ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠭᠤᠴᠢᠨ ᠲᠠᠪᠤ> Хялгасан дөрөөн дээр – Хасвулаг зохиов <35>
103ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠭᠤᠴᠢᠨ ᠲᠠᠪᠤ>
— ᠡᠦ ᠹᠧᠩ ᠮᠧᠢ᠂ ᠥᠴᠥᠭᠡᠳᠦᠷ ᠦᠳᠡᠰᠢ ᠪᠣᠯᠤᠷᠴᠠᠭᠠᠨ ᠡᠬᠡᠨᠡᠷ ᠲᠤ ᠪᠠᠨ ᠬᠣᠣᠷᠲᠤ ᠡᠮ ᠲᠠᠷᠢᠭᠠᠳ ᠠᠯᠠᠵᠠᠢ᠃ ᠣᠳᠣ ᠬᠦᠰᠡᠯ ᠴᠢᠨᠢ ᠪᠡᠶᠡᠯᠡᠭᠳᠡᠵᠦ᠂ ᠲᠠᠪᠠ ᠴᠢᠨᠢ ᠬᠠᠨᠤᠭᠰᠠᠨ ᠪᠢᠵᠡ᠃ ᠵᠥᠪᠬᠡᠨ ᠦᠬᠦᠭᠰᠡᠨ ᠨᠢ ᠴᠢᠨᠦ ᠲᠥᠯᠦᠪᠯᠡᠭᠡᠨ ᠡᠴᠡ ᠪᠠᠬᠠᠨ ᠬᠤᠷᠳᠤᠨ ᠪᠣᠯᠤᠭᠰᠠᠨ ᠪᠢᠵᠡ?
— ᠠ ᠂ ᠴᠢ ᠶᠠᠭᠤ᠁ ᠶᠠᠭᠤ ᠭᠡᠨᠡ?
— ᠴᠢ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠵᠠᠯᠢᠯᠠᠨᠠ ᠪᠣᠢ? ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠡᠮᠦᠨᠡ ᠴᠢ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠨᠢᠭᠡ ᠬᠠᠢᠷᠴᠠᠭ B ᠵᠢᠷᠭᠤᠳᠤᠭᠠᠷ ᠢ᠋ ᠥᠭᠬᠦ ᠳᠦ ᠪᠡᠨ ᠬᠣᠣᠷᠲᠤ ᠴᠢᠨᠠᠷ ᠤ᠋ᠨ Aᠭᠤᠷᠪᠠᠳᠤᠭᠠᠷ ᠢ᠋ ᠨᠡᠢᠯᠡᠭᠦᠯᠵᠦ ᠥᠭᠭᠦᠭᠰᠡᠨ ᠡᠴᠡ ᠦᠵᠡᠰᠬᠦᠯᠡᠩ ᠬᠣᠣᠷᠯᠠᠭᠳᠠᠵᠠᠢ᠃ ᠪᠣᠯᠤᠷᠴᠠᠭᠠᠨ ᠡᠳᠦᠭᠡ ᠪᠣᠯᠲᠠᠯᠠ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠦᠬᠦᠭᠰᠡᠨ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠭᠠᠷ᠃ ᠴᠢ ᠨᠡᠭᠡᠷᠡᠨ ᠬᠥᠮᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠮᠣᠭᠠᠢ ᠪᠠᠷᠢᠭᠤᠯᠤᠭᠠᠳ ᠥᠪᠡᠷ ᠦ᠋ᠨ ᠵᠣᠷᠢᠯᠭᠠ ᠳᠤ ᠪᠠᠨ ᠬᠦᠷᠳᠡᠭ ᠵᠠᠭᠤᠢ ᠵᠢᠰᠤᠷ ᠬᠥᠮᠦᠨ ᠪᠠᠢᠨᠠ᠃
— ᠴᠢ ᠶᠠᠮᠠᠷ ᠬᠥᠮᠦᠨ ᠪᠣᠢ? ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠥᠴᠦᠬᠡᠨ ᠴᠤ᠌ ᠡᠰᠢ ᠪᠠᠷᠢᠮᠲᠠ ᠦᠭᠡᠢ ᠪᠡᠷ ᠬᠥᠮᠦᠨ ᠢ᠋ ᠭᠦᠵᠢᠷᠯᠡᠨᠡ ᠪᠣᠢ?
— ᠮᠢᠨᠦ ᠬᠡᠨ ᠪᠣᠯᠬᠤ ᠶ᠋ᠢ ᠤᠷᠢᠳ ᠢ᠋ᠶ᠋ᠠᠷ ᠯᠠᠪᠯᠠᠭᠰᠠᠨ ᠤ᠋ ᠬᠡᠷᠡᠭ ᠦᠭᠡᠢ᠃ ᠴᠢ ᠡᠰᠢ ᠪᠠᠷᠢᠮᠲᠠ ᠦᠭᠡᠢ ᠪᠡᠷ ᠭᠦᠵᠢᠷᠯᠡᠯᠡ ᠭᠡᠨᠡ ᠤᠤ? ᠨᠡᠭᠡᠷᠡᠨ ᠬᠢᠯᠢᠰ! ᠬᠡᠷᠪᠡ ᠭᠦᠵᠢᠷᠯᠡᠭᠰᠡᠨ ᠪᠣᠯ ᠲᠠ ᠥᠴᠥᠭᠡᠳᠦᠷ ᠰᠥᠨᠢ ᠳᠦ ᠪᠡᠨ ᠪᠣᠯᠤᠷᠴᠠᠭᠠᠨ ᠲᠠᠢ ᠬᠠᠮᠲᠤ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠤ᠋ ᠰᠡᠷᠢᠭᠦᠨ ᠭᠡᠷ ᠲᠦ᠍ ᠰᠠᠭᠠᠲᠠᠭᠰᠠᠨ ᠪᠠᠢᠬᠤ᠃ ᠪᠢᠳᠡ ᠥᠴᠥᠭᠡᠳᠦᠷ ᠰᠥᠨᠢ ᠴᠢᠨᠦ ᠡᠮ ᠦ᠋ᠨ ᠭᠡᠷ ᠢ᠋ ᠪᠠᠢᠴᠠᠭᠠᠬᠤ ᠳ᠋ᠤ᠌ ᠪᠠᠰᠠ ᠬᠡᠳᠦᠨ ᠬᠠᠢᠷᠴᠠᠭ ᠡᠮ ᠳᠣᠲᠣᠷᠠ ᠬᠣᠣᠷᠲᠤA ᠭᠤᠷᠪᠠᠳᠤᠭᠠᠷ ᠢ᠋ ᠬᠣᠯᠢᠯᠳᠤᠭᠤᠯᠵᠤ ᠲᠠᠯᠪᠢᠭᠰᠠᠨ ᠪᠠᠢᠨᠠ᠃ ᠪᠢ ᠴᠢᠮᠠ ᠶ᠋ᠢ ᠪᠣᠳᠣᠵᠤ ᠡᠳᠡᠭᠡᠷ ᠬᠡᠷᠡᠭ ᠢ᠋ ᠴᠢᠨᠢ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠳ᠋ᠤ᠌ ᠮᠡᠳᠡᠭᠦᠯᠦᠭᠰᠡᠨ ᠦᠭᠡᠢ ᠰᠢᠦ᠃ ᠬᠡᠷᠪᠡ ᠮᠡᠳᠡᠭᠦᠯᠪᠡᠯ ᠴᠢ ᠳᠠᠷᠤᠢ ᠁
— ᠬᠣᠯᠢᠯᠳᠤᠭᠤᠯᠵᠤ ᠲᠠᠯᠪᠢᠭᠰᠠᠨ ᠴᠤ᠌ ᠡᠨᠳᠡᠭᠦᠦ ᠪᠡᠷ ᠁
— ᠥ᠂ ᠡᠨᠳᠡᠭᠦᠦ ᠪᠠᠢᠵᠤ ᠮᠡᠳᠡᠨᠡ᠃ ᠭᠡᠲᠡᠯᠡ ᠴᠢ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠡᠮ ᠡᠨᠳᠡᠭᠦᠦ ᠥᠭᠭᠦᠭᠰᠡᠨ ᠨᠢ ᠦᠨᠡᠨ ᠰᠢᠲᠠ᠃ ᠴᠢ ᠰᠠᠨᠠᠭᠠᠴᠢᠯᠠᠭᠠ ᠦᠭᠡᠢ ᠭᠡᠰᠡᠨ ᠴᠤ᠌ ᠪᠣᠳᠠᠲᠠᠢ ᠳᠡᠭᠡᠷᠡ ᠪᠡᠨ ᠬᠥᠮᠦᠨ ᠬᠣᠣᠷᠯᠠᠵᠢ ᠰᠢᠦ᠃ ᠲᠡᠢᠮᠦ ᠪᠢᠰᠢ ᠤᠤ? ᠴᠢᠨᠦ ᠡᠳᠡᠭᠡᠷ ᠦᠭᠡ ᠶ᠋ᠢ ᠴᠢᠨᠢ ᠪᠢ ᠢᠲᠡᠭᠡᠵᠦ ᠪᠣᠯᠤᠨᠠ᠃ ᠭᠡᠲᠡᠯᠡ ᠴᠢ ᠪᠣᠳᠣᠵᠤ ᠦᠵᠡ᠃ ᠪᠣᠯᠤᠷᠴᠠᠭᠠᠨ ᠲᠠ ᠬᠣᠶᠠᠭᠤᠯᠠ ᠤᠳᠠᠭᠠᠨ ᠵᠢᠯ ᠱᠠᠯᠢᠭ ᠰᠠᠮᠠᠭᠤᠨ ᠶᠠᠪᠤᠯᠴᠠᠯᠠ᠃ ᠰᠠᠷᠠ ᠭᠠᠷᠤᠢ ᠶ᠋ᠢᠨ ᠡᠮᠦᠨᠡ ᠴᠢ ᠡᠷᠡ ᠡᠴᠡ ᠪᠡᠨ ᠰᠠᠯᠤᠯᠠ᠃ ᠡᠭᠦᠨ ᠦ᠌ ᠤᠯᠠᠮ ᠠ᠋ᠴᠠ ᠪᠣᠯᠤᠷᠴᠠᠭᠠᠨ ᠡᠷᠡ ᠡᠮᠡ ᠬᠣᠶᠠᠭᠤᠯᠠ ᠶ᠋ᠢᠨ ᠬᠠᠷᠢᠴᠠᠭᠠ ᠶᠠᠪᠤᠬᠤ ᠳᠣᠳᠣᠮ ᠡᠪᠳᠡᠷᠡᠵᠦ᠂ ᠪᠣᠯᠤᠷᠴᠠᠭᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠮᠠᠷ ᠪᠤᠯᠠᠮᠠᠷ ᠠᠭᠠᠰᠢᠯᠠᠬᠤ ᠪᠣᠯᠪᠠ᠃ ᠡᠨᠡ ᠨᠢ ᠪᠦᠷ ᠴᠢᠨᠦ ᠤᠷᠰᠢᠭ ᠠ᠋ᠴᠠ ᠪᠣᠯᠤᠭᠰᠠᠨ ᠪᠢᠰᠢ ᠭᠡᠵᠢ ᠤᠤ? ᠡᠳᠦᠭᠡ ᠲᠡᠷᠡ ᠶᠠᠭ ᠰᠠᠢᠬᠠᠨ ᠲᠠ ᠬᠣᠶᠠᠭᠤᠯᠠ ᠶ᠋ᠢᠨ ᠭᠠᠷ ᠳᠣᠣᠷᠠ ᠦᠬᠦᠴᠢᠬᠡᠯᠡ᠃ ᠡᠮ ᠡᠨᠳᠡᠭᠦᠦ ᠦᠭᠭᠦᠯᠡ ᠭᠡᠬᠦ ᠶ᠋ᠢ ᠴᠢᠨᠢ ᠬᠡᠨ ᠢᠲᠡᠭᠡᠬᠦ ᠪᠣᠢ? ᠳᠣᠲᠣᠭᠠᠳᠤ ᠶᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠ ᠪᠠᠢᠲᠤᠭᠠᠢ ᠲᠠᠪᠤᠨ ᠨᠠᠰᠤᠲᠠᠢ ᠬᠡᠦᠬᠡᠳ ᠴᠤ᠌ ᠴᠢᠮᠠ ᠶ᠋ᠢ ᠰᠡᠵᠢᠭᠯᠡᠬᠦ ᠪᠠᠢᠬᠠ᠃
— ᠭᠡᠲᠡᠯᠡ᠂ ᠶᠠᠭᠠᠬᠢᠭᠰᠠᠨ ᠴᠤ᠌ ᠦᠨᠡᠨ ᠴᠠᠭᠠᠨ ᠢ᠋ ᠪᠠᠷᠢᠮᠲᠠᠯᠠᠨ ᠶᠣᠰᠣ ᠶᠠᠷᠢᠨᠠ ᠪᠣᠢ᠃ ᠪᠢ ᠪᠦᠷᠢᠨ ᠴᠠᠭᠠᠪᠤᠷᠯᠠᠪᠠᠯ ᠲᠡᠳᠡ᠁
— ᠡᠨᠡ ᠴᠢᠨᠢ ᠶᠡᠬᠡ ᠰᠠᠢᠨ ᠬᠡᠷᠡᠭ᠃
ᠨᠥᠭᠦᠭᠡ ᠬᠥᠮᠦᠨ ᠶᠠᠷᠢᠵᠤ ᠯᠠ ᠪᠠᠢᠨᠠ᠁
— ᠢᠩᠭᠢᠵᠦ ᠬᠢᠬᠦ ᠶ᠋ᠢ ᠴᠢᠨᠢ ᠪᠢ ᠡᠰᠡᠷᠭᠦᠴᠡᠬᠦ ᠦᠭᠡᠢ᠃ ᠭᠡᠲᠡᠯᠡ ᠮᠢᠨᠦ ᠪᠣᠳᠣᠬᠤ ᠪᠠᠷ ᠦᠨᠡᠨ ᠴᠠᠭᠠᠨ ᠭᠡᠳᠡᠭ ᠶᠠᠭᠤᠮᠠ ᠡᠨᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠯᠠᠪᠲᠠᠢ ᠪᠠᠢᠬᠤ ᠪᠠᠢᠯ ᠦᠭᠡᠢ᠃ ᠭᠡᠪᠡᠴᠦ ᠵᠠᠷᠢᠮ ᠳᠤ ᠪᠠᠨ ᠡᠨᠡ ᠨᠢ ᠬᠥᠮᠦᠰ ᠦ᠋ᠨ ᠬᠡᠢ ᠪᠣᠳᠣᠯ ᠲᠡᠳᠦᠢ ᠯᠡ ᠪᠠᠢᠵᠤ᠂ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠦ᠋ᠨ ᠬᠦᠷᠢᠶᠡ ᠬᠡᠪᠴᠢᠶᠡᠨ ᠳ᠋ᠦ᠍ ᠬᠠᠷᠢᠶᠠᠯᠠᠭᠳᠠᠨᠠ᠃ ᠬᠥᠮᠦᠰ ᠲᠡᠭᠦᠨ ᠢ᠋ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠲᠡᠮᠡᠴᠡᠭᠡᠳ ᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠴᠤ᠌ ᠪᠠᠢᠳᠠᠭ᠃ ᠪᠠᠢᠳᠠᠯ ᠠ᠋ᠴᠠ ᠨᠢ ᠦᠵᠡᠬᠦ ᠳ᠋ᠦ᠍ ᠴᠢ ᠣᠳᠣᠬᠠᠨ ᠳ᠋ᠤ᠌ ᠦᠨᠡᠨ ᠴᠠᠭᠠᠨ ᠢ᠋ᠶ᠋ᠠᠨ ᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ᠃ ᠬᠡᠯᠡᠪᠡᠯ ᠬᠠᠤᠯᠢ ᠴᠠᠭᠠᠵᠠ ᠶ᠋ᠢᠨ ᠪᠠᠢᠭᠤᠯᠭᠠ ᠭᠡᠭᠴᠢ ᠲᠤᠰᠬᠠᠢ ᠶᠣᠰᠣ ᠶᠠᠷᠢᠳᠠᠭ ᠭᠠᠵᠠᠷ᠃ ᠭᠡᠪᠡᠴᠦ ᠲᠡᠳᠡ ᠶᠣᠰᠣ ᠶᠠᠷᠢᠬᠤ ᠳᠤ ᠪᠠᠨ ᠭᠡᠷᠡᠴᠢ ᠪᠠᠷᠢᠮᠲᠠ ᠵᠢ ᠬᠠᠮᠤᠭ ᠠ᠋ᠴᠠ ᠢᠯᠡᠭᠦᠦ ᠴᠢᠬᠤᠯᠠᠴᠢᠯᠠᠳᠠᠭ ᠭᠡᠨᠡ᠃ ᠦᠨᠡᠨ ᠪᠣᠳᠠᠲᠠᠢ ᠭᠡᠷᠡᠴᠢ ᠪᠠᠷᠢᠮᠲᠠ ᠣᠯᠤᠭᠰᠠᠨ ᠦᠶᠡ ᠳ᠋ᠦ᠍᠂ ᠠᠮᠠᠨ ᠥᠴᠢᠭ ᠦ᠋ᠨ ᠦᠨᠡᠨ ᠬᠤᠳᠠᠯ ᠢ᠋ ᠳᠡᠮᠡᠢ ᠬᠠᠮᠢᠶᠠᠷᠳᠠᠭ ᠦᠭᠡᠢ ᠭᠡᠨᠡ᠃ ᠮᠢᠨᠦ ᠪᠣᠳᠣᠬᠤ ᠪᠠᠷ ᠴᠢᠮᠠ ᠲᠠᠢ ᠤᠷᠤᠭᠯᠠᠶᠠ ᠭᠡᠵᠦ ᠪᠣᠳᠣᠭᠠ ᠬᠥᠮᠦᠨ ᠳᠦ ᠪᠡᠨ ᠴᠢ ᠬᠣᠣᠷᠲᠤ ᠡᠮ ᠥᠭᠴᠦ᠂ ᠲᠡᠷᠡ ᠴᠢᠨᠢ ᠴᠢᠨᠠᠭᠰᠢ ᠪᠠᠨ ᠬᠡᠪᠲᠡᠷᠢ ᠳᠦ ᠪᠡᠨ ᠪᠠᠢᠭᠠ ᠡᠬᠡᠨᠡᠷ ᠲᠤ ᠪᠠᠨ ᠡᠨᠡ ᠬᠦ᠌ ᠡᠮ ᠢ᠋ ᠲᠠᠷᠢᠵᠤ ᠬᠣᠣᠷᠯᠠᠯᠠ ᠭᠡᠬᠦ ᠳ᠋ᠦ᠍ ᠠᠯᠢ ᠲᠠᠯᠠ ᠠ᠋ᠴᠠ ᠪᠣᠳᠣᠭᠰᠠᠨ ᠴᠤ᠌ ᠪᠦᠷᠢᠨ ᠲᠡᠭᠦᠯᠳᠡᠷ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠣᠯᠵᠤ ᠴᠢᠳᠠᠮᠠᠷ ᠪᠠᠢᠨᠠ᠃ ᠦᠭᠡᠢ ᠪᠣᠯ ᠴᠢᠮᠠ ᠳ᠋ᠤ᠌ ᠬᠣᠶᠠᠭᠤᠯᠠ ᠬᠤᠤᠪᠢᠯᠳᠤᠨ ᠬᠥᠮᠦᠨ ᠠᠯᠠᠭᠰᠠᠨ ᠬᠡᠷᠡᠭ ᠲᠤᠯᠭᠠᠬᠤ ᠪᠣᠯᠤᠨᠠ᠃ ᠬᠤᠤᠪᠢᠯᠳᠤᠵᠤ ᠬᠥᠮᠦᠨ ᠠ᠋ᠯᠠᠭᠰᠠᠳ ᠢ᠋ ᠬᠦᠨᠳᠦ ᠪᠡᠷ ᠰᠢᠢᠳᠬᠡᠨᠡ᠃ ᠬᠡᠷᠪᠡ ᠴᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠣᠯ ᠮᠤᠵᠢᠭᠤᠳᠠᠭᠤᠯᠵᠤ ᠪᠠᠢᠨᠠ ᠭᠡᠵᠦ ᠶᠠᠯᠠ ᠶ᠋ᠢ ᠴᠢᠨᠢ ᠬᠦᠨᠳᠦᠷᠡᠭᠦᠯᠦᠨᠡ᠃ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ᠨᠢ ᠬᠦᠨᠳᠦ ᠶ᠋ᠢᠨ ᠬᠦᠨᠳᠦ ᠪᠡᠷ ᠰᠢᠢᠳᠬᠡᠭᠳᠡᠨ ᠠᠯᠠᠬᠤ ᠶᠠᠯᠠ ᠳ᠋ᠤ᠌ ᠥᠭᠲᠡᠨᠡ᠃
— ᠮᠢᠨᠦ ᠡᠳᠡᠭᠡᠷ ᠦᠭᠡ ᠶ᠋ᠢ ᠴᠢ ᠢᠲᠡᠭᠡᠬᠦ ᠦᠭᠡᠢ ᠴᠤ᠌ ᠪᠢ ᠪᠣᠯ ᠪᠣᠳᠣᠯ ᠢ᠋ᠶ᠋ᠠᠨ ᠵᠥᠪ ᠭᠡᠵᠦ ᠦᠵᠡᠬᠦ ᠶᠦᠮ᠃ ᠡᠭᠦᠨ ᠢ᠋ ᠬᠡᠯᠡᠵᠦ ᠪᠠᠢᠬᠤ ᠶ᠋ᠢᠨ ᠤᠴᠢᠷ ᠨᠢ᠂ ᠴᠢᠨᠦ ᠴᠠᠭᠠᠪᠤᠷᠯᠠᠨ ᠶᠠᠷᠢᠵᠤ ᠦᠨᠡᠨ ᠢ᠋ᠶ᠋ᠡᠨ ᠣᠯᠬᠤ ᠶ᠋ᠢ ᠴᠢᠨᠢ ᠬᠣᠷᠢᠭᠯᠠᠵᠤ ᠪᠠᠢᠬᠤ ᠪᠢᠰᠢ᠂ ᠭᠠᠭᠴᠠ ᠬᠦ᠌ ᠶᠣᠰᠣᠨ ᠴᠠᠭᠠᠨ ᠴᠢᠷᠠᠢ ᠢᠯᠡᠷᠡᠬᠦ ᠡᠴᠡ ᠡᠮᠦᠨᠡ ᠶᠠᠰᠤᠨ ᠴᠠᠭᠠᠨ ᠨᠢ ᠭᠠᠷᠴᠢᠬᠠᠬᠤ ᠠ᠋ᠴᠠ ᠵᠣᠪᠠᠵᠤ ᠪᠠᠢᠨᠠ᠁᠃
ᠡᠤ ᠫᠧᠩ ᠮᠧᠢ ᠨᠠᠷᠢᠨ ᠰᠣᠨᠣᠰᠴᠤ᠂ ᠳᠠᠰᠴᠤ ᠳᠡᠢᠯᠦᠭᠡ ᠦᠭᠡᠢ᠄
— ᠶᠠᠭᠠᠬᠢᠯᠠ ᠴᠤ᠌ ᠭᠡᠰᠡᠨ ᠲᠡᠳᠡ ᠦᠨᠡᠨ ᠢ᠋ᠶ᠋ᠡᠷ ᠪᠠᠢᠴᠠᠭᠠᠵᠤ᠂ ᠨᠠᠷᠢᠨ ᠲᠣᠳᠣᠷᠬᠠᠢᠯᠠᠬᠤ ᠦᠭᠡᠢ ᠭᠡᠵᠢ ᠤᠤ?
— ᠪᠠᠢᠴᠠᠭᠠᠬᠤ ᠨᠢ ᠴᠤ᠌ ᠪᠠᠢᠴᠠᠭᠠᠬᠤ ᠪᠠᠢᠯ ᠦᠭᠡᠢ᠃ ᠲᠤᠰᠬᠠᠢ ᠲᠡᠢᠮᠦ ᠶᠡᠬᠡ ᠪᠠᠢᠴᠠᠭᠠᠬᠤ ᠬᠣᠷᠢᠢᠠ ᠪᠠᠢᠬᠤ ᠶᠤᠮ ᠴᠢᠨᠢ᠃ ᠬᠠᠷᠠᠮᠰᠠᠯᠲᠠᠢ ᠨᠢ ᠴᠢᠨᠦ ᠬᠡᠷᠡᠭ ᠢ᠋ ᠪᠠᠢᠴᠠᠭᠠᠯᠠ ᠯᠠ ᠭᠡᠪᠡᠯ ᠬᠤᠤᠪᠢᠯᠳᠤᠵᠤ ᠬᠥᠮᠦᠨ ᠠᠯᠠᠭᠰᠠᠨ ᠶᠠᠯᠠ ᠳ᠋ᠤ᠌ ᠥᠷᠲᠥᠬᠦ ᠡᠴᠡ ᠵᠠᠢᠯᠠᠬᠤ ᠦᠭᠡᠢ ᠰᠢᠦ᠃ ᠴᠢ ᠰᠠᠢᠲᠤᠷ ᠪᠣᠳᠣᠯᠬᠢᠯᠠᠵᠤ ᠦᠵᠡ᠃ Aᠭᠤᠷᠪᠠᠳᠤᠭᠠᠷ ᠪᠣᠯ ᠦᠨᠡᠨ ᠳᠦ ᠪᠡᠨ ᠬᠣᠣᠷ ᠢ᠋ᠶ᠋ᠠᠷ ᠪᠠᠭᠠ ᠠᠮᠤᠷᠵᠢᠭᠤᠯᠬᠤ ᠦᠢᠯᠡᠳᠦᠯ ᠲᠡᠢ ᠨᠢᠭᠡ ᠵᠦᠢᠯ ᠦ᠋ᠨ ᠡᠮ ᠶᠦᠮ᠃ ᠭᠡᠲᠡᠯᠡ B ᠵᠢᠷᠭᠤᠳᠤᠭᠠᠷ ᠲᠠᠢ ᠨᠡᠢᠯᠡᠪᠡᠯ ᠰᠢᠷᠦᠭᠦᠨ ᠤᠷᠪᠠᠯ ᠡᠭᠦᠰᠴᠦ ᠬᠣᠣᠷᠲᠤ ᠴᠢᠨᠠᠷ ᠨᠢ ᠬᠡᠳᠦ ᠳᠠᠬᠢᠨ ᠢ᠋ᠶ᠋ᠠᠷ ᠨᠡᠮᠡᠭᠳᠡᠨᠡ᠃ ᠣᠳᠣᠬᠠᠨ ᠳ᠋ᠤ᠌ Aᠭᠤᠷᠪᠠᠳᠤᠭᠠᠷ᠂ B ᠵᠢᠷᠭᠤᠳᠤᠭᠠᠷ ᠠ᠋ᠴᠠ ᠥᠭᠡᠷᠡ ᠡᠮ ᠲᠡᠢ ᠨᠡᠢᠯᠡᠪᠡᠯ ᠤᠷᠪᠠᠯ ᠡᠭᠦᠰᠴᠦ ᠬᠣᠣᠷ ᠪᠣᠯᠤᠨᠠ ᠭᠡᠳᠡᠭ ᠢ᠋ ᠬᠥᠮᠦᠰ ᠴᠤ᠌ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠭᠠᠷ᠃ ᠭᠠᠭᠴᠠ ᠤᠷᠪᠠᠯ ᠡᠭᠦᠰᠳᠡᠭ ᠡᠨᠡ ᠡᠮ ᠲᠡᠢ ᠨᠢ ᠴᠢ ᠡᠨᠳᠡᠭᠦᠦ ᠪᠡᠷ ᠬᠣᠯᠢᠬᠤ ᠭᠡᠭᠴᠢ ᠳᠡ᠃
— ᠲᠡᠭᠡᠭᠡᠳ ᠪᠠᠰᠠ ᠰᠢᠨᠤᠯ ᠢ᠋ ᠴᠢᠨᠢ ᠬᠠᠩᠭᠠᠳᠠᠭ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠥᠭᠳᠡᠭ ᠨᠢ ᠬᠡᠳᠦᠢ ᠰᠡᠵᠢᠭᠯᠡᠮᠡᠷ ᠪᠣᠢ? ᠳᠠᠬᠢᠭᠠᠳ ᠬᠡᠯᠡᠪᠡᠯ Bᠵᠢᠷᠭᠤᠳᠤᠭᠠᠷ ᠤ᠋ᠨ ᠦᠢᠯᠡᠳᠦᠯ ᠢ᠋ ᠲᠠ ᠴᠠᠭᠠᠨᠠ ᠨᠢ ᠭᠠᠷᠲᠠᠯᠠ ᠮᠡᠳᠡᠵᠦ ᠪᠠᠢᠯ ᠦᠭᠡᠢ᠃ ᠲᠡᠷᠡ ᠨᠢ ᠡᠪᠡᠳᠴᠢᠨ ᠪᠣᠯᠭᠠᠨ ᠳ᠋ᠤ᠌ ᠲᠣᠬᠢᠷᠠᠨ ᠦᠷᠭᠦᠯᠵᠢ ᠬᠡᠷᠡᠭᠯᠡᠳᠡᠭ ᠡᠮ ᠪᠢᠰᠢ ᠰᠢᠦ ᠳᠡ᠃ ᠵᠥᠪᠬᠡᠨ ᠶᠠᠰᠤ ᠬᠣᠭᠣᠷᠬᠠᠤ ᠳ᠋ᠤ᠌ ᠣᠨᠴᠠ ᠦᠢᠯᠡᠳᠦᠯ ᠲᠡᠢ ᠡᠮ ᠮᠥᠨ᠃ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠭᠠᠭᠴᠠ ᠡᠢᠮᠦ ᠡᠪᠡᠳᠴᠢᠲᠡᠨ ᠳ᠋ᠦ᠍ ᠰᠠᠶᠢ ᠬᠡᠷᠡᠭᠯᠡᠨᠡ᠃
— ᠬᠠᠷᠢᠨ ᠶᠠᠭ ᠦᠵᠡᠰᠬᠦᠯᠡᠩ ᠦ᠋ᠨ ᠶᠠᠰᠤ ᠬᠤᠭᠤᠷᠠᠭᠰᠠᠨ ᠢ᠋ ᠲᠣᠬᠢᠶᠠᠯᠳᠤᠭᠤᠯᠤᠨ ᠡᠨᠡ ᠡᠮ ᠲᠡᠢ ᠨᠡᠢᠯᠡᠪᠡᠯ ᠤᠷᠪᠠᠯ ᠡᠭᠦᠰᠳᠡᠭ ᠬᠣᠣᠷᠲᠤ ᠡᠮ ᠲᠡᠢ ᠬᠣᠯᠢᠴᠢᠬᠠᠬᠤ ᠭᠡᠭᠴᠢ ᠶᠠᠭᠠᠬᠢᠭᠰᠠᠨ ᠵᠢᠭᠲᠡᠢ ᠠᠪᠴᠠᠯᠳᠤᠭᠰᠡᠨ ᠶᠠᠪᠤᠳᠠᠯ ᠪᠣᠢ? ᠡᠭᠦᠨ ᠢ᠋ ᠴᠢ ᠶᠠᠭᠠᠬᠢᠵᠤ ᠲᠠᠢᠯᠪᠤᠷᠢᠯᠠᠨᠠ ᠪᠣᠢ? ᠨᠡᠭᠡᠷᠡᠨ ᠦᠵᠡᠰᠬᠦᠯᠡᠩ ᠦ᠋ᠨ ᠦᠬᠦᠬᠦ ᠮᠥᠴᠡ ᠨᠢ ᠲᠤᠯᠵᠤ ᠨᠠᠰᠤᠨ ᠲᠣᠭᠠ ᠨᠢ ᠳᠠᠭᠤᠰᠤᠭᠰᠠᠨ ᠭᠡᠵᠢ ᠤᠤ? ᠬᠠᠷᠠᠮᠰᠠᠯᠲᠠᠢ ᠨᠢ ᠬᠠᠤᠯᠢ ᠶ᠋ᠢᠨ ᠠᠵᠢᠯᠲᠠᠨ ᠶᠡᠷᠦ ᠡᠴᠡ ᠪᠡᠨ ᠪᠠᠢᠴᠠᠭᠠᠵᠤ ᠲᠣᠳᠣᠷᠬᠠᠢᠯᠠᠭᠰᠠᠨ ᠢ᠋ᠶ᠋ᠠᠨ ᠯᠠ ᠢᠲᠡᠭᠡᠬᠦ ᠶᠦᠮ ᠰᠢᠦ!
— ᠲᠡᠢᠮᠦ ᠪᠣᠯ ᠲᠠᠨᠤᠰ ᠤ᠋ᠨ ᠰᠠᠨᠠᠭᠠ ᠣᠳᠣ ᠨᠠᠮᠠ ᠶᠢ ᠣᠴᠢᠵᠤ ᠶᠠᠯᠠ ᠪᠠᠨ ᠲᠤᠰᠢᠶᠠᠬᠤ ᠶ᠋ᠢ ᠬᠦᠯᠢᠶᠡᠵᠦ᠁ ᠡᠤ ᠫᠧᠩ ᠮᠧᠢ ᠠᠶᠤᠵᠤ ᠰᠠᠨᠳᠤᠷᠬᠤ ᠳᠤ ᠪᠠᠨ ᠢᠡᠭᠭᠡᠵᠤ ᠯᠠ ᠠᠰᠠᠭᠤᠪᠠ᠃
— ᠲᠠᠨᠤᠰ ᠤ᠋ᠨ ᠰᠠᠨᠠᠭᠠ ᠭᠡᠨᠡ᠁ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠪᠢ ᠣᠯᠠᠨ ᠬᠥᠮᠦᠨ ᠦ᠌ ᠲᠥᠯᠥᠭᠡᠯᠡᠭᠴᠢ ᠪᠢᠰᠢ᠂ ᠨᠡᠩ ᠴᠤ᠌ ᠬᠠᠤᠯᠢ ᠶ᠋ᠢᠨ ᠠᠵᠢᠯᠲᠠᠨ ᠤ᠋ ᠬᠤᠪᠢ ᠪᠠᠷ ᠲᠠᠨ ᠳ᠋ᠤ᠌ ᠬᠠᠤᠯᠢ ᠶ᠋ᠢᠨ ᠮᠥᠨ ᠴᠢᠨᠠᠷ ᠢ᠋ ᠲᠠᠨᠢᠭᠤᠯᠤᠨ ᠴᠠᠭᠠᠪᠤᠷᠯᠠᠨ ᠲᠤᠰᠢᠶᠠᠬᠤ ᠶ᠋ᠢ ᠰᠢᠬᠠᠮᠳᠠᠭᠤᠯᠵᠤ ᠪᠠᠢᠬᠤ ᠴᠤ᠌ ᠪᠢᠰᠢ᠂ ᠵᠥᠪᠬᠡᠨ ᠨᠢᠭᠡ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠭᠴᠢ ᠠ᠋ᠴᠠ ᠴᠢᠮᠠ ᠳ᠋ᠤ᠌ ᠤᠷᠢᠳᠴᠢᠯᠠᠨ ᠰᠠᠨᠠᠭᠤᠯᠵᠤ ᠪᠠᠢᠬᠤ ᠲᠡᠳᠦᠢ᠃ ᠲᠠ ᠬᠡᠷᠪᠡ ᠮᠢᠨᠦ ᠳᠡᠭᠡᠷᠡᠬᠢ ᠲᠠᠢᠯᠪᠤᠷᠢ ᠶ᠋ᠢ ᠢᠲᠡᠭᠡᠪᠡᠯ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠳ᠋ᠤ᠌ ᠵᠠᠪᠠᠯ ᠣᠴᠢᠬᠤ ᠬᠡᠷᠡᠭᠲᠡᠢ᠃ ᠭᠡᠪᠡᠴᠦ ᠶᠠᠯᠠ ᠴᠠᠭᠠᠪᠤᠷᠯᠠᠬᠤ ᠪᠠᠷ ᠣᠴᠢᠬᠤ ᠪᠢᠰᠢ ᠬᠠᠷᠢᠨ ᠤᠴᠢᠷ ᠦᠭᠡᠢ ᠶᠠᠯᠠ ᠡᠭᠦᠷᠬᠦ ᠡᠴᠡ ᠪᠡᠨ ᠬᠡᠯᠲᠦᠷᠢᠬᠦ ᠪᠡᠷ ᠣᠴᠢᠬᠤ ᠬᠡᠷᠡᠭᠲᠡᠢ᠃
— ᠪᠢ ᠦᠨᠡᠬᠡᠷ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ᠃
— ᠲᠡᠭᠡᠪᠡᠯ ᠮᠢᠨᠦ ᠦᠷᠭᠦᠯᠵᠢᠯᠡᠨ ᠶᠠᠷᠢᠬᠤ ᠶ᠋ᠢ ᠰᠣᠨᠣᠰ᠁᠃
— ᠣᠳᠣᠬᠠᠨ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠡᠬᠡᠨᠡᠷ ᠲᠡᠭᠡᠨ ᠴᠣᠬᠣᠮ ᠶᠠᠮᠠᠷ ᠡᠮ ᠲᠠᠷᠢᠵᠤ ᠠᠯᠠᠭᠰᠠᠨ ᠢ᠋ᠶ᠋ᠠᠨ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠪᠠᠢᠬᠤ ᠲᠤᠯᠠ ᠵᠥᠪᠰᠢᠶᠡᠷᠡᠵᠦ ᠲᠤᠰᠢᠶᠠᠬᠤ ᠴᠤ᠌ ᠠᠷᠭᠠ ᠦᠭᠡᠢ ᠪᠠᠢᠨᠠ᠃ ᠲᠠ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠳ᠋ᠤ᠌ ᠬᠤᠷᠳᠤᠨ ᠣᠴᠢᠵᠤ᠂ ᠲᠡᠭᠦᠨ ᠳ᠋ᠦ᠍ ᠥᠭᠭᠦᠭᠰᠡᠨ ᠡᠮ ᠳᠦ ᠪᠡᠨ ᠶᠠᠭᠤ ᠬᠣᠯᠢᠭᠰᠠᠨ ᠭᠡᠳᠡᠭ ᠢ᠋ᠶ᠋ᠡᠨ ᠡᠷᠲᠡᠬᠡᠨ ᠲᠣᠳᠣᠷᠬᠠᠢᠯᠠᠪᠠᠯ ᠳᠡᠭᠡᠷᠡ ᠪᠣᠢ᠃ ᠦᠭᠡᠢ ᠪᠣᠯ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠ ᠪᠣᠯᠤᠷᠴᠠᠭᠠᠨ ᠠ᠋ᠴᠠ ᠡᠮ ᠦ᠋ᠨ ᠢᠷᠡᠯᠲᠡ ᠶ᠋ᠢ ᠦᠷᠭᠦᠯᠵᠢᠯᠡᠨ ᠪᠠᠢᠴᠠᠭᠠᠪᠠᠯ᠂ ᠡᠮ ᠦ᠋ᠨ ᠭᠡᠷ ᠴᠢᠨᠢ ᠬᠣᠯᠪᠣᠭᠳᠠᠵᠤ᠂ ᠭᠡᠷᠡᠴᠢ ᠪᠠᠷᠢᠮᠲᠠ ᠴᠢᠨᠢ ᠭᠠᠷᠴᠤ ᠢᠷᠡᠬᠦ ᠪᠣᠯᠤᠨᠠ᠃ ᠡᠭᠦᠨ ᠦ᠌ ᠳ᠋ᠦᠩ ᠳ᠋ᠦ᠍ ᠲᠠ ᠬᠣᠶᠠᠭᠤᠯᠠ ᠶ᠋ᠢᠨ ᠤᠲᠠᠰᠤᠨ ᠠᠮᠢ ᠬᠠᠤᠯᠢ ᠶ᠋ᠢᠨ ᠮᠡᠰᠡ ᠳ᠋ᠦ᠍ ᠲᠠᠰᠤᠷᠠᠬᠤ ᠶᠤᠮ ᠰᠢᠦ! ᠬᠡᠷᠪᠡ ᠲᠠ ᠠᠮᠢ ᠪᠠᠨ ᠪᠣᠳᠣᠪᠠᠯ ᠳᠠᠷᠤᠢᠬᠠᠨ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠣᠴᠢᠵᠤ᠂ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠡᠮ ᠡᠨᠳᠡᠭᠦᠦ ᠰᠠᠪᠠᠯᠠᠭᠰᠠᠨ ᠢ᠋ᠶ᠋ᠠᠨ ᠦᠨᠡᠨ ᠪᠣᠯᠭᠠᠨ ᠬᠡᠯᠡᠪᠡᠯ ᠳᠡᠭᠡᠷᠡ ᠰᠢᠭ ᠰᠠᠨᠠᠭᠳᠠᠨᠠ᠃
— ᠡᠨᠳᠡᠭᠦᠦ ᠰᠠᠪᠠᠯᠠᠭᠰᠠᠨ ᠢ᠋ᠶ᠋ᠠᠨ ᠦᠨᠡᠨ ᠪᠣᠯᠭᠠᠵᠤ ᠬᠡᠯᠡᠨᠡ ᠭᠡᠨᠡ?
— ᠲᠡᠢᠮᠦ ᠠ᠋᠂ ᠡᠨᠳᠡᠭᠦᠦ ᠭᠡᠪᠡᠯ ᠬᠡᠨ ᠴᠤ᠌ ᠢᠲᠡᠭᠡᠬᠦ ᠦᠭᠡᠢ᠃ ᠭᠡᠳᠡᠷᠭᠦ ᠳᠦ ᠪᠡᠨ ᠶᠠᠯᠠ ᠳ᠋ᠤ᠌ ᠤᠨᠠᠨᠠ᠃ ᠡᠭᠦᠨ ᠦ᠌ ᠡᠰᠡᠷᠭᠦ ᠪᠡᠷ᠂ ᠪᠢ ᠴᠢᠮᠠ ᠲᠠᠢ ᠤᠷᠤᠭᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠵᠣᠷᠢᠭᠤᠳᠠ ᠬᠣᠣᠷᠲᠤ ᠡᠮ ᠰᠠᠪᠠᠯᠠᠭᠰᠠᠨ᠃ ᠠᠩᠬᠠᠨ ᠳᠤ ᠪᠠᠨ ᠪᠢ ᠦᠵᠡᠰᠬᠦᠯᠡᠩ ᠢ᠋ ᠨᠢᠭᠡ ᠬᠣᠶᠠᠷ ᠡᠳᠦᠷ ᠮᠠᠨᠠᠷᠠᠵᠤ ᠪᠠᠢᠭᠠᠳ ᠴᠠᠭᠠᠰᠢ ᠵᠠᠯᠠᠷᠠᠬᠤ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠭᠤᠷ ᠡᠢᠮᠦ ᠬᠤᠷᠳᠤᠨ ᠬᠣᠣᠷᠳᠠᠭᠳᠠᠵᠤ ᠦᠬᠦᠭᠡᠳ ᠴᠢᠮᠠ ᠶᠢ ᠬᠡᠷᠡᠭ ᠲᠦ᠍ ᠴᠢᠷᠦᠭᠳᠡᠭᠦᠯᠦᠨᠡ ᠭᠡᠵᠦ ᠶᠠᠭ ᠮᠡᠳᠡᠭᠰᠡᠨ ᠦᠭᠡᠢ᠃ ᠪᠢ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠣᠴᠢᠵᠤ ᠶᠠᠯᠠ ᠪᠠᠨ ᠴᠠᠭᠠᠪᠤᠷᠯᠠᠨ ᠴᠢᠮᠠ ᠶᠢ ᠠᠪᠤᠷᠠᠶᠠ ᠭᠡᠵᠦ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠬᠡᠯᠡᠭᠡᠷᠡᠢ᠃ ᠪᠣᠯᠤᠷᠴᠠᠭᠠᠨ ᠯᠠᠪᠲᠠᠢ ᠴᠢᠨᠦ ᠲᠥᠯᠥᠭᠡ ᠨᠢᠭᠡᠨᠲᠡ ᠪᠣᠢ ᠪᠣᠯᠤᠭᠰᠠᠨ ᠪᠣᠳᠠᠲᠤ ᠬᠡᠷᠡᠭ ᠦ᠋ᠨ ᠡᠮᠦᠨᠡ ᠭᠠᠭᠴᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠦᠬᠦ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠡᠭᠦᠷᠭᠡᠯᠡᠬᠦ ᠶᠦᠮ᠃ ᠶᠠᠮᠠᠷ ᠲᠡᠨᠡᠭ ᠲᠡᠭᠡᠨ ᠨᠢᠭᠡ ᠦᠬᠦᠳᠡᠯ ᠦ᠋ᠨ ᠲᠥᠯᠥᠭᠡ ᠬᠣᠶᠠᠷ ᠬᠥᠮᠦᠨ ᠢ᠋ ᠬᠣᠷᠣᠭᠠᠬᠤ ᠪᠣᠢ? ᠡᠨᠡ ᠪᠣᠯ ᠮᠢᠨᠦ ᠪᠣᠳᠣᠯ᠃
— ᠢᠩᠭᠢᠵᠦ ᠬᠢᠬᠦ ᠨᠢ ᠬᠥᠮᠦᠨᠴᠢ ᠴᠢᠨᠠᠷ ᠠ᠋ᠴᠠ ᠲᠡᠷᠰᠯᠡᠭᠰᠡᠨ ᠬᠠᠮᠤᠭ ᠵᠢᠭᠰᠢᠭᠦᠷᠢᠲᠡᠢ ᠶᠠᠪᠤᠳᠠᠯ ᠪᠢᠰᠢ ᠤᠤ?
— ᠾᠧᠩ᠂ ᠴᠢ ᠬᠡᠴᠢᠨᠡᠭᠡᠨ ᠵᠢᠯ ᠦ᠋ᠨ ᠲᠤᠷᠰᠢ ᠨᠢᠭᠡ ᠡᠬᠡᠨᠡᠷ ᠲᠡᠢ ᠬᠥᠮᠦᠨ ᠲᠡᠢ ᠲᠣᠯᠣᠭᠠᠢ ᠬᠥᠯ ᠨᠡᠢᠯᠡᠭᠦᠯᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠤᠷᠤᠭᠯᠠᠬᠤ ᠵᠣᠷᠢᠯᠭᠠ ᠳᠤ ᠪᠠᠨ ᠬᠦᠷᠬᠦ ᠶ᠋ᠢᠨ ᠲᠥᠯᠥᠭᠡ ᠨᠢᠭᠤᠴᠠ ᠪᠠᠷ ᠬᠤᠤᠪᠢᠯᠳᠤᠵᠤ ᠪᠠᠢᠭᠰᠠᠨ ᠴᠢᠨᠢ ᠬᠥᠮᠦᠨᠴᠢ ᠴᠢᠨᠠᠷ ᠢ᠋ᠶ᠋ᠠᠨ ᠪᠠᠷᠢᠮᠲᠠᠯᠠᠭᠰᠠᠨ ᠶᠠᠪᠤᠳᠠᠯ ᠭᠡᠵᠢ ᠤᠤ? ᠴᠢᠨᠦ ᠤᠷᠰᠢᠭ ᠵᠠᠠᠷ ᠦᠵᠡᠰᠬᠦᠯᠡᠩ ᠣᠯᠠᠨ ᠤᠳᠠᠭᠠ ᠵᠣᠳᠣᠭᠳᠠᠨ ᠵᠠᠨᠴᠢᠭᠳᠠᠵᠤ᠂ ᠡᠴᠦᠰ ᠰᠡᠭᠦᠯ ᠳᠦ ᠪᠡᠨ ᠬᠥᠯ ᠢ᠋ᠶ᠋ᠡᠨ ᠬᠤᠭᠤᠯᠤᠭᠤᠯᠤᠭᠰᠠᠨ ᠨᠢ ᠴᠢᠨᠦ ᠬᠥᠮᠦᠨᠴᠢ ᠴᠢᠨᠠᠷ ᠤ᠋ᠨ ᠴᠢᠨᠢ ᠢᠯᠡᠷᠡᠯ ᠭᠡᠵᠢ ᠤᠤ? ᠥᠨᠥᠳᠥᠷ ᠦᠵᠡᠰᠬᠦᠯᠡᠩ ᠶᠠᠮᠠᠷ ᠴᠤ᠌ ᠪᠣᠯᠤᠭ᠂ ᠴᠢᠨᠦ ᠭᠠᠷ ᠲᠤ᠌ ᠠᠯᠠᠭᠳᠠᠵᠤ᠂ ᠪᠤᠯᠤᠷᠴᠠᠭᠠᠨ ᠦᠬᠦᠬᠦ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠤᠭᠰᠠᠨ ᠦᠶᠡ ᠳᠤᠭᠤᠢ ᠪᠠᠢᠬᠤ ᠨᠢ ᠴᠡᠪᠡᠷ ᠭᠡᠵᠦ ᠪᠣᠳᠣᠭᠳᠠᠪᠠ ᠤᠤ? ᠴᠢ ᠪᠤᠷᠤᠭᠤᠳᠴᠠᠢ᠃ ᠬᠠᠷᠢᠨ ᠢᠩᠭᠢᠵᠦ ᠬᠡᠯᠡᠪᠡᠯ ᠪᠣᠯᠤᠷᠴᠠᠭᠠᠨ ᠰᠠᠶᠢ ᠡᠬᠡᠨᠡᠷ ᠨᠢ ᠶᠠᠭᠠᠬᠢᠵᠤ ᠦᠬᠦᠭᠰᠡᠨ ᠰᠢᠯᠲᠠᠭᠠᠨ ᠢ᠋ ᠮᠡᠳᠡᠵᠦ᠂ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠪᠡᠶᠡ ᠳᠦ ᠪᠡᠨ ᠡᠭᠦᠷᠬᠦ ᠵᠣᠷᠢᠭ ᠲᠠᠢ ᠪᠣᠯᠵᠤ᠂ ᠨᠢᠭᠡᠨ ᠴᠠᠭ ᠤ᠋ᠨ ᠠᠭᠤᠷ ᠤ᠋ᠨ ᠮᠤᠩᠬᠠᠭ ᠠ᠋ᠴᠠ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠯᠠ ᠭᠡᠵᠦ ᠴᠠᠭᠠᠪᠤᠷᠯᠠᠪᠠᠯ ᠴᠢ ᠠᠪᠤᠷᠠᠭᠳᠠᠬᠤ ᠪᠣᠯᠤᠯᠴᠠᠭᠠ ᠲᠠᠢ ᠪᠠᠢᠨᠠ᠃
— ᠁
— ᠶᠠᠭᠤᠨ ᠳ᠋ᠤ᠌ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠣᠢ? ᠪᠢᠲᠡᠭᠡᠢ ᠢᠩᠭᠢᠵᠦ ᠴᠢᠩᠭᠢᠵᠦ ᠲᠠᠲᠠᠭᠠᠯᠵᠠ᠃ ᠥᠨᠥᠳᠥᠷ ᠦ᠋ᠨ ᠨᠠᠢ᠍ᠮᠠᠨ ᠴᠠᠭ ᠠ᠋ᠴᠠ ᠡᠮᠦᠨᠡ ᠴᠢ ᠪᠣᠯᠤᠷᠴᠠᠭᠠᠨ ᠢ᠋ ᠳᠠᠬᠢᠨ ᠰᠢᠭᠦᠬᠦ ᠡᠴᠡ ᠤᠷᠢᠳ ᠵᠠᠪᠳᠤᠨ ᠠᠭᠤᠯᠵᠠᠵᠤ ᠬᠡᠯᠡᠪᠡᠯ ᠵᠣᠬᠢᠨᠠ᠃ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠤᠨ ᠲᠣᠭᠣᠭᠠᠴᠢ ᠯᠢᠦ ᠡᠪᠦᠭᠡᠨ ᠯᠠᠪ ᠴᠢᠮᠠ ᠶᠢ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠭᠤᠯᠬᠤ ᠶᠤᠮ᠃
— ᠴᠢ ᠁ ᠴᠢ ᠶᠠᠮᠠᠷ ᠬᠥᠮᠦᠨ᠁
— ᠦ᠂ ᠪᠢ ᠪᠣᠯ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠨᠡᠷᠡᠲᠦ ᠲᠠᠩᠨᠠᠭᠴᠢ ᠶᠤᠮ᠃ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠪᠣᠯ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠢ᠋ ᠬᠠᠮᠤᠭ ᠤ᠋ᠨ ᠤᠷᠢᠳ ᠢ᠋ᠶ᠋ᠠᠷ ᠢᠯᠭᠠᠷᠠᠭᠤᠯᠤᠭᠰᠠᠨ ᠲᠤᠷᠰᠢᠭᠤᠯᠴᠢᠨ᠃ ᠥᠩᠭᠡᠷᠡᠭᠰᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠢ ᠪᠣᠯ ᠪᠣᠯᠤᠷᠴᠠᠭᠠᠨ ᠲᠠᠨ ᠤ᠋ ᠬᠣᠶᠠᠭᠤᠯᠠ ᠳ᠋ᠤ᠌ ᠵᠠᠬᠢᠳᠠᠯ ᠪᠢᠴᠢᠨ ᠨᠢᠭᠤᠴᠠ ᠬᠠᠷᠢᠴᠠᠭᠠ ᠶ᠋ᠢ ᠴᠢᠨᠢ ᠳᠤᠷᠠᠳᠴᠤ᠂ ᠠᠯᠳᠠᠭᠠ ᠪᠠᠨ ᠵᠠᠯᠠᠷᠠᠭᠤᠯᠬᠤ ᠶ᠋ᠢ ᠴᠢᠨᠢ ᠬᠦᠰᠡᠵᠦ ᠪᠠᠢᠭᠰᠠᠨ ᠲᠡᠷᠡ ᠰᠦ ᠴᠠᠭᠠᠨ ᠰᠡᠳᠬᠢᠯᠲᠡᠨ᠃ ᠣᠳᠣ ᠶ᠋ᠢᠨ ᠬᠣᠪᠢᠨ ᠳ᠋ᠤ᠌ ᠪᠢ ᠪᠣᠯ ᠲᠠᠨ ᠤ᠋ ᠬᠣᠶᠠᠷ ᠤ᠋ᠨ ᠬᠢᠯᠢᠰᠳᠡᠵᠦ᠂ ᠨᠢᠭᠡ ᠠᠮᠢᠨ ᠤ᠋ ᠲᠥᠯᠥᠭᠡ ᠬᠣᠶᠠᠭᠤᠯᠠ ᠪᠠᠨ ᠥᠷᠲᠥᠵᠦ ᠬᠢᠯᠢᠰᠳᠡᠬᠦ ᠡᠴᠡ ᠵᠠᠭᠤᠢ ᠰᠠᠨᠠᠭᠠᠰᠢᠷᠠᠨ ᠬᠠᠷᠠᠮᠰᠠᠵᠤ᠂ ᠶᠠᠭᠠᠷᠠᠤ ᠮᠡᠩᠳᠡᠭᠦᠦ ᠰᠠᠨᠠᠭᠤᠯᠵᠤ ᠪᠠᠢᠭᠠ ᠲᠡᠳᠦᠢ᠃
— ᠵᠠ᠂ ᠡᠭᠦᠨ ᠢ᠋ ᠶᠠᠷᠢᠬᠤ ᠪᠠᠨ ᠪᠠᠢᠶᠠ᠃ ᠰᠠᠢᠨ ᠰᠠᠨᠠᠭᠠ ᠶ᠋ᠢ ᠮᠢᠨᠢ ᠮᠡᠳᠡᠵᠦ᠂ ᠠᠮᠢᠳᠤᠷᠠᠶᠠ ᠭᠡᠵᠦ ᠪᠣᠳᠣᠪᠠᠯ ᠨᠠᠢ᠍ᠮᠠᠨ ᠴᠠᠭ ᠠ᠋ᠴᠠ ᠡᠮᠦᠨᠡ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠣᠴᠢ᠃ ᠳᠠᠷᠠᠭᠠ ᠨᠢ ᠡᠮ ᠦ᠋ᠨ ᠭᠡᠷ ᠲᠤ ᠪᠠᠨ ᠣᠷᠣᠵᠤ ᠴᠢᠨᠦ ᠥᠪᠡᠷ ᠦ᠋ᠨ ᠬᠠᠮᠢᠶᠠᠷᠤᠯᠲᠠ ᠳ᠋ᠤ᠌ ᠪᠠᠢᠬᠤ ᠬᠡᠳᠦᠨ ᠬᠠᠢᠷᠴᠠᠭ Aᠭᠤᠷᠪᠠᠳᠤᠭᠠᠷ ᠬᠣᠯᠢᠯᠳᠤᠭᠰᠠᠨ ᠡᠮ ᠢ᠋ ᠠᠷᠭᠠᠯᠠ᠃ ᠦᠭᠡᠢ ᠪᠣᠯ ᠬᠥᠮᠦᠰ ᠴᠢᠮᠠ ᠶᠢ ᠬᠥᠮᠦᠨ ᠬᠣᠣᠷᠯᠠᠬᠤ ᠪᠠᠷ ᠠᠪᠤᠭᠰᠠᠨ ᠠᠷᠭᠠ ᠪᠠᠰᠢᠷ ᠭᠡᠵᠦ ᠦᠵᠡᠨᠡ ᠰᠢᠦ ᠭᠡᠳ ᠲᠡᠷᠡ ᠬᠥᠮᠦᠨ ᠳ᠋ᠢᠶᠠᠩᠬᠤᠸᠠ ᠶ᠋ᠢᠨ ᠬᠠᠷᠢᠯᠴᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤᠴᠢᠬᠠᠭᠰᠠᠨ ᠭᠡᠵᠦ ᠡᠦ ᠹᠧᠩ ᠮᠧᠢ ᠲᠡᠷᠡ ᠥᠷᠯᠥᠭᠡᠨ ᠦ᠌ ᠳ᠋ᠢᠶᠠᠩᠬᠤᠸᠠ ᠳᠡᠭᠡᠷᠡ ᠶᠠᠷᠢᠯᠴᠠᠭᠰᠠᠨ ᠪᠦᠬᠦ ᠠᠭᠤᠯᠭᠠ ᠶ᠋ᠢ ᠶᠠᠷᠢᠵᠤ ᠭᠠᠷᠭᠠᠯᠠ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ