ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠳᠥᠴᠢᠨ ᠬᠣᠶᠠᠷ> Хялгасан дөрөөн дээр – Хасвулаг зохиов <42>
110ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠳᠥᠴᠢᠨ ᠬᠣᠶᠠᠷ>
ᠳᠥᠴᠢᠨ ᠬᠣᠶᠠᠷ
ᠲᠦᠪᠰᠢᠨ᠂ ᠬᠦᠬᠡᠳᠤᠯᠢ ᠬᠣᠶᠠᠭᠤᠯᠠ ᠶ᠋ᠢᠨ ᠰᠠᠭᠤᠭᠰᠠᠨ ᠪᠠᠭᠠ ᠲᠡᠷᠭᠡ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠶᠡᠬᠡ ᠪᠠᠭᠠ ᠵᠡᠭᠡᠯᠢ ᠪᠡᠷ ᠵᠢᠷᠠᠯᠵᠠᠨ ᠥᠩᠭᠡᠷᠡᠵᠦ᠂ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠤ᠋ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠢᠷᠡᠬᠦ ᠳ᠋ᠦ᠍ ᠶᠠᠭ ᠰᠠᠢᠬᠠᠨ ᠪᠠᠭᠠ ᠦᠳᠡ ᠪᠣᠯᠵᠤ ᠪᠠᠢᠯᠠ᠃ ᠲᠡᠷᠡ ᠬᠣᠶᠠᠭᠤᠯᠠ ᠲᠡᠷᠭᠡᠨ ᠡᠴᠡ ᠪᠡᠨ ᠪᠠᠭᠤᠬᠤ ᠳ᠋ᠤ᠌ ᠡᠮᠦᠨᠡ ᠡᠴᠡ ᠨᠢ ᠯᠢᠦ ᠸᠸᠨ ᠰᠢᠶᠠᠩ ᠵᠡᠷᠭᠡ ᠲᠣᠪᠴᠢᠶᠠᠨ ᠤ᠋ ᠬᠡᠳᠦᠨ ᠤᠳᠤᠷᠢᠳᠤᠯᠭᠠ ᠤᠭᠲᠤᠨ ᠭᠠᠷᠴᠤ ᠢᠷᠡᠵᠦ᠂ ᠲᠡᠷᠡ ᠬᠣᠶᠠᠭᠤᠯᠠ ᠶ᠋ᠢ ᠡᠮᠦᠨᠡ ᠮᠥᠷ ᠦ᠋ᠨ ᠵᠢᠵᠢᠭ ᠬᠤᠷᠠᠯ ᠤ᠋ᠨ ᠭᠡᠷ ᠲᠦ᠍ ᠣᠷᠣᠭᠤᠯᠪᠠ᠃
ᠬᠡᠳᠦᠭᠦᠯᠡ ᠰᠠᠭᠤᠭᠠᠳ ᠴᠠᠢ ᠤᠤᠭᠤᠨ᠂ ᠲᠠᠮᠠᠬᠢ ᠲᠠᠲᠠᠬᠤ ᠳᠤᠮᠳᠠ ᠬᠣᠲᠠ ᠶᠢᠨ ᠬᠣᠲᠠ ᠶ᠋ᠢᠨ ᠪᠠᠢᠴᠠᠭᠠᠬᠤ ᠬᠣᠷᠢᠶᠠᠨ ᠤ᠋ ᠲᠡᠷᠡ ᠵᠠᠯᠠᠭᠤ ᠰᠢᠭᠦᠭᠴᠢ ᠣᠷᠣᠵᠤ ᠢᠷᠡᠵᠡᠢ᠃ ᠡᠳᠡᠭᠡᠷ ᠨᠢ ᠬᠦᠬᠡᠲᠤᠯᠢ ᠳ᠋ᠤ᠌ ᠶᠡᠬᠡ ᠰᠣᠨᠢᠬᠠᠨ ᠰᠠᠨᠠᠭᠳᠠᠪᠠ᠃
ᠥᠨᠥᠳᠥᠷ ᠴᠤ᠌ ᠯᠠᠪ ᠨᠢᠭᠡ ᠣᠨᠴᠠᠭᠠᠢ ᠬᠡᠯᠪᠡᠷᠢ ᠶ᠋ᠢᠨ ᠬᠤᠷᠠᠯ ᠶᠤᠮ ᠤᠤ ᠰᠢᠭᠦᠯᠲᠡ ᠡᠨᠳᠡ ᠶᠠᠪᠤᠭᠳᠠᠬᠤ ᠪᠠᠢᠬᠠ ᠳᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠳ᠋ᠨᠯᠠ ᠯᠢᠦ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠪᠣᠭᠴᠣ ᠠ᠋ᠴᠠ ᠪᠠᠨ ᠬᠡᠳᠦᠨ ᠵᠦᠢᠯ ᠦ᠋ᠨ ᠬᠢᠨᠠᠨ ᠲᠣᠭᠲᠠᠭᠠᠯ ᠤ᠋ᠨ ᠵᠦᠢᠯ ᠢ᠋ ᠭᠠᠷᠭᠠᠨ ᠲᠦᠪᠰᠢᠨ ᠳ᠋ᠦ᠍ ᠭᠠᠷᠳᠠᠭᠤᠯᠪᠠ᠃
ᠲᠡᠷᠡ ᠨᠢᠭᠡ ᠨᠢᠭᠡ ᠪᠡᠷ ᠦᠵᠡᠭᠡᠳ ᠮᠠᠰᠢ ᠰᠠᠨᠠᠭᠠ ᠬᠠᠨᠤᠮᠵᠢ ᠲᠠᠢ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠵᠤ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠲᠡᠷᠡ ᠬᠦ᠌ ᠪᠠᠢᠴᠠᠭᠠᠬᠤ ᠬᠣᠷᠢᠶᠠᠨ ᠤ᠋ ᠵᠠᠯᠠᠭᠤ ᠰᠢᠭᠦᠭᠴᠢ ᠨᠢᠭᠡ ᠬᠠᠲᠠᠭᠤ ᠴᠠᠭᠠᠰᠤ ᠠᠪᠴᠢᠷᠠᠨ ᠲᠦᠪᠰᠢᠨ ᠦ᠌ ᠡᠮᠦᠨᠡ ᠳᠡᠯᠭᠡᠭᠰᠡᠨ ᠨᠢ 《ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠪᠠᠢᠴᠠᠭᠠᠬᠤ ᠬᠣᠷᠢᠶᠠᠨ ᠤ᠋ ᠪᠠᠷᠢᠪᠴᠢᠯᠠᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠭᠰᠡᠨ ᠪᠢᠴᠢᠭ》 ᠭᠡᠵᠦ ᠪᠠᠢᠯᠠ᠃
ᠬᠥᠬᠡᠲᠤᠯᠢ ᠶ᠋ᠢᠨ ᠲᠠᠷᠢᠬᠢᠨ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠪᠣᠳᠣᠯ ᠬᠠᠷᠪᠤᠨ ᠣᠷᠣᠵᠤ ᠢᠷᠡᠭᠡᠳ ᠳᠣᠣᠷᠠ ᠨᠢ ᠴᠣᠬᠣᠮ ᠬᠡᠨ ᠦ᠌ ᠨᠡᠷᠡ ᠶ᠋ᠢ ᠪᠢᠴᠢᠵᠦ ᠪᠠᠢᠨᠠ ᠭᠡᠳ ᠦᠵᠡᠬᠦ ᠭᠡᠲᠡᠯᠡ ᠲᠡᠷᠡ ᠵᠠᠯᠠᠭᠤ ᠰᠢᠭᠦᠭᠴᠢ ᠲᠦᠪᠰᠢᠨ ᠲᠡᠢ ᠬᠡᠳᠦᠨ ᠶᠠᠭᠤᠮᠠ ᠬᠡᠯᠡᠯᠴᠡᠵᠦ ᠪᠠᠷᠠᠭᠠᠳ ᠬᠦᠰᠦᠨᠦᠭ ᠢ᠋ᠶ᠋ᠡᠨ ᠪᠠᠷᠢᠭᠠᠳ ᠶᠠᠪᠤᠴᠢᠬᠠᠯᠠ᠃
ᠬᠡᠳᠦᠨ ᠮᠢᠨᠦ᠋ᠲ ᠦ᠋ᠨ ᠳᠠᠷᠠᠭᠠ ᠲᠦᠪᠰᠢᠨ ᠨᠢᠭᠡ ᠭᠣᠳᠣᠯᠢ ᠲᠠᠮᠠᠬᠢ ᠨᠣᠴᠣᠭᠠᠨ ᠲᠠᠲᠠᠬᠤ ᠶ᠋ᠢᠨ ᠳᠠᠭᠠᠤ ᠯᠢᠦ ᠸᠧᠨ ᠰᠢᠶᠠᠩ ᠳ᠋ᠤ᠌ ᠰᠡᠮᠬᠡᠨ ᠨᠢᠳᠦᠨ ᠳᠣᠬᠢᠶᠠ ᠥᠭᠬᠦ ᠰᠢᠭ ᠯᠡ ᠪᠣᠯᠪᠠ᠃
ᠤᠳᠠᠭᠰᠠᠨ ᠦᠭᠡᠢ ᠭᠠᠳᠠᠨᠠ ᠠ᠋ᠴᠠ ᠬᠣᠶᠠᠷ ᠭᠤᠷᠪᠠᠨ ᠴᠠᠭᠳᠠᠭᠠ ᠨᠢᠭᠡ ᠥᠨᠳᠥᠷ ᠲᠠᠷᠭᠤᠨ᠂ ᠡᠪᠦᠭᠡᠵᠢᠶᠡᠷ ᠪᠣᠯᠪᠠᠴᠤ ᠨᠢᠳᠦ ᠨᠢ ᠰᠦᠷᠡᠬᠡᠢ ᠬᠤᠷᠴᠠᠯᠢᠭ᠂ ᠮᠢᠬᠠᠯᠢᠭ ᠴᠠᠭᠠᠨ ᠴᠢᠷᠠᠢ ᠲᠠᠢ ᠬᠥᠮᠦᠨ ᠢ᠋ ᠲᠠᠭᠤᠵᠤ ᠢᠷᠡᠪᠡ᠃ ᠡᠨᠡ ᠬᠥᠮᠦᠨ ᠪᠣᠯ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠨᠢᠭᠡᠳᠦᠭᠡᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠳᠠᠷᠤᠭᠠ ᠭᠤᠸᠠᠨ ᠢᠦᠢ ᠱᠠᠨ ᠠᠪᠤᠭᠠᠢ ᠪᠠᠢᠯᠠ᠃ ᠡᠨᠡ ᠬᠥᠮᠦᠨ᠂ ᠸᠠᠩ ᠯᠠᠨ ᠬᠤᠸᠠ ᠶᠢᠨ ᠦᠬᠦᠭᠰᠡᠨ ᠦ᠌ ᠮᠠᠷᠭᠠᠰᠢ ᠦᠳᠡ ᠳᠡᠭᠡᠷᠡ ᠨᠢ ᠳᠠᠷᠤᠢ ᠨᠢᠭᠤᠴᠠ ᠪᠠᠷ ᠲᠦᠷ ᠬᠣᠷᠢᠭᠳᠠᠭᠰᠠᠨ ᠪᠠᠢᠵᠠᠢ᠃ ᠲᠡᠷᠡ ᠬᠤᠷᠠᠯ ᠤ᠋ᠨ ᠭᠡᠷ ᠦ᠋ᠨ ᠳᠤᠮᠳᠠ ᠵᠣᠭᠰᠣᠬᠤ ᠳ᠋ᠤ᠌ ᠯᠢᠦ ᠸᠧᠨ ᠰᠢᠶᠠᠩ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠤᠭᠠᠳ᠄
— ᠣᠳᠣ ᠨᠢᠭᠡ ᠬᠤᠪᠢ ᠪᠠᠷᠢᠪᠴᠢᠯᠠᠬᠤ ᠲᠣᠭᠲᠠᠭᠠᠯ ᠨᠡᠢᠲᠡᠯᠡᠶᠡ ᠭᠡᠳ ᠦᠭᠡ ᠪᠡᠨ ᠪᠠᠬᠠᠨ ᠵᠠᠪᠰᠠᠷᠯᠠᠪᠠ᠃ ᠲᠡᠭᠡᠭᠡᠳ ᠲᠡᠷᠡ᠄
— ᠡᠳᠦᠭᠡ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠪᠠᠢᠴᠠᠭᠠᠬᠤ ᠬᠣᠷᠢᠶᠠᠨ ᠤ᠋ ᠵᠥᠪᠰᠢᠶᠡᠷᠡᠯ ᠢ᠋ᠶ᠋ᠡᠷ ᠬᠥᠮᠦᠨ ᠠᠯᠠᠭᠰᠠᠨ ᠰᠡᠵᠢᠭᠲᠡᠨ ᠭᠤᠸᠠᠨ ᠢᠦᠢ ᠱᠠᠨ ᠢ᠋ ᠬᠠᠤᠯᠢ ᠶᠣᠰᠣᠭᠠᠷ ᠪᠠᠷᠢᠪᠴᠢᠯᠠᠨᠠ ᠭᠡᠪᠡ᠃
ᠭᠤᠸᠠᠨ ᠢᠦᠢ ᠱᠠᠨ ᠴᠡᠴᠡᠷᠬᠢᠯᠡᠭᠰᠡᠭᠡᠷ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠲᠡᠯᠡ ᠠᠷᠤ ᠠ᠋ᠴᠠ ᠨᠢ ᠬᠣᠶᠠᠷ ᠴᠠᠭᠳᠠᠭᠠ ᠢᠷᠡᠵᠦ ᠭᠠᠷ ᠲᠤᠨᠢ ᠭᠠᠪᠠ ᠣᠷᠣᠭᠤᠯᠬᠤ ᠶ᠋ᠢᠨ ᠬᠠᠮᠲᠤ ᠡᠮᠦᠨᠡ ᠨᠢ ᠪᠠᠷᠢᠪᠴᠢᠯᠠᠬᠤ ᠲᠡᠮᠳᠡᠭ ᠦᠵᠡᠭᠦᠯᠦᠨ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤ ᠭᠡᠵᠦ ᠠᠯᠪᠠᠳᠠᠪᠠ᠃ ᠭᠤᠸᠠᠨ ᠢᠦᠢ ᠱᠠᠨ ᠳᠣᠣᠷᠠ ᠨᠢ ᠶᠡᠬᠡ ᠯᠡ ᠲᠥᠪ ᠴᠢᠷᠠᠢᠯᠠᠭᠠᠳ᠄
— ᠪᠢ ᠬᠥᠮᠦᠨ ᠠᠯᠠᠭᠰᠠᠨ ᠦᠭᠡᠢ ᠭᠡᠲᠡᠯᠡ ᠲᠦᠪᠰᠢᠨ ᠤᠭᠲᠤᠨ ᠠᠪᠴᠤ᠄
— ᠴᠢ ᠦᠵᠡᠰᠬᠦᠯᠡᠩ ᠢ᠋ ᠠᠯᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠸᠠᠩ ᠯᠠᠨ ᠬᠤᠸᠠ ᠶ᠋ᠢ ᠴᠤ᠌ ᠬᠣᠣᠷᠯᠠᠭᠰᠠᠨ ᠭᠡᠵᠦ ᠰᠢᠭᠤᠳ ᠲᠤᠯᠭᠠᠪᠠ᠃
— ᠶᠠᠮᠠᠷ ᠭᠡᠷᠡᠴᠢ ᠪᠠᠢᠨᠠ?
— ᠭᠡᠷᠡᠴᠢ ᠪᠠᠷᠢᠮᠲᠠ ᠶ᠋ᠢ ᠴᠢᠨᠢ ᠲᠤᠯᠭᠠᠬᠤ ᠴᠠᠭ ᠪᠠᠢᠬᠤ ᠶᠤᠮ᠃
— ᠬᠥᠮᠦᠨ ᠢ᠋ ᠬᠢᠯᠢᠰᠳᠡᠭᠦᠯᠵᠦ ᠪᠠᠢᠨᠠ!
— ᠴᠢ ᠵᠢᠭᠠᠬᠠᠨ ᠴᠤ᠌ ᠬᠢᠯᠢᠰᠳᠡᠵᠦ ᠦᠭᠡᠢ ᠶᠦᠮ᠃ ᠭᠤᠸᠠᠨ ᠢᠦᠢ ᠱᠠᠨ ᠢ᠋ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠬᠦᠷᠭᠡ! ᠭᠡᠵᠦ ᠲᠦᠪᠰᠢᠨ ᠭᠤᠸᠠᠢ ᠳᠡᠷᠭᠡᠳᠡᠬᠢ ᠬᠣᠶᠠᠷ ᠴᠠᠭᠳᠠᠭᠠ ᠳᠤ ᠪᠠᠨ ᠬᠡᠯᠡᠪᠡ᠃
ᠬᠥᠬᠡᠲᠤᠯᠢ ᠶᠠᠭ ᠯᠠ ᠬᠠᠷᠠ ᠳᠠᠷᠤᠭᠠᠳ ᠰᠡᠷᠡᠭᠰᠡᠨ ᠮᠡᠲᠦ ᠰᠥᠨᠢ ᠬᠠᠭᠠᠰ ᠥᠩᠭᠡᠷᠡᠲᠡᠯᠡ ᠤᠨᠲᠠᠵᠤ ᠣᠷᠣᠭᠰᠠᠨ ᠦᠭᠡᠢ᠃ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠨᠢᠭᠡᠳᠦᠭᠡᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠳᠠᠷᠤᠭᠠ᠂ ᠡᠮᠨᠡᠯᠭᠡ ᠶ᠋ᠢᠨ ᠠᠯᠳᠠᠷᠲᠤ ᠮᠡᠷᠭᠡᠵᠢᠯᠲᠡᠨ ᠭᠤᠸᠠᠨ ᠢᠦᠢ ᠱᠠᠨ ᠢ᠋ ᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠡᠷᠡᠭᠦᠦ ᠶ᠋ᠢᠨ ᠬᠡᠷᠡᠭᠲᠡᠨ ᠪᠣᠯᠴᠢᠬᠠᠨᠠ ᠭᠡᠵᠦ ᠲᠡᠭᠦᠨ ᠦ᠌ ᠵᠡᠭᠦᠳᠦᠨ ᠳ᠋ᠦ᠍ ᠴᠤ᠌ ᠪᠠᠢᠭᠰᠠᠨ ᠦᠭᠡᠢ ᠠᠵᠢ᠃ ᠥᠴᠥᠭᠡᠳᠦᠷ ᠲᠦᠪᠰᠢᠨ ᠲᠡᠢ ᠶᠠᠷᠢᠯᠴᠠᠭᠰᠠᠨ ᠦᠭᠡ ᠨᠦ᠍ᠭᠦᠳ ᠲᠡᠭᠦᠨ ᠦ᠌ ᠲᠠᠷᠢᠬᠢᠨ ᠳ᠋ᠤ᠌ ᠲᠣᠪ ᠲᠣᠳᠣᠬᠠᠨ ᠪᠠᠢᠭᠰᠠᠭᠠᠷ᠃ ᠥᠨᠥᠳᠥᠷ ᠭᠡᠨᠡᠳᠲᠡ ᠳᠣᠲᠣᠭᠠᠳᠤ ᠶᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠠ᠋ᠴᠠ ᠪᠠᠷᠢᠪᠴᠢᠯᠠᠬᠤ ᠮᠡᠳᠡᠭᠳᠡᠯ ᠨᠡᠢᠳᠡᠯᠡᠨ᠂ ᠭᠤᠸᠠᠨ ᠢᠦᠢ ᠱᠠᠨ ᠢ᠋ ᠪᠠᠷᠢᠪᠴᠢᠯᠠᠬᠤ ᠳ᠋ᠤ᠌ ᠲᠡᠷᠡ ᠤᠳᠠᠲᠠᠯᠠ ᠢᠲᠡᠭᠡᠭᠰᠡᠨ ᠦᠭᠡᠢ ᠮᠥᠷᠲᠡᠭᠡᠨ ᠮᠠᠰᠢ ᠤᠳᠠᠭᠠᠨ ᠮᠡᠯᠡᠷᠡᠨ ᠵᠣᠭᠰᠣᠵᠠᠢ᠃
ᠠᠭᠰᠤᠮᠨᠠᠨ ᠠᠭᠠᠰᠢᠯᠠᠵᠤ ᠭᠡᠷᠡᠴᠢ ᠨᠡᠬᠡᠨ ᠪᠡᠶᠡ ᠪᠡᠨ ᠴᠠᠭᠠᠳᠬᠠᠬᠤ ᠭᠡᠵᠦ ᠪᠠᠢᠭᠰᠠᠨ ᠭᠤᠸᠠᠨ ᠢᠦᠢ ᠱᠠᠨ ᠢ᠋ ᠴᠠᠭᠳᠠᠭᠠ ᠨᠠᠷ ᠥᠴᠦᠬᠡᠨ ᠴᠤ᠌ ᠨᠠᠢᠷ ᠬᠠᠶᠠᠯ ᠦᠭᠡᠢ ᠬᠦᠴᠦᠯᠡᠨ ᠲᠦᠯᠬᠢᠵᠦ ᠭᠠᠳᠠᠭᠰᠢ ᠭᠠᠷᠭᠠᠬᠤ ᠳ᠋ᠤ᠌᠂ ᠭᠡᠨᠡᠳᠲᠡ ᠲᠡᠭᠦᠨ ᠦ᠌ ᠮᠥᠷᠦᠨ ᠳᠡᠭᠡᠷᠡ ᠨᠢᠭᠡ ᠬᠦᠴᠦᠲᠦ ᠠᠯᠠᠭᠠ ᠫᠠᠰᠬᠢᠨ ᠪᠠᠭᠤᠬᠤᠯᠠᠷ ᠡᠷᠭᠢᠨ ᠬᠠᠷᠠᠪᠠᠯ᠂ ᠬᠠᠷᠢᠨ ᠲᠦᠪᠰᠢᠨ ᠭᠤᠸᠠᠢ ᠢᠨᠢᠶᠡᠮᠰᠦᠭᠯᠡᠨ ᠵᠣᠭᠰᠣᠵᠤ ᠪᠠᠢᠯᠠ᠃
ᠲᠡᠷᠡ ᠲᠠᠮᠠᠬᠢᠨ ᠤᠲᠤᠭᠠ ᠪᠠᠨ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠤᠷᠭᠢᠭᠤᠯᠬᠤ ᠶ᠋ᠢᠨ ᠳᠠᠭᠠᠤ᠄
— ᠰᠠᠨᠠᠭᠠᠨ ᠠ᠋ᠴᠠ ᠴᠢᠨᠢ ᠭᠠᠳᠠᠨᠠ ᠰᠠᠨᠠᠭᠳᠠᠵᠤ ᠪᠠᠢᠨᠠ ᠤᠤ? ᠦᠨᠡᠨ ᠳᠦ ᠪᠡᠨ ᠨᠠᠭᠠᠲᠠᠢ ᠴᠠᠭᠠᠲᠠᠢ ᠶ᠋ᠢ ᠨᠢ ᠪᠠᠬᠠᠨ ᠬᠠᠷᠢᠴᠠᠭᠤᠯᠪᠠᠯ ᠪᠦᠷ ᠤᠢᠯᠠᠭᠠᠴᠢᠬᠠᠬᠤ ᠶᠤᠮ ᠭᠡᠯᠡ᠃
— ᠭᠤᠸᠠᠨ ᠳᠠᠷᠤᠭᠠ ᠶ᠋ᠢ ᠪᠠᠷᠢᠪᠴᠢᠯᠠᠨ ᠰᠢᠢᠳᠬᠡᠬᠦ ᠭᠡᠷᠡᠴᠢ ᠪᠠᠷᠢᠮᠲᠠ ᠦᠨᠡᠬᠡᠷ ᠪᠦᠷᠢᠨ ᠭᠦᠢᠴᠡᠳ ᠪᠠᠢᠬᠤ ᠶᠤᠮ ᠤᠤ?
— ᠬᠡᠯᠡᠯᠭᠡᠨ ᠦᠭᠡᠢ ᠪᠠᠢᠨᠠ᠃
— ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠠ᠋ ᠂ ᠲᠠ ᠴᠣᠬᠣᠮ ᠬᠡᠵᠢᠶᠡ ᠡᠴᠡ ᠡᠬᠢᠯᠡᠵᠦ ᠭᠤᠸᠠᠨ ᠢᠦᠢ ᠱᠠᠨ ᠢ᠋ ᠰᠡᠵᠢᠭᠯᠡᠵᠦ᠂ ᠭᠡᠷᠡᠴᠢ ᠪᠠᠷᠢᠮᠲᠠ ᠶ᠋ᠢ ᠨᠢ ᠣᠯᠤᠭᠰᠠᠨ ᠪᠣᠢ?
— ᠬᠠᠮᠤᠭ ᠤ᠋ᠨ ᠡᠮᠦᠨᠡ ᠨᠢ ᠦᠵᠡᠰᠬᠦᠯᠡᠩ ᠦ᠋ᠨ ᠬᠡᠭᠦᠷ ᠢ᠋ ᠳᠠᠬᠢᠨ ᠲᠤᠶᠠᠴᠢᠵᠤ ᠪᠠᠢᠴᠠᠭᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠦᠵᠡᠰᠬᠦᠯᠡᠩ ᠦ᠋ᠨ ᠪᠡᠶᠡ ᠳᠡᠭᠡᠷᠡ ᠡᠴᠡ ᠬᠦᠴᠦᠲᠦ ᠬᠣᠣᠷCC66 ᠳ᠋ᠤᠭᠠᠷ ᠢᠯᠡᠷᠡᠬᠦ ᠦᠶᠡ ᠳ᠋ᠦ᠍᠂ ᠪᠢ ᠳᠠᠷᠤᠢ ᠠᠩᠬᠠᠨ ᠤ᠋ ᠮᠡᠷᠭᠡᠵᠢᠯ ᠦ᠋ᠨ ᠬᠢᠨᠠᠨ ᠲᠣᠭᠲᠠᠭᠠᠯ ᠬᠢᠭᠰᠡᠨ ᠡᠮᠴᠢ ᠨᠠᠷ ᠢ᠋ ᠰᠡᠵᠢᠭᠯᠡᠵᠦ ᠥᠩᠭᠡᠷᠡᠵᠡᠢ᠃ ᠦᠵᠡᠰᠬᠦᠯᠡᠩ ᠦ᠋ᠨ ᠦᠬᠦᠳᠡᠯ᠂ ᠴᠢᠰᠤᠨ ᠳ᠋ᠤ᠌ ᠭᠣᠣᠯ ᠬᠢᠨᠠᠨ ᠲᠣᠭᠲᠠᠭᠠᠯ ᠬᠢᠭᠰᠡᠨ ᠬᠥᠮᠦᠨ ᠪᠣᠯ ᠭᠤᠸᠠᠨ ᠢᠦᠢ ᠱᠠᠨ ᠶᠤᠮ᠃ ᠤᠴᠢᠷ ᠨᠢ ᠲᠡᠷᠡ ᠪᠣᠯ ᠮᠡᠷᠭᠡᠵᠢᠯ ᠢ᠋ᠶ᠋ᠡᠷ ᠶᠡᠬᠡ ᠥᠨᠳᠥᠷ ᠡᠮᠴᠢ ᠪᠥᠭᠡᠳ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠠ᠋ᠴᠠ ᠤᠷᠢᠭᠰᠠᠨ ᠬᠢᠨᠠᠨ ᠲᠣᠭᠲᠠᠭᠠᠭᠴᠢ ᠶᠤᠮ ᠃
— ᠲᠡᠭᠡᠬᠦᠯᠡ ᠦᠵᠡᠰᠬᠦᠯᠡᠩ Aᠭᠤᠷᠪᠠᠳᠤᠭᠠᠷ ᠲᠤ᠌ ᠬᠣᠣᠷᠳᠠᠭᠰᠠᠨ ᠴᠤ᠌ ᠲᠡᠷᠡ᠂ CC66 ᠳ᠋ᠤᠭᠠᠷ ᠲᠤ᠌ ᠬᠣᠣᠷᠳᠠᠭᠰᠠᠨ ᠴᠤ᠌ ᠲᠡᠷᠡ ᠪᠦᠷ ᠴᠢᠰᠤᠨ ᠬᠣᠣᠷᠳᠠᠯ ᠶᠤᠮ᠃ ᠵᠠᠪᠠᠯ ᠴᠢᠰᠤᠨ ᠠ᠋ᠴᠠ ᠨᠢ ᠡᠳᠡᠭᠡᠷ ᠬᠣᠣᠷ ᠤ᠋ᠨ ᠪᠦᠷᠢᠯᠳᠦᠬᠦᠨ ᠢᠯᠡᠷᠡᠬᠦ ᠶᠣᠰᠣᠲᠠᠢ᠃ ᠭᠡᠲᠡᠯᠡ ᠭᠤᠸᠠᠨ ᠢᠦᠢ ᠱᠠᠨ ᠵᠥᠪᠬᠡᠨAᠭᠤᠷᠪᠠᠳᠤᠭᠠᠷ ᠲᠤ᠌ ᠬᠣᠤᠷᠳᠠᠭᠳᠠᠵᠠᠢ ᠭᠡᠵᠦ ᠲᠣᠳᠣᠯᠠᠭᠰᠠᠨ ᠠ᠋ᠴᠠ ᠪᠢᠰᠢCC66 ᠳ᠋ᠤᠭᠠᠷ ᠢ᠋ ᠪᠣᠯ ᠠᠮᠠᠯᠠᠭᠰᠠᠨ ᠴᠤ᠌ ᠦᠭᠡᠢ ᠪᠠᠢᠨᠠ᠃
— ᠦᠵᠡᠰᠬᠦᠯᠡᠩ ᠢᠪ ᠢᠯᠡᠷᠬᠡᠢCC66 ᠳ᠋ᠤᠭᠠᠷ ᠲᠤ᠌ ᠬᠣᠣᠷᠳᠠᠭᠳᠠᠨ᠂ ᠢᠯᠠᠩᠭᠤᠶᠠ ᠲᠡᠢᠮᠦ ᠬᠤᠷᠳᠤᠨ᠂ ᠲᠡᠭᠡᠵᠦ ᠭᠠᠯᠵᠠᠭᠤᠷᠠᠨ ᠰᠠᠨᠳᠤᠷᠴᠤ ᠦᠬᠦᠭᠰᠡᠨ ᠨᠢ ᠯᠠᠪᠲᠠᠢA ᠭᠤᠷᠪᠠᠳᠤᠭᠠᠷ ᠤ᠋ᠨ ᠬᠣᠣᠷᠳᠠᠯ ᠪᠢᠰᠢ ᠭᠡᠳᠡᠭ ᠢ᠋ ᠡᠩ ᠦ᠋ᠨ ᠡᠮᠴᠢ ᠨᠠᠷ ᠴᠤ᠌ ᠦᠵᠡᠵᠦ ᠭᠠᠷᠬᠤ ᠪᠠᠢᠲᠠᠯᠠ ᠭᠤᠸᠠᠨ ᠢᠦᠢ ᠱᠠᠨ ᠵᠠᠪᠠᠯ Aᠭᠤᠷᠪᠠᠳᠤᠭᠠᠷ ᠲᠤ᠌ ᠬᠣᠤᠷᠳᠠᠭᠳᠠᠯᠠ ᠭᠡᠬᠦ ᠨᠢ ᠵᠣᠷᠢᠯᠭᠠ ᠲᠠᠢ ᠬᠠᠭᠤᠷᠮᠠᠭ ᠬᠢᠨᠠᠨ ᠲᠣᠭᠲᠠᠭᠠᠯ ᠬᠢᠭᠰᠡᠨ ᠨᠢ ᠢᠯᠡᠬᠡᠨ ᠪᠢᠰᠢ ᠤᠤ?
— ᠳᠠᠬᠢᠭᠠᠳ ᠬᠡᠯᠡᠪᠡᠯ ᠬᠡᠷᠡᠭ ᠦ᠋ᠨ ᠲᠠᠯᠠᠪᠠᠢ ᠠ᠋ᠴᠠ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠵᠡᠭᠦᠦ ᠴᠣᠬᠢᠬᠤ ᠦᠶᠡ ᠳ᠋ᠦ᠍ ᠬᠡᠷᠡᠭᠯᠡᠭᠰᠡᠨ ᠠᠷᠢᠭᠤᠳᠬᠠᠯ ᠤ᠋ᠨ ᠰᠫᠢᠷᠲ ᠲᠡᠢ ᠬᠥᠪᠥᠩ ᠪᠣᠯᠤᠨ ᠬᠢᠮᠰᠠ ᠭᠡᠨᠡᠳᠲᠡ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠪᠢᠳᠡ ᠬᠡᠷᠡᠭ ᠦ᠋ᠨ ᠲᠠᠯᠠᠪᠠᠢ ᠳ᠋ᠤ᠌ ᠢᠷᠡᠭᠰᠡᠨ ᠬᠥᠮᠦᠰ ᠢ᠋ ᠨᠢᠭᠡ ᠨᠢᠭᠡ ᠪᠡᠷ ᠪᠠᠢᠴᠠᠭᠠᠭᠰᠠᠨ ᠤ᠋ ᠦᠷᠡ ᠳ᠋ᠦᠩ ᠳ᠋ᠦ᠍ ᠭᠠᠭᠴᠠᠬᠠᠨ ᠰᠡᠵᠢᠭᠯᠡᠯᠲᠡᠢ ᠬᠥᠮᠦᠨ ᠪᠣᠯ ᠭᠤᠸᠠᠨ ᠢᠦᠢ ᠱᠠᠨ ᠪᠠᠢᠭᠰᠠᠨ ᠶᠤᠮ᠃ ᠤᠴᠢᠷ ᠨᠢ᠂ ᠲᠡᠭᠦᠨ ᠦ᠌ ᠲᠡᠷᠡ ᠬᠦ᠌ ᠬᠠᠭᠤᠷᠮᠠᠭ ᠬᠢᠨᠠᠨ ᠲᠣᠭᠲᠠᠭᠠᠯ ᠪᠣᠯᠤᠨ ᠬᠣᠣᠷ ᠵᠠᠷᠤᠭᠰᠠᠨ ᠭᠡᠷᠡᠴᠢ ᠨᠢ ᠭᠡᠨᠡᠳᠲᠡ ᠤᠰᠠᠳᠬᠤ ᠬᠣᠶᠠᠷ ᠮᠠᠰᠢ ᠠᠪᠴᠠᠯᠳᠤᠭᠰᠠᠨ ᠪᠣᠯᠬᠣᠷ ᠬᠡᠨ ᠴᠤ᠌ ᠰᠡᠵᠢᠭᠯᠡᠮᠡᠷ ᠪᠢᠰᠢ ᠤᠤ? ᠡᠨᠡ ᠪᠣᠯ ᠮᠢᠨᠦ ᠡᠬᠢᠯᠡᠵᠦ ᠰᠡᠵᠢᠭᠯᠡᠯ ᠣᠯᠵᠤ ᠠᠪᠤᠭᠰᠠᠨ ᠠᠩᠬᠠᠨ ᠤ᠋ ᠭᠡᠷᠡᠴᠢ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠲᠦᠪᠰᠢᠨ ᠭᠤᠸᠠᠢ ᠦᠭᠡ ᠪᠡᠨ ᠲᠦᠷ ᠵᠠᠪᠰᠠᠷᠯᠠᠵᠤ ᠠᠪᠤᠭᠠᠳ᠄
— ᠦᠵᠡᠰᠬᠦᠯᠡᠩ ᠦ᠋ᠨ ᠤᠳᠠᠭᠠᠨ ᠵᠢᠯ ᠬᠣᠣᠷᠯᠠᠯ ᠠᠮᠰᠠᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠭᠡᠨᠡᠳᠲᠡᠬᠡᠨ ᠪᠤᠰᠤᠳ ᠠ᠋ᠴᠠ ᠣᠨᠴᠠᠭᠠᠢ ᠬᠠᠷᠠᠭᠠᠯᠵᠠᠯ ᠬᠦᠷᠲᠡᠭᠡᠮᠵᠢ ᠣᠯᠬᠤ ᠦᠶᠡ ᠳ᠋ᠦ᠍᠂ ᠲᠡᠭᠦᠨ ᠳ᠋ᠦ᠍ ᠡᠢᠮᠦ ᠬᠤᠪᠢ ᠤᠴᠠᠷᠠᠯ ᠣᠯᠭᠣᠵᠤ ᠴᠢᠳᠠᠬᠤ ᠬᠥᠮᠦᠨ ᠪᠣᠯ ᠨᠢᠭᠡ ᠳ᠋ᠦ᠍ ᠡᠷᠬᠡᠪᠰᠢ ᠲᠤᠰ ᠪᠠᠢᠭᠤᠯᠭᠠ ᠶ᠋ᠢᠨ ᠬᠥᠮᠦᠨ; ᠬᠣᠶᠠᠷ ᠲᠤ᠌ ᠡᠷᠬᠡᠪᠰᠢ ᠭᠣᠣᠯ ᠤᠳᠤᠷᠢᠳᠤᠯᠭᠠ; ᠭᠤᠷᠪᠠ ᠳ᠋ᠤ᠌ ᠡᠷᠬᠡᠪᠰᠢ ᠲᠤᠰ ᠪᠠᠢᠭᠤᠯᠭᠠ ᠳ᠋ᠤ᠌ ᠬᠣᠷᠢᠭᠠᠳ ᠵᠢᠯ ᠰᠠᠭᠤᠭᠰᠠᠨ ᠬᠠᠷᠢᠭᠤᠴᠠᠯᠭᠠᠲᠠᠨ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠵᠤ ᠣᠯᠤᠭᠰᠠᠨ᠃ ᠡᠳᠡᠭᠡᠷ ᠨᠥᠬᠥᠴᠡᠯ ᠢ᠋ ᠪᠦᠷᠢᠯᠳᠦᠭᠦᠯᠬᠦ ᠬᠥᠮᠦᠨ ᠪᠣᠯ ᠭᠠᠭᠴᠠ ᠬᠦ᠌ ᠭᠤᠸᠠᠨ ᠢᠦᠢ ᠱᠠᠨ ᠪᠣᠯᠤᠨᠠ᠃ ᠡᠨᠡ ᠪᠣᠯ ᠬᠣᠶᠠᠳᠤᠭᠠᠷ ᠰᠡᠵᠢᠭᠯᠡᠯ ᠪᠣᠯᠤᠨᠠ᠃
— ᠳᠠᠬᠢᠪᠠᠯCC66 ᠳ᠋ᠤᠭᠠᠷ ᠮᠡᠲᠦ ᠶ᠋ᠢᠨ ᠣᠨᠴᠠ ᠬᠣᠣᠷᠲᠤ ᠡᠮ ᠢ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠬᠡᠷᠡᠭᠯᠡᠬᠦ ᠡᠷᠬᠡ ᠲᠡᠢ ᠪᠠ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠵᠡᠷᠭᠡ ᠶ᠋ᠢ ᠵᠠᠷᠤᠬᠤ ᠮᠡᠷᠭᠡᠵᠢᠯ ᠮᠡᠳᠡᠯᠭᠡ ᠲᠡᠢ ᠬᠥᠮᠦᠨ ᠪᠣᠯ ᠪᠠᠰᠠ ᠭᠤᠸᠠᠨ ᠢᠦᠢ ᠱᠠᠨ ᠪᠣᠯᠤᠨᠠ᠃ ᠤᠴᠢᠷ ᠨᠢ ᠲᠡᠷᠡ ᠪᠣᠯ ᠶᠡᠬᠡ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠳᠠᠷᠤᠭᠠ ᠪᠣᠯᠬᠣᠷ ᠬᠣᠷᠢᠶᠠᠨ ᠳ᠋ᠤ᠌ ᠪᠠᠢᠳᠠᠭ ᠡᠮ ᠢ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠵᠠᠷᠤᠵᠤ ᠪᠣᠯᠤᠨᠠ᠃ ᠲᠡᠷᠡ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠤᠯᠤᠰ ᠤ᠋ᠨ ᠠᠮᠤᠷ ᠢ᠋ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠳ᠋ᠤ᠌ ᠮᠡᠷᠭᠡᠵᠢᠯ ᠦ᠋ᠨ ᠠᠵᠢᠯ ᠬᠢᠵᠦ ᠪᠠᠢᠭᠰᠠᠨ ᠲᠤᠯᠠ ᠠᠯᠢᠪᠠ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠢ᠋ ᠣᠯᠵᠤ ᠠᠪᠬᠤ ᠪᠠ ᠵᠣᠬᠢᠰᠲᠠᠢ ᠵᠠᠷᠤᠵᠤ ᠬᠡᠷᠡᠭᠯᠡᠵᠦ ᠴᠢᠳᠠᠬᠤ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠡᠨᠡ ᠪᠣᠯ ᠭᠤᠷᠪᠠᠳᠤᠭᠠᠷ ᠰᠡᠵᠢᠭᠯᠡᠯ ᠪᠣᠯᠨᠠ᠃
— ᠸᠠᠩ ᠯᠠᠨ ᠬᠤᠸᠠ ᠶᠢᠨ ᠬᠣᠣᠷᠯᠠᠭᠳᠠᠭᠰᠠᠨ ᠬᠡᠷᠡᠭ ᠦ᠋ᠨ ᠲᠠᠯᠠᠪᠠᠢ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍᠂ ᠬᠣᠣᠷᠯᠠᠭᠴᠢ ᠲᠡᠭᠦᠨ ᠲᠡᠢ ᠤᠨᠲᠠᠵᠤ ᠪᠠᠢᠭᠠᠳ ᠬᠣᠣᠷᠯᠠᠭᠰᠠᠨ ᠨᠢ ᠢᠯᠡᠬᠡᠨ ᠪᠠᠢᠨᠠ᠃ ᠤᠴᠢᠷ ᠨᠢ ᠵᠢᠵᠢᠭ ᠰᠢᠭ ᠬᠣᠶᠠᠷ ᠬᠥᠮᠦᠨ ᠦ᠌ ᠣᠷᠣᠨ ᠳᠡᠭᠡᠷᠡ ᠭᠠᠭᠴᠠ ᠬᠥᠮᠦᠨ ᠤᠨᠲᠠᠬᠤ ᠳ᠋ᠤ᠌᠂ ᠡᠩ ᠦ᠋ᠨ ᠪᠠᠢᠳᠠᠯ ᠳᠣᠣᠷᠠ ᠪᠦᠷ ᠭᠣᠣᠯ ᠳ᠋ᠤᠨᠢ ᠤᠨᠲᠠᠳᠠᠭ᠃ ᠭᠡᠲᠡᠯᠡ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠳᠡᠷᠡ ᠪᠣᠯᠤᠨ ᠳᠡᠪᠢᠰᠬᠡᠷ ᠨᠢ ᠬᠠᠮᠤᠭ ᠤ᠋ᠨ ᠨᠠᠭᠠᠳᠤ ᠢᠷᠮᠡᠭ ᠢ᠋ᠶ᠋ᠡᠷ ᠨᠢ ᠪᠠᠢᠵᠤ᠂ ᠴᠠᠭᠠᠳᠤ ᠲᠠᠯᠠ ᠪᠠᠷ ᠨᠢ ᠪᠠᠰᠠ ᠨᠢᠭᠡ ᠬᠥᠮᠦᠨ ᠦ᠌ ᠤᠨᠲᠠᠬᠤ ᠵᠠᠢᠲᠠᠢ ᠪᠠᠢᠭᠰᠠᠨ ᠨᠢ ᠲᠡᠭᠦᠨ ᠲᠡᠢ ᠬᠥᠮᠦᠨ ᠤᠨᠲᠠᠭᠰᠠᠨ ᠢ᠋ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃ ᠸᠠᠩ ᠯᠠᠨ ᠬᠤᠸᠠ ᠶᠢ ᠬᠣᠣᠷᠯᠠᠭᠳᠠᠬᠤ ᠶ᠋ᠢᠨ ᠣᠷᠣᠢ ᠪᠢᠳᠡ ᠬᠣᠶᠠᠷ ᠢ᠋ ᠣᠴᠢᠬᠤ ᠳ᠋ᠤ᠌᠂ ᠸᠠᠩ ᠯᠠᠨ ᠬᠤᠸᠠ ᠶᠢᠨ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠨᠢ ᠣᠷᠣ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠬᠤᠷᠢᠶᠠᠭᠠᠰᠤᠲᠠᠢ ᠪᠠᠢᠭᠰᠠᠨ ᠪᠥᠭᠡᠳ ᠬᠠᠮᠤᠭ ᠳᠡᠭᠡᠷᠡ ᠨᠢ ᠲᠡᠭᠦᠨ ᠦ᠌ ᠬᠣᠣᠷᠯᠠᠭᠳᠠᠬᠤ ᠦᠶᠡ ᠳᠦ ᠪᠡᠨ ᠬᠤᠴᠢᠵᠤ ᠪᠠᠢᠭᠰᠠᠨ ᠨᠣᠭᠣᠭᠠᠨ ᠬᠥᠨᠵᠢᠯᠡ ᠪᠠᠢᠭᠰᠠᠨ ᠪᠢᠰᠢ ᠤᠤ? ᠭᠡᠲᠡᠯᠡ ᠸᠠᠩ ᠯᠠᠨ ᠬᠤᠸᠠ ᠶ᠋ᠢ ᠦᠬᠦᠭᠰᠡᠨ ᠦ᠌ ᠳᠠᠷᠠᠭᠠ ᠲᠡᠷᠡ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠢ᠋ ᠤᠤᠯ ᠣᠷᠣᠨ ᠠ᠋ᠴᠠ ᠨᠢ ᠲᠣᠬᠣᠢ ᠬᠢᠷᠢᠲᠡᠢ ᠳᠣᠲᠣᠭᠰᠢ ᠰᠢᠯᠵᠢᠭᠦᠯᠦᠨ ᠬᠤᠷᠢᠶᠠᠭᠰᠠᠨ ᠪᠠᠢᠨᠠ᠃ ᠡᠩ ᠦ᠋ᠨ ᠪᠠᠢᠳᠠᠯ ᠳᠣᠣᠷᠠ ᠭᠠᠭᠴᠠ ᠬᠥᠮᠦᠨ ᠤᠨᠲᠠᠬᠤ ᠳᠤ ᠪᠠᠨ ᠬᠤᠷᠢᠶᠠᠭᠰᠠᠨ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠡᠭᠡᠷᠡ ᠲᠠᠯᠠ ᠠ᠋ᠴᠠ ᠨᠢ ᠠᠪᠬᠤ ᠠ᠋ᠴᠠ ᠪᠢᠰᠢ᠂ ᠳᠣᠣᠷᠠᠬᠢ ᠶᠢ ᠨᠢ ᠬᠥᠳᠡᠯᠭᠡᠬᠦ ᠦᠭᠡᠢ ᠶᠦᠮ᠃ ᠨᠡᠩ ᠰᠢᠯᠵᠢᠭᠦᠯᠦᠨ ᠬᠤᠷᠢᠶᠠᠬᠤ ᠬᠡᠷᠡᠭ ᠦᠭᠡᠢ ᠶᠦᠮ᠃ ᠲᠡᠷᠡᠴᠢᠯᠡᠨ ᠢᠷᠮᠡᠭ ᠢ᠋ᠶ᠋ᠡᠷ ᠨᠢ ᠤᠨᠲᠠᠬᠤ ᠬᠥᠮᠦᠨ ᠳ᠋ᠦ᠍ ᠴᠠᠭᠠᠳᠤ ᠲᠠᠯᠠ ᠳ᠋ᠠᠬᠢ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠶᠠᠮᠠᠷ ᠴᠤ᠌ ᠨᠥᠯᠥᠭᠡ ᠪᠣᠯᠬᠤ ᠦᠭᠡᠢ ᠶᠦᠮ ᠴᠢᠨᠢ ᠶᠠᠭᠤᠨ ᠳ᠋ᠤ᠌ ᠵᠠᠪᠠᠯ ᠰᠢᠯᠵᠢᠭᠦᠯᠬᠦ ᠪᠣᠢ? ᠡᠭᠦᠨ ᠡᠴᠡ ᠥᠭᠡᠷᠡ ᠬᠥᠮᠦᠨ ᠤᠨᠲᠠᠵᠤ ᠪᠠᠢᠭᠠᠳ ᠲᠡᠭᠡᠵᠦ ᠬᠤᠷᠢᠶᠠᠭᠰᠠᠨ ᠭᠡᠵᠦ ᠵᠢᠱᠢᠵᠦ ᠪᠣᠯᠤᠨᠠ᠃ ᠸᠠᠩ ᠯᠠᠨ ᠬᠤᠸᠠ ᠶᠢᠨ ᠦᠬᠦᠭᠰᠡᠨ ᠪᠠᠢᠳᠠᠯ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍᠂ ᠲᠠᠢᠪᠤᠩ ᠤᠨᠲᠠᠵᠤ ᠪᠠᠢᠭᠠᠳ ᠬᠦᠴᠦᠲᠦ ᠴᠢᠨᠠᠷ ᠤ᠋ᠨ ᠡᠮ ᠳ᠋ᠦ᠍ ᠬᠤᠤᠷᠳᠠᠭᠳᠠᠨ ᠮᠠᠰᠢ ᠲᠦᠷᠭᠡᠨ ᠦᠬᠦᠭᠰᠡᠨ ᠨᠢ ᠢᠯᠡᠬᠡᠨ ᠪᠠᠢᠨᠠ᠃ ᠡᠳᠡᠭᠡᠷ ᠡᠴᠡ ᠦᠵᠡᠬᠦ ᠳ᠋ᠦ᠍ ᠸᠠᠩ ᠯᠠᠨ ᠬᠤᠸᠠ ᠲᠡᠷᠡ ᠬᠥᠮᠦᠨ ᠲᠡᠢ ᠰᠠᠨᠠᠭᠠ ᠠᠮᠤᠷ ᠤᠨᠲᠠᠵᠤ ᠪᠠᠢᠭᠠᠳ ᠠᠯᠠᠭᠳᠠᠭᠰᠠᠨ ᠢ᠋ ᠮᠡᠳᠡᠵᠦ ᠪᠣᠯᠤᠨᠠ᠃ ᠡᠨᠡ ᠪᠣᠯ ᠮᠢᠨᠦ ᠳᠥᠷᠪᠡᠳᠦᠭᠡᠷ ᠰᠡᠵᠢᠭᠯᠡᠯ ᠪᠣᠯᠤᠨᠠ᠃
— ᠪᠢ ᠬᠣᠲᠠ ᠶᠢᠨ ᠲᠡᠭᠦᠷᠭᠡ ᠳ᠋ᠡᠬᠢ ᠨᠠᠷᠠᠰᠤᠨ ᠣᠢ ᠳ᠋ᠤ᠌ ᠲᠡᠷᠭᠡᠨ ᠠᠶᠤᠯ ᠠ᠋ᠴᠠ ᠮᠤᠯᠲᠤᠷᠠᠭᠠᠳ ᠲᠡᠷᠡ ᠳᠣᠣᠷᠠ ᠪᠠᠨ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠳ᠋ᠢᠶᠠᠩᠬᠤᠸᠠ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠲᠡᠷᠡ ᠠᠯᠪᠠᠨ ᠭᠡᠷ ᠲᠤ ᠪᠠᠨ ᠪᠠᠢᠪᠠ᠃ ᠲᠡᠭᠦᠨ ᠢ᠋ ᠲᠡᠷᠭᠡ ᠵᠢᠯᠣᠭᠣᠳᠴᠤ ᠴᠢᠳᠠᠨᠠ ᠭᠡᠳᠡᠭ ᠢ᠋ ᠨᠠᠷᠢᠨ ᠣᠢᠯᠠᠭᠠᠬᠤ ᠬᠥᠮᠦᠨ ᠪᠣᠯ ᠪᠠᠰᠠ ᠭᠤᠸᠠᠨ ᠢᠦᠢ ᠱᠠᠨ ᠪᠣᠯᠤᠨᠠ᠃ ᠲᠡᠷᠡ ᠨᠠᠷᠠᠰᠤᠨ ᠣᠢ ᠳ᠋ᠤ᠌ ᠡᠮᠡᠭᠲᠡᠢ ᠮᠠᠶᠢᠭ ᠢ᠋ᠶ᠋ᠠᠷ ᠬᠤᠪᠴᠠᠯᠠᠭᠠᠳ ᠲᠡᠷᠭᠡ ᠪᠡᠷ ᠢ᠋ᠶ᠋ᠡᠨ ᠮᠢᠨᠦ ᠲᠡᠷᠭᠡ ᠶᠢ ᠳᠠᠭᠠᠷᠢᠬᠤ ᠳ᠋ᠤ᠌ ᠪᠢ ᠨᠡᠯᠢᠶᠡᠳ ᠭᠠᠢᠬᠠᠵᠤ ᠥᠩᠭᠡᠷᠡᠭᠰᠡᠨ ᠶᠦᠮ᠃ ᠰᠡᠭᠦᠯ ᠳ᠋ᠦ᠍ᠨᠢ ᠪᠠᠢᠴᠠᠭᠠᠭᠠᠳ᠂ ᠠᠷᠪᠠᠨ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠦ ᠹᠧᠩ ᠮᠧᠢ᠂ ᠭᠤᠸᠠᠨ ᠢᠦᠢ ᠱᠠᠨ ᠲᠠᠢ ᠬᠠᠮᠲᠤ ᠬᠥᠳᠡᠭᠡ ᠪᠠᠭᠤᠵᠤ ᠪᠠᠢᠬᠤ ᠳᠤ ᠪᠠᠨ ᠲᠡᠭᠦᠨ ᠡᠴᠡ ᠲᠡᠷᠭᠡ ᠵᠢᠯᠣᠭᠣᠳᠬᠤ ᠶᠢ ᠰᠤᠷᠤᠭᠰᠠᠨ ᠢ᠋ ᠲᠣᠳᠣᠷᠬᠠᠢᠯᠠᠪᠠ᠃ ᠡᠨᠡ ᠪᠠᠢᠳᠠᠯ ᠢ᠋ ᠲᠡᠭᠦᠨ ᠡᠴᠡ ᠥᠭᠡᠷᠡ ᠨᠠᠷᠢᠨ ᠮᠡᠳᠡᠬᠦ ᠬᠥᠮᠦᠨ ᠦᠭᠡᠢ᠃
— ᠳᠡᠭᠡᠷᠡᠬᠢ ᠵᠦᠢᠴᠢᠯᠡᠯ ᠮᠠᠭᠠᠳᠯᠠᠯ ᠬᠣᠵᠢᠮ ᠤ᠋ᠨ ᠪᠠᠢᠴᠠᠭᠠᠯᠲᠠ ᠪᠠᠷ ᠲᠣᠳᠣᠷᠬᠠᠢ ᠭᠡᠷᠡᠴᠢᠯᠡᠭᠳᠡᠪᠡ᠃ ᠢᠩᠭᠢᠭᠡᠳ ᠮᠢᠨᠦ ᠠᠩᠬᠠᠷᠤᠯ ᠭᠤᠸᠠᠨ ᠢᠦᠢ ᠱᠠᠨ ᠳᠡᠭᠡᠷᠡ ᠲᠥᠪᠯᠡᠷᠡᠨ᠂ ᠲᠡᠭᠦᠨ ᠢ᠋ ᠲᠤᠰᠬᠠᠢᠯᠠᠨ ᠮᠥᠷᠳᠡᠨ ᠪᠠᠢᠴᠠᠭᠠᠭᠰᠠᠨ ᠶᠤᠮ ᠭᠡᠯᠡ᠃
ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠬᠢᠨᠢ ᠳᠠᠷᠠᠭᠠ᠂ ᠬᠦᠬᠡᠲᠤᠯᠢ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠣᠴᠢᠵᠤ ᠭᠤᠸᠠᠨ ᠢᠦᠢ ᠱᠠᠨ ᠢ᠋ ᠰᠢᠭᠦᠯᠡ᠃ ᠲᠡᠭᠦᠨ ᠦ᠌ ᠲᠤᠰᠢᠶᠠᠯᠲᠠ ᠨᠢ ᠲᠦᠪᠰᠢᠨ ᠦ᠌ ᠵᠦᠢᠴᠢᠯᠡᠯ ᠲᠡᠢ ᠳᠡᠮᠡᠢ ᠵᠦᠷᠢᠶᠡᠨ ᠦᠭᠡᠢ ᠪᠠᠢᠪᠠ᠃ ᠵᠥᠪᠬᠡᠨ ᠦᠵᠡᠰᠬᠦᠯᠡᠩ ᠦ᠋ᠨ ᠬᠡᠭᠦᠷ ᠢ᠋ ᠠᠭᠤᠳᠠᠯᠵᠤ ᠳᠠᠬᠢᠨ ᠪᠠᠢᠴᠠᠭᠠᠬᠤ ᠪᠠᠷ ᠪᠠᠢᠭᠠ ᠶ᠋ᠢ ᠭᠤᠸᠠᠨ ᠢᠦᠢ ᠱᠠᠨ ᠮᠡᠳᠡᠭᠡᠳ ᠬᠡᠭᠦᠷ ᠢ᠋ ᠨᠢ ᠬᠤᠯᠠᠭᠠᠢᠯᠠᠨ ᠠᠪᠬᠤ ᠪᠠᠷ ᠣᠴᠢᠭᠰᠠᠨ ᠳ᠋ᠤ᠌᠂ ᠬᠠᠨ ᠠᠪᠤᠭᠠᠢ ᠨᠠᠷ ᠨᠢᠭᠡᠨᠲᠡ ᠮᠠᠯᠲᠠᠵᠤ ᠠᠪᠤᠭᠠᠳ ᠶᠠᠪᠤᠴᠢᠬᠠᠵᠠᠢ ᠭᠡᠰᠡᠨ ᠲᠤᠰᠢᠶᠠᠯᠲᠠ ᠨᠢ ᠲᠦᠪᠰᠢᠨ ᠦ᠌ ᠵᠦᠢᠴᠢᠯᠡᠯ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ ᠰᠢᠨᠡ ᠵᠦᠢᠯ ᠪᠠᠢᠯᠠ᠃ ᠡᠨᠡ ᠬᠡᠷᠡᠭ ᠦ᠋ᠨ ᠲᠤᠬᠠᠢ ᠲᠦᠪᠰᠢᠨ ᠦ᠌ ᠵᠦᠢᠴᠢᠯᠡᠯ ᠨᠢ ᠬᠥᠬᠡᠲᠤᠯᠢ ᠶ᠋ᠢ ᠰᠡᠳᠬᠢᠯ ᠦ᠋ᠨ ᠤᠭ ᠠ᠋ᠴᠠ ᠨᠢ ᠪᠢᠰᠢᠷᠡᠭᠦᠯᠵᠡᠢ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠡ