ᠨᠣᠮ ᠵᠢᠷᠭᠠᠭᠠᠬᠤ ᠦᠭᠡ-ᠰᠢᠷᠠ ᠵᠤᠤ-ᠴᠢᠮᠡᠳ ᠂ ᠫᠣᠩᠰᠣᠭShar juu-Chamd ,PonsgШар жуу-Чамд ,Понсг
179 ᠰᠸᠸᠡᠩᠵᠢᠭᠵᠢᠳ
ᠥᠯᠥᠭᠡᠢ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠠᠷᠠᠳ ᠤ᠋ᠨ ᠮᠠᠨᠢ ᠰᠦᠵᠢᠭ ᠪᠢᠰᠢᠷᠡᠯ ᠦ᠋ᠨ ᠳᠠᠯᠠᠯᠭᠠ ᠪᠣᠯᠤᠭᠰᠠᠨ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠲᠤᠬᠠᠢ ᠪᠢ ᠣᠢ ᠲᠣᠢ ᠳ᠋ᠤ᠌ ᠣᠷᠣᠵᠤ ᠦᠰᠦᠭ ᠨᠢᠳᠦᠯᠡᠨ ᠰᠤᠷᠭᠠᠭᠤᠯᠢ ᠰᠣᠶᠣᠯ ᠤ᠋ᠨ ᠮᠥᠷ ᠬᠥᠭᠡᠭᠡᠵᠦ ᠡᠬᠢᠯᠡᠭᠰᠡᠨ ᠡᠴᠡ ᠪᠦᠦᠷ ᠲᠦᠦᠷᠬᠡᠨ ᠭᠠᠳᠠᠷᠯᠠᠬᠤ ᠪᠣᠯᠤᠭᠰᠠᠨ ᠶᠤᠮ᠃ ᠰᠢᠷᠠ ᠵᠣᠣ ᠰᠦᠮᠡ ᠭᠡᠵᠦ ᠴᠣᠭᠴᠢᠨ ᠳᠤᠭᠠᠩ ᠢ᠋ᠶ᠋ᠠᠷ ᠭᠣᠣᠯ ᠴᠡᠭ ᠪᠣᠯᠭᠠᠨ᠂ ᠬᠣᠶᠠᠷ ᠬᠠᠵᠠᠭᠤ᠂ ᠠᠷᠤ ᠪᠠᠷ ᠨᠢ ᠨᠡᠯᠢᠶᠡᠳ ᠠᠷᠪᠢᠨ ᠳᠤᠭᠠᠩ᠂ ᠰᠤᠪᠤᠷᠭᠠ ᠪᠠᠢᠷᠢᠯᠠᠭᠰᠠᠨ᠂ ᠭᠠᠳᠠᠭᠤᠷ ᠢ᠋ᠶ᠋ᠠᠨ ᠳᠥᠷᠪᠡᠯᠵᠢᠨ ᠶᠡᠬᠡ ᠤᠯᠠᠭᠠᠨ ᠬᠦᠷᠢᠶᠡ ᠲᠡᠢ᠂ ᠰᠦᠮᠡ ᠶ᠋ᠢᠨ ᠳᠡᠭᠡᠭᠦᠷ ᠨᠢ ᠲᠠᠭᠲᠠᠭᠠ ᠱᠦᠭᠯᠦᠳᠡᠨ ᠨᠢᠰᠦᠭᠰᠡᠨ ᠲᠤᠩ ᠰᠦᠷᠯᠢᠭ ᠶᠡᠬᠡᠮᠰᠦᠭ᠂ ᠦᠵᠡᠰᠬᠦᠯᠡᠩ ᠰᠠᠢᠬᠠᠨ ᠪᠠᠷᠢᠯᠭᠠ ᠨᠤᠭᠤᠳ ᠪᠠᠢᠭᠰᠠᠨ ᠨᠢ ᠣᠳᠣ ᠴᠤ᠌ ᠭᠡᠰᠡᠨ ᠲᠣᠳᠣᠬᠠᠨ ᠴᠡᠭᠡᠵᠢᠯᠡᠭᠳᠡᠵᠦ ᠪᠣᠢ᠃ ᠴᠣᠭᠴᠢᠨ ᠳᠤᠭᠠᠩ ᠢ᠋ ᠭᠠᠷᠭᠠᠪᠠᠯ ᠴᠣᠬᠣᠮ ᠶᠠᠮᠠᠷ ᠶᠠᠮᠠᠷ ᠳᠤᠭᠠᠩ ᠪᠠᠢᠳᠠᠭ᠂ ᠬᠡᠳᠦ ᠪᠠᠢᠳᠠᠭ᠂ ᠶᠠᠮᠠᠷ ᠶᠠᠮᠠᠷ ᠪᠤᠷᠬᠠᠳ ᠢ᠋ ᠲᠠᠬᠢᠵᠤ ᠪᠠᠢᠳᠠᠭ ᠢ᠋ ᠲᠡᠷᠡ ᠦᠶᠡ ᠳ᠋ᠦ᠍ ᠬᠠᠷᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠨ᠃ ᠮᠡᠳᠡᠬᠦ ᠡᠴᠡ ᠤᠷᠢᠳᠤ ᠪᠡᠶᠡ ᠶ᠋ᠢᠨ ᠡᠭᠦᠳᠡᠨ ᠠᠰᠠᠷ ᠤ᠋ᠨ ᠳᠥᠷᠪᠡᠨ ᠮᠠᠾᠠᠷᠠᠨᠽᠠ ᠶ᠋ᠢᠨ ᠳᠤᠭᠠᠩ ᠯᠠ ᠴᠡᠭᠡᠵᠢᠨ ᠳ᠋ᠦ᠍ ᠬᠣᠨᠣᠭᠰᠢᠭᠠᠳ ᠪᠠᠢᠳᠠᠭ ᠨᠢ ᠲᠡᠷᠡ ᠳᠤᠭᠠᠩ ᠤ᠋ᠨ ᠠᠳᠠᠭᠠᠷ ᠢ᠋ᠶ᠋ᠠᠷ ᠨᠢ ᠬᠥᠬᠡ ᠲᠩᠷᠢ ᠬᠥᠩᠬᠥᠢᠨ᠂ ᠴᠠᠭᠠᠨ ᠡᠭᠦᠯᠡ ᠡᠪᠬᠡᠷᠡᠯᠳᠦᠨ᠂ ᠳᠥᠷᠪᠡᠨ ᠮᠠᠾᠠᠷᠠᠨᠽᠠ ᠶ᠋ᠢᠨ ᠠᠢᠩᠭᠤᠷᠢ ᠲᠥᠷᠥᠭᠦᠯᠦᠮᠡ ᠶᠠᠩᠵᠤ ᠶ᠋ᠢᠨ ᠲᠥᠷᠬᠦ ᠪᠠᠢᠳᠠᠯ ᠯᠠ ᠨᠢᠯᠬᠠ ᠪᠠᠯᠴᠢᠷ ᠣᠢ ᠳ᠋ᠤ᠌ ᠭᠦᠨ ᠰᠠᠭᠤᠭᠳᠠᠯ ᠦᠯᠡᠳᠡᠭᠡᠭᠰᠡᠨ ᠦ᠌ ᠬᠢ ᠪᠠᠢᠬᠠ᠃ ᠰᠦᠮᠡ ᠶ᠋ᠢᠨ ᠠᠷᠤ ᠳ᠋ᠤ᠌ ᠰᠢᠷᠠᠵᠤᠤ ᠰᠤᠮᠤ ᠭᠡᠵᠦ ᠬᠡᠳᠦᠨ ᠮᠥᠷ ᠪᠠᠢᠰᠢᠩ ᠲᠠᠢ ᠠᠯᠪᠠᠨ ᠪᠠᠢᠭᠤᠯᠭᠠ ᠪᠠᠢᠭᠰᠠᠨ᠃ ᠰᠦᠮᠡ ᠶ᠋ᠢᠨ ᠵᠡᠭᠦᠨ ᠪᠡᠶᠡ ᠶ᠋ᠢᠨ ᠶᠡᠬᠡ ᠵᠢᠰᠠ ᠳ᠋ᠤ᠌ ᠰᠢᠷᠠᠵᠤ ᠪᠠᠭᠠ ᠰᠤᠷᠭᠠᠭᠤᠯᠢ᠂ ᠵᠡᠭᠦᠨ ᠬᠣᠢᠲᠠᠢ ᠪᠠᠢᠭᠰᠠᠨ ᠷᠠᠰᠠᠩ ᠵᠢᠰᠠ ᠳ᠋ᠤ᠌ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ᠂ ᠨᠦᠩᠨᠠᠢ ᠶ᠋ᠢᠨ ᠵᠢᠰᠠ ᠳ᠋ᠤ᠌ ᠮᠠᠯ ᠡᠮᠨᠡᠯᠭᠡ ᠶ᠋ᠢᠨ ᠥᠷᠲᠡᠭᠡ᠂ ᠪᠠᠷᠠᠭᠤᠨ ᠬᠣᠢᠲᠤ ᠪᠡᠶᠡ ᠶ᠋ᠢᠨ ᠪᠠᠷᠠᠭᠤᠨ ᠱᠠᠩ ᠳ᠋ᠤ᠌ ᠬᠠᠩᠭᠠᠨ ᠪᠣᠷᠣᠯᠠᠭᠤᠯᠬᠤ ᠬᠤᠷᠰᠢᠶᠠ ᠵᠡᠷᠭᠡ ᠶ᠋ᠢᠨ ᠪᠠᠢᠭᠤᠯᠭᠠ ᠪᠠᠢᠷᠢᠯᠠᠵᠤ ᠪᠠᠢᠯᠠ᠃ ᠮᠠᠨ ᠤ᠋ ᠰᠤᠷᠭᠠᠭᠤᠯᠢ ᠨᠢ ᠶᠠᠭ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠶᠡᠬᠡ ᠵᠢᠰᠠ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠲᠤᠯᠠ ᠡᠳᠦᠷ ᠡᠳᠦᠷ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠴᠢᠬᠤ᠂ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠪᠣᠯᠭᠠᠨ ᠰᠦᠮᠡ ᠶ᠋ᠢᠨ ᠠᠷᠤ ᠪᠠᠷ ᠪᠤᠶᠤ ᠤᠷᠳᠤᠭᠤᠷ ᠲᠣᠭᠣᠷᠢᠨ ᠶᠠᠪᠤᠳᠠᠭ ᠠ᠋ᠴᠠ ᠮᠠᠮᠠ ᠨᠠᠷ ᠤ᠋ᠨ ᠲᠤᠩ ᠳᠣᠬᠢᠶᠠ ᠲᠠᠯᠪᠢᠨ ᠨᠣᠮ ᠤᠩᠰᠢᠬᠤ ᠳᠠᠭᠤᠨ ᠨᠢ ᠬᠦᠷᠲᠡᠯᠡ ᠲᠣᠪ ᠲᠣᠳᠣᠬᠠᠨ ᠰᠣᠨᠣᠰᠳᠠᠳᠠᠭ ᠪᠠᠢᠭᠰᠠᠨ᠃ ᠢᠯᠠᠩᠭᠤᠶᠠ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠮᠠᠨᠢ ᠶ᠋ᠢᠨ ᠬᠤᠷᠠᠯ ᠬᠤᠢ ᠪᠣᠯᠪᠠᠯ ᠬᠡᠦᠬᠡᠳ ᠪᠢᠳᠡᠨ ᠦ᠌ ᠲᠩᠷᠢ ᠡᠷᠭᠢᠳᠡᠭ ᠶᠦᠮ᠃ ᠰᠢᠨᠡ ᠶ᠋ᠢ ᠡᠮᠦᠰᠴᠦ ᠴᠠᠮ ᠦᠵᠡᠬᠦ᠂ ᠠᠯᠢᠮᠠ ᠵᠢᠮᠢᠰ ᠦ᠋ᠨ ᠳᠡᠯᠭᠡᠭᠦᠷ ᠢ᠋ᠶ᠋ᠡᠷ ᠬᠡᠰᠦᠨ ᠠᠯᠢᠮᠠ᠂ ᠰᠢᠬᠢᠷ᠂ ᠲᠠᠷᠪᠤᠰ᠂ ᠵᠢᠮᠢᠰ᠂ ᠠᠮᠲᠠᠲᠤ ᠪᠣᠣᠪᠣ ᠵᠡᠷᠭᠡ ᠶ᠋ᠢ ᠠᠮᠲᠠᠷᠬᠠᠨ ᠢᠳᠡᠬᠦ ᠨᠢ ᠶᠣᠰᠣᠲᠠᠢ ᠵᠢᠷᠭᠠᠯᠲᠠᠢ ᠰᠠᠨᠠᠭᠳᠠᠳᠠᠭ ᠪᠠᠢᠯᠠ᠃ ᠲᠡᠷᠡ ᠠᠯᠢᠮᠠ ᠵᠢᠮᠢᠰ ᠦ᠋ᠨ ᠦᠨᠦᠷ ᠬᠣᠯᠠ ᠠ᠋ᠴᠠ ᠰᠡᠩᠭᠢᠨᠡᠨ᠂ ᠲᠠᠷᠪᠤᠰ ᠢᠳᠡᠬᠦ ᠳ᠋ᠦ᠍ ᠬᠦᠷᠲᠡᠯᠡ ᠴᠠᠭᠠᠨᠠ ᠪᠠᠨ ᠲᠡᠢᠮᠦ ᠨᠢᠭᠡ ᠰᠠᠢᠬᠠᠨ ᠦᠨᠦᠷᠲᠦᠳᠡᠭ ᠢ᠋ ᠶᠠᠭᠠᠬᠢᠨᠠ? ᠴᠠᠮ ᠦᠵᠡᠵᠦ ᠳᠠᠭᠤᠰᠤᠭᠠᠳ ᠨᠠᠷᠠ ᠰᠢᠩᠭᠡᠬᠦ ᠣᠢᠷᠠᠳᠤᠮᠠᠨᠵᠢᠨ ᠰᠠᠢ ᠭᠡᠷ ᠢ᠋ᠶ᠋ᠡᠨ ᠵᠦᠭᠯᠡᠳᠡᠭ ᠪᠢᠯᠡ᠃ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠤᠷᠢᠳᠤ ᠪᠡᠶᠡ ᠳ᠋ᠦ᠍ ᠬᠡᠳᠦᠨ ᠮᠠᠮᠠ ᠨᠠᠷ ᠴᠠᠢᠯᠠᠴᠢᠬᠠᠭᠰᠠᠨ ᠲᠠᠪᠠᠲᠠᠢ ᠵᠣᠭᠣᠭᠳᠠᠵᠤ ᠪᠠᠢᠭᠠ ᠶ᠋ᠢ ᠰᠦᠮᠡ ᠶ᠋ᠢᠨ ᠣᠩᠭᠣᠢᠯᠲᠠᠲᠠᠶ ᠡᠮᠦᠨᠡ ᠬᠠᠭᠠᠯᠭᠠ ᠪᠠᠷ ᠰᠣᠨᠢᠭᠤᠴᠢᠯᠠᠨ ᠬᠠᠷᠠᠵᠤ ᠶᠠᠪᠤᠭᠰᠠᠨ ᠮᠠᠨᠢ ᠣᠳᠣ ᠬᠦᠷᠲᠡᠯᠡ ᠮᠠᠷᠲᠠᠭᠳᠠᠳᠠᠭ ᠦᠭᠡᠢ ᠨᠢ ᠬᠠᠴᠢᠨ ᠰᠣᠨᠢᠨ ᠠ᠋᠃
ᠬᠠᠷᠢᠨ ᠨᠢᠭᠡ ᠥᠷᠯᠥᠭᠡ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠢᠷᠡᠬᠦ ᠳ᠋ᠦ᠍ ᠰᠦᠮᠡ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠤᠲᠤᠭᠠ ᠪᠠᠭᠠᠭᠢᠴᠢᠬᠠᠭᠰᠠᠨ ᠪᠠᠢᠭᠰᠠᠨ ᠨᠢ ᠴᠣᠭᠴᠢᠨ ᠳᠤᠭᠠᠩ ᠵᠤᠯᠠ ᠶ᠋ᠢᠨ ᠭᠠᠯ ᠳ᠋ᠤ᠌ ᠮᠠᠨᠳᠤᠴᠢᠬᠠᠭᠰᠠᠨ ᠪᠠᠢᠵᠠᠢ᠃ ᠪᠠᠢᠷᠢ ᠳ᠋ᠤ᠌ ᠰᠠᠭᠤᠯᠴᠠᠳᠠᠭ ᠵᠢᠭᠠᠯ ᠤ᠋ᠳ ᠥᠴᠥᠭᠡᠳᠦᠷ ᠰᠥᠨᠢ ᠶ᠋ᠢᠨ ᠲᠡᠷᠡ ᠶᠡᠬᠡ ᠭᠠᠯ ᠤᠤ? ᠠᠶᠤᠮᠠᠷ ᠠ᠋ ᠭᠡᠮᠡᠨ ᠶᠠᠷᠢᠵᠠᠭᠠᠨᠠ ᠪᠢᠯᠡ᠃ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠲᠣᠮᠣ ᠰᠦᠷᠯᠢᠭ ᠴᠣᠭᠴᠢᠨ ᠳᠤᠭᠠᠩ ᠨᠢ ᠢᠩᠭᠢᠭᠡᠳ ᠰᠦᠢᠳᠴᠦ᠂ ᠲᠡᠳᠦᠢ ᠬᠣᠶᠠᠷ ᠵᠢᠯ ᠪᠣᠯᠤᠯ ᠦᠭᠡᠢ ᠪᠡᠷ ᠰᠣᠶᠣᠯ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠤᠯᠠᠭᠠᠨ ᠰᠢᠭᠤᠷᠭᠠᠨ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠳᠤᠭᠠᠩ ᠰᠤᠪᠤᠷᠭᠠ ᠨᠢ ᠴᠦ᠍ ᠪᠦᠷ ᠡᠪᠳᠡᠭᠳᠡᠨ ᠰᠦᠢᠳᠦᠭᠰᠡᠨ ᠢ᠋ ᠪᠢᠳᠡ ᠨᠢᠳᠦ ᠪᠡᠷ ᠦᠵᠡᠭᠰᠡᠨ ᠶᠦᠮ᠃ ᠮᠥᠨ ᠳᠠᠷᠠᠭᠠᠬᠠᠨ ᠨᠢ ᠰᠢᠷᠠᠵᠤᠤ ᠰᠤᠮᠤ ᠳᠤᠭᠤᠢᠳᠠᠯᠠ ᠰᠤᠮᠤ ᠲᠡᠢ ᠬᠠᠮᠲᠤᠷᠠᠨ᠂ ᠰᠤᠮᠤ ᠰᠤᠮᠤ ᠬᠠᠮᠲᠤᠷᠠᠭᠰᠠᠨ ᠶᠡᠬᠡ ᠬᠤᠷᠠᠯ ᠳ᠋ᠤᠨᠢ ᠮᠠᠨ ᠤ᠋ ᠰᠣᠷᠣᠭᠴᠢᠳ ᠢ᠋ ᠴᠦ᠍ ᠳᠤᠭᠤᠢᠳᠠᠯᠠ ᠳ᠋ᠤ᠌ ᠠᠪᠠᠴᠢᠵᠤ ᠣᠷᠣᠯᠴᠠᠭᠤᠯᠤᠭᠰᠠᠨ ᠢ᠋ ᠴᠡᠭᠡᠵᠢᠯᠡᠭᠰᠡᠭᠡᠷ᠃ ᠲᠠᠯᠠᠲᠤ ᠪᠠᠷᠢᠭᠠᠳᠠ ᠠ᠋ᠴᠠ ᠢᠷᠡᠭᠰᠡᠨ ᠰᠤᠷᠤᠭᠴᠢ ᠴᠠᠭᠠᠨᠬᠦᠦ᠂ ᠭᠠᠷᠠᠭ ᠤ᠋ᠨ ᠡᠳᠦᠷ ᠲᠦ᠋ᠨᠢ ᠴᠢᠯᠥᠭᠡ ᠵᠠᠪ ᠲᠠᠢ ᠪᠣᠯᠬᠣᠷ ᠲᠠᠩᠳᠠ ᠳᠤᠭᠤᠢᠲᠠᠯᠠ ᠪᠠᠷ ᠬᠡᠰᠦᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠨᠡ ᠬᠥᠮᠦᠰ ᠪᠣᠯ ᠳᠤᠭᠤᠢᠳᠠᠯᠠ ᠰᠤᠮᠤ ᠶ᠋ᠢᠨ ᠺᠠᠳ᠋ᠷ ᠤ᠋ᠳ᠂ ᠲᠡᠷᠡ ᠬᠡᠳᠦᠨ ᠬᠥᠬᠡ ᠥᠮᠥᠳᠥ ᠬᠦᠷᠮᠡ ᠲᠡᠢ ᠪᠦᠰᠡᠭᠦᠢᠴᠦᠦᠯ ᠨᠢ ᠴᠠᠬᠢᠯᠭᠠᠨ ᠮᠡᠳᠡᠭᠡ ᠶᠠᠪᠤᠭᠤᠯᠳᠠᠭ ᠬᠥᠮᠦᠨ ᠰᠢᠦ ᠭᠡᠵᠦ ᠮᠡᠳᠡᠮᠡᠬᠡᠢᠷᠡᠨ ᠬᠡᠯᠡᠵᠦ ᠪᠠᠢᠭᠰᠠᠨ᠃ ᠰᠢᠷᠠᠵᠤᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠡᠭᠦᠨ ᠣᠷᠣᠨ ᠤ᠋ ᠪᠠᠭᠰᠢ ᠨᠠᠮᠵᠢᠯᠲᠤ᠂ ᠬᠡᠵᠢᠶᠡᠳᠡ ᠱᠣᠭ ᠭᠠᠷᠭᠠᠬᠤ ᠳᠤᠷᠠᠲᠠᠢ ᠬᠥᠮᠦᠨ᠂ ᠴᠠᠭᠠᠨᠬᠦᠦ ᠪᠠᠭᠠᠰᠤᠨ ᠪᠠᠮᠪᠤ ᠶ᠋ᠢ ᠤᠲᠠᠰᠤ ᠪᠠᠷ ᠤᠶᠠᠵᠤ ᠳᠡᠭᠦᠵᠢᠯᠡᠴᠢᠬᠡᠭᠡᠳ ᠪᠠᠭᠠᠰᠤᠨ ᠪᠠᠮᠪᠤ ᠴᠢ ᠬᠤᠷᠳᠤᠨ ᠤᠤ? ᠪᠠᠭᠠᠲᠤᠷ ᠴᠠᠭᠠᠨᠬᠦᠦ ᠪᠢ ᠬᠤᠷᠳᠤᠨ ᠤᠤ? ᠭᠡᠳ ᠮᠥᠷᠥᠢᠴᠡᠨ ᠭᠦᠶᠦᠵᠦ ᠪᠠᠢᠭᠰᠠᠨ ᠢ᠋ ᠦᠵᠡᠯᠡ ᠭᠡᠵᠦ ᠱᠣᠭ ᠭᠠᠷᠭᠠᠨ ᠬᠡᠯᠡᠭᠡᠳ ᠮᠠᠨ ᠢ᠋ ᠡᠯᠢᠭᠡ ᠬᠥᠰᠢᠲᠡᠯᠡ ᠢᠨᠢᠶᠡᠯᠭᠡᠳᠡᠭ ᠪᠠᠢᠭᠰᠠᠨ᠃ ᠰᠢᠷᠠᠵᠤᠤ ᠰᠤᠮᠤ ᠳᠤᠭᠤᠢᠲᠠᠯᠠ ᠲᠠᠢ ᠬᠠᠮᠲᠤᠷᠠᠭᠰᠠᠨ ᠠ᠋ᠴᠠ ᠰᠤᠮᠤᠨ ᠪᠠᠢᠭᠤᠯᠭᠠ᠂ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ᠂ ᠮᠠᠯ ᠡᠮᠨᠡᠯᠭᠡ ᠶ᠋ᠢᠨ ᠥᠷᠲᠡᠭᠡ᠂ ᠬᠠᠩᠭᠠᠨ ᠪᠣᠷᠣᠯᠠᠭᠤᠯᠬᠤ ᠬᠤᠷᠰᠢᠶᠠ ᠬᠦᠷᠲᠡᠯᠡ ᠨᠡᠭᠦᠭᠡᠳ ᠶᠠᠪᠤᠴᠢᠬᠠᠵᠤ ᠰᠢᠷᠠ ᠵᠣᠣ ᠳᠡᠭᠡᠷᠡ ᠡᠯᠡᠢ ᠬᠣᠯᠠᠶ ᠪᠣᠯᠴᠢᠬᠠᠭᠰᠠᠨ ᠪᠠᠢᠯᠠ᠃ ᠬᠣᠵᠢᠮ ᠨᠢ ᠰᠤᠮᠤᠨ ᠤ᠋ ᠭᠡᠷ ᠪᠠᠢᠰᠢᠩ ᠢ᠋ ᠰᠢᠬᠢᠷ ᠦ᠋ᠨ ᠭᠠᠯ ᠡᠵᠡᠯᠡᠨ ᠰᠠᠭᠤᠵᠤ᠂ ᠠᠷᠤ ᠳ᠋ᠤᠨᠢ ᠡᠯᠡᠰᠦ ᠮᠠᠩᠬᠠ ᠶ᠋ᠢ ᠥᠭᠡᠷᠡᠴᠢᠯᠡᠬᠦ ᠥᠷᠲᠡᠭᠡ ᠪᠠᠢᠭᠰᠠᠨ ᠢ᠋ᠶ᠋ᠡᠨ ᠰᠡᠭᠦᠯᠳᠡᠵᠦ ᠮᠥᠨ ᠨᠡᠭᠦᠭᠡᠳ ᠶᠠᠪᠤᠭᠰᠠᠨ ᠪᠢᠯᠡ᠃ ᠰᠢᠷᠠᠵᠤᠤ ᠪᠠᠭᠠ ᠰᠤᠷᠭᠠᠭᠤᠯᠢ ᠴᠤ᠌ ᠶᠡᠬᠡ ᠵᠢᠰᠠ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠪᠡᠨ ᠨᠡᠭᠦᠨ ᠭᠠᠷᠴᠤ ᠢᠷᠡᠭᠡᠳ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠪᠡᠶᠡ ᠳ᠋ᠦ᠍ ᠬᠡᠳᠦᠨ ᠮᠥᠷ ᠪᠠᠢᠰᠢᠩ ᠲᠠᠢ ᠨᠡᠯᠢᠶᠡᠳ ᠵᠢᠯ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ 1975 ᠣᠨ ᠤ᠋ ᠦᠶᠡᠰ ᠴᠡᠷᠢᠭ ᠬᠣᠷᠢᠶᠠᠨ ᠤ᠋ ᠳᠣᠯᠣᠳᠤᠭᠠᠷ ᠰᠤᠮᠤᠨ ᠤ᠋ ᠣᠷᠬᠢᠭᠳᠠᠭᠰᠠᠨ ᠭᠡᠷ ᠢ᠋ ᠰᠡᠯᠪᠢᠵᠦ ᠠᠪᠤᠭᠠᠳ ᠳᠠᠬᠢᠨ ᠨᠡᠭᠦᠨ ᠣᠲᠣᠭᠠᠳ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠣᠷᠣᠢ ᠲᠣᠭᠣᠷᠢᠵᠤ ᠰᠠᠭᠤᠭᠰᠠᠨ ᠬᠡᠳᠦᠬᠡᠨ ᠠᠢᠯ ᠢ᠋ ᠭᠠᠷᠭᠠᠪᠠᠯ ᠶᠣᠰᠣᠲᠠᠢ ᠬᠠᠭᠠᠷᠬᠠᠢ ᠸᠠᠭᠠᠷ ᠲᠣᠭᠣᠰᠬᠠᠨ ᠣᠪᠣᠭᠠ᠂ ᠳᠣᠷᠣ ᠲᠡᠳᠦᠢ ᠯᠡ ᠪᠣᠯᠵᠤ ᠬᠣᠴᠣᠷᠤᠭᠰᠠᠨ ᠶᠤᠮ᠃
ᠴᠠᠭ ᠵᠢᠯ ᠰᠠᠢᠵᠢᠷᠠᠨ᠂ ᠲᠥᠷᠥ ᠲᠦᠪᠰᠢᠷᠡᠨ ᠲᠦᠮᠡᠨ ᠠᠮᠤᠭᠤᠯᠠᠩ ᠪᠣᠯᠵᠤ᠂ ᠱᠠᠰᠢᠨ ᠰᠢᠲᠦᠯᠭᠡ ᠪᠤᠷᠬᠠᠨ ᠨᠣᠮ ᠳᠠᠬᠢᠨ ᠬᠦᠨᠳᠦᠳᠬᠡᠭᠳᠡᠨ ᠳᠡᠭᠡᠳᠦᠯᠡᠭᠳᠡᠵᠦ ᠡᠬᠢᠯᠡᠭᠡᠳ ᠨᠠᠰᠤᠲᠠᠢ ᠮᠠᠮᠠ ᠨᠠᠷ ᠤ᠋ᠨ ᠴᠢᠷᠮᠠᠢᠯᠭᠠ᠂ ᠨᠠᠮ ᠵᠠᠰᠠᠭ ᠤ᠋ᠨ ᠬᠠᠯᠠᠮᠵᠢ ᠪᠠᠷ ᠬᠣᠶᠠᠷ ᠳᠤᠭᠠᠩ ᠰᠢᠨᠡ ᠪᠡᠷ ᠪᠣᠰᠬᠠᠭᠳᠠᠭᠠᠳ ᠬᠤᠷᠠᠯ ᠨᠣᠮ ᠢ᠋ᠶ᠋ᠠᠨ ᠲᠠᠰᠤᠯᠳᠠᠭᠤᠯᠤᠯ ᠦᠭᠡᠢ ᠬᠤᠷᠠᠭᠰᠠᠭᠠᠷ ᠡᠳᠦᠭᠡ ᠳ᠋ᠦ᠍ ᠬᠦᠷᠴᠡᠢ᠃
2006 ᠣᠨ ᠳ᠋ᠤ᠌᠂ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠵᠠᠬᠢᠷᠤᠯ ᠤ᠋ᠨ ᠪᠦᠷᠢᠯᠳᠦᠬᠦᠨ ᠰᠡᠳᠠᠩᠨᠣᠷᠪᠤ ᠭᠤᠸᠠᠢ ᠨᠠᠳᠠ ᠳ᠋ᠤ᠌:《 ᠡᠭᠦᠨ ᠢ᠋ ᠴᠢ ᠨᠢᠭᠡ ᠶᠠᠭᠤᠮᠠ ᠪᠣᠯᠭᠠᠭᠠᠳ ᠥᠭᠭᠦᠨᠡ ᠤᠤ? 》 ᠭᠡᠵᠦ ᠨᠠᠢᠳᠠᠭᠰᠠᠨ ᠪᠢᠯᠡ᠃ ᠲᠡᠷᠡ ᠨᠢ ᠴᠢᠮᠡᠳ ᠭᠤᠸᠠᠢ ᠶ᠋ᠢᠨ ᠪᠢᠴᠢᠭᠰᠡᠨ 《 ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠦᠨᠡᠨ ᠲᠡᠦᠬᠡ ᠣᠷᠣᠰᠢᠪᠠᠢ》 ᠭᠡᠰᠡᠨ ᠨᠣᠣᠷᠠᠭ ᠪᠠᠢᠯᠠ᠃ ᠳᠠᠷᠠᠭᠠ ᠨᠢ ᠫᠤᠩᠰᠣᠭ ᠭᠤᠸᠠᠢ ᠶ᠋ᠢᠨ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢ ᠳᠠᠬᠢᠨ ᠰᠡᠯᠪᠢᠨ ᠵᠠᠰᠠᠭᠰᠠᠨ ᠵᠢᠴᠢ ᠰᠦᠮᠡ ᠶ᠋ᠢᠨ ᠠᠵᠤ ᠠᠬᠤᠢ ᠶ᠋ᠢᠨ ᠪᠠᠢᠳᠠᠯ ᠤ᠋ᠨ ᠲᠤᠬᠠᠢ ᠮᠠᠲ᠋ᠧᠷᠢᠶᠠᠯ ᠢ᠋ ᠴᠦ᠍ ᠨᠠᠳᠠ ᠰᠢᠯᠵᠢᠭᠦᠯᠦᠨ ᠥᠭᠭᠦᠭᠰᠡᠨ᠃ 2007 ᠣᠨ ᠳ᠋ᠤ᠌ ᠪᠢ ᠰᠢᠷᠠ ᠵᠣᠣ ᠳᠡᠭᠡᠷᠡ ᠰᠢᠨᠡᠯᠡᠬᠦ ᠲᠠᠰᠢᠷᠠᠮ ᠢ᠋ᠶ᠋ᠠᠷ ᠬᠡᠳᠦᠨ ᠨᠠᠰᠤᠲᠠᠢ ᠮᠠᠮᠠ ᠨᠠᠷ ᠢ᠋ ᠳᠥᠭᠥᠮ ᠰᠤᠷᠪᠤᠯᠵᠢᠯᠠᠭᠰᠠᠨ ᠮᠠᠨᠢ ᠡᠨᠡ ᠨᠣᠮ ᠢ᠋ ᠨᠠᠢᠷᠠᠭᠤᠯᠬᠤ ᠳ᠋ᠤ᠌ ᠶᠡᠬᠡᠬᠡᠨ ᠪᠣᠷᠣ ᠮᠠᠲ᠋ᠧᠷᠢᠶᠠᠯ ᠪᠣᠯᠤᠭᠰᠠᠨ ᠶᠤᠮ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠲᠤᠬᠠᠢ ᠮᠠᠲ᠋ᠧᠷᠢᠶᠠᠯ ᠮᠠᠨ ᠳ᠋ᠤ᠌ ᠣᠯᠳᠠᠭᠰᠠᠨ ᠨᠢ ᠲᠤᠩ ᠬᠣᠪᠣᠷᠬᠠᠨ ᠶᠤᠮ᠃ ᠲᠡᠢᠮᠦ ᠪᠡᠷ ᠢ᠋ᠶ᠋ᠡᠨ ᠣᠷᠳᠣᠰ ᠬᠣᠲᠠ ᠶ᠋ᠢᠨ ᠳᠠᠩᠰᠠ ᠡᠪᠬᠡᠮᠡᠯ ᠦ᠋ᠨ ᠭᠠᠵᠠᠷ ᠤ᠋ᠨ ᠪᠤᠶᠠᠨ ᠭᠤᠸᠠᠢ ᠵᠢᠴᠢ ᠦᠨᠳᠦᠰᠦᠲᠡᠨ ᠦ᠌ ᠬᠡᠷᠡᠭ ᠡᠷᠬᠢᠯᠡᠬᠦ ᠵᠥᠪᠯᠡᠯ ᠦ᠋ᠨ ᠲᠡᠮᠦᠷᠪᠠᠭᠠᠲᠤᠷ ᠬᠣᠶᠠᠷ ᠨᠥᠬᠥᠷ ᠦ᠋ᠨ ᠨᠠᠢᠷᠠᠭᠤᠯᠤᠭᠰᠠᠨ 《ᠣᠷᠳᠣᠰ ᠤ᠋ᠨ ᠰᠦᠮᠡ ᠬᠡᠢᠳ 》 ᠭᠡᠰᠡᠨ ᠨᠣᠮ ᠳ᠋ᠠᠬᠢ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠲᠤᠬᠠᠢ ᠮᠠᠲ᠋ᠧᠷᠢᠶᠠᠯ ᠤ᠋ᠳ ᠢ᠋ ᠠᠰᠢᠭᠯᠠᠨ᠂ ᠴᠢᠮᠡᠳ ᠭᠤᠸᠠᠢ᠂ ᠫᠤᠩᠰᠣᠭ ᠭᠤᠸᠠᠢ ᠶ᠋ᠢᠨ ᠪᠢᠴᠢᠭᠰᠡᠨ ᠨᠣᠣᠷᠠᠭ ᠲᠠᠢ ᠨᠠᠢᠷᠠᠭᠤᠯᠤᠨ᠂ ᠳᠡᠭᠡᠷᠡ ᠨᠢ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠠᠷᠠᠳ ᠤ᠋ᠨ ᠲᠥᠯᠥᠭᠡᠯᠡᠭᠴᠢᠳ ᠦ᠋ᠨ ᠪᠠᠢᠩᠭᠤ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠳᠡᠳ᠋ ᠡᠷᠬᠢᠯᠡᠭᠴᠢ ᠪᠠᠢᠭᠰᠠᠨ ᠰᠡᠩᠭᠡ ᠳᠠᠷᠤᠭᠠ ᠶ᠋ᠢᠨ ᠡᠮᠬᠢᠳᠬᠡᠭᠰᠡᠨ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠯᠠᠮᠠ ᠪᠠᠢᠭᠰᠠᠨ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠣᠷᠴᠢᠨ ᠦᠶᠡ ᠶ᠋ᠢᠨ ᠠᠯᠳᠠᠷᠲᠤ ᠰᠢᠯᠦᠭᠴᠢ ᠯᠤᠷᠣᠢᠰᠠᠮᠪᠤ ᠶ᠋ᠢᠨ ᠨᠠᠮᠲᠠᠷ ᠢ᠋ ᠣᠷᠣᠭᠤᠯᠵᠤ᠂ ᠰᠡᠩᠭᠡ ᠲᠡᠳᠡᠨ ᠦ᠌ ᠲᠥᠰᠥᠪᠯᠡᠨ ᠵᠢᠷᠤᠭᠤᠯᠤᠭᠰᠠᠨ ᠰᠦᠮᠡ ᠶ᠋ᠢᠨ ᠤᠤᠯ ᠤ᠋ᠨ ᠪᠠᠢᠷᠢᠰᠢᠯ ᠵᠢᠷᠤᠭ ᠢ᠋ ᠲᠤᠰ ᠨᠣᠮ ᠳ᠋ᠤ᠌ ᠳᠠᠭᠠᠯᠳᠤᠭᠤᠯᠤᠭᠰᠠᠨ ᠢ᠋ ᠡᠨᠳᠡ ᠲᠣᠳᠣᠷᠬᠠᠢᠯᠠᠶᠠ᠃
ᠲᠤᠰ ᠨᠣᠮ ᠤ᠋ᠨ ᠬᠡᠪᠯᠡᠭᠳᠡᠬᠦ ᠵᠢᠴᠢ ᠠᠵᠤ ᠠᠬᠤᠢ ᠶ᠋ᠢᠨ ᠲᠠᠯᠠ ᠪᠠᠷ ᠬᠦᠴᠦᠲᠡᠢ ᠳᠡᠮᠵᠢᠯᠭᠡ ᠦᠵᠡᠭᠦᠯᠦᠭᠰᠡᠨ ᠣᠷᠳᠣᠰ ᠬᠣᠲᠠ ᠶ᠋ᠢᠨ ᠦᠨᠳᠦᠰᠦᠲᠡᠨ ᠦ᠌ ᠬᠡᠷᠡᠭ ᠡᠷᠬᠢᠯᠡᠬᠦ ᠵᠥᠪᠯᠡᠯ ᠦ᠋ᠨ ᠰᠠᠴᠤᠷᠠᠯᠲᠤ ᠳᠠᠷᠤᠭᠠ ᠵᠢᠴᠢ ᠲᠡᠮᠦᠷᠪᠠᠭᠠᠲᠤᠷ ᠨᠥᠬᠥᠷ ᠲᠦ᠍ ᠴᠢᠩ ᠰᠡᠳᠬᠢᠯ ᠦ᠋ᠨ ᠲᠠᠯᠠᠷᠬᠠᠯ ᠳᠡᠪᠰᠢᠭᠦᠯᠦᠶᠡ!
《 ᠰᠢᠷᠠ ᠵᠣᠣ》 ᠬᠡᠮᠡᠬᠦ ᠡᠨᠡ ᠨᠣᠮ ᠢ᠋ ᠨᠠᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠬᠦ ᠪᠤᠶᠠᠨᠲᠤ ᠦᠢᠯᠡᠰ ᠲᠦ᠍ ᠲᠠᠯᠠ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠲᠤᠰᠠ ᠳᠠᠮ ᠢ᠋ ᠬᠦᠷᠲᠡᠭᠰᠡᠨ ᠪᠢᠯᠡ᠃ ᠢᠯᠠᠩᠭᠤᠶᠠ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠵᠠᠬᠢᠷᠤᠯ ᠤ᠋ᠨ ᠪᠦᠷᠢᠯᠳᠦᠬᠦᠨ ᠰᠡᠳᠡᠩᠨᠣᠷᠪᠤ ᠭᠤᠸᠠᠢ ᠶ᠋ᠢᠨ ᠣᠢᠭᠠ ᠦᠭᠡᠢ ᠬᠦᠴᠦᠯᠡᠨ ᠰᠡᠳᠦᠵᠦ ᠴᠢᠷᠮᠠᠢᠭᠰᠠᠨ᠂ ᠵᠢᠷᠭᠠᠯ ᠤ᠋ᠨ ᠰᠠᠨᠠᠭᠠᠴᠢᠯᠠᠨ ᠲᠤᠰᠠᠯᠠᠯᠴᠠᠭᠰᠠᠨ ᠤ᠋ ᠠᠴᠢ ᠪᠠᠷ ᠶᠠᠭᠤ ᠴᠤ᠌ ᠭᠡᠰᠡᠨ ᠲᠤᠰ ᠨᠣᠮ ᠬᠡᠪᠯᠡᠭᠳᠡᠭᠡᠳ ᠡᠷᠬᠢᠮ ᠲᠠ ᠨᠠᠷ ᠤ᠋ᠨ ᠠᠯᠠᠭᠠᠨ ᠳ᠋ᠤ᠌ ᠳᠡᠯᠭᠡᠭᠳᠡᠨ ᠪᠠᠢᠨᠠ᠃ ᠨᠠᠷᠢᠯᠢᠭᠵᠢᠭᠤᠯᠤᠨ ᠪᠢᠴᠢᠬᠦ ᠶᠣᠰᠣᠲᠠᠢ ᠵᠦᠢᠯᠡᠰ ᠠᠷᠪᠢᠨ ᠪᠠᠢᠭᠰᠠᠨ ᠴᠤ᠌ ᠮᠠᠲ᠋ᠧᠷᠢᠶᠠᠯ ᠬᠣᠮᠰᠠ᠂ ᠴᠠᠭ ᠨᠥᠬᠥᠴᠡᠯ ᠦ᠋ᠨ ᠬᠠᠷᠠᠭᠠ ᠪᠠᠷ ᠡᠳᠦᠢᠬᠡᠨ ᠢ᠋ ᠡᠮᠬᠢᠯᠡᠨ ᠬᠡᠪᠯᠡᠭᠦᠯᠪᠡ᠃ ᠬᠣᠵᠢᠮ ᠤ᠋ᠨ ᠮᠡᠷᠭᠡᠳ ᠨᠡᠩ ᠪᠠᠶᠠᠯᠢᠭᠵᠢᠭᠤᠯᠤᠨ ᠲᠡᠭᠦᠯᠳᠡᠷᠵᠢᠭᠦᠯᠬᠦ ᠪᠣᠯᠲᠤᠭᠠᠢ ᠭᠡᠰᠡᠨ ᠰᠠᠢᠬᠠᠨ ᠢᠷᠦᠭᠡᠯ ᠢ᠋ ᠳᠡᠪᠰᠢᠭᠦᠯᠦᠶᠡ!
ᠪᠤᠶᠠᠨ ᠤ᠋ ᠦᠢᠯᠡᠰ ᠮᠠᠨᠳᠤᠬᠤ ᠪᠣᠯᠲᠤᠭᠠᠢ !
ᠰᠢᠷᠠ ᠬᠤᠯᠤᠭᠠᠨᠠ ᠵᠢᠯ ᠦ᠋ᠨ ᠶᠢᠰᠦᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠭᠤᠷᠪᠠᠨ ᠤ᠋ ᠥᠯᠵᠡᠢᠲᠦ ᠡᠳᠦᠷ