ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠳᠥᠷᠪᠡᠳᠦᠭᠡᠷ ᠪᠦᠯᠦᠭ –2>᠂ ᠬᠤᠤᠪᠢᠯᠳᠤᠭᠠᠨ Бүргэд харьд үүрэлдэггүй – Ж᠂ Пүрэв <4-р бүлэг ~2>.хуйвалдаан
36ᠳᠥᠷᠪᠡᠳᠦᠭᠡᠷ ᠪᠥᠯᠥᠭ -ᠯᠤᠤ ᠤᠨᠵᠢᠭᠰᠠᠨ ᠬᠠᠪᠤᠷ
ᠬᠣᠶᠠᠷ᠂ ᠬᠤᠤᠪᠢᠯᠳᠤᠭᠠᠨ
ᠯᠣᠯᠣᠢ ᠠᠪᠠᠭᠠᠢ ᠶ᠋ᠢᠨ ᠠᠵᠢᠯ ᠢᠳᠡ ᠣᠷᠭᠢᠯᠤᠨ ᠡᠮᠡᠰ ᠦ᠋ᠳ ᠢ᠋ᠶ᠋ᠡᠨ ᠭᠤᠶᠤᠵᠤ ᠭᠣᠣᠳᠠᠭᠠᠳ ᠡᠵᠡᠨ ᠳ᠋ᠦ᠍ ᠪᠡᠨ ᠪᠠᠷᠠᠭᠭᠤᠯᠬᠤ ᠭᠡᠵᠦ ᠬᠥᠯ ᠠᠯᠳᠠᠬᠤ ᠰᠢᠬᠠᠨᠠ᠃ ᠤᠭ ᠬᠡᠷᠡᠭ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠢᠴᠢᠶᠡᠩᠭᠦᠢ ᠣᠷᠣᠯᠳᠣᠯᠭᠠ᠂ ᠨᠢᠭᠤᠴᠠ ᠲᠡᠮᠡᠦᠯᠦᠯ ᠢ᠋ᠶ᠋ᠡᠷ ᠪᠦᠲᠦᠳᠡᠭ ᠪᠣᠯᠬᠣᠷ ᠡᠳᠦᠷ ᠵᠠᠭᠤᠨ ᠵᠠᠳᠠᠭᠠᠢ ᠵᠢᠷᠠᠨ ᠬᠠᠭᠠᠷᠬᠠᠢ ᠪᠠᠢᠪᠠᠴᠤ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠣᠯᠬᠤ ᠳ᠋ᠤ᠌ ᠠᠶᠠ ᠭᠤᠶᠠ ᠪᠠᠨ ᠣᠯᠤᠭᠠᠳ ᠰᠢᠳᠬᠡᠭᠳᠡᠵᠦ ᠴᠢᠳᠠᠳᠠᠭ ᠨᠢ ᠬᠠᠮᠤᠭ ᠬᠡᠷᠡᠭ ᠢ᠋ ᠳᠥᠭᠥᠮ ᠲᠡᠢ ᠪᠣᠯᠭᠠᠨᠠ᠃
ᠬᠢᠲᠠᠳ ᠰᠠᠢᠨ ᠵᠢᠷᠤᠭᠠᠴᠢ ᠯᠣᠯᠣᠢ ᠶ᠋ᠢᠨ ᠭᠠᠷ ᠳᠣᠣᠷᠠ ᠪᠠᠢᠭᠠ ᠪᠣᠯᠪᠠᠴᠤ ᠡᠮᠡᠰ ᠢ᠋ ᠰᠢᠯᠢᠨ ᠰᠣᠩᠭᠣᠵᠤ᠂ ᠡᠭᠡᠯᠵᠢ ᠳᠠᠷᠠᠭᠠ ᠲᠣᠭᠲᠠᠭᠠᠨ ᠲᠡᠳᠡᠨ ᠦ᠌ ᠵᠢᠷᠤᠭ ᠢ᠋ ᠵᠢᠷᠤᠭᠤᠯᠵᠤ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠠᠭᠠᠯᠠᠯ ᠳ᠋ᠤ᠌ ᠪᠣᠯᠭᠤᠭᠠᠯᠠᠭᠠᠨᠠ ᠭᠡᠳᠡᠭ ᠪᠠᠰᠠ ᠲᠦᠪᠡᠭᠲᠡᠢ ᠬᠡᠷᠡᠭ᠃
ᠡᠨᠡ ᠪᠦᠬᠦᠨ ᠬᠥᠮᠦᠨ ᠦᠨᠡᠮᠰᠢᠬᠦ ᠠᠷᠭᠠ ᠦᠭᠡᠢ ᠮᠡᠲᠦ ᠪᠣᠯᠪᠠᠴᠤ ᠦᠨᠡᠨ᠃ ᠵᠢᠷᠤᠭᠠᠴᠢ ᠶ᠋ᠢᠨ ᠭᠠᠷ ᠴᠢᠯᠡᠭᠰᠡᠨ ᠡᠴᠡ ᠪᠣᠯᠤᠭᠠᠳ ᠪᠦᠰᠡᠭᠦᠢ ᠶ᠋ᠢᠨ ᠨᠢᠳᠦ ᠶ᠋ᠢ ᠵᠢᠭᠠᠬᠠᠨ ᠳᠠᠷᠤᠤ ᠵᠢᠷᠤᠵᠤ ᠣᠷᠬᠢᠪᠠᠯ ᠡᠵᠡᠨ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ《ᠬᠢᠯᠠᠷ ᠶᠤᠮ ᠪᠠᠢᠨᠠ》 ᠭᠡᠪᠡᠯ ᠤᠭ ᠬᠡᠦᠬᠡᠨ ᠬᠡᠴᠢᠨᠡᠨ ᠴᠡᠪᠡᠷ ᠭᠠᠩᠭᠠᠩ ᠪᠠᠢᠯᠠ ᠴᠦ᠍ ᠭᠡᠰᠡᠨ᠂ ᠲᠡᠭᠦᠨ ᠢ᠋ ᠪᠡᠯᠡᠳᠬᠡᠭᠦᠯᠦᠭᠰᠡᠨ ᠬᠠᠮᠤᠭ ᠬᠡᠷᠡᠭ ᠪᠦᠲᠦᠯ ᠦᠭᠡᠢ ᠪᠣᠯᠵᠤ ᠳᠠᠭᠤᠰᠳᠠᠭ᠃
ᠲᠠᠯᠠ ᠬᠡᠭᠡᠷᠡ ᠳ᠋ᠦ᠍ ᠬᠦᠵᠦᠭᠦᠦ ᠪᠡᠨ ᠰᠠᠢᠷᠲᠤᠭᠤᠯᠤᠨ ᠬᠣᠨᠢ ᠬᠠᠷᠢᠭᠤᠯᠵᠤ ᠶᠠᠪᠤᠭᠰᠠᠨ ᠪᠦᠰᠡᠭᠦᠢ ᠶ᠋ᠢᠨ ᠵᠢᠷᠤᠭ ᠢ᠋ ᠰᠠᠢᠬᠠᠨ ᠵᠢᠷᠤᠭᠤᠯᠤᠭᠠᠳ᠂ ᠲᠠᠭᠠᠯᠠᠯ ᠳ᠋ᠤ᠌ ᠨᠡᠢᠴᠡᠭᠦᠯᠦᠨ᠂ ᠦᠳᠡᠰᠢ ᠶ᠋ᠢᠨ ᠪᠦᠳᠡᠭᠢᠬᠡᠨ ᠭᠡᠷᠡᠯ ᠳᠤᠮᠳᠠᠭᠤᠷ ᠲᠡᠭᠦᠨ ᠢ᠋ ᠪᠡᠨ ᠪᠠᠷᠠᠯᠬᠠᠭᠤᠯᠵᠤ ᠣᠷᠬᠢᠭᠠᠳ ᠳᠡᠭᠡᠳᠦ ᠦᠨᠡᠯᠡᠭᠡ ᠬᠦᠷᠲᠡᠭᠡᠳ ᠯᠡ ᠦᠦᠷ ᠦ᠋ᠨ ᠭᠡᠭᠡᠨ ᠢ᠋ᠶ᠋ᠡᠷ ᠡᠷᠭᠢᠭᠦᠯᠦᠨ ᠠᠪᠤᠨᠠ᠃
ᠯᠣᠯᠣᠢ ᠶ᠋ᠢᠨ ᠡᠨᠡ《ᠠᠯᠪᠠ》 ᠵᠤᠭᠠᠲᠠᠢ ᠳᠡᠭᠡᠷᠡ 《ᠨᠠᠷᠢᠨ》᠂ ᠲᠠᠰᠤᠷᠠᠯᠲᠠ ᠦᠭᠡᠢ ᠪᠣᠯᠵᠤ ᠪᠠᠢᠳᠠᠭ ᠪᠣᠯᠬᠣᠷ ᠲᠡᠭᠦᠨ ᠡᠴᠡ ᠪᠡᠶᠡ ᠬᠣᠯᠠᠳᠴᠤ᠂ ᠨᠢᠳᠦᠨ ᠪᠠᠷᠠ ᠰᠠᠯᠵᠤ ᠪᠣᠯᠳᠠᠭ ᠦᠭᠡᠢ ᠨᠢ ᠭᠠᠰᠠᠯᠠᠩᠲᠠᠢ᠃
ᠡᠨᠡ ᠠᠪᠠᠭᠠᠢ ᠥᠪᠡᠷ ᠦ᠋ᠨ《ᠠᠯᠪᠠᠨ ᠤ᠋》 ᠳᠡᠯᠢᠮ ᠢ᠋ᠶ᠋ᠡᠷ ᠳᠤᠷᠠᠲᠠᠢ ᠴᠠᠭ ᠲᠤ᠌ ᠪᠠᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠷᠠᠯᠬᠠᠨ᠂ ᠴᠢᠬᠢᠨ ᠳ᠋ᠦ᠍ ᠨᠢ ᠠᠯᠲᠠᠨ ᠬᠣᠰᠢᠭᠤ ᠬᠦᠷᠭᠡᠵᠦ ᠴᠢᠳᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠨᠴᠠᠭᠠᠢ ᠤᠴᠢᠷ ᠪᠠᠢᠳᠠᠯ ᠢ᠋ ᠮᠡᠳᠡᠬᠦ ᠶ᠋ᠢᠨ《ᠲᠠᠯᠠᠷᠬᠠᠯ》 ᠪᠢᠯᠳᠠᠤᠴᠢᠯᠠᠯ ᠢ᠋ ᠢᠮᠠᠭᠲᠠ ᠠᠪᠴᠤ ᠪᠠᠢᠳᠠᠭ ᠨᠢ ᠪᠠᠰᠠ ᠴᠦ᠍ ᠵᠤᠭᠠᠲᠠᠢ ᠲᠡᠳᠦᠢ ᠦᠭᠡᠢ᠂ ᠦᠯᠡᠮᠵᠢ《ᠦᠨᠡᠲᠡᠢ》 ᠪᠣᠯᠤᠨᠠ᠃
《ᠶᠡᠬᠡ ᠡᠵᠡᠨᠲᠡᠢ ᠮᠢᠨᠢ ᠲᠠᠭᠠᠯᠠᠵᠤ ᠪᠣᠯᠭᠣᠭᠠ!》 ᠭᠡᠰᠡᠨ ᠦᠭᠡ ᠠᠮᠠᠨ ᠤ᠋ ᠤᠩᠰᠢᠯᠭᠠ ᠪᠣᠯᠤᠭᠰᠠᠨ ᠬᠢᠲᠠᠳ ᠲᠦᠰᠢᠮᠡᠳ ᠨᠠᠷ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠷᠭᠡᠳᠡ ᠥᠷᠯᠥᠭᠡ ᠣᠷᠣᠢ ᠦᠭᠡᠢ ᠪᠠᠢᠵᠤ᠂ ᠨᠣᠮ ᠪᠣᠯᠭᠤᠭᠠᠯᠭᠠᠨ᠂ ᠵᠠᠷᠢᠮ ᠨᠢ ᠲᠥᠷᠥ ᠶ᠋ᠢᠨ ᠶᠡᠬᠡ ᠬᠡᠷᠡᠭ ᠢ᠋ ᠬᠦᠷᠲᠡᠯᠡ ᠵᠥᠪᠯᠡᠯᠳᠦᠨ ᠶᠠᠷᠢᠯᠴᠠᠳᠠᠭ ᠪᠣᠯᠵᠠᠢ᠃
ᠺᠡᠢᠫᠢᠩ ᠬᠣᠲᠠ ᠶ᠋ᠢᠨ ᠵᠢᠷᠤᠭ ᠢ᠋ ᠭᠠᠷᠭᠠᠵᠤ᠂ ᠲᠡᠭᠦᠨ ᠦ᠌ ᠤᠷᠠᠨ ᠪᠠᠷᠢᠯᠭᠠ ᠨᠤᠭᠤᠳ ᠤ᠋ᠨ ᠨᠢᠭᠤᠷ ᠢ᠋ ᠵᠢᠷᠤᠨ ᠡᠵᠡᠨ ᠳ᠋ᠦ᠍ ᠳᠠᠭᠠᠯᠠᠭᠤᠯᠤᠭᠰᠠᠨ ᠯᠢᠦ ᠪᠢᠩ ᠵᠦᠩ ᠲᠦᠰᠢᠮᠡᠯ ᠪᠠᠢᠨ ᠪᠠᠢᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠷᠠᠯᠬᠠᠨ ᠡᠯᠳᠡᠪ ᠢ᠋ ᠠᠢᠯᠠᠳᠬᠠᠬᠤ ᠳ᠋ᠤ᠌ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠶᠡᠬᠡ ᠱᠠᠩ ᠭᠣᠷᠢᠳᠠᠭᠠᠳ ᠶᠠᠪᠤᠭᠠ ᠶᠤᠮ ᠤᠤ ᠭᠡᠲᠡᠯᠡ ᠦᠭᠡᠢ᠂ ᠬᠠᠷᠢᠨ ᠬᠤᠪᠢᠯᠠᠢ ᠳ᠋ᠤ᠌ ᠲᠤᠰᠠ ᠬᠢᠬᠦ ᠳ᠋ᠦ᠍ ᠪᠡᠨ ᠶᠡᠬᠡ ᠶᠣᠰᠣᠷᠬᠠᠤ ᠵᠠᠩ ᠭᠠᠷᠭᠠᠨ᠄
—《ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ ᠶᠡᠬᠡ ᠡᠵᠡᠨᠲᠡᠨ ᠮᠢᠨᠢ!》 ᠭᠡᠵᠦ ᠠᠢᠯᠠᠳᠬᠠᠯ ᠢ᠋ᠶ᠋ᠠᠨ ᠥᠭᠦᠯᠡᠬᠦ ᠶ᠋ᠢᠨ ᠡᠮᠦᠨᠡ ᠵᠠᠪᠠᠯ ᠬᠡᠯᠡᠳᠡᠭ ᠵᠢᠮᠡ ᠲᠡᠢ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠲᠠᠭᠠᠯᠠᠯ ᠠᠰᠠᠭᠤᠨ᠂ ᠶᠡᠬᠡ ᠣᠷᠳᠣᠨ ᠳ᠋ᠤ᠌ ᠪᠣᠯᠤᠨ ᠬᠣᠲᠠ ᠳ᠋ᠤ᠌ ᠶᠠᠭᠤ ᠨᠡᠮᠡᠵᠦ ᠬᠢᠮᠡᠷ ᠪᠠᠢᠭᠠ ᠶ᠋ᠢ ᠠᠰᠠᠭᠤᠨᠠ᠃ ᠡᠢᠮᠦ ᠲᠡᠢᠮᠦ ᠭᠡᠰᠡᠨ ᠵᠦᠢᠯ ᠢ᠋ ᠬᠤᠪᠢᠯᠠᠢ ᠬᠡᠯᠡᠬᠦ ᠳ᠋ᠦ᠍ ᠲᠡᠭᠦᠨ ᠢ᠋ ᠨᠢ ᠠᠵᠢᠯᠴᠢᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠭᠠᠷᠠᠤᠬᠠᠨ ᠬᠢᠯᠭᠡᠵᠦ ᠣᠷᠬᠢᠭᠠᠳ᠂ ᠡᠷᠭᠢᠵᠦ ᠬᠠᠷᠢᠭᠤ ᠵᠠᠪᠠᠯ ᠠᠢᠯᠠᠳᠬᠠᠨᠠ᠃ ᠡᠨᠡ ᠪᠣᠯ ᠪᠠᠰᠠ ᠶᠣᠰᠣ ᠪᠣᠯᠤᠭᠰᠠᠨ ᠬᠡᠷᠡᠭ᠃
ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠯᠢᠦ ᠪᠢᠩ ᠵᠦᠩ《ᠪᠢᠳᠡᠨ ᠦ᠌ ᠬᠢᠲᠠᠳ ᠤ᠋ᠳ ᠮᠣᠩᠭᠣᠯ ᠲᠠ ᠨᠠᠷ ᠢ᠋ ᠡᠰᠡᠷᠭᠦᠴᠡᠭᠡᠳ ᠳᠡᠢᠯᠬᠦ ᠡᠴᠡ ᠣᠳᠣ ᠥᠩᠭᠡᠷᠡᠭᠰᠡᠨ᠃ ᠲᠠ ᠨᠠᠷ ᠤ᠋ᠨ ᠭᠠᠷ ᠢ᠋ᠶ᠋ᠠᠷ ᠡᠮᠦᠨᠡᠲᠦ ᠶ᠋ᠢᠨ ᠴᠠᠭᠠᠨ ᠭᠠᠷ ᠲᠠᠢ ᠬᠢᠲᠠᠳ ᠤ᠋ᠳ ᠢ᠋ ᠨᠣᠮᠣᠬᠠᠳᠬᠠᠭᠠᠳ᠂ ᠨᠡᠢᠲᠡ ᠬᠢᠲᠠᠳ ᠢ᠋ ᠨᠢᠭᠡ ᠪᠦᠬᠦᠯᠢ ᠶᠠᠭᠤᠮᠠ ᠪᠣᠯᠭᠠᠭᠠᠳ ᠠᠪᠤᠪᠠᠯ ᠶᠡᠬᠡ ᠶᠠᠭᠤᠮᠠ᠃ ᠲᠡᠭᠡᠭᠡᠳ ᠴᠢᠮᠠᠶ᠋ᠢ ᠪᠦᠬᠦ ᠰᠡᠳᠬᠢᠯ ᠰᠠᠨᠠᠭᠠ ᠪᠠᠷ ᠴᠢᠨᠢ ᠬᠢᠲᠠᠳ ᠪᠣᠯᠭᠠᠭᠠᠳ ᠠᠪᠤᠪᠠᠯ ᠬᠠᠮᠤᠭ ᠬᠦᠰᠡᠯ ᠬᠠᠩᠬᠤ ᠨᠢ ᠲᠡᠷᠡ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠪᠢᠳᠡᠨ ᠦ᠌ ᠠᠴᠢ ᠦᠷᠡᠰ ᠬᠡᠳᠦ ᠶ᠋ᠢᠨ ᠴᠠᠭ ᠲᠤ〈ᠬᠤᠪᠢᠯᠠᠢ ᠬᠢᠲᠠᠳ ᠤ᠋ᠨ ᠤᠭᠰᠠᠭᠠᠨ ᠤ᠋ ᠪᠠᠢᠭᠰᠠᠨ ᠭᠡᠵᠦ ᠠᠮᠠ ᠪᠠᠷᠳᠠᠮ ᠬᠡᠯᠡᠵᠦ ᠪᠠᠢᠬᠤ ᠰᠢᠦ ᠳᠡ᠃ ᠲᠡᠷᠡ ᠨᠢ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠬᠤᠪᠢᠯᠠᠢ ᠮᠣᠩᠭᠣᠯ ᠪᠢᠰᠢ ᠬᠢᠲᠠᠳ ᠨᠣᠶᠠᠨ᠂ ᠮᠣᠩᠭᠣᠯ ᠨᠢ ᠮᠣᠩᠭᠣᠯ ᠪᠢᠰᠢ ᠬᠢᠲᠠᠳ ᠪᠣᠯᠵᠤ ᠣᠷᠬᠢᠭᠰᠠᠨ ᠪᠠᠢᠬᠤ ᠦᠶᠡ ᠶᠦᠮ ᠰᠢᠦ᠃ ᠲᠡᠭᠦᠨ ᠢ᠋ ᠪᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠵᠦ ᠴᠦ᠍ ᠪᠣᠯᠬᠤ ᠪᠣᠢ〉》 ᠭᠡᠮᠡᠨ ᠪᠣᠳᠣᠭᠰᠠᠭᠠᠷ ᠪᠠᠢᠭᠠ ᠶ᠋ᠢ ᠵᠠᠬᠢᠷᠤᠭᠴᠢ ᠬᠠᠷᠠᠭᠠᠳ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃ ᠲᠡᠷᠡ ᠪᠡᠷ ᠶᠠᠯᠢᠭᠦᠢ ᠪᠦᠲᠦᠯ ᠮᠠᠭᠤᠲᠠᠢ ᠶᠠᠭᠤᠮᠠ ᠭᠠᠷᠪᠠᠯ《ᠲᠩᠷᠢ ᠨᠢᠷᠭᠡᠭ!》 ᠭᠡᠵᠦ ᠮᠠᠭᠤᠬᠠᠢ ᠬᠠᠷᠢᠶᠠᠳᠠᠭ᠃ ᠡᠢᠮᠦ ᠨᠢᠭᠡᠨ ᠪᠥᠭᠲᠥᠷ ᠨᠢᠷᠤᠭᠤ ᠲᠠᠢ ᠴᠠᠭᠠᠨ ᠰᠠᠬᠠᠯᠲᠤ ᠬᠥᠮᠦᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠷᠠᠯᠬᠠᠨ ᠣᠷᠣᠭᠠᠳ
— ᠶᠡᠬᠡ ᠡᠵᠡᠨ ᠲᠠ ᠮᠢᠨᠦ ᠵᠥᠪᠯᠡᠭᠡ ᠶ᠋ᠢ ᠪᠣᠯᠭᠣᠭᠠᠨ ᠲᠠᠭᠠᠯᠠᠵᠤ᠂ ᠡᠨᠡ ᠺᠡᠢᠫᠢᠩ ᠢ᠋ᠶ᠋ᠡᠷ ᠥᠪᠡᠷ ᠦ᠋ᠨ ᠨᠡᠢᠰᠯᠡᠯ ᠢ᠋ ᠬᠢᠬᠦ ᠶᠣᠰᠣᠲᠠᠢ ᠪᠠᠢᠬᠤ ᠰᠢᠦ᠃ ᠡᠨᠡ ᠪᠣᠯ ᠤᠴᠢᠷᠲᠠᠢ ᠬᠡᠷᠡᠭ᠃ ᠶᠡᠬᠡ ᠡᠵᠡᠨ ᠬᠥᠮᠦᠨ ᠵᠠᠪᠠᠯ ᠥᠪᠡᠷ ᠦ᠋ᠨ ᠨᠡᠢᠰᠯᠡᠯ ᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠪᠢᠳᠡ ᠢᠩᠭᠢᠵᠦ ᠪᠣᠳᠣᠵᠤ ᠬᠢᠴᠢᠶᠡᠨ ᠰᠢᠮᠳᠠᠵᠤ ᠪᠠᠷᠢᠭᠰᠠᠨ ᠬᠣᠲᠠ᠃ ᠡᠨᠳᠡᠬᠢ ᠶ᠋ᠢᠨ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠭᠠᠵᠠᠷ ᠮᠠᠰᠢᠳᠠ ᠦᠵᠡᠰᠬᠦᠯᠡᠩᠲᠡᠢ᠂ ᠠᠭᠠᠷ ᠤᠰᠤ ᠨᠢ ᠠᠷᠢᠭᠤᠬᠠᠨ᠃ ᠲᠤᠯᠤᠨ ᠨᠠᠭᠤᠷ ᠤ᠋ᠨ ᠡᠨᠡ ᠰᠠᠪᠠ ᠭᠠᠵᠠᠷ ᠨᠢ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠭᠣᠪᠢ ᠶ᠋ᠢᠨ ᠡᠮᠦᠨᠡ ᠡᠲᠡᠭᠡᠳ ᠲᠦ᠍ ᠠᠯᠠᠭᠯᠠᠨ ᠲᠣᠭᠲᠠᠭᠰᠠᠨ ᠡᠷᠲᠡᠨ ᠦ᠌ ᠴᠢᠯᠠᠭᠤ ᠠᠳᠠᠯᠢ ᠦᠵᠡᠰᠬᠦᠯᠡᠩ ᠢ᠋ ᠪᠦᠷᠢᠳᠦᠭᠦᠯᠵᠦ ᠪᠠᠢᠭᠠ ᠪᠣᠯᠬᠣᠷ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠨᠢᠭᠡᠨ ᠴᠢᠮᠡᠭ ᠨᠡᠮᠡᠳᠡᠭ ᠰᠢᠦ᠃ ᠡᠨᠡ ᠬᠣᠲᠠ ᠪᠠᠨ ᠶᠡᠬᠡ ᠡᠵᠡᠨ ᠲᠠ ᠮᠣᠩᠭᠣᠯ ᠨᠡᠷᠡᠲᠡᠢ ᠪᠠᠢᠯᠭᠠᠶᠠ ᠭᠡᠵᠦ ᠪᠣᠯᠭᠣᠭᠠᠵᠤ ᠪᠠᠢᠪᠠᠯ ᠱᠠᠩᠳᠤ① ᠭᠡᠵᠦ ᠬᠠᠵᠠᠭᠤ ᠪᠠᠷ ᠤᠷᠤᠰᠤᠨ ᠪᠣᠢ ᠭᠣᠣᠯ ᠤ᠋ᠨ ᠨᠡᠷᠡ ᠪᠡᠷ ᠨᠡᠷᠡᠯᠡᠵᠦ ᠪᠣᠯᠤᠮᠠᠷ ᠪᠠᠢᠨᠠ᠃ ᠡᠨᠡ ᠨᠢ ᠮᠣᠩᠭᠣᠯ ᠤ᠋ᠨ ᠱᠠᠩᠳᠠ ᠤᠰᠤ ᠭᠡᠰᠡᠨ ᠦᠭᠡ ᠭᠡᠮᠡᠨ ᠠᠢᠯᠠᠳᠬᠠᠪᠠ᠃ ᠯᠢᠦ ᠪᠢᠩ ᠵᠦᠩ ᠦ᠋ᠨ ᠠᠢᠯᠠᠳᠬᠠᠯ ᠶᠠᠷᠢᠶᠠ ᠬᠤᠪᠢᠯᠠᠢ ᠳ᠋ᠤ᠌ ᠭᠣᠴᠣ ᠲᠠᠭᠠᠯᠠᠭᠳᠠᠨ《ᠡᠨᠡ ᠲᠦᠰᠢᠮᠡᠯ ᠦᠨᠡᠬᠡᠷ ᠮᠢᠨᠦ ᠲᠥᠯᠥᠭᠡ ᠯᠡ ᠪᠠᠢᠨᠠ᠃ ᠬᠣᠲᠠ ᠶ᠋ᠢ ᠴᠣᠬᠣᠮ ᠬᠦ᠌ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠨᠡᠢᠴᠡᠭᠦᠯᠦᠨ ᠪᠠᠷᠢᠶᠠ ᠭᠡᠵᠦ ᠪᠣᠳᠣᠨ ᠵᠢᠳᠬᠦᠭᠰᠡᠨ ᠭᠡᠳ ᠪᠠᠢᠳᠠᠭ ᠨᠢ ᠦᠨᠡᠨ ᠦᠭᠡ ᠠᠵᠢ》 ᠭᠡᠮᠡᠨ ᠪᠣᠳᠣᠵᠠᠢ᠃ ᠡᠨᠡ ᠮᠡᠲᠦ ᠶᠠᠷᠢᠶᠠ ᠬᠤᠪᠢᠯᠠᠢ ᠶ᠋ᠢᠨ ᠳᠡᠷᠭᠡᠳᠡ ᠪᠣᠯᠤᠭᠰᠠᠭᠠᠷ ᠪᠠᠢᠪᠠ᠃
ᠵᠢᠷᠲᠠᠭᠠᠢ ᠨᠢᠳᠦ ᠲᠡᠢ ᠶᠣᠣ ᠱᠤ᠌ ᠪᠠᠰᠠ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠷᠠᠯᠬᠠᠨ ᠬᠠᠯᠵᠠᠨ ᠲᠣᠯᠣᠭᠠᠢ ᠪᠠᠨ ᠢᠯᠪᠢᠭᠰᠡᠭᠡᠷ《ᠤᠷᠢᠬᠠᠨ》 ᠶᠠᠷᠢᠶᠠ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠬᠤᠪᠢᠯᠠᠢ ᠰᠣᠨᠣᠰᠬᠤ ᠳᠤᠷᠠᠲᠠᠢ᠃
— ᠬᠢᠲᠠᠳ ᠬᠥᠮᠦᠨ ᠣᠯᠠᠨ ᠪᠣᠯᠪᠠᠴᠤ ᠪᠡᠶᠡ ᠶ᠋ᠢᠨ ᠬᠦᠴᠦᠨ ᠴᠢᠳᠠᠯ ᠮᠡᠬᠦᠰ ᠲᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠰᠠᠨᠠᠭᠠ ᠭᠦᠨᠵᠡᠭᠡᠢ ᠤᠴᠢᠷ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠵᠦᠢᠯ ᠳ᠋ᠦ᠍ ᠪᠡᠨ ᠤᠷᠤᠭᠰᠢ ᠬᠥᠳᠡᠯᠦᠨᠡ ᠭᠡᠵᠦ ᠵᠠᠩ ᠦᠭᠡᠢ᠃ ᠬᠦᠴᠦ ᠬᠡᠷᠡᠭᠯᠡᠬᠦ ᠡᠴᠡ ᠪᠡᠨ ᠠᠷᠭᠠ ᠡᠪ ᠢ᠋ ᠨᠢ ᠣᠯᠬᠤ ᠯᠠ ᠬᠢᠲᠠᠳ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠵᠥᠭᠡᠯᠡᠷᠡᠭᠦᠯᠵᠦ ᠴᠢᠳᠠᠨᠠ ᠰᠢᠦ ᠭᠡᠵᠦ ᠡᠨᠡ ᠡᠷᠳᠡᠮᠲᠡᠨ ᠲᠦᠰᠢᠮᠡᠯ ᠥᠭᠦᠯᠡᠨᠡ᠃
— ᠡᠨᠡ ᠲᠠᠨᠢ ᠴᠣᠬᠣᠮ ᠶᠠᠭᠠᠬᠢ ᠭᠡᠰᠡᠨ ᠦᠭᠡ ᠪᠣᠢ? ᠬᠠᠤᠯᠢᠴᠢ ᠮᠢᠨᠢ ᠲᠠᠢᠯᠪᠤᠷᠢᠯᠠᠭᠠᠴᠢ!
— ᠲᠠᠢᠯᠪᠤᠷᠢᠯᠠᠨ ᠠᠢᠯᠠᠳᠬᠠᠵᠤ ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠮᠣᠩᠭᠣᠯ ᠬᠥᠮᠦᠨ ᠬᠡᠭᠡᠷᠡ ᠶ᠋ᠢᠨ ᠲᠤᠩᠭᠠᠯᠠᠭ ᠠᠭᠠᠷ ᠲᠤ ᠪᠡᠯᠴᠢᠭᠡᠷ ᠦ᠋ᠨ ᠰᠣᠷᠣᠨ ᠳᠡᠭᠡᠷᠡ ᠮᠠᠯ ᠢ᠋ᠶ᠋ᠠᠨ ᠮᠠᠯᠯᠠᠨ᠂ ᠳᠤᠷᠠᠲᠠᠢ ᠭᠠᠵᠠᠷ ᠲᠤ ᠪᠠᠨ ᠨᠡᠭᠦᠨ ᠣᠴᠢᠵᠤ ᠨᠤᠲᠤᠭᠯᠠᠨ ᠶᠠᠪᠤᠳᠠᠭ ᠪᠣᠯ ᠬᠢᠲᠠᠳ ᠬᠥᠮᠦᠰ ᠭᠠᠵᠠᠷ ᠲᠠᠢ ᠬᠠᠳᠠᠭᠳᠠᠨ᠂ ᠲᠠᠷᠢᠶᠠ ᠨᠣᠭᠣᠭᠠᠨ ᠤ᠋ ᠤᠷᠭᠤᠴᠠ ᠠᠪᠬᠤ ᠭᠡᠵᠦ ᠴᠠᠭ ᠦᠷᠭᠦᠯᠵᠢᠳᠡ ᠡᠪᠡᠰᠦ ᠰᠢᠷᠣᠢ ᠲᠠᠢ ᠵᠢᠭᠤᠷᠠᠯᠳᠤᠨ ᠪᠠᠢᠳᠠᠭ᠃ ᠪᠠᠰᠠ ᠨᠡᠭᠦᠵᠦ ᠨᠤᠲᠤᠭ ᠰᠡᠯᠭᠦᠬᠦ ᠶ᠋ᠢ ᠡᠰᠡ ᠮᠡᠳᠡᠨᠡ᠃ ᠵᠢᠵᠢᠭ ᠰᠢᠪᠠᠷ ᠭᠡᠷ ᠲᠡᠢ᠂ ᠲᠡᠭᠦᠨ ᠳ᠋ᠦ᠍ ᠪᠡᠨ ᠰᠡᠳᠬᠢᠯ ᠨᠢ ᠲᠠᠭᠠᠷᠠᠵᠤ ᠣᠯᠤᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠨᠥᠭᠡᠴᠡᠯᠡᠨ ᠭᠠᠵᠠᠷ ᠲᠤ ᠬᠠᠳᠠᠭᠠᠯᠠᠳᠠᠭ᠃ ᠶᠡᠷᠦ ᠨᠢ ᠪᠢᠲᠡᠭᠦᠦ ᠲᠦᠭᠵᠢᠭᠳᠡᠮᠡᠯ ᠬᠥᠮᠦᠰ᠃ ᠲᠡᠢᠮᠦ ᠪᠣᠯᠬᠣᠷ ᠬᠢᠲᠠᠳ ᠬᠥᠮᠦᠨ ᠢ᠋ ᠥᠪᠡᠷᠰᠡᠳ ᠢ᠋ ᠨᠢ ᠠᠬᠤᠢ ᠳ᠋ᠤ᠌ ᠨᠢ ᠲᠣᠬᠢᠷᠠᠵᠤ ᠲᠣᠭᠲᠠᠭᠠᠭᠰᠠᠨ ᠬᠠᠤᠯᠢ ᠪᠠᠷ ᠨᠢ ᠵᠠᠬᠢᠷᠴᠤ ᠪᠠᠢᠪᠠᠯ ᠭᠠᠷ ᠲᠤ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠠᠷᠢᠭᠳᠠᠵᠤ ᠪᠠᠢᠨᠠ᠃ ᠶᠡᠬᠡ ᠡᠵᠡᠨ ᠲᠠ ᠬᠢᠲᠠᠳ ᠤ᠋ᠨ ᠦᠨᠳᠦᠰᠦᠨ ᠶᠣᠰᠣ ᠵᠠᠩᠰᠢᠯ ᠢ᠋ ᠨᠢ ᠬᠥᠨᠳᠡᠨ ᠡᠪᠳᠡᠯ ᠦᠭᠡᠢ᠂ ᠲᠡᠷᠡ ᠵᠠᠩᠰᠢᠯ ᠢ᠋ᠶ᠋ᠠᠷ ᠨᠢ ᠪᠣᠯᠭᠠᠬᠤ ᠪᠢᠵᠡ ᠠ᠋᠃ ᠡᠭᠦᠨ ᠦ᠌ ᠲᠤᠯᠠ ᠪᠣᠭᠣᠯ ᠪᠢ ᠲᠠᠨ ᠳ᠋ᠤ᠌ ᠠᠢᠯᠠᠳᠬᠠᠯ ᠬᠢᠵᠦ ᠪᠠᠢᠨᠠ ᠭᠡᠵᠦ ᠦᠭᠡᠢᠯᠡᠨᠡ᠃ ᠬᠤᠪᠢᠯᠠᠢ ᠡᠪᠦᠭᠡᠨ ᠦ᠌ ᠡᠨᠡ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠨ ᠲᠣᠯᠣᠭᠠᠢ ᠳᠣᠬᠢᠵᠤ ᠰᠠᠭᠤᠬᠤ ᠳ᠋ᠤ᠌ ᠪᠠᠨ《ᠬᠠᠤᠯᠢᠴᠢ ᠮᠠᠨᠢ ᠭᠦᠷᠦᠨ ᠢ᠋ ᠠᠮᠤᠭᠤᠯᠠᠩ ᠪᠠᠢᠯᠭᠠᠬᠤ ᠭᠡᠵᠦ ᠰᠠᠨᠠᠭᠠ ᠲᠠᠯᠪᠢᠵᠤ ᠪᠠᠢᠭᠠ ᠪᠠᠢᠳᠠᠯᠲᠠᠢ᠃ ᠡᠨᠡ ᠨᠢ ᠦᠨᠡᠨ ᠪᠣᠯᠤᠯᠲᠠᠢ ᠰᠢᠦ》 ᠭᠡᠵᠦ ᠪᠣᠳᠣᠨᠠ᠃
— ᠪᠣᠭᠣᠯ ᠪᠢ ᠶᠡᠬᠡ ᠡᠵᠡᠨ ᠲᠠᠨ ᠢ᠋ ᠡᠮᠦᠨᠡᠲᠦ ᠰᠥᠩ ᠢ᠋ ᠲᠦᠪᠰᠢᠳᠬᠡᠭᠰᠡᠨ ᠴᠠᠭ ᠲᠤ ᠲᠡᠭᠦᠨ ᠳ᠋ᠦ᠍ ᠲᠣᠬᠢᠷᠠᠬᠤ ᠬᠠᠤᠯᠢ ᠶ᠋ᠢ ᠲᠠᠨ ᠤ᠋ ᠵᠠᠷᠯᠢᠭ ᠪᠣᠯᠭᠠᠨ ᠪᠢᠴᠢᠵᠦ ᠡᠷᠭᠦᠨᠡ ᠭᠡᠵᠦ ᠶᠣᠣ ᠱᠤ᠌ ᠠᠮᠠᠯᠠᠪᠠ᠃
ᠸᠠᠩ ᠦ ᠬᠤᠪᠢᠯᠠᠢ ᠳ᠋ᠤ᠌ ᠡᠭᠡᠯᠵᠢ ᠳᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ ᠪᠠᠷᠠᠯᠬᠠᠨ ᠤᠯᠴᠠᠩ ᠰᠢᠷᠠ ᠴᠢᠷᠠᠢ ᠪᠠᠨ ᠦᠷᠴᠢᠭᠢᠨᠡᠭᠦᠯᠦᠨ᠂ ᠨᠢᠳᠦᠨ ᠦ᠌ ᠴᠠᠭᠠᠨ ᠰᠢᠯ ᠢ᠋ᠶ᠋ᠡᠨ ᠠᠷᠴᠢᠭᠰᠠᠭᠠᠷ ᠺᠦᠩᠽᠢ ᠮᠡᠷᠭᠡᠨ ᠦ᠌ ᠰᠤᠷᠭᠠᠯ ᠢ᠋ ᠲᠠᠢᠯᠪᠤᠷᠢᠯᠠᠨ ᠶᠠᠷᠢᠵᠤ᠄
— ᠲᠥᠷᠥ ᠶ᠋ᠢᠨ ᠡᠵᠡᠨ ᠳᠡᠭᠡᠳᠦᠰ ᠪᠣᠯ ᠡᠨᠡ ᠭᠡᠭᠡᠨᠲᠡᠨ ᠦ᠌ ᠶᠡᠬᠡ ᠰᠤᠷᠭᠠᠯ ᠢ᠋ ᠭᠠᠷᠭᠠᠭᠤᠳ ᠮᠡᠳᠡᠬᠦ ᠦᠭᠡᠢ ᠪᠡᠷ ᠦᠢᠯᠡ ᠬᠡᠷᠡᠭ ᠢ᠋ᠶ᠋ᠡᠨ ᠵᠢᠯᠣᠭᠣᠳᠴᠤ ᠪᠣᠯᠬᠤ ᠦᠭᠡᠢ᠃ ᠢᠯᠠᠩᠭᠤᠶᠠ ᠬᠢᠲᠠᠳ ᠬᠥᠮᠦᠰ ᠢ᠋ ᠵᠠᠬᠢᠷᠬᠤ ᠡᠵᠡᠨ ᠺᠦᠩᠽᠢ ᠨᠣᠮᠴᠢ ᠶ᠋ᠢᠨ ᠨᠣᠮ ᠢ᠋ᠶ᠋ᠠᠷ ᠯᠠ ᠲᠡᠳᠡᠨ ᠢ᠋ ᠶᠠᠪᠤᠵᠤ ᠪᠣᠢ ᠭᠡᠪᠡᠯ ᠬᠡᠨ ᠴᠦ᠍ ᠥᠭᠡᠳᠡ ᠡᠴᠡ ᠠᠮᠠ ᠨᠡᠭᠡᠭᠡᠬᠦ ᠵᠢᠷᠦᠬᠡ ᠭᠠᠷᠭᠠᠬᠤ ᠦᠭᠡᠢ ᠭᠡᠵᠦ ᠰᠤᠷᠭᠠᠨᠠ᠃ ᠬᠤᠪᠢᠯᠠᠢ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ《ᠨᠡᠭᠡᠷᠡᠨ ᠴᠦ᠍ ᠲᠡᠢᠮᠦ ᠪᠢᠵᠡ᠃ ᠺᠦᠩᠽᠢ ᠭᠡᠳᠡᠭ ᠭᠠᠷᠭᠠᠭᠤᠳ ᠤᠬᠠᠭᠠᠲᠠᠨ ᠪᠠᠢᠵᠤ ᠯᠠ ᠳᠠ᠃ ᠲᠡᠭᠡᠭᠡᠳ ᠯᠡ ᠡᠨᠡ ᠰᠢᠷᠤᠢᠨ ᠲᠦᠮᠡᠨ ᠬᠢᠲᠠᠳ ᠢ᠋ ᠬᠠᠭᠠᠨ ᠪᠣᠭᠣᠯ᠂ ᠳᠡᠭᠡᠳᠦ ᠳᠣᠣᠷᠠᠲᠤ ᠪᠦᠭᠦᠳᠡ ᠶ᠋ᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠳᠠᠭᠠᠭᠤᠯᠵᠠᠢ᠃ ᠪᠢ ᠪᠠᠰᠠ ᠲᠡᠭᠦᠨ ᠢ᠋ ᠳᠠᠭᠠᠬᠤ ᠶᠣᠰᠣᠲᠠᠢ ᠪᠣᠯᠵᠤ ᠪᠠᠢᠨᠠ ᠤᠤ ᠠᠷᠠᠢ ᠶᠠᠭᠤ ᠯᠠ ᠪᠣᠯ᠃ ᠺᠦᠩᠽᠢ ᠶ᠋ᠢᠨ ᠨᠣᠮᠯᠠᠯ ᠦᠨᠡᠨ ᠳ᠋ᠦ᠍ ᠪᠡᠨ ᠤᠷᠠᠨ᠂ ᠮᠡᠷᠭᠡᠨ᠂ ᠤᠳᠬᠠ ᠲᠡᠭᠦᠯᠳᠡᠷ ᠨᠢ ᠭᠠᠷᠴᠠᠭᠠ ᠦᠭᠡᠢ ᠶᠦᠮ ᠠ᠋》 ᠭᠡᠵᠦ ᠪᠣᠳᠣᠨ᠂ ᠲᠡᠭᠦᠨ ᠦ᠌ ᠵᠠᠷᠢᠮ ᠰᠤᠷᠭᠠᠯ ᠠ᠋ᠴᠠ ᠴᠡᠭᠡᠵᠢ ᠪᠡᠷ ᠤᠩᠰᠢᠨᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠬᠤᠪᠢᠯᠠᠢ ᠪᠤᠰᠤᠳ ᠤ᠋ᠨ ᠤᠷᠬᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠲᠣᠭᠯᠠᠭᠠᠮ ᠤ᠋ᠨ ᠬᠥᠮᠦᠨ ᠪᠢᠰᠢ᠂ ᠠᠯᠢᠪᠠ ᠶ᠋ᠢ ᠠᠷᠪᠠ ᠳᠠᠬᠢᠨ ᠲᠤᠩᠭᠠᠭᠠᠵᠤ ᠪᠣᠳᠣᠳᠠᠭ ᠤᠬᠠᠭᠠᠲᠠᠢ ᠨᠣᠶᠠᠨ ᠪᠢᠯᠡ᠃
ᠬᠤᠪᠢᠯᠠᠢ ᠳ᠋ᠤ᠌ ᠬᠣᠲᠠ ᠶ᠋ᠢᠨ ᠰᠢᠨᠡ ᠨᠡᠷᠡ ᠨᠢ ᠲᠠᠭᠠᠯᠠᠭᠳᠠᠵᠤ《ᠮᠢᠨᠦ ᠬᠣᠲᠠᠬᠠᠨ ᠢ᠋ ᠡᠭᠦᠨ ᠡᠴᠡ ᠬᠣᠢᠰᠢᠳᠠ ᠱᠠᠩᠳᠤ ᠭᠡᠵᠦ ᠪᠠᠢ》 ᠭᠡᠰᠡᠨ ᠲᠤᠰᠢᠶᠠᠯ ᠢ᠋ ᠣᠷᠣᠢ ᠶ᠋ᠢᠨ ᠭᠦᠨᠴᠡᠭ ᠵᠣᠭᠣᠭᠯᠠᠵᠤ ᠪᠠᠢᠭᠠᠳ ᠥᠪᠡᠷ ᠦ᠋ᠨ ᠰᠢᠳᠠᠷ ᠲᠤ ᠪᠠᠭᠤᠯᠭᠠᠭᠰᠠᠨ ᠪᠠᠢᠨᠠ᠃ ᠵᠠᠬᠢᠷᠤᠭᠴᠢ ᠡᠢᠮᠦᠷᠬᠦᠦ ᠠᠯᠪᠠ ᠲᠠᠢ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠡᠳᠦᠷ ᠪᠣᠯᠭᠠᠨ ᠰᠥᠩ ᠦ᠋ᠨ ᠴᠡᠷᠢᠭ ᠲᠡᠢ ᠬᠥᠬᠡ ᠮᠥᠷᠡᠨ ᠦ᠌ ᠲᠡᠷᠲᠡᠭᠡ ᠳ᠋ᠦ᠍ ᠲᠤᠯᠤᠯᠳᠤᠵᠤ ᠪᠠᠢᠭᠠ ᠵᠠᠩᠵᠤᠨ ᠨᠤᠭᠤᠳ ᠠ᠋ᠴᠠ ᠬᠡᠯᠡ ᠴᠢᠮᠡᠭᠡ ᠠᠪᠴᠤ᠂ ᠲᠡᠭᠡᠰᠦᠭᠡᠢ ᠢᠩᠭᠢᠰᠦᠭᠡᠢ ᠭᠡᠰᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠨ᠂ ᠲᠡᠢᠨ ᠢ᠋ ᠠᠯᠤᠰ ᠠ᠋ᠴᠠ ᠴᠢᠭᠯᠡᠭᠦᠯᠦᠨᠡ᠃ ᠮᠡᠳᠡᠭᠡ ᠰᠡᠯᠲᠡ ᠡᠴᠡ ᠦᠵᠡᠪᠡᠯ ᠡᠮᠦᠨᠡᠲᠦ ᠬᠢᠲᠠᠳ ᠤ᠋ᠨ ᠬᠣᠲᠠ ᠨᠤᠭᠤᠳ ᠰᠦᠷᠡᠬᠡᠢ ᠡᠰᠡᠷᠭᠦᠴᠡᠨ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠲᠦ᠍ ᠪᠠᠭᠤᠵᠤ ᠥᠭᠬᠦ ᠦᠭᠡᠢ᠂ ᠡᠨᠳᠡ ᠲᠡᠨᠳᠡ ᠦᠭᠡᠢ ᠬᠣᠲᠠ ᠰᠢᠲᠠᠵᠤ᠂ ᠲᠦᠢᠮᠡᠷ ᠠᠪᠤᠯᠴᠠᠨ᠂ ᠲᠠᠷᠢᠶᠠᠨ ᠤ᠋ ᠲᠠᠯᠠᠪᠠᠢ᠂ ᠤᠰᠤᠯᠠᠯᠲᠠ ᠶ᠋ᠢᠨ ᠰᠤᠪᠠᠭ ᠡᠪᠳᠡᠷᠡᠨ ᠰᠦᠢᠳᠴᠦ᠂ ᠵᠠᠮ ᠬᠠᠷᠭᠤᠢ᠂ ᠭᠣᠣᠯ ᠤ᠋ᠨ ᠭᠠᠷᠠᠮ ᠤ᠋ᠳ ᠰᠠᠳᠠᠷᠠᠨ ᠡᠪᠳᠡᠷᠡᠵᠦ ᠪᠠᠢᠭᠠ ᠠᠵᠢ᠃
ᠰᠥᠩ ᠦ᠋ᠨ ᠨᠡᠢᠰᠯᠡᠯ ᠬᠠᠩᠵᠧᠦ ᠬᠣᠲᠠ ᠳ᠋ᠤ᠌ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠳᠥᠭᠥᠵᠦ ᠣᠴᠢᠭᠰᠠᠨ ᠤᠴᠢᠷ ᠲᠡᠳᠡ ᠥᠭᠡᠷᠡ ᠭᠠᠵᠠᠷ ᠲᠤ ᠪᠠᠢᠭᠠ ᠴᠡᠷᠢᠭ ᠦ᠋ᠨ ᠵᠠᠷᠢᠮ ᠬᠦᠴᠦ ᠪᠡᠨ ᠪᠠᠭᠤᠨ ᠥᠭ ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠬᠤ ᠰᠡᠵᠢᠭ ᠣᠭᠲᠣ ᠪᠠᠢᠬᠤ ᠦᠭᠡᠢ᠃ ᠲᠡᠳᠡᠨ ᠦ᠌ ᠬᠢ ᠮᠣᠩᠭᠣᠯ ᠤ᠋ᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠣᠮᠢᠯᠠᠨ ᠶᠠᠪᠤᠭᠤᠯᠤᠭᠰᠠᠨ ᠡᠯᠴᠢ ᠶ᠋ᠢ ᠪᠠᠰᠠ ᠪᠠᠷᠢᠨ ᠠᠪᠴᠤ ᠬᠣᠷᠢᠭᠰᠠᠭᠠᠷ ᠪᠠᠢᠭᠠ ᠶ᠋ᠢ ᠵᠠᠬᠢᠷᠤᠭᠴᠢ ᠰᠣᠨᠣᠰᠤᠭᠠᠳ ᠬᠥᠮᠥᠭᠡᠢ ᠵᠠᠭᠤᠵᠤ᠄
— ᠭᠠᠢᠭᠤᠢ ᠳᠠ᠃ ᠲᠠ ᠨᠠᠷ ᠡᠭᠦᠨ ᠦ᠌ ᠪᠡᠨ ᠬᠠᠷᠢᠭᠤ ᠶ᠋ᠢ ᠡᠳ᠋ᠯᠡᠬᠦ ᠴᠠᠭ ᠢ᠋ ᠦᠵᠡᠬᠦ ᠪᠢᠵᠡ ᠭᠡᠵᠦ ᠥᠰᠢᠶᠡᠷᠬᠡᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠭᠦᠯᠡᠨ᠂ ᠭᠠᠵᠠᠷ ᠤ᠋ᠨ ᠲᠣᠢᠮᠣ ᠵᠢᠷᠤᠭ ᠢ᠋ ᠬᠠᠷᠠᠭᠠᠳ
— ᠲᠠ ᠨᠠᠷ ᠬᠣᠷᠢᠭᠯᠠᠨ ᠪᠦᠭᠭᠦᠵᠦ ᠯᠡ ᠪᠠᠢ! ᠪᠢ ᠪᠠᠰᠠ ᠭᠠᠷ ᠢ᠋ᠶ᠋ᠠᠨ ᠴᠢᠩᠭᠠᠯᠠᠨ ᠠᠳᠬᠤᠵᠤ ᠲᠠ ᠨᠠᠷ ᠢ᠋ ᠳᠣᠲᠣᠭᠰᠢ ᠨᠢ ᠬᠤᠮᠢᠭᠠᠳ ᠪᠠᠢᠵᠤ ᠳᠥᠩᠭᠡᠬᠦ ᠪᠣᠢ᠃ ᠲᠡᠭᠡᠭᠡᠳ ᠬᠡᠨ ᠨᠢ ᠬᠦᠴᠦᠲᠡᠢ ᠪᠡᠨ ᠦᠵᠡᠬᠦ ᠪᠣᠯᠵᠤ ᠳᠠ ᠭᠡᠳ᠂ ᠲᠤᠯᠤᠯᠳᠤᠵᠤ ᠶᠠᠪᠤᠭᠠ ᠵᠠᠩᠵᠤᠨ ᠨᠤᠭᠤᠳ ᠲᠤ ᠪᠠᠨ ᠲᠡᠢᠨ ᠢ᠋ ᠤᠯᠠᠮ ᠬᠦᠴᠦᠲᠡᠢ ᠪᠣᠯᠭᠠᠬᠤ ᠲᠤᠬᠠᠢ ᠵᠠᠬᠢᠷᠤᠮᠵᠢ ᠪᠠᠭᠤᠯᠭᠠᠭᠰᠠᠭᠠᠷ ᠪᠠᠢᠯᠠ᠃
ᠬᠦᠯᠦᠭ ᠲᠦᠰᠢᠮᠡᠯ ᠬᠠᠷᠠ ᠬᠣᠷᠣᠮ ᠠ᠋ᠴᠠ ᠱᠠᠩᠳᠤ ᠳ᠋ᠤ᠌ ᠢᠷᠡᠭᠰᠡᠨ ᠳᠣᠣᠷᠠ ᠪᠠᠨ ᠶᠡᠬᠡ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠳ᠋ᠤ᠌ ᠪᠠᠷᠠᠯᠬᠠᠬᠤ ᠤᠴᠢᠷᠲᠠᠢ ᠪᠠᠨ ᠰᠢᠳᠠᠷ ᠲᠤᠰᠠᠯᠠᠬᠤ ᠳ᠋ᠤ᠌ ᠨᠢ ᠠᠢᠯᠠᠳᠬᠠᠪᠠ᠃ ᠭᠤᠷᠪᠠᠨ ᠬᠠᠭᠠᠯᠭᠠ ᠳᠡᠮᠵᠢᠵᠦ ᠣᠷᠣᠳᠠᠭ᠂ ᠣᠯᠠᠨ ᠲᠠᠰᠤᠯᠭᠠ ᠲᠠᠢ ᠣᠷᠳᠣᠨ ᠳ᠋ᠤ᠌ ᠰᠠᠭᠤᠭᠠ ᠬᠤᠪᠢᠯᠠᠢ ᠥᠪᠡᠷ ᠦ᠋ᠨ ᠲᠥᠯᠥᠭᠡᠨ ᠦ᠌ ᠡᠯᠴᠢ ᠶ᠋ᠢ ᠲᠦᠷᠭᠡᠨ ᠪᠠᠷᠠᠯᠬᠠᠭᠤᠯ ᠭᠡᠵᠡᠢ᠃ ᠪᠠᠭᠠ ᠲᠦᠰᠢᠮᠡᠯ ᠵᠢᠷᠤᠮ ᠢ᠋ ᠰᠠᠬᠢᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠷᠠᠯᠬᠠᠨ ᠶᠣᠰᠣ ᠬᠢᠵᠦ ᠰᠥᠭᠥᠳᠦᠭᠡᠳ ᠠᠮᠤᠭᠤᠯᠠᠩ ᠢ᠋ ᠡᠷᠢᠪᠡ᠃ ᠬᠤᠪᠢᠯᠠᠢ ᠡᠶᠡᠯᠡᠳᠡᠭ ᠵᠠᠩ ᠭᠠᠷᠭᠠᠨ ᠤᠭᠲᠤᠭᠠᠳ᠂ ᠬᠦᠯᠦᠭ ᠢ᠋ ᠰᠢᠷᠳᠡᠨ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ? ᠤᠨᠤᠭᠠ ᠳᠠᠭᠠᠭᠤᠯᠭᠠ ᠴᠢᠨᠢ ᠵᠦᠭᠡᠷ ᠤᠤ? ᠭᠡᠵᠦ ᠪᠦᠷ ᠡᠩ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠰᠠᠭᠤᠬᠤ ᠨᠢ ᠠᠩᠬᠠᠨ ᠤᠳᠠᠭᠠ ᠰᠣᠨᠣᠰᠤᠭᠳᠠᠵᠤ ᠪᠠᠢᠭᠠ ᠶ᠋ᠢ ᠥᠭᠦᠯᠡᠬᠦ ᠶᠠᠭᠤᠨ᠃
— ᠶᠡᠬᠡ ᠵᠠᠬᠢᠷᠤᠭᠴᠢ ᠲᠠᠨ ᠤ᠋ ᠠᠪᠤᠷᠠᠯ ᠢ᠋ᠶ᠋ᠠᠷ ᠵᠠᠷᠯᠢᠭ ᠪᠡᠶᠡᠯᠡᠭᠦᠯᠬᠦ ᠬᠡᠷᠡᠭ ᠲᠦ᠍ ᠪᠣᠭᠣᠯ ᠨᠢ ᠡᠰᠡᠨ ᠮᠡᠨᠳᠦ ᠵᠢᠳᠬᠦᠭᠡᠳ ᠢᠷᠡᠯᠡ ᠭᠡᠵᠦ ᠬᠦᠯᠦᠭ ᠲᠣᠯᠣᠭᠠᠢ ᠪᠥᠬᠥᠢᠨ ᠠᠢᠯᠠᠳᠬᠠᠪᠠ᠃
— ᠵᠠ᠂ ᠵᠠ᠃ ᠴᠢ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠣᠴᠢᠭᠠᠳ ᠶᠠᠭᠤ ᠦᠵᠡᠵᠦ ᠬᠠᠷᠠᠭᠰᠠᠨ᠂ ᠬᠡᠨ ᠲᠡᠢ ᠶᠠᠭᠠᠬᠢᠵᠤ ᠠᠭᠤᠯᠵᠠᠭᠰᠠᠨ᠂ ᠶᠠᠭᠤ ᠶᠠᠷᠢᠯᠴᠠᠭᠰᠠᠨ ᠢ᠋ᠶ᠋ᠠᠨ ᠠᠢᠯᠠᠳᠬᠠ ! ᠴᠢᠮᠠᠶ᠋ᠢ ᠪᠢ ᠣᠪᠣᠭᠠ ᠬᠤᠷᠳᠤᠨ ᠡᠷᠭᠢᠵᠦ ᠢᠷᠡᠭᠰᠡᠨ ᠳ᠋ᠦ᠍ ᠲᠠᠯᠠ ᠥᠭᠴᠦ ᠪᠠᠢᠨᠠ᠃ ᠮᠢᠨᠦ ᠳᠡᠭᠦᠦ ᠶᠠᠭᠤ ᠬᠡᠯᠡᠭᠦᠯᠪᠡ ᠠ᠋ ? ᠭᠡᠵᠦ ᠳᠠᠪᠬᠤᠷ ᠠᠰᠠᠭᠤᠯᠲᠠ ᠲᠠᠯᠪᠢᠯᠠ᠃ ᠬᠦᠯᠦᠭ ᠨᠡᠢᠰᠯᠡᠯ ᠳ᠋ᠦ᠍ ᠪᠠᠢᠭᠰᠠᠨ ᠴᠥᠭᠡᠨ ᠬᠣᠨᠣᠭ ᠲᠤ᠌ ᠦᠵᠡᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠠᠢᠯᠠᠳᠬᠠᠨ᠂ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠲᠡᠢ ᠠᠭᠤᠯᠵᠠᠭᠰᠠᠨ ᠢ᠋ᠶ᠋ᠠᠨ ᠲᠣᠳᠣᠳᠬᠠᠨ ᠥᠭᠦᠯᠡᠵᠦ ᠪᠠᠢᠪᠠ᠃ ᠬᠤᠪᠢᠯᠠᠢ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠪᠣᠳᠣᠵᠤ
— ᠠᠷᠢᠬᠪᠦ᠋ᠬᠡ ᠶᠠᠭᠤ ᠭᠡᠯᠡ ᠭᠡᠨᠡ ᠪᠣᠢ ? ᠭᠡᠮᠡᠨ ᠠᠢᠯᠠᠳᠬᠠᠯ ᠢ᠋ ᠲᠠᠰᠤᠯᠤᠨ ᠠᠰᠠᠭᠤᠯᠠ᠃
— ᠪᠣᠭᠣᠯ ᠨᠢ ᠮᠠᠳᠠᠭ ᠦᠭᠡᠢ ᠰᠣᠨᠣᠰᠤᠭᠰᠠᠨ᠃ ᠲᠠᠨ ᠤ᠋ ᠳᠡᠭᠦᠦ ᠵᠠᠬᠢᠷᠤᠭᠴᠢ ᠠᠢᠯᠠᠳᠬᠤ ᠳ᠋ᠤ᠌ ᠪᠠᠨ 《ᠪᠢ ᠴᠢᠮᠠᠲᠤ ᠪᠢᠴᠢᠭ ᠥᠭᠭᠥ ᠦᠭᠡᠢ᠃ ᠮᠣᠩᠭᠣᠯ ᠣᠷᠣᠨ ᠤ᠋ ᠪᠠᠨ ᠪᠣᠯᠤᠭᠠᠳ ᠤᠯᠤᠰ ᠭᠦᠷᠦᠨ ᠦ᠌ ᠠᠯᠪᠠ ᠶ᠋ᠢ ᠵᠠᠯᠭᠠᠭᠤᠯᠬᠤ ᠰᠠᠨᠠᠭᠠᠲᠠᠢ ᠶᠠᠳᠠᠵᠤ ᠰᠠᠭᠤᠨᠠ᠃ ᠤᠳᠠᠬᠤ ᠦᠭᠡᠢ ᠪᠢ ᠲᠠᠨ ᠳ᠋ᠤ᠌ ᠡᠯᠴᠢ ᠵᠠᠷᠤᠵᠤ ᠮᠠᠭᠠᠳ ᠦᠭᠡᠢ》 ᠭᠡᠰᠡᠨ ᠡᠴᠡ ᠭᠠᠳᠠᠨᠠ 《ᠡᠵᠢ ᠲᠠᠨ ᠢ᠋ ᠳᠤᠷᠠᠰᠤᠭᠠᠳ ᠯᠠ ᠪᠠᠢᠬᠤ ᠳ᠋ᠤ᠌ ᠲᠠ ᠳᠠᠪᠬᠢᠵᠤ ᠢᠷᠡᠭᠡᠳ ᠠᠭᠤᠯᠵᠠᠵᠤ ᠶᠠᠭᠠᠬᠢᠭᠠᠳ ᠪᠣᠯᠬᠤ ᠦᠭᠡᠢ ᠪᠠᠢᠨᠠ ᠪᠣᠢ? 》 ᠭᠡᠰᠡᠨ ᠭᠡᠵᠦ ᠬᠦᠯᠦᠭ ᠲᠦᠰᠢᠮᠡᠯ ᠠᠢᠯᠠᠳᠬᠠᠯᠠ᠃
— ᠠ᠂ ᠮᠥᠨ ᠮᠥᠨ ᠭᠡᠵᠦ ᠬᠤᠪᠢᠯᠠᠢ ᠬᠡᠯᠡᠭᠡᠳ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠬᠠᠷᠠᠬᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠬᠦ ᠳ᠋ᠦ᠍ ᠪᠡᠨ 《ᠤᠯᠤᠰ ᠭᠦᠷᠦᠨ ᠠᠯᠪᠠ ᠶ᠋ᠢ ᠭᠦᠢᠴᠡᠯᠳᠦᠭᠦᠯᠬᠦ ᠰᠠᠨᠠᠭᠠᠲᠠᠢ》 ᠭᠡᠳᠡᠭ ᠴᠢᠨᠢ ᠥᠪᠡᠷ ᠢ᠋ ᠪᠡᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠪᠠᠢᠵᠤ ᠪᠠᠢᠨᠠ ᠭᠡᠰᠡᠨ ᠦᠭᠡ ᠮᠥᠨ᠃ 《ᠳᠠᠪᠬᠢᠵᠤ ᠢᠷᠡᠭᠡᠳ ᠠᠭᠤᠯᠵᠠᠬᠤ ᠦᠭᠡᠢ》 ᠭᠡᠵᠦ ᠵᠢᠮᠡᠯᠡᠵᠦ ᠪᠠᠢᠨᠠ ᠭᠡᠳᠡᠭ ᠴᠢᠨᠢ ᠨᠠᠮᠠᠶ᠋ᠢ ᠠᠷᠢᠬᠪᠦ᠋ᠬᠡ ᠥᠪᠡᠷ ᠲᠦ᠍ ᠪᠡᠨ ᠪᠠᠷᠠᠯᠬᠠᠭᠤᠯᠬᠤ ᠭᠡᠰᠡᠨ ᠰᠠᠨᠠᠭᠠ ᠪᠢᠵᠡ᠃ ᠭᠠᠷᠴᠠᠭᠠ ᠦᠭᠡᠢ ᠲᠡᠢᠮᠦ ᠪᠠᠢᠨᠠ ᠰᠢᠦ ᠭᠡᠮᠡᠨ ᠪᠣᠳᠣᠭᠠᠳ
— ᠲᠡᠷᠡ ᠤᠯᠤᠰ ᠭᠦᠷᠦᠨ ᠦ᠌ ᠠᠯᠪᠠ ᠶ᠋ᠢ ᠪᠦᠬᠦᠯᠢ ᠳ᠋ᠦ᠍ ᠨᠢ ᠵᠠᠯᠭᠠᠭᠤᠯᠬᠤ ᠭᠡᠵᠦ ᠬᠠᠩᠬᠠᠯᠵᠠᠬᠤ ᠳ᠋ᠤ᠌ ᠪᠠᠨ ᠶᠠᠭᠠᠬᠢᠬᠤ ᠪᠣᠢ ᠳᠠ ᠭᠡᠮᠡᠨ ᠵᠥᠪᠬᠡᠨ ᠥᠪᠡᠷ ᠲᠦ᠍ ᠪᠠᠨ ᠯᠠ ᠳᠤᠭᠤᠯᠳᠠᠬᠤ ᠲᠡᠳᠦᠢ ᠪᠡᠷ ᠠᠮᠠᠨ ᠳᠣᠲᠣᠷᠠ ᠪᠠᠨ ᠥᠭᠦᠯᠡᠵᠦ ᠰᠠᠭᠤᠪᠠ᠃
— ᠬᠦᠯᠦᠭ ᠠ᠋ ! ᠴᠢᠮᠠᠲᠤ ᠥᠭᠡᠷᠡ ᠬᠡᠯᠡᠬᠦ ᠶᠠᠭᠤᠮᠠ ᠪᠠᠢᠨᠠ ᠤᠤ ? ᠠᠷᠢᠬᠪᠦ᠋ᠬᠡ ᠶ᠋ᠢᠨ ᠵᠢᠰᠦ ᠴᠢᠷᠠᠢ ᠶᠠᠮᠠᠷ ᠰᠢᠦ ᠪᠠᠢᠨᠠ ᠪᠣᠢ ? ᠭᠡᠵᠦ ᠵᠠᠬᠢᠷᠤᠭᠴᠢ ᠨᠡᠮᠡᠵᠦ ᠠᠰᠠᠭᠤᠯᠠ᠃ ᠬᠦᠯᠦᠭ ᠪᠥᠬᠥᠢᠵᠦ
— ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ᠂ ᠳᠡᠭᠡᠳᠦᠰ ᠮᠢᠨᠢ! ᠪᠣᠭᠣᠯ ᠨᠢ ᠰᠦᠷᠳᠡᠭᠡᠳ ᠲᠠᠨ ᠤ᠋ ᠳᠡᠭᠦᠦ ᠵᠠᠬᠢᠷᠤᠭᠴᠢ ᠶ᠋ᠢᠨ ᠴᠢᠷᠠᠢ ᠶ᠋ᠢ ᠰᠠᠢᠨ ᠬᠠᠷᠠᠵᠤ ᠠᠮᠵᠢᠭᠠ ᠦᠭᠡᠢ᠃ ᠶᠡᠬᠡ ᠯᠡ ᠰᠦᠷᠯᠢᠭ ᠭᠢᠯᠠᠯᠵᠠᠭᠰᠠᠨ ᠡᠷᠡ ᠪᠠᠢᠨᠠ ᠪᠢᠯᠡ᠃ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠬᠢᠵᠦ ᠶᠠᠪᠤᠭᠠᠳ ᠢᠷᠡᠯᠡ ᠭᠡᠵᠦ ᠪᠢ ᠰᠣᠨᠣᠰᠤᠭᠰᠠᠨ᠃
— ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠠ᠋? ᠬᠡᠨ ᠲᠡᠢ ᠪᠠᠢᠯᠳᠤᠬᠤ ᠭᠡᠰᠡᠨ ᠶᠦᠮ ᠪᠣᠯ?
— ᠪᠣᠭᠣᠯ ᠨᠢ ᠶᠠᠭᠤ ᠪᠠᠨ ᠮᠡᠳᠡᠬᠦ ᠪᠣᠢ᠃ ᠲᠡᠭᠡᠵᠦ ᠯᠡ ᠰᠢᠳᠠᠷ ᠬᠥᠮᠦᠰ ᠨᠢ ᠬᠡᠯᠡᠵᠦ ᠪᠠᠢᠭᠰᠠᠨ᠃
— ᠪᠢ ᠪᠢᠯᠢᠭᠦᠨ ᠭᠡᠬᠦ ᠨᠡᠷᠡ ᠲᠡᠢ ᠨᠢᠭᠡ ᠲᠦᠰᠢᠮᠡᠯ ᠢ᠋ ᠵᠠᠷᠤᠵᠤ ᠶᠠᠪᠤᠭᠤᠯᠤᠭᠠᠳ ᠤᠳᠠᠵᠤ ᠪᠠᠢᠨᠠ᠃ ᠴᠢᠮᠠᠲᠤ ᠪᠢ ᠬᠡᠯᠡᠭᠰᠡᠨ ᠪᠠᠢᠬᠤ ᠠ᠋᠃ ᠴᠢ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠪᠠ ᠤᠤ? ᠭᠡᠵᠦ ᠬᠤᠪᠢᠯᠠᠢ ᠠᠰᠠᠭᠤᠪᠠ᠃
— ᠲᠠ ᠨᠠᠳᠠᠳᠤ ᠵᠠᠷᠯᠢᠭᠯᠠᠵᠤ ᠪᠠᠢᠭᠰᠠᠨ᠃ ᠲᠡᠷᠡ ᠲᠦᠰᠢᠮᠡᠯ ᠪᠠᠷᠠᠭᠤᠨ ᠭᠠᠵᠠᠷ ᠵᠠᠷᠤᠭᠳᠠᠨ ᠶᠠᠪᠤᠭᠰᠠᠨ ᠰᠤᠷᠠᠭ ᠲᠠᠢ᠃ ᠪᠣᠭᠣᠯ ᠨᠢ ᠠᠭᠤᠯᠵᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠡᠭᠦᠨ ᠢ᠋ ᠬᠦᠯᠢᠶᠡᠬᠦ ᠠᠬᠤᠯᠠ ᠬᠡᠳᠦᠨ ᠰᠠᠷᠠ ᠪᠠᠷ ᠰᠠᠭᠠᠲᠠᠬᠤ ᠶᠠᠩᠵᠤᠲᠠᠢ ᠤᠴᠢᠷ ᠨᠠᠭᠠᠰᠢ ᠪᠠᠨ ᠪᠢ ᠶᠠᠭᠠᠷᠠᠨ ᠢᠷᠡᠯᠡ ᠭᠡᠵᠦ ᠬᠦᠯᠦᠭ ᠢ᠋ ᠶᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠳᠠᠪᠬᠤᠷ ᠡᠭᠦᠳᠡᠨ ᠦ᠌ ᠴᠠᠭᠠᠨᠠ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠯᠣᠯᠣᠢ ᠠᠪᠠᠭᠠᠢ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠴᠠᠢ᠃
ᠬᠤᠪᠢᠯᠠᠢ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠴᠢᠨ᠂ ᠠᠮᠠᠨ ᠳᠣᠲᠣᠷᠠ ᠪᠠᠨ 《ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠬᠢᠵᠦ ᠪᠠᠢᠭᠠ》 ᠂ 《ᠲᠡᠢᠮᠦ ᠪᠠᠰᠠ ᠤᠯᠤᠰ ᠭᠦᠷᠦᠨ ᠦ᠌ ᠠᠯᠪᠠ ᠶ᠋ᠢ ᠨᠡᠢᠲᠡ ᠳ᠋ᠦ᠍ ᠨᠢ ᠵᠠᠯᠭᠠᠭᠤᠯᠬᠤ ᠭᠡᠵᠦ ᠠᠷᠢᠬᠪᠦ᠋ᠬᠡ ᠶ᠋ᠢᠨ ᠬᠡᠯᠡᠵᠦ ᠪᠠᠢᠭᠠ ᠴᠢᠨᠢ ᠲᠤᠩ ᠶᠡᠬᠡ ᠡᠭᠡᠳᠡᠷᠡᠭᠡᠲᠡᠢ ᠬᠡᠷᠡᠭ ᠪᠢᠵᠡ ᠠ᠋ ᠃ ᠵᠠ ᠲᠤᠨᠭᠭᠠᠭᠠᠵᠤ ᠰᠢᠭᠦᠨᠡ ᠳᠡ》 ᠭᠡᠮᠡᠨ ᠥᠪᠡᠷ ᠲᠦ᠍ ᠪᠡᠨ ᠬᠡᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠮᠦᠨᠡ ᠪᠡᠨ ᠵᠣᠭᠰᠣᠵᠤ ᠪᠠᠢᠭᠠ ᠬᠦᠯᠦᠭ ᠢ᠋ ᠬᠠᠷᠠᠵᠤ᠄
— ᠴᠢ ᠮᠢᠨᠦ ᠦᠭᠡ ᠶ᠋ᠢ ᠳᠠᠭᠠᠨ ᠪᠡᠶᠡᠯᠡᠭᠦᠯᠵᠡᠢ᠃ ᠡᠦᠲᠦ ᠬᠠᠷᠢᠵᠤ ᠶᠠᠳᠠᠷᠠᠭᠠ ᠪᠠᠨ ᠭᠠᠷᠭᠠ ! ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠪᠠᠷᠠ ᠪᠣᠯᠤᠭᠴᠢ ᠪᠠᠨ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ᠂ ᠵᠠᠷᠤᠭᠠᠯ ᠤ᠋ᠨ ᠲᠦᠰᠢᠮᠡᠯ ᠳ᠋ᠦ᠍ ᠨᠢᠭᠡᠨ ᠭᠣᠭᠴᠣᠭᠠ ᠲᠣᠷᠭᠠ ᠱᠠᠩᠨᠠᠯ ᠪᠣᠯᠭᠠᠨ ᠥᠭ ᠭᠡᠵᠦ ᠲᠤᠰᠢᠶᠠᠯᠠ᠃
ᠬᠦᠯᠦᠭ ᠬᠡᠰᠢᠭ ᠲᠦ᠍ ᠮᠥᠷᠭᠥᠨ ᠣᠷᠳᠣᠨ ᠠ᠋ᠴᠠ ᠭᠠᠷᠬᠤ ᠳ᠋ᠤ᠌ ᠯᠣᠯᠣᠢ ᠠᠪᠠᠭᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠭᠠᠷ ᠵᠢᠷᠤᠭ ᠪᠠᠷᠢᠭᠰᠠᠭᠠᠷ ᠵᠥᠷᠢᠵᠦ ᠣᠷᠣᠭᠠᠳ᠂ ᠡᠵᠡᠨ ᠡᠴᠡ ᠪᠡᠨ ᠲᠠᠭᠠᠯᠠᠯ ᠠᠰᠠᠭᠤᠬᠤ ᠳᠡᠯᠢᠮ ᠢ᠋ᠶ᠋ᠡᠷ ᠴᠢᠩ ᠦᠨᠡᠨᠴᠢ ᠴᠢᠷᠠᠢ ᠭᠠᠷᠭᠠᠨ ᠡᠶᠡᠯᠳᠡᠭᠯᠡᠵᠤ ᠬᠠᠷᠠᠭᠠᠳ᠂ ᠬᠢᠲᠠᠳ ᠢ᠋ ᠳᠠᠭᠤᠷᠢᠶᠠᠨ᠄
— ᠶᠡᠬᠡ ᠡᠵᠡᠨᠲᠡᠨ ᠮᠢᠨᠢ ! ᠪᠢ ᠡᠨᠳᠡᠭᠦᠦ ᠲᠡᠰᠢᠶᠡ ᠰᠣᠨᠣᠰᠤᠭᠠ ᠦᠭᠡᠢ ᠪᠣᠯ ᠲᠠ ᠰᠠᠶᠢ ᠪᠠᠷᠠᠯᠬᠠᠭᠰᠠᠨ ᠲᠦᠰᠢᠮᠡᠯ ᠡᠴᠡ ᠪᠢᠯᠢᠭᠦᠨ ᠭᠡᠳᠡᠭ ᠵᠠᠷᠤᠭᠠᠯ ᠤ᠋ᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠠᠰᠠᠭᠤᠭᠠᠳ ᠪᠠᠢᠪᠠ ᠤᠤ ? ᠡᠨᠡ ᠬᠣᠶᠠᠷ ᠴᠢᠨᠢ ᠲᠥᠷᠥᠭᠰᠡᠨ ᠠᠬᠠ ᠳᠡᠭᠦᠦ ᠬᠥᠮᠦᠰ ᠭᠡᠳᠡᠭ ᠰᠢᠦ ᠳᠡ ᠭᠡᠵᠦ ᠠᠢᠯᠠᠳᠬᠠᠯᠠ᠃
— ᠠ ᠲᠡᠢᠮᠦ ᠤᠤ? ᠭᠡᠵᠦ ᠬᠤᠪᠢᠯᠠᠢ ᠤᠤᠯᠭᠠ ᠠᠯᠳᠠᠬᠤ ᠰᠢᠬᠠᠨ ᠬᠡᠯᠡᠵᠦ ᠭᠠᠢᠬᠠᠬᠤ ᠳ᠋ᠤ᠌ ᠪᠠᠨ 《ᠪᠢ ᠬᠥᠮᠦᠰ ᠢ᠋ᠶ᠋ᠡᠨ ᠲᠠᠨᠢᠵᠤ ᠮᠡᠳᠡᠬᠦ ᠶᠠᠭᠠᠬᠢᠭᠠ ᠴᠦ᠍ ᠦᠭᠡᠢ ᠪᠠᠢᠭᠠ ᠶᠤᠮ ᠰᠢᠪ》 ᠭᠡᠵᠦ ᠥᠪᠡᠷ ᠲᠦ᠍ ᠪᠡᠨ ᠪᠠᠰᠠ ᠬᠡᠯᠡᠯᠡ᠃
ᠬᠦᠯᠦᠭ ᠢ᠋ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠶᠠᠪᠤᠭᠠᠳ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠵᠠᠬᠢᠷᠤᠭᠴᠢ ᠶ᠋ᠢᠨ ᠠᠯᠪᠠ ᠮᠡᠳᠡᠭᠳᠡᠬᠦᠢᠴᠡ ᠶᠡᠬᠡᠰᠴᠦ᠂ ᠣᠷᠣᠢ ᠪᠦᠷᠦᠢ ᠶ᠋ᠢᠨ ᠵᠠᠷᠢᠮ ᠰᠢᠳᠠᠷ ᠨᠣᠶᠠᠳ ᠳᠠᠭᠠᠭᠠᠮᠠᠯ᠂ ᠬᠢᠲᠠᠳ ᠲᠦᠰᠢᠮᠡᠳ ᠨᠠᠷ ᠲᠠᠢ ᠭᠠᠭᠴᠠᠭᠠᠷ᠂ ᠬᠣᠶᠠᠷ ᠭᠤᠷᠪᠠ ᠪᠠᠷ ᠨᠡᠢᠯᠡᠨ ᠰᠠᠭᠤᠵᠤ ᠰᠥᠨᠢ ᠣᠷᠣᠢ ᠪᠣᠯᠲᠠᠯᠠ ᠶᠠᠷᠢᠯᠴᠠᠬᠤ ᠪᠣᠯᠤᠯᠠ᠃ ᠠᠳᠠ ᠴᠣᠬᠣᠮ ᠶᠠᠮᠠᠷ ᠬᠡᠷᠡᠭ ᠬᠡᠯᠡᠯᠴᠡᠭᠳᠡᠨ ᠪᠣᠢ ᠶ᠋ᠢ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃ ᠲᠡᠷᠡ ᠠᠭᠤᠯᠵᠠᠯᠲᠠ ᠶᠠᠷᠢᠶᠠᠨ ᠳ᠋ᠤ᠌ ᠶᠡᠬᠡ ᠲᠦᠰᠢᠮᠡᠯ — ᠵᠠᠬᠢᠷᠤᠭᠴᠢ ᠶ᠋ᠢᠨ ᠪᠠᠭᠰᠢ ᠵᠣᠣ ᠪᠢ᠂ ᠮᠥᠨ ᠲᠦᠰᠢᠮᠡᠯ ᠬᠣᠣ ᠵᠢᠩ ᠨᠠᠷ ᠬᠠᠮᠤᠭ ᠤ᠋ᠨ ᠢᠳᠡᠪᠬᠢᠲᠡᠢ ᠣᠷᠣᠯᠴᠠᠵᠤ ᠪᠠᠢᠪᠠ᠃
ᠰᠥᠨᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠨᠢᠭᠡ ᠤᠳᠠᠭᠠ ᠶ᠋ᠢᠨ ᠠᠭᠤᠯᠵᠠᠯᠲᠠ ᠳᠡᠭᠡᠷᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠷᠭᠡᠳᠡ ᠳ᠋ᠦ᠍ ᠵᠣᠣ ᠪᠢ᠂ ᠬᠣᠣ ᠵᠢᠩ ᠬᠣᠶᠠᠷ ᠪᠠᠢᠵᠤ᠂ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠤ᠋ ᠪᠠᠢᠳᠠᠯ᠂ ᠲᠥᠷᠥ ᠤᠯᠤᠰ ᠤ᠋ᠨ ᠦᠢᠯᠡ ᠬᠡᠷᠡᠭ ᠦ᠋ᠳ ᠢ᠋ ᠳᠡᠯᠭᠡᠨ ᠶᠠᠷᠢᠯᠴᠠᠵᠤ ᠰᠠᠭᠤᠭᠠᠳ᠂ ᠬᠤᠪᠢᠯᠠᠢ ᠰᠡᠳᠬᠢᠯ ᠵᠣᠪᠠᠭᠤᠷᠢᠲᠠᠢ ᠴᠢᠷᠠᠢ ᠦᠵᠡᠭᠦᠯᠦᠨ᠂ ᠱᠠᠨᠳᠦ᠋ᠩ ᠭᠠᠵᠠᠷ ᠤ᠋ᠨ ᠠᠮᠲᠠᠲᠤ ᠬᠠᠯᠠᠭᠤᠨ ᠴᠠᠢ ᠲᠠᠮᠰᠢᠶᠠᠯᠠᠨ ᠣᠭᠣᠴᠢᠯᠠᠵᠤ᠄
— ᠰᠠᠨᠠᠭᠠ ᠵᠣᠪᠠᠭᠠᠵᠤ ᠪᠠᠢᠭᠠ ᠵᠦᠢᠯ ᠶᠡᠬᠡ ᠪᠣᠯᠤᠯᠠ᠃ ᠰᠥᠩ ᠦ᠋ᠨ ᠬᠠᠭᠠᠨ ᠴᠡᠷᠢᠭ ᠤᠯᠠᠮ ᠰᠢᠷᠦᠭᠦᠨ ᠡᠰᠡᠷᠭᠦᠴᠡᠯ ᠦᠵᠡᠭᠦᠯᠵᠦ ᠪᠠᠢᠨᠠ᠃ ᠬᠣᠢᠲᠤ ᠨᠤᠲᠤᠭ ᠲᠤ ᠶᠡᠬᠡ ᠲᠥᠷᠥ ᠶ᠋ᠢᠨ ᠶᠠᠪᠤᠳᠠᠯ ᠴᠠᠯᠠᠭᠠᠷᠳᠠᠵᠤ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠢ ᠪᠣᠳᠣᠬᠤ ᠪᠣᠯᠤᠯᠠ ᠭᠡᠮᠡᠨ ᠦᠭᠡ ᠡᠳᠦᠪᠡ᠃ ᠵᠣᠣ ᠪᠢ ᠴᠠᠭᠠᠨ ᠪᠤᠭᠤᠷᠤᠯ ᠦᠰᠦᠲᠡᠢ ᠲᠣᠯᠣᠭᠠᠢ ᠪᠠᠨ ᠮᠠᠭᠠᠵᠢᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠠᠨᠳᠤᠵᠤ᠄
— ᠶᠡᠬᠡ ᠡᠵᠡᠨ ᠲᠠᠨ ᠤ᠋ ᠰᠡᠳᠬᠢᠯ ᠵᠣᠪᠠᠬᠤ ᠲᠠᠨᠢ ᠲᠦᠮᠡᠨ ᠵᠥᠪ᠃ ᠶᠡᠬᠡ ᠭᠦᠷᠦᠨ ᠡᠵᠡᠨ ᠦᠭᠡᠢ ᠪᠠᠢᠭᠠ ᠪᠣᠯᠬᠣᠷ ᠬᠡᠨ ᠶᠠᠭᠠᠬᠢᠵᠤ ᠳᠠᠪᠬᠢᠬᠤ ᠨᠢ ᠳᠤᠷᠠ ᠶ᠋ᠢᠨ ᠬᠡᠷᠡᠭ ᠪᠣᠯᠤᠭᠠ ᠪᠢᠵᠡ᠃ ᠲᠠᠨ ᠤ᠋ ᠳᠡᠭᠦᠦ ᠠᠷᠢᠬᠪᠥ᠋ᠬᠡ ᠲᠥᠷᠥ ᠶ᠋ᠢ ᠵᠢᠯᠣᠭᠣᠳᠴᠤ ᠴᠢᠳᠠᠬᠤ ᠬᠥᠮᠦᠨ ᠪᠢᠰᠢ ᠠ᠋᠃ ᠪᠢ ᠶᠡᠬᠡ ᠬᠠᠭᠠᠨ ᠢ᠋ ᠰᠡᠷᠡᠭᠦᠨ ᠲᠤᠩᠭᠠᠯᠠᠭ ᠪᠠᠢᠬᠤ ᠳ᠋ᠤ᠌ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠨ ᠶᠠᠷᠢᠯᠴᠠᠵᠤ ᠦᠵᠡᠭᠰᠡᠨ᠃ ᠲᠡᠭᠡᠬᠦ ᠳ᠋ᠦ᠍ ᠠᠷᠢᠬᠪᠥ᠋ᠬᠡ ᠮᠤᠯᠭᠤᠤ ᠰᠢᠨᠵᠢᠲᠡᠢ ᠪᠠᠢᠭᠰᠠᠨ᠃ ᠪᠢ ᠰᠠᠢᠨ ᠠᠵᠢᠭᠯᠠᠭᠰᠠᠨ ᠰᠢᠦ᠃ ᠶᠡᠬᠡ ᠡᠵᠡᠨ ᠲᠠ ᠯᠠ ᠪᠦᠬᠦ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠶ᠋ᠢᠨ ᠲᠡᠷᠢᠭᠦᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠠ ᠪᠣᠯ ᠣᠳᠣ ᠳᠠᠷᠤᠢ ᠬᠠᠭᠠᠨ ᠤ᠋ ᠣᠷᠣ ᠰᠠᠭᠤᠬᠤ ᠤᠴᠢᠷᠲᠠᠢ ᠤᠬᠠᠭᠠᠲᠠᠢ ᠪᠠᠢᠨᠠ ᠭᠡᠵᠦ ᠰᠢᠯᠤᠭᠤᠬᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠡᠯᠡᠭᠡᠳ ᠲᠣᠯᠣᠭᠠᠢ ᠪᠥᠬᠥᠢᠪᠡ᠃
ᠬᠣᠣ ᠵᠢᠩ ᠤᠷᠲᠤ ᠬᠤᠷᠤᠭᠤ ᠲᠠᠢ ᠲᠤᠷᠠᠩᠬᠠᠢ ᠭᠠᠷ ᠢ᠋ᠶ᠋ᠠᠨ ᠳᠡᠯᠭᠡᠨ ᠬᠤᠪᠢᠯᠠᠢ ᠳ᠋ᠤ᠌᠄
— ᠪᠢ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠵᠤ ᠪᠠᠢᠨᠠ᠃ ᠣᠳᠣ ᠤᠯᠤᠰ ᠤ᠋ᠨ ᠶᠡᠬᠡ ᠲᠥᠷᠥ ᠣᠯᠠᠨ ᠡᠵᠡᠨ ᠲᠡᠢ ᠪᠣᠯᠵᠤ ᠣᠷᠬᠢᠭᠠᠳ ᠪᠠᠢᠨᠠ᠃ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠣᠶᠠᠷ ᠨᠠᠷᠠ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ ᠲᠠᠨ ᠤ᠋ ᠳᠡᠭᠦᠦ ᠥᠪᠡᠷ ᠢ᠋ ᠪᠡᠨ ᠶᠡᠬᠡ ᠬᠠᠭᠠᠨ ᠪᠣᠯᠭᠠᠬᠤ ᠰᠠᠨᠠᠭᠠᠲᠠᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠢ ᠰᠠᠨᠠᠭᠰᠠᠨ᠃ ᠲᠡᠷᠡ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠶᠡᠬᠡ ᠡᠵᠡᠨ ᠲᠠ ᠯᠠ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠬᠠᠭᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠠ ᠪᠣᠯ ᠡᠷᠳᠡᠮ ᠳ᠋ᠦ᠍ ᠮᠡᠷᠭᠡᠨ᠂ ᠰᠡᠳᠬᠢᠯ ᠣᠶᠤᠨ ᠠᠭᠤᠵᠢᠮ ᠲᠤᠩᠭᠠᠯᠠᠭ᠂ ᠤᠬᠠᠭᠠᠨ ᠰᠠᠷᠠᠭᠤᠯ᠂ ᠬᠡᠷᠡᠭ ᠶᠠᠪᠤᠳᠠᠯ ᠳ᠋ᠤ᠌ ᠠᠯᠤᠰ ᠤ᠋ᠨ ᠭᠦᠨ ᠪᠤᠳᠤᠯᠲᠠᠢ᠃ ᠡᠢᠮᠦ ᠤᠴᠢᠷ ᠠ᠋ᠴᠠ ᠣᠳᠣ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠤᠳᠤᠮ ᠤᠭᠰᠠᠭᠠᠨ ᠤ᠋ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠠᠭᠠᠨ ᠰᠢᠷᠡᠭᠡ ᠶ᠋ᠢ ᠲᠦᠰᠢᠬᠦ ᠴᠣᠷ ᠤ᠋ᠨ ᠭᠠᠭᠴᠠ ᠬᠥᠮᠦᠨ ᠪᠣᠯ ᠲᠠ ᠯᠠ ᠪᠠᠢᠨᠠ᠃ ᠪᠢᠳᠡ ᠪᠦᠬᠦᠨ ᠲᠠᠨ ᠢ᠋ ᠣᠷᠣ ᠰᠠᠭᠤᠭᠠᠰᠠᠢ ᠭᠡᠵᠦ ᠬᠦᠰᠡᠵᠦ ᠪᠠᠢᠭᠠ᠃ ᠡᠨᠡ ᠪᠣᠯ ᠬᠭᠢᠷ ᠦᠭᠡᠢ ᠦᠨᠡᠨ ᠵᠦᠢᠯ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠪᠡᠨ《ᠴᠢᠮᠠᠶ᠋ᠢ ᠬᠠᠭᠠᠨ ᠪᠣᠯᠭᠠᠵᠤ ᠣᠷᠬᠢᠪᠠᠯ ᠪᠢᠳᠡᠨ ᠳ᠋ᠦ᠍ ᠶᠡᠬᠡ ᠠᠰᠢᠭᠲᠠᠢ᠃ ᠴᠢ ᠪᠣᠯ ᠣᠳᠣ ᠬᠢᠲᠠᠳ ᠪᠣᠯᠳᠠᠭ ᠤ᠋ᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠲᠤᠯᠵᠤ ᠣᠴᠢᠭᠠᠳ ᠪᠠᠢᠭᠠ ᠨᠣᠶᠠᠨ᠃ ᠴᠢ ᠲᠡᠭᠡᠭᠡᠳ ᠮᠣᠩᠭᠣᠯ ᠪᠢᠰᠢ᠂ ᠵᠢᠩᠬᠢᠨᠢ ᠬᠢᠲᠠᠳ ᠬᠠᠭᠠᠨ ᠪᠣᠯᠤᠨᠠ ᠰᠢᠦ ᠳᠡ᠃ ᠪᠢᠳᠡ ᠴᠢᠮᠠᠶ᠋ᠢ ᠲᠡᠢᠮᠦ ᠪᠣᠯᠭᠠᠵᠤ ᠲᠥᠩᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠠᠷᠢᠬᠪᠥ᠋ᠬᠡ ᠪᠣᠯ ᠲᠡᠭᠡᠵᠦ ᠥᠭᠡᠷᠡᠴᠢᠯᠡᠭᠳᠡᠬᠦ ᠪᠡᠷ ᠡᠷᠡ ᠪᠢᠰᠢ᠂ ᠶᠡᠬᠡ ᠬᠠᠲᠠᠭᠤ ᠰᠡᠳᠬᠢᠯ ᠲᠡᠢ ᠬᠥᠮᠦᠨ》 ᠭᠡᠮᠡᠨ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠰᠠᠭᠤᠯᠠ᠃
ᠬᠤᠪᠢᠯᠠᠢ ᠬᠣᠶᠠᠷ ᠲᠦᠰᠢᠮᠡᠯ ᠦ᠋ᠨ ᠦᠭᠡ ᠶ᠋ᠢ ᠤᠷᠮᠠᠲᠠᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠴᠢᠩᠨᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠬᠠᠷᠠᠵᠤ᠄
— ᠣᠷᠣ ᠰᠠᠭᠤᠨᠠ ᠭᠡᠳᠡᠭ ᠠᠮᠠᠷ ᠠᠯᠪᠠ ᠪᠢᠰᠢ᠃ ᠪᠢ ᠶᠡᠬᠡ ᠡᠷᠳᠡᠮᠲᠡᠨ ᠲᠠ ᠨᠠᠷ ᠤ᠋ᠨ ᠡᠷᠭᠦᠮᠵᠢᠯᠡᠯ ᠢ᠋ ᠰᠣᠨᠣᠰᠤᠭᠠᠳ ᠠᠶᠤᠬᠤ ᠰᠢᠭ᠋ ᠪᠣᠯᠵᠤ ᠪᠠᠢᠨᠠ᠃ ᠨᠥᠭᠦᠭᠡ ᠭᠡᠪᠡᠯ ᠲᠡᠷᠡ ᠬᠡᠷᠡᠭ ᠴᠢᠨᠢ ᠮᠢᠨᠦ ᠳᠤᠷᠠ ᠶ᠋ᠢᠨ ᠵᠦᠢᠯ ᠪᠢᠰᠢ ᠠ᠋᠃ ᠬᠡᠨ ᠣᠷᠣ ᠰᠠᠭᠤᠬᠤ ᠶ᠋ᠢ ᠮᠣᠩᠭᠣᠯ ᠤ᠋ᠨ ᠣᠯᠠᠨ ᠨᠣᠶᠠᠳ ᠯᠠ ᠮᠡᠳᠡᠵᠦ ᠰᠣᠩᠭᠣᠨ ᠲᠠᠯᠪᠢᠬᠤ ᠶᠣᠰᠣᠲᠠᠢ᠃《ᠶᠡᠬᠡ ᠵᠠᠰᠠᠭ》 ᠬᠠᠤᠯᠢᠨ ᠳ᠋ᠤ᠌ ᠲᠡᠭᠡᠵᠦ ᠵᠢᠭᠠᠭᠰᠠᠨ᠃ ᠡᠵᠡᠨ ᠡᠪᠦᠭᠡ ᠶ᠋ᠢᠨ ᠲᠣᠭᠲᠠᠭᠠᠭᠰᠠᠨ ᠲᠢᠭ ᠵᠢᠷᠤᠮ ᠴᠤ᠌ ᠲᠡᠢᠮᠦ ᠪᠠᠢᠳᠠᠭ ᠭᠡᠵᠦ ᠬᠤᠪᠢᠯᠠᠢ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠬᠡᠯᠡᠯᠡ᠃
ᠵᠣᠣ ᠪᠢ ᠳᠠᠭᠤ ᠦᠭᠡᠢ ᠪᠣᠳᠣᠯᠭᠠᠰᠢᠷᠠᠨ ᠰᠠᠭᠤᠪᠠ᠃
ᠬᠣᠣ ᠵᠢᠩ ᠳᠠᠯᠤ ᠮᠥᠷᠥ ᠪᠡᠨ ᠬᠠᠪᠴᠢᠰᠬᠢᠨ ᠲᠣᠯᠣᠭᠠᠢ ᠪᠠᠨ ᠬᠠᠶᠠᠯᠠᠭᠠᠳ᠄
— ᠮᠣᠩᠭᠣᠯ ᠤ᠋ᠨ ᠲᠡᠷᠡ ᠶᠣᠰᠣ ᠶᠡᠬᠡ ᠰᠠᠢᠬᠠᠨ ᠶᠤᠮ ᠪᠠᠢᠨᠠ᠃ ᠭᠡᠪᠡᠴᠦ ᠶᠠᠮᠠᠷ ᠴᠤ᠌ ᠵᠦᠢᠯ ᠨᠢᠭᠡ ᠬᠡᠪ ᠢ᠋ᠶ᠋ᠡᠷ ᠪᠠᠢᠳᠠᠭ ᠦᠭᠡᠢ᠃ ᠴᠠᠭ ᠢ᠋ ᠳᠠᠭᠠᠨ ᠲᠡᠷᠡ ᠶᠣᠰᠣ ᠶ᠋ᠢ ᠥᠭᠡᠷᠡᠴᠢᠯᠡᠨ ᠬᠥᠭᠵᠢᠭᠡᠵᠦ ᠪᠣᠯᠬᠤ ᠪᠢᠵᠡ᠃ ᠨᠥᠭᠦᠭᠡ ᠭᠡᠪᠡᠯ ᠡᠨᠳᠡ ᠶᠡᠬᠡ ᠡᠵᠡᠨ ᠲᠠᠨ ᠳ᠋ᠤ᠌ ᠰᠢᠳᠠᠷᠯᠠᠳᠠᠭ ᠣᠯᠠᠨ ᠨᠣᠶᠠᠳ ᠪᠠᠰᠠ ᠪᠠᠢᠵᠤ ᠪᠠᠢᠨᠠ᠃ ᠲᠡᠳᠡ ᠴᠢᠨᠢ ᠡᠵᠡᠨ ᠢ᠋ᠶ᠋ᠡᠨ ᠰᠣᠩᠭᠣᠨ ᠡᠷᠭᠦᠮᠵᠢᠯᠡᠬᠦ ᠡᠷᠬᠡ ᠶ᠋ᠢ ᠡᠳ᠋ᠯᠡᠵᠦ ᠪᠣᠯᠤᠨᠠ ᠪᠢᠵᠡ ᠳᠡ? ᠵᠠᠰᠠᠭ ᠬᠠᠤᠯᠢ ᠴᠢᠨᠢ ᠣᠳᠣ ᠬᠠᠭᠤᠴᠢᠷᠠᠭᠰᠠᠨ ᠰᠢᠦ᠃ ᠡᠨᠡ ᠲᠤᠬᠠᠢ ᠪᠢᠳᠡ ᠳᠠᠬᠢᠨ ᠳᠠᠪᠲᠠᠨ ᠰᠠᠢᠨ ᠪᠣᠳᠣᠵᠤ᠂ ᠤᠴᠢᠷᠲᠠᠢᠬᠠᠨ ᠶᠠᠷᠢᠯᠴᠠᠬᠤ ᠬᠡᠷᠡᠭᠲᠡᠢ ᠪᠠᠢᠬᠤ ᠠ᠋᠃ ᠶᠡᠬᠡ ᠡᠵᠡᠨᠲᠡᠨ ᠮᠢᠨᠢ ᠪᠢ ᠢᠩᠭᠢᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠲᠡᠦᠬᠡ ᠰᠡᠬᠦᠵᠦ ᠬᠠᠷᠠᠪᠠᠯ ᠶᠢᠷᠲᠢᠨᠴᠦ ᠶ᠋ᠢᠨ ᠣᠯᠠᠨ ᠲᠥᠷᠥ ᠶ᠋ᠢᠨ ᠡᠵᠡᠨ ᠬᠠᠭᠠᠳ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠷᠭᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠣᠷᠣ ᠵᠠᠯᠠᠭᠳᠠᠵᠤ ᠪᠠᠢᠭᠰᠠᠨ ᠶᠠᠪᠤᠳᠠᠯ ᠤ᠋ᠳ ᠪᠣᠢ᠃ ᠪᠣᠭᠣᠯ ᠨᠢ ᠡᠨᠡ ᠲᠤᠬᠠᠢ ᠵᠠᠷᠢᠮ ᠵᠦᠢᠯ ᠢ᠋ ᠲᠩᠷᠢ ᠳ᠋ᠦ᠍ ᠲᠣᠯᠢᠯᠠᠭᠤᠯᠵᠤ ᠪᠣᠯᠬᠤ ᠪᠢᠵᠡ᠁ ᠭᠡᠵᠦ ᠶᠠᠷᠢᠯᠠ᠃
ᠬᠤᠪᠢᠯᠠᠢ ᠴᠢᠷᠠᠢ ᠪᠠᠨ ᠬᠤᠪᠢᠷᠠᠭᠠᠨ ᠬᠣᠣ ᠣᠪᠣᠭᠲᠠᠨ ᠤ᠋ ᠨᠢᠭᠤᠷ ᠥᠭᠡᠳᠡ ᠰᠢᠷᠳᠡᠨ ᠬᠠᠷᠠᠬᠤ ᠳ᠋ᠤ᠌ ᠪᠠᠨ ᠲᠡᠭᠦᠨ ᠦ᠌ ᠶᠠᠷᠢᠶᠠᠨ ᠳ᠋ᠤ᠌ ᠡᠰᠡ ᠢᠲᠡᠭᠡᠭᠰᠡᠨ ᠪᠣᠯᠪᠠᠴᠤ《ᠶᠠᠭᠤᠮᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ?》 ᠭᠡᠰᠡᠨ ᠨᠢᠭᠡ ᠪᠣᠳᠣᠯ ᠪᠣᠳᠣᠵᠤ
— ᠤᠭ ᠨᠢ ᠤᠬᠠᠭᠠᠲᠠᠢ᠂ ᠶᠠᠭᠤᠮᠠ ᠶᠡᠬᠡ ᠦᠵᠡᠭᠰᠡᠨ᠂ ᠣᠯᠠᠨ ᠰᠤᠳᠤᠷ ᠨᠣᠮ ᠤ᠋ᠨ ᠰᠢᠷᠣᠢ ᠶ᠋ᠢ ᠰᠡᠭᠰᠦᠷᠡᠭᠰᠡᠨ ᠬᠥᠮᠦᠨ ᠳᠡ ᠡᠨᠡ᠃ ᠡᠭᠦᠨ ᠡᠴᠡ ᠶᠠᠮᠠᠷ ᠴᠤ᠌ ᠰᠠᠨᠠᠭᠠ ᠭᠠᠷᠴᠤ ᠢᠷᠡᠵᠦ ᠮᠡᠳᠡᠬᠦ ᠪᠣᠢ ᠭᠡᠮᠡᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠰᠢᠪᠡᠨᠡᠵᠡᠢ᠃
ᠬᠣᠣ ᠣᠪᠣᠭᠲᠤ ᠮᠥᠷᠥ ᠪᠡᠨ ᠬᠥᠳᠡᠯᠭᠡᠭᠡᠳ᠄
— ᠶᠡᠬᠡ ᠡᠵᠡᠨᠲᠡᠨ ᠮᠢᠨᠢ ᠲᠠᠭᠠᠯᠠᠵᠤ ᠪᠣᠯᠭᠣᠭᠠ! ᠲᠠ ᠬᠠᠷᠢᠶᠠ ᠵᠠᠩᠵᠤᠨ ᠨᠤᠭᠤᠳ ᠢ᠋ᠶ᠋ᠠᠨ ᠭᠠᠭᠴᠠ ᠨᠢᠭᠡ ᠪᠡᠷ ᠨᠢ ᠢᠷᠡᠭᠦᠯᠵᠦ ᠪᠣᠭᠣᠯ ᠨᠠᠳᠠᠲᠠᠢ ᠠᠭᠤᠯᠵᠠᠭᠤᠯᠵᠤ ᠲᠠᠭᠠᠯᠠ! ᠪᠠᠰᠠ ᠰᠠᠢᠬᠠᠨ ᠢᠳᠡᠭᠡ ᠪᠤᠳᠠᠭᠠ᠂ ᠬᠦᠨᠳᠦ ᠪᠡᠯᠡᠭ ᠪᠤᠯᠠᠭᠠᠨ ᠥᠭᠬᠦ ᠠᠯᠲᠠ ᠮᠥᠩᠭᠥᠨ ᠡᠳ᠋ ᠶᠠᠭᠤᠮᠠ᠂ ᠲᠣᠷᠭᠠ ᠳᠤᠷᠳᠤᠩ ᠨᠠᠯᠢᠶᠠᠨ ᠢ᠋ ᠪᠡᠯᠡᠳᠬᠡᠭᠦᠯᠪᠡᠯ ᠶᠡᠬᠡ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠲᠡᠭᠦᠨ ᠦ᠌ ᠡᠵᠡᠳ ᠢ᠋ ᠪᠣᠭᠣᠯ ᠪᠢ ᠣᠯᠤᠨᠠ ᠪᠠᠢᠬᠤ᠃ ᠢᠩᠭᠢᠬᠦ ᠶ᠋ᠢ ᠡᠵᠡᠨ ᠲᠠ᠂ ᠲᠠᠨ ᠤ᠋ ᠮᠡᠷᠭᠡᠨ《ᠪᠠᠭᠰᠢ》 ᠵᠣᠣ ᠪᠢ ᠭᠤᠸᠠᠢ ᠲᠠᠢ ᠲᠠ ᠬᠣᠶᠠᠷ ᠵᠥᠪᠰᠢᠶᠡᠷᠡᠨ ᠲᠠᠭᠠᠯᠠᠵᠤ᠂ ᠥᠴᠦᠬᠡᠨ ᠪᠣᠭᠣᠯ ᠨᠠᠳᠠᠳᠤ ᠵᠣᠬᠢᠬᠤ ᠢᠲᠡᠭᠡᠯ ᠬᠠᠢᠷᠠᠯᠠᠬᠤ ᠤᠤ? ᠪᠢ ᠠᠮᠢ ᠪᠡᠶᠡ ᠪᠡᠨ ᠡᠰᠡ ᠬᠠᠢᠷᠠᠯᠠᠨ ᠡᠵᠡᠨ ᠲᠠᠨ ᠤ᠋ ᠪᠠᠨ ᠲᠥᠯᠥᠭᠡ ᠵᠢᠳᠬᠦᠬᠦ ᠳ᠋ᠦ᠍ ᠪᠡᠯᠡᠨ ᠪᠠᠢᠨᠠ ᠭᠡᠵᠦ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠪᠥᠬᠥᠢᠨ ᠶᠣᠰᠣ ᠬᠢᠯᠡ᠃
ᠬᠤᠪᠢᠯᠠᠢ ᠵᠣᠣ ᠣᠪᠣᠭᠲᠤ ᠪᠠᠭᠰᠢ ᠶ᠋ᠢ ᠪᠡᠨ ᠬᠠᠷᠠᠨᠠ᠃ ᠡᠪᠦᠭᠡᠨ ᠲᠦᠰᠢᠮᠡᠳ ᠲᠣᠯᠣᠭᠠᠢ ᠬᠥᠳᠡᠯᠭᠡᠨ ᠬᠣᠣ ᠣᠪᠣᠭᠲᠤ ᠳ᠋ᠤ᠌ ᠢᠲᠡᠭᠡᠯ ᠬᠠᠢᠷᠠᠯᠠ ᠭᠡᠵᠦ ᠲᠣᠬᠢᠨᠠ᠃
— ᠲᠡᠭᠡᠪᠡᠯ ᠪᠢᠳᠡ ᠶᠡᠬᠡ ᠡᠷᠳᠡᠮᠲᠡᠨ ᠲᠠᠨ ᠤ᠋ ᠬᠡᠯᠡᠵᠦ ᠪᠠᠢᠭᠠ ᠶᠣᠰᠣ ᠪᠠᠷ ᠭᠡᠵᠦ ᠬᠤᠪᠢᠯᠠᠢ ᠶ᠋ᠢ ᠦᠭᠡ ᠪᠡᠨ ᠡᠬᠢᠯᠡᠬᠦ ᠳ᠋ᠦ᠍ ᠬᠣᠣ ᠵᠢᠩ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢᠮᠡᠭᠡ ᠦᠭᠡᠢ ᠭᠡᠵᠦ ᠳᠣᠬᠢᠭᠠᠳ᠂ ᠡᠭᠦᠳᠡ ᠤᠷᠤᠭᠤ ᠡᠷᠭᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠠᠨᠳᠤᠨ᠂ ᠳᠠᠭᠤ ᠪᠠᠨ ᠨᠠᠮ ᠪᠣᠯᠭᠠᠵᠤ ᠦᠭᠡ ᠪᠡᠨ ᠨᠢᠭᠤᠴᠠᠯᠠᠭᠠᠳ᠄
— ᠡᠨᠡ ᠬᠡᠷᠡᠭ ᠮᠠᠰᠢ ᠳᠠᠯᠳᠠ ᠬᠢᠭᠳᠡᠬᠦ ᠶᠣᠰᠣᠲᠠᠢ᠃ ᠪᠢᠳᠡ ᠭᠤᠷᠪᠠ ᠠ᠋ᠴᠠ ᠴᠠᠭᠠᠰᠢ ᠵᠠᠳᠠᠷᠠᠪᠠᠯ ᠤᠰᠤ ᠪᠤᠯᠠᠩᠭᠢᠷᠲᠤᠵᠤ᠂ ᠠᠷᠤ ᠭᠠᠵᠠᠷ ᠠ᠋ᠴᠠ ᠠᠷᠢᠬᠪᠥ᠋ᠬᠡ ᠶ᠋ᠢᠨ ᠴᠡᠷᠢᠭ ᠦᠶᠡᠷ ᠪᠣᠯᠤᠨ ᠤᠷᠤᠰᠤᠨ ᠣᠷᠣᠵᠤ ᠢᠷᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠬᠦ ᠶ᠋ᠢᠨ ᠭᠠᠵᠠᠷ ᠦᠭᠡᠢ ᠶ᠋ᠢ ᠳᠡᠭᠡᠳᠦᠰ ᠮᠢᠨᠢ ᠪᠣᠯᠭᠣᠭᠠᠨ ᠲᠠᠭᠠᠯᠠᠵᠤ ᠦᠵᠡ ! ᠭᠡᠮᠡᠨ ᠰᠢᠪᠡᠨᠡᠬᠦ ᠰᠢᠬᠠᠨ ᠬᠡᠯᠡᠭᠡᠳ᠂ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠲᠡᠷᠡ ᠯᠤᠤᠬᠠᠨ ᠵᠠᠬᠢᠷᠤᠭᠴᠢ ᠶ᠋ᠢ ᠬᠠᠷᠠᠴᠤ
— ᠶᠡᠬᠡ ᠡᠵᠡᠨᠲᠡᠨ ᠮᠢᠨᠢ ᠠ ! ᠲᠠ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠶᠠᠭᠤᠮᠠ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠴᠠᠭ ᠠᠯᠳᠠᠬᠤ ᠦᠭᠡᠢ ᠳᠣᠣᠷᠠ ᠳᠣᠣᠷᠠ ᠨᠢ ᠮᠡᠳᠡᠵᠦ ᠪᠠᠢᠬᠤ ᠤᠴᠢᠷᠲᠠᠢ ᠪᠠᠢᠨᠠ᠃ ᠠᠷᠢᠬᠪᠦ᠋ᠬᠡ ᠲᠠᠨ ᠤ᠋ ᠪᠠᠢᠳᠠᠯ ᠢ᠋ ᠢᠮᠠᠭᠲᠠ ᠮᠡᠳᠡᠵᠦ ᠠᠪᠤᠭᠠᠳ ᠪᠠᠢᠭᠠ ᠪᠠᠢᠵᠤ ᠴᠤ᠌ ᠪᠣᠯᠤᠨᠠ ᠪᠣᠯᠬᠣᠷ ᠪᠠᠷᠠᠬᠤ ᠦᠭᠡᠢ ᠲᠡᠷᠡ ᠨᠣᠶᠠᠨ ᠬᠡᠯᠡ ᠵᠥᠭᠡᠭᠡᠬᠦ ᠬᠥᠮᠦᠨ ᠢ᠋ᠶ᠋ᠡᠨ ᠡᠵᠡᠨ ᠲᠠᠨ ᠤ᠋ ᠳᠡᠷᠭᠡᠳᠡ ᠠᠯᠢ ᠬᠡᠳᠦᠢᠨ ᠦ᠌ ᠲᠠᠯᠪᠢᠵᠤ ᠣᠷᠬᠢᠭᠰᠠᠨ ᠪᠠᠢᠭᠠ ᠪᠢᠵᠡ ᠳᠡ ᠭᠡᠪᠡ᠃
— ᠡᠨᠡ ᠲᠤᠩ ᠦᠨᠡᠨ ᠦᠭᠡ ᠰᠢᠦ ᠡᠵᠡᠨᠲᠡᠨ ᠮᠢᠨᠢ ᠭᠡᠵᠦ ᠵᠣᠣ ᠣᠪᠣᠭᠲᠤ ᠦᠭᠡ ᠨᠡᠮᠡᠵᠦ ᠰᠢᠪᠡᠨᠡᠯᠡ᠃
ᠬᠤᠪᠢᠯᠠᠢ ᠴᠢᠷᠠᠢ ᠪᠠᠨ ᠴᠢᠨᠦᠷᠡᠭᠦᠯᠦᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠰᠠᠭᠤᠬᠤ ᠳ᠋ᠤ᠌ ᠪᠠᠨ 《ᠪᠢ ᠡᠨᠡ ᠬᠣᠶᠠᠷ ᠬᠢᠲᠠᠳ ᠤ᠋ᠨ ᠵᠢᠭᠠᠪᠤᠷᠢ᠂ ᠳᠡᠮᠵᠢᠯᠭᠡ ᠪᠡᠷ ᠶᠠᠪᠤᠭᠠᠳ ᠪᠠᠢᠪᠠᠯ ᠣᠷᠣ ᠰᠠᠭᠤᠬᠤ ᠭᠡᠭᠴᠢ ᠶ᠋ᠢ ᠦᠵᠡᠵᠦ ᠮᠠᠭᠠᠳ ᠦᠭᠡᠢ ᠪᠢᠰᠢ ᠤᠤ᠃ ᠶᠠᠮᠠᠷ ᠰᠦᠷᠡᠬᠡᠢ ᠦᠨᠡᠨ ᠦᠭᠡ ᠶ᠋ᠢ ᠡᠳᠡ ᠨᠠᠷ ᠭᠠᠷᠭᠠᠵᠤ ᠬᠡᠯᠡᠭᠡᠳ ᠪᠠᠢᠨᠠ ᠪᠣᠢ》 ᠭᠡᠮᠡᠨ ᠪᠣᠳᠣᠵᠤ ᠪᠠᠢᠯᠠ᠃ ᠬᠣᠣ ᠵᠢᠩ ᠳᠡᠷᠭᠡᠳᠡᠬᠢ ᠬᠣᠶᠠᠷ ᠬᠥᠮᠦᠨ ᠢ᠋ᠶ᠋ᠡᠨ ᠡᠭᠡᠯᠵᠢᠯᠡᠨ ᠬᠠᠷᠠᠵᠤ᠂ ᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂ ᠨᠢᠭᠡ ᠶ᠋ᠢ ᠰᠠᠨᠠᠪᠠ ᠪᠣᠯᠤᠯᠲᠠᠢ᠄
— ᠪᠣᠭᠣᠯ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠭᠡᠷᠡᠢ ! ᠡᠢᠮᠦ ᠲᠣᠮᠣ ᠬᠡᠷᠡᠭ ᠢ᠋ ᠪᠢᠳᠡ ᠨᠢᠭᠡᠨᠲᠡ ᠰᠠᠨᠠᠵᠤ᠂ ᠲᠡᠭᠦᠨ ᠳ᠋ᠦ᠍ ᠬᠦᠷᠬᠦ ᠶ᠋ᠢ ᠵᠣᠷᠢᠵᠤ ᠪᠠᠢᠭᠠ ᠪᠣᠯ ᠶᠠᠭᠤᠨ ᠠ᠋ᠴᠠ ᠴᠤ᠌ ᠠᠶᠤᠬᠤ ᠦᠭᠡᠢ ᠪᠡᠷ ᠴᠢᠩ ᠵᠣᠷᠢᠭ ᠭᠠᠷᠭᠠᠨ᠂ ᠬᠠᠲᠠᠭᠤ ᠰᠡᠳᠬᠢᠯ ᠢ᠋ᠶ᠋ᠡᠷ ᠥᠪᠡᠷ ᠢ᠋ ᠪᠡᠨ ᠪᠣᠯᠤᠨ ᠪᠤᠰᠤᠳ ᠢ᠋ ᠵᠢᠳᠬᠦᠭᠦᠯᠬᠦ ᠶᠣᠰᠣᠲᠠᠢ᠃ ᠲᠡᠦᠬᠡ ᠲᠡᠢᠮᠦ ᠯᠡ ᠪᠠᠢᠭᠰᠠᠨ ᠁ ᠭᠡᠵᠦ ᠬᠡᠯᠡᠪᠡ᠃
ᠲᠠᠰᠤᠯᠭᠠᠨ ᠳ᠋ᠤ᠌ ᠪᠦᠳᠡᠭᠢᠬᠡᠨ ᠭᠡᠷᠡᠯ ᠰᠦᠮᠡᠯᠵᠡᠨ᠂ ᠪᠠᠢᠭᠠ ᠶᠠᠭᠤᠮᠠᠰ ᠤ᠋ᠨ ᠥᠩᠭᠡ ᠤᠢᠳᠬᠠᠷᠲᠠᠢ ᠪᠥᠭᠡᠳ ᠴᠠᠭᠠᠨᠠ ᠪᠠᠨ ᠨᠢᠭᠡ ᠶᠠᠬᠢᠷ ᠮᠡᠲᠦ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠬᠤᠤᠪᠢᠯᠳᠤᠭᠴᠢᠳ ᠳᠠᠭᠤ ᠪᠠᠨ ᠤᠯᠠᠮ ᠨᠠᠮ ᠪᠣᠯᠭᠠᠨ ᠶᠠᠷᠢᠯᠴᠠᠭᠰᠠᠭᠠᠷ ᠰᠥᠨᠢ ᠣᠷᠣᠢ ᠪᠣᠯᠵᠤ ᠪᠣᠢ ᠶ᠋ᠢ ᠶᠠᠭᠠᠬᠢᠨ ᠠᠩᠵᠠᠭᠠᠷᠠᠵᠤ ᠮᠡᠳᠡᠬᠦ ᠪᠣᠢ᠃
ᠬᠦᠯᠦᠭ ᠱᠠᠩᠳᠤ ᠬᠣᠲᠠ ᠳ᠋ᠤ᠌ ᠠᠯᠪᠠᠨ ᠳ᠋ᠤ᠌ ᠪᠠᠨ ᠵᠢᠳᠬᠦᠭᠰᠡᠭᠡᠷ᠂ ᠵᠠᠪᠰᠠᠷ ᠵᠠᠢ ᠳ᠋ᠤ᠌ ᠨᠢ ᠫᠧᠷᠰ ᠬᠤᠳᠠᠯᠳᠤᠭᠠᠴᠢᠨ ᠬᠤᠮᠢᠨᠢ ᠲᠠᠢ ᠠᠭᠤᠯᠵᠠᠨ᠂ ᠲᠡᠭᠦᠨ ᠳ᠋ᠦ᠍ ᠲᠤᠰᠠᠯᠠᠬᠤ ᠪᠠᠷ ᠠᠶᠠ ᠬᠠᠢᠵᠤ ᠪᠠᠢᠪᠠ᠃ ᠪᠠᠢᠭᠠ ᠲᠦᠰᠢᠮᠡᠯ ᠡᠨᠡ ᠬᠤᠳᠠᠯᠳᠤᠭᠠᠴᠢᠨ ᠢ᠋ ᠬᠠᠷᠠᠬᠣᠷᠣᠮ ᠠ᠋ᠴᠠ ᠭᠠᠵᠠᠷᠴᠢᠯᠠᠨ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠤᠴᠢᠷ ᠰᠦᠷᠡᠬᠡᠢ ᠲᠦᠩᠰᠢ ᠪᠣᠯᠵᠤ᠂ ᠬᠤᠮᠢᠨᠢ ᠴᠤ᠌ ᠬᠥᠭᠡᠷᠦᠬᠦᠨ ᠰᠠᠢᠬᠠᠨ ᠬᠣᠲᠠ ᠳ᠋ᠤ᠌ ᠠᠪᠴᠢᠷᠠᠭᠰᠠᠨ ᠬᠦᠯᠦᠭ ᠲᠦ᠍ ᠲᠠᠯᠠᠷᠬᠠᠨ ᠪᠠᠢᠳᠠᠭ ᠪᠣᠯᠪᠠ᠃ ᠡᠨᠡ ᠬᠣᠶᠠᠷ ᠬᠠᠶᠠ ᠠᠭᠤᠯᠵᠠᠨ ᠭᠠᠰᠢᠭᠤᠨ ᠤᠮᠳᠠᠭᠠᠨ ᠪᠠᠯᠭᠤᠬᠤ᠂ ᠬᠢᠲᠠᠳ ᠬᠣᠭᠣᠯᠠᠨ ᠤ᠋ ᠭᠠᠵᠠᠷ ᠲᠤ᠌ ᠣᠷᠣᠵᠤ ᠡᠯᠳᠡᠪ ᠠᠮᠲᠠᠲᠠᠨ ᠠᠪᠴᠤ ᠢᠳᠡᠬᠦ ᠵᠡᠷᠭᠡ ᠪᠡᠷ ᠨᠡᠢᠯᠡᠵᠦ ᠪᠠᠢᠯᠠ᠃ ᠱᠠᠩᠳᠤ ᠳ᠋ᠤ᠌ ᠢᠷᠡᠭᠰᠡᠨ ᠫᠧᠷᠰ ᠦ᠋ᠨ ᠠᠩᠬᠠᠨ ᠤ᠋ ᠬᠥᠮᠦᠨ᠂ ᠲᠡᠷᠡ ᠪᠠᠢᠲᠤᠭᠠᠢ ᠪᠠᠷᠠᠭᠤᠨ ᠳᠤᠮᠳᠠᠳᠤ ᠣᠷᠣᠨ ᠠ᠋ᠴᠠ ᠢᠷᠡᠭᠰᠡᠨ ᠠᠩᠬᠠᠨ ᠤ᠋ ᠬᠤᠳᠠᠯᠳᠤᠭᠠᠴᠢᠨ ᠨᠢ ᠡᠨᠡ ᠬᠥᠮᠦᠨ ᠪᠣᠯᠬᠤ ᠤᠴᠢᠷ ᠲᠡᠭᠦᠨ ᠦ᠌ ᠡᠳ᠋ ᠪᠠᠷᠠᠭᠠ ᠶ᠋ᠢ ᠠᠳᠠ ᠪᠠᠢᠭᠠ ᠮᠣᠩᠭᠣᠯ᠂ ᠬᠢᠲᠠᠳ᠂ ᠪᠤᠰᠤᠳ ᠬᠥᠯ ᠦ᠋ᠨ ᠬᠥᠮᠦᠰ ᠶᠡᠬᠡᠳᠡ ᠰᠣᠨᠢᠷᠬᠠᠨ ᠠᠪᠴᠤ᠂ ᠬᠤᠮᠢᠨᠢ ᠶ᠋ᠢᠨ ᠭᠠᠷ ᠲᠤ᠌ ᠪᠠᠨ ᠪᠠᠢᠭᠠ ᠡᠳ᠋ ᠶᠠᠭᠤᠮᠠ ᠶ᠋ᠢ ᠳᠣᠣᠷᠠ ᠨᠢ ᠰᠤᠯᠠᠯᠠᠭᠠᠳ ᠬᠠᠶᠠᠵᠤ ᠣᠷᠬᠢᠭᠰᠠᠨ ᠤᠴᠢᠷ ᠲᠡᠷᠡ ᠪᠡᠷ ᠨᠤᠲᠤᠭ ᠪᠤᠴᠠᠨ᠂ ᠥᠭᠡᠷᠡ ᠶᠠᠭᠤᠮᠠ ᠣᠯᠵᠤ ᠢᠷᠡᠬᠦ ᠡᠷᠡᠮᠡᠯᠵᠡᠯ ᠲᠡᠢ ᠪᠣᠯᠪᠠ᠃ ᠡᠨᠡ ᠪᠠᠢᠳᠠᠯ ᠢ᠋ᠶ᠋ᠠᠨ ᠬᠦᠯᠦᠭ ᠡᠴᠡ ᠨᠢᠭᠤᠭᠰᠠᠨ ᠦᠭᠡᠢ᠂ ᠲᠡᠭᠦᠨ ᠳ᠋ᠦ᠍ ᠦᠨᠡᠨ ᠡᠴᠡ ᠪᠡᠨ ᠬᠡᠯᠡᠬᠦ ᠳ᠋ᠦ᠍ ᠪᠡᠨ ᠡᠩᠬᠡ ᠶ᠋ᠢᠨ ᠨᠥᠬᠥᠷᠰᠡᠭ ᠪᠠᠢᠳᠠᠯ ᠢ᠋ ᠡᠷᠬᠢᠮᠯᠡᠨ ᠠᠨᠳᠠ ᠶᠣᠰᠣᠭᠠᠷ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠵᠦ ᠪᠢᠯᠡ᠃
ᠶᠠᠭ ᠡᠢᠮᠦ ᠦᠶᠡ ᠳ᠋ᠦ᠍ ᠶᠡᠬᠡ ᠵᠠᠬᠢᠷᠤᠭᠴᠢ ᠬᠦᠯᠦᠭ ᠢ᠋ ᠳᠠᠭᠤᠳᠠᠭᠤᠯᠤᠭᠰᠠᠨ ᠪᠠᠢᠨᠠ᠃ ᠪᠠᠭᠠ ᠲᠦᠰᠢᠮᠡᠯ ᠡᠵᠡᠨ ᠳ᠋ᠦ᠍ ᠪᠡᠨ ᠪᠠᠷᠠᠯᠬᠠᠨ ᠣᠴᠢᠯᠠ᠃ ᠲᠡᠷᠡ ᠪᠡᠷ ᠡᠬᠢᠯᠡᠭᠡᠳ ᠪᠣᠭᠣᠯ ᠪᠢ ᠶᠠᠮᠠᠷ ᠡᠨᠳᠡᠭᠳᠡᠯ ᠭᠠᠷᠭᠠᠭᠰᠠᠨ ᠪᠣᠯ ᠭᠡᠮᠡᠨ ᠨᠡᠯᠢᠶᠡᠳ ᠡᠮᠢᠶᠡᠵᠦ ᠪᠠᠢᠪᠠ᠃ ᠢᠩᠭᠢᠵᠦ ᠳᠡᠭᠦᠦ ᠪᠢᠯᠢᠭᠦᠨ ᠲᠡᠢ ᠬᠣᠯᠪᠣᠭᠠᠲᠠᠢ ᠪᠠᠢᠵᠤ ᠮᠠᠭᠠᠳ᠂ ᠲᠡᠭᠦᠨ ᠢ᠋ ᠡᠵᠡᠨ ᠵᠠᠷᠯᠢᠭ ᠪᠡᠶᠡᠯᠡᠭᠦᠯᠬᠦ ᠦᠭᠡᠢ᠂ ᠥᠭᠡᠷᠡ ᠬᠥᠮᠦᠨ ᠵᠠᠷᠤᠭᠠᠯ ᠢ᠋ᠶ᠋ᠠᠷ ᠣᠨᠳᠣᠣ ᠠᠯᠪᠠᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠭᠡᠵᠦ ᠲᠡᠷᠡ ᠵᠢᠮᠡ ᠶ᠋ᠢ ᠨᠠᠳᠠᠳᠤ ᠲᠣᠬᠢᠬᠤ ᠶᠤᠮ ᠪᠣᠯᠪᠠ ᠤᠤ ᠭᠡᠮᠡᠨ ᠠᠶᠤᠵᠤ ᠣᠴᠢᠯᠠ᠃ ᠲᠡᠭᠡᠲᠡᠯᠡ ᠵᠠᠬᠢᠷᠤᠭᠴᠢ ᠥᠪᠡᠷ ᠢ᠋ᠶ᠋ᠡᠨ ᠬᠦᠯᠦᠭ ᠲᠡᠢ ᠠᠭᠤᠯᠵᠠᠭᠰᠠᠨ ᠦᠭᠡᠢ᠂ ᠰᠢᠳᠠᠷ ᠲᠦᠰᠢᠮᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠠᠮᠵᠢᠭᠤᠯᠤᠨ
— ᠴᠢᠮᠠᠶ᠋ᠢ ᠡᠷᠭᠢᠭᠡᠳ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠣᠴᠢ᠃ ᠲᠡᠨᠳᠡ ᠬᠡᠰᠡᠭ ᠵᠠᠭᠤᠷᠠ ᠪᠠᠢ᠃ ᠲᠡᠨᠳᠡ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠰᠠᠢᠨ ᠠᠵᠢᠵᠤ ᠮᠡᠳᠡᠭᠡᠳ ᠢᠷᠡ᠃ ᠶᠡᠷᠦ ᠨᠢ ᠨᠡᠢᠰᠯᠡᠯ ᠳ᠋ᠦ᠍ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠪᠣᠢ? ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠶᠠᠮᠠᠷ ᠰᠢᠦ ᠶᠠᠭᠤᠮᠠ ᠪᠣᠳᠣᠨ᠂ ᠶᠠᠭᠠᠬᠢᠵᠤ ᠪᠠᠢᠨᠠ ᠪᠣᠢ ᠭᠡᠳᠡᠭ ᠢ᠋ ᠠᠵᠢᠵᠤ ᠮᠡᠳᠡᠭᠡᠳ ᠨᠠᠭᠠᠰᠢ ᠪᠠᠨ ᠢᠷᠡ ! ᠳᠡᠭᠦᠦ ᠪᠢᠯᠢᠭᠦᠨ ᠢ᠋ᠶ᠋ᠡᠨ ᠴᠤ᠌ ᠢᠷᠡᠭᠦᠯ ᠭᠡᠵᠦ ᠶᠡᠬᠡ ᠵᠠᠬᠢᠷᠤᠭᠴᠢ ᠲᠤᠰᠢᠶᠠᠯ ᠪᠠᠭᠤᠯᠭᠠᠭᠰᠠᠨ᠃ ᠡᠦᠲᠦ ᠳᠠᠷᠤᠢ ᠮᠣᠷᠳᠠ ᠭᠡᠵᠦ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠨᠢᠭᠡᠨ ᠲᠦᠰᠢᠮᠡᠯ ᠬᠤᠪᠢᠯᠠᠢ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠲᠤᠰᠢᠶᠠᠪᠠ᠃
ᠶᠠᠪᠤᠬᠤ ᠶᠣᠰᠣᠲᠠᠢ ᠪᠣᠯᠤᠯᠠ᠃ ᠬᠦᠯᠦᠭ ᠬᠣᠶᠠᠷ ᠬᠣᠨᠣᠭ ᠲᠤ᠌ ᠪᠠᠭᠲᠠᠭᠠᠨ ᠶᠠᠭᠤᠮᠠ ᠪᠠᠨ ᠪᠡᠯᠡᠳᠬᠡᠭᠡᠳ ᠲᠠᠪᠤᠨ ᠳᠠᠭᠠᠭᠤᠯ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠮᠣᠷᠳᠠᠬᠤ ᠬᠡᠷᠡᠭᠲᠡᠢ ᠠᠵᠢ᠃ ᠬᠤᠮᠢᠨᠢ ᠬᠦᠯᠦᠭ ᠲᠡᠢ ᠬᠠᠮᠲᠤ ᠶᠠᠪᠤᠨᠠ ᠭᠡᠵᠦ ᠪᠠᠶᠠᠷᠯᠠᠪᠠ᠃ ᠬᠦᠯᠦᠭ ᠪᠠᠰᠠ ᠬᠤᠪᠢᠯᠠᠢ ᠶ᠋ᠢᠨ ᠡᠬᠡ ᠶ᠋ᠢ ᠡᠷᠭᠢᠬᠦ᠂ ᠲᠡᠭᠦᠨ ᠳ᠋ᠦ᠍ ᠭᠠᠷ ᠤ᠋ᠨ ᠪᠡᠯᠡᠭ ᠬᠦᠷᠭᠡᠬᠦ ᠶᠣᠰᠣᠲᠠᠢ ᠠᠵᠢ᠃ ᠢᠩᠭᠢᠭᠡᠳ ᠲᠡᠳᠡ ᠱᠠᠩᠳᠤ ᠠ᠋ᠴᠠ ᠬᠣᠣᠰ ᠮᠣᠷᠢᠳ ᠢ᠋ᠶ᠋ᠠᠷ ᠥᠷᠲᠡᠭᠡ ᠳᠠᠮᠵᠢᠨ ᠥᠰᠥᠷᠬᠡᠬᠦ ᠪᠣᠯᠤᠯᠠ᠃ ᠬᠤᠮᠢᠨᠢ ᠳ᠋ᠤ᠌ ᠣᠨᠣᠯᠭᠠ ᠶ᠋ᠢᠨ ᠲᠤᠰᠠ ᠦᠵᠡᠭᠦᠯᠬᠦ ᠨᠢ ᠬᠦᠯᠦᠭ ᠦ᠋ᠨ ᠳᠤᠷᠠ ᠶ᠋ᠢᠨ ᠬᠡᠷᠡᠭ ᠭᠡᠬᠦ ᠤᠤ᠂ ᠬᠠᠷᠢ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠲᠤᠰᠠ ᠬᠢᠵᠦ ᠪᠠᠢᠬᠤ ᠨᠢ ᠲᠥᠷᠥ ᠶ᠋ᠢᠨ ᠠᠯᠪᠠᠨ ᠤ᠋ ᠬᠥᠮᠦᠨ ᠦ᠌ ᠠᠷᠢᠭᠤᠨ ᠶᠣᠰᠣ ᠭᠡᠰᠡᠨ ᠶᠡᠬᠡ ᠡᠵᠡᠨ ᠬᠠᠭᠠᠨ ᠤ᠋ ᠬᠠᠭᠤᠴᠢᠨ ᠵᠠᠷᠯᠢᠭᠳᠠᠶ ᠢ᠋ ᠣᠭᠣᠷᠴᠤ ᠪᠣᠯᠬᠤ ᠦᠭᠡᠢ ᠨᠢ ᠪᠦᠬᠦᠨ ᠳ᠋ᠦ᠍ ᠢᠯᠡᠷᠬᠡᠢ ᠬᠡᠷᠡᠭ ᠠᠵᠢ᠃
— — — —
① ᠱᠠᠩᠳᠤ ᠭᠡᠳᠡᠭ ᠨᠢ ᠮᠣᠩᠭᠣᠯ ᠤ᠋ᠨ ᠱᠠᠩᠳᠠ(ᠤᠰᠤ) ᠭᠡᠰᠡᠨ ᠦᠭᠡ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠦᠷᠢᠨᠵᠢᠷᠭᠠᠯ᠂ ᠪᠠᠭᠠᠲᠤᠷ᠂ ᠴᠣᠯᠮᠣᠨᠲᠤᠶᠠᠭᠠ