ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠭᠤᠷᠪᠠᠳᠤᠭᠠᠷ ᠪᠦᠯᠦᠭ –4>᠂ ᠠᠮᠢᠨᠴᠢᠯᠠᠬᠤ ᠦᠭᠡ Бүргэд харьд үүрэлдэггүй – Ж᠂ Пүрэв <3-р бүлэг ~4>.аминчлах үг
72ᠭᠤᠷᠪᠠᠳᠤᠭᠠᠷ ᠪᠦᠯᠦᠭ – ᠴᠠᠭᠠᠨ ᠪᠡᠴᠢᠨ ᠵᠢᠯ
ᠳᠥᠷᠪᠡ᠂ ᠠᠮᠢᠨᠴᠢᠯᠠᠬᠤ ᠦᠭᠡ
ᠪᠠᠶᠠᠨ ᠵᠠᠩᠵᠤᠨ ᠢᠷᠡᠯᠡ ᠭᠡᠰᠡᠨ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠪᠠ᠃ ᠬᠤᠪᠢᠯᠠᠢ ᠪᠣᠳᠣᠯᠭᠠᠰᠢᠷᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠲᠡᠷᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ
— ᠵᠠ ᠪᠠᠢᠵᠠ! ᠪᠢ ᠪᠠᠶᠠᠨ ᠲᠠᠢ ᠶᠠᠭᠠᠬᠢᠵᠤ ᠠᠭᠤᠯᠵᠠᠬᠤ ᠪᠣᠢ? ᠲᠡᠷᠡ ᠪᠡᠷ ᠲᠤᠩ ᠶᠠᠭ ᠦᠭᠡᠢ ᠬᠠᠰᠢᠷ᠂ ᠳᠣᠣᠷᠠ ᠪᠠᠨ ᠰᠠᠭᠤᠷᠢᠲᠠᠢ᠂ ᠪᠠᠷᠤᠭᠲᠠᠢ ᠪᠣᠯ ᠠᠮᠠᠨ ᠠ᠋ᠴᠠ ᠪᠠᠨ《ᠠᠯᠲᠠ ᠭᠡᠭᠡᠨᠡ》 ᠭᠡᠳ ᠦᠭᠡ ᠤᠨᠠᠭᠠᠳᠠᠭ ᠡᠷᠡ ᠪᠢᠰᠢ ᠳᠡ᠃ ᠨᠢᠭᠡ ᠵᠠ ᠭᠡᠪᠡᠯ ᠶᠣᠣ ᠦᠭᠡᠢ ᠬᠥᠮᠦᠨ᠃ ᠣᠷᠣᠭᠠ ᠮᠣᠷᠢ ᠪᠠᠷᠢᠬᠤ ᠠᠳᠠᠯᠢ ᠬᠥᠯ ᠳ᠋ᠦ᠍ ᠨᠢ ᠰᠠᠭᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠪᠠᠢᠬᠤ᠃ ᠪᠠᠶᠠᠨ ᠳᠦᠯᠢᠵᠦ ᠳᠦᠯᠢᠵᠦ ᠨᠢᠭᠡ ᠦᠭᠡ ᠬᠡᠯᠡᠨᠡ᠂ ᠲᠡᠷᠡ ᠨᠢ ᠭᠠᠷᠴᠠᠭᠠ ᠦᠭᠡᠢ ᠶᠠᠭᠤᠮᠠ ᠪᠠᠢᠳᠠᠭ᠃ ᠪᠢᠳᠡ ᠬᠣᠶᠠᠷ ᠪᠡᠶᠡ ᠪᠠᠶᠠᠨ ᠤ᠋ ᠪᠠᠨ ᠵᠠᠩ ᠢ᠋ ᠮᠡᠳᠡᠨᠡ ᠳᠠ᠃ ᠴᠡᠷᠢᠭ ᠲᠡᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠠᠶᠠᠨ᠂ ᠴᠠᠭᠠᠨ ᠬᠣᠶᠠᠷ ᠢ᠋ ᠭᠦᠢᠴᠡᠬᠦ ᠵᠠᠩᠵᠤᠨ ᠣᠳᠣ ᠪᠠᠷ ᠮᠠᠨ ᠤ᠋ ᠳ᠋ᠤ᠌ ᠬᠣᠪᠣᠷ ᠪᠢᠵᠡ᠃ ᠪᠠᠶᠠᠨ ᠪᠣᠯ ᠲᠣᠮᠣ ᠲᠡᠢᠨ᠂ ᠪᠦᠷ ᠬᠣᠶᠠᠷ ᠤᠯᠤᠰ ᠭᠦᠷᠦᠨ ᠦ᠌ ᠬᠣᠭᠣᠷᠣᠨᠳᠣ ᠶ᠋ᠢᠨ ᠲᠡᠢᠨ ᠦ᠌ ᠪᠣᠳᠣᠯᠭᠠ ᠳ᠋ᠤ᠌ ᠭᠠᠷᠭᠠᠨᠭᠤᠳ ᠤᠬᠠᠭᠠᠨ ᠭᠠᠷᠭᠠᠳᠠᠭ᠃ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠬᠦᠷᠢᠶᠡᠯᠡᠨ ᠪᠦᠰᠡᠯᠡᠵᠦ ᠳᠠᠢᠰᠤᠨ ᠢ᠋ ᠴᠣᠬᠢᠬᠤ ᠠᠷᠠᠭᠠᠨ ᠳ᠋ᠤ᠌ ᠢᠯᠡᠭᠦᠦ ᠳᠠᠳᠤᠯᠭᠠ ᠣᠯᠤᠭᠰᠠᠨ ᠬᠥᠮᠦᠨ᠃ ᠬᠥᠮᠦᠨ ᠦ᠌ ᠠᠪᠢᠶᠠᠰ ᠭᠡᠳᠡᠭ ᠰᠣᠨᠢᠨ ᠶᠤᠮ᠃ ᠪᠠᠶᠠᠨ ᠳ᠋ᠤ᠌ ᠳᠠᠢᠰᠤᠨ ᠢ᠋ ᠲᠣᠭᠣᠷᠢᠨ ᠪᠦᠰᠡᠯᠡᠬᠦ ᠠᠷᠭᠠ ᠭᠡᠳᠡᠭ ᠶᠠᠭᠤᠮᠠ ᠶ᠋ᠢ ᠬᠡᠨ ᠴᠦ᠍ ᠵᠢᠭᠠᠵᠤ ᠥᠭᠭᠦᠭᠡ ᠦᠭᠡᠢ ᠠᠲᠠᠯᠠ᠂ ᠲᠡᠢᠮᠦ ᠲᠡᠢᠨ ᠦ᠌ ᠠᠷᠠᠭᠠᠨ ᠳ᠋ᠤ᠌ ᠮᠡᠷᠭᠡᠵᠢᠨᠡ ᠭᠡᠳᠡᠭ ᠰᠠᠨᠠᠬᠤ ᠳ᠋ᠤ᠌ ᠪᠡᠷᠬᠡᠲᠡᠢ ᠬᠡᠷᠡᠭ᠃ ᠰᠠᠷᠠᠲᠠᠢ ᠵᠠᠩᠵᠤᠨ ᠤ᠋ ᠦᠶᠡ ᠳ᠋ᠦ᠍ ᠪᠠᠶᠠᠨ ᠶᠡᠬᠡ ᠵᠠᠯᠠᠭᠤ ᠪᠠᠢᠭᠰᠠᠨ ᠳᠠ᠃ ᠡᠨᠡ ᠪᠣᠯ ᠲᠩᠷᠢ ᠶ᠋ᠢᠨ ᠠᠪᠤᠷᠠᠯ᠂ ᠡᠪᠦᠭᠡ ᠪᠣᠭᠳᠠ ᠶ᠋ᠢᠨ ᠮᠢᠨᠢ ᠵᠠᠶᠠᠭᠠᠵᠤ ᠬᠠᠢᠷᠠᠯᠠᠭᠰᠠᠨ ᠤᠬᠠᠭᠠᠨ ᠪᠢᠵᠡ᠃ ᠵᠠ ᠡᠨᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠃ ᠪᠢ ᠪᠠᠶᠠᠨ ᠲᠠᠢ ᠶᠠᠭᠤᠨ ᠠ᠋ᠴᠠ ᠡᠬᠢᠯᠡᠨ ᠥᠪᠡᠷ ᠦ᠋ᠨ ᠰᠠᠨᠠᠭᠠ ᠶ᠋ᠢ ᠶᠠᠭᠠᠬᠢᠵᠤ ᠣᠢᠯᠠᠭᠠᠭᠤᠯᠬᠤ ᠪᠣᠢ? ᠬᠠᠰᠢᠷ ᠡᠷᠡ ᠮᠢᠨᠦ ᠪᠣᠳᠣᠯ ᠢ᠋ ᠠᠯᠢ ᠡᠷᠲᠡ ᠳᠠᠭᠠᠵᠤ ᠮᠡᠳᠡᠭᠡᠳ ᠶᠠᠪᠤᠵᠤ ᠪᠠᠢᠭᠠ ᠪᠢᠵᠡ᠃ ᠲᠡᠢᠨ ᠦ᠌ ᠬᠡᠷᠡᠭ ᠢ᠋ ᠬᠡᠯᠡᠯᠴᠡᠨᠡ ᠭᠡᠵᠦ ᠲᠡᠷᠡ ᠪᠡᠷ ᠪᠠᠰᠠ ᠪᠣᠳᠣᠵᠤ ᠪᠠᠢᠭᠠ᠃ ᠪᠢ ᠪᠠᠶᠠᠨ᠂ ᠴᠠᠭᠠᠨ᠂ ᠵᠣᠣ ᠪᠢ᠂ ᠬᠣᠣ ᠵᠢᠩ ᠨᠠᠷ ᠦᠭᠡᠢ ᠪᠡᠷ ᠥᠪᠡᠷ ᠢ᠋ ᠪᠡᠨ ᠶᠡᠬᠡ ᠬᠠᠭᠠᠨ ᠪᠣᠯᠭᠠᠬᠤ ᠲᠤᠬᠠᠢ ᠪᠣᠳᠣᠬᠤ ᠶ᠋ᠢᠨ ᠴᠦ᠍ ᠠᠷᠭᠠ ᠦᠭᠡᠢ᠃ ᠬᠡᠳᠦᠨ ᠬᠢᠲᠠᠳ ᠲᠦᠰᠢᠮᠡᠯ ᠨᠠᠳᠠᠳᠤ ᠠᠷᠭᠠ ᠤᠬᠠᠭᠠᠨ ᠵᠢᠭᠠᠵᠤ ᠥᠭᠭᠦᠨᠡ᠃ ᠲᠡᠳᠡ ᠪᠣᠯ ᠮᠠᠭᠤ ᠰᠠᠨᠠᠭᠠᠨ ᠳ᠋ᠤ᠌ ᠮᠡᠷᠭᠡᠰᠢᠭᠰᠡᠨ ᠬᠥᠮᠦᠰ᠃ ᠬᠣᠶᠠᠷ ᠮᠣᠩᠭᠣᠯ ᠵᠠᠩᠵᠤᠨ ᠮᠠᠨᠢ ᠨᠡᠷᠡ ᠰᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠤᠰᠤᠳ ᠢ᠋ ᠠᠶᠤᠯᠭᠠᠨ ᠳᠠᠭᠠᠭᠤᠯᠤᠨᠠ᠃ ᠢᠯᠳᠦ ᠳᠠᠯᠠᠢᠬᠤ ᠬᠡᠷᠡᠭ ᠭᠠᠷᠪᠠᠯ ᠡᠳᠡ ᠠᠮᠢᠨ ᠳ᠋ᠤ᠌ ᠮᠠᠨᠢ ᠣᠷᠣᠨᠠ᠁ ᠭᠡᠰᠡᠨ ᠶᠠᠷᠢᠶᠠ ᠶ᠋ᠢ ᠵᠠᠬᠢᠷᠤᠭᠴᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠬᠠᠨ ᠶᠠᠷᠢᠭᠠᠳ᠂ ᠪᠠᠶᠠᠨ ᠢ᠋ ᠪᠠᠷᠠᠯᠠᠬᠠᠭᠤᠯ ᠭᠡᠵᠦ ᠪᠠᠷᠠ ᠪᠣᠯᠤᠭᠴᠢ ᠳ᠋ᠤ᠌ ᠪᠠᠨ ᠬᠡᠯᠡᠯᠡ᠃
ᠳᠤᠬᠤᠨ ᠳᠡᠭᠡᠷᠡ ᠪᠡᠨ ᠭᠦᠨᠵᠡᠭᠡᠢ ᠰᠣᠷᠪᠢ ᠲᠠᠢ᠂ ᠰᠢᠢᠳᠮᠡᠭᠡᠢ ᠪᠠᠢᠷᠢ ᠶ᠋ᠢᠨ ᠬᠠᠷᠠᠴᠠ ᠲᠠᠢ ᠪᠠᠶᠠᠨ① ᠵᠠᠩᠵᠤᠨ ᠤᠷᠲᠤ ᠦᠷᠭᠦᠭᠡᠨ ᠳ᠋ᠦ᠍ ᠪᠢᠷᠠᠯᠬᠠᠨ ᠣᠷᠣᠵᠤ ᠢᠷᠡᠭᠡᠳ ᠪᠥᠬᠥᠢᠨ ᠶᠣᠰᠣ ᠬᠢᠵᠦ ᠮᠡᠨᠳᠦᠯᠡᠪᠡ᠃
ᠬᠤᠪᠢᠯᠠᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠡᠨᠡ ᠡᠷᠡ ᠨᠥᠮᠥᠷᠢ ᠨᠦᠭᠡᠯᠭᠡᠲᠠᠢ᠂ ᠬᠠᠨᠠᠭᠠᠷ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠵᠠᠬᠢᠷᠤᠭᠴᠢ ᠠᠶᠠ ᠲᠠᠯᠪᠢᠨ ᠲᠣᠷᠭᠠᠨ ᠣᠯᠪᠣᠭ ᠲᠤ ᠵᠢᠭᠠᠨ ᠰᠠᠭᠤᠯᠭᠠᠭᠠᠳ ᠦᠯᠡᠮᠵᠢ ᠡᠩ ᠦ᠋ᠨ ᠪᠠᠢᠳᠠᠯ ᠦᠵᠡᠭᠦᠯᠦᠨ᠂ ᠥᠪᠡᠷ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠨᠢ ᠢᠷᠡᠵᠦ ᠵᠡᠷᠭᠡᠴᠡᠨ ᠰᠠᠭᠤᠵᠤ ᠶᠠᠷᠢᠶᠠ ᠡᠭᠦᠰᠬᠡᠪᠡ᠃ ᠬᠤᠪᠢᠯᠠᠢ ᠢᠩᠭᠢᠵᠦ ᠥᠪᠡᠷ ᠡᠴᠡ ᠪᠡᠨ ᠳᠣᠣᠷᠠᠲᠤ ᠠᠯᠪᠠᠨ ᠤ᠋ ᠬᠥᠮᠦᠨ ᠲᠡᠢ ᠪᠥᠭᠡᠷᠡ ᠨᠡᠢᠯᠡᠭᠦᠯᠦᠨ ᠰᠠᠭᠤᠬᠤ ᠨᠢ ᠬᠣᠪᠣᠷ ᠦᠵᠡᠭᠳᠡᠯ ᠪᠢᠯᠡ᠃ ᠡᠨᠡ ᠪᠠᠢᠳᠠᠯ ᠠ᠋ᠴᠠ ᠨᠢ ᠪᠠᠶᠠᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠶᠠᠷᠢᠬᠤ ᠭᠡᠵᠦ ᠪᠠᠢᠭᠠ ᠵᠦᠢᠯ ᠢ᠋ ᠲᠠᠭᠠᠮᠠᠭᠯᠠᠨ ᠮᠡᠳᠡᠪᠡ᠃
— ᠵᠠ ᠪᠢᠳᠡ ᠴᠢᠨᠢ ᠲᠩᠷᠢ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠢᠩᠭᠢᠭᠡᠳ ᠪᠠᠢᠵᠤ ᠪᠠᠢᠨᠠ᠃ ᠶᠡᠬᠡ ᠬᠠᠭᠠᠨ ᠠᠭᠰᠠᠨ ᠠᠬᠠ ᠶ᠋ᠢᠨ ᠦᠢᠯᠡ ᠬᠡᠷᠡᠭ ᠢ᠋ ᠶᠠᠭᠠᠬᠢᠵᠤ ᠭᠦᠢᠴᠡᠭᠡᠬᠦ ᠪᠢᠯᠡ ᠭᠡᠬᠦ ᠡᠴᠡ ᠰᠡᠳᠬᠢᠯ ᠠᠮᠤᠷ ᠪᠠᠢᠵᠤ ᠴᠠᠭ ᠠᠯᠠᠭᠠ ᠭᠡᠵᠦ ᠬᠤᠪᠢᠯᠠᠢ ᠤᠷᠲᠤ ᠶ᠋ᠢᠨ ᠶᠠᠷᠢᠶᠠ ᠡᠭᠦᠰᠬᠡᠪᠡ᠃
ᠪᠠᠶᠠᠨ ᠲᠠᠢᠪᠤᠩ ᠴᠢᠷᠠᠢ ᠭᠠᠷᠭᠠᠨ᠄
— ᠲᠩᠷᠢ ᠥᠷᠥᠰᠢᠶᠡᠨ ᠲᠠᠭᠠᠯᠠᠵᠤ᠂ ᠰᠠᠨᠠᠭᠰᠠᠨ ᠪᠦᠬᠦᠨ ᠶᠣᠰᠣᠭᠠᠷ ᠪᠦᠲᠦᠬᠦ ᠪᠢᠵᠡ᠃ ᠤᠬᠠᠭᠠᠨᠲᠠᠨ ᠲᠠᠨ ᠤ᠋ ᠵᠣᠪᠠᠭᠤᠷᠢ ᠶ᠋ᠢ ᠣᠢᠯᠠᠭᠠᠯᠠ ᠭᠡᠵᠦ ᠬᠡᠯᠡᠬᠦ ᠨᠢ ᠬᠤᠪᠢᠯᠠᠢ ᠳ᠋ᠤ᠌ ᠣᠪᠣᠭᠠᠯᠠᠩ ᠠᠳᠬᠤ ᠠᠯᠲᠠ ᠥᠭᠴᠦ ᠪᠠᠢᠭᠠ ᠠ᠋ᠴᠠ ᠢᠯᠡᠭᠦᠦ ᠦᠨᠡᠲᠡᠢ ᠮᠡᠲᠦ ᠰᠠᠨᠠᠭᠳᠠᠯᠠ᠃
ᠬᠤᠪᠢᠯᠠᠢ ᠰᠤᠯᠠᠬᠠᠨ ᠢᠨᠢᠶᠡᠵᠦ᠂ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠴᠦ ᠢᠯᠪᠢᠭᠰᠡᠨ ᠪᠠᠶᠠᠨ ᠢ᠋ ᠬᠠᠷᠠᠵᠤ᠄
— ᠲᠠ ᠪᠦᠬᠦᠨ ᠦ᠌ ᠬᠦᠴᠦᠨ ᠴᠢᠷᠮᠠᠢᠯᠲᠠ ᠯᠠ ᠬᠠᠮᠤᠭ ᠬᠡᠷᠡᠭ ᠦᠢᠯᠡ ᠶ᠋ᠢ ᠰᠢᠢᠳᠬᠦ ᠪᠣᠯᠵᠤ ᠪᠠᠢᠭᠠ ᠨᠢ ᠢᠯᠡᠳᠲᠡ᠂ ᠪᠣᠯᠬᠢ ᠪᠢ ᠵᠠᠩᠵᠤᠨ ᠲᠠᠨ ᠤ᠋ ᠪᠣᠯᠤᠨ ᠪᠤᠰᠤᠳ ᠣᠯᠠᠨ ᠤ᠋ ᠢᠲᠡᠭᠡᠵᠦ ᠪᠠᠢᠭᠠ ᠢᠲᠡᠭᠡᠯ᠂ ᠬᠠᠢᠷᠠ ᠬᠦᠨᠳᠦᠳᠬᠡᠯ ᠢ᠋ ᠭᠠᠵᠠᠷᠳᠠᠭᠤᠯᠤᠨ ᠰᠢᠷᠤᠢᠳᠠᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠯᠡ ᠡᠷᠬᠢᠮ ᠳᠡᠭᠡᠳᠦ ᠦᠢᠯᠡ ᠪᠣᠯᠭᠠᠨ ᠵᠢᠳᠬᠦᠨᠡ ᠭᠡᠵᠦ ᠬᠤᠪᠢᠯᠠᠢ ᠲᠠᠩᠭᠠᠷᠢᠭ ᠡᠷᠭᠦᠵᠦ ᠪᠠᠢᠭᠠ ᠮᠡᠲᠦ ᠬᠡᠯᠡᠯᠡ᠃
ᠦᠭᠡ ᠤᠳᠠᠭᠠᠨ ᠲᠠᠢ᠂ ᠠᠮᠠ ᠴᠥᠭᠡᠨ ᠲᠡᠢ ᠪᠠᠶᠠᠨ ᠡᠨᠡ ᠠᠭᠤᠯᠵᠠᠯᠲᠠ ᠳᠡᠭᠡᠷᠡ ᠢᠯᠡ᠂ ᠪᠡᠯᠡᠨ᠂ ᠰᠡᠳᠬᠢᠯ ᠳ᠋ᠦ᠍ ᠨᠡᠢᠴᠡᠬᠦ ᠦᠭᠡ ᠨᠦ᠍ᠭᠦᠳ ᠢ᠋ ᠬᠡᠯᠡᠵᠦ ᠪᠠᠢᠬᠤ ᠨᠢ ᠵᠠᠬᠢᠷᠤᠭᠴᠢ ᠶ᠋ᠢ ᠪᠠᠶᠠᠰᠬᠠᠵᠤ ᠪᠠᠢᠪᠠ᠃ ᠬᠤᠪᠢᠯᠠᠢ ᠲᠣᠭᠰᠢᠭᠤᠷ ᠴᠣᠬᠢᠵᠤ ᠪᠠᠷᠠ ᠪᠣᠯᠤᠭᠴᠢ ᠪᠠᠨ ᠳᠠᠭᠤᠳᠠᠭᠠᠳ᠂
— ᠪᠢᠳᠡ ᠬᠣᠶᠠᠷ ᠲᠤ ᠦᠳᠡ ᠶ᠋ᠢᠨ ᠵᠣᠭᠣᠭ ᠪᠡᠯᠡᠳᠭᠡ! ᠭᠡᠵᠦ ᠲᠤᠰᠢᠶᠠᠨ᠂ ᠤᠭ ᠶᠠᠷᠢᠶᠠ ᠪᠠᠨ ᠰᠥᠩ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠬᠦ ᠲᠤᠬᠠᠢ ᠬᠡᠷᠡᠭ ᠤᠷᠤᠭᠤ ᠰᠢᠯᠵᠢᠭᠦᠯᠬᠦ ᠳ᠋ᠦ᠍ ᠪᠡᠨ《ᠪᠢ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠬᠤ ᠰᠠᠨᠠᠭᠠᠲᠠᠢ᠃ ᠲᠡᠭᠦᠨ ᠢ᠋ ᠪᠠᠶᠠᠨ ᠳᠡᠮᠵᠢᠨᠡ ᠭᠡᠳᠡᠭ ᠢ᠋ᠶ᠋ᠡᠨ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠣᠢᠯᠠᠭᠠᠭᠤᠯᠵᠤ ᠴᠢᠳᠠᠬᠤ ᠰᠢᠪ》 ᠭᠡᠮᠡᠨ ᠬᠤᠪᠢᠯᠠᠢ ᠪᠣᠳᠣᠵᠤ
— ᠤᠭ ᠬᠡᠷᠡᠭ ᠢ᠋ ᠴᠣᠬᠣᠮ ᠶᠠᠭᠠᠬᠢᠬᠤ ᠭᠡᠳᠡᠭ ᠢ᠋ ᠰᠠᠢᠨ ᠪᠣᠳᠣᠵᠤ ᠪᠠᠢᠵᠤ ᠯᠠᠪᠰᠢᠷᠠᠭᠤᠯᠤᠶᠠ ᠭᠡᠮᠡᠨ ᠥᠪᠡᠷ ᠲᠦ᠍ ᠪᠡᠨ ᠬᠡᠯᠡᠭᠰᠡᠨ ᠪᠢᠯᠡ᠃ ᠪᠠᠶᠠᠨ ᠴᠦ᠍ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠡᠷᠡ ᠪᠣᠳᠣᠯ ᠢ᠋ ᠲᠡᠭᠦᠨ ᠦ᠌ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠠ᠋ᠴᠠ ᠠᠵᠢᠭᠯᠠᠨ ᠮᠡᠳᠡᠵᠦ᠂《 ᠪᠢ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠵᠠᠯᠭᠠᠨᠠ ᠰᠢᠦ ᠭᠡᠵᠦ ᠲᠤᠯᠭᠠᠵᠤ ᠪᠠᠢᠭᠠ ᠡᠢᠮᠦ ᠬᠥᠮᠦᠨ ᠢ᠋ ᠴᠢ ᠪᠣᠯᠬᠤ ᠦᠭᠡᠢ ᠭᠡᠬᠦ ᠶ᠋ᠢᠨ ᠠᠷᠭᠠ ᠠᠯᠠᠭᠠ᠃ ᠤᠭ ᠨᠢ ᠬᠤᠪᠢᠯᠠᠢ ᠮᠠᠨᠢ ᠪᠢᠴᠢᠭ ᠨᠣᠮ ᠨᠡᠯᠢᠶᠡᠳ ᠦᠵᠡᠭᠰᠡᠨ᠂ ᠪᠣᠯᠪᠠᠰᠤᠷᠠᠯᠲᠠᠢ᠂ ᠤᠬᠠᠭᠠᠨ ᠪᠢᠯᠢᠭ ᠢ᠋ᠶ᠋ᠡᠷ ᠰᠡᠷᠭᠦᠯᠡᠩ᠂ ᠣᠪᠰᠣᠭᠠᠲᠠᠢ᠂ ᠶᠠᠭᠤᠮᠠ ᠶᠠᠭᠤᠮᠠᠨ ᠳ᠋ᠤ᠌ ᠭᠠᠵᠢᠲᠠᠢ ᠨᠣᠶᠠᠨ᠃ ᠳᠣᠲᠣᠷᠠ ᠪᠠᠨ ᠴᠦ᠍ ᠬᠠᠷᠠ ᠮᠠᠭᠤ ᠰᠠᠨᠠᠭᠠ ᠪᠠᠷ ᠬᠢᠲᠠᠳ ᠠ᠋ᠴᠠ ᠳᠤᠲᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠢᠵᠡ᠃ ᠣᠳᠣ ᠵᠠᠬᠢᠷᠤᠭᠴᠢ ᠶ᠋ᠢᠨ ᠠᠯᠪᠠᠨ ᠬᠡᠷᠡᠭ ᠢ᠋ ᠡᠭᠦᠨ ᠡᠴᠡ ᠢᠯᠡᠭᠦᠦ ᠶᠠᠭᠠᠬᠢᠬᠤ ᠪᠣᠢ ᠳᠠ ᠭᠡᠮᠡᠷ ᠶᠠᠪᠤᠭᠤᠯᠵᠤ ᠪᠠᠢᠨᠠ᠃ ᠲᠡᠢᠨ ᠦ᠌ ᠪᠣᠳᠣᠯᠭᠠ᠂ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠲᠡᠷᠢᠭᠦᠯᠡᠨ ᠰᠢᠢᠳᠬᠦ ᠲᠠᠯᠠ ᠪᠠᠷ ᠨᠡᠯᠢᠶᠡᠳ ᠶᠠᠭᠤᠮᠠ ᠰᠤᠷᠴᠠᠢ᠃ ᠡᠢᠮᠦ ᠬᠥᠮᠦᠨ ᠰᠢᠷᠡᠭᠡᠨ ᠳ᠋ᠦ᠍ ᠭᠠᠷᠴᠤ ᠪᠣᠯᠬᠤ ᠦᠭᠡᠢ ᠭᠡᠬᠦ ᠶᠠᠭᠤ ᠪᠠᠢᠬᠤ ᠪᠣᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠡᠮᠡᠰ ᠥᠬᠢᠳ ᠲᠦ᠍ ᠳᠤᠷᠠᠲᠠᠢ ᠲᠠᠯᠠ ᠪᠣᠢ᠃ ᠲᠡᠷᠡ ᠨᠢ ᠨᠢᠭᠡ ᠲᠠᠯᠠ ᠪᠠᠷ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠬᠦᠰᠡᠯᠡᠩ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠯᠣᠯᠣᠢ ᠭᠡᠳᠡᠭ ᠡᠮᠡ ᠤᠷᠤᠭᠤ ᠨᠢ ᠲᠠᠲᠠᠭᠠᠳ ᠡᠯᠳᠡᠪ ᠥᠩᠭᠡ ᠶ᠋ᠢᠨ ᠭᠤᠩᠬᠠᠵᠤ ᠭᠠᠩᠬᠠᠭᠰᠠᠨ ᠥᠬᠢᠳ ᠦ᠋ᠳ ᠢ᠋ ᠬᠤᠪᠢᠯᠠᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠦᠯᠵᠦ ᠰᠡᠳᠬᠢᠯ᠂ ᠰᠠᠷᠠᠯ ᠢ᠋ ᠨᠢ ᠬᠥᠳᠡᠯᠭᠡᠭᠡᠳ ᠪᠠᠢᠭᠠ ᠨᠢ ᠯᠠᠪᠲᠠᠢ᠃ ᠨᠠᠮᠠᠶ᠋ᠢ ᠢᠷᠡᠬᠦ ᠳ᠋ᠦ᠍ ᠬᠦᠷᠲᠡᠯᠡ ᠨᠢᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠭᠤᠯᠤᠭᠠᠳ᠂ ᠬᠡᠳᠦ ᠬᠡᠳᠦᠨ ᠶᠠᠩᠵᠤ ᠶ᠋ᠢᠨ ᠬᠣᠪᠴᠠᠰᠤᠲᠠᠢ ᠡᠮᠡᠰ ᠢ᠋ᠶ᠋ᠡᠷ ᠴᠠᠢ ᠬᠣᠭᠣᠯᠠ ᠵᠥᠭᠡᠭᠡᠯᠭᠡᠨ ᠦᠰᠦ ᠭᠡᠵᠢᠭᠡ ᠶᠠᠩᠵᠤᠯᠠᠭᠤᠯᠵᠤ ᠪᠠᠢᠬᠤ ᠶ᠋ᠢ ᠨᠢ ᠬᠠᠷᠠ ᠳᠠ᠃ ᠬᠤᠪᠢᠯᠠᠢ ᠨᠠᠰᠤ ᠪᠠᠨ ᠠᠬᠢᠬᠤ ᠪᠠᠷ ᠡᠨᠡ ᠰᠠᠪᠰᠠᠭᠳᠠᠭᠤ ᠵᠠᠩ ᠢ᠋ᠶ᠋ᠠᠨ ᠭᠡᠭᠡᠬᠦ ᠨᠢ ᠵᠠᠢᠯᠠᠰᠢ ᠦᠭᠡᠢ᠃ ᠵᠠᠬᠢᠷᠤᠭᠴᠢ ᠮᠠᠨᠢ ᠡᠦᠲᠦ ᠬᠢᠲᠠᠳ ᠬᠥᠮᠦᠰ ᠢ᠋ ᠴᠦ᠍ ᠠᠳᠬᠤᠵᠤ ᠳᠥᠩᠭᠡᠭᠡᠳ ᠪᠠᠢᠨᠠ᠃ ᠡᠨᠡ ᠺᠡᠢᠫᠢᠩ ᠢ᠋ ᠭᠣᠣᠯᠳᠠᠭᠤ ᠬᠢᠲᠠᠳ ᠬᠥᠮᠦᠰ ᠢ᠋ᠶ᠋ᠡᠷ ᠪᠠᠷᠢᠭᠤᠯᠤᠭᠰᠠᠨ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠲᠡᠳᠡᠨ ᠢ᠋ ᠬᠥᠳᠡᠯᠭᠡᠵᠦ ᠴᠢᠳᠠᠭᠰᠠᠨ ᠪᠠᠢᠨᠠ ᠰᠢᠦ᠃
ᠬᠤᠪᠢᠯᠠᠢ ᠳ᠋ᠤ᠌ ᠴᠢᠩ ᠦᠨᠡᠨᠴᠢ ᠪᠠᠢᠳᠠᠯ ᠦᠵᠡᠭᠦᠯᠳᠡᠭ ᠬᠡᠳᠦᠨ ᠬᠢᠲᠠᠳ ᠲᠦᠰᠢᠮᠡᠯ ᠶᠡᠬᠡ ᠲᠤᠰᠠᠯᠠᠵᠤ ᠪᠠᠢᠭᠠ ᠶᠤᠮ᠃ ᠲᠡᠳᠡᠨ ᠢ᠋ ᠰᠢᠯᠢᠵᠦ ᠣᠯᠤᠨᠠ ᠭᠡᠳᠡᠭ ᠴᠦ᠍ ᠠᠮᠠᠷ ᠦᠭᠡᠢ᠃ ᠬᠤᠪᠢᠯᠠᠢ ᠬᠠᠭᠠᠨ ᠤ᠋ ᠣᠷᠣ ᠰᠠᠭᠤᠪᠠᠯ ᠬᠢᠲᠠᠳ ᠬᠥᠮᠦᠰ ᠢ᠋ ᠨᠡᠯᠢᠶᠡᠨ ᠴᠢᠩᠭᠠ ᠠᠳᠬᠤᠭᠠᠳ ᠪᠠᠢᠵᠤ ᠳᠥᠩᠭᠡᠬᠦ ᠪᠣᠢ᠃ ᠬᠢᠲᠠᠳ ᠴᠦ᠍ ᠬᠠᠷᠠᠬᠤ ᠳ᠋ᠤ᠌ ᠥᠨᠳᠡᠭᠡ ᠪᠡᠨ ᠳᠠᠷᠤᠭᠰᠠᠨ ᠲᠠᠬᠢᠶᠠ ᠰᠢᠭ᠋ ᠠᠲᠠᠯᠠ ᠲᠤᠩ ᠠᠳᠠᠷᠠᠮᠠ ᠲᠠᠢ ᠰᠢᠦ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠬᠤᠪᠢᠯᠠᠢ ᠶ᠋ᠢ ᠬᠢᠲᠠᠳ ᠤ᠋ᠳ ᠡᠯᠵᠢᠭᠡ ᠪᠣᠯᠭᠠᠵᠤ ᠣᠷᠬᠢᠭᠰᠠᠨ ᠪᠠᠢᠬᠤ ᠪᠢᠵᠡ》 ᠭᠡᠮᠡᠨ ᠪᠣᠳᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠪᠢ ᠶᠠᠭᠠᠬᠢᠬᠤ ᠪᠣᠢ ᠬᠡᠨ ᠢ᠋ ᠳᠡᠮᠵᠢᠬᠦ ᠪᠣᠢ ? 》 ᠭᠡᠳᠡᠭ ᠠᠰᠠᠭᠤᠯᠲᠠ ᠪᠠᠶᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠭᠡᠨᠡᠳᠲᠡ ᠬᠠᠷᠪᠤᠨ ᠣᠷᠣᠵᠤ ᠢᠷᠡᠭᠡᠳ᠂ ᠲᠡᠭᠦᠨ ᠳ᠋ᠦ᠍ ᠪᠡᠨ ᠪᠡᠯᠡᠨ ᠬᠠᠷᠢᠭᠤ ᠣᠯᠬᠤ ᠦᠭᠡᠢ ᠭᠠᠢᠬᠠᠯᠠ᠃ 《ᠲᠡᠢᠮᠦ ᠲᠡᠢᠮᠦ᠃ ᠬᠤᠪᠢᠯᠠᠢ ᠶ᠋ᠢᠨ ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠴᠡᠷᠢᠭ ᠡᠷᠡ ᠶ᠋ᠢᠨ ᠰᠤᠷᠭᠠᠭᠤᠯᠢ ᠲᠠᠢ᠂ ᠤᠬᠠᠭᠠᠯᠢᠭ ᠭᠡᠳᠡᠭ᠃ ᠠᠬᠠ ᠮᠥᠩᠬᠡ ᠨᠢ ᠠᠷᠢᠬᠪᠦ᠋ᠬᠡ ᠳ᠋ᠦ᠍ ᠬᠠᠷᠠ ᠬᠣᠷᠣᠮ ᠢ᠋ ᠵᠠᠬᠢᠷᠤᠭᠤᠯᠤᠨ ᠰᠠᠭᠤᠯᠭᠠᠭᠰᠠᠨ ᠨᠢ ᠴᠠᠭᠠᠨᠠ ᠪᠠᠨ ᠤᠴᠢᠷᠲᠠᠢ ᠦᠭᠡ ᠠ᠋᠃ ᠮᠥᠩᠬᠡ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠳᠠᠭᠠᠭᠠᠮᠠᠢ ᠮᠡᠳᠡᠳᠡᠭ᠂ ᠰᠢᠯᠤᠭᠤᠨ ᠰᠢᠳᠤᠷᠭᠤ᠂ ᠨᠣᠮ ᠡᠷᠳᠡᠮ ᠢ᠋ᠶ᠋ᠡᠷ ᠶᠠᠭ ᠦᠭᠡᠢ ᠡᠷᠡ ᠪᠠᠢᠭᠰᠠᠨ᠃ ᠲᠡᠢᠮᠦ ᠳ᠋ᠦ᠍ ᠪᠡᠨ ᠴᠦ᠍ ᠶᠡᠬᠡ ᠭᠦᠷᠦᠨ ᠢ᠋ ᠳᠣᠷᠣᠢᠲᠠᠯ ᠠ᠋ᠴᠠ ᠠᠪᠤᠷᠠᠭᠰᠠᠨ᠃ ᠪᠠᠰᠠ ᠭᠠᠭᠴᠠ ᠱᠠᠰᠢᠨ ᠢ᠋ ᠭᠣᠣᠯᠯᠠᠨ ᠰᠢᠲᠦᠭᠡ ᠦᠭᠡᠢ᠂ ᠪᠦᠬᠦ ᠱᠠᠰᠢᠨᠲᠠᠨ ᠲᠠᠢ ᠡᠪᠰᠡᠭ᠂ ᠬᠦᠨᠳᠦᠳᠬᠡᠯᠲᠡᠢ ᠤᠴᠠᠷᠠᠨ ᠠᠭᠤᠯᠵᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠯᠠᠨ ᠤ᠋ ᠰᠠᠨᠠᠭᠠ ᠪᠣᠳᠣᠯ ᠢ᠋ ᠥᠪᠡᠷ ᠦ᠋ᠨ ᠲᠠᠯᠠ ᠳ᠋ᠤ᠌ ᠪᠣᠯᠭᠠᠵᠤ ᠴᠢᠳᠠᠭᠰᠠᠨ᠃ ᠲᠡᠢᠮᠦ ᠬᠥᠮᠦᠨ ᠢ᠋ ᠡᠨᠳᠡᠭᠦᠦ ᠲᠠᠰᠢᠶᠠ ᠪᠣᠳᠣᠵᠤ ᠬᠠᠷᠠ ᠬᠣᠷᠣᠮ ᠤ᠋ᠨ ᠵᠠᠬᠢᠷᠤᠭᠴᠢ ᠶ᠋ᠢ ᠪᠤᠷᠤᠭᠤ ᠬᠥᠮᠦᠨ ᠢ᠋ᠶ᠋ᠡᠷ ᠲᠣᠬᠣᠭᠠᠨ ᠲᠣᠮᠢᠯᠠᠭᠰᠠᠨ ᠭᠡᠬᠦ ᠠᠷᠭᠠ ᠦᠭᠡᠢ》 ᠭᠡᠮᠡᠨ ᠪᠣᠳᠣᠵᠤ ᠪᠠᠢᠪᠠ᠃
ᠬᠤᠪᠢᠯᠠᠢ ᠪᠠᠶᠠᠨ ᠤ᠋ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠶ᠋ᠢ ᠠᠵᠢᠭᠯᠠᠨ ᠰᠢᠨᠵᠢᠭᠡᠳ᠂ ᠦᠭᠡ ᠨᠢ ᠠᠷᠠᠢ ᠴᠥᠭᠡᠷᠡᠵᠦ᠂ ᠬᠠᠷᠠᠴᠠᠨ ᠳ᠋ᠤ᠌ ᠨᠢ ᠪᠤᠯᠠᠩᠭᠢᠷ ᠰᠠᠭᠤᠪᠠ ᠤᠤ᠂ ᠶᠠᠭᠠᠬᠢᠪᠠ ? ᠭᠡᠵᠦ ᠪᠣᠳᠣᠭᠠᠳ
— ᠪᠢ ᠦᠭᠡ ᠶᠠᠷᠢᠶᠠᠨ ᠳ᠋ᠤ᠌ ᠪᠠᠨ ᠠᠯᠳᠠᠭᠠ ᠭᠠᠷᠭᠠᠪᠠ ᠤᠤ ? ᠡᠢᠮᠦ ᠬᠥᠮᠦᠨ ᠢ᠋ ᠪᠠᠶᠠᠨ ᠠ᠋ᠴᠠ ᠪᠠᠨ ᠬᠣᠯᠠᠳᠠᠭᠤᠯᠪᠠᠯ ᠵᠠᠰᠠᠵᠤ ᠪᠣᠯᠣᠰᠢ ᠦᠭᠡᠢ ᠲᠣᠮᠣ ᠳᠣᠭᠣᠯᠳᠠᠯ ᠪᠣᠯᠤᠨᠠ ᠰᠢᠦ ᠭᠡᠵᠦ ᠥᠪᠡᠷ ᠲᠦ᠍ ᠪᠡᠨ ᠰᠠᠨᠠᠭᠤᠯᠤᠨ ᠬᠡᠯᠡᠵᠦ ᠰᠠᠭᠤᠯᠠ᠃
ᠵᠣᠭᠣᠭ ᠪᠡᠯᠡᠬᠡᠨ ᠪᠣᠯᠵᠤ᠂ ᠵᠠᠬᠢᠷᠤᠭᠴᠢ᠂ ᠵᠠᠩᠵᠤᠨ ᠬᠣᠶᠠᠷ ᠢ᠋ ᠥᠭᠡᠷᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠤᠷᠢᠪᠠ᠃ ᠵᠥᠭᠡᠯᠡᠬᠡᠨ ᠬᠣᠶᠠᠷ ᠰᠠᠭᠤᠳᠠᠯ ᠤ᠋ᠨ ᠳᠤᠮᠳᠠ ᠭᠠᠢᠬᠠᠯᠲᠠᠢ ᠪᠠᠶᠠᠨ ᠰᠢᠷᠡᠭᠡ ᠵᠠᠰᠠᠵᠠᠢ᠃ ᠮᠢᠬᠠᠨ ᠵᠠᠭᠤᠰᠢ᠂ ᠠᠮᠲᠠᠲᠤ ᠵᠢᠮᠢᠰ᠂ ᠲᠠᠩᠰᠤᠭ ᠦᠨᠦᠷᠲᠦ ᠰᠠᠷᠬᠤᠳ ᠲᠡᠷᠢᠭᠦᠲᠡᠨ ᠨᠢ ᠨᠢᠳᠦ ᠪᠤᠯᠢᠶᠠᠵᠤ ᠠᠯᠠᠭᠯᠠᠭᠠᠳ ᠠᠷᠠᠭᠠᠨ ᠤ᠋ ᠰᠢᠭᠦᠰᠦ ᠠᠰᠬᠠᠷᠠᠭᠤᠯᠵᠤ ᠪᠠᠢᠪᠠ᠃ ᠭᠤᠩᠬᠠᠵᠤ ᠭᠠᠩᠬᠠᠭᠰᠠᠨ ᠳᠡᠭᠵᠢᠨ ᠪᠦᠰᠡᠭᠦᠢ ᠣᠷᠣᠵᠤ ᠢᠷᠡᠵᠦ ᠬᠠᠯᠠᠭᠤᠨ ᠴᠠᠢ ᠪᠠᠷᠢᠨ᠂ ᠭᠠᠩᠭᠠᠷ ᠱᠠᠭᠠᠵᠠᠩ ᠬᠤᠨᠳᠠᠭᠠᠨ ᠳ᠋ᠤ᠌ ᠰᠠᠷᠬᠤᠳ ᠮᠡᠯᠲᠡᠯᠵᠡᠭᠦᠯᠦᠨ ᠬᠢᠬᠦ ᠨᠢ ᠴᠠᠭᠠᠨᠠ ᠪᠠᠨ ᠨᠢᠭᠡ ᠠᠶᠠᠯᠠᠭ ᠪᠠᠢᠳᠠᠯᠳᠠᠢ ᠠᠵᠢ᠃
ᠬᠤᠨᠳᠠᠭᠠ ᠬᠠᠭᠤᠷᠠᠢ ᠪᠠᠢᠯᠭᠠᠬᠤ ᠦᠭᠡᠢ ᠪᠠᠢᠯᠠ᠃ ᠢᠷᠡᠨ᠂ ᠫᠧᠷᠰ ᠦ᠋ᠨ ᠨᠤᠲᠤᠭ ᠠ᠋ᠴᠠ ᠢᠷᠡᠭᠰᠡᠨ ᠰᠠᠷᠬᠤᠳ ᠢᠯᠡᠭᠦᠦ ᠲᠠᠩᠨᠠᠢ ᠳ᠋ᠤ᠌ ᠳᠠᠭᠠᠯᠠᠯᠲᠠᠢ ᠮᠡᠲᠦ᠃ ᠬᠢᠲᠠᠳ ᠪᠢᠰᠢ᠂ ᠮᠣᠩᠭᠣᠯ ᠬᠣᠭᠣᠯᠠ ᠰᠢᠷᠡᠭᠡᠨ ᠳᠡᠭᠡᠷᠡ ᠢᠷᠡᠵᠦ ᠪᠠᠢᠭᠠ ᠨᠢ ᠪᠠᠶᠠᠨ ᠳ᠋ᠤ᠌ ᠲᠠᠭᠠᠰᠢᠶᠠᠭᠳᠠᠵᠤ ᠪᠠᠢᠪᠠ᠃ ᠬᠤᠪᠢᠯᠠᠢ ᠶ᠋ᠢᠨ ᠲᠣᠭᠣᠭᠠᠴᠢ ᠬᠢᠲᠠᠳ ᠬᠣᠶᠠᠷᠬᠠᠨ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠨᠡᠢᠴᠡᠬᠦ ᠬᠣᠭᠣᠯᠠ ᠬᠢᠯᠭᠡᠵᠦ ᠲᠦᠩᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠶᠠᠷᠢᠶᠠ ᠦᠷᠭᠦᠯᠵᠢᠯᠡᠵᠦ ᠪᠠᠢᠯᠠ᠃
— ᠪᠢᠳᠡᠨ ᠢ᠋ ᠶᠠᠭᠤ ᠬᠢᠵᠦ ᠬᠢᠲᠠᠳ ᠲᠤ᠌ ᠰᠠᠭᠤᠵᠤ ᠪᠠᠢᠨᠠ ᠪᠣᠢ ᠭᠡᠵᠦ ᠬᠠᠷᠠ ᠬᠣᠷᠣᠮ ᠤ᠋ᠨ ᠬᠢᠨ ᠬᠠᠷᠠᠵᠤ ᠪᠠᠢᠭᠠ᠃ ᠲᠡᠭᠡᠬᠦ ᠪᠡᠷ ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠪᠦᠬᠦ ᠴᠡᠷᠢᠭ ᠢ᠋ ᠳᠠᠯᠠᠢ ᠳ᠋ᠤ᠌ ᠨᠢ ᠳᠠᠷᠤᠢ ᠵᠢᠪᠦᠭᠦᠯᠬᠦ ᠶᠣᠰᠣᠲᠠᠢ ᠪᠣᠯᠵᠤ ᠪᠠᠢᠨᠠ᠃ ᠲᠡᠳᠡᠨ ᠦ᠌ ᠴᠡᠷᠢᠭ ᠬᠥᠬᠡ ᠮᠥᠷᠡᠨ ᠦ᠌ ᠪᠡᠨ ᠤᠰᠤᠨ ᠠ᠋ᠴᠠ ᠡᠬᠢᠯᠡᠭᠡᠳ ᠳᠠᠯᠠᠢ ᠶ᠋ᠢᠨ ᠤᠰᠤᠨ ᠳ᠋ᠤ᠌ ᠪᠦᠷᠢᠮᠦᠰᠦᠨ ᠱᠤᠮᠪᠠᠬᠤ ᠴᠠᠭ ᠢ᠋ ᠨᠢ ᠴᠢ ᠪᠢᠳᠡ ᠨᠠᠷ ᠪᠣᠢ ᠪᠣᠯᠭᠠᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠠᠷᠠᠯᠲᠠᠢ ᠬᠡᠷᠡᠭ ᠠᠯᠠᠭᠠ ᠭᠡᠵᠦ ᠨᠠᠳᠠᠳᠤ ᠪᠣᠳᠣᠭᠳᠠᠭᠠᠳ ᠪᠠᠢᠨᠠ ᠭᠡᠵᠦ ᠬᠤᠪᠢᠯᠠᠢ ᠳᠤᠤᠭᠠᠷᠪᠠ᠃
— ᠶᠡᠬᠡ ᠵᠠᠬᠢᠷᠤᠭᠴᠢ ᠲᠠ ᠵᠥᠪ ᠢ᠋ ᠪᠣᠯᠭᠣᠭᠠᠵᠤ ᠪᠠᠢᠨᠠ᠃ ᠪᠢᠳᠡ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠬᠦ ᠦᠭᠡ ᠲᠡᠢ ᠪᠠᠢᠬᠤ ᠶ᠋ᠢᠨ ᠲᠤᠯᠠᠳᠠ᠂ ᠶᠡᠷᠦ ᠨᠢ ᠤᠯᠤᠰ ᠭᠦᠷᠦᠨ ᠢ᠋᠂ ᠶᠢᠷᠲᠢᠨᠴᠦ ᠶ᠋ᠢ ᠲᠦᠪᠰᠢᠳᠬᠡᠬᠦ ᠬᠡᠷᠡᠭ ᠢ᠋ ᠭᠦᠢᠴᠡᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠣᠳᠣ ᠰᠥᠩ ᠤᠯᠤᠰ ᠢ᠋ ᠵᠣᠷᠢᠭ ᠢ᠋ᠶ᠋ᠠᠷ ᠨᠢ ᠪᠠᠢᠯᠭᠠᠬᠤ ᠦᠭᠡᠢ ᠤᠴᠢᠷᠲᠠᠢ᠃ ᠪᠢ ᠲᠡᠭᠡᠵᠦ ᠪᠣᠳᠣᠭᠠᠳ ᠶᠠᠭᠤᠨ ᠤ᠋ ᠡᠮᠦᠨᠡ ᠬᠥᠬᠡ ᠮᠥᠷᠡᠨ ᠢ᠋ ᠬᠡᠳᠦ ᠬᠡᠳᠦᠨ ᠭᠠᠵᠠᠷ ᠢ᠋ᠶ᠋ᠠᠷ ᠵᠡᠷᠭᠡ ᠭᠠᠲᠤᠯᠬᠤ ᠰᠠᠨᠠᠭᠠᠲᠠᠢ ᠶᠠᠭᠤᠮᠠ ᠪᠡᠯᠡᠳᠬᠡᠵᠦ ᠪᠠᠢᠭᠠ᠃ ᠪᠠᠵᠠᠭᠠᠬᠤ ᠶᠠᠭᠤ ᠪᠠᠢᠬᠤ ᠪᠣᠢ᠃ ᠬᠢᠲᠠᠳ ᠤ᠋ᠳ ᠢ᠋ᠶ᠋ᠠᠷ ᠲᠠᠪᠢᠨ ᠲᠣᠮᠣ ᠰᠠᠯ ᠵᠠᠩᠭᠢᠳᠤᠭᠤᠯᠤᠭᠰᠠᠨ᠃ ᠴᠥᠭᠡᠨ ᠣᠩᠭᠣᠴᠠ ᠰᠢᠪᠠᠭᠤᠯᠵᠤ ᠪᠠᠢᠨᠠ᠃ ᠰᠥᠩ ᠦ᠋ᠨ ᠴᠡᠷᠢᠭ ᠬᠣᠲᠠ ᠬᠠᠮᠠᠭᠠᠯᠠᠯᠲᠠᠨ ᠳ᠋ᠤ᠌ ᠰᠦᠷᠡᠬᠡᠢ ᠪᠡᠯᠡᠳᠬᠡᠭᠰᠡᠨ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠵᠤ ᠪᠠᠢᠭᠠ᠃ ᠲᠡᠭᠡᠭᠡᠳ ᠪᠢ ᠴᠢᠳᠥᠷ ᠣᠨᠢᠰᠣ᠂ ᠬᠦᠨᠳᠦ ᠬᠠᠷᠪᠤᠭᠴᠢ᠂ ᠴᠢᠯᠠᠭᠤ ᠰᠢᠳᠡᠭᠴᠢ ᠨᠤᠮᠤ ᠨᠠᠯᠢᠶᠠᠨ ᠬᠡᠳᠦ ᠶ᠋ᠢ ᠭᠠᠵᠠᠷ ᠪᠦᠷᠢ ᠳ᠋ᠦ᠍ ᠨᠡᠮᠡᠨ ᠬᠢᠯᠭᠡᠵᠦ ᠪᠠᠢᠨᠠ᠃ ᠬᠤᠯᠤᠰᠤ ᠪᠥᠬᠡ ᠰᠠᠢᠨ ᠨᠤᠮᠤ ᠪᠣᠯᠳᠠᠭ ᠪᠣᠯᠬᠣᠷ ᠨᠢ ᠪᠦᠳᠦᠭᠦᠨ ᠬᠤᠯᠤᠰᠤ ᠣᠯᠵᠤ ᠬᠠᠷᠪᠤᠭᠴᠢ ᠬᠢᠵᠦ ᠡᠬᠢᠯᠡᠭᠰᠡᠨ ᠨᠢ ᠣᠪᠣᠭᠠ ᠬᠡᠳᠦ ᠪᠣᠯᠤᠭᠠᠳ ᠪᠠᠢᠭᠠ᠃ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠭᠠᠵᠠᠷ ᠪᠦᠷᠢ ᠣᠯᠵᠠᠨ ᠤ᠋ ᠬᠢᠲᠠᠳ ᠤ᠋ᠳ ᠲᠠᠢ ᠨᠡᠢᠯᠡᠭᠡᠳ ᠮᠣᠳᠣ ᠴᠢᠯᠠᠭᠤ ᠲᠠᠢ ᠨᠣᠴᠣᠯᠳᠤᠨ ᠵᠦᠰᠦᠵᠦ᠂ ᠨᠠᠮᠤᠷᠵᠢᠯᠠ᠃ ᠴᠡᠷᠢᠭ ᠪᠠᠢᠭᠠ ᠨᠤᠲᠤᠭ ᠳᠤ ᠡᠪᠦᠯ ᠪᠣᠯᠳᠠᠭ ᠦᠭᠡᠢ ᠲᠡᠷᠡ ᠠᠵᠢᠯ ᠢ᠋ᠶ᠋ᠠᠨ ᠴᠠᠭᠠᠰᠢ ᠨᠢ ᠦᠷᠭᠦᠯᠵᠢᠭᠦᠯᠦᠨᠡ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠨᠠ᠃ ᠡᠨᠡ ᠲᠤᠬᠠᠢ ᠪᠠᠨ ᠪᠢ ᠶᠡᠷᠦᠩᠬᠡᠢ ᠵᠠᠩᠵᠤᠨ ᠤᠷᠢᠶᠠᠩᠬᠠᠢᠳᠠᠢ ᠪᠣᠯᠤᠨ ᠴᠠᠭᠠᠨ ᠵᠠᠩᠵᠤᠨ ᠳ᠋ᠤ᠌ ᠠᠢᠯᠠᠳᠬᠠᠨ ᠶᠠᠷᠢᠭᠰᠠᠨ᠃ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠳ ᠨᠠᠳᠠ ᠠ᠋ᠴᠠ ᠳᠤᠲᠠᠭᠤ ᠦᠭᠡᠢ ᠶᠠᠭᠤᠮᠠ ᠤᠷᠤᠯᠳᠤᠵᠤ ᠪᠠᠢᠭᠠ ᠰᠤᠷᠠᠭ ᠲᠠᠢ ᠪᠢᠯᠡ ᠭᠡᠵᠦ ᠪᠠᠶᠠᠨ ᠲᠠᠢᠪᠤᠩ ᠴᠢᠷᠠᠢ ᠭᠠᠷᠭᠠᠨ ᠶᠠᠷᠢᠪᠠ᠃ ᠡᠨᠡ ᠡᠷᠡ ᠲᠠᠩᠨᠠᠨ ᠲᠠᠢᠪᠤᠩ ᠪᠠᠢᠳᠠᠭ ᠵᠠᠩᠲᠠᠢ᠃
— ᠪᠦᠬᠦ ᠡᠩᠨᠡᠭᠡ ᠪᠡᠷ ᠳᠣᠪᠲᠣᠯᠭᠠᠨ ᠡᠬᠢᠯᠡᠭᠦᠯ ᠭᠡᠵᠦ ᠪᠢ ᠵᠠᠷᠯᠢᠭ ᠭᠠᠷᠭᠠᠬᠤ ᠰᠠᠨᠠᠭᠠᠲᠠᠢ᠂ ᠲᠠ ᠨᠠᠷ ᠤ᠋ᠨ ᠪᠡᠯᠡᠳᠬᠡᠵᠦ ᠪᠠᠢᠭᠠ ᠵᠦᠢᠯ ᠢ᠋ ᠰᠣᠨᠢᠷᠬᠠᠵᠤ ᠪᠠᠢᠭᠠ ᠰᠢᠦ᠃ ᠪᠢ ᠪᠠᠰᠠ ᠤᠷᠤᠭᠰᠢ ᠪᠠᠨ ᠪᠠᠢᠯᠳᠤᠨ ᠶᠠᠪᠤᠭᠠ ᠴᠡᠷᠢᠭ ᠦ᠋ᠳ ᠲᠡᠢ ᠠᠭᠤᠯᠵᠠᠬᠤ ᠰᠠᠨᠠᠭᠠᠲᠠᠢ᠃ ᠣᠳᠣᠬᠠᠨ ᠳ᠋ᠤ᠌ ᠪᠠᠨ ᠡᠨᠳᠡ ᠶᠠᠭᠤ ᠪᠠᠨ ᠬᠢᠵᠦ ᠰᠠᠭᠤᠬᠤ ᠪᠢᠯᠡ ᠳᠠ᠃
— ᠪᠢ ᠣᠢᠯᠠᠭᠠᠯᠠ ᠵᠠᠬᠢᠷᠤᠭᠴᠢ ᠮᠢᠨᠢ! ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠭᠣᠷᠢ ᠦᠭᠡᠢ ᠰᠢᠦ᠃ ᠰᠢᠲᠠᠭᠠᠭᠰᠠᠨ ᠭᠠᠵᠠᠷ ᠤ᠋ᠨ ᠨᠤᠷᠮᠠᠨ ᠳᠣᠲᠣᠷᠠ ᠠ᠋ᠴᠠ ᠪᠣᠰᠴᠤ ᠢᠷᠡᠭᠡᠳ ᠯᠡ ᠲᠤᠯᠤᠯᠳᠤᠭᠠᠳ ᠪᠠᠢᠳᠠᠭ᠂ ᠶᠡᠬᠡ ᠬᠥᠳᠡᠯᠭᠡᠭᠡᠨ ᠲᠡᠢ᠂ ᠪᠠᠷᠢᠭᠰᠠᠨ ᠬᠤᠯᠤᠰᠤᠨ ᠰᠤᠮᠤ ᠰᠢᠭ᠋ ᠢ᠋ᠶ᠋ᠡᠨ ᠭᠤᠯᠵᠠᠯᠵᠠᠨ ᠴᠢᠪᠬᠠᠳᠠᠭᠠᠳ ᠪᠠᠢᠨᠠ᠃ ᠲᠡᠳᠡ ᠮᠣᠷᠢ ᠪᠠᠢᠬᠤ ᠦᠭᠡᠢ᠂ ᠶᠠᠪᠠᠭᠠᠨ ᠪᠣᠯᠤᠭᠠᠳ ᠯᠠ ᠮᠠᠨ ᠤ᠋ ᠴᠡᠷᠢᠭ ᠡᠴᠡ ᠠᠶᠤᠳᠠᠭ ᠪᠣᠯᠤᠯᠲᠠᠢ ᠳ᠋ᠠᠭ᠃
— ᠶᠠᠪᠠᠭᠠᠨ ᠠᠮᠢᠲᠠᠳ ᠢ᠋ ᠪᠢᠳᠡ ᠶᠠᠭᠠᠬᠢᠵᠤ ᠡᠢᠭᠡᠳ ᠱᠠᠭᠠᠢ ᠠᠳᠠᠯᠢ ᠬᠤᠷᠢᠶᠠᠵᠤ ᠪᠥᠭᠡᠮᠨᠡᠷᠡᠭᠦᠯᠦᠭᠡᠳ ᠠᠪᠤᠨᠠ ᠪᠢᠵᠡ ᠳᠡ? ᠲᠡᠢᠮᠦ ᠶᠡᠬᠡ ᠣᠯᠠᠨ ᠬᠥᠮᠦᠨ ᠦ᠌ ᠠᠮᠢ ᠨᠠᠰᠤ ᠶ᠋ᠢ ᠪᠦᠷᠢᠯᠭᠡᠬᠦ ᠦᠭᠡᠢ ᠪᠡᠷ ᠲᠡᠳᠡᠨ ᠢ᠋ ᠡᠪᠦᠳᠦᠭᠯᠡᠭᠡᠳ ᠠᠪᠴᠤ ᠳᠥᠩᠭᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠂ ᠵᠠᠩᠵᠤᠨ ᠮᠢᠨᠢ!
— ᠳᠥᠩᠭᠡᠬᠦ ᠨᠢ ᠴᠦ᠍ ᠳᠥᠩᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠤᠷᠤᠭᠰᠢᠯᠠᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠢᠯᠠᠭᠠ᠂ ᠬᠠᠯᠠᠭᠤᠨ ᠬᠣᠶᠠᠷ ᠨᠢ ᠶᠡᠬᠡ᠂ ᠤᠰᠤᠨ ᠨᠠᠮᠤᠭ ᠡᠯᠪᠡᠭ᠂ ᠮᠣᠷᠢᠨ ᠤ᠋ ᠬᠣᠭᠣᠯᠠ ᠣᠯᠳᠠᠬᠤ ᠨᠢ ᠮᠠᠭᠤ᠂ ᠲᠡᠭᠡᠭᠡᠳ ᠰᠥᠩ ᠦ᠋ᠨ ᠬᠣᠲᠠ ᠣᠯᠠᠨ᠂ ᠲᠡᠳᠡ ᠬᠣᠲᠠ ᠪᠠᠨ ᠰᠦᠷᠡᠬᠡᠢ ᠪᠡᠬᠢᠯᠡᠵᠦ ᠪᠠᠢᠭᠠ ᠰᠤᠷᠠᠭ ᠲᠠᠢ᠃ ᠪᠢ ᠨᠡᠯᠢᠶᠡᠨ ᠲᠣᠭᠠ ᠲᠠᠢ ᠲᠤᠷᠰᠢᠭᠤᠯ ᠶᠠᠪᠤᠭᠤᠯᠤᠭᠰᠠᠨ᠃ ᠲᠡᠳᠡᠨ ᠦ᠌ ᠠᠮᠠ ᠨᠢᠭᠡ ᠯᠡ ᠪᠠᠢᠭᠠ᠃ ᠰᠥᠩ ᠦ᠋ᠨ ᠳᠡᠭᠡᠳᠦ ᠨᠣᠶᠠᠳ ᠤ᠋ᠳ ᠨᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠪᠢᠳᠡᠨ ᠦ᠌ ᠡᠮᠦᠨᠡ ᠰᠥᠭᠥᠳᠬᠦ ᠦᠭᠡᠢ᠂ ᠬᠠᠷᠢᠨ ᠪᠢᠳᠡᠨ ᠢ᠋ ᠰᠥᠭᠦᠳᠦᠭᠦᠯᠦᠨ᠂ ᠪᠦᠬᠦ ᠬᠢᠲᠠᠳ ᠢ᠋ ᠡᠵᠡᠩᠨᠡᠨ ᠵᠠᠬᠢᠷᠤᠭᠴᠢ ᠪᠠᠢᠬᠤ ᠰᠠᠨᠠᠭᠠᠲᠠᠢ᠃ ᠲᠡᠭᠡᠭᠡᠳ ᠮᠠᠨ ᠤ᠋ ᠭᠠᠷ ᠠ᠋ᠴᠠ ᠬᠣᠢᠲᠤ ᠬᠢᠲᠠᠳ ᠤ᠋ᠨ ᠪᠦᠬᠦ ᠨᠤᠲᠤᠭ ᠢ᠋ ᠰᠠᠯᠠᠭᠠᠨ ᠠᠪᠤᠨᠠ ᠭᠡᠵᠦ ᠶᠠᠷᠢᠳᠠᠭ ᠪᠠᠢᠨᠠ᠃ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠮᠠᠨ ᠤ᠋ ᠶᠠᠪᠤᠭᠤᠯᠤᠭᠰᠠᠨ ᠡᠯᠴᠢ ᠨᠠᠷ ᠢ᠋ ᠳᠣᠣᠷᠠ ᠨᠢ ᠪᠠᠷᠢᠵᠤ ᠠᠪᠴᠤ ᠬᠠᠷᠠ ᠭᠡᠷ ᠲᠦ᠍ ᠲᠦᠭᠵᠢᠨ᠂ ᠲᠠᠮᠤᠯᠠᠭᠠᠳ ᠪᠠᠢᠭᠠ ᠬᠡᠷᠡᠭ᠃ ᠪᠢᠳᠡ ᠡᠯᠴᠢ ᠨᠠᠷ ᠢ᠋ᠶ᠋ᠠᠨ ᠠᠪᠤᠨᠠ᠃ ᠥᠪᠡᠷᠰᠡᠳ ᠢ᠋ ᠨᠢ ᠲᠡᠷᠡ ᠵᠢᠱ᠌ᠢᠶᠡ ᠪᠡᠷ ᠪᠠᠷᠢᠵᠤ ᠠᠪᠬᠤ ᠴᠠᠭ ᠢᠷᠡᠨᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃
— ᠠ᠂ ᠲᠡᠢᠮᠦ ᠪᠣᠢ᠃ ᠵᠠᠩᠵᠤᠨ ᠮᠠᠨᠢ ᠶᠡᠬᠡ ᠶᠠᠭᠤᠮᠠ ᠪᠣᠳᠣᠵᠤ ᠰᠢᠪ᠃
— ᠵᠠᠬᠢᠷᠤᠭᠴᠢ ᠮᠢᠨᠢ! ᠪᠢᠳᠡ ᠰᠥᠩ ᠦ᠋ᠨ ᠴᠡᠷᠢᠭ ᠲᠡᠢ ᠰᠢᠭᠤᠳ ᠬᠠᠯᠵᠠ ᠲᠤᠯᠤᠯᠳᠤᠭᠠᠳ ᠡᠨᠡ ᠲᠡᠢᠨ ᠢ᠋ ᠲᠦᠷᠭᠡᠨ ᠳᠠᠭᠤᠰᠬᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠪᠢᠳᠡ ᠳᠠᠢᠳᠤᠬᠤ ᠠᠷᠭᠠ ᠪᠠᠨ ᠥᠭᠡᠷᠡᠴᠢᠯᠡᠬᠦ ᠶᠣᠰᠣᠲᠠᠢ ᠪᠣᠯᠤᠭᠠᠳ ᠪᠠᠢᠨᠠ᠃ ᠪᠢᠳᠡ ᠡᠨᠡ ᠤᠯᠤᠰ ᠢ᠋ ᠪᠦᠷ ᠠᠯᠤᠰ ᠢ᠋ᠶ᠋ᠠᠷ ᠨᠢ ᠲᠣᠭᠣᠷᠢᠨ ᠪᠦᠰᠡᠯᠡᠵᠦ ᠠᠪᠤᠭᠠᠳ ᠪᠠᠷᠠᠭᠤᠨ᠂ ᠵᠡᠭᠦᠨ ᠲᠠᠯᠠ ᠠ᠋ᠴᠠ ᠨᠢ ᠬᠣᠭᠣᠯᠠ ᠬᠦᠨᠡᠰᠦ᠂ ᠪᠤᠰᠤᠳ ᠵᠦᠢᠯ ᠣᠷᠣᠬᠤ ᠠᠷᠭᠠ ᠦᠭᠡᠢ ᠪᠣᠯᠭᠠᠵᠤ ᠭᠠᠷ ᠢ᠋ ᠨᠢ ᠮᠤᠬᠤᠷᠯᠠᠨ᠂ ᠭᠠᠭᠴᠠᠭᠠᠷᠳᠠᠭᠤᠯᠬᠤ ᠶᠣᠰᠣᠲᠠᠢ ᠪᠠᠢᠨᠠ᠃ ᠳᠣᠲᠣᠷᠠ ᠨᠢ ᠴᠦ᠍ ᠬᠣᠲᠠ ᠨᠤᠭᠤᠳ ᠢ᠋ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠬᠠᠷᠢᠯᠴᠠᠬᠤ ᠬᠠᠷᠭᠤᠢ ᠦᠭᠡᠢ ᠪᠣᠯᠭᠠᠵᠤ᠂ ᠲᠤᠰ ᠪᠦᠷᠢ ᠳ᠋ᠦ᠍ ᠨᠢ ᠬᠠᠭᠠᠨ ᠲᠦᠭᠵᠢᠬᠦ ᠬᠡᠷᠡᠭᠲᠡᠢ᠃ ᠲᠡᠭᠡᠪᠡᠯ ᠲᠡᠳᠡ ᠥᠯᠥᠰᠬᠦ ᠪᠡᠷ ᠢ᠋ᠶ᠋ᠡᠨ᠂ ᠭᠠᠷ ᠨᠢ ᠮᠤᠬᠤᠷᠳᠠᠬᠤ ᠪᠠᠷ ᠢ᠋ᠶ᠋ᠠᠨ ᠠᠷᠭᠠ ᠦᠭᠡᠢ ᠵᠡᠪᠰᠡᠭ ᠢ᠋ᠶ᠋ᠡᠨ ᠰᠢᠳᠡᠬᠦ ᠪᠢᠵᠡ᠃ ᠢᠩᠭᠢᠪᠡᠯ ᠬᠣᠶᠠᠷ ᠵᠢᠯ ᠦ᠋ᠨ ᠳᠣᠲᠣᠷᠠ ᠰᠥᠩ ᠦ᠋ᠨ ᠬᠠᠭᠠᠳ ᠢ᠋ ᠪᠠᠷᠢᠵᠤ ᠠᠪᠴᠤ ᠳᠥᠩᠭᠡᠨᠡ ᠪᠣᠢ ᠭᠡᠵᠦ ᠪᠠᠶᠠᠨ ᠬᠣᠭᠣᠯᠠ ᠰᠠᠪᠬᠠᠳᠠᠨ᠂ ᠰᠠᠷᠬᠤᠳ ᠰᠢᠮᠡᠨ ᠰᠠᠭᠤᠵᠤ ᠶᠠᠷᠢᠯᠠ᠃
ᠬᠤᠪᠢᠯᠠᠢ ᠲᠣᠯᠣᠭᠠᠢ ᠳᠣᠬᠢᠨ ᠵᠠᠩᠵᠤᠨ ᠤ᠋ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠨ ᠵᠥᠪᠲᠡᠭᠡᠨᠡ᠃ ᠬᠡᠰᠡᠭ ᠵᠠᠭᠤᠷᠠ ᠴᠢᠮᠡᠭᠡ ᠦᠭᠡᠢ ᠪᠠᠢᠪᠠ᠃
— ᠲᠩᠷᠢ ᠥᠷᠥᠰᠢᠶᠡ! ᠪᠢ ᠮᠠᠷᠭᠠᠰᠢ ᠪᠤᠴᠠᠵᠤ ᠴᠡᠷᠢᠭ ᠳᠡᠭᠡᠷᠡ ᠪᠡᠨ ᠣᠴᠢᠭᠠᠳ ᠵᠠᠬᠢᠷᠤᠭᠴᠢ ᠲᠠᠨ ᠤ᠋ ᠲᠤᠰᠢᠶᠠᠯ ᠶᠣᠰᠣᠭᠠᠷ ᠰᠢᠭᠤᠳ ᠳᠣᠪᠲᠣᠯᠬᠤ ᠬᠡᠷᠡᠭ ᠢ᠋ᠶ᠋ᠡᠨ ᠪᠠᠵᠠᠭᠠᠶᠠ᠃ ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭᠠᠳ ᠪᠦᠬᠦ ᠡᠩᠨᠡᠭᠡ ᠪᠡᠷ ᠳᠣᠪᠲᠣᠯᠭᠠᠨ ᠢ᠋ᠶ᠋ᠠᠨ ᠡᠬᠢᠯᠡᠪᠡᠯ ᠵᠦᠭᠡᠷ ᠪᠣᠯᠪᠠ ᠤᠤ᠃ ᠬᠡᠳᠦ ᠬᠣᠨᠣᠭ ᠪᠢᠳᠡ ᠨᠠᠯᠠᠢᠭᠰᠠᠨ ᠰᠢᠨᠵᠢᠲᠡᠢ᠂ ᠮᠥᠳᠳᠥ ᠲᠤᠯᠤᠯᠳᠤᠭᠠᠨ ᠬᠢᠬᠦ ᠶᠠᠩᠵᠤ ᠦᠭᠡᠢ ᠰᠢᠪ ᠭᠡᠮᠡᠷ ᠪᠠᠢᠭᠠᠳ᠂ ᠭᠡᠨᠡᠳᠲᠡ ᠫᠢᠵᠢᠭᠢᠨᠡᠭᠦᠯᠪᠡᠯ ᠬᠥᠬᠡ ᠮᠥᠷᠡᠨ ᠦ᠌ ᠡᠮᠦᠨᠡᠲᠦ ᠡᠷᠭᠢ ᠡᠴᠡ ᠰᠥᠩ ᠦ᠋ᠨ ᠴᠡᠷᠢᠭ ᠢ᠋ ᠡᠯᠳᠡᠨ ᠬᠥᠭᠡᠭᠡᠵᠦ ᠴᠢᠳᠠᠨᠠ᠃ ᠬᠠᠭᠤᠷᠠᠢ ᠭᠠᠵᠠᠷ ᠲᠤ ᠪᠣᠯ ᠮᠣᠷᠢᠲᠠᠨ ᠬᠥᠮᠦᠨ ᠶᠠᠪᠠᠭᠠᠨ ᠢ᠋ ᠲᠠᠰᠢᠭᠤᠷᠳᠠᠨ ᠡᠯᠳᠡᠵᠦ ᠪᠣᠯᠤᠨᠠ ᠪᠢᠵᠡ᠃ ᠡᠨᠡ ᠲᠤᠬᠠᠢ ᠵᠠᠬᠢᠷᠤᠭᠴᠢ ᠲᠠ ᠤᠷᠢᠶᠠᠩᠬᠠᠢᠳᠠᠢ ᠪᠣᠯᠤᠨ ᠴᠠᠭᠠᠨ ᠵᠠᠩᠵᠤᠨ ᠲᠠᠢ ᠬᠡᠯᠡᠯᠴᠡᠵᠦ ᠲᠣᠬᠢᠷᠠᠭᠰᠠᠨ ᠶᠤᠮ ᠪᠠᠢᠭᠠ ᠪᠢᠵᠡ ᠳᠡ? ᠭᠡᠵᠦ ᠪᠠᠶᠠᠨ ᠥᠭᠦᠯᠡᠯᠡ᠃
— ᠳᠣᠪᠲᠣᠯᠭᠠᠨ ᠡᠬᠢᠯᠡᠬᠦ ᠡᠳᠦᠷ ᠰᠤᠳᠤᠷ ᠢ᠋ ᠪᠢ ᠤᠷᠢᠶᠠᠩᠬᠠᠢᠳᠠᠢ᠂ ᠴᠠᠭᠠᠨ ᠵᠠᠩᠵᠤᠨ ᠨᠠᠷ ᠲᠠᠢ ᠶᠠᠪ ᠴᠠᠪ ᠲᠣᠭᠲᠠᠭᠰᠠᠨ ᠶᠠᠭᠤᠮᠠ ᠦᠭᠡᠢ᠃ ᠲᠡᠷᠡ ᠵᠠᠩᠵᠤᠨ ᠨᠤᠭᠤᠳ ᠣᠳᠣᠬᠠᠨ ᠳ᠋ᠤ᠌ ᠪᠠᠨ ᠬᠠᠭᠠᠨ ᠠᠬᠠ ᠶ᠋ᠢᠨ ᠲᠡᠷᠢᠭᠦᠯᠡᠵᠦ ᠪᠠᠢᠭᠰᠠᠨ ᠴᠡᠷᠢᠭ ᠦ᠋ᠨ ᠲᠦᠮᠡᠲᠦ ᠨᠦ᠍ᠭᠦᠳ ᠳᠡᠭᠡᠷᠡ ᠣᠴᠢᠨᠠ᠃ ᠶᠠᠪᠤᠭᠠᠨ ᠳ᠋ᠤ᠌ ᠪᠠᠨ ᠮᠢᠨᠦ ᠳᠡᠷᠭᠡᠳᠡ ᠢᠷᠡᠵᠦ᠂ ᠪᠦᠬᠦ ᠲᠡᠢᠨ ᠦ᠌ ᠶᠠᠪᠤᠳᠠᠯ ᠢ᠋ ᠬᠥᠲᠥᠯᠬᠦ ᠳ᠋ᠦ᠍ ᠨᠠᠳᠠᠳᠤ ᠲᠤᠰᠠᠯᠠᠬᠤ ᠪᠣᠯᠤᠨᠠ᠃ ᠲᠡᠭᠡᠵᠦ ᠪᠢ ᠬᠡᠯᠡᠭᠰᠡᠨ᠃ ᠴᠢᠮᠠᠶ᠋ᠢ ᠡᠨᠳᠡ ᠪᠡᠨ ᠠᠪᠬᠤ ᠶᠤᠮ ᠪᠢᠯᠡ ᠤᠤ ᠭᠡᠵᠦ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠰᠥᠩ ᠦ᠋ᠨ ᠬᠣᠲᠠ ᠨᠤᠭᠤᠳ ᠢ᠋ ᠳᠠᠢᠯᠠᠷᠠ ᠣᠴᠢᠬᠤ ᠳ᠋ᠤ᠌ ᠴᠢ ᠴᠡᠷᠢᠭ ᠲᠡᠢ ᠪᠡᠨ ᠬᠠᠮᠲᠤ ᠪᠠᠢᠭᠰᠠᠨ ᠨᠢ ᠳᠡᠭᠡᠷᠡ ᠭᠡᠵᠦ ᠨᠠᠳᠠᠳᠤ ᠪᠣᠳᠣᠭᠳᠠᠭᠰᠠᠨ᠃ ᠣᠳᠣ ᠪᠢ ᠮᠠᠷᠭᠠᠰᠢ ᠡᠯᠴᠢ ᠮᠣᠷᠳᠠᠭᠤᠯᠤᠨ ᠳᠣᠪᠲᠣᠯᠭᠠᠨ ᠡᠬᠢᠯᠡᠬᠦ ᠡᠳᠦᠷ ᠴᠠᠭ ᠢ᠋ ᠬᠡᠯᠡᠭᠦᠯᠦᠶᠡ ᠭᠡᠵᠦ ᠬᠤᠪᠢᠯᠠᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠰᠠᠷᠬᠤᠳ ᠰᠢᠮᠡᠭᠡᠳ᠂ ᠪᠠᠶᠠᠨ ᠢ᠋ ᠠᠵᠢᠭᠴᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠠᠷᠠᠬᠤ ᠨᠢ ᠵᠠᠬᠢᠷᠤᠭᠴᠢ ᠥᠭᠡᠷᠡ ᠨᠢᠭᠡ ᠴᠤᠬᠠᠭ ᠵᠦᠢᠯ ᠪᠣᠳᠣᠭᠠᠳ ᠪᠠᠢᠭᠠ ᠨᠢ ᠢᠯᠡᠳᠲᠡ ᠪᠠᠢᠪᠠ᠃
ᠶᠡᠷᠦ ᠨᠢ ᠬᠤᠪᠢᠯᠠᠢ ᠶ᠋ᠢᠨ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠲᠤᠩ ᠰᠣᠨᠢᠨ ᠪᠠᠢᠳᠠᠭ᠃ ᠶᠠᠮᠠᠷ ᠨᠢᠭᠡ ᠴᠤᠬᠠᠭ ᠵᠦᠢᠯ ᠪᠣᠳᠣᠵᠤ ᠪᠠᠢᠭᠠ ᠨᠢ ᠲᠡᠭᠦᠨ ᠦ᠌ ᠵᠢᠭᠤᠳᠠᠭᠠᠢ ᠬᠠᠷᠠᠴᠠᠨ ᠳ᠋ᠤ᠌ ᠲᠤᠰᠬᠠᠭᠳᠠᠳᠠᠭ᠃ ᠲᠡᠷᠡ ᠪᠡᠷ ᠥᠭᠡᠷᠡ ᠪᠤᠰᠤᠳ ᠤ᠋ᠨ ᠰᠠᠨᠠᠭᠠ ᠪᠣᠳᠣᠯ ᠢ᠋ ᠬᠠᠷᠠᠵᠤ ᠠᠵᠢᠵᠤ ᠪᠠᠢᠭᠠᠳ ᠲᠠᠭᠠᠪᠤᠷᠢᠯᠠᠨ ᠮᠡᠳᠡᠬᠦ ᠳ᠋ᠦ᠍ ᠪᠡᠨ ᠭᠠᠷᠮᠠᠭᠠᠢ ᠪᠠᠢᠳᠠᠭ᠃《ᠬᠤᠪᠢᠯᠠᠢ ᠪᠤᠰᠤᠳ ᠢ᠋ ᠨᠢᠳᠦᠨ ᠦ᠌ ᠬᠢᠨᠢ ᠬᠠᠷᠠᠴᠠ ᠪᠠᠷ ᠰᠢᠨᠵᠢᠵᠦ ᠴᠢᠳᠠᠳᠠᠭ᠂ ᠲᠡᠭᠦᠨ ᠳ᠋ᠦ᠍ ᠪᠡᠨ ᠮᠡᠷᠭᠡᠨ》 ᠭᠡᠵᠦ ᠬᠥᠮᠥᠰ ᠦ᠋ᠨ ᠬᠡᠯᠡᠳᠡᠭ ᠨᠢ ᠣᠨᠣᠭᠠᠭᠰᠠᠨ ᠣᠨᠣᠰᠢ ᠪᠢᠯᠡ᠃ ᠵᠠᠬᠢᠷᠤᠭᠴᠢ ᠪᠠᠶᠠᠨ ᠤ᠋ ᠪᠠᠢᠳᠠᠯ ᠢ᠋ ᠲᠡᠢᠨ ᠠᠵᠢᠭᠠᠳ᠄
— ᠵᠠ ᠲᠡᠢᠨ ᠦ᠌ ᠬᠡᠷᠡᠭ ᠢ᠋ ᠪᠢᠳᠡ ᠬᠣᠶᠠᠷ ᠶᠠᠷᠢᠯᠴᠠᠵᠤ ᠰᠠᠨᠠᠭᠠ ᠨᠡᠢᠯᠡᠪᠡ ᠰᠢᠪ᠃ ᠡᠭᠦᠨ ᠳ᠋ᠦ᠍ ᠮᠢᠨᠦ ᠰᠡᠳᠬᠢᠯ ᠬᠠᠨᠤᠵᠤ ᠪᠠᠢᠨᠠ᠃ ᠪᠢ ᠣᠳᠣ ᠤᠯᠤᠰ ᠭᠦᠷᠦᠨ ᠮᠠᠨᠢ ᠯᠠ ᠲᠡᠷᠢᠭᠦᠨ ᠦᠭᠡᠢ ᠪᠣᠯᠬᠣᠷ ᠬᠡᠷᠡᠭ ᠶᠠᠪᠤᠳᠠᠯ ᠴᠠᠯᠠᠭᠠᠢᠷᠠᠵᠤ ᠣᠷᠬᠢᠬᠤ ᠪᠣᠢ ᠭᠡᠵᠦ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠨᠠ ᠭᠰᠡᠨ ᠳ᠋ᠡᠭᠡᠨ ᠲᠤᠷᠰᠢᠨ᠂ ᠦᠭᠡ ᠰᠣᠨᠣᠰᠬᠤ ᠭᠡᠰᠡᠨ ᠶᠠᠩᠵᠤ ᠪᠠᠷ ᠬᠡᠯᠡᠯᠡ᠃
ᠪᠠᠶᠠᠨ ᠪᠠᠰᠠ ᠰᠠᠷᠬᠤᠳ ᠰᠢᠮᠡᠨ ᠪᠣᠳᠣᠯᠬᠢᠯᠠᠵᠤ᠂ ᠣᠪᠣ ᠲᠣᠪᠣᠬᠠᠨ ᠴᠣᠬᠣᠷ ᠨᠢᠭᠤᠷ ᠢ᠋ᠶ᠋ᠠᠨ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠢᠯᠢᠭᠡᠳ᠄
— ᠡᠨᠡ ᠴᠦ᠍ ᠰᠡᠳᠬᠢᠯ ᠵᠣᠪᠠᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠵᠦᠢᠯ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠶᠡᠬᠡ ᠬᠥᠮᠦᠨ ᠦ᠌ ᠣᠷᠣ ᠶ᠋ᠢ ᠳᠣᠣᠷᠠ ᠨᠢ ᠵᠠᠯᠭᠠᠳᠠᠭ ᠦᠭᠡᠢ᠂ ᠭᠡᠰᠡᠨ ᠵᠠᠭᠤᠷᠠ ᠠᠯᠭᠤᠷᠯᠠᠨ ᠪᠠᠢᠵᠤ ᠬᠣᠢᠲᠤᠬᠢ ᠶ᠋ᠢ ᠨᠢ ᠲᠣᠳᠤᠷᠭᠤᠯᠪᠠᠯ ᠥᠯᠵᠡᠢᠲᠡᠢ ᠪᠠᠢᠳᠠᠭ ᠭᠡᠵᠦ ᠮᠣᠩᠭᠣᠯᠴᠤᠳ ᠦᠵᠡᠳᠡᠭ᠃ ᠲᠡᠷᠡ ᠴᠦ᠍ ᠦᠭᠡ ᠰᠢᠦ ᠭᠡᠪᠡ᠃
ᠬᠤᠪᠢᠯᠠᠢ ᠥᠪᠡᠷ ᠢ᠋ ᠨᠢ ᠬᠠᠭᠠᠨ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤ ᠭᠡᠬᠦ ᠮᠠᠶᠢᠭ ᠤ᠋ᠨ ᠦᠭᠡ ᠪᠠᠶᠠᠨ ᠤ᠋ ᠠᠮᠠᠨ ᠠ᠋ᠴᠠ ᠭᠠᠷᠤᠭᠰᠠᠨ ᠦᠭᠡᠢ ᠳ᠋ᠦ᠍ ᠰᠡᠳᠬᠢᠯ ᠨᠢ ᠳᠣᠲᠣᠷᠠ ᠪᠠᠨ ᠭᠣᠩᠰᠣᠢᠪᠠᠴᠤ ᠡᠨᠡ ᠬᠥᠮᠦᠨ ᠦ᠌ ᠳᠦᠭᠦᠷᠡᠩ ᠣᠷᠣᠯᠴᠠᠭᠠ ᠦᠭᠡᠢ ᠪᠡᠷ ᠶᠠᠭᠤ ᠴᠦ᠍ ᠪᠦᠲᠦᠬᠦ ᠦᠭᠡᠢ ᠭᠡᠳᠡᠭ ᠢ᠋ ᠠᠩᠵᠠᠭᠠᠷᠴᠤ ᠪᠣᠳᠣᠨ᠂ ᠦᠭᠡ ᠪᠡᠨ ᠵᠥᠭᠡᠭᠡᠰᠬᠢᠭᠡᠳ᠄
— ᠴᠠᠭ ᠦᠶᠡ ᠮᠠᠨᠢ ᠲᠡᠢᠮᠦ ᠬᠤᠭᠤᠴᠠᠭᠠ ᠶ᠋ᠢ ᠬᠦᠯᠢᠶᠡᠬᠦ ᠦᠭᠡᠢ ᠯᠡ ᠪᠣᠯᠪᠠ ᠤᠤ᠃ ᠬᠢᠲᠠᠳ ᠤ᠋ᠨ ᠪᠠᠢᠳᠠᠯ ᠵᠠᠳᠠᠭᠠᠢ ᠪᠠᠢᠳᠠᠭ᠃ ᠰᠥᠩ ᠤᠯᠤᠰ ᠢ᠋ ᠲᠣᠬᠢᠨᠠᠭᠤᠯᠵᠤ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ ᠶᠠᠪᠤᠨᠠ᠃ ᠣᠷᠣᠰ᠂ ᠢᠷᠡᠨ᠂ ᠫᠸᠷᠢᠰ ᠣᠳᠣ ᠴᠣᠬᠣᠮ ᠶᠠᠮᠠᠷ ᠪᠠᠢᠭᠠ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠪᠡᠷᠬᠡᠲᠡᠢ᠃ ᠲᠡᠳᠡ ᠶᠡᠬᠡ ᠭᠦᠷᠦᠨ ᠡᠴᠡ ᠰᠠᠯᠤᠨ ᠲᠤᠰᠠᠭᠠᠷᠯᠠᠬᠤ ᠰᠠᠨᠠᠭᠠᠲᠠᠢ ᠴᠤ᠌ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠲᠡᠷᠢᠭᠦᠨ ᠦᠭᠡᠢ ᠠᠯᠭᠤᠷᠯᠠᠵᠤ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠬᠤ᠃
— ᠲᠡᠢᠮᠦ ᠠ᠋᠃ ᠲᠠ ᠵᠥᠪ ᠪᠣᠯᠭᠣᠭᠠᠵᠤ ᠪᠠᠢᠨᠠ᠃ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠰᠢᠷᠡᠭᠡᠨ ᠳ᠋ᠦ᠍ ᠨᠢ ᠵᠠᠯᠠᠬᠤ ᠵᠦᠢᠲᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠲᠠᠨ ᠤ᠋ ᠳᠡᠭᠦᠦ ᠨᠠᠷ ᠶᠠᠭᠤ ᠪᠣᠯᠭᠣᠭᠠᠵᠤ ᠪᠠᠢᠨᠠ ᠪᠣᠢ? ᠡᠵᠢ ᠲᠠᠨᠢ ᠶᠠᠮᠠᠷ ᠰᠠᠨᠠᠭᠠᠲᠠᠢ ᠪᠠᠢᠨᠠ ᠪᠣᠢ? ᠰᠤᠷᠬᠤᠭᠲᠠᠨᠢ ᠠᠪᠠᠭᠠᠢ ᠶ᠋ᠢᠨ ᠰᠠᠨᠠᠭᠠ ᠶ᠋ᠢ ᠬᠠᠷᠠᠭᠠᠯᠵᠠᠬᠤ ᠶᠣᠰᠣᠲᠠᠢ᠃ ᠡᠨᠡ ᠪᠦᠭᠦᠳᠡ ᠶ᠋ᠢ ᠮᠡᠳᠡᠬᠦ ᠶ᠋ᠢᠨ ᠲᠤᠯᠠᠳᠠ ᠲᠠ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠬᠥᠮᠦᠨ ᠵᠠᠷᠤᠵᠤ ᠲᠡᠳᠡᠨ ᠦ᠌ ᠪᠡᠨ ᠲᠠᠭᠠᠯᠠᠯ ᠢ᠋ ᠮᠡᠳᠡᠵᠦ ᠠᠪᠤᠪᠠᠰᠤ ᠵᠦᠭᠡᠷ ᠪᠢᠵᠡ᠃ ᠪᠢ ᠢᠩᠭᠢᠵᠦ ᠲᠠᠨ ᠳ᠋ᠤ᠌ ᠠᠢᠯᠠᠳᠬᠠᠵᠤ ᠪᠠᠢᠨᠠ᠃《ᠭᠠᠯᠠᠭᠤᠳ ᠲᠡᠷᠢᠭᠦᠨ ᠦᠭᠡᠢ ᠪᠣᠯ ᠴᠤᠪᠤᠭᠠ ᠪᠣᠯᠬᠤ ᠦᠭᠡᠢ᠃ ᠭᠡᠭᠦᠦ ᠳ᠋ᠦ᠍ ᠠᠵᠢᠷᠭᠠ ᠦᠭᠡᠢ ᠪᠣᠯ ᠰᠦᠷᠦᠭ ᠪᠣᠯᠬᠤ ᠦᠭᠡᠢ》 ᠭᠡᠳᠡᠭ ᠮᠡᠷᠭᠡᠨ ᠤᠬᠠᠭᠠᠨ ᠢ᠋ ᠭᠠᠷᠭᠠᠭᠰᠠᠨ ᠦᠭᠡ ᠳᠡ᠃ ᠠᠯᠲᠠᠨ ᠤᠷᠤᠭ ᠤ᠋ᠨ ᠳᠣᠲᠣᠷᠠᠬᠢ ᠡᠨᠡ ᠬᠡᠷᠡᠭ ᠢ᠋ ᠲᠠ ᠨᠠᠷ᠂ ᠢᠯᠠᠩᠭᠤᠶᠠ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠰᠢᠢᠳᠴᠦ ᠲᠠᠭᠠᠯᠠᠪᠠᠯ ᠵᠥᠪ ᠪᠣᠯᠤᠨᠠ ᠭᠡᠵᠦ ᠪᠠᠶᠠᠨ ᠬᠡᠯᠡᠬᠦ ᠨᠢ ᠬᠤᠪᠢᠯᠠᠢ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠡᠪ ᠦᠭᠡᠢ ᠰᠣᠨᠣᠰᠤᠭᠳᠠᠭᠰᠠᠨ ᠦᠭᠡᠢ᠂ ᠥᠪᠡᠷ ᠢ᠋ ᠨᠢ ᠬᠠᠭᠠᠨ ᠤ᠋ ᠣᠷᠣ ᠰᠠᠭᠤᠨᠠ ᠭᠡᠬᠦ ᠳ᠋ᠦ᠍ ᠪᠣᠯᠬᠤ ᠦᠭᠡᠢ ᠭᠡᠬᠦ ᠶᠠᠩᠵᠤ ᠦᠭᠡᠢ ᠪᠠᠢᠳᠠᠯᠲᠠᠢ ᠨᠢ ᠢᠯᠡ ᠪᠣᠯᠤᠯᠠ᠃
ᠬᠣᠭᠣᠯᠠ ᠠᠮᠲᠠᠲᠠᠢ ᠪᠣᠯᠵᠤ᠂ ᠶᠠᠷᠢᠶᠠ ᠲᠡᠭᠦᠰᠪᠡ᠃ ᠶᠠᠮᠠᠷ ᠴᠦ᠍ ᠪᠣᠯᠤᠭᠰᠠᠨ ᠰᠥᠩ ᠦ᠋ᠨ ᠴᠡᠷᠢᠭ ᠢ᠋ ᠣᠳᠣ ᠳᠠᠷᠤᠢ ᠳᠣᠪᠲᠣᠯᠵᠤ ᠡᠬᠢᠯᠡᠬᠦ ᠨᠢ ᠵᠥᠪ ᠭᠡᠰᠡᠨ ᠵᠦᠢᠯ ᠢ᠋ ᠲᠡᠳᠡ ᠳᠠᠬᠢᠨ ᠰᠠᠨᠠᠭᠠ ᠨᠢᠭᠡᠲᠡᠢ ᠬᠡᠯᠡᠯᠴᠡᠨ ᠲᠣᠭᠲᠠᠯᠠ᠃《ᠪᠠᠶᠠᠨ ᠰᠦᠷᠡᠬᠡᠢ ᠪᠠᠭᠤᠷᠢ ᠲᠠᠢ ᠡᠷᠡ ᠰᠢᠦ᠃ ᠶᠠᠮᠠᠷ ᠴᠦ᠍ ᠭᠡᠰᠡᠨ ᠬᠠᠷᠠ ᠬᠣᠷᠣᠮ ᠢ᠋ ᠮᠡᠳᠡ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠠ ᠨᠢ ᠤᠭ ᠨᠢ ᠵᠥᠪ ᠭᠡᠵᠦ ᠬᠤᠪᠢᠯᠠᠢ ᠪᠣᠳᠣᠨ ᠵᠠᠩᠵᠤᠨ ᠢ᠋ ᠦᠳᠡᠵᠦ ᠭᠠᠷᠭᠠᠪᠠ᠃ ᠬᠤᠪᠢᠯᠠᠢ ᠴᠤ᠌ ᠲᠡᠢᠨ ᠢ᠋ ᠡᠷᠴᠢᠲᠡᠢ ᠪᠣᠯᠭᠠᠬᠤ ᠰᠠᠨᠠᠭᠠ ᠪᠠᠷ ᠡᠮᠦᠨᠡ ᠵᠦᠭ ᠶᠠᠪᠤᠬᠤ ᠪᠣᠯᠪᠠ᠃ ᠲᠡᠭᠦᠨ ᠦ᠌ ᠲᠡᠢᠨ ᠬᠦ᠌ ᠠᠶᠠᠯᠠᠬᠤ ᠨᠢ ᠣᠯᠠᠨ ᠳᠠᠭᠠᠭᠤᠯ ᠪᠠᠷᠠ ᠪᠣᠯᠤᠭᠴᠢ᠂ ᠠᠰᠠᠷ ᠮᠠᠢᠬᠠᠨ᠂ ᠬᠦᠨᠡᠰᠦ ᠵᠣᠭᠣᠭ ᠤ᠋ᠨ ᠵᠦᠢᠯᠡᠰ᠂ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠭᠡᠳ ᠯᠡ ᠨᠦᠰᠡᠷ ᠪᠣᠯᠳᠠᠭ᠃ ᠯᠣᠯᠣᠢ ᠠᠪᠠᠭᠠᠢ ᠬᠦᠷᠲᠡᠯᠡ ᠬᠡᠳᠦᠨ ᠡᠮᠡ ᠳᠠᠭᠠᠭᠤᠯᠤᠭᠠᠳ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢ ᠪᠡᠷᠲᠡᠨ᠂ ᠶᠠᠰᠤ ᠭᠣᠷᠢᠳᠠᠭᠰᠠᠨ ᠠᠮᠢᠲᠠᠨ ᠠᠳᠠᠯᠢ ᠬᠡᠯᠲᠦᠷᠢᠬᠦ ᠬᠦᠰᠡᠯᠲᠡᠢ᠃ ᠲᠡᠷᠡ ᠰᠠᠨᠠᠭᠠ ᠨᠢ ᠡᠨᠡ ᠤᠳᠠᠭᠠ ᠳ᠋ᠤ᠌ ᠲᠠᠯᠠᠭᠠᠷ ᠥᠩᠭᠡᠷᠡᠪᠡ ᠪᠣᠯᠤᠯᠲᠠᠢ᠃ ᠲᠡᠭᠡᠯᠡ ᠴᠦ᠍ ᠪᠤᠰᠤᠳ ᠪᠡᠯᠡᠳᠬᠡᠯ ᠢ᠋ ᠨᠢ ᠬᠢᠬᠦ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠬᠡᠷᠡᠭ᠃
ᠤᠳᠠᠯ ᠦᠭᠡᠢ ᠪᠥᠭᠡᠮ ᠶᠠᠭᠤᠮᠠ ᠯᠠ ᠺᠡᠢᠫᠢᠩ ᠬᠣᠲᠠᠬᠠᠨ ᠠ᠋ᠴᠠ ᠡᠮᠦᠨᠡ ᠵᠦᠭ ᠴᠢᠭᠯᠡᠨ ᠬᠦᠪᠦᠷᠡᠯᠳᠦᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠠᠶᠠᠨ ᠵᠠᠩᠵᠤᠨ ᠠᠯᠢ ᠬᠡᠳᠦᠢᠨᠡ ᠬᠣᠣᠰ ᠮᠣᠷᠢ ᠤᠨᠤᠭᠠᠳ᠂ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠡᠴᠡ ᠪᠡᠨ ᠥᠭᠡᠷᠡ ᠠᠴᠢᠶᠠ ᠦᠭᠡᠢ᠂ ᠳᠥᠩᠭᠡᠵᠢ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠠᠷᠪᠠᠨ ᠴᠡᠷᠢᠭ ᠲᠡᠢ ᠶᠠᠪᠤᠭᠠᠳ ᠥᠭᠴᠡᠢ᠃ ᠲᠡᠷᠡ ᠪᠣᠯ ᠵᠢᠩᠬᠢᠨᠢ ᠴᠡᠷᠢᠭ ᠡᠷᠡ ᠶ᠋ᠢᠨ ᠶᠣᠰᠣᠭᠠᠷ ᠶᠠᠪᠤᠨᠠ᠃
ᠴᠠᠯᠭᠢᠶᠠ ᠭᠣᠣᠯ ᠤ᠋ᠨ ᠠᠳᠠᠭ ᠢ᠋ᠶ᠋ᠠᠷ ᠬᠥᠬᠡ ᠮᠥᠷᠡᠨ ᠦ᠌ ᠡᠷᠭᠢ ᠳ᠋ᠦ᠍ ᠬᠤᠪᠢᠯᠠᠢ ᠶ᠋ᠢ ᠬᠦᠷᠬᠦ ᠳ᠋ᠦ᠍ ᠠᠯᠢᠬᠠᠢ᠂ ᠠᠷᠠᠭ᠂ ᠠᠵᠤ᠂ ᠲᠣᠭᠣᠭᠠᠨ ᠵᠡᠷᠭᠡ ᠵᠠᠩᠵᠤᠨ ᠤᠭᠲᠤᠨ ᠤᠴᠠᠷᠠᠵᠤ᠂ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠪᠠᠢᠳᠠᠯ ᠢ᠋ᠶ᠋ᠠᠨ ᠲᠠᠨᠢᠯᠴᠠᠭᠤᠯᠤᠨ ᠠᠢᠯᠠᠳᠬᠠᠵᠤ᠂ ᠬᠣᠢᠨᠠ ᠤᠷᠲᠤ ᠨᠢ ᠪᠠᠷᠠ ᠪᠣᠯᠤᠯᠠ᠃
ᠬᠤᠪᠢᠯᠠᠢ ᠲᠡᠭᠦᠨ ᠳ᠋ᠦ᠍ ᠳᠤᠷᠠ ᠦᠭᠡᠢᠴᠡᠬᠦ ᠨᠣᠶᠠᠨ ᠪᠢᠰᠢ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠬᠡᠨ ᠪᠠᠢᠬᠤ ᠪᠣᠢ᠃ ᠵᠠᠬᠢᠷᠤᠭᠴᠢ ᠣᠯᠠᠨ ᠦᠭᠡ ᠬᠡᠯᠡᠳᠡᠭ᠂ ᠡᠨᠡ ᠲᠡᠷᠡ ᠶ᠋ᠢ ᠰᠢᠯᠭᠠᠳᠠᠭ ᠡᠵᠡᠨ ᠪᠢᠰᠢ᠂ ᠰᠢᠭᠤᠳ ᠰᠢᠯᠤᠭᠤᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠪᠣᠳᠣᠵᠤ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠰᠠᠨᠠᠭᠠ ᠪᠠᠨ ᠪᠡᠶᠡᠯᠡᠭᠦᠯᠬᠦ ᠬᠡᠷᠡᠭ ᠲᠦ᠍ ᠬᠥᠮᠦᠰ ᠢ᠋ ᠳᠠᠢᠴᠢᠯᠠᠳᠠᠭ᠃ ᠲᠡᠷᠡ ᠯᠠ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠨᠦ᠍ᠭᠦᠳ ᠢ᠋ ᠠᠰᠠᠷ ᠲᠤ ᠴᠤᠭᠯᠠᠭᠤᠯᠤᠭᠠᠳ᠄
— ᠵᠠ ᠶᠡᠬᠡ ᠬᠠᠭᠠᠨ ᠤ᠋ ᠵᠠᠬᠢᠶᠠᠰᠤ ᠶ᠋ᠢ ᠭᠦᠢᠴᠡᠯᠳᠦᠭᠦᠯᠬᠦ ᠴᠠᠭ ᠢᠷᠡᠯᠡ᠃ ᠣᠳᠣ ᠬᠠᠮᠤᠭ ᠬᠡᠷᠡᠭ ᠢ᠋ ᠰᠢᠢᠳᠬᠦ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠨᠠ ᠰᠢᠦ! ᠪᠠᠶᠠᠨ ᠵᠠᠩᠵᠤᠨ ᠨᠠᠳᠠᠳᠤ ᠬᠡᠯᠡᠬᠦ ᠳ᠋ᠦ᠍ ᠪᠡᠨ《ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠠᠮᠠᠷ ᠳᠠᠢᠰᠤᠨ ᠪᠢᠰᠢ᠂ ᠬᠤᠯᠤᠰᠤᠨ ᠰᠤᠮᠤ ᠲᠠᠢ ᠪᠠᠨ ᠠᠳᠠᠯᠢ ᠬᠠᠮᠢᠭᠠᠭᠤᠷ ᠴᠤ᠌ ᠬᠠᠮᠢᠶᠠ ᠦᠭᠡᠢ ᠴᠢᠪᠬᠠᠳᠠᠨ ᠣᠷᠣᠵᠤ ᠢᠷᠡᠨᠡ》 ᠭᠡᠰᠡᠨ᠃ ᠲᠡᠭᠦᠨ ᠡᠴᠡ ᠪᠢᠳᠡ ᠨᠢᠴᠤᠬᠤ ᠶᠣᠰᠣ ᠦᠭᠡᠢ ᠭᠡᠪᠡ᠃
— ᠪᠣᠭᠣᠯ ᠮᠢᠨᠦ ᠮᠤᠩᠬᠠᠭᠯᠠᠨ ᠪᠣᠳᠣᠬᠤ ᠳ᠋ᠤ᠌ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠡᠨᠳᠡ ᠳᠦᠯᠢᠵᠦ ᠬᠡᠪᠲᠡᠬᠦ ᠪᠡᠷ ᠦᠬᠦᠬᠦ ᠰᠡᠬᠦᠬᠦ ᠪᠡᠨ ᠦᠵᠡᠭᠡᠳ ᠠᠪᠤᠭᠰᠠᠨ ᠳᠡᠭᠡᠷᠡ᠃ ᠰᠥᠩ ᠦ᠋ᠨ ᠴᠡᠷᠢᠭ ᠬᠡᠴᠡᠭᠦᠦ ᠨᠢ ᠦᠨᠡᠨ᠃ ᠭᠡᠪᠡᠴᠦ ᠲᠡᠳᠡ ᠶᠠᠪᠠᠭᠠᠨ᠂ ᠪᠢᠳᠡ ᠮᠣᠷᠢᠲᠠᠢ᠃ ᠲᠡᠳᠡ ᠬᠤᠯᠤᠰᠤᠨ ᠰᠤᠮᠤ ᠲᠠᠢ᠂ ᠪᠢᠳᠡ ᠴᠢᠳᠥᠷ ᠣᠨᠢᠰᠣ ᠲᠠᠢ ᠪᠢᠵᠡ ᠳᠡ᠃ ᠳᠠᠢᠰᠤᠨ ᠢ᠋ ᠴᠡᠴᠡᠷᠡᠭᠦᠯᠬᠦ ᠭᠣᠣᠯ ᠠᠷᠭᠠ ᠮᠠᠨᠢ ᠪᠦᠬᠦ ᠡᠩᠨᠡᠭᠡ ᠪᠡᠷ ᠵᠡᠷᠭᠡ ᠳᠣᠪᠲᠣᠯᠭᠠᠨ ᠵᠡᠷᠭᠡ ᠬᠢᠬᠦ ᠳ᠋ᠦ᠍ ᠲᠡᠳᠡ ᠪᠢᠳᠡᠨ ᠢ᠋ ᠲᠣᠭᠲᠠᠭᠠᠨ ᠪᠠᠷᠢᠵᠤ ᠳᠡᠢᠯᠬᠦ ᠦᠭᠡᠢ ᠪᠡᠨ ᠣᠢᠯᠠᠭᠠᠬᠤ ᠪᠢᠵᠡ ᠭᠡᠵᠦ ᠥᠨᠳᠥᠷ ᠨᠢᠷᠤᠭᠤ ᠲᠠᠢ᠂ ᠰᠢᠢᠳᠮᠡᠭᠡᠢ ᠪᠠᠢᠷᠢ ᠶ᠋ᠢᠨ ᠲᠣᠮᠣ ᠬᠠᠷᠠ ᠨᠢᠳᠦ ᠲᠡᠢ ᠨᠢᠭᠡ ᠵᠠᠩᠵᠤᠨ ᠪᠣᠰᠴᠤ ᠬᠡᠯᠡᠪᠡ᠃ ᠡᠨᠡ ᠪᠣᠯ ᠬᠡᠨ ᠪᠦᠬᠦᠨ ᠦ᠌ ᠲᠠᠨᠢᠯ ᠪᠣᠯᠤᠭᠰᠠᠨ᠂ ᠭᠣᠴᠣ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠲᠣᠭᠣᠭᠠᠨ ᠵᠠᠩᠵᠤᠨ ᠪᠠᠢᠯᠠ᠃ ᠪᠤᠰᠤᠳ ᠬᠥᠮᠦᠰ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠲᠠᠭᠠᠰᠢᠶᠠᠨ ᠦᠵᠡᠵᠦ《ᠵᠥᠪ》᠂《ᠲᠡᠭᠡᠬᠦ ᠶᠣᠰᠣᠲᠠᠢ》 ᠬᠡᠯᠡᠴᠡᠨᠡ᠃ ᠬᠤᠪᠢᠯᠠᠢ ᠥᠪᠡᠷ ᠦ᠋ᠨ ᠵᠠᠩᠵᠤᠨ ᠨᠤᠭᠤᠳ ᠤ᠋ᠨ ᠰᠠᠨᠠᠭᠠ ᠪᠣᠳᠣᠯ ᠢ᠋ ᠮᠡᠳᠡᠭᠡᠳ᠂ ᠬᠡᠯᠡᠯᠴᠡᠨ ᠰᠢᠢᠳᠴᠦ ᠢᠷᠡᠭᠰᠡᠨ ᠲᠡᠢᠨ ᠦ᠌ ᠪᠣᠳᠣᠯᠭᠠ ᠠ᠋ᠴᠠ ᠪᠠᠨ ᠤᠬᠤᠷᠢᠬᠤ ᠶᠣᠰᠣ ᠦᠭᠡᠢ ᠨᠢ ᠵᠥᠪ ᠭᠡᠵᠦ ᠪᠣᠳᠣᠯᠠ᠃
ᠴᠠᠭᠠᠳᠤ ᠡᠷᠭᠢ ᠨᠢ ᠨᠢᠳᠦᠨ ᠦ᠌ ᠬᠠᠷᠠᠭᠠ ᠰᠢᠯᠭᠠᠳᠠᠭ᠃ ᠭᠦᠨ ᠴᠡᠩᠬᠡᠷ ᠮᠥᠷᠡᠨ ᠤᠷᠤᠰᠴᠤ ᠪᠣᠢ ᠡᠰᠡᠬᠦ ᠨᠢ ᠡᠰᠡ ᠮᠡᠳᠡᠭᠳᠡᠨ ᠡᠷᠭᠢᠯᠳᠦᠨᠡ᠃ ᠡᠨᠡ ᠤᠰᠤᠨ ᠳ᠋ᠤ᠌ ᠴᠢᠯᠠᠭᠤ ᠰᠢᠲᠠᠵᠤ ᠦᠵᠡᠬᠦ ᠳ᠋ᠦ᠍ ᠢᠷᠣᠭᠠᠷ ᠲᠤ ᠪᠠᠨ ᠬᠦᠷᠴᠦ ᠪᠣᠢ ᠡᠰᠡᠬᠦ ᠨᠢ ᠶᠠᠭᠠᠬᠢᠨ ᠲᠡᠮᠲᠡᠷᠢᠭᠳᠡᠬᠦ ᠪᠢᠯᠡ᠃ ᠡᠳᠦᠢ ᠲᠡᠳᠦᠢ ᠬᠣᠨᠣᠭ ᠢᠶᠠᠷ ᠪᠡᠯᠡᠳᠬᠡᠭᠰᠡᠨ ᠴᠡᠷᠢᠭ ᠦ᠋ᠳ ᠭᠠᠭᠴᠠ ᠳᠣᠬᠢᠶᠠᠨ ᠢ᠋ᠶ᠋ᠠᠷ ᠦᠷᠭᠦᠭᠰᠡᠨ ᠰᠢᠪᠠᠭᠤᠳ ᠠᠳᠠᠯᠢ ᠲᠠᠷ ᠬᠢᠨ ᠪᠣᠰᠤᠭᠠᠳ ᠳᠣᠪᠲᠣᠯᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠯᠠ᠂ ᠶᠡᠬᠡ ᠮᠣᠷᠢᠨ ᠢ᠋ ᠭᠠᠲᠤᠯᠬᠤ ᠪᠡᠯᠡᠳᠬᠡᠯ ᠴᠦ᠍ ᠨᠢᠭᠤᠴᠠ ᠪᠠᠷ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠬᠢᠵᠡᠢ᠃ ᠪᠠᠰᠠ ᠤᠷᠠᠳ ᠭᠣᠣᠯ ᠳ᠋ᠤ᠌ ᠪᠡᠶᠡ ᠪᠡᠯᠡᠳᠬᠡᠭᠰᠡᠨ ᠂ ᠬᠣᠷᠭᠣᠳᠠᠵᠤ ᠭᠠᠷᠤᠭᠰᠠᠨ ᠨᠠᠮᠤᠷ ᠤ᠋ᠨ ᠰᠠᠷᠠ ᠲᠩᠷᠢ ᠶ᠋ᠢᠨ ᠰᠠᠪᠰᠠᠯᠠᠭᠠᠲᠤ ᠴᠠᠭᠠᠨ ᠳ᠋ᠧᠩᠯᠦ ᠪᠡᠨ ᠠᠰᠠᠭᠠᠬᠤ ᠲᠠᠢ ᠵᠡᠷᠭᠡ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠣᠩᠭᠣᠴᠠ᠂ ᠰᠠᠯ᠂ ᠵᠠᠪᠢ ᠳ᠋ᠤ᠌ ᠰᠠᠭᠤᠵᠤ᠂ ᠨᠡᠯᠢᠶᠡᠳ ᠬᠡᠰᠡᠭ ᠨᠢ ᠬᠦᠵᠦᠭᠦᠨ ᠳ᠋ᠦ᠍ ᠪᠡᠨ ᠦᠯᠢᠶᠡᠭᠰᠡᠨ ᠲᠤᠯᠤᠮ ᠢ᠋ᠶ᠋ᠠᠨ ᠤᠶᠠᠭᠠᠳ ᠮᠣᠷᠢᠨ ᠤ᠋ ᠪᠠᠨ ᠰᠡᠭᠦᠯ ᠡᠴᠡ ᠪᠠᠷᠢᠨ ᠤᠰᠤᠨ ᠳ᠋ᠤ᠌ ᠬᠥᠪᠦᠯᠡ᠂ ᠵᠡᠯᠡᠯᠡᠨ ᠨᠢᠰᠴᠦ ᠶᠠᠪᠤᠭᠠᠳ ᠤᠰᠤᠨ ᠳ᠋ᠤ᠌ ᠰᠠᠭᠤᠭᠰᠠᠨ ᠭᠠᠯᠠᠭᠤ ᠰᠢᠪᠠᠭᠤᠳ ᠬᠥᠪᠦᠨ ᠶᠠᠪᠤᠭᠠ ᠠᠳᠠᠯᠢ ᠬᠠᠷᠠᠭᠳᠠᠭᠴᠢ ᠶᠡᠬᠡ ᠴᠡᠷᠢᠭ ᠬᠥᠬᠡ ᠮᠣᠷᠢᠨ ᠢ᠋ ᠰᠡᠲᠡᠯᠦᠨ ᠭᠠᠷᠬᠤ ᠪᠠᠷ ᠡᠢᠨ ᠬᠦ᠌ ᠲᠢᠭᠯᠡᠨ ᠬᠥᠳᠡᠯᠬᠦ ᠳ᠋ᠦ᠍ ᠪᠡᠨ ᠵᠥᠪᠬᠡᠨ ᠤᠰᠤ ᠯᠠ ᠳᠤᠤᠭᠠᠷᠴᠤ᠂ ᠬᠠᠶᠠ ᠮᠣᠷᠢᠳ ᠢᠨᠴᠠᠭᠠᠨᠠ᠃ ᠭᠠᠢᠬᠠᠯᠲᠠᠢ ᠨᠢ ᠡᠢᠮᠦ ᠶᠠᠪᠤᠳᠠᠯ ᠭᠠᠭᠴᠠ ᠬᠡᠰᠡᠭᠬᠡᠨ ᠵᠤᠷᠪᠤᠰ ᠳᠡᠭᠡᠷᠡ ᠪᠣᠯᠵᠤ ᠪᠠᠢᠭᠠ ᠪᠢᠰᠢ᠂ ᠬᠡᠳᠦᠨ ᠮᠢᠩᠭᠠᠨ ᠳᠠᠭᠤᠨ ᠤ᠋ ᠭᠠᠵᠠᠷ ᠤᠷᠤᠰᠤᠭᠰᠠᠨ ᠶᠡᠬᠡ ᠮᠥᠷᠡᠨ ᠦ᠌ ᠳᠠᠭᠠᠭᠤᠯ ᠪᠣᠯᠵᠤ ᠪᠠᠢᠭᠠ ᠪᠠᠷ ᠢ᠋ᠶ᠋ᠠᠨ ᠣᠨᠴᠠᠯᠢᠭ ᠪᠠᠢᠪᠠ᠃ ᠬᠥᠬᠡ ᠮᠥᠷᠡᠨ ᠦ᠌ ᠡᠬᠢᠨ᠂ ᠳᠤᠮᠳᠠ᠂ ᠲᠡᠷᠡ ᠪᠠᠢᠲᠤᠭᠠᠢ ᠠᠳᠠᠭ ᠤ᠋ᠨ ᠤᠷᠤᠰᠬᠠᠯ ᠢ᠋ᠶ᠋ᠠᠷ ᠬᠦᠷᠲᠡᠯᠡ ᠮᠣᠩᠭᠣᠯ ᠴᠡᠷᠢᠭ ᠡᠢᠨ ᠬᠦ᠌ ᠳᠣᠪᠲᠣᠯᠵᠠᠢ᠃
ᠤᠳᠠᠵᠤ ᠲᠦᠳᠡᠭᠰᠡᠨ ᠴᠦ᠍ ᠦᠭᠡᠢ ᠭᠣᠣᠯ ᠤ᠋ᠨ ᠨᠥᠭᠦᠭᠡ ᠡᠷᠭᠢ ᠳ᠋ᠦ᠍ ᠬᠠᠭᠠᠯᠲᠠ ᠬᠠᠮᠠᠭᠠᠯᠠᠯᠲᠠ ᠪᠠᠷᠢᠨ ᠪᠣᠭᠰᠢᠬᠰᠡᠨ ᠰᠥᠩ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠣᠷᠢᠯᠠᠭᠠᠨ ᠱᠤᠤᠭᠢᠶᠠᠨ ᠭᠡᠨᠡᠳᠲᠡ ᠪᠣᠯᠵᠤ᠂ ᠭᠠᠵᠠᠷ ᠲᠩᠷᠢ ᠨᠡᠢᠯᠡᠬᠦ ᠳ᠋ᠦ᠍ ᠯᠡ ᠡᠢᠮᠦ ᠴᠢᠮᠡᠭᠡ ᠭᠠᠷᠳᠠᠭ ᠪᠣᠯᠪᠠ ᠭᠡᠮᠡᠷ ᠱᠤᠤᠭᠢᠶᠠᠨ ᠳᠡᠭᠳᠡᠪᠡ᠃ ᠶᠠᠭᠤᠮᠠ ᠳᠡᠯᠪᠡᠷᠡᠬᠦ᠂ ᠳᠡᠰ ᠨᠢᠰ ᠪᠠᠭᠤᠬᠤ᠂ ᠬᠥᠮᠦᠨ ᠠᠮᠢᠲᠠᠨ ᠬᠠᠰᠬᠢᠷᠤᠯᠳᠠᠬᠤ᠂ ᠪᠠᠭᠠᠯᠵᠠᠭᠤᠷ ᠢ᠋ᠶ᠋ᠠᠨ ᠰᠢᠬᠠᠭᠤᠯᠤᠭᠰᠠᠨ ᠮᠡᠲᠦ ᠪᠠᠷᠬᠢᠯᠳᠦᠬᠤ᠂ ᠮᠣᠷᠢ ᠮᠠᠯ ᠢᠨᠴᠠᠭᠠᠬᠤ᠂ ᠬᠤᠯᠤᠰᠤᠨ ᠰᠤᠮᠤᠨ ᠤ᠋ ᠳᠠᠭᠤᠨ ᠤ᠋ ᠢᠰᠬᠡᠷᠦᠯᠲᠡ ᠴᠢᠬᠢᠨ ᠳ᠋ᠦ᠍ ᠬᠠᠳᠠᠨ᠂ ᠣᠷᠴᠢᠯᠠᠩ ᠢ᠋ ᠰᠢᠷᠡᠭᠡᠨ ᠰᠣᠴᠢᠭᠠᠭᠰᠠᠨ ᠳᠠᠭᠤᠨ ᠪᠦᠬᠦ ᠣᠷᠴᠢᠨ ᠢ᠋ ᠳᠣᠩᠰᠣᠯᠭᠠᠯᠠ᠃ ᠲᠤᠩ ᠰᠠᠶᠢ ᠨᠠᠮᠤᠭᠤᠬᠠᠨ ᠪᠠᠢᠭᠰᠠᠨ ᠶᠡᠷᠳᠢᠨᠴᠦ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠢᠩᠭᠢᠵᠦ ᠬᠢᠮᠤᠷᠠᠯᠳᠤᠨᠠ ᠪᠣᠢ ᠭᠡᠮᠡᠷ ᠠᠵᠢ᠃ ᠮᠣᠩᠭᠣᠯ ᠴᠡᠷᠢᠭ ᠳᠣᠯᠣᠭᠠ ᠠᠷᠪᠠ ᠬᠣᠨᠣᠭ ᠲᠤ ᠪᠦᠬᠦ ᠡᠩᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠰᠢᠬᠠᠮ ᠬᠥᠬᠡ ᠮᠣᠷᠢᠨ ᠢ᠋ ᠭᠠᠲᠤᠯᠤᠯᠠ ᠭᠡᠰᠡᠨ ᠮᠡᠳᠡᠭᠡ ᠬᠤᠪᠢᠯᠠᠢ ᠳ᠋ᠤ᠌ ᠢᠷᠡᠵᠦ ᠪᠠᠢᠨᠠ᠃ ᠶᠡᠬᠡ ᠮᠣᠷᠢᠨ ᠳ᠋ᠤ᠌ ᠵᠢᠪᠵᠦ ᠦᠭᠡᠢ ᠪᠣᠯᠤᠭᠰᠠᠨ ᠴᠤ᠌ ᠪᠠᠰᠠ ᠨᠠᠯᠢᠶᠠᠨ ᠲᠣᠭᠠ ᠲᠠᠢ ᠭᠡᠨᠡ᠃ ᠲᠡᠭᠦᠨ ᠢ᠋ ᠠᠯᠢ ᠴᠤ᠌ ᠵᠠᠩᠵᠤᠨ ᠶᠠᠭᠤᠮᠠᠨ ᠳ᠋ᠤ᠌ ᠪᠣᠳᠣᠬᠤ ᠦᠭᠡᠢ᠃ ᠣᠷᠣᠭᠰᠢ ᠠᠬᠢᠨ ᠳᠠᠢᠰᠤᠨ ᠤ᠋ ᠭᠦᠨ ᠳ᠋ᠦ᠍ ᠨᠡᠪᠲᠡᠷᠡᠨ ᠣᠷᠣᠬᠤ ᠶ᠋ᠢ ᠡᠷᠮᠡᠯᠵᠡᠯᠡᠯ ᠪᠣᠯᠭᠠᠨᠠ᠃ ᠬᠤᠪᠢᠯᠠᠢ ᠶ᠋ᠢᠨ ᠰᠠᠨᠠᠭᠠ ᠪᠠᠷ ᠪᠣᠯ ᠰᠥᠩ ᠦ᠋ᠨ ᠬᠠᠭᠠᠨ ᠢ᠋ ᠥᠨᠥᠳᠥᠷ ᠮᠠᠷᠭᠠᠰᠢ ᠶ᠋ᠢᠨ ᠳᠣᠲᠣᠷᠠ ᠪᠠᠷᠢᠵᠤ ᠠᠪᠴᠤ ᠶᠠᠯᠠ ᠠᠰᠠᠭᠤᠬᠤ ᠪᠣᠳᠣᠯ ᠲᠠᠢ᠃ ᠭᠡᠪᠡᠴᠦ ᠳᠠᠢᠰᠤᠨ ᠪᠣᠯᠵᠤ ᠪᠠᠢᠭᠠ ᠡᠲᠡᠭᠡᠳ ᠨᠢ ᠲᠡᠢᠮᠦ ᠴᠦ᠍ ᠠᠮᠠᠷᠬᠠᠨ ᠭᠠᠷ ᠡᠷᠭᠦᠭᠰᠡᠨ ᠦᠭᠡᠢ᠃
ᠬᠥᠬᠡ ᠮᠥᠷᠡᠨ ᠦ᠌ ᠤᠷᠲᠤ ᠲᠠᠯᠠ ᠶ᠋ᠢᠨ ᠬᠣᠲᠠ ᠨᠤᠭᠤᠳ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠᠷ ᠦᠭᠡᠢ ᠪᠡᠷ ᠪᠡᠬᠢᠯᠡᠯᠲᠡ ᠬᠢᠨ᠂ ᠡᠳᠦᠢ ᠲᠡᠳᠦᠢ ᠵᠤᠵᠠᠭᠠᠨ ᠬᠡᠷᠡᠮ ᠪᠣᠰᠬᠠᠵᠤ ᠬᠠᠭᠠᠯᠲᠠ ᠬᠠᠮᠠᠭᠠᠯᠠᠯᠲᠠ ᠬᠢᠭᠰᠡᠨ ᠲᠡᠢ ᠮᠣᠩᠭᠣᠯ ᠴᠡᠷᠢᠭ ᠲᠤᠯᠭᠠᠷᠠᠯᠠ᠃ ᠪᠠᠶᠠᠨ᠂ ᠠᠯᠢᠬᠠᠢ᠂ ᠠᠷᠠᠭ᠂ ᠲᠣᠭᠣᠭᠠᠨ᠂ ᠴᠠᠭᠠᠨ ᠵᠠᠩᠵᠤᠨ ᠨᠤᠭᠤᠳ ᠲᠤᠰ ᠪᠦᠷᠢ ᠳ᠋ᠦ᠍ ᠪᠡᠨ ᠨᠢᠭᠡ ᠨᠢᠭᠡ ᠲᠣᠮᠣ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠭᠠᠳᠠᠭᠠ ᠴᠡᠷᠢᠭ ᠲᠡᠢ ᠪᠡᠨ ᠣᠴᠢᠵᠤ ᠵᠢᠭᠤᠷᠠᠯᠳᠤᠨ ᠪᠠᠢᠯᠳᠤᠵᠤ ᠡᠬᠢᠯᠡᠪᠡ᠃ ᠲᠡᠷᠡ ᠲᠤᠯᠤᠯᠳᠤᠭᠠᠨ ᠬᠡᠳᠦ ᠭᠤᠷᠪᠠᠨ ᠬᠣᠨᠣᠭ ᠲᠤ ᠳᠠᠭᠤᠰᠴᠤ ᠰᠠᠢᠳᠭᠡᠭᠳᠡᠬᠦ ᠪᠡᠷ ᠦᠭᠡᠢ ᠨᠢ ᠪᠦᠬᠦᠨ ᠳ᠋ᠦ᠍ ᠢᠯᠡᠷᠬᠡᠢ᠃ ᠰᠥᠩ ᠦ᠋ᠨ ᠬᠣᠲᠠ ᠨᠤᠭᠤᠳ ᠤ᠋ᠨ ᠣᠷᠣᠰᠢᠨ ᠰᠠᠭᠤᠭᠴᠢ ᠪᠦᠷ ᠭᠠᠷ ᠲᠤ ᠪᠠᠨ ᠵᠡᠪᠰᠡᠭ ᠪᠠᠷᠢᠨ ᠬᠡᠷᠡᠮ ᠳᠡᠭᠡᠷᠡ ᠪᠡᠨ ᠢᠷᠡᠵᠦ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠨᠢᠴᠤᠭᠠᠬᠤ ᠭᠡᠵᠦ ᠲᠤᠯᠤᠯᠳᠤᠨᠠ᠃ ᠲᠠᠪᠤ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠬᠡᠦᠬᠡᠳ ᠡᠴᠡ ᠪᠡᠨ ᠨᠠᠶᠠ ᠶᠡᠷᠡᠨ ᠨᠠᠰᠤ ᠬᠦᠷᠦᠭᠰᠡᠨ ᠡᠪᠦᠭᠡᠳ᠂ ᠡᠮᠡᠭᠡᠳ ᠬᠦᠷᠲᠡᠯᠡ ᠭᠠᠷ ᠲᠤ ᠪᠠᠨ ᠬᠦᠷᠵᠡ᠂ ᠵᠡᠭᠡᠲᠦᠦ᠂ ᠰᠢᠯᠡᠭᠡᠪᠦᠷ ᠮᠤᠨᠠ᠂ ᠬᠢᠲᠤᠭᠠ᠂ ᠰᠢᠪᠦᠭᠡ ᠪᠠᠷᠢᠨ ᠲᠤᠯᠤᠯᠳᠤᠵᠤ ᠡᠬᠢᠯᠡᠪᠡ᠃ ᠬᠠᠮᠤᠭ ᠬᠡᠷᠡᠭ ᠦ᠋ᠨ ᠵᠠᠩᠭᠢᠯᠠᠭᠠ ᠡᠵᠸᠦ ᠬᠣᠲᠠ ᠶ᠋ᠢᠨ ᠲᠥᠯᠥᠭᠡ ᠲᠤᠯᠤᠯᠳᠤᠭᠠᠨ ᠨᠡᠩ ᠰᠢᠷᠦᠭᠦᠨ ᠪᠣᠯᠪᠠ᠃ ᠪᠠᠶᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ《 ᠰᠢᠲᠠᠭᠰᠠᠨ ᠨᠤᠷᠮᠠᠨ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠰᠥᠩ ᠦ᠋ᠨ ᠴᠡᠷᠢᠭ᠂ ᠢᠷᠡᠭᠡᠳ ᠪᠣᠰᠴᠤ ᠲᠤᠯᠤᠯᠳᠤᠵᠤ ᠪᠠᠢᠯᠠ》᠃
— ᠬᠥᠮᠦᠨ᠂ ᠤᠨᠠᠭᠰᠠᠨ ᠭᠠᠵᠠᠷ᠂ ᠤᠤᠭᠤᠭᠰᠠᠨ ᠤᠰᠤᠨ ᠳ᠋ᠤ᠌ ᠪᠠᠨ ᠶᠠᠮᠠᠷ ᠶᠡᠬᠡ ᠬᠠᠷᠠᠮ ᠪᠠᠢᠳᠠᠭ ᠶᠤᠮ ᠪᠣᠢ ᠭᠡᠳᠡᠭ ᠢ᠋ ᠪᠢᠳᠡ ᠡᠨᠡ ᠬᠢᠲᠠᠳ ᠤ᠋ᠳ ᠠ᠋ᠴᠠ ᠬᠠᠷᠠᠵᠤ ᠪᠣᠯᠬᠤ ᠨᠢ ᠠ᠋᠃ ᠪᠢᠳᠡ ᠡᠳᠡᠨ ᠦ᠌ ᠭᠠᠵᠠᠷ ᠢ᠋ ᠠᠪᠤᠭᠠᠳ ᠶᠠᠪᠤᠴᠢᠬᠠᠬᠤ ᠦᠭᠡᠢ᠂ ᠬᠠᠷᠢᠨ ᠲᠠᠢᠪᠤᠩ ᠪᠣᠯᠭᠠᠵᠤ ᠲᠦᠪᠰᠢᠳᠬᠡᠨ ᠥᠭᠬᠦ ᠯᠡ ᠰᠠᠨᠠᠭᠠᠲᠠᠢ ᠭᠡᠵᠦ ᠬᠤᠪᠢᠯᠠᠢ ᠰᠥᠩ ᠦ᠋ᠨ ᠢᠷᠭᠡᠳ ᠦ᠋ᠨ ᠳᠠᠢᠳᠤᠵᠤ ᠪᠠᠢᠭᠠ ᠶ᠋ᠢ ᠰᠣᠨᠣᠰᠤᠭᠠᠳ ᠬᠡᠯᠡᠵᠡᠢ᠃
ᠴᠠᠩ ᠵᠧᠦ ᠬᠣᠲᠠ ᠶ᠋ᠢᠨ ᠲᠥᠯᠥᠭᠡ ᠲᠤᠯᠤᠯᠳᠤᠭᠠᠨ ᠠᠯᠢ ᠠᠯᠢ ᠲᠠᠯᠠ ᠳ᠋ᠤ᠌ ᠪᠠᠨ ᠶᠡᠬᠡ ᠰᠦᠢᠷᠡᠯ ᠲᠡᠢ ᠡᠬᠢᠯᠡᠪᠡ᠃ ᠭᠤᠷᠪᠠᠨ ᠳᠠᠪᠬᠤᠷ ᠵᠤᠵᠠᠭᠠᠨ ᠬᠡᠷᠡᠮ ᠪᠣᠰᠬᠠᠵᠤ᠂ ᠲᠡᠭᠦᠨ ᠳᠡᠭᠡᠷᠡ ᠡᠴᠡ ᠪᠡᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠲᠣᠯᠣᠭᠠᠢ ᠤᠷᠤᠭᠤ ᠪᠤᠴᠠᠯᠮᠠᠭᠠᠢ ᠳᠠᠪᠠᠷᠬᠠᠢ᠂ ᠰᠢᠲᠠᠩᠭᠢ ᠨᠣᠷᠮᠠ ᠠᠰᠬᠠᠵᠤ᠂ ᠵᠦᠢᠯ ᠵᠦᠢᠯ ᠦ᠋ᠨ ᠵᠡᠪᠰᠡᠭ ᠢ᠋ᠶ᠋ᠡᠷ ᠬᠥᠮᠦᠨ ᠪᠦᠷᠢ ᠨᠢ ᠵᠡᠪᠰᠡᠭᠯᠡᠨ ᠲᠤᠯᠤᠯᠳᠤᠵᠤ ᠪᠣᠢ ᠲᠡᠷᠡ ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠪᠠᠶᠠᠨ ᠵᠠᠩᠵᠤᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠣᠴᠢᠭᠠᠳ ᠲᠡᠢᠨ ᠳ᠋ᠦ᠍ ᠣᠷᠣᠵᠠᠢ᠃ ᠬᠡᠳᠦᠨ ᠲᠦᠮᠡᠨ ᠬᠥᠮᠦᠨ ᠣᠷᠣᠰᠢᠨ ᠰᠠᠭᠤᠳᠠᠭ ᠬᠣᠲᠠ ᠪᠦᠲᠦᠨ ᠬᠣᠶᠠᠷ ᠵᠢᠯ ᠦ᠋ᠨ ᠲᠤᠷᠰᠢ ᠪᠡᠬᠢᠯᠡᠯᠲᠡ ᠪᠤᠰᠬᠠᠵᠤ ᠪᠠᠷᠢᠭᠰᠠᠨ᠂ ᠬᠦᠨᠡᠰᠦ ᠲᠡᠵᠢᠭᠡᠯ᠂ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠨᠥᠭᠡᠴᠡᠯᠡᠭᠰᠡᠨ ᠪᠣᠯᠬᠣᠷ ᠭᠠᠭᠴᠠ ᠨᠢᠭᠡ ᠳᠠᠭᠠᠷᠢᠯᠲᠠ ᠪᠠᠷ ᠲᠡᠭᠦᠨ ᠢ᠋ ᠠᠷᠴᠠ ᠬᠠᠶᠠᠵᠤ ᠡᠵᠡᠯᠡᠨ ᠠᠪᠤᠨᠠ ᠭᠡᠵᠦ ᠰᠠᠨᠠᠬᠤ ᠶ᠋ᠢᠨ ᠴᠦ᠍ ᠠᠷᠭᠠ ᠦᠭᠡᠢ᠃ ᠪᠠᠶᠠᠨ ᠡᠨᠡ ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠤᠳᠠᠭᠠᠨ ᠰᠠᠭᠤᠵᠤ ᠲᠤᠯᠤᠯᠳᠤᠬᠤ ᠶ᠋ᠢ ᠪᠡᠨ ᠮᠡᠳᠡᠵᠦ᠂ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠠᠨᠳᠤᠨ《ᠲᠠ ᠪᠢᠳᠡᠨ ᠢ᠋ ᠬᠠᠷᠠᠵᠤ ᠡᠨᠳᠡ ᠰᠠᠭᠤᠬᠤ ᠶ᠋ᠢᠨ ᠬᠡᠷᠡᠭ ᠦᠭᠡᠢ᠂ ᠥᠭᠡᠷᠡ ᠭᠠᠵᠠᠷ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠣᠯᠭᠣᠭᠠᠬᠤ᠂ ᠪᠤᠰᠤᠳ ᠲᠥᠷᠥ ᠶ᠋ᠢᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠢᠴᠢᠶᠡᠪᠡᠯ ᠳᠡᠭᠡᠷᠡ ᠪᠢᠵᠡ᠃ ᠥᠴᠦᠬᠡᠨ ᠪᠣᠭᠣᠯ ᠪᠢ ᠡᠨᠳᠡ ᠵᠠᠷᠯᠢᠭ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠬᠤ ᠡᠰᠡᠬᠦ ᠪᠡᠨ ᠦᠵᠡᠵᠦ ᠪᠠᠢᠵᠤ ᠯᠠ ᠰᠠᠯᠤᠨᠠ᠃ ᠲᠩᠷᠢ ᠥᠷᠥᠰᠢᠶᠡᠬᠦ ᠪᠣᠯᠲᠤᠭᠠᠢ!》 ᠭᠡᠰᠡᠨ ᠵᠤᠷᠪᠤᠰ ᠪᠢᠴᠢᠵᠦ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠦᠷᠭᠡᠭᠦᠯᠦᠭᠰᠡᠨ ᠪᠠᠢᠨᠠ᠃ ᠴᠠᠩ ᠵᠧᠦ ᠬᠣᠲᠠ ᠶ᠋ᠢᠨ ᠲᠥᠯᠥᠭᠡ ᠲᠤᠯᠤᠯᠳᠤᠭᠠᠨ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠥᠷᠥᠭᠡᠰᠦᠨ ᠭᠤᠶᠠ ᠪᠠᠨ ᠲᠠᠰᠤ ᠬᠠᠷᠪᠦᠭᠤᠯᠤᠭᠰᠠᠨ ᠮᠣᠩᠭᠣᠯ ᠴᠡᠷᠢᠭ ᠬᠠᠯᠠᠭᠤᠨ ᠨᠣᠷᠮᠠ ᠠᠰᠬᠠᠭᠰᠠᠨ ᠭᠠᠵᠠᠷ ᠳᠡᠭᠡᠭᠦᠷ ᠮᠥᠯᠬᠥᠨ᠄
— ᠮᠥᠩᠬᠡ ᠲᠩᠷᠢ ᠥᠷᠥᠰᠢᠶᠡᠲᠦᠭᠡᠢ! ᠭᠡᠳ ᠬᠠᠷᠪᠤᠯᠳᠤᠵᠤ ᠪᠠᠢᠬᠤ ᠶ᠋ᠢ ᠪᠠᠶᠠᠨ ᠬᠠᠷᠠᠵᠤ ᠪᠠᠢᠪᠠ᠃ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠪᠠᠢᠯᠳᠤᠭᠠᠨ ᠤ᠋ ᠱᠤᠭᠤᠮ ᠳᠡᠭᠡᠷᠡ ᠡᠴᠡ ᠺᠡᠢᠫᠢᠩ ᠦ᠋ᠨ ᠵᠦᠭ ᠪᠤᠴᠠᠬᠤ ᠳ᠋ᠤ᠌ ᠪᠠᠨ《ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠬᠢᠯᠪᠠᠷᠬᠠᠨ ᠳᠠᠭᠤᠰᠬᠤ ᠲᠡᠢᠨ ᠪᠢᠰᠢ ᠭᠡᠵᠦ ᠪᠠᠶᠠᠨ ᠤ᠋ ᠬᠡᠯᠡᠳᠡᠭ ᠦᠨᠡᠨ ᠦᠭᠡ ᠪᠣᠯᠤᠯᠲᠠᠢ᠃ ᠰᠥᠩ ᠦ᠋ᠨ ᠴᠡᠷᠢᠭ ᠲᠤᠩ ᠠᠮᠠᠷ ᠦᠭᠡᠢ ᠪᠠᠢᠯᠳᠤᠵᠤ ᠴᠢᠳᠠᠳᠠᠭ ᠶᠤᠮ ᠪᠠᠢᠨᠠ᠃ ᠡᠳᠡᠨ ᠦ᠌ ᠵᠠᠩᠵᠤᠨ ᠨᠤᠭᠤᠳ ᠰᠧᠴᠤᠸᠠᠨ ᠤ᠋ ᠭᠠᠵᠠᠷ ᠢ᠋ ᠪᠢᠳᠡᠨ ᠡᠴᠡ ᠡᠷᠭᠢᠭᠦᠯᠦᠨ ᠠᠪᠬᠤ ᠪᠣᠳᠣᠯ ᠲᠠᠢ ᠲᠡᠷᠡ ᠵᠦᠭ ᠤᠷᠤᠭᠤ ᠳᠣᠪᠲᠣᠯᠭᠠᠨ ᠬᠢᠵᠦ ᠦᠵᠡᠵᠦ ᠪᠠᠢᠨᠠ ᠭᠡᠵᠦ ᠴᠠᠭᠠᠨ ᠵᠠᠩᠵᠤᠨ ᠨᠠᠳᠠᠳᠤ ᠬᠡᠯᠡᠭᠰᠡᠨ᠃ ᠰᠧᠴᠤᠸᠠᠨ ᠢ᠋ ᠪᠢᠳᠡ ᠡᠷᠭᠢᠭᠦᠯᠦᠨ ᠠᠯᠳᠠᠪᠠᠯ ᠭᠤᠲᠤᠮᠰᠢᠭᠲᠠᠢ ᠬᠡᠷᠡᠭ ᠪᠣᠯᠤᠨᠠ᠃ ᠪᠢ ᠲᠡᠭᠦᠨ ᠤᠷᠤᠭᠤ ᠲᠣᠭᠣᠭᠠᠨ ᠵᠠᠩᠵᠤᠨ ᠢ᠋ ᠶᠠᠪᠤᠭᠤᠯᠳᠠᠭ ᠨᠢ ᠵᠥᠪ ᠪᠢᠵᠡ᠃ ᠲᠡᠷᠡ ᠵᠠᠯᠠᠭᠤ᠂ ᠵᠣᠷᠢᠮᠠᠭ ᠡᠷᠡ᠃ ᠤᠬᠠᠭᠠᠲᠠᠢ ᠴᠤ᠌ ᠬᠥᠮᠦᠨ》 ᠭᠡᠮᠡᠨ ᠪᠣᠳᠣᠵᠤ ᠶᠠᠪᠤᠭᠠᠳ ᠺᠡᠢᠫᠢᠩ ᠬᠣᠲᠠ ᠳ᠋ᠤ᠌ ᠢᠷᠡᠭᠰᠡᠨ ᠳᠣᠣᠷᠠ ᠪᠠᠨ ᠥᠪᠡᠷ ᠦ᠋ᠨ ᠰᠢᠳᠠᠷ ᠪᠢᠴᠢᠭᠡᠴᠢ ᠴᠡᠷᠢᠭ ᠦ᠋ᠨ ᠪᠠᠭᠠ ᠲᠦᠰᠢᠮᠡᠯ ᠪᠠᠷᠭᠠᠢ ᠶ᠋ᠢᠨ ᠬᠦᠯᠦᠭ ᠢ᠋ ᠳᠠᠭᠤᠳᠠᠭᠤᠯᠤᠨ ᠪᠡᠶᠡ ᠪᠡᠷ ᠠᠭᠤᠯᠵᠠᠯᠠ᠃
ᠴᠢᠭᠢᠷᠠᠭ ᠲᠣᠮᠣ ᠪᠡᠶᠡᠲᠡᠢ᠂ ᠳᠦᠷᠯᠡᠭᠡᠷ ᠨᠢᠳᠦᠲᠡᠢ᠂ ᠵᠡᠭᠦᠨ ᠬᠠᠴᠠᠷ ᠳᠡᠭᠡᠷᠡ ᠪᠡᠨ ᠬᠥᠨᠳᠡᠯᠡᠨ ᠰᠣᠷᠪᠢᠲᠠᠢ ᠲᠡᠷᠡ ᠡᠷᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠠᠷᠯᠢᠭ ᠪᠢᠴᠢᠭ ᠦᠢᠯᠡ ᠳ᠋ᠦ᠍ ᠭᠡᠬᠦ ᠪᠠᠢᠬᠤ ᠪᠣᠳᠣᠨ᠂ ᠭᠠᠷ ᠲᠤ ᠪᠠᠨ ᠪᠢᠷ᠂ ᠱᠤᠪᠠᠢ ᠮᠣᠳᠣ᠂ ᠴᠠᠭᠠᠰᠤ ᠪᠠᠷᠢᠭᠰᠠᠭᠠᠷ ᠣᠷᠳᠣᠨ ᠤ᠋ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠪᠠᠯ ᠬᠤᠪᠢᠯᠠᠢ ᠶᠠᠭᠠᠬᠢᠬᠤ ᠨᠢ ᠡᠨᠡ ᠪᠢᠯᠡ ᠭᠡᠮᠡᠷ ᠠᠶᠠᠯᠭᠤ ᠪᠠᠷ ᠤᠭᠲᠤᠵᠤ ᠠᠭᠤᠯᠵᠠᠭᠠᠳ᠄
— ᠴᠢ ᠨᠠᠮᠠᠶ᠋ᠢ ᠶᠠᠭᠤᠮᠠ ᠪᠢᠴᠢ ᠭᠡᠵᠦ ᠯᠡ ᠳᠠᠭᠤᠳᠠᠭᠤᠯᠤᠯᠠ ᠭᠡᠵᠦ ᠪᠣᠳᠣᠭᠠ ᠤᠤ? ᠡᠨᠡ ᠤᠳᠠᠭᠠ ᠳ᠋ᠤ᠌ ᠴᠢᠮᠠᠶ᠋ᠢ ᠬᠣᠯᠠ ᠶ᠋ᠢᠨ ᠠᠶᠠᠨ ᠳ᠋ᠤ᠌ ᠵᠠᠷᠤᠬᠤ ᠨᠢ ᠠ᠋᠃ ᠴᠢ ᠨᠠᠳᠠᠳᠤ ᠦᠨᠡᠨ ᠭᠣᠣᠯ ᠠ᠋ᠴᠠ ᠪᠠᠨ ᠢᠲᠡᠭᠡᠯᠲᠡᠢ ᠪᠠᠢᠳᠠᠭ᠃ ᠪᠢ ᠴᠢᠮᠠᠶ᠋ᠢ ᠪᠠᠰᠠ ᠦᠨᠡᠨᠴᠢ ᠡᠷᠡ ᠭᠡᠳᠡᠭ ᠢ᠋ ᠮᠡᠳᠡᠳᠡᠭ ᠲᠡᠭᠡᠭᠡᠳ ᠴᠦ᠍ ᠣᠳᠣ ᠶᠠᠪᠤᠭᠠᠳ ᠨᠡᠢᠰᠯᠡᠯ ᠳ᠋ᠦ᠍ ᠪᠠᠢᠭᠠ ᠥᠪᠡᠷ ᠦ᠋ᠨ ᠳᠡᠭᠦᠦ ᠪᠢᠯᠢᠭᠦᠨ ᠲᠡᠢ ᠪᠡᠨ ᠠᠭᠤᠯᠵᠠᠭᠠᠳ ᠢᠷᠡ! ᠭᠡᠵᠦ ᠵᠠᠷᠯᠢᠭᠯᠠᠪᠠ᠃ ᠬᠦᠯᠦᠭ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠤᠰᠢᠶᠠᠯ ᠳ᠋ᠤ᠌ ᠳᠣᠲᠣᠷᠠ ᠠ᠋ᠴᠠ ᠪᠠᠶᠠᠷᠯᠠᠨ ᠵᠣᠭᠰᠣᠵᠤ ᠪᠠᠢᠯᠠ᠃ ᠬᠤᠪᠢᠯᠠᠢ ᠪᠣᠳᠣᠯ ᠪᠣᠯᠤᠨ ᠳᠠᠭᠠᠭᠠᠮᠠᠯ ᠲᠦᠰᠢᠮᠡᠯ ᠢ᠋ ᠴᠢ ᠶᠠᠭᠠᠬᠢᠬᠤ ᠨᠢ ᠪᠣᠢ ᠭᠡᠰᠡᠨ ᠰᠢᠭ ᠠᠵᠢᠭᠴᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠰᠢᠷᠳᠡᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠡᠨᠡ ᠣᠯᠠᠨ ᠲᠦᠰᠢᠮᠡᠳ ᠨᠠᠷ ᠳᠣᠲᠣᠷᠠ ᠠ᠋ᠴᠠ ᠪᠢ ᠴᠢᠮᠠᠶ᠋ᠢ ᠯᠠ ᠰᠢᠯᠢᠵᠦ ᠠᠪᠤᠯᠠ᠃ ᠪᠢ ᠴᠢᠮᠠᠲᠤ ᠠᠷᠢᠬᠪᠥ᠋ᠬᠡ ᠶ᠋ᠢᠨ ᠠᠮᠤᠷ ᠢ᠋ ᠡᠷᠢᠵᠦ᠂ ᠡᠵᠢ ᠶ᠋ᠢᠨ ᠪᠡᠶᠡ ᠶ᠋ᠢ ᠠᠰᠠᠭᠤᠯᠭᠠᠭᠰᠠᠨ ᠪᠢᠴᠢᠭ ᠥᠭᠭᠦᠨᠡ᠃ ᠲᠡᠭᠦᠨ ᠢ᠋ ᠴᠢ ᠬᠦᠷᠭᠡᠬᠦ ᠪᠡᠷ ᠶᠠᠪᠤ! ᠡᠨᠡ ᠳᠡᠯᠢᠮ ᠢ᠋ᠶ᠋ᠡᠷ ᠴᠢ ᠬᠠᠷᠠ ᠬᠣᠷᠣᠮ ᠤ᠋ᠨ ᠭᠠᠵᠠᠷ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠪᠣᠢ᠃ ᠮᠢᠨᠦ ᠳᠡᠭᠦᠦ ᠠᠷᠢᠬᠪᠥ᠋ᠬᠡ ᠶᠠᠭᠤ ᠬᠢᠵᠦ ᠪᠠᠢᠨᠠ ᠪᠣᠢ? ᠬᠥᠮᠦᠨ ᠣᠯᠠᠨ ᠶᠠᠮᠠᠷ ᠰᠢᠦ ᠦᠭᠡ ᠶᠠᠷᠢᠶᠠᠨᠲᠠᠢ ᠪᠠᠢᠨᠠ ᠪᠣᠢ᠂ ᠡᠨᠡ ᠪᠦᠭᠦᠳᠡ ᠶ᠋ᠢ ᠰᠠᠮ ᠠᠵᠢᠵᠤ ᠮᠡᠳᠡᠭᠡᠳ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠬᠠ ᠶ᠋ᠢ ᠶᠠᠭᠤ ᠮᠡᠳᠡᠵᠦ ᠪᠠᠢᠨᠠ ᠪᠣᠢ᠂ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠳᠠᠷᠤᠢ ᠡᠷᠭᠢᠵᠦ ᠢᠷᠡ! ᠮᠢᠨᠦ ᠲᠤᠬᠠᠢ ᠶᠠᠭᠤᠮᠠ ᠬᠥᠮᠦᠨ ᠠᠰᠠᠭᠤᠪᠠᠯ ᠰᠥᠩ ᠦ᠋ᠨ ᠴᠡᠷᠢᠭ ᠲᠡᠢ ᠬᠥᠭᠡᠭᠡᠴᠡᠯᠳᠦᠵᠦ ᠶᠠᠪᠤᠭᠠ ᠭᠡᠭᠡᠷᠡᠢ ᠭᠡᠵᠦ ᠠᠮᠢᠨᠴᠢᠯᠠᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠵᠠᠷᠯᠢᠭᠳᠠᠪᠠ᠃ ᠬᠦᠯᠦᠭ ᠮᠡᠬᠦᠢᠨ ᠶᠣᠰᠣ ᠬᠢᠭᠡᠳ ᠣᠷᠳᠣᠨ ᠠ᠋ᠴᠠ ᠭᠠᠷᠴᠤ ᠶᠠᠪᠤᠯᠠ᠃
— — — —
① ᠪᠠᠭᠠᠷᠢᠨ ᠣᠪᠣᠭ ᠤ᠋ᠨ ᠰᠡᠬᠡᠭᠦᠳᠠᠢ ᠶ᠋ᠢᠨ ᠬᠦᠦ ᠪᠠᠶᠠᠨ ᠨᠢ1236—1294 ᠣᠨ ᠳ᠋ᠤ᠌ ᠪᠠᠨ ᠡᠵᠡᠨ ᠲᠥᠷᠥ ᠳ᠋ᠦ᠍ ᠵᠢᠳᠬᠦᠭᠰᠡᠨ ᠭᠠᠷᠮᠠᠭᠠᠢ ᠵᠠᠩᠵᠤᠨ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠰᠥᠩ ᠤᠯᠤᠰ ᠢ᠋ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷ ᠤ᠋ᠨ ᠵᠢᠷᠤᠭ ᠲᠤ ᠣᠷᠣᠭᠤᠯᠤᠨ ᠲᠦᠪᠰᠢᠳᠬᠡᠬᠦ ᠬᠡᠷᠡᠭ ᠲᠦ᠍ ᠰᠢᠢᠳᠪᠦᠷᠢᠯᠡᠬᠦ ᠡᠭᠦᠷᠭᠡ ᠪᠡᠨ ᠭᠦᠢᠴᠡᠳᠬᠡᠭᠰᠡᠨ᠃ ᠲᠡᠷᠡ ᠴᠠᠭ ᠲᠤ ᠭᠠᠷᠤᠭᠰᠠᠨ ᠣᠯᠠᠨ ᠲᠣᠭᠠᠨ ᠤ᠋ ᠰᠢᠯᠦᠭ ᠦ᠋ᠳ ᠳᠣᠲᠣᠷᠠ《ᠯᠢ ᠵᠠᠩ ᠲᠤ ᠶ᠋ᠢ ᠪᠠᠢᠯᠳᠤᠨ ᠠᠪᠤᠭᠰᠠᠨ ᠨᠢ》᠂《ᠵᠠᠷᠯᠢᠭ ᠢ᠋ ᠡᠷᠬᠢᠮᠯᠡᠨ ᠮᠢᠩᠭᠠᠨ ᠭᠠᠵᠠᠷ ᠢ᠋ ᠬᠤᠷᠢᠶᠠᠭᠰᠠᠨ》᠂《ᠲᠠᠰᠢᠭᠤᠷ》 ᠵᠡᠷᠭᠡ ᠠᠯᠳᠠᠷᠲᠠᠢ ᠰᠢᠯᠦᠭ ᠢ᠋ ᠵᠠᠩᠵᠤᠨ ᠪᠠᠶᠠᠨ ᠤ᠋ ᠠᠮᠢᠳᠤᠷᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠢᠴᠢᠭᠰᠡᠨ ᠭᠡᠳᠡᠭ ᠦᠭᠡ ᠪᠠᠢᠳᠠᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠩᠷᠢ ᠡᠵᠢ᠂ ᠪᠠᠭᠠᠲᠤᠷ᠂ ᠴᠣᠯᠮᠣᠨᠲᠤᠶᠠᠭᠠ