ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠬᠣᠷᠢᠨ ᠳᠥᠷᠪᠡ> Хялгасан дөрөөн дээр – Хасвулаг зохиов <24>
121ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠬᠣᠷᠢᠨ ᠳᠥᠷᠪᠡ>
— ᠸᠠᠩ ᠯᠠᠨ ᠬᠤᠸᠠ ᠨᠥᠬᠥᠷ ᠠ᠋᠂ ᠪᠠᠰᠠ ᠯᠠ ᠲᠠᠨ ᠢ᠋ ᠵᠣᠪᠠᠭᠠᠬᠤ ᠪᠠᠷ ᠢᠷᠡᠯᠡ᠃ ᠠᠭᠤᠴᠢᠯᠠᠭᠠᠷᠠᠢ! ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠴᠠᠭᠠᠳᠤᠬᠢ ᠨᠢ ᠬᠠᠷᠢᠨ ᠴᠠᠢ ᠴᠦᠢ ᠪᠦᠷᠢᠬᠦ ᠶ᠋ᠢᠨ ᠳᠠᠭᠠᠤ᠄
— ᠶᠡᠷᠦ ᠨᠢ ᠡᠨᠡ ᠬᠠᠤᠯᠢ ᠴᠠᠭᠠᠵᠠ ᠶ᠋ᠢᠨ ᠺᠠᠲᠡᠷᠴᠦᠳ ᠲᠡᠢ ᠣᠢᠷᠠᠳᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠶᠦᠮ ᠪᠠᠢᠨᠠ᠃ ᠮᠠᠨ ᠤ᠋ ᠡᠭᠦᠳᠡ ᠶ᠋ᠢ ᠨᠢᠭᠡ ᠯᠡ ᠣᠯᠤᠭᠰᠠᠨ ᠴᠢᠨᠢ ᠪᠣᠱᠣᠭᠠ ᠡᠯᠡᠭᠡᠮᠡᠷ ᠢᠷᠡᠭᠡᠳ ᠪᠠᠢᠬᠤ ᠶᠤᠮ ᠭᠡᠳ ᠳᠣᠷᠣᠭᠰᠢ ᠬᠠᠷᠠᠨ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠄
— ᠨᠢᠭᠡᠨᠲᠡ ᠢᠷᠡᠭᠰᠡᠨ ᠦ᠌ ᠬᠣᠢᠨᠠ ᠲᠡᠭᠡᠵᠦ ᠡᠷᠡᠭᠡᠯᠡᠮᠡᠷ ᠴᠤ᠌ ᠶᠠᠭᠤ ᠪᠠᠢᠬᠤ ᠪᠣᠢ ᠳᠠ᠃ ᠳᠡᠭᠡᠷᠡ ᠤᠳᠠᠭᠠ ᠪᠢ ᠲᠠᠨᠠᠷ ᠲᠤ᠌ ᠬᠡᠯᠡᠭᠰᠡᠨ ᠰᠢᠲᠠ᠃ ᠬᠡᠷᠪᠡ ᠨᠠᠳᠠ ᠠ᠋ᠴᠠ ᠠᠰᠠᠭᠤᠵᠤ ᠲᠣᠳᠣᠷᠬᠠᠢᠯᠠᠬᠤ ᠤᠴᠢᠷ ᠪᠠᠢᠪᠠᠯ ᠬᠡᠵᠢᠶᠡ ᠢᠷᠡᠭᠰᠡᠨ ᠴᠤ᠌ ᠬᠠᠮᠢᠶᠠ ᠦᠭᠡᠢ ᠭᠡᠰᠡᠨ ᠰᠢᠦ ᠭᠡᠵᠦ ᠵᠠᠯᠭᠠᠵᠤ ᠬᠡᠯᠡᠪᠡ᠃
— ᠪᠢᠳᠡ ᠲᠠᠨ ᠠ᠋ᠴᠠ ᠦᠵᠡᠰᠬᠦᠯᠡᠩ ᠦ᠋ᠨ ᠲᠤᠬᠠᠢ ᠬᠣᠶᠠᠷ ᠠᠰᠠᠭᠤᠳᠠᠯ ᠢ᠋ ᠯᠠᠪᠯᠠᠶᠠ ᠭᠡᠰᠡᠨ ᠶᠦᠮ᠃ ᠲᠠ᠁ ᠭᠡᠲᠡᠯᠡ ᠸᠠᠩ ᠯᠠᠨ ᠬᠤᠸᠠ ᠦᠭᠡ ᠲᠣᠰᠴᠤ᠄
— ᠬᠡᠷᠪᠡ ᠮᠢᠨᠦ ᠮᠡᠳᠡᠬᠦ ᠵᠦᠢᠯ ᠪᠣᠯ ᠬᠡᠯᠡᠭᠡᠳ ᠥᠭᠭᠦᠶᠡ ᠳᠡ ᠭᠡᠵᠦ ᠰᠢᠪ ᠰᠢᠯᠤᠭᠤᠬᠠᠨ ᠬᠠᠷᠢᠭᠤᠯᠪᠠ᠃
— ᠠᠷᠪᠠᠨ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠦᠵᠡᠰᠬᠦᠯᠡᠩ ᠢ᠋ ᠬᠥᠩᠭᠡᠵᠢᠬᠦ ᠳ᠋ᠦ᠍ ᠲᠠ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠤᠤ?
— ᠨᠢᠭᠡ ᠰᠠᠢᠬᠠᠨ ᠬᠦᠦ ᠲᠥᠷᠥᠭᠡᠳ ᠠᠯᠳᠠᠴᠢᠬᠠᠭᠰᠠᠨ᠃
— ᠬᠦᠦ ᠨᠢ ᠶᠠᠮᠠᠷ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠴᠢᠬᠡᠪᠡ?
— ᠬᠥᠮᠦᠰ ᠦ᠋ᠨ ᠬᠡᠯᠡᠯᠴᠡᠬᠦ ᠪᠡᠷ ᠬᠢᠵᠢᠭ ᠡᠪᠡᠳᠴᠢᠨ ᠭᠡᠳᠡᠭ᠃ ᠴᠣᠬᠣᠮ ᠶᠠᠮᠠᠷ ᠡᠪᠡᠳᠴᠢᠨ ᠢ᠋ ᠨᠢ ᠨᠠᠷᠢᠨ ᠲᠣᠳᠣᠷᠬᠠᠢ ᠲᠣᠳᠣᠯᠠᠵᠤ ᠠᠮᠵᠢᠭᠰᠠᠨ ᠦᠭᠡᠢ᠃ ᠤᠯᠠᠭᠠᠨ ᠨᠢᠯᠬᠠ ᠪᠠᠷ ᠨᠢ ᠠᠯᠳᠠᠭᠰᠠᠨ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠠᠩᠬᠠᠷᠬᠤ ᠬᠥᠮᠦᠨ ᠴᠤ᠌ ᠳᠡᠮᠡᠢ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠦᠵᠡᠰᠬᠦᠯᠡᠩ ᠯᠡ ᠠᠯᠳᠠᠭᠰᠠᠨ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠤᠬᠢᠯᠠᠵᠤ ᠤᠨᠵᠢᠭᠠᠳ ᠰᠦᠢᠳ ᠪᠣᠯᠤᠭᠰᠠᠨ᠃
— ᠲᠡᠷᠡ ᠦᠬᠦᠭᠰᠡᠨ ᠬᠡᠦᠬᠡᠳ ᠦ᠋ᠨ ᠲᠥᠯᠥᠪ ᠰᠢᠨᠵᠢ ᠲᠠᠨ ᠤ᠋ ᠴᠡᠭᠡᠵᠢᠨ ᠳ᠋ᠦ᠍ ᠲᠣᠳᠣᠷᠬᠠᠢ ᠪᠠᠢᠨᠠ ᠤᠤ?
— ᠲᠣᠳᠣᠷᠬᠠᠢ ᠭᠡᠵᠦ ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠴᠡᠭᠡᠵᠢᠯᠡᠵᠦ ᠪᠠᠢᠬᠤ ᠪᠠᠷ ᠲᠡᠷᠡ ᠤᠯᠠᠭᠠᠨ ᠨᠢᠯᠬᠠ ᠶ᠋ᠢᠨ ᠠᠮᠠ ᠨᠢ ᠵᠠᠭᠤᠷᠠᠵᠤ ᠴᠢᠷᠠᠢ ᠨᠢ ᠬᠥᠬᠡᠷᠡᠵᠦ ᠬᠠᠷᠠᠯᠠᠭᠠᠳ ᠨᠢᠭᠡ ᠯᠡ ᠠᠶᠤᠮᠠᠷ ᠪᠠᠢᠭᠰᠠᠨ ᠳᠠ᠃
— ᠦᠵᠡᠰᠬᠦᠯᠡᠩ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠮᠨᠡᠭᠦᠯᠦᠭᠰᠡᠨ ᠦᠭᠡᠢ ᠤᠤ?
— ᠳᠡᠮᠡᠢ ᠣᠯᠢᠭ ᠲᠠᠢ ᠡᠮᠨᠡᠭᠦᠯᠵᠦ ᠵᠠᠪᠳᠤᠭᠰᠠᠨ ᠦᠭᠡᠢ᠃ ᠲᠡᠷᠡ ᠦᠶᠡᠰ ᠲᠦ᠍ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠣᠪᠢᠨ ᠳᠤ ᠪᠠᠨ ᠨᠢᠯᠬᠠ ᠬᠡᠦᠬᠡᠳ ᠦ᠋ᠨ ᠭᠡᠷ ᠲᠡᠢ ᠪᠠᠢᠭᠰᠠᠨ᠃ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠬᠡᠦᠬᠡᠳ ᠢ᠋ ᠡᠬᠡ ᠳ᠋ᠦ᠍ᠨᠢ ᠨᠢᠭᠡ ᠯᠡ ᠤᠳᠠᠭᠠ ᠦᠵᠡᠭᠦᠯᠳᠡᠭ᠃ ᠠᠩᠬᠠ ᠡᠳᠦᠷ ᠦ᠋ᠨ ᠬᠢᠨᠢ ᠦᠳᠡ ᠳ᠋ᠦ᠍ ᠲᠡᠷᠡ ᠬᠡᠦᠬᠡᠳ ᠪᠠᠬᠠᠨ ᠬᠠᠯᠠᠭᠤᠷᠠᠭᠰᠠᠨ ᠳ᠋ᠤ᠌᠂ ᠦᠵᠡᠰᠬᠦᠯᠡᠩ ᠥᠪᠡᠷ ᠢ᠋ᠶ᠋ᠡᠨ ᠡᠮ ᠤᠤᠭᠤᠯᠭᠠᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠃ ᠣᠷᠣᠢ ᠪᠣᠯᠬᠤ ᠳ᠋ᠤ᠌ ᠡᠪᠡᠳᠴᠢᠨ ᠨᠢ ᠬᠦᠨᠳᠦᠷᠡᠭᠰᠡᠨ ᠳ᠋ᠦ᠍ ᠳᠥᠩᠭᠡᠵᠦ ᠰᠠᠷᠠ ᠳ᠋ᠤ᠌ ᠰᠠᠭᠤᠭᠰᠠᠨ ᠦᠵᠡᠰᠬᠦᠯᠡᠩ ᠦ᠋ᠨ ᠡᠷᠡᠭᠦᠯ ᠮᠡᠨᠳᠦ ᠳ᠋ᠦ᠍ ᠨᠥᠯᠥᠭᠡ ᠪᠣᠯᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ ᠬᠡᠯᠡᠭᠰᠡᠨ ᠦᠭᠡᠢ᠃ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠤᠷᠢᠳᠠᠪᠡᠷ ᠮᠡᠳᠡᠭᠳᠡᠭᠰᠡᠨ ᠳ᠋ᠦ᠍ ᠢᠩᠭᠢᠵᠦ ᠴᠢᠩᠭᠢᠵᠦ ᠪᠠᠢᠲᠠᠯᠠ ᠬᠥᠭᠡᠷᠦᠬᠦᠢ ᠨᠢᠯᠬᠠ ᠠᠮᠢᠰᠬᠤᠯ ᠬᠤᠷᠢᠶᠠᠴᠢᠬᠠᠯᠠ᠃ ᠰᠡᠭᠦᠯᠡᠷ ᠨᠢ ᠦᠵᠡᠰᠬᠦᠯᠡᠩ ᠵᠠᠪᠠᠯ ᠦᠵᠡᠨᠡ ᠭᠡᠳ ᠪᠠᠢᠬᠤᠯᠠᠷ ᠠᠷᠭᠠ ᠪᠤᠰᠤ ᠬᠡᠭᠦᠷ ᠢ᠋ ᠨᠢ ᠬᠠᠯᠲᠤ ᠮᠥᠯᠲᠥ ᠦᠵᠡᠭᠦᠯᠪᠡ᠃
— ᠰᠣᠨᠣᠰᠬᠤ ᠳ᠋ᠤ᠌ ᠦᠵᠡᠰᠬᠦᠯᠡᠩ ᠲᠡᠢ ᠣᠢᠷᠠᠯᠴᠠᠭᠠ ᠪᠠᠰᠠ ᠨᠢᠭᠡ ᠡᠬᠡᠨᠡᠷ ᠬᠥᠩᠭᠡᠵᠢᠭᠡᠳ ᠪᠠᠰᠠ ᠯᠠ ᠬᠡᠦᠬᠡᠳ ᠢ᠋ᠶ᠋ᠡᠨ ᠠᠯᠳᠠᠴᠢᠬᠠᠯᠠ ᠭᠡᠳᠡᠭ ᠨᠢ ᠦᠨᠡᠨ ᠤᠤ?
— ᠦᠨᠡᠨ᠂ ᠬᠣᠶᠠᠷ ᠬᠡᠦᠬᠡᠳ ᠣᠢᠷᠠᠯᠴᠠᠭᠠ ᠭᠠᠷᠤᠭᠠᠳ ᠡᠳᠦᠷ ᠳᠠᠷᠠᠭᠠᠯᠠᠨ ᠠᠯᠳᠠᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠢᠨᠠ᠃
— ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠠ ᠲᠡᠷᠡ ᠬᠡᠦᠬᠡᠳ ᠦ᠋ᠨ ᠦᠬᠦᠳᠡᠯ ᠢ᠋ ᠣᠯᠵᠤ ᠦᠵᠡᠭᠰᠡᠨ ᠤᠤ?
— ᠣᠯᠵᠤ ᠦᠵᠡᠭᠰᠡᠨ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠪᠢ ᠦᠵᠡᠰᠬᠦᠯᠡᠩ ᠢ᠋ ᠰᠤᠪᠢᠯᠠᠳᠠᠭ ᠪᠠᠢᠭᠰᠠᠨ᠃ ᠬᠣᠶᠠᠷ ᠬᠡᠦᠬᠡᠳ ᠦ᠋ᠨ ᠦᠬᠦᠳᠡᠯ ᠦ᠋ᠨ ᠬᠢᠨᠢ ᠰᠢᠨᠵᠢ ᠲᠥᠯᠥᠪ ᠡᠭᠡᠭᠡ ᠯᠡ ᠠᠳᠠᠯᠢᠬᠠᠨ ᠪᠠᠢᠭᠰᠠᠨ ᠰᠢᠭ᠋᠃
— ᠲᠠ ᠦᠵᠡᠰᠬᠦᠯᠡᠩ ᠲᠡᠢ ᠬᠠᠮᠲᠤ ᠬᠥᠩᠭᠡᠵᠢᠭᠰᠡᠨ ᠲᠡᠷᠡ ᠡᠬᠡᠨᠡᠷ ᠲᠡᠢ ᠲᠠᠨᠢᠯᠴᠠᠨᠠ ᠤᠤ?
— ᠲᠡᠢᠮᠦ ᠰᠠᠢᠨ ᠲᠠᠨᠢᠯᠴᠠᠬᠤ ᠦᠭᠡᠢ ᠪᠠᠢᠭᠰᠠᠨ᠃
— ᠣᠳᠣ ᠦᠵᠡᠪᠡᠯ ᠲᠠᠨᠢᠨᠠ ᠤᠤ?
— ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ ᠠᠷᠪᠠᠨ ᠬᠡᠳᠦᠨ ᠵᠢᠯ ᠪᠣᠯᠵᠠᠢ᠃ ᠭᠡᠪᠡᠴᠦ ᠦᠵᠡᠪᠡᠯ ᠲᠠᠨᠢᠬᠤ ᠴᠤ᠌ ᠮᠠᠭᠠᠳ ᠦᠭᠡᠢ᠃
ᠲᠦᠪᠰᠢᠨ ᠭᠤᠸᠠᠢ ᠡᠨᠳᠡ ᠬᠦᠷᠲᠡᠯᠡ ᠶᠠᠷᠢᠯᠴᠠᠭᠠᠳ ᠦᠭᠡ ᠪᠡᠨ ᠲᠦᠷ ᠵᠠᠪᠰᠠᠷᠯᠠᠵᠤ᠂ ᠨᠢᠭᠡ ᠭᠣᠳᠣᠯᠢ ᠲᠠᠮᠠᠬᠢ ᠨᠣᠴᠣᠭᠠᠵᠤ ᠠᠪᠤᠭᠠᠳ ᠳᠤᠭᠤᠢ ᠰᠠᠭᠤᠴᠢᠬᠠᠯᠠ᠃ ᠲᠦᠪᠰᠢᠨ ᠭᠤᠸᠠᠢ ᠢᠩᠭᠢᠵᠦ ᠲᠦᠷ ᠵᠠᠭᠤᠷᠠ ᠴᠢᠮᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠸᠠᠩ ᠯᠠᠨ ᠬᠤᠸᠠ ᠶ᠋ᠢ ᠡᠭᠴᠡᠯᠡᠨ ᠰᠢᠷᠲᠡᠭᠰᠡᠭᠡᠷ᠄
— ᠸᠠᠩ ᠡᠮᠴᠢ ᠠ᠋᠂ ᠨᠢᠭᠡ ᠶᠠᠪᠤᠳᠠᠯ ᠢ᠋ ᠲᠠᠨ ᠠ᠋ᠴᠠ ᠰᠢᠯᠤᠭᠤᠨ ᠰᠢᠭᠤᠷᠬᠠᠢ ᠠᠰᠠᠭᠤᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠦᠵᠡᠰᠬᠦᠯᠡᠩ ᠬᠣᠣᠷᠯᠠᠭᠳᠠᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡᠬᠢ ᠨᠢᠭᠡ ᠴᠠᠭ ᠤ᠋ᠨ ᠨᠠᠭᠠᠭᠤᠷ ᠴᠠᠭᠠᠭᠤᠷ ᠴᠢᠮᠠ ᠲᠠᠢ ᠪᠣᠯᠤᠷᠴᠠᠭᠠᠨ ᠤ᠋ ᠲᠤᠬᠠᠢ ᠶᠠᠷᠢᠯᠴᠠᠭᠰᠠᠨ ᠤᠤ?
— ᠦᠵᠡᠰᠬᠦᠯᠡᠩ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠰᠦᠷᠡᠬᠡᠢ ᠴᠣᠬᠢᠭᠳᠠᠵᠤ ᠰᠢᠷᠬᠠᠳᠤᠭᠰᠠᠨ ᠪᠣᠯᠬᠣᠷ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠠᠮᠠᠯᠠᠬᠤ ᠠ᠋ᠴᠠ ᠳᠤᠷᠠ ᠦᠭᠡᠢ ᠬᠦᠷᠴᠦ ᠪᠠᠢᠭᠰᠠᠨ᠃
— ᠲᠠᠨ ᠤ᠋ ᠬᠣᠶᠠᠭᠤᠯᠠ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠶ᠋ᠢᠨ ᠬᠢᠨᠢ ᠲᠤᠬᠠᠢ ᠶᠠᠷᠢᠯᠴᠠᠬᠤ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠢ᠋ ᠬᠡᠯᠡᠯᠴᠡᠭᠰᠡᠨ ᠦᠭᠡᠢ ᠤᠤ?
— ᠦᠭᠡᠢ᠂ ᠪᠢᠳᠡ ᠶᠡᠷᠦ ᠪᠣᠯᠤᠷᠴᠠᠭᠠᠨ ᠤ᠋ ᠲᠤᠬᠠᠢ ᠬᠡᠯᠡᠯᠴᠡᠰᠡᠨ ᠦᠭᠡᠢ᠃
— ᠲᠠ ᠬᠣᠶᠠᠭᠤᠯᠠ ᠯᠠᠪᠲᠠᠢ ᠬᠡᠯᠡᠯᠴᠡᠭᠰᠡᠨ᠃ ᠲᠡᠭᠡᠬᠦ ᠮᠥᠷᠲᠡᠭᠡᠨ ᠲᠠ ᠪᠣᠯᠤᠷᠴᠠᠭᠠᠨ ᠢ᠋ ᠮᠠᠭᠤᠯᠠᠬᠤ ᠳ᠋ᠤ᠌ ᠦᠵᠡᠰᠬᠦᠯᠡᠩ ᠬᠠᠷᠢᠨ ᠡᠷᠡ ᠶᠢ ᠪᠡᠨ ᠥᠮᠥᠭᠯᠡᠵᠦ ᠪᠠᠢᠭᠰᠠᠨ᠃
— ᠲᠠ᠁ ᠶᠠᠭᠠᠬᠢᠭᠠᠳ᠁
— ᠲᠡᠭᠡᠭᠡᠳ ᠲᠠ ᠣᠢᠯᠭᠠᠬᠤ ᠦᠭᠡᠢ ᠶᠡᠬᠡ ᠭᠠᠢᠬᠠᠭᠰᠠᠨ ᠢ᠋ᠶ᠋ᠠᠨ ᠪᠠᠰᠠ ᠠᠷᠭᠠ ᠪᠤᠰᠤ ᠦᠵᠡᠰᠬᠦᠯᠡᠩ ᠦ᠋ᠨ ᠠᠶᠠ ᠶ᠋ᠢ ᠳᠠᠭᠠᠵᠤ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠳ᠋ᠤ᠌ ᠵᠣᠭᠣᠰ ᠭᠤᠪᠢᠭᠤᠯᠤᠭᠰᠠᠨ᠃ ᠲᠡᠢᠮᠦ ᠪᠢᠵᠡ?
— ᠠᠶᠠ᠁ᠲᠠ ᠴᠢᠨᠢ᠁
— ᠲᠡᠭᠡᠭᠡᠳ ᠵᠣᠭᠣᠰ ᠠᠪᠤᠭᠠᠳ ᠡᠭᠦᠳᠡ ᠪᠡᠷ ᠭᠠᠷᠬᠤ ᠦᠶᠡ ᠳ᠋ᠦ᠍᠂ ᠡᠰᠡᠬᠦᠯᠡ ᠡᠭᠦᠳᠡ ᠪᠡᠷ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠭᠤᠷ ᠨᠢᠭᠡᠨ ᠶᠠᠪᠤᠳᠠᠯ ᠲᠣᠬᠢᠶᠠᠯᠳᠤᠭᠰᠠᠨ᠃ ᠡᠨᠡ ᠶᠠᠪᠤᠳᠠᠯ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠴᠢᠨᠢ ᠶᠡᠬᠡ ᠰᠠᠮᠠᠭᠤᠷᠠᠭᠤᠯᠵᠤ᠂ ᠴᠢ ᠤᠬᠠᠭᠠᠨ ᠬᠥᠯ ᠢ᠋ᠶ᠋ᠡᠨ ᠠᠯᠳᠠᠬᠤ ᠳᠡᠭᠡᠷᠡ ᠬᠦᠷᠦᠭᠰᠡᠨ᠃ ᠲᠡᠢᠮᠦ ᠪᠢᠰᠢ ᠤᠤ?
— ᠦᠭᠡᠢ᠂ ᠡᠢᠮᠦ ᠤᠴᠢᠷ᠁
— ᠲᠠ ᠨᠢᠭᠤᠵᠤ ᠬᠠᠪᠴᠢᠭᠰᠠᠨ ᠤ᠋ ᠬᠡᠷᠡᠭ ᠦᠭᠡᠢ᠂ ᠢᠩᠭᠢᠭᠡᠳ ᠲᠠ ᠪᠠᠷᠤᠭ ᠯᠠ ᠭᠦᠶᠦᠬᠦ ᠶ᠋ᠢᠨ ᠨᠠᠭᠠᠲᠠᠢ ᠴᠠᠭᠠᠲᠠᠢ ᠶᠠᠪᠤᠵᠤ ᠰᠢᠤᠳᠠᠨ ᠲᠣᠪᠴᠢᠶᠠᠨ ᠳ᠋ᠤ᠌ ᠬᠦᠷᠦᠭᠰᠡᠨ᠃
— ᠪᠢ ᠰᠢᠤᠳᠠᠨ ᠲᠣᠪᠴᠢᠶᠠ ᠶ᠋ᠢ ᠡᠭᠦᠳᠡ ᠪᠡᠨ ᠬᠠᠭᠠᠬᠤ ᠠ᠋ᠴᠠ ᠡᠮᠦᠨᠡ ᠵᠠᠪᠳᠤᠵᠤ ᠬᠦᠷᠦᠨᠡ ᠭᠡᠳ ᠶᠠᠭᠠᠷᠠᠤ ᠶᠠᠪᠤᠭᠰᠠᠨ ᠶᠤᠮ᠃
— ᠰᠢᠤᠳᠠᠨ ᠲᠣᠪᠴᠢᠶᠠ ᠡᠳᠦᠷ ᠪᠦᠷᠢ ᠨᠠᠢ᠍ᠮᠠᠨ ᠴᠠᠭ ᠲᠤ᠌ ᠡᠭᠦᠳᠡ ᠪᠡᠨ ᠬᠠᠭᠠᠳᠠᠭ᠃ ᠡᠭᠦᠨ ᠢ᠋ ᠲᠠ ᠮᠠᠰᠢ ᠲᠣᠳᠣᠷᠬᠠᠢ ᠮᠡᠳᠡᠨᠡ᠃ ᠲᠡᠷᠡ ᠡᠳᠦᠷ ᠴᠢᠮᠠ ᠶᠢ ᠣᠴᠢᠬᠤ ᠳ᠋ᠤ᠌ ᠰᠠᠶᠢ ᠲᠠᠪᠤᠨ ᠴᠠᠭ ᠥᠩᠭᠡᠷᠡᠵᠦ ᠪᠠᠢᠭᠰᠠᠨ᠃
— ᠡᠳᠡᠭᠡᠷ ᠢ᠋ ᠲᠠ ᠴᠣᠬᠣᠮ ᠁
— ᠲᠠ ᠪᠠᠰᠠ ᠲᠦᠷᠭᠡᠨ ᠴᠠᠬᠢᠯᠭᠠᠨ ᠳ᠋ᠠᠬᠢ ᠦᠰᠦᠭ ᠪᠢᠴᠢᠭ ᠢ᠋ᠶ᠋ᠡᠨ ᠲᠠᠩᠳᠠ ᠪᠤᠷᠤᠭᠤ ᠪᠢᠴᠢᠵᠦ ᠣᠷᠬᠢᠭᠰᠠᠨ᠃ ᠡᠨᠡ ᠴᠢᠨᠢ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠠᠨ ᠤ᠋ ᠰᠡᠳᠬᠢᠯ ᠰᠠᠨᠠᠭᠠ ᠰᠦᠷᠡᠬᠡᠢ ᠪᠠᠴᠢᠮᠳᠠᠨ ᠰᠠᠨᠳᠤᠷᠴᠤ ᠪᠠᠢᠭᠰᠠᠨ ᠢ᠋ ᠬᠠᠷᠠᠭᠤᠯᠵᠤ ᠪᠠᠢᠨᠠ᠃
— ᠪᠢ ᠣᠢᠯᠠᠭᠠᠬᠤ ᠪᠠᠨ ᠪᠠᠢᠴᠢᠬᠠᠯᠠ᠃ ᠲᠠ ᠨᠠᠳᠠ ᠶ᠋ᠢ ᠴᠣᠬᠣᠮ ᠶᠠᠮᠠᠷ ᠶᠠᠪᠤᠳᠠᠯ ᠳᠡᠭᠡᠷᠡ ᠰᠡᠵᠢᠭᠯᠡᠭᠡᠳ ᠮᠢᠨᠦ ᠦᠭᠡ ᠶᠠᠷᠢᠶᠠ᠂ ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠢᠩᠭᠢᠵᠦ ᠨᠠᠷᠢᠨ ᠪᠠᠢᠴᠠᠭᠠᠭᠰᠠᠨ ᠪᠣᠢ? ᠣᠳᠣ ᠡᠳᠡᠭᠡᠷ ᠢ᠋ ᠨᠠᠳᠠ ᠲᠤᠯᠭᠠᠭᠠᠳ ᠳᠠᠬᠢᠨ ᠳᠠᠪᠲᠠᠨ ᠠᠰᠠᠭᠤᠭᠠᠳ ᠪᠠᠢᠬᠤ ᠶ᠋ᠢᠨ ᠤᠴᠢᠷ ᠨᠢ ᠶᠠᠭᠤ ᠪᠣᠢ?
— ᠤᠴᠢᠷ ᠨᠢ ᠪᠣᠯ ᠳᠠᠷᠤᠢ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠪᠠᠢᠳᠠᠯ ᠢ᠋ ᠦᠨᠡᠨ ᠢ᠋ᠶ᠋ᠡᠷ ᠨᠢ ᠣᠢᠯᠠᠭᠠᠬᠤ ᠰᠠᠨᠠᠭᠠᠲᠠᠢ᠃ ᠪᠢ ᠪᠣᠳᠣᠪᠠᠯ ᠲᠠ ᠬᠠᠰᠢ ᠯᠠ ᠡᠷᠲᠡᠬᠡᠨ ᠰᠢᠭ ᠪᠢᠳᠡᠨ ᠳ᠋ᠦ᠍ ᠲᠣᠳᠣᠷᠬᠠᠢ ᠶᠠᠷᠢᠭᠠᠳ ᠥᠭᠪᠡᠯ ᠳᠡᠭᠡᠷᠡ᠃
— ᠲᠠ ᠨᠠᠷ ᠨᠢᠭᠡᠨᠲᠡ ᠪᠦᠷ ᠨᠠᠷᠢᠨ ᠪᠠᠢᠴᠠᠭᠠᠭᠠᠳ ᠣᠢᠯᠠᠭᠠᠭᠰᠠᠨ ᠪᠠᠢᠨᠠ ᠰᠢᠲᠠ᠃ ᠦᠵᠡᠰᠬᠦᠯᠡᠩ ᠭᠡᠭᠴᠢ ᠪᠠᠰᠠ ᠬᠥᠭᠡᠷᠦᠬᠦᠢ ᠠᠮᠢᠲᠠᠨ᠃ ᠡᠷᠡ ᠳᠦ ᠪᠡᠨ ᠴᠣᠬᠢᠭᠳᠠᠭᠠᠳ ᠬᠥᠯ ᠢ᠋ᠶ᠋ᠡᠨ ᠬᠤᠭᠤᠯᠤᠭᠤᠯᠤᠭᠰᠠᠨ ᠦᠶᠡ ᠳ᠋ᠦ᠍᠂ ᠪᠠᠰᠠ ᠨᠠᠮᠠ ᠶᠢ ᠭᠤᠶᠤᠨ ᠬᠠᠳᠠᠮ ᠡᠴᠢᠭᠡ ᠳᠦ ᠪᠡᠨ ᠪᠣᠯᠤᠷᠴᠠᠭᠠᠨ ᠤ᠋ ᠨᠡᠷᠡ ᠪᠡᠷ ᠵᠣᠭᠣᠰ ᠭᠤᠪᠢᠭᠤᠯᠬᠤ ᠭᠡᠪᠡ᠃ ᠪᠢ ᠠᠩᠬᠠᠨ ᠳᠤ ᠪᠠᠨ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠭᠤᠶᠤᠭᠠᠳ ᠪᠠᠢᠬᠤᠯᠠᠷ ᠨᠢᠭᠤᠷ ᠳᠠᠭᠠᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠭᠤᠪᠢᠭᠤᠯᠵᠤ ᠥᠭᠬᠦ ᠪᠡᠷ ᠪᠣᠯᠪᠠ᠃ ᠲᠡᠭᠡᠬᠦ ᠳᠦ ᠪᠡᠨ ᠲᠡᠷᠡ ᠪᠠᠰᠠ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠳ᠋ᠤ᠌ ᠵᠡᠭᠢᠳᠡᠯ ᠪᠢᠴᠢᠵᠦ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠳ᠋ᠤ᠌ ᠪᠢᠲᠡᠭᠡᠢ ᠢᠷᠡ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠳᠠᠬᠢᠨ ᠳᠠᠬᠢᠨ ᠵᠠᠬᠢᠭᠰᠠᠨ ᠶᠤᠮ᠃ ᠪᠢ ᠪᠦᠷ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠬᠢᠭᠰᠡᠨ ᠲᠡᠳᠦᠢ᠃ ᠭᠡᠲᠡᠯᠡ ᠲᠠ ᠨᠠᠷ ᠨᠠᠳᠠ ᠢᠩᠭᠢᠵᠦ ᠣᠯᠠᠨ ᠶᠠᠭᠤᠮᠠ ᠲᠤᠯᠭᠠᠭᠠᠳ ᠪᠠᠢᠬᠤ ᠨᠢ ᠴᠣᠬᠣᠮ ᠶᠠᠮᠠᠷ ᠤᠬᠠᠭᠠᠨ ᠲᠠᠢ ᠶᠤᠮ?
— ᠸᠠᠩ ᠡᠮᠴᠢ ᠠ᠋᠂ ᠲᠠ ᠪᠢᠳᠡᠨ ᠢ᠋ ᠪᠤᠷᠤᠭᠤ ᠣᠢᠯᠠᠭᠠᠵᠤ ᠪᠠᠢᠬᠤ ᠮᠠᠭᠠᠳ ᠦᠭᠡᠢ᠃ ᠥᠨᠥᠳᠥᠷ ᠮᠠᠨ ᠤ᠋ ᠭᠣᠣᠯ ᠣᠢᠯᠠᠭᠠᠬᠤ ᠶᠠᠭᠤᠮᠠ ᠪᠣᠯ ᠲᠠᠨ ᠢ᠋ ᠦᠵᠡᠰᠬᠦᠯᠡᠩ ᠦ᠋ᠨ ᠭᠡᠷ ᠡᠴᠡ ᠭᠠᠷᠬᠤ ᠦᠶᠡ ᠳ᠋ᠦ᠍ ᠶᠠᠮᠠᠷ ᠬᠡᠷᠡᠭ ᠲᠣᠬᠢᠶᠠᠯᠳᠤᠭᠰᠠᠨ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠲᠠᠨ ᠳ᠋ᠤ᠌ ᠯᠠᠪᠲᠠᠢ ᠲᠣᠬᠢᠶᠠᠯᠳᠤᠭᠰᠠᠨ ᠭᠡᠵᠦ ᠪᠢ ᠪᠠᠲᠤ ᠢᠲᠡᠭᠡᠵᠦ ᠪᠠᠢᠨᠠ᠃ ᠮᠢᠨᠦ ᠠᠰᠠᠭᠤᠬᠤ ᠠᠷᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠲᠠᠨ ᠢ᠋ ᠪᠠᠬᠠᠨ ᠰᠢᠬᠠᠮᠳᠠᠭᠤᠯᠤᠭᠰᠠᠨ ᠭᠠᠵᠠᠷ ᠪᠠᠢᠵᠤ ᠮᠡᠳᠡᠨᠡ᠃ ᠡᠭᠦᠨ ᠢ᠋ ᠮᠢᠨᠢ ᠠᠭᠤᠴᠢᠯᠠᠭᠠᠷᠠᠢ᠃ ᠭᠡᠲᠡᠯᠡ ᠲᠡᠷᠡ ᠬᠦ᠌ ᠤᠴᠠᠷᠠᠯ ᠢ᠋ᠶ᠋ᠠᠨ ᠨᠠᠳᠠ ᠶᠠᠭᠠᠬᠢᠭᠰᠠᠨ ᠴᠤ᠌ ᠲᠣᠳᠣᠷᠬᠠᠢ ᠶᠠᠷᠢᠵᠤ ᠥᠭᠭᠦᠭᠡᠴᠢ᠃
— ᠁
— ᠵᠠ ᠶᠠᠷᠢ ᠳᠠ᠃ ᠡᠰᠡᠬᠦᠯᠡ ᠬᠠᠭᠠᠰ ᠢ᠋ ᠨᠢ ᠴᠤ᠌ ᠪᠣᠯᠤᠨᠠ᠃
— ᠁
— ᠲᠠᠨ ᠠ᠋ᠴᠠ ᠵᠥᠪᠬᠡᠨ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠶᠠ ᠭᠡᠵᠦ ᠯᠡ ᠪᠠᠢᠨᠠ᠃ ᠸᠠᠩ ᠡᠮᠴᠢ ᠠ᠋᠂ ᠮᠠᠨ ᠤ᠋ ᠠᠵᠢᠯ ᠳ᠋ᠤ᠌ ᠬᠠᠪᠰᠤᠷᠤᠯᠭᠠ ᠪᠣᠯᠵᠤ ᠶᠠᠷᠢᠵᠤ ᠥᠭᠭᠦᠭᠡᠴᠢ ᠳᠡ᠃
ᠸᠠᠩ ᠯᠠᠨ ᠬᠤᠸᠠ ᠡᠮᠴᠢ᠂ ᠲᠦᠪᠰᠢᠨ ᠦ᠌ ᠳᠠᠬᠢᠨ ᠳᠠᠪᠲᠠᠨ ᠠᠰᠠᠭᠤᠭᠰᠠᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠲᠠ ᠥᠭᠭᠦᠭᠰᠡᠨ ᠦᠭᠡᠢ᠃ ᠲᠡᠷᠡ ᠭᠡᠨᠡᠳᠲᠡ ᠪᠣᠰᠴᠤ ᠵᠣᠴᠢᠯᠠᠬᠤ ᠲᠢᠩᠬᠢᠮ ᠦ᠋ᠨ ᠢ᠋ᠶ᠋ᠡᠨ ᠴᠣᠩᠬᠣ ᠶ᠋ᠢ ᠨᠡᠭᠡᠭᠡᠭᠡᠳ ᠭᠠᠳᠠᠭᠰᠢ ᠪᠠᠨ ᠤᠳᠠᠲᠠᠯᠠ ᠬᠠᠷᠠᠯᠠ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳᠣᠲᠣᠷᠠ ᠨᠢ ᠰᠦᠷᠡᠬᠡᠢ ᠳᠠᠪᠠᠯᠭᠠᠨ ᠡᠭᠦᠰᠴᠦ ᠪᠠᠢᠬᠤ ᠶ᠋ᠢ ᠬᠠᠷᠠᠭᠤᠯᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠠᠭᠠᠵᠢᠮ ᠭᠡᠭᠴᠢ ᠪᠡᠶᠡ ᠡᠷᠭᠢᠨ᠄
— ᠲᠠᠨ ᠳ᠋ᠤ᠌ ᠪᠤᠷᠤᠭᠤᠳᠤᠯᠠ᠃ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠠ᠋᠂ ᠣᠳᠣᠬᠠᠨ ᠳ᠋ᠤ᠌ ᠮᠢᠨᠦ ᠰᠡᠳᠬᠢᠯ ᠳᠠᠩᠴᠤ ᠡᠷᠦᠢ ᠬᠤᠷᠤᠢ ᠦᠭᠡᠢ ᠪᠠᠢᠨᠠ᠃ ᠮᠠᠷᠭᠠᠰᠢ ᠲᠠᠨ ᠲᠠᠢ ᠶᠠᠷᠢᠯᠴᠠᠶᠠ᠂ ᠪᠣᠯᠤᠨᠠ ᠤᠤ? ᠭᠡᠪᠡ᠃
— ᠦ᠂ ᠪᠣᠯᠤᠨᠠ᠂ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠮᠠᠷᠭᠠᠰᠢ ᠲᠠᠨ ᠲᠠᠢ ᠶᠠᠷᠢᠯᠴᠠᠶᠠ᠃ ᠲᠠᠨ ᠢ᠋ ᠵᠣᠪᠠᠭᠠᠯᠠ ᠭᠡᠳ ᠲᠦᠪᠰᠢᠨ ᠰᠠᠯᠬᠤ ᠶᠣᠰᠣ ᠭᠦᠢᠴᠡᠳᠬᠡᠯᠡ᠃
ᠲᠡᠷᠡ ᠬᠣᠶᠠᠭᠤᠯᠠ ᠡᠨᠡ ᠠᠵᠢᠯ ᠠ᠋ᠴᠠ ᠭᠠᠷᠤᠭᠠᠳ ᠵᠡᠭᠡᠯᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠬᠥᠬᠡᠲᠤᠯᠢ ᠲᠦᠪᠰᠢᠨ ᠡᠴᠡ᠄
— ᠸᠠᠩ ᠯᠠᠨ ᠬᠤᠸᠠ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠳ᠋ᠤ᠌ ᠵᠣᠭᠣᠰ ᠭᠤᠪᠢᠭᠤᠯᠤᠭᠰᠠᠨ ᠢ᠋ ᠲᠠ ᠶᠠᠭᠠᠬᠢᠵᠤ ᠮᠡᠳᠡᠭᠰᠡᠨ ᠪᠣᠢ?
— ᠲᠠᠪᠤᠨ ᠴᠠᠭ ᠬᠠᠭᠠᠰ ᠤ᠋ᠨ ᠦᠶᠡ ᠳ᠋ᠦ᠍ ᠲᠡᠭᠦᠨ ᠡᠴᠡ ᠥᠭᠡᠷᠡ ᠬᠥᠮᠦᠨ ᠵᠣᠭᠣᠰ ᠭᠤᠪᠢᠭᠤᠯᠬᠤ ᠪᠣᠯᠤᠯᠴᠠᠭᠠ ᠦᠭᠡᠢ᠃ ᠲᠡᠷᠡᠴᠢᠯᠡᠨ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠦᠵᠡᠰᠬᠦᠯᠡᠩ ᠭᠠᠭᠴᠠ ᠸᠠᠩ ᠯᠠᠨ ᠬᠤᠸᠠ ᠶ᠋ᠢ ᠢᠲᠡᠭᠡᠵᠦ ᠮᠢᠩᠭᠠᠨ ᠲᠥᠭᠥᠷᠢᠭ ᠥᠭᠴᠦ ᠭᠤᠪᠢᠭᠤᠯᠤᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃
— ᠲᠠ ᠲᠡᠷᠡ ᠬᠣᠶᠠᠭᠤᠯᠠ ᠶ᠋ᠢᠨ ᠬᠡᠯᠡᠯᠴᠡᠭᠰᠡᠨ ᠦᠭᠡ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠭᠰᠡᠨ ᠪᠣᠢ?
— ᠡᠨᠡ ᠶᠡᠬᠡ ᠢᠯᠡᠬᠡᠨ ᠬᠡᠷᠡᠭ ᠰᠢᠳᠡ᠃ ᠦᠵᠡᠰᠬᠦᠯᠡᠩ᠂ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠳ᠋ᠤ᠌ ᠵᠣᠭᠣᠰ ᠭᠤᠪᠢᠭᠤᠯᠬᠤ ᠭᠡᠬᠦ ᠳ᠋ᠦ᠍ ᠸᠠᠩ ᠯᠠᠨ ᠬᠤᠸᠠ ᠯᠠᠪ ᠪᠣᠯᠤᠷᠴᠠᠭᠠᠨ ᠢ᠋ ᠮᠠᠭᠤᠯᠠᠬᠤ ᠶᠤᠮ᠃ ᠬᠡᠷᠪᠡ ᠦᠵᠡᠰᠬᠦᠯᠡᠩ ᠲᠡᠭᠦᠨ ᠳ᠋ᠦ᠍ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠥᠮᠥᠭᠯᠡᠨ ᠭᠡᠷ ᠪᠦᠯᠢ ᠶ᠋ᠢᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠨᠠᠷᠢᠨ ᠲᠣᠳᠣᠷᠬᠠᠢ ᠬᠡᠯᠡᠬᠦ ᠦᠭᠡᠢ ᠪᠣᠯ ᠲᠡᠷᠡ ᠯᠠᠪᠲᠠᠢ ᠲᠡᠭᠦᠨ ᠢ᠋ ᠣᠷᠣᠯᠠᠨ ᠵᠣᠭᠣᠰ ᠭᠤᠪᠢᠭᠤᠯᠬᠤ ᠪᠠ ᠵᠠᠬᠢᠳᠠᠯ ᠪᠢᠴᠢᠬᠦ ᠦᠭᠡᠢ ᠶᠦᠮ᠃
— ᠲᠡᠭᠡᠪᠡᠯ ᠸᠠᠩ ᠯᠠᠨ ᠬᠤᠸᠠ ᠪᠠᠰᠠ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠᠬᠢ ᠶᠠᠮᠠᠷ ᠨᠢᠭᠡᠨ ᠣᠨᠴᠠᠭᠠᠢ ᠬᠡᠷᠡᠭ ᠲᠦ᠍ ᠤᠴᠠᠷᠠᠭᠰᠠᠨ ᠭᠡᠵᠦ ᠤᠤ?
— ᠤᠴᠠᠷᠠᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠦᠵᠡᠰᠬᠦᠯᠡᠩ ᠦ᠋ᠨ ᠡᠰᠡᠷᠭᠦ ᠭᠡᠷ ᠦ᠋ᠨ ᠡᠮᠡᠭᠲᠡᠢ ᠡᠴᠡ ᠣᠢᠯᠠᠭᠠᠭᠰᠠᠨ ᠢ᠋ᠶ᠋ᠠᠷ ᠲᠡᠷᠡ ᠡᠳᠦᠷ ᠦ᠋ᠨ ᠲᠠᠪᠤᠨ ᠴᠠᠭ ᠤ᠋ᠨ ᠦᠶᠡ ᠪᠡᠷ ᠨᠢᠭᠡ ᠲᠠᠷᠭᠤᠨ ᠡᠬᠡᠨᠡᠷ ᠦᠵᠡᠰᠬᠦᠯᠡᠩ ᠦ᠋ᠨ ᠭᠡᠷ ᠡᠴᠡ ᠬᠥᠨᠳᠡᠢᠬᠡᠨ ᠭᠠᠷᠴᠤ ᠢᠷᠡᠭᠡᠳ᠂ ᠰᠡᠮᠡᠬᠡᠷ ᠰᠡᠮᠡᠬᠡᠷ ᠬᠡᠳᠦ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ ᠵᠣᠭᠬᠢᠨ ᠵᠣᠭᠰᠣᠵᠤ ᠪᠤᠴᠠᠵᠤ ᠣᠴᠢᠭᠠᠳ ᠡᠭᠦᠳᠡ ᠶ᠋ᠢ ᠨᠢ ᠴᠢᠮᠡᠭᠡ ᠦᠭᠡᠢᠬᠡᠨ ᠵᠠᠪᠰᠠᠷᠯᠠᠨ ᠳᠣᠲᠣᠭᠰᠢ ᠨᠡᠯᠢᠶᠡᠳ ᠬᠠᠷᠠᠵᠤ ᠬᠠᠷᠠᠭᠠᠳ ᠶᠠᠪᠤᠭᠰᠠᠨ ᠢ᠋ ᠲᠡᠷᠡ ᠡᠮᠡᠭᠲᠡᠢ ᠴᠣᠩᠬᠣ ᠪᠠᠷ ᠢ᠋ᠶ᠋ᠠᠨ ᠣᠯᠵᠤ ᠦᠵᠡᠵᠡᠢ᠃ ᠬᠡᠷᠪᠡ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠᠬᠢ ᠠᠨᠢᠷ ᠰᠡᠵᠢᠭ ᠠᠪᠤᠭᠰᠠᠨ ᠦᠭᠡᠢ ᠪᠣᠯ ᠲᠡᠷᠡ ᠭᠡᠷ ᠡᠴᠡ ᠭᠠᠷᠴᠤ ᠢᠷᠡᠮᠡᠭᠴᠡ ᠳᠠᠬᠢᠭᠠᠳ ᠶᠠᠭᠤᠨ ᠳ᠋ᠤ᠌ ᠲᠡᠭᠡᠵᠦ ᠡᠭᠦᠳᠡ ᠵᠠᠪᠰᠠᠷᠯᠠᠨ ᠳᠣᠲᠣᠭᠰᠢ ᠠᠵᠢᠭᠯᠠᠨ ᠱᠠᠭᠠᠢᠬᠤ ᠪᠣᠢ? ᠸᠠᠩ ᠯᠠᠨ ᠬᠤᠸᠠ ᠲᠡᠭᠡᠭᠡᠳ ᠦᠵᠡᠰᠬᠦᠯᠡᠩ ᠦ᠋ᠨ ᠭᠡᠷ ᠡᠴᠡ ᠰᠢᠤᠳᠠᠨ ᠲᠣᠪᠴᠢᠶᠠ ᠬᠦᠷᠲᠡᠯᠡ ᠮᠠᠰᠢ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ ᠶᠠᠪᠤᠵᠤ ᠪᠠᠢᠭᠰᠠᠨ ᠢ᠋ ᠬᠥᠮᠦᠰ ᠣᠯᠵᠤ ᠦᠵᠡᠵᠡᠢ᠃ ᠲᠦᠷᠭᠡᠨ ᠴᠠᠬᠢᠯᠭᠠᠨ ᠪᠢᠴᠢᠭᠰᠡᠨ ᠦᠰᠦᠭ ᠦ᠋ᠳ ᠡᠴᠡ ᠴᠤ᠌ ᠪᠠᠰᠠ ᠪᠠᠷᠤᠭᠯᠠᠵᠤ ᠪᠣᠯᠤᠨᠠ᠃ ᠡᠭᠦᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ ᠴᠠᠭ ᠤ᠋ᠨ ᠲᠠᠯᠠ ᠪᠠᠷ ᠰᠢᠬᠠᠭᠰᠠᠨ ᠴᠤ᠌ ᠲᠡᠷᠡ ᠣᠨᠴᠠᠭᠠᠢ ᠨᠢᠭᠡᠨ ᠬᠡᠷᠡᠭ ᠲᠦ᠍ ᠲᠣᠬᠢᠶᠠᠯᠳᠤᠬᠤ ᠪᠣᠯᠤᠯᠴᠠᠭᠠ ᠲᠠᠢ ᠶᠤᠮ᠃
— ᠲᠡᠢᠮᠦ ᠪᠣᠯ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠨᠢ ᠸᠠᠩ ᠯᠠᠨ ᠬᠤᠸᠠ ᠲᠠᠢ ᠬᠣᠯᠪᠣᠭᠳᠠᠯ ᠲᠠᠢ ᠭᠡᠵᠢ ᠤᠤ?
— ᠦᠭᠡᠢ᠂ ᠬᠣᠯᠪᠣᠭᠳᠠᠯ ᠦᠭᠡᠢ᠃
— ᠲᠡᠭᠡᠭᠡᠳ? ᠭᠡᠵᠦ ᠬᠥᠬᠡᠲᠤᠯᠢ ᠶ᠋ᠢ ᠤᠬᠤᠴᠢᠯᠠᠨ ᠠᠰᠠᠭᠤᠬᠤ ᠳ᠋ᠤ᠌᠂ ᠲᠦᠪᠰᠢᠨ ᠭᠤᠸᠠᠢ ᠤᠴᠢᠷᠲᠠᠢᠬᠠᠨ ᠨᠢᠭᠡᠨ ᠢᠨᠢᠶᠡᠵᠦ ᠠᠪᠤᠭᠠᠳ᠄
— ᠢᠨᠠᠭᠯᠠᠵᠤ ᠪᠠᠢᠭᠠ ᠬᠡᠦᠬᠡᠨ ᠴᠢᠨᠢ ᠴᠢᠮᠠ ᠶᠢ ᠬᠦᠯᠢᠶᠡᠨ ᠶᠠᠳᠠᠵᠤ ᠪᠠᠢᠬᠤ ᠳᠠ᠂ ᠮᠢᠨᠦ ᠮᠠᠭᠤ ᠡᠮᠡᠭᠡᠨ ᠴᠤ᠌ ᠨᠠᠮᠠ ᠶᠢ ᠬᠠᠷᠠᠵᠤ ᠪᠣᠢ᠂ ᠣᠳᠣ ᠬᠣᠶᠠᠭᠤᠯᠠ ᠵᠠᠮ ᠰᠠᠯᠤᠶᠠ ᠭᠡᠳ ᠭᠡᠷ ᠤᠷᠤᠭᠤ ᠪᠠᠨ ᠠᠯᠬᠤᠵᠠᠢ᠃
ᠤᠩᠰᠢᠭ᠌ᠰᠠᠨ ᠨᠢ᠄ ᠴᠡᠴᠡᠭᠮᠡ