ᠡᠷᠡ ᠡᠮᠡ ᠶᠢᠨ ᠶᠣᠰᠣᠨ – ᠳ ᠂ ᠪᠤᠯᠤᠳᠴᠡᠷᠢᠩ <ᠬᠣᠶᠠᠳᠤᠭᠠᠷ ᠪᠦᠯᠦᠭ>– ᠬᠣᠷᠸᠠ ᠶᠢᠨ ᠡᠷᠢᠶᠡᠨ ᠪᠠᠷᠠᠭᠠᠨ– 1᠂ ᠬᠣᠷᠮᠣᠢ ᠶᠢᠨ ᠰᠠᠯᠬᠢ Эр эмийн ёсон – Д᠂ Болдцэрэн <2-р бүлэг>– Хорвоогийн эрээн бараан - 1᠂хормойн салхи
135<ᠬᠣᠶᠠᠳᠤᠭᠠᠷ ᠪᠦᠯᠦᠭ>– ᠬᠣᠷᠸᠠ ᠶᠢᠨ ᠡᠷᠢᠶᠡᠨ ᠪᠠᠷᠠᠭᠠᠨ
ᠨᠢᠭᠡ᠂ ᠬᠣᠷᠮᠣᠢ ᠶᠢᠨ ᠰᠠᠯᠬᠢ
᠁ ᠪᠢᠳᠡ ᠬᠣᠶᠠᠷ ᠨᠠᠢ᠍ᠮᠠᠳᠤᠭᠠᠷ ᠠᠩᠭᠢ ᠠ᠋ᠴᠠ ᠪᠠᠨ ᠦᠶᠡᠷᠬᠡᠵᠦ ᠠᠷᠪᠠᠳᠤᠭᠠᠷ ᠠᠩᠭᠢ ᠲᠡᠭᠦᠰᠦᠭᠡᠳ ᠤᠳᠠᠯ ᠦᠭᠡᠢ ᠵᠢᠷᠮᠦᠰᠦᠨ ᠪᠣᠯᠤᠭᠠᠳ ᠰᠠᠭᠤᠴᠢᠬᠠᠭᠰᠠᠨ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠬᠣᠷᠢᠨ ᠵᠢᠯ ᠥᠩᠭᠡᠷᠡᠯᠡ᠃ ᠲᠠᠪᠤᠨ ᠬᠡᠦᠬᠡᠳ ᠦ᠋ᠨ ᠡᠴᠢᠭᠡ ᠡᠬᠡ ᠪᠣᠯᠤᠯᠠ᠃ ᠬᠡᠦᠬᠡᠳ ᠦ᠋ᠳ ᠮᠢᠨᠢ ᠥᠰᠴᠦ ᠥᠨᠳᠡᠢᠯᠡ᠃ ᠨᠢᠭᠡ ᠭᠡᠷ ᠲᠦ᠍ ᠣᠷᠣᠭᠰᠠᠨ ᠡᠬᠢᠨ ᠦ᠌ ᠬᠡᠳᠦᠨ ᠵᠢᠯ ᠨᠥᠬᠥᠷ ᠮᠢᠨᠢ ᠬᠠᠯᠠᠮᠵᠢᠲᠠᠢ ᠰᠠᠢᠬᠠᠨ ᠪᠠᠢᠯᠠ᠃ ᠲᠡᠭᠡᠭᠡᠳ ᠬᠣᠶᠠᠷ ᠬᠡᠦᠬᠡᠳ ᠲᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠠᠵᠢᠯ ᠠ᠋ᠴᠠ ᠪᠠᠨ ᠣᠷᠣᠢᠲᠠᠵᠤ ᠢᠷᠡᠳᠡᠭ ᠪᠣᠯᠤᠭᠰᠠᠨ᠃ ᠠᠩᠬᠠᠨ ᠳ᠋ᠠᠭᠠᠨ ᠦᠨᠡᠬᠡᠷ ᠠᠵᠢᠯ ᠶᠡᠬᠡᠲᠡᠢ ᠪᠠᠢᠭᠰᠠᠨ ᠪᠠᠢᠬᠠ ᠭᠡᠵᠦ ᠦᠨᠡᠮᠰᠢᠳᠡᠭ ᠪᠠᠢᠪᠠ᠃ ᠭᠡᠲᠡᠯᠡ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠣᠷᠣᠢᠲᠠᠬᠤ ᠶ᠋ᠢ ᠪᠤᠤ ᠬᠡᠯᠡ ᠬᠣᠨᠣᠭᠤᠲᠠ ᠥᠨᠵᠢᠭᠦᠲᠡ ᠪᠡᠷ ᠠᠯᠠᠭᠠ ᠪᠣᠯᠴᠢᠬᠠᠳᠠᠭ ᠪᠣᠯᠤᠯᠠ᠃ ᠰᠠᠢᠬᠠᠨ ᠬᠣᠭᠣᠯᠠ᠂ ᠴᠠᠢ ᠬᠢᠴᠢᠬᠡᠭᠡᠳ ᠨᠢᠳᠦ ᠪᠡᠨ ᠰᠢᠷᠭᠢᠲᠡᠯᠡ ᠬᠦᠯᠢᠶᠡᠳᠡᠭ᠂ ᠬᠠᠷᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠢᠷᠡᠬᠦ ᠦᠭᠡᠢ᠃ ᠥᠷᠯᠥᠭᠡ ᠯᠡ ᠣᠷᠣᠵᠤ ᠢᠷᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ ᠭᠣᠣᠯᠳᠠᠭᠤ ᠠᠷᠢᠬᠢ ᠦᠨᠦᠷᠳᠡᠭᠦᠯᠵᠦ ᠣᠷᠣᠵᠤ ᠢᠷᠡᠨᠡ᠃ ᠠᠰᠠᠭᠤᠬᠤ ᠪᠠᠷ ᠡᠷᠡᠴᠦᠦᠯ ᠲᠡᠢ ᠶᠠᠷᠢᠵᠤ ᠰᠠᠭᠤᠭᠠᠳ ᠢᠷᠡᠯᠡ ᠭᠡᠬᠦ ᠶᠦᠮ ᠤᠤ ᠡᠰᠡᠬᠦᠯᠡ ᠠᠵᠢᠯ ᠶᠡᠬᠡᠲᠡᠢ ᠪᠠᠢᠯᠠ ᠭᠡᠳᠡᠭ᠃ ᠣᠷᠣᠢ ᠡᠷᠲᠡ ᠠᠵᠢᠯ ᠠ᠋ᠴᠠ ᠪᠠᠨ ᠢᠷᠡᠬᠦ ᠪᠡᠷ ᠭᠡᠷ ᠲᠡᠭᠡᠨ ᠲᠣᠭᠲᠠᠬᠤ ᠦᠭᠡᠢ᠂ ᠭᠡᠨᠡᠳᠲᠡ ᠠᠵᠢᠯ ᠭᠠᠷᠤᠯᠠ ᠭᠡᠳ ᠶᠠᠪᠤᠴᠢᠬᠠᠨᠠ᠃ ᠠᠵᠢᠯ ᠤᠷᠤᠭᠤ ᠨᠢ ᠤᠲᠠᠰᠤᠳᠠᠬᠤ ᠪᠠᠷ ᠪᠠᠢᠬᠤ ᠦᠭᠡᠢ᠃ ᠰᠥᠨᠢ ᠶ᠋ᠢᠨ ᠭᠡᠢᠴᠢᠨ ᠠᠶᠠᠲᠠᠢ ᠰᠥᠨᠢ ᠳᠤᠮᠳᠠ ᠯᠠ ᠣᠷᠣᠵᠤ ᠢᠷᠡᠨᠡ᠃ ᠬᠡᠳᠦᠨ ᠬᠡᠦᠬᠡᠳ᠂ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠪᠣᠳᠣᠭᠠᠳ ᠠᠯᠢ ᠪᠣᠯᠬᠤ ᠪᠠᠷ ᠰᠠᠢᠬᠠᠨ ᠪᠠᠢᠶᠠ ᠭᠡᠵᠦ ᠤᠴᠢᠷᠯᠠᠭᠠᠳ ᠶᠠᠷᠢᠬᠤ ᠭᠡᠬᠦ ᠪᠡᠷ ᠠᠭᠤᠷᠯᠠᠳᠠᠭ᠃ ᠬᠥᠮᠦᠨ ᠵᠥᠪᠯᠡᠯᠭᠡ ᠪᠡᠨ ᠶᠠᠷᠢᠭᠠᠳ ᠪᠠᠢᠬᠤ ᠳ᠋ᠤ᠌ ᠬᠡᠨᠡᠭ ᠴᠦ᠍ ᠦᠭᠡᠢ ᠵᠢᠷᠤᠭᠲᠤ ᠦᠵᠡᠭᠡᠳ ᠰᠠᠭᠤᠭᠠᠳ ᠪᠠᠢᠨᠠ᠃ ᠭᠠᠳᠠᠭᠠᠳᠤ ᠳ᠋ᠤ᠌ ᠣᠯᠠᠨ ᠵᠢᠯ ᠪᠠᠢᠭᠰᠠᠨ ᠪᠣᠯᠬᠣᠷ ᠢᠩᠭᠢᠴᠢᠬᠡᠳᠡᠭ ᠶᠦᠮ ᠪᠣᠯᠪᠠᠤ ᠴᠦ᠍ ᠭᠡᠵᠦ ᠪᠣᠳᠣᠬᠤ ᠶᠤᠮ᠃ ᠬᠥᠮᠦᠨ ᠴᠥᠬᠥᠷᠡᠳᠡᠭ ᠶᠦᠮ ᠪᠠᠢᠨᠠ᠃ ᠪᠦᠷ ᠴᠥᠬᠥᠷᠡᠵᠦ ᠭᠦᠢᠴᠡᠯᠡ᠃ ᠰᠡᠳᠬᠢᠯ ᠰᠠᠨᠠᠭᠠ ᠬᠢᠮᠤᠷᠠᠵᠤ᠂ ᠤᠨᠲᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠦᠷᠭᠦᠯᠵᠢ ᠯᠡ ᠤᠬᠢᠯᠠᠳᠠᠭ ᠪᠣᠯᠤᠭᠰᠠᠨ᠃ ᠵᠢᠭᠠᠬᠠᠨ ᠤᠬᠢᠯᠠᠴᠢᠬᠠᠬᠤ ᠪᠠᠷ ᠳᠣᠲᠣᠷᠠ ᠣᠪᠣᠭᠠ ᠣᠩᠭᠣᠢᠨᠠ᠃ ᠴᠠᠭᠠᠨᠠ ᠨᠢ ᠶᠠᠮᠠᠷ ᠬᠡᠦᠬᠡᠨ ᠪᠠᠢᠭᠠ ᠪᠣᠯ᠂ ᠲᠡᠭᠦᠨ ᠢ᠋ ᠪᠡᠨ ᠶᠠᠭᠠᠬᠢᠵᠤ ᠲᠡᠪᠡᠷᠢᠵᠦ ᠦᠨᠦᠰᠴᠦ ᠪᠠᠢᠳᠠᠭ ᠪᠣᠯ ᠭᠡᠬᠦ ᠪᠡᠷ ᠳᠣᠲᠣᠷᠠ ᠳᠠᠪᠴᠢᠳᠠᠨ ᠪᠠᠢᠵᠤ ᠰᠠᠭᠤᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠳᠠᠭ ᠢ᠋ ᠶᠠᠮᠠᠷ ᠬᠡᠴᠡᠭᠦᠦ ᠭᠡᠵᠦ ᠰᠠᠨᠠᠨᠠ᠃ ᠰᠡᠭᠦᠯ ᠦ᠋ᠨ ᠭᠠᠭᠴᠠ ᠬᠣᠶᠠᠷᠬᠠᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠲᠣᠯᠣᠭᠠᠢ ᠲᠠᠢ ᠦᠰᠦ ᠮᠢᠨᠢ ᠪᠤᠭᠤᠷᠤᠯᠳᠠᠯᠠ᠃ ᠬᠣᠨᠣᠭᠤᠲᠠ ᠥᠨᠵᠢᠭᠦᠲᠡ ᠪᠡᠷ ᠭᠡᠷ ᠲᠡᠭᠡᠨ ᠢᠷᠡᠬᠦ ᠦᠭᠡᠢ᠂ ᠠᠯᠠᠭᠠ ᠪᠣᠯᠴᠢᠬᠠᠳᠠᠭ ᠢ᠋ ᠠᠯᠪᠠᠨ ᠭᠠᠵᠠᠷ ᠨᠢ ᠬᠡᠯᠡᠭᠰᠡᠨ ᠡᠴᠡ ᠬᠣᠢᠰᠢ《ᠴᠢᠮᠠ ᠳ᠋ᠤ᠌ ᠬᠡᠵᠢᠶᠡ ᠴᠦ᠍ ᠰᠠᠢᠨ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠴᠢ ᠨᠠᠮᠠᠶ᠋ᠢ ᠰᠢᠪᠰᠢᠭᠯᠡᠭᠰᠡᠨ》 ᠭᠡᠵᠦ ᠵᠠᠩᠨᠠᠳᠠᠭ ᠪᠣᠯᠤᠭᠰᠠᠨ᠃ ᠠᠯᠪᠠᠨ ᠭᠠᠵᠠᠷ ᠨᠢ ᠬᠡᠯᠡᠪᠡᠯ ᠵᠠᠰᠠᠷᠠᠳᠠᠭ ᠪᠣᠯᠪᠠᠤ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠬᠤ ᠠ᠋ᠴᠠ ᠰᠢᠪᠰᠢᠭᠯᠡᠬᠦ ᠬᠡ ᠥᠬᠡᠢ᠃ ᠠᠯᠪᠠᠨ ᠶᠣᠰᠣᠨ ᠤ᠋ ᠪᠠᠲᠤᠯᠠᠭᠠ ᠲᠠᠢ ᠬᠥᠮᠦᠨ ᠶᠦᠮ ᠴᠢᠨᠢ ᠬᠠᠨᠢ ᠨᠥᠬᠥᠷ ᠢ᠋ᠶ᠋ᠡᠨ《ᠬᠦᠰᠡᠬᠦ ᠦᠭᠡᠢ》 ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠢᠩᠭᠢᠵᠦ ᠬᠡᠯᠡᠬᠦ ᠪᠡᠷ《ᠴᠢ ᠨᠥᠬᠥᠷ ᠢ᠋ᠶ᠋ᠡᠨ ᠭᠤᠶᠤᠳᠠᠭ ᠠᠷᠴᠠᠭᠠ ᠪᠠᠨ ᠠᠯᠳᠠᠳᠠᠭ᠂ ᠨᠠᠮᠠᠶ᠋ᠢ ᠲᠠᠢᠪᠤᠩ ᠪᠠᠢᠯᠭᠠ》 ᠭᠡᠳ ᠪᠤᠷᠤᠭᠤ ᠬᠠᠷᠠᠭᠠᠳ ᠬᠡᠪᠲᠡᠴᠢᠬᠡᠨᠡ᠃ ᠨᠥᠬᠥᠷ ᠢ᠋ᠶ᠋ᠡᠨ ᠨᠠᠰᠢ ᠬᠠᠷᠠᠭᠠᠴᠢ ᠭᠡᠬᠦ ᠶ᠋ᠢᠨ ᠲᠥᠯᠥᠭᠡ ᠰᠥᠨᠢ ᠣᠷᠣᠨ ᠳ᠋ᠠᠭᠠᠨ ᠬᠡᠷᠡᠯᠳᠦᠵᠦ ᠪᠠᠢᠳᠠᠭ ᠪᠣᠯᠤᠭᠰᠠᠨ᠃ ᠥᠴᠢᠨᠡᠨ ᠵᠢᠯ ᠬᠠᠨᠢᠯᠠᠭᠰᠠᠨ ᠬᠠᠨᠢ ᠴᠢᠨᠢ ᠪᠠᠢᠬᠤ ᠳ᠋ᠤ᠌ ᠶᠠᠳᠠᠬᠤ ᠳ᠋ᠠᠭᠠᠨ ᠨᠢᠭᠡ ᠰᠠᠢᠬᠠᠨ ᠦᠨᠦᠰᠦᠭᠡᠴᠢ ᠭᠡᠬᠦ ᠪᠡᠷ ᠰᠢᠭᠤᠳ ᠳᠤᠷᠠ ᠦᠭᠡᠢᠴᠡᠨᠡ᠃ ᠬᠥᠮᠦᠨ ᠢ᠋ ᠬᠠᠢᠷᠠᠯᠠᠵᠤ᠂ ᠬᠠᠯᠠᠮᠵᠢᠯᠠᠬᠤ ᠶᠠᠭᠤᠮᠠ ᠳᠠᠩᠴᠢ ᠪᠠᠢᠬᠤ ᠦᠭᠡᠢ᠃ ᠰᠠᠷᠠ ᠳ᠋ᠤ᠌ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠭᠠᠭᠴᠠ ᠬᠣᠶᠠᠷ《ᠣᠢᠷᠠᠳᠬᠤ ᠪᠠᠷ ᠢ᠋ᠶ᠋ᠠᠨ》 ᠶᠠᠭᠠᠬᠢᠭᠰᠠᠨ ᠤᠳᠠᠳᠠᠭ ᠶᠤᠮ ᠪᠣᠢ ᠭᠡᠵᠦ ᠠᠭᠤᠷᠯᠠᠨᠠ᠃ ᠣᠳᠣ ᠪᠦᠷ ᠴᠠᠭᠠᠨᠠ ᠪᠠᠨ ᠭᠠᠷᠴᠤ ᠡᠯᠳᠡᠪ ᠦ᠋ᠨ ᠬᠥᠮᠦᠨ ᠲᠡᠢ ᠨᠥᠬᠥᠷᠯᠡᠳᠡᠭ ᠪᠣᠯᠤᠭᠰᠠᠨ᠃ ᠲᠠᠩᠳᠠ ᠨᠥᠬᠥᠷ ᠦᠭᠡᠢ ᠬᠡᠦᠬᠡᠨ ᠲᠡᠢ ᠲᠠᠨᠢᠯᠴᠠᠳᠠᠭ ᠪᠣᠯᠤᠭᠰᠠᠨ᠃ ᠡᠯᠳᠡᠪ ᠡᠪᠡᠳᠴᠢᠨ ᠬᠦᠷᠲᠡᠯᠡ ᠠᠪᠴᠢᠷᠠᠭᠰᠠᠨ᠃ ᠨᠥᠬᠥᠷ ᠢ᠋ᠶ᠋ᠡᠨ ᠰᠠᠢᠬᠠᠨ ᠪᠣᠯᠭᠠᠬᠤ᠂ ᠡᠷᠭᠢᠭᠦᠯᠬᠦ ᠲᠠᠯᠠ ᠶ᠋ᠢᠨ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠬᠢᠵᠦ ᠪᠠᠢᠨᠠ᠃ ᠠᠷᠭᠠ ᠪᠠᠨ ᠪᠠᠷᠠᠭᠠᠳ ᠬᠥᠮᠦᠨ ᠬᠠᠷᠠ ᠳ᠋ᠤ᠌ ᠦᠵᠡᠭᠦᠯᠦᠯᠡ᠃ ᠨᠡᠮᠡᠷᠢ ᠠᠯᠠᠭᠠ᠃ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠡᠷᠡᠭᠲᠡᠢ ᠬᠥᠮᠦᠨ ᠡᠢᠮᠦ ᠪᠣᠯᠴᠢᠬᠠᠳᠠᠭ ᠶᠤᠮ ᠪᠣᠢ? ᠬᠥᠮᠦᠨ ᠦ᠌ ᠶᠠᠭᠤᠨ ᠳ᠋ᠤᠨᠢ ᠪᠣᠯᠴᠢᠬᠠᠳᠠᠭ ᠶᠤᠮ ᠪᠣᠢ? ᠬᠣᠷᠢᠨ ᠵᠢᠯ ᠦ᠋ᠨ ᠠᠮᠢᠳᠤᠷᠠᠯ ᠢ᠋ ᠡᠢᠮᠦ ᠬᠢᠮᠳᠠᠬᠠᠨ ᠦᠷᠡᠨ ᠳᠡᠷᠡᠨ ᠬᠢᠬᠦ ᠭᠡᠵᠦ ᠤᠤ!᠁
ᠬᠡᠨ ᠴᠦ᠍ ᠬᠠᠷᠠᠭᠰᠠᠨ ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠬᠠᠨ᠂ ᠢᠯᠳᠠᠮᠬᠠᠨ ᠡᠨᠡ ᠪᠦᠰᠡᠭᠦᠢ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠵᠤ᠂ ᠬᠣᠶᠠᠷ ᠨᠢᠳᠦ ᠨᠢ ᠨᠢᠯᠪᠤᠰᠤ ᠪᠠᠷ ᠪᠦᠷᠬᠦᠨ ᠡᠢᠨᠬᠦ ᠥᠭᠦᠯᠡᠭᠰᠡᠨ ᠶᠦᠮ ᠡᠭᠦᠨ ᠦ᠌ ᠰᠢᠯᠲᠠᠭᠠᠨ ᠮᠠᠰᠢ ᠣᠯᠠᠨ ᠭᠡᠵᠦ ᠳᠡᠭᠡᠷᠡ ᠥᠭᠦᠯᠡᠭᠰᠡᠨ᠃ ᠪᠡᠯᠭᠡ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠲᠠᠯᠠ ᠪᠠᠷ ᠲᠠᠭᠠᠷᠠᠵᠤ ᠲᠣᠬᠢᠷᠠᠬᠤ ᠦᠭᠡᠢ ᠪᠠᠢᠭᠠ ᠪᠠᠢᠳᠠᠯ ᠨᠡᠯᠢᠶᠡᠳ ᠨᠥᠯᠥᠭᠡ ᠲᠡᠢ᠃ ᠢᠯᠠᠩᠭᠤᠶᠠ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠠᠮᠢ ᠪᠠᠨ ᠬᠢᠴᠢᠶᠡᠬᠦ ᠠᠷᠭᠠᠴᠠᠭᠠ ᠦᠭᠡᠢ ᠵᠠᠩ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠬᠣᠷᠮᠣᠢ ᠳ᠋ᠤ᠌ ᠰᠠᠯᠬᠢ ᠣᠷᠣᠭᠤᠯᠵᠤ ᠥᠭᠬᠦ ᠨᠢᠭᠡ ᠭᠣᠣᠯ ᠰᠢᠯᠲᠠᠭᠠᠨ ᠪᠣᠯᠳᠠᠭ᠃ ᠵᠠᠷᠢᠮ ᠬᠡᠦᠬᠡᠨ ᠨᠦ᠍ᠭᠦᠳ ᠨᠥᠬᠥᠷ ᠲᠦ᠍ ᠭᠠᠷᠤᠭᠰᠠᠨ ᠤ᠋ ᠬᠣᠢᠨᠠ ᠪᠡᠶᠡ ᠪᠡᠨ ᠬᠠᠢᠬᠤᠷᠬᠤ ᠪᠠᠨ ᠪᠣᠯᠢᠵᠤ ᠬᠡᠦᠬᠡᠳ ᠲᠦ᠍ ᠳᠠᠷᠤᠭᠳᠠᠭᠠᠳ ᠨᠤᠷᠮᠠᠢᠴᠢᠬᠠᠬᠤ ᠨᠢ ᠴᠥᠭᠡᠨ ᠦᠭᠡᠢ᠃ ᠡᠨᠡ ᠪᠠᠢᠳᠠᠯ ᠡᠷᠡᠴᠦᠳ ᠦ᠋ᠨ ᠬᠣᠷᠮᠣᠢ ᠳ᠋ᠤ᠌ ᠰᠠᠯᠬᠢ ᠣᠷᠣᠬᠤ ᠨᠢᠭᠡ ᠦᠨᠳᠦᠰᠦ ᠪᠣᠯᠳᠠᠭ᠃ ᠵᠥᠪᠬᠡᠨ ᠳᠡᠭᠡᠳᠦ ᠨᠥᠬᠥᠴᠡᠯ ᠦ᠋ᠳ ᠡᠴᠡ ᠭᠠᠳᠠᠨᠠ ᠲᠠᠩᠳᠠ ᠢᠯᠡᠭᠦᠦ ᠬᠠᠷᠠᠵᠤ ᠪᠢᠯᠡᠭᠦᠦ ᠳᠣᠯᠢᠶᠠᠵᠤ ᠶᠠᠪᠤᠳᠠᠭ ᠬᠥᠮᠦᠰ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠭᠡᠳᠡᠭ ᠡᠨᠡ ᠦᠵᠡᠭᠳᠡᠯ ᠢ᠋ ᠭᠠᠵᠢ ᠪᠣᠯᠲᠠᠯᠠ ᠨᠢ ᠳᠡᠪᠡᠷᠭᠡᠵᠦ ᠥᠭᠳᠡᠭ ᠶᠦᠮ᠃ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠨᠢ ᠬᠥᠳᠡᠭᠡ ᠳ᠋ᠦ᠍ ᠵᠥᠪᠬᠡᠨ ᠬᠡᠷᠡᠭᠴᠡᠭᠡ ᠪᠡᠨ ᠬᠠᠩᠭᠠᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠶᠠᠪᠤᠭᠳᠠᠳᠠᠭ ᠪᠣᠯ ᠬᠣᠲᠠ ᠳ᠋ᠤ᠌ ᠨᠢᠭᠤᠴᠠ《ᠠᠮᠠᠷᠠᠭᠵᠢᠬᠤ》 ᠬᠠᠨᠳᠤᠯᠭᠠ ᠲᠠᠢ ᠪᠠᠢᠨᠠ᠃ ᠬᠠᠷᠢᠨ ᠠᠢᠮᠠᠭ ᠤ᠋ᠳ ᠤ᠋ᠨ ᠲᠥᠪ ᠲᠦ᠍ ᠡᠨᠡ ᠦᠵᠡᠭᠳᠡᠯ ᠬᠠᠷᠢᠴᠠᠩᠭᠤᠢ《ᠨᠠᠮᠵᠢᠮᠠᠯ》 ᠪᠠᠢᠳᠠᠯ ᠲᠠᠢ ᠪᠠᠢᠭᠠ ᠨᠢ ᠠᠵᠢᠭᠯᠠᠭᠳᠠᠵᠤ ᠪᠠᠢᠨᠠ᠃ ᠢᠩᠭᠢᠵᠦ ᠦᠵᠡᠲᠡᠯᠡ ᠰᠠᠢᠬᠠᠨ ᠬᠠᠨᠢ ᠢᠵᠢᠯᠢ᠂ ᠦᠷᠡ ᠬᠡᠦᠬᠡᠳ ᠲᠡᠢ᠂ ᠬᠡᠨ ᠴᠦ᠍ ᠬᠠᠷᠠᠭᠰᠠᠨ ᠶᠡᠷᠦ ᠡᠴᠡ ᠳᠤᠲᠠᠭᠳᠠᠵᠤ᠂ ᠭᠠᠴᠢᠭᠳᠠᠬᠤ ᠶᠠᠭᠤᠮᠠ ᠦᠭᠡᠢ ᠠᠲᠠᠯᠠ ᠦᠷᠭᠦᠯᠵᠢ ᠢᠯᠡᠭᠦᠦ ᠬᠠᠷᠠᠵᠤ ᠪᠢᠯᠡᠭᠦᠦ ᠳᠣᠯᠢᠶᠠᠵᠤ ᠶᠠᠪᠤᠬᠤ ᠶ᠋ᠢ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠭᠡᠵᠦ ᠨᠡᠷᠡᠯᠡᠶᠡ᠃ ᠡᠢᠮᠦ ᠵᠠᠪᠬᠠᠢ ᠶᠠᠪᠤᠳᠠᠯᠲᠠᠨ ᠢ᠋ ᠳᠡᠯᠡᠬᠡᠢ ᠨᠡᠢᠲᠡ ᠪᠡᠷ ᠳ᠋ᠤᠨ— ᠵᠢᠶᠠᠨᠢᠰᠮ᠂ ᠮᠠᠨᠠᠢᠬᠢᠨ《ᠰᠡᠭᠦᠷᠯᠡᠬᠦ》 ᠬᠡᠮᠡᠳᠡᠭ᠃
ᠬᠣᠷᠮᠣᠢ ᠳ᠋ᠤᠨᠢ ᠰᠠᠯᠬᠢ ᠣᠷᠣᠭᠰᠠᠨ ᠬᠥᠮᠦᠨ ᠦ᠌ ᠭᠣᠣᠯ ᠰᠢᠨᠵᠢ ᠨᠢ ᠪᠣᠯ ᠭᠡᠷ ᠲᠡᠭᠡᠨ ᠲᠠᠲᠠᠭᠳᠠᠬᠤ ᠪᠠᠨ ᠪᠠᠢᠵᠤ᠂ ᠰᠡᠪ ᠯᠠ ᠭᠡᠪᠡᠯ ᠭᠠᠳᠠᠭᠰᠢ ᠪᠠᠨ ᠳᠡᠮᠡᠢ ᠬᠡᠰᠦᠭᠦᠴᠢᠯᠡᠨ ᠲᠡᠨᠦᠬᠦ ᠶ᠋ᠢᠨ ᠲᠤᠩ ᠱᠦᠭᠯᠡᠵᠦ᠂ ᠵᠤᠭᠠᠯᠠᠬᠤ ᠶ᠋ᠢᠨ ᠡᠪᠡᠳᠴᠢᠨ ᠡᠴᠡ ᠡᠪᠡᠳᠬᠦ ᠶᠠᠪᠤᠳᠠᠯ ᠶᠤᠮ᠃ ᠲᠡᠷᠡ ᠪᠡᠷ ᠠᠵᠢᠯ ᠠ᠋ᠴᠠ ᠪᠠᠨ ᠣᠷᠣᠢᠲᠠᠵᠤ ᠢᠷᠡᠬᠦ ᠲᠡᠳᠦᠢ ᠦᠭᠡᠢ ᠬᠣᠨᠣᠭᠤᠲᠠ ᠥᠨᠵᠢᠭᠦᠲᠡ ᠪᠡᠷ ᠴᠦ᠍ ᠭᠡᠷ ᠲᠡᠭᠡᠨ ᠢᠷᠡᠬᠦ ᠦᠭᠡᠢ ᠠᠯᠠᠭᠠ ᠪᠣᠯᠤᠨᠠ᠃ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠠᠷᠤ ᠠ᠋ᠴᠠ ᠪᠠᠨ ᠢᠮᠠᠭᠲᠠ ᠬᠠᠷᠠ ᠰᠡᠭᠦᠳᠡᠷ ᠲᠠᠲᠠᠭᠤᠯᠳᠠᠭ ᠪᠥᠭᠡᠳ ᠲᠡᠭᠦᠨ ᠢ᠋ ᠬᠣᠷᠮᠣᠢ ᠶ᠋ᠢᠨ ᠪᠤᠵᠠᠷ ᠬᠡᠮᠡᠳᠡᠭ᠃ ᠥᠭᠡᠷᠡ ᠪᠡᠷ ᠣᠷᠣᠨ ᠤ᠋ ᠪᠤᠵᠠᠷ ᠴᠦ᠍ ᠭᠡᠳᠡᠭ᠃ ᠡᠭᠦᠨ ᠢ᠋ ᠮᠠᠨᠠᠢ ᠥᠲᠡᠭᠦᠰ ᠳᠡᠭᠡᠳᠦᠰ ᠡᠷᠲᠡ ᠳᠡᠭᠡᠳᠦ ᠦᠶᠡ ᠡᠴᠡ ᠵᠢᠭᠰᠢᠵᠦ ᠢᠷᠡᠭᠰᠡᠨ ᠰᠠᠢᠬᠠᠨ ᠤᠯᠠᠮᠵᠢᠯᠠᠯ ᠲᠠᠢ ᠪᠢᠯᠡ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠡᠢᠮᠦ ᠪᠤᠵᠠᠷ ᠣᠷᠣᠭᠰᠠᠨ ᠠᠢᠯ ᠠ᠋ᠴᠠ ᠬᠡᠷᠡᠭᠦᠯ ᠤᠷᠤᠭᠤᠯ ᠲᠠᠰᠤᠷᠠᠬᠤ ᠦᠭᠡᠢ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠢ᠋ ᠨᠢ ᠶᠢᠰᠦᠨ ᠵᠣᠷ ᠤ᠋ᠨ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠣᠷᠢᠶᠠᠭᠠᠳ ᠰᠠᠯᠬᠤ ᠦᠭᠡᠢ ᠬᠡᠯᠡᠴᠡᠳᠡᠭ᠃ ᠡᠢᠮᠦ ᠡᠴᠡ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠶ᠋ᠢ ᠲᠡᠪᠴᠢᠵᠦ᠂ ᠱᠠᠭᠱᠠᠪᠠᠳ ᠢ᠋ ᠰᠠᠬᠢᠪᠠᠯ ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠦᠷᠡ ᠬᠡᠦᠬᠡᠳ᠂ ᠬᠠᠨᠢ ᠢᠵᠢᠯᠢ ᠳ᠋ᠡᠭᠡᠨ ᠶᠡᠬᠡ ᠪᠤᠶᠠᠨ ᠦᠢᠯᠡᠳᠦᠨᠡ᠃ ᠬᠣᠷᠮᠣᠢ ᠳ᠋ᠤᠨᠢ ᠰᠠᠯᠬᠢ ᠣᠷᠣᠭᠰᠠᠨ ᠬᠥᠮᠦᠨ ᠵᠥᠪᠬᠡᠨ ᠬᠠᠨᠢᠯᠠᠭᠰᠠᠨ ᠬᠠᠨᠢ ᠲᠡᠳᠦᠢ ᠦᠭᠡᠢ ᠦᠷᠡ ᠬᠡᠦᠬᠡᠳ᠂ ᠡᠴᠢᠭᠡ ᠡᠬᠡ᠂ ᠠᠬᠠ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠴᠥᠮ ᠢ᠋ ᠨᠢ ᠵᠣᠪᠠᠭᠠᠨᠠ᠃ ᠡᠨᠳᠡ ᠨᠢᠭᠡ ᠥᠬᠢᠨ ᠦ᠌ ᠵᠠᠬᠢᠳᠠᠯ ᠠ᠋ᠴᠠ ᠡᠰᠢ ᠲᠠᠲᠠᠶᠠ!
《᠁ ᠡᠮᠴᠢ ᠠ᠋! ᠪᠢ ᠠᠢᠯ ᠤ᠋ᠨ ᠲᠣᠮᠣ ᠥᠬᠢᠨ᠂ ᠳᠣᠣᠷᠠ ᠪᠠᠨ ᠬᠣᠶᠠᠷ ᠳᠡᠭᠦᠦ ᠲᠡᠢ᠃ ᠠᠪᠤ ᠮᠢᠨᠢ ᠡᠵᠢ ᠶ᠋ᠢ ᠶᠡᠬᠡ ᠵᠣᠪᠠᠭᠠᠬᠤ ᠶᠤᠮ᠃ ᠭᠡᠷ ᠲᠡᠭᠡᠨ ᠢᠷᠡᠬᠦ ᠦᠭᠡᠢ᠂ ᠬᠣᠨᠣᠭᠤᠲᠠ ᠥᠨᠵᠢᠭᠦᠲᠡ ᠪᠡᠷ ᠠᠯᠠᠭᠠ ᠪᠣᠯᠴᠢᠬᠠᠳᠠᠭ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠡᠵᠢ᠂ ᠪᠢᠳᠡ ᠨᠠᠷ ᠢ᠋ ᠬᠠᠢᠬᠤᠷᠬᠤ ᠪᠠᠨ ᠪᠠᠢᠭᠰᠠᠨ᠃ ᠡᠵᠢ ᠮᠢᠨᠢ ᠠᠪᠤ ᠶ᠋ᠢ ᠬᠦᠯᠢᠶᠡᠭᠡᠳ᠂ ᠴᠣᠩᠬᠣᠨ ᠳᠡᠷᠭᠡᠳᠡ ᠤᠬᠢᠯᠠᠨ ᠵᠣᠭᠰᠣᠬᠤ ᠶ᠋ᠢ ᠬᠠᠷᠠᠭᠠᠳ ᠪᠢ ᠡᠵᠢ ᠪᠡᠨ ᠶᠡᠬᠡ ᠦᠷᠦ ᠡᠪᠡᠳᠳᠡᠭ᠃ ᠳᠡᠭᠦᠦ ᠨᠠᠷ ᠮᠢᠨᠢ ᠵᠢᠭᠠᠬᠠᠨ ᠪᠣᠯᠬᠣᠷ ᠶᠠᠭᠤᠮᠠᠨ ᠤ᠋ ᠤᠴᠢᠷ ᠢ᠋ ᠮᠡᠳᠡᠬᠦ ᠦᠭᠡᠢ᠂ ᠨᠠᠳᠠ ᠠ᠋ᠴᠠ ᠥᠭᠡᠷᠡ ᠬᠡᠨ ᠴᠦ᠍ ᠡᠵᠢ ᠶ᠋ᠢ ᠮᠢᠨᠢ ᠣᠢᠯᠠᠭᠠᠬᠤ ᠪᠣᠢ ᠳᠠ᠃ ᠡᠵᠢ ᠮᠢᠨᠢ ᠵᠣᠪᠠᠯᠠᠩ ᠤ᠋ᠨ ᠵᠠᠬᠠ ᠵᠤᠬᠠ ᠠ᠋ᠴᠠ ᠨᠢ ᠨᠠᠳᠠ ᠳ᠋ᠤ᠌ ᠶᠠᠷᠢᠳᠠᠭ᠂ ᠥᠭᠡᠷᠡ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠬᠦ ᠶᠦᠮ ᠪᠢᠯᠡ ᠳᠠ᠃ ᠪᠢ ᠡᠵᠢ ᠳ᠋ᠡᠭᠡᠨ ᠶᠠᠭᠠᠬᠢᠵᠤ ᠲᠤᠰᠠᠯᠠᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠠᠪᠤ ᠶᠠᠭᠠᠬᠢᠭᠠᠳ ᠡᠢᠮᠦ ᠰᠠᠢᠬᠠᠨ ᠬᠠᠨᠢ ᠢᠵᠢᠯᠢ᠂ ᠬᠡᠦᠬᠡᠳ ᠲᠡᠢ ᠮᠥᠷᠲᠡᠭᠡᠨ ᠢᠩᠭᠢᠳᠡᠭ ᠶᠦᠮ ᠪᠣᠯ ᠳᠠ? ᠲᠠ ᠪᠢᠳᠡᠨ ᠳ᠋ᠦ᠍ ᠬᠡᠯᠡᠵᠦ ᠵᠥᠪᠯᠡᠭᠡᠴᠢ!》
ᠳᠡᠭᠡᠷᠡᠬᠢ ᠥᠬᠢᠨ ᠦ᠌ ᠵᠠᠬᠢᠳᠠᠯ ᠠᠪᠤ ᠨᠤᠭᠤᠳ ᠲᠤ᠌ ᠡᠷᠬᠡᠪᠰᠢ ᠨᠢᠭᠡ ᠶ᠋ᠢ ᠪᠣᠳᠣᠭᠳᠠᠭᠤᠯᠬᠤ ᠪᠢᠵᠡ ᠠ᠋᠃ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠨᠢ ᠡᠷᠡ᠂ ᠡᠮᠡ ᠬᠡᠨ ᠢ᠋ ᠴᠦ᠍ ᠢᠯᠭᠠᠵᠤ ᠦᠵᠡᠳᠡᠭ ᠦᠭᠡᠢ ᠭᠠᠮᠰᠢᠭ ᠭᠡᠯᠲᠡᠢ᠃ ᠢᠯᠠᠩᠭᠤᠶᠠ ᠡᠢᠮᠦ ᠵᠠᠮ ᠳ᠋ᠤ᠌ ᠬᠥᠲᠥᠯᠦᠭᠳᠡᠭᠰᠡᠨ ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠢᠮᠠᠭᠲᠠ ᠡᠮᠭᠡᠨᠢᠯ ᠲᠡᠢ ᠲᠡᠭᠦᠰᠬᠡᠯ ᠬᠦᠯᠢᠶᠡᠵᠦ ᠪᠠᠢᠳᠠᠭ᠃ ᠡᠢᠮᠦ ᠨᠢᠭᠡ ᠥᠬᠢᠨ ᠦ᠌ ᠪᠡᠨ ᠲᠥᠯᠥᠭᠡ ᠰᠡᠳᠬᠢᠯ ᠵᠣᠪᠠᠭᠰᠠᠨ ᠲᠡᠳᠬᠦᠪᠦᠷᠢ ᠶ᠋ᠢᠨ ᠬᠣᠶᠠᠷ ᠬᠥᠭᠰᠢᠨ ᠪᠢᠳᠡᠨ ᠳ᠋ᠦ᠍ ᠢᠷᠡᠵᠦ ᠡᠢᠨ ᠥᠭᠦᠯᠡᠭᠰᠡᠨ ᠶᠦᠮ᠃
《ᠮᠠᠨ ᠤ᠋ ᠬᠢ ᠵᠢᠷᠭᠤᠭᠠᠨ ᠬᠡᠦᠬᠡᠳ ᠲᠡᠢ ᠠᠢᠯ᠂ ᠪᠤᠰᠤᠳ ᠨᠢ ᠵᠦᠭᠡᠷ᠂ ᠪᠦᠭᠦᠳᠡ ᠠᠵᠢᠯ ᠲᠥᠷᠥᠯ ᠲᠡᠢ᠂ ᠬᠠᠨᠢ ᠢᠵᠢᠯᠢ᠂ ᠦᠷᠡ ᠬᠡᠦᠬᠡᠳ ᠲᠡᠢ᠃ ᠭᠡᠲᠡᠯᠡ ᠨᠢᠭᠡ ᠬᠡᠴᠡᠭᠦᠦ ᠥᠬᠢᠨ ᠲᠡᠢ᠃ ᠭᠠᠳᠠᠭᠤᠷ ᠲᠡᠨᠦᠭᠰᠡᠭᠡᠷ ᠪᠠᠢᠭᠠᠳ ᠨᠢᠭᠡᠳᠦᠭᠡᠷ ᠺᠦᠷᠡᠰ ᠡᠴᠡ ᠪᠡᠨ ᠰᠤᠷᠭᠠᠭᠤᠯᠢ ᠠ᠋ᠴᠠ ᠬᠠᠰᠤᠭᠤᠯᠤᠭᠰᠠᠨ᠃ ᠨᠢᠭᠡ ᠬᠡᠦᠬᠡᠳ ᠲᠥᠷᠥᠭᠦᠯᠦᠭᠰᠡᠨ᠂ ᠬᠠᠨᠢ ᠢᠵᠢᠯᠢ ᠦᠭᠡᠢ᠃ ᠲᠡᠭᠡᠭᠰᠡᠨ ᠮᠥᠷᠲᠡᠭᠡᠨ ᠭᠡᠷ ᠲᠡᠭᠡᠨ ᠲᠣᠭᠲᠠᠬᠤ ᠦᠭᠡᠢ᠃ ᠡᠷᠡᠭᠲᠡᠢ ᠬᠥᠮᠦᠨ ᠯᠡ ᠬᠠᠷᠠᠪᠠᠯ ᠬᠥᠭᠰᠢᠨ᠂ ᠵᠠᠯᠠᠭᠤ᠂ ᠰᠠᠢᠬᠠᠨ᠂ ᠮᠠᠭᠤᠬᠠᠢ ᠬᠠᠮᠢᠶᠠ ᠦᠭᠡᠢ ᠴᠠᠰᠢ ᠪᠠᠨ ᠭᠡᠬᠦ ᠦᠭᠡᠢ᠃ ᠭᠡᠷ ᠲᠡᠭᠡᠨ ᠢᠷᠡᠬᠦ ᠦᠭᠡᠢ ᠬᠡᠳᠦᠨ ᠡᠳᠦᠷ᠂ ᠪᠦᠷ ᠬᠡᠳᠦᠨ ᠳᠣᠯᠣᠭᠠ ᠬᠣᠨᠣᠭ ᠢ᠋ᠶ᠋ᠠᠷ ᠴᠦ᠍ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠴᠢᠬᠠᠨᠠ᠃ ᠳᠠᠮ ᠰᠤᠷᠠᠭ ᠢ᠋ᠶ᠋ᠠᠷ ᠰᠣᠨᠣᠰᠪᠠᠯ ᠲᠡᠨᠳᠡ ᠴᠦ᠍ ᠴᠡᠷᠢᠭ ᠦ᠋ᠨ ᠠᠩᠭᠢ ᠪᠠᠷ ᠶᠠᠪᠤᠨᠠ᠂ ᠡᠨᠳᠡ ᠴᠦ᠍ ᠬᠥᠮᠦᠨ ᠲᠡᠢ ᠶᠠᠪᠤᠵᠤ ᠪᠠᠢᠨᠠ ᠭᠡᠬᠦ ᠶᠦᠮ᠃》 ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠬᠥᠨᠳᠡᠭᠦᠯᠦᠭᠰᠡᠨ ᠶᠦᠮ᠃ ᠲᠡᠭᠡᠭᠡᠳ ᠬᠠᠰᠢᠷᠠᠬᠤ ᠦᠭᠡᠢ ᠶᠠᠪᠤᠭᠠᠳ ᠪᠠᠢᠬᠤ ᠶᠤᠮ᠃ ᠬᠡᠦᠬᠡᠳ ᠢ᠋ᠶ᠋ᠡᠨ ᠣᠭᠲᠣ ᠬᠠᠢᠬᠤᠷᠬᠤ ᠦᠭᠡᠢ᠃《ᠲᠡᠳᠡᠨ ᠦ᠌ ᠡᠷᠡ ᠡᠷᠭᠢᠭᠦᠯᠳᠡᠭ ᠥᠬᠢᠨ》 ᠭᠡᠳᠡᠭ ᠬᠣᠴᠢ ᠴᠦ᠍ ᠭᠠᠷᠴᠤ᠂ ᠬᠥᠭᠰᠢᠨ ᠪᠢᠳᠡ ᠬᠣᠶᠠᠷ ᠤ᠋ᠨ ᠶᠠᠰᠤ ᠴᠦ᠍ ᠬᠠᠪᠲᠠᠯᠵᠠᠬᠤ ᠶᠤᠮ᠃ ᠥᠴᠢᠨᠡᠨ ᠬᠥᠮᠦᠨ ᠳ᠋ᠦ᠍ ᠦᠵᠡᠭᠦᠯᠦᠯᠡ᠂ ᠣᠯᠠᠨ ᠴᠦ᠍ ᠨᠤᠮ ᠤᠩᠰᠢᠭᠤᠯᠤᠯᠠ᠂ ᠶᠠᠭᠠᠬᠢᠭᠠᠳ ᠴᠦ᠍ ᠨᠡᠮᠡᠷᠢ ᠠᠯᠠᠭᠠ᠃ ᠡᠴᠦᠰ ᠲᠦ᠋ᠨᠢ ᠬᠥᠮᠦᠨ ᠡᠴᠡ ᠳᠤᠭᠤᠯᠤᠭᠠᠳ ᠲᠠᠨ ᠤ᠋ ᠳᠡᠭᠡᠷᠡ ᠢᠷᠡᠯᠡ᠃ ᠶᠠᠳᠠᠷᠠᠭᠰᠠᠨ ᠪᠢᠳᠡ ᠬᠣᠶᠠᠷ ᠬᠥᠭᠰᠡᠨ ᠡᠨᠡ ᠥᠬᠢᠨ ᠢ᠋ ᠶᠠᠭᠠᠬᠢᠬᠤ ᠪᠣᠢ? ᠬᠡᠯᠡᠵᠦ ᠲᠤᠰᠠᠯᠠᠭᠠᠴᠢ ᠬᠦᠦ ᠮᠢᠨᠢ! ᠡᠮᠴᠢᠯᠡᠳᠡᠭ ᠠᠷᠭᠠ ᠪᠠᠢᠨᠠ ᠤᠤ?
ᠢᠩᠭᠢᠵᠦ ᠬᠣᠷᠮᠣᠢ ᠳ᠋ᠤᠨᠢ ᠬᠡᠢ ᠣᠷᠣᠭᠰᠠᠨ ᠡᠮᠡᠭᠲᠡᠢ ᠬᠥᠮᠦᠨ ᠡᠷᠡᠭᠡ ᠴᠡᠭᠡᠷ ᠢ᠋ᠶ᠋ᠡᠨ ᠠᠯᠳᠠᠵᠤ ᠡᠴᠢᠭᠡ ᠡᠬᠡ ᠪᠡᠨ ᠲᠤᠢᠯ ᠢ᠋ᠶ᠋ᠠᠷ ᠵᠣᠪᠠᠭᠠᠨᠠ᠃ ᠡᠨᠳᠡ ᠲᠡᠨᠳᠡ ᠯᠸᠺᠽᠢ ᠶᠠᠷᠢᠶᠠ᠂ ᠠᠭᠤᠯᠵᠠᠯᠲᠠ ᠶᠠᠷᠢᠯᠴᠠᠯᠭᠠ ᠬᠢᠵᠦ ᠪᠠᠢᠬᠤ ᠳ᠋ᠤ᠌《ᠰᠡᠭᠦᠳᠡᠷ ᠦᠭᠡᠢ ᠬᠣᠷᠸᠠ᠂ ᠰᠡᠭᠦᠯ ᠦᠭᠡᠢ ᠬᠥᠮᠦᠨ ᠪᠠᠢᠳᠠᠭ ᠦᠭᠡᠢ ᠭᠡᠵᠦ ᠶᠠᠷᠢᠳᠠᠭ᠂ ᠡᠭᠦᠨ ᠢ᠋ ᠲᠠ ᠶᠠᠭᠤ ᠭᠡᠵᠦ ᠦᠵᠡᠬᠦ ᠪᠣᠢ?》 ᠭᠡᠰᠡᠨ ᠠᠰᠠᠭᠤᠯᠲᠠ ᠨᠡᠯᠢᠶᠡᠳ ᠭᠠᠷᠳᠠᠭ᠃ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠠᠰᠠᠭᠤᠯᠲᠠ᠃ ᠭᠡᠪᠡᠴᠦ ᠬᠠᠷᠢᠭᠤᠯᠬᠤ ᠠ᠋ᠴᠠ ᠠᠷᠭᠠ ᠦᠭᠡᠢ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠬᠠᠷᠢᠭᠤᠯᠬᠤ ᠦᠭᠡᠢ᠂ ᠲᠣᠭᠣᠷᠢᠭᠠᠳ ᠥᠩᠭᠡᠷᠡᠴᠢᠬᠡᠬᠦ ᠪᠡᠷ ᠳᠠᠬᠢᠭᠠᠳ ᠯᠠ ᠪᠢᠴᠢᠭᠡᠳ ᠥᠨᠥᠬᠢ ᠠᠰᠠᠭᠤᠯᠲᠠ ᠬᠦᠷᠦᠭᠡᠳ ᠢᠷᠡᠳᠡᠭ᠃ ᠴᠢᠨᠠᠭᠰᠢᠳᠠ ᠣᠯᠠᠨ ᠭᠠᠵᠠᠷ᠂ ᠣᠯᠠᠨ ᠳᠠᠬᠢᠨ ᠡᠨᠡ ᠠᠰᠠᠭᠤᠯᠲᠠ ᠲᠠᠢ ᠲᠤᠯᠭᠠᠷᠠᠬᠤ ᠶᠠᠩᠵᠤ ᠲᠠᠢ᠃
ᠡᠢᠮᠦ ᠡᠴᠡ ᠬᠣᠲᠠ᠂ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠠᠮᠠ ᠳᠤᠮᠳᠠ ᠬᠢᠭᠰᠡᠨ ᠡᠷᠡ ᠡᠮᠡ ᠶ᠋ᠢᠨ ᠶᠢᠰᠦᠨ ᠦ᠌ ᠰᠤᠳᠤᠯᠤᠯ(ᠤᠯᠠᠭᠠᠨᠪᠠᠭᠠᠲᠤᠷ᠂ ᠬᠡᠨᠲᠡᠢ᠂ ᠬᠣᠪᠲᠣ᠂19891·1990)ᠣᠨ ᠳ᠋ᠦᠩ ᠡᠴᠡ ᠡᠰᠢ ᠲᠠᠲᠠᠵᠤ ᠬᠠᠷᠢᠭᠤ ᠪᠠᠷᠢᠶᠠ᠃ ᠰᠤᠳᠤᠯᠭᠠᠨ ᠳ᠋ᠤ᠌ ᠬᠠᠮᠤᠷᠤᠭᠳᠠᠭᠰᠠᠨ《ᠭᠡᠷ ᠪᠦᠯᠢ ᠡᠴᠡ ᠭᠠᠳᠠᠨᠠ ᠪᠡᠯᠭᠡ ᠶ᠋ᠢᠨ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠬᠤ ᠶ᠋ᠢ ᠲᠠ ᠶᠠᠭᠤ ᠭᠡᠵᠦ ᠦᠵᠡᠳᠡᠭ ᠪᠣᠢ?》 ᠭᠡᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠡᠷᠬᠢᠨ ᠬᠠᠷᠢᠭᠤᠯᠤᠭᠰᠠᠨ ᠢ᠋ ᠦᠵᠡᠭᠦᠯᠦᠶᠡ᠃
ᠡᠷᠡᠭᠲᠡᠢᠴᠦᠳ ᠦ᠋ᠨ ᠬᠠᠷᠢᠭᠤᠯᠲᠠ
1. ᠪᠠᠢᠵᠤ ᠪᠣᠯᠤᠨᠠ74.4%
2. ᠣᠭᠲᠣ ᠪᠠᠢᠵᠤ ᠪᠣᠯᠬᠤ ᠦᠭᠡᠢ17.9%
3. ᠮᠡᠳᠡᠬᠦ ᠦᠭᠡᠢ7.7%
ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌
1. ᠪᠠᠢᠵᠤ ᠪᠣᠯᠤᠨᠠ51.3%
2. ᠣᠭᠲᠣ ᠪᠠᠢᠵᠤ ᠪᠣᠯᠬᠤ ᠦᠭᠡᠢ30.7%
3. ᠮᠡᠳᠡᠬᠦ ᠦᠭᠡᠢ18%
ᠡᠮᠡᠭᠲᠡᠢᠴᠦᠳ ᠦ᠋ᠨ ᠬᠠᠷᠢᠭᠤᠯᠲᠠ
ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌᠄
1. ᠪᠠᠢᠵᠤ ᠪᠣᠯᠤᠨᠠ31.3%
2. ᠣᠭᠲᠣ ᠪᠠᠢᠵᠤ ᠪᠣᠯᠬᠤ ᠦᠭᠡᠢ25.7%
3. ᠮᠡᠳᠡᠬᠦ ᠦᠭᠡᠢ42.9%
ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌
1. ᠪᠠᠢᠵᠤ ᠪᠣᠯᠤᠨᠠ31.4%
2. ᠣᠭᠲᠣ ᠪᠠᠢᠵᠤ ᠪᠣᠯᠬᠤ ᠦᠭᠡᠢ31.4%
3. ᠮᠡᠳᠡᠬᠦ ᠦᠭᠡᠢ37.2%
ᠡᠨᠳᠡ ᠡᠴᠡ ᠦᠵᠡᠬᠦ ᠳ᠋ᠦ᠍᠂ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠥᠮᠦᠰ ᠦ᠋ᠨ ᠦᠵᠡᠯ ᠪᠣᠳᠣᠯ ᠶᠡᠬᠡᠬᠡᠨ ᠵᠥᠷᠢᠶᠡ ᠲᠡᠢ ᠪᠠᠢᠨᠠ᠃ ᠡᠷᠡᠭᠲᠡᠢᠴᠦᠳ ᠦ᠋ᠨ ᠶᠡᠬᠡᠩᠬᠢ ᠨᠢ(74.4%) ᠡᠭᠦᠨ ᠢ᠋《ᠪᠠᠢᠵᠤ ᠪᠣᠯᠤᠨᠠ》 ᠭᠡᠰᠡᠨ ᠪᠠᠢᠬᠤ ᠳ᠋ᠤ᠌ ᠡᠮᠡᠭᠲᠡᠢᠴᠦᠳ ᠦ᠋ᠨ ᠴᠥᠭᠡᠩᠬᠢ ᠨᠢ(31.4%) ᠡᠭᠦᠨ ᠢ᠋ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠵᠦ ᠪᠠᠢᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠡᠳᠡᠨ ᠦ᠌ ᠴᠡᠭᠡᠷᠯᠡᠬᠦ ᠴᠡᠭᠡᠷᠯᠡᠯᠲᠡ ᠶᠡᠬᠡ ᠥᠨᠳᠥᠷ ᠪᠠᠢᠨᠠ᠃ ᠪᠢᠳᠡᠨ ᠦ᠌ ᠰᠤᠳᠤᠯᠭᠠᠨ ᠠ᠋ᠴᠠ ᠪᠠᠰᠠ ᠨᠢᠭᠡ ᠰᠣᠨᠢᠨ ᠵᠦᠢᠯ ᠬᠠᠷᠠᠭᠳᠠᠭᠰᠠᠨ ᠶᠤᠮ᠃ ᠡᠨᠡ ᠶᠠᠭᠤ ᠪᠣᠢ ᠭᠡᠪᠡᠯ ᠰᠤᠳᠤᠯᠭᠠᠨ ᠳ᠋ᠤ᠌ ᠬᠠᠮᠤᠷᠤᠭᠳᠠᠭᠰᠠᠳ ᠤ᠋ᠨ ᠨᠠᠰᠤ ᠠᠬᠢᠬᠤ ᠲᠣᠰᠤᠮ ᠡᠭᠦᠨ ᠢ᠋ ᠵᠥᠪᠰᠢᠶᠡᠷᠡᠵᠦ《ᠪᠠᠢᠵᠤ ᠪᠣᠯᠤᠨᠠ》 ᠭᠡᠰᠡᠨ ᠬᠠᠷᠢᠭᠤᠯᠲᠠ ᠶ᠋ᠢᠨ ᠬᠤᠪᠢ ᠨᠡᠮᠡᠭᠳᠡᠵᠦ ᠪᠠᠢᠭᠠ ᠶᠠᠪᠤᠳᠠᠯ ᠶᠤᠮ᠃ ᠲᠤᠬᠠᠢᠯᠠᠪᠠᠯ ᠬᠣᠷᠢᠨ ᠨᠠᠰᠤᠲᠠᠢ ᠬᠠᠷᠢᠭᠤᠯᠠᠭᠰᠠᠳ ᠤ᠋ᠨ ᠲᠥᠩᠬᠡᠵᠢ19% ᠨᠢ ᠡᠭᠦᠨ ᠢ᠋《ᠪᠠᠢᠵᠤ ᠪᠣᠯᠤᠨᠠ》 ᠭᠡᠰᠡᠨ ᠪᠠᠢᠬᠤ ᠳ᠋ᠤ᠌᠂ ᠭᠤᠴᠢᠲᠠᠢ ᠬᠥᠮᠦᠰ ᠦ᠋ᠨ42%᠂ ᠳᠥᠴᠢᠲᠡᠢ ᠬᠥᠮᠦᠰ ᠦ᠋ᠨ68% ᠨᠢ ᠲᠤᠰ ᠲᠤᠰ《ᠪᠠᠢᠵᠤ ᠪᠣᠯᠤᠨᠠ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃ ᠬᠡᠷᠪᠡ ᠨᠥᠬᠥᠷ(ᠡᠬᠡᠨᠡᠷ) ᠴᠢᠨᠢ ᠥᠭᠡᠷᠡ ᠬᠥᠮᠦᠨ ᠲᠡᠢ《ᠤᠨᠲᠠᠭᠰᠠᠨ》 ᠪᠣᠯ ᠲᠠ ᠶᠠᠭᠠᠬᠢᠬᠤ ᠪᠣᠢ ᠭᠡᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠰᠤᠳᠤᠯᠭᠠᠨ ᠳ᠋ᠤ᠌ ᠬᠠᠮᠤᠷᠤᠭᠳᠠᠭᠰᠠᠨ ᠡᠷᠡᠭᠲᠡᠢᠴᠦᠳ ᠦ᠋ᠨ38.4% ᠨᠢ《ᠠᠭᠤᠴᠢᠯᠠᠨᠠ》᠂10.3% ᠨᠢ《ᠬᠠᠷᠢᠭᠤ ᠠᠪᠤᠨᠠ》᠂30.8% ᠨᠢ《ᠰᠠᠯᠤᠨᠠ》᠂20.5%《 ᠮᠡᠳᠡᠬᠦ ᠦᠭᠡᠢ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃ ᠲᠡᠭᠡᠪᠡᠯ ᠡᠮᠡᠭᠲᠡᠢᠴᠦᠳ ᠦ᠋ᠨ73.1%《ᠠᠭᠤᠴᠢᠯᠠᠨᠠ》᠂7.3% ᠨᠢ《ᠬᠠᠷᠢᠭᠤ ᠠᠪᠤᠨᠠ》᠂4.9% ᠨᠢ《ᠰᠠᠯᠤᠨᠠ》᠂14.0%《ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠨᠠ》᠂0.6% ᠨᠢ《ᠠᠮᠢ ᠪᠠᠨ ᠬᠣᠣᠷᠯᠠᠨᠠ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃ ᠡᠨᠳᠡ ᠡᠴᠡ ᠦᠵᠡᠬᠦ ᠳ᠋ᠦ᠍ ᠡᠮᠡᠭᠲᠡᠢ ᠬᠥᠮᠦᠨ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ《ᠠᠷᠤ ᠪᠠᠷ ᠨᠢ ᠲᠠᠯᠪᠢᠬᠤ ᠳ᠋ᠤ᠌》 ᠨᠡᠯᠢᠶᠡᠳ ᠬᠦᠯᠢᠴᠡᠲᠢ᠂ ᠲᠡᠪᠴᠢᠶᠡᠷᠢᠲᠡᠢ ᠬᠠᠨᠳᠤᠵᠤ ᠪᠠᠢᠨᠠ᠃ ᠡᠨᠡ ᠨᠢ ᠠᠮᠢᠳᠤᠷᠠᠯ᠂ ᠦᠷᠡ ᠬᠡᠦᠬᠡᠳ ᠲᠡᠭᠡᠨ ᠭᠡᠰᠡᠨ ᠰᠡᠳᠬᠢᠯ ᠲᠡᠢ ᠬᠣᠯᠪᠣᠭᠠ ᠲᠠᠢ᠃
ᠳᠡᠭᠡᠷᠡᠬᠢ ᠳ᠋ᠦᠩ ᠲᠠ ᠪᠦᠬᠦᠨ ᠦ᠌ ᠰᠣᠨᠢᠷᠬᠠᠨ ᠠᠰᠠᠭᠤᠳᠠᠭ ᠰᠡᠭᠦᠯ ᠲᠡᠢ᠂ ᠰᠡᠭᠦᠯ ᠦᠭᠡᠢ ᠬᠣᠷᠸᠠ ᠶ᠋ᠢᠨ ᠦᠨᠳᠦᠰᠦᠨ ᠬᠠᠷᠢᠭᠤᠯᠲᠠ ᠪᠣᠯᠤᠨᠠ ᠪᠠᠢᠬᠠ ᠭᠡᠵᠦ ᠢᠲᠡᠭᠡᠨᠡ᠃ ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠭᠤᠷᠪᠠᠨ ᠵᠢᠰᠢᠶᠠ ᠶ᠋ᠢ《ᠠᠷᠭᠠ ᠦᠭᠡᠢ ᠠᠮᠠᠷᠠᠭ》 ᠲᠠᠢ ᠬᠣᠯᠢᠬᠤ ᠨᠢ ᠤᠳᠬᠠ ᠦᠭᠡᠢ ᠬᠡᠷᠡᠭ ᠪᠣᠯᠤᠨᠠ᠃ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠨᠢ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠡᠴᠦᠰ ᠦ᠋ᠨ ᠪᠦᠯᠦᠭ ᠲᠦ᠍ ᠬᠣᠷᠮᠣᠢ ᠶ᠋ᠢᠨ ᠲᠤᠩ ᠪᠣᠯᠵᠤ ᠬᠤᠪᠢᠷᠠᠳᠠᠭ ᠲᠠᠪᠢᠯᠠᠩ ᠲᠠᠢ᠂ ᠡᠢᠮᠦ ᠲᠤᠩ ᠱᠦᠭᠯᠡᠭᠰᠡᠨ ᠬᠥᠮᠦᠨ ᠬᠤᠷᠢᠴᠠᠯ ᠬᠤᠶᠠᠯᠢ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠦ᠍ ᠪᠣᠳᠣᠵᠤ ᠰᠡᠳᠬᠢᠬᠦ ᠪᠡᠨ ᠪᠠᠢᠵᠤ ᠤᠷᠢᠨ ᠲᠠᠴᠢᠶᠠᠩᠭᠤᠢ ᠳ᠋ᠤ᠌ ᠪᠤᠳᠤᠭᠯᠤᠭᠤᠯᠵᠣ᠂ ᠤᠵᠢᠳ ᠵᠠᠪᠬᠠᠢ᠂ ᠪᠤᠰᠤᠷᠮᠠᠭ ᠶᠠᠪᠤᠳᠠᠯᠲᠠᠨ ᠪᠣᠯᠤᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠬᠣᠷᠮᠣᠢ ᠶ᠋ᠢᠨ ᠲᠤᠩ ᠵᠠᠯᠠᠭᠤ ᠽᠠᠨᠳᠠᠨ ᠴᠠᠭ ᠠ᠋ᠴᠠ ᠪᠠᠨ ᠳᠤᠷᠠ ᠲᠠᠴᠢᠶᠠᠯ ᠢ᠋ᠶ᠋ᠠᠨ ᠬᠢᠮᠠᠭᠠᠳᠠᠬᠤ ᠦᠭᠡᠢ ᠵᠣᠷᠢᠭ ᠢ᠋ᠶ᠋ᠠᠷ ᠨᠢ ᠪᠠᠢᠯᠭᠠᠭᠰᠠᠨ ᠤ᠋ ᠱᠠᠩ ᠶᠤᠮ᠃ ᠭᠡᠬᠦ ᠳ᠋ᠦ᠍ ᠬᠡᠴᠢᠨᠡᠨ ᠦᠷᠡ ᠬᠡᠦᠬᠡᠳ᠂ ᠬᠠᠨᠢ ᠢᠵᠢᠯᠢ ᠲᠡᠢ ᠪᠠᠢᠯᠠ ᠴᠦ᠍ ᠭᠡᠰᠡᠨ ᠲᠡᠷᠡ ᠪᠦᠷᠢ ᠶ᠋ᠢ ᠲᠠᠭᠠᠰᠢᠶᠠᠯ ᠥᠭᠴᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠶ᠋ᠢ ᠬᠡᠯᠡᠬᠦ ᠬᠡᠷᠡᠭᠲᠡᠢ᠃ ᠺᠸᠷᠮᠠᠨ ᠤ᠋ ᠡᠷᠳᠡᠮᠲᠡᠨ ᠵ·ᠱᠨᠠᠪᠯᠢ ᠶ᠋ᠢᠨ ᠨᠡᠷᠡ ᠦᠭᠡᠢ ᠬᠠᠭᠤᠳᠠᠰᠤ ᠪᠠᠷ ᠬᠢᠭᠰᠡᠨ ᠰᠤᠳᠤᠯᠭᠠᠨ ᠢ᠋ᠶ᠋ᠠᠷ᠂ ᠭᠡᠷ ᠪᠦᠯᠢ ᠲᠡᠢ ᠡᠮᠡᠭᠲᠡᠢᠴᠦᠳ ᠦ᠋ᠨ25%᠂ ᠭᠡᠷ ᠪᠦᠯᠢ ᠲᠡᠢ ᠡᠷᠡᠭᠲᠡᠢᠴᠦᠳ ᠦ᠋ᠨ43% ᠨᠢ ᠨᠢᠭᠡ ᠤᠳᠠᠭᠠ ᠪᠤᠶᠤ ᠨᠢᠭᠡ ᠪᠤᠰᠤ ᠤᠳᠠᠭᠠ ᠥᠭᠡᠷᠡ ᠬᠥᠮᠦᠨ ᠲᠡᠢ《ᠤᠨᠲᠠᠵᠤ》 ᠦᠵᠡᠬᠦ ᠶᠦᠮ ᠰᠠᠨ ᠭᠡᠵᠦ ᠬᠦᠰᠡᠭᠰᠡᠨ ᠪᠠᠢᠨᠠ᠃ ᠲᠡᠷᠡ ᠨᠢ ᠨᠠᠰᠤ ᠠᠬᠢᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠢᠩᠭᠢᠬᠦ ᠡᠷᠡᠮᠡᠯᠵᠡᠯ ᠡᠷᠡᠭᠲᠡᠢᠴᠦᠳ ᠲᠦ᠍ ᠤᠯᠠᠮ ᠦᠰᠦᠨ ᠨᠡᠮᠡᠭᠳᠡᠬᠦ ᠬᠠᠨᠳᠤᠯᠭᠠ ᠲᠠᠢ ᠠᠵᠠᠢ᠃ ᠵ·ᠱᠨᠠᠪᠯᠢ ᠶ᠋ᠢᠨ ᠪᠢᠴᠢᠭᠰᠡᠨ ᠢ᠋ᠶ᠋ᠡᠷ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠣᠷᠣᠬᠤ ᠦᠨᠳᠦᠰᠦᠨ ᠰᠢᠯᠲᠠᠭᠠᠨ ᠪᠣᠯ ᠭᠡᠷ ᠪᠦᠯᠢ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠵᠠᠯᠬᠠᠬᠤ ᠶᠠᠪᠤᠳᠠᠯ ᠠᠵᠠᠢ᠃ ᠬᠠᠷᠢᠨ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠬᠣᠷᠮᠣᠢ ᠶ᠋ᠢᠨ ᠰᠠᠯᠬᠢ ᠣᠷᠣᠬᠤ ᠰᠢᠯᠲᠠᠭᠠᠨ ᠨᠢ ᠡᠭᠦᠨ ᠡᠴᠡ ᠱᠠᠯ ᠥᠭᠡᠷᠡ᠂ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠤ᠋ ᠲᠠᠯᠠ ᠪᠠᠷ ᠰᠡᠳᠬᠢᠯ ᠬᠠᠨᠤᠮᠵᠢ ᠦᠭᠡᠢ ᠪᠠᠢᠬᠤ ᠶᠠᠪᠤᠳᠠᠯ ᠶᠤᠮ᠃
ᠡᠢᠮᠦ ᠡᠴᠡ ᠬᠠᠨᠢᠯᠠᠭᠰᠠᠨ ᠬᠣᠶᠠᠷ ᠬᠡᠨ ᠬᠡᠨ ᠦ᠌ ᠬᠣᠷᠮᠣᠢ ᠳ᠋ᠤ᠌ ᠰᠠᠯᠬᠢ ᠣᠷᠣᠬᠤ ᠠ᠋ᠴᠠ ᠰᠡᠷᠡᠮᠵᠢᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠳᠠᠷᠠᠭᠠᠬᠢ ᠬᠡᠳᠦᠨ ᠵᠦᠢᠯ ᠢ᠋ ᠠᠩᠬᠠᠷᠬᠤ ᠬᠡᠷᠡᠭᠲᠡᠢ᠃ ᠡᠷᠡ ᠨᠥᠬᠥᠷ ᠴᠢᠨᠢ ᠬᠤᠷᠢᠴᠠᠯ ᠦᠢᠯᠡᠳᠬᠦ ᠭᠠᠭᠴᠠᠬᠠᠨ ᠶᠠᠩᠵᠤ ᠶ᠋ᠢᠨ ᠪᠠᠢᠷᠢᠯᠠᠯ ᠳ᠋ᠤ᠌ ᠳᠠᠰᠴᠢᠬᠠᠭᠠᠳ ᠡᠢᠮᠦ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠵᠤ ᠪᠣᠯᠬᠤ ᠶᠤᠮ᠃ ᠡᠢᠮᠦ ᠳ᠋ᠦ᠍ ᠡᠷᠡ ᠡᠮᠡ ᠬᠤᠷᠢᠴᠠᠯ ᠦᠢᠯᠡᠳᠬᠦ ᠪᠠᠢᠷᠢᠯᠠᠯ ᠢ᠋ᠶ᠋ᠠᠨ ᠦᠶᠡ ᠦᠶᠡ ᠰᠡᠯᠭᠦᠨ ᠥᠭᠡᠷᠡᠴᠢᠯᠡᠵᠦ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠡᠷᠡ ᠨᠥᠬᠥᠷ ᠴᠢᠨᠢ ᠢᠯᠢᠨ ᠲᠠᠭᠠᠯᠠᠬᠤ ᠳ᠋ᠤ᠌ ᠶᠠᠭᠠᠬᠢᠬᠤ ᠴᠣ ᠦᠭᠡᠢ ᠪᠠᠢᠪᠠᠯ ᠲᠡᠭᠦᠨ ᠢ᠋ ᠣᠯᠠᠨ ᠶᠠᠩᠵᠤ ᠪᠣᠯᠭᠠᠬᠤ ᠬᠡᠷᠡᠭᠲᠡᠢ᠃ ᠲᠡᠷᠡ ᠪᠡᠷ ᠲᠠᠨ ᠢ᠋ ᠲᠠᠩᠳᠠ ᠡᠮᠦᠰᠳᠡᠭ ᠳᠠᠩ ᠳᠡᠪᠡᠯ ᠲᠡᠷᠯᠢᠭ ᠲᠦ᠍ ᠨᠢᠳᠦ ᠳᠠᠰᠴᠢᠬᠠᠵᠤ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠪᠡᠶᠡ ᠪᠡᠨ ᠲᠣᠷᠳᠠᠵᠤ᠂ ᠲᠡᠷᠯᠢᠭ᠂ ᠳᠡᠪᠡᠯ ᠢ᠋ᠶ᠋ᠡᠨ ᠴᠡᠪᠡᠷ ᠴᠡᠮᠴᠡᠭᠡᠷ ᠡᠮᠦᠰᠬᠦ ᠬᠡᠷᠡᠭᠲᠡᠢ᠃ ᠨᠥᠬᠥᠷ ᠴᠢᠨᠢ ᠦᠷᠭᠦᠯᠵᠢ ᠡᠷᠡᠦ ᠶ᠋ᠢᠨ ᠱᠥᠯᠥ ᠤᠤᠭᠤᠵᠤ᠂ ᠵᠠᠩᠨᠠᠭᠤᠯᠵᠤ ᠰᠠᠭᠤᠬᠤ ᠠ᠋ᠴᠠ ᠪᠠᠨ ᠵᠠᠯᠬᠠᠭᠰᠠᠨ ᠪᠠᠢᠵᠤ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠲᠡᠭᠦᠨ ᠢ᠋ ᠨᠢᠭᠡ ᠣᠷᠣᠢ ᠴᠦ᠍ ᠭᠡᠰᠡᠨ ᠠᠮᠠᠷᠠᠭᠠᠵᠤ᠂ ᠺᠢᠨᠣ᠋ ᠰᠢ ᠶᠦᠮ ᠤᠤ ᠪᠥᠵᠢᠭ ᠲᠦ᠍ ᠶᠠᠪᠤ᠃ ᠨᠥᠬᠥᠷ ᠴᠢᠨᠢ ᠬᠢᠬᠦ ᠶᠠᠭᠤᠮᠠ ᠦᠭᠡᠢ ᠪᠣᠯ ᠨᠠᠢᠵᠠ ᠨᠥᠬᠥᠷ ᠲᠡᠢ ᠪᠡᠨ ᠨᠢᠭᠡ ᠡᠳᠦᠷ ᠶᠠᠷᠢᠵᠤ ᠰᠠᠭᠤᠭᠠᠳ ᠢᠷᠡᠭ ᠯᠠ ᠳᠠ᠃ ᠡᠨᠡ ᠪᠣᠯ ᠲᠡᠭᠦᠨ ᠢ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠳᠣᠷᠭᠢᠭᠤᠯᠵᠤ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠭᠠᠷᠭᠠ ᠭᠡᠰᠡᠨ ᠦᠭᠡ ᠪᠢᠰᠢ᠃ ᠭᠡᠪᠡᠴᠦ ᠦᠶᠡ ᠦᠶᠡ ᠡᠷᠬᠡ ᠴᠢᠯᠥᠭᠡ ᠲᠡᠢ ᠪᠠᠢᠯᠭᠠᠬᠤ ᠬᠡᠷᠡᠭᠲᠡᠢ᠃ ᠡᠷᠡ ᠨᠥᠬᠥᠷ ᠴᠢᠨᠢ ᠨᠢᠭᠡ ᠶᠠᠩᠵᠤ ᠶ᠋ᠢᠨ ᠣᠷᠴᠢᠨ ᠨᠥᠬᠥᠴᠡᠯ ᠳ᠋ᠦ᠍᠂ ᠨᠢᠭᠡ ᠯᠡ ᠶᠠᠩᠵᠤ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠪᠠᠢᠭᠠᠳ ᠪᠦᠷ ᠵᠠᠯᠬᠠᠭᠰᠠᠨ ᠪᠠᠢᠵᠤ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠡᠭᠡᠯᠵᠢ ᠶ᠋ᠢᠨ ᠠᠮᠠᠷᠠᠯᠲᠠ ᠪᠠᠨ ᠵᠥᠷᠢᠭᠦᠯᠵᠦ ᠠᠪᠬᠤ ᠨᠢ ᠳᠡᠭᠡᠷᠡ᠃ ᠡᠷᠡ ᠨᠥᠬᠥᠷ ᠴᠢᠨᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠠᠮᠠᠷᠠᠯᠲᠠ ᠳ᠋ᠤ᠌ ᠶᠠᠪᠤᠭ ᠯᠠ ᠳᠠ᠃ ᠭᠡᠪᠡᠴᠦ ᠠᠮᠠᠷᠠᠯᠲᠠ ᠠ᠋ᠴᠠ ᠡᠷᠭᠢᠵᠦ ᠢᠷᠡᠬᠦ ᠳ᠋ᠡᠭᠡᠨ ᠰᠢᠨᠡᠬᠡᠨ ᠠᠮᠠᠷᠠᠭ ᠲᠠᠭᠠᠨ ᠣᠴᠢᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠭᠡᠷ ᠲᠡᠭᠡᠨ ᠶᠠᠭᠠᠷᠠᠵᠤ ᠲᠠᠨ ᠢ᠋ ᠤᠯᠠᠮ ᠬᠠᠢᠷᠠᠯᠠᠬᠤ ᠪᠣᠯᠤᠨᠠ ᠰᠢᠦ᠃