ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠳᠥᠷᠪᠡᠳᠦᠭᠡᠷ ᠪᠦᠯᠦᠭ –1>᠂ ᠨᠠᠢᠷᠠᠯ ᠬᠥᠭᠵᠢᠮ ᠦᠨ ᠤᠶᠠᠩᠭᠠ Бүргэд харьд үүрэлдэггүй – Ж᠂ Пүрэв <4-р бүлэг ~1>.найрал хөгжмийн уянга
80ᠳᠥᠷᠪᠡᠳᠦᠭᠡᠷ ᠪᠥᠯᠥᠭ -ᠯᠤᠤ ᠤᠨᠵᠢᠭᠰᠠᠨ ᠬᠠᠪᠤᠷ
ᠨᠢᠭᠡ᠂ᠨᠠᠢᠷᠠᠯ ᠬᠥᠭᠵᠢᠮ ᠦᠨ ᠤᠶᠠᠩᠭᠠ
ᠭᠠᠳᠠᠨᠠ ᠴᠢᠮᠡᠭᠡ ᠭᠠᠷᠬᠤ ᠲᠠᠢ ᠵᠡᠷᠭᠡ ᠮᠣᠷᠢᠨᠱᠠᠬᠠᠢ ᠬᠡᠦᠬᠡᠨ ᠳᠡᠪᠡᠯ ᠨᠥᠮᠥᠷᠦᠨ ᠭᠠᠷᠴᠤ ᠢᠷᠡᠭᠡᠳ ᠳᠣᠣᠷᠠ ᠪᠠᠨ ᠪᠡᠶᠡ ᠪᠡᠶᠡ ᠪᠡᠨ ᠲᠠᠨᠢᠵᠤ ᠮᠡᠳᠡᠨ ᠪᠥᠭᠡᠮ ᠱᠤᠤᠭᠢᠶᠠᠨ ᠪᠣᠯᠵᠤ ᠵᠣᠯᠭᠠᠪᠠ᠃ ᠶᠡᠬᠡ ᠰᠣᠨᠢᠨ ᠤᠴᠠᠷᠠᠯ ᠪᠣᠯᠤᠯᠠ᠃ ᠳᠡᠭᠦᠦ ᠪᠢᠯᠢᠭᠦᠨ ᠨᠢ ᠠᠷᠢᠬᠪᠥᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠠᠷᠤᠭᠤᠯ ᠢ᠋ᠶ᠋ᠠᠷ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠲᠡᠷᠲᠡᠭᠡ ᠢᠷᠡᠨ᠂ ᠰᠠᠮᠠᠷᠺᠠᠨᠳᠢ᠂ ᠪᠤᠬᠠᠷ ᠢ᠋ ᠵᠣᠷᠢᠨ ᠣᠳᠬᠤ ᠨᠣᠶᠠᠨ ᠰᠢᠳᠠᠷᠯᠠᠨ ᠶᠠᠪᠤᠬᠤ ᠪᠠᠷ ᠪᠡᠶᠡ ᠪᠡᠯᠡᠳᠬᠡᠨ ᠪᠣᠢ ᠠᠵᠢ᠃ ᠠᠬᠠ ᠳᠡᠭᠦᠦ ᠬᠣᠶᠠᠷ ᠠᠮᠠ ᠮᠥᠯᠲᠥᠰ ᠠᠭᠤᠯᠵᠠᠯᠠ᠃ ᠨᠢᠭᠡ ᠯᠡ ᠬᠣᠨᠣᠭ ᠬᠦᠯᠦᠭ ᠬᠣᠵᠢᠭᠤ ᠢᠷᠡᠭᠰᠡᠨ ᠪᠣᠯ ᠪᠢᠯᠢᠭᠦᠨ ᠲᠡᠢ ᠤᠴᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠤ ᠪᠠᠢᠪᠠ᠃ ᠲᠡᠳᠡ ᠬᠣᠭᠣᠯᠠ ᠴᠠᠢ ᠢᠳᠡᠵᠦ ᠤᠤᠭᠤᠵᠤ ᠰᠥᠨᠢᠵᠢᠨ ᠶᠠᠷᠢᠯᠴᠠᠯᠠ᠃ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠬᠣᠶᠠᠷ ᠵᠠᠬᠢᠷᠤᠭᠴᠢ ᠶᠠᠭᠤ ᠬᠢᠵᠦ ᠪᠠᠢᠭᠠ ᠪᠣᠯᠤᠨ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠶᠠᠪᠤᠵᠤ ᠪᠠᠢᠭᠠ ᠪᠠᠨ ᠯᠠ ᠶᠠᠷᠢᠯᠴᠠᠪᠠ᠃
— ᠵᠠᠬᠢᠷᠤᠭᠴᠢ ᠬᠤᠪᠢᠯᠠᠢ ᠶ᠋ᠢ ᠪᠠᠬᠠᠨ ᠬᠢᠲᠠᠳ ᠲᠦᠰᠢᠮᠡᠳ᠂ ᠡᠷᠳᠡᠮᠲᠡᠨ ᠨᠦ᠍ᠭᠦᠳ ᠲᠣᠭᠣᠷᠢᠨ ᠨᠣᠮ ᠰᠤᠷᠭᠠᠭᠤᠯᠢ ᠪᠣᠯᠭᠣᠭᠠᠵᠤ᠂ ᠥᠷᠯᠥᠭᠡ ᠣᠷᠣᠢ ᠦᠭᠡᠢ ᠶᠠᠷᠢᠶᠠ ᠬᠥᠭᠡᠷᠦᠭᠡ ᠶᠡᠬᠡᠲᠡᠢ ᠪᠠᠢᠳᠠᠭ ᠪᠣᠯᠤᠭᠰᠠᠨ᠃ ᠴᠣᠬᠣᠮ ᠶᠠᠭᠤ ᠶᠠᠷᠢᠳᠠᠭ ᠢ᠋ ᠨᠢ ᠭᠦᠢᠴᠡᠳ ᠮᠡᠳᠡᠬᠦ ᠪᠢᠰᠢ᠃ ᠬᠢᠲᠠᠳ ᠡᠷᠳᠡᠮᠲᠡᠨ ᠶᠣᠣ ᠱᠤ᠌ ᠭᠡᠳᠡᠭ ᠮᠠᠭᠤ ᠰᠠᠨᠠᠭᠠᠨ ᠳ᠋ᠤ᠌ ᠮᠡᠷᠭᠡᠵᠢᠭᠰᠡᠨ ᠪᠣᠯᠪᠠ ᠤᠤ ᠭᠡᠮᠡᠷ ᠵᠢᠷᠲᠠᠭᠠᠢ ᠨᠢᠳᠦᠲᠡᠢ ᠲᠦᠰᠢᠮᠡᠳ ᠵᠠᠬᠢᠷᠤᠭᠴᠢ ᠶ᠋ᠢ《ᠶᠡᠬᠡ ᠡᠵᠡᠨ》 ᠭᠡᠵᠦ ᠨᠡᠷᠡᠯᠡᠭᠡᠳ᠂ ᠲᠡᠭᠦᠨ ᠳ᠋ᠦ᠍ ᠰᠤᠷᠭᠠᠮᠵᠢ ᠪᠣᠯᠬᠤ ᠵᠦᠢᠯ ᠬᠡᠯᠡᠬᠦ ᠳ᠋ᠦ᠍ ᠪᠡᠨ《ᠬᠢᠲᠠᠳ ᠬᠥᠮᠦᠰ ᠢ᠋ ᠬᠢᠲᠠᠳ ᠶᠣᠰᠣ ᠪᠠᠷ᠂ ᠬᠢᠲᠠᠳ ᠤ᠋ᠨ ᠬᠠᠤᠯᠢ ᠪᠠᠷ ᠵᠠᠬᠢᠷᠬᠤ ᠪᠣᠯ ᠭᠠᠷ ᠲᠤ ᠠᠮᠠᠷᠬᠠᠨ ᠣᠷᠣᠵᠤ᠂ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠨᠣᠮᠣᠬᠠᠨ ᠪᠠᠢᠵᠤ ᠪᠣᠯᠤᠨᠠ》 ᠭᠡᠵᠦ ᠬᠡᠯᠡᠳᠡᠭ᠃ ᠪᠠᠰᠠ《ᠬᠢᠲᠠᠳ ᠶᠣᠰᠣ ᠭᠣᠷᠢᠮ ᠢ᠋ ᠡᠪᠳᠡᠬᠦ ᠦᠭᠡᠢ ᠪᠠᠢᠪᠠᠯ ᠬᠢᠲᠠᠳ ᠬᠥᠮᠦᠰ ᠲᠠᠨ ᠤ᠋ ᠥᠯᠮᠡᠢ ᠳᠣᠣᠷᠠ ᠰᠥᠭᠥᠳᠵᠦ ᠪᠠᠢᠬᠤ ᠪᠣᠯᠤᠨᠠ》 ᠭᠡᠵᠦ ᠰᠤᠷᠭᠠᠳᠠᠭ᠃ ᠡᠨᠡ ᠨᠢ ᠴᠠᠭᠠᠨᠠ ᠪᠠᠨ ᠴᠣᠬᠣᠮ ᠶᠠᠮᠠᠷ ᠨᠠᠷᠢᠨ ᠤᠳᠬᠠ ᠤᠴᠢᠷᠲᠠᠢ ᠶ᠋ᠢ ᠪᠦᠷᠢᠨ ᠲᠠᠢᠯᠵᠤ ᠪᠠᠢᠭᠠ ᠮᠣᠩᠭᠣᠯ ᠬᠥᠮᠦᠨ ᠣᠳᠣ ᠪᠠᠷ ᠠᠯᠠᠭᠠ᠃ ᠳᠠᠭᠠᠵᠤ ᠪᠣᠳᠣᠪᠠᠯ ᠬᠢᠲᠠᠳ ᠤ᠋ᠨ ᠡᠷᠬᠡ ᠶ᠋ᠢ ᠬᠥᠨᠳᠡᠬᠦ ᠦᠭᠡᠢ ᠳᠠᠷᠬᠠᠨ ᠪᠠᠢᠯᠭᠠᠬᠤ ᠭᠡᠰᠡᠨ ᠰᠠᠨᠠᠭᠠ ᠶᠤᠮ ᠤᠤ᠂ ᠮᠣᠩᠭᠣᠯ ᠵᠠᠬᠢᠷᠤᠭᠴᠢ ᠶ᠋ᠢ ᠬᠢᠲᠠᠳ ᠪᠣᠯᠭᠠᠬᠤ ᠭᠡᠰᠡᠨ ᠳᠠᠯᠳᠠ ᠪᠣᠳᠣᠯᠭᠠ ᠪᠣᠯᠪᠠ ᠤᠤ ᠭᠡᠵᠦ ᠮᠠᠨ ᠤ᠋ ᠵᠠᠷᠢᠮ ᠰᠢᠳᠠᠷ ᠬᠥᠮᠦᠰ ᠬᠡᠯᠡᠵᠦ ᠪᠠᠢᠭᠠ᠃ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠥᠪᠡᠷ ᠢ᠋ᠶ᠋ᠡᠨ ᠤᠬᠠᠭᠠᠨ ᠪᠠᠢᠳᠠᠯ ᠰᠠᠢᠨᠲᠠᠢ ᠭᠡᠭᠳᠡᠳᠡᠭ ᠪᠣᠯᠬᠣᠷ ᠨᠠᠷᠢᠨ ᠤᠴᠢᠷ ᠢ᠋ ᠪᠣᠯᠭᠣᠭᠠᠳᠠᠭ ᠪᠢᠵᠡ ᠭᠡᠵᠦ ᠬᠦᠯᠦᠭ ᠶᠠᠷᠢᠯᠠ᠃ ᠲᠡᠭᠡᠭᠡᠳ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠲᠡᠷᠡ ᠬᠢᠲᠠᠳ ᠨᠣᠶᠠᠳ ᠲᠠᠢ ᠪᠠᠨ ᠯᠠ ᠬᠡᠳᠦᠭᠦᠯᠡᠬᠡᠨ ᠢ᠋ᠶ᠋ᠡᠨ ᠰᠠᠭᠤᠭᠠᠳ ᠬᠣᠭᠣᠷᠣᠨᠳᠣ ᠪᠠᠨ ᠵᠠᠷᠢᠮ ᠳ᠋ᠤ᠌ ᠪᠠᠨ ᠰᠥᠨᠢ ᠳᠦᠯᠢᠨ ᠶᠠᠷᠢᠯᠴᠠᠳᠠᠭ᠃ ᠲᠡᠷᠡ ᠪᠣᠯᠭᠠᠨ ᠳ᠋ᠤ᠌ ᠪᠠᠨ ᠨᠠᠮᠠᠶ᠋ᠢ ᠪᠠᠢᠯᠭᠠᠬᠤ ᠪᠢᠰᠢ ᠳᠡ᠃ ᠪᠠᠢᠭᠠᠳ ᠴᠦ᠍ ᠪᠢ ᠬᠢᠲᠠᠳ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠪᠣᠯᠬᠣᠷ ᠳᠡᠮᠡᠢ ᠡᠪᠰᠢᠶᠡᠭᠡᠳ ᠰᠠᠭᠤᠵᠤ ᠪᠠᠢᠬᠤ ᠪᠣᠯᠤᠨᠠ᠁ ᠭᠡᠵᠦ ᠬᠦᠯᠦᠭ ᠨᠡᠮᠡᠨ ᠥᠭᠦᠯᠡᠪᠡ᠃
— ᠮᠠᠨ ᠤ᠋ ᠡᠨᠳᠡ ᠴᠦ᠍ ᠢᠯᠡ ᠳᠠᠯᠳᠠ ᠶᠠᠷᠢᠶᠠ ᠶᠡᠬᠡ ᠠ᠋᠃ ᠠᠷᠢᠬᠪᠦᠢ᠍᠋ᠬᠡ ᠵᠠᠬᠢᠷᠤᠭᠴᠢ ᠶ᠋ᠢ ᠲᠣᠭᠣᠷᠢᠭᠠᠳ ᠡᠳᠦᠷ ᠰᠥᠨᠢ ᠦᠭᠡᠢ ᠯᠡ ᠬᠥᠮᠦᠰ ᠶᠡᠬᠡ ᠵᠦᠢᠯ ᠪᠠᠰᠠ ᠶᠠᠷᠢᠬᠤ ᠪᠣᠯᠤᠭᠰᠠᠨ᠃ ᠠᠮᠢᠲᠠᠨ ᠤ᠋ ᠠᠮᠠᠨ ᠠ᠋ᠴᠠ ᠰᠣᠨᠣᠰᠪᠠᠯ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠬᠡᠨ ᠵᠠᠯᠭᠠᠵᠤ ᠰᠠᠭᠤᠬᠤ ᠪᠣᠢ? ᠭᠡᠵᠦ ᠬᠡᠯᠡᠯᠴᠡᠳᠡᠭ ᠶᠦᠮ ᠪᠠᠢᠬᠤ᠃ ᠣᠯᠠᠩᠬᠢ ᠨᠣᠶᠠᠳ ᠠᠷᠢᠬᠪᠦᠢ᠍ᠬᠡ ᠵᠠᠬᠢᠷᠤᠭᠴᠢ ᠶ᠋ᠢ ᠰᠠᠭᠤᠬᠤ ᠶᠣᠰᠣᠲᠠᠢ᠃ ᠲᠡᠭᠡᠵᠦ ᠮᠥᠩᠬᠡ ᠠᠬᠠ ᠨᠢ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠭᠡᠳᠡᠭ ᠭᠡᠨᠡ᠃ ᠠᠷᠢᠬᠪᠦᠢ᠍ᠬᠡ ᠥᠪᠡᠷ ᠢ᠋ᠶ᠋ᠡᠨ ᠬᠠᠭᠠᠨ ᠪᠣᠯᠬᠤ ᠳᠤᠷᠠ ᠦᠭᠡᠢ ᠴᠦ᠍ ᠦᠭᠡᠢ᠂《ᠲᠠ ᠣᠯᠠᠨ ᠲᠡᠭᠡᠵᠦ ᠪᠠᠢᠭᠠ ᠪᠣᠯ ᠪᠢ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠬᠥᠲᠥᠯᠦᠭᠡᠳ ᠶᠠᠪᠤᠵᠤ ᠳᠥᠩᠭᠡᠬᠦ ᠪᠠᠢᠬᠤ》 ᠭᠡᠵᠦ ᠨᠢᠭᠡ ᠤᠳᠠᠭᠠ ᠬᠡᠯᠡᠭᠰᠡᠨ ᠰᠤᠷᠠᠭ ᠲᠠᠢ᠃ ᠪᠢ ᠲᠡᠷᠡ ᠳᠡᠭᠡᠳᠦᠰ ᠦ᠋ᠳ ᠦ᠋ᠨ ᠶᠠᠷᠢᠶᠠ ᠬᠥᠭᠡᠷᠭᠡᠨ ᠳ᠋ᠦ᠍ ᠣᠷᠣᠯᠴᠠᠵᠤ ᠪᠠᠢᠬᠤ ᠡᠷᠬᠡ ᠶ᠋ᠢ ᠶᠠᠭᠠᠬᠢᠨ ᠡᠳ᠋ᠯᠡᠬᠦ ᠪᠢᠯᠡ᠃ ᠶᠡᠷᠦ ᠨᠢ ᠳᠠᠯᠳᠠ ᠶᠠᠷᠢᠶᠠ ᠶᠡᠬᠡ ᠪᠣᠯᠵᠤ ᠪᠠᠢᠭᠠ᠃ ᠡᠨᠡ ᠬᠡᠷᠡᠭ ᠢ᠋ᠶ᠋ᠡᠷ ᠰᠦᠢᠲᠦ ᠨᠣᠶᠠᠨ ᠴᠠᠭᠠᠲᠠᠢ ᠠᠪᠠᠭᠠ ᠠᠭᠰᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠣᠴᠢᠬᠤ᠂ ᠪᠠᠲᠤ ᠬᠠᠨ ᠤ᠋ ᠳᠡᠭᠦᠦ ᠪᠡᠬᠢ ᠲᠡᠢ ᠠᠭᠤᠯᠵᠠᠬᠤ ᠶᠤᠮ ᠪᠠᠢᠨᠠ᠃ ᠪᠢ ᠪᠣᠯ ᠵᠥᠪᠬᠡᠨ ᠨᠣᠶᠠᠨ ᠡᠯᠴᠢ ᠶ᠋ᠢᠨ ᠪᠢᠴᠢᠭ ᠳᠠᠩᠰᠠ᠂ ᠬᠡᠷᠡᠭᠡ( ᠫᠠᠢᠰᠠ) ᠶ᠋ᠢ ᠬᠠᠳᠠᠭᠠᠯᠠᠨ ᠠᠪᠴᠤ ᠶᠠᠪᠤᠬᠤ ᠶᠣᠰᠣᠲᠠᠢ ᠪᠣᠯᠵᠤ ᠪᠠᠢᠭᠠ᠃ ᠰᠦᠢᠲᠦ ᠨᠣᠶᠠᠨ ᠢ᠋ ᠬᠠᠲᠠᠭᠤ ᠰᠢᠷᠦᠭᠦᠨ ᠭᠡᠵᠦ ᠬᠥᠮᠦᠰ ᠬᠡᠯᠡᠳᠡᠭ᠃ ᠲᠡᠭᠡᠭᠡᠳ ᠶᠠᠭᠠᠬᠢᠵᠤ ᠠᠭᠠᠰᠢᠯᠠᠬᠤ ᠳᠡᠭᠡᠳᠦᠰ ᠶᠦᠮ ᠪᠣᠯ᠂ ᠪᠢ ᠬᠡᠨ ᠳ᠋ᠦ᠍ ᠴᠦ᠍ ᠭᠡᠮ ᠬᠢᠬᠦ ᠦᠭᠡᠢ᠂ ᠲᠡᠷᠡ ᠪᠢᠴᠢᠭ ᠶᠠᠭᠤᠮᠠ ᠶ᠋ᠢ ᠨᠢ ᠡᠭᠦᠷᠴᠦ ᠭᠡᠭᠡᠭᠳᠡᠭᠦᠯᠴᠢᠬᠦ ᠦᠭᠡᠢ ᠰᠢᠦ ᠪᠡᠶᠡ ᠡᠴᠡ ᠪᠡᠨ ᠰᠠᠯᠭᠠᠯ ᠦᠭᠡᠢ ᠠᠪᠤᠭᠠᠳ ᠶᠠᠪᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠨᠣᠶᠠᠨ ᠶᠠᠭᠤ ᠭᠡᠨᠡ《ᠵᠠ》 ᠯᠠ ᠪᠢᠵᠡ ᠭᠡᠮᠡᠨ ᠪᠢᠯᠢᠭᠦᠨ ᠵᠢᠭᠠᠬᠠᠨ ᠰᠠᠨᠠᠭᠠ ᠵᠣᠪᠠᠩᠭᠤᠢ ᠶᠠᠷᠢᠪᠠ᠃
— ᠲᠡᠢᠮᠦ ᠠ᠋᠂ ᠲᠡᠢᠮᠦ᠃ ᠡᠨᠡ ᠠᠬᠠ ᠳᠡᠭᠦᠦ ᠬᠣᠶᠠᠷ ᠡᠵᠡᠨ ᠰᠢᠷᠡᠭᠡ ᠶ᠋ᠢ ᠬᠣᠭᠣᠷᠣᠨᠳᠣ ᠪᠠᠨ ᠪᠤᠯᠢᠶᠠᠴᠠᠯᠳᠤᠬᠤ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠵᠤ ᠪᠠᠢᠭᠠ ᠬᠡᠷᠡᠭ᠃ ᠲᠡᠭᠡᠭᠡᠳ ᠥᠷᠢᠰᠦᠯᠳᠦᠳᠡᠭ ᠶᠦᠮ ᠪᠣᠯ? ᠶᠠᠭᠠᠬᠢᠵᠤ ᠰᠢᠦ ᠪᠤᠯᠢᠶᠠᠴᠠᠯᠳᠤᠬᠤ ᠨᠢ ᠪᠣᠢ? ᠬᠡᠨ ᠨᠢ ᠳᠡᠢᠯᠳᠡᠭ ᠪᠣᠯ? ᠵᠠᠮ ᠳ᠋ᠤ᠌ ᠨᠢ ᠪᠢᠳᠡ ᠶᠠᠭᠠᠬᠢᠵᠤ ᠦᠷᠡᠭᠳᠡᠨ ᠰᠦᠢᠳᠬᠦ ᠪᠣᠯ? ᠭᠡᠳᠡᠭ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠯᠴᠠᠪᠠ᠃ ᠶᠠᠭᠠᠬᠢᠳᠠᠭ ᠰᠢᠦ ᠶᠦᠮ ᠪᠢᠯᠡ?
— ᠠᠬᠠ ᠮᠢᠨᠢ! ᠡᠨᠡ ᠶᠡᠬᠡ ᠲᠦᠪᠡᠭᠲᠡᠢ ᠬᠡᠷᠡᠭ ᠪᠣᠯᠵᠤ ᠣᠯᠠᠨ ᠢ᠋ ᠰᠦᠢᠷᠡᠭᠦᠯᠦᠨᠡ᠃ ᠪᠢᠳᠡ ᠠᠯᠢ ᠶ᠋ᠢ ᠨᠢ ᠳᠡᠢᠯᠦᠨᠡ ᠭᠡᠵᠦ ᠮᠡᠳᠡᠬᠦ ᠪᠣᠢ᠃ ᠡᠴᠦᠰ ᠲᠦ᠍ ᠪᠡᠨ ᠨᠢᠭᠡ ᠨᠢ ᠵᠠᠪᠠᠯ ᠳᠡᠢᠯᠦᠨᠡ᠃ ᠲᠡᠷᠡ ᠳᠡᠢᠯᠦᠭᠰᠡᠨ ᠡᠵᠡᠨ ᠮᠢᠨᠢ ᠨᠥᠭᠦᠭᠡ ᠲᠠᠯᠠ ᠶ᠋ᠢ ᠨᠢ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠬᠥᠮᠦᠰ ᠢ᠋ ᠬᠢᠷᠭᠠᠵᠤ ᠬᠠᠶᠠᠨᠠ᠃ ᠡᠢᠮᠦ ᠯᠡ ᠬᠡᠷᠡᠭ ᠵᠠᠢᠯᠠᠰᠢ ᠦᠭᠡᠢ ᠢᠷᠡᠬᠦ ᠪᠣᠯᠤᠭᠠᠳ ᠪᠠᠢᠨᠠ᠃《ᠨᠢᠭᠡ ᠦᠬᠡᠷ ᠦ᠋ᠨ ᠡᠪᠡᠷ ᠲᠤᠷᠭᠢᠬᠤ ᠳ᠋ᠤ᠌ ᠮᠢᠩᠭᠠᠨ ᠦᠬᠡᠷ ᠦ᠋ᠨ ᠡᠪᠡᠷ ᠳᠣᠷᠭᠢᠨᠠ》 ᠭᠡᠭᠴᠢ ᠪᠡᠷ ᠡᠨᠡ ᠠᠬᠠ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠵᠥᠷᠢᠯᠳᠦᠭᠡᠨ ᠬᠡᠵᠢᠶᠡ ᠴᠦ᠍ ᠮᠣᠩᠭᠣᠯ ᠲᠦᠮᠡᠨ ᠦ᠌ ᠰᠠᠢᠨ ᠶᠠᠭᠤᠮᠠ ᠪᠣᠯᠬᠤ ᠦᠭᠡᠢ ᠭᠡᠮᠡᠨ ᠬᠦᠯᠦᠭ᠂ ᠪᠢᠯᠢᠭᠦᠨ ᠨᠠᠷ ᠶᠠᠷᠢᠯᠴᠠᠵᠤ ᠪᠠᠢᠯᠠ᠃
ᠮᠣᠷᠢᠨᠱᠠᠭᠠᠢ ᠬᠣᠭᠣᠯᠠ ᠬᠢᠵᠦ ᠤᠯᠠᠭᠠ ᠪᠤᠲᠠᠷᠠᠭᠰᠠᠨ ᠬᠥᠭᠡᠷᠦᠬᠦᠨ ᠴᠢᠷᠠᠢᠨ ᠳ᠋ᠤ᠌ ᠪᠠᠨ ᠪᠣᠯᠭᠣᠮᠵᠢᠯᠠᠯ ᠲᠣᠳᠣᠷᠠᠭᠤᠯᠤᠨ ᠣᠷᠳᠣᠨ ᠳ᠋ᠤ᠌ ᠨᠣᠶᠠᠳ ᠤ᠋ᠨ ᠴᠠᠢ ᠵᠥᠭᠡᠭᠡᠬᠦ ᠳᠡᠯᠢᠮ ᠳ᠋ᠦ᠍ ᠪᠡᠨ ᠰᠣᠨᠣᠰᠤᠭᠰᠠᠨ ᠵᠦᠢᠯ ᠢ᠋ᠶ᠋ᠡᠨ ᠥᠭᠦᠯᠡᠵᠦ᠂ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠠᠬᠠ ᠶ᠋ᠢ ᠬᠦᠨᠳᠦᠯᠡᠨ ᠴᠠᠢ ᠢᠳᠡᠭᠡ ᠪᠡᠷ ᠳᠡᠢᠯᠦᠨᠡ᠃ ᠰᠣᠨᠣᠰᠪᠠᠯ ᠠᠷᠢᠬᠪᠦᠢ᠍ᠬᠡ ᠶ᠋ᠢᠨ ᠳᠡᠷᠭᠡᠳᠡ ᠪᠣᠯᠳᠠᠭ ᠨᠣᠶᠠᠳ ᠤ᠋ᠨ ᠶᠠᠷᠢᠶᠠ ᠶᠡᠬᠡ ᠨᠢᠭᠤᠴᠠ ᠪᠠᠢᠳᠠᠯᠲᠠᠢ ᠵᠥᠪᠯᠡᠯᠳᠦᠵᠦ ᠪᠠᠢᠬᠤ ᠳ᠋ᠤ᠌ ᠪᠠᠨ ᠭᠠᠳᠠᠨᠠ ᠠ᠋ᠴᠠ ᠰᠢᠪᠡᠭᠴᠢᠨ ᠴᠦ᠍ ᠲᠡᠷᠡ ᠦᠷᠭᠦᠭᠡᠨ ᠳ᠋ᠦ᠍ ᠪᠡᠨ ᠣᠷᠣᠭᠤᠯᠬᠤ ᠳᠤᠷᠠ ᠦᠭᠡᠢ ᠭᠡᠨᠡ᠃
— ᠵᠠᠬᠢᠷᠤᠭᠴᠢ ᠨᠠᠷ ᠤ᠋ᠨ ᠡᠬᠡ ᠰᠤᠷᠬᠤᠭᠲᠠᠨᠢ ᠠᠬᠠᠢᠲᠠᠨ ᠶᠠᠮᠠᠷ ᠪᠠᠢᠭᠠ ᠪᠣᠢ? ᠪᠡᠶᠡ ᠨᠢ ᠴᠢᠯᠡᠭᠦᠷ ᠭᠡᠵᠦ ᠳᠤᠭᠤᠯᠳᠠᠭᠠᠳ ᠪᠠᠢᠳᠠᠭ᠃ ᠪᠢ ᠲᠡᠭᠦᠨ ᠢ᠋ ᠮᠡᠳᠡᠵᠦ ᠣᠴᠢᠬᠤ ᠶᠣᠰᠣᠲᠠᠢ ᠶᠤᠮ ᠰᠢᠦ ᠭᠡᠵᠦ ᠬᠦᠯᠦᠭ ᠠᠰᠠᠭᠤᠯᠠ᠃ ᠮᠣᠷᠢᠨᠱᠠᠭᠠᠢ ᠠᠮᠠ ᠤᠭᠲᠦᠭᠤᠯᠤᠨ᠄
— ᠪᠢᠳᠡ ᠶᠡᠬᠡ ᠡᠵᠢ ᠯᠡ ᠭᠡᠳᠡᠭ᠃ ᠠᠬᠠᠢᠲᠠᠨ ᠤ᠋ ᠪᠡᠶᠡ ᠲᠤᠩ ᠪᠠᠵᠠᠭᠠᠬᠤ ᠦᠭᠡᠢ ᠪᠠᠢᠬᠠ᠃ ᠪᠢ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠦᠷᠭᠦᠭᠡᠨ ᠳ᠋ᠦ᠍ ᠨᠢ ᠣᠷᠣᠵᠤ ᠡᠮ ᠠᠪᠠᠴᠢᠵᠤ ᠪᠠᠷᠢᠭᠰᠠᠨ᠃ ᠲᠡᠷᠡ ᠠᠬᠠᠢ ᠳᠡᠷᠭᠡᠳᠡ ᠪᠡᠨ ᠦᠷᠭᠦᠯᠵᠢᠳᠡ ᠰᠠᠬᠢᠭᠤᠯ ᠲᠠᠢ᠂ ᠵᠢᠭᠠᠬᠠᠨ ᠰᠦ᠂ ᠮᠢᠬᠠᠨ ᠤ᠋ ᠬᠠᠷᠠ ᠱᠥᠯᠥ ᠪᠠᠯᠭᠤᠳᠠᠭ ᠶᠤᠮ ᠭᠡᠨᠡ ᠪᠢᠯᠡ᠃ ᠶᠡᠷᠦ ᠨᠢ ᠶᠠᠭᠠᠬᠢᠪᠠᠴᠤ ᠲᠡᠰᠬᠦ ᠦᠭᠡᠢ ᠪᠣᠯᠤᠭᠰᠠᠨ᠃ ᠬᠠᠷᠢᠨ ᠬᠢᠷᠢ ᠤᠳᠠᠬᠤ ᠨᠢ ᠪᠣᠢ᠂ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠠᠷᠢᠬᠪᠦᠢ᠍ᠬᠡ ᠵᠠᠬᠢᠷᠤᠭᠴᠢ ᠡᠳᠦᠷ ᠪᠣᠯᠭᠠᠨ ᠡᠬᠡ ᠳᠡᠭᠡᠷᠡ ᠪᠡᠨ ᠣᠴᠢᠵᠤ᠂ ᠵᠠᠷᠢᠮ ᠳ᠋ᠤ᠌ ᠪᠠᠨ ᠬᠠᠷᠠᠭᠠᠳ ᠬᠠᠢᠯᠳᠠᠭ ᠶᠤᠮ ᠪᠢᠯᠡ ᠭᠡᠪᠡ᠃
— ᠲᠡᠷᠡ ᠠᠬᠠᠢᠲᠠᠨ ᠯᠠ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠡᠨ ᠨᠢ ᠣᠷᠣ ᠵᠠᠯᠭᠠᠨ ᠰᠠᠭᠤᠬᠤ ᠪᠣᠢ ᠭᠡᠳᠡᠭ ᠢ᠋ ᠬᠡᠯᠡᠳᠡᠭ ᠶᠦᠮ ᠪᠠᠢᠭᠠ ᠪᠢᠵᠡ ᠳᠡ? ᠡᠬᠡ ᠬᠥᠮᠦᠨ ᠦ᠌ ᠦᠭᠡ ᠵᠢᠩᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ ᠪᠢᠰᠢ ᠤᠤ? ᠭᠡᠵᠦ ᠬᠦᠯᠦᠭ ᠠᠰᠠᠭᠤᠯᠠ᠃ ᠪᠢᠯᠢᠭᠦᠨ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠤᠷ ᠥᠭᠡᠳᠡ ᠬᠠᠷᠠᠵᠤ᠄
— ᠬᠥᠮᠦᠰ ᠶᠠᠩᠵᠤ ᠪᠦᠷᠢ ᠪᠡᠷ ᠳᠤᠤᠭᠠᠷᠴᠤ ᠪᠠᠢᠨᠠ᠃ ᠮᠥᠩᠬᠡ ᠬᠠᠭᠠᠨ ᠪᠠᠭᠠ ᠳᠡᠭᠦᠦ ᠳ᠋ᠦ᠍ ᠪᠡᠨ ᠶᠡᠬᠡ ᠬᠠᠢᠷᠠᠲᠠᠢ᠂ ᠠᠷᠢᠬᠪᠦ᠋ᠬᠡ ᠶ᠋ᠢ ᠶᠣᠰᠣᠲᠠᠢ ᠡᠷᠡ ᠬᠥᠮᠦᠨ᠂ ᠤᠬᠠᠭᠠᠨ ᠰᠡᠷᠭᠦᠯᠡᠩ᠂ ᠪᠡᠶᠡ ᠪᠢᠯᠳᠠᠷ ᠲᠡᠭᠦᠯᠳᠡᠷ᠂ ᠴᠡᠷᠢᠭ ᠡᠷᠡ ᠶ᠋ᠢᠨ ᠡᠷᠳᠡᠮ ᠳ᠋ᠦ᠍ ᠪᠣᠯᠪᠠᠰᠤᠷᠠᠬᠤ ᠭᠡᠵᠦ ᠮᠡᠷᠡᠢᠳᠡᠭ᠃ ᠤᠯᠤᠰ ᠭᠦᠷᠦᠨ ᠢ᠋ ᠲᠡᠷᠢᠭᠦᠯᠡᠬᠦ ᠬᠥᠮᠦᠨ ᠡᠨᠡ ᠮᠥᠨ ᠭᠡᠳᠡᠭ ᠪᠠᠢᠭᠰᠠᠨ ᠭᠡᠵᠦ ᠶᠠᠷᠢᠵᠤ ᠪᠠᠢᠨᠠ᠃ ᠰᠤᠷᠬᠤᠭᠳᠠᠨᠢ ᠪᠡᠬᠢ ᠡᠵᠢ ᠨᠢ ᠪᠣᠯ ᠪᠠᠭᠠ ᠬᠦᠦ ᠳ᠋ᠦ᠍ ᠪᠡᠨ ᠢᠯᠡᠭᠦᠦ ᠬᠠᠢᠷᠠᠲᠠᠢ ᠪᠣᠯᠪᠠᠴᠤ 《ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣ ᠶ᠋ᠢ ᠲᠣᠮᠣ ᠳᠡᠭᠦᠦ ᠨᠢ ᠵᠠᠯᠭᠠᠬᠤ ᠤᠴᠢᠷᠲᠠᠢ ᠪᠠᠢᠬᠤ》 ᠭᠡᠵᠦ ᠨᠢᠭᠡ ᠬᠡᠯᠡᠭᠡᠳ᠂ ᠲᠡᠷᠡ ᠬᠦᠦ ᠪᠡᠨ ᠥᠪᠡᠷ ᠢ᠋ ᠪᠡᠨ ᠡᠷᠭᠢᠨ ᠢᠷᠡᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠶᠡᠬᠡ ᠬᠠᠷᠠᠳᠠᠭ᠃ ᠲᠡᠭᠡᠭᠡᠳ
— ᠵᠠᠪ ᠴᠢᠯᠥᠭᠡ ᠨᠢ ᠪᠣᠯᠬᠤ ᠦᠭᠡᠢ ᠶᠠᠪᠤᠭᠠ ᠪᠠᠢᠵᠤ ᠳᠠ ᠦᠷᠡ ᠮᠢᠨᠢ᠃ ᠬᠢᠲᠠᠳ ᠤ᠋ᠳ ᠬᠡᠴᠡᠭᠦᠦ ᠪᠣᠯᠬᠣᠷ ᠢ᠋ᠶ᠋ᠠᠨ ᠪᠥᠭᠰᠡ ᠥᠨᠳᠡᠢᠯᠭᠡᠬᠦ ᠦᠭᠡᠢ ᠪᠠᠢᠭᠠ ᠪᠠᠢᠬᠤ ᠭᠡᠵᠦ ᠬᠡᠯᠡᠵᠦ ᠪᠠᠢᠨᠠ ᠭᠡᠮᠡᠨ ᠳᠡᠷᠭᠡᠳᠡ ᠨᠢ ᠪᠠᠢᠳᠠᠭ ᠰᠢᠪᠡᠭᠴᠢᠨ ᠨᠦ᠍ᠭᠦᠳ ᠶᠠᠷᠢᠵᠤ ᠪᠠᠢᠭᠠ ᠃ ᠬᠡᠨ ᠮᠡᠳᠡᠬᠦ ᠪᠣᠢ᠃ ᠪᠣᠭᠣᠯ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠶᠠᠮᠠᠷ ᠦᠭᠡ ᠭᠡᠵᠦ ᠦᠵᠡᠬᠦ ᠪᠢᠰᠢ ᠳᠡ ᠭᠡᠮᠡᠨ ᠪᠢᠯᠢᠭᠦᠨ ᠶᠠᠷᠢᠵᠤ ᠪᠠᠢᠪᠠ᠃
ᠥᠷᠯᠥᠭᠡ ᠪᠣᠯᠵᠤ ᠠᠬᠠ ᠳᠡᠭᠦᠦ ᠬᠣᠶᠠᠷ ᠰᠠᠯᠤᠨ ᠣᠳᠬᠤ ᠶᠣᠰᠣᠲᠠᠢ ᠪᠣᠯᠤᠯᠠ᠃ ᠲᠡᠳᠡᠨ ᠳ᠋ᠦ᠍ ᠪᠠᠰᠠ ᠠᠮᠢᠨ ᠶᠠᠷᠢᠶᠠ ᠪᠠᠢᠪᠠ᠃ ᠪᠢᠯᠢᠭᠦᠨ ᠶᠠᠪᠤᠳᠠᠭ ᠶᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠪᠤᠬᠤ᠂ ᠬᠦᠯᠦᠭ ᠬᠡᠳᠦ ᠬᠣᠨᠣᠭ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠪᠠᠢᠭᠠᠳ ᠪᠤᠴᠠᠵᠤ᠂ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠠᠢᠯᠠᠳᠬᠠᠬᠤ᠂ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠳᠡᠭᠦᠦ ᠪᠢᠯᠢᠭᠦᠨ ᠲᠡᠢ ᠠᠭᠤᠯᠵᠠᠭᠠ ᠦᠭᠡᠢ᠂ ᠳᠡᠭᠡᠳᠦ ᠶ᠋ᠢᠨ ᠵᠠᠷᠤᠭᠠᠯ ᠢ᠋ᠶ᠋ᠠᠷ ᠠᠯᠤᠰ ᠢ᠋ ᠵᠣᠷᠢᠨ ᠣᠳᠴᠠᠢ᠃ ᠴᠣᠬᠣᠮ ᠬᠠᠮᠢᠭᠠ ᠶᠠᠪᠤᠭᠤᠯᠤᠭᠰᠠᠨ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠪᠢᠯᠢᠭᠦᠨ ᠪᠤᠴᠠᠵᠤ ᠢᠷᠡᠭᠡᠳ ᠬᠤᠪᠢᠯᠠᠢ ᠳ᠋ᠤ᠌ ᠰᠢᠳᠠᠷᠯᠠᠨ ᠣᠴᠢᠬᠤ ᠦᠭᠡᠢ᠂ ᠣᠴᠢᠬᠤ ᠰᠡᠳᠬᠢᠯ ᠦᠭᠡᠢ ᠪᠠᠢᠭᠠ ᠲᠡᠢᠮᠦ ᠪᠣᠯᠬᠣᠷ ᠪᠢᠯᠢᠭᠦᠨ ᠠᠷᠢᠬᠪᠦ᠋ᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠠᠪᠢ ᠳ᠋ᠤ᠌ ᠪᠡᠶᠡ ᠪᠡᠨ ᠳᠠᠯᠳᠠᠬᠠᠨ ᠪᠠᠢᠯᠭᠠᠵᠤ ᠪᠠᠢᠳᠠᠯ ᠢ᠋ ᠠᠵᠢᠨᠠ᠃ ᠠᠬᠠ ᠳᠡᠭᠦᠦ ᠬᠣᠶᠠᠷ ᠶᠠᠪᠤᠭᠠᠨ ᠳ᠋ᠤ᠌ ᠪᠠᠨ ᠬᠠᠷᠠ ᠬᠣᠷᠣᠮ ᠢ᠋ ᠲᠦᠰᠢᠭᠯᠡᠨ᠂ ᠲᠥᠷᠥᠭᠰᠡᠨ ᠨᠤᠲᠤᠭ ᠲᠤ᠌ ᠪᠠᠨ ᠠᠮᠢ ᠵᠢᠭᠤᠬᠤ ᠶ᠋ᠢ ᠪᠣᠳᠣᠨᠠ ᠭᠡᠰᠡᠨ ᠵᠦᠢᠯ ᠢ᠋ ᠠᠮᠢᠨᠴᠢᠯᠠᠨ ᠶᠠᠷᠢᠪᠠ᠃ ᠡᠨᠡ ᠬᠡᠷᠡᠭ ᠳᠡᠭᠡᠷᠡ ᠬᠦᠯᠦᠭ᠂ ᠪᠢᠯᠢᠭᠦᠨ ᠬᠣᠶᠠᠷ ᠲᠤ᠌ ᠰᠠᠨᠠᠭᠠ ᠵᠥᠷᠢᠬᠦ ᠵᠦᠢᠯ ᠪᠠᠢᠭᠰᠠᠨ ᠦᠭᠡᠢ ᠪᠢᠯᠡ᠃
ᠤᠷᠭᠤᠬᠤ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠᠨ ᠲᠣᠭᠣᠨᠣ ᠪᠠᠷ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠪᠢᠯᠢᠭᠦᠨ ᠬᠠᠳᠠᠮ ᠡᠴᠢᠭᠡ᠂ ᠠᠬᠠ᠂ ᠭᠡᠷᠭᠡᠢ ᠮᠤᠷᠢᠨᠱᠠᠭᠠᠢ᠂ ᠬᠦᠦ ᠨᠠᠷ ᠲᠠᠢ ᠪᠠᠨ ᠰᠠᠯᠬᠤ ᠶ᠋ᠢᠨ ᠮᠡᠨᠳᠦ ᠮᠡᠳᠡᠯᠴᠡᠵᠦ᠂ ᠭᠡᠷ ᠦ᠋ᠨ ᠪᠦᠰᠡᠭᠦᠢ ᠬᠣᠢᠨᠠ ᠠ᠋ᠴᠠ ᠨᠢ ᠰᠦ ᠡᠷᠭᠦᠭᠡᠳ᠂ ᠲᠡᠷᠡ ᠡᠷᠡ ᠠᠯᠪᠠᠨ ᠬᠡᠷᠡᠭ ᠢ᠋ᠶ᠋ᠡᠨ ᠵᠠᠯᠭᠠᠭᠤᠯᠬᠤ ᠪᠠᠷ ᠶᠠᠪᠤᠯᠠ᠃ ᠬᠦᠯᠦᠭ ᠴᠦ᠍ ᠪᠣᠯᠵᠣᠭᠰᠠᠨ ᠭᠠᠵᠠᠷ ᠲᠤ᠌ ᠪᠠᠨ ᠳᠠᠭᠠᠭᠤᠯ ᠴᠡᠷᠢᠭ ᠦ᠋ᠳ ᠲᠡᠢ ᠪᠡᠨ ᠠᠭᠤᠯᠵᠠᠨ᠂ ᠡᠪᠦᠷᠯᠡᠵᠦ ᠶᠠᠪᠤᠭᠠ ᠪᠢᠴᠢᠭ ᠢ᠋ᠶ᠋ᠡᠨ ᠡᠷᠭᠦᠵᠦ᠂ ᠠᠯᠪᠠ ᠬᠥᠭᠡᠭᠡᠴᠡᠯᠳᠦᠬᠦ ᠶᠣᠰᠣᠲᠠᠢ ᠪᠢᠯᠡ᠃ ᠡᠭᠦᠨ ᠳ᠋ᠦ᠍ ᠬᠡᠨ ᠰᠠᠭᠠᠳ ᠬᠢᠬᠦ ᠪᠣᠢ᠃
ᠬᠦᠯᠦᠭ ᠲᠡᠷᠡ ᠡᠳᠦᠷ ᠲᠦ᠍ ᠪᠡᠨ ᠲᠥᠷᠥᠯᠬᠢ ᠨᠡᠢᠰᠯᠡᠯ ᠢ᠋ᠶ᠋ᠡᠨ ᠬᠠᠷᠠᠨ᠂ ᠰᠡᠳᠬᠢᠯ ᠲᠡᠨᠢᠭᠦᠨ ᠵᠤᠭᠠᠴᠠᠵᠤ ᠶᠠᠪᠤᠭᠰᠠᠭᠠᠷ ᠳᠠᠭᠠᠭᠤᠯ ᠴᠡᠷᠢᠭ ᠦ᠋ᠳ ᠲᠦ᠍ ᠪᠡᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠡᠪᠲᠡᠭᠦᠯ ᠴᠡᠷᠢᠭ ᠦ᠋ᠨ ᠪᠠᠢᠷᠢᠨ ᠳ᠋ᠤ᠌ ᠣᠷᠣᠭᠤᠯᠤᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠠᠷᠢᠬᠪᠦ᠋ᠬᠡ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠡᠶᠡ ᠪᠡᠷ ᠪᠠᠷᠠᠯᠬᠠᠨ ᠪᠢᠴᠢᠭ ᠢ᠋ ᠡᠷᠭᠦᠬᠦ ᠪᠡᠷ ᠶᠡᠬᠡ ᠣᠷᠳᠣᠨ ᠳ᠋ᠤ᠌ ᠣᠴᠢᠯᠠ᠃ ᠣᠯᠠᠨ ᠪᠠᠭᠠᠨᠠ ᠲᠠᠢ ᠰᠦᠷᠯᠢᠭ ᠰᠠᠢᠬᠠᠨ ᠣᠷᠳᠣᠨ ᠪᠠᠢᠪᠠ᠃ ᠣᠯᠠᠨ ᠥᠷᠭᠥᠭᠡ ᠲᠠᠰᠤᠯᠭᠠ ᠪᠠᠷ ᠨᠢ ᠠᠯᠪᠠ ᠬᠠᠰᠢᠭᠴᠢ ᠣᠷᠣᠵᠤ ᠭᠠᠷᠤᠨ ᠬᠥᠯ ᠬᠥᠰᠬᠡ ᠶᠡᠬᠡ ᠪᠠᠢᠲᠠᠯᠲᠠᠢ᠃ ᠵᠠᠬᠢᠷᠤᠭᠴᠢ ᠵᠠᠷᠢᠮ ᠨᠣᠶᠠᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠬᠡᠭᠡᠷᠡ ᠰᠢᠩᠬᠤ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠥᠪᠥᠷ ᠨᠦᠮᠦᠷᠢᠭᠡ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ ᠣᠴᠢᠵᠤ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠬᠢᠬᠦ ᠪᠡᠷ ᠣᠳᠤᠭᠰᠠᠨ᠂ ᠬᠣᠶᠠᠷ ᠬᠣᠨᠣᠭ ᠲᠡᠨᠳᠡ ᠪᠡᠨ ᠪᠠᠢᠬᠤ ᠭᠡᠨᠡ᠃
ᠬᠦᠯᠦᠭ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠤᠰᠢᠶᠠᠯ ᠢ᠋ ᠭᠦᠢᠴᠡᠯᠳᠦᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠠᠷᠢᠬᠪᠦ᠋ᠬᠡ ᠨᠣᠶᠠᠨ ᠲᠠᠢ ᠤᠴᠠᠷᠠᠨ ᠠᠭᠤᠯᠵᠠᠵᠤ ᠠᠮᠤᠭᠤᠯᠠᠩ ᠢ᠋ ᠡᠷᠢᠬᠦ ᠶᠣᠰᠣᠲᠠᠢ ᠤᠴᠢᠷ ᠲᠡᠭᠦᠨ ᠦ᠌ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠬᠦ ᠪᠣᠯᠪᠠ᠃ ᠡᠨᠡ ᠵᠠᠪᠰᠠᠷ ᠮᠠᠨᠢ ᠡᠷᠡ ᠬᠠᠭᠠᠨ ᠤ᠋ ᠣᠷᠳᠣᠨ ᠬᠠᠪᠢ ᠪᠠᠷ ᠵᠢᠭᠠᠯ ᠶᠠᠪᠤᠵᠤ ᠡᠯᠳᠡᠪ ᠢ᠋ ᠰᠣᠨᠢᠷᠬᠠᠯᠠ᠃ ᠮᠥᠩᠬᠡ ᠬᠠᠭᠠᠨ᠂ ᠡᠵᠡᠳ ᠦ᠋ᠨ ᠪᠠᠢᠳᠠᠭ ᠤᠷᠲᠤ ᠶ᠋ᠢ ᠲᠣᠬᠢᠯᠢᠭ ᠪᠣᠯᠭᠠᠬᠤ ᠭᠡᠵᠦ ᠬᠠᠷᠢ ᠠ᠋ᠴᠠ ᠤᠷᠠᠨ ᠭᠠᠷᠳᠠᠨ ᠨᠤᠭᠤᠳ ᠢ᠋ ᠠᠪᠴᠢᠷᠠᠨ ᠠᠵᠢᠯᠯᠠᠭᠤᠯᠤᠭᠠᠳ᠂ ᠰᠢᠨᠡ ᠵᠦᠢᠯ ᠨᠡᠯᠢᠶᠡᠳ ᠢ᠋ ᠬᠢᠯᠭᠡᠭᠰᠡᠨ ᠠᠵᠢ᠃ ᠮᠥᠩᠭᠥᠨ ᠮᠣᠳᠣ ᠶ᠋ᠢ ᠲᠣᠭᠣᠷᠢᠭᠤᠯᠤᠭᠠᠳ ᠲᠡᠷᠡ ᠲᠠᠯᠠᠪᠠᠢ ᠳ᠋ᠤ᠌ ᠳᠡᠭᠡᠳᠦᠰ ᠦ᠋ᠳ ᠦ᠋ᠨ ᠤᠷᠲᠤ ᠶ᠋ᠢ ᠪᠠᠢᠭᠤᠯᠵᠠᠢ᠃ ᠬᠠᠷᠢ ᠶ᠋ᠢᠨ ᠭᠡᠢᠴᠢᠳ ᠵᠣᠴᠢᠳ ᠢ᠋ ᠲᠦᠷ ᠪᠠᠢᠯᠭᠠᠳᠠᠭ ᠳ᠋ᠠᠩ ᠪᠠᠭᠤᠳᠠᠯ ᠬᠡᠮᠡᠬᠦ ᠥᠷᠭᠥᠭᠡ ᠶ᠋ᠢ ᠪᠠᠰᠠ ᠪᠣᠢ ᠪᠣᠯᠭᠠᠭᠰᠠᠨ ᠪᠠᠢᠨᠠ᠃ ᠤᠯᠠᠭᠠᠨ᠂ ᠬᠥᠬᠡ ᠥᠩᠭᠡ ᠶ᠋ᠢᠨ ᠸᠠᠭᠠᠷ ᠰᠢᠪᠠᠷ ᠢ᠋ᠶ᠋ᠠᠷ ᠪᠠᠷᠢᠭᠰᠠᠨ᠂ ᠣᠯᠠᠨ ᠪᠠᠭᠠᠨᠠ ᠲᠠᠢ ᠨᠢᠭᠡ ᠲᠣᠮᠣ ᠪᠠᠢᠰᠢᠩ ᠬᠠᠭᠠᠨ ᠤ᠋ ᠶᠡᠬᠡ ᠤᠷᠲᠤ ᠲᠠᠢ ᠵᠡᠷᠭᠡᠴᠡᠭᠡᠳ ᠨᠢᠳᠦ ᠪᠤᠯᠢᠶᠠᠮᠠ ᠬᠠᠷᠠᠭᠳᠠᠨᠠ᠃ ᠲᠡᠭᠦᠨ ᠢ᠋ ᠬᠥᠭᠵᠢᠮ ᠦ᠋ᠨ ᠤᠷᠲᠤ ᠭᠡᠳᠡᠭ ᠠᠵᠢ᠃ ᠣᠢᠷᠠᠲᠤᠭᠠᠳ ᠣᠴᠢᠪᠠᠯ ᠳᠣᠲᠣᠷᠠ ᠨᠢ ᠣᠯᠠᠨ ᠥᠩᠭᠡ ᠶ᠋ᠢᠨ ᠳᠠᠭᠤ ᠲᠠᠢ ᠬᠥᠭᠵᠢᠮ ᠬᠥᠭ ᠨᠡᠢᠯᠡᠨ ᠬᠦᠩᠭᠢᠨᠡᠨ ᠳᠤᠤᠭᠠᠷᠴᠤ᠂ ᠶᠡᠷᠦ ᠪᠤᠰᠤ ᠶ᠋ᠢᠨ ᠰᠠᠢᠬᠠᠨ ᠠᠶᠠᠯᠭᠤ ᠴᠢᠬᠢᠨ ᠳ᠋ᠦ᠍ ᠨᠢ ᠭᠣᠴᠣ ᠴᠢᠮᠡᠭᠲᠡᠢ ᠰᠣᠨᠣᠰᠤᠭᠳᠠᠪᠠ᠃ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠠᠷᠤᠭᠠᠯ ᠤ᠋ᠨ ᠡᠯᠴᠢ ᠬᠥᠮᠦᠨ ᠪᠢ ᠬᠠᠮᠢᠭᠠ ᠴᠦ᠍ ᠣᠷᠣᠵᠤ ᠪᠣᠯᠤᠨᠠ ᠪᠢᠵᠡ ᠭᠡᠵᠦ ᠬᠦᠯᠦᠭ ᠪᠣᠳᠣᠭᠠᠳ ᠲᠡᠷᠡ ᠬᠥᠭᠵᠢᠮ ᠦ᠋ᠨ ᠣᠷᠳᠣᠨ ᠳ᠋ᠤ᠌ ᠣᠷᠣᠵᠤ ᠶᠠᠪᠤᠯᠠ᠃ ᠬᠠᠷᠠᠪᠠᠯ ᠲᠣᠮᠣ ᠲᠠᠩᠬᠢᠮ ᠳᠦᠭᠦᠷᠡᠩ ᠬᠡᠳᠦᠨ ᠠᠷᠪᠠᠨ ᠬᠥᠮᠦᠨ ᠰᠠᠭᠤᠵᠤ᠂ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠥᠭᠵᠢᠮ ᠳ᠋ᠦ᠍ ᠰᠤᠷᠤᠯᠴᠠᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ ᠪᠠᠢᠨᠠ᠃ ᠲᠡᠷᠡ ᠬᠥᠮᠦᠰ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠵᠢᠮᠰᠡᠭ ᠪᠠᠷᠢᠵᠤ᠂ ᠬᠢᠷᠦᠭᠡᠳᠦᠨ᠂ ᠦᠯᠢᠶᠡᠨ ᠳᠤᠤᠭᠠᠷᠭᠠᠵᠤ᠂ ᠵᠠᠷᠢᠮ ᠨᠢ ᠲᠣᠮᠣ ᠬᠡᠩᠭᠡᠷᠭᠡ ᠴᠣᠬᠢᠵᠤ ᠪᠠᠯᠪᠠᠨ ᠡᠯᠳᠡᠪ ᠦ᠋ᠨ ᠳᠠᠭᠤ ᠭᠠᠷᠭᠠᠨᠠ᠃ ᠨᠡᠷᠡ ᠶ᠋ᠢ ᠨᠢ ᠮᠡᠳᠡᠬᠦ ᠶᠠᠭᠤᠮᠠ ᠭᠡᠪᠡᠯ ᠮᠣᠷᠢᠨ ᠬᠤᠭᠤᠷ᠂ ᠯᠢᠩᠪᠦ᠂ ᠶᠠᠲᠤᠭᠠ᠂ ᠬᠡᠩᠭᠡᠷᠭᠡ᠂ ᠴᠠᠩ᠂ ᠵᠡᠰ ᠪᠦᠷᠢᠶᠡ᠂ ᠬᠤᠭᠤᠴᠢᠷ ᠲᠡᠳᠦᠢᠬᠡᠨ ᠠᠵᠢ᠃ ᠴᠠᠭᠠᠨᠠ ᠨᠢ ᠬᠦᠯᠦᠭ ᠨᠡᠷᠡ ᠶ᠋ᠢ ᠨᠢ ᠮᠡᠳᠡᠬᠦ ᠦᠭᠡᠢ ᠡᠳᠦᠢ ᠲᠡᠳᠦᠢ ᠬᠥᠭᠵᠢᠮ ᠶᠠᠩᠵᠤ ᠪᠦᠷᠢ ᠪᠡᠷ ᠳᠤᠤᠭᠠᠷᠤᠨᠠ᠃ ᠬᠢᠲᠠᠳ ᠭᠠᠵᠠᠷ ᠲᠤ᠌ ᠪᠠᠢᠳᠠᠭ ᠵᠠᠩ ᠵᠤᠨ ᠭᠡᠰᠡᠨ ᠳᠠᠭᠤ ᠲᠠᠢ᠂ ᠳᠣᠬᠢᠶᠠ ᠵᠢᠭᠠᠪᠤᠷᠢ ᠪᠠᠷ ᠬᠠᠮᠲᠤᠷᠠᠵᠤ ᠬᠥᠭᠵᠢᠮᠳᠡᠬᠦ ᠨᠢ ᠭᠣᠴᠣ ᠲᠠᠭᠠᠯᠠᠮᠵᠢᠲᠠᠢ᠂ᠴᠢᠬᠢᠨ ᠳ᠋ᠦ᠍ ᠤᠶᠠᠬᠠᠨ ᠠᠭᠠᠳ ᠰᠦᠷᠯᠢᠭ ᠰᠠᠢᠬᠠᠨ ᠠᠶᠠ ᠰᠣᠨᠣᠰᠤᠭᠳᠠᠨᠠ᠃ ᠲᠡᠭᠦᠨ ᠢ᠋ ᠴᠢᠩᠨᠠᠬᠤ ᠳ᠋ᠤ᠌ ᠴᠠᠭᠠᠨᠠ ᠨᠢ ᠶᠠᠮᠠᠷ ᠨᠢᠭᠡᠨ ᠶᠡᠬᠡ ᠦᠢᠯᠡ ᠶᠠᠪᠤᠳᠠᠯ ᠣᠪᠣᠯᠵᠠᠨ ᠪᠠᠢᠭᠠ ᠭᠡᠬᠦ ᠤᠤ᠂ ᠬᠦᠨᠳᠦᠲᠦ ᠬᠥᠮᠦᠨ ᠮᠣᠷᠢᠯᠠᠨ ᠢᠷᠡᠵᠦ ᠶᠣᠰᠣ ᠬᠢᠵᠦ ᠪᠠᠢᠭᠠ᠂ ᠣᠯᠠᠨ ᠵᠠᠭᠤᠨ ᠮᠣᠷᠢᠲᠠᠨ ᠳᠠᠪᠬᠢᠯᠳᠤᠨ ᠤᠷᠤᠯᠳᠤᠵᠤ ᠪᠠᠢᠭᠠ᠂ ᠶᠡᠬᠡ ᠨᠠᠭᠠᠳᠤᠮ ᠬᠢᠵᠦ ᠵᠦᠢᠯ ᠵᠦᠢᠯ ᠦ᠋ᠨ ᠬᠥᠭᠵᠢᠶᠡᠨᠲᠦ ᠶᠠᠪᠤᠳᠠᠯ ᠪᠣᠯᠵᠤ ᠣᠯᠠᠨ ᠪᠦᠭᠦᠳᠡᠭᠡᠷ ᠴᠡᠩᠭᠡᠨ ᠪᠣᠢ ᠮᠡᠲᠦ ᠶᠠᠪᠤᠳᠠᠯ ᠤ᠋ᠳ ᠰᠡᠳᠬᠢᠯ ᠳ᠋ᠦ᠍ ᠨᠢ ᠪᠠᠭᠤᠵᠤ ᠣᠷᠣᠵᠤ ᠢᠷᠡᠨ᠂ ᠲᠡᠭᠦᠨ ᠢ᠋ ᠴᠢᠩᠨᠠᠭᠠᠳ ᠪᠠᠬᠠᠨ ᠰᠠᠭᠤᠭᠠᠳ ᠰᠦᠷᠯᠢᠭ ᠰᠠᠢᠬᠠᠨ ᠳᠠᠭᠤ ᠲᠠᠢ ᠬᠥᠭᠵᠢᠮ ᠦ᠋ᠨ ᠠᠶᠠ ᠶ᠋ᠢ ᠰᠣᠨᠣᠰᠤᠯᠠ᠃ ᠨᠡᠯᠢᠶᠡᠳ ᠤᠳᠠᠭᠠᠨ ᠰᠠᠭᠤᠵᠤ ᠴᠢᠩᠨᠠᠪᠠᠯ ᠬᠥᠭᠵᠢᠮ ᠦ᠋ᠨ ᠠᠶᠠ ᠲᠠᠩᠳᠠ ᠥᠭᠡᠷᠡᠴᠢᠯᠡᠭᠳᠡᠨ᠂ ᠶᠠᠮᠠᠷ ᠨᠢᠭᠡ ᠲᠡᠢᠨ ᠳᠣᠯᠣᠭᠠᠨ ᠬᠢᠵᠦ ᠪᠣᠢ ᠮᠡᠲᠦ ᠳᠡᠰ ᠨᠢᠰ ᠪᠠᠭᠤᠭᠰᠠᠨ᠂ ᠬᠥᠮᠦᠨ ᠠᠮᠢᠲᠠᠨ᠂ ᠮᠣᠷᠢ ᠮᠠᠯ ᠡᠯᠳᠡᠪ ᠢ᠋ᠶ᠋ᠡᠷ ᠱᠤᠤᠭᠢᠯᠳᠤᠨ ᠪᠠᠢᠭᠠ ᠶᠠᠩᠵᠤᠲᠠᠢ ᠶᠠᠭᠤᠮᠠ ᠰᠣᠨᠣᠰᠤᠭᠳᠠᠪᠠ᠃ ᠬᠦᠯᠦᠭ ᠡᠨᠡ ᠶᠠᠭᠤ ᠶ᠋ᠢ ᠥᠭᠦᠯᠡᠨ ᠬᠥᠭᠵᠢᠮᠳᠡᠵᠦ ᠪᠠᠢᠭᠠ ᠶᠤᠮ ᠪᠣᠯ ? ᠭᠡᠵᠦ ᠪᠣᠳᠣᠨ᠂ ᠲᠡᠭᠦᠨ ᠢ᠋ ᠣᠢᠯᠠᠭᠠᠬᠤ ᠰᠠᠨᠠᠭᠠᠲᠠᠢ ᠨᠢᠳᠦ ᠪᠡᠨ ᠠᠨᠢᠵᠤ ᠰᠠᠭᠤᠭᠠᠳ ᠴᠢᠩᠨᠠᠪᠠᠯ ᠶᠡᠬᠡ ᠲᠣᠮᠣ ᠲᠤᠯᠤᠯᠳᠤᠭᠠᠨ ᠳ᠋ᠤ᠌᠂ ᠡᠩ ᠦᠭᠡᠢ ᠲᠠᠯᠠ ᠭᠠᠵᠠᠷ ᠳᠡᠭᠡᠷᠡ ᠣᠯᠠᠨ ᠮᠣᠷᠢᠲᠠᠨ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠤᠷᠲᠤ ᠵᠢᠳᠠ ᠰᠡᠷᠡᠯᠵᠡᠭᠦᠯᠦᠨ ᠳᠣᠪᠲᠣᠯᠤᠨ ᠳᠠᠭᠠᠷᠢᠵᠤ ᠪᠠᠢᠭᠠ ᠶᠤᠮ ᠰᠢᠭ᠋᠂ ᠲᠡᠷᠡ ᠣᠯᠠᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠬᠤᠪᠢᠯᠠᠢ᠂ ᠠᠷᠢᠬᠪᠦ᠋ᠬᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠲᠠᠬᠢᠷ ᠢᠯᠳᠦ ᠳᠠᠯᠠᠢᠭᠠᠳ ᠮᠣᠷᠢᠨ ᠤ᠋ ᠬᠤᠷᠳᠤ ᠪᠠᠷ ᠬᠠᠷᠪᠤᠨ ᠣᠷᠣᠵᠤ ᠢᠷᠡᠵᠦ ᠪᠠᠢᠬᠤ ᠶᠠᠩᠵᠤᠲᠠᠢ ᠶᠠᠭᠤᠮᠠ ᠳᠦᠷᠰᠦᠯᠡᠭᠲᠦᠨ ᠪᠣᠳᠣᠭᠳᠠᠯᠠ᠃ 《ᠨᠢᠭᠦᠯ ᠪᠠᠢᠭᠠ》 ᠭᠡᠵᠦ ᠵᠠᠷᠤᠭᠠᠯ ᠤ᠋ᠨ ᠡᠷᠡ ᠨᠢᠳᠦ ᠪᠡᠨ ᠨᠡᠭᠡᠭᠡᠭᠡᠳ ᠬᠠᠷᠠᠪᠠᠯ ᠨᠥᠭᠦᠭᠡ ᠣᠯᠠᠨ ᠬᠥᠭᠵᠢᠮᠴᠢᠳ ᠡᠩᠨᠡᠵᠦ ᠰᠠᠭᠤᠭᠠᠳ ᠯᠠ ᠲᠤᠰ ᠲᠤᠰ ᠤ᠋ᠨ ᠢ᠋ᠶ᠋ᠠᠨ ᠬᠥᠭᠵᠢᠮ ᠢ᠋ ᠳᠤᠤᠭᠠᠷᠭᠠᠨ ᠲᠠᠢᠪᠤᠩ ᠲᠠᠪᠠᠲᠠᠢ ᠰᠤᠷᠭᠠᠭᠤᠯᠢᠯᠠᠵᠤ ᠪᠠᠢᠪᠠ᠃
— ᠵᠠ ᠪᠢ ᠡᠨᠡ ᠬᠥᠭᠵᠢᠮ ᠦ᠋ᠨ ᠡᠭᠡᠰᠢᠭ ᠳᠠᠭᠤ ᠶ᠋ᠢ ᠣᠢᠯᠠᠭᠠᠬᠤ ᠦᠭᠡᠢ ᠶᠦᠮ ᠪᠠᠢᠨᠠ ᠭᠡᠵᠦ ᠬᠦᠯᠦᠭ ᠥᠪᠡᠷ ᠲᠦ᠍ ᠪᠡᠨ ᠬᠡᠯᠡᠭᠡᠳ ᠲᠠᠩᠬᠢᠮ ᠠ᠋ᠴᠠ ᠭᠠᠷᠴᠠᠢ᠃
ᠲᠡᠷᠡ ᠪᠡᠷ ᠬᠣᠶᠠᠷ ᠡᠳᠦᠷ ᠬᠣᠲᠠ ᠪᠠᠷ ᠶᠠᠪᠤᠵᠤ᠂ ᠶᠡᠬᠡ ᠬᠡᠷᠡᠮ ᠦ᠋ᠨ ᠳᠥᠷᠪᠡᠨ ᠬᠠᠭᠠᠯᠭᠠᠨ ᠲᠤᠰ ᠪᠠᠢᠭᠠ ᠬᠤᠳᠠᠯᠳᠤᠭᠠᠨ ᠤ᠋ ᠵᠠᠬᠠ ᠳᠡᠭᠡᠭᠦᠷ ᠲᠡᠨᠦᠯᠡ᠃ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠭᠠᠷ ᠳᠡᠭᠡᠷᠡ ᠪᠠᠢᠬᠤ ᠦᠭᠡᠢ ᠶᠠᠭᠤᠮᠠ ᠦᠭᠡᠢ ᠮᠡᠲᠦ᠃ ᠠᠷᠠᠪ᠂ ᠫᠧᠷᠰ ᠦ᠋ᠨ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠳᠡᠯᠭᠡᠨ ᠲᠠᠯᠪᠢᠭᠰᠠᠨ ᠲᠣᠷᠭᠠ᠂ ᠬᠡᠪᠢᠰ᠂ ᠲᠥᠪᠡᠳ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠵᠠᠷᠤᠬᠤ ᠭᠡᠵᠦ ᠪᠣᠢ ᠬᠣᠷᠭᠣᠢ᠂ ᠲᠠᠷᠮᠠ ᠵᠡᠷᠭᠡ ᠡᠴᠡ ᠭᠠᠳᠠᠨᠠ ᠮᠣᠩᠭᠣᠯ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠪᠠᠷᠢᠭᠰᠠᠨ ᠮᠥᠩᠭᠥᠨ ᠳᠤᠨᠤᠭᠳᠠᠢ ᠬᠡᠲᠡ ᠬᠢᠲᠤᠭᠠ᠂ ᠪᠡᠯᠡᠭ ᠰᠡᠯᠲᠡ ᠨᠢ ᠪᠤᠰᠤᠳ ᠤ᠋ᠨ ᠡᠳ᠋ ᠪᠠᠷᠠᠭᠠᠨ ᠠ᠋ᠴᠠ ᠢᠯᠡᠭᠦᠦ ᠭᠣᠶᠣ ᠴᠢᠨᠰᠠᠭᠠ ᠲᠠᠢ ᠪᠠᠢᠵᠤ ᠬᠠᠷᠠᠭᠳᠠᠯᠠ᠃ ᠬᠦᠯᠦᠭ ᠬᠤᠳᠠᠯᠳᠤᠭᠠ ᠬᠢᠬᠦ ᠪᠡᠷ ᠶᠠᠪᠤᠭᠠ ᠪᠢᠰᠢ᠂ ᠵᠦᠭᠡᠷ ᠰᠣᠨᠢᠷᠬᠠᠭᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠲᠡᠷᠡ ᠪᠦᠬᠦᠨ ᠢ᠋ ᠦᠵᠡᠭᠡᠳ᠂ 《ᠮᠠᠨ ᠤ᠋ ᠬᠤᠪᠢᠯᠠᠢ ᠶ᠋ᠢᠨ ᠵᠠᠬᠢᠷᠤᠨ ᠪᠣᠢ ᠨᠤᠲᠤᠭ ᠲᠤ᠌ ᠡᠢᠮᠦ ᠶᠡᠬᠡ ᠡᠳ᠋ ᠪᠠᠷᠠᠭᠠ ᠬᠤᠳᠠᠯᠳᠤᠵᠤ ᠪᠠᠢᠭᠠ ᠭᠠᠵᠠᠷ ᠣᠯᠠᠨ ᠲᠠᠭᠠᠷᠠᠯᠳᠤᠳᠠᠭ ᠦᠭᠡᠢ ᠳᠡ᠃ ᠬᠢᠲᠠᠳ ᠤ᠋ᠳ ᠪᠢᠳᠡᠨ ᠢ᠋ ᠶᠠᠭᠤᠮᠠ ᠪᠠᠨ ᠪᠤᠯᠢᠶᠠᠵᠤ ᠠᠪᠤᠨᠠ ᠭᠡᠵᠦ ᠪᠣᠳᠣᠭᠠᠳ ᠨᠢᠭᠤᠵᠤ ᠣᠷᠬᠢᠭᠰᠠᠨ ᠪᠠᠢᠭᠠ ᠨᠢ ᠲᠡᠷᠡ ᠪᠢᠵᠡ᠃ ᠮᠣᠩᠭᠣᠯ ᠴᠡᠷᠢᠭ ᠪᠤᠰᠤᠳ ᠤ᠋ᠨ ᠶᠠᠭᠤᠮᠠ ᠶ᠋ᠢ ᠠᠷᠠᠢ ᠴᠦ᠍ ᠰᠢᠭᠤᠳ ᠪᠤᠯᠢᠶᠠᠵᠤ ᠠᠪᠬᠤ ᠦᠭᠡᠢ᠃ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠶᠡᠬᠡ ᠬᠠᠭᠠᠨ ᠤ᠋ ᠵᠠᠷᠯᠢᠭᠳᠠᠶ ᠢ᠋ ᠪᠢᠳᠡ ᠮᠠᠲᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ》 ᠭᠡᠮᠡᠨ ᠪᠣᠳᠣᠵᠤ ᠶᠠᠪᠤᠪᠠ᠃ ᠲᠡᠷᠡ ᠪᠡᠷ ᠲᠡᠨᠦᠵᠦ ᠶᠠᠪᠤᠭᠠᠳ ᠪᠠᠷᠠᠭᠤᠨ ᠵᠠᠬᠠ ᠳᠡᠭᠡᠷᠡ ᠪᠠᠬᠠᠨ ᠱᠢᠷᠦ᠂ ᠰᠤᠪᠤᠳ ᠬᠡᠯᠬᠢᠨ ᠬᠦᠵᠦᠭᠦᠨ ᠳ᠋ᠦ᠍ ᠪᠡᠨ ᠤᠭᠯᠠᠭᠠᠳ ᠶᠠᠪᠤᠵᠤ ᠪᠠᠢᠭᠠ ᠨᠢᠭᠡ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠶᠠᠭᠤᠮᠠ ᠶ᠋ᠢ ᠦᠵᠡᠵᠦ ᠰᠣᠨᠢᠷᠬᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠰᠠᠢᠬᠠᠨ ᠱᠢᠷᠦ ᠪᠠᠢᠨᠠ ᠰᠢᠦ᠃ ᠳᠡᠢᠯᠦᠭᠳᠡᠬᠦ ᠦᠭᠡᠢ ᠶᠡᠬᠡ ᠦᠨᠡᠲᠡᠢ ᠡᠳ᠋ ᠪᠢᠵᠡ ᠳᠡ᠃ ᠨᠢᠭᠡ ᠲᠣᠮᠣ ᠱᠢᠷᠦ ᠶᠠᠮᠠᠷ ᠦᠨᠡᠲᠡᠢ ᠭᠡᠳᠡᠭ ᠪᠣᠯ ᠭᠡᠵᠦ ᠳᠡᠷᠭᠡᠳᠡᠬᠢ ᠬᠥᠮᠦᠨ ᠡᠴᠡ ᠪᠡᠨ ᠠᠰᠠᠭᠤᠪᠠᠯ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠢᠯᠭᠠᠰᠤᠨ ᠨᠣᠭᠲᠣ ᠲᠠᠢ ᠶᠤᠮ ᠰᠢᠭ᠋ ᠰᠠᠬᠠᠯ ᠦᠰᠦ ᠪᠡᠨ ᠤᠷᠭᠤᠭᠤᠯᠤᠭᠰᠠᠨ ᠥᠨᠳᠥᠷ ᠬᠠᠮᠠᠷᠳᠠᠢ ᠲᠡᠷᠡ ᠬᠤᠳᠠᠯᠳᠤᠭᠠᠴᠢᠨ ᠮᠣᠩᠭᠣᠯ ᠬᠡᠯᠡ ᠪᠡᠷ ᠶᠠᠷᠢᠵᠤ᠂ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠯᠴᠠᠭᠠᠳ ᠢᠨᠢᠶᠡᠪᠬᠢᠯᠡᠨ᠄
— ᠪᠢ ᠵᠠᠷᠤᠬᠤ ᠶᠠᠭᠤᠮᠠᠨ ᠤ᠋ ᠪᠠᠨ ᠦᠨᠡ ᠶ᠋ᠢ ᠲᠡᠭᠷᠢ ᠳ᠋ᠦ᠍ ᠬᠠᠲᠠᠭᠠᠬᠤ ᠦᠭᠡᠢ᠃ ᠪᠢ ᠮᠣᠩᠭᠣᠯ ᠳᠠᠷᠬᠠᠨ ᠤ᠋ ᠤᠷᠠᠯᠠᠭᠰᠠᠨ ᠰᠠᠢᠬᠠᠨ ᠮᠥᠩᠭᠥᠨ ᠬᠡᠲᠡ ᠬᠢᠲᠤᠭᠠ ᠣᠯᠵᠤ ᠠᠪᠬᠤ ᠰᠠᠨᠠᠭᠠᠲᠠᠢ᠃ ᠮᠢᠨᠦ ᠱᠢᠷᠦ ᠰᠤᠪᠤᠳ ᠪᠣᠯ ᠲᠣᠮᠣ᠂ ᠥᠩᠭᠡ ᠰᠠᠢᠨ ᠲᠠᠢ᠂ ᠱᠢᠷᠦ ᠨᠢ ᠤᠯᠠᠭᠠᠨ ᠳᠠᠯᠠᠢ ᠶ᠋ᠢᠨ ᠰᠢᠷᠤᠨ ᠠᠷᠠᠯ ᠤ᠋ᠨ ᠰᠢᠦ᠃ ᠲᠡᠨᠳᠡᠬᠢ ᠶ᠋ᠢᠨ ᠱᠢᠷᠦ ᠳᠡᠯᠡᠬᠡᠢ ᠶ᠋ᠢᠨ ᠵᠠᠬᠠ ᠵᠡᠭᠡᠯᠢ ᠳᠡᠭᠡᠷᠡ ᠬᠡᠵᠢᠶᠡᠳᠡ ᠲᠡᠷᠢᠭᠦᠨ ᠪᠠᠢᠳᠠᠭ ᠭᠡᠪᠡ᠃
— ᠠ᠂ ᠬᠥᠭᠡᠷᠦᠬᠦᠢ᠂ ᠮᠣᠩᠭᠣᠯ ᠬᠡᠯᠡ ᠶ᠋ᠢ ᠡᠢᠮᠦ ᠴᠡᠪᠡᠷᠬᠡᠨ ᠶᠠᠷᠢᠵᠤ ᠰᠤᠷᠤᠭᠰᠠᠨ ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠨ ᠪᠠᠰᠠ ᠪᠠᠢᠳᠠᠭ ᠶᠤᠮ ᠠ᠋᠃ ᠶᠡᠬᠡ ᠰᠡᠷᠭᠦᠯᠡᠩ ᠡᠷᠡ ᠪᠠᠢᠨᠠ᠃ ᠵᠠ ᠲᠠᠨᠢᠯᠴᠠᠶᠠ ᠭᠡᠵᠦ ᠬᠦᠯᠦᠭ ᠬᠡᠯᠡᠭᠡᠳ ᠬᠤᠳᠠᠯᠳᠤᠭᠠᠴᠢᠨ ᠳ᠋ᠤ᠌ ᠣᠢᠷᠠᠲᠤᠪᠠᠯ ᠬᠢᠯᠭᠠᠰᠤᠨ ᠨᠤᠭᠳᠤᠳᠤ ᠬᠥᠮᠦᠨ ᠢᠨᠢᠶᠡᠭᠰᠡᠭᠡᠷ᠄
— ᠮᠢᠨᠦ ᠦᠭᠡ ᠣᠢᠯᠠᠭᠠᠭᠳᠠᠬᠤ ᠪᠠᠷ ᠪᠠᠢᠨᠠ ᠤᠤ ? ᠪᠢ ᠥᠪᠡᠷ ᠢ᠋ ᠪᠡᠨ ᠦᠬᠡᠷ ᠠᠳᠠᠯᠢ ᠮᠥᠭᠡᠷᠡᠵᠦ ᠶᠠᠪᠤᠭᠠ ᠪᠠᠢᠬᠤ ᠭᠡᠵᠦ ᠪᠣᠳᠣᠳᠠᠭ ᠭᠡᠮᠡᠨ ᠠᠯᠢᠶᠠᠯᠠᠨ ᠬᠡᠯᠡᠵᠦ ᠢᠨᠢᠶᠡᠳᠦᠮ ᠪᠣᠯᠤᠯᠠ᠃ ᠢᠩᠭᠢᠭᠡᠳ ᠲᠡᠳᠡ ᠲᠠᠨᠢᠯᠴᠠᠬᠤ ᠵᠠᠮ ᠳ᠋ᠤ᠌ ᠣᠷᠣᠵᠤ᠂ ᠬᠤᠳᠠᠯᠳᠤᠭᠠᠴᠢᠨ ᠡᠷᠡ ᠥᠪᠡᠷ ᠢ᠋ ᠪᠡᠨ ᠫᠧᠷᠰ ᠬᠥᠮᠦᠨ᠂ ᠲᠡᠨᠳᠡ ᠰᠠᠭᠤᠳᠠᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠤ᠋ ᠨᠢᠭᠡ ᠪᠠᠭᠠ ᠲᠦᠰᠢᠮᠡᠯ ᠢ᠋ᠶ᠋ᠡᠷ ᠬᠡᠯᠡ ᠵᠢᠭᠠᠯᠭᠠᠭᠰᠠᠨ᠃ ᠲᠣᠷᠭᠠᠨ ᠶᠡᠬᠡ ᠵᠠᠮ ᠢ᠋ᠶ᠋ᠠᠷ ᠨᠠᠭᠠᠰᠢ ᠪᠠᠨ ᠶᠠᠪᠤᠵᠤ ᠢᠷᠡᠭᠰᠡᠨ᠃ ᠬᠤᠳᠠᠯᠳᠤᠬᠤ ᠶᠠᠭᠤᠮᠠ ᠨᠠᠯᠢᠶᠠᠨ ᠪᠣᠢ ᠭᠡᠬᠦ ᠵᠡᠷᠭᠡ ᠪᠡᠷ ᠶᠠᠷᠢᠯᠴᠠᠯᠠ᠃ ᠬᠦᠯᠦᠭ ᠴᠦ᠍ ᠬᠠᠷᠢᠭᠤ ᠳᠠᠭᠤ ᠦᠭᠡᠢ ᠪᠠᠢᠭᠰᠠᠨ ᠦᠭᠡᠢ᠂ ᠥᠪᠡᠷ ᠢ᠋ ᠪᠡᠨ ᠮᠣᠩᠭᠣᠯᠴᠤᠳ《ᠬᠦᠷᠡᠩ ᠰᠠᠬᠠᠯᠲᠤ》 ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠪᠢ ᠮᠢᠲ᠋ᠤᠯᠯᠢ ᠬᠣᠮᠢᠨᠢ ᠭᠡᠳᠡᠭ ᠨᠡᠷᠡ ᠲᠡᠢ᠂ ᠵᠦᠭᠡᠷ ᠬᠣᠮᠢᠨᠢ ᠭᠡᠳ ᠯᠡ ᠳᠠᠭᠤᠳᠠᠪᠠᠯ ᠪᠣᠯᠤᠨᠠ ᠭᠡᠯᠡ᠃
ᠬᠣᠮᠢᠨᠢ ᠴᠠᠭᠠᠨ ᠬᠡᠷᠡᠮ ᠡᠴᠡ ᠣᠷᠣᠭᠰᠢ ᠭᠠᠷᠴᠤ ᠦᠵᠡᠬᠦ ᠰᠠᠨᠠᠭᠠᠲᠠᠢ᠂ ᠵᠢᠭᠠᠬᠠᠨ ᠭᠠᠭᠴᠠᠭᠠᠷᠳᠠᠭᠠᠳ ᠪᠠᠢᠭᠠ᠃ ᠲᠠᠨ ᠢ᠋ ᠪᠠᠷᠠᠳᠠᠶᠠ ᠭᠡᠪᠡᠯ ᠬᠦᠯᠦᠭ ᠳᠤᠷᠠᠲᠠᠢ ᠵᠥᠪᠰᠢᠶᠡᠷᠡᠵᠦ᠂ ᠨᠢᠭᠡᠨ ᠰᠢᠨᠡ ᠲᠠᠨᠢᠯ ᠲᠠᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠨ ᠪᠠᠶᠠᠷᠯᠠᠵᠤ᠂ ᠪᠠᠷᠤᠭ ᠡᠳᠦᠷᠵᠢᠨ ᠵᠠᠬᠠ ᠪᠠᠷ ᠬᠠᠮᠲᠤ ᠶᠠᠪᠤᠯᠠ᠃ ᠮᠥᠷᠥ ᠪᠦᠲᠦᠨ ᠠᠶᠠᠲᠠᠢᠬᠠᠨ ᠮᠣᠩᠭᠣᠯ ᠳᠡᠪᠡᠯ ᠲᠡᠢ᠂ ᠳᠦᠷᠢᠮᠲᠦ ᠮᠠᠯᠠᠭᠠᠢ ᠡᠮᠦᠰᠦᠭᠰᠡᠨ ᠡᠨᠡ ᠮᠣᠩᠭᠣᠯ ᠡᠷᠡ ᠶ᠋ᠢ ᠬᠡᠨ ᠴᠦ᠍ ᠴᠠᠭᠠᠰᠢ ᠪᠠᠨ ᠭᠡᠬᠦ ᠦᠭᠡᠢ ᠭᠡᠬᠦ ᠤᠤ᠂ ᠭᠣᠶᠣ ᠭᠠᠩᠭᠠᠩ ᠡᠷᠡ ᠪᠢᠰᠢ ᠴᠦ᠍ ᠭᠡᠰᠡᠨ ᠳᠠᠭᠠᠭᠠᠮᠠᠯ ᠤ᠋ᠳ ᠤ᠋ᠨ ᠳᠣᠲᠣᠷᠠ ᠮᠠᠭᠤ ᠳ᠋ᠤ᠌ ᠪᠠᠨ ᠣᠷᠣᠬᠤ ᠪᠠᠷ ᠦᠭᠡᠢ ᠬᠣᠪᠴᠠᠰᠤᠲᠠᠢ ᠶᠠᠪᠤᠭᠠ ᠪᠢᠯᠡ᠃ ᠬᠣᠮᠢᠨᠢ ᠬᠦᠯᠦᠭ ᠬᠣᠶᠠᠷ ᠣᠯᠠᠨ ᠵᠦᠢᠯ ᠳᠡᠭᠡᠷᠡ ᠶᠠᠷᠢᠶᠠ ᠨᠡᠢᠯᠡᠵᠦ᠂ ᠬᠤᠳᠠᠯᠳᠤᠭᠠᠴᠢ ᠶ᠋ᠢ ᠨᠠᠯᠢᠶᠠᠨ ᠬᠡᠳᠦᠨ ᠱ᠌ᠢᠷᠦ᠂ ᠰᠤᠪᠤᠳ ᠵᠠᠷᠤᠬᠤ ᠶ᠋ᠢ ᠬᠠᠷᠠᠯᠠ᠃ ᠲᠡᠭᠦᠨ ᠢ᠋ ᠤᠷᠠᠨ ᠬᠢᠴᠡ ᠲᠡᠢ ᠮᠥᠩᠭᠥᠨ ᠬᠡᠲᠡ ᠬᠢᠲᠤᠭᠠ ᠦᠨᠡᠯᠡᠨ ᠠᠪᠬᠤ ᠳ᠋ᠤ᠌ ᠨᠢ ᠬᠦᠯᠦᠭ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠣᠰᠢᠭᠤ ᠨᠡᠮᠡᠷᠢᠯᠡᠵᠦ ᠶᠠᠪᠤᠪᠠ᠃ ᠢᠩᠭᠢᠭᠡᠳ ᠲᠡᠳᠡ ᠠᠨᠳᠠ ᠪᠣᠯᠵᠤ᠂ ᠤᠷᠤᠭᠰᠢ ᠪᠠᠨ ᠺᠡᠢᠫᠢᠩ ᠦ᠋ᠨ ᠵᠦᠭ ᠶᠠᠪᠤᠬᠤ ᠳ᠋ᠤ᠌ ᠨᠢ ᠵᠠᠮ ᠨᠡᠢᠯᠡᠬᠦ ᠪᠡᠷ ᠲᠣᠬᠢᠷᠠᠯᠴᠠᠨ᠂ ᠡᠳᠦᠷ ᠰᠤᠳᠤᠷ ᠢ᠋ᠶ᠋ᠠᠨ ᠲᠣᠪᠯᠠᠭᠠᠳ᠂ ᠣᠳᠣ ᠪᠠᠷ ᠡᠨᠡ ᠵᠠᠬᠠ ᠳᠡᠭᠡᠷᠡ ᠠᠭᠤᠯᠵᠠᠵᠤ ᠪᠠᠢᠬᠤ ᠪᠣᠯᠪᠠ᠃
ᠬᠣᠶᠠᠷ ᠬᠣᠨᠣᠭᠠᠳ ᠶᠡᠬᠡ ᠵᠠᠬᠢᠷᠤᠭᠴᠢ ᠠᠷᠢᠬᠪᠥ᠋ᠬᠡ ᠬᠣᠲᠠ ᠳ᠋ᠤ᠌ ᠢᠷᠡᠭᠰᠡᠨ ᠴᠢᠮᠡᠭᠡ ᠲᠡᠢ᠃ ᠬᠦᠯᠦᠭ ᠬᠤᠪᠴᠠᠰᠤ ᠪᠠᠨ ᠶᠠᠩᠵᠤᠯᠠᠵᠤ ᠡᠮᠦᠰᠦᠭᠡᠳ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠣᠴᠢᠪᠠᠯ ᠵᠠᠬᠢᠷᠤᠭᠴᠢ ᠥᠭᠡᠷᠡ ᠦᠷᠭᠦᠭᠡᠨ ᠳ᠋ᠦ᠍ ᠶᠠᠮᠤᠯᠠᠳᠠᠭ ᠭᠡᠨᠡ᠃ ᠲᠡᠨᠳᠡ ᠨᠢ ᠣᠴᠢᠵᠤ ᠳᠡᠷᠭᠡᠳᠡ ᠶ᠋ᠢᠨ ᠪᠠᠷᠠ ᠪᠣᠯᠤᠭᠴᠢ ᠳ᠋ᠤ᠌ ᠨᠢ ᠬᠦᠯᠦᠭ ᠤᠴᠢᠷ ᠢ᠋ᠶ᠋ᠠᠨ ᠭᠠᠷᠭᠠᠨ ᠬᠡᠯᠡᠪᠡᠯ ᠬᠢᠶᠡ ᠨᠢ ᠴᠠᠭᠠᠰᠢ ᠨᠢ ᠤᠯᠠᠮᠵᠢᠯᠠᠭᠠᠳ ᠦᠳᠡ ᠶ᠋ᠢᠨ ᠮᠣᠷᠢᠨ ᠴᠠᠭ ᠲᠤ ᠪᠠᠷᠠᠯᠬᠠᠬᠤ ᠭᠡᠯᠡ᠃ ᠲᠣᠪᠯᠠᠭᠰᠠᠨ ᠴᠠᠭ ᠲᠤ ᠨᠢ ᠡᠯᠴᠢ ᠮᠠᠨᠢ ᠬᠦᠷᠦᠯᠴᠡᠨ ᠣᠴᠢᠪᠠᠯ ᠬᠣᠣᠰᠯᠠᠭᠤᠯᠵᠤ ᠪᠠᠷᠢᠭᠰᠠᠨ ᠲᠣᠮᠣ ᠥᠷᠭᠥᠭᠡ ᠭᠡᠷ ᠲᠦ᠍ ᠠᠷᠢᠬᠪᠥ᠋ᠬᠡ ᠵᠠᠬᠢᠷᠤᠭᠴᠢ ᠬᠦᠯᠦᠭ ᠢ᠋ ᠪᠠᠷᠠᠯᠠᠭᠭᠤᠯᠤᠯᠠ᠃ ᠪᠢᠲᠡᠭᠦᠦ ᠢᠰᠡᠭᠡᠢ ᠰᠢᠷᠢᠮᠡᠯ ᠰᠢᠷᠢᠳᠡᠭ ᠲᠡᠢ᠂ ᠴᠡᠩᠬᠡᠷ ᠲᠣᠷᠭᠠᠨ ᠬᠥᠰᠢᠭᠡ ᠲᠠᠲᠠᠭᠰᠠᠨ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠬᠣᠢᠮᠣᠷ ᠲᠤ ᠵᠤᠵᠠᠭᠠᠨ ᠣᠯᠪᠤᠭᠲᠤ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠭᠰᠠᠨ ᠠᠷᠢᠬᠪᠥ᠋ᠬᠡ ᠨᠣᠶᠠᠨ ᠦᠷᠭᠦᠭᠡᠨ ᠦ᠌ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠬᠦ ᠳ᠋ᠦ᠍ ᠯᠡ ᠰᠦᠷᠯᠢᠭ ᠠᠭᠠᠳ᠂ ᠨᠢᠳᠦ ᠪᠤᠯᠢᠶᠠᠭᠰᠠᠨ ᠰᠠᠢᠬᠠᠨ ᠡᠷᠡ ᠪᠠᠢᠵᠤ ᠬᠠᠷᠠᠭᠳᠠᠪᠠ᠃ ᠠᠷᠭᠠ ᠦᠭᠡᠢ ᠯᠡ ᠬᠠᠭᠠᠨ ᠬᠥᠪᠡᠭᠦᠨ ᠪᠤᠶᠤ ᠨᠡᠢᠰᠯᠡᠯ ᠦ᠋ᠨ ᠶᠡᠬᠡ ᠵᠠᠬᠢᠷᠤᠭᠴᠢ ᠡᠢᠮᠦ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠮᠡᠷ ᠨᠢᠳᠦ ᠳᠦᠭᠦᠷᠡᠩ ᠭᠡᠷᠡᠯᠲᠡᠢ ᠪᠠᠢᠵᠤ ᠦᠵᠡᠭᠳᠡᠨᠡ᠃ ᠥᠨᠳᠥᠷ ᠭᠤᠸᠠᠯᠢᠭ ᠨᠢᠷᠤᠭᠤ ᠲᠠᠢ᠂ ᠪᠡᠶᠡ ᠴᠢᠬᠡ ᠰᠢᠯᠤᠭᠤᠨ᠂ ᠳᠥᠷᠪᠡᠯᠵᠢᠨ ᠴᠡᠭᠡᠵᠢ ᠲᠡᠢ ᠡᠨᠡ ᠡᠷᠡ ᠥᠳᠬᠡᠨ ᠬᠥᠮᠦᠰᠬᠡᠨ ᠳᠣᠣᠷᠠ ᠡᠷᠭᠢᠯᠳᠦᠬᠦ ᠬᠤᠷᠴᠠ ᠬᠠᠷᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠦᠯᠦᠭ ᠢ᠋ ᠰᠢᠷᠳᠡᠨ ᠠᠭᠤᠯᠵᠠᠪᠠ᠃ ᠬᠤᠪᠢᠯᠠᠢ ᠶ᠋ᠢᠨ ᠡᠮᠦᠨᠡ ᠰᠦᠷᠳᠡᠨ ᠰᠠᠨᠳᠤᠷᠳᠠᠭ ᠦᠭᠡᠢ ᠶᠠᠪᠤᠳᠠᠭ ᠬᠦᠯᠦᠭ ᠡᠨᠡ ᠵᠠᠬᠢᠷᠤᠭᠴᠢ ᠶ᠋ᠢ ᠬᠠᠷᠠᠭᠠᠳ ᠬᠠᠮᠤᠭ ᠪᠡᠶᠡ ᠶ᠋ᠢᠨ ᠬᠢᠨᠢ ᠬᠥᠯᠥᠰᠥ ᠳᠠᠭᠠᠪᠤᠷᠢᠯᠠᠬᠤ ᠰᠢᠭ᠋ ᠪᠣᠯᠵᠤ᠂ ᠠᠢᠯᠠᠳᠬᠠᠬᠤ ᠵᠦᠢᠯ ᠢ᠋ᠶ᠋ᠡᠨ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠬᠡᠯᠡᠭᠡᠳ᠂ ᠳᠤᠭᠲᠤᠢᠲᠤ ᠪᠢᠴᠢᠭ ᠢ᠋ᠶ᠋ᠡᠨ ᠡᠷᠭᠦᠨ ᠪᠠᠷᠢᠯᠠ᠃ ᠠᠷᠢᠬᠪᠥ᠋ᠬᠡ ᠤᠭ ᠪᠢᠴᠢᠭ ᠢ᠋ ᠵᠠᠳᠠᠯᠤᠨ ᠦᠵᠡᠭᠰᠡᠨ ᠳᠣᠣᠷᠠ ᠪᠠᠨ ᠬᠦᠯᠦᠭ ᠦ᠋ᠨ ᠨᠢᠭᠤᠷ ᠥᠭᠡᠳᠡ ᠬᠠᠷᠠᠵᠤ᠄
— ᠠᠬᠠ ᠶᠠᠭᠤ ᠪᠣᠯᠭᠣᠭᠠᠵᠤ ᠪᠠᠢᠨᠠ ᠪᠣᠢ? ᠡᠭᠦᠨ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠬᠡᠯᠡᠭᠦᠯᠦᠭᠰᠡᠨ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃ ᠡᠯᠴᠢ ᠡᠷᠡ ᠪᠡᠶᠡ ᠪᠡᠨ ᠲᠠᠢᠪᠤᠩ ᠪᠠᠢᠯᠭᠠᠵᠤ᠂ ᠰᠢᠭᠤᠳ ᠰᠢᠯᠤᠭᠤᠬᠠᠨ ᠢ᠋ᠶ᠋ᠠᠷ᠄
— ᠶᠡᠬᠡ ᠵᠠᠬᠢᠷᠤᠭᠴᠢ ᠬᠢᠲᠠᠳ ᠡᠷᠳᠡᠮᠲᠡᠨ ᠨᠦ᠍ᠭᠦᠳ ᠲᠡᠢ ᠨᠣᠮ ᠨᠡᠢᠯᠡᠨ ᠪᠣᠯᠭᠣᠭᠠᠳᠠᠭ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠵᠠᠩᠵᠤᠨ ᠨᠤᠭᠤᠳ ᠢ᠋ ᠢᠷᠡᠭᠦᠯᠦᠨ ᠵᠥᠪᠯᠡᠯᠳᠦᠵᠦ ᠪᠠᠢᠭᠠ᠃ ᠳᠠᠭᠠᠵᠤ ᠪᠣᠳᠣᠪᠠᠯ ᠮᠥᠨ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠬᠦ ᠲᠤᠬᠠᠢ ᠬᠡᠯᠡᠯᠴᠡᠵᠦ ᠪᠠᠢᠭᠠ ᠪᠢᠵᠡ᠃ ᠪᠢ ᠲᠡᠷᠡ ᠪᠣᠯᠭᠠᠨ ᠳ᠋ᠤ᠌ ᠣᠷᠣᠯᠴᠠᠳᠠᠭ ᠦᠭᠡᠢ ᠤᠴᠢᠷ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠺᠡᠢᠫᠢᠩ ᠶᠡᠬᠡ ᠭᠣᠶᠣ ᠬᠣᠲᠠᠬᠠᠨ ᠪᠣᠯᠤᠭᠰᠠᠨ᠃ ᠵᠠᠬᠢᠷᠤᠭᠴᠢ ᠲᠡᠭᠦᠨ ᠳ᠋ᠦ᠍ ᠪᠡᠨ ᠢᠳᠡᠭᠡᠰᠢᠨ ᠳᠠᠭᠠᠯᠠᠳᠠᠭ ᠪᠣᠯᠤᠯᠲᠠᠢ ᠭᠡᠵᠦ ᠠᠢᠯᠠᠳᠬᠠᠯᠠ᠃
— ᠴᠢ ᠶᠠᠭᠤ ᠦᠢᠯᠡᠳᠴᠦ ᠪᠠᠢᠳᠠᠭ ᠲᠦᠰᠢᠮᠡᠯ ᠪᠣᠢ?
— ᠪᠢ ᠪᠢᠴᠢᠭ ᠪᠢᠴᠢᠳᠡᠭ᠃ ᠵᠠᠬᠢᠷᠤᠭᠴᠢ ᠶ᠋ᠢ ᠪᠢᠴᠢᠭ ᠪᠣᠯᠭᠠ ᠭᠡᠰᠡᠨ ᠢ᠋ ᠯᠡ᠃
— ᠴᠢ ᠶᠠᠮᠠᠷ ᠶᠠᠮᠠᠷ ᠬᠡᠯᠡ ᠪᠢᠴᠢᠭ ᠮᠡᠳᠡᠳᠡᠭ ᠡᠷᠳᠡᠮᠲᠡᠢ ᠬᠥᠮᠦᠨ ᠪᠣᠢ?
— ᠪᠢ ᠮᠣᠩᠭᠣᠯ ᠬᠡᠯᠡ ᠪᠡᠷ ᠪᠢᠴᠢᠳᠡᠭ᠃ ᠬᠢᠲᠠᠳ ᠬᠡᠯᠡ ᠵᠢᠭᠠᠯᠭᠠᠨ ᠪᠠᠭᠠ ᠵᠡᠷᠭᠡ ᠰᠤᠷᠤᠭᠰᠠᠨ᠃
— ᠠᠬᠠ ᠶ᠋ᠢᠨ ᠪᠠᠢᠳᠠᠯ ᠶᠠᠮᠠᠷ ᠪᠠᠢᠨᠠ ᠪᠣᠢ? ᠴᠣᠬᠣᠮ ᠶᠠᠭᠤ ᠶᠠᠷᠢᠳᠠᠭ ᠪᠣᠢ?
— ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ ᠳᠡᠭᠡᠳᠦᠰ ᠮᠢᠨᠢ! ᠲᠠᠨ ᠤ᠋ ᠠᠬᠠ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠣᠭᠣᠯ ᠨᠢ ᠶᠡᠬᠡ ᠰᠢᠳᠠᠷ ᠪᠢᠰᠢ᠃ ᠬᠡᠷᠡᠭ ᠶᠠᠪᠤᠳᠠᠯ ᠭᠠᠷᠤᠭᠠᠳ ᠳᠠᠭᠤᠳᠠᠪᠠᠯ ᠪᠠᠷᠠᠯᠬᠠᠨ᠂ ᠵᠠᠷᠯᠢᠭ ᠢ᠋ ᠨᠢ ᠪᠡᠶᠡᠯᠡᠭᠦᠯᠳᠡᠭ᠃ ᠪᠢᠴᠢᠭ ᠦᠢᠯᠡᠳᠬᠦ ᠲᠤᠬᠠᠢ ᠯᠠ ᠪᠠᠢᠳᠠᠭ ᠶᠤᠮ᠃ ᠴᠣᠬᠣᠮ ᠶᠠᠭᠤ ᠪᠣᠯᠭᠣᠭᠠᠵᠤ᠂ ᠶᠠᠮᠠᠷ ᠵᠦᠢᠯ ᠵᠠᠷᠯᠢᠭᠯᠠᠵᠤ ᠪᠠᠢᠳᠠᠭ ᠢ᠋ ᠨᠢ ᠪᠦᠷᠢᠨ ᠮᠡᠳᠡᠬᠦ ᠦᠭᠡᠢ᠃ ᠳᠡᠷᠭᠡᠳᠡ ᠨᠢ ᠬᠢᠲᠠᠳ ᠲᠦᠰᠢᠮᠡᠳ ᠨᠠᠷ ᠵᠣᠩᠬᠢᠯᠠᠨ ᠰᠢᠳᠠᠷᠯᠠᠵᠤ ᠪᠠᠢᠵᠤ ᠬᠠᠷᠠᠭᠳᠠᠳᠠᠭ ᠭᠡᠮᠡᠨ ᠬᠦᠯᠦᠭ ᠮᠡᠬᠦᠢᠨ ᠵᠣᠭᠰᠣᠵᠤ ᠠᠢᠯᠠᠳᠬᠠᠪᠠ᠃
— ᠵᠠ ᠲᠡᠢᠮᠦ ᠴᠦ᠍ ᠪᠢᠵᠡ ᠳᠡ᠃ ᠡᠵᠢ ᠶ᠋ᠢᠨ ᠪᠡᠶᠡ ᠶ᠋ᠢ ᠲᠠᠭᠠᠷᠠᠤᠬᠠᠨ ᠪᠠᠢᠬᠤ ᠳ᠋ᠤ᠌ ᠠᠬᠠ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠭᠡᠳ ᠠᠭᠤᠯᠵᠠᠵᠤ ᠣᠷᠬᠢᠬᠤ ᠦᠭᠡᠢ᠂ ᠲᠡᠨᠳᠡ ᠡᠴᠡ ᠨᠢᠭᠡ ᠴᠠᠭᠠᠰᠤ ᠰᠢᠲᠠᠵᠤ ᠣᠷᠬᠢᠭᠠᠳ᠂ ᠴᠠᠭᠠᠨ ᠪᠤᠳᠠᠭᠠ ᠰᠢᠪᠬᠠᠳᠠᠭᠠᠳ ᠰᠠᠭᠤᠵᠤ ᠪᠠᠢᠭᠠ ᠬᠡᠷᠡᠭ ᠤᠤ? ᠴᠢ ᠬᠡᠵᠢᠶᠡ ᠪᠤᠴᠠᠬᠤ ᠲᠦᠰᠢᠮᠡᠯ ᠪᠣᠢ? ᠭᠡᠵᠦ ᠠᠷᠢᠬᠪᠥ᠋ᠬᠡ ᠬᠢᠯᠢᠩᠲᠡᠢ ᠶᠦᠮ ᠰᠢᠭ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ ᠬᠡᠯᠡᠪᠡ᠃
— ᠪᠣᠭᠣᠯ ᠨᠢ ᠳᠡᠭᠡᠳᠦᠰ ᠲᠠᠨ ᠢ᠋ ᠪᠤᠴᠠ ᠭᠡᠰᠡᠨ ᠴᠠᠭ ᠲᠤ ᠶᠠᠪᠤᠶᠠ᠃ ᠤᠭ ᠨᠢ ᠡᠨᠡ ᠨᠡᠢᠰᠯᠡᠯ ᠳ᠋ᠦ᠍ ᠪᠡᠨ ᠪᠠᠢᠭᠠᠳ ᠪᠠᠢᠮᠠᠷ ᠰᠠᠢᠬᠠᠨ ᠪᠠᠢᠨᠠ ᠰᠢᠦ ᠭᠡᠵᠦ ᠬᠦᠯᠦᠭ ᠠᠢᠯᠠᠳᠬᠠᠯᠠ᠃
— ᠠ ᠲᠡᠢᠮᠦ ᠤᠤ᠃ ᠴᠢᠨᠦ ᠠᠬᠠᠨ ᠳᠡᠭᠦᠦᠰ ᠶᠠᠮᠠᠷ ᠬᠥᠮᠦᠰ ᠡᠨᠳᠡ ᠪᠠᠢᠳᠠᠭ ᠪᠣᠢ?
— ᠮᠢᠨᠦ ᠳᠡᠭᠦᠦ ᠪᠢᠯᠢᠭᠦᠨ ᠡᠨᠳᠡ ᠰᠢᠳᠠᠷᠯᠠᠨ ᠠᠯᠪᠠ ᠬᠠᠰᠢᠳᠠᠭ᠃ ᠲᠠ ᠪᠣᠯᠭᠣᠭᠠᠵᠤ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠰᠠᠶᠢ ᠲᠠᠨ ᠤ᠋ ᠵᠠᠷᠤᠭᠠᠯ ᠢ᠋ᠶ᠋ᠠᠷ ᠪᠠᠷᠠᠭᠤᠨ ᠣᠷᠣᠨ ᠳ᠋ᠤ᠌ ᠶᠠᠪᠤᠭᠰᠠᠨ᠂ ᠨᠢᠭᠡ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠬᠠᠷᠠ ᠬᠦᠦ ᠪᠠᠢᠭᠠ᠃ ᠤᠭ ᠨᠢ ᠢᠯᠳᠠᠮ ᠵᠥᠭᠡᠯᠡᠨ ᠪᠠᠢᠳᠠᠯᠲᠠᠢ ᠰᠢᠦ ᠶᠦᠮ ᠰᠠᠨ᠃
— ᠠ᠂ ᠪᠢ ᠮᠠᠲᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠭᠠᠳᠠᠭᠠᠳᠤ ᠠ᠋ᠴᠠ ᠢᠷᠡᠭᠰᠡᠨ ᠭᠡᠢᠴᠢᠳ᠂ ᠡᠯᠴᠢ ᠨᠠᠷ ᠲᠤ ᠰᠢᠳᠠᠷᠯᠠᠵᠤ ᠶᠠᠪᠤᠳᠠᠭ ᠶᠤᠮ᠃ ᠵᠦᠭᠡᠷ ᠬᠦᠦ ᠪᠣᠯᠤᠯᠲᠠᠢ ᠪᠢᠯᠡ᠃ ᠴᠢ ᠲᠡᠭᠦᠨ ᠦ᠌ ᠠᠬᠠ ᠨᠢ ᠶᠦᠮ ᠪᠣᠢ᠃
— ᠥᠷᠥᠰᠢᠶᠡ᠂ ᠶᠡᠬᠡ ᠨᠣᠶᠠᠨᠲᠠᠨ ᠮᠢᠨᠢ᠃ ᠲᠡᠢᠮᠦ᠂ ᠪᠢ ᠪᠢᠯᠢᠭᠦᠨ ᠦ᠌ ᠲᠥᠷᠥᠭᠰᠡᠨ ᠠᠬᠠ ᠨᠢ᠃
— ᠵᠠ᠂ ᠵᠠ᠃ ᠴᠢ ᠢᠩᠭᠢᠭᠡᠳ ᠪᠤᠴᠠᠬᠤ ᠪᠢᠵᠡ᠃ ᠡᠨᠳᠡ ᠪᠡᠨ ᠬᠣᠶᠠᠷ ᠬᠣᠨᠣᠭ ᠰᠠᠭᠠᠲᠠᠵᠤ ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠴᠢ ᠪᠢᠳᠡ ᠬᠣᠶᠠᠷ ᠳᠠᠬᠢᠨ ᠠᠭᠤᠯᠵᠠᠵᠤ ᠵᠠᠪᠳᠤᠬᠤ ᠦᠭᠡᠢ ᠪᠠᠢᠬᠤ ᠠ᠋᠃ ᠴᠢ ᠮᠠᠨ ᠤ᠋ ᠠᠬᠠ ᠠ᠋ᠴᠠ ᠢᠷᠡᠭᠦᠯᠦᠭᠰᠡᠨ ᠴᠠᠭᠠᠰᠤ ᠶ᠋ᠢ ᠠᠪᠤᠯᠠ᠃ ᠡᠵᠢ ᠲᠠᠨ ᠢ᠋ ᠦᠷᠭᠦᠯᠵᠢ ᠳᠤᠷᠠᠰᠤᠨ ᠶᠠᠷᠢᠭᠠᠳ ᠪᠠᠢᠨᠠ᠃ ᠲᠠ ᠳᠠᠪᠬᠢᠵᠤ ᠢᠷᠡᠭᠡᠳ ᠠᠮᠢᠳᠤ ᠮᠡᠨᠳᠦ ᠪᠠᠢᠭᠠ ᠳᠡᠭᠡᠷᠡ ᠨᠢ ᠠᠭᠤᠯᠵᠠᠵᠤ ᠪᠣᠯᠳᠠᠭ ᠦᠭᠡᠢ ᠶᠦᠮ ᠪᠢᠵᠡ ᠳᠡ? ᠪᠢ ᠲᠠᠨ ᠳ᠋ᠤ᠌ ᠪᠢᠴᠢᠭ ᠪᠢᠴᠢᠬᠦ ᠦᠭᠡᠢ᠂ ᠲᠡᠭᠡᠵᠦ ᠰᠠᠭᠤᠬᠤ ᠵᠠᠪ ᠠᠯᠠᠭᠠ᠃ ᠤᠯᠤᠰ ᠭᠦᠷᠦᠨ ᠦ᠌ ᠠᠯᠪᠠ ᠶ᠋ᠢ ᠵᠠᠯᠭᠠᠭᠤᠯᠬᠤ ᠰᠠᠨᠠᠭᠠᠲᠠᠢ ᠶᠠᠳᠠᠵᠤ ᠰᠠᠭᠤᠨᠠ᠃ ᠤᠳᠠᠬᠤ ᠦᠭᠡᠢ ᠪᠢ ᠲᠠᠨ ᠳ᠋ᠤ᠌ ᠨᠢᠭᠡ ᠡᠯᠴᠢ ᠵᠠᠷᠤᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠠᠢᠨᠠ ᠭᠡᠮᠡᠨ ᠬᠡᠯᠡᠬᠦ ᠪᠢᠵᠡ᠃ ᠡᠢᠮᠦ ᠰᠢᠪ ᠳᠡ᠃ ᠵᠠᠮ ᠳ᠋ᠤ᠌ ᠪᠠᠨ ᠰᠠᠢᠨ ᠶᠠᠪᠤᠭᠠᠷᠠᠢ! ᠴᠢ ᠡᠨᠳᠡ ᠰᠠᠭᠤᠮᠠᠷ ᠪᠣᠯ ᠡᠷᠭᠢᠭᠡᠳ ᠢᠷᠡᠵᠦ ᠪᠣᠯᠤᠨᠠ ᠰᠢᠦ ᠭᠡᠵᠦ ᠠᠷᠢᠬᠪᠥ᠋ᠬᠡ ᠪᠣᠳᠣᠯᠭᠠᠰᠢᠷᠠᠨ᠂ ᠦᠷᠭᠦᠭᠡᠨ ᠦ᠌ ᠪᠡᠨ ᠲᠣᠭᠣᠨᠣ ᠥᠭᠡᠳᠡ ᠬᠠᠷᠠᠵᠤ ᠬᠡᠯᠡᠪᠡ᠃ ᠠᠭᠤᠯᠵᠠᠯᠲᠠ ᠡᠭᠦᠨ ᠢ᠋ᠶ᠋ᠡᠷ ᠳᠠᠭᠤᠰᠴᠤ᠂ ᠬᠦᠯᠦᠭ ᠦᠷᠭᠦᠭᠡᠨ ᠡᠴᠡ ᠭᠠᠷᠤᠭᠰᠠᠨ ᠳᠣᠣᠷᠠ ᠪᠠᠨ ᠺᠡᠢᠫᠢᠩ ᠤᠷᠤᠭᠤ ᠪᠤᠴᠠᠬᠤ ᠪᠠᠷ ᠳᠠᠭᠠᠭᠤᠯ ᠴᠡᠷᠢᠭ ᠦ᠋ᠳ᠂ ᠤᠨᠤᠭᠠ ᠮᠣᠷᠢᠳ ᠢ᠋ᠶ᠋ᠠᠨ ᠪᠡᠯᠡᠳᠬᠡᠬᠦ ᠬᠡᠷᠡᠭ ᠲᠦ᠍ ᠣᠷᠣᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠪᠠᠭᠠᠲᠤᠷ᠂ ᠴᠣᠯᠮᠣᠨᠲᠤᠶᠠᠭᠠ