ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠣᠷᠣᠰᠢᠯ- ᠯᠢᠭᠳᠡᠨ> Элсэнд булагдсан сувдаа – П.Оюунгэрэл <оршил- лигдэн>
27ᠣᠷᠣᠰᠢᠯ
ᠦᠵᠦᠮᠦᠴᠢᠨ ᠨᠤᠲᠤᠭ ᠤ᠋ᠨ ᠦᠨᠡᠨ ᠠᠮᠢᠳᠤᠷᠠᠯ ᠤ᠋ᠨ ᠨᠣᠮᠣᠬᠠᠨ ᠴᠠᠭᠠᠨ ᠲᠡᠦᠬᠡ
ᠵᠣᠬᠢᠶᠠᠯᠴᠢ ᠫ· ᠣᠶᠤᠨᠭᠡᠷᠡᠯ ᠦ᠋ᠨ ᠲᠤᠭᠤᠵᠢᠰ᠂ ᠨᠠᠢᠷᠠᠭᠤᠯᠤᠯ ᠤ᠋ᠨ ᠡᠨᠡ ᠬᠦ᠌ ᠲᠡᠭᠦᠪᠦᠷᠢ ᠨᠡᠢᠭᠡᠮ ᠠᠮᠢᠳᠤᠷᠠᠯ ᠤ᠋ᠨ ᠥᠷᠭᠡᠨ ᠠᠭᠤᠳᠠᠮ ᠬᠦᠷᠢᠶᠡ ᠬᠡᠪᠴᠢᠶᠡ ᠶ᠋ᠢ ᠬᠠᠮᠤᠷᠤᠭᠰᠠᠨ ᠰᠡᠳᠬᠢᠯ ᠰᠡᠷᠭᠦᠮᠡ ᠦᠯᠢᠭᠡᠷ᠂ ᠰᠡᠳᠬᠢᠮᠵᠢ ᠤᠷᠠᠯᠠᠯ ᠤ᠋ᠨ ᠭᠦᠨ ᠨᠠᠷᠢᠪᠴᠢᠯᠠᠯ ᠲᠠᠢ ᠪᠠᠶᠠᠨ ᠲᠠᠩᠰᠤᠭ ᠠᠭᠤᠯᠭᠠ ᠶ᠋ᠢᠨ ᠠᠯᠲᠠ ᠲᠠᠢ ᠴᠣᠭᠴᠠ ᠪᠣᠯᠵᠠᠢ᠃ ᠲᠡᠭᠦᠪᠦᠷᠢ ᠳ᠋ᠦ᠍ ᠠᠪᠤ ᠡᠵᠢ ᠨᠠᠭᠠᠴᠤ ᠡᠮᠡᠭᠡ ᠪᠡᠨ ᠮᠥᠷᠥᠭᠡᠳᠴᠦ ᠲᠥᠷᠥᠯ ᠰᠠᠳᠤᠨ ᠡᠭᠡᠴᠢ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠳᠤᠷᠠᠰᠤᠮᠵᠢᠯᠠᠭᠰᠠᠨ ᠵᠡᠷᠭᠡ ᠶ᠋ᠢᠨ ᠬᠥᠮᠦᠨ ᠦ᠌ ᠨᠡᠢᠭᠡᠮ ᠦ᠋ᠨ ᠠᠬᠤᠢ ᠠᠮᠢᠳᠤᠷᠠᠯ ᠤ᠋ᠨ ᠬᠥᠳᠡᠯᠭᠡᠭᠡᠨᠲᠦ ᠵᠢᠷᠤᠭ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠲᠡᠮᠲᠡᠷᠢᠵᠦ ᠲᠣᠳᠣᠳᠬᠠᠨ ᠠᠢᠯᠠᠳᠤᠭᠠ ᠦᠭᠡᠢ ᠪᠠᠢᠭᠠᠯᠢ ᠶᠢᠷᠲᠢᠨᠴᠦ ᠶ᠋ᠢᠨ ᠵᠠᠷᠢᠮ ᠦᠵᠡᠭᠳᠡᠯ ᠢ᠋ ᠴᠦ᠍ ᠳᠦᠷᠰᠦᠯᠡᠨ ᠲᠡᠮᠳᠡᠭᠯᠡᠭᠡᠳ ᠡᠪᠲᠡᠢᠬᠡᠨ ᠬᠦᠦᠷᠨᠢᠵᠡᠢ᠃ ᠲᠤᠬᠠᠢᠯᠠᠪᠠᠯ ᠬᠥᠮᠦᠨ᠂ ᠨᠤᠲᠤᠭ᠂ ᠨᠡᠢᠭᠡᠮ ᠦ᠋ᠨ ᠭᠤᠷᠪᠠᠯᠵᠢᠨ ᠬᠣᠯᠪᠣᠭᠠᠨ ᠤ᠋ ᠶᠣᠰᠣ ᠤᠴᠢᠷ ᠲᠤ᠌ ᠬᠠᠪᠤᠲᠠᠢᠬᠠᠨ ᠭᠦᠨ ᠨᠠᠷᠢᠨ ᠲᠤᠩᠭᠠᠯᠲᠠ ᠬᠢᠭᠰᠡᠨ ᠦ᠌ ᠤᠯᠠᠮ ᠠ᠋ᠴᠠ ᠳᠦᠷᠢ ᠲᠥᠷᠬᠦ᠂ ᠦᠢᠯᠡ ᠶᠠᠪᠤᠳᠠᠯ᠂ ᠦᠭᠡ ᠶᠠᠷᠢᠶᠠ᠂ ᠣᠶᠤᠨᠯᠢᠭ ᠤᠬᠠᠮᠰᠠᠷ ᠤ᠋ᠨ ᠥᠭᠦᠯᠡᠮᠵᠢ ᠵᠡᠷᠭᠡ ᠨᠢ ᠠᠮᠢᠯᠠᠨ ᠲᠣᠳᠣᠷᠠᠵᠠᠢ᠃ ᠪᠣᠷᠣᠭᠵᠢᠭᠤᠨ ᠣᠨᠣᠪᠴᠢᠯᠢᠭ᠋ ᠴᠡᠪᠡᠷ ᠴᠠᠭᠠᠨ ᠬᠡᠯᠡᠯᠭᠡ ᠲᠡᠢ ᠡᠨᠡ ᠨᠣᠮᠠ᠋ᠴᠠ ᠮᠣᠩᠭᠣᠯ ᠣᠷᠣᠨ ᠤ᠋ ᠠᠮᠢᠳᠤᠷᠠᠯ ᠤ᠋ᠨ ᠠᠮᠢᠳᠤ ᠵᠢᠷᠤᠭ ᠤ᠋ᠳ ᠮᠢᠷᠠᠯᠵᠠᠨ ᠬᠥᠳᠡᠯᠦᠨᠡ᠂ ᠠᠷᠠᠳ ᠤ᠋ᠨ ᠭᠦᠨ ᠤᠬᠠᠭᠠᠨ ᠤ᠋ ᠭᠡᠷᠡᠯ ᠰᠠᠴᠤᠷᠠᠨ ᠭᠢᠯᠠᠰᠤᠨᠠ᠂ ᠠᠮᠢᠳᠤᠷᠠᠯ ᠬᠠᠢᠷᠠ ᠶ᠋ᠢᠨ ᠭᠠᠯ ᠢᠯᠴᠢ ᠨᠢᠯᠴᠢᠭᠢᠨᠡᠨ ᠨᠥᠯᠥᠭᠡᠯᠡᠨᠡ᠃ ᠡᠨᠡᠷᠢᠯ ᠡᠯᠪᠡᠷᠢᠯ ᠪᠠᠶᠠᠷ ᠭᠤᠨᠢᠭ ᠡᠷᠢᠶᠡᠯᠵᠡᠨ ᠠᠯᠠᠭᠯᠠᠭᠰᠠᠨ ᠵᠢᠷᠭᠠᠯ ᠵᠣᠪᠠᠯᠠᠩᠲᠤ ᠬᠥᠮᠦᠨ ᠦ᠌ ᠶᠢᠷᠲᠢᠨᠴᠦ ᠶ᠋ᠢᠨ ᠣᠷᠣᠰᠢᠯ ᠦᠷᠭᠦᠯᠵᠢᠯᠡᠯ ᠢ᠋ ᠰᠠᠢᠨ ᠮᠠᠭᠤ᠂ ᠰᠠᠢᠬᠠᠨ ᠮᠠᠭᠤᠬᠠᠢ ᠶ᠋ᠢᠨ ᠬᠢᠨᠢ ᠲᠡᠩᠴᠡᠳᠬᠡᠯ ᠢ᠋ᠶ᠋ᠡᠷ ᠦᠵᠡᠭᠦᠯᠦᠭᠰᠡᠨ ᠨᠢ ᠤᠳᠬᠠ ᠪᠠᠨ ᠤᠯᠠᠮ ᠭᠦᠨᠵᠡᠭᠡᠢᠷᠡᠭᠦᠯᠵᠡᠢ᠃ ᠲᠤᠰ ᠲᠡᠭᠦᠪᠦᠷᠢ ᠳ᠋ᠦ᠍ ᠣᠷᠣᠭᠰᠠᠨ ᠤᠷᠲᠤ ᠲᠣᠭᠣᠵᠢ᠂ ᠪᠣᠭᠣᠨᠢ ᠨᠠᠢᠷᠠᠭᠤᠯᠤᠯ᠂ ᠴᠢᠯᠥᠭᠡᠲᠦ ᠪᠢᠴᠢᠯᠭᠡ ᠵᠡᠷᠭᠡ ᠵᠣᠬᠢᠶᠠᠯ ᠳ᠋ᠤ᠌ ᠣᠯᠠᠩᠬᠢ ᠨᠢ ᠪᠦᠷ ᠵᠣᠬᠢᠶᠠᠭᠴᠢ ᠶ᠋ᠢᠨ ᠪᠠᠭᠠ ᠨᠠᠰᠤᠨ ᠤ᠋ ᠠᠮᠢᠳᠤᠷᠠᠯ ᠤ᠋ᠨ ᠳᠤᠷᠠᠰᠤᠮᠵᠢ ᠪᠤᠶᠤ ᠲᠡᠭᠦᠨ ᠡᠴᠡ ᠦᠨᠳᠦᠰᠦᠯᠡᠨ ᠥᠷᠨᠢᠵᠦ ᠦᠷᠭᠦᠯᠵᠢᠯᠡᠭᠰᠡᠨ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠤ᠋ᠨ ᠦᠯᠢᠭᠡᠷ᠂ ᠦᠢᠯᠡ ᠶᠠᠪᠤᠳᠠᠯ᠂ ᠪᠣᠳᠣᠯ ᠲᠥᠷᠥᠭᠳᠡᠯ᠂ ᠤᠬᠠᠭᠠᠷᠠᠯ ᠰᠡᠬᠡᠭᠡᠷᠡᠯ᠂ ᠤᠶᠠᠩᠭᠠᠯᠠᠯ ᠴᠠᠭᠠᠳᠬᠠᠯ ᠶᠤᠮ᠃ ᠤᠶᠣᠨᠬᠡᠷᠡᠯ ᠦ᠋ᠨ ᠵᠣᠬᠢᠶᠠᠯ ᠤ᠋ᠨ ᠢᠯᠡᠷᠡᠭᠦᠯᠦᠯ ᠳ᠋ᠦ᠍ ᠣᠯᠠᠨ ᠠ᠋ᠴᠠ ᠣᠨᠴᠠᠯᠠᠭᠳᠠᠬᠤ ᠨᠢᠭᠡᠨ ᠢᠯᠡ ᠲᠣᠳᠣ ᠢᠮ ᠲᠡᠮᠳᠡᠭ ᠨᠢ ᠥᠪᠡᠷ ᠦ᠋ᠨ ᠤᠷᠲᠤ ᠤᠳᠠᠭᠠᠨ ᠠᠮᠢᠳᠤᠷᠠᠯ ᠠᠶᠠᠯᠠᠯ ᠤ᠋ᠨ ᠪᠠᠶᠠᠷ ᠵᠢᠷᠭᠠᠯ᠂ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠵᠢᠴᠢ ᠲᠡᠭᠦᠨ ᠢ᠋ᠶ᠋ᠡᠨ ᠬᠤᠷᠢᠶᠠᠩᠭᠤᠢᠯᠠᠨ ᠲᠤᠩᠭᠠᠵᠤ ᠤᠬᠠᠮᠰᠠᠷᠯᠠᠭᠰᠠᠨ ᠮᠠᠰᠢ ᠭᠦᠨ ᠤᠬᠠᠭᠠᠨ ᠪᠣᠳᠣᠯ ᠤ᠋ᠨ ᠤᠷᠠᠨ ᠬᠡᠯᠪᠡᠷᠢ᠂ ᠣᠯᠠᠨ ᠬᠠᠷᠠᠭᠠᠰᠤ ᠶ᠋ᠢᠨ ᠦᠵᠡᠭᠦᠯᠦᠯ ᠳ᠋ᠡᠭᠡᠨ ᠪᠣᠢ᠃ ᠡᠨᠡ ᠨᠢ ᠤᠩᠰᠢᠭᠴᠢ ᠶ᠋ᠢᠨ ᠤᠭᠲᠤᠵᠤ ᠠᠪᠬᠤ ᠮᠡᠳᠡᠷᠡᠮᠵᠢ ᠶ᠋ᠢᠨ ᠳᠣᠯᠭᠢᠶᠠᠨ ᠬᠤᠷᠢᠶᠠᠭᠴᠢ ᠲᠠᠢ ᠠᠭᠤᠯᠵᠠᠵᠤ ᠪᠠᠢᠭᠠᠠ᠋ᠴᠠ ᠰᠠᠭᠤᠭᠳᠠᠯ ᠰᠠᠢᠲᠠᠢ ᠪᠠᠢᠨᠠ᠃ ᠲᠡᠭᠦᠪᠦᠷᠢ ᠳ᠋ᠡᠭᠡᠨ ᠪᠠᠭᠠ ᠪᠠᠯᠴᠢᠷ ᠨᠠᠰᠤᠨ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠣᠳᠣ ᠬᠦᠷᠲᠡᠯᠡᠬᠢ ᠪᠦᠬᠦ ᠶᠠᠪᠤᠴᠠ ᠶ᠋ᠢ ᠪᠠᠭᠲᠠᠭᠠᠭᠰᠠᠨ᠂ ᠦᠵᠡᠭᠳᠡᠬᠦ ᠪᠠ ᠦᠯᠦ ᠦᠵᠡᠭᠳᠡᠬᠦ ᠳᠠᠯᠳᠠ ᠶᠢᠷᠲᠢᠨᠴᠦ ᠶ᠋ᠢᠨ ᠨᠠᠨᠳᠢᠨ ᠨᠢᠭᠤᠴᠠ《ᠥᠪᠡᠷ ᠪᠢ》 ᠶ᠋ᠢᠨ ᠬᠡᠯᠪᠡᠷᠢ ᠲᠡᠢ ᠪᠡᠨ ᠨᠢᠭᠲᠠ ᠤᠶᠠᠯᠳᠤᠭᠤᠯᠤᠨ ᠢᠯᠡᠳᠬᠡᠭᠰᠡᠨ ᠪᠠᠢᠨᠠ᠃ ᠡᠨᠡ ᠨᠢ ᠤᠩᠰᠢᠭᠴᠢ ᠳ᠋ᠤ᠌ ᠭᠤᠸᠠ ᠰᠠᠢᠬᠠᠨ ᠬᠠᠨᠳᠢᠪᠯᠠᠵᠤ ᠤᠬᠠᠮᠰᠠᠷᠯᠠᠯ ᠤ᠋ᠨ ᠳᠡᠮᠵᠢᠯᠭᠡ ᠦᠵᠡᠭᠦᠯᠵᠦ ᠪᠠᠢᠬᠤᠠ᠋ᠴᠠ ᠭᠠᠳᠠᠨᠠ ᠵᠣᠬᠢᠶᠠᠭᠴᠢ ᠪᠠ ᠵᠣᠬᠢᠶᠠᠯ ᠭᠡᠳᠡᠭ ᠠᠮᠢᠳᠤᠷᠠᠯ ᠤ᠋ᠨ ᠳᠠᠬᠢᠨ ᠢᠯᠡᠷᠡᠭᠦᠯᠦᠯᠲᠡ ᠪᠡᠷ《ᠬᠥᠮᠦᠨ ᠰᠤᠳᠤᠯᠤᠯ》 ᠳ᠋ᠤ᠌ ᠨᠡᠯᠢᠶᠡᠳ ᠦᠨᠡ ᠥᠷᠲᠡᠭ ᠲᠡᠢ ᠵᠦᠢᠯ ᠢ᠋ ᠬᠠᠩᠭᠠᠵᠠᠢ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠨᠠᠢᠷᠠᠭᠤᠯᠤᠯ ᠳ᠋ᠤ᠌ ᠲᠡᠳᠦᠢ ᠦᠭᠡᠢ᠂ ᠥᠭᠦᠯᠡᠯᠭᠡ ᠳ᠋ᠦ᠍ᠨᠢ ᠬᠦᠷᠲᠡᠯᠡ ᠪᠦᠷ ᠨᠢᠭᠡᠳᠦᠭᠡᠷ ᠪᠡᠶᠡ ᠪᠡᠷ᠂ ᠴᠢᠨᠠᠭᠰᠢᠯᠠᠪᠠᠯ ᠪᠦᠷ《ᠣ ᠪᠠᠭᠰᠢ》 ᠭᠡᠬᠦ ᠮᠡᠲᠦ ᠪᠡᠷ ᠳᠤᠷᠠᠰᠤᠮᠵᠢᠯᠠᠭᠰᠠᠨ ᠪᠤᠶᠤ ᠪᠠᠷᠢᠮᠲᠠᠲᠤ ᠮᠠᠶᠢᠭ ᠤ᠋ᠨ ᠵᠦᠢᠯ ᠦ᠋ᠳ ᠢ᠋ᠶ᠋ᠡᠷ ᠢᠯᠡᠳᠬᠡᠵᠦ ᠪᠠᠢᠭᠠ ᠨᠢ ᠵᠣᠬᠢᠶᠠᠯ ᠤ᠋ᠨ ᠢᠲᠡᠭᠡᠭᠦᠯᠵᠦ ᠨᠥᠯᠥᠭᠡᠯᠡᠬᠦ ᠬᠦᠴᠦᠨ ᠢ᠋ ᠤᠯᠠᠮ ᠨᠡᠮᠡᠭᠳᠡᠭᠦᠯᠵᠡᠢ᠃ ᠨᠣᠮ ᠤ᠋ᠨ ᠷᠣᠮᠠᠨ ᠥᠭᠦᠯᠡᠯᠭᠡ ᠶ᠋ᠢ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠰᠢᠨᠵᠢᠬᠦ ᠳ᠋ᠦ᠍᠂ ᠨᠢᠭᠡ ᠭᠠᠵᠠᠷ ᠣᠷᠣᠨ ᠤ᠋ ᠬᠡᠪᠴᠢᠶᠡᠨ ᠦ᠌ ᠨᠢᠭᠡ ᠠᠮᠢᠳᠤᠷᠠᠯ ᠤ᠋ᠨ ᠲᠣᠭᠣᠷᠢᠭ ᠲᠤ᠌ ᠪᠣᠯᠤᠭᠰᠠᠨ ᠭᠣᠣᠯᠯᠠᠭᠴᠢ ᠨᠢᠭᠡ ᠬᠥᠮᠦᠨ ᠦ᠌ ᠵᠣᠬᠢᠶᠠᠮᠠᠯ ᠪᠤᠰᠤ ᠠᠮᠢᠳᠤᠷᠠᠯ ᠠᠵᠢᠯᠯᠠᠭᠠ ᠶ᠋ᠢᠨ ᠦᠵᠡᠭᠳᠡᠯ ᠦ᠋ᠳ ᠭᠡᠮᠡᠷ ᠪᠠᠢᠨᠠ᠃ ᠬᠡᠳᠦᠢᠪᠡᠷ ᠵᠣᠬᠢᠶᠠᠯ ᠤ᠋ᠨ ᠪᠠᠭᠠᠲᠤᠷ ᠤ᠋ᠨ ᠨᠡᠷᠡ ᠣᠨᠳᠣᠣ᠂ ᠦᠢᠯᠡ ᠠᠵᠢᠯᠯᠠᠭᠠ ᠠᠰᠲᠠᠭᠠᠨ᠂ ᠵᠠᠷᠢᠮ ᠭᠠᠳᠠᠭᠠᠳᠤ ᠳᠦᠷᠢ ᠪᠠᠯᠠᠷᠬᠠᠢ ᠪᠣᠯᠪᠠᠴᠤ ᠥᠭᠦᠯᠡᠯᠭᠡ ᠶ᠋ᠢᠨ ᠵᠣᠬᠢᠶᠠᠯ ᠤ᠋ᠳ ᠨᠢ ᠨᠥᠭᠦᠭᠡ ᠷᠣᠮᠠᠨ ᠲᠠᠢ ᠪᠠᠨ ᠮᠢᠬᠠ ᠴᠢᠰᠤᠨ ᠤ᠋ ᠠᠮᠢᠨ ᠬᠣᠯᠪᠣᠭᠠ ᠲᠠᠢ ᠪᠠᠢᠭᠠ ᠨᠢ ᠮᠡᠳᠡᠷᠡᠭᠳᠡᠨᠡ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠪᠠᠢᠭᠠᠯᠢ ᠶ᠋ᠢᠨ ᠰᠣᠨᠢᠨ ᠬᠠᠴᠢᠨ ᠦᠵᠡᠭᠳᠡᠯ᠂ ᠵᠡᠭᠦᠳᠦ ᠵᠦᠩ ᠢ᠋ ᠴᠦ᠍ ᠳᠣᠪᠣᠢᠯᠭᠠᠨ ᠲᠤᠰᠬᠠᠵᠤ᠂ ᠲᠡᠭᠦᠨ ᠳ᠋ᠡᠭᠡᠨ ᠨᠠᠷᠢᠪᠴᠢᠯᠠᠯ ᠪᠠ ᠪᠦᠳᠦᠭᠦᠪᠴᠢᠯᠡᠯ ᠬᠢᠭᠰᠡᠨ ᠨᠢ ᠰᠣᠨᠢᠷᠬᠠᠮᠵᠢ ᠶ᠋ᠢᠨ ᠦᠨᠡ ᠴᠠᠨᠠ ᠲᠠᠢ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠴᠢᠨᠠᠳᠤ ᠶ᠋ᠢᠨ ᠤᠬᠠᠭᠠᠨ ᠤ᠋ ᠰᠢᠨᠵᠢᠲᠡᠢ ᠪᠠᠢᠨᠠ᠃ ᠢᠯᠠᠩᠭᠤᠶᠠ《ᠰᠦᠨᠡᠰᠦᠨ ᠦ᠌ ᠨᠢᠳᠦ》 ᠭᠡᠬᠦ ᠮᠡᠲᠦ ᠵᠣᠬᠢᠶᠠᠯ ᠤ᠋ᠳ ᠤ᠋ᠨ ᠬᠥᠮᠦᠨ ᠳ᠋ᠦ᠍ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠥᠷᠥᠭᠳᠡᠯ ᠥᠭᠴᠦ ᠪᠠᠢᠬᠤ ᠪᠠᠷ ᠢ᠋ᠶ᠋ᠠᠨ᠂ ᠶᠧᠯᠸᠢᠴᠢ ᠠᠬᠤᠢᠴᠢ ᠦᠵᠡᠯ ᠦ᠋ᠨ ᠪᠢᠴᠢᠯᠭᠡ ᠶ᠋ᠢᠨ ᠠᠷᠭᠠ ᠪᠠᠷ ᠪᠢᠴᠢᠭᠰᠡᠨ ᠴᠦ᠍ ᠶᠦᠮ ᠤᠤ ᠭᠡᠮᠡᠷ ᠪᠠᠢᠨᠠ᠃ ᠤᠯᠠᠮᠵᠢᠯᠠᠯᠲᠤ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠢ᠋ ᠥᠩᠭᠡ ᠳᠦᠷᠰᠦ ᠬᠣᠪᠢᠷᠠᠭᠤᠯᠤᠯ ᠦᠭᠡᠢ᠂ ᠦᠨᠦᠷ ᠠᠮᠲᠠ ᠠᠯᠳᠠᠭᠤᠯᠤᠯ ᠦᠭᠡᠢ᠂ ᠦᠨᠡ ᠬᠠᠩᠰᠢ ᠪᠠᠭᠤᠷᠠᠭᠤᠯᠤᠯ ᠦᠭᠡᠢ᠂ ᠴᠣᠯ ᠴᠡᠪᠡᠷ ᠮᠣᠩᠭᠣᠯ ᠦᠭᠡ ᠪᠡᠷ ᠦᠵᠡᠭᠦᠯᠵᠦ ᠴᠢᠳᠠᠭᠰᠠᠨ ᠳ᠋ᠠᠭᠠᠨ ᠡᠨᠡ ᠨᠣᠮ ᠰᠠᠢᠬᠠᠨ ᠪᠠᠢᠨᠠ᠃ ᠥᠴᠦᠬᠡᠨ ᠥᠨᠴᠥᠭ ᠢ᠋ ᠨᠢ ᠴᠤᠬᠤᠢᠯᠭᠠᠭᠰᠠᠨ ᠴᠤ᠌ ᠪᠣᠯᠪᠠ᠂ ᠦᠵᠦᠮᠦᠴᠢᠨ ᠲᠠᠮᠠᠭᠠ ᠲᠠᠢ ᠦᠨᠡᠨ ᠠᠮᠢᠳᠤᠷᠠᠯ ᠤ᠋ᠨ ᠥᠭᠡᠳᠡᠰᠦ ᠲᠡᠮᠳᠡᠭᠯᠡᠯ ᠪᠣᠯᠬᠣᠷ ᠬᠣᠵᠢᠮ ᠤ᠋ᠨ ᠬᠥᠮᠦᠰ ᠡᠭᠦᠨ ᠢ᠋ᠶ᠋ᠡᠷ《ᠲᠡᠷᠡ ᠦᠶᠡ ᠳ᠋ᠦ᠍ ᠦᠨᠡᠬᠡᠷ ᠶᠠᠭ ᠯᠠ ᠲᠡᠢᠮᠦ ᠪᠠᠢᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ》 ᠭᠡᠰᠡᠨ ᠰᠢᠭ ᠵᠥᠪ ᠲᠥᠪ ᠰᠤᠷᠠᠭ ᠵᠠᠩᠭᠢ ᠶ᠋ᠢᠨ ᠰᠤᠷᠪᠤᠯᠵᠢ ᠪᠣᠯᠭᠠᠵᠤ ᠪᠣᠯᠤᠨᠠ᠃
ᠨᠣᠮᠲᠤ ᠬᠠᠨᠠ ᠶ᠋ᠢᠨ ᠡᠩᠭᠡᠷ ᠲᠦ᠍
2014᠂12᠂26
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠷᠠᠨᠴᠢᠮᠡᠭ᠂ ᠮᠥᠩᠭᠥᠨ᠂ ᠡᠷᠳᠡᠨᠢᠭᠤᠸᠠ᠂ ᠡᠭᠦᠯᠡᠩᠬᠤᠸᠠᠷ᠂
ᠪᠠᠶᠠᠨᠴᠡᠴᠡᠭ ᠨᠠᠷᠠᠨᠲᠤᠶᠠᠭᠠ᠂ ᠠᠯᠲᠠᠨᠴᠡᠴᠡᠭ᠂ ᠤᠯᠠᠭᠠᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠣᠳᠬᠠᠨᠰᠣᠠ᠂ ᠭᠠᠷᠮᠠ᠂ ᠤᠷᠠᠨᠴᠢᠮᠡᠭ᠂ ᠪᠠᠯ᠂ ᠰᠡᠬᠡᠭᠡᠷᠡᠯ