ᠡᠢᠮᠦ ᠲᠤᠷᠰᠢᠭᠤᠯ ᠪᠠᠷᠤᠭ ᠬᠠᠷᠠᠭᠤᠯ ᠤ᠋ᠨ ᠠᠩᠭᠢ ᠪᠦᠬᠦᠢ ᠳᠡᠭᠡᠷᠡ ᠠᠷᠪᠠ ᠲᠠᠪᠤ ᠪᠠᠷ ᠢ᠋ᠶ᠋ᠠᠨ ᠪᠠᠷᠢᠭᠳᠠᠭᠰᠠᠨ ᠪᠠᠢᠨᠠ᠃ ᠬᠤᠳᠠᠯᠳᠤᠭᠠᠴᠢᠨ᠂ ᠮᠠᠯ ᠡᠷᠢᠭᠰᠡᠨ᠂ ᠵᠢᠩ ᠲᠡᠭᠡᠭᠡᠵᠦ ᠶᠠᠪᠤᠭᠠ᠂ ᠮᠥᠷᠭᠥᠯ ᠡᠷᠭᠢᠯ ᠬᠢᠵᠦ ᠶᠠᠪᠤᠭᠠ ᠭᠡᠬᠦᠴᠢᠯᠡᠨ ᠦᠭᠡ ᠶ᠋ᠢ ᠲᠡᠳᠡ ᠬᠡᠯᠡᠵᠦ ᠪᠠᠢᠯᠠ᠃ ᠡᠳᠡᠭᠡᠷ ᠲᠤᠷᠰᠢᠭᠤᠯ ᠤ᠋ᠳ ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠪᠠᠢᠳᠠᠯ᠂ ᠬᠠᠷᠠᠬᠣᠷᠣᠮ ᠤ᠋ᠨ ᠠᠮᠢᠵᠢᠷᠠᠭᠠ᠂ ᠨᠤᠲᠤᠭ ᠣᠷᠣᠨ ᠤ᠋ ᠨᠡᠢᠲᠡ ᠬᠥᠮᠦᠰ ᠦ᠋ᠨ ᠰᠠᠨᠠᠭᠠ ᠪᠣᠳᠣᠯ ᠢ᠋ ᠮᠡᠳᠡᠬᠦ ᠭᠡᠰᠡᠨ ᠲᠤᠰᠢᠶᠠᠯ ᠢ᠋ ᠬᠤᠪᠢᠯᠠᠢ ᠶ᠋ᠢᠨ ᠲᠦᠰᠢᠮᠡᠳ ᠨᠠᠷ ᠠ᠋ᠴᠠ ᠬᠦᠯᠢᠶᠡᠭᠰᠡᠨ ᠪᠠᠢᠪᠠ᠃ ᠪᠠᠷᠢᠭᠳᠠᠭᠰᠠᠨ ᠪᠦᠬᠦ ᠲᠤᠷᠰᠢᠭᠤᠯ ᠤ᠋ᠳ ᠢ᠋ ᠨᠡᠢᠰᠯᠡᠯ ᠳ᠋ᠦ᠍ ᠬᠥᠷᠭᠡᠭᠦᠯᠦᠨ ᠪᠠᠢᠴᠠᠭᠠᠯᠭᠠᠵᠤ᠂ ᠶᠠᠯᠠ ᠨᠣᠭᠳᠠᠭᠤᠯᠤᠨ ᠰᠢᠢᠳᠬᠡᠵᠦ ᠪᠠᠢᠯᠠ᠃
ᠠᠷᠢᠬᠪᠥᠶ᠋ᠬᠡ ᠬᠣᠶᠠᠷ ᠳᠠᠬᠢᠨ ᠲᠤᠯᠤᠯᠳᠤᠭᠠᠨ ᠬᠢᠭᠡᠳ ᠢᠯᠠᠭᠳᠠᠵᠤ ᠲᠠᠮᠲᠤᠭ ᠢ᠋ᠶ᠋ᠠᠨ ᠴᠠᠢᠵᠤ ᠶᠠᠪᠤᠭᠠ ᠪᠣᠯᠬᠣᠷ ᠬᠤᠪᠢᠯᠠᠢ ᠳ᠋ᠤ᠌ ᠬᠣᠷᠣᠰᠬᠤ ᠨᠢ ᠪᠦᠷ ᠳᠠᠭᠠᠭᠠᠮᠵᠢᠷᠠᠨ᠂ ᠲᠡᠭᠦᠨ ᠢ᠋ ᠪᠣᠳᠣᠬᠤ ᠠ᠋ᠴᠠ ᠵᠦᠭᠡᠷ ᠰᠠᠭᠤᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠳᠠᠭ ᠠᠵᠢ᠃ ᠡᠨᠡ ᠤᠴᠢᠷ ᠠ᠋ᠴᠠ ᠢᠷᠡᠵᠦ ᠪᠠᠢᠭᠠ ᠡᠪᠦᠯ ᠡᠴᠡ ᠪᠡᠨ ᠡᠬᠢᠯᠡᠨ ᠴᠠᠭ ᠴᠠᠭ ᠲᠤ ᠪᠠᠭᠠ᠂ ᠪᠠᠭᠠᠪᠲᠤᠷ ᠬᠡᠮᠵᠢᠶᠡᠨ ᠦ᠌ ᠳᠣᠪᠲᠣᠯᠭᠠᠨ ᠢ᠋ ᠱᠠᠩᠳᠤ ᠶ᠋ᠢᠨ ᠵᠦᠭ ᠬᠢᠵᠦ᠂ ᠥᠳᠥᠵᠦ ᠬᠠᠳᠬᠤᠬᠤ᠂ ᠲᠤᠷᠰᠢᠨ ᠪᠠᠢᠯᠳᠤᠬᠤ ᠳ᠋ᠤ᠌ ᠲᠡᠭᠦᠨ ᠳ᠋ᠦ᠍ ᠠᠮᠤᠷ ᠵᠠᠶᠠᠭᠠ ᠦᠵᠡᠭᠦᠯᠬᠦ ᠦᠭᠡᠢ ᠪᠠᠢᠬᠤ ᠭᠡᠵᠦ ᠪᠣᠳᠣᠵᠠᠢ᠃ ᠡᠨᠡ ᠨᠢ ᠬᠤᠪᠢᠯᠠᠢ ᠶ᠋ᠢ ᠳᠠᠷᠤᠢ ᠲᠦᠷᠭᠡᠨ ᠢᠯᠠᠨ ᠳᠡᠢᠯᠦᠨᠡ ᠭᠡᠰᠡᠨ ᠳ᠋ᠦ᠍ ᠪᠡᠨ ᠪᠢᠰᠢ᠂ ᠬᠣᠷᠣᠰᠤᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠠᠢᠯᠭᠠᠬᠤ ᠭᠡᠰᠡᠨ ᠣᠷᠣᠯᠳᠣᠯᠭᠠ ᠲᠡᠳᠦᠢ ᠪᠠᠢᠯᠠ᠃ ᠤᠷᠢᠳ ᠤ᠋ᠨ ᠠᠳᠠᠯᠢ ᠲᠣᠮᠣ ᠳᠣᠪᠲᠣᠯᠭᠠᠨ ᠶᠠᠪᠤᠭᠤᠯᠵᠤ ᠲᠤᠯᠤᠯᠳᠤᠬᠤ ᠬᠦᠴᠦ ᠴᠦ᠍ ᠠᠷᠢᠬᠪᠥᠶ᠋ᠬᠡ ᠳ᠋ᠦ᠍ ᠪᠠᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠠᠵᠢ᠃ ᠬᠥᠰᠢᠭᠡᠨ ᠠᠭᠤᠯᠠ ᠶ᠋ᠢᠨ ᠲᠡᠢᠨ ᠦ᠌ ᠳᠠᠷᠠᠭᠠ ᠲᠡᠭᠦᠨ ᠦ᠌ ᠴᠡᠷᠢᠭ ᠳᠠᠬᠢᠨ ᠪᠦᠷᠢᠨ ᠢ᠋ᠶ᠋ᠡᠷ ᠡᠮᠬᠢᠯᠡᠬᠦ ᠠᠷᠭᠠ ᠦᠭᠡᠢ ᠪᠣᠯᠲᠠᠯᠠ ᠰᠠᠷᠨᠢᠨ ᠪᠤᠲᠠᠷᠠᠵᠤ ᠦᠯᠡᠮᠵᠢ ᠬᠡᠰᠡᠭ ᠨᠢ ᠬᠢᠳᠤᠭᠤᠯᠤᠨ᠂ ᠪᠠᠰᠠ ᠨᠡᠯᠢᠶᠡᠳ ᠨᠢ ᠤᠷᠭᠤᠨ ᠵᠠᠢᠯᠠᠭᠰᠠᠨ ᠪᠣᠯᠬᠣᠷ ᠲᠡᠳᠡᠨ ᠢ᠋ ᠡᠷᠭᠢᠭᠦᠯᠦᠨ ᠠᠪᠬᠤ ᠲᠡᠩᠬᠡᠭᠡ ᠦᠭᠡᠢ ᠪᠣᠯᠵᠠᠢ᠃
ᠠᠷᠢᠬᠪᠥᠶ᠋ᠬᠡ ᠶ᠋ᠢᠨ ᠬᠠᠷᠢᠶᠠᠯᠠᠨ ᠪᠣᠢ ᠮᠣᠩᠭᠣᠯ ᠨᠤᠲᠤᠭ ᠴᠦ᠍ ᠴᠡᠷᠢᠭ ᠡᠷᠡ ᠴᠥᠭᠡᠨ ᠲᠡᠢ᠂ ᠬᠠᠷᠠ ᠨᠣᠬᠠᠢ ᠵᠢᠯ ᠦ᠋ᠨ ᠵᠤᠳ ᠲᠤ ᠮᠠᠯ ᠢ᠋ᠶ᠋ᠠᠨ ᠣᠯᠠᠨ ᠢ᠋ᠶ᠋ᠠᠷ ᠦᠬᠦᠭᠦᠯᠦᠭᠰᠡᠨ᠂ ᠪᠠᠰᠠ ᠡᠮᠦᠨᠡᠲᠦ ᠬᠢᠲᠠᠳ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠬᠡᠷᠡᠭ ᠲᠦ᠍ ᠪᠠᠷᠤᠭ ᠵᠠᠯᠠᠭᠤ᠂ ᠢᠳᠡᠷ ᠨᠠᠰᠤᠨ ᠤ᠋ ᠡᠷᠡᠴᠦᠳ ᠨᠢ ᠳᠠᠢᠴᠢᠯᠠᠭᠳᠠᠨ ᠶᠠᠪᠤᠭᠰᠠᠨ ᠵᠡᠷᠭᠡ ᠡᠴᠡ ᠤᠯᠤᠰ ᠣᠷᠣᠨ ᠶᠡᠬᠡᠳᠡ ᠲᠠᠮᠢᠷᠳᠠᠭᠰᠠᠨ ᠪᠠᠢᠳᠠᠯᠲᠠᠢ᠂ ᠲᠡᠷᠡ ᠲᠡᠩᠬᠡᠭᠡ ᠰᠤᠯᠠᠷᠠᠭᠰᠠᠨ ᠬᠠᠮᠤᠭ ᠭᠠᠢ ᠶ᠋ᠢ ᠬᠠᠷᠠᠬᠣᠷᠣᠮ ᠬᠣᠲᠠ ᠳ᠋ᠤ᠌ ᠲᠥᠪᠯᠡᠷᠡᠭᠰᠡᠨ ᠵᠠᠰᠠᠭᠯᠠᠯ ᠤ᠋ᠨ ᠭᠠᠵᠠᠷ ᠡᠭᠦᠷᠴᠦ ᠪᠠᠢᠯᠠ᠃ ᠡᠢᠮᠦ ᠨᠥᠬᠥᠴᠡᠯ ᠳ᠋ᠦ᠍ ᠠᠷᠢᠬᠪᠥᠶ᠋ᠬᠡ ᠰᠢᠨᠡ ᠪᠡᠷ ᠶᠡᠬᠡ ᠴᠡᠷᠢᠭ ᠡᠮᠬᠢᠯᠡᠨ ᠪᠠᠢᠭᠤᠯᠬᠤ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠡᠨᠡ ᠨᠣᠶᠠᠨ 《ᠪᠢ ᠣᠯᠠᠨ ᠲᠦᠮᠡᠨ ᠳ᠋ᠦ᠍ ᠪᠡᠨ ᠶᠡᠬᠡ ᠭᠠᠮᠰᠢᠭ ᠲᠠᠷᠢᠵᠤ ᠶᠠᠪᠤᠨᠠ》 ᠭᠡᠵᠦ ᠥᠪᠡᠷ ᠢ᠋ ᠪᠡᠨ ᠵᠢᠮᠡᠯᠡᠳᠡᠭ᠂ ᠡᠨᠡ ᠦᠭᠡ ᠪᠡᠨ ᠪᠤᠰᠤᠳ ᠲᠤ ᠬᠡᠯᠡᠳᠡᠭ᠃ ᠲᠡᠭᠡᠭᠡᠳ ᠰᠠᠨᠠᠭᠠ ᠰᠡᠳᠬᠢᠯ ᠦ᠋ᠨ ᠬᠤᠪᠢ ᠳ᠋ᠤ᠌ ᠨᠠᠯᠢᠶᠠᠨ ᠭᠤᠳᠤᠷᠠᠭᠰᠠᠨ ᠶᠠᠩᠵᠤᠲᠠᠢ ᠪᠣᠯᠤᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠨᠢᠭᠤᠷ ᠲᠤ ᠲᠣᠳᠣᠷᠠᠨᠠ᠃
ᠬᠥᠰᠢᠭᠡᠨ ᠠᠭᠤᠯᠠ ᠶ᠋ᠢᠨ ᠲᠤᠯᠤᠯᠳᠤᠭᠠᠨ ᠠ᠋ᠴᠠ ᠬᠣᠢᠰᠢ ᠭᠤᠷᠪᠠᠨ ᠵᠢᠯ ᠭᠠᠷᠤᠢ ᠬᠤᠪᠢᠯᠠᠢ ᠥᠪᠡᠷ ᠲᠦ᠍ ᠪᠡᠨ ᠠᠰᠢᠭᠲᠠᠢ ᠪᠠᠷ ᠢᠯᠡ᠂ ᠳᠠᠯᠳᠠ ᠶᠠᠪᠤᠭᠤᠯᠤᠭᠰᠠᠨ ᠬᠠᠷᠠ ᠬᠣᠷᠣᠮ ᠤ᠋ᠨ ᠡᠰᠡᠷᠭᠦ ᠶᠠᠪᠤᠭᠤᠯᠭᠠ ᠨᠤᠭᠤᠳ ᠲᠠᠢ ᠰᠢᠭᠤᠳ ᠬᠣᠯᠪᠣᠭᠠ ᠲᠠᠢ ᠨᠢ ᠢᠯᠡᠷᠬᠡᠢ ᠪᠠᠢᠪᠠ᠃ ᠬᠤᠪᠢᠯᠠᠢ ᠤᠯᠤᠰ ᠤ᠋ᠨ ᠲᠥᠪ ᠨᠡᠢᠰᠯᠡᠯ ᠢ᠋ ᠬᠠᠷᠠ ᠬᠣᠷᠣᠮ ᠠ᠋ᠴᠠ ᠱᠠᠩᠳᠤ ᠳ᠋ᠤ᠌ ᠨᠡᠭᠦᠯᠭᠡᠨ ᠠᠪᠠᠴᠢᠯᠠ ᠭᠡᠵᠦ ᠳᠡᠯᠡᠬᠡᠢ ᠨᠡᠢᠲᠡ ᠳ᠋ᠦ᠍ ᠵᠠᠷᠯᠠᠵᠤ᠂ ᠪᠠᠷᠠᠭᠤᠨ ᠪᠣᠯᠤᠨ ᠪᠠᠷᠠᠭᠤᠨ ᠳᠤᠮᠳᠠᠳᠤ ᠣᠷᠣᠨ ᠨᠤᠭᠤᠳ᠂ ᠣᠷᠣᠰ ᠭᠠᠵᠠᠷ᠂ ᠳᠠᠯᠠᠢ ᠶ᠋ᠢᠨ ᠪᠤᠰᠤᠳ ᠣᠷᠣᠨ ᠠ᠋ᠴᠠ ᠢᠷᠡᠳᠡᠭ ᠣᠯᠠᠨ ᠲᠣᠭᠠᠨ ᠤ᠋ ᠠᠶᠠᠯᠠᠯ ᠵᠢᠭᠤᠯᠴᠢᠯᠠᠯ᠂《ᠲᠣᠷᠭᠠᠨ》 ᠵᠠᠮ ᠤ᠋ᠨ ᠬᠤᠳᠠᠯᠳᠤᠭᠠᠴᠢᠨ᠂ ᠡᠯᠴᠢ ᠵᠠᠷᠤᠯᠭᠠ ᠵᠡᠷᠭᠡ ᠶ᠋ᠢ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠢᠷᠡᠬᠦ ᠶ᠋ᠢ ᠨᠢ ᠬᠠᠭᠠᠵᠤ ᠬᠠᠷᠠᠭᠤᠯ ᠭᠠᠷᠭᠠᠨ ᠪᠣᠭᠣᠭᠠᠳ ᠠᠯᠲᠠᠢ ᠶ᠋ᠢᠨ ᠴᠠᠭᠠᠭᠤᠷ《ᠴᠦᠯ》 ᠦ᠋ᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠠᠳ ᠱᠠᠩᠳᠤ ᠳ᠋ᠤ᠌ ᠣᠴᠢᠳᠠᠭ ᠪᠣᠯᠭᠠᠨ ᠲᠡᠭᠡᠵᠦ ᠠᠶᠠᠯᠠᠨ ᠶᠠᠪᠤᠭᠠ ᠬᠥᠮᠦᠰ ᠢ᠋ ᠬᠤᠪᠢᠯᠠᠢ ᠢᠯᠡ ᠳᠠᠯᠳᠠ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠥᠬᠢᠭᠦᠯᠦᠨ ᠳᠡᠮᠵᠢᠳᠡᠭ ᠪᠣᠯᠤᠭᠰᠠᠨ ᠨᠢ ᠠᠷᠢᠬᠪᠦ᠋ᠬᠡ ᠶ᠋ᠢ ᠪᠣᠭᠣᠵᠤ ᠲᠣᠨᠲᠣᠢᠯᠭᠠᠬᠤ ᠭᠡᠰᠡᠨ ᠡᠨᠡ ᠨᠣᠶᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠪᠦᠷᠢᠯᠳᠦᠭᠰᠡᠨ ᠨᠢᠭᠡ ᠭᠣᠣᠯ ᠠᠷᠭᠠ ᠪᠠᠢᠯᠠ᠃ ᠢᠩᠭᠢᠬᠦ ᠶ᠋ᠢ ᠸᠠᠩ ᠦ᠂ ᠵᠣᠣ ᠪᠢ᠂ ᠬᠣᠣ ᠵᠢᠩ ᠨᠠᠷ ᠵᠥᠪᠯᠡᠭᠰᠡᠨ ᠠᠵᠢ᠃ ᠪᠠᠢᠳᠠᠯ ᠡᠢᠮᠦ ᠪᠣᠯᠬᠣᠷ ᠨᠡᠢᠰᠯᠡᠯ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠶᠠᠭᠤᠮᠠ ᠶᠠᠭᠤᠮᠠ ᠬᠣᠮᠰᠠᠳᠴᠤ᠂ ᠬᠥᠮᠦᠨ ᠣᠯᠠᠨ ᠤ᠋ ᠰᠠᠨᠠᠭᠠ ᠰᠡᠳᠬᠢᠯ᠂ ᠤᠷᠮᠠ ᠵᠣᠷᠢᠭ ᠮᠠᠭᠤᠲᠠᠢ ᠪᠣᠯᠪᠠ᠃ ᠬᠣᠲᠠ ᠶ᠋ᠢᠨ ᠶᠡᠬᠡ ᠬᠡᠷᠡᠮ ᠦ᠋ᠨ ᠳᠥᠷᠪᠡᠨ ᠬᠠᠭᠠᠯᠭᠠᠨ ᠤ᠋ ᠭᠠᠳᠠᠭᠠ ᠫᠢᠵᠢᠭᠢᠨᠡᠵᠦ ᠪᠠᠢᠳᠠᠭ ᠬᠤᠳᠠᠯᠳᠤᠭᠠᠨ ᠤ᠋ ᠵᠠᠬᠠ ᠬᠣᠨᠣᠭ ᠬᠣᠨᠣᠭ ᠢ᠋ᠶ᠋ᠠᠷ ᠠᠶᠠᠨᠳᠠᠭᠠᠨ ᠬᠤᠮᠢᠭᠳᠠᠨ᠂ ᠲᠡᠨᠳᠡ ᠴᠥᠭᠡᠨ ᠲᠣᠭᠠᠨ ᠤ᠋ ᠮᠠᠯ ᠬᠤᠳᠠᠯᠳᠤᠬᠤ ᠭᠡᠰᠡᠨ ᠬᠥᠮᠦᠰ᠂ ᠳᠠᠪᠤᠰᠤ ᠬᠤᠵᠢᠷ ᠤ᠋ᠨ ᠮᠠᠢᠮᠠᠢᠴᠢᠨ᠂ ᠠᠢᠷᠠᠭ ᠴᠠᠭᠠ ᠠᠶᠠᠭᠠᠯᠠᠨ ᠬᠤᠳᠠᠯᠳᠤᠳᠠᠭ ᠴᠥᠭᠡᠨ ᠴᠢᠪᠠᠭᠠᠨᠴᠠ ᠨᠠᠷ ᠯᠠ ᠲᠠᠮᠢᠷ ᠮᠠᠭᠤᠲᠠᠢ ᠳᠠᠭᠤ ᠪᠠᠷ ᠬᠤᠳᠠᠯᠳᠤᠭᠠ ᠪᠠᠨ ᠳᠠᠭᠤᠳᠠᠵᠤ ᠪᠠᠢᠯᠠ᠃ ᠪᠢᠯᠢᠭᠦᠨ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠲᠦᠷ ᠢᠷᠡᠭᠡᠳ ᠮᠣᠷᠢᠨᠱᠠᠭᠠᠢ ᠶ᠋ᠢ ᠳᠠᠭᠠᠭᠤᠯᠤᠨ ᠨᠢᠭᠡ ᠤᠳᠠᠭᠠ ᠵᠠᠬᠠ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠤᠷᠢᠳ ᠤ᠋ᠨ ᠪᠠᠶᠠᠨ ᠪᠠᠢᠭᠰᠠᠨ ᠪᠠᠢᠳᠠᠯ ᠢ᠋ ᠳᠤᠷᠠᠰᠤᠨ ᠶᠠᠷᠢᠯᠴᠠᠪᠠ᠃ ᠪᠢᠯᠢᠭᠦᠨ ᠰᠢᠷᠣᠢ ᠲᠠᠢ ᠪᠣᠷᠣ ᠳᠠᠪᠤᠰᠤ ᠲᠠᠭᠠᠷ ᠤ᠋ᠨ ᠲᠡᠮᠪᠦᠦ(ᠲᠣᠮᠣ ᠤᠭᠤᠲᠠ) ᠳᠡᠭᠡᠷᠡ ᠳᠡᠯᠭᠡᠵᠦ ᠲᠠᠯᠪᠢᠭᠠᠳ ᠬᠤᠳᠠᠯᠳᠤᠭᠠ ᠬᠢᠬᠦ ᠰᠠᠨᠠᠭᠠᠲᠠᠢ ᠪᠠᠢᠭᠠ ᠨᠢᠭᠡᠨ ᠡᠮᠡᠭᠡᠨ ᠢ᠋ ᠬᠠᠷᠠᠭᠠᠳ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠭᠡᠷᠭᠡᠢ ᠳ᠋ᠦ᠍ ᠪᠡᠨ ᠬᠠᠨᠳᠤᠵᠤ᠄
— ᠬᠥᠭᠡᠷᠦᠬᠦᠢ ᠪᠣᠯᠵᠤ ᠳᠠ᠃ ᠶᠠᠭᠤᠮᠠ ᠶᠠᠭᠠᠬᠢᠭᠰᠠᠨ ᠠᠮᠠᠷᠬᠠᠨ ᠬᠤᠪᠢᠷᠠᠨᠠ ᠪᠣᠢ᠃ ᠡᠨᠡ ᠵᠠᠬᠠ ᠶ᠋ᠢ ᠡᠢᠮᠦ ᠶᠠᠳᠠᠭᠤ ᠪᠣᠯᠤᠨᠠ ᠭᠡᠵᠦ ᠭᠤᠷᠪᠠ ᠳᠥᠷᠪᠡᠨ ᠵᠢᠯ ᠦ᠋ᠨ ᠡᠮᠦᠨᠡ ᠬᠡᠨ ᠨᠢᠭᠡ ᠨᠢ ᠬᠡᠯᠡᠭᠰᠡᠨ ᠪᠣᠯ ᠲᠡᠭᠦᠨ ᠢ᠋ ᠮᠠᠭᠤ ᠢᠷᠣᠠ ᠢᠷᠣᠯᠠᠯᠠ ᠭᠡᠵᠦ ᠪᠠᠷᠢᠭᠠᠳ ᠵᠣᠳᠣᠬᠤ ᠰᠢᠬᠠᠬᠤ ᠪᠠᠢᠭᠰᠠᠨ ᠪᠢᠵᠡ ᠳᠡ᠃
— ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠠᠯᠠᠭᠠ᠃ ᠯᠤᠤᠰ ᠤ᠋ᠨ ᠰᠠᠩ ᠭᠡᠭᠴᠢ ᠨᠢ ᠡᠢᠮᠦ ᠪᠠᠢᠳᠠᠭ ᠪᠠᠢᠬᠤ ᠭᠡᠮᠡᠷ ᠲᠣᠷᠭᠠ ᠬᠣᠷᠭᠣᠢ᠂ ᠢᠳᠡᠭᠡ ᠪᠤᠳᠠᠭᠠ᠂ ᠰᠢᠬᠢᠷ ᠵᠢᠮᠢᠰ᠂ ᠮᠠᠯ ᠠᠬᠤᠢ᠂ ᠠᠢᠷᠠᠭ ᠴᠠᠭᠠ ᠭᠠᠵᠠᠷ ᠰᠠᠢ ᠦᠭᠡᠢ ᠳᠡᠯᠭᠡᠭᠡᠰᠦᠲᠡᠢ᠃《ᠠᠪᠤᠭᠠᠴᠢ》᠂《ᠬᠤᠳᠠᠯᠳᠤᠨ ᠠᠪᠤᠭᠠᠴᠢ》᠂《ᠬᠢᠮᠳᠠᠬᠠᠨ ᠰᠢᠦ》 ᠭᠡᠳ ᠯᠡ ᠬᠠᠷᠠᠭᠰᠠᠨ ᠵᠦᠭ ᠪᠦᠬᠦᠨ ᠳ᠋ᠦ᠍ ᠬᠤᠳᠠᠯᠳᠤᠭᠠᠴᠢᠳ ᠬᠠᠰᠬᠢᠷᠤᠯᠳᠤᠵᠤ ᠪᠠᠢᠳᠠᠭ ᠰᠠᠨ᠃
— ᠲᠡᠢᠮᠦ ᠠ᠋᠃ ᠪᠢᠳᠡ ᠲᠡᠷᠡ ᠳᠤᠮᠳᠠ ᠴᠢᠨᠢ ᠰᠡᠬᠡᠭᠦᠨ ᠵᠠᠩᠲᠠᠢ᠂ ᠬᠢᠷᠢ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠴᠦ᠍ ᠬᠠᠷᠠᠬᠤ ᠦᠭᠡᠢ ᠠᠯᠬᠤᠵᠤ ᠪᠠᠢᠭᠰᠠᠨ ᠳᠠ᠃
— ᠲᠡᠷᠡ ᠶᠡᠷᠦ ᠨᠢ ᠬᠡᠨ ᠦ᠌ ᠪᠤᠶᠠᠨ ᠪᠠᠢᠭᠠ ᠪᠣᠢ? ᠳᠡᠭᠡᠳᠦᠰ ᠦ᠋ᠳ ᠦ᠋ᠨ ᠮᠠᠨᠢ ᠠᠪᠤᠷᠠᠯ ᠪᠠᠢᠭᠰᠠᠨ᠃ ᠡᠨᠡ ᠬᠣᠲᠠ ᠨᠡᠢᠰᠯᠡᠯ ᠪᠠᠢᠭᠰᠠᠨ ᠪᠣᠯᠬᠣᠷ ᠭᠠᠳᠠᠭᠠᠳᠤ ᠶ᠋ᠢᠨ ᠣᠯᠠᠨ ᠬᠥᠯ ᠦ᠋ᠨ ᠠᠮᠢᠲᠠᠳ ᠡᠭᠦᠨ ᠢ᠋ᠶ᠋ᠡᠷ ᠵᠠᠮᠨᠠᠨ᠂ ᠠᠯᠤᠰ ᠠ᠋ᠴᠠ ᠵᠥᠭᠡᠭᠡᠵᠦ ᠠᠪᠴᠢᠷᠠᠬᠤ ᠦᠭᠡᠢ ᠵᠦᠢᠯ ᠦᠭᠡᠢ ᠪᠠᠢᠵᠤ᠃ ᠮᠠᠨ ᠤ᠋ ᠴᠡᠷᠢᠭ ᠭᠠᠳᠠᠨᠠ ᠠ᠋ᠴᠠ ᠶᠡᠬᠡ ᠴᠦ᠍ ᠶᠠᠭᠤᠮᠠ ᠨᠠᠭᠠᠰᠢ ᠨᠢ ᠵᠥᠭᠡᠭᠡᠬᠦ ᠡᠭᠦᠳᠡ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠵᠦ ᠪᠠᠢᠵᠤ ᠳᠠ᠃ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠲᠤᠩ ᠴᠦ᠍ ᠬᠥᠭᠡᠷᠦᠦ ᠪᠠᠢᠭᠰᠠᠨ ᠴᠠᠭ ᠪᠢᠵᠡ ᠭᠡᠵᠦ ᠬᠥᠭᠡᠷᠦᠯᠳᠦᠵᠦ ᠪᠠᠢᠪᠠ᠃
— ᠬᠥᠭᠡᠷᠦᠬᠦᠢ ᠳᠡ᠃ ᠴᠢ ᠴᠠᠭᠠᠳᠤ ᠡᠪᠦᠭᠡᠨ ᠢ᠋ᠶ᠋ᠡᠨ ᠬᠠᠷᠠᠭᠠᠴᠢ! ᠬᠤᠳᠠᠯᠳᠤᠵᠤ ᠰᠠᠭᠤᠭᠠ ᠶᠠᠭᠤᠮᠠ ᠨᠢ ᠲᠡᠷᠡ᠃ ᠠ᠋ ᠴᠠᠪᠠᠰᠤ ᠳᠠ ᠵᠠᠢᠯᠠᠭᠤᠯ ᠭᠡᠵᠦ ᠮᠣᠷᠢᠨᠱᠠᠭᠠᠢ ᠶ᠋ᠢ ᠬᠡᠯᠡᠬᠦ ᠪᠡᠷ ᠨᠢ ᠪᠢᠯᠢᠭᠦᠨ ᠬᠠᠷᠠᠪᠠᠯ ᠬᠥᠳᠥᠰᠥᠨ ᠳᠡᠪᠡᠯ ᠨᠢ ᠨᠣᠷᠴᠢᠬᠠᠭᠰᠠᠨ ᠨᠢᠭᠡ ᠲᠠᠶᠠᠭ ᠲᠠᠢ ᠡᠪᠦᠭᠡᠨ ᠬᠣᠷᠴᠢᠢᠲᠠᠯᠠ ᠪᠠᠨ ᠬᠠᠲᠠᠭᠰᠠᠨ ᠢᠰᠢᠭᠡᠨ ᠦ᠌ ᠬᠣᠶᠠᠷ ᠠᠷᠠᠰᠤ ᠪᠠᠷᠢᠭᠠᠳ᠂ ᠲᠡᠭᠦᠨ ᠢ᠋ ᠪᠡᠨ ᠳᠡᠯᠭᠡᠭᠰᠡᠨ ᠰᠢᠦ ᠪᠣᠯᠵᠤ ᠬᠠᠷᠠᠭᠤᠯᠤᠨ᠄
— ᠡᠭᠦᠨ ᠢ᠋ ᠠᠪᠤᠭᠠᠴᠢ! ᠪᠢ ᠴᠢᠮᠬᠢ ᠪᠤᠳᠠᠭᠠ ᠣᠯᠵᠤ ᠢᠳᠡᠶᠡ᠃ ᠡᠢᠮᠦ ᠠᠷᠠᠰᠤ ᠶ᠋ᠢ ᠡᠯᠳᠡᠭᠡᠳ ᠪᠠᠷᠢᠭᠤᠪᠴᠢ ᠬᠢᠪᠡᠯ ᠬᠡᠦᠬᠡᠳ ᠦ᠋ᠨ ᠪᠡᠶᠡ ᠳ᠋ᠦ᠍ ᠵᠥᠭᠡᠯᠡᠨ ᠰᠢᠦ ᠭᠡᠵᠦ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠥᠭᠡᠯᠡᠨ ᠬᠡᠯᠲᠦᠷᠢᠵᠦ ᠶᠠᠪᠤᠪᠠ᠃ ᠪᠢᠯᠢᠭᠦᠨ ᠡᠪᠦᠭᠡᠨ ᠢ᠋ ᠬᠠᠷᠠᠭᠠᠳ ᠤᠷᠲᠤ ᠪᠠᠷ ᠠᠮᠢᠰᠬᠤᠭᠠᠯᠠᠨ᠄
— ᠡᠵᠡᠨ ᠪᠣᠭᠳᠠ ᠶ᠋ᠢᠨ ᠬᠤᠷᠢᠶᠠᠭᠰᠠᠨ ᠪᠤᠶᠠᠨ ᠢ᠋ ᠬᠤᠪᠢᠯᠠᠢ ᠰᠡᠭᠰᠦᠷᠦᠨ ᠬᠠᠶᠠᠭᠰᠠᠨ ᠨᠢ ᠡᠨᠡ ᠪᠢᠵᠡ ᠳᠡ ᠭᠡᠵᠦ ᠬᠡᠯᠡᠯᠡ᠃ ᠦᠨᠡᠨ ᠳ᠋ᠦ᠍ ᠪᠡᠨ ᠬᠤᠪᠢᠯᠠᠢ ᠠᠷᠢᠬᠪᠦ᠋ᠬᠡ ᠶ᠋ᠢ ᠡᠮᠦᠨᠡ ᠪᠡᠨ ᠰᠥᠬᠥᠷᠡᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠴᠡᠭᠡᠷ ᠬᠦᠷᠦᠮᠡᠷ ᠶᠠᠪᠤᠭᠤᠯᠭᠠ ᠨᠤᠭᠤᠳ ᠢ᠋ ᠬᠢᠵᠦ ᠪᠠᠢᠭᠠ ᠠᠵᠢ᠃
ᠬᠤᠪᠢᠯᠠᠢ ᠪᠠᠷᠠᠭᠤᠨ ᠳᠤᠮᠳᠠᠳᠤ ᠣᠷᠣᠨ᠂ ᠢᠷᠡᠨ᠂ ᠫᠧᠷᠰ᠂ ᠠᠯᠲᠠᠨ ᠣᠷᠳᠣᠨ ᠤ᠋ ᠤᠯᠤᠰ᠂ ᠬᠦᠯᠡᠬᠦ ᠶ᠋ᠢᠨ ᠤᠯᠤᠰ᠂ ᠡᠮᠦᠨᠡᠲᠦ ᠳᠠᠯᠠᠢ ᠶ᠋ᠢᠨ ᠣᠷᠣᠨ ᠨᠤᠭᠤᠳ ᠲᠤ ᠡᠯᠴᠢ ᠵᠠᠷᠤᠵᠤ《᠁ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠶᠡᠬᠡ ᠬᠠᠭᠠᠨ ᠮᠢᠨᠦ ᠵᠠᠷᠯᠢᠭ ᠲᠤᠰᠢᠶᠠᠯ ᠢ᠋ ᠴᠢᠩᠳᠠᠯᠠᠨ ᠳᠠᠭᠠᠵᠤ ᠪᠡᠶᠡᠯᠡᠭᠦᠯᠬᠦ ᠶᠣᠰᠣᠲᠠᠢ᠃ ᠲᠩᠷᠢ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠮᠢᠨᠦ ᠭᠠᠷ ᠲᠤ ᠴᠡᠷᠢᠭ ᠦ᠋ᠨ ᠶᠡᠬᠡ ᠬᠦᠴᠦᠨ ᠬᠤᠷᠠᠯᠳᠤᠵᠠᠢ᠃ ᠥᠪᠡᠷ ᠢ᠋ ᠪᠡᠨ ᠬᠠᠭᠠᠨ ᠪᠣᠯᠭᠠᠭᠰᠠᠨ ᠠᠷᠢᠬᠪᠦ᠋ᠬᠡ ᠨᠠᠳᠠᠳᠤ ᠢᠯᠠᠭᠳᠠᠨ᠂ ᠳᠠᠬᠢᠨ ᠥᠨᠳᠡᠢᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠰᠢᠷᠭᠤᠴᠢᠨ ᠤᠨᠠᠪᠠ᠃ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠱᠠᠩᠳᠤ ᠳ᠋ᠤ᠌ ᠪᠠᠢᠭᠠ ᠲᠤᠯᠠ ᠬᠠᠷᠠ ᠬᠣᠷᠣᠮ ᠲᠠᠢ ᠠᠯᠪᠠᠨ ᠬᠠᠷᠢᠯᠴᠠᠭᠠ ᠪᠠᠢᠬᠤ ᠤᠴᠢᠷ ᠦᠭᠡᠢ᠁》 ᠭᠡᠵᠦ ᠮᠡᠳᠡᠭᠳᠡᠭᠡᠳ᠂ ᠨᠡᠢᠰᠯᠡᠯ ᠢ᠋ ᠬᠠᠭᠠᠨ ᠪᠣᠭᠣᠭᠳᠠᠭᠤᠯᠬᠤ ᠠᠷᠭᠠ ᠪᠠᠨ ᠬᠦᠴᠦᠲᠡᠢ ᠪᠣᠯᠭᠠᠭᠰᠠᠨ ᠪᠠᠢᠨᠠ᠃
ᠠᠷᠢᠬᠪᠦ᠋ᠬᠡ ᠴᠦ᠍ ᠪᠠᠰᠠ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠦᠭᠡᠢ᠃ ᠲᠡᠷᠡ ᠪᠡᠷ ᠥᠭᠦᠯᠡᠨ ᠪᠣᠢ ᠤᠯᠤᠰ ᠠᠢᠮᠠᠭ ᠤ᠋ᠳ ᠤ᠋ᠨ ᠬᠠᠨ᠂ ᠨᠣᠶᠠᠳ᠂ ᠵᠠᠬᠢᠷᠤᠭᠴᠢ ᠨᠠᠷ ᠲᠤ ᠬᠠᠨᠳᠤᠵᠤ ᠪᠠᠰᠠ ᠡᠯᠴᠢ ᠵᠠᠷᠤᠭᠰᠠᠨ ᠪᠢᠴᠢᠭ ᠢᠯᠡᠭᠡᠬᠦ ᠳ᠋ᠦ᠍ ᠪᠡᠨ《᠁ ᠬᠤᠪᠢᠯᠠᠢ᠂ ᠪᠣᠭᠳᠠ ᠡᠪᠦᠭᠡ ᠶ᠋ᠢᠨ ᠰᠠᠭᠤᠷᠢᠯᠠᠭᠤᠯᠵᠤ ᠲᠠᠯᠪᠢᠭᠰᠠᠨ ᠲᠤᠯᠭᠠ ᠶ᠋ᠢᠨ ᠴᠢᠯᠠᠭᠤ ᠶ᠋ᠢ ᠢᠰᠬᠦᠯᠦᠨ ᠬᠠᠶᠠᠵᠤ᠂ ᠲᠣᠭᠣᠭᠠ ᠶ᠋ᠢ ᠬᠥᠮᠥᠷᠢᠬᠦ ᠶ᠋ᠢ ᠬᠢᠴᠢᠶᠡᠨ ᠲᠦᠢᠪᠡᠷᠭᠡᠵᠦ ᠪᠠᠢᠨᠠ᠃ ᠥᠴᠦᠬᠡᠨ ᠪᠢ ᠪᠡᠷ ᠲᠩᠷᠢ ᠡᠴᠡ ᠵᠠᠶᠠᠭᠠᠭᠳᠠᠭᠰᠠᠨ ᠶᠡᠬᠡ ᠤᠷᠤᠭ ᠤ᠋ᠨ ᠠᠷᠢᠭᠤᠨ ᠭᠣᠯᠣᠮᠲᠠ ᠶ᠋ᠢ ᠰᠠᠬᠢᠨ ᠬᠠᠮᠠᠭᠠᠯᠠᠬᠤ ᠰᠠᠨᠠᠭᠠ ᠪᠠᠷ ᠲᠡᠮᠡᠴᠡᠯᠳᠦᠵᠦ ᠪᠠᠢᠭᠠ ᠪᠣᠯᠪᠠᠴᠤ ᠲᠠ ᠪᠦᠬᠦᠨ ᠦ᠌ ᠳᠡᠮᠵᠢᠯᠭᠡ ᠶ᠋ᠢ ᠡᠰᠡ ᠬᠦᠯᠢᠶᠡᠭᠰᠡᠨ ᠤᠴᠢᠷ ᠬᠦᠴᠦᠨ ᠮᠡᠬᠦᠰᠳᠡᠵᠦ ᠲᠡᠩᠬᠡᠭᠡ ᠪᠠᠷᠠᠭᠳᠠᠨ ᠶᠠᠪᠤᠨᠠ᠃ ᠨᠡᠢᠰᠯᠡᠯ ᠦ᠋ᠨ ᠲᠥᠪ ᠲᠦ᠍ ᠰᠦᠨᠳᠡᠷᠯᠡᠵᠦ ᠪᠠᠢᠭᠠ ᠮᠥᠩᠭᠥᠨ ᠮᠣᠳᠣ ᠶ᠋ᠢ ᠭᠠᠵᠠᠷ ᠲᠤ ᠣᠩᠬᠣᠯᠢᠳᠤᠭᠤᠯᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠲᠦᠰᠢᠬᠦ ᠰᠠᠨᠠᠭᠠᠲᠠᠢ ᠤᠷᠤᠯᠳᠤᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠬᠦᠴᠦ ᠲᠠᠮᠢᠷ ᠬᠦᠷᠬᠦ ᠦᠭᠡᠢ ᠪᠠᠢᠳᠠᠯ ᠲᠠᠢ ᠪᠣᠯᠵᠤ ᠢᠷᠡᠯᠡ᠃ ᠡᠢᠮᠦ ᠳ᠋ᠦ᠍ ᠡᠷᠬᠢᠮ ᠳᠡᠭᠡᠳᠦ ᠨᠣᠶᠠᠨ ᠲᠠ ᠮᠡᠷᠭᠡᠨ ᠮᠡᠷᠭᠡᠨ ᠣᠶᠤᠨ ᠳ᠋ᠤ᠌ ᠪᠠᠨ ᠤᠯᠤᠰ ᠭᠦᠷᠦᠨ ᠦ᠌ ᠪᠠᠢᠳᠠᠯ ᠢ᠋ ᠲᠤᠩᠭᠠᠭᠠᠨ ᠪᠣᠯᠭᠣᠭᠠᠵᠤ᠂ ᠲᠤᠯᠭᠠ ᠶ᠋ᠢᠨ ᠴᠢᠯᠠᠭᠤ ᠶ᠋ᠢ ᠬᠢᠲᠠᠳ ᠤᠷᠤᠭᠤ ᠵᠥᠭᠡᠭᠡᠵᠦ ᠪᠠᠢᠭᠠ ᠬᠤᠪᠢᠯᠠᠢ ᠶ᠋ᠢᠨ ᠲᠡᠷᠡ ᠤᠬᠠᠭᠠᠨ ᠦᠭᠡᠢ ᠪᠣᠳᠣᠯᠭᠠ ᠶ᠋ᠢ ᠲᠠᠰᠤᠯᠤᠨ ᠵᠣᠭᠰᠣᠭᠠᠬᠤ ᠬᠡᠷᠡᠭ ᠲᠦ᠍ ᠲᠥᠷᠥ ᠶ᠋ᠢᠨ ᠶᠣᠰᠣᠨ ᠤ᠋ ᠪᠣᠯᠤᠨ ᠵᠠᠷ ᠵᠡᠪᠰᠡᠭ ᠦ᠋ᠨ ᠲᠠᠯᠠ ᠪᠠᠷ ᠮᠡᠬᠦᠰ ᠨᠠᠳᠠᠳᠤ ᠲᠤᠰᠠᠯᠠᠬᠤ ᠶᠣᠰᠣᠲᠠᠢ ᠪᠣᠯᠤᠯᠠ᠃ ᠪᠣᠯᠭᠣᠭᠠᠨ ᠰᠣᠶᠣᠷᠬᠠᠬᠤ ᠠᠵᠢᠶᠠᠮᠤ!》 ᠭᠡᠵᠡᠢ᠃ ᠡᠨᠡ ᠪᠢᠴᠢᠭ ᠢ᠋ ᠡᠪᠦᠷᠯᠡᠭᠰᠡᠨ ᠵᠠᠷᠤᠭᠤᠯ ᠤ᠋ᠨ ᠲᠦᠰᠢᠮᠡᠳ ᠪᠠᠷᠠᠭᠤᠨ ᠪᠠ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠢ᠋ ᠵᠣᠷᠢᠨ ᠳᠣᠪᠲᠣᠯᠭᠠᠪᠠ᠃ ᠲᠡᠷᠡ ᠲᠦᠰᠢᠮᠡᠯ ᠦ᠋ᠨ ᠵᠠᠷᠢᠮ ᠢ᠋ ᠪᠢᠯᠢᠭᠦᠨ ᠭᠠᠵᠠᠷ ᠮᠡᠳᠡᠳᠡᠭ᠂ ᠤᠷᠢᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠳᠡᠭᠡᠳᠦᠰ ᠦ᠋ᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠠᠬᠠᠯᠠᠭᠰᠠᠨ ᠪᠠᠢᠨᠠ᠃ ᠡᠢᠨ ᠬᠦ᠌ ᠶᠡᠬᠡ ᠤᠯᠤᠰ ᠲᠤ ᠬᠠᠷᠢᠶᠠᠯᠠᠭᠳᠠᠨ ᠪᠣᠢ ᠪᠤᠰᠤᠳ ᠤᠯᠤᠰ ᠣᠷᠣᠨ ᠢ᠋ ᠬᠤᠪᠢᠯᠠᠢ᠂ ᠠᠷᠢᠬᠪᠦ᠋ᠬᠡ ᠬᠣᠶᠠᠷ ᠪᠠᠰᠠ ᠪᠤᠯᠢᠶᠠᠴᠠᠯᠳᠤᠵᠠᠢ᠃ ᠶᠡᠷᠦ ᠨᠢ ᠲᠡᠳᠡ ᠪᠠᠷᠤᠭ ᠪᠤᠯᠢᠶᠠᠴᠠᠯᠳᠤᠭᠠ ᠦᠭᠡᠢ ᠵᠦᠢᠯ ᠦᠭᠡᠢ ᠪᠣᠯᠵᠤ᠂《ᠬᠦᠢᠳᠡᠩ》 ᠯᠣᠯᠣᠢ ᠶ᠋ᠢᠨ ᠬᠠᠰᠢᠵᠤ ᠪᠣᠢ ᠡᠮᠡᠰ ᠦ᠋ᠳ ᠦ᠋ᠨ ᠬᠣᠷᠮᠣᠢ ᠶ᠋ᠢ ᠬᠡᠨ ᠨᠢ ᠤᠷᠢᠲᠠᠵᠤ ᠰᠡᠬᠦᠬᠦ ᠪᠣᠢ ᠭᠡᠵᠦ ᠠᠷᠠᠢ ᠥᠷᠢᠰᠦᠯᠳᠦᠭᠡ ᠦᠭᠡᠢ ᠪᠠᠢᠭᠠ ᠶ᠋ᠢ ᠬᠡᠨ ᠪᠦᠬᠦᠨ ᠮᠡᠳᠡᠬᠦ ᠪᠢᠯᠡ᠃
ᠬᠤᠪᠢᠯᠠᠢ ᠬᠠᠷᠠᠬᠣᠷᠣᠮ ᠢ᠋ ᠬᠠᠭᠠᠵᠤ ᠪᠣᠭᠣᠬᠤ ᠬᠡᠷᠡᠭ ᠢ᠋ᠶ᠋ᠡᠨ ᠤᠯᠠᠮ ᠯᠠᠪᠰᠢᠷᠠᠭᠤᠯᠤᠨ᠂ ᠵᠦᠢᠯ ᠵᠦᠢᠯ ᠦ᠋ᠨ ᠶᠠᠭᠤᠮᠠ ᠬᠢᠵᠦ ᠪᠣᠢ ᠶ᠋ᠢᠨ ᠳᠣᠲᠣᠷᠠ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠰᠢᠬᠤ ᠨᠢᠭᠡᠨ ᠠᠷᠭᠠ ᠶ᠋ᠢ ᠦᠢᠯᠡᠳᠪᠡ᠃ ᠲᠡᠷᠡ ᠪᠡᠷ ᠮᠣᠩᠭᠣᠯ ᠲᠦᠮᠡᠨ ᠦ᠌ ᠪᠡᠨ ᠬᠠᠷᠢᠶᠠᠯ ᠵᠦᠬᠡᠯ ᠡᠴᠡ ᠠᠶᠤᠵᠤ ᠪᠣᠯᠭᠣᠮᠵᠢᠯᠠᠬᠤ ᠳ᠋ᠤ᠌ ᠪᠠᠨ ᠨᠡᠢᠰᠯᠡᠯ ᠢ᠋ ᠳᠠᠬᠢᠨ ᠴᠡᠷᠢᠭ ᠦ᠋ᠨ ᠬᠦᠴᠦ ᠪᠡᠷ ᠳᠣᠪᠲᠣᠯᠤᠨ ᠢᠷᠡᠵᠦ ᠨᠤᠷᠠᠭᠠᠭᠠ ᠦᠭᠡᠢ ᠪᠣᠯᠪᠠᠴᠤ ᠨᠤᠷᠠᠭᠠᠵᠤ ᠪᠠᠭᠤᠯᠭᠠᠬᠤ ᠬᠡᠷᠡᠭ ᠢ᠋ᠶ᠋ᠡᠨ ᠨᠢᠳᠦᠨ ᠡᠴᠡ ᠳᠠᠯᠳᠠᠭᠤᠷ ᠬᠢᠵᠦ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠨᠢᠭᠡ ᠲᠣᠮᠣ ᠬᠡᠷᠡᠭ ᠨᠢ ᠬᠠᠷᠠᠬᠤᠷᠤᠮ ᠳ᠋ᠤ᠌ ᠡᠳ᠋ ᠪᠠᠷᠠᠭᠠ᠂ ᠢᠳᠡᠵᠦ ᠤᠤᠭᠤᠬᠤ᠂ ᠡᠮᠦᠰᠴᠦ ᠵᠡᠭᠦᠬᠦ ᠠᠯᠢ ᠶ᠋ᠢ ᠴᠦ᠍ ᠭᠠᠳᠠᠨᠠ ᠠ᠋ᠴᠠ ᠣᠷᠣᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠲᠤᠯᠠᠳᠠ ᠶᠡᠬᠡ ᠠᠯᠤᠰ ᠢ᠋ᠶ᠋ᠠᠷ ᠬᠠᠭᠠᠯᠲᠠ ᠪᠠᠢᠭᠤᠯᠤᠨ᠂《ᠪᠢ ᠠᠷᠢᠬᠪᠦ᠋ᠬᠡ ᠶ᠋ᠢ ᠥᠯᠥᠰᠬᠦᠯᠡᠩ ᠢ᠋ᠶ᠋ᠡᠷ ᠪᠠᠭᠤᠯᠭᠠᠨ ᠠᠪᠴᠤ ᠳᠥᠩᠭᠡᠬᠦ ᠪᠠᠢᠯ ᠦᠭᠡᠢ ᠳᠡ᠃ ᠲᠡᠷᠡ ᠬᠥᠮᠦᠨ ᠣᠮᠣᠭᠯᠠᠩ ᠴᠦ᠍ ᠭᠡᠰᠡᠨ ᠭᠡᠳᠡᠰᠦ ᠪᠡᠨ ᠬᠣᠩᠬᠣᠯᠵᠠᠬᠤ ᠪᠠᠷ ᠥᠪᠡᠷ ᠢ᠋ᠶ᠋ᠡᠨ ᠠᠶᠠᠨᠳᠠᠭᠠᠨ ᠴᠠᠭᠠᠨ ᠪᠤᠳᠠᠭᠠ ᠭᠤᠶᠤᠭᠠᠳ ᠢᠷᠡᠬᠦ ᠪᠢᠵᠡ》 ᠭᠡᠵᠦ ᠬᠡᠯᠡᠭᠡᠳ᠂ ᠠᠯᠲᠠᠢ ᠶ᠋ᠢᠨ ᠶᠡᠬᠡ ᠠᠭᠤᠯᠠᠰ ᠤ᠋ᠨ ᠪᠠᠷᠠᠭᠤᠨ ᠬᠥᠨᠳᠡᠢ᠂ ᠠᠯᠠᠱᠠ ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ ᠥᠪᠥᠷ᠂ ᠶᠡᠬᠡ ᠪᠣᠭᠳᠠ ᠶ᠋ᠢᠨ ᠪᠠᠷᠠᠭᠤᠨ᠂ ᠵᠡᠭᠦᠨ ᠦᠵᠦᠭᠦᠷ᠂ ᠡᠷᠢᠶᠡᠨ ᠣᠪᠣᠭᠠᠲᠤ᠂ ᠬᠠᠲᠤᠨ ᠤ᠋ ᠭᠣᠣᠯ ᠤ᠋ᠨ ᠭᠠᠷᠠᠮ ᠤ᠋ᠳ᠂ ᠬᠢᠩᠭᠠᠨ ᠤ᠋ ᠠᠭᠤᠯᠠ ᠶ᠋ᠢᠨ ᠪᠠᠷᠠᠭᠤᠨ ᠰᠤᠭᠤ ᠵᠡᠷᠭᠡ ᠭᠠᠵᠠᠷ ᠲᠤ ᠮᠣᠩᠭᠣᠯ ᠳᠠᠭᠠᠭᠠᠮᠠᠯ ᠲᠠᠢ ᠬᠢᠲᠠᠳ ᠴᠡᠷᠢᠭ ᠦ᠋ᠨ ᠠᠩᠭᠢ ᠨᠤᠭᠤᠳ ᠢ᠋ ᠰᠠᠭᠤᠯᠭᠠᠨ᠂ ᠬᠠᠷᠠ ᠬᠣᠷᠣᠮ ᠤ᠋ᠨ ᠵᠦᠭ ᠴᠤᠪᠤᠳᠠᠭ ᠵᠢᠩ ᠦ᠋ᠨ ᠴᠤᠪᠤᠭᠠ ᠶ᠋ᠢ ᠳᠠᠰᠤᠯ᠃ ᠲᠡᠷᠡ ᠵᠦᠭ ᠪᠣᠯᠳᠠᠭ ᠰᠠᠨ ᠪᠣᠯ ᠭᠠᠳᠠᠨᠠ ᠠ᠋ᠴᠠ ᠰᠢᠪᠠᠭᠤ ᠴᠦ᠍ ᠨᠢᠰᠬᠡᠬᠦ ᠦᠭᠡᠢ ᠪᠠᠢᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠴᠢᠩᠭᠠᠯᠠᠨ ᠲᠤᠰᠢᠶᠠᠵᠠᠢ᠃ ᠡᠨᠡ ᠬᠡᠷᠡᠭ ᠢ᠋ ᠬᠤᠪᠢᠯᠠᠢ ᠶ᠋ᠢᠨ ᠳᠡᠷᠭᠡᠳᠡ ᠪᠠᠢᠳᠠᠭ ᠬᠣᠣ ᠵᠢᠩ᠂ ᠨᠠᠢ ᠶᠤᠸᠠᠨ᠂ ᠯᠢᠦ ᠪᠢᠩ ᠵᠦᠩ᠂ ᠶᠣᠣ ᠱᠤ᠌ ᠵᠡᠷᠭᠡ ᠲᠦᠰᠢᠮᠡᠳ ᠰᠠᠨᠠᠯ ᠣᠷᠣᠭᠤᠯᠤᠨ᠂ ᠡᠵᠡᠨ ᠡᠴᠡ ᠪᠡᠨ《ᠮᠡᠷᠭᠡᠨ ᠠᠷᠭᠠ ᠭᠠᠷᠭᠠᠯᠠ》 ᠭᠡᠮᠡᠨ ᠬᠥᠭᠡᠷᠭᠡᠳᠡᠭᠦᠯᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ᠂ ᠭᠠᠷᠮᠠ