ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠬᠣᠶᠠᠳᠤᠭᠠᠷ ᠪᠦᠯᠦᠭ –1>᠂ᠬᠠᠷᠠ ᠬᠣᠷᠣᠮ ᠤᠨ ᠬᠢᠯᠢᠩ Бүргэд харьд үүрэлдэггүй – Ж᠂ Пүрэв <2-р бүлэг ~1>. хар хормын хилэн
57ᠬᠣᠶᠠᠳᠤᠭᠠᠷ ᠪᠦᠯᠦᠭ – ᠭᠣᠯᠣᠮᠲᠠ ᠲᠦᠰᠢᠭᠰᠡᠨ ᠡᠵᠡᠨ
ᠨᠢᠭᠡ᠂ ᠬᠠᠷᠠᠬᠣᠷᠣᠮ ᠤ᠋ᠨ ᠬᠢᠯᠢᠩ
ᠶᠡᠬᠡ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠠᠴᠢᠭᠰᠠᠨ ᠲᠡᠮᠡᠭᠡᠨ ᠲᠡᠷᠭᠡᠨ ᠦ᠌ ᠴᠤᠪᠤᠭᠠ ᠵᠠᠮ ᠤ᠋ᠨ ᠤᠷᠲᠤ ᠶ᠋ᠢ ᠲᠤᠭᠤᠯᠠᠯᠠ᠃
ᠬᠠᠭᠠᠨ ᠠᠬᠠ ᠶ᠋ᠢ ᠪᠡᠨ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠭᠠᠵᠠᠷ ᠲᠤ᠌ ᠨᠢ ᠶᠠᠭᠠᠷᠠᠨ ᠳᠣᠪᠲᠣᠯᠭᠠᠵᠤ ᠢᠷᠡᠭᠰᠡᠨ ᠲᠥᠷᠥᠭᠰᠡᠨ ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠤᠭ ᠴᠤᠪᠤᠭᠠ ᠶ᠋ᠢ ᠳᠠᠭᠠᠭᠠᠨ ᠬᠥᠳᠡᠯᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠨ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠢᠷᠡᠵᠦ᠂ ᠱᠠᠷᠢᠯ ᠶᠠᠭᠠᠬᠢᠵᠤ ᠬᠦᠯᠢᠶᠡᠨ ᠠᠪᠬᠤ᠂ ᠶᠠᠮᠠᠷ ᠵᠢᠷᠤᠮ ᠢ᠋ᠶ᠋ᠠᠷ ᠣᠷᠣᠰᠢᠭᠤᠯᠬᠤ ᠪᠡᠯᠡᠳᠬᠡᠯ ᠬᠢᠯᠭᠡᠵᠦ ᠪᠠᠢᠪᠠ᠃
ᠮᠥᠩᠬᠡ ᠶ᠋ᠢ ᠨᠠᠰᠤ ᠪᠠᠷᠠᠭᠰᠠᠨ ᠮᠡᠳᠡᠭᠡ ᠶ᠋ᠢ ᠠᠪᠤᠮᠠᠭᠴᠠ ᠬᠠᠷᠠᠬᠣᠷᠣᠮ ᠬᠣᠲᠠ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠡᠮᠭᠡᠨᠢᠯ ᠦ᠋ᠨ ᠪᠠᠢᠳᠠᠯ ᠲᠠᠢ ᠪᠣᠯᠤᠭᠰᠠᠨ ᠠᠵᠢ᠃
ᠲᠡᠨᠳᠡ ᠪᠠᠢᠭᠠ ᠣᠯᠠᠨ ᠱᠠᠰᠢᠨ ᠤ᠋ ᠰᠦᠮᠡ ᠳᠤᠭᠠᠩ ᠪᠦᠷᠢ ᠳ᠋ᠦ᠍ ᠬᠤᠷᠠᠯ ᠬᠤᠷᠠᠵᠤ ᠨᠣᠮ ᠤᠩᠰᠢᠨ᠂ ᠵᠠᠬᠠ ᠵᠡᠭᠡᠯᠢ ᠳ᠋ᠦ᠍ ᠪᠠᠢᠳᠠᠭ ᠬᠤᠳᠠᠯᠳᠤᠭᠠᠴᠢᠳ ᠳᠡᠯᠭᠡᠭᠦᠷ ᠶᠠᠭᠤᠮᠠ ᠪᠠᠨ ᠬᠤᠷᠢᠶᠠᠵᠤ ᠳᠠᠭᠤ ᠱᠣᠣ ᠦᠭᠡᠢ ᠪᠣᠯᠤᠭᠠᠳ᠂ ᠨᠠᠢᠷ ᠨᠠᠭᠠᠳᠤᠮ ᠬᠤᠭᠤᠷ ᠤ᠋ᠨ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠬᠤ ᠪᠠᠨ ᠪᠣᠯᠢᠪᠠ᠃
ᠬᠡᠨ ᠴᠦ᠍ ᠢᠩᠭᠢ ᠭᠡᠰᠡᠨ ᠦᠭᠡᠢ ᠠᠲᠠᠯᠠ ᠠᠶᠠᠨᠳᠠᠭᠠᠨ ᠲᠡᠢᠮᠦ ᠪᠠᠢᠳᠠᠯ ᠪᠣᠢ ᠪᠣᠯᠤᠯᠠ᠃
ᠬᠥᠮᠦᠰ ᠮᠠᠯᠠᠭᠠᠢ᠂ ᠳᠡᠪᠡᠯ ᠦ᠋ᠨ ᠬᠠᠨᠴᠤᠢ ᠳᠡᠭᠡᠷᠡ ᠪᠡᠨ ᠡᠯᠳᠡᠪ ᠥᠩᠭᠡ ᠶ᠋ᠢᠨ ᠳᠠᠪᠤᠤ ᠬᠠᠳᠠᠨ ᠡᠮᠭᠡᠨᠢᠵᠦ ᠪᠠᠢᠭᠠ ᠪᠠᠨ ᠢᠯᠡᠷᠬᠡᠢᠯᠡᠨᠡ᠃
ᠵᠠᠷᠢᠮ ᠰᠦᠮᠡ ᠳᠤᠭᠠᠩ ᠪᠣᠯᠤᠨ ᠮᠣᠩᠭᠣᠯ ᠠᠢᠯ ᠤ᠋ᠨ ᠭᠠᠳᠠᠭᠠ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠡᠷ ᠵᠤᠯᠠ ᠠᠰᠠᠭᠠᠵᠤ᠂ ᠥᠭᠡᠳᠡ ᠪᠣᠯᠤᠭᠴᠢ ᠬᠠᠭᠠᠨ ᠤ᠋ ᠪᠠᠨ ᠲᠥᠯᠥᠭᠡ ᠪᠤᠶᠠᠨ ᠦᠢᠯᠡᠳᠴᠦ ᠪᠠᠢᠭᠠ ᠨᠢ ᠢᠯᠡᠳᠲᠡ ᠮᠡᠳᠡᠭᠳᠡᠨᠡ᠃
ᠶᠡᠷᠦ ᠨᠢ ᠳᠠᠭᠤ ᠲᠠᠢ ᠱᠣᠣ ᠲᠠᠢ᠂ ᠢᠨᠢᠶᠡᠵᠦ ᠪᠠᠶᠠᠰᠤᠭᠰᠠᠨ ᠬᠥᠮᠦᠨ ᠦᠯᠦ ᠦᠵᠡᠭᠳᠡᠬᠦ ᠠᠵᠢ᠃ ᠬᠠᠷᠠᠬᠣᠷᠣᠮ① ᠬᠣᠲᠠ ᠶ᠋ᠢᠨ ᠶᠡᠬᠡ ᠵᠠᠬᠢᠷᠤᠭᠴᠢ ᠠᠷᠢᠬᠪᠦ᠋ᠬᠡ ᠬᠥᠮᠦᠨ ᠬᠥᠮᠦᠨ ᠡᠴᠡ ᠢᠯᠡᠭᠦᠦ ᠲᠡᠢ ᠣᠢ ᠭᠠᠰᠢᠭᠤᠳᠠᠯ ᠳ᠋ᠤ᠌ ᠣᠷᠣᠵᠤ ᠨᠢᠳᠦ ᠪᠡᠨ ᠪᠦᠯᠲᠡᠢᠲᠡᠯᠡ ᠤᠬᠢᠯᠠᠭᠠᠳ
— ᠣᠳᠣ ᠪᠢᠳᠡ ᠶᠠᠭᠠᠬᠢᠵᠤ ᠪᠠᠢᠬᠤ ᠶᠤᠮ ᠪᠣᠢ? ᠭᠡᠮᠡᠨ ᠥᠭᠦᠯᠡᠵᠦ ᠪᠠᠢᠪᠠ᠃
ᠤᠭ ᠨᠢ ᠬᠠᠷᠠᠪᠠᠰᠤ ᠨᠡᠩ ᠰᠡᠷᠭᠦᠯᠡᠩ᠂ ᠪᠡᠶᠡ ᠪᠢᠯᠳᠠᠷ ᠰᠠᠢᠬᠠᠨ᠂ ᠭᠤᠸᠠᠯᠢᠭ ᠥᠨᠳᠥᠷ ᠨᠢᠷᠤᠭᠤ ᠪᠦᠬᠦᠢ᠂ ᠵᠢᠰᠦ ᠴᠢᠷᠠᠢ ᠨᠢ ᠥᠩᠭᠡᠯᠢᠭ᠂ ᠬᠡᠨ ᠴᠦ᠍ ᠬᠠᠷᠠᠭᠰᠠᠨ ᠡᠷᠬᠢᠮ ᠰᠠᠢᠬᠠᠨ ᠡᠷᠡ ᠪᠢᠯᠡ᠃ ᠲᠡᠭᠦᠨ ᠢ᠋ ᠦᠵᠡᠭᠰᠡᠨ ᠬᠡᠨ ᠪᠣᠯᠪᠠᠴᠤ ᠠᠷᠭᠠ ᠦᠭᠡᠢ ᠠᠯᠲᠠᠨ ᠤᠷᠤᠭ ᠤ᠋ᠨ ᠢᠵᠠᠭᠤᠷᠲᠠᠨ ᠪᠣᠯᠬᠤ ᠨᠢ ᠣᠯᠠᠨ ᠤ᠋ ᠳᠣᠲᠣᠷᠠ ᠢᠯᠭᠠᠷᠠᠨ ᠪᠠᠢᠳᠠᠭ᠃
ᠪᠤᠯᠠᠭᠠᠨ ᠤ᠋ ᠠᠷᠠᠰᠤ ᠪᠠᠷ ᠡᠮᠵᠢᠭᠰᠡᠨ ᠴᠠᠭᠠᠨ ᠴᠢᠰᠴᠡᠦ ᠳᠡᠪᠡᠯ ᠡᠮᠦᠰᠴᠦ᠂ ᠠᠯᠲᠠ᠂ ᠮᠥᠩᠭᠥᠨ ᠲᠣᠨᠣᠭᠲᠠᠢ ᠬᠢᠲᠤᠭᠠ ᠰᠡᠯᠲᠡ ᠶ᠋ᠢ ᠵᠡᠭᠦᠨ ᠭᠠᠩᠭᠠᠯᠠᠵᠤ ᠶᠠᠪᠤᠳᠠᠭ ᠡᠨᠡ ᠡᠷᠡ ᠶ᠋ᠢ ᠬᠡᠨ ᠴᠦ᠍ ᠬᠠᠷᠠᠭᠰᠠᠨ ᠴᠡᠴᠡᠨ ᠴᠡᠯᠮᠡᠭ ᠤᠬᠠᠭᠠᠨᠲᠠᠢ᠂ ᠵᠣᠯᠪᠣᠭᠠᠯᠢᠭ ᠭᠡᠵᠦ ᠬᠡᠯᠡᠨᠡ᠃
ᠭᠠᠳᠠᠭᠠᠳᠤ ᠣᠷᠣᠨ ᠤ᠋ ᠭᠡᠢᠴᠢᠨ ᠵᠣᠴᠢᠨ ᠨᠤᠭᠤᠳ ᠴᠦ᠍ ᠠᠷᠢᠬᠪᠦᠢ᠍ᠬᠡ ᠶ᠋ᠢᠨ ᠬᠡᠢᠮᠥᠷᠢᠯᠢᠭ ᠰᠦᠷ ᠲᠦ᠍ ᠳᠠᠷᠤᠭᠳᠠᠨ᠂ ᠠᠢᠯᠠᠳᠬᠠᠯ ᠶᠠᠷᠢᠶᠠ ᠪᠠᠨ ᠪᠦᠷᠢᠨ ᠬᠢᠵᠦ ᠴᠢᠳᠠᠯ ᠦᠭᠡᠢ ᠦᠷᠭᠦᠭᠡᠨ ᠡᠴᠡ ᠭᠠᠷᠳᠠᠭ ᠭᠡᠳᠡᠭ ᠦᠭᠡ ᠪᠠᠢᠳᠠᠭ ᠠᠵᠢ᠃ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠬᠡ ᠰᠤᠷᠬᠤᠭᠲᠠᠨᠢ② ᠬᠠᠲᠤᠨ ᠠᠪᠠᠭᠠᠢ ᠶᠡᠬᠡ ᠬᠦᠦ ᠪᠡᠨ ᠨᠠᠰᠤ ᠪᠠᠷᠠᠯᠠ ᠭᠡᠵᠦ ᠰᠣᠨᠣᠰᠤᠮᠠᠭᠴᠠ
— ᠡᠢᠮᠦ ᠡᠨᠡᠷᠢᠯ ᠦᠭᠡᠢ ᠣᠷᠴᠢᠯᠠᠩ ᠪᠠᠢᠳᠠᠭ ᠠ᠋ ᠭᠡᠵᠦ ᠬᠡᠯᠡᠭᠡᠳ ᠤᠬᠠᠭᠠᠨ ᠠᠯᠲᠠᠨ ᠤᠨᠠᠵᠤ᠂ ᠪᠠᠷᠤᠭ ᠡᠯᠡᠢ ᠪᠠᠯᠠᠢ ᠰᠢᠬᠠᠮ ᠪᠣᠯᠤᠭᠠᠳ ᠣᠷᠳᠣᠨ ᠳ᠋ᠤ᠌ ᠪᠠᠨ ᠬᠤᠴᠢᠯᠭᠠᠨ ᠳ᠋ᠤ᠌ ᠣᠷᠣᠵᠤ ᠬᠡᠪᠲᠡᠪᠡ᠃
ᠠᠷᠢᠬᠪᠦ᠋ᠬᠡ ᠪᠦᠬᠦ ᠠᠬᠠ ᠳᠡᠭᠦᠦ᠂ ᠤᠷᠤᠭ ᠤᠳᠤᠮ ᠤ᠋ᠨ ᠢ᠋ᠶ᠋ᠠᠨ ᠬᠥᠮᠦᠨ ᠢ᠋ ᠴᠤᠭᠯᠠᠭᠤᠯᠤᠨ᠂ ᠶᠠᠭᠠᠬᠢᠪᠠᠯ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠱᠠᠷᠢᠯ ᠢ᠋ ᠵᠥᠪ ᠰᠠᠢᠬᠠᠨ ᠣᠷᠣᠰᠢᠭᠤᠯᠬᠤ ᠪᠣᠢ? ᠶᠠᠭᠠᠬᠢᠵᠤ ᠲᠡᠭᠦᠨ ᠦ᠌ ᠠᠯᠳᠠᠷ ᠢ᠋ ᠬᠠᠳᠠᠭᠠᠯᠠᠨ ᠬᠢᠲᠠᠳ ᠤ᠋ᠨ ᠨᠤᠲᠤᠭ ᠲᠤ᠌ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠠ᠋ᠴᠠ ᠡᠮᠭᠡᠨᠢᠯ ᠢᠯᠡᠷᠬᠡᠢᠯᠡᠨ ᠵᠠᠷᠤᠵᠤ ᠶᠠᠪᠤᠭᠤᠯᠤᠭᠰᠠᠨ ᠡᠯᠴᠢ ᠪᠢᠯᠢᠭᠦᠨ ᠲᠡᠢ ᠠᠶᠠᠨ ᠤ᠋ ᠵᠠᠮ ᠳ᠋ᠤ᠌ ᠠᠭᠤᠯᠵᠠᠭᠠᠳ᠂ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠪᠣᠳᠣᠯ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ᠂ ᠬᠠᠴᠠᠷ ᠤᠷᠤᠭᠤ ᠪᠠᠨ ᠤᠷᠤᠰᠴᠤ ᠪᠠᠢᠭᠠ ᠳᠤᠰᠤᠯ ᠢ᠋ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠨ᠄
— ᠠᠬᠠ ᠢᠷᠡᠬᠦ ᠦᠭᠡᠢ ᠭᠡᠨᠡ ᠤᠤ? ᠭᠡᠵᠦ ᠭᠠᠭᠴᠠ ᠦᠭᠡ ᠠᠰᠠᠭᠤᠯᠠ᠃
ᠵᠠᠷᠤᠭᠤᠯ ᠤ᠋ᠨ ᠲᠦᠰᠢᠮᠡᠯ ᠠᠷᠢᠬᠪᠦ᠋ᠬᠡ ᠶ᠋ᠢ ᠬᠠᠷᠠᠭᠠᠳ ᠶᠡᠬᠡᠳᠡ ᠦᠷᠦ ᠡᠪᠡᠳᠦᠭᠰᠡᠨ ᠪᠣᠯᠪᠠᠴᠤ ᠪᠡᠶᠡ ᠪᠠᠷᠢᠨ ᠵᠣᠭᠰᠣᠵᠤ᠄
— ᠪᠣᠯᠭᠣᠭᠠ᠂ ᠡᠵᠡᠨ ᠵᠠᠬᠢᠷᠤᠭᠴᠢ ᠮᠢᠨᠢ! ᠲᠠᠨ ᠤ᠋ ᠠᠬᠠ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠣᠴᠢᠨᠠ ᠭᠡᠵᠦ ᠠᠢᠯᠠᠳᠤᠭᠰᠠᠨ᠃ ᠡᠮᠦᠨᠡ ᠵᠦᠭ ᠲᠦ᠍ ᠶᠠᠪᠤᠭᠤᠯᠵᠤ ᠪᠣᠢ ᠲᠡᠢᠨ ᠢ᠋ᠶ᠋ᠡᠨ ᠡᠷᠴᠢᠲᠡᠢ ᠪᠣᠯᠭᠠᠭᠠᠳ ᠬᠣᠢᠰᠢ ᠪᠠᠨ ᠬᠥᠳᠡᠯᠦᠨᠡ ᠭᠡᠰᠡᠨ ᠭᠡᠪᠡ᠃
— ᠲᠡᠢᠨ ᠶᠠᠮᠠᠷ ᠬᠠᠮᠢᠶᠠ ᠪᠠᠢᠬᠤ ᠪᠣᠢ᠂ ᠲᠡᠭᠦᠨ ᠢ᠋ ᠪᠡᠨ ᠬᠠᠶᠠᠵᠤ ᠣᠷᠬᠢᠭᠠᠳ ᠨᠠᠭᠠᠰᠢ ᠪᠠᠨ ᠶᠠᠪᠤᠬᠤ ᠰᠠᠨᠠᠭᠠ ᠠᠬᠠ ᠳ᠋ᠤ᠌ ᠲᠥᠷᠥᠭᠰᠡᠨ ᠦᠭᠡᠢ ᠳᠡ᠃ ᠪᠢᠳᠡᠨ ᠢ᠋ ᠶᠠᠭᠠᠬᠢ ᠭᠡᠬᠦ ᠭᠡᠰᠡᠨ ᠶᠦᠮ ᠪᠣᠯ? ᠭᠡᠵᠦ ᠠᠷᠢᠬᠪᠦ᠋ᠬᠡ ᠬᠡᠯᠡᠭᠡᠳ᠂
— ᠲᠦᠰᠢᠮᠡᠯ ᠴᠢ ᠨᠠᠳᠠᠲᠠᠢ ᠳᠠᠬᠢᠨ ᠠᠭᠤᠯᠵᠠᠬᠤ ᠪᠢᠵᠡ᠃ ᠣᠳᠣ ᠪᠢᠳᠡᠨ ᠲᠡᠢ ᠬᠠᠮᠲᠤ ᠨᠤᠲᠤᠭ ᠲᠤ ᠪᠠᠨ ᠣᠴᠢ! ᠭᠡᠯᠡ᠃
ᠪᠢᠯᠢᠭᠦᠨ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠬᠤ ᠶ᠋ᠢ ᠬᠦᠰᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠤᠴᠢᠷ ᠨᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠪᠦᠰᠡᠭᠦᠢ᠂ ᠦᠵᠡᠰᠭᠦᠯᠡᠩ ᠭᠤᠸᠠ ᠮᠣᠷᠢᠨᠱᠠᠭᠠᠢ ᠨᠢ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠡᠴᠢᠭᠡ ᠡᠬᠡ᠂ ᠳᠡᠭᠦᠦ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠴᠥᠭᠡᠨ ᠮᠠᠯ ᠠᠳᠤᠭᠤᠯᠠᠨ ᠠᠮᠢᠳᠤᠷᠠᠳᠠᠭ ᠪᠢᠯᠡ᠃
ᠠᠵᠢᠭᠯᠠᠪᠠᠰᠤ ᠣᠢ ᠭᠠᠰᠢᠭᠤᠳᠠᠯ ᠳ᠋ᠤ᠌ ᠥᠷᠲᠥᠭᠰᠡᠨ ᠬᠥᠮᠦᠰ ᠳᠣᠲᠣᠷᠠ ᠲᠩᠷᠢ ᠳ᠋ᠦ᠍ ᠬᠠᠯᠢᠭᠰᠠᠨ ᠶᠡᠬᠡ ᠬᠠᠭᠠᠨ ᠤ᠋ ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠲᠡᠢ ᠠᠳᠠᠯᠢ ᠲᠡᠢᠮᠦ ᠭᠤᠨᠢᠭ ᠲᠤ᠌ ᠠᠪᠲᠠᠭᠰᠠᠨ ᠬᠥᠮᠦᠨ ᠬᠣᠪᠣᠷ ᠪᠣᠯᠪᠠ ᠤᠤ ᠭᠡᠮᠡᠷ᠂ ᠪᠠᠢᠨ ᠪᠠᠢᠨ ᠤᠷᠲᠤ ᠪᠠᠷ ᠰᠠᠨᠠᠭᠠ ᠠᠯᠲᠠᠨ᠂ ᠰᠡᠪ ᠯᠠ ᠬᠢᠪᠡᠯ ᠪᠣᠰᠴᠤ ᠲᠦᠷᠭᠡᠨ ᠲᠦᠷᠭᠡᠨ ᠠᠯᠬᠤᠭᠠᠳ᠂ ᠪᠤᠰᠤᠳ ᠢ᠋ ᠶᠠᠭᠤᠮᠠ ᠯᠠᠪᠯᠠᠬᠤ ᠳ᠋ᠤ᠌ ᠤᠷᠢᠳ ᠨᠢ ᠬᠡᠯᠡᠵᠦ ᠵᠠᠩᠰᠢᠭᠰᠠᠨ ᠶᠣᠰᠣᠭᠠᠷ《ᠴᠢ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤ》 ᠭᠡᠳᠡᠭ ᠦᠭᠡ ᠪᠡᠨ ᠬᠡᠯᠡᠵᠦ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨᠠ᠃
ᠡᠨᠡ ᠵᠠᠬᠢᠷᠤᠭᠴᠢ ᠰᠠᠢᠬᠠᠨ ᠲᠤᠩᠭᠠᠯᠠᠭ ᠴᠢᠷᠠᠢ ᠶ᠋ᠢ ᠤᠷᠤᠰᠤᠭᠰᠠᠨ ᠨᠢᠯᠪᠤᠰᠤᠨ ᠤ᠋ ᠣᠷᠣ ᠬᠠᠯᠲᠠᠷᠳᠠᠭᠤᠯᠤᠮᠠ ᠦᠵᠡᠰᠭᠦᠯᠡᠩ ᠭᠤᠸᠠ ᠪᠠᠢᠳᠠᠯ ᠢ᠋ ᠨᠢ ᠭᠬᠢᠷᠲᠦᠭᠡᠭᠰᠡᠨ ᠨᠢ ᠦᠷᠦ ᠡᠪᠡᠳᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ᠃
ᠪᠢᠯᠢᠭᠦᠨ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠢ᠋ ᠬᠠᠷᠠᠭᠠᠳ ᠬᠠᠷᠠᠮᠴᠢ ᠨᠢᠳᠦᠨ ᠡᠴᠡ ᠳᠤᠰᠤᠯ ᠤᠨᠠᠭᠠᠵᠤ᠂ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠨᠢ ᠴᠢᠩᠨᠠᠨ ᠬᠦᠯᠢᠶᠡᠵᠦ ᠪᠢᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠠᠷᠢᠬᠪᠦ᠋ᠬᠡ ᠬᠡᠳᠦᠢ ᠭᠤᠨᠢᠭ ᠲᠤ᠌ ᠳᠠᠷᠤᠭᠳᠠᠨ ᠶᠠᠪᠤᠭᠠ ᠴᠦ᠍ ᠭᠡᠰᠡᠨ ᠪᠡᠶᠡ ᠪᠡᠨ ᠪᠠᠷᠢᠬᠤ ᠲᠡᠩᠬᠡᠭᠡ ᠭᠠᠷᠭᠠᠨ᠄
— ᠴᠢ ᠴᠡᠷᠢᠭ ᠦ᠋ᠨ ᠠᠩᠭᠢ ᠨᠤᠭᠤᠳ ᠢ᠋ᠶ᠋ᠠᠷ ᠶᠠᠪᠤᠭᠠᠳ《ᠶᠠᠮᠠᠷ ᠴᠦ᠍ ᠪᠠᠢᠯᠠ ᠭᠡᠰᠡᠨ ᠡᠮᠬᠢ ᠵᠢᠷᠤᠮ ᠢ᠋ᠶ᠋ᠠᠨ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ᠃ ᠪᠢᠳᠡᠨ ᠳ᠋ᠦ᠍ ᠴᠢᠩᠭᠠ ᠲᠢᠭ ᠳᠢᠭᠯᠢᠮ ᠴᠢᠬᠤᠯᠠ》 ᠭᠡᠵᠦ ᠨᠠᠮᠠᠶ᠋ᠢ ᠬᠡᠯᠡᠭᠦᠯᠵᠦ ᠪᠠᠢᠨᠠ ᠭᠡᠮᠡᠨ ᠵᠠᠬᠢᠷᠤᠭᠴᠢ ᠨᠠᠷ ᠲᠤ᠌ ᠨᠢ ᠠᠢᠯᠠᠳᠬᠠᠭᠠᠳ ᠢᠷᠡ! ᠲᠡᠭᠡᠭᠡᠳ ᠨᠠᠳᠠᠲᠠᠢ ᠠᠭᠤᠯᠵᠠᠵᠤ᠂ ᠣᠢᠷᠠ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠭᠡᠷᠡᠢ! ᠭᠡᠮᠡᠨ ᠵᠠᠬᠢᠯᠠ᠃
ᠪᠢᠯᠢᠭᠦᠨ ᠠᠷᠢᠬᠪᠦ᠋ᠬᠡ ᠶ᠋ᠢᠨ ᠡᠨᠡ ᠵᠠᠷᠯᠢᠭ ᠢ᠋ ᠭᠦᠢᠴᠡᠯᠳᠦᠭᠦᠯᠬᠦ ᠪᠡᠷ ᠮᠣᠷᠳᠠᠪᠠ᠃
ᠬᠠᠷᠠᠬᠣᠷᠣᠮ ᠳ᠋ᠤ᠌ ᠬᠡᠳᠦᠨ ᠲᠦᠮᠡᠨ ᠴᠡᠷᠢᠭ ᠢᠷᠡᠵᠦ ᠬᠤᠷᠠᠯᠳᠤᠭᠰᠠᠨ ᠪᠠᠢᠭᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠬᠢᠲᠠᠳ ᠣᠷᠣᠨ ᠠ᠋ᠴᠠ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠠᠶᠠᠯᠠᠭᠤᠯᠤᠭᠰᠠᠨ ᠶᠡᠬᠡ ᠬᠠᠭᠠᠨ ᠤ᠋ ᠱᠠᠷᠢᠯ ᠨᠡᠢᠰᠯᠡᠯ ᠳ᠋ᠦ᠍ ᠬᠦᠷᠦᠯᠴᠡᠨ ᠢᠷᠡᠪᠡ᠃
ᠬᠠᠷᠠᠬᠣᠷᠣᠮ ᠤ᠋ᠨ ᠠᠭᠤᠳᠠᠮ ᠬᠥᠨᠳᠡᠢ ᠬᠥᠭᠰᠢᠨ ᠣᠷᠬᠣᠨ ᠳᠠᠶᠠᠭᠠᠷ ᠶᠡᠬᠡ ᠴᠡᠷᠢᠭ ᠵᠢᠭᠰᠠᠨ᠂ ᠨᠡᠢᠲᠡ ᠢᠷᠭᠡᠨ᠂ ᠭᠠᠳᠠᠭᠠᠳᠤ ᠣᠷᠣᠨ ᠨᠤᠭᠤᠳ ᠠ᠋ᠴᠠ ᠡᠨᠳᠡ ᠰᠠᠭᠤᠭᠠ ᠡᠯᠴᠢᠨ ᠰᠠᠢᠳ᠂ ᠣᠯᠠᠨ ᠰᠦᠮᠡ ᠬᠡᠢᠳ ᠦ᠋ᠨ ᠲᠡᠷᠢᠭᠦᠨ ᠪᠣᠯᠤᠨ ᠪᠤᠰᠤᠳ ᠯᠠᠮᠠ ᠬᠤᠸᠠᠷᠠᠭ ᠴᠥᠮ ᠭᠠᠰᠢᠭᠤᠳᠠᠯ ᠤ᠋ᠨ ᠬᠤᠪᠴᠠᠰᠤ ᠡᠮᠦᠰᠦᠨ ᠠᠷᠪᠠᠨ ᠳᠠᠭᠤᠨ ᠤ᠋ ᠭᠠᠵᠠᠷ ᠬᠦᠷᠴᠦ ᠱᠠᠷᠢᠯ ᠢ᠋ ᠤᠭᠲᠤᠯᠠ᠃
ᠡᠯᠴᠢᠨ ᠨᠦ᠍ᠭᠦᠳ᠂ ᠣᠷᠣᠰᠢᠭᠤᠯᠭᠠᠨ ᠳ᠋ᠤ᠌ ᠣᠷᠣᠯᠴᠠᠬᠤ ᠪᠠᠷ ᠢᠷᠡᠭᠰᠡᠨ ᠭᠠᠳᠠᠭᠠᠳᠤ ᠶ᠋ᠢᠨ ᠡᠯᠴᠢ ᠨᠠᠷ ᠤ᠋ᠨ ᠮᠣᠯᠴᠣᠭ ᠴᠢᠮᠡᠭᠲᠡᠢ ᠰᠡᠦᠬᠡ ᠲᠡᠷᠭᠡ ᠵᠠᠮ ᠢ᠋ᠶ᠋ᠠᠷ ᠪᠠᠭᠲᠠᠬᠤ ᠦᠭᠡᠢ ᠴᠢᠬᠢᠯᠳᠦᠨ᠂ ᠮᠣᠷᠢᠲᠠᠢ ᠶᠠᠪᠠᠭᠠᠨ ᠬᠥᠮᠦᠰ ᠥᠷᠭᠡᠨ ᠬᠥᠨᠳᠡᠢ᠂ ᠠᠭᠤᠯᠠ ᠳᠠᠪᠠᠭᠠ ᠶ᠋ᠢ ᠪᠦᠷᠬᠦᠭᠰᠡᠨ ᠪᠠᠢᠪᠠ᠃
ᠬᠠᠭᠠᠨ ᠤ᠋ ᠴᠣᠭᠴᠠᠰ ᠢ᠋ ᠬᠠᠯᠠᠭᠤᠨ ᠴᠠᠭ ᠪᠣᠯᠬᠣᠷ ᠮᠠᠭᠤᠳᠠᠬᠤ ᠠ᠋ᠴᠠ ᠬᠠᠮᠠᠭᠠᠯᠠᠨ ᠮᠣᠩᠭᠣᠯ ᠠᠷᠭᠠ ᠪᠠᠷ ᠽᠠᠨᠳᠠᠨᠰᠢᠭᠤᠯᠤᠨ ᠪᠢᠲᠡᠭᠦᠦ ᠵᠡᠰ ᠠᠪᠳᠠᠷᠠ ᠳ᠋ᠤ᠌ ᠬᠢᠵᠦ᠂ ᠭᠠᠳᠠᠨᠠ ᠲᠠᠯᠠ ᠪᠠᠷ ᠨᠢ ᠽᠠᠨᠳᠠᠨ ᠬᠠᠢᠷᠴᠠᠭ ᠲᠤ᠌ ᠳᠠᠪᠬᠤᠷ ᠰᠠᠭᠤᠯᠭᠠᠵᠠᠢ᠃ ᠨᠢᠭᠡᠨ ᠲᠦᠮᠡᠲᠦ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠮᠠᠭᠠᠯᠠᠭᠤᠯᠤᠭᠰᠠᠨ ᠭᠠᠰᠢᠭᠤᠳᠠᠯ ᠤ᠋ᠨ ᠶᠡᠬᠡ ᠴᠤᠪᠤᠭᠠ ᠠᠯᠭᠤᠷᠬᠠᠨ ᠶᠠᠪᠤᠭᠰᠠᠭᠠᠷ ᠤᠭ ᠱᠠᠷᠢᠯ ᠢ᠋ ᠨᠡᠢᠰᠯᠡᠯ ᠦ᠋ᠨ ᠲᠥᠪ ᠲᠡᠬᠢ ᠬᠠᠭᠠᠨ ᠤ᠋ ᠶᠡᠬᠡ ᠣᠷᠳᠣᠨ ᠳ᠋ᠤ᠌ ᠪᠠᠢᠷᠢᠯᠠᠭᠤᠯᠤᠨ ᠲᠠᠯᠪᠢᠯᠠ᠃
ᠬᠥᠬᠥᠯ᠂ ᠬᠦᠵᠢᠰ ᠦ᠋ᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠲᠡᠷᠡ ᠣᠷᠳᠣᠨ ᠳ᠋ᠤ᠌ ᠭᠠᠰᠢᠭᠤᠳᠠᠯ ᠤ᠋ᠨ ᠴᠢᠮᠡᠭᠲᠡᠢ ᠲᠤᠭ ᠬᠢᠭᠢᠷᠢ ᠡᠯᠭᠦᠭᠰᠡᠨ ᠪᠠᠢᠪᠠ᠃ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠱᠠᠰᠢᠨ ᠤ᠋ ᠯᠠᠮᠠ ᠨᠠᠷ ᠡᠳᠦᠷ ᠪᠣᠯᠭᠠᠨ ᠲᠡᠨᠳᠡ ᠢᠷᠡᠵᠦ ᠪᠤᠶᠠᠨ ᠤ᠋ ᠨᠣᠮ ᠤᠩᠰᠢᠨᠠ᠃
ᠤᠭ ᠱᠠᠷᠢᠯ ᠢ᠋ ᠬᠠᠲᠤᠳ ᠤ᠋ᠨ ᠦᠷᠭᠦᠭᠡᠨ ᠳ᠋ᠦ᠍ ᠡᠭᠡᠯᠵᠢ ᠪᠡᠷ ᠨᠢᠭᠡ ᠨᠢᠭᠡ ᠬᠣᠨᠣᠭᠤᠯᠤᠭᠰᠠᠨ ᠪᠠᠢᠨᠠ᠃ ᠢᠩᠭᠢᠵᠦ ᠶᠣᠰᠣ ᠬᠢ ᠭᠡᠵᠦ ᠬᠣᠲᠠ ᠶ᠋ᠢᠨ ᠵᠠᠬᠢᠷᠤᠭᠴᠢ ᠲᠤᠰᠢᠶᠠᠭᠰᠠᠨ ᠠᠵᠢ᠃
— ᠣᠯᠠᠨ ᠨᠣᠶᠠᠨ᠂ ᠢᠷᠭᠡᠨ ᠦ᠌ ᠬᠠᠢᠷᠠ ᠬᠦᠨᠳᠦᠳᠬᠡᠯ ᠢ᠋ ᠬᠦᠯᠢᠶᠡᠨ᠂ ᠲᠡᠷᠰᠡᠭᠦᠳ ᠡᠲᠡᠭᠡᠳ ᠢ᠋ ᠨᠣᠮᠣᠬᠠᠳᠬᠠᠨ ᠳᠠᠷᠤᠬᠤ ᠶ᠋ᠢᠨ ᠲᠥᠯᠥᠭᠡ ᠲᠤᠯᠤᠯᠳᠤᠵᠤ ᠶᠠᠪᠤᠭᠰᠠᠨ ᠡᠨᠡ ᠬᠠᠭᠠᠨ ᠤ᠋ ᠰᠦᠨᠡᠰᠦ ᠬᠣᠢᠲᠤ ᠨᠠᠰᠤᠨ ᠳ᠋ᠤ᠌ ᠪᠠᠨ ᠰᠠᠨᠰᠠᠷ ᠤ᠋ᠨ ᠬᠢᠵᠠᠭᠠᠷ ᠦᠭᠡᠢ ᠳ᠋ᠦ᠍ ᠪᠠᠢᠳᠠᠭ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠣᠴᠢᠵᠤ ᠰᠠᠢᠨ ᠲᠥᠷᠥᠯ ᠳ᠋ᠦ᠍ ᠲᠥᠷᠥᠨᠡ ᠭᠡᠵᠦ ᠯᠠᠮᠠ ᠨᠠᠷ ᠠᠢᠯᠠᠳᠤᠯᠠ ᠬᠡᠮᠡᠭᠰᠡᠨ ᠦᠭᠡ ᠣᠯᠠᠨ ᠤ᠋ ᠳᠤᠮᠳᠠ ᠲᠠᠷᠬᠠᠵᠠᠢ᠃
ᠰᠠᠯᠬᠤ ᠶᠣᠰᠣ ᠦᠢᠯᠡᠳᠦᠭᠰᠡᠭᠡᠷ ᠪᠠᠢᠪᠠ᠃
ᠬᠠᠭᠠᠨ ᠤ᠋ ᠪᠦᠬᠦ ᠠᠬᠠ ᠳᠡᠭᠦᠦ ᠳᠣᠲᠣᠷᠠ ᠠ᠋ᠴᠠ ᠭᠠᠭᠴᠠᠬᠠᠨ ᠬᠤᠪᠢᠯᠠᠢ ᠢᠷᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠱᠠᠷᠢᠯ ᠣᠷᠳᠣᠨ ᠳ᠋ᠤ᠌ ᠵᠠᠯᠠᠭᠳᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠠᠪᠤᠨ ᠬᠣᠨᠣᠭ ᠳᠡᠭᠡᠷᠡ ᠪᠡᠨ ᠵᠠᠭᠤᠨ ᠴᠡᠷᠢᠭ ᠢ᠋ᠶ᠋ᠡᠷ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠭᠤᠯᠤᠨ᠂ ᠴᠠᠭᠠᠨ ᠵᠠᠩᠵᠤᠨ ᠢ᠋ ᠳᠠᠭᠠᠭᠤᠯᠤᠨ ᠢᠷᠡᠯᠡ᠃
ᠲᠡᠭᠦᠨ ᠢ᠋ ᠬᠣᠶᠠᠷ ᠳᠡᠭᠦᠦ ᠨᠢ ᠤᠭᠲᠤᠨ ᠠᠭᠤᠯᠵᠠᠪᠠ᠃ ᠲᠡᠳᠡ ᠪᠡᠶᠡ ᠪᠡᠶᠡ ᠪᠡᠨ ᠲᠡᠪᠡᠷᠢᠨ ᠠᠪᠴᠤ ᠬᠠᠴᠠᠷ ᠨᠡᠢᠯᠡᠭᠦᠯᠦᠨ ᠵᠣᠭᠰᠣᠬᠤ ᠳ᠋ᠤ᠌ ᠠᠷᠢᠭᠪᠦ᠋ᠬᠡ ᠯᠡ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠤᠨ ᠰᠡᠳᠬᠢᠯ ᠦ᠋ᠨ ᠰᠢᠨᠠᠯᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠨ ᠪᠠᠢᠪᠠ᠃
ᠬᠤᠪᠢᠯᠠᠢ ᠣᠨᠢᠭᠠᠷ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ᠂ ᠳᠠᠭᠤ ᠱᠣᠣ ᠴᠤᠤ ᠦᠭᠡᠢ ᠢᠷᠪᠠᠢᠨ ᠵᠣᠭᠰᠣᠬᠤ ᠨᠢ ᠦᠯᠦ ᠲᠠᠭᠠᠭᠳᠠᠬᠤ ᠣᠨᠢᠰᠣᠭᠠ ᠠᠳᠠᠯᠢ ᠨᠢᠭᠡᠨ ᠵᠦᠢᠯ ᠳᠣᠲᠣᠷᠠ ᠪᠠᠨ ᠬᠠᠳᠠᠭᠠᠯᠠᠵᠤ ᠪᠣᠳᠣᠭᠰᠠᠨ ᠰᠢᠨᠵᠢᠲᠡᠢ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ ᠨᠢ ᠳᠠᠭᠠᠵᠤ ᠣᠯᠬᠤ ᠭᠡᠵᠦ ᠪᠣᠳᠣᠬᠤ ᠵᠠᠪᠲᠠᠢ ᠬᠥᠮᠦᠨ ᠬᠡᠨ ᠪᠠᠢᠬᠤ ᠪᠣᠢ᠃
ᠬᠤᠪᠢᠯᠠᠢ ᠤᠭ ᠤ᠋ᠨ ᠳᠠᠭᠤᠨ ᠴᠥᠭᠡᠨ ᠲᠡᠢ᠂ ᠲᠡᠭᠦᠨ ᠳᠡᠭᠡᠷᠡ ᠪᠡᠨ ᠡᠦᠲᠦ ᠲᠡᠷᠡ ᠳᠠᠯᠳᠠ ᠪᠣᠳᠣᠯ ᠳ᠋ᠤ᠌ ᠪᠠᠨ ᠠᠪᠲᠠᠨ ᠪᠦᠷ ᠴᠦ᠍ ᠳᠠᠭᠤ ᠪᠠᠨ ᠬᠤᠷᠢᠶᠠᠭᠰᠠᠨ ᠪᠠᠢᠪᠠ᠃
ᠠᠷᠢᠬᠪᠦ᠋ᠬᠡ ᠠᠬᠠ ᠳ᠋ᠤ᠌ ᠪᠠᠨ ᠬᠠᠨᠳᠤᠵᠤ᠄
— ᠲᠠ ᠵᠢᠭᠠᠬᠠᠨ ᠲᠦᠷᠦᠭᠦᠬᠡᠨ ᠢᠷᠡᠬᠦ ᠶ᠋ᠢ ᠪᠣᠳᠣᠬᠤ ᠦᠭᠡᠢ ᠶᠠᠭᠠᠬᠢᠪᠠ ᠳᠠ᠃ ᠪᠢᠳᠡ ᠴᠢᠨᠢ ᠲᠤᠯᠭᠠᠮᠳᠠᠭᠠᠳ ᠲᠠᠨ ᠤ᠋ ᠠᠮᠠ ᠶ᠋ᠢ ᠬᠠᠷᠠᠮᠠᠷ ᠵᠦᠢᠯ ᠪᠢᠰᠢᠭᠦᠢ ᠭᠠᠷᠬᠤ ᠶᠤᠮ᠃ ᠡᠵᠢ ᠶ᠋ᠢᠨ ᠪᠡᠶᠡ ᠪᠠᠰᠠ ᠮᠠᠭᠤᠳᠠᠭᠰᠠᠨ ᠰᠢᠦ ᠭᠡᠵᠦ ᠬᠡᠯᠡᠪᠡᠯ᠂
ᠬᠤᠪᠢᠯᠠᠢ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠵᠦ᠂ ᠳᠣᠣᠷᠠ ᠪᠠᠨ ᠬᠣᠯᠬᠢᠭᠠᠳ᠄
— ᠪᠢ ᠠᠬᠠ ᠬᠠᠭᠠᠨ ᠤ᠋ ᠨᠡᠷᠡ ᠪᠡᠷ ᠶᠠᠪᠤᠭᠠ ᠪᠣᠯᠬᠣᠷ ᠰᠥᠩ ᠤᠯᠤᠰ ᠲᠠᠢ ᠬᠢᠵᠦ ᠪᠣᠢ ᠲᠡᠢᠨ ᠢ᠋ ᠵᠦᠭᠡᠷ ᠣᠷᠬᠢᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠯᠠ᠃ ᠪᠠᠰᠠ ᠪᠥᠭᠰᠡ ᠥᠨᠳᠡᠢᠬᠦ ᠪᠡᠷ ᠬᠢᠲᠠᠳ ᠤ᠋ᠳ᠂ ᠬᠠᠷᠠ ᠬᠢᠲᠠᠳ ᠤ᠋ᠳ ᠶᠠᠭᠠᠬᠢᠬᠤ ᠪᠣᠯ ᠭᠡᠵᠦ ᠪᠣᠳᠣᠭᠳᠠᠭᠠᠳ ᠨᠠᠯᠢᠶᠠᠨ ᠤᠳᠠᠯᠠ᠃ ᠲᠠ ᠨᠠᠷ ᠢ᠋ ᠨᠠᠳᠠ ᠪᠠᠷ ᠶᠠᠭᠤᠨ ᠳᠤᠲᠠᠪᠠ ᠭᠡᠵᠢ ᠳᠡ ᠭᠡᠮᠡᠨ ᠰᠠᠨᠠᠭᠰᠠᠨ ᠭᠡᠵᠦ ᠬᠡᠯᠡᠪᠡ᠃
ᠬᠤᠪᠢᠯᠠᠢ ᠶ᠋ᠢᠨ ᠠᠮᠠᠨ ᠠ᠋ᠴᠠ ᠰᠡᠪ ᠯᠠ ᠬᠢᠪᠡᠯ ᠬᠢᠲᠠᠳ ᠭᠡᠳᠡᠭ ᠦᠭᠡ ᠴᠤᠪᠤᠷᠠᠨᠠ᠃ ᠠᠷᠭᠠ ᠴᠦ᠍ ᠦᠭᠡᠢ ᠶᠦᠮ ᠪᠣᠯᠪᠠ᠃ ᠨᠢᠭᠡᠨᠲᠡᠭᠦᠷ ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠬᠢᠲᠠᠳ ᠣᠷᠣᠨ ᠢ᠋ ᠵᠠᠬᠢᠷᠤᠨ ᠲᠦᠪᠰᠢᠳᠬᠡᠬᠦ ᠡᠭᠦᠷᠭᠡ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠦᠭᠭᠦᠭᠰᠡᠨ ᠪᠣᠯᠬᠣᠷ᠂ ᠲᠡᠭᠦᠨ ᠢ᠋ ᠪᠡᠨ ᠭᠡᠯ ᠦᠭᠡᠢ ᠴᠣ ᠶᠠᠭᠠᠬᠢᠬᠤ ᠪᠣᠢ᠃
ᠨᠡᠢᠰᠯᠡᠯ ᠬᠠᠷᠠ ᠬᠣᠷᠣᠮ ᠪᠣᠯᠤᠨ ᠮᠣᠩᠭᠣᠯ ᠣᠷᠣᠨ ᠢ᠋ᠶ᠋ᠠᠨ ᠡᠵᠡᠩᠨᠡᠨ ᠵᠠᠬᠢᠷᠴᠤ ᠪᠠᠢᠬᠤ ᠡᠭᠦᠷᠭᠡ ᠶ᠋ᠢ ᠶᠡᠬᠡ ᠬᠠᠭᠠᠨ ᠠ᠋ᠴᠠ ᠬᠦᠯᠢᠶᠡᠭᠰᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠣᠯᠵᠤ ᠪᠠᠢᠭᠠ ᠬᠡᠷᠡᠭ ᠢ᠋ ᠮᠡᠳᠡᠨ ᠰᠢᠢᠳᠬᠡᠵᠦ ᠶᠠᠪᠤᠭᠤᠯᠬᠤ᠂ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠬᠣᠯᠪᠣᠭᠳᠠᠯᠲᠠᠢ ᠪᠣᠯᠤᠨ ᠪᠤᠰᠤᠳ ᠬᠡᠷᠡᠭ ᠢ᠋ᠶ᠋ᠡᠨ ᠠᠷᠢᠬᠪᠦ᠋ᠬᠡ ᠥᠪᠡᠷ ᠦ᠋ᠨ ᠰᠢᠢᠳᠪᠦᠷᠢ ᠪᠡᠷ ᠶᠠᠪᠤᠭᠤᠯᠵᠤ ᠪᠠᠢᠯᠠ᠃
ᠲᠡᠭᠦᠨ ᠳ᠋ᠦ᠍ ᠨᠢ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠲᠡᠢᠮᠦ ᠴᠦ᠍ ᠶᠡᠬᠡ ᠳᠤᠷᠠᠲᠠᠢ ᠪᠢᠰᠢ ᠪᠣᠯᠪᠠ ᠤᠤ ᠭᠡᠮᠡᠷ᠂ ᠳᠠᠭᠤ ᠱᠣᠣ ᠪᠠᠨ ᠤᠯᠠᠮ ᠬᠤᠷᠢᠶᠠᠭᠰᠠᠭᠠᠷ᠂ ᠵᠠᠷᠢᠮ ᠨᠢᠭᠡ ᠵᠦᠢᠯ ᠢ᠋ ᠠᠰᠠᠭᠤᠬᠤ ᠭᠡᠬᠦ ᠳ᠋ᠦ᠍᠄
— ᠥᠪᠡᠷ ᠢ᠋ᠶ᠋ᠡᠨ ᠯᠡ ᠮᠡᠳᠡᠬᠦ ᠦᠭᠡᠢ ᠤᠤ ᠭᠡᠵᠦ ᠤᠴᠠᠭᠠᠷᠳᠠᠭᠠᠳ ᠳᠤᠤᠭᠠᠷᠤᠨᠠ᠃
ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠡᠨᠡ ᠪᠠᠢᠳᠠᠯ ᠢ᠋ ᠠᠷᠢᠬᠪᠦ᠋ᠬᠡ ᠠᠵᠢᠭᠠᠳ 《ᠭᠠᠰᠢᠭᠤᠳᠠᠯ ᠳ᠋ᠤ᠌ ᠠᠪᠲᠠᠭᠠᠳ᠂ ᠰᠡᠳᠬᠢᠯ ᠨᠢ ᠡᠪ ᠦᠭᠡᠢ ᠪᠠᠢᠭᠠ ᠶᠤᠮ ᠪᠣᠯᠪᠠ ᠤᠤ?》 ᠭᠡᠮᠡᠨ ᠴᠠᠢᠯᠭᠠᠨ ᠪᠣᠳᠣᠵᠤ ᠪᠠᠢᠪᠠ᠃
ᠪᠠᠰᠠ ᠬᠤᠪᠢᠯᠠᠢ ᠨᠢ ᠮᠥᠩᠬᠡ ᠠᠬᠠ ᠶ᠋ᠢ ᠣᠷᠣ ᠰᠠᠭᠤᠯᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠨᠣᠶᠠᠨ ᠤ᠋ ᠰᠠᠨᠠᠯ ᠢ᠋ᠶ᠋ᠠᠷ ᠶᠡᠬᠡ ᠬᠤᠷᠠᠯᠳᠠᠢ ᠶ᠋ᠢ ᠳᠠᠷᠤᠭᠠᠯᠠᠨ ᠲᠡᠷᠢᠭᠦᠯᠡᠵᠦ ᠪᠠᠢᠭᠰᠠᠨ᠂ ᠵᠠᠯᠠᠭᠤ ᠠ᠋ᠴᠠ ᠪᠠᠨ ᠡᠷᠳᠡᠮ ᠤᠬᠠᠭᠠᠨ ᠢ᠋ᠶ᠋ᠠᠷ ᠶᠠᠭ ᠦᠭᠡᠢ ᠭᠡᠵᠦ ᠨᠡᠷᠡ ᠳ᠋ᠦ᠍ ᠭᠠᠷᠴᠤ ᠢᠷᠡᠭᠰᠡᠨ ᠪᠣᠯᠬᠣᠷ ᠶᠡᠬᠡᠮᠰᠦᠭᠳᠡᠭᠦᠦ ᠪᠠᠢᠬᠤ ᠨᠢ ᠵᠦᠢ ᠴᠦ᠍ ᠪᠣᠯᠪᠠ ᠤᠤ ᠭᠡᠵᠦ ᠳᠡᠭᠦᠦ ᠨᠠᠷ ᠨᠢ ᠰᠠᠨᠠᠵᠤ ᠪᠠᠢᠯᠠ᠃
ᠨᠥᠭᠦᠭᠡ ᠲᠠᠯᠠ ᠪᠠᠷ ᠲᠤᠯᠤᠢ ᠵᠠᠩᠵᠤᠨ ᠤ᠋ ᠬᠦᠦ ᠨᠦ᠍ᠭᠦᠳ ᠦ᠋ᠨ ᠳᠣᠲᠣᠷᠠ ᠡᠦᠲᠦ ᠬᠠᠮᠤᠭ ᠤ᠋ᠨ ᠠᠬᠠ ᠨᠢ ᠬᠤᠪᠢᠯᠠᠢ ᠪᠣᠯᠵᠤ ᠦᠯᠡᠳᠡᠵᠡᠢ᠃
ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠨᠢ ᠬᠠᠷᠷᠠᠬᠣᠷᠣᠮ ᠢ᠋ ᠬᠠᠭᠠᠨ ᠠᠬᠠ ᠶ᠋ᠢᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠵᠠᠬᠢᠷᠴᠤ ᠪᠠᠢᠬᠤ ᠳ᠋ᠤ᠌ ᠪᠠᠨ ᠨᠡᠢᠰᠯᠡᠯ ᠡᠴᠡ ᠲᠡᠳᠦᠢᠯᠡ ᠬᠣᠯᠠ ᠦᠭᠡᠢ ᠵᠠᠢᠲᠠᠢ ᠠᠯᠲᠠᠨ ᠭᠣᠷᠣᠬᠠ③ ᠭᠡᠳᠡᠭ ᠭᠠᠵᠠᠷ ᠤᠷᠲᠤ ᠪᠠᠢᠭᠤᠯᠤᠨ ᠡᠬᠡ ᠰᠤᠷᠬᠤᠭᠳᠠᠨᠢ ᠪᠡᠬᠢ ᠶ᠋ᠢᠨ ᠬᠠᠮᠲᠤ ᠬᠡᠰᠡᠭ ᠵᠠᠭᠤᠷᠠ ᠰᠠᠭᠤᠨ᠂ ᠪᠠᠢᠨ ᠪᠠᠢᠨ ᠨᠡᠢᠰᠯᠡᠯ ᠳ᠋ᠦ᠍ ᠢᠷᠡᠵᠦ ᠬᠡᠷᠡᠭ ᠢ᠋ᠶ᠋ᠡᠨ ᠶᠠᠪᠤᠭᠤᠯᠤᠨ ᠪᠠᠢᠵᠠᠢ᠃
ᠲᠡᠭᠡᠵᠦ ᠪᠠᠢᠬᠤ ᠦᠶᠡ ᠳ᠋ᠦ᠍ ᠪᠡᠨ ᠬᠡᠰᠡᠭ ᠪᠦᠰᠡᠭᠦᠢ ᠶ᠋ᠢ ᠲᠡᠨᠳᠡ ᠪᠡᠨ ᠠᠪᠠᠴᠢᠨ ᠥᠪᠡᠷ ᠲᠦ᠍ ᠪᠡᠨ ᠪᠣᠯᠤᠨ ᠡᠬᠡ᠂ ᠡᠬᠡᠨᠡᠷ ᠬᠡᠦᠬᠡᠳ ᠲᠦ᠍ ᠪᠡᠨ ᠦᠢᠯᠡᠴᠢᠯᠡᠭᠦᠯᠵᠦ ᠪᠠᠢᠭᠰᠠᠨ ᠤ᠋ ᠳᠣᠲᠣᠷᠠ ᠪᠠᠭᠠ ᠳᠠᠭᠠᠭᠠᠮᠠᠯ ᠪᠢᠯᠢᠭᠦᠨ ᠦ᠌ ᠰᠡᠳᠬᠢᠯᠲᠦ ᠬᠡᠦᠬᠡᠨ ᠮᠤᠷᠢᠨᠱᠠᠭᠠᠢ ᠪᠠᠢᠵᠠᠢ᠃ ᠡᠨᠡ ᠪᠦᠰᠡᠭᠦᠢ ᠤᠢᠯᠠᠨ ᠳ᠋ᠤ᠌ ᠤᠷᠠᠨ᠂ ᠬᠣᠭᠣᠯᠠ ᠤᠮᠳᠠ ᠬᠢᠬᠦ ᠳ᠋ᠦ᠍ ᠪᠡᠨ ᠶᠠᠮᠠᠷ ᠴᠦ᠍ ᠲᠣᠭᠣᠭᠠᠴᠢ ᠠ᠋ᠴᠠ ᠡᠰᠡ ᠳᠤᠲᠠᠳᠠᠭ ᠤᠴᠢᠷ ᠰᠤᠷᠬᠤᠭᠳᠠᠨᠢ ᠬᠠᠲᠤᠨ ᠡᠬᠡ ᠳ᠋ᠦ᠍ ᠪᠣᠯᠤᠨ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠠᠲᠤᠨ ᠳ᠋ᠤ᠌ ᠲᠣᠭᠣᠭᠳᠠᠭᠰᠠᠨ ᠪᠠᠢᠯᠠ᠃ ᠤᠷᠲᠤ ᠱᠠᠩᠬᠤᠨ ᠭᠡᠵᠢᠭᠡᠲᠡᠢ᠂ ᠨᠢᠭᠤᠷ ᠲᠤ᠌ ᠪᠠᠨ ᠣᠪᠣ ᠲᠣᠪᠣᠬᠠᠨ ᠰᠡᠪᠬᠡᠲᠡᠢ᠂ ᠠᠭᠠᠰᠢ ᠵᠠᠩ ᠨᠢ ᠪᠤᠯᠠᠭᠠ ᠬᠠᠯᠢᠭᠤ ᠪᠣᠯᠤᠭᠰᠠᠨ ᠡᠨᠡ ᠬᠤᠨᠳᠠᠭᠠᠴᠢᠨ ᠪᠦᠰᠡᠭᠦᠢ ᠠᠯᠢᠪᠠ ᠳ᠋ᠤ᠌ ᠣᠪᠯᠢᠭ᠂ ᠤᠬᠠᠭᠠᠨ ᠰᠠᠷᠠᠭᠤᠯ᠂ ᠪᠡᠶᠡ ᠪᠢᠯᠳᠠᠷ ᠭᠤᠸᠠ ᠦᠵᠡᠰᠬᠦᠯᠡᠩᠲᠡᠢ ᠤᠴᠢᠷ ᠬᠠᠷᠠᠭᠰᠠᠨ᠂ ᠬᠠᠪᠢᠳᠠᠭᠰᠠᠨ ᠨᠣᠶᠠᠳ ᠳᠠᠭᠠᠭᠠᠮᠠᠯ ᠤ᠋ᠳ ᠲᠡᠭᠦᠨ ᠳ᠋ᠦ᠍ ᠲᠠᠯᠠ ᠥᠭᠬᠦ ᠶᠠᠩᠵᠤ ᠦᠵᠡᠭᠦᠯᠳᠡᠭ ᠪᠣᠯᠪᠠᠴᠤ ᠠᠷᠢᠬᠪᠦ᠋ᠬᠡ ᠲᠡᠢᠮᠦ ᠵᠠᠩ ᠭᠠᠷᠭᠠᠳᠠᠭ ᠦᠭᠡᠢ᠂ ᠲᠡᠭᠡᠵᠦ ᠱᠠᠯᠢᠭᠯᠠᠨ ᠶᠠᠪᠤᠬᠤ ᠵᠠᠪ ᠴᠢᠯᠥᠭᠡ ᠴᠦ᠍ ᠮᠠᠭᠤᠲᠠᠢ᠂ ᠴᠠᠭ ᠦᠷᠭᠦᠯᠵᠢᠳᠡ ᠮᠣᠷᠢᠨ ᠤ᠋ ᠰᠠᠢᠬᠠᠨ ᠢ᠋ ᠤᠨᠤᠭᠠᠳ᠂ ᠬᠡᠳᠦᠨ ᠬᠢᠶᠡ ᠳᠠᠭᠠᠭᠤᠯᠤᠨ ᠠᠯᠪᠠᠨ ᠬᠡᠷᠡᠭ ᠢ᠋ᠶ᠋ᠡᠨ ᠬᠥᠭᠡᠭᠡᠴᠡᠯᠳᠦᠨ ᠶᠠᠪᠤᠳᠠᠭ ᠪᠢᠯᠡ᠃
ᠪᠠᠢᠳᠠᠯ ᠡᠢᠮᠦ ᠡᠴᠡ ᠪᠢᠯᠢᠭᠦᠨ ᠲᠦᠰᠢᠮᠡᠯ ᠥᠪᠡᠷ ᠦ᠋ᠨ ᠬᠠᠢᠷᠠᠲᠤ ᠬᠥᠮᠦᠨ ᠢ᠋ᠶ᠋ᠡᠷ ᠳᠠᠮᠵᠢᠭᠤᠯᠤᠨ ᠬᠠᠭᠠᠨ ᠤ᠋ ᠳᠡᠭᠦᠦ᠂ ᠡᠬᠡ ᠬᠣᠶᠠᠷ ᠤ᠋ᠨ ᠲᠥᠷᠬᠦ ᠪᠠᠢᠳᠠᠯ ᠢ᠋ ᠵᠡᠬᠡᠭᠰᠡᠨ ᠭᠠᠳᠠᠷᠯᠠᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠡᠵᠡᠨ ᠦ᠌ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠷᠭᠡᠳᠡ ᠶ᠋ᠢᠨ ᠰᠢᠳᠠᠷ ᠲᠦᠰᠢᠮᠡᠯ ᠦ᠋ᠨ ᠠᠯᠪᠠ ᠪᠠᠷ ᠲᠡᠢᠰᠢ ᠪᠡᠨ ᠣᠴᠢᠭᠰᠠᠨ ᠨᠢᠭᠡ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠯᠠ᠃
ᠠᠷᠢᠬᠪᠦ᠋ᠬᠡ ᠪᠣᠯ ᠱᠠᠯᠢᠭ ᠰᠠᠮᠠᠭᠤᠨ ᠵᠠᠩ ᠦᠭᠡᠢ᠂ ᠡᠷᠡᠰ ᠰᠢᠯᠤᠭᠤᠬᠠᠨ ᠵᠠᠩᠲᠠᠢ ᠡᠷᠡ ᠪᠢᠯᠡ᠃ ᠪᠢᠯᠳᠠᠯᠢᠭ ᠰᠠᠢᠬᠠᠨ ᠪᠡᠶᠡᠲᠡᠢ᠂ ᠬᠥᠷᠥᠰᠥᠯᠢᠭ ᠪᠤᠷᠤᠪᠳᠤᠷᠬᠠᠨ ᠴᠢᠷᠠᠢ ᠳ᠋ᠤ᠌ ᠪᠠᠨ ᠴᠠᠭ ᠦᠷᠭᠦᠯᠵᠢᠳᠡ ᠲᠥᠯᠥᠪ ᠪᠠᠢᠳᠠᠯ ᠳᠤᠰᠬᠠᠨ᠂ ᠶᠡᠬᠡ ᠪᠠᠭᠠ ᠭᠡᠬᠦ ᠦᠭᠡᠢ ᠪᠡᠷ ᠪᠤᠰᠤᠳ ᠤ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠭᠡᠵᠦ ᠴᠢᠷᠮᠠᠢᠨ ᠶᠠᠪᠤᠳᠠᠭ ᠡᠨᠡ ᠵᠠᠬᠢᠷᠤᠭᠴᠢ ᠶᠠᠮᠠᠷ ᠴᠦ᠍ ᠵᠠᠪ ᠦᠭᠡᠢ ᠪᠠᠢᠭᠰᠠᠨ ᠡᠳᠦᠷ ᠪᠣᠯᠭᠠᠨ ᠮᠣᠷᠢᠨ ᠳ᠋ᠤ᠌ ᠮᠣᠷᠳᠠᠨ ᠳᠠᠪᠬᠢᠭᠠᠳ ᠨᠤᠮᠤ ᠪᠠᠷᠢᠵᠤ ᠰᠤᠮᠤ ᠬᠠᠷᠪᠤᠬᠤ᠂ ᠢᠯᠳᠦ ᠡᠷᠭᠢᠭᠦᠯᠬᠦ᠂ ᠮᠣᠷᠢᠨ ᠳ᠋ᠤ᠌ ᠪᠠᠨ ᠦᠰᠦᠷᠴᠦ ᠮᠣᠷᠳᠠᠬᠤ ᠵᠡᠷᠭᠡ ᠪᠡᠷ ᠳᠠᠢᠳᠤᠬᠤ ᠰᠤᠷᠭᠠᠭᠤᠯᠢ ᠵᠠᠪᠠᠯ ᠬᠢᠳᠡᠭ ᠵᠠᠩᠲᠠᠢ ᠨᠢ ᠪᠤᠰᠤᠳ ᠬᠥᠮᠦᠰ ᠡᠴᠡ ᠣᠨᠴᠠᠭᠠᠢ ᠪᠢᠯᠡ᠃
ᠡᠢᠮᠦ ᠡᠷᠡ ᠡᠵᠡᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠮᠣᠩᠭᠣᠯ ᠨᠤᠲᠤᠭ ᠢ᠋ᠶ᠋ᠠᠨ ᠵᠠᠬᠢᠷᠤᠭᠰᠠᠭᠠᠷ ᠪᠦᠲᠦᠨ ᠬᠣᠶᠠᠷ ᠵᠢᠯ ᠰᠠᠭᠤᠵᠤ᠂ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠪᠦᠬᠦ ᠠᠯᠪᠠ ᠶ᠋ᠢ ᠳᠣᠭᠣᠯᠳᠠᠭᠤᠯᠤᠯ ᠦᠭᠡᠢ ᠵᠠᠯᠭᠠᠭᠤᠯᠤᠭᠰᠠᠭᠠᠷ ᠪᠠᠢᠪᠠ᠃
ᠠᠷᠢᠬᠪᠦ᠋ᠬᠡ ᠥᠪᠡᠷ ᠦ᠋ᠨ ᠠᠬᠠ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠬᠠᠨ ᠤ᠋ ᠳᠡᠷᠭᠡᠳᠡᠬᠢ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠠᠯᠪᠠ ᠪᠠᠨ ᠶᠠᠪᠤᠭᠤᠯᠳᠠᠭ ᠦᠷᠭᠦᠭᠡᠨ ᠳ᠋ᠦ᠍ ᠤᠷᠢᠨ ᠠᠭᠤᠯᠵᠠᠵᠤ᠂ ᠭᠠᠰᠢᠭᠤᠳᠠᠯ ᠲᠠᠢ ᠪᠠᠢᠭᠠ ᠴᠦ᠍ ᠭᠡᠰᠡᠨ ᠮᠣᠩᠭᠣᠯ ᠶᠣᠰᠣ ᠪᠠᠷ ᠢ᠋ᠶ᠋ᠠᠨ ᠵᠣᠭᠣᠭ ᠪᠠᠷᠢᠵᠤ᠂ ᠵᠣᠪᠠᠯᠠᠩ ᠵᠢᠷᠭᠠᠯ᠂ ᠤᠯᠤᠰ ᠭᠦᠷᠦᠨ ᠦ᠌ ᠡᠮᠦᠨᠡ ᠲᠤᠯᠭᠠᠷᠠᠵᠤ ᠪᠠᠢᠭᠠ ᠬᠡᠷᠡᠭ ᠦ᠋ᠳ ᠢ᠋ ᠵᠥᠪᠯᠡᠯᠳᠦᠨ ᠶᠠᠷᠢᠯᠴᠠᠭᠰᠠᠭᠠᠷ ᠰᠢᠢᠳᠪᠡ᠃
ᠠᠯᠤᠰ ᠢᠷᠡᠨ ᠣᠷᠣᠨ ᠠ᠋ᠴᠠ ᠬᠥᠯᠡᠬᠦ ᠬᠠᠨ ᠢᠷᠡᠭᠰᠡᠨ ᠪᠠᠢᠯᠠ᠃
ᠲᠡᠳᠡ ᠮᠣᠩᠭᠣᠯ ᠥᠳᠬᠡᠨ ᠰᠢᠷᠠ ᠴᠠᠢ ᠪᠠᠨ ᠤᠤᠭᠤᠵᠤ᠂ ᠬᠣᠨᠢᠨ ᠤ᠋ ᠲᠠᠷᠭᠤᠨ ᠮᠢᠬᠠ ᠨᠢᠮᠭᠡᠨ ᠵᠦᠰᠦᠵᠦ ᠡᠮᠬᠦᠭᠡᠳ᠂ ᠲᠣᠮᠣ ᠬᠤᠯᠤ ᠳᠦᠭᠦᠷᠡᠩ ᠠᠢᠷᠠᠭ ᠵᠠᠯᠭᠢᠯᠠᠨ ᠰᠠᠭᠤᠭᠠᠳ᠂ ᠡᠳᠦᠭᠡ ᠪᠠ ᠬᠣᠢᠴᠢ ᠶ᠋ᠢ ᠶᠠᠷᠢᠯᠴᠠᠵᠤ ᠡᠬᠢᠯᠡᠪᠡ᠃
ᠲᠡᠨᠳᠡ ᠣᠯᠠᠨ ᠴᠦ᠍ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠂ ᠠᠬᠠ ᠳᠡᠭᠦᠦ ᠳᠥᠷᠪᠡ ᠯᠡ ᠨᠢᠭᠤᠷ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠷᠠᠨ ᠰᠠᠭᠤᠵᠤ ᠪᠠᠢᠪᠠ᠃
ᠠᠷᠢᠬᠪᠦ᠋ᠬᠡ ᠬᠠᠮᠤᠭ ᠶᠠᠷᠢᠬᠤ ᠵᠦᠢᠯ ᠢ᠋ ᠰᠡᠳᠦᠵᠦ ᠡᠬᠢᠯᠡᠯᠡ᠃
ᠬᠤᠪᠢᠯᠠᠢ ᠶᠡᠬᠡᠮᠰᠦᠭᠳᠡᠭᠦᠦ ᠠᠭᠠᠳ᠂ ᠪᠢ ᠠᠬᠠ ᠨᠢ ᠤᠴᠢᠷ ᠠ᠋ᠴᠠ ᠪᠦᠬᠦᠨ ᠢ᠋ ᠮᠡᠳᠡᠬᠦ ᠶᠣᠰᠣᠲᠠᠢ ᠭᠡᠰᠡᠨ ᠴᠢᠷᠠᠢ ᠭᠠᠷᠭᠠᠨ᠂ ᠰᠢᠷᠪᠡᠭᠡ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠦᠭᠰᠡᠭᠡᠷ᠂ ᠵᠥᠪᠬᠡᠨ ᠠᠰᠠᠭᠤᠭᠰᠠᠨ ᠵᠦᠢᠯ ᠢ᠋ ᠳᠤᠷᠠᠮᠵᠢᠬᠠᠨ ᠶᠠᠩᠵᠤ ᠪᠠᠷ ᠬᠠᠷᠢᠭᠤᠯᠤᠨᠠ᠃
ᠤᠭ ᠨᠢ ᠭᠦᠷᠦᠨ ᠮᠠᠨᠢ ᠡᠮᠬᠢᠷᠡᠵᠦ᠂ ᠡᠦᠲᠦ ᠯᠡ ᠬᠠᠮᠤᠭ ᠬᠡᠷᠡᠭ ᠦᠢᠯᠡ ᠡᠵᠡᠨ ᠪᠣᠭᠳᠠ ᠡᠪᠦᠭᠡ ᠶ᠋ᠢᠨ ᠵᠢᠭᠠᠵᠤ ᠲᠣᠭᠲᠠᠭᠠᠭᠰᠠᠨ 《ᠶᠡᠬᠡ ᠵᠠᠰᠠᠭ》 ᠬᠠᠤᠯᠢ ᠶ᠋ᠢᠨ ᠶᠣᠰᠣᠭᠠᠷ ᠶᠠᠪᠤᠵᠤ᠂ ᠲᠡᠭᠦᠨ ᠦ᠌ ᠡᠬᠢᠯᠡᠯ ᠢ᠋ ᠠᠬᠠ ᠮᠠᠨᠢ ᠲᠣᠭᠲᠠᠭᠠᠭᠠᠳ ᠶᠠᠭᠤᠮᠠ ᠶᠠᠭᠤᠮᠠ ᠶᠡᠬᠡ ᠬᠥᠭᠵᠢᠨ ᠪᠡᠬᠢᠵᠢᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠡᠨ ᠣᠷᠣᠬᠤ ᠪᠠᠷ ᠲᠠᠭᠠᠯᠠᠯ ᠲᠡᠭᠦᠰᠴᠦ ᠣᠷᠬᠢᠯᠠ᠃ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠪᠢᠳᠡ ᠬᠠᠮᠤᠭ ᠬᠡᠷᠡᠭ ᠢ᠋ ᠪᠠᠯᠠᠯᠵᠤ ᠣᠷᠬᠢᠬᠤ ᠦᠭᠡᠢ ᠪᠠᠢᠬᠤ ᠶᠣᠰᠣᠲᠠᠢ ᠪᠣᠯᠬᠤ ᠰᠢᠪ ᠳᠡ ᠭᠡᠮᠡᠨ ᠠᠷᠢᠬᠪᠦ᠋ᠬᠡ ᠶᠠᠷᠢᠶᠠ ᠡᠭᠦᠰᠬᠡᠪᠡ᠃
— ᠠᠬᠠ ᠶ᠋ᠢ ᠪᠡᠶᠡ ᠪᠠᠷᠠᠬᠤ ᠳ᠋ᠤ᠌ ᠡᠪᠡᠳᠴᠢᠨ ᠡᠴᠡ ᠥᠭᠡᠷᠡ ᠡᠯᠳᠡᠪ ᠰᠢᠯᠲᠠᠭᠠᠨ ᠪᠠᠢᠭᠰᠠᠨ ᠦᠭᠡᠢ ᠤᠤ? ᠭᠡᠵᠦ ᠰᠠᠶᠢ ᠠᠯᠤᠰ ᠬᠣᠯᠠ ᠶ᠋ᠢᠨ ᠢᠷᠡᠨ ᠡᠴᠡ ᠣᠷᠣᠰᠢᠭᠤᠯᠭᠠᠨ ᠳ᠋ᠤ᠌ ᠣᠷᠣᠯᠴᠠᠬᠤ ᠪᠠᠷ ᠢᠷᠡᠭᠰᠡᠨ ᠬᠠᠨ ᠳᠡᠭᠦᠦ ᠬᠦᠯᠡᠬᠦ ᠶᠡᠷᠦ ᠶ᠋ᠢᠨ ᠲᠠᠢᠪᠤᠩ ᠴᠢᠷᠠᠢ ᠭᠠᠷᠭᠠᠨ ᠠᠰᠠᠭᠤᠯᠠ᠃
ᠲᠡᠭᠦᠨ ᠳ᠋ᠦ᠍ ᠬᠠᠷᠢᠭᠤ ᠬᠡᠯᠡᠬᠦ ᠬᠥᠮᠦᠨ ᠠᠷᠢᠬᠪᠦ᠋ᠬᠡ ᠯᠡ ᠪᠣᠯᠤᠯᠲᠠᠢ᠂ ᠬᠣᠶᠠᠷ ᠶᠡᠬᠡ ᠠᠬᠠ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠭᠠᠳ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠪᠠᠢᠬᠤ ᠳ᠋ᠤ᠌᠂
ᠬᠤᠪᠢᠯᠠᠢ ᠵᠢᠱᠢᠮᠠ ᠦᠭᠡᠢ ᠴᠢᠷᠠᠢ ᠭᠠᠷᠭᠠᠨ᠄
— ᠪᠢ ᠡᠦᠲᠦ ᠬᠡᠯᠡᠵᠦ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠬᠡᠷᠡᠭ ᠬᠥᠭᠡᠭᠡᠴᠡᠯᠳᠦᠵᠦ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠲᠡᠨᠳᠡ ᠪᠡᠨ ᠠᠮᠢ ᠲᠠᠯᠪᠢᠨ ᠬᠡᠯᠲᠦᠷᠢᠵᠦ ᠪᠠᠢᠯᠠ᠃ ᠠᠷᠢᠬᠪᠦ᠋ᠬᠡ ᠯᠡ ᠮᠡᠳᠡᠵᠦ ᠪᠠᠢᠭᠠ᠃ ᠰᠢᠨᠵᠢᠭᠡᠴᠢ ᠪᠡᠷ ᠠᠬᠠ ᠶ᠋ᠢᠨ ᠴᠣᠭᠴᠠᠰ ᠢ᠋ ᠦᠵᠡᠭᠦᠯᠦᠭᠰᠡᠨ ᠪᠢᠵᠡ ᠳᠡ ᠭᠡᠯᠡ᠃
— ᠪᠢ ᠱᠠᠷᠢᠯ ᠢ᠋ ᠵᠠᠯᠠᠵᠤ ᠠᠪᠴᠢᠷᠠᠭᠠᠳ ᠰᠢᠨᠵᠢᠭᠡᠴᠢ ᠨᠠᠷ ᠢ᠋ᠶ᠋ᠠᠷ ᠬᠡᠳᠦ ᠳᠠᠬᠢᠨ ᠦᠵᠡᠭᠦᠯᠵᠦ ᠮᠠᠭᠠᠳᠯᠠᠭᠰᠠᠨ᠃ ᠪᠢᠳᠡᠨ ᠤ ᠡᠰᠡᠷᠭᠦ ᠪᠠᠢᠳᠠᠭ ᠬᠥᠮᠦᠰ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠬᠢᠵᠦ ᠬᠣᠣᠷᠯᠠᠭᠠ ᠪᠣᠯᠪᠠ ᠤᠤ ᠭᠡᠵᠦ ᠬᠠᠷᠠᠳᠠᠭᠰᠠᠨ ᠤᠬᠠᠭᠠᠨᠲᠠᠢ᠃ ᠲᠡᠭᠡᠭᠡᠳ ᠶᠠᠭᠤᠮᠠ ᠣᠯᠤᠭᠠ ᠦᠭᠡᠢ᠃
ᠪᠥᠬᠡ ᠨᠠᠷ 《ᠬᠠᠷᠠ ᠯᠤᠤᠰ ᠤ᠋ᠨ ᠬᠣᠣᠷᠯᠠᠯ ᠪᠣᠯᠵᠤ᠂ ᠠᠳᠠ ᠠ᠋ᠴᠠ ᠬᠠᠷᠢᠶᠠᠯ ᠵᠢᠳᠬᠠ ᠬᠢᠵᠦ ᠬᠣᠯᠪᠣᠭ ᠭᠦᠶᠦᠯᠭᠡᠭᠰᠡᠨ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠰᠡᠨ᠃
ᠰᠢᠷᠠ ᠶ᠋ᠢᠨ ᠯᠠᠮᠠ ᠨᠠᠷ ᠠ᠋ᠴᠠ ᠠᠰᠠᠭᠤᠬᠤ ᠳ᠋ᠤ᠌ 《ᠦᠬᠦᠭᠡᠷ ᠦ᠋ᠨ ᠪᠤᠵᠠᠷ ᠠ᠋ᠴᠠ ᠪᠣᠯᠵᠠᠢ᠂ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠬᠡᠭᠦᠷ ᠲᠦ᠍ ᠣᠢᠷᠠᠲᠤᠭᠰᠠᠨ ᠪᠠᠢᠨᠠ》 ᠭᠡᠵᠦ ᠪᠠᠢᠭᠠ᠃
ᠦᠨᠡᠨ ᠳ᠋ᠦ᠍ ᠪᠡᠨ ᠠᠬᠠ ᠴᠦ᠍ ᠡᠪᠡᠳᠦᠭᠰᠡᠨ᠂ ᠨᠠᠰᠤ ᠪᠠᠷᠠᠭᠰᠠᠨ ᠴᠡᠷᠢᠭ ᠦ᠋ᠳ ᠳᠤᠮᠳᠠ ᠣᠷᠣᠨ᠂ ᠲᠡᠳᠡᠨ ᠢ᠋ ᠲᠤᠰᠠᠭᠠᠷᠯᠠᠨ ᠡᠮᠴᠢᠯᠡᠭᠦᠯᠵᠦ ᠭᠡᠵᠦ ᠳᠠᠪᠬᠢᠵᠤ ᠪᠠᠢᠭᠰᠠᠨ ᠶᠤᠮ ᠪᠢᠯᠡ᠃
ᠢᠰᠯᠠᠮ ᠤ᠋ᠨ ᠬᠤᠸᠠᠷᠠᠭ ᠯᠠᠮᠠ ᠠ᠋ᠴᠠ ᠠᠰᠠᠭᠤᠬᠤ ᠳ᠋ᠤ᠌《ᠤᠰᠤᠨ ᠤ᠋ ᠨᠢᠯᠴᠠᠭᠠᠢ ᠪᠡᠶᠡᠲᠡᠢ ᠠᠮᠢᠲᠠᠨ ᠢᠳᠡᠭᠰᠡᠨ ᠪᠠᠢᠨᠠ᠃ ᠭᠠᠵᠠᠷ ᠤᠰᠤᠨ ᠠ᠋ᠴᠠ ᠪᠣᠯᠵᠤ ᠡᠪᠡᠳᠴᠢᠯᠡᠭᠰᠡᠨ ᠪᠣᠯᠤᠯᠲᠠᠢ᠃ ᠬᠣᠢᠲᠤ ᠲᠥᠷᠥᠯ ᠳ᠋ᠦ᠍ ᠪᠡᠨ ᠳᠡᠭᠡᠳᠦ ᠲᠩᠷᠢ ᠳ᠋ᠦ᠍ ᠬᠤᠲᠤᠭ ᠢ᠋ ᠣᠯᠵᠤ ᠲᠥᠷᠥᠨᠡ》 ᠭᠡᠮᠡᠨ ᠥᠭᠦᠯᠡᠭᠰᠡᠨ᠃
ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠯᠡ ᠡᠪᠡᠳᠴᠦ ᠨᠠᠰᠤ ᠪᠠᠷᠠᠭᠰᠠᠨ ᠨᠢ ᠣᠯᠠᠨ ᠰᠢᠳᠠᠷ ᠲᠦᠰᠢᠮᠡᠯ ᠦ᠋ᠨ ᠦᠭᠡ ᠪᠡᠷ ᠨᠤᠲᠠᠯᠠᠭᠳᠠᠵᠤ ᠪᠠᠢᠨᠠ ᠭᠡᠵᠦ ᠠᠷᠢᠬᠪᠦ᠋ᠬᠡ ᠰᠡᠭᠦᠷᠡᠰᠦ ᠠᠯᠲᠠᠨ ᠬᠡᠯᠡᠯᠡ᠃
ᠲᠡᠳᠡ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠰᠠᠭᠤᠪᠠ᠃
ᠪᠠᠰᠠ ᠯᠠ ᠠᠷᠢᠬᠪᠦ᠋ᠬᠡ ᠠᠮᠠ ᠬᠠᠭᠠᠯᠤᠨ ᠳᠤᠤᠭᠠᠷᠴᠤ ᠲᠣᠮᠣ ᠶᠠᠷᠢᠶᠠ ᠡᠭᠦᠰᠬᠡᠬᠦ ᠳ᠋ᠦ᠍ ᠪᠡᠨ ᠰᠡᠳᠬᠢᠯ ᠲᠥᠪᠳᠡᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ᠄
— ᠠᠬᠠ ᠶᠡᠬᠡ ᠬᠠᠲᠠᠭᠤ ᠵᠠᠬᠢᠷᠭᠠ ᠲᠠᠢ ᠬᠠᠭᠠᠨ ᠪᠠᠢᠯᠠ᠃ ᠲᠠ ᠨᠠᠷ ᠮᠡᠳᠡᠨᠡ ᠳᠠ᠃ ᠲᠡᠭᠡᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠪᠠ᠃ ᠮᠠᠨ ᠤ᠋ ᠬᠣᠶᠠᠷ ᠠᠪᠠᠭᠠ ᠠᠬᠠ ᠳᠠᠷᠠᠭᠠᠯᠠᠨ ᠬᠠᠭᠠᠨ ᠰᠠᠭᠤᠬᠤ ᠳ᠋ᠤ᠌ ᠪᠠᠨ ᠵᠠᠬᠢᠷᠭᠠ ᠰᠤᠯᠠ ᠲᠠᠢ ᠪᠠᠢᠵᠤ ᠨᠡᠢᠲᠡ ᠭᠦᠷᠦᠨ ᠦ᠌ ᠪᠠᠢᠳᠠᠯ ᠢ᠋ ᠴᠠᠯᠠᠭᠠᠷ ᠪᠣᠯᠭᠠᠭᠰᠠᠨ᠃ ᠲᠡᠭᠦᠨ ᠢ᠋ ᠨᠢ ᠡᠮᠬᠢᠯᠡᠬᠦ ᠭᠡᠵᠦ ᠶᠡᠬᠡ ᠠᠬᠠ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠭᠰᠠᠨ ᠡᠳᠦᠷ ᠡᠴᠡ ᠪᠡᠨ ᠰᠢᠭᠤᠳ ᠲᠤᠯᠤᠯᠳᠤᠭᠰᠠᠨ᠃ ᠲᠡᠷᠡ ᠪᠦᠬᠦᠨ ᠢ᠋ ᠪᠢᠳᠡ ᠶᠠᠭᠤᠨ ᠡᠰᠡ ᠠᠨᠳᠠᠬᠤ ᠪᠣᠢ᠃ ᠬᠠᠷᠠ ᠰᠠᠨᠠᠭᠠᠲᠠᠢ ᠬᠥᠮᠦᠰ ᠪᠦᠷ ᠡᠬᠢᠯᠡᠭᠡᠳ ᠯᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠰᠡᠷᠭᠦᠴᠡᠪᠡ ᠳᠡ᠃ ᠶᠠᠭᠤᠮᠠ ᠲᠡᠢᠮᠦ ᠪᠠᠢᠬᠤ ᠶᠣᠰᠣᠲᠠᠢ ᠶᠤᠮ ᠤᠤ ᠮᠡᠳᠡᠬᠦ ᠦᠭᠡᠢ ᠭᠡᠬᠦ ᠳ᠋ᠦ᠍᠂
ᠬᠥᠯᠡᠬᠦ ᠤᠷᠲᠤ ᠠ᠋ᠴᠠ ᠰᠠᠨᠠᠭᠠ ᠠᠯᠳᠠᠭᠠᠳ ᠬᠤᠯᠤ ᠲᠠᠢ ᠠᠢᠷᠠᠭ ᠠᠪᠴᠤ ᠵᠠᠯᠭᠢᠯᠠᠭᠰᠠᠨ ᠢ᠋ᠶ᠋ᠠᠨ᠄
— ᠪᠢ ᠠᠬᠠ ᠶ᠋ᠢ ᠵᠦᠭᠡᠷ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠨᠠᠰᠤ ᠪᠠᠷᠠᠵᠤ ᠤᠤ ᠭᠡᠵᠦ ᠠᠰᠠᠭᠤᠭᠠᠳ ᠪᠠᠢᠭᠠ ᠶ᠋ᠢᠨ ᠤᠴᠢᠷ ᠨᠢ ᠲᠡᠷᠡ᠃ ᠥᠭᠡᠳᠡᠢ ᠠᠪᠠᠭᠠ ᠶ᠋ᠢᠨ ᠤᠳᠤᠮ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠥᠪᠡᠷ ᠦ᠋ᠨ ᠤᠭᠰᠠᠭᠠᠨ ᠳ᠋ᠤ᠌ ᠡᠷᠭᠢᠭᠦᠯᠦᠨ ᠠᠪᠬᠤ ᠭᠡᠳ ᠯᠡ ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠣᠷᠣᠯᠳᠣᠭᠰᠠᠭᠠᠷ ᠪᠠᠢᠭᠠ ᠶ᠋ᠢ ᠲᠠ ᠨᠠᠷ ᠡᠰᠡ ᠮᠡᠳᠡᠬᠦ ᠪᠢᠰᠢ᠃ ᠣᠳᠣ ᠴᠦ᠍ ᠲᠡᠷᠡ ᠬᠡᠷᠡᠭ ᠲᠠᠰᠤᠷᠠᠭᠠ ᠦᠭᠡᠢ ᠭᠡᠵᠦ ᠰᠠᠨᠠᠵᠤ ᠪᠠᠢᠪᠠᠯ ᠢᠯᠡᠭᠦᠦ ᠦᠭᠡᠢ ᠪᠠᠢᠬᠤ ᠰᠢᠦ ᠭᠡᠵᠦ ᠰᠠᠨᠠᠭᠤᠯᠭᠠ ᠮᠠᠶᠢᠭ ᠢ᠋ᠶ᠋ᠠᠷ ᠥᠭᠦᠯᠡᠪᠡ᠃
— ᠠᠬᠠ ᠶ᠋ᠢᠨ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠵᠥᠪ ᠠ᠋᠃ ᠲᠤᠷᠠᠭᠢᠨᠠ ᠠᠬᠠᠢᠲᠠᠨ ᠤ᠋ ᠳᠠᠷᠠᠭᠠ ᠪᠠᠷ ᠲᠡᠭᠦᠨ ᠦ᠌ ᠰᠢᠭᠤᠳ ᠳᠡᠮᠵᠢᠯᠭᠡ ᠪᠡᠷ ᠣᠷᠣ ᠰᠠᠭᠤᠭᠰᠠᠨ ᠭᠦᠶᠦᠭ ᠠᠬᠠ ᠴᠦ᠍ ᠤᠬᠠᠪᠤᠷᠢ ᠮᠥᠴᠢᠳ ᠵᠠᠩ ᠭᠠᠷᠭᠠᠨ ᠳᠠᠪᠬᠢᠵᠤ ᠶᠠᠪᠤᠭᠠᠳ ᠪᠡᠶᠡ ᠪᠠᠷᠠᠭᠰᠠᠨ᠃ ᠲᠡᠷᠡ ᠬᠠᠭᠠᠨ ᠵᠠᠯᠠᠭᠤ ᠪᠠᠢᠪᠠ ᠳᠠ᠃ ᠪᠠᠲᠤ ᠠᠬᠠ ᠶ᠋ᠢ ᠪᠡᠶᠡ ᠳᠠᠭᠠᠭᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠵᠠᠬᠢᠷᠭᠠᠨ ᠤ᠋ ᠠᠯᠲᠠᠨ ᠣᠷᠳᠣᠨ ᠤ᠋ ᠤᠯᠤᠰ ᠢ᠋ ᠡᠮᠬᠢᠯᠡᠵᠦ ᠠᠪᠬᠤ ᠭᠡᠰᠡᠨ ᠰᠠᠨᠠᠭᠠ ᠶ᠋ᠢ ᠨᠢ ᠲᠠᠰᠤᠯᠤᠨ ᠵᠣᠭᠰᠣᠭᠠᠬᠤ᠂ ᠲᠡᠭᠦᠨ ᠢ᠋ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠳᠣᠣᠷᠠ ᠳᠠᠭᠤᠯᠭᠠᠪᠤᠷᠢᠲᠠᠢᠬᠠᠨ ᠪᠠᠢᠯᠭᠠᠬᠤ ᠭᠡᠵᠦ ᠲᠡᠷᠲᠡᠭᠡ ᠪᠠᠷᠠᠭᠤᠨ ᠵᠦᠭ ᠤᠷᠤᠭᠤ ᠴᠡᠷᠢᠭ ᠠᠪᠴᠤ ᠳᠠᠪᠬᠢᠭᠠ ᠦᠭᠡᠢ ᠪᠣᠯ ᠤᠯᠤᠰ ᠣᠷᠣᠨ ᠤ᠋ ᠪᠠᠢᠳᠠᠯ ᠱᠠᠯᠠ ᠳ᠋ᠤ᠌ ᠪᠠᠨ ᠪᠠᠭᠤᠲᠠᠯᠠ ᠵᠠᠳᠠᠷᠠᠨ ᠰᠤᠯᠠᠷᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠪᠢᠵᠡ᠃ ᠡᠢᠮᠦ ᠤᠬᠠᠭᠠᠨ ᠮᠠᠭᠤᠲᠠᠢ ᠬᠡᠷᠡᠭ ᠦ᠋ᠳ ᠢ᠋ ᠪᠣᠭᠳᠠ ᠡᠵᠡᠨ ᠦ᠌ ᠳᠠᠷᠠᠭᠠ ᠯᠠ ᠮᠠᠨ ᠤ᠋ ᠠᠪᠠᠭᠠ ᠨᠠᠷ᠂ ᠲᠡᠭᠦᠨ ᠦ᠌ ᠰᠢᠷᠡᠭᠡ ᠶ᠋ᠢ ᠲᠦᠷ ᠵᠠᠭᠤᠷᠠ ᠲᠦᠰᠢᠵᠦ ᠪᠠᠢᠭᠰᠠᠨ ᠬᠠᠲᠤᠳ ᠭᠠᠷᠭᠠᠵᠤ ᠤᠯᠤᠰ ᠢ᠋ ᠶᠡᠬᠡᠳᠡ ᠬᠣᠬᠢᠷᠠᠭᠠᠭᠰᠠᠨ᠃ ᠪᠢᠳᠡ ᠯᠠ ᠣᠳᠣ ᠲᠡᠷᠡ ᠵᠦᠢᠯ ᠦ᠋ᠳ ᠡᠴᠡ ᠰᠠᠨᠠᠭᠠ ᠠᠪᠴᠤ ᠪᠠᠢᠳᠠᠯ ᠢ᠋ ᠵᠥᠪ ᠵᠠᠯᠠᠵᠤ ᠶᠠᠪᠤᠬᠤ ᠶᠣᠰᠣᠲᠠᠢ ᠪᠠᠢᠨᠠ ᠭᠡᠵᠦ ᠠᠷᠢᠬᠪᠦ᠋ᠬᠡ ᠬᠡᠯᠡᠭᠡᠳ ᠰᠠᠨᠠᠭᠠ ᠠᠯᠳᠠᠪᠠ᠃
ᠬᠤᠪᠢᠯᠠᠢ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠰᠠᠭᠤᠵᠤ᠄
—《ᠪᠠᠢᠳᠠᠯ ᠢ᠋ ᠵᠥᠪ ᠵᠠᠯᠠᠨ ᠶᠠᠪᠤᠬᠤ》 ᠭᠡᠵᠦ ᠶᠠᠭᠤ ᠪᠠᠢᠬᠤ ᠪᠣᠢ᠃ ᠣᠳᠣ ᠲᠦᠪᠰᠢᠨ ᠯᠡ ᠪᠠᠢᠨᠠ᠃ ᠮᠥᠩᠬᠡ ᠠᠬᠠ ᠶ᠋ᠢᠨ ᠲᠣᠭᠲᠠᠭᠠᠭᠰᠠᠨ ᠲᠢᠭ ᠵᠢᠷᠤᠮ᠂ ᠪᠠᠢᠳᠠᠯ ᠲᠥᠷᠬᠦ ᠶ᠋ᠢ ᠤᠬᠠᠭᠠᠨᠲᠠᠢᠬᠠᠨ ᠵᠠᠯᠭᠠᠭᠠᠳ᠂ ᠬᠢᠲᠠᠳ ᠢ᠋ ᠴᠢᠩᠭᠠᠬᠠᠨ ᠠᠳᠬᠤᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠪᠤᠰᠤᠳ ᠶᠠᠭᠤᠮᠠ ᠪᠣᠯᠤᠭᠠᠳ ᠪᠠᠢᠨᠠ ᠭᠡᠵᠦ ᠳᠡᠭᠦᠦ ᠠᠷᠢᠬᠪᠦ᠋ᠬᠡ ᠲᠡᠢ ᠪᠡᠨ ᠮᠡᠲᠡᠭᠡᠯᠴᠡᠬᠦ ᠰᠠᠨᠠᠭᠠ ᠶ᠋ᠢ ᠠᠩᠬᠠᠨ ᠴᠤᠬᠤᠢᠯᠭᠠᠯᠠ᠃
ᠬᠥᠯᠡᠬᠦ ᠳᠠᠬᠢᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠲᠥᠪ ᠢ᠋ ᠰᠠᠬᠢᠵᠤ ᠪᠠᠢᠪᠠ᠃
ᠠᠬᠠ ᠳᠡᠭᠦᠦ ᠬᠡᠳᠦ ᠶ᠋ᠢᠨ ᠡᠨᠡ ᠤᠳᠠᠭᠠ ᠶ᠋ᠢᠨ ᠶᠠᠷᠢᠶᠠ ᠲᠡᠳᠦᠢ ᠯᠡ ᠨᠡᠢᠯᠡᠮᠵᠢᠲᠡᠢ ᠪᠣᠯᠤᠭᠰᠠᠨ ᠦᠭᠡᠢ ᠲᠠᠷᠬᠠᠪᠠ᠃
ᠤᠭ ᠠᠭᠤᠯᠵᠠᠯᠲᠠ ᠶᠠᠷᠢᠶᠠᠨ ᠤ᠋ ᠡᠬᠢᠨ ᠳ᠋ᠦ᠍ ᠴᠦ᠍ ᠰᠠᠨᠠᠭᠠ ᠨᠡᠢᠯᠡᠬᠦ ᠦᠭᠡᠢ ᠨᠢᠭᠡ ᠶᠠᠪᠤᠳᠠᠯ ᠪᠠᠢᠭᠰᠠᠨ ᠨᠢ ᠰᠣᠨᠢᠬᠠᠨ ᠬᠡᠷᠡᠭ᠃
ᠬᠠᠷᠠᠬᠣᠷᠣᠮ ᠬᠣᠲᠠ ᠶ᠋ᠢᠨ ᠲᠥᠪ ᠦ᠋ᠨ ᠬᠡᠰᠡᠭ ᠲᠦ᠍ ᠬᠤᠪᠢᠯᠠᠢ ᠥᠪᠡᠷ ᠦ᠋ᠨ ᠤᠷᠲᠤ ᠲᠠᠢ᠂ ᠤᠭ ᠬᠣᠲᠠ ᠶ᠋ᠢ ᠵᠠᠬᠢᠷᠤᠭᠴᠢ ᠠᠷᠢᠬᠪᠦ᠋ᠬᠡ ᠥᠪᠡᠷ ᠦ᠋ᠨ ᠤᠷᠲᠤ ᠥᠷᠭᠥᠭᠡ ᠲᠡᠢ ᠪᠠᠢᠭᠠ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠬᠥᠯᠡᠬᠦ ᠳ᠋ᠦ᠍ ᠪᠠᠰᠠ ᠲᠣᠬᠢᠯᠢᠭ ᠰᠠᠢᠬᠠᠨ ᠥᠷᠭᠥᠭᠡ ᠪᠠᠢᠯᠠ᠃
ᠲᠡᠭᠡᠭᠡᠳ ᠬᠤᠪᠢᠯᠠᠢ ᠪᠢ ᠶᠡᠬᠡ ᠠᠬᠠ ᠨᠢ ᠪᠣᠯᠬᠣᠷ ᠮᠢᠨᠦ ᠳᠡᠭᠦᠦ ᠨᠠᠷ ᠨᠠᠳᠠᠳᠤ ᠪᠠᠷᠠᠯᠬᠠᠨ ᠢᠷᠡᠬᠦ ᠶᠣᠰᠣᠲᠠᠢ ᠭᠡᠵᠦ ᠪᠤᠰᠤᠳ ᠢ᠋ ᠪᠡᠨ ᠥᠪᠡᠷ ᠦ᠋ᠨ ᠡᠮᠦᠨᠡ ᠲᠣᠯᠣᠭᠠᠢ ᠪᠥᠬᠥᠢᠯᠭᠡᠬᠦ ᠰᠠᠨᠠᠭᠠᠲᠠᠢ ᠪᠠᠢᠪᠠ᠃
ᠠᠷᠢᠬᠪᠦ᠋ᠬᠡ ᠪᠢ ᠠᠬᠠ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠶᠣᠰᠣᠭᠠᠷ ᠨᠡᠢᠰᠯᠡᠯ ᠢ᠋ ᠪᠣᠯᠤᠨ ᠮᠣᠩᠭᠣᠯ ᠦᠨᠳᠦᠰᠦᠨ ᠨᠤᠲᠤᠭ ᠢ᠋ᠶ᠋ᠠᠨ ᠮᠡᠳᠡᠬᠦ ᠵᠠᠬᠢᠷᠤᠭᠴᠢ ᠪᠠᠷ ᠲᠣᠮᠢᠯᠠᠭᠳᠠᠨ ᠰᠠᠭᠤᠵᠤ ᠪᠠᠢᠭᠠ ᠪᠣᠯᠬᠣᠷ ᠨᠠᠳᠠ ᠠ᠋ᠴᠠ ᠥᠭᠡᠷᠡ ᠡᠨᠡ ᠣᠷᠣᠨ ᠤ᠋ ᠡᠵᠡᠨ ᠣᠳᠣ ᠪᠠᠢᠬᠤ ᠦᠭᠡᠢ ᠲᠤᠯᠠ ᠠᠬᠠᠨ ᠳᠡᠭᠦᠦᠰ ᠠᠯᠢ ᠠᠯᠢ ᠨᠢ ᠨᠠᠳᠠᠳᠤ ᠢᠷᠡᠬᠦ ᠶᠣᠰᠣᠲᠠᠢ! ᠬᠤᠪᠢᠯᠠᠢ ᠠᠬᠠ ᠨᠠᠳᠠᠳᠤ ᠪᠦᠳᠦᠭᠦᠨ ᠬᠦᠵᠦᠭᠦᠦ ᠭᠠᠷᠭᠠᠬᠤ ᠦᠭᠡᠢ ᠪᠢᠵᠡ᠃ ᠡᠨᠡ ᠠᠬᠠ ᠬᠠᠭᠠᠨ ᠠᠬᠠ ᠶ᠋ᠢᠨ ᠵᠠᠷᠯᠢᠭ ᠶᠣᠰᠣᠭᠠᠷ ᠵᠥᠪᠬᠡᠨ ᠬᠢᠲᠠᠳ ᠣᠷᠣᠨ ᠢ᠋ ᠵᠠᠬᠢᠷᠤᠨ ᠮᠡᠳᠡᠭᠴᠢ ᠡᠵᠡᠨ ᠨᠢ ᠮᠥᠨ᠃ ᠲᠡᠷᠡ ᠵᠠᠷᠯᠢᠭ ᠢ᠋ ᠬᠡᠨ ᠴᠦ᠍ ᠴᠤᠴᠠᠯᠠᠭᠠ ᠦᠭᠡᠢ ᠪᠠᠢᠨᠠ᠃ ᠴᠤᠴᠠᠯᠠᠬᠤ ᠴᠦ᠍ ᠶᠣᠰᠣ ᠦᠭᠡᠢ ᠭᠡᠮᠡᠨ ᠪᠣᠳᠣᠨ᠂ ᠪᠡᠶᠡ ᠪᠡᠶᠡ ᠪᠡᠨ ᠬᠦᠯᠢᠶᠡᠭᠡᠳ ᠪᠦᠲᠦᠬᠦ ᠶᠠᠩᠵᠤ ᠦᠭᠡᠢ ᠪᠣᠯᠬᠣᠷ ᠬᠠᠷᠠᠬᠣᠷᠣᠮ ᠤ᠋ᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠥᠪᠡᠷ ᠦ᠋ᠨ ᠠᠯᠪᠠ ᠬᠡᠷᠡᠭ ᠢ᠋ᠶ᠋ᠡᠨ ᠰᠢᠢᠳᠬᠡᠨ ᠶᠠᠪᠤᠭᠤᠯᠳᠠᠭ ᠥᠷᠭᠥᠭᠡ ᠶ᠋ᠢ ᠲᠤᠰᠬᠠᠢᠯᠠᠨ ᠪᠡᠯᠡᠳᠬᠡᠭᠡᠳ ᠪᠤᠰᠤᠳ ᠬᠠᠭᠠᠨ᠂ ᠵᠠᠬᠢᠷᠤᠭᠴᠢ ᠨᠠᠷ ᠢ᠋ᠶ᠋ᠠᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠲᠡᠳᠡ ᠭᠠᠳᠠᠭᠠᠳᠤ ᠭᠦᠷᠦᠨ ᠨᠦ᠍ᠭᠦᠳ ᠡᠴᠡ ᠭᠠᠰᠢᠭᠤᠳᠠᠯ ᠳ᠋ᠤ᠌ ᠣᠷᠣᠯᠴᠠᠬᠤ ᠪᠠᠷ ᠢᠷᠡᠵᠦ ᠪᠣᠢ ᠡᠯᠴᠢ ᠨᠦ᠍ᠭᠦᠳ ᠢ᠋ ᠤᠭᠲᠤᠨ ᠠᠪᠴᠤ ᠠᠭᠤᠯᠵᠠᠨ ᠪᠠᠢᠯᠠ᠃
ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠠᠷᠢᠬᠪᠦ᠋ᠬᠡ《ᠰᠠᠨᠳᠤᠷᠴᠤ ᠮᠡᠩᠳᠡᠭᠡᠳ ᠲᠣᠯᠣᠭᠠᠢ ᠬᠥᠯ ᠢ᠋ᠶ᠋ᠡᠨ ᠣᠯᠬᠤ ᠦᠭᠡᠢ ᠪᠠᠢᠳᠠᠯᠲᠠᠢ ᠪᠣᠯᠵᠤ ᠣᠷᠬᠢᠬᠤ ᠦᠭᠡᠢ᠂ ᠶᠣᠰᠣ ᠵᠢᠷᠤᠮ ᠢ᠋ ᠴᠢᠩᠳᠠ ᠰᠠᠨᠠ》 ᠭᠡᠵᠦ ᠪᠦᠬᠦ ᠰᠢᠳᠠᠷ ᠨᠣᠶᠠᠨ᠂ ᠰᠠᠢᠳ ᠴᠢᠩᠰᠠᠩ ᠨᠠᠷ ᠲᠤ ᠪᠠᠨ ᠳᠠᠭᠠᠭᠠᠯᠭᠠᠨ ᠬᠡᠯᠡᠵᠦ ᠪᠠᠢᠪᠠ᠃
ᠶᠡᠬᠡ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠲᠤᠰᠠᠯᠠᠬᠤ ᠤᠴᠢᠷ ᠪᠠᠢᠳᠠᠯ ᠢ᠋ ᠰᠡᠬᠡᠭᠡᠷᠡᠭᠦᠯᠦᠨ ᠬᠡᠯᠡᠬᠦ ᠬᠥᠮᠦᠰ ᠴᠦ᠍ ᠪᠠᠢᠵᠤ ᠯᠠ ᠪᠠᠢᠪᠠ᠃ ᠡᠢᠮᠦ ᠵᠦᠢᠯ ᠳᠡᠭᠡᠷᠡ ᠤᠬᠠᠭᠠᠨ ᠰᠠᠮᠠᠭᠤᠷᠠᠬᠤ ᠬᠥᠮᠦᠨ ᠠᠷᠢᠬᠪᠦ᠋ᠬᠡ ᠪᠢᠰᠢ ᠠᠵᠢ᠃
ᠶᠡᠬᠡ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠪᠠᠢᠯᠭᠠᠨ ᠰᠠᠯᠬᠤ ᠶᠣᠰᠣ ᠬᠢᠵᠡᠭᠡᠵᠦ᠂ ᠬᠥᠳᠡᠭᠡᠯᠡᠭᠦᠯᠬᠦ ᠬᠡᠷᠡᠭ ᠢ᠋ ᠬᠡᠯᠡᠯᠴᠡᠬᠦ ᠪᠣᠯᠪᠠ᠃
ᠡᠨᠡ ᠴᠦ᠍ ᠲᠡᠷᠢᠭᠦᠨ ᠶᠠᠷᠢᠭᠳᠠᠵᠤ ᠵᠣᠬᠢᠬᠤ ᠪᠡᠯᠡᠳᠬᠡᠯ ᠢ᠋ ᠨᠢ ᠴᠡᠷᠢᠭ ᠦ᠋ᠳ ᠭᠠᠵᠠᠷ ᠳᠡᠭᠡᠷᠡ ᠨᠢ ᠬᠢᠵᠦ ᠪᠠᠢᠭᠠ ᠴᠠᠭ᠃
ᠮᠡᠳᠡᠭᠡᠵᠢ ᠶ᠋ᠢᠨ ᠮᠥᠩᠬᠡ ᠬᠠᠭᠠᠨ ᠢ᠋ ᠡᠵᠡᠨ ᠴᠢᠩᠭᠢᠰ᠂ ᠬᠠᠭᠠᠨ ᠥᠭᠡᠳᠡᠢ ᠨᠠᠷ ᠤ᠋ᠨ ᠱᠠᠷᠢᠯ ᠲᠠᠢ ᠵᠡᠷᠭᠡᠴᠡᠭᠦᠯᠦᠨ ᠶᠡᠬᠡ ᠬᠣᠷᠢᠭ ᠤ᠋ᠨ ᠭᠠᠵᠠᠷ ᠲᠤ ᠵᠠᠯᠠᠵᠤ ᠣᠷᠣᠰᠢᠭᠤᠯᠬᠤ ᠶᠣᠰᠣᠲᠠᠢ ᠪᠢᠯᠡ᠃ ᠶᠡᠷᠦ ᠨᠢ ᠲᠡᠨᠳᠡ ᠪᠦᠬᠦ ᠬᠠᠭᠠᠨ᠂ ᠲᠡᠳᠡᠨ ᠦ᠌ ᠴᠢᠰᠤᠨ ᠲᠥᠷᠥᠯ ᠦ᠋ᠨ ᠬᠥᠮᠦᠰ ᠦ᠋ᠨ ᠪᠡᠶᠡ ᠴᠣᠭᠴᠠᠰ ᠢ᠋ ᠣᠷᠣᠰᠢᠭᠤᠯᠵᠤ ᠪᠠᠢᠬᠤ ᠪᠠᠷ ᠤᠷᠢᠳ ᠨᠢ ᠲᠣᠭᠲᠠᠭᠠᠭᠰᠠᠨ ᠪᠠᠢᠪᠠ᠃
ᠬᠠᠷᠢᠨ ᠲᠡᠨᠳᠡ ᠬᠥᠶᠦᠭ ᠬᠠᠭᠠᠨ ᠤ᠋ ᠱᠠᠷᠢᠯ ᠯᠠ ᠣᠴᠢᠭᠠ ᠦᠭᠡᠢ᠃ ᠲᠡᠷᠡ ᠬᠠᠭᠠᠨ ᠭᠤᠷᠪᠠᠬᠠᠨ ᠵᠢᠯ ᠬᠠᠭᠠᠨᠴᠢᠯᠠᠭᠠᠳ ᠪᠠᠲᠤ ᠬᠠᠭᠠᠨ ᠢ᠋ ᠰᠠᠮ ᠴᠣᠬᠢᠵᠤ《ᠨᠣᠮᠣᠬᠠᠳᠬᠠᠬᠤ ᠪᠠᠷ》 ᠪᠠᠷᠠᠭᠤᠨ ᠭᠠᠵᠠᠷ ᠰᠠᠮᠠᠷᠺᠠᠨᠳ᠋ ᠣᠷᠴᠢᠮ ᠳ᠋ᠤ᠌ ᠣᠴᠢᠭᠠᠳ ᠨᠠᠰᠤ ᠪᠠᠷᠠᠭᠰᠠᠨ ᠤᠴᠢᠷ ᠲᠡᠨᠳᠡ ᠨᠢ ᠣᠷᠣᠰᠢᠭᠤᠯᠤᠭᠰᠠᠨ ᠬᠡᠷᠡᠭ ᠠᠵᠢ᠃ ᠭᠦᠶᠦᠭ ᠤᠭ ᠨᠢ ᠡᠪᠡᠳᠴᠢᠲᠡᠢ ᠪᠠᠢᠭᠰᠠᠨ᠃
ᠮᠥᠩᠬᠡ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠴᠣᠬᠣᠮ ᠣᠷᠣᠰᠢᠭᠤᠯᠬᠤ ᠭᠠᠵᠠᠷ ᠢ᠋ ᠪᠠᠰᠠ ᠬᠥᠮᠦᠨ ᠣᠯᠠᠨ ᠳ᠋ᠤ᠌ ᠵᠠᠷᠯᠠᠨ ᠬᠡᠯᠡᠭᠰᠡᠨ ᠦᠭᠡᠢ᠂ ᠶᠡᠬᠡ ᠬᠠᠩᠭᠠᠢ ᠳ᠋ᠤ᠌ ᠬᠥᠳᠡᠭᠡᠯᠡᠭᠦᠯᠦᠨᠡ ᠭᠡᠳ ᠲᠡᠷᠭᠡᠨ ᠳ᠋ᠦ᠍ ᠠᠴᠢᠨ ᠣᠷᠬᠣᠨ ᠭᠣᠣᠯ ᠢ᠋ ᠤᠷᠤᠭᠤᠳᠠᠭᠤᠯᠤᠨ ᠶᠠᠪᠤᠭᠤᠯᠤᠭᠰᠠᠭᠠᠷ ᠵᠡᠭᠦᠨ ᠢ᠋ᠶ᠋ᠡᠨ ᠡᠷᠭᠢᠭᠦᠯᠦᠨ ᠣᠢ ᠳᠤᠮᠳᠠᠭᠤᠷ ᠣᠷᠣᠭᠤᠯᠵᠤ ᠶᠠᠪᠤᠭᠤᠯᠤᠨ᠂ ᠣᠯᠠᠨ ᠠ᠋ᠴᠠ ᠳᠠᠯᠳᠠ ᠬᠠᠨ ᠬᠡᠨᠲᠡᠢ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠵᠠᠯᠠᠵᠤ ᠠᠪᠠᠴᠢᠭᠠᠳ᠂ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠭᠣᠣᠯ ᠮᠥᠷᠡᠨ ᠦ᠌ ᠡᠬᠢ᠂ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠪᠠᠨ ᠨᠣᠭᠣᠭᠠᠨ ᠣᠢ ᠪᠠᠷ ᠪᠦᠷᠬᠦᠮᠡᠯ᠂ ᠴᠡᠴᠡᠭ ᠨᠠᠪᠴᠢ ᠠᠯᠠᠭᠯᠠᠭᠰᠠᠨ ᠭᠠᠢᠬᠠᠮᠰᠢᠭᠲᠠᠢ ᠰᠠᠢᠬᠠᠨ ᠠᠭᠤᠯᠠ ᠶ᠋ᠢᠨ ᠪᠠᠯ ᠳ᠋ᠤ᠌ ᠣᠷᠣᠰᠢᠭᠤᠯᠤᠯᠠ᠃
ᠲᠡᠷᠡ ᠬᠦ᠌ ᠭᠠᠵᠠᠷ ᠲᠤᠷ ᠪᠠᠢᠭᠤᠯᠤᠭᠰᠠᠨ ᠪᠤᠩᠬᠤᠨ ᠢ᠋ ᠬᠥᠮᠦᠨ ᠳ᠋ᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠡᠷ ᠲᠡᠭᠰᠢᠯᠡᠨ ᠳᠠᠯᠳᠠᠯᠠᠭᠠᠳ᠂ ᠲᠡᠭᠦᠨ ᠢ᠋ ᠪᠡᠨ ᠤᠷᠢᠳ ᠲᠣᠭᠲᠠᠭᠰᠠᠨ ᠵᠠᠩᠰᠢᠯ ᠶᠣᠰᠣᠭᠠᠷ ᠨᠢᠭᠤᠴᠠᠯᠠᠵᠤ ᠣᠷᠬᠢᠭᠰᠠᠨ ᠠᠵᠢ᠃
ᠢᠩᠭᠢᠬᠦ ᠶ᠋ᠢᠨ ᠤᠴᠢᠷ ᠢ᠋ ᠯᠠᠪᠯᠠᠪᠠᠯ ᠡᠵᠡᠨ ᠪᠣᠭᠳᠠ ᠪᠣᠯᠤᠨ ᠪᠤᠰᠤᠳ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠥᠰᠢᠶᠡᠲᠡᠨ ᠡᠲᠡᠭᠡᠳ ᠲᠦ᠍ ᠣᠯᠵᠠᠯᠠᠭᠤᠯᠤᠨ ᠳᠣᠷᠣᠮᠵᠢᠯᠠᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠤᠴᠢᠷᠲᠠᠢ᠃
ᠲᠡᠢᠮᠦ ᠳ᠋ᠦ᠍ ᠬᠦᠷᠪᠡᠯ ᠪᠤᠶᠠᠨ ᠬᠡᠰᠢᠭ ᠲᠦ᠍ ᠬᠠᠮᠤᠭ ᠤ᠋ᠨ ᠮᠠᠭᠤ ᠶᠠᠪᠤᠳᠠᠯ ᠪᠣᠯᠤᠨᠠ ᠭᠡᠵᠦ ᠨᠠᠰᠤᠲᠠᠨ ᠨᠤᠭᠤᠳ ᠲᠠᠢᠯᠪᠤᠷᠢᠯᠠᠵᠤ ᠪᠠᠢᠪᠠ᠃
ᠶᠡᠬᠡ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠠᠪᠠᠴᠢᠬᠤ᠂ ᠣᠷᠣᠰᠢᠭᠤᠯᠬᠤ ᠬᠡᠷᠡᠭ ᠪᠦᠲᠦᠨ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠦᠷᠭᠦᠯᠵᠢᠯᠡᠬᠦ ᠳ᠋ᠦ᠍ ᠬᠤᠪᠢᠯᠠᠢ ᠯᠠ ᠠᠳᠬᠤᠴᠠᠭᠰᠠᠨ ᠪᠠᠢᠳᠠᠯᠲᠠᠢ《ᠠᠷᠤ ᠲᠠᠯᠠ ᠳ᠋ᠤ᠌ ᠬᠡᠷᠡᠭ ᠶᠠᠪᠤᠳᠠᠯ ᠴᠠᠯᠠᠭᠠᠷᠳᠠᠵᠤ ᠭᠦᠢᠴᠡᠯᠡ》 ᠭᠡᠬᠦ ᠮᠠᠶᠢᠭ ᠤ᠋ᠨ ᠦᠭᠡ ᠴᠤᠬᠤᠢᠯᠭᠠᠵᠤ ᠪᠠᠢᠪᠠ᠃
ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠳᠠᠷᠠᠭᠠ ᠬᠠᠭᠠᠨ ᠤ᠋ ᠤᠳᠤᠮ ᠤᠭᠰᠠᠭᠠᠨ ᠤ᠋ ᠬᠢᠨ ᠢ᠋ ᠡᠷᠭᠢᠨ ᠢᠷᠡᠬᠦ ᠳ᠋ᠦ᠍ ᠬᠠᠷᠠᠬᠣᠷᠣᠮ ᠬᠣᠲᠠ ᠶᠠᠭᠠᠬᠢᠵᠤ ᠦᠳᠡᠨ ᠮᠣᠷᠳᠠᠭᠤᠯᠤᠭᠰᠠᠨ ᠪᠢᠯᠡ᠃ ᠶᠠᠭ ᠲᠡᠭᠦᠨ ᠰᠢᠭ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ ᠬᠢᠯᠢᠩᠨᠡᠭᠰᠡᠨ ᠮᠡᠲᠦ ᠪᠠᠢᠯᠠ᠃
ᠡᠨᠡ ᠨᠢ ᠡᠵᠡᠨ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠨᠡᠢᠰᠯᠡᠯ ᠡᠢᠮᠦ ᠯᠡ ᠪᠠᠢᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠭᠡᠰᠡᠨ ᠪᠣᠳᠣᠯ ᠢ᠋ ᠬᠤᠪᠢᠯᠠᠢ᠂ ᠬᠥᠯᠡᠬᠦ᠂ ᠠᠷᠢᠬᠪᠦ᠋ᠬᠡ ᠨᠠᠷ ᠲᠤ᠌ ᠲᠥᠷᠥᠭᠦᠯᠪᠡ᠃
— — — —
① ᠬᠠᠷᠠᠬᠣᠷᠣᠮ ᠳ᠋ᠤ᠌13 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠳᠤᠮᠳᠠ ᠦᠶᠡ ᠳ᠋ᠦ᠍ ᠪᠥᠬᠡ ᠨᠠᠷ ᠠ᠋ᠴᠠ ᠭᠠᠳᠠᠨᠠ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠰᠦᠮᠡ᠂ ᠯᠠᠯᠤ ᠶ᠋ᠢᠨ ᠱᠠᠰᠢᠨ ᠤ᠋ ᠬᠣᠶᠠᠷ᠂ ᠾᠷᠢᠰᠲ᠋ᠣᠰ ᠤ᠋ᠨ ᠱᠠᠰᠢᠨ ᠤ᠋ ᠨᠢᠭᠡ ᠰᠦᠮᠡ ᠣᠷᠣᠰᠢᠵᠤ ᠪᠠᠢᠭᠰᠠᠨ᠃ ᠣᠯᠠᠨ ᠤᠯᠤᠰ ᠤ᠋ᠨ ᠰᠦᠮᠡ ᠬᠡᠢᠳ12 ᠪᠠᠢᠯᠠ ᠭᠡᠵᠦ ᠵᠢᠭᠤᠯᠴᠢᠳ ᠤ᠋ᠨ ᠳᠡᠪᠲᠡᠷ ᠲᠦ᠍ ᠲᠡᠮᠳᠡᠭᠯᠡᠵᠡᠢ᠃
② ᠰᠤᠷᠬᠤᠭᠲᠠᠨᠢ ᠬᠠᠲᠤᠨ ᠬᠡᠳᠦᠨ ᠰᠠᠢᠬᠠᠨ ᠬᠦᠦ ᠲᠡᠢ(ᠮᠥᠩᠬᠡ ᠬᠠᠭᠠᠨ᠂ ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ᠂ ᠬᠥᠯᠡᠬᠦ᠂ ᠠᠷᠢᠬᠪᠦᠢ᠍ᠬᠡ ᠬᠠᠨ)᠂ ᠲᠡᠳᠡᠨ ᠢ᠋ ᠥᠰᠬᠡᠨ ᠬᠥᠮᠦᠵᠢᠭᠦᠯᠬᠦ ᠳ᠋ᠦ᠍ ᠭᠡᠷ ᠦ᠋ᠨ ᠬᠥᠮᠦᠵᠢᠯ ᠦ᠋ᠨ ᠠᠷᠭᠠ ᠤᠬᠠᠭᠠᠨ ᠨᠢ ᠨᠥᠯᠥᠭᠡᠯᠡᠭᠰᠡᠨ ᠨᠢ ᠮᠡᠳᠡᠭᠡᠴᠢ᠃ ᠬᠠᠲᠤᠨ ᠥᠪᠡᠷ ᠢ᠋ᠶ᠋ᠡᠨ ᠪᠠᠭᠠ ᠪᠠᠯᠴᠢᠷ ᠨᠠᠰᠤᠨ ᠠ᠋ᠴᠠ ᠬᠠᠭᠠᠴᠠᠯ ᠦᠵᠡᠵᠦ ᠢᠷᠡᠭᠰᠡᠨ᠃ ᠲᠡᠷᠡ ᠪᠡᠷ ᠬᠡᠷᠡᠢᠳ ᠦ᠋ᠨ ᠸᠠᠩ ᠬᠠᠭᠠᠨ ᠤ᠋ ᠳᠡᠭᠦᠦ ᠵᠠᠭᠬᠠᠮᠪᠣ ᠶ᠋ᠢᠨ ᠥᠬᠢᠨ᠂ ᠡᠴᠢᠭᠡ ᠨᠢ ᠲᠡᠷᠰᠬᠦᠳ ᠦᠢᠯᠡ ᠳ᠋ᠦ᠍ ᠣᠷᠣᠯᠴᠠᠵᠤ ᠶᠠᠪᠤᠭᠠᠳ ᠴᠢᠩᠭᠢᠰ ᠦ᠋ᠨ ᠴᠡᠷᠢᠭ ᠲᠦ᠍ ᠠᠯᠠᠭᠳᠠᠭᠰᠠᠨ᠂ ᠡᠬᠡ ᠨᠢ ᠪᠠᠰᠠ ᠠᠮᠢ ᠦᠷᠡᠭᠳᠡᠭᠰᠡᠨ ᠤᠴᠢᠷ ᠨᠠᠢ᠍ᠮᠠᠨ ᠤ᠋ ᠨᠢᠭᠡ ᠲᠠᠲᠠᠪᠤᠷᠢ ᠡᠮᠡ ᠮᠣᠬᠠᠭ ᠤ᠋ᠨ ᠡᠬᠡ ᠳ᠋ᠦ᠍ ᠦᠷᠡᠴᠢᠯᠡᠭᠦᠯᠦᠨ ᠲᠡᠵᠢᠭᠡᠯᠭᠡᠵᠦ ᠪᠣᠢᠵᠢᠭᠰᠠᠨ᠃ ᠲᠡᠭᠦᠨ ᠦ᠌ ᠤᠳᠤᠮ ᠤᠭᠰᠠᠭᠠᠨ ᠤ᠋ ᠬᠢᠨ ᠨᠢ ᠴᠢᠩᠭᠢᠰ ᠦ᠋ᠨ ᠠᠯᠲᠠᠨ ᠤᠷᠤᠭ ᠲᠤ᠌ ᠳᠠᠢᠰᠤᠩᠨᠠᠵᠤ ᠢᠷᠡᠭᠰᠡᠨ ᠠᠵᠢ᠃
③ ᠠᠷᠢᠬᠪᠦ᠋ᠬᠡ ᠶ᠋ᠢᠨ ᠤᠷᠲᠤ ᠪᠠᠢᠭᠤᠯᠤᠭᠰᠠᠨ ᠭᠠᠵᠠᠷ ᠢ᠋ ᠳ᠋ᠣᠺᠲ᠋ᠣᠷ ᠭ ᠂ ᠫᠧᠷᠯᠡᠢ ᠲᠣᠳᠣᠷᠬᠠᠢᠯᠠᠬᠤ ᠳ᠋ᠤ᠌ ᠪᠠᠨ ᠣᠳᠣ ᠶ᠋ᠢᠨ ᠥᠪᠥᠷ ᠬᠠᠩᠭᠠᠢ ᠂ ᠴᠠᠭᠠᠨ ᠰᠦᠮᠡ ᠶ᠋ᠢᠨ ᠭᠣᠣᠯ(ᠵᠢᠷᠠᠨᠲᠠᠢ ᠶ᠋ᠢᠨ ᠭᠣᠣᠯ) ᠮᠥᠨ ᠭᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠭᠠᠷᠮᠠ᠂ ᠴᠣᠯᠮᠣᠨᠲᠤᠶᠠᠭᠠ