ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠨᠢᠭᠡᠳᠦᠭᠡᠷ ᠪᠦᠯᠦᠭ –4>᠂ ᠶᠡᠬᠡ ᠬᠥᠯ ᠦᠨ ᠲᠣᠭᠣᠰᠣ Бүргэд харьд үүрэлдэггүй – Ж᠂ Пүрэв <1-р бүлэг ~4>. их хөлийн тоос
83ᠨᠢᠭᠡᠳᠦᠭᠡᠷ ᠪᠦᠯᠦᠭ –ᠤᠮᠠᠷᠠ ᠶᠢ ᠵᠣᠷᠢᠭᠰᠠᠨ ᠭᠠᠯᠠᠭᠤᠨ ᠴᠤᠪᠤᠭᠠ
ᠳᠥᠷᠪᠡ᠂ ᠶᠡᠬᠡ ᠬᠥᠯ ᠦ᠋ᠨ ᠲᠣᠭᠣᠰᠣ
ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠥᠪᠡᠷ ᠦ᠋ᠨ ᠪᠠᠢᠭᠠ ᠲᠦᠷ ᠰᠠᠭᠤᠷᠢᠨ ᠳ᠋ᠤ᠌ ᠪᠠᠨ ᠲᠦᠮᠡᠲᠦ᠂ ᠮᠢᠩᠭᠠᠲᠤ ᠶ᠋ᠢᠨ ᠵᠠᠬᠢᠷᠤᠭᠴᠢ ᠳᠠᠭᠠᠭᠠᠮᠠᠯ ᠤ᠋ᠳ ᠢ᠋ ᠴᠤᠭᠯᠠᠭᠤᠯᠵᠠᠢ᠃ ᠡᠨᠡ ᠨᠢ ᠡᠵᠡᠨ ᠬᠠᠭᠠᠨ ᠲᠠᠭᠠᠯᠠᠯ ᠪᠣᠯᠤᠭᠰᠠᠨ ᠲᠠᠢ ᠬᠣᠯᠪᠣᠭᠠᠲᠠᠢ ᠨᠢ ᠮᠡᠳᠡᠭᠡᠵᠢ᠂ ᠨᠡᠷᠡ ᠵᠢᠭᠰᠠᠭᠠᠭᠰᠠᠨ ᠪᠦᠬᠦ ᠬᠥᠮᠦᠨ ᠢ᠋ ᠴᠤᠭᠯᠠᠷᠠᠬᠤ ᠳ᠋ᠤ᠌ ᠬᠤᠪᠢᠯᠠᠢ ᠬᠡᠯᠲᠡᠭᠡᠢ ᠵᠠᠬᠠ ᠲᠠᠢ ᠬᠤᠸᠠ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠥᠷᠭᠡᠨ ᠥᠷᠭᠡᠨ ᠪᠦᠰᠡ ᠪᠦᠰᠡᠯᠡᠵᠦ᠂ ᠲᠠᠬᠢᠷ ᠰᠡᠯᠡᠮᠡ ᠲᠠᠰᠢᠶᠠᠨ ᠳ᠋ᠤ᠌ ᠪᠠᠨ ᠵᠡᠭᠦᠭᠰᠡᠭᠡᠷ ᠬᠦᠷᠦᠯᠴᠡᠨ ᠢᠷᠡᠯᠡ᠃ ᠲᠡᠭᠦᠨ ᠦ᠌ ᠴᠢᠷᠠᠢᠨ ᠳ᠋ᠤ᠌ ᠡᠮᠭᠡᠨᠢᠯᠲᠦ ᠭᠤᠨᠢᠭ ᠲᠣᠳᠣᠷᠠᠨᠠ᠃ ᠲᠡᠷᠡ ᠭᠤᠨᠢᠭᠯᠠᠯ ᠦᠨᠡᠨ ᠬᠦ᠌ ᠰᠡᠳᠬᠢᠯ ᠡᠴᠡ ᠪᠡᠨ ᠡᠰᠡᠬᠦ ᠶ᠋ᠢ ᠬᠡᠨ ᠥᠩᠭᠡᠢᠵᠦ ᠬᠠᠷᠠᠬᠤ ᠪᠢᠯᠡ᠃ ᠲᠡᠷᠡ ᠪᠡᠷ ᠵᠥᠭᠡᠯᠡᠨ ᠠᠯᠬᠤᠵᠤ᠂ ᠬᠤᠷᠠᠭᠰᠠᠨ ᠨᠣᠶᠠᠳ ᠳᠠᠭᠠᠭᠠᠮᠠᠯ ᠤ᠋ᠳ ᠤ᠋ᠨ ᠡᠮᠦᠨᠡ ᠢᠷᠡᠵᠦ ᠪᠥᠬᠥᠢᠨ ᠶᠣᠰᠣ ᠬᠢᠭᠰᠡᠨ ᠢ᠋ᠶ᠋ᠡᠨ ᠵᠣᠷᠢᠭᠤᠳᠠ ᠳᠠᠭᠤ ᠪᠠᠨ ᠨᠠᠮ ᠪᠣᠯᠭᠠᠨ ᠰᠥᠭᠡᠩᠭᠢᠲᠦᠭᠰᠡᠨ ᠬᠣᠭᠣᠯᠠᠢ ᠪᠠᠷ
— ᠶᠡᠬᠡ ᠬᠠᠭᠠᠨ ᠲᠠᠭᠠᠯᠠᠯ ᠲᠡᠭᠦᠰᠦᠯᠡ ᠭᠡᠰᠡᠨ ᠭᠤᠨᠢᠭᠲᠤ ᠮᠠᠭᠤ ᠦᠭᠡ ᠶ᠋ᠢ ᠪᠢ ᠰᠣᠨᠣᠰᠤᠯᠠ᠃ ᠶᠠᠭᠤᠲᠠᠢ ᠭᠠᠰᠢᠭᠤᠨ ᠴᠢᠮᠡᠭᠡ ᠪᠣᠢ᠃ ᠬᠠᠭᠠᠨ ᠠᠬᠠ ᠢᠳᠡᠷ ᠨᠠᠰᠤᠨ ᠳ᠋ᠤ᠌ ᠪᠠᠨ ᠴᠣᠭ ᠵᠣᠯᠪᠣᠭᠠ ᠶ᠋ᠢ ᠪᠠᠳᠠᠷᠠᠭᠤᠯᠤᠨ ᠶᠠᠪᠤᠵᠤ᠂ ᠪᠢᠳᠡᠨ ᠦ᠌ ᠣᠯᠠᠨ ᠴᠡᠷᠢᠭ ᠡᠷᠡᠰ ᠦ᠋ᠳ ᠲᠦ᠍ ᠠᠯᠲᠠᠨ ᠰᠤᠷᠭᠠᠯ ᠬᠠᠢᠷᠠᠯᠠᠵᠤ ᠪᠠᠢᠭᠰᠠᠨ ᠨᠢ ᠰᠠᠶᠢᠬᠠᠨ ᠰᠢᠦ ᠳᠡ᠃ ᠠᠬᠠ ᠶ᠋ᠢᠨ ᠳᠠᠭᠤ ᠬᠣᠭᠣᠯᠠᠢ ᠮᠢᠨᠦ ᠴᠢᠬᠢᠨ ᠳ᠋ᠦ᠍ ᠬᠠᠳᠠᠭᠠᠰᠤᠲᠠᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠨᠠ᠁ ᠭᠡᠵᠦ ᠬᠡᠯᠡᠪᠡ᠃ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠦᠭᠡ ᠬᠡᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠠᠨ ᠪᠠᠷᠤᠭ ᠴᠢᠳᠠᠬᠤ ᠦᠭᠡᠢ᠂ ᠤᠬᠢᠯᠠᠴᠢᠬᠠᠬᠤ ᠭᠡᠳ ᠪᠠᠢᠭᠠ ᠶᠠᠩᠵᠤᠲᠠᠢ ᠬᠠᠷᠠᠭᠳᠠᠬᠤ ᠨᠢ ᠬᠡᠨ ᠳ᠋ᠦ᠍ ᠴᠦ᠍ ᠵᠦᠢ ᠪᠤᠰᠤ ᠵᠦᠢᠯ ᠪᠢᠰᠢ ᠪᠢᠯᠡ᠃
ᠬᠤᠪᠢᠯᠠᠢ ᠡᠨᠡ ᠦᠶᠡ ᠳ᠋ᠦ᠍ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠭᠦᠨ ᠳ᠋ᠦ᠍《ᠶᠠᠭᠠᠬᠢᠪᠠᠯ ᠪᠢ ᠣᠯᠠᠨ ᠨᠣᠶᠠᠳ ᠲᠤ ᠵᠥᠪ ᠠᠶᠠᠲᠠᠢᠬᠠᠨ ᠬᠠᠷᠠᠭᠳᠠᠨ ᠦᠷᠦ ᠡᠪᠡᠳᠦᠭᠦᠯᠬᠦ ᠪᠡᠷ ᠪᠠᠢᠬᠤ ᠪᠢᠯᠡ》 ᠭᠡᠰᠡᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠭᠰᠠᠨ ᠪᠠᠢᠯᠠ᠃
— ᠶᠡᠬᠡ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠪᠣᠳᠣᠪᠠᠯ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠵᠠᠯᠠᠵᠤ ᠲᠠᠭᠠᠷᠠᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠲᠠ ᠲᠠᠢᠰᠢ ᠪᠠᠨ ᠮᠣᠷᠢᠯᠠᠨ ᠣᠴᠢᠬᠤ ᠪᠢᠵᠡ ᠳᠡ? ᠭᠡᠰᠡᠨ ᠠᠰᠠᠭᠤᠯᠲᠠ ᠨᠤᠭᠤᠳ ᠭᠠᠷᠴᠤ ᠪᠠᠢᠯᠠ᠃
ᠬᠤᠪᠢᠯᠠᠢ ᠡᠮᠭᠡᠨᠢᠯ ᠳ᠋ᠦ᠍ ᠠᠪᠲᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ᠂ ᠨᠢᠳᠦ ᠪᠡᠨ ᠭᠥᠯᠥᠢᠯᠭᠡᠭᠰᠡᠭᠡᠷ᠄
— ᠶᠡᠬᠡ ᠬᠠᠯᠠᠭᠤᠨ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠬᠠᠯᠳᠠᠪᠤᠷᠢᠲᠤ ᠬᠠᠨᠢᠶᠠᠳᠤ ᠳᠡᠯᠭᠡᠷᠡᠭᠡᠳ᠂ ᠬᠠᠭᠠᠨ ᠠᠬᠠ ᠰᠤᠷᠤᠭᠰᠠᠨ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠡᠷᠢᠭ ᠲᠡᠢ ᠪᠡᠨ ᠬᠠᠮᠲᠤ ᠪᠠᠢᠨᠠ ᠭᠡᠵᠦ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠬᠤᠳᠬᠤᠯᠳᠤᠨ ᠶᠠᠪᠤᠭᠰᠠᠨ ᠤᠴᠢᠷ ᠬᠠᠯᠳᠠᠪᠤᠷᠢ ᠠᠪᠴᠠᠢ ᠭᠡᠵᠦ ᠲᠠᠢᠯᠪᠤᠷᠢᠯᠠᠨ᠂ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠨᠢᠭᠡ ᠣᠴᠢᠭᠠᠳ ᠢᠷᠡᠨᠡ᠃ ᠲᠠ ᠨᠠᠷ ᠢ᠋ ᠪᠢ ᠡᠨᠳᠡ ᠤᠳᠠᠭᠠᠨ ᠣᠷᠬᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠪᠡ᠃ ᠡᠮᠭᠡᠨᠢᠯ ᠢᠯᠡᠷᠬᠡᠢᠯᠡᠭᠰᠡᠨ ᠪᠠᠢᠳᠠᠯᠲᠠᠢ ᠡᠨᠡ ᠴᠤᠭᠯᠠᠭᠠᠨ ᠤ᠋ ᠲᠡᠭᠦᠰᠬᠡᠯ ᠳ᠋ᠦ᠍ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠰᠢᠢᠳ ᠵᠠᠷᠯᠢᠭ ᠪᠠᠭᠤᠯᠭᠠᠯᠠ᠃ ᠨᠢᠭᠡᠨᠲᠡ ᠶᠡᠬᠡ ᠬᠠᠭᠠᠨ ᠪᠠᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠴᠠᠭ ᠲᠤᠯᠠ ᠬᠤᠪᠢᠯᠠᠢ ᠡᠨᠡ ᠦᠶᠡ ᠳ᠋ᠦ᠍ ᠲᠠᠯᠢᠢᠭᠴᠢ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠲᠣᠮᠣ ᠳᠡᠭᠦᠦ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠴᠦ᠍᠂ ᠵᠡᠭᠦᠨ ᠭᠠᠷ ᠤ᠋ᠨ ᠶᠡᠬᠡ ᠳᠠᠭᠠᠭᠠᠮᠠᠯ᠂ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠴᠦ᠍᠂ ᠬᠢᠲᠠᠳ ᠨᠤᠲᠤᠭ ᠢ᠋ ᠮᠡᠳᠡᠭᠴᠢ ᠪᠣᠯᠵᠤ ᠡᠷᠬᠡ ᠣᠯᠤᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠴᠦ᠍᠂ ᠰᠥᠩ ᠤᠯᠤᠰ ᠲᠤ ᠳᠣᠪᠲᠣᠯᠭᠠᠨ ᠶᠠᠪᠤᠭᠤᠯᠤᠨ ᠲᠡᠭᠦᠨ ᠢ᠋ ᠲᠦᠪᠰᠢᠳᠬᠡᠬᠦ ᠲᠡᠷᠢᠭᠦᠨ ᠳᠠᠭᠠᠭᠠᠮᠠᠯ ᠤ᠋ᠨ ᠠᠯᠪᠠ ᠶ᠋ᠢ ᠬᠦᠯᠢᠶᠡᠬᠦ ᠪᠣᠯᠵᠤ ᠪᠣᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠳᠤᠤᠭᠠᠷᠴᠤ ᠪᠠᠢᠭᠠ ᠳᠠᠭᠤ ᠨᠢ ᠡᠳᠦᠭᠡ ᠡᠵᠡᠨ ᠬᠠᠭᠠᠨ ᠤ᠋ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠦᠭᠰᠡᠨ ᠮᠡᠲᠦ ᠪᠤᠰᠤᠳ ᠲᠤ ᠰᠣᠨᠣᠰᠤᠭᠳᠠᠵᠤ ᠪᠠᠢᠪᠠ᠃ ᠡᠨᠡ ᠨᠢ ᠴᠦ᠍ ᠲᠤᠬᠠᠢ ᠶ᠋ᠢᠨ ᠴᠠᠭ ᠲᠤ ᠪᠠᠨ ᠠᠷᠭᠠ ᠦᠭᠡᠢ ᠪᠠᠢᠯᠠ᠃
ᠬᠤᠪᠢᠯᠠᠢ ᠪᠦᠬᠦ ᠨᠣᠶᠠᠨ ᠳᠠᠭᠠᠭᠠᠮᠠᠯ ᠳ᠋ᠤ᠌ ᠬᠠᠨᠳᠤᠨ ᠲᠤᠰᠢᠶᠠᠯ ᠪᠣᠯᠭᠠᠨ ᠬᠡᠯᠡᠭᠰᠡᠨ ᠨᠢ᠄
— ᠨᠣᠶᠠᠳ ᠵᠠᠩᠵᠤᠨ ᠨᠠᠷ ᠮᠢᠨᠢ ᠪᠣᠯᠭᠣᠭᠠᠵᠤ ᠳᠠᠭᠠᠯᠠᠭᠠᠴᠢ! ᠮᠢᠨᠦ ᠠᠬᠠ ᠬᠠᠭᠠᠨᠲᠠᠨ ᠪᠣᠭᠳᠠ ᠡᠪᠦᠭᠡ ᠶ᠋ᠢᠨ ᠵᠠᠬᠢᠶᠠᠰᠤ ᠶᠣᠰᠣᠭᠠᠷ ᠰᠥᠩ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠨ ᠥᠪᠡᠷ ᠦ᠋ᠨ ᠣᠷᠣᠨ ᠤᠯᠤᠰ ᠢ᠋ᠶ᠋ᠠᠨ ᠠᠶᠤᠬᠤ ᠠᠶᠤᠯ ᠦᠭᠡᠢ ᠪᠣᠯᠭᠠᠬᠤ ᠬᠡᠷᠡᠭ ᠢ᠋ ᠰᠠᠳᠤᠨ ᠶᠠᠪᠤᠭᠤᠯᠵᠤ ᠪᠠᠢᠭᠰᠠᠨ᠃ ᠡᠪᠦᠭᠡ ᠮᠢᠨᠢ ᠲᠡᠷᠡ ᠬᠡᠷᠡᠭ ᠲᠦ᠍ ᠪᠡᠨ ᠪᠡᠶᠡ ᠪᠡᠷ ᠵᠢᠳᠬᠦᠨ ᠶᠠᠪᠤᠭᠠᠳ ᠠᠯᠲᠠᠨ ᠠᠮᠢ ᠪᠠᠨ ᠠᠯᠳᠠᠯᠠ᠃ ᠢᠩᠭᠢᠬᠦ ᠪᠡᠷ ᠪᠢᠳᠡᠨ ᠦ᠌ ᠶᠡᠬᠡ ᠴᠡᠷᠢᠭ ᠶᠡᠬᠡ ᠬᠠᠭᠠᠨᠲᠠᠨ ᠤ᠋ ᠵᠣᠷᠢᠵᠤ ᠶᠠᠪᠤᠭᠰᠠᠨ ᠬᠡᠷᠡᠭ ᠢ᠋ ᠲᠤᠢᠯ ᠳ᠋ᠤ᠌ ᠨᠢ ᠬᠦᠷᠭᠡᠬᠦ ᠶᠣᠰᠣᠲᠠᠢ ᠪᠣᠯᠪᠠ᠃ ᠪᠢᠳᠡ ᠣᠳᠣ ᠡᠷᠡ ᠵᠣᠷᠢᠭ ᠭᠠᠷᠭᠠᠨ ᠰᠥᠩ ᠤᠷᠤᠭᠤ ᠬᠢᠬᠦ ᠳᠣᠪᠲᠣᠯᠭᠠᠨ ᠢ᠋ᠶ᠋ᠠᠨ ᠰᠢᠭᠤᠷᠬᠠᠢᠯᠠᠬᠤ ᠶᠣᠰᠣᠲᠠᠢ ᠪᠣᠯᠤᠯᠠ᠃ ᠪᠢᠳᠡ ᠡᠬᠢᠯᠡᠭᠡᠳ ᠳ᠋ᠠᠯᠢ ᠤᠯᠤᠰ ᠢ᠋ ᠪᠦᠷᠢᠨᠡ ᠲᠦᠪᠰᠢᠳᠬᠡᠵᠦ ᠳᠠᠭᠤᠰᠬᠠᠬᠤ ᠤᠴᠢᠷᠲᠠᠢ᠃ ᠲᠡᠷᠡ ᠵᠢᠵᠢᠭ ᠸᠠᠩᠲᠤ ᠤᠯᠤᠰ ᠪᠢᠳᠡᠨ ᠦ᠌ ᠳᠣᠪᠲᠣᠯᠭᠠᠨ ᠤ᠋ ᠬᠡᠷᠡᠭ ᠲᠦ᠍ ᠰᠠᠭᠠᠳ ᠪᠡᠷᠬᠡᠰᠢᠶᠡᠯ ᠤᠴᠠᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠭᠠᠵᠠᠷ ᠤ᠋ᠨ ᠪᠡᠲᠡᠭᠢ ᠣᠷᠬᠢᠭᠰᠠᠨ ᠲᠡᠢᠮᠦ ᠨᠢᠭᠡ ᠶᠠᠭᠤᠮᠠ ᠵᠠᠮ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠬᠤ ᠨᠢ ᠬᠠᠴᠢᠷᠬᠠᠯᠲᠠᠢ ᠰᠠᠨᠠᠭᠳᠠᠨᠠ᠁ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠲᠦᠮᠡᠲᠦ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠨᠢᠭᠡ ᠲᠠᠯᠠ ᠪᠠᠷ ᠮᠥᠩᠬᠡ ᠬᠠᠭᠠᠨ ᠢ᠋ ᠠᠯᠳᠠᠭᠰᠠᠨ ᠳ᠋ᠤ᠌ ᠪᠠᠨ ᠡᠮᠭᠡᠨᠢᠵᠦ ᠪᠠᠢᠭᠠ ᠪᠣᠯᠪᠠᠴᠤ ᠨᠥᠭᠦᠭᠡ ᠲᠠᠯᠠ ᠪᠠᠷ ᠰᠥᠩ ᠢ᠋ ᠲᠦᠪᠰᠢᠳᠬᠡᠬᠦ ᠰᠢᠢᠳᠪᠦᠷᠢᠯᠡᠬᠦ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠨᠠ ᠭᠡᠬᠦ ᠳ᠋ᠦ᠍ ᠰᠡᠳᠬᠢᠯ ᠨᠢ ᠬᠥᠭᠡᠷᠦᠭᠰᠡᠨ ᠶᠠᠩᠵᠤᠲᠠᠢ ᠪᠠᠢᠪᠠ᠃
ᠨᠠᠰᠤᠨ ᠠᠬᠢᠮᠠᠭ ᠪᠣᠯᠵᠤ ᠶᠠᠪᠤᠭᠠ ᠪᠠᠶᠠᠨ ᠵᠠᠩᠵᠤᠨ ᠪᠣᠰᠴᠤ᠂ ᠴᠢᠩᠭᠠ ᠣᠷᠢᠶᠠᠭᠰᠠᠨ ᠰᠤᠷ ᠤ᠋ᠨ ᠪᠦᠰᠡ ᠪᠡᠨ ᠠᠳᠬᠤᠵᠤ ᠵᠣᠭᠰᠣᠭᠠᠳ᠂ ᠳᠣᠣᠷᠠ ᠪᠠᠨ ᠬᠡᠳᠦ ᠬᠣᠯᠬᠢᠭᠰᠠᠨ ᠢ᠋ᠶ᠋ᠠᠨ᠂ ᠬᠥᠬᠥᠯ ᠭᠡᠵᠢᠭᠡ ᠪᠡᠨ ᠠᠳᠬᠤᠭᠠᠳ᠄
— ᠲᠡᠭᠡᠵᠦ ᠳᠡ᠃ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠪᠣᠳᠣᠯ ᠢ᠋ ᠪᠢᠰᠢᠷᠡᠵᠦ ᠪᠠᠢᠨᠠ᠃ ᠪᠢᠳᠡ ᠬᠠᠢᠷᠠᠨ ᠬᠠᠭᠠᠨ ᠢ᠋ᠶ᠋ᠠᠨ ᠠᠯᠳᠠᠯᠠ᠃ ᠥᠭᠡᠳᠡ ᠪᠣᠯᠤᠭᠴᠢ ᠬᠠᠭᠠᠨᠲᠠᠨ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠨᠢᠭᠡᠳᠬᠡᠨ ᠵᠠᠬᠢᠷᠴᠤ ᠡᠮᠬᠢ ᠴᠡᠭᠴᠡᠲᠡᠢ ᠪᠣᠯᠭᠠᠭᠰᠠᠨ ᠰᠠᠨ᠃ ᠣᠳᠣ ᠳᠠᠬᠢᠭᠠᠳ ᠪᠦᠦ ᠵᠠᠳᠠᠷᠠᠭᠠᠰᠠᠢ᠃ ᠲᠡᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠭᠡᠪᠡᠯ ᠳ᠋ᠠᠯᠢ ᠤᠯᠤᠰ ᠴᠦ᠍ ᠪᠠᠭᠤᠵᠤ ᠴᠠᠢ ᠠᠮᠰᠠᠭᠠᠳ ᠮᠣᠷᠳᠠᠬᠤ ᠲᠡᠳᠦᠢ ᠭᠠᠵᠠᠷ᠃ ᠰᠥᠩ ᠤᠯᠤᠰ ᠪᠣᠯ ᠲᠤᠩ ᠴᠦ᠍ ᠠᠮᠠᠷ ᠦᠭᠡᠢ ᠳᠠᠢᠰᠤᠨ ᠰᠢᠦ᠃ ᠪᠢᠳᠡ ᠶᠠᠭᠠᠬᠢᠵᠤ ᠠᠯᠲᠠᠨ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠯᠡ᠃ ᠲᠡᠷᠡ ᠴᠠᠭ ᠲᠤ ᠪᠣᠭᠳᠠ ᠡᠵᠡᠨ ᠦ᠌ ᠥᠪᠡᠷ ᠢ᠋ᠶ᠋ᠡᠨ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠲᠡᠷᠡ ᠠᠷᠭᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠶᠠᠪᠤᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠪᠠᠢᠬᠤ ᠦᠭᠡᠢ᠃ ᠲᠤᠯᠤᠢ ᠠᠬᠠ᠂ ᠮᠤᠬᠤᠯᠠᠢ ᠵᠠᠩᠵᠤᠨ ᠬᠣᠶᠠᠷ ᠠᠢᠬᠤᠪᠲᠤᠷ ᠤᠷᠠᠨ ᠠᠷᠭᠠ ᠨᠤᠭᠤᠳ ᠬᠡᠷᠡᠭᠯᠡᠵᠦ ᠥᠰᠢᠶᠡᠲᠦ ᠡᠲᠡᠭᠡᠳ ᠢ᠋ ᠳᠠᠷᠤᠭᠰᠠᠨ ᠳᠠ᠃ ᠲᠡᠷᠡ ᠪᠦᠬᠦᠨ ᠢ᠋ ᠪᠢᠳᠡ ᠳᠠᠬᠢᠨ ᠡᠷᠭᠢᠵᠦ ᠰᠠᠨᠠᠬᠤ ᠶᠣᠰᠣᠲᠠᠢ ᠪᠢᠵᠡ ᠭᠡᠵᠦ ᠬᠡᠯᠡᠭᠡᠳ ᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠭᠰᠠᠨ ᠶᠠᠩᠵᠤ ᠪᠠᠷ ᠭᠠᠵᠠᠷ ᠰᠢᠷᠳᠡᠨᠡ᠃
ᠪᠠᠶᠠᠨ ᠵᠠᠩᠵᠤᠨ ᠤ᠋ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠪᠣᠳᠣᠬᠤ ᠦᠭᠡᠢ᠂ ᠲᠡᠭᠦᠨ ᠦ᠌ ᠳᠠᠢᠨᠴᠢ ᠰᠡᠳᠬᠢᠯ ᠢ᠋ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠬᠣᠪᠣᠷ ᠪᠢᠯᠡ᠃
ᠡᠨᠡ ᠵᠠᠩᠵᠤᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠲᠠᠢ ᠣᠢᠷᠠ ᠳᠣᠲᠣᠨᠣ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠢᠰᠢ᠂ ᠰᠢᠯᠤᠭᠤᠨ ᠰᠢᠳᠤᠷᠭᠤ ᠵᠠᠩ ᠠᠪᠤᠷᠢ ᠪᠡᠷ ᠢ᠋ᠶ᠋ᠡᠨ ᠪᠤᠰᠤᠳ ᠢ᠋ ᠥᠪᠡᠷ ᠦ᠋ᠨ ᠲᠠᠯᠠ ᠳ᠋ᠤ᠌ ᠲᠠᠲᠠᠵᠤ ᠴᠢᠳᠠᠳᠠᠭ᠂ ᠮᠢᠩᠭᠠᠲᠤ᠂ ᠲᠦᠮᠡᠲᠦ ᠶ᠋ᠢᠨ ᠳᠠᠷᠤᠭᠠᠴᠢ ᠨᠠᠷ ᠪᠠᠶᠠᠨ ᠤ᠋ ᠠᠮᠠ ᠶ᠋ᠢ ᠬᠠᠷᠠᠳᠠᠭ ᠪᠢᠯᠡ᠃
— ᠣᠳᠣ ᠪᠢᠳᠡ ᠬᠢᠬᠦ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠪᠠᠨ ᠶᠠᠭᠤ ᠶ᠋ᠢ ᠭᠣᠣᠯ ᠴᠢᠭ ᠪᠠᠷᠢᠮᠵᠢᠶᠠ ᠪᠣᠯᠭᠠᠬᠤ ᠪᠣᠢ? ᠶᠠᠮᠠᠷ ᠰᠢᠨᠡ ᠠᠷᠭᠠ ᠪᠠᠢᠨᠠ ᠪᠣᠢ? ᠭᠡᠵᠦ ᠬᠤᠪᠢᠯᠠᠢ ᠨᠡᠢᠲᠡ ᠳᠤᠮᠳᠠ ᠠᠰᠠᠭᠤᠯᠲᠠ ᠲᠠᠯᠪᠢᠯᠠ᠃
ᠬᠡᠰᠡᠭ ᠵᠠᠭᠤᠷᠠ ᠴᠢᠮᠡᠭᠡ ᠦᠭᠡᠢ᠂ ᠬᠥᠮᠦᠨ ᠲᠤᠰ ᠪᠦᠷᠢ ᠪᠣᠳᠣᠯᠬᠢᠯᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡᠨ ᠳᠠᠷᠤᠭᠠ ᠪᠣᠰᠴᠤ ᠢᠷᠡᠭᠡᠳ ᠮᠥᠩᠬᠡ ᠬᠠᠭᠠᠨ ᠢ᠋ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠳ᠋ᠦ᠍ ᠡᠮᠭᠡᠨᠢᠯ ᠦ᠋ᠨ ᠦᠭᠡ ᠬᠡᠯᠡᠵᠦ᠄
— ᠪᠢᠳᠡ ᠪᠦᠬᠦ ᠭᠠᠵᠠᠷ ᠢ᠋ᠶ᠋ᠠᠷ ᠨᠢᠭᠡᠨ ᠵᠡᠷᠭᠡ ᠶᠡᠬᠡ ᠳᠣᠪᠲᠣᠯᠭᠠᠨ ᠬᠢᠵᠦ᠂ ᠰᠥᠩ ᠦ᠋ᠨ ᠴᠡᠷᠢᠭ ᠦ᠋ᠨ ᠰᠦᠷ ᠬᠦᠴᠦ ᠶ᠋ᠢ ᠤᠨᠠᠭᠠᠨ ᠲᠩᠷᠢ ᠳ᠋ᠦ᠍ ᠬᠠᠯᠢᠭᠰᠠᠨ ᠶᠡᠬᠡ ᠬᠠᠭᠠᠨ ᠤ᠋ ᠪᠠᠨ ᠰᠠᠨᠠᠭᠠ ᠶ᠋ᠢ ᠭᠦᠢᠴᠡᠭᠡᠬᠦ ᠶ᠋ᠢ ᠬᠢᠴᠢᠶᠡᠬᠦ ᠶᠣᠰᠣᠲᠠᠢ᠃ ᠳᠠᠢᠰᠤᠨ ᠡᠲᠡᠭᠡᠳ ᠪᠢᠳᠡᠨ ᠡᠴᠡ ᠠᠶᠤᠵᠤ ᠪᠠᠢᠭᠠ ᠨᠢ ᠲᠡᠳᠡᠨ ᠦ᠌ ᠲᠠᠯᠠ ᠠ᠋ᠴᠠ ᠣᠯᠵᠠᠯᠠᠭᠳᠠᠭᠰᠠᠨ ᠳᠠᠭᠠᠭᠠᠮᠠᠯ ᠤ᠋ᠳ ᠤ᠋ᠨ ᠥᠴᠢᠭ ᠡᠴᠡ ᠮᠡᠳᠡᠭᠳᠡᠵᠦ ᠪᠠᠢᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠲᠡᠳᠡ ᠡᠵᠸᠤ ᠴᠤ᠌᠂ ᠪᠤᠰᠤᠳ ᠬᠣᠲᠠ ᠨᠢ ᠪᠡᠬᠢᠯᠡᠯᠲᠡ ᠬᠢᠨ᠂《ᠡᠴᠦᠰ ᠦ᠋ᠨ ᠭᠠᠭᠴᠠ ᠬᠥᠮᠦᠨ ᠦᠯᠡᠲᠡᠯᠡ ᠭᠡᠬᠦ ᠳ᠋ᠦ᠍ ᠵᠢᠳᠠ ᠪᠠᠨ ᠭᠠᠵᠠᠷ ᠲᠤ ᠬᠥᠰᠡᠷ ᠬᠠᠶᠠᠬᠤ ᠦᠭᠡᠢ》 ᠭᠡᠵᠦ ᠲᠠᠩᠭᠠᠷᠢᠭᠯᠠᠵᠤ ᠪᠠᠢᠭᠠ ᠭᠡᠨᠡ ᠪᠢᠯᠡ᠃ ᠪᠢᠳᠡ ᠶᠠᠭ ᠦᠭᠡᠢ ᠳᠠᠢᠰᠤᠨ ᠲᠠᠢ ᠵᠢᠭᠤᠷᠠᠯᠳᠤᠵᠤ ᠪᠠᠢᠵᠤ ᠮᠡᠳᠡᠬᠦ ᠪᠣᠢ᠃ ᠣᠳᠣ ᠬᠢᠲᠠᠳ ᠭᠡᠬᠦ ᠪᠡᠷ ᠰᠡᠭᠦᠯᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠣᠷᠮᠠ ᠶ᠋ᠢ ᠰᠠᠬᠢᠵᠤ ᠦᠯᠡᠳᠡᠭᠰᠡᠨ ᠨᠢ ᠰᠥᠩ ᠤᠯᠤᠰ ᠯᠠ ᠪᠠᠢᠨᠠ᠁ ᠭᠡᠪᠡ᠃
ᠴᠡᠷᠢᠭ ᠦ᠋ᠨ ᠣᠯᠠᠨ ᠳᠠᠭᠠᠭᠠᠮᠠᠯ ᠵᠠᠩᠵᠤᠨ ᠦᠭᠡ ᠬᠡᠯᠡᠬᠦ ᠪᠣᠯᠤᠯᠠ᠃
ᠡᠨᠡ ᠴᠤᠭᠯᠠᠷᠠᠯᠲᠠ ᠨᠢ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠶᠡᠬᠡ ᠬᠠᠭᠠᠨ ᠢ᠋ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ᠡᠮᠭᠡᠨᠢᠯ ᠦ᠋ᠨ ᠴᠤᠭᠯᠠᠷᠠᠯᠲᠠ ᠲᠡᠳᠦᠢ ᠪᠤᠰᠤ᠂ ᠰᠥᠩ ᠤᠯᠤᠰ ᠢ᠋ ᠬᠡᠷᠬᠢᠨ ᠲᠥᠪᠬᠢᠨᠡᠭᠦᠯᠬᠦ ᠲᠤᠬᠠᠢ ᠬᠡᠷᠡᠭ ᠢ᠋ ᠬᠡᠯᠡᠯᠴᠡᠭᠰᠡᠨ ᠨᠢᠭᠡᠨ ᠶᠣᠰᠣᠨ ᠤ᠋ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠨᠦ᠍ᠭᠦᠳ ᠦ᠋ᠨ ᠬᠤᠷᠠᠯᠳᠠᠢ ᠪᠣᠯᠪᠠ᠃
— ᠰᠥᠩ ᠤᠯᠤᠰ ᠢ᠋ ᠪᠠᠰᠤᠵᠤ ᠪᠣᠯᠬᠤ ᠦᠭᠡᠢ᠂ ᠢᠷᠮᠡᠭᠦᠨ ᠬᠦᠴᠦᠲᠡᠢ ᠰᠢᠦ᠃ ᠲᠡᠳᠡ ᠤᠯᠤᠰ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠵᠤ ᠦᠯᠡᠳᠡᠨᠡ ᠭᠡᠰᠡᠨ ᠬᠠᠲᠠᠭᠤ ᠵᠣᠷᠢᠭ ᠡᠷᠡᠮᠡᠯᠵᠡᠯ ᠲᠡᠢ᠂ ᠪᠠᠷᠤᠭ ᠪᠦᠬᠦ ᠬᠥᠮᠦᠨ ᠠᠮᠠ ᠨᠢ ᠲᠡᠷᠡ ᠵᠣᠷᠢᠯᠭᠠ ᠳ᠋ᠤ᠌ ᠨᠢᠭᠡᠳᠦᠭᠰᠡᠨ ᠰᠡᠳᠬᠢᠯᠲᠡᠢ ᠪᠠᠢᠨᠠ᠃ ᠶᠠᠭ ᠦᠭᠡᠢ ᠳᠠᠢᠰᠤᠨ ᠳᠠ᠃
— ᠲᠡᠢᠮᠦ ᠠ᠋᠃ ᠪᠢᠳᠡ ᠰᠥᠩ ᠦ᠋ᠨ ᠬᠦᠴᠦ ᠴᠢᠳᠠᠯ ᠢ᠋ ᠮᠡᠳᠡᠵᠦ ᠪᠠᠢᠭᠠ᠃ ᠲᠡᠳᠡ ᠰᠡᠭᠦᠯ ᠦ᠋ᠨ ᠬᠣᠶᠠᠷ ᠵᠢᠯ ᠦ᠋ᠨ ᠲᠤᠷᠰᠢ ᠬᠣᠲᠠ ᠨᠤᠭᠤᠳ ᠢ᠋ᠶ᠋ᠠᠨ ᠪᠡᠬᠢᠯᠡᠨ᠂ ᠬᠡᠷᠡᠮ ᠪᠠᠷᠢᠵᠤ᠂ ᠬᠦᠨᠡᠰᠦ ᠲᠡᠵᠢᠭᠡᠯ ᠢ᠋ᠶ᠋ᠡᠨ ᠨᠥᠭᠡᠴᠡᠯᠡᠵᠦ ᠪᠠᠢᠨᠠ᠃ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠰᠢᠯᠲᠠᠭᠠᠨ ᠭᠠᠷᠭᠠᠭᠠᠳ ᠬᠠᠭᠠᠨ ᠢ᠋ᠶ᠋ᠠᠨ ᠣᠯᠠᠨ ᠳᠠᠬᠢᠨ ᠰᠣᠯᠢᠵᠤ᠂ ᠶᠡᠬᠡ ᠴᠢᠳᠠᠯᠲᠠᠢ᠂ ᠲᠡᠭᠦᠯᠳᠡᠷ ᠤᠬᠠᠭᠠᠲᠠᠢ ᠲᠡᠷᠢᠭᠦᠯᠡᠬᠦ ᠬᠥᠮᠦᠨ ᠢ᠋ ᠡᠷᠢᠭᠰᠡᠭᠡᠷ ᠪᠠᠢᠭᠠ᠃ ᠲᠠᠪᠤᠬᠠᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠵᠢᠷᠭᠤᠭᠠᠨ ᠬᠠᠭᠠᠨ ᠰᠣᠯᠢᠭᠳᠠᠯᠠ᠃ ᠬᠣᠲᠠ ᠬᠠᠮᠠᠭᠠᠯᠠᠬᠤ ᠵᠡᠪᠰᠡᠭ ᠦᠢᠯᠡᠳᠬᠦ ᠪᠡᠷ ᠠᠵᠢᠯᠯᠠᠵᠤ ᠪᠠᠢᠭᠠ ᠰᠤᠷᠠᠭ ᠪᠠᠢᠨᠠ᠃ ᠲᠡᠮᠦᠷ ᠬᠠᠢᠯᠭᠠᠵᠤ ᠵᠡᠪᠰᠡᠭ ᠬᠢᠳᠡᠭ ᠤᠯᠤᠰ ᠭᠡᠪᠡᠯ ᠬᠢᠲᠠᠳ ᠤ᠋ᠨ ᠳᠣᠲᠣᠷᠠ ᠰᠥᠩ ᠯᠡ ᠰᠢᠦ ᠳᠡ ᠭᠡᠰᠡᠨ ᠦᠭᠡ ᠨᠦ᠍ᠭᠦᠳ ᠰᠣᠨᠣᠰᠤᠭᠳᠠᠵᠤ ᠪᠠᠢᠯᠠ᠃
ᠬᠤᠪᠢᠯᠠᠢ ᠳᠠᠭᠤ ᠦᠭᠡᠢ ᠰᠠᠭᠤᠵᠤ ᠵᠠᠩᠵᠤᠨ ᠨᠤᠭᠤᠳ ᠤ᠋ᠨ ᠦᠭᠡ ᠶ᠋ᠢ ᠴᠢᠩᠨᠠᠨᠠ᠃
ᠲᠡᠭᠡᠭᠡᠳ ᠠᠮᠠᠨ ᠳᠣᠲᠣᠷᠠ ᠪᠠᠨ《ᠰᠢᠭᠦᠨ ᠲᠤᠩᠭᠠᠭᠠᠵᠦ ᠪᠣᠳᠣᠬᠤ ᠶᠣᠰᠣᠲᠠᠢ》 ᠭᠡᠵᠦ ᠬᠡᠯᠡᠵᠦ ᠰᠤᠷᠤᠭᠰᠠᠨ ᠦᠭᠡ ᠪᠡᠨ ᠰᠢᠪᠡᠨᠡᠭᠰᠡᠭᠡᠷ ᠰᠢᠷᠪᠡᠭᠡ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠪᠣᠳᠣᠯᠬᠢᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠲᠡᠭᠡᠭᠡᠳ ᠪᠢᠳᠡ ᠶᠠᠭᠠᠬᠢᠵᠤ ᠪᠠᠢᠯᠳᠤᠬᠤ ᠶᠤᠮ ᠪᠣᠢ? ᠭᠡᠰᠡᠨ ᠠᠰᠠᠭᠤᠯᠲᠠ ᠶ᠋ᠢ ᠪᠠᠰᠠ ᠨᠡᠢᠲᠡ ᠳᠤᠮᠳᠠ ᠬᠠᠶᠠᠵᠤ ᠲᠠᠯᠪᠢᠯᠠ᠃
— ᠲᠡᠢᠮᠦ ᠠ᠋᠃ ᠰᠢᠨᠡ ᠠᠷᠭᠠ ᠬᠠᠢᠨᠠ ᠭᠡᠳᠡᠭ ᠲᠤᠢᠯ ᠠ᠋ᠴᠠ ᠴᠢᠬᠤᠯᠠ᠃ ᠮᠤᠬᠤᠯᠠᠢ ᠵᠠᠩᠵᠤᠨ ᠠᠯᠲᠠᠨ ᠤᠯᠤᠰ ᠲᠠᠢ ᠪᠠᠢᠯᠳᠤᠬᠤ ᠶ᠋ᠢᠨ ᠡᠮᠦᠨᠡ ᠪᠣᠭᠳᠠ ᠡᠵᠡᠨ ᠳ᠋ᠦ᠍ ᠪᠠᠷᠠᠯᠬᠠᠭᠠᠳ《ᠣᠯᠠᠨ ᠢ᠋ᠶ᠋ᠠᠷ ᠴᠥᠭᠡᠨ ᠢ᠋ ᠴᠣᠬᠢᠨ ᠤᠰᠠᠳᠬᠠᠵᠤ ᠪᠠᠢᠬᠤ ᠶ᠋ᠢ ᠪᠣᠭᠣᠯ ᠪᠢ ᠦᠵᠡᠭᠰᠡᠨ ᠦᠭᠡᠢ᠂ ᠰᠢᠯᠢᠳᠡᠭ ᠴᠥᠭᠡᠨ ᠢ᠋ᠶ᠋ᠡᠷ ᠣᠯᠠᠨ ᠢ᠋ ᠨᠣᠮᠣᠬᠠᠳᠬᠠᠬᠤ ᠨᠢ ᠢᠯᠡᠭᠦᠦ ᠠᠰᠢᠭᠲᠠᠢ ᠶ᠋ᠢ ᠰᠣᠶᠣᠷᠬᠠᠵᠤ ᠪᠣᠯᠭᠣᠭᠠᠬᠤ ᠪᠢᠵᠡ》 ᠭᠡᠵᠦ ᠠᠢᠯᠠᠳᠬᠠᠵᠤ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠰᠠᠨᠠᠶᠠ᠃ ᠰᠥᠩ ᠦ᠋ᠨ ᠴᠡᠷᠢᠭ ᠣᠯᠠᠨ ᠰᠢᠦ᠃ ᠰᠠᠶᠠ ᠪᠠᠷ ᠲᠣᠭᠠᠯᠠᠵᠤ ᠶᠠᠷᠢᠨᠠ᠃ ᠪᠢᠳᠡ ᠲᠡᠳᠡᠨ ᠦ᠌ ᠣᠯᠠᠨ ᠠ᠋ᠴᠠ ᠠᠶᠤᠬᠤ ᠤᠴᠢᠷ ᠦᠭᠡᠢ᠃ ᠤᠷᠠᠨ ᠤᠬᠠᠭᠠᠨ ᠵᠠᠷᠤᠵᠤ ᠴᠢᠳᠠᠪᠠᠯ ᠠᠷᠪᠠᠨ ᠴᠡᠷᠢᠭ ᠲᠦᠮᠡᠨ ᠳᠠᠢᠰᠤᠨ ᠢ᠋ ᠬᠠᠤ ᠲᠠᠲᠠᠵᠤ ᠬᠠᠶᠠᠨᠠ᠃ ᠲᠤᠯᠤᠢ᠂ ᠮᠤᠬᠤᠯᠠᠢ ᠬᠣᠶᠠᠷ ᠶᠠᠭᠠᠬᠢᠵᠤ ᠴᠠᠭᠠᠨ ᠬᠡᠷᠡᠮ ᠢ᠋ ᠳᠠᠪᠠᠯᠠ᠃ ᠲᠡᠢᠮᠦ ᠤᠬᠠᠭᠠᠨ ᠬᠡᠷᠡᠭᠲᠡᠢ ᠭᠡᠵᠦ ᠪᠠᠶᠠᠨ ᠵᠠᠩᠵᠤᠨ ᠬᠡᠯᠡᠯᠡ᠃
— ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ᠂ ᠶᠡᠬᠡ ᠵᠠᠬᠢᠷᠤᠭᠴᠢ ᠮᠢᠨᠢ! ᠪᠢᠳᠡᠨ ᠳ᠋ᠦ᠍ ᠠᠶᠤᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠴᠡᠷᠢᠭ᠂ ᠮᠣᠷᠢ ᠬᠣᠶᠠᠷ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤ ᠶᠣᠰᠣᠲᠠᠢ᠃ ᠪᠢ ᠬᠦᠴᠦᠷᠬᠡᠭ ᠠᠯᠲᠠᠨ ᠤᠯᠤᠰ ᠢ᠋ ᠮᠥᠬᠥᠭᠡᠬᠦ ᠳ᠋ᠦ᠍ ᠪᠡᠨ ᠤᠷᠢᠳ ᠢ᠋ᠶ᠋ᠠᠷ ᠰᠥᠩ ᠤᠯᠤᠰ ᠲᠠᠢ ᠡᠪ ᠦ᠋ᠨ ᠭᠡᠷᠡ ᠪᠠᠢᠭᠤᠯᠤᠭᠠᠳ ᠲᠡᠳᠡᠨ ᠦ᠌ ᠵᠦᠭ ᠡᠴᠡ ᠳᠠᠢᠰᠤᠨ ᠳ᠋ᠤ᠌ ᠲᠤᠰᠠ ᠳᠡᠮᠵᠢᠯᠭᠡ ᠪᠣᠯᠬᠤ ᠵᠦᠢᠯ ᠬᠢᠬᠦ ᠦᠭᠡᠢ ᠪᠡᠷ ᠪᠣᠯᠭᠠᠵᠤ ᠴᠢᠳᠠᠭᠰᠠᠨ ᠰᠢᠦ ᠳᠡ᠃ ᠡᠨᠡ ᠪᠣᠯ ᠳᠠᠢᠰᠤᠨ ᠤ᠋ ᠪᠠᠨ ᠭᠠᠷ ᠬᠥᠯ ᠢ᠋ ᠲᠤᠱᠠᠵᠤ ᠪᠠᠢᠭᠠ ᠭᠡᠰᠡᠨ ᠦᠭᠡ᠃ ᠲᠡᠭᠡᠬᠦ ᠪᠡᠷ ᠪᠢᠳᠡ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠴᠢᠭᠡ ᠵᠠᠩᠵᠤᠨ ᠲᠤᠯᠤᠢ ᠶ᠋ᠢᠨ ᠮᠡᠷᠭᠡᠨ ᠤᠬᠠᠭᠠᠨ ᠢ᠋ ᠬᠡᠷᠡᠭᠯᠡᠨ ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠭᠠᠷ ᠬᠥᠯ ᠢ᠋ ᠬᠠᠮᠢᠭᠠᠰᠢ ᠨᠢ ᠴᠦ᠍ ᠬᠥᠳᠡᠯᠬᠦ ᠠᠷᠭᠠ ᠦᠭᠡᠢ ᠪᠡᠷ ᠲᠤᠱᠠᠵᠤ ᠪᠠᠭᠯᠠᠬᠤ ᠠᠷᠭᠠ ᠪᠠᠢᠨᠠ ᠤᠤ? ᠪᠦᠰᠡᠯᠡᠵᠦ ᠠᠪᠬᠤ ᠶ᠋ᠢ ᠯᠡ ᠪᠣᠳᠣᠬᠤ ᠶᠣᠰᠣᠲᠠᠢ ᠪᠠᠢᠬᠤ᠃ ᠰᠥᠩ ᠦ᠋ᠨ ᠴᠡᠷᠢᠭ ᠤᠯᠠᠢᠷᠠᠨ ᠳᠠᠭᠠᠷᠢᠬᠤ ᠪᠠᠷ ᠢ᠋ᠶ᠋ᠠᠨ ᠡᠪᠡᠰᠦ ᠰᠢᠷᠣᠢ᠂ ᠮᠣᠳᠣ ᠰᠢᠭᠤᠢ᠂ ᠬᠠᠳᠠ ᠠᠰᠬᠠ ᠬᠠᠮᠢᠭᠠ ᠠ᠋ᠴᠠ ᠴᠤ᠌ ᠬᠠᠮᠢᠶᠠ ᠦᠭᠡᠢ ᠭᠠᠷᠴᠤ ᠢᠷᠡᠭᠡᠳ ᠨᠦᠳᠦᠯᠳᠦᠳᠡᠭ ᠠᠷᠭᠠᠲᠠᠢ ᠶ᠋ᠢ ᠰᠠᠨᠠᠬᠤ ᠶᠣᠰᠣᠲᠠᠢ ᠪᠠᠢᠨᠠ᠃
— ᠶᠡᠬᠡ ᠵᠠᠬᠢᠷᠤᠭᠴᠢ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠ᠃ ᠠᠯᠲᠠᠨ ᠤᠯᠤᠰ᠂ ᠰᠥᠩ ᠤᠯᠤᠰ ᠬᠣᠶᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠥᠰᠢᠶᠡᠲᠡᠨ ᠪᠠᠢᠭᠰᠠᠨ ᠤᠴᠢᠷ ᠠ᠋ᠴᠠ ᠲᠡᠭᠦᠨ ᠢ᠋ ᠨᠢ ᠲᠤᠯᠤᠢ ᠵᠠᠩᠵᠤᠨ ᠠᠰᠢᠭᠯᠠᠨ᠂ ᠲᠡᠳᠡᠨ ᠦ᠌ ᠠᠷᠪᠠᠨ ᠲᠦᠮᠡ ᠭᠠᠷᠤᠢ ᠴᠡᠷᠢᠭ ᠢ᠋ ᠭᠠᠭᠴᠠᠭᠠᠷᠳᠠᠭᠤᠯᠵᠤ ᠪᠠᠢᠭᠠᠳ ᠨᠢᠭᠡ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠨᠢᠷᠭᠢᠭᠦᠯᠵᠣ ᠣᠷᠬᠢᠭᠰᠠᠨ᠃ ᠲᠠᠯᠠ ᠳ᠋ᠤ᠌ ᠳᠠᠪᠬᠢᠵᠤ ᠶᠠᠪᠤᠭᠠ ᠭᠥᠷᠥᠭᠡᠰᠦ ᠶ᠋ᠢ ᠠᠩᠴᠢᠨ ᠪᠦᠷᠭᠦᠳ ᠶᠠᠭᠠᠬᠢᠵᠤ ᠳᠠᠷᠤᠵᠤ ᠠᠪᠳᠠᠭ ᠪᠢᠯᠡ᠂ ᠴᠢᠳᠠᠯᠲᠠᠢ ᠴᠥᠭᠡᠨ ᠴᠡᠷᠢᠭ ᠳᠠᠢᠰᠤᠨ ᠢ᠋ ᠶᠠᠭ ᠯᠠ ᠲᠡᠭᠦᠨ ᠰᠢᠭ ᠪᠣᠯᠭᠠᠵᠤ ᠠᠪᠳᠠᠭ᠃
— ᠲᠡᠢᠮᠦ ᠠ᠋᠃ ᠰᠥᠩ ᠤᠯᠤᠰ ᠪᠣᠯ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠣᠭᠲᠣ ᠥᠭᠡᠷᠡ ᠴᠢᠨᠠᠷᠲᠠᠢ ᠶ᠋ᠢ ᠰᠠᠨᠠᠬᠤ ᠪᠢᠵᠡ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠨᠢ ᠰᠢᠤᠳᠠᠨ ᠵᠦᠩ ᠮᠠᠨ ᠤ᠋ ᠪᠣᠭᠳᠠ ᠡᠵᠡᠨ ᠦ᠌ ᠦᠷᠭᠦᠭᠡᠨ ᠳ᠋ᠦ᠍ ᠡᠯᠴᠢ ᠵᠠᠷᠤᠨ ᠠᠯᠪᠠ ᠪᠡᠷᠢ᠂ ᠮᠢᠨᠦ ᠬᠠᠷᠢᠶᠠᠲᠤ ᠪᠠᠢ ᠭᠡᠵᠦ ᠱᠠᠭᠠᠷᠳᠠᠵᠤ ᠪᠠᠢᠭᠠᠳ ᠶᠠᠭ ᠬᠠᠯᠵᠠ ᠲᠤᠯᠤᠯᠳᠤᠬᠤ ᠪᠠᠷ ᠶᠠᠭᠠᠬᠢᠵᠤ ᠴᠦ᠍ ᠴᠢᠳᠠᠯ ᠦᠭᠡᠢ᠂ ᠨᠥᠭᠦᠭᠡ ᠲᠠᠯᠪᠢᠬᠤ ᠪᠠᠢᠭᠰᠠᠨ ᠱᠠᠭᠠᠷᠳᠠᠯᠭᠠ ᠠ᠋ᠴᠠ ᠪᠠᠨ ᠬᠣᠢᠰᠢ ᠲᠥᠯᠥᠵᠦ ᠲᠠᠪᠤᠨ ᠵᠢᠯ ᠪᠣᠯᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠨᠤᠷᠠᠨ ᠤᠨᠠᠵᠤ᠂ ᠪᠢᠳᠡᠨ ᠦ᠌ ᠮᠣᠷᠢᠳ ᠢ᠋ ᠲᠠᠬᠠᠯᠠᠭᠴᠢᠳ ᠪᠣᠯᠵᠤ ᠪᠠᠭᠤᠨ ᠥᠭᠪᠡ ᠳᠡ᠃ ᠶᠠᠭᠤᠮᠠ ᠴᠠᠭ ᠢ᠋ᠶ᠋ᠠᠨ ᠢᠷᠡᠬᠦ ᠪᠡᠷ ᠶᠡᠬᠡ ᠮᠥᠷᠡᠨ ᠭᠣᠣᠯ ᠤ᠋ᠨ ᠬᠠᠪᠤᠷ ᠤ᠋ᠨ ᠰᠥᠩ ᠲᠦᠷᠢᠬᠦ ᠠᠳᠠᠯᠢ ᠠᠶᠠᠨᠳᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠭᠠ ᠦᠰᠦᠷᠦᠨ ᠤᠷᠤᠰᠤᠭᠠᠳ ᠠᠯᠠᠭᠠ ᠪᠣᠯᠳᠠᠭ ᠵᠢᠮᠡ ᠲᠡᠢ᠃ ᠰᠥᠩ ᠤᠯᠤᠰ ᠲᠤ ᠲᠡᠢᠮᠦ ᠴᠠᠭ ᠨᠢ ᠢᠷᠡᠭᠰᠡᠨ ᠪᠠᠢᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠁ ᠭᠡᠬᠦᠴᠢᠯᠡᠨ ᠶᠠᠷᠢᠶᠠ ᠪᠣᠯᠵᠤ᠂ ᠵᠠᠩᠵᠤᠨ ᠨᠤᠭᠤᠳ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠶᠠᠭᠠᠬᠢᠵᠤ ᠣᠷᠣᠬᠤ ᠪᠠᠨ ᠪᠣᠳᠣᠨ ᠵᠥᠪᠯᠡᠯᠳᠦᠵᠦ ᠪᠠᠢᠯᠠ᠃
ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠬᠤᠪᠢᠯᠠᠢ ᠪᠤᠰᠤᠳ ᠤ᠋ᠨ ᠦᠭᠡ ᠴᠢᠩᠨᠠᠨ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠵᠠ ᠪᠢ ᠲᠠ ᠨᠠᠷ ᠤ᠋ᠨ ᠦᠭᠡ ᠶ᠋ᠢ ᠣᠢᠯᠠᠭᠠᠵᠤ ᠮᠡᠳᠡᠯᠡ᠃ ᠮᠠᠨ ᠤ᠋ ᠴᠡᠷᠢᠭ᠂ ᠮᠣᠷᠢ ᠠᠯᠢ ᠠᠯᠢ ᠨᠢ ᠣᠳᠣ ᠬᠡᠳᠦ ᠬᠣᠨᠣᠭ ᠰᠤᠯᠠ ᠪᠠᠢᠵᠤ᠂ ᠡᠴᠡᠭᠡ ᠪᠡᠨ ᠲᠠᠢᠯᠤᠭᠠ ᠪᠢᠵᠡ᠃ ᠪᠢᠳᠡ ᠥᠭᠡᠳᠡ ᠪᠣᠯᠤᠭᠴᠢ ᠠᠬᠠ ᠬᠠᠭᠠᠨ ᠤ᠋ ᠪᠠᠨ ᠵᠣᠷᠢᠭᠰᠠᠨ① ᠢ᠋ ᠭᠦᠢᠴᠡᠭᠡᠬᠦ ᠶ᠋ᠢᠨ ᠲᠥᠯᠥᠭᠡᠨᠡ ᠳᠠᠢᠳᠤᠨᠠ᠃ ᠳᠣᠯᠣᠭᠠ ᠬᠣᠨᠣᠭᠠᠳ ᠯᠠ ᠰᠢᠭᠤᠳ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠣᠷᠣᠶᠠ ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠰᠥᠩ ᠤᠯᠤᠰ ᠭᠡᠭᠴᠢ ᠶ᠋ᠢ ᠬᠡᠳᠦᠨ ᠲᠠᠯᠠ ᠠ᠋ᠴᠠ ᠨᠢ ᠬᠠᠭᠠᠵᠤ ᠪᠦᠰᠡᠯᠡᠨ ᠠᠪᠤᠭᠠᠳ ᠣᠷᠢᠶᠠᠨ ᠳᠤᠭᠲᠤᠢᠯᠠᠵᠤ ᠴᠣᠬᠢᠬᠤ ᠠᠷᠭᠠ ᠬᠡᠷᠡᠭᠯᠡᠶᠡ ᠭᠡᠵᠦ ᠬᠡᠯᠡᠭᠡᠳ᠂ ᠶᠠᠮᠠᠷ ᠵᠠᠩᠵᠤᠨ ᠤ᠋ ᠴᠡᠷᠢᠭ ᠬᠠᠮᠢᠭᠠᠭᠤᠷ ᠶᠠᠭᠠᠬᠢᠵᠤ ᠳᠣᠪᠲᠣᠯᠬᠤ ᠲᠤᠬᠠᠢ ᠪᠠᠨ ᠵᠢᠭᠠᠵᠤ ᠥᠭᠦᠯᠡᠪᠡ᠃ ᠪᠦᠬᠦ ᠴᠡᠷᠢᠭ ᠢ᠋ ᠤᠷᠢᠶᠠᠩᠬᠠᠢᠳᠠᠢ ᠵᠠᠬᠢᠷᠴᠤ᠂ ᠭᠣᠣᠯ ᠬᠦᠴᠦ ᠶ᠋ᠢ ᠪᠤᠶᠠᠨ ᠵᠠᠩᠵᠤᠨ ᠲᠡᠷᠢᠭᠦᠯᠡᠨ ᠵᠠᠬᠢᠷᠤᠭᠰᠠᠨ ᠲᠦᠮᠡᠲᠦ ᠬᠣᠰᠢᠭᠤᠴᠢᠯᠠᠨ᠂ ᠡᠬᠢᠯᠡᠭᠡᠳ ᠳᠠᠢᠰᠤᠨ ᠤ᠋ ᠲᠦᠰᠢᠴᠡ ᠭᠠᠵᠠᠷ ᠡᠵᠸᠦ ᠬᠣᠲᠠ ᠪᠣᠯᠤᠨ ᠰᠧᠴᠤᠸᠠᠨ ᠢ᠋ ᠡᠵᠡᠯᠡᠬᠦ ᠶᠣᠰᠣᠲᠠᠢ ᠭᠡᠵᠦ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠲᠤᠰᠢᠶᠠᠯ ᠪᠠᠭᠤᠯᠭᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠤᠪᠢᠯᠠᠢ ᠶ᠋ᠢᠨ ᠬᠠᠷᠢᠶᠠᠨ ᠳ᠋ᠤ᠌ ᠠᠷᠪᠠᠨ ᠲᠦᠮᠡ ᠭᠠᠷᠤᠢ ᠮᠣᠩᠭᠣᠯ ᠴᠡᠷᠢᠭ ᠬᠤᠷᠠᠯᠳᠤᠭᠰᠠᠨ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ ᠬᠠᠭᠤᠴᠢᠨ ᠠᠯᠲᠠᠨ ᠤᠯᠤᠰ ᠭᠡᠵᠦ ᠪᠠᠢᠭᠰᠠᠨ ᠤ᠋ ᠨᠡᠯᠢᠶᠡᠳ ᠴᠡᠷᠢᠭ ᠢ᠋ ᠵᠡᠭᠦᠨ ᠭᠠᠷ ᠤᠨ ᠵᠠᠬᠢᠷᠤᠭᠴᠢ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠲᠠᠢ ᠬᠡᠪ ᠢ᠋ᠶ᠋ᠡᠷ ᠨᠢ ᠪᠠᠢᠯᠭᠠᠨ᠂ ᠲᠡᠳᠡᠨ ᠢ᠋ ᠲᠡᠢᠨ ᠳ᠋ᠦ᠍ ᠠᠰᠢᠭᠯᠠᠵᠤ ᠪᠣᠯᠤᠨᠠ ᠭᠡᠮᠡᠨ ᠦᠵᠡᠭᠰᠡᠨ ᠤᠴᠢᠷ ᠵᠡᠪᠰᠡᠭ᠂ ᠴᠢᠳᠠᠪᠤᠷᠢ ᠰᠤᠯᠠᠲᠠᠢ ᠴᠦ᠍ ᠭᠡᠰᠡᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠲᠠᠯᠠ ᠬᠤᠪᠢ ᠲᠠᠢ ᠲᠡᠩᠴᠡᠬᠦ ᠲᠣᠭᠠᠨ ᠤ᠋ ᠬᠢᠲᠠᠳ ᠴᠡᠷᠢᠭ ᠮᠠᠲᠠᠯ ᠳ᠋ᠤ᠌ ᠨᠢ ᠪᠠᠢᠯᠠ᠃
ᠤᠷᠢᠳ ᠨᠢ ᠰᠥᠩ ᠤᠯᠤᠰ ᠠᠯᠲᠠᠨ ᠤᠯᠤᠰ ᠬᠣᠶᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠣᠯᠠᠨᠲᠠ ᠪᠠᠢᠯᠳᠤᠵᠤ᠂ ᠡᠪ ᠨᠡᠢᠯᠡᠬᠦ ᠠᠷᠭᠠ ᠲᠠᠰᠤᠷᠠᠨ ᠪᠡᠶᠡ ᠪᠡᠶᠡ ᠪᠡᠨ ᠦᠵᠡᠨ ᠶᠠᠳᠠᠬᠤ ᠪᠠᠢᠳᠠᠯ ᠪᠣᠯᠤᠭᠰᠠᠨ ᠲᠡᠷᠡ ᠪᠠᠢᠳᠠᠯ ᠢ᠋ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠤᠬᠠᠭᠠᠯᠢᠭ ᠢ᠋ᠶ᠋ᠠᠷ ᠠᠰᠢᠭᠯᠠᠵᠤ ᠴᠢᠳᠠᠭᠰᠠᠨ ᠪᠠᠢᠪᠠ᠃ ᠠᠷᠪᠠ ᠬᠣᠷᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠮᠤᠬᠤᠯᠠᠢ᠂ ᠰᠦᠪᠡᠭᠡᠲᠡᠢ ᠵᠠᠩᠵᠤᠨ ᠨᠠᠷ ᠵᠦᠷᠴᠢᠳ ᠦ᠋ᠨ ᠠᠯᠲᠠᠨ ᠤᠯᠤᠰ ᠲᠠᠢ ᠳᠠᠢᠳᠤᠵᠤ ᠲᠡᠭᠦᠨ ᠢ᠋ ᠮᠥᠬᠥᠭᠡᠬᠦ ᠳ᠋ᠦ᠍ ᠪᠡᠨ ᠰᠥᠩ ᠤᠯᠤᠰ ᠲᠠᠢ ᠭᠡᠷᠡ ᠬᠢᠵᠦ ᠴᠡᠷᠢᠭ ᠦ᠋ᠨ ᠲᠤᠰᠠᠯᠠᠮᠵᠢ ᠶ᠋ᠢ ᠠᠯᠲᠠᠨ ᠤᠯᠤᠰ ᠲᠤ᠌ ᠦᠵᠡᠭᠦᠯᠬᠦ ᠦᠭᠡᠢ ᠭᠡᠰᠡᠨ ᠪᠠᠲᠤᠯᠠᠭᠠ ᠶ᠋ᠢ ᠪᠣᠢ ᠪᠣᠯᠭᠠᠭᠰᠠᠨ ᠪᠠᠢᠪᠠ᠃ ᠶᠡᠷᠦ ᠨᠢ ᠪᠣᠭᠳᠠ ᠴᠢᠩᠭᠢᠰ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠣᠷᠣᠨ ᠨᠤᠭᠤᠳ ᠲᠠᠢ ᠳᠠᠢᠳᠤᠬᠤ ᠳ᠋ᠤ᠌ ᠪᠠᠨ ᠲᠡᠷᠡ ᠪᠠᠢᠯᠳᠤᠵᠤ ᠪᠠᠢᠭᠠ ᠤᠯᠤᠰ ᠤ᠋ᠨ ᠴᠠᠭᠠᠳᠤ ᠲᠠᠯᠠ ᠶ᠋ᠢᠨ ᠣᠷᠣᠨ ᠤ᠋ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠲᠠᠢ ᠡᠪ ᠦ᠋ᠨ ᠭᠡᠷᠡ ᠪᠠᠢᠭᠤᠯᠤᠨ᠂ ᠳᠠᠢᠰᠤᠨ ᠪᠣᠯᠤᠭᠰᠠᠨ ᠤᠯᠤᠰ ᠲᠤ᠌ ᠲᠤᠰᠠ ᠳᠡᠮᠵᠢᠯᠭᠡ ᠦᠵᠡᠭᠦᠯᠬᠦ ᠦᠭᠡᠢ᠂ ᠲᠡᠭᠦᠨ ᠦ᠌ ᠴᠡᠷᠢᠭ ᠵᠡᠪᠰᠡᠭ ᠢ᠋ ᠥᠪᠡᠷ ᠦ᠋ᠨ ᠨᠤᠲᠤᠭ ᠲᠤ᠌ ᠣᠷᠣᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠪᠣᠯᠭᠠᠳᠠᠭ ᠠᠷᠭᠠ ᠤᠬᠠᠭᠠᠨ ᠢ᠋ ᠭᠠᠷᠭᠠᠵᠤ ᠴᠢᠳᠠᠳᠠᠭ ᠪᠠᠢᠭᠰᠠᠨ᠃ ᠲᠡᠷᠡ ᠯᠠ ᠠᠷᠭᠠ ᠪᠠᠷ ᠬᠢᠲᠠᠳ ᠤ᠋ᠨ ᠭᠠᠵᠠᠷ ᠳᠡᠭᠡᠷᠡ ᠪᠠᠢᠭᠠ ᠠᠯᠲᠠᠨ᠂ ᠯᠢᠶᠣᠣ᠂ ᠳ᠋ᠠᠯᠢ᠂ ᠰᠥᠩ ᠤᠯᠤᠰ ᠤ᠋ᠳ ᠲᠠᠢ ᠮᠣᠩᠭᠣᠯᠴᠤᠳ ᠪᠠᠢᠯᠳᠤᠨ ᠲᠦᠪᠰᠢᠳᠬᠡᠬᠦ ᠤᠬᠠᠭᠠᠨ ᠢ᠋ ᠵᠠᠷᠤᠭᠰᠠᠨ ᠠᠵᠢ᠃
ᠬᠤᠪᠢᠯᠠᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠪᠠᠢᠭᠠ ᠬᠠᠭᠤᠴᠢᠨ ᠠᠯᠲᠠᠨ ᠤᠯᠤᠰ ᠭᠡᠵᠦ ᠪᠠᠢᠭᠰᠠᠨ ᠤ᠋ ᠬᠢᠲᠠᠳ ᠴᠡᠷᠢᠭ ᠨᠢ ᠬᠡᠳᠦᠢ ᠮᠣᠷᠢ ᠦᠭᠡᠢ ᠴᠦ᠍᠂ ᠪᠣᠭᠣᠨᠢ ᠨᠤᠮᠤ ᠰᠤᠮᠤ ᠠ᠋ᠴᠠ ᠴᠠᠭᠠᠰᠢ ᠰᠠᠯ ᠣᠩᠭᠣᠴᠠ ᠬᠢᠬᠦ ᠤᠷᠠᠲᠠᠢ᠂ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠬᠥᠩᠭᠡᠨ᠂ ᠮᠣᠩᠭᠣᠯ ᠳᠠᠭᠠᠭᠠᠮᠠᠯ ᠤ᠋ᠳ ᠤ᠋ᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠳᠠᠷᠢ᠂ ᠰᠢᠲᠠᠳᠠᠭ ᠳᠠᠪᠠᠷᠬᠠᠢ ᠵᠡᠷᠭᠡ ᠶ᠋ᠢ ᠠᠷᠪᠢᠨ ᠬᠢᠵᠦ ᠴᠢᠳᠠᠳᠠᠭ ᠠᠷᠭᠠ ᠨᠤᠭᠤᠳ ᠰᠤᠷᠤᠭᠰᠠᠨ ᠵᠡᠷᠭᠡ ᠨᠢ ᠲᠣᠮᠣ ᠲᠡᠢᠨ ᠳ᠋ᠦ᠍ ᠬᠤᠪᠢᠯᠠᠢ ᠳ᠋ᠤ᠌ ᠲᠤᠰᠠᠯᠠᠬᠤ ᠡᠷᠬᠢᠮ ᠬᠡᠷᠡᠭᠴᠡᠭᠡᠲᠡᠢ ᠪᠠᠢᠯᠠ᠃ ᠡᠢᠮᠦ ᠬᠦᠴᠦ ᠪᠡᠷ ᠰᠥᠩ ᠤᠯᠤᠰ ᠢ᠋ ᠲᠦᠪᠰᠢᠳᠬᠡᠬᠦ᠂ ᠥᠪᠡᠷ ᠲᠦ᠍ ᠪᠡᠨ ᠨᠢᠭᠡᠳᠬᠡᠬᠦ ᠡᠭᠦᠷᠭᠡ ᠮᠣᠩᠭᠣᠯ ᠵᠠᠬᠢᠷᠤᠭᠴᠢᠳ ᠲᠤ᠌ ᠨᠣᠭᠳᠠᠭᠰᠠᠨ ᠠᠵᠢ᠃ ᠬᠤᠪᠢᠯᠠᠢ ᠡᠨᠡ ᠬᠡᠷᠡᠭ ᠢ᠋ ᠭᠦᠢᠴᠡᠭᠡᠬᠦ ᠦᠭᠡᠢ ᠪᠡᠷ ᠪᠤᠰᠤᠳ ᠨᠣᠶᠠᠨ ᠤ᠋ ᠳᠡᠭᠡᠷᠡ ᠥᠪᠡᠷ ᠢ᠋ ᠪᠡᠨ ᠪᠠᠢᠯᠭᠠᠨᠠ ᠭᠡᠵᠦ ᠰᠠᠨᠠᠬᠤ ᠶ᠋ᠢᠨ ᠴᠦ᠍ ᠬᠡᠷᠡᠭ ᠦᠭᠡᠢ ᠭᠡᠵᠦ ᠬᠠᠲᠠᠭᠤ ᠪᠣᠳᠣᠵᠤ ᠪᠢᠯᠡ᠃
ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠨᠤᠭᠤᠳ ᠲᠤ᠌ ᠪᠠᠨ ᠬᠡᠯᠡᠵᠦ ᠪᠠᠢᠭᠰᠠᠨ ᠭᠤᠷᠪᠠᠨ ᠵᠦᠢᠯ ᠢ᠋ ᠪᠢᠳᠡ ᠮᠠᠷᠲᠠᠬᠤ ᠶᠣᠰᠣ ᠦᠭᠡᠢ᠃ ᠲᠤᠬᠠᠢᠯᠠᠪᠠᠯ᠄ ᠨᠢᠭᠡ ᠳ᠋ᠦ᠍᠂ ᠣᠯᠠᠨ ᠴᠡᠷᠢᠭ ᠨᠢᠭᠡᠨ ᠳᠣᠣᠷᠠ ᠪᠥᠭᠡᠮᠨᠡᠷᠡᠭᠦᠯᠦᠨ ᠨᠦᠰᠡᠷ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠥᠳᠡᠯᠵᠦ ᠶᠠᠳᠠᠨ ᠲᠤᠯᠤᠯᠳᠤᠬᠤ ᠶ᠋ᠢ ᠴᠡᠭᠡᠷᠯᠡᠨᠡ᠃ ᠬᠣᠶᠠᠷ ᠲᠤ᠌᠂ ᠬᠣᠲᠠ ᠰᠠᠭᠤᠷᠢᠨ ᠳ᠋ᠤ᠌ ᠰᠢᠭᠢᠳᠦᠨ ᠰᠠᠭᠤᠬᠤ ᠶ᠋ᠢ ᠪᠠᠰᠠ ᠴᠡᠭᠡᠷᠯᠡᠨᠡ᠃ ᠭᠤᠷᠪᠠ ᠳ᠋ᠤ᠌᠂ ᠴᠡᠷᠢᠭ ᠦ᠋ᠨ ᠤᠵᠢᠳ ᠰᠠᠮᠠᠭᠤᠨ ᠶᠠᠪᠤᠳᠠᠯ ᠢ᠋ ᠬᠣᠷᠢᠭᠯᠠ᠃ ᠬᠢᠲᠠᠳ ᠤ᠋ᠨ ᠰᠠᠢᠬᠠᠨ ᠥᠩᠭᠡ ᠶ᠋ᠢᠨ ᠡᠮᠡᠰ ᠲᠦ᠍ ᠮᠣᠩᠭᠣᠯ ᠴᠡᠷᠢᠭ ᠠᠪᠲᠠᠬᠤ ᠨᠢ ᠣᠯᠠᠨ ᠪᠣᠯᠵᠤ ᠤᠷᠠᠬᠠᠨ ᠳ᠋ᠤ᠌ ᠣᠷᠣᠵᠤ ᠣᠷᠬᠢᠬᠤ ᠪᠣᠢ᠃ ᠮᠠᠨ ᠤ᠋ ᠴᠡᠷᠢᠭ ᠡᠨᠡ ᠨᠤᠲᠤᠭ ᠣᠷᠣᠨ ᠤ᠋ ᠡᠮᠡᠰ ᠥᠬᠢᠳ ᠢ᠋ ᠴᠢᠳᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠢᠷᠢ ᠪᠡᠷ ᠳᠠᠷᠤᠯᠠᠨ ᠶᠠᠪᠤᠪᠠᠰᠤ ᠨᠡᠷᠡ ᠰᠦᠷ ᠨᠢ ᠠᠯᠳᠠᠭᠳᠠᠨᠠ ᠰᠢᠦ ᠭᠡᠵᠦ ᠬᠤᠪᠢᠯᠠᠢ ᠵᠠᠬᠢᠭᠠᠳ᠂ ᠪᠠᠢᠯᠳᠤᠬᠤ ᠠᠷᠭᠠ ᠪᠠᠨ ᠰᠢᠨᠡᠴᠢᠯᠡᠨ ᠰᠠᠢᠵᠢᠷᠠᠭᠤᠯᠬᠤ ᠲᠠᠯᠠ ᠪᠠᠷ ᠪᠠᠰᠠ ᠯᠠ ᠡᠪᠦᠭᠡ ᠵᠠᠩᠵᠤᠨ ᠨᠤᠭᠤᠳ ᠤ᠋ᠨ ᠦᠢᠯᠡᠳᠴᠦ ᠶᠠᠪᠤᠭᠰᠠᠨ ᠭᠠᠷᠮᠠᠭᠠᠢ ᠶᠠᠪᠤᠳᠠᠯ ᠤ᠋ᠳ ᠢ᠋ ᠡᠷᠭᠢᠨ ᠰᠠᠨᠠᠭᠤᠯᠪᠠ᠃ ᠳᠠᠢᠰᠤᠨ ᠢ᠋ ᠭᠡᠨᠡᠳᠡᠭᠦᠯᠦᠨ ᠭᠡᠨᠡᠳᠲᠡ ᠬᠦᠴᠦᠲᠡᠢ ᠳᠠᠭᠠᠷᠢᠯᠲᠠ ᠨᠤᠭᠤᠳ ᠢ᠋ ᠬᠢᠨᠡ᠃ ᠬᠣᠲᠠ ᠪᠠᠯᠭᠠᠳ ᠤ᠋ᠳ ᠢ᠋ ᠪᠦᠰᠡᠯᠡᠨ᠂ ᠲᠡᠷᠡ ᠠᠶᠠ ᠪᠠᠷ ᠨᠢ ᠪᠠᠭᠤᠯᠭᠠᠨ ᠠᠪᠴᠤ᠂ ᠤᠯᠤᠰ ᠠᠮᠢᠲᠠᠨ ᠤ᠋ ᠠᠮᠢ ᠶ᠋ᠢ ᠰᠠᠬᠢᠨ ᠬᠠᠮᠠᠭᠠᠯᠠᠬᠤ ᠤᠴᠢᠷ ᠢ᠋ ᠰᠢᠭᠤᠳ ᠡᠷᠢᠪᠡᠯ ᠶᠠᠭᠤᠮᠠ ᠪᠦᠬᠦᠨ ᠣᠯᠳᠠᠨᠠ ᠭᠡᠵᠦ ᠬᠡᠯᠡᠯᠡ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠳᠠᠯᠢ ᠪᠠᠷ ᠰᠥᠩ ᠤᠯᠤᠰ ᠤ᠋ᠨ ᠢᠷᠭᠡᠳ ᠦ᠋ᠨ ᠰᠡᠳᠬᠢᠯ ᠢ᠋ ᠡᠳ᠋ ᠶᠠᠭᠤᠮᠠ᠂ ᠡᠯᠳᠡᠪ ᠵᠥᠭᠡᠯᠡᠨ ᠠᠷᠭᠠ ᠪᠠᠷ ᠥᠪᠡᠷ ᠲᠦ᠍ ᠪᠡᠨ ᠲᠠᠲᠠᠵᠤ ᠠᠪᠬᠤ ᠶ᠋ᠢ ᠡᠷᠬᠢᠮ ᠪᠣᠯᠭᠠᠨᠠ᠂ ᠪᠤᠮᠪᠠ ᠶ᠋ᠢᠨ ᠪᠣᠯᠤᠨ ᠬᠥᠬᠡ ᠶᠢᠨ ᠱᠠᠰᠢᠨ ᠤ᠋ ᠯᠠᠮᠠ ᠨᠠᠷ ᠲᠤ᠌ ᠬᠦᠷᠴᠦ ᠪᠣᠯᠬᠤ ᠦᠭᠡᠢ᠃ ᠪᠢ ᠬᠢᠲᠠᠳ ᠡᠷᠳᠡᠮᠲᠡᠨ ᠪᠠᠭᠰᠢ ᠨᠠᠷ ᠢ᠋ᠶ᠋ᠠᠷ ᠮᠡᠷᠭᠡᠨ ᠺᠦᠩᠽᠢ ᠶ᠋ᠢᠨ ᠰᠤᠷᠭᠠᠯ ᠭᠡᠭᠴᠢ ᠶ᠋ᠢ ᠣᠷᠴᠢᠭᠤᠯᠤᠭᠤᠯᠤᠨ ᠦᠵᠡᠵᠦ ᠪᠠᠢᠨᠠ᠃ ᠲᠡᠷᠡ ᠰᠤᠷᠭᠠᠯ ᠢ᠋ ᠬᠢᠲᠠᠳ ᠬᠥᠮᠦᠰ᠂ ᠢᠯᠠᠩᠭᠤᠶᠠ ᠲᠥᠷᠥ ᠶ᠋ᠢᠨ ᠠᠯᠪᠠᠨ ᠤ᠋ ᠬᠡᠨ ᠱᠠᠰᠢᠨ ᠨᠣᠮ ᠤ᠋ᠨ ᠰᠤᠷᠭᠠᠯ ᠮᠡᠲᠦ ᠦᠵᠡᠵᠦ ᠬᠦᠨᠳᠦᠯᠡᠬᠦ ᠪᠠᠢᠲᠠᠯᠲᠠᠢ ᠪᠠᠢᠨᠠ᠃ ᠲᠡᠭᠦᠨ ᠢ᠋ ᠨᠢ ᠪᠢᠳᠡ ᠮᠠᠭᠤ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠡᠳᠡᠨ ᠦ᠌ ᠰᠡᠳᠬᠢᠯ ᠠᠯᠳᠠᠭᠳᠠᠨ ᠬᠥᠮᠦᠨ ᠪᠣᠯᠭᠠᠨ ᠨᠢ ᠮᠠᠨ ᠢ᠋ ᠮᠠᠭᠤ ᠦᠵᠡᠨ ᠶᠠᠳᠠᠬᠤ ᠪᠠᠢᠲᠠᠯᠲᠠᠢ ᠪᠣᠯᠵᠤ ᠣᠷᠬᠢᠨᠠ᠃ ᠡᠨᠡ ᠪᠦᠭᠦᠳᠡ ᠶ᠋ᠢ ᠰᠠᠨᠠ! ᠭᠡᠯᠡ᠃ ᠵᠠᠩᠵᠤᠨ ᠨᠤᠭᠤᠳ᠂ ᠮᠢᠩᠭᠠᠲᠤ᠂ ᠲᠦᠮᠡᠲᠦ ᠶ᠋ᠢᠨ ᠳᠠᠷᠤᠭᠠ ᠳᠠᠭᠠᠭᠠᠮᠠᠯ ᠤ᠋ᠳ ᠤ᠋ᠨ ᠪᠠᠭᠠ ᠬᠤᠷᠠᠯᠲᠠᠢ ᠡᠭᠦᠨ ᠢ᠋ᠶ᠋ᠡᠷ ᠲᠡᠭᠦᠰᠴᠦ᠂ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠲᠡᠢᠨ ᠦ᠌ ᠪᠦᠷᠢᠶᠡ ᠬᠠᠩᠭᠢᠨᠠᠬᠤ ᠲᠣᠪ ᠢ᠋ ᠲᠣᠭᠲᠠᠭᠠᠨ ᠰᠠᠯᠵᠤ ᠡᠦᠲᠦᠯᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠥᠭᠡᠳᠡ ᠪᠣᠯᠤᠭᠴᠢ ᠬᠠᠭᠠᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠤᠳᠤᠷᠢᠳᠤᠨ ᠣᠷᠳᠣᠰ ᠨᠤᠲᠤᠭ ᠢ᠋ᠶ᠋ᠠᠷ ᠳᠡᠮᠵᠢᠵᠦ᠂ ᠬᠠᠲᠤᠨ ᠤ᠋ ᠭᠣᠣᠯ ᠢ᠋ ᠭᠠᠲᠤᠯᠤᠨ ᠣᠷᠣᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠴᠦ᠍ ᠬᠤᠪᠢᠯᠠᠢ ᠶ᠋ᠢᠨ ᠴᠡᠷᠢᠭ ᠲᠡᠢ ᠨᠡᠢᠯᠡᠨ ᠪᠠᠷᠠᠭᠤᠨ ᠭᠠᠷ ᠪᠣᠯᠵᠤ ᠰᠥᠩ ᠤᠯᠤᠰ ᠤᠷᠤᠭᠤ ᠬᠦᠴᠦ ᠨᠢᠭᠡᠳᠦᠨ ᠳᠣᠪᠲᠣᠯᠬᠤ ᠶᠣᠰᠣᠲᠠᠢ ᠪᠠᠢᠯᠠ᠃
ᠮᠣᠩᠭᠣᠯ ᠴᠡᠷᠢᠭ ᠬᠤᠷᠠᠯᠲᠠᠢ ᠶ᠋ᠢᠨ ᠳᠠᠷᠠᠭᠠ ᠪᠠᠷ ᠶᠡᠬᠡ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠵᠦ ᠡᠮᠦᠨᠡ ᠵᠦᠭ ᠤᠷᠤᠭᠤ ᠲᠣᠭᠣᠰᠣ ᠮᠠᠨᠠᠷᠠᠭᠠᠨ ᠭᠡᠨᠡᠳᠲᠡ ᠳᠠᠭᠠᠷᠢᠵᠠᠢ᠃ ᠲᠡᠢᠨ ᠳ᠋ᠦ᠍ ᠠᠩᠬᠠᠨ ᠤᠳᠠᠭᠠ ᠣᠷᠣᠵᠤ ᠪᠠᠢᠭᠠ ᠪᠤᠰᠤ ᠪᠣᠯᠬᠣᠷ ᠬᠥᠮᠦᠨ᠂ ᠮᠣᠷᠢᠳ ᠤ᠋ᠨ ᠴᠣᠴᠢᠭᠠ ᠭᠠᠷᠴᠤ᠂ ᠭᠠᠵᠠᠷ ᠪᠦᠷᠢ ᠤᠤᠬᠠᠢ ᠳᠠᠭᠤ ᠴᠤᠤᠷᠢᠶᠠᠲᠤᠵᠤ ᠪᠠᠢᠪᠠ᠃ ᠨᠡᠢᠲᠡ ᠪᠠᠷᠤᠭ ᠮᠢᠩᠭᠠᠨ ᠪᠠᠷᠠ ᠶ᠋ᠢᠨ ᠤᠷᠲᠤ ᠱᠤᠭᠤᠮ ᠤ᠋ᠨ ᠳᠠᠭᠠᠤ ᠲᠡᠷᠡ ᠶᠡᠬᠡ ᠬᠥᠯ ᠦ᠋ᠨ ᠲᠣᠭᠣᠰᠣ ᠮᠠᠨᠠᠷᠠᠵᠤ ᠰᠠᠪᠠ ᠭᠠᠵᠠᠷ ᠲᠤ᠌ ᠮᠣᠩᠭᠣᠯᠴᠤᠳ ᠤ᠋ᠨ ᠦᠭᠭᠦᠭᠰᠡᠨ ᠨᠡᠷᠡ ᠪᠡᠷ ᠬᠦᠷᠡᠯ ᠬᠠᠢᠷᠬᠠᠨ ᠤ᠋ ᠬᠢᠷᠠ ᠳ᠋ᠤ᠌᠂ ᠣᠯᠠᠨ ᠵᠠᠮ ᠤ᠋ᠨ ᠠᠭᠤᠯᠵᠠᠪᠤᠷᠢ ᠪᠣᠯᠬᠤ ᠨᠢᠭᠡ ᠳᠠᠪᠠᠭᠠᠨ ᠳ᠋ᠤ᠌ ᠵᠠᠰᠠᠵᠠᠢ᠃ ᠭᠠᠵᠠᠷ ᠭᠠᠵᠠᠷ ᠠ᠋ᠴᠠ ᠳᠠᠢᠰᠤᠨ ᠤ᠋ ᠵᠦᠭ ᠳᠣᠪᠲᠣᠯᠭᠠᠨ ᠶᠠᠭᠠᠬᠢᠵᠤ ᠡᠬᠢᠯᠡᠭᠰᠡᠨ ᠲᠤᠬᠠᠢ ᠮᠡᠳᠡᠭᠡ ᠮᠣᠷᠢᠨ ᠵᠠᠷᠤᠯᠭᠠ ᠪᠠᠷ ᠪᠠᠢᠯᠳᠤᠭᠠᠨ ᠤ᠋ ᠱᠤᠭᠤᠮ ᠤ᠋ᠨ ᠵᠠᠬᠢᠷᠤᠭᠴᠢ ᠤᠷᠢᠶᠠᠩᠬᠠᠢᠳᠠᠢ ᠵᠠᠩᠵᠤᠨ ᠳ᠋ᠤ᠌ ᠢᠷᠡᠭᠰᠡᠭᠡᠷ ᠪᠠᠢᠪᠠ᠃ ᠶᠠᠭᠤᠨ ᠤ᠋ ᠡᠮᠦᠨᠡ ᠪᠠᠶᠠᠨ ᠵᠠᠩᠵᠤᠨ ᠤ᠋ ᠲᠡᠷᠢᠭᠦᠯᠡᠭᠰᠡᠨ ᠲᠦᠮᠡᠲᠦ ᠯᠡ ᠰᠧᠴᠤᠸᠠᠨ ᠢ᠋ ᠭᠠᠷ ᠲᠤ ᠪᠠᠨ ᠣᠷᠣᠭᠤᠯᠵᠤ ᠠᠪᠬᠤ ᠶᠣᠰᠣᠲᠠᠢ ᠪᠠᠢᠪᠠ᠃
ᠲᠡᠷᠡ ᠢᠳᠡᠭᠡᠰᠢᠯᠡᠭᠲᠦ ᠨᠤᠲᠤᠭ ᠪᠣᠯ ᠥᠷᠭᠡᠨ ᠠᠭᠤᠳᠠᠮ ᠲᠠᠷᠢᠶᠠᠯᠠᠩ ᠤ᠋ᠨ ᠭᠠᠵᠠᠷ ᠲᠠᠢ᠂ ᠬᠣᠲᠠ ᠲᠣᠰᠬᠣᠨ ᠣᠯᠠᠨ᠂ ᠭᠠᠬᠠᠢ ᠰᠢᠪᠠᠭᠤ ᠥᠷᠭᠡᠨ ᠦᠷᠡᠵᠢᠭᠦᠯᠳᠡᠭ᠂ ᠤᠰᠤ ᠤᠮᠳᠠ ᠡᠯᠪᠡᠭ ᠲᠡᠢ᠂ ᠠᠭᠤᠯᠠ ᠲᠠᠯᠠ ᠬᠣᠣᠰᠯᠠᠭᠰᠠᠨ ᠦᠨᠡᠬᠡᠷ ᠰᠢᠮᠡᠳᠦ ᠲᠣᠮᠣ ᠨᠤᠲᠤᠭ ᠪᠢᠯᠡ᠃ ᠰᠥᠩ ᠤᠯᠤᠰ ᠤ᠋ᠨ ᠡᠷᠬᠡᠲᠡᠨ ᠨᠦ᠍ᠭᠦᠳ ᠡᠨᠡ ᠨᠤᠲᠤᠭ ᠢ᠋ᠶ᠋ᠠᠷ ᠲᠦᠰᠢᠭ ᠲᠤᠯᠭᠠᠭᠤᠷᠢ ᠪᠣᠯᠭᠠᠭᠰᠠᠭᠠᠷ ᠢᠷᠡᠭᠰᠡᠨ᠂ ᠴᠠᠭᠠᠰᠢ ᠳ᠋ᠤ᠌ ᠪᠠᠨ ᠴᠤ᠌ ᠲᠡᠭᠦᠨ ᠳ᠋ᠦ᠍ ᠲᠤᠯᠭᠠᠭᠤᠷᠢᠯᠠᠨ ᠣᠷᠣᠰᠢᠵᠤ ᠪᠠᠢᠬᠤ ᠪᠣᠯᠤᠯᠲᠠᠢ ᠤᠴᠢᠷ ᠢ᠋ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠡᠷᠬᠡ ᠮᠡᠳᠡᠯᠲᠡᠨ ᠨᠦ᠍ᠭᠦᠳ ᠠᠯᠢ ᠬᠡᠳᠦᠢᠨ ᠮᠡᠳᠡᠭᠰᠡᠨ ᠤᠴᠢᠷ ᠬᠠᠮᠤᠭ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠬᠥᠬᠡ ᠮᠥᠷᠡᠨ ᠦ᠌ ᠰᠠᠪᠠ ᠳ᠋ᠤ᠌ ᠣᠷᠣᠰᠢᠬᠤ ᠲᠡᠷᠡ ᠭᠠᠵᠠᠷ ᠢ᠋ ᠳᠠᠢᠰᠤᠨ ᠪᠣᠯᠬᠤ ᠡᠲᠡᠭᠡᠳ ᠡᠴᠡ ᠪᠡᠨ ᠰᠠᠯᠭᠠᠵᠤ᠂ ᠭᠠᠷ ᠢ᠋ ᠨᠢ ᠮᠤᠬᠤᠷᠯᠠᠬᠤ ᠪᠣᠳᠣᠯᠭᠠᠲᠠᠢ ᠪᠠᠢᠯᠠ᠃
ᠬᠤᠪᠢᠯᠠᠢ ᠰᠢᠨᠡ ᠳᠣᠪᠲᠣᠯᠭᠠᠨ ᠢ᠋ᠶ᠋ᠠᠨ ᠡᠬᠢᠯᠡᠬᠦ ᠡᠴᠡ ᠡᠮᠦᠨᠡ ᠰᠥᠩ ᠦ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠲᠤ ᠳᠠᠬᠢᠨ ᠱᠠᠭᠠᠷᠳᠠᠯᠭᠠ ᠲᠠᠯᠪᠢᠬᠤ ᠪᠠᠷ ᠲᠠᠪᠢᠨ ᠳᠠᠭᠠᠭᠤᠯ ᠲᠠᠢ ᠡᠯᠴᠢ ᠵᠠᠷᠤᠭᠰᠠᠨ ᠨᠢ ᠴᠠᠭᠠᠳᠤ ᠲᠠᠯᠠ ᠪᠠᠰᠠ ᠲᠡᠳᠡᠨ ᠢ᠋ ᠨᠢ ᠦᠭᠡ ᠰᠣᠨᠣᠰᠤᠯ ᠦᠭᠡᠢ ᠪᠠᠷᠢᠵᠤ ᠠᠪᠤᠭᠠᠳ ᠬᠠᠲᠠᠭᠤ ᠴᠢᠩᠭᠠᠯᠠᠨ ᠬᠣᠷᠢᠵᠤ᠂ ᠵᠣᠳᠣᠵᠤ ᠨᠦᠳᠦᠨ ᠪᠠᠢᠭᠠ ᠶ᠋ᠢ ᠥᠪᠡᠷ ᠦ᠋ᠨ ᠲᠤᠷᠰᠢᠭᠤᠯ ᠤ᠋ᠨ ᠮᠡᠳᠡᠭᠡ ᠪᠡᠷ ᠮᠣᠩᠭᠣᠯ ᠵᠠᠬᠢᠷᠤᠭᠴᠢ ᠮᠡᠳᠡᠭᠰᠡᠨ ᠪᠠᠢᠯᠠ᠃ ᠦᠨᠡᠨ ᠳ᠋ᠦ᠍ ᠪᠡᠨ ᠳᠠᠭᠤ ᠦᠭᠡᠢ ᠬᠦᠯᠢᠶᠡᠨ ᠠᠪᠬᠤ ᠳ᠋ᠤ᠌ ᠴᠤ᠌ ᠪᠡᠷᠬᠡᠲᠡᠢ ᠱᠠᠭᠠᠷᠳᠠᠯᠭᠠ ᠶ᠋ᠢ ᠬᠤᠪᠢᠯᠠᠢ ᠲᠠᠯᠪᠢᠭᠰᠠᠨ ᠠᠵᠢ᠃ ᠲᠤᠬᠠᠢᠯᠠᠪᠠᠯ᠄ ᠰᠥᠩ ᠦ᠋ᠨ ᠬᠠᠭᠠᠨ ᠲᠠ ᠰᠣᠨᠣᠰᠴᠤ ᠪᠣᠯᠭᠣᠭᠠ᠃ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠲᠠᠲᠠᠵᠤ ᠠᠪᠤᠭᠠᠳ ᠪᠠᠭᠤᠨ ᠥᠭᠪᠡᠯ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠴᠢᠨᠦ ᠠᠮᠢ ᠨᠠᠰᠤ ᠶ᠋ᠢ ᠬᠠᠮᠠᠭᠠᠯᠠᠵᠤ ᠠᠪᠤᠨᠠ᠃ ᠲᠡᠭᠡᠭᠡᠳ ᠴᠠᠭᠠᠰᠢᠳᠠ ᠴᠢᠮᠠᠶ᠋ᠢ ᠪᠣᠯᠤᠨ ᠴᠢᠨᠦ ᠰᠢᠳᠠᠷ ᠬᠥᠮᠦᠰ᠂ ᠡᠮᠡᠰ ᠥᠬᠢᠳ ᠢ᠋ ᠬᠡᠷᠬᠢᠨ ᠪᠠᠢᠯᠭᠠᠬᠤ ᠲᠤᠬᠠᠢ ᠲᠠᠭᠠᠷᠠᠬᠤ ᠦᠭᠡᠢ ᠭᠡᠰᠡᠨ ᠣᠳᠬᠠᠲᠠᠢ ᠵᠦᠢᠯ ᠢ᠋ ᠬᠤᠪᠢᠯᠠᠢ ᠶ᠋ᠢᠨ ᠡᠯᠴᠢ ᠠᠪᠠᠴᠢᠨ ᠥᠭᠭᠦᠭᠰᠡᠨ ᠳ᠋ᠦ᠍ ᠬᠥᠬᠡ ᠮᠥᠷᠡᠨ ᠦ᠌ ᠴᠢᠨᠠᠳᠤ ᠳ᠋ᠠᠬᠢ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠲᠡᠷᠡ ᠡᠯᠴᠢᠳ ᠦ᠋ᠨ ᠭᠠᠷ ᠲᠤ ᠪᠠᠢᠭᠠ ᠪᠢᠴᠢᠭ ᠢ᠋ ᠲᠣᠭᠲᠠᠭᠠᠨ ᠣᠩᠰᠢᠯ ᠦᠭᠡᠢ ᠪᠡᠷ ᠰᠢᠭᠤᠳ ᠪᠠᠷᠢᠪᠴᠢᠯᠠᠨ ᠠᠪᠴᠤ ᠭᠠᠵᠠᠷ ᠳᠣᠣᠷᠠᠬᠢ ᠨᠦᠬᠡᠨ ᠳ᠋ᠦ᠍ ᠬᠣᠷᠢᠭᠰᠠᠨ ᠠᠵᠢ᠃
ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠰᠧᠴᠤᠸᠠᠨ ᠳ᠋ᠤ᠌ ᠪᠥᠭᠡᠮ ᠲᠣᠭᠣᠰᠣᠨ ᠳᠤᠮᠳᠠ ᠠ᠋ᠴᠠ ᠵᠠᠭᠤᠲᠤ᠂ ᠮᠢᠩᠭᠠᠲᠤ ᠪᠠᠷ ᠢ᠋ᠶ᠋ᠠᠨ ᠪᠠᠭᠴᠠᠯᠠᠭᠳᠠᠨ᠂ ᠬᠣᠲᠠ ᠰᠠᠭᠤᠷᠢᠨ ᠨᠤᠭᠤᠳ ᠤᠷᠤᠭᠤ ᠳᠠᠭᠠᠷᠢᠨ ᠣᠷᠣᠵᠤ ᠢᠷᠡᠨᠡ ᠭᠡᠳᠡᠭ ᠢ᠋ ᠤᠷᠢᠳ ᠠ᠋ᠴᠠ ᠪᠣᠳᠣᠨ᠂ ᠭᠠᠵᠠᠷ ᠪᠦᠷᠢ ᠳ᠋ᠦ᠍ ᠬᠣᠷᠢᠭᠯᠠᠨ ᠬᠠᠮᠠᠭᠠᠯᠠᠯᠲᠠ ᠬᠢᠵᠦ ᠡᠬᠢᠯᠡᠯᠡ᠃ ᠬᠤᠢ ᠰᠠᠯᠬᠢᠨ ᠰᠢᠭ᠋ ᠨᠥᠮᠥᠷᠦᠨ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠠ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠳᠠᠭᠠᠷᠢᠯᠲᠠ ᠶ᠋ᠢ ᠨᠢᠴᠤᠭᠠᠬᠤ ᠭᠡᠵᠦ ᠰᠥᠩ ᠦ᠋ᠨ ᠶᠠᠪᠠᠭᠠᠨ ᠴᠡᠷᠢᠭ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠷᠲᠤ ᠱᠤᠤᠳᠤᠤ ᠳ᠋ᠤ᠌ ᠣᠷᠣᠵᠤ ᠰᠠᠭᠤᠭᠠᠳ ᠬᠤᠯᠤᠰᠤᠨ ᠰᠤᠮᠤ ᠶ᠋ᠢ ᠮᠥᠨᠳᠥᠷ ᠠᠳᠠᠯᠢ ᠮᠣᠷᠢᠲᠠᠨ ᠨᠤᠭᠤᠳ ᠤ᠋ᠨ ᠥᠭᠡᠳᠡ ᠡᠴᠡ ᠠᠰᠬᠠᠷᠠᠭᠤᠯᠵᠤ ᠪᠠᠢᠯᠠ᠃ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠬᠥᠳᠡᠯᠭᠡᠭᠡᠨ ᠭᠣᠴᠣ ᠱᠠᠯᠠᠮᠠᠭ ᠪᠣᠯᠬᠣᠷ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠬᠤ ᠨᠢ ᠬᠣᠪᠣᠷ᠂ ᠮᠣᠷᠢᠨ ᠠ᠋ᠴᠠ ᠪᠠᠨ ᠣᠢᠴᠢᠭᠰᠠᠨ ᠴᠤ᠌ ᠪᠣᠰᠴᠤ ᠭᠦᠶᠦᠭᠡᠳ ᠥᠭᠡᠷᠡ ᠨᠢᠭᠡᠨ ᠦ᠌ ᠪᠡᠨ ᠤᠨᠤᠭᠰᠠᠨ ᠮᠣᠷᠢᠨ ᠳᠡᠭᠡᠷᠡ ᠦᠰᠦᠷᠦᠨ ᠭᠠᠷᠴᠤ ᠰᠤᠨᠳᠠᠯᠠᠭᠠᠳ ᠬᠣᠶᠠᠷ ᠲᠠᠢᠰᠢ ᠪᠠᠨ ᠬᠠᠷᠪᠤᠨ᠂ ᠲᠠᠬᠢᠷ ᠰᠡᠯᠡᠮᠡ ᠪᠡᠷ ᠢ᠋ᠶ᠋ᠡᠨ ᠴᠠᠪᠴᠢᠯᠳᠤᠬᠤ ᠨᠢ ᠪᠣᠰᠤᠭᠠ《ᠣᠷᠣᠯᠠᠩ》 ᠭᠡᠭᠴᠢ ᠮᠡᠲᠦ ᠠᠵᠢ᠃ ᠡᠢᠮᠦ ᠲᠤᠯᠤᠯᠳᠤᠭᠠᠨ ᠲᠡᠢᠨ ᠡᠬᠢᠯᠡᠭᠰᠡᠨ ᠠᠩᠬᠠᠨ ᠤ᠋ ᠡᠳᠦᠷ ᠡᠴᠡ ᠭᠠᠵᠠᠷ ᠪᠦᠷᠢ ᠳ᠋ᠦ᠍ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠲᠡᠭᠦᠨ ᠢ᠋ ᠨᠢᠭᠡ ᠶᠡᠬᠡ ᠦᠵᠡᠭᠰᠡᠨ ᠰᠢᠨᠵᠢ ᠦᠭᠡᠢ ᠪᠠᠢᠳᠠᠯᠲᠠᠢ ᠪᠠᠷ ᠳᠠᠪᠬᠢᠯᠳᠤᠨᠠ᠃
ᠣᠷᠴᠢᠭᠤᠯᠪᠠᠯ ᠰᠧᠴᠤᠸᠠᠨ ᠤ᠋ ᠵᠠᠬᠠ ᠶ᠋ᠢᠨ ᠤᠰᠤᠨ ᠵᠠᠩᠭᠢᠯᠠᠭᠠ ᠭᠡᠳᠡᠭ ᠨᠡᠷᠡ ᠲᠡᠢ ᠨᠢᠭᠡ ᠬᠣᠲᠠ ᠶ᠋ᠢ ᠪᠠᠶᠠᠨ ᠵᠠᠩᠵᠤᠨ ᠪᠠᠢᠯᠳᠤᠨ ᠠᠪᠬᠤ ᠪᠠᠷ ᠳᠣᠪᠲᠣᠯᠵᠤ ᠡᠬᠢᠯᠡᠪᠡ᠃ ᠲᠡᠷᠡ ᠬᠣᠲᠠ ᠳ᠋ᠤ᠌ ᠬᠣᠶᠠᠷ ᠲᠦᠮᠡᠨ ᠬᠥᠮᠦᠨ ᠣᠷᠣᠰᠢᠨ ᠰᠠᠭᠤᠳᠠᠭ᠂ ᠲᠠᠷᠢᠶᠠ ᠨᠣᠭᠣᠭᠠ ᠭᠤᠳᠤᠮᠵᠢ ᠪᠠᠷ ᠢ᠋ᠶ᠋ᠠᠨ ᠬᠦᠷᠲᠡᠯᠡ ᠲᠠᠷᠢᠭᠰᠠᠨ᠂ ᠤᠰᠤᠨ ᠰᠠᠩ ᠲᠠᠢ᠂ ᠠᠢᠯ ᠪᠦᠷᠢ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠨ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠤᠷᠭᠤᠭᠤᠯᠤᠭᠰᠠᠨ᠂ ᠦᠵᠡᠮᠵᠢᠲᠡᠢ ᠰᠡᠳᠬᠢᠯ ᠵᠠᠰᠠᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠶᠠᠲᠠᠢᠬᠠᠨ ᠪᠠᠢᠳᠠᠭ ᠠᠵᠢ᠃ ᠡᠨᠡ ᠬᠣᠲᠠ ᠶ᠋ᠢ ᠰᠥᠩ ᠦ᠋ᠨ ᠲᠦᠮᠡ ᠢᠯᠡᠭᠦᠦ ᠴᠡᠷᠢᠭ ᠬᠠᠮᠠᠭᠠᠯᠠᠵᠤ᠂ ᠬᠣᠲᠠ ᠶ᠋ᠢᠨ ᠵᠠᠬᠠ ᠪᠠᠷ ᠱᠤᠤᠳᠤᠤ ᠣᠬᠣᠨ ᠰᠠᠬᠢᠭᠰᠠᠨ ᠪᠠᠢᠪᠠ᠃ ᠲᠡᠭᠦᠨ ᠢ᠋ ᠨᠢ ᠪᠠᠶᠠᠨ ᠵᠠᠩᠵᠤᠨ ᠤᠷᠢᠳ ᠨᠢ ᠮᠡᠳᠡᠭᠰᠡᠨ ᠪᠠᠢᠯᠠ᠃ ᠪᠠᠰᠠ ᠬᠣᠲᠠ ᠶ᠋ᠢᠨ ᠲᠥᠪ ᠦ᠋ᠨ ᠬᠡᠰᠡᠭ ᠨᠢ ᠵᠤᠵᠠᠭᠠᠨ ᠰᠢᠪᠠᠷ ᠬᠡᠷᠡᠮ ᠲᠡᠢ᠂ ᠲᠡᠭᠦᠨ ᠢ᠋ ᠨᠢ ᠰᠠᠬᠢᠭᠰᠠᠨ ᠴᠡᠷᠢᠭ ᠴᠥᠭᠡᠨ ᠦᠭᠡᠢ ᠠᠵᠢ᠃ ᠮᠣᠩᠭᠣᠯ ᠴᠡᠷᠢᠭ ᠡᠬᠢᠨ ᠦ᠌ ᠪᠡᠨ ᠳᠠᠭᠠᠷᠢᠯᠲᠠ ᠶ᠋ᠢ ᠦᠦᠷ ᠰᠥᠨᠢ ᠪᠡᠷ ᠬᠢᠵᠦ ᠰᠣᠷᠢᠵᠤ ᠦᠵᠡᠯᠡ᠃ ᠰᠥᠩ ᠦ᠋ᠨ ᠴᠡᠷᠢᠭ ᠢ᠋ ᠬᠣᠷᠢᠭᠯᠠᠯᠲᠠ ᠶ᠋ᠢᠨ ᠪᠠᠢᠷᠢᠨ ᠠ᠋ᠴᠠ ᠨᠢ ᠭᠠᠷᠭᠠᠵᠤ ᠲᠠᠯᠠ ᠳ᠋ᠤ᠌ ᠨᠢ ᠠᠪᠠᠴᠢᠨ ᠳᠠᠢᠳᠤᠬᠤ ᠦᠭᠡᠢ ᠪᠣᠯ ᠬᠢᠯᠪᠠᠷ ᠠᠪᠲᠤᠮᠠ ᠦᠭᠡᠢ ᠶᠠᠩᠵᠤᠲᠠᠢ ᠪᠠᠢᠪᠠ᠃ ᠪᠠᠶᠠᠨ ᠵᠠᠩᠵᠤᠨ ᠬᠠᠵᠠᠭᠤ ᠲᠠᠯᠠ ᠶ᠋ᠢᠨ ᠬᠢᠨᠢ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠴᠠᠴᠠᠷ ᠪᠣᠰᠬᠠᠭᠤᠯᠤᠨ ᠬᠢᠨᠠᠬᠤ ᠪᠠᠢᠷᠢ ᠬᠢᠵᠦ ᠲᠡᠭᠦᠨ ᠳ᠋ᠦ᠍ ᠪᠡᠨ ᠣᠴᠢᠨ ᠬᠠᠷᠠᠭᠠᠳ ᠤᠰᠤᠨ ᠵᠠᠩᠭᠢᠯᠠᠭᠠ ᠶ᠋ᠢᠨ ᠬᠣᠲᠠ ᠶ᠋ᠢ ᠭᠤᠷᠪᠠᠨ ᠲᠠᠯᠠ ᠠ᠋ᠴᠠ ᠨᠢ ᠵᠡᠷᠭᠡ ᠳᠠᠭᠠᠷᠢᠵᠤ ᠰᠠᠨᠳᠤᠷᠭᠠᠨ᠂ ᠪᠠᠰᠠ ᠬᠠᠷᠪᠤᠭᠴᠢ ᠣᠨᠢᠰᠣ ᠪᠠᠷ ᠴᠢᠯᠠᠭᠤᠨ ᠮᠥᠨᠳᠥᠷ ᠪᠠᠭᠤᠯᠭᠠᠨ ᠬᠠᠷᠪᠤᠭᠤᠯᠵᠤ ᠲᠤᠷᠰᠢᠬᠤ ᠳ᠋ᠤ᠌ ᠲᠡᠳᠡ ᠣᠭᠲᠣᠬᠠᠨ ᠴᠦ᠍ ᠬᠥᠳᠡᠯᠬᠦ ᠶᠠᠩᠵᠤ ᠦᠭᠡᠢ ᠪᠠᠢᠯᠠ᠃ ᠢᠩᠭᠢᠵᠦ ᠭᠤᠷᠪᠠᠨ ᠡᠳᠦᠷ ᠪᠠᠢᠯᠳᠤᠭᠠᠳ ᠲᠡᠷᠡ ᠥᠴᠦᠬᠡᠨ ᠮᠡᠲᠦ ᠬᠣᠲᠠ ᠶ᠋ᠢ ᠠᠪᠴᠤ ᠴᠢᠳᠠᠬᠤ ᠶᠠᠩᠵᠤ ᠦᠭᠡᠢ ᠪᠣᠯᠬᠣᠷ《ᠪᠢᠳᠡ ᠲᠠ ᠨᠠᠷ ᠲᠠᠢ ᠨᠠᠢᠷᠠᠮᠳᠠᠯ ᠤ᠋ᠨ ᠬᠡᠯᠡᠯᠴᠡᠭᠡ ᠪᠠᠢᠭᠤᠯᠬᠤ ᠳ᠋ᠤ᠌ ᠪᠡᠯᠡᠨ》 ᠪᠠᠢᠨᠠ᠁ ᠭᠡᠰᠡᠨ ᠪᠢᠴᠢᠭ ᠶᠠᠪᠤᠭᠤᠯᠤᠭᠠᠳ᠂ ᠲᠡᠷᠡ ᠨᠢᠭᠡ ᠣᠷᠣᠢ ᠭᠡᠨᠡᠳᠲᠡ ᠪᠥᠭᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠣᠲᠠ ᠶ᠋ᠢ ᠬᠠᠶᠠᠵᠤ ᠣᠷᠬᠢᠨ ᠤᠬᠤᠷᠢᠨ ᠶᠠᠪᠤᠯᠠ᠃ ᠪᠠᠶᠠᠨ ᠤ᠋ ᠰᠠᠨᠠᠭᠠᠨ ᠳ᠋ᠤ᠌ ᠵᠠᠪ ᠵᠠᠩᠵᠤᠨ ᠤ᠋ ᠨᠢᠭᠡ ᠲᠣᠮᠣ ᠶᠠᠪᠤᠳᠠᠯ ᠣᠷᠣᠵᠤ᠂ ᠲᠡᠭᠦᠨ ᠦ᠌ ᠵᠠᠮ ᠢ᠋ᠶ᠋ᠠᠷ ᠪᠠᠢᠯᠳᠤᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠪᠠᠢᠨᠠ᠃ ᠵᠡᠪᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠳ᠋ᠦ᠍ ᠣᠷᠣᠬᠤ ᠵᠠᠮ ᠳ᠋ᠤ᠌ ᠪᠠᠨ ᠶᠡᠬᠡ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠴᠠᠪᠴᠢᠶᠠᠯ ᠪᠣᠭᠣᠮᠲᠠ ᠶ᠋ᠢ ᠠᠪᠬᠤ ᠭᠡᠵᠦ ᠬᠠᠭᠠᠰ ᠰᠠᠷᠠ ᠪᠠᠢᠯᠳᠤᠭᠠᠳ ᠬᠦᠴᠦ ᠬᠦᠷᠬᠦ ᠦᠭᠡᠢ ᠶᠠᠩᠵᠤᠲᠠᠢ ᠪᠣᠯᠬᠤ ᠪᠠᠷ ᠨᠢ ᠲᠡᠭᠦᠨ ᠢ᠋ ᠣᠷᠬᠢᠵᠤ ᠪᠠᠢᠭᠠ ᠰᠢᠨᠵᠢ ᠦᠵᠡᠭᠦᠯᠦᠨ ᠬᠠᠮᠤᠭ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠭᠠᠳ᠂ ᠵᠠᠮ ᠳ᠋ᠤ᠌ ᠪᠠᠨ ᠲᠡᠮᠡᠭᠡ ᠮᠠᠯ᠂ ᠲᠡᠷᠭᠡ ᠴᠢᠷᠭᠠ᠂ ᠮᠠᠢᠬᠠᠨ ᠰᠠᠪᠠ ᠬᠠᠶᠠᠨ ᠤᠬᠤᠷᠢᠨ ᠵᠢᠭᠤᠲᠠᠭᠠᠵᠠᠢ᠃ ᠢᠩᠭᠢᠭᠡᠳ ᠪᠦᠲᠦᠨ ᠬᠣᠶᠠᠷ ᠬᠣᠨᠣᠭ ᠵᠢᠭᠤᠲᠠᠭᠠᠪᠠ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠵᠤᠨ ᠡᠨᠡ ᠪᠠᠢᠳᠠᠯ ᠢ᠋ ᠨᠢ ᠦᠵᠡᠭᠡᠳ ᠮᠣᠩᠭᠣᠯ ᠴᠡᠷᠢᠭ ᠪᠢᠳᠡᠨ ᠢ᠋ ᠳᠡᠢᠯᠬᠦ ᠦᠭᠡᠢ ᠨᠢ ᠭᠡᠵᠦ ᠮᠡᠳᠡᠭᠡᠳ ᠡᠷᠭᠢᠨ ᠣᠳᠤᠯᠠ ᠭᠡᠮᠡᠨ ᠣᠢᠯᠠᠭᠠᠨ᠂ ᠬᠣᠢᠨᠠ ᠠ᠋ᠴᠠ ᠨᠢ ᠬᠥᠭᠡᠭᠡᠵᠦ ᠳᠠᠢᠳᠤᠭᠰᠠᠨ ᠳ᠋ᠤ᠌᠂ ᠨᠢᠭᠡᠨᠲᠡ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠬᠡᠷᠡᠮ ᠡᠴᠡ ᠪᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠤᠷᠤᠭᠤ ᠮᠣᠩᠭᠣᠯᠴᠤᠳ ᠡᠷᠭᠢᠨ ᠳᠠᠭᠠᠷᠢᠵᠤ᠂ ᠲᠠᠯᠠ ᠭᠠᠵᠠᠷ ᠳᠤ ᠲᠡᠳᠡᠨ ᠢ᠋ ᠪᠦᠬᠦᠯᠢ ᠳ᠋ᠦ᠍ ᠨᠢ ᠰᠢᠷᠣᠢ ᠲᠠᠢ ᠬᠤᠳᠬᠤᠨ ᠨᠢᠴᠠ ᠴᠣᠬᠢᠭᠰᠠᠨ ᠪᠠᠢᠨᠠ᠃
ᠡᠨᠡ ᠵᠢᠱ᠌ᠢᠶᠡ ᠪᠡᠷ ᠪᠠᠶᠠᠨ ᠵᠠᠩᠵᠤᠨ ᠤᠰᠤᠨ ᠵᠠᠩᠭᠢᠯᠠᠭᠠ ᠬᠣᠲᠠ ᠶ᠋ᠢ ᠣᠷᠬᠢᠨ ᠵᠠᠢᠯᠠᠭᠰᠠᠨ ᠳ᠋ᠤ᠌ ᠰᠥᠩ ᠦ᠋ᠨ ᠴᠡᠷᠢᠭ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠥᠭᠡᠭᠡᠵᠦ᠂ ᠬᠡᠷᠡᠮ ᠢ᠋ᠶ᠋ᠡᠨ ᠣᠷᠬᠢᠨ ᠲᠤᠯᠤᠯᠳᠤᠬᠤ ᠭᠡᠵᠦ ᠠᠷᠤ ᠠ᠋ᠴᠠ ᠪᠠᠨ ᠬᠥᠭᠡᠭᠡᠵᠦ ᠢᠷᠡᠬᠦ ᠪᠡᠷ ᠨᠢ ᠮᠣᠩᠭᠣᠯ ᠴᠡᠷᠢᠭ ᠭᠡᠨᠡᠳᠲᠡ ᠡᠷᠭᠢᠵᠦ ᠳᠠᠭᠠᠷᠢᠭᠠᠳ ᠳᠠᠢᠰᠤᠨ ᠢ᠋ ᠲᠠᠷᠢᠶᠠᠨ ᠲᠠᠯᠠᠪᠠᠢ ᠳ᠋ᠤ᠌ ᠨᠢᠴᠠ ᠪᠠᠯᠪᠠᠨ ᠭᠠᠳᠤᠴᠢᠵᠤ ᠣᠷᠬᠢᠵᠠᠢ᠃
ᠡᠢᠮᠦ ᠬᠡᠳᠦᠨ ᠲᠣᠮᠣ ᠲᠤᠯᠤᠯᠳᠤᠭᠠᠨ ᠢ᠋ᠶ᠋ᠠᠷ ᠮᠣᠩᠭᠣᠯ ᠴᠡᠷᠢᠭ ᠰᠧᠴᠤᠸᠠᠨ ᠢ᠋ ᠪᠠᠷᠤᠭ ᠪᠦᠬᠦᠯᠢ ᠳ᠋ᠦ᠍ ᠨᠢ ᠡᠷᠬᠡᠨ ᠳ᠋ᠦ᠍ ᠪᠡᠨ ᠣᠷᠣᠭᠤᠯᠤᠨ ᠠᠪᠤᠪᠠ᠃ ᠭᠠᠵᠠᠷ ᠪᠦᠷᠢ ᠲᠤᠯᠤᠯᠳᠤᠭᠠᠨ ᠦᠷᠭᠦᠯᠵᠢᠯᠡᠵᠦ ᠪᠠᠢᠯᠠ᠃
ᠶᠡᠷᠦᠩᠬᠡᠢᠯᠡᠨ ᠵᠠᠬᠢᠷᠤᠭᠴᠢ ᠳᠡᠳ᠋ ᠵᠠᠬᠢᠷᠤᠭᠴᠢ ᠤᠷᠢᠶᠠᠩᠬᠠᠢᠳᠠᠢ ᠶ᠋ᠢᠨ ᠬᠠᠮᠲᠤ ᠲᠤᠯᠤᠯᠳᠤᠭᠠᠨ ᠬᠢᠵᠦ ᠪᠣᠢ ᠭᠠᠵᠠᠷ ᠲᠤ ᠢᠷᠡᠵᠦ ᠲᠣᠷᠭᠠᠨ ᠴᠠᠴᠠᠷ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠨ᠂ ᠲᠤᠯᠤᠯᠳᠤᠭᠠᠨ ᠪᠣᠯᠵᠤ ᠪᠣᠢ ᠭᠠᠵᠠᠷ ᠤᠷᠤᠭᠤ ᠭᠤᠷᠪᠠᠨ ᠴᠢᠮᠥᠭᠡᠲᠡᠢ ᠭᠠᠤᠯᠢᠨ ᠳᠤᠷᠠᠨ ᠰᠤᠩᠭᠠᠨ ᠬᠠᠷᠠᠵᠤ᠂ ᠴᠢᠷᠠᠢ ᠨᠢ ᠶᠠᠩᠵᠤ ᠪᠦᠷᠢ ᠪᠡᠷ ᠬᠤᠪᠢᠷᠠᠨ ᠵᠠᠷᠢᠮ ᠳ᠋ᠤ᠌ ᠪᠠᠨ᠄
— ᠠ᠋ ᠴᠠᠪᠠᠰᠤ ᠭᠡᠵᠦ ᠬᠠᠯᠠᠭᠯᠠᠨ ᠪᠠᠢᠪᠠ᠃ ᠬᠤᠪᠢᠯᠠᠢ ᠵᠠᠩᠵᠤᠨ ᠨᠤᠭᠤᠳ ᠠ᠋ᠴᠠ ᠢᠷᠡᠭᠦᠯᠵᠦ ᠪᠠᠢᠭᠠ ᠠᠢᠯᠠᠳᠬᠠᠯ ᠤ᠋ᠳ ᠢ᠋ ᠰᠢᠳᠠᠷ ᠪᠠᠷᠠ ᠪᠣᠯᠤᠭᠴᠢ ᠪᠠᠷ ᠢ᠋ᠶ᠋ᠠᠨ ᠳᠠᠮᠵᠢᠭᠤᠯᠤᠨ ᠰᠣᠨᠣᠰᠤᠭᠠᠳ《ᠵᠠ ᠪᠣᠯᠵᠤ》᠂《ᠪᠦᠲᠦᠯ ᠦᠭᠡᠢ ᠠᠮᠢᠲᠠᠨ ᠪᠣᠢ᠂ ᠲᠡᠷᠡ ᠭᠠᠴᠠᠭᠠ ᠶ᠋ᠢ ᠭᠤᠷᠪᠠᠨ ᠬᠣᠨᠣᠭ ᠲᠤ ᠡᠰᠡ ᠠᠪᠴᠤ ᠴᠢᠳᠠᠪᠠᠯ ᠶᠠᠯᠠ ᠬᠡᠯᠡᠯᠴᠡᠨᠡ》᠂《ᠲᠡᠭᠡᠨᠡ ᠲᠡᠷᠡ᠃ ᠰᠥᠩ ᠦ᠋ᠨ ᠬᠢᠲᠠᠳ ᠤ᠋ᠳ ᠬᠤᠯᠤᠭᠠᠨᠠ ᠵᠤᠷᠠᠮᠠ ᠠᠳᠠᠯᠢ ᠭᠠᠵᠠᠷ ᠨᠦᠬᠡᠯᠡᠳᠡᠭ ᠢ᠋ ᠪᠢᠳᠡ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠪᠢᠰᠢ》 ᠭᠡᠬᠦᠴᠢᠯᠡᠨ ᠢ᠋ ᠬᠡᠯᠡᠨᠡ᠃
ᠶᠡᠷᠦ ᠨᠢ ᠬᠤᠪᠢᠯᠠᠢ ᠪᠤᠰᠤᠳ ᠲᠠᠢ ᠣᠯᠠᠨ ᠶᠠᠭᠤᠮᠠ ᠡᠰᠡ ᠶᠠᠷᠢᠬᠤ ᠪᠥᠭᠡᠳ ᠰᠤᠯᠠ ᠴᠠᠭ ᠭᠠᠷᠪᠠᠯ ᠰᠤᠳᠤᠷ ᠨᠣᠮ ᠱᠠᠭᠠᠢᠵᠤ᠂ ᠬᠢᠲᠠᠳ ᠪᠠᠭᠰᠢ ᠪᠠᠷ ᠢ᠋ᠶ᠋ᠠᠨ ᠵᠠᠷᠢᠮ ᠵᠦᠢᠯ ᠢ᠋ ᠬᠡᠯᠡᠭᠦᠯᠦᠨ ᠠᠪᠴᠤ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠰᠠᠭᠤᠨᠠ᠃ ᠲᠡᠷᠡ ᠪᠡᠷ ᠴᠠᠭ ᠦᠷᠭᠦᠯᠵᠢᠳᠡ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠶᠤᠮ ᠰᠢᠭ᠋ ᠪᠠᠢᠳᠠᠭ᠂ ᠠᠬᠠ ᠬᠠᠭᠠᠨ ᠢ᠋ ᠪᠡᠨ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠡᠴᠡ ᠬᠣᠢᠰᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠯᠢᠭᠡᠨ ᠳ᠋ᠦ᠍ ᠪᠡᠨ ᠵᠥᠷᠢᠭᠦᠯᠦᠨ ᠪᠠᠷᠢᠭᠠᠳ᠂ ᠪᠦᠷ ᠴᠦ᠍ ᠶᠡᠬᠡ ᠭᠠᠢᠬᠠᠭᠰᠠᠨ ᠴᠢᠷᠠᠢᠲᠠᠢ ᠰᠠᠭᠤᠬᠤ ᠪᠣᠯᠤᠭᠰᠠᠨ᠃
ᠵᠠᠬᠢᠷᠤᠭᠴᠢ ᠮᠠᠨᠢ ᠡᠢᠮᠦ ᠶᠡᠬᠡ ᠡᠮᠭᠡᠨᠢᠭᠡᠳ ᠪᠠᠢᠨᠠ ᠤᠤ ᠭᠡᠪᠡᠯ ᠪᠠᠰᠠ ᠴᠦ᠍ ᠲᠡᠢᠮᠦ ᠪᠢᠰᠢ ᠠᠵᠢ᠃
ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠳᠣᠪᠲᠣᠯᠭᠠᠨ ᠦᠷᠭᠦᠯᠵᠢᠯᠡᠭᠰᠡᠭᠡᠷ᠂ ᠠᠯᠠᠭᠰᠠᠨ᠂ ᠠᠯᠠᠭᠳᠠᠭᠰᠠᠨ ᠬᠥᠮᠦᠨ ᠦ᠌ ᠲᠣᠭᠠ ᠨᠡᠮᠡᠭᠳᠡᠭᠰᠡᠭᠡᠷ᠂ ᠶᠡᠷᠦᠩᠬᠡᠢ ᠳ᠋ᠦ᠍ ᠪᠡᠨ ᠤᠷᠤᠭᠰᠢ ᠳᠠᠪᠰᠢᠨ ᠠᠬᠢᠭᠰᠠᠭᠠᠷ ᠠᠵᠢ᠃
ᠪᠠᠶᠠᠨ ᠵᠠᠩᠵᠤᠨ ᠤ᠋ ᠭᠠᠵᠠᠷ ᠠ᠋ᠴᠠ ᠡᠯᠴᠢ ᠳᠣᠪᠲᠣᠯᠭᠠᠨ ᠢᠷᠡᠵᠦ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠪᠠᠷᠢᠭᠰᠠᠨ ᠪᠢᠴᠢᠭ ᠲᠦ᠍ ᠪᠡᠨ《ᠰᠡᠭᠦᠯᠴᠢ ᠶ᠋ᠢᠨ ᠲᠠᠪᠤ ᠬᠣᠨᠣᠭ ᠤ᠋ᠨ ᠰᠢᠷᠦᠭᠦᠨ ᠲᠤᠯᠤᠯᠳᠤᠭᠠᠨ ᠢ᠋ᠶ᠋ᠠᠷ ᠰᠧᠴᠤᠸᠠᠨ ᠢ᠋ ᠪᠦᠬᠦᠯᠢ ᠳ᠋ᠦ᠍ ᠨᠢ ᠰᠢᠬᠠᠮ ᠠᠪᠤᠯᠠ᠃ ᠰᠥᠩ ᠦ᠋ᠨ ᠴᠡᠷᠢᠭ ᠦ᠋ᠳ ᠡᠨᠡ ᠨᠤᠲᠤᠭ ᠢ᠋ ᠡᠷᠭᠢᠭᠦᠯᠦᠨ ᠠᠪᠬᠤ ᠭᠡᠵᠦ ᠬᠠᠮᠤᠭ ᠬᠦᠴᠦ ᠪᠡᠨ ᠰᠢᠪᠬᠠᠨ ᠲᠤᠯᠤᠯᠳᠤᠬᠤ ᠪᠠᠢᠨᠠ᠃ ᠪᠠᠢᠯᠳᠤᠭᠠᠨ ᠰᠢᠷᠦᠭᠦᠨ᠂ ᠰᠢᠷᠭᠠᠭᠤ ᠪᠣᠯᠵᠤ ᠪᠣᠢ᠁》 ᠭᠡᠵᠦ ᠥᠭᠦᠯᠡᠭᠰᠡᠨ ᠪᠠᠢᠪᠠ᠃
ᠬᠤᠪᠢᠯᠠᠢ ᠡᠭᠦᠨ ᠢ᠋ ᠦᠵᠡᠭᠡᠳ ᠰᠠᠶᠢ ᠰᠤᠯᠠᠬᠠᠨ ᠢᠨᠢᠶᠡᠵᠦ᠄
— ᠵᠠ ᠶᠠᠭᠠᠬᠢᠮᠤᠢ᠃ ᠰᠥᠩ ᠦ᠋ᠨ ᠬᠠᠭᠠᠨ ᠨᠢᠭᠡ ᠭᠣᠣᠯ ᠲᠦᠰᠢᠴᠡ ᠭᠠᠵᠠᠷ ᠢ᠋ᠶ᠋ᠠᠨ ᠪᠢᠳᠡᠨ ᠳ᠋ᠦ᠍《ᠪᠡᠯᠡᠭ》 ᠪᠣᠯᠭᠠᠭᠠ ᠤᠤ᠃ ᠣᠳᠣ ᠡᠮᠦᠨᠡ ᠵᠦᠭ ᠦ᠋ᠨ ᠣᠷᠣᠨ ᠤᠯᠤᠰ᠂ ᠳᠠᠯᠠᠢ ᠶ᠋ᠢᠨ ᠠᠷᠠᠯ ᠤ᠋ᠨ ᠤᠯᠤᠰ ᠤ᠋ᠳ ᠲᠤ ᠳᠠᠬᠢᠨ ᠡᠯᠴᠢ ᠵᠠᠷᠤᠵᠤ《 ᠰᠥᠩ ᠦ᠋ᠨ ᠴᠡᠷᠢᠭ ᠲᠦ᠍ ᠲᠤᠰᠠ ᠬᠦᠷᠭᠡᠬᠦ ᠠᠬᠤᠯᠠ ᠬᠣᠵᠢᠮ ᠤ᠋ᠨ ᠶᠠᠪᠤᠳᠠᠯ ᠬᠦᠨᠳᠦ ᠪᠣᠯᠤᠨᠠ》 ᠭᠡᠵᠦ ᠮᠡᠳᠡᠭᠳᠡᠬᠦ ᠬᠡᠷᠡᠭᠲᠡᠢ ᠪᠠᠢᠬᠤ ᠠ᠋ ᠭᠡᠮᠡᠨ ᠬᠡᠯᠡᠯᠡ᠃
ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠡᠷᠭᠢᠭᠦᠯᠦᠨ ᠬᠠᠶᠠᠵᠤ ᠪᠣᠢ ᠠᠳᠠᠯᠢ ᠲᠣᠭᠣᠰᠣ ᠬᠠᠳᠠᠭᠤᠯᠤᠨ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠳᠠᠪᠰᠢᠭᠰᠠᠭᠠᠷ ᠬᠥᠬᠡ ᠮᠥᠷᠡᠨ ᠦ᠌ ᠡᠬᠢᠨ ᠪᠣᠯᠤᠨ ᠳᠤᠮᠳᠠ ᠤᠷᠤᠰᠬᠠᠯ ᠢ᠋ᠶ᠋ᠠᠷ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠬᠦᠷᠴᠦ᠂ ᠰᠥᠩ ᠦ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠲᠡᠢ ᠤᠰᠤᠨ ᠳᠡᠭᠡᠷᠡ ᠪᠣᠯᠤᠨ ᠬᠠᠭᠤᠷᠠᠢ ᠭᠠᠵᠠᠷ ᠲᠤ ᠲᠤᠯᠤᠯᠳᠤᠭᠠᠨ ᠬᠢᠭᠰᠡᠭᠡᠷ ᠪᠠᠢᠯᠠ᠃
— — — —
① ᠮᠥᠩᠬᠡ ᠬᠠᠭᠠᠨ ᠣᠯᠠᠨ ᠨᠣᠶᠠᠨ᠂ ᠥᠷᠯᠥᠭ ᠦ᠋ᠨ ᠬᠤᠷᠠᠯᠲᠠᠢ ᠭᠡᠵᠦ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠢ᠋ ᠳᠠᠪᠲᠠᠬᠤ ᠰᠢᠢᠳᠪᠦᠷᠢ ᠶ᠋ᠢ 1256 ᠣᠨ ᠳ᠋ᠤ᠌ ᠭᠠᠷᠭᠠᠨ᠂ ᠥᠪᠡᠷ ᠢ᠋ᠶ᠋ᠡᠨ ᠭᠣᠣᠯ ᠬᠦᠴᠦ ᠪᠡᠨ ᠲᠡᠷᠢᠭᠦᠯᠡᠨ ᠳᠣᠪᠲᠣᠯᠤᠭᠰᠠᠨ᠃ ᠴᠢᠩᠭᠢᠬᠦ ᠳ᠋ᠦ᠍ ᠪᠡᠨ ᠨᠠᠢᠷᠠᠮᠳᠠᠯ ᠤ᠋ᠨ ᠭᠡᠷᠡ ᠪᠠᠢᠭᠤᠯᠬᠤ ᠪᠠᠷ ᠣᠴᠢᠭᠰᠠᠨ ᠮᠥᠩᠬᠡ ᠶ᠋ᠢᠨ ᠵᠠᠷᠤᠭᠰᠠᠨ ᠡᠯᠴᠢ ᠶ᠋ᠢ ᠰᠥᠩ ᠦ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠪᠠᠷᠢᠵᠤ ᠠᠪᠴᠤ ᠱᠣᠷᠣᠩ ᠳ᠋ᠤ᠌ ᠬᠣᠷᠢᠭᠰᠠᠨ ᠨᠢ ᠲᠡᠢᠨ ᠬᠢᠬᠦ ᠰᠢᠯᠲᠠᠭ ᠪᠣᠯᠵᠠᠢ ᠃ ᠲᠠᠢᠳᠠᠬᠤ ᠲᠥᠯᠥᠪᠯᠡᠭᠡ ᠶ᠋ᠢ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠪᠠᠲᠤᠯᠠᠭᠰᠠᠨ ᠪᠠᠢᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠷᠮᠠ᠂ ᠪᠠᠭᠠᠲᠤᠷ᠂ ᠴᠣᠯᠮᠣᠨᠲᠤᠶᠠᠭᠠ