ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠭᠤᠷᠪᠠᠳᠤᠭᠠᠷ ᠪᠦᠯᠦᠭ –1>᠂ ᠺᠠᠢᠫᠢᠩ ᠵᠣᠭᠣᠭ Бүргэд харьд үүрэлдэггүй – Ж᠂ Пүрэв <3-р бүлэг ~1>. кайпин зоог
17ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠴᠠᠭᠠᠨ ᠪᠡᠴᠢᠨ ᠵᠢᠯ
ᠨᠢᠭᠡ᠂ ᠺᠠᠢᠫᠢᠩ ᠵᠣᠭᠣᠭ
ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶᠡᠬᠡ ᠭᠣᠪᠢ ᠭᠡᠲᠦᠯᠦᠨ ᠰᠢᠭᠤᠳᠬᠠᠨ ᠳᠣᠪᠲᠣᠯᠤᠭᠰᠠᠭᠠᠷ ᠥᠪᠥᠷᠯᠡᠭᠴᠢ ᠨᠤᠲᠤᠭ ᠲᠤ ᠣᠷᠣᠵᠤ ᠢᠷᠡᠭᠡᠳ ᠲᠤᠯᠤᠨ ᠨᠠᠭᠤᠷ ᠤ᠋ᠨ ᠣᠷᠴᠢᠮ ᠳ᠋ᠤ᠌ ᠠᠬᠠ ᠮᠥᠩᠬᠡ ᠶ᠋ᠢᠨ ᠵᠠᠷᠯᠢᠬᠲᠠᠢ ᠪᠠᠷ ᠪᠠᠢᠭᠤᠯᠵᠤ ᠪᠣᠢ ᠰᠢᠨᠡ ᠬᠣᠲᠠ ᠳ᠋ᠤ᠌ ᠬᠦᠷᠦᠯᠴᠡᠨ ᠢᠷᠡᠪᠡ᠃ ᠲᠡᠭᠦᠨ ᠢ᠋ ᠳᠠᠭᠠᠯᠳᠤᠬᠤ ᠲᠦᠰᠢᠮᠡᠯ᠂ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠶᠠᠭᠤ ᠭᠡᠭᠴᠢ ᠪᠣᠯᠵᠤ ᠪᠠᠢᠨᠠ ᠪᠣᠢ ᠭᠡᠮᠡᠷ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠭᠤᠷᠪᠠᠨ ᠬᠥᠯᠲᠦ ᠬᠡᠢ ᠮᠣᠷᠢ᠂ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠪᠠᠷᠢᠨ᠂ ᠡᠯᠳᠡᠪ ᠳᠠᠭᠤ ᠲᠠᠢ ᠪᠦᠷᠢᠶᠡ ᠴᠠᠷᠭᠢᠭᠤᠯᠵᠤ᠂ ᠶᠡᠬᠡ ᠪᠠᠭᠠ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠩᠭᠡᠷᠭᠡ ᠪᠠᠯᠪᠠᠭᠰᠠᠭᠠᠷ ᠵᠢᠭᠲᠡᠢ ᠬᠥᠯ ᠪᠣᠯᠤᠨ ᠤᠭᠲᠤᠪᠠ᠃ ᠬᠣᠲᠠ ᠶ᠋ᠢᠨ ᠶᠡᠬᠡ ᠳᠠᠭᠠᠭᠠᠮᠠᠯ ᠸᠠᠩ ᠣᠪᠣᠭᠲᠤ ᠨᠣᠶᠠᠨ ᠬᠤᠪᠢᠯᠠᠢ ᠶ᠋ᠢᠨ ᠰᠡᠦᠬᠡ ᠲᠡᠷᠭᠡᠨ ᠦ᠌ ᠳᠡᠷᠭᠡᠳᠡ ᠢᠷᠡᠵᠦ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠨ᠂ ᠰᠢᠷᠭᠠᠯ ᠴᠢᠬᠢᠷᠰᠦᠨ ᠵᠠᠪᠳᠤᠩ ᠳᠡᠭᠡᠷᠡ ᠪᠠᠭᠤᠯᠭᠠᠵᠤ᠂ ᠬᠠᠳᠠᠭ ᠲᠠᠪᠠᠭ ᠲᠠᠢ ᠢᠳᠡᠭᠡ ᠳᠡᠯᠭᠡᠨ ᠲᠠᠯᠪᠢᠵᠤ ᠪᠠᠷᠢᠭᠠᠳ᠂ ᠵᠢᠭᠲᠡᠢ ᠶᠡᠬᠡ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠭᠡᠳ᠄
— ᠪᠣᠭᠣᠯᠴᠤᠳ ᠪᠢᠳᠡ ᠶᠡᠬᠡ ᠡᠵᠡᠨ ᠲᠠᠨ ᠤ᠋ ᠪᠠᠨ ᠠᠪᠤᠷᠠᠯ ᠥᠷᠥᠰᠢᠶᠡᠯ ᠳ᠋ᠦ᠍ ᠰᠥᠭᠥᠳᠦᠨ ᠪᠢᠰᠢᠷᠡᠵᠦ ᠪᠠᠢᠨᠠ! ᠭᠡᠵᠦ ᠥᠭᠦᠯᠡᠬᠦ ᠨᠢ ᠴᠢᠬᠢᠨ ᠳ᠋ᠦ᠍ ᠴᠢᠮᠡᠭᠡᠲᠡᠢ ᠪᠠᠢᠯᠠ᠃ ᠸᠠᠩ ᠣᠪᠣᠭᠲᠤ ᠲᠦᠰᠢᠮᠡᠯ ᠡᠨᠡ ᠰᠦᠷ ᠪᠠᠳᠠᠷᠠᠭᠠᠭᠰᠠᠨ ᠤᠭᠲᠤᠯᠲᠠ ᠶ᠋ᠢ ᠵᠣᠣ ᠪᠢ ᠲᠦᠰᠢᠮᠡᠯ ᠦ᠋ᠨ ᠵᠢᠭᠠᠪᠤᠷᠢ ᠪᠠᠷ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠪᠣᠢ ᠶ᠋ᠢ ᠬᠤᠪᠢᠯᠠᠢ ᠡᠨᠡ ᠤᠳᠠᠭᠠ ᠳ᠋ᠤ᠌ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃ ᠬᠣᠲᠠ ᠶ᠋ᠢᠨ ᠳᠠᠭᠠᠭᠠᠮᠠᠯ ᠵᠠᠬᠢᠷᠤᠭᠴᠢ ᠶ᠋ᠢ ᠵᠠᠳᠠᠭᠠᠢ ᠵᠢᠤᠵᠠᠨ ᠳ᠋ᠤ᠌ ᠰᠠᠭᠤᠯᠭᠠᠨ᠂ ᠣᠯᠠᠨ ᠬᠥᠮᠦᠨ ᠳᠠᠮᠨᠠᠵᠤ ᠨᠠᠮᠢᠯᠵᠠᠨ ᠶᠠᠪᠤᠵᠤ᠂ ᠰᠢᠨᠡ ᠬᠣᠲᠠ ᠶ᠋ᠢᠨ ᠲᠥᠪ ᠬᠡᠰᠡᠭ ᠲᠦ᠍ ᠪᠠᠢᠭᠠ ᠰᠢᠷᠭᠠᠯ ᠥᠩᠭᠡᠲᠡᠢ ᠲᠣᠭᠣᠰᠬᠠᠨ ᠣᠷᠳᠣᠨ ᠳ᠋ᠤ᠌ ᠠᠪᠠᠴᠢᠭᠠᠳ᠂ ᠬᠠᠮᠪᠤ ᠬᠢᠯᠢᠩ ᠢ᠋ᠶ᠋ᠡᠷ ᠥᠪᠴᠢ ᠳᠣᠲᠣᠷᠯᠠᠭᠰᠠᠨ ᠲᠠᠰᠤᠯᠭᠠ ᠲᠠᠢ᠂ ᠭᠢᠯᠠ ᠴᠢᠯᠡ ᠪᠣᠯᠤᠭᠰᠠᠨ ᠪᠠᠢᠷᠢᠨ ᠳ᠋ᠤ᠌ ᠪᠠᠭᠤᠯᠭᠠᠪᠠ᠃ ᠬᠦᠨᠳᠦᠳᠬᠡᠯ᠂ ᠡᠷᠭᠦᠮᠵᠢᠯᠡᠯ ᠢ᠋ ᠬᠦᠯᠢᠶᠡᠨ ᠠᠪᠴᠤ ᠶᠠᠮᠪᠠᠯᠠᠬᠤ ᠳᠤᠷᠠᠲᠠᠢ ᠡᠵᠡᠨ ᠵᠠᠬᠢᠷᠤᠭᠴᠢ ᠡᠨᠡ ᠳᠡᠭᠡᠳᠦᠯᠡᠭᠰᠡᠨ ᠪᠠᠢᠳᠠᠯ ᠢ᠋ ᠭᠠᠢᠬᠠᠨ ᠬᠠᠷᠠᠵᠤ᠂ ᠶᠠᠭᠤ ᠪᠣᠯᠬᠤ ᠭᠡᠵᠦ ᠪᠣᠢ ᠶ᠋ᠢ ᠨᠢ ᠠᠵᠢᠭᠯᠠᠨ ᠪᠠᠢᠯᠠ᠃
ᠬᠣᠲᠠ ᠶ᠋ᠢᠨ ᠳᠠᠭᠠᠭᠠᠮᠠᠯ ᠰᠢᠨᠡ ᠣᠷᠳᠣᠨ ᠢ᠋ᠶ᠋ᠠᠨ ᠬᠤᠪᠢᠯᠠᠢ ᠳ᠋ᠤ᠌ ᠦᠵᠡᠭᠦᠯᠪᠡ᠃ ᠠᠯᠲᠠ ᠮᠥᠩᠭᠥᠨ ᠵᠦᠮᠪᠦᠷᠲᠦ ᠬᠡ ᠤᠭᠠᠯᠵᠠ᠂ ᠳᠣᠪᠣᠢᠯᠭᠠᠨ ᠨᠠᠭᠠᠵᠤ ᠬᠢᠭᠰᠡᠨ ᠡᠯᠳᠡᠪ ᠠᠮᠢᠲᠠᠨ ᠤ᠋ ᠳᠦᠷᠰᠦ ᠪᠡᠷ ᠳᠣᠲᠣᠷᠠ ᠭᠠᠳᠠᠨᠠ ᠦᠭᠡᠢ ᠭᠤᠶᠤᠵᠤ ᠪᠠᠷᠢᠭᠰᠠᠨ ᠲᠡᠷᠡ ᠨᠢᠭᠡᠨ ᠳᠥᠴᠢ ᠲᠠᠪᠢᠨ ᠥᠷᠥᠭᠡ ᠲᠠᠰᠤᠯᠭᠠ ᠪᠦᠬᠦᠢ ᠪᠠᠢᠰᠢᠩ ᠨᠢ《ᠲᠩᠷᠢ ᠳ᠋ᠦ᠍ ᠳ᠋ᠧᠪᠠᠵᠠᠨ ᠭᠡᠳᠡᠭ ᠰᠠᠢᠬᠠᠨ ᠶᠠᠭᠤᠮᠠ ᠪᠠᠢᠳᠠᠭ ᠭᠡᠭᠴᠢ ᠶ᠋ᠢ ᠠᠷᠭᠠ ᠦᠭᠡᠢ ᠰᠠᠨᠠᠭᠳᠠᠭᠤᠯᠤᠭᠰᠠᠨ᠃ ᠥᠪᠡᠷ ᠢ᠋ ᠪᠡᠨ ᠪᠦᠬᠦᠢᠯᠡ ᠵᠠᠬᠢᠷᠤᠭᠴᠢ ᠡᠵᠡᠨ ᠨᠠᠳᠠᠳᠤ ᠡᠢᠮᠦ ᠶᠠᠭᠤᠮᠠ ᠪᠠᠷᠢᠵᠤ ᠥᠭᠭᠦᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠳᠠ᠂ ᠬᠢᠲᠠᠳ ᠤ᠋ᠳ》 ᠭᠡᠰᠡᠨ ᠪᠣᠳᠣᠯ ᠢ᠋ ᠶᠡᠬᠡ ᠡᠵᠡᠨ ᠳ᠋ᠦ᠍ ᠲᠥᠷᠥᠭᠦᠯᠵᠦ ᠪᠢᠯᠡ᠃ ᠡᠨᠡ ᠪᠦᠬᠦᠨ ᠢ᠋ ᠮᠡᠷᠭᠡᠨ ᠪᠠᠭᠰᠢ ᠤᠬᠠᠭᠠᠨᠲᠤ ᠲᠦᠰᠢᠮᠡᠯ ᠵᠣᠣ ᠪᠢ ᠵᠢᠭᠠᠪᠤᠷᠢᠯᠠᠨ᠂ ᠮᠣᠩᠭᠣᠯ ᠳᠠᠭᠠᠭᠠᠮᠠᠯ ᠤ᠋ᠨ ᠵᠠᠬᠢᠷᠭᠠᠨ ᠳᠣᠣᠷᠠ ᠦᠷᠭᠦᠯᠵᠢᠯᠡᠨ ᠠᠵᠢᠯᠯᠠᠵᠤ ᠪᠣᠢ ᠬᠢᠲᠠᠳ ᠤᠷᠠᠴᠤᠳ ᠬᠢᠵᠦ ᠪᠠᠢᠭᠠ ᠶ᠋ᠢ ᠬᠤᠪᠢᠯᠠᠢ ᠤᠷᠢᠳ ᠠ᠋ᠴᠠ ᠮᠡᠳᠡᠵᠦ ᠪᠠᠢᠯᠠ᠃ ᠸᠠᠩ ᠣᠪᠣᠭᠲᠤ ᠳᠠᠭᠠᠭᠠᠮᠠᠯ ᠡᠵᠡᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠥᠯ ᠦ᠋ᠨ ᠳᠣᠣᠷᠠ ᠰᠥᠭᠥᠳᠦᠨ ᠭᠦᠶᠦᠬᠦ ᠳ᠋ᠦ᠍ ᠪᠡᠨ ᠲᠡᠭᠦᠨ ᠰᠢᠭ ᠳᠤᠭᠤᠯᠭᠠᠪᠤᠷᠢᠲᠠᠢ᠂ ᠲᠡᠭᠦᠨ ᠰᠢᠭ ᠦᠨᠡᠨᠴᠢ ᠪᠣᠭᠣᠯ ᠬᠠᠮᠢᠭᠠ ᠪᠠᠢᠬᠤ ᠪᠣᠢ ᠭᠡᠬᠦ ᠪᠡᠷ ᠪᠤᠶᠤ ᠬᠣᠷᠸᠠ ᠳ᠋ᠤ᠌ ᠬᠣᠪᠣᠷ ᠬᠥᠮᠦᠨ ᠦ᠌ ᠨᠢᠭᠡ ᠡᠨᠳᠡ ᠪᠠᠢᠨᠠ ᠭᠡᠰᠡᠨ ᠰᠡᠳᠬᠢᠯ ᠢ᠋ ᠬᠤᠪᠢᠯᠠᠢ ᠳ᠋ᠤ᠌ ᠲᠥᠷᠥᠭᠦᠯᠬᠦ ᠪᠡᠷ ᠪᠠᠢᠯᠠ᠃ ᠸᠠᠩ ᠣᠪᠣᠭᠲᠤ ᠶ᠋ᠢᠨ ᠳᠣᠣᠷᠠ ᠪᠠᠢᠭᠠ ᠵᠢᠵᠢᠭ ᠳᠠᠭᠠᠭᠠᠮᠠᠯ᠂ ᠵᠠᠷᠤᠴᠠ ᠨᠠᠷ ᠴᠤ᠌ ᠰᠢᠯᠪᠢᠭᠦᠷᠳᠡᠭᠰᠡᠨ ᠮᠡᠲᠦ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠪᠠᠷ ᠬᠤᠢᠯᠠᠷᠠ ᠭᠦᠶᠦᠵᠦ᠂ ᠪᠦᠬᠦᠨ ᠢ᠋ ᠪᠦᠲᠦᠭᠡᠵᠦ ᠪᠠᠢᠬᠤ ᠨᠢ ᠰᠣᠨᠢᠬᠠᠨ ᠠᠵᠢ᠃
ᠬᠤᠪᠢᠯᠠᠢ ᠶ᠋ᠢ ᠲᠣᠷᠭᠠᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ᠂ ᠽᠠᠨᠳᠠᠨ ᠮᠣᠳᠣᠨ ᠰᠢᠷᠡᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠰᠠᠭᠤᠭᠠᠳ《ᠱᠠᠨᠳᠦ᠋ᠩ ᠭᠠᠵᠠᠷ ᠤ᠋ᠨ ᠲᠤᠩᠭᠠᠭᠠᠮᠠᠯ ᠴᠠᠢ》 ᠵᠣᠭᠣᠭᠯᠠᠵᠤ ᠪᠠᠢᠲᠠᠯᠠ ᠨᠢ ᠵᠣᠣ ᠪᠢ ᠡᠷᠳᠡᠮᠲᠡᠨ ᠵᠢᠭᠠᠬᠠᠨ ᠠᠮᠢᠰᠬᠤᠭᠠᠳᠠᠭᠰᠠᠭᠠᠷ ᠣᠷᠣᠵᠤ ᠢᠷᠡᠵᠦ ᠳᠤᠬᠤ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠬᠠᠳᠬᠤᠬᠤ ᠳᠥᠭᠥᠨ ᠪᠥᠬᠥᠢᠵᠦ ᠬᠦᠨᠳᠦᠯᠡᠯ ᠢᠯᠡᠷᠬᠡᠢᠯᠡᠭᠡᠳ᠂ ᠠᠯᠤᠰ ᠤ᠋ᠨ ᠠᠶᠠᠨ ᠵᠠᠮ ᠳ᠋ᠤ᠌ ᠠᠯᠵᠢᠶᠠᠭᠰᠠᠨ ᠡᠰᠡᠬᠦ ᠶ᠋ᠢ ᠠᠰᠠᠭᠤᠨ ᠮᠡᠨᠳᠦᠯᠡᠵᠦ ᠤᠴᠠᠷᠠᠪᠠ᠃ ᠲᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠶ᠋ᠢᠨ ᠶᠠᠷᠢᠶᠠ ᠶᠡᠬᠡ ᠬᠤᠷᠠᠮᠳᠤᠯᠠᠭᠰᠠᠨ ᠢ᠋ ᠲᠣᠭᠠᠯᠠᠵᠤ ᠪᠠᠷᠠᠰᠢ ᠦᠭᠡᠢ᠃ ᠡᠷᠳᠡᠮᠲᠡᠨ ᠪᠥᠬᠥᠯᠵᠡᠨ ᠨᠠᠬᠢᠯᠵᠠᠭᠰᠠᠭᠠᠷ ᠲᠠᠨ ᠢ᠋ ᠤᠭᠲᠤᠬᠤ ᠳ᠋ᠤ᠌ ᠪᠡᠶᠡ ᠪᠡᠷ ᠣᠷᠣᠯᠴᠠᠵᠤ ᠴᠢᠳᠠᠯ ᠦᠭᠡᠢ ᠶᠣᠰᠣ ᠠᠯᠳᠠᠯᠠ᠃ ᠥᠷᠥᠰᠢᠶᠡᠵᠦ ᠬᠠᠢᠷᠠᠯᠠ! ᠭᠡᠮᠡᠨ ᠳᠠᠬᠢᠨ ᠪᠥᠬᠥᠯᠵᠡᠵᠦ ᠭᠤᠶᠤᠬᠤ ᠳ᠋ᠤ᠌ ᠨᠢ ᠵᠠᠬᠢᠷᠤᠭᠴᠢ ᠨᠡᠩ ᠳᠠᠭᠠᠯᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ᠄
— ᠲᠠ ᠮᠢᠨᠦ ᠪᠠᠭᠰᠢ᠃ ᠪᠠᠭᠰᠢ ᠪᠠᠭᠰᠢ ᠳ᠋ᠤ᠌ ᠪᠠᠨ ᠪᠦᠷ ᠠᠩᠬᠠᠨ ᠤ᠋ ᠬᠢᠲᠠᠳ《ᠪᠠᠭᠰᠢ》 ᠲᠤᠯᠠ ᠨᠠᠮᠠᠶ᠋ᠢ ᠤᠭᠲᠤᠬᠤ ᠶᠣᠰᠣ ᠦᠭᠡᠢ᠂ ᠬᠠᠷᠢᠨ ᠪᠢ ᠲᠠᠨ ᠳ᠋ᠤ᠌ ᠪᠠᠷᠠᠯᠬᠠᠬᠤ ᠶᠣᠰᠣᠲᠠᠢ ᠭᠡᠯᠡ᠃
— ᠲᠠ ᠲᠡᠭᠡᠵᠦ ᠪᠣᠯᠭᠣᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠡᠵᠡᠨ ᠲᠠ ᠪᠣᠯ ᠶᠡᠬᠡ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠲᠥᠯᠥᠭᠡᠨ ᠦ᠌ ᠵᠠᠬᠢᠷᠤᠭᠴᠢ᠂ ᠪᠦᠬᠦ ᠬᠢᠲᠠᠳ ᠣᠷᠣᠨ ᠢ᠋ ᠮᠡᠳᠡᠨ ᠵᠠᠬᠢᠷᠤᠭᠴᠢ ᠪᠣᠯᠬᠣᠷ ᠪᠢ ᠲᠠᠨ ᠢ᠋ ᠲᠤᠢᠯ ᠠ᠋ᠴᠠ ᠬᠦᠨᠳᠦᠳᠬᠡᠬᠦ ᠶᠣᠰᠣᠲᠠᠢ᠃ ᠲᠠᠨ ᠢ᠋ ᠬᠦᠨᠳᠦᠳᠬᠡᠬᠦ ᠦᠭᠡᠢ ᠬᠥᠮᠦᠨ ᠡᠨᠡ ᠭᠠᠵᠠᠷ ᠲᠤ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ ᠲᠠ ᠬᠢᠲᠠᠳ ᠣᠷᠣᠨ ᠢ᠋ ᠪᠦᠬᠦᠢᠯᠡ ᠳ᠋ᠦ᠍ ᠨᠢ ᠨᠢᠭᠡᠳᠬᠡᠵᠦ᠂ ᠲᠡᠭᠦᠨ ᠦ᠌ ᠢᠷᠭᠡᠳ ᠪᠣᠭᠣᠯᠴᠤᠳ ᠢ᠋ ᠳᠣᠷᠣᠢ ᠶᠠᠳᠠᠭᠤ ᠠᠵᠤ ᠪᠠᠢᠳᠠᠯ ᠠ᠋ᠴᠠ ᠠᠩᠭᠢᠵᠢᠷᠠᠭᠤᠯᠬᠤ ᠠᠷᠭᠠ ᠤᠬᠠᠭᠠᠨ ᠢ᠋ ᠨᠡᠭᠡᠭᠡᠵᠦ ᠪᠠᠢᠭᠠ ᠶ᠋ᠢ ᠮᠤᠩᠬᠠᠭ ᠪᠢ ᠬᠦᠷᠲᠡᠯᠡ ᠣᠢᠯᠠᠭᠠᠵᠤ ᠪᠠᠢᠭᠠ ᠪᠣᠯᠬᠣᠷ ᠬᠢᠲᠠᠳ ᠬᠥᠮᠦᠨ ᠪᠣᠯᠭᠠᠨ ᠲᠠᠨ ᠢ᠋ ᠳᠡᠭᠡᠳᠦᠯᠡᠨ ᠬᠦᠨᠳᠦᠯᠡᠬᠦ ᠶᠣᠰᠣᠲᠠᠢ ᠭᠡᠮᠡᠨ ᠰᠠᠢᠬᠠᠨ ᠦᠭᠡ ᠪᠡᠷ ᠴᠠᠳᠬᠠᠵᠤ ᠡᠬᠢᠯᠡᠪᠡ᠃ ᠡᠢᠮᠦ ᠶᠠᠷᠢᠶᠠ ᠬᠤᠪᠢᠯᠠᠢ ᠳ᠋ᠤ᠌ ᠲᠠᠭᠠᠰᠢᠶᠠᠭᠲᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃
ᠪᠠᠭᠰᠢ ᠱᠠᠪᠢ ᠬᠣᠶᠠᠷ ᠵᠡᠷᠭᠡᠴᠡᠨ ᠰᠠᠭᠤᠭᠠᠳ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠪᠣᠯᠤᠭᠰᠠᠨ ᠪᠦᠬᠦ ᠶᠠᠪᠤᠳᠠᠯ ᠢ᠋ ᠶᠠᠷᠢᠯᠴᠠᠨ᠂《ᠲᠤᠩᠭᠠᠭᠠᠮᠠᠯ ᠴᠠᠢ》 ᠤᠤᠭᠤᠵᠤ ᠡᠬᠢᠯᠡᠯᠡ᠃ ᠵᠣᠣ ᠪᠢ《ᠪᠠᠭᠰᠢ ᠶ᠋ᠢᠨ》 ᠤᠬᠠᠭᠠᠯᠢᠭ᠂ ᠳᠤᠭᠤᠯᠭᠠᠪᠤᠷᠢᠲᠠᠢ ᠶ᠋ᠢ ᠡᠵᠡᠨ ᠵᠠᠬᠢᠷᠤᠭᠴᠢ ᠮᠠᠭᠲᠠᠵᠤ ᠪᠠᠷᠠᠰᠢ ᠦᠭᠡᠢ ᠠᠵᠢ᠃
— ᠪᠢ ᠲᠠᠨ ᠤ᠋ ᠠᠷᠤ ᠠ᠋ᠴᠠ ᠰᠡᠳᠬᠢᠯ ᠶᠡᠬᠡ ᠵᠣᠪᠠᠵᠤ ᠪᠠᠢᠯᠠ᠃ ᠵᠠᠷᠢᠮ ᠳ᠋ᠤ᠌ ᠪᠠᠨ ᠵᠡᠭᠦᠳᠦᠯᠡᠭᠡᠳ᠁
—《ᠪᠠᠭᠰᠢ》 ᠲᠠ ᠶᠠᠭᠤᠨ ᠤ᠋ ᠤᠴᠢᠷ ᠲᠡᠭᠡᠵᠦ ᠰᠡᠳᠬᠢᠯ ᠵᠣᠪᠠᠨᠢᠮ ᠪᠢᠯᠡ? ᠭᠠᠢᠬᠠᠯᠲᠠᠢ ᠪᠠᠢᠨᠠ᠃
— ᠠᠢ᠂ ᠲᠠᠨ ᠢ᠋ ᠬᠣᠢᠲᠤ ᠵᠦᠭ ᠮᠣᠷᠢᠯᠠᠨ ᠶᠠᠪᠤᠬᠤ ᠳ᠋ᠤ᠌ ᠪᠣᠭᠣᠯ ᠪᠢ ᠪᠡᠶᠡ ᠴᠢᠯᠡᠭᠦᠷ ᠪᠠᠢᠭᠰᠠᠨ ᠪᠣᠯᠤᠭᠠᠳ ᠭᠦᠢᠴᠡᠳ ᠲᠠᠪᠠᠲᠠᠢ ᠶᠠᠷᠢᠵᠤ ᠴᠢᠳᠠᠭᠠ ᠦᠭᠡᠢ ᠳ᠋ᠦ᠍ ᠪᠡᠨ ᠵᠣᠪᠠᠭᠰᠠᠨ᠃ ᠬᠠᠮᠢᠭᠠ ᠰᠠᠢ ᠦᠭᠡᠢ ᠮᠠᠭᠤ ᠰᠠᠨᠠᠭᠠᠲᠠᠢ ᠬᠥᠮᠦᠨ ᠪᠠᠢᠳᠠᠭ ᠪᠣᠯᠬᠣᠷ ᠲᠠᠨ ᠳ᠋ᠤ᠌ ᠡᠪ ᠦᠭᠡᠢ ᠶᠠᠪᠤᠳᠠᠯ ᠢ᠋ ᠵᠠᠷᠢᠮ ᠥᠭᠡᠳᠡ ᠦᠭᠡᠢ ᠬᠥᠮᠦᠨ ᠬᠢᠵᠦ ᠣᠷᠬᠢᠬᠤ ᠪᠣᠢ ᠭᠡᠮᠡᠨ ᠪᠣᠳᠣᠬᠤ ᠠ᠋ᠴᠠ ᠶᠠᠰᠤ ᠬᠠᠪᠲᠠᠯᠵᠠᠵᠤ ᠪᠠᠢᠯᠠ᠃ ᠪᠢ ᠤᠭ ᠨᠢ ᠮᠣᠩᠭᠣᠯ ᠭᠠᠷᠤᠯ ᠤ᠋ᠨ ᠬᠥᠮᠦᠨ ᠪᠣᠯᠬᠣᠷ ᠢ᠋ᠶ᠋ᠠᠨ ᠡᠵᠡᠨ ᠲᠠᠨ ᠳ᠋ᠤ᠌ ᠪᠦᠬᠦ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠢᠳᠬᠦᠬᠦ ᠤᠴᠢᠷᠲᠠᠢ ᠪᠠᠨ ᠣᠭᠣᠷᠴᠤ ᠶᠠᠭᠠᠬᠢᠨ ᠪᠣᠯᠬᠤ ᠪᠢᠯᠡ᠃ ᠲᠠ ᠡᠭᠦᠨ ᠢ᠋ ᠮᠡᠳᠡᠳᠡᠭ ᠭᠡᠵᠦ ᠵᠣᠣ ᠪᠢ ᠶ᠋ᠢ ᠶᠠᠷᠢᠬᠤ ᠳ᠋ᠤ᠌ ᠬᠤᠪᠢᠯᠠᠢ ᠪᠠᠶᠠᠰᠬᠤᠯᠠᠩᠲᠠᠢ ᠴᠢᠷᠠᠢ ᠭᠠᠷᠭᠠᠨ ᠲᠡᠭᠦᠨ ᠢ᠋ ᠬᠠᠷᠠᠵᠤ ᠰᠠᠭᠤᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠵᠠᠬᠢᠷᠤᠭᠴᠢ ᠡᠨᠡ ᠲᠦᠰᠢᠮᠡᠯ ᠢ᠋ ᠬᠡᠳᠦᠢ ᠮᠣᠩᠭᠣᠯ 《ᠭᠠᠷᠤᠯᠲᠠᠢ 》 ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠬᠡᠯᠡᠳᠡᠭ᠂ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠭᠠᠷᠭᠠᠭᠤᠳ ᠰᠠᠢᠨ ᠢ᠋ ᠮᠡᠳᠡᠳᠡᠭ ᠪᠣᠯᠪᠠᠴᠤ ᠴᠣᠬᠣᠮ ᠬᠦ ᠤᠬᠠᠭᠠᠨ ᠪᠣᠳᠣᠯ ᠤ᠋ᠨ ᠢ᠋ᠶ᠋ᠠᠨ ᠤᠭ ᠲᠤ᠌ ᠬᠢᠲᠠᠳ ᠬᠥᠮᠦᠨ ᠢ᠋ ᠪᠤᠰᠤᠳ ᠠ᠋ᠴᠠ ᠢᠯᠡᠭᠦᠦ ᠥᠮᠥᠭᠯᠡᠨ ᠦᠵᠡᠳᠡᠭ᠂ ᠬᠢᠲᠠᠳ ᠣᠷᠣᠨ ᠢ᠋ ᠯᠡ ᠰᠠᠢᠨ ᠰᠠᠢᠬᠠᠨ ᠪᠠᠢᠯᠭᠠᠬᠤ ᠭᠡᠵᠦ ᠦᠨᠡᠨ ᠭᠣᠣᠯ ᠠ᠋ᠴᠠ ᠪᠠᠨ ᠴᠢᠷᠮᠠᠢᠵᠤ᠂ ᠲᠡᠷᠡ ᠰᠠᠨᠠᠭᠠ ᠪᠠᠨ ᠳᠠᠯᠳᠠᠭᠤᠷ ᠶᠠᠪᠤᠭᠤᠯᠳᠠᠭ ᠪᠠᠢᠳᠠᠯ ᠢ᠋ ᠨᠢ ᠪᠦᠷᠢᠨ ᠭᠠᠳᠠᠷᠯᠠᠵᠤ ᠮᠡᠳᠡᠭᠡ ᠦᠭᠡᠢ ᠪᠠᠢᠪᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠵᠣᠣ ᠪᠢ ᠥᠪᠡᠷ ᠲᠦ᠍ ᠨᠢ ᠶᠠᠭᠠᠬᠢᠪᠠᠴᠤ ᠪᠤᠷᠤᠭᠤ ᠰᠠᠨᠠᠬᠤ ᠦᠭᠡᠢ᠂ ᠬᠠᠷᠢᠨ ᠪᠠᠲᠤᠲᠠᠢ ᠥᠮᠥᠭᠯᠡᠨ ᠬᠠᠮᠠᠭᠠᠯᠠᠭᠴᠢ ᠪᠣᠯᠬᠤ ᠶ᠋ᠢ ᠨᠢ ᠬᠤᠪᠢᠯᠠᠢ ᠮᠡᠳᠡᠳᠡᠭ ᠡᠴᠡ ᠭᠠᠳᠠᠨᠠ ᠡᠨᠡ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠷᠳᠡᠮ ᠢ᠋ ᠬᠦᠨᠳᠦᠯᠡᠨ ᠦᠵᠡᠳᠡᠭ᠂ ᠲᠡᠭᠦᠨ ᠢ᠋ ᠨᠢ ᠥᠪᠡᠷ ᠲᠦ᠍ ᠪᠡᠨ ᠰᠢᠩᠭᠡᠭᠡᠵᠦ ᠠᠪᠬᠤ ᠰᠠᠨ ᠭᠡᠵᠦ ᠴᠢᠷᠮᠠᠢᠵᠤ ᠰᠢᠯᠦᠩᠭᠢᠲᠦᠨ ᠪᠠᠢᠳᠠᠭ ᠪᠢᠯᠡ᠃
— ᠪᠠᠭᠰᠢ ᠲᠠ ᠮᠢᠨᠦ ᠠᠷᠤ ᠠ᠋ᠴᠠ ᠰᠠᠨᠠᠭᠠ ᠵᠣᠪᠠᠭᠰᠠᠨ ᠤ᠋ ᠴᠣᠬᠣᠮ ᠨᠠᠷᠢᠨ ᠤᠴᠢᠷ ᠶᠠᠭᠤᠨ ᠳ᠋ᠤ᠌ ᠪᠠᠢᠪᠠ ? ᠪᠣᠯᠬᠢ ᠪᠢ ᠡᠭᠦᠨ ᠢ᠋ ᠮᠡᠳᠡᠬᠦ ᠰᠠᠨ ᠭᠡᠵᠦ ᠰᠡᠳᠬᠢᠯ ᠶᠠᠭᠠᠷᠠᠨ ᠬᠦᠰᠡᠵᠦ ᠪᠠᠢᠨᠠ᠃
— ᠠᠢ᠂ ᠶᠡᠬᠡ ᠵᠠᠬᠢᠷᠤᠭᠴᠢ ᠲᠠᠨ ᠤ᠋ ᠰᠡᠳᠬᠢᠯ ᠶᠠᠭᠠᠷᠠᠬᠤ ᠴᠢᠨᠢ ᠲᠦᠮᠡᠨ ᠵᠥᠪ᠃ ᠲᠠ ᠶᠡᠬᠡ ᠤᠬᠠᠭᠠᠨᠲᠠᠨ ᠪᠣᠯᠬᠣᠷ ᠤᠭ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠨᠠᠳᠠ ᠪᠠᠷ ᠬᠡᠯᠡᠭᠦᠯᠦᠯᠲᠡ ᠦᠭᠡᠢ ᠪᠣᠯᠭᠣᠭᠠᠵᠤ ᠪᠠᠢᠭᠠ ᠪᠢᠵᠡ᠃ ᠮᠢᠨᠦ ᠮᠤᠩᠬᠠᠭᠯᠠᠨ ᠪᠣᠳᠣᠬᠤ ᠳ᠋ᠤ᠌ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠡᠦᠲᠦ ᠶᠡᠬᠡ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠲᠡᠷᠡ ᠶᠠᠪᠤᠳᠠᠯ ᠡᠵᠡᠨ ᠲᠠᠨ ᠢ᠋ ᠴᠤ᠌ ᠬᠠᠮᠤᠷᠴᠤ ᠠᠪᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠪᠢ ᠰᠠᠨᠠᠪᠠᠯ ᠡᠵᠡᠨ ᠵᠠᠬᠢᠷᠤᠭᠴᠢ ᠲᠠ ᠡᠨᠡ ᠬᠡᠷᠡᠭ ᠲᠦ᠍ ᠮᠠᠰᠢ ᠯᠤᠲᠤ ᠤᠬᠠᠭᠠᠨ ᠵᠠᠷᠤᠬᠤ ᠶᠣᠰᠣᠲᠠᠢ᠃
— ᠮᠡᠷᠭᠡᠨ《ᠪᠠᠭᠰᠢ》 ᠲᠠ ᠴᠣᠬᠣᠮ ᠶᠠᠭᠤ ᠶ᠋ᠢ ᠪᠣᠯᠭᠣᠭᠠᠨ ᠡᠢᠮᠦ ᠵᠦᠢᠯ ᠢ᠋ ᠨᠠᠳᠠᠳᠤ ᠠᠢᠯᠠᠳᠤᠭᠠᠳ ᠪᠠᠢᠨᠠ ᠪᠣᠢ? ᠮᠢᠨᠦ ᠪᠣᠳᠣᠬᠤ ᠪᠠᠷ ᠮᠣᠩᠭᠣᠯ ᠶᠡᠬᠡ ᠭᠦᠷᠦᠨ ᠢ᠋ ᠲᠡᠷᠢᠭᠦᠯᠡᠬᠦ ᠬᠥᠮᠦᠨ ᠦ᠌ ᠲᠤᠬᠠᠢ ᠲᠠ ᠪᠣᠯᠭᠣᠭᠠᠵᠤ ᠪᠠᠢᠭᠠ ᠪᠣᠯᠪᠠ ᠤᠤ᠃ ᠲᠡᠷᠡ ᠨᠢ ᠶᠡᠬᠡ ᠨᠦᠰᠡᠷ ᠶᠠᠪᠤᠳᠠᠯ ᠪᠣᠯᠬᠤ ᠦᠭᠡᠢ ᠪᠡᠢᠯ ᠦᠭᠡᠢ ᠭᠡᠵᠦ ᠬᠤᠪᠢᠯᠠᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠤᠭ ᠤ᠋ᠨ ᠶᠡᠬᠡ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠭᠠ ᠵᠦᠢᠯ ᠢ᠋ᠶ᠋ᠡᠨ ᠢᠯᠡ ᠭᠠᠷᠭᠠᠬᠤ ᠦᠭᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠡᠯᠡᠪᠡᠯ ᠵᠣᠣ ᠣᠪᠣᠭᠲᠤ ᠡᠪᠦᠳᠦᠭ ᠢ᠋ᠶ᠋ᠡᠨ ᠳᠡᠰ ᠬᠢᠲᠡᠯᠡ ᠨᠢ ᠠᠯᠠᠭᠠᠳᠠᠵᠤ᠂ ᠵᠠᠬᠢᠷᠤᠭᠴᠢ ᠶ᠋ᠢᠨ ᠨᠢᠭᠤᠷ ᠥᠭᠡᠳᠡ ᠭᠠᠯ ᠠᠰᠠᠭᠠᠭᠰᠠᠨ ᠮᠡᠲᠦ ᠴᠣᠷᠭᠢᠨ ᠬᠠᠷᠠᠭᠠᠳ᠄
— ᠲᠠ ᠶᠠᠭᠤ ᠪᠣᠯᠭᠣᠭᠠᠵᠤ ᠢᠩᠭᠢᠵᠦ ᠬᠡᠯᠡᠨᠡ ᠪᠣᠢ? ᠶᠠᠭᠠᠬᠢᠭᠠᠳ《ᠨᠦᠰᠡᠷ ᠶᠡᠬᠡ ᠬᠡᠷᠡᠭ ᠳᠡᠭᠳᠡᠬᠦ ᠦᠭᠡᠢ》 ᠭᠡᠵᠦ᠂ ᠬᠠᠮᠤᠭ ᠤ᠋ᠨ ᠶᠡᠬᠡ ᠦᠢᠮᠡᠭᠡᠨᠲᠡᠢ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠡᠦᠲᠦᠮ ᠡᠴᠡ ᠲᠠᠨ ᠤ᠋ ᠡᠴᠢᠭᠡ ᠶ᠋ᠢᠨ ᠡᠦᠲᠦᠮ ᠳ᠋ᠦ᠍ ᠲᠥᠷᠥ ᠪᠠᠷᠢᠬᠤ ᠬᠡᠷᠡᠭ ᠰᠢᠯᠵᠢᠬᠦ ᠳ᠋ᠦ᠍ ᠪᠣᠯᠤᠭᠰᠠᠨ ᠠ᠋ᠴᠠ ᠳᠠᠪᠠᠭᠤ ᠭᠡᠬᠦ ᠡᠴᠡ ᠪᠢᠰᠢ ᠳᠤᠲᠠᠬᠤ ᠦᠭᠡᠢ ᠶᠡᠬᠡ ᠬᠡᠷᠡᠭ ᠳᠡᠭᠳᠡᠨᠡ᠃ ᠲᠡᠭᠡᠭᠡᠳ ᠪᠦᠬᠦ ᠭᠦᠷᠦᠨ ᠢ᠋ ᠬᠠᠮᠤᠷᠤᠭᠰᠠᠨ ᠶᠡᠬᠡ ᠦᠢᠮᠡᠭᠡᠨ ᠴᠤ᠌ ᠳᠡᠭᠳᠡᠵᠦ ᠮᠠᠭᠠᠳ ᠦᠭᠡᠢ᠃ ᠲᠡᠷᠡ ᠰᠠᠮᠠᠭᠤᠨ ᠶᠠᠪᠤᠳᠠᠯ ᠢ᠋ ᠠᠷᠢᠭᠤᠳᠬᠠᠨ ᠴᠢᠳᠠᠬᠤ ᠴᠣᠷ ᠤ᠋ᠨ ᠭᠠᠭᠴᠠ ᠤᠬᠠᠭᠠᠨᠲᠠᠨ ᠪᠣᠯ ᠲᠠ ᠯᠠ ᠪᠠᠢᠨᠠ᠃ ᠡᠭᠦᠨ ᠳ᠋ᠦ᠍ ᠠᠯᠭᠤᠷ ᠢ᠋ᠶ᠋ᠠᠷ ᠬᠠᠨᠳᠤᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠠᠭᠰᠢ ᠶ᠋ᠢ ᠪᠡᠨ ᠰᠢᠭᠤᠳᠬᠠᠨ ᠬᠡᠯᠡᠬᠦ ᠳ᠋ᠦ᠍ ᠨᠢ ᠬᠤᠪᠢᠯᠠᠢ ᠴᠢᠷᠠᠢ ᠪᠠᠨ ᠬᠤᠪᠢᠷᠠᠭᠠᠨ᠂ ᠲᠠᠩᠨᠠᠨ ᠬᠡᠯᠡᠳᠡᠭ 《ᠰᠢᠭᠦᠨ ᠲᠤᠩᠭᠠᠭᠠᠵᠤ ᠪᠣᠳᠣᠬᠤ ᠬᠡᠷᠡᠭᠲᠡᠢ》 ᠭᠡᠰᠡᠨ ᠦᠭᠡ ᠪᠡᠨ ᠥᠪᠡᠷ ᠲᠦ᠍ ᠪᠡᠨ ᠵᠣᠷᠢᠭᠤᠯᠵᠤ ᠬᠡᠯᠡᠯᠡ᠃ ᠡᠨᠡ ᠵᠠᠬᠢᠷᠤᠭᠴᠢ ᠬᠣᠢᠲᠤ ᠭᠠᠵᠠᠷ ᠠ᠋ᠴᠠ ᠺᠠᠢᠫᠢᠩ ᠢ᠋ ᠴᠢᠭᠯᠡᠨ ᠬᠡᠳᠦᠨ ᠬᠣᠨᠣᠭ ᠳᠠᠪᠬᠢᠬᠤ ᠰᠡᠦᠬᠡ ᠲᠡᠷᠭᠡᠨ ᠳᠣᠲᠣᠷᠠ ᠪᠠᠨ ᠭᠠᠭᠴᠠᠭᠠᠷ ᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ᠂ ᠲᠠᠭ ᠴᠢᠮᠡᠭᠡ ᠦᠭᠡᠢ ᠨᠢᠳᠦ ᠪᠡᠨ ᠠᠨᠢᠨ ᠡᠭᠦᠨ ᠢ᠋ ᠯᠡ ᠪᠣᠳᠣᠵᠤ᠂ ᠤᠭ ᠬᠡᠷᠡᠭ ᠢ᠋ ᠶᠠᠭᠠᠬᠢᠵᠤ ᠰᠢᠦ ᠠᠮᠠ ᠨᠡᠭᠡᠭᠡᠨ ᠪᠠᠭᠰᠢ ᠲᠠᠢ ᠪᠠᠨ ᠵᠥᠪᠯᠡᠯᠳᠦᠬᠦ ᠪᠢᠯᠡ ᠭᠡᠮᠡᠨ ᠪᠣᠳᠣᠭᠰᠠᠭᠠᠷ ᠶᠠᠪᠤᠭᠰᠠᠨ ᠢ᠋ ᠨᠢ ᠵᠣᠣ ᠪᠢ ᠲᠦᠰᠢᠮᠡᠯ ᠶᠠᠭ ᠤᠨᠤᠵᠤ ᠮᠡᠳᠡᠭᠰᠡᠨ ᠤᠴᠢᠷ ᠠ᠋ᠴᠠ ᠥᠪᠡᠷ ᠡᠴᠡ ᠨᠢ ᠤᠷᠢᠲᠠᠵᠤ ᠠᠮᠠ ᠨᠡᠭᠡᠭᠡᠨ ᠪᠠᠶᠠᠰᠬᠠᠪᠠ᠃
ᠬᠤᠪᠢᠯᠠᠢ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠦᠯᠢᠶᠡᠭᠰᠡᠨ ᠭᠦᠵᠡᠭᠡᠨ ᠦ᠌ ᠠᠮᠠ ᠶ᠋ᠢ ᠣᠩᠭᠣᠢᠯᠭᠠᠬᠤ ᠠᠳᠠᠯᠢ ᠲᠣᠮᠣ ᠦᠯᠢᠶᠡᠭᠡᠳ᠄
—《ᠪᠠᠭᠰᠢ》 ᠮᠢᠨᠢ! ᠨᠠᠮᠠᠶ᠋ᠢ ᠥᠷᠥᠰᠢᠶᠡᠬᠦ ᠪᠢᠵᠡ᠃ ᠡᠨᠡ ᠬᠡᠷᠡᠭ ᠦ᠋ᠨ ᠲᠠᠯᠠ ᠪᠠᠷ ᠮᠡᠷᠭᠡᠨ ᠤᠬᠠᠭᠠᠨᠲᠠᠨ ᠲᠠᠢ ᠪᠢ ᠲᠤᠰᠬᠠᠢᠯᠠᠨ ᠶᠠᠷᠢᠯᠴᠠᠮᠠᠷ ᠪᠠᠢᠨᠠ᠃ ᠲᠠ ᠪᠠᠰᠠ ᠥᠪᠡᠷ ᠦ᠋ᠨ ᠢᠲᠡᠭᠡᠯᠲᠦ ᠬᠥᠮᠦᠨ ᠢ᠋ᠶ᠋ᠡᠨ ᠡᠭᠦᠨ ᠳ᠋ᠦ᠍ ᠣᠷᠣᠯᠴᠠᠭᠤᠯᠤᠨ ᠵᠥᠪᠯᠡᠯᠳᠦᠵᠦ ᠪᠣᠯᠤᠨᠠ ᠰᠢᠦ ᠳᠡ ᠭᠡᠯᠡ᠃
ᠵᠥᠪᠯᠡᠬᠦ ᠲᠦᠰᠢᠮᠡᠯ ᠴᠤ᠌ ᠥᠪᠡᠷ ᠦ᠋ᠨ ᠦᠭᠡ ᠦᠨᠡᠨ ᠳ᠋ᠦ᠍ ᠬᠦᠷᠴᠦ ᠪᠠᠢᠭᠠ ᠳ᠋ᠤ᠌ ᠪᠡᠶᠡᠰᠦᠨ 《ᠴᠢᠮᠠᠶ᠋ᠢ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ᠂ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠬᠢᠲᠠᠳ ᠬᠠᠭᠠᠨ ᠪᠣᠯᠭᠠᠵᠤ ᠣᠷᠬᠢᠪᠠᠯ ᠮᠢᠨᠦ ᠰᠠᠨᠠᠭᠠ ᠭᠦᠢᠴᠡᠬᠦ ᠨᠢ ᠲᠡᠷᠡ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ᠂ ᠲᠣᠯᠣᠭᠠᠢ ᠪᠥᠬᠥᠢᠨ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠪᠡ᠃
ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠺᠠᠢᠫᠢᠩ ᠰᠠᠭᠤᠷᠢᠨ ᠤ᠋ ᠲᠡᠷᠢᠭᠦᠨ ᠳᠠᠭᠠᠭᠠᠮᠠᠯ᠂ ᠤᠷᠠᠨ ᠭᠠᠷᠲᠤ ᠸᠠᠩ ᠣᠪᠣᠭᠲᠤ ᠭᠠᠳᠠᠨᠠ ᠠ᠋ᠴᠠ ᠪᠠᠷᠠᠯᠬᠠᠨ ᠣᠷᠣᠵᠤ ᠢᠷᠡᠵᠦ ᠪᠥᠬᠥᠢᠨ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠭᠡᠳ᠄
— ᠡᠵᠡᠨᠲᠡᠨ ᠮᠢᠨᠢ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ ! ᠪᠣᠭᠣᠯ ᠪᠢ ᠳᠡᠭᠡᠳᠦᠰ ᠲᠠᠨ ᠳ᠋ᠤ᠌ ᠭᠦᠨᠴᠡᠭ ᠡᠷᠭᠦᠬᠦ ᠬᠦᠰᠡᠯ ᠲᠡᠢ ᠪᠠᠢᠨᠠ᠃ ᠲᠡᠷᠡ ᠭᠦᠨᠴᠡᠭ ᠪᠡᠯᠡᠨ ᠪᠣᠯᠤᠭᠰᠠᠨ᠃ ᠡᠵᠡᠨ ᠵᠠᠬᠢᠷᠤᠭᠴᠢ ᠲᠠᠨ ᠢ᠋ ᠰᠢᠳᠠᠷ ᠨᠣᠶᠠᠳ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠥᠴᠦᠬᠡᠨ ᠵᠣᠭᠣᠭ ᠲᠤ᠌ ᠮᠣᠷᠢᠯᠠᠨ ᠣᠷᠣᠬᠤ ᠶ᠋ᠢ ᠭᠤᠶᠤᠵᠤ ᠪᠠᠢᠨᠠ ! ᠭᠡᠵᠦ ᠬᠡᠯᠡᠭᠡᠳ᠂ ᠠᠯᠠᠭᠠ ᠳᠡᠯᠭᠡᠨ ᠪᠥᠬᠥᠢᠵᠦ ᠶᠣᠰᠣ ᠬᠢᠯᠡ᠃ ᠬᠤᠪᠢᠯᠠᠢ ᠶ᠋ᠢ ᠽᠠᠨᠳᠠᠨ ᠮᠣᠳᠣᠨ ᠲᠠᠪᠢᠯᠭᠠ ᠪᠦᠬᠦᠢ ᠰᠠᠷᠠᠭᠤᠯᠬᠠᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠭᠤᠯᠵᠤ᠂ ᠪᠤᠰᠤᠳ ᠠ᠋ᠴᠠ ᠢᠯᠭᠠᠷᠠᠬᠤ ᠥᠨᠳᠥᠷ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠯᠭᠠᠭᠠᠳ᠂ ᠡᠮᠦᠨᠡ ᠨᠢ ᠪᠠᠢᠭᠠ ᠰᠢᠷᠡᠭᠡᠨ ᠳᠡᠭᠡᠷᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠥᠩᠭᠡᠲᠡᠢ ᠡᠯᠳᠡᠪ ᠠᠮᠲᠠ ᠪᠦᠬᠦᠢ ᠰᠠᠢᠬᠠᠨ ᠦᠨᠦᠷᠲᠦ ᠬᠣᠭᠣᠯᠠ ᠠᠪᠴᠢᠷᠠᠨ ᠥᠷᠥᠵᠦ ᠴᠡᠢᠯᠡᠯᠡ᠃ ᠡᠨᠡ ᠵᠣᠭᠣᠭ ᠲᠤ᠌ ᠵᠣᠣ ᠪᠢ ᠲᠦᠰᠢᠮᠡᠯ᠂ ᠯᠢᠦ ᠪᠢᠩ ᠵᠦᠩ ᠵᠥᠪᠯᠡᠭᠴᠢ᠂ ᠬᠣᠣ ᠵᠢᠩ ᠡᠷᠳᠡᠮᠲᠡᠨ᠂ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢ ᠳᠠᠭᠠᠯᠳᠤᠨ ᠶᠠᠪᠤᠭᠠ ᠮᠣᠩᠭᠣᠯ ᠬᠣᠶᠠᠷ ᠨᠣᠶᠠᠨ ᠲᠡᠳᠦᠢᠬᠡᠨ ᠴᠥᠭᠡᠨ ᠬᠥᠮᠦᠨ ᠪᠠᠷᠠ ᠪᠣᠯᠤᠨ ᠪᠠᠢᠯᠴᠠᠪᠠ᠃ ᠭᠦᠨᠴᠡᠭ ᠲᠦ᠍ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠳᠠᠢᠯᠭᠠ ᠳ᠋ᠤ᠌ ᠪᠠᠨ ᠬᠡᠷᠡᠭᠯᠡᠳᠡᠭ ᠵᠢᠷᠠᠨ ᠲᠥᠷᠥᠯ ᠦ᠋ᠨ ᠬᠢᠲᠠᠳ ᠬᠣᠭᠣᠯᠠ᠂ ᠭᠠᠩᠭᠠᠷ ᠱᠠᠭᠠᠵᠠᠩ ᠲᠠᠪᠠᠭ᠂ ᠵᠠᠭᠠᠨ ᠤ᠋ ᠶᠠᠰᠤᠨ ᠰᠠᠪᠬᠠ ᠵᠡᠷᠭᠡ ᠬᠡᠷᠡᠭᠰᠡᠯ ᠢ᠋ᠶ᠋ᠡᠷ ᠴᠢᠮᠡᠭᠰᠡᠨ ᠠᠵᠢ᠃ ᠪᠠᠰᠠ ᠬᠢᠲᠠᠳ ᠲᠤ᠌ ᠠᠯᠳᠠᠷᠲᠠᠢ ᠪᠦᠷ ᠡᠷᠲᠡ 《ᠳᠡᠪᠡᠩ ᠭᠠᠯᠪᠠ ᠳ᠋ᠤ᠌ ᠭᠠᠷᠤᠭᠰᠠᠨ》 ᠭᠡᠭᠳᠡᠳᠡᠭ ᠠᠮᠲᠠᠲᠤ ᠰᠠᠷᠬᠤᠳ ᠢ᠋ ᠬᠤᠨᠳᠠᠭᠠᠯᠠᠵᠤ ᠲᠠᠯᠪᠢᠭᠰᠠᠨ ᠪᠠᠢᠪᠠ᠃ ᠲᠡᠭᠦᠨ ᠳ᠋ᠦ᠍ ᠦᠢᠯᠡᠴᠢᠯᠡᠵᠦ ᠪᠠᠢᠭᠠ ᠰᠢᠪᠡᠭᠴᠢᠨ ᠡᠮᠡᠰ ᠦ᠋ᠳ ᠦ᠋ᠨ ᠦᠵᠡᠰᠬᠦᠯᠡᠩ ᠭᠤᠸᠠ᠂ ᠬᠥᠳᠡᠯᠭᠡᠭᠡᠨ ᠨᠢ ᠨᠠᠭᠤᠷ ᠲᠤ᠌ ᠬᠥᠪᠦᠭᠰᠡᠨ ᠬᠤᠨ ᠠᠳᠠᠯᠢ ᠨᠠᠮᠪᠠᠷᠬᠠᠭ ᠠᠭᠠᠳ ᠤᠷᠠᠨ ᠬᠥᠳᠡᠯᠭᠡᠭᠡᠨ ᠲᠡᠢ ᠶ᠋ᠢ ᠪᠠᠷᠠᠰᠢ ᠦᠭᠡᠢ᠃
ᠵᠣᠭᠣᠭ ᠳᠡᠭᠡᠷᠡ ᠬᠣᠲᠠᠬᠠᠨ ᠤ᠋ ᠳᠠᠭᠠᠭᠠᠮᠠᠯ ᠸᠠᠩ ᠣᠪᠣᠭᠲᠤ ᠲᠦᠰᠢᠮᠡᠯ ᠶᠡᠬᠡ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠡᠯᠭᠡᠲᠡᠢ ᠦᠭᠡ ᠬᠡᠯᠡᠵᠦ ᠢᠷᠦᠭᠡᠯ ᠲᠠᠯᠪᠢᠬᠤ ᠳ᠋ᠤ᠌ ᠪᠠᠨ ᠨᠡᠩ ᠠᠯᠪᠠᠷᠬᠠᠭ᠂ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠨ ᠪᠣᠢ ᠶ᠋ᠢ ᠬᠠᠷᠠᠬᠤ ᠠ᠋ᠴᠠ ᠢᠯᠳᠠᠮ ᠶᠣᠰᠣᠷᠬᠠᠭ ᠠᠵᠢ᠃ ᠸᠠᠩ ᠣᠪᠣᠭᠲᠤ ᠶ᠋ᠢᠨ ᠥᠭᠦᠯᠡᠭᠰᠡᠨ ᠢ᠋ᠶ᠋ᠡᠷ ᠺᠠᠢᠫᠢᠩ ᠬᠣᠲᠠ ᠶ᠋ᠢᠨ ᠪᠣᠯᠤᠨ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠤᠷᠲᠤ ᠶ᠋ᠢ ᠪᠠᠷᠢᠬᠤ ᠠᠵᠢᠯ ᠳ᠋ᠤ᠌ ᠭᠤᠷᠪᠠ ᠠ᠋ᠴᠠ ᠲᠠᠪᠤᠨ ᠮᠢᠩᠭᠠᠨ ᠬᠥᠮᠦᠨ ᠡᠳᠦᠷ ᠰᠥᠨᠢ ᠦᠭᠡᠢ ᠡᠭᠡᠯᠵᠢ ᠪᠡᠷ ᠠᠵᠢᠯᠯᠠᠵᠤ ᠪᠠᠢᠭᠠ᠃ ᠠᠩᠬᠠᠨ ᠶᠡᠬᠡ ᠬᠠᠭᠠᠨ ᠮᠥᠩᠬᠡ ᠶ᠋ᠢᠨ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠨ ᠠᠪᠤᠮᠠᠭᠴᠠ ᠬᠣᠢᠲᠤ ᠬᠢᠲᠠᠳ ᠤ᠋ᠨ ᠬᠣᠲᠠ ᠲᠣᠰᠬᠣᠨ ᠨᠤᠭᠤᠳ ᠠ᠋ᠴᠠ ᠤᠷᠠᠨ ᠴᠢᠳᠠᠪᠤᠷᠢᠲᠠᠢ ᠬᠥᠮᠦᠰ ᠢ᠋ ᠠᠯᠪᠠᠲᠠᠨ ᠳᠠᠢᠴᠢᠯᠠᠵᠤ ᠬᠥᠳᠡᠯᠭᠡᠭᠰᠡᠨ ᠦ᠌ ᠳ᠋ᠦᠩ ᠳ᠋ᠦ᠍ ᠪᠠᠷᠢᠯᠭᠠ ᠪᠠᠷᠢᠬᠤ ᠠᠵᠢᠯ ᠶᠡᠬᠡ ᠰᠢᠭᠤᠷᠬᠠᠢ ᠪᠣᠯᠤᠭᠰᠠᠨ᠃ ᠡᠦᠲᠦ ᠵᠥᠪᠬᠡᠨ ᠰᠢᠪᠡᠷ ᠰᠢᠷᠣᠢ ᠵᠥᠭᠡᠭᠡᠳᠡᠭ ᠴᠢᠭᠢᠷᠰᠦᠨ ᠫᠣᠣᠯᠤᠤ ᠰᠠᠪᠠ ᠭᠡᠬᠦ ᠳ᠋ᠦ᠍ ᠯᠡ ᠭᠤᠷᠪᠠᠨ ᠮᠢᠩᠭᠠᠭᠠᠳ ᠪᠣᠢ ᠭᠡᠨᠡ᠃ ᠬᠢᠲᠠᠳ ᠬᠥᠮᠦᠰ ᠶᠡᠬᠡ ᠡᠵᠡᠨ ᠲᠠᠨ ᠳ᠋ᠤ᠌ ᠲᠠᠭᠠᠯᠠᠭᠳᠠᠬᠤ ᠤᠷᠲᠤ ᠬᠠᠷᠰᠢ ᠶ᠋ᠢ ᠪᠠᠢᠭᠤᠯᠬᠤ ᠶᠠᠪᠤᠳᠠᠯ ᠢ᠋ ᠳᠡᠭᠡᠳᠦ ᠶ᠋ᠢᠨ ᠵᠠᠶᠠᠭᠠ ᠭᠡᠵᠦ ᠦᠵᠡᠭᠰᠡᠨ᠃ ᠡᠨᠡ ᠬᠣᠲᠠᠬᠠᠨ ᠳ᠋ᠤ᠌ ᠶᠡᠬᠡ ᠡᠵᠡᠨ ᠳ᠋ᠦ᠍ ᠰᠢᠳᠠᠷᠯᠠᠳᠠᠭ᠂ ᠪᠠᠷᠠ ᠪᠣᠯᠳᠠᠭ ᠬᠡᠳᠦᠨ ᠵᠠᠭᠤᠨ ᠠᠢᠯ ᠰᠠᠭᠤᠬᠤ ᠪᠣᠯᠤᠨᠠ᠃ ᠬᠣᠲᠠ ᠶ᠋ᠢᠨ ᠪᠠᠷᠢᠯᠭᠠ ᠴᠠᠭᠠᠰᠢᠳᠠ ᠦᠷᠭᠦᠯᠵᠢᠯᠡᠨ᠂ ᠣᠷᠴᠢᠨ ᠳ᠋ᠤ᠌ ᠲᠡᠭᠰᠢ ᠰᠢᠯᠤᠭᠤᠨ ᠵᠠᠮ ᠲᠠᠯᠪᠢᠬᠤ᠂ ᠭᠠᠵᠠᠷ ᠤᠰᠤ ᠶ᠋ᠢ ᠵᠠᠰᠠᠵᠤ ᠮᠣᠳᠣ᠂ ᠨᠣᠭᠣᠭᠠ ᠴᠡᠴᠡᠭ ᠲᠠᠷᠢᠬᠤ᠂ ᠭᠣᠣᠯ ᠳ᠋ᠤ᠌ ᠬᠢᠮᠡᠯ ᠬᠦᠷᠬᠢᠷᠡ ᠪᠣᠷᠭᠢᠶᠠ ᠬᠢᠬᠦ ᠶᠡᠬᠡ ᠠᠵᠢᠯ ᠪᠣᠢ᠃ ᠲᠡᠷᠡ ᠪᠦᠬᠦᠨ ᠢ᠋ ᠪᠢᠳᠡᠨ ᠦ᠌ ᠬᠥᠮᠦᠰ ᠬᠣᠶᠠᠷ ᠵᠢᠯ ᠳ᠋ᠦ᠍ ᠪᠠᠭᠲᠠᠭᠠᠨ ᠳᠠᠭᠤᠰᠬᠠᠨᠠ᠃ ᠪᠢᠳᠡᠨ ᠦ᠌ ᠳᠠᠭᠠᠭᠠᠮᠠᠯ ᠮᠣᠩᠭᠣᠯ ᠨᠣᠶᠠᠳ ᠮᠠᠨ ᠢ᠋ ᠶᠡᠬᠡᠳᠡ ᠠᠩᠬᠠᠷᠤᠨ᠂ ᠰᠠᠨᠠᠭᠠ ᠦᠭᠡᠢ ᠪᠣᠳᠣᠭᠠ ᠦᠭᠡᠢ ᠪᠠᠢᠭᠠ ᠪᠦᠬᠦᠨ ᠢ᠋ ᠰᠠᠨᠠᠭᠤᠯᠵᠤ᠂ ᠲᠢᠭ ᠵᠢᠷᠤᠮ ᠢ᠋ ᠴᠢᠩᠳᠠ ᠪᠠᠢᠯᠭᠠᠳᠠᠭ ᠨᠢ ᠬᠢᠵᠦ ᠪᠠᠢᠭᠠ ᠠᠵᠢᠯ ᠢ᠋ ᠶᠡᠬᠡᠳᠡ ᠣᠷᠭᠢᠯᠤᠭᠤᠯᠤᠭᠰᠠᠨ᠁ ᠭᠡᠵᠦ ᠬᠡᠯᠡᠨ᠂ ᠮᠠᠭᠲᠠᠬᠤ ᠦᠭᠡ ᠪᠡᠨ ᠣᠯᠵᠤ ᠶᠠᠳᠠᠭᠰᠠᠨ ᠮᠡᠲᠦ ᠵᠦᠢᠯ ᠢ᠋ ᠲᠠᠢᠯᠪᠤᠷᠢᠯᠠᠨ ᠶᠠᠷᠢᠯᠠ᠃ ᠬᠤᠪᠢᠯᠠᠢ ᠶᠡᠬᠡᠮᠰᠦᠭ ᠴᠢᠷᠠᠢ ᠭᠠᠷᠭᠠᠨ ᠰᠠᠭᠤᠵᠤ ᠸᠠᠩ ᠣᠪᠣᠭᠲᠤ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠬᠠᠨᠤᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠲᠠᠢᠪᠤᠩ ᠬᠠᠷᠠᠵᠤ᠂ ᠡᠨᠡ ᠲᠡᠷᠭᠡᠨ ᠵᠦᠢᠯ ᠠᠰᠠᠭᠤᠨ ᠰᠣᠨᠢᠷᠬᠠᠵᠤ ᠪᠠᠢᠪᠠ᠃
ᠵᠣᠭᠣᠭ ᠤ᠋ᠨ ᠳᠠᠷᠠᠭᠠ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠭᠠᠳᠠᠭᠠᠯᠠᠨ᠂ ᠺᠡᠢᠫᠢᠩ ᠬᠣᠲᠠᠬᠠᠨ ᠤ᠋ ᠪᠠᠢᠳᠠᠯ ᠢ᠋ ᠰᠣᠨᠢᠷᠬᠠᠨ ᠦᠵᠡᠪᠡᠯ᠂ ᠶᠡᠬᠡ ᠣᠷᠳᠣᠨ ᠨᠢ ᠭᠠᠳᠠᠨᠠ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠳᠣᠲᠣᠷᠠᠬᠢ ᠠ᠋ᠴᠠ ᠪᠠᠨ ᠳᠤᠲᠠᠭᠤ ᠦᠭᠡᠢ ᠭᠣᠶᠣ ᠦᠵᠡᠰᠬᠦᠯᠡᠩᠲᠡᠢ᠂ ᠤᠷᠲᠤ ᠶ᠋ᠢ ᠲᠣᠭᠣᠷᠢᠨ ᠶᠡᠬᠡ ᠴᠡᠴᠡᠷᠯᠢᠭ ᠪᠠᠢᠭᠤᠯᠵᠤ᠂ ᠲᠣᠮᠣ ᠬᠠᠰᠢᠶᠠᠨ ᠤ᠋ ᠡᠩ ᠢ᠋ᠶ᠋ᠡᠷ ᠥᠩᠭᠡ ᠪᠦᠷᠢ ᠶ᠋ᠢᠨ ᠴᠡᠴᠡᠭ ᠲᠡᠢ ᠮᠣᠳᠣᠳ ᠰᠠᠭᠤᠯᠭᠠᠨ ᠤᠷᠭᠤᠭᠤᠯᠤᠨ᠂ ᠪᠤᠭᠤ ᠰᠤᠭᠤ᠂ ᠠᠷᠰᠯᠠᠨ ᠵᠠᠭᠠᠨ᠂ ᠪᠤᠰᠤᠳ ᠠᠩ ᠭᠥᠷᠦᠭᠡᠨ ᠦ᠌ ᠳᠦᠷᠰᠦ ᠶ᠋ᠢ ᠴᠢᠯᠠᠭᠤ ᠰᠢᠪᠠᠷ ᠢ᠋ᠶ᠋ᠠᠷ ᠪᠠᠷᠢᠨ᠂ ᠵᠠᠮ ᠤ᠋ᠨ ᠠᠭᠤᠯᠵᠠᠷ᠂ ᠵᠢᠵᠢᠭ ᠨᠠᠭᠤᠷ ᠤ᠋ᠳ ᠤ᠋ᠨ ᠵᠠᠬᠠ ᠪᠠᠷ ᠲᠠᠯᠪᠢᠵᠤ ᠵᠣᠭᠰᠣᠭᠠᠭᠰᠠᠨ ᠨᠢ ᠬᠠᠷᠠᠪᠠᠰᠤ ᠨᠢᠳᠦ ᠪᠤᠯᠢᠶᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠠᠵᠢ᠃ ᠬᠣᠲᠠᠬᠠᠨ ᠢ᠋ ᠨᠣᠭᠣᠭᠠᠨ ᠣᠢ᠂ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠢ᠋ᠶ᠋ᠡᠷ ᠪᠦᠷᠬᠦᠮᠡᠯ ᠪᠣᠯᠭᠠᠨ᠂ ᠨᠠᠭᠤᠷ ᠲᠣᠭᠣᠷᠢᠮ᠂ ᠭᠣᠣᠯ ᠭᠣᠷᠣᠬᠠ ᠪᠠᠷ ᠪᠠᠶᠠᠯᠢᠭ᠂ ᠦᠯᠡᠮᠵᠢ ᠦᠵᠡᠰᠬᠦᠯᠡᠩᠲᠡᠢ ᠪᠠᠢᠯᠭᠠᠬᠤ ᠭᠡᠵᠦ ᠲᠤᠰᠬᠠᠢ ᠵᠢᠷᠤᠭ ᠤ᠋ᠨ ᠳᠠᠭᠤ ᠠᠵᠢᠯᠯᠠᠵᠤ ᠪᠣᠢ ᠭᠡᠨᠡ᠃
ᠬᠤᠪᠢᠯᠠᠢ ᠡᠨᠡ ᠪᠦᠭᠦᠳᠡ ᠶ᠋ᠢ ᠬᠠᠷᠠᠭᠠᠳ《ᠬᠢᠲᠠᠳ ᠬᠥᠮᠦᠨ ᠪᠣᠯ ᠭᠠᠷ ᠲᠤ ᠪᠠᠨ ᠲᠣᠢᠮᠣ ᠦᠭᠡᠢ ᠶᠡᠬᠡ ᠤᠷᠠᠲᠠᠢ ᠠᠵᠢᠯᠴᠢ ᠪᠠᠢᠳᠠᠯᠲᠠᠢ ᠪᠠᠢᠨᠠ᠃ ᠲᠡᠷᠡ ᠤᠷᠠ ᠶ᠋ᠢ ᠨᠢ ᠭᠤᠶᠤᠯᠲᠠ ᠬᠦᠰᠡᠯᠲᠡ ᠪᠡᠷ ᠪᠢᠰᠢ᠂ ᠰᠢᠭᠤᠳ ᠵᠠᠬᠢᠷᠤᠨ ᠲᠤᠰᠢᠶᠠᠬᠤ ᠠᠷᠭᠠ ᠪᠠᠷ ᠬᠦᠴᠦᠯᠡᠨ ᠭᠠᠷᠭᠠᠭᠤᠯᠪᠠᠯ ᠵᠣᠬᠢᠰᠲᠠᠢ ᠶᠤᠮ ᠰᠢᠪ᠃ ᠬᠥᠮᠦᠨ ᠬᠣᠲᠠ ᠰᠠᠭᠤᠷᠢᠨ ᠪᠠᠢᠭᠤᠯᠵᠤ ᠲᠡᠭᠦᠨ ᠳ᠋ᠦ᠍ ᠪᠡᠨ ᠰᠠᠭᠤᠷᠢᠰᠢᠨ ᠰᠠᠭᠤᠪᠠᠯ ᠠᠮᠢ ᠵᠢᠭᠤᠬᠤ ᠳ᠋ᠤ᠌ ᠪᠠᠨ ᠢᠯᠡᠭᠦᠦ ᠲᠠᠭᠠᠲᠠᠢ ᠪᠠᠢᠮᠠᠷ ᠠᠵᠢ᠃ ᠶᠡᠷᠦ ᠨᠢ ᠬᠥᠮᠦᠨ ᠨᠢᠭᠡ ᠭᠠᠵᠠᠷ ᠲᠤ ᠰᠠᠭᠤᠷᠢᠰᠢᠨ᠂ ᠣᠷᠣᠨ ᠭᠡᠷ ᠪᠠᠷᠢᠪᠠᠯ ᠲᠡᠭᠦᠨ ᠢ᠋ ᠪᠡᠨ ᠦᠷᠭᠦᠯᠵᠢᠳᠡ ᠥᠭᠡᠳᠡ ᠲᠡᠳᠡᠨ᠂ ᠶᠠᠭᠤ ᠣᠯᠤᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠨᠡᠮᠡᠷᠢᠯᠡᠭᠦᠯᠵᠦ ᠪᠠᠢᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠨᠢᠭᠡ ᠮᠣᠳᠣᠨ ᠤ᠋ ᠮᠥᠴᠢᠷ ᠣᠯᠳᠠᠭᠰᠠᠨ ᠴᠤ᠌ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠨ ᠲᠠᠷᠢᠵᠤ ᠤᠷᠭᠤᠭᠤᠯᠤᠨᠠ᠃ ᠨᠢᠭᠡ ᠬᠦᠷᠵᠡ ᠰᠢᠪᠡᠷ ᠣᠯᠤᠭᠰᠠᠨ ᠴᠤ᠌ ᠪᠠᠢᠰᠢᠩ ᠳ᠋ᠤ᠌ ᠪᠠᠨ ᠨᠡᠮᠡᠷᠢᠯᠡᠨ ᠨᠠᠭᠠᠵᠤ ᠳᠤᠯᠠᠭᠠᠯᠠᠨᠠ᠃ ᠰᠠᠭᠤᠷᠢᠨ ᠭᠠᠵᠠᠷ ᠤ᠋ᠨ ᠬᠥᠮᠦᠨ ᠦ᠌ ᠠᠵᠤ ᠲᠥᠷᠥᠬᠦ ᠪᠠᠢᠳᠠᠯ ᠨᠢ ᠢᠯᠡᠭᠦᠦ ᠲᠣᠬᠢᠲᠠᠢ ᠪᠣᠯᠤᠯᠲᠠᠢ》 ᠭᠡᠵᠦ ᠪᠣᠳᠣᠭᠰᠠᠨ ᠪᠠᠢᠨᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠨᠢ ᠲᠠᠷᠢᠶᠠ ᠨᠣᠭᠣᠭᠠ ᠶ᠋ᠢ ᠡᠷᠬᠢᠯᠡᠳᠡᠭ ᠦᠭᠡᠢ᠂ ᠮᠠᠯ ᠮᠠᠯᠯᠠᠨ ᠠᠵᠤ ᠲᠥᠷᠥᠳᠡᠭ ᠪᠣᠯᠬᠣᠷ ᠲᠡᠷᠡ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠪᠡᠯᠴᠢᠭᠡᠷ ᠢ᠋ ᠳᠠᠭᠠᠨ ᠨᠡᠭᠦᠵᠦ ᠪᠠᠢᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠤᠴᠢᠷ ᠪᠣᠢ᠃ ᠲᠡᠭᠡᠬᠦ ᠪᠡᠷ ᠮᠠᠯ᠂ ᠲᠠᠷᠢᠶᠠ ᠬᠣᠶᠠᠷ ᠢ᠋ ᠬᠣᠣᠰᠯᠠᠭᠤᠯᠪᠠᠯ ᠬᠠᠮᠤᠭ ᠤ᠋ᠨ ᠰᠠᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠵᠤ ᠲᠥᠷᠥᠬᠦ ᠶᠣᠰᠣᠲᠠᠢ ᠪᠣᠯᠬᠤ ᠨᠢ ᠭᠡᠮᠡᠨ ᠵᠠᠬᠢᠷᠤᠭᠴᠢ ᠰᠢᠪᠡᠨᠡᠨ ᠥᠪᠡᠷ ᠲᠦ᠍ ᠪᠡᠨ ᠬᠡᠯᠡᠵᠦ ᠪᠠᠢᠯᠠ᠃
ᠬᠤᠪᠢᠯᠠᠢ ᠴᠢᠯᠡᠭᠦᠷ ᠲᠠᠢᠯᠤᠨ ᠨᠢᠭᠡᠨ ᠬᠣᠨᠣᠭ ᠣᠷᠳᠣᠨ ᠳ᠋ᠤ᠌ ᠪᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠦ᠋ᠨ ᠪᠠᠭᠰᠢ᠂ ᠵᠥᠪᠯᠡᠭᠴᠢ᠂ ᠡᠷᠳᠡᠮᠲᠡᠨ ᠨᠠᠷ ᠲᠠᠢ ᠬᠡᠷᠡᠭ ᠵᠥᠪᠯᠡᠯᠳᠦᠬᠦ ᠪᠣᠯᠪᠠ᠃ ᠣᠷᠳᠣᠨ ᠤ᠋ ᠬᠠᠮᠪᠤ ᠬᠢᠯᠢᠩ ᠳᠣᠲᠣᠷᠲᠠᠢ ᠰᠠᠷᠠᠭᠤᠯ ᠲᠢᠩᠬᠢᠮ ᠳ᠋ᠦ᠍ ᠶᠡᠬᠡ ᠵᠠᠬᠢᠷᠤᠭᠴᠢ ᠴᠥᠭᠡᠨ ᠬᠥᠮᠦᠨ ᠣᠷᠣᠭᠤᠯᠵᠤ᠂ ᠣᠳᠣ ᠳᠠᠷᠤᠢ ᠬᠢᠬᠦ ᠬᠡᠷᠡᠭ ᠦ᠋ᠨ ᠢ᠋ᠶ᠋ᠡᠨ ᠲᠠᠯᠠ ᠪᠠᠷ ᠵᠥᠪᠯᠡᠯᠳᠦᠬᠦ ᠪᠣᠯᠤᠯᠠ᠃ ᠡᠨᠳᠡ ᠮᠣᠩᠭᠣᠯ ᠲᠦᠰᠢᠮᠡᠯ ᠬᠣᠶᠠᠷ᠂ ᠬᠢᠲᠠᠳ ᠪᠣᠯᠤᠨ ᠮᠣᠩᠭᠣᠯ ᠭᠠᠷᠤᠯᠲᠠᠢ ᠬᠢᠲᠠᠳ ᠲᠦᠰᠢᠮᠡᠯ ᠳᠥᠷᠪᠡ ᠶ᠋ᠢᠨ ᠵᠡᠷᠭᠡ᠂ ᠪᠠᠰᠠ ᠴᠠᠭᠠᠨ ᠵᠠᠩᠵᠤᠨ ᠪᠠᠢᠪᠠ᠃ ᠵᠣᠣ ᠪᠢ ᠬᠤᠪᠢᠯᠠᠢ ᠶ᠋ᠢ ᠠᠩᠬᠠᠨ ᠶᠡᠬᠡ ᠵᠠᠬᠢᠷᠤᠭᠴᠢ ᠪᠠᠷ ᠲᠣᠮᠢᠯᠠᠭᠳᠠᠨ ᠬᠢᠲᠠᠳ ᠨᠤᠲᠤᠭ ᠲᠤ ᠬᠦᠷᠦᠯᠴᠡᠨ ᠢᠷᠡᠬᠦ ᠳ᠋ᠦ᠍ ᠯᠡ ᠤᠭᠲᠤᠨ ᠠᠭᠤᠯᠵᠠᠵᠤ ᠡᠯᠢᠭᠡᠰᠡᠭ ᠰᠡᠳᠬᠢᠯ ᠭᠠᠷᠭᠠᠨ᠂ ᠡᠨᠡ ᠣᠷᠣᠨ ᠤ᠋ ᠪᠠᠢᠳᠠᠯ᠂ ᠬᠥᠮᠦᠨ ᠣᠯᠠᠨ ᠤ᠋ ᠠᠵᠤ ᠲᠥᠷᠥᠳᠡᠭ ᠵᠠᠩᠰᠢᠯ᠂ ᠰᠡᠳᠬᠢᠯ ᠪᠣᠳᠣᠯ ᠢ᠋ ᠲᠠᠨᠢᠯᠴᠠᠭᠤᠯᠵᠤ ᠡᠬᠢᠯᠡᠭᠰᠡᠨ ᠪᠣᠯᠬᠣᠷ ᠵᠠᠬᠢᠷᠤᠭᠴᠢ ᠡᠨᠡ ᠲᠦᠰᠢᠮᠡᠯ ᠳ᠋ᠦ᠍ ᠢᠲᠡᠭᠡᠳᠡᠭ᠂ ᠴᠠᠭᠠᠳᠤᠬᠢ ᠨᠢ ᠢᠲᠡᠭᠡᠯ ᠠᠪᠬᠤ ᠪᠠᠷ ᠴᠤ᠌ ᠦᠨᠡᠨ ᠦᠭᠡ ᠬᠡᠯᠡᠭᠰᠡᠨ ᠬᠥᠮᠦᠨ ᠪᠢᠯᠡ᠃ ᠲᠡᠷᠡ ᠪᠡᠷ ᠥᠪᠡᠷ ᠢ᠋ ᠪᠡᠨ ᠬᠢᠲᠠᠳ ᠨᠡᠷᠡ ᠲᠡᠢ ᠮᠣᠩᠭᠣᠯ ᠬᠥᠮᠦᠨ ᠭᠡᠵᠦ ᠲᠠᠨᠢᠯᠴᠠᠭᠤᠯᠤᠨ ᠬᠡᠯᠡᠳᠡᠭ ᠨᠢ ᠦᠨᠡᠨ ᠪᠣᠯᠪᠠ ᠤᠤ ᠭᠡᠮᠡᠷ ᠠᠶᠠᠰᠲᠠᠢ᠂ ᠮᠣᠩᠭᠣᠯ ᠬᠡᠯᠡ ᠶ᠋ᠢ ᠭᠣᠴᠣ ᠰᠠᠢᠨ ᠮᠡᠳᠡᠳᠡᠭ ᠨᠢ ᠬᠤᠪᠢᠯᠠᠢ ᠳ᠋ᠤ᠌ ᠪᠦᠷ ᠴᠦ᠍ ᠶᠡᠬᠡ ᠲᠠᠭᠠᠯᠠᠭᠳᠠᠨ᠂ ᠲᠡᠭᠦᠨ ᠢ᠋ᠶ᠋ᠡᠷ ᠬᠡᠯᠡ ᠪᠢᠴᠢᠭ᠂ ᠲᠡᠦᠬᠡ᠂ ᠨᠡᠢᠭᠡᠮ ᠦ᠋ᠨ ᠲᠤᠬᠠᠢ ᠨᠣᠮ ᠵᠢᠭᠠᠯᠭᠠᠵᠤ᠂ ᠶᠣᠰᠣ ᠲᠥᠷᠥ ᠬᠢᠭᠡ ᠦᠭᠡᠢ ᠴᠦ᠍ ᠭᠡᠰᠡᠨ ᠪᠠᠭᠰᠢ ᠱᠠᠪᠢ ᠶ᠋ᠢᠨ ᠪᠠᠷᠢᠯᠳᠤᠯᠭᠠ ᠲᠠᠢ ᠪᠣᠯᠤᠭᠰᠠᠨ ᠪᠢᠯᠡ᠃ ᠵᠣᠣ ᠪᠢ ᠪᠠᠰᠠ ᠨᠢᠭᠡ ᠲᠣᠮᠣ ᠲᠤᠰᠠ ᠶ᠋ᠢ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠨᠢ ᠡᠷᠳᠡᠮᠲᠡᠢ᠂ ᠤᠬᠠᠭᠠᠲᠠᠢ᠂ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠮᠡᠷᠭᠡᠨ ᠭᠡᠵᠦ ᠬᠡᠯᠡᠵᠦ ᠪᠣᠯᠬᠤ ᠬᠡᠳᠦᠨ ᠬᠥᠮᠦᠨ ᠢ᠋ ᠬᠤᠪᠢᠯᠠᠢ ᠲᠠᠢ ᠲᠠᠨᠢᠯᠴᠠᠭᠤᠯᠤᠨ᠂ ᠲᠡᠳᠡᠨ ᠦ᠌ ᠪᠡᠨ ᠵᠠᠷᠢᠮ ᠢ᠋《ᠪᠠᠭᠰᠢ》᠂ ᠵᠥᠪᠯᠡᠭᠴᠢ ᠪᠣᠯᠭᠠᠭᠰᠠᠨ ᠨᠢ ᠲᠤᠩ ᠲᠠᠭᠠᠲᠠᠢ ᠬᠡᠷᠡᠭ ᠪᠠᠢᠯᠠ᠃
ᠵᠣᠣ ᠪᠢ ᠨᠢ ᠵᠥᠪᠬᠡᠨ ᠬᠤᠪᠢᠯᠠᠢ ᠳ᠋ᠤ᠌ ᠴᠤ᠌ ᠪᠢᠰᠢ᠂ ᠮᠥᠩᠬᠡ ᠬᠠᠭᠠᠨ ᠲᠡᠭᠦᠨ ᠢ᠋ ᠶᠡᠬᠡ ᠤᠬᠠᠭᠠᠲᠠᠢ ᠲᠣᠮᠣ ᠡᠷᠳᠡᠮᠲᠡᠢ ᠭᠡᠳᠡᠭ ᠢ᠋ ᠮᠡᠳᠡᠵᠦ᠂ ᠬᠢᠲᠠᠳ ᠭᠠᠵᠠᠷ ᠢᠷᠡᠭᠰᠡᠨ ᠳᠣᠣᠷᠠ ᠪᠠᠨ ᠳᠠᠭᠤᠳᠠᠭᠤᠯᠤᠨ ᠠᠭᠤᠯᠵᠠᠭᠠᠳ ᠴᠡᠢᠯᠡᠵᠦ ᠳᠠᠢᠯᠠᠨ ᠤᠴᠠᠷᠠᠵᠤ ᠤᠯᠠᠮ ᠢ᠋ᠶ᠋ᠠᠷ《ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠶᠠᠭᠠᠬᠢᠵᠤ ᠤᠳᠤᠷᠢᠳᠬᠤ ᠪᠣᠢ?》 ᠭᠡᠮᠡᠨ ᠠᠰᠠᠭᠤᠵᠤ ᠵᠥᠪᠯᠡᠯᠳᠦᠵᠦ ᠪᠠᠢᠭᠰᠠᠨ ᠤᠳᠠᠭᠠ ᠲᠠᠢ ᠠᠵᠢ᠃ ᠲᠡᠭᠡᠬᠦ ᠳ᠋ᠦ᠍ ᠡᠨᠡ ᠡᠷᠳᠡᠮᠲᠡᠨ ᠪᠢ ᠮᠤᠩᠬᠠᠭᠯᠠᠨ ᠰᠠᠨᠠᠪᠠᠯ《ᠤᠢᠳᠬᠠᠷ ᠭᠠᠰᠠᠯᠠᠩ ᠢ᠋ ᠠᠷᠢᠯᠭᠠᠵᠤ᠂ ᠤᠷᠪᠠᠭᠴᠢ ᠮᠠᠭᠤ ᠰᠠᠨᠠᠭᠠᠲᠠᠨ ᠢ᠋ ᠵᠠᠢᠯᠠᠭᠤᠯᠪᠠᠯ ᠪᠣᠯᠬᠤ ᠪᠢᠵᠡ》① ᠭᠡᠵᠦ ᠠᠢᠯᠠᠳᠬᠠᠵᠤ ᠪᠠᠢᠵᠠᠢ᠃
ᠡᠨᠡ ᠡᠷᠳᠡᠮᠲᠡᠨ ᠬᠤᠪᠢᠯᠠᠢ ᠳ᠋ᠤ᠌ ᠰᠢᠳᠠᠷᠯᠠᠵᠤ ᠡᠬᠢᠯᠡᠮᠡᠭᠴᠡ ᠪᠡᠨ ᠬᠣᠢᠲᠤ ᠬᠢᠲᠠᠳ ᠤ᠋ᠨ ᠡᠷᠳᠡᠮ ᠤᠬᠠᠭᠠᠲᠠᠢ ᠭᠡᠭᠳᠡᠬᠦ ᠬᠥᠮᠦᠰ ᠢ᠋ ᠰᠢᠭᠦᠨ ᠰᠤᠳᠤᠯᠵᠤ ᠦᠵᠡᠭᠡᠳ ᠸᠠᠩ ᠦ᠂ ᠶᠣᠣ ᠱᠤ᠌᠂ ᠬᠣᠣ ᠵᠢᠩ᠂ ᠨᠠᠢ ᠶᠤᠸᠠᠨ ᠨᠠᠷ ᠲᠠᠢ ᠰᠢᠨᠡ ᠡᠵᠡᠨ ᠢ᠋ᠶ᠋ᠡᠨ ᠲᠠᠨᠢᠯᠴᠠᠭᠤᠯᠵᠤ᠂ ᠲᠡᠳᠡᠨ ᠢ᠋ ᠣᠪᠣᠭᠠ ᠴᠣᠪᠤᠭᠠᠬᠠᠨ ᠢ᠋ᠶ᠋ᠠᠷ ᠶᠡᠬᠡ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠣᠢᠷᠠᠲᠤᠭᠤᠯᠤᠨ ᠰᠢᠳᠠᠷᠯᠠᠭᠤᠯᠤᠭᠰᠠᠨ ᠪᠢᠯᠡ᠃
ᠸᠠᠩ ᠦ② ᠨᠢ ᠨᠠᠰᠤ ᠠᠬᠢᠭᠰᠠᠨ᠂ ᠵᠢᠷᠭᠤᠭᠠᠲᠠᠢ ᠲᠠᠶᠠᠭ ᠪᠠᠷᠢᠭᠠᠳ ᠰᠠᠢᠪᠤᠩᠨᠠᠨ ᠶᠠᠪᠤᠳᠠᠭ᠂ ᠥᠯᠥᠨ ᠰᠢᠷᠠ ᠴᠢᠷᠠᠢᠲᠠᠢ᠂ ᠳᠠᠭᠤ ᠴᠥᠭᠡᠨᠲᠡᠢ ᠡᠷᠳᠡᠮᠲᠡᠨ ᠬᠥᠮᠦᠨ᠃ ᠲᠡᠷᠡ ᠪᠡᠷ ᠠᠮᠠᠨ ᠳᠣᠲᠣᠷᠠ ᠪᠠᠨ《ᠲᠩᠷᠢ ᠶ᠋ᠢᠨ ᠠᠪᠤᠷᠠᠯ ᠥᠷᠥᠰᠢᠶᠡᠲᠦᠭᠡᠢ》 ᠭᠡᠵᠦ ᠦᠭᠡᠯᠡᠵᠦ ᠶᠠᠪᠤᠨᠠ᠃ ᠮᠡᠷᠭᠡᠨ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠢ᠋ ᠬᠥᠮᠦᠨ ᠦ᠌ ᠤᠬᠠᠭᠠᠨ ᠤ᠋ ᠳᠡᠭᠡᠳᠦ ᠭᠡᠵᠦ ᠪᠠᠰᠠ ᠪᠣᠳᠣᠳᠠᠭ᠂ ᠮᠠᠨᠵᠤ᠂ ᠬᠠᠮᠨᠢᠭᠠᠨ ᠳ᠋ᠤ᠌ ᠳᠣᠲᠣᠷᠠ ᠪᠠᠨ ᠶᠡᠬᠡ ᠳᠤᠷᠠ ᠦᠭᠡᠢ᠂ ᠲᠡᠷᠡ ᠥᠰᠢᠶᠡ ᠪᠡᠨ ᠮᠣᠩᠭᠣᠯ ᠢ᠋ᠶ᠋ᠠᠷ ᠠᠪᠬᠠᠭᠤᠯᠬᠤ ᠡᠷᠡᠮᠡᠯᠵᠡᠯᠲᠡᠢ ᠠᠵᠢ᠃ ᠶᠣᠣ ᠱᠤ᠌ ᠨᠢ ᠬᠠᠯᠵᠠᠨ ᠲᠣᠯᠣᠭᠠᠢ ᠲᠠᠢ ᠥᠨᠳᠥᠷ ᠲᠤᠷᠠᠩᠬᠠᠢ ᠡᠷᠡ᠂ ᠬᠠᠤᠯᠢ ᠶ᠋ᠢᠨ ᠮᠡᠷᠭᠡᠵᠢᠯᠲᠡᠨ ᠪᠢᠯᠡ᠃ ᠲᠡᠷᠡ ᠪᠡᠷ ᠬᠤᠪᠢᠯᠠᠢ ᠳ᠋ᠤ᠌ ᠬᠢᠲᠠᠳ ᠢ᠋ ᠵᠠᠬᠢᠷᠬᠤ ᠠᠷᠭᠠ ᠭᠡᠭᠴᠢ ᠤᠬᠠᠭᠠᠨ ᠢ᠋ ᠵᠢᠭᠠᠨ ᠵᠥᠪᠯᠡᠵᠦ᠂ ᠬᠣᠵᠢᠮ ᠨᠢ《ᠶᠠᠷᠢᠵᠤ ᠡᠮᠬᠢᠳᠬᠡᠭᠰᠡᠨ ᠬᠠᠤᠯᠢ ᠶ᠋ᠢᠨ ᠪᠢᠴᠢᠭ》 ᠭᠡᠳᠡᠭ ᠨᠣᠮ ᠵᠣᠬᠢᠶᠠᠨ᠂ ᠲᠡᠷᠡ ᠨᠢ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠰᠢᠷᠡᠭᠡᠨ ᠦ᠌ ᠬᠢᠨᠢ ᠰᠤᠳᠤᠷ ᠪᠣᠯᠤᠨᠠ ᠭᠡᠳᠡᠭ ᠢ᠋ ᠬᠤᠪᠢᠯᠠᠢ ᠡᠨᠡᠬᠡᠨ ᠦᠶᠡ ᠳ᠋ᠦ᠍ ᠶᠠᠭᠠᠬᠢᠨ ᠭᠠᠳᠠᠷᠯᠠᠵᠤ ᠮᠡᠳᠡᠬᠦ ᠪᠢᠯᠡ᠃ ᠬᠣᠣ ᠵᠢᠩ③ ᠭᠡᠳᠡᠭ ᠥᠨᠳᠥᠷ ᠲᠤᠷᠠᠩᠬᠠᠢ ᠡᠷᠡ ᠬᠤᠪᠢᠯᠠᠢ ᠳ᠋ᠤ᠌ ᠦᠨᠡᠨᠴᠢ ᠰᠡᠳᠬᠢᠯ ᠲᠡᠢ ᠪᠣᠯᠤᠯᠲᠠᠢ᠃ ᠲᠡᠷᠡ ᠪᠡᠷ ᠲᠡᠦᠬᠡ ᠰᠤᠳᠤᠯᠳᠠᠭ᠂ ᠨᠠᠰᠤ ᠪᠠᠷ ᠳᠥᠴᠢ ᠡᠷᠭᠢᠮᠡ᠂ ᠬᠤᠪᠢᠯᠠᠢ ᠶ᠋ᠢ ᠬᠣᠢᠲᠤ ᠬᠢᠲᠠᠳ ᠤ᠋ᠨ ᠵᠠᠬᠢᠷᠤᠭᠴᠢ ᠪᠣᠯᠤᠯᠠ ᠭᠡᠳᠡᠭ ᠢ᠋ ᠮᠡᠳᠡᠮᠡᠭᠴᠡ ᠪᠡᠨ ᠲᠡᠭᠦᠨ ᠢ᠋ ᠰᠤᠳᠤᠯᠵᠤ ᠡᠬᠢᠯᠡᠭᠰᠡᠨ᠂ ᠪᠡᠶᠡ ᠶ᠋ᠢᠨ ᠪᠠᠢᠳᠠᠯ ᠨᠢ ᠥᠷᠭᠡᠨ ᠴᠡᠭᠡᠵᠢ ᠲᠡᠢ᠂ ᠮᠣᠩᠭᠣᠯ ᠬᠥᠮᠦᠨ ᠲᠡᠢ ᠲᠥᠰᠦᠭᠡᠲᠡᠢ᠂ ᠢᠯᠡ ᠴᠠᠭᠠᠨ ᠰᠡᠳᠬᠢᠯᠲᠡᠢ ᠡᠷᠡ ᠪᠢᠯᠡ᠃ ᠪᠠᠰᠠ ᠨᠠᠢ ᠶᠤᠸᠠᠨ ᠨᠡᠷᠡ ᠲᠡᠢ᠂ ᠫᠠᠭᠳᠠᠭᠠᠷ ᠨᠠᠮᠬᠠᠨ ᠨᠢᠷᠤᠭᠤ ᠲᠠᠢ᠂ ᠤᠷᠲᠤ ᠴᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠬᠡᠢᠰᠬᠡᠭᠰᠡᠨ ᠬᠢᠵᠢᠶᠡᠯ ᠨᠠᠰᠤᠨ ᠤ᠋ ᠨᠢᠭᠡ ᠡᠷᠳᠡᠮᠲᠡᠨ ᠵᠣᠣ ᠪᠢ ᠶ᠋ᠢᠨ ᠤᠷᠢᠵᠤ ᠵᠠᠯᠠᠭᠰᠠᠨ ᠢ᠋ᠶ᠋ᠠᠷ ᠡᠨᠳᠡ ᠢᠷᠡᠭᠰᠡᠨ ᠪᠠᠢᠪᠠ᠃ ᠨᠠᠢ ᠶᠤᠸᠠᠨ ᠨᠢ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠢ᠋ ᠵᠣᠣ ᠪᠢ ᠶ᠋ᠢᠨ ᠵᠢᠭᠠᠪᠤᠷᠢ ᠪᠠᠷ ᠬᠤᠪᠢᠯᠠᠢ ᠳ᠋ᠤ᠌ ᠵᠢᠭᠠᠵᠤ ᠡᠬᠢᠯᠡᠭᠰᠡᠨ᠂ ᠴᠠᠭᠠᠰᠢᠳᠠ ᠪᠠᠨ ᠯᠠᠪᠰᠢᠷᠠᠭᠤᠯᠤᠨ ᠵᠢᠭᠠᠬᠤ ᠲᠤᠰᠢᠶᠠᠯ ᠲᠠᠢ᠂ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠡ ᠶᠡᠬᠡ ᠮᠡᠷᠭᠡᠨ ᠦ᠌ ᠨᠣᠮᠯᠠᠯ ᠠ᠋ᠴᠠ ᠢᠯᠡᠭᠦᠦ ᠨᠣᠮ ᠰᠤᠷᠭᠠᠯ ᠬᠣᠪᠣᠷ ᠭᠡᠵᠦ ᠦᠵᠡᠳᠡᠭ᠂ ᠴᠢᠯᠠᠭᠤ ᠶ᠋ᠢ ᠪᠥᠭᠡᠷᠡᠩᠬᠡᠢ ᠪᠣᠯᠭᠠᠳᠠᠭ ᠤᠰᠤ ᠠᠳᠠᠯᠢ ᠡᠯᠡᠭᠡᠭᠰᠡᠭᠡᠷ ᠪᠠᠢᠭᠠᠳ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢ ᠬᠢᠲᠠᠳ ᠬᠥᠮᠦᠨ ᠪᠣᠯᠭᠠᠵᠤ ᠪᠣᠯᠤᠨᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠦᠵᠡᠳᠡᠭ᠂ ᠲᠡᠭᠦᠨ ᠳ᠋ᠦ᠍ ᠪᠡᠨ ᠢᠲᠡᠭᠡᠳᠡᠭ᠂ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠥᠷᠥᠰᠢᠶᠡ ᠭᠡᠰᠡᠨ ᠤᠳᠬᠠ ᠪᠠᠷ ᠰᠡᠪ ᠯᠠ ᠬᠢᠪᠡᠯ《ᠲᠥᠷᠥ ᠶ᠋ᠢᠨ ᠪᠠᠭᠠᠨᠠ ᠥᠷᠥᠰᠢᠶᠡ》 ᠭᠡᠵᠦ ᠵᠠᠯᠪᠠᠷᠢᠬᠤ ᠰᠢᠬᠠᠨ ᠬᠡᠯᠡᠳᠡᠭ ᠠᠵᠢ᠃
ᠵᠥᠪᠯᠡᠯᠳᠦᠭᠡᠨ ᠪᠣᠯᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠬᠣᠲᠠ ᠶ᠋ᠢᠨ ᠲᠡᠷᠢᠭᠦᠨ ᠳᠠᠭᠠᠭᠠᠮᠠᠯ ᠸᠠᠩ ᠣᠪᠣᠭᠲᠤ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠵᠣᠷᠢᠭᠤᠳᠠ ᠪᠠᠷ ᠪᠠᠷᠠᠯᠬᠠᠨ᠂ ᠳᠠᠬᠢᠵᠤ ᠠᠮᠤᠭᠤᠯᠠᠩ ᠢ᠋ ᠡᠷᠢᠭᠡᠳ ᠶᠡᠬᠡ ᠯᠡ ᠮᠡᠷᠡᠢᠵᠦ ᠬᠦᠴᠦ ᠭᠠᠷᠭᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠭᠡᠬᠦ ᠤᠤ᠂ ᠭᠦᠨ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠨ ᠪᠥᠬᠥᠢᠵᠦ᠄
— ᠡᠵᠡᠨᠲᠡᠨ ᠮᠢᠨᠢ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ! ᠡᠨᠡ ᠣᠷᠳᠣᠨ ᠢ᠋ ᠪᠣᠯᠤᠨ ᠬᠣᠲᠠᠬᠠᠨ ᠢ᠋ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠲᠠᠨ ᠤ᠋ ᠠᠬᠠ ᠳ᠋ᠤ᠌ ᠪᠣᠯᠤᠨ ᠶᠡᠬᠡ ᠵᠠᠬᠢᠷᠤᠭᠴᠢ ᠲᠠᠨ ᠤ᠋ ᠭᠡᠭᠡᠨ ᠣᠶᠤᠨ ᠳ᠋ᠤ᠌ ᠨᠡᠢᠴᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠮᠠᠨ ᠤ᠋ ᠪᠦᠬᠦ ᠠᠵᠢᠯ ᠤ᠋ᠨ ᠬᠥᠮᠦᠨ ᠬᠠᠮᠤᠭ ᠬᠦᠴᠦ᠂ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠢᠪᠬᠠᠨ ᠪᠠᠢᠵᠤ᠂ ᠶᠠᠳᠠᠷᠠᠯ ᠢ᠋ ᠲᠡᠪᠴᠢᠨ ᠵᠢᠳᠬᠦᠵᠦ ᠪᠠᠷᠢᠭᠰᠠᠨ ᠪᠢᠯᠡ᠃ ᠶᠡᠬᠡ ᠡᠵᠡᠨ ᠲᠠᠨ ᠤ᠋ ᠲᠠᠭᠠᠯᠠᠯ ᠳ᠋ᠤ᠌ ᠨᠡᠢᠴᠡᠵᠦ ᠪᠠᠢᠭᠠ ᠪᠣᠯ ᠡᠨᠡ ᠬᠣᠲᠠ ᠪᠠᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠨᠡᠢᠰᠯᠡᠯ ᠪᠣᠯᠭᠠᠨ᠂ ᠴᠠᠭ ᠦᠷᠭᠦᠯᠵᠢᠳᠡ ᠲᠤᠬᠠᠯᠠᠨ ᠮᠣᠷᠢᠯᠠᠵᠤ ᠪᠠᠢᠪᠠᠯ ᠪᠣᠭᠣᠯ ᠪᠢᠳᠡ ᠲᠩᠷᠢ ᠶ᠋ᠢᠨ ᠠᠪᠤᠷᠠᠯ ᠭᠡᠵᠦ ᠰᠦᠰᠦᠭᠯᠡᠬᠦ ᠪᠣᠯᠤᠨᠠ᠃ ᠳᠣᠣᠷᠠᠲᠤ ᠪᠣᠭᠣᠯ ᠪᠢᠳᠡᠨ ᠢ᠋ ᠪᠡᠨ ᠥᠷᠥᠰᠢᠶᠡᠨ ᠲᠠᠭᠠᠯᠠᠵᠤ ᠪᠣᠯᠭᠣᠭᠠ! ᠭᠡᠮᠡᠨ ᠬᠡᠯᠡᠭᠡᠳ ᠰᠦᠬᠦᠷᠴᠤ ᠮᠥᠷᠭᠥᠬᠦ ᠳ᠋ᠦ᠍ ᠪᠡᠨ ᠬᠡᠰᠢᠭ ᠱᠠᠩ ᠭᠣᠷᠢᠯᠠᠭᠰᠠᠨ ᠪᠢᠰᠢ᠂ ᠴᠠᠭᠠᠨᠠ ᠪᠠᠨ ᠳᠠᠯᠳᠠᠭᠤᠷ ᠨᠠᠷᠢᠨ ᠪᠣᠳᠣᠯ ᠡᠪᠦᠷᠯᠡᠭᠰᠡᠨ ᠢ᠋ ᠶᠠᠭᠠᠬᠢᠨ ᠳᠠᠭᠠᠵᠤ ᠮᠡᠳᠡᠬᠦ ᠪᠣᠢ᠃ ᠬᠤᠪᠢᠯᠠᠢ ᠸᠠᠩ ᠣᠪᠣᠭᠲᠤ ᠶ᠋ᠢᠨ ᠠᠢᠯᠠᠳᠬᠠᠯ ᠢ᠋ ᠰᠣᠨᠣᠰᠤᠭᠠᠳ ᠳᠠᠭᠠᠯᠠᠭᠰᠠᠨ ᠨᠢᠳᠦ ᠪᠡᠷ ᠬᠠᠷᠠᠵᠤ᠂ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠳᠠᠭᠠᠭᠠᠮᠠᠯ ᠴᠢᠨᠦ ᠦᠭᠡ ᠨᠠᠮᠠᠶ᠋ᠢ ᠳᠤᠯᠠᠭᠠᠴᠠᠭᠤᠯᠤᠨ ᠪᠠᠶᠠᠰᠬᠠᠵᠤ ᠪᠠᠢᠨᠠ᠃ ᠴᠢ ᠦᠨᠡᠬᠡᠷ ᠰᠠᠢᠬᠠᠨ ᠣᠷᠳᠣᠨ ᠪᠠᠷᠢᠭᠤᠯᠵᠠᠢ᠃ ᠡᠨᠡ ᠴᠢᠨᠢ ᠮᠢᠨᠦ ᠨᠡᠢᠰᠯᠡᠯ ᠪᠣᠯᠬᠤ ᠡᠰᠡᠬᠦ ᠶ᠋ᠢ ᠬᠣᠵᠢᠮ ᠤ᠋ᠨ ᠬᠡᠷᠡᠭ ᠶᠠᠪᠤᠳᠠᠯ ᠮᠡᠳᠡᠨᠡ ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠨᠠ᠃
— — — —
① ᠵᠣᠣ ᠪᠢ ᠢᠩᠭᠢᠵᠦ ᠥᠭᠦᠯᠡᠭᠰᠡᠨ ᠭᠡᠵᠦ《ᠶᠤᠸᠠᠨ ᠤᠯᠤᠰ ᠤ᠋ᠨ ᠰᠤᠳᠤᠷ》 ᠲᠤ ᠪᠢᠴᠢᠭᠰᠡᠨ ᠢ᠋ ᠮᠠᠨ ᠤ᠋ ᠲᠡᠦᠬᠡᠴᠢᠳ ᠡᠰᠢ ᠲᠡᠳᠡᠨ ᠬᠡᠯᠡᠬᠦ ᠳᠤᠷᠠᠲᠠᠢ ᠪᠠᠢᠳᠠᠭ᠃
② ᠡᠷᠳᠡᠮᠲᠡᠨ ᠸᠠᠩ ᠦ ᠶ᠋ᠢ《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠢ᠋ ᠮᠣᠩᠭᠣᠯ ᠬᠡᠯᠡᠨ ᠡᠴᠡ ᠬᠢᠲᠠᠳ ᠬᠡᠯᠡᠨ ᠳ᠋ᠦ᠍ ᠣᠷᠴᠢᠭᠤᠯᠤᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠰᠡᠨ ᠳᠠᠭᠠᠪᠤᠷᠢ ᠪᠠᠢᠳᠠᠭ ᠠᠵᠢ᠃ ᠲᠡᠷᠡ ᠪᠡᠷ ᠵᠣᠣ ᠪᠢ ᠠᠳᠠᠯᠢ ᠮᠣᠩᠭᠣᠯ ᠬᠡᠯᠡ ᠶ᠋ᠢ ᠭᠠᠷᠭᠠᠭᠤᠳ ᠮᠡᠳᠡᠳᠡᠭ ᠪᠠᠢᠵᠠᠢ᠃
③ ᠬᠣᠣ ᠵᠢᠩ ᠨᠢ《 ᠲᠥᠷᠥ ᠪᠠᠢᠭᠤᠯᠬᠤ ᠰᠠᠨᠠᠯ》 ᠭᠡᠳᠡᠭ ᠨᠣᠮ ᠪᠢᠴᠢᠭᠰᠡᠨ᠂ ᠬᠤᠪᠢᠯᠠᠢ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠲᠤ ᠡᠯᠴᠢ ᠪᠡᠷ ᠵᠠᠷᠤᠭᠳᠠᠨ ᠣᠴᠢᠭᠠᠳ ᠪᠠᠷᠢᠭᠳᠠᠨ᠂ ᠲᠡᠨᠳᠡ ᠪᠡᠨ16 ᠵᠢᠯ ᠱᠣᠷᠣᠩ ᠳ᠋ᠤ᠌ ᠬᠣᠷᠢᠭᠳᠠᠨ ᠪᠠᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ᠂ ᠴᠣᠯᠮᠣᠨᠲᠤᠶᠠᠭᠠ