ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠬᠣᠷᠢᠨ ᠵᠢᠷᠭᠤᠭᠠ> Хялгасан дөрөөн дээр – Хасвулаг зохиов <26>
85ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠬᠣᠷᠢᠨ ᠵᠢᠷᠭᠤᠭᠠ>
ᠬᠣᠷᠢᠨ ᠵᠢᠷᠭᠤᠭᠠ
ᠰᠥᠨᠢ ᠫᠠᠳ ᠬᠠᠷᠠᠩᠭᠤᠢ᠃
ᠬᠡᠳᠦᠢᠪᠡᠷ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠭᠣᠣᠯ ᠵᠡᠭᠡᠯᠢ ᠪᠡᠷ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳᠤᠸᠠᠯᠠᠨ ᠭᠢᠯᠠᠯᠵᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠨᠠᠷᠢᠨ ᠭᠤᠳᠤᠮᠵᠢ ᠂ ᠮᠤᠬᠤᠷ ᠪᠤᠯᠤᠩ ᠢ᠋ᠶ᠋ᠠᠷ ᠨᠢ ᠡᠷᠡᠬᠡᠢ ᠬᠤᠷᠤᠭᠤ ᠦᠵᠡᠭᠳᠡᠬᠦ ᠦᠭᠡᠢ ᠬᠠᠷᠠᠩᠭᠤᠢ ᠪᠠᠢᠯᠠ᠃
ᠲᠦᠪᠰᠢᠨ ᠭᠤᠸᠠᠢ ᠶᠠᠭ ᠯᠠ ᠭᠠᠯᠵᠠᠭᠤ ᠰᠣᠯᠢᠶᠠᠲᠠᠢ ᠬᠥᠮᠦᠨ ᠰᠢᠭ ᠠᠯᠢ ᠬᠠᠷᠠᠩᠭᠤᠢ ᠵᠢᠵᠢᠭ ᠭᠤᠳᠤᠮᠵᠢ᠂ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠮᠠᠭᠤᠬᠠᠨ ᠵᠡᠭᠡᠯᠢ ᠶ᠋ᠢᠨ ᠬᠠᠵᠠᠭᠤ ᠶ᠋ᠢ ᠳᠠᠭᠠᠨ ᠬᠠᠷᠠ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠭᠦᠶᠦᠨᠡ᠃ ᠪᠠᠢᠳᠠᠯ ᠠ᠋ᠴᠠ ᠨᠢ ᠦᠵᠡᠬᠦ ᠳ᠋ᠦ᠍ ᠶᠠᠭ ᠯᠠ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠬᠥᠭᠡᠭᠡᠵᠦ ᠪᠠᠢᠬᠤ ᠰᠢᠭ᠋ ᠪᠣᠯᠪᠠᠴᠤ ᠭᠡᠳᠡᠷᠭᠦ ᠪᠡᠨ ᠬᠠᠷᠠᠯ ᠦᠭᠡᠢ ᠡᠮᠦᠨᠡᠰᠢ ᠲᠡᠮᠡᠦᠯᠬᠦ ᠡᠴᠡ ᠨᠢ ᠪᠠᠷᠤᠭᠯᠠᠪᠠᠯ ᠠᠷᠤ ᠠ᠋ᠴᠠ ᠨᠢ ᠬᠥᠮᠦᠨ ᠬᠥᠭᠡᠭᠡᠵᠦ ᠦᠭᠡᠢ ᠪᠣᠯᠤᠯᠲᠠᠢ᠃ ᠲᠡᠷᠡ ᠨᠢᠭᠡ ᠯᠡ ᠠᠮᠢᠰᠬᠤᠭᠠ ᠪᠠᠷ ᠭᠦᠶᠦᠭᠰᠡᠭᠡᠷ ᠬᠣᠲᠠ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠢᠷᠡᠵᠦ᠂ ᠡᠮ ᠦ᠋ᠨ ᠭᠡᠷ ᠦ᠋ᠨ ᠴᠣᠩᠬᠣᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠯᠡ᠃ ᠲᠡᠭᠦᠨ ᠦ᠌ ᠠᠮᠢᠰᠬᠤᠭᠠ ᠨᠢ ᠳᠡᠭᠡᠷᠡᠳᠡᠨ᠂ ᠠᠩᠬᠠᠨ ᠤ᠋ ᠠᠮᠢᠰᠬᠤᠯ ᠨᠢ ᠳᠠᠷᠠᠭᠠᠴᠢ ᠶ᠋ᠢᠨ ᠠᠮᠢᠰᠬᠤᠯ ᠢ᠋ᠶ᠋ᠠᠨ ᠵᠠᠯᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠲᠡᠢ ᠰᠢᠭ ᠰᠠᠨᠠᠭᠳᠠᠨᠠ᠃
ᠲᠡᠷᠡ ᠡᠨᠡ ᠪᠦᠬᠦᠨ ᠢ᠋ᠶ᠋ᠡᠨ ᠬᠠᠮᠢᠶᠠᠷᠤᠯ ᠦᠭᠡᠢ ᠪᠡᠷ ᠡᠮ ᠦ᠋ᠨ ᠭᠡᠷ ᠦ᠋ᠨ ᠪᠢᠴᠢᠬᠠᠨ ᠴᠣᠩᠬᠣ ᠪᠠᠷ ᠳᠣᠲᠣᠭᠰᠢ ᠬᠠᠷᠠᠬᠤᠯᠠ ᠡᠦ ᠹᠧᠩ ᠮᠧᠢ ᠡᠮ ᠦ᠋ᠨ ᠲᠠᠯᠪᠢᠭᠤᠷ ᠤ᠋ᠨ ᠨᠠᠭᠠᠭᠤᠷ ᠴᠠᠭᠠᠭᠤᠷ ᠶᠠᠭᠠᠷᠠᠯᠲᠠᠢ ᠡᠷᠭᠢᠴᠡᠵᠦ ᠪᠠᠢᠬᠤ ᠬᠠᠷᠠᠭᠳᠠᠪᠠ᠃ ᠲᠡᠷᠡ ᠠᠮᠢᠰᠬᠤᠭᠠ ᠪᠠᠨ ᠪᠠᠭᠠ ᠳᠠᠷᠤᠭᠠᠳ ᠡᠮ ᠦ᠋ᠨ ᠭᠡᠷ ᠦ᠋ᠨ ᠡᠭᠦᠳᠡ ᠶ᠋ᠢ ᠬᠥᠩᠭᠡᠬᠡᠨ ᠲᠣᠭᠰᠢᠪᠠ᠃
ᠪᠠᠬᠠᠨ ᠵᠣᠭᠬᠢᠭᠠᠳ ᠡᠦ ᠹᠧᠩ ᠮᠧᠢ ᠡᠭᠦᠳᠡᠨ ᠰᠢᠯ ᠦ᠋ᠨ ᠢ᠋ᠶ᠋ᠡᠨ ᠪᠦᠷᠬᠦᠭᠦᠯ ᠢ᠋ ᠢᠷᠡᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠲᠦᠪᠰᠢᠨ ᠪᠣᠯᠬᠤ ᠶ᠋ᠢ ᠲᠠᠨᠢᠵᠤ ᠡᠭᠦᠳᠡ ᠪᠡᠨ ᠬᠤᠷᠳᠤᠬᠠᠨ ᠨᠡᠭᠡᠭᠡᠪᠡ᠃
ᠲᠡᠷᠡ ᠲᠦᠪᠰᠢᠨ ᠢ᠋ ᠨᠢᠭᠡ ᠵᠡᠷᠭᠡ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ ᠳᠣᠣᠷᠠ ᠨᠢ ᠴᠢᠷᠠᠢ ᠨᠢ ᠬᠤᠪᠢᠷᠠᠨ ᠠᠶᠤᠬᠤ ᠳᠤ ᠪᠠᠨ ᠠᠮᠠ ᠪᠠᠨ ᠳᠠᠷᠤᠨ ᠭᠡᠳᠡᠷᠭᠦ ᠤᠬᠤᠷᠢᠯᠠ᠃
ᠤᠤᠯ ᠨᠢ ᠲᠦᠪᠰᠢᠨ ᠪᠢᠴᠢᠬᠠᠨ ᠪᠠᠭᠤᠳᠠᠯ ᠳ᠋ᠠᠬᠢ ᠳ᠋ᠢᠶᠠᠩᠬᠤᠸᠠ ᠪᠠᠷ ᠬᠠᠮᠢᠶᠠ ᠪᠦᠬᠦᠢ ᠪᠠᠢᠭᠤᠯᠭᠠ ᠲᠠᠢ ᠬᠠᠷᠢᠯᠴᠠᠵᠤ ᠪᠠᠷᠠᠭᠠᠳ ᠨᠢᠭᠤᠷ ᠳᠠᠬᠢ ᠴᠢᠰᠤ ᠨᠥᠵᠢ ᠪᠡᠨ ᠪᠠᠭᠠ ᠰᠠᠭᠠ ᠠᠷᠴᠢᠨ ᠴᠡᠪᠡᠷᠯᠡᠭᠡᠳ ᠡᠮᠨᠡᠯᠭᠡ ᠤᠷᠤᠭᠤ ᠶᠠᠭᠠᠷᠠᠤ ᠭᠦᠶᠦᠭᠰᠡᠨ ᠡᠴᠡ ᠰᠢᠷᠬᠠᠨ ᠠ᠋ᠴᠠ ᠨᠢ ᠳᠠᠬᠢᠨ ᠴᠢᠰᠤ ᠨᠥᠵᠢ ᠭᠣᠭᠣᠵᠢᠨ ᠬᠠᠪᠤᠳᠴᠤ ᠬᠥᠬᠡᠷᠡᠭᠡᠳ ᠬᠥᠮᠦᠨ ᠠᠶᠤᠮᠠᠷ ᠳᠦᠷᠢ ᠲᠡᠢ ᠪᠣᠯᠤᠭᠰᠠᠨ ᠠᠵᠢ᠃ ᠡᠦ ᠹᠧᠩ ᠮᠧᠢ ᠨᠡᠯᠢᠶᠡᠳ ᠮᠡᠯᠡᠷᠡᠭᠡᠳ ᠰᠠᠶᠢ ᠤᠬᠠᠭᠠᠷᠠᠨ᠄
— ᠲᠠ ᠣᠳᠣᠬᠠᠨ ᠨᠠᠳᠠ ᠳ᠋ᠢᠶᠠᠩᠬᠤᠸᠠ ᠢᠷᠡᠭᠦᠯᠵᠦ ᠡᠮ ᠦ᠋ᠨ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠭᠦᠳᠡ ᠶ᠋ᠢ ᠳᠠᠷᠤᠭᠠᠳ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠨᠢ ᠬᠠᠷᠢᠨ ᠰᠢᠷᠬᠠ ᠪᠠᠨ ᠡᠮᠨᠡᠭᠦᠯᠬᠦ ᠭᠡᠵᠦ ᠪᠠᠢᠭᠰᠠᠨ ᠪᠠᠢᠨᠠ ᠰᠢᠲᠠ᠃ ᠡᠮ ᠲᠦᠷᠬᠢᠵᠦ ᠪᠣᠭᠣᠬᠤ ᠤᠤ? ᠭᠡᠪᠡ᠃
— ᠮᠢᠨᠦ ᠰᠢᠷᠬᠠ ᠬᠡᠭᠵᠢᠷᠡᠵᠦ ᠰᠢᠯᠪᠤᠷᠠᠭᠰᠠᠨ ᠲᠡᠳᠦᠢ᠃ ᠪᠣᠭᠣᠵᠤ ᠪᠠᠭᠯᠠᠬᠤ ᠴᠢᠬᠤᠯᠠ ᠦᠭᠡᠢ᠃ ᠬᠠᠷᠢᠨ ᠲᠠ ᠪᠢᠳᠡᠨ ᠲᠡᠢ ᠨᠢᠭᠡ ᠭᠠᠵᠠᠷ ᠲᠦᠷᠭᠡᠨ ᠣᠴᠢᠬᠤ ᠴᠢᠬᠤᠯᠠ ᠲᠠᠢ ᠪᠣᠯᠵᠠᠢ᠃
— ᠠ᠋᠂ ᠨᠢᠭᠡ ᠭᠠᠵᠠᠷ ᠣᠴᠢᠨᠠ ᠭᠡᠨᠡ᠃ ᠬᠡᠵᠢᠶᠡ? ᠬᠠᠮᠢᠭᠠ?
— ᠣᠳᠣ ᠪᠠᠷ ᠢ᠋ᠶ᠋ᠠᠨ᠂ ᠡᠨᠳᠡ ᠡᠴᠡ ᠬᠡᠳᠦᠢ ᠬᠤᠷᠳᠤᠨ ᠵᠠᠢᠯᠠᠪᠠᠯ ᠲᠡᠳᠦᠢ ᠰᠠᠢᠨ᠃
ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠬᠥᠬᠡᠲᠤᠯᠢ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠪᠡ᠃
ᠲᠡᠷᠡ ᠲᠦᠪᠰᠢᠨ ᠦ᠌ ᠰᠢᠷᠬᠠ ᠰᠣᠷᠪᠢ ᠲᠠᠢ ᠨᠢᠭᠤᠷ ᠴᠢᠷᠠᠢ ᠂ ᠪᠤᠵᠠᠷ ᠪᠤᠷᠲᠠᠭ ᠪᠣᠯᠤᠭᠰᠠᠨ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ ᠬᠠᠷᠠᠭᠠᠳ ᠠᠢᠬᠤᠪᠲᠤᠷ ᠰᠣᠴᠢᠭᠰᠠᠨ ᠪᠣᠯᠪᠠᠴᠤ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠬᠠᠵᠠᠭᠤ ᠳ᠋ᠤᠨᠢ ᠮᠡᠯᠡᠷᠡᠨ ᠵᠣᠭᠰᠣᠯᠠ᠃
— ᠡᠦ ᠹᠧᠩ ᠮᠧᠢ᠂ ᠬᠤᠪᠴᠠᠰᠤ ᠪᠠᠨ ᠰᠣᠯᠢᠭᠰᠠᠨ ᠤ᠋ ᠬᠡᠷᠡᠭ ᠦᠭᠡᠢ᠃ ᠪᠢᠳᠡᠨ ᠢ᠋ ᠳᠠᠭᠠᠭᠠᠳ ᠬᠤᠷᠳᠤᠨ ᠁
— ᠥᠨᠥᠳᠥᠷ ᠮᠢᠨᠦ ᠵᠢᠵᠢᠭᠦᠷ᠃
— ᠴᠢ ᠰᠠᠨᠠᠭᠠ ᠠᠮᠤᠷ ᠪᠠᠢ᠂ ᠵᠢᠵᠢᠭᠦᠷ ᠢ᠋ ᠴᠢᠨᠢ ᠪᠢᠳᠡ ᠲᠣᠬᠢᠷᠠᠭᠤᠯᠬᠤ ᠶᠤᠮ ᠭᠡᠳ ᠬᠠᠭᠠᠰ ᠢᠳᠬᠠᠨ ᠬᠠᠭᠠᠰ ᠠᠯᠪᠠᠳᠠᠬᠤ ᠲᠠᠢ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠨᠢ ᠬᠠᠪᠴᠢᠨ ᠳᠠᠭᠠᠭᠤᠯᠤᠭᠠᠳ ᠭᠠᠷᠤᠯᠠ᠃
ᠲᠡᠳᠡ ᠡᠭᠦᠳᠡᠨ ᠪᠣᠱᠣᠭᠠ ᠶ᠋ᠢ ᠳᠥᠩᠭᠡᠵᠦ ᠠᠯᠬᠤᠲᠠᠯᠠ ᠳ᠋ᠢᠶᠠᠩᠬᠤᠸᠠ ᠶ᠋ᠢᠨ ᠬᠣᠩᠬᠣ ᠳᠠᠷᠴᠢᠭᠢᠨᠠᠨ ᠳᠤᠤᠭᠠᠷᠪᠠ᠃ ᠡᠦ ᠹᠧᠩ ᠮᠧᠢ ᠵᠣᠭᠬᠢᠨ ᠵᠣᠭᠰᠣᠲᠠᠯᠠ᠂ ᠲᠦᠪᠰᠢᠨ ᠬᠠᠵᠠᠭᠤ ᠠ᠋ᠴᠠ ᠨᠢ᠄
— ᠬᠠᠮᠢᠶᠠᠷᠬᠤ ᠬᠡᠷᠡᠭ ᠦᠭᠡᠢ᠂ ᠪᠢᠳᠡ ᠶᠠᠪᠤᠬᠤ ᠪᠠᠷ ᠢ᠋ᠶ᠋ᠠᠨ ᠶᠠᠪᠤᠶᠠ ᠭᠡᠳ ᠡᠷᠭᠢᠵᠦ ᠴᠦ᠍ ᠬᠠᠷᠠᠭᠰᠠᠨ ᠦᠭᠡᠢ᠃
ᠰᠣᠨᠢᠷᠬᠠᠯᠲᠠᠢ ᠨᠢ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠠᠰᠠᠷ ᠤ᠋ᠨ ᠭᠤᠲᠤᠮ ᠳ᠋ᠤ᠌ ᠬᠡᠳᠦ ᠬᠡᠳᠦᠨ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠲᠠᠮᠠᠬᠢ ᠲᠡᠳᠡᠨ ᠰᠤᠯᠠ ᠡᠷᠭᠢᠴᠡᠵᠦ ᠪᠠᠢᠬᠤ ᠬᠠᠷᠠᠭᠳᠠᠪᠠ᠃
ᠡᠳᠡᠭᠡᠷ ᠬᠥᠮᠦᠰ ᠢ᠋ ᠦᠵᠡᠭᠡᠳ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠳᠣᠲᠣᠷᠠ ᠨᠢᠭᠡ ᠯᠡ ᠡᠪ ᠦᠭᠡᠢ ᠪᠣᠯᠵᠠᠢ᠃ ᠴᠣᠬᠣᠮ ᠠᠶᠤᠵᠤ ᠪᠠᠢᠬᠤ ᠶᠤᠮ ᠤᠤ ᠰᠡᠵᠢᠭᠯᠡᠵᠦ ᠪᠠᠢᠬᠤ ᠶᠤᠮ ᠤᠤ? ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠰᠡᠷᠡᠵᠦ ᠮᠡᠳᠡᠬᠦ ᠦᠭᠡᠢ ᠪᠠᠢᠯᠠ᠃ ᠤᠳᠠᠯ ᠦᠭᠡᠢ ᠡᠭᠦᠳᠡᠨ ᠡᠮᠦᠨᠡ ᠵᠣᠭᠰᠣᠭᠠ ᠪᠠᠭᠠ ᠲᠡᠷᠭᠡᠨ ᠳ᠋ᠦ᠍ ᠰᠢᠷᠭᠤᠨ ᠣᠷᠣᠬᠤ ᠳ᠋ᠤ᠌ ᠳᠠᠬᠢᠭᠠᠳ ᠡᠨᠡ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠠᠭᠠᠨ ᠬᠡᠵᠢᠶᠡ ᠢᠷᠡᠳᠡᠭ ᠪᠣᠯ? ᠭᠡᠬᠦ ᠬᠠᠴᠢᠨ ᠪᠣᠳᠣᠯ ᠣᠷᠣᠵᠠᠢ᠃
ᠬᠥᠬᠡᠲᠤᠯᠢ ᠲᠡᠷᠭᠡᠨ ᠳᠦ ᠪᠡᠨ ᠣᠷᠣᠭᠠᠳ ᠮᠠᠰᠢᠨ ᠢ᠋ᠶ᠋ᠠᠨ ᠨᠣᠴᠣᠭᠠᠬᠤ ᠶ᠋ᠢᠨ ᠳᠠᠭᠠᠤ᠄
— ᠬᠠᠮᠢᠭᠠ ᠣᠴᠢᠬᠤ ᠪᠣᠢ? ᠭᠡᠯᠡ᠃
— 《ᠡᠯᠪᠡᠭ ᠵᠣᠯᠠᠲᠤ》 ᠬᠣᠭᠣᠯᠠᠨ ᠭᠡᠷ ᠲᠦ᠍ ᠭᠡᠵᠦ ᠲᠦᠪᠰᠢᠨ ᠭᠤᠸᠠᠢ ᠬᠠᠷᠢᠭᠤᠯᠪᠠ᠃
ᠪᠠᠭᠠ ᠲᠡᠷᠭᠡ ᠮᠤᠬᠤᠷ ᠬᠠᠷᠠᠩᠭᠤᠢ᠂ ᠮᠤᠷᠤᠢ ᠵᠥᠷᠢᠭᠦᠦ ᠵᠡᠭᠡᠯᠢ ᠭᠤᠳᠤᠮᠵᠢ ᠶ᠋ᠢ ᠳᠠᠮᠵᠢᠨ ᠠᠷᠪᠠᠭᠠᠳ ᠭᠠᠵᠠᠷ ᠳᠠᠪᠬᠢᠭᠠᠳ ᠬᠣᠲᠠ ᠶ᠋ᠢᠨ ᠡᠮᠦᠨᠡᠬᠢ 《ᠡᠯᠪᠡᠭ ᠵᠣᠯᠠᠲᠤ》ᠨᠡᠷᠡᠮᠵᠢᠲᠦ ᠬᠣᠭᠣᠯᠠᠨ ᠭᠡᠷ ᠲᠦ᠍ ᠬᠦᠷᠴᠦ ᠢᠷᠡᠵᠡᠢ᠃
ᠲᠦᠪᠰᠢᠨ ᠡᠦ ᠹᠧᠩ ᠮᠧᠢ ᠶ᠋ᠢ ᠳᠠᠭᠠᠭᠤᠯᠤᠨ ᠲᠡᠷᠭᠡᠨ ᠡᠴᠡ ᠪᠠᠭᠤᠭᠠᠳ᠄
— ᠲᠡᠷᠭᠡ ᠪᠡᠨ ᠬᠠᠭᠤᠴᠢᠨ ᠭᠠᠵᠠᠷ ᠳᠠᠯᠳᠠᠯᠠᠵᠤ ᠲᠠᠯᠪᠢᠭᠠᠳ ᠢᠷᠡ ᠭᠡᠵᠦ ᠠᠷᠠᠢ ᠯᠠ ᠰᠣᠨᠣᠰᠳᠠᠮᠠ ᠳᠠᠭᠤ ᠪᠠᠷ ᠬᠥᠬᠡᠲᠤᠯᠢ ᠳ᠋ᠤ᠌ ᠲᠤᠰᠢᠶᠠᠭᠠᠳ ᠬᠣᠶᠠᠭᠤᠯᠠ ᠤᠷᠢᠳᠠᠪᠡᠷ ᠬᠣᠭᠣᠯᠠᠨ ᠭᠡᠷ ᠲᠦ᠍ ᠣᠷᠣᠯᠠ᠃
ᠲᠦᠪᠰᠢᠨ ᠬᠣᠶᠠᠳᠤᠭᠠᠷ ᠳᠠᠪᠬᠤᠷᠯᠢᠭ ᠲᠤ᠌ ᠨᠢᠭᠡ ᠵᠢᠵᠢᠭ ᠲᠤᠰᠠᠭᠠᠷ ᠮᠤᠬᠤᠯᠠᠭ ᠠᠪᠴᠤ ᠡᠦ ᠹᠧᠩ ᠮᠧᠢ ᠶ᠋ᠢ ᠰᠠᠭᠤᠯᠭᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠨ ᠴᠡᠪᠡᠷᠯᠡᠵᠦ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠭᠦᠪᠢᠵᠦ ᠲᠡᠭᠰᠢᠯᠡᠭᠡᠳ ᠪᠠᠷᠠᠬᠤ ᠳ᠋ᠤ᠌ ᠬᠥᠬᠡᠲᠤᠯᠢ ᠣᠷᠣᠵᠤ ᠢᠷᠡᠪᠡ᠃
ᠭᠤᠷᠪᠠᠭᠤᠯᠠ ᠰᠠᠭᠤᠭᠠᠳ ᠬᠡᠳᠦᠨ ᠵᠦᠢᠯ ᠦ᠋ᠨ ᠨᠣᠭᠣᠭᠠ ᠳᠠᠭᠤᠳᠠᠨ ᠠᠷᠢᠬᠢ ᠳᠠᠷᠠᠰᠤ ᠠᠪᠴᠤ ᠥᠷᠥᠪᠡ᠃
ᠲᠦᠪᠰᠢᠨ ᠭᠤᠷᠪᠠᠨ ᠬᠤᠨᠳᠠᠭᠠᠨ ᠳ᠋ᠤ᠌ ᠠᠷᠢᠬᠢ ᠳᠦᠭᠦᠷᠭᠡᠵᠦ ᠬᠥᠮᠦᠨ ᠪᠣᠯᠭᠠᠨ ᠤ᠋ ᠡᠮᠦᠨᠡ ᠲᠠᠯᠪᠢᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠦ᠋ᠨ ᠬᠤᠨᠳᠠᠭᠠ ᠪᠠᠨ ᠡᠷᠭᠦᠵᠦ᠄
— ᠥᠨᠥᠳᠥᠷ ᠡᠦ ᠹᠧᠩ ᠮᠧᠢ ᠠᠪᠠᠭᠠᠢ ᠪᠢᠳᠡᠨ ᠦ᠌ ᠪᠢᠳᠠᠭᠤ ᠤᠷᠢᠯᠭᠠ ᠶ᠋ᠢ ᠬᠦᠯᠢᠶᠡᠨ ᠡᠨᠳᠡ ᠢᠷᠡᠭᠰᠡᠨ ᠳ᠋ᠦ᠍ ᠨᠢᠭᠡ ᠬᠤᠨᠳᠠᠭᠠ ᠡᠷᠭᠦᠶᠡ᠃ ᠵᠠ᠂ ᠤᠷᠢᠳ ᠢ᠋ᠶ᠋ᠠᠷ ᠨᠢᠭᠡ ᠬᠤᠨᠳᠠᠭᠠ ᠲᠤᠯᠭᠠᠴᠢᠬᠠᠶᠠ ᠭᠡᠳ ᠡᠦ ᠹᠧᠩ ᠮᠧᠢ ᠶ᠋ᠢ ᠰᠢᠷᠳᠡᠪᠡ᠃
ᠡᠮ ᠲᠣᠬᠢᠷᠠᠭᠤᠯᠬᠤ ᠭᠡᠷ ᠡᠴᠡ ᠭᠠᠷᠴᠤ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠳᠣᠲᠣᠷᠠ ᠨᠢ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠰᠠᠮᠠᠭᠤᠷᠠᠵᠠᠢ᠃ ᠡᠨᠡ ᠬᠣᠶᠠᠷ ᠬᠠᠤᠯᠢ ᠶ᠋ᠢᠨ ᠠᠵᠢᠯᠲᠠᠨ ᠢ᠋ ᠳᠠᠭᠠᠵᠤ ᠲᠡᠷᠭᠡᠨ ᠳ᠋ᠦ᠍ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠠᠮᠤᠭ ᠤ᠋ᠨ ᠮᠠᠭᠤ ᠲᠠᠯᠠ ᠠ᠋ᠴᠠ ᠲᠠᠭᠠᠮᠠᠭᠯᠠᠵᠤ᠂ ᠣᠳᠣ ᠯᠠ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠨ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠨᠢ ᠡᠨᠡ ᠪᠠᠢᠬᠤ ᠭᠡᠵᠦ ᠪᠣᠳᠣᠵᠠᠢ᠃ ᠭᠡᠲᠡᠯᠡ ᠪᠠᠭᠠ ᠲᠡᠷᠭᠡ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠣᠨᠳᠣᠣ ᠵᠦᠭ ᠤᠷᠤᠭᠤ ᠳᠠᠪᠬᠢᠬᠤ ᠳ᠋ᠤ᠌ ᠲᠡᠷᠡ ᠭᠠᠢᠬᠠᠰᠢ ᠠᠯᠳᠠᠵᠠᠢ᠃ ᠶᠡᠷᠦ ᠨᠢ ᠥᠨᠥᠳᠥᠷ ᠦ᠋ᠨ ᠤᠴᠠᠷᠠᠭᠰᠠᠨ ᠬᠡᠷᠡᠭ ᠦ᠋ᠳ ᠬᠠᠴᠢᠨ ᠰᠣᠨᠢᠨ ᠰᠠᠨᠠᠭᠳᠠᠵᠤ᠂ ᠬᠠᠤᠯᠢ ᠶ᠋ᠢᠨ ᠠᠵᠢᠯᠲᠠᠳ ᠲᠤ᠌ ᠣᠨᠴᠠᠭᠠᠢ ᠬᠡᠷᠡᠭ ᠤᠴᠢᠷ ᠲᠤᠯᠭᠠᠷᠠᠭᠰᠠᠨ ᠪᠣᠯᠪᠠ ᠤᠤ ᠭᠡᠵᠦ ᠳᠣᠲᠣᠷᠠ ᠪᠠᠨ ᠡᠯᠳᠡᠪ ᠢ᠋ᠶ᠋ᠡᠷ ᠪᠠᠷᠤᠭᠯᠠᠵᠤ ᠪᠠᠢᠯᠠ᠃ ᠴᠠᠭ ᠭᠠᠷᠤᠢ ᠶ᠋ᠢᠨ ᠡᠮᠦᠨᠡ ᠲᠡᠭᠦᠨ ᠢ᠋ ᠵᠢᠵᠢᠭᠦᠷ ᠦ᠋ᠨ ᠭᠡᠷ ᠲᠤ ᠪᠠᠨ ᠲᠠᠩᠭᠠᠢᠨ ᠬᠡᠪᠲᠡᠭᠡᠳ ᠨᠣᠮ ᠤᠩᠰᠢᠵᠤ ᠪᠠᠢᠲᠠᠯᠠ ᠲᠦᠪᠰᠢᠨ ᠳ᠋ᠢᠶᠠᠩᠬᠤᠸᠠ ᠢᠷᠡᠭᠦᠯᠦᠭᠡᠳ᠂ ᠲᠡᠭᠦᠨ ᠢ᠋ ᠡᠮ ᠦ᠋ᠨ ᠭᠡᠷ ᠡᠴᠡ ᠪᠡᠨ ᠪᠤᠤ ᠭᠠᠷ᠂ ᠲᠠᠨᠢᠬᠤ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠢ᠋ ᠪᠢᠲᠡᠭᠡᠢ ᠤᠷᠤᠭᠤᠯ᠂ ᠪᠢ ᠤᠳᠠᠯ ᠦᠭᠡᠢ ᠣᠴᠢᠨᠠ ᠭᠡᠰᠡᠨ ᠪᠠᠢᠵᠠᠢ᠃ ᠡᠳᠡ ᠶᠠᠭᠠᠬᠢᠭᠠᠳ ᠨᠠᠮᠠ ᠶᠢ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠰᠢᠭᠤᠳ ᠬᠦᠷᠭᠡᠬᠦ ᠦᠭᠡᠢ᠂ ᠬᠠᠷᠢᠨ ᠬᠣᠭᠣᠯᠠᠨ ᠭᠡᠷ ᠲᠦ᠍ ᠳᠠᠭᠠᠭᠤᠯᠵᠤ ᠠᠪᠴᠢᠷᠠᠭᠠᠳ ᠪᠤᠳᠠᠭᠠᠯᠠᠵᠤ ᠪᠠᠢᠬᠤ ᠪᠣᠢ? ᠰᠣᠨᠣᠰᠬᠤ ᠳ᠋ᠤ᠌ ᠠᠯᠠᠭᠳᠠᠬᠤ ᠶᠠᠯᠠᠲᠠᠨ ᠳ᠋ᠤ᠌ ᠤᠷᠢᠳᠴᠢᠯᠠᠨ ᠰᠠᠢᠨ ᠢᠳᠡᠭᠦᠯᠵᠦ ᠤᠤᠭᠤᠯᠭᠠᠳᠠᠭ ᠭᠡᠨᠡ ᠪᠢᠯᠡ᠃ ᠥᠨᠥᠳᠥᠷ ᠲᠤᠰᠬᠠᠢᠯᠠᠨ ᠪᠤᠳᠠᠭᠠᠯᠠᠵᠤ ᠪᠠᠢᠬᠤ ᠨᠢ ᠡᠢᠮᠦ ᠤᠴᠢᠷ ᠲᠠᠢ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠲᠦᠪᠰᠢᠨ ᠦ᠌ ᠡᠷᠭᠦᠭᠰᠡᠨ ᠬᠤᠨᠳᠠᠭᠠ ᠶ᠋ᠢ ᠪᠠᠬᠠᠨ ᠰᠢᠷᠳᠡᠭᠡᠳ ᠳᠣᠲᠣᠷᠠ ᠪᠠᠨ ᠵᠠ᠂ ᠶᠠᠭᠤ ᠪᠣᠯᠬᠤ ᠠ᠋ᠴᠠ ᠪᠠᠨ ᠠᠯᠳᠠᠷᠠᠭ! ᠨᠢᠭᠡᠨᠲᠡ ᠲᠤᠯᠭᠠᠵᠤ ᠪᠠᠢᠬᠤ ᠬᠤᠨᠳᠠᠭᠠ ᠶᠤᠮ ᠴᠢᠨᠢ ᠬᠥᠨᠲᠡᠷᠴᠦ ᠤᠷᠭᠢᠶᠠ ᠭᠡᠵᠦ ᠪᠣᠳᠣᠨ ᠮᠥᠷᠭᠥᠭᠦᠯᠦᠭᠰᠡᠨ ᠳ᠋ᠦ᠍ ᠭᠤᠷᠪᠠᠨ ᠬᠥᠮᠦᠨ ᠦ᠌ ᠠᠩᠬᠠᠨ ᠤ᠋ ᠬᠤᠨᠳᠠᠭᠠ ᠬᠣᠭᠣᠰᠣᠷᠠᠪᠠ᠃ ᠡᠦ ᠹᠧᠩ ᠮᠧᠢ ᠪᠣᠢ ᠪᠦᠬᠦᠢ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠥᠪᠯᠡᠷᠡᠭᠦᠯᠦᠨ ᠡᠳᠡᠨ ᠦ᠌ ᠶᠠᠭᠤ ᠠᠰᠠᠭᠤᠵᠤ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠬᠤ ᠶ᠋ᠢ ᠬᠦᠯᠢᠶᠡᠭᠰᠡᠭᠡᠷ ᠪᠠᠢᠭᠠᠳ ᠭᠤᠷᠪᠠᠨ ᠬᠤᠨᠳᠠᠭᠠ ᠤᠤᠭᠤᠲᠠᠯᠠ ᠶᠡᠷᠦ ᠡᠢᠮᠦ ᠲᠡᠢᠮᠦ ᠶᠠᠭᠤᠮᠠ ᠠᠰᠠᠭᠤᠵᠤ ᠪᠠᠢᠴᠠᠭᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠶᠠᠭ ᠯᠠ ᠨᠠᠢᠵᠠ ᠨᠥᠬᠥᠳ ᠠᠭᠤᠯᠵᠠᠨ ᠨᠠᠷᠭᠢᠵᠤ ᠬᠥᠭᠡᠷᠦᠯᠳᠦᠵᠦ ᠪᠠᠢᠬᠤ ᠰᠢᠭ᠋ ᠬᠡᠯᠡᠯᠴᠡᠵᠦ ᠪᠠᠢᠯᠠ᠃
— ᠲᠠ ᠠᠩᠬᠠᠨ ᠳᠤ ᠪᠠᠨ ᠡᠨᠡ ᠬᠣᠭᠣᠯᠠᠨ ᠭᠡᠷ ᠲᠦ᠍ ᠢᠷᠡᠵᠦ ᠪᠠᠢᠭᠰᠠᠨ ᠤᠤ?
— ᠦᠭᠡᠢ᠃
— ᠪᠣᠯᠤᠮᠠᠷ ᠬᠣᠭᠣᠯᠠᠨ ᠭᠡᠷ ᠶᠦᠮ ᠰᠢᠦ᠃
— ᠶᠡᠬᠡ ᠵᠦᠭᠡᠷ ᠰᠠᠨᠠᠭᠳᠠᠵᠤ ᠪᠠᠢᠨᠠ᠃
— ᠲᠠᠨ ᠤ᠋ ᠵᠢᠵᠢᠭᠦᠷ ᠥᠨᠥ ᠣᠷᠣᠢ ᠬᠡᠳᠦᠨ ᠴᠠᠭ ᠲᠤ᠌ ᠪᠠᠭᠤᠬᠤ ᠪᠠᠢᠭᠰᠠᠨ ᠪᠣᠢ?
— ᠰᠥᠨᠢ ᠶ᠋ᠢᠨ ᠠᠷᠪᠠᠨ ᠴᠠᠭ ᠲᠤ᠌᠃
— ᠲᠡᠢᠮᠦ ᠣᠷᠣᠢ ᠠᠵᠢᠯ ᠪᠠᠭᠤᠪᠠᠯ ᠭᠡᠷ ᠲᠤ ᠪᠠᠨ ᠬᠠᠷᠢᠬᠤ ᠵᠠᠮ ᠳᠤ ᠪᠠᠨ ᠠᠶᠤᠬᠤ ᠦᠭᠡᠢ ᠤᠤ?
— ᠵᠠᠷᠢᠮ ᠳᠤ ᠪᠠᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠲᠤᠰᠬᠠᠢ ᠵᠢᠵᠢᠭᠦᠷ ᠲᠡᠷᠭᠡ ᠬᠦᠷᠭᠡᠳᠡᠭ᠃ ᠵᠠᠷᠢᠮ ᠳᠤ ᠪᠠᠨ ᠬᠣᠷᠢᠶᠠᠨ ᠠ᠋ᠴᠠ ᠲᠣᠬᠢᠷᠠᠭᠤᠯᠤᠭᠰᠠᠨ ᠭᠡᠷ ᠲᠦ᠍ ᠬᠣᠨᠣᠳᠠᠭ᠃
— ᠨᠢᠭᠡ ᠭᠠᠷᠠᠭ ᠲᠤ᠌ ᠬᠡᠳᠦ ᠤᠳᠠᠭᠠ ᠰᠥᠨᠢ ᠶ᠋ᠢᠨ ᠵᠢᠵᠢᠭᠦᠷ ᠳᠠᠭᠠᠷᠠᠳᠠᠭ ᠪᠣᠢ?
— ᠨᠢᠭᠡ ᠯᠡ ᠤᠳᠠᠭᠠ ᠳᠠᠭᠠᠷᠠᠳᠠᠭ᠃ ᠥᠨᠥᠳᠥᠷ ᠪᠢ ᠬᠥᠮᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠵᠢᠵᠢᠭᠦᠷᠯᠡᠭᠰᠡᠨ ᠶᠦᠮ᠃
— ᠬᠡᠨ ᠦ᠌ ᠵᠢᠵᠢᠭᠦᠷ ᠢ᠋ ᠣᠷᠣᠯᠠᠭᠰᠠᠨ ᠪᠣᠢ?
— ᠰᠢᠶᠣᠤ ᠸᠠᠩ ᠤ᠋ᠨ᠃
— ᠲᠡᠷᠡ ᠶᠠᠭᠠᠬᠢᠭᠠᠳ ᠵᠢᠵᠢᠭᠦᠷ ᠢ᠋ᠶ᠋ᠡᠨ ᠴᠢᠮᠠ ᠪᠠᠷ ᠣᠷᠣᠯᠠᠭᠤᠯᠤᠭᠰᠠᠨ ᠪᠣᠢ?
— ᠡᠪᠡᠳᠴᠢᠯᠡᠭᠰᠡᠨ᠃ ᠲᠡᠭᠡᠭᠡᠳ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠴᠢᠯᠥᠭᠡ ᠠᠪᠤᠭᠰᠠᠨ ᠭᠡᠨᠡ᠃
— ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠲᠠᠨ ᠢ᠋ ᠭᠤᠶᠤᠭᠰᠠᠨ ᠤᠤ? ᠡᠷᠬᠢᠯᠡᠭᠴᠢ ᠴᠢᠨᠢ ᠲᠣᠬᠢᠷᠠᠭᠤᠯᠤᠭᠰᠠᠨ ᠶᠤᠮ ᠤᠤ?
— ᠦᠳᠡ ᠳ᠋ᠦ᠍ ᠰᠢᠶᠣᠤ ᠸᠠᠩ ᠮᠠᠨ ᠤ᠋ ᠳ᠋ᠤ᠌ ᠲᠤᠰᠬᠠᠢ ᠣᠴᠢᠵᠤ ᠭᠤᠶᠤᠭᠰᠠᠨ ᠶᠤᠮ᠃
— ᠲᠠᠨ ᠤ᠋ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ CC66 ᠳ᠋ᠤᠭᠠᠷ ᠡᠮ ᠢ᠋ ᠵᠠᠷᠤᠳᠠᠭ ᠤᠤ?
— ᠦᠭᠡᠢ᠂ ᠲᠡᠷᠡ ᠡᠮ ᠪᠣᠯ ᠣᠷᠴᠢᠮ ᠤ᠋ᠨ ᠬᠣᠶᠠᠷ ᠵᠢᠯ ᠳ᠋ᠦ᠍ ᠤᠯᠤᠰ ᠠ᠋ᠴᠠ ᠰᠤᠳᠤᠯᠤᠨ ᠭᠠᠷᠭᠠᠨᠰᠠᠨ ᠣᠨᠴᠠᠭᠠᠢ ᠴᠢᠨᠠᠷ ᠤ᠋ᠨ ᠬᠣᠣᠷᠲᠤ ᠡᠮ᠃ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠳ᠋ᠤ᠌ ᠵᠥᠪᠬᠡᠨ ᠨᠢᠭᠡᠳᠦᠭᠡᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ᠯᠠ ᠵᠠᠷᠤᠬᠤ ᠡᠷᠬᠡ ᠲᠡᠢ᠃ ᠮᠠᠨ ᠤ᠋ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠣᠷᠣᠭᠤᠯᠬᠤ ᠡᠷᠬᠡ ᠪᠠᠰᠠ ᠦᠭᠡᠢ᠃ ᠪᠢᠳᠡ ᠵᠥᠪᠬᠡᠨ ᠡᠮᠨᠡᠯᠭᠡ ᠶ᠋ᠢᠨ ᠳᠣᠲᠣᠭᠠᠳᠤ ᠰᠡᠳᠬᠦᠯ ᠳᠡᠭᠡᠷᠡ ᠡᠴᠡ ᠡᠨᠡ ᠬᠦ᠌ ᠡᠮ ᠦ᠋ᠨ ᠦᠢᠯᠡᠳᠦᠯ ᠬᠡᠷᠡᠭᠴᠡᠭᠡ ᠶ᠋ᠢ ᠨᠢ ᠣᠯᠵᠤ ᠮᠡᠳᠡᠭᠰᠡᠨ ᠶᠦᠮ᠃
— ᠁
ᠲᠡᠳᠡ ᠢᠩᠭᠢᠭᠡᠳ ᠬᠦᠦᠷᠨᠢᠨ ᠶᠠᠷᠢᠯᠴᠠᠬᠤ ᠶ᠋ᠢᠨ ᠳᠠᠭᠠᠤ ᠬᠡᠳᠦ ᠬᠡᠳᠦᠨ ᠬᠤᠨᠳᠠᠭᠠ ᠤᠤᠭᠤᠵᠠᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠲᠣᠯᠣᠭᠠᠢ ᠨᠢ ᠡᠷᠭᠢᠬᠦ ᠰᠢᠭ ᠪᠣᠯᠪᠠ᠃
ᠰᠥᠨᠢ ᠶ᠋ᠢᠨ ᠠᠷᠪᠠᠨ ᠨᠢᠭᠡᠨ ᠴᠠᠭ ᠪᠣᠯᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠦᠪᠰᠢᠨ ᠰᠠᠶᠢ ᠵᠢᠩᠬᠢᠨᠢ ᠰᠡᠳᠦᠪ ᠲᠤ ᠪᠠᠨ ᠣᠷᠣᠭᠰᠠᠨ ᠮᠠᠶᠢᠭ ᠲᠠᠢ ᠠᠮᠠ ᠨᠡᠭᠡᠭᠡᠨ᠄
— ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠥᠨᠥᠳᠥᠷ ᠪᠢᠳᠡ ᠨᠢᠭᠡ ᠣᠨᠴᠠᠭᠠᠢ ᠤᠴᠢᠷ ᠲᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠠ᠋ᠴᠠ ᠲᠠᠨ ᠢ᠋ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠶᠠᠷᠢᠯᠴᠠᠬᠤ ᠴᠢᠬᠤᠯᠠ ᠲᠠᠢ ᠪᠣᠯᠪᠠ᠃ ᠠᠭᠤᠴᠢᠯᠠᠭᠠᠷᠠᠢ᠃ ᠲᠡᠷᠡᠴᠢᠯᠡᠨ ᠰᠥᠨᠢ ᠬᠠᠭᠠᠰ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠲᠠᠨ ᠢ᠋ ᠳᠠᠭᠠᠭᠤᠯᠤᠨ ᠭᠡᠷ ᠲᠦ᠍ ᠴᠢᠨᠢ ᠣᠴᠢᠶᠠ᠂ ᠪᠣᠯᠤᠨᠠ ᠪᠢᠵᠡ?
ᠡᠦ ᠹᠧᠩ ᠮᠧᠢ ᠪᠠᠬᠠᠨ ᠳᠣᠷᠣᠭᠰᠢ ᠬᠠᠷᠠᠭᠠᠳ᠄
— ᠲᠡᠷᠡ ᠴᠦ᠍ ᠪᠣᠯᠤᠨᠠ ᠭᠡᠪᠡ᠃
— ᠭᠡᠲᠡᠯᠡ ᠨᠢᠭᠡ ᠱᠠᠭᠠᠷᠳᠠᠯᠭᠠ ᠪᠣᠢ᠃ ᠲᠠ ᠭᠡᠷ ᠲᠤ ᠪᠠᠨ ᠣᠷᠣᠭᠰᠠᠨ ᠤ᠋ ᠳᠠᠷᠠᠭᠠ ᠪᠢᠳᠡᠨ ᠦ᠌ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠡᠷ ᠠᠮᠠ ᠨᠡᠭᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠪᠣᠯᠤᠨᠠ ᠤᠤ?
— ᠪᠣᠯᠤᠨᠠ᠃
ᠰᠥᠨᠢ ᠬᠠᠭᠠᠰ ᠥᠩᠭᠡᠷᠡᠪᠡ᠃ ᠣᠳᠣᠨ ᠮᠡᠴᠢᠳ ᠣᠭᠲᠠᠷᠭᠤᠢ ᠳᠦᠭᠦᠷᠡᠩ ᠭᠢᠯᠠᠯᠵᠠᠭᠠᠳ᠂ ᠰᠥᠨᠢ ᠶᠡᠬᠡ ᠰᠠᠷᠠᠭᠤᠯ ᠲᠤᠩᠭᠠᠯᠠᠭ ᠪᠠᠢᠯᠠ᠃
ᠲᠡᠳᠡᠨ ᠢ᠋ ᠬᠣᠭᠣᠯᠠᠨ ᠭᠡᠷ ᠡᠴᠡ ᠭᠠᠷᠬᠤ ᠳ᠋ᠤ᠌ ᠰᠥᠨᠢ ᠶ᠋ᠢᠨ ᠭᠦᠨ ᠦ᠌ ᠰᠡᠷᠢᠭᠦᠨ ᠵᠢᠪᠠᠷ ᠡᠮᠦᠨᠡ ᠡᠴᠡ ᠨᠢ ᠰᠡᠩᠭᠢᠨᠡᠨ ᠦᠯᠢᠶᠡᠵᠦ᠂ ᠲᠠᠷᠢᠬᠢ ᠰᠡᠷᠭᠦᠭᠡᠨ ᠴᠡᠭᠡᠵᠢ ᠠᠭᠤᠵᠢᠷᠠᠭᠤᠯᠤᠨᠠ᠃
ᠭᠤᠷᠪᠠᠭᠤᠯᠠ ᠲᠡᠷᠭᠡᠨ ᠳ᠋ᠦ᠍ ᠣᠷᠣᠮᠠᠭᠴᠠ ᠲᠦᠪᠰᠢᠨ ᠲᠡᠷᠭᠡ ᠵᠢᠯᠣᠭᠣᠳᠤᠨ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠᠬᠢ ᠰᠠᠭᠤᠭᠠᠯᠢ ᠠᠷᠠᠳ ᠤ᠋ᠨ ᠠᠰᠠᠷ ᠤᠷᠤᠭᠤ ᠨᠢᠰᠬᠡᠨ ᠳᠣᠪᠲᠣᠯᠭᠠᠯᠠ᠃
ᠲᠡᠷᠭᠡᠨ ᠳ᠋ᠦ᠍ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠵᠢᠰᠦᠷᠬᠡᠭ ᠭᠣᠶᠣ ᠴᠢᠷᠠᠢ ᠨᠢ ᠬᠤᠵᠢᠢᠨ ᠴᠠᠢᠵᠤ ᠪᠡᠶᠡ ᠨᠢ ᠴᠡᠴᠡᠷᠬᠢᠯᠡᠨ ᠬᠥᠳᠡᠯᠦᠨᠡ᠃ ᠡᠨᠡ ᠨᠢ ᠪᠠᠷᠤᠭ ᠯᠠ ᠥᠨᠥ ᠦᠳᠡᠰᠢ ᠴᠣᠬᠣᠮ ᠶᠠᠭᠤ ᠪᠣᠯᠳᠠᠭ ᠪᠣᠯ? ᠭᠡᠵᠦ ᠡᠯᠳᠡᠪ ᠢ᠋ ᠪᠣᠳᠣᠨ ᠠᠶᠤᠵᠤ ᠰᠣᠴᠢᠭᠰᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠪᠠᠢᠬᠠ᠃
ᠪᠠᠭᠠ ᠲᠡᠷᠭᠡ ᠢᠯᠦᠮ ᠵᠢᠯᠦᠮᠭᠡᠨ ᠰᠥᠨᠢ ᠶ᠋ᠢᠨ ᠵᠡᠭᠡᠯᠢ ᠪᠡᠷ ᠠᠷᠪᠠᠭᠠᠳ ᠮᠢᠨᠦ᠋ᠲ ᠳᠠᠪᠬᠢᠭᠠᠳ᠂ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠰᠠᠭᠤᠭᠠ ᠠᠰᠠᠷ ᠤ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠪᠡ᠃
ᠡᠦ ᠹᠧᠩ ᠮᠧᠢ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠵᠦ ᠲᠡᠷᠡ ᠬᠣᠶᠠᠭᠤᠯᠠ ᠶ᠋ᠢ ᠳᠣᠲᠣᠭᠰᠢ ᠵᠠᠯᠠᠪᠠ᠃
ᠲᠦᠪᠰᠢᠨ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠨᠢᠳᠦᠨ ᠳᠣᠬᠢᠶᠠ ᠥᠭᠴᠦ ᠰᠡᠮᠡᠬᠡᠷ ᠳᠣᠲᠣᠭᠰᠢ ᠣᠷᠣᠭᠤᠯᠤᠨ ᠡᠭᠦᠳᠡᠨ ᠦ᠌ ᠳᠣᠲᠣᠷᠠ ᠲᠠᠯᠠ ᠳ᠋ᠤ᠌ ᠵᠣᠭᠰᠣᠭᠠᠭᠠᠳ᠂ ᠳᠡᠭᠡᠳᠦ ᠬᠠᠷᠮᠠᠨ ᠠ᠋ᠴᠠ ᠪᠠᠨ ᠨᠢᠭᠡ ᠬᠤᠪᠢ ᠨᠡᠩᠵᠢᠬᠦ ᠲᠡᠮᠳᠡᠭ ᠭᠠᠷᠭᠠᠨ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠶᠣᠰᠣᠨ ᠲᠡᠳᠦᠢ ᠦᠵᠡᠭᠦᠯᠪᠡ᠃
ᠲᠡᠭᠡᠭᠡᠳ ᠲᠡᠳᠡ ᠬᠣᠶᠠᠭᠤᠯᠠ ᠭᠡᠷ ᠢ᠋ ᠨᠢ ᠨᠡᠩᠵᠢᠵᠦ ᠡᠬᠢᠯᠡᠯᠡ᠃
ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠪᠡᠷ ᠤᠨᠲᠠᠬᠤ ᠣᠷᠣ ᠠ᠋ᠴᠠ ᠬᠣᠯᠠ ᠦᠭᠡᠢ ᠪᠠᠢᠭᠠ ᠱᠠᠹᠠ ᠳᠣᠣᠷᠠ ᠠ᠋ᠴᠠ ᠮᠠᠰᠢ ᠨᠢᠭᠤᠴᠠ ᠪᠠᠷ ᠲᠣᠬᠢᠷᠠᠭᠤᠯᠤᠨ ᠲᠠᠯᠪᠢᠭᠰᠠᠨ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠬᠤ ᠮᠠᠰᠢᠨ ᠡᠷᠢᠵᠦ ᠭᠠᠷᠭᠠᠪᠠ᠃ ᠲᠦᠪᠰᠢᠨ ᠪᠠᠭᠤᠯᠭᠠᠨ ᠠᠪᠤᠭᠠᠳ ᠨᠡᠭᠡᠭᠡᠯᠲᠡ ᠶ᠋ᠢ ᠨᠢ ᠬᠠᠭᠠᠬᠤ ᠶ᠋ᠢᠨ ᠳᠠᠭᠠᠤ᠄
— ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠣᠳᠣ ᠪᠢᠳᠡᠨ ᠦ᠌ ᠶᠠᠷᠢᠯᠴᠠᠬᠤ ᠶ᠋ᠢ ᠬᠥᠮᠦᠨ ᠬᠤᠯᠠᠭᠠᠢᠯᠠᠨ ᠰᠣᠨᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ᠃ ᠣᠳᠣ ᠦᠭᠡ ᠳᠤᠤᠭᠠᠷᠴᠤ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠲᠣᠭᠲᠠᠭᠠᠯ ᠢ᠋ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠶᠠ ᠭᠡᠳ ᠱᠣᠭᠲᠠᠢᠬᠠᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠡᠦ ᠹᠧᠩ ᠮᠧᠢ ᠡᠳᠡᠭᠡᠷ ᠢ᠋ ᠦᠵᠡᠭᠡᠳ ᠪᠠᠯᠠᠭ ᠠᠯᠲᠠᠨ ᠴᠡᠴᠡᠷᠡᠵᠦ ᠵᠣᠭᠰᠣᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠭᠠᠳ ᠣᠷᠣ ᠳᠡᠭᠡᠷᠡ ᠪᠡᠨ ᠯᠠᠭᠬᠢᠲᠠᠯᠠ ᠰᠠᠭᠤᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠮᠠᠩᠨᠠᠢ ᠪᠠᠨ ᠬᠥᠩᠭᠡᠨ ᠠᠳᠬᠤᠭᠠᠳ᠄
— ᠡᠨᠡ᠂ ᠡᠨᠡ ᠴᠣᠬᠣᠮ ᠶᠠᠮᠠᠷ ᠤᠴᠢᠷ ᠪᠣᠯᠴᠢᠬᠠᠪᠠ? ᠭᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠰᠠᠭᠤᠵᠠᠢ᠃
— ᠡᠨᠡ ᠪᠣᠯ ᠳᠠᠷᠤᠢ ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠠᠷᠪᠠ ᠶᠢᠰᠦᠨ ᠦ᠌ ᠦᠦᠷ ᠢ᠋ᠶ᠋ᠡᠷ ᠴᠢᠮᠠ ᠲᠠᠢ ᠳ᠋ᠢᠶᠠᠩᠬᠤᠸᠠ ᠨᠡᠪᠲᠡᠷᠡᠭᠰᠡᠨ ᠲᠡᠷᠡ ᠬᠥᠮᠦᠨ ᠦ᠌ ᠬᠢᠭᠰᠡᠨ ᠠᠵᠢᠯᠯᠠᠭᠠ ᠰᠢᠦ᠃ ᠲᠡᠷᠡ ᠬᠥᠮᠦᠨ ᠬᠡᠨ ᠪᠣᠯᠬᠤ ᠶ᠋ᠢ ᠴᠢ ᠲᠠᠨᠢᠬᠤ ᠦᠭᠡᠢ ᠪᠠᠢᠬᠠ ᠭᠡᠵᠦ ᠲᠦᠪᠰᠢᠨ ᠭᠤᠸᠠᠢ ᠡᠦ ᠹᠧᠩ ᠮᠧᠢ ᠶ᠋ᠢ ᠠᠵᠢᠭᠯᠠᠰᠬᠢᠵᠤ ᠠᠪᠤᠭᠠᠳ ᠡᠷᠡᠰ ᠲᠤᠯᠭᠠᠨ ᠬᠡᠯᠡᠪᠡ᠃
ᠡᠦ ᠹᠧᠩ ᠮᠧᠢ ᠶᠢᠨ ᠴᠢᠷᠠᠢ ᠳᠣᠣᠷᠠ ᠨᠢ ᠬᠤᠪᠢᠷᠠᠵᠤ ᠦᠭᠡ ᠪᠡᠨ ᠮᠠᠯᠵᠢᠨ᠄
— ᠦᠭᠡᠢ᠂ ᠦᠭᠡᠢ᠂ ᠨᠠᠳᠠ ᠦᠦᠷ ᠢ᠋ᠶ᠋ᠡᠷ ᠳ᠋ᠢᠶᠠᠩᠬᠤᠸᠠ ᠲᠣᠰᠴᠤ ᠶᠠᠷᠢᠯᠴᠠᠨᠰᠠᠨ ᠤᠴᠢᠷ ᠦᠭᠡᠢ ᠭᠡᠵᠦ ᠰᠠᠨᠳᠤᠷᠤᠨ ᠬᠡᠯᠡᠵᠡᠢ᠃
ᠲᠦᠪᠰᠢᠨ ᠭᠤᠸᠠᠢ ᠡᠨᠡ ᠬᠡᠷᠡᠭ ᠢ᠋ ᠨᠡᠭᠡᠷᠡᠨ ᠴᠠᠢᠷᠠᠲᠠᠯᠠ ᠪᠠᠢᠴᠠᠭᠠᠨ ᠲᠣᠳᠣᠯᠠᠵᠠᠢ᠃
ᠲᠡᠷᠡ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠢᠩᠭᠢᠵᠦ ᠦᠬᠦᠨ ᠨᠢᠭᠤᠬᠤ ᠶ᠋ᠢ ᠠᠯᠢ ᠡᠷᠲᠡ ᠪᠠᠷᠤᠭᠯᠠᠭᠰᠠᠨ ᠪᠠᠢᠨᠠ᠃
ᠲᠡᠭᠡᠭᠡᠳ ᠲᠡᠷᠡ᠄
— ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠨᠢ ᠬᠠᠷᠠ ᠴᠠᠭᠠᠨ ᠤ᠋ ᠢᠯᠭᠠᠭᠠ ᠦᠭᠡᠢ ᠲᠤᠢᠯ ᠤ᠋ᠨ ᠬᠠᠷᠠᠮᠰᠠᠯᠲᠠᠢ ᠬᠡᠷᠡᠭ ᠪᠣᠯᠤᠭᠰᠠᠨ ᠪᠠᠢᠲᠠᠯᠠ ᠲᠠ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠴᠤ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠭᠰᠡᠨ ᠪᠣᠳᠠᠲᠤ ᠬᠡᠷᠡᠭ ᠢ᠋ ᠢᠩᠭᠢᠵᠦ ᠨᠢᠭᠤᠨ ᠳᠠᠷᠤᠬᠤ ᠨᠢ ᠳᠠᠩᠴᠤ ᠣᠢᠯᠠᠭᠠᠭᠳᠠᠬᠤ ᠦᠭᠡᠢ ᠪᠠᠢᠨᠠ᠃ ᠥᠴᠥᠭᠡᠳᠦᠷ ᠰᠥᠨᠢ ᠸᠠᠩ ᠯᠠᠨ ᠬᠤᠸᠠ ᠨᠥᠬᠥᠷ ᠦ᠋ᠨ ᠭᠡᠷ ᠲᠦ᠍ ᠬᠥᠮᠦᠨ ᠳᠠᠭᠤ ᠰᠢᠩᠭᠡᠭᠡᠬᠦ ᠮᠠᠰᠢᠨ ᠲᠣᠬᠢᠷᠠᠭᠤᠯᠤᠭᠠᠳ ᠪᠠᠢᠭᠰᠠᠨ ᠢ᠋ ᠪᠢᠳᠡ ᠠᠩᠬᠠᠷᠴᠤ ᠰᠡᠷᠡᠮᠵᠢᠯᠡᠬᠦ ᠦᠭᠡᠢ ᠪᠡᠷ ᠨᠢᠭᠤᠴᠠ ᠶᠠᠭᠤᠮᠠ ᠶᠠᠷᠢᠯᠴᠠᠭᠰᠠᠨ ᠠ᠋ᠴᠠ ᠸᠠᠩ ᠯᠠᠨ ᠬᠤᠸᠠ ᠨᠥᠬᠥᠷ ᠬᠣᠣᠷᠯᠠᠭᠳᠠᠭᠰᠠᠨ ᠪᠠᠢᠨᠠ᠃ ᠥᠴᠥᠭᠡᠳᠦᠷ ᠰᠥᠨᠢ ᠪᠢᠳᠡ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠳ᠋ᠦ᠍ ᠪᠠᠢᠬᠤ ᠳᠤ ᠪᠠᠨ ᠬᠠᠨ ᠠᠪᠤᠭᠠᠢ ᠶ᠋ᠢᠨ ᠳ᠋ᠦ᠍ ᠶᠠᠪᠤᠬᠤ ᠲᠤᠬᠠᠢ ᠬᠠᠯᠲᠤ ᠶᠠᠷᠢᠯᠴᠠᠭᠠᠳ ᠠᠪᠤᠭᠰᠠᠨ ᠢ᠋ ᠴᠦ᠍ ᠬᠤᠯᠠᠭᠠᠢᠯᠠᠵᠤ ᠰᠣᠨᠣᠰᠤᠭᠠᠳ ᠨᠠᠮᠠ ᠶᠢ ᠪᠠᠰᠠ ᠬᠣᠣᠷᠯᠠᠬᠤ ᠪᠠᠷ ᠤᠷᠤᠯᠳᠤᠵᠤ ᠪᠠᠢᠬᠤ ᠶᠤᠮ ᠴᠢᠨᠢ ᠴᠢᠨᠦ ᠠᠮᠢ ᠨᠠᠰᠤᠨ ᠤ᠋ ᠠᠶᠤᠯ ᠨᠡᠩ ᠶᠡᠬᠡ ᠶᠦᠮ᠃ ᠭᠡᠪᠡᠴᠦ ᠪᠢᠳᠡ ᠲᠠᠨ ᠢ᠋ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠨᠠ ᠰᠢᠦ᠃ ᠲᠠ ᠬᠡᠷᠪᠡ ᠪᠢᠳᠡᠨ ᠢ᠋ ᠢᠲᠡᠭᠡᠵᠦ ᠪᠠᠢᠪᠠᠯ ᠬᠡᠳᠦᠨ ᠵᠦᠢᠯ ᠦ᠋ᠨ ᠤᠴᠢᠷ ᠢ᠋ ᠦᠨᠡᠨ ᠢ᠋ᠶ᠋ᠡᠷ ᠨᠢ ᠲᠤᠰᠬᠠᠵᠤ ᠥᠭᠭᠦᠨᠡ ᠤᠤ?
— ᠁
— ᠦᠵᠡᠰᠬᠦᠯᠡᠩ ᠦ᠋ᠨ ᠬᠥᠯ ᠬᠤᠭᠤᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠲᠠ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠡᠮ ᠣᠯᠵᠤ ᠥᠭᠭᠦᠭᠰᠡᠨ ᠤᠤ?
— ᠥᠭᠭᠦᠭᠰᠡᠨ᠃
— ᠪᠣᠯᠣᠷᠴᠠᠭᠠᠨ ᠢ᠋ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠥᠷᠯᠥᠭᠡ ᠶ᠋ᠢᠨ ᠨᠠᠢ᠍ᠮᠠᠨ ᠴᠠᠭ ᠲᠤ᠌ ᠲᠠ ᠲᠡᠭᠦᠨ ᠲᠡᠢ ᠰᠡᠮᠡᠬᠡᠷ ᠠᠭᠤᠯᠵᠠᠭᠠᠳ ᠶᠠᠭᠤ ᠶᠠᠷᠢᠯᠴᠠᠭᠰᠠᠨ ᠪᠣᠢ?
— ᠁
— ᠬᠣᠣᠷᠲᠤ ᠡᠮ ᠦ᠋ᠨ ᠤᠴᠢᠷ ᠪᠢᠵᠡ?
— ᠁
— ᠥᠨᠥᠳᠥᠷ ᠲᠠ ᠬᠡᠨ ᠦ᠌ ᠳ᠋ᠢᠶᠠᠩᠬᠤᠸᠠ ᠶ᠋ᠢ ᠲᠤᠰᠤᠭᠰᠠᠨ ᠪᠣᠢ?
— ᠬᠡᠨ ᠦ᠌ ᠳ᠋ᠢᠶᠠᠩᠬᠤᠸᠠ ᠶ᠋ᠢ ᠴᠦ᠍ ᠲᠤᠰᠤᠭᠰᠠᠨ ᠦᠭᠡᠢ᠃
ᠡᠦ ᠹᠧᠩ ᠮᠧᠢ ᠶ᠋ᠢᠨ ᠴᠢᠷᠠᠢ ᠠᠢᠬᠤᠪᠲᠤᠷ ᠬᠤᠪᠢᠷᠠᠵᠤ ᠣᠷᠣᠨ ᠳᠤ ᠪᠠᠨ ᠰᠠᠭᠤᠵᠤ ᠲᠣᠭᠲᠠᠬᠤ ᠦᠭᠡᠢ ᠴᠡᠴᠡᠷᠡᠵᠦ ᠡᠬᠢᠯᠡᠯᠡ᠃
— ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠲᠠ ᠡᠳᠡᠭᠡᠷ ᠢ᠋ ᠥᠪ ᠦᠨᠡᠨ ᠢ᠋ᠶ᠋ᠡᠷ ᠳᠤᠰᠬᠠᠬᠤ ᠨᠢ ᠪᠢᠳᠡᠨ ᠳ᠋ᠦ᠍ ᠶᠡᠬᠡ ᠬᠠᠪᠰᠤᠷᠤᠯᠭᠠ ᠲᠤᠰᠠᠯᠠᠮᠵᠢ ᠪᠣᠯᠬᠤ ᠶᠤᠮ᠃ ᠭᠡᠲᠡᠯᠡ ᠶᠠᠭ ᠬᠡᠯᠡᠬᠦ ᠦᠭᠡᠢ ᠪᠣᠯ ᠠᠯᠪᠠᠳᠠᠬᠤ ᠠᠷᠭᠠ ᠦᠭᠡᠢ ᠳᠡ᠃ ᠭᠡᠲᠡᠯᠡ ᠪᠢ ᠴᠢᠨᠦ ᠠᠮᠤᠷ ᠮᠡᠨᠳᠦ ᠶ᠋ᠢ ᠪᠠᠲᠤᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠣᠳᠣ ᠠ᠋ᠴᠠ ᠡᠬᠢᠯᠡᠵᠦ ᠨᠢᠭᠡ ᠨᠢᠭᠤᠴᠠ ᠭᠠᠵᠠᠷ ᠰᠠᠭᠤᠯᠭᠠᠨᠠ᠃ ᠨᠢᠭᠡ ᠭᠠᠷᠠᠭ ᠬᠠᠮᠢᠭᠠ ᠴᠦ᠍ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ᠃ ᠡᠨᠡ ᠶᠠᠪᠤᠳᠠᠯ ᠢ᠋ ᠲᠠᠨ ᠤ᠋ ᠪᠠᠢᠭᠤᠯᠭᠠ ᠳ᠋ᠤ᠌ ᠵᠣᠬᠢᠰ ᠢ᠋ ᠨᠢ ᠦᠵᠡᠵᠦ ᠮᠡᠳᠡᠭᠳᠡᠬᠦ ᠶᠦᠮ᠃ ᠭᠡᠪᠡᠴᠦ ᠰᠠᠨᠠᠭᠠ ᠪᠠᠨ ᠰᠤᠯᠠ ᠲᠠᠯᠪᠢᠬᠤ ᠬᠡᠷᠡᠭᠲᠡᠢ᠃ ᠡᠳᠡᠭᠡᠷ ᠢ᠋ ᠪᠡᠶᠡᠯᠡᠭᠦᠯᠵᠦ ᠳᠡᠢᠯᠦᠨᠡ ᠤᠤ?
ᠡᠦ ᠹᠧᠩ ᠮᠧᠢ ᠲᠣᠯᠣᠭᠠᠢ ᠪᠠᠨ ᠵᠣᠪᠠᠭᠤᠷᠢᠲᠠᠢᠬᠠᠨ ᠳᠣᠬᠢᠰᠬᠢᠵᠡᠢ᠃
ᠲᠦᠪᠰᠢᠨ ᠢ᠋ ᠭᠠᠳᠠᠨᠠ ᠭᠠᠷᠬᠤ ᠳ᠋ᠤ᠌ ᠰᠤᠯᠠ ᠬᠤᠪᠴᠠᠰᠤ ᠲᠠᠢ ᠭᠤᠷᠪᠠᠨ ᠬᠥᠮᠦᠨ ᠡᠮᠦᠨᠡ ᠡᠴᠡ ᠨᠢ ᠢᠷᠡᠪᠡ᠃ ᠲᠡᠷᠡ ᠲᠡᠳᠡᠨ ᠲᠡᠢ ᠠᠭᠤᠯᠵᠠᠮᠠᠭᠴᠠ᠄
— ᠶᠠᠮᠠᠷ ᠬᠥᠳᠡᠯᠦᠯ ᠪᠠᠢᠨᠠ? ᠭᠡᠵᠦ ᠤᠭᠲᠤᠨ ᠠᠰᠠᠭᠤᠪᠠ᠃
— ᠠᠷᠪᠠᠨ ᠴᠠᠭ ᠤ᠋ᠨ ᠤᠷᠳᠤᠭᠤᠷ ᠨᠢᠭᠡ ᠬᠥᠮᠦᠨ ᠦ᠌ ᠰᠡᠭᠦᠳᠡᠷ ᠠᠰᠠᠷ ᠤ᠋ᠨ ᠪᠠᠷᠠᠭᠤᠨ ᠥᠨᠴᠥᠭ ᠢ᠋ᠶ᠋ᠡᠷ ᠨᠠᠪᠲᠠᠰᠬᠢᠨ ᠦᠵᠡᠭᠳᠡᠭᠡᠳ ᠠᠪᠤᠯᠠ᠃ ᠲᠡᠭᠡᠭᠡᠳ ᠪᠢᠳᠡ ᠬᠣᠶᠠᠷ ᠲᠡᠷᠡ ᠬᠥᠮᠦᠨ ᠢ᠋ ᠶᠠᠭᠠᠬᠢᠵᠤ ᠡᠷᠢᠭᠰᠡᠨ ᠴᠦ᠍ ᠣᠯᠤᠭᠰᠠᠨ ᠦᠭᠡᠢ᠃
— ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ᠪᠠᠷ ᠶᠠᠮᠠᠷ ᠪᠠᠢᠳᠠᠯ ᠲᠠᠢ ᠪᠠᠢᠨᠠ?
— ᠶᠠᠮᠠᠷ ᠴᠦ᠍ ᠣᠨᠴᠠᠭᠠᠢ ᠪᠠᠢᠳᠠᠯ ᠦᠭᠡᠢ᠃
— ᠣᠳᠣ ᠲᠠ ᠨᠠᠷ ᠬᠠᠷᠢᠵᠤ ᠠᠮᠠᠷᠠᠭᠠᠴᠢ!
ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠲᠦᠪᠰᠢᠨ ᠬᠥᠬᠡᠲᠤᠯᠢ ᠬᠣᠶᠠᠭᠤᠯᠠ ᠳᠤᠮᠳᠠ ᠪᠠᠨ ᠡᠦ ᠹᠧᠩ ᠮᠧᠢ ᠶ᠋ᠢ ᠳᠠᠭᠠᠭᠤᠯᠤᠨ ᠭᠡᠷ ᠡᠴᠡ ᠪᠥᠷᠲᠥᠯᠵᠡᠨ ᠭᠠᠷᠴᠤ ᠢᠷᠡᠯᠡ᠃ ᠴᠣᠬᠣᠮ ᠬᠠᠮᠢᠭᠠ ᠣᠴᠢᠬᠤ ᠶ᠋ᠢ ᠪᠤᠤ ᠮᠡᠳᠡ᠃ ᠬᠠᠷᠢᠨ ᠪᠦᠷ ᠭᠠᠷ ᠫᠤᠤ ᠪᠠᠨ ᠪᠡᠯᠡᠨ ᠠᠳᠬᠤᠵᠤ ᠪᠠᠢᠯᠠ᠃ ᠪᠠᠬᠠᠨ ᠤᠳᠠᠭᠠᠳ ᠲᠦᠪᠰᠢᠨ ᠴᠣᠬᠣᠮ ᠶᠠᠭᠤ ᠪᠣᠳᠣᠭᠰᠠᠨ ᠢ᠋ ᠪᠤᠤ ᠮᠡᠳᠡ᠃ ᠡᠦ ᠹᠧᠩ ᠮᠧᠢ ᠲᠡᠢ ᠵᠡᠷᠭᠡᠴᠡᠨ ᠶᠠᠪᠤᠬᠤ ᠳᠤ ᠪᠠᠨ᠄
— ᠲᠠ ᠴᠣᠬᠣᠮ ᠬᠡᠵᠢᠶᠡ ᠲᠡᠷᠭᠡ ᠵᠢᠯᠣᠭᠣᠳᠬᠤ ᠶ᠋ᠢ ᠰᠤᠷᠤᠭᠰᠠᠨ ᠪᠣᠢ ᠭᠡᠵᠦ ᠵᠠᠭᠤᠢ ᠰᠢᠯᠤᠭᠤᠬᠠᠨ ᠲᠤᠯᠭᠠᠨ ᠠᠰᠠᠭᠤᠵᠠᠢ᠃
— ᠠᠷᠪᠠᠨ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ᠃ ᠭᠡᠪᠡᠴᠦ ᠬᠣᠵᠢᠮ ᠨᠢ ᠳᠡᠮᠡᠢ ᠶᠡᠬᠡ ᠣᠷᠣᠯᠳᠣᠬᠤ ᠵᠠᠪᠰᠢᠶᠠᠨ ᠦᠭᠡᠢ ᠪᠣᠯᠵᠠᠢ ᠭᠡᠵᠦ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠬᠡᠯᠡᠬᠦ ᠶ᠋ᠢ ᠲᠦᠪᠰᠢᠨ ᠭᠠᠢᠬᠠᠨ ᠰᠣᠨᠣᠰᠴᠤ ᠪᠠᠢᠯᠠ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ