《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》ᠲᠠᠪᠤᠳᠤᠭᠠᠷ ᠪᠦᠯᠦᠭ ᠂ ᠲᠠᠲ᠋ᠠᠷ ᠢ᠋ ᠰᠥᠨᠥᠭᠡᠭᠰᠡᠨ ᠪᠠ ᠸᠠᠩ ᠬᠠᠨ ᠲᠠᠢ ᠡᠪᠳᠡᠷᠡᠭᠰᠡᠨ ᠨᠢТатарыг сөнөөсөн ба ван хантай эвдэрсэн нь
2440《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》ᠲᠠᠪᠤᠳᠤᠭᠠᠷ ᠪᠦᠯᠦᠭ ᠂ ᠲᠠᠲ᠋ᠠᠷ ᠢ᠋ ᠰᠥᠨᠥᠭᠡᠭᠰᠡᠨ ᠪᠠ ᠸᠠᠩ ᠬᠠᠨ ᠲᠠᠢ ᠡᠪᠳᠡᠷᠡᠭᠰᠡᠨ ᠨᠢ
148᠂ ᠴᠢᠩᠭᠢᠰ ᠬᠠᠭᠠᠨ᠂ ᠲᠡᠨᠳᠡ ᠲᠠᠢᠴᠢᠭᠤᠳ ᠢ᠋ ᠳᠣᠪᠲᠣᠯᠵᠤ ᠠᠭᠤᠴᠤ ᠪᠠᠭᠠᠲᠤᠷ᠂ᠬᠣᠲᠣᠩ ᠣᠷᠴᠠᠩ᠂ ᠬᠤᠲᠤᠭᠤᠳᠠᠷ ᠵᠡᠷᠭᠡ ᠶ᠋ᠢᠨ ᠲᠠᠢᠴᠢᠭᠤᠳ ᠤ᠋ᠨ ᠢᠵᠠᠭᠤᠷᠲᠠᠨ ᠢ᠋ ᠤᠷᠤᠭ ᠤ᠋ᠨ ᠤᠷᠤᠭ ᠬᠦᠷᠲᠡᠯᠡ ᠦᠨᠡᠰᠦᠨ ᠲᠣᠪᠣᠷᠠᠭ ᠪᠣᠯᠭᠠᠵᠤ ᠬᠢᠳᠤᠪᠠ᠃ ᠤᠯᠤᠰ ᠢᠷᠭᠡᠨ ᠢ᠋ ᠨᠢ ᠨᠡᠭᠦᠯᠭᠡᠵᠦ᠂ ᠴᠢᠩᠭᠢᠰ ᠬᠠᠭᠠᠨ᠂ ᠬᠤᠪᠠ ᠬᠠᠶᠠᠭᠠ (ᠤᠬᠠᠭᠠ ᠬᠠᠶᠠᠭᠠ) ᠭᠡᠳᠡᠭ ᠭᠠᠵᠠᠷ ᠢᠷᠡᠵᠦ ᠡᠪᠦᠯᠵᠢᠪᠡ᠃
149᠂ ᠰᠤᠤᠲᠤ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ᠂ ᠵᠠᠬᠠ ᠨᠤᠲᠤᠭ ᠨᠤᠲᠤᠭᠯᠠᠵᠤ ᠶᠠᠪᠤᠬᠤ ᠶ᠋ᠢᠨ ᠴᠠᠭ ᠲᠤ᠌ ᠨᠢᠭᠡᠨ ᠡᠳᠦᠷ ᠳᠣᠲᠣᠭᠠᠳᠤ ᠶᠢᠰᠦᠨ ᠰᠠᠢᠳ ᠢ᠋ᠶ᠋ᠠᠨ ᠠᠪᠴᠤ ᠮᠥᠷ ᠬᠠᠢᠵᠤ᠂ ᠪᠠᠷᠠ ᠬᠠᠷᠠᠵᠤ ᠶᠠᠪᠤᠭᠠᠳ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠠᠯᠢ ᠴᠤ᠌ ᠵᠦᠭ ᠡᠴᠡ ᠶᠠᠮᠠᠷ ᠴᠤ᠌ ᠳᠠᠢᠰᠤᠨ ᠢᠷᠡᠬᠦ ᠮᠠᠭᠠᠳ ᠦᠭᠡᠢ᠂ ᠶᠢᠰᠦᠨ ᠰᠠᠢᠳ ᠮᠢᠨᠢ ᠭᠤᠷᠪᠠᠨ ᠬᠡᠰᠡᠭ ᠪᠣᠯᠵᠤ ᠶᠠᠪᠤ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠡᠵᠡᠨ ᠦ᠌ ᠵᠠᠷᠯᠢᠭ ᠢ᠋ ᠳᠠᠭᠠᠵᠤ ᠵᠡᠯᠮᠡ᠂ ᠴᠤᠤ ᠮᠡᠷᠭᠡᠨ᠂ ᠰᠢᠭᠢᠬᠤᠲᠤᠭ ᠭᠤᠷᠪᠠ ᠨᠢᠭᠡ ᠬᠡᠰᠡᠭ ᠪᠣᠯᠪᠠ᠂ ᠪᠣᠭᠣᠷᠴᠤ᠂ ᠪᠣᠷᠣᠬᠤᠯ᠂ ᠮᠤᠬᠤᠯᠠᠢ ᠭᠤᠷᠪᠠᠭᠤᠯᠠ ᠨᠢᠭᠡ ᠬᠡᠰᠡᠭ ᠪᠣᠯᠪᠠ᠂ ᠰᠦᠯᠳᠦᠰᠦᠨ ᠦ᠌ ᠰᠣᠷᠬᠠᠨ ᠰᠢᠷᠠ᠂ ᠪᠡᠰᠦᠲᠡᠢ ᠶ᠋ᠢᠨ ᠵᠡᠪᠡ᠂ ᠣᠢᠷᠠᠳ ᠤ᠋ᠨ ᠬᠠᠷᠠ ᠬᠢᠷᠥᠭᠡ ᠭᠤᠷᠪᠠ ᠨᠢᠭᠡ ᠬᠡᠰᠡᠭ ᠪᠣᠯᠵᠤ ᠭᠡᠷ ᠲᠦ᠍ ᠦᠯᠡᠳᠡᠪᠡ᠃ ᠡᠵᠡᠨ ᠪᠤᠰᠤᠳ ᠵᠢᠷᠭᠤᠭᠠᠨ ᠰᠠᠢᠳ ᠢ᠋ᠶ᠋ᠠᠨ ᠠᠪᠴᠤ ᠮᠥᠷ ᠬᠠᠢᠵᠤ᠂ ᠪᠠᠷᠠ ᠬᠠᠷᠠᠵᠤ᠂ ᠴᠠᠬᠠᠷ ᠬᠠᠨ ᠢ᠋ ᠠᠷᠤᠯᠠᠵᠤ᠂ ᠵᠡᠯᠮᠡᠨ ᠬᠠᠨ ᠢ᠋ ᠥᠯᠥᠭᠡᠢᠯᠡᠵᠦ ᠶᠠᠪᠤᠲᠠᠯᠠ ᠡᠵᠡᠨ ᠦ᠌ ᠳᠣᠣᠷᠠ ᠠ᠋ᠴᠠ ᠬᠠᠯᠲᠠᠷ ᠳᠠᠬᠢ ᠬᠠᠷᠠᠢᠨ ᠭᠦᠶᠦᠬᠦ ᠳ᠋ᠦ᠍ ᠡᠵᠡᠨ ᠲᠣᠯᠪᠣᠲᠤ ᠪᠣᠷᠣ ᠮᠣᠷᠢ ᠪᠠᠷ ᠢ᠋ᠶ᠋ᠠᠨ ᠳᠣᠪᠲᠣᠯᠤᠨ ᠭᠦᠢᠴᠡᠵᠦ ᠠᠭᠰᠠᠭᠰᠠᠨ ᠨᠤᠮᠤ ᠪᠠᠨ ᠠᠩᠭᠠᠢᠯᠭᠠᠨ ᠲᠠᠲᠠᠵᠤ ᠠᠯᠲᠠᠨ ᠰᠤᠮᠤ ᠪᠠᠨ ᠠᠯᠳᠠᠯᠠᠨ ᠳᠡᠯᠢᠵᠦ ᠠᠯᠠᠭ ᠳᠠᠬᠢ ᠶ᠋ᠢ ᠠᠲᠤᠷᠢᠲᠠᠯᠠ ᠬᠠᠷᠪᠤᠵᠤ ᠠᠯᠠᠭᠰᠠᠨ ᠳᠠᠷᠤᠢ ᠳ᠋ᠤ᠌ ᠠᠷᠤ ᠳ᠋ᠠᠬᠢ ᠰᠠᠢᠳ ᠨᠢ ᠠᠮᠠᠳᠠᠨ ᠪᠠᠭᠤᠵᠤ ᠠᠪᠴᠤ ᠭᠠᠨᠵᠤᠭᠠᠯᠠᠬᠤ ᠶ᠋ᠢ ᠵᠠᠪᠳᠤᠲᠠᠯᠠ ᠡᠵᠡᠨ ᠵᠠᠷᠯᠢᠭ ᠪᠣᠯᠪᠠ᠄ 《ᠡᠭᠦᠨ ᠢ᠋ ᠲᠠ ᠨᠠᠷ ᠦᠳᠲᠡᠷ ᠥᠪᠴᠢᠵᠦ ᠰᠢᠷᠠ᠂ ᠪᠢ ᠲᠡᠷᠡ ᠰᠢᠷᠠ ᠳᠡᠪᠰᠡᠭ ᠳᠡᠭᠡᠷᠡ ᠭᠠᠷᠴᠤ ᠪᠠᠷᠠ ᠬᠠᠷᠠᠶᠠ》 ᠭᠡᠳ ᠣᠳᠪᠠ᠃ ᠲᠡᠨᠳᠡ ᠡᠵᠡᠨ ᠦ᠌ ᠨᠣᠢᠷ ᠬᠦᠷᠴᠦ᠂ ᠲᠣᠯᠪᠣᠲᠤ ᠪᠣᠷᠣ ᠮᠣᠷᠢᠨ ᠤ᠋ ᠳᠡᠯ ᠳᠡᠭᠡᠷᠡ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠲᠤᠯᠵᠤ ᠤᠨᠲᠠᠭᠠᠳ ᠨᠢᠭᠡ ᠵᠡᠭᠦᠳᠦ ᠵᠡᠭᠦᠳᠦᠯᠡᠪᠡ᠃ ᠴᠢᠩᠭᠢᠰ ᠬᠠᠭᠠᠨ ᠰᠡᠷᠢᠭᠡᠳ ᠵᠢᠷᠭᠤᠭᠠᠨ ᠰᠠᠢᠳ ᠲᠠᠭᠠᠨ ᠢᠷᠡᠵᠦ ᠵᠠᠷᠯᠢᠭ ᠪᠣᠯᠤᠷᠤᠨ᠄
《ᠪᠢ ᠨᠢᠭᠡ ᠵᠡᠭᠦᠳᠦ ᠵᠡᠭᠦᠳᠦᠯᠡᠪᠡ ᠪᠣᠷᠣ ᠵᠢᠷᠦᠬᠡ ᠮᠢᠨᠢ ᠫᠣᠯ ᠫᠣᠯ ᠬᠢᠪᠡ ᠪᠣᠭᠣᠨᠢ ᠬᠠᠪᠢᠷᠭᠠ ᠮᠢᠨᠢ ᠰᠢᠷ ᠰᠢᠷ ᠬᠢᠪᠡ᠂ ᠪᠣᠯᠣᠰᠢ ᠦᠭᠡᠢ ᠳᠠᠢᠰᠤᠨ ᠢᠷᠡᠬᠦ ᠨᠢ ᠪᠣᠯᠤᠯᠲᠠᠢ᠂ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠴᠠᠭᠠᠳᠤᠬᠢ ᠥᠷᠭᠡᠨ ᠰᠢᠷᠠ ᠲᠠᠯᠠ ᠳ᠋ᠤ᠌ ᠭᠤᠷᠪᠠᠨ ᠬᠠᠷᠠ ᠲᠤᠭ ᠲᠠᠢ ᠭᠤᠷᠪᠠᠨ ᠵᠠᠭᠤᠨ ᠳᠠᠢᠰᠤᠨ ᠪᠠᠢᠨᠠ᠂ ᠭᠤᠷᠪᠠᠨ ᠵᠠᠭᠤᠨ ᠳᠠᠢᠰᠤᠨ ᠤ᠋ ᠬᠣᠰᠢᠭᠤᠴᠢ ᠪᠠᠭᠠᠲᠤᠷ ᠨᠢ ᠵᠡᠭᠡᠷᠳᠡ ᠮᠣᠷᠢ ᠪᠠᠨ ᠤᠨᠤᠵᠤ ᠵᠠᠪᠠᠳᠣ ᠰᠤᠮᠤ ᠪᠠᠨ ᠲᠡᠯᠡᠵᠦ ᠪᠠᠲᠤ ᠬᠤᠶᠠᠭ ᠢ᠋ᠶ᠋ᠠᠨ ᠡᠮᠦᠰᠴᠦ ᠪᠠᠷᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠢᠵᠦ ᠪᠠᠷᠠᠭᠤᠨ ᠲᠡᠰᠢ ᠰᠢᠷᠪᠢᠵᠦ ᠵᠡᠭᠦᠨ ᠳᠠᠰᠢ ᠠᠵᠢᠭᠯᠠᠵᠤ ᠵᠡᠭᠦᠦ ᠮᠡᠲᠦ ᠵᠢᠷᠪᠠᠯᠵᠠᠵᠤ ᠤᠲᠠᠰᠤ ᠮᠡᠲᠦ ᠤᠯᠠᠯᠵᠠᠵᠤ ᠶᠠᠪᠤᠨᠠ᠂ ᠡᠢᠮᠦ ᠵᠡᠭᠦᠳᠦ ᠮᠢᠨᠢ ᠬᠡᠷᠪᠡ ᠦᠨᠡᠨ ᠪᠣᠯ ᠵᠢᠷᠭᠤᠭᠠᠨ ᠰᠠᠢᠳ ᠮᠢᠨᠢ ᠲᠠ ᠨᠠᠷ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠵᠦ ᠠᠰᠠᠭᠤᠪᠠᠯ᠂ ᠰᠢᠭᠢᠬᠤᠲᠤᠭ ᠬᠡᠯᠡᠪᠡ᠄
《ᠬᠣᠯᠠ ᠣᠢᠷᠠ ᠶ᠋ᠢ ᠬᠠᠷᠠᠭᠴᠢ ᠬᠣᠶᠠᠷ ᠬᠤᠷᠴᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠮᠣᠩᠭ᠋ᠣᠯ ᠠᠢᠮᠠᠭ ᠢ᠋ ᠮᠣᠬᠣᠲᠠᠯᠠ ᠮᠡᠷᠭᠢᠳ ᠠᠢᠮᠠᠭ ᠢ᠋ ᠮᠡᠩᠳᠡᠷᠡᠲᠡᠯᠡ ᠲᠠᠢᠴᠢᠭᠤᠳ ᠠᠢᠮᠠᠭ ᠢ᠋ ᠳᠠᠯᠳᠢᠷᠠᠲᠠᠯᠠ ᠰᠠᠷᠠ ᠶ᠋ᠢᠨ ᠭᠠᠵᠠᠷ ᠢ᠋ ᠰᠠᠷᠠᠪᠴᠢᠯᠠᠨ ᠬᠠᠷᠠᠵᠤ ᠵᠢᠯ ᠦ᠋ᠨ ᠭᠠᠵᠠᠷ ᠢ᠋ ᠵᠢᠯᠪᠠᠴᠢᠯᠠᠨ ᠦᠵᠡᠵᠦ ᠬᠠᠷᠠ ᠨᠢᠳᠦᠨ ᠦ᠌ ᠴᠡᠴᠡᠭᠡᠢ ᠪᠡᠷ ᠬᠠᠭᠠᠨ ᠴᠢᠮᠠ ᠳ᠋ᠠᠭᠠᠨ ᠲᠤᠰᠠᠯᠠᠶᠠ ᠡᠷᠭᠢᠬᠦ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠪᠠᠷ ᠡᠵᠡᠨ ᠴᠢᠮᠠ ᠳ᠋ᠠᠭᠠᠨ ᠲᠤᠰᠠᠯᠠᠶᠠ》 ᠭᠡᠪᠡ᠃
ᠵᠡᠯᠮᠡ ᠬᠡᠯᠡᠪᠡ᠄
《ᠦᠬᠦᠬᠦ ᠠᠮᠢ ᠪᠠᠨ ᠬᠠᠢᠷᠠᠯᠠᠬᠤ ᠦᠭᠡᠢ ᠦᠭᠡᠢᠷᠡᠬᠦ ᠮᠠᠯ ᠢ᠋ᠶ᠋ᠠᠨ ᠬᠠᠷᠠᠮᠯᠠᠬᠤ ᠦᠭᠡᠢ ᠦᠵᠡᠯᠳᠦᠬᠦ ᠳᠠᠢᠰᠤᠨ ᠢ᠋ ᠦᠰᠦᠷᠲᠡᠯᠡ ᠨᠢᠳᠤᠷᠴᠤ ᠬᠠᠷᠠᠭᠳᠠᠬᠤ ᠳᠠᠢᠰᠤᠨ ᠢ᠋ ᠬᠠᠯᠲᠤᠷᠢᠲᠠᠯᠠ ᠳᠠᠭᠠᠷᠢᠵᠤ ᠵᠠᠮ ᠳ᠋ᠠᠭᠠᠨ ᠲᠣᠬᠢᠶᠠᠯᠳᠤᠭᠰᠠᠨ ᠢ᠋ ᠵᠠᠳᠠ ᠴᠣᠬᠢᠵᠤ ᠮᠥᠷ ᠲᠦ᠍ ᠲᠣᠬᠢᠶᠠᠯᠳᠤᠭᠰᠠᠨ ᠢ᠋ ᠮᠥᠯᠲᠥ ᠴᠣᠬᠢᠵᠤ ᠬᠠᠷᠠ ᠲᠤᠭ ᠢ᠋ ᠨᠢ ᠬᠠᠮᠣᠷᠠᠨ ᠠᠪᠴᠤ ᠪᠠᠷᠢᠭᠰᠠᠨ ᠬᠥᠮᠦᠨ ᠢ᠋ ᠨᠢ ᠪᠠᠢᠯᠳᠤᠨ ᠠᠯᠠᠵᠤ ᠬᠡᠢᠰᠬᠦ ᠲᠤᠭ ᠢ᠋ ᠨᠢ ᠭᠢᠰᠬᠢᠨ ᠳᠡᠪᠰᠡᠵᠦ ᠤᠷᠠᠩᠬᠠᠢ ᠲᠤᠭ ᠢ᠋ ᠨᠢ ᠤᠯᠠ ᠳ᠋ᠠᠭᠠᠨ ᠭᠢᠰᠬᠢᠵᠦ ᠳᠠᠢᠰᠤᠨ ᠤ᠋ ᠰᠦᠷ ᠢ᠋ ᠳᠠᠷᠤᠨ ᠰᠥᠨᠥᠭᠡᠵᠦ ᠳᠠᠬᠢᠨ ᠪᠣᠰᠬᠤ ᠴᠢᠳᠠᠯ ᠢ᠋ ᠨᠢ ᠮᠥᠬᠥᠭᠡᠶᠡ》 ᠭᠡᠪᠡ᠃
ᠴᠤᠤ ᠮᠡᠷᠭᠡᠨ ᠬᠡᠯᠡᠪᠡ᠄
《ᠳᠣᠪᠲᠣᠯᠤᠨ ᠣᠷᠣᠬᠤ ᠴᠢᠳᠠᠯ ᠦᠭᠡᠢ ᠪᠣᠯᠪᠠᠴᠤ ᠲᠣᠭᠲᠠᠭᠰᠠᠨ ᠢ᠋ ᠪᠠᠲᠤᠳᠬᠠᠬᠤ ᠴᠢᠳᠠᠯ ᠲᠠᠢ ᠪᠢ ᠡᠷᠴᠢᠯᠡᠨ ᠳᠠᠭᠠᠷᠢᠬᠤ ᠴᠢᠳᠠᠯ ᠦᠭᠡᠢ ᠪᠣᠯᠪᠠᠴᠤ ᠡᠪᠳᠡᠷᠡᠭᠰᠡᠨ ᠢ᠋ ᠰᠡᠯᠪᠢᠬᠦ ᠴᠢᠳᠠᠯ ᠲᠠᠢ ᠪᠢ ᠤᠤᠯᠢᠬᠠᠢ ᠵᠠᠩ ᠲᠠᠢ ᠴᠤᠤ ᠮᠡᠷᠭᠡᠨ ᠪᠢ ᠤᠤᠯᠭᠠᠯᠠᠨ ᠣᠷᠣᠬᠤ ᠴᠠᠭ ᠪᠣᠯᠬᠤ ᠳ᠋ᠤ᠌ ᠤᠬᠤᠷᠢᠨ ᠵᠢᠭᠤᠲᠠᠬᠤ ᠮᠠᠭᠠᠳ ᠦᠭᠡᠢ ᠶ᠋ᠢ ᠤᠷᠢᠳᠠ ᠠ᠋ᠴᠠ ᠬᠠᠭᠠᠨ ᠳ᠋ᠠᠭᠠᠨ ᠬᠡᠯᠡᠶᠡ᠂ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠲᠣᠭᠲᠠᠭᠠᠭᠰᠠᠨ ᠬᠣᠢᠨᠠ ᠤᠴᠢᠷᠲᠠᠢ ᠦᠭᠡ ᠪᠡᠷ ᠢ᠋ᠶ᠋ᠡᠨ ᠲᠤᠰᠠᠯᠠᠵᠤ ᠴᠢᠳᠠᠨᠠ᠂ ᠬᠠᠷᠢ ᠳᠠᠢᠰᠤᠨ ᠢ᠋ ᠳᠣᠪᠲᠣᠯᠬᠤ ᠴᠠᠭ ᠲᠤ᠌ ᠬᠠᠭᠠᠨ ᠡᠵᠡᠨ ᠴᠢᠩᠭᠢᠰ ᠴᠢᠮᠠ ᠳ᠋ᠤ᠌ ᠬᠠᠰᠢᠷ ᠮᠢᠨᠦ ᠪᠣᠯᠭᠣᠮᠵᠢᠲᠤ ᠦᠭᠡ ᠬᠠᠶᠠ ᠪᠣᠯᠪᠠᠴᠤ ᠲᠤᠰᠠ ᠪᠣᠯᠤᠨᠠ》 ᠭᠡᠪᠡ᠃
ᠪᠣᠭᠣᠷᠴᠤ ᠬᠡᠯᠡᠪᠡ᠄
《ᠥᠷᠢᠰᠦᠯᠳᠦᠨ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠡᠮᠦᠨᠡᠬᠢ ᠵᠠᠮ ᠢ᠋ ᠪᠥᠭᠯᠡᠵᠦ ᠬᠠᠯᠳᠠᠨ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠬᠠᠷᠠᠢᠬᠤ ᠵᠠᠮ ᠢ᠋ ᠬᠠᠭᠠᠵᠤ ᠠᠴᠢᠲᠤ ᠡᠵᠡᠨ ᠴᠢᠨᠦ ᠠᠮᠢ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠵᠤ ᠠᠯᠲᠠᠨ ᠵᠢᠯᠣᠭᠣ ᠶ᠋ᠢ ᠴᠢᠨᠢ ᠠᠯᠳᠠᠯ ᠦᠭᠡᠢ ᠳᠠᠭᠠᠵᠤ ᠬᠠᠨᠳᠤᠭᠰᠠᠨ ᠵᠦᠭ ᠲᠦ᠍ ᠴᠢᠨᠢ ᠬᠠᠭᠠᠴᠠᠯ ᠦᠭᠡᠢ ᠶᠠᠪᠤᠶᠠ》 ᠭᠡᠪᠡ᠃
ᠪᠣᠷᠣᠬᠤᠯ ᠬᠡᠯᠡᠪᠡ᠄
《ᠬᠠᠷᠪᠤᠬᠤ ᠰᠤᠮᠤᠨ ᠤ᠋ ᠬᠠᠯᠬᠠᠪᠴᠢ ᠪᠣᠯᠵᠤ ᠬᠠᠩᠭᠢᠨᠠᠬᠤ ᠵᠡᠪᠡ ᠶ᠋ᠢᠨ ᠪᠠᠮᠪᠠᠢ ᠪᠣᠯᠵᠤ ᠢᠲᠡᠭᠡᠯᠲᠦ ᠡᠵᠡᠨ ᠴᠢᠨᠦ ᠢᠳᠡᠲᠦ ᠪᠡᠶᠡ ᠳ᠋ᠦ᠍ ᠢᠷᠲᠦ ᠮᠡᠰᠡ ᠪᠦᠦ ᠬᠦᠷᠭᠡᠶᠡ》 ᠭᠡᠪᠡ᠃
ᠮᠤᠬᠤᠯᠠᠢ ᠬᠡᠯᠡᠪᠡ᠄
《ᠳᠠᠢᠰᠤᠨ ᠢ᠋ ᠳᠠᠷᠤᠵᠤ ᠣᠯᠵᠠ ᠶ᠋ᠢ ᠣᠷᠣᠭᠤᠯᠵᠤ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠢᠷ ᠢ᠋ ᠮᠣᠬᠣᠭᠠᠵᠤ᠂ ᠪᠤᠴᠠᠬᠤ ᠳᠠᠢᠰᠤᠨ ᠢ᠋ ᠪᠤᠯᠲᠤ ᠶ᠋ᠢ ᠬᠢᠳᠤᠵᠤ ᠬᠦᠯᠦᠭ ᠮᠣᠷᠢᠨ ᠤ᠋ ᠪᠠᠨ ᠰᠡᠭᠦᠯ ᠳᠡᠭᠡᠭᠦᠷ ᠬᠦᠳᠡᠩ ᠮᠠᠨᠠᠨ ᠲᠠᠲᠠᠭᠤᠯᠵᠤ ᠤᠨᠤᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠳᠡᠯ ᠳᠡᠭᠡᠭᠦᠷ ᠤᠷᠭᠤᠬᠤ ᠰᠠᠢᠬᠠᠨ ᠨᠠᠷᠠᠨ ᠤ᠋ ᠤᠯᠠᠭᠠᠨ ᠭᠡᠷᠡᠯ ᠢ᠋ ᠰᠠᠴᠤᠷᠠᠭᠤᠯᠵᠤ ᠪᠠᠢᠯᠳᠤᠭᠠᠨ ᠪᠦᠬᠦᠨ ᠳ᠋ᠦ᠍ ᠢᠯᠠᠭᠰᠠᠨ ᠪᠠᠶᠠᠷ ᠲᠠᠢ ᠰᠠᠢᠬᠠᠨ ᠮᠡᠳᠡᠭᠡ ᠶ᠋ᠢ ᠪᠠᠭᠠᠲᠤᠷ ᠴᠢᠮᠠ ᠳ᠋ᠠᠭᠠᠨ ᠬᠦᠷᠭᠡᠶᠡ》 ᠭᠡᠪᠡ᠃
ᠴᠢᠩᠭᠢᠰ᠄
ᠰᠢᠯᠢᠳᠡᠭ ᠵᠢᠷᠭᠤᠭᠠᠨ ᠰᠠᠢᠳ ᠤ᠋ᠨ ᠰᠢᠢᠳᠪᠦᠷᠢᠲᠡᠢ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠰᠢᠷᠠᠭᠰᠠᠨ ᠳᠠᠬᠢ ᠶ᠋ᠢᠨ ᠮᠢᠬᠠᠨ ᠠ᠋ᠴᠠ ᠱᠠᠯᠠᠮᠠᠭᠠᠢᠯᠠᠨ ᠢᠳᠡᠵᠦ ᠳᠠᠭᠤᠰᠤᠭᠠᠳ ᠰᠢᠷᠭᠠᠯ ᠮᠣᠷᠢᠨ ᠤ᠋ ᠴᠤᠯᠪᠤᠭᠤᠷ ᠢ᠋ ᠰᠢᠭᠢᠬᠤᠲᠤᠭ ᠲᠤ᠌ ᠥᠭᠴᠦ 《ᠦᠵᠡᠭᠰᠡᠨ ᠵᠡᠭᠦᠳᠦᠨ ᠦ᠌ ᠮᠢᠨᠢ ᠦᠨᠡᠨ ᠬᠤᠳᠠᠯ ᠢ᠋ ᠮᠡᠳᠡ》 ᠭᠡᠵᠦ ᠶᠠᠪᠤᠭᠤᠯᠪᠠ᠃ ᠰᠢᠭᠢᠬᠤᠲᠤᠭ᠂ ᠰᠢᠩᠬᠤᠨ ᠰᠢᠷᠭᠠᠯ ᠮᠣᠷᠢ ᠶ᠋ᠢ ᠨᠢ ᠤᠨᠤᠭᠠᠳ ᠲᠠᠯᠠ ᠭᠠᠵᠠᠷ ᠲᠠᠯᠪᠢᠭᠤᠯᠵᠤ ᠲᠠᠢᠭᠠ ᠭᠠᠵᠠᠷ ᠠᠯᠬᠤᠭᠤᠯᠵᠤ ᠬᠥᠨᠳᠡᠢ ᠭᠠᠵᠠᠷ ᠬᠠᠲᠠᠷᠢᠭᠤᠯᠵᠤ ᠬᠥᠪᠴᠢ ᠭᠠᠵᠠᠷ ᠰᠠᠵᠢᠯᠠᠭᠤᠯᠵᠤ᠂ ᠰᠢᠷᠠ ᠳᠡᠪᠰᠡᠭ ᠲᠦ᠍ ᠬᠦᠷᠦᠭᠡᠳ ᠰᠢᠯᠭᠠᠵᠤ ᠰᠠᠢᠲᠤᠷ ᠬᠠᠷᠠᠪᠠᠯ ᠪᠠᠷᠠᠭᠠᠨ ᠲᠤᠭ ᠢ᠋ ᠬᠡᠢᠰᠬᠡᠭᠰᠡᠨ ᠪᠠᠯᠠᠮᠠᠳ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠪᠠᠴᠢᠮᠠᠭ ᠲᠤᠯᠭᠠᠷᠠᠬᠤ ᠳ᠋ᠤ᠌ ᠪᠠᠭᠠᠲᠤᠷ ᠰᠢᠭᠢᠬᠤᠲᠤᠭ ᠪᠠᠢᠭᠰᠠᠨ ᠭᠠᠵᠠᠷ ᠤ᠋ᠨ ᠵᠦᠭ ᠪᠠᠴᠢᠮᠳᠠᠨ ᠳᠠᠪᠬᠢᠵᠤ ᠢᠷᠡᠭᠡᠳ᠄
《ᠰᠢᠷᠠ ᠳᠡᠪᠰᠡᠭ ᠳᠡᠭᠡᠷᠡ ᠴᠣᠴᠢᠮᠠᠭ ᠭᠠᠷᠴᠤ ᠣᠴᠢᠪᠠᠯ ᠭᠤᠷᠪᠠᠨ ᠵᠠᠭᠤᠨ ᠳᠠᠢᠰᠤᠨ ᠲᠠᠢ ᠪᠠᠴᠢᠮᠠᠭ ᠲᠤᠯᠭᠠᠷᠠᠵᠤ ᠠᠭᠤᠯᠵᠠᠪᠠ᠃ ᠲᠠᠢᠴᠢᠭᠤᠳ ᠢ᠋ ᠲᠠᠨᠢᠭᠰᠠᠨ ᠦᠭᠡᠢ ᠮᠡᠷᠭᠢᠳ ᠢ᠋ ᠮᠠᠲᠠᠭᠰᠠᠨ ᠦᠭᠡᠢ ᠮᠣᠩᠭ᠋ᠣᠯ ᠢ᠋ ᠮᠣᠬᠣᠲᠠᠯᠠ ᠬᠠᠷᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠬᠣᠢᠰᠢ ᠪᠠᠨ ᠭᠠᠭᠴᠠᠬᠠᠨ ᠬᠢᠯᠠᠮᠬᠢᠵᠤ ᠦᠵᠡᠬᠦ ᠳ᠋ᠦ᠍ ᠡᠵᠡᠨ ᠦ᠌ ᠵᠡᠭᠦᠳᠦᠨ ᠳ᠋ᠦ᠍ ᠦᠵᠡᠭᠰᠡᠨ ᠳᠠᠢᠰᠤᠨ ᠲᠠᠢ ᠠᠳᠠᠯᠢ ᠮᠡᠲᠦ ᠪᠠᠢᠨᠠ》 ᠭᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠵᠢᠷᠭᠤᠭᠠᠨ ᠰᠠᠢᠳ ᠬᠤᠶᠠᠭ ᠢ᠋ᠶ᠋ᠠᠨ ᠡᠮᠦᠰᠴᠦ᠂ ᠪᠠᠮᠪᠠᠢ ᠪᠠᠨ ᠵᠡᠭᠦᠵᠦ᠂ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠪᠡᠯᠡᠳᠴᠦ ᠪᠠᠢᠲᠠᠯᠠ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠬᠦᠷᠴᠦ ᠢᠷᠡᠪᠡ᠃ ᠰᠠᠢᠳ ᠪᠠᠭᠠᠲᠤᠷ ᠪᠣᠭᠣᠷᠴᠤ ᠰᠠᠷᠠᠯ ᠮᠣᠷᠢᠨ ᠳ᠋ᠤ᠌ ᠪᠠᠨ ᠮᠣᠷᠳᠠᠵᠤ ᠰᠠᠮᠠᠭᠤᠨ ᠳᠠᠢᠰᠤᠨ ᠤ᠋ ᠡᠮᠦᠨᠡ ᠡᠴᠡ ᠰᠠᠮᠪᠠᠭᠠ ᠶ᠋ᠢ ᠣᠯᠵᠤ ᠣᠴᠢᠭᠠᠳ ᠰᠠᠨᠠᠭᠠ ᠵᠣᠷᠢᠭ ᠢ᠋ ᠨᠢ ᠠᠰᠠᠭᠤᠷᠤᠨ᠄
《ᠲᠠ᠂ ᠶᠠᠭᠤᠨ ᠬᠥᠮᠦᠨ ᠪᠣᠢ? ᠶᠣᠰᠣᠲᠤ ᠬᠥᠮᠦᠨ ᠪᠣᠯ ᠶᠣᠰᠣ ᠪᠠᠨ ᠬᠡᠯᠡ! ᠨᠡᠷᠡᠲᠦ ᠬᠥᠮᠦᠨ ᠪᠣᠯ ᠨᠡᠷᠡ ᠪᠡᠨ ᠬᠡᠯᠡ》 ᠭᠡᠪᠡᠯ ᠲᠡᠳᠡ ᠥᠭᠦᠯᠡᠷᠦᠨ᠄
《ᠨᠡᠷᠡ ᠪᠡᠨ ᠠᠰᠠᠭᠣᠴᠠᠬᠣ ᠪᠠᠷ ᠢᠷᠡᠭᠡ ᠦᠭᠡᠢ ᠪᠢᠳᠡ ᠨᠡᠪᠰᠢᠷᠡᠲᠡᠯᠡ ᠪᠠᠢᠯᠳᠤᠬᠤ ᠪᠠᠷ ᠢᠷᠡᠯᠡ ᠪᠢᠳᠡ》
ᠪᠣᠭᠣᠷᠴᠤ ᠬᠡᠯᠡᠪᠡ᠄
《ᠨᠠᠳᠠᠳᠤ ᠤᠴᠢᠷ ᠢ᠋ᠶ᠋ᠠᠨ ᠬᠡᠯᠡᠪᠡᠯ ᠨᠠᠢᠷᠠᠮᠳᠠᠯ ᠢ᠋ᠶ᠋ᠠᠷ ᠥᠷᠥᠰᠢᠶᠡᠵᠦ ᠪᠣᠯᠤᠨᠠ ᠨᠠᠭᠠᠳᠣᠬᠣ ᠲᠤᠯᠬᠤ ᠰᠠᠨᠠᠭᠠ ᠲᠠᠢ ᠪᠣᠯ ᠨᠠᠷᠠᠨ ᠤ᠋ ᠭᠠᠯ ᠲᠠᠢ ᠳ᠋ᠤ᠌ ᠡᠬᠢᠯᠡᠶᠡ》 ᠭᠡᠪᠡ᠃
ᠲᠡᠭᠡᠬᠦ ᠳ᠋ᠦ᠍ ᠴᠠᠭᠠᠳᠤᠬᠢ ᠬᠥᠮᠦᠨ ᠬᠡᠯᠡᠷᠦᠨ᠄
《ᠲᠠᠨ ᠳ᠋ᠤ᠌ ᠬᠡᠯᠡᠬᠦ ᠰᠠᠢᠨ ᠨᠡᠷᠡ ᠪᠢᠳᠡᠨ ᠳ᠋ᠦ᠍ ᠦᠭᠡᠢ ᠲᠠᠷᠪᠠᠭᠠᠴᠢᠨ ᠵᠢᠭᠠᠰᠤᠴᠢᠨ ᠬᠥᠮᠦᠨ ᠪᠢᠳᠡ》 ᠭᠡᠪᠡ᠃
ᠲᠡᠭᠡᠬᠦ ᠳ᠋ᠦ᠍ ᠰᠢᠭᠢᠬᠤᠲᠤᠭ ᠥᠭᠦᠯᠡᠷᠦᠨ᠄
《ᠲᠡᠳᠡᠨ ᠡᠴᠡ ᠦᠭᠡ ᠠᠰᠠᠭᠤᠬᠤ ᠬᠡᠷᠡᠭ ᠦᠭᠡᠢ᠂ ᠲᠠᠨᠢᠭᠰᠠᠨ ᠲᠠᠢᠴᠢᠭᠤᠳ ᠪᠠᠢᠨᠠ᠂ ᠲᠠᠲᠠᠭᠠᠯᠵᠠᠯ ᠦᠭᠡᠢ ᠪᠠᠢᠯᠳᠤᠶᠠ》 ᠭᠡᠪᠡ᠃ ᠪᠣᠷᠣᠬᠤᠯ ᠪᠠᠭᠤᠨ ᠭᠦᠶᠦᠵᠦ᠂ ᠪᠣᠷᠣ ᠪᠠᠮᠪᠠᠢ ᠪᠠᠨ ᠠᠪᠴᠤ᠂ ᠪᠣᠭᠳᠠ ᠡᠵᠡᠨ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠨ ᠵᠣᠭᠰᠣᠪᠠ᠃ ᠵᠠᠯᠮᠠ᠂ ᠬᠥᠨᠳᠡᠯᠡᠨ ᠡᠲᠡᠭᠡᠳ ᠡᠴᠡ ᠢᠯᠳᠦ ᠪᠠᠷᠢᠵᠤ ᠣᠷᠣᠭᠠᠳ ᠮᠥᠷ ᠲᠦ᠍ ᠲᠣᠬᠢᠶᠠᠯᠳᠤᠭᠰᠠᠨ ᠢ᠋ ᠵᠠᠮ ᠭᠠᠷᠲᠠᠯᠠ ᠴᠠᠪᠴᠢᠵᠤ ᠭᠤᠷᠪᠠᠨ ᠬᠠᠷᠠ ᠲᠤᠭ ᠢ᠋ ᠨᠢ ᠭᠤᠯᠳᠤ ᠲᠠᠲᠠᠵᠤ ᠠᠪᠤᠭᠠᠳ ᠠᠭᠤᠯᠠᠨ ᠳᠡᠭᠡᠷᠡ ᠠᠪᠠᠴᠢᠵᠤ ᠤᠷᠤᠭᠤ ᠬᠠᠷᠠᠭᠤᠯᠤᠨ ᠬᠠᠳᠬᠤᠪᠠ᠃ᠴᠤᠤ ᠮᠡᠷᠭᠡᠨ ᠬᠡᠳᠦᠢ ᠨᠢ ᠳᠤᠲᠠᠭᠠᠵᠠᠢ᠃ ᠪᠣᠭᠣᠷᠴᠤ ᠤᠷᠤᠭᠰᠢ ᠪᠠᠨ ᠠᠯᠠᠯᠳᠤᠵᠤ ᠶᠠᠪᠤᠬᠤ ᠵᠠᠭᠤᠷᠠ ᠬᠣᠢᠰᠢ ᠪᠠᠨ ᠴᠤᠤ ᠮᠡᠷᠭᠡᠨ ᠢ᠋ ᠬᠠᠷᠠᠵᠤ ᠥᠭᠦᠯᠡᠷᠦᠨ᠄ 《ᠦᠢ᠂ ᠴᠤᠤ ᠮᠡᠷᠭᠡᠨ᠂ ᠪᠠᠢᠵᠠ! ᠡᠵᠡᠨ ᠬᠠᠭᠠᠨ ᠤ᠋ ᠲᠥᠯᠥᠭᠡ ᠢᠩᠭᠢᠵᠦ ᠵᠢᠳᠬᠦᠳᠡᠭ ᠪᠢᠯᠢᠤ! ᠨᠦᠬᠡᠨ ᠡᠴᠡ ᠭᠠᠷᠤᠭᠰᠠᠨ ᠠᠯᠠᠭᠳᠠᠭᠠ ᠮᠡᠲᠦ ᠭᠣᠳᠬᠢᠨ ᠵᠢᠭᠤᠲᠠᠬᠤ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠪᠡᠯ᠂ ᠴᠤᠤ ᠮᠡᠷᠭᠡᠨ ᠡᠷᠭᠢᠵᠦ ᠢᠷᠡᠭᠡᠳ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ᠄
《ᠵᠡᠷᠭᠡᠯᠳᠦᠨ ᠪᠠᠢᠯᠳᠤᠶᠠ ᠭᠡᠬᠦ ᠳ᠋ᠦ᠍᠂ ᠵᠡᠪᠡ ᠳᠤᠲᠠᠭᠠᠳ ᠪᠠᠢᠨᠠ》 ᠭᠡᠪᠡᠯ᠂ ᠡᠵᠡᠨ ᠠᠯᠲᠠᠨ ᠰᠠᠭᠠᠳᠠᠭ ᠠ᠋ᠴᠠ ᠪᠠᠨ ᠰᠢᠩᠬᠤᠲᠤ ᠵᠡᠪᠡ ᠪᠡᠨ ᠰᠤᠭᠤᠯᠵᠤ ᠥᠭᠪᠡ᠃ ᠴᠤᠤ ᠮᠡᠷᠭᠡᠨ᠂ ᠰᠢᠩᠬᠤᠨ ᠵᠡᠪᠡ ᠶ᠋ᠢ ᠰᠤᠮᠤᠯᠠᠨ ᠲᠠᠲᠠᠵᠤ᠂ ᠰᠤᠨᠢᠶᠠᠯᠭᠠᠨ ᠳᠡᠯᠢᠵᠦ᠂ ᠡᠷᠢᠬᠡᠳᠡᠨ ᠰᠣᠢᠵᠤ᠂ ᠡᠷᠭᠢᠭᠦᠯᠦᠨ ᠴᠢᠬᠯᠠᠬᠥᠯᠵᠦ᠂ ᠳᠠᠢᠰᠤᠨ ᠤ᠋ ᠲᠡᠷᠢᠭᠦᠨ ᠢ᠋ ᠲᠠᠰᠤ ᠬᠠᠷᠪᠤᠵᠤ᠂ ᠵᠡᠭᠡᠷᠳᠡ ᠬᠠᠯᠵᠠᠨ ᠮᠣᠷᠢ ᠶ᠋ᠢ ᠪᠠᠷᠢᠵᠤ ᠢᠷᠡᠭᠡᠳ ᠡᠵᠡᠨ ᠳ᠋ᠦ᠍ ᠣᠨᠣᠭᠤᠯᠪᠠ᠃ ᠡᠵᠡᠨ ᠲᠡᠷᠡ ᠮᠣᠷᠢ ᠶ᠋ᠢ ᠤᠨᠤᠵᠤ ᠦᠵᠡᠪᠡᠯ ᠨᠢᠰᠬᠦ ᠰᠢᠪᠠᠭᠤ᠂ ᠬᠡᠢᠰᠬᠦ ᠰᠠᠯᠬᠢ ᠮᠡᠲᠦ ᠪᠠᠢᠪᠠ᠃ ᠲᠡᠭᠡᠭᠡᠳ ᠵᠦᠷᠴᠢᠬᠦ ᠳᠠᠢᠰᠤᠨ ᠢ᠋ ᠴᠥᠬᠥᠷᠡᠭᠦᠯᠦᠨ ᠳᠠᠷᠤᠵᠤ᠂ ᠬᠠᠳᠬᠤᠯᠳᠤᠬᠤ ᠳᠠᠢᠰᠤᠨ ᠢ᠋ ᠬᠠᠭᠠᠰ ᠪᠣᠯᠭᠠᠵᠤ ᠪᠠᠢᠲᠠᠯᠠ᠂ ᠪᠣᠷᠣᠬᠤᠯ ᠤ᠋ᠨ ᠲᠣᠯᠣᠭᠠᠢ ᠳ᠋ᠤ᠌ ᠰᠤᠮᠤ ᠲᠣᠰᠪᠠᠯ᠂ ᠲᠡᠷᠡ ᠳᠣᠷᠣᠭᠰᠢ ᠤᠨᠠᠵᠤ᠂ ᠨᠤᠮᠤ ᠪᠠᠨ ᠲᠡᠮᠲᠡᠷᠢᠵᠦ ᠠᠪᠤᠭᠠᠳ ᠰᠠᠯᠳᠠᠷᠬᠢᠯᠡᠨ ᠲᠦᠰᠢᠵᠦ ᠪᠠᠮᠪᠠᠢ ᠪᠠᠨ ᠠᠯᠳᠠᠯ ᠦᠭᠡᠢ ᠪᠠᠷᠢᠵᠤ ᠵᠣᠭᠰᠣᠨᠠ᠂ ᠪᠣᠭᠣᠷᠴᠤ ᠣᠷᠣᠭᠰᠢ ᠪᠠᠨ ᠠᠯᠠᠯᠳᠤᠵᠤ ᠪᠠᠢᠬᠤ ᠵᠠᠭᠤᠷᠠ᠂ ᠬᠣᠢᠰᠢ ᠪᠠᠨ ᠬᠠᠷᠠᠵᠤ ᠲᠡᠭᠦᠨ ᠳ᠋ᠦ᠍ ᠥᠭᠦᠯᠡᠷᠦᠨ᠄
《ᠡᠷᠡ ᠬᠥᠮᠦᠨ ᠭᠠᠭᠴᠠ ᠰᠤᠮᠤᠨ ᠳ᠋ᠤ᠌ ᠤᠨᠠᠳᠠᠭ ᠪᠢᠯᠡ ᠤᠤ? ᠡᠪᠡᠷ ᠢ᠋ᠶ᠋ᠡᠨ ᠴᠣᠬᠢᠭᠤᠯᠤᠭᠰᠠᠨ ᠢᠰᠢᠭᠡ ᠮᠡᠲᠦ᠂ ᠡᠷᠡᠭᠡᠯᠵᠡᠨ ᠰᠠᠯᠭᠠᠨᠠᠬᠤ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠪᠡᠯ᠂ ᠪᠣᠷᠣᠬᠤᠯ᠂ ᠮᠣᠷᠢᠨ ᠤ᠋ ᠪᠠᠨ ᠪᠤᠷᠤᠭᠤ ᠲᠠᠯᠠ ᠠ᠋ᠴᠠ ᠬᠠᠷᠠᠢᠵᠤ ᠮᠣᠷᠳᠠᠭᠠᠳ ᠬᠠᠯᠬᠠᠪᠴᠢ ᠪᠠᠨ ᠪᠠᠷᠢᠵᠤ ᠬᠠᠢ᠌ᠬᠣᠷᠠᠯ ᠦᠭᠡᠢ ᠪᠠᠢᠯᠳᠤᠵᠤ ᠶᠠᠪᠤᠪᠠ᠂ ᠲᠡᠭᠡᠭᠡᠳ ᠬᠠᠯᠳᠠᠵᠤ ᠢᠷᠠᠭᠰᠠᠨ ᠳᠠᠢᠰᠤᠨ ᠠᠯᠠᠭᠳᠠᠭᠰᠠᠨ ᠬᠥᠮᠦᠨ ᠦ᠌ ᠪᠡᠨ ᠬᠡᠭᠦᠷ ᠢ᠋ ᠠᠪᠴᠤ ᠳᠤᠲᠠᠭᠠᠪᠠ᠃ ᠡᠵᠡᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠪᠤᠷᠤᠭᠤ ᠬᠠᠨᠳᠤᠭᠰᠠᠨ ᠳᠠᠢᠰᠤᠨ ᠢ᠋ ᠶᠠᠭᠠᠬᠢᠬᠤ ᠪᠢᠯᠡ?》 ᠭᠡᠪᠡᠯ ᠪᠣᠭᠣᠷᠴᠤ ᠥᠭᠦᠯᠡᠷᠦᠨ᠄
《ᠪᠤᠷᠬᠠᠨ ᠪᠣᠯᠤᠭᠰᠠᠨ ᠬᠥᠮᠦᠨ ᠢ᠋ ᠪᠤᠶᠠᠨ ᠢ᠋ᠶ᠋ᠠᠷ ᠦᠳᠡᠳᠡᠭ ᠪᠤᠷᠤᠭᠤ ᠬᠠᠨᠳᠤᠭᠰᠠᠨ ᠳᠠᠢᠰᠤᠨ ᠢ᠋ ᠵᠠᠷ ᠵᠡᠪᠡ ᠪᠡᠷ ᠦᠳᠡᠳᠡᠭ᠂ ᠨᠡᠬᠡᠶᠡ》 ᠭᠡᠪᠡᠯ᠂ ᠲᠡᠷᠡ ᠦᠭᠡ ᠶ᠋ᠢ ᠡᠵᠡᠨ ᠵᠥᠪᠰᠢᠶᠡᠷᠡᠵᠦ ᠨᠡᠬᠡᠪᠡ᠂ ᠴᠠᠢᠲᠤ ᠶ᠋ᠢᠨ ᠴᠠᠭᠠᠨ ᠲᠠᠯᠠ ᠳ᠋ᠤ᠌ ᠳᠠᠢᠰᠤᠨ ᠢ᠋ ᠭᠦᠢᠴᠡᠭᠡᠳ᠂ ᠣᠯᠠᠨ ᠬᠣᠨᠢᠨ ᠳ᠋ᠤ᠌ ᠣᠷᠣᠭᠰᠠᠨ ᠴᠢᠨᠣᠠ ᠮᠡᠲᠦ ᠴᠠᠪᠴᠢᠵᠤ ᠨᠢᠭᠡ ᠵᠠᠭᠤᠨ ᠬᠥᠮᠦᠨ ᠢ᠋ ᠠᠯᠠᠪᠠ᠃ ᠬᠣᠶᠠᠷ ᠵᠠᠭᠤᠨ ᠬᠥᠮᠦᠨ ᠳᠤᠲᠠᠭᠠᠪᠠ᠃ ᠡᠨᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠵᠠᠭᠤᠨ ᠮᠣᠷᠢ᠂ ᠲᠠᠪᠢᠨ ᠬᠤᠶᠠᠭ ᠣᠯᠵᠠᠯᠠᠵᠤ ᠠᠪᠪᠠ᠃ ᠲᠡᠷᠡ ᠴᠠᠭ ᠲᠤ᠌ ᠴᠢᠩᠭᠢᠰ ᠬᠠᠭᠠᠨ ᠲᠩᠷᠢ ᠡᠴᠢᠭᠡ ᠳ᠋ᠡᠭᠡᠨ ᠮᠥᠷᠭᠥᠶᠡ ᠭᠡᠵᠦ ᠳᠣᠪᠣᠴᠠᠭ ᠥᠨᠳᠥᠷ ᠳᠡᠭᠡᠷᠡ ᠭᠠᠷᠴᠤ᠂ ᠲᠣᠬᠣᠮ ᠢ᠋ᠶ᠋ᠠᠨ ᠳᠡᠯᠭᠡᠵᠦ ᠲᠠᠯᠪᠢᠭᠠᠳ ᠪᠦᠰᠡ ᠪᠡᠨ ᠬᠦᠵᠦᠭᠦᠨ ᠳ᠋ᠡᠭᠡᠨ ᠡᠯᠭᠦᠵᠦ ᠵᠠᠯᠪᠠᠷᠢᠨ ᠥᠴᠢᠪᠡ᠄
《ᠡᠷᠡᠮᠡᠬᠡᠢ ᠰᠠᠢᠨ ᠢ᠋ᠶ᠋ᠠᠷ ᠡᠵᠡᠨ ᠡᠰᠡ ᠪᠣᠯᠤᠯᠠ ᠪᠢ ᠡᠷᠬᠡᠲᠦ ᠲᠩᠷᠢ ᠡᠴᠢᠭᠡ ᠶ᠋ᠢᠨ ᠬᠠᠢᠷᠠ ᠪᠠᠷ ᠡᠵᠡᠨ ᠪᠣᠯᠤᠯᠠ ᠪᠢ᠃ ᠡᠴᠢᠭᠡ ᠲᠩᠷᠢ ᠶ᠋ᠢᠨ ᠠᠴᠢ ᠪᠠᠷ ᠡᠰᠡᠷᠭᠦ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠯᠠ ᠪᠢ ᠬᠠᠮᠤᠷᠤᠭᠴᠢ ᠰᠠᠢᠨ ᠢ᠋ᠶ᠋ᠠᠷ ᠬᠠᠭᠠᠨ ᠡᠰᠡ ᠪᠣᠯᠤᠯᠠ ᠪᠢ ᠬᠠᠨ ᠲᠩᠷᠢ ᠡᠴᠢᠭᠡ ᠶ᠋ᠢᠨ ᠬᠠᠢᠷᠠ ᠪᠠᠷ ᠡᠵᠡᠨ ᠪᠣᠯᠤᠯᠠ ᠪᠢ ᠬᠠᠨ ᠲᠩᠷᠢ ᠡᠴᠢᠭᠡ ᠶ᠋ᠢᠨ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ ᠬᠠᠷᠢ ᠳᠠᠢᠰᠤᠨ ᠢ᠋ ᠳᠠᠷᠤᠯᠠ ᠪᠢ》 ᠭᠡᠵᠦ ᠮᠥᠷᠭᠥᠪᠡ᠃ ᠲᠡᠨᠳᠡ ᠡᠴᠡ ᠮᠣᠷᠳᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠡᠵᠡᠨ᠂ ᠵᠢᠷᠭᠤᠭᠠᠨ ᠰᠠᠢᠳ ᠢ᠋ᠶ᠋ᠠᠨ ᠮᠠᠭᠲᠠᠨ ᠳᠠᠭᠤᠯᠠᠪᠠ᠄
ᠡᠬᠢᠯᠡᠭᠡᠳ ᠰᠢᠭᠢᠬᠤᠲᠤᠭ ᠢ᠋ ᠮᠠᠭᠲᠠᠭᠰᠠᠨ ᠨᠢ᠄
《ᠮᠡᠷᠭᠢᠳ ᠢ᠋ ᠮᠡᠩᠳᠡᠭᠦᠯᠵᠦ ᠮᠣᠩᠭ᠋ᠣᠯ ᠢ᠋ ᠮᠣᠬᠣᠭᠠᠵᠤ ᠲᠠᠢᠴᠢᠭᠤᠳ ᠢ᠋ ᠲᠠᠨᠢᠵᠤ ᠳᠠᠢᠰᠤᠨ ᠢ᠋ ᠳᠠᠷᠤᠯᠴᠠᠭᠰᠠᠨ ᠲᠠᠲ᠋ᠠᠷ ᠤ᠋ᠨ ᠰᠢᠭᠢᠬᠤᠲᠤᠭ ᠮᠢᠨᠢ》 ᠭᠡᠵᠦ ᠮᠠᠭᠲᠠᠪᠠ᠂
ᠵᠡᠯᠮᠡ ᠶ᠋ᠢ ᠮᠠᠭᠲᠠᠭᠰᠠᠨ ᠨᠢ
《ᠣᠷᠣᠭᠠ ᠭᠥᠷᠦᠭᠡᠰᠦᠨ ᠦ᠌ ᠤᠲᠤᠯᠭᠠ ᠪᠣᠯᠤᠭᠰᠠᠨ (ᠠᠩ ᠭᠥᠷᠦᠭᠡᠰᠦᠨ ᠢ᠋ ᠠᠩᠨᠠᠵᠤ ᠮᠡᠳᠡᠳᠡᠭ ) ᠣᠮᠣᠭᠲᠤ ᠳᠠᠢᠰᠤᠨ ᠤ᠋ ᠵᠢᠷᠦᠬᠡ ᠶ᠋ᠢ ᠴᠡᠴᠡᠷᠡᠭᠦᠯᠦᠭᠰᠡᠨ᠂ ᠤᠨᠤᠬᠤ ᠮᠣᠷᠢ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠤᠨᠤᠭᠠ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠤᠮᠳᠠᠭᠠᠰᠤᠨ ᠴᠠᠩᠭ᠋ᠠᠬᠣ ᠴᠠᠭ ᠲᠤ᠌ ᠤᠤᠭᠤᠬᠤ ᠳᠠᠷᠠᠰᠤ ᠥᠭᠭᠦᠭᠰᠡᠨ ᠰᠡᠷᠭᠡᠭ ᠪᠠᠭᠠ ᠨᠣᠢᠷ ᠲᠠᠢ ᠰᠡᠴᠡᠨ ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ ᠤᠯᠤᠰ ᠲᠥᠷᠥ ᠶ᠋ᠢᠨ ᠲᠥᠯᠥᠭᠡ ᠤᠷᠢᠳᠤ ᠴᠠᠭ ᠠ᠋ᠴᠠ ᠵᠢᠣᠠᠬᠥᠬᠰᠡᠨ ᠣᠷᠢᠶᠠᠩᠬᠠᠨ ᠤ᠋ ᠰᠠᠢᠨ ᠵᠡᠯᠮᠡ ᠮᠢᠨᠢ》 ᠭᠡᠵᠦ ᠮᠠᠭᠲᠠᠪᠠ᠃
ᠴᠤᠤ ᠮᠡᠷᠭᠡᠨ ᠢ᠋ ᠮᠠᠭᠲᠠᠭᠰᠠᠨ ᠨᠢ᠄
《ᠵᠠᠷᠯᠢᠭ ᠢ᠋ ᠮᠢᠨᠢ ᠠᠯᠳᠠᠯ ᠦᠭᠡᠢ ᠳᠠᠭᠠᠵᠤ ᠵᠢᠭᠠᠭᠰᠠᠨ ᠢ᠋ ᠮᠢᠨᠢ ᠡᠨᠳᠡᠯ ᠦᠭᠡᠢ ᠭᠦᠢᠴᠡᠳᠬᠡᠵᠦ ᠳᠠᠢᠰᠤᠨ ᠤ᠋ ᠲᠡᠷᠢᠭᠦᠨ ᠢ᠋ ᠲᠠᠰᠤ ᠬᠠᠷᠪᠤᠵᠤ ᠤᠨᠤᠭᠰᠠᠨ ᠵᠡᠭᠡᠷᠳᠡ ᠮᠣᠷᠢ ᠶ᠋ᠢ ᠨᠢ ᠤᠤᠯᠭᠠᠯᠠᠨ ᠪᠤᠯᠢᠶᠠᠵᠤ ᠬᠠᠳᠬᠤᠯᠳᠤᠬᠤ ᠳᠠᠢᠰᠤᠨ ᠢ᠋ ᠬᠠᠭᠠ ᠴᠣᠬᠢᠵᠤ ᠵᠥᠷᠢᠴᠡᠯᠳᠦᠬᠦ ᠳᠠᠢᠰᠤᠨ ᠢ᠋ ᠴᠥᠮᠥ ᠴᠣᠬᠢᠭᠰᠠᠨ ᠵᠦᠷᠴᠢᠳᠡᠢ ᠶ᠋ᠢᠨ ᠴᠤᠤ ᠮᠡᠷᠭᠡᠨ ᠮᠢᠨᠢ》 ᠭᠡᠵᠦ ᠮᠠᠭᠲᠠᠪᠠ᠃
ᠪᠣᠷᠣᠬᠤᠯ ᠢ᠋ ᠮᠠᠭᠲᠠᠭᠰᠠᠨ ᠨᠢ᠄
《ᠬᠠᠷᠪᠤᠬᠤ ᠰᠤᠮᠤᠨ ᠳ᠋ᠤ᠌ ᠬᠠᠯᠬᠠᠪᠴᠢ ᠪᠣᠯᠤᠭᠰᠠᠨ ᠰᠤᠷᠬᠢᠷᠠᠬᠤ ᠰᠤᠮᠤᠨ ᠳ᠋ᠤ᠌ ᠰᠠᠷᠠᠪᠴᠢ ᠪᠣᠯᠤᠭᠰᠠᠨ ᠲᠣᠯᠣᠭᠠᠢ ᠪᠠᠨ ᠰᠢᠷᠬᠠᠳᠠᠬᠣ ᠳ᠋ᠤ᠌ ᠲᠣᠬᠣᠮ ᠢ᠋ᠶ᠋ᠠᠨ ᠡᠰᠡ ᠠᠯᠳᠠᠭᠰᠠᠨ
ᠬᠥᠰᠢᠨ ᠦ᠌ (ᠥᠰᠢᠨ ᠦ᠌) ᠰᠠᠢᠨ ᠪᠣᠷᠣᠬᠤᠯ ᠮᠢᠨᠢ 》ᠭᠡᠵᠦ ᠮᠠᠭᠲᠠᠪᠠ᠃
ᠮᠤᠬᠤᠯᠠᠢ ᠶ᠋ᠢ ᠮᠠᠭᠲᠠᠭᠰᠠᠨ ᠨᠢ᠄
《ᠳᠠᠢᠰᠤᠨ ᠢ᠋ ᠳᠠᠷᠤᠯᠴᠠᠵᠤ ᠣᠯᠵᠠ ᠶ᠋ᠢ ᠣᠷᠣᠭᠣᠯᠣᠯᠴᠠᠵᠣ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠢᠷ ᠢ᠋ ᠮᠣᠬᠣᠭᠠᠵᠤ ᠪᠤᠴᠠᠬᠤ ᠳᠠᠢᠰᠤᠨ ᠤ᠋ ᠪᠣᠷᠪᠢ ᠶ᠋ᠢ ᠬᠢᠩᠭ᠋ᠠᠷᠳᠠᠵᠣ ᠬᠦᠯᠦᠭ ᠮᠣᠷᠢᠨ ᠤ᠋ ᠪᠠᠨ ᠰᠡᠭᠦᠯ ᠳᠡᠭᠡᠭᠦᠷ ᠬᠦᠳᠡᠩ ᠮᠠᠨᠠᠨ ᠲᠠᠲᠠᠭᠤᠯᠵᠤ ᠤᠨᠠᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠳᠡᠯ ᠳᠡᠭᠡᠭᠦᠷ ᠤᠷᠭᠤᠬᠤ ᠨᠠᠷᠠ ᠶ᠋ᠢ ᠭᠡᠢᠭᠦᠯᠵᠦ ᠳᠠᠢᠰᠤᠨ ᠤ᠋ ᠭᠥᠷᠥᠩᠬᠡᠨ ᠡᠴᠡ
ᠲᠠᠰᠤᠷᠬᠠᠢ ᠤᠲᠠᠰᠤ ᠣᠷᠭᠢᠯ ᠦᠭᠡᠢ ᠬᠤᠭᠤᠷᠬᠠᠢ ᠵᠡᠭᠦᠦ ᠬᠡᠭᠡᠯ ᠦᠭᠡᠢ ᠬᠣᠷᠢᠶᠠᠨ ᠠᠪᠴᠤ ᠢᠷᠠᠭᠰᠠᠨ ᠵᠠᠯᠠᠢᠷ ᠤ᠋ᠨ ᠰᠠᠢᠨ ᠮᠤᠬᠤᠯᠠᠢ ᠮᠢᠨᠢ》 ᠭᠡᠵᠦ ᠮᠠᠭᠲᠠᠪᠠ᠃
ᠪᠣᠭᠣᠷᠴᠤ ᠶ᠋ᠢ ᠮᠠᠭᠲᠠᠭᠰᠠᠨ ᠨᠢ᠄
《 ᠨᠠᠮᠠ ᠶ᠋ᠢ ᠵᠠᠯᠠᠭᠤ ᠪᠠᠢᠬᠤ ᠴᠠᠭ ᠲᠤ᠌ ᠨᠠᠢ᠍ᠮᠠᠨ ᠰᠢᠷᠭᠠ ᠶ᠋ᠢ ᠡᠷᠢᠬᠦ ᠣᠢᠶᠠ ᠳ᠋ᠤ᠌ ᠨᠠᠷᠠᠨ ᠤᠷᠭᠤᠬᠤ ᠬᠢᠷᠢ ᠳ᠋ᠦ᠍ ᠨᠠᠳᠠ ᠲᠠᠢ ᠠᠭᠤᠯᠵᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠨᠠᠰᠤᠳᠠ ᠦᠨᠡᠨ ᠢ᠋ᠶ᠋ᠡᠷ ᠵᠢᠣᠠᠬᠥᠬᠰᠡᠨ ᠨᠠᠬᠤ ᠪᠠᠶᠠᠨ ᠤ᠋ ᠬᠥᠪᠡᠭᠦᠨ ᠨᠠᠢᠷᠲᠤ ᠬᠦᠯᠦᠭ ᠪᠣᠭᠣᠷᠴᠤ ᠮᠢᠨᠢ! ᠠᠢᠯ ᠵᠠᠭᠤᠷᠠ ᠶᠠᠪᠤᠬᠤ ᠳ᠋ᠤ᠌ ᠠᠯᠠᠭ ᠪᠢᠷᠠᠭᠤ ᠮᠡᠲᠦ ᠨᠣᠮᠣᠬᠠᠨ ᠪᠠᠢᠪᠠᠴᠤ ᠠᠯᠠᠯᠴᠠᠬᠤ ᠳᠠᠢᠰᠤᠨ ᠲᠠᠢ ᠠᠭᠤᠯᠵᠠᠬᠤ ᠳ᠋ᠤ᠌ ᠠᠷᠰᠯᠠᠨ ᠪᠠᠷᠰ ᠮᠡᠲᠦ ᠳᠣᠭᠰᠢᠷᠠᠵᠤ ᠠᠶᠤᠯᠲᠤ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠶ᠋ᠢᠨ ᠲᠥᠯᠥᠭᠡ ᠠᠮᠢ ᠪᠡᠶᠡ ᠪᠡᠨ ᠦᠯᠦ ᠬᠠᠢᠷᠠᠯᠠᠭᠴᠢ ᠠᠴᠢᠲᠤ ᠬᠦᠯᠦᠭ ᠪᠣᠭᠣᠷᠴᠤ ᠮᠢᠨᠢ! ᠬᠠᠨᠢᠯᠠᠵᠤ ᠶᠠᠪᠤᠬᠤ ᠴᠠᠭ ᠲᠤ᠌ ᠬᠠᠷᠠ ᠪᠢᠷᠠᠭᠤ ᠮᠡᠲᠦ ᠨᠣᠮᠣᠬᠠᠨ ᠪᠠᠢᠪᠠᠴᠤ ᠬᠠᠳᠬᠤᠯᠳᠤᠬᠤ ᠳᠠᠢᠰᠤᠨ ᠲᠠᠢ ᠲᠤᠯᠬᠤ ᠴᠠᠭ ᠲᠤ᠌ ᠬᠠᠷᠴᠠᠭᠠᠢ ᠱᠣᠩᠬᠣᠷ ᠮᠡᠲᠦ ᠳᠣᠭᠰᠢᠷᠠᠵᠤ ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠶ᠋ᠢᠨ ᠲᠥᠯᠥᠭᠡ ᠬᠠᠯᠠᠭᠤᠨ ᠠᠮᠢ ᠪᠠᠨ ᠦᠯᠦ ᠪᠣᠳᠣᠭᠴᠢ ᠬᠠᠢᠷᠠᠲᠤ ᠬᠦᠯᠦᠭ ᠪᠣᠭᠣᠷᠴᠤ ᠮᠢᠨᠢ! ᠢᠨᠢᠶᠡᠯᠳᠦᠨ ᠶᠠᠪᠤᠬᠤ ᠴᠠᠭ ᠲᠤ᠌ ᠢᠵᠢᠯᠢ ᠪᠢᠷᠠᠭᠤ ᠮᠡᠲᠦ ᠨᠣᠮᠣᠬᠠᠨ ᠪᠠᠢᠪᠠᠴᠤ ᠢᠷᠡᠬᠦ ᠳᠠᠢᠰᠤᠨ ᠤᠴᠠᠷᠠᠬᠤ ᠳ᠋ᠤ᠌ ᠢᠳᠡᠲᠦ ᠠᠷᠢᠶᠠᠲᠠᠨ ᠮᠡᠲᠦ ᠳᠣᠭᠰᠢᠷᠠᠵᠤ ᠢᠳᠡᠮᠡᠬᠡᠢ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠶ᠋ᠢᠨ ᠲᠥᠯᠥᠭᠡ ᠢᠲᠡᠭᠡᠯᠲᠦ ᠪᠡᠶᠡ ᠪᠡᠨ ᠦᠯᠦ ᠬᠠᠢᠬᠤᠷᠤᠭᠴᠢ ᠢᠪᠡᠭᠡᠯᠲᠦ ᠬᠦᠯᠦᠭ ᠪᠣᠭᠣᠷᠴᠤ ᠮᠢᠨᠢ! ᠨᠠᠭᠠᠳᠤᠨ ᠶᠠᠪᠤᠬᠤ ᠴᠠᠭ ᠲᠤ᠌ ᠨᠠᠮᠤᠷ ᠤ᠋ᠨ ᠤᠨᠠᠭᠠ ᠮᠡᠲᠦ ᠡᠶᠡᠯᠳᠡᠭ ᠪᠣᠯᠪᠠᠴᠤ ᠨᠠᠠᠴᠢᠯᠳᠠᠬᠣ ᠳᠠᠢᠰᠤᠨ ᠲᠠᠢ ᠤᠴᠠᠷᠠᠪᠠᠯ ᠨᠠᠴᠢᠨ ᠱᠣᠩᠬᠣᠷ ᠮᠡᠲᠦ ᠳᠣᠪᠲᠣᠯᠵᠤ ᠨᠠᠰᠤᠨ ᠢᠮᠠᠭᠲᠠ ᠵᠢᠣᠠᠬᠥᠬᠰᠡᠨ ᠨᠠᠢᠵᠠ ᠬᠦᠯᠦᠭ ᠪᠣᠭᠣᠷᠴᠤ ᠮᠢᠨᠢ! ᠬᠠᠷᠢᠯ ᠪᠤᠴᠠᠯ ᠦᠭᠡᠢ ᠶᠠᠪᠤᠭᠴᠢ ᠬᠠᠭᠠᠨ ᠡᠵᠡᠨ ᠢ᠋ᠶ᠋ᠡᠨ ᠳᠠᠭᠠᠭᠴᠢ ᠬᠠᠢᠷᠠᠲᠤ ᠬᠦᠯᠦᠭ ᠪᠣᠭᠣᠷᠴᠤ ᠮᠢᠨᠢ》 ᠭᠡᠵᠦ ᠮᠠᠭᠲᠠᠪᠠ᠃
ᠡᠵᠡᠨ ᠵᠢᠷᠭᠤᠭᠠᠨ ᠰᠠᠢᠳ ᠢ᠋ᠶ᠋ᠠᠨ ᠮᠠᠭᠲᠠᠨ ᠳᠠᠭᠤᠰᠬᠤ ᠳ᠋ᠤ᠌ ᠪᠣᠭᠣᠷᠴᠤ᠂ ᠡᠵᠡᠨ ᠢ᠋ᠶ᠋ᠡᠨ ᠮᠠᠭᠲᠠᠵᠤ ᠳᠠᠭᠤᠯᠠᠭᠰᠠᠨ ᠨᠢ᠄
《ᠶᠢᠰᠦᠭᠡᠢ ᠪᠠᠭᠠᠲᠤᠷ ᠡᠴᠢᠭᠡ ᠲᠡᠢ ᠶᠢᠰᠦᠨ ᠥᠷᠯᠥᠭ ᠲᠦᠰᠢᠮᠡᠯ ᠲᠡᠢ ᠶᠡᠷᠦ ᠪᠦᠭᠦᠳᠡ ᠶ᠋ᠢ ᠡᠷᠬᠡᠨ ᠳ᠋ᠡᠭᠡᠨ ᠣᠷᠣᠭᠤᠯᠤᠭᠰᠠᠨ ᠶᠢᠷᠲᠢᠨᠴᠦ ᠶ᠋ᠢᠨ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠮᠢᠨᠢ! ᠥᠭᠡᠯᠦᠨ ᠬᠠᠲᠤᠨ ᠡᠬᠡ ᠲᠡᠢ ᠥᠷᠯᠥᠭ ᠶᠢᠰᠦᠨ ᠲᠦᠰᠢᠮᠡᠯ ᠲᠡᠢ ᠥᠭᠡᠳᠡᠢ᠂ ᠲᠤᠯᠤᠢ ᠬᠥᠪᠡᠭᠦᠨ ᠲᠡᠢ ᠥᠷᠥᠰᠢᠶᠡᠯ ᠬᠠᠢᠷᠠ ᠶᠡᠬᠡᠲᠡᠢ ᠥᠩᠭᠡ ᠪᠦᠷᠢ ᠶ᠋ᠢᠨ ᠤᠯᠤᠰ ᠢ᠋ ᠡᠮᠦᠨᠡ ᠪᠡᠨ ᠰᠥᠭᠥᠳᠦᠭᠦᠯᠦᠭᠰᠡᠨ ᠥᠰᠢᠶᠡᠲᠡᠨ ᠳᠠᠢᠰᠤᠨ ᠪᠦᠭᠦᠳᠡ ᠶ᠋ᠢ ᠥᠯᠮᠡᠢ ᠳᠣᠣᠷᠠ ᠪᠠᠨ ᠭᠢᠰᠬᠢᠭᠰᠡᠨ ᠥᠨᠳᠥᠷ ᠳᠡᠭᠡᠳᠦ ᠡᠵᠡᠨ ᠬᠠᠭᠠᠨ ᠮᠢᠨᠢ! ᠬᠠᠭᠠᠨ ᠡᠵᠡᠨ ᠴᠢᠮᠢ᠋ᠢ ᠪᠠᠢᠬᠤ ᠳ᠋ᠤ᠌ ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠠ᠋ᠴᠠ ᠬᠠᠯᠠᠰᠢᠷᠠᠬᠤ ᠶᠠᠪᠤᠳᠠᠯ ᠦᠭᠡᠢ᠃ ᠡᠵᠡᠨ ᠪᠠᠭᠠᠲᠤᠷ ᠴᠢᠮᠢ᠋ᠢ ᠪᠠᠢᠬᠤ ᠳ᠋ᠤ᠌ ᠡᠵᠡᠷᠬᠡᠭ ᠳᠠᠢᠰᠤᠨ ᠠ᠋ᠴᠠ ᠡᠮᠢᠶᠡᠬᠦ ᠶᠠᠪᠤᠳᠠᠯ ᠦᠭᠡᠢ᠃ ᠬᠠᠮᠤᠭ ᠪᠦᠭᠦᠳᠡ ᠬᠠᠮᠲᠤᠷᠠᠵᠤ ᠬᠠᠮᠢᠶᠠᠲᠠᠨ ᠰᠠᠳᠤᠨ ᠮᠡᠲᠦ ᠡᠪᠯᠡᠯᠳᠦᠵᠦ ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠢ᠋ ᠬᠠᠮᠬᠠ ᠴᠣᠬᠢᠶᠠ᠃ ᠬᠠᠯᠠᠭᠤᠨ ᠵᠠᠭᠤᠷᠠ ᠪᠠᠨ ᠴᠡᠩᠭᠡᠯᠳᠦᠨ ᠰᠠᠭᠤᠵᠤ ᠬᠤᠨ ᠭᠠᠯᠠᠬᠣ ᠮᠡᠲᠦ ᠬᠤᠷᠠᠯᠳᠤᠨ ᠴᠡᠩᠭᠡᠶᠡ᠂ ᠬᠤᠳᠠᠯᠴᠢ ᠬᠥᠮᠦᠨ ᠦ᠌ ᠦᠭᠡᠨ ᠳ᠋ᠦ᠍ ᠪᠦᠦ ᠣᠷᠣᠶᠠ᠂ ᠬᠠᠷᠴᠠᠭᠠᠢ ᠱᠣᠩᠬᠣᠷ ᠮᠡᠲᠦ ᠬᠠᠷᠠᠢᠯᠠᠨ ᠳᠡᠭᠦᠯᠢᠨ ᠶᠠᠪᠤᠶᠠ ᠬᠠᠳᠬᠤᠯᠳᠤᠬᠤ ᠲᠡᠢᠨ ᠳ᠋ᠦ᠍ ᠬᠠᠯᠠᠭᠤᠨ ᠠᠮᠢ ᠪᠠᠨ ᠪᠦᠦ ᠬᠠᠢᠷᠠᠯᠠᠶᠠ᠃ᠠᠩᠭᠢᠷ ᠰᠢᠪᠠᠭᠤ ᠮᠡᠲᠦ ᠠᠮᠠᠷᠠᠭ ᠦᠷᠡ ᠪᠡᠨ ᠪᠦᠦ ᠬᠥᠨᠥᠭᠡᠶᠡ᠁ ᠠᠯᠠᠯᠴᠠᠬᠤ ᠳᠠᠢᠰᠤᠨ ᠳ᠋ᠤ᠌ ᠠᠮᠢ ᠪᠠᠨ ᠪᠦᠦ ᠬᠠᠢᠷᠠᠯᠠᠶᠠ᠃ ᠡᠯᠢᠭᠡᠨ ᠰᠠᠳᠤᠨ ᠳᠣᠲᠣᠷᠠ ᠪᠠᠨ ᠡᠪ ᠨᠠᠢᠷᠠᠮᠳᠠᠯ ᠢ᠋ ᠪᠦᠦ ᠠᠯᠳᠠᠶᠠ᠃ ᠡᠵᠡᠷᠬᠡᠬᠦ ᠳᠠᠢᠰᠤᠨ ᠲᠠᠢ ᠲᠤᠯᠬᠤ ᠳ᠋ᠤ᠌ ᠡᠨᠡ ᠪᠡᠶᠡ ᠪᠡᠨ ᠪᠦᠦ ᠬᠠᠢᠷᠠᠯᠠᠶᠠ》 ᠬᠦᠯᠦᠭ ᠪᠣᠭᠣᠷᠴᠤ ᠶ᠋ᠢᠨ ᠳᠠᠭᠤᠯᠠᠭᠰᠠᠨ ᠦᠭᠡ ᠡᠨᠡ ᠪᠢᠯᠡ᠃ ᠰᠤᠤᠲᠤ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ᠂ ᠦᠳᠡ ᠵᠠᠭᠤᠷᠠ ᠶᠠᠪᠤᠵᠤ ᠭᠤᠷᠪᠠᠨ ᠵᠠᠭᠤᠨ ᠲᠠᠢᠴᠢᠭᠤᠳ ᠢ᠋ ᠳᠠᠷᠤᠵᠤ ᠡᠰᠡᠨ ᠮᠡᠨᠳᠦ ᠭᠡᠷ ᠲᠡᠭᠡᠨ ᠢᠷᠡᠵᠦ ᠡᠩᠬᠡ ᠠᠮᠤᠭᠤᠯᠠᠩ ᠰᠠᠭᠤᠪᠠ᠃
ᠨᠢᠴᠦᠭᠦᠨ ᠪᠠᠭᠠᠷᠢᠨ ᠤ᠋ ᠰᠢᠷᠬᠥᠬᠡᠲᠦ ᠡᠪᠦᠭᠡᠨ᠂ ᠬᠥᠪᠡᠭᠦᠨ ᠠᠯᠠᠭ ᠨᠠᠶᠠᠭᠠ ᠬᠣᠶᠠᠷ ᠲᠠᠢ ᠡᠯᠪᠡᠵᠦ ᠲᠠᠢᠴᠢᠭᠤᠳ ᠤ᠋ᠨ ᠨᠣᠶᠠᠨ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ ᠢ᠋ ᠣᠢ ᠳ᠋ᠤ᠌ ᠬᠣᠷᠭᠣᠳᠣᠵᠣ ᠪᠠᠢᠬᠤ ᠳ᠋ᠤ᠌ ᠣᠯᠵᠤ ᠪᠠᠷᠢᠭᠠᠳ᠂ ᠲᠡᠷᠡ᠂ ᠮᠣᠷᠢ ᠤᠨᠤᠵᠤ ᠦᠯᠦ ᠴᠢᠳᠠᠬᠤ ᠲᠠᠷᠭᠤᠨ ᠲᠤᠯᠠ ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠵᠤ ᠲᠡᠮᠦᠵᠢᠨ ᠳ᠋ᠦ᠍ ᠬᠦᠷᠭᠡᠬᠦ ᠪᠡᠷ ᠠᠪᠴᠤ ᠶᠠᠪᠤᠬᠤ ᠳ᠋ᠤ᠌ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ ᠤ᠋ᠨ ᠬᠥᠪᠡᠭᠦᠳ᠂ ᠳᠡᠭᠦᠦ ᠨᠠᠷ ᠨᠡᠬᠡᠵᠦ ᠪᠤᠯᠢᠶᠠᠨ ᠠᠪᠬᠤ ᠪᠠᠷ ᠢᠷᠡᠪᠡ᠃ ᠲᠡᠳᠡᠨ ᠢ᠋ ᠢᠷᠠᠮᠠᠭᠴᠠ ᠰᠢᠷᠬᠥᠬᠡᠲᠦ ᠡᠪᠦᠭᠡᠨ᠂ ᠬᠥᠳᠡᠯᠦᠨ ᠶᠠᠳᠠᠬᠤ ᠲᠠᠷᠭᠤᠲᠠᠢ ᠶ᠋ᠢ ᠬᠡᠯᠪᠡᠷᠢᠭᠦᠯᠦᠨ ᠤᠨᠠᠭᠠᠵᠤ ᠭᠡᠳᠡᠷᠭᠦ ᠬᠠᠷᠠᠭᠤᠯᠤᠨ ᠬᠡᠪᠲᠡᠭᠦᠯᠵᠦ᠂ ᠭᠡᠳᠡᠰᠦᠨ ᠳᠡᠭᠡᠷᠡ ᠨᠢ ᠰᠠᠠᠳᠠᠢ᠌ᠯᠵᠣ ᠰᠠᠭᠤᠭᠠᠳ᠂ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠵᠤ ᠥᠭᠦᠯᠡᠷᠦᠨ᠄
《ᠬᠥᠪᠡᠭᠦᠳ ᠳᠡᠭᠦᠦ ᠨᠠᠷ ᠴᠢᠨᠢ᠂ ᠴᠢᠮᠠ ᠶ᠋ᠢ ᠪᠤᠯᠢᠶᠠᠵᠤ ᠠᠪᠬᠤ ᠪᠠᠷ ᠢᠷᠡᠪᠡ᠂ ᠬᠠᠨ ᠴᠢᠮᠠ ᠶ᠋ᠢ ᠣᠳᠣ ᠪᠢ ᠡᠰᠡ ᠠᠯᠠᠪᠠᠴᠤ᠂ ᠴᠢᠮᠠᠲᠤ ᠨᠢᠭᠡᠨᠲᠡ ᠬᠠᠯᠳᠠᠭᠰᠠᠨ ᠲᠤᠯᠠ ᠨᠠᠮᠠ ᠶ᠋ᠢ ᠠᠯᠠᠬᠤ ᠪᠣᠯᠤᠨᠠ᠂ ᠴᠢᠮᠠ ᠶ᠋ᠢ ᠠᠯᠠᠪᠠᠴᠤ᠂ ᠨᠢᠭᠡᠨ ᠠᠳᠠᠯᠢ ᠠᠯᠠᠭᠳᠠᠬᠤ ᠪᠣᠯᠤᠨᠠ᠃ ᠡᠢᠮᠦ ᠶ᠋ᠢᠨ ᠲᠤᠯᠠ ᠴᠢᠮᠠ ᠪᠠᠷ ᠳᠡᠷᠡ ᠬᠢᠵᠦ ᠥᠭᠭᠦᠶᠡ》 ᠭᠡᠵᠦ ᠬᠢᠲᠤᠭᠠ ᠶ᠋ᠢᠨ ᠢᠷ ᠢ᠋ ᠲᠠᠷᠭᠤᠲᠠᠢ ᠶ᠋ᠢᠨ ᠬᠣᠭᠣᠯᠠᠢ ᠳ᠋ᠤ᠌ ᠲᠤᠯᠭᠠᠪᠠᠯ᠂ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ᠂ ᠳᠡᠭᠦᠦ ᠨᠠᠷ ᠬᠥᠪᠡᠭᠦᠳ ᠲᠡᠭᠡᠨ ᠶᠡᠬᠡ ᠳᠠᠭᠤ ᠪᠠᠷ ᠤᠬᠢᠯᠠᠨ ᠥᠭᠦᠯᠡᠷᠦᠨ᠄
《ᠰᠢᠷᠬᠥᠬᠡᠲᠦ ᠂ ᠨᠠᠮᠠ ᠶ᠋ᠢ ᠠᠯᠠᠬᠤ ᠭᠡᠵᠦ ᠪᠠᠢᠨᠠ᠃ ᠨᠢᠭᠡᠨᠲᠡ ᠠᠯᠠᠪᠠᠯ ᠮᠢᠨᠦ ᠬᠡᠭᠦᠷ ᠢ᠋ᠶ᠋ᠡᠷ ᠲᠠ ᠨᠠᠷ ᠶᠠᠭᠤ ᠬᠢᠬᠦ ᠪᠣᠢ? ᠨᠠᠮᠠ ᠶ᠋ᠢ ᠠᠯᠠᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠳᠠᠷᠤᠢ ᠪᠤᠴᠠᠭᠲᠤᠨ᠃ ᠲᠡᠮᠦᠵᠢᠨ᠂ ᠨᠠᠮᠠ ᠶ᠋ᠢ ᠠᠯᠠᠬᠤ ᠦᠭᠡᠢ᠂ ᠲᠡᠮᠦᠵᠢᠨ ᠢ᠋ ᠡᠵᠡᠨ ᠦᠭᠡᠢ ᠨᠤᠲᠤᠭ ᠲᠤ᠌ ᠣᠷᠬᠢᠭᠳᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠡᠭᠡᠨ ᠭᠠᠯᠲᠠᠢ᠂ ᠨᠢᠭᠤᠷ ᠲᠠᠭᠠᠨ ᠭᠡᠷᠡᠯᠲᠡᠢ᠂ ᠰᠡᠷᠭᠦᠯᠡᠩ ᠠᠪᠢᠶᠠᠰᠣᠳᠠᠢ ᠬᠥᠪᠡᠭᠦᠨ ᠭᠡᠵᠦ ᠪᠢ ᠣᠯᠵᠤ ᠠᠪᠴᠢᠷᠠᠭᠠᠳ᠂ ᠡᠮᠨᠢᠭ ᠦᠷᠢᠶᠡ ᠳᠠᠭᠠ ᠰᠤᠷᠭᠠᠬᠤ ᠮᠡᠲᠦ ᠰᠤᠷᠭᠠᠵᠤ ᠬᠥᠮᠦᠵᠢᠭᠦᠯᠵᠦ ᠶᠠᠪᠤᠭᠰᠠᠨ ᠪᠢᠯᠡ᠃ ᠲᠡᠷᠡ ᠴᠠᠭ ᠲᠤ᠌ ᠲᠡᠭᠦᠨ ᠢ᠋ ᠬᠢᠯᠪᠠᠷ ᠦᠬᠦᠭᠦᠯᠵᠦ ᠴᠢᠳᠠᠬᠤ ᠪᠣᠯᠪᠠᠴᠤ ᠥᠷᠥᠰᠢᠶᠡᠵᠦ ᠥᠰᠬᠡᠭᠰᠡᠨ ᠶᠦ᠍ᠮ᠃ ᠣᠳᠣ ᠲᠡᠮᠦᠵᠢᠨ᠂ ᠲᠡᠭᠦᠨ ᠢ᠋ ᠤᠬᠠᠭᠠᠨ ᠳ᠋ᠠᠭᠠᠨ ᠣᠢᠯᠠᠭᠠᠵᠤ᠂ ᠰᠡᠳᠬᠢᠯ ᠳ᠋ᠡᠭᠡᠨ ᠰᠡᠩᠬᠡᠷᠡᠵᠦ ᠪᠠᠢᠭᠠ ᠪᠢᠵᠡ᠃ ᠲᠡᠮᠦᠵᠢᠨ᠂ ᠨᠠᠮᠠ ᠶ᠋ᠢ ᠠᠯᠠᠬᠤ ᠦᠭᠡᠢ᠂ ᠲᠠ ᠬᠥᠪᠡᠭᠦᠳ ᠳᠡᠭᠦᠦ ᠨᠠᠷ ᠮᠢᠨᠢ ᠥᠭᠡᠳᠡ(ᠲᠦᠷᠭᠡᠨ) ᠬᠠᠷᠢᠭᠲᠤᠨ ᠃ ᠰᠢᠷᠬᠥᠬᠡᠲᠦ᠂ ᠨᠠᠮᠠ ᠶ᠋ᠢ ᠠᠯᠠᠭᠤᠵᠠᠢ》 ᠭᠡᠵᠦ ᠶᠡᠬᠡ ᠳᠠᠭᠤ ᠪᠠᠷ ᠤᠬᠢᠯᠠᠨ ᠪᠠᠷᠬᠢᠷᠠᠪᠠᠯ᠂ ᠬᠥᠪᠡᠭᠦᠳ ᠳᠡᠭᠦᠦ ᠨᠠᠷ ᠨᠢ ᠰᠣᠨᠣᠰᠴᠤ ᠬᠡᠯᠡᠯᠴᠡᠪᠡ᠄ 《ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠢ ᠶ᠋ᠢ ᠠᠪᠤᠷᠠᠶᠠ ᠭᠡᠵᠦ ᠢᠷᠠᠭᠰᠠᠨ ᠪᠢᠯᠡ᠂ ᠭᠡᠲᠡᠯᠡ᠂ ᠡᠴᠢᠭᠡ ᠶ᠋ᠢ ᠮᠢᠨᠢ ᠡᠨᠡ ᠰᠢᠷᠬᠥᠬᠡᠲᠦ ᠡᠪᠦᠭᠡᠨ ᠠᠯᠠᠪᠠᠯ ᠬᠣᠭᠣᠰᠣᠨ ᠠᠮᠢ ᠦᠭᠡᠢ ᠪᠡᠶᠡ ᠪᠡᠷ ᠪᠢᠳᠡ ᠶᠠᠭᠤ ᠬᠢᠬᠦ ᠪᠣᠢ? ᠣᠳᠣ ᠠᠯᠠᠭᠠ ᠦᠭᠡᠢ ᠳ᠋ᠦ᠍ ᠪᠤᠴᠠᠶᠠ》 ᠭᠡᠵᠦ ᠬᠠᠷᠢᠪᠠ᠃ ᠲᠡᠳᠡᠨ ᠢ᠋ ᠳᠠᠯᠳᠠ ᠣᠷᠣᠮᠠᠭᠴᠠ ᠲᠠᠢᠴᠢᠭᠤᠳ ᠠ᠋ᠴᠠ ᠤᠭᠲᠤᠵᠤ ᠣᠳᠤᠭᠰᠠᠨ᠂ ᠰᠢᠷᠬᠥᠬᠡᠲᠦ ᠡᠪᠦᠭᠡᠨ ᠦ᠌ ᠬᠥᠪᠡᠭᠦᠨ ᠠᠯᠠᠭ ᠨᠠᠶᠠᠭᠠ ᠬᠣᠶᠠᠷ ᠡᠴᠢᠭᠡ ᠳ᠋ᠡᠭᠡᠨ ᠪᠤᠴᠠᠵᠤ ᠢᠷᠡᠪᠡ᠃ ᠰᠢᠷᠬᠥᠬᠡᠲᠦ ᠡᠪᠦᠭᠡᠨ᠂ ᠬᠥᠪᠡᠭᠦᠳ ᠲᠡᠢ ᠬᠠᠮᠲᠤ ᠨᠡᠢᠯᠡᠭᠡᠳ᠂ ᠲᠠᠷᠭᠤᠲᠠᠢ ᠶ᠋ᠢ ᠠᠪᠤᠨ ᠬᠥᠳᠡᠯᠵᠦ ᠬᠣᠲᠤᠭᠤᠯ ᠨᠤᠭᠤ ᠭᠡᠳᠡᠭ ᠭᠠᠵᠠᠷ ᠬᠦᠷᠪᠡ᠃ ᠲᠡᠨᠳᠡ ᠨᠠᠶᠠᠭᠠ ᠥᠭᠦᠯᠡᠷᠦᠨ᠄
《ᠪᠢᠳᠡ ᠡᠨᠡ ᠲᠠᠷᠭᠤᠲᠠᠢ ᠶ᠋ᠢ ᠪᠠᠷᠢᠵᠤ ᠣᠴᠢᠪᠠᠯ᠂ ᠴᠢᠩᠭᠢᠰ ᠬᠠᠭᠠᠨ᠂ ᠪᠢᠳᠡᠨ ᠢ᠋ ᠬᠠᠨ ᠡᠵᠡᠨ ᠢ᠋ᠶ᠋ᠡᠨ ᠪᠠᠷᠢᠵᠤ ᠢᠷᠡᠭᠰᠡᠨ ᠢᠲᠡᠭᠡᠮᠵᠢ ᠦᠭᠡᠢ ᠠᠷᠠᠳ ᠭᠡᠵᠦ ᠪᠢᠳᠡᠨ ᠢ᠋ ᠢᠲᠡᠭᠡᠵᠦ ᠨᠥᠬᠥᠷᠯᠡᠬᠦ ᠦᠭᠡᠢ᠂ ᠬᠠᠷᠢᠨ ᠬᠠᠨ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠭᠰᠠᠨ ᠬᠠᠷᠠᠴᠤ ᠠᠷᠠᠳ ᠭᠡᠵᠦ ᠪᠠᠷᠢᠵᠤ ᠠᠯᠠᠬᠤ ᠪᠢᠵᠡ 》᠃ ᠣᠳᠣ ᠲᠠᠷᠭᠤᠲᠠᠢ ᠶ᠋ᠢ ᠡᠨᠳᠡ ᠡᠴᠡ ᠲᠠᠯᠪᠢᠵᠤ ᠪᠤᠴᠠᠭᠠᠭᠠᠳ ᠪᠢᠳᠡ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠪᠡᠶᠡ ᠪᠡᠷ ᠣᠴᠢᠵᠤ ᠢᠩᠭᠢᠵᠦ ᠬᠡᠯᠡᠶᠡ᠄
《ᠪᠢᠳᠡ ᠴᠢᠩᠭᠢᠰ ᠬᠠᠭᠠᠨ ᠴᠢᠮᠠᠲᠤ ᠬᠦᠴᠦ ᠪᠡᠨ ᠡᠷᠭᠦᠬᠦ ᠪᠡᠷ ᠢᠷᠡᠪᠡ᠃ ᠪᠢᠳᠡ᠂ ᠲᠠᠷᠭᠤᠲᠠᠢ ᠶ᠋ᠢ ᠪᠠᠷᠢᠵᠤ ᠢᠷᠡᠵᠦ ᠶᠠᠪᠤᠲᠠᠯᠠ᠂ ᠬᠠᠨ ᠡᠵᠡᠨ ᠢ᠋ᠶ᠋ᠡᠨ ᠬᠠᠷᠠᠭᠰᠠᠭᠠᠷ ᠪᠠᠢᠵᠤ᠂ ᠬᠠᠷᠢ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠶᠠᠭᠠᠬᠢᠵᠤ ᠪᠠᠷᠢᠵᠤ ᠥᠭᠬᠦ ᠪᠣᠢ ᠭᠡᠵᠦ ᠬᠠᠯᠠᠰᠢᠷᠠᠨ ᠥᠷᠥᠪᠳᠦᠵᠦ ᠵᠠᠮ ᠳ᠋ᠠᠭᠠᠨ ᠲᠠᠯᠪᠢᠵᠤ ᠪᠤᠴᠠᠭᠠᠭᠠᠳ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠲᠠᠨ ᠢ᠋ ᠪᠢᠰᠢᠷᠡᠨ ᠳᠠᠭᠠᠬᠤ ᠪᠠᠷ ᠢᠷᠡᠪᠡ》 ᠭᠡᠵᠦ ᠬᠡᠯᠡᠶᠡ ᠭᠡᠪᠡᠯ ᠨᠠᠶᠠᠭᠠ ᠶ᠋ᠢᠨ ᠦᠭᠡ ᠶ᠋ᠢ ᠡᠴᠢᠭᠡ ᠬᠥᠪᠡᠭᠦᠳ ᠵᠥᠪᠰᠢᠶᠡᠷᠡᠵᠦ᠂ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ ᠢ᠋ ᠬᠣᠳᠣᠭᠣᠯ ᠨᠤᠭᠤ ᠠ᠋ᠴᠠ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠠᠳ᠂ ᠰᠢᠷᠬᠥᠬᠡᠲᠦ ᠡᠪᠦᠭᠡᠨ᠂ ᠠᠯᠠᠭ ᠨᠠᠶᠠᠭᠠ ᠬᠣᠶᠠᠷ ᠬᠥᠪᠡᠭᠦᠨ ᠦ᠌ ᠬᠠᠮᠲᠤ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠬᠦᠷᠴᠦ ᠢᠷᠡᠪᠡ᠃ ᠲᠡᠳᠡᠨ ᠦ᠌ ᠢᠷᠠᠭᠰᠠᠨ ᠤᠴᠢᠷ ᠢ᠋ ᠠᠰᠠᠭᠤᠪᠠᠯ᠂ ᠰᠢᠷᠬᠥᠬᠡᠲᠦ ᠡᠪᠦᠭᠡᠨ᠂ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠥᠭᠦᠯᠡᠷᠦᠨ᠄
《ᠪᠢᠳᠡ᠂ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ ᠢ᠋ ᠠᠪᠴᠢᠷᠠᠵᠤ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ᠂ ᠵᠠᠮ ᠳ᠋ᠤ᠌ ᠡᠵᠡᠨ ᠢ᠋ᠶ᠋ᠡᠨ ᠬᠠᠷᠠᠭᠰᠠᠭᠠᠷ ᠪᠠᠢᠵᠤ ᠬᠠᠷᠢ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠶᠠᠭᠠᠬᠢᠵᠤ ᠪᠠᠷᠢᠵᠤ ᠥᠭᠬᠦ ᠪᠣᠢ ᠭᠡᠵᠦ ᠲᠠᠯᠪᠢᠵᠤ ᠪᠤᠴᠠᠭᠠᠭᠠᠳ᠂ ᠪᠢᠳᠡ ᠥᠪᠡᠰᠦᠪᠡᠨ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠬᠦᠴᠦ ᠪᠡᠨ ᠡᠷᠭᠦᠬᠦ ᠪᠡᠷ ᠢᠷᠡᠪᠡ》 ᠭᠡᠪᠡ᠃ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄
《ᠬᠠᠨ ᠡᠵᠡᠨ ᠲᠠᠷᠭᠤᠲᠠᠢ ᠶ᠋ᠢ ᠬᠠᠯᠳᠠᠵᠤ ᠠᠪᠴᠢᠷᠠᠭᠰᠠᠨ ᠪᠥᠭᠡᠰᠦ ᠬᠠᠨ ᠳ᠋ᠠᠭᠠᠨ ᠬᠠᠯᠳᠠᠭᠰᠠᠨ ᠬᠠᠷᠠᠴᠤ ᠠᠷᠠᠳ ᠲᠤ᠌ ᠢᠲᠡᠭᠡᠵᠦ ᠦᠯᠦ ᠪᠣᠯᠬᠤ ᠲᠤᠯᠠ ᠬᠠᠷᠢᠨ ᠲᠠ ᠨᠠᠷ ᠢ᠋ ᠬᠠᠮᠢᠶᠠᠲᠠᠨ ᠰᠠᠳᠤᠨ ᠤ᠋ ᠬᠠᠮᠲᠤ ᠠᠯᠠᠬᠤ ᠪᠥᠯᠥᠭᠡ᠂ ᠬᠠᠨ ᠡᠵᠡᠨ ᠢ᠋ᠶ᠋ᠡᠨ ᠬᠠᠢᠷᠠᠯᠠᠭᠰᠠᠨ ᠬᠠᠯᠠᠭᠤᠨ ᠰᠡᠳᠬᠢᠯ ᠴᠢᠨᠢ ᠬᠠᠷᠢᠨ ᠵᠥᠪ》 ᠭᠡᠳ ᠨᠠᠶᠠᠭᠠ ᠶ᠋ᠢ ᠳᠣᠲᠣᠨᠣᠴᠢᠯᠠᠨ ᠥᠷᠥᠰᠢᠶᠡᠪᠡ᠃ ᠢᠳᠡᠭᠰᠡᠭᠡᠷ ᠬᠦᠰᠡᠭᠦᠷ ᠡᠪᠦᠷᠯᠡᠭᠰᠡᠨ
150᠂ ᠲᠡᠭᠦᠨ ᠦ᠌ ᠬᠣᠢᠨᠠ᠂ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠲᠡᠷᠰᠦᠳ ᠭᠡᠳᠡᠭ ᠭᠠᠵᠠᠷ ᠪᠠᠢᠬᠤ ᠳ᠋ᠤ᠌ ᠬᠡᠷᠡᠢᠳ ᠦ᠋ᠨ ᠵᠠᠬᠠ ᠭᠣᠮᠪᠣ ᠨᠥᠬᠥᠷᠯᠡᠬᠦ ᠪᠡᠷ ᠢᠷᠡᠪᠡ᠃ ᠲᠡᠷᠡ ᠴᠠᠭ ᠲᠤ᠌ ᠮᠡᠷᠭᠡᠳ ᠬᠠᠳᠬᠤᠯᠳᠤᠬᠤ ᠪᠠᠷ ᠢᠷᠡᠪᠡᠯ᠂ ᠴᠢᠩᠭᠢᠰ ᠬᠠᠭᠠᠨ᠂ ᠵᠠᠬᠠ ᠭᠣᠮᠪᠣ ᠬᠣᠶᠠᠷ ᠬᠠᠳᠬᠤᠯᠳᠤᠨ ᠪᠠᠢᠯᠳᠤᠵᠤ ᠨᠢᠴᠤᠭᠠᠪᠠ᠃ ᠲᠡᠨᠳᠡ ᠲᠦᠮᠡᠨ ᠲᠦᠢᠪᠡᠭᠡᠨ᠂ ᠣᠯᠠᠨ ᠲᠣᠩᠭ᠋ᠠᠢ᠌ᠳ ᠬᠡᠷᠡᠢᠳ ᠦ᠋ᠨ ᠪᠤᠲᠠᠷᠠᠭᠰᠠᠨ ᠢᠷᠭᠡᠨ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠳᠠᠭᠠᠷᠠ ᠢᠷᠡᠪᠡ᠃ ᠬᠡᠷᠡᠢᠳ ᠦ᠋ᠨ ᠸᠠᠩ ᠬᠠᠨ᠂ ᠤᠷᠢᠳ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠠᠢ ᠰᠠᠢᠬᠠᠨ ᠬᠠᠨᠢᠯᠠᠵᠤ ᠠᠨᠳᠠ ᠪᠣᠯᠤᠯᠴᠠᠭᠰᠠᠨ ᠪᠢᠯᠡ᠃ ᠠᠨᠳᠠ ᠪᠣᠯᠤᠯᠴᠠᠭᠰᠠᠨ ᠤᠴᠢᠷ ᠢ᠋ ᠬᠡᠯᠡᠪᠡᠯ᠂ ᠸᠠᠩ ᠬᠠᠨ᠂ᠬᠤᠷᠴᠠᠬᠤᠰ ᠪᠣᠢᠷᠤᠭ ᠬᠠᠨ ᠡᠴᠢᠭᠡ ᠶ᠋ᠢᠨ ᠳᠡᠭᠦᠦ ᠨᠠᠷ ᠢ᠋ ᠠᠯᠠᠭᠠᠳ ᠠᠪᠠᠭᠠ ᠬᠥᠷ ᠬᠠᠭᠠᠨ ᠲᠠᠢ ᠡᠪᠳᠡᠷᠡᠨ ᠲᠡᠮᠡᠴᠡᠯᠳᠦᠵᠦ᠂ ᠬᠠᠷᠢᠭᠣᠨ ᠬᠠᠪᠴᠢᠯ ᠭᠡᠳᠡᠭ ᠭᠠᠵᠠᠷ ᠰᠢᠷᠭᠤᠨ ᠬᠣᠷᠭᠣᠳᠣᠵᠣ᠂ ᠲᠡᠨᠳᠡ ᠡᠴᠡ ᠵᠠᠭᠤᠨ ᠬᠥᠮᠦᠨ ᠲᠡᠢ ᠠᠷᠠᠢᠬᠠᠨ ᠵᠢᠭᠤᠲᠠᠵᠤ᠂ ᠶᠢᠰᠦᠭᠡᠢ ᠬᠠᠨ ᠳ᠋ᠤ᠌ ᠢᠷᠡᠪᠡᠯ᠂ ᠶᠢᠰᠦᠭᠡᠢ ᠬᠠᠨ᠂ ᠲᠡᠭᠦᠨ ᠢ᠋ ᠠᠰᠠᠷᠠᠨ ᠲᠡᠳᠬᠦᠵᠦ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠴᠡᠷᠢᠭ ᠠᠪᠴᠤ ᠮᠣᠷᠳᠠᠭᠠᠳ᠂ ᠬᠥᠷ ᠬᠠᠭᠠᠨ ᠢ᠋ ᠬᠠᠰᠢᠨ ᠣᠷᠣᠨ ᠳ᠋ᠤ᠌ ᠳᠤᠲᠠᠭᠠᠯᠭᠠᠵᠤ᠂ ᠠᠯᠪᠠᠲᠤ ᠢᠷᠭᠡᠳ ᠪᠠ ᠡᠳ᠋ ᠮᠠᠯ ᠢ᠋ ᠸᠠᠩ ᠬᠠᠨ ᠳ᠋ᠤ᠌ ᠠᠪᠴᠤ ᠥᠭᠭᠦᠭᠰᠡᠨ ᠲᠤᠯᠠ ᠠᠨᠳᠠ ᠠᠮᠠᠷᠠᠭ ᠪᠣᠯᠤᠯᠴᠠᠭᠰᠠᠨ ᠪᠢᠯᠡ᠃
151᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠸᠠᠩ ᠬᠠᠨ ᠤ᠋ ᠳᠡᠭᠦᠦ ᠡᠷᠬᠡ ᠬᠠᠷᠠ᠂ ᠠᠬᠠ ᠸᠠᠩ ᠬᠠᠨ ᠳ᠋ᠤ᠌ ᠠᠯᠠᠭᠳᠠᠬᠤ ᠠ᠋ᠴᠠ ᠠᠶᠤᠵᠤ ᠳᠤᠲᠠᠭᠠᠨ᠂ ᠨᠢᠮᠡᠨ ᠦ᠌ ᠢᠨᠠᠠᠴᠠ ᠬᠠᠨ ᠳ᠋ᠤ᠌ ᠣᠴᠢᠪᠠ᠃ ᠢᠨᠠᠠᠴᠠ ᠬᠠᠨ᠂ ᠴᠡᠷᠢᠭ ᠮᠣᠷᠳᠠᠭᠤᠯᠵᠤ ᠢᠷᠡᠬᠦ ᠳ᠋ᠦ᠍ ᠸᠠᠩ ᠬᠠᠨ ᠵᠠᠢᠯᠠᠵᠤ᠂ ᠭᠤᠷᠪᠠᠨ ᠬᠣᠲᠠ ᠳᠠᠮᠵᠢᠨ ᠲᠡᠨᠦᠵᠦ ᠬᠠᠷᠠ ᠬᠢᠲᠠᠳ ᠤ᠋ᠨ ᠬᠥᠷ ᠬᠠᠨ ᠳ᠋ᠤ᠌ ᠣᠴᠢᠪᠠ᠃ ᠲᠡᠷᠡ ᠬᠠᠨ ᠲᠠᠢ ᠪᠠᠰᠠ ᠡᠪ ᠲᠠᠰᠤᠷᠠᠭᠠᠳ ᠤᠢᠭᠤᠷ ᠤ᠋ᠨ ᠬᠣᠲᠠ᠂ ᠲᠠᠩᠭᠤᠳ ᠤ᠋ᠨ ᠪᠠᠯᠭᠠᠰᠤ ᠪᠠᠷ ᠬᠡᠰᠦᠭᠦᠯᠴᠢᠯᠡᠨ ᠶᠠᠪᠤᠵᠤ᠂ ᠲᠠᠪᠤᠨ ᠢᠮᠠᠭᠠ ᠱᠥᠷᠭᠡᠯᠡᠨ ᠰᠠᠭᠠᠵᠤ᠂ ᠲᠡᠮᠡᠭᠡᠨ ᠦ᠌ ᠴᠢᠰᠤ ᠬᠠᠨᠵᠤ ᠢᠳᠡᠭᠰᠡᠭᠡᠷ ᠠᠷᠠᠢ ᠭᠡᠵᠦ ᠬᠦᠰᠠᠬᠥᠷ ᠨᠠᠭᠤᠷ ᠲᠤ᠌ ᠬᠦᠷᠴᠦ ᠢᠷᠡᠪᠡᠯ᠂ ᠤᠷᠢᠳᠤ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠠᠢ ᠠᠨᠳᠠ ᠪᠠᠷᠢᠯᠳᠤᠭᠰᠠᠨ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠰᠡᠳᠬᠢᠵᠦ᠂ ᠲᠠᠬᠠᠢ ᠪᠠᠭᠠᠲᠤᠷ᠂ ᠰᠦᠬᠡᠬᠡᠢ ᠵᠡᠭᠦᠨ ᠬᠣᠶᠠᠷ ᠢ᠋ ᠡᠯᠴᠢ ᠪᠣᠯᠭᠠᠨ ᠣᠭᠳᠣᠭᠣᠯᠵᠣ᠂ ᠪᠠᠰᠠ ᠳᠠᠷᠠᠭᠠ ᠨᠢ ᠬᠡᠷᠦᠯᠦᠨ ᠦ᠌ ᠡᠬᠢᠨ ᠡᠴᠡ᠂ ᠴᠢᠩᠭᠢᠰ ᠬᠠᠭᠠᠨ ᠥᠪᠡᠰᠦᠪᠡᠨ ᠲᠣᠰᠴᠤ ᠠᠪᠤᠭᠠᠳ ᠥᠯᠥᠰᠴᠦ ᠲᠤᠷᠠᠵᠤ ᠢᠷᠡᠪᠡ ᠭᠡᠵᠦ ᠸᠠᠩ ᠬᠠᠨ ᠳ᠋ᠤ᠌ (ᠬᠠᠷᠢᠶᠠᠲᠤ ᠠᠷᠠᠳ ᠠ᠋ᠴᠠ) ᠭᠤᠪᠴᠢᠭᠤᠷ ᠲᠠᠲᠠᠵᠤ ᠦᠭᠭᠡᠳ ᠥᠪᠡᠷ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠠᠭᠤᠯᠵᠤ ᠲᠡᠵᠢᠭᠡᠪᠡ᠃ ᠲᠡᠷᠡ ᠡᠪᠦᠯ ᠬᠠᠮᠲᠤ ᠨᠡᠭᠦᠵᠦ ᠴᠢᠩᠭᠢᠰ ᠬᠠᠭᠠᠨ ᠬᠤᠪᠠ ᠬᠠᠶᠠᠭᠠ ᠳ᠋ᠤ᠌ ᠡᠪᠦᠯᠵᠢᠪᠡ᠃
152᠂ ᠲᠡᠷᠡ ᠴᠠᠭ ᠲᠤ᠌ ᠸᠠᠩ ᠬᠠᠨ ᠤ᠋ ᠳᠡᠭᠦᠦ ᠨᠣᠶᠠᠳ ᠤ᠋ᠨ ᠬᠡᠯᠡᠯᠴᠡᠬᠰᠡᠨ ᠨᠢ᠄
ᠡᠨᠡ ᠬᠠᠨ ᠠᠬᠠ ᠮᠠᠨᠢ ᠦᠷᠡ ᠰᠠᠳᠤᠨ ᠪᠢᠳᠡᠨ ᠢ᠋ ᠦᠨᠡᠰᠦ ᠪᠡᠷ ᠬᠡᠢᠰᠬᠡᠵᠦ ᠪᠣᠯᠬᠤ ᠦᠮᠡᠬᠡᠢ ᠰᠠᠨᠠᠭᠠ ᠡᠪᠦᠷᠯᠡᠭᠰᠡᠨ ᠦᠯᠦ ᠪᠦᠲᠦᠬᠦ ᠬᠥᠮᠦᠨ ᠪᠠᠢᠨᠠ ᠬᠠᠢᠷᠠᠨ ᠠᠬᠠ ᠳᠡᠭᠦᠦ ᠪᠡᠨ ᠬᠠᠮᠣᠷᠠᠨ ᠠᠯᠠᠵᠤ ᠪᠠᠷᠠᠪᠠ ᠬᠠᠷᠠ ᠬᠢᠲᠠᠳ ᠲᠤ᠌ ᠪᠠᠰᠠ ᠬᠠᠮᠠᠭᠠᠯᠠᠯ ᠭᠤᠶᠤᠵᠤ ᠰᠢᠷᠭᠤᠪᠠ ᠬᠠᠮᠤᠭ ᠤᠯᠤᠰ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤ ᠦᠭᠡᠢ ᠬᠠᠷᠭᠢᠰᠯᠠᠵᠤ ᠵᠣᠪᠠᠭᠠᠪᠠ᠃
ᠡᠭᠦᠨ ᠢ᠋ ᠶᠠᠭᠠᠬᠢᠬᠤ ᠪᠢᠯᠡ? ᠤᠷᠢᠳᠤ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠠᠭᠠᠨ ᠮᠡᠷᠭᠢᠳ ᠢᠷᠭᠡᠨ ᠳ᠋ᠦ᠍ ᠪᠠᠷᠢᠭᠳᠠᠵᠤ᠂ ᠬᠠᠷᠠᠯᠠᠭ ᠢᠰᠢᠭᠡᠨ ᠳᠠᠬᠤ ᠡᠮᠦᠰᠴᠦ᠂ ᠰᠡᠯᠡᠩᠭᠡ ᠶ᠋ᠢᠨ ᠪᠣᠭᠣᠷᠠ ᠬᠡᠭᠡᠷᠡ ᠳ᠋ᠦ᠍ ᠣᠴᠢᠭᠠᠳ ᠮᠡᠷᠭᠢᠳ ᠦ᠋ᠨ ᠭᠠᠵᠠᠷ ᠪᠤᠳᠠᠭᠠ ᠨᠦᠳᠦᠵᠦ ᠠᠮᠢᠳᠤᠷᠠᠵᠤ ᠶᠠᠪᠤᠭᠰᠠᠨ ᠪᠢᠯᠡ᠃ ᠬᠤᠷᠴᠠᠬᠤᠰ ᠪᠣᠢᠷᠤᠭ ᠬᠠᠨ ᠡᠴᠢᠭᠡ ᠨᠢ ᠮᠡᠷᠭᠢᠳ ᠢᠷᠭᠡᠨ ᠢ᠋ ᠪᠠᠢᠯᠳᠤᠨ ᠳᠠᠢᠯᠠᠵᠤ᠂ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠪᠤᠷᠠᠵᠤ ᠢᠷᠠᠭᠰᠠᠨ᠂ ᠭᠡᠲᠡᠯᠡ ᠡᠨᠡ ᠲᠣᠭᠣᠷᠢᠯ ᠪᠠᠰᠠ ᠲᠠᠲ᠋ᠠᠷ ᠤ᠋ᠨ ᠠᠵᠠᠢ ᠬᠠᠨ ᠳ᠋ᠤ᠌ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠠᠭᠠᠨ ᠡᠬᠡ ᠶ᠋ᠢᠨ ᠬᠠᠮᠲᠤ ᠪᠠᠷᠢᠭᠳᠠᠵᠤ ᠣᠴᠢᠭᠠᠳ ᠲᠡᠭᠦᠨ ᠦ᠌ ᠲᠡᠮᠡᠭᠡ ᠶ᠋ᠢ ᠬᠠᠷᠢᠭᠤᠯᠵᠤ ᠶᠠᠪᠤᠵᠠᠢ᠃ ᠲᠡᠨᠳᠡ ᠡᠴᠡ ᠠᠵᠠᠢ ᠬᠠᠨ ᠤ᠋ ᠬᠤᠨᠢᠴᠢ ᠶ᠋ᠢᠨ ᠬᠠᠮᠲᠤ ᠤᠷᠭᠤᠵᠤ ᠭᠡᠷ ᠲᠡᠭᠡᠨ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠬᠣᠢᠨᠠ ᠨᠢᠮᠡᠨ ᠡᠴᠡ ᠠᠶᠤᠨ ᠳᠤᠲᠠᠭᠠᠵᠤ᠂ ᠰᠠᠷᠲᠠᠭᠤᠯ ᠭᠠᠵᠠᠷ ᠤ᠋ᠨ ᠴᠦᠢ ᠮᠥᠷᠡᠨᠡ ᠬᠠᠷᠠ ᠬᠢᠲᠠᠳ ᠤ᠋ᠨ ᠬᠥᠷ ᠬᠠᠭᠠᠨ ᠳ᠋ᠤ᠌ ᠣᠴᠢᠪᠠ᠃ ᠲᠡᠨᠳᠡ ᠨᠢᠭᠡ ᠵᠢᠯ ᠪᠣᠯᠤᠭᠠᠳ ᠪᠠᠰᠠ ᠵᠠᠢᠯᠠᠵᠤ᠂ ᠤᠢᠭᠤᠷ ᠨᠤᠲᠤᠭ ᠢ᠋ᠶ᠋ᠠᠷ ᠲᠡᠨᠦᠵᠦ᠂ ᠲᠠᠩᠭᠤᠳ ᠭᠠᠵᠠᠷ ᠢ᠋ᠶ᠋ᠠᠷ ᠵᠠᠢᠯᠠᠵᠤ᠂ ᠲᠠᠪᠤᠨ ᠢᠮᠠᠭᠠ ᠱᠥᠷᠭᠡᠯᠡᠨ (ᠢᠮᠠᠭᠠ ᠶ᠋ᠢ ᠳᠡᠯᠡᠪᠴᠢᠯᠡᠬᠦ ᠪᠤᠶᠤ ᠢᠰᠢᠭᠡᠨ ᠦ᠌ ᠬᠣᠰᠢᠭᠤ ᠶ᠋ᠢ ᠱᠥᠷᠭᠡᠯᠡᠨ) ᠰᠠᠭᠠᠵᠤ᠂ ᠲᠡᠮᠡᠭᠡᠨ ᠦ᠌ ᠴᠢᠰᠤ ᠬᠠᠨᠵᠤ ᠢᠳᠡᠭᠰᠡᠭᠡᠷ ᠭᠠᠭᠴᠠ ᠰᠣᠬᠣᠷ ᠬᠠᠯᠢᠭᠤᠨ ᠮᠣᠷᠢ ᠲᠠᠢ᠂ ᠲᠡᠮᠦᠵᠢᠨ ᠳ᠋ᠦ᠍ ᠶᠠᠳᠠᠵᠤ ᠢᠷᠡᠪᠡᠯ᠂ ᠲᠡᠮᠦᠵᠢᠨ ᠬᠥᠪᠡᠭᠦᠨ᠂ ᠭᠤᠪᠴᠢᠭᠤᠷ ᠲᠠᠲᠠᠵᠤ ᠲᠡᠭᠦᠨ ᠢ᠋ ᠲᠡᠵᠢᠭᠡᠪᠡ᠃ ᠭᠡᠲᠡᠯᠡ᠂ ᠣᠳᠣ ᠲᠡᠷᠡ ᠢᠩᠭᠢᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠠᠳ ᠦᠮᠡᠬᠡᠢ ᠡᠯᠢᠭᠡ ᠡᠪᠦᠷᠲᠦᠯᠡᠵᠦ ᠶᠠᠪᠤᠨᠠ》 ᠭᠡᠵᠦ ᠬᠡᠯᠡᠯᠴᠡᠪᠡ᠃ ᠡᠨᠡ ᠬᠡᠯᠡᠯᠴᠡᠬᠰᠡᠨ ᠦᠭᠡ ᠶ᠋ᠢ ᠸᠠᠩ ᠬᠠᠨ ᠳ᠋ᠤ᠌ ᠠᠯᠲᠠᠨ ᠠᠱᠣᠭ ᠤᠯᠠᠮᠵᠢᠯᠠᠨ ᠠᠢᠯᠠᠳᠬᠠᠪᠠ᠃
ᠠᠯᠲᠠᠨ ᠠᠱᠣᠭ ᠬᠡᠯᠡᠭᠰᠡᠨ ᠨᠢ᠄ 《ᠪᠢ ᠡᠨᠡ ᠬᠤᠪᠢ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠯᠴᠠᠭᠰᠠᠨ ᠪᠢᠯᠡ᠂ ᠭᠡᠲᠡᠯᠡ᠂ ᠬᠠᠨ ᠴᠢᠮᠢ᠋ᠢ ᠲᠡᠪᠴᠢᠵᠦ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠬᠠᠮᠤᠭ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠠᠢᠯᠠᠳᠬᠠᠪᠠ》 ᠭᠡᠵᠡᠢ᠃ ᠲᠡᠷᠡ ᠦᠭᠡ ᠶ᠋ᠢ ᠬᠡᠯᠡᠯᠴᠡᠬᠰᠡᠨ ᠡᠯ ᠬᠣᠳᠣᠷ᠂ ᠬᠣᠯᠪᠠᠷᠢ᠂ ᠠᠷᠢᠨ ᠲᠠᠢᠵᠢ ᠵᠡᠷᠭᠡ ᠶ᠋ᠢᠨ ᠳᠡᠭᠦᠦ ᠨᠣᠶᠠᠳ ᠢ᠋ ᠸᠠᠩ ᠬᠠᠨ ᠪᠠᠷᠢᠭᠤᠯᠪᠠ᠃ ᠸᠠᠩ ᠬᠠᠨ ᠤ᠋ ᠳᠡᠭᠦᠦ ᠵᠠᠬᠠ ᠭᠣᠮᠪᠣ ᠠᠮᠵᠢᠨ ᠳᠤᠲᠠᠭᠠᠵᠤ᠂ ᠨᠢᠮᠡᠨ ᠳ᠋ᠦ᠍ ᠣᠴᠢᠪᠠ᠃ ᠪᠠᠷᠢᠪᠴᠢᠯᠠᠨ ᠠᠪᠤᠭᠰᠠᠨ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠸᠠᠩ ᠬᠠᠨ ᠨᠢᠭᠡᠨ ᠭᠡᠷ ᠲᠦ᠍ ᠣᠷᠣᠭᠤᠯᠵᠤ ᠥᠭᠦᠯᠡᠷᠦᠨ᠄
《ᠤᠢᠭᠤᠷ ᠨᠤᠲᠤᠭ ᠢ᠋ᠶ᠋ᠠᠷ ᠲᠠᠩᠭ᠋ᠣᠳ ᠭᠠᠵᠠᠷ ᠢ᠋ᠶ᠋ᠠᠷ ᠶᠠᠭᠠᠬᠢᠵᠤ ᠶᠠᠪᠤᠭᠰᠠᠨ ᠭᠡᠵᠦ ᠲᠠ ᠨᠠᠷ ᠬᠡᠯᠡᠭᠰᠡᠨ ᠪᠣᠢ? ᠲᠠ ᠨᠠᠷ ᠮᠤᠤᠰᠠᠢᠨ ᠶᠠᠭᠤ ᠭᠡᠵᠦ ᠪᠣᠳᠣᠪᠠ?》 ᠭᠡᠳ ᠨᠢᠭᠤᠷ ᠲᠤᠨᠢ ᠨᠤᠯᠮᠤᠵᠤ᠂ ᠭᠡᠷ ᠲᠦ᠍ ᠪᠠᠢᠭᠰᠠᠨ ᠠᠷᠠᠳ ᠴᠥᠮ ᠢ᠋ ᠪᠤᠰᠬᠠᠨ ᠨᠤᠯᠮᠤᠭᠤᠯᠵᠤ ᠂ ᠲᠡᠳᠡᠨ ᠦ᠌ ᠬᠦᠯᠦᠭ ᠢ᠋ (ᠬᠦᠯᠢᠶᠡᠰᠦ) ᠲᠠᠯᠪᠢᠭᠤᠯᠪᠠ᠃
153᠂ ᠲᠡᠷᠡ ᠡᠪᠦᠯ ᠡᠪᠦᠯᠵᠢᠵᠦ ᠂ ᠨᠣᠬᠠᠢ ᠵᠢᠯ ᠦ᠋ᠨ (1202 ᠣᠨ) ᠨᠠᠮᠤᠷ᠂ ᠴᠢᠩᠭᠢᠰ ᠬᠠᠭᠠᠨ ᠂ ᠴᠠᠭᠠᠨ ᠳᠠᠲ᠋ᠠᠷ᠂ ᠠᠯᠴᠤ ᠲᠠᠲ᠋ᠠᠷ᠂ ᠳᠤᠳᠠᠭᠤᠳ ᠳᠠᠲ᠋ᠠᠷ᠂ ᠠᠯᠤᠬᠠᠢ ᠲᠠᠲ᠋ᠠᠷ ᠨᠠᠷ ᠲᠠᠢ ᠳᠠᠯᠠᠨ ᠨᠥᠮᠥᠷᠬᠡᠰ ᠭᠡᠳᠡᠭ ᠭᠠᠵᠠᠷ ᠪᠠᠢᠯᠳᠤᠬᠤ ᠶ᠋ᠢᠨ ᠤᠷᠢᠳ ᠴᠢᠩᠭᠢᠰ ᠬᠠᠭᠠᠨ᠂ ᠴᠠᠭᠠᠵᠠ ᠲᠣᠭᠲᠠᠭᠠᠵᠤ ᠵᠠᠷᠯᠠᠭᠰᠠᠨ ᠨᠢ᠄ 《ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠴᠠᠭ ᠲᠤ᠌ ᠣᠯᠵᠠᠨ ᠳ᠋ᠤ᠌ ᠪᠤᠤ ᠰᠠᠭᠠᠳᠣᠭᠳᠣᠨ᠂ ᠳᠠᠢᠰᠤᠨ ᠨᠢᠭᠡᠨᠲᠡ ᠳᠠᠷᠤᠭᠳᠠᠪᠠᠯ ᠲᠡᠳᠡᠨ ᠦ᠌ ᠶᠠᠭᠤᠮᠠ ᠬᠡᠵᠢᠶᠡ ᠴᠦ᠍ ᠪᠢᠳᠡᠨ ᠦ᠌ ᠣᠯᠵᠠ ᠪᠣᠯᠬᠤ ᠲᠤᠯᠠ ᠬᠤᠪᠢᠶᠠᠯᠳᠤᠵᠤ ᠠᠮᠵᠢᠨᠠ᠃ ᠬᠡᠷᠪᠡ ᠪᠢᠳᠡ ᠤᠬᠤᠷᠢᠬᠤ ᠳ᠋ᠤ᠌ ᠬᠦᠷᠪᠡᠯ ᠠᠩᠬᠠ ᠳᠣᠪᠲᠣᠯᠤᠭᠰᠠᠨ ᠪᠠᠢᠷᠢᠨ ᠳ᠋ᠠᠭᠠᠨ ᠳᠠᠷᠤᠢ ᠡᠭᠡᠵᠦ ᠢᠷᠡᠪᠡᠯ ᠵᠣᠬᠢᠨᠠ᠃ ᠤᠭ ᠪᠠᠢᠷᠢᠨ ᠳ᠋ᠠᠭᠠᠨ ᠡᠭᠡᠵᠦ ᠢᠷᠡᠭᠡ ᠦᠭᠡᠢ ᠬᠥᠮᠦᠨ ᠢ᠋ ᠠᠯᠠᠲᠤᠭᠠᠢ》 ᠭᠡᠵᠦ ᠡᠢᠮᠦ ᠵᠠᠰᠠᠭ ᠲᠣᠭᠲᠠᠭᠠᠵᠤ ᠵᠠᠷᠯᠠᠪᠠ᠃ ᠳᠠᠯᠠᠨ ᠨᠥᠮᠥᠷᠬᠡᠰ ᠭᠡᠳᠡᠭ ᠭᠠᠵᠠᠷ ᠲᠠᠲ᠋ᠠᠷ ᠲᠠᠢ ᠪᠠᠢᠯᠳᠤᠵᠤ ᠲᠡᠳᠡᠨ ᠢ᠋ ᠳᠤᠲᠠᠭᠠᠯᠭᠠᠪᠠ᠃ ᠲᠡᠳᠡᠨ ᠢ᠋ ᠨᠡᠬᠡᠨ ᠪᠠᠢᠯᠳᠤᠵᠤ᠂ ᠣᠯᠬᠤᠢ ᠰᠢᠯᠦᠬᠡᠯᠵᠢᠥᠨ ᠭᠡᠳᠡᠭ ᠭᠠᠵᠠᠷ ᠡᠵᠡᠯᠡᠨ ᠳᠠᠭᠠᠭᠤᠯᠪᠠ᠃ ᠴᠠᠭᠠᠨ ᠲᠠᠲ᠋ᠠᠷ᠂ ᠠᠯᠴᠤ ᠲᠠᠲ᠋ᠠᠷ᠂ ᠲᠣᠳᠠᠭᠣᠳ ᠲᠠᠲ᠋ᠠᠷ᠂ ᠠᠯᠤᠬᠠᠢ ᠲᠠᠲ᠋ᠠᠷ ᠨᠠᠷ ᠤ᠋ᠨ ᠡᠷᠬᠡᠲᠡᠨ ᠢ᠋ (ᠳᠡᠭᠡᠳᠦ ᠢᠵᠠᠭᠤᠷᠲᠠᠨ) ᠳᠠᠷᠤᠵᠤ ᠬᠠᠷᠢᠶᠠᠲᠤ ᠨᠠᠷ ᠢ᠋ ᠡᠵᠡᠯᠡᠬᠦ ᠴᠠᠭ ᠲᠤ᠌ ᠲᠣᠭᠲᠠᠭᠠᠭᠰᠠᠨ ᠴᠠᠭᠠᠵᠠ ᠶ᠋ᠢ ᠠᠯᠲᠠᠨ ᠬᠣᠴᠠᠷ ᠲᠠᠷᠲᠠᠢ ᠭᠤᠷᠪᠠᠭᠤᠯᠠ ᠵᠥᠷᠢᠴᠡᠵᠦ᠂ ᠣᠯᠵᠠᠨ ᠳ᠋ᠤ᠌ ᠰᠢᠨᠤᠨ ᠪᠠᠢᠯᠳᠤᠭᠠᠨ ᠠ᠋ᠴᠠ ᠰᠠᠭᠠᠲᠠᠵᠠᠢ᠃ ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠬᠦᠷᠦᠭᠰᠡᠨ ᠦᠭᠡᠢ᠂ ᠲᠣᠭᠲᠠᠭᠠᠭᠰᠠᠨ ᠴᠠᠭᠠᠵᠠ ᠶ᠋ᠢ ᠳᠠᠭᠠᠭᠰᠠᠨ ᠦᠭᠡᠢ ᠭᠡᠵᠦ ᠵᠡᠪᠡ ᠬᠤᠪᠢᠯᠠᠢ ᠬᠣᠶᠠᠷ ᠢ᠋ ᠶᠠᠪᠤᠭᠤᠯᠵᠤ᠂ ᠲᠡᠳᠡᠨ ᠦ᠌ ᠣᠯᠵᠠᠯᠠᠭᠰᠠᠨ ᠠᠳᠤᠭᠤ ᠪᠠ ᠶᠠᠭᠤᠮᠠ ᠶ᠋ᠢ ᠪᠦᠷᠢᠨ ᠢ᠋ᠶ᠋ᠡᠷ ᠬᠣᠷᠢᠶᠠᠨ ᠠᠪᠠᠬᠠᠭᠣᠯᠪᠠ᠃
154᠂ ᠲᠠᠲ᠋ᠠᠷ ᠢ᠋ ᠰᠥᠨᠥᠭᠡᠵᠦ᠂ ᠪᠦᠭᠦᠳᠡ ᠶ᠋ᠢ ᠡᠵᠡᠯᠡᠭᠰᠡᠨ ᠬᠣᠢᠨᠠ᠂ ᠤᠯᠤᠰ ᠢᠷᠭᠡᠨ ᠢ᠋ ᠨᠢ ᠶᠠᠭᠠᠬᠢᠬᠤ ᠲᠤᠬᠠᠢ ᠴᠢᠩᠭᠢᠰ ᠬᠠᠭᠠᠨ᠂ ᠠᠯᠲᠠᠨ ᠤᠷᠤᠭ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠵᠤ ᠨᠢᠭᠡ ᠭᠡᠷ ᠲᠦ᠍ ᠣᠷᠣᠭᠠᠳ ᠶᠡᠬᠡ ᠵᠥᠪᠯᠡᠯᠳᠦᠭᠡᠨ ᠢ᠋ ᠬᠢᠪᠡ᠃ ᠲᠡᠳᠡᠨ ᠦ᠌ ᠵᠥᠪᠯᠡᠭᠰᠡᠨ ᠨᠢ᠄
《ᠡᠷᠲᠡ ᠴᠠᠭ ᠠ᠋ᠴᠠ ᠨᠠᠰᠢ ᠡᠴᠢᠭᠡ ᠡᠪᠦᠭᠡᠳ ᠢ᠋ ᠮᠢᠨᠢ ᠬᠣᠣᠷᠯᠠᠭᠰᠠᠨ ᠡᠨᠡ ᠮᠤᠤᠰᠠᠢᠨ ᠲᠠᠲ᠋ᠠᠷ ᠤ᠋ᠳ ᠢ᠋ ᠡᠭᠡᠨᠡᠭᠲᠡ ᠳᠠᠭᠤᠰᠬᠠᠬᠤ ᠶ᠋ᠢᠨ ᠲᠤᠯᠠ ᠲᠡᠷᠭᠡᠨ ᠦ᠌ ᠪᠤᠯᠤ ᠳ᠋ᠤ᠌ ᠬᠡᠮᠵᠢᠨ ᠦᠭᠡᠢ ᠬᠢᠵᠦ ᠤᠰᠠᠳᠬᠠᠶᠠ᠂ ᠦᠯᠡᠳᠡᠭᠰᠡᠨ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ ᠡᠭᠦᠳᠡ ᠪᠦᠷᠢ ᠳ᠋ᠦ᠍ ᠬᠤᠪᠢᠶᠠᠵᠤ ᠡᠭᠦᠷᠢᠳᠡ ᠶ᠋ᠢᠨ ᠪᠣᠭᠣᠯ ᠪᠣᠯᠭᠠᠶᠠ》 ᠭᠡᠵᠦ ᠵᠥᠪᠯᠡᠯᠳᠦᠵᠦ ᠲᠣᠭᠲᠠᠭᠠᠭᠠᠳ᠂ ᠭᠡᠷ ᠡᠴᠡ ᠭᠠᠷᠪᠠᠯ ᠲᠠᠲ᠋ᠠᠷ ᠤ᠋ᠨ ᠶᠡᠬᠡ ᠴᠡᠷᠢᠭ᠂ ᠪᠡᠯᠭᠦᠳᠡᠢ ᠡᠴᠡ ᠠᠰᠠᠭᠤᠷᠤᠨ᠄ 《ᠲᠠ ᠨᠠᠷ ᠶᠠᠮᠠᠷ ᠦᠭᠡ ᠵᠥᠪᠯᠡᠯᠳᠦᠪᠡ?》 ᠭᠡᠪᠡᠯ ᠪᠡᠯᠭᠦᠳᠡᠢ ᠥᠭᠦᠯᠡᠷᠦᠨ᠄
《ᠲᠠ ᠪᠦᠭᠦᠳᠡ ᠶ᠋ᠢ ᠲᠡᠩᠭᠡᠯᠢᠭ ᠦ᠋ᠨ ᠴᠦ᠍ ᠳ᠋ᠦ᠍ ᠬᠡᠮᠵᠢᠵᠦ᠂ ᠲᠡᠭᠦᠨ ᠡᠴᠡ ᠥᠨᠳᠥᠷ ᠨᠢᠷᠣᠭᠣᠳᠠᠨ ᠢ᠋ ᠴᠥᠮ ᠢ᠋ ᠬᠢᠳᠤᠬᠤ ᠪᠠᠷ ᠲᠣᠭᠲᠠᠪᠠ》 ᠭᠡᠪᠡ᠃ ᠪᠡᠯᠭᠦᠳᠡᠢ ᠶ᠋ᠢᠨ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠶᠡᠬᠡ ᠴᠠᠷᠠᠩ᠂ ᠣᠯᠠᠨ ᠲᠠᠲ᠋ᠠᠷ ᠲᠤ᠌ ᠲᠤᠩᠬᠠᠭ ᠵᠠᠷᠯᠠᠵᠤ᠂ ᠬᠣᠷᠢᠶᠠ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠴᠤᠭᠯᠠᠭᠤᠯᠪᠠ᠃ ᠲᠡᠳᠡᠨ ᠦ᠌ ᠪᠡᠬᠢᠯᠡᠯᠲᠡ ᠶ᠋ᠢ ᠡᠪᠳᠡᠬᠦ ᠶ᠋ᠢᠨ ᠲᠤᠯᠠ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠮᠠᠰᠢ ᠶᠡᠬᠡ ᠬᠣᠬᠢᠷᠠᠪᠠ᠃ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠴᠤᠭᠯᠠᠭᠰᠠᠨ ᠲᠠᠲ᠋ᠠᠷ ᠤ᠋ᠳ ᠢ᠋ ᠠᠷᠠᠢ ᠭᠡᠵᠦ ᠡᠵᠡᠯᠡᠨ ᠠᠪᠴᠤ ᠲᠡᠩᠭᠡᠯᠢᠭ ᠲᠦ᠍ ᠴᠢᠴᠣᠣᠯᠠᠨ ᠬᠢᠳᠤᠬᠤ ᠳ᠋ᠤ᠌ ᠲᠠᠲ᠋ᠠᠷ ᠨᠠᠷ ᠬᠥᠮᠦᠨ ᠳᠣᠳᠣᠮ 《ᠳᠡᠷᠡ ᠠᠪᠴᠤ ᠥᠭᠭᠦᠶᠡ》 ᠭᠡᠵᠦ ᠬᠢᠲᠤᠭᠠ ᠬᠠᠨᠴᠤᠢᠯᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠲᠡᠭᠦᠨ ᠡᠴᠡ ᠪᠠᠰᠠ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠶᠡᠬᠡ ᠬᠣᠬᠢᠷᠠᠵᠠᠢ᠃ ᠲᠡᠳᠡᠭᠡᠷ ᠲᠠᠲ᠋ᠠᠷ ᠨᠠᠷ ᠢ᠋ ᠲᠡᠩᠭᠡᠯᠢᠭ ᠲᠦ᠍ ᠴᠢᠴᠣᠣᠯᠠᠨ ᠬᠢᠳᠤᠵᠤ ᠳᠠᠭᠤᠰᠤᠭᠠᠳ ᠴᠢᠩᠭᠢᠰ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠪᠢᠳᠡ ᠤᠷᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠡᠬᠡ ᠵᠥᠪᠯᠡᠯᠳᠦᠭᠡᠨ ᠬᠢᠭᠰᠡᠨ ᠢ᠋ ᠪᠡᠯᠭᠦᠳᠡᠢ ᠭᠠᠷᠭᠠᠵᠤ ᠬᠡᠯᠡᠭᠡᠳ ᠪᠢᠳᠡᠨ ᠦ᠌ ᠴᠡᠷᠢᠭ ᠦ᠋ᠳ ᠲᠦ᠍ ᠮᠠᠰᠢ ᠶᠡᠬᠡ ᠬᠣᠬᠢᠷᠠᠯ ᠢ᠋ ᠤᠴᠠᠷᠠᠭᠤᠯᠪᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ᠂ ᠡᠶᠡ ᠶᠡᠬᠡ ᠵᠥᠪᠯᠡᠯᠳᠦᠬᠦ ᠳ᠋ᠦ᠍ ᠪᠡᠯᠭᠦᠳᠡᠢ ᠶ᠋ᠢ ᠪᠤᠤ ᠤᠷᠤᠭᠤᠯ᠂ ᠵᠥᠪᠯᠡᠯᠳᠦᠭᠡᠨ ᠬᠢᠵᠦ ᠪᠠᠢᠬᠤ ᠳ᠋ᠤ᠌᠂ ᠪᠡᠯᠭᠦᠳᠡᠢ ᠭᠠᠳᠠᠨᠠᠬᠢ ᠦᠢᠯᠡ ᠶ᠋ᠢ ᠵᠠᠬᠢᠷᠴᠤ᠂ ᠬᠡᠷᠡᠭᠦᠯ ᠪᠠ ᠬᠤᠯᠠᠭᠠᠢ ᠬᠤᠳᠠᠯ ᠤ᠋ᠨ ᠵᠠᠷᠭᠤ ᠶ᠋ᠢ ᠰᠢᠭᠦᠵᠦ ᠪᠠᠢᠲᠤᠭᠠᠢ᠃ ᠵᠥᠪᠯᠡᠯᠳᠦᠭᠡᠨ ᠲᠡᠭᠦᠰᠴᠦ᠂ ᠰᠠᠷᠬᠤᠳ ᠤᠤᠭᠤᠭᠰᠠᠨ ᠤ᠋ ᠬᠣᠢᠨᠠ ᠪᠡᠯᠭᠦᠳᠡᠢ ᠳᠡᠷᠳᠡᠢ ᠬᠣᠶᠠᠷ ᠰᠠᠶᠢ ᠣᠷᠣᠵᠤ ᠪᠣᠯᠤᠨᠠ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
155᠂ ᠲᠡᠷᠡ ᠴᠠᠭ ᠲᠤ᠌ ᠲᠠᠲ᠋ᠠᠷ ᠤ᠋ᠨ ᠶᠡᠬᠡ ᠴᠠᠷᠠᠩ ᠤ᠋ᠨ ᠥᠬᠢᠨ ᠶᠢᠰᠦᠬᠡᠨ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠥᠪᠡᠷ ᠦ᠋ᠨ ᠬᠠᠲᠤᠨ ᠪᠣᠯᠭᠠᠵᠤ ᠠᠪᠪᠠ᠃ ᠶᠢᠰᠦᠬᠡᠨ ᠬᠠᠲᠤᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠥᠷᠥᠰᠢᠶᠡᠯ ᠳ᠋ᠦ᠍ ᠣᠷᠣᠵᠤ ᠥᠭᠦᠯᠡᠷᠦᠨ᠄ 《ᠬᠠᠭᠠᠨ ᠰᠣᠶᠣᠷᠬᠠᠪᠠᠯ᠂ ᠨᠠᠮᠠ ᠶ᠋ᠢ ᠬᠥᠮᠦᠨ ᠳ᠋ᠦ᠍ ᠪᠣᠳᠣᠵᠤ ᠠᠰᠠᠷᠠᠬᠤ ᠪᠢᠵᠡ᠂ ᠮᠢᠨᠦ ᠡᠭᠡᠴᠢ ᠶᠢᠰᠣᠢ ᠨᠠᠳᠠ ᠠ᠋ᠴᠠ ᠳᠡᠭᠡᠷᠡ᠂ ᠬᠠᠨ ᠬᠥᠮᠦᠨ ᠳ᠋ᠦ᠍ ᠵᠣᠬᠢᠯᠳᠤᠬᠤ ᠭᠤᠸᠠ ᠪᠥᠯᠥᠭᠡ᠂ ᠭᠠᠭᠴᠠᠬᠦ ᠰᠠᠶᠢ ᠶ᠋ᠢᠨ ᠪᠤᠳᠤᠯᠢᠶᠠᠨ ᠳ᠋ᠤ᠌ ᠬᠠᠮᠢᠭᠠᠰᠢ ᠣᠳᠤᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ》 ᠭᠡᠪᠡᠯ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠡᠭᠡᠴᠢ ᠴᠢᠨᠢ ᠦᠨᠡᠬᠡᠷ ᠴᠢᠮᠠ ᠠ᠋ᠴᠠ ᠭᠤᠸᠠ ᠪᠣᠯ ᠲᠡᠭᠦᠨ ᠢ᠋ ᠢᠷᠡᠭᠦᠯᠦᠶᠡ ᠂ ᠡᠭᠡᠴᠢ ᠪᠡᠨ ᠢᠷᠡᠪᠡᠯ ᠴᠢ ᠵᠠᠢᠯᠠᠵᠤ ᠰᠠᠭᠤᠷᠢᠨ ᠢ᠋ᠶ᠋ᠠᠨ ᠥᠭᠬᠦ ᠤᠤ?》 ᠭᠡᠪᠡ᠃ ᠶᠢᠰᠦᠬᠡᠨ ᠬᠠᠲᠤᠨ ᠥᠭᠦᠯᠡᠷᠦᠨ᠄ 《ᠬᠠᠭᠠᠨ ᠰᠣᠶᠣᠷᠬᠠᠵᠤ᠂ ᠡᠭᠡᠴᠢ ᠶ᠋ᠢ ᠮᠢᠨᠢ ᠠᠪᠴᠢᠷᠠᠵᠤ ᠠᠭᠤᠯᠵᠠᠭᠤᠯᠪᠠᠯ᠂ ᠪᠢ ᠡᠭᠡᠴᠢ ᠳ᠋ᠡᠭᠡᠨ ᠳᠠᠷᠤᠢ ᠵᠠᠢᠯᠠᠶᠠ》 ᠭᠡᠪᠡ᠃ ᠡᠨᠡ ᠦᠭᠡᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠲᠤᠩᠬᠠᠭ ᠵᠠᠷᠯᠠᠵᠤ ᠢᠷᠡᠭᠦᠯᠪᠡᠯ ᠶᠢᠰᠣᠢ ᠬᠠᠲᠤᠨ᠂ ᠥᠪᠡᠷ ᠦ᠋ᠨ ᠬᠦᠷᠭᠡᠨ ᠲᠡᠢ ᠬᠠᠮᠲᠤ ᠬᠠᠳᠠ ᠣᠢ ᠳ᠋ᠤ᠌ ᠳᠤᠲᠠᠭᠠᠵᠤ ᠶᠠᠪᠤᠬᠤ ᠶ᠋ᠢ ᠪᠢᠳᠡᠨ ᠦ᠌ ᠴᠡᠷᠢᠭ ᠦ᠋ᠳ ᠦᠵᠡᠵᠦ ᠶᠢᠰᠣᠢ ᠬᠠᠲᠤᠨ ᠢ᠋ ᠪᠠᠷᠢᠵᠤ ᠠᠪᠴᠢᠷᠠᠭᠰᠠᠨ ᠪᠠ ᠡᠷᠡ ᠨᠢ ᠳᠤᠲᠠᠭᠠᠵᠠᠢ᠃ ᠶᠢᠰᠦᠬᠡᠨ ᠬᠠᠲᠤᠨ᠂ ᠡᠭᠡᠴᠢ ᠪᠡᠨ ᠦᠵᠡᠭᠡᠳ ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠬᠦᠷᠴᠦ ᠪᠣᠰᠤᠭᠠᠳ ᠰᠠᠭᠤᠭᠰᠠᠨ ᠰᠠᠭᠤᠷᠢᠨ ᠳ᠋ᠠᠭᠠᠨ ᠰᠠᠭᠤᠯᠭᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠳᠣᠣᠷᠠᠲᠤ ᠡᠲᠡᠭᠡᠳ (ᠳᠣᠣᠷᠠᠲᠤ ᠲᠠᠯᠠ) ᠳ᠋ᠤ᠌ ᠰᠠᠭᠤᠪᠠ᠃ ᠶᠢᠰᠦᠬᠡᠨ ᠬᠠᠲᠤᠨ ᠤ᠋ ᠬᠡᠯᠡᠭᠰᠡᠨ ᠲᠡᠢ ᠠᠳᠠᠯᠢ ᠶᠢᠰᠣᠢ ᠬᠠᠲᠤᠨ ᠦᠨᠡᠬᠡᠷ ᠭᠤᠸᠠ ᠲᠤᠯᠠ ᠴᠢᠩᠭᠢᠰ ᠬᠠᠭᠠᠨ ᠠᠩᠬᠠᠷᠤᠨ ᠥᠷᠥᠰᠢᠶᠡᠵᠦ᠂ ᠬᠠᠲᠤᠳ ᠤ᠋ᠨ ᠥᠷᠥᠭᠡ ᠳ᠋ᠦ᠍ ᠰᠠᠭᠤᠯᠭᠠᠪᠠ᠃
156᠂ ᠲᠠᠲ᠋ᠠᠷ ᠨᠠᠷ ᠢ᠋ ᠳᠣᠪᠲᠣᠯᠤᠨ ᠳᠠᠭᠤᠰᠬᠠᠵᠤ᠂ ᠨᠢᠭᠡᠨ ᠡᠳᠦᠷ ᠴᠢᠩᠭᠢᠰ ᠬᠠᠭᠠᠨ᠂ ᠭᠡᠷ ᠦ᠋ᠨ ᠭᠠᠳᠠᠨᠠ ᠶᠢᠰᠣᠢ ᠬᠠᠲᠤᠨ᠂ ᠶᠢᠰᠦᠬᠡᠨ ᠬᠠᠲᠤᠨ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠰᠠᠭᠤᠵᠤ ᠤᠮᠳᠠ ᠤᠤᠭᠤᠵᠤ ᠪᠠᠢᠲᠠᠯᠠ ᠶᠢᠰᠣᠢ ᠬᠠᠲᠤᠨ ᠶᠡᠬᠡᠳᠡ ᠰᠠᠨᠠᠭᠠ ᠠᠯᠳᠠᠪᠠ᠃ ᠡᠭᠦᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠳᠣᠲᠣᠷᠠ ᠪᠠᠨ ᠰᠡᠵᠢᠭ ᠠᠪᠴᠤ᠂ ᠪᠣᠭᠣᠷᠴᠤ ᠮᠤᠬᠤᠯᠠᠢ ᠬᠣᠶᠠᠷ ᠨᠣᠶᠠᠨ ᠢ᠋ ᠤᠷᠢᠵᠤ ᠢᠷᠡᠭᠦᠯᠦᠭᠡᠳ ᠥᠭᠦᠯᠡᠷᠦᠨ᠄ 《ᠲᠠ ᠬᠣᠶᠠᠷ ᠡᠨᠳᠡ ᠴᠤᠭᠯᠠᠭᠰᠠᠨ ᠪᠦᠬᠦ ᠠᠷᠠᠳ ᠢ᠋ ᠠᠢᠮᠠᠭ ᠠᠢᠮᠠᠭ ᠢ᠋ᠶ᠋ᠠᠷ ᠨᠢ ᠪᠣᠯᠭᠠ᠃ ᠪᠤᠰᠤ ᠠᠢᠮᠠᠭ ᠤ᠋ᠨ ᠬᠥᠮᠦᠨ ᠢ᠋ ᠥᠪᠡᠷ ᠦ᠋ᠨ ᠠᠢᠮᠠᠭ ᠲᠤ᠌ ᠪᠦᠦ ᠦᠯᠡᠳᠡᠭᠡᠭᠲᠦᠨ》 ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃ ᠲᠡᠭᠡᠭᠡᠳ ᠪᠦᠬᠦ ᠠᠷᠠᠳ ᠢ᠋ ᠠᠢᠮᠠᠭ ᠠᠢᠮᠠᠭ ᠢ᠋ᠶ᠋ᠠᠷ ᠢᠯᠭᠠᠪᠠᠯ ᠨᠢᠭᠡᠨ ᠵᠠᠯᠠᠭᠤ ᠰᠠᠢᠨ ᠡᠷᠡ ᠠᠢᠮᠠᠭ ᠦᠭᠡᠢ ᠦᠯᠡᠳᠡᠵᠡᠢ᠃ 《ᠴᠢ ᠶᠠᠭᠤᠨ ᠬᠥᠮᠦᠨ ᠪᠣᠢ?》 ᠭᠡᠵᠦ ᠠᠰᠠᠭᠤᠪᠠᠯ᠂ ᠲᠡᠷᠡ ᠬᠥᠮᠦᠨ ᠥᠭᠦᠯᠡᠷᠦᠨ᠄ 《ᠲᠠᠲ᠋ᠠᠷ ᠤ᠋ᠨ ᠶᠡᠬᠡ ᠴᠠᠷᠠᠩ ᠤ᠋ᠨ ᠥᠬᠢᠨ ᠶᠢᠰᠣᠢ ᠶ᠋ᠢ ᠠᠪᠤᠭᠰᠠᠨ ᠬᠦᠷᠭᠡᠨ ᠪᠢᠯᠡ᠃ ᠳᠠᠢᠰᠤᠨ ᠳ᠋ᠤ᠌ ᠲᠠᠯᠠᠭᠳᠠᠬᠤ ᠳ᠋ᠤ᠌ ᠠᠶᠤᠵᠤ ᠳᠤᠲᠠᠭᠠᠨ ᠶᠠᠪᠤᠭᠰᠠᠨ ᠪᠥᠯᠥᠭᠡ᠃ ᠣᠳᠣ ᠲᠡᠢᠨ ᠠᠮᠤᠷᠯᠢᠪᠠ ᠭᠡᠵᠦ ᠰᠡᠳᠬᠢᠵᠦ ᠢᠷᠡᠭᠡᠳ ᠣᠯᠠᠨ ᠠᠷᠠᠳ ᠤ᠋ᠨ ᠳᠣᠲᠣᠷᠠ ᠲᠠᠨᠢᠭᠳᠠᠬᠤ ᠦᠭᠡᠢ ᠪᠢᠵᠡ ᠭᠡᠵᠦ ᠰᠠᠨᠠᠵᠤ ᠶᠠᠪᠤᠯᠠ》 ᠭᠡᠪᠡ᠃ ᠡᠨᠡ ᠦᠭᠡ ᠶ᠋ᠢ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠮᠡᠳᠡᠭᠦᠯᠪᠡᠯ᠂ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ᠄ 《ᠲᠡᠷᠡ ᠬᠥᠮᠦᠨ ᠬᠣᠣᠷᠠᠲᠤ ᠰᠡᠳᠬᠢᠯ ᠡᠪᠦᠷᠯᠡᠵᠦ ᠭᠠᠭᠴᠠᠭᠠᠷ ᠲᠡᠨᠦᠭᠰᠡᠭᠡᠷ ᠣᠳᠣ ᠡᠨᠳᠡ ᠢᠷᠡᠭᠰᠡᠨ ᠠᠵᠢ᠃ ᠲᠡᠷᠡ ᠮᠡᠲᠦ ᠡᠲᠡᠭᠡᠳ ᠢ᠋ ᠬᠡᠳᠦᠢᠨᠡᠢ ᠲᠡᠩᠭᠡᠯᠢᠭ ᠲᠦ᠍ ᠴᠢᠴᠣᠣᠯᠠᠵᠣ ᠬᠢᠳᠤᠭᠰᠠᠨ ᠪᠢᠰᠢ ᠤᠤ᠃ ᠶᠠᠭᠤᠨ ᠠ᠋ᠴᠠ ᠪᠤᠴᠠᠨᠠ᠂ ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠣᠯᠭᠠ》 ᠭᠡᠰᠡᠨ ᠳ᠋ᠦ᠍ ᠲᠡᠭᠦᠨ ᠢ᠋ ᠳᠠᠷᠤᠢ ᠠᠯᠠᠪᠠ᠃
157᠂ ᠮᠥᠨ ᠨᠣᠬᠠᠢ ᠵᠢᠯ (1202 ᠣᠨ) ᠴᠢᠩᠭᠢᠰ ᠬᠠᠭᠠᠨ ᠢ᠋ ᠲᠠᠲ᠋ᠠᠷ ᠲᠠᠢ ᠪᠠᠢᠯᠳᠤᠵᠤ ᠪᠣᠢ ᠴᠠᠭ ᠲᠤ᠌ ᠸᠠᠩ ᠬᠠᠨ᠂ ᠮᠡᠷᠭᠢᠳ ᠢ᠋ ᠳᠣᠪᠲᠣᠯᠬᠤ ᠪᠠᠷ ᠮᠣᠷᠳᠠᠵᠤ᠂ ᠲᠣᠭᠳᠣᠬᠠ ᠪᠡᠬᠢ ᠶ᠋ᠢ ᠪᠠᠷᠭᠤᠵᠢᠨ ᠳᠥᠭᠥᠮ ᠦ᠋ᠨ ᠵᠦᠭ ᠦᠯᠳᠡᠨ ᠬᠥᠭᠡᠭᠡᠵᠦ᠂ ᠲᠣᠭᠳᠣᠬᠠ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠲᠡᠭᠦᠰ ᠪᠡᠬᠢ ᠶ᠋ᠢ ᠠᠯᠠᠵᠤ᠂ ᠲᠣᠭᠳᠣᠬᠠ ᠶ᠋ᠢᠨ ᠬᠤᠲᠤᠭᠲᠠᠢ ᠴᠠᠭᠠᠷᠣᠨ ᠬᠣᠶᠠᠷ ᠥᠬᠢᠨ ᠢ᠋ ᠪᠠ ᠬᠠᠲᠤᠳ ᠢ᠋ ᠣᠯᠵᠠᠯᠠᠨ ᠠᠪᠴᠤ᠂ ᠬᠣᠲᠣ ᠴᠢᠯᠠᠭᠤᠨ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ ᠨᠢ ᠬᠠᠷᠢᠶᠠᠲᠤ ᠢᠷᠭᠡᠳ ᠦ᠋ᠨ ᠬᠠᠮᠲᠤ ᠡᠵᠡᠯᠡᠨ ᠠᠪᠤᠭᠰᠠᠨ ᠪᠣᠯᠪᠠᠴᠤ᠂ ᠡᠨᠡ ᠣᠯᠵᠠᠨ ᠠ᠋ᠴᠠ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠶᠠᠭᠤᠨ ᠢ᠋ ᠴᠦ᠍ ᠡᠰᠡ ᠥᠭᠪᠡ᠃
158᠂ ᠲᠡᠭᠦᠨ ᠦ᠌ ᠬᠣᠢᠨᠠ᠂ ᠴᠢᠩᠭᠢᠰ ᠬᠠᠭᠠᠨ᠂ ᠸᠠᠩ ᠬᠠᠨ ᠬᠣᠶᠠᠷ ᠨᠢᠮᠡᠨ ᠦ᠌ ᠬᠦᠴᠥᠭᠦᠳ ᠦ᠋ᠨ ᠪᠣᠢᠷᠤᠭ ᠬᠠᠨ ᠲᠠᠢ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠢᠯᠠᠵᠤ᠂ ᠣᠯᠤᠭ ᠲᠠᠭ ᠤ᠋ᠨ ᠰᠤᠬᠤᠭ ᠤᠰᠤ ᠭᠡᠳᠡᠭ ᠭᠠᠵᠠᠷ ᠬᠦᠷᠪᠡᠯ ᠪᠣᠢᠷᠤᠭ ᠬᠠᠨ ᠪᠠᠢᠯᠳᠤᠨ ᠶᠠᠳᠠᠵᠤ᠂ ᠠᠯᠲᠠᠢ ᠳᠠᠪᠠᠨ ᠬᠥᠳᠡᠯᠪᠡ᠃ ᠴᠢᠩᠭᠢᠰ ᠬᠠᠭᠠᠨ ᠸᠠᠩ ᠬᠠᠨ ᠬᠣᠶᠠᠷ ᠰᠤᠬᠤᠭ ᠤᠰᠤᠨ ᠠ᠋ᠴᠠ ᠪᠣᠢᠷᠤᠭ ᠬᠠᠨ ᠢ᠋ ᠨᠡᠬᠡᠵᠦ ᠠᠯᠲᠠᠢ ᠳᠠᠪᠠᠭᠤᠯᠤᠨ ᠬᠣᠮᠰᠢᠩᠬᠡᠷ ᠦ᠋ᠨ ᠦᠷᠣᠩᠬᠥᠤ ᠭᠣᠣᠯ ᠤᠷᠤᠭᠤ ᠬᠥᠭᠡᠭᠡᠵᠦ ᠶᠠᠪᠤᠪᠠ᠃ ᠭᠡᠲᠡᠯᠡ᠂ ᠲᠡᠳᠡᠨ ᠦ᠌ ᠶᠠᠳᠢ ᠲᠣᠪᠯᠣᠭ ᠨᠡᠷᠡᠲᠦ ᠨᠣᠶᠠᠨ᠂ ᠬᠠᠷᠠᠭᠤᠯᠴᠢ ᠬᠠᠷᠠᠵᠤ ᠶᠠᠪᠤᠭᠠᠳ ᠪᠢᠳᠡᠨ ᠦ᠌ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠲᠦ᠍ ᠬᠥᠭᠡᠭᠡᠭᠳᠡᠵᠦ ᠠᠭᠤᠯᠠ ᠥᠭᠡᠳᠡ ᠳᠤᠲᠠᠭᠠᠬᠤ ᠳ᠋ᠤ᠌ ᠣᠯᠣᠩ ᠨᠢ ᠲᠠᠰᠤᠷᠠᠵᠤ ᠪᠠᠷᠢᠭᠳᠠᠪᠠ᠃ ᠪᠣᠢᠷᠤᠭ ᠬᠠᠨ ᠢ᠋ ᠦᠷᠣᠩᠬᠥᠤ ᠭᠣᠣᠯ ᠤᠷᠤᠭᠤ ᠬᠥᠭᠡᠭᠡᠨ ᠣᠷᠣᠭᠤᠯᠵᠤ᠂ ᠬᠢᠰᠢᠯᠪᠠᠰᠢ ᠨᠠᠭᠤᠷ ᠲᠤ᠌ ᠭᠦᠢᠴᠡᠵᠦ ᠲᠡᠭᠦᠨ ᠢ᠋ ᠲᠡᠨᠳᠡ ᠰᠥᠨᠥᠭᠡᠪᠡ᠃
159᠂ ᠲᠡᠨᠳᠡ ᠡᠴᠡ ᠴᠢᠩᠭᠢᠰ ᠬᠠᠭᠠᠨ ᠸᠠᠩ ᠬᠠᠨ ᠬᠣᠶᠠᠷ ᠪᠤᠴᠠᠵᠤ ᠢᠷᠡᠬᠦ ᠳ᠋ᠦ᠍ ᠨᠢᠮᠡᠨ ᠦ᠌ ᠬᠥᠭᠰᠡᠭᠦᠦ ᠰᠠᠪᠷᠠᠭ ᠪᠠᠭᠠᠲᠤᠷ᠂ ᠪᠠᠢᠳᠠᠷᠠᠭ ᠭᠣᠣᠯ ᠤ᠋ᠨ ᠪᠠᠯᠴᠢᠷ ᠲᠤ᠌ ᠴᠡᠷᠢᠭ ᠵᠠᠰᠠᠵᠤ ᠪᠠᠢᠯᠳᠤᠬᠤ ᠪᠠᠷ ᠲᠣᠰᠴᠤ ᠪᠠᠢᠭᠰᠠᠨ ᠠᠵᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠸᠠᠩ ᠬᠠᠨ ᠬᠣᠶᠠᠷ ᠮᠥᠨ ᠪᠠᠢᠯᠳᠤᠬᠤ ᠪᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠵᠤ ᠢᠷᠡᠲᠡᠯᠡ᠂ ᠨᠢᠭᠡᠨᠲᠡ ᠦᠳᠡᠰᠢ ᠪᠣᠯᠤᠭᠰᠠᠨ ᠲᠤᠯᠠ ᠮᠠᠷᠭᠠᠰᠢ ᠪᠠᠢᠯᠳᠤᠶᠠ ᠭᠡᠵᠦ ᠵᠠᠰᠠᠯᠭᠠᠵᠣ ᠬᠣᠨᠣᠪᠠ᠃ ᠭᠡᠲᠡᠯᠡ᠂ ᠰᠥᠨᠢ ᠶ᠋ᠢᠨ ᠴᠠᠭ ᠸᠠᠩ ᠬᠠᠨ᠂ ᠪᠠᠭᠤᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠭᠠᠯ ᠲᠦᠯᠡᠵᠦ ᠣᠷᠬᠢᠭᠠᠳ᠂ ᠬᠠᠷᠠ ᠰᠡᠭᠦᠯ ᠭᠣᠣᠯ ᠢ᠋ ᠥᠭᠰᠥᠨ ᠬᠥᠳᠡᠯᠵᠡᠢ᠃
160᠂ ᠲᠡᠷᠡ ᠰᠥᠨᠢ ᠵᠠᠮᠤᠬᠠ᠂ ᠸᠠᠩ ᠬᠠᠨ ᠲᠠᠢ ᠬᠠᠮᠲᠤ ᠬᠥᠳᠡᠯᠵᠦ ᠶᠠᠪᠤᠭᠠᠳ ᠸᠠᠩ ᠬᠠᠨ ᠳ᠋ᠤ᠌ ᠥᠭᠦᠯᠡᠷᠦᠨ᠄ 《ᠲᠡᠮᠦᠵᠢᠨ ᠠᠨᠳᠠ ᠬᠡᠳᠦᠢᠨ ᠡᠴᠡ ᠨᠢᠮᠡᠨ ᠲᠡᠢ ᠬᠠᠷᠢᠯᠴᠠᠭᠠᠲᠠᠢ ᠪᠠᠢᠭᠰᠠᠨ ᠪᠢᠯᠡ᠂ ᠣᠳᠣ ᠪᠢᠳᠡᠨ ᠲᠡᠢ ᠬᠠᠮᠲᠤ ᠡᠰᠡ ᠬᠥᠳᠡᠯᠪᠡ᠃ ᠬᠠᠨ! ᠬᠠᠨ! ᠪᠢ ᠪᠣᠯ ᠬᠠᠮᠢᠶᠠ ᠦᠭᠡᠢ ᠬᠣᠯᠠ ᠨᠢᠰᠬᠦ ᠦᠭᠡᠢ ᠬᠠᠢᠷᠭᠤᠨᠠ ᠰᠢᠪᠠᠭᠤ ᠮᠡᠲᠦ ᠬᠠᠮᠲᠤ ᠨᠢᠭᠡ ᠭᠠᠵᠠᠷ ᠪᠠᠢᠨᠠ᠂ ᠬᠠᠷᠢᠨ ᠮᠢᠨᠦ ᠠᠨᠳᠠ ᠲᠡᠮᠦᠵᠢᠨ ᠪᠣᠯ ᠬᠠᠷᠢᠵᠤ ᠨᠢᠰᠦᠭᠰᠡᠨ ᠰᠢᠪᠠᠭᠤ ᠮᠡᠲᠦ ᠬᠠᠰᠢ ᠶᠠᠰᠢ ᠤᠷᠪᠠᠨ ᠣᠳᠤᠨᠠ᠂ ᠬᠠᠨ ᠴᠢᠮᠠ ᠠ᠋ᠴᠠ ᠣᠳᠣ ᠰᠠᠯᠵᠤ ᠬᠠᠷᠢ ᠨᠢᠮᠡᠨ ᠳ᠋ᠦ᠍ ᠣᠴᠢᠬᠤ ᠭᠡᠵᠦ ᠬᠠᠷᠠᠭᠰᠠᠭᠠᠷ ᠵᠣᠷᠢᠭᠤᠳᠠ ᠬᠣᠴᠣᠷᠪᠠ᠃》 ᠭᠡᠪᠡᠯ᠂ ᠵᠠᠮᠤᠬᠠ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠣᠪᠴᠢᠭᠲᠠᠢ ᠶ᠋ᠢᠨ ᠬᠦᠷᠡᠩ ᠪᠠᠭᠠᠲᠤᠷ ᠥᠭᠦᠯᠡᠷᠦᠨ᠄ 《ᠴᠢ ᠶᠠᠭᠤᠨ ᠳᠡᠮᠡᠢ ᠵᠢᠰᠤᠷᠳᠠᠵᠤ᠂ ᠰᠢᠳᠤᠷᠭᠤ ᠠᠬᠠ ᠳᠡᠭᠦᠦ ᠪᠡᠨ ᠬᠣᠪᠯᠠᠨ ᠬᠠᠴᠢᠯᠠᠵᠤ ᠪᠠᠢᠨᠠ ᠪᠣᠢ?》 ᠭᠡᠪᠡ᠃
161᠂ ᠴᠢᠩᠭᠢᠰ ᠬᠠᠭᠠᠨ᠂ ᠲᠡᠷᠡ ᠰᠥᠨᠢ ᠲᠡᠨᠳᠡ ᠬᠣᠨᠣᠭᠠᠳ ᠮᠠᠷᠭᠠᠰᠢ ᠥᠷᠯᠥᠭᠡ ᠪᠠᠢᠯᠳᠤᠬᠤ ᠭᠡᠵᠦ ᠪᠣᠰᠪᠠᠯ ᠸᠠᠩ ᠬᠠᠨ ᠤ᠋ ᠪᠠᠭᠤᠭᠰᠠᠨ ᠭᠠᠵᠠᠷ ᠬᠣᠪ ᠬᠣᠭᠣᠰᠣᠨ ᠪᠣᠯᠤᠭᠰᠠᠨ ᠲᠤᠯᠠ 《ᠬᠠᠷᠢᠨ ᠴᠢ ᠪᠢᠳᠡᠨ ᠢ᠋ ᠮᠡᠬᠡᠯᠡᠵᠦ ᠪᠠᠭᠤᠴᠠᠨ ᠳ᠋ᠤ᠌ ᠬᠠᠶᠠᠭᠰᠠᠨ ᠪᠠᠢᠨᠠ》 ᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠬᠥᠳᠡᠯᠵᠦ᠂ ᠡᠳᠡᠷ ᠠᠯᠲᠠᠢ ᠶ᠋ᠢᠨ ᠪᠠᠯᠴᠢᠷ ᠢ᠋ᠶ᠋ᠠᠷ ᠭᠡᠲᠦᠯᠵᠦ ᠰᠠᠭᠠᠳᠣᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠰᠠᠭᠠᠷᠢ ᠬᠡᠭᠡᠷᠡ ᠳ᠋ᠦ᠍ ᠣᠴᠢᠵᠤ ᠪᠠᠭᠤᠪᠠ᠃ ᠲᠡᠨᠳᠡ ᠡᠴᠡ ᠴᠢᠩᠭᠢᠰ ᠬᠠᠭᠠᠨ ᠬᠠᠰᠠᠷ ᠬᠣᠶᠠᠷ᠂ ᠨᠢᠮᠡᠨ ᠦ᠋ᠳ ᠶᠠᠮᠠᠷ ᠲᠦᠪᠡᠭ ᠤᠴᠠᠷᠠᠭᠤᠯᠤᠭᠰᠠᠨ ᠢ᠋ ᠮᠠᠲᠠᠭᠰᠠᠨ ᠪᠣᠯᠪᠠᠴᠤ᠂ ᠡᠭᠦᠨ ᠢ᠋ ᠨᠢᠭᠡ ᠴᠦ᠍ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠦᠭᠡᠢ᠃
162᠂ ᠨᠢᠮᠡᠨ ᠦ᠌ ᠬᠥᠬᠰᠠᠬᠥᠤ ᠰᠠᠪᠷᠠᠭ ᠪᠠᠭᠠᠲᠤᠷ ᠸᠠᠩ ᠬᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠨᠡᠬᠡᠵᠦ᠂ ᠰᠡᠩᠭᠦᠮ ᠦ᠋ᠨ ᠡᠮᠡ ᠬᠥᠪᠡᠭᠦᠳ ᠪᠠ ᠡᠳ᠋ ᠬᠥᠷᠥᠩᠭᠡ᠂ ᠠᠯᠪᠠᠲᠤ ᠠᠷᠠᠳ ᠢ᠋ ᠴᠥᠮ ᠪᠤᠯᠢᠶᠠᠨ ᠠᠪᠴᠤ᠂ ᠪᠠᠰᠠ ᠸᠠᠩ ᠬᠠᠨ ᠢ᠋ ᠲᠡᠯᠠᠬᠡᠲᠦ ᠠᠮᠠᠰᠠᠷ ᠭᠡᠳᠡᠭ ᠭᠠᠵᠠᠷ ᠪᠠᠢᠬᠤ ᠳ᠋ᠤ᠌ ᠨᠡᠬᠡᠨ ᠪᠠᠢᠯᠳᠤᠵᠤ᠂ ᠵᠠᠷᠢᠮ ᠠᠯᠪᠠᠲᠤ ᠢᠷᠭᠡᠨ ᠪᠠ ᠠᠳᠤᠭᠤ ᠮᠠᠯ ᠢ᠋ ᠪᠤᠯᠢᠶᠠᠨ ᠠᠪᠤᠭᠠᠳ ᠪᠤᠴᠠᠵᠠᠢ᠃ ᠸᠠᠩ ᠬᠠᠨ ᠢ᠋ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠮᠡᠷᠭᠢᠳ ᠦ᠋ᠨ ᠲᠣᠭᠳᠣᠬᠠ ᠶ᠋ᠢᠨ ᠬᠣᠲᠣ ᠴᠢᠯᠠᠭᠤᠨ ᠬᠣᠶᠠᠷ ᠬᠥᠪᠡᠭᠦᠨ ᠲᠡᠷᠡ ᠵᠠᠪᠰᠢᠶᠠᠨ ᠢ᠋ ᠲᠣᠬᠢᠶᠠᠯᠳᠤᠭᠤᠯᠵᠤ᠂ ᠠᠯᠪᠠᠲᠤ ᠢᠷᠭᠡᠨ ᠢ᠋ᠶ᠋ᠡᠨ ᠠᠪᠴᠤ ᠰᠡᠯᠡᠩᠭᠡ ᠶ᠋ᠢ ᠴᠢᠬᠯᠠᠨ ᠬᠥᠳᠡᠯᠦᠭᠡᠳ ᠡᠴᠢᠭᠡ ᠳ᠋ᠡᠭᠡᠨ ᠨᠡᠢᠯᠡᠨ ᠣᠴᠢᠪᠠ᠃
163᠂ ᠸᠠᠩ ᠬᠠᠨ᠂ ᠨᠢᠮᠡᠨ ᠦ᠌ ᠬᠥᠬᠰᠠᠬᠥᠤ ᠰᠠᠪᠷᠠᠭ ᠪᠠᠭᠠᠲᠤᠷ ᠲᠤ᠌ ᠳᠡᠢᠯᠦᠭᠳᠡᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠡᠯᠴᠢ ᠶᠠᠪᠤᠭᠤᠯᠵᠤ ᠬᠡᠯᠡᠭᠦᠯᠦᠭᠰᠡᠨ ᠨᠢ᠄ 《ᠨᠢᠮᠡᠨ ᠳ᠋ᠦ᠍ ᠡᠳ᠋ ᠬᠥᠷᠥᠩᠭᠡ ᠪᠠ ᠡᠮᠡ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠪᠤᠯᠢᠶᠠᠭᠳᠠᠪᠠ ᠪᠢ᠂ ᠬᠥᠪᠡᠭᠦᠨ ᠴᠢᠮᠠ ᠠ᠋ᠴᠠ ᠳᠥᠷᠪᠡᠨ ᠬᠦᠯᠦᠭ ᠪᠠᠭᠠᠲᠤᠷ ᠢ᠋ᠶ᠋ᠠᠨ ᠢᠷᠡᠭᠦᠯᠬᠦ ᠶ᠋ᠢ ᠭᠤᠶᠤᠶᠠ᠂ ᠮᠢᠨᠦ ᠠᠯᠪᠠᠲᠤ ᠢᠷᠭᠡᠨ ᠪᠠ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠠᠪᠴᠢᠷᠠᠵᠤ ᠥᠭᠭᠦᠨᠡ ᠤᠤ》 ᠭᠡᠵᠡᠢ᠃ ᠴᠢᠩᠭᠢᠰ ᠬᠠᠭᠠᠨ ᠴᠡᠷᠢᠭ ᠵᠠᠰᠠᠵᠤ᠂ ᠪᠣᠭᠣᠷᠴᠤ᠂ ᠮᠤᠬᠤᠯᠠᠢ᠂ ᠪᠣᠷᠣᠬᠤᠯ ᠂ ᠴᠢᠯᠠᠭᠤᠨ ᠳᠥᠷᠪᠡᠨ ᠬᠦᠯᠦᠭ ᠪᠠᠭᠠᠲᠤᠷ ᠢ᠋ᠶ᠋ᠠᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠢᠯᠡᠭᠡᠪᠡ᠃ ᠡᠨᠡ ᠳᠥᠷᠪᠡᠨ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠨ ᠢᠷᠡᠬᠦ ᠶ᠋ᠢᠨ ᠤᠷᠢᠳᠤ ᠤᠯᠠᠭᠠᠨ ᠬᠤᠰᠤ ᠭᠡᠳᠡᠭ ᠭᠠᠵᠠᠷ ᠰᠡᠩᠭᠦᠮ ᠪᠠᠢᠯᠳᠤᠭᠠᠨ ᠬᠢᠵᠦ ᠪᠠᠢᠭᠠᠳ ᠮᠣᠷᠢᠨ ᠤ᠋ ᠪᠠᠨ ᠭᠤᠶᠠ ᠶ᠋ᠢ ᠰᠢᠷᠬᠠᠲᠤᠭᠤᠯᠵᠤ ᠪᠠᠷᠢᠭᠳᠠᠬᠤ ᠳ᠋ᠤ᠌ ᠬᠦᠷᠴᠦ ᠪᠠᠢᠲᠠᠯᠠ᠂ ᠴᠢᠩᠭᠢᠰ ᠦ᠋ᠨ ᠳᠥᠷᠪᠡᠨ ᠬᠦᠯᠦᠭ ᠣᠴᠢᠵᠤ ᠲᠡᠭᠦᠨ ᠢ᠋ ᠠᠪᠤᠷᠠᠭᠠᠳ ᠠᠯᠪᠠᠲᠤ ᠬᠥᠷᠥᠩᠭᠡ ᠪᠠ ᠡᠮᠡ ᠬᠥᠪᠡᠭᠦᠳ ᠪᠦᠭᠦᠳᠡ ᠶ᠋ᠢ ᠠᠪᠤᠷᠠᠵᠤ ᠥᠭᠪᠡ᠃ ᠲᠡᠷᠡ ᠴᠠᠭ ᠲᠤ᠌ ᠸᠠᠩ ᠬᠠᠨ ᠥᠭᠦᠯᠡᠷᠦᠨ᠄ 《ᠤᠷᠢᠳᠤ ᠲᠡᠮᠦᠵᠢᠨ ᠦ᠌ ᠰᠠᠢᠨ ᠡᠴᠢᠭᠡ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠮᠢᠨᠦ ᠪᠤᠲᠠᠷᠠᠭᠰᠠᠨ ᠤᠯᠤᠰ ᠢ᠋ ᠠᠪᠤᠷᠠᠵᠤ ᠴᠤᠭᠯᠠᠭᠤᠯᠵᠤ ᠥᠭᠭᠦᠭᠰᠡᠨ ᠪᠢᠯᠡ᠃ ᠣᠳᠣ ᠬᠥᠪᠡᠭᠦᠨ ᠲᠡᠮᠦᠵᠢᠨ ᠪᠠᠰᠠ ᠳᠥᠷᠪᠡᠨ ᠬᠦᠯᠦᠭ ᠪᠠᠭᠠᠲᠤᠷ ᠢ᠋ᠶ᠋ᠠᠨ ᠶᠠᠪᠤᠭᠤᠯᠵᠤ᠂ ᠮᠢᠨᠦ ᠠᠯᠳᠠᠭᠳᠠᠭᠰᠠᠨ ᠤᠯᠤᠰ ᠢ᠋ ᠠᠪᠴᠢᠷᠠᠵᠤ ᠣᠯᠵᠤ ᠥᠭᠪᠡ᠃ ᠠᠴᠢ ᠬᠠᠷᠢᠭᠤᠯᠬᠤ ᠶ᠋ᠢ ᠲᠩᠷᠢ ᠭᠠᠵᠠᠷ ᠤ᠋ᠨ ᠢᠪᠡᠭᠡᠯ ᠮᠡᠳᠡᠲᠦᠭᠡᠢ》 ᠭᠡᠪᠡ᠃
164᠂ ᠪᠠᠰᠠ ᠸᠠᠩ ᠬᠠᠨ ᠥᠭᠦᠯᠡᠷᠦᠨ᠄《ᠠᠨᠳᠠ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠮᠢᠨᠢ ᠠᠯᠳᠠᠭᠳᠠᠨ ᠪᠠᠷᠠᠭᠰᠠᠨ ᠤᠯᠤᠰ ᠢ᠋ ᠮᠢᠨᠢ ᠠᠪᠤᠷᠠᠵᠤ ᠴᠤᠭᠯᠠᠭᠤᠯᠵᠤ ᠥᠭᠭᠦᠭᠰᠡᠨ ᠪᠢᠯᠡ᠂ ᠲᠡᠭᠦᠨ ᠦ᠌ ᠤᠤᠭᠠᠨ ᠬᠥᠪᠡᠭᠦᠨ ᠲᠡᠮᠦᠵᠢᠨ ᠴᠢᠩᠭᠢᠰ ᠬᠠᠭᠠᠨ ᠲᠡᠨᠦᠵᠦ ᠪᠤᠲᠠᠷᠠᠭᠰᠠᠨ ᠤᠯᠤᠰ ᠢ᠋ ᠮᠢᠨᠢ ᠲᠡᠳᠬᠦᠵᠦ ᠬᠤᠷᠢᠶᠠᠵᠤ ᠥᠭᠪᠡ᠃ ᠡᠨᠡ ᠡᠴᠢᠭᠡ ᠬᠥᠪᠡᠭᠦᠨ ᠬᠣᠶᠠᠷ ᠡᠯᠡ ᠤᠯᠤᠰ ᠢ᠋ ᠮᠢᠨᠢ ᠲᠡᠳᠬᠦᠵᠦ ᠬᠡᠨ ᠦ᠌ ᠲᠥᠯᠥᠭᠡ ᠵᠢᠳᠬᠦᠵᠦ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠵᠣᠪᠠᠵᠤ ᠪᠠᠢᠭᠠ ᠪᠢᠯᠡ? ᠥᠲᠡᠯᠦᠭᠰᠡᠨ ᠡᠪᠦᠭᠡᠨ ᠪᠢ ᠥᠨᠳᠥᠷ ᠠᠭᠤᠯᠠ ᠶ᠋ᠢ ᠲᠦᠰᠢᠵᠦ ᠡᠪᠡᠰᠦ ᠬᠠᠭᠳᠠ ᠶ᠋ᠢ ᠳᠡᠷᠡᠯᠡᠵᠦ ᠥᠭᠡᠳᠡ ᠪᠣᠯᠵᠤ ᠣᠲᠣᠪᠠᠯ ᠥᠨᠢᠷ ᠣᠯᠠᠨ ᠤᠯᠤᠰ ᠢ᠋ ᠮᠢᠨᠢ ᠥᠪᠯᠡᠨ ᠬᠡᠨ ᠡᠵᠡᠯᠡᠬᠦ ᠪᠣᠢ? ᠬᠠᠨ ᠲᠣᠭᠣᠷᠢᠯ ᠪᠢ ᠬᠠᠨᠠᠲᠤ ᠭᠡᠷ ᠡᠴᠡ ᠰᠠᠯᠵᠤ ᠬᠠᠳᠠᠲᠤ ᠭᠡᠷ ᠲᠦ᠍ ᠣᠴᠢᠪᠠᠯ ᠬᠠᠮᠤᠭ ᠬᠤᠷᠢᠶᠠᠭᠰᠠᠨ ᠤᠯᠤᠰ ᠢ᠋ ᠮᠢᠨᠢ ᠬᠠᠷᠠᠵᠤ ᠬᠠᠮᠠᠭᠠᠯᠠᠵᠤ ᠪᠠᠢᠬᠤ ᠬᠥᠮᠦᠨ ᠬᠠᠮᠢᠭᠠ ᠬᠡᠨ ᠪᠠᠢᠬᠤ ᠪᠢᠯᠡ? ᠡᠵᠡᠨ ᠲᠣᠭᠣᠷᠢᠯ ᠪᠢ ᠢᠰᠡᠭᠡᠢ ᠭᠡᠷ ᠡᠴᠡ ᠬᠣᠯᠠᠳᠴᠤ ᠡᠩᠭᠡᠷ ᠭᠡᠷ ᠲᠦ᠍ ᠣᠴᠢᠪᠠᠯ ᠡᠩᠬᠦᠷᠡᠢᠯᠡᠵᠦ ᠬᠤᠷᠢᠶᠠᠭᠰᠠᠨ ᠤᠯᠤᠰ ᠢ᠋ ᠮᠢᠨᠢ ᠡᠵᠡᠯᠡᠵᠦ ᠬᠡᠨ ᠵᠠᠬᠢᠷᠠᠬᠣ ᠪᠢᠯᠡ? ᠲᠥᠷᠥᠭᠰᠡᠨ ᠳᠡᠭᠦᠦ ᠨᠠᠷ ᠪᠠᠢᠪᠠᠴᠤ ᠲᠥᠷᠥ ᠪᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠲᠥᠪ ᠰᠠᠢᠨ ᠠᠪᠤᠷᠢ ᠦᠭᠡᠢ ᠲᠦᠪᠡᠭ ᠶᠡᠬᠡᠲᠡᠢ ᠬᠥᠮᠦᠨ ᠪᠣᠢ᠂ ᠭᠠᠭᠴᠠ ᠬᠥᠪᠡᠭᠦᠨ ᠰᠡᠩᠭᠦᠮ ᠪᠠᠢᠪᠠᠴᠤ᠂ ᠲᠡᠭᠦᠨ ᠳ᠋ᠦ᠍ ᠬᠠᠨᠢ ᠪᠣᠯᠬᠤ ᠬᠥᠮᠦᠨ ᠦᠭᠡᠢ ᠲᠤᠯᠠ ᠲᠡᠮᠦᠵᠢᠨ ᠢ᠋ ᠰᠡᠩᠭᠦᠮ ᠦ᠋ᠨ ᠠᠬᠠ ᠪᠣᠯᠭᠠᠵᠤ᠂ ᠬᠣᠶᠠᠷ ᠬᠥᠪᠡᠭᠦᠨ ᠲᠡᠢ ᠪᠣᠯᠤᠭᠠᠳ ᠰᠡᠳᠬᠢᠯ ᠠᠮᠤᠷ ᠰᠠᠭᠤᠶᠠ》 ᠭᠡᠪᠡ᠃ ᠲᠡᠭᠡᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠸᠠᠩ ᠬᠠᠨ ᠬᠣᠶᠠᠷ᠂ ᠲᠤᠤᠯᠠ ᠭᠣᠣᠯ ᠤ᠋ᠨ ᠬᠠᠷᠠ ᠰᠢᠭᠤᠢ ᠳ᠋ᠤ᠌ ᠨᠡᠢᠯᠡᠵᠦ ᠡᠴᠢᠭᠡ ᠬᠥᠪᠡᠭᠦᠨ ᠪᠣᠯᠵᠤ ᠶᠣᠰᠣᠯᠠᠪᠠ᠃ ᠡᠷᠲᠡ ᠡᠳᠦᠷ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠠᠢ ᠸᠠᠩ ᠬᠠᠨ ᠠᠨᠳᠠ ᠪᠣᠯᠤᠯᠴᠠᠭᠰᠠᠨ ᠲᠤᠯᠠ ᠸᠠᠩ ᠬᠠᠨ ᠢ᠋ ᠡᠴᠢᠭᠡ ᠮᠡᠲᠦ ᠦᠵᠡᠵᠦ᠂ ᠡᠢᠨᠬᠦ ᠡᠴᠢᠭᠡ ᠬᠥᠪᠡᠭᠦᠨ ᠪᠣᠯᠤᠯᠴᠠᠭᠰᠠᠨ ᠪᠢᠯᠡ᠃ ᠡᠨᠡ ᠲᠤᠬᠠᠢ ᠬᠡᠯᠡᠯᠴᠡᠬᠰᠡᠨ ᠦᠭᠡ ᠨᠢ᠄
《ᠬᠠᠷᠢ ᠳᠠᠢᠰᠤᠨ ᠲᠠᠢ ᠲᠤᠯᠬᠤ ᠳ᠋ᠤ᠌ ᠬᠠᠮᠲᠤ ᠨᠡᠢᠯᠡᠵᠦ ᠪᠠᠢᠯᠳᠤᠶᠠ ᠬᠠᠳᠠᠨ ᠤ᠋ ᠭᠥᠷᠥᠭᠡᠰᠦ ᠶ᠋ᠢ ᠠᠪᠠᠯᠠᠬᠤ ᠳ᠋ᠤ᠌ ᠬᠠᠪᠰᠤᠷᠴᠤ ᠨᠡᠢᠯᠡᠵᠦ ᠶᠠᠪᠤᠶᠠ》 ᠭᠡᠪᠡ᠃ ᠪᠠᠰᠠ᠂ ᠴᠢᠩᠭᠢᠰ ᠬᠠᠭᠠᠨ᠂ ᠸᠠᠩ ᠬᠠᠨ ᠬᠣᠶᠠᠷ ᠬᠡᠯᠡᠪᠡ᠄
《ᠬᠣᠣᠷᠠᠲᠤ ᠮᠣᠭᠠᠢ ᠶ᠋ᠢᠨ ᠬᠡᠯᠡ ᠬᠣᠭᠣᠷᠣᠨᠳᠣ ᠮᠢᠨᠢ ᠬᠠᠳᠬᠤᠵᠤ ᠬᠣᠪ ᠵᠢᠪ ᠣᠷᠣᠭᠤᠯᠪᠠᠯ ᠬᠣᠯᠠᠳᠴᠤ ᠰᠠᠯᠤᠯ ᠦᠭᠡᠢ᠂ ᠬᠠᠷᠢᠨ ᠬᠣᠶᠠᠷ ᠨᠢᠭᠤᠷ ᠢ᠋ᠶ᠋ᠠᠷ ᠤᠴᠠᠷᠠᠵᠤ ᠬᠣᠣᠷᠠ ᠬᠥᠨᠥᠭᠡᠯ ᠢ᠋ ᠲᠠᠰᠤᠯᠠᠵᠤ ᠪᠠᠢᠶᠠ᠂ ᠠᠷᠠᠭᠠᠲᠤ ᠮᠣᠭᠠᠢ ᠶ᠋ᠢᠨ ᠰᠢᠲᠦ ᠠᠮᠠᠷᠠᠭ ᠤ᠋ᠨ ᠬᠣᠭᠣᠷᠣᠨᠳᠣ ᠣᠷᠣᠵᠤ ᠡᠶᠡ ᠡᠪ ᠢ᠋ ᠡᠪᠳᠡᠪᠡᠯ ᠠᠲᠠᠭᠠᠲᠠᠨ ᠰᠡᠳᠬᠢᠯ ᠲᠥᠷᠥᠯ ᠦᠭᠡᠢ ᠠᠮᠠ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠠᠭᠤᠯᠵᠠᠨ ᠶᠠᠷᠢᠵᠤ ᠠᠯᠢᠪᠠ ᠤᠴᠢᠷ ᠢ᠋ ᠣᠯᠵᠤ ᠪᠠᠢᠶᠠ》 ᠭᠡᠵᠦ ᠪᠠᠲᠤ ᠦᠭᠡ ᠪᠡᠷ ᠪᠠᠷᠢᠯᠳᠤᠵᠤ᠂ ᠠᠮᠠᠷᠠᠭᠯᠠᠨ ᠶᠠᠪᠤᠪᠠ᠃
165᠂ ᠲᠡᠭᠦᠨ ᠦ᠌ ᠬᠣᠢᠨᠠ᠂ ᠠᠮᠠᠷᠠᠭ ᠳᠡᠭᠡᠷᠡ ᠳᠠᠪᠬᠤᠷ ᠠᠮᠠᠷᠠᠭ ᠪᠣᠯᠤᠶᠠ ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠰᠡᠳᠬᠢᠵᠦ᠂ ᠵᠥᠴᠢ ᠳ᠋ᠦ᠍ ᠰᠡᠩᠭᠦᠮ ᠦ᠋ᠨ ᠳᠡᠭᠦᠦ ᠴᠠᠭᠤᠷ ᠪᠡᠬᠢ ᠶ᠋ᠢ ᠭᠤᠶᠤᠵᠤ᠂ ᠪᠠᠰᠠ ᠰᠡᠩᠭᠦᠮ ᠦ᠋ᠨ ᠬᠥᠪᠡᠭᠦᠨ ᠲᠣᠰᠠᠬᠠ ᠳ᠋ᠤ᠌ ᠥᠪᠡᠷ ᠦ᠋ᠨ ᠬᠣᠵᠢᠨ ᠪᠡᠬᠢ ᠶ᠋ᠢ ᠠᠷᠠᠯᠵᠢᠨ ᠥᠭᠭᠦᠶᠡ ᠭᠡᠵᠦ ᠭᠤᠶᠤᠪᠠᠯ᠂ ᠰᠡᠩᠭᠦᠮ ᠪᠡᠶᠡ ᠪᠡᠨ ᠶᠡᠬᠡᠮᠰᠦᠭᠯᠡᠨ ᠰᠡᠳᠬᠢᠵᠦ ᠥᠭᠦᠯᠡᠷᠦᠨ᠄
《ᠮᠢᠨᠦ ᠤᠷᠤᠭ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠴᠢᠪᠠᠯ᠂ ᠢᠮᠠᠭᠲᠠ ᠬᠠᠲᠠᠪᠴᠢᠨ ᠳ᠋ᠤ᠌ ᠬᠣᠢᠮᠣᠷ ᠬᠠᠷᠠᠵᠤ ᠰᠠᠭᠤᠬᠤ ᠪᠣᠯᠤᠨᠠ᠃ ᠲᠡᠳᠡᠨ ᠦ᠌ ᠤᠷᠤᠭ ᠪᠢᠳᠡᠨ ᠳ᠋ᠦ᠍ ᠢᠷᠡᠪᠡᠯ᠂ ᠬᠣᠢᠮᠣᠷ ᠰᠠᠭᠤᠵᠤ ᠬᠠᠲᠠᠪᠴᠢ ᠬᠠᠷᠠᠬᠤ ᠪᠣᠯᠤᠨᠠ》 ᠭᠡᠵᠦ ᠶᠡᠬᠡᠮᠰᠦᠭᠯᠡᠨ᠂ ᠪᠢᠳᠡᠨ ᠢ᠋ ᠳᠣᠷᠣᠮᠵᠢᠯᠠᠨ ᠬᠡᠯᠡᠵᠦ᠂ ᠴᠠᠭᠤᠷ ᠪᠡᠬᠢ ᠳᠡᠭᠦᠦ ᠪᠡᠨ ᠥᠭᠬᠦ ᠶ᠋ᠢ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠳᠣᠲᠣᠷᠠ ᠪᠠᠨ ᠸᠠᠩ ᠬᠠᠨ᠂ ᠨᠢᠯᠬᠠ ᠰᠡᠩᠭᠦᠮ ᠬᠣᠶᠠᠷ ᠲᠤ᠌ ᠳᠤᠷᠠ ᠦᠭᠡᠢ ᠪᠣᠯᠵᠠᠢ᠃
166᠂ ᠲᠡᠭᠡᠵᠦ ᠳᠤᠷᠠ ᠦᠭᠡᠢ ᠪᠣᠯᠤᠯᠴᠠᠭᠰᠠᠨ ᠢ᠋ ᠵᠠᠮᠤᠬᠠ ᠮᠡᠳᠡᠵᠦ᠂ ᠭᠠᠬᠠᠢ ᠵᠢᠯ ᠦ᠋ᠨ (1203 ᠣᠨ) ᠬᠠᠪᠤᠷ ᠵᠠᠮᠤᠬᠠ᠂ ᠠᠯᠲᠠᠨ᠂ ᠬᠣᠴᠣᠷ᠂ ᠬᠠᠷᠳᠠᠬᠢᠳᠠᠢ᠂ ᠡᠪᠦᠭᠡᠵᠢᠨ᠂ ᠨᠣᠶᠠᠬᠢᠨ᠂ ᠰᠦᠬᠡᠬᠡᠳᠡᠢ ᠲᠤᠭᠤᠷᠢᠯ᠂ ᠬᠠᠴᠢᠭᠤᠨ ᠪᠡᠬᠢ ᠨᠠᠷ ᠡᠶᠠᠯᠳᠣᠨ ᠨᠡᠢᠯᠡᠯᠳᠦᠵᠦ ᠨᠡᠭᠦᠭᠡᠳ ᠵᠡᠨᠵᠡᠭᠡᠷ ᠥᠨᠳᠥᠷ ᠦ᠋ᠨ ᠬᠢᠷᠠ ᠶ᠋ᠢᠨ ᠪᠡᠷᠬᠡ ᠡᠯᠠᠳ ᠲᠤ᠌ ᠣᠴᠢᠵᠤ ᠨᠢᠯᠬᠠ ᠰᠡᠩᠭᠦᠮ ᠲᠡᠢ ᠠᠭᠤᠯᠵᠠᠭᠠᠳ᠂ ᠵᠠᠮᠤᠬᠠ ᠬᠣᠪᠯᠠᠨ ᠥᠭᠦᠯᠡᠷᠦᠨ᠄
《ᠮᠢᠨᠦ ᠠᠨᠳᠠ ᠲᠡᠮᠦᠵᠢᠨ᠂ ᠨᠢᠮᠡᠨ ᠦ᠌ ᠲᠢᠶᠠᠨ ᠬᠠᠨ ᠳ᠋ᠤ᠌ ᠡᠯᠴᠢ ᠢᠯᠡᠭᠡᠵᠦ ᠦᠷᠭᠦᠯᠵᠢ ᠬᠠᠷᠢᠯᠴᠠᠭᠠᠲᠠᠢ ᠪᠠᠢᠳᠠᠭ ᠪᠢᠯᠡ᠃ᠲᠡᠷᠡ᠂ᠠᠮᠠ ᠬᠡᠯᠡᠨ ᠳ᠋ᠡᠭᠡᠨ ᠠᠪᠤ ᠬᠥᠪᠡᠭᠦᠨ ᠭᠡᠳᠡᠭ ᠪᠣᠯᠪᠠᠴᠤ ᠠᠪᠤᠷᠢ ᠰᠠᠨᠠᠭᠠ ᠨᠢ ᠠᠳᠠᠪᠢᠰᠢ ᠥᠭᠡᠷᠡ ᠪᠢᠰᠢᠦ ᠲᠡᠭᠦᠨ ᠳ᠋ᠦ᠍ ᠢᠲᠡᠭᠡᠵᠦ ᠪᠠᠢᠨᠠ ᠤᠤ? ᠬᠣᠵᠢᠭᠳᠠᠪᠠᠯ ᠲᠠ ᠨᠠᠷ ᠶᠠᠭᠤ ᠪᠣᠯᠬᠤ ᠪᠠᠨ ᠮᠡᠳᠡᠵᠦ ᠪᠠᠢᠨᠠ ᠤᠤ? ᠲᠠ ᠨᠠᠷ ᠲᠡᠮᠦᠵᠢᠨ ᠲᠡᠢ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠳᠠᠪᠠᠯ ᠪᠢ ᠬᠠᠵᠠᠭᠤ ᠠ᠋ᠴᠠ ᠣᠷᠣᠯᠴᠠᠶᠠ》 ᠭᠡᠵᠡᠢ᠃
ᠠᠯᠲᠠᠨ ᠬᠣᠴᠠᠷ ᠬᠣᠶᠠᠷ ᠥᠭᠦᠯᠡᠷᠦᠨ᠄
《ᠪᠢᠳᠡ᠄ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠥᠨᠥᠴᠢᠨ ᠬᠥᠪᠡᠭᠦᠳ ᠦ᠋ᠨ ᠠᠬᠠ ᠶ᠋ᠢ ᠨᠢ ᠠᠯᠠᠵᠤ ᠳᠡᠭᠦᠦ ᠶ᠋ᠢ ᠨᠢ ᠳᠡᠭᠦᠵᠢᠯᠡᠵᠦ ᠥᠭᠭᠦᠶᠡ》 ᠭᠡᠵᠡᠢ᠃ ᠬᠠᠷᠳᠠᠬᠢᠳᠠᠢ ᠡᠪᠦᠭᠡᠵᠢᠨ ᠨᠣᠶᠠᠬᠢᠨ ᠥᠭᠦᠯᠡᠷᠦᠨ᠄
《ᠭᠠᠷ ᠢ᠋ ᠨᠢ ᠪᠠᠷᠢᠵᠤ ᠬᠥᠯ ᠢ᠋ ᠨᠢ ᠬᠦᠯᠢᠵᠦ ᠥᠭᠭᠦᠶᠡ》 ᠭᠡᠵᠡᠢ᠃ ᠲᠤᠭᠤᠷᠢᠯ ᠥᠭᠦᠯᠡᠷᠦᠨ᠄ 《ᠠᠷᠭᠠ ᠰᠦᠪᠡᠬᠴᠢᠯᠡᠵᠦ ᠲᠡᠮᠦᠵᠢᠨ ᠦ᠌ ᠤᠯᠤᠰ ᠢ᠋ ᠪᠤᠯᠢᠶᠠᠵᠤ ᠠᠪᠤᠶᠠ᠂ ᠤᠯᠤᠰ ᠢ᠋ᠶ᠋ᠠᠨ ᠠᠪᠲᠠᠪᠠᠯ ᠲᠡᠷᠡ ᠶᠠᠭᠠᠬᠢᠬᠤ ᠴᠤ᠌ ᠠᠷᠭᠠ ᠦᠭᠡᠢ ᠪᠣᠯᠤᠨᠠ》 ᠭᠡᠵᠡᠢ᠃ ᠬᠠᠴᠢᠭᠤᠨ ᠪᠡᠬᠢ ᠥᠭᠦᠯᠡᠷᠦᠨ᠄ 《ᠨᠢᠯᠬᠠ ᠰᠡᠩᠭᠦᠮ ᠬᠥᠪᠡᠭᠦᠨ ᠴᠢᠮᠢ᠋ᠢ ᠰᠡᠳᠬᠢᠵᠦ᠂ ᠴᠢᠨᠦ ᠲᠥᠯᠥᠭᠡ ᠤᠷᠲᠤ ᠶ᠋ᠢᠨ ᠦᠵᠦᠭᠦᠷ ᠲᠦ᠍᠂ ᠭᠦᠨ ᠦ᠌ ᠢᠷᠣᠭᠠᠷ ᠲᠤ᠌ ᠬᠦᠷᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ》 ᠭᠡᠵᠡᠢ᠃
167᠂ ᠡᠳᠡᠭᠡᠷ ᠦᠭᠡ ᠶ᠋ᠢ ᠨᠢᠯᠬᠠ ᠰᠡᠩᠭᠦᠮ᠂ ᠡᠴᠢᠭᠡ ᠸᠠᠩ ᠬᠠᠨ ᠳ᠋ᠠᠭᠠᠨ ᠰᠠᠢᠬᠠᠨ ᠲᠦᠳᠡᠬᠡᠨ ᠭᠡᠭᠴᠢ ᠬᠥᠮᠦᠨ ᠢ᠋ᠶ᠋ᠡᠷ ᠬᠡᠯᠡᠵᠦ ᠢᠯᠡᠭᠡᠪᠡ᠃ ᠡᠨᠡ ᠦᠭᠡ ᠶ᠋ᠢ ᠸᠠᠩ ᠬᠠᠨ ᠰᠣᠨᠣᠰᠤᠭᠠᠳ ᠥᠭᠦᠯᠡᠷᠦᠨ᠄
《ᠲᠡᠮᠦᠵᠢᠨ ᠬᠥᠪᠡᠭᠦᠨ ᠳ᠋ᠦ᠍ ᠲᠡᠢᠮᠦ ᠮᠠᠭᠤ ᠰᠡᠳᠬᠢᠵᠦ ᠶᠠᠭᠠᠬᠢᠵᠤ ᠪᠣᠯᠤᠨᠠ? ᠪᠢᠳᠡ᠂ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠷ ᠲᠤᠯᠭᠠᠭᠤᠷᠢ ᠪᠣᠯᠭᠠᠵᠤ ᠪᠠᠢᠭᠠ ᠠᠲᠠᠯᠠ᠂ ᠲᠡᠭᠦᠨ ᠳ᠋ᠦ᠍ ᠮᠠᠭᠤ ᠰᠠᠨᠠᠪᠠᠯ ᠲᠩᠷᠢ ᠪᠢᠳᠡᠨ ᠢ᠋ ᠲᠠᠭᠠᠯᠠᠬᠤ ᠦᠭᠡᠢ᠂ ᠵᠠᠮᠤᠬᠠ ᠬᠡᠵᠢᠶᠡᠨ ᠡᠴᠡ ᠲᠠᠨᠤᠮᠠᠯ ᠴᠠᠯᠴᠢᠶᠠ ᠬᠥᠮᠦᠨ ᠪᠢᠯᠡ᠃ ᠲᠡᠷᠡ ᠳᠡᠮᠡᠢ ᠵᠥᠪ ᠪᠤᠷᠤᠭᠤ ᠦᠭᠡ ᠬᠡᠯᠡᠵᠦ ᠪᠠᠢᠨᠠ》 ᠭᠡᠵᠦ ᠡᠰᠡ ᠲᠠᠭᠠᠯᠠᠨ ᠪᠤᠴᠠᠭᠠᠵᠠᠢ᠃ ᠪᠠᠰᠠ ᠰᠡᠩᠭᠦᠮ ᠦ᠋ᠨ ᠬᠡᠯᠡᠭᠦᠯᠦᠭᠰᠡᠨ ᠨᠢ᠄ 《ᠠᠮᠢᠳᠤ ᠬᠥᠮᠦᠨ᠂ ᠠᠮᠠ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠬᠡᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠠᠪᠤ ᠲᠠ ᠶᠠᠭᠠᠬᠢᠭᠠᠳ ᠢᠲᠡᠭᠡᠳᠡᠭ ᠦᠭᠡᠢ ᠪᠢᠯᠡ?》 ᠭᠡᠵᠦ ᠳᠠᠬᠢᠨ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠬᠡᠯᠡᠭᠦᠯᠵᠦ ᠶᠠᠳᠠᠭᠠᠳ ᠡᠴᠦᠰ ᠲᠦ᠍ ᠨᠢ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢᠷᠡᠵᠦ ᠡᠴᠢᠭᠡ ᠳ᠋ᠡᠭᠡᠨ ᠥᠭᠦᠯᠡᠷᠦᠨ᠄ 《ᠣᠳᠣ ᠴᠢᠮᠢ᠋ᠢ ᠠᠮᠢᠳᠤ ᠪᠠᠢᠬᠤ ᠳ᠋ᠤ᠌ ᠪᠢᠳᠡᠨ ᠢ᠋ ᠲᠡᠷᠡ ᠲᠣᠭᠣᠮᠰᠣᠷᠯᠠᠬᠣ ᠦᠭᠡᠢ ᠪᠠᠢᠨᠠ᠂ ᠬᠡᠷᠪᠡ ᠬᠠᠨ ᠡᠴᠢᠭᠡ ᠴᠢᠮᠢ᠋ᠢ ᠴᠠᠭᠠᠨ ᠢᠳᠡᠭᠡᠨ ᠳ᠋ᠦ᠍ ᠴᠠᠴᠠᠵᠤ᠂ ᠬᠠᠷᠠ ᠮᠢᠬᠠᠨ ᠳ᠋ᠤ᠌ ᠬᠠᠬᠠᠪᠠᠯ᠂ ᠬᠤᠷᠴᠠᠬᠤᠰ ᠪᠤᠢ᠌ᠷᠤᠭ ᠬᠠᠨ ᠡᠴᠢᠭᠡ ᠶ᠋ᠢᠨ ᠵᠣᠪᠠᠵᠤ ᠬᠤᠷᠢᠶᠠᠭᠰᠠᠨ ᠤᠯᠤᠰ᠂ ᠵᠦᠳᠡᠵᠦ ᠪᠠᠢᠭᠤᠯᠤᠭᠰᠠᠨ ᠲᠥᠷᠥ ᠶ᠋ᠢ ᠴᠢᠨᠢ ᠪᠢᠳᠡᠨ ᠳ᠋ᠦ᠍ ᠮᠡᠳᠡᠭᠦᠯᠬᠦ ᠦᠭᠡᠢ ᠪᠣᠯᠭᠤᠵᠠᠢ》 ᠭᠡᠵᠡᠢ᠃ ᠸᠠᠩ ᠬᠠᠨ ᠥᠭᠦᠯᠡᠷᠦᠨ᠄
《ᠦᠷᠡ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠬᠥᠨᠥᠭᠡᠬᠦ ᠪᠣᠢ? ᠦᠨᠡᠬᠡᠷ ᠲᠤᠯᠭᠠᠭᠤᠷᠢ ᠪᠣᠯᠵᠤ ᠪᠠᠢᠭᠠ ᠬᠥᠮᠦᠨ ᠳ᠋ᠦ᠍ ᠮᠠᠭᠤ ᠰᠡᠳᠬᠢᠪᠡᠯ᠂ ᠲᠩᠷᠢ ᠪᠢᠳᠡᠨ ᠢ᠋ ᠦᠯᠦ ᠳᠠᠭᠠᠯᠠᠬᠤ ᠪᠣᠯᠤᠨᠠ》 ᠭᠡᠪᠡᠯ᠂ ᠬᠥᠪᠡᠭᠦᠨ ᠨᠢᠯᠬᠠ ᠰᠡᠩᠭᠦᠮ ᠠᠭᠤᠷᠯᠠᠵᠤ ᠡᠭᠦᠳᠡ ᠬᠠᠶᠠᠨ ᠭᠠᠷᠪᠠ᠃ ᠵᠢᠴᠢ᠂ ᠸᠠᠩ ᠬᠠᠨ᠂ ᠬᠥᠪᠡᠭᠦᠨ ᠰᠡᠩᠭᠦᠮ ᠢ᠋ ᠬᠠᠢᠷᠠᠯᠠᠵᠤ ᠤᠷᠢᠵᠤ ᠢᠷᠡᠭᠦᠯᠦᠭᠡᠳ ᠥᠭᠦᠯᠡᠷᠦᠨ᠄ 《ᠲᠡᠭᠷᠢ ᠳ᠋ᠦ᠍ ᠦᠯᠦ ᠲᠠᠭᠠᠯᠠᠭᠳᠠᠬᠤ ᠠ᠋ᠴᠠ ᠠᠶᠤᠵᠤ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠬᠥᠨᠥᠭᠡᠬᠦ ᠪᠣᠢ? ᠭᠡᠰᠡᠨ ᠪᠢᠯᠡ᠃ ᠲᠠ ᠨᠠᠷ ᠴᠢᠳᠠᠬᠤ ᠪᠣᠯ ᠶᠠᠭᠤ ᠦᠢᠯᠡᠳᠬᠦ ᠪᠡᠨ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠮᠡᠳᠡᠲᠦᠭᠡᠢ》 ᠭᠡᠵᠡᠢ᠃
168᠂ ᠲᠡᠨᠳᠡ ᠡᠴᠡ ᠰᠡᠩᠭᠦᠮ ᠥᠭᠦᠯᠡᠷᠦᠨ᠄ 《ᠮᠥᠨᠥᠬᠡᠨ ᠲᠡᠳᠡ ᠮᠠᠨ ᠤ᠋ ᠴᠠᠭᠤᠷ ᠪᠡᠬᠢ ᠶ᠋ᠢ ᠭᠤᠶᠤᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠣᠳᠣ 〈ᠪᠠᠭᠠᠯᠵᠤᠷ ᠢᠳᠡ〉 ᠭᠡᠵᠦ ᠡᠳᠦᠷ ᠪᠣᠯᠵᠣᠵᠤ ᠢᠷᠡᠭᠦᠯᠦᠭᠡᠳ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠠᠪᠤᠶᠠ》 ᠭᠡᠪᠡ᠃ (《ᠪᠠᠭᠠᠯᠵᠤᠷ ᠢᠳᠡᠬᠦ》 ᠭᠡᠬᠦ ᠨᠢ ᠬᠣᠨᠢᠨ ᠤ᠋ ᠪᠠᠭᠠᠯᠵᠤᠷ ᠮᠢᠬᠠ ᠶ᠋ᠢ ᠢᠳᠡ ᠭᠡᠰᠡᠨ ᠦᠭᠡ ᠪᠢᠵᠡ᠃ ᠵᠠᠯᠠᠭᠤ ᠡᠷᠡ ᠡᠮᠡ ᠭᠡᠷᠯᠡᠭᠰᠡᠨ ᠡᠳᠦᠷ ᠡᠴᠡ ᠡᠬᠢᠯᠡᠨ ᠭᠤᠷᠪᠠᠨ ᠬᠣᠨᠣᠭ ᠬᠣᠨᠢᠨ ᠤ᠋ ᠬᠦᠵᠦᠭᠦᠦ ᠪᠠᠭᠠᠯᠵᠤᠷ ᠢ᠋ ᠬᠤᠪᠢᠶᠠᠵᠤ ᠢᠳᠡᠬᠦ ᠵᠠᠩᠰᠢᠯ ᠮᠣᠩᠭ᠋ᠣᠯ ᠭᠠᠵᠠᠷ ᠣᠳᠣ ᠴᠤ᠌ ᠬᠦᠷᠲᠡᠯᠡ ᠪᠠᠢᠨᠠ᠃ ᠬᠦᠵᠦᠭᠦᠦ ᠪᠠᠭᠠᠯᠵᠤᠷ ᠤ᠋ᠨ ᠶᠠᠰᠤ ᠮᠠᠰᠢ ᠪᠠᠲᠤ ᠬᠡᠯᠬᠢᠶᠡ ᠲᠡᠢ ᠪᠠᠢᠳᠠᠭ ᠲᠤᠯᠠ ᠡᠭᠦᠪᠡᠷ ᠡᠷᠡ ᠡᠮᠡ ᠶ᠋ᠢᠨ ᠪᠠᠲᠤ ᠬᠣᠯᠪᠣᠭᠠ ᠶ᠋ᠢ ᠪᠡᠯᠭᠡᠳᠡᠵᠡᠢ᠂ ᠡᠢᠮᠦ ᠶ᠋ᠢᠨ ᠲᠤᠯᠠ 《ᠪᠠᠭᠠᠯᠵᠤᠷ ᠢᠳᠡ》 ᠭᠡᠬᠦ ᠨᠢ ᠡᠷᠡ ᠡᠮᠡ ᠪᠣᠯᠬᠤ ᠬᠤᠷᠢᠮ ᠬᠢᠶᠡ ᠭᠡᠰᠡᠨ ᠦᠭᠡ ᠪᠢᠵᠡ᠃) ᠲᠡᠭᠡᠵᠦ ᠬᠡᠯᠡᠯᠴᠡᠵᠦ ᠲᠣᠭᠲᠠᠭᠠᠳ 《ᠴᠠᠭᠤᠷ ᠪᠡᠬᠢ ᠶ᠋ᠢ ᠥᠭᠶᠡ᠂ ᠪᠠᠭᠠᠯᠵᠤᠷ ᠢᠳᠡᠬᠦ ᠪᠡᠷ ᠢᠷᠡᠭᠲᠦᠨ》 ᠭᠡᠵᠦ ᠴᠢᠩᠭᠢᠰ ᠲᠦ᠍ ᠬᠥᠮᠦᠨ ᠢᠯᠡᠭᠡᠪᠡ᠃ ᠲᠡᠷᠡ ᠶᠣᠰᠣ ᠪᠠᠷ ᠴᠢᠩᠭᠢᠰ ᠬᠠᠭᠠᠨ᠂ ᠠᠷᠪᠠᠨ ᠬᠥᠮᠦᠨ ᠳᠠᠭᠠᠭᠤᠯᠵᠤ᠂ ᠸᠠᠩ ᠬᠠᠨ ᠳ᠋ᠤ᠌ ᠣᠴᠢᠬᠤ ᠵᠠᠮ ᠤ᠋ᠨ ᠵᠠᠭᠤᠷᠠ ᠮᠦᠩᠯᠢᠭ ᠡᠴᠢᠭᠡ ᠶ᠋ᠢᠨ ᠭᠡᠷ ᠲᠦ᠍ ᠬᠣᠨᠣᠪᠠᠯ᠂ ᠮᠦᠩᠯᠢᠭ ᠡᠴᠢᠭᠡ ᠥᠭᠦᠯᠡᠷᠦᠨ᠄
《ᠮᠥᠨᠥᠬᠡᠨ ᠪᠢᠳᠡ ᠴᠠᠭᠤᠷ ᠪᠡᠬᠢ ᠶ᠋ᠢ ᠭᠤᠶᠤᠪᠠᠯ᠂ ᠪᠢᠳᠡᠨ ᠢ᠋ ᠳᠣᠷᠣᠮᠵᠢᠯᠠᠵᠤ ᠥᠭᠭᠦᠭᠰᠡᠨ ᠦᠭᠡᠢ ᠪᠢᠯᠡ᠃ ᠣᠳᠣ ᠪᠠᠭᠠᠯᠵᠤᠷ ᠢᠳᠡ ᠭᠡᠵᠦ ᠭᠡᠨᠡᠳᠲᠡ ᠤᠷᠢᠬᠤ ᠨᠢ ᠵᠢᠭᠲᠡᠢ᠂ ᠰᠠᠢᠬᠠᠨ ᠶᠡᠬᠡᠮᠰᠦᠭᠯᠡᠨ ᠪᠢᠳᠡᠨ ᠢ᠋ ᠲᠣᠭᠣᠬᠤ ᠦᠭᠡᠢ ᠪᠠᠢᠭᠰᠠᠨ ᠬᠥᠮᠦᠰ᠂ ᠭᠡᠨᠡᠳᠲᠡ ᠶᠠᠭᠠᠬᠢᠭᠠᠳ ᠴᠠᠭᠤᠷ ᠪᠡᠬᠢ ᠶ᠋ᠢ ᠥᠭᠬᠦ ᠪᠣᠯᠪᠠ? ᠡᠭᠦᠨ ᠳ᠋ᠦ᠍ ᠰᠡᠵᠢᠭᠲᠡᠢ ᠶᠠᠪᠤᠳᠠᠯ ᠪᠠᠢᠨᠠ᠃ ᠬᠥᠪᠡᠭᠦᠨ ᠴᠢ ᠪᠣᠯᠭᠣᠮᠵᠢᠯᠠᠬᠤ ᠬᠡᠷᠡᠭᠲᠡᠢ᠃ ᠣᠳᠣ ᠬᠠᠪᠤᠷ ᠪᠣᠯᠪᠠ᠂ ᠪᠢᠳᠡᠨ ᠦ᠌ ᠠᠳᠤᠭᠤ ᠲᠤᠷᠠᠩᠬᠠᠢ ᠪᠠᠢᠨᠠ᠃ ᠠᠳᠤᠭᠤ ᠪᠠᠨ ᠲᠠᠷᠭᠤᠯᠠᠮᠠᠭᠴᠠ ᠣᠴᠢᠶᠠ ᠭᠡᠵᠦ ᠰᠢᠯᠲᠠᠭᠯᠠᠵᠤ᠂ ᠡᠨᠡ ᠬᠡᠷᠡᠭ ᠢ᠋ ᠬᠣᠢᠰᠢ ᠲᠠᠯᠪᠢᠪᠠᠯ ᠶᠠᠮᠠᠷ?》 ᠭᠡᠰᠡᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ᠂ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠠᠪᠴᠤ ᠥᠪᠡᠷ ᠢ᠋ᠶ᠋ᠡᠨ ᠣᠴᠢᠭᠰᠠᠨ ᠦᠭᠡᠢ᠂ ᠪᠤᠬᠠᠲᠠᠢ᠂ ᠬᠢᠷᠠᠲᠤ ᠬᠣᠶᠠᠷ ᠢ᠋ 《ᠪᠠᠭᠠᠯᠵᠤᠷ ᠢᠳᠡ》 ᠭᠡᠵᠦ ᠶᠠᠪᠤᠭᠤᠯᠤᠭᠠᠳ ᠴᠢᠩᠭᠢᠰ ᠬᠠᠭᠠᠨ᠂ ᠮᠦᠩᠯᠢᠭ ᠡᠴᠢᠭᠡ ᠶ᠋ᠢᠨ ᠭᠡᠷ ᠡᠴᠡ ᠪᠤᠴᠠᠪᠠ᠃ ᠪᠤᠬᠠᠲᠠᠢ ᠬᠢᠷᠠᠲᠤ ᠬᠣᠶᠠᠷ ᠢ᠋ ᠣᠴᠢᠮᠠᠭᠴᠠ᠂ ᠰᠡᠩᠭᠦᠮ ᠨᠠᠷ 《ᠪᠢᠳᠡᠨ ᠦ᠌ ᠬᠡᠷᠡᠭ ᠮᠠᠲᠠᠭᠳᠠᠪᠠ᠂ ᠮᠠᠷᠭᠠᠰᠢ ᠡᠷᠲᠡ ᠬᠠᠮᠤᠷᠴᠤ ᠪᠠᠷᠢᠶᠠ》 ᠭᠡᠪᠡ᠃
169᠂ ᠲᠡᠢᠨᠬᠦ ᠪᠠᠷᠢᠬᠤ ᠭᠡᠵᠦ ᠬᠡᠯᠡᠯᠴᠡᠵᠦ ᠲᠣᠭᠲᠠᠭᠰᠠᠨ ᠢ᠋ ᠠᠯᠲᠠᠨ ᠤ᠋ ᠳᠡᠭᠦᠦ ᠶᠡᠬᠡ ᠴᠡᠷᠢᠭ ᠭᠡᠷ ᠲᠡᠭᠡᠨ ᠢᠷᠡᠵᠦ ᠥᠭᠦᠯᠡᠷᠦᠨ᠄
《ᠮᠠᠷᠭᠠᠰᠢ ᠥᠷᠯᠥᠭᠡ ᠲᠡᠮᠦᠵᠢᠨ ᠢ᠋ ᠪᠠᠷᠢᠬᠤ ᠪᠠᠷ ᠰᠢᠢᠳᠪᠡ᠃ ᠡᠨᠡ ᠦᠭᠡ ᠶ᠋ᠢ ᠬᠦᠷᠭᠡᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠲᠡᠮᠦᠵᠢᠨ ᠶᠠᠭᠤ ᠪᠠᠨ ᠴᠤ᠌ ᠬᠠᠢᠷᠠᠯᠠᠬᠤ ᠦᠭᠡᠢ ᠥᠭᠬᠦ ᠪᠢᠵᠡ》 ᠭᠡᠪᠡᠯ᠂ ᠲᠡᠭᠦᠨ ᠦ᠌ ᠡᠮᠡ ᠠᠯᠬᠠᠴᠢᠳ ᠥᠭᠦᠯᠡᠷᠦᠨ᠄ 《ᠴᠢᠨᠦ ᠡᠨᠡ ᠳᠡᠯᠢᠮ ᠦᠭᠡ᠂ ᠠᠯᠲᠠ ᠬᠡᠯᠡ ᠴᠢᠨᠢ ᠶᠠᠭᠤᠨ ᠪᠣᠯᠤᠨᠠ? ᠬᠥᠮᠦᠨ ᠰᠣᠨᠣᠰᠴᠤ ᠦᠨᠡᠮᠰᠢᠭᠦᠵᠡᠢ》 ᠭᠡᠪᠡ᠃ ᠡᠨᠡ ᠦᠭᠡ ᠶ᠋ᠢ ᠰᠦ ᠬᠦᠷᠭᠡᠬᠦ ᠪᠡᠷ ᠢᠷᠡᠭᠰᠡᠨ ᠲᠡᠳᠡᠨ ᠦ᠌ ᠠᠳᠤᠭᠤᠴᠢ ᠪᠠᠳᠠᠢ ᠰᠣᠨᠣᠰᠴᠤ ᠪᠤᠴᠠᠪᠠ᠃ ᠪᠠᠳᠠᠢ ᠬᠠᠷᠢᠵᠤ ᠢᠷᠡᠭᠡᠳ ᠨᠥᠬᠥᠷ ᠠᠳᠤᠭᠤᠴᠢ ᠬᠢᠰᠢᠯᠢᠭ ᠲᠦ᠍ ᠴᠡᠷᠢᠭ ᠦ᠋ᠨ ᠦᠭᠡ ᠶ᠋ᠢ ᠬᠡᠯᠡᠪᠡᠯ᠂ ᠬᠢᠰᠢᠯᠢᠭ ᠥᠭᠦᠯᠡᠷᠦᠨ᠄ 《ᠪᠢ ᠪᠠᠰᠠ ᠣᠴᠢᠵᠤ ᠤᠴᠢᠷ ᠢ᠋ ᠮᠡᠳᠡᠶᠡ》 ᠭᠡᠵᠦ ᠴᠡᠷᠢᠭ ᠦ᠋ᠨ ᠭᠡᠷ ᠲᠦ᠍ ᠣᠴᠢᠪᠠᠯ ᠴᠡᠷᠢᠭ ᠦ᠋ᠨ ᠬᠥᠪᠡᠭᠦᠨ ᠨᠠᠷᠢᠨ ᠭᠡᠭᠡᠨ ᠭᠠᠳᠠᠨᠠ ᠰᠠᠭᠤᠵᠤ ᠰᠤᠮᠤ ᠪᠠᠨ ᠵᠦᠯᠭᠦᠵᠦ ᠪᠠᠢᠨᠠ᠃ ᠨᠠᠷᠢᠨ ᠭᠡᠭᠡᠨ ᠥᠭᠦᠯᠡᠷᠦᠨ᠄
《ᠮᠠᠨᠠᠢᠬᠢᠨ ᠰᠠᠶᠢ ᠶᠠᠭᠤ ᠭᠡᠵᠦ ᠶᠠᠷᠢᠭᠰᠠᠨ ᠪᠣᠢ? ᠬᠡᠯᠡ ᠪᠡᠨ ᠲᠠᠲᠠᠵᠤ᠂ ᠠᠮᠠ ᠪᠠᠨ ᠪᠠᠷᠢᠵᠤ ᠶᠠᠪᠤᠭᠠᠰᠠᠢ》 ᠭᠡᠵᠡᠢ᠃ ᠲᠡᠭᠡᠭᠡᠳ ᠨᠠᠷᠢᠨ ᠭᠡᠭᠡᠨ᠂ ᠪᠠᠰᠠ ᠠᠳᠤᠭᠤᠴᠢ ᠬᠢᠰᠢᠯᠢᠭ ᠲᠦ᠍ ᠥᠭᠦᠯᠡᠷᠦᠨ᠄ 《ᠮᠠᠷᠬᠢᠳᠠᠢ ᠴᠠᠭᠠᠨ᠂ ᠠᠮᠠ ᠴᠠᠭᠠᠨ ᠬᠡᠭᠡᠷ ᠬᠣᠶᠠᠷ ᠮᠣᠷᠢ ᠶ᠋ᠢ ᠪᠠᠷᠢᠵᠤ ᠠᠪᠴᠢᠷᠠ᠃ ᠤᠶᠠᠵᠤ ᠬᠣᠨᠣᠭᠠᠳ ᠥᠷᠯᠥᠭᠡ ᠡᠷᠲᠡ ᠮᠣᠷᠳᠠᠨᠠ》 ᠭᠡᠵᠡᠢ᠃ ᠬᠢᠰᠢᠯᠢᠭ ᠢᠷᠡᠵᠦ ᠪᠠᠳᠠᠢ ᠳ᠋ᠤ᠌ ᠥᠭᠦᠯᠡᠷᠦᠨ᠄
《ᠲᠤᠭᠠᠷ ᠤ᠋ᠨ (ᠰᠠᠶᠢ ᠶ᠋ᠢᠨ) ᠦᠨᠡᠨ ᠪᠣᠯᠪᠠ᠂ ᠣᠳᠣ ᠪᠢᠳᠡ ᠬᠣᠶᠠᠷ᠂ ᠲᠡᠮᠦᠵᠢᠨ ᠳ᠋ᠦ᠍ ᠬᠡᠯᠡ ᠬᠦᠷᠭᠡᠶᠡ》 ᠭᠡᠵᠦ ᠦᠭᠡ ᠪᠠᠷᠢᠯᠳᠤᠵᠤ᠂ ᠮᠠᠷᠬᠢᠳᠠᠢ ᠴᠠᠭᠠᠨ᠂ ᠠᠮᠠ ᠴᠠᠭᠠᠨ ᠬᠡᠭᠡᠷ ᠬᠣᠶᠠᠷ ᠮᠣᠷᠢ ᠶ᠋ᠢ ᠪᠠᠷᠢᠵᠤ᠂ ᠶᠡᠬᠡ ᠭᠡᠷ ᠦ᠋ᠨ ᠭᠠᠳᠠᠨᠠ ᠤᠶᠠᠭᠠᠳ ᠮᠥᠨ ᠦᠳᠡᠰᠢ ᠬᠣᠨᠢᠨ ᠳ᠋ᠤ᠌ ᠣᠷᠣᠵᠤ ᠨᠢᠭᠡᠨ ᠬᠤᠷᠠᠭᠠ ᠠᠯᠠᠭᠠᠳ ᠢᠰᠡᠷᠢ (ᠣᠷᠣ) ᠪᠠᠷ ᠲᠦᠯᠡᠵᠦ ᠴᠢᠨᠠᠭᠠᠳ ᠮᠡᠷᠬᠢᠳᠡᠢ ᠴᠠᠭᠠᠨ ᠮᠣᠷᠢ᠂ ᠠᠮᠠ ᠴᠠᠭᠠᠨ ᠬᠡᠭᠡᠷ ᠬᠣᠶᠠᠷ ᠪᠡᠯᠡᠨ ᠤᠶᠠᠭᠰᠠᠨ ᠮᠣᠷᠢ ᠶ᠋ᠢ ᠤᠨᠤᠵᠤ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠳᠠᠪᠬᠢᠵᠤ ᠢᠷᠡᠪᠡ᠃ ᠪᠠᠳᠠᠢ ᠬᠢᠰᠢᠯᠢᠭ ᠬᠣᠶᠠᠷ᠂ ᠴᠢᠩᠭᠢᠰ ᠦ᠋ᠨ ᠭᠡᠷ ᠦ᠋ᠨ ᠠᠷᠤ ᠠ᠋ᠴᠠ ᠶᠡᠬᠡ ᠴᠡᠷᠢᠭ ᠦ᠋ᠨ ᠥᠭᠦᠯᠡᠭᠰᠡᠨ ᠦᠭᠡ ᠪᠠ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠨᠠᠷᠢᠨ ᠭᠡᠭᠡᠨ ᠦ᠌ ᠰᠤᠮᠤ ᠪᠠᠨ ᠵᠦᠯᠭᠦᠵᠦ ᠪᠡᠯᠡᠳᠴᠦ ᠪᠠᠢᠭᠰᠠᠨ ᠬᠢᠭᠡᠳ ᠮᠠᠷᠬᠢᠳᠠᠢ ᠴᠠᠭᠠᠨ᠂ ᠠᠮᠠ ᠴᠠᠭᠠᠨ ᠬᠡᠭᠡᠷ ᠬᠣᠶᠠᠷ ᠮᠣᠷᠢ ᠶ᠋ᠢ ᠪᠠᠷᠢᠵᠤ ᠤᠶᠠ ᠭᠡᠰᠡᠨ ᠪᠦᠬᠦ ᠦᠭᠡ ᠶ᠋ᠢ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠬᠡᠯᠡᠵᠦ ᠥᠭᠪᠡ ᠃ ᠪᠠᠰᠠ ᠪᠠᠳᠠᠢ ᠬᠢᠰᠢᠯᠢᠭ ᠬᠣᠶᠠᠷ ᠥᠭᠦᠯᠡᠷᠦᠨ᠄
《ᠴᠢᠩᠭᠢᠰ ᠬᠠᠭᠠᠨ ᠰᠣᠶᠣᠷᠬᠠᠪᠠᠯ᠂ ᠪᠢᠳᠡᠨ ᠦ᠌ ᠦᠭᠡᠨ ᠳ᠋ᠦ᠍ ᠡᠷᠡᠭᠡᠯᠵᠡᠬᠦ ᠶᠠᠪᠤᠳᠠᠯ ᠦᠭᠡᠢ᠂ ᠬᠠᠮᠤᠷᠤᠨ ᠢᠷᠡᠵᠦ ᠲᠠᠨ ᠢ᠋ ᠪᠠᠷᠢᠶᠠ ᠭᠡᠵᠦ ᠬᠡᠯᠡᠯᠴᠡᠵᠦ ᠲᠣᠭᠲᠠᠭᠰᠠᠨ ᠨᠢ ᠮᠠᠭᠠᠳ ᠲᠠᠢ ᠦᠨᠡᠨ》 ᠭᠡᠪᠡ᠃
