ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠳᠣᠯᠣᠳᠤᠭᠠᠷ ᠪᠦᠯᠦᠭ 1-2> Бүлжхэн хатан– [монгол] Дамбын Төрбат <долдугаар бүлэг 1-2>
74ᠪᠦᠯᠵᠢᠬᠢᠨ ᠬᠠᠲᠤᠨ– <ᠳᠣᠯᠣᠳᠤᠭᠠᠷ ᠪᠦᠯᠦᠭ 1-2>
《ᠠᠭᠤᠤ ᠶᠡᠬᠡ ᠰᠦᠯᠳᠡ ᠬᠡᠢ ᠮᠣᠷᠢ ᠠᠢᠰᠤᠢ ᠶ᠋ᠢ ᠪᠢ ᠮᠡᠳᠡᠷᠡᠵᠦ ᠪᠠᠢᠨᠠ》
᠁ᠪᠣᠱᠣᠭᠠ ᠶ᠋ᠢᠨ ᠴᠢᠨᠢ
ᠪᠣᠭᠣᠯ ᠪᠣᠯᠲᠤᠭᠠᠢ!
ᠪᠣᠱᠣᠭᠠᠨ ᠠ᠋ᠴᠠ ᠴᠢᠨᠢ
ᠪᠤᠯᠲᠠᠵᠤ ᠵᠠᠢᠯᠠᠪᠠᠯ
ᠪᠣᠷᠪᠢ ᠶ᠋ᠢ ᠨᠢ ᠤᠭᠲᠤᠯ!
ᠡᠭᠦᠳᠡᠨ ᠦ᠌ ᠴᠢᠨᠢ ᠥᠮᠴᠢ ᠪᠣᠯᠲᠤᠭᠠᠢ!
ᠡᠭᠦᠳᠡᠨ ᠡᠴᠡ ᠴᠢᠨᠢ
ᠳᠤᠲᠠᠭᠠᠵᠤ ᠵᠠᠢᠯᠠᠪᠠᠯ
ᠡᠯᠢᠭᠡ ᠶ᠋ᠢ ᠨᠢ ᠡᠮᠳᠡᠯᠡ!
《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》
1
ᠲᠦᠭᠰᠢᠭᠦᠷᠢᠲᠦ ᠡᠳᠦᠷ ᠬᠣᠨᠣᠭ ᠤ᠋ᠳ ᠲᠤ᠌ ᠪᠦᠯᠵᠢᠭᠡᠨ ᠢᠵᠢᠢ ᠱᠠᠩᠬᠤᠨ ᠠ᠋ᠴᠠ ᠪᠠᠨ ᠪᠤᠭᠤᠷᠤᠯᠲᠤᠵᠤ᠂ ᠰᠡᠳᠬᠢᠯ ᠡᠴᠡ ᠪᠡᠨ ᠰᠡᠮᠡᠷᠡᠵᠦ ᠨᠠᠷᠠᠨ ᠤᠷᠭᠤᠬᠤ ᠵᠦᠭ ᠡᠴᠡ ᠴᠢᠮᠡᠭᠡ ᠴᠢᠩᠨᠠᠨ᠂ ᠪᠢᠲᠡᠭᠦᠦ ᠰᠢᠨᠠᠯᠤᠨ ᠰᠠᠭᠤᠪᠠᠢ᠃ ᠬᠠᠩᠬᠠᠯ ᠮᠣᠷᠢᠳ ᠢ᠋ᠶ᠋ᠠᠨ ᠬᠠᠨᠲᠠᠢᠷᠠᠨ ᠲᠠᠲᠠᠵᠤ ᠬᠠᠳᠠᠨ ᠢᠯᠳᠦ ᠪᠡᠨ ᠢᠷᠯᠡᠵᠦ ᠮᠣᠷᠳᠠᠭᠰᠠᠨ ᠲᠦᠮᠡ ᠲᠦᠮᠡᠨ ᠡᠷᠡᠰ ᠮᠠᠭᠤ ᠬᠦᠦ ᠶ᠋ᠢᠨ ᠬᠢᠨᠢ ᠠᠮᠢ ᠶ᠋ᠢ ᠶᠡᠭᠦᠳᠬᠡᠬᠦ ᠭᠡᠵᠦ ᠶᠠᠪᠤᠵᠤ ᠪᠣᠢ ᠬᠡᠷᠡᠭ ᠶᠦᠮ᠃ ᠲᠡᠷᠭᠡ ᠲᠡᠷᠭᠡ ᠴᠠᠴᠠᠷ ᠠᠴᠢᠶᠠᠯᠠᠵᠤ᠂ ᠰᠠᠭᠤᠷᠢ ᠰᠠᠭᠤᠷᠢ ᠬᠣᠨᠢ ᠲᠠᠭᠤᠵᠤ᠂ ᠭᠠᠵᠠᠷ ᠲᠩᠷᠢ ᠶ᠋ᠢᠨ ᠰᠠᠪᠰᠠᠯᠭᠠ ᠰᠦᠪᠡᠯᠡᠨ ᠣᠳᠤᠭᠰᠠᠨ ᠮᠣᠷᠢᠲᠠᠨ ᠳᠠᠢᠴᠢᠳ ᠮᠢᠬᠠ ᠴᠢᠰᠤᠨ ᠤ᠋ ᠲᠠᠰᠤᠷᠬᠠᠢ ᠦᠭᠡ ᠦᠷᠡ ᠶ᠋ᠢᠨ ᠬᠢᠨᠢ ᠯᠡ ᠮᠠᠭᠤ ᠶ᠋ᠢ ᠦᠵᠡᠬᠦ ᠭᠡᠵᠦ ᠶᠠᠪᠤᠭᠠ ᠬᠡᠷᠡᠭ ᠶᠦᠮ᠃ ᠲᠡᠷᠡ ᠪᠡᠷ ᠨᠢᠯᠪᠤᠰᠤ ᠪᠠᠨ ᠨᠢᠭᠤᠨ ᠵᠠᠯᠭᠢᠵᠤ᠂ ᠬᠢᠮᠤᠰᠤ ᠪᠠᠨ ᠬᠤᠭᠤᠷᠠᠲᠠᠯᠠ ᠠᠯᠠᠭᠠ ᠪᠠᠨ ᠮᠠᠭᠠᠵᠢᠯᠠᠨ ᠪᠠᠢᠵᠤ ᠬᠣᠷᠬᠤᠨᠤᠭ ᠵᠢᠪᠦᠷ ᠡᠴᠡ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠦᠳᠡᠭᠰᠡᠨ ᠪᠢᠯᠡ᠃ ᠲᠥᠷᠥ ᠶ᠋ᠢᠨ ᠬᠥᠮᠦᠨ ᠲᠡᠢ ᠬᠠᠨᠢᠯᠠᠭᠰᠠᠨ ᠤ᠋ ᠵᠣᠪᠠᠯᠠᠩ ᠢ᠋ ᠪᠡᠶᠡ ᠪᠡᠷ ᠠᠮᠰᠠᠵᠤ᠂ ᠵᠢᠷᠦᠬᠡ ᠵᠦᠰᠦᠬᠦ ᠠᠭᠱᠠᠨ ᠢ᠋ ᠢᠨᠢᠶᠡᠵᠦ ᠦᠳᠡᠭᠰᠡᠨ ᠪᠣᠯᠠᠢ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠡᠨᠡᠯᠦᠨ ᠰᠢᠨᠠᠯᠵᠤ᠂ ᠡᠮᠲᠡᠷᠡᠨ ᠬᠡᠯᠲᠡᠷᠡᠬᠦ ᠶ᠋ᠢᠨ ᠴᠠᠭ ᠲᠤ᠌ ᠲᠣᠬᠣᠢ ᠶ᠋ᠢᠨ ᠴᠢᠨᠡᠭᠡ ᠦᠷᠡ ᠪᠡᠨ ᠡᠩᠭᠡᠷ ᠲᠡᠭᠡᠨ ᠲᠡᠪᠡᠷᠢᠵᠦ᠂
一 ᠠᠯᠢ ᠪᠣᠢ᠂ ᠮᠢᠨᠦ ᠮᠡᠷᠭᠡᠨ ᠪᠥᠭᠡᠳᠡᠢ ᠬᠡᠯᠡᠭᠡᠷᠡᠢ᠁ ᠬᠡᠯᠡᠭᠡᠷᠡᠢ᠁ ᠦᠭᠡ ᠠᠬᠠ ᠨᠢ ᠬᠠᠮᠢᠭᠠ ᠪᠠᠢᠨᠠ᠃ ᠦᠬᠦᠭᠰᠡᠨ ᠪᠣᠯᠪᠠ ᠤᠤ᠂ ᠠᠮᠢᠳᠤ ᠪᠣᠯᠪᠠ ᠤᠤ? ᠭᠡᠵᠦ ᠠᠰᠠᠭᠤᠨᠠ᠃ ᠨᠢᠳᠦ ᠳᠦᠭᠦᠷᠡᠩ ᠮᠠᠨᠳᠠᠭᠠᠷ ᠴᠠᠭᠠᠨ ᠬᠦᠦ ᠨᠢ ᠨᠢᠭᠡ ᠶᠡᠬᠡ ᠰᠢᠲᠦ ᠦᠭᠡᠢ ᠠᠮᠠ ᠭᠠᠷᠭᠠᠨ ᠮᠠᠭᠠᠰᠠᠢᠲᠠᠯᠠ ᠢᠨᠢᠶᠡᠵᠦ᠂
一 ᠢᠵᠢᠢ ᠠ᠋᠁ ᠢᠵᠢᠢ ᠠ᠋᠁ ᠭᠡᠬᠦ ᠪᠣᠯᠵᠤ ᠪᠥᠯᠥᠭᠡ᠃
一 ᠲᠡᠷᠡ ᠠ᠋ ᠬᠥᠶᠢ᠂ ᠡᠷᠡ ᠬᠥᠮᠦᠨ! ᠵᠠ᠂ ᠠᠯᠢ ᠪᠣᠢ᠂ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷᠠᠭ ᠢ᠋ ᠡᠵᠢ ᠳ᠋ᠡᠭᠡᠨ ᠬᠡᠯᠡ ᠳᠡ! ᠬᠡᠮᠡᠬᠦ ᠳ᠋ᠦ᠍ ᠱᠣᠷᠴᠢᠭᠢᠨᠠᠲᠠᠯᠠ ᠡᠪᠦᠷ ᠳᠡᠭᠡᠷᠡ ᠨᠢ ᠭᠣᠳᠣᠭᠣᠨᠠᠭᠤᠯᠬᠤ ᠨᠢ ᠪᠣᠢ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠮᠥᠨᠥᠬᠢ ᠵᠣᠪᠠᠨᠢᠯ ᠢ᠋ᠶ᠋ᠠᠨ ᠲᠦᠷ ᠵᠠᠭᠤᠷᠠ ᠮᠠᠷᠲᠠᠵᠤ ᠴᠠᠭᠠᠨ ᠴᠠᠢᠯᠭᠠᠨ ᠢ᠋ᠶ᠋ᠠᠷ ᠳᠡᠰ ᠳᠡᠰ ᠢᠨᠢᠶᠡᠬᠦ ᠪᠢᠯᠡ᠃ ᠰᠢᠭᠡᠴᠢᠬᠡᠭᠰᠡᠨ ᠬᠣᠢᠨᠠ ᠪᠠᠨ ᠵᠣᠬᠣᠢᠲᠠᠯᠠ ᠬᠠᠷᠠᠵᠤ ᠮᠠᠭᠠᠰᠠᠢᠲᠠᠯᠠ ᠢᠨᠢᠶᠡᠬᠦ ᠳ᠋ᠦ᠍ᠨᠢ ᠪᠦᠷ ᠨᠢᠯᠪᠤᠰᠤ ᠪᠠᠨ ᠭᠠᠷᠲᠠᠯᠠ ᠬᠥᠬᠥᠷᠡᠬᠦ ᠨᠢ ᠪᠣᠢ᠃ ᠡᠨᠡ ᠦᠶᠡᠰ ᠢ᠋ ᠲᠠᠭᠠᠷᠠᠭᠤᠯᠵᠤ ᠬᠣᠲᠣᠯᠠ ᠨᠣᠶᠠᠨ ᠣᠷᠣᠵᠤ ᠢᠷᠡᠬᠦ ᠪᠢᠯᠡ᠃ ᠲᠡᠷᠡ ᠪᠡᠷ ᠪᠠᠰᠠ ᠬᠦ᠌ ᠲᠠᠲᠠᠪᠤᠷᠢ ᠬᠠᠲᠤᠨ ᠤ᠋ ᠪᠠᠨ ᠡᠮᠦᠨᠡ ᠪᠤᠷᠤᠭᠤ ᠲᠠᠢ ᠮᠡᠲᠦ ᠬᠡᠯᠪᠡᠯᠵᠡᠬᠦ ᠠᠭᠠᠳ ᠥᠪᠡᠷ ᠦ᠋ᠨ ᠬᠢᠨᠢ ᠵᠠᠷᠯᠢᠭ ᠢ᠋ᠶ᠋ᠠᠷ᠂ ᠥᠪᠡᠷ ᠦ᠋ᠨ ᠬᠢᠨᠢ ᠲᠤᠭ ᠤ᠋ᠨ ᠴᠡᠷᠢᠭ ᠦ᠋ᠳ ᠬᠦᠦ ᠶ᠋ᠢ ᠨᠢ ᠠᠯᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠵᠤ ᠡᠮᠵᠡᠭᠯᠡᠨᠡ᠃ ᠴᠢᠩᠭᠢᠭᠡᠳ ᠴᠢᠷᠠᠢ ᠳᠠᠷᠤᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠬᠤ ᠳ᠋ᠤᠨᠢ ᠴᠢᠮᠡᠭᠡ ᠦᠭᠡᠢ ᠭᠠᠷᠤᠭᠠᠳ ᠶᠠᠪᠤᠴᠢᠬᠠᠳᠠᠭ ᠬᠠᠭᠠᠨᠲᠠᠨ᠂ ᠰᠠᠨᠠᠭᠠ ᠲᠠᠯᠪᠢᠭᠤᠷᠠᠵᠤ ᠭᠡᠷ ᠳᠦᠭᠦᠷᠡᠩ ᠢᠨᠢᠶᠡᠬᠦ ᠳ᠋ᠦ᠍ᠨᠢ ᠣᠷᠣᠭᠠᠳ ᠢᠷᠡᠬᠦ ᠨᠢ ᠪᠣᠢ᠃ ᠡᠢᠨ ᠬᠦᠦ ᠪᠡᠨ ᠬᠠᠷᠠᠨ ᠢᠨᠢᠶᠡᠵᠦ ᠬᠥᠭᠵᠢᠵᠦ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂ ᠲᠠᠲᠠᠪᠤᠷᠢ ᠬᠠᠲᠤᠨ ᠤ᠋ ᠴᠢᠷᠠᠢ ᠪᠠᠷᠤᠰᠬᠢᠵᠦ ᠭᠤᠨᠢᠭᠲᠠᠶᠠ ᠰᠠᠨᠠᠭᠠ ᠠᠯᠳᠠᠬᠤ ᠳ᠋ᠤ᠌᠂
— ᠪᠦᠯᠵᠢᠭᠡᠨ ᠠ᠋᠁ ᠭᠡᠵᠦ ᠨᠢᠭᠡ ᠶᠡᠬᠡ ᠴᠢᠬᠤᠯᠠ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠵᠦ ᠪᠣᠢ ᠮᠡᠲᠦ ᠳᠠᠭᠤᠳᠠᠭᠰᠠᠨ ᠢ᠋ᠶ᠋ᠠᠨ ᠰᠠᠢᠬᠠᠨ ᠨᠢᠳᠦ ᠤᠷᠤᠭᠤ ᠨᠢ ᠬᠠᠷᠠᠵᠤ ᠬᠠᠷᠠᠵᠤ ᠴᠢᠮᠡᠭᠡ ᠦᠭᠡᠢ ᠭᠠᠷᠴᠤ ᠣᠳᠤᠨᠠ᠃ ᠴᠢᠩᠭᠢᠵᠦ ᠭᠠᠨᠢᠬᠠᠷᠠᠭᠰᠠᠨ ᠰᠡᠳᠬᠢᠯ ᠠᠷᠭᠠᠳᠠᠬᠤ ᠨᠠᠮ ᠭᠦᠮᠬᠡᠨ ᠡᠳᠦᠷ ᠦ᠋ᠳ ᠢ᠋ᠶ᠋ᠡᠷ ᠬᠣᠲᠣᠯᠠ ᠬᠠᠭᠠᠨ ᠬᠥᠩᠬᠥᠷ ᠬᠣᠷᠴᠢ ᠶ᠋ᠢ ᠵᠠᠯᠠᠵᠤ ᠢᠷᠡᠭᠦᠯᠵᠡᠢ᠃ ᠲᠡᠷᠡ ᠪᠡᠷ ᠪᠠᠷᠤᠭ ᠪᠡᠶᠡ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡ ᠶ᠋ᠢ ᠮᠡᠳᠡᠬᠦ ᠪᠣᠯᠤᠭᠰᠠᠨ ᠰᠣᠯᠵᠢᠷ ᠡᠪᠡᠷ ᠲᠡᠢ ᠬᠤᠸᠠ ᠰᠠᠷᠯᠤᠭ ᠢ᠋ᠶ᠋ᠠᠨ ᠤᠨᠤᠵᠤ᠂ ᠬᠣᠲᠠᠨ ᠤ᠋ ᠨᠣᠬᠠᠳ ᠱᠤᠤᠭᠢᠭᠤᠯᠤᠨ᠂ ᠬᠣᠨᠢ ᠮᠠᠯ ᠦᠷᠭᠦᠭᠡᠨ ᠢᠷᠡᠵᠦ ᠲᠤᠬᠠᠯᠠᠭᠰᠠᠨ ᠠᠪᠠᠢ᠃ ᠬᠠᠭᠠᠨ ᠡᠵᠡᠨ ᠶᠡᠬᠡ ᠦᠷᠭᠦᠭᠡᠨ ᠳ᠋ᠡᠭᠡᠨ ᠡᠪᠦᠭᠡᠨ ᠬᠣᠷᠴᠢ ᠪᠠᠨ ᠤᠷᠢᠵᠤ᠂
— ᠬᠣᠷᠴᠢ ᠮᠢᠨᠢ᠂ ᠪᠠᠭᠠ ᠦᠷᠭᠦᠭᠡᠨ ᠦ᠌ ᠬᠡᠷᠡᠭ ᠢ᠋ᠶ᠋ᠡᠷ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠤᠷᠢᠪᠠ᠂ ᠲᠠᠨ ᠢ᠋ ᠭᠡᠬᠦ ᠳ᠋ᠦ᠍ ᠵᠤᠨ ᠤ᠋ ᠭᠤᠷᠪᠠᠨ ᠰᠠᠷᠠ ᠦᠯᠦ ᠲᠠᠢᠯᠬᠤ ᠦᠰᠦ ᠲᠡᠢ ᠳᠡᠪᠡᠯ ᠢ᠋ᠶ᠋ᠡᠨ ᠬᠥᠭᠯᠡᠷᠡᠭᠦᠯᠦᠭᠰᠡᠨ ᠬᠣᠷᠴᠢ ᠰᠥᠭᠥᠳᠦᠨ᠂
— ᠠᠯᠢ ᠠᠯᠢ ᠥᠷᠭᠥᠭᠡ ᠬᠠᠭᠠᠨ ᠲᠠᠨ ᠤ᠋ ᠬᠢ᠂ ᠠᠮᠢ ᠨᠠᠰᠤ ᠮᠢᠨᠢ ᠳᠡᠭᠡᠷᠡ ᠨᠢ ᠲᠠᠨ ᠤ᠋ ᠬᠢ᠃ ᠬᠠᠮᠢᠭᠠ ᠪᠠᠨ ᠤᠷᠢᠵᠤ᠂ ᠶᠠᠭᠤᠨ ᠳ᠋ᠠᠭᠠᠨ ᠬᠡᠷᠡᠭᠯᠡᠬᠦ ᠨᠢ ᠬᠠᠭᠠᠨ ᠲᠠᠨ ᠤ᠋ ᠬᠡᠷᠡᠭ ᠭᠡᠬᠦ ᠳ᠋ᠦ᠍ ᠬᠣᠲᠣᠯᠠ ᠬᠥᠭᠵᠢᠯᠲᠡᠢ ᠢᠨᠢᠶᠡᠵᠦ᠂
— ᠭᠦᠶᠦᠯᠭᠡᠨ ᠤᠬᠠᠭᠠᠨ ᠲᠠᠢ᠂ ᠴᠠᠢᠯᠭᠠᠨ ᠰᠡᠳᠬᠢᠯ ᠲᠡᠢ ᠡᠷᠡ ᠰᠠᠨᠵᠠᠢ᠂ ᠲᠠ ᠭᠡᠰᠡᠨ ᠢ᠋ᠶ᠋ᠡᠨ ᠤᠬᠤᠰᠬᠢᠨ ᠪᠣᠰᠬᠤ ᠳ᠋ᠤ᠌ ᠬᠠᠭᠠᠨ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠳᠡᠯᠬᠦ ᠠᠶᠠᠭᠯᠠᠬᠤ ᠪᠦᠬᠦᠨ ᠢ᠋ ᠠᠵᠢᠨ ᠰᠠᠭᠤᠭᠰᠠᠨ ᠠᠯᠲᠠᠨ ᠬᠥᠪᠡᠭᠦᠨ᠂
— ᠪᠢ ᠦᠯᠢᠭᠡᠷ ᠰᠣᠨᠣᠰᠰᠤ! ᠭᠡᠪᠡ᠃ ᠡᠨᠡ ᠦᠭᠡ ᠬᠥᠪᠡᠭᠦᠨ ᠦ᠌ ᠥᠪᠡᠷ ᠦ᠋ᠨ ᠬᠢᠨᠢ ᠦᠭᠡ ᠪᠢᠰᠢ ᠠᠭᠠᠳ ᠶᠡᠬᠡ ᠬᠠᠲᠤᠨ ᠤ᠋ ᠵᠢᠭᠠᠵᠤ ᠦᠭᠭᠦᠭᠰᠡᠨ ᠰᠠᠨᠠᠭᠠ ᠮᠥᠨ ᠲᠤᠯᠠ ᠬᠣᠲᠣᠯᠠ᠂
一 ᠬᠠᠨ ᠬᠦᠦ ᠲᠣᠭᠲᠠᠵᠤ ᠬᠠᠢᠷᠠᠯᠠ! ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠷᠡᠭᠦᠯ ᠰᠠᠯᠬᠢ ᠦᠨᠦᠷᠲᠦᠭᠰᠡᠨ ᠵᠤᠯᠠᠢ ᠳᠡᠭᠡᠷᠡ ᠦᠨᠦᠷᠯᠡᠭᠰᠡᠨ ᠢ᠋ᠶ᠋ᠡᠨ᠂ 一 ᠲᠤᠯᠭᠠᠲᠠᠢ ᠣᠳᠴᠢᠬᠢᠨ ᠳ᠋ᠤ᠌ ᠰᠣᠨᠣᠰᠬᠠᠬᠤ ᠶᠤᠮ᠃ ᠮᠢᠨᠦ ᠬᠦᠦ ᠪᠦᠭᠡᠴᠦᠭ ᠨᠢᠰᠠᠯᠵᠤ ᠪᠠᠢ ᠬᠡᠮᠡᠭᠡᠳ ᠭᠠᠷᠴᠤ ᠪᠢᠯᠡ᠃ ᠡᠢᠨ ᠲᠠᠲᠠᠪᠤᠷᠢ ᠬᠠᠲᠤᠨ ᠬᠠᠷᠴᠠᠭᠠᠢ ᠳ᠋ᠤ᠌ ᠡᠭᠡᠷᠡᠭᠦᠯᠦᠭᠰᠡᠨ ᠪᠣᠯᠵᠣᠮᠣᠷ ᠰᠢᠭ᠋ ᠪᠦᠯᠲᠡᠭᠡᠨᠡᠨ ᠰᠠᠭᠤᠬᠤ ᠪᠠᠭᠠ ᠦᠷᠭᠦᠭᠡᠨ ᠳ᠋ᠡᠭᠡᠨ ᠢᠷᠡᠬᠦ ᠳ᠋ᠦ᠍ ᠪᠦᠯᠵᠢᠭᠡᠨ ᠭᠤᠸᠠ ᠵᠦᠯᠲᠦ ᠮᠢᠬᠠ ᠴᠢᠨᠠᠨ ᠲᠠᠪᠠᠭᠯᠠᠵᠤ ᠵᠢᠷᠦᠬᠡᠨ ᠭᠦᠴᠡᠨ ᠳ᠋ᠦ᠍ ᠰᠢᠷᠠ ᠲᠣᠰᠣ ᠲᠠᠢ ᠬᠠᠯᠠᠭᠠᠭᠰᠠᠨ ᠠᠷᠢᠬᠢ ᠬᠢᠵᠦ ᠲᠠᠯᠪᠢᠭᠰᠠᠨ ᠪᠠᠢᠪᠠ᠃ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠬᠣᠲᠣᠯᠠ ᠪᠠᠷᠰ ᠤ᠋ᠨ ᠠᠷᠠᠰᠤᠨ ᠲᠦᠰᠢᠯᠭᠡ ᠲᠣᠬᠣᠢᠯᠳᠠᠨ ᠬᠠᠵᠠᠭᠤᠯᠳᠠᠵᠤ᠂ ᠮᠥᠩᠭᠥᠨ ᠲᠠᠭᠱᠠ ᠲᠠᠢ ᠰᠢᠮᠡ ᠶ᠋ᠢᠨ ᠶᠠᠭᠤᠮᠠ ᠰᠢᠮᠡᠵᠦ ᠭᠤᠷᠪᠠᠨ ᠡᠳᠦᠷ᠂ ᠭᠤᠷᠪᠠᠨ ᠰᠥᠨᠢ ᠦᠦᠬᠡ ᠲᠡᠦᠬᠡ ᠰᠣᠨᠣᠰᠴᠤ ᠠᠪᠠᠢ᠃ ᠡᠯᠦᠨᠴᠡ ᠬᠤᠯᠤᠨᠴᠠ ᠶ᠋ᠢᠨ ᠡᠪᠦᠳᠦᠭ ᠲᠦᠰᠢᠭᠰᠡᠨ ᠡᠭᠡᠰᠢᠭ ᠦ᠋ᠨ ᠪᠤᠷᠬᠠᠨ ᠡᠪᠦᠭᠡᠨ ᠬᠣᠷᠴᠢ ᠦᠶᠡ ᠳᠠᠮᠵᠢᠭᠤᠯᠤᠨ ᠶᠠᠷᠢᠵᠤ᠂ ᠦᠷᠡ ᠳᠠᠮᠨᠠᠭᠤᠯᠤᠨ ᠬᠡᠯᠡᠵᠦ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠪᠠᠷᠢᠨᠲᠠᠭᠯᠠᠵᠤ ᠢᠷᠡᠭᠰᠡᠨ ᠦᠨᠡᠨ ᠲᠡᠦᠬᠡ ᠶ᠋ᠢ ᠵᠥᠪ ᠶᠠᠷᠢᠬᠤ ᠠᠷᠢᠭᠤᠨ ᠵᠠᠶᠢᠭ ᠲᠠᠢ ᠶᠤᠮ᠃
ᠲᠡᠷᠡ ᠯᠠ ᠶᠣᠰᠣᠭᠠᠷ ᠬᠥᠩᠬᠥᠷ ᠬᠣᠷᠴᠢ ᠮᠠᠨᠳᠤᠵᠤ ᠪᠠᠭᠤᠷᠠᠭᠰᠠᠨ ᠶᠡᠬᠡ ᠲᠡᠦᠬᠡ ᠶ᠋ᠢ ᠬᠤᠨ ᠬᠤᠭᠤᠷ ᠤ᠋ᠨ ᠭᠠᠩᠭᠠᠨᠠᠨ ᠭᠤᠩᠭᠠᠨᠠᠬᠤ ᠠᠶᠠᠯᠭᠤᠨ ᠳ᠋ᠤ᠌ ᠨᠠᠮᠤᠭᠤᠬᠠᠨ ᠬᠦᠦᠷᠨᠢᠵᠦ ᠠᠪᠠᠢ᠃ ᠲᠤᠯᠭᠠᠨ ᠤ᠋ ᠭᠠᠯ ᠪᠣᠳᠣᠯᠭᠠᠰᠢᠷᠠᠨ ᠰᠣᠨᠣᠰᠬᠤ ᠮᠡᠲᠦ ᠠᠶᠠᠳᠠᠭᠤᠬᠠᠨ ᠪᠠᠳᠮᠠᠯᠠᠵᠤ᠂ ᠨᠣᠶᠠᠨ ᠤ᠋ ᠰᠡᠭᠦᠳᠡᠷ ᠨᠢ ᠬᠠᠨᠠ ᠳᠠᠮᠵᠢᠨ ᠤᠷᠲᠤᠰᠬᠤ ᠳ᠋ᠠᠭᠠᠨ ᠪᠥᠬᠥᠢᠨ ᠴᠢᠬᠢ ᠲᠠᠯᠪᠢᠵᠤ ᠰᠣᠨᠣᠰᠪᠠ᠃ ᠬᠣᠲᠣᠯᠠ ᠬᠥᠭᠵᠢᠯᠲᠡᠢ ᠦᠶᠡ ᠳ᠋ᠦ᠍ ᠬᠡᠦᠬᠡᠳ ᠰᠢᠭ ᠬᠥᠬᠥᠷᠡᠵᠦ᠂ ᠭᠤᠨᠢᠭ ᠲᠠᠢ ᠦᠶᠡ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠮᠡᠯᠲᠡᠭᠡᠨᠡᠭᠦᠯᠦᠨ ᠲᠠᠭᠠᠯᠠᠵᠤ ᠠᠵᠤᠭᠤ᠃ ᠲᠡᠷᠡ ᠪᠡᠷ ᠢᠨᠢᠶᠡᠬᠦ ᠳ᠋ᠡᠭᠡᠨ ᠴᠦ᠍᠂ ᠤᠬᠢᠯᠠᠬᠤ ᠳ᠋ᠠᠭᠠᠨ ᠴᠤ᠌ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠪᠦᠯᠵᠢᠭᠡᠨ ᠬᠠᠲᠤᠨ ᠢ᠋ ᠬᠢᠯᠠᠮ ᠬᠢᠯᠠᠮᠬᠢᠨ ᠬᠠᠷᠠᠵᠤ᠂ ᠭᠤᠨᠢᠭ ᠢ᠋ᠶ᠋ᠠᠨ ᠮᠠᠷᠲᠠᠨ ᠮᠢᠰᠢᠯᠵᠡᠵᠦ ᠪᠠᠢᠪᠠᠯ ᠭᠠᠭᠴᠠ ᠨᠠᠷᠠ ᠨᠢ ᠭᠠᠷᠬᠤ ᠪᠢᠯᠡ᠃ ᠶᠡᠷᠦ ᠪᠦᠯᠵᠢᠭᠡᠨ ᠦ᠌ ᠭᠤᠳᠤᠷᠠᠭᠰᠠᠨ ᠰᠡᠳᠬᠢᠯ ᠢ᠋ ᠦᠯᠢᠭᠡᠷ ᠲᠡᠦᠬᠡ ᠪᠡᠷ ᠰᠠᠲᠠᠭᠠᠷᠠᠭᠤᠯᠬᠤ ᠭᠡᠵᠦ ᠰᠠᠨᠠᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠪᠠᠰᠠ ᠲᠠᠲ᠋ᠠᠷ ᠤᠷᠤᠭᠤ ᠴᠡᠷᠢᠭ ᠲᠡᠷᠢᠭᠦᠯᠡᠵᠦ ᠮᠣᠷᠳᠠᠭᠰᠠᠨ ᠠᠬᠠᠨ ᠳᠡᠭᠦᠦᠰ ᠦ᠋ᠨ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠪᠢᠲᠡᠭᠦᠬᠡᠨ ᠪᠡᠲᠡᠭᠢᠷᠡᠬᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠷᠭᠠᠳᠠᠵᠤ᠂ ᠠᠷᠤ ᠳ᠋ᠠᠭᠠᠨ ᠠᠮᠢᠳᠤᠷᠠᠯ ᠲᠠᠢ ᠬᠡᠳᠦᠢ ᠴᠦ᠍ ᠠᠷᠪᠠᠲᠤ ᠠᠷᠪᠠᠲᠤ ᠪᠠᠷ ᠢ᠋ᠶ᠋ᠠᠨ ᠭᠠᠯ ᠪᠣᠯᠵᠤ ᠣᠳᠤᠭᠰᠠᠨ ᠡᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠵᠣᠪᠠᠨᠢᠨ ᠰᠢᠨᠠᠯᠬᠤ ᠪᠠᠨ ᠮᠠᠷᠲᠠᠩᠨᠠᠬᠤ ᠪᠣᠳᠣᠯ ᠲᠠᠢ ᠪᠠᠢᠪᠠ᠃ ᠶᠡᠷᠦ ᠠᠯᠢ ᠨᠢ ᠦᠬᠦᠵᠦ ᠦᠷᠡᠭᠳᠡᠬᠦ ᠶ᠋ᠢ ᠬᠡᠨ ᠮᠡᠳᠡᠬᠦ ᠪᠢᠯᠡ᠃ ᠬᠣᠲᠣᠯᠠ ᠬᠠᠭᠠᠨ ᠤ᠋ ᠬᠦᠷᠢᠶᠡᠨ ᠳ᠋ᠦ᠍ ᠨᠢᠴᠦᠭᠦᠨ ᠱᠠᠯᠳᠠᠩ ᠭᠦᠶᠦᠯᠳᠦᠬᠦ ᠪᠤᠷᠵᠢᠭᠢᠷ ᠪᠣᠷᠣ ᠵᠢᠭᠠᠯ ᠤ᠋ᠳ ᠤ᠋ᠨ ᠬᠡᠨ ᠨᠢ ᠥᠨᠥᠴᠢᠷᠡᠬᠦ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠨᠡ᠃ ᠰᠡᠩᠬᠦᠷ ᠭᠣᠷᠣᠬᠠᠨ ᠠ᠋ᠴᠠ ᠳᠠᠰᠢᠮᠠᠭ ᠳᠠᠰᠢᠮᠠᠭ ᠤᠰᠤ ᠵᠥᠭᠡᠭᠡᠨ ᠱᠠᠭᠠᠵᠠᠭᠠᠢ ᠰᠢᠭ᠋ ᠱᠤᠯᠤᠭᠠᠨᠠᠯᠳᠤᠬᠤ ᠡᠬᠡᠨᠡᠷ ᠡᠮᠡᠰ ᠦ᠋ᠨ ᠠᠯᠢ ᠨᠢ ᠪᠡᠯᠪᠡᠰᠦᠷᠡᠬᠦ ᠶ᠋ᠢ ᠶᠠᠭᠠᠬᠢᠨ ᠬᠡᠯᠡᠵᠦ ᠮᠡᠳᠡᠨᠡ᠃ ᠲᠡᠢᠨ ᠪᠣᠳᠣᠬᠤ ᠠ᠋ᠴᠠ ᠭᠤᠨᠢᠭ ᠲᠠᠢ ᠠᠭᠠᠳ ᠤᠭ ᠤ᠋ᠨ ᠦᠷᠦ ᠵᠥᠭᠡᠯᠡᠨ ᠬᠣᠲᠣᠯᠠ ᠬᠠᠭᠠᠨ ᠦᠦᠬᠡ ᠲᠡᠦᠬᠡ ᠶ᠋ᠢᠨ ᠠᠯᠤᠰ ᠲᠤ᠌ ᠶᠠᠭᠠᠷᠠᠭᠰᠠᠨ ᠤᠴᠢᠷ ᠡᠢᠮᠦ ᠶᠦᠮ᠃ ᠲᠡᠷᠡ ᠪᠡᠷ ᠮᠣᠳᠣᠨ ᠮᠡᠷᠭᠡᠨ ᠴᠠᠨ ᠢᠦᠢ ᠲᠡᠢ ᠵᠠᠬᠠ ᠶ᠋ᠢᠨ ᠬᠠᠷᠠ ᠣᠪᠣᠭᠠᠨ ᠳᠡᠭᠡᠷᠡ ᠨᠢᠭᠡ᠂ ᠬᠠᠨ ᠤᠯᠤᠰ ᠤ᠋ᠨ ᠭᠦᠩᠵᠦ ᠶ᠋ᠢᠨ ᠬᠢᠨᠢ ᠦᠷᠭᠦᠭᠡᠨ ᠳ᠋ᠦ᠍ ᠨᠢᠭᠡ ᠠᠭᠤᠯᠵᠠᠬᠤ ᠰᠢᠭ᠋ ᠪᠣᠯᠵᠤ《ᠡᠷᠡ ᠬᠥᠮᠦᠨ᠂ ᠡᠬᠡ ᠬᠥᠮᠦᠨ ᠦ᠌ ᠡᠩᠭᠡᠷ ᠲᠦ᠍ ᠤᠷᠭᠤᠵᠤ᠂ ᠡᠮᠡ ᠬᠥᠮᠦᠨ ᠦ᠌ ᠡᠪᠦᠷ ᠲᠦ᠍ ᠤᠨᠠᠳᠠᠭ ᠭᠡᠵᠦ ᠦᠨᠡᠨ ᠶᠦᠮ ᠳᠡ》 ᠭᠡᠮᠡᠨ ᠪᠣᠳᠣᠭᠰᠠᠨ ᠨᠢ ᠪᠣᠢ᠃ ᠲᠡᠷᠡ ᠪᠡᠷ ᠴᠢᠯᠮᠠ ᠰᠡᠴᠡᠨ ᠡᠪᠦᠭᠡ ᠲᠡᠢ ᠪᠡᠨ ᠤᠨᠤᠨ ᠮᠥᠷᠡᠨ ᠦ᠌ ᠡᠬᠢ ᠣᠯᠠᠨ ᠭᠣᠷᠣᠬᠠ ᠶ᠋ᠢᠨ ᠴᠢᠳᠬᠤᠯᠠᠩ ᠳᠡᠭᠡᠷᠡ ᠨᠢᠭᠡ ᠠᠭᠤᠯᠵᠠᠵᠤ᠂ ᠶᠡᠬᠡ ᠬᠣᠷᠢᠭ ᠤ᠋ᠨ ᠬᠥᠬᠡ ᠠᠭᠤᠯᠠᠰ ᠤ᠋ᠨ ᠪᠠᠯ ᠳ᠋ᠤ᠌ ᠲᠥᠷᠥᠭ ᠦ᠋ᠳ ᠲᠡᠢ ᠨᠦᠳᠦᠯᠳᠦᠵᠦ ᠪᠠᠢᠬᠤ ᠳ᠋ᠤᠨᠢ ᠨᠢᠭᠡ ᠲᠠᠭᠠᠷᠠᠬᠤ ᠰᠢᠭ᠋ ᠪᠣᠯᠵᠤ《ᠬᠠᠭᠠᠨ ᠬᠥᠮᠦᠨ ᠦ᠌ ᠤᠯᠠᠭᠠᠨ ᠭᠣᠣᠯ ᠬᠠᠷᠠᠴᠤ ᠬᠥᠮᠦᠨ ᠦ᠌ ᠬᠢ ᠡᠴᠡ ᠨᠠᠷᠢᠨ ᠪᠠᠢᠬᠤ ᠶᠤᠮ ᠳᠠ》 ᠭᠡᠵᠦ ᠰᠠᠨᠠᠭᠰᠠᠨ ᠨᠢ ᠪᠣᠢ᠃ ᠬᠤᠨ ᠬᠤᠭᠤᠷ ᠬᠦᠯᠦᠭᠯᠡᠵᠦ ᠢᠷᠡᠭᠰᠡᠨ ᠡᠯᠦᠨᠴᠡ ᠬᠤᠯᠤᠨᠴᠠ ᠲᠠᠢ ᠡᠢᠨ ᠠᠭᠤᠯᠵᠠᠬᠤ ᠳ᠋ᠤ᠌ ᠬᠡᠢ ᠮᠣᠷᠢ ᠰᠡᠷᠭᠦᠵᠦ᠂ ᠤᠬᠠᠭᠠᠨ ᠴᠠᠯᠮᠠᠨᠠ᠃ ᠴᠢᠩᠭᠢᠲᠡᠯᠡ ᠬᠠᠭᠠᠨ ᠬᠦᠷᠢᠶᠡᠨ ᠦ᠌ ᠡᠮᠡᠰ ᠬᠡᠦᠬᠡᠨ ᠨᠦ᠍ᠭᠦᠳ ᠪᠤᠵᠢᠭᠢᠨᠠᠨ ᠰᠢᠪᠡᠷ ᠠᠪᠢᠷ ᠭᠡᠯᠴᠡᠨ᠂ ᠲᠦᠳᠡᠬᠡᠨ ᠬᠠᠭᠠᠨ ᠤ᠋ ᠬᠥᠲᠥᠴᠢ ᠪᠠᠭᠠᠲᠤᠷ ᠣᠷᠣᠵᠤ ᠢᠷᠡᠨ᠂
— ᠡᠯᠴᠢ ᠢᠷᠡᠯᠡ! ᠭᠡᠵᠦ ᠠᠢᠯᠠᠳᠬᠠᠬᠤ ᠦᠶᠡᠰ ᠶᠡᠬᠡ ᠬᠠᠲᠤᠨ ᠤ᠋ ᠤᠬᠢᠯᠠᠨ ᠴᠢᠷᠠᠯᠠᠬᠤ᠂ ᠠᠯᠲᠠᠨ ᠠᠶᠤᠭᠰᠠᠨ ᠳ᠋ᠠᠭᠠᠨ ᠳᠠᠭᠠᠵᠤ ᠪᠠᠷᠬᠢᠷᠠᠬᠤ ᠰᠣᠨᠣᠰᠳᠠᠪᠠ᠃ ᠬᠣᠲᠣᠯᠠ ᠲᠦᠭᠰᠢᠨ ᠥᠨᠳᠡᠢᠲᠡᠯᠡ ᠡᠯᠴᠢ ᠪᠣᠱᠣᠭᠠ ᠳᠠᠪᠠᠨ ᠰᠥᠭᠥᠳᠴᠦ᠂
— ᠬᠠᠭᠠᠨ ᠲᠠ ᠥᠷᠥᠰᠢᠶᠡ! ᠬᠠᠷᠠ ᠬᠡᠷᠢᠶᠡ ᠮᠡᠲᠦ ᠬᠠᠷᠠ ᠶᠠᠯᠠ ᠠᠪᠴᠢᠷᠠᠪᠠ᠂ ᠪᠢ ᠭᠡᠬᠦ ᠳ᠋ᠦ᠍ ᠪᠦᠯᠵᠢᠭᠡᠨ ᠬᠠᠲᠤᠨ ᠵᠢᠭᠠᠯ ᠬᠦᠦ ᠶ᠋ᠢ ᠡᠯᠢᠭᠡᠨ ᠳ᠋ᠡᠭᠡᠨ ᠲᠠᠰᠤ ᠲᠡᠪᠡᠷᠢᠨ ᠭᠠᠯ ᠤ᠋ᠨ ᠢᠯᠴᠢ ᠪᠡᠷ ᠠᠷᠢᠭᠤᠯᠠᠪᠠ᠃ ᠡᠯᠴᠢ᠂
— ᠲᠣᠳᠣᠢᠨ ᠣᠳᠴᠢᠬᠢᠨ ᠲᠠᠲ᠋ᠠᠷ ᠲᠤ᠌ ᠠᠯᠠᠭᠳᠠᠪᠠ! ᠭᠡᠬᠦ ᠳ᠋ᠦ᠍ ᠬᠣᠲᠣᠯᠠ ᠬᠠᠭᠠᠨ ᠤᠬᠤᠰᠬᠢᠨ ᠪᠣᠰᠴᠤ᠂
— ᠶᠠᠭᠤ ᠭᠡᠨᠡ ᠠ᠋? ᠬᠡᠮᠡᠭᠰᠡᠨ ᠢ᠋ᠶ᠋ᠡᠨ ᠬᠥᠮᠥᠭᠡᠢ ᠵᠠᠭᠤᠨ ᠬᠥᠮᠥᠰᠬᠡ ᠵᠠᠩᠭᠢᠳᠴᠤ᠂
— ᠬᠠᠪᠤᠯ ᠤ᠋ᠨ ᠳᠣᠯᠣᠭᠠᠨ ᠬᠦᠦ ᠶ᠋ᠢ ᠠᠯᠠᠨ ᠪᠠᠷᠠᠬᠤ ᠠ᠋ᠴᠠ ᠪᠤᠰᠤ ᠢᠯᠠᠨ ᠳᠡᠢᠯᠬᠦ ᠪᠢᠰᠢ ᠳᠡ! ᠭᠡᠵᠦ ᠰᠢᠵᠠᠷᠠᠭᠤᠨ ᠥᠭᠦᠯᠡᠭᠰᠡᠨ ᠢ᠋ᠶ᠋ᠡᠨ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠭᠠᠷᠬᠤ ᠳ᠋ᠤ᠌ ᠪᠦᠭᠦᠳᠡ ᠭᠠᠳᠠᠭᠠᠯᠠᠪᠠ᠃ ᠬᠦᠷᠢᠶᠡ ᠲᠡᠷᠡ ᠠᠶᠠ ᠪᠠᠷ ᠢ᠋ᠶ᠋ᠠᠨ ᠬᠥᠯ ᠪᠣᠯᠵᠠᠢ᠃ ᠬᠠᠲᠤᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠦᠷᠢᠶᠡ ᠳᠠᠭᠠᠭᠠᠭᠰᠠᠨ ᠪᠢᠨᠲᠠ ᠨᠣᠶᠠᠨ ᠪᠦᠭᠦᠳᠡ ᠶ᠋ᠢ ᠪᠤᠰᠬᠠᠵᠤ᠂ ᠬᠣᠷᠢᠭ ᠣᠷᠣᠬᠤ ᠬᠥᠰᠬᠡ ᠠᠴᠢᠶᠠᠯᠠᠵᠤ᠂ ᠬᠦᠯᠦᠭ ᠮᠣᠷᠢᠳ ᠪᠡᠷᠢᠯᠡᠨ ᠬᠠᠵᠠᠭᠠᠷᠯᠠᠵᠤ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠬᠠᠭᠠᠨ ᠤ᠋ ᠪᠡᠶᠡ ᠪᠡᠷ ᠭᠦᠶᠦᠨ ᠢᠷᠡᠵᠦ᠂
— ᠬᠠᠭᠠᠨᠲᠠᠨ ᠮᠢᠨᠢ᠂ ᠲᠣᠳᠣᠢᠨ ᠣᠳᠴᠢᠭᠢᠨ᠁ ᠭᠡᠬᠦ ᠳ᠋ᠦ᠍ ᠬᠣᠲᠣᠯᠠ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠤᠨ᠂
— ᠪᠢᠨᠲᠠ ᠨᠣᠶᠠᠨ᠂ ᠲᠠ ᠮᠣᠷᠳᠠᠨᠠ ᠤᠤ ᠳᠠ᠃ ᠬᠠᠷᠯᠢ ᠺᠤ ᠬᠠᠲᠤᠨ ᠢᠵᠢᠢ ᠶ᠋ᠢᠨ ᠬᠦᠷᠢᠶᠡ ᠰᠡᠩᠬᠦᠷ ᠭᠣᠷᠣᠬᠠᠨ ᠤ᠋ ᠬᠥᠯ ᠳ᠋ᠦ᠍ ᠨᠤᠲᠤᠭᠯᠠᠵᠤ ᠪᠣᠢ᠃ ᠢᠵᠢᠢ ᠳ᠋ᠦ᠍ ᠰᠤᠷᠠᠭ ᠲᠤᠭᠤᠯᠭᠠ! ᠭᠡᠰᠡᠨ ᠢ᠋ᠶ᠋ᠡᠨ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠬᠤ ᠦᠭᠡᠢ ᠮᠣᠷᠢᠨ ᠳᠡᠯ ᠳᠡᠭᠡᠷᠡ ᠬᠡᠢᠰᠴᠦ ᠶᠠᠪᠤᠳᠠᠭ ᠪᠠᠭᠠ ᠬᠠᠲᠤᠨ ᠢ᠋ᠶ᠋ᠠᠨ ᠳᠠᠭᠤᠳᠠᠨ᠂
— ᠳᠡᠯᠡᠮᠡᠨ ᠮᠢᠨᠢ᠂ ᠬᠠᠷᠯᠢ ᠺᠤ ᠢᠵᠢᠢ ᠳ᠋ᠦ᠍ ᠰᠤᠷᠠᠭ ᠳᠣᠭᠣᠯᠭᠠᠬᠤ ᠪᠠᠭ ᠲᠡᠷᠢᠭᠦᠯᠡᠵᠦ ᠶᠠᠪᠤᠨᠠ ᠤᠤ ᠳᠠ᠃ ᠤᠬᠠᠭᠠᠨ ᠠᠯᠳᠠᠭᠠᠳ ᠤᠨᠠᠴᠢᠬᠠᠳᠠᠭ ᠶᠤᠮ ᠭᠡᠬᠦ ᠳ᠋ᠦ᠍ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠦᠰᠢᠬᠦ ᠪᠡᠷᠭᠡᠨ ᠳᠡᠷᠭᠡᠳᠡ ᠨᠢ ᠪᠠᠢᠪᠠᠯ ᠵᠦᠭᠡᠷ ᠰᠠᠨᠵᠢ ᠭᠡᠬᠦ ᠳ᠋ᠦ᠍ ᠬᠠᠲᠤᠨ ᠰᠢᠯᠪᠡᠯᠵᠡᠨ᠂
— ᠪᠦᠯᠵᠢᠭᠡᠨ ᠡᠮᠡ ᠶᠠᠪᠤᠬᠤ ᠦᠭᠡᠢ ᠶᠦᠮ ᠰᠠᠨ ᠤᠤ? ᠬᠡᠮᠡᠵᠡᠢ᠃ ᠬᠣᠲᠣᠯᠠ ᠨᠣᠶᠠᠨ ᠪᠥᠭᠡᠷᠡᠨ ᠳ᠋ᠦ᠍ᠨᠢ ᠪᠦᠯᠲᠡᠭᠡᠨᠡᠨ ᠨᠠᠭᠠᠯᠳᠤᠬᠤ ᠲᠠᠲᠠᠪᠤᠷᠢ ᠬᠠᠲᠤᠨ ᠢ᠋ᠶ᠋ᠠᠨ ᠬᠠᠷᠠᠪᠠᠯ᠂ ᠠᠶᠤᠵᠤ ᠰᠢᠷᠪᠡᠭᠡᠲᠦᠭᠰᠡᠨ ᠪᠦᠰᠡᠭᠦᠢ ᠠᠮᠢᠲᠠᠨ ᠠᠯᠠᠭ ᠦᠷᠡ ᠪᠡᠨ ᠲᠠᠰᠤ ᠲᠡᠪᠡᠷᠢᠨ ᠬᠥᠮᠦᠨ ᠬᠥᠮᠦᠨ ᠢ᠋ ᠴᠢᠷᠠᠢᠴᠢᠯᠠᠩᠭᠤᠢ ᠬᠠᠷᠠᠵᠤ ᠵᠣᠭᠰᠣᠪᠠ᠃ ᠲᠡᠷᠡ ᠪᠡᠷ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠲᠣᠳᠣᠢᠨ ᠨᠣᠶᠠᠨ ᠢ᠋ ᠠᠯᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠭᠡᠮ ᠵᠢᠮᠡ ᠶ᠋ᠢ ᠮᠡᠳᠡᠷᠡᠵᠦ᠂ ᠶᠠᠯᠠ ᠶᠠᠩᠬᠠᠨ ᠢ᠋ ᠡᠭᠦᠷᠴᠦ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠱᠠᠩᠬᠤᠨ ᠳ᠋ᠤ᠌ ᠨᠠᠰᠤᠨ ᠤ᠋ ᠴᠠᠭᠠᠨ ᠰᠢᠪᠠᠭᠤᠳ ᠡᠭᠦᠷ ᠢ᠋ᠶ᠋ᠡᠨ ᠵᠠᠰᠠᠭᠰᠠᠨ ᠢ᠋ ᠰᠠᠶᠢ ᠯᠠ ᠠᠩᠵᠠᠭᠠᠷᠠᠭᠰᠠᠨ ᠬᠣᠲᠣᠯᠠ《ᠵᠢᠷᠭᠠᠵᠤ ᠴᠢᠳᠠᠯ ᠦᠭᠡᠢ ᠥᠲᠡᠯᠦᠯᠡ ᠳᠡ》 ᠭᠡᠵᠦ ᠬᠠᠷᠠᠭᠤᠰᠤᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠭᠠᠯ ᠳᠥᠯᠥ ᠰᠢᠭ ᠠᠭᠠᠰᠢᠯᠠᠬᠤ ᠡᠷᠬᠡ ᠬᠠᠲᠤᠨ ᠳ᠋ᠤ᠌ ᠬᠠᠨᠳᠤᠨ᠂
— ᠪᠦᠯᠵᠢᠭᠡᠨ ᠨᠢᠯᠬᠠ ᠨᠣᠢᠲᠠᠨ ᠬᠡᠦᠬᠡᠳ ᠲᠡᠢ ᠶᠠᠭᠠᠬᠢᠵᠤ ᠶᠠᠪᠤᠬᠤ ᠪᠣᠢ ᠳᠠ᠃ ᠴᠢ ᠶᠠᠪᠤᠲᠤᠭᠠᠢ! ᠬᠡᠮᠡᠪᠡ᠃ ᠲᠠᠯᠠᠮᠠᠨ ᠬᠠᠲᠤᠨ《ᠬᠡᠩ》 ᠭᠡᠵᠦ ᠬᠠᠮᠠᠷ ᠳᠣᠣᠷᠠ ᠪᠠᠨ ᠳᠤᠷᠠᠮᠵᠢᠬᠠᠨ ᠳᠤᠤᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠪᠥᠭᠰᠡ ᠪᠡᠨ ᠬᠠᠶᠠᠯᠠᠨ ᠠᠯᠬᠤᠵᠤ᠂
— ᠪᠢᠨᠳᠠᠨ ᠠᠬᠠᠢ᠂ ᠣᠳᠣ ᠶᠠᠪᠤᠰᠤ ᠭᠡᠮᠡᠨ ᠳᠡᠯ ᠢ᠋ ᠨᠢ ᠱᠠᠩᠬᠤᠯᠠᠵᠤ ᠵᠠᠰᠠᠭᠰᠠᠨ ᠬᠥᠭᠡᠷᠦᠬᠦᠨ ᠬᠠᠯᠢᠭᠤᠨ ᠮᠣᠷᠢᠨ ᠳ᠋ᠤ᠌ ᠮᠣᠷᠳᠠᠬᠤ ᠳ᠋ᠤ᠌ ᠡᠪᠦᠭᠡᠨ ᠪᠢᠨᠳᠠᠨ ᠨᠣᠶᠠᠨ ᠰᠠᠨᠳᠤᠷᠤᠨ ᠮᠠᠢᠵᠢᠭᠢ ᠮᠠᠢᠵᠢᠭᠢ ᠭᠦᠶᠦᠵᠦ᠂ ᠲᠦᠳᠡᠬᠡᠨ ᠬᠡᠯᠡ ᠳᠣᠭᠣᠯᠭᠠᠬᠤ ᠪᠠᠭ ᠪᠡᠯᠡᠨ ᠪᠣᠯᠪᠠ᠃ ᠡᠷᠬᠡ ᠬᠠᠲᠤᠨ ᠬᠥᠯᠥᠰᠥ ᠪᠡᠨ ᠴᠢᠳᠬᠤᠨ ᠭᠦᠶᠦᠬᠦ ᠪᠢᠨᠳᠠᠨ ᠠᠬᠠᠢ ᠶ᠋ᠢ ᠰᠢᠪᠠᠳᠠᠭᠤᠯᠤᠨ᠂
一 ᠬᠤᠷᠳᠤᠯᠠᠭᠠᠴᠢ ᠠ᠋᠂ ᠬᠤᠷᠳᠤᠨ! ᠬᠣᠷᠮᠣᠢ ᠪᠠᠨ ᠴᠢᠷᠦᠭᠡᠳ ᠶᠠᠭᠤᠨ ᠳ᠋ᠤ᠌ ᠤᠳᠠᠨᠠ᠂ ᠴᠢ! ᠭᠠᠢ ᠲᠠᠷᠢᠭᠰᠠᠳ ᠪᠠᠭᠠᠳᠠᠭᠠ ᠦᠭᠡᠢ ᠪᠠᠢᠭᠠ ᠪᠤᠰᠤ ᠤᠤ ᠭᠡᠮᠡᠨ ᠲᠠᠴᠢᠭᠢᠨᠠᠵᠤ ᠠᠪᠠᠢ᠃ ᠭᠠᠢ ᠭᠡᠳᠡᠭ ᠦᠭᠡ ᠪᠦᠯᠵᠢᠭᠡᠨ ᠬᠠᠲᠤᠨ ᠢ᠋ ᠴᠢᠭᠯᠡᠭᠰᠡᠨ ᠰᠤᠮᠤ ᠪᠠᠢᠪᠠ᠃ ᠬᠥᠭᠡᠷᠦᠬᠦᠢ ᠡᠬᠡ᠂ ᠰᠦ ᠦᠨᠦᠷᠲᠦᠭᠰᠡᠨ ᠨᠢᠯᠬᠠ ᠪᠠᠨ ᠡᠩᠭᠡᠷ ᠲᠡᠭᠡᠨ ᠲᠡᠪᠡᠷᠢᠨ ᠬᠤᠷᠤᠢᠯᠠᠵᠤ ᠬᠥᠮᠥᠭᠡᠢ ᠵᠠᠭᠤᠪᠠᠴᠤ ᠨᠢᠯᠪᠤᠰᠤ ᠨᠢ ᠴᠢᠮᠡᠭᠡ ᠦᠭᠡᠢ ᠤᠷᠤᠰᠤᠨᠠ᠃ ᠴᠢᠩᠭᠢᠲᠡᠯᠡ ᠶᠡᠬᠡ ᠬᠠᠲᠤᠨ ᠳᠡᠭᠡᠷᠡ ᠨᠢ ᠳᠠᠪᠤᠰᠤ ᠨᠡᠮᠡᠵᠦ᠂《ᠴᠣᠬᠣᠮ ᠠ᠋᠂ ᠴᠣᠬᠣᠮ! ᠬᠡᠯᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ᠃ ᠭᠠᠢ ᠮᠤᠩᠳᠠᠬᠤ ᠪᠢᠰᠢ᠂ ᠬᠠᠶᠠᠭᠠᠨ ᠳ᠋ᠤ᠌ ᠢᠷᠡᠵᠦ ᠰᠠᠭᠤᠴᠢᠬᠠᠭᠠᠳ ᠬᠠᠮᠤᠭ ᠤ᠋ᠨ ᠬᠢᠨᠢ ᠲᠣᠯᠣᠭᠠᠢ ᠶ᠋ᠢ ᠵᠠᠯᠭᠢᠵᠤ ᠭᠦᠢᠴᠡᠬᠦ ᠨᠢ ᠰᠢᠪ ᠳᠡ! ᠭᠡᠯᠡ᠃ ᠪᠦᠯᠵᠢᠭᠡᠨ ᠲᠡᠰᠴᠦ ᠦᠯᠦ ᠴᠢᠳᠠᠨ ᠮᠡᠭᠰᠢᠨ ᠤᠬᠢᠯᠠᠬᠤ ᠳ᠋ᠤ᠌ ᠬᠣᠲᠣᠯᠠ ᠨᠣᠶᠠᠨ᠂
一 ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ ᠳᠠ ᠭᠡᠵᠦ ᠠᠷᠭᠠᠳᠠᠬᠤ ᠶ᠋ᠢ ᠦᠵᠡᠭᠰᠡᠨ ᠬᠣᠶᠠᠷ ᠬᠠᠲᠤᠨ ᠤ᠋ ᠬᠣᠷᠣ ᠰᠢᠷᠠ ᠪᠦᠷ ᠳᠡᠯᠪᠡ ᠲᠠᠲᠠᠵᠤ᠂
一 ᠬᠠᠶᠠᠭᠠ ᠪᠠᠨ ᠬᠠᠳᠤᠷᠴᠤ᠂ ᠵᠠᠶᠠᠭᠠ ᠪᠠᠨ ᠱᠤᠯᠤᠭᠰᠠᠨ ᠮᠠᠭᠤ ᠢᠷᠣᠠ ᠶ᠋ᠢᠨ ᠠᠮᠢᠲᠠᠨ᠃
一 ᠭᠠᠯ ᠰᠠᠬᠢᠵᠤ᠂ ᠭᠠᠢ ᠲᠠᠷᠢᠭᠰᠠᠨ ᠱᠤᠯᠤᠮ! ᠦᠷᠡ ᠲᠥᠷᠥᠭᠦᠯᠵᠦ ᠦᠬᠦᠯ ᠳᠠᠭᠤᠳᠠᠭᠰᠠᠨ ᠲᠠᠢᠷᠠᠩ! ᠭᠡᠮᠡᠨ ᠠᠮᠠ ᠣᠷᠣᠯᠳᠣᠭᠤᠯᠤᠨ ᠬᠠᠷᠢᠶᠠᠪᠠ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠤ᠋ ᠴᠢᠬᠢ ᠤᠷᠤᠭᠤ ᠬᠠᠯᠠᠭᠤᠨ ᠲᠤᠭᠤᠯᠭᠠ ᠴᠢᠳᠬᠤᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠦᠷᠡ ᠪᠡᠨ ᠲᠡᠪᠡᠷᠢᠨ ᠪᠤᠰᠢᠭᠤᠬᠠᠨ ᠭᠡᠷ ᠲᠡᠭᠡᠨ ᠰᠢᠷᠭᠤᠯᠠ᠃ ᠡᠷᠬᠡ ᠬᠠᠲᠤᠨ ᠠᠳᠠᠲᠠᠶᠠ ᠨᠢᠳᠦ ᠨᠢ ᠭᠢᠯᠠᠯᠵᠠᠨ᠂
—ᠴᠦ ᠭᠡᠰᠡᠨ ᠢ᠋ᠶ᠋ᠡᠨ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠳᠠᠪᠬᠢᠵᠤ ᠣᠳᠬᠤ ᠳ᠋ᠤ᠌ ᠪᠢᠨᠲᠠ ᠨᠣᠶᠠᠨ ᠰᠢᠳᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠵᠢᠭᠰᠠᠭᠠᠨ ᠬᠣᠢᠨᠠᠠ᠋ᠴᠠ ᠨᠢ ᠫᠦᠭ ᠫᠦᠭ ᠪᠠᠷᠠᠳᠠᠨ ᠱᠣᠭᠰᠢᠪᠠ᠃ ᠶᠡᠬᠡ ᠬᠠᠲᠤᠨ ᠮᠤᠬᠤᠯᠠᠭ ᠲᠡᠷᠭᠡᠨᠡ ᠠᠯᠲᠠᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠰᠠᠭᠤᠯᠭᠠᠬᠤ ᠳ᠋ᠤ᠌ ᠬᠣᠲᠣᠯᠠ᠂
一 ᠬᠠᠷᠠ ᠨᠢᠯᠬᠠᠠ᠋ᠴᠠ ᠨᠢ ᠪᠢᠨᠳᠦᠷᠯᠡᠭᠡᠳ ᠶᠠᠭᠠᠬᠢᠬᠤ ᠨᠢ ᠪᠣᠢ᠃ ᠮᠣᠷᠢ ᠲᠠᠢ ᠶᠠᠪᠤᠭᠤᠯ! ᠭᠡᠬᠦ ᠳ᠋ᠦ᠍ ᠰᠢᠷᠪᠢ ᠲᠡᠳᠡᠨ᠂ ᠰᠡᠭᠡᠷ ᠢ᠋ᠶ᠋ᠡᠨ ᠱᠦᠷᠭᠦᠭᠡᠵᠦ᠂
— ᠲᠤᠯᠭᠠᠲᠠᠢ ᠣᠳᠴᠢᠬᠢᠨ ᠢ᠋ᠶ᠋ᠠᠨ ᠲᠠ ᠬᠢᠴᠢᠶᠡ! ᠠᠯᠲᠠᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠪᠢ ᠬᠢᠴᠢᠶᠡᠶᠡ ᠭᠡᠰᠡᠨ ᠢ᠋ᠶ᠋ᠡᠨ ᠬᠠᠭᠠᠯᠭᠠ ᠪᠠᠨ ᠳᠡᠰ ᠬᠢᠲᠡᠯᠡ ᠬᠠᠭᠠᠬᠤ ᠳ᠋ᠤ᠌ ᠬᠠᠲᠤᠨ ᠲᠡᠷᠭᠡ ᠵᠤᠭᠤᠤᠬᠠᠨ ᠬᠥᠳᠡᠯᠪᠡ᠃ ᠵᠣᠴᠢ᠂ ᠬᠢᠷᠮᠡᠦ ᠬᠣᠶᠠᠷ ᠬᠥᠯᠲᠥᠷᠭᠡ ᠲᠡᠢ ᠠᠴᠢᠶᠠ ᠪᠦᠬᠦᠢ ᠰᠤᠯᠠ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠲᠥᠯᠦᠨ ᠢᠵᠢᠢ ᠬᠠᠲᠤᠨ ᠢ᠋ᠶ᠋ᠠᠨ ᠳᠠᠭᠠᠯᠠ᠃ ᠡᠨᠡ ᠦᠶᠡᠰ ᠬᠥᠲᠥᠴᠢ ᠪᠠᠭᠠᠲᠤᠷ ᠬᠠᠭᠠᠨ ᠬᠦᠯᠦᠭ ᠦ᠋ᠨ ᠴᠤᠯᠪᠤᠭᠤᠷ ᠠᠪᠴᠢᠷᠠᠵᠤ ᠥᠭᠬᠦ ᠳ᠋ᠦ᠍ ᠬᠣᠲᠣᠯᠠ᠂
一 ᠬᠣᠷᠴᠢ ᠭᠤᠸᠠᠢ ᠲᠠ ᠬᠠᠲᠤᠨ᠂ ᠠᠭᠡ ᠬᠣᠶᠠᠷ ᠲᠤ᠌ ᠬᠠᠨᠢ ᠪᠠᠷᠠ ᠪᠣᠯᠵᠤ ᠪᠠᠢᠪᠠᠯ ᠰᠠᠢᠨ ᠶᠤᠮ ᠰᠠᠨ ᠭᠡᠪᠡᠯ ᠬᠣᠷᠴᠢ ᠡᠪᠦᠭᠡᠨ ᠮᠡᠬᠦᠰᠬᠢᠨ᠂
— ᠡᠪᠦᠭᠡᠨ ᠬᠣᠷᠴᠢ ᠪᠢ ᠪᠠᠢᠲᠤᠭᠠᠢ ᠦᠯᠢᠭᠡᠷ ᠳᠣᠮᠣᠭ ᠤ᠋ᠨ ᠲᠦᠮᠡᠨ ᠨᠣᠶᠠᠳ ᠪᠠᠷᠠ ᠪᠣᠯᠵᠤ ᠦᠯᠡᠲᠡᠯᠡ᠃ ᠲᠠ ᠰᠡᠳᠬᠢᠯ ᠠᠮᠤᠭᠤᠯᠠᠩ ᠮᠣᠷᠢᠯᠠ! ᠬᠡᠮᠡᠵᠡᠢ᠃ ᠬᠣᠲᠣᠯᠠ ᠶ᠋ᠢᠨ ᠪᠥᠭᠯᠡᠷᠡᠨ ᠠᠭᠰᠠᠨ ᠳᠣᠲᠣᠷᠠ ᠡᠷᠬᠡᠪᠰᠢ ᠣᠩᠭᠣᠢᠵᠤ ᠠᠭᠤᠵᠢᠮᠬᠠᠨ ᠠᠮᠢᠰᠬᠤᠯ ᠠᠪᠤᠭᠠᠳ᠂
— ᠪᠥᠷᠲᠡ ᠴᠢᠨᠣᠠ ᠡᠪᠦᠭᠡ ᠶ᠋ᠢᠨ ᠲᠠᠩᠭᠢᠰ ᠳᠠᠯᠠᠢ ᠭᠠᠲᠤᠯᠤᠨ ᠢᠷᠡᠵᠦ᠂ ᠤᠨᠤᠨ ᠮᠥᠷᠡᠨ ᠦ᠌ ᠡᠬᠢ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠᠨᠠ ᠨᠤᠲᠤᠭᠯᠠᠵᠤ ᠰᠠᠭᠤᠭᠰᠠᠨ ᠳᠣᠮᠣᠭ ᠶᠠᠷᠢᠵᠤ ᠥᠭᠪᠡᠯ ᠵᠦᠭᠡᠷ ᠶᠦᠮ ᠰᠠᠨ᠃ ᠶᠡᠷᠦ ᠨᠢ ᠲᠠᠨ ᠳ᠋ᠤ᠌ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠲᠤᠯᠭᠠᠲᠠᠢ ᠣᠳᠴᠢᠬᠢᠨ ᠬᠦᠦ ᠪᠡᠨ ᠬᠣᠷᠴᠢ ᠪᠣᠯᠭᠠᠬᠤ ᠰᠠᠨᠠᠭᠠ ᠪᠠᠢᠨᠠ ᠰᠠᠨᠵᠠᠢ ᠭᠡᠯᠡ᠃ ᠬᠥᠩᠬᠥᠷ ᠬᠣᠷᠴᠢ ᠵᠣᠪᠠᠭᠰᠠᠨ ᠡᠴᠢᠭᠡ ᠬᠥᠮᠦᠨ ᠦ᠌ ᠠᠷᠭᠠ ᠶᠠᠳᠠᠭᠰᠠᠨ ᠰᠠᠨᠠᠭᠠ ᠶ᠋ᠢ ᠰᠠᠶᠢ ᠯᠠ ᠤᠬᠠᠭᠠᠷᠠᠵᠤ᠂ ᠠᠯᠠᠭ ᠦᠷᠡ ᠪᠡᠨ ᠠᠮᠢᠳᠤ ᠠᠪᠴᠤ ᠦᠯᠡᠳᠡᠬᠦ ᠶ᠋ᠢ ᠬᠢᠴᠢᠶᠡᠭᠰᠡᠨ ᠬᠣᠯᠠ ᠶ᠋ᠢᠨ ᠪᠣᠳᠣᠯ ᠢ᠋ ᠨᠢ ᠡᠷᠬᠢᠮᠯᠡᠵᠦ᠂
— ᠬᠢᠴᠢᠶᠡᠶᠡ᠂ ᠬᠠᠭᠠᠨᠲᠠᠨ ᠠ᠋ ᠭᠡᠮᠡᠨ ᠦᠯᠡᠳᠡᠵᠡᠢ᠃ ᠬᠡᠭᠡᠷᠡ ᠶ᠋ᠢᠨ ᠨᠣᠶᠠᠳ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠦᠬᠦᠬᠦ ᠡᠴᠡ ᠦᠯᠦ ᠠᠶᠤᠬᠤ ᠪᠥᠯᠥᠭᠡ᠃ ᠬᠠᠷᠢᠨ ᠦᠦᠬᠡ ᠲᠡᠦᠬᠡ ᠦᠷᠡᠭᠳᠡᠵᠦ ᠠᠯᠠᠭᠠ ᠪᠣᠯᠬᠤ ᠠ᠋ᠴᠠ ᠡᠮᠢᠶᠡᠬᠦ ᠪᠥᠯᠥᠭᠡ᠃ ᠡᠢᠨ ᠵᠦᠹᠦ᠋ ᠠᠷᠪᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠭᠠᠭᠴᠠ ᠬᠣᠷᠴᠢ ᠪᠠᠨ ᠦᠬᠡᠷ ᠤᠨᠤᠭᠤᠯᠵᠤ᠂ ᠢᠯᠭᠢ ᠨᠥᠮᠥᠷᠥᠭᠦᠯᠵᠦ ᠦᠬᠦᠯ ᠡᠴᠡ ᠨᠢᠭᠤᠵᠤ ᠡᠳᠦᠢ ᠬᠦᠷᠭᠡᠪᠡ᠃ ᠬᠣᠲᠣᠯᠠ ᠨᠣᠶᠠᠨ ᠲᠠᠲᠠᠪᠤᠷᠢ ᠡᠮᠡ ᠡᠴᠡ ᠭᠠᠷᠤᠭᠰᠠᠨ ᠴᠢᠰᠤᠨ ᠤᠷᠤᠭ ᠢ᠋ᠶ᠋ᠠᠨ ᠦᠦᠬᠡ ᠲᠡᠦᠬᠡ ᠡᠪᠦᠷᠲᠦᠯᠡᠭᠦᠯᠦᠨ ᠦᠬᠦᠯ ᠡᠴᠡ ᠨᠢᠭᠤᠬᠤ ᠨᠢ ᠡᠨᠡ ᠠᠵᠤᠭᠤ᠃ ᠬᠠᠭᠠᠨ ᠲᠡᠷᠢᠭᠦᠯᠡᠭᠰᠡᠨ ᠬᠥᠰᠬᠡ ᠰᠢᠭᠤᠷᠬᠠᠢ ᠤᠷᠤᠭᠰᠢᠯᠠᠵᠤ ᠲᠦᠳᠡᠬᠡᠨ ᠵᠤᠨ ᠤ᠋ ᠨᠠᠷᠠᠨ ᠳᠤᠨᠢᠶᠠᠷᠲᠤᠬᠤ ᠬᠥᠬᠡ ᠲᠡᠷᠯᠡᠨ ᠠᠭᠤᠯᠠ ᠶ᠋ᠢᠨ ᠬᠥᠪᠴᠢ ᠤᠷᠤᠭᠤ ᠰᠢᠷᠭᠤᠨ ᠣᠷᠣᠪᠠᠢ᠃ ᠡᠢᠨ ᠵᠦᠭ ᠵᠦᠭ ᠤᠷᠤᠭᠤ ᠬᠥᠮᠦᠨ ᠬᠠᠷᠠ ᠳᠡᠷᠡᠨ ᠣᠳᠴᠤ᠂ ᠬᠠᠭᠠᠨ ᠬᠦᠷᠢᠶᠡ ᠨᠠᠮ ᠭᠦᠮ ᠪᠣᠯᠬᠤ ᠳ᠋ᠤ᠌ ᠰᠣᠯᠵᠢᠷ ᠬᠤᠸᠠ ᠰᠠᠷᠯᠤᠭ ᠨᠢ ᠭᠠᠢᠬᠠᠭᠰᠠᠨ ᠮᠡᠲᠦ ᠮᠥᠭᠡᠷᠡᠵᠦ ᠡᠵᠡᠨ ᠬᠣᠷᠴᠢ ᠳ᠋ᠠᠭᠠᠨ ᠳᠣᠬᠢᠶᠠ ᠥᠭᠴᠡᠢ᠃ ᠲᠡᠷᠡ ᠪᠡᠷ ᠬᠤᠨ ᠬᠤᠭᠤᠷ ᠢ᠋ᠶ᠋ᠠᠨ ᠮᠥᠷᠦᠨ ᠡᠴᠡ ᠪᠡᠨ ᠮᠤᠯᠲᠤᠯᠤᠨ ᠠᠪᠴᠤ ᠡᠷᠭᠢᠭᠰᠡᠨ ᠢ᠋ᠶ᠋ᠡᠨ ᠣᠳᠣ ᠬᠢᠷᠢ ᠳᠡᠷᠭᠡᠳᠡ ᠨᠢ ᠵᠣᠭᠰᠣᠵᠤ᠂ ᠠᠶᠠᠨ ᠤ᠋ ᠬᠢᠨᠢ ᠪᠣᠭᠴᠣ ᠶ᠋ᠢ ᠪᠠᠷᠢᠨ ᠪᠠᠢᠬᠤ ᠰᠢᠪᠡᠭᠴᠢᠨ ᠡᠮᠡ ᠳ᠋ᠦ᠍᠂
— ᠬᠠᠭᠠᠨ ᠵᠠᠷᠯᠢᠭ ᠰᠣᠨᠣᠰᠪᠠ ᠤᠤ? ᠭᠡᠪᠡᠯ ᠵᠠᠯᠠᠭᠤ ᠥᠬᠢᠨ᠂
— ᠵᠠ᠂ ᠪᠢ ᠰᠣᠨᠣᠰᠤᠭᠰᠠᠨ ᠪᠢᠯᠡ ᠬᠡᠮᠡᠯᠡ᠃ ᠬᠥᠩᠬᠥᠷ ᠬᠣᠷᠴᠢ ᠠᠶᠠᠨ ᠤ᠋ ᠪᠣᠭᠴᠣ ᠪᠠᠨ ᠭᠠᠷ ᠳᠡᠭᠡᠷᠡ ᠡᠴᠡ ᠨᠢ ᠠᠪᠴᠤ ᠭᠡᠷ ᠲᠦᠰᠢᠭᠦᠯᠵᠦ ᠲᠠᠯᠪᠢᠭᠠᠳ᠂
— ᠵᠠ᠂ ᠲᠡᠢᠮᠦ ᠪᠣᠯ ᠴᠢ ᠶᠠᠪᠤᠵᠤ ᠰᠣᠯᠵᠢᠷ ᠬᠤᠸᠠ ᠰᠠᠷᠯᠤᠭ ᠢ᠋ ᠮᠢᠨᠢ ᠪᠡᠯᠴᠢᠭᠡᠷ ᠲᠦ᠍ ᠢᠳᠡᠭᠡᠰᠢᠯᠡᠭᠦᠯ! ᠠᠭᠡ ᠨᠣᠶᠠᠨ ᠳ᠋ᠤ᠌ ᠬᠠᠨᠢ ᠪᠣᠯᠵᠤ ᠠᠬᠠ ᠨᠢ ᠬᠡᠳᠦ ᠬᠣᠨᠣᠬᠤ ᠳ᠋ᠠᠭ ᠭᠡᠵᠡᠢ᠃ ᠡᠢᠨ ᠥᠭᠦᠯᠡᠭᠡᠳ ᠬᠠᠭᠠᠨ ᠬᠥᠰᠬᠡ ᠶ᠋ᠢᠨ ᠲᠣᠭᠣᠰᠣ ᠨᠠᠮᠵᠢᠭᠰᠠᠨ ᠬᠥᠬᠡ ᠠᠭᠤᠯᠠᠰ ᠤᠷᠤᠭᠤ ᠬᠠᠷᠠᠴᠠ ᠪᠡᠯᠴᠢᠭᠡᠪᠡᠯ ᠲᠤᠩᠭᠠᠯᠠᠭ ᠣᠭᠲᠠᠷᠭᠤᠢ ᠰᠠᠢᠬᠠᠨ ᠤᠴᠠᠷᠠᠯ ᠬᠦᠯᠢᠶᠡᠬᠦ ᠮᠡᠲᠦ ᠪᠥᠷᠲᠥᠢᠬᠦ ᠴᠦ᠍ ᠡᠭᠦᠯᠡ ᠦᠭᠡᠢ ᠮᠡᠯᠲᠡᠢᠵᠦ ᠪᠠᠢᠯᠠ᠃ ᠬᠠᠭᠠᠨ ᠬᠦᠷᠢᠶᠡᠨ ᠦ᠌ ᠬᠠᠶᠠᠭᠠ ᠡᠮᠵᠢᠵᠦ ᠤᠷᠤᠰᠬᠤ ᠰᠡᠩᠬᠦᠷ ᠦ᠋ᠨ ᠭᠣᠷᠣᠬᠠ ᠬᠣᠷᠴᠢᠭᠢᠨᠠᠬᠤ ᠨᠢ ᠳᠡᠭᠡᠷᠡ ᠴᠠᠭ ᠲᠤ᠌ ᠠᠷᠢᠭᠤᠨ ᠬᠤᠨ ᠤ᠋ ᠭᠣᠷᠣᠬᠠ ᠡᠭᠡᠰᠢᠭᠯᠡᠵᠦ ᠤᠷᠤᠰᠳᠠᠭ ᠭᠡᠮᠡᠨ ᠳᠣᠮᠣᠭ ᠲᠤ᠌ ᠥᠭᠦᠯᠡᠳᠡᠭ ᠨᠢ ᠪᠦᠦᠷ ᠲᠦᠦᠷᠬᠡᠨ ᠰᠠᠨᠠᠭᠳᠠᠵᠤ᠂ ᠬᠠᠲᠤᠨ ᠳ᠋ᠤ᠌ ᠶᠠᠷᠢᠬᠤ ᠦᠯᠢᠭᠡᠷ ᠦ᠋ᠨ ᠣᠷᠣᠰᠢᠯ ᠠᠶᠠᠯᠭᠤ ᠰᠣᠨᠣᠰᠳᠠᠨ ᠠᠵᠤᠭᠤ᠃
2
ᠭᠣᠯᠣᠮᠲᠠ ᠵᠠᠯᠭᠠᠬᠤ ᠣᠳᠬᠣᠨ ᠨᠣᠶᠠᠨ ᠢ᠋ᠶ᠋ᠠᠨ ᠠᠯᠳᠠᠵᠤ᠂ ᠠᠯᠲᠠᠨ ᠤᠷᠤᠭ ᠳᠠᠶᠠᠭᠠᠷ ᠣᠢ ᠭᠠᠰᠢᠭᠤ ᠪᠣᠯᠤᠭᠰᠠᠨ ᠬᠡᠳᠦᠢ ᠴᠦ᠍ ᠬᠤᠲᠤᠭᠲᠤ ᠨᠣᠶᠠᠨ ᠤ᠋ ᠲᠡᠷᠢᠭᠦᠯᠡᠵᠦ ᠮᠣᠷᠳᠠᠭᠰᠠᠨ ᠭᠤᠷᠪᠠᠨ ᠵᠠᠮ ᠤ᠋ᠨ ᠶᠡᠬᠡ ᠴᠡᠷᠢᠭ ᠦᠯᠦ ᠪᠤᠴᠠᠪᠠ᠃ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠦᠭᠡ ᠨᠣᠶᠠᠨ ᠥᠪᠡᠷ ᠦ᠋ᠨ ᠴᠡᠷᠢᠭ ᠢ᠋ ᠣᠷᠱᠣᠨ ᠮᠥᠷᠡᠨ ᠦ᠌ ᠡᠬᠢ ᠥᠭᠡᠳᠡ ᠲᠠᠲᠠᠵᠤ ᠬᠤᠸᠠᠷᠠᠩᠨᠠᠨ ᠴᠢᠮᠡᠭᠡ ᠴᠢᠩᠨᠠᠵᠤ ᠠᠪᠠᠢ᠃ ᠡᠪᠦᠯ ᠴᠠᠰᠤ ᠶᠡᠬᠡ ᠤᠨᠠᠵᠤ ᠮᠠᠯ ᠰᠦᠷᠦᠭ ᠵᠢᠳᠬᠦᠭᠦᠦ ᠣᠷᠣᠭᠰᠠᠨ ᠲᠤᠯᠠ ᠮᠣᠷᠢᠳ ᠤ᠋ᠨ ᠲᠠᠷᠭᠤ ᠲᠡᠪᠡᠭᠡᠷᠡᠭ ᠮᠠᠭᠤ᠂ ᠴᠡᠷᠢᠭ ᠡᠷᠡᠰ ᠦ᠋ᠨ ᠬᠣᠭᠣᠯᠠ ᠬᠦᠨᠡᠰᠦ ᠬᠣᠮᠰᠠ ᠪᠠᠢᠵᠠᠢ᠃ ᠶᠡᠷᠦ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠨᠯᠢᠭ ᠡᠢᠨ ᠶᠡᠬᠡ ᠰᠦᠷ ᠬᠦᠴᠦ ᠪᠡᠷ ᠳᠠᠭᠠᠷᠢᠨ ᠣᠷᠣᠬᠤ ᠶ᠋ᠢᠨ ᠴᠢᠨᠡᠭᠡ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠦᠭᠡᠢ᠃ ᠲᠡᠢᠮᠦ ᠶ᠋ᠢᠨ ᠤᠴᠢᠷ ᠬᠦᠴᠦ ᠰᠡᠯᠪᠢᠵᠦ᠂ ᠴᠠᠭ ᠬᠣᠵᠢᠵᠤ ᠣᠷᠱᠤᠨ ᠮᠥᠷᠡᠨ ᠦ᠌ ᠬᠠᠷᠠ ᠰᠢᠭᠤᠢ ᠳ᠋ᠤ᠌ ᠪᠦᠭᠭᠦᠨ ᠲᠤᠷᠰᠢᠭᠤᠯ ᠢᠯᠡᠭᠡᠬᠦ ᠪᠣᠯᠪᠠ᠃ ᠭᠡᠲᠡᠯᠡ ᠬᠣᠲᠣᠯᠠ ᠬᠠᠭᠠᠨ ᠴᠣ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠭᠤᠯᠭᠠᠬᠤ ᠲᠤᠬᠠᠢ ᠡᠰᠡ ᠪᠣᠳᠣᠵᠤ᠂《ᠲᠠᠪᠤᠨ ᠬᠤᠷᠤᠭᠤᠨ ᠤ᠋ ᠬᠢᠮᠤᠰᠤ ᠪᠠᠨ ᠲᠠᠮᠲᠤᠷᠠᠲᠠᠯᠠ᠂ ᠲᠠᠬᠠᠯᠠᠢ ᠵᠢᠭᠠᠬᠠᠨ ᠪᠡᠶᠡ ᠪᠡᠨ ᠳᠠᠭᠤᠰᠲᠠᠯᠠ᠂ ᠲᠠᠲ᠋ᠠᠷ ᠠ᠋ᠴᠠ ᠦᠰ ᠠᠪᠤᠭᠲᠤᠨ》 ᠭᠡᠰᠡᠨ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠦᠭᠡ ᠶ᠋ᠢ ᠡᠯᠴᠢ ᠳ᠋ᠦ᠍ ᠴᠡᠭᠡᠵᠢᠯᠡᠭᠦᠯᠵᠦ ᠢᠯᠡᠭᠡᠭᠰᠡᠨ ᠰᠤᠷᠠᠭ ᠰᠣᠨᠣᠰᠴᠠᠢ᠃ ᠦᠭᠡ ᠨᠣᠶᠠᠨ ᠲᠠᠰᠢᠶᠠᠯᠳᠠᠵᠤ ᠬᠡᠪᠲᠡᠭᠡᠳ ᠭᠠᠯ ᠰᠢᠷᠳᠡᠨ ᠴᠢᠮᠡᠭᠡ ᠦᠭᠡᠢ ᠰᠠᠭᠤᠵᠤ ᠰᠠᠭᠤᠵᠤ᠂
— ᠶᠢᠰᠦᠭᠡᠢ ᠪᠣᠯ ᠴᠢᠨᠣᠠ ᠶ᠋ᠢᠨ ᠪᠡᠯᠲᠡᠷᠭᠡ! ᠭᠡᠵᠦ ᠥᠪᠡᠷ ᠲᠡᠭᠡᠨ ᠴᠢᠩᠭᠠ ᠥᠭᠦᠯᠡᠭᠡᠳ᠂
— ᠮᠡᠯᠲᠡᠭ ᠢ᠋ ᠳᠠᠭᠤᠳᠠ! ᠭᠡᠯᠡ᠃ ᠡᠭᠦᠳᠡᠴᠢ ᠴᠡᠷᠢᠭ ᠬᠦ ᠬᠤᠶᠠᠭ ᠢ᠋ᠶ᠋ᠠᠨ ᠬᠠᠩᠭᠢᠷ ᠵᠢᠩᠭᠢᠷ ᠬᠢᠯᠭᠡᠨ ᠭᠠᠷᠴᠤ ᠣᠳᠤᠭᠰᠠᠨ ᠢ᠋ᠶ᠋ᠠᠨ ᠲᠦᠳᠡᠬᠡᠨ ᠥᠮᠥᠳᠥ ᠴᠠᠮᠴᠠᠠ᠋ᠴᠠ ᠨᠢ ᠤᠰᠤ ᠰᠠᠪᠢᠷᠠᠭᠰᠠᠨ ᠮᠠᠯᠲᠠᠭ ᠬᠢᠶᠡ ᠶ᠋ᠢ ᠣᠷᠣᠭᠤᠯᠵᠤ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠪᠤᠭᠤᠷᠤᠯ ᠦᠰᠦ ᠨᠣᠷᠤᠨ ᠨᠠᠯᠮᠠᠢᠵᠤ᠂ ᠪᠠᠳᠬᠠ ᠰᠢᠪᠠᠭᠰᠠᠨ ᠬᠠᠷᠠ ᠴᠢᠷᠠᠢ ᠨᠢ ᠦᠷᠦ ᠡᠪᠡᠳᠦᠯᠲᠡᠢ ᠦᠷᠴᠢᠢᠵᠡᠢ᠃ ᠡᠪᠦᠭᠡᠨ ᠬᠢᠶᠡ ᠣᠷᠣᠵᠤ ᠢᠷᠡᠩᠭᠦᠲᠡ ᠶᠠᠭ ᠬᠢᠲᠡᠯᠡ ᠡᠪᠦᠳᠦᠭ ᠰᠥᠭᠥᠳᠦᠨ᠂
— ᠢᠱ᠌ᠢ᠂ ᠦᠭᠡ ᠨᠣᠶᠠᠨ ᠮᠢᠨᠢ! ᠥᠴᠦᠬᠡᠨ ᠬᠥᠮᠦᠨ ᠪᠢ ᠲᠠᠨ ᠤ᠋ ᠲᠥᠯᠥᠭᠡ ᠮᠣᠷᠢ ᠨᠣᠬᠠᠢ ᠮᠡᠲᠦ ᠵᠢᠳᠬᠦᠵᠦ ᠡᠨᠡ ᠬᠦᠷᠦᠭᠰᠡᠨ ᠪᠢᠯᠡ᠃ ᠭᠡᠲᠡᠯᠡ ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠪᠠᠷᠢᠵᠤ ᠳᠥᠩᠭᠡᠯᠡᠵᠦ᠂ ᠬᠦᠯᠢᠵᠦ ᠭᠠᠪᠠᠯᠠᠵᠤ ᠤᠷᠤᠰᠬᠠᠯ ᠤᠰᠤᠨ ᠳ᠋ᠤ᠌ ᠣᠢᠨᠠ ᠪᠣᠢ? ᠬᠠᠷᠠ ᠨᠢᠯᠬᠠᠠ᠋ᠴᠠ ᠲᠠᠨᠢ ᠬᠠᠵᠠᠭᠤ ᠳ᠋ᠠᠭᠠᠨ ᠠᠪᠴᠤ᠂ ᠪᠦᠷ ᠨᠢᠯᠬᠠᠠ᠋ᠴᠠ ᠲᠠᠨᠢ ᠪᠥᠭᠡᠷᠡᠨ ᠳ᠋ᠡᠭᠡᠨ ᠠᠪᠴᠤ ᠡᠳᠦᠢ ᠵᠡᠷᠭᠡ ᠳ᠋ᠦ᠍ ᠬᠦᠷᠭᠡᠭᠰᠡᠨ ᠪᠤᠰᠤ ᠤᠤ? ᠭᠡᠬᠦ ᠳ᠋ᠦ᠍ ᠦᠭᠡ ᠨᠣᠶᠠᠨ ᠢᠳᠡᠵᠦ ᠠᠭᠰᠠᠨ ᠴᠢᠪᠠᠭᠠᠨ ᠤ᠋ ᠪᠠᠨ ᠶᠠᠰᠤ ᠶ᠋ᠢ ᠬᠣᠯᠠ ᠨᠤᠯᠮᠤᠭᠠᠳ ᠲᠠᠴᠢᠭᠢᠨᠠᠲᠠᠯᠠ ᠬᠥᠬᠥᠷᠡᠪᠡ᠃ ᠪᠦᠷ ᠭᠠᠯ ᠳᠠᠯᠳᠢᠷᠠᠲᠠᠯᠠ ᠢᠨᠢᠶᠡᠬᠦ ᠳ᠋ᠦ᠍ ᠮᠡᠯᠲᠡᠭ ᠬᠢᠶᠡ ᠭᠠᠪᠠ ᠭᠢᠨᠵᠢ ᠪᠡᠨ ᠬᠠᠷᠴᠢᠭᠢᠨᠠᠭᠤᠯᠤᠨ ᠤᠷᠤᠭᠰᠢ ᠮᠥᠯᠬᠥᠵᠦ᠂
— ᠦᠭᠡ ᠮᠢᠨᠢ᠂ ᠵᠣᠪᠠᠯᠠᠩ ᠮᠡᠳᠡᠬᠦ ᠬᠥᠮᠦᠨ ᠪᠢᠯᠡ ᠴᠢ᠃ ᠠᠢᠯ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠬᠤ ᠶᠠᠯᠠ ᠶᠠᠩᠬᠠᠨ ᠳᠣᠣᠷᠠ ᠲᠣᠯᠣᠭᠠᠢ ᠡᠪᠦᠳᠦᠭ ᠲᠦ᠍᠂ ᠲᠣᠬᠣᠢ ᠰᠢᠷᠤᠢᠨ ᠳ᠋ᠤ᠌ ᠪᠠᠢᠬᠤ ᠳ᠋ᠤ᠌ ᠴᠢᠨᠢ ᠬᠥᠮᠦᠨ ᠭᠡᠵᠦ ᠬᠠᠷᠠᠭᠰᠠᠨ ᠨᠢ ᠪᠢ ᠪᠤᠰᠤ ᠤᠤ? ᠠᠮᠢ ᠥᠷᠥᠰᠢᠶᠡ! ᠭᠡᠪᠡᠯ ᠦᠭᠡ ᠨᠣᠶᠠᠨ ᠨᠢᠯᠪᠤᠰᠤ ᠪᠠᠨ ᠭᠠᠷᠲᠠᠯᠠ ᠢᠨᠢᠶᠡᠵᠦ᠂ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠨᠢᠭᠡ ᠶᠡᠬᠡ ᠲᠣᠮᠣ ᠬᠠᠷᠠᠭᠠᠳ ᠠᠬᠢᠨ ᠡᠯᠢᠭᠡ ᠪᠡᠨ ᠬᠥᠰᠢᠲᠡᠯᠡ ᠢᠨᠢᠶᠡᠪᠡ᠃ ᠮᠡᠯᠲᠡᠭ ᠬᠢᠶᠡ ᠶ᠋ᠢᠨ ᠠᠶᠠᠳᠠᠰᠤ ᠪᠦᠷ ᠨᠡᠮᠡᠭᠳᠡᠵᠦ᠂
— ᠦᠭᠡ ᠮᠢᠨᠢ᠂ ᠦᠭᠡ ᠮᠢᠨᠢ! ᠴᠠᠭᠠᠨ ᠲᠣᠯᠣᠭᠠᠢ ᠲᠠᠢ ᠡᠬᠡᠨᠡᠷ᠂ ᠴᠠᠷᠴᠠᠭᠠ ᠰᠢᠭ᠋ ᠱᠠᠭᠠᠬᠢᠭᠰᠠᠨ ᠬᠦᠦ ᠨᠦ᠍ᠭᠦᠳ ᠮᠢᠨᠢ ᠴᠢᠮᠠᠶ᠋ᠢ ᠳᠠᠭᠠᠵᠤ ᠢᠷᠡᠭᠰᠡᠨ ᠪᠢᠯᠡ᠃ ᠠᠮᠢ ᠥᠷᠥᠰᠢᠶᠡ! ᠭᠡᠬᠦ ᠳ᠋ᠦ᠍ ᠦᠭᠡ ᠨᠣᠶᠠᠨ ᠭᠡᠨᠡᠳᠲᠡ ᠢᠨᠢᠶᠡᠬᠦ ᠪᠡᠨ ᠪᠣᠯᠢᠵᠤ ᠲᠥᠪ ᠳᠥᠯᠭᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠲᠠ ᠶᠠᠭᠤ ᠶᠠᠭᠤ ᠦᠭᠡᠢ ᠠᠯᠠᠬᠤ ᠨᠢ ᠭᠡᠵᠦ ᠪᠣᠳᠣᠪᠠ ᠤᠤ? ᠭᠡᠯᠡ᠃ ᠡᠷᠬᠡᠪᠰᠢ ᠰᠡᠳᠬᠢᠯ ᠴᠡᠯᠮᠡᠭᠡᠬᠦ ᠦᠭᠡ ᠰᠣᠨᠣᠰᠤᠭᠰᠠᠨ ᠮᠡᠯᠲᠡᠭ ᠬᠢᠶᠡ ᠤᠴᠢᠷ ᠦᠭᠡᠢ ᠲᠣᠮᠣ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂ ᠫᠠᠷᠯᠢᠭᠠᠷ ᠲᠣᠮᠣ ᠨᠢᠭᠤᠷ ᠢ᠋ᠶ᠋ᠠᠨ ᠡᠪ ᠬᠠᠪᠤ ᠦᠭᠡᠢ ᠦᠷᠴᠢᠢᠯᠭᠡᠨ ᠫᠠᠷᠭᠢᠶᠠ ᠳᠠᠭᠤ ᠪᠠᠷ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠯᠠ᠃ ᠡᠢᠨ ᠠᠰᠬᠠᠷᠠᠭᠤᠯᠬᠤ ᠶ᠋ᠢ ᠨᠢ ᠶᠡᠷᠦ ᠶᠠᠭᠤ ᠴᠣ ᠪᠣᠯᠤᠭᠠ ᠦᠭᠡᠢ ᠮᠡᠲᠦ ᠬᠠᠷᠠᠨ ᠮᠣᠷᠢᠨ ᠴᠢᠪᠠᠭᠠ ᠪᠠᠭᠠ ᠪᠠᠭᠠ ᠪᠠᠷ ᠵᠠᠵᠢᠯᠤᠨ ᠰᠠᠭᠤᠪᠠ᠃ ᠮᠠᠯᠲᠠᠭ ᠬᠢᠶᠡ ᠤᠳᠠᠭᠠᠨ ᠲᠠᠢᠳᠬᠤᠷᠠᠵᠠᠢ᠃ ᠠᠯᠠᠬᠤ ᠶ᠋ᠢ ᠠᠶᠤᠬᠤ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠭᠣᠮᠣᠳᠠᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠲᠡᠭᠡᠵᠦ ᠲᠡᠭᠡᠵᠦ ᠮᠡᠭᠰᠢᠨ ᠲᠠᠢᠳᠬᠤᠷᠠᠬᠤ ᠳ᠋ᠤ᠌
— ᠲᠠ ᠬᠤᠯᠠᠨ ᠪᠠᠭᠠᠲᠤᠷ ᠤ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠣᠴᠢᠨᠠ ᠠ᠋ ᠭᠡᠯᠡ᠃ ᠮᠡᠯᠲᠡᠭ ᠬᠢᠶᠡ ᠤᠯᠠᠢᠵᠤ ᠪᠦᠯᠲᠡᠢᠭᠰᠡᠨ ᠨᠢᠳᠦ ᠪᠡᠷ ᠮᠡᠯᠲᠡᠰᠬᠢᠨ ᠬᠠᠷᠠᠵᠤ᠂
— ᠶᠠᠭᠠᠬᠢᠬᠤ ᠭᠡᠵᠦ? ᠭᠡᠪᠡᠯ ᠦᠭᠡ ᠨᠣᠶᠠᠨ ᠮᠣᠷᠢᠨ ᠴᠢᠪᠠᠭᠠᠨ ᠤ᠋ ᠬᠣᠭᠣᠰᠣᠨ ᠶᠠᠰᠤ ᠮᠡᠷᠡᠨ ᠣᠭᠲᠣ ᠥᠭᠡᠷᠡ ᠶ᠋ᠢ ᠪᠣᠳᠣᠵᠤ᠂
— ᠮᠠᠨ ᠤ᠋ ᠬᠦᠷᠢᠶᠡᠨ ᠡᠴᠡ ᠤᠷᠭᠤᠭᠰᠠᠨ ᠬᠥᠮᠦᠨ ᠰᠢᠦ! ᠲᠡᠳᠡᠨ ᠦ᠌ ᠬᠦᠷᠢᠶᠡᠨ ᠳ᠋ᠦ᠍ ᠠᠮᠢ ᠬᠣᠷᠭᠣᠳᠠᠬᠤ ᠭᠡᠵᠦ ᠣᠴᠢᠨᠠ᠃ ᠨᠠᠮᠠᠶ᠋ᠢ ᠴᠠᠭ ᠴᠠᠭ ᠲᠤ᠌ ᠲᠡᠮᠦᠯᠡᠨ ᠲᠠᠷᠴᠢᠯᠠᠭᠠᠵᠤ ᠪᠠᠢᠪᠠ ᠭᠡᠵᠦ ᠭᠦᠳᠬᠡᠨᠡ᠃ ᠦᠭᠡ ᠨᠣᠶᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠡᠷᠭᠦᠨᠡ ᠮᠥᠷᠡᠨ ᠤᠷᠤᠭᠤ ᠵᠢᠭᠤᠲᠠᠭᠰᠠᠨ ᠭᠡᠵᠦ ᠬᠡᠯᠡᠨᠡ᠃ ᠮᠢᠨᠦ ᠮᠥᠷ ᠢ᠋ᠶ᠋ᠡᠷ ᠵᠠᠮᠴᠢᠯᠠᠵᠤ ᠠᠪᠴᠢᠷᠠᠨᠠ ᠭᠡᠯᠡ᠃ ᠮᠡᠯᠲᠡᠭ ᠬᠢᠶᠡ᠂
— ᠨᠠᠳᠠ ᠳ᠋ᠤ᠌ ᠢᠲᠡᠭᠡᠨᠡ ᠪᠢᠯᠡ ᠤᠤ᠂ ᠨᠣᠶᠠᠨᠲᠠᠨ ᠠ᠋ ᠭᠡᠬᠦ ᠳ᠋ᠦ᠍ ᠦᠭᠡ ᠨᠣᠶᠠᠨ᠂
— ᠢᠲᠡᠭᠡᠭᠦᠯᠦᠨᠡ ᠳᠡ! ᠭᠡᠮᠡᠨ ᠲᠤᠯᠭᠠᠭᠠᠳ ᠠᠶᠠᠨ ᠤ᠋ ᠴᠠᠴᠠᠷ ᠤ᠋ᠨ ᠬᠠᠶᠠᠭᠠᠨ ᠠ᠋ᠴᠠ ᠴᠢᠨᠠᠭᠠᠳ ᠰᠡᠪᠡᠷᠡᠭᠡᠭᠰᠡᠨ ᠮᠣᠳᠣᠨ ᠲᠠᠪᠠᠭ ᠲᠠᠢ ᠮᠢᠬᠠ ᠭᠠᠷᠭᠠᠵᠤ ᠤᠢᠰᠤᠨ ᠡᠰᠢ ᠲᠡᠢ ᠬᠢᠲᠤᠭᠠ ᠳᠡᠭᠡᠷᠡ ᠨᠢ ᠲᠠᠯᠪᠢᠭᠠᠳ ᠪᠠᠷᠢᠯᠠ᠃ ᠥᠯᠥᠰᠴᠦ ᠴᠠᠩᠭᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠭᠰᠡᠨ ᠮᠡᠯᠲᠡᠭ ᠬᠢᠶᠡ ᠭᠠᠪᠠ ᠭᠢᠨᠵᠢ ᠪᠡᠨ ᠬᠠᠷᠵᠢᠭᠢᠨᠠᠭᠤᠯᠤᠨ ᠡᠮᠬᠦᠯᠡᠵᠦ ᠭᠠᠷᠬᠤ ᠳ᠋ᠤ᠌ ᠦᠭᠡ ᠨᠣᠶᠠᠨ ᠳᠡᠷᠡᠨ ᠦ᠌ ᠪᠡᠨ ᠳᠡᠷᠭᠡᠳᠡ ᠡᠴᠡ ᠬᠤᠰᠤᠨ ᠤ᠋ ᠤᠢᠰᠤᠨ ᠪᠣᠷᠲᠣᠭᠣ ᠲᠠᠢ ᠳᠠᠷᠠᠰᠤ ᠠᠪᠴᠤ ᠳᠤᠮᠳᠠ ᠭᠠᠷ ᠤ᠋ᠨ ᠮᠥᠩᠭᠥᠨ ᠠᠶᠠᠭᠠ ᠮᠡᠯᠲᠡᠯᠵᠡᠭᠦᠯᠵᠦ ᠥᠭᠪᠡ᠃ ᠮᠡᠯᠲᠡᠭ ᠬᠢᠶᠡ ᠨᠢᠭᠡ ᠠᠮᠢᠰᠬᠤᠭᠠ ᠪᠠᠷ ᠲᠠᠲᠠᠵᠤ ᠣᠷᠬᠢᠯᠠ᠃ ᠴᠢᠩᠭᠢᠭᠡᠳ ᠥᠭᠡᠬᠦ ᠠᠯᠠᠭᠯᠠᠭᠰᠠᠨ ᠬᠣᠨᠢᠨ ᠤ᠋ ᠬᠠᠪᠢᠷᠭᠠ ᠬᠤ᠌ ᠲᠡᠳᠡᠨ ᠡᠮᠬᠦᠯᠡᠵᠦ᠂ ᠵᠠᠪᠠᠵᠢ ᠪᠠᠷ ᠨᠢ ᠲᠣᠰᠣ ᠰᠠᠪᠢᠷᠠᠨ ᠠᠵᠢ᠃
— ᠬᠠᠷᠢᠨ ᠳᠠᠢᠰᠤᠨ ᠢ᠋ ᠳᠠᠭᠠᠭᠤᠯᠵᠤ ᠢᠷᠡᠬᠦ ᠦᠭᠡᠢ ᠪᠣᠯ ᠳᠠᠬᠢᠵᠤ ᠮᠢᠨᠦ ᠨᠢᠭᠤᠷ ᠢ᠋ ᠪᠢᠲᠡᠭᠡᠢ ᠬᠠᠷᠠᠭᠠᠷᠠᠢ! ᠭᠡᠮᠡᠨ ᠦᠭᠡ ᠨᠣᠶᠠᠨ ᠬᠠᠲᠠᠭᠤ ᠥᠭᠦᠯᠡᠭᠡᠳ ᠤᠢᠰᠤᠨ ᠪᠣᠷᠲᠣᠭᠣ ᠲᠠᠢ ᠠᠷᠢᠬᠢ ᠪᠠᠨ ᠰᠠᠷᠪᠠᠢᠵᠤ᠂
— ᠮᠠᠢ᠂ ᠠᠪᠤᠭᠠᠳ ᠶᠠᠪᠤ! ᠭᠡᠪᠡ᠃ ᠮᠡᠯᠲᠡᠭ ᠬᠢᠶᠡ ᠶ᠋ᠢᠨ ᠵᠠᠵᠢᠯᠵᠤ ᠵᠠᠯᠭᠢᠭᠰᠠᠨ ᠮᠢᠬᠠ ᠬᠣᠭᠣᠯᠠᠢ ᠳᠡᠭᠡᠷᠡ ᠨᠢ ᠲᠡᠭᠡᠭᠯᠡᠴᠢᠬᠡᠬᠦ ᠰᠢᠭ ᠪᠣᠯᠤᠯᠠ᠃ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠦ ᠮᠠᠭᠤ ᠬᠠᠨᠢ ᠪᠠᠨ ᠪᠣᠳᠣᠪᠠ᠃ ᠦᠰᠦ ᠪᠡᠨ ᠴᠠᠢᠲᠠᠯᠠ᠂ ᠦᠷᠡ ᠪᠡᠨ ᠦᠰᠲᠡᠯᠡ ᠭᠠᠭᠴᠠᠬᠠᠨ ᠮᠡᠯᠲᠡᠭ ᠤ᠋ᠨ ᠲᠥᠯᠥᠭᠡ ᠪᠦᠬᠦᠨ ᠢ᠋ᠶ᠋ᠡᠨ ᠵᠣᠷᠢᠭᠤᠯᠤᠭᠰᠠᠨ ᠠᠮᠢᠲᠠᠨ ᠪᠢᠯᠡ᠃ ᠲᠣᠵᠢᠭ ᠬᠥᠪᠡᠭᠦᠨ ᠡᠯᠡ ᠨᠣᠶᠠᠨ ᠳ᠋ᠤ᠌ ᠰᠢᠳᠠᠷ ᠬᠥᠮᠦᠨ ᠶᠦᠮ᠃ ᠲᠣᠪᠣᠭᠣᠴᠢ ᠬᠦᠦ ᠨᠢ ᠴᠡᠷᠢᠭ ᠦ᠋ᠨ ᠠᠭᠲᠠᠨ ᠤ᠋ ᠳᠠᠭᠠᠭᠠᠮᠠᠯ ᠶᠤᠮ᠃ ᠮᠠᠭᠤ ᠪᠠᠭᠠ ᠬᠦᠦ ᠨᠢ ᠢᠵᠢᠢ ᠲᠡᠢ ᠪᠡᠨ ᠣᠷᠣᠮᠵᠢ ᠪᠠᠨ ᠰᠠᠬᠢᠵᠤ᠂ ᠭᠣᠯᠣᠮᠲᠠ ᠪᠠᠨ ᠮᠠᠨᠠᠨ ᠪᠠᠢᠳᠠᠭ ᠠᠪᠠᠢ᠃ ᠲᠡᠳᠡ ᠪᠠᠷᠢᠴᠠᠭᠠᠨ ᠤ᠋ ᠤᠯᠤᠰ ᠪᠣᠯᠵᠤ ᠦᠯᠡᠳᠡᠬᠦ ᠠᠵᠤᠭᠤ᠃ ᠦᠭᠡ ᠨᠣᠶᠠᠨ ᠬᠠᠷᠠᠭᠤᠰᠤᠯ ᠤ᠋ᠨ ᠰᠠᠯᠬᠢᠨ ᠳ᠋ᠤ᠌ ᠨᠤᠷᠠᠨ ᠤᠨᠠᠵᠤ ᠪᠣᠢ ᠰᠡᠳᠬᠢᠯ ᠦ᠋ᠨ ᠰᠤᠪᠤᠷᠭᠠ ᠶ᠋ᠢ ᠨᠢ ᠥᠩᠭᠡᠢᠵᠦ ᠬᠠᠷᠠᠭᠰᠠᠨ ᠮᠡᠲᠦ᠂
一 ᠡᠭᠡᠴᠢ ᠠᠪᠠᠭᠠᠢ ᠮᠢᠨᠦ ᠬᠠᠶᠠᠭᠠᠨ ᠳ᠋ᠤ᠌ ᠪᠠᠢᠵᠤ ᠯᠠ ᠪᠠᠢᠭ᠃ ᠠᠯᠵᠠᠬᠤ ᠦᠭᠡᠢ ᠠ᠋ ᠭᠡᠬᠦ ᠨᠢ《ᠠᠯᠠᠴᠢᠬᠠᠬᠤ ᠦᠭᠡᠢ ᠠ᠋》ᠭᠡᠰᠡᠨ ᠦᠭᠡ ᠰᠢᠭ ᠰᠠᠨᠠᠭᠳᠠᠨᠠ᠃ ᠶᠡᠷᠦ ᠨᠢ ᠯᠡ ᠴᠢᠨᠣᠠ ᠶ᠋ᠢᠨ ᠰᠠᠨᠠᠭᠠ ᠲᠠᠢ ᠨᠣᠶᠠᠨ ᠶᠤᠮ᠃
一 ᠵᠠ! ᠭᠡᠳ ᠮᠡᠬᠦᠰᠬᠢᠭᠰᠡᠨ ᠢ᠋ᠶ᠋ᠡᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠣᠰᠣ ᠶ᠋ᠢ ᠳᠣᠲᠣᠭᠠᠳᠤ ᠬᠣᠷᠮᠣᠢ ᠳ᠋ᠠᠭᠠᠨ ᠱᠤᠳᠤᠷᠬᠤ ᠳ᠋ᠤ᠌ ᠦᠭᠡ ᠨᠣᠶᠠᠨ ᠬᠡᠨ ᠨᠢᠭᠡᠨ ᠳ᠋ᠦ᠍ ᠳᠣᠬᠢᠶᠠ ᠥᠭᠬᠦ ᠪᠣᠯᠤᠯᠲᠠᠢ ᠬᠣᠭᠣᠯᠠᠢ ᠵᠠᠰᠠᠯᠠ᠃ ᠴᠠᠴᠠᠷ ᠤ᠋ᠨ ᠰᠡᠬᠦᠭᠡᠰᠦᠲᠡᠢ ᠡᠭᠦᠳᠡ ᠪᠡᠷ ᠨᠠᠬᠢᠯᠵᠠᠭᠰᠠᠨ ᠭᠤᠸᠠ ᠪᠦᠰᠡᠭᠦᠢ ᠴᠡᠴᠡᠭ ᠦ᠋ᠨ ᠦᠨᠦᠷ ᠰᠡᠩᠭᠢᠨᠡᠭᠦᠯᠦᠨ ᠣᠷᠣᠵᠤ ᠢᠷᠡᠬᠦ ᠨᠢ ᠮᠥᠨᠳᠥᠷ ᠮᠥᠨ ᠰᠠᠨᠵᠠᠢ᠃
一 ᠬᠥᠶᠢ ᠠ᠋᠂ ᠮᠥᠨᠳᠥᠷ ᠴᠢ ᠬᠡᠵᠢᠶᠡ ᠢᠷᠡᠪᠡ? ᠭᠡᠮᠡᠨ ᠥᠪᠡᠷ ᠦ᠋ᠨ ᠭᠤᠨᠢᠭ ᠢ᠋ ᠮᠠᠷᠲᠠᠵᠤ᠂ ᠥᠷᠥᠭᠡᠯ ᠦ᠋ᠨ ᠵᠢᠷᠭᠠᠯ ᠳ᠋ᠤ᠌ ᠪᠠᠶᠠᠷᠯᠠᠨ ᠳᠠᠭᠤ ᠱᠣᠣ ᠪᠣᠯᠬᠤ ᠳ᠋ᠤ᠌ ᠮᠥᠨᠥᠬᠡᠨ ᠬᠡᠯᠡ ᠦᠭᠡᠢ ᠪᠦᠰᠡᠭᠦᠢ ᠢᠨᠢᠶᠡᠬᠦ ᠡᠴᠡ ᠥᠭᠡᠷᠡ ᠶ᠋ᠢ ᠬᠦᠦᠷᠨᠢᠵᠦ ᠦᠯᠦ ᠴᠢᠳᠠᠵᠠᠢ᠃ ᠦᠭᠡ ᠨᠣᠶᠠᠨ᠂
一 ᠮᠥᠨᠳᠥᠷ ᠢᠷᠡᠭᠰᠡᠨ ᠭᠡᠳ ᠬᠠᠭᠤᠴᠢᠨ ᠲᠠᠨᠢᠯ ᠤ᠋ᠳ ᠢ᠋ᠶ᠋ᠠᠨ ᠲᠣᠭᠲᠠᠭᠠᠨ ᠬᠠᠷᠠᠵᠤ᠂
一 ᠮᠥᠨᠳᠥᠷ᠂ ᠴᠢ ᠡᠭᠦᠨ ᠢ᠋ ᠥᠪᠡᠷ ᠦ᠋ᠨ ᠴᠠᠴᠠᠷ ᠲᠤ᠌ ᠠᠮᠠᠷᠠᠭᠠ! ᠭᠡᠪᠡ᠃ ᠮᠥᠨᠳᠥᠷ ᠰᠣᠴᠢᠨ ᠪᠣᠨᠲᠤᠭᠤᠰᠬᠢᠵᠤ ᠠᠶᠤᠭᠰᠠᠨ᠂ ᠭᠠᠢᠬᠠᠭᠰᠠᠨ ᠨᠢᠳᠦ ᠪᠡᠷ ᠦᠭᠡ ᠨᠣᠶᠠᠨ ᠢ᠋ ᠬᠠᠷᠠᠬᠤ ᠳ᠋ᠤ᠌᠂
一 ᠶᠠᠪᠤᠵᠠᠭᠠ! ᠬᠡᠮᠡᠵᠡᠢ᠃ ᠮᠡᠯᠲᠡᠭ ᠬᠢᠶᠡ ᠭᠠᠪᠠ ᠭᠢᠨᠵᠢ ᠪᠡᠨ ᠬᠠᠷᠵᠢᠭᠢᠨᠠᠭᠤᠯᠤᠨ ᠥᠨᠳᠡᠢᠬᠦ ᠳ᠋ᠦ᠍ ᠮᠥᠨᠳᠥᠷ ᠰᠤᠭᠤᠨ ᠠ᠋ᠴᠠ ᠨᠢ ᠳᠥᠰᠢᠨ ᠪᠣᠰᠬᠠᠯᠠ᠃ ᠮᠡᠯᠲᠡᠭ ᠬᠢᠶᠡ ᠦᠭᠡ ᠬᠡᠯᠡᠬᠦ ᠪᠡᠷ ᠲᠦᠳᠡᠨ ᠵᠣᠭᠰᠣᠲᠠᠯᠠ᠂
一 ᠰᠠᠢᠬᠠᠨ ᠠᠮᠠᠷᠠ᠃ ᠲᠠ ᠦᠷ ᠢ᠋ᠶ᠋ᠡᠷ ᠬᠤᠲᠤᠭᠲᠤ ᠮᠣᠩᠬᠣᠷ ᠤ᠋ᠨ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠲᠤᠭᠠᠢ ᠭᠡᠯᠡ᠃ ᠶᠠᠳᠠᠷᠠᠭᠰᠠᠨ ᠬᠣᠶᠠᠷ ᠠᠮᠢᠲᠠᠨ ᠰᠡᠯᠳᠦᠷᠬᠢᠯᠡᠨ ᠬᠡᠯᠲᠦᠷᠢᠭᠰᠡᠭᠡᠷ ᠮᠥᠨᠳᠥᠷ ᠬᠡᠦᠬᠡᠨ ᠦ᠌ ᠴᠠᠴᠠᠷ ᠲᠤ᠌ ᠢᠷᠡᠪᠡᠯ ᠶᠡᠷᠦ ᠭᠠᠭᠴᠠ ᠬᠥᠮᠦᠨ ᠯᠡ ᠲᠣᠯᠣᠭᠠᠢ ᠬᠣᠷᠭᠣᠳᠠᠬᠤ ᠲᠡᠳᠦᠢ ᠵᠢᠵᠢᠭᠬᠡᠨ ᠬᠡᠳᠦᠢ ᠴᠦ᠍ ᠪᠠᠰᠠ ᠬᠦ᠌ ᠬᠢᠷᠢ ᠳ᠋ᠡᠭᠡᠨ ᠬᠡᠭᠡᠨᠴᠢᠷ ᠲᠣᠬᠢᠯᠢᠭ ᠠᠵᠢ᠃ ᠮᠥᠨᠳᠥᠷ ᠴᠢᠮᠡᠭᠡ ᠦᠭᠡᠢ ᠱᠤᠤᠬᠢᠲᠤᠨᠠᠨ ᠴᠠᠴᠠᠷ ᠤ᠋ᠨ ᠬᠠᠶᠠᠭᠠᠨ ᠠ᠋ᠴᠠ ᠰᠠᠭᠰᠤ ᠳᠦᠭᠦᠷᠡᠩ ᠵᠢᠮᠢᠰ ᠭᠠᠷᠭᠠᠨ ᠡᠮᠦᠨᠡ ᠨᠢ ᠲᠠᠯᠪᠢᠭᠠᠳ᠂ ᠵᠢᠵᠢᠭᠬᠡᠨ ᠴᠣᠵᠢᠭᠠᠷ ᠸᠠᠭᠠᠷ ᠲᠠᠢ ᠠᠷᠢᠬᠢ ᠬᠤᠨᠳᠠᠭᠠᠯᠠᠨ ᠪᠠᠷᠢᠪᠠ᠃ ᠴᠢᠩᠭᠢᠬᠦ ᠳ᠋ᠦ᠍ ᠠᠷᠢᠯᠭᠠᠭᠰᠠᠨ ᠰᠣᠩᠭᠢᠨᠠ ᠰᠢᠭ᠋ ᠠᠷᠪᠠᠨ ᠬᠤᠷᠤᠭᠤ ᠨᠢ ᠴᠡᠴᠡᠷᠬᠢᠯᠡᠨ᠂ ᠰᠢᠭᠦᠰᠦ ᠨᠢ ᠪᠦᠷᠢᠯᠳᠦᠨ ᠴᠣᠭᠴᠠᠯᠠᠭᠰᠠᠨ ᠨᠠᠮᠤᠷ ᠣᠷᠣᠢ ᠶ᠋ᠢᠨ ᠵᠢᠮᠢᠰ ᠰᠢᠭ ᠪᠤᠯᠴᠢᠭᠠᠷ ᠶᠠᠭᠠᠬᠠᠨ ᠤᠷᠤᠭᠤᠯ ᠨᠢ ᠦᠯᠦ ᠮᠡᠳᠡᠭᠬᠡᠨ ᠴᠣᠷᠪᠣᠯᠵᠠᠵᠤ ᠠᠪᠠᠢ᠃ ᠶᠡᠷᠦ ᠡᠨᠡ ᠵᠢᠭᠵᠢᠭᠡᠷᠬᠡᠨ ᠠᠮᠢᠲᠠᠨ ᠭᠠᠳᠠᠨᠠ ᠠ᠋ᠴᠠ ᠨᠢ ᠬᠠᠷᠠᠬᠤ ᠳ᠋ᠤ᠌ ᠬᠠᠷᠢᠭᠤ ᠦᠭᠡᠢ ᠲᠤᠷᠢᠬᠠᠨ ᠬᠡᠳᠦᠢ ᠴᠦ᠍ ᠳᠣᠲᠣᠷᠠ ᠰᠡᠳᠬᠢᠯ ᠨᠢ ᠬᠠᠲᠠᠭᠠᠭᠳᠠᠵᠤ ᠭᠦᠢᠴᠡᠭᠰᠡᠨ ᠭᠠᠩ ᠰᠢᠭ᠋ ᠠᠮᠢᠲᠠᠨ ᠪᠣᠯᠬᠤ ᠶ᠋ᠢ ᠭᠠᠭᠴᠠ ᠬᠦ᠌ ᠮᠡᠯᠲᠡᠭ ᠬᠢᠶᠡ ᠯᠠ ᠮᠡᠳᠡᠬᠦ ᠪᠢᠯᠡ᠃ ᠲᠡᠷᠡ ᠪᠡᠷ ᠡᠢᠨ ᠠᠷᠢᠬᠢ ᠬᠤᠨᠳᠠᠭᠠᠯᠠᠵᠤ ᠥᠭᠭᠦᠭᠡᠳ ᠭᠤᠨᠵᠢᠨ ᠰᠤᠭᠤ ᠰᠢᠭ᠋ ᠰᠠᠢᠬᠠᠨ ᠪᠡᠶᠡ ᠪᠡᠷ ᠳᠥᠷᠪᠡᠨ ᠬᠥᠯᠯᠡᠨ ᠮᠥᠯᠬᠥᠵᠦ ᠬᠣᠣᠰ ᠲᠣᠷᠭᠠᠨ ᠳᠡᠷᠡ ᠲᠠᠯᠪᠢᠵᠤ᠂ ᠬᠠᠵᠢ ᠳᠤᠷᠳᠤᠩ ᠬᠤᠴᠢᠯᠭᠠ ᠳᠡᠯᠭᠡᠵᠦ ᠣᠷᠣ ᠵᠠᠰᠠᠪᠠᠢ᠃ ᠲᠡᠭᠦᠨ ᠦ᠌ ᠬᠢᠯ ᠬᠠᠷᠠᠬᠠᠨ ᠦᠰᠦ᠂ ᠴᠠᠰᠤ ᠴᠠᠭᠠᠨ ᠴᠢᠷᠠᠢ ᠪᠠᠨ ᠲᠠᠯᠠ ᠪᠦᠲᠡᠭᠡᠨ ᠤᠨᠠᠬᠤ ᠳ᠋ᠤ᠌ ᠨᠢᠭᠤᠷ ᠨᠢ ᠰᠡᠭᠦᠳᠡᠷᠲᠦᠨ ᠭᠤᠨᠢᠭ ᠲᠠᠢ ᠠᠪᠠᠴᠤ ᠦᠵᠡᠰᠬᠦᠯᠡᠩ ᠲᠡᠢ ᠪᠣᠯᠵᠤ ᠬᠠᠷᠠᠭᠳᠠᠬᠤ ᠠᠵᠢ᠃ ᠬᠦᠰᠡᠯ ᠡᠴᠡ ᠭᠠᠳᠠᠭᠤᠷ ᠤᠢᠯᠠᠨ ᠳ᠋ᠤ᠌ ᠬᠦᠴᠦ ᠪᠡᠷ ᠥᠪᠡᠷ ᠢ᠋ ᠪᠡᠨ ᠪᠠᠷᠢᠵᠤ ᠥᠭᠴᠦ ᠪᠣᠢ ᠵᠣᠪᠠᠯᠠᠩᠲᠤ ᠪᠦᠰᠡᠭᠦᠢ ᠶ᠋ᠢᠨ ᠬᠥᠳᠡᠯᠬᠦ ᠨᠢ ᠬᠥᠰᠢᠭᠦᠨ ᠠᠭᠠᠳ ᠤᠳᠠᠭᠠᠨ᠂ ᠰᠠᠨᠠᠭᠠ ᠠᠯᠳᠠᠬᠤ ᠨᠢ ᠣᠢ ᠲᠠᠢ ᠠᠭᠠᠳ ᠰᠡᠷᠢᠭᠦᠬᠡᠨ ᠮᠡᠲᠦ ᠪᠥᠯᠥᠭᠡ᠃ ᠲᠡᠭᠡᠵᠦ ᠲᠡᠭᠡᠵᠦ ᠳ᠋ᠧᠩ ᠦ᠋ᠨ ᠭᠣᠣᠯ ᠢ᠋ᠶ᠋ᠠᠨ ᠴᠢᠮᠬᠢᠨ ᠤᠨᠲᠠᠷᠠᠭᠠᠭᠠᠳ ᠬᠤᠪᠴᠠᠰᠤ ᠪᠠᠨ ᠳᠠᠢᠴᠢᠨ ᠱᠠᠯᠳᠠᠩᠨᠠᠬᠤ ᠳ᠋ᠤ᠌ ᠵᠤᠯᠠ ᠶ᠋ᠢᠨ ᠭᠣᠣᠯ ᠰᠢᠭ᠋ ᠭᠠᠨᠢᠬᠠᠨ ᠴᠠᠭᠠᠨ ᠪᠡᠶᠡ ᠡᠴᠡ ᠬᠠᠷᠠᠩᠭᠤᠢ ᠴᠠᠴᠠᠷ ᠲᠤ᠌ ᠭᠡᠭᠡ ᠲᠣᠰᠴᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠵᠠᠢ᠃
ᠮᠥᠨᠳᠥᠷ ᠬᠡᠦᠬᠡᠨ ᠲᠡᠢᠨ ᠴᠢᠮᠡᠭᠡ ᠲᠠᠰᠤᠷᠠᠪᠠ᠃ ᠠᠬᠢᠮᠠᠭ ᠡᠷᠡ ᠬᠡᠵᠢᠶᠡ ᠣᠷᠣᠵᠤ ᠢᠷᠡᠵᠦ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠬᠤᠮᠬᠢᠨ ᠦᠩᠭᠡᠬᠦ ᠶ᠋ᠢ ᠬᠦᠯᠢᠶᠡᠨ ᠬᠡᠪᠲᠡᠵᠦ ᠠᠪᠠᠢ᠃ ᠶᠡᠷᠦ ᠲᠡᠮᠦᠵᠢᠨ ᠦᠭᠡ ᠲᠡᠭᠦᠨ ᠢ᠋ ᠬᠡᠷᠡᠭᠲᠡᠢ ᠬᠥᠮᠦᠨ ᠳ᠋ᠡᠭᠡᠨ ᠳᠡᠪᠢᠰᠴᠦ ᠦᠭᠭᠦᠭᠰᠡᠭᠡᠷ ᠥᠨᠥ ᠶ᠋ᠢ ᠬᠦᠷᠦᠭᠰᠡᠨ ᠶᠦᠮ ᠰᠠᠨᠵᠠᠢ᠃ ᠲᠡᠷᠡ ᠵᠣᠪᠠᠯᠠᠩ ᠢ᠋ ᠳᠣᠲᠣᠷᠠ ᠨᠢ ᠣᠷᠣᠭᠰᠠᠨ ᠶᠤᠮ ᠰᠢᠭ᠋ ᠮᠡᠳᠡᠬᠦ ᠭᠠᠭᠴᠠ ᠬᠥᠮᠦᠨ ᠪᠣᠯ ᠮᠡᠯᠲᠡᠭ ᠬᠢᠶᠡ ᠥᠪᠡᠷ ᠢ᠋ᠶ᠋ᠡᠨ ᠪᠢᠯᠡ᠃ ᠵᠣᠯᠢᠶᠠᠨ ᠳ᠋ᠤ᠌ ᠣᠴᠢᠵᠤ᠂ ᠪᠠᠷᠢᠴᠠᠭᠠᠨ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠬᠠᠷᠠ ᠡᠳᠦᠷ ᠦ᠋ᠳ ᠦ᠋ᠨ ᠭᠠᠭᠴᠠ ᠭᠡᠷᠡᠯ ᠡᠨᠡ ᠪᠦᠰᠡᠭᠦᠢ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡ ᠪᠡᠷ ᠬᠡᠷᠡᠢᠳ ᠨᠣᠶᠠᠳ ᠤ᠋ᠨ ᠬᠠᠷᠠᠴᠤ ᠪᠠᠷ ᠰᠦ ᠳᠣᠯᠢᠶᠠᠭᠰᠠᠨ ᠭᠥᠯᠥᠭᠡ ᠰᠢᠭ ᠨᠠᠬᠢᠯᠵᠠᠨ ᠭᠦᠶᠦᠵᠦ᠂ ᠮᠡᠬᠦᠯᠵᠡᠨ ᠪᠠᠢᠪᠠᠴᠤ ᠳᠣᠲᠣᠷᠠ ᠰᠡᠳᠬᠢᠯ ᠳ᠋ᠡᠭᠡᠨ ᠣᠭᠲᠣ ᠥᠭᠡᠷᠡ ᠶ᠋ᠢ ᠪᠣᠳᠣᠵᠤ ᠪᠥᠯᠥᠭᠡ᠃ ᠮᠥᠨᠳᠥᠷ ᠪᠦᠰᠡᠭᠦᠢ ᠴᠣᠣᠵᠢ ᠦᠭᠡᠢ ᠪᠣᠯᠬᠤ ᠠ᠋ᠴᠠ ᠱᠣᠷᠣᠩ ᠮᠡᠲᠦ ᠣᠷᠳᠣᠨ ᠳ᠋ᠤ᠌᠂ ᠭᠠᠪᠠ ᠦᠭᠡᠢ ᠯᠡ ᠪᠣᠯᠬᠤ ᠠ᠋ᠴᠠ ᠶᠠᠯᠠᠲᠠᠨ ᠮᠡᠲᠦ ᠴᠠᠭᠳᠠᠭᠤᠯᠤᠨ ᠰᠠᠭᠤᠬᠤ ᠮᠡᠯᠲᠡᠭ ᠬᠢᠶᠡ ᠶ᠋ᠢᠨ ᠬᠣᠭᠣᠯᠠ ᠴᠠᠢ ᠶ᠋ᠢ ᠣᠢᠷᠠᠲᠤᠭᠤᠯᠬᠤ ᠠᠯᠪᠠᠨ ᠳ᠋ᠤ᠌ ᠲᠣᠬᠤᠭᠠᠭᠳᠠᠵᠤ ᠠᠪᠠᠢ᠃ ᠦᠭᠡ ᠬᠥᠪᠡᠭᠦᠨ ᠬᠠᠨ ᠬᠣᠯᠠ ᠶ᠋ᠢ ᠤᠨᠤᠵᠤ᠂ ᠬᠠᠪᠤᠯ ᠬᠠᠭᠠᠨ ᠢ᠋ ᠵᠣᠷᠢᠭᠰᠠᠨ ᠠ᠋ᠴᠠ ᠬᠣᠢᠰᠢ ᠯᠠᠪᠲᠠᠶᠠ ᠬᠠᠭᠠᠰ ᠰᠠᠷᠠ ᠨᠢᠰᠦᠨ ᠣᠳᠬᠤ ᠳ᠋ᠤ᠌ ᠰᠤᠷᠠᠭ ᠠᠵᠢᠭ ᠡᠰᠡ ᠰᠣᠨᠣᠰᠳᠠᠵᠠᠢ᠃ ᠲᠠᠲ᠋ᠠᠷ ᠬᠥᠪᠡᠭᠦᠨ ᠦᠭᠡ ᠨᠣᠶᠠᠨ ᠬᠠᠷᠠᠴᠤ ᠬᠢᠶᠡ ᠶ᠋ᠢ ᠮᠠᠷᠲᠠᠭᠰᠠᠨ ᠬᠡᠷᠡᠭ ᠤᠤ᠂ ᠨᠣᠶᠠᠳ ᠳᠡᠭᠡᠳᠦᠰ ᠭᠡᠷ ᠦ᠋ᠨ ᠡᠵᠡᠨ ᠪᠣᠯᠬᠤ ᠠ᠋ᠴᠠ ᠲᠥᠷᠥ ᠶ᠋ᠢᠨ ᠡᠵᠡᠨ ᠪᠢᠰᠢ ᠮᠡᠯᠲᠡᠭ ᠤ᠋ᠨ ᠲᠥᠯᠥᠭᠡᠨᠡ ᠴᠠᠭ ᠵᠠᠪ ᠦᠷᠡᠬᠦ ᠶᠠᠭᠤᠨ ᠭᠡᠮᠡᠨ ᠣᠷᠬᠢᠭᠰᠠᠨ ᠬᠡᠷᠡᠭ ᠤᠤ᠂ ᠪᠤᠷᠬᠠᠨ ᠯᠠ ᠮᠡᠳᠡᠨᠡ᠃ ᠡᠢᠨ ᠬᠥᠨᠳᠡᠭᠦᠷ ᠰᠡᠳᠬᠢᠯ ᠲᠥᠩᠬᠢᠵᠦ ᠤᠷᠤᠰᠤᠭᠰᠠᠨ ᠡᠳᠦᠷ ᠬᠣᠨᠣᠭ᠂ ᠮᠥᠨᠳᠥᠷ ᠥᠬᠢᠨ ᠦ᠌ ᠵᠣᠷᠢᠭ ᠢ᠋ ᠬᠤᠷᠴᠠᠯᠠᠵᠤ ᠥᠭᠭᠦᠭᠰᠡᠨ ᠢ᠋ ᠬᠤᠷᠵᠠᠬᠤᠰ ᠪᠣᠶᠣᠷᠤᠭ ᠤ᠋ᠨ ᠬᠡᠷᠡᠢᠳ ᠦ᠋ᠳ ᠪᠠᠢᠲᠤᠭᠠᠢ ᠠᠪᠴᠢᠷᠠᠭᠰᠠᠨ ᠬᠣᠭᠣᠯᠠ ᠶ᠋ᠢ ᠨᠢ ᠳᠤᠷᠠᠲᠠᠢ ᠳᠤᠷᠠ ᠦᠭᠡᠢ ᠴᠥᠯᠮᠥᠵᠦ ᠰᠠᠭᠤᠬᠤ ᠮᠡᠯᠲᠡᠭ ᠬᠢᠶᠡ ᠬᠦᠷᠲᠡᠯᠡ ᠮᠡᠳᠡᠭᠡ ᠦᠭᠡᠢ ᠪᠣᠯᠠᠢ᠃ ᠡᠢᠨ ᠪᠠᠢᠲᠠᠯᠠ ᠨᠢᠭᠡᠨ ᠣᠷᠣᠢ ᠪᠦᠰᠡᠭᠦᠢ ᠴᠠᠷᠠ ᠳᠦᠭᠦᠷᠡᠩ ᠴᠢᠨᠠᠭᠰᠠᠨ ᠮᠢᠬᠠ ᠠᠪᠴᠢᠷᠠᠵᠤ ᠡᠮᠦᠨᠡ ᠨᠢ ᠲᠠᠯᠪᠢᠭᠠᠳ᠂ ᠳᠡᠷᠭᠡᠳᠡ ᠨᠢ ᠰᠥᠭᠥᠳᠦᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠮᠥᠩᠭᠥᠨ ᠲᠣᠨᠣᠭ ᠲᠠᠢ ᠤᠢᠰᠤᠨ ᠡᠰᠢ ᠲᠡᠢ ᠬᠢᠲᠤᠭᠠ ᠥᠭᠬᠦ ᠶ᠋ᠢᠨ ᠮᠠᠭᠤ ᠪᠠᠷ ᠥᠭᠴᠡᠢ᠃ ᠬᠢᠲᠤᠭᠠ ᠠᠪᠬᠤ ᠪᠠᠷ ᠰᠠᠷᠪᠠᠢᠭᠰᠠᠨ ᠮᠡᠯᠲᠡᠭ ᠤᠬᠤᠰᠬᠢᠨ ᠰᠣᠴᠢᠵᠤ ᠬᠠᠷᠠᠪᠠᠯ ᠮᠥᠨᠳᠥᠷ ᠬᠡᠦᠬᠡᠨ ᠦ᠌ ᠨᠢᠳᠦ ᠤᠴᠢᠷ ᠦᠭᠡᠢ ᠳᠦᠷᠯᠡᠭᠡᠨᠡᠨ ᠲᠣᠷᠮᠣᠯᠵᠠᠵᠤ᠂ ᠡᠷᠡᠦ ᠪᠡᠷ ᠢ᠋ᠶ᠋ᠡᠨ ᠲᠠᠪᠠᠭ ᠲᠠᠢ ᠮᠢᠬᠠ ᠤᠷᠤᠭᠤ ᠳᠣᠬᠢᠪᠠ᠃ ᠮᠥᠩᠭᠥᠨ ᠴᠡᠷᠡᠨ ᠳᠡᠭᠡᠷᠡ ᠴᠢᠨᠠᠵᠤ ᠲᠠᠯᠪᠢᠭᠰᠠᠨ ᠮᠥᠴᠢ ᠮᠢᠬᠠ ᠶ᠋ᠢ ᠪᠦᠭᠦᠳᠡ ᠶ᠋ᠢ ᠨᠢ ᠶᠣᠰᠣ ᠪᠤᠷᠤᠭᠤ ᠲᠠᠯᠪᠢᠭᠰᠠᠨ ᠨᠢ ᠶᠣᠭᠲᠠ ᠤᠴᠢᠷ ᠠᠭᠤᠯᠤᠭᠰᠠᠨ ᠢ᠋ ᠮᠡᠯᠲᠡᠭ ᠬᠢᠶᠡ ᠰᠠᠶᠢ ᠯᠠ ᠤᠬᠠᠭᠠᠷᠠᠵᠠᠢ᠃ ᠡᠢᠨ ᠬᠣᠵᠢᠭᠤ ᠣᠢᠯᠠᠭᠠᠭᠰᠠᠨ ᠭᠡᠭᠡ ᠬᠢᠯᠠᠰᠬᠢᠬᠦ ᠳ᠋ᠦ᠍ ᠬᠡᠦᠬᠡᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠤᠷᠮᠠᠰᠢᠨ ᠪᠠᠶᠠᠰᠬᠤ ᠶᠠᠩᠵᠤ ᠲᠥᠯᠥᠪ ᠢᠯᠡᠷᠡᠵᠦ᠂ ᠪᠣᠭᠲᠣᠭᠣᠰᠣ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠡᠵᠢᠭᠡ ᠶ᠋ᠢ ᠨᠢ ᠣᠭᠲᠣᠯᠵᠤ᠂ ᠭᠡᠳᠡᠰᠦ ᠶ᠋ᠢ ᠨᠢ ᠬᠠᠭᠠᠯᠵᠤ ᠣᠷᠬᠢᠭᠠᠳ ᠮᠡᠯᠲᠡᠭ ᠢ᠋ ᠬᠠᠷᠠᠯᠠ᠃ ᠮᠥᠨᠥᠬᠡᠨ ᠬᠡᠯᠡ ᠦᠭᠡᠢ ᠬᠡᠦᠬᠡᠨ ᠦ᠌ ᠶᠣᠭᠲᠠ ᠤᠳᠬᠠ ᠶ᠋ᠢ ᠬᠠᠭᠠᠰ ᠳᠤᠲᠠᠭᠤ ᠤᠬᠠᠭᠠᠷᠠᠭᠰᠠᠨ ᠮᠡᠯᠲᠡᠭ᠂
— ᠨᠠᠮᠠᠶ᠋ᠢ ᠤᠤ? ᠭᠡᠪᠡᠯ ᠥᠬᠢᠨ ᠪᠥᠩᠵᠢᠭᠡᠨᠡᠲᠡᠯᠡ ᠲᠣᠯᠣᠭᠠᠢ ᠳᠣᠬᠢᠨ᠂ ᠬᠣᠭᠣᠯᠠᠢ ᠪᠠᠨ ᠬᠡᠷᠴᠢᠵᠦ ᠦᠵᠡᠭᠦᠯᠦᠨ ᠪᠠᠲᠤᠯᠠᠵᠠᠢ᠃
— ᠬᠡᠵᠢᠶᠡ? ᠥᠬᠢᠨ ᠰᠠᠨᠳᠤᠷᠤᠨ ᠲᠠᠬᠢᠯᠵᠠᠵᠤ᠂ ᠡᠭᠦᠳᠡ ᠤᠷᠤᠭᠤ ᠵᠢᠭᠠᠨ ᠥᠨᠳᠡᠯᠵᠡᠭᠰᠡᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠯᠴᠢᠭᠤᠷ ᠢ᠋ ᠬᠠᠭᠤ ᠲᠡᠳᠡᠨ ᠠᠪᠴᠤ ᠳᠡᠯᠭᠡᠵᠦ ᠲᠠᠯᠪᠢᠭᠰᠠᠨ ᠢ᠋ᠶ᠋ᠠᠨ ᠠᠭᠤᠷ ᠰᠠᠪᠰᠠᠭᠰᠠᠨ ᠬᠠᠯᠠᠭᠤᠨ ᠮᠢᠬᠠ ᠶ᠋ᠢ ᠰᠡᠷ ᠬᠢᠲᠡᠯᠡ ᠠᠰᠬᠠᠭᠠᠳ ᠲᠡᠮᠲᠡᠴᠢᠨ ᠪᠣᠭᠣᠵᠤ ᠣᠷᠬᠢᠪᠠ᠃ ᠴᠢᠩᠭᠢᠭᠡᠳ ᠣᠳᠣ ᠬᠦᠷᠲᠡᠯᠡ ᠠᠩᠭᠠᠢᠨ ᠰᠠᠭᠤᠬᠤ ᠮᠡᠯᠲᠡᠭ ᠬᠢᠶᠡ ᠶ᠋ᠢ ᠶᠠᠭᠠᠷᠠᠭᠤᠯᠵᠤ᠂ ᠸᠴᠢᠷ ᠵᠠᠩᠭᠢᠳᠴᠤ ᠡᠪᠬᠡᠭᠰᠡᠨ ᠳᠤᠷᠳᠤᠩ ᠪᠦᠰᠡ ᠶ᠋ᠢ ᠨᠢ ᠡᠪᠦᠷ ᠳᠡᠭᠡᠷᠡ ᠨᠢ ᠴᠢᠯᠠᠭᠤᠳᠠᠯᠠ᠃ ᠮᠡᠯᠲᠡᠭ ᠬᠢᠶᠡ ᠦᠷᠭᠦᠨ ᠪᠣᠰᠬᠤ ᠬᠥᠭᠰᠢᠨ ᠠᠳᠠ ᠮᠡᠲᠦ ᠨᠥᠮᠥᠭᠡᠨ ᠳᠡᠪᠡᠯ ᠢ᠋ᠶ᠋ᠡᠨ ᠤᠨᠠᠭᠠᠨ ᠪᠠᠷᠢᠨ ᠪᠣᠰᠤᠨ ᠬᠠᠷᠠᠢᠵᠠᠢ᠃ ᠮᠥᠨᠳᠥᠷ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠪᠡᠯ ᠢ᠋ ᠪᠦᠰᠡᠯᠡᠵᠦ ᠥᠭᠴᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠭᠠᠷ ᠢ᠋ ᠨᠢ ᠠᠯᠳᠠᠯᠠᠭᠤᠯᠤᠨ ᠪᠠᠢᠵᠤ ᠪᠦᠰᠡ ᠶ᠋ᠢ ᠨᠢ ᠵᠠᠪᠬᠠᠢᠳᠠᠯᠠ ᠣᠷᠢᠶᠠᠪᠠ᠃ ᠴᠢᠩᠭᠢᠭᠡᠳ ᠪᠣᠭᠣᠭᠰᠠᠨ ᠠᠯᠴᠢᠭᠤᠷ ᠨᠢ ᠲᠣᠰᠣ ᠳᠠᠭᠠᠭᠠᠭᠰᠠᠨ ᠮᠥᠨᠥᠬᠡᠨ ᠵᠠᠮ ᠤ᠋ᠨ ᠬᠦᠨᠡᠰᠦ ᠪᠡᠨ ᠭᠠᠷ ᠲᠤᠨᠢ ᠠᠳᠬᠤᠭᠤᠯᠤᠯᠠ᠃ ᠶᠡᠷᠦ ᠮᠡᠯᠲᠡᠩ ᠬᠢᠶᠡ ᠬᠣᠪᠣᠰᠣᠳᠠᠭᠤᠯᠤᠭᠰᠠᠨ ᠮᠡᠲᠦ ᠥᠬᠢᠨ ᠦ᠌ ᠮᠠᠲᠠᠯ ᠳ᠋ᠤ᠌ ᠪᠦᠷᠢᠨ ᠣᠷᠣᠴᠢᠬᠠᠵᠤ ᠠᠪᠠᠢ᠃ ᠮᠥᠨᠳᠥᠷ ᠲᠡᠭᠦᠨ ᠢ᠋ ᠬᠥᠲᠥᠯᠦᠨ ᠪᠠᠯᠭᠠᠰᠤᠨ ᠤ᠋ ᠵᠠᠬᠠ ᠶ᠋ᠢᠨ ᠬᠠᠷᠠ ᠬᠠᠷᠰᠢ ᠠ᠋ᠴᠠ ᠪᠣᠯᠭᠣᠮᠵᠢ ᠲᠠᠢ ᠴᠤᠬᠤᠢᠪᠠ᠃ ᠲᠡᠷᠡ ᠪᠡᠷ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ᠂ ᠭᠠᠯ ᠤ᠋ᠨ ᠡᠷᠭᠢᠭᠦᠯ ᠢ᠋ ᠠᠯᠢ ᠨᠢᠭᠡ ᠵᠦᠭ ᠲᠦ᠍ ᠶᠠᠮᠠᠷ ᠨᠢᠭᠡᠨ ᠬᠤᠳᠠᠯ ᠬᠡᠯᠡ ᠥᠭᠴᠦ ᠶᠠᠪᠤᠭᠤᠯᠤᠭᠰᠠᠨ ᠪᠣᠯᠤᠯᠲᠠᠢ᠃ ᠭᠠᠳᠠᠭᠠ ᠬᠥᠮᠦᠨ ᠦ᠌ ᠪᠠᠷᠠ ᠬᠥᠯ ᠦ᠋ᠨ ᠴᠢᠮᠡᠭᠡ ᠠᠯᠢ ᠠᠯᠢ ᠨᠢ ᠦᠭᠡᠢ ᠨᠠᠮ ᠬᠦᠮᠬᠡᠨ ᠠᠵᠢ᠃ ᠬᠡᠯᠡ ᠦᠭᠡᠢ ᠥᠬᠢᠨ ᠲᠡᠭᠦᠨ ᠢ᠋ ᠬᠡᠦᠬᠡᠳ ᠰᠢᠭ ᠬᠥᠲᠥᠯᠦᠨ ᠭᠦᠶᠦᠵᠡᠢ᠃ ᠪᠤᠷᠭᠠᠰᠤ ᠲᠠᠰᠢᠭᠤᠯᠳᠠᠨ ᠱᠣᠭᠰᠢᠵᠤ᠂ ᠣᠷᠣᠢ ᠶ᠋ᠢᠨ ᠤᠰᠤᠨ ᠳ᠋ᠤ᠌ ᠢᠳᠡᠭᠳᠡᠭᠰᠡᠨ ᠵᠢᠯᠠᠭᠠ ᠳᠠᠭᠠᠵᠤ ᠭᠦᠶᠦᠭᠰᠡᠭᠡᠷ ᠨᠡᠯᠢᠶᠡᠳ ᠬᠣᠯᠠ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠮᠤᠬᠤᠷ ᠭᠠᠩᠭᠠ ᠶ᠋ᠢᠨ ᠨᠥᠮᠥᠷᠢ ᠳ᠋ᠦ᠍ ᠬᠣᠶᠠᠷ ᠮᠣᠷᠢ ᠴᠢᠳᠥᠷ ᠲᠡᠢ ᠪᠠᠢᠯᠠ᠃ ᠶᠡᠷᠦ ᠵᠣᠯ ᠦᠭᠡᠢ ᠵᠠᠶᠠᠭᠠᠨ ᠳ᠋ᠤ᠌ ᠬᠡᠯᠡ ᠦᠭᠡᠢ ᠲᠥᠷᠥᠭᠰᠡᠨ ᠬᠡᠳᠦᠢ ᠴᠦ᠍ ᠭᠦᠶᠦᠬᠦ ᠤᠬᠠᠭᠠᠨ ᠲᠡᠭᠦᠰ ᠨᠢᠭᠡᠨ ᠠᠵᠢ᠃ ᠲᠡᠷᠡ ᠪᠡᠷ ᠦᠷᠭᠦᠨ ᠬᠤᠤᠬᠢᠷᠠᠬᠤ ᠰᠠᠭᠠᠷᠠᠯ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠳᠠᠮᠵᠢᠨ ᠲᠤᠱᠠ ᠶ᠋ᠢ ᠨᠢ ᠲᠠᠢᠯᠵᠤ᠂ ᠴᠢᠳᠥᠷ ᠠᠪᠴᠤ ᠭᠠᠨᠵᠤᠭᠠᠯᠠᠨ ᠳᠥᠷᠥᠭᠡ ᠰᠢᠭᠦᠷᠡᠯᠡ᠃ ᠰᠠᠢᠬᠠᠨ ᠬᠡᠭᠡᠷᠡ ᠮᠣᠷᠢᠨ ᠤ᠋ ᠵᠣ ᠳᠡᠭᠡᠷᠡ ᠭᠠᠷᠬᠤ ᠳ᠋ᠤ᠌ ᠮᠡᠯᠲᠡᠭ ᠬᠢᠶᠡ ᠳ᠋ᠦ᠍ ᠵᠢᠭᠦᠷ ᠤᠷᠭᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠨᠢ ᠪᠣᠢ᠃ ᠡᠢᠨ ᠬᠡᠷᠡᠢᠳ ᠦ᠋ᠨ ᠴᠣᠣᠵᠢᠨ ᠠ᠋ᠴᠠ ᠭᠠᠷᠴᠤ᠂ ᠬᠡᠭᠡᠷ ᠮᠣᠷᠢᠨ ᠤ᠋ ᠬᠤᠷᠳᠤ ᠮᠡᠳᠡᠨ ᠳᠣᠪᠲᠣᠯᠭᠠᠭᠰᠠᠭᠠᠷ ᠬᠡᠷᠦᠯᠦᠨ ᠮᠥᠷᠡᠨ ᠦ᠌ ᠪᠠᠷᠠ ᠬᠠᠷᠠᠬᠤ ᠳ᠋ᠤ᠌ ᠲᠡᠮᠦᠵᠢᠨ ᠦᠭᠡ ᠳᠣᠪᠵᠢᠭ᠂ ᠲᠤᠪᠤᠭᠤᠴᠢ ᠬᠣᠶᠠᠷ ᠢ᠋ ᠳᠠᠭᠠᠭᠤᠯᠤᠨ ᠲᠣᠰᠴᠤ ᠪᠢᠯᠡ᠃ ᠶᠡᠷᠦ ᠨᠢᠭᠡᠨ ᠴᠠᠭ ᠲᠤ᠌ ᠲᠠᠰᠤᠷᠠᠭᠰᠠᠨ ᠠᠮᠢᠳᠤᠷᠠᠯ ᠤ᠋ᠨ ᠬᠠᠷᠭᠤᠢ ᠶ᠋ᠢ ᠵᠠᠯᠭᠠᠵᠤ ᠥᠭᠭᠦᠭᠰᠡᠨ ᠬᠥᠮᠦᠨ ᠪᠣᠯ ᠮᠥᠨᠳᠥᠷ ᠥᠬᠢᠨ ᠮᠥᠨ ᠶᠦᠮ ᠳᠡ᠃ ᠠᠴᠢ ᠶ᠋ᠢ ᠪᠠᠴᠢ ᠪᠠᠷ ᠭᠡᠭᠴᠢ ᠪᠡᠷ ᠨᠢᠴᠦᠭᠦᠨ ᠪᠦᠰᠡᠭᠦᠢ ᠶ᠋ᠢᠨ ᠢᠯᠴᠢ ᠶ᠋ᠢ ᠮᠡᠳᠡᠷᠡᠵᠦ᠂ ᠦᠰᠦ ᠶ᠋ᠢ ᠢᠯᠢᠬᠦ ᠡᠴᠡ ᠬᠡᠲᠦᠷᠡᠭᠰᠡᠨ ᠦᠭᠡᠢ ᠪᠢᠯᠡ᠃ ᠮᠡᠯᠲᠡᠭ ᠶᠡᠷᠦ ᠬᠥᠮᠦᠨ ᠦ᠌ ᠲᠤᠰᠠ ᠶ᠋ᠢ ᠤᠰᠤ ᠪᠠᠷ ᠬᠠᠷᠢᠭᠤᠯᠠᠬᠤ ᠡᠷᠡ ᠪᠢᠰᠢ ᠶᠦᠮ᠃ ᠡᠢᠨ ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢᠨ ᠡᠷᠢᠶᠡᠨ ᠪᠠᠷᠠᠭᠠᠨ ᠢ᠋ ᠡᠷᠭᠢᠭᠦᠯᠵᠦ ᠬᠥᠷᠪᠡᠭᠦᠯᠵᠦ ᠪᠣᠳᠣᠨ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠨᠠᠮ ᠤᠨᠲᠠᠵᠠᠢ᠃ ᠴᠠᠴᠠᠷ ᠤ᠋ᠨ ᠳᠡᠭᠡᠪᠦᠷ ᠱᠠᠷᠵᠢᠭᠢᠨᠠᠨ ᠬᠣᠶᠠᠷ ᠨᠢᠭᠡᠨ ᠪᠣᠷᠣᠭᠠ ᠲᠤᠰᠬᠤ ᠳ᠋ᠤ᠌ ᠰᠡᠷᠡᠯᠡ᠃ ᠨᠠᠮ ᠬᠦᠮᠬᠡᠨ ᠥᠷᠯᠥᠭᠡ ᠠᠵᠢ᠃ ᠴᠡᠯᠮᠡᠭ ᠬᠥᠬᠡ ᠲᠩᠷᠢ ᠳ᠋ᠦ᠍ ᠪᠢᠯᠵᠤᠤᠬᠠᠢ ᠵᠢᠷᠭᠢᠵᠦ᠂ ᠬᠣᠯᠠ ᠶ᠋ᠢᠨ ᠬᠣᠯᠠ ᠳ᠋ᠤ᠌ ᠣᠷᠱᠣᠨ ᠮᠥᠷᠡᠨ ᠦᠦᠬᠡ ᠲᠡᠦᠬᠡ ᠬᠦᠦᠷᠨᠢᠨ ᠠᠪᠠᠢ᠃ ᠮᠡᠯᠲᠡᠭ ᠬᠢᠶᠡ ᠦᠭᠡ ᠨᠣᠶᠠᠨ ᠤ᠋ ᠦᠭᠡ ᠶ᠋ᠢ ᠰᠠᠨᠠᠨ ᠭᠡᠨᠡᠳᠲᠡ ᠤᠬᠤᠰᠬᠢᠨ ᠥᠨᠳᠡᠢᠪᠡᠯ᠂ ᠨᠢᠯᠬᠠ ᠶ᠋ᠢᠨ ᠭᠡᠨᠡᠨ ᠢᠨᠢᠶᠡᠮᠰᠦᠭᠯᠡᠯ ᠤᠷᠤᠭᠤᠯ ᠳ᠋ᠤᠨᠢ ᠲᠣᠳᠣᠷᠠᠭᠰᠠᠨ ᠮᠥᠨᠳᠥᠷ ᠪᠦᠰᠡᠭᠦᠢ ᠤᠬᠠᠭᠠᠨ ᠦᠭᠡᠢ ᠤᠨᠲᠠᠵᠤ ᠪᠠᠢᠯᠠ᠃ ᠴᠢᠩᠭᠢᠭᠡᠳ ᠠᠮᠢᠨ ᠳ᠋ᠤᠨᠢ ᠣᠷᠣᠭᠰᠠᠨ ᠬᠥᠭᠡᠷᠦᠬᠦᠨ ᠥᠬᠢᠨ ᠢ᠋ ᠰᠡᠭᠦᠯᠴᠢ ᠶ᠋ᠢᠨ ᠤᠳᠠᠭᠠ ᠬᠠᠷᠠᠵᠤ ᠪᠠᠢᠨᠠ ᠪᠣᠢ ᠮᠡᠲᠦ ᠰᠢᠮᠳᠠᠨ ᠤᠳᠠᠭᠠᠨ ᠰᠢᠷᠳᠡᠵᠡᠢ᠃ ᠮᠡᠯᠲᠡᠭ ᠬᠢᠶᠡ ᠶ᠋ᠢᠨ ᠪᠠᠳᠬᠠ ᠰᠢᠪᠠᠭᠰᠠᠨ ᠬᠠᠷᠠ ᠨᠢᠭᠤᠷᠤᠨ ᠳ᠋ᠤ᠌ ᠬᠠᠢᠷᠠ ᠤᠶᠠᠷᠠᠯ ᠤ᠋ᠨ ᠭᠡᠭᠡ ᠬᠠᠷᠪᠤᠵᠤ᠂ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠴᠢᠢᠯᠭᠡᠨᠡᠨ᠂ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠵᠤ᠂
一 ᠥᠬᠢᠨ ᠮᠢᠨᠢ᠁ ᠭᠡᠵᠦ ᠰᠢᠪᠡᠨᠡᠯᠡ᠃ ᠬᠤᠪᠴᠠᠰᠤ ᠪᠠᠨ ᠴᠤ᠌ ᠲᠠᠢᠯᠤᠭᠠ ᠦᠭᠡᠢ ᠤᠨᠲᠠᠭᠰᠠᠨ ᠮᠡᠯᠲᠡᠭ ᠬᠢᠶᠡ ᠵᠥᠭᠡᠯᠡᠬᠡᠨ ᠪᠣᠰᠴᠤ ᠳᠥᠷᠪᠡᠨ ᠬᠥᠯᠯᠡᠨ ᠴᠠᠴᠠᠷ ᠠ᠋ᠴᠠ ᠭᠠᠷᠴᠠᠢ᠃ ᠴᠢᠩᠭᠢᠭᠡᠳ ᠦᠷ ᠦ᠋ᠨ ᠴᠠᠭᠠᠨ ᠮᠠᠨᠠᠨ ᠨᠠᠪᠰᠠᠢᠨ ᠪᠠᠭᠤᠭᠰᠠᠨ ᠶᠡᠬᠡ ᠲᠠᠯᠠ ᠪᠠᠷ ᠠᠷᠭᠠᠮᠵᠢᠶᠠ ᠲᠠᠢ ᠮᠣᠷᠢᠳ ᠳᠣᠷᠭᠢᠯᠠᠬᠤ ᠵᠦᠭ ᠤᠷᠤᠭᠤ ᠭᠦᠶᠦᠵᠦ ᠣᠳᠪᠠ᠃