ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠭᠤᠴᠢᠨ ᠨᠢᠭᠡ> Хялгасан дөрөөн дээр – Хасвулаг зохиов <31>
95ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠭᠤᠴᠢᠨ ᠨᠢᠭᠡ>
ᠢᠯᠡ ᠰᠢᠭᠦᠯᠲᠡ ᠵᠠᠪᠰᠠᠷᠯᠠᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠨᠥᠯᠥᠭᠡ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢ ᠲᠤᠷᠭᠢᠭᠤᠯᠤᠨ᠂ ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠪᠠᠭᠠ ᠯᠠ ᠬᠠᠤᠯᠢ ᠶ᠋ᠢᠨ ᠮᠡᠳᠡᠯᠭᠡ ᠲᠡᠢ ᠬᠥᠮᠦᠰ ᠪᠦᠷ ᠡᠭᠦᠨ ᠦ᠌ ᠲᠤᠬᠠᠢ ᠶᠠᠷᠢᠯᠴᠠᠵᠠᠭᠠᠵᠤ ᠪᠠᠢᠯᠠ᠃
ᠪᠣᠯᠤᠷᠴᠠᠭᠠᠨ ᠤ᠋ ᠠᠮᠢᠨ ᠬᠡᠷᠡᠭ ᠦ᠋ᠨ ᠤᠤᠯ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠦᠷᠢᠮᠦᠰᠦᠨ ᠲᠣᠭᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ᠂ ᠥᠭᠡᠷᠡ ᠨᠢᠭᠡᠨ ᠬᠥᠮᠦᠨ ᠦ᠌ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠢᠯᠡᠷᠡᠵᠦ ᠭᠠᠷᠴᠤ ᠢᠷᠡᠮᠡᠷ ᠪᠣᠯᠵᠤ ᠪᠠᠢᠯᠠ᠃ ᠡᠭᠦᠨ ᠢ᠋ ᠬᠠᠮᠤᠭ ᠠ᠋ᠴᠠ ᠢᠯᠡᠭᠦᠦ ᠠᠩᠬᠠᠷᠤᠨ ᠪᠣᠳᠣᠯᠬᠢᠯᠠᠵᠤ ᠢᠷᠣᠭᠠᠷ ᠲᠤᠨᠢ ᠲᠤᠯᠲᠠᠯᠠ ᠣᠢᠯᠠᠭᠠᠬᠤ ᠶ᠋ᠢ ᠬᠦᠰᠡᠳᠡᠭ ᠨᠢ ᠪᠢᠴᠢᠭᠡᠴᠢ ᠬᠥᠬᠡᠲᠤᠯᠢ ᠶᠤᠮ᠃
ᠲᠡᠷᠡ ᠲᠦᠪᠰᠢᠨ ᠢ᠋ ᠬᠡᠳᠦ ᠤᠳᠠᠭᠠ ᠱᠠᠭᠠᠷᠳᠠᠨ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠲᠡᠢ ᠬᠣᠯᠪᠣᠭᠳᠠᠵᠤ ᠪᠠᠢᠬᠤ ᠴᠠᠭᠠᠨᠠᠬᠢ ᠨᠢᠭᠤᠴᠠ ᠶ᠋ᠢ ᠨᠢ ᠮᠡᠳᠡᠬᠦ ᠶ᠋ᠢ ᠬᠦᠰᠡᠪᠡ᠃
ᠲᠦᠪᠰᠢᠨ ᠡᠬᠢᠨ ᠳᠦ ᠪᠡᠨ ᠶᠣᠰᠣ ᠶ᠋ᠢᠨ ᠲᠡᠳᠦᠢ ᠢᠨᠢᠶᠡᠭᠡᠳ ᠯᠡ ᠥᠩᠭᠡᠷᠡᠭᠡᠵᠦ᠂ ᠳᠠᠷᠠᠭᠠ ᠨᠢ ᠵᠠᠢᠯᠠᠵᠤ ᠭᠠᠷᠬᠤ ᠦᠭᠡᠢ ᠳᠦ ᠪᠡᠨ ᠴᠢᠯᠥᠭᠡ ᠲᠠᠭᠠᠷᠠᠪᠠᠯ ᠪᠣᠯᠤᠶᠠ ᠭᠡᠮᠡᠨ ᠠᠯᠪᠠ ᠬᠠᠰᠢᠨ ᠠᠮᠠ ᠬᠠᠭᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠴᠦᠰ ᠲᠤ ᠪᠠᠨ ᠲᠤᠭᠤᠯᠵᠤ ᠭᠠᠷᠤᠭᠰᠠᠨ ᠦᠭᠡᠢ᠃ ᠠᠷᠭᠠ ᠦᠭᠡᠢ ᠪᠦᠬᠦᠨ ᠢ᠋ ᠨᠢ ᠡᠬᠢᠨ ᠡᠴᠡ ᠨᠢ ᠬᠡᠯᠡᠬᠦ ᠪᠡᠷ ᠠᠮᠠ ᠠᠯᠳᠠᠵᠠᠢ᠃ ᠲᠡᠭᠡᠭᠡᠳ ᠲᠡᠷᠡ ᠡᠨᠡ ᠬᠡᠷᠡᠭ ᠢ᠋ ᠭᠦᠢᠴᠡᠳ ᠢᠯᠭᠠᠷᠠᠭᠤᠯᠵᠤ ᠪᠠᠷᠠᠭᠠᠳᠤᠢ ᠪᠣᠯᠬᠣᠷ ᠵᠠᠪ ᠴᠢᠯᠥᠭᠡᠨ ᠳᠦ ᠪᠡᠨ ᠶᠠᠷᠢᠬᠤ ᠭᠡᠮᠡᠨ ᠦᠯᠢᠭᠡᠷᠴᠢ ᠶ᠋ᠢᠨ ᠨᠠᠮᠪᠠ ᠲᠡᠳᠡᠨ ᠪᠠᠴᠢᠷᠬᠠᠨ ᠬᠡᠯᠡᠬᠦ ᠶ᠋ᠢ ᠬᠥᠬᠡᠲᠤᠯᠢ ᠨᠥᠬᠥᠴᠡᠯ ᠦᠭᠡᠢ ᠬᠦᠯᠢᠶᠡᠨ ᠠᠪᠴᠠᠢ᠃
ᠮᠠᠷᠭᠠᠰᠢ ᠶ᠋ᠢᠨ ᠬᠢᠨᠢ ᠦᠳᠡ ᠶ᠋ᠢᠨ ᠬᠣᠢᠨᠠ᠂ ᠲᠦᠪᠰᠢᠨ ᠭᠤᠸᠠᠢ ᠬᠥᠬᠡᠲᠤᠯᠢ ᠶ᠋ᠢᠨ ᠥᠭᠡᠳᠡ ᠬᠠᠨᠳᠤᠨ ᠰᠠᠭᠤᠭᠠᠳ ᠰᠤᠯᠠ ᠵᠣᠭᠣᠭ ᠳᠡᠯᠭᠡᠬᠦ ᠰᠢᠭ ᠦᠭᠡ ᠪᠡᠨ ᠡᠬᠢᠯᠡᠭᠦᠯᠬᠦ ᠨᠢ ᠲᠡᠳᠦᠢ ᠶᠡᠬᠡ ᠯᠣᠭᠢᠭ ᠵᠦᠢᠴᠢᠯᠡᠯ ᠲᠡᠢ ᠶᠠᠷᠢᠵᠤ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠨᠠ᠃
ᠭᠡᠰᠡᠨ ᠴᠦ᠍ ᠬᠥᠬᠡᠲᠤᠯᠢ ᠤᠯᠠᠮ ᠤᠢᠷᠠᠬᠠᠨ ᠰᠠᠭᠤᠭᠠᠳ ᠦᠭᠡ ᠠᠯᠳᠠᠯ ᠦᠭᠡᠢ ᠰᠣᠨᠣᠰᠬᠤ ᠪᠠᠷ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠥᠪᠯᠡᠷᠡᠭᠦᠯᠦᠨ ᠬᠢᠨᠠᠮᠠᠭᠠᠢ ᠴᠢᠷᠠᠢᠯᠠᠵᠤ ᠰᠠᠭᠤᠬᠤ ᠳ᠋ᠤ᠌ ᠲᠦᠪᠰᠢᠨ ᠮᠥᠷᠥ ᠶ᠋ᠢ ᠨᠢ ᠳᠠᠪᠰᠢᠭᠠᠳ᠄
— ᠦᠨᠡᠨ ᠳᠦ ᠪᠡᠨ ᠪᠦᠬᠦ ᠬᠡᠷᠡᠭ ᠢ᠋ ᠪᠠᠢᠴᠠᠭᠠᠬᠤ ᠳ᠋ᠤ᠌ ᠴᠢ ᠡᠬᠢᠨ ᠡᠴᠡ ᠨᠢ ᠳᠠᠭᠤᠰᠲᠠᠯᠠ ᠣᠷᠣᠯᠴᠠᠭᠰᠠᠨ ᠲᠤᠯᠠ ᠨᠠᠷᠢᠨ ᠪᠣᠳᠣᠯᠬᠢᠯᠠᠪᠠᠯ ᠤᠬᠠᠭᠠᠨ ᠬᠥᠯ ᠢ᠋ ᠨᠢ ᠣᠯᠴᠢᠬᠠᠬᠤ ᠶᠣᠰᠣᠲᠠᠢ᠃
— ᠪᠤᠯᠤᠷᠴᠠᠭᠠᠨ ᠬᠢᠯᠢᠰ ᠬᠠᠰᠬᠢᠷᠤᠨ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠠ᠋ᠴᠠ ᠪᠤᠴᠠᠭᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠤᠤᠯ ᠤ᠋ᠨ ᠠᠮᠠᠨ ᠥᠴᠢᠭ ᠢ᠋ᠶ᠋ᠡᠨ ᠦᠷᠭᠦᠯᠵᠢᠯᠡᠨ ᠪᠠᠷᠢᠮᠲᠠᠯᠠᠵᠤ᠂ ᠶᠠᠮᠠᠷ ᠴᠦ᠍ ᠡᠦ᠋ ᠰᠦᠪᠡᠭᠴᠢ ᠢᠯᠡᠷᠡᠭᠦᠯᠬᠦ ᠦᠭᠡᠢ ᠪᠠᠢᠬᠤᠯᠠᠷ ᠠᠷᠭᠠ ᠪᠤᠰᠤ ᠲᠠᠬᠢᠵᠤ ᠡᠬᠢᠨ ᠡᠴᠡ ᠨᠢ ᠪᠦᠬᠦ ᠲᠠᠯᠠ ᠪᠠᠷ ᠪᠠᠢᠴᠠᠭᠠᠬᠤ ᠴᠢᠬᠤᠯᠠ ᠲᠠᠢ ᠪᠣᠯᠤᠭᠰᠠᠨ ᠪᠢᠰᠢ ᠤᠤ᠃
— ᠪᠠᠢᠴᠠᠭᠠᠯᠲᠠ ᠶ᠋ᠢᠨ ᠳᠤᠮᠳᠠ ᠨᠠᠳᠠ ᠬᠠᠮᠤᠭ ᠰᠡᠵᠢᠭᠲᠡᠢ ᠰᠠᠨᠠᠭᠳᠠᠭᠰᠠᠨ ᠶᠠᠭᠤᠮᠠ ᠪᠣᠯ ᠬᠡᠷᠡᠭ ᠦ᠋ᠨ ᠲᠠᠯᠠᠪᠠᠢ ᠠ᠋ᠴᠠ ᠣᠯᠤᠭᠰᠠᠨ ᠬᠣᠣᠷᠲᠤ ᠡᠮ ᠦ᠋ᠨ ᠵᠢᠵᠢᠭ ᠯᠣᠩᠬᠣ ᠪᠣᠯᠤᠨ ᠪᠠᠷᠢᠪᠴᠢᠯᠠᠭᠳᠠᠬᠤ ᠶ᠋ᠢᠨ ᠦᠶᠡ ᠳ᠋ᠡᠬᠢ ᠪᠣᠯᠤᠷᠴᠠᠭᠠᠨ ᠤ᠋ ᠠᠮᠠᠨ ᠥᠴᠢᠭ ᠦ᠋ᠨ ᠬᠤᠪᠢᠷᠠᠯᠲᠠ ᠪᠣᠯᠤᠨᠠ᠃
— ᠴᠢ ᠪᠣᠳᠣᠵᠤ ᠦᠵᠡ᠃ ᠡᠮ ᠲᠠᠷᠢᠭᠰᠠᠨ ᠤ᠋ ᠬᠠᠭᠠᠰ ᠴᠠᠭ ᠤ᠋ᠨ ᠳᠠᠷᠠᠭᠠ ᠦᠵᠡᠰᠬᠦᠯᠡᠩ᠂ ᠪᠣᠯᠤᠷᠴᠠᠭᠠᠨ ᠤ᠋ ᠡᠪᠦᠷ ᠳᠡᠭᠡᠷᠡ ᠬᠣᠣᠷᠳᠠᠭᠳᠠᠨ ᠦᠬᠦᠭᠰᠡᠨ ᠪᠠᠢᠲᠠᠯᠠ᠂ ᠲᠡᠷᠡ ᠳᠣᠲᠣᠭᠠᠳᠤ ᠶᠢ ᠬᠠᠮᠠᠭᠠᠯᠠᠬᠤ ᠲᠣᠪᠴᠢᠶᠠᠨ ᠳ᠋ᠤ᠌ ᠣᠴᠢᠭᠰᠠᠨ ᠳᠠᠷᠤᠢ ᠳ᠋ᠤ᠌ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠬᠣᠣᠷᠲᠤ ᠡᠮ ᠶᠠᠭᠠᠬᠢᠵᠤ ᠡᠮ ᠦ᠋ᠨ ᠬᠠᠢᠷᠴᠠᠭ ᠲᠤ᠌ ᠣᠷᠣᠭᠰᠠᠨ᠂ ᠶᠠᠮᠠᠷ ᠡᠮ ᠳ᠋ᠦ᠍ ᠬᠣᠣᠷᠳᠠᠭᠳᠠᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠭᠡᠨᠡ᠃
— ᠡᠩ ᠦ᠋ᠨ ᠪᠠᠢᠳᠠᠯ ᠳᠣᠣᠷᠠ ᠶᠠᠯᠠᠲᠠᠨ ᠶᠠᠯᠠ ᠪᠠᠨ ᠨᠢᠭᠤᠨ ᠮᠤᠵᠢᠭᠤᠳᠠᠯᠠᠬᠤ ᠳᠤ ᠪᠠᠨ ᠯᠠᠪᠲᠠᠢ ᠥᠭᠡᠷᠡ ᠨᠢᠭᠡ ᠵᠦᠢᠯ ᠦ᠋ᠨ ᠰᠢᠯᠲᠠᠭ ᠳᠤᠷᠠᠳᠴᠤ ᠬᠠᠭᠤᠷᠮᠠᠭ ᠭᠡᠷᠡᠴᠢ ᠵᠣᠬᠢᠶᠠᠬᠤ ᠪᠣᠯᠤᠯᠴᠠᠭᠠ ᠲᠠᠢ᠂ ᠢᠯᠠᠩᠭᠤᠶᠠ ᠬᠣᠣᠷᠲᠤ ᠡᠮ ᠢ᠋ᠶ᠋ᠡᠷ ᠬᠥᠮᠦᠨ ᠠᠯᠠᠬᠤ ᠪᠣᠯ ᠨᠢᠭᠡᠨ ᠲᠥᠯᠥᠪᠯᠡᠭᠡ ᠲᠡᠢ᠂ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ᠂ ᠪᠡᠯᠡᠳᠬᠡᠯ ᠲᠡᠢ ᠠᠵᠢᠯᠯᠠᠭᠠ ᠪᠣᠯᠬᠣᠷ ᠶᠠᠯᠠᠲᠠᠳ ᠭᠡᠨᠡᠳᠲᠡ ᠪᠠᠷᠢᠪᠴᠢᠯᠠᠭᠳᠠᠬᠤ ᠦᠶᠡ ᠳ᠋ᠦ᠍ ᠪᠠᠷᠤᠭ ᠨᠢ ᠪᠦᠷ ᠤᠤᠯ ᠠ᠋ᠴᠠ ᠪᠠᠨ ᠪᠡᠯᠡᠳᠬᠡᠭᠰᠡᠨ ᠬᠠᠭᠤᠷᠮᠠᠭ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ᠶ᠋ᠠᠨ ᠳᠤᠷᠠᠳᠳᠠᠭ᠃
— ᠡᠢᠮᠦ ᠡᠴᠡ ᠶᠠᠭᠠᠬᠢᠯᠠ ᠴᠦ᠍ ᠭᠡᠰᠡᠨ ᠲᠠᠷᠢᠭᠰᠠᠨ ᠡᠮ ᠦ᠋ᠨ ᠢ᠋ᠶ᠋ᠡᠨ ᠨᠡᠷᠡ ᠶ᠋ᠢ ᠮᠡᠳᠡᠬᠦ ᠶᠣᠰᠣᠲᠠᠢ ᠶᠤᠮ᠃ ᠲᠡᠷᠡᠴᠢᠯᠡᠨ ᠦᠵᠡᠰᠬᠦᠯᠡᠩ ᠢ᠋ ᠡᠮ ᠳ᠋ᠦ᠍ ᠬᠣᠣᠷᠳᠠᠭᠳᠠᠨ ᠦᠬᠦᠬᠦ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠲᠡᠭᠡᠵᠦ ᠶᠡᠬᠡ ᠰᠠᠨᠳᠤᠷᠤᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠲᠡᠪᠡᠷᠢᠨ ᠲᠠᠢᠳᠬᠤᠷᠠᠭᠤᠯᠵᠤ᠂ ᠠᠮᠢ ᠶ᠋ᠢ ᠨᠢ ᠠᠪᠤᠷᠠᠬᠤ ᠪᠠᠷ ᠬᠥᠮᠦᠨ ᠳᠠᠭᠤᠳᠠᠭᠰᠠᠨ᠂ ᠬᠠᠤᠯᠢ ᠶ᠋ᠢᠨ ᠠᠵᠢᠯᠲᠠᠳ ᠲᠡᠭᠦᠨ ᠡᠴᠡ ᠡᠬᠡᠨᠡᠷ ᠲᠤ ᠪᠠᠨ ᠶᠠᠮᠠᠷ ᠡᠮ ᠲᠠᠷᠢᠭᠰᠠᠨ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠭᠡᠨᠡᠳᠲᠡ ᠰᠡᠬᠡᠭᠡᠷᠡᠭᠰᠡᠨ ᠮᠡᠲᠦ ᠡᠭᠦᠳᠡᠨ ᠬᠠᠵᠠᠭᠤ ᠳ᠋ᠤ᠌ ᠬᠠᠶᠠᠭᠰᠠᠨ ᠡᠮ ᠦ᠋ᠨ ᠯᠣᠩᠬᠣ ᠪᠠᠨ ᠠᠪᠴᠤ ᠦᠵᠡᠬᠦ ᠪᠡᠷ ᠣᠷᠣᠯᠳᠣᠭᠰᠠᠨ᠂ ᠡᠨᠡ ᠪᠦᠬᠦᠨ ᠢ᠋ ᠨᠠᠷᠢᠨ ᠰᠤᠳᠤᠯᠤᠭᠠᠳ ᠦᠵᠡᠪᠡᠯ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠡᠮ ᠦ᠋ᠨ ᠬᠠᠢᠷᠴᠠᠭ ᠲᠤ᠌ ᠬᠣᠣᠷᠲᠤ ᠡᠮ ᠨᠡᠢᠯᠡᠭᠰᠡᠨ ᠪᠠ ᠶᠠᠮᠠᠷ ᠡᠮ ᠪᠠᠢᠭᠰᠠᠨ ᠢ᠋ ᠬᠦᠷᠲᠡᠯᠡ ᠮᠡᠳᠡᠬᠦ ᠦᠭᠡᠢ ᠭᠡᠳᠡᠭ ᠨᠢ ᠠᠩᠬᠠᠨ ᠤ᠋ ᠠᠮᠠᠨ ᠥᠴᠢᠭ ᠲᠡᠢ ᠶᠠᠪ ᠴᠠᠪ ᠨᠡᠢᠴᠡᠵᠦ ᠪᠠᠢᠬᠤ ᠪᠢᠰᠢ ᠤᠤ᠃
— ᠡᠨᠡ ᠨᠢ ᠬᠥᠮᠦᠰ ᠲᠦ᠍ ᠪᠣᠯᠤᠷᠴᠠᠭᠠᠨ ᠲᠤᠰ ᠣᠷᠣᠢ ᠥᠪᠡᠷ ᠢ᠋ᠶ᠋ᠡᠨ ᠪᠣᠳᠣᠵᠤ ᠣᠯᠬᠤ ᠦᠭᠡᠢ ᠶᠠᠮᠠᠷ ᠨᠢᠭᠡᠨ ᠮᠡᠬᠡᠯᠡᠯ ᠳ᠋ᠦ᠍ ᠠᠪᠲᠠᠭᠳᠠᠭᠰᠠᠨ ᠪᠣᠯᠪᠠ ᠤᠤ ᠭᠡᠵᠦ ᠰᠡᠵᠢᠭᠯᠡᠭᠳᠡᠵᠦ ᠪᠠᠢᠨᠠ᠃
— ᠭᠡᠲᠡᠯᠡ ᠮᠠᠷᠭᠠᠰᠢ ᠨᠢ ᠪᠣᠯᠬᠤ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠪᠦᠬᠦ ᠶᠠᠯᠠ ᠪᠠᠨ ᠬᠦᠯᠢᠶᠡᠨ ᠴᠠᠭᠠᠪᠤᠷᠯᠠᠬᠤ ᠳᠤ ᠪᠠᠨ ᠶᠠᠮᠠᠷ ᠡᠮ᠂ ᠬᠡᠴᠢᠨᠡᠭᠡᠨ ᠬᠡᠮᠵᠢᠶᠡ ᠲᠡᠢ ᠶᠡᠭᠦᠯᠡᠭᠰᠡᠨ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠨᠠᠷᠢᠨ ᠲᠤᠰᠢᠶᠠᠭᠰᠠᠨ ᠪᠠᠢᠨᠠ᠃
— ᠡᠨᠡ ᠬᠦ᠌ ᠭᠡᠨᠡᠳᠲᠡ ᠶ᠋ᠢᠨ ᠬᠤᠪᠢᠷᠠᠯᠲᠠ ᠨᠢ ᠬᠡᠳᠦᠢ ᠶᠡᠬᠡ ᠭᠠᠢᠬᠠᠨ ᠰᠡᠵᠢᠭᠯᠡᠮᠡᠷ ᠪᠣᠢ? ᠶᠠᠭᠠᠬᠢᠭᠠᠳ ᠨᠢᠭᠡ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠡᠢᠮᠦ ᠶᠡᠬᠡ ᠡᠷᠭᠢᠯᠲᠡ ᠭᠠᠷᠤᠭᠰᠠᠨ ᠪᠣᠯ? ᠪᠢ ᠡᠯᠳᠡᠪ ᠢ᠋ ᠬᠣᠯᠪᠣᠨ ᠪᠣᠳᠣᠭᠠᠳ᠂ ᠪᠣᠯᠤᠷᠴᠠᠭᠠᠨ ᠢ᠋ ᠪᠠᠷᠢᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠥᠷᠯᠥᠭᠡ ᠨᠢᠭᠡ ᠵᠠᠯᠠᠭᠤ ᠬᠡᠭᠡᠨᠴᠢᠷ ᠡᠮᠡᠭᠲᠡᠢ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠣᠴᠢᠵᠤ ᠲᠡᠭᠦᠨ ᠲᠡᠢ ᠨᠢᠭᠤᠴᠠ ᠪᠠᠷ ᠠᠭᠤᠯᠵᠠᠭᠰᠠᠨ ᠠ᠋ᠴᠠ ᠲᠡᠭᠦᠨ ᠦ᠌ ᠰᠡᠳᠬᠢᠯᠭᠡ ᠳ᠋ᠦ᠍ ᠣᠨᠴᠠᠭᠠᠢ ᠬᠤᠪᠢᠷᠠᠯᠲᠠ ᠭᠠᠷᠤᠭᠰᠠᠨ ᠭᠡᠳᠡᠭ ᠢ᠋ ᠵᠢᠱᠢᠵᠦ ᠭᠠᠷᠭᠠᠭᠰᠠᠨ᠃
— ᠪᠠᠢᠴᠠᠭᠠᠭᠰᠠᠨ ᠤ᠋ ᠦᠷᠡ ᠳ᠋ᠦᠩ ᠳ᠋ᠦ᠍ ᠡᠨᠡ ᠡᠮᠡᠭᠲᠡᠢ ᠪᠣᠯ ᠳᠠᠷᠤᠢ ᠡᠦ ᠹᠧᠩ ᠮᠧᠢ ᠭᠡᠳᠡᠭ ᠢ᠋ ᠲᠣᠳᠣᠷᠬᠠᠢᠯᠠᠭᠰᠠᠨ᠃ ᠲᠡᠭᠡᠭᠡᠳ ᠡᠨᠡ ᠰᠠᠭᠤᠷᠢᠨ ᠳᠡᠭᠡᠷᠡ ᠪᠡᠨ ᠪᠣᠯᠤᠷᠴᠠᠭᠠᠨ ᠡᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠳᠣᠲᠣᠨᠣ ᠬᠠᠷᠢᠴᠠᠭᠠ᠂ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠬᠣᠣᠷᠲᠤ ᠡᠮ ᠲᠣᠬᠢᠷᠠᠭᠤᠯᠵᠤ ᠥᠭᠭᠦᠭᠰᠡᠨ ᠪᠠ ᠠᠯᠠᠭᠳᠠᠭᠰᠠᠨ ᠤ᠋ ᠬᠢᠨᠢ ᠮᠠᠷᠭᠠᠰᠢ ᠥᠷᠯᠥᠭᠡ ᠡᠦ ᠹᠧᠩ ᠮᠧᠢ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠣᠴᠢᠨ ᠪᠣᠯᠤᠷᠴᠠᠭᠠᠨ ᠲᠠᠢ ᠠᠭᠤᠯᠵᠠᠭᠰᠠᠨ᠂ ᠵᠢᠴᠢ ᠡᠨᠡ ᠬᠣᠶᠠᠷ ᠠᠭᠤᠯᠵᠠᠮᠠᠭᠴᠠ ᠬᠣᠣᠷᠲᠤ ᠡᠮ ᠦ᠋ᠨ ᠲᠤᠬᠠᠢ ᠬᠡᠯᠡᠯᠴᠡᠨ᠂ ᠬᠠᠷᠢᠭᠤᠴᠠᠯᠭᠠ ᠡᠭᠦᠷᠬᠦ ᠲᠤᠬᠠᠢ ᠵᠥᠪᠳᠡᠯᠴᠡᠭᠰᠡᠨ ᠵᠡᠷᠭᠡ ᠶ᠋ᠢ ᠲᠣᠳᠣᠷᠬᠠᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠡᠨᠡ ᠬᠦ᠌ ᠬᠤᠤᠪᠢᠯᠳᠤᠯᠭᠠ ᠲᠠᠢ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠶ᠋ᠢᠨ ᠴᠠᠭᠠᠳᠤᠬᠢ ᠵᠣᠷᠢᠯᠭᠠ ᠶ᠋ᠢ ᠨᠢ ᠢᠯᠡᠴᠢᠯᠡᠵᠦ ᠢᠯᠡᠷᠡᠭᠦᠯᠬᠦ ᠴᠢᠬᠤᠯᠠ ᠲᠠᠢ ᠰᠠᠨᠠᠭᠳᠠᠪᠠ᠃
— ᠪᠠᠢᠴᠠᠭᠠᠯᠲᠠ ᠶ᠋ᠢᠨ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍ ᠨᠠᠳᠠ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠡᠨᠡ ᠬᠣᠶᠠᠷ ᠬᠠᠮᠰᠠᠨ ᠨᠡᠢᠯᠡᠵᠦ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠭᠰᠠᠨ ᠭᠡᠳᠡᠭ ᠰᠡᠷᠡᠯᠲᠡ ᠪᠣᠢ ᠪᠣᠯᠤᠭᠰᠠᠨ᠃ ᠡᠳᠡᠨ ᠦ᠌ ᠨᠢᠭᠤᠴᠠ ᠬᠠᠷᠢᠴᠠᠭᠠ ᠠ᠋ᠴᠠ ᠲᠦᠯᠬᠢᠨ ᠪᠣᠳᠣᠪᠠᠯ ᠡᠢᠮᠦ ᠪᠣᠯᠤᠯᠴᠠᠭᠠ ᠪᠦᠷᠢᠨ ᠪᠠᠢᠯᠠ᠃ ᠭᠡᠲᠡᠯᠡ ᠮᠠᠨ ᠤ᠋ ᠪᠠᠢᠴᠠᠭᠠᠯᠲᠠ ᠭᠦᠨᠵᠡᠭᠡᠢᠷᠡᠬᠦ ᠳᠣᠳᠣᠮ ᠪᠣᠯᠤᠷᠴᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠪᠡᠷ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠨᠢᠭᠤᠴᠠ ᠪᠠᠷ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ ᠪᠠᠷ ᠲᠣᠬᠢᠷᠠᠭᠤᠯᠤᠭᠰᠠᠨ ᠬᠣᠣᠷᠲᠤ ᠡᠮ ᠢ᠋ ᠵᠠᠷᠤᠭᠰᠠᠨ ᠨᠢ ᠤᠯᠠᠮ ᠲᠣᠳᠣᠷᠬᠠᠢ ᠪᠣᠯᠬᠤ ᠳ᠋ᠤ᠌ ᠂ ᠬᠣᠶᠠᠭᠤᠯᠠ ᠬᠤᠤᠪᠢᠯᠳᠤᠭᠰᠠᠨ ᠭᠡᠵᠦ ᠶᠠᠯᠠ ᠲᠤᠯᠭᠠᠬᠤ ᠭᠡᠷᠡᠴᠢ ᠪᠠᠷᠢᠮᠲᠠ ᠮᠥᠴᠢᠳ ᠪᠣᠯᠵᠤ ᠬᠤᠪᠢᠷᠠᠯᠠ᠃
— ᠡᠦ ᠹᠧᠩ ᠮᠧᠢ ᠶ᠋ᠢ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠬᠦᠷᠴᠦ ᠬᠡᠷᠡᠭ ᠦ᠋ᠨ ᠦᠨᠡᠨ ᠢ᠋ᠶ᠋ᠡᠨ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠬᠡᠯᠡᠭᠰᠡᠨ ᠦ᠌ ᠳᠠᠷᠠᠭᠠ᠂ ᠲᠡᠷᠡ ᠨᠢᠭᠡᠨᠲᠡ ᠬᠡᠷᠡᠭ ᠦ᠋ᠨ ᠲᠠᠯᠠᠪᠠᠢ ᠠ᠋ᠴᠠ ᠰᠢᠭᠤᠳ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠲᠤᠯᠠ ᠬᠣᠶᠠᠭᠤᠯᠠ ᠶ᠋ᠢᠨ ᠬᠣᠭᠣᠷᠣᠨᠳᠣᠬᠢ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ ᠳᠤ ᠪᠠᠨ ᠪᠠᠷᠢᠭᠳᠠᠨ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠲᠥᠯᠥᠭᠡ ᠪᠦᠬᠦ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠡᠭᠦᠷᠬᠦ ᠪᠡᠷ ᠣᠷᠣᠯᠳᠣᠭᠰᠠᠨ ᠭᠡᠳᠡᠭ ᠢ᠋ ᠨᠤᠲᠠᠯᠠᠵᠤ ᠪᠣᠯᠤᠮᠠᠷ ᠪᠠᠢᠭᠰᠠᠨ᠃ ᠣᠨᠴᠠᠭᠠᠢ ᠬᠠᠷᠢᠴᠠᠭᠠ ᠲᠠᠢ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠣᠶᠠᠷ ᠬᠠᠮᠰᠠᠵᠤ ᠶᠠᠯᠠ ᠬᠢᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠪᠦᠷ ᠲᠣᠯᠣᠭᠠᠢ ᠠᠪᠲᠠᠬᠤ ᠶᠠᠯᠠ ᠳ᠋ᠤ᠌ ᠤᠨᠠᠬᠤ ᠠᠶᠤᠯ ᠲᠠᠢ ᠦᠶᠡ ᠳ᠋ᠦ᠍᠂ ᠪᠠᠭᠠ ᠯᠠ ᠵᠠᠪᠰᠢᠶᠠᠨ ᠪᠠᠢᠪᠠᠯ ᠨᠢᠭᠡ ᠨᠢ ᠨᠥᠭᠦᠭᠡ ᠪᠡᠨ ᠠᠪᠤᠷᠠᠬᠤ ᠪᠠᠷ ᠠᠷᠭᠠ ᠤᠬᠠᠭᠠᠨ ᠰᠦᠪᠡᠭᠴᠢᠯᠡᠳᠡᠭ ᠢ᠋ ᠨᠢᠭᠡᠨ ᠵᠦᠢᠯ ᠦ᠋ᠨ ᠯᠣᠭᠢᠭ ᠭᠡᠵᠦ ᠪᠣᠯᠤᠮᠠᠷ ᠶᠤᠮ᠃ ᠢᠯᠠᠩᠭᠤᠶᠠ ᠡᠨᠡ ᠬᠣᠶᠠᠷ ᠬᠥᠮᠦᠨ ᠪᠦᠷ ᠵᠣᠬᠢᠬᠤ ᠦᠢᠯᠡᠳᠦᠯᠭᠡ ᠶᠢᠨ ᠨᠤᠭᠤᠷᠠᠯ ᠪᠦᠳᠦᠷᠡᠯ ᠢ᠋ ᠥᠩᠭᠡᠷᠡᠭᠰᠡᠨ ᠤᠴᠢᠷ ᠠ᠋ᠴᠠ ᠠᠮᠢ ᠪᠠᠨ ᠪᠣᠳᠣᠨ᠂ ᠴᠠᠭᠠᠲᠠᠢ ᠨᠠᠭᠠᠲᠠᠢ ᠪᠠᠨ ᠲᠣᠭᠠᠴᠠᠬᠤ ᠦᠭᠡᠢ ᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠲᠦᠯᠬᠢᠯᠴᠡᠬᠦ ᠪᠣᠯᠤᠯᠴᠠᠭᠠ ᠲᠤᠩ ᠪᠠᠭᠠ ᠶᠤᠮ᠃ ᠢᠩᠭᠢᠵᠦ ᠬᠢᠬᠦ ᠶ᠋ᠢᠨ ᠡᠴᠦᠰ ᠦ᠋ᠨ ᠦᠷᠡ ᠳ᠋ᠦᠩ ᠢ᠋ ᠲᠡᠳᠡ ᠯᠠᠪᠲᠠᠢ ᠤᠷᠢᠳᠴᠢᠯᠠᠨ ᠲᠥᠰᠦᠪᠯᠡᠵᠦ ᠴᠢᠳᠠᠨᠠ᠃
— ᠢᠩᠭᠢᠭᠡᠳ ᠯᠡ ᠪᠣᠯᠤᠷᠴᠠᠭᠠᠨ ᠬᠢᠯᠢᠰ ᠭᠠᠰᠠᠯᠠᠩ ᠢ᠋ ᠳᠣᠲᠣᠷᠠ ᠪᠠᠨ ᠪᠣᠳᠣᠨ᠂ ᠠᠮᠢᠨ ᠬᠡᠷᠡᠭ ᠡᠭᠦᠷᠦᠨ ᠲᠣᠯᠣᠭᠠᠢ ᠤᠨᠠᠬᠤ ᠪᠠᠨ ᠬᠦᠯᠢᠶᠡᠭᠰᠡᠭᠡᠷ ᠪᠠᠢᠭᠰᠠᠨ᠃ ᠶᠠᠷᠢᠶᠠᠨ ᠦᠭᠡᠢ ᠲᠡᠷᠡ ᠵᠠᠷᠢᠮ ᠳᠤ ᠪᠠᠨ ᠭᠤᠨᠢᠨ ᠤᠢᠳᠬᠤ ᠳᠤ ᠪᠠᠨ ᠵᠢᠷᠦᠬᠡ ᠰᠡᠳᠬᠢᠯ ᠨᠢ ᠰᠢᠮᠰᠢᠷᠡᠨ ᠱᠠᠷᠬᠢᠷᠠᠵᠤ ᠲᠡᠰᠬᠦᠶᠡ ᠪᠡᠷᠬᠡ ᠪᠣᠯᠳᠠᠭ ᠪᠠᠢᠬᠤ᠃ ᠲᠡᠭᠡᠬᠦ ᠳᠦ ᠪᠡᠨ ᠡᠨᠳᠡᠯ ᠣᠰᠣᠯ ᠭᠡᠮᠡᠷ ᠶᠠᠭᠤᠮᠠ ᠬᠢᠭᠰᠡᠨ ᠦᠭᠡᠢ ᠪᠡᠷ ᠠᠷᠪᠠ ᠭᠠᠷᠤᠢ ᠵᠢᠯ ᠳᠡᠷᠡ ᠨᠢᠭᠡᠳᠬᠡᠭᠰᠡᠨ ᠡᠩᠬᠦᠷᠡᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠰᠠᠨᠠᠭᠠ ᠪᠣᠯᠵᠤ᠂ ᠲᠡᠭᠦᠨ ᠦ᠌ ᠭᠠᠷ ᠲᠤ᠌ ᠬᠠᠷᠠ ᠴᠠᠭᠠᠨ ᠢ᠋ᠶ᠋ᠠᠨ ᠢᠯᠭᠠᠭᠠ ᠦᠭᠡᠢ ᠪᠡᠷ ᠬᠠᠢᠷᠠᠨ ᠠᠮᠢ ᠪᠠᠨ ᠠᠯᠳᠠᠭᠰᠠᠨ ᠳ᠋ᠤᠨᠢ ᠠᠷᠭᠠ ᠦᠭᠡᠢ ᠯᠡ ᠭᠠᠰᠢᠭᠤᠳᠠᠨ ᠵᠣᠪᠠᠳᠠᠭ ᠪᠠᠢᠬᠤ᠃ ᠢᠳᠡᠷ ᠨᠠᠰᠤᠨ ᠤ᠋ ᠬᠢᠨᠢ ᠦᠶᠡ ᠢᠯᠡᠭᠦᠴᠡ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠬᠦᠷᠲᠡᠭᠡᠭᠰᠡᠨ ᠨᠢᠭᠤᠴᠠ ᠬᠠᠨᠢᠲᠠᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠲᠣᠰᠤᠮ᠂ ᠳᠤᠷᠠᠯᠠᠯ ᠳᠤ ᠪᠠᠨ ᠰᠣᠭᠲᠣᠭᠤᠷᠠᠨ ᠪᠠᠷᠤᠭ ᠯᠠ ᠮᠡᠳᠡᠷᠡᠯ ᠰᠠᠷᠠᠯ ᠤ᠋ᠨ ᠵᠢᠯᠣᠭᠣ ᠪᠠᠨ ᠠᠯᠲᠠᠨ ᠲᠡᠨᠡᠭ ᠪᠣᠯᠬᠢ ᠠᠵᠢᠯᠯᠠᠭᠠ ᠦᠢᠯᠡᠳᠦᠭᠰᠡᠨ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠲᠥᠯᠥᠭᠡ ᠭᠠᠰᠠᠯᠲᠠᠯᠠ ᠬᠠᠷᠠᠮᠰᠠᠳᠠᠭ ᠪᠠᠢᠬᠤ᠃
— ᠲᠡᠷᠡ ᠠᠮᠢᠳᠤᠷᠠᠬᠤ ᠵᠠᠪᠰᠢᠶᠠᠨ ᠨᠢᠭᠡᠨᠲᠡ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠰᠡᠷᠡᠵᠦ ᠮᠡᠳᠡᠭᠡᠳ᠂ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠬᠢᠯᠭᠠᠰᠤᠨ ᠲᠡᠳᠦᠢ ᠭᠬᠢᠷ ᠬᠠᠯᠳᠠᠭᠠᠬᠤ ᠦᠭᠡᠢ ᠪᠡᠷ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ ᠰᠢᠭᠤᠳᠤᠭᠰᠠᠨ ᠪᠠᠢᠬᠠ᠃ ᠦᠨᠡᠨ ᠳᠦ ᠪᠡᠨ ᠪᠣᠯᠤᠷᠴᠠᠭᠠᠨ ᠤ᠋ ᠬᠣᠪᠢᠨ ᠳ᠋ᠤ᠌ ᠠᠪᠴᠤ ᠬᠡᠯᠡᠪᠡᠯ ᠢᠩᠭᠢᠵᠦ ᠯᠡ ᠬᠢᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠭᠰᠠᠨ᠃ ᠤᠴᠢᠷ ᠨᠢ ᠡᠨᠡ ᠬᠡᠷᠡᠭ ᠳᠡᠭᠡᠷᠡ ᠬᠣᠯᠪᠣᠭᠳᠠᠭᠰᠠᠨ ᠮᠠᠰᠢ ᠨᠠᠷᠢᠨ ᠪᠤᠳᠤᠯᠢᠶᠠᠨ ᠲᠠᠢ ᠬᠡᠷᠡᠭ ᠦ᠋ᠳ ᠢ᠋ ᠪᠣᠯᠤᠷᠴᠠᠭᠠᠨ ᠮᠡᠳᠡᠬᠦ ᠦᠭᠡᠢ ᠶᠦᠮ᠃ ᠲᠡᠭᠡᠬᠦᠯᠡ ᠲᠡᠭᠦᠨ ᠦ᠌ ᠭᠠᠷ ᠲᠤ᠌ ᠦᠵᠡᠰᠬᠦᠯᠡᠩ ᠦ᠋ᠨ ᠠᠮᠢᠨ ᠬᠡᠷᠡᠭ ᠭᠠᠷᠤᠭᠰᠠᠨ ᠤ᠋ ᠬᠣᠢᠨᠠ ᠬᠠᠷᠢᠭᠤᠴᠠᠯᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠥᠪᠡᠷ ᠢ᠋ᠶ᠋ᠡᠨ ᠡᠭᠦᠷᠴᠦ ᠭᠠᠷᠬᠤ ᠪᠠ ᠪᠤᠰᠤᠳ ᠤᠷᠤᠭᠤ ᠲᠦᠯᠬᠢᠪᠡᠯ ᠬᠣᠶᠠᠷ ᠠᠳᠠᠯᠢᠬᠠᠨ ᠦᠷᠡ ᠳ᠋ᠦᠩ ᠢ᠋ ᠪᠣᠢ ᠪᠣᠯᠭᠠᠬᠤ ᠶᠤᠮ᠃
— ᠬᠡᠷᠪᠡ ᠡᠨᠡ ᠬᠡᠷᠡᠭ ᠢ᠋ᠶ᠋ᠡᠨ ᠡᠦ ᠹᠧᠩ ᠮᠧᠢ ᠤᠷᠤᠭᠤ ᠲᠦᠯᠬᠢᠪᠡᠯ ᠡᠰᠡᠷᠭᠦ ᠨᠢ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ ᠬᠤᠤᠪᠢᠯᠳᠤᠵᠤ ᠬᠥᠮᠦᠨ ᠠᠯᠠᠭᠰᠠᠨ ᠢ᠋ᠶ᠋ᠠᠷ ᠶᠠᠯᠠ ᠶ᠋ᠢᠨ ᠰᠢᠨᠵᠢ ᠴᠢᠨᠠᠷ ᠬᠦᠨᠳᠦᠳᠡᠵᠦ ᠬᠣᠶᠠᠭᠤᠯᠠ ᠪᠠᠨ ᠠᠯᠠᠭᠳᠠᠨᠠ᠃ ᠬᠠᠷᠢᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠡᠭᠦᠷᠴᠦ ᠭᠠᠷᠪᠠᠯ ᠨᠢᠭᠡ ᠠᠮᠢ ᠪᠠᠷ ᠨᠢᠭᠡ ᠠᠮᠢ ᠲᠥᠯᠥᠵᠦ ᠪᠠᠰᠠ ᠲᠡᠭᠡᠭᠡᠳ ᠡᠦ ᠹᠧᠩ ᠮᠧᠢ ᠶ᠋ᠢ ᠬᠠᠮᠠᠭᠠᠯᠠᠵᠤ ᠪᠣᠯᠤᠨᠠ᠃ ᠢᠩᠭᠢᠵᠦ ᠠᠷᠪᠢᠨ ᠵᠦᠢᠴᠢᠯᠡᠭᠰᠡᠨ ᠦ᠌ ᠬᠣᠢᠨᠠ ᠵᠠᠪᠠᠯ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠲᠤᠯᠵᠤ ᠭᠠᠷᠬᠤ ᠮᠤᠬᠤᠷ ᠪᠣᠳᠣᠯ ᠲᠠᠢ ᠪᠣᠯᠵᠠᠢ᠃
— ᠭᠡᠲᠡᠯᠡ ᠰᠡᠳᠬᠢᠯ ᠳᠦ ᠪᠡᠨ ᠬᠠᠷᠠ ᠠᠯᠪᠠ ᠪᠠᠷ ᠳᠠᠷᠤᠭᠰᠠᠨ ᠪᠤᠬᠢᠨᠢᠳᠤᠯ ᠢ᠋ ᠶᠠᠭᠠᠬᠢᠵᠤ ᠤᠬᠠᠮᠰᠠᠷ ᠠ᠋ᠴᠠ ᠪᠠᠨ ᠣᠢᠯᠠᠭᠠᠵᠤ ᠲᠠᠨᠢᠯᠠ ᠭᠡᠳ ᠲᠠᠷᠢᠬᠢᠨ ᠳ᠋ᠤᠨᠢ ᠬᠡᠵᠢᠶᠡᠳᠡ ᠡᠷᠭᠢᠯᠳᠦᠵᠦ ᠪᠠᠢᠳᠠᠭ ᠰᠠᠨᠵᠠᠢ᠃ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠬᠦᠷᠭᠡᠭᠳᠡᠨ ᠭᠠᠵᠠᠷ ᠰᠥᠭᠥᠳᠦᠭᠡᠳ ᠡᠴᠦᠰ ᠦ᠋ᠨ ᠮᠥᠴᠡ ᠪᠡᠨ ᠬᠦᠯᠢᠶᠡᠬᠦ ᠣᠨᠴᠠᠭᠠᠢ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠠᠮᠢᠨ ᠳᠤ ᠪᠠᠨ ᠬᠠᠷᠠᠮᠰᠠᠭᠰᠠᠨ ᠴᠦ᠍ ᠪᠣᠯᠤᠭ᠂ ᠠᠮᠠᠨ ᠤ᠋ ᠪᠠᠨ ᠠᠶᠠ ᠪᠠᠷ ᠴᠦ᠍ ᠪᠣᠯᠤᠭ᠂ ᠰᠠᠨᠠᠭᠠᠨ ᠤ᠋ ᠴᠠᠭᠠᠨᠠᠬᠢ ᠬᠠᠷᠠᠮᠰᠠᠯ ᠢ᠋ᠶ᠋ᠠᠨ ᠬᠢᠯᠢᠰ ᠬᠠᠰᠬᠢᠷᠤᠭᠰᠠᠨ ᠨᠢ ᠪᠣᠯᠤᠷᠴᠠᠭᠠᠨ ᠤ᠋ ᠤᠳᠠᠭᠠᠨ ᠬᠤᠭᠤᠴᠠᠭᠠᠨ ᠤ᠋ ᠪᠤᠳᠤᠯᠢᠶᠠᠨᠲᠤ ᠰᠡᠳᠬᠢᠯᠭᠡ ᠶ᠋ᠢ ᠬᠠᠷᠠᠭᠤᠯᠤᠭᠰᠠᠨ ᠪᠢᠰᠢ ᠤᠤ᠃
— ᠡᠨᠡ ᠬᠦ᠌ ᠵᠦᠢᠴᠢᠯᠡᠯ ᠨᠤᠲᠠᠯᠠᠯ ᠢ᠋ᠶ᠋ᠠᠨ ᠵᠥᠪ ᠭᠡᠮᠡᠨ ᠪᠢ ᠨᠢᠭᠡ ᠬᠤᠭᠤᠴᠠᠭᠠ ᠪᠠᠲᠤᠲᠠᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠳᠠᠭᠠᠯᠳᠤᠭᠰᠠᠨ ᠵᠠᠷᠢᠮ ᠠᠰᠠᠭᠤᠳᠠᠯ ᠢ᠋ ᠣᠨᠣᠪᠴᠢᠲᠠᠢ ᠲᠠᠢᠯᠪᠤᠷᠢᠯᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠯᠠ᠃ ᠪᠣᠯᠤᠷᠴᠠᠭᠠᠨ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ ᠲᠠᠷᠢᠭᠰᠠᠨ ᠡᠮ ᠦ᠋ᠨ ᠬᠡᠮᠵᠢᠶᠡ ᠪᠡᠨ ᠶᠠᠭᠠᠬᠢᠭᠠᠳ ᠵᠠᠪᠠᠯ ᠨᠠᠢ᠍ᠮᠠᠨ ᠮᠢᠯᠢᠯᠢᠲ᠋ᠷ ᠪᠣᠯᠭᠠᠨ ᠥᠰᠬᠡᠬᠦ ᠪᠣᠢ? ᠡᠨᠡ ᠰᠦᠪᠡᠭᠴᠢ ᠶ᠋ᠢ ᠠᠬᠢᠨ ᠳᠠᠬᠢᠨ ᠪᠣᠳᠣᠯᠬᠢᠯᠠᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠨᠠᠳᠠ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠᠬᠢ ᠨᠢᠭᠡ ᠵᠦᠢᠯ ᠦ᠋ᠨ ᠪᠣᠳᠣᠯ ᠣᠷᠣᠭᠤᠯᠪᠠ᠃ ᠨᠢᠭᠡ ᠪᠣᠯ Aᠭᠤᠷᠪᠠᠳᠤᠭᠠᠷ ᠢ᠋ ᠪᠠᠭᠠ ᠵᠠᠷᠤᠪᠠᠯ ᠬᠥᠮᠦᠨ ᠦ᠌ ᠠᠮᠢᠨ ᠳ᠋ᠤ᠌ ᠬᠦᠷᠳᠡᠭ ᠦᠭᠡᠢ ᠪᠠᠢᠵᠤ ᠮᠡᠳᠡᠨᠡ᠃ ᠡᠰᠡᠪᠡᠯ ᠡᠦ ᠹᠧᠩ ᠮᠧᠢ ᠶᠢᠨ ᠰᠡᠮᠡᠬᠡᠷ ᠥᠭᠭᠦᠭᠰᠡᠨ ᠡᠮ ᠦ᠋ᠨ ᠬᠡᠮᠵᠢᠶᠡ ᠶ᠋ᠢ ᠲᠡᠷᠡ ᠮᠡᠳᠡᠬᠦ ᠦᠭᠡᠢ ᠪᠣᠯᠬᠣᠷ ᠲᠡᠭᠦᠨ ᠦ᠌ ᠲᠥᠯᠥᠭᠡ ᠶᠠᠯᠠ ᠡᠭᠦᠷᠬᠦ ᠪᠡᠷ ᠢᠯᠡᠭᠦᠦ ᠨᠡᠮᠡᠵᠦ ᠬᠡᠯᠡᠵᠦ ᠪᠠᠢᠬᠤ ᠮᠠᠭᠠᠳ ᠦᠭᠡᠢ᠃ ᠪᠢ ᠡᠨᠡ ᠬᠦ᠌ ᠶᠠᠪᠤᠳᠠᠯ ᠢ᠋ ᠣᠨᠣᠪᠴᠢᠲᠠᠢ ᠲᠣᠳᠣᠷᠬᠠᠢᠯᠠᠬᠤ ᠪᠠᠷ ᠡᠮᠨᠡᠯᠭᠡ ᠶ᠋ᠢᠨ ᠰᠤᠳᠤᠯᠭᠠᠲᠠᠨ ᠬᠠᠨ ᠠᠪᠤᠭᠠᠢ ᠪᠠᠷ Aᠭᠤᠷᠪᠠᠳᠤᠭᠠᠷ᠂ B ᠵᠢᠷᠭᠤᠳᠤᠭᠠᠷ ᠤ᠋ᠨ ᠴᠢᠨᠠᠷ ᠪᠣᠯᠤᠨ ᠵᠠᠷᠤᠬᠤ ᠬᠡᠮᠵᠢᠶᠡ ᠬᠣᠣᠷᠳᠠᠭᠳᠠᠬᠤ ᠴᠠᠭ᠂ ᠢᠯᠡᠷᠡᠯ ᠪᠠᠢᠳᠠᠯ ᠢ᠋ ᠨᠣᠬᠠᠢ ᠳ᠋ᠤ᠌ ᠲᠤᠷᠰᠢᠯᠲᠠ ᠬᠢᠯᠭᠡᠪᠡ᠃ ᠨᠣᠬᠠᠢ ᠳ᠋ᠤ᠌ ᠦᠵᠡᠭᠦᠯᠦᠭᠰᠡᠨ ᠦᠢᠯᠡᠳᠦᠯ ᠡᠴᠡ ᠦᠵᠡᠪᠡᠯ ᠡᠨᠡ ᠬᠣᠶᠠᠷ ᠵᠦᠢᠯ ᠦ᠋ᠨ ᠡᠮ ᠢ᠋ ᠨᠡᠢᠯᠡᠭᠦᠯᠦᠨ ᠨᠠᠢ᠍ᠮᠠᠨ ᠮᠢᠯᠢᠯᠢᠲ᠋ᠷ ᠵᠠᠷᠤᠪᠠᠯ ᠨᠣᠬᠠᠢ ᠨᠢᠭᠡ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠭᠦᠢᠴᠡᠳ ᠮᠠᠨᠠᠷᠠᠵᠤ ᠮᠡᠳᠡᠷᠡᠯ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠭᠠᠳ᠂ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠬᠣᠶᠠᠷ ᠭᠤᠷᠪᠠᠨ ᠴᠠᠭ ᠤ᠋ᠨ ᠳᠠᠷᠠᠭᠠ ᠵᠢᠷᠦᠬᠡ ᠨᠢ ᠠᠯᠭᠤᠷ ᠵᠣᠭᠰᠣᠨ ᠦᠬᠦᠬᠦ ᠪᠣᠯᠤᠨᠠ ᠭᠡᠳᠡᠭ ᠢ᠋ ᠨᠤᠲᠠᠯᠠᠵᠠᠢ᠃ ᠭᠡᠲᠡᠯᠡ ᠦᠵᠡᠰᠬᠦᠯᠡᠩ ᠴᠣᠬᠣᠮ ᠶᠠᠭᠠᠬᠢᠵᠤ ᠦᠬᠦᠭᠰᠡᠨ ᠪᠣᠢ? ᠲᠡᠭᠦᠨ ᠳ᠋ᠦ᠍ ᠡᠮ ᠳᠠᠷᠢᠮᠠᠭᠴᠠ ᠭᠠᠯᠵᠠᠭᠤᠷᠠᠮᠠᠷ ᠰᠠᠨᠳᠤᠷᠤᠭᠠᠳ ᠬᠠᠭᠠᠰ ᠴᠠᠭ ᠴᠦ᠍ ᠪᠣᠯᠤᠭᠠ ᠦᠭᠡᠢ ᠦᠬᠦᠭᠰᠡᠨ ᠪᠠᠢᠨᠠ᠃ ᠦᠨᠡᠨ ᠳᠦ ᠪᠡᠨ Aᠭᠤᠷᠪᠠᠳᠤᠭᠠᠷ ᠡᠨᠡᠬᠡᠨ ᠬᠣᠭᠣᠷᠣᠨᠳᠣ ᠦᠢᠯᠡᠳᠦᠯ ᠢ᠋ᠶ᠋ᠡᠨ ᠴᠦ᠍ ᠭᠦᠢᠴᠡᠳ ᠪᠠᠳᠠᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠶᠦᠮ᠃ ᠡᠨᠡ ᠡᠮ ᠬᠥᠮᠦᠨ ᠳ᠋ᠦ᠍ ᠮᠠᠰᠢ ᠲᠦᠷᠭᠡᠨ ᠦᠢᠯᠡᠳᠦᠯ ᠦᠵᠡᠭᠦᠯᠦᠭᠰᠡᠨ ᠦᠷᠡ ᠳ᠋ᠦᠩ ᠨᠢ ᠮᠢᠨᠦ ᠬᠣᠯᠪᠣᠨ ᠪᠣᠳᠣᠬᠤ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ ᠶ᠋ᠢ ᠥᠷᠭᠡᠳᠬᠡᠨ᠂ ᠤᠤᠯ ᠤ᠋ᠨ ᠨᠤᠲᠠᠯᠠᠯ ᠬᠢᠵᠠᠭᠠᠷᠯᠠᠯ ᠠ᠋ᠴᠠ ᠪᠠᠨ ᠳᠠᠪᠠᠵᠤ᠂ ᠦᠰᠦᠳ ᠣᠨᠳᠣᠣ ᠵᠦᠢᠴᠢᠯᠡᠯ ᠰᠡᠳᠬᠢᠮᠵᠢ ᠲᠡᠢ ᠪᠣᠯᠪᠠ᠃ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠪᠠᠲᠤᠲᠠᠢ ᠵᠦᠢᠴᠢᠯᠡᠵᠦ ᠪᠣᠯᠬᠤ ᠨᠢ᠂ ᠪᠣᠯᠤᠷᠴᠠᠭᠠᠨ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠲᠣᠬᠢᠷᠠᠭᠤᠯᠤᠭᠰᠠᠨ ᠡᠮ ᠢ᠋ ᠶᠠᠭ ᠮᠡᠳᠡᠬᠦ ᠦᠭᠡᠢ ᠪᠡᠷ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠲᠠᠷᠢᠭᠰᠠᠨ ᠨᠢ ᠯᠠᠪᠲᠠᠢ᠃ ᠲᠡᠭᠡᠭᠡᠳ ᠮᠠᠷᠭᠠᠰᠢ ᠨᠢ ᠬᠣᠶᠠᠭᠤᠯᠠ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠬᠤ ᠳ᠋ᠤ᠌ ᠴᠠᠭ ᠤ᠋ᠨ ᠬᠠᠷᠠᠭᠠ᠂ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠨᠥᠯᠥᠭᠡᠯᠡᠯ ᠡᠴᠡ ᠪᠣᠯᠵᠤ ᠵᠥᠪᠬᠡᠨ ᠶᠠᠮᠠᠷ ᠡᠮ ᠲᠣᠬᠢᠷᠠᠭᠤᠯᠤᠭᠰᠠᠨ ᠢ᠋ ᠶᠠᠷᠢᠯᠴᠠᠭᠰᠠᠨ ᠠ᠋ᠴᠠ ᠪᠢᠰᠢ᠂ ᠬᠡᠳᠦᠢ ᠲᠣᠬᠢᠷᠠᠭᠤᠯᠤᠭᠰᠠᠨ ᠢ᠋ ᠨᠠᠷᠢᠨ ᠶᠠᠷᠢᠯᠴᠠᠵᠤ ᠵᠠᠪᠳᠤᠭᠰᠠᠨ ᠦᠭᠡᠢ᠃ ᠬᠣᠵᠢᠮ ᠨᠢ ᠪᠣᠯᠤᠷᠴᠠᠭᠠᠨ ᠠ᠋ᠴᠠ ᠡᠮ ᠦ᠋ᠨ ᠬᠡᠮᠵᠢᠶᠡ ᠶ᠋ᠢ ᠰᠢᠬᠠᠮᠳᠠᠭᠤᠯᠤᠨ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠰᠠᠶᠢ ᠪᠠᠭᠠ ᠵᠠᠷᠤᠪᠠᠯ ᠦᠬᠦᠬᠦ ᠦᠭᠡᠢ᠂ ᠶᠡᠬᠡ ᠵᠠᠷᠤᠯᠠ ᠭᠡᠬᠦ ᠳ᠋ᠦ᠍ ᠬᠡᠳᠦᠢ ᠬᠡᠮᠵᠢᠶᠡ ᠭᠡᠵᠦ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠯᠢᠳᠠᠬᠤ ᠳᠤ ᠪᠠᠨA ᠭᠤᠷᠪᠠᠳᠤᠭᠠᠷ ᠤ᠋ᠨ ᠬᠡᠮᠵᠢᠶᠡ ᠶ᠋ᠢ ᠬᠤᠳᠠᠯ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠨᠡᠮᠡᠵᠦ ᠬᠡᠯᠡᠭᠡᠳ ᠠᠮᠠ ᠨᠡᠢᠯᠡᠭᠦᠯᠬᠦ ᠪᠡᠷ ᠪᠣᠳᠣᠵᠠᠢ᠃
— ᠪᠢ ᠡᠳᠡᠭᠡᠷ ᠢ᠋ ᠵᠦᠢᠴᠢᠯᠡᠭᠡᠳ ᠲᠡᠭᠦᠨ ᠢ᠋ ᠲᠠᠬᠢᠵᠤ ᠰᠢᠭᠦᠨ ᠪᠠᠢᠴᠠᠭᠠᠬᠤ ᠳᠤ ᠪᠠᠨ᠂ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠠᠭᠤᠯᠵᠠᠵᠤ ᠬᠣᠣᠷᠲᠤ ᠡᠮ ᠦ᠋ᠨ ᠲᠤᠬᠠᠢ ᠶᠠᠷᠢᠯᠴᠠᠭᠰᠠᠨ ᠢ᠋ ᠲᠤᠯᠭᠠᠨ ᠰᠢᠬᠠᠮᠳᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠮ ᠲᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠯᠠᠪᠲᠠᠢ ᠭᠠᠷ ᠬᠥᠯ ᠨᠡᠢᠯᠡᠭᠰᠡᠨ ᠬᠠᠷᠢᠴᠠᠭᠠ ᠲᠠᠢ ᠭᠡᠵᠦ ᠰᠢᠭᠤᠳ ᠲᠤᠯᠭᠠᠭᠰᠠᠨ ᠶᠤᠮ᠃ ᠬᠡᠷᠪᠡ ᠣᠨᠴᠠᠭᠠᠢ ᠬᠠᠷᠢᠴᠠᠭᠠ ᠪᠠ ᠠᠮᠢᠨ ᠳ᠋ᠤ᠌ ᠬᠣᠯᠪᠣᠭᠳᠠᠮᠠᠷ ᠵᠦᠢᠯ ᠪᠢᠰᠢ ᠪᠣᠯ ᠲᠡᠷᠡ ᠶᠠᠭᠤᠨ ᠳ᠋ᠤ᠌ ᠲᠡᠭᠡᠵᠦ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠠᠷᠠᠯᠵᠢᠬᠤ ᠭᠡᠨᠡᠨ ᠬᠠᠷᠢᠭᠤᠴᠠᠯᠭᠠ ᠡᠭᠦᠷᠬᠦ ᠪᠢᠯᠡ᠃
— ᠬᠣᠶᠠᠭᠤᠯᠠ ᠲᠡᠷᠡ ᠤᠳᠠᠭᠠ ᠲᠡᠭᠦᠨ ᠢ᠋ ᠰᠢᠭᠦᠬᠦ ᠳ᠋ᠡᠭᠡᠨ ᠡᠮ ᠦ᠋ᠨ ᠬᠡᠮᠵᠢᠶᠡ ᠬᠥᠮᠦᠨ ᠳ᠋ᠦ᠍ ᠥᠭᠬᠦ ᠦᠢᠯᠡᠳᠦᠯ ᠢ᠋ ᠭᠠᠷᠴᠠᠭᠠ ᠦᠭᠡᠢ ᠲᠤᠯᠭᠠᠬᠤ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠠᠷᠭᠠ ᠦᠭᠡᠢ ᠯᠡ᠄ 《ᠬᠥᠮᠦᠨ ᠬᠥᠮᠦᠨ ᠦ᠌ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠪᠦᠲᠦᠴᠡ᠂ ᠡᠮ ᠳ᠋ᠦ᠍ ᠬᠤᠣᠷᠳᠠᠭᠳᠠᠬᠤ ᠨᠢ ᠠᠳᠠᠯᠢ ᠦᠭᠡᠢ ᠪᠠᠢᠵᠤ ᠮᠡᠳᠡᠬᠦ》 ᠭᠡᠵᠦ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠠᠢᠬᠤᠪᠲᠤᠷ ᠭᠤᠨᠢᠭᠰᠢᠵᠤ ᠪᠣᠳᠣᠯᠭᠠᠰᠢᠷᠠᠵᠤ ᠪᠠᠢᠭᠠ ᠪᠠᠢᠳᠠᠯ ᠬᠠᠷᠠᠴᠠᠨ ᠳ᠋ᠤᠨᠢ ᠲᠣᠳᠣᠷᠠᠵᠤ ᠪᠠᠢᠭᠰᠠᠨ ᠰᠢᠦ᠃
— ᠮᠢᠨᠦ ᠬᠣᠶᠠᠳᠤᠭᠠᠷ ᠵᠦᠢᠴᠢᠯᠡᠯ ᠪᠣᠯ ᠦᠵᠡᠰᠬᠦᠯᠡᠩ ᠦ᠋ᠨ ᠦᠬᠦᠭᠰᠡᠨ ᠰᠢᠨᠵᠢ ᠪᠠᠢᠳᠠᠯ ᠨᠢ Aᠭᠤᠷᠪᠠᠳᠤᠭᠠᠷ ᠪᠣᠯᠤᠨB ᠵᠢᠷᠭᠤᠳᠤᠭᠠᠷ ᠨᠡᠢᠯᠡᠨ ᠤᠷᠪᠠᠯ ᠡᠭᠦᠰᠦᠭᠰᠡᠨ ᠬᠣᠣᠷᠳᠠᠭᠳᠠᠯ ᠪᠢᠰᠢ ᠪᠣᠯ ᠥᠭᠡᠷᠡ ᠬᠣᠣᠷᠲᠤ ᠡᠮ ᠵᠠᠷᠤᠭᠰᠠᠨ ᠭᠡᠵᠦ ᠰᠡᠵᠢᠭᠯᠡᠭᠰᠡᠨ᠃ ᠡᠨᠡ ᠰᠡᠵᠢᠭᠯᠡᠯ ᠳᠦ ᠪᠡᠨ ᠪᠢ ᠨᠢᠭᠡ ᠬᠤᠭᠤᠴᠠᠭᠠ ᠡᠷᠡᠭᠡᠯᠵᠡᠵᠦ᠂ ᠥᠩᠭᠡᠷᠡᠦ ᠡᠮᠵᠡᠭ ᠡᠷᠢᠵᠦ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠯᠬᠢᠯᠠᠵᠤ ᠥᠩᠭᠡᠷᠡᠭᠰᠡᠨ᠃ ᠭᠡᠲᠡᠯᠡ ᠠᠵᠢᠯ ᠤ᠋ᠨ ᠬᠠᠷᠢᠭᠤᠴᠠᠯᠭᠠ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠵᠣᠷᠢᠭ ᠰᠢᠭᠤᠳᠤᠨ ᠦᠵᠡᠰᠬᠦᠯᠡᠩ ᠦ᠋ᠨ ᠬᠡᠭᠦᠷ ᠢ᠋ ᠳᠠᠬᠢᠨ ᠨᠢᠭᠤᠴᠠ ᠪᠠᠷ ᠪᠠᠢᠴᠠᠭᠠᠬᠤ ᠪᠠᠷ ᠲᠥᠯᠥᠪᠯᠡᠵᠦ᠂ ᠦᠶᠡᠷᠬᠡᠨ ᠢᠲᠡᠭᠡᠳᠡᠭ ᠬᠠᠨ 《ᠠᠰᠠᠷ》 ᠲᠤ ᠪᠠᠨ ᠡᠨᠡ ᠡᠭᠦᠷᠭᠡ ᠶ᠋ᠢ ᠳᠠᠭᠠᠭᠠᠯᠭᠠᠭᠰᠠᠨ ᠪᠢᠯᠡ᠃ ᠢᠩᠭᠢᠭᠡᠳ ᠦᠵᠡᠰᠬᠦᠯᠡᠩ ᠦ᠋ᠨ ᠬᠡᠭᠦᠷ ᠢ᠋ ᠳᠠᠬᠢᠨ ᠲᠤᠶᠠᠴᠢᠨ ᠪᠠᠢᠴᠠᠭᠠᠭᠰᠠᠨ ᠤ᠋ ᠦᠷᠡ ᠳ᠋ᠦᠩ᠁ ᠭᠡᠲᠡᠯᠡ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠵᠢᠩᠭᠢᠨᠡᠮᠡ ᠬᠣᠩᠬᠣᠨ ᠳᠠᠭᠤᠨ ᠲᠡᠭᠦᠨ ᠦ᠌ ᠶᠠᠷᠢᠶᠠ ᠶ᠋ᠢ ᠲᠠᠰᠤᠯᠪᠠ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ