ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠨᠢᠭᠡᠳᠦᠭᠡᠷ ᠪᠦᠯᠦᠭ –3>᠂ᠪᠦᠷᠭᠦᠳ ᠦᠨ ᠵᠤᠯᠵᠠᠭᠠ ᠡᠭᠦᠷ ᠢᠶᠡᠨ ᠣᠷᠬᠢᠯᠠ Бүргэд харьд үүрэлдэггүй – Ж᠂ Пүрэв <1-р бүлэг ~3>. бүргэдийн зулзага үүрээ орхилоо
12ᠨᠢᠭᠡᠳᠦᠭᠡᠷ ᠪᠦᠯᠦᠭ –ᠤᠮᠠᠷᠠ ᠶᠢ ᠵᠣᠷᠢᠭᠰᠠᠨ ᠭᠠᠯᠠᠭᠤᠨ ᠴᠤᠪᠤᠭᠠ
ᠭᠤᠷᠪᠠ᠂ᠪᠦᠷᠭᠦᠳ ᠦᠨ ᠵᠤᠯᠵᠠᠭᠠ ᠡᠭᠦᠷ ᠢᠶᠡᠨ ᠣᠷᠬᠢᠯᠠ
ᠬᠤᠪᠢᠯᠠᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠮᠦᠨᠡ ᠲᠣᠮᠣ ᠴᠠᠭᠠᠰᠤᠨ ᠳᠡᠭᠡᠷᠡ ᠵᠢᠷᠤᠭᠰᠠᠨ ᠵᠢᠷᠤᠭ ᠳᠡᠯᠭᠡᠭᠡᠲᠡᠢ᠂ ᠲᠡᠭᠦᠨ ᠢ᠋ ᠤᠷᠲᠤ ᠰᠠᠬᠠᠯᠲᠠᠢ᠂ ᠲᠣᠯᠣᠭᠠᠢ ᠶ᠋ᠢᠨ ᠦᠰᠦ ᠨᠢ ᠰᠢᠩᠭᠡᠷᠡᠭᠰᠡᠨ ᠱᠣᠳᠣᠩ ᠭᠡᠵᠢᠭᠡᠲᠡᠢ᠂ ᠲᠠᠪᠢ ᠡᠷᠭᠢᠮᠡ ᠨᠠᠰᠤᠨ ᠤ᠋ ᠬᠢᠲᠠᠳ ᠡᠷᠳᠡᠮᠲᠡᠨ ᠲᠠᠢᠯᠪᠤᠷᠢᠯᠠᠨ ᠲᠠᠨᠢᠯᠴᠠᠭᠤᠯᠵᠤ ᠪᠠᠢᠨᠠ᠃ ᠡᠨᠡ ᠬᠥᠮᠦᠨ ᠦ᠌ ᠨᠡᠷᠡ ᠯᠤᠤ ᠪᠢᠩ ᠵᠦᠩ᠃ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠣᠯᠠᠨ ᠢ᠋ ᠦᠵᠡᠵᠦ ᠥᠩᠭᠡᠷᠡᠭᠦᠯᠦᠭᠰᠡᠨ ᠬᠠᠰᠢᠷ ᠪᠠᠢᠳᠠᠯ᠂ ᠤᠬᠠᠭᠠᠯᠢᠭ ᠲᠠᠢᠪᠤᠩ ᠰᠢᠨᠵᠢ ᠲᠣᠳᠣᠷᠠᠨᠠ᠃
ᠯᠢᠤ ᠣᠪᠣᠭᠲᠤ ᠪᠣᠯ ᠬᠤᠪᠢᠯᠠᠢ ᠶ᠋ᠢᠨ ᠰᠢᠳᠠᠷ ᠵᠥᠪᠯᠡᠭᠴᠢ ᠪᠥᠭᠡᠳ ᠤᠷᠠᠨ ᠪᠠᠷᠢᠯᠭᠠᠴᠢᠨ᠂ ᠲᠥᠷᠥ ᠶ᠋ᠢᠨ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠰᠤᠳᠤᠯᠤᠭᠠᠴᠢ ᠣᠯᠠᠨ ᠲᠥᠷᠥᠯ ᠦ᠋ᠨ ᠮᠡᠷᠭᠡᠵᠢᠯ ᠡᠵᠡᠮᠰᠢᠭᠰᠡᠨ᠂ ᠰᠡᠷᠭᠦᠯᠡᠩ ᠡᠷᠡ᠃
ᠲᠡᠷᠡ ᠪᠡᠷ ᠵᠣᠣ ᠣᠪᠣᠭᠲᠤ ᠲᠠᠢ ᠮᠣᠩᠭᠣᠯ᠂ ᠬᠢᠲᠠᠳ ᠤ᠋ᠨ ᠬᠠᠷᠢᠯᠴᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠠᠳᠠᠯᠢ ᠲᠥᠰᠦᠭᠡᠲᠡᠢ ᠰᠠᠨᠠᠭᠠ ᠪᠦᠬᠦᠢ᠂ ᠠᠯᠢ ᠠᠯᠢ ᠨᠢ ᠬᠤᠪᠢᠯᠠᠢ ᠳ᠋ᠤ᠌ ᠦᠨᠡᠨᠴᠢ ᠪᠠᠢᠵᠤ ᠥᠪᠡᠷ ᠢ᠋ ᠪᠡᠨ ᠪᠣᠯᠤᠨ ᠣᠷᠣᠨ ᠭᠡᠷ ᠢ᠋ᠶ᠋ᠡᠨ ᠠᠪᠤᠷᠠᠨᠠ ᠭᠡᠵᠦ ᠪᠣᠳᠣᠳᠠᠭ ᠪᠢᠯᠡ᠃ ᠡᠨᠡ ᠡᠷᠳᠡᠮᠲᠡᠨ ᠵᠣᠣ ᠣᠪᠣᠭᠲᠤ ᠠ᠋ᠴᠠ ᠮᠣᠩᠭᠣᠯ ᠬᠡᠯᠡ ᠰᠤᠷᠤᠭᠠ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ ᠳᠤᠲᠠᠭᠤ᠂ ᠭᠠᠷ ᠤ᠋ᠨ ᠤᠷᠠ ᠶᠡᠬᠡᠲᠡᠢ ᠪᠡᠷ ᠢ᠋ᠶ᠋ᠡᠨ ᠳᠠᠪᠠᠭᠤᠲᠠᠢ ᠶ᠋ᠢ ᠥᠭᠦᠯᠡᠬᠦ ᠶᠠᠭᠤᠨ᠃
ᠯᠢᠦ ᠣᠪᠣᠭᠲᠤ ᠬᠥᠮᠦᠨ ᠥᠪᠡᠷ ᠦ᠋ᠨ ᠪᠣᠯᠪᠠᠰᠤᠷᠠᠭᠤᠯᠤᠨ ᠵᠢᠷᠤᠭᠰᠠᠨ ᠰᠢᠨᠡ ᠬᠣᠲᠠ ᠶ᠋ᠢᠨ ᠪᠠᠢᠳᠠᠯ ᠤ᠋ᠨ ᠲᠤᠬᠠᠢ ᠲᠠᠢᠯᠪᠤᠷᠢᠯᠠᠨ ᠦᠵᠡᠭᠦᠯᠦᠭᠰᠡᠭᠡᠷ᠃
— ᠭᠠᠵᠠᠷ ᠣᠷᠣᠨ ᠤ᠋ ᠪᠠᠢᠳᠠᠯᠲᠠᠢ ᠪᠠᠷᠢᠯᠭᠠ ᠪᠠᠢᠰᠢᠩ ᠤ᠋ᠳ ᠢ᠋ᠶ᠋ᠠᠨ ᠵᠣᠬᠢᠴᠠᠭᠤᠯᠤᠨ᠂ ᠰᠠᠯᠬᠢᠨ ᠤ᠋ ᠤᠷᠤᠰᠬᠠᠯ ᠳᠠᠭᠠᠭᠤᠯᠵᠤ ᠭᠤᠳᠤᠮᠵᠢ ᠨᠤᠭᠤᠳ ᠢ᠋ᠶ᠋ᠠᠨ ᠭᠠᠷᠭᠠᠪᠠᠯ ᠤᠲᠤᠭᠠ ᠤᠨᠢᠶᠠᠷ ᠲᠣᠭᠲᠠᠬᠤ ᠦᠭᠡᠢ ᠦᠯᠢᠶᠡᠭᠳᠡᠨᠡ ᠭᠡᠵᠦ ᠪᠣᠳᠣᠭᠰᠠᠨ᠃ ᠬᠣᠲᠠ ᠶ᠋ᠢᠨ ᠲᠥᠪ ᠦ᠋ᠨ ᠬᠣᠢᠨᠠ ᠬᠡᠰᠡᠭ ᠲᠦ᠍ ᠲᠠᠨ ᠤ᠋ ᠣᠷᠳᠣᠨ ᠪᠠᠢᠨᠠ᠃ ᠡᠨᠡ ᠪᠣᠯ ᠭᠠᠭᠴᠠ ᠲᠣᠮᠣ ᠪᠠᠢᠰᠢᠩ ᠪᠢᠰᠢ᠂ ᠲᠣᠭᠣᠷᠢᠨ ᠳ᠋ᠤ᠌ ᠨᠢ ᠠᠯᠪᠠ ᠬᠡᠷᠡᠭ ᠦ᠋ᠨ᠂ ᠵᠤᠭᠠᠴᠠᠭᠤᠯᠭᠠ ᠶ᠋ᠢᠨ᠂ ᠲᠦᠰᠢᠮᠡᠳ ᠦ᠋ᠨ᠂ ᠬᠠᠲᠤᠳ ᠤ᠋ᠨ᠂ ᠶᠠᠮᠪᠠ ᠶᠣᠰᠣᠯᠠᠯ ᠤ᠋ᠨ᠂ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠪᠠᠢᠰᠢᠩ ᠤ᠋ᠳ ᠪᠠᠢᠨᠠ᠃ ᠲᠡᠷᠡ ᠪᠠᠢᠰᠢᠩ ᠲᠤᠰ ᠪᠦᠷᠢ ᠥᠭᠡᠷᠡ ᠥᠭᠡᠷᠡ ᠬᠡᠯᠪᠡᠷᠢ ᠮᠠᠶᠢᠭᠲᠠᠢ᠂ ᠮᠣᠩᠭᠣᠯ ᠤ᠋ᠨ ᠭᠡᠷ ᠦ᠋ᠨ ᠬᠡᠯᠪᠡᠷᠢ᠂ ᠬᠢᠲᠠᠳ ᠤ᠋ᠨ ᠪᠠᠷᠢᠯᠭᠠ ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢ ᠬᠣᠣᠰᠯᠠᠭᠤᠯᠤᠨᠠ᠃ ᠲᠡᠭᠡᠪᠡᠯ ᠦᠵᠡᠮᠵᠢ ᠰᠠᠢᠨᠲᠠᠢ ᠪᠠᠢᠨᠠ ᠪᠢᠵᠡ᠃
— ᠵᠠᠪᠠᠯ ᠬᠢᠲᠠᠳ ᠪᠠᠷᠢᠯᠭᠠ ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢ ᠠᠪᠴᠤ ᠬᠣᠣᠰᠯᠠᠭᠤᠯᠬᠤ ᠤᠴᠢᠷ ᠶᠠᠭᠤ ᠪᠢᠯᠡ?
— ᠬᠢᠲᠠᠳ ᠪᠠᠷᠢᠯᠭᠠ ᠪᠣᠯ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠳ᠋ᠤ᠌ ᠵᠣᠬᠢᠴᠠᠨ᠂ ᠨᠠᠷᠠᠨ ᠤ᠋ ᠢᠯᠴᠢ᠂ ᠰᠠᠯᠬᠢᠨ ᠤ᠋ ᠬᠦᠴᠦ ᠶ᠋ᠢ ᠰᠠᠭᠠᠷᠠᠭᠤᠯᠬᠤ ᠲᠠᠯᠠ ᠪᠠᠷ ᠠᠰᠢᠭᠲᠠᠢ᠂ ᠪᠠᠰᠠ ᠦᠵᠡᠮᠵᠢ ᠰᠠᠢᠲᠠᠢ ᠪᠠᠢᠳᠠᠭ᠃ ᠲᠠᠨ ᠤ᠋ ᠨᠡᠷᠡ ᠰᠦᠷ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠮᠣᠩᠭᠣᠯ ᠪᠠᠢᠳᠠᠯ ᠢ᠋ ᠵᠠᠪᠠᠯ ᠰᠢᠩᠭᠡᠭᠡᠵᠦ ᠪᠠᠷᠢᠯᠭᠠ ᠪᠠᠢᠪᠠᠯ ᠢᠯᠡᠭᠦᠦ ᠭᠣᠶᠣ᠂ ᠪᠥᠬᠡ ᠪᠠᠲᠤ ᠪᠣᠯᠤᠨᠠ ᠪᠠᠢᠬᠤ ᠭᠡᠵᠦ ᠪᠣᠭᠣᠯ ᠪᠢ ᠪᠣᠳᠣᠵᠤ ᠪᠠᠢᠨᠠ᠁ ᠭᠡᠮᠡᠨ ᠲᠠᠢᠯᠪᠤᠷᠢᠯᠠᠭᠰᠠᠭᠠᠷ᠂ ᠶᠡᠬᠡ ᠵᠠᠬᠢᠷᠤᠭᠴᠢ ᠠᠰᠠᠭᠤᠵᠤ ᠬᠠᠷᠢᠭᠤ ᠰᠣᠨᠣᠰᠤᠭᠰᠠᠭᠠᠷ ᠤᠳᠠᠭᠠᠨ ᠰᠠᠭᠤᠵᠠᠢ᠃
ᠲᠡᠳᠡ ᠬᠠᠯᠠᠭᠤᠨ ᠴᠠᠢ ᠠᠪᠴᠢᠷᠠᠭᠤᠯᠵᠤ ᠤᠤᠭᠤᠭᠠᠳ᠂ ᠲᠣᠯᠣᠭᠠᠢ ᠠᠮᠠᠷᠠᠭᠠᠬᠤ ᠪᠠᠷ ᠭᠠᠳᠠᠭᠠᠯᠠᠬᠤ ᠪᠣᠯᠪᠠ᠃
ᠬᠤᠪᠢᠯᠠᠢ ᠭᠠᠳᠠᠭᠠ ᠶᠠᠪᠤᠬᠤ᠂ ᠬᠡᠭᠡᠷᠡ ᠶ᠋ᠢᠨ ᠮᠠᠢᠬᠠᠨ ᠳ᠋ᠤ᠌ ᠤᠨᠲᠠᠬᠤ᠂ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠮᠣᠷᠢ ᠪᠠᠷ ᠠᠩ ᠠᠪᠠ ᠳ᠋ᠤ᠌ ᠶᠠᠪᠤᠬᠤ᠂ ᠠᠭᠤᠯᠠ ᠬᠠᠳᠠ ᠪᠠᠷ ᠵᠤᠭᠠᠴᠠᠬᠤ ᠳᠠᠭᠠᠯᠠᠯᠲᠠᠢ᠃ ᠡᠢᠨ ᠬᠦ᠌ ᠮᠣᠩᠭᠣᠯ ᠠᠵᠤ ᠲᠥᠷᠥᠬᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠳᠤᠷᠠᠲᠠᠢ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠰᠢᠳᠠᠷᠯᠠᠨ ᠪᠣᠢ ᠵᠣᠣ ᠣᠪᠣᠭᠲᠤ᠂ ᠯᠢᠦ ᠣᠪᠣᠭᠲᠤ ᠨᠠᠷ ᠰᠠᠢᠨ ᠮᠡᠳᠡᠳᠡᠭ ᠪᠣᠯᠵᠠᠢ᠃
ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢ ᠯᠢᠦ ᠣᠪᠣᠭᠲᠤ ᠡᠷᠳᠡᠮᠲᠡᠨ ᠰᠢᠳᠠᠷᠯᠠᠨ ᠳᠠᠭᠠᠭᠰᠠᠭᠠᠷ ᠬᠣᠲᠠ ᠪᠠᠢᠭᠤᠯᠬᠤ ᠵᠢᠷᠤᠭ ᠲᠥᠰᠦᠯ ᠢ᠋ᠶ᠋ᠡᠨ ᠲᠠᠢᠯᠪᠤᠷᠢᠯᠠᠨ᠂ ᠵᠥᠪᠰᠢᠶᠡᠷᠡᠭᠦᠯᠬᠦ ᠰᠠᠨᠠᠭᠠᠲᠠᠢ ᠶᠠᠪᠤᠯᠠ᠃
ᠲᠡᠳᠡ ᠴᠠᠯᠭᠢᠶᠠ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳᠡᠭᠡᠷᠡ ᠠᠯᠬᠤᠵᠤ ᠢᠷᠡᠭᠡᠳ ᠤᠰᠤᠨ ᠤ᠋ ᠳᠥᠯᠭᠡᠬᠡᠨ ᠤᠷᠤᠰᠬᠠᠯ ᠬᠠᠷᠠᠨ᠂ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠶᠠᠭᠠᠬᠢᠵᠤ ᠲᠡᠨᠳᠡ ᠨᠠᠭᠠᠳᠤᠩᠬᠠᠨ ᠶᠠᠪᠤᠭᠠ ᠶ᠋ᠢ ᠣᠯᠵᠤ ᠬᠠᠷᠠᠬᠤ ᠭᠡᠵᠦ ᠡᠷᠢᠯᠬᠢᠯᠡᠨ ᠵᠣᠭᠰᠣᠪᠠ᠃
ᠯᠢᠦ ᠣᠪᠣᠭᠲᠤ ᠬᠤᠪᠢᠯᠠᠢ ᠶ᠋ᠢ ᠭᠦᠨ ᠬᠦᠨᠳᠦᠳᠬᠡᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠥᠭᠲᠥᠷ ᠨᠢᠷᠤᠭᠤ ᠪᠠᠨ ᠤᠯᠠᠮ ᠪᠥᠬᠥᠢᠯᠭᠡᠨ ᠵᠣᠭᠰᠣᠵᠤ᠄
— ᠪᠢ ᠡᠨᠡ ᠬᠣᠲᠠ ᠶ᠋ᠢᠨ ᠨᠣᠶᠠᠨ ᠣᠷᠭᠢᠯ ᠢ ᠶᠡᠬᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠣᠷᠳᠣᠨ ᠪᠣᠯᠭᠠᠬᠤ ᠰᠠᠨᠠᠭᠠᠲᠠᠢ᠃ ᠶᠠᠮᠠᠷ ᠴᠦ᠍ ᠬᠣᠲᠠ ᠳ᠋ᠤ᠌ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠢᠷᠡᠭᠡᠳ ᠬᠠᠷᠠᠬᠤ ᠳ᠋ᠤ᠌ ᠨᠢ ᠨᠢᠳᠦ ᠪᠤᠯᠢᠶᠠᠭᠰᠠᠨ ᠨᠢᠭᠡ ᠪᠠᠷᠢᠯᠭᠠ ᠰᠦᠨᠳᠡᠷᠯᠡᠵᠦ ᠬᠠᠷᠠᠭᠳᠠᠳᠠᠭ᠃ ᠮᠠᠨ ᠤ᠋ ᠰᠢᠨᠡ ᠬᠣᠲᠠ ᠶ᠋ᠢᠨ ᠲᠡᠢᠮᠦ ᠣᠷᠭᠢᠯ ᠨᠢ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠣᠷᠳᠣᠨ ᠪᠣᠯᠵᠤ ᠲᠠᠭᠠᠷᠠᠨᠠ᠃ ᠶᠡᠷᠦ ᠨᠢ ᠡᠨᠡ ᠪᠣᠯ ᠲᠠᠨ ᠤ᠋ ᠵᠠᠷᠯᠢᠭ ᠤ᠋ᠨ ᠬᠣᠲᠠ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠡᠨᠳᠡ ᠲᠠ ᠰᠠᠭᠤᠷᠢᠰᠢᠭᠠᠳ᠂ ᠬᠠᠮᠤᠭ ᠨᠣᠮ ᠰᠤᠳᠤᠷ᠂ ᠪᠤᠷᠬᠠᠨ ᠰᠢᠲᠦᠭᠡᠨ᠂ ᠡᠳ᠋ ᠠᠭᠤᠷᠠᠰᠤ᠂ ᠬᠠᠲᠤᠳ ᠳᠡᠭᠡᠳᠦᠰ ᠦ᠋ᠳ ᠢ᠋ᠶ᠋ᠡᠨ ᠰᠠᠢᠬᠠᠨ ᠪᠠᠢᠷᠢᠯᠠᠭᠤᠯᠵᠤ ᠠᠪᠤᠭᠰᠠᠨ ᠪᠠᠢᠪᠠᠯ ᠰᠡᠳᠬᠢᠯ ᠲᠠᠨᠢ ᠬᠡᠴᠢᠨᠡᠨ ᠥᠶᠥᠭ᠂ ᠲᠠᠭᠠᠲᠠᠢ ᠪᠠᠢᠬᠤ ᠰᠠᠨ ᠪᠢᠯᠡ ᠭᠡᠵᠦ ᠶᠠᠷᠢᠵᠤ ᠪᠠᠢᠲᠠᠯᠠ ᠨᠢ᠂ ᠵᠠᠢᠲᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠴᠡᠷᠢᠭ ᠦ᠋ᠨ ᠬᠠᠷᠠᠭᠤᠯ ᠳᠡᠭᠡᠷᠡ ᠬᠡᠳᠦᠨ ᠮᠣᠷᠢᠲᠠᠨ ᠳᠣᠪᠲᠣᠯᠭᠠᠵᠤ ᠢᠷᠡᠭᠡᠳ᠂ ᠬᠡᠰᠡᠭ ᠵᠠᠭᠤᠷᠠ ᠪᠠᠢᠴᠠᠭᠠᠭᠳᠠᠪᠠ ᠪᠣᠯᠤᠯᠲᠠᠢ ᠰᠠᠭᠠᠲᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠤᠷᠪᠠ ᠨᠢ ᠢᠯᠭᠠᠷᠠᠨ ᠭᠣᠣᠯ ᠠᠰᠠᠷ ᠤᠷᠤᠭᠤ ᠶᠠᠪᠤᠵᠤ᠂ ᠣᠢᠷᠲᠤᠨ ᠢᠷᠡᠬᠦ ᠳ᠋ᠦ᠍ ᠨᠢ ᠠᠵᠢᠭᠯᠠᠪᠠᠯ᠂ ᠰᠠᠪᠠᠭᠠ ᠮᠣᠳᠣᠨ ᠳ᠋ᠤ᠌ ᠬᠠᠷᠠ ᠢᠰᠢᠭᠡᠨ ᠦ᠌ ᠠᠷᠠᠰᠤ ᠤᠶᠠᠵᠤ᠂ ᠲᠡᠭᠦᠨ ᠢ᠋ ᠪᠡᠨ ᠬᠢᠭᠢᠷᠢ ᠠᠳᠠᠯᠢ ᠡᠷᠭᠦᠨ ᠪᠠᠢᠭᠰᠠᠨ ᠨᠢ ᠶᠠᠮᠠᠷ ᠨᠢᠭᠡ ᠲᠦᠭᠰᠢᠭᠦᠷᠢ᠂ ᠡᠮᠭᠡᠨᠢᠯ ᠵᠠᠷᠯᠠᠨ ᠶᠠᠪᠤᠭᠠ ᠨᠢ ᠢᠯᠡᠳᠲᠡ ᠪᠥᠯᠥᠭᠡ᠃
ᠬᠤᠪᠢᠯᠠᠢ ᠲᠡᠭᠦᠨ ᠢ᠋ ᠰᠡᠷᠳ᠋ ᠬᠢᠨ ᠬᠠᠷᠠᠵᠤ᠂ ᠳᠡᠷᠭᠡᠳᠡ ᠪᠡᠨ ᠪᠠᠢᠭᠠ ᠪᠠᠷᠠ ᠪᠣᠯᠤᠭᠴᠢ ᠨᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠭᠲᠦᠭᠤᠯᠪᠠ᠃
ᠡᠯᠴᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠠᠷᠠᠰᠤᠨ ᠬᠢᠭᠢᠷᠢ ᠪᠡᠨ ᠪᠠᠷᠢᠭᠰᠠᠭᠠᠷ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠣᠢᠷᠠᠲᠤᠨ ᠢᠷᠡᠵᠦ ᠰᠥᠬᠥᠷᠡᠵᠦ ᠡᠪᠦᠳᠦᠭ ᠨᠤᠭᠤᠯᠤᠨ ᠶᠣᠰᠣ ᠬᠢᠭᠡᠳ᠂ ᠳᠤᠭᠤᠯᠳᠠᠬᠤ ᠲᠡᠳᠦᠢ ᠨᠠᠮᠤᠭᠤᠨ ᠳᠠᠭᠤ ᠪᠠᠷ᠄
— ᠵᠠᠬᠢᠷᠤᠭᠴᠢ ᠲᠠᠨ ᠤ᠋ ᠠᠬᠠ᠂ ᠶᠡᠬᠡ ᠬᠠᠭᠠᠨᠲᠠᠨ ᠾᠸᠵᠸᠦ ᠶ᠋ᠢᠨ ᠳᠡᠷᠭᠡᠳᠡᠬᠢ ᠴᠡᠷᠢᠭ ᠦ᠋ᠨ ᠪᠠᠢᠷᠢᠨ ᠳ᠋ᠤ᠌ ᠬᠦᠨᠳᠦ ᠪᠡᠷ ᠡᠪᠡᠳᠴᠢᠯᠡᠵᠦ ᠪᠠᠢᠭᠠᠳ ᠭᠤᠷᠪᠠ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠲᠠᠭᠠᠯᠠᠯ ᠲᠡᠭᠦᠰᠦᠯᠡ① ᠭᠡᠵᠦ ᠠᠢᠯᠠᠳᠬᠠᠪᠠ᠃
ᠠᠵᠢᠪᠠᠰᠤ ᠤᠷᠢᠳ ᠲᠦᠮᠡᠳ ᠦ᠋ᠨ ᠳᠠᠷᠤᠭᠠ ᠪᠠᠢᠭᠠᠳ ᠰᠢᠳᠠᠷ ᠲᠤ ᠲᠠᠪᠰᠢᠨ ᠶᠡᠬᠡ ᠬᠠᠭᠠᠨ ᠳ᠋ᠤ᠌ ᠪᠠᠷᠠ ᠪᠣᠯᠵᠤ ᠪᠠᠢᠭᠰᠠᠨ ᠨᠣᠶᠠᠨ ᠪᠠᠷᠭᠠᠢ ᠶ᠋ᠢᠨ ᠬᠦᠯᠦᠭ ᠥᠷᠥᠭᠡᠰᠦᠨ ᠬᠠᠴᠠᠷ ᠳᠡᠭᠡᠷᠡᠬᠢ ᠬᠥᠨᠳᠡᠯᠡᠨ ᠰᠣᠷᠪᠢ ᠪᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠪᠢᠨ ᠵᠣᠭᠰᠣᠵᠤ ᠪᠠᠢᠪᠠ᠃
ᠬᠤᠪᠢᠯᠠᠢ ᠬᠡᠷᠳ᠋ ᠬᠢᠨ ᠴᠢᠬᠢᠨ ᠳ᠋ᠦ᠍ ᠪᠡᠨ ᠦᠯᠦ ᠢᠲᠡᠭᠡᠭᠰᠡᠨ ᠶᠦᠮ ᠰᠢᠭ ᠲᠡᠷᠡ ᠭᠤᠨᠢᠭᠲᠤ ᠮᠡᠳᠡᠭᠡ ᠶ᠋ᠢ ᠳᠠᠬᠢᠨ ᠰᠣᠨᠣᠰᠬᠤ ᠪᠠᠷ ᠲᠦᠰᠢᠮᠡᠳ ᠬᠦᠯᠦᠭ ᠲᠦ᠍ ᠣᠢᠷᠠᠲᠤᠨ᠄
— ᠶᠠᠭᠤ ᠭᠡᠯᠡ ᠭᠡᠨᠡ ᠪᠣᠢ ᠴᠢ? ᠨᠠᠭᠠᠳᠤ ᠮᠠᠭᠤ ᠢᠷᠣᠠ ᠶ᠋ᠢᠨ ᠶᠠᠭᠤᠮᠠ ᠪᠠᠨ ᠲᠡᠢᠰᠢ ᠨᠢ ᠬᠠᠶᠠ! ᠭᠡᠵᠦ ᠠᠷᠠᠰᠤᠨ ᠬᠢᠭᠢᠷᠢ ᠳ᠋ᠦ᠍ ᠡᠷᠡ ᠭᠠᠷᠭᠠᠭᠠᠳ ᠵᠠᠷᠤᠭᠤᠯ ᠤ᠋ᠨ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠬᠦᠯᠢᠶᠡᠨᠡ᠃
ᠲᠦᠰᠢᠮᠡᠯ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ ᠲᠣᠮᠣ ᠠᠯᠠᠭ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠭᠠᠵᠠᠷ ᠰᠢᠷᠳᠡᠨ ᠵᠣᠭᠰᠣᠭᠠᠳ᠄
— ᠲᠡᠢᠮᠦ ᠲᠣᠭᠠ ᠦᠭᠡᠢ ᠶᠠᠪᠤᠳᠠᠯ ᠪᠣᠯᠤᠯᠠ᠃ ᠶᠡᠬᠡ ᠬᠠᠭᠠᠨᠲᠠᠨ ᠡᠪᠡᠳᠴᠢᠯᠡᠭᠡᠳ ᠤᠳᠠᠭᠰᠠᠨ ᠦᠭᠡᠢ ᠲᠤᠩ ᠶᠡᠬᠡ ᠬᠠᠯᠠᠭᠤᠷᠠᠨ᠂ ᠲᠡᠭᠦᠨ ᠢ᠋ᠶ᠋ᠡᠨ ᠳᠠᠭᠠᠭᠠᠭᠰᠠᠨ ᠦᠭᠡᠢ ᠪᠣᠯᠤᠯᠲᠠᠢ᠂ ᠳᠡᠷᠭᠡᠳᠡ ᠶ᠋ᠢᠨ ᠣᠲᠠᠴᠢ ᠨᠠᠷ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠡᠮ ᠵᠣᠭᠣᠭᠯᠠᠭᠤᠯᠤᠭᠰᠠᠨ ᠪᠠᠢᠬᠠ ᠭᠡᠪᠡ᠃
— ᠶᠠᠮᠠᠷ ᠡᠪᠡᠳᠴᠢᠨ ᠠᠬᠠ ᠳ᠋ᠤ᠌ ᠲᠤᠰᠤᠭᠰᠠᠨ ᠬᠡᠷᠡᠭ ᠪᠢᠯᠡ?
— ᠴᠠᠭ ᠠᠭᠠᠷ ᠶᠡᠬᠡ ᠬᠠᠯᠠᠭᠤᠨ ᠪᠣᠯᠵᠤ ᠨᠡᠢᠲᠡ ᠴᠡᠷᠢᠭ ᠲᠦ᠍ ᠬᠠᠯᠳᠠᠪᠤᠷᠢᠲᠤ ᠲᠣᠮᠣᠭᠣ ᠭᠠᠷᠴᠤ ᠳᠡᠯᠭᠡᠷᠡᠭᠰᠡᠨ᠃ ᠬᠠᠭᠠᠨᠲᠠᠨ ᠪᠡᠶᠡ ᠪᠡᠨ ᠡᠰᠡ ᠪᠣᠳᠣᠨ᠂ ᠲᠡᠷᠡ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠬᠤᠳᠬᠤᠯᠳᠤᠨ ᠣᠷᠣᠵᠤ ᠶᠠᠪᠤᠭᠠᠳ ᠬᠠᠯᠳᠠᠪᠤᠷᠢ ᠵᠣᠭᠣᠭᠯᠠᠭᠰᠠᠨ ᠶᠤᠮ ᠪᠠᠢᠵᠠᠢ᠃ ᠤᠭ ᠨᠢ ᠴᠡᠷᠢᠭ ᠲᠡᠢᠨ ᠦ᠌ ᠬᠡᠷᠡᠭ ᠢ᠋ᠶ᠋ᠡᠨ ᠪᠡᠶᠡ ᠪᠡᠷ ᠬᠥᠲᠥᠯᠦᠭᠰᠡᠭᠡᠷ ᠰᠠᠷᠠᠭᠤᠯᠬᠠᠨ ᠮᠣᠷᠢᠯᠠᠵᠤ ᠶᠠᠪᠤᠭᠰᠠᠨ᠃ ᠲᠡᠭᠡᠭᠡᠳ ᠪᠦᠷᠭᠦᠳ ᠦ᠋ᠨ ᠵᠤᠯᠵᠠᠭᠠ ᠡᠭᠦᠷ ᠢ᠋ᠶ᠋ᠡᠨ ᠣᠷᠬᠢᠯᠠ᠃ ᠪᠣᠭᠣᠯ ᠨᠠᠮᠠᠶ᠋ᠢ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠲᠠᠨ ᠳ᠋ᠤ᠌ ᠡᠨᠡ ᠶᠠᠪᠤᠳᠠᠯ ᠢ᠋ ᠪᠣᠯᠭᠣᠭᠠᠯᠭᠠ ᠭᠡᠵᠦ ᠰᠢᠳᠠᠷ ᠵᠠᠩᠵᠤᠨ ᠨᠠᠭᠠᠰᠢ ᠨᠢ ᠵᠠᠷᠤᠭᠰᠠᠨ᠃
— ᠦᠨᠡᠨ ᠳ᠋ᠦ᠍ ᠪᠡᠨ ᠠᠬᠠ ᠮᠢᠨᠢ ᠪᠦᠷᠭᠦᠳ ᠯᠡ ᠪᠠᠢᠭᠰᠠᠨ᠃ ᠲᠡᠭᠡᠭᠡᠳ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠭᠠ ᠬᠡᠷᠡᠭ ᠪᠢᠯᠡ? ᠨᠠᠮᠠᠶ᠋ᠢ ᠢᠷᠡ ᠭᠡᠵᠦ ᠬᠡᠯᠡᠭᠡ ᠦᠭᠡᠢ ᠤᠤ? ᠭᠡᠮᠡᠨ ᠬᠤᠪᠢᠯᠠᠢ ᠬᠣᠭᠣᠯᠠᠢ ᠪᠠᠨ ᠰᠥᠭᠡᠩᠬᠢᠳᠦᠭᠦᠯᠦᠨ ᠴᠣᠴᠢᠷᠳᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠯᠠᠪᠯᠠᠪᠠ᠃
ᠰᠦᠷᠯᠢᠭ ᠲᠣᠮᠣ ᠪᠡᠶᠡᠲᠡᠢ ᠲᠦᠰᠢᠮᠡᠯ ᠵᠠᠬᠢᠷᠤᠭᠴᠢ ᠶ᠋ᠢ ᠡᠭᠴᠡᠯᠡᠨ ᠬᠠᠷᠠᠭᠰᠠᠭᠠᠷ᠄
— ᠬᠡᠷᠬᠢᠬᠦ ᠶ᠋ᠢ ᠪᠣᠭᠣᠯ ᠪᠢ ᠮᠡᠳᠡᠬᠦ ᠦᠭᠡᠢ᠂ ᠶᠠᠭᠠᠷᠠᠯᠲᠠᠢ ᠽᠠᠨᠳᠠᠨᠰᠢᠭᠤᠯᠤᠭᠠᠳ ᠨᠡᠢᠰᠯᠡᠯ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠵᠠᠯᠠᠵᠤ ᠠᠪᠠᠴᠢᠨᠠ ᠭᠡᠵᠦ ᠳᠡᠭᠡᠳᠦᠰ ᠦ᠋ᠳ ᠶᠠᠷᠢᠯᠴᠠᠵᠤ ᠪᠠᠢᠬᠤ ᠶ᠋ᠢ ᠪᠢ ᠰᠣᠨᠣᠰᠤᠭᠰᠠᠨ ᠭᠡᠯᠡ᠃
ᠬᠤᠪᠢᠯᠠᠢ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ᠂ ᠤᠰᠤᠨ ᠤ᠋ ᠤᠷᠤᠰᠬᠠᠯ ᠬᠠᠷᠠᠵᠤ ᠬᠡᠰᠡᠭ ᠵᠠᠭᠤᠷᠠ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠵᠠᠷᠤᠭᠤᠯ ᠤ᠋ᠨ ᠲᠦᠰᠢᠮᠡᠯ ᠢ᠋ ᠣᠷᠬᠢᠨ ᠠᠰᠠᠷ ᠤᠷᠤᠭᠤ ᠪᠠᠨ ᠠᠯᠬᠤᠵᠤ ᠣᠳᠤᠯᠠ᠃ ᠲᠡᠷᠡ ᠪᠡᠷ ᠣᠯᠪᠣᠭ ᠲᠤ ᠬᠥᠯ ᠵᠢᠭᠢᠨ ᠰᠢᠨᠡ ᠲᠤᠯᠤᠨ ᠰᠠᠭᠤᠭᠠᠳ ᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠪᠠ᠃ ᠲᠡᠭᠦᠨ ᠦ᠌ ᠨᠢᠳᠦᠨ ᠦ᠌ ᠡᠮᠦᠨᠡᠭᠦᠷ ᠠᠬᠠ ᠮᠥᠩᠬᠡ ᠶ᠋ᠢᠨ ᠰᠡᠷᠢᠭᠦᠨ ᠲᠤᠩᠭᠠᠯᠠᠭ ᠪᠠᠢᠬᠤ ᠳ᠋ᠤ᠌ ᠪᠠᠨ ᠬᠢᠵᠦ ᠪᠠᠢᠭᠰᠠᠨ ᠦᠢᠯᠡ ᠶᠠᠪᠤᠳᠠᠯ ᠤ᠋ᠳ ᠨᠢ ᠡᠷᠡᠮᠪᠡ ᠳᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ ᠴᠤᠪᠤᠷᠠᠨ ᠥᠩᠭᠡᠷᠡᠵᠦ ᠦᠵᠡᠭᠳᠡᠨ ᠡᠬᠢᠯᠡᠯᠡ᠃
— ᠲᠡᠢᠮᠦ ᠠ᠋᠃ ᠠᠬᠠ ᠲᠣᠭᠠ ᠪᠣᠳᠣᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠣᠯᠠᠨ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠠᠮᠵᠢᠭᠤᠯᠤᠨ ᠬᠢᠵᠦ ᠴᠢᠳᠠᠳᠠᠭ ᠰᠠᠨ᠃ ᠬᠥᠭᠡᠷᠦᠬᠦᠢ᠂ ᠬᠠᠲᠠᠭᠤ ᠵᠠᠷᠯᠢᠬᠲᠠᠢ᠂ ᠲᠤᠩ ᠰᠠᠮᠪᠠᠭᠠᠲᠠᠢ᠂ ᠠᠭᠱᠠᠨ ᠵᠠᠭᠤᠷᠠ ᠴᠦ᠍ ᠵᠦᠭᠡᠷ ᠰᠠᠭᠤᠵᠤ ᠴᠢᠳᠠᠳᠠᠭ ᠦᠭᠡᠢ᠂ ᠬᠠᠮᠤᠭ ᠠᠮᠢ ᠨᠠᠰᠤ ᠪᠠᠨ ᠲᠥᠷᠥ ᠳ᠋ᠦ᠍ ᠵᠣᠷᠢᠭᠤᠯᠤᠨ ᠪᠠᠢᠯᠠ᠃ ᠡᠪᠦᠭᠡᠨ ᠳᠡᠭᠡᠳᠦᠰ ᠪᠣᠭᠳᠠ ᠡᠵᠡᠨ ᠡᠴᠡ ᠬᠣᠢᠰᠢ ᠮᠠᠨ ᠤ᠋ ᠲᠥᠷᠥ ᠳ᠋ᠦ᠍ ᠡᠢᠮᠦ ᠯᠤᠲᠤ ᠴᠢᠭᠢᠷᠠᠭ᠂ ᠬᠠᠲᠠᠭᠤ ᠴᠡᠭᠴᠡᠲᠡᠢ ᠪᠠᠢᠳᠠᠯ ᠰᠠᠨᠠᠭᠠ ᠪᠦᠬᠦᠢ ᠬᠠᠭᠠᠨ ᠪᠠᠢᠭᠠ ᠦᠭᠡᠢ᠃《ᠤᠯᠤᠰ ᠢ᠋ ᠡᠨᠡ ᠬᠠᠭᠠᠨ ᠥᠭᠡᠳᠡ ᠨᠢ ᠲᠠᠲᠠᠯᠠ》 ᠭᠡᠵᠦ ᠡᠪᠦᠭᠡᠳ ᠨᠠᠰᠤᠲᠠᠨ ᠨᠤᠭᠤᠳ ᠬᠡᠯᠡᠵᠦ ᠪᠠᠢᠬᠤ ᠶ᠋ᠢ ᠪᠢ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠤᠭᠰᠠᠨ᠃ ᠲᠡᠷᠡ ᠪᠣᠯ ᠦᠨᠡᠨ ᠦᠭᠡ ᠪᠠᠢᠯᠠ᠃ ᠵᠠ ᠲᠡᠢᠮᠦ᠂ ᠲᠡᠢᠮᠦ ᠭᠡᠵᠦ ᠬᠤᠪᠢᠯᠠᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠭᠡᠯᠡᠭᠰᠡᠭᠡᠷ ᠪᠠᠢᠪᠠ᠃
— ᠲᠡᠭᠡᠭᠰᠡᠨ ᠳᠡ᠃ ᠠᠩᠬᠠᠨ ᠠᠬᠠ ᠶ᠋ᠢ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠬᠤ ᠬᠡᠷᠡᠭ ᠢ᠋ ᠠᠪᠠᠭᠠ ᠠᠬᠠ ᠶ᠋ᠢᠨ ᠮᠢᠨᠢ ᠬᠦᠦ ᠠᠬᠠ ᠯᠠ ᠰᠠᠨᠠᠭᠠ ᠰᠠᠳᠤᠨ ᠬᠢᠭᠰᠡᠨ᠃ ᠪᠢ ᠲᠡᠭᠦᠨ ᠢ᠋ ᠮᠠᠲᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠴᠠᠭᠠᠭᠴᠢᠨ ᠭᠠᠬᠠᠢ ᠵᠢᠯ ᠦ᠋ᠨ ᠬᠠᠪᠤᠷ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠪᠠᠲᠤ ᠠᠬᠠ ᠲᠡᠷᠲᠡᠭᠡ ᠪᠠᠷᠠᠭᠤᠨ ᠨᠤᠲᠤᠭ ᠠᠯᠠᠭ ᠲᠠᠭ ᠭᠡᠳᠡᠭ ᠭᠠᠵᠠᠷ ᠲᠤ ᠨᠣᠶᠠᠳ ᠤ᠋ᠨ ᠴᠤᠭᠯᠠᠷᠠᠯ ᠬᠢᠵᠦ ᠳᠥᠴᠢᠨ ᠬᠣᠶᠠᠷ ᠨᠠᠰᠤᠲᠠᠢ ᠮᠥᠩᠬᠡ ᠠᠬᠠ ᠶ᠋ᠢ ᠶᠡᠬᠡ ᠬᠠᠭᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠬᠦ ᠰᠠᠨᠠᠯ ᠢ᠋ᠶ᠋ᠠᠨ ᠣᠯᠠᠨ ᠢ᠋ᠶ᠋ᠠᠷ ᠵᠥᠪᠰᠢᠶᠡᠷᠡᠭᠦᠯᠦᠭᠰᠡᠨ᠃ ᠲᠡᠭᠡᠬᠦ ᠡᠴᠡ ᠴᠦ᠍ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠯᠠ᠃
ᠶᠡᠬᠡ ᠬᠠᠭᠠᠨ ᠬᠥᠶᠦᠭ ᠠᠬᠠ ᠦᠨᠡᠨ ᠳ᠋ᠦ᠍ ᠪᠡᠨ ᠲᠥᠷᠥ ᠪᠠᠷᠢᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠭᠠ ᠮᠥᠷᠲᠡᠭᠡᠨ ᠲᠦᠷ ᠲᠥᠷᠥ ᠪᠠᠷᠢᠵᠤ ᠪᠠᠢᠭᠰᠠᠨ ᠲᠠᠯᠢᠢᠭᠴᠢ ᠬᠠᠭᠠᠨ ᠤ᠋ ᠬᠠᠲᠤᠨ ᠣᠢᠷᠠᠳ ᠤ᠋ᠨ ᠬᠤᠳᠠᠭᠠ ᠪᠡᠬᠢ ᠶ᠋ᠢᠨ ᠥᠬᠢᠨ ᠤᠭᠤᠯ ᠬᠠᠢᠮᠢᠰᠢ ᠶ᠋ᠢᠨ ᠬᠠᠳᠬᠤᠯᠭᠠ ᠶᠠᠪᠤᠯᠭᠠ ᠪᠠᠷ᠂ ᠪᠢᠳᠡᠨ ᠦ᠌ ᠤᠳᠤᠮ ᠤᠭᠰᠠᠭᠠᠨ ᠤ᠋ ᠬᠢᠨ ᠲᠡᠢ ᠰᠦᠷᠭᠡᠯᠴᠡᠯᠳᠡᠬᠦ ᠪᠣᠳᠣᠯᠭᠠ ᠶᠠᠪᠤᠭᠤᠯᠤᠨ᠂ ᠤᠯᠤᠰ ᠭᠦᠷᠦᠨ ᠦ᠌ ᠪᠡᠨ ᠪᠠᠢᠳᠠᠯ ᠢ᠋ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠮᠠ ᠦᠭᠡᠢ ᠪᠡᠷ ᠰᠤᠯᠠᠷᠠᠭᠤᠯᠤᠭᠰᠠᠨ᠃ ᠶᠡᠬᠡᠰ ᠨᠣᠶᠠᠳ ᠳᠤᠷᠠ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠲᠣᠩᠭᠣᠴᠢᠭᠠᠳ᠂ ᠪᠦᠬᠦ ᠬᠡᠷᠡᠭ ᠵᠠᠳᠠᠷᠠᠨ᠂ ᠤᠯᠤᠰ ᠣᠷᠣᠨ ᠰᠦᠢᠷᠡᠯ ᠳ᠋ᠦ᠍ ᠣᠷᠣᠵᠤ ᠡᠬᠢᠯᠡᠭᠰᠡᠨ᠃ ᠲᠡᠷᠡ ᠨᠢ ᠨᠠᠳᠠᠳᠤ ᠬᠦᠷᠲᠡᠯᠡ ᠮᠡᠳᠡᠭᠳᠡᠵᠦ ᠪᠠᠢᠯᠠ᠃ ᠶᠡᠬᠡ ᠨᠣᠶᠠᠳ ᠤ᠋ᠨ ᠴᠤᠭᠯᠠᠭᠠᠨ ᠳᠡᠭᠡᠷᠡ ᠪᠠᠲᠤ ᠠᠬᠠ ᠲᠡᠷᠡ ᠪᠦᠬᠦ ᠪᠠᠢᠳᠠᠯ ᠢ᠋ ᠬᠡᠯᠡᠭᠡᠳ《ᠡᠵᠡᠨ ᠪᠣᠭᠳᠠ ᠶ᠋ᠢᠨ ᠠᠴᠢ ᠦᠷᠡᠰ ᠦ᠋ᠨ ᠳᠣᠲᠣᠷᠠ ᠤᠯᠤᠰ ᠭᠦᠷᠦᠨ ᠢ᠋ ᠠᠪᠤᠷᠠᠵᠤ ᠴᠢᠳᠠᠬᠤ ᠬᠡᠨ ᠪᠠᠢᠨᠠ ᠪᠣᠢ?》 ᠭᠡᠵᠦ ᠠᠰᠠᠭᠤᠯᠲᠠ ᠲᠠᠯᠪᠢᠵᠤ ᠪᠠᠢᠭᠠᠳ᠂ ᠮᠥᠩᠬᠡ ᠠᠬᠠ ᠶ᠋ᠢ ᠣᠷᠣ ᠰᠠᠭᠤᠯᠭᠠᠨᠠ᠂ ᠥᠭᠡᠳᠡᠢ ᠬᠠᠭᠠᠨ ᠴᠦ᠍ ᠮᠥᠩᠬᠡ ᠶ᠋ᠢ ᠣᠷᠣ ᠰᠠᠭᠤᠯᠭᠠᠨᠠ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ ᠭᠡᠰᠡᠨ ᠪᠠᠢᠳᠠᠭ᠃ ᠥᠭᠡᠳᠡᠢ ᠪᠠᠰᠠ ᠣᠮᠪᠣᠯᠣ ᠬᠦᠦ ᠰᠢᠷᠡᠮᠦᠨ ᠦ᠌ ᠨᠡᠷᠡ ᠶ᠋ᠢ ᠴᠦ᠍ ᠭᠠᠷᠭᠠᠨ ᠲᠡᠭᠡᠬᠦ ᠳ᠋ᠦ᠍ ᠭᠤᠷᠪᠠᠨ ᠨᠣᠶᠠᠨ ᠳᠡᠮᠵᠢᠬᠦ ᠰᠠᠨᠠᠯ ᠭᠠᠷᠭᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠤᠭ ᠰᠠᠨᠠᠭᠠ ᠪᠠᠨ ᠵᠥᠪᠲᠡᠭᠡᠬᠦ ᠨᠤᠲᠠᠯᠠᠭᠠ ᠭᠠᠷᠭᠠᠵᠤ ᠴᠢᠳᠠᠭᠠ ᠦᠭᠡᠢ᠃ ᠮᠥᠩᠬᠡ ᠠᠬᠠ ᠠᠷᠭᠠ ᠦᠭᠡᠢ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠷᠡᠭᠡ ᠶ᠋ᠢ ᠲᠦᠰᠢᠵᠦ ᠠᠪᠤᠭᠰᠠᠨ᠃ ᠠᠬᠠ ᠮᠢᠨᠢ ᠴᠡᠷᠢᠭ ᠲᠡᠢᠨ ᠦ᠌ ᠴᠢᠳᠠᠪᠤᠷᠢᠲᠠᠢ᠂ ᠡᠷᠳᠡᠮ ᠨᠣᠮ ᠳ᠋ᠤ᠌ ᠭᠠᠷᠭᠠᠭᠤᠳ᠂ ᠣᠳᠣ ᠭᠠᠷᠠᠭ᠂ ᠲᠣᠭᠠᠨ ᠤ᠋ ᠤᠬᠠᠭᠠᠨ ᠳ᠋ᠤ᠌ ᠴᠡᠴᠡᠨ᠂ ᠦᠭᠡ ᠬᠡᠯᠡ ᠰᠢᠯᠤᠭᠤᠨ ᠴᠢᠬᠡ᠂ ᠵᠠᠩ ᠠᠭᠠᠰᠢ ᠨᠢ ᠰᠢᠳᠤᠷᠭᠤ᠂ ᠶᠡᠷᠦ ᠨᠢ ᠦᠭᠡᠯᠡᠭᠡᠳ ᠪᠠᠢᠬᠤ ᠦ ᠪᠠᠭᠠᠲᠠᠢ ᠪᠠᠢᠯᠠ᠃ ᠪᠠᠲᠤ ᠠᠬᠠ ᠮᠥᠩᠬᠡ ᠠᠬᠠ ᠶ᠋ᠢᠨ ᠡᠨᠡ ᠪᠠᠢᠳᠠᠯ ᠢ᠋ ᠲᠣᠭᠠᠴᠢᠵᠤ ᠬᠡᠯᠡᠭᠡᠳ《ᠤᠯᠤᠰ ᠭᠦᠷᠦᠨ ᠢ᠋ ᠲᠡᠷᠢᠭᠦᠯᠡᠵᠦ ᠴᠢᠳᠠᠬᠤ ᠮᠥᠩᠬᠡ ᠡᠴᠡ ᠥᠭᠡᠷᠡ ᠰᠠᠢᠨ ᠨᠣᠶᠠᠨ ᠪᠢᠳᠡᠨ ᠦ᠌ ᠳᠣᠲᠣᠷᠠ ᠪᠠᠢᠨᠠ ᠤᠤ? ᠲᠠ ᠨᠠᠷ ᠲᠡᠷᠡ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠭᠠᠷᠭᠠᠭᠠᠳ ᠢᠷᠡ!》 ᠭᠡᠵᠦ ᠰᠢᠭᠤᠳᠬᠠᠨ ᠱᠠᠭᠠᠷᠳᠠᠵᠤ ᠪᠠᠢᠭᠰᠠᠨ ᠭᠡᠨᠡ ᠪᠢᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠭᠦᠶᠦᠭ ᠬᠠᠭᠠᠨ ᠤ᠋ ᠬᠦᠦ ᠶ᠋ᠢ ᠤᠳᠤᠮ ᠤᠭᠰᠠᠭᠠ ᠪᠠᠨ ᠪᠣᠳᠣᠨ ᠣᠷᠣ ᠰᠠᠭᠤᠯᠭᠠᠬᠤ ᠶᠣᠰᠣᠲᠠᠢ ᠭᠡᠰᠡᠨ ᠰᠠᠨᠠᠯ ᠭᠠᠷᠴᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠤᠯᠤᠰ ᠭᠦᠷᠦᠨ ᠢ᠋ ᠲᠡᠷᠢᠭᠦᠯᠡᠬᠦ ᠴᠢᠳᠠᠪᠤᠷᠢ ᠭᠡᠬᠦ ᠪᠡᠷ ᠬᠡᠯᠡᠬᠦ ᠦᠭᠡ ᠦᠭᠡᠢ ᠪᠣᠯᠵᠤ᠂ ᠠᠷᠭᠠ ᠦᠭᠡᠢ ᠠᠬᠠ ᠳᠡᠭᠡᠷᠡ ᠲᠤᠰᠤᠭᠰᠠᠨ᠂ ᠮᠢᠨᠦ ᠠᠪᠠᠭᠠ ᠠᠬᠠ ᠥᠭᠡᠳᠡᠢ ᠶ᠋ᠢᠨ ᠦᠷᠡ ᠤᠳᠤᠮ ᠠ᠋ᠴᠠ ᠲᠡᠷᠡ ᠡᠭᠡᠵᠢᠭᠲᠡᠢ ᠦᠶᠡ ᠳ᠋ᠦ᠍ ᠬᠠᠭᠠᠨ ᠤ᠋ ᠤᠭᠰᠠᠭᠠ ᠵᠠᠯᠭᠠᠬᠤ ᠬᠡᠨ ᠪᠠᠢᠨᠠ ᠪᠣᠢ ᠭᠡᠵᠦ ᠳᠠᠬᠢᠨ ᠬᠡᠯᠡᠯᠴᠡᠵᠦ᠂ ᠠᠮᠠᠷ ᠦᠭᠡᠢ ᠶᠡᠬᠡ ᠵᠥᠷᠢᠴᠡᠯ ᠭᠠᠷᠴᠤ ᠪᠠᠢᠭᠰᠠᠨ᠃ ᠶᠡᠷᠦ ᠨᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠭᠠᠵᠠᠷ᠂ ᠪᠦᠷ ᠨᠣᠶᠠᠳ ᠤ᠋ᠨ ᠥᠷᠥᠭᠡᠨ ᠳ᠋ᠦ᠍ ᠬᠦᠷᠲᠡᠯᠡ ᠡᠨᠡ ᠬᠡᠷᠡᠭ ᠬᠡᠯᠡᠯᠴᠡᠭᠳᠡᠨ᠂ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠶᠠᠪᠤᠳᠠᠯ ᠪᠣᠯᠤᠭᠰᠠᠨ ᠳᠠ᠃ ᠲᠡᠭᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ᠃ ᠥᠭᠡᠳᠡᠢ ᠠᠬᠠ ᠶ᠋ᠢᠨ ᠪᠠᠭᠠ ᠬᠦᠦ ᠶ᠋ᠢ ᠴᠦ᠍ ᠣᠷᠣ ᠰᠠᠭᠤᠯᠭᠠᠨᠠ ᠭᠡᠰᠡᠨ ᠶᠠᠷᠢᠶᠠ ᠳᠡᠯᠭᠡᠷᠡᠵᠦ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠪᠠᠲᠤ ᠶ᠋ᠢᠨ ᠵᠣᠷᠢᠮᠠᠭ ᠰᠢᠢᠳᠪᠦᠷᠢ ᠶᠣᠰᠣᠭᠠᠷ ᠲᠡᠷᠡ ᠵᠢᠯ ᠦ᠋ᠨ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠪᠠᠲᠤ ᠠᠬᠠ ᠶ᠋ᠢᠨ ᠵᠠᠷᠤᠭᠠᠯ ᠢ᠋ᠶ᠋ᠠᠷ ᠪᠡᠷᠬᠡ ᠨᠣᠶᠠᠨ ᠢᠷᠡᠵᠦ ᠲᠡᠭᠦᠨ ᠦ᠌ ᠰᠠᠨᠠᠯ ᠢ᠋ᠶ᠋ᠠᠷ ᠶᠡᠬᠡ ᠬᠤᠷᠠᠯᠳᠠᠢ ᠪᠣᠯᠤᠭᠠᠳ ᠬᠦᠴᠦᠷᠬᠡᠭ ᠴᠡᠷᠢᠭ ᠲᠦ᠍ ᠲᠦᠰᠢᠭᠯᠡᠨ ᠮᠥᠩᠬᠡ ᠠᠬᠠ ᠶ᠋ᠢ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠭᠰᠠᠨ᠃ ᠲᠤᠩ ᠴᠦ᠍ ᠡᠭᠡᠵᠢᠭᠲᠡᠢ᠂ ᠶᠠᠭᠤᠮᠠ ᠶᠠᠭᠤᠮᠠ ᠰᠢᠷᠦᠭᠦᠨ ᠪᠠᠢᠭᠰᠠᠨ᠃ ᠠᠬᠠ ᠴᠦ᠍ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠮᠠᠭᠴᠠ ᠭᠠᠵᠠᠷ ᠡᠪᠳᠡᠬᠦ᠂ ᠤᠰᠤ ᠪᠤᠵᠠᠷᠳᠠᠭᠤᠯᠬᠤ ᠶ᠋ᠢ ᠴᠡᠭᠡᠷᠯᠡᠨ ᠠᠩ ᠠᠪᠠ ᠳ᠋ᠤ᠌ ᠭᠠᠷᠴᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠵᠠᠷᠯᠠᠭᠰᠠᠨ᠃ ᠬᠠᠷᠢ ᠭᠦᠷᠦᠨ ᠡᠴᠡ ᠬᠡᠳᠦᠨ ᠮᠢᠩᠭᠠᠨ ᠨᠣᠶᠠᠨ ᠢᠷᠡᠵᠦ ᠣᠷᠣᠯᠴᠠᠨ᠂ ᠭᠠᠢᠬᠠᠵᠤ ᠬᠠᠨᠤᠰᠢ ᠦᠭᠡᠢ ᠬᠥᠯ ᠪᠣᠯᠵᠤ ᠪᠢᠯᠡ᠃
ᠠᠬᠠ ᠮᠠᠨᠢ ᠬᠠᠭᠠᠨ ᠪᠣᠯᠣᠮᠠᠭᠴᠠ ᠪᠠᠨ ᠯᠠ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠡᠮᠬᠢᠯᠡᠨ ᠴᠡᠭᠴᠡᠯᠡᠵᠦ ᠥᠭᠡᠳᠡ ᠨᠢ ᠲᠠᠲᠠᠬᠤ ᠬᠡᠷᠡᠭ ᠢ᠋ ᠰᠢᠭᠤᠳ ᠭᠠᠷᠳᠠᠨ ᠶᠠᠪᠤᠭᠤᠯᠵᠤ᠂ ᠵᠠᠷᠯᠢᠭ ᠤ᠋ᠳ ᠭᠠᠷᠭᠠᠭᠠᠳ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠤᠷᠠᠯᠲᠠᠢ ᠨᠤᠭᠤᠳ ᠬᠢᠯᠭᠡᠨ᠂ ᠥᠪᠡᠷ ᠦ᠋ᠨ ᠰᠢᠢᠳ ᠢ᠋ ᠭᠦᠢᠴᠡᠯᠳᠦᠭᠦᠯᠬᠦ ᠬᠡᠷᠡᠭ ᠢ᠋ ᠳᠡᠭᠳᠡᠭᠡᠭᠰᠡᠨ᠃ ᠠᠩᠬᠠᠨ ᠳ᠋ᠤ᠌ ᠪᠠᠨ ᠵᠠᠷᠢᠮ ᠨᠣᠶᠠᠨ ᠬᠠᠭᠠᠨ ᠠᠬᠠ ᠶ᠋ᠢᠨ ᠵᠠᠷᠯᠢᠭ ᠢ᠋ ᠦᠯᠦ ᠲᠣᠭᠣᠬᠤ ᠴᠢᠷᠠᠢ ᠭᠠᠷᠭᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠰᠡᠭᠦᠯ ᠳ᠋ᠦ᠍ ᠪᠡᠨ ᠬᠦᠴᠦᠨ ᠳ᠋ᠦ᠍ ᠳᠠᠷᠤᠭᠳᠠᠨ ᠱᠠᠯᠴᠢᠭᠠᠳ ᠥᠭᠭᠦᠭᠰᠡᠨ ᠳᠡ᠃ ᠲᠡᠭᠡᠭᠡᠳ ᠠᠬᠠ ᠶᠠᠭᠤ ᠬᠢᠯᠡ? ᠭᠡᠮᠡᠨ ᠬᠤᠪᠢᠯᠠᠢ ᠪᠣᠳᠣᠭᠰᠠᠭᠠᠷ᠂ ᠥᠪᠡᠷ ᠲᠦ᠍ ᠪᠡᠨ ᠶᠠᠷᠢᠭᠰᠠᠭᠠᠷ᠂ ᠭᠦᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠰᠠᠭᠤᠪᠠ᠃
ᠲᠡᠭᠦᠨ ᠦ᠌ ᠠᠰᠠᠷ ᠲᠤ ᠵᠣᠣ ᠣᠪᠣᠭᠲᠤ᠂ ᠯᠢᠦ ᠣᠪᠣᠭᠲᠤ ᠨᠠᠷ ᠪᠠᠢᠲᠤᠭᠠᠢ ᠯᠣᠯᠣᠢ ᠠᠪᠠᠭᠠᠢ ᠴᠦ᠍ ᠰᠢᠭᠤᠳ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ᠂ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠡᠮᠭᠡᠨᠢᠨ ᠭᠠᠰᠢᠭᠤᠳᠠᠵᠤ᠂ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠬᠦᠨᠳᠦ ᠪᠠᠢᠳᠠᠯ ᠳ᠋ᠤ᠌ ᠪᠠᠢᠭᠠ ᠭᠡᠮᠡᠨ ᠪᠣᠳᠣᠨ᠂ ᠳᠥᠯᠥᠭᠰᠡᠭᠡᠷ ᠪᠠᠢᠪᠠ᠃
— ᠲᠡᠢᠮᠦ ᠠ᠋᠃ ᠮᠥᠩᠬᠡ ᠠᠬᠠ ᠰᠡᠮᠡᠨ ᠦ᠌ ᠪᠥᠬᠡ ᠶ᠋ᠢ ᠬᠦᠨᠳᠦᠯᠡᠨ᠂ ᠲᠡᠭᠦᠨ ᠦ᠌ ᠰᠢᠪᠰᠢᠯᠭᠡ᠂ ᠠᠢᠯᠠᠳᠪᠤᠷᠢ ᠶ᠋ᠢ ᠳᠠᠭᠠᠳᠠᠭ᠃ ᠠᠩ ᠳ᠋ᠤ᠌ ᠳᠤᠷᠠᠲᠠᠢ᠂ ᠬᠠᠶᠠ ᠠᠪᠠ ᠬᠣᠮᠣᠷᠭᠠ ᠶᠠᠪᠤᠭᠤᠯᠳᠠᠭ ᠵᠢᠩᠬᠢᠨᠢ ᠮᠣᠩᠭᠣᠯ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠪᠡᠷ ᠢ᠋ ᠪᠡᠨ ᠪᠠᠢᠯᠭᠠᠳᠠᠭ ᠪᠠᠢᠭᠰᠠᠨ᠃ ᠲᠡᠷᠡ ᠪᠡᠷ ᠤᠯᠤᠰ ᠢ᠋ᠶ᠋ᠠᠨ ᠰᠡᠷᠭᠦᠭᠡᠨ ᠪᠣᠭᠳᠠ ᠡᠵᠡᠨ ᠡᠪᠦᠭᠡ ᠶ᠋ᠢᠨ ᠡᠮᠬᠢᠯᠡᠵᠦ ᠪᠤᠰᠬᠠᠭᠰᠠᠨ ᠤᠯᠤᠰ ᠭᠦᠷᠦᠨ ᠢ᠋ ᠬᠡᠪ ᠢ᠋ᠶ᠋ᠡᠷ ᠰᠠᠬᠢᠬᠤ ᠭᠡᠵᠦ ᠵᠢᠳᠬᠦᠭᠰᠡᠨ᠃ ᠲᠡᠭᠡᠭᠡᠳ ᠶᠠᠭᠤ ᠬᠢᠯᠡ? ᠲᠣᠭᠠᠴᠢᠵᠤ ᠪᠠᠷᠠᠰᠢ ᠦᠭᠡᠢ ᠶᠡᠬᠡ ᠶᠠᠭᠤᠮᠠ ᠪᠣᠢ ᠳᠠ᠃ ᠭᠠᠵᠠᠷ ᠪᠦᠷᠢ ᠶ᠋ᠢᠨ ᠨᠣᠶᠠᠳ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠪᠤᠷᠢᠯᠠᠨ ᠡᠮᠬᠢ ᠵᠢᠷᠤᠮ ᠦᠭᠡᠢ ᠪᠠᠢᠳᠠᠯ ᠨᠣᠶᠠᠯᠠᠵᠤ ᠢᠷᠡᠭᠰᠡᠨ ᠢ᠋ ᠠᠬᠠ ᠡᠬᠢᠯᠡᠭᠡᠳ ᠡᠪᠳᠡᠬᠦ ᠭᠡᠵᠦ ᠵᠢᠳᠬᠦᠭᠰᠡᠨ᠃ ᠲᠡᠭᠦᠨ ᠢ᠋ ᠪᠡᠨ ᠴᠢᠳᠠᠭᠰᠠᠨ ᠴᠦ᠍᠂ ᠬᠠᠭᠠᠨ ᠳ᠋ᠤ᠌ ᠦᠯᠦ ᠵᠠᠬᠢᠷᠤᠭᠳᠠᠬᠤ ᠬᠠᠨᠳᠤᠯᠭᠠ ᠭᠠᠷᠭᠠᠭᠰᠠᠨ ᠨᠣᠶᠠᠳ ᠢ᠋ ᠠᠬᠠ ᠴᠠᠭᠠᠵᠠᠯᠠᠬᠤ᠂ ᠭᠠᠳᠠᠭᠰᠢ ᠶᠠᠪᠤᠭᠤᠯᠤᠨ ᠨᠤᠲᠤᠭ ᠵᠢᠭᠠᠵᠤ ᠰᠠᠭᠤᠯᠭᠠᠬᠤ᠂ ᠶᠡᠬᠡ ᠲᠣᠷᠭᠠᠭᠤᠯᠢ ᠨᠣᠭᠳᠠᠭᠤᠯᠬᠤ ᠪᠣᠯᠤᠭᠰᠠᠨ᠂ ᠲᠡᠷᠡ ᠪᠦᠬᠦᠨ ᠢ᠋ᠶ᠋ᠡᠨ ᠴᠡᠷᠢᠭ ᠦ᠋ᠨ ᠬᠦᠴᠦ ᠪᠡᠷ ᠬᠢᠵᠦ ᠪᠠᠢᠭᠰᠠᠨ᠃ ᠬᠠᠭᠠᠨ ᠤ᠋ ᠣᠷᠳᠣᠨ ᠢ᠋ ᠴᠡᠪᠡᠷᠯᠡᠨ᠂ ᠳᠡᠷᠭᠡᠳᠡ ᠪᠡᠨ ᠴᠢᠩ ᠦᠨᠡᠨᠴᠢ ᠬᠥᠮᠦᠰ ᠢ᠋ ᠰᠣᠩᠭᠣᠨ ᠠᠪᠴᠤ ᠬᠡᠷᠡᠭ ᠡᠭᠦᠷᠦᠭᠦᠯᠦᠭᠰᠡᠨ᠃ ᠮᠥᠨ ᠴᠦ᠍ ᠰᠢᠢᠳᠮᠡᠭᠡᠢ ᠪᠡᠷ ᠦᠢᠯᠡ ᠪᠡᠨ ᠶᠠᠪᠤᠭᠤᠯᠤᠭᠰᠠᠨ ᠳᠠ᠃ ᠡᠨᠡ ᠤᠬᠠᠭᠠᠨ ᠬᠠᠮᠢᠭᠠ ᠠ᠋ᠴᠠ ᠭᠠᠷᠤᠭᠠᠳ ᠢᠷᠡᠪᠡ ᠭᠡᠮᠡᠷ ᠪᠠᠢᠵᠤ ᠪᠢᠯᠡ᠃ ᠮᠠᠰᠢ ᠵᠢᠷᠤᠮ ᠦᠭᠡᠢ᠂ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠪᠤᠷᠢᠯᠠᠵᠤ ᠪᠠᠢᠬᠤ ᠭᠡᠰᠡᠨ ᠰᠠᠨᠠᠭᠠᠷᠬᠠᠯ ᠤ᠋ᠳ ᠢ᠋ ᠠᠬᠠ ᠲᠠᠰᠤ ᠴᠣᠬᠢᠨ ᠡᠪᠳᠡᠵᠦ᠂ ᠤᠯᠤᠰ ᠢ᠋ᠶ᠋ᠠᠨ ᠰᠢᠨᠡᠴᠢᠯᠡᠬᠦ ᠶ᠋ᠢ ᠡᠬᠢᠯᠡᠭᠡᠳ ᠵᠣᠷᠢᠭᠰᠠᠨ᠃ ᠲᠦᠰᠢᠮᠡᠳ ᠥᠪᠡᠷᠰᠡᠳ ᠦ᠋ᠨ ᠳᠤᠷᠠ ᠪᠠᠷ ᠠᠯᠪᠠ ᠠᠪᠳᠠᠭ ᠢ᠋ ᠴᠠᠭᠠᠵᠠᠯᠠᠭᠰᠠᠨ᠂ ᠨᠣᠶᠠᠳ ᠲᠤᠰ ᠪᠦᠷᠢ ᠥᠪᠡᠷᠰᠡᠳ ᠦ᠋ᠨ ᠥᠮᠴᠢ ᠶ᠋ᠢᠨ ᠭᠠᠵᠠᠷ ᠲᠠᠢ ᠪᠠᠢᠬᠤ ᠡᠷᠡᠮᠡᠯᠵᠡᠯ ᠢ᠋ ᠲᠠᠰᠤᠯᠠᠨ ᠵᠣᠭᠰᠣᠭᠠᠪᠠ᠃ ᠮᠥᠨ ᠴᠦ᠍ ᠶᠡᠬᠡ ᠡᠰᠡᠷᠭᠦᠴᠡᠯ ᠦ᠋ᠳ ᠭᠠᠷᠤᠭᠰᠠᠨ ᠳᠠ᠃ ᠠᠬᠠ ᠡᠳᠦᠷ ᠰᠥᠨᠢ ᠂ ᠥᠷᠯᠥᠭᠡ ᠣᠷᠣᠢ ᠦᠭᠡᠢ ᠦᠢᠯᠡ ᠬᠡᠷᠡᠭ ᠢ᠋ᠶ᠋ᠡᠨ ᠬᠥᠭᠡᠭᠡᠴᠡᠯᠳᠦᠨ ᠬᠠᠭᠠᠨ ᠶᠠᠮᠠᠷ ᠡᠷᠬᠡ ᠶ᠋ᠢ᠂ ᠶᠠᠭᠠᠬᠢᠵᠤ ᠡᠳ᠋ᠯᠡᠬᠦ ᠶᠣᠰᠣᠲᠠᠢ ᠶ᠋ᠢ ᠦᠵᠡᠭᠦᠯᠦᠭᠰᠡᠨ᠁ ᠭᠡᠮᠡᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠥᠭᠦᠯᠡᠵᠦ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠪᠣᠰᠴᠤ᠂ ᠰᠢᠪᠡᠭᠴᠢᠨ ᠢ᠋ᠶ᠋ᠡᠨ ᠴᠠᠢ ᠠᠪᠴᠢᠷᠠ ᠭᠡᠯᠡ᠃
ᠬᠤᠪᠢᠯᠠᠢ ᠰᠢᠩᠭᠡᠨ ᠶᠠᠭᠤᠮᠠ ᠤᠤᠭᠤᠬᠤ ᠳᠤᠷᠠᠲᠠᠢ᠂ ᠬᠠᠯᠠᠭᠤᠨ ᠠᠭᠠᠷ ᠲᠤ ᠠᠮᠠ ᠨᠢ ᠴᠠᠩᠭᠠᠭᠠᠳ ᠪᠠᠢᠳᠠᠭ ᠪᠣᠯᠤᠯᠲᠠᠢ᠃ ᠲᠡᠭᠡᠭᠡᠳ ᠽᠠᠨᠳᠠᠨ ᠴᠠᠢ᠂ ᠵᠢᠮᠢᠰ ᠦ᠋ᠨ ᠰᠢᠭᠦᠰᠦ ᠲᠡᠢ ᠬᠣᠯᠢᠨ ᠤᠤᠭᠤᠵᠤ ᠪᠠᠢᠬᠤ ᠲᠠᠭᠠᠯᠠᠯᠲᠠᠢ ᠪᠠᠢᠳᠠᠭ᠃ ᠲᠡᠢᠮᠦ ᠤᠮᠳᠠᠭᠠ ᠴᠦ᠍ ᠳᠡᠷᠭᠡᠳᠡ ᠨᠢ ᠪᠡᠯᠡᠨ ᠵᠡᠬᠡᠭᠡᠰᠦᠲᠡᠢ ᠪᠠᠢᠨᠠ᠃ ᠥᠷᠯᠥᠭᠡ ᠨᠢ ᠰᠦ ᠲᠡᠢ ᠴᠠᠢ ᠬᠥᠭᠡᠷᠴᠦᠭᠳᠡᠭᠦᠯᠵᠦ ᠤᠤᠭᠤᠨ᠂ ᠢᠩᠭᠢᠬᠦ ᠵᠠᠪᠰᠠᠷ ᠢ᠋ᠶ᠋ᠠᠨ ᠬᠤᠪᠢᠯᠠᠢ ᠬᠠᠭᠠᠨ ᠤ᠋ ᠪᠠᠨ ᠦᠢᠯᠡ ᠶ᠋ᠢ ᠠᠮᠠᠨ ᠳᠣᠲᠣᠷᠠ ᠪᠠᠨ ᠲᠣᠭᠠᠴᠢᠭᠰᠠᠭᠠᠷ ᠪᠠᠢᠪᠠ᠃ ᠴᠠᠭᠠᠲᠠᠢ ᠠᠬᠠ ᠶ᠋ᠢᠨ ᠬᠦᠦ ᠭᠡᠵᠦ ᠨᠢᠭᠡ ᠲᠣᠮᠣ ᠠᠮᠢᠲᠠᠨ ᠭᠦᠶᠦᠭ ᠬᠠᠭᠠᠨ ᠤ᠋ ᠬᠠᠲᠤᠨ ᠤ᠋ ᠳᠡᠮᠵᠢᠯᠭᠡ ᠪᠡᠷ ᠭᠠᠷᠴᠤ ᠢᠷᠡᠵᠦ᠂ ᠤᠯᠤᠰ ᠤ᠋ᠨ ᠡᠷᠬᠡ ᠶ᠋ᠢ ᠮᠡᠳᠡᠯᠴᠡᠵᠦ ᠪᠠᠢᠬᠤ ᠰᠠᠨᠠᠭᠠᠲᠠᠢ ᠪᠣᠯᠤᠯᠠ᠃ ᠥᠭᠡᠷᠡ ᠪᠤᠰᠤᠳ ᠨᠣᠶᠠᠨ ᠠᠬᠠ ᠳ᠋ᠤ᠌ ᠵᠠᠬᠢᠷᠤᠭᠳᠠᠬᠤ ᠦᠭᠡᠢ ᠪᠠᠢᠬᠤ ᠭᠡᠵᠦ ᠬᠡᠰᠡᠭ ᠵᠠᠭᠤᠷᠠ ᠲᠡᠰᠢᠶᠡ ᠲᠤᠯᠤᠨ ᠵᠣᠭᠰᠣᠵᠤ ᠪᠠᠢᠪᠠ᠃《ᠪᠢ ᠤᠯᠤᠰ ᠢ᠋ ᠪᠤᠲᠠᠷᠠᠭᠠᠬᠤ ᠡᠷᠬᠡ ᠦᠭᠡᠢ᠃ ᠡᠪᠦᠭᠡᠨ ᠠᠪᠤ ᠶ᠋ᠢᠨ ᠵᠠᠬᠢᠶᠠᠰᠤ ᠪᠣᠯᠤᠭᠰᠠᠨ〈ᠠᠬᠤᠢ ᠲᠥᠷᠥ ᠮᠢᠨᠢ ᠪᠦᠦ ᠠᠯᠳᠠᠷᠠᠲᠤᠭᠠᠢ〉 ᠭᠡᠳᠡᠭ ᠦᠭᠡ ᠶ᠋ᠢ ᠲᠠ ᠨᠠᠷ ᠬᠡᠯᠡᠬᠦ ᠳᠤᠷᠠᠲᠠᠢ ᠪᠢᠰᠢ ᠤᠤ᠃ ᠲᠡᠭᠡᠭᠡᠳ ᠤᠯᠤᠰ ᠭᠦᠷᠦᠨ ᠢ᠋ᠶ᠋ᠡᠨ ᠡᠮᠬᠢ ᠴᠡᠭᠴᠡᠲᠡᠢ ᠪᠠᠢᠯᠭᠠᠬᠤ ᠭᠡᠬᠦ ᠳ᠋ᠦ᠍ ᠲᠠ ᠨᠠᠷ ᠬᠡᠷᠡᠭ ᠢ᠋ ᠦᠯᠦ ᠲᠠᠭᠠᠰᠢᠶᠠᠬᠤ ᠪᠠᠢᠳᠠᠯ ᠭᠠᠷᠭᠠᠭᠠᠳ ᠶᠠᠪᠤᠭᠠ ᠶ᠋ᠢ ᠪᠢ ᠲᠡᠰᠪᠦᠷᠢᠯᠡᠨ ᠰᠠᠭᠤᠬᠤ ᠡᠷᠬᠡ ᠦᠭᠡᠢ》 ᠭᠡᠵᠦ ᠬᠡᠯᠡᠭᠡᠳ᠂ ᠴᠡᠷᠢᠭ ᠦ᠋ᠨ ᠬᠦᠴᠦ ᠪᠡᠷ ᠲᠡᠷᠰᠬᠦᠳ ᠠᠪᠤᠷᠢ ᠭᠠᠷᠭᠠᠭᠰᠠᠳ ᠢ᠋ ᠪᠠᠵᠠᠵᠤ ᠡᠬᠢᠯᠡᠭᠰᠡᠨ᠃ ᠥᠭᠡᠳᠡ ᠡᠴᠡ ᠪᠡᠨ ᠰᠦᠷᠭᠦᠯᠳᠦᠬᠦ ᠶ᠋ᠢ ᠤᠯᠤᠰ ᠤ᠋ᠨ ᠡᠰᠡᠷᠭᠦ ᠭᠡᠮᠲᠡᠨ ᠭᠡᠵᠦ ᠵᠠᠷᠯᠠᠨ᠂ ᠲᠡᠭᠡᠭᠰᠡᠨ ᠡᠲᠡᠭᠡᠳ ᠢ᠋ ᠴᠠᠭᠠᠵᠠᠯᠠᠬᠤ᠂ ᠬᠣᠷᠣᠭᠠᠬᠤ᠂ ᠨᠤᠲᠤᠭ ᠵᠢᠭᠠᠨ ᠠᠯᠤᠰ ᠭᠠᠵᠠᠷ ᠲᠤ ᠨᠡᠭᠦᠯᠭᠡᠬᠦ ᠪᠣᠯᠤᠭᠰᠠᠨ᠃ ᠳᠠᠯᠠᠨ ᠳᠣᠯᠣᠭᠠᠨ ᠨᠣᠶᠠᠨ ᠢ᠋ ᠴᠠᠭᠠᠵᠠᠯᠠᠭᠠᠳ ᠨᠢᠭᠡ ᠪᠦᠲᠦᠨ ᠵᠢᠯ ᠬᠠᠭᠠᠰ ᠤ᠋ᠨ ᠳᠣᠲᠣᠷᠠ ᠶᠠᠭᠤᠮᠠ ᠶᠠᠭᠤᠮᠠ ᠠᠬᠠ ᠶ᠋ᠢᠨ ᠭᠠᠷ ᠲᠤ ᠪᠠᠵᠠᠭᠳᠠᠬᠤ ᠶᠠᠩᠵᠤᠲᠠᠢ ᠪᠣᠯᠵᠤ ᠡᠬᠢᠯᠡᠭᠰᠡᠨ᠃ ᠠᠬᠠ ᠡᠬᠢᠯᠡᠭᠡᠳ ᠬᠠᠷᠠᠬᠣᠷᠣᠮ ᠤ᠋ᠨ ᠵᠠᠬᠢᠷᠤᠭᠴᠢ ᠶ᠋ᠢ ᠪᠣᠢ ᠪᠣᠯᠭᠠᠨ ᠤᠤᠭᠠᠯ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠲᠠᠭᠤ ᠵᠠᠬᠢᠷᠭᠠᠨ ᠳ᠋ᠤ᠌ ᠣᠷᠣᠭᠤᠯᠤᠭᠰᠠᠨ᠃ ᠪᠠᠷᠠᠭᠤᠨ᠂ ᠵᠡᠭᠦᠨ ᠬᠣᠶᠠᠷ ᠭᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠶ᠋ᠢ ᠲᠣᠮᠢᠯᠠᠭᠰᠠᠨ᠃ ᠪᠢ ᠲᠡᠷᠡ ᠬᠡᠷᠡᠭ ᠦ᠋ᠨ ᠦᠷᠭᠦᠯᠵᠢᠯᠡᠯ ᠪᠣᠯᠬᠤ ᠵᠠᠷᠯᠢᠭ ᠢ᠋ᠶ᠋ᠠᠷ ᠡᠨᠡ ᠭᠠᠵᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠪᠣᠯᠪᠠ ᠳᠠ᠃ ᠲᠡᠭᠡᠭᠡᠳ ᠪᠢ ᠣᠳᠣ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠣᠢ? ᠭᠡᠵᠦ ᠬᠤᠪᠢᠯᠠᠢ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠭᠠᠳ ᠤᠷᠲᠤ ᠬᠠᠨᠴᠤᠢ ᠲᠠᠢ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠦᠨ᠂ ᠶᠣᠰᠣ ᠳᠥᠷᠦᠲᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠰᠷ ᠠ᠋ᠴᠠ ᠭᠠᠷᠴᠤ ᠢᠷᠡᠪᠡ᠃
ᠶᠡᠬᠡ ᠠᠰᠠᠷ ᠤ᠋ᠨ ᠳᠡᠷᠭᠡᠳᠡ ᠰᠢᠳᠠᠷ ᠲᠦᠰᠢᠮᠡᠳ᠂ ᠬᠢᠲᠠᠳ ᠪᠠᠭᠰᠢ᠂ ᠵᠥᠪᠯᠡᠭᠴᠢ ᠡᠷᠳᠡᠮᠲᠡᠳ ᠥᠭᠡᠳᠡ ᠪᠣᠯᠤᠭᠴᠢ ᠬᠠᠭᠠᠨ ᠤ᠋ ᠳᠤᠷᠠᠰᠬᠠᠯ ᠳ᠋ᠤ᠌ ᠵᠣᠷᠢᠭᠤᠯᠤᠨ ᠶᠠᠭᠤ ᠬᠢᠬᠦ᠂ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠭᠠᠵᠠᠷ ᠶᠠᠭᠠᠬᠢᠪᠠᠯ ᠵᠣᠬᠢᠬᠤ ᠲᠤᠬᠠᠢ ᠰᠢᠢᠳ ᠬᠦᠯᠢᠶᠡᠭᠰᠡᠨ ᠶᠠᠩᠵᠤᠲᠠᠢ ᠵᠣᠭᠰᠣᠵᠠᠭᠠᠵᠤ᠂ ᠵᠠᠷᠢᠮ ᠨᠢ ᠲᠣᠯᠣᠭᠠᠢ ᠭᠣᠳᠣᠢᠨ ᠡᠮᠭᠡᠨᠢᠭᠰᠡᠨ ᠪᠠᠢᠳᠠᠯᠲᠠᠢ ᠪᠠᠢᠯᠠ᠃
ᠬᠤᠪᠢᠯᠠᠢ ᠴᠦ᠍ ᠲᠡᠳᠡᠭᠡᠷ ᠬᠥᠮᠦᠰ ᠦ᠋ᠨ ᠢ᠋ᠶ᠋ᠡᠨ ᠨᠢᠭᠤᠷ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠡᠪ ᠦᠭᠡᠢ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠲᠦᠰᠢᠮᠡᠳ ᠦ᠋ᠨ ᠡᠮᠦᠨᠡ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠰᠠᠶᠢ ᠬᠡᠯᠡ ᠴᠢᠮᠡᠭᠡ ᠠᠪᠴᠤ ᠢᠷᠡᠭᠰᠡᠨ ᠬᠦᠯᠦᠭ ᠦ᠋ᠨ ᠳᠡᠭᠦᠦ᠂ ᠥᠪᠡᠷ ᠦ᠋ᠨ ᠰᠢᠳᠠᠷ ᠲᠦᠰᠢᠮᠡᠯ ᠪᠢᠯᠢᠭᠦᠨ ᠢ᠋ ᠬᠠᠷᠠᠭᠠᠳ ᠪᠠᠯᠠᠮᠠᠭᠳᠠᠭᠰᠠᠨ ᠰᠡᠳᠬᠢᠯ ᠳ᠋ᠦ᠍ ᠨᠢ ᠨᠢᠭᠡ ᠵᠦᠢᠯ ᠪᠠᠭᠤᠨ᠂ ᠲᠡᠳᠡᠨ ᠢ᠋ ᠳᠠᠭᠤᠳᠠᠵᠤ ᠳᠡᠷᠭᠡᠳᠡ ᠪᠡᠨ ᠢᠷᠡᠭᠦᠯᠦᠨ ᠭᠥᠯᠢᠢᠵᠦ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠪᠠᠷ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠤᠷᠲᠤ ᠪᠠᠷ ᠠᠮᠢᠰᠬᠤᠯᠠᠵᠤ᠄
— ᠴᠢ ᠶᠠᠪᠤ! ᠬᠦᠯᠦᠭ ᠠᠬᠠ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠵᠢᠭᠠᠯᠭᠠᠭᠠᠷᠠᠢ! ᠠᠬᠠ ᠶ᠋ᠢᠨ ᠱᠠᠷᠢᠯ ᠢ᠋ ᠶᠠᠭᠠᠬᠢᠬᠤ ᠭᠡᠵᠦ ᠪᠣᠢ᠃ ᠶᠡᠷᠦ ᠬᠥᠮᠦᠰ ᠶᠠᠭᠤ ᠶᠠᠷᠢᠵᠤ ᠪᠠᠢᠨᠠ ᠪᠣᠢ! ᠲᠡᠷᠡ ᠪᠦᠬᠦᠨ ᠢ᠋ ᠠᠵᠢᠵᠤ ᠮᠡᠳᠡ! ᠨᠠᠮᠠᠶ᠋ᠢ ᠡᠮᠭᠡᠨᠢᠯ ᠢᠯᠡᠷᠬᠡᠢᠯᠡᠨ ᠵᠠᠷᠤᠵᠤ ᠢᠷᠡᠭᠦᠯᠦᠭᠰᠡᠨ ᠭᠡᠵᠦ ᠰᠢᠳᠠᠷ ᠨᠣᠶᠠᠳ ᠲᠤ ᠠᠢᠯᠠᠳᠬᠠᠬᠤ ᠪᠢᠵᠡ᠃ ᠪᠢ ᠡᠨᠳᠡᠬᠢ ᠬᠡᠷᠡᠭ ᠢ᠋ᠶ᠋ᠡᠨ ᠴᠡᠭᠴᠡᠯᠡᠵᠦ ᠠᠪᠤᠭᠠᠳ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠡᠨᠳᠡ ᠡᠴᠡ ᠰᠢᠭᠤᠳ ᠣᠴᠢᠨᠠ᠃ ᠴᠢ ᠡᠨᠳᠡ ᠪᠡᠨ ᠬᠣᠭᠣᠯᠠᠯᠠᠵᠤ ᠠᠪᠤᠭᠠᠳ ᠰᠠᠢᠨ ᠮᠣᠷᠢ ᠬᠣᠣᠰᠯᠠᠵᠤ ᠤᠨᠤᠭᠠᠳ ᠬᠤᠷᠳᠤᠨ ᠶᠠᠪᠤ! ᠪᠠᠰᠠ ᠪᠠᠭᠠ ᠳᠠᠭᠠᠭᠠᠮᠠᠯ ᠤ᠋ᠳ ᠠ᠋ᠴᠠ ᠲᠠᠪᠤ ᠶ᠋ᠢ ᠳᠠᠭᠠᠭᠤᠯ! ᠭᠡᠵᠦ ᠲᠤᠰᠢᠶᠠᠩᠭᠤᠢ ᠪᠠᠷ ᠬᠡᠯᠡᠯᠡ᠃
ᠥᠨᠳᠥᠷᠬᠡᠨ ᠨᠢᠷᠤᠭᠤᠲᠠᠢ᠂ ᠬᠥᠬᠥᠯ ᠭᠡᠵᠢᠭᠡᠲᠡᠢ ᠪᠢᠯᠢᠭᠦᠨ ᠲᠦᠰᠢᠮᠡᠯ ᠪᠥᠬᠥᠢᠨ ᠶᠣᠰᠣ ᠬᠢᠵᠦ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠢᠭᠠᠯᠲᠠ ᠶ᠋ᠢ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠶᠠᠪᠤᠬᠤ ᠭᠡᠬᠦ ᠳ᠋ᠦ᠍ ᠨᠢ᠂
ᠬᠤᠪᠢᠯᠠᠢ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠳᠠᠯᠠᠯᠤᠨ ᠪᠦᠷ ᠳᠡᠷᠭᠡᠳᠡ ᠪᠡᠨ ᠠᠪᠠᠴᠢᠭᠠᠳ᠄
— ᠴᠢ ᠰᠡᠷᠭᠦᠯᠡᠩ ᠶᠠᠪᠤᠭᠠᠷᠠᠢ! ᠴᠢᠬᠢ ᠪᠡᠨ ᠰᠠᠢᠨ ᠣᠩᠭᠣᠢᠯᠭᠠᠨ᠂ ᠬᠠᠭᠠᠨ ᠤ᠋ ᠰᠢᠳᠠᠷ ᠬᠥᠮᠦᠰ᠂ ᠶᠡᠬᠡ᠂ ᠪᠠᠭᠠ ᠲᠦᠰᠢᠮᠡᠯ ᠨᠠᠷ ᠶᠠᠭᠤ ᠬᠡᠯᠡᠯᠴᠡᠵᠦ ᠪᠠᠢᠭᠠ ᠶ᠋ᠢ ᠴᠢᠩᠨᠠᠵᠤ ᠶᠠᠪᠤᠭᠠᠳ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠨᠠᠮᠠᠶ᠋ᠢ ᠣᠴᠢᠬᠤ ᠪᠠᠷ ᠲᠡᠨᠳᠡ ᠠᠭᠤᠯᠵᠠᠨ ᠨᠠᠳᠠᠳᠤ ᠬᠡᠯᠡᠬᠦ ᠪᠢᠵᠡ ᠭᠡᠮᠡᠨ ᠳᠥᠩᠭᠡᠵᠦ ᠳᠤᠭᠤᠯᠳᠠᠬᠤ ᠲᠡᠳᠦᠢᠬᠡᠨ ᠢ᠋ᠶ᠋ᠡᠷ ᠥᠭᠦᠯᠡᠪᠡ᠃
ᠡᠨᠡ ᠪᠣᠯ ᠵᠠᠬᠢᠷᠤᠭᠴᠢ ᠶ᠋ᠢᠨ ᠠᠮᠢᠨ ᠦᠭᠡ ᠪᠥᠭᠡᠳ ᠲᠡᠭᠦᠨ ᠢ᠋ ᠵᠠᠷᠤᠵᠤ ᠪᠠᠢᠭᠠ ᠶ᠋ᠢᠨ ᠭᠣᠣᠯ ᠤᠴᠢᠷ ᠢ᠋ ᠢᠯᠡᠳᠬᠡᠭᠰᠡᠨ ᠵᠦᠢᠯ ᠠᠵᠢ᠃
ᠪᠢᠯᠢᠭᠦᠨ ᠳᠠᠬᠢᠨ ᠶᠣᠰᠣ ᠬᠢᠵᠦ ᠡᠯᠢᠭᠡ ᠳᠠᠷᠤᠨ ᠪᠥᠬᠥᠢᠭᠡᠳ ᠰᠠᠯᠤᠨ ᠣᠳᠤᠯᠠ᠃
ᠬᠤᠪᠢᠯᠠᠢ ᠬᠠᠵᠠᠭᠤᠬᠠᠨ ᠲᠠᠢ ᠪᠠᠨ ᠵᠣᠭᠰᠣᠵᠤ ᠪᠠᠢᠭᠠ ᠵᠣᠣ ᠣᠪᠣᠭᠲᠤ《ᠪᠠᠭᠰᠢ》 ᠶ᠋ᠢ ᠪᠡᠨ ᠬᠠᠷᠠᠭᠰᠠᠨ ᠳᠣᠣᠷᠠ ᠪᠠᠨ᠂ ᠲᠡᠭᠦᠨ ᠳ᠋ᠦ᠍ ᠣᠢᠷᠠᠲᠤᠨ ᠣᠴᠢᠭᠠᠳ ᠵᠤᠤᠪᠠᠩ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠤᠴᠢᠷᠲᠠᠢᠬᠠᠨ ᠬᠠᠷᠠᠵᠤ᠄
— ᠲᠠᠨ ᠲᠠᠢ ᠶᠠᠷᠢᠯᠴᠠᠬᠤ ᠵᠦᠢᠯ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ᠂ ᠳᠡᠷᠭᠡᠳᠡ ᠶ᠋ᠢᠨ ᠪᠠᠷᠠ ᠪᠣᠯᠤᠭᠴᠢ ᠪᠠᠨ ᠢᠷᠡᠭᠦᠯᠵᠦ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠳ᠋ ᠤᠷᠢᠶᠠᠩᠬᠠᠢᠳᠠᠢ ᠵᠠᠩᠵᠤᠨ ᠢ᠋ ᠬᠠᠮᠢᠭᠠ ᠶᠠᠪᠤᠭᠠ ᠭᠠᠵᠠᠷ ᠠ᠋ᠴᠠ ᠨᠢ ᠳᠠᠭᠤᠳᠠᠨ ᠢᠷᠡᠭᠦᠯ ! ᠭᠡᠵᠦ ᠪᠠᠰᠠ ᠲᠤᠰᠢᠶᠠᠭᠠᠳ᠂ ᠬᠢᠲᠠᠳ《ᠪᠠᠭᠰᠢ》 ᠶ᠋ᠢᠨ ᠬᠠᠮᠲᠤ ᠠᠰᠠᠷ ᠲᠤ᠌ ᠪᠠᠨ ᠣᠷᠣᠪᠠ᠃
ᠲᠡᠳᠡ ᠣᠯᠪᠣᠭ ᠲᠤ᠌ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠨ ᠰᠠᠭᠤᠵᠤ ᠬᠡᠰᠡᠭ ᠵᠠᠭᠤᠷᠠ ᠴᠢᠮᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠡᠦᠲᠦ ᠪᠢᠳᠡ ᠶᠠᠭᠤ ᠶ᠋ᠢ ᠬᠢᠬᠦ ᠶᠣᠰᠣᠲᠠᠢ ᠪᠣᠯᠤᠯᠠ ᠭᠡᠵᠦ ᠲᠠ ᠪᠣᠯᠭᠣᠭᠠᠵᠤ ᠪᠠᠢᠨᠠ ᠪᠣᠢ? ᠭᠡᠮᠡᠨ ᠵᠣᠣ ᠣᠪᠣᠭᠲᠤ ᠠ᠋ᠴᠠ ᠵᠠᠬᠢᠷᠤᠭᠴᠢ ᠠᠰᠠᠭᠤᠯᠠ᠃
ᠵᠥᠪᠯᠡᠭᠴᠢ ᠯᠤᠤᠬᠠᠨ ᠴᠠᠭᠠᠨ ᠪᠤᠭᠤᠷᠤᠯ ᠭᠡᠵᠢᠭᠡ ᠪᠡᠨ ᠢᠯᠢᠵᠦ ᠪᠣᠳᠣᠯ ᠪᠣᠯᠤᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠳᠠᠭᠤ ᠪᠠᠨ ᠪᠦᠷ ᠨᠠᠮ ᠪᠣᠯᠭᠠᠭᠠᠳ᠄
— ᠡᠦᠲᠦ ᠬᠠᠮᠤᠭ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠰᠢᠢᠳᠬᠦ ᠡᠭᠡᠵᠡᠭᠲᠡᠢ ᠴᠠᠭ ᠢᠷᠡᠯᠡ᠃ ᠶᠡᠬᠡ ᠬᠠᠭᠠᠨ ᠬᠡᠴᠡᠭᠦᠦ ᠬᠥᠮᠦᠨ ᠪᠠᠢᠭᠰᠠᠨ᠃ ᠶᠡᠬᠡ ᠤᠯᠤᠰ ᠡᠵᠡᠨ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ ᠲᠠᠨ ᠤ᠋ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠬᠥᠮᠦᠨ ᠪᠣᠯᠭᠠᠨ ᠬᠠᠭᠠᠨ ᠪᠣᠯᠬᠤ ᠶ᠋ᠢ ᠡᠷᠡᠮᠡᠯᠵᠡᠵᠦ ᠪᠠᠢᠭᠠ᠃ ᠮᠥᠩᠬᠡ ᠬᠠᠭᠠᠨ ᠤ᠋ ᠣᠷᠣ ᠶ᠋ᠢ ᠬᠡᠨ ᠳᠤᠷᠠᠲᠠᠢ ᠬᠥᠮᠦᠨ ᠵᠠᠯᠭᠠᠭᠤᠯᠤᠨ ᠠᠪᠤᠭᠠᠳ ᠳᠡᠢᠯᠬᠦ ᠦᠭᠡᠢ᠃ ᠡᠨᠡ ᠲᠣᠮᠣ ᠭᠦᠷᠦᠨ ᠢ᠋ ᠲᠡᠷᠢᠭᠦᠯᠡᠨ ᠵᠢᠯᠣᠭᠣᠳᠤᠨᠠ ᠭᠡᠳᠡᠭ ᠬᠡᠴᠡᠭᠦᠦ ᠬᠡᠷᠡᠭ᠃ ᠲᠠᠨ ᠤ᠋ ᠨᠣᠶᠠᠳ ᠢ᠋ ᠪᠢ ᠪᠠᠭᠠ ᠰᠠᠭᠠ ᠮᠡᠳᠡᠨᠡ᠃ ᠲᠡᠷᠡ ᠬᠠᠭᠠᠨ ᠤ᠋ ᠠᠯᠪᠠ ᠶ᠋ᠢ ᠭᠠᠭᠴᠠᠬᠠᠨ ᠶᠡᠬᠡ ᠵᠠᠬᠢᠷᠤᠭᠴᠢ ᠲᠠ ᠯᠠ ᠵᠠᠯᠭᠠᠭᠤᠯᠵᠤ ᠴᠢᠳᠠᠨᠠ ᠭᠡᠵᠦ 《ᠡᠨᠡ ᠵᠠᠬᠢᠷᠤᠭᠴᠢ ᠶᠠᠭᠤ ᠭᠡᠳᠡᠭ ᠪᠣᠯ》 ᠭᠡᠰᠡᠨ ᠰᠠᠨᠠᠭᠠ ᠪᠠᠷ ᠬᠡᠯᠡᠭᠡᠳ ᠣᠷᠬᠢᠯᠠ᠃
ᠬᠤᠪᠢᠯᠠᠢ ᠴᠢᠷᠠᠢ ᠪᠠᠨ ᠬᠤᠪᠢᠷᠠᠭᠠᠨ ᠲᠠᠭ ᠳᠠᠭᠤ ᠦᠭᠡᠢ ᠪᠣᠯᠵᠤ ᠣᠷᠬᠢᠬᠤ ᠳ᠋ᠤ᠌ ᠪᠠᠨ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠨ ᠳᠣᠣᠷᠠ ᠨᠢ ᠵᠠᠳ ᠪᠤᠰᠬᠠᠳᠠᠭ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠥᠪᠯᠡᠬᠦ ᠲᠦᠰᠢᠮᠡᠯ ᠲᠡᠢ ᠪᠡᠨ ᠬᠠᠷᠢᠯᠴᠠᠭᠰᠠᠨ ᠦᠭᠡᠢ᠂ ᠬᠥᠯᠥᠰᠥ ᠪᠡᠨ ᠲᠠᠭᠠᠪᠤᠷᠢᠯᠠᠭᠤᠯᠤᠨ᠂ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠠᠳ ᠨᠢᠳᠦ ᠪᠡᠨ ᠠᠨᠢᠪᠠ᠃
ᠵᠣᠣ ᠣᠪᠣᠭᠲᠤ ᠬᠤᠪᠢᠯᠠᠢ ᠶ᠋ᠢᠨ ᠬᠡᠳᠦ ᠶ᠋ᠢᠨ ᠪᠣᠳᠣᠯ ᠰᠠᠨᠠᠭᠠ ᠶ᠋ᠢ ᠡᠨᠡ ᠪᠠᠢᠳᠠᠯ ᠠ᠋ᠴᠠ ᠨᠢ ᠮᠡᠳᠡᠵᠦ ᠠᠪᠤᠭᠠᠳ 《ᠤᠭ ᠨᠢ ᠡᠨᠡ ᠵᠠᠬᠢᠷᠤᠭᠴᠢ ᠯᠠ ᠤᠯᠤᠰ ᠢ᠋ᠶ᠋ᠠᠨ ᠲᠣᠯᠣᠭᠠᠢᠯᠠᠪᠠᠯ ᠬᠢᠲᠠᠳ ᠬᠥᠮᠦᠰ ᠲᠦ᠍ ᠠᠷᠠᠢ ᠠᠶᠠᠳᠠᠭᠤ ᠵᠥᠭᠡᠯᠡᠨ ᠬᠠᠨᠳᠤᠵᠤ ᠮᠠᠭᠠᠳ ᠦᠭᠡᠢ᠃ ᠵᠠᠬᠢᠷᠤᠭᠴᠢ ᠮᠠᠨᠢ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠬᠢᠲᠠᠳ ᠢ᠋ ᠥᠮᠥᠭᠯᠡᠭᠴᠢ ᠰᠡᠳᠬᠢᠯᠲᠡᠢ ᠬᠥᠮᠦᠨ ᠪᠣᠯᠵᠤ ᠬᠤᠪᠢᠷᠠᠵᠤ ᠣᠷᠬᠢᠬᠤ ᠶᠠᠭᠤᠨ ᠤ᠋ ᠮᠠᠭᠠᠳ ᠪᠢᠯᠡ᠃ ᠡᠭᠦᠨ ᠡᠴᠡ ᠥᠭᠡᠷᠡ ᠮᠠᠨ ᠳ᠋ᠤ᠌ ᠰᠡᠳᠬᠢᠯ ᠲᠠᠯᠪᠢᠬᠤ ᠨᠣᠶᠠᠳ ᠮᠣᠩᠭᠣᠯᠴᠤᠳ ᠳᠣᠲᠣᠷᠠ ᠪᠠᠢᠬᠤ ᠦᠭᠡᠢ᠃ ᠪᠢ ᠲᠡᠭᠦᠨ ᠢ᠋ ᠪᠠᠲᠤᠲᠠᠢ ᠰᠤᠳᠤᠯᠵᠤ ᠮᠡᠳᠡᠭᠰᠡᠨ᠃ ᠬᠤᠪᠢᠯᠠᠢ ᠯᠠ ᠥᠪᠥᠷ ᠭᠠᠵᠠᠷ ᠤ᠋ᠨ ᠰᠠᠭᠤᠷᠢᠨ ᠪᠠᠢᠳᠠᠯ ᠳ᠋ᠤ᠌ ᠨᠠᠭᠠᠰᠢᠲᠠᠢ ᠬᠠᠨᠳᠤᠳᠠᠭ᠃ ᠪᠤᠰᠤᠳ ᠵᠠᠷᠢᠮ ᠨᠣᠶᠠᠨ ᠨᠢ ᠬᠢᠲᠠᠳ ᠤ᠋ᠨ ᠬᠣᠲᠠ ᠰᠠᠭᠤᠷᠢᠨ ᠨᠤᠭᠤᠳ ᠢ᠋ ᠪᠠᠯᠠᠯᠵᠤ ᠭᠠᠵᠠᠷ ᠲᠠᠢ ᠨᠢ ᠲᠡᠭᠰᠢᠯᠡᠭᠡᠳ ᠮᠠᠯ ᠤ᠋ᠨ ᠪᠡᠯᠴᠢᠭᠡᠷ ᠪᠣᠯᠭᠠᠶᠠ ᠭᠡᠳᠡᠭ ᠰᠠᠨᠠᠭᠠ ᠴᠦ᠍ ᠭᠠᠷᠴᠤ ᠪᠠᠢᠭᠰᠠᠨ ᠤᠳᠠᠭᠠ ᠪᠣᠢ᠃ ᠲᠡᠭᠡᠵᠦ ᠴᠦ᠍ ᠴᠢᠳᠠᠬᠤ ᠬᠥᠮᠦᠰ ᠰᠢᠦ᠃ ᠬᠤᠪᠢᠯᠠᠢ ᠶᠢ ᠡᠨᠡ ᠰᠠᠨᠠᠭᠠ ᠪᠠᠷ ᠡᠦᠲᠦ ᠯᠡ ᠳᠡᠮᠵᠢᠳᠡᠭ ᠴᠠᠭ ᠨᠢ ᠮᠥᠨ᠃ ᠵᠠ ᠣᠷᠣᠯᠳᠣᠭᠠᠳ ᠦᠵᠡᠨᠡ ᠳᠡ》 ᠭᠡᠮᠡᠨ ᠥᠪᠡᠷ ᠲᠦ᠍ ᠪᠡᠨ ᠬᠡᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠠ᠋ ! ᠲᠠ ᠡᠨᠡ ᠴᠠᠭ ᠤ᠋ᠨ ᠠᠶᠠᠰ ᠢ᠋ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠰᠢᠦ ᠭᠡᠵᠦ ᠪᠠᠰᠠ ᠯᠠᠪᠰᠢᠷᠠᠭᠤᠯᠤᠨ ᠨᠡᠮᠡᠵᠦ ᠬᠡᠯᠡᠭᠡᠳ ᠣᠷᠬᠢᠪᠠ᠃
ᠬᠤᠪᠢᠯᠠᠢ ᠨᠢᠳᠦ ᠪᠡᠨ ᠨᠡᠭᠡᠭᠡᠨ 《ᠲᠠ ᠨᠠᠮᠠᠶ᠋ᠢ ᠡᠦᠲᠦ ᠶᠠᠭᠠᠬᠢ ᠭᠡᠬᠦ ᠭᠡᠰᠡᠨ ᠪᠢᠯᠡ?》 ᠭᠡᠮᠡᠨ ᠠᠰᠠᠭᠤᠭᠰᠠᠨ ᠶᠠᠩᠵᠤ ᠪᠠᠷ 《ᠪᠠᠭᠰᠢ》 ᠶ᠋ᠢ ᠪᠡᠨ ᠬᠠᠷᠠᠪᠠ᠃
ᠲᠡᠳᠡ ᠪᠡᠶᠡ ᠪᠡᠶᠡ ᠪᠡᠨ ᠰᠢᠷᠲᠡᠨ ᠳᠣᠲᠣᠷᠠ ᠳᠣᠲᠣᠷᠠ ᠪᠠᠨ ᠨᠢᠭᠡ ᠯᠡ ᠵᠦᠢᠯ ᠢ᠋ ᠪᠣᠳᠣᠭᠰᠠᠭᠠᠷ ᠪᠠᠰᠠ ᠤᠳᠠᠭᠠᠨ ᠰᠠᠭᠤᠵᠠᠢ᠃
— ᠪᠢ ᠡᠮᠦᠨᠡ ᠵᠦᠭ ᠶᠠᠪᠤᠭᠤᠯᠬᠤ ᠲᠡᠢᠨ ᠢ᠋ᠶ᠋ᠡᠨ ᠡᠦᠲᠦ ᠬᠦᠴᠦᠲᠡᠢ ᠪᠣᠯᠭᠠᠨ᠂ ᠬᠡᠳᠦ ᠬᠡᠳᠦᠨ ᠭᠠᠵᠠᠷ ᠢ᠋ᠶ᠋ᠠᠷ ᠰᠢᠷᠦᠭᠦᠨ ᠳᠣᠪᠲᠣᠯᠭᠠᠨ ᠶᠠᠪᠤᠭᠤᠯᠳᠠᠭ ᠶᠤᠮ ᠪᠢᠯᠡ? ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠵᠦ ᠵᠠᠬᠢᠷᠤᠭᠴᠢ ᠠᠮᠠ ᠨᠡᠭᠡᠭᠡᠯᠡ᠃
ᠵᠣᠣ ᠣᠪᠣᠭᠲᠤ ᠬᠤᠪᠢᠯᠠᠢ ᠶ᠋ᠢ ᠬᠠᠷᠠᠵᠤ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠨ ᠭᠣᠵᠣᠢᠯᠭᠠᠨ᠄
— ᠰᠠᠨᠠᠳᠠᠭ ᠯᠠ ᠰᠠᠨᠠᠭᠠ᠃ ᠲᠥᠷᠥ ᠳ᠋ᠦ᠍ ᠬᠢᠭᠰᠡᠨ ᠪᠦᠲᠦᠭᠡᠭᠰᠡᠨ 《ᠮᠠᠢ》 ᠭᠡᠬᠦ ᠶᠠᠭᠤᠮᠠ ᠲᠠᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠭᠣᠣᠮᠠᠢ ᠬᠥᠳᠡᠯᠵᠦ ᠪᠣᠯᠬᠤ ᠦᠭᠡᠢ᠃ ᠴᠡᠷᠢᠭ ᠢ᠋ᠶ᠋ᠡᠨ ᠵᠢᠰᠢᠭᠡᠳ ᠭᠦᠢᠴᠡᠳ ᠪᠡᠯᠡᠳᠬᠡᠵᠦ ᠪᠠᠢᠭᠠᠳ ᠰᠥᠩ ᠦ᠋ᠨ ᠬᠠᠭᠠᠨ ᠢ᠋ ᠭᠡᠨᠡᠳᠡᠭᠦᠯᠦᠨ᠂ ᠬᠡᠳᠦ ᠬᠡᠳᠦᠨ ᠵᠤᠷᠪᠤᠰ ᠭᠠᠵᠠᠷ ᠢ᠋ᠶ᠋ᠠᠷ ᠰᠢᠷᠦᠭᠦᠨ ᠳᠣᠪᠲᠣᠯᠵᠤ᠂ ᠣᠷᠣᠭᠰᠢ ᠪᠠᠨ ᠬᠣᠯᠠ ᠠᠬᠢᠬᠤ ᠶᠣᠰᠣᠲᠠᠢ ᠪᠠᠢᠨᠠ᠃ ᠪᠤᠰᠤᠳ ᠶᠠᠮᠠᠷ ᠴᠦ᠍ ᠵᠠᠩᠵᠤᠨ ᠠ᠋ᠴᠠ ᠢᠯᠡᠭᠦᠦ ᠠᠬᠢᠴᠠᠲᠠᠢ ᠳᠣᠪᠲᠣᠯᠭᠠᠨ ᠬᠢᠪᠡᠯ ᠲᠠᠨ ᠤ᠋ ᠠᠯᠳᠠᠷ ᠬᠠᠮᠢᠭᠠ ᠴᠣ ᠳᠠᠷᠤᠭᠳᠠᠬᠤ ᠦᠭᠡᠢ ᠪᠡᠷ ᠳᠣᠪᠣᠢᠵᠤ ᠭᠠᠷᠤᠨᠠ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠬᠠᠮᠤᠭ ᠡᠷᠬᠡ ᠪᠡᠨ ᠪᠤᠰᠤᠳ ᠲᠤ᠌ ᠠᠯᠳᠠᠨᠠ᠃ ᠲᠠ ᠶᠡᠷᠦ ᠨᠢ ᠵᠥᠪ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠨᠠ ᠰᠢᠦ ᠭᠡᠯᠡ᠃
ᠲᠡᠭᠷᠢ ᠴᠡᠯᠮᠡᠭ᠂ ᠬᠠᠯᠠᠭᠤᠨ ᠨᠠᠷᠠ ᠰᠢᠷᠠᠭᠰᠠᠨ ᠡᠳᠦᠷ ᠦ᠋ᠳ ᠢᠷᠡᠭᠰᠡᠭᠡᠷ ᠪᠠᠢᠯᠠ᠃ ᠪᠣᠷᠣᠭᠠ ᠬᠤᠷᠠ ᠲᠠᠲᠠᠷᠠᠨ ᠭᠠᠵᠠᠷ ᠤᠯᠠᠢᠳᠠᠭ ᠴᠠᠭ ᠪᠣᠯᠬᠣᠷ ᠮᠣᠩᠭᠣᠯᠴᠤᠳ ᠲᠡᠨᠳᠡ ᠪᠠᠢᠬᠤ ᠳ᠋ᠤ᠌ ᠪᠠᠨ ᠡᠳᠦᠷ ᠢ᠋ ᠪᠢᠰᠢ᠂ ᠰᠥᠨᠢ ᠶ᠋ᠢᠨ ᠰᠡᠷᠢᠭᠦᠨ ᠢ᠋ ᠬᠦᠰᠡᠨᠡ᠃ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠳᠤᠷᠠᠲᠠᠢ ᠵᠦᠭ ᠲᠦ᠍ ᠪᠡᠨ ᠮᠣᠷᠢᠨ ᠳᠡᠯ ᠳᠡᠭᠡᠭᠦᠷ ᠬᠦᠦᠷᠨᠢᠭᠦᠯᠵᠦ ᠵᠠᠩᠰᠢᠭᠰᠠᠨ ᠬᠥᠮᠦᠰ ᠲᠦ᠍ ᠨᠠᠷᠠᠨ ᠤ᠋ ᠬᠠᠯᠠᠭᠤᠨ ᠢᠯᠴᠢᠨ ᠳ᠋ᠦ᠍ ᠪᠠᠢᠬᠤ ᠨᠢ ᠰᠤᠷ ᠤ᠋ᠨ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠰᠢᠪᠬᠠᠳᠠᠭᠤᠯᠵᠤ ᠪᠠᠢᠭᠠ ᠠ᠋ᠴᠠ ᠢᠯᠭᠠᠬᠤ ᠶᠠᠭᠤᠮᠠ ᠦᠭᠡᠢ ᠮᠡᠲᠦ᠃
ᠭᠡᠲᠡᠯᠡ ᠡᠨᠡ ᠨᠤᠲᠤᠭ ᠲᠤ᠌ ᠢᠳᠡᠭᠡᠰᠢᠭᠰᠡᠨ ᠬᠢᠲᠠᠳ ᠬᠥᠮᠦᠰ ᠵᠤᠵᠠᠭᠠᠨ ᠲᠠᠭᠠᠷ ᠤ᠋ᠨ ᠬᠤᠪᠴᠠᠰᠤ ᠪᠠᠨ ᠲᠡᠳᠦᠢ ᠯᠡ ᠨᠢᠮᠭᠡᠯᠡᠯ ᠦᠭᠡᠢ ᠪᠡᠷ ᠵᠥᠪᠬᠡᠨ ᠳᠡᠩᠬᠡᠢᠭᠰᠡᠨ ᠲᠣᠮᠣ ᠳᠡᠷᠡᠰᠦᠨ ᠮᠠᠯᠠᠭᠠᠢ ᠪᠠᠷ ᠲᠣᠯᠣᠭᠠᠢ ᠪᠠᠨ ᠰᠡᠭᠦᠳᠡᠷᠯᠡᠭᠡᠳ ᠬᠡᠪᠡᠨᠡᠭ ᠦᠭᠡᠢ ᠠᠯᠬᠤᠨ ᠲᠠᠷᠢᠶᠠ ᠨᠣᠭᠣᠭᠠᠨ ᠤ᠋ ᠪᠠᠨ ᠲᠠᠯᠠᠪᠤᠷ ᠳᠡᠭᠡᠷᠡ ᠭᠠᠵᠠᠷ ᠮᠠᠯᠲᠠᠨ ᠵᠣᠭᠰᠣᠨᠠ᠃ ᠲᠡᠳᠡ ᠮᠤᠷᠤᠢ ᠰᠠᠷᠤᠢ᠂ ᠤᠷᠲᠤ ᠪᠣᠭᠣᠨᠢ ᠱᠤᠤᠳᠤᠤ ᠲᠡᠳᠡᠨ ᠤᠰᠤ ᠤᠷᠤᠰᠤᠭᠤᠯᠲᠤ ᠨᠣᠭᠣᠭᠠ ᠲᠠᠷᠢᠶᠠ ᠪᠠᠨ ᠤᠰᠤᠯᠠᠬᠤ ᠳᠤᠷᠠᠲᠠᠢ᠃ ᠲᠡᠷᠡ ᠠᠵᠢᠯ ᠠ᠋ᠴᠠ ᠪᠠᠨ ᠰᠠᠯᠤᠨᠠ ᠭᠡᠵᠦ ᠵᠠᠩ ᠦᠭᠡᠢ᠃ ᠲᠡᠮᠦᠷ᠂ ᠮᠣᠳᠣᠨ ᠭᠠᠫᠤᠤ ᠪᠠᠷᠢᠭᠰᠠᠨ ᠡᠷᠡᠭᠲᠡᠢ᠂ ᠡᠮᠡᠭᠲᠡᠢ ᠬᠢᠲᠠᠳ ᠬᠥᠮᠦᠰ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠯᠡ ᠲᠠᠷᠢᠶᠠᠨ ᠤ᠋ ᠪᠠᠨ ᠭᠠᠵᠠᠷ ᠳᠡᠭᠡᠷᠡ ᠬᠠᠳᠠᠭᠳᠠᠭᠰᠠᠨ ᠮᠡᠲᠦ ᠵᠣᠭᠰᠣᠵᠤ ᠰᠢᠷᠣᠢ ᠮᠠᠯᠲᠠᠨᠠ᠃ ᠲᠡᠭᠡᠬᠦ ᠦᠭᠡᠢ ᠪᠡᠷ ᠪᠠᠢᠬᠤ ᠶ᠋ᠢᠨ ᠴᠦ᠍ ᠠᠷᠭᠠ ᠦᠭᠡᠢ ᠪᠣᠯᠤᠯᠲᠠᠢ᠃ ᠬᠠᠯᠠᠭᠤᠨ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠭᠠᠵᠠᠷ ᠨᠢ ᠬᠠᠭᠠᠷᠠᠵᠤ ᠬᠠᠲᠠᠭᠠᠳ ᠦᠨᠦᠷᠲᠦᠬᠦ ᠴᠢᠭᠢᠭ ᠦᠭᠡᠢ ᠪᠣᠯᠳᠠᠭ ᠪᠣᠯᠬᠣᠷ ᠵᠣᠭᠰᠣᠯᠲᠠ ᠦᠭᠡᠢ ᠤᠰᠤᠯᠠᠵᠤ ᠪᠠᠢᠵᠤ ᠠᠳᠬᠤ ᠴᠢᠮᠬᠢ ᠶᠠᠭᠤᠮᠠ ᠲᠡᠭᠦᠨ ᠳᠡᠭᠡᠷᠡ ᠪᠡᠨ ᠤᠷᠭᠤᠭᠤᠯᠤᠨᠠ᠃ ᠲᠠᠷᠢᠶᠠᠨ ᠤ᠋ ᠬᠢᠲᠠᠳ ᠬᠥᠮᠦᠰ ᠥᠷᠯᠥᠭᠡ ᠲᠡᠭᠷᠢ ᠭᠡᠭᠡᠷᠡᠬᠦ ᠲᠡᠢ ᠵᠡᠷᠭᠡ ᠨᠣᠭᠣᠭᠠᠨ ᠤ᠋ ᠲᠠᠯᠠᠪᠤᠷ ᠳᠡᠭᠡᠷᠡ ᠪᠡᠨ ᠢᠷᠡᠭᠡᠳ᠂ ᠦᠳᠡᠰᠢ ᠭᠡᠭᠡ ᠲᠠᠰᠤᠷᠠᠬᠤ ᠪᠠᠷ ᠰᠠᠢ ᠠᠵᠢᠯ ᠢ᠋ᠶ᠋ᠠᠨ ᠳᠠᠭᠤᠰᠬᠠᠵᠤ᠂ ᠭᠠᠫᠤᠤ ᠪᠠᠨ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠰᠠᠭᠠᠷ ᠰᠢᠪᠡᠷ ᠨᠦᠬᠡᠨ ᠭᠡᠷ ᠤᠷᠤᠭᠤ ᠪᠠᠨ ᠶᠠᠳᠠᠷᠠᠵᠤ ᠲᠤᠢᠯᠳᠠᠭᠰᠠᠨ ᠴᠢᠷᠠᠢᠲᠠᠢ ᠠᠯᠬᠤᠨᠠ᠃
ᠲᠡᠷᠡ ᠬᠥᠮᠦᠰ ᠦ᠋ᠨ ᠡᠨᠡ ᠠᠵᠢᠯ ᠢ᠋ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠶᠠᠭᠤᠨ ᠦᠨᠡᠯᠡᠵᠦ ᠦᠵᠡᠬᠦ ᠪᠢᠯᠡ᠃
ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠦ᠋ᠨ ᠲᠠᠷᠢᠶᠠᠯᠠᠩ ᠢ᠋ ᠮᠠᠯ ᠢ᠋ᠶ᠋ᠠᠷ ᠭᠠᠳᠤᠴᠢᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠶᠣᠰᠣᠲᠠᠢ ᠠᠲᠠᠯᠠ ᠠᠭᠲᠠ ᠬᠠᠷᠢᠭᠤᠯᠤᠭᠰᠠᠨ ᠴᠡᠷᠢᠭ ᠦ᠋ᠳ ᠵᠣᠷᠢᠭᠤᠳᠠ ᠪᠠᠷ ᠮᠣᠷᠢ ᠮᠠᠯ ᠢ᠋ᠶ᠋ᠠᠨ ᠲᠠᠷᠢᠶᠠᠨ ᠤ᠋ ᠲᠠᠯᠠᠪᠠᠢ ᠤᠷᠤᠭᠤ ᠬᠥᠭᠡᠭᠡᠵᠦ ᠣᠷᠣᠭᠤᠯᠤᠭᠠᠳ ᠲᠠᠭ ᠲᠠᠭᠠᠷᠢ ᠪᠣᠯᠭᠠᠬᠤ ᠳ᠋ᠤ᠌ ᠪᠠᠨ ᠪᠠᠬᠠ ᠪᠠᠨ ᠬᠠᠩᠭᠠᠵᠤ ᠪᠣᠢ ᠴᠢᠷᠠᠢ ᠭᠠᠷᠭᠠᠨ ᠬᠠᠷᠠᠵᠤ ᠵᠣᠭᠰᠣᠨᠠ᠃ ᠲᠠᠷᠢᠶᠠᠨ ᠤ᠋ ᠠᠰᠤᠷᠤ ᠲᠣᠮᠣ ᠲᠠᠯᠠᠪᠠᠢ ᠴᠦ᠍ ᠲᠡᠨᠳᠡ ᠪᠠᠭᠠ᠃ ᠠᠢᠯ ᠠᠢᠯ ᠬᠤᠪᠢ ᠳ᠋ᠤ᠌ ᠪᠠᠨ ᠴᠢᠳᠠᠬᠤ ᠬᠢᠷᠢ ᠪᠡᠷ ᠢ᠋ᠶ᠋ᠡᠨ ᠭᠠᠵᠠᠷ ᠬᠠᠭᠠᠯᠳᠠᠭ ᠪᠣᠯᠤᠯᠲᠠᠢ᠂ ᠠᠯᠠᠭᠠ ᠶ᠋ᠢᠨ ᠴᠢᠨᠡᠭᠡ ᠲᠠᠯᠠᠪᠠᠢ ᠳ᠋ᠤ᠌ ᠯᠠ ᠲᠠᠷᠢᠶᠠ᠂ ᠨᠣᠭᠣᠭᠠ ᠣᠷᠣᠭᠤᠯᠤᠭᠰᠠᠨ᠂ ᠲᠡᠭᠦᠨ ᠤᠷᠤᠭᠤ ᠪᠠᠨ ᠤᠰᠤ ᠤᠷᠤᠰᠬᠠᠭᠰᠠᠨ᠂ ᠲᠣᠷᠳᠠᠵᠤ ᠶᠠᠩᠵᠤᠯᠠᠭᠰᠠᠨ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠲᠣᠬᠣᠮ ᠤ᠋ᠨ ᠴᠢᠨᠡᠭᠡ ᠭᠠᠵᠠᠷ ᠲᠤ᠌ ᠨᠢ ᠠᠳᠤᠭᠤ ᠮᠠᠯ ᠬᠥᠭᠡᠭᠡᠵᠦ ᠣᠷᠣᠭᠤᠯᠬᠤ ᠪᠠᠷ ᠰᠦᠭᠦᠷᠴᠦ ᠤᠨᠠᠭᠠᠳ᠂ ᠲᠣᠯᠣᠭᠠᠢ ᠪᠠᠨ ᠰᠢᠭᠠᠵᠤ ᠪᠠᠢᠭᠠ ᠬᠢᠲᠠᠳ ᠬᠥᠮᠦᠨ ᠬᠠᠷᠠᠭᠳᠠᠨᠠ᠃ ᠠᠷᠭᠠ ᠪᠠᠢᠵᠢ ᠤᠤ ᠳᠠ᠂ ᠲᠡᠷᠡ ᠠᠢᠯ ᠤ᠋ᠨ ᠪᠦᠲᠦᠨ ᠵᠢᠯ ᠢᠳᠡᠬᠦ ᠬᠣᠭᠣᠯᠠ ᠶ᠋ᠢ ᠨᠢ ᠰᠦᠢᠳᠬᠡᠨ ᠬᠠᠶᠠᠵᠤ ᠪᠠᠢᠭᠠ ᠶᠤᠮ ᠴᠢᠨᠢ ᠰᠢᠨᠠᠯᠭᠠᠨ ᠳ᠋ᠤ᠌ ᠣᠷᠣᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠦᠭᠡᠢ᠃ ᠲᠠᠭᠠᠷ ᠢ᠋ᠶ᠋ᠠᠷ ᠨᠢᠭᠤᠴᠠ ᠪᠠᠨ ᠬᠠᠭᠠᠭᠰᠠᠨ ᠬᠥᠮᠦᠰ ᠠᠯᠠᠭᠠ ᠲᠣᠰᠣᠨ ᠶᠠᠭᠤᠮᠠ ᠭᠤᠶᠤᠭᠠᠳ ᠪᠢᠰᠢᠭᠦᠢ ᠯᠡ ᠶᠠᠪᠤᠵᠤ ᠪᠠᠢᠳᠠᠭ᠃ ᠬᠣᠭᠣᠯᠠᠨ ᠤ᠋ ᠪᠠᠨ ᠪᠤᠳᠠᠭᠠ ᠲᠠᠷᠢᠶᠠᠨ ᠠ᠋ᠴᠠ ᠬᠠᠭᠠᠴᠠᠵᠤ ᠪᠠᠢᠭᠠ ᠠᠮᠢᠲᠠᠨ ᠲᠡᠢᠮᠦ ᠯᠡ ᠪᠣᠯᠤᠨᠠ ᠭᠡᠰᠡᠨ ᠦᠭᠡ᠃ ᠬᠥᠮᠦᠨ ᠢ᠋ ᠢᠩᠭᠢᠵᠦ ᠠᠯᠠᠵᠤ ᠪᠠᠢᠨᠠ ᠭᠡᠵᠦ ᠮᠣᠩᠭᠣᠯ ᠤ᠋ᠨ ᠵᠠᠷᠢᠮ ᠴᠡᠷᠢᠭ ᠡᠰᠡ ᠪᠣᠳᠣᠨᠠ᠃ ᠲᠡᠭᠡᠭᠡᠳ ᠮᠤᠩᠬᠠᠭᠯᠠᠵᠤ ᠶᠠᠪᠤᠭᠠ ᠨᠢ ᠲᠡᠷᠡ᠃
ᠲᠡᠭᠷᠢ ᠳ᠋ᠦ᠍ ᠴᠠᠭᠠᠨ ᠡᠭᠦᠯᠡ ᠭᠦᠪᠦᠯᠵᠡᠭᠰᠡᠨ ᠲᠡᠷᠡ ᠨᠢᠭᠡ ᠡᠳᠦᠷ ᠵᠥᠭᠡᠯᠡᠨ ᠰᠠᠯᠬᠢ ᠰᠡᠪᠡᠯᠵᠡᠭᠰᠡᠨ᠂ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠲᠦ᠍ ᠠᠭᠤᠳᠠᠮ ᠨᠣᠭᠣᠭᠠᠨ ᠪᠡᠯᠴᠢᠭᠡᠷ ᠲᠡᠢ ᠨᠤᠲᠤᠭ ᠢ᠋ ᠨᠢ ᠰᠠᠨᠠᠭᠳᠠᠭᠤᠯᠵᠤ ᠪᠠᠢᠯᠠ᠃
ᠭᠡᠲᠡᠯᠡ ᠣᠭᠲᠠᠷᠭᠤᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠬᠣᠷᠢ ᠭᠤᠴᠢᠨ ᠭᠠᠯᠠᠭᠤ ᠰᠢᠪᠠᠭᠤ ᠨᠢᠭᠡᠨ ᠴᠤᠪᠤᠭᠠ ᠪᠣᠯᠵᠤ ᠬᠣᠰᠢᠭᠤᠷᠠᠨ ᠬᠡᠯᠬᠢᠯᠳᠦᠭᠰᠡᠭᠡᠷ ᠲᠡᠷᠲᠡᠭᠡ ᠳᠡᠭᠡᠭᠦᠷ ᠤᠮᠠᠷᠠ ᠶ᠋ᠢ ᠵᠣᠷᠢᠨ ᠨᠢᠰᠴᠦ ᠶᠠᠪᠤᠭᠠ ᠬᠠᠷᠠᠭᠳᠠᠪᠠ᠃ ᠶᠠᠭᠤᠨ ᠳ᠋ᠤ᠌ ᠴᠠᠭ ᠣᠷᠣᠢᠲᠠᠭᠤᠯᠤᠨ ᠢᠩᠭᠢᠵᠦ ᠨᠢᠰᠳᠡᠭ ᠪᠢᠯᠡ᠃ ᠲᠡᠷᠡ ᠭᠠᠯᠠᠭᠤᠨ ᠴᠤᠪᠤᠭᠠ ᠤᠮᠠᠷᠠ ᠶ᠋ᠢ ᠴᠢᠭᠯᠡᠭᠰᠡᠨ ᠢ᠋ ᠨᠢ ᠠᠭᠲᠠ ᠮᠠᠯᠯᠠᠵᠤ ᠶᠠᠪᠤᠭᠠ ᠴᠡᠷᠢᠭ ᠦ᠋ᠳ ᠬᠠᠷᠠᠭᠠᠳ᠂ ᠳᠣᠣᠷᠠ ᠪᠦᠷᠢᠨᠡ ᠨᠢᠭᠡ ᠶ᠋ᠢ ᠰᠠᠨᠠᠪᠠ ᠪᠣᠯᠤᠯᠲᠠᠢ ᠱᠣᠬᠣᠭᠣᠷᠬᠠᠨ ᠭᠠᠢᠬᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠣᠭᠣᠯᠠᠢ ᠪᠠᠨ ᠵᠠᠩᠭᠢᠷᠠᠭᠤᠯᠤᠨ᠄
— ᠬᠠᠷᠠᠭᠠᠴᠢ! ᠬᠠᠷᠠᠭᠠᠴᠢ! ᠮᠠᠨ ᠤ᠋ ᠨᠤᠲᠤᠭ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠨᠠ᠃
— ᠮᠠᠨ ᠤ᠋ ᠤᠷᠤᠭᠤ ᠭᠡᠵᠦ ᠴᠢ ᠶᠠᠭᠠᠬᠢᠵᠤ ᠮᠡᠳᠡᠭᠡ ᠪᠢᠯᠡ?
— ᠬᠠᠯᠠᠭᠤᠨ ᠣᠷᠣᠨ ᠤ᠋ ᠪᠦᠬᠦ ᠰᠢᠪᠠᠭᠤ ᠮᠠᠨ ᠤ᠋ ᠳ᠋ᠤ᠌ ᠣᠴᠢᠵᠤ᠂ ᠲᠡᠨᠳᠡ ᠵᠤᠰᠠᠭᠠᠳ ᠥᠨᠳᠡᠭᠡ ᠪᠡᠨ ᠭᠠᠷᠭᠠᠳᠠᠭ ᠭᠡᠰᠡᠨ ᠪᠢᠵᠡ ᠳᠡ᠃
— ᠬᠠᠪᠤᠷ ᠡᠷᠲᠡ ᠯᠡ ᠨᠢᠰᠴᠦ ᠢᠷᠡᠳᠡᠭ ᠰᠠᠨ᠃ ᠡᠨᠡ ᠬᠡᠰᠡᠭ ᠭᠠᠯᠠᠭᠤ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠢᠩᠭᠢᠵᠦ ᠣᠷᠣᠢᠲᠠᠵᠤ ᠶᠠᠪᠤᠭᠠ ᠶᠤᠮ ᠪᠣᠯ ? ᠭᠠᠢᠬᠠᠮᠠᠷ ᠶᠤᠮ ᠪᠠᠢᠨᠠ᠃
— ᠡᠳᠡ ᠴᠦ᠍ ᠬᠠᠨᠢ ᠢᠵᠢᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠪᠠᠷ ᠰᠡᠳᠬᠢᠯ ᠵᠣᠪᠠᠬᠤ ᠶᠠᠭᠤᠮᠠ ᠦᠭᠡᠢ ᠠᠶᠠᠲᠠᠢᠬᠠᠨ ᠨᠢᠰᠴᠦ ᠶᠠᠪᠤᠭᠠ ᠪᠢᠵᠡ ᠳᠡ᠃ ᠬᠡᠯᠡ ᠮᠡᠳᠡᠳᠡᠭ ᠴᠦ᠍ ᠪᠣᠯᠤᠭᠠᠰᠢ᠃ ᠭᠡᠷ ᠣᠷᠣᠨ ᠳ᠋ᠤ᠌ ᠪᠠᠨ ᠠᠮᠤᠷ ᠮᠡᠨᠳᠦ ᠰᠢᠦ ᠬᠡᠯᠲᠦᠷᠢᠵᠦ ᠶᠠᠪᠤᠭᠠ ᠪᠠᠨ ᠬᠡᠯᠡᠭᠦᠯᠬᠦ ᠰᠠᠨ ᠭᠡᠰᠡᠨ ᠶᠠᠷᠢᠶᠠ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠨᠢᠭᠤᠷ ᠨᠢ ᠬᠣᠯᠴᠣᠷᠤᠤᠳᠠᠵᠤ ᠪᠣᠷᠣᠯᠠᠭᠰᠠᠨ ᠨᠢᠭᠡ ᠴᠡᠷᠢᠭ ᠰᠢᠪᠠᠭᠤᠬᠠᠢ ᠨᠤᠭᠤᠳ ᠤ᠋ᠨ ᠴᠤᠪᠤᠭᠠ ᠶ᠋ᠢ ᠰᠢᠷᠳᠡᠨ ᠵᠣᠭᠰᠣᠭᠠᠳ ᠰᠠᠨᠠᠭᠠ ᠠᠯᠳᠠᠵᠤ᠄
— ᠪᠢ ᠮᠡᠳᠡᠯᠡ᠃ ᠡᠨᠡ ᠭᠠᠯᠠᠭᠤ ᠨᠤᠭᠤᠳ ᠮᠠᠨ ᠤ᠋ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠶᠡᠬᠡ ᠬᠠᠭᠠᠨ ᠤ᠋ ᠰᠦᠨᠡᠰᠦ ᠶ᠋ᠢ ᠨᠤᠲᠤᠭ ᠲᠤ᠌ ᠨᠢ ᠵᠠᠯᠠᠵᠤ ᠬᠦᠷᠭᠡᠬᠦ ᠪᠡᠷ ᠢᠩᠭᠢᠵᠦ ᠣᠷᠣᠢᠬᠠᠨ ᠨᠢᠰᠴᠦ ᠶᠠᠪᠤᠭᠠ ᠪᠡᠢᠯ ᠦᠭᠡᠢ ᠭᠡᠪᠡ᠃
ᠪᠤᠰᠤᠳ ᠪᠦᠬᠦ ᠬᠥᠮᠦᠨ ᠲᠡᠷᠡ ᠴᠡᠷᠢᠭ ᠦ᠋ᠨ ᠦᠭᠡᠨ ᠳ᠋ᠦ᠍ ᠦᠨᠡᠮᠰᠢᠭᠰᠡᠨ ᠪᠠᠢᠲᠠᠯᠲᠠᠢ ᠬᠠᠷᠠᠵᠤ ᠰᠠᠨᠠᠭᠠ ᠠᠯᠲᠠᠨ ᠪᠠᠢᠯᠠ ᠃
— — — —
① ᠲᠤᠯᠤᠢ ᠶ᠋ᠢᠨ ᠠᠬᠠᠮᠠᠳ ᠬᠦᠦ᠂ ᠰᠤᠷᠬᠤᠭᠲᠠᠨᠢ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠮᠣᠩᠭᠣᠯ ᠭᠦᠷᠦᠨ ᠦ᠌ ᠶᠡᠬᠡ ᠬᠠᠭᠠᠨ ᠰᠤᠤ ᠪᠢᠯᠢᠭᠲᠦ ᠭᠠᠷᠮᠠᠭᠠᠢ ᠴᠢᠳᠠᠪᠤᠷᠢᠲᠠᠨ ᠮᠥᠩᠬᠡ1259 ᠣᠨ ᠤ᠋ 7 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌ 53 ᠨᠠᠰᠤᠲᠠᠢ ᠳ᠋ᠤ᠌ ᠪᠠᠨ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠤ᠋ᠨ ᠴᠡᠷᠢᠭ ᠲᠡᠢ ᠳᠠᠢᠳᠤᠵᠤ ᠶᠠᠪᠤᠭᠠᠳ ᠵᠧᠦ ᠱᠠᠨ ᠠᠭᠤᠯᠠ ᠶ᠋ᠢᠨ ᠪᠡᠯᠭᠡ ᠵᠣ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠮᠠᠢᠬᠠᠨ ᠳ᠋ᠤ᠌ ᠲᠠᠭᠠᠯᠠᠯ ᠲᠡᠭᠦᠰᠬᠦ ᠳ᠋ᠦ᠍ ᠨᠢ ᠳᠡᠷᠭᠡᠳᠡ ᠨᠢ ᠪᠣᠭᠣᠷᠴᠢ ᠶ᠋ᠢᠨ ᠬᠦᠦ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠭᠴᠢ ᠪᠤᠮᠠᠨᠲᠠᠢ᠂ ᠨᠡᠷᠡᠲᠦ ᠵᠠᠩᠵᠤᠨ ᠲᠣᠭᠣᠭᠠᠨ ᠨᠠᠷ ᠤ᠋ᠨ ᠬᠥᠮᠦᠰ ᠪᠠᠢᠵᠠᠢ᠃ ᠶᠡᠬᠡ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠮᠣᠩᠭᠣᠯ ᠭᠠᠵᠠᠷ ᠲᠤ ᠠᠪᠴᠢᠷᠠᠵᠤ ᠴᠢᠩᠭᠢᠰ᠂ ᠥᠭᠡᠳᠡᠢ ᠨᠠᠷ ᠤ᠋ᠨ ᠣᠷᠣᠰᠢᠭᠤᠯᠤᠭᠰᠠᠨ ᠶᠡᠬᠡ ᠬᠣᠷᠢᠭ ᠲᠤ ᠶᠣᠰᠣ ᠲᠡᠭᠦᠯᠳᠡᠷ ᠵᠠᠯᠠᠵᠤ ᠣᠷᠣᠰᠢᠭᠤᠯᠤᠭᠰᠠᠨ ᠪᠠᠢᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠩᠷᠢ ᠡᠵᠢ᠂ ᠳᠠᠪᠰᠢᠯᠲᠦ᠂ ᠴᠣᠯᠮᠣᠨᠲᠤᠶᠠᠭᠠ