《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠭᠤᠷᠪᠠᠳᠤᠭᠠᠷ ᠪᠦᠯᠦᠭ - ᠮᠡᠷᠭᠢᠳ ᠢ᠋ ᠰᠥᠨᠥᠭᠡᠭᠰᠡᠨ ᠪᠠ ᠲᠡᠮᠦᠵᠢᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠴᠣᠯᠠ ᠡᠷᠭᠦᠮᠵᠢᠯᠡᠭᠰᠡᠨ ᠨᠢМэргидийг сөнөөсөн ба Тэмүжинд Чингис хаан цол өргөмжилсөн нь
3559《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠭᠤᠷᠪᠠᠳᠤᠭᠠᠷ ᠪᠦᠯᠦᠭ - ᠮᠡᠷᠭᠢᠳ ᠢ᠋ ᠰᠥᠨᠥᠭᠡᠭᠰᠡᠨ ᠪᠠ ᠲᠡᠮᠦᠵᠢᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠴᠣᠯᠠ ᠡᠷᠭᠦᠮᠵᠢᠯᠡᠭᠰᠡᠨ ᠨᠢ
《 ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠂ ᠮᠡᠷᠭᠢᠳ ᠢ᠋ ᠰᠥᠨᠥᠭᠡᠭᠰᠡᠨ ᠪᠠ ᠲᠡᠮᠦᠵᠢᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠴᠣᠯᠠ ᠡᠷᠭᠦᠮᠵᠢᠯᠡᠭᠰᠡᠨ ᠨᠢ
104᠂ ᠲᠡᠨᠳᠡ ᠡᠴᠡ ᠲᠡᠮᠦᠵᠢᠨ᠂ ᠬᠠᠰᠠᠷ᠂ ᠪᠡᠯᠭᠦᠳᠡᠢ ᠭᠤᠷᠪᠠᠭᠤᠯᠠ ᠶᠠᠪᠤᠵᠤ᠂ ᠲᠤᠤᠯᠠ ᠭᠣᠣᠯ ᠤ᠋ᠨ ᠬᠠᠷᠠ ᠰᠢᠭᠤᠢ ᠳ᠋ᠤ᠌ ᠨᠤᠲᠤᠭᠯᠠᠵᠤ ᠪᠠᠢᠭᠠ ᠸᠠᠩ ᠬᠠᠨ ᠲᠤᠭᠤᠷᠢᠯ ᠳ᠋ᠤ᠌ ᠣᠴᠢᠵᠤ ᠥᠭᠦᠯᠡᠷᠦᠨ᠄ 《ᠰᠠᠨᠠᠮᠰᠠᠷ ᠦᠭᠡᠢ ᠪᠠᠢᠲᠠᠯᠠ ᠭᠤᠷᠪᠠᠨ ᠮᠡᠷᠭᠡᠳ ᠳᠣᠪᠲᠣᠯᠵᠤ᠂ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ ᠮᠢᠨᠢ ᠪᠤᠯᠢᠶᠠᠵᠤ ᠠᠪᠪᠠ᠂ ᠬᠠᠨ ᠡᠴᠢᠭᠡ ᠮᠢᠨᠢ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ ᠮᠢᠨᠢ ᠠᠪᠤᠷᠠᠵᠤ ᠥᠭᠭᠦᠨᠡ ᠤᠤ ᠭᠡᠵᠦ ᠢᠷᠡᠪᠡ》ᠭᠡᠪᠡᠯ᠂ ᠸᠠᠩ ᠬᠠᠨ ᠲᠤᠭᠤᠷᠢᠯ ᠬᠠᠷᠢᠭᠤ ᠥᠭᠦᠯᠡᠷᠦᠨ᠄ 《ᠪᠢ ᠨᠢᠳᠤᠨᠤᠨ ᠵᠢᠯ ᠴᠢᠮᠠᠲᠤ ᠬᠡᠯᠡᠭᠰᠡᠨ ᠪᠢᠰᠢ ᠤᠤ᠂ ᠡᠴᠢᠭᠡ ᠶ᠋ᠢᠨ ᠠᠳᠠᠯᠢ ᠡᠴᠢᠭᠡ ᠭᠡᠵᠦ ᠪᠤᠯᠠᠭᠠᠨ ᠳᠠᠬᠤ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠲᠤᠬᠠᠢ ᠳ᠋ᠤ᠌ ᠪᠢ ᠢᠩᠭᠢᠵᠦ ᠬᠡᠯᠡᠭᠰᠡᠨ ᠪᠢᠯᠡ᠂
〈ᠪᠤᠯᠠᠭᠠᠨ ᠳᠠᠬᠤ ᠶ᠋ᠢᠨ ᠴᠢᠨᠢ ᠬᠠᠷᠢᠭᠤ ᠳ᠋ᠤ᠌ ᠪᠤᠲᠠᠷᠠᠭᠰᠠᠨ ᠤᠯᠤᠰ ᠢ᠋ ᠴᠢᠨᠢ ᠪᠦᠭᠡᠨᠡᠷᠡᠭᠦᠯᠵᠦ ᠥᠭᠭᠦᠶᠡ
ᠬᠠᠷᠠ ᠪᠤᠯᠠᠭᠠᠨ ᠳᠠᠬᠤ ᠶ᠋ᠢᠨ ᠴᠢᠨᠢ ᠬᠠᠷᠢᠭᠤ ᠳ᠋ᠤ᠌ ᠬᠠᠭᠠᠴᠠᠭᠰᠠᠨ ᠤᠯᠤᠰ ᠢ᠋ ᠴᠢᠨᠢ ᠬᠠᠮᠲᠤᠳᠬᠠᠵᠤ ᠥᠭᠭᠦᠶᠡ
ᠴᠢᠬᠢᠷᠡ ᠪᠡᠨ ᠴᠡᠭᠡᠵᠢᠨ ᠳ᠋ᠦ᠍ ᠪᠠᠢᠯᠭᠠ ᠪᠥᠭᠡᠷᠡ ᠪᠡᠨ ᠪᠥᠭᠰᠡᠨ ᠳ᠋ᠦ᠍ ᠪᠠᠢᠯᠭᠠ (ᠠᠬᠠ ᠵᠠᠬᠠ ᠲᠠᠢ ᠪᠠᠢᠭ)〉ᠭᠡᠵᠦ ᠬᠡᠯᠡᠭᠰᠡᠨ ᠪᠢᠯᠡ᠂
ᠣᠳᠣ ᠲᠡᠷᠡ ᠦᠭᠡᠨ ᠳ᠋ᠡᠭᠡᠨ ᠬᠦᠷᠴᠦ᠂ᠪᠤᠯᠠᠭᠠᠨ ᠳᠠᠬᠤ ᠶ᠋ᠢᠨ ᠴᠢᠨᠢ ᠬᠠᠷᠢᠭᠤ ᠳ᠋ᠤ᠌ ᠪᠦᠭᠦᠳᠡ ᠮᠡᠷᠭᠡᠳ ᠢ᠋ ᠪᠦᠷᠢᠯᠭᠡᠨ ᠳᠣᠪᠲᠣᠯᠵᠤ ᠪᠥᠷᠲᠡ ᠦᠵᠢᠨ ᠢ᠋ ᠴᠢᠨᠢ
ᠪᠤᠴᠠᠭᠠᠵᠤ ᠥᠭᠭᠦᠶᠡ ᠂ᠬᠠᠷᠠ ᠪᠤᠯᠠᠭᠠᠨ ᠳᠠᠬᠤ ᠶ᠋ᠢᠨ ᠴᠢᠨᠢ ᠬᠠᠷᠢᠭᠤ ᠳ᠋ᠤ᠌ ᠬᠠᠮᠤᠭ ᠮᠡᠷᠭᠡᠳ ᠢ᠋ ᠬᠠᠮᠬᠠ ᠴᠣᠬᠢᠵᠤ ᠬᠠᠲᠤᠨ ᠪᠥᠷᠲᠡ ᠶ᠋ᠢ ᠴᠢᠨᠢ ᠬᠠᠷᠢᠭᠤᠯᠵᠤ ᠠᠪᠴᠢᠷᠠᠶᠠ᠃ ᠴᠢ ᠵᠠᠮᠤᠬᠠ ᠳᠡᠭᠦᠦ ᠳ᠋ᠦ᠍ ᠬᠡᠯᠡ ᠥᠭ᠂ ᠵᠠᠮᠤᠬᠠ ᠳᠡᠭᠦᠦ ᠬᠣᠷᠬᠣᠨᠠᠭ ᠵᠤᠪᠤᠷᠠ ᠭᠡᠳᠡᠭ ᠭᠠᠵᠠᠷ ᠪᠣᠢ᠂ ᠪᠢ ᠡᠨᠳᠡ ᠡᠴᠡ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠪᠠᠷᠠᠭᠤᠨ ᠭᠠᠷ ᠪᠣᠯᠤᠨ ᠮᠣᠷᠳᠠᠶᠠ᠂ ᠵᠠᠮᠤᠬᠠ ᠳᠡᠭᠦᠦ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠵᠡᠭᠦᠨ ᠭᠠᠷ ᠪᠣᠯᠤᠨ ᠮᠣᠷᠢᠯᠠᠭ᠂ ᠪᠢᠳᠡᠨ ᠦ᠌ ᠤᠴᠠᠷᠠᠬᠤ ᠪᠣᠯᠵᠣᠭᠠ ᠶ᠋ᠢ ᠵᠠᠮᠤᠬᠠ ᠲᠣᠭᠲᠠᠭᠠᠲᠤᠭᠠᠢ》ᠭᠡᠪᠡ᠃
105᠂ ᠲᠡᠮᠦᠵᠢᠨ᠂ ᠬᠠᠰᠠᠷ᠂ ᠪᠡᠯᠭᠦᠳᠡᠢ ᠭᠤᠷᠪᠠᠭᠤᠯᠠ ᠪᠠᠨ᠂ ᠲᠣᠭᠣᠷᠢᠯ ᠬᠠᠨ ᠠ᠋ᠴᠠ ᠰᠠᠯᠵᠤ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠲᠡᠮᠦᠵᠢᠨ᠂ ᠵᠠᠮᠤᠬᠠ ᠳ᠋ᠤ᠌ ᠬᠠᠰᠠᠷ ᠪᠡᠯᠭᠦᠳᠡᠢ ᠬᠣᠶᠠᠷ ᠢ᠋ ᠢᠯᠡᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠨᠢ᠄
《ᠥᠰᠲᠦ ᠮᠡᠷᠭᠡᠳ ᠢᠷᠡᠵᠦ ᠦᠷᠦ ᠶ᠋ᠢ ᠮᠢᠨᠢ ᠡᠪᠡᠳᠬᠡᠪᠡ ᠡᠪᠦᠷ ᠢ᠋ ᠮᠢᠨᠢ ᠬᠣᠭᠣᠰᠣᠯᠠᠪᠠ᠂ ᠥᠮᠥᠭ ᠲᠦᠰᠢᠭ ᠪᠣᠯᠬᠤ ᠦᠨᠦᠷ ᠲᠥᠷᠥᠯ ᠦ᠋ᠨ ᠲᠠ ᠨᠠᠷ
ᠥᠰᠢᠶᠡ ᠶ᠋ᠢ ᠠᠪᠴᠤ ᠥᠭᠭᠦᠨᠡ ᠤᠤ ᠡᠯᠢᠭᠡ ᠵᠢᠷᠦᠬᠡ ᠮᠢᠨᠢ ᠡᠮᠳᠠᠷᠴᠣ ᠪᠠᠢᠨᠠ᠂ᠡᠯᠢᠭᠡᠨ ᠰᠠᠳᠤᠨ ᠲᠠ ᠨᠠᠷ ᠡᠨᠡ ᠥᠰᠢᠶᠡ ᠶ᠋ᠢ ᠠᠪᠴᠤ ᠥᠭ》ᠭᠡᠪᠡ᠃ ᠪᠠᠰᠠ ᠬᠡᠷᠡᠢᠳ ᠦ᠋ᠨ ᠲᠤᠭᠤᠷᠢᠯ ᠬᠠᠨ ᠤ᠋ ᠦᠭᠡ ᠶ᠋ᠢ ᠵᠠᠮᠤᠬᠠ ᠳ᠋ᠤ᠌ ᠤᠯᠠᠮᠵᠢᠯᠠᠨ ᠬᠡᠯᠡᠭᠰᠡᠨ ᠨᠢ᠄ 《ᠡᠷᠲᠡ ᠡᠳᠦᠷ ᠡᠴᠢᠭᠡ ᠬᠠᠨ ᠶᠢᠰᠦᠭᠡᠢ ᠲᠡᠢ ᠡᠪ ᠨᠢᠭᠡᠲᠡᠢ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ᠂ ᠣᠳᠣ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠪᠠᠷᠠᠭᠤᠨ ᠭᠠᠷ ᠪᠣᠯᠤᠨ ᠮᠣᠷᠳᠠᠶᠠ᠂ ᠵᠠᠮᠤᠬᠠ ᠳᠡᠭᠦᠦ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠵᠡᠭᠦᠨ ᠭᠠᠷ ᠪᠣᠯᠤᠨ ᠮᠣᠷᠢᠯᠠᠲᠤᠭᠠᠢ᠃ ᠬᠠᠮᠲᠤᠷᠠᠬᠤ ᠪᠣᠯᠵᠣᠭᠠ ᠶ᠋ᠢ ᠵᠠᠮᠤᠬᠠ ᠳᠡᠭᠦᠦ ᠮᠡᠳᠡᠲᠦᠭᠡᠢ》ᠭᠡᠰᠡᠨ ᠢ᠋ ᠤᠯᠠᠮᠵᠢᠯᠠᠪᠠ᠃ ᠡᠳᠡᠭᠡᠷ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠭᠦᠢᠴᠡᠭᠡᠳ ᠵᠠᠮᠤᠬᠠ ᠥᠭᠦᠯᠡᠷᠦᠨ᠄
《ᠥᠨᠥ ᠲᠡᠮᠦᠵᠢᠨ ᠠᠨᠳᠠ ᠡᠳᠦᠢ ᠵᠣᠪᠠᠯᠠᠩ ᠪᠡᠷᠬᠡ ᠳ᠋ᠦ᠍ ᠥᠷᠲᠡᠭᠳᠡᠭᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠪᠢ ᠦᠷᠦ ᠡᠪᠡᠳᠴᠦ ᠥᠷᠥᠰᠢᠶᠡᠨ ᠰᠠᠨᠠᠨᠠ ᠡᠯᠢᠭᠡ ᠡᠮᠳᠠᠷᠴᠣ
ᠡᠮᠭᠡᠨᠢᠨ ᠭᠠᠰᠢᠭᠤᠳᠠᠨᠠ᠃ᠡᠯᠡ ᠥᠰᠢᠶᠡ ᠶ᠋ᠢ ᠨᠡᠬᠡᠵᠦ ᠡᠳᠡᠭᠡᠷ ᠮᠡᠷᠭᠢᠳ ᠠᠢᠮᠠᠭ ᠢ᠋ ᠡᠪᠳᠡᠨ ᠮᠥᠬᠥᠭᠡᠵᠦ ᠡᠬᠡᠨᠡᠷ ᠪᠥᠷᠲᠡ ᠶ᠋ᠢ ᠡᠷᠭᠢᠭᠦᠯᠵᠦ ᠠᠪᠴᠢᠷᠠᠶᠠ ᠬᠠᠮᠤᠭ ᠬᠠᠳ ᠮᠡᠷᠭᠡᠳ ᠢ᠋ ᠬᠠᠮᠬᠠ ᠴᠣᠬᠢᠵᠤ ᠬᠠᠲᠤᠨ ᠪᠥᠷᠲᠡ ᠶ᠋ᠢ ᠬᠠᠷᠢᠭᠤᠯᠵᠤ ᠠᠪᠤᠶᠠ ᠂ᠳᠠᠪᠢᠷᠠᠬᠤ ᠭᠥᠯᠢᠮ ᠦ᠋ᠨ ᠴᠢᠮᠡᠭᠡ ᠶ᠋ᠢ ᠲᠡᠢᠨ ᠦ᠌ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤ ᠭᠡᠵᠦ ᠲᠠᠰᠢᠶᠠᠷᠠᠨ ᠳᠤᠲᠠᠭᠠᠭᠴᠢ ᠲᠣᠭᠲᠠᠭᠠ ᠳᠠᠳ ᠪᠤᠭᠤᠷᠠ ᠬᠡᠭᠡᠷᠡ ᠳ᠋ᠦ᠍ ᠲᠠᠰᠢᠶᠠᠯᠳᠤᠨ ᠰᠠᠭᠤᠭᠠ ᠪᠢᠵᠡ᠂ ᠳᠠᠪᠬᠤᠷ ᠬᠣᠷᠣᠮᠰᠣᠬᠠ ᠶ᠋ᠢᠨ ᠠᠮᠠᠰᠠᠷ ᠳᠡᠷᠪᠡᠯᠵᠡᠨ ᠬᠥᠳᠡᠯᠬᠦ ᠳ᠋ᠦ᠍ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠪᠣᠯᠪᠠ ᠭᠡᠵᠦ ᠲᠠᠰᠢᠶᠠᠷᠠᠨ ᠳᠤᠲᠠᠭᠠᠭᠴᠢ ᠲᠡᠢᠷ ᠤᠰᠤᠨ ᠣᠳᠣ ᠳᠠᠪᠠᠯᠭᠠᠨᠲᠤ ᠣᠷᠬᠣᠨ ᠰᠡᠯᠡᠩᠭᠡ ᠶ᠋ᠢᠨ ᠳᠠᠯᠠᠳ ᠠᠷᠠᠯ ᠳ᠋ᠤ᠌ ᠳᠠᠯᠳᠢᠷᠠᠨ ᠰᠠᠭᠤᠭᠠ ᠪᠢᠵᠡ᠂ ᠬᠠᠮᠬᠤᠤᠯ ᠡᠪᠡᠰᠦ ᠬᠡᠢᠰᠬᠦ ᠳ᠋ᠦ᠍ ᠬᠠᠯᠳᠠᠬᠤ ᠳᠠᠢᠰᠤᠨ ᠢᠷᠡᠪᠡ ᠭᠡᠵᠦ ᠬᠠᠷᠠ ᠣᠢ ᠴᠢᠭᠯᠠᠵᠣ ᠬᠠᠰᠬᠢᠷᠤᠨ ᠳᠤᠲᠠᠭᠠᠭᠴᠢ ᠮᠠᠭᠤ ᠬᠠᠭᠠᠳᠠᠢ ᠲᠡᠷᠡᠮᠡᠯᠡ ᠣᠳᠣ ᠬᠠᠷᠠᠵᠠ ᠶ᠋ᠢᠨ ᠳᠠᠯᠳᠠ ᠬᠠᠮᠢᠭᠠᠰᠢ ᠴᠤ᠌ ᠦᠭᠡᠢ ᠪᠠᠢᠭᠠ ᠪᠢᠵᠡ᠂ ᠰᠠᠢᠬᠠᠨ ᠬᠢᠯᠭᠣ ᠮᠣᠷᠢᠨ ᠳ᠋ᠤ᠌ ᠰᠠᠬᠠᠯ ᠡᠪᠡᠰᠦ ᠶᠡᠬᠡ ᠭᠡᠨᠡ᠂ᠰᠠᠬᠠᠯ ᠡᠪᠡᠰᠦ ᠲᠡᠭᠦᠪᠡᠷ ᠰᠠᠯ ᠬᠢᠵᠦ ᠪᠣᠯᠳᠠᠭ ᠭᠡᠨᠡ᠂
ᠥᠨᠥ ᠳᠥᠭᠥᠮ ᠢ᠋ ᠪᠣᠳᠣᠵᠤ ᠡᠪᠡᠰᠦ ᠪᠡᠷ ᠰᠠᠯ ᠬᠢᠵᠦ ᠥᠷᠭᠡᠨ ᠬᠢᠯᠭᠣ ᠮᠥᠷᠡᠨ ᠢ᠋ ᠥᠩᠭᠡᠷᠡᠵᠦ ᠬᠥᠨᠳᠡᠯᠡᠨ ᠭᠠᠷᠤᠭᠠᠳ ᠥᠭᠡᠳᠡ ᠦᠭᠡᠢ ᠮᠤᠤᠰᠠᠢᠨ ᠮᠡᠷᠭᠡᠳ ᠦ᠋ᠨ
ᠥᠨᠥᠬᠢ ᠮᠠᠭᠤ ᠲᠣᠭᠲᠠᠭᠠ ᠶ᠋ᠢᠨ ᠡᠷᠦᠬᠡ ᠡᠭᠦᠳᠡ ᠶ᠋ᠢ ᠨᠢ ᠡᠪᠳᠡᠵᠦ ᠦᠮ ᠴᠥᠮ ᠳᠠᠭᠠᠷᠢᠵᠤ ᠥᠩᠭᠡᠲᠡᠢ ᠡᠳ᠋ ᠢ᠋ ᠨᠢ ᠣᠯᠵᠠᠯᠠᠵᠤ ᠡᠪᠦᠷᠲᠦᠯᠡᠬᠦ ᠡᠮᠡ ᠶ᠋ᠢ ᠨᠢ ᠪᠤᠯᠢᠶᠠᠵᠤ ᠥᠰᠬᠦ ᠦᠷᠡ ᠶ᠋ᠢ ᠨᠢ ᠲᠠᠰᠤᠯᠵᠤ ᠥᠰᠢᠶᠡ ᠬᠣᠷᠣᠰᠤᠯ ᠢ᠋ᠶ᠋ᠠᠨ ᠠᠪᠤᠶᠠ! ᠬᠤᠲᠤᠭᠲᠤ ᠡᠷᠬᠢᠮ ᠰᠢᠲᠦᠭᠡᠨ ᠢ᠋ ᠨᠢ ᠬᠤᠭᠤ ᠲᠠᠲᠠᠵᠤ ᠡᠪᠳᠡᠭᠡᠳ ᠬᠤᠪᠠᠬᠠᠢ ᠪᠣᠯᠭᠠᠵᠤ ᠬᠠᠶᠠᠶᠠ! ᠬᠣᠲᠠᠯᠠ ᠶᠡᠬᠡ ᠤᠯᠤᠰ ᠢ᠋ ᠨᠢ ᠬᠣᠭᠣᠰᠣᠨ ᠪᠣᠯᠲᠠᠯᠠ ᠳᠣᠪᠲᠣᠯᠤᠶᠠ》ᠭᠡᠪᠡ᠃
106᠂ ᠵᠠᠮᠤᠬᠠ ᠪᠠᠰᠠ ᠲᠡᠮᠦᠵᠢᠨ ᠠᠨᠳᠠ᠂ ᠲᠣᠭᠣᠷᠢᠯ ᠬᠠᠨ ᠠᠬᠠ ᠬᠣᠶᠠᠷ ᠲᠤ᠌ ᠬᠡᠯᠡᠭᠦᠯᠦᠭᠰᠡᠨ ᠨᠢ᠄
《ᠣᠳᠣ ᠪᠢ ᠬᠠᠷᠠᠭᠠ ᠶᠡᠬᠡᠲᠦ (ᠬᠣᠯᠠ ᠠ᠋ᠴᠠ ᠬᠠᠷᠠᠭᠳᠠᠬᠤ) ᠲᠤᠭ ᠢ᠋ᠶ᠋ᠠᠨ ᠲᠠᠬᠢᠵᠣ ᠂ᠬᠠᠷᠠ ᠪᠤᠬᠠ ᠶ᠋ᠢᠨ ᠠᠷᠠᠰᠤ ᠪᠠᠷ ᠪᠦᠷᠢᠭᠰᠡᠨ ᠬᠠᠷᠭᠢᠰ ᠳᠠᠭᠤᠲᠠᠢ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠴᠦ ᠬᠠᠲᠤᠨ ᠪᠣᠯᠣᠳ ᠵᠢᠳᠠ ᠪᠠᠨ ᠪᠠᠷᠢᠵᠤ᠂ ᠬᠠᠯᠠᠬᠤ ᠬᠤᠶᠠᠭᠲᠤ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠴᠦ᠂ ᠬᠠᠳᠬᠤᠬᠤ ᠵᠠᠪᠠᠳᠣ ᠰᠤᠮᠤ ᠪᠠᠨ ᠣᠨᠢᠯᠠᠵᠤ᠂ ᠬᠠᠷᠠ ᠬᠣᠯᠠ ᠮᠣᠷᠢ ᠪᠠᠨ ᠤᠨᠠᠵᠤ ᠂ ᠬᠠᠮᠤᠭ ᠣᠯᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠂ᠬᠠᠭᠠᠳ ᠮᠡᠷᠭᠡᠳ ᠢ᠋ ᠬᠠᠯᠳᠠᠨ ᠳᠣᠪᠲᠣᠯᠵᠤ ᠬᠠᠳᠬᠤᠯᠳᠤᠨ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠳᠠᠪᠠ ᠪᠢ᠂ ᠦᠵᠡᠮᠵᠢᠲᠦ ᠰᠠᠢᠬᠠᠨ ᠲᠤᠭ ᠢ᠋ᠶ᠋ᠠᠨ ᠲᠠᠬᠢᠵᠣ ᠦᠬᠡᠷ ᠦ᠋ᠨ ᠠᠷᠠᠰᠤᠨ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠴᠦ ᠦᠷᠭᠦᠯᠵᠢ ᠬᠡᠯᠬᠢᠶᠡ ᠬᠤᠶᠠᠭ ᠢ᠋ᠶ᠋ᠠᠨ ᠡᠮᠦᠰᠴᠦ ᠦᠵᠦᠭᠦᠷ ᠬᠤᠷᠴᠠ ᠢᠯᠳᠦ ᠪᠡᠨ ᠪᠠᠷᠢᠵᠤ ᠂ᠦᠨᠡᠬᠡᠷ ᠮᠡᠷᠭᠡᠨ ᠰᠤᠮᠤ ᠪᠠᠨ ᠣᠨᠢᠯᠠᠵᠤ ᠦᠯᠡᠮᠵᠢ ᠰᠠᠢᠨ ᠮᠣᠷᠢ ᠪᠠᠨ ᠤᠨᠤᠵᠤ ᠦᠢ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠦᠬᠡᠠᠴᠡ ᠮᠤᠤᠰᠠᠢᠨ ᠮᠡᠷᠭᠡᠳ ᠢᠷᠭᠡᠨ ᠲᠡᠢ ᠦᠬᠦᠲᠡᠯᠡ ᠲᠡᠮᠡᠴᠡᠬᠦ ᠪᠡᠷ ᠨᠢᠭᠡᠨᠲᠡ ᠮᠣᠷᠳᠠᠪᠠ᠃ ᠲᠤᠭᠤᠷᠢᠯ ᠬᠠᠨ ᠠᠬᠠ ᠮᠣᠷᠳᠠᠵᠤ᠂ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠥᠪᠥᠷ ᠢ᠋ᠶ᠋ᠡᠷ ᠲᠡᠮᠦᠵᠢᠨ ᠠᠨᠳᠠ ᠶ᠋ᠢ ᠳᠠᠭᠠᠷᠢᠵᠤ ᠠᠪᠤᠭᠠᠳ ᠤᠨᠤᠨ ᠮᠥᠷᠡᠨ ᠦ᠌ ᠡᠬᠢ ᠪᠣᠳᠣᠭᠠᠨ ᠪᠤᠭᠤᠷᠵᠢ ᠭᠡᠳᠡᠭ ᠭᠠᠵᠠᠷ ᠢᠷᠡᠭᠲᠦᠨ᠂ ᠪᠢ ᠡᠨᠳᠡ ᠡᠴᠡ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠮᠣᠷᠳᠠᠭᠠᠳ ᠵᠠᠮ ᠳ᠋ᠤ᠌ ᠤᠨᠤᠨ ᠮᠥᠷᠡᠨ ᠳ᠋ᠦ᠍ ᠨᠤᠲᠤᠭᠯᠠᠵᠤ ᠪᠠᠢᠭᠠ ᠲᠡᠮᠦᠵᠢᠨ ᠠᠨᠳᠠ ᠶ᠋ᠢᠨ ᠬᠠᠷᠢᠶᠠᠲᠤ ᠨᠠᠷ ᠠ᠋ᠴᠠ ᠪᠠᠰᠠ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠠᠪᠴᠤ᠂ ᠪᠦᠭᠦᠳᠡ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠪᠣᠯᠤᠭᠠᠳ ᠪᠣᠳᠣᠭᠠᠨ ᠪᠤᠭᠤᠷᠵᠢ ᠳ᠋ᠤ᠌ ᠣᠴᠢᠵᠤ ᠨᠡᠢᠯᠡᠶᠡ》ᠭᠡᠵᠦ ᠢᠯᠡᠭᠡᠪᠡ᠃
107᠂ ᠵᠠᠮᠤᠬᠠ ᠶ᠋ᠢᠨ ᠡᠳᠡᠭᠡᠷ ᠦᠭᠡ ᠶ᠋ᠢ ᠬᠠᠰᠠᠷ ᠪᠡᠯᠭᠦᠳᠡᠢ ᠬᠣᠶᠠᠷ ᠠ᠋ᠴᠠ ᠲᠡᠮᠦᠵᠢᠨ ᠰᠣᠨᠣᠰᠤᠭᠠᠳ ᠲᠤᠭᠤᠷᠢᠯ ᠬᠠᠨ ᠳ᠋ᠤ᠌ ᠤᠯᠠᠮᠵᠢᠯᠠᠪᠠ᠂ ᠲᠣᠭᠣᠷᠢᠯ ᠬᠠᠨ᠂ ᠵᠠᠮᠤᠬᠠ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠮᠣᠷᠳᠠᠭᠠᠳ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠥᠪᠥᠷ ᠢ᠋ᠶ᠋ᠡᠷ ᠬᠡᠷᠦᠯᠦᠨ ᠦ᠌ ᠪᠦᠷᠭᠢ ᠡᠷᠭᠢ ᠶ᠋ᠢ ᠴᠢᠭᠯᠡᠨ ᠶᠠᠪᠤᠪᠠ᠂ ᠡᠭᠦᠨ ᠢ᠋ ᠲᠡᠮᠦᠵᠢᠨ ᠰᠣᠨᠣᠰᠤᠭᠠᠳ ᠪᠦᠷᠭᠢ ᠡᠷᠭᠢ ᠡᠴᠡ ᠬᠥᠳᠡᠯᠵᠦ᠂ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠥᠪᠥᠷ ᠲᠦᠩᠬᠡᠯᠢᠭ ᠥᠭᠡᠳᠡ ᠨᠡᠭᠦᠵᠦ ᠲᠠᠨᠠ ᠭᠣᠷᠣᠬᠠᠨ ᠳ᠋ᠤ᠌ ᠣᠴᠢᠵᠤ ᠪᠠᠭᠤᠪᠠ᠃ ᠲᠣᠭᠣᠷᠢᠯ ᠬᠠᠨ᠂ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠲᠡᠢ᠂ ᠲᠣᠭᠣᠷᠢᠯ ᠬᠠᠨ ᠤ᠋ ᠳᠡᠭᠦᠦ ᠵᠠᠬᠠ ᠭᠣᠮᠪᠣ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠲᠡᠢ ᠬᠢᠮᠣᠷᠭᠠ ᠭᠣᠷᠣᠬᠠ ᠶ᠋ᠢᠨ ᠠᠢᠯ ᠬᠠᠷᠭᠠᠨᠠ ᠭᠡᠳᠡᠭ ᠭᠠᠵᠠᠷ ᠪᠠᠭᠤᠵᠤ ᠪᠦᠬᠦᠢ ᠳ᠋ᠦ᠍᠂ ᠲᠡᠮᠦᠵᠢᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠣᠴᠢᠨ ᠨᠡᠢᠯᠡᠨ ᠪᠠᠭᠤᠪᠠ᠃
108᠂ ᠲᠡᠮᠦᠵᠢᠨ᠂ ᠲᠤᠭᠤᠷᠢᠯ ᠬᠠᠨ᠂ ᠵᠠᠬᠠ ᠭᠣᠮᠪᠣ ᠭᠤᠷᠪᠠᠭᠤᠯᠠ ᠨᠡᠢᠯᠡᠨ ᠬᠥᠳᠡᠯᠵᠦ᠂ ᠤᠨᠤᠨ ᠤ᠋ ᠡᠬᠢ ᠪᠣᠳᠣᠭᠠᠨ ᠪᠤᠭᠤᠷᠵᠢ ᠭᠡᠳᠡᠭ ᠭᠠᠵᠠᠷ ᠬᠦᠷᠴᠦ ᠢᠷᠡᠪᠡᠯ ᠡᠨᠳᠡ ᠵᠠᠮᠤᠬᠠ ᠨᠢᠭᠡᠨᠲᠡ ᠢᠷᠡᠭᠡᠳ ᠭᠤᠷᠪᠠ ᠬᠣᠨᠣᠭ ᠬᠦᠯᠢᠶᠡᠵᠡᠢ᠃ ᠲᠡᠮᠦᠵᠢᠨ᠂ ᠲᠤᠭᠤᠷᠢᠯ᠂ ᠵᠠᠬᠠ ᠭᠣᠮᠪᠣ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠢ᠋ ᠵᠠᠮᠤᠬᠠ ᠦᠵᠡᠭᠡᠳ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠵᠢᠭᠰᠠᠭᠠᠪᠠ᠃ ᠲᠡᠮᠦᠵᠢᠨ᠂ ᠲᠤᠭᠤᠷᠢᠯ ᠬᠠᠨ᠂ ᠵᠠᠬᠠ ᠭᠣᠮᠪᠣ ᠭᠤᠷᠪᠠ ᠪᠠᠰᠠ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠵᠠᠰᠠᠵᠤ ᠬᠦᠷᠦᠯᠴᠡᠨ ᠨᠡᠢᠯᠡᠯᠳᠦᠵᠦ ᠲᠠᠨᠢᠯᠴᠠᠪᠠ᠃ ᠵᠠᠮᠤᠬᠠ ᠥᠭᠦᠯᠡᠷᠦᠨ᠄ 《ᠪᠣᠷᠣᠭᠠᠨ ᠲᠣᠬᠢᠶᠠᠯᠳᠤᠪᠠᠴᠤ ᠪᠣᠯᠵᠣᠭᠠᠨ ᠠ᠋ᠴᠠ ᠬᠣᠵᠢᠳᠠᠬᠤ ᠦᠭᠡᠢ᠂ ᠬᠤᠷᠠ ᠲᠣᠬᠢᠶᠠᠯᠳᠤᠪᠠᠴᠤ ᠬᠤᠷᠠᠯ ᠠ᠋ᠴᠠ ᠰᠠᠭᠠᠲᠠᠬᠤ ᠦᠭᠡᠢ ᠭᠡᠵᠦ ᠮᠣᠩᠭ᠋ᠣᠯ ᠦᠭᠡ ᠪᠡᠷ ᠬᠡᠯᠡᠯᠴᠡᠵᠦ〈ᠵᠠ〉ᠭᠡᠵᠦ ᠠᠨᠳᠠᠭᠠᠢᠯᠠᠭᠰᠠᠨ ᠪᠢᠰᠢ ᠪᠢᠯᠢᠤ?〈ᠵᠠ〉ᠭᠡᠰᠡᠨ ᠴᠠᠭ ᠠ᠋ᠴᠠ ᠬᠣᠵᠢᠭᠳᠠᠭᠰᠠᠨ ᠡᠲᠡᠭᠡᠳ ᠢ᠋ ᠵᠡᠷᠭᠡ ᠳᠣᠲᠣᠷᠠ ᠠ᠋ᠴᠠ ᠬᠠᠰᠤᠶᠠ ᠭᠡᠰᠡᠨ ᠪᠢᠰᠢ ᠪᠢᠯᠢᠤ?》ᠭᠡᠪᠡᠯ᠂ ᠲᠤᠭᠤᠷᠢᠯ ᠬᠠᠨ ᠥᠭᠦᠯᠡᠷᠦᠨ᠄ 《ᠲᠣᠭᠲᠠᠭᠰᠠᠨ ᠪᠣᠯᠵᠣᠭᠠ ᠠ᠋ᠴᠠ ᠭᠤᠷᠪᠠ ᠡᠳᠦᠷ ᠬᠣᠵᠢᠮᠳᠠᠭᠰᠠᠨ ᠤ᠋ ᠤᠴᠢᠷ ᠲᠣᠷᠭᠠᠵᠤ ᠪᠤᠷᠤᠭᠤᠰᠢᠶᠠᠬᠤ ᠶ᠋ᠢ ᠵᠠᠮᠤᠬᠠ ᠳᠡᠭᠦᠦ ᠮᠢᠨᠢ ᠮᠡᠳᠡ》ᠭᠡᠪᠡ᠃ ᠪᠣᠯᠵᠣᠭᠠ ᠬᠣᠵᠢᠳᠠᠭᠰᠠᠨ ᠲᠤᠬᠠᠢ ᠡᠢᠮᠦ ᠦᠭᠡ ᠶ᠋ᠢ ᠶᠠᠷᠢᠯᠴᠠᠵᠤ ᠥᠩᠭᠡᠷᠡᠪᠡ᠃
109᠂ ᠪᠣᠲᠣᠭᠣᠨ ᠪᠤᠭᠤᠷᠵᠢ ᠠ᠋ᠴᠠ ᠪᠦᠭᠦᠳᠡᠭᠡᠷ ᠬᠥᠳᠡᠯᠵᠦ᠂ ᠬᠢᠯᠭᠣ ᠮᠥᠷᠡᠨ ᠳ᠋ᠦ᠍ ᠬᠦᠷᠴᠦ ᠰᠠᠯ ᠤᠶᠠᠵᠤ ᠭᠡᠲᠦᠯᠦᠭᠡᠳ ᠪᠤᠭᠤᠷᠠ ᠬᠡᠭᠡᠷᠡ ᠭᠡᠳᠡᠭ ᠭᠠᠵᠠᠷ ᠣᠴᠢᠵᠤ ᠲᠣᠭᠲᠠᠭᠠ ᠪᠡᠬᠢ ᠶ᠋ᠢᠨ ᠡᠷᠦᠬᠡ ᠳᠡᠭᠡᠷᠡ ᠡᠴᠡ ᠨᠥᠮᠥᠷᠦᠨ ᠪᠠᠭᠤᠵᠤ᠂ ᠡᠷᠬᠢᠮ ᠰᠢᠲᠦᠭᠡᠨ ᠢ᠋ ᠨᠢ ᠡᠪᠳᠡᠨ ᠰᠦᠢᠳᠬᠡᠵᠦ᠂ ᠡᠮᠡ ᠬᠡᠦᠬᠡᠳ ᠢ᠋ ᠨᠢ ᠡᠵᠡᠯᠡᠨ ᠪᠤᠯᠢᠶᠠᠪᠠ᠃ ᠬᠤᠲᠤᠭᠲᠤ ᠰᠠᠬᠢᠭᠤᠰᠤ ᠶ᠋ᠢ ᠨᠢ ᠬᠤᠭᠤ ᠳᠠᠭᠠᠷᠢᠵᠤ ᠬᠣᠲᠠᠯᠠ ᠤᠯᠤᠰ ᠢ᠋ ᠨᠢ ᠬᠣᠮᠣᠷᠠᠨ ᠳᠣᠪᠲᠣᠯᠵᠤ ᠬᠣᠭᠣᠰᠣᠨ ᠪᠣᠯᠭᠠᠪᠠ᠃ ᠲᠣᠭᠲᠠᠭᠠ ᠪᠡᠬᠢ ᠶ᠋ᠢ ᠤᠨᠲᠠᠵᠤ ᠪᠠᠢᠬᠤ ᠳ᠋ᠤ᠌ ᠳᠠᠭᠠᠷᠢᠨ ᠪᠠᠷᠢᠵᠤ ᠪᠣᠯᠬᠤ ᠪᠠᠢᠭᠰᠠᠨ᠂ ᠭᠡᠲᠡᠯᠡ ᠬᠢᠯᠭᠣ ᠮᠥᠷᠡᠨ ᠳ᠋ᠦ᠍ ᠨᠤᠲᠤᠭᠯᠠᠬᠤ ᠵᠢᠭᠠᠰᠤᠴᠢᠨ ᠪᠠ ᠪᠤᠯᠠᠭᠠ ᠠᠩᠨᠠᠭᠴᠢᠳ᠂ ᠭᠥᠷᠦᠭᠡᠴᠢᠳ 《ᠳᠠᠢᠰᠤᠨ ᠠᠢᠰᠤᠢ》ᠭᠡᠵᠦ ᠲᠡᠷᠡ ᠰᠥᠨᠢ ᠶ᠋ᠢᠨ ᠳᠣᠲᠣᠷᠠ ᠲᠣᠭᠲᠠᠭᠠ ᠪᠡᠬᠢ ᠳ᠋ᠦ᠍ ᠬᠡᠯᠡ ᠬᠦᠷᠭᠡᠵᠡᠢ᠃ ᠡᠨᠡ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠲᠣᠭᠲᠠᠭᠠ ᠪᠠ ᠣᠧᠨᠰ (ᠬᠤᠸᠠ) ᠮᠡᠷᠭᠢᠳ ᠦ᠋ᠨ ᠲᠠᠢᠷ ᠤᠰᠤᠨ ᠬᠣᠶᠠᠷ ᠬᠠᠮᠲᠤᠷᠠᠵᠤ ᠴᠥᠭᠡᠨ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠰᠡᠯᠡᠩᠭᠡ ᠶ᠋ᠢ ᠤᠷᠤᠭᠤᠳᠠᠵᠤ ᠪᠠᠷᠭᠤᠵᠢᠨ ᠣᠷᠣᠨ ᠳ᠋ᠤ᠌ ᠳᠤᠲᠠᠭᠠᠨ ᠣᠳᠪᠠ᠃
110᠂ ᠮᠡᠷᠭᠢᠳ ᠦ᠋ᠨ ᠤᠯᠤᠰ ᠳᠦᠷᠪᠡᠵᠦ᠂ ᠲᠡᠷᠡ ᠰᠥᠨᠢ ᠰᠡᠯᠡᠩᠭᠡ ᠶ᠋ᠢ ᠤᠷᠤᠭᠤᠳᠠᠨ ᠳᠤᠲᠠᠭᠠᠬᠤ ᠳ᠋ᠤ᠌ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠳᠦᠷᠪᠡᠭᠰᠡᠨ ᠮᠡᠷᠭᠡᠳ ᠢ᠋ ᠨᠡᠬᠡᠵᠦ ᠳᠣᠪᠲᠣᠯᠤᠨ ᠳᠡᠭᠡᠷᠡᠮᠳᠡᠨ ᠶᠠᠪᠤᠪᠠ᠃ ᠲᠡᠮᠦᠵᠢᠨ᠂ ᠳᠦᠷᠪᠡᠵᠦ ᠶᠠᠪᠤᠭᠠ ᠬᠥᠮᠦᠰ ᠦ᠋ᠨ ᠳᠤᠮᠳᠠᠭᠤᠷ 《ᠪᠥᠷᠲᠡ ᠪᠥᠷᠲᠡ》ᠭᠡᠵᠦ ᠳᠠᠭᠤᠳᠠᠨ ᠡᠷᠢᠵᠦ ᠶᠠᠪᠤᠲᠠᠯᠠ᠂ ᠳᠦᠷᠪᠡᠵᠦ ᠶᠠᠪᠤᠭᠠ ᠢᠷᠭᠡᠨ ᠦ᠌ ᠳᠣᠲᠣᠷᠠ ᠪᠠᠢᠭᠰᠠᠨ ᠪᠥᠷᠲᠡ ᠦᠵᠢᠨ ᠲᠡᠮᠦᠵᠢᠨ ᠦ᠌ ᠳᠠᠭᠤ ᠶ᠋ᠢ ᠰᠣᠨᠣᠰᠴᠤ ᠲᠠᠨᠢᠭᠠᠳ ᠲᠡᠷᠭᠡᠨ ᠡᠴᠡ ᠪᠠᠭᠤᠵᠤ ᠬᠤᠸᠠᠭᠴᠢᠨ ᠡᠮᠡᠭᠡᠨ ᠬᠣᠶᠠᠭᠤᠯᠠ ᠭᠦᠶᠦᠵᠦ ᠢᠷᠡᠭᠡᠳ᠂ ᠲᠡᠮᠦᠵᠢᠨ ᠦ᠌ ᠵᠢᠯᠣᠭᠣ ᠴᠤᠯᠪᠤᠭᠤᠷ ᠢ᠋ ᠪᠠᠷᠢᠵᠤ ᠠᠪᠪᠠ᠃ ᠲᠡᠮᠦᠵᠢᠨ ᠰᠥᠨᠢ ᠶ᠋ᠢᠨ ᠰᠠᠷᠠᠭᠤᠯ ᠳ᠋ᠤ᠌ ᠦᠵᠡᠪᠡᠯ᠂ ᠪᠥᠷᠲᠡ ᠦᠵᠢᠨ ᠮᠥᠨ ᠲᠤᠯᠠ ᠲᠡᠪᠡᠷᠢᠯᠳᠦᠨ ᠤᠴᠠᠷᠠᠪᠠ᠃ ᠲᠡᠮᠦᠵᠢᠨ ᠮᠥᠨ ᠰᠥᠨᠢ ᠲᠤᠭᠤᠷᠢᠯ ᠬᠠᠨ ᠵᠠᠮᠤᠬᠠ ᠠᠨᠳᠠ ᠬᠣᠶᠠᠷ ᠲᠤ᠌ ᠬᠥᠮᠦᠨ ᠢᠯᠡᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠨᠢ᠄ 《ᠡᠷᠢᠭᠰᠡᠨ ᠬᠥᠮᠦᠨ ᠢ᠋ᠶ᠋ᠡᠨ ᠣᠯᠤᠭᠰᠠᠨ ᠲᠤᠯᠠ ᠡᠨᠡ ᠰᠥᠨᠢ ᠳᠣᠪᠲᠣᠯᠬᠤ ᠪᠠᠨ ᠵᠣᠭᠰᠣᠵᠤ ᠡᠨᠳᠡ ᠪᠠᠭᠤᠶᠠ》ᠭᠡᠪᠡ᠃ ᠳᠦᠷᠪᠡᠵᠦ ᠶᠠᠪᠤᠭᠰᠠᠨ ᠮᠡᠷᠭᠢᠳ ᠦ᠋ᠳ ᠮᠥᠨ ᠰᠥᠨᠢ ᠬᠠᠮᠢᠭᠠ ᠪᠠᠨ ᠬᠦᠷᠦᠭᠰᠡᠨ᠂ ᠲᠡᠷᠡ ᠭᠠᠵᠠᠷ ᠢ᠋ᠶ᠋ᠠᠨ ᠪᠠᠭᠤᠵᠤ ᠬᠣᠨᠣᠪᠠ᠃ ᠪᠥᠷᠲᠡ ᠦᠵᠢᠨ ᠮᠡᠷᠭᠡᠳ ᠦ᠋ᠨ ᠭᠠᠷ ᠠ᠋ᠴᠠ ᠭᠠᠷᠴᠤ ᠲᠡᠮᠦᠵᠢᠨ ᠲᠡᠢ ᠠᠭᠣᠯᠵᠠᠭᠰᠠ ᠶᠣᠰᠣ ᠡᠢᠮᠦ ᠪᠥᠯᠥᠭᠡ᠃
111᠂ ᠤᠷᠢᠳᠤ ᠣᠳᠦᠢ᠌ᠳ ᠮᠡᠷᠭᠢᠳ ᠦ᠋ᠨ ᠲᠣᠭᠲᠠᠭᠠ ᠪᠡᠬᠢ᠂ ᠤᠸᠠᠰ (ᠬᠤᠸᠠ)ᠮᠡᠷᠭᠡᠳ ᠦ᠋ᠨ ᠲᠠᠢᠷ ᠤᠰᠤᠨ᠂ ᠬᠠᠭᠠᠳ ᠮᠡᠷᠭᠡᠳ ᠦ᠋ᠨ ᠬᠠᠭᠠᠳᠠᠢ ᠲᠡᠷᠡᠮᠡᠯᠡ ᠭᠤᠷᠪᠠᠭᠤᠯᠠ ᠭᠤᠷᠪᠠᠨ ᠵᠠᠭᠤᠨ ᠬᠥᠮᠦᠨ ᠢ᠋ ᠳᠠᠭᠠᠭᠤᠯᠵᠤ ᠲᠣᠭᠲᠠᠭᠠ ᠪᠡᠬᠢ ᠶ᠋ᠢᠨ ᠳᠡᠭᠦᠦ ᠶᠡᠬᠡ ᠴᠢᠯᠡᠳᠦ ᠶ᠋ᠢᠨ ᠭᠡᠷᠭᠡᠢ ᠥᠭᠡᠯᠦᠨ ᠢ᠋ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠤ᠌ ᠪᠤᠯᠢᠶᠠᠭᠳᠠᠭᠰᠠᠨ ᠤ᠋ ᠥᠰᠢᠶᠡ ᠶ᠋ᠢ ᠠᠪᠤᠨᠠ ᠭᠡᠵᠦ ᠲᠡᠷᠡ ᠨᠢᠭᠡ ᠥᠷᠯᠥᠭᠡ ᠮᠣᠷᠳᠠᠭᠰᠠᠨ ᠪᠢᠯᠡ᠃ ᠲᠡᠷᠡ ᠴᠠᠭ ᠲᠤ᠌ ᠲᠡᠮᠦᠵᠢᠨ ᠢ᠋ ᠪᠤᠷᠬᠠᠨ ᠬᠠᠯᠳᠤᠨ ᠳ᠋ᠤ᠌ ᠳᠤᠲᠠᠭᠠᠯᠭᠠᠵᠤ ᠭᠤᠷᠪᠠ ᠳᠠᠬᠢᠨ ᠲᠣᠭᠣᠷᠢᠵᠤ ᠨᠡᠩᠵᠢᠭᠡᠳ ᠲᠡᠮᠦᠵᠢᠨ ᠢ᠋ ᠣᠯᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠪᠥᠷᠲᠡ ᠦᠵᠢᠨ ᠢ᠋ ᠪᠠᠷᠢᠨ ᠠᠪᠴᠤ ᠴᠢᠯᠡᠳᠦ ᠶ᠋ᠢᠨ ᠳᠡᠭᠦᠦ ᠴᠢᠯᠡᠬᠡᠷ ᠪᠥᠬᠡ ᠳ᠋ᠦ᠍ ᠥᠭᠴᠦ ᠠᠰᠠᠷᠠᠭᠤᠯᠤᠭᠰᠠᠨ ᠠᠵᠠᠢ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠪᠥᠷᠲᠡ ᠥᠵᠢᠨ ᠴᠢᠯᠡᠬᠡᠷ ᠪᠥᠬᠡ ᠶ᠋ᠢᠨ ᠭᠡᠷ ᠲᠦ᠍ ᠪᠠᠢᠭᠰᠠᠭᠠᠷ ᠪᠢᠯᠡ᠂ ᠣᠳᠣ ᠴᠢᠯᠡᠬᠡᠷ ᠪᠥᠬᠡ ᠳᠤᠲᠠᠭᠠᠵᠤ ᠭᠠᠷᠤᠭᠠᠳ ᠭᠡᠮᠰᠢᠵᠦ ᠥᠭᠦᠯᠡᠷᠦᠨ᠄
《ᠬᠠᠷᠠ ᠮᠠᠭᠤ ᠬᠡᠷᠢᠶᠡ ᠬᠠᠯᠢᠰᠤ ᠬᠣᠯᠲᠣᠰᠣ ᠢᠳᠡᠬᠦ ᠵᠠᠶᠠᠭᠠ ᠲᠠᠢ ᠪᠠᠢᠲᠠᠯᠠ ᠬᠠᠷᠠᠯᠠᠭ ᠭᠠᠯᠠᠭᠤ ᠶ᠋ᠢ ᠢᠳᠡᠬᠦ ᠪᠡᠷ ᠬᠠᠯᠳᠠᠨ ᠲᠡᠮᠡᠴᠡᠬᠦ ᠮᠡᠲᠦ᠂ ᠬᠠᠷᠢᠭᠤ ᠦᠭᠡᠢ ᠮᠠᠭᠤ ᠴᠢᠯᠡᠬᠡᠷ ᠪᠢ ᠬᠠᠷᠢᠨ ᠶᠡᠬᠡ ᠶ᠋ᠢ ᠰᠠᠨᠠᠵᠤ ᠬᠠᠲᠤᠨ ᠦᠵᠢᠨ ᠳ᠋ᠦ᠍ ᠬᠠᠯᠳᠠᠵᠤ ᠬᠠᠮᠤᠭ ᠮᠡᠷᠭᠡᠳ ᠢᠷᠭᠡᠨ ᠢ᠋ ᠬᠠᠴᠢᠯᠠᠭᠳᠠᠬᠤ ᠠᠶᠤᠯ ᠳ᠋ᠤ᠌ ᠤᠴᠠᠷᠠᠭᠤᠯᠵᠤ ᠬᠠᠯᠠᠬᠤ ᠨᠥᠮᠥᠷᠢ ᠦᠭᠡᠢ ᠪᠣᠯᠵᠤ ᠬᠠᠷᠠᠩᠭᠤᠢ ᠰᠥᠨᠢ ᠵᠢᠭᠤᠲᠠᠨ ᠭᠠᠷᠴᠤ ᠬᠠᠳᠠᠨ ᠤ᠋ ᠬᠠᠪᠴᠢᠯ ᠳ᠋ᠤ᠌ ᠬᠣᠷᠭᠣᠳᠠᠨ ᠬᠠᠢᠷᠠᠨ ᠠᠮᠢ ᠪᠠᠨ ᠭᠡᠭᠡᠵᠦ ᠬᠠᠷᠠ ᠲᠣᠯᠣᠭᠠᠢ ᠪᠠᠨ ᠠᠯᠳᠠᠬᠤ ᠪᠣᠯᠪᠠ ᠬᠣᠯᠠ ᠳ᠋ᠤ᠌ ᠮᠠᠭᠤ ᠰᠢᠪᠠᠭᠤ ᠬᠤᠯᠤᠭᠠᠨᠠ ᠣᠬᠣᠳᠠᠨᠠ ᠢᠳᠡᠬᠦ ᠵᠠᠶᠠᠭᠠᠲᠠᠢ ᠪᠠᠢᠲᠠᠯᠠ ᠬᠤᠨ ᠭᠠᠯᠠᠭᠤ ᠢᠳᠡᠶᠡ ᠭᠡᠵᠦ ᠬᠣᠰᠢᠭᠤ ᠪᠠᠨ ᠪᠢᠯᠡᠭᠦᠳᠡᠬᠦ ᠮᠡᠲᠦ ᠬᠤᠪᠠᠬᠠᠢ ᠮᠠᠭᠤ ᠴᠢᠯᠡᠬᠡᠷ ᠪᠢ ᠬᠤᠲᠤᠭᠲᠤ ᠦᠵᠢᠨ ᠬᠠᠲᠤᠨ ᠢ᠋ ᠬᠤᠪᠢᠯᠠᠨ ᠠᠪᠴᠤ ᠢᠷᠡᠭᠡᠳ ᠬᠣᠲᠠᠯᠠ ᠣᠯᠠᠨ ᠮᠡᠷᠭᠡᠳ ᠲᠦ᠍ ᠬᠣᠣᠷ ᠬᠥᠨᠥᠭᠡᠯ ᠪᠣᠯᠭᠠᠪᠠ᠃ ᠬᠣᠬᠢᠷ ᠮᠠᠭᠤ ᠴᠢᠯᠡᠬᠡᠷ ᠪᠢ ᠬᠣᠬᠢᠮᠠᠢ ᠮᠠᠭᠤ ᠲᠣᠯᠣᠭᠠᠢ ᠪᠠᠨ ᠬᠣᠷᠭᠣᠳᠣᠬᠣ ᠭᠠᠵᠠᠷ ᠦᠭᠡᠢ ᠪᠣᠯᠪᠠ ᠬᠣᠷᠭᠣᠣᠯ ᠤ᠋ᠨ ᠲᠡᠳᠦᠢ ᠠᠮᠢ ᠪᠠᠨ ᠠᠷᠴᠢᠯᠠᠬᠣ ᠭᠠᠵᠠᠷ ᠦᠭᠡᠢ ᠪᠣᠯᠪᠠ ᠬᠠᠷᠠᠩᠭᠤᠢ ᠬᠠᠪᠴᠢᠯ ᠳ᠋ᠤ᠌ ᠰᠢᠷᠭᠤᠬᠤ ᠤᠤ ᠬᠠᠳᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠣᠷᠣᠬᠤ ᠤᠤ ᠬᠠᠮᠢᠭᠠ ᠣᠴᠢᠬᠤ ᠪᠢᠯᠡ?》 ᠭᠡᠳ ᠳᠤᠲᠠᠭᠠᠭᠰᠠᠨ ᠠᠵᠢ᠃
112᠂ ᠬᠠᠭᠠᠳᠠᠢ ᠲᠡᠷᠡᠮᠡᠯᠡ ᠶ᠋ᠢ ᠪᠠᠷᠢᠨ ᠠᠪᠴᠢᠷᠠᠵᠤ᠂ ᠬᠠᠪᠲᠠᠰᠤᠨ ᠳᠥᠩᠭᠡ ᠡᠮᠦᠰᠬᠡᠵᠦ ᠬᠠᠯᠳᠤᠨ ᠠᠭᠤᠯᠠᠨ ᠳ᠋ᠤ᠌ ᠶᠠᠪᠤᠭᠤᠯᠪᠠ᠃ ᠪᠡᠯᠭᠦᠳᠡᠢ ᠶ᠋ᠢᠨ ᠡᠬᠡ ᠲᠡᠷᠡ ᠠᠢᠯ ᠳ᠋ᠤ᠌ ᠪᠣᠢ ᠭᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠪᠡᠯᠭᠦᠳᠡᠢ ᠡᠬᠡ ᠪᠡᠨ ᠠᠪᠤᠶᠠ ᠭᠡᠵᠦ ᠣᠴᠢᠭᠠᠳ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠡᠭᠦᠳᠡ ᠪᠡᠷ ᠣᠷᠣᠪᠠᠯ ᠲᠡᠭᠦᠨ ᠦ᠌ ᠡᠬᠡ ᠨᠠᠪᠲᠠᠷᠬᠠᠢ ᠨᠡᠬᠡᠢ ᠳᠡᠪᠡᠯ ᠲᠡᠢ ᠪᠥᠭᠡᠳ ᠭᠡᠷ ᠦ᠋ᠨ ᠵᠡᠭᠦᠨ ᠡᠭᠦᠳᠡ ᠪᠡᠷ ᠭᠠᠷᠴᠤ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠥᠭᠦᠯᠡᠷᠦᠨ᠄
《ᠬᠠᠢᠷᠠᠲᠤ ᠬᠥᠪᠡᠭᠦᠳ ᠮᠢᠨᠢ ᠬᠠᠭᠠᠳ ᠤ᠋ᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠴᠦ ᠪᠠᠢᠲᠠᠯᠠ ᠬᠠᠷᠢᠨ ᠪᠢ ᠡᠨᠳᠡ ᠬᠠᠷᠠᠴᠤ ᠮᠠᠭᠤ ᠬᠥᠮᠦᠨ ᠳ᠋ᠦ᠍ ᠬᠠᠷᠢᠶᠠᠯᠠᠭᠳᠠᠵᠤ ᠶᠠᠪᠤᠨᠠ ᠬᠠᠨ ᠬᠥᠪᠡᠭᠦᠳ ᠦ᠋ᠨ ᠨᠢᠭᠤᠷ ᠢ᠋ ᠬᠠᠷᠠᠵᠤ ᠶᠠᠭᠠᠬᠢᠨ ᠦᠵᠡᠬᠦ ᠪᠢᠯᠡ?》ᠭᠡᠳ ᠭᠦᠨ ᠰᠢᠭᠤᠢ ᠳ᠋ᠤ᠌ ᠭᠦᠶᠦᠵᠦ ᠣᠷᠣᠭᠰᠠᠨ ᠳ᠋ᠤ᠌ ᠬᠣᠢᠨᠠ ᠠ᠋ᠴᠠ ᠨᠢ ᠨᠡᠬᠡᠵᠦ ᠡᠷᠢᠭᠡᠳ ᠣᠯᠤᠭᠰᠠᠨ ᠦᠭᠡᠢ᠂ ᠡᠭᠦᠨ ᠳ᠋ᠦ᠍ ᠪᠡᠯᠭᠦᠳᠡᠢ ᠨᠣᠶᠠᠨ᠂ ᠮᠡᠷᠭᠢᠳ ᠣᠪᠣᠭ ᠤ᠋ᠨ ᠬᠥᠮᠦᠨ ᠢ᠋ ᠦᠵᠡᠪᠡᠯ 《ᠡᠬᠡ ᠶ᠋ᠢ ᠮᠢᠨᠢ ᠠᠪᠴᠢᠷᠠ》ᠭᠡᠵᠦ ᠬᠠᠷᠪᠤᠬᠤ ᠪᠢᠯᠡ᠃ ᠪᠤᠷᠬᠠᠨ ᠬᠠᠯᠳᠤᠨ ᠳ᠋ᠤ᠌ ᠲᠡᠮᠦᠵᠢᠨ ᠨᠠᠷ ᠢ᠋ ᠳᠣᠪᠲᠣᠯᠤᠭᠰᠠᠨ ᠭᠤᠷᠪᠠᠨ ᠵᠠᠭᠤᠨ ᠮᠡᠷᠭᠡᠳ ᠢ᠋ ᠦᠷᠡ ᠶ᠋ᠢᠨ ᠦᠷᠡ ᠶ᠋ᠢ ᠬᠦᠷᠲᠡᠯᠡ ᠦᠨᠡᠰᠦ ᠶ᠋ᠢ ᠬᠡᠢᠰᠲᠡᠯᠡ ᠬᠢᠳᠤᠵᠤ ᠦᠯᠡᠳᠡᠭᠰᠡᠨ ᠡᠮᠡ ᠬᠡᠦᠬᠡᠳ ᠢ᠋ ᠡᠬᠥᠳᠡᠨᠡ ᠵᠠᠷᠤᠴᠠ ᠪᠣᠯᠭᠠᠵᠤ ᠦᠵᠡᠰᠬᠦᠯᠡᠩ ᠰᠠᠢᠲᠠᠢ ᠵᠠᠷᠢᠮ ᠢ᠋ ᠡᠭᠦᠷᠢᠳᠡ ᠳᠣᠲᠣᠨᠣᠯᠠᠵᠤ ᠠᠪᠤᠪᠠ᠃
113᠂ ᠲᠣᠭᠣᠷᠢᠯ ᠬᠠᠨ᠂ ᠵᠠᠮᠤᠬᠠ ᠬᠣᠶᠠᠷ ᠢ᠋ ᠲᠡᠮᠦᠵᠢᠨ ᠪᠢᠰᠢᠷᠡᠨ ᠥᠭᠦᠯᠡᠷᠦᠨ᠄
《ᠡᠴᠢᠭᠡ ᠬᠠᠨ ᠲᠣᠭᠣᠷᠢᠯ ᠡᠷᠬᠢᠮ ᠠᠨᠳᠠ ᠵᠠᠮᠤᠬᠠ ᠨᠠᠷ ᠡᠪ ᠬᠦᠴᠦ ᠶ᠋ᠢ ᠨᠢᠭᠡᠳᠬᠡᠵᠦ ᠡᠷᠬᠡᠲᠦ ᠲᠡᠭᠷᠢ ᠶ᠋ᠢᠨ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠢᠪᠡᠭᠡᠯ ᠢ᠋ᠶ᠋ᠡᠷ ᠡᠷᠲᠡᠨ ᠦ᠌ ᠥᠰᠢᠶᠡᠲᠦ ᠮᠡᠷᠭᠡᠳ ᠦ᠋ᠨ ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠨᠢ ᠡᠮᠳᠠᠯᠠᠵᠣ ᠡᠷᠬᠢᠮ ᠲᠥᠷᠥᠯ ᠢ᠋ ᠨᠢ ᠰᠥᠨᠥᠭᠡᠵᠦ ᠡᠵᠡᠮᠰᠢᠬᠦ ᠭᠡᠷ ᠢ᠋ ᠨᠢ ᠬᠣᠭᠣᠰᠣᠯᠠᠵᠤ ᠡᠯᠳᠡᠪ ᠵᠦᠢᠯ ᠢ᠋ ᠨᠢ ᠣᠯᠵᠠᠯᠠᠪᠠ》ᠭᠡᠪᠡ᠃ ᠮᠡᠷᠭᠡᠳ ᠢᠷᠭᠡᠨ ᠢ᠋ ᠲᠡᠢᠨᠬᠦ ᠳᠠᠢᠯᠠᠵᠤ ᠪᠤᠴᠠᠪᠠ᠃
114᠂ ᠣᠳᠦᠢ᠌ᠳ ᠮᠡᠷᠭᠢᠳ ᠦ᠋ᠨ ᠳᠦᠷᠪᠡᠵᠦ ᠳᠤᠲᠠᠭᠠᠭᠰᠠᠨ ᠤ᠋ ᠬᠣᠢᠨᠠ ᠲᠡᠳᠡᠨ ᠢ᠋ ᠨᠤᠲᠤᠭ ᠳᠡᠭᠡᠷᠡ ᠪᠤᠯᠠᠭᠠᠨ ᠮᠠᠯᠠᠭᠠᠢ ᠲᠠᠢ᠂ ᠪᠤᠭᠤ ᠶ᠋ᠢᠨ ᠠᠷᠠᠰᠤᠨ ᠭᠤᠲᠤᠯ ᠲᠠᠢ᠂ ᠪᠤᠯᠠᠭᠠᠨ ᠬᠥᠭᠡᠮᠡᠢ ᠳᠡᠪᠡᠯ ᠲᠡᠢ᠂ ᠨᠢᠳᠦᠨ ᠳ᠋ᠡᠭᠡᠨ ᠭᠠᠯ ᠲᠠᠢ᠂ ᠨᠢᠭᠤᠷ ᠲᠠᠭᠠᠨ ᠴᠣᠭᠲᠠᠢ ᠬᠦᠴᠦ ᠭᠡᠳᠡᠭ ᠨᠡᠷᠡᠲᠡᠢ᠂ ᠲᠠᠪᠤᠨ ᠨᠠᠰᠤᠲᠠᠢ ᠬᠥᠪᠡᠭᠦᠨ ᠬᠣᠴᠣᠷᠤᠭᠰᠠᠨ ᠢ᠋ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠣᠯᠵᠤ ᠠᠪᠴᠢᠷᠠᠭᠠᠳ ᠥᠭᠡᠯᠦᠨ ᠡᠬᠡ ᠳ᠋ᠦ᠍ ᠪᠡᠯᠡᠭ ᠪᠣᠯᠭᠠᠨ ᠥᠭᠪᠡ᠃
115᠂ ᠲᠡᠮᠦᠵᠢᠨ᠂ ᠲᠤᠭᠤᠷᠢᠯ ᠬᠠᠨ ᠵᠠᠮᠤᠬᠠ ᠭᠤᠷᠪᠠᠭᠤᠯᠠ ᠨᠡᠢᠯᠡᠵᠦ ᠣᠯᠠᠨ ᠮᠡᠷᠭᠢᠳ ᠦ᠋ᠨ ᠣᠴᠣᠭᠣᠷ ᠭᠡᠷ ᠢ᠋ ᠡᠪᠳᠡᠵᠦ ᠣᠯᠢᠭᠲᠠᠢ ᠡᠮᠡᠰ ᠢ᠋ ᠨᠢ ᠣᠯᠵᠠᠯᠠᠵᠤ ᠣᠷᠬᠣᠨ ᠰᠡᠯᠡᠩᠭᠡ ᠬᠣᠶᠠᠷ ᠤ᠋ᠨ ᠣᠢ ᠲᠠᠯᠠ ᠠ᠋ᠴᠠ ᠪᠤᠴᠠᠪᠠ ᠳᠡᠯᠡᠳ ᠠᠷᠠᠯ ᠠ᠋ᠴᠠ ᠬᠥᠳᠡᠯᠵᠦ᠂ ᠲᠡᠮᠦᠵᠢᠨ᠂ ᠵᠠᠮᠤᠬᠠ ᠬᠣᠶᠠᠷ ᠬᠣᠷᠬᠣᠨᠠᠭ ᠵᠤᠪᠤᠷᠠ ᠶ᠋ᠢ ᠴᠢᠭᠯᠠᠨ ᠶᠠᠪᠤᠪᠠ᠃ ᠲᠣᠭᠣᠷᠢᠯ ᠬᠠᠨ᠂ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠬᠢᠷᠠ ᠪᠠᠷ ᠦᠬᠡᠷᠲᠦ ᠰᠢᠭᠤᠢ ᠶ᠋ᠢ ᠳᠠᠭᠠᠷᠢᠨ ᠭᠠᠴᠠᠭᠣᠷᠠᠳᠣ (ᠭᠠᠴᠠᠭᠤᠷᠠ ᠲᠠᠢ) ᠰᠦᠪᠴᠢᠳ ᠂ ᠤᠯᠢᠶᠠᠰᠤ (ᠤᠯᠢᠶᠠᠰᠤᠲᠠᠢ) ᠰᠦᠪᠴᠢᠳ ᠭᠡᠳᠡᠭ ᠭᠠᠵᠠᠷ ᠢ᠋ ᠳᠠᠭᠠᠷᠢᠵᠤ᠂ ᠠᠩ ᠬᠦᠷᠦᠭᠡ ᠬᠢᠭᠰᠡᠭᠡᠷ ᠲᠤᠤᠯᠠ ᠭᠣᠣᠯ ᠤ᠋ᠨ ᠬᠠᠷᠠ ᠰᠢᠭᠤᠢ ᠳ᠋ᠤ᠌ ᠪᠤᠴᠠᠵᠤ ᠬᠠᠷᠢᠪᠠ ᠃
116᠂ ᠲᠡᠮᠦᠵᠢᠨ ᠵᠠᠮᠤᠬᠠ ᠬᠣᠶᠠᠷ᠂ ᠬᠣᠷᠬᠣᠨᠠᠭ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠨᠡᠢᠯᠡᠨ ᠪᠠᠭᠤᠵᠤ᠂ ᠡᠷᠲᠡᠨ ᠦ᠌ ᠠᠨᠳᠠ ᠪᠣᠯᠤᠯᠴᠠᠭᠰᠠᠨ ᠢ᠋ᠶ᠋ᠠᠨ ᠳᠤᠷᠠᠳᠴᠤ ᠤᠯᠠᠮ ᠳᠣᠲᠣᠨᠣ ᠪᠣᠯᠵᠤ ᠨᠠᠢᠷᠠᠯᠳᠤᠶᠠ ᠭᠡᠯᠴᠡᠪᠡ᠃ ᠠᠩᠬᠠ ᠤᠷᠢᠳᠤ ᠠᠨᠳᠠ ᠪᠣᠯᠤᠯᠴᠠᠬᠤ ᠳ᠋ᠤ᠌ ᠲᠡᠮᠦᠵᠢᠨ ᠠᠷᠪᠠᠨ ᠨᠢᠭᠡᠨ ᠨᠠᠰᠤᠲᠠᠢ ᠪᠠᠢᠭᠰᠠᠨ ᠪᠢᠯᠡ᠃ ᠲᠡᠷᠡ ᠴᠠᠭ ᠲᠤ᠌ ᠵᠠᠮᠤᠬᠠ ᠨᠢᠭᠡᠨ ᠭᠤᠷᠠ ᠶ᠋ᠢᠨ ᠱᠠᠭᠠ ᠶ᠋ᠢ ᠲᠡᠮᠦᠵᠢᠨ ᠳ᠋ᠦ᠍ ᠥᠭᠴᠦ᠂ ᠲᠡᠮᠦᠵᠢᠨ ᠨᠢᠭᠡᠨ ᠴᠢᠳᠬᠤᠮᠠᠯ ᠱᠠᠭᠠ ᠶ᠋ᠢ ᠵᠠᠮᠤᠬᠠ ᠳ᠋ᠤ᠌ ᠥᠭᠴᠦ᠂ ᠤᠨᠤᠨ ᠤ᠋ ᠮᠥᠰᠥᠨ ᠳᠡᠭᠡᠷᠡ ᠱᠠᠭᠠᠯᠴᠠᠨ ᠨᠠᠭᠠᠳᠣᠵᠣ ᠠᠨᠳᠠ ᠪᠣᠯᠤᠯᠴᠠᠭᠰᠠᠨ ᠪᠢᠯᠡ᠃ ᠲᠡᠭᠦᠨ ᠦ᠌ ᠬᠣᠢᠲᠤ ᠬᠠᠪᠤᠷ ᠠᠯᠠᠩᠭᠢᠷ ᠨᠤᠮᠤ ᠪᠠᠷ ᠬᠠᠷᠪᠤᠵᠤ ᠪᠠᠢᠬᠤ ᠳ᠋ᠤ᠌᠂ ᠵᠠᠮᠤᠬᠠ ᠪᠢᠷᠠᠭᠤᠨ ᠤ᠋ ᠬᠣᠶᠠᠷ ᠡᠪᠡᠷ ᠢ᠋ ᠨᠠᠭᠠᠵᠤ ᠨᠦᠬᠡᠯᠡᠵᠦ ᠬᠢᠭᠰᠡᠨ ᠳᠠᠭᠤᠲᠤ ᠰᠤᠮᠤ ᠪᠠᠨ ᠲᠡᠮᠦᠵᠢᠨ ᠳ᠋ᠦ᠍ ᠥᠭᠴᠦ᠂ ᠲᠡᠮᠦᠵᠢᠨ ᠠᠷᠴᠠ ᠮᠣᠳᠣᠨ ᠭᠣᠳᠣᠯᠢ (ᠪᠣᠯᠴᠤᠤ) ᠪᠠᠨ ᠵᠠᠮᠤᠬᠠ ᠳ᠋ᠤ᠌ ᠥᠭᠴᠦ ᠠᠨᠳᠠ ᠪᠣᠯᠤᠯᠴᠠᠪᠠ᠃ ᠬᠣᠶᠠᠷ ᠤᠳᠠᠭᠠ ᠠᠨᠳᠠ ᠪᠣᠯᠤᠯᠴᠠᠭᠰᠠᠨ ᠶᠣᠰᠣ ᠡᠢᠮᠦ ᠪᠢᠯᠡ᠃
117᠂ ᠠᠬᠠᠰ ᠳᠡᠭᠡᠳᠦᠰ ᠦ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠪᠠᠯ ᠠᠯᠢᠪᠠ ᠬᠥᠮᠦᠨ ᠬᠠᠷᠢᠯᠴᠠᠨ ᠠᠨᠳᠠ ᠨᠥᠬᠥᠷ ᠪᠣᠯᠤᠯᠴᠠᠪᠠᠯ ᠠᠮᠢ ᠪᠡᠶᠡ ᠳ᠋ᠡᠭᠡᠨ ᠠᠷᠠᠴᠢ ᠪᠣᠯᠵᠤ ᠠᠯᠢ ᠠᠯᠢᠨ ᠳ᠋ᠠᠭᠠᠨ ᠲᠦᠰᠢᠭ ᠪᠣᠯᠵᠤ ᠠᠮᠠᠷᠠᠭᠯᠠᠨ ᠬᠠᠨᠢᠯᠠᠬᠤ ᠶᠣᠰᠣᠲᠠᠢ ᠣᠳᠣ ᠪᠢᠳᠡ ᠠᠮᠠᠷᠠᠭᠯᠠᠨ ᠶᠠᠪᠤᠶᠠ ᠭᠡᠵᠦ ᠲᠡᠮᠦᠵᠢᠨ᠂ ᠮᠡᠷᠭᠢᠳ ᠦ᠋ᠨ ᠲᠣᠭᠲᠠᠭᠠ ᠠ᠋ᠴᠠ ᠣᠯᠵᠠᠯᠠᠵᠤ ᠠᠪᠤᠭᠰᠠᠨ ᠠᠯᠲᠠᠨ ᠪᠦᠰᠡ ᠪᠡᠨ ᠵᠠᠮᠤᠬᠠ ᠠᠨᠳᠠ ᠳ᠋ᠤ᠌ ᠪᠦᠰᠡᠯᠡᠭᠦᠯᠵᠦ᠂ ᠲᠣᠭᠲᠠᠭᠠ ᠶ᠋ᠢᠨ ᠡᠰᠬᠡᠯ (ᠡᠷᠡᠮᠡᠭ ᠪᠤᠶᠤ ᠠᠭᠰᠤᠮ ) ᠬᠠᠯᠢᠭᠤᠨ ᠢ᠋ ᠵᠠᠮᠤᠬᠠ ᠠᠨᠳᠠ ᠳ᠋ᠤ᠌ ᠤᠨᠤᠭᠤᠯᠪᠠ᠃ ᠵᠠᠮᠤᠬᠠ ᠬᠠᠷᠢᠭᠤ ᠳ᠋ᠤ᠌ ᠨᠢ ᠣᠧᠨᠰ ᠮᠡᠷᠭᠢᠳ ᠦ᠋ᠨ ᠲᠠᠢᠷ ᠤᠰᠤᠨ ᠠ᠋ᠴᠠ ᠣᠯᠵᠠᠯᠠᠵᠤ ᠠᠪᠤᠭᠰᠠᠨ ᠠᠯᠲᠠᠨ ᠪᠦᠰᠡ ᠪᠡᠨ ᠲᠡᠮᠦᠵᠢᠨ ᠳ᠋ᠦ᠍ ᠪᠦᠰᠡᠯᠡᠭᠦᠯᠵᠦ᠂ ᠮᠥᠨ ᠲᠡᠢᠷ ᠤᠰᠤᠨ ᠤ᠋ ᠡᠪᠡᠷᠲᠦ ᠢᠰᠢᠭᠡᠨ ᠴᠠᠭᠠᠨ ᠮᠣᠷᠢ ᠶ᠋ᠢ ᠲᠡᠮᠦᠵᠢᠨ ᠳ᠋ᠦ᠍ ᠤᠨᠤᠭᠤᠯᠪᠠ᠃
ᠡᠢᠨᠬᠦ ᠠᠨᠳᠠ ᠪᠣᠯᠤᠯᠴᠠᠵᠤ ᠬᠣᠷᠬᠣᠨᠠᠭ ᠵᠤᠪᠤᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠬᠣᠯᠳᠠᠭᠠᠷ ᠬᠤᠨ ᠤ᠋ ᠥᠪᠥᠷ ᠲᠦ᠍ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠳᠣᠣᠷᠠ ᠰᠠᠢᠬᠠᠨ ᠬᠤᠷᠢᠮ ᠦᠢᠯᠡᠳᠴᠦ ᠰᠠᠢᠲᠤᠷ ᠪᠥᠵᠢᠭᠯᠡᠨ ᠵᠢᠷᠭᠠᠵᠤ ᠰᠠᠨᠠᠭᠠ ᠰᠡᠳᠬᠢᠯ ᠨᠢᠭᠡᠳᠴᠦ ᠰᠠᠢᠨ ᠨᠥᠬᠥᠳ ᠪᠣᠯᠤᠭᠠᠳ ᠰᠥᠨᠢ ᠨᠢᠭᠡᠨ ᠬᠥᠨᠵᠢᠯᠡ ᠳ᠋ᠦ᠍ ᠣᠷᠣᠵᠤ ᠬᠣᠨᠣᠬᠤ ᠪᠥᠯᠥᠭᠡ᠃
118᠂ ᠲᠡᠮᠦᠵᠢᠨ ᠵᠠᠮᠤᠬᠠ ᠬᠣᠶᠠᠷ ᠢᠨᠠᠭ ᠨᠠᠢᠷᠲᠠᠢ ᠪᠠᠢᠵᠤ᠂ ᠨᠢᠭᠡᠨ ᠵᠢᠯ ᠬᠠᠭᠠᠰ ᠬᠠᠮᠲᠤ ᠰᠠᠭᠤᠵᠤ᠂ ᠨᠢᠭᠡᠨ ᠡᠳᠦᠷ ᠲᠡᠷᠡ ᠨᠤᠲᠤᠭ ᠠ᠋ᠴᠠ ᠨᠡᠭᠦᠶᠡ ᠭᠡᠯᠴᠡᠵᠦ᠂ ᠵᠤᠨ ᠤ᠋ ᠲᠡᠷᠢᠭᠦᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠤ᠋ ᠤᠯᠠᠭᠠᠨ ᠲᠡᠷᠭᠡᠯ (ᠲᠥᠭᠥᠷᠢᠭ) ᠰᠠᠷᠠ ᠲᠠᠢ ᠡᠳᠦᠷ ᠨᠡᠭᠦᠪᠡ᠃ ᠲᠡᠮᠦᠵᠢᠨ ᠵᠠᠮᠤᠬᠠ ᠬᠣᠶᠠᠷ᠂ ᠲᠡᠷᠭᠡ ᠨᠣᠭᠦᠳ ᠦ᠋ᠨ ᠤᠷᠢᠳᠤ ᠶᠠᠪᠤᠵᠤ ᠪᠠᠢᠲᠠᠯᠠ ᠵᠠᠮᠤᠬᠠ ᠥᠭᠦᠯᠡᠷᠦᠨ᠄
《ᠲᠡᠮᠦᠵᠢᠨ ᠠᠨᠳᠠ ᠠ᠋! ᠠᠭᠤᠯᠠᠨ ᠳ᠋ᠤ᠌ ᠰᠢᠬᠠᠨ ᠪᠠᠭᠤᠶᠠ᠂ ᠠᠳᠤᠭᠤᠴᠢᠨ ᠳ᠋ᠤ᠌ ᠭᠡᠷ ᠪᠣᠯᠲᠤᠭᠠᠢ! (ᠠᠢ ᠵᠥᠪ ᠤᠤ) ᠭᠣᠣᠯ ᠳ᠋ᠤ᠌ ᠰᠢᠬᠠᠨ ᠪᠠᠭᠤᠶᠠ ᠬᠣᠨᠢᠴᠢᠨ ᠬᠤᠷᠠᠭᠠᠴᠢᠨ ᠨᠠᠷ ᠲᠤ᠌ ᠬᠣᠭᠣᠯᠠ ᠪᠣᠯᠲᠤᠭᠠᠢ! (ᠬᠣᠷᠢᠭ ᠦᠭᠡᠢ ᠪᠢᠰᠢ ᠤᠤ) (ᠬᠠᠭᠠᠰ ᠨᠢ ᠠᠳᠤᠭᠤᠨ ᠤ᠋ ᠪᠡᠯᠴᠢᠭᠡᠷ ᠢ᠋ ᠲᠠᠲᠠᠵᠤ ᠠᠭᠤᠯᠠᠨ ᠳ᠋ᠤ᠌ ᠪᠠᠭᠤᠶᠠ ᠂ ᠬᠠᠭᠠᠰ ᠨᠢ ᠬᠣᠨᠢᠨ ᠪᠡᠯᠴᠢᠭᠡᠷ ᠢ᠋ ᠲᠠᠲᠠᠵᠤ ᠭᠣᠣᠯ ᠳ᠋ᠤ᠌ ᠪᠠᠭᠤᠶᠠ ᠭᠡᠰᠡᠨ ᠦᠭᠡ ᠪᠣᠯᠤᠯᠲᠠᠢ)᠂ ᠲᠡᠮᠦᠵᠢᠨ᠂ ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠦᠭᠡ ᠶ᠋ᠢ ᠤᠬᠠᠨ ᠶᠠᠳᠠᠵᠤ ᠬᠠᠷᠢᠭᠤ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ ᠬᠣᠴᠣᠷᠤᠭᠠᠳ ᠨᠡᠭᠦᠳᠡᠯ ᠦ᠋ᠨ ᠲᠡᠷᠭᠡ ᠶ᠋ᠢ ᠬᠦᠯᠢᠶᠡᠵᠦ ᠥᠭᠡᠯᠦᠨ ᠡᠬᠡ ᠳ᠋ᠦ᠍ ᠥᠭᠦᠯᠡᠷᠦᠨ᠄
《ᠵᠠᠮᠤᠬᠠ ᠠᠨᠳᠠ ᠨᠠᠳᠠᠳᠤ ᠬᠡᠯᠡᠪᠡ᠄ ᠠᠭᠤᠯᠠᠨ ᠳ᠋ᠤ᠌ ᠰᠢᠬᠠᠨ ᠪᠠᠭᠤᠶᠠ ᠠᠳᠤᠭᠤᠴᠢᠨ ᠳ᠋ᠤ᠌ ᠭᠡᠷ ᠪᠣᠯᠲᠤᠭᠠᠢ! ᠡᠶᠡ ᠵᠥᠪ ᠤᠤ? ᠭᠣᠣᠯ ᠳ᠋ᠤ᠌ ᠰᠢᠬᠠᠨ ᠪᠠᠭᠤᠶᠠ
ᠬᠣᠨᠢᠴᠢᠨ ᠬᠤᠷᠠᠭᠠᠴᠢᠨ ᠨᠠᠷ ᠲᠤ᠌ ᠬᠣᠭᠣᠯᠠ ᠪᠣᠯᠲᠤᠭᠠᠢ! ᠬᠣᠷᠢᠭ ᠦᠭᠡᠢ ᠪᠢᠰᠢ ᠤᠤ? ᠭᠡᠵᠦ ᠥᠭᠦᠯᠡᠪᠡ᠂ ᠪᠢ ᠡᠨᠡ ᠦᠭᠡ ᠶ᠋ᠢ ᠤᠬᠠᠨ ᠶᠠᠳᠠᠵᠤ ᠬᠠᠷᠢᠭᠤ ᠶᠠᠭᠤ ᠴᠤ᠌ ᠡᠰᠡ ᠬᠡᠯᠡᠪᠡ᠃ ᠡᠬᠡ ᠡᠴᠡ ᠠᠰᠠᠭᠤᠶᠠ ᠭᠡᠵᠦ ᠢᠷᠡᠪᠡ ᠪᠢ》ᠭᠡᠪᠡ᠃ ᠥᠭᠡᠯᠦᠨ ᠡᠬᠡ ᠶ᠋ᠢ ᠦᠭᠡ ᠬᠡᠯᠡᠵᠦ ᠠᠮᠵᠢᠭᠠ ᠦᠭᠡᠢ ᠪᠠᠢᠲᠠᠯᠠ᠂ ᠪᠥᠷᠲᠡ ᠥᠵᠢᠨ ᠥᠭᠦᠯᠡᠷᠦᠨ᠄ 《ᠵᠠᠮᠤᠬᠠ ᠠᠨᠳᠠ ᠠᠮᠠᠷᠬᠠᠨ ᠤᠢᠳᠳᠠᠭ ᠭᠡᠳᠡᠭ ᠪᠢᠯᠡ᠃ ᠣᠳᠣ ᠪᠢᠳᠡᠨ ᠡᠴᠡ ᠤᠢᠳᠬᠤ ᠴᠠᠭ ᠨᠢ ᠪᠣᠯᠤᠭᠰᠠᠨ ᠪᠢᠵᠡ᠂ ᠲᠤᠭᠠᠷ ᠤ᠋ᠨ (ᠰᠠᠶᠢ ᠶ᠋ᠢᠨ) ᠵᠠᠮᠤᠬᠠ ᠠᠨᠳᠠ ᠶ᠋ᠢᠨ ᠬᠡᠯᠡᠭᠰᠡᠨ ᠨᠢ ᠪᠢᠳᠡᠨ ᠢ᠋ ᠵᠢᠱ᠌ᠢᠶᠡᠯᠡᠭᠰᠡᠨ ᠦᠭᠡ ᠪᠤᠶᠤ ᠃ ᠪᠢᠳᠡ ᠪᠦᠦ ᠪᠠᠭᠤᠶᠠ ᠂ ᠡᠨᠡ ᠬᠥᠳᠡᠯᠦᠭᠰᠡᠭᠡᠷ ᠰᠢᠯᠤᠭᠤᠬᠠᠨ ᠵᠠᠮᠤᠬᠠ ᠠ᠋ᠴᠠ ᠬᠠᠭᠠᠴᠠᠵᠤ ᠰᠥᠨᠢ ᠲᠤᠵᠢ ᠶᠠᠪᠤᠶᠠ》ᠭᠡᠪᠡ᠃
119᠂ ᠪᠥᠷᠲᠡ ᠥᠵᠢᠨ ᠦ᠌ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠵᠦ ᠦᠯᠦ ᠪᠠᠭᠤᠨ ᠰᠥᠨᠢ ᠲᠤᠵᠢ ᠶᠠᠪᠤᠵᠤ ᠵᠠᠭᠤᠷᠠ ᠮᠥᠷ ᠲᠦ᠍ ᠲᠠᠢᠴᠢᠭᠤᠳ ᠢ᠋ ᠳᠠᠭᠠᠷᠢᠪᠠ᠃ ᠲᠠᠢᠴᠢᠭᠤᠳ ᠠᠶᠤᠵᠤ ᠮᠥᠨ ᠰᠥᠨᠢ ᠬᠥᠳᠡᠯᠵᠦ ᠵᠠᠮᠤᠬᠠ ᠶ᠋ᠢᠨ ᠵᠦᠭ ᠣᠳᠪᠠ᠃ ᠲᠠᠢᠴᠢᠭᠤᠳ ᠤ᠋ᠨ ᠪᠠᠰᠣᠳ ᠤ᠋ᠨ ᠨᠤᠲᠤᠭ ᠳᠡᠭᠡᠷᠡ ᠬᠥᠭᠡᠴᠦ ᠨᠡᠷᠡ ᠲᠡᠢ ᠨᠢᠭᠡᠨ ᠥᠴᠦᠬᠡᠨ ᠬᠥᠪᠡᠭᠦᠨ ᠬᠣᠴᠣᠷᠤᠭᠰᠠᠨ ᠢ᠋ ᠮᠠᠨᠠᠢᠬᠢᠨ ᠣᠯᠵᠤ ᠠᠪᠤᠭᠠᠳ ᠥᠭᠡᠯᠦᠨ ᠡᠬᠡ ᠳ᠋ᠦ᠍ ᠥᠭᠴᠦ ᠲᠡᠵᠢᠭᠡᠯᠭᠡᠪᠡ᠃
120᠂ ᠲᠡᠮᠦᠵᠢᠨ ᠨᠠᠷ ᠲᠡᠷᠡ ᠰᠥᠨᠢ ᠳᠦᠯᠢᠨ ᠶᠠᠪᠤᠵᠤ ᠡᠳᠦᠷ ᠭᠡᠢᠬᠦ ᠳ᠋ᠦ᠍ ᠦᠵᠡᠪᠡᠯ᠂ ᠵᠠᠯᠠᠢᠷ ᠠᠢᠮᠠᠭ ᠤ᠋ᠨ ᠬᠠᠴᠢᠭᠤᠨ ᠲᠣᠬᠣᠷᠠᠭᠣᠨ᠂ ᠬᠠᠷᠠᠬᠤᠢ ᠲᠣᠬᠣᠷᠠᠭᠣᠨ᠂ ᠬᠠᠷᠠᠯᠳᠠᠢ ᠲᠣᠬᠣᠷᠠᠭᠣᠨ ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ ᠰᠥᠨᠢ ᠳᠦᠯᠢᠨ ᠨᠡᠭᠦᠵᠦ ᠳᠠᠭᠠᠯᠳᠤᠨ ᠢᠷᠡᠪᠡ᠃ ᠳᠠᠷᠬᠠᠳ ᠠᠢᠮᠠᠭ ᠤ᠋ᠨ ᠬᠠᠲᠠᠭᠠᠨ᠂ ᠲᠠᠯᠳᠣᠷᠬᠠᠨ ᠠᠬᠠ ᠳᠡᠭᠦᠦ ᠲᠠᠪᠤᠭᠤᠯᠠ ᠪᠠᠰᠠ ᠮᠥᠩᠬᠡᠲᠦ ᠬᠢᠶᠠᠨ ᠤ᠋ ᠬᠥᠪᠡᠭᠦᠨ ᠥᠩᠭᠥᠷ ᠨᠠᠷ᠂ ᠴᠠᠩᠰᠢᠭᠤᠳ ᠪᠠᠶᠠᠭᠣᠳ᠂ ᠬᠠᠷᠢᠶᠠᠲᠤ ᠨᠠᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠢᠷᠡᠪᠡ᠃ ᠪᠠᠷᠤᠯᠠᠰ ᠠᠢᠮᠠᠭ ᠠ᠋ᠴᠠ ᠬᠤᠪᠢᠯᠠᠢ᠂ ᠬᠣᠢᠲᠤᠰ ᠠᠬᠠ ᠳᠡᠭᠦᠦ ᠨᠠᠷ ᠢᠷᠡᠪᠡ᠃ ᠮᠠᠩᠭ᠋ᠣᠳ ᠠᠢᠮᠠᠭ ᠠ᠋ᠴᠠ ᠵᠠᠳᠠᠢ᠂ ᠲᠤᠭᠤᠯᠬᠤ ᠴᠡᠷᠪᠢ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠢᠷᠡᠪᠡ᠃ ᠪᠣᠭᠣᠷᠴᠤ ᠶ᠋ᠢᠨ ᠳᠡᠭᠦᠦ ᠥᠭᠡᠯᠡᠨ ᠴᠡᠷᠪᠢ᠂ ᠠᠷᠤᠯᠠᠳ ᠠᠢᠮᠠᠭ ᠠ᠋ᠴᠠ ᠬᠠᠭᠠᠴᠠᠵᠤ ᠠᠬᠠ ᠪᠣᠭᠣᠷᠴᠤ ᠳ᠋ᠠᠭᠠᠨ ᠨᠡᠢᠯᠡᠵᠦ ᠢᠷᠡᠪᠡ᠃ ᠵᠠᠯᠮᠠ ᠶ᠋ᠢᠨ ᠳᠡᠭᠦᠦ ᠴᠠᠭᠣᠷᠬᠠᠨ᠂ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ᠂ ᠤᠷᠢᠶᠠᠩᠬᠠᠢ ᠠᠢᠮᠠᠭ ᠠ᠋ᠴᠠ ᠰᠠᠯᠵᠤ ᠵᠠᠯᠮᠠ ᠳ᠋ᠤ᠌ ᠨᠡᠢᠯᠡᠨ ᠢᠷᠡᠪᠡ᠃ ᠪᠠᠰᠣᠳ ᠠᠢᠮᠠᠭ ᠠ᠋ᠴᠠ ᠳᠡᠭᠡᠢ᠂ ᠬᠦᠴᠦᠭᠦᠷ ᠠᠬᠠ ᠳᠡᠭᠦᠦ ᠬᠣᠶᠠᠷ ᠢᠷᠡᠪᠡ᠃ ᠰᠥᠯᠳᠥᠰ ᠠᠢᠮᠠᠭ ᠠ᠋ᠴᠠ ᠴᠢᠯᠡᠬᠥᠳᠡᠢ ᠳᠠᠬᠢ᠂ ᠳᠠᠢᠴᠢᠭᠤᠲᠠᠢ ᠠᠬᠠ ᠳᠡᠭᠦᠦ ᠨᠠᠷ ᠢᠷᠡᠪᠡ᠃ ᠵᠠᠯᠠᠢᠷ ᠠᠢᠮᠠᠭ ᠤ᠋ᠨ ᠰᠡᠴᠡ ᠳᠣᠮᠣᠭ᠂ ᠠᠷᠬᠠᠢ ᠬᠠᠰᠠᠷ ᠪᠡᠯᠡ ᠬᠣᠶᠠᠭᠤᠯᠠ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠢᠷᠡᠪᠡ᠃ ᠬᠣᠩᠬᠣᠳᠠᠨ ᠠ᠋ᠴᠠ ᠰᠦᠬᠡᠲᠦ ᠴᠡᠷᠪᠢ ᠢᠷᠡᠪᠡ᠃ ᠰᠥᠬᠥᠭᠡᠨ ᠡᠴᠡ ᠵᠡᠬᠡᠢ᠂ ᠬᠣᠩᠳᠠᠭᠣᠷ ᠤ᠋ᠨ ᠬᠥᠪᠡᠭᠦᠨ ᠰᠥᠭᠥᠬᠡᠢ᠂ ᠵᠡᠭᠦᠨ ᠢᠷᠡᠪᠡ᠃ ᠨᠦᠬᠡᠲᠡᠢ᠂ ᠴᠠᠭᠠᠨ ᠭᠤᠸᠠ ᠢᠷᠡᠪᠡ᠃ ᠣᠯᠬᠣᠨᠣᠳ ᠠᠢᠮᠠᠭ ᠠ᠋ᠴᠠ ᠬᠢᠩᠬᠢᠶᠠᠳᠠᠢ᠂ ᠭᠣᠷᠯᠣᠰ ᠠᠢᠮᠠᠭ ᠤ᠋ᠨ ᠰᠡᠴᠢᠬᠥᠷ᠂ ᠳᠥᠷᠪᠡᠳ ᠠᠢᠮᠠᠭ ᠤ᠋ᠨ ᠮᠥᠴᠢ ᠪᠦᠳᠦᠭᠦᠨ ᠨᠠᠷ ᠢᠷᠡᠪᠡ᠃ ᠢᠬᠢᠷᠠᠰ ᠠᠢᠮᠠᠭ ᠤ᠋ᠨ ᠪᠣᠳᠣ᠂ ᠡᠨᠳᠡ ᠬᠦᠷᠭᠡᠨ ᠪᠣᠯᠵᠤ ᠪᠠᠢᠭᠰᠠᠨ ᠲᠤᠯᠠ ᠬᠠᠮᠲᠤ ᠢᠷᠡᠪᠡ᠃ ᠨᠣᠶᠠᠬᠢᠨ ᠠᠢᠮᠠᠭ ᠤ᠋ᠨ ᠵᠤᠩᠰᠣ ᠢᠷᠡᠪᠡ᠃ ᠣᠷᠣᠨᠠᠷ ᠠᠢᠮᠠᠭ ᠠ᠋ᠴᠠ ᠵᠢᠷᠭᠤᠭᠠᠨ ᠢᠷᠡᠪᠡ᠃ ᠲᠡᠭᠡᠭᠡᠳ ᠪᠠᠷᠤᠯᠠᠰ ᠠᠢᠮᠠᠭ ᠠ᠋ᠴᠠ ᠰᠣᠬᠣ ᠰᠡᠴᠡᠨ᠂ ᠬᠠᠷᠠᠴᠠᠷ ᠬᠥᠪᠡᠭᠦᠨ ᠲᠡᠢ ᠪᠡᠨ ᠢᠷᠡᠪᠡ᠃ ᠪᠠᠰᠠ ᠪᠠᠭᠠᠷᠢᠨ ᠠᠢᠮᠠᠭ ᠤ᠋ᠨ ᠬᠣᠷᠴᠢ ᠤᠰᠤᠨ ᠡᠪᠦᠭᠡᠨ᠂ ᠬᠦᠬᠡᠴᠦᠰ᠂ ᠮᠠᠨᠠᠨ ᠪᠠᠭᠠᠷᠢᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ ᠨᠢᠭᠡᠨ ᠬᠦᠷᠢᠶᠡ ᠪᠣᠯᠵᠤ ᠢᠷᠡᠪᠡ᠃
121᠂ ᠬᠣᠷᠴᠢ ᠢᠷᠡᠵᠦ ᠥᠭᠦᠯᠡᠷᠦᠨ᠄ 《ᠪᠢᠳᠡ ᠪᠣᠳᠣᠨᠴᠠᠷ ᠪᠣᠭᠳᠠ ᠶ᠋ᠢᠨ ᠪᠠᠷᠢᠵᠤ ᠠᠪᠤᠭᠰᠠᠨ ᠡᠮᠡ ᠡᠴᠡ ᠲᠥᠷᠥᠭᠰᠡᠨ ᠲᠤᠯᠠ ᠵᠠᠮᠤᠬᠠ ᠲᠠᠢ ᠬᠡᠪᠡᠯᠢ ᠨᠢᠭᠡᠲᠡᠢ᠂ ᠬᠡᠯᠬᠢᠶᠡ ᠨᠢᠭᠡᠲᠡᠢ ᠬᠥᠮᠦᠰ ᠪᠢᠯᠡ᠃ ᠡᠢᠮᠦ ᠶ᠋ᠢᠨ ᠲᠤᠯᠠ ᠵᠠᠮᠤᠬᠠ ᠠ᠋ᠴᠠ ᠬᠠᠭᠠᠴᠠᠵᠤ ᠪᠣᠯᠬᠤ ᠦᠭᠡᠢ᠃ ᠭᠡᠪᠡᠴᠦ ᠵᠠᠭᠠᠷᠢᠨ ᠲᠩᠷᠢ ᠢᠷᠡᠵᠦ ᠨᠢᠳᠦᠨ ᠳ᠋ᠦ᠍ ᠮᠢᠨᠢ ᠵᠢᠭᠠᠵᠤ ᠦᠵᠡᠭᠦᠯᠦᠭᠰᠡᠨ ᠨᠢ᠂ ᠬᠤᠸᠠᠭᠴᠢᠨ ᠦᠨᠢᠶᠡ ᠢᠷᠡᠵᠦ ᠵᠠᠮᠤᠬᠠ ᠶ᠋ᠢ ᠲᠣᠭᠣᠷᠢᠨ ᠶᠠᠪᠤᠵᠤ᠂ ᠵᠠᠮᠤᠬᠠ ᠶ᠋ᠢ ᠪᠠ ᠭᠡᠷ ᠲᠡᠷᠭᠡ ᠶ᠋ᠢ ᠨᠢ ᠮᠥᠷᠭᠥᠭᠰᠡᠭᠡᠷ ᠥᠷᠥᠭᠡᠰᠦᠨ ᠡᠪᠡᠷ ᠢ᠋ᠶ᠋ᠡᠨ ᠬᠤᠭᠤᠯᠵᠤ ᠰᠣᠯᠵᠢᠷ ᠡᠪᠡᠷᠳᠡᠢ ᠪᠣᠯᠤᠭᠠᠳ 〈ᠡᠪᠡᠷ ᠢ᠋ ᠮᠢᠨᠢ ᠥᠭ〉ᠭᠡᠵᠦ ᠵᠠᠮᠤᠬᠠ ᠶ᠋ᠢᠨ ᠵᠦᠭ ᠮᠥᠭᠡᠷᠡᠵᠦ ᠰᠢᠷᠣᠢ ᠰᠠᠵᠢᠯᠠᠨ ᠪᠠᠢᠨᠠ᠃ ᠪᠠᠰᠠ ᠨᠢᠭᠡᠨ ᠮᠤᠬᠤᠷ ᠤᠬᠠᠭᠠ ᠦᠬᠡᠷ ᠢ᠋ ᠶᠡᠬᠡ ᠭᠡᠷ ᠲᠦ᠍ ᠲᠡᠷᠭᠡᠨ ᠳ᠋ᠦ᠍ ᠬᠥᠯᠯᠡᠵᠡᠢ᠃ ᠲᠡᠷᠡ ᠦᠬᠡᠷ ᠶᠡᠬᠡ ᠲᠡᠷᠭᠡᠭᠦᠷ (ᠵᠠᠮ) ᠢ᠋ᠶ᠋ᠠᠷ ᠲᠡᠮᠦᠵᠢᠨ ᠦ᠌ ᠬᠣᠢᠨᠠ ᠠ᠋ᠴᠠ ᠵᠢᠳᠬᠦᠨ ᠶᠠᠪᠤᠵᠤ ᠮᠥᠭᠡᠷᠡᠨ ᠬᠡᠯᠡᠬᠦ ᠨᠢ ᠄ 〈ᠲᠡᠭᠷᠢ ᠭᠠᠵᠠᠷ ᠡᠶᠡᠯᠳᠡᠵᠦ(ᠵᠥᠪᠯᠡᠵᠦ ) ᠲᠡᠮᠦᠵᠢᠨ ᠤᠯᠤᠰ ᠤ᠋ᠨ ᠡᠵᠡᠨ ᠪᠣᠯᠲᠤᠭᠠᠢ ᠭᠡᠵᠦ ᠲᠡᠭᠡᠭᠡᠵᠦ ᠬᠦᠷᠭᠡᠵᠦ ᠶᠠᠪᠤᠨᠠ〉ᠭᠡᠵᠦ ᠮᠥᠭᠡᠷᠡᠨᠡ᠃ ᠡᠢᠨᠬᠦ ᠮᠢᠨᠦ ᠨᠢᠳᠦᠨ ᠳ᠋ᠦ᠍ ᠵᠠᠭᠠᠷᠢᠨ ᠲᠡᠭᠷᠢ ᠪᠡᠷ ᠵᠢᠭᠠᠵᠤ ᠦᠵᠡᠭᠦᠯᠪᠡ᠃ ᠲᠡᠮᠦᠵᠢᠨ ᠴᠢ ᠂ ᠤᠯᠤᠰ ᠤ᠋ᠨ ᠡᠵᠡᠨ ᠪᠣᠯᠪᠠᠯ ᠨᠠᠮᠠ ᠶ᠋ᠢ ᠤᠷᠢᠳᠠ ᠠ᠋ᠴᠠ ᠵᠢᠭᠠᠵᠤ ᠬᠡᠯᠡᠭᠰᠡᠨ ᠲᠤᠯᠠ ᠬᠡᠷᠬᠢᠨ ᠵᠢᠷᠭᠠᠭᠤᠯᠬᠤ ᠪᠣᠢ?》ᠭᠡᠵᠦ ᠠᠰᠠᠭᠤᠪᠠᠯ᠂ ᠲᠡᠮᠦᠵᠢᠨ ᠥᠭᠦᠯᠡᠷᠦᠨ᠄《ᠦᠨᠡᠬᠡᠷ ᠪᠢ ᠤᠯᠤᠰ ᠤ᠋ᠨ ᠡᠵᠡᠨ ᠪᠣᠯᠪᠠᠯ ᠴᠢᠮᠢ᠋ᠢ ᠲᠦᠮᠡᠨ ᠦ᠌ ᠨᠣᠶᠠᠨ ᠪᠣᠯᠭᠠᠶᠠ》ᠭᠡᠪᠡ᠃ ᠬᠣᠷᠴᠢ ᠥᠭᠦᠯᠡᠷᠦᠨ᠄ 《ᠡᠳᠦᠢ ᠶᠡᠬᠡ ᠲᠥᠷᠥ ᠶ᠋ᠢᠨ ᠦᠢᠯᠡ ᠶ᠋ᠢ ᠤᠷᠢᠳᠠ ᠠ᠋ᠴᠠ ᠵᠢᠭᠠᠭᠰᠠᠨ ᠨᠠᠮᠠ ᠶ᠋ᠢ ᠲᠦᠮᠡᠨ ᠦ᠌ ᠨᠣᠶᠠᠨ ᠪᠣᠯᠭᠠᠬᠤ ᠨᠢ ᠶᠠᠮᠠᠷ ᠵᠢᠷᠭᠠᠯᠠᠩ ᠪᠣᠢ? ᠨᠠᠮᠠ ᠶ᠋ᠢ ᠲᠦᠮᠡᠨ ᠦ᠌ ᠨᠣᠶᠠᠨ ᠪᠣᠯᠭᠠᠭᠠᠳ ᠪᠦᠬᠦ ᠤᠯᠤᠰ ᠠ᠋ᠴᠠ ᠭᠤᠸᠠ ᠰᠠᠢᠬᠠᠨ ᠥᠬᠢᠳ ᠭᠤᠴᠢ ᠶ᠋ᠢ ᠰᠢᠯᠢᠨ ᠡᠮᠡ ᠪᠣᠯᠭᠠᠬᠤ ᠡᠷᠬᠡ ᠶ᠋ᠢ ᠣᠯᠭᠣ᠂ ᠪᠠᠰᠠ ᠮᠢᠨᠦ ᠶᠠᠭᠤ ᠬᠡᠯᠡᠭᠰᠡᠨ ᠪᠦᠬᠦᠨ ᠢ᠋ ᠠᠩᠬᠠᠷᠴᠤ ᠰᠣᠨᠣᠰ!》ᠭᠡᠪᠡ᠃
122᠂ ᠬᠤᠨᠠᠨ ᠲᠡᠷᠢᠭᠦᠲᠡᠨ ᠬᠡᠨᠢᠬᠡᠰ ᠨᠢᠭᠡᠨ ᠬᠦᠷᠢᠶᠡ ᠪᠣᠯᠵᠤ᠂ ᠪᠠᠰᠠ ᠳᠠᠷᠳᠠᠢ ᠤᠳᠴᠢᠬᠢᠨ ᠨᠢᠭᠡᠨ ᠬᠦᠷᠢᠶᠡ ᠪᠣᠯᠵᠤ ᠢᠷᠡᠪᠡ᠃ ᠵᠠᠳᠠᠷᠠᠨ ᠠᠢᠮᠠᠭ ᠤ᠋ᠨ ᠮᠣᠯᠬᠠᠯᠠᠬᠣ ᠢᠷᠡᠪᠡ᠃ ᠤᠨᠵᠢᠨ ᠰᠠᠬᠠᠢᠳ ᠨᠢᠭᠡᠨ ᠬᠦᠷᠢᠶᠡ ᠪᠣᠯᠵᠤ ᠢᠷᠡᠪᠡ᠃ ᠵᠠᠮᠤᠬᠠ ᠠ᠋ᠴᠠ ᠡᠢᠨᠬᠦ ᠰᠠᠯᠵᠤ ᠬᠥᠳᠡᠯᠦᠭᠡᠳ ᠬᠢᠮᠣᠷᠭᠠ ᠭᠣᠷᠣᠬᠠ ᠶ᠋ᠢᠨ ᠠᠢᠯ ᠬᠠᠷᠭᠠᠨᠠ ᠭᠡᠳᠡᠭ ᠭᠠᠵᠠᠷ ᠬᠦᠷᠴᠦ ᠪᠠᠭᠤᠪᠠ᠃ ᠲᠡᠷᠡ ᠴᠠᠭ ᠲᠤ᠌ ᠪᠠᠰᠠ ᠵᠠᠮᠤᠬᠠ ᠠ᠋ᠴᠠ ᠰᠠᠯᠵᠤ ᠵᠤᠷᠭᠢᠨ ᠤ᠋ ᠰᠣᠷᠬᠠᠳᠣ ᠵᠤᠷᠭᠢᠨ ᠬᠥᠪᠡᠭᠦᠨ ᠰᠡᠴᠡ ᠪᠡᠬᠢ ᠲᠠᠢ᠌ᠴᠣ ᠬᠣᠶᠠᠷ ᠨᠢᠭᠡᠨ ᠬᠦᠷᠢᠶᠡ ᠪᠣᠯᠵᠤ ᠨᠡᠭᠦᠨ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ᠬᠣᠴᠣᠷ ᠪᠡᠬᠢ ᠨᠢᠭᠡᠨ ᠬᠦᠷᠢᠶᠡ ᠪᠣᠯᠵᠤ᠂ ᠬᠣᠲᠠᠯᠠ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠠᠯᠲᠠᠨ ᠤᠳᠴᠢᠬᠢᠨ ᠨᠢᠭᠡᠨ ᠬᠦᠷᠢᠶᠡ ᠪᠣᠯᠵᠤ᠂ ᠵᠠᠮᠤᠬᠠ ᠠ᠋ᠴᠠ ᠰᠠᠯᠵᠤ ᠬᠥᠳᠡᠯᠦᠭᠡᠳ ᠲᠡᠮᠦᠵᠢᠨ ᠢ᠋ ᠬᠢᠮᠣᠷᠭᠠ ᠭᠣᠷᠣᠬᠠ ᠶ᠋ᠢᠨ ᠠᠢᠯ ᠬᠠᠷᠭᠠᠨᠠ ᠳ᠋ᠤ᠌ ᠪᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠨᠡᠢᠯᠡᠨ ᠢᠷᠡᠪᠡ᠃ ᠲᠡᠮᠦᠵᠢᠨ ᠨᠠᠷ ᠲᠡᠨᠳᠡ ᠡᠴᠡ ᠨᠡᠭᠦᠵᠦ ᠬᠥᠷᠯᠡᠬᠦ ᠳᠣᠲᠣᠷᠠᠬᠢ ᠰᠠᠩᠬᠦᠷ ᠭᠣᠷᠣᠬᠠᠨ ᠤ᠋ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷ ᠲᠤ᠌ ᠣᠴᠢᠵᠤ ᠪᠠᠭᠤᠪᠠ᠃
123᠂ ᠠᠯᠲᠠᠨ᠂ ᠬᠣᠴᠣᠷ᠂ ᠰᠡᠴᠡ ᠪᠡᠬᠢ ᠪᠦᠭᠦᠳᠡᠭᠡᠷ ᠵᠥᠪᠯᠡᠯᠳᠦᠵᠦ ᠲᠡᠮᠦᠵᠢᠨ ᠳ᠋ᠦ᠍ ᠥᠭᠦᠯᠡᠷᠦᠨ᠄
《 ᠴᠢᠮᠠ ᠶ᠋ᠢ ᠬᠠᠭᠠᠨ ᠪᠣᠯᠭᠠᠶᠠ᠂ᠲᠡᠮᠦᠵᠢᠨ ᠴᠢᠮᠢ᠋ᠢ ᠬᠠᠭᠠᠨ ᠪᠣᠯᠭᠠᠵᠤ ᠪᠢᠳᠡ ᠣᠯᠠᠨ ᠲᠡᠢᠨ ᠳ᠋ᠦ᠍ ᠣᠷᠣᠢᠯᠠᠨ ᠶᠠᠪᠤᠵᠤ ᠣᠨᠴᠠ ᠭᠤᠸᠠ ᠥᠬᠢᠳ ᠢ᠋ ᠣᠯᠵᠠᠯᠠᠵᠤ ᠣᠷᠳᠣᠨ ᠰᠠᠢᠬᠠᠨ ᠭᠡᠷ ᠢ᠋ ᠠᠪᠴᠤ ᠣᠯᠠᠨ ᠤ᠋ ᠬᠠᠭᠠᠨ ᠲᠡᠮᠦᠵᠢᠨ ᠳ᠋ᠦ᠍ ᠥᠭᠭᠦᠶᠡ ᠃ᠬᠠᠷᠢ ᠶ᠋ᠢᠨ ᠢᠷᠭᠡᠨ ᠢ᠋ ᠬᠠᠯᠳᠠᠨ ᠳᠣᠪᠲᠣᠯᠵᠤ ᠬᠠᠴᠠᠷ ᠭᠤᠸᠠ ᠬᠠᠲᠤᠳ ᠢ᠋ ᠣᠯᠵᠠᠯᠠᠵᠤ ᠬᠠᠲᠠᠷᠢᠶᠠ ᠰᠠᠢᠲᠤ ᠠᠭᠲᠠ ᠶ᠋ᠢ ᠬᠥᠭᠡᠭᠡᠵᠦ ᠠᠪᠴᠢᠷᠠᠵᠤ ᠥᠭᠭᠦᠶᠡ ᠃ᠣᠷᠣᠭᠠ ᠭᠥᠷᠥᠭᠡᠰᠦ ᠶ᠋ᠢ ᠠᠪᠠᠯᠠᠬᠤ ᠴᠠᠭ ᠲᠤ᠌ ᠤᠲᠤᠵᠤ ᠣᠢᠷᠠᠲᠤᠭᠤᠯᠵᠤ ᠥᠭᠭᠦᠶᠡ ᠪᠢᠳᠡ᠃ᠣᠢ ᠶ᠋ᠢᠨ ᠭᠥᠷᠥᠭᠡᠰᠦ ᠶ᠋ᠢ ᠠᠩᠨᠠᠬᠤ ᠴᠠᠭ ᠲᠤ᠌ ᠣᠯᠵᠠ ᠭᠠᠷᠭᠠᠵᠤ ᠥᠭᠭᠦᠶᠡ ᠪᠢᠳᠡ᠃ ᠬᠡᠭᠡᠷᠡ ᠶ᠋ᠢᠨ ᠭᠥᠷᠥᠭᠡᠰᠦ ᠶ᠋ᠢ ᠭᠡᠲᠡᠵᠦ ᠠᠪᠠᠯᠠᠬᠤ ᠳ᠋ᠤ᠌ ᠬᠡᠪᠡᠯᠢ ᠶ᠋ᠢ ᠨᠢ ᠨᠡᠢᠯᠡᠲᠡᠯᠡ ᠰᠢᠬᠠᠵᠤ ᠥᠭᠭᠦᠶᠡ ᠃ᠭᠣᠣ ᠶ᠋ᠢᠨ ᠭᠥᠷᠥᠭᠡᠰᠦ ᠶ᠋ᠢ ᠠᠩᠨᠠᠬᠤ ᠴᠠᠭ ᠲᠤ᠌ ᠭᠤᠶᠠ ᠶ᠋ᠢ ᠨᠢ ᠨᠡᠢᠯᠡᠲᠡᠯᠡ ᠰᠢᠬᠠᠵᠤ ᠥᠭᠭᠦᠶᠡ ᠃ ᠬᠠᠳᠬᠤᠯᠳᠤᠬᠤ ᠲᠡᠢᠨ ᠪᠣᠯᠬᠤ ᠴᠠᠭ ᠲᠤ᠌ ᠬᠠᠨ ᠲᠡᠮᠦᠵᠢᠨ ᠴᠢᠨᠦ ᠬᠠᠲᠠᠭᠤ ᠵᠠᠷᠯᠢᠭ ᠢ᠋ ᠬᠠᠢᠬᠤᠷᠬᠤ ᠦᠭᠡᠢ ᠶᠠᠪᠤᠪᠠᠯ ᠬᠠᠲᠤᠨ ᠡᠮᠡ ᠡᠴᠡ ᠬᠠᠭᠠᠴᠠᠭᠤᠯᠤᠨ ᠰᠠᠯᠭᠠᠵᠤ ᠬᠠᠮᠤᠭ ᠶᠠᠭᠤᠮᠠ ᠶ᠋ᠢ ᠬᠠᠮᠤᠷᠤᠨ ᠠᠪᠴᠤ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢ ᠮᠢᠨᠢ ᠬᠠᠶᠠᠵᠤ ᠣᠳᠤᠭᠲᠤᠨ᠃ᠡᠨᠡᠬᠦ ᠴᠠᠭ ᠲᠤ᠌ ᠡᠵᠡᠨ ᠲᠡᠮᠦᠵᠢᠨ ᠴᠢᠨᠦ ᠡᠶᠡ ᠵᠠᠷᠯᠢᠭ ᠢ᠋ ᠡᠰᠡ ᠳᠠᠭᠠᠬᠤ ᠪᠣᠯ ᠡᠵᠡᠯᠡᠭᠰᠡᠨ ᠠᠷᠠᠳ ᠢ᠋ ᠠᠪᠴᠤ ᠡᠮᠡ ᠬᠥᠪᠡᠭᠦᠳ ᠢ᠋ ᠪᠤᠯᠢᠶᠠᠵᠤ ᠡᠨᠡ ᠪᠡᠶᠡ ᠶ᠋ᠢ ᠮᠢᠨᠢ ᠡᠵᠡᠭᠦᠢ ᠭᠠᠵᠠᠷ ᠬᠥᠭᠡᠭᠡᠵᠦ ᠣᠷᠭᠢ》ᠭᠡᠪᠡ᠃
ᠡᠢᠮᠦ ᠦᠭᠡ ᠶ᠋ᠢ ᠬᠡᠯᠡᠵᠦ᠂ ᠡᠢᠨᠬᠦ ᠠᠮᠠ ᠠᠯᠳᠠᠵᠤ᠂ ᠲᠡᠮᠦᠵᠢᠨ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠭᠡᠵᠦ ᠨᠠᠷᠠᠢ᠌ᠳᠣᠵᠣ ᠬᠠᠭᠠᠨ ᠪᠣᠯᠭᠠᠪᠠ (ᠴᠢᠩᠭᠢᠰ ᠬᠠᠭᠠᠨ ᠭᠡᠬᠦ ᠨᠢ ᠲᠠᠩᠭᠢᠰ ᠬᠠᠭᠠᠨ᠂ ᠳᠠᠯᠠᠢ ᠬᠠᠭᠠᠨ ᠭᠡᠰᠡᠨ ᠦᠭᠡ ᠪᠣᠯᠤᠯᠲᠠᠢ᠃)
124᠂ ᠴᠢᠩᠭᠢᠰ ᠬᠠᠭᠠᠨ ᠪᠣᠯᠤᠭᠠᠳ ᠪᠣᠭᠣᠷᠴᠤ ᠶ᠋ᠢᠨ ᠳᠡᠭᠦᠦ ᠥᠭᠡᠯᠡᠨ ᠴᠡᠷᠪᠢ᠂ ᠬᠠᠴᠢᠭᠤᠨ ᠲᠣᠬᠣᠷᠭᠣᠨ ᠪᠠ ᠠᠬᠠ ᠳᠡᠭᠦᠦ ᠵᠠᠳᠠᠢ᠂ ᠲᠤᠭᠤᠯᠬᠤ ᠳᠥᠷᠪᠡ ᠳ᠋ᠦ᠍ ᠬᠣᠷᠮᠣᠰᠬᠠ ᠠᠭᠰᠠᠭᠤᠯᠪᠠ᠃ ᠥᠩᠭᠥᠷ᠂ ᠰᠦᠢᠬᠡᠲᠦ ᠴᠡᠷᠪᠢ᠂ ᠬᠠᠲᠠᠭᠠᠨ ᠲᠠᠯᠳᠣᠷᠬᠠᠨ ᠭᠤᠷᠪᠠ ᠥᠭᠦᠯᠡᠷᠦᠨ᠄
《ᠥᠷᠯᠥᠭᠡ ᠶ᠋ᠢᠨ ᠵᠤᠭᠠ ᠶ᠋ᠢ ᠥᠨᠢᠳᠡ ᠣᠰᠣᠯᠳᠠᠬᠤ ᠦᠭᠡᠢ ᠦᠳᠡ ᠶ᠋ᠢᠨ ᠤᠮᠳᠠ ᠶ᠋ᠢ ᠡᠭᠦᠷᠢᠳᠡ ᠲᠠᠰᠤᠯᠳᠠᠬᠤ ᠦᠭᠡᠢ ᠭᠦᠢᠴᠡᠳᠬᠡᠵᠦ ᠪᠠᠢᠶᠠ》ᠭᠡᠰᠡᠨ ᠲᠤᠯᠠ ᠪᠠᠭᠣᠷᠢᠴᠢᠨ (ᠲᠣᠭᠣᠭᠠᠴᠢ) ᠪᠣᠯᠭᠠᠪᠠ᠃ᠳᠡᠭᠡᠢ ᠥᠭᠦᠯᠡᠷᠦᠨ᠄
《ᠠᠯᠠᠭ ᠰᠠᠢᠬᠠᠨ ᠬᠣᠨᠢᠳ ᠢ᠋ ᠠᠷᠤ ᠳᠦᠭᠦᠷᠡᠩ ᠪᠡᠯᠴᠢᠭᠡᠵᠦ ᠬᠣᠨᠢᠨ ᠣᠯᠠᠨ ᠰᠦᠷᠦᠭ ᠢ᠋ ᠬᠣᠲᠠ ᠳᠦᠭᠦᠷᠡᠩ ᠥᠰᠬᠡᠵᠦ ᠬᠣᠪᠳᠣᠭ ᠲᠥᠷᠥᠭᠰᠡᠨ ᠪᠢ ᠴᠢᠨᠢ ᠬᠣᠣᠰ ᠴᠣᠪᠳᠠᠢ ᠬᠦᠷᠲᠡᠵᠦ ᠬᠣᠰᠬᠢᠨᠠᠭ ᠮᠢᠬᠠ ᠢᠳᠡᠵᠦ ᠡᠳᠦᠷ ᠳᠣᠳᠣᠮ ᠥᠨᠵᠢᠬᠦ ᠦᠭᠡᠢ ᠬᠣᠨᠣᠭ ᠳᠣᠳᠣᠮ ᠬᠣᠵᠢᠮᠳᠠᠬᠤ ᠦᠭᠡᠢ ᠰᠢᠯᠢᠳᠡᠭ ᠢᠷᠭᠡ ᠶ᠋ᠢ ᠠᠯᠠᠵᠤ ᠰᠢᠮᠡᠲᠡᠢ ᠱᠥᠯᠥ ᠶ᠋ᠢ ᠪᠡᠯᠡᠳᠬᠡᠵᠦ ᠶᠠᠪᠤᠶᠠ》ᠭᠡᠰᠡᠨ ᠲᠤᠯᠠ ᠳᠡᠭᠡᠢ ᠪᠡᠷ ᠬᠣᠨᠢ ᠠᠳᠤᠭᠤᠯᠠᠭᠤᠯᠪᠠ᠃ ᠲᠡᠭᠦᠨ ᠦ᠌ ᠳᠡᠭᠦᠦ ᠬᠦᠴᠦᠭᠦᠷ ᠥᠭᠦᠯᠡᠷᠦᠨ᠄
《ᠴᠣᠣᠷᠭᠠᠳᠠᠢ ᠲᠡᠷᠭᠡᠨ ᠦ᠌ ᠴᠣᠣᠷᠭᠠ ᠴᠦᠴᠡ ᠴᠤᠴᠠᠷᠠᠨ ᠡᠪᠳᠡᠷᠡᠬᠦ ᠦᠭᠡᠢ ᠪᠣᠯᠭᠠᠵᠤ ᠲᠡᠩᠭᠡᠯᠢᠭ ᠲᠡᠢ ᠲᠡᠷᠭᠡ ᠶ᠋ᠢ ᠲᠡᠷᠡᠭᠦᠷ ᠵᠠᠮ ᠳ᠋ᠤ᠌ ᠲᠡᠩᠭᠡᠯᠢᠭ ᠰᠠᠭᠠᠲᠠᠬᠤ ᠦᠭᠡᠢ ᠪᠣᠯᠭᠠᠵᠤ ᠲᠡᠷᠭᠡ ᠭᠡᠷ ᠦ᠋ᠨ ᠠᠵᠢᠯ ᠢ᠋ ᠲᠡᠭᠰᠢᠯᠡᠨ ᠵᠠᠰᠠᠵᠤ ᠶᠠᠪᠤᠶᠠ》ᠭᠡᠰᠡᠨ ᠲᠤᠯᠠ ᠭᠦᠴᠦᠭᠦᠷ ᠢ᠋ ᠲᠡᠷᠭᠡᠴᠢ ᠶ᠋ᠢᠨ ᠲᠤᠰᠢᠶᠠᠯ ᠳ᠋ᠤ᠌ ᠲᠣᠮᠢᠯᠠᠪᠠ᠃ ᠭᠡᠷ ᠳᠣᠲᠣᠷᠠᠬᠢ ᠭᠡᠷᠭᠡᠢ ᠬᠡᠦᠬᠡᠳ ᠪᠠ ᠵᠠᠷᠤᠴᠠ ᠨᠠᠷ ᠢ᠋ ᠲᠣᠳᠣᠢ ᠴᠡᠷᠪᠢ ᠪᠡᠷ ᠵᠠᠬᠢᠷᠠᠭᠣᠯᠪᠠ᠃ ᠬᠠᠰᠠᠷ ᠤ᠋ᠨ ᠵᠠᠬᠢᠷᠭᠠᠨ ᠳ᠋ᠤ᠌ ᠢᠯᠳᠦ ᠠᠭᠰᠤᠵᠤ ᠶᠠᠪᠤᠬᠤ ᠪᠠᠷ ᠬᠤᠪᠢᠯᠠᠢ᠂ ᠴᠢᠯᠬᠥᠳᠡᠢ᠂ ᠬᠠᠷᠬᠠᠢ ᠲᠣᠬᠣᠷᠭᠣᠨ ᠭᠤᠷᠪᠠ ᠶ᠋ᠢ ᠲᠣᠮᠢᠯᠠᠵᠤ᠄
《ᠬᠦᠴᠦ ᠲᠦᠷᠢᠮᠡᠬᠡᠢᠯᠡᠭᠴᠢᠳ ᠦ᠋ᠨ ᠬᠦᠵᠦᠭᠦᠦ ᠶ᠋ᠢ ᠬᠢᠶᠠᠩᠭ᠋ᠠᠷᠳᠠᠵᠣ ᠣᠮᠣᠭ ᠶᠡᠬᠡᠲᠡᠨ ᠦ᠌ ᠣᠮᠣᠷᠣ ᠶ᠋ᠢ ᠣᠭᠲᠣᠯᠵᠤ ᠶᠠᠪᠤ》ᠭᠡᠪᠡ᠃ ᠪᠡᠯᠭᠦᠳᠡᠢ᠂ ᠬᠠᠷᠠᠯᠳᠠᠢ ᠲᠣᠬᠣᠷᠭᠣᠨ ᠬᠣᠶᠠᠷ ᠢ᠋᠄ 《ᠠᠭᠲᠠ ᠬᠠᠷᠢᠭᠤᠯᠲᠤᠭᠠᠢ᠂ ᠠᠭᠲᠠᠴᠢᠨ ᠪᠣᠯᠲᠤᠭᠠᠢ》ᠭᠡᠪᠡ᠃ ᠲᠠᠢᠴᠢᠭᠤᠳ ᠤ᠋ᠨ ᠬᠣᠲᠣ ᠮᠤᠷᠢᠴᠢ᠂ ᠮᠣᠯᠠᠬᠠᠯᠬᠣ ᠭᠤᠷᠪᠠ ᠶ᠋ᠢ 《ᠠᠳᠤᠭᠤ ᠠᠳᠣᠭᠣᠯᠳᠣᠭᠠᠢ》ᠭᠡᠪᠡ᠃ ᠠᠷᠬᠠᠢ ᠬᠠᠰᠠᠷ᠂ ᠲᠠᠬᠠᠷ᠂ ᠰᠦᠬᠡᠬᠡᠢ᠂ ᠴᠠᠭᠣᠷᠬᠠᠨ ᠳᠥᠷᠪᠡ ᠶ᠋ᠢ 《ᠬᠣᠯᠠ ᠶ᠋ᠢᠨ ᠬᠣᠯᠪᠣᠭᠴᠢ ᠂ ᠣᠢᠷᠠ ᠶ᠋ᠢᠨ ᠣᠲᠣᠴᠢ (ᠬᠣᠯᠠ ᠣᠢᠷᠠ ᠶ᠋ᠢ ᠰᠤᠷᠪᠤᠯᠵᠢᠯᠠᠬᠤ ᠭᠠᠵᠠᠷᠴᠢ) ᠪᠣᠯᠲᠤᠭᠠᠢ》ᠭᠡᠪᠡ᠃ ᠰᠦᠪᠡᠬᠡᠳᠡᠢ ᠪᠠᠭᠠᠲᠤᠷ ᠥᠭᠦᠯᠡᠷᠦᠨ᠄
《ᠬᠤᠯᠤᠭᠠᠨᠠ ᠣᠭᠣᠳᠠᠨᠠ ᠮᠡᠲᠦ ᠬᠤᠷᠢᠶᠠᠭᠰᠠᠨ ᠬᠥᠷᠥᠩᠭᠡ ᠶ᠋ᠢ ᠬᠠᠳᠠᠭᠠᠯᠠᠵᠤ ᠬᠠᠷᠠ ᠬᠡᠷᠢᠶᠡ ᠮᠡᠲᠦ ᠬᠠᠮᠤᠭ ᠶᠠᠭᠤᠮᠠ ᠶ᠋ᠢ ᠬᠠᠷᠠᠮᠯᠠᠵᠤ ᠨᠥᠮᠥᠷᠬᠦ ᠢᠰᠡᠭᠡᠢ ᠮᠡᠲᠦ ᠨᠥᠬᠥᠭᠡᠰᠦ ᠪᠠᠮᠪᠠᠢ ᠪᠣᠯᠵᠤ ᠭᠡᠷ ᠣᠷᠣᠨ ᠢ᠋ ᠬᠠᠮᠠᠭᠠᠯᠠᠬᠤ ᠬᠡᠷᠡᠰᠬᠡ ᠶ᠋ᠢᠨ ᠪᠦᠷᠢᠶᠡᠰᠦ ᠪᠣᠯᠤᠶᠠ》ᠭᠡᠪᠡ᠃
125᠂ ᠲᠡᠨᠳᠡ ᠡᠴᠡ ᠴᠢᠩᠭᠢᠰ ᠬᠠᠭᠠᠨ᠂ ᠬᠠᠨ ᠪᠣᠯᠵᠤ ᠪᠣᠭᠣᠷᠴᠤ ᠵᠡᠯᠮᠡ ᠬᠣᠶᠠᠷ ᠲᠤ᠌ ᠥᠭᠦᠯᠡᠷᠦᠨ᠄
《ᠰᠡᠭᠦᠳᠡᠷ ᠡᠴᠡ ᠥᠭᠡᠷᠡ ᠨᠥᠬᠥᠷ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠰᠡᠭᠦᠳᠡᠷ ᠮᠢᠨᠢ ᠪᠣᠯᠵᠤ ᠰᠡᠭᠦᠯ ᠡᠴᠡ ᠥᠭᠡᠷᠡ ᠲᠠᠰᠢᠭᠤᠷ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠰᠡᠭᠦᠯ ᠮᠢᠨᠢ ᠪᠣᠯᠵᠤ ᠰᠡᠳᠬᠢᠯ ᠢ᠋ ᠮᠢᠨᠢ ᠰᠡᠷᠭᠦᠭᠡᠵᠦ ᠰᠠᠨᠠᠭᠠ ᠶ᠋ᠢ ᠮᠢᠨᠢ ᠠᠮᠠᠷᠠᠭᠤᠯᠤᠭᠰᠠᠨ ᠵᠢᠷᠦᠬᠡᠨ ᠦ᠌ ᠳᠣᠲᠣᠨᠣ ᠨᠥᠬᠥᠳ ᠮᠢᠨᠢ ᠲᠠ ᠬᠣᠶᠠᠷ ᠬᠠᠮᠤᠭ ᠠ᠋ᠴᠠ ᠤᠷᠢᠳᠤ ᠢᠷᠡᠵᠦ ᠨᠥᠬᠥᠷᠯᠡᠭᠰᠡᠨ ᠲᠤᠯᠠ ᠬᠠᠮᠤᠭ ᠢ᠋ ᠠᠬᠠᠯᠠᠨᠠ》ᠭᠡᠪᠡ᠃ ᠪᠠᠰᠠ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《ᠲᠡᠭᠷᠢ ᠳ᠋ᠦ᠍ ᠥᠷᠦᠰᠢᠶᠡᠭᠳᠡᠵᠦ᠂ ᠭᠠᠵᠠᠷ ᠲᠤ᠌ ᠢᠪᠡᠭᠡᠭᠳᠡᠵᠦ᠂ ᠵᠠᠮᠤᠬᠠ ᠠ᠋ᠴᠠ ᠰᠠᠯᠵᠤ ᠨᠠᠮᠠ ᠶ᠋ᠢ ᠰᠡᠳᠬᠢᠵᠦ ᠨᠥᠬᠥᠷᠯᠡᠶᠡ ᠭᠡᠵᠦ ᠢᠷᠡᠭᠰᠡᠨ ᠠᠩᠬᠠᠨ ᠤ᠋ ᠥᠯᠵᠡᠢᠲᠦ ᠨᠥᠬᠥᠳ ᠮᠢᠨᠢ ᠠᠯᠢᠨ ᠠ᠋ᠴᠠ ᠴᠤ᠌ ᠢᠯᠡᠭᠦᠦ ᠬᠦᠨᠳᠦᠲᠡᠢ ᠪᠠᠢᠬᠤ ᠤᠴᠢᠷᠲᠠᠢ ᠲᠤᠯᠠ ᠡᠢᠨᠬᠦ ᠲᠠ ᠨᠠᠷ ᠢ᠋ ᠵᠣᠬᠢᠬᠤ ᠵᠣᠬᠢᠬᠤ ᠲᠤᠰᠢᠶᠠᠯ ᠳ᠋ᠤ᠌ ᠲᠣᠮᠢᠯᠠᠪᠠ》 ᠭᠡᠪᠡ᠃
126᠂ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠬᠠᠭᠠᠨ ᠪᠣᠯᠭᠠᠪᠠ ᠭᠡᠵᠦ ᠬᠡᠷᠡᠢᠳ ᠦ᠋ᠨ ᠲᠤᠭᠤᠷᠢᠯ ᠬᠠᠨ ᠳ᠋ᠤ᠌ ᠲᠠᠬᠠᠢ᠂ ᠰᠦᠬᠡᠬᠡᠢ ᠬᠣᠶᠠᠷ ᠢ᠋ ᠢᠯᠡᠭᠡᠪᠡᠯ᠂ ᠲᠤᠭᠤᠷᠢᠯ ᠬᠠᠨ ᠥᠭᠦᠯᠡᠷᠦᠨ᠄ 《ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ ᠮᠢᠨᠢ᠂ ᠬᠠᠨ ᠪᠣᠯᠭᠠᠭᠰᠠᠨ ᠨᠢ ᠮᠠᠰᠢ ᠵᠥᠪ᠃ ᠮᠣᠩᠭ᠋ᠣᠯᠴᠣᠳ᠂ ᠬᠠᠨ ᠦᠭᠡᠢ ᠪᠠᠢᠵᠤ ᠶᠠᠭᠠᠬᠢᠵᠤ ᠪᠣᠯᠤᠨᠠ᠃ ᠡᠨᠡ ᠰᠢᠢᠳᠪᠦᠷᠢ ᠪᠡᠨ ᠡᠪᠳᠡᠬᠦ ᠦᠭᠡᠢ ᠡᠪ ᠵᠠᠩᠭᠢᠶᠠ ᠪᠠᠨ ᠲᠠᠰᠤᠯᠬᠤ ᠦᠭᠡᠢ ᠡᠬᠡ ᠵᠠᠬᠢᠶᠠ ᠠᠯᠳᠠᠬᠤ ᠦᠭᠡᠢ ᠡᠭᠡᠨᠡᠭᠲᠡ ᠵᠢᠷᠤᠮᠲᠠᠢ ᠪᠠᠢ》ᠭᠡᠪᠡ᠃
