ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠠᠷᠪᠠᠨ ᠨᠠᠢ᠍ᠮᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 18
189ᠪᠣᠳᠣᠭᠤᠰᠢᠲᠠᠢ ᠬᠡᠷᠡᠭ
ᠡᠭᠦᠨ ᠢ᠋ᠶ᠋ᠡᠷ ᠪᠣᠯ ᠰᠦᠬᠡᠪᠠᠭᠠᠲᠤᠷ᠂ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠪᠣᠯᠵᠣᠭᠰᠠᠨ ᠭᠠᠵᠠᠷ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠮᠠᠰᠢ ᠬᠢᠨᠠᠭᠤᠷ ᠬᠥᠳᠡᠯᠵᠦ ᠪᠠᠢᠭᠠ ᠶ᠋ᠢ ᠪᠠᠬᠠᠳᠤᠨ ᠰᠠᠢᠰᠢᠶᠠᠬᠤ ᠲᠡᠳᠦᠢ ᠦᠭᠡᠢ ᠡᠢᠨ ᠬᠦ᠌ ᠨᠢᠭᠡᠨᠲᠡ ᠵᠣᠷᠢᠭᠰᠠᠨ ᠳ᠋ᠠᠭᠠᠨ ᠲᠡᠰᠪᠦᠷᠢ ᠬᠠᠲᠠᠭᠤᠵᠢᠯᠲᠠᠢ ᠵᠢᠳᠬᠦᠬᠦ ᠨᠢ ᠮᠠᠭᠠᠳ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯᠠ᠃
ᠭᠦᠦᠷ ᠳᠡᠭᠡᠷᠡ ᠢᠷᠡᠬᠦ ᠳ᠋ᠦ᠍ ᠲᠡᠩᠬᠡᠬᠡᠷ ᠦᠰᠦᠲᠡᠢ ᠨᠢᠭᠡ ᠡᠬᠡᠨᠡᠷ᠂ ᠦᠶᠡ ᠳᠠᠩ ᠤ᠋ᠨ ᠨᠠᠰᠤᠨ ᠤ᠋ ᠨᠢᠭᠡ ᠬᠠᠷᠠ ᠬᠥᠮᠦᠨ ᠲᠡᠢ ᠭᠠᠷ ᠬᠡᠯᠬᠢᠯᠳᠤᠭᠦᠯᠦᠨ ᠬᠠᠰᠢᠭᠤᠷᠢ ᠳᠥᠰᠢᠨ ᠪᠥᠬᠥᠢᠵᠦ᠂ ᠬᠣᠰᠢᠭᠤ ᠬᠣᠯᠪᠣᠨ ᠰᠢᠪᠠᠷ ᠠᠪᠢᠷ ᠶᠠᠷᠢᠯᠴᠠᠨᠠ᠃ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠬᠠᠰᠢᠭᠤᠷᠢ ᠳᠡᠭᠡᠷᠡ ᠳᠥᠷᠪᠡᠯᠵᠢᠨ ᠲᠠᠯᠠ ᠪᠣᠯᠭᠠᠨ ᠲᠣᠭᠣᠷᠴᠣᠭ ᠲᠠᠢ ᠬᠥᠬᠡ ᠴᠢᠰᠴᠡᠦ ᠳᠡᠪᠡᠯ ᠳᠡᠭᠡᠷᠡ ᠥᠷᠭᠡᠨ ᠰᠢᠷᠠ ᠳᠤᠷᠳᠤᠩ ᠪᠦᠰᠡ ᠣᠷᠢᠶᠠᠭᠰᠠᠨ ᠵᠠᠯᠠᠭᠤᠬᠠᠨ ᠡᠷᠡ ᠲᠤᠭᠤᠰᠢ ᠲᠣᠩᠭᠣᠢᠨ ᠵᠣᠭᠰᠣᠨᠠ᠃ ᠪᠠᠯᠳᠠᠨᠴᠡᠷᠢᠩ ᠲᠡᠭᠦᠨ ᠦ᠌ ᠭᠡᠵᠢᠭᠡ ᠦᠭᠡᠢ ᠶ᠋ᠢ ᠠᠵᠢᠬᠤ ᠲᠠᠢ ᠪᠠᠨ ᠵᠡᠷᠭᠡ ᠭᠠᠮᠢᠩ ᠤ᠋ᠨ ᠠᠯᠪᠠᠨ ᠤ᠋ ᠭᠠᠵᠠᠷ ᠠᠵᠢᠯ ᠬᠢᠳᠡᠭ ᠪᠠᠢᠵᠤ ᠮᠠᠭᠠᠳ ᠭᠡᠵᠦ ᠳᠣᠲᠣᠷᠠ ᠰᠡᠵᠢᠭᠯᠡᠪᠡ᠃ ᠭᠡᠪᠡᠴᠦ ᠬᠡᠨ ᠴᠦ᠍ ᠪᠠᠢᠯᠠ ᠭᠡᠰᠡᠨ ᠰᠡᠵᠢᠭ ᠠᠪᠤᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠴᠢᠬᠤᠯᠠ ᠶ᠋ᠢ ᠰᠠᠨᠠᠬᠤ ᠳ᠋ᠠᠭᠠᠨ ᠠᠷᠪᠠᠭᠠᠳ ᠠᠯᠬᠤᠮ ᠤ᠋ᠨ ᠵᠠᠢᠲᠠᠢ ᠭᠠᠵᠠᠷ ᠤᠭ ᠬᠠᠰᠢᠭᠤᠷᠢ ᠶ᠋ᠢ ᠲᠦᠰᠢᠨ ᠵᠣᠭᠰᠣᠪᠠ᠃ ᠭᠦᠦᠷ ᠦ᠋ᠨ ᠳᠣᠣᠷᠠᠬᠢ ᠭᠥᠯᠢᠭᠡᠷ ᠮᠥᠰᠥ ᠶ᠋ᠢ ᠳᠡᠮᠡᠢ ᠰᠢᠷᠲᠡᠨ ᠪᠠᠢᠬᠤ ᠳ᠋ᠤ᠌ ᠠᠷᠤ ᠳ᠋ᠤ᠌ ᠪᠠᠢᠭᠠ ᠡᠷᠡ ᠡᠮᠡ ᠬᠣᠶᠠᠷ ᠤ᠋ᠨ ᠰᠢᠪᠡᠨᠡᠭᠡᠨ ᠦᠷᠭᠦᠯᠵᠢᠯᠡᠨ ᠰᠣᠨᠣᠰᠤᠭᠳᠠᠨᠠ᠃ ᠴᠣᠬᠣᠮ ᠶᠠᠭᠤ ᠬᠡᠯᠡᠯᠴᠡᠵᠦ ᠪᠠᠢᠭᠠ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠪᠣᠯᠪᠠᠴᠤ ᠬᠣᠶᠠᠭᠤᠯᠠ ᠶ᠋ᠢᠨ ᠬᠠᠮᠠᠷ ᠬᠦᠴᠦᠲᠡᠢ ᠱᠤᠤᠬᠢᠲᠤᠨᠠᠨ ᠢᠨᠠᠭ ᠤ᠋ᠨ ᠬᠠᠯᠠᠭᠤᠨ ᠳ᠋ᠤ᠌ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠱᠤᠮᠪᠠᠭᠰᠠᠨ ᠢ᠋ ᠢᠯᠡᠷᠬᠡᠢᠯᠡᠨᠡ᠃
ᠡᠮᠡᠭᠲᠡᠢ ᠶ᠋ᠢᠨ ᠳᠡᠷᠡᠭᠡᠷ ᠦᠰᠦ ᠪᠣᠯ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠂ ᠪᠤᠰᠤᠳ ᠤ᠋ᠨ ᠡᠬᠡᠨᠡᠷ ᠪᠣᠯᠤᠭᠰᠠᠨ ᠤ᠋ ᠰᠢᠨᠵᠢ ᠲᠡᠮᠳᠡᠭ᠃ ᠲᠡᠭᠡᠭᠡᠳ ᠡᠨᠡ ᠪᠤᠰᠤᠳ ᠤ᠋ᠨ ᠡᠬᠡᠨᠡᠷ ᠡᠨᠳᠡ ᠬᠡᠨ ᠲᠡᠢ ᠪᠡᠨ ᠶᠠᠭᠤ ᠪᠠᠨ ᠬᠢᠵᠦ ᠶᠠᠪᠤᠭᠠ ᠶᠤᠮ ᠪᠣᠢ? ᠡᠨᠡ ᠬᠠᠷᠠ ᠬᠥᠮᠦᠨ ᠲᠡᠢ ᠢᠨᠠᠭ ᠠᠮᠠᠷᠠᠭ ᠪᠠᠢᠭᠰᠠᠨ ᠢ᠋ ᠨᠢ ᠰᠠᠯᠠᠭᠠᠨ ᠪᠤᠰᠤᠳ ᠲᠤ ᠪᠣᠭᠲᠣᠯᠠᠨ ᠰᠠᠭᠤᠯᠭᠠᠭᠰᠠᠨ ᠠ᠋ᠴᠠ ᠢᠩᠭᠢᠵᠦ ᠶᠠᠪᠤᠭᠠ ᠨᠢ ᠮᠥᠨ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ ᠪᠠᠢᠨᠠ᠃ ᠭᠡᠪᠡᠴᠦ ᠬᠠᠢᠷᠠ ᠳᠤᠷᠠᠯᠠᠯ ᠭᠡᠳᠡᠭ ᠬᠡᠴᠢᠨᠡᠭᠡᠨ ᠬᠠᠯᠠᠭᠤᠨ ᠪᠣᠯᠪᠠᠴᠤ ᠬᠥᠮᠦᠨ ᠪᠠᠰᠠ ᠢᠩᠭᠢᠵᠦ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠶᠠᠭᠤᠮᠠ ᠪᠣᠯᠬᠤ ᠭᠡᠵᠦ ᠤᠤ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠪᠣᠳᠣᠪᠠ᠃
ᠰᠦᠬᠡᠪᠠᠭᠠᠲᠤᠷ ᠢ᠋ ᠢᠷᠡᠬᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠬᠠᠵᠠᠭᠤ ᠶ᠋ᠢᠨ ᠵᠠᠯᠠᠭᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ᠄
— ᠦᠭᠡᠢ ᠡᠨᠡ ᠴᠢᠨᠢ ᠲᠠᠨᠢᠳᠠᠭ ᠬᠥᠮᠦᠨ ᠪᠠᠢᠬᠤ ᠨᠢ ᠭᠡᠵᠦ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ ᠮᠡᠨᠳᠦ ᠮᠡᠳᠡᠪᠡ᠃ ᠰᠦᠬᠡᠪᠠᠭᠠᠲᠤᠷ ᠤᠴᠢᠷ ᠢ᠋ ᠮᠡᠳᠡᠨ ᠲᠠᠨᠢᠬᠤ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠬᠠᠷᠢᠭᠤ ᠮᠡᠨᠳᠦ ᠮᠡᠳᠡᠭᠡᠳ᠄
— ᠲᠠ ᠡᠨᠳᠡ ᠶᠠᠭᠤ ᠬᠢᠵᠦ ᠶᠠᠪᠤᠨᠠ?
— ᠵᠦᠭᠡᠷ᠃ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠴᠤ ᠶᠠᠪᠤᠨᠠ᠃ ᠲᠩᠷᠢ ᠲᠤᠩ ᠰᠠᠢᠬᠠᠨ ᠪᠠᠢᠨᠠ ᠰᠢᠦ᠃
— ᠲᠡᠢᠮᠦ ᠪᠠᠢᠨᠠ᠃ ᠪᠢ ᠴᠦ᠍ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠴᠤ ᠶᠠᠪᠤᠨᠠ᠃ ᠰᠦᠬᠡᠪᠠᠭᠠᠲᠤᠷ ᠬᠠᠵᠠᠭᠤ ᠶ᠋ᠢᠨ ᠵᠠᠯᠠᠭᠤ ᠶ᠋ᠢ ᠰᠠᠮ ᠠᠵᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ《ᠡᠨᠡ ᠶᠠᠭᠤᠨ ᠬᠥᠮᠦᠨ ᠪᠣᠢ?》 ᠭᠡᠬᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠠᠯᠳᠠᠨᠴᠡᠷᠢᠩ ᠤᠷᠤᠭᠤ ᠬᠠᠷᠠᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠪᠠᠯᠳᠠᠨᠴᠡᠷᠢᠩ᠄
—《ᠮᠡᠳᠡᠬᠦ ᠦᠭᠡᠢ》 ᠭᠡᠵᠦ ᠰᠠᠮ ᠬᠡᠯᠡᠪᠡ᠃ ᠨᠢᠭᠡ ᠬᠡᠰᠡᠭ ᠦᠭᠡ ᠲᠠᠰᠤᠷᠠᠬᠤ ᠳ᠋ᠤ᠌ ᠠᠷᠤ ᠶ᠋ᠢᠨ ᠬᠣᠶᠠᠷ ᠤ᠋ᠨ ᠱᠤᠤᠬᠢᠲᠤᠨᠠᠭᠠᠨ ᠤᠷᠢᠳ ᠠ᠋ᠴᠠ ᠠᠷᠠᠢ ᠴᠦ᠍ ᠢᠯᠡᠭᠦᠦ ᠲᠡᠢ ᠪᠣᠯᠬᠤ ᠰᠢᠭ᠋ ᠰᠣᠨᠣᠰᠤᠭᠳᠠᠨᠠ ᠬᠠᠵᠠᠭᠤ ᠶ᠋ᠢᠨ ᠵᠠᠯᠠᠭᠤ ᠶ᠋ᠢ ᠯᠠᠪᠯᠠᠨ ᠠᠵᠢᠬᠤ ᠳ᠋ᠤ᠌ ᠦᠭᠡ ᠶᠠᠷᠢᠶᠠ ᠰᠣᠨᠣᠰᠬᠤ ᠶ᠋ᠢᠨ ᠲᠥᠯᠥᠭᠡ ᠪᠦᠬᠦ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠠᠯᠪᠢᠨ ᠴᠢᠬᠢ ᠰᠤᠩᠭᠠᠨ ᠪᠠᠢᠭᠠ ᠰᠢᠭ᠋ ᠦᠵᠡᠭᠳᠡᠨᠡ᠃ ᠡᠢᠮᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠵᠥᠪᠬᠡᠨ ᠬᠣᠶᠠᠷ ᠪᠡᠶᠡ ᠳ᠋ᠡᠭᠡᠨ ᠣᠢᠯᠠᠭᠠᠭᠳᠠᠬᠤ ᠠᠷᠭᠠ ᠪᠠᠷ ᠬᠡᠯᠡᠯᠴᠡᠬᠦ ᠶ᠋ᠢ ᠡᠷᠡᠮᠡᠯᠵᠡᠪᠡ᠃
— ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠮᠠᠨ ᠤ᠋ ᠪᠡᠶᠡ ᠲᠤᠩ ᠮᠠᠭᠤ ᠪᠣᠯᠤᠭᠠᠳ ᠪᠠᠢᠭᠠ ᠶ᠋ᠢ ᠲᠠ ᠳᠣᠭᠣᠯᠤᠭᠠ ᠪᠢᠵᠡ ᠳᠡ᠃
— ᠦᠭᠡᠢ ᠬᠠᠷᠢᠨ ᠲᠡᠢᠮᠦ ᠭᠡᠰᠡᠨ᠂ ᠣᠳᠣ ᠦᠵᠡᠪᠡᠯ ᠴᠢᠷᠠᠢ ᠴᠢᠨᠢ ᠴᠦ᠍ ᠮᠠᠭᠤ ᠪᠠᠢᠨᠠ᠃ ᠶᠠᠭᠠᠬᠢᠭᠠᠳ ᠡᠨᠡ ᠪᠣᠢ?
— ᠶᠠᠭᠠᠬᠢᠬᠤᠪ᠃ ᠡᠨᠡ ᠲᠩᠷᠢ ᠶ᠋ᠢᠨ ᠪᠠᠢᠳᠠᠯ᠂ ᠠᠯᠢ ᠨᠠᠮᠤᠷ ᠠ᠋ᠴᠠ ᠡᠬᠢᠯᠡᠨ ᠵᠢᠭᠲᠡᠢᠬᠡᠨ ᠪᠣᠯᠤᠭᠰᠠᠨ ᠠ᠋ᠴᠠ ᠯᠠ ᠪᠣᠯᠤᠯᠠ᠃
— ᠲᠡᠢᠮᠦ ᠠ᠋᠃ ᠡᠨᠡ ᠲᠩᠷᠢ ᠶ᠋ᠢᠨ ᠪᠠᠢᠳᠠᠯ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠪᠡᠶᠡ ᠮᠠᠬᠠᠪᠣᠳ ᠢ᠋ ᠰᠦᠷᠡᠬᠡᠢ ᠬᠢᠮᠤᠷᠠᠯᠳᠤᠭᠤᠯᠵᠤ ᠪᠠᠢᠭᠠ ᠶᠤᠮ᠃ ᠡᠭᠦᠨ ᠳ᠋ᠦ᠍ ᠶᠡᠷᠦ ᠶᠠᠭᠤ ᠰᠠᠢᠨ ᠪᠣᠯ?
— ᠬᠠᠷᠢᠨ ᠠ᠋᠃ ᠲᠠᠨ ᠤ᠋ ᠪᠣᠳᠣᠬᠤ ᠳ᠋ᠤ᠌ ᠶᠠᠭᠤ ᠬᠡᠷᠡᠭᠲᠡᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠪᠣᠢ?
—《ᠪᠣᠳᠣᠪᠠᠴᠤ ᠪᠤᠲᠠ ᠶ᠋ᠢᠨ ᠰᠢᠭᠢᠷᠡ ᠳᠥᠷᠪᠡ》 ᠭᠡᠭᠴᠢ ᠪᠡᠷ ᠤᠬᠠᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠴᠤ᠌ ᠶᠠᠭᠤᠮᠠ ᠶᠠᠭᠤ ᠴᠦ᠍ ᠦᠭᠡᠢ ᠳᠡᠮᠡᠢ ᠭᠠᠢᠬᠠᠬᠤ ᠳ᠋ᠠᠭᠠᠨ ᠬᠡᠪᠲᠡᠭᠡᠳ ᠯᠡ ᠪᠠᠢᠭᠠ᠃
— ᠬᠡᠪᠲᠡᠬᠦ ᠳᠡᠮᠡᠢ᠃ ᠪᠦᠷ ᠳᠣᠷᠣᠢᠲᠠᠨᠠ᠃ ᠲᠡᠭᠡᠭᠰᠡᠨ ᠳ᠋ᠦ᠍ ᠣᠷᠣᠪᠠᠯ ᠲᠠ ᠶᠠᠳᠠᠵᠤ ᠭᠠᠳᠠᠭᠤᠷ ᠳᠣᠲᠣᠭᠤᠷ ᠶᠠᠪᠤ᠃ ᠡᠷᠡᠭᠦᠯ ᠠᠭᠠᠷ ᠠᠮᠢᠰᠬᠤᠯ! ᠬᠡᠷᠪᠡ ᠪᠣᠯᠤᠯᠴᠠᠭᠠ ᠪᠠᠢᠪᠠᠯ ᠠᠯᠤᠰ ᠲᠤ ᠭᠠᠷᠤᠨ ᠴᠣ ᠰᠢᠨᠡ ᠠᠭᠠᠷ ᠠᠮᠢᠰᠬᠤᠯᠯᠠᠪᠠᠯ ᠨᠢᠭᠡ ᠤᠴᠢᠷ ᠣᠯᠳᠠᠨᠠ ᠪᠣᠢ᠃ ᠬᠠᠰᠢᠷ ᠬᠥᠮᠦᠨ ᠴᠦ᠍ ᠢᠩᠭᠢᠪᠡᠯ ᠳᠡᠭᠡᠷᠡ ᠭᠡᠳ ᠪᠠᠢᠭᠠ ᠶᠤᠮ᠃
ᠪᠠᠯᠳᠠᠨᠴᠡᠷᠢᠩ《ᠬᠠᠰᠢᠷ ᠬᠥᠮᠦᠨ》 ᠭᠡᠳᠡᠭ ᠦ᠋ᠨ ᠨᠢᠭᠡ ᠨᠢ ᠵᠠᠮᠢᠶᠠᠨ᠂《ᠠᠯᠤᠰ ᠲᠤ》 ᠭᠡᠳᠡᠭ ᠨᠢ ᠭᠠᠳᠠᠭᠠᠳᠤ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠬᠡᠷᠡᠭ ᠭᠡᠵᠦ ᠳᠣᠲᠣᠷᠠ ᠪᠠᠨ ᠳᠠᠭᠠᠪᠤᠷᠢᠯᠠᠪᠠ᠃
— ᠠᠯᠤᠰ ᠲᠤ ᠶᠠᠪᠤᠵᠤ ᠪᠣᠯᠤᠨᠠ᠃ ᠭᠡᠪᠡᠴᠦ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠣᠢ? ᠭᠡᠬᠦ ᠳ᠋ᠦ᠍ ᠰᠦᠬᠡᠪᠠᠭᠠᠲᠤᠷ᠄
— ᠠᠭᠤᠯᠠ᠂ ᠤᠰᠤ᠂ ᠣᠢ ᠮᠣᠳᠣ ᠡᠯᠪᠡᠭ ᠲᠡᠢ ᠬᠣᠢᠲᠤ ᠵᠦᠭ ᠪᠠᠢᠨᠠ ᠭᠡᠳ ᠨᠡᠮᠡᠨ ᠲᠠᠢᠯᠪᠤᠷᠢᠯᠠᠬᠤ ᠳ᠋ᠠᠭᠠᠨ᠄ ᠦᠭᠡᠢ ᠶᠠᠭᠤ ᠭᠡᠪᠡ ᠠ᠋? ᠬᠣᠢᠲᠤ ᠵᠦᠭ ᠲᠦ᠍ ᠦᠦᠷ ᠦ᠋ᠨ ᠤᠯᠠᠭᠠᠨ ᠲᠤᠶᠠᠭᠠ ᠲᠠᠲᠠᠭᠰᠠᠨ ᠭᠡᠪᠡ ᠤᠤ? ᠲᠠ ᠡᠨᠡ ᠲᠤᠬᠠᠢ ᠳᠤᠭᠤᠯᠤᠯᠠ ᠯᠠ ᠪᠢᠵᠡ ᠳᠡ?
— ᠲᠤᠭᠤᠯᠤᠭᠰᠠᠨ᠃ ᠡᠨᠡ ᠴᠦ᠍ ᠣᠳᠣ ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ ᠰᠢᠦ ᠳᠡ᠃ ᠲᠡᠷᠡ ᠴᠠᠭ ᠲᠤ ᠬᠥᠮᠦᠨ ᠮᠠᠭᠤ ᠢᠷᠣᠠ ᠯᠠ ᠶᠤᠮ ᠭᠡᠵᠦ ᠱᠠᠭᠰᠢᠶᠠᠨ ᠱᠤᠤᠭᠢᠶᠠᠨ ᠲᠠᠯᠪᠢᠵᠤ ᠪᠠᠢᠯᠠ᠃
— ᠲᠡᠷᠡ ᠴᠦ᠍ ᠳᠡᠮᠡᠢ ᠶᠠᠷᠢᠨᠠ᠃ ᠤᠯᠠᠭᠠᠨ ᠲᠤᠶᠠᠭᠠᠨ ᠤ᠋ ᠦᠳᠡᠰᠢ ᠶ᠋ᠢᠨ ᠬᠢ ᠶ᠋ᠢ ᠮᠠᠭᠤ᠂ ᠦᠦᠷ ᠦ᠋ᠨ ᠬᠢ ᠶ᠋ᠢ ᠰᠠᠢᠨ ᠭᠡᠳᠡᠭ ᠰᠢᠦ ᠳᠡ᠃
— ᠠ ᠲᠡᠢᠮᠦ ᠤᠤ᠃ ᠰᠣᠨᠢᠨ ᠬᠡᠷᠡᠭ ᠪᠠᠢᠨᠠ ᠳᠠ᠃
ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠮᠥᠷᠦᠨ ᠳᠡᠭᠡᠷᠡ ᠨᠢᠭᠡ ᠬᠥᠮᠦᠨ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠴᠣᠬᠢᠨ ᠭᠡᠳᠡᠷᠭᠦ ᠲᠠᠲᠠᠪᠠ᠃ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠨᠢᠭᠤᠷ ᠲᠠᠭᠠᠨ ᠣᠪᠣ ᠳᠣᠪᠣ ᠴᠣᠬᠣᠷ ᠲᠠᠢ᠂ ᠡᠭᠦᠳᠡᠨ ᠰᠢᠲᠦ ᠨᠦ᠍ᠭᠦᠳ ᠨᠢ ᠣᠷᠰᠣᠭᠣᠢ ᠨᠢᠮᠠᠵᠠᠪ ᠪᠠᠢᠰᠠ ᠭᠡᠭᠴᠢ ᠪᠠᠢᠯᠠ᠃
ᠨᠢᠮᠠᠵᠠᠪ ᠪᠠᠯᠳᠠᠨᠴᠡᠷᠢᠩ ᠲᠡᠢ ᠠᠯᠲᠠᠨ ᠮᠡᠨᠳᠦᠯᠡᠭᠡᠳ ᠳᠠᠷᠠᠭᠠ ᠨᠢ ᠰᠦᠬᠡᠪᠠᠭᠠᠲᠤᠷ ᠢ᠋ ᠬᠠᠷᠠᠨ᠄
— ᠬᠡ ᠠ᠋᠂ ᠪᠠᠭᠠᠲᠤᠷ! ᠵᠠ ᠮᠠᠨ ᠤ᠋ ᠪᠠᠭᠠᠲᠤᠷ ᠰᠣᠨᠢᠨ ᠶᠠᠭᠤ ᠪᠠᠢᠨᠠ? ᠭᠡᠵᠦ ᠮᠥᠨ ᠯᠡ ᠲᠠᠨᠢᠮᠠᠬᠠᠢᠷᠠᠭᠰᠠᠨ ᠢ᠋ᠶ᠋ᠠᠨ᠄ ᠵᠠ ᠲᠡᠭᠡᠭᠡᠳ ᠮᠡᠳᠡᠵᠦ ᠪᠠᠢᠭᠠ ᠪᠢᠵᠡ ᠳᠡ᠃ ᠡᠨᠡ ᠮᠠᠭᠤ ᠰᠠᠢᠨ ᠭᠠᠮᠢᠩ ᠤ᠋ᠳ ᠲᠣᠯᠣᠭᠠᠢ ᠳᠡᠭᠡᠷᠡ ᠮᠠᠨᠢ ᠭᠠᠷᠴᠤ ᠭᠦᠢᠴᠡᠵᠦ ᠪᠠᠢᠭᠠ ᠶ᠋ᠢ᠃ ᠡᠨᠡ ᠲᠤᠬᠠᠢ ᠪᠢ ᠪᠣᠭᠳᠠ ᠳ᠋ᠤ᠌ ᠪᠠᠷᠠᠯᠬᠠᠬᠤ ᠭᠡᠰᠡᠨ ᠴᠢᠨᠢ ᠣᠷᠣᠢᠲᠠᠵᠤ ᠣᠷᠬᠢᠭᠠᠳ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠵᠦ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠡᠷᠡ ᠬᠡᠷᠡᠭ ᠢ᠋ ᠳᠠᠶᠠᠩ ᠳᠡᠯᠡᠬᠡᠢ ᠳ᠋ᠦ᠍ ᠮᠡᠳᠡᠭᠳᠡᠬᠦ ᠭᠡᠰᠡᠨ ᠶᠦᠮ ᠰᠢᠭ ᠬᠠᠷᠠ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠴᠢᠨ ᠶᠠᠷᠢᠪᠠ᠃ ᠡᠭᠦᠨ ᠳ᠋ᠦ᠍ᠨᠢ ᠬᠥᠮᠦᠨ ᠪᠦᠷ ᠰᠣᠴᠢᠨ ᠥᠪᠡᠷ ᠢ᠋ ᠨᠢ ᠠᠵᠢᠬᠤ ᠠᠵᠢ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠪᠠᠯᠳᠠᠨᠴᠡᠷᠢᠩ ᠣᠨᠴᠠ ᠰᠣᠴᠢᠨ᠂ ᠬᠠᠵᠠᠭᠤ ᠶ᠋ᠢᠨ ᠰᠡᠵᠢᠭᠯᠡᠯᠲᠡᠢ ᠵᠠᠯᠠᠭᠤ ᠶ᠋ᠢ ᠰᠠᠮ ᠵᠢᠭᠠᠨ ᠴᠠᠭᠠᠰᠢ ᠶᠠᠷᠢᠬᠤ ᠶ᠋ᠢ ᠬᠣᠷᠢᠭᠯᠠᠭᠰᠠᠨ ᠳ᠋ᠤ᠌ ᠨᠢᠮᠠᠵᠠᠪ ᠴᠢᠷᠠᠢ ᠬᠤᠪᠢᠷᠠᠭᠠᠨ ᠵᠠᠯᠠᠭᠤ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠨ᠄
— ᠴᠢ ᠬᠡᠨ ᠪᠣᠢ? ᠶᠠᠭᠤ ᠪᠣᠯᠤᠭᠠᠳ ᠴᠢ ᠬᠥᠮᠦᠨ ᠦ᠌ ᠶᠠᠷᠢᠶᠠ ᠴᠢᠩᠨᠠᠨᠠ ᠪᠢᠯᠡ? ᠭᠡᠵᠦ ᠰᠢᠭᠤᠳ ᠣᠮᠣᠭᠳᠠᠨ ᠬᠡᠷᠡᠭᠦᠯ ᠥᠳᠥᠭᠡᠪᠡ᠃ ᠢᠩᠭᠢᠬᠦ ᠳ᠋ᠦ᠍ ᠲᠡᠷᠡ ᠦᠭᠡ ᠳᠠᠭᠤ ᠦᠭᠡᠢ ᠠᠶᠤᠨ ᠴᠡᠴᠡᠷᠡᠵᠡᠢ᠃
— ᠪᠢ ᠮᠡᠳᠡᠵᠦ ᠪᠠᠢᠨᠠ᠃ ᠴᠢ ᠭᠠᠮᠢᠩ ᠤ᠋ᠨ ᠲᠠᠩᠨᠠᠭᠤᠯ᠃ ᠤᠳᠠᠬᠤ ᠦᠭᠡᠢ ᠲᠡᠷᠡ ᠭᠠᠮᠢᠨᠩ ᠤ᠋ᠳ ᠲᠠᠢ ᠪᠠᠨ ᠦᠨᠡᠰᠦᠨ ᠴᠢᠨᠳᠠᠷᠤᠤ ᠪᠣᠯᠤᠨ ᠬᠡᠢᠰᠬᠦ ᠶ᠋ᠢ ᠴᠢ ᠮᠡᠳᠡᠵᠦ ᠪᠠᠢᠨᠠ ᠤᠤ? ᠲᠣᠨᠢᠯ ᠡᠨᠳᠡ ᠡᠴᠡ᠃ ᠡᠰᠡᠬᠦᠯᠡ ᠴᠢ ᠴᠢᠰᠤ ᠪᠠᠨ ᠬᠣᠯᠢᠭᠤᠯᠬᠤ ᠴᠢᠨᠢ ᠳᠤᠲᠠᠭᠠᠳ ᠪᠠᠢᠨᠠ ᠤᠤ? ᠭᠡᠵᠦ ᠨᠢᠮᠠᠵᠠᠪ ᠬᠠᠨᠴᠤᠢ ᠰᠢᠮᠡᠯᠡᠨ ᠳᠠᠪᠰᠢᠯᠠᠪᠠ᠃ ᠥᠨᠥᠬᠢ ᠵᠠᠯᠠᠭᠤ ᠦᠭᠡ ᠳᠠᠭᠤ ᠦᠭᠡᠢ ᠵᠢᠭᠤᠲᠠᠯᠠ᠂ ᠠᠷᠤ ᠳ᠋ᠤ᠌ ᠪᠠᠢᠭᠰᠠᠨ ᠡᠷᠡ ᠡᠮᠡ ᠬᠣᠶᠠᠷ ᠴᠤ᠌ ᠵᠠᠢᠯᠠᠨ ᠣᠳᠤᠭᠰᠠᠨ ᠪᠠᠢᠪᠠ᠃
ᠶᠡᠷᠦ ᠨᠢᠮᠠᠵᠠᠪ ᠤ᠋ᠨ ᠡᠨᠡ ᠬᠡᠷᠴᠡᠭᠡᠢ ᠪᠣᠯᠤᠭᠠᠳ ᠪᠣᠯᠭᠣᠮᠵᠢᠯᠠᠨ ᠰᠡᠷᠭᠡᠢᠯᠡᠬᠦ ᠤᠬᠠᠭᠠᠨ ᠦᠭᠡᠢ ᠶᠠᠪᠤᠳᠠᠯ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠮᠥᠨ ᠵᠠᠢᠯᠠᠨ ᠣᠳᠬᠤ ᠡᠷᠡᠮᠡᠯᠵᠡᠯ ᠲᠥᠷᠥᠭᠦᠯᠪᠡ᠃
— ᠦᠭᠡᠢ᠂ ᠡᠨᠡ ᠴᠢᠨᠢ ᠨᠠᠷᠠ ᠵᠢᠷᠭᠠᠵᠤ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠬᠠᠷᠢᠯ ᠦᠭᠡᠢ ᠭᠣᠷᠢ ᠦᠭᠡᠢ᠃ ᠵᠠ ᠡᠷᠬᠢᠮ ᠦ᠋ᠳ ᠠᠮᠤᠭᠤᠯᠠᠩ ᠮᠣᠷᠢᠯᠠᠵᠠᠭᠠᠷᠠᠢ! ᠭᠡᠬᠦ ᠳ᠋ᠦ᠍ ᠰᠦᠬᠡᠪᠠᠭᠠᠲᠤᠷ᠄
— ᠵᠠ᠂ ᠵᠠ᠃ ᠲᠠ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠭᠤ ᠪᠠᠢᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠮᠠᠷᠭᠠᠰᠢ ᠳᠠᠬᠢᠨ ᠨᠢᠭᠡ ᠭᠠᠳᠠᠭᠤᠷ ᠶᠠᠪᠤᠵᠤ ᠦᠵᠡ! ᠡᠳᠦᠷ ᠳᠤᠮᠳᠠ ᠶ᠋ᠢᠨ ᠦᠶᠡ ᠪᠡᠷ ᠵᠡᠭᠦᠨ ᠰᠡᠯᠪᠢ ᠶ᠋ᠢᠨ ᠠᠭᠠᠷ ᠢ᠋ ᠣᠨᠴᠠ ᠰᠠᠢᠨ ᠭᠡᠳᠡᠭ ᠰᠢᠦ ᠭᠡᠪᠡ᠃ ᠡᠨᠡ ᠨᠢ ᠮᠠᠷᠭᠠᠰᠢ ᠡᠨᠳᠡ ᠠᠭᠤᠯᠵᠠᠶᠠ ᠭᠡᠰᠡᠨ ᠦᠭᠡ ᠪᠣᠯᠬᠤ ᠶ᠋ᠢ ᠪᠠᠯᠳᠠᠨᠴᠡᠷᠢᠩ ᠲᠣᠳᠣᠷᠬᠠᠢ ᠣᠢᠯᠠᠭᠠᠵᠤ《ᠵᠠ᠂ ᠵᠠ》 ᠭᠡᠳ ᠶᠠᠪᠤᠪᠠ᠃
ᠬᠠᠷᠢᠬᠤ ᠵᠠᠮ ᠳ᠋ᠠᠭᠠᠨ ᠪᠠᠯᠳᠠᠨᠴᠡᠷᠢᠩ᠂ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠬᠡᠯᠡᠭᠰᠡᠨ ᠦᠭᠡ ᠪᠦᠷᠢ ᠶ᠋ᠢ ᠡᠷᠭᠢᠴᠡᠭᠦᠯᠦᠨ ᠬᠢᠨᠠᠪᠠ᠃《ᠬᠣᠢᠲᠤ ᠵᠦᠭ ᠲᠦ᠍ ᠦᠦᠷ ᠦ᠋ᠨ ᠤᠯᠠᠭᠠᠨ ᠲᠤᠶᠠᠭᠠ ᠲᠠᠲᠠᠭᠰᠠᠨ》 ᠭᠡᠳᠡᠭ ᠨᠢ ᠣᠷᠣᠰ ᠲᠤ ᠭᠠᠷᠤᠭᠰᠠᠨ ᠬᠤᠪᠢᠰᠬᠠᠯ ᠢ᠋ ᠳᠤᠷᠠᠳᠤᠭᠰᠠᠨ ᠠᠵᠢ᠃ ᠲᠦᠷᠦᠭᠦᠨ ᠴᠦ᠍ ᠮᠥᠨ ᠢᠩᠭᠢᠵᠦ ᠳᠠᠭᠠᠪᠤᠷᠢᠯᠠᠭᠰᠠᠨ ᠪᠢᠯᠡ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠮᠣᠩᠭᠣᠯ ᠣᠷᠣᠨ ᠣᠷᠣᠰ ᠢ᠋ ᠬᠡᠵᠢᠶᠡ ᠴᠦ᠍ ᠢᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠳᠠᠭ ᠲᠤᠯᠠ ᠪᠢ ᠪᠤᠷᠤᠭᠤ ᠣᠢᠯᠠᠭᠠᠭᠰᠠᠨ ᠶᠤᠮ ᠪᠣᠯᠪᠠ ᠤᠤ ᠭᠡᠵᠦ ᠡᠷᠡᠭᠡᠯᠵᠡᠨᠡ᠃ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠮᠠᠷᠭᠠᠰᠢ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠨᠢᠭᠤᠷ ᠤᠴᠠᠷᠠᠨ ᠬᠡᠯᠡᠯᠴᠡᠬᠦ ᠳ᠋ᠦ᠍ ᠪᠦᠬᠦ ᠶᠠᠪᠤᠳᠠᠯ ᠠᠶᠠᠨᠳᠠᠭᠠᠨ ᠲᠣᠳᠣᠷᠬᠠᠢ ᠪᠣᠯᠬᠤ ᠰᠢᠦ ᠳᠡ ᠭᠡᠵᠦ ᠪᠣᠳᠣᠨᠠ᠃
ᠮᠠᠷᠭᠠᠰᠢ ᠨᠢ ᠪᠠᠯᠳᠠᠨᠴᠡᠷᠢᠩ ᠵᠡᠭᠦᠨ ᠰᠡᠯᠪᠢ ᠳᠡᠭᠡᠷᠡ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠠᠭᠤᠯᠵᠠᠪᠠ᠃ ᠭᠣᠣᠯ ᠤ᠋ᠨ ᠭᠥᠯᠢᠭᠡᠷ ᠮᠥᠰᠥᠨ ᠦ᠌ ᠵᠠᠬᠠ ᠶ᠋ᠢ ᠪᠠᠷᠢᠨ ᠥᠭᠰᠥᠨ ᠶᠠᠪᠤᠬᠤ ᠳ᠋ᠤ᠌ ᠠᠭᠠᠷ ᠲᠤᠩᠭᠠᠯᠠᠭ᠂ ᠬᠥᠮᠦᠨ ᠠᠮᠢᠲᠠᠨ ᠦᠭᠡᠢ ᠰᠡᠯᠡᠭᠦᠬᠡᠨ ᠪᠠᠢᠪᠠ᠃
— ᠣᠳᠣ ᠴᠠᠭ ᠲᠤ ᠪᠢᠳᠡ ᠡᠨᠳᠡ ᠥᠮᠥᠭ ᠲᠦᠰᠢᠭ ᠪᠣᠯᠬᠤ ᠤᠯᠤᠰ ᠭᠠᠭᠴᠠᠬᠠᠨ ᠣᠷᠣᠰ ᠯᠠ ᠪᠠᠢᠨᠠ ᠳᠠ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ᠄
— ᠣᠷᠣᠰ ᠭᠡᠵᠦ ᠤᠤ? ᠣᠷᠣᠰ ᠤ᠋ᠨ ᠢ᠋ᠶ᠋ᠠᠨ ᠰᠢᠨᠵᠢ ᠴᠢᠨᠠᠷ ᠢ᠋ ᠪᠢᠳᠡ ᠮᠡᠳᠡᠬᠦ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠭᠤᠨᠢᠭᠲᠠᠢᠬᠠᠨ ᠢ᠋ᠶ᠋ᠠᠷ ᠬᠡᠯᠡᠪᠡ᠃
— ᠲᠡᠢᠮᠦ ᠠ᠋᠃ ᠣᠷᠣᠰ ᠢ᠋ ᠪᠢᠳᠡ ᠮᠡᠳᠡᠨᠡ᠃ ᠭᠡᠪᠡᠴᠦ ᠣᠳᠣ ᠶ᠋ᠢᠨ ᠣᠷᠣᠰ ᠤᠷᠢᠳᠤ ᠶ᠋ᠢᠨ ᠬᠢ ᠡᠴᠡ ᠪᠡᠨ ᠥᠭᠡᠷᠡ ᠭᠡᠳ ᠰᠦᠬᠡᠪᠠᠭᠠᠲᠤᠷ ᠤᠺᠲ᠋ᠢᠶᠠᠪᠡᠷ ᠦ᠋ᠨ ᠬᠤᠪᠢᠰᠬᠠᠯ ᠢ᠋ᠶ᠋ᠠᠷ ᠢᠯᠠᠨ ᠳᠡᠢᠯᠦᠭᠰᠡᠨ ᠣᠷᠣᠰ ᠤ᠋ᠨ ᠠᠵᠢᠯᠴᠢᠨ ᠲᠠᠷᠢᠶᠠᠴᠢᠨ ᠪᠠ ᠲᠡᠭᠦᠨ ᠦ᠌ ᠵᠥᠪᠯᠡᠯᠲᠦ ᠵᠠᠰᠠᠭ ᠤ᠋ᠨ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠪᠣᠳᠣᠯᠭᠠ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠡᠬᠢᠯᠡᠪᠡ᠃ ᠲᠡᠷᠡ ᠶᠠᠷᠢᠶᠠᠨ ᠤ᠋ ᠶᠡᠬᠡᠩᠬᠢ ᠶ᠋ᠢ ᠪᠠᠯᠳᠠᠨᠴᠡᠷᠢᠩ ᠤᠷᠢᠳ ᠡᠮᠦᠨᠡ ᠲᠤᠭᠤᠯᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠲᠤᠬᠠᠢ ᠳ᠋ᠠᠭᠠᠨ ᠥᠩᠭᠡᠨ ᠳᠡᠭᠡᠷᠡ ᠡᠯᠳᠡᠪ ᠰᠠᠢᠬᠠᠨ ᠢ᠋ ᠴᠤᠤᠷᠷᠶᠠᠳᠤᠭᠤᠯᠬᠤ ᠨᠢ ᠡᠳᠦᠭᠡ ᠶ᠋ᠢᠨ ᠤᠯᠤᠰ ᠣᠷᠣᠨ ᠪᠦᠬᠦᠨ ᠦ᠌ ᠨᠢᠭᠡ ᠭᠣᠣᠯ ᠠᠷᠭᠠ ᠭᠡᠵᠦ ᠦᠵᠡᠨ ᠥᠩᠭᠡᠷᠡᠭᠦᠯᠦᠭᠰᠡᠨ ᠪᠠᠢᠯᠠ᠃ ᠣᠳᠣ ᠣᠷᠣ ᠲᠠᠰᠤ ᠲᠤᠭᠤᠯᠳᠠᠭᠠ ᠦᠭᠡᠢ ᠡᠴᠡ ᠵᠥᠪᠯᠡᠯᠲᠦ ᠵᠠᠰᠠᠭ ᠤ᠋ᠨ ᠦᠶᠡ ᠮᠣᠩᠭᠣᠯ ᠢ᠋ ᠡᠵᠡᠯᠡᠨ ᠠᠪᠬᠤ ᠪᠣᠳᠣᠯᠭᠠ ᠶᠠᠪᠤᠭᠤᠯᠵᠤ ᠪᠠᠢᠭᠰᠠᠨ ᠢ᠋ ᠰᠢᠭᠤᠳ ᠢᠯᠡᠷᠬᠡᠢᠯᠡᠭᠰᠡᠨ ᠨᠢᠭᠡᠨ ᠵᠦᠢᠯ᠂ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠲᠣᠭᠲᠠᠭᠠᠭᠰᠠᠨ ᠵᠦᠢ ᠪᠤᠰᠤ ᠶ᠋ᠢᠨ ᠭᠡᠷᠡ ᠪᠠ ᠡᠷᠬᠡ ᠮᠠᠲᠠᠯ ᠢ᠋ᠶ᠋ᠠᠨ ᠭᠦᠨᠵᠡᠭᠡᠢᠷᠡᠭᠦᠯᠬᠦ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠵᠢᠭᠡᠯᠡᠳᠦᠭᠦᠯᠦᠭᠰᠡᠨ ᠮᠥᠩᠭᠥ᠂ ᠡᠳ᠋ ᠬᠣᠭᠰᠢᠯ ᠡᠯᠳᠡᠪ ᠶᠠᠭᠤᠮᠠᠰ ᠢ᠋ ᠪᠦᠷᠢᠮᠦᠰᠦᠨ ᠬᠡᠷᠡᠭᠰᠡᠬᠦ ᠦᠭᠡᠢ ᠪᠣᠯᠭᠠᠭᠰᠠᠨ ᠬᠣᠶᠠᠳᠠᠬᠢ ᠵᠦᠢᠯ᠃ ᠡᠳᠦᠭᠡ ᠮᠣᠩᠭᠣᠯ ᠣᠷᠣᠨ ᠢ᠋ ᠲᠤᠰᠠᠭᠠᠷ ᠤᠯᠤᠰ ᠭᠡᠵᠦ ᠦᠵᠡᠨ ᠬᠠᠷᠢᠯᠴᠠᠭᠠ ᠬᠣᠯᠪᠣᠭᠠ ᠲᠣᠭᠲᠠᠭᠠᠬᠤ ᠭᠡᠰᠡᠨ ᠭᠤᠷᠪᠠᠳᠠᠬᠢ ᠵᠦᠢᠯ ᠪᠠᠢᠯᠠ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠡᠳᠡᠭᠡᠷ ᠢ᠋ ᠪᠠᠬᠠᠳᠤᠨ ᠰᠠᠢᠰᠢᠶᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌᠄《ᠡᠨᠡ ᠰᠠᠢᠬᠠᠨ ᠳᠠᠭᠤ ᠬᠣᠭᠣᠯᠠᠢ ᠶ᠋ᠢᠨ ᠴᠠᠭᠠᠨᠠ ᠨᠢ ᠶᠠᠮᠠᠷ ᠨᠢᠭᠤᠴᠠ ᠪᠠᠢᠬᠤ ᠶᠤᠮ ᠪᠣᠯ ᠳᠠ》 ᠭᠡᠳᠡᠭ ᠠᠰᠠᠭᠤᠯᠲᠠ ᠶ᠋ᠢ ᠥᠪᠡᠷᠲᠡᠭᠡᠨ ᠲᠠᠯᠪᠢᠨ ᠪᠣᠳᠣᠨᠠ᠃ ᠭᠡᠲᠡᠯᠡ ᠰᠦᠬᠡᠪᠠᠭᠠᠲᠤᠷ᠄
— ᠣᠳᠣ ᠴᠠᠭ ᠲᠤ ᠪᠢᠳᠡᠨ ᠦ᠌ ᠲᠦᠰᠢᠭ ᠪᠣᠯᠬᠤ ᠤᠯᠤᠰ ᠭᠠᠭᠴᠠᠬᠠᠨ ᠡᠨᠡ ᠤᠯᠠᠭᠠᠨ ᠣᠷᠣᠰ ᠳᠠ ᠭᠡᠵᠦ ᠳᠠᠪᠲᠠᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ᠄
— ᠪᠣᠳᠣᠭᠤᠰᠢᠲᠠᠢ ᠯᠠ ᠬᠡᠷᠡᠭ ᠪᠠᠢᠨᠠ ᠭᠡᠯᠡ᠃
— ᠪᠣᠳᠣᠬᠤ ᠶ᠋ᠢ ᠴᠦ᠍ ᠪᠢᠳᠡ ᠪᠣᠳᠣᠭᠰᠠᠨ ᠯᠠ ᠳᠠ᠃ ᠣᠳᠣ ᠭᠠᠭᠴᠠᠬᠠᠨ ᠠᠵᠢᠯ ᠬᠡᠷᠡᠭ ᠲᠡᠭᠡᠨ ᠵᠣᠷᠢᠭᠯᠠᠨ ᠣᠷᠣᠬᠤ ᠯᠠ ᠦᠯᠡᠳᠡᠭᠡᠳ ᠪᠠᠢᠭᠠ ᠶᠤᠮ ᠭᠡᠬᠦ ᠳ᠋ᠦ᠍ᠨᠢ᠄
— ᠦᠨᠡᠬᠡᠷ ᠪᠣᠳᠣᠭᠤᠰᠢᠲᠠᠢ ᠬᠡᠷᠡᠭ ᠪᠠᠢᠨᠠ ᠰᠢᠦ ᠭᠡᠵᠦ ᠤᠯᠠᠮ ᠢ᠋ᠶ᠋ᠠᠷ ᠯᠠᠪᠰᠢᠷᠠᠭᠤᠯᠤᠨ ᠳᠠᠪᠲᠠᠪᠠ᠃ ᠲᠡᠨᠳᠡ ᠡᠴᠡ ᠬᠣᠶᠠᠭᠤᠯᠠ ᠪᠠᠨ ᠡᠷᠭᠢᠨ ᠭᠡᠳᠡᠷᠭᠦ ᠪᠤᠴᠠᠪᠠ᠃ ᠬᠦᠷᠢᠶᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠰᠠᠯᠤᠯᠴᠠᠬᠤ ᠳ᠋ᠠᠭᠠᠨ᠄ ᠨᠡᠭᠡᠷᠡᠨ ᠪᠣᠳᠣᠭᠤᠰᠢᠲᠠᠢ! ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠳᠠᠪᠲᠠᠯᠠ᠃
ᠭᠠᠭᠴᠠᠭᠠᠷ ᠤᠷᠢᠳ ᠡᠮᠦᠨᠡ ᠶᠠᠪᠤᠵᠤ ᠦᠵᠡᠭᠡ ᠦᠭᠡᠢ ᠭᠤᠳᠤᠮᠵᠢ ᠤᠷᠤᠭᠤᠳᠠᠨ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤᠨᠢ ᠨᠢᠭᠡ ᠬᠥᠮᠦᠨ ᠬᠠᠵᠠᠭᠤ ᠠ᠋ᠴᠠ ᠨᠢ᠄ ᠬᠥᠶᠢ ᠪᠠᠯᠳᠠᠨᠴᠡᠷᠢᠩ ᠠ᠋! ᠭᠡᠵᠦ ᠳᠠᠭᠤᠳᠠᠨ ᠭᠦᠶᠦᠨ ᠢᠷᠡᠪᠡ᠃ ᠲᠡᠷᠡ ᠨᠢ ᠨᠢᠮᠠᠵᠠᠪ ᠪᠠᠢᠭᠰᠠᠨ ᠪᠠᠢᠯᠠ᠃ ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌᠄
— ᠪᠢ ᠲᠦᠷᠦᠭᠦᠨ ᠴᠢᠨᠦ ᠰᠡᠯᠪᠢ ᠥᠭᠰᠥᠨ ᠶᠠᠪᠤᠵᠤ ᠪᠠᠢᠬᠤ ᠶ᠋ᠢ ᠴᠢᠨᠢ ᠬᠠᠷᠠᠭᠰᠠᠨ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠭᠡᠳ ᠠᠰᠠᠭᠤᠨᠠ᠄
— ᠦᠭᠡᠢ ᠬᠠᠵᠠᠭᠤ ᠳ᠋ᠤ᠌ ᠴᠢᠨᠢ ᠬᠡᠨ ᠶᠠᠪᠤᠪᠠ᠂ ᠰᠦᠬᠡᠪᠠᠭᠠᠲᠤᠷ ᠤᠤ?
ᠡᠨᠡ ᠠᠰᠠᠭᠤᠳᠠᠯ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍《ᠴᠢ ᠬᠡᠨ ᠪᠣᠢ?》 ᠭᠡᠳᠡᠭ ᠪᠣᠳᠣᠯ ᠲᠥᠷᠥᠭᠦᠯᠪᠡ᠃ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠡᠨᠡ ᠬᠥᠮᠦᠨ ᠦ᠌ ᠡᠮᠦᠨᠡ ᠦᠨᠡᠨ ᠨᠢᠭᠤᠷ ᠢ᠋ᠶ᠋ᠠᠨ ᠦᠵᠡᠭᠦᠯᠬᠦ ᠪᠡᠨ ᠪᠠᠢᠶᠠ ᠭᠡᠬᠦ ᠳ᠋ᠡᠭᠡᠨ ᠪᠠᠯᠳᠠᠨᠴᠡᠷᠢᠩ᠄
— ᠡᠪᠦᠭᠡᠨ ᠦ᠌ ᠴᠢᠨᠢ ᠪᠡᠶᠡ ᠮᠠᠭᠤ᠃ ᠦᠷᠭᠦᠯᠵᠢ ᠲᠣᠯᠣᠭᠠᠢ ᠡᠪᠡᠳᠳᠡᠭ ᠪᠣᠯᠤᠭᠠᠳ ᠠᠭᠠᠷ ᠲᠤ ᠭᠠᠷᠤᠭᠰᠠᠨ ᠶᠤᠮ᠃ ᠬᠠᠷᠢᠨ ᠲᠠ ᠡᠨᠳᠡ ᠶᠠᠭᠤ ᠬᠢᠵᠦ ᠶᠠᠪᠤᠨᠠ ᠳᠠ?
— ᠪᠢ ᠤᠤ? ᠳᠣᠢᠩᠬᠤᠷ ᠤ᠋ᠨ ᠳᠠ ᠯᠠᠮᠠ ᠳ᠋ᠤ᠌ ᠪᠠᠷᠠᠯᠬᠠᠨᠠ᠃
— ᠤᠤᠬᠠᠢ᠂ ᠣᠨᠴᠠ ᠬᠡᠷᠡᠭ ᠲᠡᠢ ᠤᠤ?
— ᠲᠡᠢᠮᠦ᠂ ᠮᠡᠳᠡᠵᠦ ᠪᠠᠢᠭᠠ ᠪᠢᠵᠡ ᠳᠡ᠂ ᠡᠨᠡ ᠮᠠᠭᠤ ᠰᠠᠢᠨ ᠭᠠᠮᠢᠩ ᠤ᠋ᠳ ᠢ᠋?
— ᠮᠡᠳᠡᠭᠡᠳ ᠴᠦ᠍ ᠶᠠᠭᠠᠬᠢᠬᠤ ᠶᠤᠮ ᠪᠢᠯᠡ ᠳᠠ? ᠨᠢᠮᠠᠵᠠᠪ ᠴᠢᠷᠠᠢ ᠬᠤᠪᠢᠷᠠᠭᠠᠨ ᠪᠤᠬᠢᠨᠢᠳᠤᠵᠤ᠄
— ᠨᠢᠭᠡ ᠶ᠋ᠢ ᠪᠡᠨ ᠦᠵᠡᠯᠴᠡᠬᠦ ᠦᠭᠡᠢ ᠤᠤ? ᠭᠡᠲᠡᠯᠡ ᠴᠢᠮᠠ ᠠ᠋ᠴᠠ ᠡᠬᠢᠯᠡᠨ ᠬᠠᠷᠠ ᠠᠮᠢ ᠪᠠᠨ ᠪᠣᠳᠣᠬᠤ ᠨᠢ ᠶᠠᠭᠤ ᠪᠣᠢ? ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ᠂ ᠬᠡᠵᠢᠶᠡ ᠪᠣᠯᠪᠠᠴᠤ ᠥᠩᠭᠡᠷᠡᠬᠦ ᠨᠢᠭᠡ ᠨᠠᠰᠤ᠂ ᠲᠡᠭᠦᠨ ᠢ᠋ ᠤᠯᠤᠰ ᠣᠷᠣᠨ ᠳ᠋ᠠᠭᠠᠨ ᠵᠣᠷᠢᠭᠤᠯᠬᠤ ᠦᠭᠡᠢ ᠶᠦᠮ ᠪᠣᠯ ᠶᠠᠭᠤ ᠬᠢᠨᠡ᠃
— ᠦᠭᠡᠢ ᠶᠠᠭᠠᠬᠢᠯᠠ ᠴᠦ᠍ ᠭᠡᠰᠡᠨ ᠨᠡᠮᠡᠷᠢ ᠦᠭᠡᠢ ᠪᠠᠢᠪᠠᠯ ᠶᠠᠭᠠᠬᠢᠨᠠ᠃
— ᠨᠡᠮᠡᠷᠢ ᠲᠡᠢ ᠳᠡᠭᠡᠷᠡ ᠴᠢᠨᠢ ᠪᠤᠷᠬᠠᠨ᠂ ᠳᠣᠣᠷᠠ ᠴᠢᠨᠢ ᠠᠷᠠᠳ ᠲᠦᠮᠡᠨ᠂ ᠳᠡᠷᠭᠡᠳᠡ ᠴᠢᠨᠢ ᠬᠠᠨᠢ ᠨᠥᠬᠥᠳ ᠪᠡᠯᠡ ᠪᠠᠢᠨᠠ᠃
— ᠭᠡᠯᠡ ᠴᠦ᠍ ᠨᠡᠮᠡᠷᠢ ᠦᠭᠡᠢ ᠪᠢᠵᠡ ᠳᠡ᠃
— ᠬᠠᠢ ᠡᠴᠦᠰ᠂ ᠵᠣᠷᠢᠭ ᠪᠠᠢᠪᠠᠯ ᠶᠠᠭᠤ ᠶ᠋ᠢ ᠴᠦ᠍ ᠢᠯᠠᠨᠠ᠃ ᠭᠠᠭᠴᠠᠬᠠᠨ ᠲᠡᠭᠦᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠲᠡᠨᠡᠭ ᠬᠥᠮᠦᠰ ᠭᠡᠵᠦ ᠬᠡᠯᠡᠩᠭᠦᠲᠡ ᠲᠤᠬᠠᠢᠯᠠᠪᠠᠯ ᠴᠢ ᠭᠡᠬᠦ ᠮᠡᠲᠦ ᠶ᠋ᠢᠨ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠨᠢᠭᠤᠷ ᠢ᠋ ᠰᠢᠷᠲᠡᠨ ᠰᠡᠭᠦᠯ ᠬᠠᠪᠴᠢᠨ ᠠᠶᠤᠨ ᠴᠡᠴᠡᠷᠡᠨᠡ᠃
— ᠮᠡᠳᠡᠬᠦ ᠦᠭᠡᠢ᠃
— ᠶᠠᠭᠠᠬᠢᠭᠠᠳ ᠴᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ?
— ᠶᠠᠭᠠᠬᠢᠬᠤᠪ᠂ ᠮᠡᠳᠡᠬᠦ ᠦᠭᠡᠢ ᠭᠡᠳᠡᠭ ᠪᠣᠯ ᠮᠢᠩᠭᠠᠨ ᠦᠭᠡᠨ ᠦ᠌ ᠲᠠᠭᠯᠠᠭᠠ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠪᠦᠬᠦ ᠶᠠᠪᠤᠳᠠᠯ ᠢ᠋ ᠢᠨᠢᠶᠡᠳᠦᠮ ᠲᠣᠭᠯᠠᠭᠠᠮ ᠪᠣᠯᠭᠠᠨ ᠬᠤᠪᠢᠷᠠᠭᠠᠬᠤ ᠶ᠋ᠢ ᠣᠷᠣᠯᠳᠣᠪᠠ᠃ ᠨᠢᠮᠠᠵᠠᠪ ᠦᠨᠡᠬᠡᠷ ᠭᠤᠲᠤᠷᠠᠬᠤ ᠮᠡᠲᠦ ᠬᠠᠷᠠᠭᠠ ᠪᠠᠨ ᠳᠣᠷᠣᠭᠰᠢ ᠪᠠᠭᠤᠯᠭᠠᠨ ᠰᠠᠨᠠᠭᠠ ᠠᠯᠳᠠᠭᠠᠳ᠂ ᠰᠠᠯᠬᠤ ᠶᠣᠰᠣ ᠭᠦᠢᠴᠡᠳᠬᠡᠯ ᠦᠭᠡᠢ ᠡᠷᠭᠢᠨ ᠶᠠᠪᠤᠪᠠ᠃ ᠪᠠᠯᠳᠠᠨᠴᠡᠷᠢᠩ ᠨᠢᠭᠡ ᠦᠶᠡ ᠭᠡᠮ ᠦᠭᠡᠢ ᠨᠥᠬᠥᠷ ᠦ᠋ᠨ ᠰᠡᠳᠬᠢᠯ ᠢ᠋ ᠳᠡᠮᠡᠢ ᠭᠤᠲᠤᠭᠠᠵᠤ ᠣᠷᠬᠢᠪᠠ ᠤᠤ ᠳᠠ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡᠨᠲᠡ ᠡᠢᠮᠦ ᠪᠣᠯᠭᠣᠮᠵᠢ ᠦᠭᠡᠢ ᠠᠮᠠ ᠵᠠᠳᠠᠭᠠᠢ ᠠ᠋ᠴᠠ ᠬᠣᠢᠰᠢ ᠪᠢ ᠲᠡᠭᠦᠨ ᠦ᠌ ᠡᠮᠦᠨᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠨᠢᠭᠤᠬᠤ ᠨᠢ ᠵᠥᠪ ᠰᠢᠦ ᠳᠡ ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠷᠢᠭᠤᠳᠬᠠᠪᠠ᠃ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠪᠠᠯᠳᠠᠨᠴᠡᠷᠢᠩ ᠥᠨᠥᠬᠢ ᠯᠡ ᠣᠷᠣᠨ ᠳᠡᠭᠡᠷᠡ ᠪᠡᠨ ᠭᠡᠳᠡᠷᠭᠦ ᠬᠠᠷᠠᠨ ᠬᠡᠪᠲᠡᠭᠡ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠡᠮᠦᠨᠡ《ᠪᠤᠳᠤᠭᠤᠰᠢᠲᠠᠢ ᠬᠡᠷᠡᠭ》 ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠣᠳᠣᠵᠤ ᠭᠠᠷᠪᠠ᠃ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠴᠠᠭᠠᠨ ᠪᠠᠢᠭᠰᠠᠨ ᠣᠷᠣᠰ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠦᠷᠡ ᠦᠨᠳᠦᠰᠦ ᠪᠡᠷ ᠢ᠋ᠶ᠋ᠡᠨ ᠥᠭᠡᠷᠡᠴᠢᠯᠡᠭᠳᠡᠬᠦ ᠤᠤ? ᠭᠡᠳᠡᠭ ᠳᠡᠭᠡᠷᠡ ᠰᠡᠳᠬᠢᠯ ᠨᠢ ᠣᠴᠢᠪᠠ᠃ ᠭᠡᠲᠡᠯᠡ ᠭᠤᠢᠪᠢᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠣᠷᠣᠰ ᠬᠥᠮᠦᠨ ᠣᠷᠣᠰ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ ᠲᠡᠳᠦᠢ ᠦᠭᠡᠢ᠂ ᠴᠠᠭᠠᠨ ᠪᠠᠢᠬᠤ ᠳ᠋ᠠᠭᠠᠨ ᠡᠵᠡᠯᠡᠵᠦ ᠪᠠᠷᠠᠭᠠ ᠦᠭᠡᠢ ᠪᠡᠨ ᠤᠯᠠᠭᠠᠨ ᠥᠩᠭᠡ ᠪᠡᠷ ᠪᠠᠷᠠᠬᠤ ᠭᠡᠰᠡᠨ ᠬᠡᠳᠦᠨ ᠳᠠᠪᠬᠤᠷ ᠨᠢᠭᠤᠴᠠ ᠪᠣᠳᠣᠯᠭᠠ ᠲᠠᠢ ᠪᠠᠢᠪᠠᠯ ᠶᠠᠭᠠᠬᠢᠨᠠ ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠬᠣᠶᠠᠷ ᠲᠤᠨᠢ ᠪᠦᠬᠦ ᠳᠡᠯᠡᠬᠡᠢ ᠶ᠋ᠢᠨ ᠦᠭᠡᠢᠭᠦᠦ ᠶᠠᠳᠠᠭᠤᠰ ᠪᠠ ᠺᠣᠯᠣᠨᠢᠴᠢᠯᠠᠭᠳᠠᠭᠰᠠᠨ ᠣᠷᠣᠨ ᠤ᠋ ᠠᠷᠠᠳ ᠲᠦᠮᠡᠨ ᠢ᠋ ᠰᠠᠨᠠᠯ ᠬᠦᠴᠦᠨ ᠢ᠋ᠶ᠋ᠡᠨ ᠨᠢᠭᠡᠳᠬᠡᠨ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯ ᠭᠡᠵᠦ ᠤᠷᠢᠶᠠᠯᠠᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠬᠠᠭᠠᠨᠲᠤ ᠵᠠᠰᠠᠭ ᠤ᠋ᠨ ᠮᠣᠩᠭᠣᠯ ᠤᠷᠤᠭᠤ ᠶᠠᠪᠤᠭᠤᠯᠵᠤ ᠪᠠᠢᠭᠰᠠᠨ ᠪᠦᠬᠦ ᠪᠣᠳᠣᠯᠭᠠ ᠶ᠋ᠢᠨ ᠨᠢᠭᠤᠴᠠ ᠶ᠋ᠢ ᠬᠠᠢᠷᠠ ᠨᠠᠢᠷ ᠦᠭᠡᠢ ᠢᠯᠡᠷᠬᠡᠢᠯᠡ ᠬᠣᠢᠰᠢᠳᠠ ᠪᠠᠨ ᠲᠤᠰᠠᠭᠠᠷ ᠤᠯᠤᠰ ᠭᠡᠵᠦ ᠦᠵᠡᠨᠡ ᠭᠡᠰᠡᠨ ᠲᠤᠬᠠᠢ ᠪᠣᠳᠣᠪᠠ᠃ ᠭᠡᠲᠡᠯᠡ ᠥᠩᠭᠡᠷᠡᠭᠰᠡᠨ ᠬᠠᠭᠠᠨᠲᠤ ᠵᠠᠰᠠᠭ ᠨᠢ ᠮᠥᠨ ᠯᠡ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠠᠮᠤᠷ ᠵᠢᠷᠭᠠᠯ᠂ ᠪᠠᠭᠠ ᠪᠠᠭᠤᠷᠠᠢ ᠤᠯᠤᠰ ᠣᠷᠣᠨ ᠳ᠋ᠤ᠌ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠭᠡᠳ ᠲᠡᠭᠦᠨ ᠦ᠌ ᠪᠡᠨ ᠲᠥᠯᠥᠭᠡ ᠥᠪᠡᠷ ᠦ᠋ᠨ ᠤᠯᠤᠰ ᠢ᠋ ᠪᠠᠯᠠᠷᠠᠨ ᠮᠥᠬᠥᠲᠡᠯᠡ ᠲᠡᠮᠡᠴᠡᠨᠡ ᠭᠡᠵᠦ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠨᠢ ᠰᠠᠨᠠᠭᠳᠠᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠶᠡᠷᠦ ᠡᠯᠳᠡᠪ ᠰᠠᠢᠬᠠᠨ ᠢ᠋ ᠠᠮᠠᠨ ᠳᠡᠭᠡᠷᠡ ᠪᠡᠨ ᠬᠡᠯᠡᠬᠦ ᠨᠢ ᠡᠳᠦᠭᠡ ᠴᠠᠭ ᠤ᠋ᠨ ᠶᠡᠬᠡ ᠭᠦᠷᠦᠨ ᠪᠣᠯᠭᠠᠨ ᠤ᠋ ᠬᠤᠳᠠᠯ ᠬᠠᠭᠤᠷᠮᠠᠭ ᠵᠥᠪᠬᠡᠨ ᠥᠩᠭᠡ ᠶ᠋ᠢᠨ ᠶᠠᠪᠤᠳᠠᠯ ᠰᠢᠦ ᠳᠡ ᠭᠡᠵᠦ ᠲᠣᠳᠣᠳᠠ ᠪᠣᠳᠣᠭᠳᠠᠪᠠ᠃
ᠪᠠᠯᠳᠠᠨᠴᠡᠷᠢᠩ ᠤᠯᠠᠭᠠᠨ ᠣᠷᠣᠰ ᠢ᠋ ᠪᠦᠷᠢᠮᠦᠰᠦᠨ ᠣᠢᠰᠢᠶᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠪᠠᠨ ᠡᠴᠦᠰ ᠲᠦ᠍ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠤᠯᠠᠭᠠᠨ ᠣᠷᠣᠰ ᠢ᠋ ᠲᠦᠰᠢᠭᠯᠡᠬᠦ ᠭᠡᠰᠡᠨ ᠰᠢᠢᠳᠮᠡᠭᠡᠢ ᠰᠠᠨᠠᠭᠠ᠂ ᠨᠢᠭᠡᠨᠲᠡ ᠵᠣᠷᠢᠭᠰᠠᠨ ᠠ᠋ᠴᠠ ᠪᠠᠨ ᠡᠰᠡ ᠪᠤᠴᠠᠬᠤ ᠣᠨᠴᠠᠭᠠᠢ ᠴᠢᠨᠠᠷ ᠬᠣᠶᠠᠷ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠭᠰᠡᠨ ᠦ᠌ ᠪᠡᠨ ᠬᠤᠪᠢ ᠳ᠋ᠤ᠌ ᠵᠦᠭᠡᠷ ᠪᠡᠶᠡ ᠪᠡᠨ ᠡᠷᠲᠡᠬᠡᠨ ᠵᠠᠢᠯᠠᠭᠤᠯᠬᠤ ᠶ᠋ᠢ ᠴᠢᠬᠤᠯᠠᠴᠢᠯᠠᠪᠠ᠃ ᠲᠡᠷᠡ ᠪᠠᠢᠲᠤᠭᠠᠢ ᠪᠠᠯᠳᠠᠨᠴᠡᠷᠢᠩ ᠣᠳᠣ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠡᠮᠦᠨᠡ ᠭᠡᠮᠲᠡᠨ ᠡᠲᠡᠭᠡᠳ ᠪᠣᠯᠤᠭᠰᠠᠨ ᠰᠢᠦ ᠨᠢᠭᠤᠷ ᠤᠴᠠᠷᠠᠬᠤ ᠠ᠋ᠴᠠ ᠪᠠᠨ ᠬᠠᠯᠠᠰᠢᠷᠠᠬᠤ ᠪᠣᠯᠤᠭᠰᠠᠨ ᠤᠴᠢᠷ ᠡᠳᠦᠷ ᠦ᠋ᠨ ᠴᠠᠭ ᠢ᠋ᠶ᠋ᠠᠷ ᠭᠠᠳᠠᠭᠰᠢ ᠭᠠᠷᠬᠤ ᠪᠠᠨ ᠪᠣᠯᠢᠵᠤ ᠬᠣᠶᠠᠳᠠᠬᠢ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠢ ᠦᠳᠡᠰᠢ ᠶ᠋ᠢᠨ ᠬᠠᠷᠠᠩᠭᠤᠢ ᠪᠠᠷ ᠭᠡᠷ ᠡᠴᠡ ᠪᠡᠨ ᠭᠠᠷᠪᠠ᠃ ᠢᠩᠭᠢᠬᠦ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠨ ᠰᠠᠨᠠᠬᠤ ᠶᠠᠭᠤ ᠴᠦ᠍ ᠦᠭᠡᠢ ᠵᠥᠪᠬᠡᠨ ᠠᠭᠠᠷ ᠠᠮᠢᠰᠬᠤᠯᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠪᠠᠢᠯᠠ᠃ ᠨᠢᠭᠡ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠᠨ ᠤ᠋ ᠡᠮᠦᠨᠡ ᠪᠥᠮᠪᠦᠭᠡᠨ ᠳᠤᠭᠤᠢᠲᠤ ᠰᠡᠦᠬᠡ ᠲᠡᠷᠭᠡ ᠵᠣᠭᠰᠣᠵᠤ ᠪᠠᠢᠭᠠ ᠳᠡᠭᠡᠷᠡ ᠲᠤᠯᠤᠨ ᠣᠴᠢᠭᠰᠠᠨ ᠢ᠋ᠶ᠋ᠠᠨ ᠬᠠᠮᠢᠭᠠ ᠶᠠᠪᠤᠭᠠ ᠪᠠᠨ ᠮᠡᠳᠡᠪᠡ᠃ ᠲᠣᠮᠣ ᠨᠡᠬᠡᠢ ᠳᠡᠪᠡᠯ ᠲᠡᠢ ᠡᠪᠦᠭᠡᠨ ᠵᠢᠯᠣᠭᠣᠴᠢ ᠰᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠬᠠᠨᠴᠤᠢ ᠳ᠋ᠠᠭᠠᠨ ᠭᠠᠷ ᠵᠥᠷᠢᠭᠦᠯᠦᠨ᠂ ᠪᠡᠶᠡ ᠬᠣᠷᠢᠶᠠᠨ ᠰᠠᠭᠤᠭᠰᠠᠨ ᠢ᠋ ᠦᠵᠡᠬᠦ ᠡᠨᠳᠡ ᠢᠷᠡᠭᠰᠡᠭᠡᠷ ᠨᠡᠯᠢᠶᠡᠳ ᠤᠳᠠᠭᠠᠨ ᠪᠣᠯᠪᠠ ᠤᠤ ᠭᠡᠯᠲᠡᠢ ᠠᠵᠢ᠃ ᠬᠠᠵᠠᠭᠤ ᠪᠠᠷ ᠨᠢ ᠠᠭᠠᠵᠢᠭᠤᠬᠠᠨ ᠢ᠋ᠶ᠋ᠠᠷ ᠭᠢᠰᠬᠢᠯᠡᠨ ᠭᠠᠷᠬᠤ ᠳ᠋ᠤ᠌ ᠱᠤᠳᠤᠷᠭᠤ ᠬᠥᠭᠵᠢᠮ ᠦ᠋ᠨ ᠠᠪᠢᠶᠠ ᠲᠡᠳᠡᠨ ᠴᠤᠤᠷᠢᠶᠠᠲᠤᠨᠠ᠃ ᠴᠠᠭᠠᠰᠢ ᠬᠣᠯᠠᠳᠠᠨ ᠶᠠᠪᠤᠬᠤ ᠳ᠋ᠤ᠌ ᠬᠥᠭᠵᠢᠮ ᠦ᠋ᠨ ᠠᠪᠢᠶᠠ ᠪᠦᠳᠡᠭᠢᠷᠡᠬᠦ ᠪᠥᠭᠡᠳ ᠪᠠᠯᠳᠠᠨᠴᠡᠷᠢᠩ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠡᠷᠭᠢᠪᠡ᠃
ᠬᠠᠭᠠᠯᠭᠠᠨ ᠤ᠋ ᠵᠦᠭ ᠠᠠᠮᠢᠰᠬᠣᠬᠠ ᠪᠠᠨ ᠳᠠᠷᠤᠨ ᠣᠢᠷᠠᠲᠤᠬᠤ ᠳ᠋ᠤ᠌ ᠬᠥᠭᠵᠢᠮ ᠦ᠋ᠨ ᠠᠪᠢᠶᠠ ᠴᠢᠩᠭᠠᠷᠠᠭᠰᠠᠨ ᠲᠡᠳᠦᠢ ᠦᠭᠡᠢ ᠥᠨᠥᠬᠢ ᠦᠵᠡᠰᠬᠦᠯᠡᠩᠲᠦ ᠡᠮᠡᠭᠲᠡᠢ ᠶ᠋ᠢᠨ ᠡᠬᠢᠯᠡᠨ ᠳᠠᠭᠤᠯᠠᠬᠤ ᠰᠣᠨᠣᠰᠤᠭᠳᠠᠪᠠ᠃ ᠡᠨᠡ ᠤᠳᠠᠭᠠ ᠡᠮᠡᠭᠲᠡᠢ᠂ ᠬᠢᠲᠠᠳ ᠢ᠋ᠶ᠋ᠠᠷ ᠪᠢᠰᠢ᠂ ᠮᠣᠩᠭᠣᠯ ᠢ᠋ᠶ᠋ᠠᠷ᠄
ᠭᠠᠳᠠᠭᠠᠳᠤ ᠮᠣᠩᠭᠣᠯ ᠲᠥᠷᠥ ᠶ᠋ᠢᠨ ᠦᠨᠡᠨ ᠴᠠᠭᠠᠨ ᠪᠣᠭᠣᠯ ᠢ᠋
ᠭᠠᠭᠴᠠ ᠪᠡᠶᠡ ᠶ᠋ᠢᠨ ᠥᠮᠴᠢ ᠮᠡᠲᠦ ᠡᠨᠳᠡᠭᠦᠷᠡᠯ ᠪᠣᠯᠭᠠᠭᠠᠳ
ᠭᠠᠰᠠᠯᠭᠠᠬᠤ᠂ ᠪᠦᠷᠢᠯᠭᠡᠬᠦ᠂ ᠮᠥᠯᠵᠢᠬᠦ ᠳ᠋ᠦ᠍ ᠰᠢᠨᠤᠭᠴᠢ
ᠭᠠᠮᠰᠢᠭ ᠣᠨᠣᠯ ᠲᠩᠷᠢ ᠳ᠋ᠦ᠍ ᠴᠠᠭᠠᠵᠠ ᠲᠠᠢ ᠪᠤᠰᠤ ᠤᠤ᠂
ᠡᠭᠡᠯ ᠪᠣᠭᠣᠯ ᠬᠦᠨᠳᠦᠯᠡᠬᠦ ᠶ᠋ᠢᠨ ᠶᠣᠰᠣ ᠶᠡᠬᠡ ᠪᠠᠢᠲᠠᠯᠠ
ᠡᠷᠬᠢᠮ ᠶᠡᠬᠡᠰ ᠠᠰᠠᠷᠠᠬᠤ ᠶ᠋ᠢᠨ ᠵᠢᠷᠤᠮ ᠪᠠᠭᠠ ᠭᠤᠲᠤᠮᠰᠢᠭ
ᠡᠵᠡᠨ ᠲᠥᠷᠥ ᠶ᠋ᠢᠨ ᠬᠡᠰᠢᠭ ᠢ᠋ᠶ᠋ᠡᠷ ᠳᠡᠯᠭᠡᠷᠡᠵᠦ ᠪᠠᠢᠲᠠᠯᠠ
ᠡᠭᠦᠷᠢᠳᠡ ᠮᠥᠯᠵᠢᠬᠦ ᠶ᠋ᠢ ᠬᠢᠴᠢᠶᠡᠭᠴᠢ ᠭᠤᠲᠤᠮᠰᠢᠭ᠃ ᠭᠡᠬᠦ ᠮᠡᠲᠦ ᠶ᠋ᠢᠨ ᠦᠭᠡᠰ ᠴᠢᠬᠢᠨ ᠳ᠋ᠦ᠍ᠨᠢ ᠪᠠᠷᠢᠭᠳᠠᠨᠠ᠃ ᠦᠨᠡᠨ ᠳ᠋ᠡᠭᠡᠨ ᠪᠠᠯᠳᠠᠨᠴᠡᠷᠢᠩ ᠡᠨᠡ ᠡᠮᠡᠭᠲᠡᠢ ᠶ᠋ᠢ ᠬᠠᠢᠷᠠ ᠳᠤᠷᠠᠯᠠᠯ ᠤ᠋ᠨ ᠡᠭᠦᠳᠡᠨ ᠡᠴᠡ ᠰᠣᠨᠢᠷᠬᠠᠬᠤ ᠤᠴᠢᠷ ᠡᠨᠳᠡ ᠡᠷᠭᠢᠯᠳᠦᠵᠦ ᠪᠠᠢᠭᠠ ᠪᠠᠨ ᠪᠤᠰᠤᠳ ᠲᠤ ᠮᠡᠳᠡᠭᠳᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠬᠦ ᠠᠵᠢ᠃ ᠲᠡᠷᠭᠡᠨ ᠦ᠌ ᠬᠠᠵᠠᠭᠤ ᠪᠠᠷ ᠬᠣᠶᠠᠷ ᠤᠳᠠᠭᠠ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠬᠢᠨ ᠶᠠᠪᠤᠬᠤ ᠳ᠋ᠤ᠌ ᠪᠡᠷᠬᠡ ᠲᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠲᠡᠷᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠤᠷᠲᠤᠭᠠᠰᠢ ᠪᠠᠨ ᠭᠤᠴᠢᠭᠠᠳ ᠠᠯᠬᠤᠮ ᠳ᠋ᠤ᠌ ᠨᠠᠭᠠᠰᠢ ᠴᠠᠭᠠᠰᠢ ᠬᠣᠯᠬᠢᠨᠠ᠃ ᠭᠡᠨᠡᠳᠲᠡ ᠡᠮᠡᠭᠲᠡᠢ ᠳᠠᠭᠤᠯᠠᠬᠤ ᠪᠠᠨ ᠪᠤᠯᠢᠨ᠂ ᠠᠪᠢᠶᠠ ᠲᠠᠰᠤᠷᠠᠬᠤ ᠨᠢ ᠬᠠᠷᠠᠮᠰᠠᠯᠲᠠᠢ ᠰᠠᠨᠠᠭᠳᠠᠨᠠ᠃ ᠭᠡᠷ ᠦ᠋ᠨ ᠬᠠᠭᠠᠯᠭᠠ ᠪᠠᠷ ᠨᠢᠭᠡᠨᠲᠡ ᠬᠥᠮᠦᠨ ᠭᠠᠷᠬᠤ ᠰᠣᠨᠣᠰᠤᠭᠳᠠᠬᠤ ᠳ᠋ᠤ᠌ ᠰᠡᠳᠬᠢᠯ ᠲᠦᠭᠰᠢᠨᠡ᠃ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠬᠣᠶᠠᠷ ᠬᠥᠮᠦᠨ ᠴᠤᠪᠤᠷᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠦ᠌ ᠨᠢᠭᠡ ᠨᠢ ᠵᠠᠮᠢᠶᠠᠨ᠂ ᠨᠥᠭᠦᠭᠡ ᠨᠢ ᠦᠵᠡᠰᠬᠦᠯᠡᠩᠲᠦ ᠡᠮᠡᠭᠲᠡᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠠᠢᠯᠠ᠃ ᠲᠡᠳᠡᠨ ᠢ᠋ ᠬᠠᠰᠢᠶᠠᠨ ᠤ᠋ ᠬᠠᠷᠠᠩᠭᠤᠢ ᠰᠡᠭᠦᠳᠡᠷ ᠲᠦ᠍ ᠪᠡᠶᠡ ᠬᠣᠷᠣᠭᠳᠠᠭᠤᠯᠤᠨ ᠠᠵᠢᠬᠤ ᠳ᠋ᠤ᠌ ᠵᠢᠷᠦᠬᠡ ᠪᠦᠷ ᠬᠦᠴᠦᠲᠡᠢ ᠴᠣᠬᠢᠯᠠᠨᠠ᠃ ᠲᠡᠷᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠬᠣᠶᠠᠭᠤᠯᠠ ᠪᠠᠨ ᠵᠣᠭᠰᠣᠨ ᠬᠡᠳᠦᠨ ᠦᠭᠡ ᠬᠡᠯᠡᠯᠴᠡᠬᠦ ᠨᠢ ᠵᠠᠮᠢᠶᠠᠨ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠳᠡᠭᠡᠷᠡ ᠰᠤᠷᠭᠠᠮᠵᠢ ᠥᠭᠬᠦ ᠪᠣᠯᠤᠯᠲᠠᠢ᠃
— ᠵᠠ ᠶᠠᠪᠤ ᠳᠠ! ᠭᠡᠬᠦ ᠳ᠋ᠦ᠍ ᠡᠮᠡᠭᠲᠡᠢ᠄《ᠵᠠ》 ᠭᠡᠳ ᠡᠪᠦᠳᠦᠭ ᠳᠠᠷᠤᠨ ᠮᠡᠬᠦᠰᠬᠢᠭᠡᠳ ᠲᠡᠷᠭᠡᠨ ᠳ᠋ᠡᠭᠡᠨ ᠣᠷᠣᠪᠠ᠃
ᠵᠠᠮᠢᠶᠠᠨ ᠤ᠋ ᠪᠤᠴᠠᠨ ᠣᠷᠣᠬᠤ ᠳ᠋ᠤ᠌ ᠲᠡᠷᠭᠡ ᠠᠭᠠᠵᠢᠭᠤᠬᠠᠨ ᠬᠥᠳᠡᠯᠪᠡ᠃ ᠪᠠᠯᠳᠠᠨᠴᠡᠷᠢᠩ ᠬᠣᠢᠨᠠ ᠠ᠋ᠴᠠ ᠨᠢ ᠥᠪᠡᠷ ᠦ᠋ᠨ ᠮᠠᠲᠠᠯ ᠦᠭᠡᠢ ᠳᠠᠭᠠᠭᠰᠠᠨ ᠠᠵᠢ᠃ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠭᠦᠢᠴᠡᠨ ᠠᠷᠤ ᠳ᠋ᠤᠨᠢ ᠢᠷᠡᠭᠰᠡᠨ ᠪᠣᠯᠪᠠᠴᠤ᠂ ᠵᠡᠷᠭᠡᠴᠡᠨ ᠣᠴᠢᠬᠤ ᠠ᠋ᠴᠠ ᠪᠠᠨ ᠬᠠᠯᠠᠰᠢᠷᠠᠨᠠ᠃ ᠡᠮᠡᠭᠲᠡᠢ ᠶ᠋ᠢᠨ ᠭᠤᠸᠠ ᠰᠠᠢᠬᠠᠨ ᠴᠢᠷᠠᠢ᠂ ᠣᠶᠤᠨ ᠪᠢᠯᠢᠭ ᠲᠡᠭᠦᠯᠳᠡᠷ ᠮᠠᠩᠨᠠᠢ᠂ ᠤᠷᠠᠨ ᠲᠤᠩᠭᠠᠯᠠᠭ ᠬᠣᠭᠣᠯᠠᠢ᠂ ᠱᠤᠳᠤᠷᠭᠤ ᠴᠣᠬᠢᠳᠠᠭ ᠰᠠᠢᠬᠠᠨ ᠭᠠᠷ ᠲᠡᠷᠡ ᠪᠦᠷᠢ ᠪᠡᠷ ᠢ᠋ᠶ᠋ᠡᠨ ᠰᠡᠳᠬᠢᠯ ᠳ᠋ᠦ᠍ ᠲᠣᠰᠣᠨ ᠪᠣᠳᠣᠭᠳᠠᠵᠤ᠂ ᠳᠡᠷᠭᠡᠳᠡ ᠨᠢ ᠨᠢᠭᠡ ᠲᠠᠪᠠᠲᠠᠢ ᠰᠠᠭᠤᠨ ᠠᠵᠢᠬᠤ ᠬᠦᠰᠡᠯ ᠣᠷᠭᠢᠯᠤᠨᠠ᠃
ᠵᠢᠯᠣᠭᠣᠴᠢ ᠪᠠᠷᠭᠢᠯ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ《ᠴᠤᠤ》 ᠭᠡᠵᠦ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠭᠦᠨ ᠱᠠᠪᠬᠢᠯᠭᠡᠪᠡ᠃ ᠮᠣᠷᠢ ᠨᠢ ᠣᠷᠣᠭᠰᠢ ᠵᠢᠳᠬᠦᠨ ᠱᠣᠭᠰᠢᠵᠤ ᠲᠡᠷᠭᠡᠨ ᠦ᠌ ᠪᠥᠮᠪᠦᠭᠡᠨ ᠳᠤᠭᠤᠢ ᠨᠤᠭᠤᠳ ᠤ᠋ᠨ ᠡᠷᠭᠢᠯᠲᠡ ᠬᠤᠷᠳᠤᠰᠪᠠ᠃ ᠠᠷᠤ ᠳ᠋ᠤᠨᠢ ᠪᠠᠯᠳᠠᠨᠴᠡᠷᠢᠩ ᠬᠣᠴᠣᠷᠤᠯᠠ᠃ ᠮᠣᠷᠢᠨ ᠲᠡᠷᠭᠡ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠪᠠᠷᠠ ᠦᠭᠡᠢ ᠪᠣᠯᠵᠤ᠂ ᠨᠢᠭᠡ ᠦᠶᠡ ᠵᠥᠪᠬᠡᠨ ᠮᠣᠷᠢᠨ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠠᠰᠠ ᠲᠠᠰᠤᠷᠠᠬᠤ ᠨᠢ ᠠᠶᠠ ᠦᠭᠡᠢ᠃ ᠪᠦᠬᠦ ᠤᠬᠠᠭᠠᠨ ᠰᠠᠨᠠᠭᠠᠨ ᠤ᠋ ᠬᠠᠭᠠᠰ ᠢ᠋ ᠠᠪᠤᠨ ᠣᠳᠬᠤ ᠰᠢᠭ᠋ ᠪᠣᠯᠤᠨᠠ᠃ ᠲᠡᠨᠳᠡ ᠡᠴᠡ ᠬᠠᠰᠢᠶᠠᠨ ᠤ᠋ ᠪᠠᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠢᠷᠡᠬᠦ ᠳ᠋ᠦ᠍ ᠪᠠᠰᠠ ᠯᠠ ᠵᠢᠭᠠᠬᠠᠨ ᠭᠠᠳᠠᠭᠤᠷ ᠶᠠᠪᠤᠭᠤᠰᠢᠲᠠᠢ ᠪᠣᠳᠣᠭᠳᠠᠨᠠ᠃ ᠢᠩᠭᠢᠵᠦ ᠬᠣᠯᠬᠢᠬᠤ ᠨᠢ ᠪᠠᠰᠠ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠪᠣᠢ ᠭᠡᠪᠡᠯ ᠰᠠᠶᠢ ᠶ᠋ᠢᠨ ᠡᠮᠡᠭᠲᠡᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠲᠡᠮᠡᠦᠯᠦᠭᠰᠡᠨ ᠰᠡᠳᠬᠢᠯ ᠪᠠᠢᠯᠠ᠃ ᠳᠡᠭᠡᠭᠰᠢ ᠬᠠᠷᠠᠬᠤ ᠳ᠋ᠤ᠌ ᠦᠳᠡᠰᠢ ᠶ᠋ᠢᠨ ᠬᠢᠯᠠᠭᠠᠨ(ᠪᠢᠮᠪᠠ ᠭᠠᠷᠠᠭ) ᠣᠷᠣᠢ ᠳᠡᠭᠡᠷᠡ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠪᠠᠨ ᠣᠯᠠᠨ ᠣᠳᠣᠳ ᠠ᠋ᠴᠠ ᠣᠨᠴᠠᠭᠠᠢ ᠭᠡᠭᠡ ᠭᠡᠷᠡᠯᠲᠡᠢ ᠪᠡᠷ ᠨᠢᠳᠦᠨ ᠳ᠋ᠦ᠍ ᠲᠤᠰᠬᠤ ᠨᠢ ᠥᠨᠥᠬᠢ ᠦᠵᠡᠰᠬᠦᠯᠡᠩᠲᠦ ᠡᠮᠡᠭᠲᠡᠢ ᠲᠦᠷᠭᠡᠨ ᠠᠭᠤᠯᠵᠠᠨ ᠲᠠᠨᠢᠯᠴᠠᠬᠤ ᠭᠡᠵᠦ ᠶᠠᠭᠠᠷᠠᠭᠤᠯᠤᠭᠠᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃
ᠶᠡᠷᠦ ᠪᠠᠯᠳᠠᠨᠴᠡᠷᠢᠩ ᠡᠨᠡ ᠰᠥᠨᠢ ᠶ᠋ᠢᠨ᠂ ᠡᠨᠡ ᠮᠢᠨᠦᠬᠢ ᠡᠴᠡ ᠡᠬᠢᠯᠡᠨ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢ ᠤᠯᠠᠮ ᠬᠦᠴᠦᠲᠡᠢ ᠬᠦᠰᠡᠨ ᠮᠥᠷᠥᠭᠡᠳᠬᠦ ᠪᠣᠯᠤᠯᠠ᠃ ᠤᠯᠤᠰ ᠲᠥᠷᠥ ᠶ᠋ᠢᠨ ᠲᠤᠬᠠᠢ ᠭᠡᠪᠡᠯ《ᠲᠥᠷᠥ ᠶ᠋ᠢᠨ ᠲᠥᠯᠥᠭᠡ ᠣᠭᠣᠲᠣᠨᠠ ᠪᠣᠭᠣᠵᠤ ᠦᠬᠦᠨᠡ》 ᠭᠡᠭᠴᠢ ᠪᠡᠷ ᠮᠢᠨᠦ ᠡᠯᠳᠡᠪ ᠢ᠋ ᠪᠣᠳᠣᠨ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠣᠪᠠᠭᠠᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠢᠯᠡ? ᠭᠡᠵᠦ ᠥᠪᠡᠷᠲᠡᠭᠡᠨ ᠠᠰᠠᠭᠤᠳᠠᠯ ᠲᠠᠯᠪᠢᠨᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠪᠦᠷ ᠲᠡᠷᠡ ᠲᠤᠬᠠᠢ ᠣᠭᠲᠣ ᠶ᠋ᠢᠨ ᠮᠡᠳᠡᠳᠡᠭ ᠦᠭᠡᠢ ᠬᠥᠮᠦᠨ ᠪᠣᠯᠬᠤ ᠴᠤ᠌ ᠭᠡᠵᠦ ᠡᠷᠡᠮᠡᠯᠵᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ