ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠳᠥᠴᠢᠨ ᠨᠢᠭᠡ> Хялгасан дөрөөн дээр – Хасвулаг зохиов <41>
72ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠳᠥᠴᠢᠨ ᠨᠢᠭᠡ>
ᠲᠦᠪᠰᠢᠨ ᠭᠤᠸᠠᠢ᠂ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠬᠣᠣᠷᠯᠠᠭᠳᠠᠭᠰᠠᠨ ᠢ᠋ ᠬᠥᠬᠡᠲᠤᠯᠢ ᠳ᠋ᠤ᠌ ᠨᠠᠷᠢᠨ ᠵᠦᠢᠴᠢᠯᠡᠵᠦ ᠬᠡᠯᠡᠭᠰᠡᠨ ᠦᠭᠡᠢ ᠴᠤ᠌ ᠲᠡᠭᠦᠨ ᠦ᠌ ᠢᠩᠭᠢᠵᠦ ᠦᠷᠡᠭᠳᠡᠯ ᠦ᠋ᠨ ᠡᠳ᠋ ᠪᠣᠯᠤᠭᠰᠠᠨ ᠳ᠋ᠤ᠌ ᠶᠡᠬᠡ ᠬᠠᠷᠠᠮᠰᠠᠵᠤ ᠪᠠᠢᠯᠠ᠃ ᠸᠠᠩ ᠯᠠᠨ ᠬᠤᠸᠠ ᠪᠣᠯ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠢ᠋ ᠳᠠᠬᠢᠨ ᠪᠠᠢᠴᠠᠭᠠᠬᠤ ᠳᠤᠮᠳᠠ ᠬᠣᠣᠷᠯᠠᠭᠳᠠᠭᠰᠠᠨ ᠪᠣᠯᠬᠣᠷ ᠲᠦᠪᠰᠢᠨ ᠭᠤᠸᠠᠢ ᠰᠡᠷᠡᠮᠵᠢ ᠰᠤᠯᠠᠳᠠᠭᠰᠠᠨ ᠠ᠋ᠴᠠ ᠭᠠᠷᠭᠠᠭᠰᠠᠨ ᠠᠯᠳᠠᠰᠢ ᠭᠡᠳᠡᠭ ᠢ᠋ᠶ᠋ᠡᠨ ᠵᠥᠪᠰᠢᠶᠡᠷᠡᠨ ᠥᠪᠡᠷ ᠦ᠋ᠨ ᠬᠠᠷᠢᠭᠤᠴᠠᠯᠭᠠ ᠡᠨᠳᠡᠯ ᠳᠦ ᠪᠡᠨ ᠪᠡᠶᠡ ᠪᠡᠨ ᠰᠢᠭᠦᠮᠵᠢᠯᠡᠮᠡᠷ ᠪᠠᠢᠯᠠ᠃ ᠲᠡᠷᠡ ᠬᠡᠷᠪᠡ ᠪᠠᠬᠠᠨ ᠠᠩᠬᠠᠷᠤᠯ ᠲᠠᠯᠪᠢᠨ ᠡᠮᠦᠨᠡ ᠬᠣᠢᠨᠠᠬᠢ ᠶ᠋ᠢ ᠨᠢ ᠠᠪᠴᠠᠯᠳᠤᠭᠤᠯᠤᠨ ᠪᠣᠳᠣᠭᠰᠠᠨ ᠪᠣᠯ ᠪᠦᠷ ᠵᠠᠢᠯᠠᠰᠬᠢᠵᠦ ᠪᠣᠯᠤᠮᠠᠷ ᠬᠡᠷᠡᠭ ᠪᠠᠢᠭᠰᠠᠨ᠃
ᠦᠨᠡᠨ ᠢ᠋ ᠬᠡᠯᠡᠪᠡᠯ ᠲᠡᠷᠡ ᠰᠥᠨᠢ ᠸᠠᠩ ᠯᠠᠨ ᠬᠤᠸᠠ ᠠ᠋ᠴᠠ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠬᠤ ᠦᠶᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠨᠢᠭᠡᠨᠲᠡ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠦ᠋ᠨ ᠦᠨᠡᠨ ᠳᠦᠷᠢ᠂ ᠡᠬᠢ ᠠᠳᠠᠭ ᠦᠨᠳᠦᠰᠦᠨ ᠳᠦ ᠪᠡᠨ ᠲᠣᠭᠠ ᠲᠠᠢ ᠪᠣᠯᠵᠠᠢ᠃ ᠲᠡᠷᠡᠴᠢᠯᠡᠨ ᠸᠠᠩ ᠯᠠᠨ ᠬᠤᠸᠠ᠂ ᠦᠵᠡᠰᠬᠦᠯᠡᠩ ᠦ᠋ᠨ ᠭᠡᠷ ᠡᠴᠡ ᠭᠠᠷᠬᠤ ᠳᠤ ᠪᠠᠨ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠵᠦᠢᠯ ᠲᠤᠰ ᠬᠡᠷᠡᠭ ᠲᠡᠢ ᠮᠠᠰᠢ ᠨᠢᠭᠲᠠ ᠬᠣᠯᠪᠣᠭᠳᠠᠵᠤ᠂ ᠡᠭᠦᠨ ᠢ᠋ ᠯᠡᠪᠡᠷᠡᠭᠦᠯᠪᠡᠯ ᠶᠠᠯᠠᠲᠠᠨ ᠳ᠋ᠤ᠌ ᠬᠦᠴᠦᠲᠡᠢ ᠳᠠᠷᠤᠯᠲᠠ ᠥᠭᠬᠦ ᠶ᠋ᠢ ᠣᠢᠯᠠᠭᠠᠵᠤ ᠪᠠᠢᠭᠰᠠᠨ ᠶᠤᠮ᠃ ᠬᠡᠷᠪᠡ ᠢᠩᠭᠢᠭᠡᠳ ᠴᠢᠨᠠᠭᠰᠢ ᠵᠦᠢᠴᠢᠯᠠᠪᠠᠯ ᠸᠠᠩ ᠯᠠᠨ ᠬᠤᠸᠠ ᠡᠨᠡ ᠭᠡᠷᠡᠴᠢ ᠳ᠋ᠦ᠍ ᠡᠵᠡᠨ ᠪᠣᠯᠣᠮᠠᠭᠴᠠ ᠲᠡᠭᠦᠨ ᠦ᠌ ᠠᠮᠢ ᠨᠠᠰᠤᠨ ᠳ᠋ᠤ᠌ ᠠᠶᠤᠯ ᠠᠪᠴᠢᠷᠠᠬᠤ ᠶ᠋ᠢ ᠤᠷᠢᠳᠴᠢᠯᠠᠨ ᠪᠣᠳᠣᠯᠬᠢᠯᠠᠵᠤ ᠪᠣᠯᠬᠤ ᠪᠠᠢᠭᠰᠠᠨ᠃ ᠦᠭᠡᠢ ᠴᠤ᠌ ᠭᠡᠰᠡᠨ ᠡᠢᠮᠦ ᠶᠠᠪᠤᠳᠠᠯ ᠭᠠᠷᠬᠤ ᠶ᠋ᠢ ᠰᠡᠷᠭᠡᠢᠯᠡᠬᠦ ᠬᠠᠷᠢᠭᠤᠴᠠᠯᠭᠠ ᠲᠡᠭᠦᠨ ᠳ᠋ᠦ᠍ ᠵᠠᠢᠯᠠᠰᠢ ᠦᠭᠡᠢ ᠪᠠᠢᠭᠰᠠᠨ᠃ ᠥᠴᠦᠬᠡᠨ ᠣᠮᠲᠣᠭᠠᠢᠯᠠᠯ ᠡᠢᠮᠦ ᠬᠦᠨᠳᠦ ᠬᠣᠣᠷ ᠬᠥᠨᠥᠭᠡᠯ ᠲᠡᠢ ᠦᠷᠡ ᠳ᠋ᠦᠩ ᠠᠪᠴᠢᠷᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠮᠠᠰᠢ ᠶᠡᠬᠡ ᠬᠠᠷᠠᠮᠰᠠᠵᠤ ᠪᠢᠯᠡ᠃ ᠲᠦᠪᠰᠢᠨ ᠭᠤᠸᠠᠢ᠂ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠤᠷᠲᠤ ᠤᠳᠠᠭᠠᠨ ᠬᠤᠭᠤᠴᠠᠭᠠᠨ ᠤ᠋ ᠭᠡᠷ ᠪᠦᠯᠢ᠂ ᠡᠷᠡ ᠡᠮᠡ ᠶ᠋ᠢᠨ ᠬᠠᠷᠢᠴᠠᠭᠠ᠂ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠭᠰᠠᠨ ᠪᠠ ᠴᠢᠨᠠᠭᠰᠢ ᠠᠮᠢ ᠪᠠᠨ ᠠᠯᠳᠠᠭᠰᠠᠨ ᠬᠦᠷᠲᠡᠯᠡ ᠨᠠᠷᠢᠨ ᠵᠦᠢᠴᠢᠯᠡᠵᠦ ᠲᠤᠯᠭᠠᠵᠠᠢ᠃
— ᠸᠠᠩ ᠯᠠᠨ ᠬᠤᠸᠠ ᠭᠡᠭᠴᠢ ᠡᠨᠡ ᠳᠤᠮᠳᠠ ᠶ᠋ᠢ ᠪᠠᠷᠢᠮᠲᠠᠯᠠᠨ᠂ ᠶᠣᠰᠣ ᠶ᠋ᠢ ᠰᠢᠲᠦᠳᠡᠭ ᠡᠮᠡᠭᠲᠡᠢ ᠦᠨᠡᠨ ᠦᠭᠡ᠂ ᠦᠨᠡᠨ ᠬᠡᠷᠡᠭ ᠢ᠋ᠶ᠋ᠡᠷ ᠳᠣᠯᠣᠭᠠᠨ ᠲᠥᠷᠥᠯ ᠦ᠋ᠨ ᠳᠡᠭᠡᠳᠦᠰ ᠢ᠋ ᠨᠢ ᠠᠭᠤᠳᠠᠯᠤᠨ ᠬᠠᠷᠢᠶᠠᠭᠰᠠᠨ ᠴᠤ᠌ ᠬᠠᠯᠢᠷᠠᠯ ᠦᠭᠡᠢ ᠬᠦᠯᠢᠶᠡᠨ ᠠᠪᠬᠤ ᠠᠭᠤᠳᠠᠮ ᠪᠠᠭᠲᠠᠭᠠᠮᠵᠢ ᠲᠠᠢ ᠪᠢᠯᠡ᠃ ᠬᠡᠷᠪᠡ ᠪᠠᠰᠢᠷ ᠨᠠᠭᠠᠳᠤᠨ ᠮᠡᠬᠡᠯᠡᠯ ᠬᠢᠪᠡᠯ ᠶᠠᠰᠤᠨ ᠳ᠋ᠤᠨᠢ ᠣᠷᠣᠲᠠᠯᠠ ᠵᠠᠨᠤᠳᠠᠭ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠨᠢ ᠴᠤ᠌ ᠬᠡᠵᠢᠶᠡᠳᠡ ᠬᠠᠯᠠᠬᠤ ᠳ᠋ᠤ᠌ ᠪᠡᠷᠬᠡ ᠪᠠᠢᠵᠠᠢ᠃ ᠡᠢᠮᠦ ᠰᠢᠯᠲᠠᠭᠠᠨ ᠠ᠋ᠴᠠ ᠲᠡᠷᠡ ᠤᠳᠠᠭᠠᠨ ᠵᠢᠯ ᠵᠣᠪᠠᠯ ᠵᠢᠷᠭᠠᠯ ᠢ᠋ᠶ᠋ᠠᠨ ᠬᠠᠮᠲᠤᠳᠬᠠᠭᠰᠠᠨ ᠲᠡᠷᠡ 《ᠨᠣᠶᠠᠨ》 ᠡᠷᠡ ᠲᠡᠢ ᠪᠡᠨ ᠡᠪᠳᠡᠷᠡᠨ᠂ ᠡᠴᠦᠰ ᠲᠤ ᠪᠠᠨ ᠳᠡᠷᠡ ᠰᠠᠯᠭᠠᠨ ᠰᠠᠭᠤᠴᠠ ᠪᠠᠨ ᠬᠣᠯᠠᠳᠤᠭᠤᠯᠤᠭᠰᠠᠨ ᠶᠤᠮ᠃ ᠁ᠡᠨᠡ ᠨᠢ ᠴᠤ᠌ ᠶᠠᠯᠢᠮ ᠦᠭᠡᠢ ᠤᠴᠢᠷ ᠠ᠋ᠴᠠ ᠡᠭᠦᠰᠦᠭᠰᠡᠨ ᠲᠤᠯᠠ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠢᠨᠠᠭᠰᠠᠳ ᠭᠠᠢᠭᠤᠢ ᠯᠠ ᠰᠠᠢᠨ ᠰᠠᠢᠬᠠᠨ ᠪᠠᠢᠭᠰᠠᠨ ᠤᠯᠤᠰ ᠢᠩᠭᠢᠵᠦ ᠡᠪᠳᠡᠷᠡᠨᠡ ᠭᠡᠭᠴᠢ ᠳᠡ ᠭᠡᠮᠡᠨ ᠬᠠᠷᠠᠮᠰᠠᠳᠠᠭ ᠪᠠᠢᠯᠠ᠃
— ᠤᠤᠯ ᠨᠢ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠲᠡᠵᠢᠭᠡᠭᠰᠡᠨ ᠬᠡᠦᠬᠡᠳ ᠥᠰᠬᠦ ᠳᠣᠳᠣᠮ ᠨᠢᠭᠤᠷ ᠴᠢᠷᠠᠢ ᠨᠢ ᠡᠷᠡ ᠲᠡᠢ ᠨᠢ ᠲᠥᠰᠦᠭᠡ ᠲᠡᠢ ᠪᠣᠯᠵᠤ᠂ ᠳᠡᠭᠡᠷᠡ ᠤᠷᠤᠭᠤᠯ ᠨᠢ ᠳᠣᠣᠷᠠ ᠲᠠᠯᠠ ᠠ᠋ᠴᠠ ᠪᠠᠨ ᠪᠠᠬᠠᠨ ᠭᠠᠳᠠᠭᠰᠢ ᠳᠠᠷᠪᠠᠢᠭᠰᠠᠨ ᠳᠣᠷᠪᠣᠭᠣᠷ ᠬᠡᠯᠪᠡᠷᠢ ᠨᠢ ᠬᠦᠷᠲᠡᠯᠡ ᠰᠡᠭᠦᠳᠡᠷᠯᠡᠭᠰᠡᠨ ᠰᠢᠭ ᠳᠠᠭᠤᠷᠢᠶᠠᠭᠰᠠᠨ ᠢ᠋ ᠨᠢ ᠬᠡᠨ ᠦᠵᠡᠯᠡ ᠭᠡᠳ ᠲᠥᠷᠥᠭᠰᠡᠨ ᠬᠦᠦ ᠨᠢ ᠭᠡᠮᠡᠷ ᠠᠳᠠᠯᠢᠬᠠᠨ ᠪᠠᠢᠵᠠᠢ᠃
— ᠸᠠᠩ ᠯᠠᠨ ᠬᠤᠸᠠ ᠴᠤ᠌ ᠬᠠᠷᠠᠬᠤ ᠳᠣᠳᠣᠮ ᠰᠡᠵᠢᠭᠯᠡᠨ᠂ ᠡᠨᠡ ᠬᠦᠦ ᠶ᠋ᠢ ᠠᠪᠴᠢᠷᠠᠬᠤ ᠳ᠋ᠤ᠌ ᠴᠤ᠌ ᠬᠡᠳᠦ ᠬᠣᠨᠣᠭᠰᠠᠨ ᠮᠠᠶᠢᠭ ᠲᠠᠢ ᠪᠠᠢᠭᠰᠠᠨ᠃ ᠶᠠᠮᠠᠷ ᠬᠥᠮᠦᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠢᠮᠦ ᠲᠡᠢᠮᠦ ᠰᠢᠯᠲᠠᠭ ᠢ᠋ᠶ᠋ᠠᠷ ᠬᠠᠶᠠᠬᠤ ᠪᠠᠷ ᠪᠣᠳᠣᠭᠰᠠᠨ ᠴᠤ᠌ ᠬᠡᠳᠦ ᠬᠣᠨᠣᠭᠤᠯᠤᠭᠠᠳ ᠬᠠᠶᠠᠬᠤ ᠦᠭᠡᠢ ᠶᠦᠮ᠃
— ᠲᠡᠷᠡ ᠴᠤ᠌ ᠪᠠᠢᠲᠤᠭᠠᠢ᠂ ᠬᠡᠦᠬᠡᠳ ᠲᠡᠵᠢᠭᠡᠭᠰᠡᠨ ᠦ᠌ ᠳᠠᠷᠠᠭᠠ ᠭᠠᠷᠠᠭ ᠲᠤ᠌ ᠡᠷᠡ ᠨᠢ ᠲᠡᠭᠦᠨ ᠢ᠋ ᠠᠷᠭᠠᠳᠠᠮᠠᠷ ᠣᠪᠣᠷ ᠲᠠᠢ ᠪᠠᠷ᠂ ᠬᠣᠵᠢᠮ ᠢ᠋ᠶ᠋ᠠᠨ ᠪᠣᠳᠣᠨ ᠲᠥᠷᠥᠭᠰᠡᠨ ᠬᠡᠦᠬᠡᠳ ᠭᠡᠵᠦ ᠬᠡᠯᠡᠶᠡ ᠯᠠᠨ ᠬᠤᠸᠠ ᠮᠢᠨᠢ᠂ ᠭᠠᠳᠠᠨᠠ ᠠᠵᠢᠯ ᠰᠢᠯᠵᠢᠵᠦ ᠶᠠᠪᠤ ᠭᠡᠵᠦ ᠬᠡᠯᠡᠭᠡᠳ ᠬᠣᠶᠠᠷ ᠵᠢᠯ ᠭᠠᠳᠠᠭᠰᠢ ᠶᠠᠪᠤᠭᠤᠯᠤᠭᠰᠠᠨ ᠵᠡᠷᠭᠡ ᠶ᠋ᠢ ᠨᠢ ᠪᠣᠳᠣᠪᠠᠯ ᠡᠨᠡ ᠬᠦᠦ ᠶ᠋ᠢ ᠲᠡᠵᠢᠭᠡᠭᠰᠡᠨ ᠳ᠋ᠦ᠍ ᠯᠠᠪ ᠴᠢᠳᠬᠥᠷ ᠪᠠᠢᠨᠠ᠃ ᠡᠬᠡ ᠨᠢ ᠴᠤ᠌ ᠡᠨᠡ ᠣᠷᠴᠢᠮ ᠳ᠋ᠤ᠌ ᠪᠠᠢᠵᠤ ᠮᠡᠳᠡᠨᠡ᠃ ᠴᠢᠭᠢᠶᠡᠲᠦᠷᠦᠦ᠂ ᠠᠳᠠᠯᠢᠪᠲᠤᠷ ᠵᠢᠰᠦ ᠲᠡᠢ ᠬᠥᠮᠦᠨ ᠴᠤ᠌ ᠬᠠᠶᠠ ᠪᠠᠢᠳᠠᠭ ᠶᠤᠮ᠃ ᠢᠩᠭᠢᠵᠦ ᠰᠠᠢᠬᠠᠨ ᠲᠠᠭᠠᠷᠠᠯᠴᠠᠬᠤ ᠭᠡᠭᠴᠢ ᠯᠠᠪ ᠪᠠᠢᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠬᠤ ᠳᠣᠳᠣᠮ ᠠᠲᠠᠭᠠ ᠨᠢ ᠬᠥᠳᠡᠯᠵᠦ ᠳᠡᠭᠡᠷᠡ ᠳᠣᠣᠷᠠ ᠦᠭᠡᠢ ᠴᠤᠤᠭᠢᠯᠴᠠᠵᠤ ᠭᠠᠷᠳᠠᠭ᠃ ᠲᠡᠭᠡᠭᠡᠳ ᠯᠡ ᠥᠭᠡᠬᠦᠨ ᠳ᠋ᠦ᠍ ᠥᠷᠭᠡᠰᠦ ᠴᠤᠭᠯᠠᠨ ᠡᠮᠬᠦᠭᠦᠯᠦᠭᠰᠡᠨ ᠰᠢᠭ ᠮᠡᠬᠡᠯᠡᠭᠰᠡᠨ ᠡᠷᠡ ᠶ᠋ᠢ ᠪᠡᠨ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠵᠠᠨᠤᠨ ᠬᠣᠷᠣᠰᠴᠤ᠂ ᠰᠥᠭᠥᠳᠦᠮᠡᠷ ᠭᠤᠶᠤᠵᠤ ᠪᠠᠢᠭᠰᠠᠨ ᠡᠷᠡ ᠶ᠋ᠢ ᠪᠡᠨ ᠡᠷᠭᠢᠵᠦ ᠴᠤ᠌ ᠬᠠᠷᠠᠯ ᠦᠭᠡᠢ ᠪᠡᠷ ᠣᠷᠣ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠲᠡᠪᠡᠷᠢᠵᠦ ᠭᠠᠷᠤᠭᠠᠳ ᠬᠤᠪᠢ ᠬᠣᠪᠢᠨ ᠳᠤ ᠪᠠᠨ ᠰᠠᠭᠤᠭᠰᠠᠨ ᠶᠤᠮ᠃
— ᠢᠩᠭᠢᠵᠦ ᠰᠠᠯᠤᠯᠴᠠᠭᠰᠠᠨ ᠨᠢ 《ᠨᠣᠶᠠᠨ》 ᠭᠤᠸᠠᠢ ᠶ᠋ᠢ ᠠᠮᠢᠳᠤᠷᠠᠯ ᠳ᠋ᠤᠨᠢ ᠭᠠᠭᠴᠠᠭᠠᠷᠳᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠦᠵᠡᠰᠬᠦᠯᠡᠩ ᠲᠡᠢ ᠡᠳᠦᠷ ᠪᠣᠯᠭᠠᠨ ᠲᠠᠭᠠᠯᠴᠠᠵᠤ ᠠᠮᠠ ᠬᠣᠩᠰᠢᠶᠠᠷ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠦᠨ ᠠᠪᠢᠷ ᠰᠢᠪᠠᠷ ᠬᠡᠯᠡᠯᠴᠡᠬᠦ ᠨᠢ ᠴᠤ᠌ ᠲᠡᠭᠦᠨ ᠳ᠋ᠦ᠍ ᠰᠡᠵᠢᠭᠯᠡᠯᠲᠡᠢ ᠰᠠᠨᠠᠭᠳᠠᠵᠠᠢ᠃
— ᠤᠳᠠᠭᠰᠠᠨ ᠦᠭᠡᠢ ᠦᠵᠡᠰᠬᠦᠯᠡᠩ ᠲᠡᠭᠦᠨ ᠦ᠌ ᠲᠡᠦᠬᠡ ᠶ᠋ᠢᠨ ᠳᠠᠷᠤᠭᠳᠠᠮᠠᠯ ᠨᠢᠭᠤᠴᠠ ᠶ᠋ᠢ ᠢᠯᠡᠷᠡᠭᠦᠯᠦᠨ ᠰᠢᠬᠠᠮᠳᠠᠭᠤᠯᠬᠤ ᠳ᠋ᠤ᠌᠂ ᠠᠢᠬᠤᠪᠲᠤᠷ ᠰᠦᠷᠳᠡᠨ ᠡᠨᠡ ᠬᠣᠶᠠᠷ ᠡᠬᠡᠨᠡᠷ ᠢ᠋ ᠰᠡᠷᠡᠮᠵᠢᠯᠡᠵᠦ ᠡᠬᠢᠯᠡᠭᠰᠡᠨ ᠨᠢ ᠦᠨᠡᠨ ᠳᠦ ᠪᠡᠨ ᠢᠯᠡᠭᠦᠴᠡ ᠰᠡᠵᠢᠭᠯᠡᠯ ᠪᠠᠢᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠲᠡᠷᠡ ᠡᠨᠡᠬᠡᠨ ᠰᠡᠵᠢᠭ ᠢ᠋ᠶ᠋ᠡᠨ ᠦᠨᠡᠨ ᠮᠠᠭᠠᠳ ᠪᠣᠯᠭᠠᠬᠤ ᠪᠠᠷ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠭᠡᠷ ᠲᠦ᠋ᠨᠢ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠰᠡᠮᠬᠡᠨ ᠲᠣᠬᠢᠶᠠᠵᠤ ᠲᠠᠯᠪᠢᠵᠠᠢ᠃ ᠨᠡᠯᠢᠶᠡᠳ ᠬᠤᠭᠤᠴᠠᠭᠠ ᠲᠡᠭᠦᠨ ᠦ᠌ ᠲᠤᠬᠠᠢ ᠡᠨᠡ ᠬᠣᠶᠠᠷ ᠡᠮᠡᠭᠲᠡᠢ ᠶᠠᠭᠤ ᠴᠤ᠌ ᠬᠡᠯᠡᠯᠴᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠲᠡᠷᠡ ᠪᠠᠬᠠᠨ ᠰᠠᠨᠠᠭᠠ ᠠᠮᠠᠷᠠᠭᠰᠠᠨ ᠪᠠᠢᠬᠤ᠃
— ᠬᠠᠷᠢᠨ ᠲᠡᠷᠡ ᠦᠳᠡ ᠶ᠋ᠢᠨ ᠬᠣᠢᠨᠠ 《ᠨᠣᠶᠠᠨ》ᠭᠤᠸᠠᠢ᠂ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠬᠤ ᠪᠠᠷ ᠭᠡᠷ ᠲᠦ᠋ᠨᠢ ᠣᠷᠣᠬᠤ ᠳ᠋ᠤ᠌ ᠸᠠᠩ ᠯᠠᠨ ᠬᠤᠸᠠ ᠲᠡᠨᠳᠡ ᠪᠠᠢᠬᠤ ᠲᠠᠢ ᠬᠠᠷᠭᠤᠯᠳᠤᠵᠠᠢ᠃ 《ᠨᠣᠶᠠᠨ》 ᠮᠡᠳᠡᠭᠳᠡᠬᠦ ᠡᠴᠡ ᠪᠡᠨ ᠠᠶᠤᠬᠤ ᠳ᠋ᠠᠭᠠᠨ ᠵᠣᠷᠯᠣᠩ ᠳ᠋ᠤ᠌ ᠨᠢᠭᠤᠨ ᠬᠦᠯᠢᠶᠡᠵᠦ ᠪᠠᠢᠬᠤ ᠳ᠋ᠤ᠌᠂ ᠸᠠᠩ ᠯᠠᠨ ᠬᠤᠸᠠ ᠭᠠᠳᠠᠭᠰᠢ ᠭᠠᠷᠬᠤ ᠳᠤ ᠪᠠᠨ ᠭᠡᠨᠡᠳᠲᠡ ᠵᠣᠷᠯᠣᠩ ᠤ᠋ᠨ ᠳᠡᠷᠭᠡᠳᠡ ᠵᠣᠭᠰᠣᠰᠬᠢᠬᠦ ᠰᠢᠭ᠋ ᠪᠣᠯᠤᠭᠰᠠᠨ ᠨᠢ ᠲᠡᠭᠦᠨ ᠢ᠋ ᠠᠢᠬᠤᠪᠲᠤᠷ ᠰᠣᠴᠢᠭᠠᠨ᠂ ᠨᠠᠮᠠ ᠶᠢ ᠰᠡᠷᠡᠵᠦ ᠮᠡᠳᠡᠭᠰᠡᠨ ᠪᠣᠯᠪᠠ ᠤᠤ ᠭᠡᠮᠡᠨ ᠰᠡᠵᠢᠭᠯᠡᠭᠰᠡᠨ ᠴᠤ᠌ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤᠨᠢ ᠥᠨᠳᠥᠷ ᠪᠣᠰᠬᠠᠭᠳᠠᠭᠰᠠᠨ ᠬᠡᠷᠡᠮ ᠦ᠋ᠨ ᠭᠠᠳᠠᠨᠠ ᠠ᠋ᠴᠠ ᠳᠣᠲᠣᠷᠠᠬᠢ ᠬᠥᠮᠦᠨ ᠢ᠋ ᠶᠠᠭᠠᠬᠢᠭᠰᠠᠨ ᠴᠤ᠌ ᠣᠯᠵᠤ ᠦᠵᠡᠬᠦ ᠦᠭᠡᠢ ᠪᠣᠢ ᠭᠡᠵᠦ ᠪᠣᠳᠣᠬᠤ ᠳᠤ ᠪᠠᠨ ᠰᠠᠨᠠᠭᠠ ᠨᠢ ᠠᠮᠠᠷᠠᠵᠠᠢ᠃
— ᠦᠵᠡᠲᠡᠯᠡ ᠴᠠᠭ ᠪᠠᠴᠢᠮ ᠪᠣᠯᠵᠤ ᠳᠠᠬᠢᠭᠠᠳ ᠣᠯᠠᠨ ᠢ᠋ ᠪᠣᠳᠣᠬᠤ ᠵᠠᠪ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠸᠠᠩ ᠯᠠᠨ ᠬᠤᠸᠠ ᠶᠢ ᠭᠠᠷᠴᠤ ᠶᠠᠪᠤᠩᠭᠤᠲᠠ ᠳᠣᠲᠣᠭᠰᠢ ᠬᠤᠷᠳᠤᠨ ᠣᠷᠣᠵᠤ ᠬᠥᠮᠦᠨ ᠬᠣᠣᠷᠯᠠᠬᠤ ᠠᠵᠢᠯ ᠢ᠋ᠶ᠋ᠠᠨ ᠡᠬᠢᠯᠡᠭᠰᠡᠨ ᠪᠠᠢᠵᠠᠢ᠃
— ᠰᠡᠵᠢᠭ ᠶᠡᠬᠡ ᠲᠡᠢ ᠡᠨᠡ 《ᠨᠣᠶᠠᠨ》 ᠬᠠᠷᠢᠵᠤ ᠢᠷᠡᠭᠰᠡᠨ ᠦ᠌ ᠪᠡᠨ ᠳᠠᠷᠠᠭᠠ᠂ ᠦᠵᠡᠰᠬᠦᠯᠡᠩ ᠦ᠋ᠨ ᠳ᠋ᠦ᠍ ᠣᠴᠢᠭᠰᠠᠨ ᠢ᠋ ᠮᠠᠨᠢ ᠸᠠᠩ ᠯᠠᠨ ᠬᠤᠸᠠ ᠣᠯᠵᠤ ᠮᠡᠳᠡᠭᠰᠡᠨ ᠪᠣᠯᠪᠠ ᠤᠤ ᠦᠭᠡᠢ ᠪᠣᠯ ᠲᠡᠷᠡ ᠶᠠᠭᠤᠨ ᠳ᠋ᠤ᠌ ᠰᠢᠭᠤᠳ ᠶᠠᠪᠤᠬᠤ ᠦᠭᠡᠢ ᠵᠣᠷᠯᠣᠩ ᠤ᠋ᠨ ᠳᠡᠷᠭᠡᠳᠡ ᠵᠣᠭᠰᠣᠭᠰᠠᠨ ᠶᠤᠮ? ᠡᠰᠡᠪᠡᠯ ᠲᠡᠷᠡ ᠵᠣᠷᠯᠣᠩ ᠳ᠋ᠤ᠌ ᠪᠡᠶᠡ ᠵᠠᠰᠠᠬᠤ ᠶ᠋ᠢ ᠪᠣᠳᠣᠭᠠᠳ ᠪᠠᠢᠴᠢᠬᠠᠭᠰᠠᠨ ᠭᠡᠵᠢ ᠤᠤ? ᠭᠡᠵᠦ ᠡᠯᠳᠡᠪᠴᠢᠯᠡᠨ ᠰᠡᠵᠢᠭᠯᠡᠬᠦ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠬᠡᠵᠢᠶᠡᠳᠡ ᠪᠠᠲᠤᠲᠠᠢ ᠪᠠᠢᠬᠤ ᠶ᠋ᠢ ᠪᠣᠳᠣᠯᠬᠢᠯᠠᠨ ᠭᠡᠷ ᠲᠦ᠋ᠨᠢ ᠲᠣᠬᠢᠶᠠᠭᠰᠠᠨ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠢ᠋ᠶ᠋ᠠᠨ ᠠᠰᠢᠭᠯᠠᠵᠤ᠂ ᠬᠥᠳᠡᠯᠦᠯ ᠪᠠᠢᠳᠠᠯ᠂ ᠦᠭᠡ ᠶᠠᠷᠢᠶᠠ ᠶ᠋ᠢ ᠨᠢ ᠠᠩᠬᠠᠷᠴᠤ ᠰᠣᠨᠣᠰᠴᠤ ᠪᠠᠢᠭᠰᠠᠨ᠃
— ᠶᠠᠮᠠᠷ ᠴᠤ᠌ ᠣᠨᠴᠠᠭᠠᠢ ᠪᠠᠢᠳᠠᠯ ᠭᠠᠷᠤᠭᠠ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠳᠥᠩᠭᠡᠵᠦ ᠰᠠᠨᠠᠭᠠ ᠲᠠᠯᠪᠢᠭᠤᠷᠠᠵᠤ ᠪᠠᠢᠲᠠᠯᠠ ᠲᠦᠪᠰᠢᠨ᠂ ᠬᠥᠬᠡᠲᠤᠯᠢ ᠲᠡᠷᠡ ᠣᠷᠣᠢ ᠸᠠᠩ ᠯᠠᠨ ᠬᠤᠸᠠ ᠠ᠋ᠴᠠ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠭᠳᠠᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠴᠢᠭᠰᠠᠨ ᠬᠥᠮᠦᠰ ᠢ᠋ ᠮᠥᠷᠳᠡᠬᠦ ᠳᠦ ᠪᠡᠨ ᠯᠠᠪ ᠦᠵᠡᠭᠰᠡᠨ ᠪᠤᠶᠤ ᠮᠡᠳᠡᠭᠰᠡᠨ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠰᠢᠬᠠᠨ ᠲᠤᠯᠭᠠᠬᠤ ᠳ᠋ᠤ᠌᠂ ᠸᠠᠩ ᠯᠠᠨ ᠬᠤᠸᠠ ᠴᠤ᠌ ᠲᠡᠷᠡ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠬᠡᠯᠡᠮᠡᠷ ᠪᠠᠢᠭᠰᠠᠨ ᠢ᠋ ᠲᠡᠷᠡ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠣᠨᠣᠰᠴᠠᠢ᠃
— ᠵᠣᠯ ᠢ᠋ᠶ᠋ᠠᠷ ᠸᠠᠩ ᠯᠠᠨ ᠬᠤᠸᠠ ᠮᠠᠷᠭᠠᠰᠢ ᠨᠢ ᠬᠡᠯᠡᠬᠦ ᠪᠡᠷ ᠪᠣᠯᠤᠭᠰᠠᠨ ᠳ᠋ᠤ᠌ ᠰᠠᠶᠢ ᠨᠢᠭᠡ ᠠᠭᠤᠵᠢᠮ ᠠᠮᠢᠰᠬᠤᠭᠰᠠᠨ ᠪᠠᠢᠬᠤ᠃ ᠭᠡᠲᠡᠯᠡ ᠲᠡᠷᠡ ᠪᠣᠳᠣᠬᠤ ᠳᠣᠳᠣᠮ ᠰᠡᠵᠢᠭᠯᠡᠨ᠂ ᠰᠡᠵᠢᠭᠯᠡᠬᠦ ᠳᠣᠳᠣᠮ ᠠᠶᠤᠨ᠂ ᠰᠥᠨᠢ ᠳᠦ ᠪᠡᠨ ᠵᠠᠪᠳᠤᠨ ᠸᠠᠩ ᠯᠠᠨ ᠬᠤᠸᠠ ᠶᠢᠨ ᠳ᠋ᠦ᠍ ᠣᠴᠢᠭᠰᠠᠨ ᠨᠢ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠬᠤ ᠭᠡᠰᠡᠨ ᠪᠠᠢᠬᠤ᠃ ᠶᠠᠷᠢᠶᠠᠨ ᠦᠭᠡᠢ ᠲᠡᠷᠡ ᠣᠴᠢᠬᠤ ᠳᠤ ᠪᠠᠨ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠪᠡᠯᠡᠳᠬᠡᠯ ᠲᠡᠢ ᠪᠠᠢᠭᠰᠠᠨ ᠨᠢ ᠢᠯᠡᠬᠡᠨ᠃ ᠬᠡᠷᠪᠡ ᠲᠡᠭᠦᠨ ᠦ᠌ ᠣᠴᠢᠭᠰᠠᠨ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠵᠣᠷᠯᠣᠩ ᠳ᠋ᠤ᠌ ᠬᠡᠨ ᠪᠠᠢᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠᠯ ᠠᠶᠠ ᠪᠠᠷ ᠨᠢ ᠬᠠᠶᠠᠵᠤ ᠠᠮᠢ ᠶ᠋ᠢ ᠨᠢ ᠦᠯᠡᠳᠡᠭᠡᠨᠡ᠃ ᠬᠡᠷᠪᠡ ᠲᠡᠭᠦᠨ ᠢ᠋ ᠶᠠᠭ ᠲᠠᠨᠢᠭᠰᠠᠨ ᠪᠣᠯ ᠠᠯᠠᠵᠤ ᠣᠷᠬᠢᠬᠤ ᠪᠠᠷ ᠲᠥᠯᠥᠪᠯᠡᠵᠡᠢ᠃ ᠲᠡᠷᠡ ᠡᠨᠡ ᠬᠦ᠌ ᠴᠢᠨᠠᠭᠰᠢ ᠬᠠᠨᠳᠤᠭᠰᠠᠨ ᠡᠬᠡᠨᠡᠷ ᠲᠤ ᠪᠠᠨ ᠶᠠᠭᠠᠬᠢᠵᠤ ᠠᠮᠠ ᠨᠡᠭᠡᠭᠡᠨ ᠠᠷᠭᠠᠳᠠᠵᠤ ᠪᠠᠢᠭᠠᠳ ᠦᠨᠡᠨ ᠢ᠋ ᠨᠢ ᠣᠯᠬᠤ ᠲᠤᠬᠠᠢ ᠣᠯᠠᠨ ᠲᠠᠯᠠ ᠪᠠᠷ ᠪᠣᠳᠣᠯᠬᠢᠯᠠᠭᠰᠠᠨ ᠪᠥᠭᠡᠳ ᠪᠠᠰᠠ ᠡᠳᠦᠢ ᠲᠡᠳᠦᠢ ᠡᠷᠡᠭᠡᠯᠵᠡᠯ ᠲᠡᠢ ᠪᠠᠢᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠭᠡᠲᠡᠯᠡ ᠲᠡᠷᠡ ᠬᠣᠶᠠᠭᠤᠯᠠ ᠠᠭᠤᠯᠵᠠᠮᠠᠭᠴᠠ ᠲᠡᠭᠦᠨ ᠦ᠌ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠ ᠤᠴᠢᠷ ᠡᠭᠦᠰᠴᠡᠢ᠃
— ᠤᠤᠯ ᠨᠢ ᠸᠠᠩ ᠯᠠᠨ ᠬᠤᠸᠠ᠂ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠭᠳᠠᠬᠤ ᠲᠡᠷᠡ ᠦᠳᠡ ᠶ᠋ᠢᠨ ᠬᠣᠢᠨᠠ ᠲᠡᠭᠦᠨ ᠲᠡᠢ ᠬᠠᠨᠲᠠᠯᠠ ᠶᠠᠷᠢᠯᠴᠠᠭᠠᠳ ᠭᠠᠳᠠᠭᠰᠢ ᠭᠠᠷᠬᠤ ᠳ᠋ᠤ᠌᠂ ᠵᠣᠷᠯᠣᠩ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠰᠡᠵᠢᠭᠲᠡᠢ ᠶᠠᠭᠤᠮᠠ ᠪᠠᠢᠬᠤ ᠰᠢᠭ᠋ ᠲᠡᠭᠦᠨ ᠳ᠋ᠦ᠍ ᠰᠠᠨᠠᠭᠳᠠᠭᠰᠠᠨ᠃ ᠲᠡᠭᠡᠭᠡᠳ ᠸᠠᠩ ᠯᠠᠨ ᠬᠤᠸᠠ ᠵᠣᠭᠰᠣᠰᠬᠢᠨ ᠦᠵᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠵᠣᠷᠢᠭ ᠬᠦᠷᠦᠭᠰᠡᠨ ᠦᠭᠡᠢ᠃ ᠭᠡᠲᠡᠯᠡ ᠬᠠᠶᠠᠴᠢᠬᠠᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠰᠠᠨᠠᠭᠠ ᠠᠮᠤᠷ ᠦᠭᠡᠢ ᠰᠢᠭ ᠪᠠᠢᠭᠰᠠᠨ ᠪᠣᠯᠬᠣᠷ ᠬᠠᠭᠠᠰ ᠡᠷᠡᠭᠡᠯᠵᠡᠯ᠂ ᠬᠠᠭᠠᠰ ᠰᠡᠵᠢᠭᠯᠡᠯ ᠢ᠋ᠶ᠋ᠡᠷ ᠭᠠᠳᠠᠭᠰᠢ ᠭᠠᠷᠤᠭᠠᠳ ᠡᠭᠦᠳᠡ ᠵᠠᠪᠰᠠᠷᠯᠠᠵᠤ ᠳᠣᠲᠣᠭᠰᠢ ᠱᠠᠭᠠᠢᠭᠰᠠᠨ ᠪᠠᠢᠬᠤ᠃ ᠤᠳᠠᠭᠰᠠᠨ ᠦᠭᠡᠢ ᠡᠷᠡ ᠨᠢ ᠵᠣᠷᠯᠣᠩ ᠠ᠋ᠴᠠ ᠭᠠᠷᠴᠤ ᠢᠷᠡᠬᠦ ᠳᠦ ᠪᠡᠨ ᠶᠡᠬᠡ ᠠᠷᠪᠢᠨ ᠰᠢᠮᠡ ᠲᠡᠵᠢᠭᠡᠯᠲᠦ ᠶᠠᠭᠤᠮᠠ ᠠᠪᠴᠢᠬᠠᠭᠰᠠᠨ ᠡᠢᠰᠢ ᠲᠡᠢᠰᠢ ᠬᠢᠯᠠᠩ ᠬᠢᠯᠠᠩ ᠬᠠᠷᠠᠭᠰᠠᠭᠠᠷ ᠳᠣᠲᠣᠭᠰᠢ ᠭᠤᠯᠭᠤᠨ ᠣᠷᠣᠬᠤ ᠳ᠋ᠤ᠌᠂ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠠᠲᠠᠭᠠ ᠵᠢᠲᠥᠭᠡ ᠰᠦᠷᠡᠬᠡᠢ ᠬᠥᠳᠡᠯᠦᠭᠰᠡᠨ ᠪᠠᠢᠨᠠ᠃
— ᠡᠨᠡ ᠭᠱᠠᠨ ᠳ᠋ᠤ᠌ ᠦᠵᠡᠰᠬᠦᠯᠡᠩ ᠦ᠋ᠨ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠵᠦ ᠪᠠᠢᠭᠰᠠᠨ ᠡᠮᠡᠭᠲᠡᠢ ᠶ᠋ᠢᠨ ᠰᠠᠷᠠᠯ᠂ ᠣᠨᠴᠠᠭᠠᠢ ᠮᠡᠳᠡᠷᠡᠯ ᠢ᠋ᠶ᠋ᠡᠷ ᠳᠤᠲᠠᠮᠠᠭ ᠭᠡᠳᠡᠭ ᠦᠭᠡ ᠶᠠᠷᠢᠶᠠ ᠬᠢᠭᠡᠳ ᠡᠷᠡ ᠲᠡᠢ ᠨᠢ ᠠᠳᠠᠯᠢᠬᠠᠨ ᠵᠢᠰᠦᠲᠡᠢ ᠲᠡᠵᠢᠭᠡᠪᠦᠷᠢ ᠬᠡᠦᠬᠡᠳ ᠨᠢ ᠪᠣᠳᠣᠭᠳᠠᠬᠤ ᠳ᠋ᠤ᠌ ᠡᠯᠳᠡᠪ ᠰᠡᠵᠢᠭ ᠠᠯᠢᠪᠠ ᠶ᠋ᠢ ᠨᠢ ᠡᠵᠡᠮᠳᠡᠵᠡᠢ᠃ ᠲᠡᠭᠡᠭᠡᠳ ᠲᠡᠷᠡ ᠡᠨᠳᠡ ᠡᠴᠡ ᠮᠡᠳᠡᠭᠡ ᠰᠡᠭᠡᠭᠡ ᠪᠡᠨ ᠠᠯᠳᠠᠭᠰᠠᠨ ᠰᠢᠭ᠋ ᠪᠠᠢᠳᠠᠯ ᠲᠠᠢ ᠪᠠᠷ ᠰᠢᠤᠳᠠᠨ ᠲᠣᠪᠴᠢᠶᠠᠨ ᠳ᠋ᠤ᠌ ᠬᠦᠷᠴᠦ᠂ ᠵᠠᠬᠢᠳᠠᠯ ᠤ᠋ᠨ ᠦᠰᠦᠭ ᠢ᠋ ᠡᠨᠳᠡᠭᠦᠦ ᠪᠤᠷᠤᠭᠤ ᠪᠠᠷ ᠪᠢᠴᠢᠨ ᠵᠣᠭᠣᠰ ᠢ᠋ᠶ᠋ᠠᠨ ᠭᠤᠪᠢᠭᠤᠯᠤᠭᠰᠠᠨ ᠪᠠᠢᠵᠠᠢ᠃ ᠦᠨᠡᠨ ᠳᠦ ᠪᠡᠨ ᠲᠡᠭᠦᠨ ᠦ᠌ ᠡᠳᠡᠭᠡᠷ ᠪᠠᠢᠳᠠᠯ ᠢ᠋ ᠶᠡᠬᠡ ᠣᠯᠠᠨ ᠬᠥᠮᠦᠨ ᠦᠵᠡᠭᠰᠡᠨ ᠢ᠋ᠶ᠋ᠡᠷ ᠦᠯᠦ ᠪᠠᠷᠠᠨ ᠡᠳᠦᠭᠡ ᠵᠦᠢᠴᠢᠯᠡᠨ ᠪᠣᠳᠣᠭᠰᠠᠨ ᠴᠤ᠌ ᠮᠠᠰᠢ ᠢᠯᠡᠬᠡᠨ ᠪᠢᠰᠢ ᠤᠤ? ᠢᠩᠭᠢᠭᠡᠳ ᠸᠠᠩ ᠯᠠᠨ ᠬᠤᠸᠠ ᠬᠠᠷᠢᠵᠤ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠳᠣᠲᠣᠷᠠ ᠨᠢ ᠠᠢᠬᠤᠪᠲᠤᠷ ᠪᠤᠬᠢᠨᠢᠳᠤᠨ ᠡᠷᠡ ᠪᠡᠨ ᠬᠠᠷᠠ ᠰᠠᠨᠠᠭᠠᠨ ᠠ᠋ᠴᠠ ᠪᠠᠨ ᠰᠡᠵᠢᠭᠯᠡᠭᠡᠳ ᠪᠠᠢᠭᠰᠠᠨ᠃
— ᠦᠵᠡᠰᠬᠦᠯᠡᠩ ᠡᠷᠡ ᠲᠡᠢ ᠪᠡᠨ ᠡᠪᠳᠡᠷᠡᠯᠴᠡᠨ ᠵᠣᠳᠣᠭᠳᠠᠨ ᠳᠠᠷᠴᠢᠯᠭᠠᠭᠳᠠᠵᠤ ᠪᠠᠢᠭᠰᠠᠨ ᠨᠢ ᠬᠠᠷᠢᠨ ᠮᠠᠨ ᠤ᠋ ᠬᠥᠮᠦᠨ ᠳᠤᠮᠳᠠ ᠨᠢ ᠣᠷᠣᠵᠤ ᠬᠤᠳᠬᠤᠭᠰᠠᠨ ᠪᠠᠢᠵᠢ ᠰᠢᠦ᠃ ᠬᠡᠷᠪᠡ ᠨᠥᠬᠥᠷ ᠨᠠᠢᠵᠠ ᠶ᠋ᠢᠨ ᠬᠤᠪᠢ ᠪᠠᠷ ᠣᠴᠢᠵᠤ ᠦᠵᠡᠬᠦ ᠶᠦᠮ ᠪᠣᠯ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠶᠠᠭᠤᠨ ᠳ᠋ᠤ᠌ ᠡᠬᠡᠨᠡᠷ ᠡᠴᠡ ᠪᠡᠨ ᠨᠢᠭᠤᠵᠤ ᠳᠠᠯᠳᠠᠯᠠᠬᠤ ᠪᠣᠢ? ᠴᠢᠭᠢᠶᠡᠲᠦᠷᠦᠦ! ᠮᠠᠭᠤ ᠦᠵᠡᠰᠬᠦᠯᠡᠩ ᠴᠢ ᠬᠠᠷᠢᠨ ᠮᠠᠨ ᠤ᠋ ᠡᠪᠦᠭᠡᠨ ᠲᠡᠢ ᠠᠳᠠᠭ ᠮᠠᠭᠤ ᠠᠷᠠᠯᠵᠢᠶᠠ ᠬᠢᠵᠦ᠂ ᠠᠯᠢᠪᠠ ᠪᠠᠨ ᠰᠢᠢᠳᠪᠦᠷᠢᠯᠡᠭᠦᠯᠵᠦ ᠪᠠᠢᠭᠰᠠᠨ ᠪᠠᠢᠨᠠ ᠰᠢᠦ᠃ ᠢᠩᠭᠢᠭᠡᠳ ᠨᠠᠳᠠ ᠠ᠋ᠴᠠ ᠨᠢᠭᠤᠬᠤ ᠳᠤ ᠪᠠᠨ! ᠮᠣᠭᠠᠢ ᠶ᠋ᠢᠨ ᠡᠷᠢᠶᠡᠨ ᠭᠠᠳᠠᠨᠠ ᠪᠠᠨ᠂ ᠬᠥᠮᠦᠨ ᠦ᠌ ᠡᠷᠢᠶᠡᠨ ᠳᠣᠲᠣᠷᠠ ᠪᠠᠨ ᠭᠡᠭᠴᠢ ᠳᠡ᠃ ᠲᠡᠭᠦᠨ ᠢ᠋ ᠢᠩᠭᠢᠵᠦ ᠡᠯᠳᠡᠪᠴᠢᠯᠡᠨ ᠵᠦᠢᠴᠢᠯᠡᠵᠦ ᠪᠠᠢᠲᠠᠯᠠ ᠮᠠᠷᠭᠠᠰᠢ ᠨᠢ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠨᠢ ᠰᠣᠨᠣᠰᠳᠠᠭᠰᠠᠨ ᠳ᠋ᠤ᠌ ᠨᠡᠩ ᠮᠡᠳᠡᠭᠡ ᠠᠯᠳᠠᠲᠠᠯᠠ ᠰᠣᠴᠢᠵᠠᠢ᠃
— ᠲᠡᠭᠡᠭᠡᠳ ᠸᠠᠩ ᠯᠠᠨ ᠬᠤᠸᠠ᠂ ᠡᠷᠡ ᠶ᠋ᠢ ᠪᠡᠨ ᠲᠡᠷᠡ ᠦᠳᠡ ᠶ᠋ᠢᠨ ᠬᠣᠢᠨᠠ ᠦᠵᠡᠰᠬᠦᠯᠡᠩ ᠲᠡᠢ ᠡᠯᠳᠡᠪᠯᠡᠵᠦ ᠪᠠᠢᠭᠠᠳ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠪᠠᠢᠬᠠ᠃ ᠲᠡᠭᠡᠭᠡᠳ ᠪᠣᠯᠤᠷᠴᠠᠭᠠᠨ ᠠᠭᠤᠷ ᠠᠲᠠᠭᠠ ᠳᠤ ᠪᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠵᠣᠳᠣᠵᠤ ᠠᠯᠠᠭᠰᠠᠨ ᠪᠠᠢᠯ ᠦᠭᠡᠢ ᠭᠡᠵᠦ ᠶᠠᠭ ᠦᠭᠡᠢ ᠪᠣᠳᠣᠵᠤ ᠪᠠᠢᠭᠰᠠᠨ᠃
— ᠭᠡᠲᠡᠯᠡ ᠰᠡᠭᠦᠯ ᠳ᠋ᠦ᠍ᠨᠢ ᠪᠤᠯᠤᠷᠴᠠᠭᠠᠨ ᠤ᠋ ᠲᠤᠰᠢᠶᠠᠭᠰᠠᠨ ᠢ᠋ ᠰᠤᠨᠤᠰᠤᠬᠤᠯᠠ ᠡᠨᠡ ᠬᠡᠷᠡᠭ ᠲᠦ᠍ ᠡᠷᠡ ᠨᠢ ᠬᠣᠯᠪᠣᠭᠳᠠᠬᠤ ᠦᠭᠡᠢ ᠪᠥᠭᠡᠳ ᠦᠵᠡᠰᠬᠦᠯᠡᠩ ᠴᠤ᠌ ᠵᠣᠳᠣᠭᠳᠠᠵᠤ ᠠᠯᠠᠭᠳᠠᠭᠰᠠᠨ ᠪᠢᠰᠢ ᠰᠢᠭ ᠪᠠᠢᠬᠤ ᠳ᠋ᠤ᠌ ᠲᠡᠷᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ᠂ ᠭᠤᠷᠪᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠵᠥᠪ ᠳ᠋ᠦᠩ ᠢ᠋ᠶ᠋ᠡᠨ ᠭᠠᠷᠭᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠯᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠲᠦᠪᠰᠢᠨ ᠨᠠᠷ ᠸᠠᠩ ᠯᠠᠨ ᠬᠤᠸᠠ ᠠ᠋ᠴᠠ ᠦᠵᠡᠰᠬᠦᠯᠡᠩ ᠦ᠋ᠨ ᠭᠠᠳᠠᠨᠠ ᠲᠠᠭᠠᠷᠠᠯᠳᠤᠭᠰᠠᠨ ᠬᠥᠮᠦᠨ ᠢ᠋ ᠰᠢᠬᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠠᠷᠵᠠᠰᠬᠢᠨ ᠰᠣᠴᠢᠵᠤ᠄ 《ᠡᠪᠦᠭᠡᠨ ᠮᠢᠨᠢ ᠮᠢᠨᠦ ᠲᠥᠯᠥᠭᠡ ᠣᠳᠣ ᠴᠤ᠌ ᠠᠮᠢᠨ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠠ ᠳᠦᠭᠦᠷᠬᠦ ᠶᠦᠮ ᠪᠠᠢᠨᠠ》 ᠭᠡᠵᠦ ᠪᠣᠳᠣᠨ ᠲᠦᠪᠰᠢᠨ ᠨᠠᠷ ᠲᠤ᠌ ᠡᠷᠡ ᠶᠢᠨ ᠢ᠋ᠶ᠋ᠡᠨ ᠨᠡᠷᠡ ᠶ᠋ᠢ ᠰᠢᠭᠤᠳ ᠬᠡᠯᠡᠬᠦ ᠡᠴᠡ ᠡᠷᠡᠭᠡᠯᠵᠡᠵᠦ ᠪᠠᠢᠭᠰᠠᠨ᠃ ᠡᠨᠡ ᠬᠦ᠌ ᠡᠷᠡᠭᠡᠯᠵᠡᠯ ᠨᠢ ᠲᠡᠭᠦᠨ ᠦ᠌ ᠠᠮᠢᠨ ᠳ᠋ᠤ᠌ ᠬᠦᠷᠬᠦ ᠶ᠋ᠢ ᠬᠡᠨ ᠰᠠᠨᠠᠯᠠ ᠳᠠ᠃
— ᠸᠠᠩ ᠯᠠᠨ ᠬᠤᠸᠠ᠂ ᠲᠦᠪᠰᠢᠨ ᠬᠥᠬᠡᠲᠤᠯᠢ ᠬᠣᠶᠠᠷ ᠢ᠋ ᠦᠳᠡᠵᠦ ᠭᠠᠷᠭᠠᠴᠢᠬᠠᠭᠠᠳ ᠶᠠᠭ ᠤᠨᠲᠠᠬᠤ ᠭᠡᠵᠦ ᠪᠠᠢᠳ᠋ᠨᠯᠠ ᠨᠢᠭᠡ ᠬᠥᠮᠦᠨ ᠡᠭᠦᠳᠡ ᠶᠢ ᠨᠢ ᠲᠣᠭᠰᠢᠵᠠᠢ᠃ ᠢᠷᠡᠭᠰᠡᠨ ᠬᠥᠮᠦᠨ ᠡᠷᠡ ᠨᠢ ᠪᠠᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠰᠡᠵᠢᠭ ᠪᠤᠬᠢᠨᠢᠳᠤᠯ ᠨᠢ ᠬᠢᠯᠢᠩ ᠪᠤᠯᠳ ᠬᠤᠪᠢᠷᠠᠵᠤ᠂ ᠡᠷᠡ ᠶᠢ ᠪᠡᠨ ᠳᠥᠩᠭᠡᠵᠦ ᠳᠣᠲᠣᠭᠰᠢ ᠣᠷᠣᠭᠤᠯᠤᠮᠠᠭᠴᠠ ᠨᠢᠭᠤᠷ ᠨᠢᠳᠦ ᠦᠭᠡᠢ ᠬᠠᠷᠢᠶᠠᠵᠤ ᠡᠬᠢᠯᠡᠵᠡᠢ᠃
— ᠡᠵᠡᠨ ᠢ᠋ᠶ᠋ᠡᠨ ᠠᠯᠲᠠᠨᠰᠠᠨ ᠠᠳᠤᠭᠤᠰᠤ᠂ ᠶᠠᠭᠤᠨ ᠳ᠋ᠤ᠌ ᠡᠢᠮᠦ ᠣᠷᠣᠢ ᠡᠨᠳᠡ ᠢᠷᠡᠭᠰᠡᠨ ᠶᠦᠮ? ᠴᠢ ᠲᠡᠷᠡ ᠦᠵᠡᠰᠭᠦᠯᠡᠡᠩ ᠡᠬᠡ ᠲᠡᠢ ᠪᠡᠨ ᠭᠦᠶᠦᠵᠦ ᠪᠠᠢᠭᠰᠠᠭᠠᠷ ᠶᠠᠮᠠᠷ ᠪᠣᠯᠪᠠ? ᠣᠳᠣ ᠠᠮᠢᠨ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠯᠠ ᠪᠢᠵᠡ? ᠣᠳᠣᠬᠠᠨ ᠴᠢᠮᠠ ᠶᠢ ᠮᠥᠷᠳᠡᠵᠦ ᠪᠠᠢᠭᠰᠠᠨ ᠢ᠋ ᠴᠢ ᠮᠡᠳᠡᠨᠡ ᠤᠤ? ᠬᠥᠭᠰᠢᠷᠡᠭᠡᠳ ᠡᠮᠡ ᠶᠢᠨ ᠪᠥᠭᠰᠡᠨ ᠳ᠋ᠦ᠍ ᠠᠮᠢ ᠪᠠᠨ ᠥᠭᠬᠦ ᠴᠢᠨᠢ᠃ ᠡᠯᠵᠢᠭᠡ ᠠ᠋᠂ ᠡᠯᠵᠢᠭᠡ᠃ ᠥᠭᠡᠢ ᠪᠣᠯ ᠴᠢ ᠲᠡᠷᠡ ᠠᠢᠯ ᠳ᠋ᠤ᠌ ᠣᠴᠢᠬᠤ ᠳᠤ ᠪᠠᠨ ᠶᠠᠭᠤᠨ ᠳ᠋ᠤ᠌ ᠬᠥᠮᠦᠨ ᠡᠴᠡ ᠨᠢᠭᠤᠳᠠᠭ ᠶᠤᠮ? ᠁ᠯᠠᠪ ᠲᠠ ᠬᠣᠶᠠᠭᠤᠯᠠ ᠶᠢᠨ ᠠᠪᠤᠰᠢ ᠦᠭᠡᠢ ᠲᠡᠪᠡᠷᠢᠯᠴᠡᠭᠡ ᠳᠡᠭᠡᠷᠡ ᠡᠴᠡ ᠡᠷᠡ ᠨᠢ ᠣᠷᠣᠭᠠᠳ ᠢᠷᠡᠭᠰᠡᠨ ᠪᠠᠢᠯ ᠦᠭᠡᠢ ᠭᠡᠵᠦ ᠬᠠᠷᠢᠶᠠᠬᠤ ᠳᠣᠳᠣᠮ ᠬᠡᠳᠡᠷᠯᠡᠨ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠭᠠᠷᠴᠠᠢ᠃ ᠡᠷᠡ ᠨᠢ ᠲᠡᠭᠦᠨ ᠦ᠌ ᠢᠩᠭᠢᠵᠦ ᠬᠡᠯᠡᠬᠦ ᠶᠢ ᠰᠣᠨᠣᠰᠤᠭᠠᠳ ᠰᠦᠨᠡᠰᠦ ᠪᠡᠨ ᠵᠠᠢᠯᠠᠲᠠᠯᠠ ᠠᠶᠤᠪᠠ᠃
— ᠤᠴᠢᠷ ᠨᠢ ᠲᠡᠭᠦᠨ ᠦ᠌ ᠪᠦᠬᠦ ᠨᠢᠭᠤᠴᠠ᠂ ᠲᠡᠭᠦᠨ ᠦ᠌ ᠠᠮᠠᠨ ᠠ᠋ᠴᠠ ᠢᠯᠡᠷᠡᠮᠡᠷ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠠᠮᠢ ᠪᠠᠨ ᠬᠠᠮᠠᠭᠠᠯᠠᠶᠠ ᠭᠡᠪᠡᠯ ᠸᠠᠩ ᠯᠠᠨ ᠬᠤᠸᠠ ᠶᠢ ᠠᠷᠢᠯᠭᠠᠬᠤ ᠳᠡᠭᠡᠷᠡ ᠰᠡᠳᠬᠢᠯ ᠵᠥᠭᠡᠯᠡᠷᠡᠨ ᠭᠠᠷ ᠲᠠᠲᠠᠵᠤ ᠪᠣᠯᠬᠤ ᠦᠭᠡᠢ᠃ ᠣᠳᠣ ᠬᠤᠷᠳᠤᠬᠠᠨ᠁ ᠭᠡᠳ ᠳᠣᠣᠷᠠ ᠪᠠᠨ ᠠᠮᠠᠨ ᠳᠡᠭᠡᠷᠡ ᠪᠡᠨ ᠠᠯᠢᠪᠠ ᠶ᠋ᠢ ᠵᠥᠪᠰᠢᠶᠡᠷᠡᠨ ᠪᠤᠷᠤᠭᠤ ᠬᠦᠯᠢᠶᠡᠵᠦ᠂ ᠠᠭᠤᠴᠢᠯᠠᠬᠤ ᠶᠢ ᠬᠦᠰᠡᠭᠰᠡᠨ ᠪᠥᠭᠡᠳ ᠡᠬᠡᠨᠡᠷ ᠲᠡᠢ ᠪᠡᠨ ᠬᠣᠨᠣᠬᠤ ᠶᠢ ᠭᠤᠶᠤᠵᠠᠢ᠃
— ᠲᠡᠭᠡᠭᠰᠡᠨ ᠳ᠋ᠦ᠍ ᠸᠠᠩ ᠯᠠᠨ ᠬᠤᠸᠠ ᠶᠢᠨ ᠰᠡᠳᠬᠢᠯ ᠨᠢ ᠵᠥᠭᠡᠯᠡᠷᠡᠵᠦ ᠲᠡᠭᠦᠨ ᠦ᠌ ᠠᠶᠠ ᠪᠠᠷ ᠪᠣᠯᠤᠭᠠᠳ᠂ ᠡᠴᠦᠰ ᠲᠤ ᠪᠠᠨ ᠠᠮᠢ ᠪᠠᠨ ᠠᠯᠳᠠᠭᠰᠠᠨ ᠪᠠᠢᠨᠠ᠃
ᠲᠦᠪᠰᠢᠨ ᠡᠨᠳᠡ ᠬᠦᠷᠲᠡᠯᠡ ᠬᠡᠯᠡᠭᠡᠳ᠂ ᠸᠠᠩ ᠯᠠᠨ ᠬᠤᠸᠠ ᠬᠡᠷᠪᠡ ᠲᠡᠷᠡ ᠦᠳᠡᠰᠢ ᠪᠢᠳᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠨᠡᠷᠡ ᠶᠢ ᠬᠡᠯᠡᠭᠰᠡᠨ ᠪᠣᠯ ᠠᠷᠠᠢ ᠬᠣᠣᠷᠯᠠᠭᠳᠠᠬᠤ ᠪᠠᠷ ᠦᠭᠡᠢ ᠪᠠᠢᠭᠰᠠᠨ ᠶᠤᠮ᠃ ᠠᠢ᠂ ᠶᠠᠭᠤ ᠭᠡᠵᠦ ᠬᠡᠯᠡᠨᠡ ᠳᠡ᠃ ᠨᠢᠭᠡᠨᠲᠡ ᠣᠷᠣᠢᠲᠠᠵᠠᠢ ᠭᠡᠵᠦ ᠪᠣᠳᠣᠨ ᠠᠢᠬᠤᠪᠲᠤᠷ ᠰᠡᠭᠦᠷᠡᠰᠦ ᠠᠯᠳᠠᠪᠠ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠡ