ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠭᠤᠴᠢᠨ ᠳᠥᠷᠪᠡ> Хялгасан дөрөөн дээр – Хасвулаг зохиов <34>
100ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠭᠤᠴᠢᠨ ᠳᠥᠷᠪᠡ>
ᠦᠳᠡ ᠶ᠋ᠢᠨ ᠬᠣᠢᠨᠠᠬᠢ ᠭᠤᠷᠪᠠᠨ ᠴᠠᠭ ᠤ᠋ᠨ ᠦᠶᠡ ᠪᠡᠷ ᠡᠦ ᠹᠧᠩ ᠮᠧᠢ᠂ ᠬᠣᠶᠠᠷ ᠡᠮᠡᠭᠲᠡᠢ ᠴᠠᠭᠳᠠᠭᠠ ᠶ᠋ᠢᠨ ᠬᠠᠮᠠᠭᠠᠯᠠᠯᠲᠠ ᠲᠠᠢ ᠪᠠᠷ ᠰᠢᠭᠦᠬᠦ ᠬᠣᠷᠢᠶᠠᠨ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠲᠦᠪᠰᠢᠨ ᠭᠤᠸᠠᠢ ᠠᠯᠪᠠᠨ ᠰᠢᠷᠡᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠡᠯᠢᠭᠡᠳᠡᠭᠡᠳ ᠠᠷᠪᠠ ᠭᠠᠷᠤᠢ ᠨᠠᠰᠤᠨ ᠤ᠋ ᠵᠢᠭᠠᠯ ᠬᠦᠦ ᠲᠡᠢ ᠳᠡᠭᠲᠦ ᠨᠠᠭᠠᠳᠴᠤ ᠪᠠᠢᠯᠠ᠃
ᠡᠦ ᠹᠧᠩ ᠮᠧᠢ ᠬᠣᠶᠠᠷ ᠴᠠᠭᠳᠠᠭᠠ ᠲᠠᠢ ᠣᠷᠣᠵᠤ ᠢᠷᠡᠬᠦ ᠶ᠋ᠢ ᠦᠵᠡᠭᠡᠳ ᠲᠡᠷᠡ ᠳᠡᠷᠭᠡᠳᠡᠬᠢ ᠰᠠᠨᠳᠠᠯᠢ ᠤᠷᠤᠭᠤ ᠪᠠᠨ ᠵᠢᠭᠠᠵᠤ ᠰᠠᠭᠤ ᠭᠡᠰᠡᠨ ᠰᠠᠨᠠᠭᠠ ᠪᠠᠨ ᠢᠯᠡᠳᠬᠡᠭᠡᠳ ᠦᠷᠭᠦᠯᠵᠢᠯᠡᠨ ᠨᠠᠭᠠᠳᠬᠤ ᠶ᠋ᠢᠨ ᠳᠠᠭᠠᠤ᠄
— ᠡᠨᠡ ᠬᠦᠦ ᠦᠨᠡᠬᠡᠷ ᠰᠡᠷᠭᠦᠯᠡᠩ᠂ ᠪᠢ ᠬᠣᠶᠠᠷ ᠤᠳᠠᠭᠠ ᠨᠠᠭᠠᠳᠤᠭᠠᠳ ᠪᠦᠷ ᠳᠡᠢᠯᠦᠭᠳᠡᠬᠦ ᠨᠢ ᠭᠡᠵᠦ ᠠᠮᠠᠨ ᠳᠤ ᠪᠠᠨ ᠳᠦᠳᠦᠨᠡᠵᠦ ᠪᠠᠢᠯᠠ᠃ ᠳᠡᠮᠡᠢ ᠤᠳᠠᠯ ᠦᠭᠡᠢ ᠨᠠᠭᠠᠳᠴᠤ ᠪᠠᠷᠠᠯᠠ᠃ ᠲᠦᠪᠰᠢᠨ᠂ ᠲᠡᠷᠡ ᠬᠦᠦ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠬᠥᠩᠭᠡᠨ ᠢᠯᠪᠢᠭᠡᠳ᠄
— ᠬᠦᠦ ᠮᠢᠨᠢ ᠰᠤᠷᠭᠠᠭᠤᠯᠢ ᠳᠤ ᠪᠠᠨ ᠬᠤᠷᠳᠤᠨ ᠣᠴᠢ ᠳᠠ᠃ ᠠᠪᠤ ᠴᠢᠨᠢ ᠭᠡᠷ ᠲᠦ ᠪᠡᠨ ᠪᠠᠢᠬᠤ ᠦᠭᠡᠢ ᠶᠦᠮ ᠴᠢᠨᠢ ᠠᠪᠠᠭᠠ ᠶ᠋ᠢᠨ ᠳᠤ ᠪᠠᠨ ᠢᠷᠡᠵᠦ ᠪᠤᠳᠠᠭᠠ ᠢᠳᠡᠳᠡᠭ ᠶᠦᠮ ᠰᠢᠦ᠃ ᠲᠡᠭᠡᠭᠡᠳ ᠴᠢᠯᠥᠭᠡ ᠲᠡᠢ ᠪᠣᠯ ᠠᠪᠠᠭᠠ ᠴᠢᠨᠢ ᠴᠢᠮᠠ ᠲᠠᠢ ᠲᠡᠭᠲᠦ ᠨᠠᠭᠠᠳᠤᠶᠠ᠂ ᠪᠣᠯᠤᠨᠠ ᠤᠤ? ᠭᠡᠯᠡ᠃ ᠡᠨᠡ ᠬᠦᠦ ᠦᠨᠡᠬᠡᠷ ᠬᠥᠭᠡᠷᠦᠬᠦᠨ ᠲᠥᠷᠥᠵᠡᠢ᠃ ᠲᠣᠷᠮᠣᠭᠣᠷ ᠬᠠᠷᠠ ᠨᠢᠳᠦ ᠲᠡᠢ᠂ ᠨᠠᠷᠢᠬᠠᠨ ᠥᠨᠳᠥᠷ ᠪᠡᠶᠡ ᠲᠡᠢ᠂ ᠢᠯᠠᠩᠭᠤᠶᠠ ᠰᠣᠷᠮᠤᠤᠰᠤ ᠶ᠋ᠢᠨ ᠬᠢᠨᠢ ᠤᠷᠲᠤ ᠲᠡᠭᠰᠢ ᠶ᠋ᠢ ᠬᠡᠯᠡᠪᠡᠯ ᠴᠦᠢᠳ᠋ᠧᠩ ᠦ᠋ᠨ ᠮᠣᠳᠣ ᠶ᠋ᠢ ᠬᠥᠨᠳᠡᠯᠡᠨ ᠲᠠᠯᠪᠢᠬᠤ ᠳ᠋ᠤ᠌ ᠤᠨᠠᠬᠤ ᠦᠭᠡᠢ ᠭᠡᠰᠡᠨ ᠴᠤ᠌ ᠠᠬᠠᠳᠠᠬᠤ ᠦᠭᠡᠢ ᠶᠦᠮ᠃
ᠵᠢᠭᠠᠯ ᠬᠦᠦ ᠪᠣᠰᠴᠤ ᠵᠣᠭᠰᠣᠭᠠᠳ ᠬᠤᠪᠴᠠᠰᠤ ᠪᠠᠨ ᠳᠠᠷᠢ ᠲᠡᠭᠰᠢ ᠵᠠᠰᠠᠭᠰᠠᠨ ᠢ᠋ᠶ᠋ᠠᠨ ᠭᠡᠷ ᠳᠣᠲᠣᠷᠠᠬᠢ ᠬᠥᠮᠦᠨ ᠢ᠋ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠬᠦᠨᠳᠦᠯᠡᠨ ᠳᠠᠭᠤᠳᠠᠭᠠᠳ 《ᠪᠠᠶᠠᠷᠲᠠᠢ!》 ᠭᠡᠵᠦ ᠰᠠᠯᠬᠤ ᠶᠣᠰᠣ ᠬᠢᠭᠡᠳ ᠭᠠᠷᠴᠤ ᠶᠠᠪᠤᠯᠠ᠃ ᠡᠨᠡ ᠬᠦᠦ᠂ ᠡᠦ ᠹᠧᠩ ᠮᠧᠢ ᠶ᠋ᠢ ᠬᠦᠨᠳᠦᠯᠡᠨ ᠳᠠᠭᠤᠳᠠᠬᠤ ᠳ᠋ᠤ᠌ ᠲᠡᠭᠦᠨ ᠳ᠋ᠦ᠍ ᠨᠢᠭᠡ ᠯᠡ ᠡᠪ ᠦᠭᠡᠢ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ ᠬᠤᠷᠳᠤᠬᠠᠨ ᠳᠣᠷᠣᠭᠰᠢ ᠬᠠᠷᠠᠪᠠ᠃ ᠪᠣᠳᠣᠬᠤ ᠳ᠋ᠤ᠌ ᠡᠨᠡ ᠬᠦᠦ᠂ ᠡᠦ ᠹᠧᠩ ᠮᠧᠢ ᠶ᠋ᠢ ᠶᠠᠯᠠ ᠲᠠᠢ ᠭᠡᠵᠦ ᠮᠡᠳᠡᠭᠰᠡᠨ ᠦᠭᠡᠢ ᠪᠠᠢᠬᠠ᠃ ᠬᠠᠷᠢᠨ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠡᠢᠮᠦ ᠠᠭᠤᠴᠢᠯᠠᠭᠳᠠᠰᠢ ᠦᠭᠡᠢ ᠶᠠᠯᠠᠲᠠᠨ᠂ ᠤᠰᠬᠠᠯ ᠴᠠᠭᠠᠪᠤᠷ ᠬᠡᠦᠬᠡᠳ ᠦ᠋ᠨ ᠬᠦᠨᠳᠦᠯᠡᠯ ᠢ᠋ ᠣᠯᠬᠤ ᠡᠷᠬᠡ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠪᠠ᠃ ᠠᠢ᠂ ᠶᠠᠭᠠᠬᠢᠭᠰᠠᠨ ᠬᠥᠮᠦᠵᠢᠯ ᠲᠡᠢ ᠥᠰᠦᠭᠰᠡᠨ ᠬᠡᠦᠬᠡᠳ ᠶᠦᠮ ᠭᠡᠵᠦ ᠲᠡᠷᠡ ᠪᠣᠳᠣᠪᠠ᠃
ᠲᠦᠪᠰᠢᠨ ᠣᠷᠣᠨ ᠳᠤ ᠪᠠᠨ ᠯᠠᠪᠳᠠᠭᠤᠬᠠᠨ ᠰᠠᠭᠤᠭᠠᠳ ᠲᠡᠷᠡ ᠬᠣᠶᠠᠷ ᠢ᠋ ᠡᠭᠡᠯᠵᠢᠯᠡᠨ ᠬᠠᠷᠬᠠᠰᠠᠠ ᠢᠶᠠᠨ᠄
— ᠡᠦ ᠹᠧᠩ ᠮᠧᠢ᠂ ᠪᠣᠳᠣᠬᠤ ᠳ᠋ᠤ᠌ ᠣᠷᠴᠢᠮ ᠤ᠋ᠨ ᠬᠡᠳᠦᠨ ᠡᠳᠦᠷ ᠨᠣᠢᠷ ᠬᠣᠭᠣᠯᠠ ᠴᠢᠨᠢ ᠪᠠᠭᠠᠰᠤᠭᠰᠠᠨ ᠪᠢᠵᠡ? ᠮᠠᠨ ᠤ᠋ ᠨᠥᠬᠥᠳ ᠡᠯᠡ ᠲᠠᠯᠠ ᠪᠠᠷ ᠬᠠᠷᠠᠭᠠᠯᠵᠠᠭᠰᠠᠨ ᠢ᠋ᠶ᠋ᠠᠷ ᠶᠠᠮᠠᠷ ᠪᠣᠢ? ᠭᠡᠯᠡ᠃
— ᠶᠡᠬᠡ ᠰᠠᠢᠨ᠃ ᠬᠠᠷᠢᠨ ᠡᠳᠡ ᠨᠠᠷ ᠰᠥᠨᠢᠵᠢᠨ ᠨᠠᠮᠠ ᠶᠢ ᠮᠠᠨᠠᠭᠠᠳ ᠤᠨᠲᠠᠬᠤ ᠦᠭᠡᠢ ᠨᠢ ᠠᠷᠭᠠ ᠪᠠᠷᠠᠭᠤᠯᠬᠤ ᠶᠤᠮ ᠭᠡᠳ ᠳᠡᠷᠭᠡᠳᠡ ᠨᠢ ᠪᠠᠢᠭᠠ ᠬᠣᠶᠠᠷ ᠡᠮᠡᠭᠲᠡᠢ ᠴᠠᠭᠳᠠᠭᠠ ᠶ᠋ᠢ ᠬᠢᠯᠠᠪᠬᠢᠨ ᠬᠠᠷᠠᠪᠠ᠃
— ᠲᠡᠷᠡ ᠪᠣᠯ ᠠᠵᠢᠯ ᠤ᠋ᠨ ᠬᠠᠷᠢᠭᠤᠴᠠᠯᠭᠠ ᠶᠤᠮ ᠴᠢᠨᠢ ᠠᠷᠭᠠ ᠦᠭᠡᠢ ᠰᠢᠦ᠃ ᠲᠡᠷᠡ ᠨᠢ ᠲᠠᠨ ᠳ᠋ᠤ᠌ ᠶᠡᠬᠡ ᠳᠠᠷᠤᠭᠠᠰᠤ ᠲᠠᠢ ᠰᠠᠨᠠᠭᠳᠠᠭᠰᠠᠨ ᠪᠠᠢᠬᠠ ᠭᠡᠯᠡ᠃ ᠲᠡᠭᠡᠭᠡᠳ ᠲᠦᠪᠰᠢᠨ ᠲᠡᠷᠡ ᠬᠣᠶᠠᠷ ᠡᠮᠡᠭᠲᠡᠢ ᠴᠠᠭᠳᠠᠭᠠ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠭᠠᠳ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠭᠠᠷ ᠢ᠋ ᠨᠢ ᠠᠳᠬᠤᠭᠠᠳ᠄
— ᠲᠠᠨ ᠤ᠋ ᠬᠣᠶᠠᠭᠤᠯᠠ ᠶ᠋ᠢ ᠵᠦᠳᠡᠷᠡᠭᠡᠯᠡ᠃ ᠡᠭᠦᠷᠭᠡ ᠪᠡᠨ ᠠᠮᠵᠢᠯᠲᠠ ᠲᠠᠢ ᠪᠡᠶᠡᠯᠡᠭᠦᠯᠦᠭᠰᠡᠨ ᠳ᠋ᠦ᠍ ᠴᠢᠨᠢ ᠲᠠᠯᠠᠷᠬᠠᠶᠠ᠃ ᠪᠢ ᠰᠠᠯᠠᠭᠠᠨ ᠳᠠᠷᠤᠭᠠ ᠠ᠋ᠴᠠ ᠴᠢᠨᠢ ᠲᠠᠨ ᠤ᠋ ᠬᠣᠶᠠᠭᠤᠯᠠ ᠳ᠋ᠤ᠌ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠴᠢᠯᠥᠭᠡ ᠠᠪᠤᠭᠰᠠᠨ ᠶᠤᠮ᠃ ᠣᠳᠣ ᠬᠠᠷᠢᠵᠤ ᠰᠠᠢᠨ ᠠᠮᠠᠷᠠᠭᠠᠷᠠᠢ ᠭᠡᠪᠡ᠃ ᠬᠣᠶᠠᠷ ᠡᠮᠡᠭᠲᠡᠢ ᠴᠠᠭᠳᠠᠭᠠ ᠶ᠋ᠢ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠡᠦ ᠹᠧᠩ ᠮᠧᠢ᠄
— ᠶᠠᠯᠠ ᠬᠢᠭᠡᠳ ᠬᠥᠮᠦᠨ ᠳ᠋ᠦ᠍ ᠬᠢᠨᠠᠭᠳᠠᠵᠤ ᠰᠠᠭᠤᠬᠤ ᠨᠢ ᠦᠨᠡᠬᠡᠷ ᠪᠡᠷᠬᠡ ᠵᠣᠪᠠᠯᠠᠩ ᠲᠠᠢ ᠬᠡᠷᠡᠭ ᠪᠠᠢᠨᠠ ᠳᠠ᠃ ᠠᠢ! ᠭᠡᠵᠦ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠳ᠋ᠤ᠌ ᠲᠦᠪᠰᠢᠨ᠄
— ᠴᠢ ᠦᠨᠡᠬᠡᠷ ᠲᠡᠢᠮᠦ ᠰᠦᠷᠡᠬᠡᠢ ᠬᠠᠷᠠᠮᠰᠠᠨ ᠭᠡᠮᠰᠢᠵᠦ ᠪᠠᠢᠨᠠ ᠭᠡᠵᠢ ᠤᠤ? ᠭᠡᠪᠡ᠃
— ᠦᠨᠡᠨ᠂ ᠵᠢᠭᠠᠬᠠᠨ ᠴᠤ᠌ ᠬᠤᠳᠠᠯ ᠦᠭᠡᠢ᠃
— ᠮᠢᠨᠦ ᠪᠣᠳᠣᠬᠤ ᠪᠠᠷ ᠴᠢ ᠡᠳᠡᠭᠡᠷ ᠢ᠋ ᠪᠦᠷ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠᠬᠢ ᠬᠡᠷᠡᠭ ᠢ᠋ᠶ᠋ᠡᠷ ᠦᠵᠡᠵᠦ ᠦᠭᠡᠢ ᠭᠡᠵᠢ ᠤᠤ?
— ᠡᠨᠡ᠁ᠡᠨᠡ᠁
— ᠡᠨᠡ ᠶᠠᠭᠤ ᠪᠣᠢ?
— ᠪᠢ᠂ ᠤᠤᠯ ᠠ᠋ᠴᠠ ᠪᠠᠨ ᠡᠢᠮᠦ ᠦᠷᠡ ᠳ᠋ᠦᠩ ᠲᠡᠢ ᠪᠣᠯᠤᠶᠠ ᠭᠡᠵᠦ ᠦᠨᠡᠨ ᠰᠠᠨᠠᠭᠠᠨ ᠠ᠋ᠴᠠ ᠪᠠᠨ ᠬᠦᠰᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠦᠢᠯᠡ ᠠᠵᠢᠯᠯᠠᠭᠠ ᠳᠡᠭᠡᠷᠡ ᠪᠡᠨ ᠴᠤ᠌ ᠢᠩᠭᠢᠵᠦ ᠬᠢᠭᠰᠡᠨ᠃
— ᠴᠢᠨᠦ ᠡᠳᠡᠭᠡᠷ ᠦᠭᠡ ᠪᠣᠳᠠᠲᠠᠢ ᠲᠠᠢ ᠨᠡᠢᠴᠡᠬᠦ ᠦᠭᠡᠢ ᠰᠢᠭ ᠪᠠᠢᠨᠠ᠃ ᠴᠢ ᠦᠨᠡᠬᠡᠷ ᠢᠩᠭᠢᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠣᠯ ᠶᠠᠭᠠᠬᠢᠨᠠ ᠳᠠ᠂ ᠭᠡᠲᠡᠯᠡ ᠪᠣᠳᠠᠲᠠᠢ ᠳᠡᠭᠡᠷᠡ ᠪᠡᠨ ᠢᠩᠭᠢᠵᠦ ᠬᠢᠯᠡ ᠭᠡᠬᠦ ᠨᠢ ᠶᠡᠬᠡ ᠰᠣᠨᠢᠷᠬᠠᠯᠲᠠᠢ ᠪᠠᠢᠨᠠ ᠳᠠ᠃
— ᠦᠨᠡᠨ᠃
— ᠬᠥᠮᠦᠨ ᠦ᠌ ᠪᠣᠳᠣᠯ ᠢ᠋ ᠬᠡᠨ ᠦᠭᠡᠢᠰᠬᠡᠵᠦ ᠴᠢᠳᠠᠬᠤ ᠪᠣᠢ? ᠭᠡᠲᠡᠯᠡ ᠥᠨᠥᠳᠥᠷ ᠴᠢᠮᠠ ᠲᠠᠢ ᠶᠠᠷᠢᠯᠴᠠᠬᠤ ᠶᠠᠭᠤᠮᠠ ᠪᠣᠯ ᠨᠢᠭᠡ ᠭᠡᠷ ᠪᠦᠯᠢ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠠᠰᠠᠭᠤᠳᠠᠯ᠃
— ᠶᠠᠭᠤ ᠶᠠᠷᠢᠯᠴᠠᠭᠰᠠᠨ ᠴᠤ᠌ ᠬᠠᠮᠢᠶᠠ ᠦᠭᠡᠢ᠃ ᠡᠷᠲᠡᠬᠡᠨ ᠵᠣᠬᠢᠬᠤ ᠰᠢᠢᠳᠬᠡᠯ ᠢ᠋ᠶ᠋ᠡᠨ ᠣᠯᠪᠠᠯ ᠪᠣᠯᠬᠤ ᠨᠢ ᠲᠡᠷᠡ᠃ ᠪᠢ ᠡᠳᠡᠭᠡᠷ ᠡᠳᠦᠷ ᠦ᠋ᠳ ᠲᠦ᠍ ᠢᠩᠭᠢᠵᠦ ᠰᠢᠭᠤᠳᠤᠭᠰᠠᠭᠠᠷ ᠢᠷᠡᠵᠡᠢ᠃
— ᠲᠣᠯᠣᠭᠠᠢ ᠪᠠᠨ ᠠᠪᠤᠭᠤᠯᠬᠤ ᠤᠴᠢᠷ ᠲᠤ᠌ ᠢᠩᠭᠢᠵᠦ ᠵᠣᠷᠢᠭ ᠰᠢᠭᠤᠳᠬᠤ ᠭᠡᠭᠴᠢ ᠬᠢᠯᠪᠠᠷ ᠦᠭᠡᠢ᠃ ᠡᠭᠦᠨ ᠡᠴᠡ ᠴᠢᠮᠠ ᠶ᠋ᠢ ᠴᠢᠩᠭᠠ ᠵᠣᠷᠢᠭᠲᠠᠢ ᠬᠥᠮᠦᠨ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨᠠ᠃ ᠨᠢᠭᠡ ᠬᠥᠮᠦᠨ ᠦ᠌ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ ᠭᠠᠷᠭᠠᠬᠤ ᠶ᠋ᠢ ᠬᠣᠷᠢᠭᠯᠠᠵᠤ᠂ ᠪᠤᠷᠤᠭᠤᠳᠬᠠᠵᠤ᠂ ᠨᠢᠴᠤᠭᠠᠬᠤ ᠦᠭᠡᠢ ᠪᠡᠷ ᠰᠣᠨᠣᠰᠪᠠᠯ ᠵᠣᠬᠢᠨᠠ᠃ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠡᠷᠲᠡᠬᠡᠨ ᠢᠯᠭᠠᠷᠠᠭᠤᠯᠵᠤ ᠴᠢᠨᠦ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠠᠭᠤᠵᠢᠷᠠᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ᠂ ᠦᠵᠡᠰᠬᠦᠯᠡᠩ ᠦ᠋ᠨ ᠬᠡᠷᠡᠭ ᠢ᠋ ᠳᠠᠬᠢᠨ ᠪᠠᠢᠴᠠᠭᠠᠵᠤ ᠵᠠᠳᠠᠯᠤᠭᠰᠠᠨ ᠪᠠᠢᠳᠠᠯ ᠢ᠋ ᠬᠡᠯᠡᠪᠡᠯ ᠡᠨᠡ ᠬᠡᠷᠡᠭ ᠴᠢᠮᠠ ᠲᠠᠢ ᠰᠢᠭᠤᠳ ᠬᠣᠯᠪᠣᠭᠳᠠᠯ ᠦᠭᠡᠢ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠬᠥᠮᠦᠨ ᠠᠯᠠᠭᠰᠠᠨ ᠬᠡᠷᠡᠭ ᠲᠦ᠍ ᠴᠢᠨᠦ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ᠃
— ᠠ! ᠭᠡᠳ ᠡᠦ ᠹᠧᠩ ᠮᠧᠢ ᠰᠠᠭᠤᠭᠰᠠᠨ ᠣᠷᠣᠨ ᠠ᠋ᠴᠠ ᠪᠠᠨ ᠣᠭᠯᠣ ᠦᠰᠦᠷᠦᠨ ᠪᠣᠰᠪᠠ᠃ ᠰᠣᠴᠢᠬᠤ ᠭᠠᠢᠬᠠᠬᠤ ᠬᠣᠣᠰᠯᠠᠨᠰᠠᠨ ᠤ᠋ ᠡᠷᠬᠡ ᠪᠡᠷ ᠲᠣᠮᠣ ᠬᠣᠶᠠᠷ ᠨᠢᠳᠦ ᠨᠢ ᠤᠯᠠᠮ ᠪᠦᠯᠲᠡᠢᠨ ᠲᠣᠮᠣ ᠪᠣᠯᠵᠤ ᠲᠣᠭᠲᠠᠭᠰᠠᠨ ᠨᠢ ᠬᠥᠮᠦᠨ ᠠᠶᠤᠮᠠᠷ ᠪᠠᠢᠯᠠ᠃ ᠲᠡᠷᠡ ᠨᠡᠯᠢᠶᠡᠳ ᠤᠳᠠᠲᠠᠯᠠ ᠢᠩᠭᠢᠵᠦ ᠵᠣᠭᠰᠣᠭᠠᠳ᠄
— ᠲᠠ ᠣᠳᠣᠬᠠᠨ ᠶᠠᠭᠤ ᠭᠡᠯᠡ? ᠭᠡᠪᠡ᠃
— ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋! ᠲᠠ ᠰᠡᠳᠬᠢᠯᠭᠡ ᠪᠡᠨ ᠳᠠᠷᠤ! ᠠᠯᠪᠠᠨ ᠬᠡᠷᠡᠭ ᠢ᠋ ᠶᠠᠷᠢᠯᠴᠠᠬᠤ ᠦᠶᠡ ᠳ᠋ᠦ᠍ ᠪᠢ ᠶᠡᠷᠦ ᠡᠴᠡ ᠪᠡᠨ ᠨᠠᠭᠠᠳᠤᠮ ᠲᠣᠭᠯᠠᠭᠠᠮ ᠬᠢᠳᠡᠭ ᠦᠭᠡᠢ᠃ ᠮᠡᠳᠡᠪᠡ ᠤᠤ? ᠡᠨᠡ ᠪᠣᠯ ᠦᠨᠡᠨ ᠦᠭᠡ ᠰᠢᠦ ᠭᠡᠵᠦ ᠲᠦᠪᠰᠢᠨ ᠢ᠋ ᠶᠠᠷᠢᠵᠤ ᠪᠠᠷᠠᠬᠤ ᠲᠠᠢ ᠵᠡᠷᠭᠡ ᠡᠦ ᠹᠧᠩ ᠮᠧᠢ ᠭᠡᠨᠡᠳᠲᠡ ᠴᠢᠷᠠᠢ ᠪᠠᠨ ᠬᠤᠪᠢᠷᠠᠭᠤᠯᠤᠨ ᠪᠠᠷᠤᠭ ᠵᠣᠳᠣᠯᠴᠠᠵᠤ ᠲᠤᠯᠤᠯᠳᠤᠮᠠᠷ ᠠᠭᠠᠰᠢᠯᠠᠨ ᠳᠡᠷᠭᠡᠳᠡ ᠨᠢ ᠢᠷᠡᠭᠡᠳ᠄
— ᠪᠢ ᠣᠳᠣ ᠮᠡᠳᠡᠯᠡ᠃ ᠲᠠᠨᠤᠰ᠂ ᠪᠣᠯᠤᠷᠴᠠᠭᠠᠨ ᠤ᠋ ᠤᠤᠯ ᠠᠮᠠᠨ ᠥᠴᠢᠭ᠂ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢ ᠬᠡᠪ ᠢ᠋ᠶ᠋ᠡᠷ ᠨᠢ ᠪᠠᠷᠢᠮᠲᠠᠯᠠᠨ ᠨᠠᠳᠠ ᠶᠠᠯᠠ ᠦᠭᠡᠢ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠠ ᠪᠢᠵᠡ᠃ ᠲᠦᠪᠰᠢᠨ ᠭᠤᠸᠠᠢ᠂ ᠢᠩᠭᠢᠵᠦ ᠰᠢᠢᠳᠬᠡᠪᠡᠯ ᠬᠥᠮᠦᠨ ᠢ᠋ ᠬᠢᠯᠢᠰᠳᠡᠭᠦᠯᠦᠨᠡ ᠰᠢᠦ᠃ ᠾᠧᠩ᠂ ᠪᠢ ᠠᠩᠬᠠᠨ ᠳᠤ ᠪᠠᠨ ᠮᠠᠰᠢ ᠡᠷᠡᠭᠡᠯᠵᠡᠵᠦ ᠥᠩᠭᠡᠷᠡᠭᠰᠡᠨ ᠶᠦᠮ᠃ ᠭᠠᠭᠴᠠ ᠬᠥᠮᠦᠨ ᠦ᠌ ᠦᠭᠡ ᠬᠡᠳᠦᠢ ᠦᠨᠡᠨ ᠴᠤ᠌ ᠭᠡᠷᠡᠴᠢ ᠪᠣᠯᠭᠠᠬᠤ ᠦᠭᠡᠢ ᠶ᠋ᠢ ᠪᠢ ᠣᠯᠠᠨ ᠤᠳᠠᠭᠠ ᠦᠵᠡᠭᠰᠡᠨ᠃ ᠲᠠᠨᠤᠰ᠂ ᠬᠥᠮᠦᠨ ᠦ᠌ ᠭᠡᠷᠡᠴᠢ ᠪᠠᠷᠢᠮᠲᠠ ᠳ᠋ᠤ᠌ ᠭᠠᠳᠠᠭᠠᠳᠤ ᠨᠥᠬᠥᠴᠡᠯ ᠪᠦᠷᠢᠯᠳᠦᠭᠦᠯᠵᠦ ᠥᠭᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠬᠥᠮᠦᠨ ᠦ᠌ ᠲᠤᠰᠢᠶᠠᠭᠰᠠᠨ ᠠᠮᠠᠨ ᠥᠴᠢᠭ ᠦ᠋ᠨ ᠦᠨᠡᠨ ᠬᠤᠳᠠᠯ ᠢ᠋ ᠴᠤ᠌ ᠢᠯᠭᠠᠬᠤ ᠦᠭᠡᠢ ᠪᠠᠢᠨᠠ᠃ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠴᠢ ᠨᠠᠳᠠ ᠭᠠᠳᠠᠭᠠᠳᠤ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠦᠷᠢᠳᠦᠭᠦᠯᠬᠦ ᠪᠡᠷ ᠮᠠᠰᠢ ᠢᠲᠡᠭᠡᠯ ᠲᠡᠢ ᠦᠭᠡ ᠶᠠᠷᠢᠵᠤ ᠪᠠᠢᠭᠰᠠᠨ᠃ ᠤᠤᠯ ᠨᠢ ᠬᠠᠷᠢᠨ ᠤᠷᠠᠨ ᠬᠣᠩᠰᠢᠶᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠠᠮᠠ ᠶᠢ ᠮᠡᠬᠡᠯᠡᠵᠦ ᠪᠠᠢᠭᠰᠠᠨ ᠰᠢᠲᠠ᠃ ᠮᠥᠨ ᠯᠡ ᠨᠢᠭᠡ ᠬᠣᠭᠣᠰᠣᠨ ᠲᠣᠯᠣᠭᠠᠢ ᠬᠣᠩᠭᠢᠯᠳᠠᠭ ᠴᠡᠭᠡᠵᠢ ᠯᠡ ᠪᠠᠢᠨᠠ᠃ ᠪᠢ ᠶᠠᠭᠠᠬᠢᠭᠠᠳ ᠡᠷᠲᠡ ᠮᠡᠳᠡᠭᠰᠡᠨ ᠦᠭᠡᠢ ᠪᠣᠢ? ᠭᠡᠮᠡᠨ ᠬᠡᠯᠡᠬᠦ ᠳᠣᠳᠣᠮ ᠬᠣᠣᠷ ᠨᠢ ᠪᠤᠴᠠᠯᠵᠤ ᠪᠠᠢᠯᠠ᠃
ᠲᠦᠪᠰᠢᠨ ᠣᠷᠣ ᠠ᠋ᠴᠠ ᠪᠠᠨ ᠪᠣᠰᠴᠤ ᠢᠨᠢᠶᠡᠭᠰᠡᠨ ᠴᠢᠷᠠᠢ ᠲᠠᠢ ᠪᠠᠷ ᠡᠦ ᠹᠧᠩ ᠮᠧᠢ ᠢᠢᠨ ᠮᠥᠷᠥ ᠶ᠋ᠢ ᠬᠥᠩᠭᠡᠬᠡᠨ ᠳᠠᠷᠤᠵᠤ ᠰᠠᠭᠤᠯᠭᠠᠭᠠᠳ᠄
— ᠡᠭᠦᠨ ᠢ᠋ ᠪᠢᠳᠡ ᠦᠷᠭᠦᠯᠵᠢᠯᠡᠨ ᠶᠠᠷᠢᠨᠬᠤ ᠪᠠᠨ ᠪᠠᠢᠴᠢᠬᠠᠶᠠ᠃ ᠲᠠᠨ ᠤ᠋ ᠨᠠᠳᠠ ᠥᠭᠭᠦᠭᠰᠡᠨ ᠦᠨᠡᠯᠡᠯᠲᠡ ᠵᠣᠬᠢᠰᠲᠠᠢ ᠰᠢᠭ᠋ ᠪᠠᠢᠨᠠ᠃ ᠪᠠᠰᠠ ᠵᠠᠷᠢᠮ ᠨᠢ ᠵᠤᠭᠡᠰ ᠦᠭᠡᠢ ᠰᠢᠭ ᠪᠠᠢᠨᠠ᠂ ᠬᠡᠷᠡᠭ ᠦ᠋ᠨ ᠦᠨᠡᠨ ᠬᠤᠳᠠᠯ ᠢ᠋ ᠪᠣᠯ ᠦᠢᠯᠡᠳᠦᠯᠭᠡ ᠭᠡᠷᠡᠴᠢᠯᠡᠬᠦ ᠶᠦᠮ᠃ ᠭᠡᠲᠡᠯᠡ ᠪᠢ ᠴᠢᠮᠠ ᠳ᠋ᠤ᠌ ᠲᠣᠳᠣᠷᠬᠠᠢᠯᠠᠬᠤ ᠨᠢ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠬᠡᠷᠡᠭ ᠴᠢᠨᠦ ᠪᠣᠳᠣᠭᠰᠠᠨ ᠠ᠋ᠴᠠ ᠬᠣᠯᠠ ᠪᠤᠳᠤᠯᠢᠶᠠᠨᠲᠠᠢ᠃ ᠬᠣᠵᠢᠮ ᠦᠨᠡᠨ ᠴᠠᠭᠠᠨ ᠢ᠋ᠶ᠋ᠠᠨ ᠣᠯᠬᠤ ᠦᠶᠡ ᠳ᠋ᠦ᠍ ᠮᠡᠳᠡᠬᠦ ᠶᠦᠮ᠃ ᠬᠠᠷᠢᠨ ᠥᠨᠥᠳᠥᠷ ᠲᠠᠨ ᠠ᠋ᠴᠠ ᠠᠰᠠᠭᠤᠬᠤ ᠨᠢ ᠭᠡᠳ ᠦᠭᠡ ᠪᠡᠨ ᠵᠣᠭᠬᠢᠵᠠᠢ᠃
ᠤᠤᠯ ᠨᠢ ᠲᠡᠷᠡ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠬᠡᠷᠡᠭ ᠳᠡᠭᠡᠷᠡ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ ᠭᠡᠳᠡᠭ ᠢ᠋ ᠬᠡᠯᠡᠭᠰᠡᠨ ᠦ᠌ ᠳᠠᠷᠠᠭᠠ᠂ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠲᠠᠯᠪᠢᠭᠤᠷᠠᠬᠤ ᠶ᠋ᠢ ᠠᠰᠢᠭᠯᠠᠵᠤ᠂ ᠴᠢᠬᠤᠯᠠ ᠭᠡᠵᠦ ᠰᠠᠨᠠᠭᠳᠠᠭᠰᠠᠨ ᠵᠠᠷᠢᠮ ᠠᠰᠠᠭᠤᠳᠠᠯ ᠢ᠋ ᠪᠠᠢᠴᠠᠭᠠᠬᠤ ᠪᠠᠷ ᠪᠣᠳᠣᠯᠬᠢᠯᠠᠭᠰᠠᠨ ᠨᠢ ᠣᠳᠣ ᠬᠣᠭᠣᠰᠣᠷᠠᠵᠠᠢ᠃ ᠭᠡᠪᠡᠴᠦ ᠠᠷᠭᠠᠯᠠᠵᠤ ᠪᠠᠢᠭᠠᠳ ᠠᠰᠠᠭᠤᠬᠤ ᠴᠢᠬᠤᠯᠠ ᠲᠠᠢ ᠪᠠᠢᠯᠠ᠃
ᠡᠦ ᠹᠧᠩ ᠮᠧᠢ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ ᠶᠠᠭᠤ ᠠᠰᠠᠭᠤᠬᠤ ᠶ᠋ᠢ ᠨᠢ ᠬᠦᠯᠢᠶᠡᠭᠰᠡᠭᠡᠷ᠃
— ᠠᠷᠪᠠᠨ ᠲᠠᠪᠤᠨ ᠵᠢᠯ ᠦ᠋ᠨ ᠡᠮᠦᠨᠡ ᠴᠢ ᠬᠣᠲᠠ ᠶ᠋ᠢᠨ ᠨᠢᠭᠡᠳᠦᠭᠡᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠥᠩᠭᠡᠵᠢᠵᠦ ᠥᠩᠭᠡᠷᠡᠭᠰᠡᠨ ᠤᠤ?
— ᠠ᠋᠂ ᠥᠨᠥᠳᠥᠷ ᠪᠢ ᠲᠠ ᠨᠠᠷ ᠢ᠋ ᠶᠠᠮᠠᠷ ᠴᠢᠬᠤᠯᠠ ᠶᠠᠭᠤᠮᠠ ᠠᠰᠠᠭᠤᠬᠤ ᠪᠣᠯ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠴᠢᠨᠢ ᠬᠠᠷᠢᠨ ᠡᠭᠦᠨ ᠢ᠋ ᠪᠠᠢᠴᠠᠭᠠᠬᠤ ᠭᠡᠵᠦ ᠪᠠᠢᠵᠤ ᠰᠢᠲᠠ᠃ ᠲᠠᠨᠤᠰ ᠬᠡᠷᠡᠭ ᠢᠯᠭᠠᠷᠠᠭᠤᠯᠬᠤ ᠴᠢᠳᠠᠯ ᠢ᠋ᠶ᠋ᠠᠷ ᠠᠨᠠᠢᠬᠠᠨ ᠴᠤ᠌ ᠬᠥᠮᠦᠨ ᠦ᠌ ᠶᠠᠷᠠ ᠶ᠋ᠢ ᠮᠠᠯᠲᠠᠬᠤ ᠳᠤ ᠪᠠᠨ ᠳᠠᠪᠠᠭᠤ ᠶᠤᠮ ᠪᠠᠢᠨᠠ᠃ ᠪᠣᠯᠤᠷᠴᠠᠭᠠᠨ ᠢ᠋ ᠪᠠᠷᠢᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠠᠨᠢᠯᠠᠭᠰᠠᠨ ᠤᠴᠢᠷ ᠢ᠋ ᠳᠠᠬᠢᠨ ᠳᠠᠪᠲᠠᠨ ᠪᠠᠢᠴᠠᠭᠠᠯᠠ᠃ ᠪᠢ ᠭᠡᠳᠡᠭ ᠬᠥᠮᠦᠨ ᠡᠭᠡᠯ ᠴᠠᠭᠠᠪᠤᠷ ᠲᠠᠭᠠᠨ ᠪᠣᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠲᠤᠰᠢᠶᠠᠬᠤ ᠳ᠋ᠤ᠌ ᠲᠠ ᠬᠠᠷᠢᠨ ᠶᠠᠭᠤ ᠪᠠᠷ ᠴᠤ᠌ ᠦᠵᠡᠵᠦ ᠦᠭᠡᠢ ᠮᠡᠲᠦ ᠠᠪᠤᠷᠢᠯᠠᠵᠤ ᠪᠠᠢᠭᠰᠠᠨ ᠨᠢ ᠱᠠᠯ ᠪᠡᠴᠢ ᠪᠠᠢᠵᠢ ᠰᠢᠦ᠃ ᠤᠤᠯ ᠨᠢ ᠬᠠᠷᠢᠨ ᠡᠭᠦᠨ ᠡᠴᠡ ᠢᠯᠡᠭᠦᠦ ᠶᠠᠷᠠ ᠶ᠋ᠢ ᠮᠢᠨᠢ ᠮᠠᠯᠲᠠᠴᠢᠬᠠᠭᠠᠳ ᠰᠡᠭᠦᠯ ᠮᠢᠷᠢᠶᠠᠵᠤ ᠪᠠᠢᠭᠰᠠᠨ ᠢ᠋ ᠴᠢᠨᠢ ᠬᠡᠨ ᠮᠡᠳᠡᠯᠡ ᠳᠠ ᠭᠡᠵᠦ ᠲᠡᠷᠡ ᠬᠡᠯᠡᠭᠰᠡᠭᠡᠷ ᠪᠠᠢᠭᠠᠳ ᠣᠷᠣᠨ ᠳᠤ ᠪᠠᠨ ᠰᠠᠭᠤᠵᠤ ᠲᠣᠭᠲᠠᠬᠤ ᠦᠭᠡᠢ ᠪᠣᠯᠵᠤ ᠬᠡᠳᠦ ᠤᠳᠠᠭᠠ ᠥᠨᠳᠡᠯᠵᠡᠵᠦ ᠠᠪᠤᠭᠠᠳ᠄
— ᠳᠠᠷᠤᠭᠠ ᠭᠤᠸᠠᠢ᠂ ᠦᠨᠡᠬᠡᠷ ᠡᠢᠮᠦ ᠬᠡᠷᠡᠭ ᠪᠠᠢᠨᠠ᠃ ᠲᠡᠷᠡ ᠮᠥᠷᠲᠡᠭᠡᠨ ᠪᠢ ᠬᠣᠷᠢ ᠴᠤ᠌ ᠬᠦᠷᠦᠭᠡᠳᠦᠢ ᠬᠡᠦᠬᠡᠨ ᠪᠠᠢᠬᠤ ᠳᠤ ᠪᠠᠨ ᠲᠥᠷᠥᠭᠰᠡᠨ ᠶᠦᠮ᠃ ᠠᠷᠪᠠ ᠭᠠᠷᠤᠢ ᠵᠢᠯ ᠳᠠᠷᠤᠭᠰᠠᠨ ᠨᠢᠭᠤᠴᠠ ᠶ᠋ᠢ ᠥᠨᠥᠳᠥᠷ ᠬᠠᠰᠢ ᠯᠠ ᠲᠠ ᠨᠠᠷ ᠢᠯᠡᠷᠡᠭᠦᠯᠴᠢᠬᠡᠯᠡ᠃ ᠡᠢᠮᠦ ᠴᠢᠳᠠᠪᠤᠷᠢ ᠪᠠᠨ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠳᠡᠭᠡᠷᠡ ᠲᠥᠪᠯᠡᠷᠡᠭᠦᠯᠦᠭᠰᠡᠨ ᠪᠣᠯ ᠠᠷᠠᠢ ᠢᠩᠭᠢᠵᠦ ᠰᠤᠨᠵᠢᠷᠠᠬᠤ ᠦᠭᠡᠢ ᠪᠠᠢᠬᠠ᠃ ᠲᠠ ᠪᠠᠷᠤᠭ ᠡᠢᠮᠦ ᠶᠠᠷᠠ ᠰᠢᠷᠬᠠ ᠲᠠᠢ ᠡᠮᠡᠭᠲᠡᠢ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠭᠠ ᠪᠢᠵᠡ? ᠾᠧᠩ᠂ ᠮᠢᠨᠦ ᠲᠡᠷᠡ ᠬᠡᠦᠬᠡᠳ ᠦ᠋ᠨ ᠡᠴᠢᠭᠡ ᠨᠢ ᠴᠤ᠌ ᠲᠠᠨ ᠰᠢᠭ᠋ ᠨᠣᠶᠠᠨ ᠬᠥᠮᠦᠨ ᠪᠠᠢᠭᠠ ᠰᠢᠦ! ᠭᠡᠯᠡ᠃
ᠡᠨᠡ ᠡᠬᠡᠨᠡᠷ ᠣᠷᠭᠢᠯᠤᠭᠰᠠᠨ ᠠᠭᠤᠷ ᠲᠤ ᠪᠠᠨ ᠡᠯᠳᠡᠪ ᠦ᠋ᠨ ᠬᠠᠷᠠ ᠬᠣᠣᠷᠲᠠᠢ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠨ ᠬᠡᠯᠡᠮᠡᠷ ᠪᠠᠢᠯᠠ᠃
ᠲᠦᠪᠰᠢᠨ ᠪᠣᠰᠴᠤ ᠵᠣᠭᠰᠣᠭᠠᠳ᠂ ᠭᠦᠷᠡᠭᠡᠨ ᠰᠤᠳᠠᠰᠤ ᠨᠢ ᠭᠦᠷᠪᠡᠯᠵᠡᠨ ᠬᠢᠯᠢᠩᠨᠡᠵᠦ ᠪᠠᠢᠭᠠ ᠡᠦ ᠹᠧᠩ ᠮᠧᠢ ᠳ᠋ᠦ᠍᠄
— ᠵᠠᠷᠢᠮ ᠬᠡᠷᠡᠭ ᠤᠴᠢᠷ ᠮᠠᠰᠢ ᠪᠤᠳᠤᠯᠢᠶᠠᠨᠲᠠᠢ ᠮᠥᠷᠲᠡᠭᠡᠨ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠ ᠪᠠᠢᠳᠠᠭ᠃ ᠬᠡᠷᠪᠡ ᠠᠯᠢᠪᠠ ᠬᠡᠷᠡᠭ ᠢ᠋ ᠪᠦᠷ ᠥᠪᠡᠷ ᠦ᠋ᠨ ᠳᠥᠭᠥᠮ ᠪᠣᠳᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠢᠯᠠᠭᠠᠵᠤ᠂ ᠴᠢᠨᠠᠭᠰᠢ ᠦᠬᠦᠨ ᠢᠲᠡᠭᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠪᠦᠷ ᠲᠠᠢᠯᠪᠤᠷᠢᠯᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠬᠤ ᠶᠤᠮ᠃ ᠪᠢᠳᠡ ᠬᠠᠰᠢ ᠯᠠ ᠰᠠᠷᠠᠯ ᠰᠡᠳᠬᠢᠯᠭᠡ ᠪᠡᠨ ᠵᠢᠯᠣᠭᠣᠳᠤᠨ ᠵᠢᠩᠬᠢᠨᠢ ᠶᠠᠭᠤᠮᠠ ᠪᠠᠨ ᠶᠠᠷᠢᠯᠴᠠᠶᠠ᠃ ᠡᠦ ᠹᠧᠩ ᠮᠧᠢ᠂ ᠲᠡᠭᠡᠬᠦ ᠳ᠋ᠦ᠍ ᠲᠡᠷᠡ ᠵᠢᠯ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠰᠠ ᠨᠢᠭᠡ ᠡᠮᠩᠲᠡᠢ ᠬᠥᠩᠭᠡᠵᠢᠭᠰᠡᠨ ᠪᠢᠵᠡ᠃ ᠲᠠ ᠣᠳᠣ ᠡᠨᠡ ᠡᠮᠡᠭᠲᠡᠢ ᠶ᠋ᠢ ᠲᠠᠨᠢᠨᠠ ᠤᠤ? ᠭᠡᠯᠡ᠃
— ᠲᠠᠨᠢᠬᠤ ᠦᠭᠡᠢ᠃ ᠬᠡᠨ ᠲᠡᠭᠦᠨ ᠢ᠋ ᠠᠩᠬᠠᠷᠴᠤ ᠡᠳᠦᠭᠡ ᠪᠣᠯᠲᠠᠯᠠ ᠴᠡᠭᠡᠵᠢᠯᠡᠨᠡ ᠳᠡ᠃ ᠭᠡᠪᠡᠴᠦ ᠲᠡᠢᠮᠦ ᠨᠢᠭᠡ ᠡᠬᠡᠨᠡᠷ ᠴᠣᠭ ᠬᠥᠩᠭᠡᠵᠢᠭᠰᠡᠨ ᠨᠢ ᠦᠨᠡᠨ᠃ ᠲᠡᠭᠡᠭᠡᠳ ᠪᠠᠰᠠ ᠮᠢᠨᠦ ᠬᠡᠦᠬᠡᠳ ᠢ᠋ ᠬᠥᠬᠥᠭᠦᠯᠵᠦ ᠥᠩᠭᠡᠷᠡᠵᠡᠢ᠃
— ᠴᠢᠮᠠ ᠲᠠᠢ ᠬᠠᠮᠲᠤ ᠬᠥᠩᠭᠡᠵᠢᠭᠰᠡᠨ ᠲᠡᠷᠡ ᠡᠮᠡᠭᠲᠡᠢ ᠪᠣᠯ ᠳᠠᠷᠤᠢ ᠦᠵᠡᠰᠬᠦᠯᠡᠩ ᠮᠥᠨ᠃
— ᠪᠢ ᠲᠠᠨᠢᠬᠤ ᠦᠭᠡᠢ᠃ ᠦᠵᠡᠰᠬᠦᠯᠡᠩ ᠢ᠋ ᠪᠢ ᠶᠡᠷᠦ ᠦᠵᠡᠭᠰᠡᠨ ᠦᠭᠡᠢ᠃ ᠪᠣᠯᠤᠷᠴᠠᠭᠠᠨ ᠲᠠᠢ ᠶᠠᠪᠤᠯᠴᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠦᠵᠡᠰᠬᠦᠯᠡᠩ ᠭᠡᠳᠡᠭ ᠨᠡᠷᠡ ᠶ᠋ᠢ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠲᠡᠢ ᠲᠠᠨᠢᠯᠴᠠᠬᠤ ᠶ᠋ᠢ ᠬᠦᠰᠡᠳᠡᠭ ᠦᠭᠡᠢ᠃
— ᠦᠨᠡᠨ ᠳᠦ ᠪᠡᠨ ᠴᠢ ᠲᠡᠭᠦᠨ ᠲᠡᠢ ᠤᠴᠠᠷᠠᠵᠤ ᠥᠩᠭᠡᠷᠡᠰᠡᠨ ᠶᠦᠮ᠃ ᠬᠠᠭᠠᠰ ᠵᠢᠯ ᠦ᠋ᠨ ᠡᠮᠦᠨᠡ ᠬᠡᠪᠡᠯᠢ ᠶ᠋ᠢ ᠴᠢᠨᠢ ᠪᠠᠢᠴᠠᠭᠠᠨ᠂ ᠲᠥᠷᠥᠬᠦ ᠴᠢᠳᠠᠪᠤᠷᠢ ᠪᠠᠨ ᠠᠯᠳᠠᠭᠰᠠᠨ ᠭᠡᠵᠦ ᠲᠣᠳᠣᠯᠠᠭᠰᠠᠨ ᠡᠮᠴᠢ ᠪᠣᠯ ᠳᠠᠷᠤᠢ ᠦᠵᠡᠰᠬᠦᠯᠡᠩ ᠮᠥᠨ᠃
— ᠥ᠂ ᠲᠡᠷᠡ ᠴᠢᠨᠢ ᠦᠵᠡᠰᠬᠦᠯᠡᠩ ᠶᠦᠮ ᠤᠤ?
— ᠲᠡᠢᠮᠦ ᠠ᠋᠃
— ᠲᠠ ᠨᠠᠷ ᠦᠨᠡᠬᠡᠷ ᠬᠠᠴᠢᠨ ᠤᠯᠤᠰ ᠪᠠᠢᠨᠠ᠃ ᠮᠢᠨᠦ ᠠᠯᠢᠪᠠ ᠢᠬᠢᠷ ᠰᠢᠬᠢᠷ ᠠᠮᠢᠳᠤᠷᠠᠯ ᠤ᠋ᠨ ᠤᠴᠢᠷ ᠢ᠋ ᠬᠦᠷᠲᠡᠯᠡ ᠠᠯᠳᠠᠯ ᠦᠭᠡᠢ ᠪᠠᠢᠴᠠᠭᠠᠵᠠᠢ᠃ ᠡᠭᠦᠨ ᠦ᠌ ᠴᠠᠭᠠᠨᠠᠬᠢ ᠰᠠᠨᠠᠭᠠ ᠴᠢᠨᠢ ᠴᠣᠬᠣᠮ ᠶᠠᠭᠤ ᠪᠣᠢ?
— ᠬᠡᠯᠡᠵᠦ ᠪᠠᠢᠬᠤ ᠴᠢᠨᠢ ᠪᠠᠬᠠᠨ ᠠᠬᠠᠳᠠᠵᠤ ᠪᠠᠢᠨᠠ᠃ ᠮᠠᠨ ᠤ᠋ ᠬᠡᠷᠡᠭ ᠲᠡᠢ ᠠᠷᠭᠠ ᠦᠭᠡᠢ ᠯᠡ ᠰᠢᠭᠤᠳ ᠬᠣᠯᠪᠣᠭᠳᠠᠴᠢᠬᠠᠬᠤ ᠪᠠᠷ ᠯᠠ ᠢᠩᠭᠢᠵᠦ ᠮᠥᠷᠳᠡᠵᠦ ᠪᠠᠢᠴᠠᠭᠠᠬᠤ ᠴᠢᠬᠤᠯᠠ ᠲᠠᠢ ᠪᠣᠯᠤᠭᠠᠳ ᠪᠠᠢᠨᠠ ᠰᠢᠦ᠃ ᠵᠥᠪ ᠢ᠋ᠶ᠋ᠡᠷ ᠣᠢᠯᠠᠭᠠᠨ ᠬᠠᠩᠭᠠᠮᠵᠢᠲᠠᠢ ᠬᠠᠷᠢᠭᠤᠯᠲᠠ ᠬᠢᠵᠦ ᠬᠠᠪᠰᠤᠷᠤᠯᠭᠠ ᠦᠵᠡᠭᠦᠯᠬᠦ ᠶ᠋ᠢ ᠴᠢᠨᠢ ᠪᠢᠳᠡ ᠬᠦᠰᠡᠵᠦ ᠪᠠᠶᠢᠨᠠ᠃
— ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯ ᠳᠠ᠃ ᠨᠢᠭᠡᠨᠲᠡ ᠦᠬᠦᠬᠦ ᠶᠠᠯᠠ ᠬᠦᠯᠢᠶᠡᠭᠰᠡᠨ ᠨᠠᠳᠠ ᠥᠨᠥᠳᠥᠷ ᠲᠠᠨᠠᠷ ᠠ᠋ᠴᠠ ᠤᠲᠠᠰᠤᠨ ᠲᠡᠳᠦᠢ ᠵᠦᠢᠯ ᠢ᠋ ᠴᠤ᠌ ᠨᠢᠭᠤᠵᠤ ᠬᠠᠭᠠᠶᠠ ᠭᠡᠵᠦ ᠪᠣᠳᠣᠭᠠ ᠦᠭᠡᠢ᠃
ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠰᠠᠢᠬᠠᠨ ᠵᠢᠰᠦᠲᠡᠨ ᠦ᠌ ᠦᠯᠢᠭᠡᠷ ᠶᠠᠩᠵᠤ ᠭᠡᠮᠡᠷ ᠬᠠᠷᠠᠭᠳᠠᠬᠤ ᠡᠨᠡ ᠡᠬᠡᠨᠡᠷ ᠠᠮᠢᠳᠤᠷᠠᠯ ᠤ᠋ᠨ ᠰᠤᠷᠲᠠᠯ ᠳᠤ ᠪᠠᠨ ᠠᠷᠠᠢ ᠣᠳᠣᠬᠠᠨ ᠤ᠋ ᠬᠥᠮᠦᠰ ᠦ᠋ᠨ ᠶᠠᠷᠢᠶᠠᠨ ᠳ᠋ᠤ᠌ ᠬᠡᠯᠡᠯᠴᠡᠳᠡᠭ ᠰᠢᠭ ᠲᠡᠢᠮᠦ ᠵᠠᠢᠳᠠᠩ ᠰᠤᠯᠠ ᠪᠢᠰᠢ ᠪᠠᠢᠵᠠᠢ᠃ ᠭᠡᠪᠡᠴᠦ ᠰᠠᠢᠬᠠᠨ ᠥᠩᠭᠡᠲᠡᠨ ᠳ᠋ᠦ᠍ ᠰᠤᠯᠠ ᠶᠠᠷᠢᠶᠠ ᠣᠯᠠᠨ᠂ ᠰᠠᠯᠤᠭᠰᠠᠨ ᠡᠬᠡᠨᠡᠷ ᠲᠦ᠍ ᠰᠠᠭᠠᠷ ᠨᠡᠷᠡ ᠠᠷᠪᠢᠨ ᠭᠡᠳᠡᠭ ᠢ᠋ᠶ᠋ᠡᠷ ᠡᠨᠡ ᠬᠣᠶᠠᠷ ᠨᠥᠬᠥᠴᠡᠯ ᠢ᠋ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠡᠦ ᠹᠧᠩ ᠮᠧᠢ ᠢᠯᠡᠭᠦᠦ ᠬᠤᠪᠢ ᠮᠠᠭᠤ ᠨᠡᠷᠡ ᠣᠯᠤᠨᠠ ᠭᠡᠳᠡᠭ ᠢ᠋ ᠬᠡᠨ ᠴᠤ᠌ ᠪᠠᠷᠤᠭᠯᠠᠮᠠᠷ ᠪᠢᠯᠡ᠃ ᠳᠣᠬᠢ ᠬᠠᠰᠢᠷ ᠲᠣᠯᠣᠭᠠᠢᠲᠠᠨ ᠨᠠᠷ ᠢᠵᠢᠯᠢ ᠪᠤᠰᠤ ᠬᠦᠢᠰᠦᠲᠡᠨ ᠳ᠋ᠦ᠍ ᠬᠠᠪᠢᠳᠠᠭᠰᠠᠨ ᠲᠣᠭᠠ ᠪᠠᠨ ᠮᠠᠷᠲᠠᠨ᠂ ᠬᠣᠶᠠᠷ ᠭᠤᠷᠪᠠᠨ ᠦᠶᠡ ᠳ᠋ᠦ᠍ ᠬᠦᠷᠴᠢᠬᠡᠭᠡᠳ ᠠᠵᠢᠭ ᠴᠤ᠌ ᠦᠭᠡᠢ ᠰᠡᠩᠭᠢᠨᠡᠭᠦᠯᠵᠦ ᠥᠩᠭᠡᠷᠡᠨᠡ᠃ ᠣᠯᠠᠨ ᠤ᠋ ᠨᠢᠳᠦ ᠲᠤᠰᠤᠭᠰᠠᠨ ᠠᠵᠠ ᠦᠭᠡᠢ ᠨᠢᠭᠡ ᠬᠣᠶᠠᠷ ᠨᠢ ᠯᠡ ᠡᠯᠳᠡᠪ ᠡᠰᠡᠨ ᠬᠡᠯᠡᠯᠴᠡᠭᠡᠨ ᠢ᠋ ᠡᠭᠦᠷᠴᠦ ᠦᠯᠦ ᠳᠠᠭᠠᠭᠠᠮᠠᠷ ᠪᠣᠯᠳᠠᠭ ᠪᠠᠢᠯᠠ᠃ ᠡᠦ ᠹᠧᠩ ᠮᠧᠢ᠂ ᠪᠣᠯᠤᠷᠴᠠᠭᠠᠨ ᠬᠣᠶᠠᠷ ᠢ᠋ ᠲᠡᠢᠮᠦ ᠬᠠᠷᠢᠴᠠᠭᠠ ᠲᠠᠢ ᠭᠡᠳᠡᠭ ᠨᠢ ᠣᠷᠣ ᠲᠠᠢ ᠭᠡᠬᠦ ᠳ᠋ᠦ᠍᠂ ᠲᠡᠭᠦᠨ ᠡᠴᠡ ᠡᠮᠦᠨᠡ ᠠᠷᠪᠠᠨ ᠲᠠᠪᠤᠨ ᠵᠢᠯ ᠦ᠋ᠨ ᠡᠮᠦᠨᠡ ᠬᠡᠨ ᠳ᠋ᠦ᠍ ᠴᠤ᠌ ᠢᠯᠡᠷᠡᠭᠦᠯᠬᠦ ᠡᠴᠡ ᠪᠡᠷᠬᠡᠰᠢᠶᠡᠭᠰᠡᠨ ᠣᠩᠭᠣᠨ ᠪᠡᠶᠡ ᠨᠢ ᠡᠪᠳᠡᠷᠡᠭᠰᠡᠨ ᠨᠢ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠦᠨᠡᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠡᠨᠡ ᠬᠡᠷᠡᠭ ᠢ᠋ᠶ᠋ᠡᠨ ᠲᠡᠷᠡ ᠳᠠᠷᠤᠭᠠᠳ ᠤᠳᠠᠭᠰᠠᠨ᠃ ᠪᠠᠰᠠ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠳᠠᠷᠤᠬᠤ ᠪᠠᠷ ᠵᠣᠷᠢᠭ ᠰᠢᠭᠤᠳᠤᠭᠰᠠᠨ ᠴᠤ᠌ ᠥᠨᠥᠳᠥᠷ ᠲᠡᠷᠡ ᠲᠦᠪᠰᠢᠨ ᠦ᠌ ᠡᠮᠦᠨᠡ ᠣᠵᠣᠭᠣᠷ ᠤ᠋ᠨ ᠥᠩᠭᠡᠷᠡᠯᠲᠡ ᠪᠡᠨ ᠬᠡᠪ ᠢ᠋ᠶ᠋ᠡᠷ ᠨᠢ ᠳᠤᠰᠬᠠᠬᠤ ᠵᠣᠷᠢᠭ ᠣᠷᠣᠵᠠᠢ᠃ ᠡᠨᠡ ᠨᠢ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠵᠣᠷᠢᠭᠤᠳᠠ ᠨᠢ ᠣᠢᠯᠠᠭᠰᠠᠨ ᠠᠭᠤᠷ ᠬᠣᠣᠷ ᠲᠤ ᠪᠠᠨ ᠪᠠᠢᠪᠠ᠃ ᠡᠦ ᠹᠧᠩ ᠮᠧᠢ ᠰᠠᠨᠠᠭᠠᠨ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠪᠢᠰᠢ ᠪᠣᠯᠪᠠᠴᠤ ᠬᠠᠤᠯᠢ ᠪᠠᠷ ᠭᠡᠷᠯᠡᠭᠰᠡᠨ ᠡᠷᠡ ᠲᠡᠢ ᠪᠡᠨ ᠠᠷᠪᠠᠭᠠᠳ ᠵᠢᠯ ᠠᠮᠢᠳᠤᠷᠠᠬᠤ ᠳᠤ ᠪᠠᠨ ᠡᠳᠡᠭᠡᠷ ᠢ᠋ ᠪᠠᠰᠠ ᠴᠤ᠌ ᠠᠮᠠ ᠮᠠᠯᠵᠢᠨ ᠳᠠᠷᠤᠵᠤ ᠴᠢᠳᠠᠭᠰᠠᠨ᠃
ᠲᠡᠷᠡ ᠴᠤ᠌ ᠪᠠᠢᠲᠤᠭᠠᠢ ᠬᠡᠦᠬᠡᠨ ᠬᠠᠯᠢᠰᠤ ᠪᠦᠲᠦᠨ ᠭᠡᠵᠦ ᠬᠠᠭᠤᠷᠬᠤ ᠪᠠᠷ ᠵᠣᠷᠢᠭᠰᠠᠨ ᠡᠦ ᠹᠧᠩ ᠮᠧᠢ ᠳᠡᠷᠡ ᠨᠢᠭᠡᠳᠬᠡᠬᠦ ᠳᠦ ᠪᠡᠨ ᠵᠣᠷᠢᠭᠤᠳᠠ ᠬᠣᠷᠢᠭᠠ ᠴᠡᠭᠡᠷ ᠲᠡᠢ ᠡᠳᠦᠷ ᠢ᠋ᠶ᠋ᠡᠨ ᠲᠠᠭᠠᠷᠠᠭᠤᠯᠤᠨ᠂ ᠬᠡᠦᠬᠡᠨ ᠪᠡᠶᠡ ᠶ᠋ᠢ ᠮᠢᠨᠢ ᠢᠩᠭᠢᠵᠦ ᠯᠡ ᠡᠪᠳᠡᠯᠡᠵᠦ ᠣᠷᠬᠢᠯᠠ ᠰᠢᠦ ᠭᠡᠵᠦ ᠵᠠᠯᠭᠢᠵᠤ ᠣᠷᠬᠢᠮᠠᠷ ᠪᠠᠢᠭᠠ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠬᠢᠨ ᠳ᠋ᠦ᠍ ᠭᠡᠨᠡᠨ ᠴᠠᠭᠠᠪᠤᠷ ᠰᠢᠪᠡᠨᠡᠭᠰᠡᠨ ᠪᠠᠢᠵᠠᠢ᠃ ᠡᠨᠡ ᠪᠠᠰᠢᠷ ᠢ᠋ ᠨᠢ ᠴᠠᠯᠠᠭᠠᠢ ᠪᠦᠳᠦᠭᠦᠯᠢᠭ ᠡᠷᠡ ᠨᠢ ᠦᠨᠡᠨ ᠭᠣᠣᠯ ᠠ᠋ᠴᠠ ᠪᠠᠨ ᠦᠵᠦᠭᠦᠷ ᠦᠭᠡᠢ ᠢᠳᠡᠭᠡᠨ᠂ ᠤᠷᠤᠭ ᠰᠠᠯᠲᠠᠯᠠ ᠪᠠᠨ ᠴᠤ᠌ ᠥᠴᠦᠬᠡᠨ ᠲᠡᠳᠦᠢ ᠠᠨᠢᠷ ᠰᠡᠵᠢᠭ ᠠᠪᠤᠭᠠᠳᠤᠢ ᠨᠢ ᠯᠠᠪᠲᠠᠢ ᠪᠠᠢᠪᠠ᠃ ᠭᠡᠲᠡᠯᠡ ᠬᠠᠭᠤᠷᠮᠠᠭ ᠦᠢᠯᠡ ᠨᠢ ᠡᠦ ᠹᠧᠩ ᠮᠧᠢ ᠶ᠋ᠢ ᠬᠡᠪᠡᠯᠢ ᠶ᠋ᠢᠨ ᠪᠤᠵᠠᠷᠲᠤᠯ ᠢ᠋ᠶ᠋ᠠᠷ ᠡᠮᠨᠡᠯᠭᠡ ᠳ᠋ᠦ᠍ ᠣᠷᠣᠭᠤᠯᠵᠤ᠂ ᠲᠥᠷᠥᠬᠦ ᠴᠢᠳᠠᠪᠤᠷᠢ ᠪᠠᠨ ᠠᠯᠳᠠᠭᠰᠠᠨ ᠨᠠᠰᠤᠨ ᠤ᠋ ᠵᠣᠪᠠᠯᠠᠩ ᠳ᠋ᠤ᠌ ᠤᠨᠠᠭᠠᠵᠠᠢ᠃ ᠡᠢᠮᠦ ᠭᠠᠰᠠᠯᠠᠩ ᠢ᠋ ᠪᠣᠢ ᠪᠣᠯᠭᠠᠭᠰᠠᠨ ᠨᠢ ᠠᠷᠪᠠᠨ ᠲᠠᠪᠤᠨ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠤᠴᠢᠷ ᠪᠠᠢᠵᠠᠢ᠃
ᠳᠥᠩᠭᠡᠵᠦ ᠠᠵᠢᠯ ᠳ᠋ᠤ᠌ ᠣᠷᠣᠭᠰᠠᠨ ᠡᠦ ᠹᠧᠩ ᠮᠧᠢ ᠬᠡᠦᠬᠡᠨ ᠨᠢᠭᠡ ᠤᠳᠠᠭᠠ ᠡᠮᠨᠡᠯᠭᠡ ᠶ᠋ᠢᠨ ᠰᠢᠰᠲ᠋ᠧᠮ ᠦ᠋ᠨ ᠠᠵᠢᠯ ᠤ᠋ᠨ ᠳᠤᠭᠤᠢᠯᠠᠩ ᠳ᠋ᠤ᠌ ᠲᠠᠲᠠᠭᠳᠠᠨ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠ ᠲᠠᠢ ᠪᠠᠷ ᠦᠨᠳᠦᠰᠦᠨ ᠱᠠᠲᠤᠨ ᠳ᠋ᠤ᠌ ᠪᠠᠭᠤᠵᠠᠢ᠃ ᠡᠦ ᠹᠧᠩ ᠮᠧᠢ ᠠᠵᠢᠯ ᠤ᠋ᠨ ᠳᠤᠭᠤᠢᠯᠠᠩ ᠤ᠋ᠨ ᠢ᠋ᠶ᠋ᠠᠨ ᠳᠠᠷᠤᠭᠠ ᠲᠠᠢ ᠭᠠᠢᠭᠤᠢ ᠳᠣᠲᠣᠨᠣ ᠬᠠᠷᠢᠴᠠᠭᠠ ᠲᠠᠢ ᠪᠣᠯᠵᠤ᠂ ᠴᠢᠨᠠᠭᠰᠢᠯᠠᠨ ᠤᠷᠬᠠᠨ ᠳᠤ ᠪᠠᠨ ᠲᠠᠲᠠᠵᠤ ᠣᠷᠣᠭᠤᠯᠤᠭᠰᠠᠨ ᠨᠢ ᠦᠨᠡᠨ ᠳᠦ ᠪᠡᠨ ᠤᠳᠠᠯ ᠦᠭᠡᠢ ᠵᠢᠩᠬᠢᠨᠢᠴᠢᠯᠡᠬᠦ ᠭᠡᠵᠦ ᠪᠠᠢᠭᠠ ᠠᠵᠢᠯ᠂ ᠨᠠᠮ ᠤ᠋ᠨ ᠠᠰᠠᠭᠤᠳᠠᠯ ᠢ᠋ᠶ᠋ᠠᠨ ᠪᠠᠲᠤᠳᠬᠠᠬᠤ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠪᠠᠢᠵᠠᠢ᠃ ᠢᠩᠭᠢᠬᠦ ᠨᠢ ᠬᠡᠦᠬᠡᠨ ᠪᠡᠶᠡ ᠳ᠋ᠦ᠍ᠨᠢ ᠬᠡᠦᠬᠡᠳ ᠲᠡᠢ ᠪᠣᠯᠭᠠᠨᠠ ᠭᠡᠵᠦ ᠲᠡᠷᠡ ᠶᠡᠷᠦ ᠪᠣᠳᠣᠵᠤ ᠣᠯᠤᠭᠰᠠᠨ ᠦᠭᠡᠢ ᠪᠠᠢᠵᠠᠢ᠃ ᠮᠠᠭᠤᠬᠠᠢ ᠬᠡᠷᠡᠭ ᠲᠤ ᠪᠠᠨ ᠢᠴᠢᠩᠭᠦᠷᠡᠬᠦ ᠳᠦ ᠪᠡᠨ ᠰᠢᠳᠦᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠤ᠌ ᠬᠡᠢ ᠭᠠᠷᠭᠠᠯ ᠦᠭᠡᠢ ᠳᠠᠷᠤᠭᠰᠠᠨ ᠪᠣᠯᠪᠠᠴᠤ ᠬᠡᠪᠡᠯᠢ ᠳ᠋ᠦ᠍ᠨᠢ ᠲᠠᠷᠢᠭᠰᠠᠨ ᠤᠷᠰᠢᠭ ᠲᠠᠢ ᠶᠠᠭᠤᠮᠠ ᠨᠢ ᠡᠳᠦᠷ ᠡᠴᠡ ᠡᠳᠦᠷ ᠳᠣᠪᠣᠢᠬᠤ ᠳ᠋ᠤ᠌ ᠲᠡᠰᠴᠦ ᠶᠠᠳᠠᠬᠤ ᠳᠤ ᠪᠠᠨ ᠨᠢᠭᠤᠴᠠ ᠡᠵᠡᠨ ᠳ᠋ᠦ᠍ᠨᠢ ᠨᠢᠭᠤᠷ ᠢ᠋ᠶ᠋ᠠᠨ ᠤᠯᠠᠢᠯᠭᠠᠵᠤ ᠪᠠᠢᠭᠠᠳ ᠬᠡᠯᠡᠪᠡ᠃ ᠡᠨᠡ ᠬᠥᠮᠦᠨ ᠡᠰᠡ ᠮᠡᠳᠡᠭᠴᠢ ᠪᠡᠷ ᠣᠪᠯᠠᠨ ᠣᠪᠣᠭᠠ ᠯᠠ ᠨᠢᠷᠤᠭᠤ ᠲᠦᠰᠢᠭ ᠲᠡᠢ ᠳᠤ ᠪᠡᠨ ᠡᠷᠳᠦᠨ ᠳᠣᠣᠷᠠ ᠨᠢ ᠴᠢᠯᠥᠭᠡ ᠥᠭᠭᠦᠭᠰᠡᠨ ᠦᠭᠡᠢ᠃ ᠲᠠᠪᠤᠨ ᠰᠠᠷᠠ ᠳᠡᠭᠡᠷᠡ ᠨᠢ ᠬᠣᠲᠠ ᠶ᠋ᠢᠨ ᠡᠮᠨᠡᠯᠭᠡ ᠳ᠋ᠦ᠍ ᠪᠠᠢᠴᠠᠭᠠᠯᠭᠠᠬᠤ ᠳ᠋ᠤ᠌ ᠬᠡᠦᠬᠡᠳ ᠨᠢ ᠨᠢᠭᠡᠨᠲᠡ ᠠᠮᠢᠯᠠᠵᠤ ᠪᠤᠵᠠᠭᠠᠢᠷᠠᠭᠰᠠᠨ ᠤ᠋ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠬᠢᠯᠪᠠᠷ ᠳᠥᠭᠥᠮ ᠪᠠᠭᠤᠯᠭᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠪᠠ᠃ ᠲᠡᠷᠡ ᠮᠤᠬᠤᠷᠳᠠᠬᠤ ᠳᠤ ᠪᠠᠨ ᠤᠷᠲᠤ ᠬᠤᠭᠤᠴᠠᠭᠠ ᠪᠠᠷ ᠴᠢᠯᠥᠭᠡ ᠠᠪᠴᠤ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠨᠢᠭᠤᠨ ᠳᠠᠯᠳᠠᠯᠠᠵᠤ ᠰᠠᠷᠠ ᠡᠳᠦᠷ ᠲᠦ᠋ᠨᠢ ᠬᠦᠷᠭᠡᠪᠡ᠃
ᠲᠡᠭᠡᠭᠡᠳ ᠡᠦ ᠹᠧᠩ ᠮᠧᠢ ᠲᠠᠨᠢᠵᠤ ᠮᠡᠳᠡᠬᠦ ᠬᠥᠮᠦᠨ ᠦᠭᠡᠢ ᠬᠣᠲᠠ ᠶ᠋ᠢᠨ ᠨᠢᠭᠡᠳᠦᠭᠡᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠣᠴᠢᠵᠤ ᠨᠡᠷᠡ ᠣᠪᠣᠭ ᠢ᠋ᠶ᠋ᠠᠨ ᠰᠣᠯᠢᠵᠤ ᠪᠠᠢᠵᠤ ᠳᠥᠩᠭᠡᠵᠦ ᠯᠡ ᠬᠥᠩᠭᠡᠵᠢᠭᠰᠡᠨ ᠪᠠᠢᠨᠠ᠃ ᠡᠦ ᠹᠧᠩ ᠮᠧᠢ ᠡᠨᠡ ᠬᠡᠦᠬᠡᠳ ᠢ᠋ ᠲᠦᠷᠦᠮᠡᠭᠴᠡ ᠬᠥᠮᠦᠨ ᠳ᠋ᠦ᠍ ᠥᠭᠬᠦ ᠪᠤᠶᠤ ᠬᠥᠳᠡᠭᠡ ᠬᠠᠶᠠᠬᠤ ᠬᠠᠲᠠᠭᠤ ᠵᠣᠷᠢᠭ ᠢ᠋ ᠡᠪᠦᠷᠯᠡᠵᠦ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠭᠤᠷᠪᠠ ᠬᠣᠨᠣᠭ ᠳᠡᠭᠡᠷᠡ ᠨᠢ ᠬᠡᠦᠬᠡᠳ ᠨᠢ ᠬᠢᠵᠢᠭ ᠢ᠋ᠶ᠋ᠡᠷ ᠥᠩᠭᠡᠷᠡᠬᠦ ᠳ᠋ᠦ᠍ ᠲᠡᠷᠡ ᠳᠣᠲᠣᠷᠠ ᠪᠠᠨ ᠪᠤᠷᠬᠠᠨ ᠲᠡᠭᠷᠢ ᠥᠷᠥᠰᠢᠶᠡᠯ ᠳᠦ ᠪᠡᠨ ᠪᠠᠭᠲᠠᠭᠠᠨ ᠨᠢᠭᠤᠷ ᠢ᠋ ᠮᠢᠨᠢ ᠬᠠᠮᠠᠭᠠᠯᠠᠯᠠ ᠭᠡᠵᠦ ᠵᠠᠯᠪᠠᠷᠢᠵᠠᠢ᠃ ᠳᠥᠩᠭᠡᠵᠦ ᠯᠡ ᠠᠵᠢᠯ ᠳ᠋ᠤ᠌ ᠣᠷᠣᠭᠠ ᠬᠥᠳᠡᠭᠡ ᠶ᠋ᠢᠨ ᠪᠣᠷᠣ ᠬᠡᠦᠬᠡᠨ ᠡᠦ ᠹᠧᠩ ᠮᠧᠢ ᠶ᠋ᠢ ᠡᠨᠡ ᠬᠣᠲᠠ ᠳ᠋ᠤ᠌ ᠲᠠᠨᠢᠬᠤ ᠬᠥᠮᠦᠨ ᠡᠳᠦᠷ ᠦ᠋ᠨ ᠣᠳᠣ ᠰᠢᠭ᠋ ᠯᠡ ᠪᠠᠢᠭᠰᠠᠨ᠃ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠡᠮᠴᠢ ᠰᠤᠪᠢᠯᠠᠭᠴᠢ ᠨᠠᠷ ᠯᠠ ᠡᠷᠡ ᠨᠥᠬᠥᠷ ᠴᠢᠨᠢ ᠶᠠᠭᠠᠬᠢᠭᠠᠳ ᠢᠷᠡᠳᠡᠭ ᠦᠭᠡᠢ ᠪᠣᠢ? ᠬᠠᠮᠢᠭᠠ ᠠᠵᠢᠯᠯᠠᠵᠤ ᠪᠠᠢᠬᠤ ᠶᠤᠮ? ᠠᠵᠢᠯᠯᠠᠵᠤ ᠪᠠᠢᠬᠤ ᠭᠠᠵᠠᠷ ᠨᠢ ᠬᠣᠯᠠ ᠤᠤ? ᠭᠡᠳ ᠪᠠᠢᠨ ᠳᠠᠬᠢᠨ ᠠᠰᠠᠭᠤᠬᠤ ᠠ᠋ᠴᠠ ᠴᠠᠭᠠᠰᠢ ᠶᠠᠮᠠᠷ ᠴᠤ᠌ ᠶᠠᠷᠰᠢᠭ ᠭᠠᠷᠤᠭᠰᠠᠨ ᠦᠭᠡᠢ᠃
ᠢᠩᠭᠢᠭᠡᠳ ᠦᠨᠡᠬᠡᠷ ᠲᠡᠭᠦᠨ ᠦ᠌ ᠪᠣᠳᠣᠭᠰᠠᠨ ᠶᠣᠰᠣᠭᠠᠷ ᠥᠨᠥᠳᠥᠷ ᠬᠦᠷᠲᠡᠯᠡ ᠳᠠᠷᠤᠵᠤ ᠲᠠᠢᠯᠵᠠᠢ᠃
ᠠᠷᠪᠠᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠠᠷᠠᠭᠠ᠂ ᠡᠨᠡ ᠬᠥᠩᠬᠥᠷ ᠰᠢᠷᠠ ᠴᠢᠷᠠᠢᠲᠠᠢ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠢᠩᠭᠢᠵᠦ ᠰᠠᠪᠠ ᠲᠠᠢ ᠳᠡᠭᠡᠵᠢ ᠲᠡᠢ ᠨᠢ ᠲᠤᠯᠭᠠᠴᠢᠬᠠᠨᠠ ᠭᠡᠵᠦ ᠲᠡᠭᠦᠨ ᠦ᠌ ᠠᠷᠪᠠᠨ ᠵᠡᠭᠦᠳᠦᠨ ᠳ᠋ᠦ᠍ ᠴᠤ᠌ ᠪᠠᠢᠭᠰᠠᠨ ᠦᠭᠡᠢ ᠪᠢᠯᠡ᠃ ᠲᠡᠭᠡᠭᠡᠳ ᠲᠡᠷᠡ ᠠᠯᠠᠭᠳᠠᠬᠤ ᠶᠠᠯᠠ ᠲᠠᠢ ᠨᠠᠳᠠ ᠶᠠᠮᠠᠷ ᠯᠠ ᠨᠢᠭᠤᠮᠠᠷ ᠵᠦᠢᠯ ᠪᠠᠢᠬᠤ ᠪᠣᠢ᠂ ᠠᠰᠠᠭᠤᠭᠰᠠᠨ ᠢ᠋ᠶ᠋ᠠᠷ ᠨᠢ ᠬᠠᠷᠢᠭᠤᠯᠵᠤ ᠠᠮᠠᠷᠠᠶᠠ ᠭᠡᠵᠦ ᠢᠩᠭᠢᠵᠦ ᠶᠠᠷᠢᠵᠤ ᠥᠭᠴᠡᠢ᠃
ᠲᠦᠪᠰᠢᠨ ᠭᠤᠸᠠᠢ ᠡᠨᠳᠡ ᠬᠦᠷᠲᠡᠯᠡ ᠰᠣᠨᠣᠰᠤᠭᠠᠳ ᠶᠡᠬᠡ ᠬᠠᠩᠭᠠᠮᠵᠢᠲᠠᠢ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ᠂ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠯᠵᠠᠨ ᠢᠨᠢᠶᠡᠮᠰᠦᠭᠯᠡᠵᠦ᠄
— ᠡᠦ ᠹᠧᠩ ᠮᠧᠢ᠂ ᠴᠢ ᠶᠡᠬᠡ ᠲᠣᠳᠣᠷᠬᠠᠢ ᠶᠠᠷᠢᠯᠠ᠂ ᠦᠨᠡᠨ ᠳᠦ ᠪᠡᠨ ᠴᠢᠨᠦ ᠥᠩᠭᠡᠷᠡᠭᠰᠡᠨ ᠦ᠌ ᠰᠢᠷᠬᠠ ᠰᠣᠷᠪᠢ ᠶ᠋ᠢ ᠴᠢᠨᠢ ᠢᠩᠭᠢᠵᠦ ᠬᠥᠨᠳᠡᠬᠦ ᠨᠢ ᠵᠣᠬᠢᠰ ᠦᠭᠡᠢ ᠮᠥᠷᠲᠡᠭᠡᠨ ᠨᠠᠳᠠ ᠴᠤ᠌ ᠡᠪ ᠦᠭᠡᠢ ᠰᠠᠨᠠᠭᠳᠠᠬᠤ ᠶᠤᠮ᠃ ᠭᠡᠪᠡᠴᠦ ᠡᠳᠡᠭᠡᠷ ᠬᠡᠷᠡᠭ᠂ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠲᠠᠢ ᠰᠢᠭᠤᠳ ᠬᠣᠯᠪᠣᠭᠳᠠᠭᠰᠠᠨ ᠠ᠋ᠴᠠ ᠠᠰᠠᠭᠤᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ᠃ ᠲᠠᠨ ᠳ᠋ᠤ᠌ ᠶᠡᠬᠡ ᠣᠰᠣᠯ ᠪᠣᠯᠤᠯᠠ᠃ ᠴᠢᠨᠦ ᠲᠡᠷᠡ ᠬᠡᠦᠬᠡᠳ ᠴᠢᠨᠢ ᠣᠳᠣ ᠪᠣᠯᠲᠠᠯᠠ ᠠᠮᠢᠳᠤ ᠪᠠᠢᠨᠠ ᠭᠡᠳᠡᠭ ᠢ᠋ ᠥᠨᠥᠳᠥᠷ ᠴᠢᠮᠠ ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠶᠡ᠃
— ᠪᠠᠢᠬᠤ ᠦᠭᠡᠢ᠂ ᠡᠨᠡ ᠬᠤᠳᠠᠯ! ᠡᠨᠡ᠁ ᠭᠡᠵᠦ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠨᠢᠳᠦ ᠨᠢ ᠬᠣᠶᠠᠳᠠᠬᠢ ᠤᠳᠠᠭᠠ ᠲᠣᠮᠣᠷᠠᠨ ᠲᠣᠭᠲᠠᠭᠠᠳ᠂ ᠰᠣᠯᠢᠶᠠᠲᠠᠢ ᠬᠥᠮᠦᠨ ᠰᠢᠭ ᠬᠡᠯᠡᠬᠦ ᠳ᠋ᠦ᠍ ᠤᠷᠤᠭᠤᠯ ᠨᠢ ᠴᠤ᠌ ᠵᠢᠭᠲᠡᠢ ᠮᠠᠭᠤᠬᠠᠢ ᠲᠠᠲᠠᠪᠠᠯᠵᠠᠨ ᠴᠡᠴᠡᠷᠭᠡᠨᠡᠵᠦ ᠪᠠᠢᠯᠠ᠃
— ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠦᠨᠡᠨ᠃ ᠣᠳᠣᠬᠠᠨ ᠨᠠᠳᠠ ᠲᠠᠢ ᠲᠡᠭᠲᠦ ᠨᠠᠭᠠᠳᠴᠤ ᠪᠠᠢᠭᠰᠠᠨ ᠲᠡᠷᠡ ᠬᠡᠦᠬᠡᠳ ᠪᠣᠯ ᠳᠠᠷᠤᠢ ᠴᠢᠨᠦ ᠬᠦᠦ ᠮᠥᠨ᠃ ᠲᠡᠭᠦᠨ ᠦ᠌ ᠨᠢᠭᠤᠷ ᠴᠢᠷᠠᠢ ᠨᠢ ᠴᠢᠮᠠ ᠲᠠᠢ ᠶᠡᠬᠡ ᠲᠥᠰᠦᠭᠡ ᠲᠡᠢ ᠰᠢᠦ! ᠮᠠᠨᠤᠰ ᠴᠢᠨᠦ ᠴᠢᠰᠤ ᠶ᠋ᠢ ᠪᠠᠢᠴᠠᠭᠠᠵᠤ ᠲᠣᠳᠣᠯᠵᠤ ᠦᠵᠡᠭᠰᠡᠨ ᠠ᠋᠃
— ᠪᠢ ᠥᠨᠥᠳᠥᠷ ᠠᠷᠠᠢ ᠵᠡᠭᠦᠳᠦᠯᠡᠵᠦ ᠪᠠᠢᠭᠠ ᠪᠢᠰᠢ ᠪᠢᠵᠡ? ᠭᠡᠳ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠴᠢᠬᠢ ᠨᠢ ᠱᠤᠤᠭᠢᠨ ᠬᠦᠩᠭᠢᠨᠡᠵᠦ᠂ ᠨᠢᠳᠦ ᠨᠢ ᠡᠷᠢᠶᠡᠯᠵᠡᠨ ᠠᠯᠢᠪᠠ ᠰᠠᠷᠠᠯ ᠮᠡᠳᠡᠷᠡᠯ ᠨᠢ ᠮᠢᠨᠴᠦᠭᠦᠷᠡᠭᠰᠡᠨ ᠰᠢᠭ ᠰᠠᠨᠠᠭᠳᠠᠵᠠᠢ᠃ ᠲᠡᠷᠡ ᠵᠤᠵᠠᠭᠠᠨ ᠭᠤᠶᠠ ᠪᠠᠨ ᠰᠡᠮᠡᠭᠡᠷᠬᠡᠨ ᠴᠢᠮᠬᠢᠵᠦ ᠦᠵᠡᠭᠡᠳ ᠴᠢᠨᠦᠷᠡᠨ ᠡᠪᠡᠳᠴᠦ ᠪᠠᠢᠬᠤᠯᠠᠷ ᠵᠡᠭᠦᠳᠦᠯᠡᠵᠦ ᠪᠠᠢᠬᠤ ᠪᠢᠰᠢ ᠭᠡᠳᠡᠭ ᠢ᠋ᠶ᠋ᠡᠨ ᠮᠡᠳᠡᠪᠡ᠃
ᠲᠦᠪᠰᠢᠨ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠣᠢᠷᠠᠲᠤᠨ ᠵᠣᠭᠰᠣᠭᠠᠳ᠄
— ᠰᠢᠭᠦᠬᠦ ᠬᠣᠷᠢᠶᠠᠨ ᠳ᠋ᠤ᠌ ᠲᠠ ᠯᠠᠪ ᠡᠢᠮᠦ ᠰᠠᠢᠬᠠᠨ ᠵᠡᠭᠦᠳᠦ ᠵᠡᠭᠦᠳᠦᠯᠡᠬᠦ ᠦᠭᠡᠢ ᠶᠦᠮ ᠰᠢᠦ᠃
— ᠡᠳᠡᠭᠡᠷ ᠁
— ᠡᠦ ᠹᠧᠩ ᠮᠧᠢ ᠠ᠋᠂ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠡᠦᠬᠡᠳ ᠴᠢᠨᠢ ᠦᠬᠦᠭᠰᠡᠨ ᠭᠡᠳᠡᠭ ᠨᠢ ᠪᠦᠷ ᠬᠤᠳᠠᠯ ᠦᠭᠡ᠃ ᠦᠨᠡᠨ ᠳᠦ ᠪᠡᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠡᠦᠬᠡᠳ ᠦ᠋ᠨ ᠬᠢᠵᠢᠭ ᠳᠡᠯᠭᠡᠷᠡᠭᠰᠡᠨ ᠶᠠᠪᠤᠳᠠᠯ ᠣᠭᠲᠣ ᠦᠭᠡᠢ᠃ ᠲᠡᠷᠡ ᠪᠣᠯ ᠬᠡᠦᠬᠡᠳ ᠢ᠋ ᠴᠢᠨᠢ ᠠᠪᠬᠤ ᠭᠡᠰᠡᠨ ᠬᠥᠮᠦᠨ ᠦ᠌ ᠠᠷᠭᠠ ᠮᠡᠬᠡ ᠶᠦᠮ᠃
— ᠬᠥᠮᠦᠨ ᠁ ᠶᠠᠭᠤᠨ ᠤ᠋ ᠨᠠᠮᠠ ᠶᠢ ᠁
— ᠦᠷᠭᠦᠯᠵᠢᠯᠡᠨ ᠶᠠᠷᠢᠭᠰᠠᠨ ᠤ᠋ ᠬᠡᠷᠡᠭ ᠦᠭᠡᠢ᠃ ᠬᠣᠵᠢᠮ ᠴᠢᠮᠠ ᠳ᠋ᠤ᠌ ᠲᠣᠳᠣᠷᠬᠠᠢ ᠲᠠᠢᠯᠪᠤᠷᠢᠯᠠᠬᠤ ᠶᠤᠮ᠃
ᠡᠦ ᠹᠧᠩ ᠮᠧᠢ ᠳᠣᠲᠣᠷᠠ ᠪᠠᠨ ᠵᠡᠭᠦᠳᠦ ᠪᠣᠯᠤᠭᠰᠠᠨ ᠴᠤ᠌ ᠣᠳᠣ ᠰᠡᠷᠡᠬᠦ ᠣᠢᠷᠠᠲᠤᠭᠰᠠᠨ ᠪᠠᠢᠬᠠ ᠭᠡᠵᠦ ᠪᠣᠳᠣᠨ ᠵᠤᠵᠠᠭᠠᠨ ᠭᠤᠶᠠ ᠪᠠᠨ ᠪᠠᠰᠠ ᠨᠢᠭᠡ ᠤᠳᠠᠭᠠ ᠰᠡᠮᠡᠬᠡᠷ ᠴᠢᠮᠬᠢᠵᠦ ᠦᠵᠡᠯᠡ᠃ ᠡᠪᠡᠳᠴᠦ ᠪᠠᠢᠨᠠ᠃ ᠵᠡᠭᠦᠳᠦ ᠪᠢᠰᠢ ᠠ᠋!
— ᠣᠳᠣ ᠵᠠᠯᠭᠠᠭᠠᠳ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠥᠷᠯᠥᠭᠡ ᠴᠢᠮᠠ ᠳ᠋ᠤ᠌ ᠳ᠋ᠢᠶᠠᠩᠬᠤᠸᠠ ᠢᠷᠡᠭᠦᠯᠦᠭᠰᠡᠨ ᠲᠡᠷᠡ ᠬᠥᠮᠦᠨ ᠲᠡᠢ ᠶᠠᠷᠢᠯᠴᠠᠭᠰᠠᠨ ᠬᠢᠭᠡᠳ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠣᠴᠢᠭᠰᠠᠨ ᠥᠩᠭᠡᠷᠡᠯᠲᠡ ᠪᠡᠨ ᠶᠠᠷᠢᠪᠠᠯ ᠶᠠᠮᠠᠷ ᠪᠣᠢ? ᠮᠢᠨᠦ ᠪᠣᠳᠣᠬᠤ ᠪᠠᠷ ᠥᠨᠥᠳᠥᠷ ᠲᠠ ᠯᠠᠪ ᠶᠠᠷᠢᠬᠤ ᠶᠤᠮ ᠭᠡᠵᠦ ᠲᠦᠪᠰᠢᠨ ᠵᠠᠯᠭᠠᠨ ᠶᠠᠷᠢᠯᠠ᠃
ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ ᠡᠨᠡ ᠪᠣᠯ ᠪᠠᠰᠠ ᠨᠢᠭᠡ ᠨᠢᠭᠤᠴᠠ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠥᠨᠥᠳᠥᠷ ᠲᠡᠷᠡ ᠨᠢᠭᠤᠵᠤ ᠳᠠᠷᠤᠬᠤ ᠰᠠᠨᠠᠭᠠ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠦᠪᠰᠢᠨ ᠦ᠌ ᠠᠰᠠᠭᠤᠯᠲᠠ ᠶ᠋ᠢ ᠤᠭᠲᠤᠨ᠄
— ᠪᠣᠯᠤᠨᠠ᠃ ᠪᠦᠬᠦᠨ ᠢ᠋ ᠬᠡᠯᠡᠶᠡ᠃ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠪᠢ ᠦᠨᠡᠬᠡᠷ ᠬᠤᠳᠠᠯ ᠬᠠᠭᠤᠷᠮᠠᠭ ᠭᠡᠷᠡᠴᠢ ᠪᠠᠷᠢᠮᠲᠠ ᠵᠣᠬᠢᠶᠠᠭᠰᠠᠨ ᠶᠤᠮ᠃ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠠᠳᠠ ᠶᠠᠭ ᠲᠡᠭᠡᠵᠦ ᠬᠢᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠷᠡ ᠥᠷᠯᠥᠭᠡ ᠶ᠋ᠢᠨ ᠦᠨᠡᠨ ᠥᠩᠭᠡᠷᠡᠯᠲᠡ ᠪᠣᠯ ᠡᠢᠮᠦ ᠶᠦᠮ᠃
— ᠦᠨᠡᠨ ᠳᠦ ᠪᠡᠨ ᠪᠢ ᠦᠵᠡᠰᠬᠦᠯᠡᠩ ᠢ᠋ ᠲᠡᠷᠡ ᠰᠥᠨᠢ ᠬᠣᠣᠷᠯᠠᠭᠳᠠᠭᠰᠠᠨ ᠢ᠋ ᠶᠠᠭᠠᠬᠢᠭᠰᠠᠨ ᠴᠤ᠌ ᠳᠠᠷᠤᠢ ᠳ᠋ᠤᠨᠢ ᠣᠯᠵᠤ ᠮᠡᠳᠡᠬᠦ ᠦᠭᠡᠢ ᠶᠦᠮ᠃ ᠲᠡᠷᠡ ᠥᠷᠯᠥᠭᠡ ᠦᠦᠷ ᠮᠠᠩᠬᠠᠢᠨ ᠴᠠᠢᠬᠤ ᠦᠶᠡ ᠳ᠋ᠦ᠍ ᠪᠢ ᠳᠥᠩᠭᠡᠵᠦ ᠪᠣᠰᠤᠭᠠᠳ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠵᠤ ᠪᠠᠢᠲᠠᠯᠠ ᠠᠰᠠᠷ ᠳᠣᠣᠷᠠᠬᠢ ᠳ᠋ᠢᠶᠠᠩᠬᠤᠸᠠ ᠮᠠᠨᠠᠭᠠᠴᠢ ᠡᠪᠦᠭᠡᠨ ᠢᠷᠡᠵᠦ᠂ ᠨᠠᠮᠠ ᠶᠢ ᠬᠤᠷᠳᠤᠨ ᠣᠴᠢᠵᠤ ᠳ᠋ᠢᠶᠠᠩᠬᠤᠸᠠ ᠲᠣᠰᠤᠭᠲᠤᠨ ᠭᠡᠵᠦ ᠶᠠᠭᠠᠷᠠᠭᠤᠯᠤᠨ ᠲᠠᠭᠤᠲᠠᠯᠠ᠃ ᠪᠢ ᠪᠠᠬᠠᠨ ᠭᠠᠢᠬᠠᠵᠤ ᠡᠭ ᠵᠣᠭ ᠭᠡᠰᠡᠨ ᠢ᠋ᠶ᠋ᠡᠨ ᠡᠪᠦᠭᠡᠨ ᠢ᠋ ᠳᠠᠭᠠᠵᠤ ᠳᠣᠣᠷᠠ ᠪᠠᠭᠤᠪᠠ᠃ ᠡᠢᠮᠦ ᠬᠠᠷᠠ ᠥᠷᠯᠥᠭᠡᠭᠦᠷ ᠴᠣᠬᠣᠮ ᠬᠡᠨ ᠨᠠᠳᠠ ᠳ᠋ᠢᠶᠠᠩᠬᠤᠸᠠ ᠢᠷᠡᠭᠦᠯᠦᠭᠰᠡᠨ ᠪᠣᠯ? ᠰᠠᠢᠨ ᠴᠢᠮᠡᠭᠡ ᠪᠠᠢᠬᠤ ᠪᠣᠯᠪᠠ ᠤᠤ? ᠡᠰᠡᠬᠦᠯᠡ ᠮᠠᠭᠤ ᠴᠢᠮᠡᠭᠡ ᠪᠠᠢᠬᠤ ᠪᠣᠯᠪᠠ ᠤᠤ? ᠭᠡᠵᠦ ᠡᠯᠳᠡᠪ ᠢ᠋ ᠪᠣᠳᠣᠭᠰᠠᠭᠠᠷ ᠳ᠋ᠢᠶᠠᠩᠬᠤᠸᠠ ᠶ᠋ᠢᠨ ᠬᠠᠷᠢᠯᠴᠠᠭᠤᠷ ᠢ᠋ ᠠᠪᠴᠤ ᠴᠢᠬᠢᠨ ᠳᠦ ᠪᠡᠨ ᠶᠠᠪ ᠴᠠᠪ ᠲᠤᠯᠭᠠᠵᠤ ᠰᠣᠨᠣᠰᠬᠤ ᠳ᠋ᠤ᠌᠂ ᠴᠠᠭᠠᠨᠠ ᠠ᠋ᠴᠠ ᠨᠢ ᠨᠢᠭᠡ ᠡᠷᠡᠭᠲᠡᠢ ᠶ᠋ᠢᠨ ᠳᠠᠭᠤ ᠪᠦᠦᠷ ᠲᠦᠦᠷ ᠰᠣᠨᠣᠰᠲᠠᠯᠠ᠃ ᠪᠢ ᠬᠡᠳᠦ ᠤᠳᠠᠭᠠ ᠨᠡᠷᠡ ᠶ᠋ᠢ ᠨᠢ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ᠃ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠲᠡᠷᠡ ᠠᠮᠢᠲᠠᠨ ᠨᠡᠯᠢᠶᠡᠳ ᠳᠡᠭᠡᠷᠡ ᠳᠠᠭᠤᠨ ᠢ᠋ᠶ᠋ᠠᠷ ᠁ ᠭᠡᠵᠦ ᠬᠡᠯᠡᠲᠡᠯᠡ ᠬᠣᠶᠠᠷ ᠴᠠᠭᠳᠠᠭᠠ ᠣᠷᠣᠵᠤ ᠢᠷᠡᠨ ᠲᠦᠪᠰᠢᠨ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠮᠡᠷ ᠪᠣᠯᠪᠠᠯ ᠲᠦᠪᠰᠢᠨ᠂ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠵᠦᠭ ᠭᠠᠷ ᠳᠣᠬᠢᠨ ᠪᠢᠲᠡᠭᠡᠢ ᠶᠠᠷᠢ ᠭᠡᠰᠡᠨ ᠳᠣᠬᠢᠶᠠ ᠦᠭᠭᠦᠯᠡ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ