ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠭᠤᠷᠪᠠᠳᠤᠭᠠᠷ ᠪᠦᠯᠦᠭ –2>᠂ ᠠᠷᠭᠠᠲᠤ ᠦᠨᠡᠭᠡᠨ ᠦ ᠦᠭᠡ Бүргэд харьд үүрэлдэггүй – Ж᠂ Пүрэв <3-р бүлэг ~2>. аргат үнэгний үг
18ᠭᠤᠷᠪᠠᠳᠤᠭᠠᠷ ᠪᠦᠯᠦᠭ – ᠴᠠᠭᠠᠨ ᠪᠡᠴᠢᠨ ᠵᠢᠯ
ᠬᠣᠶᠠᠷ᠂ᠠᠷᠭᠠᠲᠤ ᠦᠨᠡᠭᠡᠨ ᠦ ᠦᠭᠡ
ᠵᠥᠪᠯᠡᠯᠳᠦᠬᠦ ᠶᠠᠷᠢᠶᠠ ᠡᠬᠢᠯᠡᠯᠡ᠃ ᠬᠤᠪᠢᠯᠠᠢ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠪᠤᠰᠤᠳ ᠤ᠋ᠨ ᠵᠦᠭ ᠬᠠᠨᠳᠤᠨ᠄
— ᠡᠷᠬᠢᠮ ᠨᠣᠶᠠᠳ᠂ ᠲᠦᠰᠢᠮᠡᠳ᠂ ᠵᠠᠩᠵᠤᠨ ᠲᠠ ᠪᠦᠬᠦᠨ ᠲᠡᠢ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠵᠥᠪᠯᠡᠯᠳᠦᠬᠦ ᠶ᠋ᠢ ᠪᠢ ᠡᠷᠡᠮᠡᠯᠵᠡᠵᠦ ᠪᠠᠢᠨᠠ᠃ ᠲᠣᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠠᠬᠠ ᠶ᠋ᠢ ᠣᠷᠣᠰᠢᠭᠤᠯᠬᠤ ᠠᠯᠪᠠ ᠪᠣᠯᠵᠤ ᠪᠠᠢᠬᠤ ᠬᠣᠢᠭᠤᠷ ᠬᠡᠷᠡᠭ ᠶᠠᠪᠤᠳᠠᠯ ᠮᠠᠨᠢ ᠨᠡᠯᠢᠶᠡᠳ ᠨᠠᠵᠠᠭᠠᠢᠷᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠰᠡᠨ ᠦᠭᠡ ᠮᠢᠨᠦ ᠴᠢᠬᠢ ᠶ᠋ᠢ ᠳᠡᠯᠡᠰᠬᠦ ᠪᠣᠯᠤᠯᠠ᠃ ᠡᠭᠦᠨ ᠳ᠋ᠦ᠍ ᠰᠡᠳᠬᠢᠯ ᠵᠣᠪᠠᠨᠢᠮ ᠭᠡᠳ᠂ ᠥᠨᠥᠳᠥᠷ ᠶᠡᠬᠡ ᠲᠥᠷᠥ ᠶ᠋ᠢ ᠲᠦᠪᠰᠢᠨ ᠠᠮᠤᠭᠤᠯᠠᠩ ᠪᠠᠢᠯᠭᠠᠬᠤ ᠳ᠋ᠤ᠌ ᠪᠢᠳᠡᠨ ᠦ᠌ ᠵᠦᠭ ᠡᠴᠡ ᠶᠠᠭᠠᠬᠢᠵᠤ ᠬᠠᠨᠳᠤᠪᠠᠯ ᠵᠦᠢᠲᠡᠢ ᠪᠣᠯᠬᠤ ᠪᠣᠢ ᠭᠡᠰᠡᠨ ᠵᠦᠢᠯ᠃ ᠪᠠᠰᠠ ᠡᠮᠦᠨᠡᠲᠦ ᠬᠢᠲᠠᠳ ᠣᠷᠣᠨ ᠳ᠋ᠤ᠌ ᠶᠠᠪᠤᠭᠤᠯᠵᠤ ᠪᠠᠢᠭᠠ ᠲᠡᠢᠨ ᠢ᠋ ᠡᠴᠦᠰ ᠲᠡᠭᠦᠰᠬᠡᠯ ᠳ᠋ᠦ᠍ ᠨᠢ ᠬᠦᠷᠭᠡᠵᠦ᠂ ᠲᠡᠷᠡ ᠨᠤᠲᠤᠭ ᠢ᠋ ᠶᠡᠬᠡ ᠤᠯᠤᠰ ᠤ᠋ᠨ ᠭᠠᠵᠠᠷ ᠤ᠋ᠨ ᠵᠢᠷᠤᠭ ᠲᠤ ᠨᠢᠭᠡᠳᠬᠡᠨ ᠣᠷᠣᠭᠤᠯᠵᠤ ᠳᠠᠭᠤᠰᠬᠠᠬᠤ᠃ ᠡᠢᠮᠦ ᠬᠣᠶᠠᠷ ᠵᠦᠢᠯ ᠳᠡᠭᠡᠷᠡ ᠤᠬᠠᠭᠠᠨᠲᠠᠨ ᠪᠠᠭᠰᠢ᠂ ᠨᠣᠶᠠᠳ ᠲᠦᠰᠢᠮᠡᠯ᠂ ᠵᠠᠩᠵᠤᠨ ᠲᠠ ᠪᠦᠬᠦᠨ ᠦ᠌ ᠰᠠᠨᠠᠭᠠ ᠶ᠋ᠢ ᠠᠪᠴᠤ ᠨᠡᠮᠡᠷᠢᠯᠡᠭᠦᠯᠬᠦ ᠶ᠋ᠢ ᠪᠣᠳᠣᠵᠤ ᠪᠠᠢᠨᠠ ᠭᠡᠯᠡ᠃ ᠬᠤᠪᠢᠯᠠᠢ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠬᠥᠮᠦᠰ ᠬᠡᠰᠡᠭ ᠵᠠᠭᠤᠷᠠ ᠲᠠᠭ ᠳᠠᠭᠤ ᠦᠭᠡᠢ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠵᠤ ᠰᠠᠭᠤᠪᠠ᠃
ᠴᠠᠭᠠᠨ ᠵᠠᠩᠵᠤᠨ ᠤᠯᠠᠭᠠᠨ ᠤᠲᠠᠰᠤᠨ ᠵᠠᠯᠠᠭᠠ ᠲᠠᠢ ᠴᠠᠩ ᠮᠠᠯᠠᠭᠠᠢ ᠪᠠᠨ ᠵᠠᠰᠠᠵᠤ ᠡᠮᠦᠰᠦᠭᠡᠳ᠂ ᠬᠤᠪᠢᠯᠠᠢ ᠳ᠋ᠤ᠌ ᠪᠥᠬᠥᠢᠨ ᠵᠥᠪᠰᠢᠶᠡᠷᠡᠯ ᠠᠪᠴᠤ᠂ ᠰᠥᠭᠡᠩᠭᠢᠳᠡᠭᠦᠦ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠦᠭᠡ ᠬᠡᠯᠡᠯᠡ᠃
— ᠪᠢ ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠰᠥᠩ ᠤᠯᠤᠰ ᠢ᠋ ᠲᠣᠬᠢᠨᠡᠭᠤᠯᠬᠤ ᠬᠡᠷᠡᠭ ᠲᠦ᠍ ᠬᠦᠯᠢᠶᠡᠭᠰᠡᠨ ᠡᠭᠦᠷᠭᠡ ᠪᠡᠨ ᠵᠢᠭᠠᠬᠠᠨ ᠠᠯᠭᠤᠷᠯᠠᠭᠰᠠᠨ᠃ ᠮᠠᠨ ᠤ᠋ ᠬᠡᠷᠡᠭ ᠦ᠋ᠨ ᠲᠡᠷᠡ ᠪᠦᠲᠦᠯ ᠦᠭᠡᠢ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠰᠥᠩ ᠦ᠋ᠨ ᠡᠷᠬᠡ ᠪᠠᠷᠢᠬᠤ ᠬᠠᠭᠠᠳ ᠬᠦᠯᠢᠶᠡᠬᠦ ᠶᠣᠰᠣᠲᠠᠢ᠃ ᠰᠥᠩ ᠦ᠋ᠨ ᠬᠠᠭᠠᠨ ᠲᠡᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠬᠦᠷᠦᠯ ᠦᠭᠡᠢ ᠪᠡᠷ ᠡᠪ ᠨᠠᠢᠷᠲᠠᠢ ᠪᠠᠷ ᠬᠡᠯᠡᠯᠴᠡᠨ ᠪᠠᠭᠤᠵᠤ ᠥᠭᠬᠦ ᠲᠤᠬᠠᠢ ᠮᠠᠨ ᠤ᠋ ᠶᠡᠬᠡ ᠬᠠᠭᠠᠨ ᠤ᠋ ᠲᠠᠯᠪᠢᠭᠰᠠᠨ ᠱᠠᠭᠠᠷᠳᠠᠯᠭᠠ ᠶ᠋ᠢ ᠰᠢᠭᠤᠳ ᠡᠰᠡᠷᠭᠦᠴᠡᠭᠰᠡᠨ᠃ ᠲᠡᠭᠦᠨ ᠢ᠋ᠶ᠋ᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ ᠮᠠᠨ ᠤ᠋ ᠤᠳᠠᠭᠠ ᠳᠠᠷᠠᠭᠠ ᠶᠠᠪᠤᠭᠤᠯᠤᠭᠰᠠᠨ ᠡᠯᠴᠢ ᠶ᠋ᠢ ᠶᠣᠰᠣ ᠪᠤᠰᠤ ᠪᠠᠷ ᠪᠠᠷᠢᠪᠴᠢᠯᠠᠨ ᠠᠪᠴᠤ ᠡᠷᠬᠡ ᠶ᠋ᠢ ᠡᠪᠳᠡᠯᠡᠨ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠭᠰᠠᠨ᠃ ᠣᠳᠣ ᠰᠥᠩ ᠦ᠋ᠨ ᠨᠡᠢᠰᠯᠡᠯ ᠳ᠋ᠦ᠍ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠣᠴᠢᠭᠠᠳ ᠪᠠᠷᠢᠭᠳᠠᠨ᠂ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠭᠳᠠᠨ ᠡᠷᠡᠭᠦᠳᠡᠯᠭᠡ ᠬᠦᠯᠢᠶᠡᠵᠦ ᠪᠣᠢ ᠮᠠᠨ ᠤ᠋ ᠠᠷᠪᠠ ᠭᠠᠷᠤᠢ ᠡᠷᠬᠢᠮ ᠲᠦᠰᠢᠮᠡᠯ ᠡᠯᠴᠢ᠂ ᠨᠢᠭᠡᠨ ᠵᠠᠭᠤ ᠭᠠᠷᠤᠢ ᠳᠠᠭᠠᠯᠳᠤᠬᠤ ᠬᠥᠮᠦᠨ ᠦ᠌ ᠬᠠᠮᠲᠤ ᠵᠣᠪᠠᠵᠤ ᠵᠦᠳᠡᠷᠡᠨ ᠪᠠᠢᠨᠠ᠃ ᠪᠢᠳᠡ ᠰᠥᠩ ᠦ᠋ᠨ ᠴᠡᠷᠢᠭ ᠲᠡᠢ ᠠᠩᠬᠠᠨ ᠠ᠋ᠴᠠ ᠪᠠᠨ ᠪᠠᠢᠯᠳᠤᠬᠤ ᠶ᠋ᠢ ᠬᠦᠰᠡᠭᠡ ᠦᠭᠡᠢ᠂ ᠬᠠᠷᠢᠨ ᠬᠠᠮᠲᠤᠷᠠᠵᠤ ᠴᠡᠷᠢᠭ ᠵᠡᠪᠰᠡᠭ ᠦ᠋ᠨ ᠪᠣᠯᠤᠨ ᠡᠳ᠋ ᠶᠠᠭᠤᠮᠠᠨ ᠤ᠋ ᠬᠣᠯᠪᠣᠭᠠ ᠪᠠᠢᠭᠤᠯᠵᠤ᠂ ᠴᠠᠭᠠᠰᠢᠳᠠ ᠡᠮᠦᠨᠡᠲᠦ ᠳᠠᠯᠠᠢ ᠶ᠋ᠢᠨ ᠣᠷᠣᠨ ᠨᠤᠭᠤᠳ ᠢ᠋ ᠨᠢᠭᠡᠳᠬᠡᠨ᠂ ᠨᠡᠢᠲᠡ ᠶ᠋ᠢᠨ ᠬᠦᠴᠦ ᠪᠡᠷ ᠠᠮᠤᠷ ᠵᠢᠮᠦᠷ ᠪᠣᠯᠬᠤ ᠶ᠋ᠢ ᠯᠡ ᠵᠣᠷᠢᠭᠰᠠᠨ᠃ ᠭᠡᠲᠡᠯᠡ ᠰᠥᠩ ᠦ᠋ᠨ ᠬᠠᠭᠠᠨ ᠮᠠᠨ ᠤ᠋ ᠶᠡᠬᠡ ᠬᠠᠭᠠᠨ ᠤ᠋ ᠠᠢᠯᠠᠳᠪᠤᠷᠢ ᠶ᠋ᠢ ᠬᠡᠷᠡᠭ ᠦᠭᠡᠢ ᠵᠦᠢᠯ ᠪᠣᠯᠭᠠᠨ᠂ ᠪᠢᠳᠡᠨ ᠢ᠋ ᠬᠤᠤᠷᠯᠯ ᠲᠠᠢ ᠪᠠᠷ ᠳᠠᠢᠰᠤᠩᠨᠠᠬᠤ ᠪᠣᠯᠤᠭᠰᠠᠨ ᠤᠴᠢᠷ ᠲᠡᠷᠡ ᠣᠷᠣᠨ ᠢ᠋ ᠪᠦᠷᠢᠮᠦᠰᠦᠨ ᠨᠢᠭᠡᠳᠬᠡᠵᠦ ᠠᠪᠬᠤ ᠬᠡᠷᠡᠭ ᠢ᠋ ᠨᠡᠩ ᠳᠠᠷᠤᠢ ᠳᠠᠭᠤᠰᠬᠠᠪᠠᠯ ᠵᠣᠬᠢᠨᠠ᠃ ᠪᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠳᠣᠪᠲᠣᠯᠤᠨ ᠡᠨᠡ ᠨᠠᠮᠤᠷ ᠴᠠᠭ ᠲᠤ ᠬᠥᠬᠡ ᠮᠥᠷᠡᠨ ᠢ᠋ ᠭᠠᠲᠤᠯᠤᠭᠤᠯᠤᠨ᠂ ᠮᠣᠩᠭᠣᠯ ᠴᠡᠷᠢᠭ ᠶᠠᠮᠠᠷᠬᠠᠨ ᠬᠦᠴᠦᠲᠡᠢ᠂ ᠶᠠᠭᠠᠬᠢᠵᠤ ᠪᠠᠢᠯᠳᠤᠳᠠᠭ ᠢ᠋ᠶ᠋ᠠᠨ ᠲᠡᠳᠡᠨ ᠳ᠋ᠦ᠍ ᠬᠠᠷᠠᠭᠤᠯᠵᠤ ᠪᠣᠯᠬᠤ ᠪᠣᠯᠪᠠ ᠤᠤ ᠭᠡᠵᠦ ᠰᠠᠨᠠᠵᠤ ᠶᠠᠪᠤᠭᠠ᠃ ᠶᠡᠬᠡ ᠵᠠᠬᠢᠷᠤᠭᠴᠢ ᠲᠠ ᠡᠭᠦᠨ ᠢ᠋ ᠪᠣᠯᠭᠣᠭᠠᠨ ᠲᠠᠭᠠᠯᠠᠬᠤ ᠪᠢᠵᠡ ᠠ᠋! ᠭᠡᠵᠦ ᠬᠡᠯᠡᠪᠡ᠃ ᠬᠤᠷᠠᠭᠰᠠᠨ ᠬᠥᠮᠦᠰ ᠴᠠᠭᠠᠨ ᠵᠠᠩᠵᠤᠨ ᠤ᠋ ᠦᠭᠡ ᠶ᠋ᠢ ᠲᠠᠭᠠᠰᠢᠶᠠᠭᠰᠠᠨ ᠪᠠᠢᠳᠠᠯᠲᠠᠢ᠂ ᠰᠢᠪᠡᠷ ᠢᠪᠢᠷ ᠬᠢᠨ ᠲᠣᠯᠣᠭᠠᠢ ᠳᠣᠬᠢᠵᠤ᠂ ᠲᠠᠯᠠᠷᠬᠠᠯ ᠬᠦᠷᠭᠡᠨ ᠪᠠᠢᠯᠠ᠃
ᠵᠣᠣ ᠪᠢ《ᠪᠠᠭᠰᠢ》 ᠪᠣᠰᠴᠤ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠦᠭ ᠪᠥᠬᠥᠢᠨ ᠥᠷᠥᠰᠢᠶᠡᠯ ᠭᠤᠶᠤᠭᠠᠳ ᠦᠭᠡ ᠬᠡᠯᠡᠬᠦ ᠪᠣᠯᠪᠠ᠃ ᠶᠡᠷᠦ ᠨᠢ ᠡᠨᠳᠡ ᠦᠭᠡ ᠬᠡᠯᠡᠵᠦ ᠪᠠᠢᠭᠠ ᠬᠥᠮᠦᠰ ᠴᠠᠭᠠᠨ ᠠ᠋ᠴᠠ ᠪᠤᠰᠤᠳ ᠨᠢ ᠵᠠᠪᠠᠯ ᠪᠣᠰᠴᠤ ᠬᠤᠪᠢᠯᠠᠢ ᠶ᠋ᠢ ᠬᠦᠨᠳᠦᠳᠬᠡᠨᠡ᠃ ᠵᠣᠣ ᠪᠢ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ᠄
— ᠶᠡᠬᠡ ᠡᠵᠡᠨ ᠵᠠᠬᠢᠷᠤᠭᠴᠢ ᠲᠠ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ! ᠭᠡᠵᠦ ᠦᠭᠡ ᠪᠡᠨ ᠬᠡᠯᠡᠬᠦ ᠨᠢ《ᠶᠡᠬᠡ ᠡᠵᠡᠨ》 ᠭᠡᠳᠡᠭ ᠦᠭᠡ ᠶ᠋ᠢ ᠠᠩᠬᠠᠨ ᠭᠠᠷᠭᠠᠵᠤ ᠢᠷᠡᠵᠦ ᠪᠠᠢᠭᠠ ᠪᠠᠷ ᠢ᠋ᠶ᠋ᠠᠨ ᠣᠨᠴᠠᠯᠢᠭ ᠪᠠᠢᠪᠠ᠃ ᠬᠤᠪᠢᠯᠠᠢ ᠴᠦ᠍ ᠬᠢᠷᠢ ᠶ᠋ᠢᠨ ᠬᠦᠨᠳᠦᠳᠬᠡᠯ ᠢ᠋ ᠬᠦᠯᠢᠶᠡᠵᠦ ᠠᠪᠳᠠᠭ ᠦᠭᠡᠢ᠂ ᠲᠠᠩᠨᠠᠨ ᠶᠡᠬᠡ ᠬᠠᠭᠠᠨ ᠤ᠋ ᠲᠥᠯᠥᠭᠡ ᠭᠡᠳᠡᠭ ᠠᠲᠠᠯᠠ ᠪᠠᠨ ᠡᠨᠡ ᠡᠳᠦᠷ《ᠶᠡᠬᠡ ᠡᠵᠡᠨ》 ᠭᠡᠳᠡᠭ ᠲᠣᠮᠣ ᠦᠭᠡᠨ ᠳ᠋ᠦ᠍ ᠣᠭᠲᠣᠬᠠᠨ ᠴᠦ᠍ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠶᠠᠩᠵᠤ ᠦᠭᠡᠢ ᠢᠩᠭᠢᠵᠦ ᠬᠡᠯᠡᠬᠦ ᠶᠣᠰᠣᠲᠠᠢ ᠭᠡᠰᠡᠨ ᠰᠢᠭ ᠰᠠᠭᠤᠵᠤ ᠪᠠᠢᠪᠠ᠃
— ᠪᠣᠭᠣᠯ ᠪᠢ ᠦᠭᠡᠨ ᠳ᠋ᠦ᠍ ᠮᠤᠩᠬᠠᠭᠯᠠᠬᠤ ᠳ᠋ᠤ᠌ ᠪᠠᠨ ᠬᠠᠮᠤᠭ ᠤ᠋ᠨ ᠤᠷᠢᠳ ᠢ᠋ᠶ᠋ᠠᠷ ᠶᠡᠬᠡ ᠡᠵᠡᠨᠲᠡᠨ ᠰᠥᠩ ᠤᠯᠤᠰ ᠢ᠋ ᠮᠥᠬᠥᠭᠡᠬᠦ ᠶᠣᠰᠣᠲᠠᠢ᠃ ᠡᠭᠦᠨ ᠢ᠋ ᠶᠠᠭᠠᠷᠠᠪᠴᠢᠯᠠᠬᠤ ᠬᠡᠷᠡᠭᠲᠡᠢ ᠪᠣᠯᠤᠯᠠ᠃ ᠴᠠᠭᠠᠨ ᠵᠠᠩᠵᠤᠨ ᠡᠨᠡ ᠲᠤᠬᠠᠢ ᠮᠡᠷᠭᠡᠨ ᠦᠭᠡ ᠠᠢᠯᠠᠳᠤᠭᠰᠠᠨ᠂ ᠰᠥᠩ ᠦ᠋ᠨ ᠬᠠᠭᠠᠨ ᠪᠣᠯ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠲᠥᠷᠥ ᠶ᠋ᠢᠨ ᠰᠠᠨᠠᠯ ᠪᠣᠯᠭᠠᠨ ᠲᠠᠯᠪᠢᠭᠰᠠᠨ ᠠᠷᠢᠭᠤᠨ ᠦᠭᠡ ᠶ᠋ᠢ ᠨᠢᠴᠤᠭᠠᠭᠰᠠᠨ ᠨᠢᠭᠦᠯᠲᠡᠢ᠃ ᠶᠡᠷᠦ ᠡᠴᠡ ᠪᠡᠨ ᠲᠡᠳᠡᠨ ᠦ᠌ ᠬᠠᠭᠠᠳ ᠵᠦᠭᠡᠷ ᠪᠠᠢᠵᠤ ᠴᠢᠳᠠᠳᠠᠭ ᠦᠭᠡᠢ᠂ ᠴᠠᠭ ᠡᠭᠦᠷᠢᠳᠡ ᠲᠠᠯᠠ ᠲᠠᠯᠠ ᠲᠠᠢᠰᠢ ᠪᠠᠨ ᠰᠥᠯᠪᠡᠭᠡᠷᠳᠡᠨ ᠬᠠᠳᠬᠤᠵᠤ ᠪᠠᠢᠳᠠᠭ ᠪᠤᠵᠠᠷ ᠮᠠᠭᠤ ᠵᠠᠩᠲᠠᠢ᠃ ᠠᠯᠲᠠᠨ ᠤᠯᠤᠰ ᠢ᠋ ᠣᠷᠣᠰᠢᠵᠤ ᠪᠠᠢᠬᠤ ᠳ᠋ᠤ᠌ ᠰᠥᠩ ᠦ᠋ᠨ ᠬᠠᠭᠠᠨ ᠡᠯᠳᠡᠪ ᠢ᠋ᠶ᠋ᠡᠷ ᠡᠳᠦᠵᠦ ᠬᠠᠳᠬᠤᠨ᠂ ᠲᠡᠢᠨ ᠳᠠᠵᠢᠨ ᠢ᠋ ᠳᠡᠭᠳᠡᠭᠡᠵᠦ ᠢᠷᠡᠭᠰᠡᠨ᠃ ᠳ᠋ᠡᠯᠢ ᠤᠯᠤᠰ᠂ ᠯᠢᠶᠣᠣ ᠤᠯᠤᠰ ᠤ᠋ᠳ ᠢ᠋ ᠢᠯᠠᠭᠠ ᠦᠭᠡᠢ ᠵᠦᠭᠡᠷ ᠪᠠᠢᠯᠭᠠᠳᠠᠭ ᠦᠭᠡᠢ ᠪᠠᠢᠭᠰᠠᠨ᠃ ᠡᠢᠮᠦ ᠡᠴᠡ ᠰᠥᠩ ᠦ᠋ᠨ ᠬᠠᠭᠠᠨ ᠢ᠋ ᠰᠢᠭᠦᠷᠳᠡᠨ ᠬᠠᠶᠠᠬᠤ ᠶᠣᠰᠣᠲᠠᠢ᠃ ᠲᠡᠢᠮᠦ ᠬᠦᠴᠦ ᠶᠡᠬᠡ ᠡᠵᠡᠨ ᠳ᠋ᠦ᠍ ᠣᠳᠣ ᠪᠠᠰᠠ ᠪᠠᠢᠨᠠ᠃᠁ ᠭᠡᠯᠡ᠃ ᠡᠨᠡ ᠮᠣᠩᠭᠣᠯᠴᠤᠳ ᠶᠠᠭᠠᠬᠢᠪᠠᠴᠤ ᠰᠥᠩ ᠢ᠋ ᠪᠠᠷᠳᠠᠮ ᠳᠡᠢᠯᠦᠨᠡ ᠭᠡᠵᠦ ᠵᠣᠣ ᠣᠪᠣᠭᠲᠤ ᠤᠨᠤᠭᠠ ᠠᠪᠬᠤ ᠶ᠋ᠢᠨ ᠲᠤᠯᠠᠳᠠ ᠡᠨᠡ ᠦᠭᠡ ᠶ᠋ᠢ ᠬᠡᠯᠡᠵᠡᠢ᠃
ᠨᠠᠢ ᠶᠤᠸᠠᠨ ᠭᠡᠳᠡᠭ ᠫᠠᠭᠳᠠᠭᠠᠷ ᠪᠡᠶᠡᠲᠡᠢ᠂ ᠴᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠨᠠᠮᠢᠷᠠᠭᠤᠯᠤᠭᠰᠠᠨ ᠡᠷᠳᠡᠮᠲᠡᠨ ᠪᠣᠰᠴᠤ ᠢᠷᠡᠭᠡᠳ ᠬᠤᠪᠢᠯᠠᠢ ᠶ᠋ᠢᠨ ᠵᠦᠭ ᠲᠣᠩᠭᠣᠢᠨ ᠪᠥᠬᠥᠢᠵᠦ ᠶᠣᠰᠣ ᠬᠢᠭᠰᠡᠨ ᠢ᠋ᠶ᠋ᠡᠨ᠄
— ᠶᠡᠬᠡ ᠡᠵᠡᠨ ᠳᠡᠭᠡᠳᠦᠰ ᠪᠣᠭᠣᠯ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ! ᠰᠥᠩ ᠦ᠋ᠨ ᠬᠠᠭᠠᠳ ᠮᠠᠭᠤ ᠰᠠᠨᠠᠭᠠᠲᠠᠢ ᠬᠥᠮᠦᠰ ᠰᠢᠦ᠃ ᠲᠡᠳᠡᠨ ᠦ᠌ ᠬᠢ ᠶᠡᠬᠡ ᠬᠠᠭᠠᠨ ᠢ᠋ᠶ᠋ᠠᠨ ᠤᠳᠠᠭᠠ ᠳᠠᠷᠠᠭᠠ ᠡᠯᠳᠡᠪ ᠠᠷᠭᠠ ᠪᠠᠷ ᠬᠠᠯᠠᠨ ᠰᠣᠯᠢᠵᠤ ᠪᠠᠢᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠪᠡᠨ ᠤᠯᠠᠮ ᠶᠡᠬᠡ ᠬᠠᠷᠠ ᠳᠣᠲᠣᠷᠲᠠᠢ᠂ ᠬᠡᠷᠴᠡᠭᠡᠢ ᠬᠠᠲᠠᠭᠤ ᠬᠠᠭᠠᠨ ᠲᠠᠢ ᠪᠣᠯᠬᠤ ᠶ᠋ᠢ ᠵᠣᠷᠢᠵᠤ ᠪᠠᠢᠭᠠ᠃ ᠪᠣᠭᠣᠯ ᠪᠢ ᠵᠣᠷᠢᠭᠤᠳᠠ ᠨᠢᠭᠡᠨ ᠵᠦᠢᠯ ᠢ᠋ ᠠᠢᠯᠠᠳᠬᠠᠬᠤ ᠳ᠋ᠤ᠌᠄ ᠤᠷᠢᠳᠤ ᠭᠠᠵᠠᠷ ᠠ᠋ᠴᠠ ᠣᠯᠵᠠᠯᠠᠭᠳᠠᠭᠰᠠᠨ ᠶᠡᠬᠡ᠂ ᠪᠠᠭᠠ ᠬᠥᠮᠦᠨ ᠦ᠌ ᠠᠮᠠᠨ ᠥᠴᠢᠭ ᠡᠴᠡ ᠦᠵᠡᠪᠡᠯ ᠰᠥᠩ ᠦ᠋ᠨ ᠤᠳᠠᠭᠠ ᠳᠠᠷᠠᠭᠠ ᠣᠷᠣ ᠰᠠᠭᠤᠭᠰᠠᠨ ᠬᠠᠭᠠᠳ ᠮᠠᠨ ᠤ᠋ ᠤᠮᠠᠷᠠᠲᠤ ᠬᠢᠲᠠᠳ ᠢ᠋ ᠮᠣᠩᠭᠣᠯ ᠤ᠋ᠨ ᠬᠠᠭᠠᠳ ᠤ᠋ᠨ ᠮᠠᠲᠠᠯ ᠠ᠋ᠴᠠ ᠰᠠᠯᠠᠭᠠᠨ ᠠᠪᠴᠤ ᠥᠪᠡᠷ ᠲᠦ᠍ ᠪᠡᠨ ᠨᠢᠭᠡᠳᠬᠡᠬᠦ᠂ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠶᠡᠬᠡ ᠬᠠᠭᠠᠳ ᠪᠣᠯᠬᠤ᠂ ᠬᠣᠢᠲᠤ ᠬᠢᠲᠠᠳ ᠤ᠋ᠨ ᠬᠥᠮᠦᠨ ᠣᠯᠠᠨ ᠢ᠋ ᠪᠣᠭᠣᠯ ᠢ᠋ᠶ᠋ᠠᠨ ᠪᠣᠯᠭᠠᠬᠤ ᠬᠠᠲᠠᠭᠤ ᠵᠣᠷᠢᠯᠭᠠ ᠪᠠᠨ ᠪᠣᠯᠭᠠᠨ᠂ ᠲᠡᠭᠦᠨ ᠦ᠌ ᠲᠥᠯᠥᠭᠡ《ᠦᠬᠦᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ ᠶᠠᠪᠤ》 ᠭᠡᠵᠦ ᠴᠡᠷᠢᠭ ᠲᠦ᠍ ᠪᠡᠨ ᠬᠡᠯᠡᠭᠡᠳ ᠨᠠᠭᠠᠰᠢ ᠨᠢ ᠲᠠᠪᠰᠢᠭᠤᠯᠵᠤ ᠪᠠᠢᠭᠠ᠃ ᠲᠡᠷᠡ ᠪᠣᠯ ᠬᠡᠵᠢᠶᠡ ᠴᠦ᠍ ᠦᠯᠦ ᠪᠡᠶᠡᠯᠡᠬᠦ ᠪᠣᠳᠣᠯᠭᠠ ᠮᠥᠨ᠃ ᠡᠢᠮᠦ ᠪᠣᠯᠬᠣᠷ ᠰᠥᠩ ᠤᠯᠤᠰ ᠭᠡᠳᠡᠭ ᠠᠢᠯ ᠢ᠋ ᠪᠦᠷᠢᠮᠦᠰᠦᠨ ᠪᠠᠢᠬᠤ ᠦᠭᠡᠢ ᠪᠣᠯᠭᠠᠬᠤ ᠨᠢ ᠮᠠᠨ ᠤ᠋ ᠨᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠭᠦᠢᠴᠡᠯᠳᠦᠭᠦᠯᠬᠦ ᠶᠡᠬᠡ ᠬᠡᠷᠡᠭ ᠮᠥᠨ᠃ ᠰᠥᠩ ᠦ᠋ᠨ ᠬᠠᠭᠠᠳ ᠮᠠᠨ ᠤ᠋ ᠮᠡᠷᠭᠡᠨ ᠳᠡᠭᠡᠳᠦ ᠭᠦᠩᠽᠢ ᠶ᠋ᠢᠨ ᠠᠢᠯᠠᠳᠤᠭᠰᠠᠨ ᠰᠤᠷᠭᠠᠯ ᠳ᠋ᠤ᠌ ᠬᠠᠷᠰᠢ ᠵᠦᠢᠯ ᠢ᠋ ᠬᠢᠵᠦ ᠪᠠᠢᠭᠠ ᠪᠣᠯᠬᠣᠷ ᠲᠡᠷᠡ ᠠᠷᠢᠭᠤᠨ ᠶᠣᠰᠣ ᠶ᠋ᠢ ᠪᠢᠳᠡ ᠪᠠᠰᠠ ᠪᠤᠵᠠᠷᠯᠠᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠶᠡᠬᠡ ᠡᠵᠡᠨ ᠵᠠᠬᠢᠷᠤᠭᠴᠢ ᠲᠠᠨ ᠤ᠋ ᠵᠣᠷᠢᠵᠤ ᠪᠠᠢᠭᠠ ᠡᠨᠡ ᠬᠡᠷᠡᠭ ᠪᠣᠯ ᠪᠤᠶᠠᠨᠲᠠᠢ ᠦᠢᠯᠡ ᠮᠥᠨ᠁ ᠭᠡᠵᠦ ᠬᠡᠯᠡᠭᠡᠳ᠂ ᠳᠠᠬᠢᠨ ᠪᠥᠬᠥᠢᠵᠦ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠬᠦ ᠨᠢ ᠦᠨᠡᠬᠡᠷ ᠬᠤᠪᠢᠯᠠᠢ ᠶ᠋ᠢ ᠳᠡᠭᠡᠳᠦᠯᠡᠨ ᠪᠣᠢ ᠪᠠᠢᠳᠠᠯ ᠢᠯᠡᠳᠲᠡ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃ ᠥᠭᠡᠷᠡ ᠬᠥᠮᠦᠰ ᠦᠭᠡ ᠬᠡᠯᠡᠬᠦ ᠳ᠋ᠦ᠍ ᠪᠡᠨ ᠪᠦᠭᠦᠳᠡ ᠯᠡ ᠰᠥᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠢ᠋ ᠮᠥᠬᠥᠭᠡᠶᠡ᠃ ᠡᠨᠡ ᠬᠡᠷᠡᠭ ᠢ᠋ ᠬᠤᠷᠳᠤᠪᠴᠢᠯᠠᠶᠠ᠃ ᠰᠥᠩ ᠦ᠋ᠨ ᠴᠡᠷᠢᠭ ᠢ᠋ ᠬᠡᠳᠦᠬᠡᠨ ᠳᠠᠭᠠᠷᠢᠯᠲᠠ ᠪᠠᠷ ᠠᠷᠴᠢᠭᠠᠳ ᠬᠠᠶᠠᠬᠤ ᠬᠦᠴᠦᠨ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠪᠠᠢᠨᠠ ᠬᠢᠴᠢᠬᠡᠵᠦ ᠪᠢᠯᠡ᠃ ᠬᠤᠪᠢᠯᠠᠢ ᠬᠥᠮᠦᠰ ᠦ᠋ᠨ ᠦᠭᠡᠨ ᠳ᠋ᠦ᠍ ᠰᠡᠳᠬᠢᠯ ᠨᠢ ᠬᠠᠨᠣᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠴᠠᠭᠠᠨᠠ ᠨᠢ ᠥᠭᠡᠷᠡ ᠨᠢᠭᠡ ᠴᠢᠬᠤᠯᠠ ᠬᠡᠷᠡᠭ ᠲᠤᠯᠭᠠᠷᠠᠵᠤ᠂ ᠲᠡᠭᠦᠨ ᠢ᠋ ᠪᠡᠨ ᠣᠯᠠᠨ ᠤ᠋ ᠨᠢᠭᠤᠷ ᠳᠡᠭᠡᠷᠡ ᠢᠯᠡ᠂ ᠰᠢᠭᠤᠳ ᠬᠡᠯᠡᠬᠦ ᠠᠷᠭᠠ ᠦᠭᠡᠢ ᠨᠢ ᠵᠢᠷᠦᠬᠡᠨ ᠦ᠌ ᠬᠢᠨᠢ ᠤᠭ ᠠ᠋ᠴᠠ ᠵᠠᠩᠭᠢᠷᠴᠤ ᠪᠠᠢᠪᠠ᠃ ᠣᠯᠠᠨ ᠢ᠋ᠶ᠋ᠠᠷ ᠬᠡᠯᠡᠯᠴᠡᠬᠦ ᠬᠡᠷᠡᠭ ᠲᠡᠭᠦᠰᠴᠦ᠂ ᠡᠮᠦᠨᠡ ᠵᠦᠭ ᠶᠠᠪᠤᠭᠤᠯᠵᠤ ᠪᠣᠢ ᠲᠡᠢᠨ ᠢ᠋ ᠪᠦᠬᠦ ᠡᠭᠡᠨᠡᠭᠡ ᠪᠡᠷ ᠬᠦᠴᠦᠲᠡᠢ ᠪᠣᠯᠭᠠᠬᠤ ᠬᠡᠷᠡᠭᠲᠡᠢ ᠭᠡᠰᠡᠨ ᠵᠦᠢᠯ ᠡᠴᠡ ᠵᠥᠪᠯᠡᠯᠳᠦᠭᠡᠨ ᠢ᠋ᠶ᠋ᠡᠷ ᠰᠢᠳᠡᠭᠳᠡᠵᠡᠢ᠃
ᠬᠤᠪᠢᠯᠠᠢ ᠥᠪᠡᠷ ᠲᠦ᠍ ᠪᠡᠨ ᠵᠣᠷᠢᠭᠤᠯᠤᠭᠰᠠᠨ ᠥᠭᠡᠷᠡ ᠨᠢᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠰᠢᠯᠵᠢᠨ ᠣᠷᠣᠵᠤ᠂ ᠵᠥᠭᠡᠯᠡᠨ ᠨᠠᠯᠠᠭᠠᠷ ᠳᠡᠭᠡᠷᠡ ᠰᠠᠭᠤᠭᠠᠳ᠂ ᠴᠢᠬᠤᠯᠠᠴᠢᠯᠠᠭᠳᠠᠬᠤ ᠬᠥᠮᠦᠰ ᠢ᠋ᠶ᠋ᠡᠨ ᠭᠠᠭᠴᠠ ᠭᠠᠭᠴᠠᠭᠠᠷ ᠨᠢ ᠴᠤᠪᠤᠷᠠᠭᠤᠯᠤᠨ ᠳᠠᠭᠤᠳᠠᠵᠤ ᠠᠭᠤᠯᠵᠠᠬᠤ ᠪᠠᠷ ᠰᠢᠢᠳᠪᠡ᠃ ᠡᠬᠢᠯᠡᠭᠡᠳ ᠴᠠᠭᠠᠨ ᠵᠠᠩᠵᠤᠨ ᠢ᠋ ᠪᠠᠷᠠᠯᠬᠠᠭᠤᠯᠤᠯᠠ᠃ ᠲᠡᠷᠡ ᠡᠷᠡ ᠵᠣᠷᠢᠮᠠᠭ᠂ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠰᠢᠭᠤᠳ ᠬᠡᠯᠡᠳᠡᠭ᠂ ᠰᠣᠯᠣᠩᠭᠣᠰ ᠣᠷᠣᠨ ᠢ᠋ ᠲᠦᠪᠰᠢᠳᠬᠡᠬᠦ ᠪᠣᠯᠤᠨ ᠵᠢᠩᠬᠢᠨᠢ ᠬᠡᠪᠲᠡᠭᠦᠯ ᠴᠡᠷᠢᠭ ᠴᠡᠷᠢᠭ ᠡᠴᠡ ᠡᠬᠢᠯᠡᠨ ᠵᠠᠩᠵᠤᠨ ᠤ᠋ ᠵᠡᠷᠭᠡ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠣᠯᠬᠣᠷ ᠲᠡᠭᠦᠨ ᠲᠡᠢ ᠬᠡᠯᠡᠯᠴᠡᠬᠦ ᠵᠦᠢᠯ ᠢ᠋ᠶ᠋ᠡᠨ ᠰᠢᠭᠤᠳ ᠬᠡᠯᠡᠵᠦ ᠦᠭᠡ ᠶ᠋ᠢ ᠨᠢ ᠴᠢᠩᠨᠠᠬᠤ ᠶᠣᠰᠣᠲᠠᠢ ᠭᠡᠵᠦ ᠵᠠᠬᠢᠷᠤᠭᠴᠢ ᠪᠣᠳᠣᠵᠤ ᠪᠠᠢᠪᠠ᠃ ᠪᠠᠰᠠ ᠲᠡᠭᠦᠨ ᠳ᠋ᠦ᠍ ᠥᠨᠳᠥᠷ ᠲᠤᠰᠢᠶᠠᠯ ᠠᠮᠠᠯᠠᠬᠤ ᠨᠢ ᠴᠢᠨᠠᠭᠰᠢᠳᠠ ᠶ᠋ᠢᠨ ᠤᠢᠯᠠᠨ ᠳ᠋ᠤ᠌ ᠢᠯᠡᠭᠦᠦ ᠪᠢᠰᠢ ᠭᠡᠵᠦ ᠬᠤᠪᠢᠯᠠᠢ ᠪᠣᠳᠣᠵᠤ ᠠᠭᠤᠯᠵᠠᠯᠠ᠃
— ᠵᠠ ᠢᠩᠭᠢᠭᠡᠳ ᠯᠡ ᠣᠷᠣᠭᠰᠢ ᠪᠠᠨ ᠰᠢᠭᠤᠷᠠᠭᠤᠯᠵᠠᠢ᠃ ᠲᠤᠯᠤᠯᠳᠤᠭᠠᠨ ᠢ᠋ ᠪᠦᠬᠦ ᠡᠩᠨᠡᠭᠡ ᠪᠡᠷ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠣᠳᠣ ᠶᠠᠭᠤ ᠳᠤᠲᠠᠵᠤ ᠪᠠᠢᠨᠠ ᠪᠣᠢ? ᠭᠡᠮᠡᠨ ᠵᠠᠬᠢᠷᠤᠭᠴᠢ ᠠᠰᠠᠭᠤᠯᠠ᠃
ᠴᠠᠭᠠᠨ ᠵᠠᠩᠵᠤᠨ ᠣᠪᠣ ᠲᠣᠪᠣᠬᠠᠨ ᠴᠣᠬᠣᠷ ᠨᠢᠭᠤᠷ ᠢ᠋ᠶ᠋ᠠᠨ ᠢᠯᠢᠵᠦ᠄
— ᠪᠣᠭᠣᠯ ᠳ᠋ᠤ᠌ ᠨᠢ ᠡᠨᠡ ᠲᠠᠯᠠ ᠪᠠᠷ ᠪᠣᠳᠣᠵᠤ ᠶᠠᠪᠤᠭᠠ ᠵᠦᠢᠯ ᠨᠠᠯᠢᠶᠠᠨ ᠪᠣᠢ᠃ ᠵᠠᠬᠢᠷᠤᠭᠴᠢ ᠲᠠᠨ ᠳ᠋ᠤ᠌ ᠲᠡᠭᠦᠨ ᠢ᠋ ᠪᠡᠨ ᠲᠤᠰᠬᠠᠢᠯᠠᠨ ᠪᠣᠯᠭᠤᠭᠠᠯᠭᠠᠵᠤ ᠵᠠᠷᠯᠢᠭ ᠰᠣᠨᠣᠰᠬᠤ ᠰᠠᠨᠠᠭᠠᠲᠠᠢ ᠪᠠᠢᠨᠠ ᠭᠡᠪᠡ᠃
— ᠵᠠᠩᠵᠤᠨ ᠮᠢᠨᠢ! ᠢᠩᠭᠢᠬᠦ ᠳ᠋ᠦ᠍ ᠪᠢᠳᠡ ᠲᠡᠢᠨ ᠦ᠌ ᠪᠡᠨ ᠪᠠᠢᠳᠠᠯ ᠢ᠋ ᠳᠡᠭᠡᠭᠰᠢ ᠨᠢ ᠬᠡᠨ ᠳ᠋ᠦ᠍ ᠠᠢᠯᠠᠳᠬᠠᠵᠤ ᠪᠠᠢᠬᠤ ᠪᠣᠢ? ᠤᠯᠤᠰ ᠭᠦᠷᠦᠨ ᠢ᠋ ᠪᠦᠬᠦᠯᠢ ᠳ᠋ᠦ᠍ ᠨᠢ ᠲᠡᠷᠢᠭᠦᠯᠡᠵᠦ ᠪᠠᠢᠭᠠ ᠡᠵᠡᠨ ᠦᠭᠡᠢ ᠪᠡᠷ ᠬᠡᠷᠡᠭ ᠶᠠᠪᠤᠳᠠᠯ ᠶᠠᠪᠤᠵᠤ ᠥᠭᠡᠳᠡᠯᠡᠬᠦ ᠨᠢ ᠰᠠᠭᠠᠳ ᠲᠠᠢ ᠪᠣᠯᠵᠤ ᠣᠷᠬᠢᠬᠤ ᠪᠣᠯᠪᠠ ᠤᠤ? ᠭᠡᠵᠦ ᠪᠢ ᠰᠠᠨᠠᠬᠤ ᠪᠣᠯᠤᠯᠠ᠃
— ᠵᠠᠬᠢᠷᠤᠭᠴᠢ ᠮᠢᠨᠢ! ᠲᠠ ᠶᠠᠭᠤ ᠠᠢᠯᠠᠳᠴᠤ ᠪᠠᠢᠨᠠ ᠪᠣᠢ? ᠣᠳᠣ ᠪᠠᠷ ᠤᠯᠤᠰ ᠤ᠋ᠨ ᠡᠵᠡᠨ ᠲᠠ ᠰᠢᠦ ᠳᠡ᠃ ᠲᠠ ᠪᠣᠯ ᠥᠭᠡᠳᠡ ᠪᠣᠯᠤᠭᠴᠢ ᠬᠠᠭᠠᠨ ᠤ᠋ ᠬᠠᠮᠤᠭ ᠤ᠋ᠨ ᠲᠣᠮᠣ ᠳᠡᠭᠦᠦ ᠨᠢ᠃ ᠲᠠ ᠪᠣᠯ ᠮᠠᠨ ᠤ᠋ ᠶᠠᠪᠤᠭᠤᠯᠵᠤ ᠪᠣᠢ ᠲᠡᠢᠨ ᠢ᠋ ᠰᠢᠢᠳᠪᠦᠷᠢᠯᠡᠬᠦ ᠡᠮᠦᠨᠡ ᠵᠦᠭ ᠢ᠋ ᠮᠡᠳᠡᠨ ᠵᠠᠬᠢᠷᠤᠭᠴᠢ ᠪᠢᠯᠡ᠃ ᠣᠳᠣ ᠴᠦ᠍ ᠲᠡᠢᠮᠦ ᠯᠡ ᠪᠠᠢᠨᠠ᠃ ᠰᠥᠩ ᠢ᠋ ᠲᠦᠪᠰᠢᠳᠬᠡᠬᠦ ᠬᠡᠷᠡᠭ ᠢ᠋ ᠲᠠ ᠲᠡᠷᠢᠭᠦᠯᠡᠭᠰᠡᠭᠡᠷ ᠲᠡᠭᠦᠰᠬᠡᠬᠦ ᠶᠣᠰᠣᠲᠠᠢ᠃ ᠲᠡᠭᠡᠭᠡᠳ ᠲᠠ ᠡᠷᠴᠢ ᠪᠡᠷ ᠢ᠋ᠶ᠋ᠡᠨ ᠤᠯᠤᠰ ᠭᠦᠷᠦᠨ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠬᠦ ᠤᠴᠢᠷᠲᠠᠢ ᠭᠡᠵᠦ ᠪᠢ ᠰᠠᠨᠠᠳᠠᠭ ᠭᠡᠮᠡᠨ ᠴᠠᠭᠠᠨ ᠤ᠋ ᠬᠡᠯᠡᠬᠦ ᠶ᠋ᠢ ᠨᠢ ᠥᠪᠡᠷ ᠢ᠋ ᠪᠡᠨ ᠪᠠᠶᠠᠷᠯᠠᠭᠤᠯᠵᠤ᠂ ᠴᠣᠬᠣᠮ ᠬᠦ᠌ ᠡᠨᠡ ᠦᠭᠡ ᠶ᠋ᠢ ᠯᠡ ᠲᠡᠭᠦᠨ ᠢ᠋ᠶ᠋ᠡᠷ ᠬᠡᠯᠡᠭᠦᠯᠬᠦ ᠭᠡᠰᠡᠨ ᠬᠤᠪᠢᠯᠠᠢ ᠶ᠋ᠢᠨ ᠰᠠᠨᠠᠭᠠ ᠨᠢ ᠬᠠᠨᠤᠪᠠ ᠪᠣᠯᠤᠯᠲᠠᠢ᠃
ᠵᠠᠬᠢᠷᠤᠭᠴᠢ ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠯᠬᠢᠯᠠᠨ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠵᠠᠩᠵᠤᠨ ᠢ᠋ ᠬᠠᠷᠠᠵᠤ᠄
— ᠲᠠ ᠯᠠ ᠲᠡᠢᠨ ᠦ᠌ ᠬᠡᠷᠡᠭ ᠢ᠋ ᠲᠡᠷᠢᠭᠦᠯᠡᠬᠦ ᠵᠠᠩᠵᠤᠨ ᠤ᠋ ᠨᠢᠭᠡ ᠨᠢ ᠳᠡ᠃ ᠲᠠ ᠮᠢᠨᠦ ᠨᠢᠭᠡᠨ ᠳᠡᠳ᠋ ᠵᠠᠬᠢᠷᠤᠭᠴᠢ ᠪᠠᠢᠬᠤ ᠶᠣᠰᠣᠲᠠᠢ ᠪᠢᠵᠡ᠃ ᠲᠡᠭᠡᠭᠡᠳ ᠲᠠ ᠪᠢᠳᠡ ᠬᠣᠶᠠᠷ ᠲᠤ ᠬᠡᠯᠡᠯᠴᠡᠨ ᠰᠢᠢᠳᠴᠦ ᠪᠣᠢ ᠬᠡᠷᠡᠭ ᠲᠤᠩ ᠣᠯᠠᠨ ᠪᠣᠯᠵᠤ ᠲᠠᠭᠠᠷᠠᠯᠠ᠃ ᠪᠢ ᠲᠠᠨ ᠢ᠋ ᠲᠦᠮᠡᠲᠦ ᠶ᠋ᠢᠨ ᠨᠣᠶᠠᠨ ᠤ᠋ ᠠᠯᠪᠠᠨ ᠠ᠋ᠴᠠ ᠥᠭᠡᠷᠡᠴᠢᠯᠡᠨ᠂ ᠥᠪᠡᠷ ᠦ᠋ᠨ ᠳᠡᠷᠭᠡᠳᠡ ᠪᠠᠢᠪᠠᠯ ᠢᠯᠡᠭᠦᠦ ᠶᠡᠬᠡ ᠳᠠᠭᠠᠭᠠᠴᠠᠲᠠᠢ ᠪᠠᠢᠬᠤ ᠪᠣᠯᠪᠠ ᠤᠤ ᠭᠡᠵᠦ ᠪᠠᠰᠠ ᠪᠣᠳᠣᠨᠠᠮ ᠭᠡᠪᠡᠯ᠂ ᠴᠠᠭᠠᠨ ᠵᠠᠩᠵᠤᠨ ᠦᠰᠦ ᠭᠡᠵᠢᠭᠡ ᠪᠡᠨ ᠢᠯᠢᠵᠦ ᠪᠣᠳᠣᠯᠬᠢᠯᠠᠭᠠᠳ᠄
— ᠲᠠᠨ ᠤ᠋ ᠵᠠᠷᠯᠢᠭ ᠲᠤ ᠪᠢ ᠪᠢᠰᠢᠷᠡᠵᠦ ᠪᠠᠢᠨᠠ ᠭᠡᠪᠡ᠃
ᠴᠠᠭᠠᠨ ᠨᠠᠰᠤ ᠪᠠᠷ ᠨᠡᠯᠢᠶᠡᠨ ᠠᠬᠠ ᠪᠣᠯᠬᠣᠷ ᠬᠤᠪᠢᠯᠠᠢ ᠲᠡᠭᠦᠨ ᠢ᠋ ᠠᠬᠠ ᠭᠡᠬᠦ ᠨᠢ ᠵᠦᠢ᠃ ᠬᠤᠪᠢᠯᠠᠢ ᠡᠨᠡ ᠵᠠᠩᠵᠤᠨ ᠢ᠋ ᠥᠪᠡᠷ ᠢ᠋ ᠪᠡᠨ ᠪᠦᠷᠢᠨ ᠳᠡᠮᠵᠢᠬᠦ ᠶᠦᠮ ᠪᠠᠢᠨᠠ ᠭᠡᠳᠡᠭ ᠢ᠋ ᠯᠠᠪᠲᠠᠢ ᠮᠡᠳᠡᠵᠦ ᠠᠪᠤᠭᠠᠳ ᠰᠡᠳᠬᠢᠯ ᠨᠢ ᠬᠠᠨᠤᠵᠤ
— ᠵᠠᠩᠵᠤᠨ ᠲᠠ ᠶᠠᠮᠠᠷ ᠴᠦ᠍ ᠪᠣᠯᠤᠭᠰᠠᠨ ᠲᠡᠢᠨ ᠦ᠌ ᠪᠡᠨ ᠪᠡᠯᠡᠳᠬᠡᠯ ᠦ᠋ᠨ ᠲᠤᠬᠠᠢ ᠵᠦᠢᠯ ᠢ᠋ᠶ᠋ᠡᠨ ᠶᠠᠭᠠᠷᠠᠪᠴᠢᠯᠠᠨ ᠪᠣᠳᠣᠭᠠᠳ ᠨᠠᠳᠠᠲᠠᠢ ᠮᠠᠷᠭᠠᠰᠢ ᠳᠠᠬᠢᠨ ᠠᠭᠤᠯᠵᠠᠨᠠ ᠤᠤ ᠭᠡᠯᠡ᠃ ᠴᠠᠭᠠᠨ ᠡᠨᠡ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠨ ᠭᠠᠷᠴᠤ ᠣᠳᠪᠠ᠃
ᠬᠤᠪᠢᠯᠠᠢ ᠵᠣᠣ ᠪᠢ ᠲᠦᠰᠢᠮᠡᠯ ᠲᠡᠢ ᠠᠭᠤᠯᠵᠠᠬᠤ ᠶ᠋ᠢ ᠶᠠᠭᠠᠷᠠᠵᠤ ᠪᠢᠯᠡ᠃ ᠤᠴᠢᠷ ᠨᠢ ᠡᠨᠡ ᠲᠦᠰᠢᠮᠡᠯ ᠬᠢᠲᠠᠳ ᠨᠣᠶᠠᠳ ᠤ᠋ᠨ ᠳᠣᠲᠣᠷᠠ ᠬᠠᠮᠤᠭ ᠤ᠋ᠨ ᠶᠡᠬᠡ ᠨᠥᠯᠥᠭᠡᠲᠡᠢ ᠪᠠᠢᠯᠠ᠃ ᠵᠠᠬᠢᠷᠤᠭᠴᠢ《ᠪᠠᠭᠰᠢ》 ᠲᠦᠰᠢᠮᠡᠯ ᠲᠡᠢ ᠪᠡᠨ ᠪᠤᠯᠠᠭᠠ ᠬᠠᠯᠢᠭᠤ ᠮᠡᠲᠦ ᠠᠭᠠᠰᠢ ᠭᠠᠷᠭᠠᠨ ᠤᠭᠲᠤᠵᠤ ᠠᠭᠤᠯᠵᠠᠪᠠ᠃
ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠬᠡᠨ ᠬᠡᠨ ᠨᠢ ᠴᠣᠬᠣᠮ ᠶᠠᠭᠤ ᠶᠠᠷᠢᠬᠤ ᠭᠡᠵᠦ ᠪᠠᠢᠭᠠ ᠪᠠᠨ ᠳᠣᠲᠣᠷᠠ ᠪᠠᠨ ᠮᠡᠳᠡᠵᠦ ᠪᠠᠢᠪᠠᠴᠤ ᠲᠡᠷᠡ ᠬᠡᠷᠡᠭ ᠢ᠋ᠶ᠋ᠡᠨ ᠰᠢᠭᠤᠳ ᠭᠠᠷᠭᠠᠨ ᠬᠡᠯᠡᠬᠦ ᠳ᠋ᠦ᠍ ᠡᠬᠢᠯᠡᠭᠡᠳ ᠵᠢᠭᠠᠬᠠᠨ ᠨᠢᠭᠤᠷ ᠬᠠᠯᠠᠭᠠᠳ ᠪᠠᠢᠯᠠ᠃
ᠬᠤᠪᠢᠯᠠᠢ ᠱᠠᠨᠳᠦ᠋ᠩ ᠭᠠᠵᠠᠷ ᠤ᠋ᠨ ᠱᠦᠭᠦᠮᠡᠯ ᠴᠠᠢ ᠠᠪᠴᠢᠷᠠᠭᠤᠯᠤᠨ ᠳᠡᠷᠭᠡᠳᠡ ᠪᠡᠨ ᠲᠠᠯᠪᠢᠵᠤ ᠲᠤᠬᠠᠯᠠᠨ ᠰᠠᠭᠤᠭᠠᠳ ᠡᠨᠡ ᠲᠡᠷᠡᠬᠡᠨ ᠢ᠋ ᠥᠭᠦᠯᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠡᠨᠡᠭ ᠦᠭᠡᠢ ᠴᠢᠷᠠᠢᠯᠠᠨ᠄
— ᠪᠢᠳᠡᠨ ᠢ᠋ ᠰᠥᠩ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠬᠦ ᠳ᠋ᠦ᠍ ᠳᠡᠭᠡᠷᠡ ᠡᠴᠡ ᠴᠢᠭᠯᠡᠭᠦᠯᠬᠦ ᠡᠵᠡᠨ ᠬᠡᠷᠡᠭᠲᠡᠢ ᠪᠣᠯᠤᠭᠠᠳ ᠪᠠᠢᠨᠠ᠃ ᠶᠠᠭᠤᠮᠠ ᠪᠦᠭᠦᠳᠡ ᠶ᠋ᠢ ᠰᠡᠯᠡᠮᠡ ᠶ᠋ᠢᠨ ᠢᠷ ᠢ᠋ᠶ᠋ᠡᠷ ᠴᠠᠪᠴᠢᠨ ᠲᠠᠭᠠᠷᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠳᠡ ᠠ᠋ ᠭᠡᠪᠡᠯ ᠵᠣᠣ ᠪᠢ ᠲᠦᠰᠢᠮᠡᠯ ᠲᠤᠷᠠᠩᠬᠠᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠵᠠᠰᠠᠵᠤ ᠢᠨᠢᠶᠡᠭᠡᠳ᠄
— ᠲᠠ ᠶᠡᠬᠡ ᠮᠡᠷᠭᠡᠨ ᠢ᠋ᠶ᠋ᠡᠷ ᠠᠢᠯᠠᠳᠴᠤ ᠪᠠᠢᠨᠠ᠃ ᠰᠡᠯᠡᠮᠡ ᠶ᠋ᠢᠨ ᠢᠷ ᠢ᠋ᠶ᠋ᠡᠷ ᠨᠢᠭᠡ ᠤᠳᠠᠭᠠ ᠪᠤᠰᠤᠳ ᠤ᠋ᠨ ᠶᠠᠪᠤᠬᠤ ᠵᠦᠭ ᠢ᠋ ᠵᠢᠭᠠᠵᠤ ᠪᠣᠯᠤᠨᠠ᠃ ᠬᠣᠶᠠᠷ ᠲᠠᠬᠢ ᠤᠳᠠᠭᠠ ᠪᠠᠨ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠶᠠᠭᠤᠮᠠ ᠨᠠᠷᠢᠨ᠂ ᠬᠥᠮᠦᠨ ᠤᠬᠠᠭᠠᠨᠲᠠᠢ᠂ ᠬᠡᠷᠡᠭ ᠶᠠᠪᠤᠳᠠᠯ ᠬᠡᠴᠡᠭᠦᠦ᠃ ᠳᠡᠭᠡᠷᠡ ᠡᠴᠡ ᠴᠢᠭᠯᠡᠭᠦᠯᠦᠨ ᠵᠢᠭᠠᠵᠤ ᠪᠠᠢᠬᠤ ᠡᠵᠡᠨ ᠭᠡᠪᠡᠯ ᠲᠠ ᠪᠠᠢᠨᠠ ᠰᠢᠦ ᠳᠡ᠃ ᠲᠠ ᠪᠣᠯ ᠡᠷᠳᠡᠮ ᠴᠢᠳᠠᠯᠲᠠᠢ᠂ ᠤᠬᠠᠭᠠᠨ ᠲᠡᠭᠦᠯᠳᠡᠷ᠂ ᠰᠦᠷ ᠵᠢᠪᠬᠤᠯᠠᠩ ᠢ᠋ ᠪᠠᠳᠠᠷᠠᠭᠠᠭᠰᠠᠨ ᠶᠡᠬᠡ ᠬᠥᠮᠦᠨ᠃ ᠲᠠᠨ ᠢ᠋ ᠬᠥᠮᠦᠨ ᠪᠣᠯᠭᠠᠨ ᠬᠦᠨᠳᠦᠯᠡᠨ ᠦᠵᠡᠳᠡᠭ᠃ ᠪᠢ ᠡᠨᠡ ᠦᠭᠡ ᠶ᠋ᠢ ᠲᠠᠨ ᠤ᠋ ᠨᠢᠭᠤᠷ ᠳᠡᠭᠡᠷᠡ ᠵᠤᠯᠭᠤᠢᠳᠠᠨ ᠬᠡᠯᠡᠵᠦ ᠰᠠᠭᠤᠭᠠ ᠶᠠᠭᠤᠮᠠ ᠪᠢᠰᠢ᠃ ᠪᠢ ᠡᠨᠡ ᠦᠭᠡ ᠪᠡᠨ ᠬᠠᠮᠢᠭᠠ ᠴᠦ᠍ ᠬᠡᠯᠡᠨᠡ᠃ ᠨᠥᠭᠦᠭᠡ ᠭᠡᠪᠡᠯ ᠶᠡᠬᠡ ᠭᠦᠷᠦᠨ ᠵᠠᠪᠠᠯ ᠡᠵᠡᠨ ᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠡᠵᠡᠨ ᠬᠠᠭᠠᠨ ᠦᠭᠡᠢ ᠪᠣᠯ ᠬᠥᠮᠦᠨ ᠬᠥᠮᠦᠨ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯᠵᠤ ᠤᠯᠤᠰ ᠣᠷᠣᠨ ᠵᠠᠳᠠᠷᠠᠬᠤ ᠳ᠋ᠤ᠌ ᠬᠦᠷᠦᠨᠡ᠃ ᠡᠨᠡ ᠪᠣᠯ ᠭᠠᠷᠴᠠᠭᠠ ᠦᠭᠡᠢ᠃ ᠲᠠ ᠪᠣᠯᠭᠣᠭᠠᠯ ᠳᠠ᠃ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠳᠠᠷᠠᠭᠠ ᠶᠠᠭᠤ ᠪᠣᠯᠤᠯᠠ᠃ ᠬᠠᠲᠤᠨ ᠠᠬᠠᠢ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠯᠪᠠᠨ ᠲᠠᠲᠠᠪᠤᠷᠢ ᠶᠡᠬᠡ ᠳᠡᠭᠳᠡᠭᠡᠭᠰᠡᠨ᠃ ᠬᠥᠶᠦᠭ ᠬᠠᠭᠠᠨ ᠲᠠᠭᠠᠯᠠᠯ ᠲᠡᠭᠦᠰᠬᠦ ᠳ᠋ᠦ᠍ ᠨᠣᠶᠠᠳ ᠲᠦᠰᠢᠮᠡᠳ ᠨᠠᠷ ᠲᠠᠨᠢ ᠪᠦᠷ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠲᠤᠷᠭᠢᠬᠤ ᠪᠣᠯᠤᠭᠰᠠᠨ᠃ ᠲᠡᠭᠡᠭᠡᠳ ᠲᠠᠨ ᠤ᠋ ᠠᠬᠠ ᠬᠠᠭᠠᠨ ᠪᠣᠯᠣᠮᠠᠭᠴᠠ ᠪᠠᠨ ᠪᠠᠷᠤᠭ ᠯᠠ ᠳᠣᠲᠣᠷᠠ ᠪᠠᠨ ᠲᠡᠢᠨ ᠬᠢᠬᠦ ᠰᠢᠬᠠᠨ ᠪᠠᠢᠵᠤ ᠬᠠᠲᠠᠭᠤ ᠭᠠᠷ ᠭᠠᠷᠭᠠᠨ ᠤᠯᠤᠰ ᠢ᠋ᠶ᠋ᠠᠨ ᠡᠮᠬᠢᠯᠡᠵᠦ ᠠᠪᠤᠭᠰᠠᠨ᠃ ᠶᠠᠮᠠᠷ ᠰᠠᠢᠬᠠᠨ ᠳ᠋ᠤ᠌ ᠪᠠᠨ ᠮᠥᠩᠬᠡ ᠠᠬᠠ ᠲᠠᠨᠢ ᠣᠷᠣ ᠰᠠᠭᠤᠮᠠᠭᠴᠠ ᠪᠠᠨ ᠳᠠᠯᠠᠨ ᠨᠠᠢ᠍ᠮᠠᠨ ᠨᠣᠶᠠᠨ ᠢ᠋ ᠴᠠᠭᠠᠵᠠ ᠪᠠᠷ ᠠᠪᠬᠠᠭᠤᠯᠵᠤ ᠪᠠᠢᠬᠤ ᠪᠣᠢ᠃ ᠡᠢᠮᠦ ᠪᠠᠢᠳᠠᠯ ᠳ᠋ᠤ᠌ ᠳᠠᠬᠢᠭᠠᠳ ᠣᠳᠣ ᠣᠷᠣᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠶᠠᠷᠢᠯᠠ᠃
ᠵᠠᠬᠢᠷᠤᠭᠴᠢ ᠲᠦᠰᠢᠮᠡᠯ ᠦ᠋ᠨ ᠦᠭᠡ ᠶ᠋ᠢ ᠳᠠᠭᠤ ᠦᠭᠡᠢ ᠰᠠᠭᠤᠵᠤ ᠴᠢᠩᠨᠠᠨᠠ᠃ ᠲᠡᠳᠡ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠭᠠᠳ ᠬᠡᠰᠡᠭ ᠵᠠᠭᠤᠷᠠ ᠭᠠᠢᠬᠠᠭᠰᠠᠨ ᠮᠡᠲᠦ᠂ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠰᠠᠭᠤᠵᠤ᠂ ᠴᠠᠢ ᠪᠠᠯᠭᠠᠳ᠂ ᠠᠷᠰᠯᠠᠩᠲᠤ ᠲᠢᠪ ᠡᠴᠡ ᠠᠪᠴᠢᠷᠠᠭᠰᠠᠨ ᠠᠮᠲᠠᠲᠤ ᠵᠢᠮᠢᠰ ᠢᠳᠡᠨᠡ᠃ ᠬᠤᠪᠢᠯᠠᠢ ᠨᠢᠭᠡ ᠶ᠋ᠢ ᠰᠠᠨᠠᠪᠠ ᠪᠣᠯᠤᠯᠲᠠᠢ᠂ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠭᠠᠳ《ᠪᠠᠭᠰᠢ》 ᠶ᠋ᠢ ᠪᠡᠨ ᠠᠬᠢᠭᠤᠯᠤᠨ ᠬᠠᠷᠠᠵᠤ᠄
— ᠲᠠᠨ ᠤ᠋ ᠠᠢᠯᠠᠳᠬᠠᠯ ᠢ᠋ ᠪᠢ ᠣᠢᠯᠠᠭᠠᠵᠤ ᠪᠠᠢᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠡᠵᠡᠨ ᠪᠠᠢᠨᠠ ᠭᠡᠳᠡᠭ ᠴᠢᠨᠢ ᠮᠢᠨᠦ ᠳᠤᠷᠠ ᠶ᠋ᠢᠨ ᠬᠡᠷᠡᠭ ᠪᠢᠰᠢ ᠰᠢᠦ ᠳᠡ᠃ ᠴᠣᠬᠣᠮ ᠳᠡᠭᠡᠷᠡ ᠪᠡᠨ ᠪᠣᠯ ᠮᠢᠨᠦ ᠠᠬᠠ ᠬᠠᠭᠠᠨ ᠰᠡᠷᠡᠭᠦᠨ ᠲᠤᠩᠭᠠᠯᠠᠭ ᠪᠠᠢᠬᠤ ᠳ᠋ᠤ᠌ ᠪᠠᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣ ᠶ᠋ᠢ ᠲᠣᠮᠢᠯᠠᠵᠤ ᠣᠷᠬᠢᠭᠰᠠᠨ ᠪᠠᠢᠭᠠ ᠰᠢᠦ ᠭᠡᠪᠡ᠃
ᠵᠣᠣ ᠪᠢ ᠲᠦᠰᠢᠮᠡᠯ ᠢᠷᠪᠠᠢᠵᠤ ᠲᠣᠯᠣᠭᠠᠢ ᠰᠡᠭᠰᠦᠷᠦᠭᠡᠳ᠂ ᠬᠤᠷᠤᠭᠤ ᠭᠣᠵᠣᠢᠯᠭᠠᠨ᠄
— ᠲᠠ ᠰᠡᠳᠬᠢᠯ ᠦ᠋ᠨ ᠬᠠᠲᠠᠭᠤ ᠲᠡᠪᠴᠢᠶᠡᠷᠢᠲᠡᠢ ᠪᠠᠢᠬᠤ ᠤᠴᠢᠷᠲᠠᠢ᠃ ᠲᠠᠨ ᠢ᠋ ᠡᠵᠡᠨ ᠰᠠᠭᠤᠬᠤ ᠳ᠋ᠤ᠌ ᠰᠠᠭᠠᠳ ᠪᠠᠢᠭᠠ ᠨᠢ ᠦᠨᠡᠨ᠃ ᠡᠭᠦᠨ ᠢ᠋ ᠲᠠ ᠵᠥᠪ ᠪᠣᠯᠭᠣᠭᠠᠵᠤ ᠪᠣᠳᠣᠭᠰᠠᠨ ᠪᠠᠢᠨᠠ᠃ ᠭᠡᠪᠡᠴᠦ ᠪᠢᠳᠡ ᠤᠷᠠ ᠤᠬᠠᠭᠠᠨ᠂ ᠠᠷᠭᠠ ᠮᠡᠬᠡ᠂ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠣᠳᠣ ᠯᠠ ᠨᠠᠷᠢᠨ ᠲᠤᠩᠭᠠᠭᠠᠵᠤ ᠦᠵᠡᠬᠦ ᠶᠣᠰᠣᠲᠠᠢ᠃ ᠲᠠᠨ ᠳ᠋ᠤ᠌ ᠪᠠᠰᠠ ᠴᠡᠷᠢᠭ ᠣᠯᠠᠨ ᠪᠣᠢ ᠶ᠋ᠢ ᠴᠦ᠍ ᠰᠠᠨᠠᠬᠤ ᠳ᠋ᠤ᠌ ᠢᠯᠡᠭᠦᠦ ᠵᠦᠢᠯ ᠪᠢᠰᠢ᠃ ᠪᠣᠯᠭᠠᠶᠠ ᠭᠡᠪᠡᠯ ᠪᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ᠃ ᠲᠠᠨ ᠤ᠋ ᠮᠣᠩᠭᠣᠯ ᠳ᠋ᠤ᠌《ᠡᠵᠡᠨ ᠬᠢᠴᠢᠶᠡᠪᠡᠯ ᠵᠠᠶᠠᠭᠠ ᠬᠢᠴᠢᠶᠡᠨᠡ》 ᠭᠡᠳᠡᠭ ᠨᠢᠭᠡ ᠮᠡᠷᠭᠡᠨ ᠦᠭᠡ ᠪᠠᠰᠠ ᠪᠣᠢ ᠶ᠋ᠢ ᠮᠠᠷᠲᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠪᠡ᠃ ᠬᠤᠪᠢᠯᠠᠢ ᠡᠨᠡ ᠪᠠᠭᠰᠢ ᠪᠣᠯ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠬᠠᠰᠢᠷ ᠮᠡᠷᠭᠡᠨ ᠨᠢ ᠳᠡ ᠭᠡᠵᠦ ᠪᠣᠳᠣᠭᠠᠳ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠮᠡᠷᠭᠡᠨ ᠪᠠᠭᠰᠢ ᠮᠢᠨᠢ! ᠲᠠ ᠲᠡᠭᠡᠪᠡᠯ ᠪᠢ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠠᠷᠭᠠ ᠤᠴᠢᠷ ᠢ᠋ ᠨᠠᠷᠢᠨ ᠲᠤᠩᠭᠠᠭᠠᠵᠤ ᠪᠣᠯᠭᠣᠭᠠᠭᠠᠳ᠂ ᠳᠠᠷᠤᠢᠬᠠᠨ ᠨᠠᠳᠠᠳᠤ ᠠᠢᠯᠠᠳᠴᠤ ᠬᠠᠢᠷᠠᠯᠠᠪᠠᠯ ᠶᠠᠮᠠᠷ ᠪᠣᠯ? ᠰᠢᠭᠤᠳ ᠬᠡᠯᠡᠬᠦ ᠳ᠋ᠦ᠍ ᠪᠢ ᠲᠠᠨ ᠤ᠋ ᠤᠬᠠᠭᠠᠨ ᠢ᠋ ᠯᠡ ᠰᠣᠨᠣᠰᠤᠮᠠᠷ ᠪᠠᠢᠨᠠ ᠭᠡᠵᠦ ᠠᠯᠪᠠ ᠪᠠᠷ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠨ ᠬᠡᠯᠡᠪᠡ᠃ ᠶᠡᠷᠦ ᠨᠢ ᠬᠤᠪᠢᠯᠠᠢ ᠬᠡᠵᠢᠶᠡᠨ ᠦ᠌ ᠲᠥᠪ ᠪᠥᠭᠡᠳ ᠬᠡᠨᠡᠭ ᠦᠭᠡᠢ ᠴᠢᠷᠠᠢ ᠲᠠᠢ᠂ ᠴᠤᠬᠠᠭ ᠬᠡᠷᠡᠭ ᠶᠠᠪᠤᠳᠠᠯ ᠲᠣᠬᠢᠶᠠᠯᠳᠤᠬᠤ ᠳ᠋ᠤ᠌ ᠲᠡᠷᠡ ᠪᠠᠢᠳᠠᠯ ᠨᠢ ᠠᠯᠳᠠᠭᠳᠠᠳᠠᠭ ᠦᠭᠡᠢ᠃
— ᠠᠢ ᠂ ᠪᠣᠭᠣᠯ ᠪᠢ ᠤᠬᠠᠭᠠᠨ ᠪᠠᠯᠠᠷ ᠰᠢᠦ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠡᠵᠡᠨ ᠲᠠᠨ ᠤ᠋ ᠲᠠᠭᠠᠯᠠᠯ ᠶᠣᠰᠣᠭᠠᠷ ᠤᠭ ᠬᠡᠷᠡᠭ ᠢ᠋ ᠴᠢᠩᠳᠠᠯᠠᠨ ᠪᠣᠳᠣᠵᠤ ᠦᠵᠡᠭᠡᠳ ᠲᠠᠨ ᠳ᠋ᠤ᠌ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠠᠢᠯᠠᠳᠴᠤ ᠪᠣᠯᠬᠤ ᠰᠠᠨ ᠪᠣᠯᠪᠠ ᠤᠤ ? ᠭᠡᠮᠡᠨ ᠵᠣᠣ ᠪᠢ ᠶᠡᠬᠡᠳᠡ ᠬᠦᠨᠳᠦᠯᠡᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠥᠬᠥᠢᠵᠦ ᠬᠡᠯᠡᠪᠡ᠃
ᠲᠡᠷᠡ ᠭᠠᠷᠴᠤ ᠡᠦᠲᠦᠯᠡ᠃
ᠰᠠᠶᠢ ᠶ᠋ᠢᠨ ᠬᠣᠶᠠᠷ ᠬᠥᠮᠦᠨ ᠦ᠌ ᠦᠭᠡᠨ ᠳ᠋ᠦ᠍ ᠬᠤᠪᠢᠯᠠᠢ ᠶ᠋ᠢᠨ ᠰᠡᠳᠬᠢᠯ ᠶᠡᠬᠡᠳᠡ ᠳᠣᠭᠳᠣᠯᠵᠠᠢ᠃
— ᠵᠠ ᠪᠠᠢᠵᠠ ! ᠡᠨᠡ ᠬᠥᠮᠦᠰ ᠦ᠋ᠨ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠴᠠᠭᠠᠨᠠ ᠪᠠᠨ ᠬᠢᠷᠢ ᠶᠠᠪᠤᠴᠠ ᠲᠠᠢ᠂ ᠥᠭᠡᠷᠡ ᠪᠤᠰᠤᠳ ᠬᠥᠮᠦᠰ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠ ᠶ᠋ᠢ ᠪᠢ ᠮᠡᠳᠡᠬᠦ ᠶᠣᠰᠣᠲᠠᠢ ᠪᠣᠯᠤᠯᠠ ᠭᠡᠵᠦ ᠲᠡᠷᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ᠂ ᠬᠠᠮᠤᠭ ᠤ᠋ᠨ ᠬᠠᠰᠢᠷ ᠳᠣᠬᠢ᠂ ᠨᠠᠰᠤ ᠪᠠᠷ ᠴᠦ᠍ ᠠᠬᠢᠮᠠᠭ᠂ ᠬᠠᠯᠠ ᠦᠵᠡᠵᠦ ᠵᠣᠪᠠᠯᠠᠩ ᠵᠢᠷᠭᠠᠯ ᠢ᠋ ᠮᠡᠳᠡᠬᠦ ᠪᠣᠯᠤᠭᠰᠠᠨ᠂ ᠭᠦᠨ ᠤᠬᠠᠭᠠᠨᠲᠠᠨ ᠪᠠᠭᠰᠢ ᠨᠠᠢ ᠶᠤᠸᠠᠨ ᠲᠠᠢ ᠠᠭᠤᠯᠵᠠᠴᠤ ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠤᠶᠠ᠃ ᠮᠣᠩᠭᠣᠯ᠂ ᠬᠢᠲᠠᠳ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠨᠠᠮᠠᠶ᠋ᠢ ᠣᠷᠣ ᠰᠠᠭᠤᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠ ᠶᠤᠮ ᠤᠤ᠂ ᠠᠯᠢ ᠠᠭᠤᠯᠵᠠᠭᠰᠠᠨ ᠬᠡᠳᠦ ᠯᠡ ᠨᠠᠳᠠᠳᠤ ᠬᠣᠭᠣᠰᠣᠨ ᠲᠠᠯᠠ ᠥᠭᠴᠦ ᠪᠠᠢᠨᠠ ᠤᠤ ? ᠭᠡᠵᠦ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠰᠠ ᠰᠢᠪᠡᠨᠡᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠡᠪᠦᠭᠡᠨ ᠪᠠᠭᠰᠢ ᠶᠢ ᠪᠡᠨ ᠳᠠᠭᠤᠳᠠᠭᠤᠯᠤᠯᠠ᠃
ᠪᠥᠭᠲᠥᠷ ᠨᠢᠷᠤᠭᠤ ᠲᠠᠢ᠂ ᠵᠢᠷᠭᠤᠭᠠᠲᠠᠢ ᠲᠠᠶᠠᠭ ᠲᠤᠯᠤᠭᠰᠠᠨ ᠡᠪᠦᠭᠡᠨ ᠤᠷᠲᠤ ᠰᠠᠬᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠩᠭᠡᠷ ᠶᠦ᠍ᠭᠡᠨ ᠪᠦᠲᠡᠭᠡᠵᠦ ᠫᠦᠭ ᠫᠦᠭ ᠬᠠᠨᠢᠶᠠᠵᠤ ᠣᠷᠣᠵᠤ ᠢᠷᠡᠪᠡ᠃ ᠬᠤᠪᠢᠯᠠᠢ ᠠᠶᠠ ᠲᠠᠯᠪᠢᠨ 《ᠪᠠᠭᠰᠢ》 ᠪᠠᠨ ᠬᠦᠨᠳᠦᠯᠡᠵᠦ ᠪᠥᠬᠥᠢᠨ ᠤᠭᠲᠤᠭᠠᠳ᠂ ᠵᠠᠰᠠᠭᠰᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠮᠣᠷᠢᠯᠠ ᠭᠡᠵᠦ ᠤᠷᠢᠯᠠ᠃ ᠨᠠᠢ ᠶᠤᠸᠠᠨ ᠡᠪᠦᠭᠡᠨ ᠳᠠᠪᠠᠯᠠᠨ ᠰᠠᠭᠤᠵᠤ᠂ ᠲᠠᠪᠠᠭ ᠲᠠᠢ ᠵᠢᠮᠢᠰ ᠡᠴᠡ ᠶᠣᠰᠣ ᠪᠣᠯᠭᠠᠨ ᠠᠮᠰᠠᠭᠠᠳ ᠬᠠᠭᠤᠴᠢᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠯᠠ ᠮᠡᠷᠭᠡᠨ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠠ᠋ᠴᠠ ᠬᠡᠰᠡᠭᠯᠡᠨ ᠤᠩᠰᠢᠵᠤ᠂ ᠲᠡᠭᠦᠨ ᠦ᠌ ᠶᠡᠬᠡ ᠤᠬᠠᠭᠠᠨ ᠢ᠋ ᠮᠠᠭᠲᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠤᠪᠢᠯᠠᠢ ᠶ᠋ᠢᠨ ᠦᠭᠡ ᠶ᠋ᠢ ᠠᠩᠬᠠᠷᠴᠤ ᠡᠬᠢᠯᠡᠪᠡ᠃ ᠵᠠᠬᠢᠷᠤᠭᠴᠢ ᠪᠠᠰᠠ ᠯᠠ ᠤᠯᠤᠰ ᠣᠷᠣᠨ ᠡᠵᠡᠨ ᠦᠭᠡᠢᠳᠡᠬᠦ ᠪᠣᠢ ᠭᠡᠮᠡᠨ ᠪᠣᠯᠭᠣᠮᠵᠢᠯᠠᠵᠤ ᠪᠠᠢᠭᠠ ᠲᠤᠬᠠᠢ ᠨᠠᠯᠢᠶᠠᠨ ᠠᠯᠤᠰ ᠢ᠋ᠶ᠋ᠠᠷ ᠶᠠᠷᠢᠶᠠ ᠡᠭᠦᠰᠬᠡᠭᠡᠳ ᠪᠣᠳᠣᠯᠬᠢᠯᠠᠭᠰᠠᠨ ᠪᠠᠢᠳᠠᠯ ᠦᠵᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ᠄
— ᠲᠠ ᠪᠦᠭᠦᠳᠡ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠠᠬᠠ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠮᠣᠩᠭᠣᠯ ᠤ᠋ᠨ ᠵᠠᠩᠰᠢᠯ ᠶᠣᠰᠣ ᠪᠠᠷ ᠰᠠᠢᠬᠠᠨ ᠣᠷᠣᠰᠢᠭᠤᠯᠤᠭᠰᠠᠨ᠃ ᠲᠡᠭᠡᠭᠡᠳ ᠤᠯᠤᠰ ᠭᠦᠷᠦᠨ ᠮᠠᠨᠢ ᠡᠵᠡᠨ ᠦᠭᠡᠢᠳᠡᠬᠦ ᠳ᠋ᠦ᠍ ᠡᠪ ᠦᠭᠡᠢ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠣᠬᠤ ᠪᠣᠢ ᠭᠡᠬᠦ ᠡᠴᠡ ᠰᠡᠳᠬᠢᠯ ᠭᠣᠩᠰᠣᠢᠵᠤ ᠪᠠᠢᠨᠠ᠃ ᠰᠥᠩ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠬᠦ ᠡᠴᠡ ᠥᠭᠰᠥᠭᠦᠯᠦᠭᠡᠳ ᠬᠡᠷᠡᠭ ᠶᠠᠪᠤᠳᠠᠯ ᠠᠷᠪᠢᠨ ᠪᠠᠢᠨᠠ ᠭᠡᠵᠦ ᠶᠠᠷᠢᠶᠠ ᠳᠡᠯᠭᠡᠪᠡᠯ ᠨᠠᠢ ᠶᠤᠸᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠬᠥᠳᠡᠯᠭᠡᠨ ᠬᠠᠷᠠᠵᠤ᠄
— ᠭᠦᠷᠦᠨ ᠤᠯᠤᠰ ᠡᠵᠡᠨ ᠥᠬᠡᠢᠳᠡᠨᠡ ᠭᠡᠵᠦ ᠶᠠᠷᠢᠬᠤ ᠶᠣᠰᠣ ᠦᠭᠡᠢ᠃ ᠲᠠ ᠪᠣᠯ ᠶᠡᠬᠡ ᠭᠦᠷᠦᠨ ᠦ᠌ ᠲᠡᠷᠢᠭᠦᠨ ᠮᠥᠨ᠃ ᠲᠠ ᠶᠠᠭᠤᠨ ᠳ᠋ᠤ᠌ ᠥᠭᠡᠷᠡ ᠵᠦᠢᠯ ᠤᠷᠤᠭᠤ ᠠᠯᠮᠠᠢᠷᠠᠨᠠ ᠪᠣᠢ ? ᠪᠢᠳᠡ ᠶᠡᠬᠡ ᠡᠵᠡᠨ ᠵᠠᠬᠢᠷᠤᠭᠴᠢ ᠶ᠋ᠢ ᠮᠠᠨ ᠤ᠋ ᠲᠥᠷᠥ ᠶᠣᠰᠣᠨ ᠤ᠋ ᠳᠡᠭᠡᠳᠦ ᠡᠵᠡᠨ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠ᠃ ᠲᠡᠢᠮᠦ ᠪᠠᠢᠬᠤ ᠴᠦ᠍ ᠶᠣᠰᠣᠲᠠᠢ ᠪᠣᠯᠤᠯᠠ ᠭᠡᠵᠦ ᠣᠯᠠᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠦᠵᠡᠵᠦ ᠪᠠᠢᠨᠠ᠁ ᠭᠡᠰᠡᠨ ᠶᠠᠷᠢᠶᠠ ᠴᠤᠪᠤᠷᠠᠭᠤᠯᠵᠤ ᠭᠠᠷᠪᠠ᠃
ᠬᠤᠪᠢᠯᠠᠢ ᠡᠪᠦᠭᠡᠨ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠬᠤ ᠠᠷᠭᠠ ᠦᠭᠡᠢ᠃ ᠡᠪᠦᠭᠡᠨ ᠦ᠌ ᠶᠠᠷᠢᠭᠰᠠᠨ ᠵᠦᠢᠯ ᠳᠣᠲᠣᠷᠠ 《ᠣᠯᠠᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠵᠠᠬᠢᠷᠤᠭᠴᠢ ᠲᠠᠨ ᠢ᠋ ᠥᠪᠡᠷ ᠦ᠋ᠨ ᠳᠡᠭᠡᠳᠦ ᠡᠵᠡᠨ ᠭᠡᠵᠦ ᠦᠵᠡᠵᠦ ᠪᠠᠢᠭᠠ》 ᠭᠡᠳᠡᠭ ᠦᠭᠡ ᠶᠠᠮᠠᠷ ᠳᠤᠯᠠᠭᠠᠬᠠᠨ ᠰᠣᠨᠣᠰᠤᠭᠳᠠᠨᠠ ᠪᠣᠢ᠃ ᠲᠡᠭᠡᠭᠡᠳ ᠪᠠᠭᠰᠢ ᠳ᠋ᠤ᠌ ᠪᠠᠨ ᠬᠠᠷᠢᠭᠤ ᠬᠡᠯᠡᠬᠦ ᠦᠭᠡᠢ ᠴᠦ᠍ ᠶᠤᠮ ᠰᠢᠭ᠋ ᠪᠣᠯᠵᠤ᠂ ᠭᠱᠠᠨ ᠵᠠᠭᠤᠷᠠ ᠳ᠋ᠤ᠌ ᠰᠡᠳᠬᠢᠯ ᠨᠢ ᠬᠥᠳᠡᠯᠦᠭᠰᠡᠨ ᠳ᠋ᠦ᠍ ᠪᠡᠨ ᠣᠯᠠᠨ ᠶᠠᠭᠤᠮᠠ ᠵᠡᠷᠭᠡ ᠪᠣᠳᠣᠭᠳᠠᠪᠠ᠃ ᠲᠤᠬᠠᠢᠯᠠᠪᠠᠯ ᠥᠪᠡᠷ ᠢ᠋ ᠺᠠᠢᠫᠢᠩ ᠬᠣᠲᠠ ᠳ᠋ᠤ᠌ ᠢᠷᠡᠮᠡᠭᠴᠡ ᠨᠢ 《ᠳᠡᠭᠡᠳᠦ ᠡᠵᠡᠨ》 ᠭᠡᠵᠦ ᠡᠷᠭᠦᠮᠵᠢᠯᠡᠭᠡᠳ ᠪᠠᠢᠭᠠ ᠨᠢ ᠤᠴᠢᠷ ᠤᠳᠬᠠ ᠲᠠᠢ ᠬᠡᠷᠡᠭ ᠪᠣᠯᠵᠤ ᠲᠠᠭᠠᠷᠠᠯᠠ ᠭᠡᠮᠡᠨ ᠪᠣᠳᠣᠪᠠ᠃ ᠪᠠᠰᠠ ᠠᠳᠠ ᠪᠠᠢᠭᠠ ᠬᠢᠲᠠᠳ ᠡᠷᠳᠡᠮᠲᠡᠳ᠂ ᠵᠥᠪᠯᠡᠬᠦ ᠨᠦ᠍ᠭᠦᠳ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠠᠯᠢ ᠪᠣᠯᠬᠣᠷ ᠠᠶᠠᠲᠠᠢ ᠳᠤᠯᠠᠭᠠᠨ ᠦᠭᠡ ᠣᠯᠵᠤ ᠬᠡᠯᠡᠨᠡ᠃ ᠲᠠᠭᠠᠰᠢᠶᠠᠯ ᠨᠡᠮᠡᠵᠦ ᠠᠪᠬᠤ ᠭᠡᠳ ᠪᠠᠢᠭᠠ ᠶᠠᠩᠵᠤᠲᠠᠢ ᠪᠠᠢᠨᠠ ᠭᠡᠰᠡᠨ ᠨᠢᠭᠡ ᠣᠢᠯᠠᠭᠠᠯᠲᠠ ᠬᠤᠪᠢᠯᠠᠢ ᠳ᠋ᠤ᠌ ᠰᠠᠨᠠᠭᠳᠠᠵᠤ᠂ ᠲᠡᠳᠡᠨ ᠦ᠌ ᠦᠭᠡ ᠶᠠᠷᠢᠶᠠᠨ ᠤ᠋ ᠥᠩᠭᠡ ᠠᠶᠠᠰ ᠢ᠋ ᠠᠵᠢᠭᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠨ 《ᠶᠠᠭᠠᠬᠢᠭᠠᠳ ᠡᠳᠡ ᠨᠠᠷ ᠨᠠᠮᠠᠢ ᠤᠯᠤᠰ ᠤ᠋ᠨ ᠲᠡᠷᠢᠭᠦᠨ ᠶᠡᠬᠡ ᠡᠵᠡᠨ ᠪᠣᠯᠭᠠᠬᠤ ᠭᠡᠳ ᠪᠠᠢᠨᠠ ᠪᠣᠢ ?》 ᠭᠡᠮᠡᠨ ᠪᠣᠳᠣᠭᠠᠳ᠂ ᠲᠡᠭᠦᠨ ᠦ᠌ ᠴᠠᠭᠠᠳᠤ ᠨᠠᠷᠢᠨ ᠤᠴᠢᠷ ᠢ᠋ ᠮᠡᠳᠡᠬᠦ ᠰᠠᠨ ᠭᠡᠵᠦ ᠬᠦᠰᠡᠬᠦ ᠰᠡᠳᠬᠢᠯ ᠣᠷᠭᠢᠯᠤᠨ ᠭᠠᠷᠴᠤ ᠢᠷᠡᠵᠦ ᠪᠠᠢᠯᠠ᠃ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠶᠡᠬᠡ ᠡᠵᠡᠨ ᠬᠠᠭᠠᠨ ᠪᠣᠯᠬᠤ ᠬᠦᠰᠡᠯᠲᠡᠢ ᠶ᠋ᠢ ᠥᠪᠡᠷ ᠡᠴᠡ ᠨᠢ ᠨᠢᠭᠤᠬᠤ ᠶᠠᠭᠤ ᠪᠠᠢᠬᠤ ᠪᠢᠯᠡ᠃ ᠡᠨᠡ ᠬᠦᠰᠡᠯ ᠨᠢ ᠪᠡᠶᠡᠯᠡᠵᠦ ᠮᠠᠭᠠᠳ ᠦᠭᠡᠢ ᠴᠦ᠍ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃
— 《ᠡᠳᠡ ᠨᠠᠷ ᠨᠠᠮᠠᠶ᠋ᠢ ᠬᠠᠭᠠᠨ ᠪᠣᠯᠭᠠᠬᠤ ᠠᠬᠤᠯᠠ ᠥᠪᠡᠷᠰᠡᠳ ᠲᠦ᠍ ᠪᠡᠨ ᠡᠭᠡᠯᠢᠲᠡᠢ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠵᠢᠰᠤᠷ ᠪᠠᠷᠠᠯᠬᠠᠭᠠᠳ ᠪᠠᠢᠭᠠ ᠨᠢ ᠯᠠᠪ ᠰᠢᠦ᠃ ᠡᠳᠡᠨ ᠦ᠌ ᠲᠡᠷᠡ ᠰᠠᠨᠠᠭᠠ ᠪᠡᠶᠡᠯᠡᠳᠡᠭ ᠶᠦᠮ ᠪᠣᠯ ᠪᠢ ᠠᠴᠢ ᠶ᠋ᠢ ᠨᠢ ᠬᠠᠷᠢᠭᠤᠯᠬᠤ ᠯᠠ ᠪᠣᠯᠤᠨᠠ》 ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠦᠭᠡᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠠᠨ ᠬᠤᠪᠢᠯᠠᠢ ᠬᠢᠲᠠᠳ ᠲᠦᠰᠢᠮᠡᠯ ᠨᠠᠷ ᠤ᠋ᠨ ᠳᠣᠲᠣᠷᠠ ᠪᠠᠨ ᠰᠠᠨᠠᠵᠤ ᠪᠠᠢᠭᠠ ᠵᠦᠢᠯᠡᠰ ᠦ᠋ᠨ ᠬᠠᠮᠤᠭ ᠤ᠋ᠨ ᠨᠠᠷᠢᠨ ᠤᠴᠢᠷ ᠲᠤ᠌ ᠬᠦᠷᠴᠦ ᠣᠢᠯᠠᠭᠠᠵᠤ ᠣᠭᠲᠣ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠲᠤᠬᠠᠢᠯᠠᠪᠠᠯ ᠬᠢᠲᠠᠳ ᠨᠣᠶᠠᠳ ᠡᠨᠡ ᠵᠠᠬᠢᠷᠤᠭᠴᠢ ᠶ᠋ᠢ ᠶᠡᠬᠡ ᠭᠦᠷᠦᠨ ᠦ᠌ ᠬᠠᠭᠠᠨ ᠪᠣᠯᠭᠠᠬᠤ ᠳ᠋ᠤ᠌ ᠪᠠᠨ ᠮᠣᠩᠭᠣᠯ ᠬᠠᠭᠠᠨ ᠪᠢᠰᠢ᠂ ᠬᠢᠲᠠᠳ ᠬᠠᠭᠠᠨ ᠪᠣᠯᠭᠠᠬᠤ ᠬᠤᠪᠢᠯᠠᠢ ᠶ᠋ᠢ ᠥᠪᠡᠷ ᠢ᠋ ᠨᠢ ᠬᠢᠲᠠᠳ ᠪᠣᠯᠭᠠᠬᠤ ᠳᠠᠯᠳᠠ ᠶ᠋ᠢᠨ ᠪᠣᠳᠣᠯᠭᠠ ᠲᠠᠢ ᠪᠠᠢᠭᠠ ᠶ᠋ᠢ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃ ᠢᠩᠭᠢᠵᠦ ᠴᠦ᠍ ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠭᠰᠠᠨ ᠠᠵᠢ᠃ ᠨᠠᠢ ᠶᠤᠸᠠᠨ ᠵᠠᠬᠢᠷᠤᠭᠴᠢ ᠶ᠋ᠢ ᠨᠠᠷᠢᠨ ᠵᠦᠢᠯ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠰᠠᠭᠤᠬᠤ ᠳ᠋ᠤ᠌ ᠨᠢ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠠ᠋ᠴᠠ ᠲᠠᠢᠯᠪᠤᠷᠢᠯᠠᠭᠰᠠᠭᠠᠷ᠂ ᠲᠡᠭᠦᠨ ᠢ᠋ ᠨᠢ ᠬᠤᠪᠢᠯᠠᠢ ᠳᠠᠮ ᠲᠣᠮ ᠰᠣᠨᠣᠰᠴᠤ ᠪᠠᠢᠪᠠ᠃
— ᠶᠡᠬᠡ ᠡᠵᠡᠨᠲᠡᠨ ᠮᠢᠨᠢ ᠠ᠋ ! ᠲᠠ ᠶᠠᠭᠤᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠭᠡᠭᠡᠨ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠠ᠋ᠴᠠ ᠲᠥᠷᠥ ᠶ᠋ᠢ ᠤᠳᠤᠷᠢᠳᠬᠤ ᠲᠠᠢ ᠬᠣᠯᠪᠣᠭᠳᠠᠬᠤ ᠵᠦᠢᠯ ᠦ᠋ᠳ ᠢ᠋ ᠨᠠᠷᠢᠪᠴᠢᠯᠠᠨ ᠣᠢᠯᠠᠭᠠᠵᠤ ᠳᠠᠭᠠᠯᠠ᠃ ᠶᠡᠬᠡ ᠤᠬᠠᠭᠠᠨᠲᠠᠨ ᠤ᠋ ᠰᠤᠷᠭᠠᠯ ᠢ᠋ ᠪᠦᠷᠢᠨ ᠮᠡᠳᠡᠵᠦ ᠴᠢᠳᠠᠪᠠᠯ ᠵᠥᠪᠬᠡᠨ ᠲᠥᠷᠥ ᠶ᠋ᠢᠨ ᠶᠠᠪᠤᠳᠠᠯ ᠲᠡᠳᠦᠢ ᠦᠭᠡᠢ᠂ ᠬᠥᠮᠦᠨ ᠣᠯᠠᠨ᠂ ᠭᠠᠵᠠᠷ ᠨᠤᠲᠤᠭ᠂ ᠠᠵᠤ ᠲᠥᠷᠥᠬᠦ ᠶ᠋ᠢᠨ ᠪᠦᠬᠦ ᠵᠢᠮᠡ ᠶᠣᠰᠣ ᠶ᠋ᠢ ᠬᠡᠨ ᠢ᠋ᠶ᠋ᠡᠷ ᠴᠦ᠍ ᠬᠡᠯᠡᠭᠦᠯᠦᠯ ᠦᠭᠡᠢ ᠪᠡᠷ ᠮᠡᠳᠡᠨ ᠰᠢᠢᠳᠴᠦ ᠪᠠᠢᠬᠤ ᠲᠦᠯᠬᠢᠭᠦᠷ ᠢ᠋ ᠣᠯᠳᠠᠭ᠃ ᠡᠵᠡᠨ ᠲᠠ ᠪᠣᠯᠭᠣᠭᠠᠯ ᠳᠠ ! ᠮᠡᠷᠭᠡᠨ ᠺᠦᠩᠽᠢ ᠡᠴᠡ ᠬᠣᠢᠰᠢ ᠮᠢᠩᠭᠠ ᠭᠠᠷᠤᠢ ᠵᠢᠯ ᠥᠩᠭᠡᠷᠡᠵᠦ ᠪᠠᠢᠬᠤ ᠲᠡᠷᠡ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠬᠢᠲᠠᠳ ᠤ᠋ᠨ ᠠᠯᠢ ᠴᠦ᠍ ᠨᠤᠲᠤᠭ᠂ ᠶᠠᠮᠠᠷ ᠴᠦ᠍ ᠤᠯᠤᠰ ᠢᠯᠭᠠᠭᠠ ᠦᠭᠡᠢ ᠬᠠᠭᠠᠳ ᠤ᠋ᠳ ᠮᠠᠨᠢ ᠲᠡᠷᠡ ᠶᠡᠬᠡ ᠭᠡᠭᠡᠨ ᠦ᠌ ᠰᠤᠷᠭᠠᠯ ᠢ᠋ᠶ᠋ᠠᠷ ᠨᠠᠷᠠ ᠬᠢᠨ᠂ ᠲᠥᠷᠥ ᠤᠯᠤᠰ ᠢ᠋ᠶ᠋ᠠᠨ ᠵᠢᠯᠣᠭᠣᠳᠴᠤ ᠢᠷᠡᠭᠰᠡᠨ᠃ ᠲᠡᠷᠡ ᠴᠦ᠍ ᠪᠤᠤ ᠬᠡᠯᠡ ᠺᠦᠩᠽᠢ ᠮᠡᠷᠭᠡᠨ ᠦ᠌ ᠰᠤᠷᠭᠠᠯ ᠢ᠋ ᠰᠤᠳᠤᠯᠤᠭᠠ ᠦᠭᠡᠢ ᠬᠥᠮᠦᠨ ᠲᠥᠷᠥ ᠳ᠋ᠦ᠍ ᠲᠦᠰᠢᠮᠡᠯ ᠦ᠋ᠨ ᠠᠯᠪᠠ ᠶ᠋ᠢ ᠬᠠᠭᠠᠵᠤ ᠪᠠᠢᠭᠠ ᠦᠭᠡᠢ᠃ ᠲᠥᠷᠥ ᠶ᠋ᠢᠨ ᠠᠯᠪᠠᠨ ᠳ᠋ᠤ᠌ ᠵᠢᠳᠬᠦᠬᠦ ᠬᠡᠨ ᠢ᠋ ᠴᠦ᠍ ᠪᠣᠯᠪᠠ ᠺᠦᠩᠽᠢ ᠶ᠋ᠢᠨ ᠠᠢᠯᠠᠳᠤᠭᠰᠠᠨ 《ᠰᠢᠭᠦᠮᠵᠢᠯᠡᠯᠲᠦ ᠨᠣᠮ》 ᠂ 《ᠬᠣᠶᠠᠷ ᠰᠤᠷᠭᠠᠯ》 ᠵᠡᠷᠭᠡ ᠨᠣᠮ ᠢ᠋ ᠬᠢᠷᠢ ᠰᠤᠳᠤᠯᠤᠨ ᠮᠡᠳᠡᠭᠰᠡᠨ ᠢ᠋ ᠨᠢ ᠰᠢᠭᠦᠨ ᠰᠢᠯᠭᠠᠵᠤ᠂ ᠤᠭ ᠠᠯᠪᠠᠨ ᠳ᠋ᠤ᠌ ᠲᠡᠩᠴᠡᠭᠦᠯᠵᠦ ᠢᠷᠡᠭᠰᠡᠨ᠃ ᠡᠨᠡ ᠠᠯᠪᠠ ᠪᠣᠯ ᠪᠦᠷ ᠲᠡᠭᠷᠢ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠵᠠᠪᠠᠯ ᠭᠦᠢᠴᠡᠯᠳᠦᠭᠦᠯᠬᠦ ᠶᠣᠰᠣ ᠪᠣᠯᠭᠠᠵᠤ ᠢᠷᠡᠭᠰᠡᠨ ᠬᠡᠷᠡᠭ᠃ ᠬᠢᠲᠠᠳ ᠤ᠋ᠨ ᠨᠣᠶᠠᠳ᠂ ᠬᠠᠭᠠᠳ ᠡᠭᠦᠨ ᠢ᠋ ᠣᠷᠣᠢ ᠳᠡᠭᠡᠷᠡ ᠪᠡᠨ ᠵᠠᠯᠠᠨ ᠡᠷᠬᠢᠮᠯᠡᠨ ᠳᠠᠭᠠᠵᠤ ᠶᠠᠪᠤᠭᠠ ᠰᠢᠦ ᠳᠡ᠁ ᠭᠡᠮᠡᠨ ᠶᠠᠷᠢᠵᠤ ᠪᠠᠢᠯᠠ᠃
ᠬᠤᠪᠢᠯᠠᠢ ᠨᠠᠢ ᠶᠤᠸᠠᠨ ᠪᠠᠭᠰᠢ ᠶ᠋ᠢ ᠪᠡᠨ ᠬᠦᠨᠳᠦᠯᠡᠨ ᠦᠵᠡᠳᠡᠭ᠂ ᠲᠡᠭᠦᠨ ᠦ᠌ ᠭᠦᠨ ᠤᠬᠠᠭᠠᠨ ᠤ᠋ ᠮᠡᠳᠡᠯᠭᠡ ᠡᠴᠡ ᠶᠠᠭᠤᠮᠠ ᠣᠯᠵᠤ ᠠᠪᠬᠤ ᠭᠡᠵᠦ ᠳᠣᠲᠣᠷᠠ ᠪᠠᠨ ᠶᠡᠬᠡᠳᠡ ᠪᠣᠳᠣᠳᠠᠭ ᠪᠣᠯᠬᠣᠷ ᠡᠨᠡ ᠡᠷᠳᠡᠮᠲᠡᠨ ᠦ᠌ ᠬᠡᠯᠡᠭᠡᠳ ᠪᠠᠢᠭᠠ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠦᠭᠡᠢ ᠪᠠᠢᠬᠤ ᠠᠷᠭᠠ ᠦᠭᠡᠢ ᠪᠣᠯᠪᠠ᠃ ᠲᠡᠭᠡᠭᠡᠳ ᠡᠵᠡᠨ ᠵᠠᠬᠢᠷᠤᠭᠴᠢ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠵᠢᠭᠠᠯᠭᠠᠵᠤ ᠪᠠᠢᠭᠠᠳ ᠣᠷᠬᠢᠭᠰᠠᠨ ᠲᠡᠷᠡ ᠨᠡᠷᠡᠲᠦ ᠰᠤᠷᠭᠠᠯ ᠠ᠋ᠴᠠ ᠨᠠᠢ ᠶᠤᠸᠠᠨ ᠪᠠᠭᠰᠢ ᠪᠠᠷ ᠢ᠋ᠶ᠋ᠠᠨ ᠴᠠᠭᠠᠰᠢ ᠦᠷᠭᠦᠯᠵᠢᠯᠡᠭᠦᠯᠦᠨ ᠵᠢᠭᠠᠯᠭᠠᠬᠤ ᠪᠠᠷ ᠬᠡᠯᠡᠯᠴᠡᠨ ᠲᠣᠬᠢᠷᠠᠵᠤ ᠶᠠᠷᠢᠶᠠ ᠪᠠᠨ ᠲᠡᠭᠦᠰᠬᠡᠭᠡᠳ᠂ ᠪᠣᠯᠵᠤ ᠪᠠᠢᠭᠠ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠡᠮᠬᠢᠯᠡᠭᠦᠯᠦᠨ ᠪᠣᠳᠣᠵᠤ᠂ ᠴᠠᠭᠠᠰᠢᠳᠠ ᠬᠡᠷᠬᠢᠪᠡᠯ ᠵᠣᠬᠢᠬᠤ ᠶ᠋ᠢ ᠨᠠᠷᠢᠪᠴᠢᠯᠠᠨ ᠲᠥᠯᠥᠪᠯᠡᠵᠦ ᠲᠣᠭᠲᠠᠭᠠᠶᠠ ᠭᠡᠮᠡᠨ ᠰᠢᠢᠳᠦᠯᠡ᠃
ᠪᠣᠳᠣᠵᠤ ᠦᠵᠡᠪᠡᠯ ᠶᠠᠭᠤᠮᠠ ᠶᠠᠭᠤᠮᠠ ᠪᠠᠭᠠᠯᠵᠠᠭᠤᠷ ᠲᠤ᠌ ᠨᠢ ᠲᠤᠯᠤᠭᠰᠠᠨ ᠶᠤᠮ ᠰᠢᠭ᠋᠂ ᠶᠡᠷᠦ ᠨᠢ ᠶᠠᠭᠠᠷᠠᠬᠤ ᠦᠭᠡᠢ ᠪᠣᠯ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠥᠭᠡᠷᠡ ᠬᠥᠮᠦᠨ ᠳ᠋ᠦ᠍ ᠠᠯᠳᠠᠬᠤ ᠨᠢ ᠵᠠᠢᠯᠠᠰᠢ ᠦᠭᠡᠢ ᠴᠦ᠍ ᠶᠤᠮ ᠰᠢᠭ᠋᠂ ᠶᠠᠭᠠᠷᠠᠪᠴᠢᠯᠠᠨᠠ ᠭᠡᠬᠦᠨ ᠳ᠋ᠦ᠍ ᠴᠣᠬᠣᠮ ᠶᠠᠭᠤ ᠬᠢᠪᠡᠯ ᠵᠣᠬᠢᠬᠤ ᠨᠢ ᠰᠡᠳᠬᠢᠯ ᠳ᠋ᠦ᠍ ᠨᠢ ᠭᠦᠢᠴᠡᠳ ᠪᠠᠭᠤᠵᠤ ᠥᠭᠬᠦ ᠦᠭᠡᠢ ᠪᠠᠢᠯᠠ᠃ ᠲᠡᠭᠡᠭᠡᠳ ᠬᠤᠪᠢᠯᠠᠢ ᠰᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠲᠣᠭᠲᠠᠨ ᠰᠠᠭᠤᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠨ ᠪᠠᠢᠨ ᠪᠣᠰᠤᠨ ᠬᠠᠷᠠᠢᠵᠤ ᠤᠷᠲᠤ ᠪᠠᠷ ᠠᠮᠢᠰᠬᠤᠭᠠᠯᠠᠨ᠂ ᠲᠣᠯᠣᠭᠠᠢ ᠪᠠᠨ ᠪᠠᠵᠠᠭᠠᠳ
— ᠵᠠ ᠪᠠᠢᠵᠠ ᠠ ? ᠭᠡᠮᠡᠨ ᠬᠡᠢ ᠰᠠᠨᠠᠭᠠᠰᠢᠷᠠᠨ ᠶᠠᠭᠠᠬᠢᠬᠤ ᠶ᠋ᠢ ᠪᠡᠨ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠨᠢ ᠲᠣᠯᠣᠭᠠᠢ ᠶ᠋ᠢᠨ ᠠᠷᠠᠰᠤ ᠨᠢ ᠬᠠᠮᠤᠭ ᠣᠶᠤᠨ ᠪᠣᠳᠣᠯ ᠢ᠋ ᠨᠢ ᠪᠠᠭᠯᠠᠵᠤ ᠬᠦᠯᠢᠵᠦ᠂ ᠲᠠᠷᠢᠬᠢᠨ ᠳᠣᠲᠣᠷᠠ ᠨᠢ ᠤᠰᠤ ᠳᠦᠭᠦᠷᠴᠦ ᠣᠷᠬᠢᠭᠰᠠᠨ ᠴᠦ᠍ ᠶᠤᠮ ᠰᠢᠭ᠋᠂ ᠶᠡᠷᠦ ᠨᠢ ᠪᠢ ᠡᠦᠲᠦ ᠶᠠᠭᠠᠷᠠᠨ ᠲᠡᠭᠡᠶᠡ᠂ ᠢᠩᠭᠢᠶᠡ ᠭᠡᠬᠦᠯᠡᠷ ᠬᠡᠷᠡᠭ ᠣᠷᠣᠵᠤ ᠢᠷᠡᠬᠦ ᠦᠭᠡᠢ᠂ ᠬᠡᠢ ᠪᠤᠬᠢᠮᠳᠤᠨᠠ᠃ ᠬᠥᠮᠦᠰ ᠦ᠋ᠨ ᠶᠠᠷᠢᠭᠠᠳ ᠪᠠᠢᠭᠠ ᠵᠦᠢᠯ ᠠᠷᠭᠠᠲᠤ ᠰᠢᠷᠠ ᠦᠨᠡᠭᠡᠨ ᠦ᠌ ᠦᠭᠡ ᠬᠡᠯᠡ ᠡᠢᠮᠦ ᠪᠠᠢᠳᠠᠭ ᠪᠣᠯᠪᠠ ᠤᠤ ᠭᠡᠵᠦ ᠬᠤᠪᠢᠯᠠᠢ ᠳ᠋ᠤ᠌ ᠰᠠᠨᠠᠭᠳᠠᠨᠠ᠃
— ᠵᠠ ᠪᠠᠢᠵᠠ ! ᠰᠡᠭᠡᠬᠦᠯᠡᠢ ᠶ᠋ᠢᠨ ᠬᠦᠦ ᠪᠠᠶᠠᠨ ᠵᠠᠩᠵᠤᠨ ᠢ᠋ ᠢᠷᠡᠭᠦᠯᠦᠨ ᠲᠡᠭᠦᠨ ᠦ᠌ ᠰᠠᠨᠠᠭᠠ ᠶ᠋ᠢ ᠮᠡᠳᠡᠳᠡᠭ ᠶᠦᠮ ᠪᠢᠯᠡ ᠤᠤ᠃ ᠪᠠᠶᠠᠨ ᠬᠡᠴᠡᠭᠦᠦ ᠡᠷᠡ ᠳᠡ᠃ ᠳᠡᠩᠳᠡᠭᠦᠦ ᠳᠠᠷᠤᠤ᠂ ᠨᠣᠮᠣᠬᠠᠨ ᠴᠢᠷᠠᠢ ᠲᠠᠢ ᠪᠣᠯᠬᠣᠷ ᠢ᠋ᠶ᠋ᠠᠨ ᠬᠢᠷᠢ ᠶ᠋ᠢᠨ ᠶᠠᠭᠤᠮᠠᠨ ᠳ᠋ᠤ᠌ ᠦᠭᠡ ᠪᠡᠨ ᠬᠡᠯᠡᠬᠦ ᠦᠭᠡᠢ᠂ ᠳᠦᠯᠢᠭᠡᠳ ᠰᠠᠭᠤᠬᠤ ᠪᠠᠢᠬᠤ ᠳᠠ᠃
ᠴᠡᠷᠢᠭ ᠡᠷᠡ ᠶ᠋ᠢᠨ ᠶᠠᠪᠤᠳᠠᠯ᠂ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠬᠡᠷᠡᠭ ᠭᠡᠬᠦ ᠪᠡᠷ ᠵᠠᠩᠵᠤᠨ ᠰᠠᠬᠠᠯ ᠢ᠋ᠶ᠋ᠠᠨ ᠭᠣᠵᠣᠢᠯᠭᠠᠭᠠᠳ ᠯᠠ ᠪᠣᠰᠤᠭᠠᠳ ᠢᠷᠡᠨᠡ᠃ ᠪᠢᠴᠢᠭᠰᠡᠨ᠂ ᠬᠡᠯᠡᠭᠰᠡᠨ ᠤᠷᠠᠨ ᠰᠢᠯᠦᠭ ᠦ᠋ᠳ ᠨᠢ ᠴᠠᠭᠠᠨᠠ ᠪᠠᠨ ᠯᠠ ᠨᠢᠭᠡ ᠤᠴᠢᠷᠲᠠᠢ ᠭᠡᠬᠦ ᠤᠤ ᠂ ᠰᠡᠳᠬᠢᠯ ᠬᠥᠳᠡᠯᠭᠡᠬᠦ ᠨᠢ ᠪᠠᠶᠠᠨ ᠤ᠋ ᠶᠡᠬᠡ ᠤᠬᠠᠭᠠᠨ ᠴᠢᠳᠠᠯ ᠢ᠋ ᠬᠠᠷᠠᠭᠤᠯᠳᠠᠭ ᠭᠠᠷᠭᠠᠭᠤᠳ ᠬᠥᠮᠦᠨ ᠰᠢᠦ᠃ ᠰᠠᠷᠲᠠᠭ ᠵᠠᠩᠵᠤᠨ ᠪᠠᠭᠠ ᠠ᠋ᠴᠠ ᠨᠢ ᠪᠠᠶᠠᠨ ᠢ᠋ ᠰᠣᠯᠣᠩᠭᠣᠰ ᠤ᠋ᠨ ᠲᠡᠢᠨ ᠳ᠋ᠦ᠍ ᠳᠠᠭᠠᠭᠤᠯᠤᠨ ᠶᠠᠪᠤᠵᠤ ᠶᠡᠬᠡ ᠶᠠᠭᠤᠮᠠ ᠰᠤᠷᠭᠠᠭᠰᠠᠨ ᠭᠡᠳᠡᠭ᠃ ᠲᠡᠭᠡᠭᠡᠳ ᠶᠡᠷᠦ ᠨᠢ ᠪᠠᠶᠠᠨ ᠵᠠᠩᠵᠤᠨ ᠢ᠋ ᠢᠷᠡᠭᠦᠯᠵᠦ ᠰᠥᠩ ᠦ᠋ᠨ ᠬᠠᠭᠠᠨ ᠲᠠᠢ ᠬᠢᠵᠦ ᠪᠠᠢᠭᠠ ᠲᠡᠢᠨ ᠦ᠌ ᠶᠠᠪᠤᠴᠠ ᠶ᠋ᠢ ᠬᠡᠯᠡᠯᠴᠡᠬᠦ ᠦᠭᠡᠢ ᠪᠡᠷ ᠬᠡᠷᠡᠭ ᠪᠦᠲᠦᠬᠦ ᠦᠭᠡᠢ ᠳᠡ᠃ ᠪᠠᠶᠠᠨ ᠨᠠᠮᠠᠶ᠋ᠢ ᠣᠷᠣ ᠰᠠᠭᠤᠯᠭᠠᠬᠤ ᠲᠠᠯᠠ ᠪᠠᠷ ᠶᠠᠭᠠᠷᠠᠨ ᠲᠡᠭᠡ ᠢᠩᠭᠢ ᠭᠡᠵᠦ ᠠᠷᠭᠠ ᠮᠡᠬᠡ ᠵᠢᠭᠠᠬᠤ ᠦᠭᠡᠢ᠂ ᠬᠠᠷᠢᠨ ᠤᠭ ᠬᠡᠷᠡᠭ ᠲᠦ᠍ ᠢᠯᠳᠦ ᠶ᠋ᠢᠨ ᠬᠦᠴᠦ ᠪᠡᠷ ᠲᠤᠰᠠ ᠦᠵᠡᠭᠦᠯᠵᠦ ᠴᠢᠳᠠᠨᠠ᠃ ᠲᠡᠭᠡᠬᠦ ᠶᠠᠪᠤᠳᠠᠯ ᠳ᠋ᠤ᠌ ᠪᠠᠶᠠᠨ ᠢ᠋ ᠳᠤᠷᠠ ᠦᠭᠡᠢᠴᠡᠬᠦ ᠦᠭᠡᠢ ᠪᠣᠯᠭᠠᠬᠤ ᠬᠡᠷᠡᠭᠲᠡᠢ᠃ ᠡᠨᠡ ᠴᠤᠬᠠᠭ ᠬᠡᠷᠡᠭ ᠰᠢᠦ᠃ ᠣᠷᠣ ᠰᠠᠭᠤᠭᠰᠠᠨ ᠬᠣᠢᠨᠠ ᠪᠣᠯ ᠮᠢᠨᠦ ᠦᠭᠡᠨ ᠡᠴᠡ ᠭᠠᠷᠬᠤ ᠦᠭᠡᠢ ᠲᠡᠢᠮᠦ ᠯᠡ ᠡᠷᠡ᠃ ᠲᠡᠭᠡᠬᠦ ᠪᠡᠷ ᠪᠢ ᠪᠠᠶᠠᠨ ᠵᠠᠩᠵᠤᠨ ᠳ᠋ᠤ᠌ ᠣᠢᠷᠠ ᠳᠣᠲᠣᠨᠣ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠬᠤᠪᠢᠯᠠᠢ ᠨᠠᠢ ᠶᠤᠸᠠᠨ ᠪᠠᠭᠰᠢ ᠶ᠋ᠢ ᠪᠡᠨ ᠭᠠᠷᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠭᠠᠳ᠂ ᠪᠠᠷᠠ ᠪᠣᠯᠤᠭᠴᠢ ᠪᠠᠨ ᠳᠠᠭᠤᠳᠠᠵᠤ᠄
ᠴᠢ ᠣᠷᠣᠭᠰᠢ ᠪᠠᠨ ᠵᠠᠷᠤᠯᠭᠠ ᠮᠣᠷᠳᠠᠭᠤᠯᠤᠨ ᠪᠠᠶᠠᠨ ᠵᠠᠩᠵᠤᠨ ᠢ᠋ ᠭᠤᠷᠪᠠ ᠳᠥᠷᠪᠡ ᠬᠣᠨᠣᠭ ᠲᠤ᠌ ᠪᠠᠭᠲᠠᠨ ᠢᠷᠡᠵᠦ ᠠᠭᠤᠯᠵᠠ ᠭᠡᠵᠦ ᠳᠠᠭᠤᠳᠠᠭᠤᠯ ! ᠭᠡᠰᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠪᠠᠭᠠᠲᠤᠷ᠂ ᠴᠣᠯᠮᠣᠨᠲᠤᠶᠠᠭᠠ