ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠬᠣᠶᠠᠳᠤᠭᠠᠷ ᠪᠦᠯᠦᠭ –4>᠂ᠱᠠᠭᠠᠵᠠᠭᠠᠢ ᠶᠠᠭᠤ ᠥᠭᠦᠯᠡᠪᠡ Бүргэд харьд үүрэлдэггүй – Ж᠂ Пүрэв <2-р бүлэг ~4>. шаазгай юу өгүүлэв
43ᠬᠣᠶᠠᠳᠤᠭᠠᠷ ᠪᠦᠯᠦᠭ – ᠭᠣᠯᠣᠮᠲᠠ ᠳᠦᠰᠢᠬᠰᠡᠨ ᠡᠵᠡᠨ
ᠳᠥᠷᠪᠡ᠂ ᠱᠠᠭᠠᠵᠠᠭᠠᠢ ᠶᠠᠭᠤ ᠥᠭᠦᠯᠡᠪᠡ
ᠭᠠᠳᠠᠭᠠᠳᠤ ᠶ᠋ᠢᠨ ᠠᠯᠪᠠᠨ ᠤ᠋ ᠬᠥᠮᠦᠨ ᠲᠡᠢ ᠬᠠᠷᠢᠯᠴᠠᠬᠤ ᠲᠢᠭ ᠵᠢᠷᠤᠮ ᠨᠠᠷᠢᠨ᠂ ᠵᠥᠷᠢᠴᠡᠯ ᠭᠠᠷᠭᠠᠪᠠᠯ ᠬᠦᠯᠢᠶᠡᠬᠦ ᠪᠠᠭᠠᠯ ᠨᠢ ᠶᠡᠬᠡ ᠠᠵᠢ᠃ ᠲᠡᠷᠡ ᠪᠡᠷ ᠪᠠᠰᠠ ᠳᠣᠣᠷᠠ ᠨᠢ ᠵᠠᠷᠤᠭᠳᠠᠵᠤ ᠪᠠᠢᠬᠤ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠪᠠᠢᠩᠭᠤ ᠰᠠᠭᠤᠭᠠ ᠡᠯᠴᠢᠨ ᠰᠠᠢᠳ ᠤ᠋ᠳ ᠤ᠋ᠨ ᠬᠡᠷᠡᠭ ᠢ᠋ ᠵᠠᠯᠭᠠᠭᠤᠯᠬᠤ ᠳ᠋ᠤ᠌ ᠣᠷᠣᠯᠴᠠᠬᠤ ᠡᠭᠦᠷᠭᠡᠲᠡᠢ ᠪᠠᠭᠠ ᠲᠦᠰᠢᠮᠡᠯ ᠠᠷᠪᠠ ᠣᠷᠴᠢᠮ᠂ ᠪᠠᠭᠠ ᠲᠦᠰᠢᠮᠡᠯ ᠨᠠᠷ ᠬᠦᠯᠢᠶᠡᠭᠰᠡᠨ ᠭᠡᠷᠭᠡᠯ(ᠴᠠᠭᠳᠠᠭᠠ) ᠬᠥᠮᠦᠰ ᠦ᠋ᠨ ᠪᠦᠲᠦᠨ ᠬᠣᠷᠣᠭᠠ ᠪᠠᠢᠯᠠ᠃
ᠡᠳᠡᠨ ᠦ᠌ ᠳᠤᠮᠳᠠ ᠪᠢᠯᠢᠭᠦᠨ ᠲᠣᠷᠭᠠᠨ ᠬᠠᠨᠲᠠᠭᠠᠰᠤ ᠡᠮᠦᠰᠴᠦ᠂ ᠳᠦᠷᠢᠮᠲᠦ ᠬᠤᠪᠴᠠᠰᠤ ᠲᠠᠢ ᠶᠠᠪᠤᠵᠤ ᠪᠠᠢᠬᠤ ᠨᠢ ᠨᠢᠭᠡ ᠲᠠᠯᠠ ᠪᠠᠷ ᠰᠠᠢᠬᠠᠨ ᠴᠦ᠍ ᠶᠤᠮ ᠰᠢᠭ᠋ ᠮᠥᠷᠲᠡᠭᠡᠨ ᠶᠠᠯᠢᠬᠤ ᠦᠭᠡᠢ ᠣᠰᠣᠯ ᠭᠠᠷᠭᠠᠬᠤ᠂ ᠵᠢᠷᠤᠮ ᠲᠢᠭ ᠢ᠋ ᠠᠯᠳᠠᠭᠳᠠᠭᠤᠯᠬᠤ ᠳ᠋ᠤ᠌ ᠬᠦᠷᠪᠡᠯ ᠬᠦᠯᠢᠶᠡᠬᠦ ᠶᠠᠯᠠ ᠬᠥᠩᠭᠡᠨ ᠦᠭᠡᠢ ᠨᠢ ᠰᠡᠳᠬᠢᠯ ᠳ᠋ᠦ᠍ ᠵᠣᠪᠠᠭᠤᠷᠢ ᠲᠥᠷᠥᠭᠦᠯᠵᠦ ᠪᠠᠢᠪᠠ᠃
ᠭᠡᠯᠡ ᠴᠦ᠍ ᠡᠵᠡᠨ ᠪᠣᠭᠳᠠ ᠶ᠋ᠢᠨ ᠰᠤᠷᠭᠠᠭᠰᠠᠨ ᠶᠣᠰᠣᠭᠠᠷ《ᠡᠷᠡ ᠬᠥᠮᠦᠨ ᠭᠤᠯᠵᠠᠢᠬᠤ ᠶᠣᠰᠣ ᠦᠭᠡᠢ᠂ ᠲᠣᠩᠭᠣᠷᠠᠭ ᠮᠡᠲᠦ ᠬᠤᠷᠴᠠ᠂ ᠰᠤᠮᠤ ᠮᠡᠲᠦ ᠬᠤᠷᠳᠤᠨ ᠪᠠᠢᠵᠤ ᠲᠥᠷᠥ ᠳ᠋ᠦ᠍ ᠵᠢᠳᠬᠦᠬᠦ ᠡᠭᠦᠷᠭᠡᠲᠡᠢ》 ᠠᠵᠢ᠃
ᠡᠨᠡ ᠦᠭᠡ ᠶ᠋ᠢ ᠲᠦᠰᠢᠮᠡᠯ ᠨᠠᠷ ᠠᠮᠠᠨ ᠤᠩᠰᠢᠯᠭᠠ ᠠᠳᠠᠯᠢ ᠬᠡᠯᠡᠳᠡᠭ ᠡᠴᠡ ᠭᠠᠳᠠᠨᠠ ᠠᠯᠪᠠᠨ ᠳᠡᠭᠡᠷᠡ ᠪᠡᠨ ᠦᠵᠡᠭᠦᠯᠳᠡᠭ ᠶᠣᠰᠣᠲᠠᠢ᠃
ᠪᠢᠯᠢᠭᠦᠨ ᠢ᠋ ᠠᠯᠪᠠᠨ ᠳ᠋ᠤ᠌ ᠣᠷᠣᠭᠠᠳ ᠤᠳᠠᠭᠠ ᠦᠭᠡᠢ᠂ ᠶᠡᠬᠡ ᠬᠠᠭᠠᠨ ᠲᠠᠭᠠᠯᠠᠯ ᠲᠡᠭᠦᠰᠬᠦ ᠳ᠋ᠦ᠍ ᠡᠮᠭᠡᠨᠢᠯ ᠢᠯᠡᠷᠬᠡᠢᠯᠡᠨ ᠰᠠᠯᠬᠤ ᠶᠣᠰᠣᠯᠠᠯ ᠳ᠋ᠤ᠌ ᠣᠷᠣᠯᠴᠠᠭᠰᠠᠨ ᠭᠠᠳᠠᠭᠠᠳᠤ ᠶ᠋ᠢᠨ ᠡᠯᠴᠢ ᠨᠠᠷ ᠢ᠋ ᠳᠥᠩᠭᠡᠵᠦ ᠦᠳᠡᠨ ᠮᠣᠷᠳᠠᠭᠤᠯᠤᠭᠠᠳ᠂ ᠶᠡᠬᠡ ᠭᠠᠰᠢᠭᠤᠳᠠᠯ ᠳᠠᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠᠬᠠᠨ ᠨᠢᠭᠡᠨ ᠲᠣᠮᠣ ᠡᠯᠴᠢ ᠢᠷᠡᠬᠦ ᠪᠣᠯᠵᠤ᠂ ᠲᠡᠭᠦᠨ ᠢ᠋ ᠶᠣᠰᠣ ᠲᠥᠷᠥ ᠲᠡᠢ ᠬᠦᠯᠢᠶᠡᠨ ᠠᠪᠬᠤ ᠪᠠᠷ ᠤᠷᠲᠤ ᠥᠷᠭᠥᠭᠡ᠂ ᠲᠡᠷᠭᠡ ᠵᠠᠷᠤᠴᠠ᠂ ᠵᠣᠭᠣᠭ ᠭᠦᠨᠴᠡᠭ ᠪᠡᠯᠡᠳᠬᠡᠭᠦᠯᠬᠦ ᠠᠯᠪᠠᠨ ᠳ᠋ᠤ᠌ ᠶᠡᠬᠡ ᠪᠡᠷ ᠵᠠᠷᠤᠭᠳᠠᠨ ᠱᠣᠭᠰᠢᠵᠤ ᠡᠬᠢᠯᠡᠪᠡ᠃
ᠡᠵᠡᠨ ᠦ᠌ ᠠᠯᠪᠠ ᠡᠷᠴᠢ ᠪᠡᠷ ᠢ᠋ᠶ᠋ᠡᠨ ᠭᠦᠢᠴᠡᠯᠳᠦᠳᠡᠭ ᠪᠣᠯᠬᠣᠷ ᠡᠨᠡ ᠠᠵᠢᠯ ᠪᠠᠰᠠ ᠯᠠ ᠰᠠᠨᠠᠭᠰᠠᠨ ᠶᠣᠰᠣᠭᠠᠷ ᠪᠦᠲᠦᠵᠦ ᠪᠠᠢᠯᠠ᠃ ᠭᠡᠯᠡ ᠴᠦ᠍ ᠨᠣᠢᠷ ᠬᠣᠭᠣᠯᠠᠨ ᠠ᠋ᠴᠠ ᠬᠠᠭᠠᠴᠠᠭᠰᠠᠨ ᠡᠳᠦᠷ ᠨᠢᠭᠡ ᠪᠢᠰᠢ᠃
ᠤᠳᠠᠭᠰᠠᠨ ᠴᠦ᠍ ᠦᠭᠡᠢ ᠠᠷᠮᠸᠨ ᠤ᠋ ᠸᠠᠩ ᠬᠣᠶᠠᠳᠤᠭᠠᠷ ᠭᠸᠲ᠋ᠣᠮ ᠤ᠋ᠨ ᠲᠥᠯᠥᠭᠡᠨ ᠦ᠌ ᠪᠡᠶᠡ ᠡᠯᠴᠢ ᠭᠡᠵᠦ ᠨᠢᠭᠡᠨ ᠵᠠᠭᠤ ᠰᠢᠬᠠᠮ ᠳᠠᠭᠠᠭᠤᠯ ᠲᠠᠢ᠂ ᠤᠯᠠᠭᠠᠨ ᠡᠷᠢᠶᠡᠨ ᠬᠠᠮᠪᠤ ᠬᠢᠯᠢᠩ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠲᠣᠮᠣ ᠨᠣᠶᠠᠨ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠬᠣᠣᠰ ᠮᠣᠷᠢ ᠬᠥᠯᠯᠡᠨ ᠤᠨᠤᠭᠠᠳ ᠢᠷᠡᠯᠡ᠃
ᠬᠠᠷᠠᠬᠣᠷᠣᠮ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠶ᠋ᠢᠨ ᠶᠡᠬᠡ ᠵᠠᠮ ᠳᠡᠭᠡᠷᠡ ᠬᠠᠮᠠᠭᠠᠯᠠᠬᠤ ᠮᠣᠩᠭᠣᠯ ᠴᠡᠷᠢᠭ ᠵᠣᠭᠰᠣᠵᠤ ᠲᠡᠷᠡ ᠭᠡᠢᠴᠢᠨ ᠢ᠋ ᠤᠭᠲᠤᠵᠤ ᠠᠪᠤᠭᠠᠳ᠂ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠳᠣᠲᠣᠷᠠ ᠪᠠᠷᠢᠭᠰᠠᠨ ᠠᠷᠪᠠ ᠭᠠᠷᠤᠢ ᠥᠷᠭᠥᠭᠡ ᠭᠡᠷ ᠲᠦ᠍ ᠪᠠᠭᠤᠯᠭᠠᠵᠤ᠂ ᠴᠢᠯᠡᠭᠦᠷ ᠳᠠᠢᠯᠠᠭᠤᠯᠤᠨ ᠨᠢᠭᠡ ᠬᠣᠨᠣᠭ ᠪᠠᠢᠯᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠶᠡᠬᠡ ᠵᠠᠬᠢᠷᠤᠭᠴᠢ ᠠᠷᠢᠬᠪᠥᠢ᠍ᠬᠡ ᠨᠣᠶᠠᠨ ᠳ᠋ᠤ᠌ ᠪᠠᠷᠠᠯᠠᠬᠠᠭᠤᠯᠬᠤ ᠪᠣᠯᠪᠠ᠃ ᠡᠨᠡ ᠨᠣᠶᠠᠨ ᠠᠷᠮᠸᠨ ᠤ᠋ ᠸᠠᠩ᠂ ᠳᠠᠯᠠᠢᠭᠴᠢ ᠮᠥᠩᠬᠡ ᠬᠠᠭᠠᠨ ᠲᠠᠢ ᠲᠠᠪᠤᠨ ᠵᠢᠯ ᠦ᠋ᠨ ᠡᠮᠦᠨᠡ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠶᠣᠰᠣ ᠲᠥᠷᠥ ᠪᠣᠯᠤᠨ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ① ᠶ᠋ᠢᠨ ᠵᠢᠭᠠᠯᠲᠠ ᠶ᠋ᠢ ᠦᠵᠡᠵᠦ ᠲᠠᠨᠢᠯᠴᠠᠨ᠂ ᠤᠭ ᠵᠦᠢᠯ ᠡᠴᠡ ᠭᠦᠢᠴᠡᠯᠳᠦᠭᠦᠯᠦᠭᠡ ᠦᠭᠡᠢ ᠪᠠᠢᠭᠠ ᠵᠦᠢᠯ ᠢ᠋ ᠴᠠᠭᠠᠰᠢᠳᠠ ᠮᠥᠷᠳᠡᠨ ᠶᠠᠪᠤᠭᠤᠯᠬᠤ ᠬᠡᠷᠡᠭ ᠢ᠋ ᠬᠡᠯᠡᠯᠴᠡᠬᠦ ᠪᠡᠷ ᠢᠷᠡᠭᠰᠡᠨ ᠠᠵᠢ᠃
ᠡᠯᠴᠢ ᠶ᠋ᠢ ᠡᠵᠡᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠷᠠᠯᠠᠬᠠᠬᠤ ᠳ᠋ᠤ᠌ ᠬᠠᠭᠠᠨ ᠳ᠋ᠤ᠌ ᠶᠠᠭᠠᠬᠢᠵᠤ ᠬᠠᠷᠢ ᠶ᠋ᠢᠨ ᠨᠣᠶᠠᠳ ᠪᠠᠷᠠᠯᠬᠠᠳᠠᠭ ᠪᠠᠢᠭᠰᠠᠨ᠂ ᠲᠡᠷᠡ ᠶᠣᠰᠣ ᠪᠠᠷ ᠠᠭᠤᠯᠵᠠᠭᠤᠯᠬᠤ ᠶᠣᠰᠣᠲᠠᠢ ᠪᠣᠯᠪᠠ᠃ ᠡᠯᠴᠢ ᠳ᠋ᠦ᠍ ᠬᠡᠰᠢᠭᠲᠡᠨ ᠴᠡᠷᠢᠭ ᠦ᠋ᠨ ᠳᠠᠭᠠᠭᠠᠮᠠᠯ ᠠ᠋ᠴᠠ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠶᠠᠭᠠᠬᠢᠵᠤ ᠪᠠᠷᠠᠯᠬᠠᠳᠠᠭ ᠵᠢᠷᠤᠮᠲᠠᠢ ᠶ᠋ᠢ ᠵᠣᠷᠢᠭᠤᠳᠠ ᠤᠷᠢᠳᠴᠢᠯᠠᠨ ᠬᠡᠯᠡᠵᠦ ᠥᠭᠭᠦᠯᠡ᠃
ᠭᠡᠢᠴᠢᠨ ᠡᠯᠴᠢ ᠶ᠋ᠢ ᠡᠷᠢᠶᠡᠨ ᠵᠢᠦᠵᠠᠨ ᠳ᠋ᠤ᠌ ᠰᠠᠭᠤᠯᠭᠠᠨ᠂ ᠳᠠᠭᠠᠯᠳᠤᠬᠤ ᠬᠣᠶᠠᠷ ᠲᠦᠰᠢᠮᠡᠯ ᠦ᠋ᠨ ᠬᠠᠮᠲᠤ ᠬᠠᠭᠠᠨ ᠤ᠋ ᠣᠯᠠᠨ ᠪᠠᠭᠠᠨᠠᠲᠤ ᠣᠷᠳᠣᠨ ᠳ᠋ᠤ᠌ ᠠᠪᠠᠴᠢᠭᠠᠳ᠂ ᠶᠡᠬᠡ ᠬᠠᠭᠠᠯᠭᠠᠨ ᠤ᠋ ᠭᠠᠳᠠᠭᠠ ᠬᠣᠶᠠᠷ ᠭᠠᠯ ᠤ᠋ᠨ ᠳᠤᠮᠳᠠᠭᠤᠷ ᠶᠠᠪᠤᠭᠤᠯᠤᠨ ᠠᠷᠢᠭᠤᠳᠬᠠᠭᠠᠳ᠂ ᠣᠷᠣᠮᠠᠭᠴᠠ ᠪᠡᠶᠡ ᠳ᠋ᠦ᠍ ᠨᠢ ᠦᠵᠡᠯᠭᠡ ᠬᠢᠵᠦ᠂ ᠬᠢᠲᠤᠭᠠ ᠮᠡᠰᠡ ᠪᠣᠢ ᠡᠰᠡᠬᠦ ᠶ᠋ᠢ ᠦᠵᠡᠯᠡ᠃
ᠡᠭᠦᠨ ᠦ᠌ ᠡᠮᠦᠨᠡ ᠨᠢ ᠴᠣᠬᠣᠮ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠶᠠᠭᠤ ᠶᠠᠷᠢᠯᠴᠠᠬᠤ ᠶ᠋ᠢ ᠨᠢ ᠪᠠᠰᠠ ᠠᠰᠠᠭᠤᠵᠤ ᠲᠠᠨᠢᠯᠴᠠᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠠᠢᠯᠠᠳᠬᠠᠭᠰᠠᠨ ᠪᠠᠢᠪᠠ᠃ ᠡᠯᠴᠢ ᠶ᠋ᠢᠨ ᠤᠷᠢᠳᠴᠢᠯᠠᠨ ᠬᠡᠯᠡᠭᠰᠡᠨ ᠨᠢ ᠰᠣᠨᠢᠨ᠄
— ᠪᠢ ᠸᠠᠩ ᠤ᠋ᠨ ᠵᠠᠷᠯᠢᠭ ᠶᠣᠰᠣᠭᠠᠷ ᠬᠣᠶᠠᠷ ᠤᠯᠤᠰ ᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠶ᠋ᠢᠨ ᠲᠤᠬᠠᠢ ᠲᠠᠨ ᠤ᠋ ᠶᠡᠬᠡ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠠᠢᠯᠠᠳᠬᠠᠯ ᠬᠢᠨᠡ᠃
ᠤᠭ ᠭᠡᠷᠡ ᠳ᠋ᠦ᠍ ᠾᠷᠢᠰᠲ᠋ᠣᠰ ᠱᠠᠰᠢᠨᠲᠠᠨ ᠪᠠ ᠮᠣᠩᠭᠣᠯ ᠤ᠋ᠨ ᠬᠣᠭᠣᠷᠣᠨᠳᠣ ᠨᠠᠢᠷᠠᠮᠳᠠᠯ᠂ ᠨᠥᠬᠥᠷᠯᠡᠯ ᠲᠣᠭᠲᠠᠭᠠᠬᠤ᠂ ᠮᠣᠩᠭᠣᠯ ᠤ᠋ᠨ ᠡᠵᠡᠯᠡᠭᠰᠡᠨ ᠨᠤᠲᠤᠭ ᠲᠤ ᠪᠠᠢᠭᠠ ᠾᠷᠢᠰᠲ᠋ᠣᠰ ᠱᠠᠰᠢᠨ ᠤ᠋ ᠰᠦᠮᠡ ᠬᠡᠢᠳ ᠢ᠋ ᠠᠯᠪᠠᠨ ᠭᠤᠪᠴᠢᠭᠤᠷ ᠠ᠋ᠴᠠ ᠴᠢᠯᠥᠭᠡᠯᠡᠬᠦ᠂ ᠾᠷᠢᠰᠲ᠋ᠣᠰ ᠤ᠋ᠨ ᠱᠠᠷᠢᠯ ᠪᠠᠢᠭᠠ ᠶᠧᠷᠦᠢ᠍ᠰᠡᠯᠧᠮ ᠢ᠋ ᠰᠠᠷᠠᠨᠴᠢᠨ ᠨᠠᠷ ᠠ᠋ᠴᠠ ᠴᠢᠯᠥᠭᠡᠯᠡᠬᠦ᠂ ᠯᠠᠯᠤ ᠶ᠋ᠢᠨ ᠱᠠᠰᠢᠨ ᠤ᠋ ᠲᠣᠯᠣᠭᠠᠢ᠂ ᠪᠠᠭᠳᠠᠳ᠋ ᠤ᠋ᠨ ᠬᠠᠯᠢᠹ ᠤ᠋ᠨ ᠡᠰᠡᠷᠭᠦ ᠳᠠᠢᠳᠤᠬᠤ᠂ ᠠᠷᠮᠸᠨ ᠪᠠ ᠲᠡᠭᠦᠨ ᠦ᠌ ᠬᠦᠷᠰᠢ ᠤᠯᠤᠰ ᠤ᠋ᠳ ᠲᠤ ᠬᠡᠷᠡᠭᠲᠡᠢ ᠴᠠᠭ ᠲᠤ ᠨᠢ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠠ᠋ᠴᠠ ᠲᠤᠰᠠᠯᠠᠮᠵᠢ ᠶ᠋ᠢ ᠦᠵᠡᠭᠦᠯᠵᠦ ᠪᠠᠢᠬᠤ ᠭᠡᠰᠡᠨ ᠳᠣᠯᠣᠭᠠᠨ ᠵᠦᠢᠯᠲᠦ ᠭᠡᠷᠡ ᠶ᠋ᠢ ᠪᠠᠢᠭᠤᠯᠤᠭᠰᠠᠨ ᠠᠵᠢ᠃
ᠠᠷᠮᠸᠨ ᠤ᠋ ᠡᠯᠴᠢ ᠴᠠᠭᠠᠨ ᠢᠰᠡᠭᠡᠢ ᠳᠡᠭᠡᠭᠦᠷ ᠬᠦᠨᠳᠦᠳᠬᠡᠯ ᠦ᠋ᠨ ᠭᠤᠲᠤᠮ ᠢ᠋ᠶ᠋ᠠᠷ ᠶᠠᠪᠤᠵᠤ ᠠᠷᠢᠬᠪᠥᠢ᠍ᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠪᠠᠢᠭᠠ ᠣᠷᠳᠣᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠭᠠᠳ᠂ ᠲᠣᠭᠲᠠᠭᠰᠠᠨ ᠵᠢᠷᠤᠮ ᠢ᠋ ᠰᠠᠬᠢᠨ ᠵᠡᠭᠦᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠨᠤᠭᠤᠯᠵᠤ᠂ ᠭᠠᠷ ᠢ᠋ᠶ᠋ᠠᠨ ᠲᠣᠰᠣᠨ ᠶᠣᠰᠣ ᠬᠢᠨ ᠠᠭᠤᠯᠵᠠᠯᠠ᠃
ᠲᠡᠷᠡ ᠪᠡᠷ ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠮᠦᠨᠡ ᠬᠠᠵᠠᠭᠤ ᠳ᠋ᠤ᠌ ᠵᠠᠰᠠᠭᠰᠠᠨ ᠣᠯᠪᠣᠭᠲᠤ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠵᠤ ᠠᠮᠤᠭᠤᠯᠠᠩ ᠢ᠋ ᠡᠷᠢᠨ ᠬᠡᠷᠡᠭ ᠵᠣᠷᠢᠭ ᠢ᠋ᠶ᠋ᠠᠨ ᠠᠢᠯᠠᠳᠬᠠᠵᠤ ᠡᠬᠢᠯᠡᠪᠡ᠃
ᠪᠢᠯᠢᠭᠦᠨ ᠲᠦᠰᠢᠮᠡᠯ ᠶᠣᠰᠣ ᠵᠢᠷᠤᠮ ᠰᠠᠬᠢᠭᠤᠯᠤᠭᠴᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠡᠯᠴᠢ ᠳ᠋ᠦ᠍ ᠵᠠᠮᠴᠢᠯᠠᠨ ᠣᠷᠳᠣᠨ ᠳ᠋ᠤ᠌ ᠣᠷᠣᠭᠠᠳ᠂ ᠬᠠᠭᠠᠯᠭᠠᠨ ᠲᠤᠰ ᠭᠠᠵᠠᠷ ᠵᠣᠭᠰᠣᠨ ᠪᠠᠢᠳᠠᠯ ᠢ᠋ ᠠᠵᠢᠵᠤ ᠪᠠᠢᠪᠠ᠃ ᠲᠡᠭᠦᠨ ᠳ᠋ᠦ᠍ ᠶᠠᠭᠤ ᠬᠢᠶᠡ ᠭᠡᠨᠡ ᠴᠢᠯᠥᠭᠡᠲᠡᠢ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠪᠦᠷ ᠳᠡᠷᠭᠡᠳᠡ ᠡᠴᠡ ᠨᠢ ᠠᠷᠢᠬᠪᠥᠢ᠍ᠬᠡ ᠶ᠋ᠢ ᠰᠠᠢᠨ ᠠᠵᠢᠭᠯᠠᠪᠠ᠃
ᠤᠷᠢᠳ ᠨᠢ ᠵᠢᠰᠦ ᠮᠡᠳᠡᠬᠦ ᠲᠡᠳᠦᠢ ᠲᠠᠨᠢᠯ ᠪᠣᠯᠪᠠᠴᠤ ᠴᠣᠬᠣᠮ ᠳᠡᠷᠭᠡᠳᠡ ᠨᠢ ᠲᠤᠯᠵᠤ ᠪᠠᠢᠳᠠᠯ ᠢ᠋ ᠨᠢ ᠠᠵᠢᠵᠤ ᠪᠠᠢᠭᠠ ᠦᠭᠡᠢ ᠪᠣᠯᠬᠣᠷ ᠪᠠᠷᠤᠭ ᠲᠠᠨᠢᠬᠤ ᠦᠭᠡᠢ ᠲᠡᠢ ᠠᠳᠠᠯᠢ ᠪᠢᠯᠡ᠃
ᠶᠡᠬᠡ ᠵᠠᠬᠢᠷᠤᠭᠴᠢ ᠮᠠᠨᠢ ᠰᠠᠢᠬᠠᠨ ᠡᠷᠡ ᠠᠵᠢ᠃ ᠬᠠᠷᠠᠪᠠᠰᠤ ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠨ᠂ ᠬᠤᠷᠴᠠ ᠰᠡᠷᠭᠦᠯᠡᠩ ᠬᠠᠷᠠᠴᠠᠲᠠᠢ᠂ ᠨᠢᠷᠤᠭᠤ ᠳᠣᠷᠣᠭᠣ ᠲᠡᠭᠰᠢ᠂ ᠡᠩ ᠦ᠋ᠨ ᠮᠥᠷᠲᠡᠭᠡᠨ ᠡᠷᠡᠯᠬᠡᠭ ᠡᠷᠡ ᠶ᠋ᠢᠨ ᠰᠢᠨᠵᠢ ᠶ᠋ᠢ ᠪᠡᠶᠡ ᠳ᠋ᠦ᠍ ᠪᠡᠨ ᠬᠠᠳᠠᠭᠠᠯᠠᠭᠰᠠᠨ᠂ ᠬᠥᠬᠥᠯ ᠬᠠᠷᠠ ᠦᠰᠦ ᠨᠢ ᠴᠦ᠍ ᠪᠡᠶᠡ ᠳ᠋ᠦ᠍ ᠨᠢ ᠲᠠᠭᠠᠷᠠᠵᠤ ᠵᠣᠬᠢᠭᠰᠠᠨ ᠬᠠᠷᠠᠭᠳᠠᠨᠠ᠃ ᠠᠷᠢᠬᠪᠥᠢ᠍ᠬᠡ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠪᠡᠨ ᠬᠥᠳᠡᠯᠭᠡᠨ ᠠᠭᠱᠠᠨ ᠵᠠᠭᠤᠷᠠ ᠳ᠋ᠤ᠌ ᠡᠯᠴᠢ ᠶ᠋ᠢ ᠪᠣᠯᠤᠨ ᠲᠡᠭᠦᠨ ᠢ᠋ ᠳᠠᠭᠠᠯᠳᠤᠭᠴᠢᠳ᠂ ᠥᠪᠡᠷ ᠦ᠋ᠨ ᠰᠢᠳᠠᠷ ᠪᠠᠷᠠ ᠪᠣᠯᠤᠭᠴᠢ ᠨᠠᠷ ᠢ᠋ᠶ᠋ᠠᠨ ᠠᠵᠢᠭᠯᠠᠨ ᠬᠠᠷᠠᠵᠤ ᠠᠮᠵᠢᠳᠠᠭ᠂ ᠦᠭᠡ ᠶᠠᠷᠢᠬᠤ ᠳ᠋ᠤ᠌ ᠪᠠᠨ《ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤ》 ᠭᠡᠵᠦ ᠬᠡᠯᠡᠬᠦ ᠳᠤᠷᠠᠲᠠᠢ ᠭᠡᠬᠦ ᠤᠤ᠂ ᠬᠥᠮᠦᠨ ᠦ᠌ ᠬᠡᠯᠡᠵᠦ ᠶᠠᠷᠢᠵᠤ ᠪᠠᠢᠭᠠ ᠵᠦᠢᠯ ᠢ᠋ᠶ᠋ᠡᠨ ᠨᠠᠷᠢᠨ ᠪᠣᠳᠣᠵᠤ ᠴᠡᠭᠨᠡ ᠭᠡᠰᠡᠨ ᠡᠯᠴᠢ ᠲᠡᠢ ᠤᠳᠠᠭᠠᠨ ᠶᠠᠷᠢᠯᠴᠠᠵᠤ᠂ ᠨᠠᠭᠠᠰᠢ ᠴᠠᠭᠠᠰᠢ ᠪᠣᠯᠭᠠᠬᠤ ᠵᠦᠢᠯ ᠳᠡᠭᠡᠷᠡ ᠰᠠᠨᠠᠯ ᠲᠣᠬᠢᠷᠠᠬᠤ ᠭᠡᠵᠦ ᠮᠡᠷᠡᠢᠵᠦ ᠪᠠᠢᠭᠠ ᠨᠢ ᠢᠯᠠᠤᠳᠠ ᠪᠠᠢᠪᠠ᠃
ᠠᠷᠢᠬᠪᠥᠢ᠍ᠬᠡ ᠠᠷᠮᠸᠨ ᠤ᠋ ᠡᠯᠴᠢ ᠶ᠋ᠢ ᠬᠦᠨᠳᠦᠳᠬᠡᠨ ᠴᠠᠢ ᠵᠣᠭᠣᠭ ᠪᠠᠷᠢᠬᠤ ᠳ᠋ᠤ᠌ ᠪᠠᠨ ᠶᠣᠰᠣ ᠵᠢᠷᠤᠮᠲᠠᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠢᠳᠡᠭᠡ ᠪᠤᠳᠠᠭᠠ ᠪᠠᠨ ᠵᠣᠭᠣᠭᠯᠠᠨ ᠪᠠᠢᠵᠤ ᠠᠯᠪᠠᠨ ᠤ᠋ ᠪᠣᠯᠤᠨ ᠠᠮᠢᠨ ᠦᠭᠡ ᠪᠡᠨ ᠬᠡᠯᠡᠯᠴᠡᠪᠡ᠃
ᠶᠡᠬᠡ ᠵᠠᠬᠢᠷᠤᠭᠴᠢ ᠠᠭᠤᠯᠵᠠᠯᠲᠠ ᠶ᠋ᠢᠨ ᠲᠡᠭᠦᠰᠬᠡᠯ ᠳ᠋ᠦ᠍ ᠶᠣᠰᠣ ᠬᠢᠵᠦ ᠡᠯᠴᠢ ᠪᠡᠨ ᠦᠳᠡᠬᠦ ᠢᠯᠳᠠᠮ ᠳ᠋ᠤ᠌ ᠪᠠᠨ ᠪᠢᠯᠢᠭᠦᠨ ᠢ᠋ ᠰᠢᠷᠲᠡᠨ ᠠᠵᠢᠭᠯᠠᠵᠤ《ᠡᠨᠡ ᠴᠢᠨᠢ ᠬᠡᠨ ᠪᠢᠯᠡ?》 ᠭᠡᠰᠡᠨ ᠪᠠᠢᠳᠠᠯᠲᠠᠢ ᠪᠠᠢᠯᠠ᠃
ᠪᠢᠯᠢᠭᠦᠨ ᠦ᠌ ᠪᠡᠶᠡ ᠪᠡᠷ ᠠᠩᠬᠠᠨ ᠣᠷᠣᠯᠴᠠᠭᠰᠠᠨ ᠭᠡᠢᠴᠢᠨ ᠢ᠋ ᠪᠠᠷᠠᠯᠬᠠᠭᠤᠯᠬᠤ ᠠᠯᠪᠠ ᠵᠣᠬᠢᠬᠤ ᠵᠢᠷᠤᠮ ᠤ᠋ᠨ ᠳᠠᠭᠠᠤ ᠠᠶᠠᠲᠠᠢᠬᠠᠨ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠠᠭᠤᠵᠢᠷᠠᠯᠠ᠃
ᠪᠢᠯᠢᠭᠦᠨ ᠠᠯᠪᠠ ᠪᠠᠨ ᠳᠠᠭᠤᠰᠬᠠᠵᠤ ᠣᠷᠣᠢ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠬᠤ ᠵᠠᠮ ᠳ᠋ᠤ᠌ ᠪᠠᠨ ᠠᠬᠠ ᠳᠡᠭᠦᠦ ᠬᠣᠶᠠᠷ ᠵᠠᠬᠢᠷᠤᠭᠴᠢ ᠶ᠋ᠢ ᠵᠡᠷᠭᠡᠴᠡᠭᠦᠯᠦᠨ ᠪᠣᠳᠣᠬᠤ ᠳ᠋ᠤ᠌ ᠬᠦᠷᠪᠡ᠃ ᠡᠳᠦᠷ ᠳᠡᠷᠭᠡᠳᠡ ᠨᠢ ᠪᠠᠢᠵᠤ ᠠᠵᠢᠭᠯᠠᠭᠰᠠᠨ ᠠᠷᠢᠬᠪᠥᠢ᠍ᠬᠡ ᠰᠡᠳᠬᠢᠯ ᠳ᠋ᠦ᠍ ᠨᠢ ᠴᠠᠭᠠᠨᠠ ᠪᠠᠨ ᠨᠢᠭᠡ ᠠᠶᠠᠲᠠᠢᠬᠠᠨ ᠰᠠᠨᠠᠭᠳᠠᠨᠠ᠃ ᠲᠡᠭᠦᠨ ᠦ᠌ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠬᠦᠷᠲᠡᠯᠡ ᠣᠨᠣᠪᠴᠢᠲᠠᠢ᠂ ᠴᠢᠩᠨᠠᠬᠤ ᠳ᠋ᠤ᠌ ᠴᠢᠬᠢᠨ ᠳ᠋ᠦ᠍ ᠵᠥᠭᠡᠯᠡᠬᠡᠨ᠂ ᠲᠡᠭᠡᠭᠰᠡᠨ ᠮᠥᠷᠲᠡᠭᠡᠨ ᠶᠡᠬᠡ ᠡᠩ ᠦ᠋ᠨ ᠦᠨᠡᠨ ᠪᠠᠢᠳᠠᠯᠲᠠᠢ ᠠᠵᠢ᠃ ᠪᠠᠰᠠ ᠵᠡᠬᠡᠭᠰᠡᠨ ᠡᠷᠡᠯᠬᠡᠭ ᠪᠠᠢᠳᠠᠯ ᠢ᠋ ᠪᠡᠶᠡ ᠳ᠋ᠦ᠍ ᠪᠡᠨ ᠰᠢᠩᠭᠡᠭᠰᠡᠨ ᠨᠢ ᠴᠦ᠍ ᠰᠡᠳᠬᠢᠯ ᠲᠠᠲᠠᠬᠤ ᠪᠠᠷ ᠬᠠᠷᠠᠭᠳᠠᠯᠠ᠃ ᠲᠡᠭᠡᠭᠡᠳ ᠪᠢᠯᠢᠭᠦᠨ《ᠬᠤᠪᠢᠯᠠᠢ ᠶᠠᠮᠠᠷ ᠰᠢᠦ ᠡᠷᠡ ᠪᠢᠯᠡ?》 ᠭᠡᠵᠦ ᠠᠰᠠᠭᠤᠯᠲᠠ ᠲᠠᠯᠪᠢᠭᠠᠳ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠨᠢ《ᠲᠡᠷᠡ ᠪᠣᠯ ᠤᠯᠤᠰ ᠭᠦᠷᠦᠨ ᠦ᠌ ᠶᠡᠬᠡ ᠬᠠᠭᠠᠨ ᠴᠦ᠍ ᠪᠣᠯᠵᠤ ᠮᠡᠳᠡᠬᠦ᠂ ᠪᠦᠷᠢᠨ ᠡᠷᠬᠡ ᠪᠦᠬᠦᠢ ᠲᠣᠮᠣ ᠵᠠᠬᠢᠷᠤᠭᠴᠢ ᠮᠥᠨ᠃ ᠡᠨᠡ ᠭᠦᠷᠦᠨ ᠦ᠌ ᠶᠠᠮᠠᠷ ᠴᠦ᠍ ᠢᠷᠭᠡᠨ ᠢ᠋ ᠶᠠᠭᠤ ᠪᠣᠯᠭᠠᠶᠠ ᠭᠡᠨᠡ᠂ ᠲᠡᠭᠦᠨ ᠢ᠋ ᠪᠡᠨ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠭᠦᠢᠴᠡᠭᠡᠵᠦ ᠴᠢᠳᠠᠬᠤ ᠡᠷᠬᠡᠲᠦ ᠬᠥᠮᠦᠨ᠃ ᠣᠳᠣ ᠳ᠋ᠤ᠌ ᠪᠠᠨ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠬᠤᠪᠢᠯᠠᠢ ᠠᠷᠢᠬᠪᠥᠢ᠍ᠬᠡ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠲᠣᠮᠣ ᠬᠥᠮᠦᠨ ᠬᠡᠨ ᠪᠠᠢᠬᠤ ᠪᠢᠯᠡ᠃ ᠬᠡᠨ ᠴᠦ᠍ ᠠᠯᠠᠭᠠ᠂ ᠲᠡᠭᠡᠬᠦ ᠪᠡᠷ ᠪᠢ ᠭᠡᠳᠡᠭ〈ᠬᠣᠷᠣᠬᠠᠢ〉 ᠡᠨᠡ ᠨᠣᠶᠠᠳ ᠤ᠋ᠨ ᠶᠠᠭᠤ ᠬᠡᠯᠡᠭᠰᠡᠨ ᠢ᠋〈ᠵᠠ〉 ᠭᠡᠵᠦ ᠪᠥᠬᠥᠢᠨ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠭᠦᠶᠦᠵᠦ ᠶᠠᠪᠤᠬᠤ ᠵᠠᠶᠠᠭᠠᠲᠠᠢ᠃ ᠡᠭᠦᠨ ᠡᠴᠡ ᠥᠭᠡᠷᠡ ᠵᠠᠮ ᠨᠠᠳᠠ ᠳ᠋ᠤ᠌ ᠪᠠᠢᠬᠤ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ ᠨᠠᠳᠠᠳᠤ ᠶᠠᠮᠠᠷ ᠴᠦ᠍ ᠪᠤᠷᠤᠭᠤ ᠪᠠᠢᠬᠤ ᠦᠭᠡᠢ᠃ ᠲᠡᠷᠡ ᠲᠣᠮᠣ ᠬᠥᠮᠦᠨ ᠥᠴᠦᠬᠡᠨ ᠨᠠᠮᠠᠶ᠋ᠢ ᠲᠣᠭᠣᠵᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ᠂ ᠨᠠᠳᠠᠲᠠᠢ ᠶᠠᠷᠢᠭᠰᠠᠨ ᠨᠢ ᠶᠡᠬᠡ ᠶᠦᠮ᠃ ᠲᠡᠭᠡᠪᠡᠯ ᠪᠢ ᠬᠤᠪᠢᠯᠠᠢ ᠶ᠋ᠢᠨ ᠵᠠᠷᠯᠢᠭ ᠢ᠋ ᠶᠣᠰᠣᠴᠢᠯᠠᠨ ᠪᠡᠶᠡᠯᠡᠭᠦᠯᠬᠦ ᠤᠤ?》 ᠭᠡᠮᠡᠨ ᠳᠠᠬᠢᠨ ᠠᠰᠠᠭᠤᠯᠲᠠ ᠲᠠᠯᠪᠢᠵᠤ ᠤᠳᠠᠭᠠᠨ ᠪᠣᠳᠣᠯᠠ᠃ ᠢᠩᠭᠢᠵᠦ ᠪᠢᠯᠢᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠠᠯᠬᠤᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠬᠤᠪᠢᠯᠠᠢ ᠶ᠋ᠢᠨ ᠵᠠᠩᠨᠠᠵᠤ ᠪᠠᠢᠭᠰᠠᠨ ᠨᠢᠭᠡ ᠠᠪᠤᠷᠢ ᠨᠢ ᠬᠠᠴᠢᠨ ᠵᠢᠪᠡᠭᠦᠴᠡᠯᠲᠡᠢ ᠰᠠᠨᠠᠭᠳᠠᠨ᠂ ᠲᠡᠷᠡ ᠶᠠᠪᠤᠳᠠᠯ ᠪᠦᠷ ᠨᠢᠳᠦᠨ ᠳ᠋ᠦ᠍ ᠨᠢ ᠦᠵᠡᠭᠳᠡᠬᠦ ᠰᠢᠭ ᠪᠣᠯᠪᠠ᠃《ᠶᠠᠭᠤ ᠪᠢᠯᠡ? ᠠ ᠲᠡᠢᠮᠦ᠃ ᠴᠠᠪ ᠤ᠋ᠨ ᠬᠣᠭᠣᠯᠠᠢ ᠳ᠋ᠤ᠌ ᠪᠢᠳᠡ ᠠᠩ ᠬᠢᠵᠦ ᠬᠡᠰᠡᠭ ᠬᠤᠯᠠᠨ ᠤ᠋ ᠰᠦᠷᠦᠭ ᠢ᠋ ᠪᠦᠰᠡᠯᠡᠵᠦ ᠠᠪᠤᠭᠠᠳ ᠲᠠᠯᠠ ᠲᠠᠯᠠ ᠠ᠋ᠴᠠ ᠨᠢ ᠳᠠᠭᠠᠷᠢᠨ ᠳᠣᠪᠲᠣᠯᠵᠤ ᠬᠠᠷᠪᠤᠯᠳᠤᠭᠰᠠᠨ᠃ ᠲᠡᠷᠡ ᠴᠦ᠍ ᠰᠣᠨᠢᠨ ᠪᠠᠢᠯᠠ᠃ ᠢᠩᠭᠢᠵᠦ ᠠᠩ ᠬᠢᠬᠦ ᠨᠢ ᠨᠣᠶᠠᠨ ᠤ᠋ ᠡᠷᠬᠡ᠃ ᠲᠡᠭᠡᠬᠦ ᠳ᠋ᠦ᠍ ᠬᠤᠪᠢᠯᠠᠢ ᠬᠡᠳᠦᠨ ᠵᠠᠭ ᠮᠣᠳᠣᠨ ᠤ᠋ ᠬᠠᠵᠠᠭᠤ ᠪᠠᠷ ᠡᠬᠡ ᠪᠡᠨ ᠳᠠᠭᠠᠭᠠᠳ ᠳᠠᠪᠬᠢᠵᠤ ᠪᠠᠢᠭᠰᠠᠨ ᠬᠤᠯᠠᠨ ᠤ᠋ ᠤᠨᠠᠭᠠ ᠶ᠋ᠢ ᠬᠠᠷᠪᠤᠵᠤ ᠬᠣᠶᠠᠷ ᠬᠥᠯ ᠢ᠋ ᠨᠢ ᠬᠤᠭᠤᠯᠤᠭᠰᠠᠨ᠃ ᠲᠡᠷᠡ ᠠᠮᠢᠲᠠᠨ ᠤ᠋ ᠨᠢᠳᠦ ᠨᠢ ᠪᠦᠯᠲᠡᠭᠡᠨᠡᠨ᠂ ᠬᠣᠶᠠᠷ ᠴᠢᠬᠢ ᠨᠢ ᠭᠣᠵᠣᠯᠵᠠᠭᠠᠳ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠪᠥᠭᠰᠡ ᠪᠡᠨ ᠴᠢᠷᠦᠨ ᠲᠡᠮᠡᠦᠯᠵᠦ ᠪᠠᠢᠯᠠ᠃ ᠲᠡᠷᠡ ᠨᠢᠯᠬᠠ ᠠᠮᠢᠲᠠᠨ ᠢ᠋ ᠵᠠᠬᠢᠷᠤᠭᠴᠢ ᠬᠠᠷᠠᠭᠠᠳ ᠪᠠᠢᠳᠠᠭ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠢᠨᠢᠶᠡᠵᠦ ᠪᠠᠢᠭᠰᠠᠨ᠃ ᠬᠥᠭᠡᠷᠦᠬᠦᠢ ᠠᠮᠢᠲᠠᠨ ᠤ᠋ ᠨᠢᠯᠬᠠ ᠦᠷᠡ ᠶ᠋ᠢ ᠳᠡᠭᠡᠵᠦ ᠰᠢᠨᠠᠯᠤᠨ ᠵᠢᠷᠦᠬᠡ ᠪᠡᠨ ᠳᠡᠯᠪᠡᠯᠴᠢᠬᠡᠬᠦ ᠰᠢᠬᠠᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠪᠡᠶᠡᠰᠦᠨ ᠢᠨᠢᠶᠡᠵᠦ ᠶᠠᠪᠤᠳᠠᠭ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠶᠠᠮᠠᠷ ᠪᠣᠢ? ᠬᠡᠳᠦᠨ ᠠᠯᠲᠠ ᠭᠠᠵᠠᠷ ᠤ᠋ᠨ ᠴᠠᠭᠠᠨᠠ ᠠ᠋ᠴᠠ ᠲᠡᠷᠡ ᠤᠨᠠᠭᠠᠨ ᠤ᠋ ᠡᠬᠡ ᠨᠢ ᠰᠦ ᠪᠡᠨ ᠭᠣᠭᠣᠵᠢᠭᠤᠯᠤᠨ ᠡᠷᠭᠢᠵᠦ ᠳᠠᠭᠠᠷᠢᠵᠤ ᠦᠵᠡᠭᠡᠳ ᠭᠣᠮᠣᠳᠠᠯ ᠨᠢ ᠲᠠᠰᠤᠷᠠᠪᠠ ᠪᠣᠯᠤᠯᠲᠠᠢ ᠴᠠᠭᠠᠰᠢ ᠪᠠᠨ ᠵᠢᠭᠤᠲᠠᠭᠰᠠᠨ᠃ ᠬᠤᠪᠢᠯᠠᠢ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠰᠤᠮᠤ ᠬᠠᠷᠪᠤᠭᠰᠠᠨ ᠪᠣᠯᠪᠠᠴᠤ ᠤᠨᠤᠭᠠ ᠦᠭᠡᠢ᠃ ᠮᠠᠨ ᠤ᠋ ᠵᠠᠬᠢᠷᠤᠭᠴᠢ ᠡᠬᠡ ᠦᠷᠡ ᠶ᠋ᠢ ᠳᠡᠭᠡᠵᠦ ᠬᠠᠭᠠᠴᠠᠭᠠᠭᠰᠠᠨ ᠠᠲᠠᠯᠠ ᠶᠡᠬᠡ ᠯᠡ ᠪᠠᠶᠠᠷᠲᠤ ᠶᠠᠪᠤᠳᠠᠯ ᠦᠢᠯᠡᠳᠦᠭᠰᠡᠨ ᠮᠡᠲᠦ ᠰᠠᠢᠬᠠᠨ ᠵᠠᠩ ᠭᠠᠷᠭᠠᠨ ᠪᠤᠰᠤᠳ ᠲᠠᠢ ᠶᠠᠷᠢᠵᠤ ᠪᠠᠢᠭᠰᠠᠨ᠃ ᠲᠡᠢᠮᠦ ᠠ᠋᠃ ᠡᠨᠡ ᠦᠨᠡᠨ᠃ ᠵᠠᠬᠢᠷᠤᠭᠴᠢ ᠲᠡᠷᠡ ᠤᠨᠠᠭᠠ ᠶ᠋ᠢ ᠳᠡᠷᠭᠡᠳᠡ ᠡᠴᠡ ᠪᠡᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠪᠤᠵᠤ ᠠᠯᠠᠭᠰᠠᠨ᠃ ᠨᠢᠭᠡᠨᠲᠡ ᠪᠥᠭᠰᠡ ᠶ᠋ᠢ ᠨᠢ ᠴᠢᠷᠦᠭᠦᠯᠵᠦ ᠣᠷᠬᠢᠭᠠᠳ ᠠᠮᠢᠲᠠᠨ ᠢ᠋ ᠤᠳᠠᠭᠠᠨ ᠵᠣᠪᠠᠭᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠠᠯᠠᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠬᠤᠪᠢᠯᠠᠢ ᠡᠷᠡᠯᠬᠡᠭ ᠪᠠᠷᠳᠠᠮ ᠴᠢᠷᠠᠢ ᠭᠠᠷᠭᠠᠵᠤ ᠪᠠᠢᠭᠰᠠᠨ ᠨᠢ ᠬᠥᠭᠲᠡᠢ ᠰᠢᠦ᠃ ᠵᠠᠬᠢᠷᠤᠭᠴᠢ ᠮᠠᠨᠢ ᠡᠢᠮᠦ ᠯᠡ ᠬᠥᠮᠦᠨ᠃ ᠲᠡᠭᠦᠨ ᠦ᠌ ᠵᠠᠷᠯᠢᠭ ᠢ᠋ ᠪᠢ ᠪᠡᠶᠡᠯᠡᠭᠦᠯᠬᠦ ᠭᠡᠳ ᠬᠣᠷᠮᠣᠢ ᠪᠠᠨ ᠴᠢᠷᠦᠨ ᠠᠯᠬᠤᠵᠤ ᠶᠠᠪᠤᠭᠠ ᠮᠠᠨᠢ ᠡᠨᠡ ᠪᠢᠵᠡ ᠳᠡ?》 ᠭᠡᠮᠡᠨ ᠪᠢᠯᠢᠭᠦᠨ ᠪᠣᠳᠣᠭᠰᠠᠭᠠᠷ᠂ ᠵᠠᠷᠢᠮ ᠵᠦᠢᠯ ᠢ᠋ ᠠᠮᠠᠨ ᠳᠣᠲᠣᠷᠠ ᠪᠠᠨ ᠥᠭᠦᠯᠡᠨ ᠶᠠᠪᠤᠭᠠᠳ ᠭᠡᠷ ᠲᠦ᠍ ᠪᠡᠨ ᠢᠷᠡᠪᠡ᠃ ᠮᠡᠳᠡᠭᠡᠵᠢ ᠶ᠋ᠢᠨ ᠮᠣᠩᠭᠣᠯ ᠠᠢᠯ ᠬᠣᠭᠣᠯᠠ ᠪᠠᠨ ᠣᠷᠣᠢᠬᠠᠨ ᠬᠢᠵᠦ ᠢᠳᠡᠨ ᠮᠠᠭᠠᠳ ᠦᠭᠡᠢ ᠲᠠᠷᠠᠭ ᠰᠦ ᠤᠤᠭᠤᠭᠠᠳ ᠪᠢᠯᠢᠭᠦᠨ ᠮᠣᠷᠢᠨᠱᠠᠭᠠᠢ ᠪᠠᠨ ᠲᠡᠪᠡᠷᠢᠭᠡᠳ ᠨᠣᠢᠷᠰᠤᠭᠠ ᠪᠢᠵᠡ᠃ ᠡᠨᠡ ᠴᠦ᠍ ᠡᠷᠡ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃
ᠪᠢᠯᠢᠭᠦᠨ ᠭᠡᠷᠭᠡᠢ ᠶ᠋ᠢᠨ ᠬᠠᠮᠲᠤ ᠠᠯᠪᠠᠨ ᠳ᠋ᠤ᠌ ᠪᠠᠨ ᠭᠦᠶᠦᠵᠦ ᠪᠠᠢᠯᠠ᠃ ᠨᠠᠮᠤᠷ ᠴᠠᠭ ᠲᠤ ᠶᠠᠭᠤᠮᠠ ᠶᠠᠭᠤᠮᠠ ᠬᠡᠪ ᠦ᠋ᠨ ᠪᠠᠢᠳᠠᠯᠲᠠᠢ᠃ ᠵᠣᠴᠢᠨ ᠭᠡᠢᠴᠢᠨ ᠨᠡᠢᠰᠯᠡᠯ ᠳ᠋ᠦ᠍ ᠲᠠᠰᠤᠷᠠᠯᠲᠠ ᠦᠭᠡᠢ ᠢᠷᠡᠳᠡᠭ ᠪᠣᠯᠬᠣᠷ ᠪᠢᠯᠢᠭᠦᠨ ᠳ᠋ᠦ᠍ ᠠᠵᠢᠯ ᠶᠠᠭᠤ ᠡᠰᠡ ᠲᠠᠰᠤᠷᠠᠬᠤ ᠪᠣᠢ᠃ ᠵᠠᠷᠢᠮ ᠳ᠋ᠤ᠌ ᠪᠠᠨ ᠭᠠᠳᠠᠭᠠᠳᠤ ᠠ᠋ᠴᠠ ᠬᠡᠳᠦᠨ ᠵᠠᠭᠤᠨ ᠵᠦᠢᠯ ᠵᠦᠢᠯ ᠦ᠋ᠨ ᠠᠯᠪᠠ ᠪᠠᠷ ᠵᠡᠷᠭᠡ ᠢᠷᠡᠵᠦ᠂ ᠤᠨᠤᠭᠠ ᠬᠥᠰᠬᠡ᠂ ᠥᠷᠭᠥᠭᠡ ᠭᠡᠷ᠂ ᠵᠣᠭᠣᠭ ᠭᠦᠨᠴᠡᠭ ᠰᠡᠯᠲᠡ ᠶ᠋ᠢ ᠨᠢ ᠪᠡᠯᠡᠳᠬᠡᠭᠦᠯᠬᠦ ᠭᠡᠵᠦ ᠰᠠᠨᠳᠤᠷᠤᠨ᠂ ᠥᠷᠯᠥᠭᠡ ᠣᠷᠣᠢ ᠦᠭᠡᠢ ᠭᠦᠶᠦᠨᠡ᠃ ᠲᠣᠭᠲᠠᠭᠰᠠᠨ ᠲᠢᠭ ᠵᠢᠷᠤᠮ ᠨᠠᠷᠢᠨ᠂ ᠬᠠᠷᠢ ᠶ᠋ᠢᠨ ᠭᠦᠷᠦᠨ ᠦ᠌ ᠡᠯᠴᠢ ᠶ᠋ᠢ ᠣᠨᠴᠠᠭᠠᠢᠯᠠᠨ ᠬᠦᠨᠳᠦᠳᠬᠡᠵᠦ ᠦᠢᠯᠡᠴᠢᠯᠡᠬᠦ ᠬᠠᠲᠠᠭᠤ ᠵᠢᠭᠠᠪᠤᠷᠢ ᠲᠠᠢ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠬᠠᠷᠢᠭᠤᠴᠠᠭᠴᠢ ᠬᠥᠮᠦᠰ ᠦ᠋ᠨ ᠠᠯᠪᠠ ᠭᠦᠢᠴᠡᠭᠳᠡᠬᠦ ᠦᠭᠡᠢ᠂ ᠳᠡᠭᠡᠷᠡ ᠳᠡᠭᠡᠷᠡ ᠡᠴᠡ ᠨᠡᠮᠡᠵᠦ ᠪᠠᠭᠤᠨᠠ᠃ ᠡᠨᠡ ᠴᠦ᠍ ᠳᠡᠭᠡᠵᠦ ᠪᠠᠢᠬᠤ ᠶᠣᠰᠣᠲᠠᠢ ᠵᠦᠢᠯ ᠪᠢᠵᠡ᠃
ᠨᠢᠭᠡ ᠤᠳᠠᠭᠠ ᠬᠠᠰᠢᠮᠸᠷ ᠨᠤᠲᠤᠭ ᠤ᠋ᠨ ᠪᠤᠷᠬᠠᠨ ᠤ᠋ ᠯᠠᠮᠠ ᠭᠡᠵᠦ ᠬᠣᠷᠢ ᠭᠤᠴᠢᠨ ᠳᠠᠭᠠᠭᠤᠯ ᠲᠠᠢ᠂ ᠵᠠᠭᠤᠨ ᠲᠡᠮᠡᠭᠡᠨ ᠦ᠌ ᠠᠴᠢᠶᠠ ᠪᠦᠬᠦᠢ ᠨᠢᠭᠡ ᠬᠥᠮᠦᠨ ᠠᠷᠢᠬᠪᠥᠢ᠍ᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠠᠯᠠᠯᠭᠠ ᠪᠠᠷ ᠨᠡᠢᠰᠯᠡᠯ ᠳ᠋ᠦ᠍ ᠬᠦᠷᠦᠯᠴᠡᠨ ᠢᠷᠡᠪᠡ᠃ ᠲᠡᠷᠡ ᠯᠠᠮᠠ ᠶ᠋ᠢ ᠬᠦᠨᠳᠦᠯᠡᠨ ᠬᠡᠷᠡᠮ ᠦ᠋ᠨ ᠭᠠᠳᠠᠭᠠ ᠳᠡᠭᠡᠳᠦ ᠨᠣᠶᠠᠳ ᠤ᠋ᠳ ᠭᠠᠷᠴᠤ ᠵᠦᠢᠯ ᠵᠦᠢᠯ ᠦ᠋ᠨ ᠬᠥᠭᠵᠢᠮ ᠳᠤᠤᠭᠠᠷᠭᠠᠨ᠂ ᠲᠤᠭ ᠬᠢᠭᠢᠷᠢ ᠬᠡᠢᠰᠬᠡᠵᠦ ᠬᠥᠯ ᠪᠣᠯᠤᠨ ᠤᠭᠲᠤᠵᠤ ᠠᠪᠤᠭᠠᠳ᠂ ᠲᠤᠰᠬᠠᠢ ᠪᠡᠯᠡᠳᠬᠡᠭᠰᠡᠨ ᠶᠡᠬᠡ ᠥᠷᠥᠭᠡ ᠭᠡᠷ ᠲᠦ᠍ ᠪᠠᠭᠤᠯᠭᠠᠨ᠂ ᠬᠣᠭᠣᠯᠠ ᠤᠮᠳᠠ ᠶ᠋ᠢᠨ ᠳᠡᠭᠡᠳᠦ ᠶ᠋ᠢ ᠡᠷᠭᠦᠨ ᠪᠠᠷᠢᠵᠤ ᠳᠠᠭᠠᠯᠠᠭᠤᠯᠪᠠ᠃
ᠰᠣᠨᠣᠰᠪᠠᠯ ᠠᠷᠢᠬᠪᠥᠢ᠍ᠬᠡ ᠵᠠᠬᠢᠷᠤᠭᠴᠢ ᠲᠡᠷᠡ ᠯᠠᠮᠠ ᠪᠠᠷ ᠨᠣᠮ ᠤᠩᠰᠢᠭᠤᠯᠤᠨ ᠥᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠬᠤ ᠶᠤᠮ ᠭᠡᠨᠡ ᠭᠡᠯᠴᠡᠨᠡ᠃ ᠭᠡᠢᠴᠢᠨ ᠯᠠᠮᠠ ᠳᠥᠩᠭᠡᠵᠦ ᠬᠣᠶᠠᠷ ᠬᠣᠨᠣᠭᠠᠳ ᠪᠤᠷᠬᠠᠨ ᠤ᠋ ᠰᠦᠮᠡ ᠳ᠋ᠦ᠍ ᠣᠴᠢᠵᠤ ᠬᠤᠷᠠᠯ ᠳ᠋ᠤ᠌ ᠰᠠᠭᠤᠯᠠ᠃ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠳᠥᠷᠪᠡ ᠬᠣᠨᠣᠭᠠᠳ ᠠᠷᠢᠬᠪᠥᠢ᠍ᠬᠡ ᠶ᠋ᠢᠨ ᠥᠷᠭᠥᠭᠡ ᠶᠡᠬᠡ ᠴᠠᠭᠠᠨ ᠭᠡᠷ ᠲᠦ᠍ ᠨᠢ ᠮᠣᠷᠢᠯᠠᠨ ᠣᠴᠢᠵᠤ ᠨᠣᠮ ᠤᠩᠰᠢᠬᠤ ᠪᠣᠯᠪᠠ᠃ ᠵᠠᠬᠢᠷᠤᠭᠴᠢ ᠥᠷᠭᠥᠭᠡ ᠪᠡᠨ ᠵᠣᠷᠢᠭᠤᠳᠠ ᠪᠡᠯᠡᠳᠬᠡᠨ ᠵᠡᠬᠡᠭᠰᠡᠨ ᠬᠥᠯ ᠪᠣᠯᠵᠤ ᠲᠡᠷᠡ ᠯᠠᠮᠠ ᠶ᠋ᠢ ᠵᠠᠯᠠᠭᠠᠳ᠂ ᠭᠦᠨᠴᠡᠭ ᠡᠷᠭᠦᠨ᠂ ᠤᠯᠠᠮ ᠢ᠋ᠶ᠋ᠠᠷ ᠨᠣᠮ ᠤᠩᠰᠢᠭᠤᠯᠤᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠲᠤᠳ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠵᠠᠯᠪᠠᠷᠢᠨ ᠰᠠᠭᠤᠭᠠᠳ ᠲᠡᠭᠦᠨ ᠢ᠋ ᠨᠢ ᠰᠣᠨᠣᠰᠴᠤ ᠪᠠᠢᠪᠠ᠃ ᠬᠢᠵᠢᠶᠡᠯᠳᠡᠭᠦᠦ ᠨᠠᠰᠤᠨ ᠤ᠋ ᠪᠥᠭᠡᠳ ᠤᠯᠠᠭᠠᠨ᠂ ᠰᠢᠷᠠ ᠬᠤᠪᠴᠠᠰᠤ ᠠᠯᠠᠭᠯᠠᠭᠤᠯᠤᠨ ᠡᠮᠦᠰᠦᠭᠰᠡᠨ ᠲᠡᠷᠡ ᠴᠠᠭᠠᠨ ᠴᠢᠷᠠᠢᠲᠠᠢ ᠯᠠᠮᠠ ᠮᠢᠬᠠ ᠵᠣᠭᠣᠭᠯᠠᠳᠠᠭ ᠦᠭᠡᠢ᠂ ᠰᠦ ᠴᠠᠭᠠᠨ ᠢᠳᠡᠭᠡ᠂ ᠰᠢᠷᠠ ᠲᠣᠰᠣᠨ ᠳ᠋ᠤ᠌ ᠪᠠᠭᠰᠠᠷᠠᠭᠰᠠᠨ ᠵᠠᠮᠪᠠᠭᠠ ᠭᠤᠯᠢᠷ ᠢᠳᠡᠳᠡᠭ᠂ ᠠᠷᠢᠬᠢ ᠳᠡᠷᠡᠰᠦᠨ ᠦ᠌ ᠵᠦᠢᠯ ᠪᠠᠢᠲᠤᠭᠠᠢ ᠭᠡᠭᠦᠦ ᠶ᠋ᠢᠨ ᠢᠰᠬᠦᠯᠡᠩ ᠠᠢᠷᠠᠭ ᠴᠦ᠍ ᠠᠮᠰᠠᠳᠠᠭ ᠦᠭᠡᠢ᠂ ᠴᠠᠭ ᠦᠷᠭᠦᠯᠵᠢᠳᠡ ᠮᠢᠰᠢᠶᠡᠨ᠂ ᠤᠷᠤᠭᠤᠯ ᠨᠢ ᠬᠥᠳᠡᠯᠦᠭᠡᠳ ᠨᠣᠮ ᠤᠩᠰᠢᠵᠤ ᠪᠠᠢᠳᠠᠭ ᠨᠢ ᠰᠣᠨᠢᠨ ᠠᠵᠢ᠃ ᠡᠨᠡ ᠯᠠᠮᠠ ᠥᠪᠡᠷ ᠦ᠋ᠨ ᠳᠠᠭᠠᠭᠤᠯ ᠳᠣᠲᠣᠷᠠ ᠠ᠋ᠴᠠ ᠠᠷᠪᠠᠭᠠᠳ ᠬᠥᠮᠦᠨ ᠦ᠌ ᠬᠠᠮᠲᠤ ᠠᠷᠢᠬᠪᠥᠢ᠍ᠬᠡ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠲᠠᠪᠤᠨ ᠤᠳᠠᠭᠠ ᠣᠴᠢᠵᠤ ᠨᠣᠮ ᠲᠠᠯᠪᠢᠨ᠂ ᠪᠠᠰᠠ ᠮᠡᠷᠭᠡ ᠲᠥᠯᠭᠡ ᠪᠠᠭᠤᠯᠭᠠᠵᠤ᠂ ᠭᠠᠢ ᠪᠠᠷᠴᠢᠳ ᠠᠷᠢᠯᠭᠠᠬᠤ ᠭᠦᠷᠢᠮ ᠦ᠋ᠨ ᠨᠣᠮ ᠠᠢᠯᠠᠳᠬᠠᠬᠤ ᠳ᠋ᠤ᠌ ᠪᠠᠨ ᠴᠢᠬᠢᠨ ᠳ᠋ᠦ᠍ ᠴᠢᠮᠡᠭᠲᠡᠢ ᠦᠭᠡ ᠬᠡᠯᠡᠯᠡ᠃ ᠯᠠᠮᠠᠳᠠᠨ ᠳ᠋ᠤ᠌ ᠪᠠᠷᠠ ᠪᠣᠯᠤᠭᠴᠢ ᠶ᠋ᠢᠨ ᠨᠢᠭᠡ ᠨᠢ ᠪᠣᠯᠤᠭᠰᠠᠨ ᠪᠢᠯᠢᠭᠦᠨ ᠲᠡᠭᠦᠨ ᠦ᠌ ᠠᠢᠯᠠᠳᠤᠭᠰᠠᠨ ᠦᠭᠡ ᠶ᠋ᠢ ᠪᠦᠷᠢᠨᠡ ᠰᠣᠨᠣᠰᠪᠠ᠃ ᠲᠡᠷᠡ ᠪᠡᠷ ᠬᠡᠯᠡᠮᠦᠷᠴᠢ ᠪᠡᠷ ᠳᠠᠮᠵᠢᠭᠤᠯᠤᠨ ᠬᠡᠯᠡᠬᠦ ᠳ᠋ᠡᠭᠡᠨ᠄
— ᠨᠠᠰᠤ ᠪᠠᠷᠠᠭᠰᠠᠨ ᠮᠥᠩᠬᠡ ᠬᠠᠭᠠᠨ ᠲᠩᠷᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠣᠴᠢᠵᠤ ᠰᠠᠢᠨ ᠲᠥᠷᠥᠯ ᠢ᠋ ᠣᠯᠤᠨᠠ᠃ ᠲᠠᠨ ᠤ᠋ ᠳ᠋ᠤ᠌ ᠨᠢᠭᠡ ᠲᠠᠢᠷᠠᠩ ᠱᠦᠭᠯᠡᠭᠰᠡᠨ ᠪᠠᠢᠨᠠ᠃ ᠲᠡᠭᠦᠨ ᠢ᠋ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠬᠤ ᠳ᠋ᠤ᠌ ᠪᠡᠷᠬᠡ ᠪᠣᠯᠤᠯᠲᠠᠢ᠃ ᠶᠡᠬᠡ ᠵᠠᠬᠢᠷᠤᠭᠴᠢ ᠲᠠᠨ ᠤ᠋ ᠦᠢᠯᠡ ᠳ᠋ᠦ᠍ ᠨᠡᠯᠢᠶᠡᠨ ᠪᠠᠷᠴᠢᠳ ᠪᠠᠢᠨᠠ᠃ ᠲᠠᠨ ᠤ᠋ ᠪᠦᠷ ᠣᠢᠷᠠ ᠳᠣᠲᠣᠨᠣ ᠶ᠋ᠢᠨ ᠰᠠᠳᠤᠨ ᠲᠥᠷᠥᠯ ᠦ᠋ᠨ ᠬᠥᠮᠦᠨ ᠴᠢᠨᠢ ᠲᠠᠨ ᠤ᠋ ᠬᠢᠬᠦ ᠦᠢᠯᠡ ᠳ᠋ᠦ᠍ ᠶᠡᠬᠡ ᠰᠠᠳᠠᠭᠠ ᠬᠢᠵᠦ ᠰᠠᠨᠠᠭᠰᠠᠨ ᠰᠠᠨᠠᠭᠠ ᠶ᠋ᠢ ᠲᠠᠨᠢ ᠭᠬᠢᠷᠲᠦᠭᠦᠯᠬᠦ ᠪᠣᠯᠤᠯᠲᠠᠢ᠃ ᠬᠠᠷᠠ ᠡᠯᠢᠭᠡᠲᠡᠢ ᠰᠠᠢᠨ ᠨᠥᠬᠥᠳ ᠴᠢᠨᠢ ᠯᠡ ᠲᠠᠨ ᠳ᠋ᠤ᠌ ᠶᠡᠬᠡ ᠲᠤᠰᠠᠯᠠᠬᠤ ᠪᠣᠯᠪᠠ ᠤᠤ ᠴᠦ᠍ ᠁ ᠭᠡᠵᠦ ᠬᠡᠯᠡᠵᠦ᠂ ᠥᠪᠡᠷ ᠢ᠋ᠶ᠋ᠡᠨ ᠪᠢᠰᠢ᠂ ᠳᠠᠭᠠᠭᠤᠯᠤᠨ ᠶᠠᠪᠤᠭᠠ ᠨᠢᠭᠡ ᠯᠠᠮᠠ ᠪᠠᠷ ᠢ᠋ᠶ᠋ᠠᠨ ᠠᠷᠢᠬᠪᠥᠢ᠍ᠬᠡ ᠶ᠋ᠢᠨ ᠭᠡᠷ ᠲᠦ᠍ ᠭᠦᠷᠢᠮ ᠬᠢᠯᠭᠡᠨ ᠨᠣᠮ ᠤᠩᠰᠢᠭᠤᠯᠤᠭᠠᠳ ᠲᠥᠯᠭᠡ ᠲᠠᠯᠪᠢᠨ᠂ ᠪᠠᠰᠠ《ᠲᠠᠨ ᠤ᠋ ᠨᠡᠩ ᠣᠢᠷᠠ ᠶ᠋ᠢᠨ ᠲᠥᠷᠥᠯ ᠦ᠋ᠨ ᠬᠥᠮᠦᠨ ᠴᠢᠨᠢ ᠰᠠᠪᠳᠠᠭ ᠲᠠᠢᠷᠠᠩ ᠠ᠋ᠴᠠ ᠳᠤᠲᠠᠭᠤ ᠦᠭᠡᠢ ᠪᠡᠷ ᠲᠠᠨ ᠳ᠋ᠤ᠌ ᠭᠠᠢ ᠤᠴᠠᠷᠠᠭᠤᠯᠤᠨᠠ᠃ ᠲᠡᠷᠡ ᠪᠣᠯ ᠴᠠᠭᠠᠨᠠ ᠪᠠᠨ ᠶᠡᠬᠡ ᠴᠢᠭᠢᠷᠠᠭ ᠪᠠᠲᠤ ᠰᠠᠭᠤᠷᠢᠲᠠᠢ ᠪᠠᠢᠨᠠ᠃ ᠪᠤᠷᠤᠭᠤ ᠬᠡᠯᠡ ᠶ᠋ᠢᠨ ᠠᠮᠢᠲᠠᠳ ᠲᠡᠭᠦᠨ ᠳ᠋ᠦ᠍ ᠲᠤᠰᠠ ᠬᠦᠷᠭᠡᠨ᠂ ᠲᠠᠨ ᠳ᠋ᠤ᠌ ᠤᠴᠠᠷᠠᠬᠤ ᠪᠠᠷᠴᠢᠳ ᠢ᠋ ᠤᠯᠠᠮ ᠭᠠᠭᠠᠷᠠᠭᠤᠯᠤᠨᠠ》 ᠭᠡᠵᠦ ᠠᠢᠯᠠᠳᠴᠠᠢ᠃ ᠡᠨᠡ ᠪᠦᠬᠦᠨ ᠢ᠋ ᠯᠠᠮᠠ ᠳ᠋ᠤ᠌ ᠪᠠᠷᠠ ᠪᠣᠯᠵᠤ ᠶᠠᠪᠤᠭᠠ ᠪᠢᠯᠢᠭᠦᠨ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠬᠤ ᠳ᠋ᠤ᠌ ᠪᠠᠨ ᠲᠡᠷᠡ ᠲᠠᠢᠷᠠᠩ ᠪᠣᠯᠵᠤ ᠪᠣᠢ ᠬᠥᠮᠦᠨ ᠢ᠋ ᠨᠢ ᠳᠣᠲᠣᠷᠠ ᠪᠠᠨ ᠭᠠᠳᠠᠷᠯᠠᠨ ᠪᠠᠢᠪᠠ᠃ ᠦᠷᠭᠦᠭᠡᠨ ᠳ᠋ᠦ᠍ ᠵᠣᠭᠣᠭ ᠪᠠᠷᠢᠨ᠂ ᠯᠠᠮᠠ ᠳ᠋ᠤ᠌ ᠲᠠᠷᠠᠭ ᠰᠦ ᠡᠷᠭᠦᠵᠦ ᠶᠠᠪᠤᠭᠰᠠᠨ ᠮᠣᠷᠢᠨᠱᠠᠭᠠᠢ ᠴᠦ᠍ ᠪᠠᠰᠠ ᠲᠡᠷᠡ ᠬᠤᠸᠠᠷᠠᠭ ᠤ᠋ᠳ ᠤ᠋ᠨ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠶ᠋ᠢ ᠰᠣᠨᠣᠰᠴᠠᠢ᠃
ᠠᠷᠢᠬᠪᠥᠢ᠍ᠬᠡ ᠵᠠᠬᠢᠷᠤᠭᠴᠢ ᠬᠠᠰᠢᠮᠸᠷ ᠤ᠋ᠨ ᠯᠠᠮᠠ ᠶ᠋ᠢ ᠳᠡᠷᠭᠡᠳᠡ ᠪᠡᠨ ᠬᠠᠭᠠᠰ ᠰᠠᠷᠠ ᠭᠠᠷᠤᠢ ᠪᠠᠢᠯᠭᠠᠭᠠᠳ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠨᠢ ᠮᠠᠯ ᠠᠬᠤᠢ᠂ ᠡᠳ᠋ ᠮᠥᠩᠭᠥ ᠪᠡᠷ ᠡᠷᠭᠦᠯ ᠪᠠᠷᠢᠨ᠂ ᠥᠪᠡᠷ ᠢ᠋ ᠪᠡᠨ ᠳᠠᠭᠠᠳᠬᠠᠵᠤ᠂ ᠵᠣᠷᠢᠵᠤ ᠪᠠᠢᠭᠠ ᠦᠢᠯᠡ ᠪᠡᠨ ᠪᠦᠲᠦᠮᠵᠢᠲᠡᠢ ᠪᠣᠯᠭᠠᠬᠤ ᠬᠡᠷᠡᠭ ᠲᠦ᠍ ᠵᠠᠯᠪᠠᠷᠢᠯ ᠦᠢᠯᠡᠳᠦᠨ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠᠬᠤ ᠶ᠋ᠢ ᠬᠦᠰᠡᠨ ᠮᠣᠷᠳᠠᠭᠤᠯᠵᠤ ᠪᠢᠯᠡ᠃ ᠯᠠᠮᠠᠳᠠᠨ ᠢ᠋ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠢᠯᠢᠭᠦᠨ ᠭᠡᠷ ᠲᠦ᠍ ᠪᠡᠨ ᠭᠡᠷᠭᠡᠢ ᠲᠡᠢ ᠪᠡᠨ ᠵᠡᠷᠭᠡᠴᠡᠨ ᠰᠠᠭᠤᠭᠠᠳ ᠶᠠᠷᠢᠶᠠ ᠪᠣᠯᠬᠤ ᠳ᠋ᠤ᠌ ᠪᠠᠨ ᠥᠪᠡᠷ ᠦ᠋ᠨ ᠡᠵᠡᠨ ᠵᠠᠬᠢᠷᠤᠭᠴᠢ ᠶ᠋ᠢ ᠪᠡᠨ ᠳᠡᠭᠡᠳᠦᠯᠡᠬᠦ ᠳ᠋ᠦ᠍ ᠴᠢᠭᠯᠡᠵᠦ ᠪᠢᠯᠡ᠃ ᠮᠣᠷᠢᠨᠱᠠᠭᠠᠢ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠷᠠᠨ ᠪᠠᠢᠵᠤ᠂ ᠱᠠᠩᠬᠤᠨ ᠭᠡᠵᠢᠭᠡ ᠪᠡᠨ ᠵᠠᠰᠠᠵᠤ ᠣᠷᠣᠯᠳᠣᠭᠰᠠᠭᠠᠷ᠄
— ᠡᠷᠡᠴᠦᠳ ᠲᠠ ᠨᠠᠷ ᠵᠦᠭᠡᠷ ᠰᠠᠭᠤᠵᠤ ᠴᠢᠳᠠᠳᠠᠭ ᠦᠭᠡᠢ᠂ ᠲᠠᠩᠨᠠᠨ ᠨᠢᠭᠡ ᠶ᠋ᠢ ᠪᠡᠨ ᠤᠷᠤᠯᠳᠤᠵᠤ ᠪᠠᠢᠬᠤ ᠶᠤᠮ ᠠ᠋ ᠳᠠ ᠭᠡᠵᠦ ᠬᠡᠯᠡᠭᠡᠳ ᠢᠨᠢᠶᠡᠯᠡ᠃ ᠪᠢᠯᠢᠭᠦᠨ ᠡᠨᠡ ᠦᠭᠡᠨ ᠳ᠋ᠦ᠍ ᠭᠠᠢᠬᠠᠵᠤ᠄
— ᠶᠠᠭᠠᠬᠢᠵᠤ ᠪᠠᠢᠨᠠ ᠬᠦ ᠭᠡᠮᠡᠨ ᠯᠠᠪᠯᠠᠨ ᠠᠰᠠᠭᠤᠪᠠ᠃
— ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠡᠵᠡᠨ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠣᠭᠣᠯᠠ ᠴᠠᠢ ᠣᠷᠣᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠳᠡᠷᠭᠡᠳᠡ ᠨᠢ ᠨᠢᠭᠡ ᠶᠡᠬᠡ ᠲᠦᠰᠢᠮᠡᠯ ᠵᠠᠪᠠᠯ ᠪᠠᠢᠵᠤ᠂ ᠡᠨᠡ ᠲᠡᠷᠡ ᠥᠭᠡᠷᠡ ᠪᠤᠰᠤᠳ ᠨᠢᠭᠡ ᠬᠥᠮᠦᠨ ᠦ᠌ ᠲᠤᠬᠠᠢ ᠯᠠ ᠶᠤᠮ ᠰᠢᠭ᠋ ᠬᠠᠴᠢᠨ ᠦᠭᠡ ᠰᠣᠨᠣᠰᠤᠭᠳᠠᠳᠠᠭ᠃ ᠪᠢ ᠲᠡᠭᠦᠨ ᠢ᠋ ᠨᠢ ᠲᠡᠳᠦᠢ ᠯᠡ ᠠᠩᠵᠠᠭᠠᠷᠠᠳᠠᠭ ᠦᠭᠡᠢ᠃
— ᠤᠤᠬᠠᠢ᠂ ᠬᠡᠨ ᠢ᠋ ᠶᠠᠭᠤ ᠭᠡᠵᠦ ᠬᠠᠷᠠᠳᠠᠵᠤ ᠪᠠᠢᠨᠠ ᠪᠣᠢ? ᠪᠣᠳᠣᠪᠠᠯ ᠲᠣᠮᠣ ᠨᠣᠶᠠᠳ ᠤ᠋ᠳ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠳᠠᠵᠤ ᠰᠡᠷᠡᠳᠡᠭᠡᠳ ᠡᠯᠳᠡᠪ ᠢ᠋ᠶ᠋ᠡᠷ ᠶᠠᠷᠢᠵᠤ ᠪᠠᠢᠭᠠ ᠪᠢᠵᠡ ᠠ᠋?
— ᠲᠡᠢᠮᠦ ᠳᠡ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠮᠠᠨ ᠤ᠋ ᠠᠷᠢᠬᠪᠥᠢ᠍ᠬᠡ ᠨᠣᠶᠠᠨ ᠥᠪᠡᠷ ᠢ᠋ᠶ᠋ᠡᠨ ᠪᠣᠯ ᠡᠯᠳᠡᠪ ᠬᠣᠪ ᠵᠢᠪ ᠲᠦ᠍ ᠳᠤᠷᠠ ᠦᠭᠡᠢ᠂ ᠰᠢᠯᠤᠭᠤᠨ ᠵᠠᠩ ᠲᠠᠢ᠂ ᠬᠡᠯᠡᠬᠦ ᠠᠢᠯᠠᠳᠬᠤ ᠵᠦᠢᠯ ᠢ᠋ᠶ᠋ᠡᠨ ᠬᠡᠨ ᠢ᠋ ᠴᠦ᠍ ᠭᠡᠬᠦ ᠦᠭᠡᠢ ᠰᠢᠭᠤᠳᠬᠠᠨ ᠬᠡᠯᠡᠳᠡᠭ ᠡᠷᠡᠮᠡᠬᠡᠢ ᠰᠠᠢᠬᠠᠨ ᠡᠷᠡ᠃ ᠲᠠ ᠮᠡᠳᠡᠨᠡ ᠪᠢᠵᠡ ᠳᠡ?
— ᠲᠡᠢᠮᠦ ᠪᠠᠢᠬᠤ ᠠ᠋᠃ ᠲᠡᠳᠡ ᠵᠠᠬᠢᠷᠤᠭᠴᠢ ᠨᠣᠶᠠᠨ᠂ ᠵᠠᠷᠢᠮ ᠴᠢᠩᠰᠠᠩ ᠶᠡᠬᠡ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠷᠠᠯᠬᠠᠬᠤ ᠳ᠋ᠤ᠌《ᠲᠠ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣ ᠰᠠᠭᠤᠬᠤ ᠶᠣᠰᠣᠲᠠᠢ ᠬᠥᠮᠦᠨ》᠃《ᠲᠠ ᠮᠥᠩᠬᠡ ᠬᠠᠭᠠᠨ ᠤ᠋ ᠵᠠᠷᠯᠢᠭᠯᠠᠵᠤ ᠪᠠᠢᠭᠰᠠᠨ ᠶᠣᠰᠣ ᠪᠠᠷ ᠭᠣᠯᠣᠮᠲᠠ ᠲᠦᠰᠢᠭᠰᠡᠨ ᠶᠡᠬᠡ ᠨᠣᠶᠠᠨ》᠂《ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠲᠠᠨ ᠠ᠋ᠴᠠ ᠤᠷᠢᠲᠠᠵᠤ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠠᠪᠬᠤ ᠭᠡᠵᠦ ᠪᠠᠢᠭᠠ ᠶᠠᠩᠵᠤᠲᠠᠢ》᠃《ᠬᠤᠪᠢᠯᠠᠢ ᠶ᠋ᠢᠨ ᠳᠡᠷᠭᠡᠳᠡ ᠡᠴᠡ ᠰᠡᠵᠢᠭᠲᠡᠢ ᠦᠭᠡ ᠰᠣᠨᠣᠰᠤᠭᠳᠠᠵᠤ ᠪᠠᠢᠨᠠ ᠰᠢᠦ᠃ ᠲᠠ ᠡᠷᠲᠡᠬᠡᠨ ᠬᠡᠷᠡᠭ ᠦᠢᠯᠡ ᠪᠡᠨ ᠪᠣᠯᠭᠣᠭᠠᠵᠤ ᠪᠣᠳᠣ》 ᠭᠡᠬᠦ ᠰᠢᠭ ᠶᠠᠭᠤᠮᠠ ᠶᠠᠷᠢᠭᠠᠳ ᠪᠠᠢᠬᠤ ᠰᠣᠨᠣᠰᠤᠭᠳᠠᠵᠤ ᠪᠠᠢᠨᠠ᠁ ᠭᠡᠵᠦ ᠮᠣᠷᠢᠨᠱᠠᠭᠠᠢ ᠬᠡᠯᠡᠯᠡ᠃ ᠪᠢᠯᠢᠭᠦᠨ ᠭᠡᠷᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠢᠬᠠᠨ ᠰᠠᠨᠠᠭᠠᠳ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠶ᠋ᠢ ᠰᠣᠨᠣᠰᠤᠨ᠂ ᠳᠠᠭᠤ ᠦᠭᠡᠢ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠪᠠᠢᠪᠠ᠃ ᠮᠣᠷᠢᠨᠱᠠᠭᠠᠢ ᠶᠠᠷᠢᠶᠠ ᠪᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃
ᠭᠡᠷ ᠦ᠋ᠨ ᠬᠢᠨᠢ ᠭᠠᠳᠠᠭᠠ ᠠᠯᠠᠭ ᠱᠠᠭᠠᠵᠠᠭᠠᠢ ᠬᠦᠷᠴᠦ ᠢᠷᠡᠵᠦ ᠪᠠᠭᠤᠭᠠᠳ ᠵᠠᠭ᠂ ᠵᠠᠭ ᠬᠢᠨ ᠳᠤᠤᠭᠠᠷᠴᠤ ᠡᠬᠢᠯᠡᠪᠡ᠃ ᠲᠡᠷᠡ ᠰᠢᠪᠠᠭᠤ ᠬᠢᠷᠢ ᠳ᠋ᠦ᠍ ᠪᠡᠨ ᠶᠡᠬᠡ ᠲᠣᠮᠣ ᠶᠠᠷᠢᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ ᠵᠥᠩᠳᠡᠭᠡᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠪᠢᠯᠢᠭᠦᠨ ᠲᠡᠭᠦᠨ ᠢ᠋ ᠴᠢᠩᠨᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠢᠨᠢᠶᠡᠵᠦ᠄
— ᠴᠢ ᠰᠣᠨᠣᠰᠴᠤ ᠪᠠᠢᠨᠠ ᠤᠤ? ᠪᠠᠰᠠ ᠯᠠ ᠴᠢᠨᠦ ᠢᠵᠢᠯᠢ ᠰᠣᠨᠢᠨ ᠶᠠᠭᠤᠮᠠ ᠶ᠋ᠢ ᠡᠨᠡ ᠱᠠᠭᠠᠵᠠᠭᠠᠢ ᠶᠠᠷᠢᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ ᠭᠡᠪᠡ᠃ ᠮᠣᠷᠢᠨᠱᠠᠭᠠᠢ ᠲᠡᠭᠦᠨ ᠢ᠋ ᠴᠢᠩᠨᠠᠭᠰᠠᠨ ᠳᠣᠣᠷᠠ ᠪᠠᠨ ᠨᠡᠭᠡᠷᠡᠨ ᠡᠨᠡ ᠱᠠᠭᠠᠵᠠᠭᠠᠢ ᠶᠠᠭᠤ ᠶᠠᠷᠢᠵᠤ ᠪᠠᠢᠭᠠ ᠪᠣᠯ? ᠬᠡᠯᠡ ᠶ᠋ᠢ ᠨᠢ ᠮᠡᠳᠡᠳᠡᠭ ᠴᠦ᠍ ᠪᠣᠯᠤᠭᠠᠰᠠᠢ᠃ ᠡᠵᠢ ᠱᠠᠭᠠᠵᠠᠭᠠᠢ ᠳᠤᠤᠭᠠᠷᠬᠤ ᠪᠠᠷ《ᠰᠠᠢᠨ ᠬᠡᠯᠡ! ᠰᠠᠢᠨ ᠬᠡᠯᠡ! ᠰᠢᠷᠠ ᠲᠣᠰᠣ ᠬᠣᠳᠣᠭᠣᠳᠣᠨ ᠳ᠋ᠤ᠌ ᠴᠢᠨᠢ ᠬᠢᠶᠡ》 ᠭᠡᠳᠡᠭ ᠭᠡᠳ
— ᠰᠢᠷᠠ ᠲᠣᠰᠣ ᠥᠭᠭᠦᠶᠡ ᠴᠢᠮᠠᠲᠤ ᠭᠡᠵᠦ ᠴᠢᠩᠭᠠ ᠪᠠᠷ ᠬᠡᠯᠡᠯᠡ᠃ ᠪᠢᠯᠢᠭᠦᠨ ᠢᠨᠢᠶᠡᠭᠰᠡᠭᠡᠷ᠄
— ᠪᠢ ᠡᠨᠡ ᠰᠢᠪᠠᠭᠤᠨ ᠤ᠋ ᠶᠠᠷᠢᠶᠠ ᠶ᠋ᠢ ᠮᠡᠳᠡᠯᠡ ᠭᠡᠪᠡ᠃
— ᠵᠠ ᠶᠠᠭᠤ ᠶᠠᠷᠢᠵᠤ ᠪᠠᠢᠨᠠ ᠪᠣᠢ᠂ ᠲᠠ ᠬᠡᠯᠡ ᠳᠡ?
— ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠴᠢ ᠬᠠᠭᠠᠨ ᠪᠣᠯᠬᠤ ᠤᠤ? ᠪᠢ ᠪᠣᠯᠬᠤ ᠤᠤ? ᠭᠡᠵᠦ ᠯᠡ ᠮᠠᠨ ᠤ᠋ ᠵᠠᠬᠢᠷᠤᠭᠴᠢ ᠨᠠᠷ ᠤ᠋ᠨ ᠶᠠᠷᠢᠵᠤ ᠪᠠᠢᠭᠠ ᠶ᠋ᠢ ᠡᠨᠡ ᠰᠢᠪᠠᠭᠤ ᠳᠠᠭᠤᠷᠢᠶᠠᠨ ᠳᠠᠮᠵᠢᠭᠤᠯᠵᠤ ᠪᠠᠢᠨᠠ ᠭᠡᠵᠦ ᠪᠢᠯᠢᠭᠦᠨ ᠳᠣᠭᠣᠭᠢᠯᠠᠨ ᠬᠡᠯᠡᠭᠡᠳ ᠢᠨᠢᠶᠡᠨ ᠠᠯᠤᠰ ᠢ᠋ ᠪᠣᠳᠣᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠲᠣᠭᠣᠨᠣ ᠥᠭᠡᠳᠡ ᠰᠢᠷᠳᠡᠪᠡ᠃
— ᠲᠠ ᠪᠢᠳᠡ ᠬᠣᠶᠠᠷ ᠤ᠋ᠨ ᠰᠢᠪᠠᠭᠤᠨ ᠤ᠋ ᠬᠡᠯᠡ ᠮᠡᠳᠡᠵᠦ ᠶᠠᠷᠢᠬᠤ ᠴᠦ᠍ ᠬᠥᠭ ᠪᠠᠢᠬᠤ ᠳᠠ ᠭᠡᠵᠦ ᠮᠣᠷᠢᠨᠱᠠᠭᠠᠢ ᠢᠨᠢᠶᠡᠳᠦᠮ ᠪᠣᠯᠭᠠᠨ ᠬᠡᠯᠡᠪᠡ᠃
— — — —
① ᠤᠭ ᠭᠡᠷᠡ ᠶ᠋ᠢ ᠮᠥᠩᠬᠡ ᠬᠠᠭᠠᠨ᠂ ᠬᠣᠶᠠᠳᠤᠭᠠᠷ ᠭᠸᠲ᠋ᠣᠮ ᠨᠠᠷ1253 ᠣᠨ ᠳ᠋ᠤ᠌ ᠪᠠᠢᠭᠤᠯᠵᠤ᠂ ᠮᠣᠳᠣᠷ ᠤ᠋ᠨ ᠦᠰᠦᠭ ᠵᠢᠷᠤᠭᠰᠠᠨ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ