ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠭᠤᠴᠢ ᠶᠢᠰᠦ > Хялгасан дөрөөн дээр – Хасвулаг зохиов <39>
61ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠭᠤᠴᠢ ᠶᠢᠰᠦ>
ᠲᠦᠪᠰᠢᠨ ᠭᠤᠸᠠᠢ᠂ ᠮᠠᠷᠭᠠᠲᠠ ᠶ᠋ᠢᠨ ᠬᠢᠨᠢ ᠦᠳᠡ ᠶ᠋ᠢᠨ ᠬᠣᠢᠨᠠ ᠬᠥᠬᠡᠲᠤᠯᠢ ᠶ᠋ᠢᠨ ᠬᠦᠰᠡᠯᠲᠡ ᠪᠡᠷ ᠵᠦᠢᠴᠢᠯᠡᠯ ᠢ᠋ᠶ᠋ᠡᠨ ᠢᠩᠭᠢᠵᠦ ᠦᠷᠭᠦᠯᠵᠢᠯᠡᠭᠦᠯᠵᠡᠢ᠃
— ᠦᠵᠡᠰᠬᠦᠯᠡᠩ ᠡᠮᠴᠢ ᠠᠢᠬᠤᠪᠲᠤᠷ ᠳᠣᠲᠣᠷᠠ ᠲᠠᠮᠢᠷ ᠲᠠᠢ ᠬᠥᠮᠦᠨ ᠪᠠᠢᠵᠠᠢ᠃
— ᠲᠡᠷᠡ ᠠᠯᠢᠪᠠ ᠰᠦᠢᠳᠦᠯ ᠢ᠋ᠶ᠋ᠡᠨ ᠲᠥᠯᠥᠭᠦᠯᠬᠦ ᠪᠡᠷ ᠠᠯᠬᠤᠮ ᠳᠠᠷᠠᠭᠠ᠂ ᠠᠷᠭᠠ ᠮᠠᠶᠢᠭ ᠢ᠋ᠶ᠋ᠠᠨ ᠪᠦᠷ ᠪᠣᠳᠣᠯᠬᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠡᠷᠡ 《ᠨᠣᠶᠠᠨ》 ᠭᠡᠭᠴᠢ ᠬᠥᠮᠦᠨ ᠲᠡᠢ ᠣᠢᠷᠠᠲᠤᠨ ᠡᠬᠢᠨ ᠳᠦ ᠪᠡᠨ ᠦᠭᠡ ᠶᠠᠷᠢᠶᠠᠨ ᠤ᠋ ᠪᠠᠨ ᠳᠤᠮᠳᠠ ᠲᠡᠭᠦᠨ ᠳ᠋ᠦ᠍ ᠨᠢᠭᠡ ᠵᠦᠢᠯ ᠦ᠋ᠨ ᠳᠠᠯᠳᠠ ᠨᠢᠭᠤᠴᠠ ᠤᠴᠢᠷ ᠢ᠋ ᠬᠡᠯᠡᠵᠦ ᠰᠣᠨᠣᠰᠬᠠᠮᠠᠷ ᠦᠭᠡᠨ ᠦᠵᠦᠭᠦᠷ ᠪᠤᠯᠲᠠᠢᠯᠭᠠᠨ ᠨᠠᠭᠠᠳᠴᠤ ᠲᠣᠭᠯᠠᠵᠤ ᠪᠠᠢᠬᠤ ᠰᠢᠭ᠋ ᠢ᠋ᠶ᠋ᠡᠷ ᠬᠡᠯᠡᠭᠡᠳ ᠪᠠᠢᠭᠰᠠᠨ ᠪᠠᠢᠬᠤ᠃
— ᠲᠡᠭᠡᠭᠡᠳ ᠲᠡᠷᠡ 《ᠨᠣᠶᠠᠨ》 ᠴᠤ᠌ ᠭᠠᠢᠬᠠᠰᠢ ᠲᠥᠷᠥᠨ ᠪᠠᠬᠠᠨ ᠡᠷᠡᠭᠡᠯᠵᠡᠵᠦ ᠰᠡᠵᠢᠭᠯᠡᠵᠦ ᠪᠠᠢᠭᠰᠠᠨ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ᠃ ᠭᠡᠲᠡᠯᠡ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠲᠡᠭᠦᠨ ᠦ᠌ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠶᠠ ᠭᠡᠵᠦ ᠶᠠᠭᠠᠷᠠᠵᠤ ᠪᠠᠢᠭᠰᠠᠨ ᠨᠢ ᠯᠠᠪᠲᠠᠢ᠃ ᠡᠢᠮᠦ ᠪᠢᠰᠢ ᠪᠣᠯ ᠲᠡᠷᠡ ᠰᠥᠨᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠦᠵᠡᠰᠬᠦᠯᠡᠩ ᠦ᠋ᠨ ᠤᠷᠢᠯᠭᠠ ᠳ᠋ᠤ᠌ ᠲᠡᠢᠮᠦ ᠢᠯᠭᠤᠮ ᠣᠴᠢᠬᠤ ᠪᠣᠯᠤᠯᠴᠠᠭᠠ ᠦᠭᠡᠢ᠃
— ᠲᠡᠷᠡ ᠬᠣᠶᠠᠷ ᠠᠭᠤᠯᠵᠠᠮᠠᠭᠴᠠ ᠦᠵᠡᠰᠬᠦᠯᠡᠩ᠄《ᠴᠢ ᠲᠡᠷᠡ ᠨᠢᠭᠤᠴᠠ ᠶ᠋ᠢ ᠰᠣᠨᠣᠰᠬᠤ ᠭᠡᠵᠦ ᠬᠦᠯᠢᠶᠡᠭᠡᠳ ᠤᠳᠠᠯᠠ ᠪᠢᠵᠡ? 》 ᠭᠡᠬᠦ ᠦᠭᠡᠨ ᠡᠴᠡ ᠡᠳᠡᠨᠥᠰ ᠦ᠋ᠨ ᠠᠩᠬᠠᠨ ᠤ᠋ ᠶᠠᠷᠢᠯᠴᠠᠭᠰᠠᠨ ᠢ᠋ ᠪᠠᠷᠤᠭᠯᠠᠵᠤ ᠪᠣᠯᠬᠤ ᠶᠤᠮ᠃ ᠲᠡᠷᠡᠴᠢᠯᠡᠨ ᠡᠳᠡ ᠨᠢᠭᠡ ᠨᠢᠭᠤᠴᠠ ᠵᠦᠢᠯ ᠢ᠋ ᠶᠠᠷᠢᠯᠴᠠᠬᠤ ᠭᠡᠳ ᠤᠳᠠᠭᠰᠠᠨ ᠨᠢ ᠢᠯᠡᠬᠡᠨ ᠪᠠᠢᠨᠠ᠃ ᠲᠡᠷᠡ 《ᠨᠣᠶᠠᠨ》 ᠭᠡᠭᠴᠢ ᠪᠠᠷᠤᠭ ᠯᠠ ᠰᠥᠨᠢ ᠶ᠋ᠢᠨ ᠠᠷᠪᠠᠨ ᠨᠢᠭᠡᠨ ᠴᠠᠭ ᠤ᠋ᠨ ᠣᠷᠴᠢᠮ ᠢ᠋ᠶ᠋ᠠᠷ ᠦᠵᠡᠰᠬᠦᠯᠡᠩ ᠦ᠋ᠨ ᠠᠵᠢᠯᠯᠠᠵᠤ ᠪᠠᠢᠭᠰᠠᠨX ᠰᠠᠴᠤᠷᠠᠭ ᠤ᠋ᠨ ᠭᠡᠷ ᠦ᠋ᠨ ᠳᠣᠲᠣᠷᠠ ᠥᠷᠥᠭᠡᠨ ᠳ᠋ᠦ᠍ ᠣᠴᠢᠬᠤ ᠳ᠋ᠤ᠌᠂ ᠦᠵᠡᠰᠬᠦᠯᠡᠩ ᠠᠷᠢᠬᠢᠨ ᠳ᠋ᠤ᠌ ᠬᠠᠯᠠᠮᠰᠠᠭᠰᠠᠨ ᠰᠢᠭ᠋ ᠪᠠᠢᠳᠠᠯ ᠲᠠᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠢᠭᠰᠠᠨ᠃
— ᠲᠡᠭᠦᠨ ᠦ᠌ ᠡᠨᠡ ᠬᠦ᠌ ᠭᠡᠨᠡᠳᠲᠡ ᠶ᠋ᠢᠨ ᠬᠤᠪᠢᠷᠠᠯᠲᠠ᠂ ᠬᠠᠴᠢᠨ ᠰᠣᠨᠢᠨ ᠠᠭᠤᠯᠵᠠᠯᠲᠠ ᠨᠢ ᠲᠡᠷᠡ 《ᠨᠣᠶᠠᠨ》 ᠭᠡᠭᠴᠢ ᠳ᠋ᠦ᠍ ᠶᠡᠬᠡ ᠯᠡ ᠣᠨᠳᠣᠣ ᠰᠠᠨᠠᠭᠳᠠᠨ᠂ ᠠᠪᠤᠨ ᠳᠣᠣᠷᠠ ᠪᠠᠨ ᠭᠡᠯᠮᠡᠭᠳᠡᠨ ᠰᠣᠴᠢᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠡᠷᠡ 《ᠨᠣᠶᠠᠨ》 ᠦᠵᠡᠰᠬᠦᠯᠡᠩ ᠲᠡᠢ ᠤᠳᠠᠭᠠᠨ ᠵᠢᠯ ᠬᠠᠮᠲᠤ ᠠᠵᠢᠯᠯᠠᠭᠰᠠᠨ ᠤ᠋ ᠬᠤᠪᠢ ᠪᠠᠷ ᠲᠡᠭᠦᠨ ᠦ᠌ ᠡᠢᠮᠦᠷᠬᠦᠦ ᠪᠠᠢᠳᠠᠯ ᠢ᠋ ᠯᠠᠪᠲᠠᠢ ᠣᠯᠵᠤ ᠦᠵᠡᠭᠡᠳᠦᠢ ᠶᠦᠮ᠃ ᠨᠡᠩ ᠢᠯᠠᠩᠭᠤᠶᠠ ᠦᠵᠡᠰᠬᠦᠯᠡᠩ ᠲᠡᠭᠦᠨ ᠢ᠋ ᠦᠵᠡᠮᠡᠭᠴᠡ ᠬᠠᠯᠠᠭᠤᠨ ᠢᠶᠠᠷ ᠨᠠᠭᠠᠯᠢᠩᠬᠠᠢᠳᠤᠨ ᠠᠷᠢᠬᠢ ᠵᠠᠰᠠᠨ ᠱᠠᠯᠠᠵᠤ᠂ ᠬᠤᠨᠳᠠᠭᠠ ᠮᠥᠷᠭᠥᠭᠦᠯᠬᠦ ᠪᠡᠷ ᠤᠷᠤᠯᠳᠤᠭᠰᠠᠨ ᠨᠢ ᠴᠤ᠌ ᠲᠡᠭᠦᠨ ᠳᠦ ᠵᠢᠭᠲᠡᠢ ᠰᠣᠨᠢᠨ ᠰᠠᠨᠠᠭᠳᠠᠭᠰᠠᠨ ᠪᠠᠢᠭᠠ᠃
— ᠦᠵᠡᠰᠬᠦᠯᠡᠩ ᠢᠩᠭᠢᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠴᠢᠷᠠᠢ ᠬᠤᠪᠢᠷᠠᠨ ᠬᠢᠯᠢᠩᠨᠡᠨ ᠪᠣᠰᠴᠤ᠂ ᠲᠡᠷᠡ 《ᠨᠣᠶᠠᠨ》ᠭᠡᠭᠴᠢ ᠶ᠋ᠢ ᠬᠤᠮᠤᠬᠠᠢᠲᠠᠨ᠂ ᠰᠠᠨᠠᠭᠠᠨ ᠳᠤ ᠪᠠᠨ ᠬᠦᠷᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠥᠰᠢᠶᠡᠨ ᠳᠦ ᠪᠡᠨ ᠡᠴᠢᠨᠡᠭᠡᠨ ᠵᠢᠯ ᠴᠣᠬᠢᠯᠲᠠ ᠳᠠᠷᠤᠯᠲᠠ ᠦᠵᠡᠭᠦᠯᠦᠭᠰᠡᠨ ᠢ᠋ ᠴᠢᠨᠢ ᠪᠢ ᠮᠡᠳᠡᠵᠦ ᠪᠠᠢᠨᠠ᠃ ᠴᠢᠨᠦ ᠲᠡᠷᠡ ᠬᠡᠦᠬᠡᠳ ᠦ᠋ᠨ ᠭᠠᠷᠤᠯ ᠢᠷᠡᠯ ᠢ᠋ ᠡᠨᠡ ᠡᠬᠡ ᠴᠢᠨᠢ ᠨᠢᠭᠡᠨᠲᠡ ᠪᠠᠢᠴᠠᠭᠠᠵᠤ ᠲᠣᠳᠣᠯᠠᠵᠠᠢ᠃ ᠬᠥᠮᠦᠨᠴᠢ ᠴᠢᠨᠠᠷ ᠦᠭᠡᠢ ᠠᠮᠢᠲᠠᠨ ᠴᠢᠮᠠ ᠶᠢ᠂ ᠥᠭᠡᠷᠡ ᠬᠥᠮᠦᠨ ᠦ᠌ ᠬᠡᠪᠡᠯᠢ ᠶ᠋ᠢ ᠵᠢᠭᠡᠯᠡᠬᠦ ᠶ᠋ᠢ ᠴᠢᠨᠢ ᠪᠢ ᠬᠠᠮᠢᠶᠠᠷᠬᠤ ᠦᠭᠡᠢ᠃ ᠪᠣᠯᠠᠢ ᠪᠤᠵᠠᠷ ᠠ᠋ᠴᠠ ᠵᠢᠭᠰᠢᠬᠦ ᠦᠭᠡᠢ ᠬᠥᠮᠦᠨ ᠶᠠᠭᠠᠬᠢᠭᠰᠠᠨ ᠴᠤ᠌ ᠨᠢᠭᠡ ᠬᠣᠶᠠᠷ ᠪᠠᠢᠬᠤ ᠶᠤᠮ᠃ ᠲᠡᠭᠡᠪᠡᠴᠦ ᠴᠢ ᠶᠠᠭᠤᠨ ᠳ᠋ᠤ᠌ ᠮᠢᠨᠦ ᠬᠡᠦᠬᠡᠳ ᠢ᠋ ᠬᠣᠣᠷᠯᠠᠵᠤ ᠬᠥᠮᠦᠨ ᠦ᠌ ᠨᠢᠳᠦ ᠶ᠋ᠢ ᠬᠠᠯᠬᠠᠯᠠᠨ᠂ ᠥᠪᠡᠷ ᠦ᠋ᠨ ᠦᠷᠡ ᠦᠨᠳᠦᠰᠦ ᠪᠡᠨ ᠬᠠᠮᠠᠭᠠᠯᠠᠬᠤ ᠪᠣᠢ? ᠭᠡᠮᠡᠨ ᠡᠷᠡᠭᠡ ᠬᠣᠷᠢᠭᠠ ᠦᠭᠡᠢ ᠲᠤᠯᠭᠠᠭᠰᠠᠨ ᠪᠠᠢᠬᠤ᠃
— ᠲᠡᠷᠡ 《ᠨᠣᠶᠠᠨ》 ᠤ᠋ ᠡᠢᠮᠦ ᠲᠡᠦᠬᠡᠨ ᠨᠢᠭᠤᠴᠠ ᠨᠢ ᠢᠯᠡᠷᠡᠭᠰᠡᠨ ᠳ᠋ᠦ᠍᠂ ᠠᠶᠤᠵᠤ ᠰᠠᠨᠳᠤᠷᠬᠤ ᠳᠤ ᠪᠠᠨ ᠴᠡᠴᠡᠷᠡᠨ ᠳᠠᠭᠵᠢᠵᠤ᠂ ᠮᠡᠳᠡᠷᠡᠯ ᠢ᠋ᠶ᠋ᠡᠨ ᠠᠯᠳᠠᠬᠤ ᠰᠢᠬᠠᠭᠰᠠᠨ ᠪᠠᠢᠬᠤ᠃
— ᠲᠡᠭᠡᠲᠡᠯᠡ ᠦᠵᠡᠰᠬᠦᠯᠡᠩ ᠵᠠᠯᠭᠠᠭᠠᠳ᠄ 《ᠪᠢ ᠠᠷᠠᠢ ᠲᠡᠢᠮᠦ ᠳᠣᠷᠣᠢ ᠨᠣᠮᠣᠢ᠂ ᠲᠡᠨᠡᠭ ᠮᠤᠨᠤᠭ ᠬᠥᠮᠦᠨ ᠪᠢᠰᠢ᠃ ᠬᠡᠷᠪᠡ ᠨᠢᠭᠡ ᠯᠡ ᠵᠠᠭᠠᠯᠳᠤᠪᠠᠯ ᠴᠢ ᠨᠡᠷᠡ ᠨᠢᠭᠤᠷ ᠢ᠋ᠶ᠋ᠠᠨ ᠪᠠᠷᠠᠵᠤ ᠡᠷᠬᠡ ᠲᠤᠰᠢᠶᠠᠯ ᠢ᠋ᠶ᠋ᠠᠨ ᠠᠯᠳᠠᠬᠤ ᠪᠠᠷ ᠵᠣᠭᠰᠣᠬᠤ ᠦᠭᠡᠢ ᠪᠠᠢᠬᠠ᠃ ᠪᠣᠳᠣᠪᠠᠯ ᠬᠠᠤᠯᠢ ᠳᠡᠭᠡᠷᠡ ᠶᠡᠬᠡ ᠪᠠᠭᠠ ᠬᠥᠮᠦᠨ ᠦ᠌ ᠠᠮᠢᠨ ᠳ᠋ᠤ᠌ ᠬᠦᠷᠪᠡᠯ ᠪᠦᠷ ᠠᠳᠠᠯᠢᠬᠠᠨ ᠰᠢᠢᠳᠬᠡᠯ ᠲᠡᠢ ᠪᠢᠵᠡ᠃ ᠦᠨᠡᠨ ᠳᠦ ᠪᠡᠨ ᠪᠢ ᠴᠢᠨᠦ ᠬᠣᠣᠷᠯᠠᠯ ᠬᠠᠪᠴᠢᠯ ᠢ᠋ ᠬᠣᠷᠢᠭᠠᠳ ᠵᠢᠯ ᠠᠮᠰᠠᠵᠤ ᠭᠦᠢᠴᠡᠭᠰᠡᠨ ᠳᠡ᠃ ᠨᠢᠭᠡᠨᠲᠡ ᠠᠷᠠᠰᠤ ᠶ᠋ᠢ ᠴᠢᠨᠢ ᠱᠠᠭᠠᠯᠤᠨ ᠰᠢᠷᠪᠥᠰᠥ ᠶ᠋ᠢ ᠴᠢᠨᠢ ᠰᠤᠭᠤᠯᠪᠠᠯ ᠰᠠᠶᠢ ᠰᠠᠨᠠᠭᠠᠨ ᠳᠤ ᠪᠠᠨ ᠬᠦᠷᠦᠮᠡᠷ ᠪᠠᠢᠨᠠ᠃ ᠭᠡᠪᠡᠴᠦ ᠴᠢ ᠪᠢᠲᠡᠭᠡᠢ ᠠᠶᠤ! ᠪᠢ ᠠᠷᠠᠢ ᠴᠢᠮᠠ ᠰᠢᠭ᠋ ᠲᠡᠢᠮᠦ ᠬᠠᠷᠠ ᠰᠠᠨᠠᠭᠠᠲᠠᠨ ᠪᠢᠰᠢ ᠰᠢᠦ! ᠨᠢᠭᠡᠨᠲᠡ ᠥᠩᠭᠡᠷᠡᠭᠰᠡᠨ ᠬᠡᠷᠡᠭ ᠢ᠋ ᠳᠠᠬᠢᠨ ᠰᠡᠬᠦᠵᠦ ᠠᠮᠢ ᠨᠠᠰᠤ᠂ ᠡᠷᠬᠡ ᠲᠤᠰᠢᠶᠠᠯ ᠳ᠋ᠤ᠌ ᠴᠢᠨᠢ ᠬᠠᠯᠳᠠᠬᠤ ᠳᠤᠷᠠ ᠦᠭᠡᠢ᠃ ᠲᠡᠷᠡᠴᠢᠯᠡᠨ ᠮᠢᠨᠦ ᠴᠣᠷ ᠤ᠋ᠨ ᠭᠠᠭᠴᠠ ᠰᠡᠳᠬᠢᠯ ᠦ᠋ᠨ ᠨᠠᠢᠵᠠ ᠨᠢᠳᠦᠨ ᠤᠰᠤ ᠪᠠᠨ ᠠᠯᠳᠠᠭᠠᠳ ᠴᠢᠮᠠ ᠰᠢᠭ᠋ ᠵᠢᠰᠤᠷ ᠵᠡᠷᠯᠢᠭ ᠠᠮᠢᠲᠠᠨ ᠲᠠᠢ ᠲᠣᠯᠣᠭᠠᠢ ᠬᠣᠯᠪᠣᠭᠰᠠᠨ ᠤ᠋ ᠬᠣᠢᠨᠠ᠂ ᠲᠡᠭᠦᠨ ᠦ᠌ ᠪᠡᠨ ᠨᠢᠭᠤᠷ ᠢ᠋ ᠪᠣᠳᠣᠬᠤ ᠶᠤᠮ᠃ ᠭᠡᠪᠡᠴᠦ ᠴᠢ ᠮᠢᠨᠦ ᠶᠠᠯᠢᠮ ᠦᠭᠡᠢᠬᠡᠨ ᠬᠡᠳᠦᠨ ᠱᠠᠭᠠᠷᠳᠠᠯᠭᠠ ᠶ᠋ᠢ ᠪᠡᠶᠡᠯᠡᠭᠦᠯᠬᠦ ᠬᠡᠷᠡᠭᠲᠡᠢ᠃ ᠬᠣᠷᠢᠭᠠᠳ ᠵᠢᠯ ᠦ᠋ᠨ ᠲᠤᠷᠰᠢ ᠨᠠᠳᠠ ᠤᠴᠠᠷᠠᠭᠤᠯᠤᠭᠰᠠᠨ ᠥᠷᠢ ᠲᠥᠯᠥᠭᠡᠰᠦ ᠶ᠋ᠢ ᠲᠥᠯᠥᠵᠦ ᠥᠭᠪᠡᠯ ᠵᠣᠬᠢᠬᠤ ᠪᠢᠵᠡ》ᠭᠡᠵᠦ ᠰᠡᠷᠡᠮᠵᠢᠯᠡᠭᠦᠯᠬᠦ ᠬᠣᠩᠬᠣ ᠴᠣᠬᠢᠭᠰᠠᠨ ᠪᠠᠢᠬᠤ᠃
— ᠦᠵᠡᠰᠬᠦᠯᠡᠩ ᠡᠳᠡᠭᠡᠷ ᠢ᠋ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠬᠡᠯᠡᠵᠦ ᠠᠮᠵᠢᠭᠰᠠᠨ ᠥᠬᠡᠢ᠂ ᠰᠡᠭᠦᠯᠡᠷ ᠨᠢ ᠨᠢᠭᠡ ᠨᠢᠭᠡ ᠪᠡᠨ ᠡᠨᠳᠡᠭᠦᠦ ᠣᠢᠯᠭᠠᠨ ᠥᠰᠢᠯᠴᠡᠵᠦ᠂ ᠬᠡᠯᠡᠬᠦ ᠲᠤᠭᠡᠶᠡᠯ ᠴᠤ᠌ ᠲᠠᠭᠠᠷᠠᠭᠰᠠᠨ ᠦᠭᠡᠢ ᠪᠠᠢᠵᠤ ᠮᠡᠳᠡᠨᠡ᠃
— ᠲᠡᠭᠡᠪᠡᠯ ᠦᠵᠡᠰᠬᠦᠯᠡᠩ ᠲᠡᠷᠡ 《ᠨᠣᠶᠠᠨ》 ᠳ᠋ᠤ᠌ ᠶᠠᠮᠠᠷ ᠶᠠᠮᠠᠷ ᠱᠠᠭᠠᠷᠳᠠᠯᠭᠠ ᠳᠤᠷᠠᠳᠤᠭᠰᠠᠨ ᠪᠣᠢ? ᠭᠡᠵᠦ ᠬᠥᠬᠡᠲᠤᠯᠢ ᠤᠬᠤᠴᠢᠯᠠᠨ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠲᠦᠪᠰᠢᠨ ᠭᠤᠸᠠᠢ᠄
— ᠦᠵᠡᠰᠬᠦᠯᠡᠩ ᠡᠨᠡ 《ᠨᠣᠶᠠᠨ》 ᠳ᠋ᠤ᠌ ᠲᠡᠷᠡ ᠦᠶᠡ ᠳ᠋ᠦ᠍ ᠶᠠᠮᠠᠷ ᠶᠠᠮᠠᠷ ᠵᠦᠢᠯ ᠢ᠋ ᠪᠡᠶᠡᠯᠡᠭᠦᠯᠬᠦ ᠲᠤᠬᠠᠢ ᠲᠣᠳᠣᠷᠬᠠᠢ ᠳᠤᠷᠠᠳᠤᠭᠰᠠᠨ ᠦᠭᠡᠢ ᠪᠣᠯᠤᠯᠲᠠᠢ᠃
— ᠬᠡᠳᠦ ᠬᠣᠨᠣᠭ ᠤ᠋ᠨ ᠬᠢᠨᠢ ᠳᠠᠷᠠᠭᠠ᠂ ᠲᠡᠷᠡ ᠠᠮᠠ ᠨᠡᠭᠡᠭᠡᠵᠦ ᠨᠠᠳᠠ ᠨᠢᠭᠡ ᠯᠡ ᠳᠡᠭᠡᠷᠡ ᠬᠣᠶᠠᠷ ᠳᠡᠰ ᠴᠠᠯᠢᠩ ᠨᠡᠮᠡᠵᠦ ᠥᠭ ᠭᠡᠵᠦ ᠰᠢᠬᠠᠮᠳᠠᠭᠤᠯᠤᠭᠰᠠᠨ ᠪᠠᠢᠬᠠ᠃
— ᠢᠩᠭᠢᠭᠡᠳ ᠲᠡᠷᠡ 《ᠨᠣᠶᠠᠨ》ᠠᠷᠭᠠ ᠦᠭᠡᠢ ᠯᠡ ᠡᠨᠳᠡ ᠲᠡᠨᠳᠡ ᠭᠦᠶᠦᠨ ᠤᠬᠠᠭᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠰᠦᠪᠡᠭᠴᠢᠯᠡᠨ ᠪᠠᠢᠵᠤ ᠰᠢᠢᠳᠪᠦᠷᠢᠯᠡᠵᠦ ᠥᠭᠭᠦᠭᠰᠡᠨ ᠪᠠᠢᠬᠤ᠃ ᠡᠨᠡ ᠶᠠᠪᠤᠳᠠᠯ ᠥᠩᠭᠡᠷᠡᠭᠡᠳ ᠳᠡᠮᠡᠢ ᠬᠡᠳᠦ ᠬᠣᠨᠣᠭᠰᠠᠨ ᠦᠭᠡᠢ ᠪᠡᠷ᠂ ᠲᠡᠷᠡ ᠳᠠᠬᠢᠭᠠᠳ ᠣᠷᠣᠨ ᠰᠠᠭᠤᠴᠠ ᠶ᠋ᠢᠨ ᠠᠰᠠᠭᠤᠳᠠᠯ ᠢ᠋ ᠰᠢᠢᠳᠪᠦᠷᠢᠯᠡᠵᠦ ᠥᠭ ᠭᠡᠵᠦ ᠰᠢᠬᠠᠮᠳᠠᠭᠤᠯᠤᠭᠰᠠᠨ ᠪᠠᠢᠬᠤ᠃ ᠢᠩᠭᠢᠭᠡᠳ ᠲᠡᠷᠡ 《ᠨᠣᠶᠠᠨ》 ᠬᠡᠳᠦ ᠤᠳᠠᠭᠠ ᠪᠠᠭᠠ ᠰᠢᠭ᠋ ᠭᠡᠷ ᠣᠯᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠲᠡᠷᠡ ᠪᠦᠷ ᠠᠪᠤᠭᠰᠠᠨ ᠦᠭᠡᠢ᠃ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ᠨᠢ ᠪᠦᠬᠦ ᠬᠣᠷᠢᠶᠠᠨ ᠳ᠋ᠤ᠌ ᠬᠣᠶᠠᠷᠬᠠᠨ ᠬᠤᠪᠢᠶᠠᠵᠤ ᠢᠷᠡᠭᠰᠡᠨ ᠳᠠᠷᠤᠭᠠ ᠨᠠᠷ ᠤ᠋ᠨ ᠰᠠᠭᠤᠬᠤ ᠭᠡᠷ ᠡᠴᠡ ᠨᠢᠭᠡ ᠶ᠋ᠢ ᠨᠢ ᠥᠭᠬᠦ ᠳ᠋ᠦ᠍ ᠲᠡᠷᠡ ᠰᠠᠶᠢ ᠠᠪᠤᠭᠰᠠᠨ ᠪᠠᠢᠨᠠ᠃ ᠭᠡᠲᠡᠯᠡ ᠲᠡᠭᠦᠨ ᠦ᠌ ᠨᠥᠬᠥᠴᠡᠯ ᠠᠷᠠᠢ ᠬᠦᠷᠬᠦ ᠦᠭᠡᠢ ᠪᠣᠯᠬᠣᠷ ᠣᠯᠠᠨ ᠤ᠋ ᠰᠠᠨᠠᠯ ᠲᠤᠰᠬᠠᠯ ᠭᠠᠷᠬᠤ ᠠ᠋ᠴᠠ ᠠᠶᠤᠬᠤ ᠳᠤ ᠪᠠᠨ ᠲᠡᠷᠡ 《ᠨᠣᠶᠠᠨ》ᠠᠷᠭᠠ ᠪᠤᠰᠤ ᠦᠵᠡᠰᠬᠦᠯᠡᠩ ᠢ᠋ ᠳᠡᠳ᠋ ᠬᠣᠷᠢᠶᠠᠨ ᠳᠠᠷᠤᠭᠠ ᠪᠣᠯᠭᠠᠬᠤ ᠪᠠᠷ ᠣᠷᠣᠯᠳᠣᠭᠰᠠᠨ᠃ ᠮᠥᠨ ᠴᠤ᠌ ᠢᠩᠭᠢᠵᠦ ᠲᠤᠰᠢᠶᠠᠯ ᠲᠣᠮᠢᠯᠠᠬᠤ ᠪᠠᠷ ᠨᠢᠭᠤᠷ ᠣᠯᠵᠤ ᠰᠡᠳᠬᠢᠯ ᠢ᠋ ᠨᠢ ᠡᠳᠦᠢ ᠲᠡᠳᠦᠢ ᠴᠤ᠌ ᠪᠣᠯᠤᠭ ᠣᠯᠬᠤ ᠭᠡᠰᠡᠨ ᠪᠠᠢᠬᠤ᠃
— ᠭᠡᠰᠡᠨ ᠴᠤ᠌ ᠡᠳᠡᠭᠡᠷ ᠢ᠋ ᠨᠢ ᠦᠵᠡᠰᠬᠦᠯᠡᠩ ᠨᠢᠯᠪᠤᠵᠤ ᠭᠦᠢᠴᠡᠬᠦ ᠦᠭᠡᠢ ᠨᠢᠭᠤᠷ᠂ ᠨᠣᠬᠠᠢ ᠳᠣᠯᠢᠶᠠᠬᠤ ᠦᠭᠡᠢ ᠨᠠᠢᠷ ᠲᠠᠯᠠ ᠪᠠᠷ ᠦᠵᠡᠨ᠂ ᠵᠥᠭᠡᠯᠡᠨ ᠨᠢᠳᠦ ᠪᠡᠷ ᠴᠤ᠌ ᠬᠠᠷᠠᠭᠰᠠᠨ ᠦᠭᠡᠢ ᠪᠠᠢᠬᠤ ᠬᠢᠴᠢᠬᠡᠭᠡᠳ ᠲᠦᠪᠰᠢᠨ ᠭᠤᠸᠠᠢ ᠠᠶᠠᠭᠠ ᠲᠠᠢ ᠴᠠᠢ ᠠ᠋ᠴᠠ ᠪᠠᠨ ᠨᠢᠭᠡ ᠣᠭᠣᠴᠢᠵᠤ ᠠᠮᠠ ᠪᠠᠨ ᠳᠡᠪᠲᠦᠭᠡᠵᠦ ᠠᠪᠤᠭᠠᠳ᠄
— ᠡᠢᠮᠦ ᠠᠯᠪᠠᠳᠠᠯᠭᠠ ᠰᠢᠬᠠᠮᠳᠠᠭᠤᠯᠭᠠ ᠳ᠋ᠤ᠌ ᠰᠦᠷᠳᠡᠭᠳᠡᠭᠰᠡᠨ 《ᠨᠣᠶᠠᠨ》 ᠭᠤᠸᠠᠢ ᠪᠣᠢ ᠪᠦᠬᠦᠢ ᠴᠢᠳᠠᠯ ᠢ᠋ᠶ᠋ᠠᠨ ᠰᠢᠪᠬᠠᠨ ᠲᠡᠭᠦᠨ ᠳ᠋ᠦ᠍ ᠵᠠᠭᠤᠢ ᠯᠠ ᠠᠰᠢᠭ ᠣᠯᠭᠣᠭᠰᠠᠭᠠᠷ ᠪᠠᠢᠭᠰᠠᠨ᠃
— ᠪᠠᠷᠤᠭ ᠯᠠ ᠨᠢᠭᠡ ᠰᠠᠷᠠ ᠶ᠋ᠢᠨ ᠬᠢᠨᠢ ᠳᠠᠷᠠᠭᠠ ᠦᠵᠡᠰᠬᠦᠯᠡᠩ ᠳᠠᠬᠢᠨ ᠲᠡᠭᠦᠨ ᠲᠡᠢ ᠬᠠᠷᠢᠯᠴᠠᠵᠤX ᠰᠠᠴᠤᠷᠠᠭ ᠤ᠋ᠨ ᠮᠠᠰᠢᠨ ᠤ᠋ ᠡᠷᠭᠢ ᠱᠤᠷᠠᠭ ᠠᠪᠬᠤ ᠪᠣᠯᠤᠭᠰᠠᠨ ᠠ᠋ᠴᠠ ᠭᠤᠷᠪᠠᠨ ᠮᠢᠩᠭᠠᠨ ᠲᠥᠭᠥᠷᠢᠭ ᠣᠯᠵᠤ ᠥᠭ ᠭᠡᠰᠡᠨ ᠪᠠᠢᠨᠠ᠃
— ᠲᠡᠭᠡᠭᠡᠳ 《ᠨᠣᠶᠠᠨ》 ᠭᠤᠸᠠᠢ ᠡᠭᠦᠨ ᠢ᠋ ᠨᠢ ᠣᠯᠤᠭᠠᠳ ᠥᠭᠭᠦᠭᠰᠡᠨ ᠴᠢᠨᠢ ᠠᠷᠠᠢ ᠬᠡᠳᠦᠨ ᠡᠳᠦᠷ ᠪᠣᠯᠤᠭᠠ ᠦᠭᠡᠢ ᠪᠡᠷ᠂ ᠪᠢ ᠲᠡᠷᠡ ᠵᠣᠭᠣᠰ ᠢ᠋ ᠴᠢᠨᠢ ᠬᠣᠷᠢᠭᠠᠳ ᠵᠢᠯ ᠦ᠋ᠨ ᠲᠤᠷᠰᠢᠬᠢ ᠠᠵᠤ ᠠᠬᠤᠢ ᠶ᠋ᠢᠨ ᠰᠦᠢᠳᠦᠯ ᠳ᠋ᠡᠭᠡᠨ ᠨᠥᠬᠥᠪᠥᠷᠢ ᠪᠣᠯᠭᠠᠭᠠᠳ ᠵᠠᠷᠤᠴᠢᠬᠠᠭᠰᠠᠨ᠃ ᠴᠢ ᠲᠡᠷᠡ ᠵᠢᠭᠡᠯᠡᠪᠦᠷᠢ ᠪᠡᠨ ᠥᠪᠡᠷ ᠢ᠋ᠶ᠋ᠡᠨ ᠪᠥᠭᠯᠡ ᠭᠡᠵᠦ ᠵᠠᠷᠯᠢᠭᠳᠠᠮᠠᠷ ᠬᠡᠯᠡᠭᠡᠳ ᠶᠠᠪᠤᠵᠤ ᠣᠷᠬᠢᠬᠤ ᠳ᠋ᠤ᠌᠂ ᠲᠡᠷᠡ 《ᠨᠣᠶᠠᠨ》 ᠬᠡᠳᠦᠢ ᠪᠡᠷ ᠠᠭᠤᠰᠬᠢ ᠪᠡᠨ ᠳᠡᠯᠪᠡᠷᠡᠲᠡᠯᠡ ᠠᠭᠤᠷᠯᠠᠭᠰᠠᠨ ᠴᠤ᠌ ᠠᠷᠭᠠ ᠦᠭᠡᠢ ᠯᠡ ᠳᠤᠭᠤᠢ ᠬᠣᠴᠣᠷᠤᠨ ᠵᠢᠭᠡᠯᠡᠪᠦᠷᠢ ᠪᠡᠨ ᠲᠥᠯᠥᠬᠦ ᠬᠡᠷᠡᠭ ᠪᠣᠯᠵᠠᠢ᠃
— ᠦᠵᠡᠰᠬᠦᠯᠡᠩ ᠥᠪᠡᠷ ᠦ᠋ᠨ ᠰᠡᠳᠦᠭᠰᠡᠨ ᠠᠷᠭᠠ ᠤᠬᠠᠭᠠᠨ ᠳᠤ ᠪᠠᠨ ᠵᠢᠭᠲᠡᠢ ᠬᠠᠨᠤᠮᠵᠢᠲᠠᠢ ᠪᠠᠢᠵᠠᠢ᠃ ᠢᠩᠭᠢᠵᠦ ᠠᠰᠢᠭ ᠣᠯᠬᠤ ᠪᠦᠷᠢ ᠪᠠᠬᠠ ᠨᠢ ᠬᠠᠨᠤᠨ ᠬᠣᠷᠣᠰᠤᠯ ᠨᠢ ᠲᠠᠢᠯᠤᠭᠳᠠᠳᠠᠭ ᠪᠠᠢᠯᠠ᠃
— ᠰᠢᠬᠠᠮᠳᠠᠭᠳᠠᠭᠰᠠᠨ 《ᠨᠣᠶᠠᠨ》 ᠭᠤᠸᠠᠢ᠂ ᠦᠵᠡᠰᠬᠦᠯᠡᠩ ᠢ᠋ ᠠᠮᠠ ᠠᠩᠭᠠᠢᠬᠤ ᠪᠣᠯᠭᠠᠨ ᠳ᠋ᠤ᠌ ᠠᠷᠭᠠ ᠪᠤᠰᠤ ᠲᠣᠯᠣᠭᠠᠢ ᠳᠣᠬᠢᠨ ᠪᠦᠬᠦᠨ ᠢ᠋ ᠨᠢ ᠵᠥᠪᠰᠢᠶᠡᠷᠡᠭᠰᠡᠭᠡᠷ ᠪᠠᠢᠪᠠ᠃
— ᠡᠳᠡᠭᠡᠷ ᠪᠣᠯ ᠳᠠᠷᠤᠢ ᠦᠵᠡᠰᠬᠦᠯᠡᠩ ᠬᠣᠣᠷᠯᠠᠭᠳᠠᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠸᠠᠩ ᠯᠠᠨ ᠬᠤᠸᠠ ᠳ᠋ᠤ᠌ ᠄《ᠪᠢ ᠣᠳᠣ ᠨᠢᠭᠡᠨᠲᠡ ᠵᠣᠭᠣᠰ ᠣᠯᠬᠤ ᠠᠷᠭᠠ ᠲᠠᠢ ᠪᠣᠯᠤᠭᠰᠠᠨ᠃ ᠲᠡᠳᠡ ᠨᠠᠳᠠ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠭᠡᠵᠦ ᠢᠷᠡᠬᠦ ᠶᠦᠮ》 ᠭᠡᠳᠡᠭ ᠦᠭᠡ ᠨᠢ ᠮᠥᠨ᠃
— ᠭᠡᠲᠡᠯᠡ ᠰᠠᠢᠨ ᠬᠡᠷᠡᠭ ᠲᠦ᠍ ᠰᠠᠭᠠᠳ ᠲᠠᠢ ᠭᠡᠭᠴᠢ ᠪᠡᠷ 《ᠨᠣᠶᠠᠨ》 ᠭᠤᠸᠠᠢ ᠬᠡᠳᠦ ᠤᠳᠠᠭᠠ ᠰᠢᠬᠠᠮᠳᠠᠭᠳᠠᠨ ᠠᠷᠭᠠ ᠪᠠᠷᠠᠬᠤ ᠳᠤ ᠪᠠᠨ ᠲᠠᠷᠢᠬᠢ ᠪᠠᠨ ᠰᠢᠪᠬᠠᠨ ᠤᠬᠠᠭᠠᠨ ᠰᠡᠢᠯᠵᠡᠢ᠃ ᠬᠡᠵᠢᠶᠡᠳᠡ ᠬᠥᠮᠦᠨ ᠳ᠋ᠦ᠍ ᠢᠩᠭᠢᠵᠦ ᠪᠣᠭᠣᠯᠴᠢᠯᠠᠭᠳᠠᠭᠠᠳ ᠪᠠᠢᠵᠤ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠲᠡᠷᠡᠴᠢᠯᠡᠨ ᠨᠢᠭᠡ ᠬᠥᠮᠦᠨ ᠳ᠋ᠦ᠍ ᠢᠩᠭᠢᠵᠦ ᠣᠨᠴᠠ ᠬᠠᠷᠠᠭᠠᠯᠵᠠᠯ ᠦᠵᠡᠭᠦᠯᠦᠭᠡᠳ ᠪᠠᠢᠬᠤ ᠨᠢ ᠲᠡᠭᠦᠨ ᠦ᠌ ᠪᠠᠢᠷᠢ ᠰᠠᠭᠤᠷᠢ ᠳ᠋ᠤ᠌ ᠴᠤ᠌ ᠠᠶᠤᠯ ᠵᠣᠪᠠᠯᠠᠩ ᠠᠪᠴᠢᠷᠠᠵᠤ ᠮᠡᠳᠡᠨᠡ᠃ ᠴᠣᠬᠣᠮ ᠶᠠᠭᠠᠬᠢᠪᠠᠯ ᠰᠠᠢᠨ ᠪᠣᠢ? ᠲᠡᠷᠡ ᠨᠢᠭᠡ ᠬᠤᠭᠤᠴᠠᠭᠠ ᠨᠠᠷᠢᠨ ᠨᠢᠭᠲᠠ ᠪᠣᠳᠣᠯᠬᠢᠯᠠᠭᠠᠳ ᠡᠴᠦᠰ ᠲᠤ ᠪᠠᠨ ᠠᠶᠤᠯ ᠰᠦᠷᠳᠡᠯ ᠡᠴᠡ ᠡᠭᠦᠷᠢᠳᠡ ᠮᠤᠯᠲᠤᠷᠠᠬᠤ ᠶ᠋ᠢᠨ ᠲᠥᠯᠥᠭᠡ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠬᠤ ᠨᠢᠭᠤᠴᠠ ᠲᠥᠯᠥᠪᠯᠡᠭᠡ ᠵᠣᠬᠢᠶᠠᠭᠠᠳ ᠪᠡᠶᠡᠯᠡᠭᠦᠯᠦᠭᠰᠡᠨ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠥᠬᠡᠲᠤᠯᠢ ᠲᠡᠰᠴᠦ ᠶᠠᠳᠠᠭᠰᠠᠨ ᠪᠠᠢᠳᠠᠯ ᠲᠠᠢ᠄
— ᠡᠨᠡ《ᠨᠣᠶᠠᠨ》 ᠭᠡᠭᠴᠢ ᠨᠢ ᠴᠣᠬᠣᠮ ᠬᠡᠨ ᠪᠣᠯᠴᠢᠬᠠᠪᠠ? ᠭᠡᠵᠦ ᠠᠰᠠᠭᠤᠯᠠ᠃
— ᠦᠨᠡᠨ ᠳᠦ ᠪᠡᠨ 《ᠠᠳᠤᠭᠤᠰᠤ》᠂ 《ᠨᠣᠶᠠᠨ》᠂ 《ᠰᠦ ᠴᠠᠭᠠᠨ ᠰᠡᠳᠬᠢᠯᠲᠡᠨ》ᠪᠣᠯ ᠪᠦᠷ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠡᠷᠡᠭᠲᠡᠢ ᠪᠣᠯᠤᠨᠠ᠃
— ᠲᠡᠷᠡ᠁ᠭᠡᠵᠦ ᠬᠥᠬᠡᠲᠤᠯᠢ ᠶ᠋ᠢ ᠠᠮᠠ ᠨᠡᠭᠡᠭᠡᠲᠡᠯᠡ ᠲᠦᠪᠰᠢᠨ ᠭᠠᠷ ᠳᠣᠬᠢᠨ ᠶᠠᠷᠢᠬᠤ ᠶ᠋ᠢ ᠨᠢ ᠵᠣᠭᠰᠣᠭᠠᠳ᠄
— ᠥᠨᠥᠳᠥᠷ ᠣᠷᠣᠢ ᠪᠣᠯᠴᠢᠬᠠᠯᠠ᠂ ᠪᠢᠳᠡ ᠠᠮᠠᠷᠠᠶᠠ᠂ ᠡᠭᠦᠨ ᠦ᠌ ᠵᠠᠯᠭᠠᠮᠵᠢ ᠪᠣᠯᠤᠭᠰᠠ ᠶᠠᠪᠤᠳᠠᠯ ᠤ᠋ᠳ ᠢ᠋ ᠮᠠᠷᠭᠠᠰᠢ ᠶᠠᠷᠢᠶᠠ ᠭᠡᠯᠡ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠡ