ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠭᠤᠴᠢᠨ ᠵᠢᠷᠭᠤᠭᠠ> Хялгасан дөрөөн дээр – Хасвулаг зохиов <36>
63ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠭᠤᠴᠢᠨ ᠵᠢᠷᠭᠤᠭᠠ>
ᠭᠤᠴᠢᠨ ᠵᠢᠷᠭᠤᠭᠠ
ᠡᠦ ᠹᠧᠩ ᠮᠧᠢ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠥᠷᠯᠥᠭᠡ ᠲᠡᠷᠡ ᠬᠦ᠌ ᠨᠡᠷᠡ ᠪᠡᠨ ᠨᠢᠭᠤᠭᠰᠠᠨ ᠬᠥᠮᠦᠨ ᠦ᠌ ᠳ᠋ᠢᠶᠠᠩᠬᠤᠸᠠ ᠪᠠᠷ ᠬᠡᠯᠡᠭᠰᠡᠨ ᠦᠭᠡᠨ ᠦ᠌ ᠪᠦᠬᠦ ᠠᠭᠤᠯᠭᠠ ᠶ᠋ᠢ ᠥᠴᠦᠬᠡᠨ ᠴᠦ᠍ ᠦᠯᠡᠳᠡᠭᠡᠯ ᠦᠭᠡᠢ ᠪᠦᠬᠦᠨ ᠢ᠋ ᠨᠢ ᠬᠡᠯᠡᠵᠦ ᠭᠠᠷᠭᠠᠵᠠᠢ᠃
ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠡᠦ ᠹᠧᠩ ᠮᠧᠢ ᠴᠠᠭᠠᠳᠤᠬᠢ ᠭᠠᠢᠬᠠᠯ ᠴᠣᠬᠣᠮ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠲᠡᠭᠦᠨ ᠦ᠌ ᠡᠮᠦᠨᠡ ᠬᠣᠢᠨᠠᠬᠢ ᠡᠮᠵᠡᠭ ᠢ᠋ ᠢᠩᠭᠢᠵᠦ ᠰᠠᠢᠬᠠᠨ ᠣᠢᠯᠠᠭᠠᠭᠰᠠᠨ ᠤᠭ ᠰᠠᠨᠠᠭᠠ ᠶ᠋ᠢ ᠣᠢᠯᠠᠭᠠᠵᠤ ᠳᠡᠢᠯᠦᠭᠡ ᠦᠭᠡᠢ᠃ ᠡᠭᠦᠨ ᠢ᠋ ᠴᠠᠭᠠᠰᠢ ᠨᠢ ᠮᠥᠷᠳᠡᠵᠦ ᠣᠢᠯᠠᠭᠠᠬᠤ ᠶ᠋ᠢᠨ ᠰᠠᠨᠠᠭᠠ ᠴᠦ᠍ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠠ ᠦᠭᠡᠢ᠃ ᠬᠠᠷᠢᠨ ᠬᠥᠮᠦᠨ ᠲᠡᠭᠦᠨ ᠦ᠌ ᠡᠯᠳᠡᠪ ᠢ᠋ ᠮᠡᠳᠡᠴᠢᠬᠡᠭᠡᠳ ᠪᠠᠰᠠ ᠢᠩᠭᠢᠵᠦ ᠰᠠᠢᠨ ᠰᠠᠨᠠᠭᠠ ᠪᠠᠷ ᠬᠠᠮᠠᠭᠠᠯᠠᠵᠤ ᠳᠠᠷᠤᠵᠤ ᠪᠠᠢᠨᠠ᠃ ᠪᠠᠰᠠ ᠠᠯᠢ ᠡᠷᠲᠡ ᠲᠡᠷᠡ ᠬᠣᠶᠠᠭᠤᠯᠠ ᠶ᠋ᠢᠨ ᠬᠤᠪᠢ ᠶ᠋ᠢᠨ ᠨᠢᠭᠤᠴᠠ ᠶ᠋ᠢ ᠮᠡᠳᠡᠴᠢᠬᠡᠭᠡᠳ ᠣᠳᠣ ᠪᠣᠯᠲᠠᠯᠠ ᠶᠠᠮᠠᠷ ᠴᠦ᠍ ᠬᠣᠣᠷ ᠬᠢᠭᠡ ᠦᠭᠡᠢ ᠰᠢᠳᠡ ᠭᠡᠵᠦ ᠪᠣᠳᠣᠬᠤ ᠳᠤ ᠪᠠᠨ ᠬᠠᠷᠢᠭᠤ ᠲᠠᠯᠠᠷᠬᠠᠮᠠᠷ ᠰᠠᠨᠠᠭᠳᠠᠭᠠᠳ ᠪᠠᠢᠵᠠᠢ᠃
ᠢᠩᠭᠢᠭᠡᠳ ᠡᠦ ᠹᠧᠩ ᠮᠧᠢ ᠲᠡᠷᠡ ᠬᠥᠮᠦᠨ ᠦ᠌ ᠬᠡᠯᠡᠭᠰᠡᠨ ᠢ᠋ ᠭᠦᠢᠴᠡᠳ ᠢᠲᠡᠭᠡᠭᠰᠡᠨ ᠢ᠋ᠶ᠋ᠡᠷ ᠦᠯᠦ ᠪᠠᠷᠠᠨ ᠬᠡᠨ ᠳ᠋ᠦ᠍ ᠴᠦ᠍ ᠶᠠᠷᠢᠭᠠ ᠦᠭᠡᠢ ᠪᠠᠢᠭᠰᠠᠨ ᠨᠢ ᠡᠨᠡ ᠠᠵᠢ᠃
ᠡᠦ ᠹᠧᠩ ᠮᠧᠢ ᠥᠨᠥᠳᠥᠷ ᠶᠠᠷᠢᠶᠠᠨ ᠤ᠋ ᠲᠡᠭᠦᠰᠬᠡᠯ ᠳ᠋ᠡᠭᠡᠨ᠄
— ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠠ᠋᠂ ᠲᠡᠷᠡ ᠬᠥᠮᠦᠨ ᠳᠠᠬᠢᠭᠠᠳ ᠮᠢᠨᠦ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠣᠭᠲᠣ ᠬᠦᠯᠢᠶᠡᠭᠰᠡᠨ ᠦᠭᠡᠢ᠃ ᠪᠢ ᠰᠡᠳᠬᠢᠯ ᠦ᠋ᠨ ᠳᠣᠭᠳᠣᠯᠤᠯ ᠢ᠋ᠶ᠋ᠠᠨ ᠬᠦᠴᠦᠯᠡᠨ ᠳᠠᠷᠤᠵᠤ ᠡᠳᠡᠭᠡᠷ ᠬᠡᠷᠡᠭ ᠢ᠋ ᠪᠣᠳᠣᠯᠬᠢᠯᠠᠵᠤ ᠦᠵᠡᠯᠡ᠃ ᠨᠡᠭᠡᠷᠡᠨ ᠳᠥᠷᠪᠡᠨ ᠡᠳᠦᠷ ᠦ᠋ᠨ ᠡᠮᠦᠨᠡ ᠬᠣᠲᠠ ᠶ᠋ᠢᠨ ᠡᠷᠡᠭᠦᠯ ᠬᠠᠮᠠᠭᠠᠯᠠᠯ ᠤ᠋ᠨ ᠲᠣᠪᠴᠢᠶᠠᠨ ᠤ᠋ ᠪᠠᠢᠴᠠᠭᠠᠬᠤ ᠳᠤᠭᠤᠢᠯᠠᠩ ᠤ᠋ᠨ ᠬᠢᠨ ᠮᠢᠨᠦ ᠠᠵᠢᠯᠯᠠᠵᠤ ᠪᠠᠢᠬᠤ ᠡᠮ ᠦ᠋ᠨ ᠭᠡᠷ ᠪᠣᠯᠤᠨ ᠡᠮ ᠲᠣᠬᠢᠷᠠᠭᠤᠯᠤᠭᠴᠢᠳ ᠤ᠋ᠨ ᠠᠵᠢᠯ ᠢ᠋ ᠪᠠᠢᠴᠠᠭᠠᠭᠰᠠᠨ ᠪᠢᠯᠡ᠃ ᠢᠩᠭᠢᠭᠡᠳ ᠨᠢᠭᠡ ᠬᠠᠢᠷᠴᠠᠭA ᠭᠤᠷᠪᠠᠳᠤᠭᠠᠷ ᠤ᠋ᠨ ᠬᠠᠢᠷᠴᠠᠭ ᠨᠢ ᠵᠠᠳᠠᠷᠠᠨ ᠪᠤᠰᠤᠳ ᠡᠮ ᠲᠡᠢ ᠬᠣᠯᠢᠯᠳᠤᠭᠰᠠᠨ ᠢ᠋ ᠪᠠᠢᠴᠠᠭᠠᠵᠤ ᠭᠠᠷᠭᠠᠭᠠᠳ ᠨᠠᠮᠠ ᠶᠢ ᠰᠢᠭᠦᠮᠵᠢᠯᠡᠵᠦ ᠥᠩᠭᠡᠷᠡᠪᠡ᠃ ᠪᠢ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠲᠡᠷᠡ ᠬᠦ᠌ ᠬᠠᠢᠷᠴᠠᠭ ᠨᠢ ᠵᠠᠳᠠᠷᠠᠭᠠᠳ ᠳᠠᠬᠢᠨ ᠰᠠᠪᠠᠯᠠᠭᠰᠠᠨB ᠵᠢᠷᠭᠤᠳᠤᠭᠠᠷ ᠢ᠋ ᠥᠭᠭᠦᠭᠰᠡᠨ ᠪᠣᠯᠬᠣᠷ ᠦᠨᠡᠬᠡᠷ ᠪᠤᠷᠤᠭᠤ ᠥᠭᠴᠢᠬᠡᠭᠰᠡᠨ ᠮᠠᠭᠠᠳ ᠦᠭᠡᠢ ᠭᠡᠵᠦ ᠰᠡᠵᠢᠭᠯᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠪᠠ᠃ ᠢᠩᠭᠢᠭᠡᠳ ᠪᠢ ᠲᠡᠷᠡ ᠳ᠋ᠢᠶᠠᠩᠬᠤᠸᠠ ᠪᠠᠷ ᠶᠠᠷᠢᠯᠴᠠᠭᠰᠠᠨ ᠬᠥᠮᠦᠨ ᠦ᠌ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠣᠴᠢᠵᠤ ᠪᠣᠯᠤᠷᠴᠠᠭᠠᠨ ᠲᠠᠢ ᠠᠭᠤᠯᠵᠠᠪᠠ᠃ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠭᠰᠠᠨ ᠠᠭᠤᠯᠭᠠ ᠪᠠᠨ ᠪᠢ ᠳᠡᠭᠡᠷᠡ ᠤᠳᠠᠭᠠ ᠢᠯᠡ ᠰᠢᠭᠦᠯᠲᠡ ᠳᠡᠭᠡᠷᠡ ᠪᠦᠬᠦᠨ ᠢ᠋ ᠲᠤᠰᠢᠶᠠᠭᠰᠠᠨ᠃ ᠲᠡᠷᠡ ᠤᠳᠠᠭᠠ ᠪᠢ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠪᠤᠴᠠᠵᠤ ᠢᠷᠡᠭᠡᠳ᠂ ᠡᠮ ᠦ᠋ᠨ ᠲᠠᠯᠪᠢᠭᠤᠷ ᠤ᠋ᠨ ᠳᠥᠷᠪᠡᠳᠦᠭᠡᠷ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠲᠠᠯᠪᠢᠵᠤ ᠪᠠᠢᠭᠠ Bᠵᠢᠷᠭᠤᠳᠤᠭᠠᠷ ᠢ᠋ ᠪᠠᠢᠴᠠᠭᠠᠵᠤ ᠦᠵᠡᠭᠰᠡᠨ ᠳ᠋ᠦ᠍ ᠵᠠᠷᠢᠮ ᠳ᠋ᠤᠨᠢ ᠦᠨᠡᠬᠡᠷ Aᠭᠤᠷᠪᠠᠳᠤᠭᠠᠷ ᠬᠣᠯᠢᠯᠳᠤᠵᠤ ᠪᠠᠢᠭᠰᠠᠨ ᠪᠢᠯᠡ ᠭᠡᠪᠡ᠃
— ᠬᠣᠲᠠ ᠶ᠋ᠢᠨ ᠡᠷᠡᠭᠦᠯ ᠬᠠᠮᠠᠭᠠᠯᠠᠯ ᠤ᠋ᠨ ᠲᠣᠪᠴᠢᠶᠠᠨ ᠠ᠋ᠴᠠ ᠴᠢᠨᠦ ᠡᠮ ᠦ᠋ᠨ ᠭᠡᠷ ᠢ᠋ ᠬᠡᠵᠢᠶᠡ ᠶᠠᠭᠠᠬᠢᠵᠤ ᠪᠠᠢᠴᠠᠭᠠᠭᠰᠠᠨ ᠶᠤᠮ?
— ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠭᠳᠠᠬᠤ ᠠ᠋ᠴᠠ ᠡᠮᠦᠨᠡ ᠬᠡᠳᠦᠨ ᠡᠳᠦᠷ ᠰᠢᠭ ᠰᠠᠨᠠᠭᠳᠠᠵᠤ ᠪᠠᠢᠨᠠ᠃ ᠴᠣᠬᠣᠮ ᠠᠯᠢ ᠡᠳᠦᠷ ᠢ᠋ ᠨᠢ ᠮᠠᠷᠲᠠᠴᠢᠬᠠᠵᠠᠢ᠃ ᠦ ᠂ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠦᠵᠡᠰᠬᠦᠯᠡᠩ ᠢ᠋ ᠬᠥᠯ ᠢ᠋ᠶ᠋ᠡᠨ ᠬᠤᠭᠤᠯᠤᠭᠤᠯᠤᠭᠰᠠᠨ ᠲᠡᠷᠡ ᠡᠳᠦᠷ ᠦ᠋ᠨ ᠦᠳᠡ ᠶ᠋ᠢᠨ ᠬᠣᠢᠨᠠ ᠶᠤᠮ ᠪᠠᠢᠨᠠ᠃ ᠪᠠᠢᠴᠠᠭᠠᠬᠤ ᠳᠤᠭᠤᠢᠯᠠᠩ ᠤ᠋ᠨ ᠬᠢᠨ ᠡᠮ ᠦ᠋ᠨ ᠭᠡᠷ ᠲᠡᠬᠢ ᠠᠵᠢᠯᠯᠠᠭᠴᠢᠳ ᠢ᠋ ᠪᠦᠷ ᠭᠠᠳᠠᠨᠠ ᠭᠠᠷᠭᠠᠭᠠᠳ ᠨᠡᠯᠢᠶᠡᠳ ᠤᠳᠠᠭᠠᠨ ᠪᠠᠢᠴᠠᠭᠠᠭᠰᠠᠨ ᠶᠤᠮ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍᠂ ᠪᠣᠯᠤᠷᠴᠠᠭᠠᠨ ᠢᠷᠡᠭᠡᠳ ᠨᠢᠭᠡ ᠬᠠᠢᠷᠴᠠᠭ Bᠵᠢᠷᠭᠤᠳᠤᠭᠠᠷ ᠠᠪᠬᠤ ᠭᠡᠪᠡ᠃ ᠲᠡᠳᠡᠨᠡᠷ ᠢ᠋ ᠳᠥᠩᠭᠡᠵᠦ ᠶᠠᠪᠤᠮᠠᠭᠴᠠ ᠪᠢ ᠲᠡᠭᠦᠨ ᠳ᠋ᠦ᠍ ᠡᠮ ᠭᠠᠷᠭᠠᠵᠤ ᠥᠭᠭᠦᠭᠰᠡᠨ ᠪᠢᠯᠡ᠃
— ᠴᠢᠮᠠ ᠲᠠᠢ ᠶᠠᠷᠢᠯᠴᠠᠭᠰᠠᠨ ᠲᠡᠷᠡ ᠬᠥᠮᠦᠨ ᠦ᠌ ᠳᠠᠭᠤ ᠨᠢ ᠲᠠᠨᠢᠭᠳᠠᠭᠰᠠᠨ ᠦᠭᠡᠢ ᠤᠤ?
— ᠲᠠᠨᠢᠭᠳᠠᠭᠰᠠᠨ ᠦᠭᠡᠢ᠃
— ᠴᠢᠮᠠᠲᠤ ᠥᠭᠡᠷᠡ ᠰᠠᠨᠠᠯ ᠱᠠᠭᠠᠷᠳᠠᠯᠭᠠ ᠪᠠᠢᠨᠠ ᠤᠤ?
— ᠪᠢ᠁ ᠲᠡᠷᠡ᠂ ᠲᠡᠷᠡ ᠬᠦᠦ ᠶ᠋ᠢ ᠰᠡᠮᠡᠬᠡᠷ ᠨᠢᠭᠡ ᠦᠵᠡᠬᠦ ᠰᠠᠨᠠᠭᠠᠲᠠᠢ᠃ ᠪᠣᠯᠬᠤ ᠡᠰᠡᠬᠦ ᠶ᠋ᠢ᠁ ᠭᠡᠪᠡᠴᠦ ᠲᠠᠨᠢᠯᠴᠠᠶᠠ ᠭᠡᠵᠦ ᠪᠣᠳᠣᠵᠤ ᠦᠭᠡᠢ᠃
— ᠥᠭᠡᠷᠡ?
— ᠪᠠᠰᠠ᠂ ᠪᠠᠰᠠ ᠪᠢ ᠰᠢᠢᠳᠬᠡᠭᠳᠡᠬᠦ ᠡᠴᠡ ᠪᠡᠨ ᠡᠮᠦᠨᠡ ᠪᠣᠯᠤᠷᠴᠠᠭᠠᠨ ᠲᠠᠢ ᠨᠢᠭᠡ ᠠᠭᠤᠯᠵᠠᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠳ ᠲᠡᠷᠡ ᠳᠣᠷᠣᠭᠰᠢ ᠬᠠᠷᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠲᠦᠷ ᠵᠠᠭᠤᠵᠤ ᠠᠪᠤᠭᠠᠳ᠄
— ᠬᠡᠷᠪᠡ ᠮᠢᠨᠦ ᠡᠳᠡᠭᠡᠷ ᠱᠠᠭᠠᠷᠳᠠᠯᠭᠠ ᠶ᠋ᠢ ᠪᠡᠶᠡᠯᠡᠭᠦᠯᠴᠢᠬᠡᠪᠡᠯ ᠪᠢ ᠡᠷᠯᠢᠭ ᠦ᠋ᠨ ᠣᠷᠳᠣᠨ ᠳ᠋ᠤ᠌ ᠣᠴᠢᠭᠰᠠᠨ ᠴᠦ᠍ ᠰᠡᠳᠬᠢᠯ ᠳᠦᠭᠦᠷᠡᠩ ᠶᠦᠮ᠃
— ᠲᠠ ᠦᠨᠡᠬᠡᠷ ᠠᠯᠠᠭᠳᠠᠬᠤ ᠡᠷᠡᠭᠦᠦ ᠳ᠋ᠦ᠍ ᠦᠭᠳᠡᠬᠦ ᠭᠡᠵᠦ ᠰᠠᠨᠠᠭᠰᠠᠭᠠᠷ ᠤᠤ? ᠬᠡᠷᠪᠡ ᠴᠢᠨᠦ ᠲᠤᠰᠢᠶᠠᠯᠲᠠ ᠪᠦᠷ ᠦᠨᠡᠨ ᠪᠣᠯ ᠡᠨᠡ ᠰᠢᠢᠳᠬᠡᠯ ᠳ᠋ᠦ᠍ ᠬᠦᠷᠬᠦ ᠦᠭᠡᠢ ᠶᠦᠮ᠃ ᠪᠢ ᠪᠠᠰᠠ ᠴᠢᠨᠦ ᠲᠤᠰᠢᠶᠠᠭᠰᠠᠨ ᠢ᠋ ᠪᠦᠷ ᠦᠨᠡᠨ ᠮᠠᠭᠠᠳ ᠭᠡᠵᠦ ᠦᠵᠡᠵᠦ ᠪᠠᠢᠨᠠ ᠰᠢᠦ!
— ᠡᠨᠡ᠁
ᠡᠦ ᠹᠧᠩ ᠮᠧᠢ ᠣᠳᠣ ᠪᠣᠯᠲᠠᠯᠠ ᠦᠨᠡᠬᠡᠷ ᠠᠯᠠᠭᠳᠠᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠠᠵᠢ᠃
ᠲᠡᠷᠡ ᠢᠯᠡ ᠰᠢᠭᠦᠯᠲᠡ ᠳᠡᠭᠡᠷᠡ ᠭᠡᠷᠡᠴᠢ ᠬᠢᠭᠰᠡᠨ ᠡᠴᠡ ᠬᠣᠢᠰᠢ ᠶᠠᠭ ᠯᠠ ᠠᠮᠢ ᠪᠠᠨ ᠥᠭᠬᠦ ᠲᠠᠩᠭᠠᠷᠢᠭ ᠲᠠᠯᠪᠢᠵᠤ᠂ ᠠᠯᠠᠬᠤ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢ ᠤᠷᠢᠳᠴᠢᠯᠠᠨ ᠬᠦᠯᠢᠶᠡᠭᠰᠡᠨ ᠲᠡᠢ ᠠᠳᠠᠯᠢ ᠭᠡᠵᠦ ᠭᠦᠨ ᠰᠠᠨᠠᠵᠠᠢ᠃
ᠣᠷᠴᠢᠮ ᠤ᠋ᠨ ᠡᠳᠦᠷ ᠦ᠋ᠳ ᠲᠦ᠍ ᠲᠡᠷᠡ ᠠᠯᠠᠭᠳᠠᠬᠤ ᠴᠠᠭ ᠮᠥᠴᠡ ᠪᠡᠨ ᠨᠢᠭᠡ ᠴᠠᠭ ᠨᠢᠭᠡ ᠮᠢᠨᠦ᠋ᠲ ᠢ᠋ᠶ᠋ᠡᠷ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠵᠣᠪᠠᠨᠢᠯ ᠤ᠋ᠨ ᠳᠤᠮᠳᠠ ᠠᠮᠢᠳᠤᠷᠠᠭᠰᠠᠭᠠᠷ ᠪᠠᠢᠯᠠ᠃ ᠦᠨᠡᠨ ᠳᠦ ᠪᠡᠨ ᠲᠡᠷᠡ ᠪᠣᠯ ᠠᠶᠤᠭᠰᠠᠨ᠂ ᠠᠶᠤᠭᠰᠠᠨ ᠦᠭᠡᠢ ᠴᠦ᠍ ᠵᠠᠪᠠᠯ ᠬᠦᠷᠴᠦ ᠢᠷᠡᠬᠦ ᠴᠠᠭ ᠮᠥᠴᠡ ᠮᠥᠨ᠃ ᠲᠡᠷᠡᠴᠢᠯᠡᠨ ᠥᠪᠡᠷ ᠢ᠋ᠶ᠋ᠡᠨ ᠦᠢᠯᠡᠳᠦᠭᠰᠡᠨ ᠬᠡᠷᠡᠭ ᠶᠦ᠍ᠮ ᠴᠢᠨᠢ ᠠᠶᠤᠪᠠᠯ ᠪᠤᠤ ᠬᠢ᠂ ᠬᠢᠪᠡᠯ ᠪᠤᠤ ᠠᠶᠤ ᠭᠡᠭᠴᠢ ᠪᠡᠷ ᠨᠢᠭᠡᠨᠲᠡ ᠬᠢᠭᠰᠡᠨ ᠦ᠌ ᠬᠣᠢᠨᠠ ᠲᠡᠭᠷᠢ ᠨᠤᠷᠠᠯᠠ ᠭᠡᠳ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠲᠤᠯᠵᠤ ᠠᠪᠤᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌᠂ ᠲᠡᠭᠦᠨ ᠦ᠌ ᠵᠣᠷᠢᠭ ᠵᠢᠷᠦᠬᠡ ᠨᠢ ᠪᠦᠳᠦᠭᠦᠷᠡᠨᠡ᠃ ᠾᠧᠩ᠂ ᠡᠦ ᠹᠧᠩ ᠮᠧᠢ ᠪᠢ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠠᠯᠠᠭᠳᠠᠬᠤ ᠪᠠᠷ ᠬᠦᠷᠦᠭᠰᠡᠨ ᠴᠦ᠍ ᠤᠷᠤᠭᠤ ᠴᠢᠷᠠᠢᠯᠠᠨ ᠤᠰᠤᠨ ᠨᠢᠳᠦᠯᠡᠵᠦ ᠵᠣᠭᠰᠣᠬᠤ ᠦᠭᠡᠢ᠂ ᠬᠠᠷᠢᠨ ᠴᠡᠭᠡᠵᠢ ᠲᠡᠨᠡᠢᠨ᠂ ᠴᠢᠷᠠᠢ ᠬᠤᠪᠢᠷᠠᠯ ᠦᠭᠡᠢ ᠪᠠᠢᠵᠤ ᠫᠤᠤᠳᠠᠭᠳᠠᠨᠠ᠃ ᠲᠦᠮᠡᠨ ᠮᠠᠭᠤ᠂ ᠮᠢᠩᠭᠠᠨ ᠰᠢᠪᠰᠢᠭ ᠪᠣᠯᠤᠭᠰᠠᠨ ᠴᠦ᠍ ᠪᠢ ᠯᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠡᠭᠦᠷᠦᠨᠡ᠃ ᠥᠭᠡᠷᠡ ᠪᠤᠰᠤᠳ ᠲᠤ᠌ ᠬᠢᠯᠭᠠᠰᠤᠨ ᠲᠡᠳᠦᠢ ᠴᠦ᠍ ᠬᠠᠯᠳᠠᠭᠠᠬᠤ ᠦᠭᠡᠢ᠃ ᠬᠥᠮᠦᠰ ᠳᠡᠭᠡᠷᠡ ᠳᠣᠣᠷᠠ ᠨᠢ ᠳᠡᠯ ᠰᠡᠭᠦᠯ ᠨᠡᠮᠡᠨ᠂ ᠵᠡᠭᠡᠯᠢ ᠭᠤᠳᠤᠮᠵᠢ ᠪᠠᠷ ᠰᠣᠨᠢᠨ ᠪᠣᠯᠭᠠᠨ ᠬᠡᠯᠡᠵᠦ ᠳᠣᠷᠣᠮᠵᠢᠯᠠᠬᠤ ᠨᠢ ᠯᠠᠪᠲᠠᠢ᠃ ᠶᠠᠭᠠᠬᠢᠪᠠᠯ ᠶᠠᠭᠠᠬᠢᠭ ᠴᠠᠭᠠᠰᠢ ᠪᠠᠨ᠂ ᠬᠥᠮᠦᠨ ᠦ᠌ ᠦᠭᠡ ᠶᠠᠷᠢᠶᠠ᠂ ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠬᠡᠨ ᠬᠣᠷᠢᠭᠯᠠᠵᠤ ᠴᠢᠳᠠᠨᠠ ᠪᠣᠢ? ᠬᠠᠷᠢᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠪᠤᠭᠳᠠᠨ ᠤᠨᠠᠮᠠᠭᠴᠠ ᠬᠠᠮᠤᠭ ᠨᠢᠭᠦᠯ ᠥᠷᠢ ᠪᠡᠨ ᠲᠥᠯᠦᠴᠢᠬᠡᠭᠰᠡᠨ ᠨᠢ ᠲᠡᠷᠡ᠃ ᠶᠠᠭᠠᠬᠢᠭᠰᠠᠨ ᠴᠦ᠍ ᠪᠣᠯᠤᠷᠴᠠᠭᠠᠨ ᠰᠢᠭ᠋᠁ ᠬᠡᠯᠡᠯᠭᠡᠨ ᠦᠭᠡᠢ᠂ ᠪᠣᠯᠤᠷᠴᠠᠭᠠᠨ ᠤ᠋ ᠬᠢᠯᠢᠰ ᠬᠠᠰᠬᠢᠷᠤᠨ ᠠᠮᠢ ᠮᠤᠯᠲᠤᠷᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠮᠠᠰᠢ ᠵᠠᠪᠰᠢᠶᠠᠷᠬᠠᠨ ᠪᠠᠶᠠᠷᠯᠠᠭᠰᠠᠨ᠃
ᠡᠷᠭᠢᠭᠡᠳ ᠣᠳᠣ ᠣᠷᠣᠨ ᠳ᠋ᠤᠨᠢ ᠥᠪᠡᠷ ᠦ᠋ᠨ ᠠᠮᠢ ᠪᠠᠨ ᠬᠦᠷᠭᠡᠬᠦ ᠳ᠋ᠦ᠍ ᠥᠴᠦᠬᠡᠨ ᠴᠦ᠍ ᠬᠠᠷᠠᠮᠰᠠᠬᠤ ᠦᠭᠡᠢ᠃ ᠶᠡᠷᠦ ᠨᠢ ᠲᠡᠷᠡ ᠤᠤᠯ ᠠ᠋ᠴᠠ ᠪᠠᠨ ᠪᠣᠯᠤᠷᠴᠠᠭᠠᠨ ᠤ᠋ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢ ᠡᠷᠡᠮᠡᠯᠵᠡᠨ ᠬᠦᠰᠡᠭᠰᠡᠭᠡᠷ ᠢᠷᠡᠵᠡᠢ᠃ ᠨᠡᠭᠡᠷᠡᠨ ᠲᠡᠭᠦᠨ ᠢ᠋ ᠠᠯᠠᠬᠤ ᠳ᠋ᠤ᠌ ᠰᠡᠳᠬᠢᠯ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠲᠦᠪᠳᠡᠬᠦ ᠦᠭᠡᠢ ᠪᠠᠢᠳᠠᠭ᠃
ᠡᠦ ᠹᠧᠩ ᠮᠧᠢ ᠳ᠋ᠦ᠍᠂ ᠪᠣᠯᠤᠷᠴᠠᠭᠠᠨ ᠤ᠋ ᠠᠮᠢ ᠮᠤᠯᠲᠤᠷᠠᠭᠰᠠᠨ ᠨᠢ ᠨᠢᠭᠡ ᠤᠳᠠᠭᠠᠨ ᠤ᠋ ᠰᠡᠳᠬᠢᠯ ᠦ᠋ᠨ ᠥᠷᠢ ᠳᠠᠷᠤᠭᠠᠰᠤ ᠶ᠋ᠢ ᠬᠥᠩᠭᠡᠯᠡᠬᠦ ᠠᠯᠪᠠ ᠬᠠᠷᠢᠭᠤᠯᠲᠠ ᠪᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠬᠡᠷᠪᠡ ᠪᠣᠯᠤᠷᠴᠠᠭᠠᠨ ᠠᠯᠠᠭᠳᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠲᠡᠷᠡ ᠬᠦ᠌ ᠲᠥᠯᠥᠵᠦ ᠳᠡᠢᠯᠦᠰᠢ ᠦᠭᠡᠢ ᠬᠥᠮᠦᠨᠴᠢ ᠴᠢᠨᠠᠷ ᠤ᠋ᠨ ᠥᠷᠢ ᠳᠠᠩᠰᠠ᠂ ᠡᠭᠦᠷᠴᠦ ᠦᠯᠦ ᠳᠠᠭᠠᠭᠠᠬᠤ ᠰᠡᠳᠬᠢᠯ ᠦ᠋ᠨ ᠳᠠᠷᠤᠭᠠᠰᠤ ᠨᠢ ᠲᠡᠭᠦᠨ ᠢ᠋ ᠨᠠᠰᠤᠨ ᠲᠤᠷᠰᠢᠳᠠ ᠲᠠᠷᠴᠢᠯᠭᠠᠵᠤ᠂ ᠨᠢᠭᠡ ᠡᠳᠦᠷ ᠴᠦ᠍ ᠠᠭᠤᠵᠢᠮ ᠠᠮᠢᠰᠬᠤᠭᠤᠯᠬᠤ ᠳ᠋ᠤ᠌ ᠪᠡᠷᠬᠡ ᠪᠣᠯᠭᠠᠬᠤ ᠶᠤᠮ᠃
ᠢᠩᠭᠢᠵᠦ ᠠᠮᠢᠳᠤᠷᠠᠬᠤ ᠨᠢ ᠦᠬᠦᠭᠰᠡᠨ ᠳᠦ ᠪᠡᠨ ᠬᠦᠷᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠰᠠᠨᠠᠭᠠ ᠨᠢ ᠲᠠᠯᠪᠢᠭᠤᠷᠠᠨ ᠵᠣᠷᠢᠭ ᠨᠢ ᠪᠦᠳᠦᠭᠦᠷᠡᠵᠦ᠂ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠪᠣᠳᠣᠬᠤ ᠪᠠᠨ ᠪᠣᠯᠢᠴᠢᠬᠠᠳᠠᠭ᠃ ᠬᠡᠷᠪᠡ ᠬᠠᠤᠯᠢ ᠶ᠋ᠢᠨ ᠪᠠᠢᠭᠤᠯᠭᠠ ᠠ᠋ᠴᠠ ᠲᠡᠭᠦᠨ ᠦ᠌ ᠭᠡᠷᠡᠴᠢ ᠶ᠋ᠢ ᠢᠲᠡᠭᠡᠪᠡᠯ ᠪᠣᠯᠤᠷᠴᠠᠭᠠᠨ ᠯᠠᠪᠲᠠᠢ ᠰᠤᠯᠠᠯᠠᠭᠳᠠᠨ ᠠᠮᠢᠳᠤᠷᠠᠨᠠ᠃ ᠢᠩᠭᠢᠪᠡᠯ ᠲᠡᠷᠡ ᠡᠳᠦᠢ ᠴᠢᠨᠡᠭᠡᠨ ᠡᠳᠦᠷ ᠰᠢᠭᠤᠳᠤᠭᠰᠠᠨ ᠵᠣᠷᠢᠭ ᠲᠤ ᠪᠠᠨ ᠬᠦᠷᠴᠢᠬᠡᠯᠡ ᠭᠡᠰᠡᠨ ᠦᠭᠡ᠃ ᠬᠡᠷᠪᠡ ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠦᠷᠡ ᠳ᠋ᠦᠩ ᠨᠢ ᠶᠠᠮᠠᠷ ᠪᠣᠯᠬᠤ ᠶ᠋ᠢ ᠪᠤᠤ ᠮᠡᠳᠡ᠃ ᠬᠠᠷᠠ ᠵᠣᠷᠢᠭ ᠰᠢᠭᠤᠳᠤᠭᠰᠠᠨ ᠡᠨᠡ ᠪᠦᠰᠡᠭᠦᠢ᠂ ᠪᠤᠯᠤᠷᠴᠠᠭᠠᠨ ᠢ᠋ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠠ᠋ᠴᠠ ᠪᠤᠴᠠᠭᠠᠬᠤ ᠳ᠋ᠤ᠌᠂ ᠭᠠᠭᠴᠠ ᠬᠥᠮᠦᠨ ᠦ᠌ ᠦᠭᠡ ᠭᠡᠷᠡᠴᠢ ᠪᠣᠯᠵᠤ ᠪᠣᠯᠤᠨᠠᠤ ᠭᠡᠵᠦ ᠠᠰᠠᠭᠤᠭᠰᠠᠨ ᠨᠢ ᠡᠢᠮᠦ ᠵᠣᠷᠢᠯᠭᠠ ᠶ᠋ᠢᠨ ᠡᠭᠦᠰᠦᠯ ᠪᠠᠢᠵᠠᠢ᠃ ᠲᠡᠭᠦᠨ ᠦ᠌ ᠪᠦᠬᠦ ᠪᠣᠳᠣᠯ ᠰᠡᠳᠬᠢᠯ ᠨᠢ ᠪᠣᠯᠤᠷᠴᠠᠭᠠᠨ ᠢ᠋ ᠠᠪᠤᠷᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠦᠬᠦᠬᠦ ᠳᠡᠭᠡᠷᠡ ᠲᠥᠪᠯᠡᠷᠡᠵᠡᠢ᠃ ᠡᠢᠮᠦᠷᠬᠦᠦ ᠦᠬᠦᠵᠦ ᠠᠮᠢᠳᠤᠷᠠᠬᠤ ᠶ᠋ᠢᠨ ᠰᠣᠯᠢᠯᠴᠠᠭᠠ ᠲᠡᠭᠦᠨ ᠦ᠌ ᠵᠣᠷᠢᠭ ᠰᠦᠯᠳᠡ ᠶ᠋ᠢ ᠬᠥᠪᠴᠢᠯᠡᠵᠦ ᠪᠠᠲᠤ ᠰᠢᠭᠤᠷᠬᠠᠢ ᠪᠣᠯᠭᠠᠭᠰᠠᠨ ᠪᠠᠢᠯᠠ᠃
ᠪᠣᠯᠤᠷᠴᠠᠭᠠᠨ ᠤ᠋ ᠬᠢᠯᠢᠰ ᠬᠠᠰᠬᠢᠷᠤᠨ ᠮᠠᠨᠠᠷᠠᠭᠰᠠᠨ ᠨᠢ ᠲᠡᠭᠦᠨ ᠳ᠋ᠦ᠍ ᠳᠠᠩᠴᠤ ᠦᠭᠡᠨᠴᠡ ᠳᠣᠷᠣᠢ ᠰᠠᠨᠠᠭᠳᠠᠳᠠᠭ ᠪᠠᠢᠭᠰᠠᠨ᠃ ᠲᠡᠭᠦᠨ ᠢ᠋ ᠶᠠᠮᠠᠷ ᠡᠷᠡ ᠬᠦᠢᠰᠦᠲᠡᠨ ᠭᠡᠵᠦ ᠬᠡᠯᠡᠬᠦ ᠪᠣᠢ? ᠡᠦ ᠹᠧᠩ ᠮᠧᠢ ᠯᠠᠪᠲᠠᠢ ᠲᠡᠭᠡᠵᠦ ᠬᠠᠰᠬᠢᠷᠬᠤ ᠦᠭᠡᠢ᠂ ᠨᠡᠭᠡᠷᠡᠨ ᠬᠢᠯᠢᠰᠳᠡᠯᠡ ᠭᠡᠳ ᠲᠡᠭᠡᠵᠦ ᠬᠠᠰᠬᠢᠷᠬᠤ ᠦᠭᠡᠢ ᠶᠦᠮ᠃ ᠬᠤᠳᠠᠯ ᠭᠡᠪᠡᠯ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠬᠦᠷᠭᠡᠬᠦ ᠡᠳᠦᠷ ᠯᠡ ᠬᠠᠷᠠᠵᠤ ᠪᠠᠢ ᠭᠡᠵᠦ ᠰᠢᠲᠦ ᠵᠠᠭᠤᠨ ᠵᠣᠷᠢᠭ ᠰᠢᠭᠤᠳᠤᠨᠠ᠃ ᠲᠡᠷᠡ ᠡᠨᠡ ᠬᠦ᠌ ᠬᠠᠴᠢᠨ ᠰᠣᠨᠢᠨ ᠲᠥᠷᠥᠭᠳᠡᠯ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠲᠠᠢᠯᠪᠤᠷᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠭᠡᠲᠡᠯᠡ ᠡᠨᠡ ᠬᠦ᠌ ᠲᠥᠷᠥᠭᠳᠡᠯ ᠢ᠋ᠶ᠋ᠡᠨ ᠲᠠᠶᠠᠭᠳᠠᠬᠤ ᠪᠠᠷ ᠣᠷᠣᠯᠳᠣᠭᠰᠠᠨ ᠴᠦ᠍ ᠴᠢᠳᠠᠰᠢ ᠦᠭᠡᠢ ᠪᠠᠢᠪᠠ᠃ ᠴᠣᠬᠣᠮ ᠪᠣᠯᠤᠷᠴᠠᠭᠠᠨ ᠲᠡᠭᠦᠨ ᠢ᠋ ᠬᠠᠮᠠᠭᠠᠯᠠᠬᠤ ᠦᠭᠡᠢ ᠠᠮᠢ ᠪᠠᠨ ᠦᠯᠡᠳᠡᠭᠡᠭᠰᠡᠨ ᠡᠴᠡ ᠪᠣᠯᠤᠭᠰᠠᠨ ᠬᠣᠣᠷ ᠶᠤᠮ ᠤᠤ? ᠥᠪᠡᠷ ᠢ᠋ᠶ᠋ᠡᠨ ᠶᠠᠯᠠ ᠪᠠᠨ ᠲᠤᠰᠢᠶᠠᠨ ᠭᠡᠷᠡᠴᠢ ᠬᠢᠬᠦ ᠳ᠋ᠦ᠍ ᠪᠣᠢ ᠪᠣᠯᠤᠭᠰᠠᠨ ᠡᠷᠴᠢ ᠵᠣᠷᠢᠭ ᠤᠤ? ᠥᠪᠡᠷ ᠦ᠋ᠨ ᠠᠵᠢᠯ ᠤ᠋ᠨ ᠡᠨᠳᠡᠯ᠂ ᠠᠮᠢᠳᠤᠷᠠᠯ ᠤ᠋ᠨ ᠭᠠᠵᠢᠭᠤ ᠪᠠᠨ ᠵᠢᠭᠰᠢᠭᠰᠡᠨ ᠬᠣᠷᠣᠰᠤᠯ ᠠ᠋ᠴᠠ ᠤᠤ? ᠪᠦᠷ ᠪᠢᠰᠢ ᠰᠢᠭ᠃ ᠡᠰᠡᠬᠦᠯᠡ ᠲᠥᠷᠥᠯᠬᠢ ᠵᠠᠩ ᠴᠢᠨᠠᠷ ᠠ᠋ᠴᠠ ᠪᠣᠯᠤᠭᠰᠠᠨ ᠥᠰᠢᠶᠡᠷᠬᠡᠬᠦ ᠪᠣᠳᠣᠯ ᠶᠤᠮ ᠤᠤ? ᠮᠡᠳᠡᠬᠦ ᠦᠭᠡᠢ᠃ ᠲᠡᠷᠡ ᠡᠢᠮᠦ ᠪᠤᠳᠤᠯᠢᠶᠠᠨᠲᠤ ᠰᠡᠳᠬᠢᠯᠭᠡ ᠶ᠋ᠢᠨ ᠳᠤᠮᠳᠠ ᠳᠠᠬᠢᠭᠠᠳ ᠶᠠᠭᠤ ᠴᠦ᠍ ᠳᠤᠤᠭᠠᠷᠤᠯ ᠦᠭᠡᠢ ᠪᠡᠷ ᠠᠮᠢ ᠨᠠᠰᠤᠨ ᠤ᠋ ᠪᠠᠨ ᠡᠴᠦᠰ ᠦ᠋ᠨ ᠰᠧᠺᠦ᠋ᠨ᠋ᠳ᠋ ᠢ᠋ ᠬᠦᠯᠢᠶᠡᠨᠡ ᠭᠡᠵᠦ ᠰᠢᠢᠳᠴᠡᠢ᠃
ᠭᠡᠲᠡᠯᠡ ᠥᠨᠥᠳᠥᠷ ᠲᠦᠪᠰᠢᠨ ᠦ᠌ ᠰᠢᠭᠦᠯᠲᠡ ᠨᠡᠬᠡᠮᠵᠢᠯᠡᠯᠲᠡ ᠳ᠋ᠦ᠍᠂ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠯᠡ ᠪᠠᠢᠳᠠᠭ ᠠᠷᠪᠠᠨ ᠮᠣᠷᠢ ᠪᠠᠷ ᠲᠠᠲᠠᠭᠰᠠᠨ ᠴᠦ᠍ ᠦᠯᠦ ᠡᠷᠭᠢᠮᠡ ᠵᠣᠷᠢᠭ ᠰᠢᠢᠳᠪᠦᠷᠢ ᠨᠢ ᠡᠷᠭᠢᠭᠡᠳ ᠪᠠᠭᠤᠷᠠᠵᠤ ᠡᠬᠢᠯᠡᠪᠡ᠃ ᠢᠩᠭᠢᠭᠡᠳ ᠲᠡᠷᠡ ᠴᠠᠭᠠᠪᠤᠷᠯᠠᠨ ᠲᠤᠰᠢᠶᠠᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠨ ᠨᠠᠰᠤᠨ ᠲᠤᠷᠰᠢ ᠳᠠᠷᠤᠬᠤ ᠪᠠᠷ ᠵᠣᠷᠢᠭᠰᠠᠨ ᠬᠡᠦᠬᠡᠨ ᠦᠶᠡ ᠶ᠋ᠢᠨ ᠨᠢᠭᠤᠴᠠ ᠵᠦᠢᠯ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠲᠤᠰᠢᠶᠠᠵᠠᠢ᠃ ᠬᠦᠦ ᠶ᠋ᠢᠨ ᠬᠢᠨᠢ ᠠᠮᠢᠳᠤ ᠪᠠᠢᠭᠠ ᠶᠠᠪᠤᠳᠠᠯ ᠦᠨᠡᠬᠡᠷ ᠲᠡᠭᠦᠨ ᠦ᠌ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠭᠤᠷ ᠶᠠᠪᠤᠳᠠᠯ ᠪᠣᠯᠵᠠᠢ᠃ ᠲᠡᠷᠡ ᠲᠣᠷᠮᠣᠭᠣᠷ ᠬᠦᠦ᠁ ᠨᠡᠭᠡᠷᠡᠨ ᠢᠲᠡᠭᠡᠰᠢ ᠦᠭᠡᠢ᠃ ᠦᠨᠡᠨ ᠭᠡᠵᠢ ᠤᠤ? ᠲᠡᠷᠡ ᠡᠴᠦᠰ ᠲᠤ ᠪᠠᠨ ᠬᠠᠰᠢ ᠯᠠ ᠢᠲᠡᠭᠡᠯᠡ᠃ ᠲᠦᠪᠰᠢᠨ ᠯᠠᠪ ᠲᠡᠭᠦᠨ ᠢ᠋ ᠮᠡᠬᠡᠯᠡᠬᠦ ᠦᠭᠡᠢ ᠶᠦᠮ᠃ ᠢᠡᠭᠭᠢᠵᠤ ᠰᠠᠳᠭᠢᠯ ᠢ᠋ᠶ᠋ᠡᠷ ᠤᠨᠠᠭᠰᠠᠨ ᠭᠰᠠᠨᠠ ᠲᠡᠭᠦᠨ ᠢ᠋ ᠮᠡᠬᠡᠯᠡᠬᠦ ᠬᠡᠷᠡᠭᠴᠡᠭᠡ᠂ ᠴᠢᠬᠤᠯᠠ ᠶᠡᠷᠦᠳᠡᠭᠡᠨ ᠦᠭᠡᠢ᠂ ᠨᠡᠩ ᠡᠨᠡ ᠲᠥᠪᠯᠡᠭᠦᠨ ᠴᠢᠩᠭᠠ ᠰᠢᠭᠦᠬᠦ ᠲᠢᠩᠬᠢᠮ ᠳ᠋ᠦ᠍ ᠲᠡᠭᠦᠨ ᠢ᠋ ᠮᠡᠭᠡᠯᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ᠂ ᠠᠢ᠂ ᠶᠠᠭᠤ ᠭᠡᠵᠦ ᠬᠡᠯᠡᠨᠡ ᠳᠡ᠃
ᠲᠡᠷᠡ ᠠᠩᠬᠠᠨ ᠳᠤ ᠪᠠᠨ ᠠᠯᠠᠭᠳᠠᠬᠤ ᠠ᠋ᠴᠠ ᠪᠠᠨ ᠠᠶᠤᠬᠤ ᠦᠭᠡᠢ ᠪᠠᠢᠭᠰᠠᠨ ᠤ᠋ ᠤᠴᠢᠷ ᠰᠢᠯᠲᠠᠭᠠᠨ ᠪᠣᠯ᠂ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠨᠢ ᠡᠨᠡᠷᠢᠬᠦ ᠠᠪᠤ ᠡᠵᠢ᠂ ᠳᠡᠷᠭᠡᠳᠡ ᠨᠢ ᠲᠦᠰᠢᠬᠦ ᠡᠷᠡ ᠨᠥᠬᠥᠷ᠂ ᠠᠬᠠᠰ ᠵᠠᠬᠠᠰ᠂ ᠳᠣᠷᠣᠭᠰᠢ ᠪᠠᠨ ᠬᠠᠢᠷᠠᠯᠠᠬᠤ ᠦᠷᠡ ᠬᠡᠦᠬᠡᠳ ᠭᠡᠵᠦ ᠦᠭᠡᠢ ᠪᠠᠢᠭᠰᠠᠨ ᠠ᠋ᠴᠠ ᠪᠣᠯᠵᠠᠢ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠡᠭᠦᠨ ᠦ᠌ ᠲᠥᠯᠥᠭᠡ ᠵᠣᠪᠠᠵᠤ ᠭᠤᠨᠢᠬᠤ ᠬᠥᠮᠦᠨ ᠦᠭᠡᠢ᠃ ᠲᠡᠷᠡ ᠴᠦ᠍ ᠰᠠᠨᠠᠭᠠᠯᠵᠠᠵᠤ ᠳᠤᠷᠠᠰᠬᠤ ᠬᠥᠮᠦᠨ ᠦᠭᠡᠢ᠃ ᠶᠠᠭᠠᠬᠢᠭᠰᠠᠨ ᠠᠵᠠ ᠪᠤᠰᠤ ᠤᠴᠠᠷᠠᠯ ᠪᠣᠢ? ᠶᠠᠭ ᠬᠢᠲᠤᠭᠠᠨ ᠢᠷ ᠲᠦ᠍ ᠬᠦᠵᠦᠭᠦᠦ ᠲᠤᠯᠤᠭᠰᠠᠨ ᠪᠠᠴᠢᠮ ᠦᠶᠡ ᠳ᠋ᠦ᠍᠂ ᠦᠬᠦᠯ ᠦ᠋ᠨ ᠨᠦᠬᠡᠨ ᠳᠦ ᠪᠡᠨ ᠥᠩᠭᠡᠢᠭᠰᠡᠨ ᠢᠷᠣᠠ ᠶ᠋ᠢᠨ ᠴᠠᠭ ᠲᠤ᠌᠂ ᠲᠥᠷᠥᠭᠰᠡᠨ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠨᠠ ᠭᠡᠭᠴᠢ ᠭᠡᠮᠡᠨ ᠪᠣᠳᠣᠬᠤ ᠳᠣᠳᠣᠮ ᠥᠪᠡᠷ ᠦ᠋ᠨ ᠬᠢᠭᠰᠡᠨ ᠠᠵᠢᠯᠯᠠᠭᠠ ᠳᠤ ᠪᠠᠨ ᠭᠡᠮᠰᠢᠨ᠂ ᠡᠬᠡ ᠶ᠋ᠢᠨ ᠬᠠᠢᠷᠠ ᠪᠠᠨ ᠥᠭᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠳᠦ ᠪᠡᠨ ᠴᠢᠰᠤ ᠪᠠᠷ ᠤᠬᠢᠯᠠᠮᠠᠷ ᠰᠠᠨᠠᠭᠳᠠᠨᠠ᠃
ᠠᠷᠪᠠᠨ ᠲᠠᠪᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠬᠦᠦ ᠳᠦ ᠪᠡᠨ ᠬᠡᠴᠢᠨᠡᠭᠡᠨ ᠣᠰᠣᠯᠳᠠᠵᠤ᠂ ᠶᠠᠭᠠᠬᠢᠵᠤ ᠪᠤᠷᠤᠭᠤᠳᠤᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠵᠤ ᠰᠡᠳᠬᠢᠵᠦ ᠣᠯᠬᠤᠶᠠ ᠪᠡᠷᠬᠡ ᠡᠴᠡ ᠪᠡᠷᠬᠡ ᠪᠣᠯᠤᠭᠰᠠᠨ᠃ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠲᠡᠭᠦᠨ ᠢ᠋ ᠠᠮᠢᠳᠤ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠶᠦᠮ᠃ ᠶᠠᠭ ᠦᠨᠡᠨ ᠭᠣᠣᠯ ᠢ᠋ᠶ᠋ᠠᠷ ᠬᠡᠯᠡᠪᠡᠯ᠂ ᠬᠦᠦ ᠪᠡᠨ ᠬᠣᠷᠸᠠ ᠳ᠋ᠤ᠌ ᠤᠨᠠᠭᠰᠠᠨ ᠴᠠᠭ ᠠ᠋ᠴᠠ ᠨᠢ ᠲᠡᠭᠦᠨ ᠦ᠌ ᠬᠥᠮᠦᠨ ᠪᠣᠯᠤᠨ ᠠᠮᠢᠳᠤᠷᠠᠬᠤ ᠶ᠋ᠢ ᠬᠦᠰᠡᠭᠡ ᠦᠭᠡᠢ ᠪᠢᠯᠡ᠃ ᠭᠡᠲᠡᠯᠡ ᠥᠨᠥᠳᠥᠷ ᠦ᠋ᠨ ᠪᠤᠳᠤᠯᠢᠶᠠᠨᠲᠤ ᠣᠷᠴᠢᠨ ᠲᠣᠭᠣᠷᠢᠨ᠂ ᠬᠤᠪᠢ ᠵᠠᠶᠠᠭᠠᠨ ᠳᠤ ᠪᠠᠨ ᠠᠪᠴᠤ ᠬᠡᠯᠡᠪᠡᠯ᠂ ᠡᠨᠡ ᠬᠣᠷᠸᠠ ᠳ᠋ᠤ᠌ ᠡᠢᠮᠦ ᠨᠢᠭᠡ ᠬᠦᠦ ᠳ᠋ᠦ᠍ ᠠᠮᠢ ᠨᠠᠰᠤ ᠣᠯᠭᠣᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠠᠷᠢᠯᠭᠠᠵᠤ ᠴᠢᠳᠠᠰᠢ ᠦᠭᠡᠢ ᠪᠤᠷᠤᠭᠤᠳᠤᠯ ᠭᠡᠨᠡᠳᠡᠯ᠂ ᠬᠦᠨᠳᠦ ᠶᠡᠬᠡ ᠶᠠᠯᠠ ᠨᠢᠭᠦᠯ ᠪᠠᠢᠵᠤ ᠮᠡᠳᠡᠨᠡ᠃ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠲᠡᠷᠡ ᠬᠡᠳᠦᠢ ᠪᠡᠷ ᠰᠠᠳᠭᠡᠯ ᠡᠮᠲᠡᠷᠡᠵᠦ᠂ ᠭᠡᠳᠡᠰᠦ ᠲᠠᠰᠤᠷᠠᠮᠠᠷ ᠭᠤᠨᠢᠨ ᠵᠣᠪᠠᠭᠰᠠᠨ ᠴᠦ᠍ ᠵᠣᠷᠢᠭ ᠰᠢᠭᠤᠳᠤᠨ ᠨᠢᠭᠡ ᠤᠳᠠᠭᠠ ᠠᠭᠤᠯᠵᠠᠬᠤ ᠱᠠᠭᠠᠷᠳᠠᠯᠭᠠ ᠲᠠᠯᠪᠢᠵᠠᠢ᠃ ᠥᠪᠡᠷ ᠦ᠋ᠨ ᠳᠣᠲᠣᠭᠠᠳᠤ ᠰᠡᠳᠬᠢᠯᠭᠡ ᠪᠡᠨ ᠲᠡᠷᠡ ᠨᠡᠭᠡᠷᠡᠨ ᠲᠠᠢᠯᠪᠤᠷᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠵᠥᠪᠬᠡᠨ ᠠᠯᠠᠭᠳᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠬᠣᠯᠠ ᠠ᠋ᠴᠠ ᠪᠤᠶᠤ ᠲᠠᠨᠢᠯᠴᠠᠬᠤ ᠦᠭᠡᠢ ᠪᠡᠷ ᠲᠡᠭᠦᠨ ᠲᠡᠢ ᠰᠡᠮᠡᠬᠡᠷ ᠨᠢᠭᠡ ᠠᠭᠤᠯᠵᠠᠶᠠ᠃ ᠲᠡᠷᠡ ᠡᠢᠮᠦ ᠶᠠᠯᠠ ᠨᠢᠭᠦᠯ ᠲᠡᠢ ᠪᠡᠷ ᠬᠥᠮᠦᠨ ᠦ᠌ ᠡᠬᠡ ᠪᠣᠯᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ᠂ ᠬᠠᠷᠢᠨ ᠲᠡᠷᠡ ᠡᠢᠮᠦ ᠨᠢᠭᠡ ᠬᠦᠦ ᠶ᠋ᠢ ᠲᠥᠷᠥᠵᠦ ᠦᠯᠡᠳᠡᠭᠡᠰᠡᠨ ᠪᠠᠯᠠᠯᠵᠤ ᠪᠣᠯᠣᠰᠢ ᠦᠭᠡᠢ ᠲᠡᠦᠬᠡ ᠪᠡᠨ ᠪᠣᠳᠣᠬᠤ ᠳ᠋ᠤ᠌᠂ ᠲᠡᠭᠦᠨ ᠦ᠌ ᠬᠣᠵᠢᠮ ᠢᠷᠡᠭᠡᠳᠦᠢ ᠶ᠋ᠢ ᠰᠠᠨᠠᠭᠠᠰᠢᠷᠠᠬᠤ ᠪᠣᠳᠣᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠲᠥᠷᠥᠵᠡᠢ᠃
ᠠᠢ᠂ ᠵᠠᠶᠠᠭᠠ ᠳᠤᠲᠠᠭᠤ ᠬᠦᠦ ᠮᠢᠨᠢ᠂ ᠨᠠᠰᠤᠨ ᠲᠤᠷᠰᠢ ᠳᠤ ᠪᠠᠨ ᠡᠬᠡ ᠨᠢ ᠬᠡᠨ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠣᠯ ᠮᠢᠨᠦ ᠬᠤᠪᠢ ᠪᠤᠶᠠᠨ ᠳᠠ᠃ ᠲᠡᠷᠡ ᠲᠦᠪᠰᠢᠨ ᠭᠤᠸᠠᠢ ᠳ᠋ᠤ᠌ ᠨᠢᠭᠤᠴᠠ ᠪᠣᠯᠬᠢ ᠬᠠᠷᠢᠴᠠᠭᠠ ᠲᠠᠢ᠂ ᠨᠡᠢᠯᠡᠵᠦ ᠬᠥᠮᠦᠨ ᠬᠣᠣᠷᠯᠠᠯᠠ ᠭᠡᠮᠡᠷ ᠰᠡᠵᠢᠭᠲᠡᠨ ᠪᠣᠯᠤᠷᠴᠠᠭᠠᠨ ᠲᠠᠢ ᠠᠭᠤᠯᠵᠠᠬᠤ ᠭᠡᠵᠦ ᠠᠮᠠ ᠨᠡᠭᠡᠭᠡᠭᠰᠡᠨ ᠨᠢ ᠬᠡᠳᠦᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠡᠴᠡ ᠪᠣᠯᠤᠭᠰᠠᠨ ᠴᠦ᠍ ᠬᠠᠷᠢᠨ ᠴᠠᠭᠠᠨᠠᠬᠢ ᠦᠨᠡᠨ ᠰᠡᠳᠬᠢᠯ ᠦ᠋ᠨ ᠬᠢᠨᠢ ᠡᠷᠡᠮᠡᠯᠵᠡᠯ ᠪᠠᠢᠵᠠᠢ᠃ ᠬᠡᠷᠪᠡ ᠡᠨᠡ ᠵᠠᠪᠰᠢᠶᠠᠨ ᠢ᠋ ᠠᠯᠳᠠᠪᠠᠯ ᠳᠠᠬᠢᠭᠠᠳ ᠶᠠᠮᠠᠷ ᠦᠷᠡ ᠳ᠋ᠦᠩ ᠲᠡᠢ ᠪᠣᠯᠬᠤ ᠶ᠋ᠢ ᠲᠡᠷᠡ ᠣᠳᠣᠬᠠᠨ ᠳ᠋ᠤ᠌ ᠲᠥᠰᠦᠪᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠨᠠᠷᠢᠨ ᠲᠥᠰᠥᠪᠯᠡᠨ ᠪᠣᠳᠣᠬᠤ ᠠ᠋ᠴᠠ ᠴᠦ᠍ ᠵᠢᠷᠦᠬᠡᠰᠢᠶᠡᠵᠦ ᠪᠠᠢᠯᠠ᠃
ᠲᠡᠷᠡ ᠪᠣᠯᠤᠷᠴᠠᠭᠠᠨ ᠲᠠᠢ ᠠᠭᠤᠯᠵᠠᠭᠠᠳ ᠶᠠᠭᠤ ᠬᠡᠯᠡᠬᠦ ᠶᠦᠮ? ᠪᠦᠬᠦ ᠥᠩᠭᠡᠷᠡᠯᠲᠡ ᠪᠡᠨ ᠬᠡᠯᠡᠬᠦ ᠤᠤ? ᠬᠦᠦ ᠪᠡᠨ ᠠᠰᠠᠷᠠᠨ ᠬᠠᠷᠠᠭᠠᠯᠵᠠᠬᠤ ᠶ᠋ᠢ ᠨᠠᠢᠳᠠᠬᠤ ᠤᠤ? ᠡᠴᠦᠰ ᠦ᠋ᠨ ᠰᠠᠯᠤᠯᠲᠠ ᠬᠢᠬᠦ ᠤᠤ? ᠡᠨᠡ ᠪᠦᠬᠦᠨ ᠡᠴᠡ ᠠᠯᠢ ᠶ᠋ᠢ ᠨᠢ ᠬᠡᠯᠡᠬᠦ ᠪᠡᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠲᠣᠭᠲᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠶᠢᠭᠰᠠᠨ᠃ ᠶᠠᠭᠤ ᠴᠦ᠍ ᠪᠣᠯᠤᠭᠰᠠᠨ ᠨᠢᠭᠡ ᠠᠭᠤᠯᠵᠠᠬᠤ ᠰᠠᠨᠠᠭᠠ ᠲᠥᠷᠥᠭᠳᠡᠭᠡᠳ ᠪᠠᠢᠨᠠ᠃ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠭᠠᠳ ᠦᠭᠡ ᠬᠡᠯᠡᠯᠴᠡᠬᠦ ᠦᠭᠡᠢ᠃ ᠦᠭᠡ ᠬᠡᠯᠡᠯᠴᠡᠪᠡᠯ ᠤᠬᠢᠯᠠᠵᠤ ᠮᠡᠳᠡᠨᠡ᠃ ᠪᠢ ᠨᠢᠳᠦᠨ ᠳᠦ ᠪᠡᠨ ᠰᠢᠩᠭᠡᠭᠡᠵᠦ ᠠᠪᠤᠮᠠᠷ ᠬᠠᠷᠠᠨᠠ᠃ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠦᠨᠡᠨᠴᠢ ᠪᠡᠷ ᠳᠤᠰᠬᠠᠳᠠᠭ ᠨᠢ ᠨᠢᠳᠦ ᠭᠡᠵᠦ ᠬᠥᠮᠦᠰ ᠬᠡᠯᠡᠯᠴᠡᠳᠡᠭ ᠪᠢᠯᠡ᠃ ᠦᠭᠡ ᠦᠨᠡᠨ ᠡᠴᠡ ᠬᠡᠲᠦᠷᠡᠵᠦ ᠪᠠᠭᠤᠷᠠᠵᠤ ᠪᠦᠷ ᠪᠣᠯᠤᠨᠠ᠃ ᠭᠡᠲᠡᠯᠡ ᠨᠢᠳᠦᠨ ᠡᠴᠡ ᠰᠠᠴᠤᠷᠠᠭᠰᠠᠨ ᠭᠡᠷᠡᠯ ᠭᠢᠯᠪᠠᠭᠠ ᠪᠣᠯ ᠦᠨᠡᠨᠴᠢ ᠰᠢᠳᠤᠷᠭᠤ ᠶ᠋ᠢᠨ ᠲᠥᠯᠥᠭᠡᠯᠡᠯ᠂ ᠵᠢᠷᠦᠬᠡᠨ ᠡᠴᠡ ᠦᠷᠪᠢᠰᠦᠨ ᠰᠢᠲᠠᠭᠰᠠᠨ ᠭᠡᠷᠡᠯᠲᠦ ᠴᠠᠮᠬᠠᠭ᠃ ᠪᠢ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠡᠷ ᠲᠡᠭᠦᠨ ᠢ᠋ ᠤᠳᠠᠭᠠᠨ ᠭᠡᠭᠴᠢ ᠬᠠᠷᠠᠨᠠ ᠁
ᠡᠦ ᠹᠧᠩ ᠮᠧᠢ ᠨᠡᠭᠡᠷᠡᠨ ᠳᠣᠲᠣᠭᠠᠳᠤ ᠰᠡᠳᠬᠢᠯ ᠦ᠋ᠨ ᠤᠭ ᠠ᠋ᠴᠠ ᠪᠠᠨ ᠪᠣᠯᠤᠷᠴᠠᠭᠠᠨ ᠢ᠋ ᠠᠪᠤᠷᠠᠵᠤ ᠭᠠᠷᠭᠠᠬᠤ ᠪᠠᠷ ᠴᠢᠷᠮᠠᠢᠭᠰᠠᠨ ᠪᠢᠯᠡ᠃
ᠲᠡᠷᠡ ᠤᠳᠠᠭᠠᠨ ᠤ᠋ ᠢᠯᠡ ᠰᠢᠭᠦᠯᠲᠡ ᠡᠴᠡ ᠨᠠᠭᠠᠰᠢ ᠨᠢᠭᠡᠨᠲᠡ ᠠᠯᠢᠪᠠ ᠪᠣᠭᠦᠨ ᠢ᠋ ᠨᠥᠬᠥᠴᠡᠯ ᠦᠭᠡᠢ ᠪᠡᠷ ᠪᠡᠶᠡ ᠳᠦ ᠪᠡᠨ ᠡᠭᠦᠷᠴᠦ ᠡᠳᠦᠢ ᠲᠡᠳᠦᠢ ᠬᠢᠯᠢᠰᠳᠡᠭᠰᠡᠨ ᠴᠦ᠍ ᠬᠠᠮᠢᠶᠠᠷᠤᠭᠰᠠᠨ ᠦᠭᠡᠢ᠃ ᠡᠴᠦᠰ ᠲᠤ ᠪᠠᠨ ᠪᠣᠯᠤᠷᠴᠠᠭᠠᠨ ᠢ᠋ ᠠᠪᠤᠷᠠᠬᠤ ᠵᠣᠷᠢᠯᠭᠠ ᠳᠤ ᠪᠠᠨ ᠬᠦᠷᠴᠢᠬᠡᠪᠡᠯ ᠰᠠᠨᠠᠭᠠ ᠬᠠᠩᠬᠤ ᠪᠣᠯᠤᠨᠠ᠃ ᠢᠩᠭᠢᠭᠡᠳ ᠲᠡᠷᠡ ᠪᠤᠰᠤᠳ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠬᠤ ᠨᠠᠭᠠᠲᠠᠢ ᠴᠠᠭᠠᠲᠠᠢ ᠳᠠᠯᠳᠠ ᠨᠢᠭᠤᠴᠠ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ ᠪᠦᠬᠦᠨ ᠢ᠋ ᠦᠬᠦᠨ ᠨᠢᠭᠤᠭᠰᠠᠨ ᠪᠢᠯᠡ᠃
ᠰᠠᠨᠠᠮᠰᠠᠷ ᠦᠭᠡᠢ ᠲᠦᠪᠰᠢᠨ ᠲᠡᠭᠦᠨ ᠢ᠋ ᠶᠠᠯᠠ ᠦᠭᠡᠢ ᠭᠡᠮᠡᠨ ᠨᠡᠢᠲᠡᠯᠡᠬᠦ ᠳ᠋ᠦ᠍ ᠲᠡᠷᠡ ᠳᠣᠣᠷᠠ ᠨᠢ ᠪᠣᠯᠤᠷᠴᠠᠭᠠᠨ ᠡᠷᠭᠢᠭᠡᠳ ᠠᠶᠤᠯᠲᠠᠢ ᠪᠣᠯᠤᠭᠰᠠᠨ ᠭᠡᠮᠡᠨ ᠲᠠᠭᠠᠮᠠᠭᠯᠠᠵᠤ᠂ ᠡᠳᠦᠢ ᠴᠢᠨᠡᠭᠡᠨ ᠭᠡᠷᠡᠴᠢ ᠪᠠᠷᠢᠮᠲᠠ᠂ ᠲᠡᠷᠡᠴᠢᠯᠡᠨ ᠠᠯᠳᠠᠷ ᠨᠡᠷᠡ ᠪᠡᠨ ᠬᠠᠶᠠᠨ ᠠᠮᠢ ᠨᠠᠰᠤ ᠪᠠᠨ ᠴᠦᠯᠡᠭᠰᠡᠨ ᠴᠢᠷᠮᠠᠢᠯᠲᠠ ᠪᠦᠷ ᠦᠵᠡᠲᠡᠯᠡ ᠬᠣᠭᠣᠰᠣᠨ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ ᠭᠡᠵᠦ ᠪᠣᠳᠣᠵᠠᠢ᠃
ᠲᠡᠷᠡ ᠠᠭᠤᠷᠯᠠᠯᠠ᠂ ᠲᠡᠷᠡ ᠬᠣᠷᠣᠰᠤᠯᠠ᠃ ᠠ! ᠪᠣᠯᠵᠠᠢ᠃ ᠨᠠᠳᠠ ᠳᠠᠬᠢᠭᠠᠳ ᠨᠢᠭᠤᠬᠤ ᠵᠦᠢᠯ ᠦᠭᠡᠢ᠃ ᠪᠦᠬᠦᠨ ᠢ᠋ ᠬᠡᠯᠡᠨᠡ᠃ ᠪᠦᠬᠦᠨ ᠢ᠋ ᠰᠣᠨᠣᠰᠬᠠᠨᠠ᠃ ᠶᠠᠭᠠᠬᠢᠪᠠᠯ ᠶᠠᠭᠠᠬᠢᠭ ᠴᠠᠭᠠᠰᠢ ᠪᠠᠨ᠃ ᠥᠨᠳᠥᠷ ᠪᠣᠭᠣᠨᠢ ᠶ᠋ᠢ ᠲᠡᠭᠷᠢ ᠮᠡᠳᠡᠵᠦ᠂ ᠦᠨᠡᠨ ᠬᠤᠳᠠᠯ ᠢ᠋ ᠪᠤᠷᠬᠠᠨ ᠮᠡᠳᠡᠬᠦ᠃ ᠶᠠᠮᠠᠷ ᠦᠷᠡ ᠳ᠋ᠦᠩ ᠣᠯᠬᠤ ᠶ᠋ᠢ ᠬᠤᠪᠢ ᠵᠠᠶᠠᠭᠠ ᠮᠡᠳᠡᠭ ᠭᠡᠵᠦ ᠵᠣᠷᠢᠭ ᠰᠢᠭᠤᠳᠤᠭᠰᠠᠨ ᠪᠠᠢᠯᠠ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ