《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠠᠷᠪᠠᠳᠤᠭᠠᠷ ᠪᠦᠯᠦᠭ ᠂ ᠤᠢᠭᠤᠷ ᠪᠠ ᠣᠢ ᠶ᠋ᠢᠨ ᠢᠷᠭᠡᠳ ᠢ᠋ ᠡᠵᠡᠯᠡᠭᠰᠡᠨ ᠨᠢУйгар ба ойн иргэдийг эзэлсэн нь
1439230᠂ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄
《ᠡᠭᠦᠯᠡ ᠲᠡᠢ ᠰᠥᠨᠢ ᠡᠭᠦᠳᠡ ᠲᠡᠢ ᠭᠡᠷ ᠢ᠋ ᠮᠢᠨᠢ ᠦᠷᠭᠦᠯᠵᠢ ᠰᠠᠬᠢᠵᠤ ᠡᠨᠡ ᠪᠡᠶᠡ ᠶ᠋ᠢ ᠮᠢᠨᠢ ᠡᠩᠬᠡ ᠤᠨᠲᠠᠭᠤᠯᠵᠤ ᠡᠷᠳᠡᠨᠢ ᠶ᠋ᠢᠨ ᠰᠠᠭᠤᠷᠢᠨ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠡᠷᠲᠡᠨ ᠦ᠌ ᠡᠭᠡᠯᠢᠲᠦ ᠬᠡᠪᠲᠡᠭᠦᠯ ᠮᠢᠨᠢ! ᠣᠳᠣ ᠲᠠᠢ ᠰᠥᠨᠢ ᠤᠷᠲᠤ ᠭᠡᠷ ᠦ᠋ᠨ ᠮᠢᠨᠢ ᠣᠷᠴᠢᠮ ᠳ᠋ᠤ᠌ ᠬᠡᠪᠲᠡᠵᠦ ᠥᠯᠥᠭᠡᠢ ᠳᠡᠪᠢᠰᠬᠡᠷ ᠦ᠋ᠨ ᠮᠢᠨᠢ ᠥᠮᠥᠭ ᠪᠣᠯᠵᠤ ᠥᠴᠦᠬᠡᠨ ᠪᠡᠶᠡ ᠶ᠋ᠢᠨ ᠮᠢᠨᠢ ᠲᠦᠰᠢᠭ ᠪᠣᠯᠵᠤ ᠥᠨᠳᠥᠷ ᠰᠠᠭᠤᠷᠢᠨ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠥᠯᠵᠡᠢᠲᠦ ᠪᠤᠶᠠᠨᠲᠤ ᠬᠡᠪᠲᠡᠭᠦᠯ ᠮᠢᠨᠢ! ᠬᠠᠯᠢᠬᠤ ᠤᠰᠤᠨ ᠪᠣᠷᠣᠭᠠᠨ ᠳ᠋ᠤ᠌ ᠬᠠᠭᠠᠷᠢᠬᠤ ᠬᠦᠢᠲᠡᠨ ᠵᠢᠪᠠᠷ ᠲᠤ᠌ ᠬᠠᠨᠠ ᠲᠠᠢ ᠭᠡᠷ ᠢ᠋ ᠮᠢᠨᠢ ᠬᠠᠷᠠᠭᠠᠯᠵᠠᠨ ᠪᠠᠢᠵᠤ ᠬᠠᠯᠠᠭᠤᠨ ᠠᠮᠢ ᠶ᠋ᠢ ᠮᠢᠨᠢ ᠬᠠᠮᠠᠭᠠᠯᠠᠨ ᠮᠠᠨᠠᠵᠤ ᠬᠠᠭᠠᠨ ᠰᠠᠭᠤᠷᠢᠨ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠬᠠᠢᠷᠠ ᠢᠪᠡᠭᠡᠯᠲᠦ ᠬᠡᠪᠲᠡᠭᠦᠯ ᠮᠢᠨᠢ! ᠥᠷᠢᠰᠬᠦ ᠳᠠᠢᠰᠤᠨ ᠤ᠋ ᠮᠥᠷ ᠡᠴᠡ ᠥᠰᠢᠬᠦ ᠬᠣᠣᠷᠲᠠᠨ ᠤ᠋ ᠭᠠᠷ ᠠ᠋ᠴᠠ ᠥᠷᠯᠥᠭᠡ ᠦᠳᠡᠰᠢ ᠢᠯᠭᠠᠯ ᠦᠭᠡᠢ ᠡᠷᠦᠬᠡ ᠭᠡᠷ ᠢ᠋ ᠮᠢᠨᠢ ᠬᠠᠮᠠᠭᠠᠯᠠᠵᠤ᠂ ᠥᠪᠡᠷ ᠦ᠋ᠨ ᠨᠢᠳᠦ ᠶ᠋ᠢ ᠴᠠᠪᠴᠢᠯ ᠦᠭᠡᠢ ᠥᠪᠴᠢ ᠪᠡᠶᠡ ᠶ᠋ᠢ ᠮᠢᠨᠢ ᠠᠷᠠᠴᠢᠯᠠᠭᠰᠠᠨ ᠥᠨᠢ ᠶ᠋ᠢᠨ ᠢᠲᠡᠭᠡᠯᠲᠦ ᠬᠡᠪᠲᠡᠭᠦᠯ ᠮᠢᠨᠢ! ᠬᠣᠯᠲᠣᠰᠣᠨ ᠬᠣᠷᠮᠣᠰᠬᠠ ᠶ᠋ᠢᠨ ᠬᠣᠷᠳ᠋ ᠭᠡᠬᠦ ᠴᠢᠮᠡᠭᠡᠨ ᠡᠴᠡ ᠬᠣᠴᠣᠷᠤᠯ ᠦᠭᠡᠢ ᠢᠷᠡᠭᠴᠢ ᠬᠣᠲᠠᠯᠠ ᠶ᠋ᠢᠨ ᠰᠠᠢᠬᠠᠨ ᠬᠡᠪᠲᠡᠭᠦᠯ ᠮᠢᠨᠢ! ᠰᠢᠨᠡᠭᠰᠡᠨ ᠨᠤᠮᠤ ᠶ᠋ᠢᠨ ᠰᠢᠷᠳ᠋ ᠭᠡᠬᠦ ᠴᠢᠮᠡᠭᠡᠨ ᠡᠴᠡ ᠰᠢᠯᠵᠢᠷᠠᠯ ᠦᠭᠡᠢ ᠢᠷᠡᠭᠴᠢ ᠰᠢᠭᠰᠢᠮᠡᠯ ᠰᠠᠢᠨ ᠬᠡᠪᠲᠡᠭᠦᠯ ᠮᠢᠨᠢ! ᠥᠨᠢ ᠬᠡᠳᠦᠢᠨᠡᠢ ᠥᠯᠵᠡᠢᠲᠦ ᠬᠡᠪᠲᠡᠭᠦᠯ ᠢ᠋ ᠮᠢᠨᠢ ᠡᠪᠦᠭᠡᠨ ᠬᠡᠪᠲᠡᠭᠦᠯ ᠭᠡᠭᠲᠦᠨ᠃ ᠢᠲᠡᠭᠡᠯᠲᠦ ᠥᠭᠡᠯᠡᠨ ᠴᠡᠷᠪᠢ ᠶ᠋ᠢᠨ ᠢᠪᠡᠭᠡᠯᠲᠦ ᠳᠠᠯᠠᠨ ᠲᠣᠷᠬᠠᠭ ᠤ᠋ᠳ ᠢ᠋ ᠶᠡᠬᠡ ᠲᠣᠷᠬᠠᠭ ᠤ᠋ᠳ ᠭᠡᠭᠲᠦᠨ᠃ ᠠᠷᠬᠠᠢ ᠬᠠᠰᠠᠷ ᠤ᠋ᠨ ᠬᠠᠷᠢᠶᠠᠲᠤ ᠠᠴᠢᠲᠤ ᠰᠢᠯᠢᠳᠡᠭ ᠪᠠᠭᠠᠲᠤᠷ ᠤ᠋ᠳ ᠢ᠋ ᠠᠬᠠᠮᠠᠳ ᠪᠠᠭᠠᠲᠤᠷ ᠤ᠋ᠳ ᠭᠡᠭᠲᠦᠨ᠃ ᠶᠢᠰᠦᠨ ᠲᠡᠭᠡ ᠪᠥᠬᠡᠲᠡᠢ ᠶ᠋ᠢᠨ ᠬᠠᠷᠢᠶᠠᠲᠤ ᠢᠷᠦᠭᠡᠯᠲᠦ ᠬᠠᠭᠤᠴᠢᠨ ᠬᠣᠷᠴᠢᠨ ᠢ᠋ ᠶᠡᠷᠦᠩᠬᠡᠢ ᠬᠣᠷᠴᠢᠨ ᠭᠡᠭᠲᠦᠨ》ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
231᠂ 《ᠶᠡᠷᠡᠨ ᠲᠠᠪᠤᠨ ᠮᠢᠩᠭ᠋ᠠᠳᠣ ᠠ᠋ᠴᠠ ᠮᠢᠨᠦ ᠪᠡᠶᠡ ᠶ᠋ᠢᠨ ᠰᠢᠳᠠᠷ ᠥᠮᠴᠢ ᠪᠣᠯᠭᠠᠨ ᠢᠯᠡᠭᠡᠭᠰᠡᠨ ᠲᠦᠮᠡᠨ ᠬᠡᠰᠢᠭᠲᠡᠨ ᠢ᠋ ᠮᠢᠨᠦ ᠬᠣᠢᠨᠠ ᠶᠡᠬᠡ ᠰᠠᠭᠤᠷᠢ ᠶ᠋ᠢ ᠵᠠᠯᠭᠠᠮᠵᠢᠯᠠᠭᠰᠠᠨ ᠬᠥᠪᠡᠭᠦᠳ᠂ ᠤᠷᠤᠭ ᠤ᠋ᠨ ᠤᠷᠤᠭ ᠲᠤ᠌ ᠬᠦᠷᠲᠡᠯᠡ ᠮᠢᠨᠦ ᠭᠡᠷᠢᠶᠡᠰ ᠳᠤᠷᠠᠰᠬᠠᠯ ᠮᠡᠲᠦ ᠰᠡᠳᠬᠢᠵᠦ᠂ ᠠᠯᠢᠪᠠ ᠭᠠᠰᠠᠯᠠᠩ ᠳ᠋ᠤ᠌ ᠭᠥᠷᠦᠭᠦᠯᠦᠯᠡ ᠦᠭᠡᠢ ᠰᠠᠢᠲᠤᠷ ᠠᠰᠠᠷᠠᠭᠲᠤᠨ᠃ ᠡᠳᠡᠭᠡᠷ ᠲᠦᠮᠡᠨ ᠬᠡᠰᠢᠭᠲᠡᠨ ᠢ᠋ ᠮᠢᠨᠦ ᠡᠷᠬᠢᠮᠰᠦᠭ ᠬᠡᠰᠢᠭᠲᠡᠨ ᠭᠡᠵᠦ ᠡᠷᠭᠦᠮᠵᠢᠯᠡᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠤᠤ?》 ᠭᠡᠪᠡ᠃
232᠂ ᠪᠠᠰᠠ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠣᠷᠳᠣᠨ ᠤ᠋ ᠴᠡᠷᠪᠢ ᠶ᠋ᠢᠨ ᠥᠬᠢᠳ᠂ ᠭᠡᠷ ᠦ᠋ᠨ ᠬᠥᠮᠦᠰ᠂ ᠲᠡᠮᠡᠭᠡᠴᠢᠨ ᠦᠬᠡᠷᠴᠢᠨ ᠨᠠᠷ ᠢ᠋ ᠬᠡᠪᠲᠡᠭᠦᠯ ᠡᠷᠬᠢᠯᠡᠨ ᠮᠡᠳᠡᠵᠦ᠂ ᠣᠷᠳᠣᠨ ᠤ᠋ ᠭᠡᠷ ᠲᠡᠷᠭᠡ ᠶ᠋ᠢ ᠪᠠᠰᠠ ᠮᠡᠳᠡᠲᠦᠭᠡᠢ᠃ ᠲᠤᠭ᠂ ᠬᠡᠩᠭᠡᠷᠭᠡ᠂ ᠳᠥᠷᠥᠭᠡ᠂ ᠵᠢᠳᠠ ᠶ᠋ᠢ ᠬᠡᠪᠲᠡᠭᠦᠯ ᠳᠠᠷᠤᠭᠠᠯᠠᠲᠤᠭᠠᠢ᠃ ᠠᠶᠠᠭᠠ ᠰᠠᠪᠠ ᠶ᠋ᠢ ᠮᠥᠨ ᠬᠡᠪᠲᠡᠭᠦᠯ ᠡᠷᠬᠢᠯᠡᠲᠦᠭᠡᠢ᠃ ᠪᠢᠳᠡᠨ ᠦ᠌ ᠤᠮᠳᠠ ᠢᠳᠡᠭᠡ ᠶ᠋ᠢ ᠬᠡᠪᠲᠡᠭᠦᠯ ᠳᠠᠷᠤᠭᠠᠯᠠᠲᠤᠭᠠᠢ᠃ ᠲᠠᠬᠢᠯᠭᠠ ᠶ᠋ᠢᠨ ᠮᠢᠬᠠ ᠢᠳᠡᠭᠡ ᠶ᠋ᠢ ᠬᠡᠪᠲᠡᠭᠦᠯ ᠳᠠᠷᠤᠭᠠᠯᠠᠵᠤ ᠪᠣᠯᠭᠣᠭᠠᠲᠤᠭᠠᠢ᠃ ᠤᠮᠳᠠ ᠢᠳᠡᠭᠡ ᠬᠤᠷ ᠬᠣᠮᠰᠠ ᠪᠣᠯᠪᠠᠯ ᠳᠠᠷᠤᠭᠠᠯᠠᠭᠰᠠᠨ ᠬᠡᠪᠲᠡᠭᠦᠯ ᠡᠴᠡ ᠱᠠᠭᠠᠷᠳᠠᠶᠠ》 ᠭᠡᠪᠡ᠃ 《ᠬᠣᠷᠴᠢᠨ ᠨᠠᠷ ᠤᠮᠳᠠ ᠢᠳᠡᠭᠡ ᠶ᠋ᠢ ᠲᠦᠭᠡᠭᠡᠬᠦ ᠳ᠋ᠡᠭᠡᠨ ᠳᠠᠷᠤᠭᠠᠯᠠᠭᠰᠠᠨ ᠬᠡᠪᠲᠡᠭᠦᠯ ᠦ᠋ᠨ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠡᠷ ᠲᠠᠷᠬᠠᠭᠠᠨ ᠥᠭᠴᠦ ᠦᠯᠦ ᠪᠣᠯᠤᠨᠠ᠃ ᠢᠳᠡᠭᠡ ᠶ᠋ᠢ ᠲᠦᠭᠡᠭᠡᠬᠦ ᠳ᠋ᠡᠭᠡᠨ ᠤᠷᠢᠳᠠᠪᠡᠷ ᠬᠡᠪᠲᠡᠭᠦᠯ ᠡᠴᠡ ᠡᠬᠢᠯᠡᠨ ᠲᠦᠭᠡᠭᠡᠲᠦᠭᠡᠢ》 ᠭᠡᠪᠡ᠃ 《ᠤᠷᠲᠤ ᠭᠡᠷ ᠲᠦ᠍ ᠣᠷᠣᠬᠤ ᠭᠠᠷᠬᠤ ᠶᠠᠭᠤᠮᠠ ᠶ᠋ᠢ ᠬᠡᠪᠲᠡᠭᠦᠯ ᠡᠷᠬᠢᠯᠡᠨ ᠮᠡᠳᠡᠲᠦᠭᠡᠢ᠃ ᠭᠡᠷ ᠦ᠋ᠨ ᠣᠢᠷᠠ ᠡᠭᠦᠳᠡᠨ ᠳ᠋ᠦ᠍ ᠬᠡᠪᠲᠡᠭᠦᠯ ᠦ᠋ᠨ ᠬᠠᠭᠠᠯᠭᠠᠴᠢᠨ ᠪᠠᠢᠲᠤᠭᠠᠢ᠃ ᠬᠡᠪᠲᠡᠭᠦᠯ ᠦ᠋ᠨ ᠬᠣᠶᠠᠷ ᠬᠥᠮᠦᠨ ᠳᠣᠲᠣᠭᠰᠢ ᠣᠷᠣᠵᠤ᠂ ᠶᠡᠬᠡ ᠰᠥᠩ ᠢ᠋ ᠲᠦᠰᠢᠵᠦ ᠪᠠᠢᠲᠤᠭᠠᠢ᠃ ᠬᠡᠪᠲᠡᠭᠦᠯ ᠡᠴᠡ ᠨᠤᠲᠤᠭ ᠡᠷᠢᠨ ᠦᠵᠡᠵᠦ ᠤᠷᠲᠤ ᠭᠡᠷ ᠢ᠋ ᠪᠠᠭᠤᠯᠭᠠᠲᠤᠭᠠᠢ》 ᠭᠡᠪᠡ᠃ 《ᠪᠢᠳᠡᠨ ᠢ᠋ ᠰᠢᠪᠠᠭᠤ ᠠᠪᠠᠯᠠᠬᠤ ᠳ᠋ᠤ᠌ ᠬᠡᠪᠲᠡᠭᠦᠯ ᠪᠢᠳᠡᠨ ᠲᠡᠢ ᠬᠠᠮᠲᠤ ᠰᠢᠪᠠᠭᠤ ᠠᠪᠠᠯᠠᠨ ᠶᠠᠪᠤᠲᠤᠭᠠᠢ᠃ ᠭᠡᠷ ᠲᠡᠷᠭᠡ ᠶ᠋ᠢᠨ ᠳᠡᠷᠭᠡᠳᠡ ᠵᠠᠷᠢᠮ ᠢ᠋ ᠨᠢ ᠴᠠᠭ ᠤ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠦᠯᠡᠳᠡᠭᠡᠲᠦᠭᠡᠢ》 ᠭᠡᠪᠡ᠃
233᠂ ᠪᠠᠰᠠ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠪᠢᠳᠡᠨ ᠦ᠌ ᠪᠡᠶᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠡᠰᠡ ᠮᠣᠷᠳᠠᠪᠠᠯ ᠬᠡᠪᠲᠡᠭᠦᠯ ᠪᠢᠳᠡᠨ ᠡᠴᠡ ᠠᠩᠭᠢᠳᠠ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠮᠣᠷᠳᠠᠵᠤ ᠦᠯᠦ ᠪᠣᠯᠤᠨᠠ》 ᠭᠡᠪᠡ᠃ 《ᠡᠨᠡ ᠵᠠᠷᠯᠢᠭ ᠢ᠋ ᠮᠡᠳᠡᠭᠰᠡᠭᠡᠷ ᠪᠠᠢᠭᠠᠳ ᠠᠲᠠᠭᠠᠷᠬᠠᠨ ᠵᠥᠷᠢᠴᠡᠵᠦ᠂ ᠬᠡᠪᠲᠡᠭᠦᠯ ᠢ᠋ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠮᠣᠷᠳᠠᠭᠤᠯᠪᠠᠯ ᠴᠡᠷᠢᠭ ᠦ᠋ᠨ ᠬᠡᠷᠡᠭ ᠢ᠋ ᠡᠷᠬᠢᠯᠡᠬᠦ ᠴᠡᠷᠪᠢ ᠶ᠋ᠢ ᠪᠤᠷᠤᠭᠤᠰᠢᠶᠠᠨ ᠰᠢᠳᠬᠡᠨᠡ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ 《ᠬᠡᠪᠲᠡᠭᠦᠯ ᠦ᠋ᠨ ᠴᠡᠷᠢᠭ ᠢ᠋ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠦᠯᠦ ᠮᠣᠷᠳᠠᠭᠤᠯᠬᠤ ᠰᠢᠯᠲᠠᠭᠠᠨ ᠢ᠋ ᠲᠠ ᠨᠠᠷ ᠠᠰᠠᠭᠤᠪᠠᠯ᠂ ᠬᠡᠪᠲᠡᠭᠦᠯ᠂ ᠮᠢᠨᠦ ᠠᠯᠲᠠᠨ ᠠᠮᠢ ᠶ᠋ᠢ ᠰᠠᠬᠢᠨᠠ᠃ ᠰᠢᠪᠠᠭᠤ᠂ ᠭᠥᠷᠥᠭᠡᠰᠦ ᠶ᠋ᠢ ᠠᠪᠠᠯᠠᠬᠤ ᠳ᠋ᠤ᠌ ᠬᠠᠮᠲᠤ ᠵᠣᠪᠠᠵᠤ ᠵᠦᠳᠡᠨᠡ᠃ ᠨᠡᠭᠦᠬᠦ ᠰᠠᠭᠤᠬᠤ ᠳ᠋ᠤ᠌ ᠤᠷᠲᠤ ᠶ᠋ᠢ ᠬᠠᠮᠠᠭᠠᠯᠠᠵᠤ᠂ ᠬᠥᠰᠬᠡ ᠲᠡᠷᠭᠡ ᠶ᠋ᠢ ᠬᠠᠷᠠᠭᠠᠯᠵᠠᠨᠠ᠃ ᠮᠢᠨᠦ ᠪᠡᠶᠡ ᠶ᠋ᠢ ᠰᠠᠬᠢᠵᠤ ᠬᠣᠨᠣᠬᠤ ᠬᠢᠯᠪᠠᠷ ᠤᠤ? ᠭᠡᠷ ᠲᠡᠷᠭᠡ᠂ ᠶᠡᠬᠡ ᠠᠭᠤᠷᠤᠭ ᠢ᠋ (ᠭᠣᠣᠯ ᠤᠷᠲᠤ) ᠨᠡᠭᠦᠬᠦ ᠳ᠋ᠦ᠍ ᠬᠠᠮᠠᠭᠠᠯᠠᠬᠤ ᠭᠡᠳᠡᠭ ᠬᠢᠯᠪᠠᠷ ᠤᠤ? ᠡᠢᠮᠦ ᠳᠠᠪᠬᠤᠷ ᠰᠠᠯᠪᠤᠷᠢ ᠶ᠋ᠢᠨ ᠠᠵᠢᠯ ᠲᠠᠢ ᠲᠤᠯᠠ ᠲᠡᠳᠡᠨ ᠢ᠋ ᠪᠢᠳᠡᠨ ᠡᠴᠡ ᠠᠩᠭᠢᠳᠠ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠦᠭᠡᠢ ᠭᠡᠰᠡᠨ ᠤᠴᠢᠷ ᠲᠡᠢᠮᠦ ᠪᠢᠵᠡ》 ᠭᠡᠵᠡᠢ᠃
234᠂ ᠪᠠᠰᠠ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠰᠢᠭᠢᠬᠤᠲᠤᠭ ᠤ᠋ᠨ ᠵᠠᠷᠭᠤ ᠰᠢᠳᠬᠡᠬᠦ ᠳ᠋ᠦ᠍ ᠬᠡᠪᠲᠡᠭᠦᠯ ᠡᠴᠡ ᠰᠣᠨᠣᠰᠣᠯᠴᠠᠨ ᠣᠷᠣᠯᠴᠠᠲᠤᠭᠠᠢ᠃ ᠬᠡᠪᠲᠡᠭᠦᠯ ᠡᠴᠡ ᠨᠤᠮᠤ᠂ ᠰᠠᠭᠠᠳᠠᠭ᠂ ᠬᠤᠶᠠᠭ᠂ ᠵᠡᠪᠡ ᠶ᠋ᠢ ᠬᠠᠳᠠᠭᠠᠯᠠᠬᠤ᠂ ᠲᠦᠭᠡᠭᠡᠬᠦ ᠠᠵᠢᠯ ᠢ᠋ ᠡᠷᠬᠢᠯᠡᠲᠦᠭᠡᠢ᠃ ᠠᠭᠲᠠ ᠮᠣᠷᠢᠳ ᠢ᠋ ᠠᠪᠴᠢᠷᠠᠵᠤ ᠠᠴᠢᠶᠠ ᠶᠠᠭᠤᠮᠠ ᠶ᠋ᠢ ᠠᠴᠢᠵᠤ ᠶᠠᠪᠤᠲᠤᠭᠠᠢ》 ᠭᠡᠪᠡ᠃ 《ᠬᠡᠪᠲᠡᠭᠦᠯ᠂ ᠴᠡᠷᠪᠢ ᠨᠠᠷ ᠤ᠋ᠨ ᠬᠠᠮᠲᠤ ᠡᠳ᠋ ᠠᠭᠣᠷᠰᠣᠨ ᠢ᠋ ᠲᠦᠭᠡᠭᠡᠵᠦ ᠪᠠᠢ᠌ᠭᠳᠣᠨ᠃ ᠬᠣᠷᠴᠢᠨ᠂ ᠲᠣᠷᠬᠠᠭ ᠤ᠋ᠳ ᠨᠠᠷ ᠨᠤᠲᠤᠭ ᠵᠢᠭᠠᠭᠠᠳ ᠨᠡᠭᠦᠬᠦ ᠳ᠋ᠦ᠍ ᠶᠢᠰᠦᠨ ᠲᠡᠭᠡ᠂ ᠪᠥᠬᠡᠲᠡᠢ ᠨᠠᠷ ᠤ᠋ᠨ ᠬᠣᠷᠴᠢᠨ᠂ᠠᠯᠴᠢᠲᠠᠢ᠂ ᠥᠭᠡᠯᠡᠨ᠂ ᠠᠬᠣᠳᠠᠢ ᠨᠠᠷ ᠤ᠋ᠨ ᠲᠣᠷᠬᠠᠭ ᠤ᠋ᠳ ᠣᠷᠳᠣᠨ ᠤ᠋ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠶᠠᠪᠤᠲᠤᠭᠠᠢ》 ᠭᠡᠪᠡ᠃ 《ᠪᠤᠬᠠ᠂ ᠲᠣᠳᠢ ᠴᠡᠷᠪᠢ᠂ ᠴᠠᠨᠠᠢ ᠨᠠᠷ ᠤ᠋ᠨ ᠲᠣᠷᠬᠠᠭ ᠤ᠋ᠳ ᠣᠷᠳᠣᠨ ᠤ᠋ ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠶᠠᠪᠤᠲᠤᠭᠠᠢ》 ᠭᠡᠪᠡ᠃ 《ᠠᠷᠬᠠᠢ ᠶ᠋ᠢᠨ ᠪᠠᠭᠠᠲᠤᠷ ᠤ᠋ᠳ ᠣᠷᠳᠣᠨ ᠤ᠋ ᠤᠷᠢᠳ ᠶᠠᠪᠤᠲᠤᠭᠠᠢ》 ᠭᠡᠪᠡ᠃ 《ᠬᠡᠪᠲᠡᠭᠦᠯ᠂ ᠤᠷᠲᠤ ᠭᠡᠷ᠂ ᠲᠡᠷᠭᠡ ᠶ᠋ᠢ ᠬᠠᠮᠠᠭᠠᠯᠠᠵᠤ ᠣᠷᠳᠣᠨ ᠤ᠋ ᠳᠡᠷᠭᠡᠳᠡ᠂ ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠶᠠᠪᠤᠲᠤᠭᠠᠢ》 ᠭᠡᠪᠡ᠃ 《ᠪᠦᠬᠦ ᠬᠡᠰᠢᠭᠲᠡᠨ᠂ ᠲᠣᠷᠬᠠᠭ ᠤ᠋ᠳ ᠪᠠ ᠣᠷᠳᠣᠨ ᠤ᠋ ᠣᠷᠴᠢᠮ ᠶᠠᠪᠤᠬᠤ᠂ ᠤᠷᠲᠤ ᠭᠡᠷ ᠦ᠋ᠨ ᠬᠥᠪᠡᠭᠦᠳ ᠠᠳᠤᠭᠤᠴᠢᠨ᠂ ᠬᠣᠨᠢᠴᠢᠨ᠂ ᠲᠡᠮᠡᠭᠡᠴᠢᠨ᠂ ᠦᠬᠡᠷᠴᠢᠨ ᠢ᠋ ᠣᠷᠳᠣᠨ ᠤ᠋ ᠳᠠᠷᠠᠭᠠ ᠠᠷᠤ ᠳ᠋ᠤ᠌ ᠶᠠᠪᠤᠬᠤ ᠲᠣᠳᠠᠢ ᠴᠢᠷᠪᠢ ᠵᠠᠬᠢᠷᠲᠤᠭᠠᠢ》 ᠭᠡᠵᠦ ᠲᠤᠰᠢᠶᠠᠪᠠ᠃ 《 ᠲᠣᠳᠢ ᠴᠡᠷᠪᠢ᠂ ᠬᠣᠲᠠᠯᠠ ᠣᠷᠳᠣᠨ ᠤ᠋ ᠬᠣᠢᠨᠠ ᠠ᠋ᠴᠠ ᠳᠠᠭᠠᠵᠤ᠂ ᠬᠣᠭ ᠢᠳᠡᠵᠦ᠂ ᠬᠣᠮᠣᠣᠯ ᠲᠡᠭᠦᠵᠦ ᠶᠠᠪᠤᠲᠤᠭᠠᠢ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
235᠂ ᠬᠤᠪᠢᠯᠠᠢ ᠨᠣᠶᠠᠨ ᠢ᠋ ᠬᠠᠷᠯᠣᠭ ᠤ᠋ᠳ ᠲᠤ᠌ ᠮᠣᠷᠳᠠᠭᠤᠯᠪᠠ᠃ ᠬᠠᠷᠯᠣᠭ ᠤ᠋ᠨ ᠠᠷᠰᠯᠠᠨ ᠬᠠᠨ᠂ ᠬᠤᠪᠢᠯᠠᠢ ᠳ᠋ᠤ᠌ ᠡᠶᠠᠰᠣᠨ ᠢᠷᠡᠭᠰᠡᠨ ᠳ᠋ᠦ᠍ ᠬᠤᠪᠢᠯᠠᠢ ᠨᠣᠶᠠᠨ᠂ ᠠᠷᠰᠯᠠᠨ ᠬᠠᠨ ᠢ᠋ ᠠᠪᠴᠢᠷᠠᠵᠤ᠂ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠠᠭᠤᠯᠵᠠᠭᠤᠯᠪᠠ᠃ ᠴᠢᠩᠭᠢᠰ ᠬᠠᠭᠠᠨ᠂ ᠠᠷᠰᠯᠠᠨ ᠢ᠋ ᠪᠠᠢᠯᠳᠤᠭᠰᠠᠨ ᠦᠭᠡᠢ ᠳᠠᠭᠠᠪᠠ ᠭᠡᠵᠦ ᠰᠠᠢᠰᠢᠶᠠᠨ ᠰᠣᠶᠣᠷᠬᠠᠵᠤ᠂ ᠥᠬᠢᠨ ᠢ᠋ᠶ᠋ᠡᠨ ᠦᠭᠶᠡ ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠬᠠᠷᠯᠣᠭ ᠤ᠋ᠳ ᠤ᠋ᠨ ᠠᠷᠰᠯᠠᠨ ᠳ᠋ᠤ᠌ ᠠᠯᠠᠭᠠ ᠪᠡᠬᠢ ᠶ᠋ᠢ ᠥᠭᠴᠦ ᠴᠢᠩᠭᠢᠰ ᠬᠠᠭᠠᠨ ᠰᠣᠶᠣᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄
ᠬᠠᠷᠠᠢᠬᠤ ᠳ᠋ᠤ᠌ ᠮᠢᠨᠢ ᠬᠥᠯ ᠪᠣᠯᠵᠤ ᠬᠠᠵᠠᠢᠬᠤ ᠳ᠋ᠤ᠌ ᠮᠢᠨᠢ ᠲᠦᠰᠢᠭ ᠪᠣᠯᠵᠤ ᠬᠠᠯᠲᠤᠷᠢᠬᠤ ᠳ᠋ᠤ᠌ ᠮᠢᠨᠢ ᠲᠠᠬᠠ ᠪᠣᠯᠵᠤ ᠬᠠᠯᠠᠮᠵᠢ ᠲᠤᠰᠠ ᠬᠦᠷᠭᠡᠬᠦ ᠪᠡᠨ ᠬᠠᠢᠷᠠᠲᠤ ᠠᠯᠠᠭᠠ ᠮᠢᠨᠢ ᠮᠡᠳᠡᠲᠦᠭᠡᠢ᠃ ᠡᠨᠡ ᠪᠡᠶᠡ ᠬᠡᠪᠡᠷᠡᠭ ᠪᠣᠯᠪᠠᠴᠤ ᠡᠷᠬᠢᠮ ᠨᠡᠷᠡ ᠮᠥᠩᠬᠡ ᠰᠢᠦ ᠂ ᠰᠠᠷᠠᠭᠤᠯ ᠤᠬᠠᠭᠠᠨ ᠠ᠋ᠴᠠ ᠢᠯᠡᠭᠦᠦ ᠰᠠᠢᠨ ᠨᠥᠬᠥᠷ ᠪᠠᠢᠳᠠᠭ ᠦᠭᠡᠢ ᠮᠤᠩᠬᠠᠭ ᠬᠢᠯᠢᠩ ᠡᠴᠡ ᠢᠯᠡᠭᠦᠦ ᠮᠠᠭᠤ ᠳᠠᠢᠰᠤᠨ ᠪᠠᠢᠳᠠᠭ ᠦᠭᠡᠢ᠃ ᠡᠷᠬᠢᠮ ᠢᠲᠡᠭᠡᠯ ᠣᠯᠠᠨ ᠪᠣᠯᠪᠠᠴᠤ ᠡᠨᠡ ᠪᠡᠶᠡ ᠪᠦᠭᠦᠳᠡ ᠡᠴᠡ ᠢᠲᠡᠭᠡᠯ ᠲᠡᠢ ᠬᠠᠢᠷᠠᠯᠠᠬᠤ ᠶᠠᠭᠤᠮᠠ ᠣᠯᠠᠨ ᠪᠣᠯᠪᠠᠴᠤ ᠬᠠᠯᠠᠭᠤᠨ ᠠᠮᠢ ᠬᠠᠮᠤᠭ ᠠ᠋ᠴᠠ ᠬᠠᠢᠷᠠᠯᠠᠯᠲᠠᠢ ᠬᠠᠲᠠᠭᠤᠵᠢᠵᠤ ᠶᠠᠪᠤᠪᠠᠯ ᠬᠠᠮᠤᠭ ᠲᠤ᠌ ᠬᠡᠷᠡᠭ ᠲᠡᠢ ᠠᠷᠢᠭᠤᠨ ᠶᠠᠪᠤᠪᠠᠯ ᠠᠰᠢᠭ ᠲᠤᠰᠠ ᠲᠠᠢ ᠭᠡᠵᠦ ᠰᠤᠷᠭᠠᠭᠰᠠᠨ ᠠᠵᠠᠢ᠃
236᠂ ᠰᠦᠪᠡᠬᠡᠳᠡᠢ ᠪᠠᠭᠠᠲᠤᠷ᠂ ᠲᠡᠮᠦᠷ ᠲᠡᠷᠭᠡ ᠲᠡᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠶᠠᠪᠤᠭᠠᠳ ᠮᠡᠷᠭᠢᠳ ᠦ᠋ᠨ ᠲᠣᠭᠳᠠᠬᠠ ᠶ᠋ᠢᠨ ᠬᠣᠳᠣ᠂ ᠴᠢᠯᠠᠭᠤᠨ ᠵᠡᠷᠭᠡ ᠬᠥᠪᠡᠭᠦᠳ ᠢ᠋ ᠨᠡᠬᠡᠨ ᠳᠣᠪᠲᠣᠯᠵᠤ᠂ ᠴᠦᠢ ᠮᠥᠷᠡᠨ ᠦ᠌ ᠲᠡᠨᠳᠡ ᠭᠦᠢᠴᠡᠵᠦ ᠰᠥᠨᠥᠭᠡᠭᠡᠳ ᠢᠷᠡᠪᠡ᠃
237᠂ ᠵᠡᠪᠡ ᠨᠢᠮᠡᠨ ᠦ᠌ ᠬᠦᠴᠥᠯᠥᠭ ᠬᠠᠭᠠᠨ ᠢ᠋ ᠨᠡᠬᠡᠵᠦ ᠰᠡᠷᠢᠭ ᠬᠤᠨ ᠭᠡᠳᠡᠭ ᠭᠠᠵᠠᠷ ᠭᠦᠢᠴᠡᠵᠦ ᠰᠥᠨᠥᠭᠡᠭᠡᠳ ᠢᠷᠡᠪᠡ᠃
238᠂ ᠤᠢᠭᠤᠷ ᠤ᠋ᠨ ᠢᠲᠦᠭᠦᠳ ᠬᠠᠨ᠂ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠠᠳᠬᠢᠷᠠᠭ ᠳᠡᠷᠪᠡᠢ ᠬᠣᠶᠠᠷ ᠡᠯᠴᠢ ᠶ᠋ᠢ ᠢᠯᠡᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠨᠢ᠄ 《ᠡᠭᠦᠯᠡ ᠠᠷᠢᠯᠵᠤ ᠭᠡᠭᠡᠨ ᠨᠠᠷᠠᠨ ᠲᠣᠳᠣᠷᠠᠭᠰᠠᠨ ᠮᠡᠲᠦ᠂ ᠮᠥᠰᠥ ᠬᠠᠢᠯᠵᠤ ᠲᠣᠩᠭ᠋ᠠᠯᠠᠭ ᠮᠥᠷᠡᠨ ᠤᠷᠤᠰᠤᠭᠰᠠᠨ ᠮᠡᠲᠦ᠂ ᠴᠢᠩᠭᠢᠰ ᠬᠠᠭᠠᠨ ᠰᠣᠶᠣᠷᠬᠠᠪᠠᠯ᠂ ᠠᠯᠲᠠᠨ ᠪᠦᠰᠡ ᠶ᠋ᠢᠨ ᠴᠢᠨᠢ ᠭᠣᠷᠭᠢ ᠠ᠋ᠴᠠ ᠪᠠᠷᠢᠵᠤ᠂ ᠠᠷᠢᠭᠤᠨ ᠳᠡᠪᠡᠯ ᠦ᠋ᠨ ᠴᠢᠨᠢ ᠦᠷᠦᠳᠡᠰᠦᠨ ᠡᠴᠡ ᠣᠯᠵᠤ᠂ ᠲᠠᠪᠤᠳᠤᠭᠠᠷ ᠬᠥᠪᠡᠭᠦᠨ ᠴᠢᠨᠢ ᠪᠣᠯᠵᠤ ᠬᠦᠴᠦ ᠥᠭᠭᠦᠶᠡ》 ᠭᠡᠵᠦ ᠥᠴᠢᠵᠦ ᠢᠯᠡᠭᠡᠵᠡᠢ᠃ ᠲᠡᠷᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠰᠣᠶᠣᠷᠬᠠᠵᠤ ᠬᠠᠷᠢᠭᠤ ᠬᠡᠯᠡᠵᠦ ᠢᠯᠡᠭᠡᠭᠰᠡᠨ ᠨᠢ᠄ 《ᠥᠬᠢᠨ ᠢ᠋ᠶ᠋ᠡᠨ ᠥᠭᠭᠦᠶᠡ᠃ ᠲᠠᠪᠤᠳᠤᠭᠠᠷ ᠬᠥᠪᠡᠭᠦᠨ ᠪᠣᠯᠲᠤᠭᠠᠢ᠃ ᠠᠯᠲᠠ ᠮᠥᠩᠭᠥ᠂ ᠰᠤᠪᠤᠳ᠂ ᠲᠠᠨᠠ᠂ ᠬᠣᠷᠭᠣᠢ ᠬᠡ ᠲᠡᠢ ᠣᠶᠣᠮᠠᠯ᠂ ᠲᠣᠷᠭᠠ ᠠᠭᠤᠷᠰᠤ ᠶ᠋ᠢ ᠠᠪᠴᠤ ᠢᠷᠡᠲᠦᠭᠡᠢ》 ᠭᠡᠵᠦ ᠢᠯᠡᠭᠡᠪᠡᠯ᠂ ᠢᠲᠦᠭᠦᠳ ᠰᠣᠶᠣᠷᠬᠠᠭᠳᠠᠪᠠ ᠭᠡᠵᠦ ᠪᠡᠶᠡᠰᠴᠦ᠂ ᠠᠯᠲᠠ᠂ ᠮᠥᠩᠭᠥ᠂ ᠰᠤᠪᠤᠳ᠂ ᠲᠠᠨᠠ᠂ ᠲᠣᠷᠭᠠ᠂ ᠬᠣᠷᠭᠣᠢ ᠵᠡᠷᠭᠡ ᠠᠭᠤᠷᠰᠤ ᠠᠪᠴᠤ ᠢᠷᠡᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠪᠠ᠃ ᠴᠢᠩᠭᠢᠰ ᠬᠠᠭᠠᠨ᠂ ᠢᠲᠦᠭᠦᠳ ᠢ᠋ ᠰᠣᠶᠣᠷᠬᠠᠵᠤ᠂ ᠠᠯ ᠠᠯᠳᠣᠨ ᠪᠡᠬᠢ ᠥᠬᠢᠨ ᠢ᠋ᠶ᠋ᠡᠨ ᠥᠭᠪᠡ᠃ ᠤᠢᠭᠤᠷ ᠤ᠋ᠨ ᠢᠲᠦᠭᠦᠳ ᠲᠦ᠍ ᠠᠯ ᠠᠯᠳᠣᠨ ᠪᠡᠬᠢ ᠶ᠋ᠢ ᠥᠭᠬᠦ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠰᠤᠷᠭᠠᠭᠰᠠᠨ ᠨᠢ᠄ 《ᠬᠠᠲᠤᠭᠲᠠᠢ ᠬᠥᠮᠦᠨ ᠳ᠋ᠦ᠍ ᠭᠤᠷᠪᠠᠨ ᠡᠷᠡ ᠪᠣᠢ᠃ ᠠᠩᠬᠠᠨ ᠤ᠋ ᠡᠷᠡ ᠨᠢ ᠠᠯᠲᠠᠨ ᠲᠥᠷᠥ᠂ ᠲᠡᠭᠦᠨ ᠦ᠌ ᠳᠠᠷᠠᠭᠠᠬᠢ ᠡᠷᠡ ᠨᠢ ᠠᠷᠢᠭᠤᠨ ᠨᠡᠷᠡ᠂ ᠲᠡᠭᠦᠨ ᠦ᠌ ᠳᠠᠷᠠᠭᠠᠬᠢ ᠡᠷᠡ ᠨᠢ ᠠᠪᠤᠭᠰᠠᠨ ᠡᠷᠡ ᠮᠥᠨ ᠪᠢᠯᠡ᠃ ᠠᠯᠲᠠᠨ ᠲᠥᠷᠥ ᠶ᠋ᠢ ᠬᠠᠲᠠᠭᠤᠵᠢᠵᠤ ᠳᠠᠭᠠᠪᠠᠯ ᠠᠷᠢᠭᠤᠨ ᠨᠡᠷᠡ ᠪᠡᠯᠡᠨ ᠪᠣᠯᠤᠨᠠ᠃ ᠠᠷᠢᠭᠤᠨ ᠨᠡᠷᠡ ᠶ᠋ᠢ ᠪᠡᠬᠢᠯᠡᠪᠡᠯ᠂ ᠠᠪᠤᠭᠰᠠᠨ ᠡᠷᠡ ᠠᠩᠭᠢᠳᠠ ᠦᠯᠦ ᠣᠳᠤᠨᠠ》 ᠭᠡᠵᠦ ᠵᠠᠷᠯᠢᠭ ᠪᠣᠯᠤᠭᠰᠠᠨ ᠠᠵᠠᠢ᠃
239᠂ ᠲᠠᠤᠯᠠᠢ ᠵᠢᠯ (1207 ᠣᠨ ᠳ᠋ᠤ᠌ )᠂ ᠵᠥᠴᠢ᠂ ᠪᠠᠷᠠᠭᠤᠨ ᠭᠠᠵᠠᠷ ᠤ᠋ᠨ ᠴᠡᠷᠢᠭ ᠢ᠋ ᠠᠪᠴᠤ ᠣᠢ ᠶ᠋ᠢᠨ ᠢᠷᠭᠡᠨ ᠢ᠋ ᠡᠵᠡᠯᠡᠬᠦ ᠪᠡᠷ ᠮᠣᠷᠳᠠᠬᠤ ᠳ᠋ᠤ᠌ ᠪᠤᠬᠠ ᠭᠠᠵᠠᠷᠴᠢᠯᠠᠵᠤ ᠶᠠᠪᠤᠪᠠ᠃ ᠣᠢᠷᠠᠳ ᠤ᠋ᠨ ᠬᠣᠳᠣᠭᠠ ᠪᠡᠬᠢ ᠲᠦᠮᠡᠨ ᠣᠢᠷᠠᠳ ᠢ᠋ᠶ᠋ᠠᠨ ᠠᠪᠴᠤ ᠳᠠᠭᠠᠷᠠ ᠢᠷᠡᠪᠡ᠃ ᠬᠣᠳᠣᠭᠠ ᠪᠡᠬᠢ ᠢᠷᠡᠭᠡᠳ ᠵᠥᠴᠢ ᠶ᠋ᠢ ᠭᠠᠵᠠᠷᠴᠢᠯᠠᠨ ᠲᠦᠮᠡᠨ ᠣᠢᠷᠠᠳ ᠤ᠋ᠨ ᠨᠤᠲᠤᠭ ᠢ᠋ᠶ᠋ᠠᠷ ᠶᠠᠪᠤᠵᠤ ᠰᠢᠭ᠌ᠰᠢᠳ (ᠭᠣᠣᠯ) ᠳ᠋ᠤ᠌ ᠬᠦᠷᠪᠡ᠃ ᠵᠥᠴᠢ᠂ ᠣᠢᠷᠠᠳ (ᠣᠢ ᠶ᠋ᠢᠨ ᠠᠷᠠᠳ)᠂ ᠪᠤᠷᠢᠶᠠᠳ᠂ ᠪᠠᠷᠠᠭᠤᠨ᠂ ᠣᠷᠰᠣᠳ ᠂ ᠬᠠᠪᠬᠠᠨᠠᠰ ᠂ ᠬᠠᠩᠬᠠᠰ ᠂ ᠲᠣᠪᠠᠰ ᠠᠢᠮᠠᠭ ᠢ᠋ ᠣᠷᠣᠭᠤᠯᠤᠭᠠᠳ ᠲᠦᠮᠡᠨ ᠬᠢᠷᠭᠢᠰ ᠦ᠋ᠨ ᠨᠤᠲᠤᠭ ᠲᠤ᠌ ᠬᠦᠷᠪᠡᠯ᠂ ᠬᠢᠷᠭᠢᠰ ᠦ᠋ᠨ ᠨᠣᠶᠠᠳ᠂ ᠶᠠᠳᠠᠢ ᠂ ᠢᠨᠠᠯ ᠂ ᠡᠡᠯᠳᠢᠬᠡᠷ᠂ ᠦᠷᠠᠪᠡᠭ᠌ ᠲᠢᠬᠢᠨ ᠨᠠᠷ ᠡᠯᠰᠡᠨ ᠣᠷᠣᠵᠤ ᠴᠠᠭᠠᠨ ᠱᠣᠩᠬᠣᠷ᠂ ᠴᠠᠭᠠᠨ ᠮᠣᠷᠢ᠂ ᠬᠠᠷᠠ ᠪᠤᠯᠠᠭᠠ ᠠᠪᠴᠢᠷᠠᠭᠠᠳ ᠵᠥᠴᠢ ᠲᠡᠢ ᠠᠭᠤᠯᠵᠠᠪᠠ᠃ ᠰᠢᠪᠡᠷ᠂ ᠬᠡᠰᠳᠢᠶᠢᠮ᠂ ᠪᠠᠢ᠌ᠳ᠂ ᠲᠣᠬᠠᠰ᠂ ᠲᠠᠩᠯᠢᠭ᠌᠂ ᠲᠦᠬᠡᠯᠡᠰ᠂ ᠳᠡᠰ᠂ ᠪᠢᠵᠢᠭᠡᠳ ᠵᠡᠷᠭᠡ ᠪᠠᠢ᠌ᠳ ᠠ᠋ᠴᠠ ᠨᠠᠰᠢᠬᠢ ᠣᠢ ᠶ᠋ᠢᠨ ᠢᠷᠭᠡᠨ ᠢ᠋ ᠡᠵᠡᠯᠡᠵᠦ ᠣᠷᠣᠭᠤᠯᠤᠭᠠᠳ ᠬᠢᠷᠭᠢᠰ ᠦ᠋ᠨ ᠲᠦᠮᠡᠨ ᠦ᠌ ᠨᠣᠶᠠᠳ᠂ ᠮᠢᠩᠭᠠᠨ ᠤ᠋ ᠨᠣᠶᠠᠳ ᠪᠠ ᠣᠢ ᠶ᠋ᠢᠨ ᠢᠷᠭᠡᠨ ᠦ᠌ ᠨᠣᠶᠠᠳ ᠢ᠋ ᠠᠪᠤᠭᠠᠳ ᠢᠷᠡᠭᠰᠡᠨ ᠳ᠋ᠦ᠍ ᠲᠡᠳᠡ᠂ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠴᠠᠭᠠᠨ ᠱᠣᠩᠬᠣᠷ ᠤ᠋ᠳ᠂ ᠴᠠᠭᠠᠨ ᠮᠣᠷᠢᠳ᠂ ᠬᠠᠷᠠ ᠪᠤᠯᠠᠭᠠᠨ ᠨᠤᠭᠤᠳ ᠢ᠋ᠶ᠋ᠠᠨ ᠪᠡᠯᠡᠭᠯᠡᠵᠦ ᠠᠭᠤᠯᠵᠠᠪᠠ᠃ ᠣᠢᠷᠠᠳ ᠤ᠋ᠨ ᠬᠣᠳᠣᠭᠠ ᠪᠡᠬᠢ ᠶ᠋ᠢ ᠤᠷᠢᠳᠠ ᠠ᠋ᠴᠠ ᠤᠭᠲᠤᠨ᠂ ᠲᠦᠮᠡᠨ ᠣᠢᠷᠠᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠡᠯᠰᠡᠵᠦ ᠢᠷᠡᠪᠡ ᠭᠡᠵᠦ ᠰᠣᠶᠣᠷᠬᠠᠵᠤ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠢᠨᠠᠯᠴᠢ ᠳ᠋ᠤ᠌ ᠴᠡᠴᠡᠢ᠌ᠬᠡᠨ ᠥᠬᠢᠨ ᠢ᠋ᠶ᠋ᠡᠨ ᠥᠭᠪᠡ᠃ ᠢᠨᠠᠯᠴᠢ ᠶ᠋ᠢᠨ ᠠᠬᠠ ᠲᠥᠷᠥᠯᠴᠢ ᠳ᠋ᠦ᠍ ᠵᠥᠴᠢ ᠶ᠋ᠢᠨ ᠥᠬᠢᠨ ᠣᠯᠣᠢ᠌ᠬᠠᠨ ᠢ᠋ ᠥᠭᠪᠡ᠃ ᠠᠯᠠᠭᠠ ᠪᠡᠬᠢ ᠥᠬᠢᠨ ᠢ᠋ ᠣᠩᠭ᠋ᠣᠳ ᠲᠤ᠌ ᠥᠭᠪᠡ᠃ ᠴᠢᠩᠭᠢᠰ ᠬᠠᠭᠠᠨ᠂ ᠵᠥᠴᠢ ᠶ᠋ᠢ ᠰᠣᠶᠣᠷᠬᠠᠵᠤ ᠥᠭᠦᠯᠡᠷᠦᠨ᠄ 《ᠬᠥᠪᠡᠭᠦᠳ ᠦ᠋ᠨ ᠮᠢᠨᠢ ᠠᠬᠠᠮᠠᠳ ᠴᠢ᠂ ᠭᠡᠷ ᠲᠦ᠍ ᠡᠴᠡ ᠠᠩᠬᠠ ᠭᠠᠷᠤᠭᠠᠳ ᠮᠥᠷ ᠰᠠᠢᠲᠠᠢ ᠶᠠᠪᠤᠵᠤ ᠬᠦᠷᠦᠭᠰᠡᠨ ᠭᠠᠵᠠᠷ ᠲᠤ᠌ ᠬᠥᠮᠦᠨ᠂ ᠮᠣᠷᠢ ᠶ᠋ᠢ ᠭᠠᠵᠠᠷᠳᠠᠵᠤ ᠵᠣᠪᠠᠭᠠᠭᠰᠠᠨ ᠦᠭᠡᠢ᠂ ᠥᠯᠵᠡᠢᠲᠦ ᠣᠢ ᠶ᠋ᠢᠨ ᠢᠷᠭᠡᠨ ᠢ᠋ ᠣᠷᠣᠭᠤᠯᠵᠤ ᠢᠷᠡᠪᠡ᠂ ᠴᠢ᠃ ᠡᠳᠡᠭᠡᠷ ᠢᠷᠭᠡᠨ ᠢ᠋ ᠴᠢᠮᠠ ᠳ᠋ᠤ᠌ ᠥᠭᠭᠦᠶᠡ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
240᠂ ᠪᠠᠰᠠ ᠪᠣᠷᠣᠬᠤᠯ ᠨᠣᠶᠠᠨ ᠢ᠋ ᠬᠣᠷᠢ ᠲᠦᠮᠡᠳ ᠢᠷᠭᠡᠨ ᠢ᠋ ᠡᠵᠡᠯᠡᠭᠦᠯᠬᠦ ᠪᠡᠷ ᠶᠠᠪᠤᠭᠤᠯᠪᠠ᠃ ᠬᠣᠷᠢ ᠲᠦᠮᠡᠳ ᠢᠷᠭᠡᠨ ᠦ᠌ ᠨᠣᠶᠠᠨ ᠳᠠᠢᠳᠤ ᠬᠣᠯ ᠰᠣᠬᠣᠷ ᠢ᠋ ᠦᠬᠦᠭᠰᠡᠨ ᠦ᠌ ᠬᠣᠢᠨᠠ ᠲᠡᠭᠦᠨ ᠦ᠌ ᠭᠡᠷᠭᠡᠢ ᠨᠢ ᠲᠠᠷᠭᠤᠨ ᠪᠣᠳᠣᠬᠤᠢ ᠬᠣᠷᠢ ᠲᠦᠮᠡᠳ ᠢ᠋ ᠵᠠᠬᠢᠷᠴᠤ ᠪᠠᠢᠵᠠᠢ᠃ ᠪᠣᠷᠣᠬᠤᠯ ᠨᠣᠶᠠᠨ᠂ ᠲᠡᠨᠳᠡ ᠣᠴᠢᠭᠠᠳ ᠭᠤᠷᠪᠠᠨ ᠬᠥᠮᠦᠨ ᠢ᠋ ᠳᠠᠭᠠᠭᠤᠯᠤᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠨ ᠦᠳᠡ ᠣᠷᠣᠢ ᠶ᠋ᠢ ᠣᠢᠯᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠣᠢ ᠶ᠋ᠢᠨ ᠳᠣᠲᠣᠷᠠ ᠨᠠᠷᠢᠨ ᠬᠠᠷᠭᠤᠢ ᠪᠠᠷ ᠶᠠᠪᠤᠵᠤ ᠪᠠᠢᠲᠠᠯᠠ ᠬᠣᠷᠢ ᠲᠦᠮᠡᠳ ᠦ᠋ᠨ ᠬᠠᠷᠠᠭᠤᠯ ᠤ᠋ᠨ ᠬᠥᠮᠦᠰ ᠲᠡᠳᠡᠨ ᠦ᠌ ᠠᠷᠤ ᠳ᠋ᠤ᠌ ᠭᠠᠷᠴᠤ ᠵᠠᠮ ᠪᠣᠭᠣᠭᠠᠳ ᠪᠣᠷᠣᠬᠤᠯ ᠨᠣᠶᠠᠨ ᠢ᠋ ᠪᠠᠷᠢᠵᠤ ᠠᠯᠠᠵᠠᠢ᠃ ᠪᠣᠷᠣᠬᠤᠯ ᠢ᠋ ᠬᠣᠷᠢ ᠲᠦᠮᠡᠳ ᠲᠦ᠍ ᠠᠯᠠᠭᠳᠠᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠮᠠᠰᠢ ᠬᠢᠯᠢᠩᠨᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠮᠣᠷᠢᠯᠠᠬᠤ ᠶ᠋ᠢ ᠵᠠᠪᠳᠤᠲᠠᠯᠠ᠂ ᠪᠣᠭᠣᠷᠴᠤ ᠮᠤᠬᠤᠯᠠᠢ ᠬᠣᠶᠠᠭᠤᠯᠠ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠢᠳᠬᠠᠵᠤ ᠪᠣᠯᠢᠭᠤᠯᠪᠠ᠃ ᠵᠢᠴᠢ ᠳᠥᠷᠪᠡᠳ ᠦ᠋ᠨ ᠲᠦᠷᠪᠡᠢ ᠲᠣᠭᠰᠢᠨ ᠳ᠋ᠤ᠌ ᠲᠤᠰᠢᠶᠠᠭᠰᠠᠨ ᠨᠢ᠄ 《ᠴᠡᠷᠢᠭ ᠢ᠋ ᠴᠢᠩᠭᠠ ᠵᠠᠬᠢᠷᠴᠤ ᠮᠥᠩᠬᠡ ᠲᠡᠭᠷᠢ ᠳ᠋ᠦ᠍ ᠵᠠᠯᠪᠠᠷᠢᠵᠤ᠂ ᠬᠣᠷᠢ ᠲᠦᠮᠡᠳ ᠢᠷᠭᠡᠨ ᠢ᠋ ᠡᠵᠡᠯᠡᠬᠦ ᠶ᠋ᠢ ᠤᠷᠤᠯᠳᠤᠭᠲᠤᠨ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠲᠦᠷᠪᠡᠢ᠂ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠭᠠᠳ ᠤᠷᠢᠳᠠ ᠴᠡᠷᠢᠭ ᠨᠢ ᠶᠠᠪᠤᠵᠤ᠂ ᠬᠠᠷᠠᠭᠤᠯ ᠤ᠋ᠨ ᠰᠠᠬᠢᠭᠰᠠᠨ ᠵᠠᠮ ᠰᠦᠪᠡ ᠪᠡᠷ ᠴᠥᠭᠡᠨ ᠴᠡᠷᠢᠭ ᠢ᠋ ᠶᠠᠪᠤᠭᠤᠯᠵᠤ ᠰᠦᠷ ᠦᠵᠡᠭᠦᠯᠵᠦ ᠮᠡᠬᠡᠯᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠣᠯᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠤᠯᠠᠭᠠᠨ ᠪᠤᠬᠠ ᠶ᠋ᠢᠨ ᠬᠠᠷᠭᠤᠢ ᠪᠠᠷ ᠤᠷᠤᠭᠰᠢ ᠲᠠᠪᠰᠢᠪᠠ᠃ ᠴᠡᠷᠢᠭ ᠦ᠋ᠨ ᠠᠯᠢᠪᠠ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠰᠢᠨᠲᠠᠷᠠᠪᠠᠯ ᠵᠠᠨᠴᠢᠬᠤ ᠶ᠋ᠢᠨ ᠲᠤᠯᠠᠳᠠ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠠᠷᠪᠠᠨ ᠰᠠᠪᠠᠭᠠ ᠡᠭᠦᠷᠦᠭᠦᠯᠵᠦ᠂ ᠡᠷᠡ ᠪᠦᠷᠢ ᠳ᠋ᠦ᠍ ᠰᠦᠬᠡ᠂ ᠣᠭᠣᠯᠢ᠂ ᠬᠢᠷᠥᠭᠡ᠂ ᠴᠦᠴᠡ ᠪᠡᠷ ᠵᠡᠪᠰᠡᠭᠯᠡᠭᠦᠯᠦᠭᠡᠳ ᠤᠯᠠᠭᠠᠨ ᠪᠤᠬᠠ ᠶ᠋ᠢᠨ ᠶᠠᠪᠤᠭᠰᠠᠨ ᠮᠥᠷ ᠢ᠋ᠶ᠋ᠡᠷ ᠤᠷᠤᠭᠰᠢ ᠳᠠᠪᠰᠢᠵᠤ᠂ ᠮᠥᠷ ᠲᠦ᠍ ᠲᠣᠬᠢᠶᠠᠯᠳᠤᠭᠰᠠᠨ ᠮᠣᠳᠣ ᠶ᠋ᠢ ᠣᠭᠲᠣᠴᠢᠨ ᠴᠠᠪᠴᠢᠭᠤᠯᠵᠤ᠂ ᠬᠢᠷᠥᠬᠡᠲᠦᠬᠥᠯᠵᠦ ᠵᠠᠮ ᠢ᠋ ᠴᠡᠪᠡᠷᠯᠡᠭᠡᠳ᠂ ᠠᠭᠤᠯᠠᠨ ᠳᠡᠭᠡᠷᠡ ᠭᠠᠷᠤᠭᠠᠳ᠂ ᠬᠤᠷᠢᠮᠯᠠᠨ ᠰᠠᠭᠤᠭᠠ ᠲᠦᠮᠡᠳ ᠢᠷᠭᠡᠨ ᠦ᠌ ᠣᠷᠣᠢ ᠳᠡᠭᠡᠷᠡ ᠡᠴᠡ ᠳᠣᠪᠲᠣᠯᠤᠨ ᠣᠷᠣᠪᠠ᠃
241᠂ ᠤᠷᠢᠳᠠ ᠬᠣᠷᠴᠢ ᠨᠣᠶᠠᠨ᠂ ᠬᠣᠳᠣᠭᠠ ᠪᠡᠬᠢ ᠬᠣᠶᠠᠷ ᠬᠣᠷᠢ ᠲᠦᠮᠡᠳ ᠲᠦ᠍ ᠪᠠᠷᠢᠭᠳᠠᠭᠠᠳ ᠲᠠᠷᠭᠤᠨ ᠪᠣᠳᠣᠬᠤᠢ ᠶ᠋ᠢᠨ ᠲᠡᠨᠳᠡ ᠪᠠᠢᠭᠰᠠᠨ ᠠᠵᠢ᠃ ᠬᠣᠷᠴᠢ ᠶ᠋ᠢᠨ ᠪᠠᠷᠢᠭᠳᠠᠭᠰᠠᠨ ᠤᠴᠢᠷ ᠨᠢ᠄ ᠬᠣᠷᠢ ᠲᠦᠮᠡᠳ ᠡᠴᠡ ᠭᠤᠸᠠ ᠰᠠᠢᠬᠠᠨ ᠬᠡᠦᠬᠡᠨ ᠭᠤᠴᠢ ᠶ᠋ᠢ ᠰᠢᠯᠢᠵᠦ ᠠᠪ ᠭᠡᠰᠡᠨ ᠵᠠᠷᠯᠢᠭ ᠪᠣᠯᠤᠭᠰᠠᠨ ᠳ᠋ᠤ᠌ ᠬᠣᠷᠴᠢ ᠨᠣᠶᠠᠨ᠂ ᠬᠣᠷᠢ ᠲᠦᠮᠡᠳ ᠡᠴᠡ ᠬᠡᠦᠬᠡᠨ ᠨᠦ᠍ᠭᠦᠳ ᠢ᠋ ᠠᠪᠬᠤ ᠭᠡᠵᠦ ᠣᠴᠢᠲᠠᠯᠠ᠂ ᠤᠷᠢᠳᠠ ᠳᠠᠭᠠᠭᠰᠠᠨ ᠬᠣᠷᠢ ᠲᠦᠮᠡᠳ ᠳᠠᠬᠢᠨ ᠳᠠᠢᠰᠤᠨ ᠪᠣᠯᠵᠤ ᠬᠣᠷᠴᠢ ᠨᠣᠶᠠᠨ ᠢ᠋ ᠪᠠᠷᠢᠵᠤ ᠠᠪᠴᠠᠢ᠃ ᠬᠣᠷᠴᠢ ᠶ᠋ᠢ ᠲᠦᠮᠡᠳ ᠲᠦ᠍ ᠪᠠᠷᠢᠭᠳᠠᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠣᠢ ᠶ᠋ᠢᠨ ᠢᠷᠭᠡᠨ ᠦ᠌ ᠪᠠᠢᠳᠠᠯ ᠢ᠋ ᠮᠡᠳᠡᠬᠦ ᠬᠥᠮᠦᠨ ᠭᠡᠵᠦ ᠬᠣᠳᠣᠭᠠ ᠪᠡᠬᠢ ᠶ᠋ᠢ ᠢᠯᠡᠭᠡᠪᠡᠯ᠂ ᠬᠣᠳᠣᠭᠠ ᠪᠡᠬᠢ ᠪᠠᠰᠠ ᠪᠠᠷᠢᠭᠳᠠᠵᠠᠢ᠃ ᠬᠣᠷᠢ ᠲᠦᠮᠡᠳ ᠢ᠋ ᠡᠵᠡᠯᠡᠵᠦ ᠳᠠᠭᠤᠰᠤᠭᠠᠳ ᠪᠣᠷᠣᠬᠤᠯ ᠤ᠋ᠨ ᠬᠡᠭᠦᠷ ᠶᠠᠰᠤ ᠶ᠋ᠢᠨ ᠲᠤᠯᠠ ᠵᠠᠭᠤᠨ ᠲᠦᠮᠡᠳ ᠢ᠋ ᠲᠡᠭᠦᠨ ᠦ᠌ ᠭᠡᠷ ᠪᠦᠯᠢ ᠳ᠋ᠦ᠍ ᠥᠭᠪᠡ᠃ ᠬᠣᠷᠴᠢ ᠳ᠋ᠤ᠌ ᠭᠤᠴᠢᠨ ᠥᠬᠢᠨ ᠢ᠋ ᠥᠭᠪᠡ᠃ ᠲᠠᠷᠭᠤᠨ ᠪᠣᠳᠣᠬᠤᠢ ᠬᠠᠲᠤᠨ ᠢ᠋ ᠬᠣᠳᠣᠭᠠ ᠪᠡᠬᠢ ᠳ᠋ᠦ᠍ ᠥᠭᠪᠡ᠃
242᠂ ᠴᠢᠩᠭᠢᠰ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠵᠤ᠂ ᠡᠬᠡ᠂ ᠬᠥᠪᠡᠭᠦᠳ᠂ ᠳᠡᠭᠦᠦ ᠨᠠᠷ ᠲᠠᠭᠠᠨ ᠢᠷᠭᠡᠨ ᠢ᠋ ᠬᠤᠪᠢᠶᠠᠵᠤ ᠦᠭᠭᠰᠡᠨ ᠨᠢ᠄ 《ᠤᠯᠤᠰ ᠢ᠋ ᠬᠤᠷᠢᠶᠠᠬᠤ ᠳ᠋ᠤ᠌ ᠵᠣᠪᠠᠵᠤ ᠵᠦᠳᠡᠭᠰᠡᠨ ᠡᠬᠡ ᠮᠢᠨᠢ ᠪᠢᠵᠡ᠃ ᠬᠥᠪᠡᠭᠦᠳ ᠦ᠋ᠨ ᠮᠢᠨᠢ ᠠᠬᠠ ᠵᠥᠴᠢ ᠪᠢᠵᠡ᠃ ᠳᠡᠭᠦᠦ ᠨᠠᠷ ᠤ᠋ᠨ ᠮᠢᠨᠢ ᠪᠠᠭᠠ ᠤᠳᠴᠢᠬᠢᠨ ᠪᠢᠵᠡ》 ᠭᠡᠳ ᠡᠬᠡ ᠤᠳᠴᠢᠬᠢᠨ ᠬᠣᠶᠠᠷ ᠲᠤ᠌ ᠨᠢᠭᠡᠨ ᠲᠦᠮᠡᠨ ᠢᠷᠭᠡᠨ ᠢ᠋ ᠥᠭᠪᠡᠯ ᠡᠬᠡ ᠴᠢᠮᠠᠯᠠᠵᠤ ᠡᠰᠡ ᠳᠤᠤᠭᠠᠷᠪᠠ᠃ ᠵᠥᠴᠢ ᠳ᠋ᠦ᠍ ᠶᠢᠰᠦᠨ ᠮᠢᠩᠭᠠᠨ ᠢᠷᠭᠡᠨ ᠢ᠋ ᠥᠭᠪᠡ᠃ ᠴᠠᠭᠠᠲᠠᠢ ᠳ᠋ᠤ᠌ ᠨᠢᠮᠡᠨ ᠮᠢᠩᠭᠠᠨ ᠢᠷᠭᠡᠨ ᠢ᠋ ᠥᠭᠪᠡ᠃ ᠥᠭᠡᠳᠡᠢ ᠳ᠋ᠦ᠍ ᠲᠠᠪᠤᠨ ᠮᠢᠩᠭᠠᠨ ᠢᠷᠭᠡᠨ ᠢ᠋ ᠥᠭᠪᠡ᠃ ᠲᠤᠯᠤᠢ ᠳ᠋ᠤ᠌ ᠲᠠᠪᠤᠨ ᠮᠢᠩᠭᠠᠨ ᠢᠷᠭᠡᠨ ᠢ᠋ ᠥᠭᠪᠡ᠃ ᠬᠠᠰᠠᠷ ᠲᠤ᠌ ᠳᠥᠷᠪᠡᠨ ᠮᠢᠩᠭᠠᠨ ᠢᠷᠭᠡᠨ ᠢ᠋ ᠥᠭᠪᠡ᠃ ᠠᠯᠴᠢᠳᠠᠢ ᠳ᠋ᠤ᠌ ᠬᠣᠶᠠᠷ ᠮᠢᠩᠭᠠᠨ ᠢᠷᠭᠡᠨ ᠢ᠋ ᠥᠭᠪᠡ᠃ ᠪᠡᠯᠭᠦᠳᠡᠢ ᠳ᠋ᠦ᠍ ᠨᠢᠭᠡ ᠮᠢᠩᠭᠠ ᠲᠠᠪᠤᠨ ᠵᠠᠭᠤᠨ ᠢᠷᠭᠡᠨ ᠢ᠋ ᠥᠭᠪᠡ᠃ ᠠᠪᠠᠭᠠ ᠳᠠᠭᠠᠷᠢᠲᠠᠢ ᠶ᠋ᠢ ᠬᠡᠷᠡᠢᠳ ᠲᠡᠢ ᠨᠡᠢᠯᠡᠵᠦ ᠶᠠᠪᠤᠭᠰᠠᠨ ᠭᠡᠵᠦ 《ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠣᠯᠭᠠᠶᠠ》 ᠭᠡᠪᠡᠯ᠂ ᠪᠣᠭᠣᠷᠴᠤ ᠮᠤᠬᠤᠯᠠᠢ ᠰᠢᠭᠢᠬᠤᠲᠤᠭ ᠭᠤᠷᠪᠠᠭᠤᠯᠠ ᠥᠭᠦᠯᠡᠷᠦᠨ᠄ 《ᠥᠪᠡᠷ ᠦ᠋ᠨ ᠭᠣᠯᠣᠮᠲᠠ ᠶ᠋ᠢ ᠰᠥᠨᠥᠭᠡᠬᠦ ᠮᠡᠲᠦ᠂ ᠥᠪᠡᠷ ᠦ᠋ᠨ ᠭᠡᠷ ᠢ᠋ ᠡᠪᠳᠡᠬᠦ ᠮᠡᠲᠦ ᠪᠣᠯᠬᠤ ᠪᠢᠰᠢᠦ᠃ ᠰᠠᠢᠨ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠭᠡᠷᠢᠶᠡᠰᠦ ᠪᠣᠯᠵᠤ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠠᠪᠠᠭᠠ ᠴᠢᠨᠢ ᠪᠢᠰᠢᠦ᠃ ᠲᠡᠭᠦᠨ ᠢ᠋ ᠦᠭᠡᠢ ᠬᠢᠵᠦ ᠶᠠᠭᠠᠬᠢᠵᠤ ᠪᠣᠯᠤᠨᠠ? ᠲᠡᠭᠦᠨ ᠦ᠌ ᠤᠬᠠᠵᠤ ᠮᠡᠳᠡᠭᠰᠡᠨ ᠦᠭᠡᠢ ᠶ᠋ᠢ ᠠᠭᠤᠴᠢᠯᠠᠲᠤᠭᠠᠢ᠃ ᠰᠠᠢᠨ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠪᠠᠭᠠ ᠶ᠋ᠢᠨ ᠨᠤᠲᠤᠭ ᠲᠤ᠌ ᠭᠣᠯᠣᠮᠲᠠ ᠳ᠋ᠤ᠌ ᠪᠠᠨ ᠤᠲᠤᠭᠠ ᠭᠠᠷᠭᠠᠵᠤ ᠶᠠᠪᠤᠭ》 ᠭᠡᠵᠦ ᠬᠠᠯᠠᠭᠤᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢᠳᠬᠠᠵᠤ ᠬᠠᠮᠠᠷ ᠠ᠋ᠴᠠ ᠪᠠᠨ ᠤᠲᠤᠭᠠ ᠭᠠᠷᠲᠠᠯᠠ ᠬᠡᠯᠡᠭᠰᠡᠨ ᠳ᠋ᠦ᠍᠄ 《ᠵᠠ ᠲᠡᠢᠮᠦ ᠪᠣᠯᠤᠭ》 ᠭᠡᠵᠦ ᠰᠠᠢᠨ ᠡᠴᠢᠭᠡ ᠪᠡᠨ ᠰᠠᠨᠠᠵᠤ᠂ ᠪᠣᠭᠣᠷᠴᠤ ᠮᠤᠬᠤᠯᠠᠢ ᠰᠢᠭᠢᠬᠤᠲᠤᠭ ᠭᠤᠷᠪᠠ ᠶ᠋ᠢᠨ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠠᠮᠣᠷᠢᠯᠠᠪᠠ᠃
243᠂ 《ᠪᠢ᠂ ᠡᠬᠡ ᠤᠳᠴᠢᠬᠢᠨ ᠬᠣᠶᠠᠷ ᠲᠤ᠌ ᠲᠦᠮᠡᠨ ᠢᠷᠭᠡᠨ ᠢ᠋ ᠥᠭᠭᠡᠳ᠂ ᠬᠦᠴᠦ᠂ ᠬᠥᠭᠡᠴᠦ᠂ ᠵᠤᠩᠰᠠᠢ ᠂ ᠬᠣᠷᠭᠣᠰᠤᠨ ᠳᠥᠷᠪᠡᠨ ᠨᠣᠶᠠᠳ ᠢ᠋ ᠲᠤᠰᠢᠶᠠᠵᠤ ᠥᠭᠪᠡ᠃ ᠵᠥᠴᠢ ᠳ᠋ᠦ᠍᠂ ᠬᠤᠨᠠᠨ᠂ ᠮᠦᠩᠬᠡᠬᠥᠷ᠂ ᠬᠡᠲᠡ ᠭᠤᠷᠪᠠ ᠶ᠋ᠢ ᠲᠤᠰᠢᠶᠠᠵᠤ ᠥᠭᠪᠡ᠃ ᠴᠠᠭᠠᠲᠠᠢ ᠳ᠋ᠤ᠌᠂ ᠬᠠᠷᠠᠴᠠᠷ᠂ ᠮᠥᠩᠬᠡ᠂ ᠢᠳᠣᠬᠣᠳᠠᠢ ᠭᠤᠷᠪᠠ ᠶ᠋ᠢ ᠲᠤᠰᠢᠶᠠᠵᠤ ᠥᠭᠪᠡ》᠃ ᠪᠠᠰᠠ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠴᠠᠭᠠᠲᠠᠢ ᠬᠡᠴᠡᠭᠦᠦ ᠳᠣᠭᠰᠢᠨ ᠠᠪᠤᠷᠢ ᠲᠠᠢ ᠲᠤᠯᠠ ᠬᠦᠬᠡᠴᠥᠰ ᠥᠷᠯᠥᠭᠡ ᠦᠳᠡᠰᠢ ᠳᠡᠷᠭᠡᠳᠡ ᠨᠢ ᠪᠠᠢᠵᠤ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ ᠵᠥᠪᠯᠡᠵᠦ ᠪᠠᠢᠲᠤᠭᠠᠢ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠥᠭᠡᠳᠡᠢ ᠳ᠋ᠦ᠍ ᠢᠯᠡᠭᠡ᠂ ᠳᠡᠭᠡᠢ ᠬᠣᠶᠠᠷ ᠢ᠋ ᠲᠤᠰᠢᠶᠠᠵᠤ ᠥᠭᠪᠡ᠃ ᠲᠤᠯᠤᠢ ᠳ᠋ᠤ᠌ ᠵᠠᠳᠠᠢ᠂ ᠪᠡᠯᠡ ᠬᠣᠶᠠᠷ ᠢ᠋ ᠲᠤᠰᠢᠶᠠᠵᠤ ᠥᠭᠪᠡ᠃ ᠬᠠᠰᠠᠷ ᠲᠤ᠌ ᠵᠠᠪᠬᠡ ᠶ᠋ᠢ ᠲᠤᠰᠢᠶᠠᠵᠤ ᠥᠭᠪᠡ᠃ ᠠᠯᠴᠢᠳᠠᠢ ᠳ᠋ᠤ᠌ ᠴᠠᠭᠤᠷᠬᠠᠢ ᠶ᠋ᠢ ᠲᠤᠰᠢᠶᠠᠵᠤ ᠥᠭᠪᠡ᠃
244᠂ ᠬᠣᠩᠬᠣᠳᠠᠢ ᠶ᠋ᠢᠨ ᠮᠠᠩᠬᠡᠯᠢᠭ᠌ ᠡᠴᠢᠭᠡ ᠶ᠋ᠢᠨ ᠬᠥᠪᠡᠭᠦᠳ ᠳᠣᠯᠣᠭᠠ ᠪᠢᠯᠡ᠃ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠦ᠌ ᠳᠤᠮᠳᠠᠬᠢ ᠨᠢ ᠬᠥᠭᠡᠴᠦ ᠳᠠᠪ ᠲᠡᠭᠷᠢ ᠪᠥᠬᠡ ᠪᠥᠯᠥᠭᠡ᠃ ᠲᠡᠷᠡ ᠬᠣᠩᠬᠣᠳᠠᠢ ᠶ᠋ᠢᠨ ᠳᠣᠯᠣᠭᠠᠨ ᠬᠥᠪᠡᠭᠦᠳ᠂ ᠬᠠᠰᠠᠷ ᠢ᠋ ᠪᠠᠷᠢᠭᠠᠳ ᠡᠯᠪᠡᠵᠦ ᠵᠠᠨᠴᠢᠵᠠᠢ᠃ ᠬᠠᠰᠠᠷ᠂ ᠳᠣᠯᠣᠭᠠᠨ ᠬᠣᠩᠬᠣᠳᠠᠢ ᠳ᠋ᠤ᠌ ᠵᠠᠨᠴᠢᠭᠳᠠᠪᠠ ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠰᠣᠨᠣᠰᠬᠠᠪᠠᠯ ᠴᠢᠩᠭᠢᠰ ᠬᠠᠭᠠᠨ ᠪᠤᠰᠤᠳ ᠬᠡᠷᠡᠭ ᠲᠦ᠍ ᠬᠢᠯᠢᠩᠨᠡᠵᠦ ᠪᠠᠢᠭᠰᠠᠨ ᠴᠠᠭ ᠲᠤᠯᠠ ᠬᠢᠯᠢᠩᠲᠡᠢ ᠪᠡᠷ ᠬᠠᠰᠠᠷ ᠲᠤ᠌ ᠥᠭᠦᠯᠡᠷᠦᠨ᠄ 《ᠠᠮᠢᠲᠠᠨ ᠳ᠋ᠤ᠌ ᠳᠡᠢᠯᠦᠭᠳᠡᠳᠡᠭ ᠦᠭᠡᠢ ᠬᠥᠮᠦᠨ ᠭᠡᠳᠡᠭ ᠪᠢᠰᠢ ᠪᠢᠯᠢᠤ᠂ ᠴᠢ? ᠶᠠᠭᠠᠬᠢᠭᠠᠳ ᠳᠡᠢᠯᠦᠭᠳᠡᠪᠡ?》 ᠭᠡᠪᠡᠯ ᠬᠠᠰᠠᠷ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠪᠣᠰᠤᠭᠠᠳ ᠭᠠᠷᠪᠠ᠃ ᠬᠠᠰᠠᠷ ᠭᠣᠮᠣᠳᠠᠵᠤ᠂ ᠭᠤᠷᠪᠠᠨ ᠡᠳᠦᠷ ᠢᠷᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠴᠠᠭ ᠲᠤ᠌ ᠳᠠᠪ ᠲᠡᠭᠷᠢ᠂ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠥᠭᠦᠯᠡᠷᠦᠨ᠄ 《ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠰᠠᠬᠢᠭᠤᠰᠤ᠂ ᠨᠢᠭᠡᠨ ᠤᠳᠠᠭᠠ ᠲᠡᠮᠦᠵᠢᠨ᠂ ᠤᠯᠤᠰ ᠤ᠋ᠨ ᠡᠷᠬᠡ ᠶ᠋ᠢ ᠪᠠᠷᠢᠨᠠ᠃ ᠨᠢᠭᠡᠨ ᠤᠳᠠᠭᠠ ᠬᠠᠰᠠᠷ᠂ ᠤᠯᠤᠰ ᠤ᠋ᠨ ᠡᠷᠬᠡ ᠶ᠋ᠢ ᠪᠠᠷᠢᠨᠠ ᠭᠡᠵᠦ ᠵᠦᠩ ᠮᠡᠳᠡᠭᠳᠡᠪᠡ᠃ ᠬᠠᠰᠠᠷ ᠠ᠋ᠴᠠ ᠡᠰᠡ ᠪᠣᠯᠭᠣᠮᠵᠢᠯᠠᠪᠠᠯ ᠶᠠᠭᠤ ᠪᠣᠯᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ》 ᠭᠡᠰᠡᠨ ᠳ᠋ᠦ᠍᠂ ᠴᠢᠩᠭᠢᠰ ᠬᠠᠭᠠᠨ ᠮᠥᠨ ᠰᠥᠨᠢ ᠮᠣᠷᠢᠯᠠᠵᠤ᠂ ᠬᠠᠰᠠᠷ ᠢ᠋ ᠪᠠᠷᠢᠬᠤ ᠪᠠᠷ ᠣᠲᠣᠪᠠᠯ᠂ ᠬᠦᠴᠦ ᠬᠥᠭᠡᠴᠦ ᠬᠣᠶᠠᠷ᠂ 《ᠬᠠᠰᠠᠷ ᠢ᠋ ᠪᠠᠷᠢᠬᠤ ᠪᠠᠷ ᠤᠲᠤᠪᠠ》 ᠭᠡᠵᠦ ᠥᠭᠡᠯᠦᠨ ᠡᠬᠡ ᠳ᠋ᠦ᠍ ᠮᠡᠳᠡᠭᠡᠯᠡᠪᠡ᠃ ᠥᠭᠡᠯᠦᠨ ᠡᠬᠡ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠴᠠᠭᠠᠨ ᠲᠡᠮᠡᠭᠡ ᠬᠥᠯᠯᠡᠭᠡᠳ ᠰᠥᠨᠢ ᠲᠤᠷᠰᠢ ᠶᠠᠪᠤᠵᠤ᠂ ᠨᠠᠷᠠᠨ ᠤᠷᠭᠤᠬᠤ ᠦᠶᠡ ᠪᠡᠷ ᠬᠦᠷᠴᠦ ᠢᠷᠡᠪᠡᠯ᠂ ᠴᠢᠩᠭᠢᠰ ᠬᠠᠭᠠᠨ᠂ ᠬᠠᠰᠠᠷ ᠤ᠋ᠨ ᠬᠠᠨᠴᠤᠢ ᠶ᠋ᠢ ᠤᠶᠠᠵᠤ᠂ ᠮᠠᠯᠠᠭᠠᠢ ᠪᠦᠰᠡ ᠶ᠋ᠢ ᠨᠢ ᠠᠪᠤᠭᠠᠳ ᠪᠠᠢᠴᠠᠭᠠᠨ ᠠᠰᠠᠭᠤᠵᠤ ᠪᠠᠢᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠡᠬᠡ ᠪᠡᠨ ᠦᠵᠡᠭᠡᠳ ᠡᠮᠢᠶᠡᠨ ᠵᠠᠢᠯᠠᠪᠠ᠃ ᠥᠭᠡᠯᠦᠨ ᠡᠬᠡ ᠠᠭᠤᠷᠯᠠᠵᠤ ᠲᠡᠷᠭᠡᠨ ᠡᠴᠡ ᠪᠠᠭᠤᠮᠠᠭᠴᠠ᠂ ᠬᠠᠰᠠᠷ ᠤ᠋ᠨ ᠬᠠᠨᠴᠤᠢ ᠶ᠋ᠢᠨ ᠬᠦᠯᠢᠶᠡ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠲᠠᠢᠯᠵᠤ ᠲᠠᠯᠪᠢᠭᠠᠳ ᠮᠠᠯᠠᠭᠠᠢ᠂ ᠪᠦᠰᠡ ᠶ᠋ᠢ ᠨᠢ ᠬᠠᠰᠠᠷ ᠲᠤ᠌ ᠥᠭᠭᠡᠳ ᠠᠭᠤᠷ ᠬᠢᠯᠢᠩ ᠢ᠋ᠶ᠋ᠡᠨ ᠳᠠᠷᠤᠨ ᠶᠠᠳᠠᠵᠤ ᠵᠠᠪᠢᠯᠠᠨ ᠰᠠᠭᠤᠭᠠᠳ ᠬᠣᠶᠠᠷ ᠬᠥᠬᠥ ᠪᠡᠨ ᠭᠠᠷᠭᠠᠵᠤ᠂ ᠬᠣᠶᠠᠷ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠪᠠᠷᠢᠵᠤ ᠥᠭᠦᠯᠡᠷᠦᠨ᠄ 《ᠡᠭᠦᠨ ᠢ᠋ ᠬᠠᠷᠠᠵᠤ ᠪᠠᠢᠨᠠ ᠤᠤ? ᠬᠥᠬᠥᠭᠰᠡᠨ ᠬᠥᠬᠥ ᠴᠢᠨᠢ ᠡᠨᠡ ᠪᠠᠢᠨᠠ᠃ ᠬᠠᠪᠢᠷᠭᠠ ᠪᠠᠨ ᠬᠠᠲᠠᠷᠢᠨ ᠬᠠᠵᠠᠭᠴᠢᠳ᠂ ᠬᠦᠦ ᠪᠡᠨ ᠬᠦᠴᠦᠷᠬᠡᠨ ᠲᠠᠰᠣᠯᠠᠭᠴᠢᠳ! ᠬᠠᠰᠠᠷ ᠶᠠᠭᠠᠬᠢᠪᠠ! ᠲᠡᠮᠦᠵᠢᠨ ᠡᠨᠡ ᠨᠢᠭᠡᠨ ᠬᠥᠬᠥ ᠶ᠋ᠢᠨ ᠰᠦ ᠶ᠋ᠢ ᠬᠥᠬᠥᠵᠦ ᠪᠠᠷᠠᠬᠤ ᠪᠢᠯᠡ᠃ ᠬᠠᠴᠢᠭᠤᠨ ᠤᠳᠴᠢᠬᠢᠨ ᠬᠣᠶᠠᠷ ᠨᠢᠭᠡᠨ ᠬᠥᠬᠥ ᠶ᠋ᠢᠨ ᠰᠦ ᠶ᠋ᠢ ᠬᠥᠬᠥᠵᠦ ᠦᠯᠦ ᠪᠠᠷᠠᠬᠤ ᠪᠢᠯᠡ᠂ ᠬᠠᠰᠠᠷ ᠪᠣᠯ ᠬᠣᠶᠠᠷ ᠬᠥᠬᠥ ᠶ᠋ᠢᠨ ᠮᠢᠨᠢ ᠰᠦ ᠶ᠋ᠢ ᠳᠠᠭᠤᠰᠲᠠᠯᠠ ᠬᠥᠬᠥᠵᠦ᠂ ᠴᠡᠭᠡᠵᠢ ᠶ᠋ᠢ ᠮᠢᠨᠢ ᠠᠭᠤᠵᠢᠮ ᠪᠣᠯᠭᠠᠵᠤ ᠠᠮᠣᠷᠢᠯᠠᠭᠣᠯᠳᠠᠭ ᠪᠢᠯᠡ᠃ ᠲᠡᠢ᠌ᠠᠬᠥ ᠲᠡᠮᠦᠵᠢᠨ ᠴᠡᠭᠡᠵᠢᠨ ᠳ᠋ᠡᠭᠡᠨ ᠡᠷᠳᠡᠮ ᠲᠡᠢ᠂ ᠬᠠᠰᠠᠷ ᠬᠠᠪᠤ ᠬᠦᠴᠦ ᠲᠡᠢ ᠲᠤᠯᠠ ᠬᠠᠳᠬᠤᠯᠳᠤᠨ ᠵᠠᠢᠯᠠᠭᠰᠠᠳ ᠢ᠋ ᠬᠠᠷᠪᠤᠬᠤ ᠰᠤᠮᠤ ᠶ᠋ᠢᠨ ᠬᠦᠴᠦ ᠪᠡᠷ ᠬᠠᠮᠤᠵᠤ ᠠᠪᠴᠢᠷᠠᠳᠠᠭ ᠪᠢᠯᠡ᠃ ᠣᠭᠰᠢᠵᠤ ᠲᠣᠳᠠᠭᠠᠭᠰᠠᠳ ᠢ᠋ ᠤᠨᠤᠬᠤ ᠰᠤᠮᠤ ᠶ᠋ᠢᠨ ᠬᠦᠴᠦ ᠪᠡᠷ ᠣᠷᠣᠭᠤᠯᠤᠨ ᠠᠪᠴᠢᠷᠠᠳᠠᠭ ᠪᠢᠯᠡ᠃ ᠣᠳᠣ ᠳᠠᠢᠰᠤᠨ ᠢ᠋ ᠳᠠᠷᠤᠵᠤ ᠲᠡᠭᠦᠰᠪᠡ ᠭᠡᠵᠦ ᠬᠠᠰᠠᠷ ᠢ᠋ ᠦᠵᠡᠨ ᠶᠠᠳᠠᠵᠤ ᠪᠠᠢᠨᠠ ᠤᠤ?》 ᠭᠡᠪᠡ᠃
ᠡᠬᠡ ᠶ᠋ᠢᠨ ᠠᠭᠤᠷ ᠢ᠋ ᠠᠮᠤᠷᠯᠢᠭᠤᠯᠤᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠡᠬᠡ ᠶ᠋ᠢ ᠬᠢᠯᠢᠩᠨᠡᠭᠰᠡᠨ ᠳ᠋ᠦ᠍ ᠪᠢ ᠠᠶᠤᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠠᠶᠤᠵᠤ᠂ ᠢᠴᠢᠬᠦ ᠶ᠋ᠢᠨ ᠶᠡᠬᠡ ᠪᠡᠷ ᠢᠴᠢᠪᠡ᠃ ᠪᠢᠳᠡ ᠣᠳᠣ ᠢᠩᠭᠢᠬᠦ ᠪᠡᠨ ᠪᠣᠯᠢᠶᠠ!》 ᠭᠡᠪᠡ᠃ ᠡᠬᠡ ᠳ᠋ᠡᠭᠡᠨ ᠬᠡᠯᠡᠯ ᠦᠭᠡᠢ ᠳᠠᠯᠳᠠᠭᠤᠷ ᠬᠠᠰᠠᠷ ᠤ᠋ᠨ ᠵᠠᠷᠢᠮ ᠢᠷᠭᠡᠨ ᠢ᠋ ᠪᠤᠯᠢᠶᠠᠨ ᠠᠪᠴᠤ ᠬᠠᠰᠠᠷ ᠲᠤ᠌ ᠨᠢᠭᠡᠨ ᠮᠢᠩᠭᠠ ᠳᠥᠷᠪᠡᠨ ᠵᠠᠭᠤᠨ ᠢᠷᠭᠡᠨ ᠢ᠋ ᠦᠯᠡᠳᠡᠭᠡᠪᠡ᠃ ᠡᠭᠦᠨ ᠢ᠋ ᠥᠭᠡᠯᠡᠨ ᠡᠬᠡ ᠮᠡᠳᠡᠭᠡᠳ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠣᠪᠠᠭᠰᠠᠭᠠᠷ ᠬᠤᠷᠳᠤᠨ ᠬᠥᠭᠰᠢᠷᠡᠵᠡᠢ᠃ ᠬᠠᠰᠠᠷ ᠲᠤ᠌ ᠥᠭᠭᠦᠭᠰᠡᠨᠵᠠᠯᠠᠢᠷ ᠤ᠋ᠨ ᠵᠠᠪᠬᠡ ᠲᠡᠨᠳᠡ ᠡᠴᠡ ᠵᠠᠢᠯᠠᠵᠤ ᠪᠠᠷᠠᠭᠣᠵᠢᠨ ᠣᠷᠣᠨ ᠳ᠋ᠤ᠌ ᠳᠤᠲᠠᠭᠠᠪᠠ᠃
245᠂ ᠲᠡᠭᠦᠨ ᠡᠴᠡ ᠬᠣᠢᠰᠢ ᠶᠢᠰᠦᠨ ᠬᠡᠯᠡᠲᠡᠨ (ᠬᠠᠮᠤᠭ) ᠤᠯᠤᠰ ᠳᠠᠪ ᠲᠡᠭᠷᠢ ᠳ᠋ᠦ᠍ ᠬᠤᠷᠠᠯᠳᠤᠨ ᠣᠴᠢᠭᠰᠠᠨ ᠪᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠭᠲᠠ ᠶ᠋ᠢᠨ ᠬᠣᠷᠢᠶᠠᠨ ᠠ᠋ᠴᠠ ᠴᠤ᠌ ᠣᠯᠠᠩᠬᠢ ᠨᠢ ᠳᠠᠪ ᠲᠡᠭᠷᠢ ᠳ᠋ᠦ᠍ ᠣᠴᠢᠵᠤ ᠵᠠᠬᠢᠷᠤᠭᠳᠠᠪᠠ᠃ ᠪᠠᠰᠠ ᠤᠳᠴᠢᠬᠢᠨ ᠨᠣᠶᠠᠨ ᠲᠡᠮᠦᠭᠡ ᠶ᠋ᠢᠨ ᠬᠠᠷᠢᠶᠠᠲᠤ ᠢᠷᠭᠡᠨ᠂ ᠳᠠᠪ ᠲᠡᠭᠷᠢ ᠳ᠋ᠦ᠍ ᠣᠴᠢᠵᠠᠢ᠃ ᠤᠳᠴᠢᠬᠢᠨ ᠨᠣᠶᠠᠨ᠂ ᠣᠴᠢᠭᠰᠠᠨ ᠢᠷᠭᠡᠨ ᠢ᠋ᠶ᠋ᠡᠨ ᠠᠪᠴᠢᠷᠠᠭᠤᠯᠬᠤ ᠪᠠᠷ ᠰᠣᠬᠣᠷ ᠨᠡᠷᠡᠲᠦ ᠡᠯᠴᠢ ᠶ᠋ᠢ ᠢᠯᠡᠭᠡᠪᠡᠯ᠂ ᠳᠠᠪ ᠲᠡᠭᠷᠢ᠂ ᠡᠯᠴᠢ ᠰᠣᠬᠣᠷ ᠲᠤ᠌ ᠥᠭᠦᠯᠡᠷᠦᠨ᠄ 《 ᠤᠳᠴᠢᠬᠢᠨ ᠲᠠ ᠬᠣᠶᠠᠷ᠂ ᠶᠡᠬᠡ ᠡᠯᠴᠢ ᠢᠯᠡᠭᠡᠳᠡᠭ ᠪᠣᠯᠵᠠᠢ》 ᠭᠡᠵᠦ ᠡᠯᠴᠢ ᠰᠣᠬᠣᠷ ᠢ᠋ ᠵᠣᠳᠣᠵᠤ᠂ ᠡᠮᠡᠭᠡᠯ ᠢ᠋ ᠨᠢ ᠡᠭᠦᠷᠦᠭᠦᠯᠦᠨ ᠶᠠᠪᠠᠭᠠᠨ ᠪᠤᠴᠠᠭᠠᠵᠠᠢ᠃ ᠡᠯᠴᠢ ᠰᠣᠬᠣᠷ ᠢ᠋ ᠵᠣᠳᠣᠭᠤᠯᠵᠤ ᠶᠠᠪᠠᠭᠠᠨ ᠢᠷᠡᠭᠰᠡᠨ ᠦ᠌ ᠮᠠᠷᠭᠠᠰᠢ ᠤᠳᠴᠢᠬᠢᠨ ᠨᠣᠶᠠᠨ ᠥᠪᠡᠷ ᠢ᠋ᠶ᠋ᠡᠨ ᠳᠠᠪ ᠲᠡᠭᠷᠢ ᠶ᠋ᠢᠨ ᠳ᠋ᠦ᠍ ᠣᠴᠢᠵᠤ ᠥᠭᠦᠯᠡᠷᠦᠨ᠄ 《ᠡᠯᠴᠢ ᠰᠣᠬᠣᠷ ᠢ᠋ ᠢᠯᠡᠭᠡᠪᠡᠯ ᠵᠣᠳᠣᠭᠠᠳ ᠶᠠᠪᠠᠭᠠᠨ ᠪᠤᠴᠠᠭᠠᠵᠠᠢ᠃ ᠣᠳᠣ ᠪᠢ ᠢᠷᠭᠡᠨ ᠢ᠋ᠶ᠋ᠡᠨ ᠠᠪᠬᠤ ᠪᠠᠷ ᠢᠷᠡᠪᠡ》 ᠭᠡᠪᠡᠯ᠂ ᠳᠣᠯᠣᠭᠠᠨ ᠬᠣᠩᠬᠣᠳᠠᠢ᠂ ᠤᠳᠴᠢᠬᠢᠨ ᠨᠣᠶᠠᠨ ᠢ᠋ ᠡᠨᠳᠡ ᠲᠡᠨᠳᠡ ᠡᠴᠡ ᠬᠠᠭᠠᠵᠤ 《ᠡᠯᠴᠢ ᠰᠣᠬᠣᠷ ᠢ᠋ ᠢᠯᠡᠭᠡᠳᠡᠭ ᠴᠢᠨᠢ ᠵᠥᠪ ᠤᠤ?》 ᠭᠡᠵᠦ ᠪᠠᠷᠢᠵᠤ ᠵᠣᠳᠣᠬᠤ ᠶ᠋ᠢ ᠵᠠᠪᠳᠤᠭᠰᠠᠨ ᠳ᠋ᠤ᠌᠂ ᠤᠳᠴᠢᠬᠢᠨ ᠨᠣᠶᠠᠨ ᠠᠶᠤᠵᠤ ᠥᠭᠦᠯᠡᠷᠦᠨ᠄ 《ᠡᠯᠴᠢ ᠢᠯᠡᠭᠡᠭᠰᠡᠨ ᠮᠢᠨᠢ ᠪᠤᠷᠤᠭᠤ ᠪᠣᠯᠵᠠᠢ》 ᠭᠡᠪᠡ᠃ ᠬᠣᠩᠬᠣᠳᠠᠢ ᠶ᠋ᠢᠨ ᠳᠣᠯᠣᠭᠠᠨ ᠬᠥᠪᠡᠭᠦᠳ ᠥᠭᠦᠯᠡᠷᠦᠨ᠄ 《ᠪᠤᠷᠤᠭᠤ ᠪᠠᠨ ᠮᠡᠳᠡᠭᠰᠡᠨ ᠪᠣᠯ ᠨᠠᠮᠠᠨᠴᠢᠯᠠᠨ ᠰᠥᠭᠥᠳ!》 ᠭᠡᠵᠦ ᠤᠳᠴᠢᠬᠢᠨ ᠢ᠋ ᠳᠠᠪ ᠲᠡᠭᠷᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠰᠥᠭᠥᠳᠦᠭᠦᠯᠵᠡᠢ᠃ ᠲᠡᠭᠡᠭᠡᠳ ᠤᠳᠴᠢᠬᠢᠨ ᠨᠣᠶᠠᠨ ᠢᠷᠭᠡᠨ ᠢ᠋ᠶ᠋ᠡᠨ ᠠᠪᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠤᠴᠠᠵᠤ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠪᠣᠰᠤᠭᠠ ᠦᠭᠡᠢ᠂ ᠣᠷᠣᠨ ᠳᠣᠲᠣᠷᠠ ᠪᠠᠨ ᠪᠠᠢᠬᠤ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠤᠬᠢᠯᠠᠨ ᠰᠥᠭᠥᠳᠴᠦ ᠥᠭᠦᠯᠡᠷᠦᠨ᠄ 《ᠶᠢᠰᠦᠨ ᠬᠡᠯᠡᠲᠡᠨ ᠢᠷᠭᠡᠨ᠂ ᠳᠠᠪ ᠲᠡᠭᠷᠢ ᠳ᠋ᠦ᠍ ᠴᠣᠭᠯᠠᠯᠳᠣᠵᠣ ᠪᠠᠢᠭᠠ ᠡᠭᠦᠨ ᠳ᠋ᠦ᠍᠂ ᠳᠠᠪ ᠲᠡᠭᠷᠢ ᠡᠴᠡ ᠬᠠᠷᠢᠶᠠᠲᠤ ᠢᠷᠭᠡᠨ ᠢ᠋ᠶ᠋ᠡᠨ ᠠᠪᠬᠤ ᠪᠠᠷ ᠡᠯᠴᠢ ᠰᠣᠬᠣᠷ ᠢ᠋ ᠢᠯᠡᠭᠡᠪᠡ᠃ ᠡᠯᠴᠢ ᠰᠣᠬᠣᠷ ᠵᠣᠳᠣᠭᠤᠯᠵᠤ ᠡᠮᠡᠭᠡᠯ ᠢ᠋ᠶ᠋ᠡᠨ ᠡᠭᠦᠷᠴᠦ ᠶᠠᠪᠠᠭᠠᠨ ᠢᠷᠡᠭᠰᠡᠨ ᠳ᠋ᠦ᠍᠂ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠣᠴᠢᠪᠠᠯ᠂ ᠳᠣᠯᠣᠭᠠᠨ ᠬᠣᠩᠬᠣᠳᠠᠢ᠂ ᠨᠠᠮᠠ ᠶ᠋ᠢ ᠡᠨᠳᠡ ᠲᠡᠨᠳᠡ ᠡᠴᠡ ᠬᠠᠭᠠᠵᠤ ᠲᠤᠯᠭᠠᠵᠤ ᠪᠤᠷᠤᠭᠤ ᠶ᠋ᠢ ᠬᠦᠯᠢᠶᠡᠯᠭᠡᠨ ᠨᠠᠮᠠᠨᠴᠢᠯᠠᠭᠤᠯᠪᠠ᠃ ᠳᠠᠪ ᠲᠡᠭᠷᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠰᠥᠭᠦᠳᠦᠭᠦᠯᠪᠡ》 ᠭᠡᠳ ᠤᠬᠢᠯᠠᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠦᠭᠡ ᠬᠡᠯᠡᠬᠦ ᠶ᠋ᠢᠨ ᠡᠮᠦᠨᠡ ᠪᠥᠷᠲᠡ ᠦᠵᠢᠨ᠂ ᠣᠷᠣᠨ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠥᠨᠳᠡᠢᠨ ᠰᠠᠭᠤᠵᠤ ᠬᠥᠨᠵᠢᠯᠡ ᠶ᠋ᠢᠨ ᠵᠠᠬᠠ ᠪᠠᠷ ᠡᠪᠴᠢᠭᠦᠦ ᠪᠡᠨ ᠪᠦᠷᠬᠦᠵᠦ᠂ ᠤᠳᠴᠢᠬᠢᠨ ᠤ᠋ ᠤᠬᠢᠯᠠᠬᠤ ᠶ᠋ᠢ ᠦᠵᠡᠵᠦ᠂ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠥᠭᠦᠯᠡᠷᠦᠨ᠄ 《ᠲᠡᠳᠡ ᠬᠣᠩᠬᠣᠳᠠᠢ ᠨᠠᠷ ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠬᠥᠮᠦᠰ ᠪᠢᠯᠡ? ᠤᠷᠢᠳ ᠬᠠᠰᠠᠷ ᠢ᠋ ᠪᠦᠰᠡᠯᠡᠨ ᠵᠠᠨᠴᠢᠭᠰᠠᠨ᠃ ᠣᠳᠣ ᠪᠠᠰᠠ ᠡᠨᠡ ᠤᠳᠴᠢᠬᠢᠨ ᠢ᠋ ᠶᠠᠭᠠᠬᠢᠭᠠᠳ ᠬᠣᠢᠨᠠ ᠠ᠋ᠴᠠ ᠪᠠᠨ ᠰᠥᠭᠦᠳᠦᠭᠦᠯᠪᠡ? ᠡᠨᠡ ᠶᠠᠮᠠᠷ ᠶᠣᠰᠣ ᠪᠣᠢ? ᠴᠢᠮᠠ ᠶ᠋ᠢ ᠪᠡᠯᠡᠬᠡᠨ ᠠᠮᠢᠳᠤ ᠪᠠᠢᠬᠤ ᠳ᠋ᠤ᠌ ᠣᠢ ᠶ᠋ᠢᠨ ᠨᠠᠷᠠᠰᠤ ᠮᠡᠲᠦ ᠣᠯᠠᠨ ᠰᠠᠢᠬᠠᠨ ᠳᠡᠭᠦᠦ ᠨᠠᠷ ᠢ᠋ ᠴᠢᠨᠢ ᠢᠩᠭᠢᠵᠦ ᠳᠠᠷᠤᠯᠠᠵᠤ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠲᠡᠳᠡ ᠡᠭᠦᠯᠡ ᠮᠡᠲᠦ ᠪᠡᠶᠡ ᠶ᠋ᠢ ᠴᠢᠨᠢ ᠦᠭᠡᠢ ᠪᠣᠯᠵᠤ ᠣᠲᠣᠪᠠᠯ ᠦᠯᠡᠭᠰᠡᠨ ᠶᠡᠬᠡ ᠤᠯᠤᠰ ᠢ᠋ ᠴᠢᠨᠢ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠷ ᠴᠢᠨᠢ ᠮᠡᠳᠡᠭᠦᠯᠬᠦ ᠤᠤ? ᠰᠡᠭᠦᠯ ᠦ᠋ᠨ ᠴᠠᠭ ᠲᠤ᠌ ᠲᠡᠳᠡ ᠰᠦᠯᠳᠡ ᠭᠡᠭᠡᠨ ᠪᠡᠶᠡ ᠶ᠋ᠢ ᠴᠢᠨᠢ ᠰᠡᠭᠦᠳᠡᠷ ᠪᠣᠯᠵᠤ ᠣᠲᠣᠪᠠᠯ ᠰᠦᠷᠦᠭ ᠶᠡᠬᠡ ᠤᠯᠤᠰ ᠢ᠋ ᠴᠢᠨᠢ ᠰᠦᠢᠳᠬᠡᠬᠦ ᠳ᠋ᠦ᠍ ᠬᠦᠷᠬᠦ ᠪᠢᠰᠢᠦ᠂ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠨᠠᠷᠠᠰᠤ ᠮᠡᠲᠦ ᠥᠨᠢᠷ ᠰᠠᠢᠬᠠᠨ ᠳᠡᠭᠦᠦ ᠨᠠᠷ ᠢ᠋ ᠴᠢᠨᠢ ᠥᠰᠢᠨ ᠳᠠᠷᠤᠯᠠᠭᠴᠢ ᠲᠡᠳᠡ ᠥᠰᠴᠦ ᠪᠣᠢᠵᠢᠵᠤ ᠠᠮᠵᠢᠭᠠ ᠦᠭᠡᠢ ᠥᠴᠦᠬᠡᠨ ᠬᠡᠳᠦᠨ ᠬᠡᠦᠬᠡᠳ ᠲᠦ᠍ ᠴᠢᠨᠢ ᠥᠷᠭᠡᠨ ᠤᠯᠤᠰ ᠢ᠋ ᠮᠡᠳᠡᠭᠦᠯᠬᠦ ᠦᠭᠡᠢ᠂ ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠬᠣᠩᠬᠣᠳᠠᠢ ᠨᠠᠷ ᠪᠢᠯᠡ? ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠢᠩᠭᠢᠵᠦ ᠳᠠᠷᠤᠯᠠᠬᠤ ᠶ᠋ᠢ ᠦᠵᠡᠭᠰᠡᠭᠡᠷ ᠪᠠᠢᠭᠠᠳ ᠵᠦᠭᠡᠷ ᠥᠩᠭᠡᠷᠡᠭᠦᠯᠦᠨᠡ ᠤᠤ᠂ ᠴᠢ?》 ᠭᠡᠳ ᠪᠥᠷᠲᠡ ᠦᠵᠢᠨ ᠨᠢᠯᠪᠤᠰᠤ ᠴᠤᠪᠤᠷᠠᠭᠤᠯᠪᠠ᠃ ᠪᠥᠷᠲᠡ ᠥᠵᠢᠨ ᠦ᠌ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠤᠳᠴᠢᠬᠢᠨ ᠳ᠋ᠤ᠌ ᠥᠭᠦᠯᠡᠷᠦᠨ᠄ 《ᠳᠠᠪ ᠲᠡᠭᠷᠢ ᠣᠳᠣ ᠢᠷᠡᠨᠡ᠂ ᠥᠰᠢᠶᠡ ᠪᠡᠨ ᠶᠠᠭᠠᠬᠢᠵᠤ ᠠᠪᠬᠤ ᠪᠠᠨ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ》 ᠭᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠤᠳᠴᠢᠬᠢᠨ ᠪᠣᠰᠴᠤ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠵᠤ ᠭᠠᠳᠠᠨᠠ ᠭᠠᠷᠤᠭᠠᠳ ᠭᠤᠷᠪᠠᠨ ᠪᠥᠬᠡ ᠶ᠋ᠢ ᠪᠡᠯᠡᠳᠬᠡᠵᠦ ᠵᠣᠭᠰᠣᠭᠠᠪᠠ᠃ ᠤᠳᠠᠯ ᠦᠭᠡᠢ ᠮᠠᠩᠬᠡᠯᠢᠭ᠌ ᠡᠴᠢᠭᠡ᠂ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠢᠷᠡᠵᠦ ᠪᠦᠭᠦᠳᠡᠭᠡᠷ ᠭᠡᠷ ᠲᠦ᠍ ᠣᠷᠣᠵᠤ᠂ ᠳᠠᠪ ᠲᠡᠭᠷᠢ᠂ ᠰᠥᠩ ᠦ᠋ᠨ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠰᠠᠭᠤᠪᠠ᠃ ᠤᠳᠴᠢᠬᠢᠨ᠂ ᠳᠠᠪ ᠲᠡᠭᠷᠢ ᠶ᠋ᠢᠨ ᠳᠡᠪᠡᠯ ᠦ᠋ᠨ ᠵᠠᠬᠠ ᠠ᠋ᠴᠠ ᠪᠠᠷᠢᠵᠤ 《ᠥᠴᠥᠭᠡᠳᠦᠷ ᠴᠢ ᠨᠠᠮᠠ ᠶ᠋ᠢ ᠨᠠᠮᠠᠠᠴᠢᠯᠠᠭᠣᠯᠣᠭᠰᠠ ᠪᠢᠯᠢᠤ? ᠬᠦᠴᠦ ᠪᠡᠨ ᠦᠵᠡᠯᠴᠡᠶᠡ》 ᠭᠡᠵᠦ ᠡᠭᠦᠳᠡᠨ ᠳᠠᠰᠢ ᠴᠢᠷᠦᠪᠡ᠃ ᠳᠠᠪ ᠲᠡᠭᠷᠢ᠂ ᠤᠳᠴᠢᠬᠢᠨ ᠢ᠋ ᠡᠰᠡᠷᠭᠦᠴᠡᠵᠦ᠂ ᠲᠡᠭᠦᠨ ᠦ᠌ ᠳᠡᠪᠡᠯ ᠦ᠋ᠨ ᠵᠠᠬᠠ ᠠ᠋ᠴᠠ ᠪᠠᠷᠢᠪᠠ᠃ ᠲᠡᠷᠡ ᠬᠣᠶᠠᠷ ᠢ᠋ ᠪᠠᠷᠢᠯᠳᠤᠬᠤ ᠳ᠋ᠤ᠌ ᠳᠠᠪ ᠲᠡᠭᠷᠢ ᠶ᠋ᠢᠨ ᠮᠠᠯᠠᠭᠠᠢ᠂ ᠭᠣᠯᠣᠮᠲᠠ ᠶ᠋ᠢᠨ ᠳᠡᠭᠡᠷᠡ ᠤᠨᠠᠪᠠ᠃ ᠮᠠᠩᠬᠡᠯᠢᠭ᠌ ᠡᠴᠢᠭᠡ ᠤᠨᠠᠭᠰᠠᠨ ᠮᠠᠯᠠᠭᠠᠢ ᠶ᠋ᠢ ᠠᠪᠴᠤ ᠦᠨᠦᠰᠦᠭᠡᠳ ᠡᠪᠦᠷ ᠲᠡᠭᠡᠨ ᠬᠢᠪᠡ᠃ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠭᠠᠳᠠᠭᠰᠢ ᠭᠠᠷᠴᠤ ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠲᠡᠮᠠᠴᠡᠯᠳᠡᠭᠳᠥᠨ》 ᠭᠡᠪᠡ᠃ ᠤᠳᠴᠢᠬᠢᠨ᠂ᠳᠠᠪ ᠲᠡᠭᠷᠢ ᠶ᠋ᠢ ᠪᠣᠱᠣᠭᠠ ᠳᠡᠭᠡᠭᠦᠷ ᠴᠢᠷᠴᠦ ᠭᠠᠷᠬᠤ ᠳ᠋ᠤ᠌ ᠤᠷᠢᠳᠠ ᠪᠡᠯᠡᠳᠬᠡᠭᠰᠡᠨ ᠭᠤᠷᠪᠠᠨ ᠪᠥᠬᠡ ᠤᠭᠲᠤᠵᠤ ᠳᠠᠪ ᠲᠡᠭᠷᠢ ᠶ᠋ᠢ ᠪᠠᠷᠢᠭᠠᠳ ᠴᠢᠷᠣᠯᠴᠠᠵᠣ᠂ ᠨᠢᠷᠤᠭᠤ ᠶ᠋ᠢ ᠬᠤᠭᠤᠯᠤᠭᠠᠳ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠤᠭᠰᠠᠷᠠᠭᠰᠠᠨ ᠲᠡᠷᠭᠡᠨ ᠦ᠌ ᠦᠵᠦᠭᠦᠷ ᠲᠦ᠍ ᠣᠷᠬᠢᠪᠠ᠃ ᠤᠳᠴᠢᠬᠢᠨ ᠣᠷᠣᠵᠤ ᠥᠭᠦᠯᠡᠷᠦᠨ᠄ 《ᠳᠠᠪ ᠲᠡᠭᠷᠢ᠂ ᠨᠠᠮᠠ ᠶ᠋ᠢ ᠨᠠᠮᠠᠨᠴᠢᠯᠠᠭᠤᠯᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠣᠳᠣ ᠬᠦᠴᠦ ᠪᠡᠨ ᠦᠵᠡᠭᠦᠯᠦᠶᠡ ᠭᠡᠪᠡᠯ᠂ ᠦᠯᠦ ᠵᠥᠪᠰᠢᠶᠡᠷᠡᠵᠦ ᠪᠠᠰᠢᠷᠯᠠᠨ ᠬᠡᠪᠲᠡᠵᠦ ᠪᠠᠢᠨᠠ》 ᠭᠡᠪᠡᠯ᠂ ᠮᠠᠩᠬᠡᠯᠢᠭ᠌ ᠡᠴᠢᠭᠡ᠂ ᠤᠴᠢᠷ ᠢ᠋ ᠮᠡᠳᠡᠵᠦ ᠨᠢᠯᠪᠤᠰᠤ ᠴᠤᠪᠤᠷᠠᠭᠤᠯᠤᠨ ᠥᠭᠦᠯᠡᠷᠦᠨ᠄
《ᠠᠭᠤᠵᠢᠮ ᠶᠡᠬᠡ ᠭᠠᠵᠠᠷ ᠢ᠋ ᠳᠣᠪᠣ ᠶ᠋ᠢᠨ ᠲᠡᠳᠦᠢ ᠪᠠᠢᠬᠤ ᠳ᠋ᠤ᠌ ᠠᠭᠤᠯᠵᠠᠵᠤ ᠨᠥᠬᠥᠷᠯᠡᠭᠰᠡᠨ ᠪᠢᠯᠡ᠂ ᠪᠢ ᠤᠰᠤᠨ ᠶᠡᠬᠡ ᠮᠥᠷᠡᠨ ᠢ᠋ ᠭᠣᠷᠣᠬᠠ ᠶ᠋ᠢᠨ ᠲᠡᠳᠦᠢ ᠪᠠᠢᠬᠤ ᠳ᠋ᠤ᠌ ᠤᠴᠠᠷᠠᠵᠤ ᠲᠠᠨᠢᠯᠴᠠᠭᠰᠠᠨ ᠪᠢᠯᠡ᠂ ᠪᠢ 》 ᠭᠡᠬᠦ ᠳ᠋ᠦ᠍ ᠬᠣᠩᠬᠣᠳᠠᠢ ᠶ᠋ᠢᠨ ᠵᠢᠷᠭᠤᠭᠠᠨ ᠬᠥᠪᠡᠭᠦᠳ ᠡᠭᠦᠳᠡ ᠶ᠋ᠢ ᠬᠠᠭᠠᠵᠤ᠂ ᠭᠣᠯᠣᠮᠲᠠ ᠶ᠋ᠢ ᠲᠣᠭᠣᠷᠢᠨ ᠬᠠᠨᠴᠤᠢ ᠪᠠᠨ ᠰᠢᠮᠡᠯᠡᠵᠦ ᠲᠦᠷᠢᠮᠡᠬᠡᠢᠯᠡᠬᠦ ᠶ᠋ᠢ ᠵᠠᠪᠳᠤᠬᠤ ᠳ᠋ᠤ᠌᠂ ᠴᠢᠩᠭᠢᠰ ᠬᠠᠭᠠᠨ ᠪᠠᠴᠢᠮᠳᠠᠨ ᠰᠢᠬᠠᠭᠳᠠᠵᠤ᠂ 《ᠵᠠᠢᠯᠠ᠂ ᠭᠠᠷᠤᠶᠠ》 ᠭᠡᠳ ᠭᠡᠷ ᠡᠴᠡ ᠭᠠᠷᠪᠠᠯ᠂ ᠣᠷᠴᠢᠮ ᠳ᠋ᠤ᠌ ᠪᠠᠢᠭᠰᠠᠨ ᠬᠣᠷᠴᠢᠨ ᠲᠣᠷᠬᠠᠭ ᠤ᠋ᠳ ᠨᠠᠷ ᠢᠷᠡᠵᠦ ᠲᠣᠭᠣᠷᠢᠨ ᠬᠠᠮᠠᠭᠠᠯᠠᠪᠠ᠃ ᠳᠠᠪ ᠲᠡᠭᠷᠢ ᠶ᠋ᠢ ᠤᠭᠰᠠᠷᠠᠭᠰᠠᠨ ᠲᠡᠷᠭᠡᠨ ᠦ᠌ ᠠᠳᠠᠭ ᠲᠤ᠌ ᠨᠢᠷᠤᠭᠤ ᠶ᠋ᠢ ᠬᠤᠭᠤᠯᠤᠭᠠᠳ ᠣᠷᠬᠢᠭᠰᠠᠨ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠦᠵᠡᠵᠦ ᠬᠤᠢ᠌ᠲᠤᠭᠣᠯ ᠠ᠋ᠴᠠ ᠨᠢᠭᠡᠨ ᠪᠣᠷᠣ ᠭᠡᠷ ᠢ᠋ ᠠᠪᠴᠢᠷᠠᠭᠤᠯᠵᠤ᠂ ᠳᠠᠪ ᠲᠡᠭᠷᠢ ᠶ᠋ᠢᠨ ᠳᠡᠭᠡᠷᠡ ᠨᠢ ᠪᠠᠷᠢᠭᠤᠯᠤᠭᠠᠳ 《ᠬᠥᠰᠬᠡ ᠪᠡᠨ ᠪᠡᠯᠡᠳᠭᠡ! ᠨᠡᠭᠦᠶᠡ》 ᠭᠡᠳ ᠲᠡᠨᠳᠡ ᠡᠴᠡ ᠨᠡᠭᠦᠪᠡ᠃
246᠂ ᠳᠠᠪ ᠲᠡᠭᠷᠢ ᠶ᠋ᠢ ᠲᠠᠯᠪᠢᠭᠰᠠᠨ ᠭᠡᠷ ᠦ᠋ᠨ ᠡᠷᠦᠬᠡ ᠶ᠋ᠢ ᠪᠦᠲᠡᠭᠡᠵᠦ᠂ ᠡᠭᠦᠳᠡ ᠶ᠋ᠢ ᠳᠠᠷᠤᠵᠤ ᠬᠥᠮᠦᠨ ᠢ᠋ᠶ᠋ᠡᠷ ᠰᠠᠬᠢᠭᠣᠯᠪᠠᠯ᠂ ᠭᠤᠷᠪᠠᠳᠤᠭᠠᠷ ᠰᠥᠨᠢ ᠦᠷ ᠴᠠᠢᠵᠤ ᠪᠠᠢᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠡᠷᠦᠬᠡ ᠨᠡᠭᠡᠭᠡᠭᠳᠡᠵᠦ᠂ ᠳᠠᠪ ᠲᠡᠭᠷᠢ ᠶ᠋ᠢᠨ ᠪᠡᠶᠡ ᠦᠭᠡᠢ ᠪᠣᠯᠵᠠᠢ᠃ ᠨᠢᠭᠲᠠᠯᠠᠵᠤ ᠦᠵᠡᠪᠡᠯ ᠦᠨᠡᠬᠡᠷ ᠲᠡᠭᠦᠨ ᠦ᠌ ᠬᠡᠭᠦᠷ ᠠᠯᠠᠭᠠ ᠪᠠᠢᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《 ᠳᠠᠪ ᠲᠡᠭᠷᠢ᠂ ᠮᠢᠨᠦ ᠳᠡᠭᠦᠦ ᠨᠠᠷ ᠲᠤ᠌ ᠭᠠᠷ ᠬᠥᠯ ᠬᠦᠷᠦᠭᠰᠡᠨ ᠪᠠ ᠮᠢᠨᠦ ᠳᠡᠭᠦᠦ ᠨᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠣᠷᠣ ᠦᠭᠡᠢ ᠬᠣᠪ ᠦᠭᠡ ᠬᠡᠯᠡᠭᠰᠡᠨ ᠦ᠌ ᠲᠤᠯᠠ ᠲᠡᠭᠷᠢ ᠶ᠋ᠢᠨ ᠲᠠᠭᠠᠯᠠᠯ ᠳ᠋ᠤ᠌ ᠡᠰᠡ ᠨᠡᠢᠯᠡᠵᠦ᠂ ᠲᠡᠭᠦᠨ ᠦ᠌ ᠠᠮᠢ ᠪᠡᠶᠡ ᠬᠣᠶᠠᠭᠤᠯᠠ ᠶ᠋ᠢ ᠲᠡᠭᠷᠢ ᠠᠪᠴᠤ ᠣᠳᠪᠠ》 ᠭᠡᠪᠡ᠃ ᠴᠢᠩᠭᠢᠰ ᠬᠠᠭᠠᠨ᠂ ᠮᠠᠩᠬᠡᠯᠢᠭ᠌ ᠡᠴᠢᠭᠡ ᠶ᠋ᠢ ᠲᠡᠨᠳᠡ ᠲᠣᠩᠭ᠋ᠣᠳᠴᠣ ᠬᠡᠯᠡᠭᠰᠡᠨ ᠨᠢ᠄ 《ᠲᠠ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠠᠪᠤᠷᠢ ᠵᠠᠩ ᠢ᠋ ᠢᠳᠬᠠᠬᠤ ᠦᠭᠡᠢ ᠲᠤᠯᠠ ᠲᠡᠳᠡ᠂ ᠪᠢᠳᠡᠨ ᠲᠡᠢ ᠲᠡᠮᠡᠴᠡᠬᠦ ᠭᠡᠳ ᠳᠠᠪ ᠲᠡᠭᠷᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠠᠯᠳᠠᠪᠠ᠃ ᠲᠠ ᠨᠠᠷ ᠤ᠋ᠨ ᠡᠢᠮᠦ ᠵᠠᠩ ᠭᠠᠷᠭᠠᠬᠤ ᠶ᠋ᠢ ᠮᠡᠳᠡᠭᠰᠡᠨ ᠪᠣᠯ ᠲᠠ ᠨᠠᠷ ᠢ᠋ ᠬᠡᠳᠦᠢᠨ ᠵᠠᠮᠤᠬᠠ᠂ ᠠᠯᠲᠠᠨ᠂ ᠬᠣᠴᠣᠷ ᠨᠠᠷ ᠤ᠋ᠨ ᠠᠳᠠᠯᠢ ᠪᠣᠯᠭᠠᠬᠤ ᠪᠢᠯᠡ》 ᠭᠡᠵᠦ ᠮᠠᠩᠬᠡᠯᠢᠭ᠌ ᠡᠴᠢᠭᠡ ᠶ᠋ᠢ ᠪᠤᠷᠤᠭᠤᠰᠢᠶᠠᠨ ᠲᠣᠩᠭ᠋ᠣᠳᠣᠭᠠᠳ᠂ ᠵᠢᠴᠢ 《ᠥᠷᠯᠥᠭᠡ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠦᠳᠡᠰᠢ ᠨᠢᠴᠤᠵᠤ᠂ ᠦᠳᠡᠰᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠥᠷᠯᠥᠭᠡ ᠨᠢᠴᠤᠵᠤ ᠶᠠᠪᠤᠪᠠᠯ ᠢᠴᠢᠭᠦᠷᠢᠲᠡᠢ ᠪᠢᠰᠢᠦ᠃ ᠤᠷᠢᠳᠤ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠬᠠᠲᠠᠭᠤ ᠪᠠᠷᠢᠵᠤ ᠶᠠᠪᠤᠪᠠᠯ ᠳᠡᠭᠡᠷᠡ ᠪᠢᠰᠢᠦ》 ᠭᠡᠳ ᠪᠠᠰᠠ ᠵᠠᠷᠯᠢᠭ ᠪᠣᠯᠤᠷᠤᠨ 《ᠠᠭᠠᠰᠢ ᠠᠪᠤᠷᠢ ᠪᠠᠨ ᠲᠠᠲᠠᠵᠤ ᠶᠠᠪᠤᠭᠰᠠᠨ ᠪᠣᠯ ᠮᠠᠩᠬᠡᠯᠢᠭ᠌ ᠡᠴᠢᠭᠡ ᠶ᠋ᠢᠨ ᠤᠷᠤᠭ ᠲᠠᠢ ᠬᠡᠨ ᠲᠡᠩᠴᠡᠬᠦ ᠪᠢᠯᠡ》 ᠭᠡᠪᠡ᠃ ᠳᠠᠪ ᠲᠡᠭᠷᠢ ᠶ᠋ᠢ ᠦᠭᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠣᠩᠬᠣᠳᠠᠢ ᠶ᠋ᠢᠨ ᠬᠥᠪᠡᠭᠦᠳ ᠨᠣᠮᠣᠬᠠᠷᠠᠪᠠ᠃
