《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠠᠷᠪᠠᠨ ᠬᠣᠶᠠᠳᠤᠭᠠᠷ ᠪᠦᠯᠦᠭ ᠂ ᠴᠢᠩᠭᠢᠰ ᠦ᠋ᠨ ᠨᠠᠰᠤ ᠪᠠᠷᠠᠭᠰᠠᠨ ᠪᠠ ᠥᠭᠡᠳᠡᠢ ᠶ᠋ᠢᠨ ᠬᠠᠭᠠᠨ ᠪᠣᠯᠤᠭᠰᠠᠨ ᠨᠢЧингисийн нас барсан ба Өгэдэй хаан болсон нь
2354265᠂ ᠲᠡᠷᠡ ᠡᠪᠦᠯ ᠡᠪᠦᠯᠵᠢᠵᠦ᠂ ᠲᠠᠩᠭᠤᠳ ᠢᠷᠭᠡᠨ ᠳ᠋ᠦ᠍ ᠮᠣᠷᠢᠯᠠᠶᠠ ᠭᠡᠵᠦ ᠴᠡᠷᠢᠭ ᠢ᠋ᠶ᠋ᠡᠨ ᠰᠢᠨᠡ ᠪᠡᠷ ᠲᠣᠭᠠᠯᠠᠨ ᠪᠦᠷᠢᠳᠬᠡᠵᠦ᠂ ᠨᠣᠬᠠᠢ ᠵᠢᠯ ᠦ᠋ᠨ (1226 ᠣᠨ) ᠨᠠᠮᠤᠷ ᠴᠢᠩᠭᠢᠰ ᠬᠠᠭᠠᠨ᠂ ᠲᠠᠩᠭᠤᠳ ᠢᠷᠭᠡᠨ ᠲᠡᠢ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠳᠠᠪᠠ᠃ ᠬᠠᠲᠤᠳ ᠠ᠋ᠴᠠ ᠶᠢᠰᠤᠢ ᠬᠠᠲᠤᠨ ᠢ᠋ ᠠᠪᠴᠤ ᠶᠠᠪᠤᠪᠠ᠃ ᠵᠠᠮ ᠤ᠋ᠨ ᠵᠠᠭᠤᠷᠠ ᠡᠪᠦᠯ᠂ ᠠᠷᠤ ᠪᠤᠬᠠ ᠳ᠋ᠤ᠌ ᠣᠯᠠᠨ ᠬᠤᠯᠠᠨ ᠠᠪᠠᠯᠠᠬᠤ ᠳ᠋ᠤ᠌ ᠴᠢᠩᠭᠢᠰ ᠬᠠᠭᠠᠨ᠂ ᠵᠣᠰᠣᠲᠤ (ᠲᠣᠯᠪᠣᠲᠤ) ᠪᠣᠷᠣ ᠮᠣᠷᠢ ᠶ᠋ᠢ ᠤᠨᠤᠵᠤ ᠶᠠᠪᠤᠪᠠ᠃ ᠣᠯᠠᠨ ᠬᠤᠯᠠᠨ ᠳᠠᠭᠠᠷᠢᠵᠤ ᠢᠷᠡᠬᠦ ᠳ᠋ᠦ᠍ ᠵᠣᠰᠣᠲᠤ ᠪᠣᠷᠣ ᠮᠣᠷᠢ ᠦᠷᠭᠦᠵᠦ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠤᠨᠠᠭᠠᠪᠠᠯ᠂ ᠬᠠᠭᠠᠨ ᠤ᠋ ᠪᠡᠶᠡ ᠮᠠᠰᠢ ᠴᠢᠯᠡᠭᠡᠷᠬᠡᠵᠦ ᠴᠤᠭᠤᠷᠬᠠᠳ ᠭᠡᠳᠡᠭ ᠭᠠᠵᠠᠷ ᠪᠠᠭᠤᠪᠠ᠃
ᠲᠡᠷᠡ ᠰᠥᠨᠢ ᠬᠣᠨᠣᠭᠠᠳ ᠥᠷᠯᠥᠭᠡ ᠶᠢᠰᠣᠢ ᠬᠠᠲᠤᠨ ᠥᠭᠦᠯᠡᠷᠦᠨ᠄ 《ᠬᠥᠪᠡᠭᠦᠳ ᠨᠣᠶᠠᠳ ᠬᠡᠯᠡᠯᠴᠡᠭᠲᠦᠨ! ᠬᠠᠭᠠᠨ ᠤ᠋ ᠪᠡᠶᠡ ᠰᠥᠨᠢ ᠶᠡᠬᠡ ᠬᠠᠯᠠᠭᠤᠷᠠᠵᠤ ᠬᠣᠨᠣᠪᠠ》 ᠭᠡᠪᠡ᠃ ᠬᠥᠪᠡᠭᠦᠳ ᠨᠣᠶᠠᠳ ᠬᠤᠷᠠᠯᠳᠤᠭᠰᠠᠨ ᠳ᠋ᠤ᠌ ᠬᠣᠩᠬᠣᠲᠠᠨ ᠤ᠋ ᠲᠤᠯᠤᠨ ᠴᠡᠷᠪᠢ ᠥᠭᠦᠯᠡᠷᠦᠨ᠄ 《ᠲᠠᠩᠭᠤᠳ ᠢᠷᠭᠡᠨ᠂ ᠪᠠᠢᠭᠰᠠᠨ ᠭᠠᠵᠠᠷ ᠲᠤ᠌ ᠪᠠᠨ ᠪᠠᠢᠷᠢᠨ ᠨᠤᠲᠤᠭᠯᠠᠳᠠᠭ᠂ ᠰᠢᠪᠡᠷ ᠬᠣᠲᠠᠨ ᠳ᠋ᠠᠭᠠᠨ ᠰᠢᠪᠠᠯᠳᠤᠨ ᠰᠠᠭᠤᠳᠠᠭ ᠲᠤᠯᠠ ᠪᠠᠢᠷᠢᠨ ᠨᠤᠲᠤᠭ᠂ ᠰᠢᠪᠠᠷ ᠬᠣᠲᠠ ᠪᠠᠨ ᠬᠠᠶᠠᠵᠤ ᠲᠡᠳᠡ ᠬᠠᠮᠢᠭᠠ ᠣᠴᠢᠬᠤ ᠪᠣᠢ? ᠪᠢᠳᠡ ᠪᠤᠴᠠᠵᠤ᠂ ᠬᠠᠭᠠᠨ ᠤ᠋ ᠪᠡᠶᠡ ᠶ᠋ᠢ ᠰᠠᠢᠵᠢᠷᠠᠭᠤᠯᠤᠨ᠂ ᠵᠢᠴᠢ ᠳᠠᠬᠢᠨ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠳᠠᠶᠠ!》 ᠭᠡᠪᠡᠯ᠂ ᠬᠥᠪᠡᠭᠦᠳ ᠨᠣᠶᠠᠳ ᠴᠥᠮ ᠢ᠋ᠶ᠋ᠡᠷ ᠲᠡᠷᠡ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠵᠦ᠂ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠠᠢᠯᠠᠳᠬᠠᠪᠠᠯ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠲᠠᠩᠭᠤᠳ ᠢᠷᠭᠡᠨ ᠪᠢᠳᠡᠨ ᠢ᠋ ᠵᠢᠷᠦᠬᠡ ᠰᠢᠨᠲᠠᠷᠠᠵᠤ ᠪᠤᠴᠠᠪᠠ ᠭᠡᠬᠦ ᠪᠣᠯᠤᠨᠠ᠃ ᠪᠢᠳᠡ ᠡᠯᠴᠢ ᠢᠯᠡᠭᠡᠵᠦ᠂ ᠮᠥᠨ ᠡᠯᠴᠢ ᠶ᠋ᠢ ᠢᠷᠡᠲᠡᠯᠡ ᠡᠨᠳᠡ ᠴᠤᠭᠤᠷᠬᠠᠳ ᠲᠤ᠌ ᠪᠡᠶᠡ ᠪᠡᠨ ᠰᠤᠪᠢᠯᠠᠵᠤ ᠪᠠᠢᠭᠠᠳ ᠲᠠᠩᠭ᠋ᠣᠳ ᠤ᠋ᠨ ᠬᠡᠯᠡᠬᠦ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠪᠤᠴᠠᠪᠠᠯ ᠪᠣᠯᠤᠨᠠ》 ᠭᠡᠵᠦ ᠡᠯᠴᠢ ᠶ᠋ᠢ ᠲᠣᠮᠢᠯᠠᠭᠠᠳ ᠳᠠᠭᠤᠤ ᠪᠠᠷᠢᠭᠤᠯᠵᠤ (ᠠᠯᠪᠠᠨ ᠪᠢᠴᠢᠭ ᠨᠢ ᠶᠡᠬᠡ ᠲᠥᠯᠥᠪ ᠰᠢᠯᠦᠭ ᠪᠥᠭᠡᠳ ᠴᠡᠭᠡᠵᠢᠯᠡᠪᠡᠴᠦ ᠠᠮᠠᠷᠬᠠᠨ ᠲᠤᠯᠠ ᠳᠠᠭᠤᠤ ᠭᠡᠵᠦ ᠨᠡᠷᠡᠯᠡᠭᠰᠡᠨ) ᠬᠡᠯᠡᠭᠦᠯᠦᠭᠰᠡᠨ ᠨᠢ᠄ 《ᠤᠷᠢᠳᠠ ᠲᠠᠩᠭ᠋ᠣᠳ ᠢᠷᠭᠡᠳ ᠪᠠᠷᠠᠭᠤᠨ ᠭᠠᠷ ᠪᠣᠯᠵᠤ ᠲᠤᠰᠠᠯᠠᠶᠠ! ᠭᠡᠵᠦ ᠪᠤᠷᠬᠠᠨ ᠴᠢ ᠬᠡᠯᠡᠭᠰᠡᠨ ᠪᠢᠯᠡ᠃ ᠴᠢᠨᠦ ᠲᠡᠷᠡ ᠦᠭᠡ ᠶ᠋ᠢᠨ ᠶᠣᠰᠣᠭᠠᠷ ᠪᠢᠳᠡ ᠰᠠᠷᠲᠠᠭᠤᠯ ᠢᠷᠭᠡᠨ ᠢ᠋ ᠡᠷᠬᠡᠨ ᠳ᠋ᠡᠭᠡᠨ ᠣᠷᠣᠭᠤᠯᠬᠤ ᠪᠠᠷ ᠮᠣᠷᠳᠠᠬᠤ ᠳ᠋ᠠᠭᠠᠨ ᠴᠢᠮᠠ ᠳ᠋ᠤ᠌ ᠮᠡᠳᠡᠭᠳᠡᠪᠡᠯ᠂ ᠪᠤᠷᠬᠠᠨ ᠴᠢ ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠬᠦᠷᠦᠭᠰᠡᠨ ᠦᠭᠡᠢ᠃ ᠴᠡᠷᠢᠭ ᠴᠦ᠍ ᠥᠭᠭᠰᠡᠨ ᠦᠭᠡᠢ᠂ ᠬᠠᠷᠢᠨ ᠶᠡᠬᠡ ᠦᠭᠡ ᠪᠡᠷ ᠳᠠᠭᠠᠷᠢᠭᠰᠠᠨ ᠪᠢᠯᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠪᠢᠳᠡ ᠥᠭᠡᠷᠡ ᠤᠯᠤᠰ ᠲᠤ᠌ ᠵᠣᠷᠢᠭᠰᠠᠨ ᠲᠤᠯᠠ ᠳᠠᠷᠠᠭᠠ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠯᠴᠠᠶᠠ ᠭᠡᠵᠦ ᠰᠠᠷᠲᠠᠭᠤᠯ ᠢᠷᠭᠡᠨ ᠳ᠋ᠦ᠍ ᠮᠣᠷᠢᠯᠠᠵᠤ᠂ ᠮᠥᠩᠬᠡ ᠲᠡᠭᠷᠢ ᠳ᠋ᠦ᠍ ᠢᠪᠡᠭᠡᠭᠳᠡᠵᠦ᠂ ᠰᠠᠷᠲᠠᠭᠤᠯ ᠢᠷᠭᠡᠨ ᠢ᠋ ᠡᠷᠬᠡᠨ ᠳ᠋ᠡᠭᠡᠨ ᠣᠷᠣᠭᠤᠯᠵᠤ᠂ ᠣᠳᠣ ᠪᠤᠷᠬᠠᠨ ᠴᠢᠮᠠ ᠲᠠᠢ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠯᠴᠠᠶᠠ ᠭᠡᠵᠦ ᠢᠷᠡᠪᠡ》 ᠭᠡᠵᠦ ᠢᠯᠡᠭᠡᠪᠡᠯ᠂ ᠪᠤᠷᠬᠠᠨ ᠥᠭᠦᠯᠡᠷᠦᠨ᠄ 《ᠳᠠᠭᠠᠷᠢᠬᠤ ᠮᠠᠭᠤ ᠦᠭᠡ ᠶ᠋ᠢ ᠪᠢ ᠬᠡᠯᠡᠭᠰᠡᠨ ᠦᠭᠡᠢ》 ᠭᠡᠪᠡ᠃ ᠠᠱᠠ ᠭᠣᠮᠪᠣ ᠥᠭᠦᠯᠡᠷᠦᠨ᠄ 《ᠳᠠᠭᠠᠷᠢᠬᠤ ᠦᠭᠡ ᠶ᠋ᠢ ᠪᠢ ᠬᠡᠯᠡᠭᠰᠡᠨ᠃ ᠣᠳᠣ ᠮᠣᠩᠭ᠋ᠣᠯᠴᠣᠳ ᠲᠠ ᠨᠠᠷ ᠪᠠᠢᠯᠳᠤᠵᠤ ᠰᠤᠷᠤᠭᠠᠳ ᠪᠠᠢᠯᠳᠤᠶᠠ! ᠭᠡᠪᠡᠯ ᠮᠢᠨᠦ ᠪᠦᠬᠦ ᠠᠯᠠᠱᠠ ᠨᠤᠲᠤᠭ ᠲᠤ᠌ ᠲᠠᠷᠠᠮ (ᠬᠠᠨᠠᠲᠤ) ᠭᠡᠷ ᠲᠡᠢ᠂ ᠲᠡᠮᠡᠭᠡᠨ ᠠᠴᠢᠶᠠ ᠲᠠᠢ ᠬᠥᠮᠦᠰ ᠪᠣᠢ ᠃ ᠠᠯᠠᠱᠠ ᠳ᠋ᠤ᠌ ᠠᠶᠠᠯᠠᠵᠤ ᠨᠠᠳᠠ ᠳ᠋ᠤ᠌ ᠢᠷᠡᠭᠲᠦᠨ! ᠲᠡᠨᠳᠡ ᠪᠠᠢᠯᠳᠤᠶᠠ! ᠠᠯᠲᠠ᠂ ᠮᠥᠩᠭᠥ᠂ ᠠᠭᠤᠷᠰᠤ᠂ ᠲᠠᠸᠠᠷ ᠬᠡᠷᠡᠭᠲᠡᠢ ᠪᠣᠯ ᠢᠷᠭᠠᠢ (ᠨᠢᠩᠰᠢᠶᠠ)᠂ ᠡᠷᠵᠢᠤ (ᠰᠢᠯᠢᠶᠠᠩ ) ᠬᠣᠲᠠᠨ ᠳ᠋ᠤ᠌ ᠢᠷᠡᠭᠲᠦᠨ!》 ᠭᠡᠵᠦ ᠢᠯᠡᠭᠡᠵᠡᠢ᠃ ᠡᠨᠡ ᠦᠭᠡ ᠶ᠋ᠢ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠰᠣᠨᠣᠰᠬᠠᠪᠠᠯ᠂ ᠴᠢᠩᠭᠢᠰ ᠬᠠᠭᠠᠨ ᠪᠡᠶᠡ ᠶᠡᠬᠡ ᠬᠠᠯᠠᠭᠤᠨ ᠲᠠᠢ ᠪᠠᠷ ᠥᠭᠦᠯᠡᠷᠦᠨ᠄ 《ᠵᠠ ᠲᠡᠷᠡ ᠪᠢᠰᠢᠦ᠃ ᠲᠡᠳᠡ ᠡᠢᠮᠦ ᠶᠡᠬᠡ ᠦᠭᠡ ᠬᠡᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠢᠳᠡ ᠶᠠᠭᠠᠬᠢᠵᠤ ᠪᠤᠴᠠᠵᠤ ᠪᠣᠯᠤᠨᠠ? ᠦᠬᠦᠪᠡᠴᠦ ᠲᠡᠷᠡ ᠶᠡᠬᠡ ᠦᠭᠡ ᠶ᠋ᠢ ᠵᠦᠭᠡᠷ ᠣᠷᠬᠢᠬᠤ ᠦᠭᠡᠢ᠃ ᠮᠥᠩᠬᠡ ᠲᠡᠭᠷᠢ ᠴᠢ ᠮᠡᠳᠡ!》 ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠠᠯᠠᠱᠠ ᠶ᠋ᠢ ᠵᠣᠷᠢᠵᠤ ᠬᠦᠷᠦᠭᠡᠳ ᠠᠱᠠ ᠭᠣᠮᠪᠣ ᠲᠠᠢ ᠪᠠᠢᠯᠳᠤᠵᠤ᠂ ᠠᠯᠠᠱᠠ ᠳ᠋ᠤ᠌ ᠪᠦᠰᠡᠯᠡᠵᠦ ᠠᠱᠠ ᠭᠣᠮᠪᠣ ᠶ᠋ᠢ ᠪᠠᠷᠢᠵᠤ ᠲᠡᠭᠦᠨ ᠦ᠌ ᠲᠡᠷᠡᠮ ᠭᠡᠷ ᠲᠡᠢ᠂ ᠲᠡᠮᠡᠭᠡᠨ ᠠᠴᠢᠶᠠ ᠲᠠᠢ ᠢᠷᠭᠡᠨ ᠢ᠋ ᠦᠨᠡᠰᠦᠨ ᠲᠣᠪᠷᠣᠭ ᠪᠣᠯᠲᠠᠯᠠ ᠲᠡᠯᠡᠵᠦ ᠰᠦᠢᠳᠬᠡᠪᠡ᠃ 《ᠲᠠᠩᠭᠤᠳ ᠤ᠋ᠨ ᠣᠮᠣᠭ ᠲᠠᠢ ᠳᠤᠭᠤᠯᠭᠠᠷ ᠭᠤᠸᠠᠢ ᠶ᠋ᠢ ᠨᠢ ᠬᠢᠳᠤᠵᠤ ᠣᠷᠣᠵᠤ ᠳᠠᠭᠠᠭᠰᠠᠳ ᠢ᠋ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠳᠤᠷᠠ ᠪᠠᠷ ᠪᠠᠷᠢᠵᠤ ᠣᠯᠵᠠᠯᠠᠵᠤ ᠠᠪᠣᠳᠣᠭᠠᠢ!》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
266᠂ ᠴᠢᠩᠭᠢᠰ ᠬᠠᠭᠠᠨ᠂ ᠴᠠᠰᠤᠲᠤ ᠠᠭᠤᠯᠠᠨ ᠳ᠋ᠤ᠌ ᠵᠤᠰᠠᠵᠤ᠂ ᠴᠡᠷᠢᠭ ᠢ᠋ᠶ᠋ᠡᠨ ᠶᠠᠪᠤᠭᠤᠯᠵᠤ᠂ ᠠᠱᠠ ᠭᠣᠮᠪᠣ ᠶ᠋ᠢ ᠳᠠᠭᠠᠵᠤ ᠠᠭᠤᠯᠠᠨ ᠳ᠋ᠤ᠌ ᠳᠤᠲᠠᠭᠠᠨ ᠪᠥᠬᠥᠭᠰᠡᠨ ᠲᠡᠷᠡᠮ ᠭᠡᠷᠲᠡᠨ᠂ ᠲᠡᠮᠡᠭᠡᠨ ᠠᠴᠢᠶᠠᠳᠠᠨ ᠲᠠᠩᠭ᠋ᠣᠳ ᠢ᠋ ᠬᠣᠷᠢᠶᠠᠨ ᠡᠵᠡᠯᠡᠵᠦ ᠠᠪᠪᠠ᠃ ᠲᠡᠨᠳᠡ ᠡᠴᠡ ᠪᠣᠭᠣᠷᠴᠤ ᠮᠤᠬᠤᠯᠠᠢ ᠬᠣᠶᠠᠷ ᠲᠤ᠌ 《ᠲᠠᠩᠭᠤᠳ ᠢᠷᠭᠡᠨ ᠡᠴᠡ ᠴᠢᠳᠠᠯ ᠤ᠋ᠨ ᠬᠢᠷᠢ ᠪᠡᠷ ᠠᠪᠣᠳᠣᠭᠠᠢ!》 ᠭᠡᠵᠦ ᠰᠣᠶᠣᠷᠬᠠᠭᠠᠳ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠪᠣᠭᠣᠷᠴᠤ ᠮᠤᠬᠤᠯᠠᠢ ᠬᠣᠶᠠᠷ ᠲᠤ᠌ ᠬᠢᠲᠠᠳ ᠢᠷᠭᠡᠨ ᠡᠴᠡ ᠰᠣᠶᠣᠷᠬᠠᠵᠤ ᠡᠰᠡ ᠥᠭᠭᠦᠭᠰᠡᠨ ᠪᠢᠯᠡ᠃ ᠬᠢᠲᠠᠳ ᠢᠷᠭᠡᠨ ᠦ᠌ ᠵᠢᠶᠦ᠋ᠨ ᠢ᠋ ᠲᠠ ᠬᠣᠶᠠᠷ ᠠᠳᠠᠯᠢ ᠬᠤᠪᠢᠶᠠᠵᠤ ᠠᠪᠤᠭᠲᠤᠨ! ᠲᠡᠳᠡᠨ ᠦ᠌ ᠰᠠᠢᠨ ᠡᠷᠡᠰ ᠢ᠋ᠶ᠋ᠡᠷ ᠰᠢᠪᠠᠭᠤ ᠪᠠᠨ ᠪᠠᠷᠢᠭᠤᠯᠵᠤ ᠳᠠᠭᠠᠭᠤᠯᠵᠤ ᠶᠠᠪᠤᠭᠲᠤᠨ! ᠰᠠᠢᠬᠠᠨ ᠬᠡᠦᠬᠡᠨ ᠢ᠋ᠶ᠋ᠡᠷ ᠨᠢ ᠡᠬᠡᠨᠡᠷ ᠦ᠋ᠳ ᠦ᠋ᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠶ᠋ᠢ ᠵᠠᠰᠠᠭᠤᠯᠵᠤ ᠶᠠᠪᠤᠭᠲᠤᠨ! ᠬᠢᠲᠠᠳ ᠢᠷᠭᠡᠨ ᠦ᠌ ᠠᠯᠲᠠᠨ ᠬᠠᠭᠠᠨ ᠤ᠋ ᠢᠲᠡᠭᠡᠯᠲᠦ ᠢᠨᠠᠭ ᠤ᠋ᠳ ᠨᠢ ᠮᠣᠩᠭ᠋ᠣᠯ ᠤ᠋ᠨ ᠡᠪᠦᠭᠡ ᠡᠴᠢᠭᠡ ᠶ᠋ᠢ ᠬᠣᠣᠷᠯᠠᠭᠰᠠᠨ ᠬᠠᠷᠠ ᠬᠢᠲᠠᠳ ᠤ᠋ᠨ ᠵᠢᠶᠦ᠋ᠨ ᠪᠠᠢᠭᠰᠠᠨ ᠪᠢᠯᠡ᠃ ᠣᠳᠣ ᠮᠢᠨᠦ ᠢᠲᠡᠭᠡᠯᠲᠦ ᠢᠨᠠᠭ ᠨᠥᠬᠥᠳ ᠪᠣᠭᠣᠷᠴᠤ ᠮᠤᠬᠤᠯᠠᠢ ᠲᠠ ᠬᠣᠶᠠᠷ ᠪᠢᠰᠢᠦ!》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
267᠂ ᠴᠢᠩᠭᠢᠰ ᠬᠠᠭᠠᠨ᠂ ᠴᠠᠰᠤᠲᠤ ᠠᠭᠤᠯᠠᠨ ᠠ᠋ᠴᠠ ᠬᠥᠳᠡᠯᠵᠦ᠂ ᠢᠷᠭᠠᠢ ᠬᠣᠲᠠ ᠳ᠋ᠤ᠌ ᠪᠠᠭᠤᠵᠤ᠂ ᠶᠠᠷᠭᠠᠢ ᠬᠣᠲᠠ ᠠ᠋ᠴᠠ ᠬᠥᠳᠡᠯᠵᠦ᠂ ᠲᠦᠷᠢᠮᠡᠬᠡᠢ ᠬᠣᠲᠠ ᠶ᠋ᠢ ᠡᠪᠳᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠤᠷᠬᠠᠨ᠂ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠪᠡ᠃ ᠲᠡᠨᠳᠡ ᠪᠤᠷᠬᠠᠨ ᠠᠭᠤᠯᠵᠠᠵᠤ ᠠᠯᠲᠠᠨ ᠰᠦᠮᠡ ᠲᠡᠷᠢᠭᠦᠲᠡᠨ ᠠᠯᠲᠠᠨ ᠮᠥᠩᠭᠥᠨ ᠠᠶᠠᠭᠠ ᠰᠠᠪᠠ ᠶᠢᠰᠦᠨ ᠶᠢᠰᠦ᠂ ᠬᠥᠪᠡᠭᠦᠳ ᠥᠬᠢᠳ ᠶᠢᠰᠦᠨ ᠶᠢᠰᠦ᠂ ᠮᠣᠷᠢ ᠲᠡᠮᠡᠭᠡ ᠶᠢᠰᠦᠨ ᠶᠢᠰᠦ᠂ ᠡᠯᠳᠡᠪ ᠵᠦᠢᠯ ᠲᠤᠰ ᠪᠦᠷᠢ ᠶᠢᠰᠦᠨ ᠶᠢᠰᠦ ᠶ᠋ᠢ ᠪᠡᠯᠡᠭᠯᠡᠨ ᠠᠭᠤᠯᠵᠠᠬᠤ ᠳ᠋ᠤ᠌ ᠪᠤᠷᠬᠠᠨ ᠢ᠋ ᠡᠭᠦᠳᠡᠨ ᠦ᠌ ᠭᠠᠳᠠᠨᠠ ᠪᠠᠷᠠᠭᠠᠯᠠᠬᠠᠭᠣᠯᠪᠠ᠃ ᠲᠡᠷᠡ ᠠᠭᠤᠯᠵᠠᠬᠤ ᠦᠶᠡ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠣᠲᠣᠷᠠ ᠮᠠᠭᠤᠬᠠᠢ ᠪᠣᠯᠪᠠ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠴᠢᠩᠭᠢᠰ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠵᠤ᠂ ᠢᠯᠠᠬᠤ ᠪᠤᠷᠬᠠᠨ ᠳ᠋ᠤ᠌ ᠰᠢᠳᠤᠷᠭᠤ ᠨᠡᠷᠡ ᠶ᠋ᠢ ᠥᠭᠴᠦ᠂ ᠢᠯᠠᠬᠤ ᠪᠤᠷᠬᠠᠨ ᠢ᠋ ᠰᠢᠳᠤᠷᠭᠤ ᠶ᠋ᠢ ᠢᠷᠡᠭᠦᠯᠦᠭᠡᠳ ᠴᠢᠩᠭᠢᠰ ᠬᠠᠭᠠᠨ᠂ ᠢᠯᠠᠬᠤ ᠶ᠋ᠢ ᠲᠤᠯᠤᠨ ᠴᠢᠷᠪᠢ ᠭᠠᠷᠳᠠᠵᠤ ᠨᠥᠭᠴᠢᠭᠡᠲᠦᠭᠡᠢ! ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠲᠤᠯᠤᠨ ᠴᠡᠷᠪᠢ᠂ ᠢᠯᠠᠬᠤ ᠶ᠋ᠢ ᠭᠠᠷᠳᠠᠵᠤ ᠲᠣᠨᠢᠯᠭᠠᠪᠠ ᠭᠡᠵᠦ ᠠᠢᠯᠠᠳᠬᠠᠪᠠᠯ᠂ ᠴᠢᠩᠭᠢᠰ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠲᠠᠩᠭᠤᠳ ᠤᠯᠤᠰ ᠲᠠᠢ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠯᠴᠠᠬᠤ ᠭᠡᠵᠦ ᠢᠷᠡᠬᠦ ᠵᠠᠮ ᠳ᠋ᠤ᠌ ᠠᠷᠪᠣᠬᠠ ᠳ᠋ᠤ᠌ ᠬᠤᠯᠠᠨ ᠠᠪᠠᠯᠠᠵᠤ ᠡᠪᠡᠳᠦᠭᠰᠡᠨ ᠪᠡᠶᠡ ᠶ᠋ᠢ ᠮᠢᠨᠢ ᠠᠨᠠᠭᠠᠶᠠ ᠭᠡᠵᠦ ᠠᠮᠢ ᠪᠡᠶᠡ ᠶ᠋ᠢ ᠮᠢᠨᠢ ᠬᠠᠢᠷᠠᠯᠠᠵᠤ ᠦᠭᠡ ᠳᠤᠷᠠᠳᠬᠠᠭᠰᠠᠨ ᠲᠤᠯᠤᠨ ᠴᠢ ᠮᠥᠨ ᠪᠢᠵᠡ᠃ ᠳᠠᠢᠰᠤᠨ ᠬᠥᠮᠦᠨ ᠦ᠌ ᠬᠣᠣᠷᠲᠤ ᠦᠭᠡᠨ ᠳ᠋ᠦ᠍ ᠬᠣᠷᠣᠰᠴᠤ ᠶᠠᠪᠤᠭᠠᠳ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠬᠦᠴᠦ ᠨᠡᠮᠡᠭᠰᠡᠨ ᠦ᠌ ᠠᠴᠢ ᠪᠠᠷ ᠳᠠᠢᠰᠤᠨ ᠢ᠋ ᠭᠠᠷ ᠲᠠᠭᠠᠨ ᠣᠷᠣᠭᠤᠯᠵᠤ ᠥᠰᠢᠶᠡ ᠪᠡᠨ ᠠᠪᠪᠠ ᠪᠢᠳᠡ᠃ ᠢᠯᠠᠬᠤ ᠶ᠋ᠢᠨ ᠠᠪᠴᠢᠷᠠᠭᠰᠠᠨ ᠨᠡᠭᠦᠳᠡᠯ ᠦ᠋ᠨ ᠬᠠᠷᠰᠢ (ᠲᠠᠭᠰᠢᠶᠠ ᠤᠷᠲᠤ)᠂ ᠠᠶᠠᠭᠠ ᠰᠠᠪᠠ ᠰᠡᠯᠲᠡ ᠶ᠋ᠢ ᠲᠤᠯᠤᠨ ᠴᠢ ᠠᠪᠣᠳᠣᠭᠠᠢ!》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
268᠂ ᠲᠠᠩᠭᠤᠳ ᠤᠯᠤᠰ ᠢ᠋ ᠡᠵᠡᠯᠡᠵᠦ᠂ ᠢᠯᠠᠬᠤ ᠪᠤᠷᠬᠠᠨ ᠳ᠋ᠤ᠌ ᠰᠢᠳᠤᠷᠭᠤ ᠨᠡᠷᠡ ᠦᠭᠭᠡᠳ ᠲᠡᠭᠦᠨ ᠢ᠋ ᠲᠣᠨᠢᠯᠭᠠᠵᠤ᠂ ᠲᠠᠩᠭᠤᠳ ᠢᠷᠭᠡᠨ ᠢ᠋ ᠤᠭ ᠤᠳᠤᠮ ᠢ᠋ᠶ᠋ᠠᠷ ᠨᠢ ᠬᠦᠷᠲᠡᠯᠡ ᠮᠣᠬᠣᠯ ᠮᠣᠰᠬᠢᠯ ᠦᠭᠡᠢ ᠪᠣᠯᠭᠠᠵᠤ (ᠦᠷᠡ ᠦᠯᠡᠳᠡᠭᠳᠡᠯ ᠦᠭᠡᠢ ᠪᠣᠯᠭᠠᠵᠤ ᠡᠭᠦᠨ ᠢ᠋ ᠲᠡᠮᠳᠡᠭᠯᠡᠬᠦ ᠶ᠋ᠢᠨ ᠤᠴᠢᠷ) ᠢᠳᠡᠭᠡᠨ ᠤᠮᠳᠠ ᠪᠠᠨ ᠢᠳᠡᠵᠦ ᠤᠤᠭᠤᠭᠠᠳ᠄ 《 ᠮᠣᠬᠣᠯ ᠮᠣᠰᠬᠢᠯ ᠦᠭᠡᠢ ᠪᠣᠯᠤᠭᠰᠠᠨ ᠭᠡᠵᠦ ᠬᠡᠯᠡᠵᠦ ᠲᠡᠭᠦᠰᠬᠡᠵᠦ ᠪᠠᠢ!》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠲᠠᠩᠭ᠋ᠣᠳ ᠤᠯᠤᠰ᠂ ᠦᠭᠡ ᠪᠡᠨ ᠪᠠᠲᠤᠯᠠᠵᠤ ᠬᠡᠯᠡᠭᠡᠳ ᠲᠡᠷᠡ ᠦᠭᠡᠨ ᠳ᠋ᠡᠭᠡᠨ ᠬᠦᠷᠦᠭᠰᠡᠨ ᠦᠭᠡᠢ ᠲᠤᠯᠠ ᠳᠠᠬᠢᠨ ᠪᠠᠢᠯᠳᠤᠬᠤ ᠪᠠᠷ ᠶᠠᠪᠤᠵᠤ᠂ ᠲᠠᠩᠭᠤᠳ ᠤᠯᠤᠰ ᠢ᠋ ᠰᠥᠨᠥᠭᠡᠨ ᠳᠠᠷᠤᠭᠠᠳ ᠭᠠᠬᠠᠢ ᠵᠢᠯ (1227 ᠣᠨ) 7 ᠰᠠᠷᠠᠢᠨ 12 ᠲᠤ᠌ ᠲᠦᠷᠢᠮᠡᠬᠡᠢ ᠪᠠᠯᠭᠠᠰᠤᠨ ᠳ᠋ᠤ᠌ ᠴᠢᠩᠭᠢᠰ ᠬᠠᠭᠠᠨ᠂ ᠲᠡᠭᠷᠢ ᠳ᠋ᠦ᠍ ᠬᠠᠯᠢᠪᠠ᠃ ᠬᠠᠯᠢᠬᠤ ᠶ᠋ᠢᠨ ᠡᠮᠦᠨᠡ᠂ ᠲᠠᠩᠭᠤᠳ ᠢᠷᠭᠡᠨ ᠡᠴᠡ ᠮᠠᠰᠢ ᠣᠯᠠᠨ ᠢ᠋ ᠶᠢᠰᠣᠢ ᠬᠠᠲᠤᠨ ᠳ᠋ᠤ᠌ ᠥᠭᠪᠡ᠃ ᠡᠵᠡᠨ ᠦ᠌ ᠠᠯᠲᠠᠨ ᠬᠡᠭᠦᠷ ᠢ᠋ ᠬᠠᠰᠠᠭ ᠲᠡᠷᠭᠡᠨ ᠳ᠋ᠦ᠍ ᠲᠡᠭᠡᠭᠡᠵᠦ ᠬᠠᠷᠢᠨ ᠥᠭᠡᠳᠡ ᠪᠣᠯᠤᠨ ᠢᠷᠡᠬᠦ ᠳ᠋ᠦ᠍ ᠰᠥᠨᠢᠳ ᠦ᠋ᠨ ᠬᠢᠯᠦᠬᠡᠳᠡᠢ ᠪᠠᠭᠠᠲᠤᠷ ᠮᠠᠭᠲᠠᠨ ᠰᠢᠯᠦᠭᠯᠡᠭᠰᠡᠨ ᠨᠢ᠄
《ᠬᠠᠮᠤᠭ ᠤ᠋ᠨ ᠬᠠᠭᠠᠨ᠂ ᠤᠯᠤᠰ ᠤ᠋ᠨ ᠡᠵᠡᠨ ᠮᠢᠨᠢ
ᠬᠠᠷᠴᠠᠭᠠᠢ ᠰᠢᠪᠠᠭᠤᠨ ᠤ᠋ ᠵᠢᠭᠦᠷ ᠪᠣᠯᠤᠨ ᠣᠳᠪᠠ
ᠬᠠᠩᠭᠢᠨᠠᠬᠤ ᠲᠡᠷᠭᠡᠨ ᠦ᠌ ᠲᠡᠭᠡᠭᠡᠰᠢ ᠪᠣᠯᠤᠨ ᠣᠳᠪᠠ
ᠵᠢᠷᠭᠢᠬᠦ ᠰᠢᠪᠠᠭᠤᠨ ᠤ᠋ ᠵᠢᠭᠦᠷ ᠪᠣᠯᠤᠨ ᠣᠳᠪᠠ
ᠵᠢᠭᠳᠡᠷᠡᠬᠦ ᠲᠡᠷᠭᠡᠨ ᠦ᠌ ᠠᠴᠢᠶᠠ ᠪᠣᠯᠤᠨ ᠣᠳᠪᠠ》
ᠭᠡᠵᠦ ᠮᠠᠭᠲᠠᠨ ᠳᠠᠭᠤᠯᠠᠪᠠ᠃
ᠮᠤᠨᠠ ᠶ᠋ᠢᠨ ᠬᠥᠬᠡᠪᠦᠷ ᠲᠦ᠍ ᠬᠠᠰᠠᠭ ᠲᠡᠷᠭᠡ ᠪᠤᠯᠤ ᠳ᠋ᠤ᠌ ᠬᠦᠷᠲᠡᠯᠡ ᠰᠢᠭᠢᠳᠴᠦ ᠲᠠᠪᠤᠨ ᠬᠦᠯᠦᠭ ᠢ᠋ᠶ᠋ᠡᠷ ᠲᠠᠲᠠᠵᠤ ᠬᠥᠳᠡᠯᠦᠨ ᠶᠠᠳᠠᠵᠤ᠂ ᠬᠥᠷ ᠶᠡᠬᠡ ᠤᠯᠤᠰ ᠵᠣᠪᠠᠬᠤ ᠳ᠋ᠤ᠌ ᠰᠥᠨᠢᠳ ᠦ᠋ᠨ ᠬᠢᠯᠦᠬᠡᠳᠡᠢ ᠪᠠᠭᠠᠲᠤᠷ ᠥᠴᠢᠷᠦᠨ᠄
《ᠬᠥᠬᠡ ᠮᠥᠩᠬᠡ ᠲᠡᠭᠷᠢ ᠡᠴᠡ ᠵᠠᠶᠠᠭᠠ ᠪᠠᠷ ᠲᠥᠷᠥᠭᠰᠡᠨ ᠬᠦᠯᠦᠭ ᠪᠣᠭᠳᠠ ᠡᠵᠡᠨ ᠮᠢᠨᠢ! ᠬᠥᠷ ᠶᠡᠬᠡ ᠤᠯᠤᠰ ᠢ᠋ᠶ᠋ᠠᠨ ᠣᠷᠬᠢᠵᠤ ᠣᠳᠪᠠ ᠤᠤ᠂ ᠴᠢ?
ᠲᠦᠪᠰᠢᠳᠬᠡᠨ ᠪᠠᠢᠭᠤᠯᠤᠭᠰᠠᠨ ᠤᠯᠤᠰ ᠲᠥᠷᠥ ᠴᠢᠨᠢ ᠲᠡᠭᠦᠰ ᠵᠠᠶᠠᠭᠠᠲᠤ ᠬᠠᠲᠤᠳ ᠬᠥᠪᠡᠭᠦᠳ ᠴᠢᠨᠢ ᠲᠥᠷᠥᠭᠰᠡᠨ ᠶᠡᠬᠡ ᠭᠠᠵᠠᠷ ᠤᠰᠤ ᠴᠢᠨᠢ ᠲᠡᠮᠦᠵᠢᠨ ᠡᠵᠡᠨ ᠴᠢᠮᠠ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠨᠠ᠂ ᠠᠷᠢᠭᠤᠨ ᠢ᠋ᠶ᠋ᠠᠷ ᠪᠠᠢᠭᠤᠯᠤᠭᠰᠠᠨ ᠲᠥᠷᠥ ᠴᠢᠨᠢ ᠠᠯᠪᠠᠲᠤ ᠣᠯᠠᠨ ᠤᠯᠤᠰ ᠴᠢᠨᠢ ᠠᠮᠠᠷᠠᠭ ᠬᠠᠲᠤᠳ ᠬᠥᠪᠡᠭᠦᠳ ᠴᠢᠨᠢ ᠠᠯᠲᠠᠨ ᠤᠷᠲᠤ ᠬᠠᠷᠰᠢ ᠴᠢᠨᠢ ᠠᠯᠤᠰ ᠭᠠᠵᠠᠷ ᠪᠢᠯᠡ᠂ ᠤᠳᠤᠷᠢᠳᠤᠨ ᠪᠠᠢᠭᠤᠯᠤᠭᠰᠠᠨ ᠲᠥᠷᠥ ᠴᠢᠨᠢ ᠤᠴᠠᠷᠠᠭᠰᠠᠨ ᠬᠠᠲᠤᠳ ᠬᠥᠪᠡᠭᠦᠳ ᠴᠢᠨᠢ ᠤᠷᠤᠭ ᠡᠯᠢᠭᠡᠨ ᠮᠣᠩᠭ᠋ᠣᠯ ᠴᠢᠨᠢ ᠤᠯᠤᠰ ᠣᠯᠠᠨ ᠢᠷᠭᠡᠨ ᠴᠢᠨᠢ ᠤᠨᠠᠭᠰᠠᠨ ᠳᠡᠯᠢᠭᠦᠨ ᠪᠣᠯᠳᠠᠭ ᠴᠢᠨᠢ ᠲᠡᠨᠳᠡ ᠬᠣᠯᠠ ᠪᠠᠢᠨᠠ᠂ ᠬᠡᠭᠡᠷ ᠠᠵᠢᠷᠭᠠᠨ ᠤ᠋ ᠬᠥᠬᠥᠯ ᠢ᠋ᠶ᠋ᠡᠷ ᠬᠢᠭᠰᠡᠨ ᠬᠢᠭᠢᠷᠢ ᠲᠤᠭ ᠰᠦᠯᠳᠡ ᠴᠢᠨᠢ ᠬᠡᠩᠭᠡᠷᠭᠡ ᠪᠦᠷᠢᠶᠡ ᠤᠷᠢᠶᠠ ᠴᠢᠨᠢ ᠬᠡᠯᠡᠬᠦ ᠦᠭᠡᠢ ᠪᠦᠭᠦᠳᠡ ᠤᠯᠤᠰ ᠴᠢᠨᠢ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠴᠢᠨᠢ ᠲᠡᠨᠳᠡ ᠪᠢᠯᠡ᠂ ᠡᠵᠡᠨ ᠮᠢᠨᠢ! ᠪᠦᠲᠦᠬᠦ ᠶ᠋ᠢᠨ ᠤᠷᠢᠳ ᠤᠴᠠᠷᠠᠭᠰᠠᠨ ᠪᠥᠷᠳᠡᠭᠡᠯᠵᠢᠨ ᠰᠡᠴᠡᠨ ᠬᠠᠲᠤᠨ ᠴᠢᠨᠢ ᠪᠤᠶᠠᠨᠲᠤ ᠭᠠᠵᠠᠷ ᠨᠤᠲᠤᠭ ᠴᠢᠨᠢ ᠪᠣᠭᠣᠷᠴᠤ ᠮᠤᠬᠤᠯᠠᠢ ᠨᠥᠬᠥᠳ ᠴᠢᠨᠢ ᠪᠤᠯᠲᠤ ᠶᠡᠬᠡ ᠤᠯᠤᠰ ᠴᠢᠨᠢ ᠲᠡᠨᠳᠡ ᠪᠢᠯᠡ᠂ ᠡᠵᠡᠨ ᠮᠢᠨᠢ! ᠬᠤᠪᠢᠯᠭᠠᠨ ᠢ᠋ᠶ᠋ᠠᠷ ᠤᠴᠠᠷᠠᠭᠰᠠᠨ ᠬᠤᠯᠠᠨ ᠬᠠᠲᠤᠨ ᠴᠢᠨᠢ ᠬᠤᠭᠤᠷ ᠴᠣᠭᠣᠷ ᠬᠥᠭ ᠳᠠᠭᠤᠤ ᠴᠢᠨᠢ ᠬᠣᠲᠠᠯᠠ ᠪᠦᠭᠦᠳᠡ ᠤᠯᠤᠰ ᠴᠢᠨᠢ ᠬᠤᠲᠤᠭᠲᠤ ᠡᠷᠬᠢᠮ ᠭᠠᠵᠠᠷ ᠤᠰᠤ ᠴᠢᠨᠢ ᠲᠡᠨᠳᠡ ᠪᠢᠯᠡ᠂ ᠡᠵᠡᠨ ᠮᠢᠨᠢ! ᠬᠠᠷᠭᠤᠨᠠ ᠠᠭᠤᠯᠠ ᠶ᠋ᠢ ᠳᠤᠯᠠᠭᠠᠨ ᠭᠡᠵᠦ ᠬᠠᠷᠢ ᠲᠠᠩᠭ᠋ᠣᠳ ᠢ᠋ ᠣᠯᠠᠨ ᠭᠡᠵᠦ ᠬᠠᠲᠤᠳ ᠥᠬᠢᠳ ᠢ᠋ ᠭᠤᠸᠠ ᠭᠡᠵᠦ ᠬᠠᠮᠤᠭ ᠮᠣᠩᠭ᠋ᠣᠯ ᠢ᠋ᠶ᠋ᠠᠨ ᠮᠠᠷᠲᠠᠪᠠ ᠤᠤ ᠬᠠᠢᠷᠠᠲᠤ ᠡᠵᠡᠨ ᠮᠢᠨᠢ! ᠬᠠᠯᠠᠭᠤᠨ ᠠᠮᠢ ᠶ᠋ᠢ ᠴᠢᠨᠢ ᠠᠯᠳᠠᠪᠠᠴᠤ ᠬᠠᠰ ᠡᠷᠳᠡᠨᠢ ᠮᠡᠲᠦ ᠬᠡᠭᠦᠷ ᠢ᠋ ᠴᠢᠨᠢ ᠬᠠᠮᠠᠭᠠᠯᠠᠨ ᠠᠪᠴᠤ ᠬᠠᠷᠢᠶᠠ ᠡᠵᠡᠨ ᠮᠢᠨᠢ! ᠬᠠᠲᠤᠨ ᠪᠥᠷᠳᠡᠭᠡᠯᠵᠢᠨ ᠳ᠋ᠦ᠍ ᠴᠢᠨᠢ ᠦᠵᠡᠭᠦᠯᠦᠶᠡ ᠬᠠᠮᠤᠭ ᠤᠯᠤᠰ ᠲᠤ᠌ ᠴᠢᠨᠢ ᠬᠦᠷᠭᠡᠶᠡ》 ᠭᠡᠵᠦ ᠥᠴᠢᠪᠡᠯ ᠬᠠᠭᠠᠨ ᠡᠵᠡᠨ ᠡᠨᠡᠷᠢᠨ ᠰᠣᠶᠣᠷᠬᠠᠪᠠ᠃
ᠬᠠᠰᠠᠭ ᠲᠡᠷᠭᠡ ᠬᠠᠩᠭᠢᠷᠠᠰᠠᠨ ᠬᠥᠳᠡᠯᠪᠡ ᠬᠠᠮᠤᠭ ᠤᠯᠤᠰ ᠪᠠᠶᠠᠰᠬᠤᠯᠠᠩᠲᠤ ᠪᠣᠯᠪᠠ ᠬᠠᠨ ᠶᠡᠬᠡ ᠭᠠᠵᠠᠷ ᠲᠡᠨᠳᠡ ᠬᠦᠷᠪᠡ ᠬᠠᠮᠤᠭ ᠤ᠋ᠨ ᠮᠥᠩᠬᠡ ᠶ᠋ᠢ ᠲᠡᠨᠳᠡ ᠣᠷᠣᠰᠢᠭᠤᠯᠵᠤ ᠬᠠᠭᠠᠨ ᠵᠠᠢᠰᠠᠩ ᠤ᠋ᠳ ᠤ᠋ᠨ ᠲᠤᠯᠭᠠᠭᠤᠷᠢ ᠪᠣᠯᠵᠤ ᠬᠠᠮᠤᠭ ᠤᠯᠤᠰ ᠤ᠋ᠨ ᠰᠢᠲᠦᠭᠡᠨ ᠪᠣᠯᠤᠭᠠᠳ ᠨᠢᠮᠡᠨ ᠴᠠᠭᠠᠨ ᠭᠡᠷ ᠪᠣᠯᠪᠠ ᠵᠠ ᠃ ᠡᠨᠡ ᠶᠡᠬᠡ ᠤᠯᠤᠰ ᠲᠤ᠌ ᠲᠤᠩᠬᠠᠭ ᠵᠠᠷᠯᠠᠵᠤ ᠡᠮᠦᠰᠦᠭᠰᠡᠨ ᠴᠠᠮᠴᠠ᠂ ᠥᠷᠭᠥᠭᠡ ᠭᠡᠷ ᠣᠷᠢᠶᠠᠭᠰᠠᠨ ᠣᠢᠮᠣᠰᠤ ᠶ᠋ᠢ ᠲᠡᠨᠳᠡ ᠣᠩᠬᠣᠯᠠᠪᠠ᠃
ᠦᠨᠡᠨ ᠬᠡᠭᠦᠷ ᠢ᠋ ᠨᠢ ᠵᠠᠷᠢᠮ ᠤ᠋ᠳ ᠪᠤᠷᠬᠠᠨ ᠬᠠᠯᠳᠤᠨ ᠳ᠋ᠤ᠌ ᠣᠩᠬᠣᠯᠠᠪᠠ ᠭᠡᠬᠦ᠂ ᠵᠠᠷᠢᠮ ᠤ᠋ᠳ ᠠᠯᠲᠠᠢ ᠬᠠᠨ ᠤ᠋ ᠠᠷᠤ ᠳ᠋ᠤ᠌᠂ ᠬᠡᠨᠲᠡᠢ ᠬᠠᠨ ᠤ᠋ ᠥᠪᠥᠷ ᠲᠦ᠍ ᠶᠡᠬᠡ ᠬᠥᠲᠥᠭ ᠨᠡᠷᠡᠲᠦ ᠭᠠᠵᠠᠷ ᠣᠩᠬᠣᠯᠠᠪᠠ ᠭᠡᠬᠦ ᠪᠣᠢ᠃
269᠂ ᠬᠤᠯᠤᠭᠠᠨᠠ ᠵᠢᠯ (1228 ᠣᠨ) ᠴᠠᠭᠠᠲᠠᠢ᠂ ᠪᠠᠲᠤ ᠲᠡᠷᠢᠭᠦᠲᠡᠨ ᠪᠠᠷᠠᠭᠤᠨ ᠭᠠᠷ ᠢ᠋ ᠡᠵᠡᠯᠡᠭᠰᠡᠨ ᠬᠥᠪᠡᠭᠦᠳ᠂ ᠣᠳᠴᠢᠭᠢᠨ ᠨᠣᠶᠠᠨ᠂ ᠶᠡᠬᠦ ᠂ ᠶᠢᠰᠦᠢ᠌ᠭᠡ ᠲᠡᠷᠢᠭᠦᠲᠡᠨ ᠵᠡᠭᠦᠨ ᠭᠠᠷ ᠢ᠋ ᠡᠵᠡᠯᠡᠭᠰᠡᠨ ᠬᠥᠪᠡᠭᠦᠳ᠂ ᠲᠤᠯᠤᠢ ᠲᠡᠷᠢᠭᠦᠲᠡᠨ ᠭᠣᠣᠯ ᠢ᠋ ᠡᠵᠡᠯᠡᠭᠰᠡᠨ ᠬᠥᠪᠡᠭᠦᠳ ᠥᠬᠢᠳ᠂ ᠲᠦᠮᠡᠨ ᠦ᠌ ᠨᠣᠶᠠᠳ᠂ ᠮᠢᠩᠭᠠᠨ ᠤ᠋ ᠨᠣᠶᠠᠳ ᠪᠦᠭᠦᠳᠡᠭᠡᠷ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠳ᠋ᠤ᠌ (ᠣᠳᠣ ᠶ᠋ᠢᠨ ᠪᠠᠶᠠᠨ ᠤᠯᠠᠭᠠᠨ) ᠬᠤᠷᠠᠵᠤ᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠭᠡᠷᠢᠶᠡᠰᠦᠯᠡᠭᠰᠡᠨ ᠵᠠᠷᠯᠢᠭ ᠤ᠋ᠨ ᠶᠣᠰᠣ ᠪᠠᠷ ᠥᠭᠡᠳᠡᠢ ᠶ᠋ᠢ ᠬᠠᠭᠠᠨ ᠡᠷᠭᠦᠮᠵᠢᠯᠡᠪᠡ᠃ ᠴᠠᠭᠠᠲᠠᠢ ᠠᠬᠠ᠂ ᠥᠭᠡᠳᠡᠢ ᠳᠡᠭᠦᠦ ᠪᠡᠨ ᠬᠠᠭᠠᠨ ᠡᠷᠭᠦᠮᠵᠢᠯᠡᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠠᠯᠲᠠᠨ ᠠᠮᠢ ᠶ᠋ᠢ ᠰᠠᠬᠢᠵᠤ ᠪᠠᠢᠭᠰᠠᠨ ᠬᠡᠪᠲᠡᠭᠦᠯ᠂ ᠬᠣᠷᠴᠢᠨ᠂ ᠮᠢᠩᠭᠠᠨ ᠲᠣᠷᠬᠠᠭ ᠤ᠋ᠳ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠰᠢᠳᠠᠷ ᠶᠠᠪᠤᠭᠰᠠᠨ ᠥᠮᠴᠢ ᠲᠦᠮᠡᠨ ᠬᠡᠰᠢᠭᠲᠡᠨ ᠢ᠋ ᠴᠠᠭᠠᠲᠠᠢ ᠲᠤᠯᠤᠢ ᠬᠣᠶᠠᠷ᠂ ᠥᠭᠡᠳᠡᠢ ᠬᠠᠭᠠᠨ ᠳ᠋ᠤ᠌ ᠥᠭᠪᠡ᠃ ᠭᠣᠣᠯ ᠤ᠋ᠨ ᠤᠯᠤᠰ ᠢ᠋ ᠮᠥᠨ ᠶᠣᠰᠣ ᠪᠠᠷ ᠥᠭᠡᠳᠡᠢ ᠬᠠᠭᠠᠨ ᠳ᠋ᠤ᠌ ᠥᠭᠪᠡ᠃
270᠂ ᠥᠭᠡᠳᠡᠢ᠂ ᠬᠠᠭᠠᠨ ᠡᠷᠭᠦᠮᠵᠢᠯᠡᠭᠳᠡᠭᠡᠳ ᠰᠢᠳᠠᠷ ᠪᠠᠷᠠ ᠪᠣᠯᠬᠤ ᠲᠦᠮᠡᠨ ᠬᠡᠰᠢᠭᠲᠡᠨ᠂ ᠭᠣᠣᠯ ᠤ᠋ᠨ ᠤᠯᠤᠰ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠵᠠᠬᠢᠷᠴᠤ ᠤᠷᠢᠳᠠᠪᠡᠷ ᠴᠠᠭᠠᠲᠠᠢ ᠠᠬᠠ ᠲᠠᠢ ᠵᠥᠪᠯᠡᠭᠡᠳ᠂ ᠴᠢᠩᠭᠢᠰ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠳᠠᠭᠤᠰᠬᠠᠭᠠ ᠦᠭᠡᠢ ᠪᠠᠭᠳᠠᠳ᠋ ᠤᠯᠤᠰ ᠤ᠋ᠨ ᠬᠠᠯᠢᠫ ᠰᠤᠯᠲᠠᠨ ᠳ᠋ᠤ᠌ ᠠᠶᠠᠯᠠᠭᠰᠠᠨ ᠴᠣᠷᠮᠠᠬᠠᠨ ᠬᠣᠷᠴᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠣᠭᠣᠲᠣᠷ ᠮᠥᠩᠬᠡᠲᠦ ᠬᠣᠶᠠᠷ ᠢ᠋ ᠢᠯᠡᠭᠡᠪᠡ᠃ ᠪᠠᠰᠠ ᠤᠷᠢᠳᠤ ᠰᠦᠪᠡᠬᠡᠳᠡᠢ ᠪᠠᠭᠠᠲᠤᠷ ᠢ᠋ ᠬᠠᠩᠯᠢᠨ᠂ ᠬᠢᠪᠴᠠᠭ᠂ ᠪᠠᠵᠢᠭᠢᠳ᠂ ᠣᠷᠣᠰ᠂ ᠠᠰᠤ᠂ ᠰᠡᠰᠦ᠂ ᠮᠠᠵᠠᠷ᠂ ᠬᠡᠰᠢᠮᠢᠷ᠂ ᠰᠡᠷᠬᠡᠰ᠂ ᠪᠤᠬᠠᠷ (ᠪᠣᠯᠭᠠᠷᠢ)᠂ ᠭᠡᠷᠡᠯ ᠤᠯᠤᠰ ᠤ᠋ᠳ ᠲᠤ᠌ ᠬᠦᠷᠲᠡᠯᠡ᠂ ᠢᠵᠢᠯ᠂ ᠵᠠᠶᠠᠭ ᠮᠥᠷᠡᠨ ᠦ᠋ᠳ ᠢ᠋ ᠭᠡᠲᠦᠯᠦᠭᠦᠯᠦᠨ᠂ ᠮᠠᠺᠠᠳᠮᠠᠨ᠂ ᠬᠡᠷᠡᠮᠡᠨ᠂ ᠭᠡᠢᠪᠡ ᠲᠡᠷᠢᠭᠦᠲᠡᠨ ᠬᠣᠲᠠ ᠶ᠋ᠢ ᠪᠠᠢᠯᠳᠤᠨ ᠡᠵᠡᠯᠡᠭᠦᠯᠬᠦ ᠪᠡᠷ ᠶᠠᠪᠤᠭᠤᠯᠤᠭᠰᠠᠨ ᠨᠢ ᠲᠡᠳᠡᠭᠡᠷ ᠤᠯᠤᠰ ᠤ᠋ᠨ ᠡᠰᠡᠷᠭᠦᠴᠡᠯ ᠦᠯᠡᠮᠵᠢ ᠭᠡᠬᠦ ᠮᠡᠳᠡᠭᠡ ᠶ᠋ᠢ ᠠᠪᠤᠭᠠᠳ ᠰᠦᠪᠡᠬᠡᠳᠡᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠪᠠᠲᠤ᠂ ᠪᠦᠷᠢ᠂ ᠭᠦᠶᠦᠭ᠂ ᠮᠥᠩᠬᠡ ᠲᠡᠷᠢᠭᠦᠲᠡᠨ ᠬᠠᠭᠠᠨ ᠤ᠋ ᠲᠥᠷᠥᠯ ᠦ᠋ᠨ ᠠᠬᠠᠮᠠᠳ ᠬᠥᠪᠡᠭᠦᠳ ᠨᠣᠶᠠᠳ ᠢ᠋ ᠮᠣᠷᠢᠯᠠᠭᠤᠯᠪᠠ᠃ ᠡᠨᠡ ᠠᠶᠠᠨ ᠳ᠋ᠤ᠌ ᠮᠣᠷᠳᠠᠭᠰᠠᠨ ᠬᠥᠪᠡᠭᠦᠳ ᠨᠣᠶᠠᠳ ᠢ᠋ ᠪᠠᠲᠤ ᠠᠬᠠᠯᠠᠨ ᠵᠠᠬᠢᠷᠲᠤᠭᠠᠢ! ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠭᠣᠣᠯ ᠤᠯᠤᠰ ᠠ᠋ᠴᠠ ᠭᠠᠷᠤᠭᠰᠠᠨ ᠴᠡᠷᠢᠭ ᠢ᠋ ᠭᠦᠶᠦᠭ ᠠᠬᠠᠯᠠᠲᠤᠭᠠᠢ! ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠡᠨᠡ ᠠᠶᠠᠨ ᠳ᠋ᠤ᠌ ᠤᠯᠤᠰ ᠢᠷᠭᠡᠨ ᠢ᠋ ᠵᠠᠬᠢᠷᠤᠭᠰᠠᠨ ᠬᠠᠨ ᠬᠥᠪᠡᠭᠦᠳ ᠥᠪᠡᠷᠰᠡᠳ ᠦ᠋ᠨ ᠬᠥᠪᠡᠭᠦᠳ ᠦ᠋ᠨ ᠠᠬᠠᠮᠠᠳ ᠢ᠋ ᠶᠠᠪᠤᠭᠤᠯᠲᠤᠭᠠᠢ! ᠤᠯᠤᠰ ᠢ᠋ ᠡᠰᠡ ᠵᠠᠬᠢᠷᠤᠭᠰᠠᠨ ᠬᠠᠨ ᠬᠥᠪᠡᠭᠦᠳ᠂ ᠲᠦᠮᠡᠨ᠂ ᠮᠢᠩᠭᠠᠨ᠂ ᠵᠠᠭᠤᠨ᠂ ᠠᠷᠪᠠᠨ ᠤ᠋ ᠨᠣᠶᠠᠳ᠂ ᠣᠯᠠᠨ ᠬᠥᠮᠦᠨ ᠬᠡᠨ ᠪᠣᠯᠪᠠᠴᠤ᠂ ᠮᠥᠨ ᠲᠡᠷᠡᠴᠢᠯᠡᠨ ᠥᠪᠡᠷ ᠦ᠋ᠨ ᠬᠥᠪᠡᠭᠦᠳ ᠦ᠋ᠨ ᠠᠬᠠᠮᠠᠳ ᠢ᠋ ᠶᠠᠪᠤᠭᠤᠯᠲᠤᠭᠠᠢ! ᠬᠠᠨ ᠤ᠋ ᠥᠬᠢᠳ ᠬᠦᠷᠭᠡᠳ ᠮᠥᠨ ᠲᠡᠭᠦᠨ ᠦ᠌ ᠠᠳᠠᠯᠢ ᠪᠠᠷ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠠᠬᠠᠮᠠᠳ ᠢ᠋ ᠶᠠᠪᠤᠭᠤᠯᠲᠤᠭᠠᠢ! ᠭᠡᠵᠦ ᠵᠠᠷᠯᠢᠭ ᠪᠣᠯᠤᠭᠠᠳ ᠪᠠᠰᠠ ᠥᠭᠡᠳᠡᠢ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠬᠥᠪᠡᠭᠦᠳ ᠦ᠋ᠨ ᠠᠬᠠᠮᠠᠳ ᠢ᠋ ᠢᠩᠭᠢᠵᠦ ᠠᠶᠠᠨ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠰᠠᠨᠠᠯ ᠢ᠋ ᠴᠠᠭᠠᠲᠠᠢ ᠠᠬᠠ ᠭᠠᠷᠭᠠᠪᠠ᠃ ᠴᠠᠭᠠᠳᠠᠢᠠᠬᠠ ᠶ᠋ᠢᠨ ᠬᠡᠯᠡᠭᠦᠯᠦᠭᠰᠡᠨ ᠨᠢ᠄ 〈ᠰᠦᠪᠡᠬᠡᠳᠡᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠠᠬᠠ ᠪᠦᠷᠢ ᠶ᠋ᠢ ᠶᠠᠪᠤᠭᠤᠯᠤᠨᠠ᠃ ᠬᠥᠪᠡᠭᠦᠳ ᠦ᠋ᠨ ᠠᠬᠠ ᠠᠶᠠᠯᠠᠪᠠᠯ ᠴᠡᠷᠢᠭ ᠠᠷᠪᠢᠨ ᠪᠣᠯᠤᠨᠠ᠃ ᠴᠡᠷᠢᠭ ᠣᠯᠠᠨ ᠪᠣᠯ ᠦᠵᠡᠭᠳᠡᠬᠦ ᠰᠦᠷ ᠬᠦᠴᠦ ᠶᠡᠬᠡ ᠪᠣᠯᠤᠨᠠ᠃ ᠲᠡᠨᠳᠡ᠂ ᠳᠠᠢᠰᠤᠨ ᠤ᠋ ᠬᠥᠮᠦᠨ ᠦᠯᠡᠮᠵᠢ᠂ ᠬᠠᠷᠢ ᠶ᠋ᠢᠨ ᠤᠯᠤᠰ ᠣᠯᠠᠨ ᠪᠣᠢ᠃ ᠲᠡᠷᠡ ᠬᠢᠵᠠᠭᠠᠷ ᠤ᠋ᠨ ᠤᠯᠤᠰ ᠤ᠋ᠳ ᠬᠡᠴᠡᠭᠦᠦ᠃ ᠬᠢᠯᠢᠩᠨᠡᠪᠡᠯ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠮᠡᠰᠡ ᠪᠡᠷ ᠬᠣᠣᠷᠯᠠᠵᠤ ᠦᠬᠦᠬᠦ ᠤᠯᠤᠰ ᠪᠣᠢ᠃ ᠬᠤᠷᠴᠠ ᠮᠡᠰᠡ ᠲᠡᠢ ᠭᠡᠨᠡ〉 ᠭᠡᠵᠦ ᠢᠯᠡᠭᠡᠯᠡ᠃ ᠴᠠᠭᠠᠲᠠᠢ ᠠᠬᠠ ᠶᠢᠨ ᠬᠢᠴᠢᠶᠡᠨ ᠪᠣᠯᠭᠣᠮᠵᠢᠯᠠᠵᠤ ᠬᠡᠯᠡᠭᠰᠡᠨ ᠡᠨᠡ ᠦᠭᠡ ᠶ᠋ᠢᠨ ᠶᠣᠰᠣ ᠪᠠᠷ ᠬᠥᠪᠡᠭᠦᠳ ᠦ᠋ᠨ ᠠᠬᠠᠮᠠᠳ ᠢ᠋ ᠲᠣᠮᠢᠯᠠᠵᠤ ᠶᠠᠪᠤᠭᠤᠯᠤᠶᠠ! ᠭᠡᠵᠦ ᠵᠦᠭ ᠵᠦᠭ ᠲᠦ᠍ ᠲᠤᠩᠬᠠᠭ ᠵᠠᠷᠯᠠᠵᠤ ᠪᠠᠲᠤ᠂ ᠪᠦᠷᠢ᠂ ᠬᠥᠶᠦᠭ᠂ ᠮᠥᠩᠬᠡ ᠲᠡᠷᠢᠭᠦᠲᠡᠨ ᠢ᠋ ᠠᠶᠠᠨ ᠳ᠋ᠤ᠌ ᠮᠣᠷᠳᠠᠭᠤᠯᠬᠤ ᠪᠣᠯᠤᠭᠰᠠᠨ ᠤᠴᠢᠷ ᠡᠢᠮᠦ ᠪᠢᠯᠡ》 ᠭᠡᠵᠡᠢ᠃
271᠂ ᠪᠠᠰᠠ ᠥᠭᠡᠳᠡᠢ ᠬᠠᠭᠠᠨ᠂ ᠴᠠᠭᠠᠲᠠᠢ ᠠᠬᠠ ᠳ᠋ᠤ᠌ ᠵᠥᠪᠯᠡᠵᠦ ᠢᠯᠡᠭᠡᠭᠰᠡᠨ ᠨᠢ᠄ 《ᠪᠢ ᠴᠢᠩᠭᠢᠰ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠡᠯᠡᠨ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠪᠠ᠃ ᠶᠠᠮᠠᠷ ᠡᠷᠳᠡᠮ ᠢ᠋ᠶ᠋ᠡᠷ ᠬᠠᠭᠠᠨ ᠰᠠᠭᠤᠪᠠ? ᠭᠡᠵᠦ ᠪᠢ ᠬᠡᠯᠡᠳᠡᠭ ᠪᠢᠰᠢᠦ? ᠴᠠᠭᠠᠲᠠᠢ ᠠᠬᠠ ᠵᠥᠪᠰᠢᠶᠡᠷᠡᠪᠡᠯ ᠪᠢᠳᠡᠨ ᠦ᠌ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠡᠵᠡᠯᠡᠵᠦ ᠳᠠᠭᠤᠰᠤᠭᠠ ᠦᠭᠡᠢ ᠣᠷᠬᠢᠭᠰᠠᠨ ᠬᠢᠲᠠᠳ ᠤᠯᠤᠰ ᠤ᠋ᠨ ᠠᠯᠲᠠᠨ ᠬᠠᠭᠠᠨ ᠢ᠋ ᠡᠵᠡᠯᠡᠬᠦ ᠪᠡᠷ ᠮᠣᠷᠢᠯᠠᠶᠠ》 ᠭᠡᠵᠦ ᠵᠥᠪᠯᠡᠵᠦ ᠢᠯᠡᠭᠡᠪᠡᠯ ᠴᠠᠭᠠᠲᠠᠢ ᠠᠬᠠ ᠵᠥᠪᠰᠢᠶᠡᠷᠡᠵᠦ 《ᠶᠠᠭᠤ ᠠᠯᠵᠠᠬᠤ ᠪᠣᠢ? ᠠᠭᠤᠷᠤᠭ ᠤᠷᠲᠤ ᠪᠠᠨ ᠰᠠᠢᠨ ᠬᠥᠮᠦᠨ ᠳ᠋ᠦ᠍ ᠲᠤᠰᠢᠶᠠᠭᠠᠳ ᠮᠣᠷᠢᠯᠠᠭᠲᠤᠨ! ᠪᠢ ᠡᠨᠳᠡ ᠡᠴᠡ ᠴᠡᠷᠢᠭ ᠭᠠᠷᠭᠠᠵᠤ ᠢᠯᠡᠭᠡᠶᠡ!》 ᠭᠡᠵᠡᠢ᠃ ᠶᠡᠬᠡ ᠤᠷᠲᠤ ᠪᠠᠨ ᠣᠯᠳᠠᠭᠠᠷ ᠬᠣᠷᠴᠢ ᠳ᠋ᠤ᠌ ᠲᠤᠰᠢᠶᠠᠪᠠ᠃
272᠂ ᠲᠠᠤᠯᠠᠢ ᠵᠢᠯ (1231ᠣᠨ) ᠥᠭᠡᠳᠡᠢ ᠬᠠᠭᠠᠨ᠂ ᠬᠢᠲᠠᠳ ᠢᠷᠭᠡᠨ ᠳ᠋ᠦ᠍ ᠮᠣᠷᠢᠯᠠᠵᠤ᠂ ᠵᠠᠪᠠᠵᠢ ᠮᠠᠩᠯᠠᠢ ᠪᠣᠯᠭᠠᠵᠤ ᠢᠯᠡᠭᠡᠪᠡ᠃ ᠲᠡᠭᠡᠭᠡᠳ ᠬᠢᠲᠠᠳ ᠤ᠋ᠨ ᠴᠡᠷᠢᠭ ᠢ᠋ ᠬᠢᠶᠠᠷᠠᠲᠠᠯᠠ ᠬᠢᠳᠤᠵᠤ᠂ ᠴᠠᠪᠴᠢᠶᠠᠯ ᠤ᠋ᠨ ᠳᠠᠪᠠᠭᠠ ᠪᠠᠷ ᠳᠠᠪᠠᠵᠤ ᠵᠦᠭ ᠵᠦᠭ ᠲᠦ᠍ ᠣᠯᠠᠨ ᠬᠣᠲᠠ ᠶ᠋ᠢ ᠬᠠᠭᠠᠵᠤ ᠪᠠᠢᠯᠳᠤᠬᠤ ᠴᠡᠷᠢᠭ ᠦ᠋ᠳ ᠢ᠋ ᠶᠠᠪᠤᠭᠤᠯᠪᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠥᠭᠡᠳᠡᠢ ᠬᠠᠭᠠᠨ ᠡᠪᠡᠳᠴᠢᠨ ᠬᠦᠷᠴᠦ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠ᠃ ᠪᠥᠬᠡ᠂ ᠲᠦᠯᠬᠢᠴᠢᠨ ᠨᠠᠷ ᠢ᠋ᠶ᠋ᠠᠷ ᠮᠡᠷᠭᠡᠯᠡᠭᠦᠯᠪᠡᠯ ᠬᠢᠲᠠᠳ ᠤᠯᠤᠰ ᠤ᠋ᠨ ᠭᠠᠵᠠᠷ ᠤᠰᠤᠨ ᠤ᠋ ᠡᠵᠡᠳ᠂ ᠬᠥᠮᠦᠨ ᠬᠥᠷᠥᠩᠭᠡ ᠪᠡᠨ ᠰᠦᠢᠳᠦᠭᠦᠯᠵᠦ᠂ ᠬᠣᠲᠠ ᠪᠠᠯᠭᠠᠰᠤ ᠪᠠᠨ ᠡᠪᠳᠡᠭᠦᠯᠦᠭᠰᠡᠨ ᠦ᠌ ᠤᠴᠢᠷ ᠬᠢᠯᠢᠩᠨᠡᠨ ᠬᠠᠭᠠᠨ ᠳ᠋ᠤ᠌ ᠬᠣᠣᠷ ᠬᠦᠷᠭᠡᠵᠦ ᠪᠠᠢᠨᠠ ᠭᠡᠪᠡ᠃ ᠬᠥᠮᠦᠨ ᠬᠥᠷᠥᠩᠭᠡ᠂ ᠠᠯᠲᠠ ᠮᠥᠩᠭᠥ᠂ ᠠᠳᠤᠭᠤᠰᠤ ᠢᠷᠭᠡᠨ ᠢ᠋ᠶ᠋ᠡᠷ ᠵᠣᠯᠢᠶᠠ ᠥᠭᠭᠦᠶᠡ ᠭᠡᠵᠦ ᠲᠥᠯᠭᠡᠳᠡᠪᠡᠯ ᠢᠯᠠᠷᠢᠰᠢᠬᠤ ᠦᠭᠡᠢ ᠬᠠᠷᠢᠨ ᠤᠯᠠᠮ ᠬᠦᠨᠳᠦ ᠪᠣᠯᠪᠠ᠃ ᠣᠢᠷᠠ ᠲᠥᠷᠥᠯ ᠦ᠋ᠨ ᠬᠥᠮᠦᠰ ᠡᠴᠡ ᠵᠣᠯᠢᠶᠠ ᠪᠣᠯᠭᠠᠵᠤ ᠥᠭᠭᠦᠶᠡ ᠭᠡᠵᠦ ᠳᠥᠯᠭᠡᠳᠡᠪᠡᠯ ᠬᠠᠭᠠᠨ ᠭᠡᠨᠡᠳᠲᠡ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ ᠤᠰᠤ ᠭᠦᠶᠦᠵᠦ ᠤᠤᠭᠤᠭᠠᠳ 《ᠶᠠᠭᠤ ᠪᠣᠯᠪᠠ?》 ᠭᠡᠵᠦ ᠠᠰᠠᠭᠤᠪᠠ᠃ ᠪᠥᠬᠡ ᠨᠠᠷ ᠥᠭᠦᠯᠡᠷᠦᠨ᠄ 《ᠬᠢᠲᠠᠳ ᠤᠯᠤᠰ ᠤ᠋ᠨ ᠭᠠᠵᠠᠷ ᠤᠰᠤᠨ ᠤ᠋ ᠡᠵᠡᠳ ᠭᠠᠵᠠᠷ ᠢ᠋ᠶ᠋ᠠᠨ ᠰᠦᠢᠳᠬᠡᠭᠦᠯᠵᠦ᠂ ᠬᠥᠮᠦᠨ ᠬᠥᠷᠥᠩᠭᠡ ᠪᠡᠨ ᠲᠠᠯᠠᠯᠠᠭᠤᠯᠤᠭᠠᠳ ᠬᠣᠣᠷᠯᠠᠵᠤ ᠡᠢᠮᠦ ᠡᠪᠡᠳᠴᠢᠨ ᠬᠦᠷᠭᠡᠵᠡᠢ᠃ ᠡᠯᠳᠡᠪ ᠪᠤᠰᠤᠳ ᠶᠠᠭᠤᠮᠠ ᠪᠠᠷ ᠵᠣᠯᠢᠶᠠ ᠲᠥᠯᠥᠭᠡᠰᠦ ᠥᠭᠭᠦᠶᠡ ᠭᠡᠬᠦ ᠳ᠋ᠦ᠍ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠤᠯᠠᠮ ᠬᠢᠯᠢᠩᠨᠡᠵᠦ ᠪᠠᠢᠨᠠ᠃ ᠭᠠᠭᠴᠠ ᠬᠦ ᠣᠶ᠋ᠢᠷᠠ ᠲᠥᠷᠥᠯ ᠦ᠋ᠨ ᠬᠥᠮᠦᠨ ᠢ᠋ ᠵᠣᠯᠢᠶᠠ ᠪᠣᠯᠭᠠᠵᠤ ᠥᠭᠭᠦᠶᠡ ᠭᠡᠪᠡᠯ ᠵᠥᠪᠰᠢᠶᠡᠷᠡᠵᠦ ᠡᠪᠡᠳᠴᠢᠨ ᠢ᠋ ᠬᠥᠩᠭᠡᠷᠡᠭᠦᠯᠵᠦ ᠪᠠᠢᠨᠠ᠃ ᠣᠳᠣ ᠶᠠᠭᠠᠬᠢᠬᠤ ᠶ᠋ᠢ ᠵᠠᠷᠯᠢᠭ ᠮᠡᠳᠡᠨᠡ!》 ᠭᠡᠵᠦ ᠥᠴᠢᠪᠡᠯ ᠥᠭᠡᠳᠡᠢ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠬᠠᠨ ᠬᠥᠪᠡᠭᠦᠳ ᠡᠴᠡ ᠮᠢᠨᠦ ᠳᠡᠷᠭᠡᠳᠡ ᠬᠡᠨ ᠪᠠᠢᠨᠠ?》 ᠭᠡᠪᠡᠯ᠂ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠲᠤᠯᠤᠢ ᠥᠭᠦᠯᠡᠷᠦᠨ᠄ 《ᠰᠤᠤᠲᠤ ᠴᠢᠩᠭᠢᠰ ᠬᠠᠭᠠᠨ ᠡᠴᠢᠭᠡ ᠮᠢᠨᠢ᠂ ᠳᠡᠭᠡᠷᠡ ᠴᠢᠨᠢ ᠠᠬᠠ ᠨᠠᠷ᠂ ᠳᠣᠣᠷᠠ ᠴᠢᠨᠢ ᠳᠡᠭᠦᠦ ᠨᠠᠷ ᠪᠠᠢᠲᠠᠯᠠ᠂ ᠬᠠᠭᠠᠨ ᠠᠬᠠ ᠲᠠᠨ ᠢ᠋ ᠠᠭᠲᠠ ᠮᠣᠷᠢ ᠰᠢᠭ᠋ ᠰᠣᠷᠢᠵᠤ᠂ ᠢᠷᠭᠡ ᠬᠣᠨᠢ ᠰᠢᠭ᠋ ᠪᠠᠷᠢᠯᠠᠵᠤ ᠦᠵᠡᠭᠡᠳ ᠶᠡᠬᠡ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠯᠭᠠᠵᠤ᠂ ᠣᠯᠠᠨ ᠤᠯᠤᠰ ᠢ᠋ ᠵᠠᠬᠢᠷᠬᠤ ᠳᠡᠭᠡᠳᠦ ᠡᠭᠦᠷᠭᠡ ᠶ᠋ᠢ ᠳᠠᠭᠠᠭᠠᠯᠭᠠᠪᠠ᠃ ᠨᠠᠮᠠ ᠶ᠋ᠢ ᠬᠠᠭᠠᠨ ᠠᠬᠠ ᠶ᠋ᠢᠨ ᠳᠡᠷᠭᠡᠳᠡ ᠪᠠᠢᠵᠤ᠂ ᠮᠠᠷᠲᠠᠭᠰᠠᠨ ᠢ᠋ ᠰᠠᠨᠠᠭᠤᠯᠵᠤ᠂ ᠤᠨᠲᠠᠭᠰᠠᠨ ᠢ᠋ ᠰᠡᠷᠢᠭᠦᠯᠵᠦ ᠶᠠᠪᠤ ᠭᠡᠰᠡᠨ ᠪᠢᠯᠡ᠃ ᠣᠳᠣ ᠬᠠᠭᠠᠨ ᠠᠬᠠ ᠴᠢᠮᠠ ᠶ᠋ᠢ ᠠᠯᠳᠠᠪᠠᠯ᠂ ᠪᠢ ᠬᠡᠨ ᠦ᠌ ᠮᠠᠷᠲᠠᠭᠰᠠᠨ ᠢ᠋ ᠰᠠᠨᠠᠭᠤᠯᠵᠤ᠂ ᠬᠡᠨ ᠦ᠌ ᠤᠨᠲᠠᠭᠰᠠᠨ ᠢ᠋ ᠰᠡᠷᠢᠭᠦᠯᠬᠦ ᠪᠣᠢ? ᠦᠨᠡᠬᠡᠷ ᠬᠠᠭᠠᠨ ᠠᠬᠠ ᠮᠠᠭᠤᠵᠢᠷᠠᠪᠠᠯ᠂ ᠣᠯᠠᠨ ᠮᠣᠩᠭ᠋ᠣᠯ ᠤᠯᠤᠰ ᠥᠨᠥᠴᠢᠷᠡᠵᠦ᠂ ᠬᠢᠲᠠᠳ ᠤᠯᠤᠰ ᠪᠠᠶᠠᠰᠬᠤ ᠪᠣᠯᠤᠨᠠ᠃ ᠬᠠᠭᠠᠨ ᠠᠬᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠪᠢ ᠵᠣᠯᠢᠶᠠ ᠪᠣᠯᠤᠶᠠ! ᠳᠤᠯᠠᠨ ᠵᠢᠭᠠᠰᠤᠨ ᠤ᠋ ᠨᠢᠷᠤᠭᠤ ᠶ᠋ᠢ ᠲᠣᠭᠳᠠᠷᠠᠵᠣ ᠶᠠᠪᠤᠯᠠ ᠪᠢ᠂ ᠬᠠᠯᠢᠮᠤ ᠵᠢᠭᠠᠰᠤᠨ ᠤ᠋ ᠨᠢᠷᠤᠭᠤ ᠶ᠋ᠢ ᠬᠢᠷᠠᠭᠠᠵᠣ ᠶᠠᠪᠤᠯᠠ ᠪᠢ᠃ ᠢᠯᠡ ᠶ᠋ᠢ ᠢᠯᠠᠵᠤ᠂ ᠳᠠᠯᠳᠠ ᠶ᠋ᠢ ᠳᠠᠷᠤᠵᠤ ᠪᠠᠢᠪᠠ᠃ ᠮᠢᠨᠦ ᠨᠢᠭᠤᠷ ᠭᠤᠸᠠ᠂ ᠨᠢᠷᠤᠭᠤ ᠥᠨᠳᠥᠷ ᠪᠢᠵᠡ᠃ ᠪᠥᠬᠡ ᠨᠠᠷ ᠪᠥᠬᠡᠯᠡᠵᠦ ᠵᠠᠯᠪᠠᠷᠢᠭᠲᠤᠨ!》 ᠭᠡᠪᠡ᠃ ᠪᠥᠬᠡ ᠨᠠᠷ ᠪᠥᠬᠡᠯᠡᠨ ᠵᠠᠯᠪᠠᠷᠢᠵᠤ᠂ ᠠᠳᠢᠰᠯᠠᠨ ᠤᠰᠤ ᠶ᠋ᠢ ᠲᠤᠯᠤᠢ ᠳ᠋ᠤ᠌ ᠤᠤᠭᠤᠯᠭᠠᠪᠠ᠃ ᠪᠢᠴᠢᠬᠠᠨ ᠰᠠᠭᠤᠭᠠᠳ ᠥᠭᠦᠯᠡᠷᠦᠨ᠄ 《ᠰᠣᠭᠲᠣᠪᠠ ᠪᠢ᠃ ᠰᠣᠭᠲᠣᠭᠰᠠᠨ ᠠ᠋ᠴᠠ ᠰᠡᠷᠭᠦᠲᠡᠯᠡ ᠥᠨᠥᠴᠢᠨ ᠥᠴᠦᠬᠡᠨ ᠳᠡᠭᠦᠦ ᠨᠠᠷ ᠪᠠ ᠪᠡᠯᠪᠡᠰᠦᠨ ᠪᠡᠷᠢ ᠪᠡᠷᠢᠶᠡᠳ ᠢ᠋ ᠬᠥᠮᠦᠵᠢᠭᠦᠯᠦᠨ ᠠᠰᠠᠷᠠᠬᠤ ᠶ᠋ᠢ ᠬᠠᠭᠠᠨ ᠠᠬᠠ ᠮᠡᠳᠡᠲᠦᠭᠡᠢ! ᠠᠯᠢᠪᠠ ᠦᠭᠡ ᠪᠡᠨ ᠬᠡᠯᠡᠪᠡ ᠪᠢ᠃ ᠰᠣᠭᠲᠣᠪᠠ!》 ᠭᠡᠳ ᠭᠠᠷᠤᠨ ᠣᠳᠴᠤ ᠮᠠᠭᠤᠵᠢᠷᠠᠭᠰᠠᠨ ᠪᠢᠯᠡ᠃
273᠂ ᠥᠭᠡᠳᠡᠢ ᠬᠠᠭᠠᠨ᠂ ᠲᠡᠭᠡᠭᠡᠳ ᠠᠯᠲᠠᠨ ᠬᠠᠭᠠᠨ ᠢ᠋ ᠮᠥᠬᠥᠭᠡᠵᠦ ᠰᠠᠥᠰᠠ (ᠵᠠᠷᠤᠴᠠ) ᠨᠡᠷᠡ ᠶ᠋ᠢ ᠥᠭᠴᠦ ᠂ ᠠᠯᠲᠠ᠂ ᠮᠥᠩᠭᠥ᠂ ᠠᠯᠲᠠᠲᠠᠢ ᠬᠡ ᠲᠡᠢ ᠠᠭᠤᠷᠰᠤ ᠲᠠᠸᠠᠷ᠂ ᠠᠭᠲᠠ ᠮᠣᠷᠢ ᠠᠯᠪᠠᠲᠤ ᠵᠠᠷᠤᠴᠠ ᠶ᠋ᠢ ᠬᠤᠷᠢᠶᠠᠵᠤ ᠠᠪᠤᠭᠠᠳ ᠵᠠᠬᠢᠷᠤᠭᠴᠢ᠂ ᠮᠡᠳᠡᠭᠡᠯᠡᠭᠴᠢ ᠨᠠᠷ ᠢ᠋ ᠲᠣᠮᠢᠯᠠᠭᠠᠳ ᠨᠠᠠᠵᠢᠩ᠂ ᠵᠥᠩᠲᠦ ᠪᠠ ᠵᠦᠭ ᠵᠦᠭ ᠦ᠋ᠨ ᠬᠣᠲᠠ ᠤ᠋ᠳ ᠲᠤ᠌ ᠳᠠᠷᠤᠭᠠ ᠨᠠᠷ ᠢ᠋ ᠲᠠᠯᠪᠢᠵᠤ ᠲᠦᠪᠰᠢᠨ ᠮᠡᠨᠳᠦ ᠪᠡᠷ ᠪᠤᠴᠠᠵᠤ᠂ ᠬᠠᠷᠠᠬᠣᠷᠣᠮ ᠬᠣᠲᠠ ᠳ᠋ᠤ᠌ ᠢᠷᠡᠵᠦ ᠪᠠᠭᠤᠪᠠ᠃
274᠂ ᠴᠤᠷᠮᠠᠬᠠᠨ ᠬᠣᠷᠴᠢ᠂ ᠪᠠᠭᠳᠠᠳ᠋ ᠤᠯᠤᠰ ᠢ᠋ ᠳᠠᠭᠠᠭᠤᠯᠵᠠᠢ᠃ ᠲᠡᠨᠳᠡᠬᠢ ᠶ᠋ᠢᠨ ᠭᠠᠵᠠᠷ ᠰᠠᠢᠨ᠂ ᠡᠳ᠋ ᠡᠷᠬᠢᠮ ᠭᠡᠳᠡᠭ ᠢ᠋ ᠮᠡᠳᠡᠭᠡᠳ ᠥᠭᠡᠳᠡᠢ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《 ᠴᠤᠷᠮᠠᠬᠠᠨ ᠬᠣᠷᠴᠢ᠂ ᠮᠥᠨ ᠲᠡᠷᠡ ᠭᠠᠵᠠᠷ ᠲᠤ᠌ ᠵᠠᠬᠢᠷᠤᠭᠴᠢ (ᠲᠠᠮᠠᠭᠠᠴᠢ) ᠪᠣᠯᠵᠤ᠂ ᠰᠢᠷᠠ ᠠᠯᠲᠠ᠂ ᠰᠢᠷᠠᠮᠠᠯ ᠴᠢᠮᠡᠭ᠂ ᠬᠣᠷᠭᠣᠢ᠂ ᠮᠠᠩᠨᠤᠭ᠂ ᠭᠬᠢᠪ᠂ ᠲᠣᠷᠭᠠ᠂ ᠰᠤᠪᠤᠳ᠂ ᠲᠠᠨᠠ᠂ ᠤᠷᠲᠤ ᠬᠦᠵᠦᠭᠦᠦ ᠲᠡᠢ᠂ ᠥᠨᠳᠥᠷ ᠬᠥᠯ ᠲᠡᠢ ᠠᠷᠭᠤᠮᠠᠭ ᠮᠣᠷᠢ᠂ ᠠᠴᠢᠶᠠᠨ ᠤ᠋ ᠲᠡᠮᠡᠭᠡ᠂ ᠯᠠᠭᠤᠰᠠ ᠵᠡᠷᠭᠡ ᠶᠠᠭᠤᠮᠠ ᠶ᠋ᠢ ᠵᠢᠯ ᠪᠦᠷᠢ ᠬᠦᠷᠭᠡᠨ ᠢᠷᠡᠭᠦᠯᠵᠦ ᠪᠠᠢ᠌ᠭᠳᠣᠨ!》 ᠭᠡᠪᠡ᠃ ᠰᠦᠪᠡᠬᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠭᠰᠠᠨ ᠪᠠᠲᠤ᠂ ᠪᠦᠷᠢ᠂ ᠬᠥᠶᠦᠭ᠂ ᠮᠥᠩᠬᠡ ᠲᠡᠷᠢᠭᠦᠲᠡᠨ ᠣᠯᠠᠨ ᠬᠥᠪᠡᠭᠦᠳ ᠬᠠᠩᠯᠢᠨ᠂ ᠬᠢᠪᠴᠠᠭ᠂ ᠪᠠᠵᠢᠭᠢᠳ ᠢ᠋ ᠣᠷᠣᠭᠤᠯᠵᠤ᠂ ᠢᠵᠢᠯ᠂ ᠵᠠᠶᠠᠭ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ ᠮᠡᠬᠡᠥᠨ ᠬᠣᠲᠠ ᠶ᠋ᠢ ᠡᠪᠳᠡᠵᠦ ᠣᠷᠣᠰ ᠢ᠋ ᠬᠢᠳᠤᠵᠤ ᠰᠦᠢᠳᠬᠡᠪᠡ᠃ ᠠᠰᠤ᠂ ᠰᠡᠰᠦ᠂ ᠪᠣᠯᠭᠠᠷᠢ᠂ ᠬᠡᠷᠡᠮᠡᠨ᠂ ᠬᠢᠧᠨ ᠵᠡᠷᠭᠡ ᠬᠣᠲᠠ ᠶ᠋ᠢᠨ ᠢᠷᠭᠡᠨ ᠢ᠋ ᠡᠵᠡᠯᠡᠨ ᠳᠠᠭᠠᠭᠤᠯᠵᠤ᠂ ᠳᠠᠷᠤᠭᠠ ᠵᠠᠬᠢᠷᠤᠭᠴᠢ ᠨᠠᠷ ᠢ᠋ ᠲᠠᠯᠪᠢᠭᠠᠳ ᠪᠤᠴᠠᠪᠠ᠃ ᠤᠷᠢᠳᠤ ᠵᠦᠷᠴᠢᠳ ᠰᠣᠯᠣᠩᠭ᠋ᠣᠰ ᠢ᠋ ᠡᠵᠡᠯᠡᠬᠦ ᠪᠡᠷ ᠠᠶᠠᠯᠠᠭᠰᠠᠨ ᠵᠠᠯᠠᠢ᠌ᠷᠳᠠᠢ ᠬᠣᠷᠴᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠶᠢᠰᠣᠳᠠᠷ ᠬᠣᠷᠴᠢ ᠶ᠋ᠢ ᠶᠠᠪᠤᠭᠤᠯᠪᠠ᠃ ᠲᠡᠭᠦᠨ ᠢ᠋ ᠲᠡᠨᠳᠡ ᠵᠠᠬᠢᠷᠤᠭᠴᠢ ᠰᠠᠭᠤᠲᠤᠭᠠᠢ! ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
275᠂ ᠪᠠᠲᠤ᠂ ᠬᠢᠪᠴᠠᠭ ᠨᠤᠲᠤᠭ ᠠ᠋ᠴᠠ ᠥᠭᠡᠳᠡᠢ ᠬᠠᠭᠠᠨ ᠳ᠋ᠤ᠌ ᠨᠢᠭᠤᠴᠠ ᠪᠠᠷ ᠥᠴᠢᠵᠦ ᠢᠯᠡᠭᠡᠭᠰᠡᠨ ᠨᠢ᠄ 《ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍᠂ ᠬᠠᠭᠠᠨ ᠠᠪᠠᠭᠠ ᠶ᠋ᠢᠨ ᠰᠤᠤ ᠳ᠋ᠤ᠌ ᠮᠡᠬᠡᠥᠨ ᠬᠣᠲᠠ ᠶ᠋ᠢ ᠡᠪᠳᠡᠵᠦ᠂ ᠣᠷᠣᠰ ᠤᠯᠤᠰ ᠢ᠋ ᠡᠵᠡᠯᠡᠵᠦ᠂ ᠵᠦᠭ ᠵᠦᠭ ᠲᠦ᠍ ᠠᠷᠪᠠᠨ ᠨᠢᠭᠡᠨ ᠬᠠᠷᠢ ᠤᠯᠤᠰ ᠢ᠋ ᠣᠷᠣᠭᠤᠯᠵᠤ᠂ ᠠᠯᠲᠠᠨ ᠵᠢᠯᠣᠭᠣ ᠪᠠᠨ ᠲᠠᠲᠠᠵᠤ ᠰᠠᠯᠤᠯᠴᠠᠬᠤ ᠪᠣᠯᠬᠤ ᠳ᠋ᠤ᠌ ᠶᠡᠬᠡ ᠠᠰᠠᠷ ᠪᠤᠰᠬᠠᠵᠤ ᠬᠤᠷᠢᠮ ᠢ᠋ ᠬᠤᠷᠢᠮᠯᠠᠪᠠ᠃ ᠡᠨᠡ ᠬᠤᠷᠢᠮ ᠳᠡᠭᠡᠷᠡ ᠪᠢ ᠪᠦᠬᠦ ᠬᠠᠨ ᠬᠥᠪᠡᠭᠦᠳ ᠦ᠋ᠨ ᠠᠬᠠᠮᠠᠳ ᠲᠤᠯᠠ ᠨᠢᠭᠡ ᠬᠣᠶᠠᠷ ᠠᠶᠠᠭᠠ ᠰᠠᠷᠬᠤᠳ ᠲᠡᠷᠢᠭᠦᠯᠡᠨ ᠤᠤᠭᠤᠪᠠ᠃ ᠭᠡᠲᠡᠯᠡ᠂ ᠪᠦᠷᠢ ᠭᠦᠶᠦᠭ ᠬᠣᠶᠠᠷ ᠨᠠᠳᠠ ᠳ᠋ᠤ᠌ ᠮᠠᠭᠤᠳᠠᠵᠤ ᠬᠤᠷᠢᠮ ᠠ᠋ᠴᠠ ᠭᠠᠷᠴᠤ ᠣᠳᠪᠠ᠃ ᠶᠠᠪᠤᠬᠤ ᠳ᠋ᠠᠭᠠᠨ ᠪᠦᠷᠢ ᠬᠡᠯᠡᠭᠰᠡᠨ ᠨᠢ᠄ 〈ᠪᠠᠲᠤ ᠪᠢᠳᠡ ᠠᠳᠠᠯᠢ ᠪᠠᠢᠲᠠᠯᠠ᠂ ᠶᠠᠭᠠᠬᠢᠭᠠᠳ ᠲᠡᠷᠢᠭᠦᠯᠡᠨ ᠤᠤᠭᠤᠬᠤ ᠪᠢᠯᠡ? ᠲᠡᠷᠡ ᠰᠠᠴᠠᠭᠣᠷᠠᠬᠣ ᠰᠠᠨᠠᠭᠠᠲᠠᠢ ᠰᠠᠬᠠᠯᠲᠤ ᠡᠮᠡᠭᠡᠨ ᠦ᠌ ᠥᠰᠥᠭᠡᠢ ᠪᠡᠷ ᠳᠠᠪᠲᠠᠵᠤ ᠥᠯᠮᠡᠢ ᠪᠡᠷ ᠭᠢᠰᠬᠢᠴᠢᠬᠡᠬᠦ ᠶᠤᠮᠰᠠᠨ!〉 ᠭᠡᠵᠡᠢ᠃ ᠭᠦᠶᠦᠭ ᠦ᠋ᠨ ᠬᠡᠯᠡᠭᠰᠡᠨ ᠨᠢ᠄ 〈ᠪᠢᠳᠡ ᠬᠣᠶᠠᠷ ᠲᠡᠷᠡ ᠨᠤᠮᠤ ᠰᠤᠮᠤ ᠠᠭᠰᠠᠭᠰᠠᠨ ᠡᠮᠡᠭᠡᠳ ᠦ᠋ᠨ ᠡᠭᠡᠮ ᠢ᠋ ᠬᠠᠷᠪᠤᠯᠳᠤᠶᠠ〉 ᠭᠡᠵᠡᠢ᠃ ᠡᠯᠵᠢᠭᠡᠳᠡᠢ ᠶ᠋ᠢᠨ ᠬᠥᠪᠡᠭᠦᠨ ᠠᠷᠭᠠᠰᠤᠨ ᠤ᠋ ᠬᠡᠯᠡᠭᠰᠡᠨ ᠨᠢ᠄ 〈ᠲᠡᠳᠡ ᠮᠣᠳᠣᠨ ᠰᠡᠭᠦᠯ ᠵᠡᠭᠦᠪᠡᠯ ᠵᠣᠬᠢᠨᠠ〉 ᠭᠡᠪᠡ᠃ ᠪᠢᠳᠡ᠂ ᠬᠠᠷᠢ ᠡᠯᠢᠭᠡ ᠲᠡᠢ᠂ ᠳᠠᠭᠠᠭᠰᠠᠨ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠶᠠᠪᠤᠵᠤ ᠪᠠᠢᠭᠠ ᠤᠴᠢᠷ ᠵᠦᠢ ᠶ᠋ᠢ ᠭᠠᠷᠭᠠᠵᠤ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ᠂ ᠪᠦᠷᠢ᠂ ᠬᠥᠶᠦᠭ ᠬᠣᠶᠠᠷ ᠲᠡᠭᠡᠵᠦ ᠬᠡᠷᠡᠭᠦᠯ ᠦ᠋ᠨ ᠦᠭᠡ ᠶ᠋ᠢ ᠬᠡᠯᠡᠭᠡᠳ ᠨᠠᠢᠷᠠᠮᠳᠠᠯ ᠦᠭᠡᠢ ᠲᠠᠷᠬᠠᠪᠠ᠃ ᠣᠳᠣ ᠶᠠᠭᠠᠬᠢᠬᠤ ᠶ᠋ᠢ ᠬᠠᠭᠠᠨ ᠠᠪᠠᠭᠠ ᠮᠡᠳᠡᠲᠦᠭᠡᠢ!》 ᠭᠡᠵᠦ ᠥᠴᠢᠵᠦ ᠢᠯᠡᠭᠡᠵᠡᠢ᠃
276᠂ ᠪᠠᠲᠤ ᠶ᠋ᠢᠨ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠥᠭᠡᠳᠡᠢ ᠬᠠᠭᠠᠨ ᠮᠠᠰᠢ ᠶᠡᠬᠡ ᠬᠢᠯᠢᠩᠨᠡᠵᠦ᠂ ᠬᠥᠶᠦᠭ ᠢ᠋ ᠪᠠᠷᠠᠯᠠᠬᠠᠭᠣᠯᠣᠭᠰᠠᠨ ᠦᠭᠡᠢ ᠪᠡᠷ ᠥᠭᠦᠯᠡᠷᠦᠨ᠄ 《ᠡᠨᠡ ᠲᠦᠷᠢᠮᠡᠬᠡᠢ ᠭᠠᠢᠬᠠᠯ᠂ ᠬᠡᠨ ᠦ᠌ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠠᠬᠠ ᠬᠥᠮᠦᠨ ᠢ᠋ ᠠᠮᠠ ᠮᠡᠳᠡᠨ ᠳᠣᠷᠣᠮᠵᠢᠯᠠᠬᠤ ᠪᠣᠯᠪᠠ? ᠭᠠᠭᠴᠠ ᠮᠠᠭᠤ ᠥᠨᠳᠡᠭᠡ ᠢᠯᠵᠠᠷᠠᠵᠠᠢ᠃ ᠠᠬᠠ ᠬᠥᠮᠦᠨ ᠦ᠌ ᠥᠭᠡᠳᠡ ᠡᠴᠡ ᠡᠰᠡᠷᠭᠦᠴᠡᠭᠰᠡᠨ ᠠᠵᠠᠢ᠃ ᠬᠠᠷᠢ ᠬᠣᠯᠠ ᠭᠠᠵᠠᠷ ᠬᠠᠢᠭᠤᠯ ᠳ᠋ᠤ᠌ ᠶᠠᠪᠤᠭᠤᠯᠵᠤ᠂ ᠠᠷᠪᠠᠨ ᠬᠤᠷᠤᠭᠤᠨ ᠤ᠋ ᠬᠢᠨᠢ ᠬᠢᠮᠤᠰᠤ ᠶ᠋ᠢ ᠬᠠᠨᠵᠠᠷᠠᠲᠠᠯᠠ ᠠᠭᠤᠯᠠ ᠮᠡᠲᠦ ᠬᠣᠲᠠ ᠶ᠋ᠢ ᠡᠵᠡᠯᠡᠭᠦᠯᠬᠦ ᠪᠡᠷ ᠣᠷᠣᠭᠰᠢ ᠵᠢᠳᠬᠦᠭᠦᠯᠦᠶᠡ! ᠵᠠᠬᠠ ᠬᠣᠯᠠ ᠭᠠᠵᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠪᠣᠯᠭᠠᠵᠤ ᠲᠠᠪᠤᠨ ᠬᠤᠷᠤᠭᠤᠨ ᠤ᠋ ᠬᠢᠨᠢ ᠬᠢᠮᠤᠰᠤ ᠶ᠋ᠢ ᠲᠠᠮᠲᠤᠷᠠᠲᠠᠯᠠ ᠪᠠᠲᠤ ᠪᠡᠬᠢ ᠬᠣᠲᠠ ᠶ᠋ᠢ ᠪᠠᠢᠯᠳᠤᠭᠤᠯᠤᠨ ᠠᠪᠠᠷᠢᠭᠤᠯᠤᠶᠠ! ᠪᠤᠵᠠᠷ ᠮᠠᠭᠤ ᠲᠦᠷᠢᠮᠡᠬᠡᠢ ᠠᠷᠭᠠᠰᠤᠨ᠂ ᠬᠡᠨ ᠢ᠋ ᠳᠠᠭᠤᠷᠢᠶᠠᠵᠤ᠂ ᠪᠢᠳᠡᠨ ᠦ᠌ ᠤᠷᠤᠭ ᠤ᠋ᠨ ᠬᠥᠮᠦᠨ ᠳ᠋ᠦ᠍ ᠠᠮᠠ ᠭᠠᠷᠴᠤ ᠲᠣᠷᠣᠮᠵᠢᠯᠠᠳᠠᠭ ᠦᠭᠡ ᠬᠡᠯᠡᠪᠡ? ᠭᠦᠶᠦᠭ ᠠᠷᠭᠠᠰᠤᠨ ᠬᠣᠶᠠᠷ ᠢ᠋ ᠬᠠᠮᠲᠤ ᠢᠯᠡᠭᠡᠶᠡ! ᠵᠦᠢ ᠨᠢ ᠠᠷᠭᠠᠰᠤᠨ ᠢ᠋ ᠠᠯᠠᠪᠠᠯ ᠵᠣᠬᠢᠬᠤ ᠪᠢᠯᠡ᠃ ᠭᠡᠲᠡᠯᠡ᠂ ᠲᠠ ᠨᠠᠷ ᠠᠯᠠᠭᠴᠢᠯᠠᠪᠠ ᠭᠡᠬᠦ ᠪᠢᠵᠡ᠃ ᠪᠦᠷᠢ ᠶ᠋ᠢᠨ ᠲᠤᠬᠠᠢ ᠪᠣᠯ ᠪᠠᠲᠤ ᠳ᠋ᠤ᠌ ᠬᠡᠯᠡᠭᠲᠦᠨ! ᠴᠠᠭᠠᠲᠠᠢ ᠠᠬᠠ ᠳ᠋ᠤ᠌ ᠬᠡᠯᠡᠵᠦ ᠢᠯᠡᠭᠡᠲᠦᠭᠡᠢ! ᠴᠠᠭᠠᠲᠠᠢ ᠠᠬᠠ ᠮᠡᠳᠡᠲᠦᠭᠡᠢ!》 ᠭᠡᠪᠡ᠃
277᠂ ᠬᠠᠭᠠᠨ ᠬᠥᠪᠡᠭᠦᠳ ᠡᠴᠡ ᠮᠡᠩᠬᠡᠢ᠂ ᠨᠣᠶᠠᠳ ᠠ᠋ᠴᠠ ᠠᠯᠴᠢᠳᠠᠢ᠂ ᠬᠣᠩᠬᠣᠷᠳᠠᠢ᠂ ᠵᠠᠩᠭᠢ ᠲᠡᠷᠢᠭᠦᠲᠡᠨ ᠨᠣᠶᠠᠳ ᠳᠤᠷᠠᠳᠬᠠᠨ ᠥᠴᠢᠷᠦᠨ᠄ 《ᠴᠢᠩᠭᠢᠰ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠵᠠᠷᠯᠢᠭ ᠪᠢᠯᠡ᠄ ᠬᠡᠭᠡᠷᠡ ᠶ᠋ᠢᠨ ᠦᠢᠯᠡ ᠶ᠋ᠢ ᠬᠡᠭᠡᠷᠡ ᠰᠢᠳᠬᠡᠵᠦ᠂ ᠭᠡᠷ ᠦ᠋ᠨ ᠦᠢᠯᠡ ᠶ᠋ᠢ ᠭᠡᠷ ᠲᠦ᠍ ᠰᠢᠳᠬᠡᠬᠦ ᠪᠢᠯᠡ᠃ ᠬᠠᠭᠠᠨ᠂ ᠣᠳᠣ ᠭᠦᠶᠦᠭ ᠲᠦ᠍ ᠬᠢᠯᠢᠩᠨᠡᠵᠦ ᠪᠠᠢᠨᠠ᠂ ᠡᠨᠡ ᠪᠣᠯ ᠬᠡᠭᠡᠷᠡ ᠶ᠋ᠢᠨ ᠦᠢᠯᠡ ᠬᠡᠷᠡᠭ ᠮᠥᠨ᠂ ᠬᠠᠭᠠᠨ ᠰᠣᠶᠣᠷᠬᠠᠪᠠᠯ ᠡᠨᠡ ᠬᠡᠷᠡᠭ ᠢ᠋ ᠪᠠᠲᠤ ᠳ᠋ᠤ᠌ ᠲᠤᠰᠢᠶᠠᠵᠤ ᠢᠯᠡᠭᠡᠪᠡᠯ ᠪᠣᠯᠬᠤ ᠤᠤ?》 ᠭᠡᠵᠦ ᠥᠴᠢᠪᠡᠯ ᠡᠨᠡ ᠦᠭᠡ ᠶ᠋ᠢ ᠬᠠᠭᠠᠨ ᠵᠥᠪᠰᠢᠶᠡᠷᠡᠵᠦ ᠲᠠᠢᠳᠬᠤᠷᠠᠭᠠᠳ᠂ ᠭᠦᠶᠦᠭ ᠢ᠋ ᠠᠭᠤᠯᠵᠠᠭᠤᠯᠵᠤ ᠪᠤᠷᠤᠭᠤᠰᠢᠶᠠᠨ ᠲᠣᠩᠭ᠋ᠣᠳᠴᠣ ᠰᠤᠷᠭᠠᠭᠰᠠᠨ ᠨᠢ᠄ 《ᠠᠶᠠᠨ ᠳ᠋ᠤ᠌ ᠶᠠᠪᠤᠬᠤ ᠵᠠᠭᠤᠷᠠ ᠡᠷᠡᠭᠦᠯ ᠪᠥᠭᠰᠡ ᠲᠡᠢ ᠬᠥᠮᠦᠨ ᠢ᠋ ᠡᠰᠡ ᠦᠯᠡᠳᠡᠭᠡᠭᠰᠡᠨ ᠭᠡᠨᠡ ᠴᠢ᠂ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠦ᠌ ᠨᠢᠭᠤᠷ ᠤ᠋ᠨ ᠠᠷᠠᠰᠤ ᠶ᠋ᠢ ᠬᠠᠣᠯᠠᠵᠣ ᠶᠠᠪᠤᠭᠰᠠᠨ ᠭᠡᠨᠡ᠂ ᠴᠢ᠃ ᠴᠢᠨᠦ ᠲᠡᠷᠡ ᠠᠭᠤᠷ ᠬᠢᠯᠢᠩ ᠡᠴᠡ ᠠᠶᠤᠵᠤ᠂ ᠣᠷᠣᠰ ᠤᠯᠤᠰ ᠢ᠋ ᠳᠠᠭᠠᠵᠤ ᠣᠷᠣᠭᠰᠠᠨ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠴᠢ ᠣᠷᠣᠰ ᠢᠷᠭᠡᠨ ᠢ᠋ ᠭᠠᠭᠴᠠᠭᠠᠷ ᠳᠠᠭᠠᠭᠤᠯᠵᠤ ᠣᠷᠣᠭᠤᠯᠤᠭᠰᠠᠨ ᠮᠡᠲᠦ ᠰᠠᠨᠠᠵᠤ᠂ ᠪᠠᠷᠳᠠᠮ ᠣᠮᠣᠭ ᠭᠠᠷᠭᠠᠵᠤ᠂ ᠠᠬᠠ ᠬᠥᠮᠦᠨ ᠦ᠌ ᠥᠭᠡᠳᠡ ᠡᠴᠡ ᠡᠰᠡᠷᠭᠦᠴᠡᠪᠡ ᠤᠤ? ᠴᠢᠩᠭᠢᠰ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠵᠠᠷᠯᠢᠭ ᠲᠤ᠌᠄ ᠣᠯᠠᠨ ᠬᠥᠮᠦᠨ ᠬᠦᠴᠦ ᠲᠡᠢ᠂ ᠭᠦᠨ ᠤᠰᠤ ᠠᠶᠤᠯ ᠲᠠᠢ! ᠭᠡᠵᠦ ᠪᠣᠢ ᠪᠢᠰᠢᠦ᠃ ᠰᠦᠪᠡᠬᠡᠳᠡᠢ ᠪᠥᠵᠢᠭ ᠬᠣᠶᠠᠷ ᠤ᠋ᠨ ᠳᠠᠯᠠᠪᠴᠢ ᠳᠣᠣᠷᠠ ᠶᠠᠪᠤᠵᠤ ᠣᠯᠠᠨ ᠪᠦᠭᠦᠳᠡᠭᠡᠷ ᠬᠠᠮᠰᠠᠵᠤ᠂ ᠣᠷᠣᠰ᠂ ᠬᠢᠪᠴᠠᠭ ᠤ᠋ᠳ ᠢ᠋ ᠣᠷᠣᠭᠤᠯᠵᠤ ᠠᠪᠤᠭᠰᠠᠨ ᠪᠠᠢᠲᠠᠯᠠ᠂ ᠴᠢ ᠠᠩᠬᠠ ᠤᠳᠠᠭᠠ ᠭᠡᠷ ᠡᠴᠡ ᠭᠠᠷᠤᠭᠠᠳ ᠣᠷᠣᠰ᠂ ᠬᠢᠪᠴᠠᠭ ᠤ᠋ᠳ ᠤ᠋ᠨ ᠨᠢᠭᠡ ᠴᠣ ᠬᠥᠮᠦᠨ ᠢ᠋ ᠣᠯᠵᠤ ᠪᠠᠷᠢᠭᠰᠠᠨ ᠦᠭᠡᠢ᠂ ᠠᠳᠠᠭᠯᠠᠪᠠᠯ ᠢᠰᠢᠭᠡ ᠶ᠋ᠢᠨ ᠰᠢᠭᠢᠷᠡ ᠴᠦ᠍ ᠣᠯᠵᠤ ᠠᠪᠤᠭᠰᠠᠨ ᠦᠭᠡᠢ ᠪᠠᠢᠵᠤ᠂ ᠡᠷᠡᠮᠡᠬᠡᠢ ᠲᠦᠷᠢᠮᠡᠬᠡᠢ ᠵᠠᠩ ᠭᠠᠷᠭᠠᠵᠤ᠂ ᠡᠢᠮᠦ ᠲᠡᠢᠮᠦ ᠦᠭᠡ ᠬᠡᠯᠡ ᠪᠣᠯᠵᠤ᠂ ᠭᠠᠭᠴᠠ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠵᠤ ᠶᠠᠪᠤᠳᠠᠭ ᠴᠢᠨᠢ ᠶᠠᠭᠤ ᠪᠣᠢ? ᠬᠠᠷᠢᠨ ᠠᠯᠴᠢᠳᠠᠢ᠂ ᠬᠣᠩᠬᠣᠷᠳᠠᠢ᠂ ᠵᠠᠩᠭᠢ ᠨᠠᠷ᠂ ᠪᠤᠷᠭᠢᠯᠤᠭᠰᠠᠨ ᠵᠢᠷᠦᠬᠡ ᠶ᠋ᠢ ᠳᠠᠷᠤᠬᠤ ᠨᠥᠬᠥᠷ ᠪᠣᠯᠵᠤ᠂ ᠪᠤᠴᠠᠯᠤᠭᠰᠠᠨ ᠤᠰᠤ ᠶ᠋ᠢ ᠰᠡᠪᠢᠬᠦ ᠰᠢᠨᠠᠭᠠ ᠪᠣᠯᠵᠤ᠂ ᠠᠭᠤᠷ ᠬᠢᠯᠢᠩ ᠢ᠋ ᠮᠢᠨᠢ ᠠᠮᠣᠷᠢᠯᠠᠭᠣᠯᠪᠠ᠃ ᠬᠡᠭᠡᠷᠡ ᠪᠣᠯᠤᠭᠰᠠᠨ ᠬᠡᠷᠡᠭ ᠲᠤᠯᠠ ᠡᠭᠦᠨ ᠢ᠋ ᠪᠠᠲᠤ ᠰᠢᠳᠬᠡᠪᠡᠯ ᠵᠣᠬᠢᠨᠠ᠃ ᠭᠦᠶᠦᠭ᠂ ᠠᠷᠭᠠᠰᠤᠨ ᠬᠣᠶᠠᠷ ᠢ᠋ ᠪᠠᠲᠤ ᠮᠡᠳᠡᠲᠦᠭᠡᠢ! ᠪᠦᠷᠢ ᠶ᠋ᠢ ᠴᠠᠭᠠᠲᠠᠢ ᠠᠬᠠ ᠮᠡᠳᠡᠵᠦ ᠰᠢᠳᠬᠡᠲᠦᠭᠡᠢ!》 ᠭᠡᠪᠡ᠃
278᠂ ᠪᠠᠰᠠ ᠥᠭᠡᠳᠡᠢ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠴᠢᠩᠭᠢᠰ ᠬᠠᠭᠠᠨ ᠡᠴᠢᠭᠡ ᠶ᠋ᠢ ᠮᠢᠨᠢ ᠬᠠᠮᠠᠭᠠᠯᠠᠵᠤ ᠶᠠᠪᠤᠭᠰᠠᠨ ᠬᠡᠪᠲᠡᠭᠦᠯ᠂ ᠬᠣᠷᠴᠢᠨ᠂ ᠲᠣᠷᠬᠠᠭ ᠤ᠋ᠳ᠂ ᠪᠦᠬᠦ ᠬᠡᠰᠢᠭᠲᠡᠨ ᠦ᠌ ᠲᠤᠬᠠᠢ ᠨᠡᠢᠲᠡ ᠳ᠋ᠦ᠍ ᠲᠤᠩᠬᠠᠭ ᠵᠠᠷᠯᠢᠭ ᠢ᠋ ᠪᠠᠭᠤᠯᠭᠠᠬᠤ ᠨᠢ᠄ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠵᠠᠷᠯᠢᠭ ᠢ᠋ ᠤᠷᠢᠳᠤ ᠶ᠋ᠢᠨ ᠶᠣᠰᠣ ᠪᠠᠷ ᠳᠠᠭᠠᠵᠤ ᠶᠠᠪᠤᠲᠤᠭᠠᠢ! ᠬᠣᠷᠴᠢᠨ᠂ ᠲᠣᠷᠬᠠᠭ ᠤ᠋ᠳ ᠤᠷᠢᠳᠤ ᠶᠣᠰᠣ ᠪᠠᠷ ᠡᠳᠦᠷ ᠳᠠᠷᠠᠭᠠᠯᠠᠨ ᠡᠭᠡᠯᠵᠢᠯᠡᠨ ᠮᠠᠨᠠᠵᠤ᠂ ᠨᠠᠷᠠᠨ ᠰᠢᠩᠭᠡᠮᠡᠭᠴᠡ ᠡᠭᠦᠷᠭᠡ ᠪᠡᠨ ᠬᠡᠪᠲᠡᠭᠦᠯ ᠳ᠋ᠦ᠍ ᠰᠢᠯᠵᠢᠭᠦᠯᠦᠭᠡᠳ ᠭᠠᠳᠠᠨᠠ ᠭᠠᠷᠴᠤ ᠬᠣᠨᠣᠲᠤᠭᠠᠢ᠃ ᠰᠥᠨᠢ ᠪᠢᠳᠡᠨ ᠦ᠌ ᠭᠡᠷ ᠢ᠋ ᠬᠣᠷᠴᠢᠨ ᠬᠡᠪᠲᠡᠭᠦᠯ ᠰᠠᠬᠢᠲᠤᠭᠠᠢ᠃ ᠨᠠᠷᠠᠨ ᠰᠢᠩᠭᠡᠭᠰᠡᠨ ᠦ᠌ ᠬᠣᠢᠨᠠ ᠰᠥᠨᠢ ᠶᠠᠪᠤᠬᠤ ᠠᠷᠠᠳ ᠢ᠋ ᠬᠡᠪᠲᠡᠭᠦᠯ ᠪᠠᠷᠢᠵᠤ ᠬᠣᠨᠣᠲᠤᠭᠠᠢ᠃ ᠣᠯᠠᠨ ᠬᠥᠮᠦᠨ ᠢ᠋ ᠲᠠᠷᠬᠠᠭᠰᠠᠨ ᠤ᠋ ᠰᠡᠭᠦᠯᠡᠷ ᠬᠣᠨᠣᠭᠰᠠᠨ ᠬᠡᠪᠲᠡᠭᠦᠯ ᠡᠴᠡ ᠥᠭᠡᠷᠡ ᠬᠥᠮᠦᠨ ᠳᠣᠲᠣᠭᠰᠢ ᠣᠷᠳᠣᠨ ᠳ᠋ᠤ᠌ ᠣᠷᠣᠪᠠᠯ᠂ ᠬᠡᠪᠲᠡᠭᠦᠯ ᠮᠠᠨᠠᠭᠠᠴᠢ ᠲᠡᠷᠡ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠴᠠᠪᠴᠢᠵᠤ ᠬᠠᠶᠠᠲᠤᠭᠠᠢ᠂ ᠰᠥᠨᠢ ᠶᠠᠭᠠᠷᠠᠯᠲᠠᠢ ᠮᠡᠳᠡᠭᠡ ᠶ᠋ᠢ ᠬᠥᠮᠦᠨ ᠬᠦᠷᠭᠡᠵᠦ ᠢᠷᠡᠪᠡᠯ ᠬᠡᠪᠲᠡᠭᠦᠯ ᠦ᠋ᠨ ᠬᠠᠮᠲᠤ ᠭᠡᠷ ᠦ᠋ᠨ ᠬᠣᠢᠨᠠ ᠪᠠᠢᠵᠤ᠂ ᠮᠡᠳᠡᠭᠡ ᠪᠡᠨ ᠬᠡᠯᠡᠲᠦᠭᠡᠢ! ᠤᠷᠲᠤ ᠭᠡᠷ ᠲᠦ᠍ ᠣᠷᠣᠬᠤ ᠭᠠᠷᠬᠤ ᠪᠦᠬᠦ ᠵᠦᠢᠯ ᠢ᠋ ᠬᠣᠩᠬᠣᠷᠳᠠᠢ᠂ ᠰᠢᠷᠠᠬᠠᠨ ᠬᠣᠶᠠᠷ ᠬᠡᠪᠲᠡᠭᠦᠯ ᠦ᠋ᠨ ᠬᠠᠮᠲᠤ ᠡᠯᠪᠡᠵᠦ ᠡᠷᠬᠢᠯᠡᠨ ᠮᠡᠳᠡᠲᠦᠭᠡᠢ᠃ ᠡᠯᠵᠢᠭᠡᠳᠡᠢ ᠢᠲᠡᠭᠡᠯ ᠲᠡᠢ ᠬᠥᠮᠦᠨ ᠪᠣᠯᠪᠠᠴᠤ ᠦᠳᠡᠰᠢ ᠬᠡᠪᠲᠡᠭᠦᠯ ᠦ᠋ᠨ ᠳᠡᠷᠭᠡᠳᠡᠭᠦᠷ ᠶᠠᠪᠤᠭᠠᠳ ᠬᠡᠪᠲᠡᠭᠦᠯ ᠳ᠋ᠦ᠍ ᠪᠠᠷᠢᠭᠳᠠᠭᠰᠠᠨ ᠤ᠋ ᠠᠳᠠᠯᠢ ᠪᠠᠷ ᠵᠠᠷᠯᠢᠭ ᠢ᠋ ᠳᠠᠭᠠᠵᠤ᠂ ᠬᠡᠳᠦᠢ ᠢᠲᠡᠭᠡᠯ ᠲᠡᠢ ᠬᠥᠮᠦᠨ ᠪᠣᠯᠪᠠᠴᠤ ᠬᠡᠪᠲᠡᠭᠦᠯ ᠦ᠋ᠨ ᠣᠢᠷᠠ ᠣᠴᠢᠵᠤ ᠦᠯᠦ ᠪᠣᠯᠬᠤ ᠪᠠ ᠬᠡᠪᠲᠡᠭᠦᠯ ᠦ᠋ᠨ ᠲᠣᠭᠠ ᠶ᠋ᠢ ᠠᠰᠠᠭᠤᠵᠤ ᠦᠯᠦ ᠪᠣᠯᠤᠨᠠ᠃ ᠬᠡᠪᠲᠡᠭᠦᠯ ᠦ᠋ᠨ ᠳᠡᠷᠭᠡᠳᠡᠭᠦᠷ ᠪᠦᠦ ᠶᠠᠪᠤᠲᠤᠭᠠᠢ! ᠬᠡᠪᠲᠡᠭᠦᠯ ᠦ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠪᠦᠦ ᠶᠠᠪᠤᠲᠤᠭᠠᠢ! ᠬᠡᠪᠲᠡᠭᠦᠯ ᠦ᠋ᠨ ᠳᠡᠷᠭᠡᠳᠡᠭᠦᠷ ᠶᠠᠪᠤᠵᠤ᠂ ᠬᠡᠪᠲᠡᠭᠦᠯ ᠦ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠣᠷᠣᠭᠰᠠᠨ ᠠᠷᠠᠳ ᠢ᠋ ᠬᠡᠪᠲᠡᠭᠦᠯ ᠪᠠᠷᠢᠲᠤᠭᠠᠢ! ᠬᠡᠪᠲᠡᠭᠦᠯ ᠦ᠋ᠨ ᠲᠣᠭᠠ ᠠᠰᠠᠭᠤᠭᠰᠠᠨ ᠬᠥᠮᠦᠨ ᠢ᠋ ᠲᠡᠷᠡ ᠡᠳᠦᠷ ᠦ᠋ᠨ ᠤᠨᠤᠵᠤ ᠶᠠᠪᠤᠭᠰᠠᠨ ᠡᠮᠡᠭᠡᠯ ᠬᠠᠵᠠᠭᠠᠷ ᠲᠠᠢ ᠮᠣᠷᠢ ᠶ᠋ᠢ ᠪᠦᠬᠦ ᠬᠤᠪᠴᠠᠰᠤᠨ ᠤ᠋ ᠬᠠᠮᠲᠤ ᠬᠡᠪᠲᠡᠭᠦᠯ ᠠᠪᠣᠳᠣᠭᠠᠢ᠃ ᠬᠡᠪᠲᠡᠭᠦᠯ ᠦ᠋ᠨ ᠪᠠᠢᠷᠢᠨ ᠤ᠋ ᠳᠡᠭᠡᠷᠡ ᠬᠡᠨ ᠴᠦ᠍ ᠰᠠᠭᠤᠵᠤ ᠦᠯᠦ ᠪᠣᠯᠤᠨᠠ᠃ ᠬᠡᠪᠲᠡᠭᠦᠯ᠂ ᠲᠤᠭ ᠬᠡᠩᠭᠡᠷᠭᠡ᠂ ᠳᠥᠷᠥᠭᠡ᠂ ᠵᠢᠳᠠ᠂ ᠠᠶᠠᠭᠠ ᠰᠠᠪᠠ ᠶ᠋ᠢ ᠠᠰᠠᠷᠠᠵᠤ ᠬᠠᠳᠠᠭᠠᠯᠠᠲᠤᠭᠠᠢ! ᠢᠳᠡᠭᠡ ᠤᠮᠳᠠ᠂ ᠠᠷᠢᠬᠢ ᠠᠢᠷᠠᠭ᠂ ᠮᠢᠬᠠ ᠰᠢᠭᠦᠰᠦ ᠶ᠋ᠢ ᠬᠡᠪᠲᠡᠭᠦᠯ ᠳᠠᠷᠤᠭᠠᠯᠠᠵᠤ ᠮᠡᠳᠡᠲᠦᠭᠡᠢ!》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ 《ᠤᠷᠲᠤ ᠲᠡᠷᠭᠡ ᠶ᠋ᠢ ᠬᠡᠪᠲᠡᠭᠦᠯ ᠠᠰᠠᠷᠠᠵᠤ ᠮᠡᠳᠡᠲᠦᠭᠡᠢ! ᠪᠢᠳᠡᠨ ᠦ᠌ ᠪᠡᠶᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠡᠰᠡ ᠮᠣᠷᠳᠠᠪᠠᠯ᠂ ᠬᠡᠪᠲᠡᠭᠦᠯ ᠪᠢᠳᠡᠨ ᠡᠴᠡ ᠠᠩᠭᠢᠳᠠ ᠴᠡᠷᠢᠭ ᠲᠦ᠍ ᠪᠦᠦ ᠮᠣᠷᠳᠠᠲᠤᠭᠠᠢ! ᠪᠢᠳᠡᠨ ᠢ᠋ ᠰᠢᠪᠠᠭᠤ ᠠᠪᠠᠯᠠᠬᠤ ᠳ᠋ᠤ᠌ ᠬᠡᠪᠲᠡᠭᠦᠯ ᠦ᠋ᠨ ᠵᠠᠷᠢᠮ ᠨᠢ ᠤᠷᠲᠤ ᠭᠡᠷ᠂ ᠲᠡᠷᠭᠡ ᠶ᠋ᠢ ᠰᠠᠬᠢᠵᠤ᠂ ᠵᠠᠷᠢᠮ ᠨᠢ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠲᠤᠭᠠᠢ! ᠬᠡᠪᠲᠡᠭᠦᠯ ᠂ ᠨᠤᠲᠤᠭ ᠦᠵᠡᠵᠦ᠂ ᠤᠷᠲᠤ ᠥᠷᠭᠥᠭᠡ ᠶ᠋ᠢ ᠨᠡᠭᠦᠯᠭᠡᠵᠦ ᠪᠠᠭᠤᠯᠭᠠᠲᠤᠭᠠᠢ! ᠣᠷᠳᠣᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠬᠠᠭᠠᠯᠭᠠᠴᠢᠨ ᠬᠡᠪᠲᠡᠭᠦᠯ ᠦᠷᠭᠦᠯᠵᠢ ᠰᠠᠬᠢᠵᠤ ᠪᠠᠢᠲᠤᠭᠠᠢ! ᠪᠦᠬᠦ ᠬᠡᠪᠲᠡᠭᠦᠯ ᠢ᠋ ᠮᠢᠩᠭᠠᠨ ᠤ᠋ ᠨᠣᠶᠠᠨ ᠬᠠᠲᠠᠭᠠᠨ ᠵᠠᠬᠢᠷᠴᠤ ᠮᠡᠳᠡᠲᠦᠭᠡᠢ!》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ 《ᠪᠠᠰᠠ ᠬᠡᠪᠲᠡᠭᠦᠯ ᠦ᠋ᠨ ᠡᠭᠡᠯᠵᠢ ᠬᠡᠰᠢᠭ ᠦ᠋ᠨ ᠨᠣᠶᠠᠳ ᠬᠠᠲᠠᠭᠠᠨ ᠪᠣᠯᠬᠠᠳᠠᠷ ᠬᠣᠶᠠᠷ᠂ ᠨᠢᠭᠡ ᠡᠭᠡᠯᠵᠢ ᠪᠣᠯᠤᠨ ᠬᠠᠪᠰᠤᠷᠴᠤ᠂ ᠨᠢᠭᠡ ᠡᠭᠡᠯᠵᠢ ᠪᠣᠯᠤᠨ ᠮᠠᠨᠠᠵᠤ᠂ ᠣᠷᠳᠣᠨ ᠤ᠋ ᠪᠠᠷᠠᠭᠤᠨ ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠣᠨᠣᠭᠳᠠᠭᠰᠠᠨ ᠬᠠᠭᠠᠰ ᠠ᠋ᠴᠠ ᠰᠡᠷᠭᠡᠢᠯᠡᠵᠦ ᠮᠠᠨᠠᠲᠤᠭᠠᠢ᠃ ᠠᠮᠠᠯ ᠴᠠᠨᠠᠷ ᠬᠣᠶᠠᠷ ᠬᠠᠪᠰᠤᠷᠴᠤ ᠨᠢᠭᠡ ᠡᠭᠡᠯᠵᠢ ᠪᠣᠯᠵᠤ ᠣᠷᠳᠣᠨ ᠤ᠋ ᠪᠠᠷᠠᠭᠤᠨ ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠣᠨᠣᠭᠳᠠᠭᠰᠠᠨ ᠬᠠᠭᠠᠰ ᠢ᠋ᠶ᠋ᠠᠨ ᠰᠡᠷᠭᠡᠢᠯᠡᠨ ᠮᠠᠨᠠᠲᠤᠭᠠᠢ! ᠬᠠᠲᠠᠢ ᠬᠣᠷᠢᠴᠠᠷ ᠬᠣᠶᠠᠷ ᠬᠠᠪᠰᠤᠷᠴᠤ ᠨᠢᠭᠡᠨ ᠡᠭᠡᠯᠵᠢ ᠪᠣᠯᠤᠨ ᠣᠷᠣᠵᠤ ᠣᠷᠳᠣᠨ ᠤ᠋ ᠪᠠᠷᠠᠭᠤᠨ ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠣᠨᠣᠭᠳᠠᠭᠰᠠᠨ ᠬᠠᠭᠠᠰ ᠢ᠋ᠶ᠋ᠠᠨ ᠰᠠᠬᠢᠵᠤ ᠮᠠᠨᠠᠲᠤᠭᠠᠢ! ᠶᠠᠯᠪᠠᠭ ᠬᠠᠷᠠᠭᠣᠳᠠᠷ ᠬᠣᠶᠠᠷ ᠬᠠᠪᠰᠤᠷᠴᠤ ᠨᠢᠭᠡ ᠡᠭᠡᠯᠵᠢ ᠪᠣᠯᠤᠨ ᠣᠷᠣᠵᠤ ᠣᠷᠳᠣᠨ ᠤ᠋ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠣᠨᠣᠭᠳᠠᠭᠰᠠᠨ ᠬᠠᠭᠠᠰ ᠢ᠋ᠶ᠋ᠠᠨ ᠰᠠᠬᠢᠵᠤ ᠮᠠᠨᠠᠲᠤᠭᠠᠢ! ᠪᠠᠰᠠ ᠬᠠᠲᠠᠭᠠᠨ᠂ ᠪᠣᠯᠬᠠᠳᠠᠷ ᠤ᠋ᠨ ᠡᠭᠡᠯᠵᠢ᠂ ᠠᠮᠠᠯ ᠴᠠᠨᠠᠷ ᠤ᠋ᠨ ᠡᠭᠡᠯᠵᠢ᠂ ᠡᠨᠡ ᠬᠣᠶᠠᠷ ᠡᠭᠡᠯᠵᠢ ᠵᠢᠰᠢᠶᠠᠨ ᠤ᠋ ᠮᠠᠨᠠᠭᠠᠴᠢᠳ ᠣᠷᠳᠣᠨ ᠤ᠋ ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠪᠠᠢᠷᠢᠯᠠᠵᠤ ᠰᠠᠭᠤᠲᠤᠭᠠᠢ᠃ ᠬᠠᠲᠠᠢ ᠬᠣᠷᠢᠴᠠᠷ ᠬᠣᠶᠠᠷ ᠤ᠋ᠨ ᠡᠭᠡᠯᠵᠢ᠂ ᠶᠠᠯᠪᠠᠭ ᠬᠠᠷᠠᠭᠣᠳᠠᠷ ᠬᠣᠶᠠᠷ ᠤ᠋ᠨ ᠡᠭᠡᠯᠵᠢ ᠡᠨᠡ ᠬᠣᠶᠠᠷ ᠡᠭᠡᠯᠵᠢ ᠵᠢᠰᠢᠶᠠᠨ ᠤ᠋ ᠮᠠᠨᠠᠭᠠᠴᠢᠳ ᠣᠷᠳᠣᠨ ᠤ᠋ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠪᠠᠢᠷᠢᠯᠠᠵᠤ ᠰᠠᠭᠤᠲᠤᠭᠠᠢ᠃ ᠡᠨᠡ ᠳᠥᠷᠪᠡᠨ ᠡᠭᠡᠯᠵᠢ ᠶ᠋ᠢᠨ ᠬᠡᠪᠲᠡᠭᠦᠯ ᠢ᠋ ᠬᠠᠲᠠᠭᠠᠨ ᠨᠣᠶᠠᠨ ᠵᠠᠬᠢᠷᠤᠨᠠ᠃ ᠪᠠᠰᠠ ᠬᠡᠪᠲᠡᠭᠦᠯ ᠮᠢᠨᠦ ᠪᠡᠶᠡ ᠶ᠋ᠢᠨ ᠰᠢᠳᠠᠷ ᠤᠷᠲᠤ ᠶ᠋ᠢ ᠲᠣᠭᠣᠷᠢᠨ ᠪᠠᠢᠵᠤ ᠡᠭᠦᠳᠡ ᠶ᠋ᠢ ᠰᠠᠬᠢᠵᠤ ᠬᠠᠷᠠᠭᠠᠯᠵᠠᠲᠤᠭᠠᠢ᠃ ᠬᠡᠪᠲᠡᠭᠦᠯ ᠦ᠋ᠨ ᠬᠣᠶᠠᠷ ᠬᠥᠮᠦᠨ ᠣᠷᠳᠣᠨ ᠳ᠋ᠤ᠌ ᠣᠷᠣᠵᠤ ᠰᠥᠩ ᠲᠦᠰᠢᠵᠦ ᠪᠠᠷᠢᠲᠤᠭᠠᠢ!》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ 《ᠪᠠᠰᠠ ᠬᠣᠷᠴᠢᠨ ᠢ᠋ ᠵᠠᠬᠢᠷᠤᠭᠰᠠᠨ ᠶᠢᠰᠦᠠᠳᠡᠬᠡ᠂ ᠪᠥᠬᠡᠲᠡᠢ᠂ ᠬᠣᠷᠬᠣᠳᠠᠭ ᠂ ᠯᠠᠪᠯᠠᠭᠠ ᠳᠥᠷᠪᠡᠭᠦᠯᠡ ᠨᠤᠮᠤ ᠰᠤᠮᠤ ᠠᠭᠰᠠᠭᠰᠠᠨ ᠲᠣᠷᠬᠠᠭ ᠤ᠋ᠳ ᠢ᠋ᠶ᠋ᠠᠨ ᠳᠥᠷᠪᠡᠨ ᠡᠭᠡᠯᠵᠢ ᠪᠣᠯᠭᠠᠵᠤ᠂ ᠡᠭᠡᠯᠵᠢ ᠪᠦᠷᠢ ᠶ᠋ᠢᠨ ᠬᠣᠷᠴᠢᠨ ᠢ᠋ᠶ᠋ᠠᠨ ᠵᠠᠬᠢᠷᠤᠨ ᠣᠷᠣᠵᠤ ᠰᠠᠬᠢᠲᠤᠭᠠᠢ!》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ 《ᠪᠠᠰᠠ ᠲᠣᠷᠬᠠᠭ ᠤ᠋ᠳ ᠤ᠋ᠨ ᠡᠭᠡᠯᠵᠢ ᠶ᠋ᠢᠨ ᠠᠬᠠᠯᠠᠭᠴᠢᠳ ᠢ᠋ ᠤᠷᠢᠳᠠ ᠶ᠋ᠢᠨ ᠵᠠᠬᠢᠷᠤᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠬᠥᠮᠦᠨ ᠦ᠌ ᠤᠷᠤᠭ ᠠ᠋ᠴᠠ ᠪᠣᠯᠭᠠᠵᠤ᠂ ᠤᠷᠢᠳᠠ ᠮᠡᠳᠡᠵᠦ ᠪᠠᠢᠭᠰᠠᠨ ᠠᠯᠴᠢᠳᠠᠢ ᠬᠣᠩᠬᠣᠷᠳᠠᠢ ᠬᠣᠶᠠᠷ ᠬᠠᠪᠰᠤᠷᠴᠤ ᠨᠢᠭᠡ ᠡᠭᠡᠯᠵᠢ ᠲᠣᠷᠬᠠᠭ ᠤ᠋ᠳ ᠢ᠋ ᠵᠠᠬᠢᠷᠴᠤ ᠣᠷᠣᠲᠤᠭᠠᠢ᠃ ᠲᠠᠮᠣᠳᠠᠷ ᠵᠡᠭᠦ ᠬᠣᠶᠠᠷ ᠬᠠᠪᠰᠤᠷᠴᠤ ᠨᠢᠭᠡ ᠡᠭᠡᠯᠵᠢ ᠲᠣᠷᠬᠠᠭ ᠤ᠋ᠳ ᠢ᠋ ᠵᠠᠬᠢᠷᠴᠤ ᠣᠷᠣᠲᠤᠭᠠᠢ! ᠮᠠᠩᠭᠤᠲᠠᠢ ᠭᠡᠵᠢᠭᠡᠯᠡᠭᠦᠯ (ᠲᠤᠰᠠᠯᠠᠬᠤ) ᠨᠢᠭᠡᠨ ᠡᠭᠡᠯᠵᠢ ᠶ᠋ᠢᠨ ᠲᠣᠷᠬᠠᠭ ᠤ᠋ᠳ ᠢ᠋ ᠵᠠᠬᠢᠷᠴᠤ ᠣᠷᠣᠲᠤᠭᠠᠢ!》 ᠪᠠᠰᠠ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠪᠦᠬᠦ ᠨᠣᠶᠠᠳ ᠢ᠋ ᠡᠯᠵᠢᠭᠡᠳᠡᠢ ᠠᠬᠠᠯᠠᠵᠤ᠂ ᠡᠯᠵᠢᠭᠡᠳᠡᠢ ᠶ᠋ᠢᠨ ᠦᠭᠡ ᠪᠡᠷ ᠶᠠᠪᠤᠲᠤᠭᠠᠢ! ᠡᠭᠡᠯᠵᠢ ᠶ᠋ᠢᠨ ᠮᠠᠨᠠᠭᠠᠴᠢ᠂ ᠴᠠᠭ ᠠ᠋ᠴᠠ ᠬᠣᠵᠢᠮᠳᠠᠪᠠᠯ ᠤᠷᠢᠳᠠᠬᠢ ᠵᠠᠷᠯᠢᠭ ᠤ᠋ᠨ ᠶᠣᠰᠣ ᠪᠠᠷ ᠭᠤᠷᠪᠠᠨ ᠪᠠᠷᠢᠶᠠ ᠵᠠᠨᠴᠢᠲᠤᠭᠠᠢ! ᠮᠥᠨ ᠬᠥᠮᠦᠨ ᠳ᠋ᠡᠭᠡᠨ ᠡᠭᠡᠯᠵᠢ ᠡᠴᠡ ᠬᠣᠵᠢᠳᠠᠪᠠᠯ ᠳᠣᠯᠣᠭᠠᠨ ᠪᠠᠷᠢᠶᠠ ᠵᠠᠨᠴᠢᠲᠤᠭᠠᠢ! ᠪᠠᠰᠠ ᠲᠡᠷᠡ ᠬᠥᠮᠦᠨ ᠡᠪᠡᠳᠴᠢᠨ ᠦ᠌ ᠰᠢᠯᠲᠠᠭᠠᠨ ᠦᠭᠡᠢ᠂ ᠡᠭᠡᠯᠵᠢ ᠶ᠋ᠢᠨ ᠠᠬᠠᠯᠠᠭᠴᠢ ᠶ᠋ᠢᠨ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠡᠷ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠲᠠᠰᠤᠯᠪᠠᠯ ᠪᠢᠳᠡᠨ ᠳ᠋ᠦ᠍ ᠪᠠᠷᠠ ᠪᠣᠯᠬᠤ ᠠ᠋ᠴᠠ ᠪᠡᠷᠬᠡᠰᠢᠶᠡᠭᠰᠡᠨ ᠡᠲᠡᠭᠡᠳ ᠭᠡᠵᠦ ᠦᠵᠡᠭᠡᠳ᠂ ᠭᠤᠴᠢᠨ ᠳᠣᠯᠣᠭᠠᠨ ᠪᠠᠷᠢᠶᠠ ᠪᠠᠷ ᠵᠠᠨᠴᠢᠭᠠᠳ ᠬᠣᠯᠠ ᠭᠠᠵᠠᠷ ᠨᠢᠳᠦᠨ ᠦ᠌ ᠳᠠᠯᠳᠠ ᠴᠦᠯᠡᠵᠦ ᠤᠷᠭᠢᠶᠠ᠃ ᠪᠠᠰᠠ ᠡᠭᠡᠯᠵᠢ ᠶ᠋ᠢᠨ ᠠᠬᠠᠯᠠᠭᠴᠢᠳ᠂ ᠬᠠᠷᠢᠶᠠᠲᠤ ᠬᠡᠰᠢᠭᠲᠡᠨ ᠢ᠋ᠶ᠋ᠡᠨ ᠪᠦᠷᠢᠳᠬᠡᠨ ᠵᠢᠭᠰᠠᠭᠠᠭᠰᠠᠨ ᠦᠭᠡᠢ ᠪᠡᠷ ᠮᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠᠯ ᠡᠭᠡᠯᠵᠢ ᠶ᠋ᠢᠨ ᠠᠬᠠᠯᠠᠭᠴᠢ ᠶ᠋ᠢ ᠰᠢᠳᠬᠡᠶᠡ! ᠪᠠᠰᠠ ᠡᠭᠡᠯᠵᠢ ᠶ᠋ᠢᠨ ᠠᠬᠠᠯᠠᠭᠴᠢᠳ ᠭᠤᠷᠪᠠᠨ ᠡᠭᠡᠯᠵᠢ ᠰᠣᠯᠢᠯᠴᠠᠬᠤ ᠳ᠋ᠠᠭᠠᠨ ᠡᠨᠡ ᠵᠠᠷᠯᠢᠭ ᠢ᠋ ᠬᠡᠰᠢᠭᠲᠡᠨ ᠳ᠋ᠡᠭᠡᠨ ᠰᠣᠨᠣᠰᠬᠠᠵᠤ ᠪᠠᠢᠲᠤᠭᠠᠢ᠃ ᠵᠠᠷᠯᠢᠭ ᠢ᠋ ᠰᠣᠨᠣᠰᠤᠭᠰᠠᠨ ᠪᠥᠭᠡᠲᠡᠯᠡ ᠬᠡᠰᠢᠭᠲᠡᠨ ᠡᠭᠡᠯᠵᠢ ᠲᠠᠰᠤᠯᠪᠠᠯ ᠵᠠᠷᠯᠢᠭ ᠶᠣᠰᠣ ᠪᠠᠷ ᠰᠢᠳᠬᠡᠶᠡ! ᠡᠨᠡ ᠵᠠᠷᠯᠢᠭ ᠢ᠋ ᠬᠡᠰᠢᠭᠲᠡᠨ ᠳ᠋ᠡᠭᠡᠨ ᠡᠰᠡ ᠰᠣᠨᠣᠰᠬᠠᠭᠰᠠᠨ ᠪᠣᠯ ᠡᠭᠡᠯᠵᠢ ᠶ᠋ᠢᠨ ᠠᠬᠠᠯᠠᠭᠴᠢᠳ ᠤ᠋ᠨ ᠪᠤᠷᠤᠭᠤ ᠪᠣᠯᠤᠨᠠ᠃ ᠪᠠᠰᠠ ᠡᠭᠡᠯᠵᠢ ᠶ᠋ᠢᠨ ᠠᠬᠠᠯᠠᠭᠴᠢᠳ ᠬᠠᠷᠢᠶᠠᠯᠠᠵᠤ ᠬᠠᠮᠲᠤ ᠮᠠᠨᠠᠵᠤ ᠪᠠᠢᠭᠠ ᠮᠢᠨᠦ ᠬᠡᠰᠢᠭᠲᠡᠨ ᠨᠠᠷ ᠢ᠋ ᠠᠬᠠᠯᠠᠭᠴᠢ ᠭᠡᠰᠡᠨ ᠲᠡᠳᠦᠢ ᠪᠡᠷ ᠳᠤᠷᠠ ᠮᠡᠳᠡᠨ ᠰᠢᠳᠬᠡᠵᠦ ᠦᠯᠦ ᠪᠣᠯᠤᠨᠠ᠃ ᠲᠡᠳᠡ᠂ ᠵᠠᠰᠠᠭ ᠢ᠋ ᠵᠥᠷᠢᠴᠡᠪᠡᠯ ᠪᠢᠳᠡᠨ ᠳ᠋ᠦ᠍ ᠮᠡᠳᠡᠭᠳᠡᠵᠦ ᠢᠷᠡᠭᠦᠯᠲᠦᠭᠡᠢ! ᠠᠯᠠᠬᠤ ᠶᠣᠰᠣᠲᠠᠢ ᠶ᠋ᠢ ᠪᠢᠳᠡ ᠠᠯᠠᠨᠠ᠃ ᠰᠢᠳᠬᠡᠬᠦ ᠶᠣᠰᠣᠲᠠᠢ ᠶ᠋ᠢ ᠪᠢᠳᠡ ᠰᠢᠳᠬᠡᠨᠡ᠃ ᠠᠬᠠᠯᠠᠭᠴᠢ ᠭᠡᠰᠡᠨ ᠲᠡᠳᠦᠢ ᠪᠡᠷ ᠪᠢᠳᠡᠨ ᠳ᠋ᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠡᠷ᠂ ᠮᠢᠨᠦ ᠬᠡᠰᠢᠭᠲᠡᠨ ᠳ᠋ᠦ᠍ ᠭᠠᠷ ᠬᠥᠯ ᠬᠦᠷᠭᠡᠪᠡᠯ ᠨᠢᠳᠤᠷᠭᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠨᠢᠳᠤᠷᠭᠠ ᠪᠠᠷ᠂ ᠪᠠᠷᠢᠶᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠪᠠᠷᠢᠶᠠ ᠪᠠᠷ ᠴᠣᠬᠢᠵᠤ ᠬᠠᠷᠢᠭᠤᠯᠤᠨᠠ᠃ ᠭᠠᠳᠠᠨᠠᠬᠢ ᠮᠢᠩᠭᠠᠨ ᠤ᠋ ᠨᠣᠶᠠᠳ ᠠ᠋ᠴᠠ ᠮᠢᠨᠦ ᠬᠡᠰᠢᠭᠲᠡᠨ ᠳᠡᠭᠡᠷᠡ ᠪᠠᠢᠵᠤ᠂ ᠭᠠᠳᠠᠨᠠᠬᠢ ᠮᠢᠩᠭᠠᠨ ᠤ᠋ ᠨᠣᠶᠠᠳ᠂ ᠮᠢᠨᠦ ᠬᠡᠰᠢᠭᠲᠡᠨ ᠲᠡᠢ ᠬᠡᠷᠡᠯᠳᠦᠪᠡᠯ ᠮᠢᠩᠭᠠᠨ ᠤ᠋ ᠨᠣᠶᠠᠳ ᠢ᠋ ᠰᠢᠳᠬᠡᠨᠡ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
279᠂ ᠪᠠᠰᠠ ᠥᠭᠡᠳᠡᠢ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠴᠢᠩᠭᠢᠰ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠵᠣᠪᠠᠵᠤ ᠪᠠᠢᠭᠤᠯᠤᠭᠰᠠᠨ ᠤᠯᠤᠰ ᠢ᠋ ᠪᠦᠦ ᠵᠣᠪᠠᠭᠠᠶᠠ᠃ ᠬᠥᠯ ᠢ᠋ ᠨᠢ ᠬᠥᠰᠡᠷ᠂ ᠭᠠᠷ ᠢ᠋ ᠨᠢ ᠭᠠᠵᠠᠷ ᠲᠤ᠌ ᠲᠠᠯᠪᠢᠭᠤᠯᠵᠤ ᠵᠢᠷᠭᠠᠭᠤᠯᠤᠶᠠ᠃ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠪᠡᠯᠡᠨ ᠰᠠᠭᠤᠷᠢ ᠶ᠋ᠢ ᠡᠵᠡᠯᠡᠭᠡᠳ ᠢᠷᠭᠡᠨ ᠢ᠋ ᠦᠯᠦ ᠵᠣᠪᠠᠭᠠᠬᠤ ᠶ᠋ᠢ ᠡᠷᠬᠢᠮ ᠪᠣᠯᠭᠠᠨᠠ᠃ ᠱᠥᠯᠥ ᠰᠢᠭᠦᠰᠦ ᠪᠣᠯᠭᠠᠵᠤ ᠬᠠᠷᠢᠶᠠᠲᠤ ᠤᠯᠤᠰ ᠤ᠋ᠨ ᠰᠦᠷᠦᠭ ᠬᠣᠨᠢ ᠪᠦᠷᠢ ᠡᠴᠡ ᠨᠢᠵᠡᠭᠡᠳ ᠬᠣᠨᠢ ᠵᠢᠯ ᠳᠣᠳᠣᠮ ᠠᠪᠴᠤ ᠪᠠᠢᠨᠠ᠃ ᠵᠠᠭᠤᠨ ᠬᠣᠨᠢ ᠠ᠋ᠴᠠ ᠨᠢᠵᠡᠭᠡᠳ ᠬᠣᠨᠢ ᠭᠠᠷᠭᠠᠵᠤ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠦᠭᠡᠭᠦᠦ ᠶᠠᠳᠠᠭᠤᠴᠤᠳ ᠤ᠋ᠨ ᠲᠤᠰᠠᠯᠠᠮᠵᠢ ᠪᠣᠯᠭᠠᠵᠤ ᠥᠭᠲᠦᠭᠡᠢ᠃ ᠪᠠᠰᠠ ᠣᠯᠠᠨ ᠠᠬᠠ ᠳᠡᠭᠦᠦ ᠡᠷᠡ ᠴᠡᠷᠢᠭ᠂ ᠠᠭᠲᠠ ᠮᠣᠷᠢ ᠳᠠᠷᠠᠭᠠᠯᠠᠨ ᠴᠤᠭᠯᠠᠷᠠᠬᠤ ᠪᠣᠯ ᠴᠣᠭᠯᠠᠷᠠᠭᠰᠠᠳ ᠤ᠋ᠨ ᠤᠮᠳᠠ ᠶ᠋ᠢ ᠲᠤᠬᠠᠢ ᠪᠦᠷᠢ ᠠᠷᠠᠳ ᠠ᠋ᠴᠠ ᠲᠠᠲᠠᠪᠤᠷᠢᠯᠠᠨ ᠠᠪᠬᠤ ᠨᠢ ᠵᠣᠬᠢᠯᠳᠤᠬᠤ ᠦᠭᠡᠢ᠃ ᠵᠦᠭ ᠵᠦᠭ ᠦ᠋ᠨ ᠮᠢᠩᠭ᠋ᠠᠳᠣ ᠪᠦᠷᠢ ᠡᠴᠡ ᠭᠡᠭᠦᠦ ᠭᠠᠷᠭᠠᠵᠤ᠂ ᠮᠥᠨ ᠰᠠᠭᠠᠬᠤ ᠰᠠᠭᠠᠯᠢᠴᠢᠨ ᠠᠳᠤᠭᠤᠯᠠᠬᠤ ᠨᠤᠲᠤᠭᠴᠢᠨ ᠢ᠋ ᠲᠣᠮᠢᠯᠠᠵᠤ ᠥᠷᠢ ᠬᠥᠯᠥᠰᠥ ᠶ᠋ᠢ ᠨᠢ ᠲᠥᠯᠥᠭᠡᠳ ᠣᠨᠠᠭᠠᠴᠢᠨ ᠪᠣᠯᠭᠠᠲᠤᠭᠠᠢ᠃ ᠪᠠᠰᠠ ᠨᠣᠶᠠᠳ ᠠᠬᠠ ᠳᠡᠭᠦᠦ ᠨᠠᠷ ᠴᠤᠭᠯᠠᠷᠠᠪᠠᠯ ᠥᠭᠯᠢᠭᠡ ᠰᠣᠶᠣᠷᠬᠠᠯ ᠢ᠋ ᠥᠭᠴᠦ ᠪᠠᠢᠶᠠ᠃ ᠡᠭᠦᠨ ᠦ᠌ ᠲᠤᠯᠠ ᠡᠳ᠋ ᠠᠭᠤᠷᠰᠤ᠂ ᠮᠥᠩᠭᠥ᠂ ᠰᠦᠬᠡ᠂ ᠨᠤᠮᠤ᠂ ᠰᠠᠭᠠᠳᠠᠭ ᠬᠤᠶᠠᠭ᠂ ᠵᠡᠪᠡ ᠵᠡᠷᠭᠡ ᠶ᠋ᠢ ᠪᠠᠢᠰᠢᠩ ᠵᠣᠭᠣᠷᠢᠨ ᠳ᠋ᠤ᠌ ᠬᠠᠳᠠᠭᠠᠯᠠᠵᠤ᠂ ᠲᠡᠷᠡ ᠪᠠᠢᠰᠢᠩ ᠪᠠᠯᠭᠠᠰᠤ ᠶ᠋ᠢ ᠰᠠᠬᠢᠭᠣᠯᠣᠶᠠ᠃ ᠡᠭᠦᠨ ᠢ᠋ ᠵᠦᠭ ᠪᠦᠷᠢ ᠡᠴᠡ ᠪᠠᠯᠭᠠᠰᠤᠴᠢᠨ᠂ ᠠᠮᠤᠴᠢᠨ (ᠠᠮᠤ ᠪᠤᠳᠠᠭᠠ ᠬᠠᠳᠠᠭᠠᠯᠠᠭᠴᠢ) ᠨᠠᠷ ᠢ᠋ ᠲᠣᠮᠢᠯᠠᠵᠤ ᠰᠠᠬᠢᠭᠣᠯᠣᠶᠠ᠃ ᠪᠠᠰᠠ ᠤᠯᠤᠰ ᠢᠷᠭᠡᠨ ᠢ᠋ ᠨᠤᠲᠤᠭ ᠤᠰᠤ ᠶ᠋ᠢ ᠬᠤᠪᠢᠶᠠᠵᠤ ᠥᠭᠭᠦᠶᠡ᠃ ᠨᠤᠲᠤᠭ ᠢ᠋ ᠬᠤᠪᠢᠶᠠᠵᠤ ᠰᠣᠩᠭ᠋ᠣᠵᠣ ᠨᠤᠲᠤᠭᠯᠠᠬᠤ ᠳ᠋ᠤ᠌ ᠮᠢᠩᠭ᠋ᠠᠳᠣ ᠪᠦᠷᠢ ᠡᠴᠡ ᠨᠤᠲᠤᠭᠴᠢᠨ ᠢ᠋ ᠢᠯᠭᠠᠵᠤ ᠭᠠᠷᠭᠠᠪᠠᠯ ᠪᠣᠯᠤᠨᠠ᠃ ᠪᠠᠰᠠ ᠴᠦᠯ ᠭᠣᠪᠢ ᠨᠤᠲᠤᠭ ᠲᠤ᠌ ᠭᠥᠷᠦᠭᠡᠰᠦᠨ ᠡᠴᠡ ᠥᠭᠡᠷᠡ ᠠᠮᠢᠲᠠᠨ ᠦᠭᠡᠢ ᠪᠠᠢᠨᠠ᠃ ᠠᠷᠠᠳ ᠢᠷᠭᠡᠨ᠂ ᠠᠭᠤᠵᠢᠮ ᠰᠠᠭᠤᠬᠤ ᠶ᠋ᠢ ᠬᠦᠰᠡᠨᠡ᠃ ᠴᠠᠨᠠᠢ ᠣᠢ᠌ᠭᠣᠷᠳᠠᠢ ᠬᠣᠶᠠᠷ ᠲᠡᠷᠢᠭᠦᠲᠡᠢ ᠨᠤᠲᠤᠭᠴᠢᠨ ᠢ᠋ ᠶᠠᠪᠤᠭᠤᠯᠵᠤ᠂ ᠴᠦᠯ ᠭᠣᠪᠢ ᠳ᠋ᠤ᠌ ᠬᠤᠳᠳᠤᠭ ᠮᠠᠯᠲᠠᠭᠤᠯᠵᠤ ᠬᠠᠰᠢᠭᠤᠯᠤᠶᠠ᠃ ᠪᠠᠰᠠ ᠡᠯᠴᠢ ᠨᠠᠷ ᠢ᠋ ᠣᠳᠣ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠡᠯᠴᠢ ᠨᠠᠷ ᠤᠳᠠᠭᠠᠨ ᠶᠠᠪᠤᠬᠤ ᠪᠠ ᠠᠷᠠᠳ ᠣᠯᠠᠨ ᠳ᠋ᠤ᠌ ᠵᠣᠪᠠᠯᠠᠩ ᠴᠢᠷᠦᠭᠳᠡᠯ ᠦᠯᠡᠮᠵᠢ ᠪᠠᠢᠨᠠ᠃ ᠣᠳᠣ ᠪᠢᠳᠡ ᠪᠠᠢᠩᠭᠤ ᠵᠢᠷᠤᠮ ᠪᠣᠯᠭᠠᠵᠤ ᠵᠦᠭ ᠵᠦᠭ ᠦ᠋ᠨ ᠮᠢᠩᠭ᠋ᠠᠳᠣ ᠠ᠋ᠴᠠ ᠵᠠᠮᠴᠢᠨ ᠤᠯᠠᠭᠠᠴᠢᠨ ᠭᠠᠷᠭᠠᠵᠤ᠂ ᠰᠠᠭᠤᠷᠢ ᠰᠠᠭᠤᠷᠢᠨ ᠳ᠋ᠤ᠌ ᠥᠷᠲᠡᠭᠡ ᠲᠠᠯᠪᠢᠵᠤ ᠡᠯᠴᠢ ᠨᠠᠷ ᠢ᠋ ᠠᠷᠠᠳ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠬᠠᠮᠢᠶᠠ ᠦᠭᠡᠢ ᠤᠷᠤᠭ ᠤ᠋ᠨ ᠤᠯᠠᠭᠠ ᠤᠨᠤᠵᠤ ᠬᠡᠰᠦᠴᠢᠯᠡᠨ ᠳᠠᠪᠬᠢᠬᠤ ᠦᠭᠡᠢ ᠭᠠᠭᠴᠠ ᠬᠦ ᠥᠷᠲᠡᠭᠡ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠬᠤ ᠪᠣᠯᠭᠠᠶᠠ᠃ ᠡᠨᠡ ᠦᠢᠯᠡ ᠬᠡᠷᠡᠭ ᠢ᠋ ᠢᠩᠭᠢᠵᠦ ᠶᠠᠪᠤᠭᠤᠯᠤᠶᠠ ᠭᠡᠵᠦ ᠴᠠᠨᠠᠢ ᠪᠣᠯᠬᠠᠳᠠᠷ ᠬᠣᠶᠠᠷ ᠰᠠᠨᠠᠵᠤ ᠪᠢᠳᠡᠨ ᠳ᠋ᠦ᠍ ᠳᠤᠷᠠᠳᠬᠠᠭᠰᠠᠨ ᠨᠢ ᠵᠥᠪ ᠵᠦᠢᠲᠡᠢ ᠰᠠᠨᠠᠭᠳᠠᠬᠤ ᠪᠣᠯᠪᠠᠴᠤ᠂ ᠴᠠᠭᠠᠲᠠᠢ ᠠᠬᠠ ᠮᠡᠳᠡᠲᠦᠭᠡᠢ! ᠡᠳᠡᠭᠡᠷ ᠬᠡᠯᠡᠭᠰᠡᠨ ᠦᠢᠯᠡᠰ ᠢ᠋ ᠵᠣᠬᠢᠮᠵᠢᠲᠠᠢ ᠭᠡᠵᠦ ᠵᠥᠪᠰᠢᠶᠡᠬᠦ ᠡᠰᠡᠬᠦ ᠶ᠋ᠢ ᠴᠠᠭᠠᠲᠠᠢ ᠠᠬᠠ ᠰᠢᠢᠳᠲᠦᠭᠡᠢ !》 ᠭᠡᠵᠦ ᠢᠯᠡᠭᠡᠪᠡᠯ᠂ ᠡᠳᠡᠭᠡᠷ ᠠᠰᠠᠭᠤᠵᠤ ᠢᠯᠡᠭᠡᠭᠰᠡᠨ ᠪᠦᠬᠦ ᠦᠢᠯᠡ ᠬᠡᠷᠡᠭ ᠢ᠋ ᠴᠥᠮ ᠵᠥᠪᠰᠢᠶᠡᠷᠡᠵᠦ 《ᠲᠡᠷᠡ ᠶᠣᠰᠣ ᠪᠠᠷ ᠬᠢᠲᠦᠭᠡᠢ!》 ᠭᠡᠵᠦ ᠬᠠᠷᠢᠭᠤ ᠢᠯᠡᠭᠡᠵᠡᠢ᠃ ᠪᠠᠰᠠ ᠴᠠᠭᠠᠲᠠᠢ ᠠᠬᠠ ᠶ᠋ᠢᠨ ᠬᠡᠯᠡᠵᠦ ᠢᠯᠡᠭᠡᠭᠰᠡᠨ ᠨᠢ᠄ 《ᠪᠢ ᠡᠨᠳᠡ ᠡᠴᠡ ᠣᠭᠳᠣᠭᠣᠯᠣᠨ ᠥᠷᠲᠡᠭᠡ ᠵᠠᠮ ᠢ᠋ ᠪᠠᠢᠭᠤᠯᠰᠤᠭᠠᠢ᠃ ᠪᠠᠰᠠ ᠡᠨᠳᠡ ᠡᠴᠡ ᠪᠠᠲᠤ ᠳ᠋ᠤ᠌ ᠡᠯᠴᠢ ᠢᠯᠡᠭᠡᠶᠡ᠃ ᠪᠠᠲᠤ ᠣᠭᠳᠣᠭᠣᠯᠣᠨ ᠥᠷᠲᠡᠭᠡ ᠵᠠᠮ ᠪᠠᠢᠭᠤᠯᠵᠤ ᠬᠣᠯᠪᠣᠲᠤᠭᠠᠢ!》 ᠭᠡᠳ ᠪᠠᠰᠠ ᠥᠭᠦᠯᠡᠭᠰᠡᠨ ᠨᠢ᠄ 《ᠪᠦᠭᠦᠳᠡ ᠶ᠋ᠢᠨ ᠬᠣᠭᠣᠷᠣᠨᠳᠣ ᠥᠷᠲᠡᠭᠡ ᠵᠠᠮ ᠲᠠᠯᠪᠢᠶᠠ ᠭᠡᠳᠡᠭ᠂ ᠵᠥᠪ ᠡᠴᠡ ᠵᠥᠪ ᠦᠭᠡ ᠶ᠋ᠢ ᠳᠤᠷᠠᠳᠬᠠᠵᠠᠢ!》 ᠭᠡᠵᠦ ᠢᠯᠡᠭᠡᠵᠡᠢ᠃
280᠂ ᠲᠡᠨᠳᠡ ᠡᠴᠡ ᠥᠭᠡᠳᠡᠢ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠡᠨᠡ ᠶᠠᠪᠤᠳᠠᠯ ᠢ᠋ ᠴᠠᠭᠠᠲᠠᠢ ᠠᠬᠠ᠂ ᠪᠠᠲᠤ ᠲᠡᠷᠢᠭᠦᠲᠡᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠥᠪᠡᠭᠦᠳ᠂ ᠠᠬᠠ ᠳᠡᠭᠦᠦ ᠨᠠᠷ ᠴᠥᠮ᠂ ᠣᠳᠴᠢᠭᠢᠨ ᠨᠣᠶᠠᠨ᠂ ᠵᠡᠭᠦ ᠲᠡᠷᠢᠭᠦᠲᠡᠨ ᠵᠡᠭᠦᠨ ᠭᠠᠷ ᠤ᠋ᠨ ᠬᠥᠪᠡᠭᠦᠳ ᠠᠬᠠ ᠳᠡᠭᠦᠦ ᠨᠠᠷ ᠴᠥᠮ᠂ ᠭᠣᠣᠯ ᠤ᠋ᠨ ᠥᠬᠢᠳ᠂ ᠬᠦᠷᠭᠡᠳ᠂ ᠲᠦᠮᠡᠨ ᠦ᠌ ᠨᠣᠶᠠᠳ᠂ ᠮᠢᠩᠭᠠᠨ ᠤ᠋ ᠨᠣᠶᠠᠳ᠂ ᠵᠠᠭᠤᠨ ᠤ᠋ ᠨᠣᠶᠠᠳ᠂ ᠠᠷᠪᠠᠨ ᠤ᠋ ᠨᠣᠶᠠᠳ ᠴᠥᠮ ᠵᠥᠪᠰᠢᠶᠡᠷᠡᠵᠡᠢ᠃ ᠵᠥᠪᠰᠢᠶᠡᠷᠡᠭᠰᠡᠨ ᠵᠦᠢᠯ ᠨᠢ᠄ ᠳᠠᠯᠠᠢ ᠬᠠᠭᠠᠨ ᠤ᠋ (ᠥᠭᠡᠳᠡᠢ ᠬᠠᠭᠠᠨ ᠢ᠋ ᠵᠢᠵᠢᠭ ᠬᠠᠭᠠᠳ ᠠ᠋ᠴᠠ ᠢᠯᠭᠠᠪᠤᠷᠢᠯᠠᠵᠤ᠂ ᠶᠡᠬᠡ ᠬᠠᠭᠠᠨ ᠪᠤᠶᠤ ᠳᠠᠯᠠᠢ ᠬᠠᠭᠠᠨ ᠭᠡᠨᠡ) ᠱᠥᠯᠥ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠪᠡᠷ ᠵᠢᠯ ᠳᠣᠳᠣᠮ ᠰᠦᠷᠦᠭ ᠪᠦᠷᠢ ᠡᠴᠡ ᠨᠢᠵᠡᠭᠡᠳ ᠱᠥᠯᠦᠨ ᠢᠷᠭᠡ ᠶ᠋ᠢ ᠭᠠᠷᠭᠠᠵᠤ ᠥᠭᠭᠦᠨᠡ ᠂ ᠵᠠᠭᠤᠨ ᠬᠣᠨᠢᠨ ᠠ᠋ᠴᠠ ᠨᠢᠵᠡᠭᠡᠳ ᠵᠤᠰᠠᠭ ᠬᠣᠨᠢ ᠭᠠᠷᠭᠠᠵᠤ ᠦᠭᠡᠭᠦᠦ ᠶᠠᠳᠠᠭᠤ ᠬᠥᠮᠦᠰ ᠦ᠋ᠨ ᠲᠤᠰᠠᠯᠠᠮᠵᠢ ᠪᠣᠯᠭᠠᠵᠤ ᠥᠭᠪᠡᠯ ᠰᠠᠢᠨ ᠪᠣᠢ᠃ ᠥᠷᠲᠡᠭᠡ ᠲᠠᠯᠪᠢᠭᠤᠯᠵᠤ᠂ ᠵᠠᠮᠴᠢᠨ᠂ ᠤᠯᠠᠭᠠᠴᠢ ᠶ᠋ᠢ ᠭᠠᠷᠭᠠᠪᠠᠯ ᠣᠯᠠᠨ ᠤᠯᠤᠰ ᠢᠷᠭᠡᠨ ᠳ᠋ᠦ᠍ ᠠᠮᠤᠭᠤᠯᠠᠩ ᠪᠣᠯᠬᠤ ᠪᠠ ᠡᠯᠴᠢ ᠨᠠᠷ ᠲᠤ᠌ ᠳᠥᠭᠥᠮ ᠲᠡᠢ ᠭᠡᠰᠡᠨ ᠢ᠋ ᠪᠦᠭᠦᠳᠡᠭᠡᠷ ᠵᠥᠪᠰᠢᠶᠡᠷᠡᠵᠡᠢ ᠭᠡᠵᠦ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠵᠤ᠂ ᠴᠠᠭᠠᠲᠠᠢ ᠠᠬᠠ ᠲᠠᠢ ᠵᠥᠪᠯᠡᠭᠡᠳ ᠴᠠᠭᠠᠲᠠᠢ ᠠᠬᠠ ᠵᠥᠪᠰᠢᠶᠡᠷᠡᠭᠰᠡᠨ ᠲᠤᠯᠠ ᠪᠦᠬᠦ ᠤᠯᠤᠰ ᠠ᠋ᠴᠠ᠂ ᠵᠦᠭ ᠵᠦᠭ ᠦ᠋ᠨ ᠮᠢᠩᠭ᠋ᠠᠳᠣ ᠠ᠋ᠴᠠ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠵᠢᠯ ᠳᠣᠳᠣᠮ᠂ ᠰᠦᠷᠦᠭ ᠬᠣᠨᠢ ᠠ᠋ᠴᠠ ᠨᠢᠵᠡᠭᠡᠳ ᠱᠥᠯᠦᠨ ᠢᠷᠭᠡ ᠵᠠᠭᠤᠨ ᠬᠣᠨᠢᠨ ᠠ᠋ᠴᠠ ᠨᠢᠵᠡᠭᠡᠳ ᠵᠤᠰᠠᠭ ᠬᠣᠨᠢ ᠭᠠᠷᠭᠠᠭᠤᠯᠪᠠ᠃ ᠭᠡᠭᠦᠦ ᠶ᠋ᠢ ᠭᠠᠷᠭᠠᠭᠤᠯᠤᠨ ᠴᠤᠭᠯᠠᠭᠤᠯᠵᠤ ᠣᠨᠠᠭᠠᠴᠢᠨ ᠢ᠋ ᠰᠠᠭᠤᠯᠭᠠᠪᠠ᠃ ᠣᠨᠠᠭᠠᠴᠢᠨ᠂ ᠪᠠᠯᠭᠠᠰᠤᠴᠢᠨ᠂ ᠠᠮᠣᠴᠢᠨ ᠢ᠋ ᠲᠣᠮᠢᠯᠠᠵᠤ ᠭᠠᠷᠭᠠᠭᠤᠯᠪᠠ᠃ ᠵᠠᠮᠴᠢᠨ᠂ ᠤᠯᠠᠭᠠᠴᠢᠨ ᠢ᠋ ᠭᠠᠷᠭᠠᠭᠤᠯᠵᠤ ᠰᠠᠭᠤᠷᠢᠯᠠᠬᠤ ᠭᠠᠵᠠᠷ ᠢ᠋ ᠲᠣᠭᠲᠠᠭᠠᠵᠤ᠂ ᠥᠷᠲᠡᠭᠡ ᠵᠠᠮ ᠢ᠋ ᠲᠠᠯᠪᠢᠭᠤᠯᠤᠭᠠᠳ ᠠᠷᠠᠴᠠᠨ ᠲᠣᠭᠣᠴᠠᠷ ᠬᠣᠶᠠᠷ ᠢ᠋ᠶ᠋ᠠᠷ ᠵᠠᠬᠢᠷᠤᠭᠤᠯᠵᠤ᠂ ᠵᠠᠮ ᠤ᠋ᠨ ᠨᠢᠭᠡᠨ ᠰᠠᠭᠤᠷᠢ ᠥᠷᠲᠡᠭᠡᠨ ᠳ᠋ᠦ᠍ ᠬᠣᠷᠢᠨ ᠤᠯᠠᠭᠠᠴᠢᠨ ᠢ᠋ ᠭᠠᠷᠭᠠᠪᠠ᠃ ᠰᠠᠭᠤᠷᠢ ᠳᠣᠳᠣᠮ ᠢ᠋ ᠬᠣᠷᠢᠭᠠᠳ ᠤᠯᠠᠭᠠᠴᠢ ᠲᠠᠢ ᠪᠣᠯᠭᠠᠪᠠ᠃ ᠤᠯᠠᠭᠠ ᠶ᠋ᠢᠨ ᠮᠣᠷᠢ᠂ ᠰᠢᠭᠦᠰᠦᠨ ᠦ᠌ ᠬᠣᠨᠢ᠂ ᠰᠠᠭᠠᠯᠢ ᠶ᠋ᠢᠨ ᠭᠡᠭᠦᠦ᠂ ᠬᠥᠯᠯᠡᠬᠦ ᠦᠬᠡᠷ᠂ ᠠᠴᠢᠬᠤ ᠲᠡᠷᠭᠡ ᠵᠡᠷᠭᠡ ᠶ᠋ᠢ ᠲᠣᠭᠲᠠᠭᠠᠭᠰᠠᠨ ᠬᠡᠮᠵᠢᠶᠡ ᠪᠡᠷ ᠪᠡᠯᠡᠳᠬᠡᠵᠦ᠂ ᠣᠬᠣᠷ ᠰᠢᠳᠠᠮ ᠠ᠋ᠴᠠ ᠳᠤᠲᠠᠭᠤᠯᠪᠠᠯ ᠤᠷᠤᠭᠤᠯ ᠢ᠋ᠶ᠋ᠠᠷ ᠬᠠᠭᠠᠰ ᠠᠯᠳᠠᠯ ᠲᠠᠢ ᠪᠣᠯᠲᠤᠭᠠᠢ᠃ ᠬᠠᠯᠪᠠᠭᠠ ᠬᠡᠬᠢᠶᠡᠰᠤ ᠳᠤᠲᠠᠭᠤᠯᠪᠠᠯ ᠬᠠᠮᠠᠷ ᠤ᠋ᠨ ᠬᠠᠭᠠᠰ ᠢ᠋ ᠠᠯᠳᠠᠯ ᠲᠠᠢ ᠪᠣᠯᠲᠤᠭᠠᠢ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
281᠂ ᠥᠭᠡᠳᠡᠢ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠡᠬᠡ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠵᠤ᠂ ᠬᠠᠭᠠᠨ ᠡᠴᠢᠭᠡ ᠡᠴᠡ ᠬᠣᠢᠰᠢ ᠦᠢᠯᠡᠳᠦᠭᠰᠡᠨ ᠬᠡᠷᠡᠭ ᠮᠢᠨᠢ᠄ ᠨᠢᠭᠡᠳᠦᠭᠡᠷ ᠲᠦ᠍᠂ ᠪᠢ ᠠᠯᠲᠠᠨ ᠤᠯᠤᠰ ᠢ᠋ ᠡᠵᠡᠯᠡᠨ ᠳᠠᠭᠠᠭᠤᠯᠪᠠ᠃ ᠬᠣᠶᠠᠳᠤᠭᠠᠷ ᠲᠤ᠌᠂ ᠪᠢᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠡᠯᠴᠢ ᠶᠠᠪᠤᠭᠤᠯᠵᠤ ᠬᠠᠷᠢᠯᠴᠠᠬᠤ ᠪᠠ ᠡᠯᠳᠡᠪ ᠬᠡᠷᠡᠭ ᠢ᠋ ᠵᠥᠭᠡᠭᠡᠯᠭᠡᠬᠦ ᠥᠷᠲᠡᠭᠡ ᠵᠠᠮ ᠢ᠋ ᠲᠠᠯᠪᠢᠭᠤᠯᠪᠠ᠃ ᠭᠤᠷᠪᠠᠳᠤᠭᠠᠷ ᠲᠤ᠌᠂ ᠤᠰᠤ ᠦᠭᠡᠢ ᠭᠠᠵᠠᠷ ᠲᠤ᠌ ᠬᠤᠳᠳᠤᠭ ᠮᠠᠯᠲᠠᠭᠤᠯᠵᠤ ᠭᠠᠷᠭᠠᠭᠤᠯᠤᠭᠠᠳ ᠤᠯᠤᠰ ᠢᠷᠭᠡᠨ ᠢ᠋ ᠤᠰᠤ ᠡᠪᠡᠰᠦᠨ ᠳ᠋ᠦ᠍ ᠬᠦᠷᠦᠯᠴᠡᠭᠡᠲᠡᠢ ᠪᠣᠯᠭᠠᠪᠠ᠃ ᠳᠥᠷᠪᠡᠳᠦᠭᠡᠷ ᠲᠦ᠍᠂ ᠵᠦᠭ ᠵᠦᠭ ᠦ᠋ᠨ ᠰᠠᠭᠤᠷᠢᠨ ᠤᠯᠤᠰ ᠤ᠋ᠨ ᠬᠣᠲᠠ ᠤ᠋ᠳ ᠲᠤ᠌ ᠮᠡᠳᠡᠭᠡᠯᠡᠭᠴᠢ᠂ ᠵᠠᠬᠢᠷᠤᠭᠴᠢ ᠨᠠᠷ ᠢ᠋ ᠲᠠᠯᠪᠢᠵᠤ᠂ ᠤᠯᠤᠰ ᠢᠷᠭᠡᠨ ᠢ᠋ ᠬᠥᠯ ᠬᠥᠰᠡᠷ᠂ ᠭᠠᠷ ᠭᠠᠵᠠᠷ ᠲᠠᠯᠪᠢᠭᠤᠯᠵᠤ ᠠᠮᠤᠷ ᠲᠦᠪᠰᠢᠨ ᠪᠣᠯᠭᠠᠪᠠ᠃ ᠬᠠᠭᠠᠨ ᠡᠴᠢᠭᠡ ᠡᠴᠡ ᠬᠣᠢᠰᠢ᠂ ᠡᠨᠡ ᠳᠥᠷᠪᠡᠨ ᠦᠢᠯᠡ ᠶ᠋ᠢ ᠨᠡᠮᠡᠪᠡ᠂ ᠪᠢ᠃ ᠪᠠᠰᠠ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠶᠡᠬᠡ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠵᠤ᠂ ᠣᠯᠠᠨ ᠤᠯᠤᠰ ᠢᠷᠭᠡᠨ ᠢ᠋ ᠵᠠᠬᠢᠷᠬᠤ ᠶᠡᠬᠡ ᠡᠭᠦᠷᠭᠡ ᠶ᠋ᠢ ᠬᠦᠯᠢᠶᠡᠭᠰᠡᠨ ᠪᠠᠢᠲᠠᠯᠠ ᠪᠣᠷᠣ ᠳᠡᠷᠡᠰᠦᠨ ᠳ᠋ᠦ᠍ ᠣᠷᠣᠭᠰᠠᠨ ᠮᠢᠨᠢ ᠨᠢᠭᠡᠳᠦᠭᠡᠷ ᠪᠤᠷᠤᠭᠤ ᠪᠣᠯᠪᠠ᠃ ᠬᠣᠶᠠᠳᠤᠭᠠᠷ ᠲᠤ᠌ ᠶᠣᠰᠣ ᠦᠭᠡᠢ ᠶᠠᠭᠤᠮᠠ ᠬᠥᠮᠦᠨ ᠦ᠌ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠤᠳᠴᠢᠬᠢᠨ ᠠᠪᠠᠭᠠ ᠶ᠋ᠢᠨ ᠬᠠᠷᠢᠶᠠᠲᠤ ᠨᠠᠷ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠡᠦᠬᠡᠨ ᠠᠪᠴᠢᠷᠠᠭᠤᠯᠤᠭᠰᠠᠨ ᠨᠢ ᠪᠤᠷᠤᠭᠤ ᠪᠣᠯᠪᠠ᠃ ᠤᠯᠤᠰ ᠤ᠋ᠨ ᠡᠵᠡᠨ ᠬᠠᠭᠠᠨ ᠬᠥᠮᠦᠨ ᠪᠠᠢᠲᠠᠯᠠ᠂ ᠶᠣᠰᠣ ᠦᠭᠡᠢ ᠮᠠᠭᠤ ᠠᠯᠵᠢᠶᠠᠰ ᠦᠢᠯᠡ ᠳ᠋ᠦ᠍ ᠠᠪᠲᠠᠭᠳᠠᠭᠰᠠᠨ ᠮᠢᠨᠢ ᠪᠠᠰᠠ ᠨᠢᠭᠡ ᠪᠤᠷᠤᠭᠤ᠃ ᠭᠤᠷᠪᠠᠳᠤᠭᠠᠷ ᠲᠤ᠌᠂ ᠲᠤᠭᠤᠯᠬᠤ ᠶ᠋ᠢ ᠳᠠᠯᠳᠠ ᠠ᠋ᠴᠠ ᠬᠠᠷᠠᠳᠠᠭᠰᠠᠨ ᠨᠢᠭᠡ ᠪᠤᠷᠤᠭᠤ ᠪᠣᠢ᠃ ᠶᠠᠮᠠᠷ ᠪᠤᠷᠤᠭᠤ ᠪᠣᠢ ᠭᠡᠪᠡᠯ᠂ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠮᠢᠨᠢ ᠬᠠᠷᠠᠬᠤ ᠨᠢᠳᠦᠨ ᠦ᠌ ᠡᠮᠦᠨᠡ᠂ ᠬᠠᠮᠤᠭ ᠠ᠋ᠴᠠ ᠲᠦᠷᠦᠭᠦᠨ ᠳ᠋ᠦ᠍ ᠬᠠᠳᠬᠤᠯᠳᠤᠵᠤ ᠶᠠᠪᠤᠭᠰᠠᠨ ᠲᠤᠭᠤᠯᠬᠤ ᠶ᠋ᠢ ᠬᠣᠣᠷᠲᠤ ᠮᠠᠭᠤ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠬᠣᠷᠣᠭᠠᠵᠠᠢ᠃ ᠣᠳᠣ ᠮᠢᠨᠦ ᠡᠮᠦᠨᠡ ᠬᠡᠨ ᠲᠡᠭᠡᠵᠦ ᠲᠡᠷᠢᠭᠦᠯᠡᠨ ᠳᠠᠪᠰᠢᠵᠤ ᠥᠭᠬᠦ ᠪᠣᠢ? ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠮᠢᠨᠢ ᠡᠮᠦᠨᠡ ᠵᠢᠳᠬᠦᠭᠰᠡᠨ ᠵᠢᠷᠤᠮᠲᠤ ᠬᠥᠮᠦᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠡᠷ ᠥᠰᠢᠶᠡᠯᠡᠭᠰᠡᠨ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠪᠢ ᠪᠤᠷᠤᠭᠤᠰᠢᠶᠠᠨᠠ᠃ ᠳᠥᠷᠪᠡᠳᠦᠭᠡᠷ ᠲᠦ᠍᠂ ᠲᠡᠭᠷᠢ ᠭᠠᠵᠠᠷ ᠤ᠋ᠨ ᠵᠠᠶᠠᠭᠠ ᠪᠠᠷ ᠲᠥᠷᠥᠭᠰᠡᠨ ᠭᠥᠷᠥᠭᠡᠰᠦ ᠶ᠋ᠢ ᠪᠤᠰᠤᠳ ᠠᠬᠠ ᠳᠡᠭᠦᠦ ᠨᠠᠷ ᠤ᠋ᠨ ᠨᠤᠲᠤᠭ ᠲᠤ᠌ ᠣᠴᠢᠬᠤ ᠪᠣᠯᠭᠤᠵᠠᠢ ᠭᠡᠵᠦ ᠬᠠᠷᠠᠮᠯᠠᠵᠤ᠂ ᠰᠢᠪᠡᠷ ᠬᠡᠷᠡᠮ ᠪᠠᠷᠢᠭᠤᠯᠵᠤ᠂ ᠠᠬᠠ ᠳᠡᠭᠦᠦ ᠨᠠᠷ ᠠ᠋ᠴᠠ ᠭᠣᠮᠣᠳᠠᠬᠤ ᠦᠭᠡ ᠶ᠋ᠢ ᠰᠣᠨᠣᠰᠪᠠ᠂ ᠪᠢ᠃ ᠡᠨᠡ ᠪᠠᠰᠠ ᠨᠢᠭᠡ ᠪᠤᠷᠤᠭᠤ ᠪᠣᠢ᠃ ᠬᠠᠭᠠᠨ ᠡᠴᠢᠭᠡ ᠡᠴᠡ ᠬᠣᠢᠰᠢ ᠳᠥᠷᠪᠡᠨ ᠦᠢᠯᠡ ᠶ᠋ᠢ ᠨᠡᠮᠡᠪᠡ᠂ ᠪᠠᠰᠠ ᠳᠥᠷᠪᠡᠨ ᠪᠤᠷᠤᠭᠤ ᠦᠢᠯᠡᠳᠴᠡᠢ!》 ᠭᠡᠪᠡ᠃
282᠂ ᠶᠡᠬᠡ ᠬᠤᠷᠠᠯᠳᠤᠭᠠᠨ ᠪᠣᠯᠵᠤ᠂ ᠬᠤᠯᠤᠭᠠᠨᠠ ᠵᠢᠯ (1240 ᠣᠨ) ᠬᠤᠷᠠᠨ (ᠳᠣᠯᠣᠳᠤᠭᠠᠷ) ᠰᠠᠷᠠ ᠳ᠋ᠤ᠌ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠤ᠋ᠨ ᠳᠣᠯᠣᠭᠠᠨ ᠪᠣᠯᠳᠣᠭ᠂ ᠰᠢᠯᠭᠢᠨᠴᠡᠭ ᠬᠣᠶᠠᠷ ᠤ᠋ᠨ ᠵᠠᠪᠰᠠᠷ ᠬᠠᠭᠠᠨ ᠤᠷᠲᠤ ᠪᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠪᠢᠴᠢᠵᠦ ᠲᠡᠭᠦᠰᠬᠡᠪᠡ᠃
