ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠬᠣᠶᠠᠳᠤᠭᠠᠷ ᠪᠦᠯᠦᠭ –2>᠂ ᠬᠤᠯᠠᠨ ᠤ ᠤᠨᠠᠭᠠ Бүргэд харьд үүрэлдэггүй – Ж᠂ Пүрэв <2-р бүлэг ~2>. хулангийн унага
50ᠬᠣᠶᠠᠳᠤᠭᠠᠷ ᠪᠦᠯᠦᠭ - ᠭᠣᠯᠣᠮᠲᠠ ᠳᠦᠰᠢᠬᠰᠡᠨ ᠡᠵᠡᠨ
ᠬᠣᠶᠠᠷ᠂ ᠬᠤᠯᠠᠨ ᠤ᠋ ᠤᠨᠠᠭᠠ
— ᠬᠠᠭᠠᠨ ᠠᠬᠠ ᠨᠢᠭᠡᠨᠲᠡ ᠪᠠᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠤᠴᠢᠷ ᠤᠯᠤᠰ ᠭᠦᠷᠦᠨ ᠦ᠌ ᠬᠡᠷᠡᠭ ᠶᠠᠪᠤᠳᠠᠯ ᠴᠠᠯᠠᠭᠠᠷᠳᠠᠨ ᠰᠤᠯᠠᠷᠠᠬᠤ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠨᠠ᠃ ᠲᠡᠢᠮᠦ ᠪᠠᠢᠳᠠᠯ ᠢ᠋ ᠶᠠᠭᠠᠬᠢᠵᠤ ᠭᠠᠷᠭᠠᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠪᠢᠯᠡ ᠭᠡᠬᠦ ᠡᠴᠡ ᠶᠠᠰᠤ ᠬᠠᠪᠲᠠᠢᠵᠤ ᠪᠠᠢᠨᠠ ᠭᠡᠵᠦ ᠰᠠᠷᠬᠤᠳ᠂ ᠠᠢᠷᠠᠭ ᠠᠶᠠᠭᠠᠯᠠᠨ ᠲᠠᠯᠪᠢᠭᠰᠠᠨ ᠰᠢᠷᠡᠭᠡᠨ ᠦ᠌ ᠠᠷᠤ ᠠ᠋ᠴᠠ ᠠᠷᠢᠬᠪᠦ᠋ᠬᠡ ᠬᠡᠯᠡᠯᠡ᠃ ᠪᠤᠰᠤᠳ ᠠᠬᠠ ᠳᠡᠭᠦᠦ ᠨᠢ ᠡᠨᠡ ᠦᠭᠡ ᠶ᠋ᠢ ᠲᠠᠭᠠᠯᠠᠨ ᠰᠣᠨᠣᠰᠤᠭᠠᠳ ᠴᠢᠷᠠᠢ ᠳ᠋ᠤ᠌ ᠪᠠᠨ ᠵᠣᠪᠠᠭᠤᠷᠢᠲᠤ ᠪᠠᠢᠳᠠᠯ ᠳᠤᠰᠬᠠᠨᠠ᠃
ᠬᠥᠯᠡᠬᠦ ᠬᠠᠨ ᠥᠨᠳᠡᠢᠵᠦ᠄
— ᠲᠥᠷᠥ ᠶ᠋ᠢᠨ ᠵᠠᠬᠢᠷᠭᠠ ᠥᠪᠡᠷ ᠢ᠋ᠶ᠋ᠡᠨ ᠶᠡᠬᠡ ᠡᠮᠬᠢ ᠴᠡᠭᠴᠡᠲᠡᠢ᠂ ᠴᠢᠩᠭᠠᠬᠠᠨ ᠳᠢᠭᠯᠢᠮ ᠲᠡᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠬᠦ ᠶᠣᠰᠣᠲᠠᠢ ᠪᠣᠯᠤᠨᠠ ᠪᠢᠵᠡ ᠭᠡᠵᠦ ᠬᠡᠯᠡᠯᠡ᠃
ᠬᠤᠪᠢᠯᠠᠢ ᠵᠢᠱ᠌ᠢᠮᠡ ᠦᠭᠡᠢ ᠴᠢᠷᠠᠢ ᠭᠠᠷᠭᠠᠨ ᠲᠣᠮᠣ ᠬᠤᠯᠤ ᠲᠠᠢ ᠠᠢᠷᠠᠭ ᠠ᠋ᠴᠠ ᠪᠠᠨ ᠬᠡᠳᠦ ᠪᠠᠯᠭᠤᠨ ᠵᠠᠯᠭᠢᠯᠠᠭᠠᠳ᠄
— ᠵᠠ ᠶᠠᠭᠠᠬᠢᠬᠤ ᠪᠣᠢ ᠳᠠ᠂ ᠲᠥᠷᠥ ᠪᠠᠷᠢᠬᠤ ᠶᠡᠬᠡ ᠬᠠᠭᠠᠨ ᠤ᠋ ᠤᠬᠠᠭᠠᠨ ᠰᠠᠨᠠᠭᠠ ᠮᠡᠳᠡᠬᠦ ᠬᠡᠷᠡᠭ ᠭᠡᠪᠡ᠃ ᠡᠨᠡ ᠦᠭᠡ ᠪᠤᠰᠤᠳ ᠳᠤ ᠣᠢᠯᠠᠭᠠᠮᠵᠢ ᠦᠭᠡᠢ ᠪᠠᠢᠯᠠ᠃
ᠠᠷᠢᠬᠪᠦ᠋ᠬᠡ ᠡᠭᠦᠨ ᠡᠴᠡ ᠰᠠᠳᠤᠨ
— ᠲᠥᠷᠥ ᠶ᠋ᠢ ᠬᠡᠨ ᠪᠠᠷᠢᠬᠤ ᠪᠣᠯᠵᠤ ᠪᠠᠢᠨᠠ ᠪᠣᠢ? ᠭᠡᠵᠦ ᠬᠡᠨᠡᠭ ᠦᠭᠡᠢᠬᠡᠨ ᠴᠢᠷᠠᠢ ᠭᠠᠷᠭᠠᠨ ᠠᠰᠠᠭᠤᠪᠠ᠃
— ᠲᠠᠨ ᠳ᠋ᠤ᠌ ᠯᠠ ᠠᠬᠠ ᠬᠠᠭᠠᠨ ᠢᠲᠡᠭᠡᠯ ᠬᠠᠢᠷᠠᠯᠠᠵᠤ᠂ ᠡᠬᠡ ᠨᠤᠲᠤᠭ ᠢ᠋ᠶ᠋ᠠᠨ ᠵᠠᠬᠢᠷᠤᠭᠤᠯᠤᠭᠰᠠᠨ ᠪᠢᠰᠢ ᠤᠤ ᠭᠡᠵᠦ ᠲᠠᠯᠢᠢᠭᠴᠢ ᠬᠠᠭᠠᠨ ᠤ᠋ ᠨᠢᠭᠡ ᠳᠡᠭᠦᠦ ᠨᠢ ᠤᠷᠢᠲᠠᠵᠤ ᠠᠮᠠ ᠳᠤᠤᠭᠠᠷᠤᠯᠠ᠃
ᠬᠤᠪᠢᠯᠠᠢ ᠶᠡᠬᠡᠮᠰᠦᠭ ᠶᠠᠩᠵᠤ ᠪᠠᠷ ᠲᠠᠮᠰᠢᠶᠠᠯᠠᠨ᠂ ᠰᠠᠬᠠᠯ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠤᠷᠤᠯᠳᠤᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠨᠠᠮᠬᠠᠨ ᠳᠠᠭᠤ ᠪᠠᠷ᠄
— ᠲᠥᠷᠥ ᠶ᠋ᠢ ᠪᠠᠷᠢᠵᠤ ᠬᠥᠲᠥᠯᠦᠨ ᠶᠠᠪᠤᠭᠤᠯᠤᠨᠠ ᠭᠡᠳᠡᠭ ᠠᠮᠠᠷ ᠶᠠᠭᠤᠮᠠ ᠪᠢᠰᠢ ᠭᠡᠵᠦ ᠪᠣᠭᠳᠠ ᠡᠵᠡᠨ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠵᠠᠷᠯᠢᠭᠯᠠᠵᠤ ᠪᠠᠢᠭᠰᠠᠨ᠃ ᠶᠡᠬᠡ ᠤᠬᠠᠭᠠᠨ᠂ ᠵᠣᠷᠢᠭ ᠰᠠᠮᠪᠠᠭᠠ᠂ ᠨᠢᠭᠡᠨ ᠴᠢᠭ ᠢ᠋ ᠪᠠᠷᠢᠭᠰᠠᠨ ᠲᠤᠭᠤᠰᠢᠲᠠᠢ ᠪᠣᠳᠣᠯᠭᠠ ᠭᠠᠷᠭᠠᠵᠤ ᠬᠥᠲᠥᠯᠬᠦ ᠶᠣᠰᠣᠲᠠᠢ᠃ ᠭᠦᠶᠦᠭ ᠠᠬᠠ ᠲᠡᠭᠡᠵᠦ ᠴᠢᠳᠠᠭᠠ ᠦᠭᠡᠢ ᠡᠴᠡ ᠤᠯᠤᠰ ᠭᠦᠷᠦᠨ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠡᠮᠬᠢ ᠵᠠᠮᠪᠠᠷᠠᠭᠠ ᠪᠠᠨ ᠠᠯᠲᠠᠨ᠂ ᠬᠥᠮᠦᠨ ᠬᠥᠮᠦᠨ ᠳᠤᠷᠠ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯᠤᠭᠰᠠᠨ ᠰᠢᠦ ᠳᠡ᠃ ᠬᠢᠷᠢ ᠶ᠋ᠢᠨ ᠬᠥᠮᠦᠨ ᠲᠥᠷᠥ ᠶ᠋ᠢ ᠪᠠᠷᠢᠬᠤ ᠬᠡᠷᠡᠭ ᠪᠢᠰᠢ ᠭᠡᠵᠦ ᠬᠡᠯᠡᠬᠦ ᠨᠢ《ᠪᠢ ᠬᠠᠭᠠᠨ ᠰᠠᠭᠤᠪᠠᠯ ᠤᠭ ᠬᠡᠷᠡᠭ ᠢ᠋ ᠳᠥᠩᠭᠡᠬᠦ ᠪᠢᠵᠡ》 ᠭᠡᠰᠡᠨ ᠰᠠᠨᠠᠭᠠ ᠶ᠋ᠢ ᠢᠯᠡᠷᠬᠡᠢᠯᠡᠪᠡ᠃ ᠡᠭᠦᠨ ᠦ᠌ ᠤᠴᠢᠷ ᠢ᠋ ᠳᠡᠭᠦᠦ ᠨᠠᠷ ᠨᠢ ᠣᠢᠯᠠᠭᠠᠵᠤ ᠮᠡᠳᠡᠯᠡ᠃
ᠡᠭᠦᠨ ᠳ᠋ᠦ᠍ ᠠᠷᠢᠬᠪᠦ᠋ᠬᠡ ᠳᠤᠷᠠ ᠦᠭᠡᠢ ᠬᠦᠷᠴᠦ《ᠪᠢᠳᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠬᠡᠷᠡᠭᠦᠯ ᠦ᠋ᠨ ᠦᠷᠡ ᠰᠣᠶᠣᠭᠠᠯᠠᠵᠤ ᠪᠠᠢᠭᠠ ᠶᠤᠮ ᠪᠢᠰᠢ ᠪᠢᠵᠡ ᠠ᠋?》 ᠭᠡᠮᠡᠨ ᠪᠣᠳᠣᠭᠠᠳ ᠵᠢᠪᠡᠭᠦᠷᠡᠭᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠠᠷᠢᠵᠤ ᠲᠠᠢᠯᠤᠯ ᠦᠭᠡᠢ
— ᠪᠣᠭᠳᠠ ᠡᠪᠦᠭᠡ ᠶ᠋ᠢᠨ ᠵᠠᠷᠯᠢᠭᠯᠠᠵᠤ ᠪᠠᠢᠭᠰᠠᠨ ᠵᠠᠷᠯᠢᠭ ᠤ᠋ᠳ ᠢ᠋ ᠪᠢᠳᠡ ᠮᠠᠲᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠬᠠᠭᠠᠨ ᠡᠪᠦᠭᠡ ᠳ᠋ᠦ᠍ ᠶᠸᠯᠣᠢ ᠴᠦᠰᠠᠢ ᠨᠣᠶᠠᠨ ᠠ᠋ᠴᠠ ᠮᠣᠷᠢᠨ ᠳᠡᠯ ᠳᠡᠭᠡᠷᠡ ᠪᠠᠢᠭᠤᠯᠤᠭᠰᠠᠨ ᠤᠯᠤᠰ ᠢ᠋ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠯ ᠦᠭᠡᠢ ᠤᠳᠤᠷᠢᠳᠤᠨ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠵᠥᠪᠯᠡᠨ ᠠᠢᠯᠠᠳᠬᠠᠵᠤ ᠪᠠᠢᠭᠰᠠᠨ ᠢ᠋ ᠪᠢᠳᠡ ᠮᠡᠳᠡᠨᠡ᠃ ᠭᠦᠶᠦᠭ ᠠᠬᠠ ᠶ᠋ᠢ ᠪᠠᠷᠠᠭᠤᠨ ᠭᠠᠵᠠᠷ᠂ ᠣᠷᠣᠰ ᠨᠤᠲᠤᠭ ᠲᠤ ᠳᠠᠢᠳᠤᠵᠤ ᠶᠠᠪᠤᠭᠠᠳ ᠢᠷᠡᠬᠦ ᠳ᠋ᠦ᠍ ᠬᠠᠭᠠᠨ ᠠᠭᠤᠯᠵᠠᠭᠠᠳ ᠴᠢ ᠠᠶᠠᠨ ᠳ᠋ᠤ᠌ ᠶᠠᠪᠤᠬᠤ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠡᠷᠡᠭᠦᠯ ᠪᠥᠭᠰᠡ ᠲᠡᠢ ᠬᠥᠮᠦᠨ ᠡᠰᠡ ᠦᠯᠡᠳᠡᠭᠡᠰᠡ ᠭᠡᠨᠡ᠃ ᠴᠡᠷᠢᠭ ᠬᠥᠮᠦᠨ ᠦ᠌ ᠨᠢᠷᠤᠭᠤᠨ ᠤ᠋ ᠠᠷᠠᠰᠤ ᠶ᠋ᠢ ᠬᠠᠭᠤᠯᠵᠤ ᠶᠠᠪᠤᠭᠰᠠᠨ ᠭᠡᠨᠡ ᠴᠢ᠃ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠣᠮᠣᠭᠲᠠᠢ᠂ ᠴᠢᠳᠠᠯᠲᠠᠢ ᠬᠥᠮᠦᠨ ᠪᠣᠢ ᠭᠡᠮᠡᠨ ᠳᠣᠩᠭᠣᠳᠤᠨ ᠵᠢᠮᠡᠯᠡᠵᠦ ᠪᠠᠢᠭᠰᠠᠨ ᠢ᠋ ᠴᠦ᠍ ᠪᠢᠳᠡ ᠴᠥᠮ ᠮᠡᠳᠡᠨᠡ ᠳᠠ᠃ ᠡᠪᠦᠭᠡ ᠮᠢᠨᠢ ᠬᠠᠭᠠᠨ ᠬᠥᠮᠦᠨ ᠴᠣᠬᠣᠮ ᠶᠠᠮᠠᠷ ᠤᠬᠠᠭᠠᠨ ᠵᠠᠷᠤᠵᠤ᠂ ᠶᠠᠮᠠᠷ ᠪᠠᠭᠤᠷᠢ ᠰᠠᠭᠤᠷᠢ ᠭᠠᠷᠭᠠᠵᠤ ᠪᠠᠢᠪᠠᠯ ᠵᠣᠬᠢᠬᠤ ᠲᠤᠬᠠᠢ ᠵᠠᠷᠯᠢᠭᠳᠠᠵᠤ ᠪᠠᠢᠭᠰᠠᠨ ᠵᠦᠢᠯ ᠣᠳᠣ ᠮᠡᠷᠭᠡᠨ ᠲᠦᠰᠢᠮᠡᠳ ᠦ᠋ᠨ ᠪᠢᠴᠢᠭ ᠲᠦ᠍ ᠪᠠᠢᠵᠤ ᠯᠠ ᠪᠠᠢᠨᠠ᠃《 ᠶᠡᠬᠡ ᠵᠠᠰᠠᠭ》 ᠬᠠᠤᠯᠢ ᠭᠡᠵᠦ ᠲᠥᠷᠥ ᠶ᠋ᠢᠨ ᠭᠣᠣᠯ ᠪᠠᠭᠰᠢ ᠴᠦ᠍ ᠪᠠᠢᠵᠤ ᠪᠠᠢᠭᠠ᠃ ᠲᠠ ᠴᠦ᠍ ᠲᠡᠭᠦᠨ ᠢ᠋ ᠪᠣᠯᠭᠣᠭᠠᠵᠤ ᠪᠠᠢᠭᠠ ᠪᠢᠵᠡ ᠭᠡᠵᠦ ᠰᠢᠭᠤᠳᠬᠠᠨ ᠬᠡᠯᠡᠪᠡ᠃
ᠬᠤᠪᠢᠯᠠᠢ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠲᠠᠮᠰᠢᠶᠠᠯᠠᠨ ᠳᠡᠭᠡᠭᠦᠷ ᠬᠠᠷᠠᠵᠤ᠄
— ᠬᠠᠭᠠᠨ ᠡᠵᠡᠨ ᠦ᠌ ᠲᠤᠬᠠᠢ ᠳ᠋ᠤ᠌ ᠪᠣᠯ ᠪᠢᠳᠡ ᠤᠯᠠ ᠰᠠᠭᠤᠷᠢᠲᠠᠢ᠂ ᠨᠠᠷᠢᠨ ᠪᠣᠳᠣᠯ ᠵᠠᠷᠤᠵᠤ ᠲᠠᠪᠠᠲᠠᠢ ᠰᠠᠢᠨ ᠬᠡᠯᠡᠯᠴᠡᠬᠦ ᠶᠣᠰᠣᠲᠠᠢ ᠪᠠᠢᠬᠤ᠃ ᠣᠯᠠᠨ ᠨᠣᠶᠠᠨ ᠡᠭᠦᠨ ᠳ᠋ᠦ᠍ ᠣᠷᠣᠯᠴᠠᠬᠤ ᠨᠢ ᠵᠦᠢ᠃ ᠶᠠᠭᠠᠷᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ᠃ ᠪᠢᠳᠡ ᠠᠭᠠᠵᠢᠭᠤ ᠠᠭᠠᠵᠢᠭᠤᠬᠠᠨ ᠳᠠᠬᠢᠭᠠᠳ ᠰᠠᠢᠨ ᠪᠣᠳᠣᠵᠤ ᠶᠠᠷᠢᠯᠴᠠᠪᠠᠯ ᠳᠡᠭᠡᠷᠡ ᠳᠡ ᠭᠡᠯᠡ᠃
ᠠᠷᠢᠬᠪᠦ᠋ᠬᠡ ᠶ᠋ᠢᠨ ᠰᠠᠨᠠᠭᠠ ᠠᠬᠠ ᠶ᠋ᠢᠨ ᠬᠢᠨᠢ ᠦᠭᠡ ᠲᠡᠢ ᠵᠥᠷᠢᠵᠦ᠂ ᠲᠡᠭᠦᠨ ᠢ᠋ ᠪᠡᠨ ᠲᠠᠢᠯᠪᠤᠷᠢᠯᠠᠪᠠ᠃
— ᠠᠬᠠ᠂ ᠳᠡᠭᠦᠦ ᠨᠠᠷ ᠮᠢᠨᠢ! ᠲᠠ ᠪᠦᠬᠦᠨ ᠮᠡᠳᠡᠵᠦ ᠪᠠᠢᠭᠠ᠃ ᠶᠡᠬᠡ ᠡᠪᠦᠭᠡ ᠶ᠋ᠢᠨ ᠪᠠᠢᠭᠤᠯᠤᠭᠰᠠᠨ ᠲᠥᠷᠥ ᠤᠯᠤᠰ ᠢ᠋ᠶ᠋ᠠᠷ ᠵᠠᠷᠢᠮ ᠰᠠᠮᠠᠭᠤᠨ ᠡᠮᠡ ᠳᠣᠭᠣᠭᠢᠯᠠᠨ ᠰᠤᠯᠠᠳᠠᠭᠤᠯᠵᠤ《ᠶᠡᠬᠡ ᠵᠠᠰᠠᠭ》 ᠬᠠᠤᠯᠢ ᠶ᠋ᠢ ᠭᠠᠳᠤᠴᠢᠬᠰᠠᠨ ᠠᠶᠤᠯ ᠭᠠᠷᠤᠭᠰᠠᠭᠠᠷ ᠢᠷᠡᠭᠰᠡᠨ᠃ ᠣᠳᠣ ᠲᠡᠢᠮᠦ ᠳ᠋ᠦ᠍ ᠬᠦᠷᠭᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ ᠪᠢᠳᠡ ᠬᠢᠴᠢᠶᠡᠬᠦ ᠤᠴᠢᠷᠲᠠᠢ ᠪᠠᠢᠨᠠ ᠭᠡᠯᠡ᠃
— ᠴᠢᠨᠦ ᠴᠤᠬᠤᠯᠵᠠᠭᠤᠯᠵᠤ ᠪᠠᠢᠭᠠ ᠦᠭᠡᠨ ᠦ᠌ ᠤᠴᠢᠷ ᠨᠠᠳᠠᠳᠤ ᠣᠢᠯᠠᠭᠠᠭᠳᠠᠵᠤ ᠪᠠᠢᠨᠠ᠃ ᠴᠢ ᠶᠠᠷᠢᠬᠤ ᠶᠠᠭᠤᠮᠠ ᠪᠠᠢᠪᠠᠯ ᠬᠡᠯᠡ ᠯᠡ ᠳᠡ ᠭᠡᠵᠦ ᠬᠤᠪᠢᠯᠠᠢ ᠥᠭᠦᠯᠡᠪᠡ᠃
ᠭᠡᠷ ᠲᠦ᠍ ᠬᠥᠬᠥᠯ ᠦ᠋ᠨ ᠲᠠᠩᠰᠤᠭ ᠦᠨᠦᠷ ᠬᠠᠩᠬᠤᠯᠤᠨᠠ᠂ ᠭᠠᠳᠠᠨᠠ ᠠ᠋ᠴᠠ ᠠᠮᠲᠠᠲᠤ ᠢᠳᠡᠭᠡᠨ᠂ ᠰᠡᠷᠢᠭᠦᠨ ᠤᠮᠳᠠᠭᠠᠨ᠂ ᠪᠠᠷᠠᠭᠤᠨ᠂ ᠳᠤᠮᠳᠠᠳᠤ ᠣᠷᠣᠨ ᠳ᠋ᠤ᠌ ᠨᠡᠷᠡᠭᠰᠡᠨ ᠪᠠᠯ ᠤ᠋ᠨ ᠠᠮᠲᠠᠲᠤ ᠳᠠᠷᠠᠰᠤ ᠰᠡᠯᠲᠡ ᠶ᠋ᠢ ᠰᠢᠪᠡᠭᠴᠢᠨ ᠨᠦ᠍ᠭᠦᠳ ᠣᠷᠣᠭᠤᠯᠤᠨ ᠢᠷᠡᠵᠦ ᠪᠠᠢᠯᠠ᠃
ᠠᠷᠢᠬᠪᠦ᠋ᠬᠡ ᠳᠦᠷᠯᠡᠭᠡᠷ ᠬᠤᠷᠴᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠤᠪᠢᠯᠠᠢ ᠶ᠋ᠢ ᠰᠢᠷᠳᠡᠨ ᠬᠠᠷᠠᠵᠤ᠄
— ᠲᠡᠢᠮᠦ ᠠ᠋᠃ ᠥᠭᠡᠳᠡᠢ ᠠᠬᠠ ᠶ᠋ᠢᠨ ᠳᠠᠷᠠᠭᠠ ᠳᠥᠷᠪᠡᠨ ᠵᠢᠯ ᠳᠣᠷᠠᠺᠢᠨᠠ① ᠠᠪᠠᠭᠠᠢ ᠲᠥᠷᠥ ᠪᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠨ ᠫᠧᠷᠰ ᠦ᠋ᠨ ᠬᠤᠳᠠᠯᠳᠤᠭᠠᠴᠢᠨ ᠱᠠᠩ ᠭᠡᠭᠴᠢ ᠲᠡᠢ ᠰᠦᠯᠪᠡᠭᠡᠯᠳᠦᠨ ᠡᠯᠳᠡᠪ ᠬᠠᠴᠢᠨ ᠠᠯᠪᠠ ᠭᠠᠷᠭᠠᠵᠤ ᠢᠯᠡᠭᠦᠦ ᠶᠡᠬᠡ ᠲᠠᠲᠠᠪᠤᠷᠢ ᠠᠪᠤᠨ᠂ ᠪᠦᠷ ᠲᠡᠷᠡ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠥᠷᠢ ᠰᠢᠷᠢ ᠶ᠋ᠢ ᠠᠯᠪᠠ ᠪᠣᠯᠭᠠᠨ ᠬᠥᠭᠡᠯᠭᠡᠬᠦ ᠵᠡᠷᠭᠡ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠᠷ ᠦᠭᠡᠢ ᠮᠠᠭᠤᠬᠠᠢ ᠶᠠᠭᠤᠮᠠ ᠬᠢᠵᠦ᠂ ᠤᠯᠤᠰ ᠭᠦᠷᠦᠨ ᠦ᠌ ᠨᠡᠷᠡ ᠶ᠋ᠢ ᠭᠤᠲᠤᠭᠠᠭᠰᠠᠨ᠃ ᠳᠠᠷᠠᠭᠠ ᠨᠢ ᠪᠠᠰᠠ ᠹᠢᠲ᠋ᠢᠮ ᠭᠡᠳᠡᠭ ᠲᠡᠨᠦᠭᠦᠯᠴᠢᠨ ᠠᠪᠠᠭᠠᠢ ᠳᠣᠷᠠᠺᠢᠨᠠ ᠳ᠋ᠤ᠌ ᠵᠢᠰᠤᠷᠳᠠᠨ ᠨᠠᠭᠠᠯᠳᠤᠵᠤ ᠦᠢᠮᠡᠭᠦᠯᠦᠭᠡᠳ᠂ ᠳᠡᠭᠡᠳᠦ ᠡᠷᠬᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠨᠣᠶᠠᠳ ᠪᠥᠬᠡ ᠨᠠᠷ ᠤ᠋ᠨ ᠳᠤᠮᠳᠠ ᠡᠯᠳᠡᠪ ᠬᠣᠪ ᠵᠥᠭᠡᠭᠡᠨ ᠬᠤᠳᠬᠤᠨ ᠦᠢᠮᠡᠭᠦᠯᠵᠦ᠂ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠪᠠᠷᠢᠵᠤ ᠪᠠᠢᠭᠠ ᠬᠥᠮᠦᠰ ᠦ᠋ᠨ ᠡᠪ ᠰᠠᠨᠠᠭᠠ ᠶ᠋ᠢ ᠪᠤᠵᠠᠷᠯᠠᠨ ᠪᠠᠢᠵᠤ ᠴᠠᠭᠠᠵᠠᠯᠠᠭᠤᠯᠪᠠ᠃ ᠬᠥᠶᠦᠭ ᠠᠬᠠ ᠶ᠋ᠢᠨ ᠶᠡᠬᠡ ᠬᠠᠲᠤᠨ ᠤᠭᠤᠯ ᠺᠠᠢᠮᠢᠰᠢ② ᠠᠪᠠᠭᠠᠢ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠷ ᠪᠠᠰᠠ ᠲᠣᠭᠯᠠᠵᠤ᠂ ᠬᠦᠦ ᠬᠡᠦᠬᠡᠳ ᠦ᠋ᠳ ᠲᠦ᠍ ᠪᠡᠨ ᠪᠣᠭᠳᠠ ᠡᠵᠡᠨ ᠦ᠌ ᠪᠠᠢᠳᠠᠯᠲᠠᠢ ᠪᠠᠢᠯᠭᠠᠬᠤ᠂ ᠬᠠᠭᠠᠨ ᠡᠵᠡᠨ ᠢ᠋ ᠵᠠᠯᠭᠠᠮᠵᠢᠯᠠᠬᠤ ᠶᠣᠰᠣ ᠶ᠋ᠢ ᠥᠪᠡᠷ ᠦ᠋ᠨ ᠥᠮᠴᠢ ᠮᠠᠲᠠᠯ ᠤ᠋ᠨ ᠬᠡᠷᠡᠭ ᠪᠣᠯᠭᠠᠬᠤ ᠭᠡᠵᠦ ᠲᠣᠢᠮᠣ ᠦᠭᠡᠢ ᠶᠡᠬᠡ ᠦᠢᠮᠡᠭᠦᠯᠦᠭᠰᠡᠨ᠃ ᠲᠡᠭᠡᠬᠦ ᠪᠡᠷ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠨᠢᠭᠡᠨ ᠰᠠᠪᠠᠭᠠ ᠦᠭᠡᠢ ᠡᠮᠡ ᠶ᠋ᠢᠨ ᠭᠠᠷ ᠲᠤ ᠣᠷᠣᠭᠠᠳ ᠭᠠᠷ ᠤ᠋ᠨ ᠤᠬᠢᠶᠠᠭᠤᠷ ᠠᠳᠠᠯᠢ ᠶᠠᠭᠤᠮᠠ ᠪᠣᠯᠤᠭᠤᠵᠠᠢ ᠭᠡᠵᠦ ᠪᠢ ᠰᠡᠳᠬᠢᠯ ᠵᠣᠪᠠᠨᠢᠵᠤ ᠪᠠᠢᠨᠠ ᠭᠡᠪᠡ᠃
ᠪᠦᠬᠦ ᠢᠷᠡᠨ ᠦ᠌ ᠬᠠᠨ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠭᠰᠠᠨ ᠵᠠᠯᠠᠮᠠᠭᠡᠷ ᠴᠠᠭᠠᠨ ᠴᠢᠷᠠᠢᠲᠤ ᠬᠦᠦ ᠬᠥᠯᠡᠬᠦ ᠨᠢ ᠠᠬᠠ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠢ᠋ᠶ᠋ᠠᠨ ᠨᠢᠭᠤᠷ ᠢ᠋ ᠡᠭᠡᠯᠵᠢᠯᠡᠨ ᠬᠠᠷᠠᠵᠤ᠂ ᠬᠡᠨ ᠨᠢ ᠶᠠᠭᠤ ᠭᠡᠬᠦ ᠨᠢ ᠪᠣᠢ ᠭᠡᠰᠡᠨ ᠶᠠᠩᠵᠤᠲᠠᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠮᠠᠨ ᠤ᠋ ᠬᠠᠭᠠᠨ ᠠᠬᠠ ᠶ᠋ᠢᠨ ᠬᠠᠲᠤᠳ ᠴᠦ᠍ ᠡᠳᠦᠭᠡ ᠳᠤᠷᠠᠺᠢᠨᠠ᠂ ᠤᠭᠤᠯ ᠺᠠᠢᠮᠢᠰᠠᠢ ᠨᠠᠷ ᠲᠠᠢ ᠠᠳᠠᠯᠢ ᠣᠯᠠᠨ ᠢ᠋ ᠦᠢᠮᠡᠭᠦᠯᠵᠦ ᠳᠠᠪᠬᠢᠬᠤ ᠦᠭᠡᠢ ᠪᠠᠢᠬᠤ ᠰᠢᠦ᠃ ᠬᠥᠭᠡᠷᠦᠬᠦᠢ ᠲᠡᠳᠡ ᠨᠠᠷ ᠲᠣᠯᠣᠭᠠᠢ ᠥᠭᠡᠳᠡ ᠲᠠᠲᠠᠬᠤ ᠦᠭᠡᠢ ᠪᠡᠶᠡ ᠪᠡᠶᠡ ᠪᠡᠨ ᠤᠷᠤᠭᠤ ᠨᠢ ᠲᠡᠳᠡᠨ ᠤᠬᠢᠯᠠᠭᠰᠠᠭᠠᠷ ᠪᠠᠢᠬᠤ ᠶᠤᠮ᠃ ᠬᠠᠷᠠᠬᠤ ᠠ᠋ᠴᠠ ᠰᠡᠳᠬᠢᠯ ᠡᠪᠡᠳᠦᠨ ᠡᠯᠢᠭᠡ ᠡᠮᠲᠡᠷᠡᠭᠡᠳ ᠭᠣᠷᠢ ᠦᠭᠡᠢ ᠪᠠᠢᠨᠠ ᠭᠡᠵᠦ ᠬᠡᠯᠡᠪᠡ᠃ ᠬᠤᠪᠢᠯᠠᠢ ᠬᠠᠭᠠᠨ ᠪᠢᠳ ᠬᠢᠨ ᠢᠨᠢᠶᠡᠵᠦ᠄
— ᠪᠢ ᠠᠬᠠ ᠶ᠋ᠢᠨ ᠪᠠᠭᠠ ᠬᠠᠲᠤᠨ ᠰᠤ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ ᠶᠦᠮ᠃ ᠨᠢᠳᠦ ᠨᠢ ᠵᠢᠷᠲᠠᠯᠵᠠᠭᠠᠳ ᠴᠠᠭᠠᠨᠠ ᠪᠠᠨ ᠨᠢᠭᠡ ᠠᠭᠠᠯᠢ ᠦᠭᠡᠢ ᠰᠢᠨᠵᠢᠲᠡᠢ ᠰᠢᠦ᠃ ᠤᠭ ᠭᠠᠷᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠢᠭᠤᠷ ᠬᠢᠳᠠᠨ ᠡᠬᠡᠨᠡᠷ ᠪᠣᠯᠬᠣᠷ ᠢ᠋ᠶ᠋ᠠᠨ ᠡᠯᠢᠭᠡ ᠨᠢ ᠲᠡᠢᠮᠦ ᠴᠦ᠍ ᠶᠡᠬᠡ ᠨᠠᠭᠠᠰᠢ ᠪᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠳᠡ ᠭᠡᠯᠡ᠃
— ᠠᠬᠠ ᠶ᠋ᠢᠨ ᠬᠡᠯᠡᠵᠦ ᠪᠠᠢᠭᠠ ᠵᠥᠪ ᠰᠢᠦ᠃ ᠪᠢᠳᠡ ᠠᠩᠬᠠᠷᠤᠯᠲᠠᠢ ᠯᠠ ᠪᠠᠢᠬᠤ ᠶᠣᠰᠣᠲᠠᠢ᠃ ᠬᠠᠮᠤᠭ ᠤ᠋ᠨ ᠭᠣᠣᠯ ᠨᠢ ᠭᠦᠷᠦᠨ ᠦ᠌ ᠠᠯᠪᠠ ᠶ᠋ᠢ ᠴᠠᠯᠠᠭᠠᠷᠳᠠᠭᠤᠯᠤᠨ᠂ ᠰᠠᠪᠠᠭᠠ ᠦᠭᠡᠢ ᠬᠥᠮᠦᠰ ᠦ᠋ᠨ ᠵᠤᠭᠠ ᠶ᠋ᠢᠨ ᠬᠡᠷᠡᠭ ᠪᠣᠯᠭᠠᠵᠤ ᠣᠷᠬᠢᠬᠤ ᠪᠣᠢ ᠭᠡᠵᠦ ᠪᠢ ᠵᠣᠪᠠᠵᠤ ᠪᠠᠢᠨᠠ ᠭᠡᠵᠦ ᠠᠷᠢᠬᠪᠥ᠋ᠬᠡ ᠪᠠᠰᠠ ᠥᠭᠦᠯᠡᠪᠡ᠃
ᠠᠬᠠ᠂ ᠳᠡᠭᠦᠦ ᠨᠠᠷ ᠤ᠋ᠨ ᠠᠭᠤᠯᠵᠠᠯᠲᠠ ᠡᠭᠦᠨ ᠢ᠋ᠶ᠋ᠡᠷ ᠳᠠᠭᠤᠰᠬᠤ ᠳ᠋ᠤ᠌ ᠪᠠᠨ ᠲᠣᠮᠣ᠂ ᠪᠠᠭᠠ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶᠠᠷᠢᠶᠠ ᠨᠡᠢᠯᠡᠬᠦ ᠦᠭᠡᠢ ᠪᠠᠢᠭᠠ ᠶ᠋ᠢ ᠬᠦᠯᠡᠬᠦ ᠠᠵᠢᠵᠤ᠂ ᠴᠠᠭᠠᠰᠢᠳᠠ ᠪᠠᠨ ᠶᠠᠭᠠᠬᠢᠳᠠᠭ ᠪᠣᠯ? ᠭᠡᠮᠡᠨ ᠠᠶᠤᠯᠠ᠃ ᠬᠤᠪᠢᠯᠠᠢ ᠰᠥᠩ ᠤᠯᠤᠰ ᠢ᠋ ᠮᠥᠬᠥᠭᠡᠨᠡ ᠭᠡᠵᠦ ᠭᠡᠳᠡᠷᠭᠦ ᠪᠡᠨ ᠶᠠᠭᠠᠷᠠᠨ ᠪᠤᠴᠠᠬᠤ ᠭᠡᠵᠦ ᠲᠡᠮᠡᠦᠯᠦᠭᠰᠡᠭᠡᠷ ᠡᠬᠡ ᠲᠡᠢ ᠪᠡᠨ ᠶᠠᠭᠠᠷᠠᠤᠬᠠᠨ ᠠᠭᠤᠯᠵᠠᠭᠠᠳ ᠬᠠᠷᠠ ᠬᠣᠷᠣᠮ ᠠ᠋ᠴᠠ ᠡᠮᠦᠨᠡ ᠶ᠋ᠢ ᠵᠣᠷᠢᠨ ᠬᠥᠳᠡᠯᠬᠦ ᠳ᠋ᠦ᠍ ᠳᠡᠭᠦᠦ ᠨᠠᠷ ᠨᠢ ᠦᠳᠡᠵᠦ ᠱᠠᠩᠬᠤ ᠶ᠋ᠢᠨ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠭᠠᠭᠠᠳ᠂ ᠬᠡᠭᠡᠷᠡ ᠰᠡᠦᠬᠡ ᠲᠡᠷᠭᠡᠨ ᠦ᠌ ᠢᠷᠣᠭᠠᠷ ᠲᠤ ᠰᠢᠷᠢᠳᠡᠭ ᠳᠡᠪᠢᠰᠦᠭᠦᠯᠦᠨ ᠰᠠᠭᠤᠵᠤ ᠴᠠᠢ ᠪᠠᠷᠢᠪᠠ᠃ ᠠᠷᠢᠬᠪᠦ᠋ᠬᠡ ᠶᠡᠬᠡ ᠠᠬᠠ ᠶ᠋ᠢ ᠪᠡᠨ ᠠᠷᠭᠠᠳᠠᠩᠭᠤᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠶᠠ ᠲᠠᠯᠪᠢᠨ ᠪᠠᠢᠵᠤ᠄
— ᠲᠠ ᠬᠢᠲᠠᠳ ᠤᠷᠤᠭᠤ ᠪᠤᠴᠠᠬᠤ ᠭᠡᠵᠦ ᠳᠡᠩᠳᠡᠭᠦᠦ ᠶᠠᠭᠠᠷᠠᠯᠠ᠃ ᠵᠦᠢ ᠨᠢ ᠡᠨᠳᠡᠬᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠨᠡᠯᠢᠶᠡᠳ ᠲᠥᠪᠬᠢᠨᠡᠭᠦᠯᠦᠭᠡᠳ ᠪᠤᠴᠠᠬᠤ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠭᠡᠪᠡ᠃
ᠬᠤᠪᠢᠯᠠᠢ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ᠂ ᠴᠢᠷᠠᠢ ᠪᠠᠨ ᠬᠤᠪᠢᠷᠠᠭᠠᠭᠠᠳ᠂ ᠬᠥᠮᠥᠭᠡᠢ ᠵᠠᠭᠤᠨ ᠰᠠᠭᠤᠵᠤ᠄
— ᠴᠢ ᠶᠠᠭᠤ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠥᠭᠡᠳᠡ ᠪᠣᠯᠤᠭᠴᠢ ᠠᠬᠠ ᠨᠠᠮᠠᠶ᠋ᠢ ᠬᠢᠲᠠᠳ ᠭᠠᠵᠠᠷ ᠵᠦᠭᠡᠷ ᠵᠤᠭᠠᠴᠠᠭᠤᠯᠬᠤ ᠪᠠᠷ ᠰᠠᠭᠤᠯᠭᠠᠭᠰᠠᠨ ᠶᠤᠮ ᠪᠢᠰᠢ᠃ ᠬᠢᠲᠠᠳ ᠤ᠋ᠳ ᠶᠡᠬᠡ ᠬᠡᠴᠡᠭᠦᠦ ᠬᠥᠮᠦᠰ᠃《ᠵᠠ》᠂《ᠵᠠ》 ᠭᠡᠵᠦ ᠪᠠᠢᠭᠠᠳ ᠯᠠ ᠪᠥᠭᠰᠡ ᠵᠢᠭᠠᠬᠠᠨ ᠥᠨᠳᠡᠢᠬᠦ ᠪᠡᠷ ᠨᠢᠭᠡ ᠡᠪ ᠦᠭᠡᠢ ᠶᠠᠭᠤᠮᠠ ᠬᠢᠵᠦ ᠪᠠᠢᠳᠠᠭ ᠵᠠᠩᠲᠠᠢ᠃ ᠠᠶᠠ ᠦᠭᠡᠢ ᠪᠣᠯ ᠪᠢᠳᠡᠨ ᠢ᠋ ᠣᠩᠬᠣᠯᠢᠳᠤᠭᠤᠯᠬᠤ ᠭᠡᠵᠦ ᠠᠷᠭᠠ ᠡᠷᠢᠨᠡ᠃ ᠠᠯᠲᠠᠨ ᠤᠯᠤᠰ ᠢ᠋ ᠮᠥᠬᠥᠭᠡᠭᠰᠡᠨ ᠦ᠌ ᠬᠣᠨᠵᠢᠩ ᠢ᠋ ᠲᠡᠳᠡ ᠭᠡᠭᠡᠬᠦ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ᠂ ᠵᠢᠷᠦᠬᠡᠨ ᠦ᠌ ᠪᠡᠨ ᠮᠤᠬᠤᠷ ᠲᠤ ᠦᠰ ᠪᠣᠯᠭᠠᠨ ᠲᠡᠭᠡᠭᠡᠭᠰᠡᠭᠡᠷ ᠶᠠᠪᠤᠭᠠ ᠶ᠋ᠢ ᠴᠢ ᠣᠢᠯᠠᠭᠠᠬᠤ ᠬᠡᠷᠡᠭᠲᠡᠢ ᠪᠣᠯᠵᠤ ᠰᠢᠦ᠃ ᠲᠡᠭᠡᠭᠡᠳ ᠴᠦ᠍ ᠶᠡᠷᠦ ᠨᠢ ᠬᠢᠲᠠᠳ ᠣᠷᠣᠨ ᠪᠣᠯ ᠠᠯᠢ ᠴᠦ᠍ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠪᠢᠳᠡᠨ ᠦ᠌ ᠨᠢᠭᠡ ᠭᠣᠣᠯ ᠲᠦᠰᠢᠴᠡ ᠪᠣᠯᠬᠤ ᠶᠣᠰᠣᠲᠠᠢ ᠭᠠᠵᠠᠷ ᠮᠥᠨ᠃ ᠬᠢᠲᠠᠳ ᠢ᠋ ᠲᠣᠭᠲᠠᠭᠠᠨ ᠠᠳᠬᠤᠵᠤ ᠪᠠᠢᠬᠤ ᠦᠭᠡᠢ ᠪᠡᠷ ᠮᠠᠨ ᠤ᠋ ᠭᠦᠷᠦᠨ ᠤᠯᠤᠰ ᠣᠷᠣᠰᠢᠨ ᠪᠠᠢᠬᠤ ᠳ᠋ᠤ᠌ ᠪᠡᠷᠬᠡ ᠪᠣᠯᠤᠨᠠ ᠭᠡᠵᠦ ᠰᠢᠭᠤᠳᠬᠠᠨ ᠬᠡᠯᠡᠪᠡ᠃ ᠠᠷᠢᠬᠪᠥ᠋ᠬᠡ ᠬᠤᠪᠢᠯᠠᠢ ᠶ᠋ᠢᠨ ᠡᠨᠡ ᠦᠭᠡᠨ ᠳ᠋ᠦ᠍ ᠵᠢᠪᠡᠭᠦᠴᠡᠬᠦ ᠶᠠᠩᠵᠤ ᠪᠠᠷ ᠳᠠᠭᠤ ᠪᠠᠨ ᠦᠯᠦ ᠮᠡᠳᠡᠭ ᠥᠨᠳᠥᠷᠯᠡᠨ᠂ ᠴᠢᠷᠠᠢ ᠪᠠᠨ ᠤᠯᠠᠢᠯᠭᠠᠭᠠᠳ᠂ ᠰᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠥᠨᠳᠡᠢᠵᠦ᠄
— ᠲᠠ ᠬᠢᠲᠠᠳ ᠦᠭᠡᠢ ᠪᠡᠷ ᠪᠢᠳᠡᠨ ᠦ᠌ ᠤᠯᠤᠰ ᠢ᠋ ᠣᠷᠣᠰᠢᠨ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠳᠡᠩᠳᠡᠭᠦᠦ ᠪᠦᠳᠦᠭᠦᠨ ᠦᠭᠡ ᠳᠤᠤᠭᠠᠷᠴᠤ ᠪᠠᠢᠨᠠ᠃ ᠮᠣᠩᠭᠣᠯ ᠤᠯᠤᠰ ᠬᠢᠲᠠᠳ ᠦᠭᠡᠢ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠬᠡᠯᠡᠳᠡᠭ ᠬᠥᠮᠦᠨ ᠪᠠᠢᠭᠠ ᠳ᠋ᠤ᠌ ᠪᠢ ᠢᠴᠢᠬᠦ ᠰᠢᠭ ᠪᠣᠯᠤᠯᠠ᠃ ᠶᠠᠮᠠᠷ ᠤᠬᠠᠭᠠᠨ ᠦᠭᠡᠢ ᠪᠣᠢ᠃ ᠪᠢᠳᠡ ᠬᠢᠲᠠᠳ ᠠᠳᠬᠤᠭᠠᠳ ᠪᠠᠢᠵᠤ ᠳᠥᠩᠭᠡᠬᠦ ᠦᠭᠡᠢ ᠭᠡᠵᠢ ᠤᠤ? ᠭᠡᠯᠡ᠃
ᠬᠤᠪᠢᠯᠠᠢ ᠪᠡᠶᠡ ᠪᠡᠨ ᠪᠠᠷᠢᠨ᠂ ᠦᠭᠡ ᠶᠠᠷᠢᠶᠠ ᠶ᠋ᠢ ᠬᠤᠷᠴᠠᠳᠬᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠪᠡ ᠪᠣᠯᠤᠯᠲᠠᠢ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠥᠭᠦᠭᠡ ᠶ᠋ᠢ ᠴᠢᠩᠭᠠ ᠠᠳᠬᠤᠭᠠᠳ᠄
— ᠠᠷᠢᠬᠪᠥ᠋ᠬᠡ ᠠ᠋! ᠴᠢ ᠶᠠᠭᠤᠨ ᠳ᠋ᠤ᠌ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠣᠪᠠᠭᠠᠭᠠᠳ ᠪᠠᠢᠭᠠ ᠶᠤᠮ ᠪᠣᠢ? ᠣᠳᠣ ᠠᠬᠠ ᠶ᠋ᠢᠨ ᠣᠷᠣ ᠶ᠋ᠢ ᠬᠡᠯᠡᠯᠴᠡᠬᠦ ᠴᠠᠭ ᠪᠢᠰᠢ ᠰᠢᠦ ᠳᠡ ᠭᠡᠪᠡ᠂ ᠠᠷᠢᠬᠪᠦ᠋ᠬᠡ ᠬᠢᠯᠢᠩᠲᠡᠢ ᠪᠡᠷ᠄
— ᠲᠠᠨ ᠳ᠋ᠤ᠌ ᠪᠣᠳᠣᠯ ᠠᠯᠠᠭᠠ ᠭᠡᠵᠢ ᠤᠤ? ᠨᠠᠳᠠᠳᠤ ᠪᠣᠳᠣᠬᠤ ᠶᠠᠭᠤᠮᠠ ᠶᠡᠬᠡ ᠪᠠᠢᠨᠠ᠃ ᠥᠭᠡᠳᠡᠢ ᠠᠬᠠ ᠶ᠋ᠢᠨ ᠤᠳᠤᠮ ᠤ᠋ᠨ ᠬᠢᠨ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠡᠷᠭᠢᠭᠦᠯᠦᠨ ᠠᠪᠬᠤ ᠶ᠋ᠢᠨ ᠲᠤᠯᠠᠳᠠ ᠳᠠᠯᠳᠠᠭᠤᠷ ᠶᠠᠮᠠᠷ ᠴᠦ᠍ ᠬᠤᠤᠪᠢᠯᠳᠤᠭᠠᠨ ᠬᠢᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ ᠪᠠᠢᠳᠠᠯᠲᠠᠢ ᠴᠠᠭᠠᠨᠠ ᠪᠠᠨ ᠨᠢᠭᠡ ᠬᠠᠴᠢᠨ ᠪᠠᠢᠭᠠ᠃ ᠤᠭ ᠨᠢ ᠲᠡᠭᠡᠮᠡ ᠦᠭᠡᠢ ᠯᠡ ᠪᠠᠢᠮᠠᠷ ᠰᠠᠨ᠃ ᠥᠭᠡᠳᠡᠢ ᠠᠪᠠᠭᠠ ᠶ᠋ᠢ ᠰᠢᠷᠡᠭᠡᠨ ᠳ᠋ᠦ᠍ ᠪᠠᠢᠵᠤ ᠪᠡᠶᠡ ᠨᠢ ᠡᠪᠡᠳᠦᠭᠡᠳ ᠮᠠᠭᠤᠳᠠᠬᠤ ᠳ᠋ᠤ᠌ ᠪᠢᠳᠡᠨ ᠦ᠌ ᠠᠪᠤ ᠣᠴᠢᠵᠤ ᠠᠭᠤᠯᠵᠠᠭᠠᠳ《ᠪᠢ ᠴᠢᠨᠦ ᠣᠷᠣᠨ ᠳ᠋ᠤ᠌ ᠦᠬᠦᠶᠡ᠃ ᠪᠤᠷᠬᠠᠨ ᠲᠩᠷᠢ ᠢᠩᠭᠢᠵᠦ ᠬᠠᠢᠷᠠᠯᠠ!》 ᠭᠡᠵᠦ ᠵᠠᠯᠪᠠᠷᠢᠵᠤ ᠪᠠᠢᠭᠰᠠᠨ᠃ ᠡᠭᠦᠨ ᠢ᠋ ᠲᠦᠮᠡᠨ ᠣᠯᠠᠨ ᠮᠡᠳᠡᠨᠡ᠃ ᠶᠡᠷᠦ ᠨᠢ ᠤᠯᠤᠰ ᠤ᠋ᠨ ᠬᠠᠭᠠᠨ ᠪᠣᠯ ᠮᠠᠨ ᠤ᠋ ᠠᠪᠤ ᠶ᠋ᠢᠨ ᠤᠳᠤᠮ ᠠ᠋ᠴᠠ ᠪᠠᠢᠬᠤ ᠶᠣᠰᠣᠲᠠᠢ᠃ ᠢᠩᠭᠢ ᠭᠡᠵᠦ ᠪᠣᠭᠳᠠ ᠡᠪᠦᠭᠡ ᠲᠠᠭᠠᠯᠠᠭᠰᠠᠨ ᠬᠡᠷᠡᠭ᠃ ᠲᠠ ᠨᠠᠷ ᠪᠣᠳᠣᠭᠠᠳ ᠦᠵᠡ!
ᠬᠠᠭᠠᠨ ᠡᠪᠦᠭᠡ ᠬᠠᠮᠤᠭ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠬᠡᠦᠬᠡᠳ ᠦ᠋ᠳ ᠲᠦ᠍ ᠪᠡᠨ ᠬᠤᠪᠢᠶᠠᠵᠤ ᠥᠭᠬᠦ ᠳ᠋ᠦ᠍ ᠪᠡᠨ ᠪᠢᠳᠡᠨ ᠦ᠌ ᠠᠪᠤ ᠶ᠋ᠢᠨ ᠥᠮᠴᠢᠨ ᠳ᠋ᠦ᠍ ᠡᠨᠡ ᠮᠣᠩᠭᠣᠯ ᠨᠤᠲᠤᠭ ᠢ᠋ᠶ᠋ᠠᠨ ᠦᠯᠡᠳᠡᠭᠡᠨ᠂ ᠥᠭᠡᠷᠡ ᠬᠡᠨ ᠳ᠋ᠦ᠍ ᠴᠦ᠍ ᠭᠣᠯᠣᠮᠲᠠ ᠪᠠᠨ ᠥᠭᠴᠦ ᠰᠠᠬᠢᠭᠤᠰᠤᠭᠰᠠᠨ ᠦᠭᠡᠢ᠃ ᠶᠡᠷᠦ ᠡᠴᠡ ᠪᠡᠨ ᠮᠣᠩᠭᠣᠯ ᠵᠠᠩᠰᠢᠯ ᠪᠣᠯ ᠣᠳᠬᠣᠨ ᠬᠦᠦ ᠨᠢ ᠭᠠᠯ ᠭᠣᠯᠣᠮᠲᠠ ᠪᠠᠨ ᠰᠠᠬᠢᠳᠠᠭ ᠭᠡᠳᠡᠭ ᠪᠢᠵᠡ ᠳᠡ᠃ ᠡᠨᠡ ᠴᠢᠨᠢ ᠠᠪᠤ ᠶ᠋ᠢᠨ ᠦᠷᠡ ᠬᠡᠦᠬᠡᠳ ᠦ᠋ᠳ ᠢ᠋ ᠡᠬᠡ ᠨᠤᠲᠤᠭ ᠢ᠋ᠶ᠋ᠠᠨ ᠮᠡᠳᠡᠨ ᠵᠠᠬᠢᠷᠴᠤ ᠪᠠᠢᠭ ᠭᠡᠰᠡᠨ ᠬᠡᠷᠡᠭ ᠪᠢᠰᠢ ᠭᠡᠵᠢ ᠤᠤ? ᠡᠢᠮᠦ ᠪᠠᠢᠭᠰᠠᠭᠠᠷ ᠪᠠᠢᠲᠠᠯᠠ ᠲᠣᠷᠠᠺᠢᠨᠠ ᠭᠡᠳᠡᠭ ᠤᠪᠠᠢ ᠦᠭᠡᠢ ᠬᠠᠲᠤᠨ ᠠ᠋ᠴᠠ ᠪᠣᠯᠵᠤ ᠠᠬᠠ ᠳᠡᠭᠦᠦ ᠶ᠋ᠢᠨ ᠬᠣᠭᠣᠷᠣᠨᠳᠣ ᠳᠠᠭᠤᠰᠤᠰᠢ ᠦᠭᠡᠢ ᠥᠰᠢᠶᠡ ᠶ᠋ᠢ ᠪᠣᠢ ᠪᠣᠯᠭᠠᠭᠰᠠᠨ᠃ ᠡᠭᠦᠨ ᠢ᠋ ᠪᠢᠳᠡ ᠵᠦᠭᠡᠷ ᠬᠠᠷᠠᠭᠠᠳ ᠰᠠᠭᠤᠵᠤ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠢ ᠤᠤ? ᠭᠡᠮᠡᠨ ᠬᠢᠯᠢᠩᠲᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠡᠯᠡᠪᠡ᠃
ᠬᠤᠪᠢᠯᠠᠢ ᠲᠠᠭ ᠳᠠᠭᠤ ᠦᠭᠡᠢ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠪᠠᠢᠬᠤ ᠨᠢ ᠤᠭ ᠬᠡᠷᠡᠭ ᠢ᠋ ᠥᠪᠡᠷ ᠲᠦ᠍ ᠪᠡᠨ ᠶᠠᠭᠠᠬᠢᠵᠤ ᠠᠰᠢᠭᠲᠠᠢ ᠪᠠᠷ ᠡᠷᠭᠢᠭᠦᠯᠬᠦ ᠪᠣᠢ ᠭᠡᠵᠦ ᠪᠣᠳᠣᠵᠤ ᠰᠠᠭᠤᠭᠠ ᠨᠢ ᠢᠯᠡᠳᠲᠡ᠃ ᠬᠥᠯᠡᠬᠦ ᠪᠣᠯᠤᠨ ᠠᠬᠠ ᠳᠡᠭᠦᠦ ᠨᠠᠷ ᠨᠢ ᠴᠢᠮᠡᠭᠡ ᠦᠭᠡᠢ᠂ ᠠᠢᠷᠠᠭ ᠤᠤᠭᠤᠵᠤ ᠪᠠᠢᠯᠠ᠃ ᠲᠡᠳᠡᠨ ᠭᠡᠳᠡᠰᠦ ᠰᠠᠢᠬᠠᠨ ᠠᠢᠷᠠᠭ ᠲᠤ ᠬᠠᠨᠤᠬᠤ ᠭᠡᠵᠦ ᠪᠠᠢᠬᠤ ᠪᠢᠰᠢ᠃ ᠬᠠᠭᠠᠨ ᠤ᠋ ᠬᠡᠦᠬᠡᠳ ᠦ᠋ᠳ ᠲᠦ᠍ ᠶᠠᠭᠠᠬᠢᠵᠤ ᠴᠦ᠍ ᠮᠠᠭᠤ ᠠᠢᠷᠠᠭ ᠬᠡᠨ ᠴᠦ᠍ ᠠᠪᠴᠤ ᠢᠷᠡᠵᠦ ᠪᠠᠷᠢᠬᠤ ᠪᠢᠯᠡ᠃
ᠠᠷᠢᠬᠪᠥ᠋ᠬᠡ ᠪᠠᠴᠢᠭᠤᠳᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠬᠤᠪᠢᠯᠠᠢ ᠳ᠋ᠤ᠌ ᠬᠠᠨᠳᠤᠨ᠂ ᠴᠢᠷᠠᠢ ᠪᠠᠨ ᠤᠯᠠᠯᠵᠠᠭᠤᠯᠵᠤ᠄
— ᠲᠠ ᠡᠨᠡ ᠪᠠᠢᠳᠠᠯ ᠢ᠋ ᠬᠠᠷᠠᠭᠰᠠᠭᠠᠷ ᠪᠠᠢᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠰᠠᠮ ᠪᠡᠶᠡ ᠵᠠᠢᠯᠠᠨ᠂ ᠨᠠᠮᠠᠶ᠋ᠢ ᠪᠤᠷᠤᠭᠤ ᠰᠠᠨᠠᠭᠠ ᠡᠪᠦᠷᠯᠡᠭᠰᠡᠨ ᠬᠥᠮᠦᠰ ᠲᠡᠢ ᠬᠠᠯᠵᠠ ᠲᠤᠯᠤᠯᠳᠤᠭᠤᠯᠬᠤ ᠪᠠᠷ ᠪᠣᠳᠣᠵᠤ ᠶᠠᠪᠤᠭᠠ ᠴᠢᠨᠢ ᠵᠠᠢᠯᠠᠰᠢ ᠦᠭᠡᠢ ᠪᠣᠯᠤᠯᠠ᠃ ᠲᠡᠭᠡᠭᠡᠳ ᠲᠠ ᠪᠢᠳᠡᠨ ᠢ᠋ ᠦᠷᠡᠭᠳᠡᠪᠡᠯ ᠴᠦ᠍ ᠦᠷᠡᠭᠳᠡᠭ ᠭᠡᠵᠦ ᠪᠣᠳᠣᠵᠤ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠰᠢᠪ ᠭᠡᠵᠦ ᠰᠢᠭᠤᠳᠬᠠᠨ ᠬᠡᠯᠡᠵᠦ ᠣᠷᠬᠢᠪᠠ᠃ ᠡᠢᠨ ᠬᠦ᠌ ᠶᠠᠩᠵᠤ ᠪᠠᠷ ᠶᠠᠷᠢᠶᠠ ᠨᠡᠢᠯᠡᠯ ᠦᠭᠡᠢ ᠠᠭᠤᠯᠵᠠᠯᠲᠠ ᠲᠡᠭᠦᠰᠴᠦ᠂ ᠬᠤᠪᠢᠯᠠᠢ ᠪᠡᠶᠡ ᠵᠠᠢᠯᠠᠨ ᠰᠠᠯᠵᠤ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠪᠡᠨ ᠣᠷᠣᠵᠤ ᠰᠠᠭᠤᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠨᠢᠭᠡ ᠴᠦ᠍ ᠤᠳᠠᠭᠠ ᠢᠨᠢᠶᠡᠭᠰᠡᠨ ᠦᠭᠡᠢ᠂ ᠪᠣᠳᠣᠯᠭᠠᠰᠢᠷᠠᠨ ᠪᠠᠢᠪᠠ᠃ ᠬᠤᠪᠢᠯᠠᠢ ᠶ᠋ᠢ ᠦᠳᠡᠵᠦ ᠶᠠᠪᠤᠭᠠ ᠳᠡᠭᠦᠦ ᠨᠠᠷ ᠨᠢ ᠱᠠᠩᠬᠤᠨ ᠤ᠋ ᠳᠥᠷᠪᠡᠯᠵᠢᠨ ᠳᠡᠭᠡᠷᠡ ᠡᠴᠡ ᠪᠤᠴᠠᠯᠠ᠃
ᠬᠤᠪᠢᠯᠠᠢ ᠳᠥᠷᠪᠡᠨ ᠮᠣᠷᠢ ᠬᠣᠣᠰᠯᠠᠨ ᠬᠥᠯᠯᠡᠵᠦ᠂ ᠨᠠᠢ᠍ᠮᠠᠨ ᠮᠣᠷᠢᠲᠠᠨ ᠬᠠᠰᠢᠭᠰᠠᠨ ᠲᠡᠷᠭᠡ ᠪᠡᠷ᠂ ᠵᠠᠭᠤᠨ ᠴᠡᠷᠢᠭ ᠢ᠋ᠶ᠋ᠡᠷ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠭᠤᠯᠤᠨ ᠡᠮᠦᠨᠡᠲᠦ ᠶ᠋ᠢ ᠵᠣᠷᠢᠵᠤ ᠬᠠᠲᠠᠷᠢᠭᠤᠯᠪᠠ᠃ ᠲᠡᠷᠡ ᠪᠡᠷ ᠤᠷᠢᠳ ᠨᠢ ᠵᠠᠷᠤᠵᠤ ᠮᠥᠩᠬᠡ ᠶ᠋ᠢᠨ ᠱᠠᠷᠢᠯ ᠳᠡᠭᠡᠷᠡ ᠢᠷᠡᠭᠦᠯᠦᠭᠰᠡᠨ ᠪᠢᠯᠢᠭᠦᠨ ᠲᠦᠰᠢᠮᠡᠯ ᠢ᠋ ᠳᠠᠭᠠᠭᠤᠯᠤᠨ ᠡᠷᠭᠢᠭᠰᠡᠨ᠃ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠠᠯᠪᠠ ᠲᠠᠢ ᠡᠨᠡ ᠲᠦᠰᠢᠮᠡᠯ ᠲᠡᠢ ᠬᠤᠪᠢᠯᠠᠢ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠪᠠᠢᠬᠤ ᠳ᠋ᠤ᠌ ᠪᠠᠨ ᠲᠠᠪᠠᠲᠠᠢ ᠠᠭᠤᠯᠵᠠᠨ᠂ ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠴᠤ ᠴᠢᠳᠠᠭᠠ ᠦᠭᠡᠢ ᠶᠠᠪᠤᠭᠠ ᠪᠣᠯᠬᠣᠷ ᠬᠡᠭᠡᠷᠡ ᠭᠠᠷᠴᠤ ᠶᠠᠷᠢᠯᠴᠠᠬᠤ ᠶ᠋ᠢ ᠵᠣᠷᠢᠵᠠᠢ᠃ ᠲᠡᠳᠡ ᠣᠩ ᠤ᠋ᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠢᠷᠡᠵᠦ ᠪᠠᠭᠤᠳᠠᠯᠯᠠᠨ᠂ ᠨᠣᠭᠣᠭᠠᠨ ᠤ᠋ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠠᠭᠤᠳᠠᠮ ᠬᠥᠨᠳᠡᠢ ᠳ᠋ᠦ᠍ ᠬᠣᠨᠣᠭᠯᠠᠬᠤ ᠪᠣᠯᠪᠠ᠃ ᠬᠤᠪᠢᠯᠠᠢ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠪᠢᠯᠢᠭᠦᠨ ᠢ᠋ ᠳᠠᠭᠠᠭᠤᠯᠤᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠣᠴᠢᠵᠤ ᠵᠢᠭᠠᠬᠠᠨ ᠶᠠᠷᠢᠯᠴᠠᠯᠠ᠃ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠶᠠᠷᠢᠬᠤ ᠶᠠᠭᠤᠮᠠ ᠬᠣᠪᠣᠷᠬᠠᠨ ᠪᠢᠯᠡ᠃
ᠬᠤᠪᠢᠯᠠᠢ ᠤᠰᠤᠨ ᠤ᠋ ᠤᠷᠤᠰᠬᠠᠯ ᠰᠢᠷᠳᠡᠨ ᠬᠡᠰᠡᠭ ᠵᠠᠭᠤᠷᠠ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠰᠤᠯᠠᠬᠠᠨ ᠢᠨᠢᠶᠡᠵᠦ᠄
— ᠴᠢ ᠨᠠᠳᠠᠲᠠᠢ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠪᠠᠵᠠᠭᠠᠲᠠᠢ ᠠᠭᠤᠯᠵᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠰᠢᠪ᠃ ᠰᠣᠨᠢᠨ ᠬᠠᠴᠢᠨ ᠶᠠᠭᠤᠮᠠ ᠶᠠᠭᠤ ᠰᠣᠨᠣᠰᠴᠤ ᠶᠠᠪᠤᠪᠠ ᠳᠠ? ᠭᠡᠮᠡᠨ ᠠᠶᠠ ᠲᠠᠯᠪᠢᠩᠭᠤᠢ ᠪᠠᠷ ᠠᠰᠠᠭᠤᠯᠠ᠃
— ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ ᠳᠡᠭᠡᠳᠦᠰ ᠮᠢᠨᠢ! ᠲᠠᠨ ᠳ᠋ᠤ᠌ ᠪᠣᠭᠣᠯ ᠪᠢ ᠰᠢᠳᠠᠷᠯᠠᠬᠤ ᠵᠠᠪ ᠭᠠᠷᠤᠭᠠ ᠦᠭᠡᠢ ᠰᠢᠦ ᠳᠡ᠃ ᠲᠠ ᠴᠠᠭ ᠦᠷᠭᠦᠯᠵᠢᠳᠡ ᠵᠠᠢ ᠵᠠᠪ ᠦᠭᠡᠢ ᠮᠣᠷᠢᠯᠠᠵᠤ ᠪᠠᠢᠪᠠ ᠳᠠ᠃
— ᠲᠡᠢᠮᠦ ᠲᠡᠢᠮᠦ᠃ ᠵᠠ ᠴᠢ ᠮᠢᠨᠦ ᠲᠠᠯᠠ ᠪᠠᠷ ᠠᠮᠢᠲᠠᠨ ᠣᠯᠠᠨ ᠠ᠋ᠴᠠ ᠶᠠᠭᠤ ᠰᠣᠨᠣᠰᠴᠤ ᠪᠠᠢᠪᠠ ᠠ᠋?
— ᠱᠠᠯᠢᠬᠤ ᠶᠠᠭᠤᠮᠠ ᠦᠭᠡᠢ ᠳᠡ᠃ ᠶᠡᠬᠡ ᠵᠠᠬᠢᠷᠤᠭᠴᠢ ᠮᠢᠨᠢ᠃ ᠲᠠᠨ ᠢ᠋ ᠬᠢᠲᠠᠳ ᠬᠥᠮᠦᠰ ᠦ᠋ᠨ ᠠᠷᠭᠠ ᠶ᠋ᠢ ᠣᠯᠵᠤ᠂ ᠨᠣᠮᠣᠬᠠᠳᠬᠠᠨ ᠵᠠᠬᠢᠷᠴᠤ ᠪᠠᠢᠬᠤ ᠲᠠᠯᠠ ᠪᠠᠷ ᠶᠡᠬᠡ ᠤᠬᠠᠭᠠᠨ ᠵᠠᠷᠤᠵᠤ ᠴᠢᠳᠠᠵᠤ ᠪᠠᠢᠨᠠ ᠭᠡᠰᠡᠨ ᠠᠮᠠ ᠲᠠᠢ ᠯᠠ ᠪᠠᠢᠬᠤ ᠶᠤᠮ᠃ ᠪᠢ ᠲᠡᠷᠡ ᠦᠭᠡᠨ ᠳ᠋ᠦ᠍ ᠪᠡᠶᠡᠰᠴᠦ ᠪᠠᠢᠯᠠ᠃
— ᠮᠠᠨ ᠤ᠋ ᠳᠡᠭᠦᠦ ᠨᠠᠷ ᠶᠠᠭᠤ ᠶᠠᠷᠢᠵᠤ ᠪᠠᠢᠨᠠ ᠪᠣᠢ? ᠴᠢ ᠶᠠᠭᠤ ᠰᠣᠨᠣᠰᠪᠠ ᠠ᠋?
— ᠲᠠᠨ ᠤ᠋ ᠠᠯᠢ ᠴᠦ᠍ ᠳᠡᠭᠦᠦ ᠨᠠᠷ ᠲᠠᠨ ᠤ᠋ ᠲᠤᠬᠠᠢ ᠶᠠᠭᠤ ᠴᠦ᠍ ᠶᠠᠷᠢᠭᠠ ᠦᠭᠡᠢ᠂ ᠶᠠᠷᠢᠬᠤ ᠴᠦ᠍ ᠵᠠᠪ ᠪᠠᠢᠭᠰᠠᠨ ᠦᠭᠡᠢ᠃ ᠨᠠᠳᠠᠲᠠᠢ ᠶᠠᠭᠤ ᠪᠠᠨ ᠴᠦ᠍ ᠶᠠᠷᠢᠬᠤ ᠶᠤᠮ ᠪᠢᠯᠡ ᠳᠠ᠃ ᠪᠢ ᠥᠴᠦᠬᠡᠨ ᠪᠣᠭᠣᠯ ᠰᠢᠦ ᠳᠡ᠃
— ᠠᠩᠬᠠᠨ ᠴᠢᠮᠠᠶ᠋ᠢ ᠣᠴᠢᠬᠤ ᠳ᠋ᠤ᠌ ᠠᠷᠢᠬᠪᠦ᠋ᠬᠡ ᠶᠠᠭᠤ ᠴᠦ᠍ ᠬᠡᠯᠡᠭᠰᠡᠨ ᠦᠭᠡᠢ ᠤᠤ?
— ᠨᠠᠮᠠᠶ᠋ᠢ ᠲᠡᠷᠡ ᠬᠣᠲᠠ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌ ᠶᠡᠬᠡ ᠵᠠᠬᠢᠷᠤᠭᠴᠢ ᠠᠷᠢᠬᠪᠦ᠋ᠬᠡ ᠨᠣᠶᠠᠨ ᠢᠷᠡᠭᠡ ᠦᠭᠡᠢ ᠪᠠᠢᠭᠰᠠᠨ᠃ ᠨᠠᠳᠠ ᠠ᠋ᠴᠠ ᠬᠣᠢᠰᠢ ᠬᠣᠶᠠᠷ ᠬᠣᠨᠣᠭᠠᠳ ᠳᠠᠪᠬᠢᠵᠤ ᠢᠷᠡᠭᠰᠡᠨ᠃ ᠨᠣᠶᠠᠨᠲᠠᠨ ᠶᠡᠬᠡ ᠯᠡ ᠬᠠᠢᠯᠠᠨ《ᠠᠬᠠ ᠮᠢᠨᠢ ᠶᠠᠭᠠᠬᠢᠭᠠᠳ ᠠᠯᠠᠭᠠ ᠪᠣᠯᠵᠤ ᠣᠷᠬᠢᠪᠠ ᠠ᠋? ᠶᠠᠭᠠᠬᠢᠭᠠᠳ ᠪᠢᠳᠡᠨ ᠢ᠋ ᠪᠡᠨ ᠢᠩᠭᠢᠵᠦ ᠥᠨᠦᠴᠢᠷᠡᠭᠦᠯᠦᠨ ᠣᠷᠬᠢᠵᠤ ᠪᠠᠢᠭᠠ ᠶᠤᠮ ᠪᠣᠢ? ᠬᠥᠬᠡ ᠲᠩᠷᠢ ᠶᠠᠭᠠᠬᠢᠭᠰᠠᠨ ᠥᠷᠥᠰᠢᠶᠡᠯ ᠦᠭᠡᠢ ᠪᠣᠢ?》 ᠭᠡᠵᠦ ᠴᠤᠷᠬᠢᠷᠠᠵᠤ ᠪᠠᠢᠬᠤ ᠶ᠋ᠢ ᠨᠢ ᠪᠢ ᠰᠣᠨᠣᠰᠤᠭᠰᠠᠨ᠃ ᠲᠠᠨ ᠤ᠋ ᠠᠯᠳᠠᠷ ᠤ᠋ᠨ ᠡᠮᠦᠨᠡ ᠡᠴᠡ ᠨᠠᠮᠠᠶ᠋ᠢ ᠡᠮᠭᠡᠨᠢᠯ ᠢᠯᠡᠷᠬᠡᠢᠯᠡᠨ ᠶᠡᠬᠡ ᠬᠠᠳᠠᠭ ᠡᠷᠭᠦᠬᠦ ᠳ᠋ᠦ᠍ ᠠᠷᠢᠬᠪᠦ᠋ᠬᠡ ᠵᠠᠬᠢᠷᠤᠭᠴᠢ ᠰᠢᠷᠦᠭᠦᠨ ᠬᠠᠷᠠᠭᠠᠳ《ᠠᠬᠠ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠬᠦ ᠦᠭᠡᠢ ᠭᠡᠨᠡ ᠤᠤ?》 ᠭᠡᠵᠦ ᠠᠰᠠᠭᠤᠭᠰᠠᠨ᠃ ᠪᠢ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢ ᠨᠠᠭᠠᠰᠢ ᠨᠢ ᠶᠠᠪᠤᠭᠤᠯᠬᠤ ᠪᠣᠯᠤᠯᠴᠠᠭᠠ ᠶ᠋ᠢ ᠰᠥᠩ ᠤᠯᠤᠰ ᠤ᠋ᠨ ᠴᠡᠷᠢᠭ ᠭᠠᠷᠭᠠᠭᠤᠯᠬᠤ ᠦᠭᠡᠢ ᠪᠠᠢᠭᠠ ᠤᠴᠢᠷ ᠢ᠋ ᠠᠢᠯᠠᠳᠬᠠᠭᠰᠠᠨ᠃ ᠲᠡᠭᠡᠬᠦ ᠳ᠋ᠦ᠍ ᠠᠷᠢᠬᠪᠦ᠋ᠬᠡ ᠨᠣᠶᠠᠨ ᠴᠢᠷᠠᠢ ᠪᠠᠨ ᠬᠤᠪᠢᠷᠠᠭᠠᠭᠠᠳ《ᠶᠠᠭᠠᠬᠢᠭᠰᠠᠨ ᠴᠦ᠍ ᠶᠡᠬᠡ ᠲᠤᠨᠢᠷᠠᠬᠤ ᠪᠢᠯᠡ ᠳᠠ᠃ ᠰᠥᠩ ᠦ᠋ᠨ ᠴᠡᠷᠢᠭ ᠢ᠋ ᠪᠢᠳᠡ ᠡᠨᠡ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠥᠩᠭᠡᠷᠡᠭᠡᠭᠡᠳ ᠳᠠᠷᠠᠭᠠ ᠳ᠋ᠤ᠌ ᠨᠢ ᠠᠪᠴᠤ ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠡᠢᠮᠦ ᠬᠦᠨᠳᠦ ᠶᠠᠪᠤᠳᠠᠯ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠶᠠᠪᠤᠭᠠᠳ ᠢᠷᠡᠬᠦ ᠦᠭᠡᠢ᠂ ᠵᠠᠩ ᠨᠢ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠬᠤᠪᠢᠷᠠᠭᠠ ᠪᠣᠢ》 ᠭᠡᠵᠦ ᠪᠠᠢᠨᠠ ᠯᠠᠢ᠃ ᠥᠭᠡᠷᠡ ᠶᠠᠭᠤᠮᠠ ᠶᠠᠷᠢᠬᠤ ᠪᠣᠯᠤᠮᠵᠢ ᠭᠠᠷᠤᠭᠠ ᠦᠭᠡᠢ ᠭᠡᠵᠦ ᠪᠢᠯᠢᠭᠦᠨ ᠬᠡᠯᠡᠯᠡ᠃
ᠬᠤᠪᠢᠯᠠᠢ ᠬᠡᠰᠡᠭ ᠵᠠᠭᠤᠷᠠ ᠳᠣᠣᠷᠠ ᠪᠠᠨ ᠬᠣᠯᠬᠢᠨ᠂ ᠨᠣᠭᠣᠭᠠᠨ ᠳᠡᠭᠡᠷᠡ ᠨᠠᠭᠠᠰᠢ ᠴᠠᠭᠠᠰᠢ ᠠᠯᠬᠤᠵᠤ ᠪᠠᠢᠭᠠᠳ ᠵᠠᠭᠤᠲᠤ ᠶ᠋ᠢᠨ ᠳᠠᠭᠠᠭᠠᠮᠠᠯ ᠳ᠋ᠤ᠌ ᠣᠢᠷᠠᠲᠤᠨ ᠢᠷᠡᠵᠦ᠂ ᠨᠢᠭᠤᠷ ᠥᠭᠡᠳᠡ ᠨᠢ ᠡᠭᠴᠡᠯᠡᠨ ᠬᠠᠷᠠᠵᠤ ᠵᠣᠭᠰᠣᠭᠠᠳ᠄
— ᠴᠢ ᠨᠠᠳᠠᠳᠤ ᠦᠨᠡᠨᠴᠢ ᠰᠢᠳᠤᠷᠭᠤ ᠳᠠᠭᠠᠭᠠᠮᠠᠯ ᠳᠠ᠃ ᠪᠢ ᠡᠨᠳᠡᠭᠦᠷᠡᠭᠡ ᠦᠭᠡᠢ ᠶᠦᠮ ᠪᠠᠢᠨᠠ᠃ ᠴᠢ ᠶᠡᠷᠦ ᠨᠢ ᠭᠣᠪᠢ ᠳ᠋ᠤ᠌ ᠣᠴᠢᠵᠤ ᠠᠩ ᠵᠢᠭᠠᠬᠠᠨ ᠬᠢᠯᠴᠡᠭᠡᠳ ᠡᠷᠭᠢᠵᠦ ᠶᠠᠪᠤᠨᠠ ᠪᠠᠢᠬᠠ᠃ ᠮᠢᠨᠦ ᠲᠥᠯᠥᠭᠡᠨ ᠦ᠌ ᠨᠢᠭᠡ ᠬᠥᠮᠦᠨ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠪᠠᠢᠬᠤ ᠤᠴᠢᠷᠲᠠᠢ ᠪᠠᠢᠨᠠ᠃ ᠪᠢ ᠴᠢᠮᠠ ᠳ᠋ᠤ᠌ ᠴᠢᠮᠠᠯᠠᠯ ᠦᠭᠡᠢ ᠪᠡᠷ ᠫᠦᠩᠯᠦ ᠥᠭᠭᠦᠨᠡ᠃ ᠣᠳᠣ ᠴᠦ᠍ ᠪᠢ ᠴᠢᠮᠠᠲᠤ ᠬᠢᠲᠠᠳ ᠤ᠋ᠨ ᠲᠠᠩᠰᠤᠭ ᠬᠣᠷᠭᠣᠢ᠂ ᠲᠣᠷᠭᠠᠨ ᠠ᠋ᠴᠠ ᠪᠠᠭᠠ ᠰᠠᠭᠠ ᠶ᠋ᠢ ᠥᠭᠭᠦᠨᠡ᠃ ᠴᠢ ᠲᠡᠨᠳᠡ ᠡᠷᠭᠢᠵᠦ ᠣᠴᠢᠭᠠᠳ《ᠪᠡᠶᠡ ᠪᠠᠷᠤᠭᠲᠠᠢ ᠪᠣᠯᠤᠭᠠᠳ ᠴᠢᠯᠥᠭᠡ ᠮᠡᠳᠡᠭᠦᠯᠵᠦ ᠢᠷᠡᠭᠰᠡᠨ᠃ ᠬᠠᠯᠠᠭᠤᠨ ᠭᠠᠵᠠᠷ ᠨᠠᠳᠠᠳᠤ ᠲᠠᠭᠠᠷᠠᠬᠤ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠬᠡᠯᠡᠬᠦ ᠪᠢᠵᠡ᠃ ᠲᠡᠭᠡᠭᠡᠳ ᠪᠣᠯᠪᠠᠯ ᠠᠷᠢᠬᠪᠦ᠋ᠬᠡ ᠳ᠋ᠦ᠍ ᠣᠢᠷᠠ ᠪᠠᠢᠬᠤ ᠠᠯᠪᠠᠨ ᠳ᠋ᠤ᠌ ᠣᠷᠣᠬᠤ ᠶ᠋ᠢ ᠬᠢᠴᠢᠶᠡᠬᠦ ᠬᠡᠷᠡᠭᠲᠡᠢ᠃ ᠪᠢ ᠴᠢᠮᠠᠶ᠋ᠢ ᠳᠡᠷᠭᠡᠳᠡ ᠪᠡᠨ ᠪᠠᠢᠯᠭᠠᠭᠠᠷᠠᠢ ᠭᠡᠵᠦ ᠠᠷᠢᠬᠪᠦ᠋ᠬᠡ ᠳ᠋ᠦ᠍ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃ ᠲᠡᠭᠡᠪᠡᠯ ᠴᠠᠭᠠᠳᠤᠬᠢ ᠴᠢᠨᠢ ᠬᠠᠷᠠ ᠠᠪᠤᠭᠠᠳ ᠴᠢᠮᠠᠶ᠋ᠢ ᠰᠦᠢᠳ ᠬᠢᠨᠡ᠃ ᠴᠢ ᠮᠢᠨᠦ ᠲᠠᠯᠠ ᠪᠠᠷ ᠬᠡᠨ ᠶᠠᠭᠤ ᠬᠡᠯᠡᠵᠦ ᠪᠠᠢᠭᠠ ᠶ᠋ᠢ ᠰᠠᠢᠨ ᠮᠡᠳᠡᠭᠡᠳ ᠨᠠᠳᠠᠳᠤ ᠬᠡᠯᠡᠵᠦ ᠪᠠᠢᠬᠤ ᠤᠴᠢᠷᠲᠠᠢ ᠪᠣᠯᠵᠤ ᠪᠠᠢᠨᠠ ᠰᠢᠦ᠃ ᠪᠢ ᠴᠢᠮᠠᠶ᠋ᠢ ᠬᠠᠷᠠᠵᠤ ᠬᠠᠮᠠᠭᠠᠯᠠᠬᠤ ᠪᠣᠯᠤᠨᠠ᠃ ᠴᠢ ᠪᠠᠢᠨ ᠪᠠᠢᠨ ᠨᠠᠳᠠᠲᠠᠢ ᠰᠡᠮᠬᠡᠨ ᠠᠭᠤᠯᠵᠠᠵᠤ ᠪᠠᠢᠬᠤ ᠪᠢᠵᠡ᠃ ᠵᠠ ᠡᠢᠮᠦ ᠳᠡ᠃ ᠤᠳᠠᠯ ᠦᠭᠡᠢ ᠪᠢᠵᠡ᠃ ᠴᠢ ᠨᠠᠮᠠᠶ᠋ᠢ ᠰᠠᠢᠨ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠮᠠᠭᠤ ᠴᠦ᠍ ᠬᠡᠯᠡᠭᠡᠳ ᠳᠡᠮᠡᠢ᠃ ᠪᠢ ᠴᠢᠮᠠᠶ᠋ᠢ ᠪᠠᠰᠠ ᠲᠡᠢᠮᠦ ᠯᠡ ᠪᠠᠢᠬᠤ ᠪᠣᠯᠤᠨᠠ ᠭᠡᠯᠡ᠃ ᠪᠢᠯᠢᠭᠦᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠦᠭᠡ ᠶ᠋ᠢ ᠦᠭᠡᠢ ᠭᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠲᠤᠯᠠ《ᠵᠠ》 ᠭᠡᠵᠦ ᠲᠣᠯᠣᠭᠠᠢ ᠪᠥᠬᠥᠢᠯᠭᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠳᠣᠲᠣᠷᠠ ᠪᠠᠨ ᠨᠢᠭᠡ ᠲᠠᠯᠠ ᠪᠠᠷ ᠬᠠᠢᠷᠠᠲᠤ ᠪᠦᠰᠡᠭᠦᠢ ᠳ᠋ᠦ᠍ ᠪᠡᠨ ᠣᠢᠷᠠ ᠪᠠᠢᠨᠠ ᠭᠡᠳᠡᠭ ᠲᠦ᠍ ᠪᠠᠶᠠᠷᠯᠠᠪᠠᠴᠤ ᠨᠥᠭᠦᠭᠡ ᠲᠠᠯᠠ ᠪᠠᠷ ᠬᠣᠵᠢᠮ ᠠᠬᠠ ᠳᠡᠭᠦᠦ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠪᠤᠳᠠᠩ ᠬᠤᠳᠬᠤᠬᠤ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠨ ᠲᠣᠯᠣᠭᠠᠢ ᠪᠠᠨ ᠭᠡᠭᠡᠬᠦ ᠪᠠᠢᠬᠠ ᠭᠡᠬᠦ ᠡᠴᠡ ᠠᠶᠤᠯᠠ᠃
ᠬᠤᠪᠢᠯᠠᠢ ᠶ᠋ᠢ ᠪᠤᠴᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠥᠯᠡᠬᠦ ᠬᠠᠨ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠠᠷᠪᠠᠭᠠᠳ ᠬᠣᠨᠣᠭ ᠰᠠᠭᠠᠳᠠᠨ ᠠᠷᠢᠬᠪᠦ᠋ᠬᠡ ᠲᠡᠢ ᠪᠡᠨ ᠬᠡᠳᠦ ᠬᠡᠳᠦ ᠠᠭᠤᠯᠵᠠᠨ ᠶᠠᠷᠢᠯᠴᠠᠵᠤ ᠪᠠᠢᠭᠠᠳ ᠢᠷᠡᠨ ᠣᠷᠣᠨ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠪᠣᠯᠪᠠ᠃ ᠲᠡᠷᠡ ᠪᠡᠷ ᠳᠡᠭᠦᠦ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠨ ᠲᠤᠩ ᠳᠣᠲᠣᠨᠣ ᠪᠠᠢᠳᠠᠯᠲᠠᠢ ᠪᠠᠢᠵᠤ
— ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ᠶ᠋ᠡᠷ ᠪᠢ ᠲᠠᠨ ᠲᠠᠢ ᠦᠷᠭᠦᠯᠵᠢ ᠬᠠᠷᠢᠯᠴᠠᠭᠠᠲᠠᠢ ᠪᠠᠢᠬᠤ ᠪᠣᠯᠤᠨᠠ᠃ ᠡᠯᠳᠡᠪ ᠣᠯᠠᠨ ᠠᠯᠪᠠᠨ ᠳ᠋ᠤ᠌ ᠴᠢ ᠰᠠᠮᠭᠠᠷᠳᠠᠨ ᠬᠥᠮᠦᠨ ᠣᠯᠠᠨ ᠳ᠋ᠤ᠌ ᠪᠠᠨ ᠬᠠᠷᠰᠢ ᠰᠢᠢᠳᠪᠦᠷᠢ ᠭᠠᠷᠭᠠᠵᠤ ᠠᠯᠳᠠᠪᠠ ᠠ᠋! ᠳᠣᠣᠷᠠᠲᠤ ᠣᠯᠠᠨ ᠴᠢᠨᠢ ᠳᠡᠭᠡᠳᠦ ᠲᠥᠷᠥ ᠶ᠋ᠢᠨ ᠰᠢᠢᠳ ᠢ᠋ ᠲᠠᠩᠨᠠᠨ ᠵᠢᠳᠬᠦᠵᠦ ᠪᠠᠢᠳᠠᠭ᠃ ᠶᠠᠯᠢᠮ ᠦᠭᠡᠢ ᠪᠠᠭᠠ ᠴᠦ᠍ ᠪᠠᠢᠭᠰᠠᠨ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠲᠤᠰᠠ ᠳ᠋ᠤ᠌ ᠬᠠᠷᠰᠢᠯᠠᠭᠰᠠᠨ ᠰᠢᠢᠳᠦᠯ ᠭᠠᠷᠭᠠᠬᠤ ᠶ᠋ᠢ ᠠᠨᠳᠠᠬᠤ ᠦᠭᠡᠢ ᠳᠣᠣᠷᠠ ᠨᠢ ᠮᠡᠳᠡᠭᠡᠳ ᠯᠡ ᠡᠰᠡᠷᠭᠦᠴᠡᠯ ᠪᠣᠯᠳᠠᠭ ᠰᠢᠦ᠃ ᠬᠠᠭᠠᠨ᠂ ᠵᠠᠬᠢᠷᠤᠭᠴᠢ ᠬᠥᠮᠦᠨ ᠲᠠᠩᠳᠠ ᠯᠠ ᠥᠪᠡᠷ ᠦ᠋ᠨ ᠬᠠᠷᠢᠶᠠᠯᠠᠬᠤ ᠲᠦᠮᠡᠨ ᠳ᠋ᠦ᠍ ᠲᠤᠰᠠᠲᠠᠢ ᠵᠦᠢᠯ ᠬᠠᠢᠨ ᠣᠯᠵᠤ᠂ ᠬᠡᠷᠡᠭᠵᠢᠭᠦᠯᠵᠦ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠬᠦ ᠶᠣᠰᠣᠲᠠᠢ ᠪᠣᠯᠤᠯᠲᠠᠢ᠃ ᠳᠡᠷᠭᠡᠳᠡ ᠪᠡᠨ ᠡᠮᠡ ᠬᠣᠰᠢᠭᠤᠲᠠᠢ᠂ ᠬᠣᠪ ᠵᠢᠪ ᠬᠥᠭᠡᠭᠡᠴᠡᠯᠳᠦᠵᠦ ᠪᠠᠢᠳᠠᠭ᠂ ᠤᠷᠪᠠᠭᠴᠢ ᠡᠯᠳᠡᠪ ᠨᠣᠪᠰᠢ ᠶ᠋ᠢᠨ ᠠᠮᠢᠲᠠᠳ ᠰᠢᠷᠭᠤᠭᠤᠯᠪᠠᠯ ᠶᠡᠬᠡ ᠠᠶᠤᠯᠲᠠᠢ᠁ ᠭᠡᠬᠦᠴᠢᠯᠡᠨ ᠦ᠌ ᠵᠦᠢᠯ ᠵᠠᠬᠢᠶᠠᠰᠤ ᠪᠣᠯᠭᠠᠨ ᠠᠷᠢᠬᠪᠦ᠋ᠬᠡ ᠳ᠋ᠦ᠍ ᠬᠡᠯᠡᠭᠡᠳ᠂ ᠬᠤᠪᠢᠯᠠᠢ ᠠᠬᠠ ᠥᠪᠡᠷ ᠢ᠋ ᠪᠠᠨ ᠯᠠ ᠥᠨᠳᠥᠷ ᠳᠡᠭᠡᠳᠦ ᠡᠵᠡᠨ ᠪᠠᠢᠯᠭᠠᠬᠤ ᠰᠠᠨᠠᠭᠠᠲᠠᠢ ᠪᠣᠯᠤᠯᠲᠠᠢ᠃ ᠲᠡᠭᠦᠨ ᠲᠡᠢ ᠬᠠᠷᠢᠯᠴᠠᠬᠤ ᠳ᠋ᠤ᠌ ᠪᠠᠨ ᠪᠣᠯᠭᠣᠮᠵᠢᠲᠠᠢ᠂ ᠬᠦᠯᠢᠴᠡᠲᠡᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠬᠦ ᠶᠣᠰᠣᠲᠠᠢ ᠪᠢᠵᠡ᠃ ᠬᠥᠮᠦᠨ ᠲᠠᠨ ᠲᠠᠢ ᠶᠠᠭᠠᠬᠢᠵᠤ ᠬᠠᠷᠢᠯᠴᠠᠨᠠ᠂ ᠲᠡᠷᠡ ᠯᠠ ᠪᠠᠢᠳᠠᠯ ᠢ᠋ᠶ᠋ᠠᠷ ᠨᠢ ᠬᠠᠷᠢᠯᠴᠠᠬᠤ ᠨᠢ ᠵᠥᠪ ᠪᠣᠯᠤᠨᠠ ᠪᠢᠵᠡ ᠭᠡᠵᠦ ᠮᠥᠩᠬᠡ ᠠᠬᠠ ᠶ᠋ᠢᠨ ᠬᠢᠨᠢ ᠬᠡᠯᠡᠵᠦ ᠪᠠᠢᠭᠰᠠᠨ ᠲᠠᠢ ᠠᠳᠠᠯᠢ ᠦᠭᠡ ᠬᠡᠯᠡᠯᠡ᠃ ᠲᠡᠭᠡᠭᠡᠳ ᠴᠦ᠍ ᠬᠥᠯᠡᠬᠦ ᠭᠤᠷᠪᠠᠨ ᠵᠠᠭᠤᠨ ᠳᠠᠭᠠᠭᠤᠯ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠪᠤᠴᠠᠬᠤ ᠪᠣᠯᠵᠤ᠂ ᠠᠷᠢᠬᠪᠦ᠋ᠬᠡ ᠲᠡᠭᠦᠨ ᠢ᠋ ᠣᠷᠬᠣᠨ ᠭᠣᠣᠯ ᠤ᠋ᠨ ᠶᠡᠬᠡ ᠭᠠᠷᠠᠮ ᠳᠡᠭᠡᠷᠡ ᠬᠡᠭᠡᠷᠡ ᠶ᠋ᠢᠨ ᠴᠠᠢ ᠵᠣᠭᠣᠭᠯᠠᠭᠤᠯᠤᠭᠠᠳ᠂ ᠦᠳᠡᠨ ᠮᠣᠷᠳᠠᠭᠤᠯᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠠᠭᠠ ᠠᠬᠠ ᠬᠦᠯᠡᠬᠦ ᠨᠢ ᠨᠤᠲᠤᠭ ᠲᠤ ᠪᠠᠨ ᠬᠣᠷᠭᠣᠳᠠᠨ ᠶᠠᠪᠤᠬᠤ ᠳᠤᠷᠠᠲᠠᠢ ᠪᠢᠰᠢ ᠪᠠᠢᠳᠠᠯᠲᠠᠢ ᠨᠢ ᠢᠯᠡᠳᠲᠡ ᠮᠡᠳᠡᠭᠳᠡᠵᠦ ᠪᠠᠢᠵᠠᠢ᠃ ᠠᠬᠠ ᠳᠡᠭᠦᠦ ᠬᠣᠶᠠᠷ ᠬᠡᠭᠡᠷᠡ ᠶ᠋ᠢᠨ ᠵᠠᠮ ᠳᠡᠭᠡᠷᠡ ᠰᠠᠯᠵᠤ ᠶᠠᠳᠠᠨ ᠤᠳᠠᠭᠠᠨ ᠲᠡᠪᠡᠷᠢᠯᠳᠦᠵᠦ ᠵᠣᠭᠰᠣᠬᠤ ᠳ᠋ᠤ᠌ ᠪᠠᠨ ᠬᠦᠯᠡᠬᠦ ᠠᠷᠢᠬᠪᠦ᠋ᠬᠡ ᠶ᠋ᠢ ᠦᠷᠦ ᠡᠪᠡᠳᠦᠨ
— ᠴᠢ ᠮᠢᠨᠢ ᠭᠠᠯ ᠭᠣᠯᠣᠮᠲᠠ ᠪᠠᠨ ᠰᠠᠬᠢᠭᠠᠳ᠂ ᠠᠴᠢᠶᠠᠨ ᠤ᠋ ᠬᠦᠨᠳᠦ ᠶ᠋ᠢ ᠡᠭᠦᠷᠬᠦ ᠪᠣᠯᠵᠤ ᠳᠠ᠃ ᠪᠢ ᠶᠡᠬᠡ ᠲᠤᠰᠠ ᠦᠵᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ᠃ ᠰᠠᠭᠤᠳᠠᠭ ᠨᠤᠲᠤᠭ ᠮᠠᠨᠢ ᠳᠡᠩᠳᠡᠭᠦᠦ ᠬᠣᠯᠠ ᠪᠠᠢᠨᠠ ᠳᠠ ᠭᠡᠳ ᠬᠠᠴᠠᠷ ᠤᠷᠤᠭᠤ ᠪᠠᠨ ᠬᠣᠪᠣᠷ ᠦᠵᠡᠭᠳᠡᠳᠡᠭ ᠰᠤᠪᠤᠳ ᠤ᠋ᠨ ᠳᠤᠰᠤᠯ ᠪᠥᠮᠪᠥᠷᠢᠭᠦᠯᠵᠦ ᠪᠢᠯᠡ᠃ ᠢᠩᠭᠢᠵᠦ ᠲᠡᠷᠡ ᠠᠬᠠ ᠳᠡᠭᠦᠦ ᠬᠣᠶᠠᠷ ᠬᠠᠭᠠᠴᠠᠬᠤ ᠳ᠋ᠤ᠌ ᠪᠠᠨ ᠳᠠᠬᠢᠨ ᠠᠭᠤᠯᠵᠠᠬᠤ ᠲᠠᠪᠢᠯᠠᠩ ᠦᠭᠡᠢ ᠪᠣᠯᠵᠤ ᠪᠠᠢᠭᠠ ᠪᠠᠨ ᠠᠯᠢ ᠠᠯᠢ ᠨᠢ ᠶᠠᠭᠠᠬᠢᠨ ᠤᠷᠢᠲᠠᠵᠤ ᠮᠡᠳᠡᠬᠦ ᠪᠣᠢ᠃ ᠢᠩᠭᠢᠭᠡᠳ ᠠᠷᠭᠠ ᠦᠭᠡᠢ ᠰᠠᠯᠠᠭᠠ ᠵᠠᠮ ᠤ᠋ᠨ ᠡᠷᠬᠡ ᠪᠡᠷ ᠲᠡᠳᠡ ᠰᠠᠯᠵᠤ᠂ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠨ ᠪᠥᠬᠥᠢᠵᠦ᠂ ᠮᠣᠳᠣᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠯᠳᠠ ᠣᠷᠣᠲᠠᠯᠠ ᠨᠢ ᠳᠠᠯᠠᠯᠤᠨ ᠬᠠᠭᠠᠴᠠᠪᠠ᠃ ᠪᠦᠰᠡᠭᠦᠢᠴᠦᠳ ᠠᠷᠢᠬᠪᠦ᠋ᠬᠡ ᠶ᠋ᠢᠨ ᠬᠠᠲᠤᠳ ᠬᠥᠯᠡᠬᠦ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠰᠠᠴᠤᠯᠢ ᠪᠠᠷ ᠰᠦ ᠡᠷᠭᠦᠨ ᠠᠯᠲᠠᠨ ᠰᠢᠷᠠ ᠵᠠᠮ ᠳ᠋ᠤ᠌ ᠪᠠᠨ ᠰᠠᠢᠨ ᠶᠠᠪᠤᠵᠤ ᠬᠦᠷᠬᠦ ᠶ᠋ᠢ ᠪᠡᠯᠭᠡᠳᠡᠨ ᠢᠷᠥᠭᠡᠵᠦ ᠬᠣᠴᠣᠷᠤᠯᠠ᠃ ᠬᠦᠯᠡᠬᠦ ᠬᠠᠨ ᠢᠷᠡᠭᠰᠡᠨ ᠲᠡᠢ ᠪᠡᠨ ᠠᠳᠠᠯᠢ ᠪᠠᠷ ᠬᠠᠭᠠᠰ ᠰᠠᠷᠠ ᠭᠠᠷᠤᠢ ᠥᠷᠲᠡᠭᠡ ᠵᠠᠮ ᠢ᠋ᠶ᠋ᠠᠷ ᠵᠢᠤᠵᠠᠨ ᠳ᠋ᠤ᠌ ᠪᠦᠪᠡᠢᠯᠡᠭᠳᠡᠨ ᠳᠣᠪᠲᠣᠯᠭᠠᠬᠤ ᠠᠵᠢ᠃
ᠬᠤᠪᠢᠯᠠᠢ ᠪᠠᠷᠠ ᠪᠣᠯᠤᠭᠴᠢᠳ ᠤ᠋ᠨ ᠬᠠᠮᠲᠤ ᠡᠮᠦᠨᠡᠲᠦ ᠶ᠋ᠢ ᠵᠣᠷᠢᠨ ᠳᠠᠪᠬᠢᠭᠰᠠᠭᠠᠷ ᠬᠣᠶᠠᠷ ᠲᠠᠬᠢ ᠬᠣᠨᠣᠭ ᠳᠡᠭᠡᠷᠡ ᠪᠡᠨ ᠱᠠᠯᠠ ᠶ᠋ᠢᠨ ᠬᠣᠭᠣᠯᠠᠢ ᠳ᠋ᠤ᠌ ᠣᠷᠣᠵᠤ ᠢᠷᠡᠯᠡ ᠃ ᠡᠨᠡ ᠨᠢ ᠠᠩ ᠤ᠋ᠨ ᠮᠥᠷ ᠬᠥᠭᠡᠭᠡᠵᠦ ᠵᠠᠮ ᠠ᠋ᠴᠠ ᠪᠠᠨ ᠪᠠᠷᠠᠭᠤᠨ ᠲᠡᠢᠰᠢ ᠬᠠᠵᠠᠢᠭᠰᠠᠨ ᠬᠡᠷᠡᠭ ᠃ ᠡᠯᠡᠰᠦᠨ ᠬᠥᠷᠥᠰᠥ ᠲᠡᠢ᠂ ᠵᠠᠭ ᠮᠣᠳᠣᠨ ᠤ᠋ ᠰᠢᠭᠤᠢ ᠨᠣᠭᠣᠭᠠᠷᠠᠭᠰᠠᠨ ᠡᠨᠡ ᠭᠣᠪᠢ ᠳ᠋ᠤ᠌ ᠬᠤᠯᠠᠨ᠂ ᠳᠠᠬᠢ᠂ ᠪᠥᠬᠥᠩ ᠭᠥᠷᠥᠭᠡᠰᠦ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠬᠥᠳᠡᠯᠵᠦ ᠪᠠᠢᠭᠠ ᠠᠳᠠᠯᠢ ᠠᠵᠢ᠃ ᠬᠠᠷᠢᠨ ᠬᠠᠪᠲᠠᠭᠠᠢ ᠲᠡᠮᠡᠭᠡ ᠴᠥᠭᠡᠬᠡᠨ ᠦᠵᠡᠭᠳᠡᠵᠦ ᠪᠠᠢᠯᠠ᠃ ᠬᠤᠪᠢᠯᠠᠢ ᠰᠠᠷᠠ ᠲᠡᠭᠡᠭᠡᠭᠰᠡᠨ ᠤᠰᠤ ᠪᠠᠨ ᠤᠤᠭᠤᠵᠤ ᠬᠡᠭᠡᠷᠡ ᠬᠣᠨᠣᠭᠯᠠᠭᠠᠳ ᠥᠷᠯᠥᠭᠡ ᠡᠷᠲᠡ ᠠᠪᠠ ᠳ᠋ᠤ᠌ ᠭᠠᠷᠴᠤ᠂ ᠡᠬᠢᠯᠡᠭᠡᠳ ᠬᠡᠰᠡᠭ ᠬᠤᠯᠠᠨ ᠢ᠋ ᠴᠡᠷᠢᠭ ᠢ᠋ᠶ᠋ᠡᠷ ᠠᠯᠤᠰ ᠢ᠋ᠶ᠋ᠠᠷ ᠲᠣᠭᠣᠷᠢᠨ ᠪᠦᠰᠡᠯᠡᠵᠦ ᠠᠪᠤᠭᠠᠳ ᠨᠠᠮᠨᠠᠬᠤ ᠪᠣᠯᠪᠠ᠃ ᠲᠡᠷᠡ ᠮᠠᠩᠬᠠᠲᠤ ᠬᠥᠨᠳᠡᠢ ᠳ᠋ᠦ᠍ ᠬᠤᠯᠠᠨ ᠤ᠋ ᠬᠥᠯ ᠢ᠋ᠶ᠋ᠡᠷ ᠪᠣᠰᠤᠭᠰᠠᠨ ᠲᠣᠭᠣᠰᠣ ᠲᠡᠭᠷᠢ ᠳ᠋ᠦ᠍ ᠲᠤᠯᠵᠤ ᠪᠠᠢᠯᠠ᠃ ᠡᠨᠡ ᠠᠮᠢᠲᠠᠨ ᠤ᠋ ᠣᠮᠣᠭᠯᠠᠩ ᠬᠤᠷᠳᠤᠨ ᠢ᠋ ᠵᠦᠢᠷᠯᠡᠵᠦ ᠬᠡᠯᠡᠬᠦ ᠶᠠᠭᠤᠮᠠ ᠠᠯᠠᠭᠠ ᠃ ᠨᠢᠭᠡᠨᠲᠡ ᠪᠦᠰᠡᠯᠡᠭᠳᠡᠭᠰᠡᠨ ᠵᠡᠷᠯᠢᠭ ᠠᠳᠤᠭᠤ ᠬᠠᠮᠢᠭᠠᠰᠢ ᠪᠠᠨ ᠴᠦ᠍ ᠳᠠᠢᠵᠢᠵᠤ ᠵᠢᠭᠤᠲᠠᠭᠠᠭᠰᠠᠨ ᠬᠥᠮᠦᠨ ᠦ᠌ ᠭᠠᠷ ᠲᠤ᠌ ᠥᠷᠲᠥᠬᠦ ᠪᠠᠢᠲᠠᠯᠲᠠᠢ ᠠᠵᠢ᠃ ᠬᠤᠪᠢᠯᠠᠢ ᠰᠡᠦᠬᠡ ᠲᠡᠷᠭᠡ ᠪᠡᠨ ᠶᠠᠢᠵᠢᠭᠢᠨᠠᠭᠤᠯᠤᠨ ᠠᠩ ᠤ᠋ᠨ ᠰᠦᠷᠦᠭ ᠳᠤᠮᠳᠠ ᠬᠡᠳᠦ ᠬᠡᠳᠦ ᠤᠮᠪᠠᠨ ᠣᠷᠣᠭᠠᠳ ᠂ ᠪᠥᠭᠡᠮ ᠲᠣᠭᠣᠰᠣᠨ ᠳᠣᠲᠣᠷᠠ ᠬᠠᠷᠠᠭᠳᠠᠭᠰᠠᠨ ᠪᠥᠬᠥᠩ ᠤᠷᠤᠭᠤ ᠬᠠᠷᠪᠤᠵᠤ ᠪᠠᠢᠪᠠ᠃ ᠵᠠᠬᠢᠷᠤᠭᠴᠢ ᠶ᠋ᠢᠨ ᠪᠠᠷᠢᠭᠰᠠᠨ ᠨᠤᠮᠤ ᠰᠤᠮᠤ ᠴᠦ᠍ ᠡᠵᠡᠨ ᠨᠢ ᠲᠠᠲᠠᠵᠤ ᠴᠢᠳᠠᠳᠠᠭ ᠶᠤᠮ ᠪᠣᠯ ᠪᠠᠷᠤᠭ ᠥᠪᠡᠷ ᠢ᠋ᠶ᠋ᠡᠨ ᠣᠴᠢᠭᠠᠳ ᠤᠨᠠᠴᠢᠬᠠᠬᠤ ᠰᠢᠬᠠᠮ ᠰᠠᠢᠨ ᠵᠡᠪᠰᠡᠭ ᠪᠢᠯᠡ᠃ ᠲᠡᠷᠭᠡᠨ ᠦ᠌ ᠪᠡᠨ ᠮᠣᠷᠢᠳ ᠢ᠋ ᠬᠠᠷᠠ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠳᠠᠪᠬᠢᠵᠤ ᠪᠠᠢᠬᠤ ᠳ᠋ᠤ᠌ ᠬᠤᠪᠢᠯᠠᠢ ᠪᠤᠰᠢᠭᠤᠯᠠ! ᠶᠠᠪᠤᠭᠠᠴᠢ! ᠭᠡᠵᠦ ᠵᠠᠩᠳᠤᠷᠤᠭᠰᠠᠭᠠᠷ ᠪᠠᠢᠪᠠ᠃ ᠢᠩᠭᠢᠵᠦ ᠳᠠᠪᠬᠢᠵᠤ ᠪᠠᠢᠭᠠᠳ ᠬᠡᠰᠡᠭ ᠵᠠᠭ ᠤ᠋ᠨ ᠰᠢᠭᠤᠢ ᠲᠣᠭᠣᠷᠢᠨ ᠥᠰᠥᠷᠬᠡᠬᠦ ᠳ᠋ᠦ᠍ ᠪᠡᠨ ᠬᠤᠪᠢᠯᠠᠢ ᠶ᠋ᠢᠨ ᠲᠡᠷᠭᠡ ᠣᠩᠬᠣᠯᠢᠳᠤᠨ ᠤᠨᠠᠯᠠ᠃ ᠵᠤᠵᠠᠭᠠᠨ ᠡᠯᠡᠰᠦᠨ ᠳᠡᠭᠡᠷᠡ ᠪᠡᠨ ᠨᠠᠮᠢᠷᠠᠭᠤᠯᠤᠨ ᠪᠣᠰᠤᠭᠠᠳ ᠨᠤᠮᠤ ᠰᠤᠮᠤ ᠪᠠᠨ ᠪᠠᠷᠢᠭᠠᠳ ᠭᠦᠶᠦᠵᠦ ᠬᠠᠷᠠᠭᠳᠠᠪᠠ ᠃ ᠲᠡᠷᠡ ᠪᠡᠷ ᠲᠡᠷᠭᠡ᠂ ᠬᠥᠯᠯᠡᠭᠡᠨ ᠦ᠌ ᠮᠣᠷᠢᠳ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠠᠩᠵᠠᠭᠠᠷᠠᠵᠤ ᠬᠠᠷᠠᠯ ᠦᠭᠡᠢ᠂ ᠬᠡᠳᠦᠨ ᠬᠤᠯᠠᠨ ᠤ᠋ ᠠᠷᠤ ᠠ᠋ᠴᠠ ᠰᠤᠮᠤ ᠲᠠᠯᠪᠢᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠤᠨᠤᠭᠰᠠᠨ ᠶᠤᠮ ᠤᠤ᠂ ᠠᠯᠢ ᠪᠤᠰᠤᠳ ᠬᠥᠮᠦᠨ ᠴᠦ᠍ ᠬᠠᠷᠪᠤᠵᠤ ᠤᠨᠠᠭᠠᠭᠰᠠᠨ ᠶᠤᠮ ᠤᠤ᠂ ᠨᠢᠭᠡᠨ ᠬᠤᠯᠠᠨ ᠤ᠋ ᠤᠨᠠᠭᠠ ᠭᠠᠵᠠᠷᠳᠠᠭᠤᠯᠵᠠᠢ᠃ ᠬᠤᠪᠢᠯᠠᠢ ᠲᠡᠭᠦᠨ ᠤᠷᠤᠭᠤ ᠬᠠᠷᠠᠢᠯᠭᠠᠨ ᠣᠴᠢᠪᠠ᠃ ᠬᠣᠢᠲᠤ ᠬᠣᠶᠠᠷ ᠬᠥᠯ ᠢ᠋ ᠨᠢ ᠲᠠᠰᠢᠷ ᠢ᠋ᠶ᠋ᠠᠷ ᠨᠢ ᠬᠤᠭᠤ ᠬᠠᠷᠪᠤᠭᠰᠠᠨ ᠲᠡᠷᠡ ᠠᠮᠢᠲᠠᠨ ᠡᠯᠡᠰᠦᠨ ᠳᠡᠭᠡᠷᠡ ᠮᠥᠯᠬᠥᠨ ᠲᠡᠮᠡᠦᠯᠵᠦ᠂ ᠠᠮᠠ ᠨᠢ ᠠᠩᠭᠠᠯᠵᠠᠭᠠᠳ᠂ ᠵᠢᠷᠦᠬᠡ ᠨᠢ ᠳᠡᠯᠪᠡᠷᠡᠬᠦ ᠭᠡᠵᠦ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠮᠡᠷ ᠦᠷᠦ ᠡᠪᠡᠳᠦᠯᠲᠡᠢ ᠮᠥᠯᠬᠥᠵᠦ ᠪᠠᠢᠪᠠ᠃ ᠣᠢᠷᠠᠬᠠᠨ ᠣᠴᠢᠭᠰᠠᠨ ᠪᠢᠯᠢᠭᠦᠨ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ 《ᠳᠠᠩᠴᠢ ᠨᠢᠯᠬᠠ ᠠᠮᠢᠲᠠᠨ ᠪᠠᠢᠨᠠ ᠰᠢᠦ ᠳᠡ》 ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠬᠡᠯᠡᠭᠡᠳ ᠨᠢᠯᠪᠤᠰᠤ ᠤᠨᠠᠭᠠᠬᠤ ᠰᠢᠬᠠᠯᠠ᠃ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠣᠴᠢᠭᠠᠳ ᠨᠢᠭᠡ ᠴᠦ᠍ ᠢᠨᠢᠶᠡᠬᠦ ᠦᠭᠡᠢ ᠶᠠᠪᠤᠭᠰᠠᠨ ᠬᠤᠪᠢᠯᠠᠢ ᠲᠡᠷᠡ ᠴᠢᠰᠤ ᠪᠠᠨ ᠰᠠᠪᠢᠷᠠᠭᠤᠯᠤᠭᠰᠠᠨ᠂ ᠤᠷᠲᠤ ᠬᠣᠶᠠᠷ ᠬᠥᠯ ᠳᠡᠭᠡᠷᠡ ᠪᠡᠨ ᠣᠴᠣᠢᠭᠠᠳ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠲᠡᠮᠡᠦᠯᠦᠨ ᠪᠠᠢᠭᠠ ᠤᠨᠠᠭᠠᠨ ᠳᠡᠭᠡᠷᠡ ᠢᠷᠡᠵᠦ ᠢᠨᠢᠶᠡᠭᠰᠡᠭᠡᠷ᠂ ᠰᠠᠬᠠᠯ ᠢ᠋ᠶ᠋ᠠᠨ ᠰᠡᠷᠪᠡᠯᠵᠡᠭᠦᠯᠦᠨ ᠰᠡᠳᠬᠢᠯ ᠬᠠᠨᠤᠭᠰᠠᠨ ᠶᠠᠩᠵᠤ ᠪᠠᠷ ᠬᠠᠷᠠᠵᠤ᠂ ᠨᠢᠭᠡ ᠲᠣᠭᠣᠷᠢᠵᠤ ᠦᠵᠡᠭᠰᠡᠨ ᠢ᠋ᠶ᠋ᠡᠨ᠂ ᠨᠤᠮᠤ ᠪᠠᠨ ᠬᠥᠪᠴᠢᠯᠡᠨ᠄
— ᠳᠠᠪᠬᠢᠭᠠᠳ ᠶᠠᠪᠤᠴᠢᠬᠠᠬᠤ ᠰᠠᠨᠠᠭᠠᠲᠠᠢ ᠪᠣᠯᠤᠯᠲᠠᠢ ᠰᠢᠦ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠴᠡᠭᠡᠵᠢ ᠤᠷᠤᠭᠤ ᠨᠢ ᠬᠠᠷᠪᠤᠨ ᠨᠠᠮ ᠤᠨᠠᠭᠠᠯᠠ᠃ ᠪᠢᠯᠢᠭᠦᠨ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ ᠲᠡᠰᠦᠭᠰᠡᠨ ᠦᠭᠡᠢ᠄
— ᠡᠷᠯᠢᠭᠯᠡᠬᠦ ᠠᠮᠢᠲᠠᠨ ᠢ᠋ᠶ᠋ᠠᠨ ᠣᠯᠵᠤ ᠡᠷᠯᠢᠭᠯᠡᠪᠡ ᠭᠡᠵᠦ ᠬᠡᠯᠡᠵᠦ ᠣᠷᠬᠢᠪᠠ᠃ ᠡᠨᠡ ᠡᠷᠡ ᠶ᠋ᠢᠨ ᠲᠡᠷᠡ ᠦᠭᠡ ᠶ᠋ᠢ ᠪᠥᠭᠡᠮ ᠱᠤᠤᠭᠢᠶᠠᠨ ᠳᠣᠲᠣᠷᠠ ᠬᠡᠨ ᠴᠦ᠍ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠨᠢ ᠠᠵᠠ ᠪᠢᠯᠡ᠃
ᠣᠷᠣᠢᠬᠠᠨ ᠠᠩ ᠤ᠋ᠨ ᠶᠠᠪᠤᠳᠠᠯ ᠳᠠᠭᠤᠰᠴᠤ᠂ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠱᠦᠷᠭᠦᠨ ᠬᠠᠴᠠᠷ ᠳᠡᠭᠡᠷᠡ ᠪᠡᠨ ᠰᠢᠯᠪᠤᠯᠠᠭᠰᠠᠨ ᠵᠢᠭᠠᠬᠠᠨ ᠰᠢᠷᠬᠠ ᠪᠠᠨ ᠬᠤᠪᠢᠯᠠᠢ ᠰᠠᠶᠢ ᠮᠡᠳᠡᠪᠡ ᠪᠣᠯᠤᠯᠲᠠᠢ ᠠᠷᠴᠢᠵᠤ ᠦᠵᠡᠭᠡᠳ ᠭᠠᠢᠬᠠᠰᠢᠷᠠᠬᠤ ᠳ᠋ᠤ᠌ ᠨᠢ ᠪᠠᠷᠠ ᠪᠣᠯᠤᠭᠴᠢᠳ ᠨᠢ ᠠᠯᠴᠢᠭᠤᠷ ᠪᠠᠷᠢᠨ ᠲᠡᠭᠦᠨ ᠤᠷᠤᠭᠤ ᠬᠣᠰᠢᠭᠤᠷᠠᠵᠤ ᠡᠬᠢᠯᠡᠪᠡ᠃ ᠵᠠᠬᠢᠷᠤᠭᠴᠢ ᠬᠡᠭᠡᠷᠡ ᠳᠡᠪᠢᠰᠦᠭᠰᠡᠨ ᠣᠯᠪᠣᠭ ᠳᠡᠭᠡᠷᠡ ᠰᠠᠭᠤᠵᠤ ᠪᠡᠶᠡ ᠶ᠋ᠢᠨ ᠴᠢᠯᠡᠭᠡ ᠭᠠᠷᠭᠠᠬᠤ ᠢᠯᠳᠠᠮ ᠳ᠋ᠤ᠌ ᠪᠠᠭᠠ ᠲᠦᠰᠢᠮᠡᠯ ᠪᠢᠯᠢᠭᠦᠨ ᠢ᠋ ᠣᠯᠵᠤ ᠬᠠᠷᠠᠭᠠᠳ᠂ ᠰᠠᠶᠢ ᠤᠬᠠᠭᠠᠨ ᠣᠷᠣᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ᠄
— ᠵᠠᠭᠤᠲᠤ ᠶ᠋ᠢᠨ ᠳᠠᠭᠠᠭᠠᠮᠠᠯ ᠴᠢ ᠪᠤᠴᠠᠵᠤ ᠶᠠᠪᠤᠭᠠ ᠦᠭᠡᠢ ᠪᠠᠢᠭᠠ ᠬᠡᠷᠡᠭ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠡᠵᠡᠨ ᠳᠡᠭᠡᠳᠦᠰ ᠮᠢᠨᠢ! ᠲᠠ ᠨᠠᠳᠠᠳᠤ ᠪᠤᠴᠠᠬᠤ ᠴᠠᠭ ᠢ᠋ ᠵᠠᠷᠯᠢᠭᠯᠠᠨᠠ ᠭᠡᠰᠡᠨ ᠰᠢᠦ ᠳᠡ ᠭᠡᠵᠦ ᠪᠢᠯᠢᠭᠦᠨ ᠬᠠᠷᠢᠭᠤ ᠠᠢᠯᠠᠳᠬᠠᠬᠤ ᠪᠥᠯᠥᠭᠡ᠃
— ᠠ᠂ ᠲᠡᠢᠮᠦ ᠪᠢᠯᠡ ᠤᠤ᠃ ᠴᠢ ᠡᠦᠲᠦ ᠬᠠᠷᠠ ᠬᠣᠷᠣᠮ ᠤᠷᠤᠭᠤ ᠪᠠᠨ ᠪᠤᠴᠠ! ᠮᠠᠷᠭᠠᠰᠢ ᠠᠳᠠ ᠠ᠋ᠴᠠ ᠪᠠᠨ ᠮᠣᠷᠢ ᠬᠣᠣᠰᠯᠠᠵᠤ ᠤᠨᠤᠭᠠᠳ ᠶᠠᠪᠤ! ᠪᠢ ᠴᠢᠮᠠ ᠤᠷᠤᠭᠤ ᠬᠠᠶᠠ ᠨᠢᠭᠡ ᠬᠥᠮᠦᠨ ᠵᠠᠷᠤᠵᠤ ᠠᠭᠤᠯᠵᠠᠭᠤᠯᠤᠨ ᠪᠠᠢᠬᠤ ᠪᠣᠯᠤᠨᠠ ᠁ᠭᠡᠵᠦ ᠬᠡᠯᠡᠯᠡ᠃
— — — —
① ᠳᠣᠷᠠᠺᠢᠨᠠ1242 — 1245 ᠣᠨ ᠳ᠋ᠤ᠌4 ᠵᠢᠯ ᠲᠥᠷᠥ ᠪᠠᠷᠢᠵᠠᠢ᠃
② ᠤᠭᠤᠯ ᠺᠡᠢᠮᠢᠰᠢ 1248 —1251 ᠣᠨ ᠳ᠋ᠤ᠌ ᠲᠥᠷᠥ ᠪᠠᠷᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠪᠠᠭᠠᠲᠤᠷ᠂ ᠭᠠᠷᠮᠠ᠂ ᠴᠣᠯᠮᠣᠨᠲᠤᠶᠠᠭᠠ