ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠳᠥᠷᠪᠡᠳᠦᠭᠡᠷ ᠪᠦᠯᠦᠭ –3>᠂ ᠵᠣᠯᠢᠶᠠᠰᠤᠯᠠᠭᠳᠠᠭᠰᠠᠨ《ᠶᠡᠬᠡ ᠬᠤᠷᠠᠯᠲᠠᠢ》 Бүргэд харьд үүрэлдэггүй – Ж᠂ Пүрэв <4-р бүлэг ~3>.золиослогдсон их хуралтай
30ᠭᠤᠷᠪᠠ᠂ ᠵᠣᠯᠢᠶᠠᠰᠤᠯᠠᠭᠳᠠᠭᠰᠠᠨ《ᠶᠡᠬᠡ ᠬᠤᠷᠠᠯᠲᠠᠢ》
ᠫᠧᠷᠰ ᠦ᠋ᠨ ᠬᠤᠳᠠᠯᠳᠤᠭᠠᠴᠢᠨ ᠬᠥᠭᠵᠢᠯᠲᠡᠢ ᠡᠷᠡ ᠠ᠋᠃ ᠲᠡᠷᠡ ᠪᠡᠷ ᠬᠣᠨᠣᠭ ᠤ᠋ᠨ ᠭᠠᠵᠠᠷ ᠲᠤ ᠠᠮᠲᠠᠲᠤ ᠳᠠᠷᠠᠰᠤ ᠭᠠᠷᠭᠠᠨ ᠵᠠᠳᠠᠯᠵᠤ᠂ ᠡᠯᠳᠡᠪ ᠰᠣᠨᠢᠨ ᠶᠠᠪᠤᠳᠠᠯ ᠳᠡᠯᠭᠡᠨ ᠶᠠᠷᠢᠭᠰᠠᠭᠠᠷ ᠬᠠᠮᠲᠤ ᠶᠠᠪᠤᠬᠤ ᠬᠥᠮᠦᠰ ᠢ᠋ᠶ᠋ᠡᠨ ᠬᠥᠭᠵᠢᠭᠡᠨ ᠰᠠᠭᠠᠲᠠᠭᠤᠯᠵᠤ ᠬᠡᠨ ᠢ᠋ ᠴᠦ᠍ ᠤᠢᠳᠬᠠᠷᠯᠠᠭᠤᠯᠬᠤ ᠦᠭᠡᠢ ᠪᠠᠢᠵᠤ ᠴᠢᠳᠠᠨᠠ᠃ ᠲᠡᠷᠡ ᠪᠡᠷ ᠮᠣᠩᠭᠣᠯ ᠬᠡᠯᠡ ᠶ᠋ᠢ ᠬᠤᠷᠳᠤᠨ ᠰᠤᠷᠴᠤ᠂ ᠪᠦᠷ ᠡᠩ ᠦ᠋ᠨ ᠶᠠᠷᠢᠶᠠᠨ ᠤ᠋ ᠦᠭᠡᠨ ᠳ᠋ᠦ᠍ ᠰᠦᠷᠡᠬᠡᠢ ᠪᠣᠯᠵᠠᠢ᠃
ᠢᠩᠭᠢᠵᠦ ᠲᠡᠷᠡ ᠪᠤᠵᠢᠭᠢᠨᠠᠭᠤᠯᠤᠨ ᠬᠡᠳᠦᠨ ᠬᠣᠨᠣᠭ ᠶᠠᠪᠤᠭᠠᠳ ᠨᠡᠢᠰᠯᠡᠯ ᠳ᠋ᠦ᠍ ᠢᠷᠡᠵᠦ ᠵᠢᠯᠣᠭᠣ ᠲᠠᠲᠠᠪᠠ᠃
ᠬᠣᠮᠢᠨᠢ ᠬᠦᠯᠦᠭ ᠲᠦ᠍ ᠳᠣᠲᠣᠨᠣᠰᠢᠵᠤ ᠪᠠᠢᠭᠠ ᠨᠢ ᠭᠠᠢᠬᠠᠯᠲᠠᠢ᠃ ᠬᠦᠯᠦᠭ ᠴᠦ᠍ ᠡᠨᠡ ᠲᠠᠨᠢᠯ ᠳ᠋ᠤ᠌ ᠪᠠᠨ ᠭᠣᠮᠣᠳᠠᠬᠤ ᠪᠠᠷ ᠦᠭᠡᠢ ᠲᠤᠰᠠ ᠬᠢᠵᠦ ᠶᠠᠪᠤᠭᠠ ᠪᠢᠯᠡ᠃
ᠲᠤᠬᠠᠢᠯᠠᠪᠠᠯ ᠴᠥᠭᠡᠨ ᠴᠡᠷᠢᠭ ᠳᠠᠭᠠᠭᠤᠯᠤᠭᠰᠠᠨ ᠬᠦᠯᠦᠭ ᠫᠧᠷᠰ ᠬᠣᠮᠢᠨᠢ ᠥᠷᠲᠡᠭᠡ ᠤᠨᠤᠭᠠ ᠬᠡᠷᠡᠭᠯᠡᠭᠦᠯᠦᠨ ᠠᠪᠴᠤ ᠶᠠᠪᠤᠭᠰᠠᠭᠠᠷ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠬᠦᠷᠦᠯᠴᠡᠨ ᠢᠷᠡᠯᠡ᠃
ᠮᠡᠳᠡᠭᠡᠵᠢ ᠶ᠋ᠢᠨ ᠬᠦᠯᠦᠭ ᠲᠡᠷᠡ ᠠᠨᠳᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠳᠡᠭᠦᠦ ᠶ᠋ᠢᠨ ᠳ᠋ᠦ᠍ ᠪᠡᠨ ᠪᠠᠭᠤᠪᠠ᠃
ᠪᠢᠯᠢᠭᠦᠨ ᠬᠡᠳᠦᠬᠡᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠪᠠᠷᠠᠭᠤᠨ ᠭᠠᠵᠠᠷ ᠠ᠋ᠴᠠ ᠡᠷᠭᠢᠵᠦ ᠢᠷᠡᠭᠡᠳ ᠠᠭᠤᠯᠵᠠᠭᠰᠠᠨ ᠠᠵᠢ᠃
ᠠᠬᠠ ᠳᠡᠭᠦᠦ ᠬᠣᠶᠠᠷ ᠶᠠᠪᠤᠭᠰᠠᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠰᠣᠨᠢᠷᠬᠠᠭᠤᠯᠤᠨ ᠨᠢᠭᠡᠨ ᠪᠦᠲᠦᠨ ᠡᠳᠦᠷᠵᠢᠨ ᠶᠠᠷᠢᠯᠴᠠᠯᠠ᠃
ᠡᠨᠡ ᠵᠠᠪᠰᠠᠷ ᠬᠣᠮᠢᠨᠢ ᠥᠪᠡᠷ ᠦ᠋ᠨ ᠨᠤᠲᠤᠭ ᠤᠷᠤᠭᠤ ᠪᠤᠴᠠᠬᠤ ᠤᠨᠤᠭᠠ ᠬᠥᠰᠬᠡ ᠣᠯᠵᠤ ᠪᠡᠯᠡᠳᠬᠡᠬᠦ ᠪᠡᠷ ᠬᠣᠲᠠ ᠪᠠᠷ ᠶᠠᠪᠤᠵᠤ ᠬᠥᠮᠦᠨ ᠠᠮᠢᠲᠠᠨ ᠲᠠᠢ ᠠᠭᠤᠯᠵᠠᠨ ᠪᠠᠢᠪᠠ᠃
ᠲᠡᠷᠡ ᠬᠢᠯᠭᠠᠰᠤᠨ《ᠨᠣᠭᠲᠣ ᠲᠠᠢ》 ᠡᠷᠡ ᠳ᠋ᠦ᠍ ᠮᠣᠩᠭᠣᠯ ᠭᠠᠵᠠᠷ ᠬᠦᠯᠦᠭ ᠡᠴᠡ ᠥᠭᠡᠷᠡ ᠲᠠᠨᠢᠯ ᠪᠠᠰᠠ ᠪᠣᠢ ᠠᠵᠢ᠃ ᠤᠷᠢᠳ ᠨᠢ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠪᠠᠢᠬᠤ ᠳ᠋ᠤ᠌ ᠪᠠᠨ ᠬᠡᠳᠦ ᠬᠡᠳᠦᠨ ᠬᠤᠳᠠᠯᠳᠤᠭᠠᠴᠢᠨ ᠲᠠᠢ ᠲᠠᠨᠢᠯᠴᠠᠭᠰᠠᠨ᠃ ᠣᠳᠣ ᠭᠠᠷ ᠳᠡᠭᠡᠷᠡ ᠪᠡᠨ ᠵᠡᠬᠡᠭᠰᠡᠨ ᠮᠥᠩᠭᠥ ᠲᠡᠢ ᠪᠣᠯᠬᠣᠷ ᠴᠠᠭ ᠤ᠋ᠨ ᠬᠦᠢᠲᠡᠨ ᠡᠴᠡ ᠤᠷᠢᠲᠠᠵᠤ ᠵᠠᠮ ᠳᠥᠭᠥᠬᠦ ᠶ᠋ᠢ ᠬᠢᠴᠢᠶᠡᠵᠦ ᠪᠢᠯᠡ᠃
ᠬᠦᠯᠦᠭ ᠱᠠᠩᠳᠤ ᠬᠣᠲᠠ ᠳ᠋ᠤ᠌ ᠪᠣᠯᠵᠤ ᠪᠠᠢᠭᠠ ᠬᠡᠷᠡᠭ ᠶᠠᠪᠤᠳᠠᠯ ᠤ᠋ᠨ ᠪᠠᠢᠳᠠᠯ ᠢ᠋ ᠲᠣᠢᠮᠣᠯᠠᠨ ᠳᠡᠭᠦᠦ ᠳ᠋ᠦ᠍ ᠪᠡᠨ ᠶᠠᠷᠢᠵᠤ ᠪᠠᠢᠪᠠ᠃ ᠪᠢᠯᠢᠭᠦᠨ ᠳᠤᠮᠳᠠᠳᠤ ᠭᠠᠵᠠᠷ᠂ ᠫᠧᠷᠰ᠂ ᠢᠷᠡᠨ ᠦ᠌ ᠨᠤᠲᠤᠭ᠂ ᠣᠷᠣᠰ ᠤ᠋ᠨ ᠡᠮᠦᠨᠡ ᠬᠢᠪᠴᠠᠭ ᠤ᠋ᠨ ᠲᠠᠯᠠ ᠪᠠᠷ ᠶᠠᠪᠤᠵᠤ᠂ ᠲᠡᠨᠳᠡ ᠥᠪᠡᠷᠰᠡᠳ ᠦ᠋ᠨ ᠵᠠᠬᠢᠷᠭᠠ ᠶ᠋ᠢ ᠲᠣᠭᠲᠠᠭᠠᠨ ᠡᠵᠡᠩᠨᠡᠵᠦ ᠰᠠᠭᠤᠭᠠ ᠮᠣᠩᠭᠣᠯ ᠤ᠋ᠨ ᠢ᠋ᠶ᠋ᠠᠨ ᠨᠣᠶᠠᠳ ᠤ᠋ᠨ ᠥᠷᠭᠥᠭᠡ ᠪᠡᠷ ᠳᠣᠪᠲᠣᠯᠵᠤ ᠣᠴᠢᠭᠠᠳ ᠮᠠᠰᠢ ᠬᠤᠷᠳᠤᠨ ᠢ᠋ᠶ᠋ᠠᠷ ᠡᠷᠭᠢᠨ᠂ ᠡᠵᠡᠨ ᠳ᠋ᠦ᠍ ᠪᠡᠨ ᠬᠦᠷᠴᠦ ᠪᠠᠷᠠᠯᠬᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠳᠡᠯᠭᠡᠵᠦ ᠶᠠᠷᠢᠯᠠ᠃ ᠳᠤᠮᠳᠠᠳᠤ ᠶ᠋ᠢᠨ ᠣᠷᠣᠨ ᠨᠤᠭᠤᠳ ᠢ᠋ᠶ᠋ᠠᠷ ᠡᠯᠵᠢᠭᠡ ᠶ᠋ᠢ ᠤᠨᠤᠭᠠᠨ ᠳ᠋ᠤ᠌ ᠶᠡᠬᠡ ᠬᠡᠷᠡᠭᠯᠡᠳᠡᠭ᠂ ᠡᠳ᠋ ᠪᠠᠷᠠᠭᠠ ᠡᠯᠪᠡᠭ᠂ ᠲᠣᠮᠣ ᠳᠤᠭᠤᠢ ᠭᠠᠮᠪᠢᠷ ᠬᠠᠭᠠᠷᠢᠵᠤ ᠢᠳᠡᠬᠦ ᠳᠤᠷᠠᠲᠠᠢ᠂ ᠲᠡᠭᠦᠨ ᠢ᠋ ᠪᠡᠨ ᠬᠦᠨᠳᠦᠲᠡᠢ ᠰᠠᠢᠨ ᠬᠣᠭᠣᠯᠠᠨ ᠳ᠋ᠤ᠌ ᠲᠣᠭᠠᠴᠠᠳᠠᠭ ᠠᠵᠢ᠃ ᠲᠡᠨᠳᠡᠬᠢ ᠶ᠋ᠢᠨ ᠬᠥᠮᠦᠰ ᠤᠷᠲᠤ ᠲᠠᠯᠠ ᠨᠢ ᠵᠠᠳᠠᠭᠠᠢ ᠡᠩᠭᠡᠷ ᠬᠣᠷᠮᠣᠢ ᠲᠠᠢ ᠤᠷᠲᠤ ᠳᠡᠪᠡᠯ ᠡᠮᠦᠰᠳᠡᠭ᠂ ᠮᠣᠩᠭᠣᠯ ᠬᠥᠮᠦᠨ ᠢ᠋ ᠬᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠩᠭᠡᠷ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠰᠥᠭᠥᠳᠴᠦ ᠵᠠᠯᠪᠠᠷᠢᠭᠠᠳ᠂ ᠵᠢᠭᠲᠡᠢ ᠬᠦᠨᠳᠦᠯᠡᠬᠦ ᠪᠠᠢᠳᠠᠯ ᠦᠵᠡᠭᠦᠯᠳᠡᠭ ᠨᠢ ᠲᠡᠢᠨ ᠳ᠋ᠦ᠍ ᠢᠯᠠᠭᠳᠠᠵᠤ ᠬᠥᠯ ᠳ᠋ᠦ᠍ ᠭᠢᠰᠬᠢᠭᠳᠡᠨ ᠪᠠᠢᠭᠰᠠᠨ ᠤ᠋ ᠬᠢᠨᠢ ᠳᠤᠷᠠᠰᠬᠠᠯ ᠭᠡᠯᠲᠡᠢ ᠬᠠᠷᠠᠭᠳᠠᠳᠠᠭ ᠭᠡᠨᠡ᠃ ᠢᠯᠠᠩᠭᠤᠶᠠ ᠪᠤᠬᠠᠷ ᠬᠣᠲᠠ᠂ ᠰᠠᠮᠠᠷᠺᠠᠨᠳ᠋ ᠣᠷᠴᠢᠮ ᠤ᠋ᠨ ᠬᠥᠮᠦᠰ ᠥᠪᠡᠷᠰᠡᠳ ᠦ᠋ᠨ ᠬᠠᠭᠠᠳ ᠨᠣᠶᠠᠳ ᠢ᠋《 ᠴᠢᠳᠠᠯ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ ᠠᠷᠰᠯᠠᠨ ᠤ᠋ ᠳᠦᠷᠢ ᠭᠠᠷᠭᠠᠨ ᠳᠠᠢᠳᠤᠬᠤ ᠭᠡᠵᠦ ᠣᠩᠭᠢᠷᠠᠵᠤ ᠶᠠᠪᠤᠭᠠᠳ ᠣᠯᠠᠨ ᠢ᠋ ᠵᠣᠪᠠᠯᠠᠩ ᠳ᠋ᠤ᠌ ᠣᠷᠣᠭᠤᠯᠤᠭᠰᠠᠨ》 ᠭᠡᠵᠦ ᠬᠡᠯᠡᠬᠦ ᠳᠤᠷᠠᠲᠠᠢ᠃ ᠮᠣᠩᠭᠣᠯ ᠨᠣᠶᠠᠳ᠂ ᠴᠡᠷᠢᠭ ᠲᠦ᠍ ᠵᠢᠭᠲᠡᠢ ᠶᠡᠬᠡ《ᠳᠣᠲᠣᠨᠣ》 ᠴᠢᠷᠠᠢ ᠭᠠᠷᠭᠠᠨ᠂ ᠶᠠᠭᠤ ᠪᠠᠢᠭᠠ ᠪᠠᠨ ᠡᠷᠭᠦᠨ ᠪᠠᠷᠢᠵᠤ ᠪᠠᠢᠳᠠᠭ ᠨᠢ ᠪᠦᠷ ᠭᠣᠣᠯ ᠢ᠋ᠶ᠋ᠠᠨ ᠬᠠᠷᠠᠯᠠᠲᠠᠯᠠ ᠴᠣᠬᠢᠭᠤᠯᠤᠭᠰᠠᠨ ᠤ᠋ ᠰᠢᠨᠵᠢ ᠶᠦᠮ ᠭᠡᠵᠦ ᠪᠢᠯᠢᠭᠦᠨ ᠶᠠᠷᠢᠪᠠ᠃
ᠲᠡᠨᠳᠡ ᠡᠴᠡ ᠴᠠᠭᠠᠰᠢ ᠪᠠᠷᠠᠭᠤᠨ ᠲᠠᠢᠰᠢ ᠪᠠᠨ ᠶᠠᠪᠤᠭᠠᠳ ᠢᠷᠡᠨ ᠣᠷᠣᠨ ᠣᠷᠣᠬᠤ ᠪᠠᠷ ᠬᠥᠮᠦᠨ ᠣᠯᠠᠨ ᠨᠢ ᠦᠨᠡᠨ ᠭᠣᠣᠯ ᠠ᠋ᠴᠠ ᠪᠠᠨ ᠮᠣᠩᠭᠣᠯ ᠬᠥᠮᠦᠨ ᠳ᠋ᠦ᠍ ᠳᠤᠷᠠᠲᠠᠢ᠂ ᠶᠡᠬᠡ ᠮᠣᠩᠭᠣᠯ ᠠ᠋ᠴᠠ ᠶᠠᠪᠤᠭᠠ ᠭᠡᠬᠦ ᠪᠡᠷ ᠬᠠᠮᠤᠭ ᠰᠠᠢᠨ ᠰᠠᠢᠬᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠭᠠᠷᠭᠠᠨ ᠲᠠᠢᠯᠵᠤ ᠪᠠᠢᠳᠠᠭ᠂ ᠤᠨᠤᠭᠠ ᠬᠥᠰᠬᠡ ᠶ᠋ᠢ ᠬᠡᠯᠡᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠯᠠ ᠪᠡᠯᠡᠳᠬᠡᠭᠡᠳ ᠠᠯᠢ ᠬᠡᠳᠦᠢᠨᠡ ᠵᠡᠬᠡᠭᠰᠡᠨ ᠪᠠᠢᠳᠠᠭ᠂ ᠪᠡᠯᠡᠭ ᠰᠡᠯᠲᠡ ᠭᠠᠷᠳᠠᠭᠤᠯᠬᠤ ᠭᠡᠵᠦ ᠰᠠᠨᠠᠭᠠ ᠲᠠᠯᠪᠢᠳᠠᠭ ᠭᠡᠨᠡ᠃ ᠢᠷᠠᠨᠴᠤᠳ ᠮᠣᠩᠭᠣᠯ ᠢ᠋ ᠠᠬᠠ ᠳᠡᠭᠦᠦ ᠭᠡᠵᠦ ᠶᠠᠷᠢᠬᠤ ᠳᠤᠷᠠᠲᠠᠢ ᠠᠵᠢ᠃ ᠬᠦᠯᠦᠭ ᠬᠠᠨ ᠳ᠋ᠤ᠌ ᠪᠠᠷᠠᠯᠬᠠᠨ ᠲᠡᠨᠳᠡ ᠲᠣᠭᠯᠠᠨ ᠭᠤᠷᠪᠠᠨ ᠬᠣᠨᠣᠭ ᠲᠡᠳᠡᠨ ᠦ᠌ ᠳ᠋ᠦ᠍ ᠰᠠᠭᠠᠲᠠᠵᠠᠢ᠃
ᠣᠷᠣᠰ ᠨᠤᠲᠤᠭ ᠲᠤ ᠣᠷᠣᠭᠠᠳ ᠢᠷᠡᠬᠦ ᠪᠡᠷ ᠪᠠᠢᠳᠠᠯ ᠶᠡᠬᠡ ᠥᠭᠡᠷᠡ ᠪᠣᠯᠵᠤ ᠪᠠᠢᠨᠠ᠃ ᠨᠣᠶᠠᠳ᠂ ᠢᠷᠭᠡᠳ ᠠᠯᠢ ᠨᠢ ᠴᠦ᠍ ᠢᠯᠭᠠᠭᠠ ᠦᠭᠡᠢ ᠮᠣᠩᠭᠣᠯ ᠴᠡᠷᠢᠭ ᠢ᠋《ᠠᠪᠤᠷᠠᠭᠴᠢ ᠶᠡᠬᠡ ᠬᠦᠴᠦᠨ》 ᠭᠡᠵᠦ ᠬᠦᠨᠳᠦᠯᠡᠨ ᠵᠠᠯᠪᠠᠷᠢᠵᠤ ᠰᠥᠭᠥᠳᠬᠦ᠂ ᠶᠠᠪᠤᠭᠰᠠᠨ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠪᠥᠭᠡᠷᠡᠩᠬᠡᠢ ᠲᠣᠮᠣ ᠲᠠᠯᠬᠠᠨ ᠳᠡᠭᠡᠷᠡ ᠳᠠᠪᠤᠰᠤ ᠲᠠᠯᠪᠢᠵᠤ ᠪᠠᠷᠢᠨ ᠵᠣᠯᠭᠠᠬᠤ ᠨᠢ ᠰᠣᠨᠢᠨ ᠭᠡᠵᠦ ᠪᠢᠯᠢᠭᠦᠨ ᠶᠠᠷᠢᠭᠠᠳ᠂ ᠶᠠᠭᠠᠬᠢᠭᠠᠳ《ᠠᠪᠤᠷᠠᠭᠴᠢ》 ᠪᠣᠯᠤᠭᠰᠠᠨ ᠢ᠋ ᠨᠢ ᠠᠰᠠᠭᠤᠪᠠᠯ ᠣᠷᠣᠰ ᠤ᠋ᠳ ᠬᠡᠯᠡᠬᠦ ᠳ᠋ᠦ᠍ ᠪᠡᠨ ᠲᠧᠧᠲ᠋ᠤᠩ ᠤ᠋ᠨ ᠣᠷᠳᠣᠨ ᠭᠡᠳᠡᠭ ᠤᠯᠤᠰ ᠤ᠋ᠨ ᠠᠢᠬᠤᠪᠲᠤᠷ ᠲᠦᠷᠢᠮᠡᠬᠡᠢᠴᠦᠳ ᠦ᠋ᠨ ᠶᠡᠬᠡ ᠴᠡᠷᠢᠭ ᠮᠠᠨ ᠤ᠋ ᠣᠷᠣᠨ ᠤᠷᠤᠭᠤ ᠳᠠᠷᠠᠭᠠ ᠳᠠᠷᠠᠭᠠᠯᠠᠨ ᠬᠠᠯᠳᠠᠵᠤ ᠢᠷᠡᠭᠡᠳ ᠪᠢᠳᠡᠨ ᠢ᠋ ᠪᠦᠬᠦᠯᠢ ᠪᠡᠷ ᠨᠢ ᠪᠣᠭᠣᠯ ᠢ᠋ᠶ᠋ᠠᠨ ᠪᠣᠯᠭᠠᠬᠤ ᠭᠡᠰᠡᠨ ᠳ᠋ᠦ᠍ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠴᠡᠷᠢᠭ ᠮᠠᠨ ᠤ᠋ ᠨᠧᠧᠰᠺᠢ ᠬᠠᠭᠠᠨ ᠤ᠋ ᠬᠦᠰᠡᠯᠲᠡ ᠪᠡᠷ ᠲᠤᠰᠠᠯᠠᠬᠤ ᠪᠣᠯᠵᠤ᠂ ᠣᠷᠣᠰ ᠤ᠋ᠨ ᠨᠤᠲᠤᠭ ᠳᠤᠮᠳᠠᠭᠤᠷ ᠲᠣᠮᠣ ᠠᠶᠠᠯᠠᠯ ᠬᠢᠨ ᠪᠠᠷᠠᠭᠤᠨ ᠬᠣᠢᠲᠤ ᠨᠤᠲᠤᠭ ᠲᠤ ᠣᠴᠢᠭᠠᠳ᠂ ᠲᠡᠷᠡ ᠡᠵᠡᠯᠡᠨ ᠲᠦᠷᠢᠮᠡᠬᠡᠢᠯᠡᠭᠴᠢ ᠴᠡᠷᠢᠭ ᠢ᠋ ᠪᠤᠲᠠ ᠨᠢᠷᠭᠡᠭᠰᠡᠨ ᠬᠡᠷᠡᠭ᠃ ᠲᠡᠭᠡᠭᠡᠳ ᠴᠦ᠍ ᠣᠷᠣᠰ ᠤ᠋ᠨ ᠶᠡᠬᠡ ᠵᠠᠩᠵᠤᠨ ᠤ᠋ ᠬᠦᠦ ᠲᠡᠢ ᠮᠣᠩᠭᠣᠯ ᠤ᠋ᠨ ᠵᠠᠷᠢᠮ ᠨᠣᠶᠠᠳ ᠤ᠋ᠨ ᠬᠡᠦᠬᠡᠳ ᠦ᠋ᠳ ᠠᠬᠠ ᠳᠡᠭᠦᠦ ᠪᠣᠯᠤᠨ ᠰᠤᠩᠭᠣᠯ ᠤ᠋ᠨ ᠶᠣᠰᠣ ᠪᠠᠷ ᠴᠢᠰᠤ ᠪᠠᠨ ᠠᠮᠰᠠᠯᠴᠠᠭᠰᠠᠨ᠃ ᠲᠡᠢᠮᠦ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠪᠢᠳᠡ ᠮᠠᠭᠤ ᠪᠠᠢᠬᠤ ᠶᠣᠰᠣ ᠦᠭᠡᠢ ᠭᠡᠵᠦ ᠶᠠᠷᠢᠵᠤ ᠪᠠᠢᠨᠠ᠃ ᠣᠳᠣ ᠮᠣᠩᠭᠣᠯ᠂ ᠣᠷᠣᠰ ᠬᠥᠮᠦᠰ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠰᠠᠢᠨ ᠰᠡᠳᠬᠢᠯ ᠲᠡᠢ ᠣᠷᠣᠰᠢᠵᠤ ᠪᠠᠢᠬᠤ ᠶᠤᠮ᠃ ᠲᠡᠭᠦᠨ ᠢ᠋ ᠨᠢ ᠪᠢᠳᠡ ᠦᠵᠡᠯᠡ᠃ ᠢᠯᠠᠨ ᠳᠡᠢᠯᠦᠭᠴᠢ ᠪᠣᠯᠬᠣᠷ ᠢ᠋ᠶ᠋ᠠᠨ ᠮᠣᠩᠭᠣᠯ ᠨᠢ ᠠᠷᠠᠢ ᠳᠡᠭᠡᠷᠡᠯᠬᠡᠦ ᠰᠢᠨᠵᠢᠲᠡᠢ ᠪᠠᠢᠳᠠᠭ ᠪᠣᠯᠪᠠ ᠤᠤ ᠭᠡᠮᠡᠷ ᠵᠦᠢᠯ ᠠᠵᠢᠭᠯᠠᠭᠳᠠᠵᠤ ᠪᠠᠢᠨᠠ ᠭᠡᠵᠦ ᠪᠢᠯᠢᠭᠦᠨ ᠶᠠᠷᠢᠪᠠ᠃ ᠪᠠᠷᠠᠭᠤᠨ ᠳᠤᠮᠳᠠᠳᠤ ᠭᠠᠵᠠᠷ ᠲᠤ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠮᠲᠠᠲᠠᠢ ᠰᠠᠢᠬᠠᠨ ᠵᠢᠮᠢᠰ ᠯᠡ ᠡᠯᠪᠡᠭ ᠪᠠᠢᠳᠠᠭ᠃ ᠬᠥᠮᠦᠰ ᠲᠡᠷᠡ ᠵᠢᠮᠢᠰ ᠢ᠋ ᠲᠣᠭᠣᠵᠤ ᠠᠪᠬᠤ ᠪᠠᠨ ᠪᠠᠢᠴᠢᠬᠠᠭᠰᠠᠨ ᠪᠣᠯᠬᠣᠷ ᠦᠨᠡ ᠨᠢ ᠬᠢᠮᠳᠠ ᠶᠡᠷᠦ ᠨᠢ ᠬᠥᠮᠦᠨ ᠲᠡᠭᠦᠨ ᠢ᠋ ᠬᠣᠶᠠᠷ ᠭᠤᠷᠪᠠ ᠬᠣᠨᠣᠭ ᠳᠤᠷᠠᠯᠠᠨ ᠢᠳᠡᠭᠡᠳ ᠰᠡᠭᠦᠯ ᠳ᠋ᠦ᠍ ᠪᠡᠨ ᠰᠢᠬᠢᠷ ᠠᠮᠲᠠᠨ ᠳ᠋ᠤ᠌ ᠨᠢ ᠪᠢᠯᠠᠭᠤᠷᠠᠭᠠᠳ ᠢᠳᠡᠬᠦ ᠪᠡᠨ ᠪᠠᠢᠳᠠᠭ ᠭᠡᠵᠦ ᠶᠠᠷᠢᠯᠠ᠃ ᠥᠭᠡᠷᠡ ᠪᠤᠰᠤᠳ ᠰᠣᠨᠢᠨ ᠭᠠᠢᠬᠠᠯᠲᠠᠢ ᠵᠦᠢᠯ ᠪᠢᠯᠢᠭᠦᠨ ᠣᠯᠠᠨ ᠢ᠋ ᠦᠵᠡᠬᠦ ᠪᠣᠯᠣᠮᠵᠢᠲᠠᠢ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠰᠦᠢᠲᠦ ᠨᠣᠶᠠᠨ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ᠂ ᠨᠢᠭᠡ ᠭᠠᠵᠠᠷ ᠲᠤ ᠬᠣᠶᠠᠷ ᠬᠣᠨᠣᠭ ᠠ᠋ᠴᠠ ᠢᠯᠡᠭᠦᠦ ᠪᠠᠢᠬᠤ ᠳᠤᠷᠠ ᠦᠭᠡᠢ᠂ ᠪᠠᠢᠬᠤ ᠴᠦ᠍ ᠪᠣᠯᠤᠮᠵᠢ ᠦᠭᠡᠢ ᠭᠡᠬᠦ ᠤᠤ᠂ ᠡᠨᠳᠡ ᠡᠴᠡ ᠲᠣᠭᠲᠠᠭᠠᠵᠤ ᠥᠭᠭᠦᠭᠰᠡᠨ ᠬᠤᠭᠤᠴᠠᠭᠠ ᠨᠢ ᠳᠠᠪᠴᠢᠭᠤ ᠪᠣᠯᠬᠣᠷ ᠣᠴᠢᠭᠰᠠᠨ ᠭᠠᠵᠠᠷ ᠤ᠋ᠨ ᠢ᠋ᠶ᠋ᠠᠨ ᠶᠡᠬᠡ ᠨᠣᠶᠠᠨ ᠲᠠᠢ ᠬᠡᠯᠡᠯᠴᠡᠭᠡ ᠬᠢᠵᠦ ᠨᠢᠭᠡ ᠬᠣᠶᠠᠷ ᠬᠣᠨᠣᠭᠠᠳ ᠯᠠ ᠪᠥᠬᠡᠬᠡᠭᠲᠦ ᠲᠡᠷᠭᠡᠨ ᠳ᠋ᠦ᠍ ᠪᠡᠨ ᠡᠯᠳᠡᠪ ᠰᠠᠪᠠ ᠲᠠᠢ ᠬᠠᠲᠠᠭᠤ ᠠᠷᠢᠬᠢ ᠬᠢᠵᠦ ᠠᠪᠤᠭᠠᠳ ᠳᠠᠪᠬᠢᠵᠤ ᠪᠠᠢᠯᠠ ᠭᠡᠨᠡ᠃ ᠶᠠᠪᠤᠭᠰᠠᠨ ᠬᠡᠷᠡᠭ ᠨᠢ ᠪᠦᠲᠦᠮᠵᠢᠲᠡᠢ ᠪᠣᠯᠵᠠᠢ᠃
ᠴᠠᠭᠠᠲᠠᠢ ᠬᠠᠭᠠᠨ ᠤ᠋ ᠤᠳᠤᠮ ᠤ᠋ᠨ ᠨᠣᠶᠠᠳ ᠤ᠋ᠳ᠂ ᠪᠠᠲᠤ ᠬᠠᠨ ᠤ᠋ ᠣᠷᠣ ᠰᠠᠭᠤᠭᠰᠠᠨ ᠬᠠᠨ ᠪᠣᠯᠵᠤ᠂ ᠲᠡᠭᠦᠨ ᠦ᠌ ᠵᠠᠬᠢᠷᠭᠠᠨ ᠳ᠋ᠤ᠌ ᠪᠠᠢᠭᠠ ᠳᠡᠭᠡᠳᠦᠰ ᠦ᠋ᠳ ᠪᠠᠷᠤᠭ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠭᠦᠷᠦᠨ ᠦ᠌ ᠶᠡᠬᠡ ᠬᠠᠭᠠᠨ ᠢ᠋ ᠨᠡᠩ ᠳᠠᠷᠤᠢ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠶᠠ᠃ ᠤᠯᠤᠰ ᠡᠵᠡᠨ ᠦᠭᠡᠢᠳᠡᠵᠦ ᠮᠠᠭᠠᠳ ᠦᠭᠡᠢ ᠪᠠᠢᠨᠠ᠃ ᠰᠠᠯᠠᠩ ᠵᠠᠳᠠᠭᠠᠢ ᠶᠠᠪᠤᠳᠠᠯ ᠳᠡᠯᠭᠡᠷᠡᠵᠦ᠂ ᠡᠯᠳᠡᠪ ᠠᠰᠢᠭ ᠵᠠᠪᠰᠢᠶᠠᠨ ᠬᠥᠭᠡᠭᠡᠭᠴᠢᠳ ᠢ᠋ ᠲᠣᠯᠣᠭᠠᠢ ᠥᠨᠳᠡᠢᠯᠭᠡᠨ᠂ ᠲᠢᠭ ᠵᠢᠷᠤᠮ ᠰᠤᠯᠠᠷᠠᠵᠤ᠂ ᠶᠣᠰᠣ ᠦᠭᠡᠢ ᠡᠲᠡᠭᠡᠳ ᠦ᠋ᠳ ᠶᠣᠰᠣ ᠶ᠋ᠢ ᠡᠳ᠋ᠯᠡᠬᠦ ᠰᠠᠨᠠᠭᠠᠲᠠᠢ ᠪᠣᠯᠵᠤ ᠪᠠᠢᠨᠠ᠃ ᠬᠠᠲᠠᠭᠤ ᠳᠢᠭᠯᠢᠮ ᠳᠡᠭᠡᠳᠦ ᠪᠣᠭᠳᠠ ᠶ᠋ᠢᠨ ᠲᠣᠭᠲᠠᠭᠠᠭᠰᠠᠨ ᠵᠢᠷᠤᠮ ᠭᠣᠷᠢᠮ᠂《ᠶᠡᠬᠡ ᠵᠠᠰᠠᠭ》 ᠬᠠᠤᠯᠢ ᠪᠠᠨ ᠳᠠᠷᠤᠢ ᠰᠡᠷᠭᠦᠭᠡᠬᠦ ᠪᠣᠯᠤᠯᠠ᠃ ᠮᠥᠩᠬᠡ ᠬᠠᠭᠠᠨᠲᠠᠨ ᠨᠢᠭᠡᠨᠲᠡ ᠭᠠᠯ ᠭᠣᠯᠣᠮᠲᠠ ᠪᠠᠨ ᠠᠷᠢᠬᠪᠥᠢ᠍ᠬᠡ ᠨᠣᠶᠠᠨ ᠢ᠋ᠶ᠋ᠠᠷ ᠰᠠᠬᠢᠭᠤᠯᠤᠭᠰᠠᠨ ᠪᠣᠯᠬᠣᠷ ᠡᠨᠡ ᠬᠥᠮᠦᠨ ᠣᠷᠣ ᠰᠠᠭᠤᠬᠤ ᠶᠣᠰᠣᠲᠠᠢ᠃ ᠪᠢᠳᠡ ᠲᠡᠭᠦᠨ ᠢ᠋ ᠡᠷᠭᠦᠮᠵᠢᠯᠡᠨ ᠳᠡᠮᠵᠢᠨᠡ᠃ ᠵᠢᠩᠬᠢᠨᠢ ᠮᠣᠩᠭᠣᠯ ᠦᠵᠡᠯᠲᠡᠢ ᠪᠠᠢᠭᠠ ᠪᠠᠨ ᠲᠡᠳᠡᠭᠡᠷ ᠣᠴᠢᠭᠰᠠᠨ ᠭᠠᠵᠠᠷ ᠤ᠋ᠨ ᠶᠡᠬᠡᠰ ᠨᠣᠶᠠᠳ ᠤ᠋ᠳ ᠰᠦᠢᠲᠦ ᠨᠣᠶᠠᠨ ᠲᠠᠢ ᠬᠢᠭᠰᠡᠨ ᠬᠡᠯᠡᠯᠴᠡᠭᠡᠷ ᠳᠡᠭᠡᠷᠡ ᠲᠡᠮᠳᠡᠭᠯᠡᠵᠦ᠂ ᠠᠷᠢᠬᠪᠥᠢ᠍ᠬᠡ ᠳ᠋ᠦ᠍ ᠶᠣᠰᠣ ᠬᠢᠨ ᠬᠦᠨᠳᠦᠳᠬᠡᠯ ᠦ᠋ᠨ ᠵᠦᠢᠯ ᠢ᠋ ᠳᠠᠮᠵᠢᠭᠤᠯᠤᠨ ᠪᠠᠷᠢᠭᠰᠠᠨ ᠪᠠᠢᠨᠠ᠃
ᠰᠦᠢᠲᠦ ᠨᠣᠶᠠᠨ ᠴᠦ᠍ ᠲᠡᠷᠡ ᠨᠣᠶᠠᠳ ᠲᠠᠢ ᠬᠡᠯᠡᠯᠴᠡᠭᠡ ᠬᠢᠬᠦ ᠳ᠋ᠦ᠍ ᠪᠡᠨ ᠤᠴᠢᠷ ᠵᠦᠢ ᠶ᠋ᠢ ᠲᠠᠢᠯᠪᠤᠷᠢᠯᠠᠵᠤ᠂ ᠬᠡᠷᠡᠭ ᠦ᠋ᠨ ᠡᠪ ᠵᠦᠢ ᠶ᠋ᠢ ᠣᠯᠵᠤ ᠲᠠᠨᠢᠯᠴᠠᠭᠤᠯᠵᠤ ᠴᠢᠳᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠪᠲᠠᠢ᠂ ᠳ᠋ᠦᠶ᠋ᠲᠠᠢ ᠠᠵᠢ᠃ ᠡᠨᠡ ᠨᠣᠶᠠᠨ ᠤ᠋ ᠡᠯᠪᠡᠭ ᠰᠠᠢᠬᠠᠨ ᠦᠭᠡ ᠲᠡᠢ ᠶ᠋ᠢ ᠪᠢᠯᠢᠭᠦᠨ ᠱᠠᠭᠰᠢᠨ ᠮᠠᠭᠲᠠᠵᠤ ᠪᠠᠷᠠᠬᠤ ᠦᠭᠡᠢ ᠪᠠᠢᠯᠠ᠃ ᠰᠦᠢᠲᠦ ᠨᠣᠶᠠᠨ ᠪᠠᠲᠤ ᠶ᠋ᠢᠨ ᠣᠷᠣ ᠰᠠᠭᠤᠭᠰᠠᠨ① ᠬᠠᠨ ᠳ᠋ᠤ᠌ ᠣᠴᠢᠭᠠᠳ ᠪᠠᠷᠠᠯᠬᠠᠩᠭᠠᠨ ᠭᠦᠨ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠵᠦ ᠪᠠᠢᠭᠠ ᠶ᠋ᠢ ᠨᠢ ᠬᠠᠷᠠᠭᠠᠳ ᠪᠠᠢᠮᠠᠷ ᠰᠦᠷᠲᠡᠢ ᠪᠠᠢᠵᠠᠢ᠃
ᠲᠡᠷᠡ ᠪᠡᠷ ᠳᠠᠭᠠᠭᠤᠯ ᠠᠷᠪᠠᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠶᠣᠰᠣ ᠳᠥᠷᠦᠲᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠤᠪᠴᠠᠰᠤᠯᠠᠭᠤᠯᠤᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠭᠣᠶᠣ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠦᠭᠰᠡᠨ᠂ ᠭᠤᠷᠪᠠᠨ ᠳᠠᠪᠬᠤᠷ ᠲᠠᠰᠤᠯᠭᠠ ᠪᠠᠨ ᠳᠠᠮᠵᠢᠨ ᠣᠷᠣᠳᠠᠭ ᠬᠠᠭᠠᠯᠭᠠ ᠪᠠᠷ ᠳᠠᠭᠠᠭᠤᠯ ᠨᠤᠭᠤᠳ ᠢ᠋ᠶ᠋ᠠᠨ ᠠᠷᠤ ᠠ᠋ᠴᠠ ᠪᠠᠨ ᠴᠤᠪᠤᠷᠠᠭᠤᠯᠤᠨ ᠣᠷᠣᠵᠤ᠂ ᠶᠡᠬᠡ ᠴᠠᠭᠠᠨ ᠲᠣᠷᠭᠠ ᠳᠡᠯᠭᠡᠨ᠂ ᠳᠡᠭᠡᠷᠡ ᠨᠢ ᠠᠯᠲᠠᠨ ᠠᠶᠠᠭᠠᠨ ᠳ᠋ᠤ᠌ ᠢᠳᠡᠭᠡ ᠵᠢᠮᠢᠰ ᠬᠢᠨ ᠲᠠᠯᠪᠢᠭᠠᠳ᠂ ᠲᠡᠭᠦᠨ ᠢ᠋ ᠪᠡᠨ ᠬᠣᠶᠠᠷ ᠭᠠᠷᠳᠠᠨ ᠪᠠᠷᠢᠵᠤ ᠬᠠᠨ ᠳ᠋ᠤ᠌ ᠡᠷᠭᠦᠨ ᠭᠤᠷᠪᠠᠨᠲᠠ ᠰᠥᠭᠥᠳᠴᠦ
— ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠳᠡᠭᠡᠳᠦᠰ ᠬᠠᠭᠠᠨᠲᠠᠨ ᠠᠮᠤᠭᠤᠯᠠᠩ ᠮᠣᠷᠢᠯᠠᠵᠤ ᠪᠠᠢᠨᠠ ᠤᠤ ? ᠲᠠᠨ ᠤ᠋ ᠭᠠᠯ ᠭᠣᠯᠣᠮᠲᠠ ᠬᠠᠷᠠᠬᠣᠷᠣᠮ ᠠ᠋ᠴᠠ ᠡᠷᠬᠢᠮ ᠬᠠᠨᠳᠠᠨ ᠤ᠋ ᠠᠮᠤᠭᠤᠯᠠᠩ ᠢ᠋ ᠰᠥᠭᠥᠳᠦᠶᠡ ! ᠭᠡᠳ ᠡᠷᠭᠦᠯ ᠶᠠᠭᠤᠮᠠ ᠪᠠᠨ ᠪᠠᠷᠢᠵᠤ᠂ ᠳᠠᠭᠠᠯᠳᠤᠨ ᠶᠠᠪᠤᠭᠠ ᠬᠥᠮᠦᠰ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠳᠠᠷᠠᠭᠠᠯᠠᠨ ᠲᠠᠨᠢᠯᠴᠠᠭᠤᠯᠤᠨ ᠶᠣᠰᠣ ᠬᠢᠯᠭᠡᠪᠡ᠃ ᠡᠨᠡ ᠶᠣᠰᠣᠯᠠᠯ ᠨᠢ ᠰᠦᠷᠲᠡᠢ ᠠᠭᠠᠳ᠂ ᠨᠥᠭᠦᠭᠡ ᠬᠠᠨ ᠪᠡᠷᠬᠡ ᠶ᠋ᠢᠨ ᠰᠡᠳᠬᠢᠯ ᠢ᠋ ᠬᠥᠳᠡᠯᠭᠡᠬᠦ ᠪᠡᠷ ᠡᠷᠬᠢᠮ ᠬᠦᠨᠳᠦᠳᠬᠡᠯᠲᠡᠢ ᠪᠠᠢᠵᠠᠢ᠃ ᠰᠦᠢᠲᠦ ᠨᠣᠶᠠᠨ ᠰᠠᠭᠤᠳᠠᠯ ᠪᠠᠷᠢᠵᠤ ᠦᠷᠭᠦᠯᠵᠢᠯᠡᠭᠦᠯᠦᠨ᠂ ᠨᠤᠲᠤᠭ ᠣᠷᠣᠨ ᠤ᠋ ᠪᠠᠨ ᠲᠤᠬᠠᠢ ᠲᠠᠨᠢᠯᠴᠠᠭᠤᠯᠭᠠ ᠬᠢᠭᠡᠳ
— ᠡᠷᠬᠢᠮ ᠳᠡᠭᠡᠳᠦ ᠬᠦᠦ ᠠᠷᠢᠬᠪᠦ᠋ᠬᠡ ᠨᠣᠶᠠᠨ ᠬᠠᠭᠠᠨᠲᠠᠨ ᠲᠠᠨ ᠳ᠋ᠤ᠌ ᠪᠡᠶᠡ ᠪᠡᠷ ᠢᠷᠡᠵᠦ ᠠᠭᠤᠯᠵᠠᠬᠤ ᠭᠦᠨ ᠬᠦᠰᠡᠯᠲᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠬᠡᠷᠡᠭ ᠶᠠᠪᠤᠳᠠᠯ ᠠ᠋ᠴᠠ ᠰᠢᠯᠲᠠᠭᠠᠯᠠᠨ᠂ ᠬᠠᠷᠠᠬᠣᠷᠣᠮ ᠢ᠋ ᠣᠷᠬᠢᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠤᠭᠠᠳ ᠥᠴᠦᠬᠡᠨ ᠨᠠᠮᠠᠶ᠋ᠢ ᠢᠲᠡᠭᠡᠮᠵᠢᠯᠡᠨ ᠲᠠᠨ ᠳ᠋ᠤ᠌ ᠰᠢᠳᠠᠷᠯᠠᠭᠤᠯᠬᠤ ᠪᠠᠷ ᠵᠠᠷᠤᠭᠰᠠᠨ ᠲᠤᠯᠠ ᠪᠠᠷᠠᠯᠬᠠᠵᠤ ᠪᠠᠢᠨᠠ ᠭᠡᠵᠦ ᠠᠢᠯᠠᠳᠬᠠᠨ᠂ ᠪᠠᠷᠠ ᠪᠣᠯᠤᠭᠴᠢᠳ ᠢ᠋ ᠪᠡᠨ ᠴᠢᠯᠥᠭᠡᠯᠡᠵᠦ ᠬᠣᠶᠠᠷᠬᠠᠨ ᠪᠡᠶᠡ ᠪᠡᠷ ᠰᠠᠭᠤᠨ᠂ ᠬᠡᠷᠡᠭ ᠢ᠋ᠶ᠋ᠡᠨ ᠬᠡᠯᠡᠯᠴᠡᠵᠡᠢ᠃ ᠰᠦᠢᠲᠦ ᠨᠣᠶᠠᠨ ᠠᠯᠲᠠᠨ ᠣᠷᠳᠣᠨ ᠤ᠋ ᠬᠠᠨ ᠳ᠋ᠤ᠌ ᠠᠢᠯᠠᠳᠬᠠᠬᠤ ᠳ᠋ᠤ᠌ ᠪᠠᠨ ᠶᠡᠬᠡ ᠭᠦᠷᠦᠨ ᠦ᠌ ᠡᠵᠡᠨ ᠬᠠᠭᠠᠨ ᠤ᠋ ᠰᠢᠷᠡᠭᠡᠨ ᠳ᠋ᠦ᠍ ᠮᠥᠩᠬᠡ ᠶ᠋ᠢᠨ ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠨᠣᠶᠠᠨ ᠢ᠋ ᠰᠠᠭᠤᠯᠭᠠᠬᠤ ᠬᠦᠰᠡᠯ ᠢ᠋ ᠰᠢᠳᠠᠷ ᠨᠣᠶᠠᠳ ᠤ᠋ᠳ ᠢᠯᠡᠷᠬᠡᠢᠯᠡᠵᠦ ᠪᠠᠢᠭᠠ ᠪᠥᠭᠡᠳ ᠬᠠᠭᠠᠨᠲᠠᠨ ᠲᠠᠨ ᠤ᠋ ᠲᠠᠭᠠᠯᠠᠯ ᠢ᠋ ᠠᠰᠠᠭᠤᠵᠤ ᠶᠠᠪᠤᠨᠠ ᠭᠡᠵᠦ ᠥᠴᠢᠭᠰᠡᠨ ᠪᠠᠢᠨᠠ᠃ ᠶᠠᠷᠢᠶᠠ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠵᠦ᠂ ᠬᠠᠨ ᠪᠡᠷᠬᠡ ᠡᠴᠡ ᠠᠷᠢᠬᠪᠦ᠋ᠬᠡ ᠲᠡᠢ ᠬᠡᠨ ᠶᠠᠭᠠᠬᠢᠵᠤ ᠥᠷᠢᠰᠦᠯᠳᠦᠨ ᠪᠣᠢ ᠶ᠋ᠢ ᠯᠠᠪᠯᠠᠭᠰᠠᠨ ᠠᠵᠢ᠃ ᠰᠦᠢᠲᠦ ᠨᠣᠶᠠᠨ ᠰᠢᠯᠤᠭᠤᠬᠠᠨ ᠢ᠋ᠶ᠋ᠠᠷ ᠬᠢᠲᠠᠳ ᠭᠠᠵᠠᠷ ᠢ᠋ ᠮᠡᠳᠡᠨ ᠵᠠᠬᠢᠷᠤᠭᠴᠢ ᠬᠤᠪᠢᠯᠠᠢ ᠨᠣᠶᠠᠨ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠰᠠᠭᠤᠬᠤ ᠳᠠᠯᠳᠠ ᠶ᠋ᠢᠨ ᠪᠣᠳᠣᠯᠭᠠ ᠲᠠᠢ ᠪᠠᠢ ᠪᠡᠯᠡᠳᠬᠡᠨ ᠪᠣᠢ ᠯᠠᠪᠲᠠᠢ ᠮᠡᠳᠡᠭᠡ ᠪᠣᠢ ᠶ᠋ᠢ ᠬᠠᠨ ᠳ᠋ᠤ᠌ ᠠᠢᠯᠠᠳᠬᠠᠵᠠᠢ ᠃
ᠣᠷᠳᠣᠨ ᠤ᠋ ᠬᠠᠨ ᠪᠡᠷᠬᠡ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠪᠣᠳᠣᠨ ᠲᠤᠩᠭᠠᠭᠠᠵᠤ ᠦᠵᠡᠭᠡᠳ᠂ ᠲᠠᠢᠪᠤᠩ ᠪᠠᠢᠳᠠᠯ ᠢ᠋ᠶ᠋ᠠᠷ
— ᠪᠢ ᠰᠠᠨᠠᠪᠠᠯ ᠶᠡᠬᠡ ᠬᠠᠭᠠᠨ ᠰᠡᠷᠡᠭᠦᠨ ᠲᠤᠩᠭᠠᠯᠠᠭ ᠪᠠᠢᠬᠤ ᠳ᠋ᠤ᠌ ᠪᠠᠨ ᠨᠢᠭᠡᠨᠲᠡ ᠭᠠᠯ ᠭᠣᠯᠣᠮᠲᠠ ᠪᠠᠨ ᠰᠠᠬᠢᠭᠤᠯᠤᠨ ᠲᠠᠯᠪᠢᠭᠰᠠᠨ ᠲᠡᠷᠡ ᠨᠣᠶᠠᠨ ᠯᠠ ᠣᠷᠣ ᠰᠠᠭᠤᠬᠤ ᠶᠣᠰᠣᠲᠠᠢ᠃ ᠲᠡᠢᠮᠦ ᠵᠢᠷᠤᠮ ᠶᠣᠰᠣ ᠶ᠋ᠢ ᠪᠣᠭᠳᠠ ᠥᠪᠡᠷ ᠢ᠋ᠶ᠋ᠡᠨ ᠲᠣᠭᠲᠠᠭᠠᠨ ᠲᠠᠭᠠᠯᠠᠵᠤ ᠵᠠᠬᠢᠶᠠᠰᠤ ᠪᠣᠯᠭᠠᠭᠰᠠᠨ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠬᠡᠨ ᠴᠦ᠍ ᠡᠪᠳᠡᠬᠦ ᠤᠴᠢᠷ ᠦᠭᠡᠢ ᠪᠢᠰᠢ ᠤᠤ ᠭᠡᠯᠡ ᠃
— ᠬᠠᠭᠠᠨᠲᠠᠨ ᠲᠠ ᠮᠡᠷᠭᠡᠨ ᠢ᠋ᠶ᠋ᠡᠷ ᠠᠢᠯᠠᠳᠴᠤ ᠪᠠᠢᠨᠠ᠃ ᠤᠭᠰᠠᠭᠠᠨ ᠤ᠋ ᠨᠣᠶᠠᠳ ᠪᠢᠳᠡ ᠲᠡᠭᠡᠵᠦ ᠦᠵᠡᠵᠦ ᠪᠠᠢᠭᠠ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ ᠬᠤᠪᠢᠯᠠᠢ ᠡᠪᠳᠡᠬᠦ ᠶ᠋ᠢ ᠬᠢᠴᠢᠶᠡᠨ ᠪᠣᠢ ᠨᠢ ᠢᠯᠡᠳᠲᠡ ᠪᠣᠯᠤᠭᠰᠠᠨ᠃ ᠲᠡᠷᠡ ᠵᠠᠬᠢᠷᠤᠭᠴᠢ ᠳᠡᠷᠭᠡᠳᠡ ᠪᠡᠨ ᠪᠠᠬᠠᠨ ᠬᠢᠲᠠᠳ ᠨᠣᠶᠠᠳ ᠲᠦᠰᠢᠮᠡᠳ ᠴᠤᠭᠯᠠᠭᠤᠯᠤᠨ᠂ ᠲᠡᠳᠡᠨ ᠦ᠌ ᠪᠡᠨ ᠬᠦᠴᠦ ᠪᠡᠷ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠠᠪᠬᠤ ᠭᠡᠵᠦ ᠳᠠᠯᠳᠠᠭᠤᠷ ᠬᠤᠤᠪᠢᠯᠳᠤᠭᠠᠨ ᠬᠢᠵᠦ ᠪᠣᠢ ᠶ᠋ᠢ ᠪᠢᠳᠡ ᠮᠡᠳᠡᠭᠰᠡᠨ ᠤᠴᠢᠷ ᠤᠭ ᠪᠠᠢᠳᠠᠯ ᠢ᠋ ᠲᠠᠨ ᠳ᠋ᠤ᠌ ᠠᠢᠯᠠᠳᠬᠠ ᠭᠡᠵᠦ ᠠᠷᠢᠬᠪᠦ᠋ᠬᠡ ᠵᠠᠬᠢᠷᠤᠭᠴᠢ ᠪᠣᠭᠣᠯ ᠨᠠᠮᠠᠶ᠋ᠢ ᠢᠯᠡᠳᠬᠡᠨ ᠶᠠᠪᠤᠭᠤᠯᠤᠭᠰᠠᠨ ᠪᠢᠯᠡ ᠁ ᠭᠡᠮᠡᠨ ᠶᠠᠷᠢᠵᠠᠢ᠃ ᠵᠠᠯᠠᠭᠤ ᠬᠠᠨ ᠪᠣᠳᠣᠯ ᠪᠣᠯᠤᠨ ᠪᠠᠢᠵᠤ
— ᠪᠢ ᠪᠠᠢᠳᠠᠯ ᠢ᠋ ᠮᠡᠳᠡᠯᠡ᠃ ᠲᠠ ᠪᠦᠬᠦᠨ ᠵᠥᠪ ᠢ᠋ ᠪᠣᠯᠭᠣᠭᠠᠵᠤ ᠪᠠᠢᠨᠠ᠃ ᠨᠡᠢᠰᠯᠡᠯ ᠦ᠋ᠨ ᠵᠠᠬᠢᠷᠤᠭᠴᠢ ᠪᠣᠯᠤᠭᠰᠠᠨ ᠨᠣᠶᠠᠨ ᠣᠷᠣ ᠰᠠᠭᠤᠬᠤ ᠨᠢ ᠲᠦᠮᠡᠨ ᠵᠥᠪ᠃ ᠪᠢ ᠢᠩᠭᠢᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠡᠨᠡ ᠬᠡᠷᠡᠭ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠬᠥᠶᠦᠭ ᠬᠠᠭᠠᠨ ᠢ᠋ ᠨᠠᠰᠤ ᠡᠴᠦᠰᠯᠡᠭᠰᠡᠨ ᠦ᠌ ᠳᠠᠷᠠᠭᠠ ᠮᠥᠩᠬᠡ ᠶ᠋ᠢ ᠣᠷᠣ ᠰᠠᠭᠤᠬᠤ ᠳ᠋ᠤ᠌ ᠪᠣᠯᠤᠭᠰᠠᠨ ᠠ᠋ᠴᠠ ᠳᠤᠲᠠᠭᠤ ᠦᠭᠡᠢ ᠬᠡᠷᠡᠭ ᠳᠡᠭᠳᠡᠵᠦ ᠮᠠᠭᠠᠳ ᠦᠭᠡᠢ ᠰᠢᠪ᠃ ᠮᠠᠨ ᠤ᠋ ᠶᠡᠬᠡ ᠠᠬᠠ ᠬᠠᠭᠠᠨ ᠤ᠋ ᠥᠪᠡᠷ ᠦ᠋ᠨ ᠰᠢᠯᠢᠮᠡᠯ ᠴᠡᠷᠢᠭ ᠢ᠋ ᠨᠠᠳᠠ ᠪᠠᠷ ᠲᠡᠷᠢᠭᠦᠯᠡᠨ ᠮᠥᠩᠬᠡ ᠳ᠋ᠦ᠍ ᠶᠠᠪᠤᠭᠤᠯᠤᠨ᠂ ᠲᠡᠨᠳᠡ ᠤᠳᠠᠭᠠᠨ ᠪᠠᠢᠯᠭᠠᠭᠰᠠᠨ᠃ ᠡᠦᠲᠦ ᠲᠡᠭᠦᠨ ᠲᠡᠢ ᠠᠳᠠᠯᠢ ᠪᠠᠷ ᠪᠢᠳᠡ ᠴᠡᠷᠢᠭ ᠶᠠᠪᠤᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠣᠷᠣ ᠰᠠᠭᠤᠬᠤ ᠶᠣᠰᠣᠯᠠᠯ ᠳ᠋ᠤ᠌ ᠪᠢ ᠪᠡᠶᠡ ᠪᠡᠷ ᠪᠤᠶᠤ ᠲᠥᠯᠥᠭᠡᠨ ᠦ᠌ ᠡᠯᠴᠢ ᠪᠡᠨ ᠵᠠᠷᠤᠨᠠ᠃ ᠬᠤᠪᠢᠯᠠᠢ ᠲᠡᠷᠡ ᠬᠢᠲᠠᠳ ᠣᠷᠣᠨ ᠢ᠋ᠶ᠋ᠠᠨ ᠯᠠ ᠪᠦᠷᠢᠨ ᠡᠷᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠣᠰᠣ ᠪᠠᠷ ᠰᠠᠭᠤᠵᠤ ᠪᠠᠢᠪᠠᠯ ᠲᠠᠭᠠᠷᠠᠬᠤ ᠪᠢᠰᠢ ᠤᠤ᠃ ᠬᠤᠪᠢᠯᠠᠢ ᠪᠣᠯ ᠬᠢᠲᠠᠳ ᠠᠳᠠᠯᠢ ᠰᠠᠭᠤᠷᠢᠨ ᠰᠠᠭᠤᠬᠤ ᠳᠠᠭᠠᠯᠠᠯᠲᠠᠢ ᠪᠣᠯᠤᠭᠰᠠᠨ᠃ ᠮᠥᠩᠬᠡ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠡᠬᠢᠯᠡᠭᠦᠯᠦᠭᠰᠡᠨ ᠱᠠᠩᠳᠤ ᠬᠣᠲᠠ ᠶ᠋ᠢ ᠥᠪᠡᠷ ᠦ᠋ᠨ ᠪᠣᠯᠭᠠᠵᠤ ᠠᠪᠤᠭᠰᠠᠨ ᠭᠡᠳᠡᠭ ᠦᠭᠡ ᠨᠠᠳᠠᠳᠤ ᠪᠠᠲᠤᠲᠠᠢ ᠰᠣᠨᠣᠰᠤᠭᠳᠠᠭᠰᠠᠨ ᠪᠣᠢ ᠁ ᠭᠡᠬᠦᠴᠢᠯᠡᠨ ᠵᠦᠢᠯ ᠢ᠋ ᠶᠠᠷᠢᠭᠠᠳ᠂ ᠰᠦᠢᠲᠦ ᠨᠣᠶᠠᠨ ᠢ᠋ ᠦᠷᠭᠦᠭᠡᠨ ᠳ᠋ᠦ᠍ ᠪᠡᠨ ᠲᠠᠭᠠᠯᠠᠨ ᠬᠡᠳᠦ ᠬᠣᠨᠣᠭ ᠪᠠᠢᠬᠤ ᠶ᠋ᠢ ᠤᠷᠢᠭᠰᠠᠨ ᠪᠠᠢᠨᠠ᠃ ᠠᠭᠤᠯᠵᠠᠯᠲᠠ ᠡᠢᠮᠦ ᠪᠠᠢᠲᠠᠯᠲᠠᠢ ᠲᠡᠭᠦᠰᠴᠡᠢ᠃
ᠬᠦᠯᠦᠭ ᠳᠡᠭᠦᠦ ᠡᠴᠡ ᠪᠠᠨ ᠡᠨᠡ ᠪᠦᠭᠦᠳᠡ ᠶ᠋ᠢ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠬᠠᠨᠤᠭᠰᠠᠨ ᠪᠠᠢᠲᠠᠯᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠯᠠᠨ ᠣᠷᠣᠨ ᠳᠡᠮᠵᠢᠵᠦ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠵᠠᠮ ᠳ᠋ᠤ᠌ ᠦᠵᠡᠭᠰᠡᠨ ᠪᠤᠰᠤᠳ ᠡᠩ ᠦ᠋ᠨ ᠵᠦᠢᠯ ᠡᠴᠡ ᠪᠡᠨ ᠶᠠᠷᠢᠵᠤ ᠥᠭᠬᠦ ᠶ᠋ᠢ ᠡᠷᠢᠯᠡ᠃ ᠪᠢᠯᠢᠭᠦᠨ ᠲᠠᠭᠠᠯᠠᠨ ᠢᠨᠢᠶᠡᠵᠦ
— ᠠᠯᠢ ᠦᠵᠡᠵᠦ ᠬᠠᠷᠠᠭᠠ ᠦᠭᠡᠢ ᠰᠣᠨᠢᠨ ᠬᠠᠴᠢᠨ ᠶᠠᠭᠤᠮᠠ ᠶ᠋ᠢ ᠲᠡᠷᠡ ᠭᠡᠬᠦ ᠪᠣᠢ ᠭᠡᠳ᠂ ᠥᠭᠦᠯᠡᠭᠰᠡᠨ ᠨᠢ ᠄ ᠫᠧᠷᠰ ᠦ᠋ᠨ ᠪᠤᠯᠤᠩ ᠭᠡᠳᠡᠭ ᠶᠡᠬᠡ ᠨᠠᠭᠤᠷ ᠤ᠋ᠨ ᠬᠠᠪᠢ ᠳ᠋ᠤ᠌ ᠫᠤᠷᠮᠤᠽ ᠬᠣᠲᠠ ᠶ᠋ᠢᠨ ᠬᠢᠨ ᠬᠠᠨᠢᠶᠠᠳᠤ ᠡᠪᠡᠳᠴᠢᠨ ᠬᠦᠷᠬᠦ ᠦᠭᠡᠢ ᠭᠡᠳ ᠮᠢᠬᠠ ᠢᠳᠡᠬᠦ ᠦᠭᠡᠢ᠂ ᠳᠠᠪᠤᠰᠤᠯᠠᠭᠰᠠᠨ ᠵᠢᠭᠠᠰᠤ᠂ ᠰᠣᠩᠭᠢᠨᠠ ᠪᠠᠷ ᠬᠣᠭᠣᠯᠠᠯᠠᠳᠠᠭ ᠶᠤᠮ ᠭᠡᠳᠡᠭ ᠭᠡᠬᠦ ᠳ᠋ᠦ᠍ ᠬᠦᠯᠦᠭ ᠳᠠᠭᠤ ᠠᠯᠲᠠᠨ
— ᠫᠧᠷᠰ ᠬᠤᠮᠢᠨᠢ ᠲᠠᠩᠳᠠ ᠬᠠᠲᠠᠭᠰᠠᠨ ᠵᠢᠭᠠᠰᠤ᠂ ᠳᠠᠪᠤᠰᠤ ᠲᠠᠢ ᠬᠣᠯᠢᠵᠤ ᠢᠳᠡᠭᠡᠳ᠂ ᠠᠷᠢᠬᠢ ᠪᠠᠯᠭᠤᠵᠤ ᠶᠠᠪᠤᠳᠠᠭ᠃ ᠲᠡᠢᠮᠦ ᠤᠴᠢᠷᠲᠠᠢ ᠪᠠᠢᠵᠠᠢ ᠭᠡᠯᠡ᠃
— ᠮᠤᠬᠠᠮᠸᠳ᠋ ᠢ᠋ ᠰᠢᠲᠦᠭᠰᠡᠨ ᠨᠢᠭᠡ ᠵᠢᠵᠢᠭ ᠣᠷᠣᠨ ᠳ᠋ᠤ᠌ ᠬᠥᠮᠦᠰ ᠨᠢ ᠠᠷᠪᠠᠨ ᠠᠯᠠᠭᠠ ᠳᠠᠷᠤᠮᠠ ᠳᠡᠭᠡᠰᠦ ᠮᠡᠲᠦ ᠪᠥᠭᠡᠷᠡᠩᠬᠡᠢᠯᠡᠭᠰᠡᠨ ᠳᠠᠪᠤᠤ ᠪᠠᠷ ᠲᠣᠯᠣᠭᠠᠢ ᠪᠠᠨ ᠣᠷᠢᠶᠠᠵᠤ᠂ ᠠᠯᠴᠢᠭᠤᠷ᠂ ᠮᠠᠯᠠᠭᠠᠢ ᠬᠡᠷᠡᠭᠯᠡᠬᠦ ᠦᠭᠡᠢ ᠪᠠᠢᠬᠤ ᠶᠤᠮ᠃ ᠪᠢᠳᠡ ᠺᠠᠮᠤᠯ (ᠬᠠᠮᠢ) ᠭᠡᠳᠡᠭ ᠭᠠᠵᠠᠷ ᠢ᠋ ᠳᠠᠭᠠᠷᠢᠵᠤ ᠥᠩᠭᠡᠷᠡᠯᠡ᠃ ᠲᠡᠨᠳᠡ ᠶᠡᠬᠡ ᠰᠣᠨᠢᠨ ᠵᠠᠩᠰᠢᠯᠲᠠᠢ ᠪᠠᠢᠨᠠ᠃ ᠬᠠᠷᠢ ᠶ᠋ᠢᠨ ᠵᠣᠴᠢᠨ ᠬᠥᠮᠦᠨ ᠢᠷᠡᠪᠡᠯ ᠲᠤᠢᠯ ᠤ᠋ᠨ ᠶᠡᠬᠡ ᠪᠠᠶᠠᠷᠲᠠᠢ ᠤᠭᠲᠤᠳᠠᠭ᠃ ᠭᠡᠷ ᠦ᠋ᠨ ᠡᠵᠡᠨ ᠥᠪᠡᠷ ᠦ᠋ᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠲᠡᠷᠡ ᠢᠷᠡᠭᠰᠡᠨ ᠭᠡᠢᠴᠢᠨ ᠦ᠌ ᠠᠯᠢᠪᠠ ᠬᠦᠰᠡᠯ ᠢ᠋ ᠬᠠᠩᠭᠠᠬᠤ ᠶ᠋ᠢ ᠰᠠᠨᠠᠭᠤᠯᠤᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠠᠢᠯ ᠬᠤᠨᠠᠷ ᠬᠡᠰᠦᠭᠡᠳ ᠬᠡᠳᠦᠨ ᠬᠣᠨᠣᠭ ᠢ᠋ᠶ᠋ᠠᠷ ᠶᠠᠪᠤᠵᠤ ᠣᠷᠬᠢᠳᠠᠭ᠃ ᠲᠡᠷᠡ ᠵᠠᠪᠰᠠᠷ ᠢᠷᠡᠭᠰᠡᠨ ᠭᠡᠢᠴᠢᠨ ᠦᠯᠡᠳᠡᠭᠰᠡᠨ ᠡᠬᠡᠨᠡᠷ ᠲᠡᠢ ᠨᠢ ᠡᠩᠭᠡᠷ ᠵᠥᠷᠢᠭᠦᠯᠦᠨ᠂ ᠶᠠᠭᠤ ᠪᠣᠯᠵᠤ ᠪᠠᠢᠭᠰᠠᠨ ᠴᠦ᠍ ᠡᠷᠡ ᠨᠢ ᠰᠠᠨᠠᠭᠠ ᠵᠣᠪᠠᠳᠠᠭ ᠦᠭᠡᠢ᠃ ᠲᠡᠨᠳᠡᠬᠢ ᠶ᠋ᠢᠨ ᠡᠬᠡᠨᠡᠷ ᠦ᠋ᠳ ᠨᠢ ᠦᠵᠡᠰᠬᠦᠯᠡᠩᠲᠡᠢ ᠪᠥᠭᠡᠳ ᠴᠡᠩᠭᠡᠯ ᠳ᠋ᠦ᠍ ᠳᠤᠷᠠᠲᠠᠢ ᠠᠵᠢ ᠭᠡᠵᠦ ᠶᠠᠷᠢᠬᠤ ᠳ᠋ᠤ᠌ ᠭᠡᠷ ᠳᠦᠭᠦᠷᠡᠩ ᠢᠨᠢᠶᠡᠳᠦᠮ ᠪᠣᠯᠤᠯᠠ᠃ ᠬᠠᠮᠤᠭ ᠤ᠋ᠨ ᠶᠡᠬᠡ ᠡᠳ᠋ ᠪᠠᠶᠠᠯᠢᠭ ᠠᠷᠪᠢᠨ ᠲᠠᠢ᠂ ᠰᠣᠨᠢᠨ ᠬᠠᠴᠢᠨ ᠶᠠᠭᠤᠮᠠ ᠡᠯᠪᠡᠭᠲᠡᠢ ᠣᠷᠣᠨ ᠪᠣᠯ ᠪᠠᠭᠳᠠᠳ᠋② ᠪᠣᠯᠤᠯᠲᠠᠢ᠃ ᠪᠢᠳᠡ ᠲᠡᠨᠳᠡ ᠤᠳᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠶᠠᠭᠠᠷᠠᠨ ᠥᠩᠭᠡᠷᠡᠯᠡ ᠭᠡᠵᠦ ᠪᠢᠯᠢᠭᠦᠨ ᠬᠠᠷᠠᠮᠰᠠᠩᠭᠤᠢ ᠶᠠᠷᠢᠪᠠ᠃ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠲᠡᠨᠳᠡ ᠠᠩᠬᠠᠨ ᠣᠴᠢᠬᠤ ᠳ᠋ᠤ᠌ ᠪᠠᠭᠳᠠᠳ᠋ ᠤ᠋ᠨ ᠬᠠᠯᠢᠹ ᠨᠢ ᠮᠥᠩᠭᠥ᠂ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤ ᠪᠠᠷ ᠬᠣᠣᠰ ᠦᠭᠡᠢ ᠶᠡᠬᠡ ᠪᠠᠶᠠᠨ ᠬᠥᠮᠦᠨ ᠪᠠᠢᠵᠠᠢ᠃ ᠬᠠᠯᠢᠹ ᠤ᠋ᠨ ᠰᠤᠪᠤᠷᠭᠠ ᠶ᠋ᠢ ᠦᠵᠡᠪᠡᠯ ᠤᠷᠢᠳᠤ ᠬᠡᠵᠢᠶᠡ ᠴᠦ᠍᠂ ᠬᠠᠮᠢᠭᠠ ᠴᠦ᠍ ᠲᠠᠭᠠᠷᠠᠯᠳᠤᠵᠤ ᠪᠠᠢᠭᠠ ᠦᠭᠡᠢ ᠲᠡᠢᠮᠦ ᠶᠡᠬᠡ ᠡᠷᠳᠡᠨᠢᠰ ᠳᠣᠲᠣᠷᠠ ᠨᠢ ᠪᠠᠢᠵᠤ᠂ ᠲᠡᠭᠦᠨ ᠢ᠋ ᠪᠡᠨ ᠡᠵᠡᠨ ᠨᠢ ᠦᠵᠡᠭᠦᠯᠬᠦ ᠦᠭᠡᠢ ᠭᠡᠵᠦ ᠬᠠᠷᠠᠮᠯᠠᠭᠰᠠᠨ ᠪᠠᠢᠨᠠ᠃ ᠲᠡᠭᠡᠬᠦ ᠪᠡᠷ ᠨᠢ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠭᠴᠢ ᠲᠡᠷᠡ ᠬᠠᠯᠢᠹ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ ᠰᠤᠪᠤᠷᠭᠠᠨ ᠳ᠋ᠤ᠌ ᠨᠢ ᠡᠷᠳᠡᠨᠢ ᠶ᠋ᠢ ᠨᠢ ᠬᠠᠮᠲᠤ ᠬᠢᠵᠦ ᠰᠠᠭᠤᠯᠭᠠᠨ᠂ ᠡᠭᠦᠨ ᠢ᠋ ᠪᠡᠨ ᠵᠣᠭᠣᠭᠯᠠᠭᠠᠳ ᠪᠠᠢᠵᠤ ᠪᠠᠢ ᠭᠡᠵᠦ ᠬᠡᠯᠡᠭᠡᠳ ᠬᠠᠭᠠᠵᠤ ᠣᠷᠬᠢᠭᠰᠠᠨ ᠳ᠋ᠤ᠌ ᠭᠤᠷᠪᠠ ᠬᠣᠨᠣᠭᠠᠳ ᠨᠥᠭᠦᠭᠡ ᠡᠵᠡᠨ ᠨᠢ ᠨᠠᠰᠤᠨ ᠥᠭᠡᠳᠡ ᠪᠣᠯᠤᠭᠰᠠᠨ ᠪᠠᠢᠵᠠᠢ᠃ ᠡᠢᠮᠦ ᠴᠦ᠍ ᠶᠠᠭᠤᠮᠠ ᠲᠣᠬᠢᠶᠠᠯᠳᠤᠳᠠᠭ ᠪᠠᠢᠨᠠ᠃ ᠶᠢᠷᠲᠢᠨᠴᠦ ᠭᠡᠳᠡᠭ ᠴᠢᠨᠢ ᠶᠠᠮᠠᠷ ᠬᠠᠴᠢᠨ ᠭᠠᠢᠬᠠᠯᠲᠠᠢ ᠪᠣᠢ ᠭᠡᠵᠦ ᠪᠢᠯᠢᠭᠦᠨ ᠶᠠᠷᠢᠵᠤ ᠪᠠᠢᠯᠠ᠃ ᠴᠥᠭᠡᠪᠲᠦᠷ ᠬᠣᠨᠣᠭ ᠤ᠋ᠨ ᠶᠠᠪᠤᠳᠠᠯ ᠴᠤ᠌ ᠭᠡᠰᠡᠨ ᠶᠠᠷᠢᠭᠠᠳ ᠳᠠᠭᠤᠰᠤᠰᠢ ᠦᠭᠡᠢ ᠨᠢ ᠰᠣᠨᠢᠨ᠃ ᠬᠦᠯᠦᠭ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠦᠵᠡᠭᠰᠡᠨ ᠵᠦᠢᠯ ᠢ᠋ ᠠᠮᠲᠠᠷᠬᠠᠨ ᠰᠣᠨᠣᠰᠪᠠ᠃
ᠶᠡᠬᠡ ᠬᠠᠭᠠᠨ ᠤ᠋ ᠤᠷᠲᠤ ᠬᠠᠪᠢ ᠪᠠᠷ ᠬᠥᠯ ᠬᠥᠭᠵᠢᠶᠡᠨ ᠠᠰᠤᠷᠤ ᠶᠡᠬᠡ ᠪᠣᠯᠤᠯᠠ᠃ ᠠᠷᠢᠬᠪᠥ᠋ᠬᠡ ᠵᠠᠬᠢᠷᠤᠭᠴᠢ ᠶ᠋ᠢ ᠣᠷᠣ ᠰᠠᠭᠤᠯᠭᠠᠨᠠ ᠭᠡᠳᠡᠭ ᠦᠭᠡ ᠢᠯᠡ ᠶᠠᠷᠢᠭᠳᠠᠬᠤ ᠪᠣᠯᠪᠠ᠃ ᠰᠤᠷᠬᠤᠭᠲᠠᠨᠢ ᠠᠪᠠᠭᠠᠢ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠭᠠᠳ《ᠮᠢᠨᠦ ᠠᠮᠢᠳᠤ ᠪᠠᠢᠭᠠ ᠳ᠋ᠤ᠌ ᠶᠡᠬᠡ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣ ᠶ᠋ᠢ ᠵᠠᠯᠭᠠᠵᠤ ᠦᠵᠡ᠃ ᠠᠪᠤ ᠴᠢᠨᠢ᠂ ᠬᠠᠭᠠᠨ ᠠᠬᠠ ᠴᠢᠨᠢ ᠴᠢᠮᠠᠲᠤ ᠬᠠᠢᠷᠠᠲᠠᠢ ᠪᠠᠢᠭᠰᠠᠨ᠃ ᠲᠡᠳᠡ ᠴᠢᠮᠠᠲᠤ ᠴᠡᠷᠢᠭ ᠡᠷᠡ ᠶ᠋ᠢᠨ ᠪᠣᠯᠤᠨ ᠪᠢᠴᠢᠭ ᠦ᠋ᠨ ᠡᠷᠳᠡᠮ ᠰᠤᠷᠭᠠᠬᠤ ᠭᠡᠵᠦ ᠭᠣᠴᠣ ᠠᠩᠬᠠᠷᠳᠠᠭ ᠪᠠᠢᠭᠰᠠᠨ᠃ ᠴᠢ ᠵᠣᠷᠢᠮᠠᠭ ᠡᠷᠡᠳᠡᠭᠦᠦ ᠬᠦᠦ ᠪᠣᠯᠬᠣᠷ ᠢ᠋ᠶ᠋ᠠᠨ ᠳᠡᠷᠭᠡᠳᠡᠬᠢ ᠨᠣᠶᠠᠳ ᠤ᠋ᠨ ᠢ᠋ᠶ᠋ᠠᠨ ᠵᠥᠪᠯᠡᠮᠵᠢ ᠶ᠋ᠢ ᠰᠠᠢᠨ ᠰᠣᠨᠣᠰᠤᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠲᠥᠷᠥ ᠪᠠᠷᠢᠵᠤ ᠪᠠᠢᠵᠤ ᠴᠢᠳᠠᠨᠠ᠃ ᠬᠠᠭᠠᠨ ᠬᠥᠮᠦᠨ ᠥᠪᠡᠷ ᠢ᠋ᠶ᠋ᠡᠨ ᠪᠣᠯᠤᠭᠠᠳ ᠪᠤᠰᠤᠳ ᠢ᠋ᠶ᠋ᠠᠷ ᠬᠠᠲᠠᠭᠤ ᠲᠢᠭ ᠵᠢᠷᠤᠮ ᠢ᠋ ᠰᠠᠭᠢᠭᠤᠯᠵᠤ ᠪᠠᠢᠬᠤ ᠶ᠋ᠢ ᠯᠡ ᠡᠷᠬᠢᠮᠯᠡᠬᠦ ᠶᠣᠰᠣᠲᠠᠢ ᠪᠣᠯᠤᠯᠲᠠᠢ ᠪᠢᠯᠡ》 ᠭᠡᠵᠦ ᠬᠡᠯᠡᠵᠦ᠂ ᠤᠷᠢᠳ ᠨᠢ ᠬᠤᠪᠢᠯᠠᠢ ᠶ᠋ᠢ ᠬᠠᠭᠠᠨ ᠰᠠᠭᠤᠯᠭᠠᠬᠤ ᠨᠢ ᠵᠦᠢ ᠭᠡᠳᠡᠭ ᠪᠠᠢᠭᠰᠠᠨ ᠦᠭᠡ ᠪᠡᠨ ᠠᠪᠠᠭᠠᠢ ᠪᠤᠴᠠᠭᠠᠨ ᠠᠪᠴᠠᠢ ᠭᠡᠰᠡᠨ ᠶᠠᠷᠢᠶᠠ ᠳᠡᠯᠭᠡᠷᠡᠪᠡ᠃ ᠲᠡᠷᠡ ᠨᠢ ᠴᠦ᠍ ᠦᠨᠡᠨ ᠠᠵᠢ᠃
ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠷᠭᠡᠳᠡᠬᠢ ᠬᠥᠮᠦᠰ᠂ ᠲᠤᠬᠠᠢᠯᠠᠪᠠᠯ ᠴᠢᠩᠰᠠᠩ ᠰᠢᠳᠠᠷ ᠰᠠᠢᠳ ᠨᠠᠷ᠂ ᠮᠣᠩᠭᠣᠯ ᠨᠤᠲᠤᠭ ᠲᠤ ᠪᠠᠨ ᠪᠠᠢᠭᠠ ᠴᠡᠷᠢᠭ ᠦ᠋ᠨ ᠬᠡᠷᠡᠭ ᠡᠷᠬᠢᠯᠡᠳᠡᠭ ᠨᠣᠶᠠᠳ ᠴᠥᠮ ᠪᠠᠢᠨ ᠪᠠᠢᠨ ᠵᠥᠪᠯᠡᠯᠳᠦᠨ᠂ ᠦᠷᠭᠦᠭᠡᠨ ᠳ᠋ᠦ᠍ ᠪᠡᠶᠡ ᠪᠡᠷ ᠪᠠᠷᠠᠯᠬᠠᠵᠤ ᠠᠷᠢᠬᠪᠥ᠋ᠬᠡ ᠶ᠋ᠢ ᠣᠷᠣ ᠰᠠᠭᠤᠯᠭᠠᠨᠠ ᠭᠡᠵᠦ ᠱᠠᠭᠠᠷᠳᠠᠨ ᠪᠣᠢ ᠭᠡᠨᠡ᠃ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠠᠯᠠᠨᠳᠠᠷ ᠨᠣᠶᠠᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠡᠳᠦ ᠳᠠᠬᠢᠨ ᠪᠠᠷᠠᠯᠬᠠᠵᠤ᠂ ᠰᠠᠷᠬᠤᠳ ᠰᠢᠮᠡᠨ ᠲᠤᠬᠠᠯᠠᠨ ᠰᠠᠭᠤᠵᠤ᠂ ᠪᠦᠷ ᠱᠠᠭᠠᠷᠳᠠᠩᠭᠤᠢ ᠪᠠᠷ᠄
— ᠲᠠ ᠣᠳᠣ ᠳᠠᠷᠤᠢ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠵᠠᠯᠭᠠᠨ ᠰᠠᠭᠤᠬᠤ ᠶᠣᠰᠣᠲᠠᠢ᠃ ᠡᠭᠦᠨ ᠢ᠋ ᠣᠯᠠᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠱᠠᠭᠠᠷᠳᠠᠵᠤ ᠪᠠᠢᠭᠠ ᠰᠢᠦ᠃ ᠬᠡᠳᠦᠢ ᠪᠡᠷ ᠮᠥᠩᠬᠡ ᠠᠬᠠ ᠲᠠᠨᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠨ ᠳ᠋ᠤ᠌ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠬᠤ ᠬᠥᠮᠦᠨ ᠢ᠋ᠶ᠋ᠡᠨ ᠭᠡᠷᠢᠶᠡᠰᠦᠯᠡᠨ ᠬᠡᠯᠡᠭᠡ ᠦᠭᠡᠢ ᠴᠦ᠍ ᠭᠡᠰᠡᠨ ᠨᠡᠢᠰᠯᠡᠯ ᠢ᠋ ᠵᠠᠬᠢᠷᠤᠭᠴᠢ ᠪᠠᠷ ᠲᠣᠮᠢᠯᠠᠭᠳᠠᠭᠰᠠᠨ ᠲᠡᠷᠡ ᠬᠥᠮᠦᠨ ᠬᠠᠭᠠᠨ ᠪᠣᠯᠳᠠᠭ ᠪᠣᠭᠳᠠ ᠬᠠᠭᠠᠨ ᠬᠠᠤᠯᠢᠴᠢᠯᠠᠨ ᠲᠣᠭᠲᠠᠭᠠᠭᠰᠠᠨ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠃ ᠲᠠ ᠪᠣᠯ ᠠᠯᠢ ᠴᠦ᠍ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠵᠤ ᠪᠠᠢᠬᠤ ᠶᠣᠰᠣᠲᠠᠢ ᠨᠣᠶᠠᠨ ᠮᠥᠨ᠃ ᠡᠨᠡ ᠪᠣᠯ《ᠶᠡᠬᠡ ᠵᠠᠰᠠᠭ》 ᠬᠠᠣᠯᠢᠨ ᠳ᠋ᠤ᠌ ᠲᠠᠭᠠᠷᠠᠵᠤ ᠪᠠᠢᠭᠠ ᠬᠡᠷᠡᠭ ᠭᠡᠵᠦ ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠢᠳᠬᠠᠵᠠᠢ᠃ ᠮᠡᠳᠡᠭᠡᠵᠢ ᠶ᠋ᠢᠨ ᠡᠨᠡ ᠦᠭᠡ ᠠᠷᠢᠬᠪᠥ᠋ᠬᠡ ᠳ᠋ᠦ᠍ ᠳᠠᠭᠠᠯᠠᠯᠲᠠᠢ ᠰᠣᠨᠣᠰᠤᠭᠳᠠᠵᠤ ᠪᠠᠢᠭᠠ ᠪᠢᠵᠡ᠃ ᠵᠠᠬᠢᠷᠤᠭᠴᠢ ᠰᠢᠷᠪᠡᠭᠡ ᠨᠠᠷᠢᠨ ᠬᠠᠷᠠ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠪᠠᠢᠵᠤ ᠠᠯᠠᠨᠲᠠᠷ ᠨᠣᠶᠠᠨ ᠢ᠋ ᠬᠠᠷᠠᠭᠠᠳ᠄
— ᠦᠨᠡᠬᠡᠷ ᠲᠦᠮᠡᠨ ᠣᠯᠠᠨ ᠲᠡᠭᠡᠵᠦ ᠪᠠᠢᠭᠠ ᠪᠣᠯ ᠪᠢ ᠪᠡᠶᠡ ᠵᠠᠢᠯᠠᠬᠤ ᠶᠣᠰᠣ ᠦᠭᠡᠢ ᠪᠢᠯᠡ᠃ ᠬᠤᠪᠢᠯᠠᠢ ᠠᠬᠠ ᠯᠠ ᠣᠷᠣ ᠰᠠᠭᠤᠬᠤ ᠭᠡᠵᠦ ᠵᠢᠳᠬᠦᠨ᠂ ᠱᠠᠩᠳᠤ ᠭᠡᠳᠡᠭ ᠰᠢᠨᠡ ᠬᠣᠲᠠ ᠳ᠋ᠤ᠌ ᠪᠠᠨ ᠪᠡᠯᠡᠳᠬᠡᠭᠡᠳ ᠪᠠᠢᠭᠠ ᠰᠤᠷᠠᠭ ᠲᠠᠢ᠃ ᠲᠡᠨᠳᠡ ᠣᠴᠢᠭᠠᠳ ᠢᠷᠡᠭᠰᠡᠨ ᠬᠥᠮᠦᠰ ᠪᠠᠲᠤᠲᠠᠢ ᠦᠨᠡᠨ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠠ᠃ ᠲᠡᠭᠡᠬᠦ ᠪᠡᠷ ᠬᠡᠷᠪᠡ ᠪᠢ ᠣᠷᠣ ᠰᠠᠭᠤᠳᠠᠭ ᠶᠤᠮ ᠪᠣᠯ ᠠᠬᠠ ᠨᠠᠮᠠᠶ᠋ᠢ ᠪᠠᠭᠠᠯᠵᠠᠭᠤᠷᠳᠠᠬᠤ ᠭᠡᠵᠦ ᠨᠠᠭᠠᠰᠢ ᠪᠠᠨ ᠶᠡᠬᠡ ᠴᠡᠷᠢᠭ ᠬᠥᠳᠡᠯᠭᠡᠵᠦ ᠮᠠᠭᠠᠳ ᠦᠭᠡᠢ ᠪᠠᠢᠨᠠ ᠭᠡᠮᠡᠨ ᠤᠴᠢᠷᠯᠠᠨ ᠶᠠᠷᠢᠵᠤ ᠪᠠᠢᠭᠠ᠃ ᠠᠯᠠᠨᠳᠠᠷ ᠨᠣᠶᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠠᠯᠠᠭᠠ ᠪᠠᠷ ᠨᠢ ᠦᠷᠡᠴᠢᠨ᠄
— ᠬᠤᠪᠢᠯᠠᠢ ᠶ᠋ᠢ ᠲᠡᠢᠮᠦ ᠴᠠᠳᠢᠭ ᠦᠭᠡᠢ ᠵᠠᠩ ᠭᠠᠷᠭᠠᠪᠠᠯ ᠪᠢᠳᠡ ᠵᠦᠭᠡᠷ ᠰᠠᠭᠤᠵᠤ ᠪᠠᠢᠬᠤ ᠤᠤ? ᠲᠡᠭᠦᠨ ᠳ᠋ᠦ᠍ ᠴᠡᠷᠢᠭ ᠪᠠᠢᠭᠠ ᠪᠣᠯ ᠨᠠᠳᠠᠳᠤ ᠪᠠᠰᠠ ᠴᠡᠷᠢᠭ ᠪᠠᠢᠨᠠ᠃ ᠡᠮᠦᠨᠡ ᠵᠦᠭ ᠲᠦ᠍ ᠶᠠᠪᠤᠭᠠ ᠴᠡᠷᠢᠭ ᠦᠨᠡᠬᠡᠷ ᠰᠥᠩ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠬᠦ ᠭᠡᠵᠦ ᠪᠠᠢᠯᠳᠤᠭᠠᠨ ᠬᠢᠵᠦ ᠪᠠᠢᠭᠠ ᠪᠣᠯ ᠨᠠᠭᠠᠰᠢ ᠪᠠᠨ ᠪᠢᠳᠡᠨ ᠲᠡᠢ ᠪᠠᠢᠯᠳᠤᠬᠤ ᠭᠡᠵᠦ ᠢᠷᠡᠬᠦ ᠵᠠᠪ ᠦᠭᠡᠢ ᠪᠠᠢᠯᠲᠠᠢ᠃ ᠠᠯᠠᠯᠳᠤᠵᠤ ᠪᠠᠢᠭᠠ ᠳᠠᠢᠰᠤᠨ ᠢ᠋ᠶ᠋ᠠᠨ ᠣᠷᠬᠢᠭᠠᠳ ᠠᠬᠠ ᠳᠡᠭᠦᠦ ᠪᠡᠨ ᠰᠥᠨᠥᠭᠡᠨᠡ ᠭᠡᠵᠦ ᠶᠠᠪᠤᠳᠠᠭ ᠶᠣᠰᠣ ᠬᠠᠮᠢᠭᠠ ᠪᠠᠢᠨᠠ ᠪᠣᠢ᠃ ᠲᠠ ᠪᠢᠳᠡᠨ ᠳ᠋ᠦ᠍ ᠰᠢᠯᠢᠮᠡᠯ ᠬᠣᠶᠠᠷ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠪᠠᠢᠭᠠ ᠶ᠋ᠢ ᠰᠠᠨᠠᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠬᠡᠯᠡᠵᠦ ᠪᠠᠢᠯᠠ᠃
ᠰᠦᠢᠲᠦ ᠨᠣᠶᠠᠨ ᠪᠠᠷᠠᠭᠤᠨ ᠵᠦᠭ ᠠᠶᠠᠯᠠᠵᠤ ᠢᠷᠡᠭᠡᠳ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠠᠷᠢᠬᠪᠥ᠋ᠬᠡ ᠳ᠋ᠦ᠍ ᠪᠠᠷᠠᠯᠬᠠᠨ᠂ ᠥᠷᠥᠮᠡ ᠬᠥᠪᠦᠯᠦᠭᠰᠡᠨ ᠬᠣᠩᠭᠣᠷ ᠰᠢᠷᠠ ᠴᠠᠢ ᠤᠤᠭᠤᠵᠤ ᠲᠤᠬᠠᠯᠠᠨ ᠰᠠᠭᠤᠭᠠᠳ᠄
— ᠪᠢ ᠤᠷᠤᠭ ᠲᠥᠷᠥᠯ ᠦ᠋ᠨ ᠬᠣᠯᠪᠣᠭᠠᠲᠠᠢ ᠤᠭᠰᠠᠭᠠᠲᠠᠨ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠵᠠᠬᠢᠷᠤᠭᠴᠢ ᠲᠠᠨ ᠳ᠋ᠤ᠌ ᠵᠥᠪᠯᠡᠨ ᠬᠡᠯᠡᠬᠦ ᠳ᠋ᠦ᠍᠂ ᠨᠢᠭᠡᠨᠲᠡ ᠲᠠᠨ ᠤ᠋ ᠪᠦᠬᠦ ᠠᠬᠠᠨ ᠳᠡᠭᠦᠦᠰ᠂ ᠬᠠᠷᠢ ᠭᠠᠵᠠᠷ ᠢ᠋ ᠡᠵᠡᠩᠨᠡᠨ ᠰᠠᠭᠤᠭᠠ ᠨᠣᠶᠠᠳ᠂ ᠶᠡᠬᠡ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠨ ᠨᠠᠷ ᠵᠠᠬᠢᠷᠤᠭᠴᠢ ᠲᠠᠨ ᠢ᠋ ᠪᠡᠨ ᠶᠡᠬᠡ ᠬᠠᠭᠠᠨ ᠤ᠋ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠨᠠ ᠭᠡᠳ ᠯᠡ ᠪᠠᠢᠬᠤ ᠳ᠋ᠤ᠌ ᠲᠠ ᠦᠭᠡᠢ ᠭᠡᠬᠦ ᠶᠣᠰᠣ ᠦᠭᠡᠢ᠃ ᠡᠨᠡ ᠡᠷᠭᠦᠮᠵᠢᠯᠡᠯ ᠢ᠋ ᠬᠢᠲᠠᠳ ᠤ᠋ᠳ ᠲᠠᠢ ᠪᠠᠨ ᠲᠡᠨᠳᠡ ᠪᠡᠨ ᠳᠤᠯᠠᠭᠠᠬᠠᠨ ᠮᠣᠷᠢᠯᠠᠵᠤ ᠪᠠᠢᠭ᠃ ᠲᠡᠭᠦᠨ ᠳ᠋ᠦ᠍ ᠬᠦᠴᠦ ᠴᠢᠳᠠᠯ ᠪᠣᠢ ᠪᠣᠯ ᠪᠦᠬᠦ ᠬᠢᠲᠠᠳ ᠣᠷᠣᠨ ᠢ᠋ ᠶᠡᠬᠡ ᠤᠯᠤᠰ ᠲᠤ ᠨᠢᠭᠡᠳᠬᠡᠭᠡᠳ ᠥᠭ᠃ ᠲᠡᠭᠦᠨ ᠢ᠋ ᠨᠢ ᠪᠢᠳᠡ ᠬᠠᠷᠠᠶᠠ ᠭᠡᠵᠦ ᠰᠢᠭᠤᠳᠬᠠᠨ ᠬᠡᠯᠡᠭᠡᠳ᠂ ᠪᠢᠳᠡ ᠲᠠᠨ ᠤ᠋ ᠰᠠᠭᠤᠬᠤ ᠡᠳᠦᠷ ᠢ᠋ ᠳᠠᠷᠬᠠᠨ ᠪᠥᠬᠡ ᠶ᠋ᠢ ᠵᠠᠯᠠᠵᠤ ᠦᠵᠡᠭᠦᠯᠦᠨᠡ ᠭᠡᠵᠡᠢ᠃
ᠲᠡᠳᠦᠢ ᠯᠡ ᠤᠳᠠᠯ ᠦᠭᠡᠢ ᠶᠡᠬᠡ ᠬᠠᠷᠠ ᠪᠥᠬᠡ ᠪᠠᠭᠤᠭᠠᠳ ᠰᠠᠬᠢᠭᠤᠰᠤ ᠪᠠᠨ ᠵᠠᠯᠠᠵᠤ ᠴᠠᠭᠠᠨ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠨ ᠪᠠᠢᠵᠤ ᠠᠷᠢᠬᠪᠥ᠋ᠬᠡ ᠶ᠋ᠢ ᠬᠠᠭᠠᠨ ᠤ᠋ ᠣᠷᠣ ᠰᠠᠭᠤᠬᠤ ᠨᠢ ᠲᠩᠷᠢ ᠳ᠋ᠦ᠍ ᠲᠠᠭᠠᠯᠠᠭᠳᠠᠵᠤ ᠪᠠᠢᠨᠠ ᠭᠡᠳ᠂ ᠵᠣᠬᠢᠬᠤ ᠡᠳᠦᠷ ᠢ᠋ ᠲᠣᠭᠲᠠᠭᠠᠨ ᠬᠡᠯᠡᠵᠦ ᠥᠭᠪᠡ᠃ ᠲᠤᠯᠤᠢ ᠶ᠋ᠢᠨ ᠶᠡᠬᠡ ᠬᠠᠲᠤᠨ ᠰᠤᠷᠬᠤᠭᠲᠠᠨᠢ ᠪᠥᠬᠡ ᠶ᠋ᠢᠨ ᠲᠣᠭᠲᠠᠭᠠᠭᠰᠠᠨ ᠡᠳᠦᠷ ᠲᠦ᠍ ᠶᠡᠬᠡ ᠬᠤᠷᠠᠯᠳᠠᠢ ᠶ᠋ᠢ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠣᠢᠷᠠᠯᠴᠠᠭᠠ ᠣᠷᠬᠣᠨ ᠭᠣᠣᠯ ᠤ᠋ᠨ ᠡᠬᠢ ᠨᠢᠭᠡᠨ ᠠᠮᠠᠨ ᠳ᠋ᠤ᠌ ᠬᠢᠵᠦ ᠲᠠᠭᠠᠯᠠᠬᠤ ᠶ᠋ᠢ ᠣᠯᠠᠨ ᠬᠠᠨ ᠬᠥᠪᠡᠭᠦᠳ᠂ ᠤᠭᠰᠠᠭᠠᠨ ᠤ᠋ ᠨᠣᠶᠠᠳ᠂ ᠨᠥᠯᠥᠭᠡ ᠪᠦᠬᠦᠢ ᠰᠠᠢᠳ᠂ ᠵᠠᠩᠵᠤᠨ ᠨᠤᠭᠤᠳ ᠲᠤ ᠥᠪᠡᠷ ᠦ᠋ᠨ ᠨᠡᠷᠡ ᠪᠡᠷ ᠤᠷᠢᠶᠠᠯᠠᠨ᠂ ᠵᠠᠯᠠᠯᠭᠠ ᠠᠢᠯᠠᠳᠬᠠᠵᠠᠢ᠃ ᠡᠨᠡ ᠵᠠᠯᠠᠯᠭᠠ ᠪᠠᠨ ᠪᠦᠷ ᠡᠬᠢᠯᠡᠭᠡᠳ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠪᠠᠨ ᠣᠷᠬᠢᠭᠰᠠᠨ ᠦᠭᠡᠢ᠃
ᠺᠠᠢᠫᠢᠩ ᠳ᠋ᠤ᠌ ᠬᠦᠷᠭᠡᠭᠦᠯᠦᠭᠰᠡᠨ ᠵᠠᠯᠠᠯᠭᠠ ᠶ᠋ᠢᠨ ᠪᠢᠴᠢᠭ ᠲᠦ᠍ ᠥᠭᠦᠯᠡᠭᠰᠡᠨ ᠨᠢ《ᠥᠷᠥᠰᠢᠶᠡᠯᠲᠦ ᠠᠬᠠ ᠲᠠ ᠪᠣᠯᠭᠣᠭᠠᠨ ᠰᠣᠶᠣᠷᠬᠠᠬᠤ ᠠᠵᠢᠶᠠᠮᠤ! ᠮᠢᠨᠦ ᠪᠡᠶᠡ ᠥᠴᠦᠬᠡᠨ ᠬᠡᠳᠦᠢ ᠪᠣᠯᠪᠠᠴᠤ ᠥᠪᠡᠷ ᠦ᠋ᠨ ᠠᠴᠢᠲᠤ ᠡᠬᠡ ᠪᠣᠯᠤᠨ ᠣᠯᠠᠨ ᠬᠠᠨ ᠬᠥᠪᠡᠭᠦᠳ ᠲᠤᠬᠠᠢᠯᠠᠪᠠᠯ ᠠᠪᠠᠭᠠ ᠠᠬᠠ ᠴᠠᠭᠠᠲᠠᠢ ᠪᠠ ᠵᠥᠴᠢ ᠶ᠋ᠢᠨ ᠦᠷᠡ ᠬᠡᠦᠬᠡᠳ ᠦ᠋ᠳ᠂ ᠲᠡᠭᠦᠨ ᠦ᠌ ᠣᠷᠣ ᠶ᠋ᠢ ᠵᠠᠯᠭᠠᠭᠴᠢ ᠠᠯᠲᠠᠨ ᠣᠷᠳᠣᠨ ᠤ᠋ ᠪᠡᠷᠬᠡ ᠬᠠᠨ᠂ ᠢᠯᠢ ᠬᠠᠨ ᠤ᠋ ᠲᠡᠷᠢᠭᠦᠨ ᠠᠬᠠ ᠬᠥᠯᠡᠬᠦ᠂ ᠪᠤᠰᠤᠳ ᠤᠭᠰᠠᠭᠠᠨ ᠤ᠋ ᠨᠣᠶᠠᠳ᠂ ᠣᠯᠠᠩᠬᠢ ᠰᠠᠢᠳ᠂ ᠵᠠᠩᠵᠤᠨ ᠨᠤᠭᠤᠳ ᠤ᠋ᠨ ᠭᠦᠨ ᠶᠡᠬᠡ ᠡᠷᠭᠦᠮᠵᠢᠯᠡᠯ ᠢ᠋ ᠳᠠᠭᠠᠨ ᠬᠠᠭᠠᠨ ᠠᠬᠠ ᠶ᠋ᠢᠨ ᠣᠷᠣ ᠶ᠋ᠢ ᠵᠠᠯᠭᠠᠬᠤ ᠶᠣᠰᠣᠲᠠᠢ ᠪᠣᠯᠪᠠ᠃ ᠡᠢᠮᠦ ᠳ᠋ᠦ᠍ ᠲᠡᠷᠡ ᠡᠳᠦᠷ ᠲᠦ᠍ ᠬᠦᠨᠳᠦᠲᠦ ᠠᠬᠠ ᠲᠠ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠮᠣᠷᠢᠯᠠᠨ ᠢᠷᠡᠵᠦ᠂ ᠤᠯᠤᠰ ᠤ᠋ᠨ ᠶᠡᠬᠡ ᠬᠠᠭᠠᠨ ᠤ᠋ ᠰᠢᠷᠡᠭᠡ ᠶ᠋ᠢ ᠲᠦᠰᠢᠬᠦ ᠬᠡᠷᠡᠭ ᠢ᠋ ᠪᠡᠶᠡ ᠪᠡᠷ ᠬᠥᠲᠥᠯᠦᠨ ᠶᠠᠪᠤᠭᠤᠯᠵᠤ ᠲᠠᠭᠠᠯᠠᠨ ᠥᠷᠥᠰᠢᠶᠡᠬᠦ ᠠᠵᠢᠶᠠᠮᠤ! ᠡᠭᠦᠨ ᠦ᠌ ᠲᠤᠯᠠ ᠤᠬᠠᠭᠠᠨ ᠶᠡᠬᠡᠲᠦ᠂ ᠠᠷᠢᠭᠤᠨ ᠰᠢᠳᠤᠷᠭᠤ ᠰᠡᠳᠬᠢᠯᠲᠦ ᠰᠤᠷᠬᠤᠭᠲᠠᠨᠢ ᠡᠬᠡ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠲᠡᠭᠦᠨ ᠦ᠌ ᠰᠠᠨᠠᠯ ᠵᠢᠭᠠᠪᠤᠷᠢ ᠶ᠋ᠢᠨ ᠶᠣᠰᠣᠭᠠᠷ ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠬᠢᠴᠢᠶᠡᠩᠭᠦᠢᠯᠡᠨ ᠲᠠᠨ ᠳ᠋ᠤ᠌ ᠢᠯᠡᠭᠡᠪᠡ》 ᠭᠡᠵᠡᠢ᠃ ᠬᠤᠪᠢᠯᠠᠢ ᠲᠤᠰᠬᠠᠢ ᠵᠠᠷᠤᠭᠤᠯ ᠤ᠋ᠨ ᠡᠯᠴᠢ ᠪᠡᠷ ᠬᠠᠷᠠᠬᠣᠷᠣᠮ ᠠ᠋ᠴᠠ ᠢᠷᠡᠭᠰᠡᠨ ᠤᠭ ᠪᠢᠴᠢᠭ ᠢ᠋ ᠠᠪᠴᠤ ᠦᠵᠡᠭᠡᠳ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ᠂ ᠥᠪᠡᠷ ᠦ᠋ᠨ ᠬᠠᠷᠠᠭᠠᠨ ᠳ᠋ᠤ᠌ ᠢᠲᠡᠭᠡᠯ ᠦᠭᠡᠢ ᠳᠠᠬᠢᠨ ᠤᠩᠰᠢᠵᠤ ᠦᠵᠡᠭᠡᠳ᠂《ᠪᠢ ᠵᠥᠪ ᠬᠠᠷᠠᠵᠠᠢ᠃ ᠢᠩᠭᠢᠬᠦ ᠰᠢᠨᠵᠢ ᠲᠦᠷᠦᠭᠦᠨ ᠡᠴᠡ ᠮᠡᠳᠡᠭᠳᠡᠭᠡᠳ ᠪᠠᠢᠭᠰᠠᠨ ᠳᠠ᠃ ᠪᠢ ᠲᠡᠭᠡᠵᠦ ᠰᠡᠵᠢᠭᠯᠡᠨ ᠶᠠᠪᠤᠭᠰᠠᠨ ᠨᠢ ᠵᠥᠪ ᠪᠠᠢᠵᠠᠢ》 ᠭᠡᠮᠡᠨ ᠪᠣᠳᠣᠨ᠂ ᠭᠠᠢᠬᠠᠵᠤ ᠳᠠᠭᠵᠠ ᠤᠷᠤᠭᠤ ᠨᠢ ᠬᠦᠨᠳᠦ ᠶᠠᠭᠤᠮᠠ ᠪᠠᠷ ᠴᠣᠬᠢᠭᠠᠳ ᠠᠪᠤᠭᠰᠠᠨ ᠠᠳᠠᠯᠢ ᠲᠣᠯᠣᠭᠠᠢ ᠨᠢ ᠮᠠᠨᠠᠷᠠᠨ᠂ ᠶᠠᠭᠠᠬᠢᠵᠤ ᠪᠠᠢᠭᠠ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠠᠩᠵᠠᠭᠠᠷᠠᠵᠤ ᠮᠠᠲᠠᠯ ᠦᠭᠡᠢ ᠨᠢᠭᠡ ᠪᠣᠰᠴᠤ᠂ ᠨᠢᠭᠡ ᠰᠠᠭᠤᠭᠠᠳ᠄
— ᠪᠢ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠬᠠᠭᠠᠨ ᠤ᠋ ᠲᠠᠮᠠᠭᠠ ᠶ᠋ᠢᠨ ᠬᠠᠮᠲᠤ ᠢᠩᠭᠢᠭᠡᠳ ᠠᠯᠳᠠᠪᠠ ᠤᠤ? ᠮᠥᠩᠬᠡ ᠠᠬᠠ ᠯᠠ ᠨᠠᠳᠠᠳᠤ ᠬᠦᠢᠲᠡᠨ ᠴᠢᠷᠠᠢ ᠭᠠᠷᠭᠠᠨ᠂ ᠠᠷᠢᠬᠪᠦ᠋ᠬᠡ ᠶ᠋ᠢ ᠶᠡᠬᠡᠳᠡ ᠲᠣᠭᠣᠨ ᠦᠵᠡᠵᠦ᠂ ᠪᠠᠷᠤᠭ ᠯᠠ ᠠᠮᠢᠳᠤ ᠮᠡᠨᠳᠦ ᠪᠠᠢᠭᠠ ᠳᠡᠭᠡᠷᠡ ᠪᠡᠨ ᠲᠡᠭᠦᠨ ᠢ᠋ ᠣᠷᠣ ᠰᠠᠭᠤᠯᠭᠠᠵᠤ ᠣᠷᠬᠢᠪᠠᠯ ᠳᠡᠭᠡᠷᠡ ᠪᠣᠯᠤᠨᠠ ᠪᠠᠢᠬᠤ ᠭᠡᠬᠦ ᠰᠢᠬᠠᠭᠠᠳ ᠪᠠᠢᠭᠰᠠᠨ᠃ ᠡᠨᠡ ᠴᠢᠨᠢ ᠴᠦ᠍ ᠨᠠᠳᠠᠳᠤ ᠪᠥᠭᠡᠮ ᠭᠠᠢ ᠲᠠᠷᠢᠵᠤ ᠪᠠᠢᠭᠠ ᠬᠡᠷᠡᠭ᠃ ᠬᠣᠢᠲᠤ ᠨᠤᠲᠤᠭ ᠤ᠋ᠨ ᠬᠢᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠠᠷᠢᠬᠪᠦ᠋ᠬᠡ ᠶ᠋ᠢ ᠦᠵᠡᠬᠦ ᠪᠡᠷ ᠢ᠋ᠶ᠋ᠡᠨ ᠬᠥᠯ ᠳ᠋ᠦ᠍ ᠨᠢ ᠰᠥᠬᠥᠷᠡᠵᠦ ᠤᠨᠠᠬᠤ ᠰᠢᠬᠠᠭᠠᠳ ᠯᠠ ᠤᠷᠲᠤ ᠬᠣᠢᠨᠠ ᠨᠢ ᠪᠥᠩᠵᠢᠭᠡᠨᠡᠨ ᠭᠦᠶᠦᠭᠡᠳ ᠰᠦᠢᠳ ᠪᠣᠯᠵᠤ ᠪᠠᠢᠵᠤ ᠬᠠᠷᠠᠭᠳᠠᠵᠤ ᠪᠠᠢᠪᠠ ᠳᠠ᠃ ᠲᠡᠳᠡ ᠨᠠᠷ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠥᠮᠥᠭᠯᠡᠵᠦ ᠬᠠᠮᠠᠭᠠᠯᠠᠭᠠᠳ ᠰᠦᠢᠳ ᠲᠡᠢ ᠶᠠᠭᠤᠮᠠ ᠪᠣᠯᠤᠨᠠ ᠪᠠᠢᠬᠤ᠃ ᠮᠠᠨ ᠤ᠋ ᠡᠵᠢ ᠪᠠᠰᠠ ᠤᠷᠤᠭᠤ ᠨᠢ ᠲᠠᠲᠠᠵᠤ ᠬᠥᠭᠡᠷᠭᠡᠭᠡᠳ ᠠᠷᠢᠬᠪᠦ᠋ᠬᠡ ᠶ᠋ᠢ ᠤᠩᠭᠢᠷᠠᠭᠠᠵᠤ ᠭᠦᠢᠴᠡᠭᠡᠳ ᠪᠠᠢᠭᠠ ᠬᠡᠷᠡᠭ᠃ ᠪᠡᠶᠡ ᠨᠢ ᠮᠠᠭᠤ ᠪᠠᠢᠭᠠ ᠶᠤᠮ ᠪᠣᠯ ᠡᠵᠢ ᠲᠡᠷᠡ ᠡᠪᠡᠳᠴᠢᠨ ᠦ᠌ ᠪᠡᠨ ᠮᠥᠷ ᠢ᠋ ᠬᠥᠭᠡᠭᠡᠭᠡᠳ ᠬᠡᠪᠲᠡᠵᠦ ᠪᠠᠢᠬᠤ ᠦᠭᠡᠢ᠃《ᠴᠢ ᠤᠯᠤᠰ ᠤ᠋ᠨ ᠬᠠᠭᠠᠨ ᠡᠵᠡᠨ ᠨᠢ ᠪᠠᠢᠬᠤ ᠶᠣᠰᠣᠲᠠᠢ》 ᠭᠡᠵᠦ ᠦᠢᠮᠡᠭᠦᠯᠦᠭᠡᠳ᠂ ᠬᠠᠮᠤᠭ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠲᠡᠷᠡ ᠬᠦᠦ ᠶ᠋ᠢ ᠬᠥᠭᠡᠷᠭᠡᠳᠡᠵᠦ ᠣᠷᠬᠢᠯᠠ᠃ ᠣᠳᠣ ᠪᠢ ᠴᠢᠨᠢ ᠶᠠᠭᠠᠬᠢᠳᠠᠭ ᠬᠡᠷᠡᠭ ᠪᠣᠢ? ᠭᠡᠮᠡᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠬᠠᠨ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ᠂ ᠰᠠᠶᠢ ᠰᠡᠭᠡᠭᠡ ᠠᠪᠤᠪᠠ ᠪᠣᠯᠤᠯᠲᠠᠢ ᠲᠣᠯᠣᠭᠠᠢ ᠪᠠᠨ ᠪᠠᠵᠠᠯᠠᠨ ᠪᠣᠳᠣᠯᠬᠢᠯᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠪᠢ ᠡᠨᠡ ᠬᠡᠷᠡᠭ ᠢ᠋ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠢᠢᠳᠬᠦ ᠦᠭᠡᠢ᠃ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠤᠬᠠᠭᠠᠨᠲᠠᠢ᠂ ᠨᠣᠮᠲᠠᠢ ᠭᠡᠭᠳᠡᠵᠦ ᠪᠠᠢᠭᠠ ᠬᠡᠰᠡᠭ ᠬᠢᠲᠠᠳ ᠲᠦᠰᠢᠮᠡᠳ ᠨᠠᠷ ᠢ᠋ ᠪᠢ ᠳᠡᠷᠭᠡᠳᠡ ᠪᠡᠨ ᠪᠡᠶᠡ ᠶ᠋ᠢ ᠨᠢ ᠣᠲᠣᠷᠯᠠᠭᠤᠯᠤᠨ ᠪᠠᠢᠭᠠ ᠪᠢᠯᠡ᠃ ᠪᠢ ᠲᠡᠳᠡᠨ ᠲᠡᠢ ᠡᠨᠡ ᠬᠡᠷᠡᠭ ᠤᠷᠢᠳ ᠨᠢ ᠪᠢᠰᠢᠭᠦᠢ ᠯᠡ ᠶᠠᠷᠢᠪᠠ ᠳᠠ᠂ ᠣᠳᠣ ᠢᠳᠡ ᠶ᠋ᠢ ᠨᠢ ᠦᠵᠡᠶᠡ᠃《ᠣᠯᠠᠨ ᠨᠣᠶᠠᠳ ᠤ᠋ᠨ ᠬᠤᠷᠠᠯᠲᠠᠢ》 ᠭᠡᠵᠦ ᠨᠢᠭᠡ ᠦᠭᠡ ᠪᠠᠰᠠ ᠪᠠᠢᠭᠠ᠃ ᠲᠡᠭᠡᠬᠦ ᠪᠡᠷ ᠨᠠᠳᠠᠳᠤ ᠲᠦᠰᠢᠭ ᠪᠣᠯᠵᠤ ᠪᠣᠯᠬᠤ ᠵᠠᠷᠢᠮ ᠨᠣᠶᠠᠳ᠂ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠨᠦ᠍ᠭᠦᠳ ᠢ᠋ ᠪᠢ《ᠳᠠᠭᠠᠬᠤ》 ᠶᠣᠰᠣᠲᠠᠢ ᠪᠣᠯᠤᠯᠠ᠃ ᠶᠠᠭᠤᠨ ᠤ᠋ ᠲᠤᠯᠠᠳᠠ ᠪᠢ ᠲᠡᠳᠡᠨ ᠢ᠋ ᠡᠯᠳᠡᠪ ᠢ᠋ᠶ᠋ᠡᠷ ᠳᠠᠮᠵᠢᠨ ᠳᠡᠭᠡᠳᠦ ᠡᠯᠳᠡᠪ ᠠᠯᠪᠠᠨ ᠳ᠋ᠤ᠌ ᠲᠣᠬᠣᠭᠠᠨ ᠲᠣᠮᠢᠯᠠᠵᠤ ᠴᠠᠯᠢᠩ ᠹᠦᠩᠯᠦ ᠬᠦᠷᠲᠡᠭᠡᠵᠦ ᠪᠠᠢᠭᠠ ᠪᠢᠯᠡ? ᠬᠡᠷᠡᠭ ᠢ᠋ ᠨᠢ ᠣᠳᠣ ᠡᠰᠡ ᠬᠢᠪᠡᠯ ᠬᠡᠵᠢᠶᠡ ᠶᠠᠭᠤᠨ ᠳ᠋ᠤ᠌ ᠠᠰᠢᠭᠯᠠᠬᠤ ᠶᠤᠮ ᠪᠣᠢ? ᠲᠡᠳᠡᠨ ᠢ᠋ ᠪᠡᠨ ᠳᠠᠭᠤᠳᠠᠵᠤ ᠵᠥᠪᠯᠡᠳᠡᠭ ᠬᠡᠷᠡᠭ ᠠ᠋᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠪᠢ ᠭᠤᠶᠤᠬᠤ ᠦᠭᠡᠢ᠂ ᠰᠠᠨᠠᠭᠠ ᠪᠣᠳᠣᠯ ᠢ᠋ ᠨᠢ ᠰᠢᠬᠠᠨ ᠭᠠᠷᠭᠠᠭᠤᠯᠤᠨᠠ᠃ ᠪᠠᠰᠠ ᠨᠡᠷᠡᠯᠬᠡᠭᠡᠳ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠦᠨᠡᠨ ᠢ᠋ᠶ᠋ᠡᠨ ᠰᠢᠭᠤᠳ ᠬᠡᠯᠡᠶᠡ᠃ ᠪᠢ ᠡᠨᠳᠡ ᠶᠠᠪᠤᠭᠤᠯᠵᠤ ᠪᠠᠢᠭᠠ ᠲᠡᠢᠨ ᠢ᠋ ᠲᠡᠷᠢᠭᠦᠯᠡᠨ ᠬᠢᠵᠦ ᠪᠠᠢᠨᠠ ᠭᠡᠳᠡᠭ ᠢ᠋ᠶ᠋ᠡᠨ ᠰᠢᠭᠤᠳᠬᠠᠨ ᠬᠡᠯᠡᠭᠡᠳ᠂ ᠲᠠ ᠨᠠᠷ ᠨᠠᠮᠠᠶ᠋ᠢ ᠳᠠᠮᠵᠢ ᠭᠡᠳᠡᠭ ᠢ᠋ᠶ᠋ᠡᠨ ᠬᠡᠯᠡᠬᠦ ᠪᠡᠷ ᠪᠣᠯᠪᠠ᠃ ᠲᠡᠭᠡᠭᠡᠳ ᠡᠨᠡ ᠬᠡᠷᠡᠭ ᠢ᠋ᠶ᠋ᠡᠷ ᠬᠠᠷᠢᠶᠠ ᠵᠥᠪᠯᠡᠬᠦ ᠲᠦᠰᠢᠮᠡᠳ᠂ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠨᠤᠭᠤᠳ ᠳᠤ ᠪᠠᠨ ᠪᠠᠰᠠ ᠳᠠᠬᠢᠨ ᠶᠠᠭᠠᠷᠠᠯᠲᠠᠢ ᠢᠷᠡ ᠭᠡᠵᠦ ᠳᠠᠭᠤᠳᠠᠬᠤ ᠪᠣᠯᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠤᠪᠢᠯᠠᠢ ᠣᠯᠠᠨ ᠶᠠᠭᠤᠮᠠ ᠪᠣᠳᠣᠵᠤ ᠰᠡᠳᠬᠢᠯ ᠨᠢ ᠲᠠᠪᠠᠷᠠᠨ ᠰᠠᠭᠤᠬᠤ ᠳ᠋ᠤ᠌ ᠪᠠᠨ᠄
《ᠪᠢ ᠶᠠᠮᠠᠷ ᠠᠯᠳᠠᠭᠠ ᠬᠢᠪᠡ ᠠ᠋? ᠵᠦᠭᠡᠷ ᠰᠢᠬᠠᠮ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠠ᠋ᠴᠠ ᠡᠢᠮᠦ ᠪᠣᠯᠪᠠ ᠭᠡᠵᠢ ᠤᠤ?》᠂《ᠡᠵᠢ ᠨᠠᠮᠠᠶ᠋ᠢ ᠪᠣᠳᠣᠭᠰᠠᠨ ᠦᠭᠡᠢ ᠬᠡᠷᠡᠭ ᠤᠤ? ᠪᠢ ᠡᠵᠢ ᠡᠴᠡ ᠬᠣᠯᠠ ᠪᠠᠢᠭᠰᠠᠨ ᠮᠠᠨᠢ ᠭᠣᠣᠯ ᠠᠯᠳᠠᠭᠠ ᠪᠣᠯᠪᠠ᠃ ᠡᠵᠢ ᠶ᠋ᠢ ᠪᠢ ᠲᠥᠷᠥᠭᠰᠡᠨ ᠨᠤᠲᠤᠭ ᠳᠤ ᠪᠠᠨ ᠪᠠᠢᠵᠤ ᠪᠠᠢᠪᠠᠯ ᠨᠠᠰᠤ ᠠᠬᠢᠭᠰᠠᠨ ᠪᠣᠯᠬᠣᠷ ᠪᠡᠶᠡ ᠳ᠋ᠦ᠍ ᠨᠢ ᠳᠡᠭᠡᠷᠡ ᠭᠡᠵᠦ ᠪᠣᠳᠣᠭᠰᠠᠨ᠃ ᠪᠠᠰᠠ ᠡᠵᠢ ᠶ᠋ᠢ ᠡᠨᠳᠡ ᠢᠷᠡᠪᠡᠯ ᠡᠯᠳᠡᠪ ᠳᠡᠭᠡᠳᠦ ᠶ᠋ᠢ ᠦᠭᠡᠯᠡᠭᠡᠳ ᠲᠦᠪᠡᠭ ᠲᠠᠷᠢᠨᠠ ᠪᠠᠢᠬᠤ ᠭᠡᠵᠦ ᠰᠠᠨᠠᠭᠰᠠᠨ ᠮᠠᠨᠢ ᠪᠤᠷᠤᠭᠤᠳᠠᠵᠠᠢ᠃ ᠵᠠ ᠣᠳᠣ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠮᠡᠨ᠂ ᠲᠣᠯᠣᠭᠠᠢ ᠪᠠᠨ ᠪᠠᠵᠠᠯᠠᠨ ᠪᠣᠰᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ
— ᠢᠩᠭᠢᠵᠦ ᠮᠠᠩᠭᠤᠷᠠᠵᠤ ᠪᠠᠢᠭᠠᠳ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠪᠢ ᠢᠲᠡᠭᠡᠯᠲᠡᠢ ᠬᠥᠮᠦᠰ ᠲᠡᠢ ᠪᠡᠨ ᠠᠭᠤᠯᠵᠠᠶᠠ ᠭᠡᠵᠦ ᠥᠪᠡᠷ ᠲᠦ᠍ ᠪᠡᠨ ᠪᠠᠰᠠ ᠬᠡᠯᠡᠭᠡᠳ᠂ ᠪᠠᠷᠠ ᠪᠣᠯᠤᠭᠴᠢ ᠪᠠᠨ ᠳᠠᠭᠤᠳᠠᠨ
— ᠴᠢ ᠶᠠᠪᠤᠭᠠᠳ ᠵᠣᠣ ᠪᠢ ᠲᠦᠰᠢᠮᠡᠯ᠂ ᠬᠣᠣ ᠵᠢᠩ ᠨᠣᠶᠠᠨ ᠢ᠋ ᠳᠠᠭᠤᠳᠠᠨ ᠣᠳᠣᠬᠠᠨ ᠢᠷᠡᠭᠦᠯ᠃ ᠤᠷᠢᠶᠠᠩᠬᠠᠢᠳᠠᠢ᠂ ᠴᠠᠭᠠᠨ ᠵᠠᠩᠵᠤᠨ ᠨᠠᠷ ᠲᠤ ᠬᠥᠮᠦᠨ ᠵᠠᠷᠤᠵᠤ ᠨᠠᠭᠠᠰᠢ ᠨᠢ ᠳᠠᠭᠤᠳᠠᠭᠤᠯ! ᠭᠡᠵᠦ ᠲᠤᠰᠢᠶᠠᠯᠠ᠃
ᠤᠳᠠᠵᠤ ᠲᠦᠳᠡᠭᠰᠡᠨ ᠴᠦ᠍ ᠦᠭᠡᠢ ᠬᠣᠶᠠᠷ ᠬᠢᠲᠠᠳ ᠲᠦᠰᠢᠮᠡᠯ ᠰᠠᠯᠪᠠᠭᠠᠨᠠᠨ ᠣᠷᠳᠣᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠶᠡᠬᠡ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠲᠣᠩᠭᠣᠯᠵᠠᠨ ᠶᠣᠰᠣ ᠬᠢᠵᠦ《ᠵᠠᠷᠯᠢᠭ》 ᠬᠦᠯᠢᠶᠡᠪᠡ᠃ ᠬᠤᠪᠢᠯᠠᠢ ᠲᠡᠳᠡᠨ ᠢ᠋ ᠳᠡᠷᠭᠡᠳᠡ ᠪᠡᠨ ᠰᠠᠭᠤᠬᠤ ᠶ᠋ᠢ ᠤᠷᠢᠯᠠ᠃ ᠡᠵᠡᠨ ᠦ᠌ ᠬᠢᠨᠢ ᠴᠢᠷᠠᠢ ᠪᠠᠷᠤᠭᠠᠷ᠂ ᠨᠢᠳᠦᠨ ᠳ᠋ᠦ᠍ ᠪᠡᠨ ᠣᠨᠴᠠᠭᠠᠢ ᠴᠢᠯᠡᠭᠦᠷ ᠲᠤᠰᠬᠠᠭᠰᠠᠨ ᠪᠠᠢᠬᠤ ᠶ᠋ᠢ ᠲᠦᠰᠢᠮᠡᠳ ᠦ᠋ᠳ ᠣᠯᠵᠤ ᠬᠠᠷᠠᠭᠠᠳ᠄
— ᠳᠡᠭᠡᠳᠦ ᠡᠵᠡᠨᠲᠡᠨ ᠮᠢᠨᠢ! ᠶᠠᠮᠠᠷ ᠵᠠᠷᠯᠢᠭ ᠪᠠᠭᠤᠯᠭᠠᠬᠤ ᠭᠡᠵᠦ ᠲᠠᠭᠠᠯᠠᠭᠰᠠᠨ ᠪᠣᠯ? ᠭᠡᠮᠡᠨ ᠪᠠᠷᠤᠭ ᠨᠢᠭᠡᠨ ᠵᠡᠷᠭᠡ ᠠᠰᠠᠭᠤᠯᠠ᠃ ᠬᠤᠪᠢᠯᠠᠢ ᠪᠡᠶᠡ ᠪᠡᠨ ᠪᠠᠷᠢᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ ᠪᠣᠰᠴᠤ ᠢᠷᠡᠭᠡᠳ᠂ ᠰᠤᠯᠠ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ᠄
— ᠰᠠᠶᠢ ᠬᠠᠷᠠᠬᠣᠷᠣᠮ ᠬᠣᠲᠠ ᠠ᠋ᠴᠠ ᠨᠠᠳᠠᠳᠤ ᠪᠢᠴᠢᠭ ᠢᠷᠡᠯᠡ᠃ ᠮᠢᠨᠦ ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠲᠡᠨᠳᠡ ᠨᠣᠶᠠᠳ ᠤ᠋ᠨ ᠬᠤᠷᠠᠯᠳᠠᠢ ᠬᠢᠯᠭᠡᠨ᠂ ᠥᠪᠡᠷ ᠢ᠋ ᠪᠡᠨ ᠭᠦᠷᠦᠨ ᠦ᠌《ᠶᠡᠬᠡ ᠬᠠᠭᠠᠨ》 ᠪᠣᠯᠭᠠᠨᠠ ᠭᠡᠵᠦ ᠰᠢᠢᠳᠴᠦ ᠪᠠᠢᠭᠠ ᠭᠡᠨᠡ᠃ ᠲᠡᠭᠡᠭᠡᠳ ᠨᠠᠮᠠᠶ᠋ᠢ ᠢᠷᠡᠵᠦ ᠥᠪᠡᠷ ᠲᠦ᠍ ᠪᠡᠨ ᠪᠠᠷᠠᠯᠬᠠᠨ ᠠᠢᠯᠠᠳᠬᠠᠯ ᠬᠢ ᠭᠡᠵᠦ ᠪᠢᠴᠢᠭ ᠢ᠋ᠶ᠋ᠡᠷ《ᠲᠤᠰᠢᠶᠠᠭᠰᠠᠨ》 ᠪᠠᠢᠨᠠ᠃ ᠣᠳᠣ ᠬᠡᠷᠬᠢᠪᠡᠯ ᠵᠣᠬᠢᠬᠤ ᠪᠣᠢ? ᠭᠡᠵᠦ ᠪᠣᠳᠣᠵᠤ ᠰᠠᠭᠤᠨᠠ ᠭᠡᠮᠡᠨ ᠰᠢᠭᠤᠳᠬᠠᠨ ᠠᠰᠠᠭᠤᠪᠠ᠃
— ᠠ᠂ ᠲᠡᠢᠮᠦ ᠪᠣᠢ᠃ ᠶᠡᠬᠡ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠰᠠᠭᠤᠯᠭᠠᠨᠠ᠂ ᠲᠠᠨ ᠢ᠋ ᠬᠤᠷᠠᠯᠲᠠᠢ ᠳ᠋ᠤ᠌ ᠮᠣᠷᠢᠯᠠᠨ ᠢᠷᠡ ᠭᠡᠵᠦ ᠶᠡᠬᠡ ᠡᠵᠡᠨ ᠲᠠᠨ ᠳ᠋ᠤ᠌ ᠮᠡᠳᠡᠭᠳᠡᠨ ᠵᠠᠯᠠᠯᠭᠠ ᠢᠷᠡᠭᠦᠯᠦᠭᠰᠡᠨ ᠰᠢᠦ ᠳᠡ᠃ ᠲᠡᠭᠦᠨ ᠳ᠋ᠦ᠍ ᠨᠢ ᠲᠠ ᠬᠠᠷᠢᠭᠤ ᠥᠭᠬᠦ ᠦᠭᠡᠢ ᠪᠠᠢᠬᠤ ᠠ᠋᠃ ᠨᠠᠮᠠᠶ᠋ᠢ ᠣᠷᠣᠯᠴᠠᠭᠤᠯᠬᠤ ᠦᠭᠡᠢ ᠪᠡᠷ ᠡᠨᠡ ᠲᠣᠮᠣ ᠬᠡᠷᠡᠭ ᠢ᠋ ᠶᠠᠭᠠᠬᠢᠪᠠᠴᠤ ᠲᠡᠳᠡᠨ ᠢ᠋ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠢᠳᠪᠦᠷᠢᠯᠡᠬᠦ ᠦᠭᠡᠢ ᠭᠡᠵᠦ ᠲᠠ ᠪᠣᠯᠭᠣᠭᠠᠭᠰᠠᠨ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠲᠠ ᠨᠠᠷ ᠮᠢᠨᠦ ᠦᠭᠡ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢ ᠭᠡᠰᠡᠨ ᠬᠠᠷᠢᠭᠤ ᠶ᠋ᠢ ᠲᠠ ᠠᠢᠯᠠᠳᠳᠠᠭ ᠪᠠᠢᠵᠤ ᠤᠤ ᠳᠠ ᠭᠡᠮᠡᠨ ᠵᠣᠣ ᠪᠢ《ᠪᠠᠭᠰᠢ》 ᠨᠢ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ ᠬᠡᠯᠡᠪᠡ᠃
ᠬᠣᠣ ᠵᠢᠩ ᠦᠭᠡ ᠰᠣᠨᠣᠰᠤᠭᠠᠳ ᠲᠠᠭ ᠳᠠᠭᠤ ᠦᠭᠡᠢ᠂ ᠨᠢᠳᠦ ᠪᠡᠨ ᠠᠨᠢᠨ ᠰᠠᠭᠤᠵᠤ ᠪᠣᠳᠣᠯ ᠪᠣᠯᠬᠤ ᠳ᠋ᠤ᠌ ᠪᠠᠨ ᠥᠷᠭᠡᠨ ᠮᠠᠩᠨᠠᠢ ᠪᠠᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠳᠡᠯᠡᠰᠦᠨ ᠪᠠᠢᠵᠤ《ᠠᠷᠢᠬᠪᠦ᠋ᠬᠡ ᠪᠡᠷ ᠬᠠᠭᠠᠨ ᠰᠠᠭᠤᠯᠭᠠᠵᠤ ᠪᠣᠯᠬᠤ ᠦᠭᠡᠢ᠂ ᠶᠠᠭᠠᠬᠢᠭᠰᠠᠨ ᠴᠦ᠍ ᠪᠣᠯᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠬᠢᠲᠠᠳ ᠬᠢᠲᠠᠳ ᠢ᠋ᠶ᠋ᠠᠨ ᠠᠯᠳᠠᠨᠠ᠃ ᠡᠨᠡ ᠤᠯᠤᠰ ᠤ᠋ᠨ ᠶᠡᠬᠡ ᠬᠠᠭᠠᠨ ᠬᠢᠲᠠᠳ ᠰᠡᠳᠬᠢᠯ ᠲᠡᠢ᠂ ᠦᠨᠡᠨ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠬᠢᠲᠠᠳ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠬᠥᠮᠦᠨ ᠪᠠᠢᠬᠤ ᠶᠣᠰᠣᠲᠠᠢ》 ᠭᠡᠮᠡᠨ ᠪᠣᠳᠣᠭᠠᠳ
— ᠲᠡᠭᠡᠬᠦ ᠪᠡᠷ ᠡᠨᠡ ᠬᠡᠷᠡᠭ ᠤᠵᠢᠭ᠂ ᠲᠤᠩ ᠨᠣᠴᠢᠲᠠᠢ ᠵᠦᠢᠯ᠃ ᠶᠠᠭᠠᠬᠢᠪᠠᠴᠤ ᠡᠩ ᠦ᠋ᠨ ᠨᠢᠭᠡ ᠶᠠᠷᠢᠶᠠ ᠪᠠᠷ ᠪᠦᠲᠦᠬᠦ ᠦᠭᠡᠢ᠃ ᠰᠢᠷᠦᠭᠦᠬᠡᠨ ᠲᠡᠮᠡᠴᠡᠯ ᠪᠣᠯᠵᠤ ᠪᠠᠢᠵᠤ ᠡᠮᠦᠨᠡ ᠵᠦᠭ ᠪᠠᠢᠯᠳᠤᠬᠤ ᠪᠠᠨ ᠲᠦᠷ ᠠᠵᠠᠨᠠᠨ᠂ ᠮᠣᠩᠭᠣᠯ᠂ ᠬᠢᠲᠠᠳ ᠴᠡᠷᠢᠭ ᠢ᠋ᠶ᠋ᠡᠨ ᠤᠮᠠᠷᠠ ᠵᠦᠭ ᠳᠠᠢᠳᠤᠬᠤ ᠳ᠋ᠤ᠌ ᠪᠡᠯᠡᠳᠭᠡ᠃ ᠲᠠ ᠨᠠᠷ ᠬᠡᠳᠦᠢ ᠠᠬᠠᠨ ᠳᠡᠭᠦᠦ ᠪᠣᠯᠪᠠᠴᠤ ᠡᠨᠡ ᠬᠡᠷᠡᠭ ᠢ᠋ᠶ᠋ᠡᠨ ᠢᠯᠳᠦᠨ ᠦ᠌ ᠦᠵᠦᠭᠦᠷ ᠢ᠋ᠶ᠋ᠡᠷ ᠯᠡ ᠨᠢᠭᠡᠨ ᠲᠡᠢᠰᠢ ᠪᠣᠯᠭᠠᠨᠠ᠃ ᠲᠡᠭᠡᠬᠦ ᠪᠡᠷ ᠲᠠ ᠢᠯᠠᠭᠳᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠰᠠᠢᠨ ᠪᠡᠯᠡᠳᠬᠡᠬᠦ ᠬᠡᠷᠡᠭᠲᠡᠢ ᠪᠣᠯᠵᠤ ᠪᠠᠢᠨᠠ᠃ ᠬᠣᠶᠠᠷ ᠭᠡᠪᠡᠯ᠄ ᠡᠨᠡ ᠬᠠᠪᠢ ᠪᠠᠷ ᠪᠠᠢᠭᠠ ᠨᠣᠶᠠᠳ ᠲᠦᠰᠢᠮᠡᠳ᠂ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠨᠤᠭᠤᠳ ᠢ᠋ ᠠᠶᠠᠲᠠᠢᠬᠠᠨ ᠴᠤᠭᠯᠠᠭᠤᠯᠤᠭᠠᠳ᠂ ᠲᠡᠳᠡᠨ ᠳ᠋ᠦ᠍ ᠠᠷᠪᠢᠬᠠᠨ ᠬᠡᠰᠢᠭ ᠬᠦᠷᠲᠡᠭᠡᠨ ᠥᠪᠡᠷ ᠦ᠋ᠨ ᠲᠠᠯᠠ ᠶ᠋ᠢᠨ ᠪᠣᠯᠭᠠᠵᠤ ᠠᠪᠤᠭᠠᠳ᠂ ᠬᠠᠷᠠ ᠬᠣᠷᠣᠮ ᠠ᠋ᠴᠠ ᠤᠷᠢᠲᠠᠭᠠᠳ《ᠶᠡᠬᠡ ᠬᠤᠷᠠᠯᠲᠠᠢ》 ᠵᠣᠬᠢᠶᠠᠵᠤ ᠲᠡᠷᠡ ᠬᠤᠷᠠᠯᠳᠠᠢ ᠠ᠋ᠴᠠ ᠡᠵᠡᠨ ᠲᠠᠨ ᠢ᠋ ᠶᠡᠬᠡ ᠬᠠᠭᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠬᠦ ᠤᠴᠢᠷᠲᠠᠢ ᠪᠣᠯᠵᠤ ᠪᠠᠢᠨᠠ᠃ ᠢᠩᠭᠢᠪᠡᠯ ᠲᠠ ᠠᠷᠢᠬᠪᠦ᠋ᠬᠡ ᠶ᠋ᠢᠨ《ᠵᠠᠷᠯᠢᠭ》 ᠢ᠋ ᠬᠦᠯᠢᠶᠡᠵᠦ ᠠᠪᠬᠤ ᠦᠭᠡᠢ ᠪᠠᠢᠬᠤ᠂ ᠴᠠᠭᠠᠰᠢᠯᠠᠪᠠᠯ ᠲᠡᠭᠦᠨ ᠲᠡᠢ ᠳᠠᠢᠳᠤᠬᠤ ᠡᠷᠬᠡ ᠲᠡᠢ ᠪᠣᠯᠵᠤ ᠪᠠᠢᠨᠠ᠃ ᠡᠢᠮᠦ ᠬᠣᠶᠠᠷ ᠶᠠᠭᠤᠮᠠ ᠬᠢᠬᠦ ᠶᠣᠰᠣᠲᠠᠢ ᠪᠣᠯᠤᠯᠠ᠃ ᠠᠯᠢ ᠤᠷᠢᠲᠠᠭᠰᠠᠨ ᠨᠢ ᠬᠦᠴᠦ ᠶ᠋ᠢ ᠣᠯᠤᠨᠠ ᠰᠢᠦ! ᠭᠡᠪᠡ᠃
ᠪᠠᠭᠰᠢ ᠲᠦᠰᠢᠮᠡᠯ ᠵᠣᠣ ᠪᠢ᠂ ᠬᠣᠣ ᠵᠢᠩ ᠦ᠋ᠨ ᠡᠨᠡ ᠰᠠᠨᠠᠯ ᠢ᠋ ᠤᠭᠲᠤᠨ ᠠᠪᠴᠤ ᠳᠡᠮᠵᠢᠭᠰᠡᠨ ᠳᠣᠣᠷᠠ ᠪᠠᠨ ᠥᠭᠡᠷᠡ ᠨᠢᠭᠡ ᠰᠠᠨᠠᠯ ᠭᠠᠷᠭᠠᠯᠠ᠃ ᠲᠤᠬᠠᠢᠯᠠᠪᠠᠯ᠄
— ᠶᠡᠬᠡ ᠬᠠᠭᠠᠨ ᠬᠥᠮᠦᠨ ᠵᠠᠪᠠᠯ ᠥᠪᠡᠷ ᠦ᠋ᠨ ᠨᠡᠢᠰᠯᠡᠯ ᠲᠥᠪ ᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠡᠳᠦᠭᠡ ᠪᠠᠢᠲᠤᠭᠠᠢ ᠡᠷᠲᠡᠨ ᠦ᠌ ᠨᠡᠭᠦᠳᠡᠯᠴᠢᠨ ᠤᠯᠤᠰ ᠾᠦᠩᠨᠦ ᠶ᠋ᠢᠨ ᠬᠠᠭᠠᠨ ᠥᠪᠡᠷ ᠦ᠋ᠨ ᠰᠠᠢᠬᠠᠨ ᠨᠡᠢᠰᠯᠡᠯ ᠲᠡᠢ ᠪᠠᠢᠭᠰᠠᠨ ᠭᠡᠵᠦ ᠰᠤᠳᠤᠷ ᠳᠤ ᠲᠡᠮᠳᠡᠭᠡᠯᠡᠭᠰᠡᠨ ᠨᠢ ᠪᠣᠢ᠃ ᠡᠢᠮᠦ ᠳ᠋ᠦ᠍ ᠶᠡᠬᠡ ᠡᠵᠡᠨ ᠲᠠ ᠥᠪᠡᠷ ᠦ᠋ᠨ ᠨᠡᠢᠰᠯᠡᠯ ᠲᠡᠢ ᠪᠣᠯᠵᠤ᠂ ᠲᠡᠭᠦᠨ ᠢ᠋ ᠪᠡᠨ ᠣᠯᠠᠨ ᠤᠯᠤᠰ ᠲᠤ ᠠᠯᠪᠠᠨ ᠶᠣᠰᠣᠭᠠᠷ ᠵᠠᠷᠯᠠᠬᠤ ᠤᠴᠢᠷᠲᠠᠢ᠃ ᠡᠨᠡ ᠱᠠᠩᠳᠤ ᠪᠣᠯ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠭᠡᠵᠦ ᠬᠤᠷᠠᠯᠳᠠᠢ ᠬᠢᠬᠦ ᠳ᠋ᠦ᠍ ᠪᠡᠨ ᠲᠡᠭᠦᠨ ᠢ᠋ ᠪᠡᠨ ᠵᠠᠷᠯᠢᠭ ᠪᠣᠯᠭᠠᠪᠠᠯ ᠲᠠᠭᠠᠷᠠᠨᠠ ᠭᠡᠯᠡ᠃ ᠬᠤᠪᠢᠯᠠᠢ ᠥᠪᠡᠷ ᠦ᠋ᠨ ᠪᠠᠭᠰᠢ᠂ ᠵᠥᠪᠯᠡᠬᠦ ᠲᠦᠰᠢᠮᠡᠯ ᠬᠣᠶᠠᠷ ᠤ᠋ᠨ ᠭᠠᠷᠭᠠᠭᠰᠠᠨ ᠠᠷᠭᠠ ᠨᠤᠭᠤᠳ ᠢ᠋ ᠳᠦᠭᠦᠷᠡᠩ ᠵᠥᠪᠰᠢᠶᠡᠷᠡᠵᠦ᠂ ᠳᠡᠭᠦᠦ ᠠᠷᠢᠬᠪᠥ᠋ᠭᠡ ᠲᠡᠢ ᠪᠡᠨ ᠬᠠᠭᠠᠨ ᠶᠣᠰᠣᠨ ᠤ᠋ ᠬᠠᠷᠢᠯᠴᠠᠭᠠ ᠪᠠᠷᠢᠬᠤ ᠦᠭᠡᠢ ᠭᠡᠮᠡᠨ ᠲᠣᠭᠲᠠᠵᠤ᠂ ᠲᠡᠭᠦᠨ ᠦ᠌ ᠡᠯᠴᠢ ᠪᠣᠯᠤᠭᠰᠠᠨ ᠬᠦᠯᠦᠭ ᠢ᠋ ᠪᠠᠷᠢᠨ ᠠᠪᠴᠤ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠨ᠂ ᠶᠠᠮᠠᠷ ᠳᠠᠭᠠᠭᠠᠯᠠᠭᠠᠪᠦᠷᠢᠲᠠᠢ᠂ ᠶᠠᠭᠤ ᠬᠢᠬᠦ ᠪᠡᠷ ᠢᠷᠡᠭᠰᠡᠨ ᠢ᠋ ᠨᠢ ᠡᠷᠡᠭᠦᠳᠡᠨ ᠠᠰᠠᠭᠤᠬᠤ ᠪᠠᠷ ᠪᠣᠯᠪᠠ᠃
ᠬᠦᠯᠦᠭ ᠰᠥᠨᠢ ᠳᠤᠮᠳᠠ ᠭᠡᠷ ᠲᠦ ᠪᠡᠨ ᠤᠨᠲᠠᠵᠤ ᠪᠠᠢᠬᠤ ᠳᠤ ᠨᠢ ᠬᠡᠳᠦᠨ ᠴᠡᠷᠢᠭ᠂ ᠨᠢᠭᠡ ᠳᠠᠭᠠᠭᠠᠮᠠᠯ ᠣᠴᠢᠭᠠᠳ᠂ ᠣᠯᠠᠨ ᠦᠭᠡ ᠴᠦ᠍ ᠦᠭᠡᠢ᠂ ᠰᠢᠭᠤᠳ ᠪᠠᠷᠢᠵᠤ ᠠᠪᠤᠭᠠᠳ᠂ ᠭᠠᠷ ᠢ ᠨᠢ ᠠᠷᠤ ᠳᠤ ᠨᠢ ᠬᠥᠯᠢᠨ ᠲᠠᠭᠤᠵᠤ ᠠᠪᠠᠴᠢᠵᠤ ᠠᠷᠢᠬᠪᠥ᠋ᠬᠡ ᠠᠴᠠ ᠶᠠᠮᠠᠷ ᠳᠤᠰᠢᠶᠠᠯ ᠬᠦᠯᠢᠶᠡᠵᠦ᠂ ᠶᠠᠭᠠᠬᠢᠬᠤ ᠭᠡᠵᠦ ᠢᠷᠡᠭ᠍ᠰᠡᠨ᠃ ᠲᠡᠷᠡ ᠨᠣᠶᠠᠨ ᠢ᠋ ᠴᠢ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠬᠠᠭᠠᠨ ᠭᠡᠵᠦ ᠪᠢᠰᠢᠷᠡᠵᠦ ᠪᠠᠢᠨᠠ ᠤᠤ? ᠭᠡᠬᠦᠴᠢᠯᠡᠨ ᠵᠦᠢᠯ ᠪᠠᠢᠴᠠᠭᠠᠨ ᠠᠰᠠᠭᠤᠵᠤ
— ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡ! ᠡᠰᠡ ᠬᠡᠯᠡᠪᠡᠯ ᠴᠠᠪᠴᠢᠨ ᠬᠣᠷᠣᠭᠠᠬᠤ ᠶᠠᠯᠠ ᠨᠣᠭᠳᠠᠭᠤᠯᠤᠨᠠ ᠭᠡᠵᠦ ᠰᠦᠷᠳᠡᠭᠦᠯᠦᠭᠰᠡᠨ ᠪᠠᠢᠨᠠ᠃ ᠬᠦᠯᠦᠭ ᠲᠡᠰᠪᠦᠷᠢᠯᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠦᠷ ᠨᠡᠯᠢᠶᠡᠨ ᠬᠣᠵᠢᠭᠤ ᠥᠪᠡᠷ ᠲᠦ᠍ ᠪᠡᠨ ᠲᠣᠬᠢᠶᠠᠯᠳᠤᠭᠰᠠᠨ ᠪᠦᠬᠦᠨ ᠢ᠋ ᠦᠨᠡᠨ ᠢ᠋ᠶ᠋ᠡᠷ ᠨᠢ ᠮᠡᠳᠡᠭᠦᠯᠵᠦ
— ᠣᠯᠠᠨ ᠨᠣᠶᠠᠳ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠴᠤᠭᠯᠠᠷᠠᠨ ᠬᠤᠷᠠᠯᠲᠠᠢ ᠬᠢᠭᠡᠳ ᠠᠷᠢᠬᠪᠥ᠋ᠬᠡ ᠶ᠋ᠢ ᠶᠡᠬᠡ ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠯᠭᠠᠬᠤ ᠪᠣᠯᠤᠨᠠ ᠭᠡᠵᠦ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ᠃ ᠪᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠠᠷᠢᠬᠪᠥ᠋ᠬᠡ ᠨᠣᠶᠠᠨ ᠬᠠᠭᠠᠨ ᠪᠣᠯᠬᠤ ᠶᠤᠮ ᠪᠠᠢᠵᠤ ᠭᠡᠵᠦ ᠪᠣᠳᠣᠭᠰᠠᠨ ᠭᠡᠮᠡᠨ ᠬᠤᠪᠢᠯᠠᠢ ᠳ᠋ᠤ᠌ ᠠᠢᠯᠠᠳᠬᠠᠭᠰᠠᠨ ᠢ᠋ᠶ᠋ᠠᠨ ᠶᠠᠭ ᠬᠡᠪ ᠢ᠋ᠶ᠋ᠡᠷ ᠨᠢ ᠥᠴᠢᠭᠰᠡᠨ ᠠᠵᠢ᠃ ᠡᠨᠡ ᠦᠭᠡ ᠲᠡᠭᠦᠨ ᠦ᠌ ᠦᠢᠯᠡᠳᠦᠭᠰᠡᠨ ᠭᠣᠣᠯ《ᠶᠠᠯᠠ》 ᠪᠣᠯᠵᠠᠢ᠃
ᠬᠥᠬᠡ ᠮᠥᠷᠡᠨ ᠦ᠌ ᠡᠷᠭᠢ ᠬᠠᠪᠢ ᠠ᠋ᠴᠠ ᠱᠠᠩᠳᠤ ᠬᠣᠲᠠ ᠳ᠋ᠤ᠌ ᠰᠠᠶᠢ ᠢᠷᠡᠵᠦ ᠰᠠᠭᠤᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠷᠭᠡᠳᠡ᠂ ᠲᠡᠭᠦᠨ ᠦ᠌ ᠳᠡᠳ᠋ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠯᠪᠠ ᠬᠠᠰᠢᠵᠤ ᠪᠠᠢᠭᠠ ᠴᠠᠭᠠᠨ ᠬᠤᠪᠢᠯᠠᠢ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠪᠠᠷᠠᠯᠬᠠᠨ ᠣᠷᠣᠯᠠ᠃ ᠶᠡᠬᠡ ᠵᠠᠬᠢᠷᠤᠭᠴᠢ ᠲᠡᠭᠦᠨ ᠢ᠋ ᠡᠶᠡᠯᠳᠡᠭᠬᠡᠨ ᠤᠭᠲᠤᠵᠤ᠂ ᠳᠡᠷᠭᠡᠳᠡ ᠪᠡᠨ ᠰᠠᠭᠤᠯᠭᠠᠭᠠᠳ᠂ ᠲᠡᠢᠨ ᠦ᠌ ᠭᠠᠵᠠᠷ ᠲᠤ ᠪᠣᠯᠵᠤ ᠪᠠᠢᠭᠠ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠠᠰᠠᠭᠤᠵᠤ ᠡᠬᠢᠯᠡᠪᠡ᠃ ᠴᠠᠭᠠᠨ ᠣᠪᠣ ᠲᠣᠪᠣᠬᠠᠨ ᠴᠣᠬᠣᠷ ᠨᠢᠭᠤᠷ ᠢ᠋ᠶ᠋ᠠᠨ ᠦᠷᠴᠢᠭᠢᠨᠡᠭᠦᠯᠦᠨ ᠢᠯᠢᠵᠦ᠂ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠥᠭᠦᠯᠡᠬᠦ ᠳ᠋ᠦ᠍ ᠪᠡᠨ᠄
— ᠰᠡᠭᠦᠯᠴᠢ ᠶ᠋ᠢᠨ ᠬᠡᠳᠦ ᠬᠣᠨᠣᠭ ᠲᠤ ᠭᠠᠷᠤᠭᠰᠠᠨ ᠣᠨᠴᠠᠭᠠᠢ ᠥᠭᠡᠷᠡᠴᠢᠯᠡᠯᠲᠡ ᠦᠭᠡᠢ ᠰᠢᠬᠠᠮ᠃ ᠪᠠᠢᠳᠠᠯ ᠢ᠋ ᠲᠠᠨ ᠳ᠋ᠤ᠌ ᠠᠢᠯᠠᠳᠬᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠠᠪᠤᠨ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠪᠠᠶᠠᠨ ᠵᠠᠩᠵᠤᠨ ᠤ᠋ ᠶᠡᠬᠡ ᠴᠡᠷᠢᠭ ᠳᠡᠢᠯᠥ᠋ᠩ ᠬᠣᠲᠠ ᠶ᠋ᠢ ᠳᠠᠭᠠᠷᠢᠨ ᠡᠵᠡᠯᠡᠭᠰᠡᠨ᠃ ᠮᠠᠨ ᠤ᠋ ᠴᠡᠷᠢᠭ ᠤᠭ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠢ᠋ ᠦᠬᠡᠷ ᠣᠨᠢᠰᠣ ᠪᠠᠷ ᠣᠨᠢᠰᠣ ᠪᠠᠷ ᠬᠠᠷᠪᠤᠵᠤ ᠴᠥᠯᠮᠡᠭᠡᠳ᠂ ᠡᠰᠡᠷᠬᠦᠴᠡᠭᠴᠢᠳ ᠢ᠋ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠨᠢ ᠣᠯᠵᠠᠯᠠᠨ ᠠᠪᠴᠤ ᠭᠠᠷ ᠲᠤ ᠪᠠᠨ ᠣᠷᠣᠭᠤᠯᠤᠭᠰᠠᠨ᠃ ᠲᠡᠨᠳᠡ ᠮᠠᠨ ᠤ᠋ ᠲᠠᠯᠠ ᠠ᠋ᠴᠠ ᠨᠢᠭᠡᠨ ᠵᠠᠭᠤ ᠰᠢᠬᠠᠮ ᠬᠥᠮᠦᠨ᠂ ᠰᠥᠩ ᠦ᠋ᠨ ᠲᠠᠯᠠ ᠠ᠋ᠴᠠ ᠭᠤᠷᠪᠠᠨ ᠮᠢᠩᠭᠠᠨ ᠬᠥᠮᠦᠨ ᠥᠷᠭᠡᠳᠡᠭᠰᠡᠨ ᠪᠣᠯᠤᠯᠲᠠᠢ ᠴᠢᠮᠡᠭᠡ ᠪᠢ ᠰᠠᠶᠢ ᠠᠪᠤᠯᠠ ᠭᠡᠵᠦ ᠠᠢᠯᠠᠳᠬᠠᠬᠤ ᠳ᠋ᠤ᠌ ᠬᠤᠪᠢᠯᠠᠢ ᠲᠠᠭᠠᠯᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠠᠷᠠᠵᠤ᠄
— ᠮᠠᠨ ᠤ᠋ ᠳᠣᠪᠲᠣᠯᠭᠠ ᠤᠷᠤᠭᠰᠢᠯᠠᠭᠰᠠᠭᠠᠷ ᠯᠠ ᠪᠠᠢᠬᠤ ᠰᠢᠪ᠃ ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠴᠥᠬᠥᠷᠡᠯᠲᠡ ᠦᠭᠡᠢ ᠨᠦᠳᠦᠯᠳᠦᠭᠰᠡᠭᠡᠷ ᠪᠠᠢᠨᠠ᠃ ᠪᠢᠳᠡᠨ ᠢ᠋ ᠳᠡᠢᠯᠦᠨᠡ ᠭᠡᠵᠦ ᠪᠣᠳᠣᠭᠠᠳ ᠪᠠᠢᠭᠠ ᠤᠤ᠂ ᠲᠡᠳᠡ? ᠭᠡᠯᠡ᠃ ᠴᠠᠭᠠᠨ ᠵᠠᠬᠢᠷᠤᠭᠴᠢ ᠪᠠᠨ ᠰᠢᠷᠲᠡᠵᠦ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠪᠢᠳᠡ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠠᠮᠢ ᠶ᠋ᠢ ᠬᠠᠢᠷᠠᠯᠠᠵᠤ ᠪᠠᠢᠨᠠ᠃ ᠬᠦᠴᠦᠲᠦ ᠰᠠᠯᠬᠢ ᠰᠢᠭᠤᠷᠭᠠ ᠠᠳᠠᠯᠢ ᠤᠴᠢᠷ ᠵᠦᠭ ᠦᠭᠡᠢ ᠳᠠᠭᠠᠷᠢᠪᠠᠯ ᠴᠤ᠌ ᠬᠡᠳᠦᠬᠡᠨ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠰᠥᠩ ᠦ᠋ᠨ ᠪᠦᠬᠦ ᠴᠡᠷᠢᠭ ᠢ᠋ ᠠᠷᠴᠢᠭᠠᠳ ᠬᠠᠶᠠᠴᠢᠬᠠᠵᠤ ᠪᠣᠯᠤᠮᠠᠷ ᠪᠠᠢᠨᠠ᠃ ᠮᠣᠷᠢᠨ ᠳ᠋ᠤ᠌ ᠶᠡᠬᠡ ᠬᠠᠯᠭᠤᠭᠠᠲᠠᠢ᠂ ᠵᠠᠷᠢᠮ ᠳ᠋ᠤ᠌ ᠪᠠᠨ ᠬᠡᠳᠦ ᠬᠠᠯᠠᠭᠤᠨ ᠭᠠᠵᠠᠷ ᠲᠤ ᠲᠣᠮᠣ ᠳᠠᠭᠠᠷᠢᠯᠲᠠ ᠬᠢᠵᠦ ᠬᠥᠮᠦᠨ᠂ ᠮᠣᠷᠢ ᠬᠣᠶᠠᠷ ᠢ᠋ᠶ᠋ᠠᠨ ᠣᠯᠠᠨ ᠢ᠋ᠶ᠋ᠠᠷ ᠭᠠᠷᠤᠵᠠᠳᠠᠪᠠᠯ ᠬᠡᠳᠦ ᠶ᠋ᠢᠨ ᠶᠠᠪᠤᠳᠠᠯ ᠳ᠋ᠤ᠌ ᠮᠠᠭᠤ ᠪᠣᠯᠬᠤ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠭᠠᠳ ᠪᠠᠢᠭᠠ ᠶᠤᠮ ᠭᠡᠯᠡ᠃ ᠬᠤᠪᠢᠯᠠᠢ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠴᠢᠷᠠᠢ ᠪᠠᠷ ᠴᠠᠭᠠᠨ ᠢ᠋ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠵᠠᠩᠵᠤᠨ ᠮᠢᠨᠢ! ᠡᠮᠦᠨᠡ ᠵᠦᠭ ᠲᠦ᠍ ᠬᠢᠵᠦ ᠪᠠᠢᠭᠠ ᠪᠢᠳᠡᠨ ᠦ᠌ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠨᠢᠭᠡ ᠰᠠᠳᠠᠭᠠ ᠭᠠᠷᠴᠤ ᠢᠷᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠠᠶᠠᠭᠦᠢ ᠪᠣᠯ ᠪᠢᠳᠡ ᠲᠡᠢᠨ ᠢ᠋ ᠲᠦᠷ ᠵᠠᠭᠤᠷᠠ ᠵᠣᠭᠰᠣᠭᠠᠵᠤ ᠮᠠᠭᠠᠳ ᠦᠭᠡᠢ ᠪᠣᠯᠬᠤ ᠨᠢ ᠤᠤ᠃ ᠲᠡᠭᠦᠨ ᠢ᠋ ᠬᠣᠶᠠᠭᠤᠯᠠ ᠪᠠᠨ ᠶᠠᠷᠢᠯᠴᠠᠬᠤ ᠤᠴᠢᠷ ᠤᠷᠭᠤᠯᠠ ᠭᠡᠵᠦ ᠬᠡᠯᠡᠪᠡ᠃
ᠴᠠᠭᠠᠨ ᠭᠠᠢᠬᠠᠨ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠭᠠᠳ᠄
— ᠶᠡᠬᠡ ᠵᠠᠬᠢᠷᠤᠭᠴᠢ ᠮᠢᠨᠢ! ᠶᠠᠮᠠᠷ ᠬᠡᠷᠡᠭ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠮᠠᠨᠠᠷᠠᠨ ᠭᠠᠷᠴᠤ ᠢᠷᠡᠪᠡ ᠠ᠋? ᠭᠡᠮᠡᠨ ᠠᠰᠠᠭᠤᠯᠠ᠃ ᠬᠤᠪᠢᠯᠠᠢ ᠬᠠᠷᠠ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠪᠣᠳᠣᠯᠬᠢᠯᠠᠵᠤ᠄
— ᠴᠢ ᠲᠤᠭᠤᠯᠤᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ ᠳᠠ᠃ ᠬᠠᠷᠠᠬᠣᠷᠣᠮ ᠤ᠋ᠨ ᠶᠠᠪᠤᠳᠠᠯ ᠢ᠋ ᠭᠡᠪᠡ᠃
— ᠠ᠂ ᠵᠠᠬᠢᠷᠤᠭᠴᠢ ᠲᠠᠨ ᠤ᠋ ᠳᠡᠭᠦᠦ ᠶ᠋ᠢ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣ ᠰᠠᠭᠤᠯᠭᠠᠬᠤ ᠭᠡᠰᠡᠨ ᠨᠢᠭᠡ ᠦᠭᠡ ᠳᠤᠤᠯᠢᠶᠠᠨᠲᠠᠢ ᠲᠠᠷᠬᠠᠵᠤ ᠪᠠᠢᠭᠠ᠃ ᠲᠠ ᠲᠡᠭᠦᠨ ᠢ᠋ ᠪᠣᠯᠭᠣᠭᠠᠨ ᠬᠡᠯᠡᠵᠦ ᠪᠠᠢᠨᠠ ᠤᠤ?
— ᠲᠡᠢᠮᠦ᠃ ᠴᠢ ᠲᠤᠭᠤᠯᠤᠭᠰᠠᠨ ᠪᠠᠢᠨᠠ ᠰᠢᠦ ᠳᠡ᠃ ᠲᠡᠭᠦᠨ ᠢ᠋ ᠴᠢ ᠪᠢᠳᠡᠨ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠡᠳ ᠳᠠᠭᠤ ᠦᠭᠡᠢ ᠬᠠᠷᠠᠵᠤ ᠪᠠᠢᠬᠤ ᠤᠤ? ᠬᠢᠲᠠᠳ ᠪᠠᠭᠰᠢ᠂ ᠵᠥᠪᠯᠡᠭᠴᠢ ᠨᠠᠷ ᠨᠠᠮᠠᠶ᠋ᠢ ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠤᠬᠠᠭᠠᠷᠠᠭᠤᠯᠬᠤ ᠭᠡᠵᠦ ᠲᠡᠢᠮᠦ ᠬᠡᠷᠡᠭ ᠢ᠋ ᠲᠡᠪᠴᠢᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠡᠭᠡᠵᠦ ᠪᠠᠢᠨᠠ᠂ ᠬᠣᠣ ᠵᠢᠩ ᠲᠦᠰᠢᠮᠡᠯ ᠡᠨᠳᠡ ᠣᠷᠣᠵᠤ ᠢᠷᠡᠭᠡᠳ᠂ ᠶᠡᠬᠡᠳᠡ ᠭᠠᠢᠬᠠᠨ《ᠡᠨᠡ ᠬᠡᠷᠡᠭ ᠶᠠᠪᠤᠳᠠᠯ ᠮᠣᠩᠭᠣᠯᠴᠤᠳ ᠲᠠ ᠨᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠵᠡᠪᠰᠡᠭ ᠵᠥᠷᠢᠭᠦᠯᠵᠦ ᠪᠠᠢᠵᠤ ᠯᠠ ᠤᠴᠢᠷ ᠢ᠋ᠶ᠋ᠠᠨ ᠣᠯᠵᠤ ᠰᠠᠯᠤᠨᠠ᠃ ᠲᠡᠭᠦᠨ ᠳ᠋ᠦ᠍ ᠰᠦᠷᠡᠬᠡᠢ ᠪᠡᠯᠡᠳᠬᠡᠬᠦ ᠶᠣᠰᠣᠲᠠᠢ ᠪᠣᠯᠵᠤ ᠰᠢᠦ》 ᠭᠡᠵᠦ ᠬᠡᠯᠡᠭᠡᠳ ᠭᠠᠷᠤᠭᠰᠠᠨ᠃ ᠵᠣᠣ ᠪᠢ ᠲᠦᠰᠢᠮᠡᠯ ᠪᠠᠰᠠ ᠲᠡᠢᠮᠦ ᠦᠭᠡ ᠬᠡᠯᠡᠵᠦ ᠪᠠᠢᠨᠠ᠃ ᠡᠭᠦᠨ ᠢ᠋ ᠪᠢ ᠵᠠᠩᠵᠤᠨ ᠴᠢᠮᠠᠲᠠᠢ ᠵᠥᠪᠯᠡᠯᠳᠦᠨ ᠰᠢᠢᠳᠬᠦ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠤᠯᠠ ᠭᠡᠵᠦ ᠵᠠᠬᠢᠷᠤᠭᠴᠢ ᠤᠴᠢᠷᠯᠠᠨ ᠥᠭᠦᠯᠡᠯᠡ᠃ ᠴᠠᠭᠠᠨ ᠲᠠᠭᠠᠵᠠ ᠰᠢᠷᠲᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠡᠨᠡ ᠬᠡᠷᠡᠭ ᠦᠨᠡᠬᠡᠷ ᠨᠤᠬᠤᠴᠠᠲᠠᠢ ᠪᠠᠢᠨᠠ ᠰᠢᠦ ᠭᠡᠵᠦ ᠬᠡᠯᠡᠬᠦ ᠨᠢ《ᠪᠢ ᠠᠬᠠ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠠᠯᠢᠨ ᠤ᠋ ᠬᠢᠨᠢ ᠲᠠᠯᠠ ᠳ᠋ᠤ᠌ ᠵᠣᠭᠰᠣᠪᠠᠯ ᠬᠣᠵᠢᠮ ᠳ᠋ᠤ᠌ ᠪᠠᠨ ᠨᠢᠭᠤᠷ ᠢᠯᠡᠭᠦᠦ ᠪᠣᠯᠬᠤ ᠪᠣᠢ? ᠠᠷᠢᠬᠪᠥ᠋ᠬᠡ ᠲᠥᠷᠥᠭᠰᠡᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠣᠯᠠᠨ ᠤ᠋ ᠳᠡᠮᠵᠢᠯᠭᠡ ᠶ᠋ᠢ ᠠᠪᠴᠤ ᠶᠡᠬᠡᠬᠡᠨ ᠬᠦᠴᠦᠲᠡᠢ ᠪᠣᠯᠤᠭᠠ ᠪᠢᠵᠡ᠃ ᠬᠤᠪᠢᠯᠠᠢ ᠳ᠋ᠤ᠌ ᠴᠤ᠌ ᠨᠡᠯᠢᠶᠡᠨ ᠶᠠᠭᠤᠮᠠ ᠪᠠᠢᠨᠠ᠃ ᠬᠢᠲᠠᠳ ᠤ᠋ᠳ ᠡᠭᠦᠨ ᠦ᠌ ᠲᠠᠯᠠ ᠳ᠋ᠤ᠌ ᠪᠠᠲᠤᠲᠠᠢ ᠵᠣᠭᠰᠣᠵᠤ ᠪᠠᠢᠭᠠ ᠨᠢ ᠶᠠᠭ ᠦᠭᠡᠢ ᠬᠡᠷᠡᠭ᠃ ᠬᠤᠪᠢᠯᠠᠢ ᠶ᠋ᠢ ᠴᠠᠭᠠᠰᠢ ᠨᠢ ᠲᠦᠯᠬᠢᠪᠡᠯ ᠪᠢᠳᠡ ᠬᠢᠲᠠᠳ ᠢ᠋ ᠲᠦᠷ ᠪᠣᠯᠪᠠᠴᠤ ᠠᠯᠳᠠᠵᠤ ᠮᠡᠳᠡᠨᠡ᠃ ᠬᠣᠢᠲᠤ᠂ ᠤᠷᠲᠤ ᠬᠣᠶᠠᠷ ᠬᠢᠲᠠᠳ ᠨᠢᠭᠡᠳᠦᠭᠡᠳ ᠮᠠᠨ ᠤ᠋ ᠥᠭᠡᠳᠡ ᠡᠴᠡ ᠪᠣᠰᠴᠤ ᠢᠷᠡᠪᠡᠯ ᠨᠡᠯᠢᠶᠡᠨ ᠶᠠᠷᠰᠢᠭ ᠣᠲᠣᠬᠤ ᠬᠡᠷᠡᠭ ᠮᠠᠨᠠᠷᠠᠨᠠ ᠭᠡᠰᠡᠨ ᠦᠭᠡ᠃ ᠠᠬᠠ ᠳᠡᠭᠦᠦ ᠬᠣᠶᠠᠷ ᠲᠤᠯᠤᠯᠳᠤᠯᠠ ᠭᠡᠬᠦ ᠳ᠋ᠦ᠍ ᠬᠡᠷᠪᠡ ᠬᠢᠲᠠᠳ ᠴᠡᠷᠢᠭ ᠡᠭᠦᠨ ᠳ᠋ᠦ᠍ ᠲᠤᠰᠠᠯᠠᠪᠠᠯ ᠡᠨᠡ ᠵᠠᠬᠢᠷᠤᠭᠴᠢ ᠳᠡᠢᠯᠦᠨᠡ᠃ ᠡᠨᠳᠡ ᠰᠠᠭᠤᠳᠠᠭ ᠰᠢᠢᠳᠪᠦᠷᠢᠯᠡᠬᠦ ᠨᠥᠯᠥᠭᠡ ᠪᠦᠬᠦᠢ ᠲᠦᠰᠢᠮᠡᠳ ᠦ᠋ᠳ ᠦ᠋ᠨ ᠲᠡᠷᠡ ᠦᠭᠡᠨ ᠡᠴᠡ ᠦᠵᠡᠬᠦ ᠳ᠋ᠦ᠍ ᠬᠢᠲᠠᠳ ᠤ᠋ᠳ ᠬᠤᠪᠢᠯᠠᠢ ᠳ᠋ᠤ᠌ ᠲᠤᠰᠠᠯᠠᠬᠤ ᠨᠢ ᠯᠠᠪᠲᠠᠢ ᠰᠢᠪ᠃ ᠲᠡᠭᠡᠪᠡᠯ ᠪᠢ ᠬᠤᠪᠢᠯᠠᠢ ᠪᠠᠨ ᠪᠠᠷᠠᠳᠠᠭᠰᠠᠨ ᠨᠢ ᠳᠡᠭᠡᠷᠡ ᠪᠣᠯᠬᠤ ᠤᠤ? ᠡᠨᠡ ᠨᠣᠶᠠᠨ ᠨᠠᠳᠠᠳᠤ ᠮᠠᠭᠤ ᠴᠤ᠌ ᠪᠢᠰᠢ᠃ ᠨᠠᠳᠠᠳᠤ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠰᠢᠭ᠂ ᠬᠡᠷᠬᠡᠮ ᠵᠡᠷᠭᠡ ᠬᠠᠢᠷᠠᠯᠠᠵᠤ ᠪᠠᠢᠭᠠ᠃ ᠣᠳᠣ ᠴᠦ᠍ ᠭᠡᠬᠦᠨᠡ ᠪᠢ ᠥᠨᠳᠥᠷ ᠬᠡᠷᠬᠡᠮ ᠲᠡᠢ ᠶᠠᠪᠤᠵᠤ ᠪᠠᠢᠨᠠ᠃ ᠡᠨᠡ ᠮᠠᠨᠢ ᠬᠡᠳᠦᠢ ᠮᠢᠨᠦ ᠥᠪᠡᠷ ᠦ᠋ᠨ ᠬᠦᠴᠦ ᠪᠣᠯᠪᠠᠴᠤ ᠬᠤᠪᠢᠯᠠᠢ ᠡᠷᠭᠦᠨ ᠲᠡᠮᠵᠢᠭᠡ ᠦᠭᠡᠢ ᠪᠣᠯ ᠶᠠᠮᠠᠷ ᠴᠦ᠍ ᠪᠣᠯᠬᠤ ᠪᠢᠯᠡ᠃ ᠢᠩᠭᠢᠬᠦ ᠪᠡᠷ ᠬᠤᠪᠢᠯᠠᠢ ᠶ᠋ᠢ ᠪᠡᠨ ᠳᠡᠭᠡᠳᠦᠯᠡᠵᠦ᠂ ᠲᠡᠭᠦᠨ ᠢ᠋ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡᠨᠡ ᠶᠠᠪᠤᠨᠠ ᠪᠠᠢᠭᠠ᠃ ᠢᠩᠭᠢᠭᠦᠯᠬᠦ ᠯᠡ ᠭᠡᠵᠦ ᠡᠨᠡ ᠵᠠᠬᠢᠷᠤᠭᠴᠢ ᠨᠠᠳᠠᠲᠠᠢ ᠵᠥᠪᠯᠡᠯᠳᠦᠬᠦ ᠭᠡᠰᠡᠨ ᠰᠠᠨᠠᠭᠠ ᠭᠠᠷᠭᠠᠨ ᠠᠭᠤᠯᠵᠠᠵᠤ ᠪᠠᠢᠭᠠ ᠨᠢ ᠯᠠᠪᠲᠠᠢ》 ᠭᠡᠮᠡᠨ ᠪᠣᠳᠣᠭᠠᠳ᠄
— ᠵᠠᠬᠢᠷᠤᠭᠴᠢ ᠮᠢᠨᠢ! ᠪᠢᠳᠡ ᠤᠴᠢᠷᠲᠠᠢᠬᠠᠨ ᠬᠥᠳᠡᠯᠬᠦ ᠦᠭᠡᠢ ᠪᠣᠯ ᠲᠠᠨ ᠤ᠋ ᠳᠡᠭᠦᠦ ᠠᠷᠢᠬᠪᠥ᠋ᠬᠡ ᠨᠠᠯᠢᠶᠠᠨ ᠬᠦᠴᠦᠲᠡᠢ ᠪᠠᠢᠭᠠ ᠰᠢᠦ᠃ ᠠᠷᠤ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠭᠡᠨᠡ᠃ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠭᠤᠷᠪᠠᠨ ᠲᠦᠮᠡ ᠪᠠᠢᠳᠠᠭ᠃ ᠳᠡᠭᠡᠷᠡ ᠨᠢ ᠬᠠᠢᠲᠦ ᠨᠣᠶᠠᠨ ᠤ᠋ ᠴᠡᠷᠢᠭ ᠨᠡᠮᠡᠭᠳᠡᠨᠡ᠃ ᠪᠦᠷ ᠴᠠᠭᠠᠨᠠ ᠠ᠋ᠴᠠ ᠠᠯᠲᠠᠨ ᠣᠷᠳᠣᠨ ᠤ᠋ ᠴᠡᠷᠢᠭ ᠢᠷᠡᠬᠦ ᠦᠭᠡᠢ ᠭᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠢᠵᠡ ᠭᠡᠵᠦ ᠬᠡᠯᠡᠯᠡ᠃ ᠬᠤᠪᠢᠯᠠᠢ ᠪᠣᠳᠣᠯᠬᠢᠯᠠᠨ ᠪᠠᠢᠵᠤ
— ᠴᠢ ᠬᠠᠰᠢᠷ ᠵᠠᠩᠵᠤᠨ ᠤ᠋ ᠦᠭᠡ ᠴᠤᠬᠤᠢᠯᠭᠠᠵᠤ ᠪᠠᠢᠨᠠ᠃ ᠠᠷᠢᠬᠪᠥ᠋ᠬᠡ ᠶ᠋ᠢᠨ ᠴᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠪᠠᠢᠭᠠ ᠬᠦᠴᠦ ᠶ᠋ᠢ ᠪᠢᠳᠡ ᠰᠠᠨᠠᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃ ᠤᠷᠢᠶᠠᠩᠬᠠᠢᠳᠠᠢ᠂ ᠪᠠᠶᠠᠨ᠂ ᠲᠣᠭᠣᠭᠠᠨ ᠮᠡᠲᠦ ᠵᠠᠩᠵᠤᠨ ᠨᠤᠭᠤᠳ ᠢ᠋ ᠪᠢᠳᠡ ᠣᠳᠣᠬᠠᠨ ᠨᠠᠭᠠᠰᠢ ᠨᠢ ᠢᠷᠡᠭᠦᠯᠦᠨ ᠠᠮᠢᠨ ᠦᠭᠡ ᠪᠡᠨ ᠬᠡᠯᠡᠯᠴᠡᠵᠦ ᠠᠪᠬᠤ ᠦᠭᠡᠢ ᠪᠣᠯ ᠭᠣᠷᠢ ᠦᠭᠡᠢ ᠪᠣᠯᠤᠨᠠ ᠪᠢᠵᠡ ᠳᠡ? ᠲᠡᠢᠮᠦ ᠤᠤ? ᠭᠡᠯᠡ᠃
— ᠲᠠ ᠵᠥᠪ ᠢ᠋ ᠪᠣᠯᠭᠣᠭᠠᠵᠤ ᠪᠠᠢᠨᠠ᠃ ᠤᠷᠢᠶᠠᠩᠬᠠᠢᠳᠠᠢ᠂ ᠪᠠᠶᠠᠨ᠂ ᠲᠣᠭᠣᠭᠠᠨ ᠠᠯᠢ ᠨᠢ ᠴᠦ᠍ ᠮᠢᠨᠦ ᠦᠭᠡᠨ ᠡᠴᠡ ᠵᠥᠷᠢᠬᠦ ᠬᠥᠮᠦᠰ ᠪᠢᠰᠢ᠃ ᠪᠢᠳᠡ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠲᠤ ᠪᠡᠶᠡ ᠪᠡᠶᠡ ᠪᠡᠨ ᠰᠣᠷᠢᠵᠤ ᠭᠦᠢᠴᠡᠭᠰᠡᠨ ᠶᠦᠮ ᠳ᠋ᠠᠭ᠃ ᠬᠠᠷᠢᠨ ᠪᠢᠳᠡᠨ ᠢ᠋ ᠴᠡᠷᠢᠭ ᠢ᠋ᠶ᠋ᠡᠨ ᠲᠠᠲᠠᠬᠤ ᠪᠠᠷ ᠰᠥᠩ ᠦ᠋ᠨ ᠬᠠᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠨᠠᠭᠠᠰᠢ ᠨᠢ ᠳᠠᠪᠰᠢᠭᠤᠯᠵᠤ ᠮᠠᠭᠠᠳ ᠦᠭᠡᠢ ᠤᠴᠢᠷ ᠭᠠᠷᠭᠠᠨᠠ ᠰᠢᠦ᠃ ᠡᠭᠦᠨ ᠢ᠋ ᠪᠣᠳᠣᠬᠤ ᠶᠣᠰᠣᠲᠠᠢ᠃
— ᠲᠡᠭᠦᠨ ᠢ᠋ ᠪᠢ ᠪᠣᠳᠣᠭᠰᠠᠨ᠃ ᠰᠥᠩ ᠦ᠋ᠨ ᠬᠠᠭᠠᠨ《ᠨᠠᠢᠷᠠᠮᠳᠠᠶᠠ᠂ ᠠᠯᠪᠠ ᠪᠠᠷᠢᠶᠠ》 ᠭᠡᠵᠦ ᠪᠢᠴᠢᠭ ᠮᠠᠨ ᠤ᠋ ᠳ᠋ᠤ᠌ ᠰᠠᠶᠢ ᠡᠷᠭᠦᠭᠰᠡᠨ ᠪᠠᠢᠨᠠ ᠪᠢᠯᠡ᠃ ᠲᠡᠭᠦᠨ ᠢ᠋ ᠨᠢ ᠰᠤᠳᠤᠯᠵᠤ ᠪᠠᠢᠭᠠ ᠶᠠᠩᠵᠤ ᠦᠵᠡᠭᠦᠯᠦᠨ ᠬᠠᠭᠤᠷᠴᠤ ᠳᠥᠩᠭᠡᠬᠦ ᠪᠣᠯᠪᠠ ᠤᠤ᠃ ᠲᠡᠢᠮᠦ ᠤᠬᠠᠭᠠᠨ ᠢ᠋ ᠲᠠ ᠨᠠᠷ ᠪᠣᠳᠣᠬᠤ ᠪᠢᠵᠡ ᠭᠡᠵᠦ ᠬᠤᠪᠢᠯᠠᠢ ᠬᠡᠯᠡᠭᠡᠳ ᠶᠠᠷᠢᠶᠠ ᠪᠠᠨ ᠲᠡᠭᠦᠰᠬᠡᠬᠦ ᠳ᠋ᠦ᠍ ᠪᠡᠨ᠂ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠱᠠᠩᠳᠤ ᠳ᠋ᠤ᠌ ᠵᠠᠩᠵᠤᠨ ᠨᠤᠭᠤᠳ ᠢ᠋ᠶ᠋ᠠᠨ ᠳᠠᠭᠤᠳᠠᠬᠤ᠂ ᠪᠠᠷᠠᠭᠤᠨ ᠵᠦᠭ ᠡᠯᠴᠢ ᠵᠠᠷᠤᠵᠤ᠂ ᠠᠷᠢᠬᠪᠥ᠋ᠬᠡ ᠶ᠋ᠢᠨ《ᠮᠣᠭᠤᠢ(ᠥᠩᠬᠥᠷᠢᠭᠦᠯᠭᠡ)》 ᠶ᠋ᠢ ᠳᠠᠭᠤᠳᠠᠨ ᠢᠷᠡᠨ ᠪᠣᠯᠤᠨ ᠠᠯᠲᠠᠨ ᠣᠷᠳᠣᠨ ᠳ᠋ᠤ᠌ ᠬᠡᠯᠡᠬᠦ᠂ ᠳᠤᠮᠳᠠᠳᠤ ᠣᠷᠣᠨ ᠳ᠋ᠤ᠌ ᠡᠯᠴᠢ ᠵᠠᠷᠤᠵᠤ ᠲᠡᠷᠡ ᠦᠭᠡ ᠪᠡᠨ ᠳᠣᠭᠣᠯᠭᠠᠬᠤ ᠭᠡᠵᠦ ᠪᠠᠰᠠ ᠲᠣᠭᠲᠠᠯᠠ᠃
ᠬᠡᠯᠡᠯᠴᠡᠭᠰᠡᠨ ᠶᠣᠰᠣᠭᠠᠷ ᠳᠠᠭᠤᠳᠠᠭᠤᠯᠤᠭᠰᠠᠨ ᠬᠥᠮᠦᠰ ᠴᠦ᠍ ᠱᠠᠩᠳᠤ ᠳ᠋ᠤ᠌ ᠳᠣᠣᠷᠠ ᠪᠠᠨ ᠢᠷᠡᠵᠦ ᠴᠤᠭᠯᠠᠷᠠᠪᠠ᠃ ᠪᠠᠰᠠ ᠵᠣᠣ ᠪᠢ ᠪᠣᠯᠤᠨ ᠬᠣᠣ ᠵᠢᠩ ᠨᠠᠷ ᠤ᠋ᠨ ᠰᠠᠨᠠᠯ ᠶᠣᠰᠣᠭᠠᠷ ᠱᠠᠩᠳᠤ ᠶ᠋ᠢ ᠨᠡᠢᠰᠯᠡᠯ ᠪᠣᠯᠭᠠᠬᠤ᠂《ᠶᠡᠬᠡ ᠬᠤᠷᠠᠯᠳᠠᠢ》 ᠶ᠋ᠢ ᠵᠠᠷᠯᠠᠨ ᠡᠨᠳᠡ ᠬᠤᠷᠠᠯᠳᠤᠭᠤᠯᠬᠤ ᠬᠡᠷᠡᠭ ᠢ᠋ ᠬᠤᠪᠢᠯᠠᠢ ᠴᠠᠭᠠᠨ ᠵᠠᠩᠵᠤᠨ ᠢ᠋ᠶ᠋ᠠᠷ ᠳᠡᠮᠵᠢᠭᠦᠯᠦᠭᠡᠳ᠂ ᠡᠴᠦᠰ ᠲᠦ᠍ ᠨᠢ ᠢᠷᠡᠭᠰᠡᠨ ᠨᠣᠶᠠᠳ᠂ ᠵᠠᠩᠵᠤᠨ ᠨᠤᠭᠤᠳ ᠢ᠋ ᠲᠤᠰᠬᠠᠢᠯᠠᠨ ᠪᠡᠯᠡᠳᠬᠡᠭᠦᠯᠦᠭᠰᠡᠨ ᠬᠣᠭᠣᠯᠠᠨ ᠳ᠋ᠤ᠌ ᠪᠠᠨ ᠳᠠᠭᠠᠭᠤᠯᠤᠨ ᠣᠷᠣᠵᠤ ᠰᠠᠭᠤᠭᠠᠳ᠂ ᠣᠷᠳᠣᠨ ᠪᠠᠢᠰᠢᠩ ᠪᠠᠷᠢᠭᠤᠯᠵᠤ ᠥᠭᠭᠦᠨᠡ ᠭᠡᠯᠡ᠃ ᠱᠠᠩ ᠬᠦᠷᠲᠡᠭᠡᠬᠦ ᠳ᠋ᠦ᠍ ᠠᠪᠬᠤ ᠦᠭᠡᠢ ᠭᠡᠬᠦ ᠬᠡᠨ ᠪᠠᠢᠬᠤ ᠪᠣᠢ᠃
ᠪᠥᠭᠲᠥᠷ ᠨᠢᠷᠤᠭᠤᠲᠤ ᠯᠢᠦ ᠪᠢᠩ ᠵᠦᠩ ᠭᠠᠷ ᠲᠤ ᠪᠠᠨ ᠬᠤᠢᠯᠠᠭᠠᠰᠤᠲᠠᠢ ᠴᠠᠭᠠᠰᠤ ᠪᠠᠷᠢᠭᠰᠠᠭᠠᠷ᠂ ᠪᠠᠶᠠᠷᠯᠠᠭᠰᠠᠨ ᠴᠢᠷᠠᠢ ᠲᠠᠢ ᠪᠠᠷ ᠬᠤᠪᠢᠯᠠᠢ ᠳᠡᠭᠡᠷᠡ ᠣᠷᠣᠵᠤ ᠢᠷᠡᠯᠡ᠃ ᠲᠡᠷᠡ ᠪᠡᠷ ᠢᠨᠢᠶᠡᠨ ᠲᠠᠭᠠᠯᠠᠵᠤ᠄
— ᠶᠡᠬᠡ ᠡᠵᠡᠨ ᠲᠠ ᠡᠨᠡ ᠱᠠᠩᠳᠤ ᠬᠣᠲᠠ ᠪᠠᠨ ᠨᠡᠢᠰᠯᠡᠯ ᠪᠣᠯᠭᠠᠬᠤ ᠭᠡᠵᠦ ᠪᠠᠢᠨᠠ ᠭᠡᠨᠡ᠃ ᠲᠡᠭᠦᠨ ᠳ᠋ᠦ᠍ ᠨᠢ ᠪᠢ ᠪᠡᠶᠡᠰᠴᠦ ᠶᠠᠪᠤᠨᠠ᠃ ᠲᠡᠭᠡᠵᠦ ᠴᠦ᠍ ᠪᠣᠳᠣᠵᠤ ᠡᠨᠡ ᠬᠣᠲᠠ ᠶ᠋ᠢ ᠪᠠᠷᠢᠭᠤᠯᠤᠭᠰᠠᠨ③᠃ ᠶᠡᠷᠦ ᠨᠢ ᠬᠢᠲᠠᠳ ᠢ᠋ ᠠᠷᠭᠠ ᠪᠠᠷ᠂ ᠬᠢᠲᠠᠳ ᠭᠠᠵᠠᠷ ᠳᠡᠭᠡᠷᠡ ᠡᠴᠡ ᠵᠠᠯᠠᠵᠤ ᠤᠳᠤᠷᠢᠳᠬᠤ ᠦᠭᠡᠢ ᠪᠣᠯ ᠠᠯᠤᠰ ᠤ᠋ᠨ ᠶᠡᠬᠡ ᠬᠡᠷᠡᠭ ᠪᠦᠲᠦᠬᠦ ᠦᠭᠡᠢ ᠪᠠᠢᠭᠰᠠᠨ᠃ ᠡᠭᠦᠨ ᠢ᠋ ᠴᠡᠴᠡᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠ ᠪᠣᠯᠭᠣᠭᠠᠵᠠᠢ ᠭᠡᠳ᠂ ᠱᠠᠩᠳᠤ ᠶ᠋ᠢ ᠨᠡᠢᠰᠯᠡᠯ ᠪᠣᠯᠭᠠᠬᠤ ᠳ᠋ᠤ᠌ ᠨᠡᠮᠡᠵᠦ ᠬᠡᠳᠦᠨ ᠪᠠᠷᠢᠯᠭᠠ ᠪᠠᠷᠢᠨᠠ᠃ ᠲᠤᠬᠠᠢᠯᠠᠪᠠᠯ ᠳᠡᠭᠡᠳᠦᠰ ᠦ᠋ᠳ ᠲᠦ᠍ ᠠᠯᠪᠠ ᠬᠠᠰᠢᠳᠠᠭ ᠡᠯᠴᠢ— ᠡᠯᠴᠢᠨ ᠨᠦ᠍ᠭᠦᠳ ᠢ᠋ ᠪᠠᠭᠤᠯᠭᠠᠵᠤ ᠪᠠᠢᠬᠤ ᠭᠣᠶᠣ ᠰᠠᠢᠬᠠᠨ ᠳ᠋ᠠᠩ ᠪᠠᠭᠤᠳᠠᠯ ᠪᠠᠢᠰᠢᠩ ᠵᠡᠷᠭᠡ ᠶ᠋ᠢ ᠲᠤᠩ ᠲᠦᠷᠭᠡᠨ ᠪᠠᠷᠢᠭᠤᠯᠤᠨᠠ ᠭᠡᠵᠦ ᠬᠡᠯᠡᠭᠡᠳ᠂ ᠬᠡᠳᠦᠨ ᠪᠠᠢᠰᠢᠩ ᠤ᠋ᠨ ᠵᠢᠷᠤᠭ ᠦᠵᠡᠭᠦᠯᠪᠡ᠃ ᠯᠢᠦ ᠣᠪᠣᠭᠲᠤ ᠶ᠋ᠢᠨ ᠭᠠᠷᠭᠠᠭᠰᠠᠨ ᠡᠨᠡ ᠵᠢᠷᠤᠭ ᠤ᠋ᠳ ᠥᠪᠡᠷᠮᠢᠴᠡ ᠰᠣᠨᠢᠨ ᠬᠡᠯᠪᠡᠷᠢᠲᠡᠢ᠂ ᠮᠣᠩᠭᠣᠯ ᠠᠰᠠᠷ ᠮᠠᠢᠬᠠᠨ ᠤ᠋ ᠬᠡᠯᠪᠡᠷᠢ ᠶ᠋ᠢ ᠲᠤᠰᠬᠠᠭᠰᠠᠨ ᠨᠢ ᠬᠤᠪᠢᠯᠠᠢ ᠤᠯᠠᠮ ᠶᠡᠬᠡ ᠨᠢᠭᠤᠷ ᠣᠯᠵᠤ ᠠᠪᠬᠤ ᠳ᠋ᠤ᠌ ᠵᠣᠷᠢᠬᠳᠠᠭᠰᠠᠨ ᠠᠵᠢ᠃
ᠬᠤᠪᠢᠯᠠᠢ ᠶ᠋ᠢᠨ ᠪᠠᠷᠠᠭᠤᠨ ᠵᠦᠭ ᠰᠠᠶᠢᠬᠠᠨ ᠵᠠᠷᠤᠭᠰᠠᠨ ᠡᠯᠴᠢ ᠨᠠᠷ ᠡᠷᠭᠢᠨ ᠢᠷᠡᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠨᠢ᠂ ᠬᠢᠲᠠᠳ ᠨᠤᠲᠤᠭ ᠲᠤ ᠬᠡᠷᠡᠭ ᠢ᠋ᠶ᠋ᠡᠷ ᠪᠠᠢᠭᠠ ᠮᠣᠩᠭᠣᠯ ᠵᠠᠷᠢᠮ ᠨᠣᠶᠠᠳ᠂ ᠴᠡᠷᠢᠭ ᠦ᠋ᠨ ᠡᠷᠬᠡ ᠪᠠᠷᠢᠬᠤ ᠵᠠᠩᠵᠤᠨ ᠨᠤᠭᠤᠳ᠂ ᠪᠤᠰᠤᠳ ᠲᠦᠰᠢᠮᠡᠳ ᠨᠠᠷ ᠳᠠᠭᠤᠳᠠᠯᠭᠠ ᠶᠣᠰᠣᠭᠠᠷ ᠱᠠᠩᠳᠤ ᠳ᠋ᠤ᠌ ᠴᠤᠭᠯᠠᠷᠠᠨ ᠢᠷᠡᠯᠡ᠃ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠦᠭ ᠡᠴᠡ ᠲᠡᠷᠡ ᠳᠡᠭᠡᠳᠦᠰ ᠦ᠋ᠳ ᠲᠦ᠍ ᠪᠡᠨ ᠵᠢᠭᠲᠡᠢ ᠶᠡᠬᠡ ᠬᠥᠯ ᠪᠣᠯᠤᠨ ᠤᠭᠲᠤᠵᠤ ᠪᠡᠯᠡᠨ ᠬᠣᠭᠣᠯᠠ ᠴᠠᠢ ᠲᠠᠢ ᠭᠡᠷ ᠲᠦ᠍ ᠪᠠᠭᠤᠯᠭᠠᠨ᠂ ᠪᠠᠬᠠᠨ ᠵᠣᠴᠢᠯᠠᠭᠠᠳ᠂ ᠵᠠᠷᠢᠮ ᠣᠯᠠᠩᠬᠢ ᠨᠢ ᠭᠠᠷ ᠢ᠋《ᠴᠠᠢᠯᠭᠠᠨ》 ᠣᠷᠢᠶᠠᠯᠲᠠ ᠲᠣᠷᠭᠠ᠂ ᠭᠦᠯᠦᠦᠰᠡ ᠮᠥᠩᠭᠥ ᠰᠡᠯᠲᠡ ᠶ᠋ᠢ ᠥᠭᠭᠦᠭᠰᠡᠨ ᠨᠢ ᠴᠦ᠍ ᠪᠣᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠣᠯᠠᠨ ᠳ᠋ᠤ᠌ ᠨᠥᠯᠥᠭᠡ ᠦᠵᠡᠭᠦᠯᠵᠦ ᠴᠢᠳᠠᠬᠤ ᠲᠡᠩᠬᠡᠭᠡ ᠶ᠋ᠢ ᠨᠢ ᠬᠠᠷᠠᠨ ᠪᠠᠯᠠᠩ ᠤ᠋ᠨ ᠢ᠋ᠶ᠋ᠠᠨ ᠶᠡᠬᠡ ᠪᠠᠭᠠ ᠶ᠋ᠢᠨ ᠬᠡᠮᠵᠢᠶᠡ ᠲᠣᠭᠲᠠᠭᠠᠵᠠᠢ᠃ ᠢᠯᠠᠩᠭᠤᠶᠠ ᠴᠠᠭᠠᠨ᠂ ᠲᠣᠭᠣᠭᠠᠨ᠂ ᠪᠠᠶᠠᠨ ᠮᠡᠲᠦ ᠵᠠᠩᠵᠤᠨ ᠨᠤᠭᠤᠳ ᠤ᠋ᠨ ᠭᠠᠷ ᠳᠡᠭᠡᠷᠡ ᠴᠢᠮᠪᠠᠢᠬᠠᠨ ᠶᠠᠭᠤᠮᠠ ᠲᠠᠯᠪᠢᠵᠤ᠂ ᠲᠡᠳᠡᠨ ᠦ᠌ 《ᠡᠮᠦᠨᠡ ᠵᠦᠭ ᠲᠦ᠍ ᠬᠢᠵᠦ ᠪᠠᠢᠭᠠ ᠲᠡᠢᠨ ᠦ᠌ ᠶᠠᠪᠤᠴᠠ》 ᠶ᠋ᠢ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠡᠷᠭᠦᠵᠦ ᠦᠨᠡᠯᠡᠭᠰᠡᠨ ᠨᠢ ᠤᠴᠢᠷᠲᠠᠢ ᠬᠡᠷᠡᠭ᠃ ᠴᠣᠬᠣᠮ ᠦᠨᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠣᠯ ᠰᠡᠭᠦᠯᠴᠢ ᠶ᠋ᠢᠨ ᠭᠤᠷᠪᠠᠨ ᠰᠠᠷᠠ ᠳ᠋ᠤ᠌ ᠪᠠᠶᠠᠨ ᠠ᠋ᠴᠠ ᠪᠤᠰᠤᠳ ᠬᠥᠮᠦᠰ ᠦ᠋ᠨ ᠲᠡᠷᠢᠭᠦᠯᠡᠭᠰᠡᠨ ᠴᠡᠷᠢᠭ ᠦ᠋ᠨ ᠠᠩᠭᠢ ᠨᠣᠭᠠᠳ ᠤᠷᠤᠭᠰᠢ ᠪᠠᠨ ᠭᠠᠪᠢᠵᠤ ᠳᠠᠪᠰᠢᠭᠠ ᠦᠭᠡᠢ ᠭᠡᠬᠦ ᠤᠤ᠂ ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠤᠷᠢᠭᠯᠠᠯᠳᠠᠨ ᠳ᠋ᠤ᠌ ᠡᠭᠡᠷᠡᠭᠳᠡᠨ ᠰᠠᠭᠠᠳᠤᠭᠠᠳ᠂ ᠬᠡᠳᠦᠨ ᠲᠣᠮᠣ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠢ᠋ ᠡᠪᠳᠡᠬᠦ ᠭᠡᠵᠦ ᠨᠣᠴᠣᠯᠳᠤᠭᠰᠠᠭᠠᠷ ᠪᠠᠢᠭᠠ ᠪᠢᠯᠡ᠃ ᠭᠡᠲᠡᠯᠡ ᠬᠤᠪᠢᠯᠠᠢ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠭᠣᠴᠣᠯᠠᠨ ᠦᠵᠡᠵᠦ 《ᠱᠠᠩᠨᠠᠭᠰᠠᠨ》 ᠨᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠯᠵᠤ ᠪᠣᠯᠬᠤ ᠬᠤᠪᠢ ᠲᠠᠪᠢᠯᠠᠩ ᠤ᠋ᠨ ᠪᠠᠵᠠᠭᠠᠵᠤ ᠪᠣᠳᠣᠭᠰᠠᠨ ᠤ᠋ ᠭᠡᠷᠡᠴᠢ ᠪᠠᠢᠪᠠ᠃ ᠬᠢᠲᠠᠳ ᠨᠤᠲᠤᠭ ᠲᠤ᠌ ᠠᠯᠪᠠᠨ ᠬᠡᠷᠡᠭ ᠢ᠋ᠶ᠋ᠡᠷ ᠰᠠᠭᠤᠵᠤ ᠪᠠᠢᠭᠠ ᠮᠣᠩᠭᠣᠯ ᠨᠣᠶᠠᠳ᠂ ᠮᠣᠩᠭᠣᠯ ᠤ᠋ᠨ ᠥᠪᠥᠷᠯᠡᠭᠴᠢ ᠨᠤᠲᠤᠭ ᠲᠤ᠌ ᠰᠠᠭᠤᠳᠠᠭ ᠵᠠᠷᠢᠮ ᠨᠣᠶᠠᠳ᠂ ᠱᠠᠩᠳᠤ ᠳ᠋ᠤ᠌ ᠪᠠᠰᠠ ᠬᠦᠷᠦᠯᠴᠡᠨ ᠢᠷᠡᠵᠦ᠂ ᠲᠡᠳᠡ ᠶᠡᠬᠡ ᠵᠠᠬᠢᠷᠤᠭᠴᠢ ᠠ᠋ᠴᠠ 《ᠬᠡᠰᠢᠭ》 ᠬᠦᠷᠲᠡᠬᠦ ᠶᠠᠪᠤᠳᠠᠯ ᠠ᠋ᠴᠠ ᠬᠣᠵᠢᠭᠳᠠᠭᠰᠠᠨ ᠦᠭᠡᠢ ᠪᠠᠢᠨᠠ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠯᠣᠯᠣᠢ ᠠᠪᠠᠭᠠᠢ ᠮᠡᠲᠦ ᠶ᠋ᠢᠨ ᠬᠥᠮᠦᠰ ᠬᠤᠷᠠᠭᠰᠠᠨ ᠨᠣᠶᠠᠳ᠂ ᠲᠦᠰᠢᠮᠡᠳ ᠨᠠᠷ ᠤ᠋ᠨ ᠳᠤᠮᠳᠠ ᠰᠠᠮᠪᠠᠭᠠᠴᠢᠯᠠᠨ ᠣᠷᠣᠵᠤ᠂ ᠲᠡᠳᠡᠨ ᠦ᠌ ᠦᠭᠡ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠴᠤ ᠪᠠᠢᠯᠠ᠃ ᠬᠥᠮᠦᠰ ᠣᠯᠵᠠᠨ ᠳ᠋ᠤ᠌ ᠳᠤᠷᠠᠲᠠᠢ ᠪᠣᠯᠬᠣᠷ ᠢ᠋ᠶ᠋ᠠᠨ ᠳᠡᠢᠯᠦᠩᠭᠢ ᠨᠣᠶᠠᠳ ᠬᠤᠪᠢᠯᠠᠢ ᠳ᠋ᠤ᠌ ᠠᠮᠠ 《ᠰᠠᠢᠨᠲᠠᠢ》 ᠪᠠᠢᠵᠠᠢ᠃
ᠱᠠᠩᠳᠤ ᠳ᠋ᠤ᠌ ᠶᠡᠬᠡ ᠬᠥᠯ ᠪᠣᠯᠵᠤ ᠬᠥᠮᠦᠰ ᠢ᠋ ᠳᠠᠢᠴᠢᠯᠠᠨ ᠠᠵᠢᠯᠯᠠᠭᠤᠯᠵᠤ ᠲᠣᠷᠭᠠᠨ ᠠᠰᠠᠷ ᠪᠣᠰᠬᠠᠵᠤ ᠮᠣᠩᠭᠣᠯ ᠵᠠᠩᠰᠢᠯ ᠢ᠋ᠶ᠋ᠠᠨ 《ᠬᠠᠳᠠᠭᠠᠯᠠᠨ》 ᠦᠬᠡᠷ᠂ ᠬᠣᠨᠢ ᠣᠯᠠᠨ ᠲᠣᠭᠠ ᠪᠠᠷ ᠨᠢᠲᠤᠯᠤᠨ᠂ ᠢᠳᠡᠭᠡ ᠵᠣᠭᠣᠭ ᠪᠡᠯᠡᠳᠬᠡᠭᠰᠡᠨ ᠪᠠᠢᠨᠠ᠃ ᠡᠨᠡ ᠪᠦᠬᠦ ᠬᠡᠷᠡᠭ ᠦ᠋ᠨ ᠴᠠᠭᠠᠨᠠ ᠨᠢ ᠵᠣᠣ ᠪᠢ᠂ ᠬᠣᠣ ᠵᠢᠩ ᠮᠡᠲᠦ ᠶ᠋ᠢᠨ ᠲᠦᠰᠢᠮᠡᠳ ᠨᠠᠷ ᠪᠠᠢᠭᠠ ᠶ᠋ᠢ ᠬᠡᠯᠡᠬᠦ ᠶᠠᠭᠤᠨ᠃ ᠪᠡᠯᠡᠳᠬᠡᠯ ᠦ᠋ᠨ ᠬᠠᠮᠤᠭ ᠬᠠᠷᠠ ᠪᠣᠷᠣ ᠠᠵᠢᠯ ᠢ᠋ ᠴᠦ᠍ ᠬᠢᠲᠠᠳ ᠬᠥᠮᠦᠰ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠵᠢᠭᠠᠪᠤᠷᠢ ᠪᠠᠷ ᠬᠢᠵᠦ ᠪᠠᠢᠯᠠ᠃ ᠬᠢᠲᠠᠳ ᠲᠣᠭᠣᠭᠠᠴᠢ ᠬᠣᠭᠣᠯᠠ ᠶ᠋ᠢ ᠠᠮᠲᠠᠲᠠᠢ ᠬᠢᠵᠦ ᠴᠢᠳᠠᠳᠠᠭ ᠢ᠋ ᠪᠠᠰᠠ ᠥᠭᠦᠯᠡᠬᠦ ᠶᠠᠭᠤᠨ᠃ 《ᠵᠠ ᠶᠠᠭᠠᠬᠢᠳᠠᠭ ᠪᠣᠯ ?》 ᠭᠡᠵᠦ ᠬᠤᠪᠢᠯᠠᠢ ᠶ᠋ᠢᠨ ᠰᠡᠳᠬᠢᠯ ᠲᠦᠭᠰᠢᠵᠦ ᠪᠠᠢᠪᠠ᠃
ᠲᠣᠪᠯᠠᠭᠰᠠᠨ ᠴᠠᠭ ᠠ᠋ᠴᠠ ᠪᠠᠨ ᠨᠡᠯᠢᠶᠡᠳ ᠬᠣᠵᠢᠮᠳᠠᠵᠤ ᠲᠣᠷᠭᠠᠨ ᠠᠰᠠᠷ ᠲᠤ᠌ ᠨᠣᠶᠠᠳ ᠴᠤᠭᠯᠠᠷᠠᠨ 《ᠬᠤᠷᠠᠯᠳᠠᠢ》 ᠨᠡᠭᠡᠭᠡᠵᠦ᠂ ᠠᠯᠲᠠᠨ ᠤᠷᠤᠭ ᠠ᠋ᠴᠠ 《ᠰᠢᠯᠢᠵᠦ》 ᠣᠯᠤᠭᠰᠠᠨ ᠬᠥᠮᠦᠨ ᠨᠢ ᠲᠡᠭᠦᠨ ᠢ᠋ ᠲᠡᠷᠢᠭᠦᠯᠡᠨ ᠶᠠᠪᠤᠭᠤᠯᠪᠠ᠃ ᠬᠤᠷᠠᠯᠲᠠᠢ ᠠᠬᠠᠷᠬᠠᠨ ᠬᠤᠭᠤᠴᠠᠭᠠᠨ ᠤ᠋ ᠳᠣᠲᠣᠷᠠ ᠬᠡᠷᠡᠭ ᠢ᠋ᠶ᠋ᠡᠨ ᠭᠦᠢᠴᠡᠭᠡᠯᠡ᠃ ᠲᠤᠬᠠᠢᠯᠠᠪᠠᠯ ᠬᠤᠷᠠᠯᠳᠠᠢ ᠨᠡᠭᠡᠭᠡᠭᠳᠡᠭᠰᠡᠨ ᠳᠣᠣᠷᠠ ᠪᠠᠨ ᠬᠤᠪᠢᠯᠠᠢ ᠶ᠋ᠢ ᠪᠡᠯᠡᠳᠬᠡᠵᠦ ᠵᠠᠰᠠᠭᠰᠠᠨ ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠳ᠋ᠤ᠌ ᠬᠣᠶᠠᠷ ᠬᠥᠮᠦᠨ 《ᠬᠥᠲᠥᠯᠵᠦ》 ᠭᠠᠷᠭᠠᠨ ᠰᠠᠭᠤᠯᠭᠠᠭᠠᠳ᠂ 《ᠶᠡᠬᠡ ᠬᠠᠭᠠᠨ》 ᠭᠡᠰᠡᠨ ᠦᠭᠡ ᠶ᠋ᠢ ᠲᠡᠨᠳᠡ ᠪᠠᠢᠭᠠ ᠬᠥᠮᠦᠰ ᠢ᠋ᠶ᠋ᠡᠷ ᠭᠤᠷᠪᠠᠨᠲᠠ ᠬᠡᠯᠡᠭᠦᠯᠵᠡᠢ᠃ ᠬᠤᠷᠠᠯᠳᠤᠭᠰᠠᠳ ᠤ᠋ᠨ ᠳᠣᠲᠣᠷᠠ ᠠᠮᠠ ᠪᠠᠨ ᠵᠢᠮᠢᠢᠵᠦ ᠰᠠᠭᠤᠭᠰᠠᠨ ᠬᠥᠮᠦᠰ ᠪᠠᠢᠭᠰᠠᠨ ᠨᠢ ᠣᠯᠠᠨ ᠳ᠋ᠤ᠌ ᠨᠥᠯᠥᠭᠡᠯᠡᠵᠦ ᠡᠰᠡ ᠴᠢᠳᠠᠪᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠤᠭ 《ᠬᠤᠷᠠᠯᠳᠠᠢ》④ ᠬᠢᠲᠠᠳ ᠴᠡᠷᠢᠭ ᠢ᠋ᠶ᠋ᠡᠷ ᠭᠤᠷᠪᠠᠨ ᠳᠠᠪᠬᠤᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ ᠤᠴᠢᠷ 《ᠠᠶᠤᠯ ᠦᠭᠡᠢ》 ᠪᠠᠢᠯᠠ᠃ ᠮᠥᠩᠬᠡ ᠬᠠᠭᠠᠨ ᠤ᠋ ᠲᠣᠮᠣ ᠳᠡᠭᠦᠦ ᠬᠤᠪᠢᠯᠠᠢ ᠡᠢᠨ ᠬᠦ ᠥᠪᠡᠷ ᠢ᠋ ᠪᠡᠨ ᠶᠡᠬᠡ ᠬᠠᠭᠠᠨ ᠳ᠋ᠤ᠌ 《ᠡᠷᠭᠦᠮᠵᠢᠯᠡᠭᠦᠯᠵᠡᠢ》᠃ ᠡᠨᠡ ᠬᠤᠷᠠᠯᠲᠠᠢ ᠶ᠋ᠢᠨ ᠭᠠᠷᠤᠭᠰᠠᠨ ᠰᠢᠢᠳ ᠣᠯᠠᠨ ᠮᠣᠩᠭᠣᠯᠴᠤᠳ ᠲᠤ᠌ ᠶᠡᠬᠡ ᠬᠠᠴᠢᠷᠬᠠᠯᠲᠠᠢ ᠵᠦᠢᠯ ᠪᠣᠳᠣᠭᠳᠠᠭᠤᠯᠤᠭᠰᠠᠨ ᠠᠵᠢ᠃ ᠱᠠᠩᠳᠤ ᠬᠣᠲᠠ ᠳ᠋ᠤ᠌ ᠴᠦ᠍ 《ᠶᠠᠭᠤ ᠭᠡᠭᠴᠢ ᠪᠣᠯᠳᠠᠭ ᠪᠣᠯ ?》 《ᠪᠠᠰᠠ ᠯᠠ ᠲᠡᠢᠨ ᠳᠠᠵᠢᠨ ᠤ᠋ ᠵᠣᠪᠠᠯᠠᠩ ᠡᠳ᠋ᠯᠡᠬᠦ ᠨᠢ ᠤᠤ ?》 ᠭᠡᠰᠡᠨ ᠰᠡᠳᠬᠢᠯ ᠶᠡᠬᠡ ᠪᠠᠭᠠ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠬᠠᠷᠪᠤᠨ ᠣᠷᠣᠵᠤ ᠢᠷᠡᠵᠦ ᠪᠣᠳᠣᠯ ᠰᠠᠨᠠᠭᠠᠲᠠᠢ ᠨᠢ ᠲᠦᠭᠰᠢᠭᠡᠳ ᠪᠠᠢᠯᠠ᠃ ᠭᠡᠯᠡ ᠭᠡᠬᠦ ᠳ᠋ᠦ᠍ ᠨᠢᠭᠡᠨᠲᠡ ᠬᠠᠮᠤᠭ ᠡᠷᠬᠡ ᠮᠠᠲᠠᠯ ᠭᠠᠭᠴᠠ ᠨᠢᠭᠡᠬᠡᠨ ᠬᠥᠮᠦᠨ ᠦ᠌ ᠭᠠᠷ ᠲᠤ᠌ ᠪᠠᠢᠳᠠᠭ ᠪᠣᠯᠬᠣᠷ ᠣᠯᠠᠨ ᠮᠠᠨᠢ ᠬᠠᠮᠬᠤᠤᠯ ᠠᠳᠠᠯᠢ ᠰᠠᠯᠬᠢᠨ ᠤ᠋ ᠠᠶᠠ ᠳᠠᠭᠠᠬᠤ ᠠ᠋ᠴᠠ ᠥᠭᠡᠷᠡ ᠪᠡᠷ ᠶᠠᠭᠠᠬᠢᠬᠤ ᠪᠣᠢ ᠪᠢᠯᠡ᠃ ᠬᠥᠮᠦᠰ ᠨᠡᠢᠲᠡ ᠪᠡᠷ 《ᠮᠥᠩᠬᠡ ᠲᠡᠭᠷᠢ ᠥᠷᠥᠰᠢᠶᠡᠨ ᠲᠠᠭᠠᠯᠠᠬᠤ ᠪᠣᠯᠲᠤᠭᠠᠢ !》 ᠭᠡᠵᠦ ᠵᠠᠯᠪᠠᠷᠢᠭᠰᠠᠭᠠᠷ ᠥᠭᠡᠷᠡ ᠪᠡᠷ ᠬᠠᠮᠢᠭᠠ ᠣᠴᠢᠬᠤ ᠪᠣᠢ᠃
ᠲᠡᠭᠷᠢ ᠴᠦ᠍ ᠵᠠᠷᠢᠮ ᠳ᠋ᠤ᠌ ᠪᠠᠨ ᠠᠢᠬᠤᠪᠲᠤᠷ ᠳᠣᠭᠰᠢᠷᠠᠳᠠᠭ ᠤᠴᠢᠷ ᠪᠣᠢ᠃ ᠡᠨᠡ ᠵᠢᠯ ᠦ᠋ᠨ ᠬᠠᠪᠤᠷ ᠬᠥᠬᠡ ᠮᠥᠷᠡᠨ ᠦ᠌ ᠨᠢᠭᠡ ᠰᠠᠯᠠᠭᠠ ᠴᠠᠯᠭᠢᠶᠠ ᠭᠣᠣᠯ ᠤ᠋ᠨ ᠠᠳᠠᠭ ᠬᠠᠪᠢ ᠪᠠᠷ ᠭᠡᠨᠡᠳᠲᠡ ᠠᠭᠠᠳᠠᠷ ᠪᠣᠷᠣᠭᠠ ᠴᠢᠳᠬᠤᠨ᠂ ᠲᠡᠭᠷᠢ ᠦᠷᠭᠦᠯᠵᠢᠯᠡᠨ ᠨᠦᠷᠭᠢᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠦᠴᠦᠲᠦ ᠬᠤᠢ ᠰᠠᠯᠬᠢᠨ ᠳᠤᠮᠳᠠᠭᠤᠷ ᠬᠥᠬᠡ ᠭᠠᠯ ᠠᠶᠠᠲᠠᠢ ᠤᠷᠲᠤ ᠶᠠᠭᠤᠮᠠ ᠳᠣᠭᠣᠭᠰᠢ ᠤᠨᠵᠢᠢᠨ ᠴᠢᠬᠢ ᠳᠦᠯᠡᠢᠷᠡᠮᠡ ᠳᠠᠭᠤ ᠭᠠᠷᠴᠤ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠠᠶᠤᠯᠭᠠᠵᠠᠢ᠃ ᠪᠣᠷᠣᠭᠠ ᠲᠠᠲᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠬᠥᠮᠦᠰ 《ᠯᠤᠤ ᠤᠨᠵᠢᠯᠠ》 ᠂ ᠬᠠᠪᠤᠷ ᠡᠷᠲᠡ ᠢᠩᠭᠢᠬᠦ ᠨᠢ ᠮᠠᠭᠤ ᠢᠷᠣᠠ ᠭᠡᠮᠡᠨ ᠥᠭᠦᠯᠡᠵᠦ ᠪᠠᠢᠪᠠ᠃ ᠵᠠᠷᠢᠮ ᠬᠥᠮᠦᠨ ᠭᠠᠩ ᠭᠠᠴᠢᠭ ᠪᠣᠯᠤᠨᠠ ᠭᠡᠯᠡ᠃ ᠵᠠᠷᠢᠮ ᠨᠢ ᠦᠶᠡᠷ ᠤᠰᠤ ᠪᠠᠭᠤᠵᠤ ᠠᠶᠤᠯ ᠤᠴᠠᠷᠠᠭᠤᠯᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠡᠭᠡᠪᠡ᠂ ᠨᠥᠭᠦᠭᠡ ᠬᠡᠰᠡᠭ ᠨᠢ ᠲᠥᠷᠥ ᠲᠦᠮᠡᠨ ᠬᠢᠮᠤᠷᠠᠯᠳᠤᠳᠠᠭ ᠤᠴᠢᠷ ᠪᠣᠢ ᠭᠡᠮᠡᠨ ᠶᠠᠷᠢᠵᠤ ᠪᠠᠢᠪᠠ᠃
— — — —
① ᠠᠯᠲᠠᠨ ᠤᠷᠳᠤ ᠶᠢ ᠦᠨᠳᠦᠰᠦᠯᠡᠭ᠍ᠴᠢ ᠵᠦᠴᠢ ᠶᠢᠨ ᠬᠣᠶᠠᠳᠤᠭᠠᠷ ᠬᠦᠦ ᠪᠠᠲᠤ 1256 ᠣᠨ ᠳᠤ ᠨᠠᠰᠤ ᠪᠠᠷᠠᠭᠰᠠᠨ᠃
② ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠦᠯᠡᠬᠦ ᠬᠠᠨ1255 ᠣᠨ ᠳ᠋ᠤ᠌ ᠪᠠᠭᠳᠠᠳ᠋ ᠢ᠋ ᠡᠵᠡᠯᠡᠭᠰᠡᠨ ᠭᠡᠵᠦ ᠸᠸᠨ᠋ᠸᠼ ᠬᠣᠲᠠ ᠶ᠋ᠢᠨ ᠶᠡᠬᠡ ᠵᠢᠭᠤᠯᠴᠢᠨ ᠮᠠᠷᠺᠣ ᠫᠣᠯᠣ1298 ᠣᠨ ᠳ᠋ᠤ᠌ ᠪᠢᠴᠢᠭᠰᠡᠨ《ᠣᠷᠴᠢᠯᠠᠩ ᠤ᠋ᠨ ᠡᠯᠳᠡᠪ ᠰᠣᠨᠢᠨ》 ᠨᠣᠮ ᠳ᠋ᠤ᠌ ᠪᠠᠨ ᠲᠡᠮᠳᠡᠭᠯᠡᠵᠡᠢ᠃
③ ᠲᠡᠦᠬᠡ ᠱᠠᠰᠲᠢᠷ ᠳᠤ ᠥᠭᠦᠯᠡᠭᠰᠡᠨ ᠢ᠋ᠶ᠋ᠡᠷ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠᠨ ᠠ᠋ᠴᠠ ᠵᠡᠭᠦᠨ ᠬᠣᠢᠰᠢ250 ᠺᠢᠯᠣᠮᠧᠲ᠋ᠷ ᠲᠦ᠍ ᠱᠠᠩᠳᠤ ᠭᠣᠣᠯ ᠤ᠋ᠨ ᠳᠡᠭᠡᠳᠦ ᠤᠷᠤᠰᠬᠠᠯ ᠤ᠋ᠨ ᠭᠠᠵᠠᠷ ᠳᠤ108 ᠰᠦᠮᠡ ᠭᠡᠬᠦ ᠬᠠᠭᠤᠴᠢᠨ ᠨᠡᠷᠡ ᠪᠡᠷ ᠳᠤᠷᠠᠳᠤᠳᠠᠭ ᠲᠤᠭᠤᠷᠠᠢ ᠪᠠᠢᠳᠠᠭ᠃ ᠲᠡᠨᠳᠡ ᠵᠥᠪᠬᠡᠨ ᠬᠡᠳᠦᠨ ᠮᠣᠩᠭᠣᠯ ᠭᠡᠷ᠂ ᠮᠠᠯ ᠢ᠋ᠶ᠋ᠠᠷ ᠠᠮᠢᠳᠤᠷᠠᠨ ᠨᠡᠭᠦᠳᠡᠯ ᠪᠠᠢᠳᠠᠯᠲᠠᠢ ᠪᠠᠢᠵᠠᠢ᠃ ᠡᠨᠳᠡ ᠬᠣᠲᠠ ᠪᠠᠢᠭᠤᠯᠬᠤ ᠶ᠋ᠢ ᠮᠥᠩᠬᠡ ᠬᠠᠭᠠᠨ ᠠ᠋ᠴᠠ ᠬᠢᠲᠠᠳ ᠣᠷᠣᠨ ᠳ᠋ᠤ᠌ ᠶᠡᠬᠡ ᠵᠠᠬᠢᠷᠤᠭᠴᠢ ᠪᠠᠢᠬᠤ ᠵᠠᠷᠯᠢᠭ ᠬᠦᠯᠢᠶᠡᠭᠰᠡᠨ ᠬᠤᠪᠢᠯᠠᠢ(《ᠶᠤᠸᠠᠨ ᠭᠦᠷᠦᠨ ᠦ᠌ ᠲᠡᠦᠬᠡᠨ》 ᠳ᠋ᠦ᠍ ᠥᠭᠦᠯᠡᠭᠰᠡᠨ ᠢ᠋ᠶ᠋ᠡᠷ) ᠬᠢᠲᠠᠳ ᠬᠥᠮᠦᠨ ᠯᠢᠦ ᠪᠢᠩ ᠵᠦᠩ ᠳ᠋ᠦ᠍ ᠲᠤᠰᠢᠶᠠᠯ ᠪᠠᠭᠤᠯᠭᠠᠨ ᠭᠤᠷᠪᠠᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠱᠠᠩᠳᠤ ᠬᠣᠲᠠ ᠶ᠋ᠢ ᠪᠠᠢᠭᠤᠯᠤᠭᠰᠠᠨ᠃ ᠲᠡᠭᠦᠨ ᠢ᠋ ᠺᠡᠢᠫᠢᠩ ᠹᠦ ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠬᠣᠵᠢᠮᠬᠠᠨ ᠨᠢ ᠳᠡᠭᠡᠳᠦ ᠨᠡᠢᠰᠯᠡᠯ᠂ ᠳᠠᠷᠠᠭᠠ ᠨᠢ ᠮᠣᠩᠭᠣᠯ ᠤ᠋ᠨ ᠨᠡᠢᠰᠯᠡᠯ ᠪᠡᠭᠡᠵᠢᠩ ᠳ᠋ᠦ᠍ ᠨᠡᠭᠦᠭᠰᠡᠨ ᠡᠴᠡ ᠬᠣᠢᠰᠢ ᠬᠤᠪᠢᠯᠠᠢ ᠶ᠋ᠢᠨ ᠵᠤᠨ ᠤ᠋ ᠨᠡᠢᠰᠯᠡᠯ ᠪᠣᠯᠵᠤ ᠪᠠᠢᠭᠰᠠᠨ᠃ ᠡᠨᠡ ᠬᠣᠲᠠ ᠶ᠋ᠢᠨ ᠤᠷᠲᠤ ᠬᠠᠷᠰᠢ ᠶ᠋ᠢ ᠵᠡᠭᠦᠳᠦᠨ ᠳ᠋ᠦ᠍ ᠣᠷᠣᠮᠠᠷ ᠦᠭᠡᠢ ᠭᠣᠶᠣ ᠰᠠᠢᠬᠠᠨ ᠢ᠋ᠶ᠋ᠠᠷ ᠪᠠᠷᠢᠭᠰᠠᠨ᠂ ᠲᠡᠨᠳᠡ ᠪᠠᠭᠠᠪᠲᠤᠷ ᠨᠠᠭᠤᠷ ᠳᠡᠭᠡᠷᠡ ᠨᠢ ᠬᠠᠭᠠᠨ ᠤ᠋ ᠣᠷᠳᠣᠨ ᠢ᠋ ᠪᠠᠷᠢᠭᠰᠠᠨ᠃ ᠴᠢᠩᠭᠢᠬᠦ ᠳ᠋ᠦ᠍ ᠪᠡᠨ ᠣᠷᠳᠣᠨ ᠤ᠋ ᠰᠠᠭᠤᠷᠢ ᠶ᠋ᠢ ᠴᠢᠯᠠᠭᠤᠨ ᠨᠡᠭᠦᠷᠡᠰᠦ ᠪᠡᠷ ᠰᠢᠲᠠᠭᠠᠭᠰᠠᠨ ᠲᠣᠭᠣᠰᠬᠠ ᠪᠠᠷ ᠬᠢᠵᠦ᠂ ᠬᠠᠷᠠ ᠲᠤᠭᠤᠯᠭᠠ ᠬᠠᠢᠯᠤᠭᠤᠯᠤᠨ ᠴᠢᠳᠬᠤᠵᠤ ᠪᠡᠬᠢᠵᠢᠭᠦᠯᠦᠭᠰᠡᠨ᠃ ᠳᠡᠭᠡᠷᠡ ᠨᠢ ᠭᠠᠨᠲᠢᠭ ᠴᠢᠯᠠᠭᠤ ᠥᠷᠥᠵᠦ ᠬᠠᠨᠠ ᠪᠣᠯᠤᠨ ᠬᠡᠷᠡᠮ ᠢ᠋ ᠪᠠᠷᠢᠵᠤ ᠤᠷᠲᠤ ᠶ᠋ᠢ ᠴᠣᠭᠴᠠᠯᠠᠭᠰᠠᠨ ᠭᠡᠵᠦ ᠶᠠᠫᠣᠨ ᠤ᠋ ᠡᠷᠳᠡᠮᠲᠡᠨ ᠣᠲ᠋ᠠᠬᠢ ᠮᠠᠴᠣᠸᠣ᠋ 《ᠬᠤᠪᠢᠯᠠᠢ ᠬᠠᠭᠠᠨ》 ᠨᠣᠮ ᠳ᠋ᠤ᠌ ᠪᠠᠨ ᠪᠢᠴᠢᠭᠰᠡᠨ ᠪᠠᠢᠨᠠ᠃
④ ᠲᠡᠦᠬᠡᠨ ᠳ᠋ᠦ᠍ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ ᠱᠠᠩᠳᠤ ᠳ᠋ᠤ᠌ ᠪᠣᠯᠤᠭᠰᠠᠨ ᠬᠤᠷᠠᠯᠲᠠᠢ ᠳ᠋ᠤ᠌ ᠴᠠᠭᠠᠲᠠᠢ ᠶ᠋ᠢᠨ ᠣᠮᠪᠣᠯ ᠠᠵᠢᠭ᠂ ᠵᠥᠴᠢ ᠬᠠᠰᠠᠷ ᠤ᠋ᠨ ᠬᠦᠦ ᠶᠢᠰᠦᠩᠭᠡ᠂ ᠬᠠᠴᠢᠭᠤᠨ ᠣᠮᠪᠣᠯ ᠬᠤᠯᠭᠤᠷ᠂ ᠲᠡᠮᠦᠭᠡ ᠤᠳᠴᠢᠬᠢᠨ ᠤ᠋ ᠣᠮᠪᠣᠯ ᠲᠤᠭᠴᠠᠷ᠂ ᠪᠡᠯᠭᠦᠳᠡᠢ ᠶ᠋ᠢᠨ ᠣᠮᠪᠣᠯ ᠰᠣᠳᠣ ᠨᠣᠶᠠᠨ ᠵᠡᠷᠭᠡ ᠴᠢᠩᠭᠢᠰ ᠦ᠋ᠨ ᠬᠥᠪᠡᠭᠦᠨ ᠳᠡᠭᠦᠦ ᠨᠠᠷ ᠤ᠋ᠨ ᠠᠴᠢ ᠦᠷᠡᠰ ᠦ᠋ᠳ ᠣᠷᠣᠯᠴᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡᠭᠡᠷ ᠦ᠋ᠨ ᠠᠯᠢ ᠨᠢ ᠴᠦ᠍ ᠮᠣᠵᠢ᠂ ᠣᠲᠣᠭ ᠣᠪᠣᠭ᠂ ᠣᠯᠠᠨ ᠤᠯᠤᠰ ᠠ᠋ᠴᠠ ᠲᠣᠮᠢᠯᠠᠭᠳᠠᠭᠰᠠᠨ ᠲᠥᠯᠥᠭᠡᠯᠡᠭᠴᠢ ᠪᠢᠰᠢ ᠪᠠᠢᠪᠠ᠃
ᠬᠤᠷᠠᠯᠳᠠᠢ ᠳᠡᠭᠡᠷᠡ ᠬᠤᠪᠢᠯᠠᠢ ᠬᠡᠯᠡᠬᠦ ᠳ᠋ᠦ᠍ ᠪᠡᠨ 《᠁ ᠮᠢᠨᠦ ᠪᠡᠶᠡ ᠴᠢᠩᠭᠠ ᠬᠠᠲᠠᠭᠤ ᠦᠭᠡ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠮᠥᠷᠭᠥᠯ ᠳᠠᠭᠠᠳᠬᠠᠯ ᠢ᠋ ᠳᠠᠪᠲᠠᠵᠤ ᠴᠢᠩ ᠰᠡᠳᠬᠢᠯ ᠦ᠋ᠨ ᠰᠢᠯᠵᠢᠰᠢ ᠦᠭᠡᠢ ᠲᠠᠩᠭᠠᠷᠢᠭᠯᠠᠬᠤ ᠨᠢ ᠡᠨᠡ ᠪᠣᠯᠠᠢ᠃ ᠤᠴᠢᠷ ᠡᠢᠮᠦ ᠳ᠋ᠦ᠍ ᠲᠦᠮᠡᠨ ᠦ᠌ ᠬᠦᠰᠡᠯ ᠢ᠋ ᠳᠠᠭᠠᠵᠤ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠬᠤ ᠪᠥᠯᠥᠭᠡ》 ᠭᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ᠂ ᠪᠠᠭᠠᠲᠤᠷ᠂ ᠴᠣᠯᠮᠣᠨᠲᠤᠶᠠᠭᠠ