ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠵᠢᠷᠭᠤᠳᠤᠭᠠᠷ ᠪᠦᠯᠦᠭ 4-5> Бүлжхэн хатан– [монгол] Дамбын Төрбат <зургадугаар бүлэг 4-5>
118ᠪᠦᠯᠵᠢᠬᠢᠨ ᠬᠠᠲᠤᠨ– <ᠵᠢᠷᠭᠤᠳᠤᠭᠠᠷ ᠪᠦᠯᠦᠭ 4-5>
ᠬᠥᠮᠦᠨ ᠦ᠌ ᠮᠠᠭᠤ ᠳ᠋ᠤ᠌ ᠳᠤᠷᠠᠯᠠᠭᠰᠠᠨ ᠬᠠᠷᠠᠴᠤ ᠶᠠᠳᠠᠭᠤᠰ ᠪᠥᠬᠡ ᠶ᠋ᠢᠨ ᠭᠠᠭᠴᠠ ᠮᠣᠳᠣᠨ ᠤ᠋ ᠳᠡᠷᠭᠡᠳᠡ ᠪᠠᠭᠲᠠᠵᠤ ᠶᠠᠳᠠᠨ ᠴᠤᠭᠯᠠᠵᠠᠢ᠃ ᠵᠢᠭᠠᠯ ᠪᠠᠨᠳᠢ ᠨᠠᠷ᠂ ᠭᠣᠳᠣᠭᠣᠷ ᠥᠬᠢᠳ ᠮᠣᠩᠭᠣᠯ ᠬᠥᠮᠦᠨ ᠦᠵᠡᠭᠡ ᠦᠭᠡᠢ ᠰᠢᠬᠠᠮ ᠠᠭᠠᠳ ᠶᠡᠷᠦ ᠨᠢᠭᠤᠷ ᠲᠠᠭᠠᠨ ᠦᠰᠦ ᠲᠡᠢ ᠠᠮᠢᠲᠠᠨ ᠪᠠᠢᠬᠤ ᠪᠣᠯᠤᠭᠤᠵᠠᠢ ᠭᠡᠮᠡᠨ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠨᠢ ᠪᠣᠢ᠃ ᠭᠡᠲᠡᠯᠡ ᠬᠡᠳᠦ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠲᠠᠯᠠ ᠬᠡᠭᠡᠷᠡ ᠶ᠋ᠢᠨ ᠴᠡᠴᠡᠭ ᠦᠨᠦᠷᠲᠦᠭᠰᠡᠨ ᠶᠡᠬᠡ ᠬᠥᠰᠬᠡ ᠢᠷᠡᠵᠦ᠂ ᠬᠠᠮᠠᠭᠠᠯᠠᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠬᠢᠭᠡᠳ ᠬᠠᠮᠠᠭᠠᠯᠠᠭᠤᠯᠵᠤ ᠢᠷᠡᠭᠰᠡᠨ ᠭᠤᠸᠠ ᠭᠦᠩᠵᠦ ᠨᠠᠷ ᠢ᠋ ᠱᠠᠪᠠᠢ ᠪᠠᠨ ᠬᠠᠨᠲᠠᠯᠠ ᠬᠠᠷᠠᠵᠤ ᠠᠪᠴᠠᠢ᠃ ᠶᠡᠷᠦ ᠥᠪᠡᠷᠰᠡᠳ ᠰᠢᠭ ᠨᠢ᠂ ᠮᠠᠭᠠᠳ ᠴᠤ᠌ ᠦᠭᠡᠢ ᠥᠪᠡᠷᠰᠡᠳ ᠡᠴᠡ ᠨᠢ ᠴᠦ᠍ ᠢᠯᠡᠭᠦᠦ ᠴᠢᠷᠠᠢᠯᠢᠭ᠂ ᠨᠢᠷᠤᠭᠤᠯᠢᠭ ᠤᠯᠤᠰ ᠪᠠᠢᠭᠰᠠᠨ ᠳ᠋ᠤ᠌ ᠪᠠᠬᠠᠨ ᠭᠠᠢᠬᠠᠵᠤ《ᠮᠥᠨ》᠂《ᠪᠢᠰᠢ》 ᠭᠡᠮᠡᠨ ᠮᠠᠷᠭᠤᠯᠳᠤᠭᠰᠠᠨ ᠶᠠᠪᠤᠳᠠᠯ ᠪᠣᠢ ᠶᠤᠮ᠃ ᠭᠡᠲᠡᠯᠡ ᠭᠤᠷᠪᠠᠨ ᠭᠣᠣᠯ ᠤ᠋ᠨ ᠮᠣᠩᠭᠣᠯᠴᠤᠳ ᠡᠭᠦᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ᠂ ᠬᠠᠭᠠᠨ ᠠᠮᠪᠠᠭᠠᠢ ᠨᠢ ᠬᠦᠷᠲᠡᠯᠡ ᠪᠡᠶᠡ ᠪᠡᠷ ᠮᠣᠷᠢᠯᠠᠨ ᠢᠷᠡᠭᠰᠡᠨ ᠨᠢ ᠲᠡᠷᠡ ᠶᠤᠮᠰᠠᠨᠵᠠᠢ᠃ ᠬᠡᠵᠢᠶᠡᠨ ᠦ᠌ ᠨᠠᠷᠭᠢᠶᠠᠨᠴᠢ ᠲᠠᠲ᠋ᠠᠷ ᠡᠷᠡᠰ ᠦ᠋ᠨ ᠤᠳᠤᠮ ᠬᠥᠯᠥᠨ ᠳᠠᠯᠠᠢ ᠶ᠋ᠢ ᠴᠠᠯᠭᠢᠲᠠᠯᠠ᠂ ᠪᠤᠢᠷ ᠨᠠᠭᠤᠷ ᠢ᠋ ᠪᠤᠴᠠᠯᠲᠠᠯᠠ᠂ ᠣᠷᠱᠣᠨ ᠮᠥᠷᠡᠨ ᠢ᠋ ᠣᠷᠭᠢᠯᠲᠠᠯᠠ ᠶᠡᠬᠡ ᠪᠥᠵᠢᠭ ᠴᠡᠩᠭᠡᠭᠡᠨ ᠬᠢᠵᠦ ᠬᠡᠭᠡᠷᠡ ᠲᠠᠯᠠ ᠶ᠋ᠢᠨ ᠴᠠᠭᠠᠨ ᠰᠡᠳᠬᠢᠯᠲᠦ ᠡᠷᠡᠰ ᠢ᠋ ᠰᠣᠭᠲᠣᠲᠠᠯᠠ ᠳᠠᠢᠯᠠᠵᠠᠢ᠃ ᠡᠨᠡ ᠪᠣᠯ ᠲᠡᠳᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠦᠬᠦᠯ ᠦ᠋ᠨ ᠪᠥᠵᠢᠭ ᠪᠠᠢᠪᠠ᠃ ᠨᠠᠩᠭᠢᠶᠠᠳ ᠣᠷᠣᠨ ᠤ᠋ ᠵᠠᠬᠠ ᠶ᠋ᠢᠨ ᠬᠤᠰᠢᠭᠤᠨ ᠤ᠋ ᠨᠣᠶᠠᠨ ᠢᠰᠬᠡᠳᠡᠭ ᠪᠣᠷᠣ ᠳᠠᠷᠠᠰᠤ ᠤᠰᠤ ᠰᠢᠭ᠋ ᠴᠠᠯᠭᠢᠵᠤ᠂ ᠬᠠᠷᠠ ᠳᠠᠷᠠᠰᠤ ᠳᠠᠯᠠᠢ ᠰᠢᠭ ᠳᠠᠪᠠᠯᠭᠠᠯᠠᠵᠤ ᠪᠠᠢᠭᠰᠠᠨ ᠪᠥᠯᠥᠭᠡ᠃ ᠶᠡᠷᠦ ᠨᠠᠩᠭᠢᠶᠠᠳ ᠨᠣᠶᠠᠳ ᠳᠡᠷᠡᠰᠦᠨ ᠳ᠋ᠡᠭᠡᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠵᠢᠪᠦᠭᠦᠯᠵᠦ ᠪᠠᠢ ᠭᠡᠮᠡᠨ ᠢᠰᠬᠡᠳᠡᠭ ᠪᠠᠢᠵᠤ ᠴᠤ᠌ ᠪᠣᠯᠬᠤ ᠶᠤᠮ᠃ ᠭᠡᠲᠡᠯᠡ ᠲᠠᠲ᠋ᠠᠷ ᠨᠣᠶᠠᠳ ᠦᠰᠲᠡᠨ ᠡᠴᠡ ᠪᠡᠨ ᠥᠷᠢᠰᠴᠦ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠦᠷᠲᠡᠬᠦ ᠨᠢ ᠨᠣᠳ ᠪᠣᠯᠠᠢ᠃ ᠴᠢᠰᠤᠨ ᠲᠥᠷᠥᠯ ᠦ᠋ᠨ ᠮᠣᠩᠭᠣᠯ ᠨᠣᠶᠠᠳ ᠢ᠋ ᠬᠠᠷᠢ ᠡᠯᠢᠭᠡ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠪᠠᠷᠢᠵᠤ ᠥᠭᠴᠦ ᠭᠣᠣᠯ ᠢ᠋ ᠨᠢ ᠲᠠᠰᠤᠯᠤᠭᠤᠯᠵᠤ᠂ ᠭᠣᠯᠣᠮᠲᠠ ᠶ᠋ᠢ ᠨᠢ ᠰᠠᠮᠤᠷᠤᠭᠤᠯᠤᠭᠠᠳ ᠪᠠᠢᠬᠤ ᠶᠠᠮᠠᠷ ᠯᠠ ᠣᠯᠢᠭ ᠪᠠᠢᠪᠠ ᠭᠡᠵᠦ᠁ ᠡᠨᠡ ᠨᠢᠭᠦᠯᠲᠦ ᠦᠢᠯᠡ ᠳ᠋ᠡᠭᠡᠨ ᠭᠤᠨᠢᠵᠤ᠂ ᠭᠤᠲᠤᠵᠤ ᠬᠥᠯᠴᠥᠭᠦᠦ ᠮᠠᠨᠠᠨ ᠳ᠋ᠤ᠌ ᠤᠮᠪᠠᠬᠤ ᠶ᠋ᠢ ᠶᠠᠭᠠᠷᠠᠳᠠᠭ ᠪᠠᠢᠵᠤ ᠴᠤ᠌ ᠮᠡᠳᠡᠨᠡ᠃ ᠶᠡᠷᠦ ᠲᠠᠲᠠᠷ ᠨᠣᠶᠠᠳ ᠤ᠋ᠨ ᠵᠣᠪᠠᠯᠠᠩ ᠶᠡᠬᠡ᠂ ᠡᠨᠡ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ ᠪᠣᠯ ᠲᠦᠷᠢᠶᠡᠰᠦᠯᠡᠵᠦ ᠰᠠᠭᠤᠭᠰᠠᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠣᠯᠢᠶᠠᠨ ᠳ᠋ᠤ᠌ ᠲᠦᠮᠡᠨ ᠡᠷᠦᠬᠡ ᠲᠡᠢ ᠶᠢᠰᠦᠨ ᠲᠠᠲ᠋ᠠᠷ ᠵᠢᠪᠬᠦ ᠪᠢᠵᠡ᠃ ᠣᠳᠣ ᠴᠤ᠌ ᠭᠡᠰᠡᠨ ᠲᠡᠳᠡ ᠪᠠᠰᠠ ᠯᠠ ᠨᠢᠭᠦᠯᠲᠦ ᠦᠢᠯᠡ ᠦᠢᠯᠡᠳᠬᠦ ᠪᠡᠷ ᠴᠤᠭᠯᠠᠭᠠᠳ ᠪᠠᠢᠪᠠ᠃ ᠡᠨᠡ ᠬᠢᠷᠢ ᠬᠦᠷᠢᠶᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠲᠤᠰᠬᠠᠢᠯᠠᠨ ᠪᠠᠷᠢᠵᠤ ᠵᠡᠭᠦᠦ ᠣᠷᠣᠬᠤ ᠵᠠᠢ ᠦᠭᠡᠢ ᠬᠠᠷᠠᠭᠤᠯ ᠮᠠᠨᠠᠭᠠ ᠵᠣᠭᠰᠣᠭᠰᠠᠨ ᠬᠥᠯᠲᠥᠷᠭᠡ ᠲᠡᠢ ᠴᠠᠭᠠᠨ ᠦᠷᠭᠦᠭᠡᠨ ᠡᠴᠡ ᠮᠣᠩᠭᠣᠯ ᠳᠠᠢᠴᠢᠳ ᠢ᠋ ᠲᠠᠭᠤᠵᠤ ᠨᠠᠭᠠᠰᠢᠯᠠᠵᠠᠢ᠃ ᠲᠡᠳᠡᠨ ᠢ᠋ ᠬᠣᠨᠢ ᠬᠣᠯᠪᠣᠵᠤ ᠪᠣᠢ ᠮᠡᠲᠦ ᠭᠠᠷ ᠭᠠᠷ ᠠ᠋ᠴᠠ ᠨᠢ ᠬᠡᠯᠬᠢᠨ ᠦᠬᠦᠯᠦᠭᠦᠲᠡ ᠵᠠᠩᠭᠢᠳᠴᠤ᠂ ᠲᠡᠷᠡ ᠬᠦ᠌ ᠨᠢᠭᠦᠯᠲᠦ ᠣᠯᠣᠰᠣᠨ ᠤ᠋ ᠬᠣᠶᠠᠷ ᠦᠵᠦᠭᠦᠷ ᠢ᠋ ᠴᠢᠪᠢᠯᠲᠦ ᠴᠢᠷᠠᠢ ᠳ᠋ᠤᠨᠢ ᠬᠢᠯᠢᠩ ᠲᠣᠳᠣᠷᠠᠭᠰᠠᠨ ᠲᠠᠲ᠋ᠠᠷ ᠡᠷᠡᠰ ᠪᠠᠲᠤ ᠠᠳᠬᠤᠭᠰᠠᠨ ᠪᠠᠢᠪᠠ᠃ ᠨᠠᠢᠷ ᠤ᠋ᠨ ᠭᠡᠷ ᠲᠦ᠍ ᠮᠣᠷᠢᠯᠠᠵᠤ ᠢᠷᠡᠭᠡᠳ᠂ ᠬᠡᠭᠦᠷ ᠦ᠋ᠨ ᠭᠠᠵᠠᠷ ᠣᠳᠴᠤ ᠪᠣᠢ ᠮᠣᠩᠭᠣᠯ ᠡᠷᠡᠰ ᠦ᠋ᠨ ᠴᠢᠷᠠᠢ ᠭᠤᠨᠢᠭ ᠲᠠᠢ ᠪᠥᠯᠥᠭᠡ᠃ ᠪᠦᠭᠦᠳᠡ ᠬᠥᠯ ᠨᠢᠴᠦᠭᠦᠨ ᠲᠤᠯᠠ ᠶᠠᠳᠠᠵᠤ ᠰᠢᠷᠣᠢ ᠴᠢᠯᠠᠭᠤ ᠦᠯᠦ ᠱᠠᠷᠵᠢᠭᠢᠨᠠᠬᠤ ᠠᠭᠠᠳ ᠬᠡᠢ ᠦᠵᠡᠭᠳᠡᠯ ᠮᠡᠲᠦ ᠴᠢᠪ ᠴᠢᠮᠡᠭᠡ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠴᠤᠭᠯᠠᠨ ᠢᠷᠡᠭᠰᠡᠨ ᠣᠯᠠᠨ ᠤ᠋ ᠳᠤᠮᠳᠠ ᠣᠷᠣᠵᠤ ᠢᠷᠡᠭᠡᠳ ᠵᠣᠭᠰᠣᠪᠠ᠃ ᠢᠯᠠᠭᠠ ᠨᠢᠰᠬᠦ ᠰᠣᠨᠣᠰᠳᠠᠮᠠ ᠠᠨᠢᠷ ᠦᠭᠡᠢ ᠪᠣᠯᠵᠠᠢ᠃ ᠡᠯᠢᠭᠡ ᠲᠠᠲᠠᠭᠤ ᠴᠠᠷᠺᠢᠯ ᠨᠣᠲᠤᠢ ᠶ᠋ᠢᠨ ᠳᠡᠭᠦᠦ᠂ ᠡᠷᠲᠡᠨ ᠦ᠌ ᠦᠰ ᠬᠣᠨᠵᠢᠩᠲᠤ ᠵᠡᠯᠢᠪᠤᠬᠠ ᠨᠣᠶᠠᠨ᠂
一 ᠠᠮᠪᠠᠭᠠᠢ᠂ ᠴᠢᠮᠠ ᠳ᠋ᠤ᠌ ᠨᠤᠲᠤᠭ ᠤ᠋ᠨ ᠵᠦᠭ ᠢᠯᠡᠭᠡᠬᠦ ᠨᠢᠭᠡᠨ ᠡᠯᠴᠢ ᠶ᠋ᠢᠨ ᠠᠮᠢ ᠣᠯᠭᠣᠶᠠ᠂ ᠥᠪᠡᠷ ᠦ᠋ᠨ ᠡᠷᠡᠰ ᠦ᠋ᠨ ᠴᠢ ᠬᠡᠨ ᠳ᠋ᠦ᠍ᠨᠢ ᠡᠮᠡᠭᠡᠯ ᠦ᠋ᠨ ᠳᠠᠭᠤᠤ ᠪᠠᠷᠢᠭᠤᠯᠵᠤ ᠡᠯᠢᠭᠡᠨ ᠰᠠᠳᠤᠨ ᠳ᠋ᠠᠭᠠᠨ ᠮᠣᠷᠳᠠᠭᠤᠯᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠳᠠ? ᠭᠡᠪᠡ᠃ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠭᠠᠷ ᠬᠦᠯᠢᠶᠡᠲᠡᠢ᠂ ᠨᠢᠳᠦ ᠪᠣᠭᠣᠯᠲᠠ ᠲᠠᠢ ᠲᠤᠯᠠ᠂
一 ᠵᠠᠯᠢᠪᠤᠬᠠ ᠡᠷᠭᠢᠭᠡᠳ ᠢᠷᠡᠬᠦ ᠢᠯᠳᠦᠨ ᠦ᠌ ᠬᠢᠨᠢ ᠢᠷ ᠡᠴᠡ ᠠᠶᠤᠭᠠ ᠦᠭᠡᠢ ᠶᠦᠮ ᠪᠣᠯ ᠴᠢ ᠮᠢᠨᠦ ᠡᠷᠡᠰ ᠢ᠋ ᠪᠦᠭᠦᠳᠡ ᠶ᠋ᠢ ᠰᠤᠯᠠᠯᠠᠭᠲᠤᠨ! ᠭᠡᠬᠦ ᠳ᠋ᠦ᠍ ᠵᠠᠯᠢᠪᠤᠬᠠ ᠲᠠᠯᠠ ᠶ᠋ᠢᠨ ᠪᠣᠯᠵᠣᠮᠣᠷ ᠰᠣᠴᠢᠵᠤ ᠳᠠᠷᠬᠢᠲᠠᠯᠠ ᠨᠢᠭᠡ ᠶᠡᠬᠡ ᠲᠣᠮᠣ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠂
— ᠶᠠᠭᠤ ᠶᠠᠷᠢᠨᠠ ᠴᠢ᠂ ᠳᠠᠢᠰᠤᠨ ᠤ᠋ ᠲᠣᠭᠠ ᠬᠣᠷᠣᠪᠠᠯ᠂ ᠥᠪᠡᠷ ᠦ᠋ᠨ ᠲᠣᠭᠠ ᠨᠡᠮᠡᠭᠳᠡᠳᠡᠭ ᠭᠡᠳᠡᠭ ᠪᠢᠰᠢ ᠤᠤ ᠬᠡᠮᠡᠪᠡ᠃ ᠠᠮᠪᠠᠭᠠᠢ ᠬᠠᠭᠠᠨ ᠡᠷᠡᠳᠡᠭᠦᠦ ᠰᠠᠢᠬᠠᠨ ᠳᠠᠭᠤ ᠪᠠᠨ ᠥᠨᠳᠥᠷᠰᠡᠭᠡᠨ᠂
— ᠳᠠᠯᠠᠨ ᠡᠷᠡ ᠨᠠᠮᠠᠶ᠋ᠢ ᠳᠠᠭᠠᠵᠤ ᠭᠠᠷᠤᠭᠰᠠᠨ ᠪᠢᠯᠡ᠃ ᠪᠤᠷᠤᠭᠤ ᠦᠭᠡᠢ ᠡᠷᠡᠰ ᠢ᠋ ᠲᠠᠯᠪᠢᠭᠲᠤᠨ! ᠪᠡᠯᠡᠭ ᠡᠪᠦᠷᠲᠦᠯᠡᠵᠦ ᠢᠷᠡᠭᠰᠡᠨ ᠪᠣᠯᠬᠤ ᠠ᠋ᠴᠠ ᠡᠯᠢᠭᠡ ᠪᠤᠷᠤᠭᠤᠯᠠᠨ ᠢᠷᠡᠭᠡ ᠦᠭᠡᠢ ᠪᠢᠯᠡ᠃ ᠴᠢ ᠰᠤᠯᠠᠯᠠ! ᠬᠠᠷᠢᠨ ᠳᠠᠯᠠᠨ ᠰᠤᠮᠤ ᠴᠢᠨᠢ ᠢᠯᠡᠭᠦᠳᠡᠭᠡᠳ ᠪᠠᠢᠪᠠᠯ ᠠᠮᠢᠨ ᠪᠤᠰᠤ ᠭᠠᠵᠠᠷ ᠮᠢᠨᠢ ᠳᠠᠯᠠᠨ ᠤᠳᠠᠭᠠ ᠬᠠᠷᠪᠤᠵᠤ ᠪᠠᠬᠠ ᠪᠠᠨ ᠬᠠᠩᠭᠠᠭᠲᠤᠨ! ᠭᠡᠯᠡ᠃ ᠵᠠᠯᠢᠪᠤᠬᠠ ᠳᠣᠭᠣᠭᠢ ᠲᠠᠢ ᠢᠨᠢᠶᠡᠵᠦ᠂
— ᠪᠡᠷᠭᠡᠨ ᠭᠦᠩᠵᠦ ᠪᠡᠨ ᠶᠠᠭᠠᠬᠢᠬᠤ ᠪᠣᠢ᠂ ᠪᠢᠳᠡ? ᠭᠡᠬᠦ ᠳ᠋ᠦ᠍ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠬᠣᠭᠣᠯᠠᠢ ᠥᠭᠡᠳᠡ ᠪᠥᠭᠡᠮ ᠬᠠᠷᠠ ᠶᠠᠭᠤᠮᠠ ᠣᠭᠰᠢᠨ ᠬᠡᠰᠡᠭ ᠵᠠᠭᠤᠷᠠ ᠴᠢᠮᠡᠭᠡ ᠲᠠᠰᠤᠷᠠᠪᠠ᠃ ᠬᠡᠯᠡᠬᠦ ᠦᠭᠡ᠂ ᠵᠠᠬᠢᠬᠤ ᠭᠡᠷᠢᠶᠡᠰ ᠵᠥᠩᠳᠡᠭᠡᠨ ᠪᠠᠢᠭᠰᠠᠨ ᠴᠤ᠌ ᠳᠠᠭᠤ ᠰᠠᠭᠠᠷᠠᠯᠳᠤᠨ᠂ ᠬᠣᠭᠣᠯᠠᠢ ᠵᠠᠩᠭᠢᠷᠠᠵᠤ ᠬᠥᠮᠦᠨ ᠳ᠋ᠦ᠍ ᠮᠠᠭᠤ ᠪᠠᠨ ᠦᠵᠡᠭᠦᠯᠴᠢᠬᠡᠬᠦ ᠭᠡᠳ ᠪᠠᠢᠯᠠ᠃ ᠵᠠᠯᠢᠪᠤᠬᠠ᠂
— ᠮᠡᠷᠭᠡᠨ ᠬᠠᠭᠠᠨ ᠲᠠ ᠰᠣᠶᠣᠷᠬᠠᠵᠤ ᠬᠠᠢᠷᠠᠯᠠ᠂ ᠪᠦᠲᠦᠨ ᠭᠦᠩᠵᠦ ᠪᠡᠨ ᠪᠢᠳᠡ ᠶᠠᠭᠠᠬᠢᠬᠤ ᠪᠣᠢ⁈ ᠭᠡᠬᠦ ᠳ᠋ᠦ᠍ ᠠᠮᠪᠠᠭᠠᠢ ᠬᠠᠭᠠᠨ᠂
— ᠮᠢᠬᠠ ᠴᠢᠰᠤᠨ ᠤ᠋ ᠮᠢᠨᠢ ᠲᠠᠰᠤᠷᠬᠠᠢ ᠪᠢᠯᠡ᠃ ᠲᠥᠷᠥᠭᠦᠯᠵᠦ ᠥᠰᠬᠡᠭᠰᠡᠨ ᠡᠴᠢᠭᠡ ᠬᠠᠭᠠᠨ ᠨᠢ ᠲᠥᠷᠥ ᠶ᠋ᠢᠨ ᠲᠥᠯᠥᠭᠡ ᠠᠮᠢ ᠶ᠋ᠢ ᠨᠢ ᠵᠣᠯᠢᠯᠠ᠃ ᠮᠢᠨᠦ ᠭᠦᠩᠵᠦ ᠨᠠᠮᠠᠶ᠋ᠢ ᠣᠢᠯᠠᠭᠠᠨᠠ ᠭᠡᠬᠦ ᠳ᠋ᠦ᠍ ᠴᠢᠮᠡᠭᠡ ᠦᠭᠡᠢ ᠤᠬᠢᠯᠠᠵᠤ ᠰᠠᠭᠤᠭᠰᠠᠨ ᠭᠦᠩᠵᠦ᠂
— ᠬᠠᠭᠠᠨ ᠠᠪᠤ ᠲᠠᠨ ᠤ᠋ ᠲᠦᠮᠡᠨ ᠵᠥᠪ! ᠭᠡᠵᠦ ᠴᠠᠩᠭᠢᠨᠠᠪᠠ᠃ ᠠᠮᠪᠠᠭᠠᠢ ᠶ᠋ᠢᠨ ᠳᠣᠲᠣᠷᠠ ᠴᠡᠯᠮᠡᠭᠡᠳ ᠢᠷᠡᠵᠡᠢ᠃《᠁ ᠡᠢᠮᠦ ᠥᠬᠢᠨ ᠲᠥᠷᠥᠭᠦᠯᠦᠭᠰᠡᠨ ᠬᠠᠭᠠᠨ ᠪᠢᠯᠡ᠂ ᠪᠢ》 ᠭᠡᠵᠦ ᠣᠮᠣᠭ ᠪᠠᠷᠳᠠᠮ ᠪᠣᠳᠣᠬᠤ ᠠᠭᠱᠠᠨ ᠳ᠋ᠤ᠌ ᠠᠪᠠᠭᠠ ᠨᠣᠶᠠᠨ ᠨᠡᠭᠦᠳᠡᠯ ᠠᠯᠳᠠᠵᠤ ᠬᠣᠵᠢᠭᠳᠠᠭᠰᠠᠨ ᠳ᠋ᠤ᠌ ᠠᠭᠤᠷᠰᠠᠭᠰᠠᠨ ᠲᠡᠮᠦᠵᠢᠨ ᠦᠭᠡ᠂
— ᠠᠢᠯ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠬᠤ ᠶᠠᠯᠠ ᠶᠠᠩᠬᠠᠨ ᠳ᠋ᠤ᠌ ᠤᠨᠠᠭᠠᠵᠤ ᠪᠠᠢᠨᠠ! ᠭᠡᠪᠡ᠃ ᠠᠮᠪᠠᠭᠠᠢ ᠶ᠋ᠢᠨ ᠵᠢᠷᠦᠬᠡ ᠶᠣᠭ ᠬᠢᠭᠡᠳ ᠶᠠᠪᠤᠴᠢᠬᠠᠬᠤ ᠠᠭᠱᠠᠨ ᠳ᠋ᠤ᠌ ᠤᠬᠠᠭᠠᠨᠲᠤ ᠪᠤᠭᠤᠷᠤᠯ ᠬᠠᠷᠯᠢ ᠺᠤ ᠬᠠᠲᠤᠨ ᠤ᠋᠂
— ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠬᠠᠭᠠᠨ ᠲᠠᠨ ᠤ᠋ ᠵᠥᠪ ᠮᠡᠲᠦ ᠠ᠋! ᠬᠠᠷᠢᠨ ᠭᠦᠩᠵᠦ ᠬᠡᠮᠡᠨᠡ ᠭᠦᠩᠵᠦ ᠪᠡᠨ ᠶᠠᠪᠤᠭᠤᠯᠬᠤ ᠤᠤ? ᠭᠡᠮᠡᠨ ᠠᠰᠠᠭᠤᠭᠰᠠᠨ ᠨᠢ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠤᠭᠳᠠᠯᠠ᠃ ᠨᠠᠮ ᠭᠦᠮ ᠠᠵᠢ᠃ ᠴᠢᠩᠭᠢᠲᠡᠯᠡ ᠲᠩᠷᠢ ᠶ᠋ᠢᠨ ᠴᠡᠩᠬᠡᠷ ᠰᠠᠯᠬᠢ ᠬᠦᠯᠦᠭᠯᠡᠨ ᠬᠥᠩᠬᠥᠷ ᠬᠣᠷᠴᠢ ᠶ᠋ᠢᠨ ᠬᠤᠨ ᠬᠤᠭᠤᠷ ᠤ᠋ᠨ ᠠᠶᠠᠯᠭᠤ ᠳᠠᠭᠤᠷᠢᠰᠴᠤ᠂
— ᠬᠠᠨ ᠤᠯᠤᠰ ᠤᠬᠠᠭᠠᠨ ᠭᠦᠶᠦᠯᠭᠡᠵᠦ
ᠬᠠᠷᠠᠴᠤ ᠶ᠋ᠢᠨ ᠥᠬᠢᠨ ᠲᠡᠪᠡᠷᠢᠭᠦᠯᠦᠭᠰᠡᠨ ᠪᠢᠯᠡ
ᠬᠠᠷᠠ ᠮᠥᠷ ᠦ᠋ᠨ ᠨᠢᠭᠦᠯ ᠱᠦᠭᠯᠡᠵᠦ
ᠬᠠᠭᠠᠨ ᠰᠦᠯᠳᠡ ᠭᠣᠳᠣᠢᠭᠰᠠᠨ ᠭᠡᠳᠡᠭ ᠪᠢᠯᠡ ᠭᠡᠵᠦ ᠠᠶᠠᠯᠭᠤᠯᠠᠨ ᠤᠴᠢᠷᠯᠠᠬᠤ ᠨᠢ ᠰᠣᠨᠣᠰᠳᠠᠵᠤ ᠠᠪᠠᠢ᠃ ᠠᠮᠪᠠᠭᠠᠢ ᠬᠠᠭᠠᠨ ᠶᠠᠰᠤ ᠵᠢᠭᠠᠵᠤ᠂
— ᠠᠷᠭᠠ ᠪᠠᠷᠠᠭᠰᠠᠨ ᠲᠠ ᠨᠠᠷ ᠤ᠋ᠨ ᠰᠢᠲᠦᠭᠡᠨ ᠠᠯᠲᠠᠨ ᠤᠯᠤᠰ ᠰᠢᠭ᠋ ᠴᠢᠨᠢ ᠮᠠᠭᠤ ᠵᠠᠯᠢ ᠬᠡᠷᠡᠭᠯᠡᠵᠦ ᠬᠠᠭᠠᠨ ᠤ᠋ ᠭᠦᠩᠵᠦ ᠶ᠋ᠢᠨ ᠨᠡᠷᠡ ᠪᠡᠷ ᠬᠠᠷᠠᠴᠤ ᠶ᠋ᠢᠨ ᠥᠬᠢᠨ ᠠᠪᠴᠢᠷᠠᠭᠠ ᠦᠭᠡᠢ ᠡᠷᠡ ᠵᠣᠷᠢᠭ ᠲᠠᠭᠠᠨ ᠬᠢᠯᠠᠢᠵᠤ ᠰᠠᠭᠤᠨᠠ᠃ ᠥᠪᠡᠷ ᠦ᠋ᠨ ᠶᠠᠭᠤᠮᠠ ᠥᠷᠢ ᠦᠭᠡᠢ ᠭᠡᠳᠡᠭ ᠳᠡ ᠭᠡᠪᠡ᠃ ᠲᠠᠲ᠋ᠠᠷ ᠡᠷᠡᠰ ᠦᠭᠡ ᠶ᠋ᠢᠨ ᠨᠡᠭᠦᠳᠡᠯ ᠬᠣᠵᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠯᠠᠢ᠂ ᠵᠠᠯᠢᠪᠤᠬᠠ ᠨᠣᠶᠠᠨ ᠠᠯᠬᠤᠮ ᠪᠦᠷᠢ ᠳ᠋ᠡᠭᠡᠨ ᠱᠠᠯᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠨᠡᠭᠦᠳᠡᠯ ᠮᠤᠬᠤᠷᠳᠠᠵᠤ ᠪᠣᠢ ᠲᠤᠯᠠ ᠰᠡᠴᠡ ᠰᠣᠷᠢᠭᠰᠠᠨ ᠦᠭᠡ ᠶ᠋ᠢᠨ ᠬᠠᠶᠠᠯᠭᠠ ᠪᠠᠨ ᠪᠤᠰᠢᠭᠤᠬᠠᠨ ᠳᠠᠭᠤᠰᠬᠠᠬᠤ ᠶ᠋ᠢᠨ ᠮᠥᠨ ᠪᠣᠯᠵᠤ᠂
— ᠠᠮᠪᠠᠭᠠᠢ᠂ ᠡᠯᠴᠢ ᠪᠡᠨ ᠰᠣᠩᠭᠣᠭᠲᠤᠨ! ᠭᠡᠪᠡ᠃ ᠠᠮᠪᠠᠭᠠᠢ ᠬᠠᠭᠠᠨ ᠳ᠋ᠤ᠌ ᠶᠠᠭᠤ ᠶᠠᠭᠤᠨ ᠤ᠋ ᠡᠮᠦᠨᠡ ᠲᠤᠯᠭᠤᠷ ᠪᠡᠶᠡ ᠲᠡᠢ ᠭᠡᠷᠭᠡᠢ ᠨᠢ ᠪᠠᠰᠤᠳ ᠤ᠋ᠨ ᠪᠠᠯᠠᠭᠴᠢ ᠬᠢᠶᠡ ᠶ᠋ᠢ ᠭᠠᠷᠭᠠᠵᠤ ᠥᠭᠬᠦ ᠳ᠋ᠡᠭᠡᠨ᠂
— ᠢᠷᠡᠬᠦ ᠳ᠋ᠦ᠍ ᠴᠢᠨᠢ ᠬᠦᠦ ᠲᠡᠢ ᠤᠭᠲᠤᠶᠠ! ᠭᠡᠮᠡᠨ ᠰᠢᠪᠡᠨᠡᠵᠦ ᠠᠭᠰᠠᠨ ᠨᠢ ᠰᠠᠨᠠᠭᠳᠠᠵᠠᠢ᠃ ᠥᠭᠡᠷᠡ ᠶ᠋ᠢ ᠪᠣᠳᠣᠭᠰᠠᠨ ᠦᠭᠡᠢ᠂
— ᠪᠠᠰᠤᠳ ᠤ᠋ᠨ ᠪᠠᠯᠠᠭᠴᠢ! ᠭᠡᠬᠦ ᠳ᠋ᠦ᠍ ᠬᠦ ᠬᠤᠶᠠᠭ ᠬᠠᠷᠰᠢᠬᠤ ᠰᠣᠨᠣᠰᠳᠠᠵᠤ ᠲᠦᠳᠡᠬᠡᠨ ᠬᠡᠨ ᠨᠢᠭᠡᠨ ᠦ᠌ ᠠᠮᠢᠰᠬᠤᠭᠠ ᠣᠢᠷᠠᠲᠤᠨ᠂
— ᠪᠢ ᠢᠷᠡᠯᠡ᠂ ᠬᠠᠭᠠᠨᠲᠠᠨ ᠭᠡᠬᠦ ᠪᠠᠷᠭᠢᠯ ᠳᠠᠭᠤ ᠰᠣᠨᠣᠰᠲᠠᠯᠠ᠃ ᠠᠮᠪᠠᠭᠠᠢ ᠬᠠᠭᠠᠨ ᠵᠠᠯᠠᠭᠤ ᠪᠠᠷᠠ ᠪᠣᠯᠤᠭᠠᠴᠢ ᠶ᠋ᠢᠨ ᠳᠠᠭᠤ ᠴᠣᠭᠯᠢᠭ ᠪᠠᠢᠭᠠ ᠳ᠋ᠤ᠌ ᠪᠠᠰᠠ ᠬᠦ᠌ ᠵᠣᠷᠢᠭᠵᠢᠵᠤ᠂
— ᠵᠠᠯᠢᠪᠤᠬᠠ! ᠴᠢ ᠮᠢᠨᠦ ᠬᠠᠷᠠᠴᠠᠨ ᠠ᠋ᠴᠠ ᠠᠶᠤᠭᠠ ᠦᠭᠡᠢ ᠪᠣᠯ ᠨᠢᠳᠦᠨ ᠦ᠌ ᠮᠢᠨᠢ ᠪᠣᠭᠣᠯᠲᠠ ᠶ᠋ᠢ ᠠᠪᠤᠭᠲᠤᠨ! ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠮᠢᠨᠦ ᠪᠡᠶᠡ ᠬᠥᠮᠦᠨ ᠦ᠌ ᠨᠢᠭᠤᠷ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠢᠭᠦᠯ ᠬᠢᠭᠡ ᠦᠭᠡᠢ ᠪᠢᠯᠡ ᠭᠡᠬᠦ ᠳ᠋ᠦ᠍ ᠬᠡᠨ ᠨᠢᠭᠡᠨ ᠦ᠌ ᠰᠢᠷᠦᠭᠦᠨ ᠭᠠᠷ ᠨᠢᠳᠦᠨ ᠦ᠌ ᠬᠢᠨᠢ ᠪᠣᠭᠣᠯᠲᠠ ᠶ᠋ᠢ ᠬᠠᠭᠤ ᠲᠠᠲᠠᠪᠠ᠃ ᠠᠮᠪᠠᠭᠠᠢ ᠬᠠᠭᠠᠨ ᠰᠠᠶᠢ ᠨᠢᠭᠡ ᠠᠮᠢᠰᠬᠤᠭᠠ ᠠᠪᠴᠤ ᠲᠣᠭᠣᠷᠢᠵᠤ ᠵᠣᠭᠰᠣᠭᠰᠠᠨ ᠲᠦᠮᠡᠨ ᠲᠠᠲᠠᠷ ᠢᠷᠭᠡᠳ ᠢ᠋ ᠬᠠᠷᠠᠴᠠ ᠲᠠᠯᠲᠠᠷᠢᠲᠠᠯᠠ ᠴᠣᠭᠣ ᠰᠢᠷᠲᠡᠵᠦ᠂ ᠬᠣᠨᠢ ᠰᠢᠭ᠋ ᠬᠣᠯᠪᠣᠭᠤᠯᠤᠭᠰᠠᠨ ᠡᠷᠡᠰ ᠢ᠋ᠶ᠋ᠡᠨ ᠨᠢᠭᠡ ᠬᠠᠷᠠᠵᠤ᠂ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠵᠠᠷᠯᠢᠭ ᠬᠦᠯᠢᠶᠡᠵᠦ ᠰᠥᠭᠥᠳᠦᠭᠰᠡᠨ ᠪᠠᠰᠤᠳ ᠤ᠋ᠨ ᠪᠠᠯᠠᠭᠴᠢ ᠳᠡᠭᠡᠷᠡ ᠬᠠᠷᠠᠴᠠ ᠲᠣᠭᠲᠠᠪᠠ᠃
— ᠪᠠᠰᠤᠳ ᠤ᠋ᠨ ᠪᠠᠯᠠᠭᠴᠢ ᠴᠢ ᠲᠣᠭᠲᠠᠭᠠᠵᠤ ᠠᠪ! ᠭᠡᠳ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠰᠢᠷᠳᠡᠨ ᠤᠬᠠᠭᠠᠨ ᠪᠣᠳᠣᠯ ᠢ᠋ᠶ᠋ᠠᠨ ᠬᠣᠯᠠ ᠶ᠋ᠢᠨ ᠬᠣᠯᠠ ᠳ᠋ᠤ᠌ ᠪᠡᠯᠴᠢᠭᠡᠵᠦ ᠥᠭᠦᠯᠡᠷᠦᠨ᠄
ᠨᠠᠢᠷ ᠪᠦᠬᠦᠨ ᠢ᠋ ᠲᠠᠰᠤᠯᠤᠭᠴᠢ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ
ᠨᠡᠷᠡᠲᠦ ᠰᠢᠲᠦᠭᠡᠨ ᠰᠣᠨᠣᠰᠤᠭ!
ᠬᠤᠷᠢᠮ ᠪᠦᠬᠦᠨ ᠢ᠋ ᠲᠠᠰᠤᠯᠤᠭᠴᠢ ᠬᠤᠪᠢ ᠦᠭᠡᠢ ᠲᠠᠲ᠋ᠠᠷ ᠤ᠋ᠨ
ᠬᠤᠰᠤᠲᠤ ᠰᠢᠲᠦᠭᠡᠨ ᠰᠣᠨᠣᠰᠤᠭ!
ᠲᠥᠷᠥ ᠪᠡᠨ ᠲᠦᠪᠰᠢᠳᠬᠡᠬᠦ ᠠᠮᠪᠠᠭᠠᠢ ᠪᠢ
ᠲᠥᠷᠥᠭᠰᠡᠨ ᠭᠦᠩᠵᠦ ᠪᠡᠨ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ
ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠬᠠᠨ ᠬᠥᠪᠡᠭᠦᠨ ᠳ᠋ᠦ᠍
ᠢᠷᠦᠭᠡᠯ ᠦ᠋ᠨ ᠬᠠᠮᠲᠤ ᠡᠪᠦᠷᠲᠦᠯᠡᠵᠦ ᠢᠷᠡᠭᠰᠡᠨ
ᠤᠴᠠᠷᠠᠯ ᠪᠦᠷᠢᠳᠦᠭᠰᠡᠨ ᠰᠡᠳᠬᠢᠯ ᠢ᠋ ᠮᠢᠨᠢ ᠡᠳᠡ
ᠤᠰᠤ ᠰᠠᠴᠤᠵᠤ ᠤᠨᠲᠠᠷᠠᠭᠠᠭᠰᠠᠨ!
ᠴᠤᠭᠯᠠᠨ ᠨᠢᠭᠡᠳᠬᠦ ᠰᠡᠳᠬᠢᠯ ᠢ᠋ ᠮᠢᠨᠢ ᠡᠳᠡ
ᠴᠢᠰᠤ ᠰᠠᠴᠤᠵᠤ ᠬᠥᠨᠥᠭᠡᠭᠰᠡᠨ!
ᠬᠠᠮᠤᠭ ᠤ᠋ᠨ ᠬᠠᠭᠠᠨ ᠪᠠᠢᠲᠠᠯᠠ ᠠᠮᠪᠠᠭᠠᠢ ᠪᠢ
ᠬᠠᠷᠠᠴᠤ ᠶ᠋ᠢᠨ ᠠᠳᠠᠯᠢ ᠥᠬᠢᠨ ᠢ᠋ᠶ᠋ᠡᠨ ᠳᠠᠭᠠᠵᠠᠢ!
ᠤᠯᠤᠰ ᠤ᠋ᠨ ᠡᠵᠡᠨ ᠪᠠᠢᠲᠠᠯᠠ ᠠᠮᠪᠠᠭᠠᠢ ᠪᠢ
ᠤᠷᠤᠭ ᠤ᠋ᠨ ᠭᠠᠵᠠᠷ ᠢᠷᠡᠵᠦ ᠠᠯᠳᠠᠵᠠᠢ!
ᠥᠬᠢᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠦᠳᠡᠵᠦ ᠭᠠᠷᠭᠠᠬᠤ ᠶ᠋ᠢ
ᠣᠯᠠᠨ ᠮᠣᠩᠭᠣᠯᠴᠤᠳ ᠨᠠᠳᠠ ᠪᠠᠷ ᠴᠡᠭᠡᠷᠯᠡᠯ ᠪᠣᠯᠭᠠ
ᠭᠦᠶᠦᠭᠰᠡᠨ ᠮᠣᠷᠢᠨ ᠡᠷᠭᠢᠵᠦ ᠬᠦᠷᠳᠡᠭ ᠨᠤᠲᠤᠭ ᠢ᠋ᠶ᠋ᠠᠨ
ᠭᠦᠩᠵᠦ ᠶ᠋ᠢᠨ ᠰᠦᠨᠡᠰᠦ ᠣᠴᠢᠬᠤ ᠶ᠋ᠢ ᠳᠠᠭᠤᠯᠠᠯ ᠪᠣᠯᠭᠠ
ᠬᠠᠪᠤᠯ ᠬᠠᠭᠠᠨ ᠤ᠋ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠦ᠌
ᠬᠠᠮᠤᠭ ᠤ᠋ᠨ ᠳᠥᠯᠭᠡᠨ ᠨᠢ ᠬᠣᠲᠣᠯᠠ ᠪᠢᠯᠡ
ᠲᠤᠭᠤᠷᠭᠠᠨ ᠤ᠋ ᠬᠢᠨᠢ ᠳᠣᠲᠣᠷᠠ ᠣᠷᠣᠵᠤ ᠬᠡᠯᠡ!
ᠲᠤᠯᠭᠠᠨ ᠤ᠋ ᠬᠢᠨᠢ ᠵᠠᠬᠠ ᠳ᠋ᠤ᠌ ᠱᠠᠯᠠᠵᠤ ᠬᠡᠯᠡ!
ᠠᠮᠪᠠᠭᠠᠢ ᠮᠢᠨᠦ ᠠᠷᠪᠠᠨ ᠬᠥᠪᠡᠭᠦᠨ ᠦ᠌
ᠠᠪᠬᠠᠯᠵᠢ ᠲᠡᠭᠦᠰ ᠨᠢ ᠬᠠᠲᠠᠭᠠᠨ ᠪᠢᠯᠡ
ᠲᠣᠭᠣᠨᠣᠨ ᠳᠡᠭᠡᠷᠡ ᠨᠢ ᠰᠢᠪᠠᠭᠤ ᠪᠣᠯᠵᠤ ᠬᠡᠯᠡ!
ᠲᠣᠲᠣᠭᠣᠨ ᠳᠡᠷᠭᠡᠳᠡ ᠪᠠᠷᠠ ᠪᠣᠯᠵᠤ ᠬᠡᠯᠡ!
ᠲᠠᠪᠤᠨ ᠬᠤᠷᠤᠭᠤᠨ ᠤ᠋ ᠬᠢᠮᠤᠰᠤ ᠶ᠋ᠢ ᠲᠠᠮᠲᠤᠷᠠᠲᠠᠯᠠ
ᠳᠠᠬᠤᠯᠠᠢ ᠵᠢᠭᠠᠬᠠᠨ ᠪᠡᠶᠡ ᠪᠡᠨ ᠳᠠᠭᠤᠰᠲᠠᠯᠠ
ᠲᠠᠲ᠋ᠠᠷ ᠠ᠋ᠴᠠ ᠮᠢᠨᠦ ᠥᠰᠢᠶᠡ ᠠᠪᠤᠭᠲᠤᠨ!
ᠲᠠᠭᠠᠯᠠᠵᠤ ᠲᠩᠷᠢ ᠰᠣᠶᠣᠷᠬᠠᠬᠤ ᠪᠣᠯᠲᠤᠭᠠᠢ!
ᠭᠡᠮᠡᠨ ᠬᠡᠯᠡᠵᠦ ᠳᠠᠭᠤᠰᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠰᠡᠴᠡᠨ ᠮᠡᠷᠭᠡᠨ ᠦᠭᠡ ᠶ᠋ᠢ ᠪᠢᠰᠢᠷᠡᠵᠦ᠂ ᠴᠡᠭᠡᠯ ᠰᠠᠢᠬᠠᠨ ᠬᠣᠭᠣᠯᠠᠢ ᠶ᠋ᠢ ᠰᠦᠰᠦᠭᠯᠡᠭᠰᠡᠨ ᠲᠠᠲ᠋ᠠᠷ ᠡᠮᠡᠰ ᠬᠠᠩᠭᠢᠨᠠᠲᠠᠯᠠ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠴᠢᠬᠡᠬᠦ ᠪᠣᠢ ᠭᠡᠬᠦ ᠰᠢᠭ ᠵᠠᠯᠢᠪᠤᠬᠠ ᠨᠣᠶᠠᠨ ᠢ᠋ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠰᠠᠮ ᠬᠠᠷᠠᠵᠠᠢ᠃ ᠡᠨᠡ ᠬᠢᠷᠢ ᠤᠯᠠᠭᠠᠨ ᠬᠥᠮᠥᠯᠳᠥᠷᠭᠡ ᠲᠡᠢ ᠴᠠᠭᠠᠨ ᠮᠣᠷᠢ ᠠᠪᠴᠢᠷᠠᠵᠤ ᠴᠤᠯᠪᠤᠭᠤᠷ ᠢ᠋ ᠨᠢ ᠠᠳᠬᠤᠭᠤᠯᠬᠤ ᠳ᠋ᠤ᠌ ᠪᠠᠰᠤᠳ ᠪᠠᠯᠠᠭᠴᠢ ᠠᠯᠠᠪᠬᠢᠨ ᠮᠣᠷᠳᠠᠵᠤ ᠡᠬᠡ ᠨᠤᠲᠤᠭ ᠤ᠋ᠨ ᠵᠦᠭ ᠴᠢᠪᠬᠠᠨ ᠤ᠋ ᠴᠢᠯᠠᠭᠤ ᠰᠢᠭ᠋ ᠴᠢᠪᠬᠠᠳᠠᠪᠠ᠃ ᠲᠡᠭᠦᠨ ᠦ᠌ ᠪᠠᠷᠠ ᠲᠠᠰᠤᠷᠠᠲᠠᠯᠠ ᠳᠠᠯᠠᠨ ᠡᠷᠡ ᠨᠢᠭᠡᠨ ᠵᠡᠷᠭᠡ ᠬᠥᠬᠡ ᠲᠡᠭᠷᠢ ᠶ᠋ᠢᠨ ᠬᠠᠶᠠᠭᠠ ᠴᠣᠭᠣᠷᠠᠲᠠᠯᠠ ᠰᠢᠷᠳᠡᠨ ᠰᠡᠮᠡᠷᠡᠵᠦ ᠬᠣᠴᠣᠷᠤᠭᠰᠠᠨ ᠠᠪᠠᠢ᠃ ᠠᠯᠠᠭᠤᠯᠬᠤ ᠶᠠᠯᠠ ᠲᠠᠢ ᠲᠡᠳᠡᠨ ᠦ᠌ ᠳᠤᠤᠭᠠᠷᠬᠤ ᠶ᠋ᠢ ᠬᠦᠯᠢᠶᠡᠵᠦ ᠠᠯᠠᠬᠤ ᠶᠣᠰᠣᠲᠠᠢ ᠲᠠᠲ᠋ᠠᠷ ᠤ᠋ᠳ ᠨᠠᠮ ᠭᠦᠮ ᠪᠣᠯᠵᠠᠢ᠃ ᠡᠯᠡ ᠢᠷᠣᠠ ᠶ᠋ᠢᠨ ᠴᠢᠮᠡᠭᠡ ᠦᠭᠡᠢ ᠥᠷᠥᠭᠡᠯ ᠳ᠋ᠦ᠍ ᠪᠤᠰᠤ᠂ ᠥᠪᠡᠷ ᠲᠡᠭᠡᠨ ᠠᠯᠠᠬᠤ ᠶᠠᠯᠠ ᠣᠨᠣᠭᠠᠭᠰᠠᠨ ᠮᠡᠲᠦ ᠲᠠᠲ᠋ᠠᠷ ᠤ᠋ᠳ ᠲᠤ᠌ ᠰᠠᠨᠠᠭᠳᠠᠭᠰᠠᠨ ᠨᠢ ᠪᠠᠰᠠ ᠪᠣᠢ᠃
5
ᠡᠯᠢᠭᠡᠨ ᠳ᠋ᠡᠭᠡᠨ ᠲᠡᠪᠡᠷᠢᠭᠡᠳ ᠥᠰᠬᠡᠬᠦ ᠶᠦᠮ ᠰᠠᠨ᠂ ᠪᠦᠪᠡᠢ ᠪᠦᠪᠡᠢ
ᠡᠩᠭᠡᠷ ᠲᠡᠭᠡᠨ ᠨᠠᠭᠠᠭᠠᠳ ᠪᠣᠰᠬᠠᠬᠤ ᠶᠤᠮ ᠰᠠᠨ᠂ ᠪᠦᠪᠡᠢ ᠪᠦᠪᠡᠢ
ᠡᠪᠡᠢᠯᠡᠵᠦ ᠬᠥᠯ ᠳ᠋ᠦ᠍ ᠣᠷᠣᠭᠤᠯᠬᠤ ᠶᠤᠮ ᠰᠠᠨ᠂ ᠪᠦᠪᠡᠢ ᠪᠦᠪᠡᠢ
ᠡᠩᠬᠦᠷᠡᠢᠯᠡᠵᠦ ᠬᠡᠯᠡ ᠳ᠋ᠦ᠍ ᠣᠷᠣᠭᠤᠯᠬᠤ ᠶᠤᠮ ᠰᠠᠨ᠂ ᠪᠦᠪᠡᠢ ᠪᠦᠪᠡᠢ
ᠭᠡᠵᠦ ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠬᠠᠩᠭᠢᠨᠠᠲᠠᠯᠠ ᠪᠦᠪᠡᠢᠯᠡᠵᠦ᠂ ᠬᠠᠵᠠᠭᠠᠳ ᠠᠪᠤᠮᠠᠷ ᠮᠠᠨᠲᠤᠭᠤᠷ ᠴᠠᠭᠠᠨ ᠬᠦᠦ ᠪᠡᠨ ᠬᠠᠷᠠᠨ ᠬᠠᠷᠠᠨ ᠬᠠᠢᠷᠠᠯᠠᠵᠤ ᠰᠠᠭᠤᠯᠠ᠃ ᠬᠣᠲᠣᠯᠠ ᠨᠣᠶᠠᠨ ᠭᠣᠯᠣᠮᠲᠠ ᠰᠠᠬᠢᠬᠤ ᠭᠣᠣᠯᠲᠤ ᠦᠷᠡ ᠣᠳᠬᠣᠯᠠᠵᠤ ᠲᠥᠷᠥᠪᠡ ᠭᠡᠮᠡᠨ ᠠᠮᠢ ᠪᠠᠨ ᠲᠠᠯᠪᠢᠬᠤ ᠠᠭᠠᠳ᠂
— ᠲᠤᠯᠭᠠᠲᠠᠢ ᠣᠳᠴᠢᠬᠢᠨ᠁ ᠨᠡᠷᠡ ᠬᠠᠢᠷᠠᠯᠠᠵᠠᠢ᠃ ᠬᠥᠪᠡᠭᠦᠨ ᠵᠢᠯ ᠢ᠋ᠶ᠋ᠡᠷ ᠪᠤᠰᠤ ᠰᠠᠷᠠ ᠪᠠᠷ ᠦᠰᠦᠨ ᠡᠳᠦᠭᠡ ᠲᠣᠯᠣᠭᠠᠢ ᠪᠠᠨ ᠳᠠᠭᠠᠭᠠᠬᠤ ᠲᠠᠢ ᠪᠣᠯᠵᠤ᠂
一 ᠠᠯᠢ ᠪᠣᠢ᠁ ᠠᠯᠢ ᠪᠣᠢ ᠮᠢᠨᠦ ᠬᠦᠦ ᠬᠠᠮᠢᠭᠠ ᠪᠠᠢᠨᠠ᠁ ᠠᠯᠢ ᠪᠣᠢ᠁ ᠭᠡᠮᠡᠨ ᠥᠬᠥᠭᠡᠷᠳᠡᠬᠦ ᠳ᠋ᠦ᠍ ᠨᠢᠳᠦ ᠲᠣᠭᠲᠠᠭᠠᠨ ᠬᠠᠷᠠᠵᠤ ᠴᠢᠳᠠᠬᠤ ᠠᠪᠠᠢ᠃ ᠡᠢᠨ ᠬᠣᠲᠣᠯᠠ ᠨᠣᠶᠠᠨ ᠤ᠋ ᠪᠠᠭᠠ ᠭᠡᠷ ᠲᠦ᠍ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠢᠨᠢᠶᠡᠳᠦ ᠪᠠᠶᠠᠰᠤᠯ ᠪᠢᠯᠬᠠᠨ ᠪᠠᠢᠬᠤ ᠪᠣᠯᠵᠤ᠂ ᠡᠨᠡ ᠬᠦ᠌ ᠡᠯᠢᠭᠡᠮᠰᠡᠦ ᠥᠪᠡᠷᠦᠮᠰᠦᠭ ᠬᠠᠲᠤᠨ ᠢ᠋ᠶ᠋ᠠᠨ ᠪᠠᠷᠠᠳᠠᠨ ᠪᠦᠯᠵᠢᠭᠡᠨ ᠦ᠌ ᠳ᠋ᠦ᠍ ᠡᠳᠦᠷ ᠦ᠋ᠨ ᠶᠡᠬᠡᠩᠬᠢ ᠶ᠋ᠢ ᠥᠩᠭᠡᠷᠡᠭᠡᠬᠦ ᠪᠣᠯᠪᠠ᠃
ᠶᠡᠬᠡ ᠬᠠᠲᠤᠨ ᠢᠨᠵᠢᠮᠡᠢ ᠲᠠᠯᠠ ᠰᠢᠭ᠋ ᠬᠠᠩᠬᠠᠷ ᠦᠷᠭᠦᠭᠡᠨ ᠳ᠋ᠡᠭᠡᠨ ᠡᠷᠡ ᠶ᠋ᠢᠨ ᠪᠠᠷᠠ᠂ ᠨᠥᠬᠥᠷ ᠦ᠋ᠨ ᠲᠦᠰᠢᠭ ᠦᠭᠡᠢᠯᠡᠵᠦ ᠶᠠᠳᠠᠬᠤ ᠳ᠋ᠠᠭᠠᠨ ᠳᠠᠪᠬᠢᠵᠤ ᠶᠠᠪᠤᠭᠠ ᠭᠤᠸᠠ ᠮᠠᠷᠠᠯ ᠤ᠋ᠨ ᠳᠦᠷᠰᠦ ᠪᠡᠷ ᠬᠦᠷᠢᠶᠡᠯᠡᠭᠦᠯᠵᠦ᠂ ᠳᠠᠪᠬᠤᠷ ᠲᠣᠭᠯᠣᠭᠣᠷᠭᠠ ᠰᠢᠷᠢᠵᠦ ᠪᠣᠢ ᠠᠵᠢ᠃ ᠪᠣᠳᠣᠯ ᠰᠠᠨᠠᠭᠠ ᠪᠠᠨ ᠲᠥᠭᠡᠷᠢᠭᠦᠯᠵᠦ᠂ ᠬᠠᠷᠠ ᠬᠣᠷᠣ ᠪᠠᠨ ᠮᠠᠷᠲᠠᠩᠨᠠᠵᠤ ᠰᠠᠭᠤᠭᠠ ᠬᠥᠮᠦᠨ ᠶᠦᠮ᠃ ᠪᠠᠭᠠ ᠬᠠᠲᠤᠨ ᠠᠬᠠᠢ ᠬᠠᠷᠢᠨ ᠵᠣᠪᠠᠯᠠᠩ ᠢ᠋ ᠦᠷᠭᠦᠭᠡᠵᠦ ᠭᠠᠭᠴᠠᠭᠠᠷᠳᠠᠯ ᠢ᠋ ᠰᠡᠭᠰᠦᠷᠬᠦ ᠮᠡᠲᠦ ᠲᠤᠩ ᠴᠤ᠌ ᠬᠥᠳᠡᠯᠭᠡᠭᠡᠨ ᠲᠡᠢ ᠵᠤᠨ ᠢ᠋ ᠥᠩᠭᠡᠷᠡᠭᠡᠪᠡ᠃ ᠲᠡᠷᠡ ᠪᠡᠷ ᠰᠡᠩᠬᠦᠷ ᠭᠣᠷᠣᠬᠠ᠂ ᠤᠨᠤᠨ ᠮᠥᠷᠡᠨ ᠦ᠌ ᠴᠢᠳᠬᠤᠬᠤ ᠪᠠᠯᠴᠢᠷ ᠪᠠᠷᠠᠳᠠᠭᠤᠯᠵᠤ ᠨᠠᠷᠠᠰᠤ ᠮᠣᠳᠣᠨ ᠤᠷᠲᠤ ᠪᠠᠷᠢᠵᠤ ᠪᠣᠢ ᠭᠡᠬᠦ ᠪᠥᠯᠥᠭᠡ᠃ ᠡᠢᠨ ᠥᠪᠡᠷ ᠢ᠋ ᠪᠡᠨ ᠰᠠᠲᠠᠭᠠᠷᠠᠭᠤᠯᠬᠤ ᠶᠠᠭᠤᠮᠠ ᠪᠣᠳᠣᠵᠤ ᠣᠯᠤᠭᠰᠠᠨ ᠳ᠋ᠠᠭᠠᠨ ᠲᠠᠯᠠᠮᠠᠨ ᠬᠠᠲᠤᠨ ᠣᠮᠣᠭ ᠪᠠᠷᠳᠠᠮ ᠶᠠᠪᠤᠬᠤ ᠠᠭᠠᠳ ᠬᠦᠷᠢᠶᠡ ᠬᠦᠯᠬᠦᠨ ᠡᠷᠡᠰ ᠳᠠᠭᠠᠭᠤᠯᠵᠤ ᠥᠷᠯᠥᠭᠡ ᠭᠠᠷᠴᠤ ᠣᠷᠣᠢ ᠢᠷᠡᠬᠦ ᠪᠣᠯᠠᠢ᠃
ᠶᠡᠷᠦ ᠪᠠᠭᠠ ᠬᠠᠲᠤᠨ ᠬᠣᠲᠣᠯᠠ ᠨᠣᠶᠠᠨ ᠢ᠋ ᠥᠪᠡᠷ ᠡᠴᠡ ᠪᠡᠨ ᠡᠭᠡᠴᠢᠮᠡᠳ ᠪᠦᠯᠵᠢᠭᠡᠨ ᠬᠠᠲᠤᠨ ᠳ᠋ᠤ᠌ ᠠᠯᠳᠠᠪᠠ ᠭᠡᠮᠡᠨ ᠳᠠᠯᠳᠠ ᠬᠣᠷᠣᠰᠬᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠢᠳᠠᠮᠠᠭ ᠨᠢᠭᠤᠳᠠᠭ ᠪᠢᠯᠡ᠃ ᠵᠣᠯᠪᠣᠭᠠ ᠲᠡᠭᠦᠰ ᠭᠤᠸᠠ ᠬᠠᠲᠤᠨ ᠤ᠋ ᠡᠨᠡ ᠠᠭᠠᠰᠢ ᠠᠶᠠᠭ ᠢ᠋ ᠪᠦᠯᠵᠢᠭᠡᠨ ᠳᠣᠲᠣᠷᠠ ᠨᠢ ᠣᠷᠣᠭᠰᠠᠨ ᠶᠤᠮ ᠰᠢᠭ᠋ ᠮᠡᠳᠡᠵᠦ ᠪᠠᠢᠪᠠ᠃ ᠲᠡᠭᠡᠭᠡᠳ ᠴᠦ᠍ ᠬᠦᠦ ᠲᠡᠢ ᠪᠡᠨ ᠨᠠᠭᠠᠳᠤᠨ᠂ ᠠᠮᠠᠨ ᠳ᠋ᠤ᠌ ᠪᠠᠭᠲᠠᠬᠤ ᠵᠢᠭᠠᠬᠠᠨ ᠬᠥᠯ ᠢ᠋ ᠨᠢ ᠡᠮᠬᠦᠨ ᠥᠩᠭᠡᠨ ᠬᠣᠳ ᠬᠣᠳ ᠢᠨᠢᠶᠡᠯᠭᠡᠵᠦ ᠨᠣᠶᠠᠨ ᠳ᠋ᠤ᠌ ᠬᠠᠨᠳᠤᠵᠤ᠂
— ᠡᠷᠬᠢᠮ ᠠ᠋᠂ ᠲᠠ ᠠᠯᠢ ᠦᠷᠭᠦᠭᠡᠨ ᠳ᠋ᠡᠭᠡᠨ ᠮᠣᠷᠢᠯᠠᠬᠤ ᠶᠤᠮ ᠪᠣᠢ? ᠭᠡᠮᠡᠨ ᠨᠠᠮᠤᠭᠤᠬᠠᠨ ᠠᠲᠠᠯᠠ ᠠᠷᠭᠠᠳᠠᠩᠭᠤᠢ ᠥᠭᠦᠯᠡᠳᠡᠭ ᠪᠢᠯᠡ᠃ ᠡᠨᠡ ᠤᠳᠠᠭᠠ ᠴᠤ᠌ ᠡᠢᠨ ᠬᠡᠯᠡᠭᠡᠳ ᠲᠠᠯᠮᠢᠶᠠ ᠲᠠᠲᠠᠭᠰᠠᠨ ᠠᠯᠠᠭ ᠨᠢᠳᠦ ᠪᠡᠷ ᠳᠥᠯᠭᠡᠬᠡᠨ ᠰᠢᠷᠳᠡᠵᠡᠢ᠃ ᠲᠦᠮᠡᠨ ᠨᠠᠰᠤᠨ ᠬᠡ ᠲᠡᠢ ᠰᠢᠷᠢᠮᠡᠯ ᠲᠣᠭᠣᠷᠢᠭᠤᠯᠭᠠ ᠳᠡᠭᠡᠷᠡ ᠳᠡᠯᠭᠡᠵᠦ ᠣᠷᠬᠢᠭᠰᠠᠨ ᠬᠣᠨᠢᠨ ᠤ᠋ ᠨᠡᠬᠡᠢ ᠥᠯᠥᠭᠡᠢ ᠳᠡᠭᠡᠷᠡ ᠲᠤᠯᠭᠠᠲᠠᠢ ᠣᠳᠴᠢᠬᠢᠨ ᠳᠡᠷᠪᠡᠯᠵᠡᠨ᠂ ᠡᠴᠢᠭᠡ ᠨᠣᠶᠠᠨ ᠢ᠋ᠶ᠋ᠠᠨ ᠬᠠᠷᠠᠵᠤ ᠬᠣᠳ ᠬᠣᠳ ᠢᠨᠢᠶᠡᠵᠦ ᠠᠪᠠᠢ᠃
— ᠬᠠᠷᠢᠨ ᠠ᠋ ᠬᠦ᠃
— ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠬᠢ ᠡᠴᠡ ᠭᠠᠷᠬᠤ ᠪᠠᠨ ᠪᠣᠯᠢᠯᠠ ᠭᠡᠵᠦ ᠲᠠᠨ ᠢ᠋ ᠬᠥᠮᠦᠨ ᠮᠠᠭᠤ ᠬᠡᠯᠡᠨᠡ ᠪᠢᠯᠡ᠃
— ᠬᠡᠯᠡᠳᠡᠭ ᠨᠢ ᠬᠡᠯᠡ ᠪᠡᠨ ᠬᠥᠰᠢᠲᠡᠯᠡ ᠶᠠᠷᠢᠵᠤ᠂ ᠬᠠᠷᠠᠳᠠᠭ ᠨᠢ ᠨᠢᠳᠦ ᠪᠡᠨ ᠴᠢᠯᠡᠲᠡᠯᠡ ᠰᠢᠷᠳᠡᠵᠦ ᠪᠠᠢᠭᠠ ᠪᠢᠵᠡ ᠳᠡ ᠬᠦ᠃ ᠠᠯᠢ ᠶ᠋ᠢᠨ ᠪᠣᠯᠭᠠᠨ ᠠ᠋ᠴᠠ ᠠᠶᠤᠵᠤ᠂ ᠠᠯᠠᠭᠠ ᠶ᠋ᠢᠨ ᠴᠢᠨᠡᠭᠡ ᠪᠣᠯᠬᠤ ᠪᠣᠢ᠃ ᠶᠡᠬᠡ ᠣᠷᠣ ᠰᠠᠭᠤᠬᠤ ᠢᠲᠡᠭᠡᠯ ᠨᠠᠢᠳᠠᠪᠤᠷᠢ ᠪᠠᠷ ᠰᠣᠯᠢᠵᠤ ᠠᠪᠤᠭᠰᠠᠨ ᠠᠵᠠ ᠵᠢᠷᠭᠠᠯ ᠮᠢᠨᠢ ᠲᠠ ᠬᠣᠶᠠᠷ ᠭᠡᠳᠡᠭ ᠢ᠋ ᠮᠡᠳᠡᠲᠦᠭᠡᠢ! ᠭᠡᠰᠡᠨ ᠢ᠋ᠶ᠋ᠡᠨ ᠬᠥᠭᠵᠢᠯᠲᠡᠢ ᠬᠥᠬᠥᠷᠡᠨ᠂
一 ᠮᠡᠳᠡᠲᠦᠭᠡᠢ᠁ ᠠᠶᠤᠲᠤᠭᠠᠢ᠁ ᠳᠠᠭᠠᠲᠤᠭᠠᠢ᠁ ᠭᠡᠮᠡᠨ ᠤᠬᠤᠰ ᠤᠬᠤᠰᠬᠢᠬᠦ ᠪᠦᠷᠢ ᠳᠡᠭᠡᠭᠰᠢ ᠪᠡᠨ ᠬᠠᠷᠠᠨ ᠳᠡᠷᠪᠡᠯᠵᠡᠬᠦ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠪᠣᠷᠣ ᠪᠣᠷᠣᠬᠠᠨ ᠪᠣᠣᠵᠠᠭᠠᠢ ᠶ᠋ᠢ ᠦᠨᠦᠰᠦᠨ ᠦᠨᠦᠰᠦᠨ ᠪᠠᠢᠯᠠ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠰᠡᠳᠬᠢᠯ ᠲᠠᠯᠪᠢᠭᠤᠨ ᠢᠨᠢᠶᠡᠵᠦ᠂
一 ᠬᠠᠭᠠᠨ ᠲᠠᠨ ᠤ᠋ ᠬᠢ ᠪᠡᠷ ᠪᠣᠯᠤᠭ ᠭᠡᠵᠦ ᠠᠶᠠᠳᠠᠭᠤᠬᠠᠨ ᠥᠭᠦᠯᠡᠪᠡ᠃ ᠶᠡᠷᠦ ᠠᠯᠢᠪᠠ ᠦᠢᠯᠡ ᠳ᠋ᠦ᠍ ᠡᠷᠡ ᠬᠥᠮᠦᠨ ᠦ᠌ ᠮᠠᠲᠠᠯ ᠳ᠋ᠤ᠌ ᠪᠦᠷᠢᠨ ᠣᠷᠣᠵᠤ ᠶᠠᠮᠠᠷ ᠴᠤ᠌ ᠠᠭᠠᠰᠢ ᠠᠶᠠᠭ ᠢ᠋ ᠲᠡᠪᠴᠢᠨ ᠥᠩᠭᠡᠷᠡᠭᠦᠯᠬᠦ ᠨᠠᠮᠳᠠᠭᠤ ᠠᠭᠠᠯᠢ ᠵᠥᠭᠡᠯᠡᠨ ᠵᠠᠩ ᠨᠢ ᠬᠡᠨ ᠭᠤᠸᠠᠢ ᠶ᠋ᠢᠨ ᠴᠦ᠍ ᠬᠦᠰᠡᠯ ᠢ᠋ ᠪᠠᠳᠠᠷᠠᠭᠠᠬᠤ ᠰᠢᠳᠢ ᠲᠡᠢ ᠠᠵᠤᠭᠤ᠃ ᠬᠣᠲᠣᠯᠠ ᠨᠣᠶᠠᠨ ᠲᠠᠲᠠᠪᠤᠷᠢ ᠬᠠᠲᠤᠨ ᠤ᠋ ᠪᠠᠨ ᠨᠠᠭᠠᠯᠢᠩᠬᠠᠢ ᠠᠭᠠᠰᠢᠨ ᠳ᠋ᠤ᠌ ᠠᠪᠲᠠᠨ ᠰᠡᠳᠬᠢᠯ ᠠᠯᠳᠠᠵᠤ᠂ ᠡᠳ᠋ᠯᠡᠨ ᠵᠢᠷᠭᠠᠬᠤ ᠶ᠋ᠢᠨ ᠡᠲᠡᠭᠡᠳ ᠠᠳᠠ ᠮᠥᠷ ᠨᠡᠪᠲᠡ ᠰᠢᠩᠭᠡᠭᠰᠡᠨ ᠨᠢᠳᠦ ᠪᠡᠷ ᠲᠣᠪᠴᠢ ᠨᠢ ᠮᠤᠯᠲᠤᠷᠠᠲᠠᠯᠠ ᠴᠣᠭᠣ ᠰᠢᠷᠳᠡᠵᠦ᠂
一 ᠴᠢ ᠮᠠᠭᠤᠬᠠᠢ ᠬᠦᠦ ᠲᠥᠷᠥᠭᠦᠯᠵᠦ ᠥᠭᠭᠦᠭᠰᠡᠨ ᠶᠦᠮ ᠰᠢᠦ! ᠭᠡᠯᠡ᠃ ᠡᠨᠡ ᠬᠦ᠌ ᠭᠠᠯ ᠪᠠᠶᠠᠷᠯᠠᠭᠤᠯᠤᠭᠰᠠᠨ ᠨᠠᠮ ᠭᠦᠮ ᠢ᠋ ᠡᠪᠳᠡᠵᠦ ᠭᠡᠷ ᠦ᠋ᠨ ᠰᠢᠪᠡᠭᠴᠢᠨ ᠡᠮᠡᠰ ᠰᠠᠨᠳᠤᠷᠤᠤ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ᠂
一 ᠨᠣᠶᠠᠨ ᠲᠠ ᠥᠷᠥᠰᠢᠶᠡ! ᠬᠠᠷᠠᠭᠤᠯ ᠤ᠋ᠨ ᠥᠨᠳᠥᠷ ᠡᠴᠡ ᠶᠠᠭᠠᠷᠠᠤ ᠡᠯᠴᠢ ᠢᠷᠡᠯᠡ ᠭᠡᠬᠦ ᠳ᠋ᠦ᠍ ᠬᠣᠲᠣᠯᠠ ᠨᠣᠶᠠᠨ ᠥᠨᠳᠡᠰᠬᠢᠭᠰᠡᠨ ᠢ᠋ᠶ᠋ᠡᠨ ᠪᠤᠴᠠᠨ ᠰᠠᠭᠤᠵᠤ᠂
一 ᠨᠤᠭᠤᠨ ᠦᠷᠡ ᠲᠥᠷᠥᠭᠦᠯᠵᠦ ᠥᠭᠭᠦᠭᠰᠡᠨ ᠪᠦᠯᠵᠢᠭᠡᠨ ᠬᠠᠲᠤᠨ ᠠ᠋ᠴᠠ ᠨᠢᠭᠤᠬᠤ ᠶᠠᠭᠤᠮᠠ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠲᠥᠷᠥ ᠳ᠋ᠦ᠍ ᠪᠠᠢᠬᠤ ᠤᠴᠢᠷ ᠦᠭᠡᠢ᠂ ᠡᠯᠴᠢ ᠶ᠋ᠢ ᠤᠷᠤᠭᠤᠯ ᠠ᠋ ᠬᠡᠮᠡᠪᠡ᠃ ᠢᠷᠡᠭᠰᠡᠨ ᠡᠯᠴᠢ ᠶ᠋ᠢᠨ ᠭᠡᠮ ᠬᠡᠮᠨᠡᠯ ᠳ᠋ᠦ᠍ ᠠᠪᠲᠠᠵᠤ ᠠᠮᠠ ᠪᠠᠨ ᠠᠷᠭᠠᠲᠠᠯᠠ ᠠᠮᠢᠰᠬᠤᠭᠠᠳᠠᠨ ᠵᠣᠭᠰᠣᠭᠰᠠᠨ ᠰᠢᠪᠡᠭᠴᠢᠨ ᠡᠮᠡ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠭᠠᠷᠴᠤ ᠣᠳᠬᠤ ᠳ᠋ᠤ᠌ ᠬᠣᠲᠣᠯᠠ ᠨᠣᠶᠠᠨ᠂
一 ᠪᠦᠯᠵᠢᠭᠡᠨ ᠬᠦᠦ ᠪᠡᠨ ᠥᠯᠥᠭᠡᠢᠳᠡ ᠭᠡᠪᠡ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠤ᠋ ᠪᠢᠲᠡᠭᠦᠦ ᠰᠢᠷᠢᠮᠡᠯ ᠳᠡᠪᠢᠰᠭᠡᠷᠦᠨᠡ ᠳᠦᠷᠡᠯᠵᠡᠬᠦ ᠭᠠᠯ ᠤ᠋ᠨ ᠳᠡᠭᠡᠭᠦᠷ ᠮᠥᠯᠬᠥᠨ ᠢᠷᠡᠵᠦ ᠬᠠᠭᠤᠴᠢᠨ ᠨᠡᠬᠡᠢ ᠥᠯᠥᠭᠡᠢ ᠳ᠋ᠦ᠍ᠨᠢ ᠬᠦᠦ ᠪᠡᠨ ᠣᠷᠢᠶᠠᠨ᠂ ᠬᠣᠶᠠᠷ ᠬᠥᠬᠥᠨ ᠦ᠌ ᠪᠡᠨ ᠬᠣᠭᠣᠷᠣᠨᠳᠣ ᠶᠠᠮᠠᠷᠪᠠ ᠮᠠᠭᠤ ᠢᠷᠣᠠ ᠠ᠋ᠴᠠ ᠬᠠᠷᠠᠮᠨᠠᠬᠤ ᠮᠡᠲᠦ ᠲᠠᠰᠤ ᠲᠡᠪᠡᠷᠢᠯᠡ᠃ ᠢᠵᠢᠢ ᠬᠠᠲᠤᠨ ᠲᠤᠯᠭᠠᠨ ᠲᠣᠲᠣᠭᠣᠨ ᠠ᠋ᠴᠠ ᠬᠦ ᠵᠠᠯᠠᠵᠤ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠠᠷ ᠬᠥᠳᠡᠵᠦ ᠰᠠᠭᠤᠲᠠᠯᠠ ᠢᠰᠡᠭᠡᠢ ᠡᠭᠦᠳᠡ ᠰᠡᠪᠬᠢᠨ ᠣᠩᠭᠣᠢᠵᠤ ᠪᠠᠰᠤᠳ ᠤ᠋ᠨ ᠪᠠᠯᠬᠠᠴᠢ ᠣᠷᠣᠵᠤ ᠢᠷᠡᠵᠡᠢ᠃
ᠲᠡᠭᠦᠨ ᠦ᠌ ᠴᠢᠷᠠᠢ ᠴᠣᠩᠬᠢᠭᠠᠷ᠂ ᠨᠢᠳᠦ ᠬᠤᠷᠴᠠ ᠠᠵᠢ᠃ ᠶᠡᠷᠦ ᠬᠠᠷᠠᠭᠠᠳ ᠯᠠ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠰᠠᠢᠬᠠᠨ ᠰᠡᠳᠬᠢᠯ ᠲᠠᠯᠠᠭᠠᠷ ᠪᠣᠯᠤᠭᠰᠠᠨ ᠢ᠋ ᠬᠣᠲᠣᠯᠠ ᠣᠢᠯᠠᠭᠠᠪᠠ᠃ ᠪᠠᠰᠤᠳ ᠤ᠋ᠨ ᠪᠠᠯᠬᠠᠴᠢ ᠶᠡᠦᠳᠡᠨ ᠮᠠᠯᠠᠭᠠᠢ ᠪᠠᠨ ᠰᠢᠪᠲᠤ ᠲᠡᠳᠡᠨ ᠠᠪᠴᠤ ᠰᠤᠭᠤᠨ ᠳ᠋ᠠᠭᠠᠨ ᠬᠠᠪᠴᠢᠭᠤᠯᠤᠭᠠᠳ᠂
— ᠬᠠᠪᠤᠯ ᠬᠠᠭᠠᠨ ᠤ᠋ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠦ᠌
ᠬᠠᠮᠤᠭ ᠤ᠋ᠨ ᠳᠥᠯᠭᠡᠬᠡᠨ ᠨᠢ ᠬᠣᠲᠣᠯᠠ ᠪᠢᠯᠡ
ᠲᠤᠭᠤᠷᠭᠠᠨ ᠤ᠋ ᠬᠢᠨᠢ ᠳᠣᠲᠣᠷᠠ ᠣᠷᠣᠵᠤ ᠬᠡᠯᠡ!
ᠲᠤᠯᠭᠠᠨ ᠤ᠋ ᠬᠢᠨᠢ ᠵᠠᠬᠠ ᠳ᠋ᠤ᠌ ᠱᠠᠯᠠᠵᠤ ᠬᠡᠯᠡ! ᠭᠡᠵᠦ ᠠᠮᠪᠠᠭᠠᠢ ᠬᠠᠭᠠᠨ ᠨᠠᠮᠠᠶ᠋ᠢ ᠢᠯᠡᠭᠡᠭᠰᠡᠨ ᠪᠢᠯᠡ᠃ ᠡᠢᠮᠦ ᠶ᠋ᠢᠨ ᠤᠴᠢᠷ ᠦᠳᠡᠰᠢ ᠣᠷᠣᠢ ᠭᠡᠯ ᠦᠭᠡᠢ ᠦᠷᠭᠦᠭᠡᠨ ᠳ᠋ᠦ᠍ ᠲᠠᠨᠢ ᠪᠠᠷᠠᠯᠬᠠᠪᠠ᠂ ᠥᠷᠥᠰᠢᠶᠡ! ᠰᠡᠪᠡᠯᠭᠡ ᠨᠣᠢᠲᠠᠨ ᠦᠷᠡ ᠶ᠋ᠢ ᠲᠠᠨᠢ ᠠᠶᠤᠯᠭᠠᠵᠤ᠂ ᠰᠡᠳᠬᠢᠯ ᠲᠦᠪᠰᠢᠨ ᠬᠠᠲᠤᠨ ᠢ᠋ ᠲᠠᠨᠢ ᠰᠣᠴᠢᠭᠠᠭᠰᠠᠨ ᠪᠣᠯ ᠥᠷᠥᠰᠢᠶᠡ! ᠭᠡᠬᠦ ᠳ᠋ᠦ᠍ ᠬᠣᠲᠣᠯᠠ᠂
— ᠡᠮᠡᠭᠡᠯ ᠦ᠋ᠨ ᠳᠠᠭᠤᠤ ᠪᠠᠨ ᠪᠡᠷᠢ! ᠬᠡᠮᠡᠪᠡ᠃ ᠪᠠᠰᠤᠳ ᠤ᠋ᠨ ᠪᠠᠯᠬᠠᠴᠢ ᠦᠭᠡ ᠪᠡᠨ ᠡᠪᠯᠡᠭᠦᠯᠵᠦ ᠬᠣᠷᠣᠮ ᠬᠢᠷᠢ ᠪᠣᠳᠣᠯᠬᠢᠯᠠᠬᠤ ᠳ᠋ᠤ᠌ ᠬᠣᠲᠣᠯᠠ ᠨᠣᠶᠠᠨ ᠣᠷᠣᠨ ᠤ᠋ ᠬᠥᠨᠳᠡᠢ ᠡᠴᠡ ᠬᠤᠨ ᠬᠤᠭᠤᠷ ᠠᠪᠴᠤ ᠪᠠᠷᠢᠯᠠ᠃ ᠪᠠᠯᠠᠭᠴᠢ ᠪᠠᠬᠢᠮ ᠭᠠᠷ ᠲᠠᠭᠠᠨ ᠡᠮᠵᠡᠭ ᠬᠤᠭᠤᠷ ᠢ᠋ ᠲᠠᠰᠤ ᠠᠳᠬᠤᠨ ᠬᠣᠷᠣᠮ ᠬᠢᠷᠢ ᠠᠵᠢᠭᠰᠠᠨ ᠢ᠋ᠶ᠋ᠠᠨ᠂ ᠡᠪᠡᠷᠰᠢᠭᠰᠡᠨ ᠮᠣᠢᠨᠣᠭ ᠬᠤᠷᠤᠭᠤ ᠪᠠᠷ ᠴᠢᠪᠬᠠᠳᠠᠰᠤ ᠶᠠᠭᠤ ᠶ᠋ᠢ ᠨᠢ ᠲᠡᠮᠲᠡᠷᠢᠨ ᠡᠭᠡᠰᠢᠭ ᠠᠶᠠᠯᠭᠤ ᠪᠠᠨ ᠡᠷᠢᠯᠡ᠃ ᠴᠢᠩᠭᠢᠵᠦ ᠬᠣᠷᠣᠮ ᠬᠢᠷᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠠᠶᠠᠯᠭᠤ ᠤᠷᠤᠰᠤᠨ ᠬᠥᠯᠯᠡᠬᠦ ᠳ᠋ᠦ᠍ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠭᠡᠭᠡᠨ ᠳᠦᠷᠢ ᠠᠯᠭᠤᠷ ᠲᠣᠳᠣᠷᠠᠵᠤ᠂ ᠲᠦᠳᠡᠬᠡᠨ ᠬᠡᠯᠡᠭᠰᠡᠨ ᠦᠭᠡ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠭᠣᠭᠠᠳ ᠢᠷᠡᠵᠡᠢ᠃ ᠪᠠᠰᠤᠳ ᠤ᠋ᠨ ᠪᠠᠯᠬᠠᠴᠢ ᠡᠭᠡᠭᠡ ᠯᠡ ᠣᠪᠣᠭ ᠤ᠋ᠨ ᠬᠣᠷᠴᠢ ᠮᠡᠲᠦ ᠥᠭᠦᠯᠡᠨ ᠥᠭᠦᠯᠡᠨ᠂
ᠲᠠᠪᠤᠨ ᠬᠤᠷᠤᠭᠤᠨ ᠤ᠋ ᠬᠢᠮᠤᠰᠤ ᠶ᠋ᠢ ᠲᠠᠮᠲᠤᠷᠠᠲᠠᠯᠠ
ᠳᠠᠬᠤᠯᠠᠢ ᠵᠢᠭᠠᠬᠠᠨ ᠪᠡᠶᠡ ᠪᠡᠨ ᠳᠠᠭᠤᠰᠲᠠᠯᠠ
ᠲᠠᠲ᠋ᠠᠷ ᠠ᠋ᠴᠠ ᠮᠢᠨᠦ ᠥᠰᠢᠶᠡ ᠠᠪᠤᠭᠲᠤᠨ!
ᠲᠠᠭᠠᠯᠠᠵᠤ ᠲᠩᠷᠢ ᠥᠷᠥᠰᠢᠶᠡᠬᠦ ᠪᠣᠯᠲᠤᠭᠠᠢ! ᠭᠡᠮᠡᠨ ᠡᠮᠡᠭᠡᠯ ᠦ᠋ᠨ ᠳᠠᠭᠤ ᠪᠠᠨ ᠵᠢᠷᠭᠠᠭᠠᠪᠠ᠃
ᠪᠦᠯᠵᠢᠭᠡᠨ ᠬᠠᠲᠤᠨ ᠥᠯᠥᠭᠡᠢ ᠲᠡᠢ ᠬᠦᠦ ᠪᠡᠨ ᠲᠠᠰᠤ ᠲᠡᠪᠡᠷᠢᠨ ᠳᠠᠭᠵᠢᠲᠠᠯᠠ ᠴᠡᠴᠡᠷᠡᠵᠦ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠰᠢᠯᠤᠭᠤᠨ ᠬᠠᠮᠠᠷ ᠤ᠋ᠨ ᠤᠷᠠᠨ ᠰᠠᠮᠰᠠ ᠳᠡᠭᠡᠷᠡ ᠳᠤᠰᠤᠯ ᠨᠢᠯᠪᠤᠰᠤ ᠪᠦᠨᠵᠢᠭᠡᠨᠡᠨ ᠤᠷᠤᠭᠤᠯ ᠨᠢ ᠬᠡᠳᠦᠨᠲᠡ ᠴᠣᠷᠪᠣᠯᠵᠠᠭᠰᠨᠨ ᠢ᠋ᠶ᠋ᠠᠨ ᠲᠡᠰᠴᠦ ᠴᠢᠳᠠᠯ ᠦᠭᠡᠢ᠂
— ᠦᠭᠡ ᠬᠥᠪᠡᠭᠦᠨ ᠪᠠᠢᠪᠠ ᠤᠤ? ᠭᠡᠬᠦ ᠳ᠋ᠦ᠍ ᠪᠠᠰᠤᠳ ᠤ᠋ᠨ ᠪᠠᠯᠬᠠᠴᠢ ᠰᠣᠴᠢᠬᠤ ᠮᠡᠲᠦ ᠣᠪᠣᠭᠣᠰᠬᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠪᠠᠢᠭᠰᠠᠨ ᠠ᠋᠂ ᠬᠠᠲᠤᠨ ᠮᠢᠨᠢ ᠪᠠᠢᠭᠰᠠᠨ᠂ ᠪᠠᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠭᠣᠣᠯᠯᠠᠬᠤ ᠨᠣᠶᠠᠨ ᠨᠢ ᠪᠣᠯᠤᠯᠲᠠᠢ ᠶᠤᠮ ᠪᠢᠯᠡ ᠭᠡᠬᠦ ᠳ᠋ᠦ᠍ ᠭᠤᠸᠠ ᠬᠠᠲᠤᠨ ᠤ᠋ ᠤᠯᠠᠭᠠ ᠪᠤᠲᠠᠷᠠᠭᠰᠠᠨ ᠶᠠᠭᠠᠨ ᠴᠢᠷᠠᠢ ᠬᠤᠪᠠᠬᠠᠢ ᠴᠠᠢᠵᠤ᠂
— ᠬᠥᠮᠦᠨ ᠠᠯᠠᠪᠠ ᠭᠡᠵᠦ ᠤᠤ ᠬᠡᠮᠡᠯᠡ᠃ ᠰᠠᠢᠬᠠᠨ ᠪᠦᠯᠵᠢᠭᠡᠨ ᠦ᠌ ᠬᠣᠶᠠᠷ ᠨᠢᠳᠦ ᠪᠠᠰᠤᠳ ᠤ᠋ᠨ ᠪᠠᠯᠬᠠᠴᠢ ᠶ᠋ᠢ ᠵᠠᠢ ᠦᠭᠡᠢ ᠡᠭᠡᠷᠡᠵᠦ᠂
— ᠬᠥᠮᠦᠨ ᠠᠯᠠᠯᠠ ᠭᠡᠵᠦ ᠤᠤ⁈ ᠬᠡᠮᠡᠬᠦ ᠳ᠋ᠦ᠍᠂
— ᠶᠡᠷᠦ ᠠᠯᠠᠬᠤ ᠪᠣᠯᠤᠯᠲᠠᠢ ᠬᠥᠮᠦᠨ ᠪᠢᠯᠡ ᠭᠡᠳ ᠪᠤᠷᠤᠭᠤ ᠴᠤ᠌ ᠶᠠᠭᠤᠮᠠ ᠬᠡᠯᠡᠴᠢᠬᠡᠪᠡ ᠤᠤ ᠭᠡᠬᠦ ᠠᠶᠠ ᠲᠠᠢ ᠬᠣᠲᠣᠯᠠ ᠨᠣᠶᠠᠨ ᠤᠷᠤᠭᠤ ᠬᠠᠷᠠᠵᠤ᠂ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠣᠶᠤᠨ ᠰᠠᠨᠠᠭᠠᠨ ᠳ᠋ᠤᠨᠢ ᠪᠦᠦᠷ ᠲᠥᠥᠷᠬᠡᠨ ᠰᠣᠨᠣᠰᠤᠭᠰᠠᠨ ᠬᠣᠯᠠ ᠶ᠋ᠢᠨ ᠬᠣᠪ ᠵᠢᠪ ᠰᠣᠨᠣᠰᠳᠠᠪᠠ ᠪᠣᠯᠤᠯᠲᠠᠢ ᠬᠦᠯᠲᠦᠰᠬᠡᠨ ᠴᠢᠮᠡᠭᠡ ᠲᠠᠰᠤᠷᠠᠯᠠ᠃ ᠬᠡᠷᠡᠭ ᠦᠭᠡᠢ ᠭᠠᠵᠠᠷ ᠣᠯᠢᠭ ᠦᠭᠡᠢ ᠦᠭᠡ ᠬᠡᠯᠡᠪᠡ ᠭᠡᠮᠡᠨ ᠠᠶᠤᠭᠰᠠᠨ ᠨᠢ ᠪᠣᠢ᠃ ᠴᠢᠩᠭᠢᠲᠡᠯᠡ ᠬᠣᠲᠣᠯᠠ ᠨᠣᠶᠠᠨ᠂
— ᠰᠣᠨᠣᠰᠪᠠ᠂ ᠪᠠᠯᠠᠭᠴᠢ ᠴᠢ ᠣᠳᠣ ᠮᠣᠷᠳᠠ᠂ ᠲᠠᠢᠴᠢᠭᠤᠳ ᠤ᠋ᠨ ᠬᠠᠲᠠᠭᠠᠨ ᠨᠣᠶᠠᠨ ᠤ᠋
ᠲᠣᠭᠣᠨᠣᠨ ᠳᠡᠭᠡᠷᠡ ᠨᠢ ᠰᠢᠪᠠᠭᠤ ᠪᠣᠯᠵᠤ ᠬᠡᠯᠡ!
ᠲᠣᠲᠣᠭᠣᠨ ᠳᠡᠭᠡᠷᠡ ᠨᠢ ᠪᠠᠷᠠ ᠪᠣᠯᠵᠤ ᠬᠡᠯᠡ! ᠬᠡᠮᠡᠬᠦ ᠳ᠋ᠦ᠍ ᠬᠤᠯᠤᠭᠠᠨᠠ ᠵᠠᠯᠭᠢᠭᠰᠠᠨ ᠮᠣᠭᠠᠢ ᠮᠡᠲᠦ ᠬᠦᠯᠲᠦᠭᠡᠨᠡᠵᠦ ᠰᠠᠭᠤᠭᠰᠠᠨ ᠡᠷᠡ ᠦᠷᠭᠦᠭᠰᠡᠨ ᠲᠡᠮᠡᠭᠡ ᠰᠢᠭ ᠳᠡᠷᠬᠢᠨ ᠪᠣᠰᠤᠭᠠᠳ ᠭᠠᠷᠴᠤ ᠣᠳᠤᠯᠠ᠃ ᠬᠠᠷᠠ ᠡᠯᠢᠭᠡ ᠶ᠋ᠢᠨ ᠬᠥᠮᠦᠨ ᠦ᠌ ᠶᠠᠪᠤᠬᠤ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠮᠡᠲᠦ ᠪᠦᠯᠵᠢᠭᠡᠨ ᠬᠠᠲᠤᠨ ᠶᠠᠩᠭᠢᠨᠠᠲᠠᠯᠠ ᠤᠬᠢᠯᠠᠵᠤ᠂
一 ᠪᠢ ᠶᠠᠮᠠᠷ ᠦᠢᠯᠡ ᠶ᠋ᠢᠨ ᠦᠷᠡ ᠲᠡᠢ ᠠᠮᠢᠲᠠᠨ ᠪᠢᠯᠡ᠁ ᠭᠡᠮᠡᠨ ᠭᠠᠰᠠᠯᠪᠠ᠃ ᠴᠢᠩᠭᠢᠭᠰᠡᠨ ᠢ᠋ᠶ᠋ᠡᠨ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠯ ᠦᠭᠡᠢ ᠤᠷᠤᠰᠬᠠᠨ ᠭᠠᠯ ᠢ᠋ᠶ᠋ᠠᠨ ᠰᠢᠷᠲᠡᠵᠦ᠂
一 ᠬᠥᠮᠦᠨ ᠪᠣᠯᠵᠤ ᠬᠣᠷᠸᠠ ᠳ᠋ᠤ᠌ ᠲᠥᠷᠥᠭᠦᠯᠦᠭᠰᠡᠨ ᠡᠬᠡ ᠪᠡᠨ ᠦᠯᠦ ᠪᠣᠳᠣᠬᠤ ᠨᠢ ᠶᠠᠮᠠᠷ ᠬᠥᠮᠦᠨ ᠦ᠌ ᠶᠣᠰᠣ ᠪᠢᠯᠡ᠃ ᠬᠠᠷᠢ ᠶ᠋ᠢᠨ ᠭᠠᠵᠠᠷ ᠲᠤ᠌ ᠬᠠᠶᠠᠵᠤ ᠣᠳᠴᠢᠬᠠᠭᠠᠳ ᠬᠠᠨᠢᠯᠠᠭᠰᠠᠨ ᠡᠷᠡ ᠶ᠋ᠢᠨ ᠬᠢᠨᠢ ᠬᠠᠮᠢᠶᠠᠲᠠᠨ ᠰᠠᠳᠤᠨ ᠢ᠋ ᠬᠠᠮᠤᠵᠤ ᠠᠯᠠᠬᠤ ᠨᠢ ᠶᠠᠮᠠᠷ ᠶᠣᠰᠣ ᠪᠢᠯᠡ᠃ ᠲᠥᠷᠥᠭᠦᠯᠦᠭᠰᠡᠨ ᠦᠷᠡ ᠨᠢ ᠡᠢᠨ ᠬᠣᠯᠠ ᠳ᠋ᠤ᠌ ᠳᠠᠢᠰᠤᠩᠨᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠲᠥᠷᠥᠭᠰᠡᠨ ᠡᠬᠡ ᠨᠢ ᠣᠢᠷᠠ ᠳ᠋ᠤ᠌ ᠰᠢᠳᠠᠷᠯᠠᠵᠤ ᠲᠠᠨ ᠤ᠋ ᠬᠣᠭᠣᠯᠠ ᠬᠣᠷᠣᠭᠠᠬᠤ ᠶᠠᠮᠠᠷ ᠶᠣᠰᠣ ᠪᠢᠯᠡ ᠭᠡᠮᠡᠨ ᠭᠤᠨᠢᠭᠲᠠᠢᠬᠠᠨ ᠬᠡᠯᠡᠵᠡᠢ᠃ ᠬᠣᠲᠣᠯᠠ ᠨᠣᠶᠠᠨ ᠲᠥᠷᠥ ᠶ᠋ᠢᠨ ᠪᠤᠭᠤᠯᠠᠭᠠ ᠥᠪᠡᠷ ᠦ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠢ᠋ ᠭᠦᠨᠡ ᠤᠬᠠᠭᠠᠷᠠᠵᠤ᠂ ᠭᠠᠯ ᠰᠢᠷᠲᠡᠨ ᠪᠣᠳᠣᠯᠭᠠᠰᠢᠷᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂
一 ᠵᠠᠶᠠᠭᠠ ᠲᠥᠭᠡᠷᠭᠡ ᠡᠢᠮᠦ ᠠᠵᠢ᠃ ᠮᠥᠩᠬᠡ ᠲᠡᠭᠷᠢ ᠮᠡᠳᠡᠲᠦᠭᠡᠢ! ᠭᠡᠳ ᠤᠬᠤᠰᠬᠢᠨ ᠪᠣᠰᠴᠤ᠂ ᠠᠯᠲᠠᠨ ᠲᠢᠲᠢᠮᠲᠦ ᠬᠣᠷᠭᠣᠢ ᠶᠡᠦᠳᠡᠨ ᠢ᠋ᠶ᠋ᠡᠨ ᠡᠮᠦᠰᠬᠦ ᠳ᠋ᠦ᠍ ᠪᠦᠯᠵᠢᠭᠡᠨ ᠬᠠᠲᠤᠨ ᠳᠠᠭᠠᠭᠤᠯᠤᠨ ᠬᠠᠷᠠᠵᠤ ᠬᠠᠷᠠᠵᠤ᠂
一 ᠲᠠ ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠬᠡᠮᠡᠪᠡ᠃ ᠬᠣᠲᠣᠯᠠ ᠨᠣᠶᠠᠨ ᠮᠥᠩᠭᠥᠨ ᠲᠣᠨᠣᠭ ᠲᠠᠢ ᠰᠣᠷᠣᠨ ᠪᠦᠰᠡ ᠪᠡᠨ ᠵᠠᠪᠬᠠᠢᠳᠠᠯᠠ ᠪᠦᠰᠡᠯᠡᠵᠦ᠂
一 ᠬᠤᠷᠠᠯᠲᠠᠢ ᠵᠠᠷᠯᠠᠶᠠ! ᠭᠡᠪᠡᠯ᠂
一 ᠬᠤᠲᠤᠭᠲᠤ ᠠᠬᠠ ᠪᠠᠢᠯᠳᠤᠶᠠ ᠯᠠ ᠭᠡᠬᠦ ᠪᠠᠢᠬᠠ ᠳᠠ! ᠭᠡᠵᠦ ᠢᠵᠢᠢ ᠬᠠᠲᠤᠨ ᠭᠦᠨ ᠡᠮᠭᠡᠨᠢᠯ ᠲᠡᠢ ᠥᠭᠦᠯᠡᠪᠡ᠃
一 ᠲᠡᠭᠡᠵᠦ ᠯᠡ ᠲᠠᠭᠠᠷᠠᠨᠠ ᠪᠢᠵᠡ ᠠ᠋᠃
一 ᠲᠠ ᠶᠠᠪᠤᠬᠤ ᠤᠤ?
一 ᠶᠠᠪᠤᠵᠤ ᠯᠠ ᠲᠠᠭᠠᠷᠠᠨᠠ ᠪᠢᠵᠡ ᠠ᠋᠃
一 ᠦᠭᠡ ᠲᠡᠢ ᠲᠠᠭᠠᠷᠠᠬᠤ ᠯᠠ ᠪᠠᠢᠬᠠ ᠳᠠ?
一 ᠬᠠᠷᠢᠨ᠁
~ ᠦᠷᠭᠦᠯᠵᠢᠯᠡᠯ ᠪᠣᠢ~