ᠡᠷᠡ ᠡᠮᠡ ᠶᠢᠨ ᠶᠣᠰᠣᠨ– ᠳ᠂ᠪᠤᠯᠤᠳᠴᠡᠷᠢᠩ <ᠭᠤᠷᠪᠠᠳᠤᠭᠠᠷ ᠪᠦᠯᠦᠭ> - ᠬᠣᠶᠠᠷ᠂ᠨᠠᠰᠤᠨ ᠤ᠋ ᠨᠠᠮᠤᠷ ᠪᠠ ᠪᠡᠯᠭᠡ ᠶ᠋ᠢᠨ ᠲᠣᠭᠲᠠᠯᠴᠠᠭᠠ Эр эмийн ёсон – Д᠂ Болдцэрэн <3-р бүлэг> - 2᠂ Насны намр ба бэлгийн тогтолцоо
172ᠬᠣᠶᠠᠷ᠂ ᠨᠠᠰᠤᠨ ᠤ᠋ ᠨᠠᠮᠤᠷ ᠪᠠ ᠪᠡᠯᠭᠡ ᠶ᠋ᠢᠨ ᠲᠣᠭᠲᠠᠯᠴᠠᠭᠠ
ᠲᠥᠮᠥᠰᠦᠭ ᠨᠢ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠠ᠋ᠴᠠ ᠭᠠᠳᠠᠨᠠ ᠡᠷᠡ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠶ᠋ᠢ ᠢᠯᠭᠠᠷᠠᠭᠤᠯᠳᠠᠭ ᠬᠣᠣᠰ ᠡᠭᠦᠷᠭᠡ ᠲᠡᠢ ᠡᠷᠬᠡᠲᠡᠨ ᠶᠦᠮ᠃ ᠦᠷᠡ ᠬᠥᠪᠦᠷᠡᠯ ᠦ᠋ᠨ ᠦᠶᠡ ᠳ᠋ᠦ᠍ ᠲᠥᠮᠥᠰᠦᠭ ᠨᠢ ᠪᠥᠭᠡᠷᠡ ᠶ᠋ᠢᠨ ᠣᠢᠷᠠᠯᠴᠠᠭᠠ ᠪᠠᠢᠬᠤ ᠪᠠ ᠤᠭᠤᠷᠠᠭ ᠥᠰᠴᠦ ᠲᠣᠮᠣᠷᠠᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠠᠭᠠᠵᠢᠮ ᠢ᠋ᠶ᠋ᠠᠷ ᠳᠣᠷᠣᠭᠰᠢᠯᠠᠵᠤ᠂ ᠬᠡᠦᠬᠡᠳ ᠡᠬᠡ ᠡᠴᠡ ᠲᠥᠷᠥᠬᠦ ᠦᠶᠡ ᠳ᠋ᠦ᠍ ᠴᠠᠪᠢᠨ ᠤ᠋ ᠰᠤᠪᠠᠭ ᠢ᠋ ᠳᠠᠭᠠᠷᠢᠨ ᠬᠣᠳᠬᠠᠨᠠᠭ ᠲᠤ᠌ ᠪᠠᠭᠤᠨᠠ᠃ ᠡᠢᠨᠬᠦ ᠬᠡᠪᠡᠯᠢ ᠶ᠋ᠢᠨ ᠬᠥᠨᠳᠡᠢ ᠡᠴᠡ ᠪᠠᠭᠤᠵᠤ᠂ ᠬᠣᠳᠬᠠᠨᠠᠭ ᠲᠤ᠌ ᠪᠠᠢᠷᠢᠯᠠᠬᠤ ᠳ᠋ᠠᠭᠠᠨ ᠳᠣᠯᠣᠭᠠᠨ ᠳᠠᠪᠬᠤᠷ ᠪᠦᠷᠬᠦᠭᠦᠯ ᠢ᠋ᠶ᠋ᠡᠷ ᠬᠤᠴᠢᠭᠳᠠᠨᠠ᠃ ᠬᠠᠮᠤᠭ ᠤ᠋ᠨ ᠭᠠᠳᠠᠨᠠ ᠲᠠᠯᠠ ᠶ᠋ᠢᠨ ᠪᠦᠷᠬᠦᠭᠦᠯ ᠨᠢ ᠬᠣᠳᠬᠠᠨᠠᠭ ᠤ᠋ᠨ ᠠᠷᠠᠰᠤ ᠪᠥᠭᠡᠳ ᠡᠨᠡ ᠨᠢ ᠪᠡᠶᠡ ᠶ᠋ᠢᠨ ᠪᠤᠰᠤᠳ ᠬᠡᠰᠡᠭ ᠢ᠋ ᠪᠣᠳᠣᠪᠠᠯ ᠨᠢᠮᠭᠡᠬᠡᠨ᠂ ᠠᠲᠤᠷᠢᠶᠠ ᠲᠠᠢ᠂ ᠨᠡᠯᠢᠶᠡᠳ ᠨᠥᠰᠦᠭᠡᠲᠡᠢ ᠶᠦᠮ᠃ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠲᠥᠮᠥᠰᠥᠭ ᠢᠮᠠᠭᠲᠠ ᠬᠣᠳᠬᠠᠨᠠᠭ ᠲᠤ᠌ ᠪᠠᠢᠳᠠᠭ ᠪᠣᠯ ᠶᠡᠬᠡᠩᠬᠢ ᠬᠥᠬᠥᠲᠡᠨ ᠠᠮᠢᠲᠠᠨ ᠤ᠋ ᠵᠥᠪᠬᠡᠨ ᠣᠷᠣᠭᠠ ᠣᠷᠣᠬᠤ ᠦᠶᠡ ᠳ᠋ᠡᠭᠡᠨ ᠯᠡ ᠬᠣᠳᠬᠠᠨᠠᠭ ᠲᠤ᠌ ᠪᠠᠭᠤᠳᠠᠭ᠃ ᠬᠣᠳᠬᠠᠨᠠᠭ ᠤ᠋ᠨ ᠳᠣᠲᠣᠷᠠᠬᠢ ᠳᠤᠯᠠᠭᠠᠨ ᠬᠡᠪᠡᠯᠢ ᠶ᠋ᠢᠨ ᠬᠥᠨᠳᠡᠢ ᠶ᠋ᠢᠨ ᠳᠤᠯᠠᠭᠠᠨ ᠠ᠋ᠴᠠ3—7 ᠭᠡᠮ ᠢ᠋ᠶ᠋ᠡᠷ ᠪᠠᠭᠠ ᠪᠠᠢᠳᠠᠭ ᠨᠢ ᠲᠥᠮᠥᠰᠦᠭ ᠲᠦ᠍ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠬᠡᠪ ᠢ᠋ᠶ᠋ᠡᠷ ᠪᠣᠯᠪᠠᠰᠤᠷᠠᠬᠤ ᠬᠠᠮᠤᠭ ᠤ᠋ᠨ ᠲᠠᠭᠠᠯᠠᠮᠵᠢᠲᠠᠢ ᠨᠥᠬᠥᠴᠡᠯ ᠢ᠋ ᠬᠠᠩᠭᠠᠵᠤ ᠥᠭᠭᠦᠨᠡ᠃ ᠡᠭᠦᠨ ᠦ᠌ ᠤᠴᠢᠷ ᠨᠢ ᠭᠡᠪᠡᠯ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠥᠨᠳᠡᠭᠡᠨ ᠡᠰ ᠢ᠋ ᠪᠣᠳᠣᠪᠠᠯ ᠡᠷᠡ ᠪᠡᠯᠭᠡ ᠶ᠋ᠢᠨ ᠥᠰᠦᠯᠲᠡ ᠬᠥᠭᠵᠢᠯᠲᠡ ᠳ᠋ᠦ᠍ ᠳᠤᠯᠠᠭᠠᠨ ᠪᠠᠭᠠ ᠱᠠᠭᠠᠷᠳᠠᠯᠭᠠᠲᠠᠢ ᠪᠠᠢᠳᠠᠭ᠃ ᠲᠡᠢᠮᠦ ᠡᠴᠡ ᠴᠦ᠍ ᠡᠷᠡ ᠬᠥᠮᠦᠨ ᠦ᠌ ᠲᠥᠮᠥᠰᠦᠭ ᠪᠡᠶᠡ ᠶ᠋ᠢᠨ ᠭᠠᠳᠠᠨᠠ ᠬᠣᠳᠬᠠᠨᠠᠭ ᠲᠤ᠌ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠥᠨᠳᠡᠭᠡᠪᠴᠢ ᠪᠡᠶᠡ ᠶ᠋ᠢᠨ ᠳᠣᠲᠣᠷᠠ ᠲᠠᠯᠠ ᠳ᠋ᠤ᠌ ᠪᠠᠢᠳᠠᠭ᠃ ᠲᠣᠭᠲᠠᠮᠠᠯ ᠳᠤᠯᠠᠭᠠᠨ ᠣᠷᠴᠢᠨ ᠪᠣᠯ ᠥᠨᠳᠡᠭᠡᠨ ᠡᠰ ᠪᠣᠯᠪᠠᠰᠤᠷᠠᠬᠤ ᠬᠠᠮᠤᠭ ᠤ᠋ᠨ ᠲᠠᠭᠠᠯᠠᠮᠵᠢᠲᠠᠢ ᠨᠥᠬᠥᠴᠡᠯ ᠤᠴᠢᠷ ᠠ᠋ᠴᠠ ᠥᠨᠳᠡᠭᠡᠨ ᠡᠰ ᠥᠨᠳᠡᠭᠡᠪᠴᠢ ᠡᠴᠡ ᠭᠠᠳᠠᠭᠰᠢᠯᠠᠬᠤ ᠳ᠋ᠤ᠌ ᠪᠡᠶᠡ ᠶ᠋ᠢᠨ ᠬᠠᠯᠠᠭᠤᠨ ᠪᠠᠭᠠ ᠵᠡᠷᠭᠡ(ᠨᠢᠭᠡ ᠭᠡᠮ)ᠨᠡᠮᠡᠭᠳᠡᠳᠡᠭ᠃ ᠲᠡᠭᠡᠪᠡᠯ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠣᠷᠴᠢᠨ ᠳ᠋ᠤ᠌ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠪᠣᠯᠪᠠᠰᠤᠷᠠᠬᠤ ᠹᠷᠤᠽᠰᠰ ᠠᠯᠳᠠᠭᠳᠠᠨᠠ᠃ ᠡᠭᠦᠨ ᠢ᠋ ᠺᠯᠢᠨᠢᠺ ᠦ᠋ᠨ ᠣᠯᠠᠨ ᠠᠵᠢᠭᠯᠠᠯᠲᠠ ᠭᠡᠷᠡᠴᠢᠯᠡᠵᠦ ᠪᠠᠢᠭᠠ ᠶᠤᠮ᠃ ᠲᠤᠬᠠᠢᠯᠠᠪᠠᠯ᠂ ᠲᠥᠮᠥᠰᠦᠭ ᠨᠢ ᠬᠣᠳᠬᠠᠨᠠᠭ ᠲᠤ᠌ ᠪᠠᠭᠤᠭᠠᠳᠤᠢ ᠪᠤᠶᠤ ᠴᠠᠪᠢᠨ ᠤ᠋ ᠢᠪᠡᠷᠬᠡᠢ ᠲᠡᠢ᠂ ᠡᠰᠡᠬᠦᠯᠡ ᠣᠯᠠᠨ ᠬᠣᠨᠣᠭ᠂ ᠰᠠᠷᠠ ᠬᠠᠯᠠᠭᠤᠨ ᠲᠠᠢ ᠪᠠᠢᠭᠰᠠᠨ(ᠬᠠᠯᠠᠭᠤᠷᠠᠭᠰᠠᠨ) ᠬᠥᠮᠦᠨ ᠦ᠌ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠢ᠋ ᠰᠢᠨᠵᠢᠯᠡᠨ ᠦᠵᠡᠬᠦ ᠳ᠋ᠦ᠍ ᠲᠡᠭᠦᠨ ᠳ᠋ᠦ᠍ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠦ᠋ᠨ ᠲᠣᠭᠠ ᠢᠯᠡᠳᠲᠡ ᠴᠥᠭᠡᠷᠡᠭᠰᠡᠨ ᠪᠠᠢᠳᠠᠭ᠃ ᠬᠠᠯᠠᠭᠤᠨ ᠪᠠᠭᠤᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠪᠤᠴᠠᠭᠠᠳ ᠬᠡᠪ ᠲᠡᠭᠡᠨ ᠣᠷᠣᠳᠠᠭ᠃ ᠥᠷᠥᠭᠡᠰᠦᠨ ᠲᠥᠮᠥᠰᠦᠭ ᠬᠣᠳᠬᠠᠨᠠᠭ ᠪᠠᠭᠤᠭᠠᠳᠤᠢ ᠲᠣᠬᠢᠶᠠᠯᠳᠤᠯ ᠤ᠋ᠨ40%—60% ᠨᠢ ᠨᠥᠭᠦᠭᠡ ᠬᠣᠳᠬᠠᠨᠠᠭ ᠲᠤ᠌ ᠪᠠᠢᠭᠠ ᠲᠥᠮᠤᠰᠦᠭ ᠦ᠋ᠨ ᠦᠢᠯᠡ ᠠᠵᠢᠯᠯᠠᠭᠠᠨ ᠳ᠋ᠤ᠌ ᠮᠠᠭᠤ ᠪᠠᠷ ᠨᠥᠯᠥᠭᠡᠯᠡᠵᠦ᠂ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠦᠷᠡᠭᠦᠢᠳᠡᠯ ᠦ᠋ᠨ ᠨᠢᠭᠡ ᠰᠢᠯᠲᠠᠭᠠᠨ ᠪᠣᠯᠳᠠᠭ ᠢ᠋ ᠰᠤᠳᠤᠯᠭᠠᠨ ᠪᠠᠲᠤᠯᠠᠵᠤ ᠪᠠᠢᠨᠠ᠃ ᠢᠩᠭᠢᠬᠦᠯᠡᠷ᠂ ᠬᠣᠳᠬᠠᠨᠠᠭ ᠪᠣᠯ ᠲᠥᠮᠥᠰᠦᠭ ᠦ᠋ᠨ ᠬᠠᠯᠠᠭᠤᠨ᠂ ᠬᠦᠢᠲᠡᠨ ᠢ᠋ ᠲᠣᠬᠢᠷᠠᠭᠤᠯᠤᠭᠴᠢ ᠴᠢᠬᠤᠯᠠ ᠡᠭᠦᠷᠭᠡ ᠲᠡᠢ᠃ ᠲᠠᠭᠠᠷᠠᠵᠤ ᠬᠦᠷᠦᠬᠦ ᠪᠤᠶᠤ ᠬᠦᠢᠲᠡᠨ ᠳ᠋ᠦ᠍ ᠬᠣᠳᠬᠠᠨᠠᠭ ᠤ᠋ᠨ ᠪᠤᠯᠴᠢᠩᠯᠢᠭ ᠪᠦᠷᠬᠦᠭᠦᠯ ᠠᠭᠰᠢᠵᠤ᠂ ᠲᠥᠮᠥᠰᠦᠭ ᠳᠡᠭᠡᠭᠰᠢ ᠲᠠᠲᠠᠭᠳᠠᠨᠠ᠃ ᠲᠡᠭᠡᠪᠡᠯ ᠬᠠᠯᠠᠭᠤᠨ ᠳ᠋ᠤ᠌ ᠲᠡᠭᠦᠨ ᠦ᠌ ᠪᠤᠯᠴᠢᠩ ᠰᠤᠯᠠᠷᠠᠵᠤ᠂ ᠬᠣᠳᠭᠠᠨᠠᠭ ᠤᠨᠵᠢᠢᠨᠠ᠃
ᠥᠭᠡᠷᠡ ᠨᠢᠭᠡ ᠰᠣᠨᠢᠨ ᠵᠦᠢᠯ ᠬᠣᠳᠬᠠᠨᠠᠭ ᠤ᠋ᠨ ᠳᠤᠯᠠᠭᠠᠨ ᠡᠷᠡ ᠪᠡᠯᠭᠡ ᠡᠷᠬᠡᠲᠡᠨ ᠦ᠌(ᠭᠤᠤᠷ ᠤ᠋ᠨ) ᠲᠡᠭᠡᠷᠬᠡᠢ ᠶ᠋ᠢᠨ ᠳᠤᠯᠠᠭᠠᠨ ᠠ᠋ᠴᠠ ᠴᠦ᠍ ᠪᠠᠭᠠ ᠪᠠᠢᠳᠠᠭ ᠶᠠᠪᠤᠳᠠᠯ ᠶᠤᠮ᠃ ᠰᠤᠳᠤᠯᠭᠠᠨ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍᠂ ᠬᠣᠳᠬᠠᠨᠠᠭ ᠤ᠋ᠨ ᠳᠤᠯᠠᠭᠠᠨ26—32 ᠪᠠᠢᠬᠤ ᠳ᠋ᠤ᠌ ᠭᠤᠤᠷ ᠤ᠋ᠨ ᠲᠡᠭᠡᠷᠬᠡᠢ ᠶ᠋ᠢᠨ ᠳᠤᠯᠠᠭᠠᠨ27.7—35.1 ᠭᠡᠮ ᠪᠠᠢᠨᠠ᠃ ᠡᠢᠨᠬᠦ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠨᠠᠰᠤᠨ ᠤ᠋ ᠡᠷᠡᠭᠦᠯ ᠴᠢᠬᠢᠷᠠᠭ ᠡᠷᠡᠴᠦᠳ ᠦ᠋ᠨ ᠬᠣᠳᠬᠠᠨᠠᠭ ᠪᠣᠯᠤᠨ ᠲᠡᠭᠡᠷᠬᠡᠢ ᠶ᠋ᠢᠨ ᠳᠤᠯᠠᠭᠠᠨ ᠪᠡᠶᠡ ᠶ᠋ᠢᠨ ᠪᠤᠰᠤᠳ ᠬᠡᠰᠡᠭ ᠲᠡᠢ ᠵᠢᠱ᠌ᠢᠬᠦ ᠳ᠋ᠦ᠍ ᠶᠡᠬᠡᠬᠡᠨ ᠵᠥᠷᠢᠶᠡ ᠲᠡᠢ ᠠᠵᠠᠢ᠃
ᠭᠡᠪᠡᠴᠦ ᠨᠠᠰᠤᠵᠢᠬᠤ ᠳᠣᠳᠣᠮ ᠲᠡᠳᠡᠭᠡᠷ ᠦ᠋ᠨ ᠵᠥᠷᠢᠶᠡ ᠪᠠᠭᠠᠰᠴᠤ᠂ ᠬᠣᠳᠬᠠᠨᠠᠭ ᠤ᠋ᠨ ᠳᠤᠯᠠᠭᠠᠨ ᠨᠡᠮᠡᠭᠳᠡᠵᠦ ᠲᠡᠭᠡᠷᠬᠡᠢ ᠶ᠋ᠢᠨ ᠳᠤᠯᠠᠭᠠᠨ ᠪᠠᠭᠤᠷᠠᠨᠠ᠃ ᠲᠤᠬᠠᠢᠯᠠᠪᠠᠯ᠂20—30 ᠨᠠᠰᠤᠨ ᠤ᠋ ᠳᠤᠯᠠᠭᠠᠨ ᠤ᠋ ᠵᠥᠷᠢᠶᠡ 5 ᠭᠡᠮ ᠣᠷᠴᠢᠮ ᠪᠠᠢᠳᠠᠭ ᠪᠣᠯ45 ᠬᠦᠷᠬᠦ ᠳ᠋ᠦ᠍1᠂5 ᠭᠡᠮ ᠪᠣᠯᠵᠤ᠂55 ᠠ᠋ᠴᠠ ᠳᠡᠭᠡᠭᠰᠢ ᠨᠠᠰᠤᠨ ᠳ᠋ᠤ᠌ ᠡᠯᠡ ᠵᠥᠷᠢᠶᠡ ᠪᠠᠷᠤᠭ ᠠᠷᠢᠯᠤᠨᠠ᠃
ᠡᠢᠨᠬᠦ ᠨᠠᠰᠤ ᠨᠡᠮᠡᠬᠦ ᠲᠣᠰᠤᠮ ᠲᠡᠭᠡᠷᠬᠡᠢ ᠶ᠋ᠢᠨ ᠳᠤᠯᠠᠭᠠᠨ ᠪᠠᠭᠠᠰᠴᠤ( ᠪᠠᠭᠤᠷᠠᠵᠤ) ᠪᠣᠢ ᠨᠢ ᠭᠤᠤᠷ ᠤ᠋ᠨ ᠴᠠᠰᠤᠨ ᠤ᠋ ᠬᠠᠩᠭᠠᠮᠵᠢ ᠳᠦᠭᠦᠷᠦᠯᠲᠡ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠦ᠌ ᠬᠢ ᠶᠦᠮ᠃ ᠡᠴᠦᠰ ᠦ᠋ᠨ ᠪᠦᠯᠦᠭ ᠲᠦ᠍ ᠡᠷᠡᠭᠲᠡᠢ ᠶ᠋ᠢᠨ ᠪᠡᠯᠭᠡ ᠡᠷᠬᠡᠲᠡᠨ ᠬᠥᠪᠴᠢᠷᠡᠬᠦ ᠴᠢᠳᠠᠪᠤᠷᠢ ᠲᠡᠭᠦᠨ ᠦ᠌ ᠬᠥᠨᠳᠡᠢᠲᠦ ᠪᠡᠶᠡ ᠶ᠋ᠢᠨ ᠴᠢᠰᠤᠨ ᠳᠦᠭᠦᠷᠦᠯᠲᠡ ᠡᠴᠡ ᠰᠢᠯᠲᠠᠭᠠᠯᠠᠳᠠᠭ ᠪᠣᠯᠬᠣᠷ ᠶᠠᠮᠠᠷ ᠨᠢᠭᠡᠨ ᠰᠢᠯᠲᠠᠭᠠᠨ ᠤ᠋ ᠤᠯᠠᠮ ᠠ᠋ᠴᠠ ᠴᠢᠰᠤᠨ ᠬᠠᠩᠭᠠᠮᠵᠢ ᠨᠢ ᠪᠠᠭᠠᠰᠬᠠᠬᠤ ᠳ᠋ᠤ᠌ ᠬᠥᠪᠴᠢᠷᠡᠬᠦ ᠨᠢ ᠮᠠᠭᠤᠳᠠᠨᠠ᠃ ᠨᠠᠰᠤᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠡᠷᠡ ᠬᠥᠮᠦᠨ ᠦ᠌ ᠲᠥᠮᠥᠰᠦᠭ ᠲᠠᠭᠲᠠᠭᠠᠨ ᠤ᠋ ᠥᠨᠳᠡᠭᠡᠨ ᠡᠴᠡ ᠠᠷᠠᠢ ᠲᠣᠮᠣ ᠬᠡᠮᠵᠢᠶᠡᠨ ᠦ᠌(4—4.5×2.5—3.5 ᠰᠡᠨᠲ᠋ᠢᠮᠧᠲᠷ)᠂20—30 ᠭᠷᠠᠮ ᠵᠢᠩ ᠲᠡᠢ ᠪᠠᠢᠨᠠ᠃ ᠲᠥᠮᠥᠰᠥᠭ ᠲᠦ᠍ ᠣᠯᠠᠨ ᠰᠠᠶᠠ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠪᠣᠯᠪᠠᠰᠤᠷᠠᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠲᠥᠮᠥᠰᠦᠭ ᠪᠣᠯ ᠦᠷᠡ ᠶ᠋ᠢᠨ ᠵᠠᠶᠠᠭᠠ ᠬᠠᠢᠷᠠᠯᠠᠳᠠᠭ(ᠲᠡᠳᠬᠦᠳᠡᠭ) ᠡᠷᠬᠡᠲᠡᠨ ᠪᠣᠯᠠᠢ᠃ ᠲᠡᠢᠮᠦ ᠡᠴᠡ ᠠᠳᠤᠭᠤ ᠳ᠋ᠤ᠌ ᠢᠰᠬᠦᠯᠦᠭᠦᠯᠬᠦ᠂ ᠶᠠᠭᠤᠮᠠᠨ ᠳ᠋ᠤ᠌ ᠨᠢᠳᠡᠷᠡᠬᠦ ᠵᠡᠷᠭᠡ ᠮᠧᠬᠠᠨᠢᠭ ᠭᠡᠮᠲᠦᠯ ᠦ᠋ᠨ ᠤᠯᠠᠮ ᠠ᠋ᠴᠠ ᠲᠥᠮᠥᠰᠦᠭ ᠭᠡᠮᠲᠦᠪᠡᠯ ᠦᠷᠡ ᠵᠠᠶᠠᠭᠠᠬᠤ ᠦᠭᠡᠢ᠃
ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠨᠢ ᠥᠰᠪᠥᠷᠢ ᠨᠠᠰᠤᠨ ᠠ᠋ᠴᠠ ᠥᠲᠡᠯᠡ ᠨᠠᠰᠤ ᠬᠦᠷᠲᠡᠯᠡ ᠳᠥᠷᠪᠡᠨ ᠴᠠᠭ ᠤ᠋ᠨ ᠡᠷᠭᠢᠯᠲᠡ ᠳ᠋ᠦ᠍ ᠲᠤᠵᠢ ᠪᠣᠯᠪᠠᠰᠤᠷᠠᠵᠤ ᠪᠠᠢᠳᠠᠭ ᠪᠥᠭᠡᠳ ᠪᠣᠯᠪᠠᠰᠤᠷᠠᠭᠰᠠᠨ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠰᠠᠶᠠ ᠡᠰ ᠨᠢ ᠳᠥᠮᠥᠰᠦᠭ ᠦ᠋ᠨ ᠳᠠᠢᠪᠤᠷᠢ ᠳ᠋ᠤ᠌ ᠣᠷᠣᠵᠤ᠂ ᠲᠡᠨᠳᠡ ᠴᠠᠭ ᠤ᠋ᠨ ᠡᠴᠦᠰ ᠬᠦᠷᠲᠡᠯᠡ ᠪᠣᠯᠪᠠᠰᠤᠷᠠᠵᠤ᠂ ᠦᠷᠡ ᠲᠣᠭᠲᠠᠬᠤ ᠴᠢᠳᠠᠪᠤᠷᠢ ᠣᠯᠵᠤ ᠠᠪᠤᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠲᠥᠮᠥᠰᠦᠭ ᠦ᠋ᠨ ᠳᠠᠢᠪᠤᠷᠢ ᠪᠣᠯ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠪᠣᠯᠪᠠᠰᠤᠷᠠᠬᠤ ᠣᠯᠠᠨ ᠰᠠᠶᠠ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠢ᠋ ᠠᠭᠤᠯᠤᠭᠴᠢ ᠰᠠᠪᠠ ᠮᠥᠨ᠃ ᠬᠤᠷᠢᠴᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠲᠥᠮᠥᠰᠦᠭ ᠦ᠋ᠨ ᠳᠠᠢᠪᠤᠷᠢ ᠳ᠋ᠤ᠌ ᠬᠠᠳᠠᠭᠠᠯᠠᠭᠰᠠᠨ ᠣᠯᠠᠨ ᠰᠠᠶᠠ ᠪᠡᠯᠭᠡ ᠶ᠋ᠢᠨ ᠡᠰ ᠦ᠋ᠳ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠪᠠ ᠦᠷᠡ ᠶ᠋ᠢᠨ ᠴᠤᠯᠴᠠᠩ ᠤ᠋ᠨ ᠱᠦᠭᠦᠷᠡᠯ ᠳ᠋ᠦ᠍ ᠬᠣᠯᠢᠯᠳᠤᠨ ᠭᠠᠳᠠᠭᠰᠢ ᠪᠠᠨ ᠰᠠᠴᠤᠭᠳᠠᠨᠠ᠃ ᠡᠭᠦᠨ ᠢ᠋ ᠦᠷᠡ ᠶ᠋ᠢᠨ ᠰᠣᠩ ᠭᠡᠵᠦ ᠨᠡᠷᠡᠯᠡᠨᠡ᠃ ᠭᠡᠪᠡᠴᠦ ᠪᠢᠳᠡ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠭᠡᠵᠦ ᠶᠠᠷᠢᠵᠤ ᠵᠠᠩᠰᠢᠵᠠᠢ᠃
ᠰᠢᠨᠡᠬᠡᠨ ᠢᠯᠭᠠᠷᠠᠭᠰᠠᠨ ᠦᠷᠡ ᠶ᠋ᠢᠨ ᠰᠣᠩ ᠤᠨᠵᠢᠷᠠᠯᠳᠤᠭᠰᠠᠨ ᠥᠳᠬᠡᠨ᠂ ᠰᠦ ᠰᠢᠭ ᠪᠤᠯᠠᠩᠭᠢᠷ ᠪᠠᠢᠳᠠᠯ ᠲᠠᠢ᠂ ᠥᠪᠡᠷᠮᠢᠴᠡ ᠦᠨᠦᠷ ᠲᠡᠢ ᠰᠢᠩᠭᠡᠨ ᠪᠠᠢᠳᠠᠭ᠃ ᠨᠢᠭᠡ ᠤᠳᠠᠭᠠ ᠬᠤᠷᠢᠴᠠᠯ ᠦᠢᠯᠡᠳᠦᠯ ᠳ᠋ᠦ᠍ ᠨᠠᠰᠤ᠂ ᠪᠡᠶᠡ ᠭᠦᠢᠴᠡᠭᠰᠡᠨ ᠬᠥᠮᠦᠨ ᠡᠴᠡ3—5 ᠭᠷᠠᠮ ᠦᠷᠡ ᠶ᠋ᠢᠨ ᠰᠤᠩ ᠭᠠᠷᠳᠠᠭ ᠪᠥᠭᠡᠳ ᠲᠡᠭᠦᠨ ᠳ᠋ᠦ᠍200—300 ᠣᠷᠴᠢᠮ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠠᠭᠤᠯᠤᠭᠳᠠᠨᠠ᠃ ᠭᠡᠪᠡᠴᠦ ᠨᠠᠰᠤ ᠠᠬᠢᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠢᠯᠭᠠᠷᠠᠬᠤ ᠦᠷᠡ ᠶ᠋ᠢᠨ ᠰᠤᠩ ᠤ᠋ᠨ ᠬᠡᠮᠵᠢᠶᠡ᠂ ᠲᠡᠭᠦᠨ ᠳ᠋ᠦ᠍ ᠠᠭᠤᠯᠤᠭᠳᠠᠬᠤ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠦ᠋ᠨ ᠲᠣᠭᠠ ᠴᠥᠭᠡᠷᠡᠨᠡ᠃ ᠡᠨᠡ ᠪᠣᠯ ᠡᠷᠡ ᠶ᠋ᠢ ᠨᠠᠰᠤ ᠳᠠᠷᠤᠵᠤ ᠪᠣᠢ ᠶ᠋ᠢᠨ ᠨᠢᠭᠡᠨ ᠢᠯᠡᠷᠬᠡᠢᠯᠡᠯ ᠭᠡᠯᠲᠡᠢ᠃ 《ᠲᠣᠯᠣᠭᠠᠢ ᠬᠣᠯᠪᠣᠭᠠᠳ ᠨᠡᠯᠢᠶᠡᠳ ᠬᠡᠳᠦᠨ ᠵᠢᠯ ᠥᠩᠭᠡᠷᠡᠵᠦ ᠪᠠᠢᠭᠠ ᠪᠣᠯᠪᠠᠴᠤ ᠦᠷᠡ ᠵᠠᠶᠠᠭᠠᠬᠤ ᠦᠭᠡᠢ᠂ ᠬᠡᠦᠬᠡᠳ ᠭᠠᠷᠬᠤ ᠦᠭᠡᠢ ᠶᠦᠮ》 ᠭᠡᠮᠡᠨ ᠵᠥᠪᠯᠡᠯᠭᠡ ᠠᠪᠬᠤ ᠪᠠᠷ ᠪᠢᠳᠡᠨ ᠳ᠋ᠦ᠍ ᠢᠷᠡᠵᠦ ᠪᠣᠢ ᠡᠷᠡᠴᠦᠳ ᠦ᠋ᠨ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠢ᠋ ᠰᠢᠨᠵᠢᠯᠡᠨ ᠦᠵᠡᠬᠦ ᠳ᠋ᠦ᠍ ᠵᠠᠷᠢᠮ ᠤ᠋ᠨ ᠬᠢᠨᠢ ᠶᠡᠬᠡ ᠥᠳᠬᠡᠨ ᠪᠠᠢᠳᠠᠭ᠃ ᠡᠨᠡ ᠪᠣᠯ ᠦᠷᠡ ᠶ᠋ᠢᠨ ᠰᠤᠩ ᠤ᠋ᠨ《ᠥᠳᠬᠡᠨ》 ᠬᠡᠰᠡᠭ ᠢ᠋ ᠪᠦᠲᠦᠭᠡᠳᠡᠭ ᠲᠥᠮᠥᠰᠦᠭ ᠦ᠋ᠨ ᠦᠢᠯᠡ ᠠᠵᠢᠯᠯᠠᠭᠠ ᠬᠡᠪ ᠦ᠋ᠨ ᠪᠠᠢᠬᠤ ᠶ᠋ᠢ ᠢᠯᠡᠳᠬᠡᠨ ᠬᠠᠷᠠᠭᠤᠯᠬᠤ ᠠ᠋ᠴᠠ ᠭᠠᠳᠠᠨᠠ ᠲᠡᠭᠦᠨ ᠦ᠌《ᠰᠢᠩᠭᠡᠨ》 ᠬᠡᠰᠡᠭ ᠢ᠋ ᠪᠦᠲᠦᠭᠡᠳᠡᠭ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠪᠠ ᠦᠷᠡ ᠶ᠋ᠢᠨ ᠴᠤᠯᠴᠠᠩ ᠤ᠋ᠨ ᠱᠦᠭᠦᠷᠡᠯ ᠪᠠᠭᠠᠰᠤᠭᠰᠠᠨ ᠢ᠋ ᠵᠢᠭᠠᠨᠠ᠃ ᠡᠢᠨᠬᠦ ᠦᠷᠡ ᠶ᠋ᠢᠨ ᠰᠤᠩ ᠥᠳᠬᠡᠷᠡᠬᠦ ᠨᠢ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠪᠠ ᠦᠷᠡ ᠶ᠋ᠢᠨ ᠴᠤᠯᠴᠠᠩ ᠤ᠋ᠨ ᠶᠠᠮᠠᠷ ᠨᠢᠭᠡ ᠡᠪᠡᠳᠴᠢᠨ ᠡᠮᠭᠡᠭ ᠲᠡᠢ ᠬᠣᠯᠪᠣᠭᠠ ᠲᠠᠢ᠃ ᠭᠡᠲᠡᠯᠡ ᠨᠥᠭᠦᠭᠡ ᠨᠢᠭᠡ ᠬᠡᠰᠡᠭ ᠦ᠋ᠨ ᠬᠢᠨᠢ ᠦᠷᠡ ᠶ᠋ᠢᠨ ᠰᠤᠩ ᠶᠡᠬᠡ ᠰᠢᠩᠭᠡᠨ ᠪᠠᠢᠳᠠᠭ᠃ ᠡᠨᠡ ᠪᠣᠯ ᠦᠷᠡ ᠶ᠋ᠢᠨ ᠰᠤᠩ ᠤ᠋ᠨ《ᠥᠳᠬᠡᠨ》 ᠢ᠋ ᠪᠦᠲᠦᠭᠡᠳᠡᠭ ᠲᠥᠮᠥᠰᠦᠭ ᠦ᠋ᠨ ᠦᠢᠯᠡ ᠠᠵᠢᠯᠯᠠᠭᠠ ᠠᠯᠳᠠᠭᠳᠠᠭᠰᠠᠨ ᠬᠢ ᠲᠡᠭᠦᠨ ᠳ᠋ᠦ᠍ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠪᠠᠢᠬᠤ ᠦᠭᠡᠢ ᠪᠠᠢᠭᠠ ᠶ᠋ᠢᠨ ᠬᠢ ᠶᠦᠮ᠃ ᠡᠢᠨᠬᠦ ᠦᠷᠡ ᠶ᠋ᠢᠨ ᠰᠤᠩ ᠥᠳᠬᠡᠷᠡᠬᠦ᠂ ᠰᠢᠩᠭᠡᠷᠡᠬᠦ ᠨᠢ ᠡᠷᠡᠭᠲᠡᠢ ᠶ᠋ᠢᠨ ᠦᠷᠡᠭᠦᠢᠳᠡᠯ ᠢ᠋ ᠲᠠᠨᠢᠬᠤ ᠣᠨᠣᠰᠢ ᠶ᠋ᠢᠨ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ᠃ ᠭᠡᠪᠡᠴᠦ ᠦᠷᠡᠭᠦᠢᠳᠡᠯ ᠵᠥᠪᠬᠡᠨ ᠡᠷᠡᠭᠲᠡᠢ ᠬᠥᠮᠦᠨ ᠡᠴᠡ ᠪᠤᠰᠤ ᠪᠠᠰᠠ ᠡᠮᠡᠭᠲᠡᠢ ᠡᠴᠡ ᠴᠦ᠍ ᠰᠢᠯᠲᠠᠭᠠᠯᠠᠨᠠ᠃ ᠰᠤᠳᠤᠯᠤᠭᠴᠢᠳ ᠤ᠋ᠨ ᠪᠢᠴᠢᠭᠰᠡᠨ ᠢ᠋ᠶ᠋ᠡᠷ᠂ ᠦᠷᠡᠭᠦᠢᠳᠡᠯ ᠦ᠋ᠨ ᠰᠢᠯᠲᠠᠭᠠᠨ ᠤ᠋40% ᠨᠢ ᠡᠷᠡᠭᠲᠡᠢ ᠬᠥᠮᠦᠨ ᠡᠴᠡ᠂ ᠦᠯᠡᠳᠡᠭᠰᠡᠨ60% ᠨᠢ ᠡᠮᠡᠭᠲᠡᠢ ᠡᠴᠡ ᠪᠣᠯᠳᠠᠭ ᠠᠵᠠᠢ᠃ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠷᠬᠡᠲᠡᠨ ᠨᠢ ᠬᠤᠷᠢᠴᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠶᠡ ᠡᠴᠡ ᠭᠠᠷᠴᠤ ᠪᠣᠢ ᠦᠷᠡ ᠶ᠋ᠢᠨ ᠰᠤᠩ ᠢ᠋ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍《ᠦᠷᠡᠭᠳᠡᠯ ᠬᠠᠶᠠᠭᠳᠠᠯ ᠦᠭᠡᠢ》 ᠬᠦᠷᠭᠡᠬᠦ ᠳ᠋ᠦ᠍ ᠴᠢᠭᠯᠡᠭᠰᠡᠨ ᠪᠦᠲᠦᠴᠡ᠂ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠲᠠᠢ ᠪᠠᠢᠳᠠᠭ ᠪᠥᠭᠡᠳ ᠡᠨᠡ ᠡᠭᠦᠷᠭᠡ ᠪᠣᠯ ᠪᠡᠯᠭᠡ ᠡᠷᠬᠡᠲᠡᠨ ᠦ᠌ ᠬᠥᠪᠴᠢᠷᠡᠯᠲᠡ ᠬᠠᠮᠤᠭ ᠤ᠋ᠨ ᠴᠢᠬᠤᠯᠠ ᠶᠤᠮ᠃ ᠬᠡᠷᠪᠡ ᠡᠷᠡᠭᠲᠡᠢ ᠶ᠋ᠢᠨ ᠪᠡᠯᠭᠡ ᠡᠷᠬᠡᠲᠡᠨ ᠬᠥᠪᠴᠢᠷᠡᠬᠦ ᠦᠭᠡᠢ ᠪᠣᠯ ᠦᠷᠡ ᠶ᠋ᠢᠨ ᠰᠤᠩ《ᠬᠦᠷᠬᠦ ᠭᠠᠵᠠᠷ ᠢ᠋ᠶ᠋ᠠᠨ》 ᠲᠣᠷᠣᠯ ᠦᠭᠡᠢ ᠬᠦᠷᠴᠦ᠂ ᠤᠳᠤᠮ ᠤᠭᠰᠠᠭᠠ ᠪᠠᠨ ᠵᠠᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠳ᠋ᠦ᠍ ᠬᠦᠷᠬᠦ ᠪᠢᠯᠡ᠃ ᠬᠡᠳᠦᠨ ᠬᠡᠦᠬᠡᠳ ᠲᠡᠢ ᠪᠣᠢ ᠭᠡᠳᠡᠭ ᠢ᠋ᠶ᠋ᠡᠷ ᠡᠷᠡ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠴᠢᠳᠠᠪᠬᠢ(ᠴᠢᠯᠬᠠ) ᠶ᠋ᠢ ᠬᠡᠮᠵᠢᠬᠦ ᠦᠭᠡᠢ᠃ ᠪᠡᠯᠭᠡ ᠶ᠋ᠢᠨ ᠴᠢᠳᠠᠪᠬᠢ ᠰᠠᠢᠲᠠᠢ ᠮᠥᠷᠲᠡᠭᠡᠨ ᠴᠥᠭᠡᠨ ᠬᠡᠦᠬᠡᠳ ᠲᠡᠢ᠂ ᠡᠰᠡᠬᠦᠯᠡ ᠪᠡᠯᠭᠡ ᠶ᠋ᠢᠨ ᠴᠢᠳᠠᠪᠬᠢ ᠲᠠᠭᠠᠷᠠᠤ ᠠᠲᠠᠯᠠ ᠣᠯᠠᠨ ᠬᠡᠦᠬᠡᠳ ᠲᠡᠢ ᠠᠢᠯ ᠵᠥᠩᠳᠡᠭᠡᠨ ᠯᠡ ᠪᠠᠢᠳᠠᠭ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠯᠡ ᠨᠠᠰᠤ ᠠᠬᠢᠭᠠᠳ ᠢᠷᠡᠬᠦ ᠪᠡᠷ ᠵᠠᠯᠠᠭᠤ ᠶ᠋ᠢᠨ ᠬᠢ ᠰᠢᠭ ᠶᠠᠭᠤᠮᠠ ᠬᠠᠮᠢᠭᠠ ᠪᠠᠢᠬᠤᠪ᠃ ᠬᠡᠷᠡᠭ ᠲᠡᠢ ᠦᠶᠡ ᠳ᠋ᠡᠭᠡᠨ ᠬᠡᠵᠢᠶᠡᠳᠡ ᠪᠡᠯᠡᠨ ᠪᠠᠢᠬᠤ ᠪᠠᠨ ᠪᠣᠯᠢᠵᠤ᠂ ᠬᠠᠨᠢ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠬᠠᠯᠠᠮᠵᠢ ᠠᠩᠬᠠᠷᠤᠯ᠂ ᠦᠢᠯᠡᠴᠢᠯᠡᠭᠡ ᠱᠠᠭᠠᠷᠳᠠᠵᠤ ᠡᠬᠢᠯᠡᠨᠡ᠃ ᠬᠠᠷᠢᠨ ᠨᠢᠭᠡᠨᠲᠡ ᠬᠥᠪᠴᠢᠷᠡᠭᠰᠡᠨ ᠪᠣᠯ ᠬᠤᠷᠢᠴᠠᠯ ᠤ᠋ᠨ ᠦᠷᠭᠦᠯᠵᠢᠯᠡᠬᠦ ᠬᠤᠭᠤᠴᠠᠭᠠ ᠵᠠᠯᠠᠭᠤ ᠬᠥᠮᠦᠨ ᠢ᠋ ᠪᠣᠳᠣᠪᠠᠯ ᠨᠡᠯᠢᠶᠡᠳ ᠤᠷᠲᠤᠰᠤᠨᠠ᠃ ᠲᠤᠬᠠᠢᠯᠠᠪᠠᠯ᠂ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠰᠤᠳᠤᠯᠤᠭᠴᠢᠳ ᠤ᠋ᠨ ᠲᠣᠭᠲᠠᠭᠠᠭᠰᠠᠨ ᠢ᠋ᠶ᠋ᠠᠷ᠂ ᠵᠠᠯᠠᠭᠤ ᠬᠥᠮᠦᠨ50~60 ᠤᠳᠠᠭᠠ ᠬᠠᠪᠢᠷᠬᠤ ᠬᠥᠳᠡᠯᠭᠡᠨ ᠬᠢᠭᠰᠡᠨ ᠦ᠌ ᠳᠠᠷᠠᠭᠠ ᠦᠷᠡ ᠶ᠋ᠢᠨ ᠰᠤᠩ ᠭᠠᠷᠴᠤ᠂ ᠳᠤᠷᠠ ᠨᠢ ᠬᠠᠨᠳᠠᠭ ᠪᠣᠯ ᠡᠭᠦᠨ ᠡᠴᠡ ᠨᠠᠰᠤ ᠠᠬᠢᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠬᠤᠷᠢᠴᠠᠯ ᠤ᠋ᠨ ᠦᠷᠭᠦᠯᠵᠢᠯᠡᠬᠦ ᠬᠤᠭᠤᠴᠠᠭᠠ ᠤᠷᠲᠤᠰᠤᠨᠠ᠃ ᠡᠨᠡ ᠨᠢ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠢᠯᠡᠭᠦᠦ ᠲᠠᠭᠠᠯᠠᠮᠵᠢᠲᠠᠢ ᠴᠦ᠍ ᠪᠠᠢᠵᠤ ᠪᠣᠯᠬᠤ ᠶᠤᠮ᠃ ᠦᠷᠡ ᠶ᠋ᠢᠨ ᠰᠤᠩ ᠭᠠᠳᠠᠭᠰᠢ ᠪᠠᠨ ᠰᠠᠴᠤᠭᠳᠠᠬᠤ ᠨᠢ ᠬᠥᠮᠦᠨ ᠦ᠌ ᠰᠠᠨᠠᠭᠠ ᠵᠣᠷᠢᠭ ᠠᠴᠠ ᠦᠯᠦ ᠬᠠᠮᠢᠶᠠᠷᠬᠤ ᠦᠢᠯᠡᠳᠦᠯ ᠤᠴᠢᠷ ᠠ᠋ᠴᠠ ᠨᠢᠭᠡᠨᠲᠡ ᠡᠬᠢᠯᠡᠭᠰᠡᠨ ᠪᠣᠯ ᠲᠡᠭᠦᠨ ᠢ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠣᠭᠰᠣᠭᠠᠵᠤ ᠶᠠᠭᠠᠬᠢᠪᠠᠴᠤ ᠴᠢᠳᠠᠬᠤ ᠦᠭᠡᠢ᠃ ᠦᠷᠡ ᠶ᠋ᠢᠨ ᠰᠤᠩ ᠭᠠᠷᠴᠤ᠂ ᠦᠷᠡ ᠶ᠋ᠢᠨ ᠰᠩ ᠭᠠᠷᠴᠤ ᠳᠤᠷᠠ ᠬᠠᠨᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠡᠯᠭᠡ ᠶ᠋ᠢᠨ ᠰᠠᠷᠠᠯ ᠦᠭᠡᠢ ᠦᠶᠡ ᠡᠬᠢᠯᠡᠨᠡ᠃ ᠡᠨᠡ ᠦᠶᠡ ᠶ᠋ᠢᠨ ᠦᠷᠭᠦᠯᠵᠢᠯᠡᠬᠦ ᠬᠤᠭᠤᠴᠠᠭᠠ ᠨᠢ ᠡᠷᠡ ᠪᠡᠯᠭᠡ ᠶ᠋ᠢᠨ ᠴᠢᠯᠬᠠ ᠠ᠋ᠴᠠ ᠬᠠᠮᠢᠶᠠᠷᠤᠨᠠ᠃ ᠪᠡᠯᠭᠡ ᠶ᠋ᠢᠨ ᠴᠢᠯᠬᠠ ᠰᠠᠢᠲᠠᠢ ᠪᠠᠢᠬᠤ ᠲᠣᠰᠤᠮ《ᠠᠮᠢᠯᠠᠬᠤ》 ᠬᠤᠭᠤᠴᠠᠭᠠ ᠪᠣᠭᠣᠨᠢ ᠪᠠᠢᠬᠤ ᠪᠣᠯᠪᠠᠴᠤ ᠨᠠᠰᠤᠨ ᠤ᠋ ᠡᠷᠬᠡ ᠪᠡᠷ ᠡᠨᠡ ᠬᠤᠭᠤᠴᠠᠭᠠ ᠤᠷᠲᠤ ᠤᠳᠠᠭᠠᠨ ᠪᠠᠢᠬᠤ ᠨᠢ ᠠᠷᠭᠠ ᠦᠭᠡᠢ ᠶᠦᠮ᠃ ᠨᠥᠭᠥᠭᠡᠲᠡᠭᠡᠭᠦᠷ᠂ ᠨᠡᠯᠢᠶᠡᠳ ᠬᠡᠳᠦ ᠬᠣᠨᠣᠭ ᠰᠠᠢᠬᠠᠨ ᠠᠮᠠᠷᠠᠵᠤ᠂ ᠰᠠᠢᠨ ᠬᠣᠭᠣᠯᠠ ᠴᠠᠢ᠂ ᠢᠳᠡᠵᠦ᠂ ᠤᠤᠭᠤᠵᠤ ᠪᠠᠢᠵᠤ ᠰᠠᠶᠢ ᠠᠯᠵᠢᠶᠠᠯ ᠪᠦᠷᠢᠨ ᠲᠠᠢᠯᠤᠭᠳᠠᠨᠠ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠬᠤᠷᠢᠴᠠᠯ ᠪᠣᠯ ᠪᠡᠶᠡ ᠮᠬᠠᠨᠪᠤᠳ ᠲᠤ᠌ ᠶᠡᠬᠡᠬᠡᠨ ᠠᠴᠢᠶᠠᠯᠠᠯ ᠦᠵᠡᠭᠦᠯᠦᠨᠡ᠃ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠰᠤᠳᠤᠯᠤᠭᠴᠢᠳ ᠤ᠋ᠨ ᠲᠣᠭᠲᠠᠭᠠᠭᠰᠠᠨ ᠢ᠋ᠶ᠋ᠠᠷ᠂ ᠨᠢᠭᠡ ᠤᠳᠠᠭᠠ ᠶ᠋ᠢᠨ ᠬᠤᠷᠢᠴᠠᠯ ᠤ᠋ᠨ ᠦᠢᠯᠡᠳᠦᠯ ᠳ᠋ᠦ᠍ ᠪᠡᠶᠡ ᠶ᠋ᠢᠨ ᠬᠦᠴᠦᠨ ᠦ᠌ ᠬᠦᠨᠳᠦ ᠬᠦᠴᠢᠷ ᠠᠵᠢᠯ ᠬᠢᠭᠰᠡᠨ ᠲᠡᠢ ᠲᠡᠩᠴᠡᠬᠦᠢᠴᠡ ᠬᠡᠮᠵᠢᠶᠡᠨ ᠦ᠌(3000—5000 ᠺᠠᠯᠣᠷᠢ) ᠡᠷᠴᠢ ᠬᠦᠴᠦ ᠵᠠᠷᠤᠴᠠᠭᠤᠯᠳᠠᠭ ᠪᠠᠢᠨᠠ᠃ ᠡᠢᠮᠦ ᠬᠡᠮᠵᠢᠶᠡᠨ ᠦ᠌ ᠡᠷᠴᠢ ᠬᠦᠴᠦ ᠭᠡᠳᠡᠭ ᠪᠣᠯ ᠪᠣᠺᠰᠴᠢᠨ ᠭᠤᠷᠪᠠᠨ ᠡᠭᠡᠯᠵᠢ ᠳ᠋ᠦ᠍ ᠲᠣᠭᠯᠠᠵᠤ᠂ ᠡᠰᠡᠬᠦᠯᠡ ᠪᠦᠲᠦᠨ ᠡᠳᠦᠷᠵᠢᠨ ᠭᠠᠵᠠᠷ ᠭᠢᠰᠬᠢᠨ ᠬᠠᠭᠠᠯᠤᠭᠰᠠᠨ ᠲᠠᠢ ᠲᠡᠩᠴᠡᠬᠦ ᠬᠦᠴᠦ ᠶᠦᠮ᠃
ᠵᠠᠯᠠᠭᠤ ᠬᠥᠮᠦᠨ ᠠᠯᠳᠠᠭᠰᠠᠨ ᠡᠷᠴᠢ ᠬᠦᠴᠦ ᠪᠡᠨ ᠨᠢᠭᠡ ᠰᠠᠢᠨ ᠨᠣᠢᠷ ᠠᠪᠤᠭᠠᠳ ᠯᠠ ᠨᠥᠬᠥᠴᠢᠬᠡᠨᠡ᠃ ᠲᠡᠭᠡᠪᠡᠯ ᠨᠠᠰᠤ ᠠᠬᠢᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠪᠥᠬᠡ ᠤᠨᠲᠠᠵᠤ ᠠᠮᠠᠷᠠᠬᠤ ᠠ᠋ᠴᠠ ᠭᠠᠳᠠᠨᠠ ᠰᠠᠢᠨ ᠬᠣᠭᠣᠯᠠ᠂ ᠰᠠᠢᠨ ᠴᠠᠢ ᠪᠠᠷ ᠰᠡᠷᠭᠦᠨᠡ᠃ ᠬᠤᠷᠢᠴᠠᠯ ᠪᠣᠯ ᠬᠥᠮᠦᠨ ᠦ᠌ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠵᠥᠪᠬᠡᠨ ᠪᠡᠯᠭᠡ ᠶ᠋ᠢᠨ ᠲᠣᠭᠲᠠᠯᠴᠠᠭᠠ ᠶ᠋ᠢ ᠬᠥᠨᠳᠡᠳᠡᠭ ᠦᠢᠯᠡᠳᠦᠯ ᠬᠠᠷᠠᠬᠠᠨ ᠪᠢᠰᠢ ᠠ᠋᠃ ᠬᠤᠷᠢᠴᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠴᠢᠰᠤᠨ ᠳᠠᠷᠤᠯᠲᠠ200—220 ᠪᠣᠯᠲᠠᠯᠠ ᠨᠡᠮᠡᠭᠳᠡᠵᠦ᠂ ᠨᠢᠭᠡ ᠮᠢᠨᠦ᠋ᠲ ᠴᠣᠬᠢᠯᠠᠬᠤ ᠰᠤᠳᠠᠰᠤᠨ ᠤ᠋ ᠯᠤᠭᠰᠢᠯᠲᠠ175᠂ ᠠᠮᠢᠰᠬᠤᠯ ᠤ᠋ᠨ ᠲᠣᠭᠠ40 ᠬᠦᠷᠦᠨᠡ᠃ ᠡᠳᠡᠭᠡᠷ ᠨᠢ ᠬᠡᠪ ᠦ᠋ᠨ ᠬᠡᠮᠵᠢᠶᠡ ᠡᠴᠡ ᠪᠠᠷᠤᠭ ᠬᠣᠶᠠᠷ ᠳᠠᠬᠢᠨ ᠶᠡᠬᠡ ᠲᠣᠭᠠ ᠶᠤᠮ᠃ ᠭᠡᠪᠡᠴᠦ ᠳᠤᠷᠠ ᠬᠠᠨᠵᠤ ᠪᠡᠶᠡ ᠲᠠᠯᠪᠢᠭᠤᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠲᠦᠳᠡᠬᠡᠨ ᠪᠤᠴᠠᠭᠠᠳ ᠤᠤᠯ ᠬᠠᠭᠤᠴᠢᠨ ᠤ᠋ ᠬᠡᠪ ᠲᠡᠭᠡᠨ ᠣᠷᠣᠳᠠᠭ ᠢ᠋ ᠡᠮᠦᠨᠡ ᠥᠭᠦᠯᠡᠭᠰᠡᠨ ᠪᠢᠯᠡ᠃ ᠢᠩᠭᠢᠵᠦ ᠣᠬᠣᠷ ᠪᠣᠭᠣᠨᠢ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠦᠷᠭᠦᠯᠵᠢᠯᠡᠬᠦ ᠳ᠋ᠡᠭᠡᠨ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠪᠦᠬᠦᠯᠢ ᠪᠦᠲᠦᠴᠡ᠂ ᠲᠣᠭᠲᠠᠯᠴᠠᠭᠠ ᠳ᠋ᠤ᠌ ᠡᠢᠮᠦ ᠠᠰᠤᠷᠤ ᠶᠡᠬᠡ ᠥᠭᠡᠷᠡᠴᠢᠯᠡᠯᠲᠡ ᠣᠷᠣᠭᠤᠯᠳᠠᠭ ᠥᠭᠡᠷᠡ ᠨᠢᠭᠡ ᠴᠦ᠍ ᠹᠢᠽᠢᠣᠯᠣᠭᠢ ᠶ᠋ᠢᠨ ᠦᠢᠯᠡᠳᠦᠯ ᠪᠠᠢᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍ ᠬᠡᠲᠦᠷᠡᠭᠦᠯᠦᠭᠰᠡᠨ ᠪᠣᠯᠬᠤ ᠦᠭᠡᠢ᠃ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠴᠢᠰᠤᠨ ᠰᠤᠳᠠᠯ ᠤᠶᠠᠨ ᠬᠠᠳᠠᠨ᠂ ᠵᠢᠷᠦᠬᠡᠨ ᠦ᠌ ᠪᠤᠯᠴᠢᠩ ᠰᠠᠢᠨ ᠪᠠᠢᠳᠠᠭ ᠤᠴᠢᠷ ᠠ᠋ᠴᠠ ᠬᠤᠷᠢᠴᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠪᠡᠶᠡ ᠮᠠᠬᠠᠪᠣᠳ ᠲᠤ᠌ ᠭᠠᠷᠴᠤ ᠪᠠᠢᠭᠠ ᠳᠡᠭᠡᠷᠡᠬᠢ ᠬᠣᠪᠣᠷ ᠥᠭᠡᠷᠡᠴᠢᠯᠡᠯᠲᠡ ᠳ᠋ᠦ᠍《ᠠᠵᠢᠷᠠᠬᠤ ᠦᠭᠡᠢ》᠃ ᠭᠡᠲᠡᠯᠡ ᠳᠠᠷᠤᠯᠲᠠ ᠶᠡᠬᠡᠲᠡᠢ᠂ ᠵᠢᠷᠦᠬᠡᠨ ᠦ᠌ ᠲᠢᠲᠢᠮ ᠦ᠋ᠨ ᠰᠤᠳᠠᠰᠤᠨ ᠳᠤᠲᠠᠮᠠᠭᠰᠢᠯ ᠲᠠᠢ᠂ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠬᠥᠮᠦᠨ ᠡᠭᠦᠨ ᠢ᠋ ᠲᠡᠰᠪᠦᠷᠢᠯᠡᠬᠦ ᠳ᠋ᠦ᠍ ᠠᠮᠠᠷ ᠦᠭᠡᠢ ᠲᠤᠯᠠ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠯᠬᠠ ᠶ᠋ᠢ ᠪᠣᠳᠣᠯ ᠦᠭᠡᠢ ᠪᠡᠷ ᠢᠵᠢᠯᠢᠳᠦᠨ ᠳᠠᠰᠤᠭᠰᠠᠨ ᠬᠠᠨᠢ ᠠ᠋ᠴᠠ ᠪᠠᠨ ᠣᠨᠳᠣᠣ ᠪᠦᠰᠡᠭᠦᠢᠴᠦᠳ ᠲᠡᠢ《ᠦᠶᠡᠷᠬᠡᠪᠡᠯ》 ᠬᠠᠷᠢᠭᠤ ᠨᠢ ᠬᠦᠨᠳᠦ ᠲᠣᠰᠴᠤ ᠪᠣᠯᠤᠨᠠ᠃ ᠡᠢᠮᠦ ᠭᠠᠰᠢᠭᠤᠨ ᠶᠠᠪᠤᠳᠠᠯ ᠮᠠᠨ ᠤ᠋ ᠳ᠋ᠤ᠌ ᠴᠦ᠍ ᠮᠡᠷ ᠰᠡᠷ ᠭᠠᠷᠤᠭᠰᠠᠨ ᠢ᠋ ᠨᠢᠭᠤᠬᠤ ᠶᠠᠭᠤᠨ᠃ ᠨᠠᠰᠤᠨ ᠤ᠋ ᠨᠠᠮᠤᠷ ᠲᠤ᠌ ᠪᠡᠯᠭᠡ ᠶ᠋ᠢᠨ ᠠᠮᠢᠳᠤᠷᠠᠯ ᠣᠯᠠᠨ᠂ ᠴᠥᠭᠡᠨ ᠪᠠᠢᠬᠤ ᠳ᠋ᠠᠭᠠᠨ ᠪᠢᠰᠢ᠂ ᠬᠠᠮᠤᠭ ᠤ᠋ᠨ ᠭᠣᠣᠯ ᠨᠢ ᠲᠣᠭᠲᠠᠮᠠᠯ ᠪᠠᠢᠬᠤ ᠨᠢ ᠴᠢᠬᠤᠯᠠ᠃ ᠲᠣᠭᠲᠠᠮᠠᠯ ᠪᠡᠯᠭᠡ ᠶ᠋ᠢᠨ ᠠᠮᠢᠳᠤᠷᠠᠯ ᠨᠢ ᠮᠡᠳᠡᠷᠡᠯ ᠴᠣᠴᠠᠷᠠᠭᠳᠠᠯ᠂ ᠠᠭᠤᠷ ᠬᠢᠯᠢᠩ ᠦ᠋ᠨ ᠠᠶᠤᠯ ᠠ᠋ᠴᠠ ᠠᠪᠤᠷᠠᠵᠤ᠂ ᠡᠷᠡᠭᠦᠯ ᠡᠩᠬᠡ ᠪᠠᠢᠬᠤ ᠳ᠋ᠤ᠌ ᠲᠤᠰᠠᠯᠠᠨᠠ᠃ ᠪᠢᠳᠡ ᠥᠪᠡᠷᠰᠡᠳ ᠦ᠋ᠨ ᠰᠤᠳᠤᠯᠭᠠᠨ ᠳ᠋ᠤ᠌ ᠲᠤᠯᠭᠠᠭᠤᠷᠢᠯᠠᠨ45—50 ᠨᠠᠰᠤᠨ ᠳ᠋ᠤ᠌ ᠰᠠᠷᠠ ᠳ᠋ᠤ᠌3 - 4 ᠤᠳᠠᠭᠠ ᠣᠢᠷᠠᠳᠬᠤ ᠶ᠋ᠢ ᠬᠡᠪ ᠦ᠋ᠨ ᠭᠡᠵᠦ ᠦᠵᠡᠵᠦ ᠪᠠᠢᠭᠠ ᠶᠤᠮ᠃ ᠰᠠᠷᠠ ᠳ᠋ᠤ᠌1-2 ᠤᠳᠠᠭᠠ ᠣᠢᠷᠠᠳᠬᠤ ᠶ᠋ᠢ ᠳᠡᠩᠳᠡᠭᠦᠦ ᠴᠥᠭᠡᠨ᠂ ᠬᠠᠷᠢᠨ ᠵᠢᠯ ᠳ᠋ᠦ᠍2-6 ᠤᠳᠠᠭᠠ ᠣᠢᠷᠠᠳᠬᠤ ᠶ᠋ᠢ ᠪᠡᠯᠭᠡ ᠶ᠋ᠢᠨ ᠦᠢᠯᠡ ᠠᠵᠢᠯᠯᠠᠭᠠ ᠲᠤᠩ ᠰᠤᠯᠠᠷᠠᠭᠰᠠᠨ ᠪᠠᠢᠨᠠ ᠭᠡᠵᠦ ᠦᠵᠡᠨᠡ᠃ ᠭᠡᠪᠡᠴᠦ ᠳᠡᠭᠡᠷᠡᠬᠢ ᠲᠣᠭᠠ ᠪᠣᠯ ᠶᠡᠷᠦᠩᠬᠡᠢ ᠪᠠᠭᠴᠠᠭᠠ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠵᠠᠪᠠᠯ ᠲᠡᠢᠮᠦ ᠪᠠᠢᠬᠤ ᠠᠯᠪᠠ ᠲᠠᠢ ᠪᠢᠰᠢ ᠶᠦᠮ᠃
ᠬᠡᠪᠯᠡᠯ ᠦ᠋ᠨ ᠲᠣᠭᠠ ᠪᠠᠷᠢᠮᠲᠠ ᠪᠣᠯᠤᠨ ᠥᠪᠡᠷᠰᠡᠳ ᠦ᠋ᠨ ᠠᠵᠢᠭᠯᠠᠯᠲᠠ ᠶ᠋ᠢ ᠡᠰᠢ ᠦᠨᠳᠦᠰᠦ ᠪᠣᠯᠭᠠᠨ ᠬᠤᠷᠢᠴᠠᠯ ᠤ᠋ᠨ ᠲᠣᠭᠠ ᠬᠡᠮᠵᠢᠶᠡ ᠶ᠋ᠢ ᠪᠢᠳᠡ ᠳᠠᠷᠠᠭᠠᠬᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠲᠣᠭᠲᠠᠭᠠᠵᠤ ᠪᠠᠢᠨᠠ᠃ ᠡᠭᠦᠨ ᠳ᠋ᠦ᠍᠄20—30 ᠨᠠᠰᠤᠨ ᠳ᠋ᠤ᠌ ᠳᠣᠯᠣᠭᠠ ᠬᠣᠨᠣᠭ ᠲᠤ᠌2—3 ᠤᠳᠠᠭᠠ᠂30—40 ᠨᠠᠰᠤᠨ ᠳ᠋ᠤ᠌ ᠳᠣᠯᠣᠭᠠ ᠬᠣᠨᠣᠭ ᠲᠤ᠌2 ᠤᠳᠠᠭᠠ᠂40—50 ᠨᠠᠰᠤᠨ ᠳ᠋ᠤ᠌ ᠳᠣᠯᠣᠭᠠ ᠬᠣᠨᠣᠭ ᠲᠤ᠌ ᠨᠢᠭᠡ ᠤᠳᠠᠭᠠ᠂50—60 ᠨᠠᠰᠤᠨ ᠳ᠋ᠤ᠌2—3 ᠳᠣᠯᠣᠭᠠ ᠬᠣᠨᠣᠭ ᠲᠤ᠌ ᠨᠢᠭᠡ ᠤᠳᠠᠭᠠ ᠣᠢᠷᠠᠳᠬᠤ ᠶ᠋ᠢ ᠬᠡᠪ ᠦ᠋ᠨ ᠭᠡᠵᠦ ᠦᠵᠡᠵᠦ ᠪᠠᠢᠨᠠ᠃ ᠡᠨᠳᠡ ᠡᠴᠡ ᠦᠵᠡᠬᠦ ᠳ᠋ᠦ᠍᠂ ᠬᠤᠷᠢᠴᠠᠯ ᠤ᠋ᠨ ᠲᠣᠭᠠ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠥᠮᠦᠨ ᠦ᠌ ᠨᠠᠰᠤ ᠶᠡᠬᠡᠬᠡᠨ ᠨᠥᠯᠥᠭᠡᠯᠡᠵᠦ ᠪᠠᠢᠨᠠ᠃ ᠭᠡᠪᠡᠴᠦ ᠬᠡᠷᠬᠢᠨ ᠶᠠᠭᠠᠬᠢᠨ ᠨᠥᠯᠥᠭᠡᠯᠡᠵᠦ ᠪᠣᠢ ᠶ᠋ᠢ ᠨᠠᠷᠢᠪᠴᠢᠯᠠᠨ ᠰᠤᠳᠤᠯᠬᠤ ᠳ᠋ᠤ᠌ ᠤᠷᠢᠳᠤ ᠡᠮᠦᠨᠡ ᠦᠢᠯᠡᠳᠴᠦ ᠪᠠᠢᠭᠰᠠᠨ ᠬᠤᠷᠢᠴᠠᠯ ᠤ᠋ᠨ ᠲᠣᠭᠠ ᠶ᠋ᠢ ᠣᠳᠣ ᠶ᠋ᠢᠨ ᠬᠢ ᠲᠡᠢ ᠵᠢᠱ᠌ᠢᠨ ᠦᠵᠡᠬᠦ ᠨᠢ ᠶᠡᠬᠡᠬᠡᠨ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ᠃ ᠪᠠᠢᠭᠠᠯᠢ ᠶ᠋ᠢᠨ ᠵᠢᠮᠡ ᠶᠣᠰᠣ ᠪᠠᠷ ᠪᠡᠶᠡ ᠮᠠᠬᠠᠪᠣᠳ ᠬᠡᠪ ᠦ᠋ᠨ ᠥᠲᠡᠯᠵᠦ ᠪᠠᠢᠪᠠᠯ ᠬᠤᠷᠢᠴᠠᠯ ᠤ᠋ᠨ ᠲᠣᠭᠠ ᠬᠡᠮᠵᠢᠶᠡ ᠠᠭᠠᠵᠢᠮ ᠢ᠋ᠶ᠋ᠠᠷ ᠴᠥᠭᠡᠷᠡᠨ ᠴᠥᠭᠡᠷᠡᠵᠦ᠂ ᠡᠭᠦᠨ ᠢ᠋ ᠴᠡᠪᠡᠷᠰᠢᠵᠦ ᠪᠠᠢᠭᠠ ᠡᠷᠡᠭᠲᠡᠢ ᠬᠥᠮᠦᠨ《ᠠᠷᠭᠠ ᠦᠭᠡᠢ ᠨᠠᠰᠤᠨ ᠤ᠋ ᠬᠢ ᠶᠦᠮ ᠳᠡ》 ᠭᠡᠵᠦ ᠵᠦᠭᠡᠷ ᠬᠦᠯᠢᠶᠡᠵᠦ ᠠᠪᠤᠨᠠ᠃ ᠲᠡᠭᠡᠪᠡᠯ ᠴᠡᠪᠡᠷᠰᠢᠬᠦ ᠦᠢᠯᠡ ᠶᠠᠪᠤᠴᠠ ᠬᠡᠪ ᠦ᠋ᠨ ᠪᠢᠰᠢ ᠶᠠᠪᠤᠭᠳᠠᠪᠠᠯ ᠬᠤᠷᠢᠴᠠᠯ ᠤ᠋ᠨ ᠲᠣᠭᠠ ᠬᠡᠮᠵᠢᠶᠡ ᠬᠡᠪ ᠭᠡᠨᠡᠳᠲᠡᠬᠡᠨ ᠪᠠᠭᠠᠰᠴᠤ᠂ ᠠᠨ ᠨᠢ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠰᠠᠨᠠᠭᠠᠨ ᠳ᠋ᠤ᠌ ᠭᠦᠨᠵᠡᠭᠡᠢ ᠨᠥᠯᠥᠭᠡᠯᠡᠨᠡ᠃ ᠡᠭᠦᠨ ᠦ᠌ ᠤᠯᠠᠮ ᠠ᠋ᠴᠠ᠂ ᠮᠡᠳᠡᠷᠡᠯ ᠴᠣᠴᠠᠷᠠᠭᠳᠠᠯ ᠤ᠋ᠨ ᠰᠢᠨᠵᠢ ᠲᠡᠮᠳᠡᠭ ᠲᠣᠳᠣ ᠢᠯᠡᠷᠡᠨᠡ᠃
ᠲᠥᠮᠥᠰᠦᠭ ᠦ᠋ᠨ ᠭᠦᠢᠴᠡᠳᠬᠡᠳᠡᠭ ᠨᠥᠭᠦᠭᠡ ᠨᠢᠭᠡ ᠡᠭᠦᠷᠭᠡ ᠪᠣᠯ ᠡᠷᠡ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠢᠯᠭᠠᠷᠠᠭᠤᠯᠬᠤ ᠶᠠᠪᠤᠳᠠᠯ ᠪᠢᠯᠡ᠃ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠨᠢ ᠡᠷᠡᠭᠲᠡᠢ ᠶ᠋ᠢᠨ ᠰᠡᠳᠬᠢᠯ ᠵᠦᠢ᠂ ᠪᠡᠯᠭᠡ ᠶ᠋ᠢᠨ ᠴᠢᠯᠬᠠ᠂ ᠬᠥᠮᠦᠨ ᠦ᠌ ᠣᠶᠤᠨ ᠰᠠᠨᠠᠭᠠ ᠪᠣᠯᠤᠨ ᠲᠠᠷᠢᠬᠢᠨ ᠤ᠋ ᠪᠣᠷᠣ ᠭᠠᠳᠠᠷ ᠲᠤ᠌ ᠶᠡᠬᠡᠬᠡᠨ ᠨᠥᠯᠥᠭᠡᠯᠡᠨᠡ᠃ ᠨᠠᠰᠤ ᠠᠬᠢᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠲᠡᠭᠦᠨ ᠦ᠌ ᠳᠠᠭᠠᠭᠠᠪᠤᠷᠢ ᠢᠯᠭᠠᠷᠠᠭᠤᠯᠬᠤ ᠦᠢᠯᠡ ᠠᠵᠢᠯᠯᠠᠭᠠ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠪᠣᠯᠪᠠᠰᠤᠷᠠᠭᠤᠯᠬᠤ ᠡᠭᠦᠷᠭᠡ ᠡᠴᠡ ᠲᠦᠷᠦᠭᠦᠯᠡᠵᠦ ᠠᠯᠳᠠᠭᠳᠠᠨᠠ᠃ ᠬᠠᠷᠢᠨ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠪᠣᠯᠪᠠᠰᠤᠷᠠᠭᠤᠯᠬᠤ ᠡᠭᠦᠷᠭᠡ ᠪᠡᠨ ᠨᠠᠰᠤᠨ ᠥᠨᠳᠥᠷ ᠭᠠᠷᠲᠠᠯᠠ ᠬᠡᠪ ᠢ᠋ᠶ᠋ᠡᠷ ᠭᠦᠢᠴᠡᠳᠬᠡᠨᠡ᠃ ᠡᠭᠦᠨ ᠦ᠌ ᠨᠢᠭᠡ ᠭᠡᠷᠡᠴᠢ ᠪᠣᠯ ᠵᠢᠷᠠ᠂ ᠳᠠᠯᠠ᠂ ᠨᠠᠶᠠ᠂ ᠶᠡᠷᠡ ᠭᠠᠷᠤᠭᠰᠠᠨ ᠥᠨᠳᠥᠷ ᠨᠠᠰᠤᠲᠠᠢ ᠬᠥᠮᠦᠨ ᠡᠴᠡ ᠬᠡᠦᠬᠡᠳ ᠭᠠᠷᠬᠤ ᠶᠠᠪᠤᠳᠠᠯ ᠶᠤᠮ᠃ ᠨᠠᠰᠤᠵᠢᠬᠤ ᠲᠣᠰᠤᠮ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠢᠯᠭᠠᠷᠠᠭᠤᠯᠤᠯᠲᠠ ᠪᠠᠭᠠᠰᠴᠤ᠂ ᠡᠨᠡ ᠨᠢ ᠲᠥᠪ ᠮᠡᠳᠡᠷᠡᠯ ᠦ᠋ᠨ ᠰᠢᠰᠲ᠋ᠧᠮ᠂ ᠪᠣᠳᠠᠰ ᠤ᠋ᠨ ᠰᠣᠯᠢᠯᠴᠠᠭᠠᠨ ᠳ᠋ᠤ᠌ ᠮᠠᠭᠤ ᠪᠠᠷ ᠨᠥᠯᠥᠭᠡᠯᠡᠬᠦ ᠡᠴᠡ ᠭᠠᠳᠠᠨᠠ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ᠂ ᠦᠷᠡ ᠶ᠋ᠢᠨ ᠴᠤᠯᠴᠠᠩ ᠵᠡᠷᠭᠡ ᠪᠡᠯᠭᠡ ᠶ᠋ᠢᠨ ᠲᠣᠭᠲᠠᠯᠴᠠᠭᠠᠨ ᠤ᠋ ᠪᠤᠯᠴᠢᠷᠬᠠᠢ ᠶ᠋ᠢᠨ ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠥᠭᠡᠷᠡᠴᠢᠯᠡᠨᠡ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠪᠣᠯ ᠬᠤᠷᠢᠴᠠᠯ ᠤ᠋ᠨ ᠠᠮᠢᠳᠤᠷᠠᠯ ᠬᠡᠪ ᠢ᠋ᠶ᠋ᠡᠷ ᠶᠠᠪᠤᠭᠳᠠᠬᠤ ᠳ᠋ᠤ᠌ ᠴᠢᠬᠤᠯᠠ ᠡᠭᠦᠷᠭᠡ ᠲᠡᠢ ᠪᠥᠭᠡᠳ ᠲᠡᠭᠦᠨ ᠡᠴᠡ ᠡᠷᠡ ᠪᠡᠯᠭᠡ ᠡᠷᠬᠡᠲᠡᠨ ᠦ᠌ ᠬᠥᠪᠴᠢᠷᠡᠯᠲᠡ ᠪᠣᠯᠤᠨ ᠦᠷᠡ ᠶ᠋ᠢᠨ ᠰᠤᠩ ᠭᠠᠷᠬᠤ ᠨᠢ ᠶᠡᠬᠡᠬᠡᠨ ᠰᠢᠯᠲᠠᠭᠠᠯᠠᠨᠠ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠪᠣᠯ ᠳᠠᠪᠤᠰᠠᠩ ᠤ᠋ᠨ ᠳᠣᠣᠷᠠ᠂ ᠤᠮᠠᠳᠠᠭ᠂ ᠰᠢᠯᠤᠭᠤᠨ ᠭᠡᠳᠡᠰᠦ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠢᠷᠢᠯᠠᠭᠰᠠᠨ ᠮᠠᠨᠵᠢᠨ ᠬᠡᠯᠪᠡᠷᠢ ᠲᠡᠢ ᠡᠷᠬᠡᠲᠡᠨ ᠶᠦᠮ᠃ ᠲᠡᠷᠡ ᠪᠡᠷ ᠵᠥᠪᠬᠡᠨ ᠰᠦᠨ ᠲᠡᠵᠢᠭᠡᠯᠲᠡᠨ ᠳ᠋ᠦ᠍ ᠯᠡ ᠪᠠᠢᠬᠤ ᠠ᠋ᠴᠠ ᠪᠢᠰᠢ᠂ ᠳᠣᠣᠷᠠᠲᠤ ᠵᠡᠷᠭᠡ ᠶ᠋ᠢᠨ ᠠᠮᠢᠲᠠᠨ ᠳ᠋ᠤ᠌ ᠪᠠᠢᠳᠠᠭ ᠦᠭᠡᠢ ᠡᠴᠡ ᠪᠣᠳᠣᠭᠠᠳ ᠦᠵᠡᠪᠡᠯ ᠦᠷᠡᠵᠢᠯ ᠦ᠋ᠨ ᠦᠢᠯᠡ ᠠᠵᠢᠯᠯᠠᠭᠠᠨ ᠳ᠋ᠤ᠌ ᠶᠠᠮᠠᠷ ᠴᠢᠬᠤᠯᠠ ᠡᠭᠦᠷᠭᠡ ᠲᠡᠢ ᠪᠣᠯᠬᠤ ᠨᠢ ᠲᠣᠪ ᠲᠣᠳᠣᠷᠬᠠᠢ ᠪᠠᠢᠨᠠ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠳ᠋ᠤ᠌ ᠨᠠᠰᠤ ᠶ᠋ᠢ ᠳᠠᠭᠠᠨ ᠭᠠᠷᠴᠤ ᠢᠷᠡᠬᠦ ᠥᠭᠡᠷᠴᠢᠯᠡᠯᠲᠡ ᠶ᠋ᠢᠨ ᠲᠤᠬᠠᠢ ᠥᠭᠦᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠲᠡᠭᠦᠨ ᠦ᠌ ᠭᠦᠢᠴᠡᠳᠬᠡᠬᠦ ᠡᠭᠦᠷᠭᠡ ᠶ᠋ᠢ ᠡᠷᠬᠡᠪᠰᠢ ᠲᠣᠪᠴᠢᠬᠠᠨ ᠴᠦ᠍ ᠠᠲᠤᠭᠠᠢ ᠲᠠᠨᠢᠯᠴᠠᠬᠤ ᠨᠢ ᠵᠦᠢᠲᠡᠢ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠨᠢ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠠᠮᠢᠳᠤᠷᠠᠬᠤ ᠪᠣᠯᠤᠨ ᠲᠡᠭᠦᠨ ᠦ᠌ ᠦᠷᠡ ᠲᠣᠭᠲᠠᠭᠠᠬᠤ ᠴᠢᠳᠠᠪᠤᠷᠢ ᠶ᠋ᠢ ᠰᠠᠢᠵᠢᠷᠠᠭᠤᠯᠬᠤ ᠲᠠᠭᠠᠯᠠᠮᠵᠢᠲᠠᠢ ᠨᠥᠬᠥᠴᠡᠯ ᠢ᠋ ᠪᠦᠷᠢᠳᠦᠭᠦᠯᠳᠡᠭ ᠣᠨᠴᠣᠭᠣᠢ ᠰᠢᠩᠭᠡᠨ ᠭᠠᠷᠭᠠᠨᠠ᠃ ᠲᠡᠭᠦᠨ ᠡᠴᠡ ᠭᠠᠳᠠᠨᠠ ᠴᠢᠰᠤᠨ ᠳ᠋ᠤ᠌ ᠪᠠᠰᠠ ᠳᠠᠭᠠᠭᠠᠪᠤᠷᠢ ᠢᠯᠭᠠᠷᠠᠭᠤᠯᠤᠨᠠ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠱᠦᠭᠦᠷᠡᠯ ᠨᠢ ᠦᠷᠡ ᠶ᠋ᠢᠨ ᠰᠤᠩ ᠤ᠋ᠨ ᠶᠡᠬᠡᠩᠬᠢ ᠬᠡᠰᠡᠭ ᠢ᠋ ᠪᠦᠲᠦᠭᠡᠨᠡ᠃ ᠲᠡᠢᠮᠦ ᠡᠴᠡ ᠦᠷᠡ ᠶ᠋ᠢᠨ ᠰᠤᠩ ᠤ᠋ᠨ ᠬᠡᠮᠵᠢᠶᠡ ᠶᠡᠬᠡᠰᠬᠦ᠂ ᠪᠠᠭᠠᠰᠬᠤ ᠨᠢ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠪᠠ ᠦᠷᠡ ᠶ᠋ᠢᠨ ᠴᠤᠯᠴᠠᠩ ᠤ᠋ᠨ ᠱᠦᠭᠦᠷᠡᠯ ᠡᠴᠡ ᠪᠣᠯᠤᠨᠠ᠃ ᠪᠡᠯᠭᠡ ᠶ᠋ᠢᠨ ᠪᠣᠯᠤᠨ ᠥᠭᠡᠷᠡ ᠶᠠᠮᠠᠷ ᠨᠢᠭᠡᠨ ᠰᠠᠲᠤᠯ ᠦᠭᠡᠢ᠂ ᠬᠡᠪ ᠦ᠋ᠨ ᠨᠥᠬᠥᠴᠡᠯ ᠳ᠋ᠦ᠍ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠠ᠋ᠴᠠ ᠬᠣᠨᠣᠭ ᠲᠤ᠌0.5—2 ᠮᠢᠯᠢᠮᠧᠲ᠋ᠷ ᠱᠦᠭᠦᠷᠡᠯ ᠭᠠᠷᠭᠠᠬᠤ ᠪᠠ ᠲᠡᠭᠦᠨ ᠦ᠌ ᠥᠴᠦᠬᠡᠨ ᠬᠡᠰᠡᠭ ᠢ᠋ ᠰᠢᠭᠡᠰᠦ ᠲᠡᠢ ᠬᠠᠮᠲᠤ ᠭᠠᠳᠠᠭᠰᠢᠯᠠᠨᠠ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠱᠦᠭᠦᠷᠡᠯ ᠨᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠣᠷᠭᠠᠨᠢᠭ(ᠤᠭᠤᠷᠠᠭ᠂ ᠨᠢᠲ᠋ᠷᠲ᠋᠂ ᠹᠷᠮᠸᠨᠲ᠂ ᠥᠭᠡᠬᠦ ᠲᠣᠰᠣ) ᠪᠣᠯᠤᠨ ᠣᠷᠭᠠᠨᠢᠭ ᠪᠢᠰᠢ(ᠨᠠᠲ᠋ᠷᠢ᠂ ᠺᠠᠯᠢ᠂ ᠺᠠᠯᠼ᠂ ᠾᠯᠣᠷ ᠪᠢᠺᠷᠹᠤᠨᠠᠲ᠂ ᠹᠣᠰᠹᠣᠷ ᠭᠡᠬᠦ ᠮᠡᠲᠦ) ᠪᠣᠳᠠᠰ ᠠᠭᠤᠯᠤᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠱᠦᠭᠦᠷᠡᠯ ᠳ᠋ᠦ᠍ ᠨᠠᠲ᠋ᠷᠢ᠂ ᠺᠠᠯᠢ᠂ ᠺᠠᠯᠼ ᠨᠢ ᠴᠢᠰᠤᠨ ᠤ᠋ ᠰᠠᠢᠪᠠᠩ ᠳ᠋ᠤ᠌ ᠪᠠᠢᠳᠠᠭ ᠠ᠋ᠴᠠ ᠶᠡᠬᠡ ᠬᠡᠮᠵᠢᠶᠡ ᠲᠡᠢ ᠪᠠᠢᠨᠠ᠃ ᠨᠠᠰᠤ ᠠᠬᠢᠬᠤ ᠲᠣᠰᠤᠮ ᠬᠣᠯᠪᠣᠭᠴᠢ ᠡᠳ᠋ ᠤᠷᠭᠤᠭᠰᠠᠨ ᠠ᠋ᠴᠠ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠲᠣᠮᠣᠷᠠᠳᠠᠭ ᠪᠥᠭᠡᠳ ᠡᠨᠡ ᠨᠢ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠡᠷᠡᠴᠦᠳ ᠲᠦ᠍(50—60 ᠠ᠋ᠴᠠ ᠳᠡᠭᠡᠭᠰᠢ ᠨᠠᠰᠤᠨ ᠤ᠋) ᠬᠠᠮᠤᠭ ᠤ᠋ᠨ ᠡᠯᠪᠡᠭ ᠲᠣᠬᠢᠶᠠᠯᠳᠤᠳᠠᠭ ᠡᠪᠡᠳᠴᠢᠨ ᠦ᠌ ᠨᠢᠭᠡ ᠶᠦᠮ᠃ ᠲᠠᠪᠢ ᠠ᠋ᠴᠠ ᠳᠡᠭᠡᠭᠰᠢ ᠨᠠᠰᠤᠨ ᠤ᠋ ᠡᠷᠡᠴᠦᠳ ᠲᠦ᠍ ᠤᠷᠢᠳᠴᠢᠯᠠᠨ ᠰᠡᠷᠭᠡᠢᠯᠡᠬᠦ ᠦᠵᠡᠯᠭᠡ ᠬᠢᠬᠦ ᠳ᠋ᠦ᠍ ᠲᠡᠳᠡᠭᠡᠷ ᠦ᠋ᠨ10%—15% ᠳ᠋ᠤ᠌ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠲᠣᠮᠣᠷᠠᠭᠰᠠᠨ ᠪᠠᠢᠳᠠᠭ ᠠᠵᠠᠢ᠃ ᠡᠭᠦᠨ ᠦ᠌ ᠤᠯᠠᠮ ᠠ᠋ᠴᠠ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠱᠦᠭᠦᠷᠡᠯ ᠢᠯᠭᠠᠷᠠᠭᠤᠯᠬᠤ ᠦᠢᠯᠡ ᠠᠵᠢᠯᠯᠠᠭᠠ ᠪᠠᠭᠤᠷᠠᠵᠤ᠂ ᠮᠡᠳᠡᠷᠡᠯ— ᠰᠡᠳᠬᠢᠴᠡ ᠶ᠋ᠢᠨ ᠬᠢᠮᠤᠷᠠᠯ ᠡᠭᠦᠰᠦᠨᠡ᠃ ᠲᠤᠬᠠᠢᠯᠠᠪᠠᠯ᠂ ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠬᠤ᠂ ᠮᠡᠳᠡᠷᠡᠯ ᠰᠤᠯᠠᠳᠠᠯ ᠤ᠋ᠨ ᠰᠢᠨᠵᠢ ᠲᠡᠮᠳᠡᠭ ᠢᠯᠡᠷᠡᠬᠦ᠂ ᠠᠮᠢᠰᠬᠤᠭᠠᠳᠠᠬᠤ᠂ ᠵᠢᠷᠦᠬᠡ ᠳᠡᠯᠡᠰᠬᠦ᠂ ᠵᠢᠷᠦᠬᠡ ᠪᠡᠷ ᠬᠠᠳᠬᠤᠬᠤ ᠵᠡᠷᠭᠡ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠤᠨᠠ᠃ ᠡᠨᠡ ᠪᠦᠬᠦᠨ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠪᠡᠶᠡ ᠮᠠᠬᠠᠪᠣᠳ ᠲᠤ᠌ ᠴᠢᠬᠤᠯᠠ ᠡᠭᠦᠷᠭᠡ ᠭᠦᠢᠴᠡᠳᠬᠡᠳᠡᠭ ᠢ᠋ ᠢᠯᠡᠳᠬᠡᠨ ᠬᠠᠷᠠᠭᠤᠯᠬᠤ ᠤᠴᠢᠷ ᠠ᠋ᠴᠠ ᠵᠠᠷᠢᠮ ᠡᠷᠳᠡᠮᠲᠡᠨ ᠲᠡᠭᠦᠨ ᠢ᠋ ᠡᠷᠡ ᠬᠥᠮᠦᠨ ᠦ᠌《ᠬᠣᠶᠠᠳᠠᠬᠢ ᠠᠮᠢᠨ ᠵᠢᠷᠦᠬᠡ》 ᠭᠡᠵᠦ ᠨᠡᠷᠡᠯᠡᠬᠦ ᠨᠢ ᠪᠣᠢ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠲᠣᠮᠣᠷᠠᠭᠰᠠᠨ ᠠ᠋ᠴᠠ ᠰᠢᠭᠡᠰᠦ ᠬᠠᠭᠠᠭᠳᠠᠵᠤ᠂ ᠰᠢᠭᠡᠰᠦ ᠣᠢᠷᠠ ᠣᠢᠷᠠᠬᠠᠨ ᠬᠦᠷᠬᠦ᠂ ᠳᠤᠲᠠᠭᠤ᠂ ᠤᠳᠠᠭᠠᠨ ᠰᠢᠭᠡᠬᠦ᠂ ᠰᠢᠭᠡᠰᠦ ᠬᠣᠯᠠ ᠰᠠᠴᠤᠭᠳᠠᠬᠤ ᠦᠭᠡᠢ᠂ ᠥᠯᠮᠡᠢ ᠳᠡᠭᠡᠷᠡ ᠪᠡᠨ ᠰᠢᠭᠡᠬᠦ ᠵᠡᠷᠭᠡ ᠣᠯᠠᠨ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠤᠨᠠ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠱᠦᠭᠦᠷᠡᠯ ᠨᠢ ᠲᠥᠮᠥᠰᠦᠭ ᠦ᠋ᠨ ᠦᠢᠯᠡ ᠠᠵᠢᠯᠯᠠᠭᠠᠨ ᠳ᠋ᠤ᠌ ᠨᠥᠯᠥᠭᠡᠯᠡᠬᠦ ᠡᠴᠡ ᠭᠠᠳᠠᠨᠠ ᠳᠣᠲᠣᠷᠠ ᠡᠷᠬᠡᠲᠡᠨ ᠦ᠌ ᠦᠢᠯᠡ ᠠᠵᠢᠯᠯᠠᠭᠠᠨ ᠳ᠋ᠤ᠌ ᠴᠦ᠍ ᠪᠠᠰᠠ ᠨᠥᠯᠥᠭᠡ ᠦᠵᠡᠭᠦᠯᠦᠨᠡ᠃ ᠢᠩᠭᠢᠬᠦᠯᠡᠷ ᠪᠡᠯᠭᠡ ᠶ᠋ᠢᠨ ᠲᠣᠭᠲᠠᠯᠴᠠᠭᠠ ᠨᠢ ᠦᠯᠡᠮᠵᠢ ᠨᠠᠷᠢᠨ ᠪᠦᠲᠦᠴᠡ᠂ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠲᠠᠢ ᠦᠷᠡ ᠤᠳᠤᠮ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨ ᠦᠯᠡᠳᠡᠭᠡᠬᠦ ᠳ᠋ᠦ᠍ ᠦᠯᠡᠮᠵᠢ ᠴᠢᠬᠤᠯᠠ ᠡᠭᠦᠷᠭᠡ ᠭᠦᠢᠴᠡᠳᠬᠡᠨᠡ᠃ ᠣᠯᠠᠨ ᠵᠢᠯ ᠦ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠨᠢᠭᠤᠷ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠪᠡᠯᠭᠡ ᠡᠷᠬᠡᠲᠡᠨ ᠦ᠌ ᠪᠦᠲᠦᠴᠡ— ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠪᠠᠷᠤᠭᠲᠠᠢ ᠮᠡᠳᠡᠬᠦ ᠨᠢ ᠪᠢᠳᠡᠨ ᠦ᠌ ᠫᠷᠩᠲ᠋ᠢᠭ ᠲᠦ᠍ ᠴᠥᠭᠡᠨ ᠦᠭᠡᠢ ᠲᠠᠭᠠᠷᠠᠯᠳᠤᠬᠤ ᠶᠤᠮ᠃ ᠡᠢᠮᠦ ᠡᠴᠡ ᠪᠡᠯᠭᠡ ᠶ᠋ᠢᠨ ᠲᠣᠭᠲᠠᠯᠴᠠᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠡᠢᠨᠬᠦ ᠰᠤᠨᠵᠢᠷᠠᠭᠤ ᠤᠷᠲᠤ ᠥᠭᠦᠯᠡᠭᠰᠡᠨ ᠢ᠋ ᠲᠠ ᠪᠦᠬᠦᠨ ᠪᠣᠯᠭᠣᠭᠠᠨᠠ ᠤᠤ!
ᠠᠬᠢᠮᠠᠭ ᠨᠠᠰᠤᠨ ᠤ᠋ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠰᠤᠳᠤᠯᠭᠠᠨ ᠬᠢᠵᠦ ᠦᠵᠡᠬᠦ ᠳ᠋ᠦ᠍《ᠡᠨᠡ ᠲᠠᠯᠠ ᠶ᠋ᠢᠨ》 ᠰᠣᠨᠢᠷᠬᠠᠯ ᠶᠠᠭᠤᠨ ᠠ᠋ᠴᠠ ᠪᠣᠯᠵᠤ ᠡᠷᠲᠡ ᠮᠠᠭᠤᠳᠠᠳᠠᠭ ᠢ᠋ ᠯᠠᠪᠯᠠᠨ ᠠᠰᠠᠭᠤᠬᠤ ᠨᠢ ᠴᠥᠭᠡᠨ ᠦᠭᠡᠢ ᠪᠠᠢᠳᠠᠭ᠃ ᠡᠭᠦᠨ ᠦ᠌ ᠰᠢᠯᠲᠠᠭᠠᠨ ᠪᠣᠯ ᠠᠷᠢᠬᠢ᠂ ᠲᠠᠮᠠᠬᠢ ᠪᠠᠷ ᠠᠷᠢᠭᠤᠨ ᠪᠡᠶᠡ ᠴᠣᠭᠴᠠᠰ ᠢ᠋ᠶ᠋ᠠᠨ ᠬᠣᠣᠷᠳᠠᠭᠤᠯᠠᠵᠤ᠂ ᠠᠮᠠᠷᠠᠭ ᠬᠠᠨᠢ᠂ ᠠᠯᠠᠭ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠢᠷᠠ ᠢᠪᠡᠭᠡᠯ ᠳ᠋ᠦ᠍ ᠳᠣᠯᠳᠣᠢᠳᠠᠵᠤ ᠭᠡᠷ ᠣᠷᠣᠨ ᠤ᠋ ᠬᠠᠷᠠ ᠪᠣᠷᠣ ᠠᠵᠢᠯ ᠠ᠋ᠴᠠ ᠬᠥᠨᠳᠡᠢᠷᠡᠨ ᠬᠥᠳᠡᠯᠬᠦ ᠪᠡᠨ ᠪᠣᠯᠢᠵᠤ᠂ ᠭᠦᠵᠡᠭᠡᠯᠡᠬᠦ ᠶᠠᠪᠤᠳᠠᠯ ᠶᠤᠮ᠃ ᠡᠨᠡ《ᠳᠥᠷᠪᠡᠨ ᠪᠡᠷᠬᠡ》 ᠳᠡᠭᠡᠷᠡ ᠡᠯᠳᠡᠪ ᠦ᠋ᠨ ᠡᠪᠡᠳᠴᠢᠨ ᠬᠠᠭᠤᠴᠢ᠂ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠬᠢᠮᠤᠷᠠᠯ ᠨᠡᠮᠡᠭᠡᠰᠦ ᠪᠣᠯᠤᠨᠠ᠃ ᠡᠮᠡᠭᠲᠡᠢ ᠶ᠋ᠢᠨ ᠪᠡᠯᠭᠡ ᠶ᠋ᠢᠨ ᠠᠮᠢᠳᠤᠷᠠᠯ ᠬᠡᠳᠦᠨ ᠨᠠᠰᠤᠨ ᠳ᠋ᠤ᠌ ᠴᠢᠭᠯᠡᠬᠦ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ᠃ ᠤᠴᠢᠷ ᠨᠢ ᠲᠡᠷᠡ ᠡᠨᠡ ᠲᠠᠯᠠ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠡᠷᠡᠭᠲᠡᠢ ᠬᠥᠮᠦᠨ ᠰᠢᠭ ᠲᠡᠭᠡᠲᠡᠯᠡ ᠰᠢᠮᠡᠳᠡᠳᠡᠭ ᠦᠭᠡᠢ᠂ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠠᠶᠠᠯᠳᠤᠨ ᠳᠠᠭᠠᠳᠠᠭ᠃ ᠡᠮᠡᠭᠲᠡᠢ ᠬᠥᠮᠦᠨ45—50 ᠭᠠᠷᠤᠭᠠᠳ ᠴᠡᠪᠡᠷᠰᠢᠵᠦ ᠡᠬᠢᠯᠡᠳᠡᠭ ᠴᠦ᠍ ᠭᠡᠰᠡᠨ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠨᠠ᠃ ᠭᠡᠪᠡᠴᠦ ᠵᠠᠷᠢᠮ ᠡᠮᠡᠭᠲᠡᠢᠴᠦᠳ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ《ᠬᠥᠭᠰᠢᠷᠡᠴᠢᠬᠡᠭᠡᠳ》 ᠭᠡᠵᠦ ᠬᠠᠵᠢᠭᠯᠠᠬᠤ ᠨᠢ ᠪᠠᠢᠳᠠᠭ ᠪᠣᠯᠤᠯᠲᠠᠢ᠃ ᠨᠠᠰᠤ ᠠᠬᠢᠭᠰᠠᠨ ᠴᠦ᠍ ᠡᠪᠦᠭᠡᠨ ᠴᠢᠨᠢ ᠬᠦᠰᠡᠭᠡᠳ ᠬᠦᠷᠦᠭᠡᠳ ᠢᠷᠡᠬᠦ ᠢᠷᠡᠭᠰᠡᠨ ᠦᠶᠡ ᠳ᠋ᠦ᠍ ᠪᠢᠲᠡᠭᠡᠢ ᠭᠣᠮᠣᠳᠠᠭᠠᠭᠠᠷᠠᠢ᠃ ᠡᠷᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠭᠣᠪᠢ ᠶ᠋ᠢᠨ ᠵᠠᠭ ᠰᠢᠭ᠋ ᠬᠠᠲᠠᠭᠤ ᠴᠦ᠍ ᠪᠠᠰᠠ ᠶᠡᠬᠡ ᠡᠮᠵᠡᠭᠬᠡᠨ ᠡᠳ᠋ ᠰᠢᠦ᠃
ᠡᠮᠡᠭᠲᠡᠢ ᠬᠥᠮᠦᠨ ᠴᠡᠪᠡᠷᠰᠢᠨᠡ ᠭᠡᠳᠡᠭ ᠪᠣᠯ ᠰᠠᠷᠠ ᠶ᠋ᠢᠨ ᠲᠡᠮᠳᠡᠭ ᠲᠠᠲᠠᠷᠠᠵᠤ᠂ ᠬᠡᠦᠬᠡᠳ ᠭᠠᠷᠭᠠᠬᠤ ᠦᠭᠡᠢ ᠭᠡᠰᠡᠨ ᠦᠭᠡ ᠪᠣᠯᠬᠤ ᠠ᠋ᠴᠠ ᠪᠢᠰᠢ᠂ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠣᠭᠲᠣ ᠦᠭᠡᠢ ᠪᠣᠯᠴᠢᠬᠠᠨᠠ ᠭᠡᠰᠡᠨ ᠬᠡᠷᠡᠭ ᠪᠢᠰᠢ ᠠ᠋᠃ ᠬᠠᠷᠢᠨ ᠴᠦ᠍ ᠵᠠᠷᠢᠮ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠴᠡᠪᠡᠷᠰᠢᠭᠰᠡᠨ ᠡᠴᠡ ᠬᠣᠢᠰᠢ ᠨᠢᠭᠡ ᠦᠶᠡ ᠵᠠᠯᠠᠭᠤ ᠽᠠᠨᠳᠠᠨ ᠪᠠᠢᠬᠤ ᠠ᠋ᠴᠠ ᠴᠦ᠍ ᠶᠡᠬᠡᠰᠬᠦ ᠶᠠᠪᠤᠳᠠᠯ ᠪᠣᠢ᠃ ᠡᠨᠡ ᠨᠢᠭᠡ ᠲᠠᠯᠠ ᠠ᠋ᠴᠠ᠂ ᠵᠠᠯᠠᠭᠤ ᠽᠠᠨᠳᠠᠨ ᠪᠠᠢᠬᠤ ᠳ᠋ᠤ᠌ ᠵᠢᠷᠮᠦᠰᠦᠨ ᠪᠣᠯᠴᠢᠬᠠᠪᠠᠯ ᠶᠠᠭᠠᠬᠢᠨᠠ ᠭᠡᠰᠡᠨ ᠭᠡᠰᠡᠨ ᠮᠥᠩᠬᠡ ᠶ᠋ᠢᠨ ᠠᠢᠳᠠᠰ ᠲᠦᠭᠰᠢᠯ ᠠᠷᠤᠯᠠᠭᠰᠠᠨ ᠤ᠋ ᠬᠢ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ᠂ ᠰᠠᠷᠠ ᠶ᠋ᠢᠨ ᠲᠡᠮᠳᠡᠭ ᠲᠠᠲᠠᠷᠠᠵᠤ᠂ ᠡᠮᠡ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠢᠯᠭᠠᠷᠠᠬᠤ ᠪᠠᠨ ᠪᠣᠯᠢᠳᠠᠭ ᠴᠦ᠍ ᠭᠡᠰᠡᠨ ᠡᠷᠡ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠨᠢ ᠪᠥᠭᠡᠷᠡ ᠶ᠋ᠢᠨ ᠳᠡᠭᠡᠳᠦ ᠪᠤᠯᠴᠢᠷᠬᠠᠢ ᠳ᠋ᠤ᠌ ᠪᠣᠯᠪᠠᠰᠤᠷᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠳᠠᠭ ᠲᠠᠢ ᠬᠣᠯᠪᠣᠭᠠ ᠲᠠᠢ᠃ ᠡᠢᠨᠬᠦ ᠡᠮᠡᠭᠲᠡᠢ ᠶ᠋ᠢᠨ ᠪᠡᠶᠡ ᠮᠠᠬᠠᠪᠣᠳ ᠲᠤ᠌ ᠡᠷᠡ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠢᠯᠡᠭᠦᠦ ᠶᠡᠬᠡᠰᠦᠨᠡ(ᠳᠠᠪᠠᠮᠠᠭᠠᠢᠯᠠᠨᠠ)᠃ ᠢᠩᠭᠢᠬᠦᠯᠡᠷ ᠲᠡᠭᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠨᠡᠮᠡᠭᠳᠡᠨᠡ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠤ᠋ᠨ ᠡᠷᠴᠢᠮ ᠨᠢ ᠴᠢᠰᠤᠨ ᠳ᠋ᠠᠬᠢ ᠡᠮᠡ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠶ᠋ᠢᠨ ᠬᠡᠮᠵᠢᠶᠡ ᠡᠴᠡ ᠰᠢᠯᠲᠠᠭᠠᠯᠠᠳᠠᠭ ᠪᠣᠯ ᠡᠮᠡᠭᠲᠡᠢ ᠶ᠋ᠢᠨ ᠬᠢ ᠴᠢᠰᠤᠨ ᠳ᠋ᠠᠬᠢ ᠡᠷᠡ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠶ᠋ᠢᠨ ᠬᠡᠮᠵᠢᠶᠡ ᠡᠴᠡ ᠬᠠᠮᠢᠶᠠᠷᠳᠠᠭ᠃ ᠨᠠᠷᠠᠨ ᠤ᠋ ᠬᠣᠷᠸᠠ ᠳ᠋ᠤ᠌ ᠠᠷᠭᠠ ᠦᠭᠡᠢ ᠠᠮᠠᠷᠠᠭ ᠢ᠋ᠶ᠋ᠠᠨ ᠣᠯᠵᠤ᠂ ᠰᠠᠯᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠢᠵᠢᠯᠢᠳᠦᠨ ᠳᠠᠰᠤᠭᠰᠠᠨ ᠨᠠᠰᠤᠲᠠᠨ ᠪᠤᠭᠤᠷᠤᠯ ᠤ᠋ᠳ ᠲᠤ᠌ ᠬᠣᠷᠮᠣᠢ ᠶ᠋ᠢᠨ ᠶᠠᠪᠤᠳᠠᠯ ᠨᠢ ᠨᠠᠰᠤ ᠰᠡᠭᠦᠳᠡᠢ ᠥᠨᠳᠥᠷ ᠭᠠᠷᠤᠭᠰᠠᠨ ᠴᠦ᠍ ᠠᠴᠢ ᠬᠣᠯᠪᠣᠭᠳᠠᠯ ᠢ᠋ᠶ᠋ᠠᠨ ᠠᠯᠳᠠᠬᠤ ᠦᠭᠡᠢ᠃ ᠠᠵᠠ ᠵᠢᠷᠭᠠᠯ᠂ ᠪᠠᠶᠠᠷ ᠴᠡᠩᠭᠡᠯ ᠪᠡᠯᠭᠡᠯᠡᠭᠰᠡᠭᠡᠷ ᠪᠠᠢᠳᠠᠭ᠃ ᠬᠣᠶᠠᠷ ᠪᠡᠶᠡ ᠡᠴᠡ ᠪᠡᠨ ᠡᠷᠲᠡ ᠬᠥᠨᠳᠡᠢᠷᠡᠭᠰᠡᠨ ᠡᠬᠡᠨᠡᠷ᠂ ᠨᠥᠬᠥᠷ ᠬᠣᠶᠠᠷ ᠬᠤᠷᠳᠤᠨ ᠥᠲᠡᠯᠵᠦ ᠪᠠᠢᠬᠤ ᠳ᠋ᠤ᠌ ᠤᠭᠤᠷᠠᠭ ᠤ᠋ᠨ ᠤᠯᠠᠭᠠᠨ ᠴᠠᠢ ᠪᠠᠨ ᠬᠤᠪᠢᠶᠠᠨ ᠤᠤᠭᠤᠵᠤ᠂ ᠵᠡᠷᠭᠡ ᠥᠲᠡᠯᠵᠦ ᠪᠠᠢᠭᠠ ᠨᠠᠰᠤᠲᠠᠨ ᠪᠤᠭᠤᠷᠤᠯ ᠤ᠋ᠳ ᠤᠷᠲᠤ ᠨᠠᠰᠤᠯᠠᠭᠠᠳ ᠪᠠᠢᠬᠤ ᠨᠢ ᠴᠠᠭᠠᠨᠠ ᠪᠠᠨ ᠨᠠᠷᠢᠨ ᠤᠴᠢᠷ ᠲᠠᠢ᠃ ᠢᠩᠭᠢᠬᠦᠯᠡᠷ ᠤᠷᠲᠤ ᠨᠠᠰᠤᠯᠠᠵᠤ᠂ ᠤᠳᠠᠭᠠᠨ ᠵᠢᠷᠭᠠᠬᠤ ᠳ᠋ᠤ᠌ ᠬᠠᠨᠢ ᠶ᠋ᠢᠨ ᠲᠦᠰᠢᠭ ᠬᠠᠮᠤᠭ ᠠ᠋ᠴᠠ ᠡᠷᠬᠢᠮ᠂ ᠬᠠᠩᠭᠠᠢ ᠰᠢᠭ᠋ ᠲᠦᠰᠢᠭ ᠲᠡᠢ ᠬᠠᠨᠢ ᠢᠵᠢᠯᠢ ᠲᠡᠢ ᠬᠥᠮᠦᠨ ᠤᠬᠢᠯᠠᠵᠤ᠂ ᠳᠠᠭᠤᠯᠠᠬᠤ ᠬᠣᠷᠸᠠ ᠳ᠋ᠤ᠌ ᠠᠯᠵᠢᠶᠠᠬᠤ ᠦᠭᠡᠢ᠂ ᠰᠡᠳᠬᠢᠯ ᠠᠮᠤᠷ᠂ ᠨᠢᠷᠤᠭᠤ ᠲᠡᠨᠢᠭᠡᠷ ᠠᠯᠬᠤᠨᠠ᠃