ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠠᠷᠪᠠᠨ ᠳᠥᠷᠪᠡ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 14
580ᠤᠷᠢᠳ ᠡᠮᠦᠨᠡ ᠦᠵᠡᠭᠳᠡᠭᠡ ᠦᠭᠡᠢ ᠶᠠᠭᠤᠮᠠ
ᠠᠷᠤ ᠳ᠋ᠤ᠌ ᠬᠦᠷᠴᠢᠭᠢᠨᠡᠭᠰᠡᠨ ᠬᠠᠴᠢᠨ ᠴᠢᠮᠡᠭᠡ ᠭᠠᠷᠴᠠᠢ᠃ ᠰᠣᠴᠢᠨ ᠬᠠᠷᠠᠵᠠᠭᠠᠬᠤ ᠳ᠋ᠤ᠌ ᠤᠷᠲᠤ ᠪᠠᠨ ᠬᠣᠶᠠᠷ ᠪᠦᠯᠲᠡᠭᠡᠷ ᠨᠢᠳᠦ ᠰᠢᠭ ᠶᠠᠭᠤᠮᠠ ᠲᠠᠢ ᠲᠣᠮᠣ ᠬᠠ ᠬᠠᠷᠠ ᠶᠠᠭᠤᠮᠠ ᠵᠠᠢ ᠵᠠᠪᠰᠠᠷ ᠦᠭᠡᠢ ᠴᠤᠪᠤᠷᠠᠭᠰᠠᠨ ᠭᠠᠮᠢᠩ ᠤ᠋ᠳ ᠲᠠᠢ ᠵᠠᠮ ᠪᠤᠯᠢᠶᠠᠯᠳᠤᠨ ᠣᠪᠣᠯᠵᠠᠨ ᠠᠢᠰᠤᠢ ᠶᠠᠪᠤᠨᠠ᠃ ᠡᠨᠡ ᠪᠣᠯ ᠳ᠋ᠢᠸᠢᠽᠢ ᠶ᠋ᠢᠨ ᠳᠠᠷᠤᠭᠠ ᠵᠣᠣ ᠴᠢ ᠮᠢᠨ ᠪᠤᠰᠤᠳ ᠬᠥᠮᠦᠨ ᠲᠡᠢ ᠴᠢᠴᠸᠨ ᠲᠡᠷᠭᠡ ᠪᠡᠷ ᠶᠠᠪᠤᠭᠠ ᠨᠢ ᠪᠠᠢᠵᠠᠢ᠃ ᠵᠢᠩᠴᠢᠳ ᠲᠡᠳᠡᠨ ᠦ᠌ ᠬᠡᠨ ᠪᠣᠯᠬᠤ ᠶ᠋ᠢ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃
ᠳ᠋ᠠᠨᠽᠡᠨ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠲᠡᠷᠡ ᠣᠪᠣᠭᠠᠨ ᠳᠠᠪᠬᠢᠭᠴᠢ ᠬᠠᠷᠠ ᠶᠠᠭᠤᠮᠠᠨ ᠳᠡᠭᠡᠷᠡ ᠴᠢᠭ ᠥᠭᠡᠳᠡ ᠪᠡᠨ ᠭᠣᠵᠣᠢᠭᠰᠠᠨ ᠴᠠᠭᠠᠨ ᠣᠲᠣᠭ ᠲᠠᠢ ᠬᠥᠮᠦᠰ ᠰᠠᠭᠤᠭᠰᠠᠨ ᠢ᠋ ᠦᠵᠡᠪᠡ᠃ ᠳᠠᠷᠠᠭᠠ ᠳ᠋ᠤᠨᠢ ᠳᠣᠣᠷᠠ ᠨᠢ ᠳᠥᠷᠪᠡᠨ ᠳᠤᠭᠤᠢ ᠵᠢᠷᠢᠯᠵᠡᠨ ᠥᠩᠭᠡᠷᠡᠬᠦ ᠶ᠋ᠢ ᠦᠵᠡᠭᠡᠳ ᠤᠷᠲᠤ ᠪᠠᠨ ᠬᠥᠯᠯᠦᠭᠰᠡᠨ ᠮᠣᠷᠢ ᠦᠭᠡᠢ᠂ ᠦᠬᠡᠷ ᠴᠦ᠍ ᠦᠭᠡᠢ᠂ ᠶᠠᠳᠠᠵᠤ ᠡᠯᠵᠢᠭᠡ ᠴᠦ᠍ ᠦᠭᠡᠢ ᠠᠲᠠᠯᠠ ᠪᠠᠨ ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠬᠤᠷᠳᠤᠯᠠᠨᠠ ᠪᠣᠢ ᠭᠡᠵᠦ ᠭᠠᠢᠬᠠᠨᠠ᠃ ᠴᠢᠴᠧ ᠶ᠋ᠢᠨ ᠳᠠᠭᠤ ᠪᠠᠨ ᠤᠯᠠᠮ ᠴᠢᠩᠭᠠᠷᠠᠭᠤᠯᠤᠨ ᠬᠤᠷᠳᠤᠯᠠᠵᠤ ᠵᠢᠩᠴᠢᠳ ᠦ᠋ᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠪᠡ᠃ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠲᠦ᠍ ᠬᠡᠩᠰᠢᠭᠦᠦ ᠬᠢᠷᠪᠤᠰᠤ ᠰᠢᠭ᠋ ᠶᠠᠭᠤᠮᠠ ᠦᠨᠦᠷᠲᠦᠨᠡ᠃
— ᠡᠨᠡ ᠶᠠᠭᠤ ᠭᠡᠭᠴᠢ ᠪᠣᠢ? ᠭᠡᠵᠦ ᠳ᠋ᠠᠨᠽᠡᠨ ᠬᠦᠷᠡᠯ ᠡᠴᠡ ᠠᠰᠠᠭᠤᠭᠰᠠᠨ ᠳ᠋ᠤ᠌᠄ ᠬᠦᠷᠡᠯ ᠨᠣᠭᠣᠭᠠᠨ ᠨᠢᠳᠦ ᠪᠡᠨ ᠳ᠋ᠠᠨᠽᠡᠨ ᠦ᠌ ᠨᠢᠭᠤᠷ ᠲᠤ ᠳᠤᠰᠬᠠᠨ᠄
— ᠴᠢᠴᠧ᠂ ᠥᠪᠡᠷ ᠢ᠋ᠶ᠋ᠡᠨ ᠶᠠᠪᠤᠳᠠᠭ ᠴᠢᠴᠧ ᠭᠡᠳ ᠴᠢᠴᠧ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠰᠢᠷᠲᠡᠪᠡ᠃
ᠳ᠋ᠠᠨᠽᠡᠨ ᠤᠷᠢᠳ ᠡᠮᠦᠨᠡ ᠴᠢᠴᠧ ᠲᠡᠷᠭᠡ ᠭᠡᠵᠦ ᠣᠯᠠᠨᠲᠠ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠪᠠ᠃ ᠭᠡᠲᠡᠯᠡ ᠪᠠᠰᠠ ᠨᠤᠲᠤᠭ ᠠ᠋ᠴᠠ ᠭᠠᠷᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠲᠡᠢ《ᠴᠢᠭᠯᠡᠭᠡᠳ ᠢᠷᠡᠭᠰᠡᠨ ᠴᠢᠴᠧ ᠲᠡᠷᠭᠡ ᠨᠢ ᠴᠢᠬᠢ ᠨᠢ ᠮᠤᠯᠲᠤᠷᠠᠭᠠᠳ ᠤᠨᠠᠨᠠ᠂ ᠳᠤᠤᠭᠠᠷᠤᠭᠠᠳ ᠢᠷᠡᠭᠰᠡᠨ ᠭᠠᠮᠢᠩ ᠴᠢᠨᠳᠠᠷᠤᠤ ᠳᠤᠬᠤ ᠪᠠᠷ ᠢ᠋ᠶ᠋ᠠᠨ ᠪᠤᠤᠳᠠᠭᠤᠯᠤᠨ ᠰᠥᠨᠥᠨᠡ ᠳᠡ ᠠᠢ ᠬᠦ》 ᠭᠡᠵᠦ ᠳᠠᠭᠤᠯᠠᠳᠠᠭ ᠪᠣᠯᠤᠭᠰᠠᠨ ᠢ᠋ ᠮᠥᠨ ᠰᠠᠨᠠᠭᠰᠠᠨ ᠪᠥᠭᠡᠳ ᠴᠢᠴᠧ ᠲᠡᠷᠭᠡᠨ ᠦ᠌ ᠴᠢᠬᠢ ᠶᠠᠮᠠᠷ ᠪᠠᠢᠳᠠᠭ ᠢ᠋ ᠬᠠᠷᠠᠬᠤ ᠶ᠋ᠢ ᠬᠦᠰᠡᠨ ᠬᠣᠢᠨᠠ ᠠ᠋ᠴᠠ ᠨᠢ ᠬᠠᠷᠠᠪᠠ᠃ ᠴᠢᠴᠧ ᠬᠣᠯᠠᠳᠠᠨ ᠴᠢᠬᠢ ᠨᠢ ᠠᠯᠢ ᠬᠡᠳᠦᠢᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠵᠠᠢ᠃
— ᠴᠢᠴᠧ᠂ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠠᠷᠤ ᠳ᠋ᠤ᠌ ᠣᠴᠢᠨ ᠣ ᠣ — ᠠ ᠠ ᠣ ᠣ — ᠠ ᠠ᠁ ᠪᠠᠷᠬᠢᠷᠠᠨ ᠣᠪᠣᠯᠵᠠᠪᠠ᠃ ᠤᠷᠢᠳ ᠡᠮᠦᠨᠡ ᠲᠡᠢᠮᠦ ᠬᠠᠴᠢᠨ ᠠᠪᠢᠶᠠ ᠶ᠋ᠢ ᠲᠤᠭᠤᠯᠭᠠ ᠦᠭᠡᠢ ᠲᠡᠮᠡᠭᠡ ᠰᠡᠭᠦᠯᠴᠢ ᠡᠴᠡ ᠪᠡᠨ ᠦᠷᠭᠦᠨ᠂ ᠬᠥᠲᠥᠯᠵᠦ ᠶᠠᠪᠤᠭᠠ ᠬᠥᠮᠦᠰ ᠢ᠋ᠶ᠋ᠡᠨ ᠰᠠᠨᠳᠤᠷᠭᠠᠪᠠ᠃ ᠲᠡᠮᠡᠭᠡ ᠪᠣᠯ ᠨᠢᠭᠡ ᠶ᠋ᠢ ᠪᠡᠨ ᠦᠷᠭᠦᠬᠦ ᠪᠡᠷ ᠨᠥᠭᠦᠭᠡ ᠨᠢ ᠠᠶᠠᠯᠳᠤᠨ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠳᠠᠭᠠᠯᠳᠤᠳᠠᠭ ᠣᠯᠢᠭ ᠦᠭᠡᠢ ᠵᠠᠩ ᠲᠠᠢ ᠠᠮᠢᠲᠠᠨ ᠪᠢᠯᠡ᠃ ᠪᠦᠬᠦ ᠲᠡᠮᠡᠭᠡ ᠦᠷᠭᠦᠬᠦ ᠳᠣᠳᠣᠮ ᠴᠢᠴᠧ ᠳᠠᠭᠤ ᠴᠢᠮᠡᠭᠡ ᠤᠯᠠᠮ ᠢ᠋ᠶ᠋ᠠᠷ ᠴᠢᠩᠭᠠᠷᠠᠭᠤᠯᠤᠨ ᠬᠤᠷᠳᠤᠯᠠᠪᠠ᠃ ᠠᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠲᠠᠪᠢᠨ ᠭᠤᠷᠪᠠ ᠲᠡᠮᠡᠭᠡ ᠲᠤᠢᠯᠠᠨ ᠵᠦᠭ ᠪᠦᠷᠢ ᠳ᠋ᠦ᠍ ᠬᠠᠷᠠᠢᠯᠭᠠᠵᠤ ᠨᠢᠷᠤᠭᠤᠨ ᠳ᠋ᠠᠬᠢ ᠠᠴᠢᠶᠠ ᠪᠠᠨ ᠬᠣᠯᠠ ᠬᠣᠯᠠ ᠬᠠᠶᠠᠯᠠᠨ᠂ ᠡᠮᠦᠨᠡ ᠪᠡᠨ ᠲᠤᠯᠭᠠᠷᠠᠭᠰᠠᠨ ᠢ᠋ ᠨᠡᠪᠲᠡ ᠰᠢᠪᠲᠤ ᠲᠠᠭᠠᠷᠢᠨᠠ᠃ ᠬᠥᠲᠥᠯᠦᠨ ᠶᠠᠪᠤᠭᠰᠠᠳ ᠨᠢ ᠠᠯᠢ ᠬᠡᠳᠦᠢᠨ ᠦ᠌ ᠪᠤᠷᠠᠨᠲᠠᠭ ᠬᠠᠶᠠᠨ ᠵᠢᠭᠤᠲᠠᠵᠤ ᠴᠤᠪᠤᠭᠠᠨ ᠶᠠᠪᠤᠭᠠ ᠪᠦᠬᠦᠨ ᠲᠠᠯᠠ ᠲᠠᠯᠠ ᠲᠠᠢᠰᠢ ᠪᠠᠨ ᠪᠤᠲᠠᠷᠠᠪᠠ᠃ ᠲᠡᠷᠭᠡᠨ ᠳ᠋ᠦ᠍ ᠬᠥᠯᠦᠭᠰᠡᠨ ᠮᠣᠷᠢ᠂ ᠯᠠᠭᠤᠰᠠ᠂ ᠡᠯᠵᠢᠭᠡ ᠴᠥᠮ ᠲᠤᠢᠯᠠᠨ ᠬᠥᠨᠳᠡᠯᠡᠨ ᠭᠣᠳᠣᠰ ᠳᠠᠪᠬᠢᠯᠠ᠃ ᠬᠠᠮᠢᠭᠠ ᠪᠣᠯ ᠳᠠᠭᠤ ᠴᠢᠮᠡᠭᠡ᠂ ᠦᠢᠮᠡᠭᠡᠨ ᠪᠤᠵᠢᠭᠢᠨᠠᠭᠠᠨ᠂ ᠬᠣᠮ ᠪᠠᠮᠪᠠᠢ ᠪᠠᠨ ᠴᠢᠷᠦᠭᠦᠯᠦᠭᠰᠡᠨ ᠮᠣᠷᠢ᠂ ᠯᠠᠭᠤᠰᠠ᠂ ᠡᠯᠵᠢᠭᠡ᠂ ᠫᠤᠤ ᠬᠦᠷᠲᠡᠯᠡ ᠳᠡᠰ ᠨᠢᠰ ᠳᠤᠤᠭᠠᠷᠤᠨᠠ᠃ ᠵᠢᠩᠴᠢᠳ ᠥᠭᠡᠷᠡ ᠴᠦ᠍ ᠦᠭᠡᠢ ᠰᠠᠨᠳᠤᠷᠤᠯᠠ᠃ ᠭᠤᠷᠪᠠᠭᠤᠯᠠ ᠵᠡᠷᠭᠡ ᠬᠠᠰᠬᠢᠷᠤᠨ ᠭᠦᠶᠦᠪᠡ᠃ ᠲᠡᠮᠡᠭᠡ ᠨᠦ᠍ᠭᠦᠳ ᠨᠢ ᠢᠵᠢᠯᠢ ᠳᠠᠰᠤᠯ ᠪᠣᠯᠤᠭᠰᠠᠨ ᠬᠥᠮᠦᠨ ᠦ᠌ ᠪᠡᠨ ᠳᠠᠭᠤ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠨᠣᠮᠣᠬᠠᠷᠠᠨ《ᠢᠪᠡᠭᠡᠯᠲᠦ ᠡᠵᠡᠨ ᠬᠠᠮᠢᠭᠠ ᠪᠣᠢ》 ᠭᠡᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠥᠭᠡᠮᠨᠡᠷᠡᠪᠡ᠃ ᠬᠦᠷᠡᠯ ᠲᠡᠮᠡᠭᠡᠨ ᠳᠣᠲᠣᠷᠠ ᠣᠷᠣᠵᠤ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠰᠠᠬᠢᠭᠤᠰᠤᠲᠤ ᠤᠯᠠᠭᠠᠨ ᠠᠳᠠ ᠪᠠᠨ ᠬᠦᠵᠦᠭᠦᠳᠡᠨ ᠠᠪᠤᠯᠠ᠃ ᠳ᠋ᠠᠨᠽᠡᠨ ᠠᠯᠤᠰ ᠢ᠋ ᠪᠠᠷᠢᠨ ᠭᠦᠶᠦᠵᠦ᠂ ᠠᠩᠬᠠ ᠠᠶᠠᠯᠠᠨ ᠭᠠᠷᠤᠭᠰᠠᠨ ᠡᠳᠦᠷ ᠡᠴᠡ ᠪᠡᠨ ᠵᠠᠩᠴᠢᠬᠦᠦ ᠬᠦᠷᠲᠡᠯᠡ ᠤᠨᠤᠭᠰᠠᠨ ᠲᠠᠢᠯᠤᠭ ᠤ᠋ᠨ ᠢ᠋ᠶ᠋ᠠᠨ ᠲᠤᠭ ᠰᠢᠷᠡᠭᠡ ᠪᠦᠬᠦ ᠪᠡᠨ ᠰᠣᠯᠪᠢᠯᠵᠠᠭᠤᠯᠤᠨ ᠭᠦᠶᠦᠨ ᠢᠷᠡᠬᠦ ᠳ᠋ᠦ᠍ᠨᠢ ᠴᠢᠷᠦᠭᠦᠯᠦᠨ ᠶᠠᠪᠤᠭᠠ ᠪᠤᠷᠠᠨᠲᠠᠭ ᠠ᠋ᠴᠠ ᠨᠢ ᠰᠢᠭᠦᠷᠡᠨ ᠠᠪᠴᠠᠢ᠃ ᠳᠡᠢᠯᠦᠭ ᠲᠠᠢᠪᠤᠰᠢᠷᠠᠨ ᠬᠥᠭᠡᠷᠦᠬᠦᠨ ᠲᠣᠯᠣᠭᠠᠢ ᠪᠠᠨ ᠳᠣᠷᠣᠭᠰᠢ ᠪᠠᠭᠤᠯᠭᠠᠨ ᠬᠤᠵᠢᠷ ᠤ᠋ᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠨᠣᠢᠲᠠᠨ ᠨᠡᠬᠡᠢ ᠳᠡᠪᠡᠯ ᠢ᠋ ᠨᠢ ᠦᠨᠦᠷᠯᠡᠭᠰᠡᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠲᠡᠳᠡᠨ ᠬᠠᠮᠠᠷ ᠳᠣᠷᠭᠢᠪᠠ᠃ ᠪᠦᠬᠦ ᠲᠡᠮᠡᠭᠡ ᠬᠠᠨᠢ ᠢᠵᠢᠯᠢ ᠪᠡᠨ ᠲᠡᠳᠡᠨ ᠨᠢᠭᠡᠨ ᠳᠣᠣᠷᠠ ᠴᠤᠭᠯᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠠᠳᠠ ᠦᠵᠡᠭᠳᠡᠨ ᠬᠡᠵᠢᠶᠡ ᠢᠮᠠᠭᠲᠠ ᠬᠦᠨᠳᠦ ᠶ᠋ᠢᠨ ᠶᠡᠬᠡ ᠶ᠋ᠢ ᠠᠴᠢᠭᠤᠯᠤᠨ ᠵᠢᠩ ᠦ᠋ᠨ ᠰᠡᠭᠦᠯ ᠳ᠋ᠦ᠍ ᠶᠠᠪᠤᠳᠠᠭ ᠳᠣᠭᠰᠢᠨ ᠬᠠᠷᠠ ᠪᠤᠤᠷᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠴᠦᠢᠯᠡᠨ ᠪᠠᠷᠠᠭᠤᠨ ᠲᠥᠪᠥᠭᠡᠷ ᠳᠡᠭᠡᠷᠡ ᠭᠠᠷᠤᠨ ᠴᠠᠭᠠᠰᠢ ᠶᠠᠪᠤᠬᠤ ᠬᠠᠨᠢ ᠦᠭᠡᠢ ᠳ᠋ᠡᠭᠡᠨ ᠭᠤᠨᠢᠬᠷᠠᠨ ᠵᠣᠭᠰᠣᠨᠠ᠃ ᠳᠣᠷᠵᠢ ᠶ᠋ᠢᠨ ᠭᠦᠶᠦᠨ ᠣᠴᠢᠬᠤ ᠳ᠋ᠤ᠌ ᠪᠠᠷᠠᠭᠤᠨ ᠵᠦᠭ ᠦ᠋ᠨ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ᠂ ᠵᠡᠭᠦᠨ ᠳᠣᠣᠷᠠ ᠬᠣᠴᠣᠷᠤᠭᠰᠠᠨ ᠬᠠᠨᠢ ᠢᠵᠢᠯᠢ ᠬᠣᠶᠠᠷ ᠢ᠋ᠶ᠋ᠠᠨ ᠡᠭᠡᠯᠵᠢᠯᠡᠨ ᠬᠠᠷᠠᠵᠤ《ᠪᠢᠳᠡ ᠢᠩᠭᠢᠭᠡᠳ ᠡᠨᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠢᠭᠤᠲᠠᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ?》 ᠭᠡᠰᠡᠨ ᠰᠢᠭ ᠪᠠᠢᠯᠠ᠃
ᠵᠢᠩᠴᠢᠳ ᠪᠦᠬᠦ ᠲᠡᠮᠡᠭᠡ ᠪᠡᠨ ᠴᠤᠭᠯᠠᠭᠤᠯᠵᠤ ᠠᠪᠤᠭᠠᠳ ᠳᠠᠬᠢᠨ ᠠᠴᠢᠶᠠᠯᠠᠪᠠ᠃ ᠬᠠᠮᠲᠤ ᠶᠠᠪᠤᠭᠴᠢ ᠭᠠᠮᠢᠩ ᠤ᠋ᠳ ᠰᠠᠶᠢ ᠶ᠋ᠢᠨ ᠲᠤᠢᠯᠠᠭᠠᠨ ᠳ᠋ᠤ᠌ ᠬᠠᠶᠠᠭᠳᠠᠭᠰᠠᠨ ᠬᠠᠢᠷᠴᠠᠭ ᠤ᠋ᠳ ᠢ᠋ ᠴᠢᠷᠴᠦ ᠭᠤᠯᠳᠤᠷᠢᠨ ᠠᠪᠴᠢᠷᠠᠵᠤ᠂ ᠡᠪᠳᠡᠷᠡᠨ ᠬᠡᠮᠬᠡᠷᠡᠭᠰᠡᠨ ᠢ᠋ ᠨᠢ ᠬᠠᠲᠠᠵᠤ ᠪᠠᠭᠯᠠᠨᠠ᠃ ᠰᠧᠯᠸᠳᠢ ᠲᠡᠢ ᠨᠣᠶᠠᠨ ᠬᠦᠷᠡᠯ ᠦ᠋ᠨ ᠬᠠᠨᠴᠤᠢ ᠠ᠋ᠴᠠ ᠬᠥᠲᠥᠯᠦᠨ ᠵᠡᠭᠦᠨ ᠲᠡᠢᠰᠢ ᠶᠠᠪᠤᠪᠠ᠃ ᠤᠷᠳᠤᠭᠤᠷ ᠨᠢ ᠮᠣᠷᠢᠨ ᠳ᠋ᠤ᠌ ᠬᠥᠯᠦᠭᠰᠡᠨ ᠦᠬᠡᠷ ᠫᠤᠤ ᠨᠤᠭᠤᠳ ᠴᠤᠪᠤᠨ ᠶᠠᠪᠤᠭᠰᠠᠨ ᠤ᠋ ᠳᠤᠮᠳᠠᠭᠤᠷ ᠭᠠᠷᠤᠯᠠ᠃ ᠲᠡᠨᠳᠡ ᠬᠣᠶᠠᠷ ᠲᠡᠮᠡᠭᠡ ᠣᠰᠣᠯᠳᠠᠭᠰᠠᠨ ᠪᠠᠢᠵᠠᠢ᠃ ᠨᠢᠭᠡ ᠨᠢ ᠬᠦᠷᠡᠯ ᠦ᠋ᠨ ᠥᠪᠡᠷ ᠦ᠋ᠨ ᠲᠡᠮᠡᠭᠡ᠃ ᠡᠵᠡᠨ ᠢ᠋ᠶ᠋ᠡᠨ ᠬᠠᠷᠠᠮᠠᠭᠴᠠ ᠭᠠᠵᠠᠷ ᠰᠤᠩᠭᠠᠨ ᠬᠠᠶᠠᠭᠰᠠᠨ ᠤᠷᠲᠤ ᠬᠦᠵᠦᠭᠦᠦ ᠪᠡᠨ ᠠᠯᠭᠤᠷ ᠡᠷᠭᠦᠨ ᠪᠣᠰᠬᠤ ᠶ᠋ᠢ ᠲᠡᠮᠦᠯᠦᠨ ᠥᠨᠳᠡᠢᠭᠰᠡᠨ ᠢ᠋ᠶ᠋ᠡᠨ ᠲᠡᠩᠬᠡᠯ ᠠᠯᠲᠠᠨ ᠳᠣᠷᠣᠭᠰᠢ ᠤᠨᠠᠪᠠ᠃ ᠬᠦᠷᠡᠯ ᠳᠡᠷᠭᠡᠳᠡ ᠨᠢ ᠣᠴᠢᠭᠠᠳ ᠲᠡᠭᠦᠨ ᠦ᠌ ᠶᠠᠭ ᠴᠡᠭᠡᠵᠢ ᠪᠡᠷ ᠨᠢ ᠫᠤᠤᠳᠠᠭᠤᠯᠤᠨ ᠬᠡᠳᠦᠨ ᠠᠯᠲᠠ ᠭᠠᠵᠠᠷ ᠤᠯᠠᠭᠠᠨ ᠴᠢᠰᠤᠨ ᠵᠠᠮ ᠴᠤᠪᠤᠷᠠᠭᠤᠯᠤᠭᠰᠠᠨ ᠢ᠋ ᠨᠢ ᠦᠵᠡᠯᠡ᠃ ᠣᠳᠣ ᠴᠦ᠍ ᠭᠡᠰᠡᠨ ᠴᠢᠰᠤ ᠨᠢ ᠵᠤᠷᠭᠠᠨ ᠳ᠋ᠠᠭᠠᠨ ᠤᠷᠤᠰᠤᠭᠰᠠᠭᠠᠷ ᠪᠠᠢᠵᠠᠢ᠃ ᠡᠢᠮᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠠᠮᠢ ᠥᠩᠭᠡᠷᠡᠭᠰᠡᠨ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠲᠡᠭᠦᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠵᠦ ᠪᠠᠢᠭᠠ ᠮᠡᠲᠦ ᠬᠤᠷᠴᠠ ᠰᠢᠳᠦ ᠪᠡᠨ ᠭᠠᠰᠠᠯᠠᠩ ᠤ᠋ᠨ ᠠᠪᠢᠶᠠ ᠪᠠᠷ ᠬᠠᠪᠢᠷᠤᠨ ᠬᠢᠬᠤᠲᠤᠨᠠᠭᠤᠯᠵᠤ ᠬᠡᠯᠡᠨ ᠦ᠌ ᠪᠡᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠰᠡᠲᠡᠷᠬᠡᠢ ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠣᠯᠢᠶᠠᠨ᠂ ᠲᠤᠩᠭᠠᠯᠠᠭ ᠨᠢᠳᠦᠨ ᠡᠴᠡ ᠨᠢ ᠪᠥᠭᠡᠮ ᠪᠥᠭᠡᠮ ᠨᠢᠯᠪᠤᠰᠤ ᠤᠨᠠᠨᠠ᠃ ᠬᠦᠷᠡᠯ ᠬᠠᠢᠷᠠᠯᠠᠨ ᠬᠠᠷᠠᠮᠰᠠᠬᠤ ᠳ᠋ᠠᠭᠠᠨ ᠳᠣᠲᠣᠷᠠ ᠬᠠᠷᠠᠩᠭᠤᠢᠯᠠᠪᠠ᠃ ᠦᠬᠦᠭᠰᠡᠨ ᠢ᠋ ᠨᠢ ᠭᠠᠵᠠᠷ ᠲᠠᠭᠠᠨ᠂ ᠠᠮᠢᠳᠤ ᠶ᠋ᠢ ᠨᠢ ᠶᠠᠪᠤᠳᠠᠯ ᠳ᠋ᠠᠭᠠᠨ ᠭᠡᠵᠦ ᠪᠠᠢᠳᠠᠭ ᠲᠤᠯᠠ ᠬᠠᠮᠠᠷ ᠤ᠋ᠨ ᠬᠢᠨᠢ ᠪᠤᠢᠯᠠ ᠮᠣᠳᠣ ᠶ᠋ᠢ ᠠᠪᠴᠤ ᠡᠪᠦᠷᠯᠡᠭᠡᠳ《ᠬᠣᠢᠲᠤ ᠨᠠᠰᠤᠨ ᠳ᠋ᠠᠭᠠᠨ ᠳᠡᠭᠡᠳᠦ ᠲᠥᠷᠥᠯ ᠳ᠋ᠦ᠍ ᠲᠥᠷᠥᠬᠦ ᠪᠣᠯᠲᠤᠭᠠᠢ》 ᠭᠡᠵᠦ ᠨᠢᠳᠦ ᠠᠨᠢᠨ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠨᠡᠨ᠂ ᠬᠠᠨᠴᠤᠢ ᠳ᠋ᠠᠭᠠᠨ ᠵᠠᠯᠪᠠᠷᠢᠪᠠ᠃ ᠳᠠᠷᠠᠭᠠ ᠨᠢ ᠰᠧᠯᠸᠳᠢ ᠲᠡᠢ ᠨᠣᠶᠠᠨ ᠳ᠋ᠤ᠌ ᠦᠬᠦᠬᠦ ᠶ᠋ᠢᠨ ᠲᠡᠮᠳᠡᠭ ᠢ᠋ ᠨᠢᠳᠦ ᠠᠨᠢᠨ᠂ ᠲᠣᠯᠣᠭᠠᠢ ᠳᠣᠷᠣᠭᠰᠢ ᠤᠨᠠᠭᠠᠬᠤ ᠪᠠᠷ ᠦᠵᠡᠭᠦᠯᠵᠡᠢ᠃
ᠬᠣᠶᠠᠳᠠᠬᠢ ᠲᠡᠮᠡᠭᠡ᠃ ᠳᠣᠷᠵᠢ ᠶ᠋ᠢᠨ ᠠᠩᠬᠠ ᠤᠳᠠᠭᠠ ᠠᠶᠠᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠭᠠ ᠳᠥᠷᠪᠡᠨ ᠨᠠᠰᠤᠲᠠᠢ ᠴᠠᠭᠠᠨ ᠲᠠᠢᠯᠤᠭ ᠪᠠᠢᠪᠠ᠃ ᠲᠡᠷᠡ ᠠᠮᠢᠲᠠᠨ ᠡᠭᠡᠭᠡ ᠯᠡ ᠬᠡᠦᠬᠡᠳ ᠰᠢᠭ ᠦᠶᠡ ᠮᠥᠴᠢ ᠪᠡᠨ ᠠᠲᠤᠷᠢᠭᠤᠯᠤᠨ᠂ ᠪᠢᠴᠢᠬᠠᠨ ᠴᠠᠭᠠᠨ ᠲᠣᠯᠣᠭᠠᠢ ᠪᠠᠨ ᠤᠭᠵᠢᠭᠤᠷ ᠪᠦᠬᠦᠨ ᠳ᠋ᠡᠭᠡᠨ ᠲᠤᠯᠭᠠᠨ ᠬᠠᠵᠠᠭᠤᠯᠳᠠᠨ ᠬᠡᠪᠲᠡᠨᠡ᠃ ᠴᠡᠪᠡᠷᠬᠡᠨ ᠪᠣᠷᠣ ᠲᠠᠤᠯᠠᠢ ᠬᠠᠮᠠᠷ ᠠ᠋ᠴᠠ ᠨᠢ ᠬᠦᠷᠡᠩ ᠬᠠᠷᠠ ᠴᠢᠰᠤ ᠭᠠᠷᠤᠭᠰᠠᠨ ᠠ᠋ᠴᠠ ᠨᠢ ᠬᠦᠷᠡᠯ᠂ ᠵᠢᠷᠦᠬᠡ ᠨᠢ ᠬᠠᠭᠠᠷᠠᠵᠤ ᠭᠡᠵᠦ ᠮᠡᠳᠡᠪᠡ᠃ ᠰᠧᠯᠸᠳᠢ ᠲᠡᠢ ᠨᠣᠶᠠᠨ ᠲᠡᠭᠦᠨ ᠢ᠋ ᠦᠵᠡᠮᠡᠭᠴᠡ ᠴᠢᠷᠠᠢ ᠬᠤᠪᠢᠷᠠᠭᠠᠨ《ᠬᠠᠢ ᠶᠠ!》 ᠭᠡᠵᠦ ᠳᠠᠭᠤ ᠠᠯᠳᠠᠪᠠ᠃ ᠪᠣᠳᠣᠪᠠᠯ ᠡᠨᠡ ᠬᠥᠮᠦᠨ ᠠᠷᠤ ᠳ᠋ᠠᠭᠠᠨ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠠᠢ ᠬᠥᠮᠦᠨ ᠪᠣᠯᠪᠠ ᠤᠤ᠃ ᠭᠡᠪᠡᠴᠦ ᠮᠠᠯ ᠢ᠋ ᠬᠠᠢᠷᠠᠯᠠᠨ ᠬᠦᠨᠳᠦᠳᠬᠡᠵᠦ ᠵᠠᠩᠰᠢᠭᠠ ᠦᠭᠡᠢ ᠳ᠋ᠡᠭᠡᠨ ᠲᠡᠮᠦᠷ ᠲᠣᠪᠣᠷᠤᠤᠲᠤ ᠬᠦᠨᠳᠦ ᠱᠠᠬᠠᠢ ᠪᠡᠷ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠢᠰᠬᠦᠯᠦᠨ ᠭᠠᠢᠬᠠᠨᠠ᠃ ᠬᠦᠷᠡᠯ ᠲᠠᠢᠯᠤᠭ ᠤ᠋ᠨ ᠪᠤᠢᠯᠠ ᠶ᠋ᠢ ᠲᠦᠷᠦᠭᠦᠴᠢ ᠶ᠋ᠢᠨ ᠠᠳᠠᠯᠢ ᠰᠤᠭᠤᠯᠤᠨ ᠠᠪᠴᠤ ᠡᠪᠦᠷᠯᠡᠨ ᠨᠣᠶᠠᠨ ᠤ᠋ ᠬᠠᠮᠲᠤ ᠪᠤᠴᠠᠪᠠ᠃
ᠳᠣᠷᠵᠢ᠂ ᠳ᠋ᠠᠨᠽᠡᠨ ᠬᠣᠶᠠᠷ ᠠᠴᠢᠶᠠᠯᠠᠨ ᠳᠠᠭᠤᠰᠴᠤ ᠲᠡᠮᠡᠭᠡ ᠨᠦ᠍ᠭᠦᠳ ᠢ᠋ ᠥᠪᠡᠷᠰᠡᠳ ᠦ᠋ᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠴᠤᠪᠤᠷᠠᠭᠤᠯᠤᠨ ᠪᠤᠷᠠᠨᠲᠠᠭ ᠬᠠᠪᠴᠢᠭᠤᠯᠤᠨ ᠬᠥᠳᠡᠯᠭᠡᠵᠦ ᠪᠠᠢᠯᠠ᠃ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠤᠨᠤᠬᠤ ᠲᠡᠮᠡᠭᠡ ᠭᠠᠷᠭᠠᠨ ᠠᠪᠤᠭᠰᠠᠨ ᠠᠵᠢ᠃ ᠠᠷᠤ ᠳ᠋ᠤᠨᠢ ᠬᠡᠳᠦᠨ ᠭᠠᠮᠢᠩ᠂ ᠨᠣᠶᠠᠨ ᠤ᠋ ᠰᠠᠭᠠᠷᠠᠯ ᠡᠯᠵᠢᠭᠡ ᠶ᠋ᠢ ᠬᠦᠷᠡᠯ ᠦ᠋ᠨ ᠤᠨᠤᠬᠤ ᠲᠡᠮᠡᠭᠡ ᠲᠡᠢ ᠪᠠᠷᠢᠨ ᠦᠯᠡᠳᠡᠵᠡᠢ᠃ ᠬᠦᠷᠡᠯ ᠢᠷᠡᠩᠭᠦᠲᠡ ᠪᠡᠨ ᠲᠡᠮᠡᠭᠡ ᠪᠡᠨ ᠬᠦᠯᠢᠶᠡᠨ ᠠᠪᠴᠤ ᠬᠡᠪᠲᠡᠭᠦᠯᠦᠨ ᠮᠣᠷᠳᠠᠬᠤ ᠭᠡᠲᠡᠯᠡ᠂ ᠨᠣᠶᠠᠨ ᠡᠯᠵᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠷᠤᠭᠤᠨ ᠳ᠋ᠠᠬᠢ ᠪᠢᠴᠢᠬᠠᠨ ᠪᠣᠭᠴᠣ ᠪᠠᠨ ᠠᠭᠤᠳᠠᠯᠤᠨ ᠬᠣᠶᠠᠷ ᠰᠢᠷᠬᠡᠭ ᠮᠠᠨᠲᠠᠤ᠂ ᠨᠢᠭᠡ ᠬᠠᠢᠷᠴᠠᠭ ᠶᠠᠩᠵᠤᠤᠷ ᠭᠠᠷᠭᠠᠨ ᠬᠦᠷᠡᠯ ᠳ᠋ᠦ᠍ ᠥᠭᠪᠡ᠃ ᠬᠦᠷᠡᠯ ᠳ᠋ᠦ᠍ ᠲᠡᠷᠡ ᠵᠦᠢᠯ ᠢ᠋ ᠠᠪᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠥᠯ ᠦ᠋ᠨ ᠤᠯᠠ ᠳ᠋ᠤ᠌ ᠨᠠᠭᠠᠯᠳᠤᠨ ᠰᠢᠭᠢᠳᠴᠦ ᠪᠠᠢᠭᠠ ᠰᠢᠪᠠᠷ ᠠ᠋ᠴᠠ ᠠᠪᠤᠨ ᠨᠢᠭᠤᠷ ᠤᠷᠤᠭᠤ ᠨᠢ ᠰᠢᠳᠡᠭᠦᠰᠢᠲᠡᠢ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠭᠡᠬᠦ ᠪᠠᠢᠲᠤᠭᠠᠢ ᠥᠭᠴᠦ ᠪᠠᠢᠭᠠ ᠵᠦᠢᠯ ᠢ᠋ ᠠᠪᠬᠤ ᠦᠭᠡᠢ ᠪᠣᠯ ᠡᠨᠡ ᠴᠢᠳᠬᠥᠷ ᠠᠭᠤᠷᠯᠠᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠳᠣᠨ ᠠᠪᠴᠤ《ᠰᠠᠢᠨ ᠰᠠᠢᠨ》 ᠭᠡᠮᠡᠨ ᠥᠪᠡᠷᠰᠡᠳ ᠦ᠋ᠨ ᠬᠢᠨᠢ ᠵᠠᠩᠰᠢᠯ ᠢ᠋ ᠳᠠᠭᠤᠷᠢᠶᠠᠨ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠭᠣᠵᠣᠢᠯᠭᠠᠪᠠ᠃ ᠨᠣᠶᠠᠨ ᠬᠠᠷᠢᠭᠤ ᠲᠠᠯᠠᠷᠬᠠᠨ ᠢᠨᠢᠶᠡᠨ ᠮᠥᠷᠦᠨ ᠳᠡᠭᠡᠷᠡ ᠨᠢ ᠴᠣᠬᠢᠨ ᠨᠠᠢᠵᠠᠷᠬᠠᠬᠤ ᠳ᠋ᠠᠭᠠᠨ᠂ ᠡᠯᠵᠢᠭᠡᠨ ᠳᠡᠭᠡᠷᠡ ᠪᠡᠨ ᠦᠰᠦᠷᠦᠨ ᠭᠠᠷᠴᠤ ᠰᠠᠢᠪᠤᠷᠯᠠᠭᠤᠯᠤᠨ ᠣᠳᠤᠯᠠ᠃ ᠬᠦᠷᠡᠯ ᠲᠡᠮᠡᠭᠡ ᠪᠡᠨ ᠤᠨᠤᠨ ᠬᠣᠢᠨᠠ ᠠ᠋ᠴᠠ ᠨᠢ ᠰᠠᠵᠢᠯᠠᠭᠤᠯᠪᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠭᠠᠮᠢᠩ ᠤ᠋ᠳ ᠫᠤᠤ ᠮᠥᠷᠥᠪᠴᠢᠯᠡᠨ ᠶᠠᠩᠵᠤᠤᠷ ᠭᠠᠷᠭᠠᠨ ᠪᠠᠭᠠᠭᠢᠭᠤᠯᠵᠤ ᠶᠠᠪᠤᠨᠠ᠃ ᠬᠦᠷᠡᠯ ᠮᠥᠨ ᠬᠠᠢᠷᠴᠠᠭ ᠲᠠᠢ ᠠ᠋ᠴᠠ ᠪᠠᠨ ᠨᠢᠭᠡ ᠶ᠋ᠢ ᠰᠤᠭᠤᠯᠤᠨ ᠠᠪᠴᠤ ᠳᠣᠷᠣᠭᠰᠢ ᠪᠥᠬᠥᠢᠨ ᠨᠢᠭᠡᠨ ᠦ᠌ ᠬᠢᠨᠢ ᠶᠠᠩᠵᠤᠤᠷ ᠤ᠋ᠨ ᠭᠠᠯ ᠠ᠋ᠴᠠ ᠠᠰᠠᠭᠠᠨ ᠲᠠᠲᠠᠪᠠ᠃ ᠨᠢᠯᠤᠭᠤᠨ ᠤᠲᠤᠭᠠ ᠨᠢ ᠵᠢᠷᠦᠬᠡᠨ ᠳ᠋ᠦ᠍ ᠭᠦᠷᠦᠨ ᠨᠢᠳᠦ ᠡᠷᠢᠶᠡᠯᠵᠡᠭᠦᠯᠦᠨᠡ᠃ ᠭᠡᠯᠡ ᠴᠦ᠍ ᠬᠦᠷᠡᠯ ᠠᠮᠠᠨ ᠳ᠋ᠠᠬᠢ ᠶᠠᠩᠵᠤᠤᠷ ᠢ᠋ᠶ᠋ᠠᠨ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠤᠭᠵᠠᠷᠠᠨ ᠰᠤᠷᠤᠨᠠ᠃ ᠡᠨᠡ ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠲᠣᠯᠣᠭᠠᠢ ᠳ᠋ᠤ᠌ ᠪᠠᠭᠤᠭᠰᠠᠨ ᠶᠡᠬᠡ ᠭᠠᠢ ᠭᠠᠮᠰᠢᠭ ᠢ᠋ ᠠᠭᠱᠠᠨ ᠵᠠᠭᠤᠷᠠ ᠪᠣᠯᠪᠠᠴᠤ ᠮᠠᠷᠲᠠᠬᠤ ᠶ᠋ᠢ ᠬᠦᠰᠡᠭᠰᠡᠨ ᠲᠡᠮᠡᠴᠡᠯ ᠪᠠᠢᠯᠠ᠃