ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ< ᠲᠠᠪᠤᠳᠤᠭᠠᠷ ᠪᠦᠯᠦᠭ -2>᠂ᠭᠣᠯᠣᠮᠲᠠ ᠰᠠᠬᠢᠭᠰᠠᠨ ᠡᠵᠡᠨ ᠦ᠌ ᠳ᠋ᠦ᠍ Бүргэд харьд үүрэлдэггүй – Ж᠂ Пүрэв <5-р бүлэг ~2>.голомт сахисан эзнийд
25<ᠲᠠᠪᠤᠳᠤᠭᠠᠷ ᠪᠦᠯᠦᠭ - ᠬᠣᠶᠠᠷ> ᠭᠣᠯᠣᠮᠲᠠ ᠰᠠᠬᠢᠭᠰᠠᠨ ᠡᠵᠡᠨ ᠦ᠌ ᠳ᠋ᠦ᠍
— ᠫᠦᠬᠦ᠂ ᠶᠠᠭᠤ ᠪᠣᠢ? ᠠᠬᠠ ᠨᠠᠳᠠᠳᠤ ᠡᠢᠮᠦ ᠮᠠᠭᠤᠬᠠᠢ ᠦᠭᠡ ᠠᠷᠠᠢ ᠬᠡᠯᠡᠮᠡᠷ ᠦᠭᠡᠢ ᠪᠠᠢᠮᠠᠷ᠃ ᠡᠨᠡ ᠪᠢᠴᠢᠭ ᠢ᠋ ᠥᠭᠡᠷᠡ ᠬᠥᠮᠦᠨ ᠵᠠᠮ ᠠ᠋ᠴᠠ ᠪᠢᠴᠢᠭᠡᠳ ᠠᠬᠠ ᠳᠡᠭᠦᠦ ᠪᠢᠳᠡᠨ ᠢ᠋ ᠦᠢᠮᠡᠭᠦᠯᠵᠦ ᠪᠠᠢᠭᠠ ᠬᠡᠷᠡᠭ ᠠᠷᠠᠢ ᠪᠢᠰᠢ ᠪᠠᠢᠭᠠ ᠳᠠ? ᠭᠡᠮᠡᠨ ᠠᠷᠢᠬᠪᠦᠢ᠍ᠬᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠭᠠᠳ᠂ ᠤᠭ ᠪᠢᠴᠢᠭ ᠢ᠋ ᠳᠠᠬᠢᠨ ᠳᠠᠬᠢᠨ ᠤᠩᠰᠢᠵᠤ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠪᠣᠰᠤᠨ ᠬᠠᠷᠠᠢᠵᠤ᠂ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠡᠨᠡ ᠴᠦ᠍ ᠭᠠᠷᠴᠠᠭᠠ ᠦᠭᠡᠢ ᠬᠤᠪᠢᠯᠠᠢ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠮᠥᠨ ᠪᠠᠢᠨᠠ᠃ ᠶᠠᠭᠠᠬᠢᠭᠰᠠᠨ ᠭᠤᠳᠢᠭ ᠦᠭᠡᠢ ᠪᠢᠯᠡ᠃ ᠪᠢ ᠡᠭᠦᠨ ᠢ᠋ ᠶᠠᠭᠠᠬᠢᠵᠤ ᠡᠵᠢ ᠳ᠋ᠦ᠍ ᠦᠵᠡᠭᠦᠯᠬᠦ ᠪᠢᠯᠡ᠃ ᠡᠵᠢ ᠡᠨᠡ ᠪᠢᠴᠢᠭ ᠢ᠋ ᠦᠵᠡᠭᠡᠳ ᠵᠢᠷᠦᠬᠡ ᠰᠡᠳᠬᠢᠯ ᠨᠢ ᠬᠠᠴᠢᠨ ᠡᠪ ᠦᠭᠡᠢ ᠪᠣᠯᠵᠤ᠂ ᠪᠡᠶᠡ ᠨᠢ ᠤᠯᠠᠮ ᠮᠠᠭᠤᠳᠠᠬᠤ ᠪᠠᠢᠬᠤ ᠳᠠ᠃ ᠶᠠᠭᠠᠬᠢᠵᠤ ᠴᠦ᠍ ᠡᠭᠦᠨ ᠢ᠋ ᠨᠢᠭᠤᠬᠤ ᠪᠣᠢ᠃ ᠵᠣᠷᠢᠭ ᠭᠠᠷᠭᠠᠨ ᠰᠢᠭᠤᠳ ᠬᠡᠯᠡᠬᠦ ᠡᠴᠡ ᠪᠢᠰᠢ ᠭᠡᠰᠡᠨ ᠡᠴᠡ ᠳᠠᠭᠤ ᠨᠢ ᠴᠢᠩᠭᠠᠷᠠᠨ ᠴᠢᠷᠠᠢ ᠵᠢᠪᠡᠬᠡᠢᠷᠡᠵᠦ
— ᠠᠬᠠ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠠᠷᠢᠯᠴᠠᠭᠠ ᠡᠢᠮᠦ ᠳ᠋ᠦ᠍ ᠬᠦᠷᠴᠦ ᠪᠠᠢᠭᠠ ᠪᠣᠯ ᠪᠢ ᠪᠠᠯᠮᠠᠭᠳᠠᠨ ᠬᠤᠯᠴᠢᠢᠵᠤ ᠰᠠᠭᠤᠭᠠᠳ ᠶᠠᠭᠠᠬᠢᠬᠤ ᠪᠣᠢ᠃ ᠨᠠᠳᠠᠳᠤ ᠪᠠᠰᠠ ᠢᠯᠳᠦ ᠪᠣᠢ᠃ ᠵᠠᠷ ᠵᠡᠪᠰᠡᠭ᠂ ᠴᠡᠷᠢᠭ ᠮᠣᠷᠢᠳ ᠪᠣᠢ᠃ ᠪᠢ ᠬᠥᠮᠦᠨ ᠰᠢᠭ ᠯᠡ ᠬᠥᠮᠦᠨ᠃ ᠪᠤᠰᠤᠳ ᠠ᠋ᠴᠠ ᠠᠶᠤᠵᠤ ᠬᠤᠯᠴᠢᠬᠢᠨᠠᠭᠠᠳ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠬᠤᠪᠢᠯᠠᠢ ᠳ᠋ᠤ᠌ ᠥᠭᠬᠦ ᠦᠭᠡᠢ ᠰᠢᠦ᠃ ᠪᠠᠰᠠ ᠨᠡᠢᠰᠯᠡᠯ ᠢ᠋ ᠱᠠᠩᠳᠤ ᠳ᠋ᠤ᠌ ᠰᠢᠯᠵᠢᠭᠦᠯᠦᠯᠡ ᠭᠡᠵᠦ ᠮᠡᠳᠡᠭᠳᠡᠭᠰᠡᠨ ᠪᠠᠢᠭᠠ᠃ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠪᠡᠷ ᠤᠷᠤᠭᠤ ᠪᠠᠨ ᠵᠥᠭᠡᠭᠡᠬᠦ ᠨᠢ ᠰᠢᠪ ᠳᠡ᠂ ᠲᠡᠷᠡ ᠬᠥᠮᠦᠨ᠃ ᠢᠩᠭᠢᠵᠦ ᠲᠣᠩᠭᠣᠴᠢᠬᠤ ᠶ᠋ᠢ ᠪᠢ ᠵᠥᠪᠰᠢᠶᠡᠷᠡᠵᠦ ᠪᠣᠯᠬᠤ ᠤᠤ? ᠮᠥᠩᠬᠡ ᠲᠩᠷᠢ ᠲᠡᠭᠦᠨ ᠢ᠋ ᠲᠠᠭᠠᠯᠠᠬᠤ ᠤᠤ? ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠳᠣᠷᠭᠢᠵᠤ ᠶᠠᠪᠤᠭᠠ ᠠᠮᠢᠲᠠᠨ ᠢ᠋ ᠬᠠᠵᠠᠭᠠᠷᠯᠠᠳᠠᠭ ᠶᠣᠰᠣ ᠪᠣᠢ᠃ ᠡᠮᠨᠢᠭ ᠮᠣᠷᠢ ᠶ᠋ᠢ ᠬᠥᠮᠦᠨ ᠪᠠᠷᠢᠵᠤ ᠠᠪᠤᠭᠠᠳ ᠨᠣᠮᠣᠬᠠᠳᠬᠠᠨ ᠰᠤᠷᠭᠠᠳᠠᠭ ᠪᠢᠵᠡ ᠳᠡ᠃ ᠲᠡᠢᠮᠦ ᠯᠡ ᠬᠡᠷᠡᠭ ᠪᠣᠯᠬᠤ ᠨᠢ ᠴᠦ᠍ ᠭᠡᠵᠦ ᠠᠷᠢᠬᠪᠦᠢ᠍ᠬᠡ ᠪᠣᠳᠣᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠲᠣᠪᠰᠢᠭᠤᠷ ᠮᠣᠳᠣ ᠴᠣᠬᠢᠨ ᠪᠠᠷᠠ ᠪᠣᠯᠤᠭᠴᠢ ᠶ᠋ᠢ ᠳᠠᠭᠤᠳᠠᠨ ᠢᠷᠡᠭᠦᠯᠦᠭᠡᠳ ᠠᠯᠨᠨᠳᠠᠢ᠂ ᠲᠡᠮᠦᠷ ᠲᠣᠯᠣᠭᠠᠢ᠂ ᠰᠦᠢᠲᠦ᠂ ᠪᠢᠯᠢᠭᠦᠨ ᠨᠠᠷ ᠤ᠋ᠨ ᠨᠣᠶᠠᠳ ᠢ᠋ ᠶᠠᠭᠠᠷᠠᠯᠲᠠᠢ ᠡᠨᠳᠡ ᠢᠷᠡᠭᠦᠯ! ᠭᠡᠵᠦ ᠲᠤᠰᠢᠶᠠᠪᠠ᠃ ᠤᠳᠠᠭᠰᠠᠨ ᠴᠦ᠍ ᠦᠭᠡᠢ ᠨᠡᠷᠡ ᠪᠦᠬᠦᠢ ᠠᠷᠪᠠᠭᠠᠳ ᠨᠣᠶᠠᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠬᠤᠷᠠᠨ ᠴᠤᠭᠯᠠᠷᠠᠯᠠ᠃
ᠠᠷᠢᠬᠪᠦᠢ᠍ᠬᠡ ᠬᠠᠭᠠᠨ ᠠᠭᠤᠷᠲᠠᠢ ᠲᠣᠭᠰᠢᠨ ᠴᠦ᠍ ᠶᠤᠮ ᠰᠢᠭ᠋᠂ ᠠᠭᠠᠰᠢ ᠵᠠᠩ ᠨᠢ ᠢᠮᠠᠭᠲᠠ ᠲᠠᠢᠪᠤᠩ ᠪᠠᠢᠳᠠᠭ ᠪᠠᠢᠳᠠᠯ ᠢ᠋ᠶ᠋ᠠᠨ ᠥᠭᠡᠷᠡᠴᠢᠯᠡᠨ ᠪᠠᠢᠪᠠ᠃ ᠬᠥᠮᠦᠰ ᠶᠡᠷᠦ ᠪᠤᠰᠤ ᠶ᠋ᠢᠨ ᠨᠢᠭᠡ ᠶᠠᠪᠤᠳᠠᠯ ᠲᠡᠭᠦᠨ ᠢ᠋ ᠵᠣᠪᠠᠭᠠᠵᠤ ᠪᠠᠢᠭᠠ ᠶ᠋ᠢ ᠭᠠᠳᠠᠷᠯᠠᠨ ᠵᠠᠷᠯᠢᠭ ᠬᠦᠯᠢᠶᠡᠵᠦ ᠵᠣᠭᠰᠣᠯᠠ᠃ ᠬᠠᠭᠠᠨ ᠬᠠᠭᠤᠴᠢᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠳᠠᠷ ᠬᠥᠮᠦᠰ ᠢ᠋ᠶ᠋ᠡᠨ ᠨᠢᠭᠡ ᠪᠦᠷᠢ ᠪᠡᠷ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠰᠠᠭᠤᠵᠤ ᠳᠠᠭᠠᠯᠠᠭᠠᠴᠢ! ᠮᠣᠳᠣᠨ ᠥᠮᠥᠳᠥ ᠡᠮᠦᠰᠦᠭᠰᠡᠨ ᠪᠢᠰᠢ ᠳᠡ ᠭᠡᠵᠦ ᠵᠣᠴᠢᠯᠠᠪᠠ᠃ ᠨᠣᠶᠠᠳ ᠤ᠋ᠳ ᠪᠡᠯᠡᠨ ᠵᠠᠰᠠᠭᠠᠰᠤᠲᠠᠢ ᠵᠠᠪᠳᠤᠩ ᠳ᠋ᠤ᠌ ᠴᠢᠮᠡᠭᠡ ᠦᠭᠡᠢ ᠰᠠᠭᠤᠯᠠ᠃ ᠬᠠᠭᠠᠨ ᠬᠤᠪᠢᠯᠠᠢ ᠠ᠋ᠴᠠ ᠢᠷᠡᠭᠦᠯᠦᠭᠰᠡᠨ ᠪᠢᠴᠢᠭ ᠢ᠋ ᠰᠠᠶᠢᠬᠠᠨ ᠰᠢᠳᠠᠷ ᠪᠣᠯᠤᠭᠰᠠᠨ ᠪᠢᠯᠢᠭᠦᠨ ᠳ᠋ᠦ᠍ ᠥᠭᠴᠦ
— ᠡᠭᠦᠨ ᠢ᠋ ᠤᠩᠰᠢᠨ ᠰᠣᠨᠣᠰᠬᠠ! ᠭᠡᠵᠦ ᠵᠠᠷᠯᠢᠭᠯᠠᠪᠠ᠃ ᠰᠦᠢᠲᠦ ᠨᠣᠶᠠᠨ ᠳ᠋ᠤ᠌ ᠪᠠᠷᠠ ᠪᠣᠯᠤᠨ ᠲᠠᠮᠠᠭᠠ ᠲᠦᠰᠢᠵᠦ᠂ ᠳᠤᠮᠳᠠᠳᠤ ᠣᠷᠣᠨ ᠨᠤᠭᠤᠳ ᠢ᠋ᠶ᠋ᠠᠷ ᠶᠠᠪᠤᠭᠠᠳ ᠢᠷᠡᠭᠰᠡᠨ ᠦ᠌ ᠪᠡᠨ ᠳᠠᠷᠠᠭᠠᠬᠠᠨ ᠪᠢᠯᠢᠭᠦᠨ ᠶᠡᠬᠡ ᠬᠠᠭᠠᠨ ᠤ᠋ ᠳᠣᠲᠣᠭᠠᠳᠤ ᠪᠢᠴᠢᠭ ᠦ᠋ᠨ ᠨᠣᠶᠠᠨ ᠪᠣᠯᠵᠤ ᠡᠷᠭᠦᠭᠳᠡᠭᠰᠡᠨ ᠤᠴᠢᠷ ᠬᠠᠮᠤᠭ ᠨᠠᠷᠢᠨ ᠰᠠᠢᠨ ᠵᠦᠢᠯ ᠲᠡᠭᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠳᠠᠮᠵᠢᠳᠠᠭ ᠪᠣᠯᠤᠭᠰᠠᠨ ᠨᠢ ᠥᠨᠳᠥᠷ ᠢᠲᠡᠭᠡᠯ ᠬᠦᠯᠢᠶᠡᠯᠭᠡᠭᠰᠡᠨ ᠬᠡᠷᠡᠭ ᠪᠠᠢᠯᠠ᠃ ᠠᠬᠠᠨ ᠳᠡᠭᠦᠦ ᠬᠦᠯᠦᠭ᠂ ᠪᠢᠯᠢᠭᠦᠨ ᠬᠣᠶᠠᠷ ᠠᠯᠢ ᠠᠯᠢ ᠨᠢ ᠳᠡᠭᠡᠳᠦ ᠡᠵᠡᠳ ᠦ᠋ᠨ ᠪᠢᠴᠢᠭ ᠬᠡᠷᠡᠭ ᠦ᠋ᠨ ᠨᠠᠷᠢᠨ ᠠᠷᠭᠠᠨ ᠳ᠋ᠤ᠌ ᠢᠲᠡᠭᠡᠳᠡᠭ ᠪᠣᠯᠤᠭᠰᠠᠨ ᠨᠢ ᠲᠡᠭᠦᠨ ᠢ᠋ ᠡᠴᠢᠭᠡ ᠪᠠᠷᠭᠠᠢ ᠶ᠋ᠢᠨ ᠠᠴᠢ ᠭᠠᠪᠢᠶᠠ ᠭᠡᠬᠦ ᠤᠤ᠂ ᠲᠡᠷᠡ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠦᠷᠡ ᠬᠡᠦᠬᠡᠳ ᠦ᠋ᠳ ᠲᠦ᠍ ᠪᠡᠨ ᠥᠪᠡᠷ ᠦ᠋ᠨ ᠡᠷᠳᠡᠮ ᠢ᠋ ᠤᠯᠠᠮᠵᠢᠯᠠᠭᠤᠯᠤᠨ ᠰᠤᠷᠭᠠᠭᠰᠠᠨ ᠤ᠋ ᠪᠤᠶᠠᠨ ᠪᠢᠯᠡ᠃ ᠪᠢᠯᠢᠭᠦᠨ ᠥᠪᠡᠷ ᠢ᠋ᠶ᠋ᠡᠨ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠣᠢᠷᠠᠯᠴᠠᠭᠠ ᠠᠯᠪᠠ ᠬᠠᠰᠢᠵᠤ ᠪᠠᠢᠭᠰᠠᠨ᠂ ᠲᠡᠭᠦᠨ ᠦ᠌ ᠵᠠᠷᠤᠭᠠᠯ ᠢ᠋ᠶ᠋ᠠᠷ ᠨᠡᠢᠰᠯᠡᠯ ᠳ᠋ᠦ᠍ ᠢᠷᠡᠭᠰᠡᠨ ᠵᠡᠷᠭᠡ ᠪᠡᠨ ᠨᠢᠭᠡᠳ ᠨᠢᠭᠡᠨ ᠦᠭᠡᠢ ᠠᠷᠢᠬᠪᠦᠢ᠍ᠬᠡ ᠳ᠋ᠦ᠍ ᠠᠢᠯᠠᠳᠬᠠᠵᠤ ᠠᠮᠵᠢᠭᠰᠠᠨ ᠤᠴᠢᠷ ᠭᠠᠳᠠᠭᠠᠳᠤ ᠬᠡᠷᠡᠭ ᠦ᠋ᠨ ᠠᠯᠪᠠᠨ ᠳ᠋ᠤ᠌ ᠤᠳᠠᠭᠠᠨ ᠪᠠᠢᠯ ᠦᠭᠡᠢ᠂ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠰᠢᠳᠠᠷᠯᠠᠬᠤ ᠪᠣᠯᠵᠠᠢ᠃ ᠡᠢᠮᠦ ᠨᠢᠭᠡᠨ ᠲᠦᠰᠢᠮᠡᠯ ᠵᠠᠷᠯᠢᠭ ᠶᠣᠰᠣᠭᠠᠷ ᠪᠣᠰᠴᠤ ᠵᠣᠭᠰᠣᠭᠠᠳ ᠬᠤᠪᠢᠯᠠᠢ ᠠᠬᠠ ᠠ᠋ᠴᠠ ᠨᠢ ᠳᠡᠭᠦᠦ ᠳ᠋ᠦ᠍ ᠪᠡᠨ ᠢᠷᠡᠭᠦᠯᠦᠭᠰᠡᠨ ᠪᠢᠴᠢᠭ ᠢ᠋ ᠨᠢ ᠨᠣᠶᠠᠳ ᠲᠤ ᠤᠩᠰᠢᠵᠤ ᠰᠣᠨᠣᠰᠬᠠᠯᠠ᠃ ᠪᠢᠯᠢᠭᠦᠨ ᠪᠢᠴᠢᠭ ᠳᠠᠭᠤᠳᠠᠬᠤ ᠳ᠋ᠤ᠌ ᠪᠠᠨ ᠬᠥᠮᠦᠰ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠴᠢᠳᠬᠤᠨ ᠬᠢᠵᠦ ᠪᠠᠢᠭᠠ ᠠᠳᠠᠯᠢ ᠠᠶᠠᠯᠭᠤ ᠲᠣᠳᠣᠬᠠᠨ᠂ ᠤᠳᠬᠠ ᠲᠡᠭᠦᠯᠳᠡᠷ ᠬᠡᠯᠡᠳᠡᠭ ᠨᠢ ᠪᠠᠬᠠᠷᠬᠠᠮᠠᠷ ᠪᠠᠢᠳᠠᠭ ᠪᠢᠯᠡ᠃
ᠨᠣᠶᠠᠳ ᠤ᠋ᠳ ᠤᠭ ᠪᠢᠴᠢᠭ ᠢ᠋ ᠰᠣᠨᠣᠰᠤᠭᠠᠳ ᠳᠣᠣᠷᠠ ᠪᠦᠷᠢᠨᠡ ᠴᠢᠷᠠᠢ ᠪᠠᠨ ᠬᠤᠪᠢᠷᠠᠭᠠᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠵᠤ ᠬᠡᠰᠡᠭ ᠵᠠᠭᠤᠷᠠ ᠴᠢᠮᠡᠭᠡ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠵᠠᠷᠢᠮ ᠨᠢ ᠬᠢᠯᠢᠩᠨᠡᠪᠡ ᠪᠣᠯᠤᠯᠲᠠᠢ ᠭᠠᠷ ᠵᠠᠩᠭᠢᠳᠤᠨ ᠪᠣᠰᠴᠤ ᠢᠷᠡᠪᠡ᠃ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠠᠯᠠᠨᠳᠠᠷ ᠨᠣᠶᠠᠨ ᠰᠦᠷᠯᠢᠭ ᠲᠣᠮᠣ ᠴᠡᠭᠡᠵᠢ ᠪᠡᠨ ᠬᠥᠳᠡᠯᠭᠡᠨ᠂ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠵᠤ᠂ ᠵᠠᠩᠭᠢᠷᠣᠭᠰᠨ ᠰᠥᠭᠡᠩᠳᠡᠭᠦᠦ ᠬᠣᠭᠣᠯᠠᠢ ᠪᠠᠷ᠄
— ᠬᠤᠪᠢᠯᠠᠢ ᠶᠠᠭᠤ ᠭᠡᠯᠡ ᠭᠡᠨᠡ ᠪᠣᠢ?《ᠭᠠᠩ ᠢᠯᠳᠦ ᠶ᠋ᠢᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠪᠢᠴᠢᠭᠰᠡᠨ ᠪᠢᠴᠢᠭ ᠢᠷᠡᠭᠦᠯᠦᠨᠡ》 ᠭᠡᠪᠡ ᠤᠤ? ᠡᠨᠡ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠶᠠᠮᠠᠷ ᠮᠠᠭᠤᠬᠠᠢ ᠦᠭᠡ ᠪᠣᠢ? ᠰᠢᠭᠤᠳ ᠪᠠᠢᠯᠳᠤᠶᠠ ᠭᠡᠵᠦ ᠪᠢᠳᠡᠨ ᠢ᠋ ᠲᠡᠢᠨ ᠳ᠋ᠦ᠍ ᠳᠠᠭᠤᠳᠠᠭᠠ ᠰᠢᠪ᠃ ᠲᠡᠭᠡᠪᠡᠯ ᠪᠢᠳᠡᠨ ᠳ᠋ᠦ᠍ ᠴᠦ᠍ ᠪᠠᠰᠠ ᠭᠠᠩ ᠢ᠋ᠶ᠋ᠠᠷ ᠬᠢᠭᠰᠡᠨ ᠢᠯᠳᠦ ᠪᠠᠢᠭᠠ ᠰᠢᠦ ᠳᠡ᠃ ᠠᠬᠠ ᠨᠢ ᠳᠡᠭᠦᠦ ᠳ᠋ᠦ᠍ ᠪᠡᠨ ᠢᠩᠭᠢᠵᠦ ᠬᠡᠯᠡᠵᠦ ᠪᠣᠯᠳᠠᠭ ᠶᠤᠮ ᠪᠠᠢᠬᠤ ᠳᠠ? ᠪᠢ ᠮᠤᠩᠬᠠᠭᠯᠠᠨ ᠰᠠᠨᠠᠪᠠᠯ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠨᠡ ᠪᠢᠴᠢᠭ ᠪᠣᠯ ᠪᠦᠬᠦᠨ ᠢ᠋ ᠦᠢᠮᠡᠭᠡᠨ ᠳ᠋ᠦ᠍ ᠤᠷᠢᠶᠠᠯᠠᠨ ᠳᠠᠭᠤᠳᠠᠭᠰᠠᠨ ᠭᠤᠲᠤᠮᠰᠢᠭᠲᠤ ᠳᠠᠭᠤᠳᠠᠯᠭᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠲᠡᠭᠡᠭᠡᠳ ᠦᠵᠡᠯᠴᠡᠪᠡᠯ ᠦᠵᠡᠯᠴᠡᠬᠦ ᠯᠡ ᠪᠣᠯᠵᠤ ᠪᠠᠢᠨᠠ ᠭᠡᠮᠡᠨ ᠥᠭᠦᠯᠡᠯᠡ᠃ ᠨᠡᠢᠰᠯᠡᠯ ᠢ᠋ ᠬᠠᠮᠠᠭᠠᠯᠠᠨ ᠬᠠᠷᠠᠵᠤ ᠪᠠᠢᠳᠠᠭ ᠲᠦᠮᠡᠲᠦ ᠶ᠋ᠢᠨ ᠵᠠᠬᠢᠷᠤᠭᠴᠢ ᠡᠨᠡ ᠨᠣᠶᠠᠨ ᠤ᠋ ᠦᠭᠡ ᠪᠤᠰᠤᠳ ᠤ᠋ᠨ ᠬᠢ ᠡᠴᠡ ᠴᠡᠷᠢᠭ ᠦ᠋ᠨ ᠪᠠᠯ ᠢ᠋ᠶ᠋ᠠᠷ ᠢᠯᠡᠭᠦᠦ ᠵᠢᠩ ᠲᠡᠢ ᠪᠠᠢᠬᠤ ᠤᠴᠢᠷᠲᠠᠢ ᠨᠢ ᠬᠡᠨ ᠪᠦᠬᠦᠨ ᠦ᠌ ᠮᠡᠳᠡᠭᠡᠵᠢ᠃
ᠲᠡᠮᠦᠷ ᠲᠣᠯᠣᠭᠠᠢ ᠨᠣᠶᠠᠨ ᠳᠠᠷᠠᠭᠠ ᠨᠢ ᠥᠨᠳᠡᠢᠵᠦ ᠢᠷᠡᠭᠡᠳ ᠬᠦᠷᠡᠩ ᠴᠣᠬᠣᠷ ᠴᠢᠷᠠᠢ ᠳ᠋ᠤ᠌ ᠪᠠᠨ ᠬᠢᠯᠢᠩ ᠪᠠᠳᠠᠷᠠᠭᠤᠯᠤᠭᠰᠠᠨ ᠶᠠᠩᠵᠤ ᠪᠠᠷ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠪᠠᠢᠵᠤ ᠤᠳᠠᠭᠠᠨ ᠦᠭᠡ ᠬᠡᠯᠡᠪᠡ᠃ ᠡᠨᠡ ᠨᠣᠶᠠᠨ ᠮᠥᠩᠬᠡ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ᠂ ᠲᠡᠭᠦᠨ ᠦ᠌ ᠲᠠᠮᠠᠭᠠ ᠶ᠋ᠢ ᠲᠦᠰᠢᠵᠦ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠲᠥᠷᠥ ᠤᠯᠤᠰ ᠤ᠋ᠨ ᠬᠠᠮᠤᠭ ᠨᠠᠷᠢᠨ ᠰᠢᠷᠢᠨ ᠶᠠᠪᠤᠳᠠᠯ ᠢ᠋ ᠰᠠᠢᠨ ᠮᠡᠳᠡᠳᠡᠭ ᠲᠡᠳᠦᠢ ᠦᠭᠡᠢ᠂ ᠬᠠᠭᠠᠨ ᠥᠪᠡᠷ ᠦ᠋ᠨ ᠳᠣᠲᠣᠭᠠᠳᠤ ᠪᠣᠳᠣᠯ ᠰᠠᠨᠠᠭᠠ ᠪᠠᠨ ᠬᠡᠯᠡᠳᠡᠭ᠂ ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠳᠠᠭ᠂ ᠨᠢᠭᠡ ᠶᠣᠰᠣᠨ ᠳ᠋ᠤ᠌ ᠪᠠᠨ ᠵᠥᠪᠯᠡᠭᠴᠢ ᠨᠢ ᠪᠠᠢᠭᠰᠠᠨ ᠭᠡᠬᠦ ᠳ᠋ᠦ᠍ ᠬᠡᠳᠦ ᠡᠷᠭᠦᠮᠵᠢᠯᠡᠯ ᠪᠣᠯᠬᠤ ᠦᠭᠡᠢ ᠪᠢᠵᠡ ᠠ᠋᠃
— ᠪᠢᠳᠡ ᠬᠤᠪᠢᠯᠠᠢ ᠪᠠᠨ ᠮᠠᠲᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠡᠨᠡ ᠢᠷᠡᠭᠦᠯᠦᠭᠰᠡᠨ ᠪᠢᠴᠢᠭ ᠲᠦ᠍ ᠶᠠᠭ ᠯᠠ ᠬᠤᠪᠢᠯᠠᠢ ᠶ᠋ᠢᠨ ᠪᠣᠳᠣᠯ ᠰᠠᠨᠠᠭᠠ ᠶ᠋ᠢ ᠢᠯᠡᠷᠬᠡᠢᠯᠡᠭᠰᠡᠨ ᠪᠠᠢᠨᠠ᠃ ᠨᠢᠭᠤᠯ ᠦᠭᠡᠢ ᠬᠡᠯᠡᠬᠦ ᠳ᠋ᠦ᠍ ᠬᠤᠪᠢᠯᠠᠢ ᠠᠬᠠ ᠬᠠᠭᠠᠨ ᠢ᠋ ᠪᠡᠨ ᠲᠠᠭᠠᠯᠠᠯ ᠲᠡᠭᠦᠰᠬᠦ ᠳ᠋ᠦ᠍ ᠭᠤᠲᠤᠷᠠᠵᠤ ᠭᠤᠨᠢᠭᠠ ᠦᠭᠡᠢ᠂ ᠬᠠᠷᠢᠨ ᠪᠠᠶᠠᠷᠯᠠᠭᠰᠠᠨ ᠬᠥᠮᠦᠨ᠃ ᠶᠠᠭᠠᠬᠢᠵᠤ ᠴᠢ ᠡᠭᠦᠨ ᠢ᠋ ᠮᠡᠳᠡᠭᠰᠡᠨ ᠪᠣᠢ ᠭᠡᠪᠡᠯ ᠶᠡᠬᠡ ᠬᠠᠭᠠᠨ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠭᠦᠯᠬᠦ ᠳ᠋ᠦ᠍ ᠬᠠᠮᠤᠭ ᠠᠬᠠ ᠳᠡᠭᠦᠦ ᠨᠠᠷ ᠨᠢ ᠶᠠᠭᠠᠷᠠᠨ ᠬᠦᠷᠴᠦ ᠣᠴᠢᠭᠰᠠᠨ ᠪᠠᠢᠬᠤ ᠳ᠋ᠤ᠌ ᠬᠤᠪᠢᠯᠠᠢ ᠰᠠᠷᠠ ᠰᠢᠬᠠᠮ ᠪᠣᠯᠤᠭᠰᠠᠨ ᠬᠣᠢᠨᠠ ᠳᠥᠩᠭᠡᠵᠦ ᠱᠠᠷᠢᠯ ᠢ᠋ ᠨᠢ ᠬᠡᠭᠡᠷᠡ ᠶ᠋ᠢᠨ ᠬᠣᠢᠮᠣᠷ ᠳᠤ ᠵᠠᠯᠠᠬᠤ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠢᠷᠡᠭᠦᠴᠡᠬᠡᠨ ᠪᠣᠯᠤᠭᠰᠠᠨ᠃ ᠶᠡᠷᠦ ᠨᠢ ᠬᠤᠪᠢᠯᠠᠢ ᠠᠬᠠ ᠶ᠋ᠢ ᠪᠡᠨ ᠪᠤᠰᠢᠭᠤ ᠨᠠᠰᠤ ᠪᠠᠷᠠᠭᠠᠰᠠᠢ ᠭᠡᠵᠦ ᠪᠣᠳᠣᠨ ᠲᠡᠭᠦᠨ ᠦ᠌ ᠠᠮᠢᠳᠤ ᠠᠬᠤᠢ ᠳ᠋ᠤ᠌ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠬᠠᠭᠠᠨ ᠪᠣᠯᠬᠤ ᠭᠡᠵᠦ ᠡᠷᠡᠮᠡᠯᠵᠡᠨ ᠪᠠᠢᠭᠰᠠᠨ ᠢ᠋ ᠪᠠᠲᠤᠯᠠᠬᠤ ᠨᠢᠭᠡ ᠵᠦᠢᠯ ᠪᠣᠯ《ᠪᠣᠭᠳᠠ ᠡᠵᠡᠨ ᠬᠤᠪᠢᠯᠠᠢ ᠶ᠋ᠢ ᠬᠠᠭᠠᠨ ᠪᠠᠢᠪᠠᠯ ᠵᠣᠬᠢᠬᠤ ᠬᠥᠮᠦᠨ》 ᠭᠡᠵᠦ ᠰᠡᠷᠡᠭᠦᠨ ᠲᠤᠩᠭᠠᠯᠠᠭ ᠪᠠᠢᠬᠤ ᠳ᠋ᠤ᠌ ᠪᠠᠨ ᠵᠠᠷᠯᠢᠭᠯᠠᠵᠤ ᠪᠠᠢᠭᠰᠠᠨ ᠭᠡᠳᠡᠭ ᠨᠢ ᠲᠠᠭᠠᠷᠠᠭᠰᠠᠨ᠃ ᠡᠨᠡ ᠦᠭᠡ ᠶ᠋ᠢ ᠬᠤᠪᠢᠯᠠᠢ ᠯᠠ ᠵᠣᠬᠢᠶᠠᠨ ᠪᠣᠳᠣᠵᠤ ᠠᠮᠢᠲᠠᠨ ᠣᠯᠠᠨ ᠳ᠋ᠤ᠌ ᠰᠡᠮᠬᠡᠨ ᠬᠡᠯᠡᠭᠰᠡᠨ ᠬᠡᠷᠡᠭ ᠭᠡᠵᠦ ᠶᠠᠷᠢᠭᠠᠳ᠂ ᠰᠢᠪᠡᠭᠴᠢᠨ ᠢ᠋ᠶ᠋ᠡᠷ ᠠᠢᠷᠠᠭ ᠠᠶᠠᠭᠠᠯᠠᠭᠤᠯᠤᠨ ᠠᠪᠴᠤ ᠬᠡᠳᠦ ᠲᠣᠮᠣ ᠪᠠᠯᠭᠤᠭᠠᠳ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠪᠡ᠃ ᠲᠡᠮᠦᠷ ᠲᠣᠯᠣᠭᠠᠢ ᠨᠣᠶᠠᠨ ᠨᠢᠭᠡ ᠭᠠᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠥᠭᠦᠭᠡ ᠪᠡᠨ ᠠᠳᠬᠤᠭᠠᠳ ᠬᠡᠯᠡᠬᠦ ᠳ᠋ᠦ᠍ ᠪᠡᠨ᠄
— ᠪᠢ ᠮᠡᠳᠡᠨᠡ᠃ ᠬᠤᠪᠢᠯᠠᠢ ᠳ᠋ᠤ᠌ ᠬᠢᠲᠠᠳ ᠢ᠋ ᠵᠠᠬᠢᠷᠤᠭᠤᠯᠬᠤ ᠪᠣᠯᠤᠭᠰᠠᠨ ᠬᠡᠷᠡᠭ《ᠲᠣᠮᠣᠳᠠᠵᠤ》 ᠪᠠᠢᠪᠠ᠃ ᠲᠡᠷᠡ ᠪᠡᠷ ᠪᠡᠶᠡ ᠪᠡᠨ ᠶᠡᠬᠡ ᠳ᠋ᠦ᠍ ᠪᠣᠳᠣᠨ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠪᠤᠷᠢᠯᠠᠵᠤ᠂ ᠶᠡᠬᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠴᠦ᠍ ᠲᠣᠭᠣᠵᠤ ᠦᠵᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ᠃ ᠡᠢᠮᠦ ᠬᠥᠮᠦᠨ ᠢ᠋ᠶ᠋ᠡᠷ ᠲᠠ ᠥᠪᠡᠷ ᠦ᠋ᠨ ᠣᠷᠣ ᠶ᠋ᠢ ᠰᠠᠭᠤᠯᠭᠠᠨᠠ ᠭᠡᠵᠦ ᠲᠠᠭᠠᠯᠠᠵᠤ ᠪᠣᠯᠬᠤ ᠦᠭᠡᠢ ᠰᠢᠦ ᠭᠡᠰᠡᠨ ᠵᠠᠷᠢᠮ ᠨᠣᠶᠠᠨ ᠮᠥᠩᠬᠡ ᠬᠠᠭᠠᠨ ᠳ᠋ᠤ᠌ ᠨᠢᠭᠡ ᠪᠤᠰᠤ ᠤᠳᠠᠭᠠ ᠠᠢᠯᠠᠳᠴᠤ ᠪᠠᠢᠭᠰᠠᠨ᠃ ᠪᠢ ᠲᠡᠭᠦᠨ ᠢ᠋ ᠨᠢ ᠮᠡᠳᠡᠨᠡ᠃ ᠥᠭᠡᠳᠡ ᠪᠣᠯᠤᠭᠴᠢ ᠬᠠᠭᠠᠨᠲᠠᠨ ᠳᠡᠭᠦᠦ ᠪᠡᠨ ᠬᠠᠢᠷᠠᠯᠠᠵᠤ ᠪᠠᠢᠭᠰᠠᠨ᠃ ᠲᠡᠭᠡᠯᠡ ᠴᠦ᠍ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠬᠢᠲᠠᠳ ᠣᠷᠣᠨ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠪᠣᠳᠣᠯᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠵᠥᠷᠢᠴᠡᠬᠦ ᠪᠣᠯᠤᠭᠰᠠᠨ ᠤᠴᠢᠷ ᠠᠷᠭᠠ ᠪᠤᠰᠤ ᠬᠤᠪᠢᠯᠠᠢ ᠶ᠋ᠢ ᠳᠠᠭᠤᠳᠠᠭᠤᠯᠤᠨ ᠠᠭᠤᠯᠵᠠᠵᠤ ᠬᠣᠭᠣᠷᠣᠨᠳᠣ ᠪᠠᠨ ᠬᠠᠲᠠᠭᠤᠬᠠᠨ ᠶᠠᠷᠢᠶᠠ ᠪᠣᠯᠤᠭᠰᠠᠨ᠃ ᠶᠠᠭ ᠲᠡᠷᠡ ᠶᠠᠷᠢᠶᠠᠨ ᠳ᠋ᠤ᠌ ᠪᠢ ᠳᠡᠷᠭᠡᠳᠡ ᠨᠢ ᠪᠠᠢᠭᠠ ᠦᠭᠡᠢ᠃ ᠭᠡᠯᠡ ᠴᠦ᠍ ᠬᠣᠵᠢᠮ ᠨᠢ ᠬᠠᠭᠠᠨ ᠤ᠋ ᠠᠮᠠᠨ ᠠ᠋ᠴᠠ ᠪᠠᠰᠠ ᠰᠢᠷᠠ ᠶᠡᠬᠡᠡᠤᠯᠵᠠ ᠲᠦᠰᠢᠮᠡᠯ ᠡᠴᠡ ᠰᠣᠨᠣᠰᠴᠤ ᠮᠡᠳᠡᠭᠰᠡᠨ᠃ ᠲᠡᠷᠡ ᠤᠯᠠᠮ ᠠ᠋ᠴᠠ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠬᠤᠪᠢᠯᠠᠢ ᠠᠬᠠ ᠬᠠᠭᠠᠨ ᠲᠠᠢ ᠪᠠᠨ ᠡᠪ ᠡᠶᠡ ᠪᠡᠷ ᠲᠠᠭᠠᠷᠠᠤᠬᠠᠨ ᠪᠣᠯᠤᠭᠰᠠᠨ᠃ ᠡᠨᠡ ᠨᠢ ᠬᠤᠪᠢᠯᠠᠢ ᠬᠡᠳᠦ ᠶᠡᠬᠡ ᠶ᠋ᠢ ᠪᠣᠳᠣᠭᠰᠠᠨ ᠬᠢᠲᠠᠳ ᠢ᠋ ᠳᠡᠩᠳᠡᠭᠦᠦ ᠬᠠᠮᠠᠭᠠᠯᠠᠳᠠᠭ ᠪᠣᠯᠤᠭᠰᠠᠨ᠃ ᠲᠡᠷᠡ ᠵᠠᠬᠢᠷᠤᠭᠴᠢ ᠥᠪᠡᠷ ᠢ᠋ ᠨᠢ ᠵᠠᠬᠢᠷᠤᠭᠰᠠᠨ ᠭᠠᠵᠠᠷ ᠲᠤ ᠶᠡᠬᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠬᠠᠮᠢᠶᠠ ᠦᠭᠡᠢ ᠮᠡᠲᠦ ᠪᠠᠢᠯᠭᠠᠬᠤ ᠭᠡᠵᠦ ᠪᠣᠳᠣᠳᠠᠭ ᠵᠡᠷᠭᠡ ᠡᠴᠡ ᠤᠭ ᠶᠠᠪᠤᠳᠠᠯ ᠡᠭᠦᠳᠦᠭᠳᠡᠭᠰᠡᠨ᠃ ᠲᠡᠭᠡᠭᠡᠳ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠶᠣᠰᠣ ᠪᠠᠷ ᠰᠥᠩ ᠦ᠋ᠨ ᠵᠦᠭ ᠲᠠᠪᠰᠢᠯᠲᠠ ᠶ᠋ᠢ ᠬᠤᠪᠢᠯᠠᠢ ᠰᠠᠭᠠᠷᠠᠭᠤᠯᠤᠭᠰᠠᠨ᠃ ᠶᠡᠬᠡ ᠬᠠᠭᠠᠨᠲᠠᠨ ᠳᠠᠬᠢᠵᠤ ᠬᠤᠪᠢᠯᠠᠢ ᠲᠠᠢ ᠠᠭᠤᠯᠵᠠᠨ ᠰᠢᠢᠳᠪᠦᠷᠢᠲᠡᠢ ᠶᠠᠷᠢᠯᠴᠠᠬᠤ᠂ ᠦᠭᠡ ᠡᠰᠡ ᠠᠪᠤᠪᠠᠯ ᠬᠢᠲᠠᠳ ᠤ᠋ᠨ ᠵᠠᠬᠢᠷᠤᠭᠴᠢ ᠠ᠋ᠴᠠ ᠪᠣᠯᠢᠭᠤᠯᠬᠤ ᠭᠡᠵᠦ ᠪᠡᠯᠡᠳᠬᠡᠵᠦ ᠪᠠᠢᠭᠠᠳ ᠠᠮᠵᠢᠯ ᠦᠭᠡᠢ ᠪᠡᠶᠡ ᠪᠠᠷᠠᠭᠰᠠᠨ ᠭᠡᠮᠡᠨ ᠶᠠᠷᠢᠭᠠᠳ᠂ ᠡᠴᠦᠰ ᠲᠦ᠍ ᠨᠢ
— ᠬᠤᠪᠢᠯᠠᠢ ᠲᠠᠢ ᠪᠢᠳᠡ ᠵᠠᠷ ᠵᠡᠪᠰᠡᠭ ᠦ᠋ᠨ ᠬᠦᠴᠦ ᠪᠡᠷ ᠯᠡ ᠡᠶᠡ ᠡᠪ ᠢ᠋ᠶ᠋ᠡᠨ ᠣᠯᠬᠤ ᠬᠡᠷᠡᠭ ᠲᠤᠯᠭᠠᠷᠠᠯᠠ ᠭᠡᠵᠦ ᠲᠡᠮᠦᠷ ᠲᠣᠯᠣᠭᠠᠢ ᠨᠣᠶᠠᠨ ᠬᠡᠯᠡᠪᠡ᠃ ᠨᠣᠶᠠᠨ ᠤ᠋ ᠡᠨᠡ ᠦᠭᠡ ᠶ᠋ᠢ ᠬᠤᠷᠠᠭᠰᠠᠨ ᠪᠦᠭᠦᠳᠡ ᠳᠠᠮᠵᠢᠯᠠ᠃ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠤᠷᠢᠳᠠᠬᠢ ᠶᠡᠬᠡ ᠬᠠᠭᠠᠨ ᠳ᠋ᠤ᠌ ᠰᠢᠳᠠᠷᠯᠠᠵᠤ ᠪᠠᠢᠭᠰᠠᠨ᠂ ᠲᠡᠭᠦᠨ ᠦ᠌ ᠣᠢᠷᠠ ᠳᠣᠲᠣᠨᠣ ᠶ᠋ᠢᠨ ᠬᠥᠮᠦᠰ ᠵᠣᠩᠬᠢᠯᠠᠵᠤ ᠪᠠᠢᠭᠠ ᠤᠴᠢᠷ ᠲᠡᠳᠡ ᠦᠨᠡᠨ ᠬᠦ᠌ ᠰᠡᠳᠬᠢᠯ ᠡᠴᠡ ᠪᠡᠨ ᠬᠤᠪᠢᠯᠠᠢ ᠳ᠋ᠤ᠌ ᠳᠤᠷᠠ ᠦᠭᠡᠢ᠂ ᠲᠡᠭᠦᠨ ᠦ᠌ ᠢᠷᠡᠭᠦᠯᠦᠭᠰᠡᠨ ᠪᠢᠴᠢᠭ ᠢ᠋ ᠰᠦᠢᠲᠦ ᠨᠣᠶᠠᠨ ᠪᠣᠰᠴᠤ ᠠᠢᠯᠠᠳᠬᠠᠯ ᠬᠢᠬᠦ ᠵᠥᠪᠰᠢᠶᠡᠷᠡᠯ ᠭᠤᠶᠤᠨ ᠪᠥᠬᠥᠢᠵᠦ ᠶᠣᠰᠣ ᠬᠢᠭᠡᠳ᠄
— ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ ᠬᠠᠭᠠᠨᠲᠠᠨ ᠮᠢᠨᠢ! ᠲᠠᠨ ᠤ᠋ ᠠᠬᠠ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠪᠣᠯ ᠲᠦᠮᠡᠨ ᠳ᠋ᠦ᠍ ᠨᠢᠭᠤᠷ ᠮᠠᠭᠤᠲᠠᠢ ᠨᠣᠶᠠᠨ᠃ ᠨᠠᠮᠠᠶ᠋ᠢ ᠰᠠᠶᠢ ᠳᠤᠮᠳᠠᠳᠤ ᠪᠠ ᠪᠠᠷᠠᠭᠤᠨ ᠭᠠᠵᠠᠷ᠂ ᠣᠷᠣᠰ ᠨᠤᠲᠤᠭ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠬᠤᠪᠢᠯᠠᠢ ᠳ᠋ᠤ᠌ ᠲᠠᠯᠠ ᠥᠭᠴᠦ ᠪᠠᠢᠭᠠ᠂ ᠲᠡᠭᠦᠨ ᠢ᠋ ᠢᠳᠡᠭᠡᠨ ᠲᠠᠯᠠᠷᠬᠠᠵᠤ ᠪᠠᠢᠭᠠ ᠨᠣᠶᠠᠨ ᠨᠢᠭᠡ ᠴᠦ᠍ ᠪᠠᠢᠭᠠ ᠦᠭᠡᠢ᠃ ᠭᠠᠭᠴᠠᠬᠠᠨ ᠫᠧᠷᠰ ᠦ᠋ᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠪᠠᠢᠭᠠ ᠵᠠᠷᠢᠮ ᠮᠣᠩᠭᠣᠯ ᠨᠣᠶᠠᠨ《ᠠᠬᠠ ᠳᠡᠭᠦᠦ ᠬᠥᠮᠦᠰ ᠦ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠣᠯᠴᠠᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠪᠠᠢᠨᠠ᠃ ᠲᠡᠳᠡ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠭᠠᠳ ᠨᠢᠭᠡ ᠶ᠋ᠢ ᠪᠡᠨ ᠣᠷᠣ ᠰᠠᠭᠤᠯᠭᠠᠬᠤ ᠪᠠᠷ ᠡᠷᠭᠦᠮᠵᠢᠯᠡᠪᠡᠯ ᠰᠠᠢᠬᠠᠨ ᠪᠣᠯᠬᠤ ᠪᠢᠯᠡ ᠭᠡᠵᠦ ᠪᠢᠳᠡ ᠵᠠᠯᠪᠠᠷᠢᠨᠠ᠃ ᠤᠭ ᠬᠡᠷᠡᠭ ᠳᠠᠭᠠᠭᠠᠮᠵᠢᠷᠠᠪᠠᠯ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠳᠡᠭᠡᠳᠦ ᠠᠯᠲᠠᠨ ᠤᠷᠤᠭ ᠤ᠋ᠨ ᠳᠣᠲᠣᠷᠠ ᠦᠢᠮᠡᠭᠡᠨ ᠪᠣᠯᠤᠨᠠ ᠪᠠᠢᠬᠤ ᠰᠢᠦ᠃ ᠲᠡᠭᠡᠪᠡᠯ ᠤᠯᠤᠰ ᠭᠦᠷᠦᠨ ᠰᠠᠷᠨᠢᠵᠤ ᠰᠤᠯᠠᠷᠠᠬᠤ ᠳ᠋ᠤ᠌ ᠬᠦᠷᠦᠨᠡ》 ᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ᠃ ᠲᠡᠷᠡ ᠪᠣᠯ ᠣᠷᠣ ᠲᠠᠢ ᠦᠭᠡ᠃ ᠬᠤᠪᠢᠯᠠᠢ ᠶᠠᠭᠠᠬᠢᠭᠠᠳ ᠲᠡᠢᠨ ᠬᠦ᠌ ᠣᠯᠠᠨ ᠳ᠋ᠤ᠌ ᠨᠢᠭᠤᠷ ᠮᠠᠭᠤᠲᠠᠢ ᠪᠣᠯᠤᠭᠰᠠᠨ ᠬᠡᠷᠡᠭ ᠪᠣᠢ? ᠭᠡᠪᠡᠯ᠂ ᠲᠡᠭᠦᠨ ᠦ᠌ ᠥᠪᠡᠷ ᠢ᠋ ᠪᠡᠨ ᠶᠡᠬᠡᠳᠡ ᠲᠥᠪᠥᠢᠯᠭᠡᠨ ᠪᠣᠳᠣᠭᠰᠠᠨ᠂ ᠬᠢᠲᠠᠳ ᠦᠵᠡᠯ ᠢ᠋ ᠬᠡᠳᠦ ᠪᠠᠷᠢᠮᠲᠠᠯᠠᠬᠤ ᠪᠣᠯᠤᠭᠰᠠᠨ ᠲᠠᠢ ᠬᠣᠯᠪᠣᠭᠠ ᠲᠠᠢ ᠪᠣᠯᠪᠠ ᠤᠤ᠃ ᠪᠣᠭᠣᠯ ᠨᠢ ᠢᠩᠭᠢᠵᠦ ᠮᠤᠩᠬᠠᠭᠯᠠᠵᠤ ᠪᠠᠢᠨᠠ᠃ ᠲᠦᠮᠡᠨ ᠣᠯᠠᠨ ᠴᠤ᠌ ᠬᠥᠮᠦᠨ ᠢ᠋ ᠲᠠᠨᠢᠵᠤ ᠮᠡᠳᠡᠬᠦ ᠳ᠋ᠦ᠍ ᠪᠡᠨ ᠭᠠᠷᠭᠠᠭᠤᠳ ᠪᠠᠢᠳᠠᠭ᠁ ᠭᠡᠵᠦ ᠬᠡᠯᠡᠯᠡ᠃ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠪᠣᠯᠤᠭᠰᠠᠨ ᠠᠭᠤᠯᠵᠠᠯᠲᠠ ᠡᠭᠦᠨ ᠢ᠋ᠶ᠋ᠡᠷ ᠳᠠᠭᠤᠰᠤᠭᠰᠠᠨ ᠦᠭᠡᠢ᠂ ᠪᠦᠬᠦ ᠬᠥᠮᠦᠨ ᠬᠤᠪᠢᠯᠠᠢ ᠶ᠋ᠢᠨ ᠪᠢᠴᠢᠭ ᠢ᠋ ᠪᠤᠷᠤᠭᠤᠰᠢᠶᠠᠨ᠂《ᠲᠡᠭᠦᠨ ᠦ᠌ ᠵᠣᠷᠢᠵᠤ ᠪᠠᠢᠭᠠ ᠶᠣᠰᠣᠭᠠᠷ ᠬᠡᠷᠡᠭ ᠶᠠᠪᠤᠳᠠᠯ〈ᠭᠠᠩ ᠢᠯᠳᠦᠨ ᠦ᠌ ᠦᠵᠦᠭᠦᠷ ᠢ᠋ᠶ᠋ᠡᠷ ᠰᠢᠢᠳᠦᠭᠳᠡᠬᠦ ᠨᠢ〉 ᠭᠡᠮᠡᠨ ᠦᠵᠡᠭᠡᠳ᠂ ᠬᠤᠪᠢᠯᠠᠢ ᠶ᠋ᠢ ᠶᠡᠬᠡ ᠬᠠᠭᠠᠨ ᠭᠡᠵᠦ ᠬᠡᠷᠬᠢᠪᠡᠴᠦ ᠦᠵᠡᠬᠦ ᠦᠭᠡᠢ᠂ ᠲᠡᠷᠡ ᠪᠡᠷ ᠥᠪᠡᠷ ᠢ᠋ ᠪᠡᠨ〈ᠬᠠᠭᠠᠨ〉 ᠭᠡᠵᠦ ᠮᠢᠩᠭᠠ ᠲᠦᠮᠡ ᠬᠠᠰᠬᠢᠷᠤᠯᠠ ᠴᠤ᠌ ᠭᠡᠰᠡᠨ ᠦᠨᠡᠨ ᠳ᠋ᠦ᠍ ᠬᠦᠷᠬᠦ ᠦᠭᠡᠢ᠃ ᠪᠢᠳᠡ ᠣᠳᠣ ᠶᠠᠭᠠᠷᠠᠯᠲᠠᠢ ᠪᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠵᠢᠱ᠌ᠢᠬᠦ ᠶᠣᠰᠣ ᠲᠠᠢ ᠪᠣᠯᠵᠠᠢ》 ᠭᠡᠮᠡᠨ ᠶᠠᠷᠢᠯᠴᠠᠭᠰᠠᠨ ᠠᠵᠢ᠃
ᠡᠨᠡ ᠦᠶᠡ ᠳ᠋ᠦ᠍ ᠱᠠᠩᠳᠤ ᠬᠣᠲᠠ ᠠ᠋ᠴᠠ ᠪᠠᠰᠠ ᠨᠢᠭᠡ ᠴᠢᠮᠡᠭᠡ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠢᠷᠡᠵᠡᠢ᠃ ᠬᠣᠮᠢᠨᠢ ᠬᠦᠯᠦᠭ ᠦ᠋ᠨ ᠠᠪᠠᠯᠢ ᠭᠡᠷᠭᠡᠢ ᠬᠤᠰᠢᠮᠤᠭᠲᠥ ᠶ᠋ᠢ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠬᠦᠦ ᠶ᠋ᠢᠨ ᠬᠢᠨᠢ ᠬᠠᠮᠲᠤ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠶᠠᠪᠤᠭᠤᠯᠵᠠᠢ᠃ ᠫᠧᠷᠰ ᠬᠤᠳᠠᠯᠳᠤᠭᠠᠴᠢᠨ ᠬᠣᠶᠠᠷ ᠰᠠᠢᠬᠠᠨ ᠲᠡᠮᠡᠭᠡ᠂ ᠨᠢᠭᠡ ᠮᠣᠷᠢ ᠬᠤᠳᠠᠯᠳᠤᠨ ᠠᠪᠤᠭᠠᠳ ᠬᠣᠰᠢᠮᠤᠭᠳᠤ ᠬᠦᠦ ᠬᠣᠶᠠᠷ ᠢ᠋ ᠵᠢᠵᠢᠭ ᠭᠡᠷ ᠢ᠋ ᠨᠢ ᠬᠠᠮᠲᠤ ᠠᠴᠢᠭᠤᠯᠤᠨ᠂ ᠮᠣᠷᠢᠨ ᠳ᠋ᠤ᠌ ᠰᠤᠨᠳᠠᠯᠠᠭᠤᠯᠤᠭᠠᠳ ᠶᠡᠬᠡ ᠵᠠᠮ ᠤ᠋ᠨ ᠬᠠᠵᠠᠭᠤ ᠪᠠᠷ ᠨᠤᠲᠤᠭ ᠰᠠᠯᠵᠤ ᠶᠠᠪᠤᠭᠠ ᠠᠢᠯ ᠤ᠋ᠨ ᠮᠠᠶᠢᠭᠲᠠᠢ ᠪᠠᠷ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠤ᠌᠂ ᠲᠡᠷᠡ ᠬᠣᠶᠠᠷ ᠵᠤᠨ ᠤ᠋ ᠳᠤᠯᠠᠭᠠᠨ ᠴᠠᠭ ᠪᠣᠯᠬᠣᠷ ᠬᠡᠭᠡᠷᠡ ᠪᠡᠷ ᠭᠡᠷ ᠬᠢᠵᠦ ᠠᠷᠪᠠ ᠭᠠᠷᠤᠢ ᠬᠣᠨᠣᠭ ᠰᠠᠵᠢᠯᠠᠭᠰᠠᠭᠠᠷ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠢᠷᠡᠵᠦ ᠴᠢᠳᠠᠭᠰᠠᠨ ᠪᠠᠢᠨᠠ᠃ ᠬᠤᠰᠢᠮᠤᠭᠲᠤ ᠡᠷᠡᠳᠡᠭᠦᠦ ᠪᠠᠢᠳᠠᠯᠲᠠᠢ᠂ ᠰᠡᠷᠭᠦᠯᠡᠩ ᠬᠡᠦᠬᠡᠨ ᠪᠣᠯᠬᠣᠷ ᠢ᠋ᠶ᠋ᠠᠨ《ᠲᠠᠮᠤ ᠶ᠋ᠢᠨ ᠣᠷᠣᠨ》 ᠠ᠋ᠴᠠ ᠭᠠᠭᠴᠠ ᠬᠦᠦ ᠪᠡᠨ ᠵᠠᠢᠯᠠᠭᠤᠯᠵᠤ ᠠᠮᠵᠢᠭᠰᠠᠨ ᠨᠢ ᠡᠨᠡ ᠪᠢᠯᠡ᠃
ᠬᠦᠯᠦᠭ ᠱᠠᠩᠳᠤ ᠳ᠋ᠤ᠌ ᠡᠯᠵᠢᠭᠡ ᠬᠠᠷᠢᠭᠤᠯᠬᠤ ᠢᠯᠳᠠᠮ ᠳ᠋ᠤ᠌ ᠪᠠᠨ ᠬᠣᠲᠠ ᠶ᠋ᠢᠨ ᠪᠠᠢᠳᠠᠯ᠂ ᠬᠥᠮᠦᠨ ᠣᠯᠠᠨ ᠤ᠋ ᠬᠥᠳᠡᠯᠭᠡᠭᠡᠨ᠂ ᠬᠤᠪᠢᠯᠠᠢ ᠶ᠋ᠢᠨ ᠣᠷᠳᠣᠨ ᠬᠠᠪᠢ ᠪᠠᠷ ᠪᠣᠯᠵᠤ ᠪᠣᠢ ᠶᠠᠪᠤᠳᠠᠯ ᠤ᠋ᠳ ᠢ᠋ ᠲᠠᠰᠤᠷᠠᠯᠲᠠ ᠦᠭᠡᠢ ᠠᠵᠢᠭᠯᠠᠨ ᠪᠠᠢᠭᠠᠳ᠂ ᠲᠡᠷᠡ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠨᠢᠮᠭᠡᠨ ᠮᠣᠣᠲᠤᠤ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠢᠴᠢᠭᠡᠳ᠂ ᠤᠷᠠᠩᠬᠠᠢ ᠭᠤᠲᠤᠯ ᠤ᠋ᠨ ᠣᠯᠠᠨ ᠤ᠋ ᠵᠠᠪᠰᠠᠷ ᠬᠢᠵᠦ ᠠᠴᠢᠶᠠᠨ ᠳ᠋ᠤ᠌ ᠣᠷᠣᠭᠤᠯᠤᠨ ᠶᠠᠪᠤᠭᠤᠯᠤᠭᠰᠠᠨ ᠪᠠᠢᠵᠠᠢ᠃ ᠬᠣᠰᠢᠮᠤᠭᠲᠤ ᠬᠡᠦᠬᠡᠨ ᠴᠦ᠍ ᠲᠡᠷᠡ ᠪᠢᠴᠢᠭ ᠢ᠋ ᠯᠠᠪᠲᠠᠢ ᠬᠦᠷᠭᠡᠵᠦ ᠴᠢᠳᠠᠨᠠ ᠭᠡᠵᠦ ᠵᠣᠷᠢᠭᠯᠠᠨ ᠠᠪᠴᠤ ᠶᠠᠪᠤᠭᠰᠠᠨ ᠲᠡᠳᠦᠢ ᠦᠭᠡᠢ ᠲᠡᠭᠦᠨ ᠳ᠋ᠦ᠍ ᠪᠢᠴᠢᠭᠳᠡᠭᠰᠡᠨ ᠵᠦᠢᠯ ᠢ᠋ ᠴᠡᠭᠡᠵᠢ ᠪᠡᠷ ᠮᠡᠳᠡᠵᠦ ᠪᠠᠢᠯᠠ᠃
ᠥᠭᠦᠯᠡᠭᠰᠡᠨ ᠨᠢ᠄ ᠁ ᠰᠡᠭᠦᠯ ᠦ᠋ᠨ ᠡᠳᠦᠷ ᠦ᠋ᠳ ᠲᠦ᠍ ᠱᠠᠩᠳᠤ ᠬᠠᠪᠢ ᠪᠠᠷ ᠬᠥᠯ ᠬᠥᠰᠬᠡ ᠶᠡᠬᠡ ᠪᠣᠯᠤᠯᠠ᠃ ᠪᠢ ᠲᠡᠷᠡ ᠪᠦᠬᠦᠨ ᠢ᠋ ᠠᠵᠢᠵᠤ ᠪᠠᠢᠨᠠ᠃ ᠶᠠᠯᠠ ᠡᠳ᠋ᠯᠡᠭᠰᠡᠨ ᠪᠣᠭᠣᠯ ᠨᠠᠮᠠᠶ᠋ᠢ ᠡᠯᠵᠢᠭᠡ ᠬᠠᠷᠢᠭᠤᠯᠤᠭᠠᠳ ᠰᠠᠯᠮᠠᠷᠠᠨ ᠶᠠᠪᠤᠬᠤ ᠳ᠋ᠤ᠌ ᠬᠡᠨ ᠲᠣᠭᠣᠵᠤ ᠦᠵᠡᠬᠦ ᠪᠣᠢ᠃ ᠭᠡᠮ ᠨᠢ ᠶᠡᠬᠡᠰ ᠨᠣᠶᠠᠳ ᠲᠤ ᠣᠢᠷᠠᠳᠬᠤ ᠠᠷᠭᠠ ᠦᠭᠡᠢ ᠪᠠᠢᠨᠠ᠃ ᠪᠣᠭᠣᠯ ᠤ᠋ᠨ ᠦᠵᠡᠭᠰᠡᠨ ᠵᠦᠢᠯ ᠭᠡᠪᠡᠯ ᠤᠷᠢᠶᠠᠩᠬᠠᠢᠳᠠᠢ᠂ ᠴᠠᠭᠠᠨ᠂ ᠬᠠᠳᠠᠨ᠂ ᠲᠣᠭᠣᠭᠠᠨ ᠵᠠᠩᠵᠤᠨ ᠨᠠᠷ ᠴᠡᠷᠢᠭ ᠡᠷᠡ ᠶ᠋ᠢᠨ ᠬᠤᠪᠴᠠᠰᠤ ᠲᠠᠢ᠂ ᠪᠠᠷᠳᠠᠮ ᠪᠠᠢᠳᠠᠯᠲᠠᠢ᠂ ᠣᠷᠳᠣᠨ ᠳ᠋ᠤ᠌ ᠣᠷᠣᠨ ᠭᠠᠷᠤᠨ ᠶᠠᠪᠤᠳᠠᠭ ᠪᠣᠯᠤᠭᠰᠠᠨ᠃ ᠲᠡᠳᠡ ᠭᠠᠵᠠᠷ ᠪᠦᠷᠢ ᠳ᠋ᠦ᠍ ᠬᠣᠰᠢᠭᠤ ᠬᠣᠯᠪᠣᠨ ᠶᠠᠷᠢᠯᠴᠠᠵᠤ ᠪᠣᠢ ᠶᠠᠩᠵᠤᠲᠠᠢ ᠬᠠᠷᠠᠭᠳᠠᠳᠠᠭ ᠪᠢᠯᠡ᠃ ᠪᠣᠭᠣᠯ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠪᠠᠶᠠᠨ ᠵᠠᠩᠵᠤᠨ ᠦᠵᠡᠭᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠪᠣᠳᠣᠪᠠᠯ ᠲᠡᠷᠡ ᠬᠥᠮᠦᠨ ᠱᠠᠩᠳᠤ ᠳ᠋ᠤ᠌ ᠪᠠᠢᠬᠤ ᠦᠭᠡᠢ ᠪᠣᠯᠤᠯᠲᠠᠢ᠃ ᠬᠤᠪᠢᠯᠠᠢ ᠬᠡᠵᠢᠶᠡᠨ ᠦ᠌ ᠪᠠᠶᠠᠨ ᠠ᠋ᠴᠠ ᠳᠠᠯᠳᠢᠷᠠᠳᠠᠭ ᠪᠣᠯᠬᠣᠷ ᠢ᠋ᠶ᠋ᠠᠨ ᠲᠡᠭᠦᠨ ᠡᠴᠡ ᠬᠣᠯᠠᠬᠠᠨ ᠪᠠᠢᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠪᠢᠵᠡ᠃ ᠬᠣᠲᠠ ᠶ᠋ᠢᠨ ᠣᠢᠷᠠᠯᠴᠠᠭᠠ ᠪᠠᠷ ᠡᠴᠡᠨᠭᠡᠢᠳᠡᠬᠦᠦ ᠤᠨᠤᠭᠠ ᠤᠨᠤᠭᠰᠠᠨ ᠴᠡᠷᠢᠭ ᠣᠯᠠᠨ ᠦᠵᠡᠭᠳᠡᠬᠦ ᠪᠣᠯᠤᠯᠠ᠃ ᠡᠨᠡ ᠨᠢ ᠡᠮᠦᠨᠡ ᠵᠦᠭ ᠰᠥᠩ ᠦ᠋ᠨ ᠬᠠᠭᠠᠨ ᠲᠠᠢ ᠪᠠᠢᠯᠳᠤᠵᠤ ᠶᠠᠪᠤᠭᠠ ᠴᠡᠷᠢᠭ ᠦ᠋ᠳ ᠪᠢᠵᠡ᠃ ᠬᠤᠪᠢᠯᠠᠢ ᠰᠥᠩ ᠦ᠋ᠨ ᠴᠡᠷᠢᠭ ᠲᠡᠢ ᠪᠠᠢᠯᠳᠤᠵᠤ ᠶᠠᠪᠤᠭᠠ ᠴᠡᠷᠢᠭ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠨᠠᠭᠠᠰᠢ ᠨᠢ ᠲᠠᠲᠠᠵᠤ ᠪᠠᠢᠭᠠ ᠶ᠋ᠢ ᠪᠣᠳᠣᠪᠠᠯ ᠡᠨᠳᠡ ᠬᠦᠴᠦ ᠪᠥᠭᠡᠮᠨᠡᠷᠡᠭᠦᠯᠵᠦ ᠪᠣᠢ ᠨᠢ ᠢᠯᠡ ᠪᠣᠯᠵᠤ ᠪᠠᠢᠨᠠ᠃ ᠶᠡᠷᠦ ᠨᠢ ᠱᠠᠩᠳᠤ ᠳ᠋ᠤ᠌ ᠪᠠᠢᠳᠠᠭ ᠴᠡᠷᠢᠭ ᠦ᠋ᠨ ᠲᠣᠭᠠ ᠣᠢᠷᠠ ᠠ᠋ᠴᠠ ᠦᠯᠡᠮᠵᠢ ᠨᠡᠮᠡᠭᠳᠡᠭᠰᠡᠨ ᠶᠠᠩᠵᠤᠲᠠᠢ ᠬᠠᠷᠠᠭᠳᠠᠳᠠᠭ᠃ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠶᠡᠬᠡ ᠪᠠᠭᠠ ᠳᠠᠭᠠᠭᠠᠮᠠᠯ ᠣᠯᠠᠨ ᠦᠵᠡᠭᠳᠡᠬᠦ ᠪᠣᠯᠤᠭᠰᠠᠨ᠃ ᠡᠮᠦᠨᠡ ᠵᠦᠭ ᠡᠴᠡ ᠬᠤᠯᠤᠰᠤᠨ ᠨᠤᠮᠤ ᠰᠤᠮᠤ ᠣᠪᠣᠭᠠᠯᠠᠨ ᠠᠴᠢᠭᠰᠠᠨ ᠲᠡᠷᠭᠡ ᠨᠦ᠍ᠭᠦᠳ ᠴᠦ᠍ ᠱᠠᠩᠳᠤ ᠳ᠋ᠤ᠌ ᠢᠷᠡᠵᠦ ᠪᠠᠢᠨᠠ᠃ ᠴᠡᠷᠢᠭ ᠦ᠋ᠨ ᠬᠣᠭᠣᠯᠠ ᠬᠦᠨᠡᠰᠦᠨ ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ᠪᠣᠯᠤᠯᠲᠠᠢ ᠦᠬᠡᠷ᠂ ᠬᠣᠨᠢ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠣᠲᠠ ᠬᠠᠪᠢ ᠶ᠋ᠢᠨ ᠪᠡᠯᠴᠢᠭᠡᠷ ᠲᠦ᠍ ᠲᠠᠭᠤᠭᠳᠠᠨ ᠢᠷᠡᠵᠦ᠂ ᠲᠠᠷᠭᠤ ᠳᠡᠪᠡᠭᠡᠷ ᠠᠪᠬᠠᠭᠤᠯᠬᠤ ᠭᠡᠰᠡᠨ ᠶᠠᠩᠵᠤ ᠪᠠᠷ ᠪᠠᠢᠬᠤ ᠪᠣᠯᠤᠯᠠ᠃ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠬᠤ ᠳ᠋ᠤ᠌ ᠮᠠᠨ ᠤ᠋ ᠮᠣᠩᠭᠣᠯ ᠴᠡᠷᠢᠭ ᠵᠥᠪᠬᠡᠨ ᠡᠮᠦᠨᠡ ᠵᠦᠭ ᠲᠦ᠍ ᠪᠢᠰᠢ᠂ ᠪᠠᠰᠠ ᠬᠣᠢᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠯᠳᠤᠬᠤ ᠭᠡᠳ ᠪᠠᠢᠭᠠ ᠰᠢᠨᠵᠢ ᠪᠦᠷᠢᠨ ᠢᠯᠡᠷᠬᠡᠢ ᠪᠣᠯᠪᠠ᠃ ᠭᠠᠭᠴᠠ ᠮᠣᠩᠭᠣᠯ ᠪᠢᠰᠢ᠂ ᠬᠢᠲᠠᠳ ᠴᠡᠷᠢᠭ ᠲᠡᠷᠡ ᠲᠡᠢᠨ ᠳ᠋ᠦ᠍ ᠣᠷᠣᠯᠴᠠᠬᠤ ᠶᠠᠩᠵᠤ ᠠᠵᠢᠭᠯᠠᠭᠳᠠᠵᠤ ᠪᠠᠢᠨᠠ᠃ ᠲᠡᠳᠡ ᠡᠮᠦᠨᠡ ᠣᠷᠣᠨ ᠳ᠋ᠤ᠌ ᠰᠥᠩ ᠦ᠋ᠨ ᠴᠡᠷᠢᠭ ᠲᠡᠢ ᠳᠣᠯᠣᠭᠠᠨ ᠬᠢᠵᠦ ᠶᠠᠪᠤᠭᠰᠠᠨ ᠴᠡᠷᠢᠭ ᠪᠠᠢᠬᠤ ᠠ᠋ᠴᠠ ᠵᠠᠢᠯᠠᠯᠠ ᠭᠡᠵᠢ ᠤᠤ ᠭᠡᠵᠡᠢ᠃
ᠬᠡᠳᠦ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠬᠤᠪᠢᠯᠠᠢ ᠪᠠᠶᠠᠨ ᠢ᠋ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠠᠷᠭᠠᠳᠠᠩᠭᠤᠢ ᠪᠠᠷ ᠤᠭᠲᠤᠨ ᠠᠪᠴᠤ ᠠᠭᠤᠯᠵᠠᠭᠠᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠳᠣᠯ ᠰᠠᠨᠠᠭᠠ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠨᠢ ᠲᠡᠷᠡ ᠵᠠᠩᠵᠤᠨ᠄《᠁ ᠪᠢ ᠠᠬᠠᠨ ᠳᠡᠭᠦᠦᠰ ᠶᠡᠬᠡ ᠳᠡᠭᠡᠳᠦᠰ ᠦ᠋ᠳ ᠦ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠬᠡᠷᠡᠭ ᠲᠦ᠍ ᠭᠠᠷ ᠳᠥᠷᠦᠯᠴᠡᠨ ᠶᠠᠪᠤᠬᠤ ᠪᠣᠳᠣᠯ ᠦᠭᠡᠢ ᠶᠠᠪᠤᠳᠠᠭ ᠰᠢᠦ》 ᠭᠡᠮᠡᠨ ᠰᠢᠭᠤᠳᠬᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠤᠪᠢᠯᠠᠢ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠬᠡᠳᠦ ᠳᠠᠬᠢᠨ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠲᠤᠩᠭᠠᠭᠠᠳ《ᠴᠢᠮᠠᠶ᠋ᠢ ᠪᠢ ᠡᠮᠦᠨᠡᠲᠦ ᠬᠢᠲᠠᠳ ᠤ᠋ᠨ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠤᠷ ᠲᠤ ᠬᠠᠳᠠᠨ᠂ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠳᠤᠯᠠᠭᠠᠴᠠᠭᠤᠯᠵᠤ ᠳᠥᠩᠭᠡᠬᠦ ᠰᠢᠦ ᠪᠢᠵᠡ᠃ ᠮᠣᠩᠭᠣᠯ ᠠᠢᠷᠠᠭ ᠵᠠᠯᠭᠢᠯᠠᠬᠤ ᠳᠤᠷᠠ ᠦᠭᠡᠢ ᠪᠠᠢᠭᠠ ᠪᠣᠯ ᠲᠡᠨᠳᠡ ᠣᠴᠢᠭᠠᠳ ᠳᠠᠯᠠᠢ ᠶ᠋ᠢᠨ ᠮᠥᠭᠥ ᠢᠳᠡᠭᠡᠳ ᠰᠠᠭᠤᠵᠤ ᠪᠠᠢ》 ᠭᠡᠮᠡᠨ ᠪᠣᠳᠣᠭᠠᠳ
— ᠴᠢ ᠲᠤᠩ ᠳᠠᠷᠤᠢ ᠬᠥᠬᠡ ᠮᠥᠷᠡᠨ ᠦ᠌ ᠳᠤᠮᠳᠠ ᠤᠷᠤᠰᠬᠠᠯ ᠤᠷᠤᠭᠤ ᠶᠠᠪᠤ ᠳᠠ᠃ ᠮᠣᠩᠭᠣᠯ ᠤ᠋ᠨ ᠬᠣᠶᠠᠷ ᠵᠠᠭᠤᠲᠤ᠂ ᠨᠢᠭᠡ ᠮᠢᠩᠭᠠᠲᠤ ᠬᠢᠲᠠᠳ ᠴᠡᠷᠢᠭ ᠦ᠋ᠨ ᠬᠦᠴᠦ ᠪᠡᠷ ᠬᠠᠮᠤᠭ ᠶᠠᠭᠤᠮᠠᠨ ᠤ᠋ ᠡᠭᠦᠳᠡ ᠬᠠᠭᠠᠯᠭᠠ ᠪᠣᠯᠵᠤ ᠪᠣᠢ ᠡᠵᠸᠦ ᠬᠣᠲᠠ ᠶ᠋ᠢ ᠡᠵᠡᠯᠡᠵᠦ ᠠᠪ! ᠬᠣᠶᠠᠷ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠰᠢᠦ᠃ ᠡᠰᠡᠷᠭᠦᠴᠡᠭᠡᠳ ᠪᠣᠯᠬᠤ ᠦᠭᠡᠢ ᠪᠣᠯ ᠲᠡᠷᠡ ᠬᠣᠲᠠ ᠶ᠋ᠢ ᠭᠠᠵᠠᠷ ᠲᠠᠢ ᠨᠢ ᠲᠡᠭᠰᠢᠯᠡᠵᠦ ᠣᠷᠬᠢᠬᠤ ᠪᠢᠵᠡ! ᠭᠡᠮᠡᠨ ᠲᠤᠰᠢᠶᠠᠨ ᠶᠠᠪᠤᠭᠤᠯᠤᠭᠰᠠᠨ ᠠᠵᠢ᠃ ᠡᠭᠦᠨ ᠢ᠋ ᠬᠦᠯᠦᠭ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃
ᠤᠭ ᠵᠠᠬᠢᠶᠠ ᠪᠢᠴᠢᠭ ᠢ᠋ ᠬᠣᠰᠢᠮᠤᠭᠲᠤ ᠠ᠋ᠴᠠ ᠪᠢᠯᠢᠭᠦᠨ ᠠᠪᠤᠭᠠᠳ ᠶᠠᠭᠠᠬᠢᠵᠤ ᠠᠷᠢᠬᠪᠥ᠋ᠬᠡ ᠶ᠋ᠢᠨ ᠭᠠᠷ ᠲᠤ ᠠᠳᠬᠤᠭᠤᠯᠬᠤ ᠪᠣᠢ ᠭᠡᠮᠡᠨ ᠪᠣᠳᠣᠨ ᠣᠷᠳᠣᠨ ᠬᠠᠪᠢ ᠪᠠᠷ ᠡᠷᠭᠢᠯᠳᠦᠵᠦ ᠪᠠᠢᠲᠠᠯᠠ ᠰᠢᠩᠬᠤ ᠠᠭᠤᠯᠠᠨ ᠳ᠋ᠤ᠌ ᠣᠴᠢᠵᠤ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠡᠷᠭᠢᠭᠡᠳ ᠢᠷᠡᠭᠰᠡᠨ ᠬᠠᠭᠠᠨ ᠣᠯᠠᠨ ᠳᠠᠭᠠᠭᠤᠯ ᠤ᠋ᠨ ᠬᠠᠮᠲᠤ ᠳᠠᠪᠬᠢᠭᠠᠳ ᠢᠷᠡᠵᠡᠢ᠂ ᠪᠢᠯᠢᠭᠦᠨ ᠠᠷᠢᠬᠪᠥ᠋ᠬᠡ ᠲᠡᠢ ᠤᠴᠠᠷᠠᠨ ᠠᠮᠤᠭᠤᠯᠠᠩ ᠢ᠋ ᠡᠷᠢᠭᠰᠡᠨ ᠳᠠᠷᠤᠢ ᠳ᠋ᠤ᠌ ᠨᠢᠭᠡ ᠵᠠᠬᠢᠶᠠ ᠱᠠᠩᠳᠤ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠢ᠋ᠶ᠋ᠠᠨ ᠠᠢᠯᠠᠳᠬᠠᠪᠠ᠃ ᠬᠠᠭᠠᠨ ᠠᠢᠯᠠᠳᠬᠠᠯ ᠢ᠋ ᠠᠩᠬᠠᠷᠴᠤ ᠰᠣᠨᠣᠰᠤᠭᠠᠳ ᠪᠣᠳᠣᠯᠬᠢᠯᠠᠭᠰᠠᠨ ᠢ᠋ᠶ᠋ᠠᠨ ᠪᠢᠯᠢᠭᠦᠨ ᠳ᠋ᠦ᠍ ᠬᠠᠨᠳᠤᠨ᠄
— ᠲᠡᠷᠡ ᠵᠠᠬᠢᠶᠠ ᠶ᠋ᠢ ᠤᠩᠰᠢᠵᠤ ᠦᠵᠡᠭᠰᠡᠨ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃
— ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ ᠬᠠᠭᠠᠨᠲᠠᠨ ᠮᠢᠨᠢ! ᠣᠨᠴᠠᠭᠠᠢ ᠴᠢᠬᠤᠯᠠ ᠭᠡᠬᠦ ᠤᠤ᠂ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠣᠳᠣ ᠶ᠋ᠢᠨ ᠪᠠᠢᠳᠠᠯ ᠢ᠋ ᠲᠡᠭᠦᠨ ᠳ᠋ᠦ᠍ ᠪᠢᠴᠢᠭᠰᠡᠨ ᠪᠠᠢᠨᠠ᠃ ᠤᠭ ᠵᠠᠬᠢᠳᠠᠯ ᠵᠠᠳᠠᠭᠠᠢ ᠢᠷᠡᠬᠦ ᠶ᠋ᠢᠨ ᠤᠴᠢᠷ ᠠᠬᠠ ᠨᠢ ᠳᠡᠭᠦᠦ ᠳ᠋ᠦ᠍ ᠪᠡᠨ ᠰᠤᠷᠭᠠᠮᠵᠢ ᠪᠢᠴᠢᠭᠰᠡᠨ ᠪᠠᠢᠬᠤ ᠭᠡᠵᠦ ᠪᠣᠳᠣᠭᠠᠳ ᠪᠣᠭᠣᠯ ᠨᠢ ᠲᠡᠭᠦᠨ ᠢ᠋ ᠤᠩᠰᠢᠵᠤ ᠦᠵᠡᠭᠰᠡᠨ᠃ ᠮᠠᠨ ᠤ᠋ ᠠᠬᠠ ᠬᠡᠷᠡᠭ ᠲᠦ᠍ ᠰᠡᠵᠢᠭᠯᠡᠭᠳᠡᠨ ᠪᠠᠷᠢᠭᠳᠠᠭᠠᠳ ᠱᠠᠩᠳᠤ ᠳ᠋ᠤ᠌ ᠶᠠᠯᠠᠲᠠᠨ ᠪᠣᠭᠣᠯ ᠤ᠋ᠨ ᠠᠵᠢᠯ ᠬᠢᠵᠦ ᠪᠠᠢᠨᠠ ᠭᠡᠵᠦ ᠪᠢᠯᠢᠭᠦᠨ ᠠᠢᠯᠠᠳᠬᠠᠪᠠ᠃ ᠬᠠᠭᠠᠨ ᠳᠡᠷᠭᠡᠳᠡ ᠪᠡᠨ ᠪᠠᠢᠭᠠ ᠨᠢᠭᠡ ᠪᠠᠷᠠ ᠪᠣᠯᠤᠭᠴᠢ ᠳ᠋ᠤ᠌ ᠪᠠᠨ ᠬᠠᠨᠳᠤᠵᠤ᠄
— ᠴᠢ ᠮᠣᠷᠢ ᠪᠠᠨ ᠡᠨᠡ ᠲᠦᠰᠢᠮᠡᠯ ᠳ᠋ᠦ᠍ ᠥᠭ! ᠪᠢᠯᠢᠭᠦᠨ ᠴᠢ ᠨᠠᠳᠠᠲᠠᠢ ᠬᠠᠮᠲᠤ ᠬᠡᠭᠡᠷᠡ ᠭᠠᠷᠴᠤ ᠲᠡᠷᠡ ᠪᠢᠴᠢᠭ ᠢ᠋ᠶ᠋ᠡᠨ ᠦᠵᠡᠭᠦᠯ ᠭᠡᠵᠦ ᠬᠡᠯᠡᠭᠡᠳ ᠮᠣᠷᠢᠨ ᠳ᠋ᠤ᠌ ᠪᠠᠨ ᠦᠰᠦᠷᠦᠨ ᠮᠣᠷᠳᠠᠯᠠ᠃ ᠪᠢᠯᠢᠭᠦᠨ ᠴᠦ᠍ ᠪᠠᠷᠠ ᠪᠣᠯᠤᠭᠴᠢ ᠶ᠋ᠢᠨ ᠤᠨᠤᠵᠤ ᠶᠠᠪᠤᠭᠰᠠᠨ ᠮᠣᠷᠢ ᠶ᠋ᠢ ᠠᠪᠴᠤ᠂ ᠬᠠᠭᠠᠨ ᠤ᠋ ᠠᠷᠤ ᠠ᠋ᠴᠠ ᠳᠠᠭᠠᠪᠠ᠃ ᠲᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠡᠪᠲᠡᠭᠦᠯ ᠠᠷᠪᠠ ᠭᠠᠷᠤᠢ ᠮᠣᠳᠤᠢ ᠴᠡᠷᠢᠭ(ᠪᠡᠶᠡ ᠬᠠᠮᠠᠭᠠᠯᠠᠭᠴᠢ) ᠳᠠᠭᠠᠯᠳᠤᠨ ᠳᠠᠪᠬᠢᠯᠠ᠃
ᠨᠣᠭᠣᠭᠠᠨ ᠤ᠋ ᠠᠩᠬᠢᠯᠤᠮᠠ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠶᠡᠬᠡ ᠬᠥᠨᠳᠡᠢ ᠳᠤᠮᠳᠠᠭᠤᠷ ᠣᠷᠬᠣᠨ ᠭᠣᠣᠯ ᠢ᠋ ᠤᠷᠤᠭᠤᠳᠠᠭᠠᠳ ᠨᠢᠳᠦᠨ ᠦ᠌ ᠬᠠᠷᠠᠭᠠ ᠰᠢᠯᠭᠠᠬᠤ ᠠᠭᠤᠳᠠᠮ ᠬᠥᠨᠳᠡᠢ ᠳᠤᠮᠳᠠᠭᠤᠷ ᠲᠠᠷᠭᠤᠨ ᠬᠡᠭᠡᠷ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠬᠥᠨᠳᠡᠯᠢᠳᠦᠨ ᠰᠠᠭᠤᠵᠤ ᠶᠠᠪᠤᠭᠠ ᠠᠷᠢᠬᠪᠥ᠋ᠬᠡ ᠬᠠᠭᠠᠨ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠤᠯᠤᠰ ᠤ᠋ᠨ ᠵᠢᠩᠬᠢᠨᠢ ᠡᠵᠡᠨ ᠡᠢᠮᠦ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠮᠡᠷ ᠰᠦᠷᠯᠢᠭ ᠠᠭᠠᠳ ᠵᠣᠯᠪᠣᠭᠠᠯᠢᠭ ᠪᠠᠢᠪᠠ᠃ ᠬᠠᠳᠠᠭ ᠤ᠋ᠨ ᠴᠡᠩᠬᠡᠷ ᠳᠣᠯᠭᠢᠶᠠ ᠭᠡᠭᠡᠳᠡᠭᠦᠯᠦᠨ ᠤᠷᠤᠰᠤᠭᠴᠢ ᠶᠡᠬᠡ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠦ᠌ ᠲᠠᠩᠰᠤᠭ ᠠᠭᠠᠷ ᠳᠤᠮᠳᠠᠭᠤᠷ ᠮᠣᠷᠢᠲᠠᠨ ᠨᠤᠭᠤᠳ ᠰᠢᠭᠤᠳᠬᠠᠨ ᠳᠠᠪᠬᠢᠭᠰᠠᠭᠠᠷ ᠴᠡᠭᠡᠯ ᠦ᠋ᠨ ᠴᠡᠩᠬᠡᠷ ᠡᠷᠭᠢ ᠳᠡᠭᠡᠷᠡ ᠢᠷᠡᠵᠦ ᠬᠦᠯᠦᠭ ᠦ᠋ᠨ ᠵᠢᠯᠣᠭᠣ ᠶ᠋ᠢ ᠲᠠᠲᠠᠯᠠ᠃ ᠬᠠᠭᠠᠨᠲᠠᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ ᠲᠠᠰᠢᠶᠠᠨ ᠳ᠋ᠠᠬᠢ ᠲᠠᠬᠢᠷ ᠢᠯᠳᠦᠨ ᠦ᠌ ᠪᠡᠨ ᠡᠰᠢᠨ ᠡᠴᠡ ᠪᠠᠷᠢᠨ ᠵᠣᠭᠰᠣᠵᠤ᠂ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠪᠠᠨ ᠪᠢᠲᠡᠭᠦᠦ ᠳᠡᠯᠭᠡᠷᠡᠭᠰᠡᠨ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠢ᠋ ᠬᠠᠷᠠᠨ ᠰᠠᠭᠠᠲᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠢᠯᠢᠭᠦᠨ ᠢ᠋ ᠳᠡᠷᠭᠡᠳᠡ ᠪᠡᠨ ᠢᠷᠡᠭᠦᠯᠦᠭᠡᠳ᠄
— ᠬᠠᠶᠠ ᠢᠩᠭᠢᠵᠦ ᠳᠠᠪᠬᠢᠬᠤ ᠰᠠᠢᠬᠠᠨ ᠰᠢᠦ᠃ ᠪᠡᠶᠡ ᠰᠡᠳᠬᠢᠯ ᠰᠡᠷᠡᠭᠡᠳᠡᠭ ᠭᠡᠰᠡᠨ ᠢ᠋ᠶ᠋ᠡᠨ ᠴᠢ ᠶᠠᠭᠤ ᠶᠠᠭᠤ ᠭᠡᠯᠡ ᠭᠡᠨᠡ? ᠭᠡᠮᠡᠨ ᠠᠰᠠᠭᠤᠯᠠ᠃ ᠲᠦᠰᠢᠮᠡᠯ ᠬᠦᠯᠦᠭ ᠠᠬᠠ ᠠ᠋ᠴᠠ ᠪᠠᠨ ᠢᠷᠡᠭᠦᠯᠦᠭᠰᠡᠨ ᠵᠠᠬᠢᠳᠠᠯ ᠢ᠋ ᠳᠡᠯᠭᠡᠵᠦ ᠪᠠᠷᠢᠪᠠᠯ ᠬᠠᠭᠠᠨ ᠲᠡᠭᠦᠨ ᠢ᠋ ᠬᠠᠷᠠᠵᠤ᠄
— ᠴᠢ ᠲᠦᠷᠭᠡᠨ ᠳᠠᠭᠤᠳᠠᠭᠠᠳ ᠣᠷᠭᠢ! ᠭᠡᠯᠡ᠃ ᠲᠡᠷᠡ ᠬᠠᠭᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠵᠣᠭᠰᠣᠨ ᠲᠠᠢᠪᠤᠩ ᠪᠠᠢᠳᠠᠯ ᠢ᠋ᠶ᠋ᠠᠷ ᠤᠭ ᠪᠢᠴᠢᠭ ᠢ᠋ ᠡᠬᠢᠨ ᠡᠴᠡ ᠨᠢ ᠤᠩᠰᠢᠨ ᠰᠣᠨᠣᠰᠬᠠᠯᠠ᠃ ᠠᠷᠢᠬᠪᠥ᠋ᠬᠡ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ᠂ ᠳᠣᠣᠷᠠ ᠪᠠᠨ ᠬᠡᠳᠦ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ ᠤᠭ ᠪᠢᠴᠢᠭ ᠢ᠋ ᠭᠠᠷ ᠲᠤ ᠪᠠᠨ ᠠᠪᠴᠤ ᠦᠵᠡᠭᠡᠳ᠄
— ᠴᠢᠨᠦ ᠠᠬᠠ ᠡᠢᠮᠦ ᠬᠥᠮᠦᠨ ᠶᠦᠮ ᠪᠣᠢ᠃ ᠬᠤᠪᠢᠯᠠᠢ ᠳ᠋ᠤ᠌ ᠪᠠᠷᠢᠭᠳᠠᠭᠠᠳ᠂ ᠲᠡᠭᠦᠨ ᠳ᠋ᠦ᠍ ᠥᠰᠢᠭᠰᠡᠨ ᠳ᠋ᠦ᠍ ᠪᠡᠨ ᠪᠢᠰᠢ᠂ ᠶᠡᠷᠦ ᠨᠢ ᠨᠠᠳᠠᠳᠤ ᠬᠡᠯᠡᠶᠡ ᠭᠡᠰᠡᠨ ᠢ᠋ᠶ᠋ᠡᠨ ᠯᠡ ᠪᠢᠴᠢᠭᠰᠡᠨ ᠪᠣᠯᠤᠯᠲᠠᠢ᠃ ᠪᠢ ᠣᠳᠣᠬᠠᠨ ᠲᠡᠷᠡ ᠬᠥᠮᠦᠨ ᠢ᠋ ᠪᠤᠰᠤᠳ ᠤ᠋ᠨ ᠭᠠᠷ ᠠ᠋ᠴᠠ ᠭᠠᠷᠭᠠᠨ ᠠᠪᠬᠤ ᠤᠴᠢᠷᠲᠠᠢ ᠰᠢᠪ ᠭᠡᠯᠡ᠃ ᠪᠢᠯᠢᠭᠦᠨ ᠪᠥᠬᠥᠢᠵᠦ᠄
— ᠬᠠᠭᠠᠨᠲᠠᠨ ᠮᠢᠨᠢ! ᠬᠦᠯᠦᠭ ᠠᠬᠠ ᠡᠬᠡᠨᠡᠷ ᠲᠦ᠍ ᠪᠡᠨ ᠬᠡᠯᠡᠬᠦ ᠳ᠋ᠦ᠍ ᠪᠡᠨ᠄《ᠪᠢ ᠥᠪᠡᠷ ᠢ᠋ᠶ᠋ᠡᠨ ᠬᠤᠳᠠᠯᠳᠤᠭᠠᠴᠢᠨ ᠬᠣᠮᠢᠨᠢ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠣᠴᠢᠵᠤ ᠳᠥᠩᠭᠡᠬᠦ ᠪᠢᠵᠡ ᠠ᠋᠃ ᠡᠨᠡ ᠪᠢᠴᠢᠭ ᠢ᠋ ᠶᠡᠬᠡ ᠬᠠᠭᠠᠨ ᠤ᠋ ᠰᠣᠨᠣᠷ ᠲᠤ ᠬᠦᠷᠭᠡᠬᠦ ᠶ᠋ᠢ ᠬᠢᠴᠢᠶᠡᠵᠦ ᠦᠵᠡᠭᠡᠷᠡᠢ ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠨᠠ ᠪᠢᠯᠡ᠁》 ᠭᠡᠵᠦ ᠠᠢᠯᠠᠳᠬᠠᠪᠠᠯ ᠬᠠᠭᠠᠨ ᠬᠣᠶᠠᠷ ᠴᠢᠬᠢᠨ ᠦ᠌ ᠪᠡᠨ ᠠᠷᠤ ᠪᠠᠷ ᠣᠷᠢᠶᠠᠵᠤ ᠰᠦᠯᠵᠢᠭᠰᠡᠨ ᠭᠡᠵᠢᠭᠡ ᠪᠡᠨ ᠢᠯᠢᠵᠦ᠄
— ᠠᠳᠠᠯᠢᠬᠠᠨ ᠯᠠ ᠡᠷᠡ ᠡᠮᠡ ᠪᠡᠨ ᠦᠵᠡᠯᠴᠡᠬᠦ ᠭᠡᠳᠡᠭ ᠪᠣᠯᠵᠤ ᠳᠠ᠃ ᠥᠭᠡᠷᠡ ᠪᠡᠷ ᠶᠠᠭᠠᠬᠢᠨᠠ ᠭᠡᠬᠦ ᠪᠣᠢ ᠭᠡᠵᠦ ᠬᠡᠯᠡᠬᠦ ᠨᠢ《ᠶᠠᠭᠤ ᠴᠦ᠍ ᠭᠡᠰᠡᠨ ᠪᠢ ᠵᠦᠭᠡᠷ ᠪᠠᠭᠤᠵᠤ ᠥᠭᠬᠦ ᠦᠭᠡᠢ》 ᠭᠡᠰᠡᠨ ᠰᠠᠨᠠᠭᠠ ᠪᠠᠨ ᠢᠯᠡᠷᠬᠡᠢᠯᠡᠪᠡ᠃
ᠠᠷᠢᠬᠪᠥ᠋ᠬᠡ ᠬᠦᠯᠦᠭ ᠦ᠋ᠨ ᠪᠢᠴᠢᠭ ᠢ᠋ ᠳᠠᠬᠢᠨ ᠠᠪᠴᠤ ᠦᠵᠡᠭᠡᠳ ᠡᠷᠭᠢᠭᠦᠯᠵᠦ ᠲᠣᠭᠣᠷᠢᠭᠤᠯᠵᠤ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄《ᠴᠠᠭᠠᠨ᠂ ᠬᠠᠳᠠᠨ᠂ ᠲᠣᠭᠣᠭᠠᠨ ᠵᠠᠩᠵᠤᠨ ᠨᠠᠷ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠶᠡᠬᠡᠮᠰᠦᠭ ᠪᠠᠢᠳᠠᠯ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠠᠢᠳᠠᠭ》 ᠭᠡᠯᠡ ᠭᠡᠨᠡ ᠲᠡᠢᠮᠦ ᠪᠠᠢᠵᠠᠢ᠃《ᠬᠤᠪᠢᠯᠠᠢ ᠪᠠᠶᠠᠨ ᠠ᠋ᠴᠠ ᠳᠠᠯᠳᠢᠷᠠᠳᠠᠭ》 ᠭᠡᠳᠡᠭ ᠴᠦ᠍ ᠦᠨᠡᠨ᠃ ᠪᠠᠶᠠᠨ ᠪᠢᠳᠡᠨ ᠦ᠌ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠬᠤ ᠦᠭᠡᠢ ᠭᠡᠵᠦ ᠪᠠᠢᠭᠠ ᠨᠢ ᠯᠠᠪᠲᠠᠢ᠃ ᠲᠡᠷᠡ ᠪᠣᠯ ᠠᠷᠢᠭᠤᠬᠠᠨ ᠰᠡᠳᠬᠢᠯ ᠲᠡᠢ ᠵᠠᠩᠵᠤᠨ᠃ ᠵᠠ ᠪᠠᠢᠵᠠ! ᠬᠢᠲᠠᠳ ᠴᠡᠷᠢᠭ ᠦᠯᠡᠮᠵᠢ ᠣᠯᠠᠨ ᠪᠣᠯᠤᠭᠰᠠᠨ᠃《ᠲᠡᠳᠡ ᠶᠡᠬᠡ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠳᠠᠯᠲᠠᠢ》 ᠭᠡᠯᠡ ᠭᠡᠨᠡ? ᠬᠢᠲᠠᠳ ᠤ᠋ᠳ ᠪᠢᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠰᠢᠭᠤᠳ ᠣᠷᠣᠯᠴᠠᠮᠠ ᠦᠭᠡᠢ ᠪᠠᠢᠯᠲᠠᠢ᠃ ᠬᠤᠪᠢᠯᠠᠢ ᠶ᠋ᠢ ᠣᠷᠣᠯᠴᠠ ᠭᠡᠬᠦ ᠪᠡᠷ ᠲᠡᠭᠦᠨ ᠦ᠌ ᠡᠷᠬᠡᠨ ᠳ᠋ᠦ᠍ ᠪᠠᠢᠭᠠ ᠠᠮᠢᠲᠠᠳ ᠵᠠ ᠯᠠ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠭᠡᠬᠦ ᠪᠢᠯᠡ ᠳᠠ᠃《ᠴᠡᠷᠢᠭ ᠶᠡᠬᠡ ᠣᠯᠠᠨ》 ᠭᠡᠳᠡᠭ ᠨᠣᠬᠠᠢ ᠦᠭᠡ᠃ ᠲᠡᠭᠦᠨ ᠦ᠌ ᠴᠡᠷᠢᠭ ᠬᠣᠨᠣᠭ ᠥᠩᠭᠡᠷᠡᠬᠦ ᠲᠣᠰᠤᠮ ᠤᠯᠠᠮ ᠪᠣᠯᠬᠤ ᠨᠢ ᠰᠢᠪ᠃ ᠪᠢ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠣᠢ? ᠠᠯᠲᠠᠨ ᠣᠷᠳᠣᠨ ᠠ᠋ᠴᠠ ᠴᠡᠷᠢᠭ ᠭᠤᠶᠤᠭᠠᠳ ᠮᠥᠳᠳᠥ ᠢᠷᠡᠬᠦ ᠦᠭᠡᠢ᠂ ᠪᠠᠷᠤᠭ ᠬᠠᠭᠠᠰ ᠵᠢᠯ ᠪᠣᠯᠵᠤ ᠪᠠᠢᠵᠤ ᠲᠦᠷᠦᠭᠦᠴᠢ ᠨᠢ ᠦᠵᠡᠭᠳᠡᠬᠦ ᠪᠠᠢᠬᠤ᠃ ᠲᠡᠭᠡᠭᠡᠳ? ᠵᠦᠭᠡᠷ ᠰᠠᠭᠤᠭᠠᠳ ᠴᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯ ᠪᠢ ᠬᠤᠪᠢᠯᠠᠢ ᠳ᠋ᠤ᠌ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠡᠷᠡ ᠶ᠋ᠢᠨ ᠭᠤᠲᠤᠮᠰᠢᠭ ᠪᠣᠯᠤᠨᠠ ᠭᠡᠰᠡᠨ ᠦᠭᠡ ᠭᠡᠮᠡᠨ ᠡᠮᠦᠨᠡᠭᠦᠷ ᠢ᠋ᠶ᠋ᠡᠨ ᠡᠷᠭᠢᠯᠳᠦᠨ ᠬᠥᠳᠡᠯᠵᠦ ᠶᠠᠳᠠᠬᠤ ᠴᠡᠭᠡᠯ ᠦ᠋ᠨ ᠤᠰᠤ ᠶ᠋ᠢ ᠬᠠᠷᠠᠵᠤ ᠪᠣᠳᠣᠯᠭᠠᠰᠢᠷᠠᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠬᠡᠯᠡᠯᠡ᠃ ᠨᠠᠮᠤᠭᠤᠬᠠᠨ ᠦᠯᠢᠶᠡᠬᠦ ᠰᠠᠯᠬᠢᠨ ᠤ᠋ ᠠᠶᠠᠰ ᠢ᠋ᠶ᠋ᠠᠷ ᠭᠣᠣᠯ ᠤ᠋ᠨ ᠵᠠᠬᠠ ᠪᠠᠷ ᠤᠷᠭᠤᠭᠰᠠᠨ ᠪᠤᠷᠭᠠᠰᠤ ᠮᠣᠳᠣᠳ ᠤ᠋ᠨ ᠨᠠᠪᠴᠢᠰ ᠭᠠᠩᠬᠤᠨ ᠬᠥᠳᠡᠯᠵᠦ ᠳᠡᠯᠪᠢ ᠪᠡᠨ ᠨᠠᠷᠠᠨ ᠳ᠋ᠤ᠌ ᠳᠡᠯᠭᠡᠭᠰᠡᠨ ᠬᠥᠬᠡ᠂ ᠤᠯᠠᠭᠠᠨ᠂ ᠴᠠᠭᠠᠨ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠦ᠋ᠳ ᠥᠪᠡᠷ ᠢ᠋ ᠪᠡᠨ ᠬᠠᠷᠠᠭᠠᠴᠢ ᠭᠡᠰᠡᠨ ᠶᠠᠩᠵᠤ ᠪᠠᠷ ᠨᠢᠳᠦ ᠪᠤᠯᠢᠶᠠᠵᠤ ᠬᠠᠷᠠᠭᠳᠠᠨᠠ᠃ ᠭᠣᠣᠯ ᠤ᠋ᠨ ᠣᠰᠤᠨᠠ ᠰᠦᠷᠦᠭ ᠭᠠᠯᠠᠭᠤ ᠰᠠᠭᠤᠨ ᠬᠥᠩᠭᠡᠨ ᠵᠥᠭᠡᠯᠡᠨ ᠶᠠᠩᠵᠤ ᠪᠠᠷ ᠬᠦᠪᠦᠬᠦ ᠨᠢ《ᠪᠢᠳᠡ ᠡᠩᠬᠡ ᠲᠤᠩᠬᠠ ᠪᠠᠷ ᠵᠢᠷᠭᠠᠯ ᠢ᠋ᠶ᠋ᠠᠨ ᠡᠳ᠋ᠯᠡᠵᠦ ᠶᠠᠪᠤᠨᠠ》 ᠭᠡᠰᠡᠨ ᠪᠠᠢᠳᠠᠯᠲᠠᠢ ᠠᠵᠢ᠃
ᠡᠯᠳᠡᠪ ᠬᠡᠷᠡᠭ ᠲᠦ᠍ ᠠᠯᠵᠢᠶᠠᠵᠤ ᠶᠠᠳᠠᠷᠠᠭᠰᠠᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠬᠡᠭᠡᠷᠡ ᠶ᠋ᠢᠨ ᠠᠭᠠᠷ ᠢ᠋ᠶ᠋ᠠᠷ ᠴᠡᠩᠭᠡᠭᠦᠯᠵᠦ ᠠᠮᠠᠷᠠᠭᠠᠬᠤ ᠬᠠᠭᠠᠨ ᠢ᠋ ᠬᠦᠯᠦᠭ ᠦ᠋ᠨ ᠪᠢᠴᠢᠭ ᠤᠯᠠᠮ ᠴᠦ᠍ ᠬᠦᠨᠳᠦ ᠪᠣᠳᠣᠯ ᠳ᠋ᠤ᠌ ᠣᠷᠣᠭᠤᠯᠪᠠ᠃ ᠠᠷᠢᠬᠪᠥ᠋ᠬᠡ ᠬᠠᠭᠠᠨ ᠭᠣᠣᠯ ᠤ᠋ᠨ ᠡᠷᠭᠢ ᠳᠠᠭᠠᠨ ᠵᠢᠭᠠᠬᠠᠨ ᠰᠠᠭᠠᠲᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠣᠷᠢᠨ ᠳ᠋ᠤ᠌ ᠪᠠᠨ ᠦᠰᠦᠷᠦᠨ ᠮᠥᠷᠳᠡᠵᠦ ᠳᠠᠭᠠᠭᠤᠯ ᠤ᠋ᠳ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠪᠠᠷ ᠬᠠᠷᠠ ᠬᠣᠷᠣᠮ ᠬᠣᠲᠠ ᠶ᠋ᠢᠨ ᠬᠣᠢᠲᠤ ᠬᠥᠨᠳᠡᠢ ᠳ᠋ᠦ᠍ ᠪᠠᠢᠭᠠ《ᠣᠷᠬᠣᠨ ᠲᠦᠮᠡᠲᠦ》 ᠴᠡᠷᠢᠭ ᠦ᠋ᠨ ᠠᠩᠭᠢ ᠤᠷᠤᠭᠤ ᠵᠢᠯᠣᠭᠣ ᠵᠠᠯᠠᠯᠠ᠃
ᠦᠰᠦᠭ ᠬᠠᠭᠤᠯᠤᠨ ᠠᠮᠢᠯᠠᠭᠤᠯᠤᠭᠴᠢ᠄ ᠲᠩᠷᠢ ᠡᠵᠢ᠂ ᠪᠠᠭᠠᠲᠤᠷ