《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》ᠨᠢᠭᠡᠳᠦᠭᠡᠷ ᠪᠦᠯᠦᠭ-ᠲᠡᠮᠦᠵᠢᠨ ᠦ᠌ ᠤᠭ ᠭᠠᠷᠤᠯ ᠪᠠ ᠪᠠᠭᠠ ᠨᠠᠰᠤᠨ ᠤ᠋ ᠦᠶᠡТэмүжиний уг гарал ба бага насны үе
22713ᠲᠡᠮᠦᠵᠢᠨ ᠦ᠌ ᠤᠭ ᠭᠠᠷᠤᠯ ᠪᠠ ᠪᠠᠭᠠ ᠨᠠᠰᠤᠨ ᠤ᠋ ᠦᠶᠡ
1᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠢᠵᠠᠭᠤᠷ᠂ ᠳᠡᠭᠡᠳᠦ ᠲᠡᠭᠷᠢ ᠡᠴᠡ ᠵᠠᠶᠠᠭᠠᠲᠤ ᠲᠥᠷᠥᠭᠰᠡᠨ ᠪᠥᠷᠲᠡ ᠴᠢᠨᠣᠠ᠂ ᠭᠡᠷᠭᠡᠢ ᠭᠤᠸᠠ ᠮᠠᠷᠠᠯ ᠤ᠋ᠨ ᠬᠠᠮᠲᠤ ᠲᠠᠩᠭᠢᠰ ᠳᠠᠯᠠᠢ ᠶ᠋ᠢ ᠭᠡᠲᠦᠯᠵᠦ ᠢᠷᠡᠭᠡᠳ ᠤᠨᠤᠨ ᠮᠥᠷᠡᠨ ᠦ᠌ ᠡᠬᠢ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠᠨ ᠳ᠋ᠤ᠌ ᠨᠤᠲᠤᠭᠯᠠᠵᠤ ᠪᠠᠲᠤᠴᠠᠭᠠᠨ ᠭᠡᠳᠡᠭ ᠨᠢᠭᠡᠨ ᠬᠥᠪᠡᠭᠦᠨ ᠢ᠋ ᠲᠥᠷᠥᠭᠦᠯᠵᠡᠢ᠃
2᠂ ᠪᠠᠲᠤᠴᠠᠭᠠᠨ ᠤ᠋ ᠬᠥᠪᠡᠭᠦᠨ ᠲᠡᠮᠡᠴᠡ᠂ ᠲᠡᠮᠡᠴᠡ ᠶ᠋ᠢᠨ ᠬᠥᠪᠡᠭᠦᠨ ᠬᠣᠷᠢᠴᠠᠷ ᠮᠡᠷᠭᠡᠨ᠂ ᠬᠣᠷᠢᠴᠠᠷ ᠮᠡᠷᠭᠡᠨ ᠦ᠌ ᠬᠥᠪᠡᠭᠦᠨ ᠠᠭᠤᠵᠠᠮ ᠪᠤᠭᠤᠷᠤᠯ᠂ ᠠᠭᠤᠵᠠᠮ ᠪᠤᠭᠤᠷᠤᠯ ᠤ᠋ᠨ ᠬᠥᠪᠡᠭᠦᠨ ᠰᠠᠯᠢ ᠬᠠᠴᠠᠭᠤ᠂ ᠰᠠᠯᠢ ᠬᠠᠴᠠᠭᠤ ᠶ᠋ᠢᠨ ᠬᠥᠪᠡᠭᠦᠨ ᠶᠡᠬᠡ ᠨᠢᠳᠦᠨ᠂ ᠶᠡᠬᠡ ᠨᠢᠳᠦᠨ ᠦ᠌ ᠬᠥᠪᠡᠭᠦᠨ ᠰᠠᠮ ᠰᠣᠴᠢ᠂ ᠰᠠᠮ ᠰᠣᠴᠢ ᠶ᠋ᠢᠨ ᠬᠥᠪᠡᠭᠦᠨ ᠬᠠᠷᠴᠤ᠃
3᠂ ᠬᠠᠷᠴᠤ ᠶ᠋ᠢᠨ ᠬᠥᠪᠡᠭᠦᠨ ᠪᠣᠷᠵᠢᠭᠢᠳᠠᠢ ᠮᠡᠷᠭᠡᠨ ᠪᠥᠯᠥᠭᠡ᠃ ᠪᠣᠷᠵᠢᠭᠢᠳᠠᠢ ᠮᠡᠷᠭᠡᠨ ᠦ᠌ ᠭᠡᠷᠭᠡᠢ ᠨᠢ ᠮᠣᠩᠭᠣᠯᠵᠢᠨ ᠭᠤᠸᠠ᠂ ᠲᠡᠭᠦᠨ ᠡᠴᠡ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠲᠣᠷᠣᠭᠣᠯᠵᠢᠨ ᠪᠠᠶᠠᠨ᠃ ᠲᠣᠷᠣᠭᠣᠯᠵᠢᠨ ᠪᠠᠶᠠᠨ᠂ ᠪᠣᠷᠣᠭᠴᠢᠨ ᠭᠤᠸᠠ ᠭᠡᠷᠭᠡᠢ ᠲᠡᠢ᠂ ᠪᠣᠷᠣᠯᠳᠠᠢ ᠰᠣᠶᠠᠯᠪᠢ ᠭᠡᠳᠡᠭ ᠵᠠᠯᠠᠭᠤ ᠵᠠᠷᠤᠴᠠ ᠲᠠᠢ᠂ ᠲᠠᠢᠷ᠂ ᠪᠣᠷᠣ ᠬᠣᠶᠠᠷ ᠬᠦᠯᠦᠭ ᠮᠣᠷᠢ ᠲᠠᠢ ᠪᠥᠯᠥᠭᠡ᠃ ᠲᠣᠷᠭᠣᠯᠵᠢᠨ ᠪᠠᠶᠠᠨ ᠤ᠋ ᠬᠥᠪᠡᠭᠦᠨ ᠲᠣᠧᠨ ᠰᠣᠬᠣᠷ᠂ ᠳᠣᠪᠣᠨ ᠮᠡᠷᠭᠡᠨ ᠬᠣᠶᠠᠷ ᠪᠥᠯᠥᠭᠡ᠃
4᠂ ᠲᠣᠧᠨ ᠰᠣᠬᠣᠷ᠂ ᠮᠠᠩᠨᠠᠢ ᠳᠤᠮᠳᠠ ᠪᠠᠨ ᠭᠠᠭᠴᠠ ᠨᠢᠳᠦ ᠲᠡᠢ ᠭᠤᠷᠪᠠᠨ ᠨᠡᠭᠦᠳᠡᠯ ᠦ᠋ᠨ ᠭᠠᠵᠠᠷ ᠬᠠᠷᠠᠬᠤ ᠪᠥᠯᠥᠭᠡ᠃
5᠂ ᠨᠢᠭᠡᠨ ᠡᠳᠦᠷ ᠲᠣᠧᠨ ᠰᠣᠬᠣᠷ᠂ ᠳᠣᠪᠣᠨ ᠮᠡᠷᠭᠡᠨ ᠳᠡᠭᠦᠦ ᠲᠡᠢ ᠪᠡᠨ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠᠨ ᠳᠡᠭᠡᠷᠡ ᠭᠠᠷᠪᠠ᠃ ᠲᠣᠧᠨ ᠰᠣᠬᠣᠷ᠂ ᠪᠤᠷᠬᠠᠨ ᠬᠠᠯᠳᠤᠨ ᠳᠡᠭᠡᠷᠡ ᠡᠴᠡ ᠬᠠᠷᠠᠪᠠᠯ ᠲᠦᠩᠬᠡᠯᠢᠭ ᠭᠣᠷᠣᠬᠠ ᠶ᠋ᠢᠨ ᠤᠷᠤᠭᠤ ᠨᠢᠭᠡᠨ ᠪᠦᠯᠦᠭ ᠢᠷᠭᠡᠨ ᠨᠡᠭᠦᠵᠦ ᠠᠢᠰᠤᠢ᠃
6᠂ ᠲᠣᠧᠨ ᠰᠣᠬᠣᠷ ᠥᠭᠦᠯᠡᠷᠦᠨ᠄ 《ᠲᠡᠷᠡ ᠨᠡᠭᠦᠳᠡᠯ ᠢᠷᠭᠡᠨ ᠦ᠌ ᠳᠣᠲᠣᠷᠠ᠂ ᠲᠡᠷᠭᠡᠨ ᠦ᠌ ᠮᠤᠬᠤᠯᠠᠭ ᠤ᠋ᠨ ᠡᠮᠦᠨᠡ ᠨᠢᠭᠡ ᠰᠠᠢᠬᠠᠨ ᠥᠬᠢᠨ ᠰᠠᠭᠤᠵᠤ ᠪᠠᠢᠨᠠ᠂ ᠬᠥᠮᠦᠨ ᠦ᠌ ᠭᠡᠷᠭᠡᠢ ᠪᠣᠯᠤᠭᠠ ᠦᠭᠡᠢ ᠪᠣᠯ ᠳᠣᠪᠣᠨ ᠮᠡᠷᠭᠡᠨ ᠳᠡᠭᠦᠦ ᠴᠢᠮᠠ ᠳ᠋ᠤ᠌ ᠭᠤᠶᠤᠵᠤ ᠭᠡᠷᠭᠡᠢ ᠪᠣᠯᠭᠠᠶᠠ》 ᠭᠡᠳ ᠲᠡᠭᠦᠨ ᠢ᠋ ᠦᠵᠡᠭᠦᠯᠬᠦ ᠪᠡᠷ ᠳᠣᠪᠣᠨ ᠮᠡᠷᠭᠡᠨ ᠳᠡᠭᠦᠦ ᠪᠡᠨ ᠢᠯᠡᠭᠡᠪᠡ᠃
7᠂ ᠳᠣᠪᠣᠨ ᠮᠡᠷᠭᠡᠨ᠂ ᠲᠡᠷᠡ ᠨᠡᠭᠦᠳᠡᠯ ᠳ᠋ᠦ᠍ ᠬᠦᠷᠴᠦ ᠥᠬᠢᠨ ᠢ᠋ ᠦᠵᠡᠪᠡᠯ ᠦᠨᠡᠬᠡᠷ ᠠᠯᠳᠠᠷᠲᠠᠢ᠂ ᠭᠣᠶᠣ ᠰᠠᠢᠬᠠᠨ ᠥᠬᠢᠨ ᠪᠥᠭᠡᠳ ᠬᠥᠮᠦᠨ ᠦ᠌ ᠭᠡᠷᠭᠡᠢ ᠪᠣᠯᠤᠭᠠ ᠦᠭᠡᠢ ᠠᠵᠠᠢ᠂ᠨᠡᠷᠡ ᠠᠯᠤᠨ ᠭᠤᠸᠠ ᠭᠡᠨᠡ᠃
8᠂ ᠡᠨᠡ ᠥᠬᠢᠨ᠂ ᠬᠣᠷᠢ ᠲᠦᠮᠡᠳ ᠦ᠋ᠨ ᠨᠣᠶᠠᠨ ᠬᠣᠷᠢᠯᠠᠷᠲᠠᠢ ᠮᠡᠷᠭᠡᠨ ᠦ᠌ ᠭᠡᠷᠭᠡᠢ ᠪᠠᠷᠭᠤᠵᠢᠨ ᠭᠤᠸᠠ ᠠ᠋ᠴᠠ ᠬᠣᠷᠢ ᠲᠦᠮᠡᠳ ᠦ᠋ᠨ(ᠬᠣᠷᠢ ᠪᠤᠷᠢᠶᠠᠳ) ᠨᠤᠲᠤᠭ ᠠᠷᠢᠭ ᠤᠰᠤ ᠭᠡᠳᠡᠭ ᠭᠠᠵᠠᠷ ᠲᠥᠷᠥᠵᠡᠢ᠃ ᠲᠡᠭᠦᠨ ᠦ᠌ ᠡᠬᠡ ᠪᠠᠷᠭᠤᠵᠢᠨ ᠭᠤᠸᠠ ᠪᠣᠯ ᠬᠣᠯᠠ ᠭᠠᠵᠠᠷ ᠤ᠋ᠨ ᠪᠠᠷᠭᠤᠵᠢᠨ ᠳᠥᠭᠥᠮ ᠦ᠋ᠨ ᠡᠵᠡᠨ ᠪᠠᠷᠭᠤᠳᠠᠢ ᠮᠡᠷᠭᠡᠨ ᠦ᠌ ᠥᠬᠢᠨ ᠪᠥᠯᠥᠭᠡ᠂ ᠲᠡᠷᠡ ᠪᠦᠯᠦᠭ ᠢᠷᠭᠡᠨ ᠪᠣᠯ ᠬᠣᠷᠢᠯᠠᠷᠲᠠᠢ ᠮᠡᠷᠭᠡᠨ ᠦ᠌ ᠬᠢ ᠠᠵᠠᠢ᠃
9᠂ ᠬᠣᠷᠢᠯᠠᠷᠲᠠᠢ ᠮᠡᠷᠭᠡᠨ᠂ ᠬᠣᠷᠢ ᠲᠦᠮᠡᠳ ᠦ᠋ᠨ ᠭᠠᠵᠠᠷ ᠲᠤ᠌ ᠪᠤᠯᠠᠭᠠ᠂ ᠬᠡᠷᠡᠮᠦ ᠵᠡᠷᠭᠡ ᠠᠩ ᠭᠥᠷᠥᠭᠡᠰᠦ ᠠᠩᠨᠠᠬᠤ ᠪᠠᠨ ᠬᠣᠷᠢᠭᠯᠠᠨ ᠪᠤᠯᠢᠶᠠᠯᠳᠤᠵᠤ ᠬᠠᠷᠢᠯᠴᠠᠨ ᠮᠠᠭᠤᠳᠠᠯᠴᠠᠭᠠᠳ ᠰᠠᠯᠵᠤ᠂ ᠬᠣᠷᠢᠯᠠᠷ ᠣᠪᠣᠭᠲᠠᠨ ᠪᠣᠯᠤᠭᠠᠳ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠᠨ ᠳ᠋ᠤ᠌ ᠠᠩ ᠭᠥᠷᠥᠭᠡᠰᠦ ᠡᠯᠪᠡᠭ ᠭᠡᠵᠦ ᠰᠣᠨᠣᠰᠴᠤ᠂ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠡᠵᠡᠨ ᠪᠤᠷᠬᠠᠨ ᠪᠤᠰᠬᠠᠭᠰᠠᠨ ᠰᠢᠨᠴᠢ ᠪᠠᠶᠠᠨ ᠤᠷᠢᠶᠠᠩᠬᠠᠢ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠨᠡᠭᠦᠵᠦ ᠢᠷᠡᠭᠰᠡᠨ ᠠᠵᠠᠢ᠃ ᠡᠨᠡᠬᠦ ᠬᠣᠷᠢ ᠲᠦᠮᠡᠳ ᠦ᠋ᠨ ᠨᠣᠶᠠᠨ ᠬᠣᠷᠢᠯᠠᠷᠲᠠᠢ ᠮᠡᠷᠭᠡᠨ ᠦ᠌ ᠥᠬᠢᠨ ᠠᠷᠢᠭ ᠣᠰᠤᠨᠠ ᠲᠥᠷᠥᠭᠰᠡᠨ ᠠᠯᠤᠨ ᠭᠤᠸᠠ ᠶ᠋ᠢ ᠭᠤᠶᠤᠵᠤ᠂ ᠳᠣᠪᠣᠨ ᠮᠡᠷᠭᠡᠨ ᠦ᠌ ᠭᠡᠷᠭᠡᠢ ᠪᠣᠯᠭᠠᠭᠰᠠᠨ ᠶᠣᠰᠣ ᠲᠡᠢᠮᠦ ᠠᠵᠢ᠃
10᠂ ᠠᠯᠤᠨ ᠭᠤᠸᠠ᠂ ᠳᠣᠪᠣᠨ ᠮᠡᠷᠭᠡᠨ ᠳ᠋ᠦ᠍ ᠢᠷᠡᠭᠡᠳ ᠪᠦᠭᠦᠨᠦᠲᠡᠢ᠂ ᠪᠡᠯᠭᠦᠨᠦᠲᠡᠢ ᠭᠡᠳᠡᠭ ᠨᠡᠷᠡ ᠲᠡᠢ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ ᠲᠥᠷᠥᠭᠦᠯᠪᠡ᠃
11᠂ ᠲᠣᠧᠨ ᠰᠣᠬᠣᠷ ᠠᠬᠠ ᠨᠢ ᠳᠥᠷᠪᠡᠨ ᠬᠥᠪᠡᠭᠦᠨ ᠲᠡᠢ ᠪᠥᠯᠥᠭᠡ᠃ ᠲᠣᠧᠨ ᠰᠣᠬᠣᠷ ᠢ᠋ ᠦᠬᠦᠭᠰᠡᠨ ᠦ᠌ ᠬᠣᠢᠨᠠ ᠲᠡᠭᠦᠨ ᠦ᠌ ᠳᠥᠷᠪᠡᠨ ᠬᠥᠪᠡᠭᠦᠨ᠂ ᠳᠣᠪᠣᠨ ᠮᠡᠷᠭᠡᠨ ᠢ᠋ ᠠᠪᠠᠭᠠ ᠭᠡᠵᠦ ᠦᠵᠡᠬᠦ ᠦᠭᠡᠢ ᠳᠣᠷᠣᠮᠵᠢᠯᠠᠵᠤ ᠰᠠᠯᠵᠤ ᠨᠡᠭᠦᠭᠡᠳ ᠳᠥᠷᠪᠡᠳ ᠣᠪᠣᠭᠲᠠᠨ ᠪᠣᠯᠪᠠ᠃
12᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠨᠢᠭᠡ ᠡᠳᠦᠷ ᠳᠣᠪᠣᠨ ᠮᠡᠷᠭᠡᠨ ᠳᠣᠭᠣᠴᠠᠭ ᠥᠨᠳᠥᠷ ᠳᠡᠭᠡᠷᠡ ᠭᠥᠷᠥᠭᠡᠯᠡᠬᠦ ᠪᠡᠷ ᠭᠠᠷᠪᠠᠯ᠂ ᠣᠢ ᠳᠣᠲᠣᠷᠠ ᠨᠢᠭᠡᠨ ᠤᠷᠢᠶᠠᠩᠬᠠᠢ ᠬᠥᠮᠦᠨ ᠭᠤᠨᠵᠢᠨ ᠪᠤᠭᠤ ᠠᠯᠠᠭᠠᠳ᠂ ᠬᠠᠪᠢᠷᠭᠠ ᠴᠣᠷᠣᠢ ᠶ᠋ᠢ ᠰᠢᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠠᠭᠤᠯᠵᠠᠵᠠᠢ᠃
13᠂ 《ᠨᠥᠬᠥᠷ ᠱᠣᠷᠣᠯᠭᠠ ᠳᠠ》 ᠭᠡᠵᠦ ᠳᠣᠪᠣᠨ ᠮᠡᠷᠭᠡᠨ ᠬᠡᠯᠡᠪᠡᠯ᠂ ᠲᠡᠷᠡ ᠬᠥᠮᠦᠨ ᠠᠭᠤᠰᠬᠢ ᠵᠦᠯᠲᠦ ᠪᠠ ᠠᠷᠠᠰᠤ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠠᠪᠴᠤ᠂ ᠪᠤᠰᠤᠳ ᠢ᠋ ᠨᠢ ᠴᠥᠮ ᠳᠣᠪᠣᠨ ᠮᠡᠷᠭᠡᠨ ᠳ᠋ᠦ᠍ ᠥᠭᠪᠡ᠃
14᠂ ᠳᠣᠪᠣᠨ ᠮᠡᠷᠭᠡᠨ ᠲᠡᠷᠡ ᠪᠤᠭᠤ ᠶ᠋ᠢᠨ ᠮᠢᠬᠠ ᠶ᠋ᠢ ᠠᠴᠢᠵᠤ ᠶᠠᠪᠤᠲᠠᠯᠠ᠂ ᠵᠠᠮ ᠳ᠋ᠤ᠌ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠥᠲᠥᠯᠦᠭᠰᠡᠨ ᠨᠢᠭᠡ ᠶᠠᠳᠠᠭᠤ ᠬᠥᠮᠦᠨ ᠤᠴᠠᠷᠠᠪᠠ᠃
15᠂ 《ᠴᠢ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ?》 ᠭᠡᠵᠦ ᠳᠣᠪᠣᠨ ᠮᠡᠷᠭᠡᠨ ᠠᠰᠠᠭᠤᠪᠠᠯ᠂ ᠲᠡᠷᠡ ᠬᠥᠮᠦᠨ ᠥᠭᠦᠯᠡᠷᠦᠨ᠄ 《ᠪᠢ ᠮᠠᠭᠠᠯᠢᠭ ᠪᠠᠶᠠᠭᠣᠳ ᠤ᠋ᠨ ᠬᠥᠮᠦᠨ᠂ ᠡᠳᠦᠭᠡ ᠪᠢ ᠶᠠᠳᠠᠵᠤ ᠶᠠᠪᠤᠨᠠ᠂ ᠲᠡᠷᠡ ᠭᠥᠷᠦᠭᠡᠰᠦᠨ ᠦ᠌ ᠮᠢᠬᠠᠨ ᠠ᠋ᠴᠠ ᠨᠠᠳᠠ ᠳ᠋ᠤ᠌ ᠥᠭ᠂ ᠪᠢ ᠡᠨᠡ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠴᠢᠮᠠᠲᠤ ᠥᠭᠭᠦᠶᠡ》 ᠭᠡᠪᠡᠯ᠂
16᠂ ᠳᠣᠪᠣᠨ ᠮᠡᠷᠭᠡᠨ ᠵᠥᠪᠰᠢᠶᠡᠷᠡᠵᠦ᠂ ᠪᠤᠭᠤ ᠶ᠋ᠢᠨ ᠥᠷᠥᠭᠡᠰᠦᠨ ᠭᠤᠶᠠ ᠶ᠋ᠢ ᠲᠡᠷᠡ ᠬᠥᠮᠦᠨ ᠳ᠋ᠦ᠍ ᠥᠭᠭᠦᠭᠡᠳ ᠬᠥᠪᠡᠭᠦᠨ ᠢ᠋ ᠠᠪᠴᠤ ᠢᠷᠡᠵᠦ ᠭᠡᠷ ᠲᠡᠭᠡᠨ ᠵᠠᠷᠤᠴᠠᠯᠠᠬᠤ ᠪᠣᠯᠪᠠ᠃
17᠂ ᠲᠡᠭᠡᠵᠦ ᠪᠠᠢᠲᠠᠯᠠ ᠳᠣᠪᠣᠨ ᠮᠡᠷᠭᠡᠨ ᠦᠭᠡᠢ ᠪᠣᠯᠪᠠ᠃ ᠳᠣᠪᠣᠨ ᠮᠡᠷᠭᠡᠨ ᠢ᠋ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠲᠡᠭᠦᠨ ᠦ᠌ ᠭᠡᠷᠭᠡᠢ ᠠᠯᠤᠨ ᠭᠤᠸᠠ ᠪᠡᠯᠪᠡᠰᠦᠨ ᠪᠥᠭᠡᠲᠡᠯᠡ᠂ ᠪᠤᠭᠤ ᠬᠠᠲᠠᠭᠢ᠂ ᠪᠤᠬᠠᠲᠤ ᠰᠠᠯᠴᠢ᠂ ᠪᠣᠳᠣᠨᠴᠠᠷ ᠮᠤᠩᠬᠠᠭ ᠭᠡᠳᠡᠭ ᠨᠡᠷᠡ ᠲᠡᠢ ᠭᠤᠷᠪᠠᠨ ᠬᠥᠪᠡᠭᠦᠨ ᠢ᠋ ᠲᠥᠷᠥᠭᠦᠯᠪᠡ᠃
18᠂ ᠤᠷᠢᠳᠤ ᠳᠣᠪᠣᠨ ᠮᠡᠷᠭᠡᠨ ᠢ᠋ ᠠᠮᠢᠳᠤ ᠪᠦᠬᠦᠢ ᠴᠠᠭ ᠲᠤ᠌ ᠲᠥᠷᠥᠭᠰᠡᠨ ᠪᠡᠯᠭᠦᠨᠦᠲᠡᠢ᠂ ᠪᠦᠭᠦᠨᠦᠲᠡᠢ ᠬᠣᠶᠠᠷ ᠬᠥᠪᠡᠭᠦᠨ ᠨᠢ᠂ ᠡᠬᠡ ᠠᠯᠤᠨ ᠭᠤᠸᠠ ᠠ᠋ᠴᠠ ᠡᠴᠢᠨᠡ ᠬᠡᠯᠡᠯᠴᠡᠭᠰᠡᠨ ᠨᠢ᠄ 《ᠪᠢᠳᠡᠨ ᠦ᠌ ᠡᠬᠡ᠂ ᠣᠢᠷᠠ ᠲᠥᠷᠥᠯ ᠦ᠋ᠨ ᠡᠷᠡᠭᠲᠡᠢ ᠬᠥᠮᠦᠨ ᠦᠭᠡᠢ ᠪᠠ ᠡᠷᠡ ᠦᠭᠡᠢ ᠪᠥᠭᠡᠲᠡᠯᠡ ᠡᠨᠡ ᠭᠤᠷᠪᠠᠨ ᠬᠥᠪᠡᠭᠦᠨ ᠢ᠋ ᠲᠥᠷᠥᠭᠦᠯᠪᠡ᠂ ᠭᠡᠷ ᠳᠣᠲᠣᠷᠠ ᠭᠠᠭᠴᠠ ᠮᠠᠭᠠᠯᠢᠭ ᠪᠠᠶᠠᠭᠣᠳ ᠣᠪᠣᠭ ᠤ᠋ᠨ ᠵᠠᠷᠤᠴᠠ ᠬᠥᠮᠦᠨ ᠪᠠᠢᠨᠠ᠂ ᠡᠨᠡ ᠭᠤᠷᠪᠠᠨ ᠬᠥᠪᠡᠭᠦᠨ ᠲᠡᠭᠦᠨ ᠦ᠌ ᠬᠡᠦᠬᠡᠳ ᠪᠢᠵᠡ》 ᠭᠡᠵᠦ ᠡᠬᠡ ᠡᠴᠡ ᠳᠠᠯᠳᠠ ᠬᠡᠯᠡᠯᠴᠡᠬᠦ ᠶ᠋ᠢ ᠨᠢ ᠠᠯᠤᠨ ᠭᠤᠸᠠ ᠮᠡᠳᠡᠭᠡᠳ᠂
19᠂ ᠬᠠᠪᠤᠷ ᠤ᠋ᠨ ᠨᠢᠭᠡᠨ ᠡᠳᠦᠷ ᠬᠣᠨᠢᠨ ᠤ᠋ ᠬᠠᠲᠠᠭᠰᠠᠨ ᠮᠢᠬᠠ ᠴᠢᠨᠠᠵᠤ᠂ ᠪᠡᠯᠭᠦᠨᠦᠲᠡᠢ᠂ ᠪᠦᠭᠦᠨᠦᠲᠡᠢ᠂ ᠪᠤᠭᠤ ᠬᠠᠲᠠᠭᠢ᠂ ᠪᠤᠬᠠᠲᠤ ᠰᠠᠯᠴᠢ᠂ ᠪᠣᠳᠣᠨᠴᠠᠷ ᠮᠤᠩᠬᠠᠭ ᠲᠠᠪᠤᠨ ᠬᠥᠪᠡᠭᠦᠨ ᠳ᠋ᠡᠭᠡᠨ ᠢᠳᠡᠭᠦᠯᠦᠭᠡᠳ ᠲᠡᠳᠡᠨ ᠢ᠋ ᠵᠡᠷᠭᠡᠴᠡᠭᠦᠯᠦᠨ ᠰᠠᠭᠤᠯᠭᠠᠵᠤ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠨᠢᠵᠡᠭᠡᠳ ᠮᠥᠰᠥ (ᠰᠤᠮᠤ ᠪᠤᠶᠤ ᠨᠠᠷᠢᠨ ᠮᠣᠳᠣ) ᠶ᠋ᠢ ᠬᠤᠭᠤᠯ ᠭᠡᠵᠦ ᠥᠭᠪᠡᠯ᠂ ᠠᠮᠠᠷᠬᠠᠨ ᠬᠤᠭᠤᠴᠢᠵᠤ ᠣᠷᠬᠢᠪᠠ᠃ ᠪᠠᠰᠠ ᠲᠠᠪᠤᠨ ᠮᠥᠰᠥ ᠶ᠋ᠢ ᠨᠡᠢᠯᠡᠭᠦᠯᠵᠦ ᠪᠠᠭᠯᠠᠭᠠᠳ ᠬᠤᠭᠤᠯ ᠭᠡᠵᠦ ᠥᠭᠪᠡᠯ ᠲᠠᠪᠤᠭᠤᠯᠠ ᠪᠠᠨ ᠳᠠᠷᠠᠭᠠᠯᠠᠨ ᠤᠷᠤᠯᠳᠤᠵᠤ ᠬᠤᠭᠤᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
20᠂ ᠡᠭᠦᠨ ᠳ᠋ᠦ᠍ ᠠᠯᠤᠨ ᠭᠤᠸᠠ ᠡᠬᠡ ᠨᠢ ᠥᠭᠦᠯᠡᠷᠦᠨ᠄ 《ᠪᠡᠯᠭᠦᠨᠦᠲᠡᠢ᠂ ᠪᠦᠭᠦᠨᠦᠲᠡᠢ ᠲᠠ ᠬᠣᠶᠠᠷ ᠨᠠᠮᠢ᠋ᠢ ᠡᠨᠡ ᠭᠤᠷᠪᠠᠨ ᠬᠥᠪᠡᠭᠦᠨ ᠢ᠋ ᠶᠠᠭᠠᠬᠢᠨ ᠲᠥᠷᠥᠭᠦᠯᠪᠡ᠂ ᠬᠡᠨ ᠦ᠌ ᠬᠥᠪᠡᠭᠦᠳ ᠪᠣᠯ ᠭᠡᠵᠦ ᠰᠡᠵᠢᠭᠯᠡᠨ ᠬᠡᠯᠡᠯᠴᠡᠨᠡ᠂ ᠰᠡᠵᠢᠭᠯᠡᠬᠦ ᠲᠠᠨᠢ ᠵᠥᠪ᠂
21᠂ ᠭᠡᠪᠡᠴᠦ᠂ ᠲᠠ ᠨᠠᠷ ᠤᠴᠢᠷ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠂ ᠰᠥᠨᠢ ᠪᠦᠷᠢ ᠴᠠᠭᠠᠨ ᠰᠢᠷᠠ ᠬᠥᠮᠦᠨ᠂ ᠭᠡᠷ ᠦ᠋ᠨ ᠡᠷᠦᠬᠡ ᠲᠣᠲᠣᠭᠣ ᠪᠠᠷ ᠭᠡᠢᠭᠦᠯᠦᠨ ᠣᠷᠣᠵᠤ ᠢᠷᠡᠭᠡᠳ ᠮᠢᠨᠦ ᠬᠡᠪᠡᠯᠢ ᠶ᠋ᠢ ᠢᠯᠪᠢᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠭᠡᠷᠡᠯ ᠮᠢᠨᠦ ᠬᠡᠪᠡᠯᠢ ᠳ᠋ᠦ᠍ ᠰᠢᠩᠭᠡᠬᠦ ᠪᠥᠯᠥᠭᠡ᠂ ᠲᠡᠷᠡ ᠬᠥᠮᠦᠨ᠂ ᠭᠠᠷᠬᠤ ᠨᠠᠷᠠ ᠰᠠᠷᠠᠨ ᠤ᠋ ᠬᠢᠯᠢ ᠪᠡᠷ ᠰᠢᠷᠠ ᠨᠣᠬᠠᠢ ᠮᠡᠲᠦ ᠰᠢᠷᠪᠢᠯᠵᠡᠭᠰᠡᠭᠡᠷ ᠰᠢᠷᠠᠪᠠᠯᠵᠠᠭᠰᠠᠭᠠᠷ ᠭᠠᠷᠴᠤ ᠣᠳᠤᠨᠠ᠃ ᠳᠡᠮᠡᠢ ᠶᠠᠭᠠᠬᠢᠨ ᠥᠭᠦᠯᠡᠨᠡ ᠲᠠ᠂ ᠲᠡᠭᠦᠨ ᠡᠴᠡ ᠦᠵᠡᠪᠡᠯ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠳ ᠪᠢᠵᠡ᠂ ᠬᠠᠷᠠ ᠲᠡᠷᠢᠭᠦᠲᠦ ᠬᠥᠮᠦᠨ ᠲᠡᠢ ᠠᠳᠠᠯᠢᠳᠬᠠᠵᠤ ᠶᠠᠭᠠᠬᠢᠨ ᠪᠣᠯᠤᠨᠠ᠂ ᠬᠠᠮᠤᠭ ᠤ᠋ᠨ ᠬᠠᠳ ᠪᠣᠯᠬᠤ ᠴᠠᠭ ᠲᠤ᠌ ᠬᠠᠷᠠᠴᠤ ᠬᠥᠮᠦᠨ ᠰᠠᠶᠢ ᠤᠴᠢᠷ ᠢ᠋ ᠮᠡᠳᠡᠨᠡ》 ᠭᠡᠳ
22᠂ ᠪᠠᠰᠠ ᠠᠯᠤᠨ ᠭᠤᠸᠠ᠂ ᠲᠠᠪᠤᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠰᠤᠷᠭᠠᠵᠤ ᠥᠭᠦᠯᠡᠷᠦᠨ᠄ 《ᠲᠠ ᠲᠠᠪᠤᠨ ᠬᠥᠪᠡᠭᠦᠨ᠂ ᠮᠢᠨᠦ ᠨᠢᠭᠡᠨ ᠬᠡᠪᠡᠯᠢ ᠡᠴᠡ ᠲᠥᠷᠥᠭᠰᠡᠨ ᠪᠢᠰᠢ ᠤᠤ᠂ ᠲᠠ ᠨᠠᠷ ᠭᠠᠭᠴᠠ ᠭᠠᠭᠴᠠᠭᠠᠷ ᠰᠠᠯᠪᠠᠯ ᠨᠢᠵᠡᠭᠡᠳ ᠰᠤᠮᠤ ᠮᠡᠲᠦ ᠬᠥᠮᠦᠨ ᠳ᠋ᠦ᠍ ᠬᠢᠯᠪᠠᠷᠬᠠᠨ ᠳᠡᠢᠯᠦᠭᠳᠡᠨᠡ᠂ ᠲᠠ ᠨᠠᠷ ᠡᠪ ᠡᠶᠡ ᠪᠡᠨ ᠨᠢᠬᠡᠲᠦᠬᠡᠪᠡᠯ ᠲᠡᠷᠡ ᠪᠠᠭᠯᠠᠭᠰᠠᠨ ᠲᠠᠪᠤᠨ ᠰᠤᠮᠤ ᠮᠡᠲᠦ ᠪᠡᠬᠢ ᠪᠣᠯᠵᠤ᠂ ᠬᠡᠨ ᠳ᠋ᠦ᠍ ᠴᠦ᠍ ᠬᠢᠯᠪᠠᠷᠬᠠᠨ ᠳᠡᠢᠯᠦᠭᠳᠡᠬᠦ ᠦᠭᠡᠢ ᠪᠣᠯᠤᠨᠠ》 ᠭᠡᠪᠡ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠠᠯᠤᠨ ᠭᠤᠸᠠ ᠡᠬᠡ ᠨᠢ ᠦᠭᠡᠢ ᠪᠣᠯᠪᠠ᠃
23᠂ ᠡᠬᠡ ᠠᠯᠤᠨ ᠭᠤᠸᠠ ᠶ᠋ᠢ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠠᠬᠠ ᠳᠡᠭᠦᠦ ᠲᠠᠪᠤᠭᠤᠯᠠ ᠪᠠᠨ᠂ ᠠᠳᠤᠭᠤ ᠮᠠᠯ ᠢ᠋ᠶ᠋ᠠᠨ ᠬᠤᠪᠢᠶᠠᠬᠤ ᠪᠣᠯᠵᠤ᠂ ᠪᠡᠯᠭᠦᠨᠦᠲᠡᠢ᠂ ᠪᠦᠭᠦᠨᠦᠲᠡᠢ᠂ ᠪᠤᠭᠤ ᠬᠠᠲᠠᠭᠢ᠂ ᠪᠤᠬᠠᠲᠤ ᠰᠠᠯᠴᠢ ᠳᠥᠷᠪᠡᠭᠦᠯᠡ ᠪᠡᠨ ᠶᠠᠭᠤᠮᠠ ᠪᠠᠨ ᠬᠤᠪᠢᠶᠠᠵᠤ ᠠᠪᠤᠭᠠᠳ ᠳᠡᠭᠦᠦ ᠪᠣᠳᠣᠨᠴᠠᠷ ᠮᠤᠩᠬᠠᠭ ᠢ᠋ ᠪᠢᠳᠠᠭᠤ ᠭᠡᠵᠦ ᠤᠷᠤᠭ ᠲᠤ᠌ ᠦᠯᠦ ᠲᠣᠭᠠᠴᠠᠵᠤ ᠬᠤᠪᠢ ᠡᠰᠡ ᠥᠭᠪᠡ᠃
24᠂ ᠪᠣᠳᠣᠨᠴᠠᠷ ᠤᠷᠤᠭ ᠲᠤ᠌ ᠦᠯᠦ ᠲᠣᠭᠠᠯᠠᠭᠳᠠᠬᠤ ᠠᠲᠠᠯᠠ᠂ ᠡᠨᠳᠡ ᠶᠠᠭᠤ ᠬᠢᠵᠦ ᠰᠠᠭᠤᠨᠠ ᠭᠡᠳ ᠭᠣᠣᠯ ᠳᠠᠭᠠᠷᠢᠲᠤ ᠭᠣᠳᠣᠯᠢ ᠰᠡᠭᠦᠯᠲᠦ ᠤᠷᠤᠭ ᠰᠢᠩᠬᠤᠯᠠ ᠮᠣᠷᠢ ᠪᠠᠨ ᠤᠨᠤᠵᠤ 《ᠦᠬᠦᠪᠡᠯ ᠦᠬᠦᠶᠡ ᠠᠮᠢᠳᠤᠷᠠᠪᠠᠯ ᠠᠮᠢᠳᠤᠷᠠᠶᠠ》 ᠭᠡᠵᠦ ᠤᠨᠤᠨ ᠮᠥᠷᠡᠨ ᠤᠷᠤᠭᠤ ᠵᠣᠷᠢᠵᠤ ᠣᠳᠪᠠ᠃ ᠲᠡᠨᠳᠡ ᠪᠠᠯᠵᠣᠨ ᠠᠷᠠᠯ ᠭᠡᠳᠡᠭ ᠭᠠᠵᠠᠷ ᠬᠦᠷᠴᠦ ᠡᠪᠡᠰᠦᠨ ᠡᠮᠪᠦᠯᠡ ᠭᠡᠷ ᠪᠠᠷᠢᠵᠤ ᠰᠠᠭᠤᠪᠠ᠃
25᠂ ᠲᠡᠭᠡᠵᠦ ᠪᠠᠢᠲᠠᠯᠠ᠂ ᠬᠠᠷᠠ ᠬᠣᠷᠣ ᠰᠢᠪᠠᠭᠤ ᠶ᠋ᠢ ᠪᠣᠷᠣ ᠬᠠᠷᠴᠠᠭᠠᠢ ᠪᠠᠷᠢᠵᠤ ᠢᠳᠡᠬᠦ ᠶ᠋ᠢ ᠦᠵᠡᠵᠦ᠂ ᠭᠣᠣᠯ ᠳᠠᠭᠠᠷᠢᠲᠤ ᠭᠣᠳᠣᠯᠢ ᠰᠡᠭᠦᠯᠲᠦ ᠤᠷᠤᠭ ᠰᠢᠩᠬᠤᠯᠠ ᠮᠣᠷᠢᠨ ᠤ᠋ ᠬᠢᠯᠭᠠᠰᠤᠨ ᠢ᠋ᠶ᠋ᠠᠷ ᠣᠷᠬᠠ ᠬᠢᠵᠦ ᠲᠡᠷᠡ ᠪᠣᠷᠣ ᠬᠠᠷᠴᠠᠭᠠᠢ ᠶ᠋ᠢ ᠪᠠᠷᠢᠵᠤ ᠠᠪᠴᠢᠷᠠᠪᠠ᠃
26᠂ ᠪᠣᠳᠣᠨᠴᠠᠷ᠂ ᠢᠳᠡᠬᠦ ᠶᠠᠭᠤᠮᠠ ᠦᠭᠡᠢ ᠲᠤᠯᠠ ᠴᠢᠨᠣᠠ ᠶ᠋ᠢᠨ ᠭᠣᠣ ᠳ᠋ᠤ᠌ ᠬᠣᠷᠢᠭᠰᠠᠨ ᠭᠥᠷᠥᠭᠡᠰᠦ ᠶ᠋ᠢ ᠮᠢᠷᠢᠶᠠᠵᠤ ᠬᠠᠷᠪᠤᠨ ᠠᠯᠠᠵᠤ ᠢᠳᠡᠬᠦ ᠪᠤᠶᠤ ᠴᠢᠨᠣᠠ ᠶ᠋ᠢᠨ ᠢᠳᠡᠭᠰᠡᠨ ᠰᠡᠭ ᠢ᠋ ᠲᠡᠭᠦᠵᠦ ᠭᠡᠳᠡᠰᠦ ᠪᠡᠨ ᠬᠣᠭᠣᠯᠠᠯᠠᠵᠤ᠂ ᠬᠠᠷᠴᠠᠭᠠᠢ ᠲᠡᠵᠢᠭᠡᠭᠰᠡᠭᠡᠷ ᠲᠡᠷᠡ ᠡᠣᠨ ᠭᠠᠷᠪᠠ᠃
27᠂ ᠬᠠᠪᠤᠷ ᠪᠣᠯᠵᠤ᠂ ᠨᠤᠭᠤᠰᠤ ᠢᠷᠡᠬᠦ ᠴᠠᠭ ᠲᠤ᠌ ᠬᠠᠷᠴᠠᠭᠠᠢ ᠪᠠᠨ ᠰᠣᠢᠵᠤ ᠲᠠᠯᠪᠢᠭᠠᠳ ᠭᠠᠯᠠᠭᠤ ᠨᠤᠭᠤᠰᠤ ᠣᠯᠠᠨ ᠢ᠋ ᠠᠯᠠᠵᠤ᠂ ᠢᠳᠡᠵᠦ ᠦᠯᠦ ᠪᠠᠷᠠᠬᠤ ᠲᠤᠯᠠ᠂ ᠮᠥᠴᠢᠷ ᠪᠦᠷᠢ ᠡᠴᠡ ᠮᠥᠴᠢ ᠭᠤᠶᠠ ᠡᠯᠭᠦᠵᠦ ᠬᠣᠵᠤᠤᠯᠠ ᠪᠦᠷᠢ ᠡᠴᠡ ᠬᠣᠶᠠᠷ ᠭᠤᠷᠪᠠᠨ ᠰᠢᠪᠠᠭᠤ ᠡᠯᠭᠦᠭᠰᠡᠨ ᠨᠢ ᠢᠯᠵᠠᠷᠠᠬᠤ ᠳ᠋ᠤ᠌ ᠬᠦᠷᠴᠡᠢ᠃
28᠂ ᠪᠢᠲᠡᠭᠦᠦ ᠮᠣᠳᠣᠲᠤ ᠠᠭᠤᠯᠠᠨ ᠬᠢᠷᠠ ᠠ᠋ᠴᠠ ᠨᠢᠭᠡᠨ ᠪᠦᠯᠦᠭ ᠢᠷᠭᠡᠨ᠂ ᠲᠦᠩᠬᠡᠯᠢᠭ ᠭᠣᠷᠣᠬᠠᠨ ᠤᠷᠤᠭᠤ ᠨᠡᠭᠦᠵᠦ ᠢᠷᠡᠪᠡ᠃ ᠪᠣᠳᠣᠨᠴᠠᠷ ᠬᠠᠷᠴᠠᠭᠠᠢ ᠲᠠᠯᠪᠢᠨ ᠡᠳᠦᠷ ᠪᠦᠷᠢ ᠲᠡᠷᠡ ᠢᠷᠭᠡᠨ ᠳ᠋ᠦ᠍ ᠣᠴᠢᠵᠤ ᠴᠡᠭᠡ ᠭᠤᠶᠤᠵᠤ ᠤᠤᠭᠤᠭᠠᠳ᠂ ᠰᠥᠨᠢ ᠡᠪᠡᠰᠦᠨ ᠡᠮᠪᠦᠯᠡ ᠭᠡᠷ ᠲᠡᠭᠡᠨ ᠢᠷᠡᠵᠦ ᠬᠣᠨᠣᠬᠤ ᠪᠥᠯᠥᠭᠡ᠃
29᠂ ᠲᠡᠳᠡ ᠢᠷᠭᠡᠨ᠂ ᠪᠣᠳᠣᠨᠴᠠᠷ ᠤ᠋ᠨ ᠬᠠᠷᠴᠠᠭᠠᠢ ᠶ᠋ᠢ ᠭᠤᠶᠤᠪᠠᠯ ᠡᠰᠡ ᠥᠭᠪᠡ᠃ ᠲᠡᠳᠡ ᠢᠷᠭᠡᠨ ᠨᠢ ᠪᠣᠳᠣᠨᠴᠠᠷ ᠢ᠋ ᠬᠡᠨ ᠶᠠᠭᠤᠨ ᠬᠥᠮᠦᠨ ᠪᠣᠢ ᠭᠡᠵᠦ ᠠᠰᠠᠭᠤᠬᠤ ᠦᠭᠡᠢ᠂ ᠪᠣᠳᠣᠨᠴᠠᠷ ᠪᠠᠰᠠ ᠲᠡᠷᠡ ᠢᠷᠭᠡᠨ ᠢ᠋ ᠶᠠᠭᠤᠨ ᠢᠷᠭᠡᠨ ᠭᠡᠵᠦ ᠠᠰᠠᠭᠤᠬᠤ ᠦᠭᠡᠢ ᠶᠠᠪᠤᠨᠠ᠃
30᠂ ᠭᠡᠲᠡᠯᠡ ᠪᠤᠭᠤ ᠬᠠᠲᠠᠭᠢ ᠠᠬᠠ ᠨᠢ ᠪᠣᠳᠣᠨᠴᠠᠷ ᠮᠤᠩᠬᠠᠭ ᠳᠡᠭᠦᠦ ᠪᠡᠨ ᠡᠨᠡ ᠤᠨᠤᠨ ᠮᠥᠷᠡᠨ ᠤᠷᠤᠭᠤ ᠣᠳᠤᠯᠠ ᠭᠡᠵᠦ ᠨᠡᠬᠡᠨ ᠢᠷᠡᠵᠦ᠂ ᠲᠦᠩᠬᠡᠯᠢᠭ ᠭᠣᠷᠣᠬᠠᠨ ᠳ᠋ᠤ᠌ ᠨᠤᠲᠤᠭᠯᠠᠬᠤ ᠲᠡᠳᠡ ᠢᠷᠭᠡᠨ ᠳ᠋ᠦ᠍ ᠬᠦᠷᠦᠭᠡᠳ ᠲᠡᠢᠮᠦ ᠮᠣᠷᠢᠲᠠᠢ᠂ ᠲᠡᠢᠮᠦ ᠬᠥᠮᠦᠨ ᠦᠵᠡᠭᠳᠡᠪᠡ ᠤᠤ ᠭᠡᠵᠦ ᠰᠤᠷᠠᠪᠠᠯ᠂
31᠂ ᠲᠡᠳᠡ ᠢᠷᠭᠡᠨ ᠥᠭᠦᠯᠡᠷᠦᠨ᠄ 《ᠡᠳᠦᠷ ᠪᠦᠷᠢ ᠨᠢᠭᠡᠨ ᠬᠥᠮᠦᠨ ᠮᠠᠨ ᠳ᠋ᠤ᠌ ᠢᠷᠡᠵᠦ ᠡᠰᠡᠭ (ᠴᠡᠭᠡ) ᠤᠤᠭᠤᠵᠤ ᠣᠳᠤᠨᠠ᠂ ᠲᠡᠷᠡ ᠬᠥᠮᠦᠨ ᠪᠠ ᠲᠡᠭᠦᠨ ᠦ᠌ ᠮᠣᠷᠢ ᠴᠢᠨᠦ ᠰᠤᠷᠠᠳᠠᠭ ᠲᠠᠢ ᠠᠳᠠᠯᠢ ᠪᠠᠢᠨᠠ᠂ ᠲᠡᠭᠦᠨ ᠳ᠋ᠦ᠍ ᠨᠢᠭᠡ ᠬᠠᠷᠴᠠᠭᠠᠢ ᠪᠠᠢᠨᠠ᠃ ᠲᠡᠷᠡ᠂ ᠰᠥᠨᠢ ᠬᠠᠮᠢᠭᠠ ᠬᠣᠨᠣᠳᠠᠭ ᠢ᠋ ᠮᠡᠳᠡᠬᠦ ᠦᠭᠡᠢ᠂ ᠪᠠᠷᠠᠭᠤᠨ ᠬᠣᠢᠨᠠ ᠠ᠋ᠴᠠ ᠰᠠᠯᠬᠢ ᠰᠠᠯᠬᠢᠯᠠᠪᠠᠯ ᠲᠡᠭᠦᠨ ᠦ᠌ ᠬᠠᠷᠴᠠᠭᠠᠢ ᠪᠠᠷ ᠪᠠᠷᠢᠭᠤᠯᠤᠭᠰᠠᠨ ᠨᠤᠭᠤᠰᠤ ᠭᠠᠯᠠᠭᠤ ᠶ᠋ᠢᠨ ᠥᠳᠥ ᠰᠣᠳᠣ ᠨᠢ ᠴᠠᠰᠤ ᠮᠡᠲᠦ ᠪᠤᠲᠠᠷᠠᠵᠤ ᠬᠡᠢᠰᠴᠦ ᠢᠷᠡᠨᠡ᠂ ᠪᠣᠳᠣᠪᠠᠯ ᠲᠡᠭᠦᠨ ᠦ᠌ ᠭᠡᠷ ᠬᠣᠯᠠ ᠦᠭᠡᠢ ᠪᠢᠵᠡ᠂ ᠣᠳᠣ ᠲᠡᠭᠦᠨ ᠦ᠌ ᠢᠷᠡᠬᠦ ᠴᠠᠭ ᠪᠣᠯᠪᠠ᠂ ᠬᠣᠷᠣᠮᠬᠠᠨ ᠬᠦᠯᠢᠴᠡ》 ᠭᠡᠪᠡ᠃
32᠂ ᠤᠳᠠᠯ ᠦᠭᠡᠢ ᠲᠦᠩᠬᠡᠯᠢᠭ ᠭᠣᠷᠣᠬᠠ ᠶ᠋ᠢᠨ ᠥᠭᠡᠳᠡ ᠨᠢᠭᠡᠨ ᠬᠥᠮᠦᠨ ᠠᠢᠰᠤᠢ᠂ ᠬᠦᠷᠴᠦ ᠢᠷᠡᠪᠡᠯ ᠪᠣᠳᠣᠨᠴᠠᠷ ᠮᠥᠨ᠃ ᠪᠤᠭᠤ ᠬᠠᠲᠠᠭᠢ ᠠᠬᠠ ᠨᠢ ᠲᠠᠨᠢᠵᠤ ᠠᠪᠤᠭᠠᠳ᠂ ᠤᠨᠤᠨ ᠮᠥᠷᠡᠨ ᠥᠭᠡᠳᠡ ᠳᠠᠭᠠᠭᠤᠯᠤᠨ ᠳᠠᠪᠬᠢᠪᠠ᠃
33᠂ ᠪᠣᠳᠣᠨᠴᠠᠷ᠂ ᠪᠤᠭᠤ ᠬᠠᠲᠠᠭᠢ ᠠᠬᠠ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠳ᠋ᠠᠭᠠᠨ ᠬᠠᠲᠠᠷᠢᠵᠤ ᠥᠭᠦᠯᠡᠷᠦᠨ᠄ 《ᠠᠬᠠ ᠠ᠋᠂ ᠠᠬᠠ ᠠ᠋! ᠪᠡᠶᠡ ᠲᠡᠷᠢᠭᠦᠨ ᠲᠡᠢ᠂ ᠳᠡᠪᠡᠯ ᠵᠠᠬᠠ ᠲᠠᠢ ᠨᠢ ᠰᠠᠢᠨ》 ᠭᠡᠪᠡᠯ᠂ ᠠᠬᠠ ᠨᠢ ᠲᠡᠷᠡ ᠦᠭᠡ ᠶ᠋ᠢ ᠬᠠᠢ᠌ᠬᠣᠷᠠᠭᠰᠠᠨ ᠦᠭᠡᠢ᠃
34᠂ ᠪᠣᠳᠣᠨᠴᠠᠷ ᠮᠥᠨ ᠦᠭᠡ ᠶ᠋ᠢ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠥᠭᠦᠯᠡᠪᠡᠯ᠂ ᠠᠬᠠ ᠨᠢ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠦᠭᠡᠢ᠂ ᠮᠥᠨ ᠦᠭᠡ ᠶ᠋ᠢ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠬᠡᠯᠡᠬᠦ ᠳ᠋ᠦ᠍ ᠠᠬᠠ ᠨᠢ ᠥᠭᠦᠯᠡᠷᠦᠨ᠄ 《ᠴᠢ ᠡᠨᠡ ᠦᠭᠡ ᠶ᠋ᠢ ᠶᠠᠭᠤᠨ ᠳ᠋ᠤ᠌ ᠳᠠᠬᠢᠨ ᠳᠠᠬᠢᠨ ᠥᠭᠦᠯᠡᠨᠡ?》
35᠂ ᠪᠣᠳᠣᠨᠴᠠᠷ ᠥᠭᠦᠯᠡᠷᠦᠨ᠄ 《 ᠲᠤᠭᠠᠷ ᠤ᠋ᠨ (ᠰᠠᠶᠢ ᠶ᠋ᠢᠨ) ᠲᠦᠩᠬᠡᠯᠢᠭ ᠭᠤᠷᠤᠬᠠᠨᠠ ᠪᠦᠬᠦᠢ ᠢᠷᠭᠡᠨ ᠳ᠋ᠦ᠍ ᠡᠵᠡᠨ ᠦᠭᠡᠢ ᠂ ᠶᠡᠬᠡ ᠪᠠᠭᠠ ᠂ ᠰᠠᠢᠨ ᠮᠠᠭᠤ ᠂ ᠲᠣᠯᠣᠭᠠᠢ ᠰᠢᠭᠢᠷᠡ ᠴᠥᠮ ᠨᠢᠭᠡᠨ ᠠᠳᠠᠯᠢ ᠴᠠᠴᠠᠭᠤ ᠪᠠᠢᠨᠠ᠃ ᠡᠢᠮᠦ ᠬᠢᠯᠪᠠᠷ ᠢᠷᠭᠡᠨ ᠲᠤᠯᠠ ᠲᠡᠳᠡᠨ ᠢ᠋ ᠪᠢᠳᠡ ᠡᠵᠡᠯᠡᠵᠦ ᠠᠪᠤᠶᠠ》
36᠂ ᠠᠬᠠ ᠨᠢ ᠥᠭᠦᠯᠡᠷᠦᠨ᠄ 《ᠵᠠ ᠲᠡᠢᠮᠦ ᠪᠣᠯ ᠭᠡᠷ ᠲᠡᠭᠡᠨ ᠬᠦᠷᠴᠦ᠂ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠵᠦᠪᠯᠡᠯᠳᠡᠵᠦ᠂ ᠲᠡᠳᠡ ᠢᠷᠭᠡᠨ ᠢ᠋ ᠡᠵᠡᠯᠡᠶᠡ》 ᠭᠡᠵᠦ
37᠂ ᠭᠡᠷ ᠲᠡᠭᠡᠨ ᠬᠦᠷᠦᠭᠡᠳ᠂ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠬᠡᠯᠡᠯᠴᠡᠵᠦ ᠮᠣᠷᠳᠠᠪᠠ᠃ ᠲᠡᠷᠢᠭᠦᠯᠡᠨ ᠬᠢᠨᠠᠭᠴᠢ ᠳ᠋ᠤ᠌ ᠮᠥᠨ ᠪᠣᠳᠣᠨᠴᠠᠷ ᠢ᠋ ᠶᠠᠪᠤᠭᠤᠯᠪᠠ᠃
38᠂ ᠪᠣᠳᠣᠨᠴᠠᠷ ᠲᠡᠷᠢᠭᠦᠯᠡᠨ ᠶᠠᠪᠤᠵᠤ ᠨᠢᠭᠡᠨ ᠵᠢᠷᠮᠦᠰᠦᠨ ᠡᠮᠡ ᠶ᠋ᠢ ᠪᠠᠷᠢᠵᠤ 《ᠴᠢ ᠶᠠᠭᠤᠨ ᠬᠥᠮᠦᠨ ᠪᠣᠢ?》 ᠭᠡᠵᠦ ᠠᠰᠠᠭᠤᠪᠠᠯ᠂ ᠲᠡᠷᠡ ᠡᠮᠡ ᠥᠭᠦᠯᠡᠷᠦᠨ᠄ 《ᠪᠢ ᠵᠠᠷᠴᠢᠭᠤᠳ ᠠᠲᠠᠩᠬᠠᠨ ᠤᠷᠢᠶᠠᠩᠬᠠᠢ ᠬᠥᠮᠦᠨ》 ᠭᠡᠪᠡ᠃
39᠂ ᠲᠡᠨᠳᠡ ᠡᠴᠡ ᠠᠬᠠ ᠳᠡᠭᠦᠦ ᠲᠠᠪᠤᠭᠤᠯᠠ ᠪᠠᠨ ᠲᠡᠳᠡ ᠢᠷᠭᠡᠨ ᠢ᠋ ᠳᠣᠪᠲᠣᠯᠵᠤ᠂ ᠠᠳᠤᠭᠤ ᠮᠠᠯ ᠢ᠋ ᠠᠪᠴᠤ᠂ ᠬᠥᠮᠦᠨ ᠠᠷᠠᠳ ᠢ᠋ ᠵᠠᠷᠤᠴᠠ ᠪᠣᠯᠭᠠᠪᠠ᠃
40᠂ ᠲᠡᠷᠡ ᠵᠢᠷᠮᠦᠰᠦᠨ ᠡᠮᠡ ᠪᠣᠳᠣᠨᠴᠠᠷ ᠲᠤ᠌ ᠢᠷᠡᠵᠦ ᠬᠥᠪᠡᠭᠦᠨ ᠲᠥᠷᠥᠪᠡ᠂ ᠲᠡᠭᠦᠨ ᠢ᠋ ᠬᠠᠷᠢ ᠣᠪᠣᠭ ᠤ᠋ᠨ ᠬᠥᠪᠡᠭᠦᠨ ᠭᠡᠵᠦ ᠵᠠᠵᠢᠷᠠᠳᠠᠢ ᠭᠡᠵᠦ ᠨᠡᠷᠡᠢᠳᠪᠡ᠃ ᠵᠠᠳᠠᠷᠠᠨ ᠤ᠋ ᠡᠪᠦᠭᠡ ᠲᠡᠷᠡ ᠪᠣᠯᠪᠠ᠃ ᠲᠡᠷᠡ ᠵᠠᠵᠢᠷᠠᠳᠠᠢ ᠶ᠋ᠢᠨ ᠬᠥᠪᠡᠭᠦᠨ ᠲᠦᠬᠥᠣᠳᠡᠢ ᠨᠡᠷᠡᠲᠦ ᠪᠥᠯᠥᠭᠡ᠃ ᠲᠦᠬᠥᠣᠳᠡᠢ ᠶ᠋ᠢᠨ ᠬᠥᠪᠡᠭᠦᠨ ᠪᠦᠷᠢ ᠪᠤᠯᠴᠢᠷᠤ᠂ ᠪᠦᠷᠢ ᠪᠤᠯᠴᠢᠷᠤ ᠶ᠋ᠢᠨ ᠬᠥᠪᠡᠭᠦᠨ ᠬᠠᠷᠠ ᠬᠠᠲᠠᠭᠠᠨ ᠪᠥᠯᠥᠭᠡ᠃ ᠬᠠᠷᠠ ᠬᠠᠲᠠᠭᠠᠨ ᠤ᠋ ᠬᠥᠪᠡᠭᠦᠨ ᠵᠠᠮᠤᠬᠠ ᠪᠥᠯᠥᠭᠡ᠃ ᠵᠠᠳᠠᠷᠠᠨ ᠣᠪᠣᠭᠲᠠᠨ ᠲᠡᠳᠡ ᠪᠣᠯᠪᠠ᠃
41᠂ ᠲᠡᠷᠡ ᠡᠮᠡ ᠪᠠᠰᠠ ᠪᠣᠳᠣᠨᠴᠠᠷ ᠠ᠋ᠴᠠ ᠨᠢᠭᠡᠨ ᠬᠥᠪᠡᠭᠦᠨ ᠲᠥᠷᠥᠭᠦᠯᠪᠡ᠃ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠠᠪᠤᠭᠰᠠᠨ ᠡᠮᠡ ᠶ᠋ᠢᠨ ᠬᠥᠪᠡᠭᠦᠨ ᠭᠡᠮᠡᠨ ᠪᠠᠭᠠᠷᠢᠳᠠᠢ ᠭᠡᠮᠡᠨ ᠨᠡᠷᠡᠢᠳᠪᠡ᠃ ᠪᠠᠭᠠᠷᠢᠨ ᠤ᠋ ᠡᠪᠦᠭᠡ ᠲᠡᠷᠡ ᠪᠣᠯᠪᠠ᠃ ᠪᠠᠭᠠᠷᠢᠳᠠᠢ ᠶ᠋ᠢᠨ ᠬᠥᠪᠡᠭᠦᠨ ᠴᠢᠳᠬᠤᠯ ᠪᠥᠬᠡ᠂ ᠴᠢᠳᠬᠤᠯ ᠪᠥᠬᠡ ᠣᠯᠠᠨ ᠡᠮᠡ ᠠᠪᠤᠭᠰᠠᠨ ᠲᠤᠯᠠ ᠬᠥᠪᠡᠭᠦᠨ ᠨᠢ ᠮᠠᠨᠠᠨ ᠮᠡᠲᠦ (ᠣᠯᠠᠨ) ᠲᠥᠷᠥᠪᠡ᠃ ᠮᠠᠨᠠᠨ ᠪᠠᠭᠠᠷᠢᠨ ᠣᠪᠣᠭᠲᠠᠨ ᠲᠡᠳᠡ ᠪᠣᠯᠪᠠ᠃
42᠂ ᠪᠡᠯᠭᠦᠨᠦᠲᠡᠢ ᠪᠡᠯᠭᠦᠨᠦᠳ ᠣᠪᠣᠭᠲᠠᠨ ᠪᠣᠯᠪᠠ᠃ ᠪᠦᠭᠦᠨᠦᠲᠡᠢ ᠪᠦᠭᠦᠨᠦᠳ ᠣᠪᠣᠭᠲᠠᠨ ᠪᠣᠯᠪᠠ᠃ ᠪᠤᠭᠤ ᠬᠠᠲᠠᠭᠢ ᠬᠠᠲᠠᠭᠢᠨ ᠣᠪᠣᠭᠲᠠᠨ ᠪᠣᠯᠪᠠ᠃ ᠪᠤᠬᠠᠲᠤ ᠰᠠᠯᠴᠢ ᠰᠠᠯᠵᠢᠭᠣᠳ ᠣᠪᠣᠭᠲᠠᠨ ᠪᠣᠯᠪᠠ᠃ ᠪᠣᠳᠣᠨᠴᠠᠷ ᠪᠣᠷᠵᠢᠭᠢᠨ ᠣᠪᠣᠭᠲᠠᠨ ᠪᠣᠯᠪᠠ᠃
43᠂ ᠪᠣᠳᠣᠨᠴᠠᠷ ᠤ᠋ᠨ ᠠᠪᠠᠯᠢ ᠡᠮᠡ ᠡᠴᠡ ᠲᠥᠷᠥᠭᠰᠡᠨ ᠪᠠᠷᠢᠮ ᠰᠢᠬᠢᠷᠠᠳᠣ ᠬᠠᠪᠢᠴᠢ ᠨᠡᠷᠡᠲᠦ ᠪᠥᠯᠥᠭᠡ᠃ ᠲᠡᠷᠡ ᠬᠠᠪᠢᠴᠢ ᠪᠠᠭᠠᠲᠤᠷ ᠤ᠋ᠨ ᠡᠬᠡ ᠶ᠋ᠢᠨ ᠢᠨᠵᠢ ᠳ᠋ᠦ᠍ ᠢᠷᠡᠭᠰᠡᠨ ᠡᠮᠡ ᠶ᠋ᠢ ᠪᠣᠳᠣᠨᠴᠠᠷ ᠲᠠᠲᠠᠪᠤᠷᠢ ᠡᠮᠡ ᠪᠣᠯᠭᠠᠨ ᠨᠢᠭᠡᠨ ᠬᠥᠪᠡᠭᠦᠨ ᠲᠥᠷᠥᠭᠰᠡᠨ ᠳ᠋ᠦ᠍ ᠵᠠᠬᠥᠷᠡᠳᠡᠢ ᠨᠡᠷᠡ ᠥᠭᠪᠡ᠃ ᠪᠣᠳᠣᠨᠴᠠᠷ ᠠᠮᠢᠳᠤ ᠪᠠᠢᠬᠤ ᠴᠠᠭ ᠲᠤ᠌ ᠵᠠᠬᠥᠷᠡᠳᠡᠢ ᠶ᠋ᠢ ᠵᠦᠬᠡᠯ ᠳᠠᠢᠯᠭᠠ ᠳ᠋ᠤ᠌ ᠣᠷᠣᠬᠤ ᠡᠷᠬᠡ ᠲᠡᠢ ᠪᠣᠯᠭᠠᠪᠠ᠃
44᠂ ᠪᠣᠳᠣᠨᠴᠠᠷ ᠢ᠋ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠲᠡᠷᠡ ᠵᠠᠬᠥᠷᠡᠳᠡᠢ ᠶ᠋ᠢ ᠢᠮᠠᠭᠲᠠ ᠭᠡᠷ ᠲᠦ᠍ ᠠᠳᠠᠩᠬᠠ ᠤᠷᠢᠶᠠᠩᠬᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠲᠤᠯᠠ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠭᠡᠵᠦ ᠳᠠᠢᠯᠭᠠ ᠠ᠋ᠴᠠ ᠬᠥᠭᠡᠭᠡᠵᠦ ᠭᠠᠷᠭᠠᠪᠠ᠃ ᠲᠡᠷᠡ ᠵᠠᠬᠥᠷᠡᠢ᠌ᠥᠨ ᠦ᠌ ᠡᠪᠦᠭᠡ ᠪᠣᠯᠪᠠ᠃
45᠂ ᠬᠠᠪᠢᠴᠢ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠨ ᠮᠠᠨᠠᠨ ᠲᠤᠳᠤᠨ ᠪᠥᠯᠥᠭᠡ᠃ ᠮᠠᠨᠠᠨ ᠲᠤᠳᠤᠨ ᠤ᠋ ᠬᠥᠪᠡᠭᠦᠨ ᠬᠠᠴᠢ ᠬᠦᠯᠦᠭ᠂ ᠬᠠᠴᠢᠨ᠂ ᠬᠠᠴᠢᠭᠤ᠂ ᠬᠠᠴᠤᠯᠠ᠂ ᠬᠠᠷᠠᠯᠳᠠᠢ᠂ ᠬᠠᠴᠢᠭᠤᠨ᠂ ᠨᠠᠴᠢᠨ ᠪᠠᠭᠠᠲᠤᠷ ᠳᠣᠯᠣᠭᠠ ᠪᠥᠯᠥᠭᠡ᠃
46᠂ ᠬᠠᠴᠢ ᠬᠦᠯᠦᠭ ᠦ᠋ᠨ ᠬᠥᠪᠡᠭᠦᠨ ᠬᠠᠢ᠌ᠳᠣ᠂ ᠨᠣᠮᠣᠯᠣᠨ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠪᠥᠯᠥᠭᠡ᠃ ᠬᠠᠴᠢᠨ ᠤ᠋ ᠬᠥᠪᠡᠭᠦᠨ ᠨᠣᠶᠠᠭᠢᠳᠠᠢ ᠨᠡᠷᠡ ᠲᠡᠢ ᠪᠥᠯᠥᠭᠡ᠃ ᠨᠣᠶᠠᠨ ᠰᠢᠭ᠋ ᠠᠪᠤᠷᠢᠲᠠᠢ ᠲᠤᠯᠠ ᠨᠣᠶᠠᠬᠢᠨ ᠣᠪᠣᠭᠲᠠᠨ ᠪᠣᠯᠪᠠ᠃ ᠬᠠᠴᠢᠭᠤ ᠶ᠋ᠢᠨ ᠬᠥᠪᠡᠭᠦᠨ ᠪᠠᠷᠣᠯᠳᠠᠢ ᠨᠡᠷᠡᠲᠦ ᠪᠥᠯᠥᠭᠡ᠃ ᠶᠡᠬᠡ ᠪᠡᠶᠡ ᠲᠡᠢ ᠪᠠ ᠢᠳᠡᠭᠡ ᠪᠠᠷᠠᠬᠤ ᠬᠣᠪᠳᠣᠭ ᠲᠤᠯᠠ ᠪᠠᠷᠤᠯᠠᠰ ᠣᠪᠣᠭᠲᠠᠨ ᠪᠣᠯᠪᠠ᠃ ᠬᠠᠴᠤᠯᠠ ᠶ᠋ᠢᠨ ᠬᠥᠪᠡᠭᠦᠨ ᠪᠠᠰᠠ ᠢᠳᠡᠭᠡ ᠪᠠᠷᠠᠳᠠᠭ ᠬᠣᠪᠳᠣᠭ ᠲᠤᠯᠠ ᠶᠡᠬᠡ ᠪᠠᠷᠤᠯᠠ᠂ ᠥᠴᠦᠬᠡᠨ ᠪᠠᠷᠤᠯᠠ ᠭᠡᠳᠡᠭ ᠬᠣᠴᠢ ᠨᠡᠷᠡ ᠲᠡᠢ ᠪᠣᠯᠵᠤ᠂ ᠤᠯᠠᠮ ᠢ᠋ᠶ᠋ᠠᠷ ᠡᠷᠳᠡᠮᠲᠦ ᠪᠠᠷᠤᠯᠠ᠂ ᠲᠦᠲᠦᠬᠡᠨ ᠪᠠᠷᠤᠯᠠ ᠲᠡᠷᠢᠭᠦᠲᠡᠨ ᠪᠠᠷᠤᠯᠠᠰ ᠣᠪᠣᠭᠲᠠᠨ ᠪᠣᠯᠪᠠ᠃ ᠬᠠᠷᠠᠯᠳᠠᠢ ᠶ᠋ᠢᠨ ᠬᠥᠪᠡᠭᠦᠨ ᠪᠤᠳᠠᠭᠠ ᠮᠡᠲᠦ ᠡᠬᠢ ᠲᠦᠷᠦᠭᠦᠦ ᠦᠭᠡᠢ ᠬᠤᠳᠬᠤᠯᠳᠤᠬᠤ ᠲᠤᠯᠠ ᠪᠣᠳᠠᠭᠠᠳ ᠣᠪᠣᠭᠲᠠᠨ ᠪᠣᠯᠪᠠ᠃ ᠬᠠᠴᠢᠭᠤᠨ ᠤ᠋ ᠬᠥᠪᠡᠭᠦᠨ ᠠᠳᠠᠷᠬᠢᠳᠠᠢ ᠨᠡᠷᠡᠲᠦ ᠪᠥᠯᠥᠭᠡ᠃ ᠠᠬᠠ ᠳᠡᠭᠦᠦ ᠶ᠋ᠢᠨ ᠳᠤᠮᠳᠠ ᠠᠳᠠᠷᠮᠠᠭᠠᠳᠠᠢ (ᠶᠠᠬᠢᠷ ᠬᠡᠷᠦᠬᠦᠯᠴᠢ) ᠲᠤᠯᠠ ᠠᠳᠠᠷᠬᠢᠨ ᠣᠪᠣᠭᠲᠠᠨ ᠪᠣᠯᠪᠠ᠃ ᠨᠠᠴᠢᠨ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠨ ᠤᠷᠤᠭᠤᠲᠠᠢ᠂ ᠮᠠᠩᠭ᠋ᠣᠳᠠᠢ ᠬᠣᠶᠠᠷ ᠪᠥᠯᠥᠭᠡ᠃ ᠣᠷᠣᠭᠣᠳ᠂ ᠮᠠᠩᠭ᠋ᠣᠳ ᠣᠪᠣᠭᠲᠠᠨ ᠪᠣᠯᠪᠠ᠃ ᠨᠠᠴᠢᠨ ᠪᠠᠭᠠᠲᠤᠷ ᠤ᠋ᠨ ᠠᠪᠠᠯᠢ ᠡᠮᠡ ᠡᠴᠡ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠰᠢᠵᠣᠭᠣᠳᠠᠢ᠂ ᠳᠣᠭᠣᠯᠲᠠᠢ ᠬᠣᠶᠠᠷ ᠪᠥᠯᠥᠭᠡ᠃
47᠂ ᠬᠠᠢ᠌ᠳᠣ ᠶ᠋ᠢᠨ ᠬᠥᠪᠡᠭᠦᠳ ᠪᠠᠢ᠌ᠰᠢᠩᠬᠣᠷ ᠲᠣᠭᠰᠢᠨ᠂ ᠴᠢᠷᠬᠠᠢ ᠯᠢᠩᠬᠤ᠂ ᠴᠠᠦᠵᠢᠨ ᠣᠷᠳᠠᠭᠠᠢ ᠭᠤᠷᠪᠠ ᠪᠥᠯᠥᠭᠡ᠃ ᠪᠠᠢ᠌ᠰᠢᠩᠬᠣᠷ ᠲᠣᠭᠰᠢᠨ ᠤ᠋ ᠬᠥᠪᠡᠭᠦᠨ ᠲᠤᠮᠪᠢᠨᠠᠢ ᠰᠡᠴᠡᠨ ᠪᠥᠯᠥᠭᠡ᠃ ᠴᠢᠷᠬᠠᠢ ᠯᠢᠩᠬᠤ ᠶ᠋ᠢᠨ ᠬᠥᠪᠡᠭᠦᠨ ᠰᠡᠩᠭᠦᠮ ᠪᠢᠯᠬᠡ᠂ ᠠᠮᠪᠠᠭᠠᠢ ᠲᠠᠨ ᠲᠠᠢᠴᠢᠭᠤᠳ ᠣᠪᠣᠭᠲᠠᠨ ᠪᠣᠯᠪᠠ᠃ ᠴᠢᠷᠬᠠᠢ ᠯᠢᠩᠬᠤ ᠶ᠋ᠢᠨ ᠪᠡᠷᠭᠡᠨ ᠢ᠋ᠶ᠋ᠡᠨ ᠡᠮᠡ ᠪᠣᠯᠭᠠᠨ ᠠᠪᠴᠤ ᠨᠢᠭᠡᠨ ᠬᠥᠪᠡᠭᠦᠨ ᠲᠥᠷᠥᠵᠡᠢ᠃ᠨᠡᠷᠡ ᠨᠢ ᠪᠡᠰᠦᠲᠡᠢ ᠭᠡᠨᠡ᠃ ᠪᠠᠰᠣᠳ ᠣᠪᠣᠭᠲᠠᠨ ᠪᠣᠯᠪᠠ᠃ ᠴᠠᠦᠵᠢᠨ ᠣᠷᠳᠠᠭᠠᠢ ᠵᠢᠷᠭᠤᠭᠠᠨ ᠬᠥᠪᠡᠭᠦᠨ ᠲᠡᠢ᠂ᠨᠡᠷᠡ ᠨᠢ᠄ ᠣᠷᠣᠨᠠᠷ᠂ ᠬᠣᠩᠬᠣᠲᠠᠨ᠂ ᠠᠷᠣᠯᠠᠳ᠂ ᠰᠥᠨᠢᠳ᠂ ᠬᠠᠪᠳᠣᠷᠬᠠᠰ᠂ ᠬᠡᠨᠢᠬᠡᠰ ᠭᠡᠳᠡᠭ ᠲᠤᠯᠠ ᠡᠢᠮᠦ ᠣᠪᠣᠭᠲᠠᠨ ᠪᠣᠯᠪᠠ᠃
48᠂ ᠲᠤᠮᠪᠢᠨᠠᠢ ᠰᠡᠴᠡᠨ ᠦ᠌ ᠬᠥᠪᠡᠭᠦᠨ ᠬᠠᠪᠤᠯ ᠬᠠᠭᠠᠨ ᠰᠠᠮ ᠰᠠᠴᠤᠯᠠ ᠬᠣᠶᠠᠷ ᠪᠥᠯᠥᠭᠡ᠃ ᠰᠠᠮ ᠰᠠᠴᠤᠯᠠ ᠶ᠋ᠢᠨ ᠬᠥᠪᠡᠭᠦᠨ ᠪᠦᠯᠳᠡᠴᠦ ᠪᠠᠭᠠᠲᠤᠷ ᠪᠥᠯᠥᠭᠡ᠃ ᠬᠠᠪᠤᠯ ᠬᠠᠭᠠᠨ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠲᠡᠢ᠂ ᠲᠡᠳᠡᠨ ᠦ᠌ ᠨᠡᠷᠡ ᠨᠢ ᠣᠬᠢᠨ ᠪᠠᠷᠬᠠᠭ᠂ ᠪᠠᠷᠳᠠᠨ ᠪᠠᠭᠠᠲᠤᠷ᠂ ᠬᠤᠲᠤᠭᠲᠤ ᠮᠦᠩᠬᠥᠷ᠂ ᠬᠣᠲᠠᠯᠠ ᠬᠠᠭᠠᠨ᠂ ᠬᠤᠯᠠᠨ᠂ ᠬᠠᠲᠠᠭᠠᠨ᠂ ᠲᠦᠲᠦᠬᠡᠨ ᠤᠳᠴᠢᠬᠢᠨ ᠭᠡᠨᠡ᠃
49᠂ ᠣᠭᠢᠨ ᠪᠠᠷᠬᠠᠭ ᠤ᠋ᠨ ᠬᠥᠪᠡᠭᠦᠨ ᠬᠤᠲᠤᠭᠲᠤ ᠵᠦᠷᠬᠢ ᠪᠥᠯᠥᠭᠡ᠃ ᠬᠤᠲᠤᠭᠲᠤ ᠵᠦᠷᠬᠢ ᠶ᠋ᠢᠨ ᠬᠥᠪᠡᠭᠦᠳ ᠰᠡᠴᠡ ᠪᠡᠬᠢ᠂ ᠲᠠᠢ᠌ᠴᠣ ᠬᠣᠶᠠᠷ ᠪᠥᠯᠥᠭᠡ᠃ ᠲᠡᠳᠡ ᠵᠦᠷᠬᠢ ᠣᠪᠣᠭᠲᠠᠨ ᠪᠣᠯᠪᠠ᠃
50᠂ ᠪᠡᠷᠲᠡᠨ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠳ ᠮᠡᠩᠭᠡᠲᠦ ᠬᠢᠶᠣᠨ᠂ ᠨᠡᠭᠦᠨ ᠲᠠᠢᠵᠢ᠂ ᠶᠢᠰᠦᠭᠡᠢ ᠪᠠᠭᠠᠲᠤᠷ᠂ ᠲᠠᠷᠢᠳᠠᠢ ᠤᠳᠴᠢᠬᠢᠨ ᠡᠨᠡ ᠳᠥᠷᠪᠡ ᠪᠥᠯᠥᠭᠡ᠃ ᠬᠤᠲᠤᠭᠲᠤ ᠮᠦᠩᠬᠥᠷ ᠦ᠋ᠨ ᠬᠥᠪᠡᠭᠦᠨ ᠪᠦᠷᠢ ᠪᠥᠬᠡ ᠪᠥᠯᠥᠭᠡ᠃ ᠤᠨᠤᠨ ᠮᠥᠷᠡᠨ ᠦ᠌ ᠰᠢᠭᠤᠢ ᠳ᠋ᠤ᠌ ᠬᠤᠷᠢᠮᠯᠠᠬᠤ ᠴᠠᠭ ᠲᠤ᠌ ᠪᠡᠯᠭᠦᠳᠡᠢ ᠶ᠋ᠢᠨ ᠮᠥᠷᠥ ᠶ᠋ᠢ ᠲᠡᠷᠡ ᠲᠠᠰᠤ ᠴᠠᠪᠴᠢᠭᠰᠠᠨ ᠪᠢᠯᠡ᠃
51᠂ ᠬᠣᠲᠠᠯᠠ ᠬᠠᠭᠠᠨ ᠤ᠋ ᠬᠥᠪᠡᠭᠦᠳ ᠵᠥᠴᠢ᠂ ᠬᠢᠷᠮᠠᠭᠣ᠂ ᠠᠯᠲᠠᠨ ᠭᠤᠷᠪᠠ ᠪᠥᠯᠥᠭᠡ᠃ ᠬᠤᠯᠠᠨ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠨ ᠶᠡᠬᠡ ᠴᠠᠷᠠ ᠪᠥᠯᠥᠭᠡ᠃ ᠪᠠᠳᠠᠢ᠂ ᠭᠢᠯᠢᠰᠢᠭ ᠬᠣᠶᠠᠷ ᠳᠠᠷᠬᠠᠳ ᠤ᠋ᠨ ᠨᠣᠶᠠᠳ ᠪᠣᠯᠪᠠ᠃ ᠬᠠᠲᠠᠭᠠᠨ᠂ ᠳᠦᠳᠦᠭᠡᠨ ᠬᠣᠶᠠᠷ ᠦᠷᠡ ᠦᠭᠡᠢ ᠥᠩᠭᠡᠷᠡᠵᠡᠢ᠃
52᠂ ᠬᠠᠮᠤᠭ ᠮᠣᠩᠭᠣᠯ ᠢ᠋ ᠬᠠᠪᠤᠯ ᠬᠠᠭᠠᠨ ᠵᠠᠬᠢᠷᠴᠤ ᠪᠠᠢᠪᠠ᠃ ᠬᠠᠪᠤᠯ ᠬᠠᠭᠠᠨ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠪᠠᠢᠲᠠᠯᠠ᠂ ᠰᠡᠩᠭᠦᠮ ᠪᠢᠯᠬᠡ ᠶ᠋ᠢᠨ ᠬᠥᠪᠡᠭᠦᠨ ᠠᠮᠪᠠᠭᠠᠢ ᠶ᠋ᠢ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠪᠣᠯᠭᠠᠬᠤ ᠪᠠᠷ ᠬᠡᠯᠡᠭᠰᠡᠨ ᠠᠵᠠᠢ᠃
53᠂ ᠪᠤᠢᠷ ᠬᠥᠯᠥᠨ ᠬᠣᠶᠠᠷ ᠨᠠᠭᠤᠷ ᠢ᠋ ᠬᠣᠯᠪᠣᠵᠤ ᠤᠷᠤᠰᠬᠤ ᠣᠷᠱᠣᠨ ᠮᠥᠷᠡᠨ ᠳ᠋ᠦ᠍ ᠠᠢ᠌ᠷᠢᠭᠣᠳ᠂ ᠪᠤᠢᠷᠤᠭᠤᠳ ᠣᠪᠣᠭ ᠤ᠋ᠨ ᠲᠠᠲ᠋ᠠᠷ ᠠᠢᠮᠠᠭ ᠨᠤᠲᠤᠭᠯᠠᠨᠠ᠃ ᠲᠡᠳᠡᠨ ᠳ᠋ᠦ᠍ ᠠᠮᠪᠠᠭᠠᠢ ᠬᠠᠭᠠᠨ ᠥᠬᠢᠨ ᠢ᠋ᠶ᠋ᠡᠨ ᠥᠭᠴᠦ ᠥᠪᠡᠷ ᠢ᠋ᠶ᠋ᠡᠨ ᠥᠬᠢᠨ ᠢ᠋ ᠬᠦᠷᠭᠡᠵᠦ ᠣᠴᠢᠭᠠᠳ ᠲᠠᠲ᠋ᠠᠷ ᠲᠤ᠌ ᠪᠠᠷᠢᠭᠳᠠᠪᠠ᠃ ᠲᠠᠲ᠋ᠠᠷ ᠠᠮᠪᠠᠭᠠᠢ ᠬᠠᠭᠠᠨ ᠢ᠋ ᠪᠠᠷᠢᠵᠤ᠂ ᠬᠢᠲᠠᠳ ᠤ᠋ᠨ ᠠᠯᠲᠠᠨ ᠬᠠᠭᠠᠨ ᠳ᠋ᠤ᠌ ᠬᠦᠷᠭᠡᠭᠦᠯᠪᠡ᠃ ᠪᠠᠰᠣᠳ ᠣᠪᠣᠭ ᠤ᠋ᠨ ᠪᠠᠯᠬᠠᠴᠢ ᠭᠡᠳᠡᠭ ᠬᠥᠮᠦᠨ ᠢ᠋ ᠡᠯᠴᠢ ᠪᠣᠯᠭᠠᠵᠤ᠂ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠬᠡᠯᠡᠭᠰᠡᠨ ᠨᠢ᠄ 《ᠬᠠᠪᠤᠯ ᠬᠠᠭᠠᠨ ᠤ᠋ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠦ᠌ ᠳᠤᠮᠳᠠᠬᠢ ᠬᠣᠲᠠᠯᠠ ᠳ᠋ᠤ᠌᠂ ᠮᠢᠨᠦ ᠠᠷᠪᠠᠨ ᠬᠥᠪᠡᠭᠦᠨ ᠦ᠌ ᠳᠤᠮᠳᠠᠬᠢ ᠬᠠᠲᠠᠭᠠᠨ ᠲᠠᠢᠵᠢ ᠳ᠋ᠤ᠌ ᠴᠢ ᠣᠴᠢᠵᠤ ᠬᠡᠯᠡ᠂ ᠬᠠᠮᠤᠭ ᠤ᠋ᠨ ᠬᠠᠭᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠪᠠᠢᠲᠠᠯᠠ ᠥᠬᠢᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠦᠳᠡᠵᠦ ᠬᠦᠷᠭᠡᠬᠦ ᠶ᠋ᠢ ᠨᠠᠳᠠ ᠪᠠᠷ ᠴᠡᠭᠡᠷᠯᠡᠯ ᠪᠣᠯᠭᠠᠭᠲᠤᠨ! ᠪᠢ ᠲᠠᠲ᠋ᠠᠷ ᠠᠢᠮᠠᠭ ᠲᠤ᠌ ᠪᠠᠷᠢᠭᠳᠠᠪᠠ᠃ ᠲᠠᠪᠤᠨ ᠬᠤᠷᠤᠭᠤᠨ ᠤ᠋ ᠬᠢᠮᠤᠰᠤ ᠶ᠋ᠢ ᠲᠠᠮᠲᠤᠷᠠᠲᠠᠯᠠ᠂ ᠠᠷᠪᠠᠨ ᠬᠤᠷᠤᠭᠤ ᠪᠠᠨ ᠪᠠᠷᠠᠭᠳᠠᠲᠠᠯᠠ ᠮᠢᠨᠦ ᠥᠰᠢᠶᠡ ᠶ᠋ᠢ ᠠᠪᠬᠤ ᠶ᠋ᠢ ᠤᠷᠤᠯᠳᠤᠭᠲᠤᠨ!》 ᠭᠡᠵᠦ ᠢᠯᠡᠭᠡᠵᠡᠢ᠃
54᠂ ᠲᠡᠷᠡ ᠴᠠᠭ ᠲᠤ᠌ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠰᠢᠪᠠᠭᠤ ᠠᠩᠨᠠᠨ ᠶᠠᠪᠤᠬᠤ ᠵᠠᠭᠤᠷᠠ ᠣᠯᠬᠣᠨᠣᠳ ᠠᠢᠮᠠᠭ ᠠ᠋ᠴᠠ ᠡᠮᠡ ᠠᠪᠤᠭᠠᠳ ᠪᠤᠴᠠᠵᠤ ᠶᠠᠪᠤᠭᠠ ᠮᠡᠷᠭᠢᠳ ᠦ᠋ᠨ ᠶᠡᠬᠡ ᠴᠢᠯᠡᠳᠦ ᠭᠡᠳᠡᠭ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠪᠠ᠃ ᠲᠡᠭᠦᠨ ᠦ᠌ ᠡᠮᠡ ᠶ᠋ᠢ ᠥᠩᠭᠡᠢᠵᠦ ᠦᠵᠡᠪᠡᠯ ᠭᠤᠸᠠ ᠦᠵᠡᠰᠬᠦᠯᠡᠩᠲᠡᠢ ᠬᠠᠲᠤᠨ ᠪᠠᠢᠨᠠ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠭᠡᠷ ᠲᠡᠭᠡᠨ ᠳᠠᠪᠬᠢᠵᠤ ᠢᠷᠡᠭᠡᠳ᠂ ᠠᠬᠠ ᠨᠡᠭᠦᠨ ᠲᠠᠢᠵᠢ᠂ ᠳᠡᠭᠦᠦ ᠲᠠᠷᠢᠳᠠᠢ ᠣᠳᠴᠢᠬᠢᠨ ᠬᠣᠶᠠᠷ ᠢ᠋ ᠳᠠᠭᠠᠭᠤᠯᠤᠨ ᠮᠣᠷᠳᠠᠵᠤ᠂ ᠶᠡᠬᠡ ᠴᠢᠯᠡᠳᠦ ᠶ᠋ᠢ ᠭᠦᠢᠴᠡᠵᠦ ᠣᠴᠢᠪᠠᠯ᠂
55᠂ ᠲᠡᠷᠡ ᠠᠶᠤᠵᠤ᠂ ᠬᠤᠷᠳᠤᠨ ᠤᠬᠠᠭᠠ ᠮᠣᠷᠢᠨ ᠤ᠋ ᠭᠤᠶᠠ ᠶ᠋ᠢ ᠲᠠᠰᠢᠭᠤᠷᠳᠠᠵᠤ᠂ ᠠᠭᠤᠯᠠ ᠶ᠋ᠢᠨ ᠪᠠᠯ ᠢ᠋ᠶ᠋ᠠᠷ ᠳᠤᠲᠠᠭᠠᠪᠠ᠃ ᠲᠡᠭᠦᠨ ᠢ᠋ ᠭᠤᠷᠪᠠᠭᠤᠯᠠ ᠪᠠᠨ ᠴᠣᠪᠠᠯᠳᠠᠨ ᠬᠥᠭᠡᠭᠡᠪᠡᠯ ᠲᠡᠷᠡ ᠤᠯᠠᠮ ᠳᠤᠲᠠᠭᠠᠭᠰᠠᠭᠠᠷ ᠨᠢᠭᠡᠨ ᠬᠣᠰᠢᠭᠤ ᠶ᠋ᠢ ᠲᠣᠭᠣᠷᠢᠵᠤ ᠡᠷᠭᠢᠵᠦ ᠲᠡᠷᠭᠡᠨ ᠳ᠋ᠡᠭᠡᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠡᠮᠡ ᠥᠭᠡᠯᠦᠨ ᠥᠵᠢᠨ (ᠹᠦᠵᠢᠨ ᠭᠡᠵᠦ ᠬᠢᠲᠠᠳ ᠢ᠋ᠶ᠋ᠠᠷ ᠬᠠᠲᠤᠨ ᠢ᠋ ᠬᠡᠯᠡᠨᠡ) ᠥᠭᠦᠯᠡᠷᠦᠨ ᠄ 《ᠲᠡᠷᠡ ᠭᠤᠷᠪᠠᠨ ᠬᠥᠮᠦᠨ ᠦ᠌ ᠤᠴᠢᠷ ᠢ᠋ ᠮᠡᠳᠡᠪᠡ ᠤᠤ ᠴᠢ? ᠲᠡᠳᠡᠨ ᠦ᠌ ᠴᠢᠷᠠᠢ ᠰᠡᠵᠢᠭᠯᠡᠮᠡᠷ ᠪᠠᠢᠨᠠ᠂ ᠴᠢᠨᠦ ᠠᠮᠢᠨ ᠳ᠋ᠤ᠌ ᠬᠣᠣᠷ ᠬᠦᠷᠭᠡᠵᠦ ᠪᠣᠯᠤᠨᠠ᠂ ᠠᠮᠢᠳᠤ ᠮᠡᠨᠳᠦ ᠦᠯᠡᠳᠡᠪᠡᠯ ᠡᠬᠡᠨᠡᠷ ᠢ᠋ ᠣᠯᠬᠤ ᠳ᠋ᠤ᠌ ᠪᠡᠷᠬᠡ ᠦᠭᠡᠢ᠂ ᠮᠤᠬᠤᠯᠠᠭ ᠳᠣᠳᠣᠮ ᠥᠬᠢᠳ ᠪᠣᠢ᠂ ᠲᠡᠷᠭᠡ ᠳᠣᠳᠣᠮ ᠬᠠᠲᠤᠳ ᠪᠣᠢ᠃ (ᠮᠢᠨᠦ ᠮᠡᠲᠦ ᠡᠬᠡᠨᠡᠷ ᠣᠯᠳᠠᠨᠠ) ᠬᠡᠷᠪᠡ ᠨᠠᠮᠢ᠋ᠢ ᠰᠠᠨᠠᠪᠠᠯ ᠳᠠᠬᠢᠨ ᠠᠪᠤᠭᠰᠠᠨ ᠭᠡᠷᠭᠡᠢ ᠶ᠋ᠢ ᠮᠢᠨᠦ ᠨᠡᠷᠡ ᠪᠡᠷ ᠨᠡᠷᠡᠯᠡᠭᠲᠦᠨ᠃ ᠣᠳᠣ ᠠᠮᠢᠨ ᠢ᠋ᠶ᠋ᠠᠨ ᠠᠷᠠᠴᠢᠯᠠ᠂ ᠮᠢᠨᠦ ᠦᠨᠦᠷ ᠢ᠋ ᠦᠨᠦᠰᠴᠦ ᠶᠠᠪᠤ》 ᠭᠡᠳ ᠡᠮᠦᠰᠦᠭᠰᠡᠨ ᠴᠠᠮᠴᠠ ᠪᠠᠨ ᠲᠠᠢᠯᠵᠤ ᠥᠭᠪᠡ᠃ ᠶᠡᠬᠡ ᠴᠢᠯᠡᠳᠦ ᠲᠡᠷᠡ ᠴᠠᠮᠴᠠ ᠶ᠋ᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠳᠣᠩᠬᠣᠢᠵᠤ ᠠᠪᠤᠮᠠᠭᠴᠠ ᠬᠠᠷᠠᠪᠠᠯ᠂ ᠨᠥᠭᠦᠭᠡ ᠭᠤᠷᠪᠠ ᠮᠥᠨ ᠬᠣᠰᠢᠭᠤ ᠶ᠋ᠢ ᠲᠣᠭᠣᠷᠢᠵᠤ ᠨᠡᠬᠡᠵᠦ ᠠᠢᠰᠤᠢ᠃ ᠴᠢᠯᠡᠳᠦ ᠬᠤᠷᠳᠤᠨ ᠤᠬᠠᠭᠠ ᠮᠣᠷᠢᠨ ᠤ᠋ ᠭᠤᠶᠠ ᠶ᠋ᠢ ᠲᠠᠰᠢᠭᠤᠷᠳᠠᠵᠤ ᠶᠠᠭᠠᠷᠠᠨ ᠤᠨᠤᠨ ᠮᠥᠷᠡᠨ ᠥᠭᠡᠳᠡ ᠳᠤᠲᠠᠭᠠᠪᠠ᠃
56᠂ ᠲᠡᠭᠦᠨ ᠢ᠋ ᠭᠤᠷᠪᠠᠭᠤᠯᠠ ᠬᠣᠢᠨᠠ ᠠ᠋ᠴᠠ ᠨᠢ ᠨᠡᠬᠡᠵᠦ ᠳᠣᠯᠣᠭᠠᠨ ᠳᠠᠪᠠᠭᠠ ᠳᠠᠪᠠᠲᠠᠯᠠ ᠬᠥᠭᠡᠭᠡᠵᠦ ᠣᠷᠬᠢᠭᠠᠳ᠂ ᠥᠭᠡᠯᠦᠨ ᠥᠵᠢᠨ ᠢ᠋ ᠠᠪᠴᠤ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠵᠢᠯᠣᠭᠣᠳᠤᠨ ᠬᠥᠲᠥᠯᠵᠦ᠂ ᠠᠬᠠ ᠨᠡᠭᠦᠨ ᠲᠠᠢᠵᠢ ᠲᠡᠷᠢᠭᠦᠯᠡᠵᠦ᠂ ᠳᠡᠭᠦᠦ ᠲᠠᠷᠢᠳᠠᠢ ᠤᠳᠴᠢᠬᠢᠨ ᠬᠠᠵᠠᠭᠤ ᠳ᠋ᠤ᠌ ᠳᠠᠭᠠᠵᠤ (ᠲᠡᠮᠡᠭᠡ ᠶ᠋ᠢ ᠭᠡᠯᠢᠵᠦ) ᠶᠠᠪᠤᠨᠠ᠃ ᠡᠭᠦᠨ ᠳ᠋ᠦ᠍ ᠥᠭᠡᠯᠦᠨ ᠥᠵᠢᠨ ᠥᠭᠦᠯᠡᠷᠦᠨ᠄
《ᠮᠢᠨᠦ ᠡᠷᠡ ᠴᠢᠯᠡᠳᠦ
ᠰᠡᠷᠢᠭᠦᠨ ᠰᠠᠯᠬᠢᠨ ᠳ᠋ᠤ᠌
ᠰᠡᠪᠡᠯᠭᠡ ᠦᠰᠦ ᠪᠡᠨ ᠬᠡᠢᠰᠬᠡᠵᠦ
ᠬᠡᠭᠡᠷᠡ ᠬᠥᠳᠡᠭᠡ
ᠭᠡᠳᠡᠰᠦ ᠪᠡᠨ ᠥᠯᠦᠰᠬᠡᠵᠦ ᠶᠠᠭᠠᠬᠢᠨ ᠵᠣᠪᠠᠬᠤ ᠪᠣᠯᠪᠠ?
ᠣᠳᠣ ᠪᠢ ᠬᠣᠶᠠᠷ ᠰᠡᠪᠡᠯᠭᠡ ᠦᠰᠦ ᠪᠡᠨ ᠬᠣᠢᠰᠢ ᠣᠷᠣᠭᠰᠢ ᠤᠨᠵᠢᠭᠤᠯᠵᠤ ᠶᠠᠭᠠᠬᠢᠨ ᠣᠳᠤᠨᠠ?》ᠭᠡᠳ ᠤᠨᠤᠨ ᠮᠥᠷᠡᠨ ᠢ᠋ ᠳᠣᠯᠭᠢᠰᠲᠠᠯᠠ᠂ ᠣᠢ ᠰᠢᠭᠤᠢ ᠶ᠋ᠢ ᠭᠠᠩᠬᠠᠳᠠᠯᠠ ᠶᠡᠬᠡ ᠳᠠᠭᠤ ᠪᠠᠷ ᠤᠬᠢᠯᠠᠬᠤ ᠳ᠋ᠤ᠌
ᠲᠠᠷᠢᠳᠠᠢ ᠤᠳᠴᠢᠬᠢᠨ ᠬᠠᠵᠠᠭᠤ ᠠ᠋ᠴᠠ ᠥᠭᠦᠯᠡᠷᠦᠨ᠄
《ᠲᠡᠪᠡᠷᠢᠬᠦ ᠬᠠᠢᠷᠠᠲᠤ ᠡᠷᠡ ᠴᠢᠨᠢ
ᠲᠡᠷᠲᠡᠭᠡ ᠳᠠᠪᠠᠭᠠ ᠶ᠋ᠢ ᠳᠠᠪᠠᠪᠠ᠂
ᠤᠬᠢᠯᠠᠨ ᠰᠠᠨᠠᠬᠤ ᠡᠷᠡ ᠴᠢᠨᠢ
ᠤᠰᠤ ᠣᠯᠠᠨ ᠢ᠋ ᠭᠡᠲᠦᠯᠪᠡ᠂
ᠬᠠᠢᠯᠠᠵᠤ ᠣᠬᠢᠯᠠᠪᠠᠴᠤ
ᠬᠠᠷᠠᠵᠤ ᠴᠢᠮᠢ᠋ᠢ ᠦᠵᠡᠬᠦ ᠦᠭᠡᠢ᠂
ᠬᠠᠢᠵᠤ ᠡᠷᠢᠪᠡᠴᠦ
ᠬᠠᠭᠠᠯᠭᠠ ᠵᠠᠮ ᠨᠢ ᠣᠯᠳᠠᠬᠤ ᠦᠭᠡᠢ᠂
ᠭᠤᠷᠪᠠᠨ ᠭᠣᠣᠯ ᠭᠡᠲᠦᠯᠭᠡᠪᠡ
ᠭᠤᠷᠪᠠᠨ ᠭᠤᠷᠪᠠ ᠶ᠋ᠢ ᠳᠠᠪᠠᠭᠤᠯᠪᠠ
ᠬᠠᠢᠪᠠᠯ ᠮᠥᠷ ᠦᠭᠡᠢ
ᠬᠠᠷᠠᠪᠠᠯ ᠪᠠᠷᠠ ᠦᠭᠡᠢ
ᠬᠠᠢᠯᠠᠪᠠᠯ ᠦᠯᠦ ᠰᠣᠨᠣᠰᠳᠠᠨᠠ
ᠳᠤᠭᠤᠢ ᠪᠠᠢ》 ᠭᠡᠵᠦ ᠢᠳᠬᠠᠪᠠ᠃
ᠥᠭᠡᠯᠦᠨ ᠥᠵᠢᠨ ᠢ᠋ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠡᠭᠡᠭᠡᠳ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠵᠤ ᠭᠡᠷᠭᠡᠢ ᠪᠣᠯᠭᠠᠪᠠ᠃ ᠥᠭᠡᠯᠦᠨ ᠦᠵᠢᠨ ᠢ᠋ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠠᠪᠴᠢᠷᠠᠭᠰᠠᠨ ᠶᠣᠰᠣ ᠡᠢᠮᠦ ᠪᠥᠯᠥᠭᠡ᠃
57᠂ ᠠᠮᠪᠠᠭᠠᠢ ᠬᠠᠭᠠᠨ ᠪᠠᠷᠢᠭᠳᠠᠭᠠᠳ᠂ ᠬᠠᠲᠠᠭᠠᠨ ᠬᠣᠲᠠᠯᠠ ᠬᠣᠶᠠᠷ ᠢ᠋ ᠨᠡᠷᠡ ᠵᠢᠭᠠᠭᠰᠠᠨ ᠲᠤᠯᠠ᠂ ᠬᠠᠮᠤᠭ ᠮᠣᠩᠭᠣᠯ᠂ ᠲᠠᠢᠴᠢᠭᠤᠳ ᠨᠠᠷ ᠤᠨᠤᠨ ᠮᠥᠷᠡᠨ ᠦ᠌ ᠬᠣᠷᠬᠣᠨᠠᠭ ᠤ᠋ᠨ ᠬᠥᠨᠳᠡᠢ ᠭᠡᠳᠡᠭ ᠭᠠᠵᠠᠷ ᠴᠤᠭᠯᠠᠷᠠᠵᠤ ᠬᠡᠯᠡᠯᠴᠡᠭᠡᠳ᠂ ᠬᠣᠲᠠᠯᠠ ᠶ᠋ᠢ ᠬᠠᠭᠠᠨ ᠪᠣᠯᠭᠠᠪᠠ᠃ ᠮᠣᠩᠭᠣᠯ ᠤ᠋ᠨ ᠵᠢᠷᠭᠠᠯᠠᠩ ᠨᠢ ᠪᠥᠵᠢᠭ᠂ ᠬᠤᠷᠢᠮ ᠪᠥᠯᠥᠭᠡ᠃ ᠬᠣᠲᠠᠯᠠ ᠶ᠋ᠢ ᠬᠠᠭᠠᠨ ᠡᠷᠭᠦᠮᠵᠢᠯᠡᠭᠡᠳ ᠬᠣᠷᠬᠣᠨᠠᠭ ᠤ᠋ᠨ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠳᠣᠣᠷᠠ ᠬᠠᠪᠢᠷᠭᠠ ᠭᠠᠵᠠᠷ ᠢ᠋ ᠬᠠᠯᠴᠠᠷᠠᠲᠠᠯᠠ᠂ ᠡᠪᠦᠳᠦᠭ ᠭᠠᠵᠠᠷ ᠢ᠋ ᠦᠯᠳᠥᠷᠳᠡᠯᠡ ᠳᠡᠪᠬᠡᠴᠡᠨ ᠪᠥᠵᠢᠭᠯᠡᠵᠦ ᠬᠤᠷᠢᠮᠯᠠᠪᠠ᠃
58᠂ ᠬᠣᠲᠠᠯᠠ ᠬᠠᠭᠠᠨ ᠪᠣᠯᠤᠭᠠᠳ ᠬᠠᠲᠠᠭᠠᠨ ᠲᠠᠢᠵᠢ ᠲᠠᠢ ᠬᠣᠶᠠᠭᠤᠯᠠ ᠪᠠᠨ ᠲᠠᠲ᠋ᠠᠷ ᠢᠷᠭᠡᠨ ᠡᠴᠡ ᠥᠰᠢᠶᠡ ᠠᠪᠬᠤ ᠪᠠᠷ ᠮᠣᠷᠳᠠᠪᠠ᠃ ᠲᠠᠲ᠋ᠠᠷ ᠤ᠋ᠨ ᠬᠥᠲᠥᠨ ᠪᠠᠷᠠᠬᠠ᠂ ᠵᠠᠯᠢ ᠪᠤᠬᠠ ᠬᠣᠶᠠᠷ ᠲᠠᠢ ᠠᠷᠪᠠᠨ ᠭᠤᠷᠪᠠᠨ ᠤᠳᠠᠭᠠ ᠪᠠᠢᠯᠳᠤᠪᠠᠴᠤ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠥᠰᠢᠶᠡ ᠶ᠋ᠢ ᠰᠠᠢᠲᠤᠷ ᠠᠪᠴᠤ ᠡᠰᠡ ᠴᠢᠳᠠᠪᠠ᠃
59᠂ ᠲᠡᠷᠡ ᠴᠠᠭ ᠲᠤ᠌ ᠶᠢᠰᠦᠭᠡᠢ ᠪᠠᠭᠠᠲᠤᠷ᠂ ᠲᠠᠲ᠋ᠠᠷ ᠤ᠋ᠨ ᠲᠡᠮᠦᠵᠢᠨ ᠦᠭᠡ᠂ ᠬᠣᠷᠢ ᠪᠤᠬᠠ ᠵᠡᠷᠭᠡ ᠶ᠋ᠢᠨ ᠲᠠᠲ᠋ᠠᠷ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠢᠷᠡᠬᠦ ᠳ᠋ᠦ᠍᠂ ᠵᠢᠷᠮᠦᠰᠦᠨ ᠵᠢᠷᠣᠮᠣᠰᠣᠨ ᠪᠠᠢᠭᠰᠠᠨ ᠥᠭᠡᠯᠦᠨ ᠦᠵᠢᠨ ᠤᠨᠤᠨ ᠤ᠋ ᠳᠡᠯᠢᠭᠦᠨ ᠪᠣᠯᠳᠠᠭ ᠭᠡᠳᠡᠭ ᠭᠠᠵᠠᠷ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠲᠥᠷᠥᠭᠦᠯᠵᠡᠢ᠃ ᠴᠢᠩᠭᠢᠰ ᠲᠥᠷᠥᠬᠦ ᠳ᠋ᠡᠭᠡᠨ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠪᠠᠨ ᠱᠠᠭᠠ ᠶ᠋ᠢᠨ ᠴᠢᠨᠡᠭᠡᠨ ᠨᠥᠵᠢ ᠠᠳᠬᠤᠨ ᠲᠥᠷᠥᠵᠡᠢ᠃ ᠲᠠᠲ᠋ᠠᠷ ᠤ᠋ᠨ ᠲᠡᠮᠦᠵᠢᠨ ᠦᠭᠡ ᠶ᠋ᠢ ᠪᠠᠷᠢᠵᠤ ᠢᠷᠡᠬᠦ ᠴᠠᠭ ᠲᠤ᠌ ᠲᠣᠬᠢᠶᠠᠯᠳᠤᠵᠤ ᠲᠥᠷᠥᠪᠡ ᠭᠡᠵᠦ ᠲᠡᠮᠦᠵᠢᠨ ᠨᠡᠷᠡ ᠶ᠋ᠢ ᠥᠭᠴᠡᠢ᠃
60᠂ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠥᠭᠡᠯᠦᠨ ᠦᠵᠢᠨ ᠡᠴᠡ ᠲᠡᠮᠦᠵᠢᠨ᠂ ᠬᠠᠰᠠᠷ᠂ ᠬᠠᠴᠢᠭᠤᠨ᠂ ᠲᠡᠮᠦᠭᠡ ᠳᠥᠷᠪᠡᠨ ᠬᠥᠪᠡᠭᠦᠨ ᠲᠥᠷᠥᠪᠡ᠃ ᠪᠠᠰᠠ ᠳᠡᠮᠡᠥᠯᠠᠨ ᠨᠡᠷᠡ ᠲᠡᠢ ᠨᠢᠭᠡᠨ ᠥᠬᠢᠨ ᠲᠥᠷᠥᠪᠡ᠃ (ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠨᠥᠭᠦᠭᠡ ᠭᠡᠷᠭᠡᠢ ᠰᠤᠴᠢᠭᠡᠯ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠪᠡᠭᠲᠡᠷ᠂ ᠪᠡᠯᠭᠦᠳᠡᠢ ᠬᠣᠶᠠᠷ ᠪᠥᠯᠥᠭᠡ᠃) ᠲᠡᠮᠦᠵᠢᠨ ᠢ᠋ ᠶᠢᠰᠦᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌ ᠵᠥᠴᠢ ᠬᠠᠰᠠᠷ ᠳᠣᠯᠣᠭᠠᠨ ᠨᠠᠰᠤᠲᠠᠢ᠃ ᠬᠠᠴᠢᠭᠤᠨ ᠠᠯᠴᠢ ᠲᠠᠪᠤᠨ ᠨᠠᠰᠤᠲᠠᠢ᠃ ᠲᠡᠮᠦᠭᠡ ᠤᠳᠴᠢᠬᠢᠨ (ᠤᠳᠬᠤᠨ ᠨᠢ ᠭᠠᠯ ᠤ᠋ᠨ ᠬᠠᠭᠠᠨ᠂ ᠭᠣᠯᠣᠮᠲᠠ ᠶ᠋ᠢᠨ ᠡᠵᠡᠨ ᠭᠡᠰᠡᠨ ᠦᠭᠡ ᠪᠣᠯᠤᠨᠠ) ᠭᠤᠷᠪᠠᠨ ᠨᠠᠰᠤᠲᠠᠢ᠃ ᠲᠡᠮᠦᠯᠡᠨ ᠦᠯᠦᠭᠡᠢ᠌ᠳᠡᠢ ᠪᠠᠢᠭᠰᠠᠨ ᠪᠥᠯᠥᠭᠡ᠃
61᠂ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠡᠮᠦᠵᠢᠨ ᠢ᠋ ᠶᠢᠰᠦᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌ ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠲᠥᠷᠬᠥᠮ ᠣᠯᠬᠣᠨᠣᠳ ᠢᠷᠭᠡᠨ ᠳ᠋ᠦ᠍ ᠬᠥᠪᠡᠭᠦᠨ ᠦ᠌ ᠨᠠᠭᠠᠴᠤ ᠨᠠᠷ ᠠ᠋ᠴᠠ ᠥᠬᠢᠨ ᠭᠤᠶᠤᠶᠠ ᠭᠡᠵᠦ ᠲᠡᠮᠦᠵᠢᠨ ᠢ᠋ ᠠᠪᠤᠭᠠᠳ ᠣᠳᠪᠠ᠃ ᠶᠠᠪᠤᠬᠤ ᠵᠠᠮ ᠳ᠋ᠤ᠌ ᠴᠡᠭᠴᠡᠷ ᠴᠢᠬᠤᠷᠭᠤ ᠭᠡᠳᠡᠭ ᠭᠠᠵᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠬᠣᠩᠭᠢᠷᠠᠳ ᠤ᠋ᠨ ᠳ᠋ᠠᠢ ᠰᠡᠴᠡᠨ ᠲᠡᠢ ᠠᠭᠤᠯᠵᠠᠪᠠ᠃
62᠂ ᠳ᠋ᠠᠢ ᠰᠡᠴᠡᠨ ᠥᠭᠦᠯᠡᠷᠦᠨ᠄ 《ᠶᠢᠰᠦᠭᠡᠢ ᠬᠣᠲᠠ ᠠᠯᠢ ᠬᠦᠷᠬᠦ ᠪᠡᠷ ᠶᠠᠪᠤᠨᠠ?》 ᠶᠢᠰᠦᠭᠡᠢ ᠪᠠᠭᠠᠲᠤᠷ ᠥᠭᠦᠯᠡᠷᠦᠨ᠄ 《ᠮᠢᠨᠦ ᠬᠥᠪᠡᠭᠦᠨ ᠦ᠌ ᠨᠠᠭᠠᠴᠤ ᠣᠯᠬᠣᠨᠣᠳ ᠢᠷᠭᠡᠨ ᠡᠴᠡ ᠥᠬᠢᠨ ᠭᠤᠶᠤᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ᠃》 ᠭᠡᠲᠡᠯᠡ᠂ ᠳ᠋ᠠᠢ ᠰᠡᠴᠡᠨ ᠥᠭᠦᠯᠡᠷᠦᠨ᠄ 《ᠡᠨᠡ ᠬᠥᠪᠡᠭᠦᠨ ᠴᠢᠨᠢ ᠨᠢᠳᠦᠨ ᠳ᠋ᠡᠭᠡᠨ ᠭᠠᠯ ᠲᠠᠢ᠂ ᠨᠢᠭᠤᠷ ᠲᠠᠭᠠᠨ ᠭᠡᠷᠡᠯᠲᠡᠢ ᠬᠥᠪᠡᠭᠦᠨ ᠪᠠᠢᠨᠠ᠂
63᠂ ᠶᠢᠰᠦᠭᠡᠢ ᠬᠣᠲᠠ᠂ ᠪᠢ ᠡᠨᠡ ᠰᠥᠨᠢ ᠨᠢᠭᠡᠨ ᠵᠡᠭᠦᠳᠦ ᠵᠡᠭᠦᠳᠦᠯᠡᠪᠡ᠂ ᠴᠠᠭᠠᠨ ᠱᠣᠩᠬᠣᠷ ᠰᠢᠪᠠᠭᠤ ᠨᠠᠷᠠ ᠰᠠᠷᠠ ᠬᠣᠶᠠᠷ ᠢ᠋ ᠠᠳᠬᠤᠨ ᠨᠢᠰᠴᠦ ᠢᠷᠡᠭᠡᠳ ᠮᠢᠨᠦ ᠭᠠᠷ ᠳᠡᠭᠡᠷᠡ ᠪᠠᠭᠤᠪᠠ ᠭᠡᠵᠦ ᠵᠡᠭᠦᠳᠦᠯᠡᠪᠡ᠃ ᠨᠠᠷᠠ ᠰᠠᠷᠠ ᠶ᠋ᠢ ᠪᠢᠳᠡ ᠨᠢᠳᠦ ᠪᠡᠷ ᠦᠵᠡᠳᠡᠭ ᠪᠢᠯᠡ᠂ ᠭᠡᠲᠡᠯᠡ ᠨᠠᠷᠠ ᠰᠠᠷᠠ ᠶ᠋ᠢ ᠱᠣᠩᠬᠣᠷ ᠰᠢᠪᠠᠭᠤ ᠠᠳᠬᠤᠵᠤ᠂ ᠮᠢᠨᠦ ᠭᠠᠷ ᠳᠡᠭᠡᠷᠡ ᠪᠠᠭᠤᠬᠤ ᠨᠢ ᠭᠠᠢᠬᠠᠯᠲᠠᠢ᠃ ᠶᠠᠮᠠᠷ ᠰᠠᠢᠨ ᠲᠣᠬᠢᠶᠠᠯ ᠤᠴᠠᠷᠠᠬᠤ ᠪᠣᠯᠪᠠ ᠭᠡᠵᠦ ᠪᠢ ᠪᠤᠰᠤᠳ ᠲᠤ᠌ ᠬᠡᠯᠡᠭᠰᠡᠨ ᠪᠥᠯᠥᠭᠡ᠂ ᠶᠢᠰᠦᠭᠡᠢ ᠬᠣᠲᠠ ᠴᠢ ᠬᠥᠪᠡᠭᠦᠨ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠨᠢ ᠳᠠᠷᠤᠢ ᠮᠢᠨᠦ ᠵᠡᠭᠦᠳᠦᠨ ᠦ᠌ ᠲᠠᠢᠯᠪᠤᠷᠢ ᠪᠣᠯᠪᠠ᠃ ᠶᠠᠭᠤᠨ ᠵᠡᠭᠦᠳᠦ ᠪᠠᠢᠬᠤ ᠪᠣᠢ! ᠲᠠᠨ ᠤ᠋ ᠬᠢᠶᠠᠳ ᠠᠢᠮᠠᠭ ᠤ᠋ᠨ ᠰᠦᠯᠳᠡ ᠢᠷᠡᠵᠦ᠂ ᠵᠡᠭᠦᠳᠦ ᠪᠡᠷ ᠳᠣᠬᠢᠭᠤᠯᠤᠭᠰᠠᠨ ᠠᠵᠠᠢ᠃
64᠂ ᠮᠠᠨ ᠤ᠋ ᠬᠣᠩᠭᠢᠷᠠᠳ ᠬᠡᠳᠦᠢᠨ ᠡᠴᠡ ᠪᠤᠰᠤᠳ ᠤ᠋ᠨ ᠨᠤᠲᠤᠭ ᠪᠠ ᠬᠥᠮᠦᠨ ᠢ᠋ ᠪᠤᠯᠢᠶᠠᠨ ᠲᠡᠮᠡᠴᠡᠯᠳᠦᠳᠡᠭ ᠦᠭᠡᠢ᠂
ᠬᠠᠷᠢ ᠤᠯᠤᠰ ᠢ᠋ ᠦᠯᠦ ᠳᠣᠪᠲᠣᠯᠤᠨ
ᠬᠠᠴᠠᠷ ᠰᠠᠢᠲᠤ ᠥᠬᠢᠳ ᠢ᠋ᠶ᠋ᠡᠨ
ᠬᠠᠰᠠᠭ ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠵᠤ
ᠬᠠᠷᠠ ᠪᠤᠤᠷᠠ ᠬᠥᠯᠯᠡᠵᠦ
ᠬᠠᠲᠠᠷᠢᠭᠤᠯᠵᠤ ᠣᠳᠴᠤ
ᠬᠠᠭᠠᠨ ᠪᠣᠯᠤᠭᠰᠠᠨ ᠲᠠ ᠨᠠᠷ ᠤ᠋ᠨ
ᠬᠠᠲᠤᠨ ᠰᠠᠭᠤᠷᠢᠨ ᠳ᠋ᠤ᠌ ᠳᠡᠪᠰᠢᠭᠦᠯᠵᠦ
ᠬᠠᠮᠲᠤ ᠰᠠᠭᠤᠯᠭᠠᠨᠠ᠂
ᠥᠭᠡᠷᠡ ᠢᠷᠭᠡᠨ ᠢ᠋ ᠦᠯᠦ ᠲᠡᠮᠡᠴᠡᠨ
ᠥᠩᠭᠡ ᠰᠠᠢᠲᠤ ᠥᠬᠢᠳ ᠢ᠋ᠶ᠋ᠡᠨ
ᠦᠯᠵᠢᠭᠳᠡᠢ (ᠰᠠᠭᠤᠳᠠᠯ ᠲᠠᠢ) ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠵᠤ
ᠦᠯᠦ ᠪᠤᠤᠷᠠ ᠬᠥᠯᠯᠡᠵᠦ
ᠡᠭᠦᠰᠬᠡᠵᠦ ᠣᠳᠴᠤ
ᠥᠨᠳᠥᠷ ᠰᠠᠭᠤᠷᠢ ᠡᠵᠡᠯᠡᠭᠴᠢᠳ ᠦ᠋ᠨ
ᠥᠷᠥᠭᠡᠯ ᠬᠠᠨᠢ ᠪᠣᠯᠭᠠᠨᠠ᠃
ᠮᠠᠨ ᠤ᠋ ᠬᠣᠩᠭᠢᠷᠠᠳ ᠬᠡᠳᠦᠢᠨ ᠡᠴᠡ ᠬᠠᠴᠠᠷ ᠭᠤᠸᠠ ᠬᠠᠲᠤᠳ ᠲᠠᠢ᠂ ᠥᠩᠭᠡ ᠰᠠᠢᠨ ᠥᠬᠢᠳ ᠲᠡᠢ ᠲᠤᠯᠠ᠂ ᠵᠢᠭᠡ ᠶ᠋ᠢᠨ ᠵᠢᠰᠦ ᠪᠡᠷ᠂ ᠥᠬᠢᠳ ᠦ᠋ᠨ ᠥᠩᠭᠡ ᠪᠡᠷ ᠶᠠᠪᠤᠨᠠ᠃
65᠂ ᠨᠤᠭᠤᠨ ᠬᠡᠦᠬᠡᠳ ᠨᠤᠲᠤᠭ ᠢ᠋ᠶ᠋ᠠᠨ ᠡᠵᠡᠮᠰᠢᠨᠡ᠂ ᠥᠬᠢᠨ ᠬᠡᠦᠬᠡᠳ ᠥᠩᠭᠡ ᠰᠢᠯᠢᠭᠳᠡᠨᠡ᠂ ᠶᠢᠰᠦᠭᠡᠢ ᠬᠣᠲᠠ᠂ ᠮᠢᠨᠦ ᠭᠡᠷ ᠲᠦ᠍ ᠣᠴᠢ᠂ ᠨᠠᠳᠠᠳᠤ ᠥᠴᠦᠬᠡᠨ ᠥᠬᠢᠨ ᠪᠠᠢᠨᠠ᠂ ᠲᠠ ᠦᠵᠡ》 ᠭᠡᠵᠦ ᠳ᠋ᠠᠢ ᠰᠡᠴᠡᠨ ᠬᠡᠯᠡᠭᠡᠳ ᠶᠢᠰᠦᠭᠡᠢ ᠶ᠋ᠢ ᠭᠡᠷ ᠲᠡᠭᠡᠨ ᠳᠠᠭᠠᠭᠤᠯᠵᠤ ᠠᠪᠠᠴᠢᠪᠠ᠃
66᠂ ᠶᠢᠰᠦᠭᠡᠢ ᠬᠣᠲᠠ ᠥᠬᠢᠨ ᠢ᠋ ᠦᠵᠡᠪᠡᠯ᠂ ᠨᠢᠭᠤᠷ ᠲᠠᠭᠠᠨ ᠭᠡᠷᠡᠯᠲᠡᠢ᠂ ᠨᠢᠳᠦᠨ ᠳ᠋ᠡᠭᠡᠨ ᠭᠠᠯ ᠲᠠᠢ ᠥᠬᠢᠨ ᠲᠤᠯᠠ᠂ ᠰᠠᠨᠠᠭᠠᠨ ᠳ᠋ᠤ᠌ ᠨᠡᠢᠯᠡᠪᠡ᠃ ᠲᠡᠭᠦᠨ ᠦ᠌ ᠨᠡᠷᠡ ᠪᠥᠷᠲᠡ ᠭᠡᠨᠡ᠃ ᠲᠡᠮᠦᠵᠢᠨ ᠡᠴᠡ ᠨᠢᠭᠡᠨ ᠨᠠᠰᠤ ᠠᠬᠠ᠂ ᠠᠷᠪᠠᠲᠠᠢ ᠠᠵᠢ᠃ ᠳ᠋ᠠᠢ ᠰᠡᠴᠡᠨ ᠦ᠌ ᠭᠡᠷ ᠲᠦ᠍ ᠬᠣᠨᠣᠭᠠᠳ ᠮᠠᠷᠭᠠᠰᠢ ᠨᠢ ᠥᠬᠢᠨ ᠢ᠋ ᠭᠤᠶᠤᠪᠠᠯ᠂ ᠳ᠋ᠠᠢ ᠰᠡᠴᠡᠨ ᠥᠭᠦᠯᠡᠷᠦᠨ᠄ 《ᠣᠯᠠᠨ ᠤᠳᠠᠭᠠ ᠭᠣᠶᠣᠯᠭᠠᠵᠣ ᠥᠭᠪᠡᠯ ᠡᠷᠬᠢᠮᠯᠡᠭᠳᠡᠬᠦ᠂ ᠴᠥᠭᠡᠨ ᠤᠳᠠᠭᠠ ᠭᠣᠶᠣᠯᠭᠠᠵᠣ ᠥᠭᠪᠡᠯ ᠳᠣᠷᠣᠮᠵᠢᠯᠠᠭᠳᠠᠬᠤ ᠭᠡᠳᠡᠭ ᠪᠣᠯᠪᠠᠴᠤ᠂ ᠥᠬᠢᠨ ᠬᠥᠮᠦᠨ ᠦ᠌ ᠵᠠᠶᠠᠭᠠ᠂ ᠲᠥᠷᠥᠭᠰᠡᠨ ᠡᠭᠦᠳᠦᠨ ᠳ᠋ᠦ᠍ ᠥᠲᠡᠯᠬᠦ ᠦᠭᠡᠢ ᠲᠤᠯᠠ ᠥᠬᠢᠨ ᠢ᠋ᠶ᠋ᠡᠨ ᠥᠭᠭᠦᠶᠡ᠂ ᠴᠢ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠬᠦᠷᠭᠡᠨ ᠪᠣᠯᠭᠠᠵᠤ ᠮᠠᠨ ᠤ᠋ ᠭᠡᠷ ᠲᠦ᠍ ᠦᠯᠡᠳᠡᠭᠡ》 ᠭᠡᠪᠡᠯ᠂ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠥᠭᠦᠯᠡᠷᠦᠨ᠄ 《ᠪᠢ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠤᠷᠭᠢᠶᠠ᠂ ᠮᠢᠨᠦ ᠬᠥᠪᠡᠭᠦᠨ ᠨᠣᠬᠠᠢ ᠠ᠋ᠴᠠ ᠴᠣᠴᠢᠮᠠᠲᠠᠭᠠᠢ ᠪᠢᠯᠡ᠂ ᠡᠷᠬᠢᠮ ᠬᠣᠲᠠ ᠴᠢ ᠮᠢᠨᠦ ᠬᠥᠪᠡᠭᠦᠨ ᠢ᠋ ᠨᠣᠬᠠᠢ ᠠ᠋ᠴᠠ ᠪᠤᠤ ᠴᠣᠴᠢᠭᠤᠯ》 ᠭᠡᠳ ᠬᠥᠲᠥᠯᠵᠦ ᠶᠠᠪᠤᠭᠰᠠᠨ ᠮᠣᠷᠢ ᠪᠠᠷ ᠪᠡᠯᠡᠭ ᠥᠭᠴᠦ᠂ ᠲᠡᠮᠦᠵᠢᠨ ᠢ᠋ ᠣᠷᠬᠢᠭᠠᠳ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠪᠤᠴᠠᠪᠠ᠃
67᠂ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠴᠡᠭᠴᠡᠷ ᠦ᠋ᠨ ᠰᠢᠷᠠ ᠲᠠᠯᠠ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠲᠠᠲ᠋ᠠᠷ ᠢᠷᠭᠡᠨ ᠬᠤᠷᠢᠮᠯᠠᠵᠤ ᠪᠠᠢᠬᠤ ᠲᠠᠢ ᠲᠣᠬᠢᠶᠠᠯᠳᠤᠭᠠᠳ᠂ ᠠᠮᠠ ᠴᠠᠩᠭ᠋ᠠᠬᠣ ᠲᠤᠯᠠ ᠬᠤᠷᠢᠮ ᠳ᠋ᠤ᠌ ᠪᠠᠭᠤᠪᠠ᠃ ᠲᠠᠲ᠋ᠠᠷ ᠨᠠᠷ ᠶᠢᠰᠦᠭᠡᠢ ᠶ᠋ᠢ ᠲᠠᠨᠢᠵᠤ᠂ 《ᠡᠷᠬᠢᠮ ᠶᠢᠰᠦᠭᠡᠢ ᠢᠷᠡᠪᠡ》 ᠭᠡᠵᠦ ᠬᠤᠷᠢᠮ ᠳ᠋ᠤ᠌ ᠰᠠᠭᠤᠯᠭᠠᠭᠠᠳ᠂ ᠤᠷᠢᠳᠤ ᠶ᠋ᠢᠨ ᠪᠤᠯᠢᠶᠠᠭᠳᠠᠭᠰᠠᠨ ᠥᠰᠢᠶᠡ ᠶ᠋ᠢ ᠰᠠᠨᠠᠵᠤ᠂ ᠨᠢᠭᠤᠴᠠ ᠪᠠᠷ ᠬᠡᠯᠡᠯᠴᠡᠨ᠂ ᠬᠣᠭᠣᠯᠠᠨ ᠳ᠋ᠤᠨᠢ ᠬᠣᠣᠷ ᠬᠣᠯᠢᠵᠤ ᠥᠭᠴᠡᠢ᠃ ᠶᠢᠰᠦᠭᠡᠢ ᠲᠡᠨᠳᠡ ᠡᠴᠡ ᠮᠣᠷᠳᠠᠵᠤ ᠶᠠᠪᠤᠬᠤ ᠵᠠᠮ ᠳ᠋ᠤ᠌ ᠪᠡᠶᠡ ᠮᠠᠭᠤᠵᠢᠷᠠᠵᠤ᠂ ᠭᠤᠷᠪᠠᠨ ᠬᠣᠨᠣᠭ ᠠᠷᠠᠢ ᠭᠡᠵᠦ ᠶᠠᠪᠤᠭᠠᠳ ᠭᠡᠷ ᠲᠦ᠍ ᠬᠦᠷᠴᠦ᠂
68᠂ ᠶᠢᠰᠦᠭᠡᠢ ᠥᠭᠦᠯᠡᠷᠦᠨ᠄ 《ᠮᠢᠨᠦ ᠳᠣᠲᠣᠷᠠ ᠮᠠᠭᠤ ᠪᠠᠢᠨᠠ᠂ ᠳᠡᠷᠭᠡᠳᠡ ᠮᠢᠨᠢ ᠬᠡᠨ ᠪᠠᠢᠨᠠ?》 ᠭᠡᠵᠦ ᠠᠰᠠᠭᠤᠪᠠᠯ᠂ ᠬᠣᠩᠬᠣᠲᠠᠨ ᠤ᠋ ᠴᠢᠷᠬᠠ ᠡᠪᠦᠭᠡᠨ ᠦ᠌ ᠬᠥᠪᠡᠭᠦᠨ ᠮᠦᠩᠯᠢᠭ (ᠮᠡᠩᠯᠢᠭ᠌ ᠪᠤᠶᠤ ᠮᠦᠩᠯᠢᠭ) ᠣᠢᠷᠠ ᠪᠠᠢᠨᠠ ᠭᠡᠪᠡᠯ᠂ ᠲᠡᠭᠦᠨ ᠢ᠋ ᠳᠠᠭᠤᠳᠠᠵᠤ ᠥᠭᠦᠯᠡᠷᠦᠨ᠄ 《ᠬᠦᠦ ᠮᠢᠨᠢ ᠮᠦᠩᠯᠢᠭ ᠴᠢ ᠰᠣᠨᠣᠰ᠂ ᠬᠥᠪᠡᠭᠦᠨ ᠮᠢᠨᠢ ᠪᠠᠯᠴᠢᠷ ᠪᠢᠯᠡ᠂ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ ᠤᠷᠤᠭ ᠲᠤ᠌ ᠣᠷᠬᠢᠭᠠᠳ ᠢᠷᠡᠬᠦ ᠵᠠᠮ ᠤ᠋ᠨ ᠵᠠᠭᠤᠷᠠ ᠲᠠᠲ᠋ᠠᠷ ᠲᠤ᠌ ᠬᠣᠣᠷᠯᠠᠭᠳᠠᠪᠠ᠂ ᠳᠣᠲᠣᠷ ᠮᠢᠨᠢ ᠮᠠᠭᠤ ᠪᠠᠢᠨᠠ᠂ ᠥᠨᠥᠴᠢᠨ ᠬᠣᠴᠣᠷᠤᠭᠰᠠᠨ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ᠂ ᠪᠡᠯᠪᠡᠰᠦᠨ ᠪᠡᠷᠭᠡᠨ ᠢ᠋ᠶ᠋ᠡᠨ ᠠᠰᠠᠷᠠᠬᠤ ᠶ᠋ᠢ ᠴᠢ ᠮᠡᠳᠡ᠂ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ ᠳᠠᠷᠤᠢ ᠶᠠᠪᠤᠵᠤ ᠠᠪᠴᠢᠷᠠ! ᠬᠠᠢᠷᠠᠲᠤ ᠮᠦᠩᠯᠢᠭ ᠮᠢᠨᠢ!》 ᠭᠡᠳ ᠨᠠᠰᠤᠨ ᠠ᠋ᠴᠠ ᠨᠥᠭᠴᠢᠪᠡ᠃
ᠲᠠᠢᠯᠪᠤᠷᠢ᠄
ᠹᠢᠯᠢᠮ (ᠬᠥᠳᠡᠯᠭᠡᠭᠡᠨᠲᠡᠢ ᠵᠢᠷᠤᠭ )ᠳᠡᠭᠡᠷᠡ ᠪᠢᠴᠢᠵᠦ ᠪᠠᠢᠭᠠ 《ᠮᠣᠩᠭᠣᠯ ᠣᠨ ᠨᠢᠭᠤᠴᠠ ᠲᠣᠪᠴᠢᠠᠨ》ᠪᠤᠷᠤᠭᠤ ᠲᠠᠢ᠂ᠵᠥᠪ ᠨᠢ 《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》
