ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠭᠤᠴᠢᠨ ᠭᠤᠷᠪᠠ> Хялгасан дөрөөн дээр – Хасвулаг зохиов <33>
83ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠭᠤᠴᠢᠨ ᠭᠤᠷᠪᠠ>
— ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠠ᠋᠂ ᠣᠷᠴᠢᠮ ᠤ᠋ᠨ ᠬᠡᠳᠦᠨ ᠡᠳᠦᠷ ᠮᠢᠨᠦ ᠪᠣᠳᠣᠭᠠᠳ ᠣᠯᠬᠤ ᠦᠭᠡᠢ ᠨᠢᠭᠡ ᠠᠰᠠᠭᠤᠳᠠᠯ ᠪᠣᠯ ᠡᠦ ᠹᠧᠩ ᠮᠧᠢ᠂ ᠦᠵᠡᠰᠬᠦᠯᠡᠩ ᠢ᠋ Aᠭᠤᠷᠪᠠᠳᠤᠭᠠᠷ ᠢ᠋ᠶ᠋ᠠᠷ ᠬᠣᠣᠷᠯᠠᠬᠤ ᠪᠠᠷ ᠣᠷᠣᠯᠳᠣᠬᠤ ᠦᠶᠡ ᠳ᠋ᠦ᠍ ᠪᠠᠰᠠ ᠨᠢᠭᠡ ᠬᠥᠮᠦᠨ ᠨᠢᠭᠤᠴᠠ ᠪᠠᠷ CC66 ᠳ᠋ᠤᠭᠠᠷ ᠢ᠋ᠶ᠋ᠠᠷ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠬᠤ ᠪᠠᠷ ᠣᠷᠣᠯᠳᠣᠭᠰᠠᠨ ᠭᠡᠵᠢ ᠤᠤ? ᠰᠣᠨᠢᠷᠬᠠᠯᠲᠠᠢ ᠨᠢ ᠡᠨᠡ ᠬᠣᠶᠠᠷ ᠬᠥᠮᠦᠨ ᠬᠤᠪᠢ ᠬᠣᠪᠢᠨ ᠤ᠋ ᠪᠠᠨ ᠬᠣᠣᠷᠲᠤ ᠡᠮ ᠢ᠋ ᠠᠳᠠᠯᠢ ᠴᠠᠭ ᠳᠡᠭᠡᠷᠡ᠂ ᠲᠡᠭᠡᠭᠡᠳ ᠪᠠᠰᠠ ᠪᠦᠷ ᠪᠣᠯᠤᠷᠴᠠᠭᠠᠨ ᠤ᠋ ᠭᠠᠷ ᠢ᠋ᠶ᠋ᠠᠷ ᠨᠢᠭᠡᠨ ᠬᠥᠮᠦᠨ ᠳ᠋ᠦ᠍ ᠵᠠᠷᠤᠭᠰᠠᠨ ᠪᠠᠢᠭᠠᠳ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠭᠠᠬᠢᠭᠠᠳ ᠮᠡᠳᠡᠳᠡᠭ ᠦᠭᠡᠢ ᠪᠣᠢ? ᠢᠩᠭᠢᠵᠦ ᠰᠠᠢᠬᠠᠨ ᠲᠠᠭᠠᠷᠠᠭᠰᠠᠨ ᠬᠡᠷᠡᠭ ᠪᠠᠰᠠ ᠪᠠᠢᠨᠠ ᠭᠡᠵᠢ ᠤᠤ? ᠡᠰᠡᠪᠡᠯ᠁ ᠭᠡᠵᠦ ᠬᠥᠬᠡᠲᠤᠯᠢ ᠦᠭᠡ ᠡᠭᠦᠰᠬᠡᠪᠡ᠃
— ᠶᠠᠭ ᠲᠠᠭᠠᠷᠠᠵᠤ ᠪᠠᠢᠨᠠ᠃ ᠪᠢ ᠴᠦ᠍ ᠡᠨᠡ ᠠᠰᠠᠭᠤᠳᠠᠯ ᠢ᠋ ᠪᠣᠳᠣᠭᠠᠳ ᠮᠠᠰᠢ ᠤᠳᠠᠭᠰᠠᠨ ᠶᠤᠮ᠃ ᠦᠨᠡᠬᠡᠷ ᠭᠠᠢᠬᠠᠯᠲᠠᠢ ᠰᠠᠨᠠᠭᠳᠠᠭᠠᠳ ᠪᠠᠢᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠲᠡᠷᠡ ᠤᠳᠠᠭᠠ ᠪᠢᠳᠡ ᠬᠣᠶᠠᠭᠤᠯᠠ 《ᠲᠡᠮᠡᠭᠡᠨ ᠪᠦᠭᠦᠳᠦ ᠠᠭᠤᠯᠠᠨ》 ᠳ᠋ᠠᠬᠢ ᠬᠥᠳᠡᠯᠮᠦᠷᠢ ᠪᠡᠷ ᠥᠭᠡᠷᠡᠴᠢᠯᠡᠬᠦ ᠲᠠᠯᠠᠪᠠᠢ ᠠ᠋ᠴᠠ ᠪᠤᠴᠠᠵᠤ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠴᠢᠨᠦ ᠬᠡᠯᠡᠭᠰᠡᠨ ᠨᠢᠭᠡ ᠦᠭᠡ ᠨᠠᠮᠠ ᠶᠢ ᠰᠡᠩᠬᠡᠷᠡᠭᠦᠯᠵᠡᠢ᠃
— ᠮᠢᠨᠦ ᠬᠡᠯᠡᠭᠰᠡᠨ ᠨᠢᠭᠡ ᠦᠭᠡ ᠭᠡᠨᠡ? ᠭᠡᠳ ᠬᠥᠬᠡᠲᠤᠯᠢ ᠭᠠᠢᠬᠠᠪᠠ᠃
— ᠲᠡᠢᠮᠦ ᠠ᠋᠂ ᠬᠡᠷᠪᠡ ᠪᠣᠯᠤᠷᠴᠠᠭᠠᠨ᠂ ᠡᠦ ᠹᠧᠩ ᠮᠧᠢ ᠬᠣᠶᠠᠭᠤᠯᠠ ᠤᠤᠯ ᠠ᠋ᠴᠠ ᠪᠠᠨ ᠵᠣᠷᠢᠯᠭᠠ ᠲᠥᠯᠥᠪᠯᠡᠭᠡ ᠦᠭᠡᠢ ᠪᠣᠯ ᠦᠵᠡᠰᠬᠦᠯᠡᠩ ᠰᠥᠨᠢ ᠠᠯᠠᠭᠳᠠᠮᠠᠭᠴᠨ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠬᠥᠮᠦᠰ ᠠᠵᠢᠯ ᠳ᠋ᠤ᠌ ᠭᠠᠷᠬᠤ ᠠ᠋ᠴᠠ ᠡᠮᠦᠨᠡ ᠡᠦ ᠹᠧᠩ ᠮᠧᠢ ᠶᠠᠭᠤ ᠭᠡᠵᠦ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠲᠡᠢᠮᠦ ᠶᠠᠭᠠᠷᠠᠤ ᠣᠴᠢᠬᠤ ᠪᠣᠢ? ᠭᠡᠵᠦ ᠴᠢ ᠠᠰᠠᠭᠤᠭᠰᠠᠨ ᠰᠢᠲᠠ᠃
— ᠡᠦ ᠹᠧᠩ ᠮᠧᠢ᠂ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠡᠮ ᠲᠣᠬᠢᠷᠠᠭᠤᠯᠵᠤ ᠥᠭᠭᠦᠭᠰᠡᠨ ᠨᠢ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠡᠮᠦᠨᠡᠬᠢ ᠬᠡᠷᠡᠭ᠃ ᠡᠮ ᠦ᠋ᠨ ᠬᠠᠢᠷᠴᠠᠭ ᠤ᠋ᠨ ᠭᠣᠣᠯ ᠳ᠋ᠤ᠌ ᠬᠣᠶᠠᠷ ᠯᠣᠩᠬᠣA ᠭᠤᠷᠪᠠᠳᠤᠭᠠᠷ ᠢ᠋ ᠬᠣᠯᠢᠵᠤ ᠲᠣᠬᠢᠷᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠪᠣᠳᠣᠬᠤ ᠳ᠋ᠤ᠌ ᠠᠯᠢ ᠡᠳᠦᠷ ᠦ᠋ᠨ ᠬᠡᠳᠦᠨ ᠴᠠᠭ ᠲᠤ᠌ ᠦᠬᠦᠬᠦ ᠶ᠋ᠢ ᠲᠡᠷᠡ ᠮᠡᠳᠡᠬᠦ ᠦᠭᠡᠢ᠃ ᠲᠡᠷᠡᠴᠢᠯᠡᠨ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠬᠡᠷᠡᠭ ᠦ᠋ᠨ ᠲᠠᠯᠠᠪᠠᠢ ᠪᠣᠯᠤᠨ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠪᠦᠷ ᠡᠦ ᠹᠧᠩ ᠮᠧᠢ ᠶᠢᠨ ᠭᠡᠷ ᠡᠴᠡ ᠬᠣᠷᠢᠭᠠᠳ ᠭᠠᠵᠠᠷ ᠵᠠᠢᠲᠠᠢ᠃ ᠶᠠᠭᠠᠬᠢᠭᠠᠳ ᠲᠡᠷᠡ ᠰᠥᠨᠢ ᠳᠦ ᠪᠡᠨ ᠡᠨᠡ ᠬᠡᠷᠡᠭ ᠢ᠋ ᠮᠡᠳᠡᠵᠦ ᠲᠡᠢᠮᠦ ᠡᠷᠲᠡ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠬᠦᠷᠦᠭᠰᠡᠨ ᠪᠣᠢ? ᠶᠠᠮᠠᠷ ᠬᠥᠮᠦᠨ ᠲᠡᠭᠦᠨ ᠳ᠋ᠦ᠍ ᠡᠨᠡ ᠴᠢᠮᠡᠭᠡ ᠶ᠋ᠢ ᠡᠢᠮᠦ ᠬᠤᠷᠳᠤᠨ ᠳᠠᠮᠵᠢᠭᠤᠯᠤᠭᠰᠠᠨ ᠪᠣᠢ? ᠮᠢᠨᠦ ᠪᠣᠳᠣᠬᠤ ᠪᠠᠷ 《ᠠᠳᠤᠭᠤᠰᠤ》 ᠭᠡᠳᠡᠭ ᠬᠥᠮᠦᠨ ᠡᠨᠡ ᠴᠢᠮᠡᠭᠡ ᠶ᠋ᠢ ᠥᠷᠯᠥᠭᠡ ᠡᠷᠲᠡ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠳ᠋ᠢᠶᠠᠩᠬᠤᠸᠠ ᠪᠠᠷ ᠳᠠᠮᠵᠢᠭᠤᠯᠤᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃
— ᠤᠴᠢᠷ ᠨᠢ ᠡᠦ ᠹᠧᠩ ᠮᠧᠢ᠂ ᠪᠣᠯᠤᠷᠴᠠᠭᠠᠨ ᠭᠣᠶᠠᠭᠤᠯᠠ ᠬᠤᠤᠪᠢᠯᠳᠤᠵᠤ ᠬᠥᠮᠦᠨ ᠠᠯᠠᠭᠰᠠᠨ ᠬᠡᠷᠡᠭ ᠢ᠋ ᠦᠭᠡᠢᠰᠬᠡᠭᠰᠡᠨ ᠦᠶᠡ ᠳ᠋ᠦ᠍᠂ ᠪᠠᠰᠠ ᠪᠣᠯᠤᠷᠴᠠᠭᠠᠨ ᠨᠢᠭᠡᠨᠲᠡ ᠪᠠᠷᠢᠪᠴᠢᠯᠠᠭᠳᠠᠨ ᠬᠣᠷᠢᠭᠳᠠᠭᠰᠠᠨ ᠬᠣᠢᠨᠠ᠂ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠡᠨᠡ ᠬᠡᠷᠡᠭ ᠢ᠋ ᠮᠡᠳᠡᠭᠳᠡᠬᠦ ᠬᠥᠮᠦᠨ ᠪᠣᠯ ᠵᠥᠪᠬᠡᠨ ᠲᠡᠷᠡ ᠢᠯᠡᠷᠡᠭᠡᠳᠦᠢ ᠪᠣᠯᠪᠠᠴᠤ ᠦᠵᠡᠰᠬᠦᠯᠡᠩ ᠢ᠋ ᠠᠯᠠᠵᠤ ᠪᠣᠯᠬᠤ ᠬᠦᠨᠳᠦ ᠰᠡᠵᠢᠭᠲᠦ ᠡᠲᠡᠭᠡᠳ 《ᠠᠳᠤᠭᠤᠰᠤ》 ᠭᠡᠳᠡᠭ ᠬᠥᠮᠦᠨ ᠪᠠᠢᠬᠤ ᠪᠣᠯᠤᠯᠴᠠᠭᠠ ᠲᠠᠢ᠃ ᠲᠡᠷᠡ ᠬᠥᠮᠦᠨ ᠡᠨᠡ ᠬᠡᠷᠡᠭ ᠢ᠋ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠲᠡᠭᠡᠵᠦ ᠬᠤᠷᠳᠤᠨ ᠳᠠᠮᠵᠢᠭᠤᠯᠬᠤ ᠨᠢ ᠶᠠᠮᠠᠷ ᠨᠢᠭᠡᠨ ᠵᠣᠷᠢᠯᠭᠠ ᠲᠠᠢ ᠪᠠᠢᠵᠤ ᠮᠡᠳᠡᠨᠡ᠃ ᠡᠰᠡᠪᠡᠯ ᠵᠠᠪᠠᠯ ᠳᠠᠮᠵᠢᠭᠤᠯᠬᠤ ᠴᠢᠬᠤᠯᠠ ᠲᠠᠢ ᠬᠣᠯᠪᠣᠭᠠ ᠰᠦᠯᠪᠡᠭᠡ ᠲᠡᠢ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃
— ᠶᠠᠭᠤ ᠴᠦ᠍ ᠪᠣᠯᠤᠭ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠥᠷᠯᠥᠭᠡ ᠡᠷᠲᠡ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠳ᠋ᠢᠶᠠᠩᠬᠤᠸᠠ ᠪᠠᠷ ᠮᠡᠳᠡᠭᠳᠡᠭᠰᠡᠨ ᠪᠣᠯᠪᠠ ᠤᠤ ᠭᠡᠵᠦ ᠲᠠᠭᠠᠮᠠᠭᠯᠠᠵᠠᠢ᠃ ᠪᠢᠳᠡ ᠰᠠᠭᠤᠭᠠᠯᠢ ᠠᠷᠠᠳ ᠤ᠋ᠨ ᠠᠰᠠᠷ ᠲᠠᠬᠢ ᠳ᠋ᠢᠶᠠᠩᠬᠤᠸᠠ ᠮᠠᠨᠠᠭᠠᠴᠢ ᠡᠪᠦᠭᠡᠨ ᠡᠴᠡ ᠡᠨᠡ ᠪᠠᠢᠳᠠᠯ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠡᠨᠡ ᠬᠦ᠌ ᠲᠠᠭᠠᠮᠠᠭᠯᠠᠯ ᠦᠨᠡᠨ ᠪᠣᠯᠤᠭᠰᠠᠨ ᠪᠢᠰᠢ ᠤᠤ?
— ᠲᠡᠷᠡ ᠬᠥᠮᠦᠨ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠳ᠋ᠢᠶᠠᠩᠬᠤᠸᠠ ᠣᠴᠢᠭᠤᠯᠵᠤ ᠨᠢᠭᠤᠴᠠ ᠬᠣᠣᠷᠯᠠᠯ ᠪᠡᠶᠡᠯᠡᠭᠳᠡᠯᠡ ᠭᠡᠵᠦ ᠬᠡᠯᠡᠭᠰᠡᠨ ᠭᠡᠵᠢ ᠤᠤ? ᠡᠨᠡ ᠬᠥᠮᠦᠨ ᠶᠠᠭᠠᠬᠢᠭᠠᠳ ᠡᠦ ᠹᠧᠩ ᠮᠧᠢ ᠲᠡᠢ ᠨᠡᠢᠯᠡᠵᠦ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠬᠤ ᠪᠣᠢ? ᠡᠰᠡᠬᠦᠯᠡ ᠪᠣᠯᠤᠷᠴᠠᠭᠠᠨ ᠤ᠋ ᠥᠰᠢᠶᠡᠲᠡᠨ ᠭᠡᠵᠢ ᠤᠤ?
— ᠲᠡᠢᠮᠦ ᠪᠢᠰᠢ᠂ ᠳ᠋ᠢᠶᠠᠩᠬᠤᠸᠠ ᠮᠠᠨᠠᠭᠠᠴᠢ ᠡᠪᠦᠭᠡᠨ ᠦ᠌ ᠬᠡᠯᠡᠬᠦ ᠪᠡᠷ ᠡᠦ ᠹᠧᠩ ᠮᠧᠢ ᠲᠡᠷᠡ ᠬᠥᠮᠦᠨ ᠲᠡᠢ ᠶᠠᠷᠯᠴᠠᠬᠤ ᠳᠤᠮᠳᠠ ᠪᠠᠨ᠄《ᠴᠢ ᠨᠠᠮᠠ ᠶᠢ ᠭᠦᠵᠢᠷᠯᠡᠵᠦ ᠪᠠᠢᠨᠠ》 ᠭᠡᠰᠡᠨ ᠪᠢᠰᠢ ᠤᠤ? ᠡᠭᠦᠨ ᠡᠴᠡ ᠦᠵᠡᠬᠦ ᠳ᠋ᠦ᠍ ᠲᠡᠷᠡ ᠬᠥᠮᠦᠨ ᠶᠠᠮᠠᠷ ᠨᠢᠭᠡᠨ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠡᠦ ᠹᠧᠩ ᠮᠧᠢ ᠶ᠋ᠢ ᠰᠦᠷᠳᠡᠭᠦᠯᠵᠦ ᠭᠦᠵᠢᠷᠯᠡᠭᠰᠡᠨ ᠨᠢ ᠮᠠᠰᠢ ᠢᠯᠡᠬᠡᠨ ᠪᠠᠢᠨᠠ᠃ ᠡᠦ ᠹᠧᠩ ᠮᠧᠢ ᠳᠠᠬᠢᠨ ᠳᠠᠬᠢᠨ ᠨᠡᠷᠡ ᠶ᠋ᠢ ᠨᠢ ᠠᠰᠠᠭᠤᠵᠤ ᠪᠠᠢᠭᠰᠠᠨ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍᠂ ᠡᠦ ᠹᠧᠩ ᠮᠧᠢ ᠲᠡᠭᠦᠨ ᠢ᠋ ᠲᠠᠨᠢᠵᠤ ᠭᠠᠷᠤᠭᠰᠠᠨ ᠦᠭᠡᠢ ᠪᠥᠭᠡᠳ ᠨᠥᠭᠦᠭᠡ ᠡᠲᠡᠭᠡᠳ ᠨᠢ ᠨᠡᠷᠡ ᠪᠡᠨ ᠬᠡᠯᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠢ᠋ ᠮᠡᠳᠡᠵᠦ ᠪᠣᠯᠤᠨᠠ᠃
— ᠡᠦ ᠹᠧᠩ ᠮᠧᠢ ᠶᠠᠷᠢᠯᠴᠠᠵᠤ ᠪᠠᠢᠭᠠᠳ ᠭᠡᠨᠡᠳᠲᠡ 《ᠨᠢᠭᠤᠴᠠ ᠢᠯᠡᠷᠡᠭᠦᠯᠦᠭᠰᠡᠨ ᠬᠥᠮᠦᠨ》 ᠭᠡᠮᠡᠨ ᠪᠠᠷᠬᠢᠷᠠᠯᠠ ᠭᠡᠰᠡᠨ ᠪᠢᠰᠢ ᠤᠤ? ᠡᠳᠡᠭᠡᠷ ᠡᠴᠡ ᠵᠣᠢᠴᠢᠯᠠᠪᠠᠯ᠂ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠳ᠋ᠢᠶᠠᠩᠬᠤᠸᠠ ᠢᠷᠡᠭᠦᠯᠦᠨ 《ᠭᠦᠵᠢᠷᠯᠡᠵᠦ》ᠪᠠᠢᠭᠠ ᠡᠨᠡ ᠬᠥᠮᠦᠨ ᠪᠣᠯ ᠲᠡᠭᠦᠨ ᠦ᠌ ᠶᠠᠮᠠᠷ ᠨᠢᠭᠡᠨ ᠨᠢᠭᠤᠴᠠ ᠶ᠋ᠢ ᠨᠢ ᠢᠯᠡᠷᠡᠭᠦᠯᠦᠭᠰᠡᠨ ᠬᠥᠮᠦᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠡᠭᠡᠭᠡᠳ ᠡᠨᠡ ᠨᠢᠭᠤᠴᠠ ᠶ᠋ᠢ ᠨᠢ ᠪᠠᠷᠢᠨ ᠰᠦᠷᠳᠡᠭᠦᠯᠦᠨ ᠲᠡᠭᠦᠨ ᠢ᠋ ᠭᠦᠵᠢᠷᠯᠡᠵᠡᠢ᠃
— ᠭᠡᠲᠡᠯᠡ ᠶᠠᠭᠠᠬᠢᠭᠠᠳ ᠲᠠᠨᠢᠯᠴᠠᠳᠠᠭ ᠦᠭᠡᠢ ᠪᠣᠢ? ᠴᠣᠬᠣᠮ ᠶᠠᠮᠠᠷ ᠨᠢᠭᠤᠴᠠ ᠶ᠋ᠢ ᠨᠢ ᠢᠯᠡᠷᠡᠭᠦᠯᠦᠭᠰᠡᠨ ᠪᠣᠢ? ᠡᠨᠡ ᠪᠣᠯ ᠪᠠᠰᠠ ᠨᠢᠭᠡ ᠲᠠᠢᠯᠪᠤᠷᠢᠯᠠᠭᠳᠠᠰᠢ ᠦᠭᠡᠢ ᠰᠣᠨᠢᠨ ᠬᠡᠷᠡᠭ ᠰᠢᠦ᠃ ᠣᠯᠠᠨ ᠲᠠᠯᠠ ᠠ᠋ᠴᠠ ᠨᠠᠷᠢᠨ ᠪᠣᠳᠣᠯᠬᠢᠯᠠᠵᠤ ᠦᠵᠡᠪᠡᠯ᠂ ᠨᠢᠭᠤᠴᠠ ᠶ᠋ᠢᠨ ᠲᠠᠢᠯᠪᠤᠷᠢ ᠨᠢ ᠠᠮᠢᠳᠤᠷᠠᠯ ᠤ᠋ᠨ ᠰᠤᠷᠲᠠᠯ ᠳ᠋ᠤ᠌ ᠯᠠ ᠪᠠᠢᠬᠠ᠃ ᠲᠡᠷᠡ ᠨᠢᠭᠡ ᠬᠥᠮᠦᠨ ᠪᠣᠯᠤᠷᠴᠠᠭᠠᠨ᠂ ᠡᠦ ᠹᠧᠩ ᠮᠧᠢ ᠬᠣᠶᠠᠭᠤᠯᠠ ᠶ᠋ᠢᠨ ᠰᠤᠷᠲᠠᠯ ᠳᠡᠭᠡᠷᠡ ᠶᠠᠪᠤᠳᠠᠯ ᠲᠠᠢ ᠭᠡᠵᠦ ᠤᠷᠢᠳᠠᠴᠢ ᠨᠥᠬᠥᠴᠡᠯ ᠭᠠᠷᠭᠠᠭᠠᠳ᠂ ᠳᠠᠷᠠᠭᠠ ᠨᠢ ᠰᠠᠶᠢ ᠪᠣᠯᠤᠷᠴᠠᠭᠠᠨ ᠬᠥᠮᠦᠨ ᠠᠯᠠᠭᠰᠠᠨ ᠨᠢ ᠡᠦ ᠹᠧᠩ ᠮᠧᠢ ᠲᠡᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠬᠤᠤᠪᠢᠯᠳᠤᠯᠭᠠ ᠭᠡᠮᠡᠨ ᠭᠦᠵᠢᠷᠯᠡᠵᠡᠢ᠃
— ᠢᠩᠭᠢᠭᠡᠳ ᠪᠢᠳᠡ ᠪᠣᠯᠤᠷᠴᠠᠭᠠᠨ ᠠ᠋ᠴᠠ ᠪᠠᠢᠴᠠᠭᠠᠬᠤ ᠳ᠋ᠤ᠌᠂ ᠨᠡᠭᠡᠷᠡᠨ ᠲᠡᠳᠡᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠰᠤᠷᠲᠠᠯ ᠲᠥᠪ ᠪᠤᠰᠤ ᠶ᠋ᠢ ᠨᠢᠭᠡ ᠬᠥᠮᠦᠨ ᠮᠡᠳᠡᠭᠡᠳ ᠨᠡᠷᠡ ᠦᠭᠡᠢ ᠵᠠᠬᠢᠳᠠᠯ ᠢ᠋ᠶ᠋ᠠᠷ ᠰᠡᠷᠡᠮᠵᠢᠯᠡᠭᠦᠯᠦᠭᠰᠡᠨ ᠪᠢᠰᠢ ᠤᠤ? ᠶᠠᠭ ᠡᠨᠡ ᠬᠥᠮᠦᠨ ᠠᠷᠪᠠᠨ ᠨᠠᠢ᠍ᠮᠠᠨ ᠤ᠋ ᠦᠳᠡ ᠶ᠋ᠢᠨ ᠬᠣᠢᠨᠠ ᠶ᠋ᠢᠨ ᠲᠠᠪᠤᠨ ᠴᠠᠭ ᠭᠠᠷᠤᠢ ᠳ᠋ᠤ᠌ ᠦᠵᠡᠰᠬᠦᠯᠡᠩ ᠦ᠋ᠨ ᠳ᠋ᠦ᠍ ᠣᠴᠢᠨ ᠬᠢᠮᠰᠠ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠬᠣᠣᠷ ᠲᠠᠯᠪᠢᠵᠠᠢ᠃
— ᠡᠳᠡᠭᠡᠷ ᠬᠡᠷᠡᠭ ᠦ᠋ᠳ ᠢ᠋ ᠬᠣᠯᠪᠣᠭᠳᠠᠭᠤᠯᠤᠨ ᠪᠣᠳᠣᠪᠠᠯ ᠦᠷᠡ ᠳ᠋ᠦᠩ ᠨᠢ ᠡᠢᠮᠦ ᠰᠢᠭ᠂ ᠤᠤᠯ ᠨᠢ ᠡᠨᠡ 《ᠠᠳᠤᠭᠤᠰᠤ》ᠭᠡᠭᠴᠢ ᠠᠮᠢᠲᠠᠨ᠂ ᠪᠣᠯᠤᠷᠴᠠᠭᠠᠨ᠂ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠬᠠᠷᠢᠴᠠᠭᠠ ᠶ᠋ᠢ ᠵᠣᠷᠢᠯᠭᠠ ᠲᠠᠢ ᠪᠠᠷ ᠨᠢᠭᠤᠴᠠ ᠪᠠᠷ ᠪᠠᠷᠢᠵᠤ᠂ ᠳᠠᠷᠠᠭᠠ ᠨᠢ ᠵᠠᠬᠢᠳᠠᠯ ᠢ᠋ᠶ᠋ᠠᠷ ᠮᠡᠳᠡᠭᠳᠡᠨ ᠰᠦᠷᠳᠡᠭᠦᠯᠦᠭᠰᠡᠨ ᠨᠢ ᠳᠠᠷᠤᠢ ᠬᠣᠵᠢᠮ ᠦᠵᠡᠰᠬᠦᠯᠡᠩ ᠢ᠋ ᠠᠯᠠᠭᠠᠳ ᠬᠡᠷᠡᠭ ᠢ᠋ᠶ᠋ᠡᠨ ᠲᠡᠳᠡ ᠬᠣᠶᠠᠷ ᠤᠷᠤᠭᠤ ᠲᠦᠯᠬᠢᠬᠦ ᠪᠡᠷ ᠪᠡᠯᠡᠳᠬᠡᠭᠰᠡᠨ ᠤᠷᠢᠳᠴᠢᠯᠠᠯ ᠪᠢᠰᠢ ᠤᠤ?
— ᠦᠭᠡᠢ ᠪᠣᠯ ᠡᠢᠮᠦ ᠰᠠᠢᠨ ᠳᠤᠷᠠ ᠶ᠋ᠢᠨ ᠡᠷᠡ ᠡᠮᠡ ᠶ᠋ᠢᠨ ᠬᠡᠷᠡᠭ ᠢ᠋ ᠲᠡᠷᠡ ᠬᠥᠮᠦᠨ ᠮᠡᠳᠡᠯᠡ ᠭᠡᠳ ᠢᠩᠭᠢᠵᠦ ᠭᠠᠷ ᠲᠥᠷᠥᠵᠦ ᠶᠠᠪᠤᠳᠠᠯ ᠪᠣᠯᠭᠠᠬᠤ ᠦᠭᠡᠢ ᠶᠦᠮ᠃ ᠲᠡᠷᠡ ᠶᠠᠮᠠᠷ ᠨᠢᠭᠡᠨ ᠵᠣᠷᠢᠯᠭᠠ ᠳᠤ ᠪᠠᠨ ᠬᠦᠷᠬᠦ ᠡᠭᠦᠳᠡᠨ ᠡᠴᠡ ᠢᠩᠭᠢᠵᠦ ᠪᠠᠢᠭᠠ ᠨᠢ ᠢᠯᠡᠬᠡᠨ ᠭᠡᠳ ᠲᠦᠪᠰᠢᠨ ᠴᠣᠮᠣ ᠲᠠᠢ ᠴᠠᠢ ᠠ᠋ᠴᠠ ᠪᠠᠨ ᠬᠡᠳᠦ ᠣᠭᠣᠴᠢᠵᠤ ᠠᠪᠤᠭᠠᠳ᠄
— ᠡᠨᠡ ᠬᠦ᠌ ᠨᠢᠭᠤᠴᠠ ᠢᠯᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠡᠨᠡ 《ᠠᠳᠤᠭᠤᠰᠤ》ᠭᠡᠳᠡᠭ ᠬᠥᠮᠦᠨ ᠠᠯᠢ ᠡᠷᠲᠡ ᠡᠴᠡ ᠦᠵᠡᠰᠬᠦᠯᠡᠩ ᠲᠡᠢ ᠨᠢᠭᠡ ᠵᠦᠢᠯ ᠦ᠋ᠨ ᠡᠪᠯᠡᠷᠡᠰᠢ ᠦᠭᠡᠢ ᠠᠰᠢᠭ ᠬᠣᠣᠷ ᠤ᠋ᠨ ᠮᠥᠷᠭᠥᠯᠳᠦᠭᠡᠨ ᠲᠡᠢ ᠪᠣᠯᠬᠣᠷ ᠨᠢᠭᠡᠨᠲᠡ ᠵᠣᠷᠢᠭ ᠰᠢᠭᠤᠳᠤᠨ ᠬᠠᠷᠠᠳᠠᠵᠤ ᠬᠣᠣᠷᠯᠠᠬᠤ ᠠᠯᠢᠪᠠ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠬᠡᠵᠢᠶᠡᠨ ᠦ᠌ ᠬᠢᠵᠦ ᠵᠠᠪᠳᠤᠭᠰᠠᠨ ᠨᠢ ᠢᠯᠡᠷᠬᠡᠢ ᠪᠠᠢᠭᠠ ᠶ᠋ᠢ ᠵᠦᠢᠴᠢᠯᠡᠨ ᠮᠡᠳᠡᠵᠦ ᠪᠣᠯᠬᠤ ᠶᠤᠮ᠃ ᠭᠡᠲᠡᠯᠡ ᠬᠣᠣᠷᠯᠠᠬᠤ ᠳᠤ ᠪᠠᠨ ᠬᠥᠮᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠮᠣᠭᠠᠢ ᠪᠠᠷᠢᠭᠤᠯᠬᠤ ᠠᠷᠭᠠ ᠠᠪᠴᠤ ᠬᠠᠮᠤᠭ ᠤ᠋ᠨ ᠪᠠᠲᠤᠯᠠᠭᠠ ᠲᠠᠢ ᠪᠠᠷ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠬᠤ ᠤᠬᠠᠭᠠᠨ ᠵᠠᠷᠤᠵᠠᠢ᠃
— ᠢᠩᠭᠢᠭᠡᠳ ᠲᠡᠷᠡ᠂ ᠪᠣᠯᠤᠷᠴᠠᠭᠠᠨ᠂ ᠡᠦ ᠹᠧᠩ ᠮᠧᠢ ᠬᠣᠶᠠᠷ ᠤ᠋ᠨ ᠬᠠᠷᠢᠴᠠᠭᠠ ᠶ᠋ᠢ ᠡᠵᠡᠮᠰᠢᠵᠦ ᠠᠪᠤᠭᠠᠳ ᠪᠠᠢᠬᠤ ᠳ᠋ᠤ᠌᠂ ᠦᠵᠡᠰᠬᠦᠯᠡᠩ ᠦ᠋ᠨ ᠬᠥᠯ ᠬᠤᠭᠤᠷᠠᠭᠰᠠᠨ ᠨᠢ ᠣᠯᠳᠠᠰᠢ ᠦᠭᠡᠢ ᠵᠠᠪᠰᠢᠶᠠᠨ ᠪᠣᠯᠵᠤ᠂ ᠬᠣᠶᠠᠷ ᠵᠦᠢᠯ ᠦ᠋ᠨ ᠡᠮ ᠢ᠋ᠶ᠋ᠡᠷ ᠬᠣᠣᠷᠯᠠᠵᠤ ᠠᠯᠠᠬᠤ ᠪᠠᠷ ᠭᠠᠷ ᠬᠥᠳᠡᠯᠦᠭᠰᠡᠨ ᠪᠠᠢᠨᠠ᠃
— ᠶᠠᠭᠠᠬᠢᠭᠠᠳ ᠬᠣᠶᠠᠷ ᠲᠥᠷᠥᠯ ᠦ᠋ᠨ ᠬᠣᠣᠷᠲᠤ ᠡᠮ ᠢ᠋ ᠵᠡᠷᠭᠡ ᠪᠡᠷ ᠬᠡᠷᠡᠭᠯᠡᠭᠰᠡᠨ ᠪᠣᠢ? ᠦᠵᠡᠰᠬᠦᠯᠡᠩ ᠢ᠋ ᠵᠠᠪᠠᠯ ᠠᠯᠠᠶᠠ ᠭᠡᠪᠡᠯ ᠡᠷᠬᠡᠪᠰᠢ ᠬᠦᠴᠦᠲᠦ ᠬᠣᠣᠷCC66 ᠳ᠋ᠤᠭᠠᠷ ᠢ᠋ ᠵᠠᠷᠤᠬᠤ ᠬᠡᠷᠡᠭᠲᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠣᠯᠤᠷᠴᠠᠭᠠᠨ ᠡᠦ ᠹᠧᠩ ᠮᠧᠢ ᠬᠣᠶᠠᠷ ᠤ᠋ᠨ ᠡᠮᠴᠢ᠂ ᠡᠮ ᠲᠣᠬᠢᠷᠠᠭᠤᠯᠤᠭᠴᠢ ᠶ᠋ᠢᠨ ᠠᠪᠤᠯ ᠥᠭᠭᠦᠯ ᠪᠣᠯᠤᠨ ᠡᠪᠡᠳᠴᠢᠨ ᠦ᠌ ᠣᠨᠴᠠᠯᠢᠭ ᠢ᠋ ᠠᠰᠢᠭᠯᠠᠬᠤ ᠳ᠋ᠤ᠌ ᠵᠠᠪᠠᠯ Aᠭᠤᠷᠪᠠᠳᠤᠭᠠᠷ ᠢ᠋ ᠵᠠᠷᠤᠬᠤ ᠴᠢᠬᠤᠯᠲᠠᠢ ᠪᠣᠯᠵᠠᠢ᠃ ᠲᠡᠷᠡᠴᠢᠯᠡᠨ ᠭᠤᠷᠪᠠᠳᠤᠭᠠᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠCC66 ᠳ᠋ᠤᠭᠠᠷ ᠢ᠋ ᠬᠡᠷᠡᠭᠯᠡᠬᠦ ᠡᠷᠬᠡ ᠦᠭᠡᠢ᠃ ᠡᠨᠡ ᠨᠢ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠬᠣᠶᠠᠷ ᠵᠦᠢᠯ ᠦ᠋ᠨ ᠬᠣᠣᠷᠲᠤ ᠡᠮ ᠢ᠋ ᠨᠢᠭᠡ ᠬᠥᠮᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠵᠡᠷᠭᠡ ᠪᠡᠷ ᠵᠠᠷᠤᠬᠤ ᠠᠰᠠᠭᠤᠳᠠᠯ ᠲᠤᠯᠭᠠᠷᠠᠵᠠᠢ᠃ ᠦᠵᠡᠬᠦ ᠳ᠋ᠦ᠍ ᠶᠠᠭ ᠯᠠ ᠬᠣᠶᠠᠷ ᠬᠥᠮᠦᠨ ᠬᠣᠷᠰᠢᠨ ᠬᠠᠮᠰᠠᠭᠰᠠᠨ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠰᠢᠭ᠋ ᠴᠦ᠍ ᠦᠨᠡᠨ ᠳᠦ ᠪᠡᠨ ᠭᠠᠭᠴᠠ 《ᠠᠳᠤᠭᠤᠰᠤ》 ᠶ᠋ᠢᠨ ᠦᠢᠯᠡᠳᠦᠭᠰᠡᠨ ᠬᠡᠷᠡᠭ ᠪᠣᠯᠤᠨᠠ᠃
— ᠡᠨᠡ ᠬᠥᠮᠦᠨ ᠶᠠᠭᠠᠬᠢᠭᠠᠳ ᠡᠳᠡᠨ ᠦ᠌ ᠬᠠᠷᠢᠴᠠᠭᠠ ᠶ᠋ᠢ ᠡᠢᠮᠦ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠡᠮᠨᠡᠯᠭᠡ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠮᠡᠳᠡᠯᠭᠡ ᠲᠡᠢ ᠪᠣᠢ? ᠭᠡᠵᠦ ᠬᠥᠬᠡᠲᠤᠯᠢ ᠰᠣᠨᠢᠷᠬᠠᠨ ᠠᠰᠠᠭᠤᠪᠠ᠃
— ᠡᠨᠡ ᠬᠥᠮᠦᠨ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠡᠮᠨᠡᠯᠭᠡ ᠶ᠋ᠢᠨ ᠪᠠᠢᠭᠤᠯᠭᠠ ᠳ᠋ᠤ᠌ ᠠᠵᠢᠯᠯᠠᠵᠤ ᠪᠠᠢᠬᠤ ᠮᠥᠷᠲᠡᠭᠡᠨ ᠡᠮ ᠡᠮᠨᠡᠯᠭᠡ ᠶ᠋ᠢ ᠨᠡᠯᠢᠶᠡᠳ ᠰᠤᠳᠤᠯᠵᠠᠢ᠃ ᠲᠡᠭᠡᠭᠡᠳ ᠪᠠᠰᠠ ᠶᠠᠭᠠᠬᠢᠭᠠᠳ ᠪᠣᠯᠤᠷᠴᠠᠭᠠᠨ ᠲᠠᠢ ᠲᠠᠨᠢᠯᠴᠠᠵᠤ ᠣᠢᠯᠠᠭᠠᠯᠴᠠᠳᠠᠭ ᠪᠣᠢ ᠭᠡᠪᠡᠯ ᠡᠨᠡ ᠬᠥᠮᠦᠨ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠢ᠋ ᠡᠦ ᠹᠧᠩ ᠮᠧᠢ ᠶᠢᠨ ᠭᠡᠷ ᠲᠦ᠍ ᠲᠣᠬᠢᠷᠠᠭᠤᠯᠵᠤ ᠪᠠᠢᠭᠠᠳ ᠡᠨᠡ ᠬᠣᠶᠠᠷ ᠤ᠋ᠨ ᠨᠠᠷᠢᠨ ᠬᠠᠷᠢᠴᠠᠭᠠ ᠶ᠋ᠢ ᠣᠯᠵᠤ ᠮᠡᠳᠡᠭᠰᠡᠨ ᠪᠠᠢᠨᠠ᠃ ᠪᠢᠳᠡ ᠨᠢᠭᠡᠨᠲᠡ ᠡᠨᠡ ᠬᠦ᠌ ᠮᠠᠰᠢᠨ ᠢ᠋ ᠨᠡᠩᠵᠢᠨ ᠭᠠᠷᠭᠠᠵᠠᠢ᠃
— ᠲᠡᠷᠡ ᠤᠳᠠᠭᠠ ᠪᠢᠳᠡ ᠬᠣᠶᠠᠭᠤᠯᠠ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠭᠡᠷ ᠲᠦ᠍ ᠣᠴᠢᠵᠤ ᠪᠠᠢᠴᠠᠭᠠᠯᠲᠠ ᠬᠢᠭᠡᠳ ᠪᠠᠷᠠᠬᠤ ᠳ᠋ᠤ᠌ ᠪᠢ ᠡᠮᠨᠡᠯᠭᠡ ᠶ᠋ᠢᠨ ᠰᠤᠳᠤᠯᠭᠠᠲᠠᠨ ᠬᠠᠨ ᠠᠪᠤᠭᠠᠢ ᠶ᠋ᠢᠨ ᠳ᠋ᠦ᠍ ᠮᠠᠷᠭᠠᠰᠢ ᠣᠴᠢᠨᠠ ᠭᠡᠵᠦ ᠬᠡᠯᠡᠭᠰᠡᠨ ᠪᠢᠰᠢ ᠤᠤ᠃ ᠡᠨᠡ 《ᠠᠳᠤᠭᠤᠰᠤ》 ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠢ᠋ᠶ᠋ᠠᠷ ᠲᠡᠷᠡ ᠦᠭᠡ ᠶ᠋ᠢ ᠣᠯᠵᠤ ᠰᠣᠨᠣᠰᠴᠠᠢ᠃ ᠦᠭᠡᠢ ᠪᠣᠯ ᠪᠢ ᠴᠢᠮᠠ ᠠ᠋ᠴᠠ ᠥᠭᠡᠷᠡ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠭᠡ ᠦᠭᠡᠢ ᠪᠠᠢᠲᠠᠯᠠ ᠲᠡᠷᠡ ᠶᠠᠭᠠᠬᠢᠭᠠᠳ ᠮᠢᠨᠦ ᠣᠴᠢᠬᠤ ᠭᠠᠵᠠᠷ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠵᠦ᠂ ᠨᠠᠷᠠᠰᠤᠨ ᠣᠢ ᠳ᠋ᠤ᠌ ᠨᠠᠮᠠ ᠶᠢ ᠠᠮᠠᠳᠠᠨ ᠬᠣᠣᠷᠯᠠᠬᠤ ᠪᠠᠷ ᠣᠷᠣᠯᠳᠣᠬᠤ ᠪᠣᠢ?
— ᠢᠩᠭᠢᠭᠡᠳ ᠪᠢᠳᠡ ᠲᠡᠷᠡ ᠰᠥᠨᠢ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠭᠡᠷ ᠢ᠋ ᠨᠡᠩᠵᠢᠬᠦ ᠳ᠋ᠦ᠍ ᠦᠨᠡᠬᠡᠷ ᠨᠢᠭᠡ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠭᠠᠷᠴᠤ ᠢᠷᠡᠭᠰᠡᠨ ᠪᠢᠰᠢ ᠤᠤ? ᠭᠡᠳ ᠨᠢᠭᠡ ᠲᠠᠮᠠᠬᠢ ᠨᠣᠴᠣᠭᠠᠵᠤ ᠠᠪᠤᠭᠠᠳ᠄
— ᠦᠨᠡᠨ ᠳᠦ ᠪᠡᠨ ᠲᠡᠷᠡ ᠠᠮᠢᠲᠠᠨ ᠲᠤᠢᠯ ᠤ᠋ᠨ ᠵᠠᠯᠢᠬᠠᠢ ᠬᠤᠯᠵᠢᠨ᠃ ᠸᠠᠩ ᠯᠠᠨ ᠬᠤᠸᠠ ᠶ᠋ᠢ ᠬᠣᠣᠷᠯᠠᠮᠠᠭᠴᠠ ᠥᠪᠡᠷ ᠢ᠋ᠶ᠋ᠡᠨ ᠰᠡᠷᠡᠭᠳᠡᠬᠦ ᠪᠡᠨ ᠣᠰᠣᠯ ᠦᠭᠡᠢ ᠮᠡᠳᠡᠭᠰᠡᠨ᠃ ᠲᠡᠷᠡ ᠦᠳᠡᠰᠢ ᠨᠠᠮᠠ ᠶᠢ ᠬᠣᠲᠠ ᠶ᠋ᠢᠨ ᠡᠮ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ 《ᠬᠠᠲᠤᠨ ᠭᠣᠣᠯ》 ᠲᠡᠮᠳᠡᠭᠲᠦ ᠲᠡᠷᠭᠡ ᠪᠡᠷ ᠮᠢᠨᠦ ᠲᠡᠷᠭᠡ ᠶ᠋ᠢ ᠲᠣᠰᠴᠤ ᠳᠠᠭᠠᠷᠢᠭᠰᠠᠨ ᠪᠠᠢᠨᠠ᠃ ᠲᠡᠭᠦᠨ ᠦ᠌ ᠵᠣᠷᠢᠯᠭᠠ ᠨᠢ ᠨᠠᠮᠠ ᠶᠢ ᠬᠣᠣᠷᠯᠠᠵᠤ ᠠᠮᠵᠢᠬᠤ ᠦᠭᠡᠢ ᠪᠣᠯ ᠬᠠᠷᠠᠯᠲᠠ ᠪᠠᠨ ᠡᠦ ᠹᠧᠩ ᠮᠧᠢ ᠤᠷᠤᠭᠤ ᠰᠢᠯᠵᠢᠭᠦᠯᠬᠦ ᠪᠡᠷ ᠣᠷᠣᠯᠳᠣᠭᠰᠠᠨ ᠶᠤᠮ᠃
— ᠭᠡᠲᠡᠯᠡ ᠪᠢ ᠲᠡᠷᠭᠡᠨ ᠡᠴᠡ ᠦᠰᠦᠷᠴᠦ ᠠᠶᠤᠯ ᠠ᠋ᠴᠠ ᠮᠤᠯᠲᠤᠷᠠᠭᠠᠳ ᠬᠡᠳᠦᠬᠡᠨ ᠮᠢᠨᠦ᠋ᠲ ᠦ᠋ᠨ ᠳᠠᠷᠠᠭᠠ᠂ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠳ᠋ᠢᠶᠠᠩᠬᠤᠸᠠ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠡᠮᠨᠡᠯᠭᠡ ᠳᠦ ᠪᠡᠨ ᠵᠢᠵᠢᠭᠦᠷᠯᠡᠵᠦ ᠪᠠᠢᠵᠠᠢ᠃ ᠪᠢ ᠪᠠᠰᠠ ᠴᠢᠮᠠ ᠳ᠋ᠤ᠌᠂ ᠬᠣᠲᠠ ᠶ᠋ᠢᠨ ᠳᠣᠲᠣᠭᠠᠳᠤ ᠶᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠ ᠳ᠋ᠤ᠌ ᠳ᠋ᠢᠶᠠᠩᠬᠤᠸᠠ ᠥᠭᠴᠦ ᠪᠠᠢᠳᠠᠯ ᠪᠠᠴᠢᠮ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠳᠡᠭᠡᠳ ᠴᠢᠬᠤᠯᠠ ᠭᠠᠵᠠᠷ ᠲᠤ᠌ ᠣᠨᠴᠠ ᠲᠣᠮᠢᠯᠠᠯᠲᠠ ᠲᠣᠬᠢᠷᠠᠭᠤᠯᠤᠯᠲᠠ ᠬᠢᠯᠭᠡᠭᠰᠡᠨ ᠶᠦᠮ᠃
— ᠲᠡᠭᠡᠭᠡᠳ ᠰᠠᠶᠢ ᠪᠢᠳᠡ ᠴᠠᠭ ᠢ᠋ ᠵᠠᠪᠳᠤᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠢᠷᠡᠵᠦ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠠᠮᠢ ᠨᠠᠰᠤᠨ ᠤ᠋ ᠠᠶᠤᠯ ᠢ᠋ ᠰᠡᠷᠭᠡᠢᠯᠡᠨ ᠲᠤᠰᠬᠠᠢᠯᠠᠨ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠬᠠᠮᠠᠭᠠᠯᠠᠵᠠᠢ᠃
— ᠡᠦ ᠹᠧᠩ ᠮᠧᠢ ᠴᠦ᠍ ᠴᠠᠭᠠᠨᠠ ᠪᠠᠨ ᠴᠢᠳᠬᠥᠷ ᠲᠡᠢ ᠪᠠᠢᠬᠤ ᠪᠣᠢ᠃ ᠦᠭᠡᠢ ᠪᠣᠯ ᠲᠡᠷᠡ ᠶᠠᠭᠤᠨ ᠳ᠋ᠤ᠌ ᠡᠢᠮᠦ ᠪᠤᠳᠤᠯᠢᠶᠠᠨᠲᠠᠢ ᠶᠠᠪᠤᠳᠠᠯ ᠢ᠋ ᠦᠬᠦᠨ ᠨᠢᠭᠤᠵᠤ᠂ ᠵᠠᠪᠠᠯ ᠥᠪᠡᠷ ᠢ᠋ᠶ᠋ᠡᠨ ᠶᠠᠯᠠ ᠡᠭᠦᠷᠦᠨ ᠬᠥᠮᠦᠨ ᠦ᠌ ᠲᠥᠯᠥᠭᠡ ᠠᠮᠢ ᠪᠠᠨ ᠦᠷᠡᠬᠦ ᠪᠣᠢ?
— ᠶᠠᠭ ᠲᠠᠭᠠᠷᠠᠵᠤ ᠪᠠᠢᠨᠠ᠃ ᠮᠠᠷᠭᠠᠰᠢ ᠡᠦ ᠹᠧᠩ ᠮᠧᠢ ᠶ᠋ᠢ ᠰᠢᠭᠦᠬᠦ ᠦᠶᠡ ᠳ᠋ᠦ᠍ ᠴᠢ ᠡᠭᠦᠨ ᠢ᠋ ᠲᠣᠳᠣᠷᠬᠠᠢ ᠣᠢᠯᠠᠭᠠᠴᠢᠬᠠᠬᠤ ᠶᠤᠮ ᠭᠡᠯᠡ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ