ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠵᠢᠷᠭᠤᠳᠤᠭᠠᠷ ᠪᠦᠯᠦᠭ 6-7> Бүлжхэн хатан– [монгол] Дамбын Төрбат <зургадугаар бүлэг 6-7>
66ᠪᠦᠯᠵᠢᠬᠢᠨ ᠬᠠᠲᠤᠨ– <ᠵᠢᠷᠭᠤᠳᠤᠭᠠᠷ ᠪᠦᠯᠦᠭ 6-7>
6
ᠴᠠᠭᠠᠭᠴᠢᠨ ᠮᠣᠭᠠᠢ ᠵᠢᠯ ᠦ᠋ᠨ ᠬᠠᠪᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠭᠤᠷᠪᠠᠨ ᠳ᠋ᠤ᠌ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠴᠡᠷᠢᠭ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷᠠ᠋ᠴᠠ ᠭᠤᠷᠪᠠᠨ ᠵᠠᠮ ᠪᠣᠯᠤᠨ ᠶᠢᠰᠦᠨ ᠲᠠᠲ᠋ᠠᠷ ᠠ᠋ᠴᠠ ᠶᠠᠯᠠ ᠠᠰᠠᠭᠤᠬᠤ ᠪᠠᠷ ᠮᠣᠷᠳᠠᠪᠠ᠃ ᠲᠤᠩ ᠰᠠᠶᠢᠬᠠᠨ ᠬᠥᠯ ᠳᠠᠷᠤᠵᠤ᠂ ᠬᠦᠯᠦᠭ ᠮᠣᠷᠢᠳ ᠤ᠋ᠨ ᠦᠦᠷᠰᠡᠨ ᠢᠨᠴᠠᠭᠠᠬᠤ ᠴᠢᠮᠡᠭᠡᠨ ᠳ᠋ᠦ᠍ ᠥᠨᠳᠡᠯᠵᠡᠨ ᠠᠭᠰᠠᠨ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠬᠥᠬᠡ ᠠᠭᠤᠯᠠᠰ ᠡᠵᠡᠭᠦᠢ ᠴᠡᠩᠬᠡᠷ ᠠᠰᠠᠷ ᠰᠢᠭ᠋ ᠬᠠᠪᠤᠷ ᠤ᠋ᠨ ᠵᠡᠷᠭᠡᠯᠭᠡᠨ ᠳ᠋ᠦ᠍ ᠥᠨᠳᠡᠯᠵᠡᠨ ᠦᠯᠡᠲᠡᠯᠡ᠃ ᠲᠡᠷᠡ ᠬᠦ᠌ ᠲᠩᠷᠢ ᠶ᠋ᠢᠨ ᠬᠥᠬᠡ ᠠᠰᠠᠷ ᠤ᠋ᠨ ᠬᠣᠷᠮᠣᠢ ᠲᠦᠰᠢᠭᠦᠯᠦᠨ ᠪᠠᠷᠢᠭᠰᠠᠨ ᠭᠡᠯᠲᠡᠢ ᠬᠠᠭᠠᠨ ᠠᠯᠲᠠᠨ ᠲᠡᠷᠮᠡ ᠶ᠋ᠢᠨ ᠭᠠᠳᠠᠭᠠ ᠬᠣᠲᠣᠯᠠ ᠬᠠᠭᠠᠨ ᠪᠠᠷᠠ ᠪᠣᠯᠤᠭᠴᠢᠳ ᠤ᠋ᠨ ᠬᠠᠮᠲᠤ ᠰᠠᠴᠤᠯᠢ ᠰᠠᠴᠤᠨ ᠥᠴᠢᠯ ᠥᠴᠢᠨ ᠦᠯᠡᠳᠡᠪᠡ᠃ ᠠᠯᠲᠠᠨ ᠲᠣᠭᠣᠰᠣ ᠨᠢ ᠮᠠᠨᠠᠷᠠᠨ ᠬᠣᠯᠠᠳᠬᠤ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠳ ᠤ᠋ᠨ ᠴᠤᠪᠤᠭᠠ ᠶ᠋ᠢ ᠬᠠᠷᠠᠵᠤ ᠬᠠᠷᠠᠵᠤ᠂
— ᠬᠠᠭᠠᠨ ᠠᠪᠤ ᠰᠣᠶᠣᠷᠬᠠ᠂ ᠲᠠ ᠨᠠᠮᠠᠶ᠋ᠢ ᠬᠣᠷᠴᠢ ᠪᠣᠯᠭᠠᠬᠤ ᠨᠢ ᠤᠤ? ᠬᠡᠮᠡᠬᠦ ᠳ᠋ᠦ᠍ ᠬᠥᠩᠬᠥᠷ ᠬᠣᠷᠴᠢ ᠲᠣᠰᠣᠨ ᠠᠪᠴᠤ᠂
— ᠲᠠ ᠬᠠᠭᠠᠨ ᠤᠷᠤᠭ ᠤ᠋ᠨ ᠬᠥᠮᠦᠨ ᠪᠢᠯᠡ᠃ ᠢᠷᠡᠬᠦ ᠵᠢᠯ ᠦ᠋ᠳ ᠦ᠋ᠨ ᠲᠩᠷᠢ ᠳ᠋ᠦ᠍ ᠢᠯᠠᠬᠤ ᠣᠳᠣ ᠴᠢᠨᠢ ᠪᠠᠢᠭᠠ ᠪᠣᠢ ᠪᠢᠵᠡ ᠬᠡᠮᠡᠪᠡ᠃ ᠬᠣᠷᠴᠢ ᠶ᠋ᠢᠨ ᠨᠢᠳᠦ ᠭᠠᠷᠠᠬᠠᠯᠠᠵᠤ᠂ ᠴᠢᠷᠠᠢ ᠴᠣᠩᠬᠢᠢᠨ ᠰᠤᠯᠠᠳᠠᠵᠤ ᠶᠠᠳᠠᠷᠠᠭᠰᠠᠨ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠪᠡᠷ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠠᠮᠪᠠᠭᠠᠢ ᠬᠠᠭᠠᠨ ᠢ᠋ ᠮᠣᠳᠣᠨ ᠡᠯᠵᠢᠭᠡᠨ ᠳ᠋ᠦ᠍ ᠬᠠᠲᠠᠵᠤ ᠦᠬᠦᠭᠦᠯᠪᠡ ᠬᠡᠮᠡᠬᠦ ᠰᠤᠷᠠᠭ ᠰᠣᠨᠣᠰᠤᠭᠰᠠᠨᠠ᠋ᠴᠠ ᠬᠣᠢᠰᠢ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠬᠥᠮᠦᠨ ᠭᠡᠬᠦ ᠳ᠋ᠦ᠍ ᠪᠣᠯᠤᠨᠠ ᠪᠢᠯᠡ᠃ ᠶᠡᠷᠦ ᠬᠠᠨᠯᠢᠭ ᠳᠠᠶᠠᠭᠠᠷ ᠬᠥᠯ ᠳᠡᠭᠡᠷᠡ ᠪᠡᠨ ᠪᠣᠰᠤᠭᠰᠠᠨ ᠶᠤᠮᠰᠠᠨᠵᠠᠢ᠃ ᠬᠣᠷᠬᠣᠨᠠᠭ ᠵᠢᠪᠣᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠳ᠋ᠤ᠌ ᠬᠤᠷᠠᠯᠲᠠᠢ ᠬᠤᠷᠠᠨ ᠴᠤᠭᠯᠠᠵᠤ᠂ ᠬᠠᠪᠤᠯ ᠰᠡᠴᠡᠨ ᠦ᠌ ᠬᠣᠲᠣᠯᠠ ᠨᠣᠶᠠᠨ ᠢ᠋ ᠬᠠᠭᠠᠨ ᠡᠷᠭᠦᠮᠵᠢᠯᠡᠨ ᠶᠣᠰᠣ ᠶ᠋ᠢ ᠶᠣᠰᠣᠯᠠᠵᠤ ᠬᠣᠷᠬᠣᠨᠠᠭ ᠤ᠋ᠨ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠳᠣᠣᠷᠠ ᠬᠠᠪᠢᠷᠭᠠ ᠭᠠᠵᠠᠷ ᠢ᠋ ᠬᠠᠯᠴᠠᠷᠠᠲᠠᠯᠠ᠂ ᠡᠪᠦᠳᠦᠭ ᠭᠠᠵᠠᠷ ᠢ᠋ ᠥᠯᠴᠡᠷᠡᠲᠡᠯᠡ ᠳᠡᠪᠬᠡᠴᠡᠨ ᠪᠥᠵᠢᠨ ᠬᠤᠷᠢᠮᠯᠠᠭᠰᠠᠨ ᠠᠪᠠᠢ᠃ ᠵᠠᠭᠠᠷ ᠤ᠋ᠨ ᠦᠨᠦᠷ᠂ ᠢᠳᠤᠭᠠᠨ ᠡᠬᠡ ᠶ᠋ᠢᠨ ᠠᠰᠠᠭᠠᠭᠰᠠᠨ ᠶᠡᠬᠡ ᠲᠦᠳᠡᠭ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠬᠠᠭᠠᠨ ᠲᠠᠢ ᠪᠣᠯᠤᠭᠰᠠᠨ ᠲᠦᠮᠡᠨ ᠦ᠌ ᠨᠢᠭᠤᠷ ᠲᠤᠨᠢ ᠪᠠᠶᠠᠷ ᠬᠡᠷᠡᠯᠳᠦᠵᠦ ᠢᠨᠢᠶᠡᠵᠦ ᠠᠭᠰᠠᠨ ᠴᠤ᠌ ᠨᠢᠳᠦᠨ ᠳ᠋ᠦ᠍ᠨᠢ ᠬᠢᠯᠢᠩ ᠭᠢᠯᠠᠯᠵᠠᠨ ᠪᠠᠢᠬᠤ ᠶ᠋ᠢ ᠬᠥᠩᠬᠥᠷ ᠬᠣᠷᠴᠢ ᠠᠵᠢᠵᠤ ᠪᠢᠯᠡ᠃ ᠲᠡᠷᠡ ᠬᠦ᠌ ᠶᠡᠬᠡ ᠨᠠᠢᠷ ᠬᠤᠷᠢᠮ ᠤ᠋ᠨ ᠮᠠᠷᠭᠠᠰᠢ ᠥᠷᠯᠥᠭᠡ ᠬᠣᠲᠣᠯᠠ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠲᠦᠭᠡᠵᠦ᠂《ᠥᠬᠢᠨᠪᠠᠷᠬᠠᠭ ᠣᠯᠵᠠᠯᠠᠨ ᠠᠪᠴᠤ ᠳᠣᠷᠣᠮᠵᠢᠯᠠᠨ ᠦᠬᠦᠭᠦᠯᠦᠭᠰᠡᠨ᠂ ᠬᠠᠲᠠᠭᠠᠨ ᠳᠡᠭᠦᠦ ᠶ᠋ᠢ ᠬᠤᠯᠠᠭᠠᠢᠯᠠᠨ ᠠᠪᠴᠤ ᠬᠤᠯᠤᠰᠤ ᠪᠣᠷᠳᠣᠵᠤ ᠠᠯᠠᠭᠰᠠᠨ᠂ ᠠᠮᠪᠠᠭᠠᠢ ᠬᠠᠭᠠᠨ ᠰᠠᠢᠨ ᠰᠡᠳᠬᠢᠯ ᠡᠪᠦᠷᠯᠡᠨ ᠲᠥᠷᠥᠭᠰᠡᠨ ᠭᠦᠩᠵᠦ ᠪᠡᠨ ᠤᠷᠤᠭ ᠤ᠋ᠨ ᠬᠡᠷᠡᠭ ᠢ᠋ᠶ᠋ᠡᠷ ᠠᠪᠴᠤ ᠣᠴᠢᠬᠤ ᠳ᠋ᠤ᠌ ᠮᠣᠳᠣᠨ ᠡᠯᠵᠢᠭᠡᠨ ᠳ᠋ᠦ᠍ ᠬᠠᠳᠠᠨ ᠦᠬᠦᠭᠦᠯᠦᠭᠰᠡᠨ ᠦ᠌ ᠤᠴᠢᠷ ᠶᠢᠰᠦᠨ ᠲᠠᠲ᠋ᠠᠷ ᠠ᠋ᠴᠠ ᠮᠢᠩᠭᠠᠨ ᠶᠠᠯᠠ ᠠᠰᠠᠭᠤᠬᠤ》 ᠶᠡᠬᠡ ᠲᠡᠢᠨ ᠦ᠌ ᠨᠦᠰᠡᠷ ᠪᠡᠯᠡᠳᠬᠡᠯ ᠳ᠋ᠦ᠍ ᠣᠷᠣᠵᠤ ᠠᠪᠠᠢ᠃ ᠴᠡᠷᠢᠭ ᠡᠷᠡᠰ ᠡᠪᠦᠯᠵᠢᠨ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠯ ᠦᠭᠡᠢ ᠠᠩ ᠤ᠋ᠨ ᠮᠥᠷ ᠬᠥᠭᠡᠭᠡᠵᠦ᠂ ᠬᠦᠯᠦᠭ ᠮᠣᠷᠢᠳ ᠢ᠋ᠶ᠋ᠠᠨ ᠤᠲᠤᠭᠠᠨ ᠤ᠋ ᠦᠨᠦᠷ ᠠᠪᠬᠤ ᠦᠭᠡᠢ ᠠᠯᠤᠰ ᠭᠠᠵᠠᠷ ᠣᠲᠣᠷᠯᠠᠨ ᠲᠠᠷᠭᠤᠯᠠᠭᠤᠯᠵᠤ ᠡᠪᠦᠯᠵᠢᠪᠡ᠃ ᠬᠤᠨ ᠬᠤᠭᠤᠷ ᠮᠥᠷᠥᠯᠡᠭᠰᠡᠨ ᠬᠥᠩᠬᠥᠷ ᠬᠣᠷᠴᠢ ᠴᠠᠩ ᠬᠦᠦᠷᠭᠡ ᠪᠣᠯᠤᠭᠰᠠᠨ ᠬᠠᠷᠠ ᠰᠠᠷᠯᠤᠭ ᠢ᠋ᠶ᠋ᠠᠨ ᠳᠠᠪᠢᠴᠢᠨ ᠤᠷᠤᠭᠤ ᠭᠠᠵᠠᠷ ᠭᠤᠯᠭᠤᠵᠤ ᠲᠡᠰᠢᠨ ᠥᠭᠡᠳᠡ ᠭᠠᠵᠠᠷ ᠥᠭᠰᠥᠵᠦ ᠮᠠᠴᠤᠨ ᠶᠠᠪᠤᠵᠤ᠂ ᠣᠲᠣᠭ ᠪᠦᠬᠦᠨ ᠳ᠋ᠦ᠍ ᠦᠦᠬᠡ ᠲᠡᠦᠬᠡ ᠬᠡᠯᠡᠭᠰᠡᠨ ᠠᠪᠠᠢ᠃ ᠡᠷᠡ ᠵᠣᠷᠢᠭ ᠤ᠋ᠨ ᠢᠷ ᠬᠤᠷᠴᠠᠯᠠᠵᠤ ᠶᠠᠪᠤᠭᠠ ᠨᠢ ᠲᠡᠷᠡ ᠶᠦᠮ᠃ ᠬᠠᠷᠢᠨ ᠮᠡᠩᠬᠢᠲᠦ ᠬᠢᠶᠠᠨ ᠤᠬᠠᠭᠠᠨ ᠤ᠋ ᠤᠷᠠ ᠲᠠᠢ ᠭᠡᠮᠡᠨ ᠬᠣᠩᠭᠢᠷᠠᠳ ᠢᠷᠭᠡᠳ ᠡᠴᠡ ᠲᠠᠪᠢ ᠶ᠋ᠢ ᠠᠪᠴᠤ᠂ ᠭᠠᠷ ᠤ᠋ᠨ ᠪᠦᠯᠢ ᠲᠡᠢ ᠭᠡᠮᠡᠨ ᠣᠯᠬᠣᠨᠤᠳ ᠢᠷᠭᠡᠳ ᠡᠴᠡ ᠵᠠᠭᠤ ᠶ᠋ᠢ ᠠᠪᠴᠤ ᠲᠦᠩᠬᠡᠯᠢᠭ ᠭᠣᠷᠣᠬᠠᠨ ᠤ᠋ ᠣᠷᠬᠢᠭᠳᠠᠭᠰᠠᠨ ᠴᠢᠯᠠᠭᠤᠨ ᠰᠦᠮᠡ ᠳ᠋ᠦ᠍ ᠳᠠᠷᠬᠠ ᠬᠢᠵᠦ ᠢᠯᠳᠦ ᠬᠤᠷᠴᠠᠯᠠᠵᠠᠢ᠃ ᠡᠢᠨ ᠨᠠᠮᠤᠷᠵᠢᠨ ᠡᠪᠦᠯᠵᠢᠨ ᠠᠰᠠᠭᠠᠵᠤ ᠰᠢᠲᠠᠭᠠᠭᠰᠠᠨ ᠵᠣᠷᠢᠭ᠂ ᠤᠷᠤᠰᠴᠤ ᠬᠠᠲᠠᠭᠠᠭᠰᠠᠨ ᠬᠢᠯᠢᠩ ᠬᠠᠪᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠭᠤᠷᠪᠠᠨᠠ ᠴᠢᠭᠤᠯᠵᠤ ᠣᠷᠳᠣᠨ ᠤ᠋ ᠵᠦᠭ ᠴᠤᠪᠤᠬᠤ ᠨᠢ ᠡᠨᠡ ᠠᠵᠤᠭᠤ᠃
— ᠬᠥᠬᠡ ᠲᠩᠷᠢ ᠢᠪᠡᠭᠡ!
— ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ᠷ ᠲᠡᠷᠰᠯᠡᠭᠦᠦ ᠲᠠᠲ᠋ᠠᠷ ᠢ᠋ ᠨᠣᠮᠣᠬᠠᠳᠬᠠᠵᠤ ᠬᠠᠢᠷᠠᠯᠠ! ᠭᠡᠮᠡᠨ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠥᠭᠦᠯᠡᠬᠦ ᠬᠠᠲᠤᠨ ᠰᠦᠨ ᠰᠠᠴᠤᠯᠢ ᠡᠷᠭᠦᠨ ᠦᠯᠡᠳᠡᠵᠦ ᠠᠪᠠᠢ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠯᠠ ᠪᠢᠴᠢᠬᠠᠨ ᠲᠤᠯᠭᠠᠲᠠᠢ ᠣᠳᠴᠢᠬᠢᠨ ᠢ᠋ ᠲᠠᠰᠤ ᠲᠡᠪᠡᠷᠢᠨ ᠶᠢᠰᠦᠨ ᠲᠠᠲ᠋ᠠᠷ ᠢ᠋ ᠢᠷᠥᠭᠡᠵᠦ ᠴᠦ᠍ ᠬᠠᠷᠢᠶᠠᠵᠤ ᠴᠤ᠌ ᠡᠰᠡ ᠴᠢᠳᠠᠨ ᠬᠠᠷᠠ ᠴᠠᠭᠠᠨ ᠳᠠᠭᠤ ᠦᠭᠡᠢ ᠬᠠᠷᠠᠵᠤ ᠵᠣᠭᠰᠣᠪᠠ᠃ ᠶᠡᠬᠡ ᠴᠡᠷᠢᠭ ᠦ᠋ᠨ ᠴᠣᠪᠣᠭᠣ ᠠᠭᠤᠯᠠᠰ ᠥᠪᠥᠷᠯᠡᠨ ᠴᠤᠪᠤᠵᠤ ᠬᠥᠬᠡ ᠶ᠋ᠢᠨ ᠬᠥᠬᠡ ᠤᠨᠢᠶᠠᠷ ᠲᠤ᠌ ᠠᠭᠤᠰᠤᠨ ᠳᠠᠯᠳᠠ ᠣᠷᠣᠪᠠᠢ!
ᠲᠡᠷᠡ ᠬᠦ᠌᠂ ᠨᠡᠭᠦᠵᠦ ᠪᠣᠢ ᠬᠥᠬᠡ ᠠᠭᠤᠯᠠᠰ ᠮᠡᠲᠦ ᠣᠯᠠᠨ ᠴᠡᠷᠢᠭ ᠢ᠋ ᠬᠤᠲᠤᠭᠲᠤ ᠮᠣᠩᠬᠣᠷ ᠶᠡᠷᠦᠩᠬᠡᠢᠯᠡᠨ ᠲᠡᠷᠢᠭᠦᠯᠡᠵᠦ ᠮᠣᠷᠳᠠᠵᠠᠢ᠃ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠰᠢᠳᠠᠷ ᠵᠥᠪᠯᠡᠬᠦ᠂ ᠭᠣᠣᠯ ᠵᠠᠮ ᠤ᠋ᠨ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠳ᠋ᠤ᠌ ᠪᠠᠷᠠᠳᠠᠨᠪᠠᠭᠠᠲᠤᠷ ᠲᠣᠬᠣᠭᠠᠵᠤ ᠪᠢᠯᠡ᠃ ᠡᠢᠨ ᠵᠠᠷᠯᠢᠭ ᠪᠣᠯᠬᠤ ᠳ᠋ᠠᠭᠠᠨ《ᠥᠪᠡᠷ ᠦ᠋ᠨ ᠡᠴᠢᠭᠡ ᠶ᠋ᠢᠨ ᠭᠡᠷ ᠲᠦ᠍ ᠡᠪᠦᠷ ᠲᠦᠷᠡᠢ ᠳ᠋ᠡᠭᠡᠨ ᠦᠰᠴᠢᠬᠡᠭᠡᠳ ᠭᠡᠭᠡᠨ ᠨᠠᠷᠠᠨ ᠳᠣᠣᠷᠠ ᠪᠢᠳᠡᠨ ᠭᠡᠳᠡᠰᠦᠨ ᠳ᠋ᠡᠭᠡᠨ ᠬᠥᠯ ᠢ᠋ᠶ᠋ᠡᠨ ᠬᠢᠯᠴᠡᠨ ᠠᠯᠳᠠᠵᠤ ᠶᠠᠪᠤᠪᠠ᠃ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠡᠪ ᠲᠡᠢ ᠶᠠᠪᠤ᠃ ᠴᠤᠪᠤᠵᠤ ᠶᠠᠪᠤᠭᠰᠠᠨ ᠪᠠᠷᠰᠠ᠋ᠴᠠ ᠴᠤᠭᠯᠠᠵᠤ ᠰᠠᠭᠤᠭᠰᠠᠨ ᠱᠠᠭᠠᠵᠠᠭᠠᠢ ᠭᠡᠳᠡᠭ ᠪᠢᠯᠡ》 ᠭᠡᠮᠡᠨ ᠬᠣᠲᠣᠯᠠ ᠬᠠᠭᠠᠨ ᠠᠮᠢᠨᠴᠢᠯᠠᠨ ᠵᠠᠬᠢᠵᠠᠢ᠃ ᠴᠢᠩᠭᠢᠵᠦ ᠬᠣᠶᠠᠷ ᠠᠬᠠ ᠶ᠋ᠢ ᠳᠥᠷᠥᠭᠡ ᠬᠠᠷᠰᠢᠭᠤᠯᠤᠨ ᠢᠯᠡᠭᠡᠭᠡᠳ ᠰᠡᠳᠬᠢᠯ ᠬᠠᠨᠤᠭᠰᠠᠨ ᠨᠢ ᠦᠭᠡᠢ ᠠᠵᠢ᠃ ᠪᠠᠷᠳᠠᠨᠪᠠᠭᠠᠲᠤᠷ ᠤ᠋ᠨ ᠭᠠᠷ ᠰᠢᠳᠠᠷ ᠪᠣᠯᠭᠠᠵᠤ ᠬᠤᠲᠤᠭᠲᠤ ᠮᠣᠩᠬᠣᠷ ᠤ᠋ᠨ ᠭᠠᠭᠴᠠ ᠬᠦᠦ ᠪᠦᠷᠢ ᠪᠥᠬᠡ ᠶ᠋ᠢ ᠮᠣᠷᠳᠠᠭᠤᠯᠵᠠᠢ᠃ ᠠᠪᠠᠭᠠ ᠬᠠᠭᠠᠨ ᠤ᠋ ᠶᠡᠬᠡ ᠣᠷᠣ ᠰᠠᠭᠤᠭᠰᠠᠨ ᠨᠠᠭᠠᠳᠤᠮ ᠳ᠋ᠤ᠌ ᠬᠦᠴᠦᠲᠦ ᠡᠷᠡᠰ ᠦ᠋ᠨ ᠲᠦᠷᠦᠭᠦᠦ ᠠᠪᠤᠭᠰᠠᠨ ᠤᠯᠤᠰ ᠤ᠋ᠨ ᠪᠥᠬᠡ ᠪᠦᠷᠢ ᠰᠠᠭᠤᠳᠠᠯ ᠲᠠᠯᠪᠢᠭᠤ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠪᠠᠭᠲᠠᠵᠤ ᠶᠠᠳᠠᠨ ᠬᠠᠩᠬᠠᠯᠵᠠᠵᠤ ᠶᠠᠪᠤᠪᠠ᠃ ᠶᠡᠷᠦ ᠬᠡᠦᠬᠡᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠷᠡ ᠪᠣᠯᠠᠢ᠃ ᠬᠠᠷᠢᠨ ᠬᠤᠲᠤᠭᠲᠤ ᠨᠣᠶᠠᠨ ᠤ᠋ ᠭᠠᠷ ᠤ᠋ᠨ ᠰᠢᠳᠠᠷ ᠲᠤ᠌ ᠪᠠᠷᠳᠠᠨ ᠠᠬᠠ ᠶ᠋ᠢᠨ ᠲᠣᠮᠣ ᠬᠦᠦ ᠮᠡᠩᠬᠢᠲᠦ ᠬᠢᠶᠡ ᠶ᠋ᠢ ᠮᠣᠷᠳᠠᠭᠤᠯᠤᠭᠰᠠᠨ ᠨᠢ ᠠᠭᠤᠷ ᠬᠢᠯᠢᠩ ᠢ᠋ ᠤᠳᠤᠮ ᠰᠤᠳᠤᠷ ᠢ᠋ᠶ᠋ᠠᠷ ᠰᠦᠯᠵᠢᠭᠰᠡᠨ ᠤᠬᠠᠭᠠᠨ ᠪᠠᠢᠯᠠ᠃ ᠬᠣᠲᠣᠯᠠ ᠬᠠᠭᠠᠨ ᠤ᠋ ᠬᠣᠯᠠ ᠶ᠋ᠢᠨ ᠪᠣᠳᠣᠯ ᠲᠠᠢ ᠨᠡᠭᠦᠳᠡᠯ ᠦ᠋ᠨ ᠠᠴᠢ ᠪᠠᠷ ᠠᠶᠠᠨ ᠰᠠᠭᠠᠲᠤᠭᠰᠠᠨ ᠦᠭᠡᠢ ᠰᠢᠭᠤᠷᠬᠠᠢ ᠶᠠᠪᠤᠭᠰᠠᠭᠠᠷ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠶ᠋ᠢᠨ ᠬᠠᠭᠤᠴᠢᠳ ᠢ᠋ᠶ᠋ᠠᠷ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠬᠢᠯᠢ ᠶ᠋ᠢᠨ ᠳᠡᠭᠡᠰᠦᠨ ᠳ᠋ᠦ᠍ ᠲᠤᠯᠵᠤ ᠣᠴᠢᠯᠠ᠃ ᠪᠤᠭᠤᠷᠤᠯ ᠦᠰᠦ ᠨᠢ ᠰᠠᠯᠬᠢᠨ ᠳ᠋ᠤ᠌ ᠵᠠᠳᠠᠷᠠᠨ ᠬᠡᠢᠰᠬᠦ ᠪᠠᠷᠳᠠᠨᠪᠠᠭᠠᠲᠤᠷ᠂
— ᠢᠯᠡ ᠴᠡᠷᠢᠭ ᠢ᠋ ᠪᠠᠭᠤᠯᠭᠠᠶᠠ! ᠮᠣᠷᠢᠳ ᠤ᠋ᠨ ᠨᠢᠷᠤᠭᠤ ᠠᠮᠠᠷᠠᠵᠤ ᠡᠷᠡᠰ ᠦ᠋ᠨ ᠴᠢᠷᠠᠢ ᠳᠠᠯᠪᠢᠷᠠᠨᠠ ᠭᠡᠰᠡᠨ ᠢ᠋ᠶ᠋ᠡᠷ ᠶᠡᠬᠡ ᠴᠡᠷᠢᠭ ᠬᠦᠷᠢᠶᠡ ᠡᠭᠦᠰᠦᠨ ᠪᠠᠭᠤᠵᠤ᠂ ᠭᠠᠯ ᠭᠠᠯ ᠤ᠋ᠨ ᠲᠦᠳᠡᠭ ᠠᠰᠠᠨ᠂ ᠠᠭᠤᠳᠠᠮ ᠲᠠᠯᠠ ᠶ᠋ᠢᠨ ᠡᠯᠢᠭᠡᠨ ᠳ᠋ᠦ᠍ ᠣᠳᠣ ᠬᠣᠲᠠᠯᠠᠭᠰᠠᠨ ᠮᠡᠲᠦ ᠪᠣᠯᠵᠠᠢ᠃ ᠲᠦᠳᠡᠬᠡᠨ ᠲᠦᠷᠦᠭᠦᠨ ᠳᠥᠷᠪᠡᠨ ᠵᠠᠩᠵᠤᠨ ᠤ᠋ ᠠᠶᠠᠨ ᠤ᠋ ᠴᠠᠴᠠᠷ ᠳᠡᠷᠪᠡᠨ ᠪᠣᠰᠴᠤ᠂ ᠬᠡᠭᠡᠷᠡ ᠶ᠋ᠢᠨ ᠬᠣᠢᠮᠣᠷ ᠠᠪᠤ ᠬᠥᠪᠡᠭᠦᠳ ᠴᠤᠭᠯᠠᠨ ᠲᠣᠭᠯᠠᠵᠤ᠂ ᠴᠠᠭᠠᠰᠢᠳᠠ ᠶ᠋ᠢᠨ ᠬᠡᠷᠡᠭ ᠵᠣᠷᠢᠭ ᠢ᠋ ᠬᠡᠯᠡᠯᠴᠡᠵᠦ ᠠᠪᠠᠢ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠲᠠᠲ᠋ᠠᠷ ᠤ᠋ᠨ ᠲᠠᠯᠠ ᠳ᠋ᠤ᠌ ᠪᠠᠷᠢᠬᠤ ᠭᠡᠷ ᠦ᠋ᠨ ᠪᠠᠭᠤᠷᠢ ᠪᠠᠨ ᠰᠢᠨᠵᠢᠬᠦ ᠮᠡᠲᠦ ᠦ᠋ ᠦᠭᠡᠢ ᠲᠠᠯᠠ ᠶ᠋ᠢ ᠬᠡᠰᠦᠭᠦᠯᠦᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠪᠡᠷᠲᠡᠨ ᠨᠣᠶᠠᠨ ᠲᠠ ᠪᠣᠯᠭᠣᠭᠠᠪᠠᠯ ᠪᠠᠷᠠᠭᠤᠨ ᠵᠡᠭᠦᠨ ᠬᠣᠶᠠᠷ ᠭᠠᠷ ᠤᠷᠤᠭᠤ ᠡᠯᠴᠢᠨ ᠮᠣᠷᠳᠠᠭᠤᠯᠤᠶᠠ ᠭᠡᠯᠡ᠃ ᠪᠤᠭᠤᠷᠤᠯ ᠨᠣᠶᠠᠨ ᠲᠣᠯᠣᠭᠠᠢ ᠳᠣᠬᠢᠵᠤ᠂
— ᠬᠤᠲᠤᠭᠲᠤ ᠵᠠᠩᠵᠤᠨ ᠤ᠋ ᠵᠥᠪ᠃ ᠭᠣᠣᠯ ᠵᠠᠮ ᠤ᠋ᠨ ᠭᠠᠯ ᠢ᠋ ᠪᠤᠮᠪᠠᠲᠤ ᠬᠤᠸᠠ ᠳᠡᠭᠡᠷᠡ ᠠᠰᠠᠭᠠᠵᠤ ᠳᠣᠬᠢᠶᠠ ᠥᠭᠭᠦᠶᠡ! ᠡᠨᠡ ᠤᠲᠤᠭᠠᠨ ᠤ᠋ ᠪᠠᠷᠠ ᠪᠠᠷ ᠬᠤᠯᠠᠨ ᠳᠡᠭᠦᠦ ᠶ᠋ᠢᠨ ᠲᠡᠷᠢᠭᠦᠯᠡᠭᠰᠡᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠴᠡᠷᠢᠭ ᠵᠣᠩᠵᠤᠤ ᠳᠣᠪᠣᠭ ᠤ᠋ᠨ ᠠᠷᠤ ᠪᠠᠷ᠂ ᠪᠣᠰᠢᠭ ᠭᠣᠷᠣᠬᠠᠨ ᠤ᠋ ᠬᠥᠯ ᠢ᠋ᠶ᠋ᠡᠷ ᠨᠥᠮᠥᠷᠦᠨ ᠣᠷᠣᠪᠠᠯ ᠶᠠᠮᠠᠷ?
— ᠲᠠᠲ᠋ᠠᠷ ᠤ᠋ᠳ⁈
— ᠲᠡᠳᠡᠨ ᠦ᠌ ᠬᠦᠷᠢᠶᠡ ᠬᠣᠶᠠᠷ ᠨᠠᠭᠤᠷ᠂ ᠨᠢᠭᠡᠨ ᠮᠥᠷᠡᠨ ᠦ᠌ ᠪᠠᠯᠴᠢᠷ ᠲᠤ᠌ ᠰᠠᠭᠤᠷᠢᠨ ᠪᠣᠢ ᠭᠡᠵᠦ ᠲᠠᠩᠳᠠᠭᠤᠯ ᠠᠢᠯᠠᠳᠤᠭᠰᠠᠨ ᠪᠢᠯᠡ᠃
— ᠳᠡᠭᠡᠰᠦ! ᠪᠤᠮᠪᠠᠲᠤ ᠬᠣᠲᠠ ᠶ᠋ᠢᠨ ᠤᠲᠤᠭᠠᠨ ᠤ᠋ ᠪᠠᠷᠠ ᠪᠠᠷ ᠲᠣᠳᠣᠢᠨ ᠳᠡᠭᠦᠦ ᠶ᠋ᠢᠨ ᠠᠬᠠᠯᠠᠭᠰᠠᠨ ᠵᠡᠭᠦᠨ ᠭᠠᠷ ᠰᠢᠪᠡᠭᠡ ᠪᠤᠷᠭᠠᠰᠤᠨᠠ᠋ᠴᠠ ᠬᠣᠢᠰᠢᠯᠠᠵᠤ᠂ ᠬᠠᠯᠬᠠ ᠨᠥᠮᠥᠷᠭᠡ ᠶ᠋ᠢᠨ ᠭᠣᠣᠯ ᠠ᠋ᠴᠠ ᠰᠣᠷᠣᠯᠵᠠᠵᠤ ᠡᠷᠭᠢᠮᠡᠷ ᠰᠠᠨᠵᠠᠢ ᠭᠡᠬᠦ ᠳ᠋ᠦ᠍ ᠪᠤᠭᠤᠷᠤᠯ ᠵᠠᠩᠵᠤᠨ ᠲᠣᠯᠣᠭᠠᠢ ᠳᠣᠬᠢᠵᠤ᠂
— ᠮᠥᠩᠬᠡ ᠲᠡᠭᠷᠢ ᠮᠡᠳᠡᠲᠦᠭᠡᠢ! ᠭᠡᠪᠡ᠃ ᠡᠢᠨ ᠬᠤᠷᠠᠭᠠᠨ ᠴᠠᠭᠠᠨ ᠡᠭᠦᠯᠡ ᠨᠡᠭᠦᠬᠦ ᠬᠤᠷᠮᠤᠰᠲᠠ ᠲᠡᠭᠷᠢ ᠶ᠋ᠢ ᠰᠥᠰᠥᠯᠡᠨ ᠬᠠᠷᠠᠬᠤ ᠳ᠋ᠤ᠌ ᠮᠡᠩᠬᠢᠲᠦ ᠬᠢᠶᠠᠨ᠂ ᠪᠦᠷᠢ ᠪᠥᠬᠡ ᠶᠡᠷᠦ ᠪᠦᠭᠦᠳᠡ ᠰᠥᠬᠥᠷᠡᠨ ᠰᠠᠭᠤᠵᠤ᠂
— ᠮᠥᠩᠬᠡ ᠲᠡᠭᠷᠢ ᠮᠡᠳᠡᠲᠦᠭᠡᠢ! ᠬᠡᠮᠡᠬᠦ ᠳ᠋ᠦ᠍ ᠳᠠᠭᠤ ᠨᠢᠭᠡ ᠪᠠᠢᠵᠤ ᠪᠢᠯᠡ᠃ ᠴᠢᠩᠭᠢᠵᠦ ᠳᠤᠤᠭᠠᠷᠪᠠᠯ ᠳᠠᠭᠤ ᠨᠢᠭᠡᠲᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠨᠠᠰᠤ ᠬᠡᠪᠡᠢᠭᠰᠡᠨ ᠴᠦ᠍ ᠭᠡᠯᠡ ᠪᠡᠶᠡᠰᠦᠨ ᠬᠥᠭᠡᠷᠦᠭᠰᠡᠨ ᠪᠡᠷᠲᠡᠨ ᠵᠠᠩᠵᠤᠨ《ᠮᠠᠭᠤ ᠰᠠᠢᠨ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠰᠥᠰᠥ ᠳᠡᠯᠡᠰᠴᠡᠢ᠂ ᠰᠦᠨᠡᠰᠦ ᠵᠠᠢᠯᠠᠵᠤ ᠪᠠᠢᠭᠠ ᠪᠢᠵᠡ 》ᠭᠡᠮᠡᠨ ᠪᠠᠲᠤ ᠨᠤᠲᠠ ᠢᠲᠡᠭᠡᠵᠦ ᠠᠪᠠᠢ᠃ ᠲᠡᠢᠨ ᠭᠠᠯ ᠪᠠᠷᠢᠭᠰᠠᠨ ᠡᠯᠴᠢ ᠮᠣᠷᠳᠠᠭᠤᠯᠤᠯᠠ᠃ ᠪᠠᠮᠪᠠᠷ ᠰᠢᠳᠡᠵᠦ ᠳᠠᠭᠤᠰᠬᠤ ᠠ᠋ᠴᠠ ᠡᠮᠦᠨᠡ ᠵᠣᠷᠢᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠬᠦᠷᠦᠭᠰᠡᠨ ᠪᠠᠢᠬᠤ ᠶᠣᠰᠣᠲᠠᠢ ᠡᠯᠴᠢ ᠡᠷᠡ ᠤᠯᠠᠭᠠᠨ ᠭᠠᠯᠠᠭᠤ ᠳᠠᠪᠬᠢᠵᠤ ᠢᠷᠡᠬᠦ ᠳ᠋ᠦ᠍ ᠲᠣᠳᠣᠢᠨ ᠣᠳᠴᠢᠬᠢᠨ ᠵᠡᠭᠡᠰᠦᠲᠦ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠣᠯᠪᠣᠭ ᠳᠡᠪᠢᠰᠦᠭᠦᠯᠵᠦ᠂ ᠴᠡᠭᠡ ᠰᠥᠩᠨᠡᠭᠦᠯᠵᠦ ᠰᠢᠳᠠᠷ ᠵᠠᠩᠵᠤᠨ ᠲᠠᠢ ᠪᠠᠨ ᠮᠠᠷᠭᠠᠰᠢ ᠶ᠋ᠢᠨ ᠳᠣᠯᠣᠭᠠᠨ ᠤ᠋ ᠲᠤᠬᠠᠢ ᠶᠠᠷᠢᠯᠴᠠᠨ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠡᠯᠴᠢ ᠶ᠋ᠢᠨ ᠪᠠᠷᠢᠭᠰᠠᠨ ᠳᠠᠭᠤᠤ ᠶ᠋ᠢ ᠲᠡᠪᠴᠢᠶᠡᠷᠢ ᠲᠡᠢ ᠰᠣᠨᠣᠰᠤᠭᠠᠳ᠂
— ᠰᠢᠪᠡᠭᠡ ᠪᠤᠷᠭᠠᠰᠤᠨᠠ᠋ᠴᠠ ᠬᠣᠢᠰᠢᠯᠠᠵᠤ᠂ ᠬᠠᠯᠬᠠ ᠨᠥᠮᠥᠷᠭᠡ ᠶ᠋ᠢᠨ ᠭᠣᠣᠯ ᠢ᠋ᠶ᠋ᠠᠷ ᠱᠦᠷᠭᠦᠯᠡᠵᠦ ᠡᠷᠭᠢ ᠭᠡᠵᠡᠢ! ᠭᠡᠰᠡᠨ ᠢ᠋ᠶ᠋ᠡᠨ ᠵᠠᠪᠢᠯᠠᠨ ᠰᠠᠭᠤᠭᠰᠠᠨ ᠶᠢᠰᠦᠭᠡᠢ ᠶ᠋ᠢᠨ ᠡᠮᠦᠨᠡ ᠳᠡᠯᠭᠡᠭᠡᠰᠦ ᠲᠡᠢ ᠢᠯᠭᠢᠨ ᠳᠡᠭᠡᠷᠡᠬᠢ ᠵᠢᠷᠤᠭ ᠢ᠋ᠶ᠋ᠠᠨ ᠬᠠᠷᠠᠯᠠ᠃ ᠲᠡᠳᠡ ᠲᠣᠷᠭᠠ ᠰᠢᠭ᠋ ᠡᠯᠳᠡᠭᠰᠡᠨ ᠢᠯᠭᠢᠨ ᠳᠡᠭᠡᠷᠡ ᠵᠡᠭᠦᠦ ᠰᠢᠭ ᠦᠵᠦᠭᠦᠷᠯᠡᠭᠰᠡᠨ ᠴᠤᠴᠠᠯᠢ ᠪᠠᠷ ᠬᠠᠪᠢ ᠶ᠋ᠢᠨ ᠭᠠᠵᠠᠷ ᠢ᠋ ᠲᠣᠢᠮᠣᠯᠠᠨ ᠵᠢᠷᠤᠵᠤ ᠰᠠᠭᠤᠭᠰᠠᠨ ᠠᠵᠢ᠃
— ᠮᠥᠨ ᠰᠠᠨᠵᠠᠢ᠃ ᠬᠤᠲᠤᠭᠲᠤ ᠠᠪᠠᠭᠠ ᠪᠢᠳᠡᠨ ᠦ᠌ ᠰᠠᠨᠠᠭᠠ ᠨᠠᠯᠠᠢ ᠪᠠᠭᠤᠭᠰᠠᠨ ᠱᠠᠭᠠ ᠰᠢᠭ᠋ ᠨᠢᠭᠡᠨ ᠠᠵᠢ ᠭᠡᠬᠦ ᠳ᠋ᠦ᠍ ᠶᠢᠰᠦᠭᠡᠢ ᠢᠨᠢᠶᠡᠳᠦ ᠠᠯᠲᠠᠨ᠂
— ᠲᠡᠢᠮᠦ ᠪᠠᠢᠨᠠ᠂ ᠲᠩᠷᠢ ᠶ᠋ᠢᠨ ᠰᠣᠶᠣᠷᠬᠠᠯ ᠢ᠋ᠶ᠋ᠠᠷ ᠪᠢᠳᠡ ᠲᠡᠷᠰᠯᠡᠭᠦᠦ ᠲᠠᠲ᠋ᠠᠷ ᠢ᠋ ᠭᠠᠨᠵᠤᠭᠠᠯᠠᠭᠠᠳ ᠬᠠᠷᠢᠬᠤ ᠪᠣᠢ! ᠬᠡᠮᠡᠪᠡᠯ ᠪᠦᠭᠦᠳᠡ ᠢᠨᠢᠶᠡᠯᠳᠦᠵᠦ ᠲᠣᠳᠣᠢᠨ ᠣᠳᠴᠢᠬᠢᠨ᠂
— ᠳᠡᠭᠦᠦ ᠨᠣᠶᠠᠳ ᠦᠨᠡᠨ ᠬᠡᠯᠡᠪᠡ᠂ ᠡᠨᠡ ᠦᠭᠡ ᠶ᠋ᠢ ᠲᠡᠷᠡ ᠴᠢᠭ ᠲᠦ᠋ᠨᠢ ᠠᠬᠠ ᠨᠠᠷ ᠲᠤ᠌ ᠳᠠᠮᠵᠢᠭᠤᠯ ᠠ᠋! ᠨᠢᠰ᠂ ᠨᠢᠰ ᠭᠡᠮᠡᠨ ᠲᠤᠯᠭᠠ ᠶ᠋ᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠳᠡᠷᠡᠯᠡᠭᠦᠯᠦᠨ ᠲᠠᠯᠪᠢᠭᠰᠠᠨ ᠪᠠᠮᠪᠠᠷ ᠢ᠋ᠶ᠋ᠠᠨ ᠠᠪᠴᠤ ᠠᠳᠬᠤᠭᠤᠯᠬᠤ ᠳ᠋ᠤ᠌ ᠡᠯᠴᠢ ᠴᠡᠷᠢᠭ ᠰᠢᠭᠦᠷᠡᠨ ᠡᠷᠭᠦᠭᠡᠳ᠂ ᠴᠥᠯᠡᠨ ᠳᠣᠪᠲᠣᠯᠭᠠᠵᠤ ᠣᠳᠤᠯᠠ᠃ ᠲᠣᠳᠣᠢᠨ ᠣᠳᠴᠢᠬᠢᠨ ᠵᠡᠭᠡᠰᠦᠲᠦ ᠨᠠᠭᠤᠷ ᠤ᠋ᠨ ᠮᠠᠨᠳᠠᠯ ᠳᠡᠭᠡᠷᠡ ᠰᠡᠭᠦᠳᠡᠷ ᠲᠡᠳᠡᠨ ᠬᠥᠪᠬᠦ ᠳᠦᠷᠰᠦ ᠪᠡᠨ ᠰᠢᠷᠲᠡᠵᠦ ᠨᠠᠮ ᠭᠦᠮᠬᠡᠨ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ᠂
— ᠨᠡᠭᠦᠨ᠂ ᠴᠢ ᠮᠣᠷᠳᠠ᠂ ᠲᠠᠮᠢᠷᠯᠠᠨ ᠨᠣᠶᠠᠨ ᠤ᠋ ᠮᠢᠩᠭᠠᠲᠤ ᠶ᠋ᠢ ᠪᠣᠰᠬᠠᠵᠤ ᠬᠠᠯᠬᠠ ᠨᠥᠮᠥᠷᠭᠡ ᠶ᠋ᠢᠨ ᠪᠤᠷᠭᠠᠰᠤᠨ ᠳ᠋ᠤ᠌ ᠪᠦᠭᠭᠦ! ᠴᠢᠮᠡᠭᠡ ᠪᠦᠦ ᠭᠠᠷᠭᠠ! ᠳᠥᠷᠥᠭᠡ ᠪᠦᠦ ᠳᠤᠤᠭᠠᠷᠭᠠ! ᠭᠡᠯᠡ᠃
— ᠵᠠ! ᠨᠡᠭᠦᠨ ᠲᠠᠢᠵᠢ ᠰᠤᠭᠤ ᠰᠠᠭᠠᠷᠠᠯ ᠮᠣᠷᠢᠨ ᠳ᠋ᠠᠭᠠᠨ ᠤᠬᠤᠰᠬᠢᠨ ᠮᠣᠷᠳᠠᠵᠤ᠂ ᠲᠩᠷᠢ ᠶ᠋ᠢᠨ ᠬᠥᠬᠡ ᠬᠠᠶᠠᠭᠠ ᠤᠷᠤᠭᠤ ᠠᠭᠤᠰᠤᠨ ᠣᠷᠣᠲᠠᠯᠠ ᠬᠠᠷᠠᠵᠤ ᠬᠠᠷᠠᠭᠠᠳ᠂
— ᠶᠢᠰᠦᠭᠡᠢ ᠴᠢ ᠮᠣᠷᠳᠠ! ᠮᠤᠨᠳᠠᠭ ᠪᠠᠭᠠᠲᠤᠷ ᠤ᠋ᠨ ᠮᠢᠩᠭᠠᠲᠤ ᠶ᠋ᠢ ᠲᠡᠷᠢᠭᠦᠯᠡᠵᠦ ᠰᠢᠪᠡᠭᠡ ᠪᠤᠷᠭᠠᠰᠤᠨ ᠳ᠋ᠤ᠌ ᠰᠢᠪᠡᠭᠡᠯᠡ! ᠭᠠᠯ ᠲᠣᠳᠣ ᠭᠠᠷᠭᠠ᠂ ᠦᠭᠡ ᠴᠢᠩᠭᠠ ᠶᠠᠷᠢ! ᠳᠥᠷᠥᠭᠡ ᠶᠡᠬᠡ ᠳᠤᠤᠭᠠᠷᠭᠠ!
— ᠵᠠ!
ᠶᠢᠰᠦᠭᠡᠢ ᠪᠤᠭᠤᠨ ᠬᠠᠯᠢᠭᠤᠨ ᠮᠣᠷᠢᠨ ᠤ᠋ ᠪᠠᠨ ᠡᠷᠭᠢᠴᠡᠬᠡᠨ ᠳᠤᠮᠳᠠ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠮᠣᠷᠳᠠᠭᠠᠳ᠂ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠳᠠᠪᠬᠢᠵᠤ ᠣᠳᠬᠤ ᠳ᠋ᠤ᠌ ᠪᠠᠷᠠ ᠶ᠋ᠢ ᠲᠠᠰᠤᠷᠠᠲᠠᠯᠠ ᠬᠠᠷᠠᠵᠤ ᠵᠣᠭᠰᠣᠪᠠ᠃ ᠴᠢᠩᠭᠢᠭᠡᠳ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠠᠩᠬᠠ ᠤᠳᠠᠭᠠ ᠴᠡᠷᠢᠭ ᠲᠡᠷᠢᠭᠦᠯᠡᠵᠦ ᠮᠣᠷᠳᠠᠭᠰᠠᠨ ᠤ᠋ ᠪᠠᠶᠠᠷ ᠴᠡᠭᠡᠵᠢ ᠳᠦᠭᠦᠷᠡᠩ ᠴᠠᠯᠭᠢᠬᠤ ᠲᠤᠯᠠ ᠨᠠᠭᠤᠷ ᠤ᠋ᠨ ᠣᠰᠤᠨᠠ ᠥᠪᠡᠷ ᠦ᠋ᠨ ᠳᠦᠷᠢ ᠶ᠋ᠢ ᠳᠠᠬᠢᠨ ᠳᠠᠬᠢᠨ ᠲᠣᠯᠢᠳᠠᠬᠤ ᠨᠡᠩ ᠳᠤᠷᠠ ᠲᠠᠢ ᠪᠠᠢᠭᠠ ᠪᠢᠯᠡ᠃ ᠪᠥᠭᠡᠮ ᠴᠠᠭᠠᠨ ᠡᠭᠦᠯᠡ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠴᠤᠪᠤᠭᠠ ᠰᠢᠭ᠋ ᠬᠥᠪᠬᠦ ᠬᠥᠬᠡ ᠲᠩᠷᠢ ᠨᠠᠭᠤᠷ ᠤ᠋ᠨ ᠣᠰᠤᠨᠠ ᠤᠨᠠᠵᠠᠢ᠃ ᠲᠡᠭᠦᠨ ᠦ᠌ ᠠᠮᠤᠭᠤᠯᠠᠩ ᠲᠣᠯᠢᠨ ᠳᠡᠭᠡᠷᠡ ᠬᠠᠪᠤᠯ ᠬᠠᠭᠠᠨ ᠤ᠋ ᠣᠳᠬᠣᠨ ᠬᠥᠪᠡᠭᠦᠨ ᠲᠣᠳᠣᠢᠨ ᠲᠠᠰᠢᠶᠠ ᠲᠤᠯᠤᠨ ᠵᠣᠭᠰᠣᠵᠤ ᠬᠠᠷᠠᠭᠳᠠᠪᠠ᠃ ᠶᠡᠷᠦ ᠬᠡᠢ ᠮᠣᠷᠢ ᠶ᠋ᠢᠨ ᠴᠠᠭᠠᠨ ᠡᠭᠦᠯᠡ ᠬᠥᠯᠭᠡᠯᠡᠭᠰᠡᠨ ᠲᠩᠷᠢ ᠶ᠋ᠢᠨ ᠡᠭᠦᠯᠡ ᠮᠡᠲᠦ ᠬᠠᠷᠠᠭᠳᠠᠬᠤ ᠲᠤᠯᠠ ᠶᠡᠬᠡ ᠪᠡᠶᠡᠰᠦᠨ ᠢᠨᠢᠶᠡᠯᠡ᠁ ᠲᠣᠳᠣᠢᠨ ᠡᠬᠢᠯᠡᠭᠡᠳ ᠰᠣᠴᠢᠬᠤ ᠰᠢᠭ᠋ ᠪᠣᠯᠪᠠ᠃ ᠤᠰᠤᠨ ᠤ᠋ ᠲᠣᠷᠭᠠᠨ ᠮᠠᠨᠳᠠᠯ ᠨᠠᠮᠤᠭᠤᠬᠠᠨ ᠪᠢᠳᠠᠷᠲᠤᠵᠤ᠂ ᠲᠡᠷᠡ ᠳᠣᠣᠭᠤᠷ ᠯᠤᠤᠰ ᠤ᠋ᠨ ᠥᠬᠢᠨ ᠮᠡᠲᠦ ᠰᠠᠢᠬᠠᠨ ᠪᠦᠰᠡᠭᠦᠢ ᠬᠥᠪᠴᠦ ᠶᠠᠪᠤᠯᠠ᠃ ᠥᠬᠢᠨ ᠦ᠌ ᠨᠢᠮᠭᠡᠨ ᠰᠠᠮᠪᠠᠢ ᠳᠡᠪᠡᠯ ᠨᠣᠷᠤᠭᠠᠳ ᠤᠨᠠᠭᠠᠨ ᠪᠡᠶᠡ ᠳ᠋ᠦ᠍ᠨᠢ ᠨᠠᠭᠠᠯᠳᠤᠨ ᠣᠷᠢᠶᠠᠵᠤ᠂ ᠴᠡᠪᠴᠡᠭᠡᠷ ᠬᠥᠬᠥᠨ ᠦ᠌ ᠬᠢᠨᠢ ᠶᠠᠭᠠᠨ ᠲᠣᠪᠴᠢ ᠴᠡᠴᠡᠷᠡᠭᠡᠨᠡᠬᠦ ᠨᠢ ᠬᠦᠷᠲᠡᠯᠡ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃
— ᠲᠩᠷᠢ ᠥᠷᠥᠰᠢᠶᠡ! ᠭᠡᠵᠦ ᠲᠣᠳᠣᠢᠨ ᠳᠠᠭᠤ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦᠨ ᠳ᠋ᠡᠭᠡᠨ ᠢᠲᠡᠭᠡᠵᠦ ᠶᠠᠳᠠᠨ ᠲᠠᠰᠤ ᠠᠨᠢᠯᠠ᠃ ᠴᠢᠩᠭᠢᠭᠡᠳ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠪᠠᠯ ᠤᠰᠤ ᠱᠠᠯᠢᠬᠤ ᠰᠣᠨᠣᠰᠳᠠᠵᠤ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ ᠬᠠᠷᠠᠪᠠᠯ ᠭᠤᠸᠠ ᠥᠬᠢᠨ ᠭᠦᠶᠦᠬᠡᠨ ᠤᠷᠤᠰᠬᠠᠯ ᠰᠠᠨᠳᠠᠭᠠᠨ ᠪᠣᠰᠴᠤ ᠢᠷᠡᠪᠡ᠃
— ᠴᠢ ᠬᠡᠨ ᠪᠣᠢ? ᠥᠬᠢᠨ ᠦᠯᠦ ᠳᠤᠤᠭᠠᠷᠴᠤ ᠲᠣᠷᠮᠣᠯᠵᠠᠨ ᠢᠨᠢᠶᠡᠬᠦ ᠠᠭᠠᠳ ᠵᠠᠳᠠᠭᠠᠢ ᠦᠰᠦᠨ ᠡᠴᠡ ᠨᠢ ᠤᠰᠤ ᠰᠠᠪᠢᠷᠠᠵᠤ᠂ ᠤᠷᠲᠤ ᠬᠠᠷᠠ ᠰᠣᠷᠮᠣᠣᠰᠤᠨ ᠤ᠋ ᠬᠢᠨᠢ ᠦᠵᠦᠭᠦᠷ ᠲᠦ᠍ ᠤᠰᠤᠨ ᠤ᠋ ᠳᠤᠰᠤᠯ ᠣᠯᠠᠨ ᠰᠤᠪᠤᠳ ᠮᠡᠲᠦ ᠪᠦᠨᠵᠢᠭᠢᠨᠡᠨ ᠪᠠᠢᠯᠠ᠃
— ᠴᠢ ᠬᠡᠨ ᠪᠣᠢ⁈
7
ᠪᠤᠮᠪᠠᠲᠤ ᠥᠨᠳᠥᠷ ᠦ᠋ᠨ ᠬᠠᠳᠠᠲᠤ ᠣᠷᠣᠢᠠ᠋ᠴᠠ ᠲᠦᠳᠡᠭ ᠦ᠋ᠨ ᠪᠠᠷᠠᠭᠠᠨ ᠤᠲᠤᠭᠠ ᠣᠯᠣᠭᠠᠢᠳᠠᠨ ᠪᠣᠰᠴᠤ᠂ ᠬᠥᠬᠡ ᠲᠩᠷᠢ ᠶ᠋ᠢᠨ ᠵᠠᠬᠠ ᠦᠭᠡᠢ ᠠᠭᠤᠳᠠᠮ ᠲᠡᠢᠰᠢ ᠶᠡᠬᠡ ᠲᠡᠢᠨ ᠦ᠌ ᠵᠠᠷ ᠲᠦᠭᠡᠭᠡᠨ ᠨᠡᠭᠦᠵᠦ ᠡᠬᠢᠯᠡᠪᠡ ᠠ᠋᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠬᠠᠳᠠ ᠰᠠᠨᠳᠠᠢᠯᠠᠨ ᠰᠠᠭᠤᠵᠤ᠂ ᠵᠣᠩᠵᠤᠤ ᠳᠣᠪᠣᠭ ᠤᠷᠤᠭᠤ ᠨᠢᠭᠡ᠂ ᠰᠢᠪᠡᠭᠡ ᠪᠤᠷᠭᠠᠰᠤ ᠤᠷᠤᠭᠤ ᠨᠢᠭᠡ ᠬᠠᠷᠠᠴᠠ ᠰᠢᠳᠡᠯᠡᠨ ᠰᠠᠭᠤᠯᠠ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠭᠠᠯ ᠳᠦᠷᠡᠯᠵᠡᠨ᠂ ᠤᠰᠤ ᠴᠠᠯᠭᠢᠯᠠᠨ ᠪᠣᠢ ᠶ᠋ᠢ ᠮᠡᠳᠡᠵᠦ ᠶᠠᠳᠠᠬᠤ ᠶᠠᠭᠤᠮᠠ ᠦᠭᠡᠢ ᠰᠠᠨᠵᠠᠢ᠃
一 ᠳᠣᠬᠢᠶᠠ ᠬᠠᠷᠠᠭᠳᠠᠨᠠ ᠤᠤ?
一 ᠦᠭᠡᠢ ᠠᠵᠢ᠃
一 ᠵᠣᠩᠵᠣᠣ ᠲᠤᠯᠤᠭᠠᠳ ᠤ᠋ᠨ ᠵᠦᠭ ᠡᠴᠡ ᠴᠦ᠍ ᠪᠠᠷᠠ ᠠᠯᠠᠭᠠ ᠤᠤ?
一 ᠦᠭᠡᠢ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠪᠠᠷᠲᠠᠨ ᠨᠣᠶᠠᠨ ᠦᠨᠳᠦᠰᠦᠨ ᠬᠤᠯᠤ ᠳᠦᠭᠦᠷᠡᠩ ᠠᠮᠲᠠᠲᠤ ᠴᠡᠬᠡ ᠰᠢᠮᠡᠵᠦ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂
一 ᠪᠠᠭᠠ ᠦᠳᠡ ᠪᠣᠯᠬᠤ ᠨᠢ ᠠ᠋ ᠬᠡᠮᠡᠪᠡ᠃
ᠶᠡᠬᠡ ᠴᠡᠷᠢᠭ ᠡᠩᠨᠡᠨ ᠵᠢᠭᠰᠠᠵᠤ᠂ ᠢᠯᠠᠬᠤ ᠶ᠋ᠢᠨ ᠣᠳᠣ ᠮᠠᠩᠨᠠᠢ ᠳ᠋ᠤᠨᠢ ᠭᠡᠢᠭᠰᠡᠨ ᠬᠦᠳᠡᠷ ᠡᠷᠡᠰ ᠢᠯᠠᠭᠠᠷᠬᠠᠨ ᠰᠢᠯᠭᠡᠭᠡᠬᠦ ᠮᠣᠷᠢᠳ ᠤ᠋ᠨ ᠵᠣ ᠳᠡᠭᠡᠷᠡ ᠬᠥᠨᠳᠡᠯᠢᠳᠦᠨ ᠪᠠᠢᠯᠠ᠃ ᠲᠡᠷᠡ ᠬᠦ᠌ ᠮᠣᠩᠭᠣᠯ ᠤ᠋ᠨ ᠰᠦᠷ ᠰᠦᠯᠳᠡ ᠪᠣᠯᠤᠭᠰᠠᠨ ᠡᠷᠡᠰ ᠦ᠋ᠨ ᠡᠮᠦᠨᠡ ᠮᠡᠩᠬᠢᠲᠦ ᠬᠢᠶᠠᠨ᠂ ᠪᠦᠷᠢ ᠪᠥᠬᠡ ᠬᠣᠶᠠᠷ ᠲᠣᠭᠲᠠᠵᠤ ᠶᠠᠳᠠᠨ ᠲᠦᠬᠦᠭᠡᠯᠵᠡᠬᠦ ᠬᠦᠯᠦᠭ ᠦ᠋ᠨ ᠵᠣ ᠳ᠋ᠤ᠌ ᠲᠡᠰᠴᠦ ᠶᠠᠳᠠᠨ ᠥᠨᠳᠡᠯᠵᠡᠨ ᠠᠪᠠᠢ᠃ ᠬᠠᠶᠠ ᠨᠢᠭᠡ ᠠᠮᠠᠭᠠᠢ ᠲᠡᠩᠭᠡᠯᠢᠭ ᠬᠠᠩᠭᠢᠷ ᠵᠢᠩᠭᠢᠷ ᠳᠤᠤᠭᠠᠷᠴᠤ ᠳᠥᠷᠥᠭᠡ ᠬᠠᠷᠰᠢᠨ ᠵᠢᠩ ᠵᠢᠩ ᠬᠢᠬᠦ ᠨᠠᠮ ᠭᠦᠮ ᠦ᠋ᠨ ᠳᠤᠮᠳᠠᠭᠤᠷ ᠲᠡᠷᠲᠡᠭᠡ ᠬᠣᠯᠠ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨ ᠠ᠋ᠴᠠ ᠤᠯᠠᠭᠠᠨ ᠲᠣᠭᠣᠰᠣ ᠮᠠᠨᠠᠷᠠᠨ ᠪᠣᠰᠤᠯᠠ᠃
ᠪᠠᠷᠠ ᠬᠠᠷᠠᠨ ᠰᠠᠷᠠᠪᠴᠢᠯᠠᠵᠤ ᠠᠭᠰᠠᠨ ᠵᠠᠯᠠᠭᠤ ᠬᠦᠯᠦᠭ ᠪᠠᠭᠠᠲᠤᠷ᠂
一 ᠬᠤᠲᠤᠭᠲᠤ ᠨᠣᠶᠠᠨᠲᠠᠨ ᠠ᠋᠂ ᠬᠤᠲᠤᠭᠲᠤ ᠨᠣᠶᠠᠨᠲᠠᠨ ᠠ᠋! ᠲᠣᠭᠣᠰᠣ ᠠᠢᠰᠤᠢ! ᠭᠡᠬᠦ ᠳ᠋ᠦ᠍ ᠢᠳᠡᠷᠮᠡᠭ ᠵᠠᠩᠵᠤᠨ ᠭᠠᠷᠠᠬᠠᠨ ᠬᠦ ᠬᠤᠶᠠᠭ ᠢ᠋ᠶ᠋ᠠᠨ ᠬᠠᠩᠭᠢᠷ ᠵᠢᠩᠭᠢᠷ ᠬᠢᠯᠭᠡᠨ ᠪᠣᠰᠴᠤ᠂
一 ᠶᠠᠭᠤ ᠭᠡᠨᠡ!
一 ᠲᠣᠭᠣᠰᠣ ᠠᠢᠰᠤᠢ!
— ᠬᠠᠮᠢᠭᠠ ᠠ᠋ᠴᠠ? ᠭᠡᠰᠡᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠣᠯᠵᠤ ᠬᠠᠷᠠᠭᠰᠠᠨ ᠳᠠᠷᠤᠢ ᠴᠢᠷᠠᠢ ᠳ᠋ᠤᠨᠢ ᠲᠦᠭᠰᠢᠭᠦᠷᠢ ᠶ᠋ᠢᠨ ᠰᠡᠭᠦᠳᠡᠷ ᠤᠨᠠᠵᠤ ᠳᠣᠣᠷᠠᠲᠤ ᠵᠣᠪᠬᠢ ᠲᠠᠲᠠᠵᠤ ᠪᠣᠢ ᠰᠢᠭ᠋ ᠪᠣᠯᠤᠯᠠ᠃ ᠮᠣᠷᠢᠳ ᠬᠦᠷᠲᠡᠯᠡ ᠢᠷᠣᠠ ᠵᠥᠩᠨᠡᠬᠦ ᠮᠡᠲᠦ ᠢᠯᠠᠭᠠᠷᠬᠠᠬᠤ ᠶ᠋ᠢ ᠮᠠᠷᠲᠠᠨ ᠠᠢᠰᠤᠬᠤ ᠪᠠᠷᠠ ᠶ᠋ᠢ ᠲᠣᠭᠲᠠᠭᠠᠨ ᠰᠢᠷᠳᠡᠪᠡ᠃ ᠡᠯᠴᠢ ᠳᠣᠪᠲᠣᠯᠤᠨ ᠠᠢᠰᠤᠢ ᠠᠵᠢ᠃ ᠲᠡᠷᠡ ᠳᠦᠷᠡᠯᠵᠡᠨ ᠴᠣᠷᠣᠯᠵᠠᠬᠤ ᠤᠯᠠᠭᠠᠨ ᠪᠠᠮᠪᠠᠷ ᠢ᠋ᠶ᠋ᠠᠨ ᠠᠰᠠᠭᠠᠰᠤᠲᠠᠢ ᠴᠢᠭ ᠲᠤᠨᠢ ᠬᠤᠲᠤᠭᠲᠤ ᠨᠣᠶᠠᠨ ᠤ᠋ ᠬᠥᠲᠥᠴᠢ ᠴᠡᠷᠢᠭ ᠲᠦ᠍ ᠰᠢᠳᠡᠭᠡᠳ ᠦᠰᠦᠷᠦᠨ ᠪᠠᠭᠤᠵᠤ ᠰᠥᠭᠥᠳᠦᠭᠰᠡᠨ ᠢ᠋ᠶ᠋ᠡᠨ
— ᠳᠡᠭᠡᠳᠦᠰ ᠮᠢᠨᠢ ᠥᠷᠥᠰᠢᠶᠡ! ᠥᠰᠲᠦ ᠲᠠᠲ᠋ᠠᠷ ᠤ᠋ᠨ ᠴᠢᠰᠤᠲᠤ ᠭᠠᠷ ᠲᠤ᠌ ᠬᠠᠨ ᠬᠥᠪᠡᠭᠦᠨ ᠲᠣᠳᠣᠢᠨ ᠣᠳᠬᠢᠴᠢᠨ ᠬᠣᠣᠷᠯᠠᠭᠳᠠᠪᠠ! ᠭᠡᠯᠡ᠃ ᠲᠤᠩᠭᠠᠯᠠᠭ ᠡᠳᠦᠷ ᠠᠶᠤᠩᠭᠠ ᠪᠠᠭᠤᠭᠰᠠᠨ ᠮᠡᠲᠦ ᠬᠢᠷᠳ᠋ᠬᠢᠵᠦ ᠪᠠᠷᠳᠠᠨ ᠨᠣᠶᠠᠨ ᠴᠢᠬᠢᠨ ᠳ᠋ᠡᠭᠡᠨ ᠢᠲᠡᠭᠡᠵᠦ ᠶᠠᠳᠠᠨ᠂
— ᠶᠠᠭᠤ ᠭᠡᠨᠡ? ᠬᠡᠮᠡᠪᠡᠯ ᠡᠯᠴᠢ ᠡᠷᠡ ᠬᠠᠷᠠᠴᠠᠠ᠋ᠴᠠ ᠨᠢ ᠳᠠᠯᠳᠢᠴᠢᠨ᠂
— ᠲᠡᠢᠮᠦ ᠠ᠋᠂ ᠡᠵᠡᠨᠲᠡᠨ ᠠ᠋᠂ ᠲᠣᠳᠣᠢᠨ ᠣᠳᠬᠢᠴᠢᠨ ᠦᠭᠡᠢ ᠪᠣᠯᠪᠠ ᠭᠡᠯᠡ᠃ ᠵᠢᠭᠲᠡᠢᠬᠡᠨ ᠨᠠᠮ ᠭᠦᠮ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠨᠥᠮᠥᠷᠦᠨ ᠠᠪᠤᠯᠠ᠃ ᠡᠨᠡ ᠠᠵᠢᠨ ᠳᠥᠵᠢᠨ ᠢ᠋ ᠡᠪᠳᠡᠵᠦ ᠬᠤᠲᠤᠭᠲᠤ ᠨᠣᠶᠠᠨ ᠤᠷᠲᠤ ᠪᠠᠷ ᠰᠡᠭᠦᠷᠡᠰᠦ ᠠᠯᠲᠠᠨ᠂
— ᠬᠠᠪᠤᠯ ᠬᠠᠭᠠᠨ ᠤ᠋ ᠳᠣᠯᠣᠭᠠᠨ ᠬᠦᠦ ᠶ᠋ᠢᠨ ᠠᠮᠢ ᠪᠠᠷ ᠲᠣᠭᠯᠠᠵᠤ ᠳᠠᠭᠤᠰᠬᠤ ᠨᠢ ᠰᠢᠪ ᠳᠡ! ᠭᠡᠵᠦ ᠭᠦᠨ ᠭᠤᠨᠢᠭ ᠲᠠᠢ ᠥᠭᠦᠯᠡᠭᠰᠡᠨ ᠢ᠋ᠶ᠋ᠡᠨ᠂
— ᠭᠠᠯ ᠤ᠋ᠨ ᠡᠵᠡᠨ ᠬᠠᠮᠤᠭ ᠤ᠋ᠨ ᠪᠠᠭᠠ ᠮᠢᠨᠢ ᠠᠯᠠᠭᠳᠠᠵᠠᠢ᠃ ᠬᠠᠷᠯᠢ ᠺᠤ ᠬᠠᠲᠤᠨ ᠡᠵᠢ ᠳ᠋ᠦ᠍ ᠶᠠᠭᠠᠬᠢᠵᠤ ᠳᠣᠭᠣᠯᠭᠠᠨᠠ ᠠ᠋ ᠭᠡᠬᠦ ᠳ᠋ᠦ᠍ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠨ ᠨᠢᠯᠪᠤᠰᠤ ᠴᠠᠢᠯᠠᠪᠠ᠃ ᠪᠠᠷᠳᠠᠨ ᠨᠣᠶᠠᠨ ᠣᠮᠣᠭᠯᠠᠩ ᠲᠣᠭᠰᠢᠨ ᠵᠠᠩ ᠲᠠᠢ ᠳᠡᠭᠦᠦ ᠪᠡᠨ ᠡᠢᠮᠦ ᠤᠶᠠᠬᠠᠨ ᠭᠡᠵᠦ ᠵᠡᠭᠦᠳᠦᠯᠡᠭᠰᠡᠨ ᠦᠭᠡᠢ ᠶᠠᠪᠤᠵᠠᠢ᠃
— ᠮᠢᠨᠦ ᠳᠡᠭᠦᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ!
— ᠪᠡᠷᠲᠡᠨ ᠠᠬᠠ ᠮᠢᠨᠢ᠂ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ ᠪᠡᠶᠡ ᠪᠡᠶᠡ ᠲᠡᠢ ᠪᠡᠨ ᠪᠠᠢᠯᠳᠤᠭᠰᠠᠭᠠᠷ ᠪᠢᠳᠡ ᠬᠥᠮᠦᠨ ᠦ᠌ ᠢᠳᠡᠰᠢ ᠪᠣᠯᠬᠤ ᠨᠢ ᠪᠠᠢᠨᠠ ᠰᠢᠦ ᠳᠡ! ᠭᠡᠳ ᠠᠰᠬᠠᠷᠠᠲᠠᠯᠠ ᠤᠬᠢᠯᠠᠪᠠ᠃ ᠪᠦᠷᠢ ᠪᠥᠬᠡ ᠡᠴᠢᠭᠡ ᠨᠣᠶᠠᠨ ᠤ᠋ ᠮᠡᠯᠮᠡᠷᠡᠲᠡᠯᠡ ᠠᠰᠬᠠᠷᠠᠬᠤ ᠨᠢᠯᠪᠤᠰᠤ ᠶ᠋ᠢ ᠬᠠᠷᠠᠨ ᠰᠠᠨᠳᠤᠷᠴᠤ᠂
— ᠠᠪᠤ ᠠ᠋᠂ ᠠᠪᠤ ᠠ᠋᠁ ᠭᠡᠬᠦ ᠡᠴᠡ ᠥᠭᠡᠷᠡ ᠶ᠋ᠢ ᠡᠰᠡ ᠬᠡᠯᠡᠵᠦ ᠴᠢᠳᠠᠨ ᠪᠦᠯᠲᠡᠭᠡᠨᠡᠬᠦ ᠳ᠋ᠦ᠍ ᠮᠡᠩᠬᠢᠲᠦ ᠬᠢᠶᠠᠨ᠂
— ᠨᠣᠶᠠᠳ ᠠ᠋᠂ ᠰᠢᠪᠡᠭᠡ ᠪᠤᠷᠭᠠᠰᠤᠨᠠ᠋ᠴᠠ ᠤᠲᠤᠭᠠ ᠭᠠᠷᠤᠯᠠ! ᠭᠡᠵᠡᠢ᠃ ᠬᠤᠲᠤᠭᠲᠤ ᠨᠣᠶᠠᠨ ᠰᠢᠷᠲᠡᠰᠬᠢᠨ ᠬᠠᠷᠠᠵᠤ ᠤᠬᠤᠰᠬᠢᠨ ᠪᠣᠰᠤᠭᠰᠠᠨ ᠢ᠋ᠶ᠋ᠠᠨ᠂
— ᠪᠡᠷᠲᠡᠨ ᠠᠬᠠ᠂ ᠵᠤᠯᠠᠢ ᠵᠤᠯᠠᠢ ᠪᠠᠨ ᠭᠢᠰᠬᠢᠵᠦ ᠲᠥᠷᠥᠭᠰᠡᠨ ᠳᠣᠯᠣᠭᠠᠨ ᠬᠦᠦ ᠶ᠋ᠢᠨ ᠤᠤᠭᠠᠨ ᠨᠢ ᠲᠠ ᠪᠢᠯᠡ᠃ ᠣᠳᠣ ᠠᠪᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠠᠪᠤ ᠪᠣᠯᠬᠤ ᠴᠠᠭ ᠢᠷᠡᠪᠡ᠃ ᠲᠣᠳᠣᠢᠨ ᠳᠡᠭᠦᠦ ᠶ᠋ᠢᠨ ᠱᠠᠷᠢᠯ ᠢ᠋ ᠲᠠ ᠤᠨᠤᠨ ᠮᠥᠷᠡᠨ ᠦ᠌ ᠬᠢᠨᠢ ᠤᠰᠤ ᠪᠠᠷ ᠤᠬᠢᠶᠠᠨ ᠣᠩᠭᠣᠯᠠᠵᠤ ᠶᠣᠰᠣᠯᠠ! ᠪᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠶᠢᠰᠦᠨ ᠲᠠᠲ᠋ᠠᠷ ᠠ᠋ᠴᠠ ᠶᠠᠯᠠ ᠠᠰᠠᠭᠤᠨᠠ! ᠭᠡᠪᠡ᠃
ᠪᠠᠷᠳᠠᠨᠪᠠᠭᠠᠲᠤᠷ ᠪᠤᠭᠤᠷᠤᠯ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠴᠢᠮᠡᠭᠡ ᠦᠭᠡᠢ ᠲᠣᠬᠢᠬᠤ ᠳ᠋ᠤ᠌ ᠮᠡᠩᠬᠢᠲᠦ ᠬᠢᠶᠠᠨ ᠡᠴᠢᠭᠡ ᠨᠣᠶᠠᠨ ᠢ᠋ᠶ᠋ᠠᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠶᠡᠬᠡ ᠪᠡᠷ ᠦᠷᠦ ᠡᠪᠡᠳᠴᠡᠢ᠃ ᠦᠰᠲᠡᠨ ᠲᠠᠲ᠋ᠠᠷ ᠲᠠᠢ ᠳᠠᠢᠳᠤᠨᠠ ᠭᠡᠮᠡᠨ ᠬᠠᠷᠠᠭᠠ ᠶᠡᠬᠡᠲᠦ ᠲᠤᠭ ᠢ᠋ᠶ᠋ᠠᠨ ᠵᠠᠯᠠᠵᠤ᠂ ᠪᠦᠷᠢᠶᠡ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠵᠤ ᠮᠣᠷᠳᠠᠭᠰᠠᠨ ᠠᠲᠠᠯᠠ ᠣᠳᠬᠣᠨ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠱᠠᠷᠢᠯ ᠢ᠋ ᠠᠴᠢᠭᠠᠳ ᠪᠤᠴᠠᠨᠠ ᠭᠡᠳᠡᠭ ᠬᠦᠰᠡᠮᠡᠷ ᠵᠠᠶᠠᠭᠠ ᠪᠢᠰᠢ ᠶᠦ᠍ᠮ᠃ ᠭᠡᠪᠡᠴᠦ ᠬᠤᠲᠤᠭᠲᠤ ᠨᠣᠶᠠᠨ ᠤ᠋ ᠵᠠᠷᠯᠢᠭ ᠭᠠᠷᠴᠠᠭᠠ ᠦᠭᠡᠢ ᠵᠥᠪ ᠪᠠᠢᠯᠠ᠃ ᠪᠡᠷᠲᠡᠨ ᠨᠣᠶᠠᠨ ᠨᠠᠰᠤᠨ ᠲᠤᠷᠰᠢ ᠡᠪᠰᠡᠬᠦ ᠶ᠋ᠢᠨ ᠤᠬᠠᠭᠠᠨ ᠳ᠋ᠤ᠌ ᠦᠨᠡᠨᠴᠢ ᠪᠠᠢᠵᠤ᠂ ᠬᠥᠮᠦᠨ ᠦ᠌ ᠤᠷᠮᠠᠨ ᠳ᠋ᠤ᠌ ᠲᠠᠲ᠋ᠠᠷ ᠢᠷᠭᠡᠳ ᠤᠷᠤᠭᠤ ᠢᠯᠳᠦ ᠰᠤᠭᠤᠯᠵᠤ᠂ ᠰᠤᠮᠤ ᠠᠭᠰᠠᠭᠰᠠᠨ ᠦᠭᠡᠢ ᠪᠣᠯᠠᠢ᠃ ᠭᠡᠲᠡᠯᠡ ᠠᠬᠠ ᠳᠡᠭᠦᠦᠰ ᠦ᠋ᠨ ᠢ᠋ᠶ᠋ᠡᠨ ᠱᠠᠷᠢᠯ ᠢ᠋ ᠤᠬᠢᠯᠠᠵᠤ ᠪᠤᠯᠠᠭᠰᠠᠭᠠᠷ ᠨᠢᠭᠡ ᠨᠠᠰᠤ ᠶ᠋ᠢ ᠪᠠᠷᠠᠵᠠᠢ᠃ ᠲᠡᠭᠦᠨ ᠢ᠋ ᠨᠢ ᠬᠤᠲᠤᠭᠲᠤ ᠨᠣᠶᠠᠨ ᠦᠭᠡ ᠪᠡᠷ ᠪᠤᠰᠤ ᠦᠢᠯᠡ ᠪᠡᠷ ᠬᠡᠯᠡᠵᠦ ᠬᠠᠲᠠᠭᠤ ᠰᠢᠢᠳᠬᠡᠭᠰᠡᠨ ᠬᠡᠷᠡᠭ ᠠᠪᠠᠢ᠃ ᠳᠡᠭᠦᠦ ᠨᠣᠶᠠᠨ ᠤ᠋ ᠴᠢᠯᠠᠭᠤ ᠰᠢᠭ᠋ ᠵᠢᠷᠦᠬᠡᠨ ᠡᠴᠡ ᠭᠠᠷᠤᠭᠰᠠᠨ᠂ ᠦᠬᠦᠯ ᠰᠢᠭ ᠬᠡᠴᠡᠭᠦᠦ ᠵᠠᠷᠯᠢᠭ ᠢ᠋ ᠪᠠᠷᠳᠠᠨᠪᠠᠭᠠᠲᠤᠷ ᠡᠰᠡᠷᠭᠦᠴᠡᠵᠦ ᠦᠯᠦ ᠴᠢᠳᠠᠯᠠ᠃ ᠲᠡᠷᠡ ᠪᠡᠷ ᠴᠢᠮᠡᠭᠡ ᠦᠭᠡᠢ ᠲᠣᠯᠣᠭᠠᠢ ᠳᠣᠬᠢᠭᠠᠳ ᠲᠣᠷᠭᠠᠨ ᠬᠥᠮᠥᠯᠳᠥᠷᠭᠡ ᠲᠡᠢ ᠬᠣᠯᠠ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠡᠯᠴᠢ ᠶ᠋ᠢ ᠳᠠᠭᠠᠭᠤᠯᠤᠨ ᠶᠡᠬᠡ ᠲᠠᠯᠠ ᠶ᠋ᠢᠨ ᠳᠤᠮᠳᠠᠭᠤᠷ ᠨᠢᠰᠠᠯᠤᠭᠰᠠᠨ ᠴᠢᠯᠠᠭᠤ ᠰᠢᠭ᠋ ᠱᠤᠤᠭᠢᠨ ᠣᠳᠴᠠᠢ᠃ ᠦᠬᠦᠯ ᠬᠠᠭᠠᠴᠠᠯᠠ᠋ᠴᠠ ᠵᠢᠷᠦᠬᠡᠰᠢᠶᠡᠨ ᠬᠠᠯᠠᠰᠢᠷᠠᠵᠤ ᠭᠦᠢᠴᠡᠭᠰᠡᠨ ᠡᠪᠦᠭᠡᠨ ᠨᠣᠶᠠᠨ ᠢ᠋ ᠲᠣᠳᠣᠢᠨ ᠣᠳᠴᠢᠬᠢᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠢᠷᠡᠬᠦ ᠳ᠋ᠦ᠍ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠵᠦ᠂ ᠢᠯᠳᠦ ᠪᠡᠨ ᠠᠭᠰᠠᠭᠠᠳ ᠵᠠᠷᠯᠢᠭ ᠬᠦᠯᠢᠶᠡᠨ ᠴᠡᠷᠢᠭ ᠡᠷᠡᠰ ᠴᠢᠮᠡᠭᠡ ᠦᠭᠡᠢ ᠰᠠᠭᠤᠵᠠᠢ᠃ ᠲᠡᠳᠡᠨ ᠦ᠌ ᠴᠢᠷᠠᠢ ᠬᠢᠯᠢᠩ ᠲᠡᠢ ᠪᠠᠷᠤᠭᠠᠷ ᠪᠥᠯᠥᠭᠡ᠃ ᠰᠢᠪᠡᠷ ᠪᠠᠷᠢᠮᠠᠯ ᠮᠡᠲᠦ ᠰᠦᠭᠯᠡᠢᠨ ᠰᠠᠭᠤᠬᠤ ᠡᠷᠡᠰ ᠦ᠋ᠨ ᠳᠤᠮᠳᠠᠭᠤᠷ ᠭᠠᠭᠴᠠᠬᠠᠨ ᠮᠣᠷᠢᠨ ᠤ᠋ ᠲᠣᠪᠣᠷ ᠲᠣᠪᠣᠷ ᠠᠯᠬᠤᠭᠠᠨ ᠴᠢᠮᠡᠭᠡ ᠰᠣᠨᠣᠰᠬᠠᠨ ᠶᠠᠪᠤᠭᠰᠠᠭᠠᠷ ᠬᠡᠭᠡᠷᠡ ᠶ᠋ᠢᠨ ᠴᠠᠴᠠᠷ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠢᠷᠡᠵᠦ ᠪᠠᠭᠤᠪᠠ᠃ ᠪᠤᠷᠬᠠᠨ ᠪᠣᠯᠤᠭᠠᠴᠢ ᠨᠣᠶᠠᠨ ᠤ᠋ ᠬᠦ ᠬᠤᠶᠠᠭ ᠢ᠋ ᠡᠮᠦᠰᠬᠡᠵᠦ᠂ ᠳᠤᠭᠤᠯᠠᠭᠠ ᠶ᠋ᠢ ᠨᠢ ᠠᠰᠬᠠᠵᠤ᠂ ᠢᠯᠳᠦ ᠶ᠋ᠢ ᠪᠠᠷᠢᠭᠤᠯᠤᠭᠠᠳ ᠲᠡᠮᠡᠭᠡᠨ ᠲᠡᠷᠭᠡᠨ ᠳᠡᠭᠡᠷᠡ ᠪᠡᠶᠡ ᠶ᠋ᠢ ᠨᠢ ᠵᠠᠰᠠᠵᠤ ᠲᠠᠯᠪᠢᠭᠰᠠᠨ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ《ᠮᠢᠨᠦ ᠮᠠᠭᠤ ᠬᠣᠶᠠᠷ ᠬᠦᠦ ᠬᠥᠮᠦᠨ ᠯᠡ ᠪᠣᠯᠵᠤ ᠶᠠᠪᠤᠨᠠ ᠳᠠ》ᠭᠡᠵᠦ ᠪᠣᠳᠣᠵᠠᠢ᠃ ᠴᠢᠩᠭᠢᠭᠡᠳ ᠬᠠᠷᠠ ᠨᠢᠯᠬᠠ ᠪᠠᠷ ᠢ᠋ᠶ᠋ᠠᠨ ᠠᠮᠢ ᠠᠯᠳᠠᠭᠰᠠᠨ ᠣᠳᠬᠣᠨ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠠᠯᠲᠠᠨ ᠱᠠᠷᠢᠯ ᠤ᠋ᠨ ᠲᠣᠯᠣᠭᠠᠢ ᠳ᠋ᠤ᠌ ᠢᠷᠡᠵᠦ ᠵᠣᠭᠰᠣᠭᠠᠳ ᠭᠡᠨᠡᠨ ᠱᠣᠬᠣᠭᠣᠷᠬᠠᠯ ᠨᠢ ᠨᠡᠪᠲᠡ ᠰᠢᠩᠭᠡᠭᠰᠡᠨ ᠭᠡᠭᠡᠨ ᠮᠦᠰᠢᠶᠡᠯ ᠨᠢ ᠠᠷᠢᠯᠤᠭᠠ ᠦᠭᠡᠢ ᠬᠥᠰᠢᠭᠰᠡᠨ ᠨᠢᠭᠤᠷ ᠢ᠋ ᠨᠢ ᠤᠳᠠᠭᠠᠨ ᠰᠢᠷᠳᠡᠪᠡ᠃ ᠡᠢᠨ ᠬᠠᠷᠠᠵᠤ ᠬᠠᠷᠠᠵᠤ ᠵᠥᠭᠡᠯᠡᠨ ᠪᠥᠬᠥᠢᠨ ᠴᠠᠪ ᠬᠦᠢᠲᠡᠨ ᠮᠠᠩᠨᠠᠢ ᠳ᠋ᠤᠨᠢ ᠬᠣᠰᠢᠭᠤ ᠬᠦᠷᠭᠡᠨ ᠦᠨᠦᠰᠦᠭᠡᠳ᠂
— ᠮᠥᠩᠬᠡ ᠲᠡᠭᠷᠢ ᠮᠡᠳᠡᠲᠦᠭᠡᠢ! ᠭᠡᠮᠡᠨ ᠰᠢᠪᠡᠨᠡᠬᠦ ᠳ᠋ᠦ᠍ ᠡᠬᠢᠯᠡᠭᠡᠳ ᠳᠡᠷᠭᠡᠳᠡ ᠨᠢ ᠵᠣᠭᠰᠣᠵᠤ ᠠᠭᠰᠠᠨ ᠶᠢᠰᠦᠭᠡᠢ᠂ ᠨᠡᠭᠦᠨ ᠲᠠᠢᠵᠢ ᠬᠣᠶᠠᠷ ᠲᠦᠷᠢᠵᠦ᠂ ᠳᠠᠷᠠᠭᠠ ᠨᠢ ᠪᠦᠬᠦ ᠴᠡᠷᠢᠭ ᠦ᠋ᠳ ᠲᠦᠷᠢᠨ᠂
— ᠮᠥᠩᠬᠡ ᠲᠡᠭᠷᠢ ᠮᠡᠳᠡᠲᠦᠭᠡᠢ! ᠭᠡᠮᠡᠨ ᠨᠢᠷ ᠬᠢᠯᠡ᠃ ᠣᠭᠲᠣ ᠴᠢᠮᠡᠭᠡ ᠦᠭᠡᠢ ᠪᠥᠬᠥᠯᠵᠡᠨ ᠠᠭᠰᠠᠨ ᠪᠤᠷᠭᠠᠰᠤᠨ ᠰᠢᠭᠤᠢ ᠰᠡᠷᠲᠡᠰᠬᠢᠵᠦ᠂ ᠨᠣᠢᠷᠮᠤᠭ ᠵᠥᠭᠡᠯᠡᠨ ᠦᠯᠢᠶᠡᠬᠦ ᠰᠢᠪᠰᠢᠶᠡ ᠰᠠᠯᠬᠢᠨ ᠰᠡᠪᠡᠯᠵᠡᠬᠦ ᠰᠢᠭ ᠪᠣᠯᠤᠯᠠ᠃ ᠪᠡᠷᠲᠡᠨ ᠨᠣᠶᠠᠨ᠂ ᠪᠤᠷᠬᠠᠨ ᠪᠣᠯᠤᠭᠴᠢ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠵᠦ ᠪᠠᠢᠭᠰᠠᠨ ᠬᠦᠷᠢᠶᠡ ᠶ᠋ᠢ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠵᠤ᠂
— ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠳ ᠠ᠋! ᠲᠣᠳᠣᠢᠨ ᠨᠣᠶᠠᠨ ᠤ᠋ ᠲᠤᠭ ᠤ᠋ᠨ ᠳᠣᠣᠷᠠ ᠶᠢᠰᠦᠨ ᠲᠠᠲ᠋ᠠᠷ ᠢ᠋ ᠳᠠᠭᠠᠷᠢᠨ ᠣᠷᠣᠬᠤ ᠭᠡᠵᠦ ᠬᠤᠷᠠᠨ ᠴᠤᠭᠯᠠᠷᠠᠭᠰᠠᠨ ᠴᠡᠷᠢᠭ ᠦ᠋ᠳ ᠲᠠ ᠨᠠᠷ ᠵᠣᠷᠢᠭᠰᠠᠨ ᠵᠦᠭ ᠲᠡᠭᠡᠨ ᠶᠠᠪᠤ! ᠡᠷᠡ ᠬᠥᠮᠦᠨ ᠵᠣᠷᠢᠭᠰᠠᠨ ᠳ᠋ᠠᠭᠠᠨ᠂ ᠡᠮᠡᠭᠡᠯᠲᠦ ᠮᠣᠷᠢ ᠬᠠᠷᠠᠢᠭᠰᠠᠨ ᠳ᠋ᠠᠭᠠᠨ ᠭᠡᠬᠦ ᠪᠢᠯᠡ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠲᠤᠭ ᠤ᠋ᠨ ᠳᠣᠣᠷᠠ᠂ ᠨᠡᠭᠦᠨ ᠲᠠᠢᠵᠢ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠳᠣᠣᠷᠠ ᠤᠷᠤᠭᠰᠢᠯᠠᠭᠲᠤᠨ! ᠬᠡᠮᠡᠬᠦ ᠳ᠋ᠦ᠍ ᠢᠷᠯᠡᠭᠰᠡᠨ ᠢᠯᠳᠦ ᠰᠢᠭ ᠵᠠᠷᠯᠢᠭ ᠰᠣᠨᠣᠰᠤᠭᠰᠠᠨ ᠴᠡᠷᠢᠭ ᠦ᠋ᠳ ᠪᠠᠶᠠᠷᠯᠠᠨ ᠪᠣᠰᠴᠠᠭᠠᠵᠤ᠂
— ᠪᠠᠷᠳᠠᠨᠪᠠᠭᠠᠲᠤᠷ ᠤ᠋ᠨ ᠥᠯᠮᠡᠢ ᠪᠠᠲᠤ ᠣᠷᠣᠰᠢᠭ! ᠭᠡᠮᠡᠨ ᠨᠦᠷᠭᠢᠯᠡᠵᠦ ᠠᠪᠠᠢ᠃ ᠡᠨᠡ ᠬᠢᠷᠢ ᠲᠣᠳᠣᠢᠨ ᠣᠳᠴᠢᠬᠢᠨ ᠤ᠋ ᠬᠥᠲᠥᠴᠢ ᠴᠡᠷᠢᠭ ᠬᠠᠷᠠᠭᠤᠯ ᠵᠣᠭᠰᠣᠭᠠᠭᠰᠠᠨ ᠬᠠᠷᠠ ᠭᠡᠷ ᠡᠴᠡ ᠴᠠᠪ ᠴᠠᠭᠠᠨ ᠡᠮᠦᠰᠬᠡᠯ ᠲᠡᠢ ᠨᠢᠴᠦᠭᠦᠨ ᠪᠦᠰᠡᠭᠦᠢ ᠶ᠋ᠢ ᠲᠠᠭᠤᠭᠰᠠᠭᠠᠷ ᠭᠠᠷᠴᠤ ᠢᠷᠡᠯᠡ᠃ ᠪᠠᠷᠳᠠᠨ ᠨᠣᠶᠠᠨ ᠭᠠᠢᠬᠠᠨ ᠠᠯᠮᠠᠢᠷᠠᠵᠤ ᠳᠡᠮᠡᠢ ᠯᠡ ᠬᠣᠶᠠᠷ ᠬᠦᠦ ᠪᠡᠨ ᠬᠠᠷᠠᠪᠠᠯ ᠶᠢᠰᠦᠭᠡᠢ᠂
— ᠲᠣᠳᠣᠢᠨ ᠠᠪᠠᠭᠠ ᠶ᠋ᠢᠨ ᠠᠮᠢᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠡᠮᠡ! ᠭᠡᠪᠡ᠃
— ᠬᠤᠷᠬᠤᠨᠤᠭ ᠵᠢᠪᠤᠷ ᠠ᠋ᠴᠠ ᠲᠠ ᠨᠠᠷ ᠲᠠᠲᠠᠪᠤᠷᠢ ᠡᠮᠡᠰ ᠠᠪᠴᠤ ᠭᠠᠷᠤᠭᠰᠠᠨ ᠤᠯᠤᠰ ᠤᠤ?
— ᠦᠭᠡᠢ᠃
— ᠲᠡᠭᠡᠭᠡᠳ ᠡᠨᠡ ᠡᠮᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠶᠠᠭᠤ ᠪᠡᠳᠡᠷᠢᠵᠦ ᠶᠠᠪᠤᠳᠠᠭ ᠪᠠᠢᠨᠠ?
— ᠮᠡᠳᠡᠬᠦ ᠦᠭᠡᠢ᠃
— ᠲᠠᠲ᠋ᠠᠷ ᠡᠮᠡ ᠤᠤ?
一 ᠮᠡᠳᠡᠬᠦ ᠦᠭᠡᠢ
一 ᠬᠡᠨ ᠭᠡᠳᠡᠭ ᠬᠥᠮᠦᠨ ᠪᠣᠢ?
一 ᠮᠡᠳᠡᠬᠦ ᠦᠭᠡᠢ᠁ ᠭᠡᠵᠦ ᠬᠣᠶᠠᠷ ᠬᠥᠪᠡᠭᠦᠨ ᠠᠮᠠ ᠤᠷᠤᠯᠳᠤᠨ ᠥᠭᠦᠯᠡᠪᠡ᠃ ᠮᠥᠨᠥᠬᠢ ᠡᠮᠡ ᠨᠢᠴᠦᠭᠦᠨ ᠪᠡᠶᠡ ᠨᠢ ᠭᠡᠷᠡᠯᠲᠦᠭᠰᠡᠨ ᠨᠢᠮᠭᠡᠨ ᠴᠠᠭᠠᠨ ᠤᠤᠵᠢ ᠮᠡᠲᠦ ᠶ᠋ᠢ ᠡᠮᠦᠰᠴᠦ᠂ ᠭᠢᠯᠠ ᠬᠠᠷᠠᠬᠠᠨ ᠦᠰᠦ ᠪᠡᠨ ᠵᠠᠳᠠᠭᠠᠢ ᠬᠠᠶᠠᠭᠰᠠᠨ ᠴᠢᠷᠠᠢᠯᠢᠭ ᠪᠦᠰᠡᠭᠦᠢ ᠠᠵᠢ᠃ ᠤᠷᠤᠭᠤᠯ ᠨᠢ ᠪᠣᠯᠪᠠᠰᠤᠷᠠᠵᠤ ᠭᠦᠢᠴᠡᠭᠰᠡᠨ ᠶᠠᠭᠠᠨ ᠵᠢᠮᠢᠰ ᠮᠡᠲᠦ ᠠᠭᠠᠳ ᠬᠠᠷᠠᠴᠠ ᠨᠢ ᠢᠩᠭᠡ ᠪᠡᠨ ᠳᠠᠭᠤᠳᠠᠨ ᠭᠤᠩᠭᠠᠨᠠᠬᠤ ᠪᠣᠲᠣᠭᠣᠨ ᠤ᠋ ᠨᠢᠳᠦ ᠮᠡᠲᠦ ᠭᠤᠨᠢᠭ ᠲᠠᠢ ᠪᠢᠯᠡ᠃ ᠲᠡᠷᠡ ᠪᠡᠷ ᠬᠠᠷᠠ ᠴᠠᠭᠠᠨ ᠳᠠᠭᠤ ᠦᠭᠡᠢ ᠲᠠᠭᠤᠭᠳᠠᠨ ᠢᠷᠡᠵᠦ ᠴᠢᠮᠡᠭᠡ ᠦᠭᠡᠢ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠬᠥᠲᠥᠴᠢ ᠴᠡᠷᠢᠭ ᠮᠥᠷᠦᠨ ᠳᠡᠭᠡᠷᠡ ᠨᠢ ᠴᠣᠬᠢᠬᠤ ᠳ᠋ᠤ᠌ ᠬᠥᠭᠰᠢᠨ ᠲᠡᠮᠡᠭᠡ ᠬᠡᠪᠲᠡᠬᠦ ᠮᠡᠲᠦ ᠶᠠᠭᠬᠢᠨ ᠰᠠᠭᠤᠴᠢᠬᠠᠪᠠ᠃ ᠲᠡᠭᠦᠨ ᠦ᠌ ᠮᠠᠷᠢᠶᠠᠯᠢᠭ ᠮᠥᠷᠥ ᠢᠯᠡᠬᠡᠨ ᠠᠭᠠᠳ ᠰᠣᠷᠣᠨ ᠲᠠᠰᠢᠭᠤᠷ ᠤ᠋ᠨ ᠮᠥᠷ ᠴᠥᠭᠡᠨ ᠪᠤᠰᠤ ᠬᠦᠷᠡᠩᠲᠦᠨ ᠪᠢᠯᠡ᠃ ᠵᠠᠯᠠᠭᠤ ᠵᠠᠩᠵᠤᠳ ᠪᠦᠰᠡᠭᠦᠢ ᠶ᠋ᠢ ᠪᠠᠰᠠ ᠪᠠᠢᠴᠠᠭᠠᠭᠰᠠᠨ ᠪᠣᠯᠤᠯᠲᠠᠢ᠃
一 ᠴᠢ ᠠᠯᠢ ᠣᠪᠣᠭ ᠤ᠋ᠨ ᠬᠠᠷᠢᠶᠠᠲᠤ ᠪᠢᠯᠡ? ᠬᠡᠨ ᠦ᠌ ᠤᠳᠤᠮ ᠰᠤᠳᠤᠷ ᠤ᠋ᠨ ᠬᠥᠮᠦᠨ ᠪᠣᠢ?
一 ᠡᠩ᠁ ᠡᠩ᠁
ᠪᠦᠰᠡᠭᠦᠢ ᠶ᠋ᠢᠨ ᠨᠢᠳᠦ ᠳᠦᠷᠯᠡᠯᠵᠡᠨ᠂ ᠤᠷᠤᠭᠤᠯ ᠣᠮᠣᠯᠵᠠᠬᠤ ᠠ᠋ᠴᠠ ᠥᠭᠡᠷᠡ ᠶ᠋ᠢ ᠡᠰᠡ ᠬᠡᠯᠡᠨᠡ ᠠᠵᠢ᠃ ᠪᠡᠷᠲᠡᠨ ᠨᠣᠶᠠᠨ ᠭᠠᠢᠬᠠᠰᠢ ᠲᠠᠰᠤᠷᠠᠨ ᠶᠢᠰᠦᠭᠡᠢ ᠶ᠋ᠢ ᠬᠠᠷᠠᠪᠠᠯ᠂
一 ᠬᠡᠯᠡ ᠦᠭᠡᠢ ᠶᠦᠮ ᠰᠢᠭ ᠪᠠᠢᠨᠠ ᠪᠢᠯᠡ ᠭᠡᠪᠡ᠃ ᠪᠡᠷᠲᠡᠨ ᠨᠣᠶᠠᠨ ᠴᠥᠪᠥᠷᠢᠭᠦᠦ ᠰᠢᠭ ᠠᠮᠢᠲᠠᠨ ᠢ᠋ ᠬᠥᠯ ᠡᠴᠡ ᠲᠣᠯᠣᠭᠠᠢ ᠬᠦᠷᠲᠡᠯᠡ ᠤᠳᠠᠭᠠᠨ ᠠᠵᠢᠭᠰᠠᠨ ᠢ᠋ᠶ᠋ᠠᠨ᠂
一 ᠡᠭᠦᠨ ᠲᠡᠢ ᠴᠦ᠍ ᠶᠠᠭᠤ ᠶᠠᠷᠢᠬᠤ ᠪᠢᠯᠡ᠃ ᠲᠠᠯᠪᠢᠵᠤ ᠣᠷᠭᠢ! ᠲᠣᠯᠣᠭᠠᠢ ᠬᠠᠨᠳᠤᠭᠰᠠᠨ ᠵᠦᠭ ᠲᠡᠭᠡᠨ ᠳᠠᠯᠳᠠ ᠤᠷᠤᠭ! ᠭᠡᠯᠡ᠃ ᠬᠥᠲᠥᠴᠢ ᠴᠡᠷᠢᠭ ᠡᠪᠦᠭᠡᠨ ᠨᠣᠶᠠᠨ ᠢ᠋ ᠭᠠᠢᠬᠠᠰᠢ ᠲᠠᠰᠤᠷᠠᠭᠰᠠᠨ ᠬᠠᠷᠠᠴᠠ ᠪᠠᠷ ᠲᠦᠷᠯᠡᠬᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠰᠡᠯᠡᠮᠡ ᠪᠡᠨ ᠰᠤᠭᠤᠯᠤᠨ ᠣᠭᠵᠣᠮ ᠳᠠᠢᠯᠠᠬᠤ ᠳ᠋ᠤ᠌ ᠪᠦᠰᠡᠭᠦᠢ ᠠᠮᠢ ᠲᠠᠯᠪᠢᠵᠤ ᠪᠣᠢ ᠮᠡᠲᠦ ᠴᠢᠷᠠᠯᠠᠯᠠ᠃ ᠶᠡᠷᠦ ᠬᠡᠨ ᠦ᠌ ᠶᠠᠨᠠᠨ ᠦᠭᠡᠢ ᠴᠠᠪᠴᠢᠴᠢᠬᠠᠯᠠ ᠭᠡᠵᠦ ᠪᠣᠳᠣᠵᠠᠢ᠃ ᠭᠡᠲᠡᠯᠡ ᠬᠥᠲᠥᠴᠢ ᠡᠷᠡ ᠭᠠᠷ ᠪᠣᠭᠣᠭᠰᠠᠨ ᠰᠣᠷᠣᠨ ᠬᠦᠯᠢᠭ ᠢ᠋ ᠨᠢ ᠲᠠᠰᠤ ᠴᠠᠪᠴᠢᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠲᠡᠷᠡ ᠪᠡᠷ ᠰᠣᠷᠣᠨ ᠤ᠋ ᠲᠠᠰᠤᠷᠬᠠᠢ ᠶ᠋ᠢ ᠰᠤᠭᠤ ᠲᠡᠳᠡᠨ ᠠᠪᠴᠤ ᠪᠦᠰᠡᠭᠦᠢ ᠶ᠋ᠢ ᠨᠢᠭᠡ ᠰᠢᠪᠬᠠᠷᠤᠭᠰᠠᠨ ᠢ᠋ᠶ᠋ᠠᠨ᠂
— ᠨᠢᠳᠦᠨ ᠡᠴᠡ ᠳᠠᠯᠳᠠ ᠣᠷᠣ! ᠭᠡᠯᠡ᠃ ᠪᠠᠶᠠᠷᠯᠠᠵᠤ᠂ ᠭᠠᠢᠬᠠᠵᠤ᠂ ᠡᠷᠡᠭᠡᠯᠵᠡᠵᠦ ᠭᠦᠢᠴᠡᠭᠰᠡᠨ ᠠᠮᠢᠲᠠᠨ ᠵᠢᠭᠠᠬᠠᠨ ᠪᠣᠰᠴᠤ ᠨᠢᠭᠡ ᠬᠣᠶᠠᠷ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠨ ᠬᠠᠷᠠᠪᠠ᠃ ᠴᠢᠩᠭᠢᠭᠰᠡᠨ ᠢ᠋ᠶ᠋ᠡᠨ ᠠᠯᠬᠤᠭᠠ ᠪᠠᠨ ᠲᠦᠷᠭᠡᠰᠬᠡᠨ ᠨᠡᠯᠢᠶᠡᠳ ᠶᠠᠪᠤᠭᠠᠳ ᠵᠣᠭ ᠲᠣᠰᠣᠨ ᠵᠥᠭᠡᠯᠡᠬᠡᠨ ᠡᠷᠭᠢᠵᠦ ᠬᠠᠷᠠᠯᠠ᠃ ᠲᠡᠭᠡᠵᠦ ᠲᠡᠭᠡᠵᠦ ᠰᠠᠶᠢ ᠯᠠ ᠰᠤᠯᠠᠷᠠᠭᠰᠠᠨ ᠳ᠋ᠠᠭᠠᠨ ᠢᠲᠡᠭᠡᠪᠡ ᠪᠣᠯᠤᠯᠲᠠᠢ ᠨᠢᠴᠦᠭᠦᠨ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠤᠯᠠ ᠶ᠋ᠢ ᠭᠢᠯᠠᠯᠵᠠᠭᠤᠯᠤᠨ ᠭᠦᠶᠦᠵᠦ ᠣᠳᠬᠤ ᠳ᠋ᠤ᠌ ᠬᠥᠲᠥᠴᠢ ᠡᠷᠡ᠂
— ᠦᠨᠡᠬᠡᠷ ᠬᠡᠯᠡ ᠦᠭᠡᠢ ᠶᠦᠮ ᠰᠢᠭ ᠪᠠᠢᠨᠠ ᠠ᠋᠂ ᠵᠠᠢᠯᠠᠭᠤᠯ! ᠭᠡᠮᠡᠨ ᠢᠯᠳᠦ ᠪᠡᠨ ᠬᠤᠢ ᠳ᠋ᠤᠨᠢ ᠬᠢᠪᠡ᠃ ᠲᠡᠢᠨ ᠰᠦᠷ ᠢ᠋ ᠦᠵᠡᠭᠦᠯᠵᠦ ᠴᠠᠪᠴᠢᠭᠰᠠᠨ ᠨᠢ ᠪᠦᠰᠡᠭᠦᠢ ᠶ᠋ᠢᠨ ᠦᠨᠡᠬᠡᠷ ᠬᠡᠯᠡ ᠲᠡᠢ᠂ ᠬᠡᠯᠡ ᠦᠭᠡᠢ ᠶ᠋ᠢ ᠰᠢᠯᠭᠠᠭᠰᠠᠨ ᠰᠣᠷᠢᠯᠭᠠ ᠶᠤᠮ ᠰᠠᠨᠵᠠᠢ᠃ ᠬᠡᠯᠡ ᠦᠭᠡᠢ ᠬᠡᠦᠬᠡᠨ ᠦ᠌ ᠪᠠᠷᠠ ᠲᠠᠰᠤᠷᠠᠭᠰᠠᠨ ᠬᠣᠢᠨᠠ ᠬᠦᠷᠢᠶᠡ ᠳᠠᠶᠠᠭᠠᠷ ᠠᠮᠢᠰᠬᠤᠭᠠ ᠠᠪᠬᠤ ᠮᠡᠲᠦ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠣᠷᠣᠵᠤ᠂ ᠶᠢᠰᠦᠭᠡᠢ ᠶ᠋ᠢᠨ ᠲᠤᠭ ᠤ᠋ᠨ ᠴᠡᠷᠢᠭ ᠬᠠᠯᠬᠠ ᠨᠥᠮᠥᠷᠭᠡ ᠶ᠋ᠢᠨ ᠪᠤᠷᠭᠠᠰᠤ ᠤᠷᠤᠭᠤ ᠮᠣᠷᠳᠠᠪᠠ᠃ ᠲᠠᠮᠢᠷᠯᠠᠨ ᠨᠣᠶᠠᠨ ᠤ᠋ ᠮᠢᠩᠭᠠᠲᠤ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠮᠠᠭᠠᠯᠠᠭᠤᠯᠤᠭᠰᠠᠨ ᠱᠠᠷᠢᠯ ᠤ᠋ᠨ ᠴᠤᠪᠤᠭᠠ ᠡᠬᠡ ᠪᠣᠯᠤᠭᠰᠠᠨ ᠤᠨᠤᠨ ᠮᠥᠷᠡᠨ ᠢ᠋ᠶ᠋ᠡᠨ ᠴᠢᠭᠯᠡᠵᠦ ᠠᠪᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠤᠯ᠂ ᠨᠠᠷᠠᠨᠲᠤᠶᠠᠭᠠ᠂ ᠡᠷᠳᠡᠨᠢᠭᠤᠸᠠ᠂
ᠪᠠᠶᠠᠨᠴᠡᠴᠡᠭ᠂ ᠭᠡᠷᠡᠯ᠂ ᠠᠯᠲᠠᠨᠴᠢᠮᠡᠭ᠂ ᠳᠡᠭᠦᠦᠳᠠᠭᠤᠯᠠ᠂
ᠣᠶᠤᠨᠴᠡᠴᠡᠭ᠂ ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ ᠮᠥᠩᠬᠡᠨᠠᠰᠤᠨ᠂
ᠮᠥᠩᠭᠥᠨ᠂ ᠣᠶᠤᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠪᠠ᠋᠂ ᠭᠠᠷᠮᠠ᠂ ᠬᠡᠷᠡᠢᠳ ᠵᠣᠯ᠂ ᠬᠡᠷᠡᠢᠳ ᠮᠥᠩᠬᠡᠨᠠᠰᠤᠨ᠂
ᠬᠠᠳᠠᠴᠢᠨ ᠱᠠᠵᠢᠨ᠂ ᠠᠷᠢᠭᠤᠨ᠂ ᠰᠠᠷᠠᠨᠲᠤᠶᠠᠭᠠ᠂ ᠪᠠᠶᠠᠨᠴᠡᠴᠡᠭ