ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠭᠤᠷᠪᠠᠳᠤᠭᠠᠷ ᠪᠦᠯᠦᠭ –3>᠂ ᠡᠳᠦᠷ ᠦᠨ ᠪᠣᠳᠣᠯ ᠰᠥᠨᠢ ᠶᠢᠨ ᠵᠡᠭᠦᠳᠦ Бүргэд харьд үүрэлдэггүй – Ж᠂ Пүрэв <3-р бүлэг ~3>. өдрийн бодол шөнийн зүүд
96ᠭᠤᠷᠪᠠᠳᠤᠭᠠᠷ ᠪᠦᠯᠦᠭ – ᠴᠠᠭᠠᠨ ᠪᠡᠴᠢᠨ ᠵᠢᠯ
ᠭᠤᠷᠪᠠ᠂ᠡᠳᠦᠷ ᠦᠨ ᠪᠣᠳᠣᠯ ᠰᠥᠨᠢ ᠶᠢᠨ ᠵᠡᠭᠦᠳᠦ
ᠲᠡᠭᠡᠭᠡᠳ ᠪᠡᠶᠡ ᠪᠡᠨ ᠶᠠᠭᠠᠬᠢᠵᠤ ᠵᠢᠭᠠᠬᠠᠨ ᠲᠠᠢᠳᠬᠤᠷᠠᠭᠤᠯᠤᠨ᠂ ᠲᠠᠷᠢᠬᠢ ᠪᠠᠨ ᠠᠮᠠᠷᠠᠭᠠᠶᠠ ᠳᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠲᠠᠯᠠ ᠨᠢ ᠠᠰᠢᠭᠦᠢ ᠴᠠᠯᠭᠢᠶᠠ ᠭᠣᠣᠯ ᠳ᠋ᠤ᠌ ᠪᠠᠢᠭᠤᠯᠤᠭᠰᠠᠨ ᠲᠦᠷ ᠵᠤᠰᠠᠯᠠᠩ ᠠ᠋ᠴᠠ《ᠭᠦᠢᠳᠠᠩ ᠠᠪᠤᠭᠠᠢ》 ᠬᠡᠳᠦᠨ ᠬᠠᠲᠤᠨ ᠢ᠋ ᠨᠢ ᠵᠥᠭᠡᠯᠡᠨ ᠪᠥᠬᠡᠭᠡᠭᠲᠦ ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠭᠠᠳ ᠺᠠᠢᠫᠢᠩ(ᠱᠠᠩᠳᠤ) ᠳ᠋ᠤ᠌ ᠠᠪᠴᠢᠷᠠᠵᠠᠢ᠃ ᠁
ᠡᠨᠡ ᠴᠦ᠍ ᠵᠤᠭᠠᠲᠠᠢ ᠬᠡᠷᠡᠭ᠃ ᠵᠠᠬᠢᠷᠤᠭᠴᠢ ᠬᠡᠳᠦᠢ ᠮᠣᠩᠭᠣᠯ ᠨᠤᠲᠤᠭ ᠠ᠋ᠴᠠ ᠪᠠᠨ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠷ ᠰᠢᠯᠢᠵᠦ ᠪᠠᠢᠭᠠᠳ《ᠬᠤᠪᠴᠠᠰᠤ ᠣᠷᠣᠭᠤᠯᠤᠨᠠ》᠂《ᠴᠠᠢ ᠵᠥᠭᠡᠭᠡᠯᠭᠡᠨᠡ》᠂《ᠰᠢᠳᠠᠷ ᠪᠠᠷᠠ ᠪᠣᠯᠤᠭᠴᠢ ᠪᠣᠯᠭᠠᠨᠠ》᠂《ᠬᠠᠲᠤᠨ ᠠᠪᠠᠬᠠᠢ ᠨᠠᠷ ᠤ᠋ᠨ ᠬᠤᠨᠳᠠᠭᠠᠴᠢᠨ ᠪᠣᠯᠭᠠᠨᠠ》 ᠭᠡᠳᠡᠭ ᠨᠡᠷᠡ ᠪᠡᠷ ᠵᠢᠷᠭᠤᠭᠠᠨ ᠴᠢᠷᠠᠢᠯᠢᠭ ᠪᠦᠰᠡᠭᠦᠢ ᠶ᠋ᠢ ᠳᠠᠭᠠᠭᠤᠯᠤᠨ ᠠᠪᠴᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠲᠡᠳᠡᠨ ᠦ᠌ ᠬᠢᠨᠢ ᠪᠠᠢᠳᠠᠯ ᠰᠡᠳᠬᠢᠯ ᠳ᠋ᠦ᠍ ᠨᠢ ᠲᠡᠳᠦᠢ ᠯᠡ ᠲᠠᠭᠠᠰᠢᠶᠠᠭᠳᠠᠬᠤ ᠦᠭᠡᠢ᠂ ᠨᠠᠭᠠᠳᠤ ᠵᠠᠬᠠ ᠨᠢ ᠯᠣᠯᠣᠢ ᠠᠳᠠᠯᠢ ᠲᠡᠷᠡ ᠪᠦᠰᠡᠭᠦᠢᠴᠦᠳ ᠢ᠋ ᠣᠷᠣᠢ ᠳ᠋ᠤ᠌ ᠤᠰᠤᠨ ᠳ᠋ᠤ᠌ ᠣᠷᠣᠭᠤᠯᠤᠭᠠᠳ《ᠰᠠᠢᠬᠠᠨ》 ᠪᠡᠯᠡᠳᠬᠡᠭᠦᠯᠴᠢᠬᠡᠬᠦ ᠬᠥᠮᠦᠨ ᠦᠭᠡᠢ ᠪᠣᠯᠬᠣᠷ ᠵᠠᠷᠢᠮ ᠵᠦᠢᠯ ᠨᠢ ᠳᠤᠲᠠᠭᠳᠠᠭᠠᠳ ᠪᠠᠢᠯᠠ᠃
ᠲᠡᠭᠡᠭᠡᠳ ᠲᠡᠷᠡ ᠬᠣᠲᠠ ᠭᠠᠵᠠᠷ ᠤ᠋ᠨ ᠪᠦᠰᠡᠭᠦᠢᠴᠦᠳ ᠲᠡᠢ ᠪᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠡᠩᠭᠡᠭᠦᠯᠬᠦ ᠪᠡᠷ ᠵᠤᠭᠠᠴᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠯᠣᠯᠣᠢ ᠶ᠋ᠢ ᠳᠠᠭᠤᠳᠠᠭᠤᠯᠤᠭᠰᠠᠨ ᠪᠠᠢᠵᠠᠢ᠃
ᠭᠤᠷᠪᠠᠯᠵᠢᠨ ᠨᠢᠳᠦ ᠲᠡᠢ᠂ ᠭᠤᠩᠬᠠᠭᠰᠠᠨ ᠲᠡᠷᠡ ᠠᠪᠠᠭᠠᠢ ᠬᠣᠯᠠ ᠶ᠋ᠢᠨ ᠵᠠᠮ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠳᠣᠣᠷᠠ ᠪᠠᠨ ᠯᠠ ᠬᠣᠢᠲᠤ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ ᠰᠠᠭᠤᠵᠤ ᠪᠠᠢᠭᠠ ᠣᠷᠣᠨ ᠭᠡᠷ ᠢ᠋ᠶ᠋ᠡᠷ ᠭᠦᠶᠦᠵᠦ ᠣᠷᠣᠭᠠᠳ᠂ ᠪᠡᠶᠡ ᠶ᠋ᠢ ᠦᠵᠡᠵᠦ ᠰᠢᠭᠤᠳ ᠰᠢᠯᠤᠭᠤᠬᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠡᠷᠡᠭᠡ ᠪᠠᠷᠠᠭᠠ ᠴᠦ᠍ ᠦᠭᠡᠢ ᠲᠡᠭᠡ᠂᠂ ᠢᠩᠭᠢ ᠭᠡᠵᠦ ᠵᠢᠭᠠᠨ
— ᠲᠠ ᠨᠠᠷ ᠴᠢᠨᠢ ᠡᠮᠡᠰ ᠦ᠋ᠳ ᠪᠠᠢᠨᠠ ᠳᠠ᠃ ᠨᠠᠳᠠ ᠠ᠋ᠴᠠ ᠪᠤᠤ ᠵᠣᠪᠠ᠃ ᠶᠡᠬᠡ ᠵᠠᠬᠢᠷᠤᠭᠴᠢ ᠢᠷᠡᠵᠦ ᠰᠢᠳᠠᠷᠯᠠ ᠭᠡᠪᠡᠯ ᠶᠠᠭᠠᠬᠢᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠪᠣᠢ? ᠣᠳᠣᠬᠠᠨ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠪᠡᠶᠡ ᠪᠡᠨ ᠤᠬᠢᠶᠠ᠃ ᠬᠠᠪᠴᠢᠭ ᠰᠠᠪᠠᠨ ᠳ᠋ᠤ᠌ ᠬᠢᠭᠡᠳ ᠪᠡᠯᠡᠳᠬᠡᠴᠢᠬᠡᠭᠰᠡᠨ ᠪᠦᠯᠢᠶᠡᠨ ᠤᠰᠤᠨ ᠳ᠋ᠤ᠌ ᠬᠠᠷᠠᠢᠵᠤ ᠣᠷᠣᠭᠠᠳ ᠬᠠᠮᠤᠭ ᠪᠡᠶᠡ ᠪᠡᠨ ᠵᠠᠳᠠ ᠤᠬᠢᠶᠠᠨ ᠬᠭᠢᠷ ᠪᠤᠷᠲᠠᠭ ᠠ᠋ᠴᠠ ᠪᠠᠨ ᠰᠠᠯ! ᠬᠭᠢᠷ ᠦᠭᠡᠢ ᠬᠤᠪᠴᠠᠰᠤ ᠡᠮᠦᠰ! ᠪᠡᠶᠡ ᠳ᠋ᠦ᠍ ᠪᠡᠨ ᠭᠦᠷᠭᠦᠮ᠂ ᠬᠥᠬᠥᠯ ᠦ᠋ᠨ ᠲᠥᠷᠥᠯ ᠲᠠᠭᠠᠯᠠᠮᠵᠢᠲᠠᠢ ᠦᠨᠦᠷᠲᠦ ᠶᠠᠭᠤᠮᠠ ᠰᠢᠩᠭᠡᠭᠡᠵᠦ ᠦᠵᠡ ᠭᠡᠵᠦ ᠵᠢᠭᠠᠵᠤ ᠵᠢᠷᠤᠭᠠᠳ᠂ ᠪᠤᠵᠢᠭᠢᠨᠠᠭᠤᠯᠵᠤ ᠭᠠᠷᠪᠠ᠃ ᠢᠩᠭᠢᠬᠦ ᠪᠠᠢᠳᠠᠯ ᠳᠤᠲᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠭᠰᠡᠨ ᠲᠡᠷᠡ ᠠᠪᠠᠭᠠᠢ ᠬᠤᠪᠢᠯᠠᠢ ᠳ᠋ᠤ᠌ ᠶᠠᠮᠠᠷ ᠬᠡᠦᠬᠡᠨ ᠲᠠᠭᠠᠯᠠᠭᠳᠠᠳᠠᠭ ᠢ᠋ ᠶᠣᠰᠣᠲᠠᠢ ᠯᠠ ᠲᠠᠪᠤᠨ ᠬᠤᠷᠤᠭᠤ ᠰᠢᠭ᠋ ᠢ᠋ᠶ᠋ᠡᠨ ᠠᠨᠳᠠᠬᠤ ᠦᠭᠡᠢ᠃ ᠯᠣᠯᠣᠢ ᠡᠢᠮᠦ ᠶᠠᠭᠤᠮᠠ ᠬᠢᠵᠦ ᠣᠷᠬᠢᠭᠠᠳ ᠬᠤᠪᠢᠯᠠᠢ ᠶ᠋ᠢᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠬᠡᠨ ᠡᠴᠡ ᠴᠦ᠍ ᠵᠥᠪᠰᠢᠶᠡᠷᠡᠯ ᠠᠪᠤᠯ ᠦᠭᠡᠢ ᠳᠠᠪᠬᠢᠨ ᠣᠴᠢᠵᠤ᠂ ᠰᠠᠢᠬᠠᠨ ᠪᠡᠶᠡ ᠪᠡᠨ ᠭᠤᠩᠬᠠᠭᠤᠯᠤᠨ ᠳᠡᠷᠭᠡᠳᠡ ᠨᠢ ᠣᠴᠢᠭᠠᠳ᠄
— ᠶᠡᠬᠡ ᠡᠵᠡᠨᠲᠡᠨ ᠮᠢᠨᠢ! ᠠᠮᠤᠭᠤᠯᠠᠩ ᠮᠣᠷᠢᠯᠠᠵᠤ ᠶᠠᠪᠤᠨᠠ ᠤᠤ? ᠪᠣᠳᠣᠪᠠᠯ ᠪᠢ ᠲᠠᠨ ᠳ᠋ᠤ᠌ ᠳᠤᠲᠠᠭᠳᠠᠵᠤ ᠪᠠᠢᠭᠠ ᠪᠢᠵᠡ ᠳᠡ? ᠲᠠ ᠨᠠᠳᠠ ᠦᠭᠡᠢ ᠪᠡᠷ《ᠪᠠᠯ ᠪᠤᠷᠠᠮ》 ᠠᠮᠲᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠨᠢ ᠯᠠᠪᠲᠠᠢ ᠭᠡᠮᠡᠨ ᠰᠢᠳᠠᠷᠯᠠᠨ ᠠᠭᠤᠯᠵᠠᠪᠠ᠃
ᠶᠠᠷᠢᠶᠠᠨ ᠤ᠋ ᠳᠡᠯᠢᠮ ᠢ᠋ᠶ᠋ᠡᠷ ᠥᠪᠡᠷ ᠦ᠋ᠨ ᠬᠢᠨᠢ ᠬᠠᠷᠢᠶᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠬᠤᠪᠢᠯᠠᠢ ᠶ᠋ᠢᠨ ᠠᠯᠪᠠᠨ ᠶᠣᠰᠣᠨ ᠤ᠋ ᠴᠢᠮᠪᠠᠢ ᠮᠡᠲᠦ ᠬᠠᠲᠤᠳ ᠤ᠋ᠳ ᠨᠢ ᠮᠡᠨᠳᠦ ᠰᠠᠢᠨ ᠪᠠᠢᠭᠠ᠂ ᠪᠣᠭᠣᠯ ᠨᠢ ᠲᠡᠳᠡᠨ ᠢ᠋ ᠬᠡᠨ ᠳ᠋ᠦ᠍ ᠴᠦ᠍ ᠬᠠᠪᠢᠳᠠᠭᠤᠯᠬᠤ ᠦᠭᠡᠢ ᠴᠠᠭᠳᠠᠭᠤᠯᠵᠤ ᠪᠠᠢᠭᠠ ᠪᠠᠢᠳᠠᠯ ᠢ᠋ᠶ᠋ᠠᠨ ᠰᠠᠢᠬᠢ ᠠᠪᠠᠭᠠᠢ ᠬᠡᠯᠡᠵᠦ ᠠᠮᠵᠢᠯᠠ᠃
ᠡᠵᠡᠨ ᠵᠠᠬᠢᠷᠤᠭᠴᠢ ᠡᠢᠮᠦ ᠢᠲᠡᠭᠡᠯᠲᠦ ᠬᠥᠮᠦᠨ ᠡᠴᠡ ᠦᠭᠡ ᠰᠣᠨᠣᠰᠬᠤ ᠶ᠋ᠢ ᠲᠠᠭᠠᠯᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃
— ᠵᠠ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠴᠠᠯᠭᠢᠶᠠ ᠭᠣᠣᠯ ᠤ᠋ᠨ ᠵᠤᠰᠠᠯᠠᠩ ᠢ᠋ᠶ᠋ᠠᠷ ᠰᠣᠨᠢᠨ ᠭᠣᠢᠳᠠ ᠶᠠᠭᠤᠮᠠ ᠦᠭᠡᠢ᠃ ᠪᠣᠭᠣᠯ ᠰᠢᠪᠡᠭᠴᠢᠨ ᠨᠦ᠍ᠭᠦᠳ ᠡᠴᠡ ᠡᠬᠢᠯᠡᠭᠡᠳ᠂ ᠨᠣᠶᠠᠳ ᠲᠦᠰᠢᠮᠡᠳ ᠨᠠᠷ ᠵᠠᠬᠢᠷᠤᠭᠴᠢ ᠲᠠᠨ ᠢ᠋ ᠪᠡᠨ ᠦᠭᠡᠢᠯᠡᠵᠦ ᠤᠢᠳᠬᠠᠷᠲᠠᠢᠬᠠᠨ ᠪᠠᠢᠭᠠ ᠶᠠᠩᠵᠤᠲᠠᠢ᠃ ᠲᠠᠨ ᠤ᠋ ᠬᠡᠳᠦᠨ ᠬᠠᠲᠤᠳ ᠴᠢᠨᠢ ᠴᠦ᠍ ᠡᠵᠡᠨ ᠢ᠋ᠶ᠋ᠡᠨ ᠮᠥᠷᠥᠭᠡᠳᠴᠦ᠂ ᠵᠠᠷᠢᠮ ᠵᠠᠯᠠᠭᠤ ᠨᠢ ᠰᠢᠯᠢᠷᠡᠵᠦ ᠭᠦᠶᠦᠬᠦ ᠰᠢᠬᠠᠭᠠᠳ ᠯᠠ ᠪᠠᠢᠵᠤ ᠰᠠᠭᠤᠵᠤ ᠶᠠᠳᠠᠨ ᠪᠠᠢᠭᠠ᠃ ᠮᠠᠨ ᠤ᠋ ᠵᠠᠷᠢᠮ ᠬᠥᠮᠦᠨ ᠵᠠᠬᠢᠷᠤᠭᠴᠢ ᠲᠠᠨ ᠢ᠋ ᠡᠵᠡᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠭᠠ ᠭᠡᠵᠦ ᠶᠠᠷᠢᠳᠠᠭ ᠪᠣᠯᠵᠠᠢ᠃ ᠡᠨᠡ ᠴᠦ᠍ ᠵᠦᠢ ᠪᠢᠵᠡ ᠳᠡ ᠭᠡᠮᠡᠨ《ᠰᠢᠷᠠ ᠣᠯᠪᠢᠩ》 ᠪᠠᠰᠠ ᠶᠠᠷᠢᠵᠤ ᠡᠬᠢᠯᠡᠪᠡ᠃ ᠬᠤᠪᠢᠯᠠᠢ ᠳᠣᠣᠷᠠᠲᠤ ᠣᠯᠠᠨ ᠤ᠋ ᠳᠣᠲᠣᠷᠠ ᠶᠠᠪᠤᠳᠠᠭ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠳᠤᠷᠠᠲᠠᠢ ᠪᠢᠯᠡ᠃ ᠲᠡᠷᠡ ᠠᠶᠠᠰ ᠢ᠋ ᠴᠦ᠍ ᠵᠠᠯᠢᠲᠤ ᠡᠮᠡ ᠯᠣᠯᠣᠢ ᠲᠠᠭᠠᠷᠠᠭᠤᠯᠬᠤ ᠳ᠋ᠤ᠌ ᠪᠠᠨ ᠴᠢᠳᠠᠮᠠᠭ ᠢ᠋ ᠬᠡᠯᠡᠬᠦ ᠶᠠᠭᠤᠨ᠃
ᠬᠤᠪᠢᠯᠠᠢ ᠲᠠᠢᠪᠤᠩ ᠰᠠᠭᠤᠵᠤ
— ᠴᠢ ᠮᠢᠨᠦ ᠡᠨᠡ ᠰᠢᠨᠡ ᠬᠣᠲᠠ ᠪᠠᠷ ᠶᠠᠪᠤᠵᠤ ᠦᠵᠡᠭᠰᠡᠨ ᠤᠤ? ᠠᠶᠠᠲᠠᠢᠬᠠᠨ ᠪᠠᠢᠭᠠ ᠪᠢᠵᠡ? ᠭᠡᠵᠦ ᠠᠰᠠᠭᠤᠭᠠᠳ᠂ ᠠᠩᠬᠠᠯᠠᠨ ᠬᠠᠭᠠᠨ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠵᠥᠪᠰᠢᠶᠡᠷᠡᠵᠦ ᠪᠠᠷᠢᠭᠤᠯᠤᠭᠰᠠᠨ ᠡᠨᠡ ᠬᠥᠭᠡᠷᠦᠬᠦᠨ ᠬᠣᠲᠠ ᠪᠠᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠥᠪ ᠢ᠋ ᠪᠣᠯᠭᠠᠬᠤ ᠰᠠᠨᠠᠭᠠᠲᠠᠢ ᠪᠠᠨ ᠶᠠᠷᠢᠵᠤ᠂ ᠮᠣᠩᠭᠣᠯ᠂ ᠬᠢᠲᠠᠳ ᠬᠥᠮᠦᠰ ᠴᠦ᠍ ᠡᠢᠮᠦ ᠰᠠᠨᠠᠭᠠᠲᠠᠢ ᠪᠠᠢᠭᠠ ᠶ᠋ᠢ ᠥᠭᠦᠯᠡᠨ ᠪᠠᠢᠪᠠ᠃
ᠯᠣᠯᠣᠢ ᠠᠶᠠ ᠲᠠᠯᠪᠢᠨ᠄
— ᠪᠢ ᠭᠠᠳᠠᠭᠤᠷ ᠶᠠᠪᠤᠵᠤ ᠠᠮᠵᠢᠭᠠ ᠦᠭᠡᠢ᠂ ᠤᠷᠢᠳ ᠢ᠋ᠶ᠋ᠠᠷ ᠲᠠᠨ ᠢ᠋ ᠵᠢᠭᠠᠬᠠᠨ ᠵᠤᠭᠠᠴᠠᠭᠤᠯᠵᠤ ᠠᠮᠠᠷᠠᠭᠠᠬᠤ ᠰᠠᠨᠠᠭᠠᠲᠠᠢ ᠬᠣᠢᠲᠤ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠪᠦᠰᠡᠭᠦᠢᠴᠦᠳ ᠢ᠋ ᠴᠡᠪᠡᠷᠯᠡᠵᠦ ᠶᠠᠩᠵᠤᠯᠠᠭᠠᠳ ᠰᠠᠶᠢ ᠯᠠ ᠵᠢᠭᠠᠬᠠᠨ ᠵᠠᠪ ᠭᠠᠷᠴᠤ ᠮᠠᠭᠠᠳ ᠦᠭᠡᠢ ᠪᠣᠯᠬᠣᠷ ᠨᠢ ᠲᠠᠨ ᠳ᠋ᠤ᠌ ᠰᠢᠳᠠᠷᠯᠠᠨ ᠣᠷᠣᠵᠤ ᠢᠷᠡᠯᠡ᠃ ᠡᠬᠢᠯᠡᠭᠡᠳ ᠬᠠᠷᠠᠬᠤ ᠳ᠋ᠤ᠌ ᠲᠤᠩ ᠰᠠᠢᠬᠠᠨ ᠬᠣᠲᠠ ᠪᠣᠰᠴᠤ ᠪᠠᠢᠭᠠ ᠰᠢᠪ᠃ ᠭᠠᠳᠠᠭᠤᠷ ᠭᠤᠳᠤᠮᠵᠢᠨ ᠳ᠋ᠤ᠌ ᠬᠢᠲᠠᠳ ᠬᠥᠮᠦᠰ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠬᠦᠷᠵᠡ ᠬᠠᠩᠭᠢᠨᠠᠭᠤᠯᠤᠨ ᠠᠵᠢᠯ ᠬᠢᠭᠡᠳ᠂ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠳᠠᠭᠤ ᠬᠠᠳᠠᠭᠰᠠᠭᠠᠷ ᠪᠠᠢᠨᠠ᠃ ᠶᠡᠬᠡ ᠴᠦ᠍ ᠬᠥᠯ ᠭᠦᠯᠳᠡᠢ ᠪᠠᠢᠬᠤ ᠰᠢᠪ᠃ ᠪᠢ ᠰᠡᠭᠦᠵᠢ ᠪᠡᠨ ᠠᠮᠠᠷᠠᠭᠠᠬᠤ ᠨᠢᠭᠡ ᠭᠠᠵᠠᠷ ᠣᠯᠵᠤ ᠠᠪᠤᠭᠠᠳ᠂ ᠭᠠᠳᠠᠭᠤᠷ ᠶᠠᠪᠤᠵᠤ ᠬᠣᠲᠠᠬᠠᠨ ᠤ᠋ ᠪᠠᠢᠳᠠᠯᠲᠠᠢ ᠲᠠᠨᠢᠯᠴᠠᠨᠠ ᠭᠡᠪᠡᠯ ᠬᠤᠪᠢᠯᠠᠢ ᠳᠠᠭᠠᠯᠠᠭᠰᠠᠨ ᠴᠢᠷᠠᠢ ᠪᠠᠷ ᠬᠠᠷᠠᠵᠤ᠄
— ᠪᠢ ᠴᠢᠮᠠᠲᠤ ᠲᠤᠰᠬᠠᠢ ᠪᠠᠢᠷᠢ ᠪᠡᠯᠡᠳᠬᠡᠵᠦ ᠥᠭᠭᠦᠭᠡᠷᠡᠢ ᠭᠡᠰᠡᠨ᠃ ᠲᠡᠭᠦᠨ ᠳ᠋ᠦ᠍ ᠰᠡᠳᠬᠢᠯ ᠵᠣᠪᠠᠬᠤ ᠶᠠᠭᠤᠮᠠ ᠦᠭᠡᠢ᠃ ᠴᠠᠭᠠᠰᠢ ᠳ᠋ᠤ᠌ ᠪᠠᠨ ᠴᠦ᠍ ᠴᠢᠮᠠᠲᠤ ᠪᠢ ᠬᠡᠳᠦᠨ ᠡᠷᠦᠬᠡ ᠠᠢᠯ ᠨᠤᠲᠤᠭ ᠮᠠᠶᠢᠭ ᠤ᠋ᠨ ᠶᠠᠭᠤᠮᠠ ᠪᠣᠯᠭᠠᠨ ᠲᠠᠰᠤᠯᠵᠤ ᠥᠭᠭᠦᠨᠡ᠃ ᠲᠡᠭᠡᠪᠡᠯ ᠴᠢ ᠠᠷᠤ ᠲᠠᠯᠠ ᠤᠷᠤᠭᠤ ᠪᠠᠨ ᠰᠠᠨᠠᠭᠠ ᠵᠣᠪᠠᠯᠲᠠ ᠦᠭᠡᠢ ᠪᠡᠷ ᠨᠠᠳᠠᠳᠤ ᠬᠠᠨᠳᠤᠵᠤ ᠪᠠᠢᠬᠤ ᠪᠢᠵᠡ ᠭᠡᠰᠡᠨ ᠶᠠᠷᠢᠶᠠ ᠪᠣᠯᠬᠤ ᠳ᠋ᠤ᠌ ᠯᠣᠯᠣᠢ ᠵᠠᠯᠪᠠᠷᠢᠬᠤ ᠰᠢᠬᠠᠨ ᠪᠥᠬᠥᠢᠵᠦ ᠪᠠᠶᠠᠷᠯᠠᠨ ᠪᠠᠢᠭᠠ ᠪᠠᠨ ᠢᠯᠡᠷᠬᠡᠢᠯᠡᠭᠡᠳ᠂ ᠭᠠᠭᠴᠠ ᠨᠢᠭᠡ ᠨᠣᠶᠠᠨ ᠤ᠋ ᠲᠠᠯᠠ ᠪᠠᠷ ᠰᠡᠳᠬᠢᠯ ᠳᠠᠭᠠ ᠦᠭᠡᠢ ᠪᠠᠢᠳᠠᠯᠲᠠᠢ ᠪᠠᠢᠭᠠ ᠶ᠋ᠢ ᠬᠣᠪ ᠪᠣᠯᠭᠠᠨ ᠥᠭᠦᠯᠡᠵᠦ ᠭᠠᠷᠪᠠ᠃ ᠡᠨᠡ ᠴᠦ᠍ ᠭᠡᠮ ᠪᠢᠰᠢ ᠵᠠᠩ᠃ ᠵᠠᠬᠢᠷᠤᠭᠴᠢ ᠪᠤᠰᠤᠳ ᠠ᠋ᠴᠠ ᠬᠣᠪ ᠵᠢᠪ ᠦ᠋ᠨ ᠴᠢᠨᠠᠷᠲᠠᠢ ᠦᠭᠡ ᠰᠣᠨᠣᠰᠬᠤ ᠳᠤᠷᠠ ᠦᠭᠡᠢ ᠪᠠᠢᠳᠠᠭ ᠠᠲᠠᠯᠠ ᠪᠠᠨ ᠯᠣᠯᠣᠢ ᠶ᠋ᠢ ᠯᠡ ᠬᠡᠨ ᠡᠴᠡ ᠴᠦ᠍ ᠢᠯᠡᠭᠦᠦ ᠢᠳᠡᠭᠡᠨ᠂ ᠲᠡᠭᠦᠨ ᠦ᠌ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠬᠤ ᠲᠠᠭᠠᠯᠠᠯᠲᠠᠢ ᠪᠠᠢᠳᠠᠭ᠃ ᠠᠷᠭᠠ ᠴᠦ᠍ ᠦᠭᠡᠢ ᠪᠣᠯᠪᠠ ᠤᠤ᠃ ᠡᠨᠡ ᠠᠪᠠᠭᠠᠢ ᠬᠤᠪᠢᠯᠠᠢ ᠶ᠋ᠢᠨ ᠰᠥᠨᠢ ᠶ᠋ᠢᠨ ᠵᠤᠭᠠ ᠶ᠋ᠢ ᠭᠠᠷᠭᠠᠬᠤ ᠬᠠᠮᠤᠭ《ᠲᠡᠵᠢᠭᠡᠯ》 ᠢ᠋ ᠨᠢ ᠪᠡᠯᠡᠳᠬᠡᠨ ᠲᠣᠷᠳᠠᠵᠤ᠂ ᠬᠠᠮᠢᠭᠠᠬᠢ ᠶ᠋ᠢᠨ ᠶᠠᠮᠠᠷ ᠰᠢᠦ ᠡᠮᠡᠭᠲᠡᠢ ᠶᠠᠭᠠᠬᠢᠵᠤ ᠨᠠᠷᠭᠢᠪᠠᠯ ᠲᠠᠭᠠᠷᠠᠬᠤ ᠶ᠋ᠢ ᠨᠢ ᠵᠢᠭᠠᠵᠤ ᠪᠠᠢᠳᠠᠭ ᠪᠣᠯᠬᠣᠷ ᠲᠡᠭᠦᠨ ᠳ᠋ᠦ᠍ ᠢᠲᠡᠭᠡᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠮᠡᠲᠦ ᠪᠢᠯᠡ᠃ ᠶᠡᠷᠦ ᠨᠢ ᠬᠤᠪᠢᠯᠠᠢ ᠬᠡᠨ ᠬᠥᠮᠦᠨ ᠲᠡᠢ ᠬᠤᠪᠢ ᠶ᠋ᠢᠨ ᠲᠠᠯᠠ ᠪᠠᠷ ᠳᠣᠲᠣᠨᠣᠴᠢᠯᠠᠳᠠᠭ ᠦᠭᠡᠢ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠵᠤ ᠪᠠᠢᠳᠠᠯ ᠢ᠋ ᠪᠤᠰᠤᠳ ᠳᠤ ᠬᠡᠯᠡᠬᠦ ᠳᠤᠷᠠ ᠦᠭᠡᠢ᠂ ᠲᠣᠭᠯᠠᠭᠠᠮ ᠨᠠᠷᠭᠢᠶᠠᠨ ᠳ᠋ᠤ᠌ ᠴᠦ᠍ ᠴᠠᠭ ᠵᠠᠷᠤᠬᠤ ᠳᠤᠷᠠ ᠦᠭᠡᠢ᠂ ᠶᠠᠷᠢᠶᠠ ᠬᠦᠷᠦᠭᠡ ᠴᠥᠭᠡᠨᠲᠡᠢ᠂ ᠭᠠᠭᠴᠠᠭᠠᠷᠳᠠᠮᠠᠯ ᠮᠡᠲᠦ ᠪᠠᠢᠳᠠᠭ᠃ ᠡᠢᠮᠦ ᠪᠣᠯᠬᠣᠷ ᠲᠡᠭᠦᠨ ᠦ᠌ ᠵᠤᠭᠠ ᠶ᠋ᠢ ᠭᠠᠷᠭᠠᠬᠤ ᠭᠠᠭᠴᠠ ᠵᠦᠢᠯ ᠨᠢ ᠪᠣᠯᠬᠤ ᠴᠢᠷᠠᠢᠯᠢᠭ ᠡᠮᠡᠰ ᠢ᠋ ᠡᠭᠡᠯᠵᠢ ᠳᠠᠷᠠᠭᠠ ᠲᠠᠢ ᠪᠡᠯᠡᠳᠬᠡᠵᠦ ᠲᠣᠭᠠᠯᠠᠭᠤᠯᠳᠠᠭ ᠬᠥᠮᠦᠨ ᠨᠢ ᠯᠤᠤᠯᠢ ᠰᠢᠦ ᠳᠡ①᠃ ᠨᠢᠭᠡ ᠦᠭᠡ ᠪᠡᠷ ᠬᠡᠯᠡᠪᠡᠯ ᠯᠣᠯᠣᠢ ᠬᠤᠪᠢᠯᠠᠢ ᠶ᠋ᠢᠨ《ᠬᠣᠭᠣᠯᠠ ᠲᠡᠵᠢᠭᠡᠯ》 ᠦ᠋ᠨ ᠨᠢᠭᠡ ᠴᠤᠬᠠᠭ ᠬᠡᠰᠡᠭ ᠢ᠋ ᠨᠢ ᠭᠠᠷ ᠳᠤ ᠪᠠᠨ ᠠᠳᠬᠤᠨ ᠶᠠᠪᠤᠭᠠ ᠬᠥᠮᠦᠨ ᠨᠢ ᠪᠣᠯᠬᠣᠷ ᠡᠵᠡᠨ ᠦ᠌ ᠡᠷᠬᠢᠮ ᠨᠢ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃
ᠯᠣᠯᠣᠢ ᠴᠦ᠍ ᠴᠢᠩᠭᠢᠵᠦ ᠶᠠᠪᠤᠬᠤ ᠶ᠋ᠢ ᠪᠡᠨ《ᠡᠷᠬᠢᠮ ᠳᠡᠭᠡᠳᠦ ᠦᠢᠯᠡ》 ᠭᠡᠵᠦ ᠪᠣᠳᠣᠵᠤ᠂ ᠲᠡᠭᠦᠨ ᠳ᠋ᠦ᠍ ᠪᠡᠨ ᠳᠤᠷᠠᠯᠠᠨ᠂ ᠬᠠᠮᠤᠭ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠠᠯᠪᠢᠵᠤ ᠭᠦᠶᠦᠳᠡᠭ ᠪᠢᠯᠡ᠃
— ᠵᠠ ᠮᠠᠨ ᠤ᠋ ᠬᠢᠨ ᠲᠡᠢᠮᠦ ᠪᠠᠢᠭᠠ ᠪᠠᠢᠵᠠᠢ᠃ ᠴᠠᠭᠠᠨ ᠵᠠᠩᠵᠤᠨ᠂ ᠪᠠᠶᠠᠨ ᠵᠠᠩᠵᠤᠨ ᠨᠠᠷ ᠶᠠᠮᠠᠷ ᠰᠢᠦ ᠶᠠᠮᠠᠷ ᠠᠶᠠ ᠵᠠᠩᠲᠠᠢ ᠪᠠᠢᠨᠠ ᠪᠣᠢ? ᠴᠢ ᠶᠠᠭᠤ ᠠᠵᠢᠭᠯᠠᠪᠠ ᠳᠠ! ᠭᠡᠵᠦ ᠬᠤᠪᠢᠯᠠᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠥᠭᠡᠷᠡ ᠵᠦᠢᠯ ᠠᠰᠠᠭᠤᠯᠠ᠃
ᠯᠣᠯᠣᠢ ᠲᠥᠯᠥᠪ ᠴᠢᠷᠠᠢ ᠪᠠᠷ᠄
— ᠪᠢ ᠨᠠᠷᠢᠨ ᠰᠢᠷᠢᠨ ᠶᠠᠭᠤᠮᠠ ᠶ᠋ᠢ ᠨᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ᠃ ᠴᠠᠭᠠᠨ ᠭᠤᠸᠠᠢ ᠲᠠᠨ ᠲᠠᠢ ᠬᠠᠮᠲᠤ ᠬᠣᠢᠲᠤ ᠵᠦᠭ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠠ ᠪᠢᠵᠡ᠃ ᠪᠠᠶᠠᠨ ᠵᠠᠩᠵᠤᠨ ᠲᠠᠢ ᠪᠢ ᠣᠯᠠᠨ ᠠᠭᠤᠯᠵᠠᠬᠤ ᠪᠢᠰᠢ᠃ ᠲᠡᠷᠡ ᠬᠥᠮᠦᠨ ᠭᠣᠣᠯᠳᠠᠭᠤ ᠴᠡᠷᠢᠭ ᠳᠡᠭᠡᠷᠡ ᠪᠡᠨ ᠪᠠᠢᠳᠠᠭ᠃ ᠰᠠᠭᠤᠷᠢᠨ ᠳᠡᠭᠡᠷᠡ ᠪᠠᠷᠤᠭ ᠢᠷᠡᠳᠡᠭ ᠦᠭᠡᠢ ᠪᠣᠯᠬᠣᠷ ᠨᠠᠳᠠᠳᠤ ᠮᠡᠳᠡᠭᠰᠡᠨ ᠶᠠᠭᠤᠮᠠ ᠠᠯᠠᠭᠠ᠂ ᠶᠡᠷᠦ ᠨᠢ ᠪᠠᠶᠠᠨ ᠭᠤᠸᠠᠢ ᠳᠡᠭᠡᠳᠦ ᠶ᠋ᠢᠨ ᠵᠠᠷᠯᠢᠭ ᠶᠠᠭᠤ ᠪᠠᠢᠨᠠ ᠪᠣᠢ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠳᠠᠭ ᠦᠭᠡᠢ᠂ ᠵᠠᠪ ᠯᠠ ᠭᠠᠷᠪᠠᠯ ᠴᠡᠷᠢᠭ ᠢ᠋ᠶ᠋ᠡᠨ ᠪᠣᠳᠣᠵᠤ ᠶᠠᠪᠤᠳᠠᠭ ᠡᠷᠡ ᠴᠡᠷᠢᠭ ᠦ᠋ᠨ ᠶᠡᠬᠡ ᠴᠢᠳᠠᠪᠤᠷᠢᠲᠠᠢ᠂ ᠨᠡᠷᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠵᠠᠩᠵᠤᠨ ᠳ᠋ᠤ᠌ ᠳᠣᠣᠷᠠᠲᠤ ᠡᠮᠡ ᠪᠢ ᠰᠢᠳᠠᠷᠯᠠᠬᠤ ᠴᠤ᠌ ᠭᠡᠵᠦ ᠬᠦᠰᠡᠳᠡᠭ ᠦᠭᠡᠢ᠃ ᠪᠠᠶᠠᠨ ᠭᠤᠸᠠᠢ ᠳ᠋ᠤ᠌ ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡ ᠶᠠᠷᠢᠶᠠ ᠪᠠᠢᠬᠤ ᠪᠢᠰᠢ ᠳᠡ ᠭᠡᠵᠦ ᠯᠣᠯᠣᠢ ᠲᠡᠷᠡ ᠵᠠᠩᠵᠤᠨ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠠᠯᠠᠯᠲᠠᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠡᠯᠡᠯᠡ᠃ ᠲᠡᠷᠡ ᠪᠡᠷ ᠡᠵᠡᠨ ᠢ᠋ᠶ᠋ᠡᠨ ᠪᠠᠶᠠᠨ ᠵᠠᠩᠵᠤᠨ ᠳ᠋ᠤ᠌ ᠶᠠᠭᠠᠬᠢᠭᠠᠳ ᠠᠩᠬᠠᠷᠤᠯ ᠲᠠᠯᠪᠢᠭᠠᠳ ᠪᠠᠢᠭᠠ ᠶ᠋ᠢ ᠡᠰᠡ ᠠᠩᠵᠠᠭᠠᠷᠠᠪᠠ᠃
ᠬᠤᠪᠢᠯᠠᠢ ᠪᠠᠢᠨ ᠪᠠᠢᠨ ᠳᠡᠷᠭᠡᠳᠡᠬᠢ ᠬᠥᠮᠦᠰ ᠢ᠋ᠶ᠋ᠡᠨ᠂ ᠢᠯᠠᠩᠭᠤᠶᠠ ᠬᠢᠲᠠᠳ ᠨᠣᠶᠠᠳ ᠤ᠋ᠨ ᠪᠠᠢᠳᠠᠯ ᠢ᠋ ᠠᠰᠠᠭᠤᠨ《ᠴᠢ ᠴᠠᠭ ᠦᠷᠭᠦᠯᠵᠢᠳᠡ ᠠᠵᠢᠨ ᠮᠡᠳᠡᠵᠦ᠂ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠥᠪᠡᠷ ᠲᠦ᠍ ᠪᠡᠨ ᠬᠡᠯᠡᠵᠦ ᠪᠠᠢ》 ᠭᠡᠮᠡᠨ ᠯᠣᠯᠣᠢ ᠠᠪᠠᠭᠠᠢ ᠳ᠋ᠤ᠌ ᠵᠠᠬᠢᠳᠠᠭ᠂ ᠲᠡᠷᠡ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠯᠠ ᠪᠠᠶᠠᠨ ᠢ᠋ ᠠᠰᠠᠭᠤᠵᠤ ᠪᠠᠢᠨᠠ ᠭᠡᠵᠦ ᠰᠠᠢᠬᠢ ᠠᠪᠠᠭᠠᠢ ᠪᠣᠳᠣᠪᠠ᠃
ᠭᠡᠲᠡᠯᠡ ᠬᠤᠪᠢᠯᠠᠢ ᠳ᠋ᠤ᠌ ᠤᠷᠢᠶᠠᠩᠬᠠᠢᠳᠠᠢ᠂ ᠪᠠᠶᠠᠨ᠂ ᠴᠠᠭᠠᠨ ᠨᠠᠷ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠬᠤ᠂ ᠪᠣᠯᠵᠤ ᠥᠭᠪᠡᠯ ᠲᠡᠳᠡᠨ ᠢ᠋ ᠪᠦᠷᠢᠨᠡ ᠭᠠᠷ ᠲᠤ ᠪᠠᠨ ᠣᠷᠣᠭᠤᠯᠤᠨ᠂ ᠳᠡᠭᠡᠳᠦ ᠬᠡᠮᠵᠢᠶᠡ ᠪᠡᠷ ᠠᠰᠢᠭᠯᠠᠬᠤ ᠨᠡᠩ ᠴᠤᠬᠠᠭ ᠬᠡᠷᠡᠭ ᠲᠤᠯᠭᠠᠷᠠᠵᠤ ᠪᠠᠢᠭᠠ ᠶ᠋ᠢ《ᠨᠣᠭᠣᠭᠠᠨ ᠲᠠᠢᠷᠠᠩ》 ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃
— ᠲᠠᠨ ᠤ᠋ ᠥᠷᠭᠥᠭᠡ ᠲᠤᠩ ᠴᠤ᠌ ᠲᠣᠬᠢᠯᠢᠭ᠂ ᠭᠣᠶᠣ ᠰᠠᠢᠬᠠᠨ ᠪᠠᠢᠨᠠ᠃ ᠡᠢᠮᠦ ᠣᠷᠳᠣᠨ ᠳ᠋ᠤ᠌ ᠡᠵᠡᠨ ᠬᠥᠮᠦᠨ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠵᠤᠭᠠᠴᠠᠵᠤ ᠪᠠᠢᠬᠤ ᠦᠭᠡᠢ ᠪᠣᠯ ᠡᠷᠡ ᠶ᠋ᠢᠨ ᠠᠵᠠ ᠵᠠᠶᠠᠭᠠᠨ ᠳ᠋ᠤ᠌ ᠮᠠᠭᠤ ᠪᠢᠵᠡ᠃ ᠪᠣᠭᠣᠯ ᠨᠢ ᠣᠷᠣᠢ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠵᠢᠷᠤᠭ ᠤ᠋ᠨ ᠶᠤᠮ ᠰᠢᠭ᠋ ᠬᠣᠶᠠᠷ ᠭᠤᠸᠠ ᠪᠦᠰᠡᠭᠦᠢ ᠣᠷᠣᠭᠤᠯᠵᠤ ᠢᠷᠡᠨᠡ᠃ ᠲᠠ ᠲᠠᠭᠠᠯᠠᠵᠤ ᠪᠤᠯᠭᠤᠭᠠᠷᠠᠢ! ᠴᠡᠭᠡᠷᠯᠡᠬᠦ ᠶᠠᠭᠤ ᠪᠠᠢᠬᠤ ᠪᠣᠢ᠃ ᠡᠷᠡ ᠬᠥᠮᠦᠨ ᠦ᠌ ᠶᠠᠪᠤᠳᠠᠯ᠃ ᠲᠡᠭᠡᠭᠡᠳ《ᠪᠠᠯ ᠪᠤᠷᠠᠮ》 ᠵᠣᠭᠣᠭᠯᠠᠬᠤ ᠪᠢᠵᠡ᠃ ᠪᠢ ᠪᠠᠰᠠ ᠲᠡᠷᠡ ᠴᠠᠭ ᠲᠤ ᠬᠡᠷᠡᠭᠯᠡᠬᠦ ᠵᠣᠭᠣᠭ ᠤ᠋ᠨ ᠵᠦᠢᠯ ᠢ᠋ ᠲᠠᠨ ᠤ᠋ ᠤᠨᠲᠠᠯᠭᠠ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠪᠡᠯᠡᠳᠬᠡᠭᠦᠯᠦᠨᠡ ᠭᠡᠵᠦ《ᠭᠦᠢᠲᠡᠩ ᠠᠪᠠᠭᠠᠢ》 ᠬᠡᠯᠡᠭᠡᠳ ᠦᠷᠭᠦᠭᠡᠨ ᠡᠴᠡ ᠭᠠᠷᠤᠯᠠ᠃ ᠯᠣᠯᠣᠢ ᠶ᠋ᠢ ᠢᠩᠭᠢᠵᠦ ᠰᠢᠳᠠᠷ ᠤ᠋ᠳ ᠨᠡᠷᠡᠯᠡᠳᠡᠭ᠃ ᠲᠡᠷᠡ ᠨᠢ ᠴᠣᠬᠣᠮ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ᠂ ᠮᠡᠳᠡᠬᠦ ᠦᠭᠡᠢ᠃《 ᠭᠦᠶᠦᠳᠡᠭ》 ᠴᠦ᠍ ᠭᠡᠵᠦ ᠪᠠᠢᠭᠠ ᠶᠤᠮ ᠤᠤ᠂ ᠬᠡᠨ ᠮᠡᠳᠡᠬᠦ ᠪᠢᠯᠡ᠃
ᠨᠠᠷᠠᠨ ᠰᠢᠩᠭᠡᠬᠦ ᠦᠶᠡ ᠪᠡᠷ ᠨᠠᠮᠤᠭᠤᠬᠠᠨ ᠣᠷᠣᠢ ᠢᠷᠡᠯᠡ᠃ ᠠᠭᠠᠷ ᠲᠩᠷᠢ ᠶᠠᠭᠤᠲᠠᠢ ᠲᠠᠭᠠᠯᠠᠮᠵᠢᠲᠠᠢ ᠪᠣᠢ᠃
ᠡᠵᠡᠨ ᠵᠠᠬᠢᠷᠤᠭᠴᠢ ᠬᠢᠲᠠᠳ ᠬᠢᠴᠡᠨ ᠦ᠌ ᠬᠡᠯᠬᠡᠭᠡᠷ ᠲᠣᠮᠣ ᠲᠣᠷᠭᠠᠨ ᠨᠥᠮᠥᠷᠭᠡ ᠡᠩᠭᠡᠷ ᠵᠠᠳᠠᠭᠠᠢ ᠨᠥᠮᠥᠷᠦᠭᠡᠳ ᠣᠷᠳᠣᠨ ᠤ᠋ ᠪᠠᠨ ᠥᠷᠭᠡᠨ ᠲᠠᠭᠲᠤ ᠳᠡᠭᠡᠷᠡ ᠭᠠᠷᠤᠨ ᠵᠣᠭᠰᠣᠵᠤ ᠣᠷᠴᠢᠨ ᠢ᠋ ᠠᠵᠢᠭᠯᠠᠨᠠ᠃
ᠬᠣᠲᠠ ᠶ᠋ᠢᠨ ᠪᠠᠢᠳᠠᠯ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠰᠠᠢᠬᠠᠨ ᠬᠠᠷᠠᠭᠳᠠᠪᠠ᠃ ᠨᠠᠷᠢᠪᠲᠤᠷ ᠪᠣᠯᠪᠠᠴᠤ ᠴᠢᠬᠡ ᠰᠢᠯᠤᠭᠤᠨ ᠭᠤᠳᠤᠮᠵᠢ ᠭᠠᠷᠭᠠᠨ ᠪᠠᠷᠢᠭᠰᠠᠨ ᠡᠨᠡ ᠰᠠᠭᠤᠷᠢᠨ ᠴᠠᠭᠠᠨᠠ ᠪᠠᠨ ᠯᠠ ᠨᠢᠭᠡ ᠲᠣᠬᠢᠲᠠᠢ᠂ ᠴᠡᠪᠡᠷ ᠭᠣᠶᠣᠮᠰᠣᠭ ᠨᠢ ᠨᠢᠳᠦ ᠪᠤᠯᠢᠶᠠᠬᠤ ᠦᠭᠡᠢ ᠪᠠᠢᠬᠤ ᠠᠷᠭᠠ ᠦᠭᠡᠢ᠃ ᠬᠥᠬᠡ ᠸᠠᠭᠠᠷ ᠤ᠋ᠨ ᠳᠡᠭᠡᠪᠦᠷ ᠲᠡᠢ ᠬᠣᠶᠠᠷ ᠭᠤᠷᠪᠠᠨ ᠳᠠᠪᠬᠤᠷ ᠪᠠᠢᠰᠢᠩ ᠢ᠋ᠶ᠋ᠠᠷ ᠣᠷᠴᠢᠨ ᠢ᠋ ᠨᠢ ᠬᠦᠷᠢᠶᠡᠯᠡᠭᠦᠯᠵᠦ᠂ ᠬᠠᠷᠠ ᠬᠣᠷᠣᠮ ᠢ᠋ ᠳᠠᠭᠤᠷᠢᠶᠠᠯᠭᠠᠭᠰᠠᠨ ᠶᠤᠮ ᠰᠢᠭ᠋ ᠪᠠᠷᠠᠭᠤᠨ ᠬᠣᠢᠲᠤ ᠬᠡᠰᠡᠭ ᠲᠦ᠍ ᠨᠢ ᠡᠵᠡᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠣᠷᠳᠣᠨ ᠢ᠋ ᠪᠠᠢᠭᠤᠯᠵᠠᠢ᠃ ᠡᠨᠡ ᠣᠷᠳᠣᠨ ᠨᠢᠭᠡ ᠲᠠᠯᠠ ᠠ᠋ᠴᠠ ᠪᠠᠨ ᠬᠣᠶᠠᠷ᠂ ᠨᠥᠭᠦᠭᠡ ᠲᠠᠯᠠ ᠠ᠋ᠴᠠ ᠪᠠᠨ ᠭᠤᠷᠪᠠᠨ ᠳᠠᠪᠬᠤᠷ᠂ ᠮᠠᠢᠬᠠᠨ ᠣᠷᠣᠢ ᠲᠠᠢ ᠪᠠᠢᠰᠢᠩ ᠪᠢᠯᠡ᠃ ᠣᠷᠳᠣᠨ ᠢ᠋ ᠲᠣᠭᠣᠷᠢᠭᠤᠯᠤᠭᠠᠳ ᠮᠣᠳᠣ ᠴᠡᠴᠡᠭ ᠲᠠᠷᠢᠵᠤ ᠤᠷᠭᠤᠭᠤᠯᠤᠭᠰᠠᠨ᠂ ᠤᠰᠤᠨ ᠣᠷᠭᠢᠭᠤᠯᠤᠭᠤᠷ ᠬᠣᠶᠠᠷ ᠢ᠋ ᠪᠠᠢᠭᠤᠯᠤᠭᠰᠠᠨ ᠨᠢ ᠠᠭᠠᠷ ᠢ᠋ ᠴᠢᠭᠢᠭᠯᠢᠭ᠂ ᠲᠠᠭᠠᠯᠠᠮᠵᠢᠲᠠᠢ ᠪᠣᠯᠭᠠᠭᠰᠠᠨ ᠪᠠᠢᠨᠠ᠃ ᠶᠡᠷᠦ ᠨᠢ ᠶᠠᠭᠠᠬᠢᠵᠤ ᠬᠡᠳᠦᠬᠡᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠡᠢᠮᠦ ᠭᠣᠶᠣᠮᠰᠣᠭ ᠣᠷᠳᠣᠨ᠂ ᠪᠦᠬᠦᠯᠢ ᠪᠦᠲᠦᠨ ᠬᠣᠲᠠᠬᠠᠨ ᠢ᠋ ᠢᠩᠭᠢᠵᠦ ᠭᠣᠶᠣ ᠴᠡᠮᠴᠡᠭᠡᠷ ᠢ᠋ᠶ᠋ᠡᠷ ᠪᠠᠷᠢᠪᠠ ᠠ᠋ ᠭᠡᠮᠡᠷ ᠠᠵᠢ᠃ ᠲᠡᠷᠡ ᠪᠦᠬᠦᠨ ᠢ᠋ ᠲᠠᠭᠠᠯᠠᠨ ᠬᠠᠷᠠᠵᠤ ᠪᠠᠢᠭᠠ ᠬᠤᠪᠢᠯᠠᠢ ᠨᠢᠳᠦ ᠪᠡᠨ ᠣᠨᠢᠢᠯᠭᠠᠨ
— ᠬᠢᠲᠠᠳ ᠬᠥᠮᠦᠨ ᠴᠦ᠍ ᠬᠡᠯᠡᠵᠦ ᠪᠠᠷᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠶᠡᠬᠡ ᠠᠵᠢᠯᠴᠢ ᠶᠤᠮ᠃ ᠴᠡᠷᠢᠭ ᠦ᠋ᠳ ᠴᠦ᠍ ᠰᠦᠷᠡᠬᠡᠢ ᠴᠠᠭᠳᠠᠨ᠂ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠱᠠᠭᠠᠷᠳᠠᠵᠤ ᠬᠥᠳᠡᠯᠭᠡᠳᠡᠭ ᠡᠴᠡ ᠡᠰᠡ ᠵᠠᠢᠯᠠᠪᠠ ᠭᠡᠵᠢ᠃ ᠡᠢᠮᠦ ᠲᠣᠬᠢᠲᠠᠢ ᠭᠠᠵᠠᠷ ᠬᠥᠮᠦᠨ ᠰᠠᠭᠤᠷᠢᠰᠢᠭᠠᠳ ᠬᠡᠷᠡᠭ ᠶᠠᠪᠤᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠲᠠᠭᠠᠲᠠᠢ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠮᠡᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠶᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠨ ᠪᠦᠬᠦ ᠬᠣᠲᠠ ᠶ᠋ᠢᠨ ᠵᠢᠷᠤᠭ ᠲᠥᠰᠦᠯ ᠢ᠋ ᠪᠦᠲᠦᠭᠡᠭᠰᠡᠨ ᠬᠢᠲᠠᠳ ᠡᠷᠳᠡᠮᠲᠡᠨ ᠯᠢᠦ ᠪᠢᠩ ᠵᠦᠩ ᠦ᠋ᠨ ᠤᠷᠠ ᠤᠬᠠᠭᠠᠨ ᠬᠣᠶᠠᠷ ᠢ᠋ ᠪᠠᠬᠠᠳᠤᠨ᠂《ᠮᠥᠨ ᠴᠦ᠍ ᠰᠦᠷᠡᠬᠡᠢ ᠬᠥᠮᠦᠨ ᠪᠢᠳᠡᠨ ᠳ᠋ᠦ᠍ ᠲᠠᠭᠠᠷᠠᠯᠳᠤᠵᠠᠢ᠃ ᠵᠣᠣ ᠪᠢ〈ᠪᠠᠭᠰᠢ〉 ᠮᠢᠨᠢ ᠯᠡ ᠠᠩᠬᠠᠨ ᠯᠢᠦ ᠪᠢᠩ ᠵᠦᠩ ᠢ᠋ ᠲᠠᠨᠢᠨ ᠮᠡᠳᠡᠵᠦ ᠣᠯᠵᠤ ᠥᠭᠭᠦᠭᠰᠡᠨ᠃ ᠡᠢᠮᠦ ᠬᠥᠮᠦᠰ ᠢ᠋ ᠲᠠ ᠨᠠᠷ ᠳᠡᠭᠡᠷᠡ ᠢᠷᠡᠭᠦᠯᠦᠨᠡ ᠤᠤ ᠭᠡᠰᠡᠨ ᠲᠩᠷᠢ ᠶ᠋ᠢᠨ ᠥᠷᠥᠰᠢᠶᠡᠯ᠃ ᠲᠡᠭᠦᠨ ᠢ᠋ᠶ᠋ᠡᠷ ᠪᠦᠲᠦᠭᠰᠡᠨ ᠬᠡᠷᠡᠭ》 ᠭᠡᠮᠡᠨ ᠪᠣᠳᠣᠵᠤ
— ᠤᠷᠠ ᠤᠬᠠᠭᠠᠨ ᠬᠣᠶᠠᠷ ᠢ᠋ ᠬᠣᠣᠰᠯᠠᠭᠤᠯᠤᠭᠰᠠᠨ ᠬᠥᠮᠦᠨ ᠦ᠌ ᠭᠡᠵᠦ ᠨᠠᠳᠠᠳᠤ ᠲᠡᠷᠡ ᠤᠷᠠᠨ ᠴᠢᠳᠠᠪᠤᠷᠢᠲᠠᠨ ᠬᠡᠯᠡᠭᠡᠳ ᠪᠠᠢᠭᠠ ᠨᠢ ᠪᠠᠰᠠ ᠤᠴᠢᠷᠲᠠᠢ ᠪᠢᠵᠡ᠃ ᠶᠡᠷᠦ ᠨᠢ ᠬᠢᠲᠠᠳ ᠢ᠋ ᠲᠡᠷᠢᠭᠦᠯᠡᠨ ᠰᠠᠭᠤᠵᠤ ᠬᠥᠲᠥᠯᠦᠨᠡ ᠭᠡᠳᠡᠭ ᠦ᠋ᠨ ᠬᠡᠷᠡᠭ ᠢ᠋ ᠪᠦᠷ ᠲᠠᠷᠢᠬᠢᠨ ᠳᠡᠭᠡᠷᠡ ᠨᠢ ᠰᠠᠭᠤᠵᠤ ᠯᠠ ᠪᠠᠢᠵᠤ ᠬᠢᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠬᠤ ᠠ᠋᠃ ᠲᠡᠭᠦᠨ ᠢ᠋ ᠲᠡᠷᠡ ᠡᠷᠳᠡᠮᠲᠡᠨ ᠤᠬᠠᠭᠠᠲᠠᠢ ᠪᠣᠳᠣᠭᠠᠳ ᠨᠠᠮᠠᠶ᠋ᠢ ᠡᠨᠳᠡ ᠰᠠᠭᠤᠵᠤ ᠪᠠᠢ ᠭᠡᠵᠦ ᠪᠠᠢᠭᠠ ᠪᠢᠵᠡ ᠭᠡᠮᠡᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠬᠠᠨ ᠶᠠᠷᠢᠯᠠ᠃
ᠬᠣᠲᠠ ᠶ᠋ᠢᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠬᠥᠮᠦᠰ ᠠᠵᠢᠯᠯᠠᠭᠰᠠᠭᠠᠷ᠂ ᠣᠯᠠᠨ ᠬᠦᠷᠵᠡ ᠵᠡᠭᠡᠲᠦᠦ ᠶ᠋ᠢᠨ ᠳᠠᠭᠤ ᠲᠠᠰᠤᠷᠠᠯᠲᠠ ᠦᠭᠡᠢ ᠰᠣᠨᠣᠰᠤᠭᠳᠠᠭᠰᠠᠭᠠᠷ ᠠᠵᠢ᠃
ᠡᠳᠡ ᠢᠩᠭᠢᠭᠡᠳ ᠣᠷᠣᠢᠵᠢᠨ᠂ ᠰᠥᠨᠢᠵᠢᠨ ᠠᠵᠢᠯᠯᠠᠵᠤ ᠪᠠᠢᠳᠠᠭ ᠶᠤᠮ ᠪᠢᠵᠡ ᠳᠡ? ᠢᠩᠭᠢᠬᠦ ᠦᠭᠡᠢ ᠪᠡᠷ ᠪᠦᠬᠦᠯᠢ ᠪᠦᠲᠦᠨ ᠬᠣᠲᠠ ᠶ᠋ᠢ ᠶᠠᠭᠠᠬᠢᠵᠤ ᠴᠦ᠍ ᠪᠠᠷᠢᠵᠤ ᠳᠠᠭᠤᠰᠬᠠᠬᠤ ᠪᠢᠯᠡ᠃ ᠡᠨᠡ ᠬᠢᠲᠠᠳ ᠤ᠋ᠳ ᠨᠠᠳᠠᠳᠤ ᠰᠠᠢᠨ ᠪᠠᠢᠭᠠ ᠪᠣᠯᠤᠭᠠᠳ ᠯᠠ ᠺᠡᠢᠫᠢᠩ ᠢ᠋ ᠭᠣᠶᠣ᠂ ᠬᠤᠷᠳᠤᠨ ᠪᠠᠷᠢᠵᠤ ᠪᠤᠰᠬᠠᠭᠰᠠᠨ ᠬᠡᠷᠡᠭ ᠤᠤ? ᠬᠢᠲᠠᠳ ᠬᠥᠮᠦᠰ ᠦᠨᠡᠬᠡᠷ ᠨᠠᠳᠠᠳᠤ ᠰᠠᠢᠨ ᠰᠡᠳᠬᠢᠯ ᠲᠡᠢ ᠪᠠᠢᠭᠠ ᠭᠡᠵᠢ ᠤᠤ? ᠲᠡᠭᠡᠵᠦ ᠣᠢᠯᠠᠭᠠᠪᠠᠯ ᠪᠢ ᠠᠯᠳᠠᠨᠠ᠃ ᠡᠨᠡ ᠪᠣᠯ ᠪᠦᠬᠦ ᠨᠡᠢᠲᠡ ᠶ᠋ᠢᠨ ᠰᠠᠨᠠᠭᠠ ᠴᠤ᠌ ᠪᠢᠰᠢ ᠵᠣᠣ ᠪᠢ ᠪᠠᠭᠰᠢ᠂ ᠯᠢᠦ ᠪᠢᠩ ᠵᠦᠩ᠂ ᠶᠣᠣ ᠱᠤ᠌ ᠨᠠᠷ ᠤ᠋ᠨ ᠠᠴᠢ᠃ ᠲᠡᠳᠡ ᠶᠠᠭᠠᠬᠢᠭᠠᠳ ᠨᠠᠮᠠᠶ᠋ᠢ ᠢᠩᠭᠢᠵᠦ ᠠᠴᠢᠯᠠᠬᠤ ᠪᠣᠯᠪᠠ ᠠ᠋? ᠲᠡᠳᠡ ᠴᠢᠨᠢ ᠡᠬᠢᠯᠡᠭᠡᠳ ᠮᠢᠨᠦ ᠳᠠᠢᠰᠤᠨ ᠪᠠᠢᠭᠰᠠᠨ ᠪᠢᠰᠢ ᠤᠤ? ᠬᠥᠮᠦᠨ ᠦ᠌ ᠰᠠᠨᠠᠭᠠ ᠬᠦᠴᠦᠨ ᠳ᠋ᠦ᠍ ᠠᠪᠲᠠᠬᠤ ᠪᠠᠷ ᠢ᠋ᠶ᠋ᠠᠨ ᠡᠢᠮᠦ ᠠᠮᠠᠷᠬᠠᠨ ᠡᠷᠭᠢᠳᠡᠭ ᠭᠡᠵᠢ ᠤᠤ? ᠦᠭᠡᠢ ᠯᠡ ᠪᠠᠢᠯᠲᠠᠢ᠃ ᠸᠠᠩ ᠦ ᠡᠪᠦᠭᠡᠨ ᠴᠠᠭ ᠢᠷᠡᠬᠦ ᠪᠡᠷ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠠᠮᠠᠷᠬᠠᠨ ᠬᠤᠪᠢᠰᠳᠠᠭ ᠵᠢᠮᠡ ᠲᠡᠢ ᠭᠡᠵᠦ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠳ᠋ᠤ᠌ ᠪᠣᠢ ᠭᠡᠮᠡᠨ ᠨᠠᠳᠠᠳᠤ ᠶᠠᠷᠢᠭᠰᠠᠨ᠃ ᠲᠡᠷᠡ ᠨᠢ ᠦᠨᠡᠨ ᠶᠠᠭᠤᠮᠠ ᠪᠠᠢᠯ ᠦᠭᠡᠢ ᠭᠡᠮᠡᠨ ᠬᠤᠪᠢᠯᠠᠢ ᠪᠣᠳᠣᠨ᠂ ᠲᠣᠷᠭᠠᠨ ᠨᠥᠮᠥᠷᠭᠡ ᠳᠣᠲᠣᠷᠠ ᠪᠠᠨ ᠪᠡᠶᠡ ᠪᠡᠨ ᠱᠦᠷᠭᠦᠭᠡᠨ ᠲᠠᠭᠲᠤ ᠳᠡᠭᠡᠷᠡ ᠪᠡᠨ ᠪᠠᠬᠠᠨ ᠵᠣᠭᠰᠣᠵᠠᠢ᠃
ᠡᠨᠡ ᠦᠶᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠤᠨᠲᠠᠯᠭᠠ ᠶ᠋ᠢᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠽᠠᠨᠳᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠭᠠᠩᠭᠠᠩ ᠱᠠᠭᠠᠵᠠᠩ ᠥᠷᠥᠵᠦ᠂ ᠠᠷᠰᠯᠠᠨ ᠲᠢᠪ ᠦ᠋ᠨ ᠵᠢᠮᠢᠰ ᠲᠠᠪᠠᠭ ᠲᠤ᠂ ᠥᠭᠡᠷᠡ ᠬᠡᠳᠦᠨ ᠣᠷᠣᠨ ᠤ᠋ ᠲᠠᠩᠰᠤᠭ ᠦᠨᠦᠷᠲᠦ ᠳᠠᠷᠠᠰᠤ ᠪᠠᠰᠠ ᠪᠤᠰᠤ ᠠᠮᠲᠠᠲᠠᠨ᠂ ᠬᠣᠭᠣᠯᠠ ᠵᠡᠷᠭᠡ ᠶ᠋ᠢ ᠵᠡᠬᠡᠨ ᠲᠠᠯᠪᠢᠵᠤ᠂ ᠦᠰᠦ ᠭᠡᠵᠢᠭᠡ ᠶ᠋ᠢ ᠨᠢ ᠵᠠᠰᠠᠵᠤ ᠭᠣᠣᠳᠠᠭᠰᠠᠨ᠂ ᠭᠤᠸᠠ ᠪᠠᠶᠠᠨ ᠳ᠋ᠤ᠌ ᠪᠠᠨ ᠵᠥᠭᠡᠯᠡᠬᠡᠨ ᠨᠥᠮᠥᠷᠭᠡ ᠳᠡᠪᠡᠯ ᠵᠠᠳᠠᠭᠠᠢ ᠨᠥᠮᠥᠷᠢᠭᠦᠯᠦᠭᠰᠡᠨ ᠬᠣᠶᠠᠷ ᠪᠦᠰᠡᠭᠦᠢ ᠶ᠋ᠢ ᠵᠡᠷᠭᠡᠯᠡᠳᠡᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠨᠢ ᠯᠣᠯᠣᠢ ᠳᠠᠭᠠᠭᠤᠯᠤᠨ ᠢᠷᠡᠵᠦ ᠰᠠᠭᠤᠯᠭᠠᠭᠠᠳ ᠬᠡᠷᠡᠭᠯᠡᠬᠦ ᠡᠵᠡᠨ ᠢ᠋ ᠨᠢ ᠬᠦᠯᠢᠶᠡᠯᠭᠡᠵᠦ ᠪᠠᠢᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠲᠡᠷᠡ ᠬᠣᠶᠠᠷ ᠪᠦᠰᠡᠭᠦᠢ ᠳ᠋ᠦ᠍ ᠰᠠᠢᠬᠢ ᠠᠪᠠᠭᠠᠢ ᠢᠳᠬᠠᠵᠤ ᠬᠡᠯᠡᠬᠦ ᠳ᠋ᠦ᠍ ᠪᠡᠨ
— ᠲᠩᠷᠢ ᠤᠭᠰᠠᠭᠠᠨ ᠤ᠋ ᠳᠡᠭᠡᠳᠦ ᠡᠵᠡᠨ ᠲᠡᠢ ᠤᠴᠠᠷᠠᠨᠠ ᠭᠡᠳᠡᠭ ᠪᠤᠷᠬᠠᠨ ᠤ᠋ ᠥᠷᠥᠰᠢᠶᠡᠭᠰᠡᠨ ᠠᠪᠤᠷᠠᠯ᠃ ᠠᠶᠤᠬᠤ ᠡᠮᠢᠶᠡᠬᠦ ᠪᠣᠯ ᠴᠢᠪᠠᠯᠲᠠᠢ ᠬᠡᠷᠡᠭ ᠪᠣᠯᠤᠨᠠ᠃ ᠪᠦᠰᠡᠭᠦᠢ ᠪᠢᠳᠡᠨ ᠳ᠋ᠦ᠍ ᠨᠢᠭᠡᠨᠲᠡ ᠲᠩᠷᠢ ᠡᠴᠡ ᠵᠠᠶᠠᠭᠠᠭᠰᠠᠨ ᠦᠢᠯᠡ ᠶ᠋ᠢ ᠴᠠᠭᠠᠰᠢ ᠨᠢ ᠲᠦᠯᠬᠢᠵᠦ᠂ ᠲᠡᠭᠦᠨ ᠡᠴᠡ ᠵᠢᠭᠤᠲᠠᠭᠠᠬᠤ ᠠᠷᠭᠠ ᠦᠭᠡᠢ᠁ ᠭᠡᠮᠡᠨ ᠰᠡᠩᠬᠡᠷᠡᠭᠦᠯᠦᠭᠰᠡᠨ ᠪᠠᠢᠯᠠ᠃ ᠣᠳᠣᠳ ᠲᠦᠭᠡᠭᠰᠡᠨ ᠰᠥᠨᠢ ᠣᠯᠠᠨ ᠥᠩᠭᠡ ᠶ᠋ᠢᠨ ᠳ᠋ᠧᠩᠯᠦ ᠠᠰᠠᠭᠠᠭᠰᠠᠨ ᠰᠠᠷᠠᠭᠤᠯ ᠲᠠᠰᠤᠯᠭᠠᠨ ᠳ᠋ᠤ᠌ ᠬᠤᠪᠢᠯᠠᠢ ᠦᠵᠡᠰᠬᠦᠯᠡᠩ ᠭᠤᠸᠠ ᠮᠣᠩᠭᠣᠯ ᠥᠬᠢᠳ ᠲᠡᠢ ᠶᠠᠭᠠᠬᠢᠨ ᠵᠤᠭᠠᠴᠠᠵᠤ᠂ ᠶᠠᠭᠤ ᠵᠣᠭᠣᠭᠯᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠩᠭᠠᠭᠰᠠᠨ ᠢ᠋ ᠲᠣᠭᠠᠴᠢᠨ ᠪᠠᠷᠠᠬᠤ ᠠᠷᠭᠠ ᠠᠯᠠᠭᠠ᠃ ᠲᠠᠰᠤᠯᠭᠠᠨ ᠳ᠋ᠠᠬᠢ ᠳ᠋ᠧᠩᠯᠦ ᠠᠰᠠᠵᠤ ᠤᠨᠲᠠᠷᠴᠦ ᠪᠠᠢᠯᠠ᠁ ᠭᠡᠯᠡ ᠴᠦ᠍ ᠬᠤᠪᠢᠯᠠᠢ ᠶ᠋ᠢᠨ ᠰᠡᠳᠬᠢᠯ ᠢ᠋ ᠶᠠᠮᠠᠷ ᠴᠦ᠍ ᠵᠤᠭᠠ ᠴᠡᠩᠭᠡᠯ ᠰᠠᠭᠠᠲᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠱᠠᠯ ᠥᠭᠡᠷᠡ ᠨᠢᠭᠡᠨ ᠵᠦᠢᠯ ᠤᠷᠤᠭᠤ ᠲᠡᠮᠡᠦᠯᠦᠭᠰᠡᠭᠡᠷ ᠪᠠᠢᠭᠠ ᠶ᠋ᠢ ᠲᠡᠭᠦᠨ ᠦ᠌ ᠳᠡᠷᠭᠡᠳᠡᠬᠢ ᠡᠮᠡᠰ ᠥᠬᠢᠳ᠂ ᠰᠠᠢᠬᠢ ᠯᠣᠯᠣᠢ ᠲᠠᠭᠠᠮᠠᠭᠯᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ᠃
ᠵᠠᠬᠢᠷᠤᠭᠴᠢ ᠡᠷᠡ ᠪᠠᠢᠨ ᠪᠠᠢᠨ ᠤᠷᠲᠤ ᠪᠠᠷ ᠠᠮᠢᠰᠬᠤᠭᠠᠯᠠᠨ
— ᠪᠢ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠣᠯᠵᠤ ᠪᠠᠢᠨᠠ ᠪᠣᠢ? ᠵᠠ ᠪᠠᠢᠵᠠ! ᠬᠡᠨ ᠲᠡᠢ ᠶᠠᠭᠤ ᠭᠡᠵᠦ ᠶᠠᠷᠢᠬᠤ ᠪᠣᠢ? ᠭᠡᠮᠡᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠦᠭᠡᠯᠡᠭᠰᠡᠭᠡᠷ᠂ ᠲᠡᠷᠡ ᠲᠡᠮᠡᠦᠯᠦᠨ ᠪᠣᠳᠣᠵᠤ ᠪᠠᠢᠭᠠ ᠬᠡᠷᠡᠭ ᠨᠢ ᠥᠪᠡᠷ ᠲᠦ᠍ ᠨᠢ ᠰᠢᠨᠠᠯᠭᠠᠲᠠᠢ ᠴᠤ᠌ ᠭᠡᠯᠡ ᠬᠡᠴᠢᠨᠡᠨ ᠬᠠᠬᠢᠷ ᠬᠠᠲᠠᠭᠤ ᠴᠤ᠌ ᠭᠡᠰᠡᠨ ᠵᠠᠪᠠᠯ ᠬᠢᠬᠦ ᠶᠣᠰᠣᠲᠠᠢ ᠵᠦᠢᠯ ᠪᠣᠯᠤᠨ ᠬᠠᠮᠤᠭ ᠣᠶᠤᠨ ᠪᠣᠳᠣᠯ ᠢ᠋ ᠨᠢ ᠡᠵᠡᠮᠳᠡᠵᠦ ᠪᠠᠢᠪᠠ᠃
— ᠪᠢ ᠬᠠᠭᠠᠨ ᠪᠣᠯᠤᠨᠠ ᠮᠠᠨᠢ ᠵᠥᠪ ᠤᠤ? ᠶᠠᠮᠠᠷ ᠴᠦ᠍ ᠡᠷᠡᠭᠡᠯᠵᠡᠭᠡ ᠠᠯᠠᠭᠠ᠃ ᠪᠢ ᠣᠷᠣ ᠰᠠᠭᠤᠭᠠᠳ ᠶᠠᠭᠤ ᠬᠢᠵᠦ ᠴᠢᠳᠠᠬᠤ ᠪᠢᠯᠡ? ᠡᠨᠡ ᠲᠣᠮᠣ ᠭᠦᠷᠦᠨ ᠢ᠋ ᠵᠠᠬᠢᠷᠴᠤ ᠴᠢᠳᠠᠬᠤ ᠤᠤ? ᠪᠣᠯᠬᠤ ᠪᠢᠵᠡ᠃ ᠪᠢ ᠶᠠᠮᠠᠷ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠢᠬᠦ ᠬᠡᠷᠡᠭ ᠪᠢᠰᠢ ᠳᠡ᠁ ᠭᠡᠵᠦ ᠬᠤᠪᠢᠯᠠᠢ ᠠᠮᠠᠨ ᠳ᠋ᠤ᠌ ᠪᠠᠨ ᠦᠭᠡᠯᠡᠨᠡ᠃
ᠡᠭᠦᠨ ᠡᠴᠡ ᠥᠭᠡᠷᠡ ᠪᠣᠳᠣᠵᠤ ᠰᠠᠨᠠᠬᠤ ᠶᠠᠭᠤᠮᠠ ᠠᠭᠤᠯᠠ ᠣᠪᠣᠭᠠ ᠠᠳᠠᠯᠢ ᠶᠡᠬᠡ ᠪᠠᠢᠯᠠ ᠴᠦ᠍ ᠭᠡᠰᠡᠨ ᠲᠡᠷᠡ ᠪᠦᠬᠦᠨ ᠢ᠋ ᠪᠣᠳᠣᠬᠤ ᠵᠠᠪ ᠠᠯᠠᠭᠠ᠃
— ᠡᠵᠡᠨ ᠦ᠌ ᠣᠷᠣ ᠰᠠᠭᠤᠭᠠᠳ ᠨᠠᠳᠠᠳᠤ ᠶᠠᠮᠠᠷ ᠠᠰᠢᠭ ᠪᠠᠢᠨᠠ ᠪᠣᠢ? ᠶᠠᠮᠠᠷ ᠬᠣᠣᠷ ᠤᠷᠰᠢᠭ ᠲᠠᠷᠢᠨᠠ ᠭᠡᠬᠦ ᠪᠣᠢ? ᠭᠡᠵᠦ ᠲᠡᠷᠡ ᠥᠪᠡᠷ ᠡᠴᠡ ᠪᠡᠨ ᠪᠠᠰᠠ ᠠᠰᠠᠭᠤᠭᠠᠳ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠨᠢ ᠲᠠᠷᠢᠬᠢ ᠲᠣᠯᠣᠭᠠᠢ ᠳ᠋ᠤ᠌ ᠨᠢ ᠪᠠᠭᠲᠠᠵᠤ ᠶᠠᠳᠠᠭᠰᠠᠨ ᠣᠯᠠᠨ ᠵᠦᠢᠯ ᠴᠢᠭᠴᠢᠡᠯᠳᠦᠨ ᠣᠷᠣᠵᠤ ᠢᠷᠡᠨᠡ᠃
— ᠵᠠ ᠰᠠᠢᠨ ᠲᠠᠯᠠ ᠨᠢ ᠭᠡᠪᠡᠯ ᠭᠡᠳ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠢᠷ ᠢ᠋ᠶ᠋ᠡᠷ ᠲᠠᠲᠠᠯᠦᠨ᠄
1. ᠶᠡᠬᠡ ᠬᠠᠭᠠᠨ ᠪᠠᠢᠨᠠ ᠭᠡᠳᠡᠭ ᠲᠩᠷᠢ ᠠᠳᠠᠯᠢ ᠨᠡᠷᠡ ᠠᠯᠳᠠᠷᠲᠠᠢ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃
2. ᠪᠦᠬᠦ ᠮᠣᠩᠭᠣᠯ ᠢ᠋ ᠪᠤᠤ ᠬᠡᠯᠡ᠂ ᠶᠡᠬᠡ ᠭᠦᠷᠦᠨ ᠢ᠋ ᠪᠦᠭᠦᠳᠡ ᠶ᠋ᠢ ᠵᠠᠬᠢᠷᠤᠨᠠ᠃ ᠴᠠᠭᠠᠰᠢᠯᠠᠪᠠᠯ ᠶᠢᠷᠲᠢᠨᠴᠦ ᠶ᠋ᠢ ᠮᠡᠳᠡᠭᠴᠢ ᠪᠣᠯᠤᠨ ᠳᠡᠭᠡᠭᠰᠢᠯᠡᠵᠦ ᠴᠦ᠍ ᠪᠣᠯᠤᠨᠠ᠃
3. ᠪᠢ᠂ ᠪᠣᠭᠳᠠ ᠡᠪᠦᠭᠡ ᠶ᠋ᠢᠨ ᠪᠠᠷᠠᠳᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠶᠢᠷᠲᠢᠨᠴᠦ ᠶ᠋ᠢ ᠪᠦᠬᠦᠯᠢ ᠳ᠋ᠦ᠍ ᠨᠢ ᠲᠦᠪᠰᠢᠳᠬᠡᠬᠦ ᠶᠡᠬᠡ ᠬᠡᠷᠡᠭ ᠢ᠋ ᠦᠷᠭᠦᠯᠵᠢᠯᠡᠭᠦᠯᠦᠨ᠂ ᠲᠤᠢᠯ ᠳ᠋ᠤ᠌ ᠨᠢ ᠬᠦᠷᠭᠡᠬᠦ ᠶ᠋ᠢ ᠵᠣᠷᠢᠨᠠ ᠳᠠ᠃
4. ᠪᠢ ᠤᠯᠤᠰ ᠭᠦᠷᠦᠨ ᠦ᠌ ᠬᠡᠷᠡᠭ ᠢ᠋ ᠴᠠᠯᠠᠭᠠᠢᠳᠠᠭᠤᠯᠬᠤ ᠦᠭᠡᠢ ᠪᠡᠷ ᠨᠡᠩ ᠶᠡᠬᠡ ᠨᠠᠷᠢᠨ ᠵᠢᠷᠤᠮ ᠰᠠᠬᠢᠳᠠᠭ᠂ ᠴᠢᠩᠳᠠ ᠬᠠᠲᠠᠭᠤ ᠲᠢᠭ ᠲᠡᠢ᠂ ᠰᠦᠷᠯᠢᠭ ᠰᠠᠢᠬᠠᠨ ᠤᠯᠤᠰ ᠪᠣᠯᠭᠠᠨ ᠶᠠᠪᠤᠭᠤᠯᠤᠨᠠ᠃ ᠡᠨᠡ ᠬᠡᠷᠡᠭ ᠪᠦᠲᠦᠨᠡ᠃ ᠪᠦᠲᠦᠬᠦ ᠲᠠᠪᠢᠯᠠᠩ ᠲᠠᠢ ᠴᠤ᠌ ᠪᠢᠵᠡ᠃ ᠶᠠᠭᠤᠨ ᠤ᠋ ᠡᠮᠦᠨᠡ ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠢᠲᠠᠳ ᠢ᠋ ᠮᠡᠳᠡᠨ ᠴᠢᠩᠳᠠ ᠵᠠᠬᠢᠷᠴᠤ ᠮᠣᠩᠭᠣᠯ ᠤ᠋ᠨ ᠬᠥᠯ ᠳᠣᠣᠷᠠ ᠪᠠᠢᠯᠭᠠᠨᠠ᠃ ᠡᠨᠡ ᠪᠣᠯ ᠠᠤᠭᠠ ᠲᠣᠮᠣ ᠶᠠᠪᠤᠳᠠᠯ᠃ ᠮᠣᠩᠭᠣᠯ ᠢ᠋ᠶ᠋ᠠᠨ ᠬᠢᠲᠠᠳ ᠪᠣᠯᠭᠠᠬᠤ ᠦᠭᠡᠢ᠂ ᠬᠢᠲᠠᠳ ᠢ᠋ ᠴᠦ᠍ ᠮᠣᠩᠭᠣᠯ ᠪᠣᠯᠭᠠᠬᠤ ᠦᠭᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠬᠢᠲᠠᠳ ᠮᠣᠩᠭᠣᠯᠴᠤᠳ ᠢ᠋ ᠪᠣᠭᠣᠯᠴᠢᠯᠠᠵᠤ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠲᠡᠳᠡ ᠨᠠᠷ ᠤ᠋ᠨ ᠪᠣᠳᠣᠳᠠᠭ ᠪᠣᠳᠣᠯ ᠬᠡᠵᠢᠶᠡ ᠴᠦ᠍ ᠪᠦᠲᠦᠬᠦ ᠦᠭᠡᠢ᠂ ᠪᠦᠲᠦᠬᠦ ᠴᠠᠭ ᠨᠢ ᠥᠩᠭᠡᠷᠡᠭᠰᠡᠨ ᠬᠡᠷᠡᠭ᠁ ᠭᠡᠬᠦᠴᠢᠯᠡᠨ ᠵᠦᠢᠯ ᠢ᠋ ᠳ᠋ᠤᠭᠠᠷᠯᠠᠨ ᠪᠢᠴᠢᠯᠡ᠃
ᠨᠢᠭᠡ ᠳ᠋ᠦ᠍᠂ ᠪᠢ ᠵᠦᠭᠡᠷ ᠪᠠᠢᠭᠠᠳ ᠬᠠᠭᠠᠨ ᠰᠠᠭᠤᠵᠤ ᠴᠢᠳᠠᠬᠤ ᠦᠭᠡᠢ᠂ ᠮᠢᠨᠦ ᠥᠭᠡᠳᠡ ᠡᠴᠡ ᠵᠠᠪᠠᠯ ᠥᠷᠢᠰᠦᠯᠳᠦᠨ ᠲᠡᠮᠡᠴᠡᠯᠳᠦᠬᠦ ᠬᠥᠮᠦᠨ ᠭᠠᠷᠴᠤ ᠢᠷᠡᠨᠡ᠃ ᠥᠭᠡᠳᠡᠢ ᠠᠪᠠᠭᠠ ᠶ᠋ᠢᠨ ᠦᠷᠡ ᠤᠳᠤᠮ ᠤ᠋ᠨ ᠬᠥᠮᠦᠰ ᠪᠤᠶᠤ ᠮᠢᠨᠦ ᠳᠡᠭᠦᠦ ᠨᠠᠷ ᠨᠠᠳᠠᠲᠠᠢ ᠥᠷᠢᠰᠦᠯᠳᠦᠨᠡ᠃ ᠲᠡᠳᠡ ᠬᠦᠴᠦᠲᠡᠢ᠃ ᠪᠢ ᠴᠦ᠍ ᠨᠠᠯᠢᠶᠠᠨ ᠴᠡᠷᠢᠭ ᠲᠡᠢ ᠪᠠᠢᠨᠠ᠃ ᠲᠡᠷᠡ ᠥᠷᠢᠰᠦᠯᠳᠦᠭᠡᠨ ᠳ᠋ᠦ᠍ ᠴᠡᠷᠢᠭ ᠬᠡᠷᠡᠭᠯᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠮᠢᠨᠦ ᠵᠠᠬᠢᠷᠤᠨ ᠶᠠᠪᠤᠭᠠ ᠴᠡᠷᠢᠭ ᠦᠭᠡ ᠲᠤᠭᠤᠯᠬᠤ ᠤᠤ? ᠡᠨᠡ ᠡᠷᠡᠭᠡᠯᠵᠡᠭᠡᠲᠡᠢ ᠬᠡᠷᠡᠭ᠃ ᠡᠭᠦᠨ ᠢ᠋ ᠮᠡᠳᠡᠵᠦ ᠰᠢᠢᠳᠪᠦᠷᠢᠯᠡᠬᠦ ᠬᠥᠮᠦᠰ ᠪᠣᠯ ᠤᠷᠢᠶᠠᠩᠬᠠᠢᠳᠠᠢ᠂ ᠴᠠᠭᠠᠨ᠂ ᠪᠠᠶᠠᠨ ᠵᠠᠩᠵᠤᠨ ᠨᠠᠷ ᠰᠢᠦ ᠳᠡ᠃ ᠲᠡᠭᠡᠬᠦ ᠪᠡᠷ ᠪᠢ ᠲᠡᠷᠡ ᠭᠤᠷᠪᠠ ᠳ᠋ᠤ᠌ ᠨᠠᠯᠢᠶᠠᠨ ᠵᠡᠬᠡᠭᠰᠡᠨ ᠶᠠᠭᠤᠮᠠ ᠠᠮᠠᠯᠠᠵᠤ᠂ ᠬᠡᠰᠢᠭ ᠬᠦᠷᠲᠡᠭᠡᠬᠦ ᠶᠣᠰᠣᠲᠠᠢ ᠪᠣᠯᠵᠤ ᠪᠠᠢᠨᠠ᠃ ᠪᠠᠶᠠᠨ ᠪᠣᠯ ᠰᠢᠨᠤᠯ ᠦᠭᠡᠢ ᠡᠷᠡ ᠳᠡ᠃ ᠲᠡᠭᠦᠨ ᠢ᠋ ᠪᠢ ᠶᠠᠭᠠᠬᠢᠬᠤ ᠪᠣᠢ? ᠶᠠᠭᠠᠬᠢᠬᠤ ᠪᠣᠢ ᠳᠠ᠂ ᠶᠡᠬᠡ ᠯᠡ ᠴᠢᠷᠠᠢᠴᠢᠯᠠᠨ ᠬᠥᠯ ᠳ᠋ᠦ᠍ ᠨᠢ ᠰᠠᠭᠤᠨᠠ ᠳᠠ᠃ ᠥᠭᠡᠷᠡ ᠶᠠᠭᠤ ᠪᠢᠯᠡ᠃
ᠬᠣᠶᠠᠷ ᠲᠤ᠂ ᠮᠢᠨᠦ ᠠᠬᠠ ᠳᠡᠭᠦᠦ ᠨᠠᠷ ᠨᠠᠳᠠᠳᠤ ᠳᠤᠷᠠ ᠦᠭᠡᠢ ᠪᠣᠯᠤᠨᠠ᠃ ᠲᠡᠭᠦᠨ ᠢ᠋ᠶ᠋ᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ ᠪᠢ ᠳᠡᠭᠦᠦ ᠨᠠᠷ ᠲᠠᠢ ᠪᠠᠨ ᠦᠰᠲᠡᠨ ᠪᠣᠯᠵᠤ ᠳᠠᠢᠳᠤᠨᠠ ᠭᠡᠰᠡᠨ ᠦᠭᠡ᠃ ᠠᠬᠠ ᠮᠥᠩᠬᠡ ᠬᠠᠭᠠᠨ ᠳᠡᠭᠦᠦ ᠠᠷᠢᠬᠪᠥ᠋ᠬᠡ ᠶ᠋ᠢ ᠬᠠᠷᠠ ᠬᠣᠷᠣᠮ ᠢ᠋ ᠮᠡᠳᠡᠬᠦ ᠵᠠᠬᠢᠷᠤᠭᠴᠢ ᠪᠣᠯᠭᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠮᠠᠨᠢ ᠲᠡᠭᠦᠨ ᠢ᠋ᠶ᠋ᠡᠷ ᠣᠷᠣ ᠰᠠᠭᠤᠯᠭᠠ ᠭᠡᠰᠡᠨ ᠬᠡᠷᠡᠭ᠃ ᠡᠨᠡ ᠪᠣᠯ ᠮᠠᠷᠭᠤᠭᠠᠨ ᠦᠭᠡᠢ ᠵᠦᠢᠯ᠃ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠶᠠᠪᠤᠵᠤ ᠢᠷᠡᠭᠰᠡᠨ ᠵᠠᠩᠰᠢᠯ ᠪᠣᠯ ᠲᠥᠷᠥᠯᠬᠢ ᠡᠬᠡ ᠨᠤᠲᠤᠭ ᠬᠠᠷᠠ ᠬᠣᠷᠣᠮ ᠢ᠋ ᠬᠠᠭᠠᠨ ᠤ᠋ ᠣᠷᠣ ᠰᠠᠭᠤᠬᠤ ᠬᠥᠮᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠠᠬᠢᠷᠤᠭᠤᠯᠳᠠᠭ ᠵᠢᠮᠡ ᠲᠡᠢ᠃ ᠢᠩᠭᠢᠵᠦ ᠪᠠᠢ ᠭᠡᠰᠡᠨ ᠪᠣᠭᠳᠠ ᠴᠢᠩᠭᠢᠰ ᠡᠪᠦᠭᠡ ᠶ᠋ᠢᠨ ᠵᠠᠷᠯᠢᠭ ᠪᠣᠢ᠃ ᠪᠠᠰᠠ ᠡᠪᠦᠭᠡ ᠶ᠋ᠢᠨ ᠪᠦᠲᠦᠭᠡᠭᠰᠡᠨ《 ᠶᠡᠬᠡ ᠵᠠᠰᠠᠭ》 ᠭᠡᠳᠡᠭ ᠮᠤᠨᠳᠠᠭ ᠪᠣᠷᠤᠳᠬᠠᠢ ᠪᠣᠢ᠃ ᠲᠡᠭᠡᠭᠡᠳ ᠪᠢ ᠶᠠᠭᠠᠬᠢᠬᠤ ᠪᠣᠢ? ᠲᠡᠷᠡ ᠬᠠᠤᠯᠢᠨ ᠳ᠋ᠤ᠌ ᠵᠢᠭᠠᠭᠰᠠᠨ ᠶᠣᠰᠣ ᠵᠠᠩᠰᠢᠯ ᠢ᠋ ᠡᠪᠳᠡᠬᠦ ᠤᠤ? ᠡᠪᠳᠡᠬᠦ ᠦᠭᠡᠢ ᠪᠡᠷ ᠶᠠᠭᠤ ᠴᠣ ᠪᠦᠲᠦᠬᠦ ᠦᠭᠡᠢ ᠰᠢᠦ ᠳᠡ᠃
ᠭᠤᠷᠪᠠ ᠳ᠋ᠤ᠌᠂ ᠮᠣᠩᠭᠣᠯ ᠳ᠋ᠤ᠌ ᠪᠠᠢᠭᠠ ᠴᠡᠷᠢᠭ᠂ ᠨᠡᠢᠲᠡ ᠲᠦᠮᠡᠨ ᠮᠠᠨᠢ ᠨᠠᠮᠠᠶ᠋ᠢ ᠳᠠᠭᠠᠨᠠ ᠭᠡᠳᠡᠭ ᠨᠣᠬᠠᠢ ᠬᠡᠷᠡᠭ᠃《ᠶᠡᠬᠡ ᠬᠠᠭᠠᠨ ᠴᠢᠮᠠ ᠳ᠋ᠤ᠌ ᠬᠢᠲᠠᠳ ᠢ᠋ ᠥᠭᠭᠦᠭᠰᠡᠨ᠃ ᠴᠢ ᠲᠡᠭᠦᠨ ᠢ᠋ ᠪᠡᠨ ᠵᠠᠬᠢᠷᠤᠭᠠᠳ ᠰᠠᠭᠤᠵᠤ ᠪᠣᠢ᠃ ᠨᠠᠭᠠᠰᠢ ᠪᠠᠨ ᠶᠠᠭᠤᠨ ᠳ᠋ᠤ᠌ ᠬᠣᠮᠣᠯᠵᠠᠭᠠᠳ ᠪᠠᠢᠭᠠ ᠶᠤᠮ ᠪᠣᠢ?》 ᠭᠡᠵᠦ ᠬᠠᠷᠠ ᠬᠣᠷᠣᠮ ᠤ᠋ᠨ ᠬᠢᠨ ᠬᠡᠯᠡᠨᠡ᠃ ᠡᠵᠢ ᠰᠤᠷᠬᠤᠭᠲᠠᠨᠢ ᠮᠠᠨᠢ ᠪᠠᠰᠠ ᠲᠡᠭᠡᠵᠦ ᠦᠵᠡᠨᠡ ᠠ᠋᠃ ᠡᠨᠡ ᠠᠶᠤᠯᠲᠠᠢ ᠦᠭᠡ ᠰᠢᠦ᠃ ᠪᠦᠬᠦ ᠮᠣᠩᠭᠣᠯᠴᠤᠳ ᠨᠠᠳᠠᠳᠤ ᠳᠤᠷᠠ ᠦᠭᠡᠢ ᠪᠣᠯᠵᠤ ᠣᠷᠬᠢᠪᠠᠯ ᠪᠢ ᠶᠠᠭᠠᠬᠢᠨᠠ ᠪᠣᠢ? ᠭᠠᠭᠴᠠᠭᠠᠷᠳᠠᠬᠤ ᠪᠣᠯᠤᠨᠠ᠃ ᠲᠡᠭᠡᠬᠦ ᠪᠡᠷ ᠨᠠᠳᠠᠳᠤ ᠬᠡᠨ ᠲᠦᠰᠢᠭ ᠪᠣᠯᠬᠤ ᠪᠣᠢ? ᠬᠢᠲᠠᠳ ᠤ᠋ᠳ ᠤᠤ? ᠥᠭᠡᠷᠡ ᠬᠡᠨ ᠪᠠᠢᠬᠤ ᠪᠢᠯᠡ᠃
ᠳᠥᠷᠪᠡ ᠳ᠋ᠦ᠍᠂ ᠬᠠᠷᠢ ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠲᠤ ᠰᠠᠭᠤᠭᠠ ᠠᠬᠠᠨ ᠳᠡᠭᠦᠦᠰ ᠮᠠᠨᠢ ᠨᠠᠳᠠᠳᠤ ᠶᠠᠭᠠᠬᠢᠪᠠᠴᠤ ᠲᠠᠯᠠ ᠪᠦᠯᠢ ᠪᠣᠯᠬᠤ ᠦᠭᠡᠢ᠂ ᠰᠠᠶᠢ ᠠᠭᠤᠯᠵᠠᠬᠤ ᠳ᠋ᠤ᠌ ᠬᠥᠯᠡᠬᠦ ᠬᠠᠨ ᠳᠡᠭᠦᠦ ᠨᠠᠳᠠᠳᠤ ᠪᠢᠰᠢ᠂ ᠠᠷᠢᠬᠪᠦ᠋ᠬᠡ ᠳ᠋ᠦ᠍ ᠶᠡᠬᠡ ᠲᠠᠯᠠ ᠲᠠᠢ ᠪᠠᠢᠭᠰᠠᠨ ᠳᠠ᠃ ᠢᠯᠠᠩᠭᠤᠶᠠ ᠪᠠᠲᠤ ᠬᠠᠨ ᠤ᠋ ᠣᠷᠣ ᠰᠠᠭᠤᠭᠠᠳ ᠳᠥᠷᠪᠡᠨ ᠵᠢᠯ ᠪᠣᠯᠵᠤ ᠪᠣᠢ ᠪᠡᠷᠬᠡ ᠬᠠᠨ ᠶᠡᠬᠡᠳᠡ ᠳᠤᠷᠠ ᠦᠭᠡᠢᠴᠡᠵᠦ ᠮᠡᠳᠡᠨᠡ᠃ ᠲᠡᠷᠡ ᠪᠣᠯ ᠣᠳᠣ ᠪᠠᠷ ᠪᠢᠳᠡᠨ ᠦ᠌ ᠤᠷᠤᠭ ᠤ᠋ᠨ ᠳᠣᠲᠣᠷᠠ ᠬᠠᠮᠤᠭ ᠤ᠋ᠨ ᠨᠥᠯᠥᠭᠡᠲᠡᠢ ᠨᠢ ᠪᠣᠯᠵᠤ ᠪᠣᠢ ᠪᠢᠯᠡ᠃ ᠵᠥᠴᠢ᠂ ᠴᠠᠭᠠᠲᠠᠢ ᠠᠪᠠᠭᠠ ᠨᠠᠷ ᠤ᠋ᠨ ᠤᠳᠤᠮ ᠤᠭᠰᠠᠭᠠᠨ ᠤ᠋ ᠬᠢᠨ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠠ ᠬᠣᠷᠣᠮ ᠤ᠋ᠨ ᠬᠢᠨ ᠢ᠋ ᠥᠮᠥᠭᠯᠡᠵᠦ᠂ ᠲᠡᠭᠦᠨ ᠦ᠌ ᠲᠠᠯᠠ ᠳ᠋ᠤ᠌ ᠵᠣᠭᠰᠣᠨᠠ᠃ ᠪᠠᠲᠤ ᠠᠬᠠ ᠪᠣᠯ ᠠᠷᠢᠬᠪᠦ᠋ᠬᠡ ᠶ᠋ᠢ ᠯᠡ ᠪᠠᠭᠠ ᠠ᠋ᠴᠠ ᠨᠢ ᠡᠩᠬᠦᠷᠡᠢᠯᠡᠳᠡᠭ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠲᠥᠯᠥᠭᠡ ᠪᠠᠢᠭᠠ ᠶᠤᠮ ᠰᠢᠭ᠋ ᠶᠠᠪᠤᠳᠠᠭ ᠬᠥᠮᠦᠨ᠃ ᠮᠠᠨ ᠤ᠋ ᠳᠡᠭᠦᠦ ᠪᠦᠬᠦ ᠢᠷᠡᠨ ᠦ᠌ ᠬᠠᠨ ᠬᠦᠯᠡᠬᠦ ᠠᠷᠢᠬᠪᠦ᠋ᠬᠡ ᠳᠡᠭᠦᠦ ᠳ᠋ᠦ᠍ ᠪᠡᠨ ᠨᠠᠳᠠ ᠠ᠋ᠴᠠ ᠢᠯᠡᠭᠦᠦ ᠰᠠᠢᠨ ᠪᠠᠢᠳᠠᠭ᠃ ᠲᠡᠷᠡ ᠬᠣᠶᠠᠷ ᠪᠦᠷ ᠨᠢᠯᠬᠠ ᠠ᠋ᠴᠠ ᠪᠠᠨ ᠬᠣᠭᠣᠷᠣᠨᠳᠣ ᠪᠠᠨ ᠲᠣᠭᠯᠠᠵᠤ ᠢᠳᠡᠵᠦ ᠤᠤᠭᠤᠬᠤ ᠪᠠᠨ ᠪᠤᠯᠢᠶᠠᠯᠴᠠᠨ ᠥᠰᠦᠭᠰᠡᠨ ᠪᠣᠯᠬᠣᠷ ᠢ᠋ᠶ᠋ᠠᠨ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠭᠣᠴᠣ ᠭᠣᠢᠳᠠ ᠳᠣᠲᠣᠨᠣ ᠪᠠᠢᠳᠠᠭ᠃ ᠲᠡᠭᠡᠬᠦ ᠪᠡᠷ ᠬᠠᠷᠢ ᠳ᠋ᠤ᠌ ᠪᠠᠢᠭᠠ ᠶᠡᠬᠡ ᠨᠣᠶᠠᠳ ᠨᠠᠮᠠᠶ᠋ᠢ ᠳᠡᠮᠵᠢᠬᠦ ᠦᠭᠡᠢ ᠪᠣᠯ ᠪᠢ ᠭᠠᠭᠴᠠᠭᠠᠷᠳᠠᠨᠠ᠃ ᠡᠨᠡ ᠶᠡᠬᠡ ᠬᠡᠴᠡᠭᠦᠦ ᠬᠡᠷᠡᠭ᠂ ᠪᠠᠲᠤ ᠠᠬᠠ ᠶ᠋ᠢ ᠶᠠᠭᠤ ᠭᠡᠨᠡ ᠲᠡᠷᠡ ᠤᠷᠤᠭᠤ ᠯᠠ ᠮᠠᠨ ᠤ᠋ ᠨᠣᠶᠠᠳ ᠬᠣᠰᠢᠭᠤᠷᠠᠳᠠᠭ ᠪᠠᠢᠭᠰᠠᠨ᠃ ᠠᠷᠭᠠ ᠴᠦ᠍ ᠦᠭᠡᠢ ᠪᠢᠵᠡ᠃ ᠪᠠᠲᠤ ᠪᠣᠯ ᠶᠡᠬᠡ ᠠᠪᠠᠭᠠ ᠶ᠋ᠢᠨ ᠮᠠᠨᠢ ᠦᠷᠡ ᠰᠡᠳᠦ ᠰᠢᠦ᠃ ᠲᠡᠭᠡᠭᠡᠳ ᠡᠴᠦᠰ ᠲᠦ᠍ ᠨᠢ ᠶᠡᠬᠡ ᠤᠯᠤᠰ ᠵᠠᠳᠠᠷᠠᠨᠠ᠃
ᠲᠠᠪᠤ ᠳ᠋ᠤ᠌᠂ ᠵᠠ ᠪᠠᠢᠵᠠ! ᠥᠭᠡᠷᠡ ᠶᠠᠭᠤ ᠪᠢᠯᠡ? ᠥᠭᠡᠳᠡᠢ ᠠᠬᠠ ᠶ᠋ᠢᠨ ᠦᠷᠡ ᠠᠴᠢ ᠨᠠᠷ ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠢ᠋ ᠥᠪᠡᠷ ᠦ᠋ᠨ ᠤᠳᠤᠮ ᠳ᠋ᠤ᠌ ᠡᠷᠭᠢᠭᠦᠯᠦᠨ ᠠᠪᠬᠤ ᠭᠡᠵᠦ ᠵᠢᠳᠬᠦᠭᠰᠡᠭᠡᠷ᠂ ᠲᠡᠭᠦᠨ ᠦ᠌ ᠲᠥᠯᠥᠭᠡ ᠬᠠᠷᠠ ᠰᠠᠨᠠᠭᠠ ᠰᠠᠨᠠᠭᠰᠠᠭᠠᠷ ᠠᠷᠪᠠᠭᠠᠳ ᠵᠢᠯ ᠪᠣᠯᠵᠤ ᠪᠠᠢᠭᠠ᠃ ᠣᠳᠣ ᠥᠭᠡᠳᠡᠢ ᠠᠬᠠ ᠶ᠋ᠢᠨ ᠲᠠᠪᠤᠳᠠᠬᠢ ᠬᠦᠦ ᠬᠠᠢᠳᠤ ᠨᠣᠶᠠᠨ ᠭᠡᠵᠦ ᠪᠣᠢ᠃ ᠲᠡᠷᠡ ᠪᠠᠰᠠ ᠨᠥᠯᠥᠭᠡ ᠶᠡᠬᠡᠲᠡᠢ᠂ ᠤᠬᠠᠭᠠᠨ ᠵᠡᠬᠡᠭᠰᠡᠨ ᠲᠡᠢ ᠭᠡᠭᠳᠡᠳᠡᠭ ᠬᠦᠴᠦᠲᠡᠢ ᠨᠣᠶᠠᠨ᠃ ᠮᠥᠩᠬᠡ ᠠᠬᠠ ᠲᠡᠭᠦᠨ ᠢ᠋ ᠲᠥᠪ ᠡᠴᠡ ᠵᠣᠷᠢᠭᠤᠳᠠ ᠬᠣᠯᠠᠳᠠᠭᠤᠯᠤᠭᠰᠠᠨ ᠴᠦ᠍ ᠭᠡᠰᠡᠨ ᠲᠡᠷᠡ ᠪᠡᠷ ᠥᠪᠡᠷ ᠲᠦ᠍ ᠪᠡᠨ ᠨᠡᠯᠢᠶᠡᠳ ᠴᠡᠷᠢᠭ ᠲᠡᠢ ᠪᠠᠢᠭᠠ ᠭᠡᠳᠡᠭ ᠳᠡ᠃ ᠲᠡᠷᠡ ᠬᠥᠮᠦᠨ ᠶᠠᠭᠠᠬᠢᠪᠠᠴᠤ ᠨᠠᠮᠠᠶ᠋ᠢ ᠳᠡᠮᠵᠢᠬᠦ ᠦᠭᠡᠢ᠃ ᠲᠡᠭᠡᠭᠡᠳ ᠨᠠᠮᠠᠶ᠋ᠢ ᠬᠡᠨ ᠳᠡᠮᠵᠢᠬᠦ ᠪᠣᠯᠵᠤ ᠪᠠᠢᠨᠠ ᠪᠣᠢ? ᠬᠢᠲᠠᠳ ᠲᠦᠰᠢᠮᠡᠯ ᠨᠠᠷ ᠤᠤ?᠁ ᠭᠡᠮᠡᠨ ᠵᠠᠬᠢᠷᠤᠭᠴᠢ ᠲᠠᠲᠠᠯ ᠪᠢᠴᠢᠭ ᠢ᠋ᠶ᠋ᠡᠷ ᠪᠢᠴᠢᠵᠦ ᠳᠠᠭᠤᠰᠬᠠᠭᠠᠳ᠂ ᠲᠡᠭᠦᠨ ᠢ᠋ ᠪᠡᠨ ᠡᠷᠭᠢᠨ ᠬᠠᠷᠠᠵᠤ ᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨᠠ᠃
ᠬᠤᠪᠢᠯᠠᠢ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠰᠠᠢᠨ ᠮᠠᠭᠤ᠂ ᠪᠣᠯᠬᠤ ᠪᠣᠯᠬᠤ ᠦᠭᠡᠢ ᠣᠯᠠᠨ ᠲᠠᠯᠠ ᠠ᠋ᠴᠠ ᠨᠢ ᠳᠠᠬᠢᠨ ᠳᠠᠬᠢᠨ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠳᠠᠭ᠂ ᠲᠡᠷᠡ ᠪᠣᠳᠣᠯ ᠢ᠋ᠶ᠋ᠠᠨ ᠳᠠᠬᠢᠨ ᠥᠪᠡᠷ ᠢ᠋ᠶ᠋ᠡᠨ ᠰᠢᠭᠦᠵᠦ ᠦᠵᠡᠳᠡᠭ ᠵᠠᠩᠲᠠᠢ᠃ ᠲᠡᠷᠡ ᠨᠢ ᠲᠡᠭᠦᠨ ᠦ᠌ ᠭᠣᠣᠯ ᠠᠷᠭᠠ ᠪᠣᠯᠵᠤ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠡᠷᠡᠭ ᠢ᠋ ᠪᠡᠶᠡ ᠰᠡᠳᠬᠢᠯ ᠳ᠋ᠦ᠍ ᠪᠡᠨ ᠲᠡᠭᠡᠭᠡᠵᠦ ᠶᠠᠪᠤᠭᠠ ᠪᠢᠯᠡ᠃ ᠬᠤᠪᠢᠯᠠᠢ ᠡᠢᠨ ᠬᠦ᠌ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠵᠠᠯᠭᠠᠨ ᠰᠠᠭᠤᠬᠤ ᠪᠢᠯᠡ? ᠭᠡᠳᠡᠭ ᠨᠢ ᠲᠡᠭᠦᠨ ᠦ᠌ ᠡᠳᠦᠷ ᠦ᠋ᠨ ᠪᠣᠳᠣᠯ᠂ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠪᠣᠯᠵᠤ᠂ ᠠᠮᠠᠷᠠᠬᠤ ᠴᠡᠩᠭᠡᠬᠦ ᠪᠦᠬᠦᠨ ᠡᠴᠡ ᠨᠢ ᠪᠠᠷᠤᠭ ᠰᠠᠯᠭᠠᠵᠠᠢ᠃
ᠵᠠᠬᠢᠷᠤᠭᠴᠢ ᠯᠣᠯᠣᠢ ᠠᠪᠠᠭᠠᠢ ᠶ᠋ᠢ ᠳᠠᠭᠤᠳᠠᠭᠤᠯᠤᠨ ᠠᠭᠤᠯᠵᠠᠪᠠ᠃ ᠰᠠᠶᠢᠬᠢ ᠡᠬᠡᠨᠡᠷ ᠬᠤᠪᠢᠯᠠᠢ ᠶ᠋ᠢ ᠤᠷᠢᠳ ᠨᠢ ᠰᠢᠳᠠᠷᠯᠠᠭᠤᠯᠤᠭᠰᠠᠨ ᠪᠦᠰᠡᠭᠦᠢᠴᠦᠳ ᠢ᠋ ᠭᠣᠯᠣᠭᠰᠠᠨ ᠪᠠᠢᠬᠤ ᠭᠡᠵᠦ ᠳᠣᠲᠣᠷᠠ ᠪᠠᠨ ᠠᠶᠤᠵᠤ ᠠᠭᠤᠯᠵᠠᠯᠠ᠃ ᠵᠠᠬᠢᠷᠤᠭᠴᠢ ᠭᠦᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠶᠠᠩᠵᠤᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠯᠣᠯᠣᠢ ᠶ᠋ᠢ ᠬᠠᠷᠠᠭᠠᠳ᠄
— ᠠ᠂ ᠪᠢ ᠴᠢᠮᠠ ᠠ᠋ᠴᠠ ᠨᠢᠭᠡ ᠵᠦᠢᠯ ᠭᠤᠶᠤᠶᠠ! ᠪᠢ ᠪᠠᠶᠠᠨ ᠵᠠᠩᠵᠤᠨ ᠢ᠋ ᠢᠷᠡ ᠭᠡᠵᠦ ᠳᠠᠭᠤᠳᠠᠭᠤᠯᠤᠭᠰᠠᠨ᠃ ᠴᠢ ᠬᠠᠷᠠᠵᠤ ᠪᠠᠢᠭᠠᠳ ᠲᠡᠭᠦᠨ ᠢ᠋ ᠡᠮᠦᠨᠡ ᠵᠦᠭ ᠡᠴᠡ ᠢᠷᠡᠬᠦ ᠪᠡᠷ ᠨᠢ ᠣᠨᠴᠠᠭᠠᠢᠯᠠᠨ ᠤᠭᠲᠤᠵᠤ᠂ ᠠᠶᠠᠲᠠᠢ ᠲᠠᠪᠠᠲᠠᠢ ᠭᠡᠷ ᠲᠠᠰᠤᠯᠭᠠᠨ ᠳ᠋ᠤ᠌ ᠪᠠᠭᠤᠯᠭᠠᠭᠠᠳ᠂ ᠬᠣᠭᠣᠯᠠ ᠤᠮᠳᠠ ᠪᠤᠰᠤᠳ ᠪᠦᠬᠦ ᠵᠦᠢᠯ ᠢ᠋ᠶ᠋ᠡᠷ ᠨᠢ ᠲᠤᠬᠠᠯᠭᠤᠯᠵᠤ ᠦᠵᠡᠭᠡᠷᠡᠢ! ᠴᠢᠮᠠᠲᠤ ᠢᠯᠡᠭᠦᠦ ᠳᠤᠲᠠᠭᠤ ᠡᠮᠡᠰ ᠦ᠋ᠳ ᠪᠠᠢᠭᠠ ᠪᠣᠯ ᠴᠢ ᠲᠡᠭᠦᠨ ᠡᠴᠡ ᠪᠡᠨ ᠪᠠᠶᠠᠨ ᠳ᠋ᠤ᠌ ᠰᠢᠳᠠᠷᠯᠠᠭᠤᠯᠬᠤ ᠠᠷᠭᠠ ᠪᠣᠳᠣᠭᠰᠠᠨ ᠴᠦ᠍ ᠭᠡᠮ ᠦᠭᠡᠢ ᠰᠢᠦ᠃ ᠲᠡᠢᠨ ᠦ᠌ ᠭᠠᠵᠠᠷ ᠶᠠᠪᠤᠭᠠ ᠡᠷᠡ ᠭᠠᠴᠢᠭᠳᠠᠳᠠᠭ ᠯᠠ ᠪᠢᠵᠡ᠃ ᠪᠢ ᠡᠭᠦᠨ ᠢ᠋ ᠴᠢᠮᠠᠲᠤ ᠬᠡᠯᠡᠬᠦ ᠭᠡᠰᠡᠨ ᠤᠬᠠᠭᠠᠨᠲᠠᠢ᠃ ᠥᠭᠡᠷᠡ ᠵᠦᠢᠯ ᠦᠭᠡᠢ᠃ ᠴᠢ ᠶᠠᠪᠤ! ᠭᠡᠯᠡ᠃
ᠯᠣᠯᠣᠢ ᠠᠪᠠᠭᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠨᠡ ᠦᠭᠡᠨ ᠳ᠋ᠦ᠍ ᠭᠠᠢᠬᠠᠭᠰᠠᠨ ᠦᠭᠡᠢ᠂ ᠥᠪᠡᠷ ᠲᠦ᠍ ᠪᠡᠨ ᠰᠡᠳᠬᠢᠯ ᠳ᠋ᠦ᠍ ᠨᠢ ᠲᠠᠭᠠᠯᠠᠮᠵᠢ ᠦᠭᠡᠢ ᠡᠮᠡ ᠢᠷᠡᠭᠦᠯᠦᠯᠡ ᠭᠡᠵᠦ ᠵᠢᠮᠡᠯᠡᠯ ᠬᠦᠯᠢᠶᠡᠭᠡ ᠦᠭᠡᠢ ᠳ᠋ᠦ᠍ ᠪᠡᠨ ᠣᠯᠵᠠᠭᠤᠷᠬᠠᠨ᠂
— ᠪᠠᠰᠠ ᠪᠠᠶᠠᠨ ᠭᠡᠳᠡᠭ ᠨᠣᠶᠠᠨ ᠳ᠋ᠤ᠌ ᠡᠮᠡᠰ ᠣᠢᠷᠠᠲᠤᠭᠤᠯᠤᠨ ᠥᠭᠬᠦ ᠪᠣᠯᠵᠤ ᠪᠠᠢᠨᠠ ᠤᠤ? ᠲᠡᠷᠡ ᠨᠢ ᠶᠡᠬᠡᠮᠰᠦᠭ ᠪᠠᠢᠷᠢ ᠶ᠋ᠢᠨ ᠬᠡᠴᠡᠭᠦᠦ ᠡᠷᠡ ᠳᠡ᠃ ᠮᠢᠨᠦ ᠣᠢᠷᠠᠲᠤᠭᠤᠯᠵᠤ ᠥᠭᠭᠦᠭᠰᠡᠨ ᠬᠡᠦᠬᠡᠨ ᠢ᠋ ᠲᠣᠭᠣᠵᠤ ᠪᠡᠶᠡ ᠳ᠋ᠦ᠍ ᠪᠡᠨ ᠬᠠᠪᠢᠳᠠᠭᠤᠯᠬᠤ ᠦᠭᠡᠢ ᠯᠡ ᠪᠣᠯᠪᠠ ᠤᠤ᠃ ᠶᠠᠭᠠᠬᠢᠬᠤ ᠪᠣᠢ᠃ ᠨᠠᠳᠠᠳᠤ ᠠᠮᠠᠷ ᠪᠢᠵᠡ᠃ ᠬᠤᠪᠢᠯᠠᠢ ᠪᠠᠶᠠᠨ ᠢ᠋ ᠶᠠᠮᠠᠷ ᠡᠮᠡ ᠶᠠᠭᠠᠬᠢᠵᠤ ᠬᠡᠷᠡᠭᠯᠡᠪᠡ ᠠ᠋ ᠭᠡᠵᠦ ᠨᠠᠳᠠ ᠠ᠋ᠴᠠ ᠠᠰᠠᠭᠤᠬᠤ ᠦᠭᠡᠢ ᠨᠢ ᠯᠠᠪᠲᠠᠢ ᠭᠡᠮᠡᠨ ᠯᠣᠯᠣᠢ ᠪᠣᠳᠣᠭᠰᠠᠭᠠᠷ ᠥᠪᠡᠷ ᠦ᠋ᠨ《ᠮᠠᠯᠯᠠᠳᠠᠭ》 ᠡᠮᠡᠰ ᠦ᠋ᠳ ᠳᠡᠭᠡᠷᠡ ᠪᠡᠨ ᠢᠷᠡᠵᠡᠢ᠃
— — — —
① ᠢᠲ᠋ᠠᠯᠢ ᠶᠢᠨ ᠵᠢᠭᠤᠯᠴᠢᠨ ᠮᠠᠷᠺᠣ ᠫᠣᠯᠣ᠂ ᠶᠠᠫᠤᠨ ᠤ ᠲᠡᠦᠬᠡᠴᠢ ᠮᠠᠼᠣᠸᠤ ᠵᠡᠷᠭᠡ ᠠᠵᠢᠭᠯᠠᠭᠴᠢᠳ᠂ ᠰᠣᠳᠣᠯᠭᠠᠴᠢᠳ ᠬᠤᠪᠢᠯᠠᠢ ᠶᠢᠨ ᠬᠠᠲᠤᠳ ᠡᠮᠡᠰ ᠦᠳ ᠦᠨ ᠪᠠᠢᠳᠠᠯ ᠢ ᠠᠩᠬᠠᠷᠴᠤ ᠪᠢᠴᠢᠭᠰᠡᠨ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠬᠣᠭᠣᠷᠣᠨᠳᠣ ᠪᠠᠨ ᠵᠥᠷᠢᠶᠡᠲᠡᠢ ᠲᠡᠮᠳᠡᠭᠯᠡᠵᠡᠢ᠃ ᠬᠤᠪᠢᠯᠠᠢ ᠶ᠋ᠢ ᠵᠢᠩᠬᠢᠨᠢ ᠳᠥᠷᠪᠡᠨ ᠬᠠᠲᠤᠨ ᠲᠠᠢ ᠪᠤᠶᠤ ᠨᠠᠢ᠍ᠮᠠᠨ ᠬᠠᠲᠤᠨ ᠲᠠᠢ᠂ ᠰᠤᠯᠠ ᠬᠣᠶᠠᠷ ᠬᠠᠲᠤᠨ ᠲᠠᠢ ᠪᠠᠢᠭᠰᠠᠨ ᠭᠡᠨᠡ᠃ ᠪᠠᠰᠠ ᠵᠠᠭᠤᠭᠠᠳ ᠡᠮᠡᠰ ᠰᠢᠳᠠᠷᠯᠠᠵᠤ ᠪᠠᠢᠭᠰᠠᠨ ᠭᠡᠨᠡ᠃ ᠬᠣᠩᠭᠢᠷᠠᠳ ᠠᠢᠮᠠᠭ ᠤ᠋ᠨ ᠴᠡᠪᠡᠷ᠂ ᠲᠡᠭᠦᠨ ᠦ᠌ ᠠᠬᠠ ᠨᠠᠴᠢᠨ ᠭᠡᠭᠴᠢ ᠶ᠋ᠢᠨ ᠣᠮᠪᠣᠯᠣ ᠥᠬᠢᠨ ᠨᠠᠮᠪᠢ ᠬᠣᠶᠠᠷ ᠨᠢ ᠬᠤᠪᠢᠯᠠᠢ ᠶ᠋ᠢᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠳᠠᠭ᠃ ᠴᠡᠪᠡᠷ ᠨᠢ ᠬᠤᠪᠢᠯᠠᠢ ᠳ᠋ᠤ᠌ ᠨᠠᠷᠢᠨ ᠬᠠᠨᠴᠤᠢ ᠲᠠᠢ ᠳᠡᠪᠡᠯ᠂ ᠬᠥᠳᠥᠰᠥᠨ ᠮᠠᠯᠠᠭᠠᠢ ᠣᠶᠣᠵᠤ ᠥᠭᠴᠦ ᠪᠠᠢᠭᠰᠠᠨ ᠭᠡᠳᠡᠭ᠃ ᠡᠨᠡ ᠪᠣᠯ ᠠᠵᠤ ᠠᠬᠤᠢᠴᠢ᠂ ᠤᠷᠠᠨ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠴᠢᠮᠪᠠᠢ ᠬᠠᠲᠤᠨ ᠮᠥᠨ ᠪᠢᠵᠡ᠃ ᠬᠤᠪᠢᠯᠠᠢ ᠶ᠋ᠢ ᠨᠠᠰᠤ ᠠᠬᠢᠬᠤ ᠪᠠᠷ ᠨᠢ ᠨᠠᠮᠪᠢ ᠨᠢ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠨᠢ ᠵᠥᠪᠯᠡᠳᠡᠭ ᠪᠠᠢᠵᠠᠢ᠃ ᠬᠤᠪᠢᠯᠠᠢ ᠨᠠᠰᠤᠨ ᠤ᠋ ᠪᠠᠨ ᠡᠴᠦᠰ ᠲᠦ᠍ ᠠᠮᠢᠳᠤᠷᠠᠯ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠷᠭᠠᠯᠲᠠᠢ ᠪᠠᠢᠵᠤ ᠴᠢᠳᠠᠭᠠ ᠦᠭᠡᠢ᠂ ᠲᠡᠭᠦᠨ ᠢ᠋ ᠨᠢ ᠳᠠᠷᠠᠭᠠ ᠪᠢᠴᠢᠬᠦ《ᠬᠤᠪᠢᠯᠠᠢ ᠬᠠᠭᠠᠨ》 ᠵᠣᠬᠢᠶᠠᠯ ᠳ᠋ᠤ᠌ ᠪᠠᠨ ᠬᠠᠷᠠᠭᠤᠯᠤᠭᠰᠠᠨ ᠪᠣᠯᠤᠨᠠ᠃ — ᠵᠣᠬᠢᠶᠠᠭᠴᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠪᠠᠭᠠᠲᠤᠷ᠂ ᠭᠠᠷᠮᠠ