ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠠᠷᠪᠠᠨ ᠭᠤᠷᠪᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 13
301ᠨᠢᠭᠤᠴᠠ ᠶᠠᠪᠤᠭᠤᠯᠭᠠ
ᠤᠨᠲᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠭᠤᠷᠪᠠ ᠠ᠋ᠴᠠ ᠳᠣᠷᠣᠭᠰᠢ ᠦᠭᠡᠢ ᠤᠩᠰᠢᠳᠠᠭ《ᠳ᠋ᠠᠷᠢ ᠡᠬᠡ》 ᠬᠡᠮᠡᠬᠦ ᠵᠠᠯᠪᠠᠷᠢᠯ ᠤ᠋ᠨ ᠨᠣᠮ ᠢ᠋ ᠴᠡᠭᠡᠵᠢ ᠪᠠᠷ ᠬᠦᠷᠴᠢᠭᠢᠨᠡᠭᠦᠯᠦᠨ ᠤᠩᠰᠢᠯᠠ᠃ ᠳᠣᠷᠵᠢ ᠲᠣᠯᠣᠭᠠᠢ ᠳᠡᠷᠡᠨ ᠳᠡᠭᠡᠷᠡ ᠲᠠᠯᠪᠢᠩᠭᠤᠲᠠ ᠪᠠᠨ ᠤᠨᠲᠠᠳᠠᠭ ᠶᠣᠰᠣᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠯᠢ ᠬᠡᠳᠦᠢᠨ ᠦ᠌ ᠲᠠᠴᠢᠭᠢᠨᠠᠲᠠᠯᠠ ᠬᠤᠷᠬᠢᠷᠠᠵᠤ ᠪᠠᠢᠯᠠ᠃ ᠳ᠋ᠠᠨᠽᠠᠨ ᠨᠥᠬᠥᠳ ᠡᠴᠡ ᠪᠡᠨ ᠲᠦᠷᠦᠭᠦᠯᠡᠨ ᠬᠡᠪᠲᠡᠭᠰᠡᠨ ᠪᠣᠯᠪᠠᠴᠤ ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠪᠣᠳᠣᠨ ᠤᠨᠲᠠᠬᠤ ᠨᠣᠢᠷ ᠨᠢ ᠬᠤᠯᠵᠢᠪᠠ᠃ ᠶᠠᠪᠤᠭᠰᠠᠨ ᠬᠥᠮᠦᠨ ᠶᠠᠰᠤ ᠵᠠᠭᠤᠨᠠ ᠭᠡᠭᠴᠢ ᠪᠡᠷ ᠳ᠋ᠠᠨᠽᠠᠨ᠂ ᠬᠦᠷᠡᠯ ᠳᠣᠷᠵᠢ ᠬᠣᠶᠠᠷ ᠠ᠋ᠴᠠ ᠪᠡᠶᠡ ᠬᠥᠯᠥᠰᠥ ᠪᠡᠨ ᠠᠪᠤᠭᠰᠠᠨ ᠪᠥᠭᠡᠳ ᠠᠪᠴᠢᠷᠠᠭᠰᠠᠨ ᠵᠦᠢᠯᠡᠰ ᠢ᠋ᠶ᠋ᠡᠨ ᠬᠦᠷᠡᠯ ᠦ᠋ᠨ ᠲᠤᠰᠠᠯᠠᠮᠵᠢ ᠲᠠᠢ ᠪᠠᠷ ᠪᠣᠷᠣᠯᠠᠭᠤᠯᠤᠭᠰᠠᠨ ᠠᠵᠢ᠃ ᠠᠪᠤᠭᠰᠠᠨ ᠵᠦᠢᠯᠡᠰ ᠨᠢ ᠡᠬᠡ᠂ ᠡᠭᠡᠴᠢ ᠬᠣᠶᠠᠷ ᠲᠤ ᠳᠡᠪᠡᠯ ᠦ᠋ᠨ ᠥᠩᠭᠡ ᠲᠤᠰ ᠪᠦᠷᠢ ᠨᠢᠭᠡ᠂ ᠱᠠᠭᠠ ᠵᠤᠯᠤᠭ ᠬᠣᠶᠠᠷ ᠳᠡᠭᠡᠷᠡ ᠪᠡᠨ ᠤᠭᠠᠯᠵᠠᠨ ᠯᠤᠤᠴᠢᠨ ᠭᠤᠲᠤᠯ ᠮᠥᠨ ᠲᠤᠰ ᠪᠦᠷᠢ ᠨᠢᠭᠡ᠂ ᠥᠪᠡᠷ ᠲᠡᠭᠡᠨ ᠭᠡᠪᠡᠯ᠄ ᠮᠥᠨ ᠯᠤᠤᠴᠢᠨ ᠭᠤᠲᠤᠯ᠂ ᠴᠠᠭᠠᠨ ᠢᠰᠡᠭᠡᠢ ᠲᠣᠭᠣᠷᠴᠣᠭ᠂ ᠲᠡᠮᠦᠷ ᠬᠡᠲᠡ᠂ ᠬᠢᠲᠤᠭᠠ ᠡᠳᠡᠭᠡᠷ ᠡᠴᠡ ᠭᠠᠳᠠᠨᠠ ᠬᠡᠳᠦᠢᠪᠡᠷ ᠲᠠᠮᠠᠬᠢ ᠲᠠᠲᠠᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠡᠷᠡ ᠶ᠋ᠢᠨ ᠴᠢᠨᠡᠭᠡᠨ ᠳ᠋ᠦ᠍ ᠭᠦᠷᠦᠨ ᠠᠶᠠᠨ ᠵᠢᠩ ᠳ᠋ᠦ᠍ ᠶᠠᠪᠤᠭᠰᠠᠨ ᠤ᠋ ᠪᠠᠨ ᠢᠳᠡ ᠪᠠᠬᠠ ᠶ᠋ᠢ ᠰᠠᠨᠠᠨ᠂ ᠭᠠᠩᠰᠠᠨ ᠤ᠋ ᠳᠥᠷᠪᠡᠨ ᠬᠤᠷᠤᠭᠤ ᠭᠠᠷᠤᠢ ᠲᠠᠢ ᠤᠷᠲᠤ ᠴᠠᠭᠠᠨ ᠰᠣᠷᠣᠭᠤᠯ ᠨᠢᠭᠡ ᠶ᠋ᠢ ᠠᠪᠴᠠᠢ᠃ ᠭᠡᠲᠡᠯᠡ ᠪᠠᠰᠠ ᠬᠡᠨ ᠦ᠌ ᠬᠡᠨ ᠪᠣᠯᠬᠤ ᠶ᠋ᠢ ᠬᠡᠨ ᠬᠥᠮᠦᠨ ᠦ᠌ ᠡᠮᠦᠨᠡ ᠬᠡᠯᠡᠬᠦ ᠪᠠᠢᠲᠤᠭᠠᠢ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠤᠷ ᠢ᠋ ᠨᠢ ᠬᠠᠷᠠᠬᠤ ᠪᠦᠷᠢ ᠳ᠋ᠡᠭᠡᠨ ᠢᠴᠢᠨ ᠳᠠᠯᠳᠢᠷᠠᠳᠠᠭ ᠨᠢᠭᠡᠨ ᠡᠮᠡᠭᠲᠡᠢ ᠳ᠋ᠦ᠍ ᠭᠤᠷᠪᠠᠨ ᠲᠣᠮᠣ ᠬᠣᠪ᠂ ᠠᠯᠲᠠᠨ ᠰᠢᠷᠠᠮᠠᠯ ᠡᠭᠡᠮᠦᠭ᠂ ᠨᠢᠭᠤᠷ ᠤ᠋ᠨ ᠪᠢᠴᠢᠬᠠᠨ ᠲᠣᠯᠢ ᠵᠡᠷᠭᠡ ᠶ᠋ᠢ ᠠᠪᠤᠭᠰᠠᠨ ᠶᠠᠪᠤᠳᠠᠯ ᠪᠣᠢ᠃ ᠡᠭᠦᠨᠴᠢᠯᠡᠨ ᠠᠢᠯ ᠠᠢᠮᠠᠭ ᠤ᠋ᠨ ᠬᠥᠮᠦᠰ ᠲᠦ᠍ ᠠᠮᠰᠠᠭᠤᠯᠬᠤ ᠪᠣᠣᠪᠣ ᠰᠢᠬᠢᠷ᠂ ᠵᠢᠮᠢᠰ ᠴᠢᠪᠠᠭᠠ ᠶ᠋ᠢᠨ ᠵᠦᠢᠯᠡᠰ ᠢ᠋ ᠪᠦᠷ ᠮᠠᠷᠲᠠᠭᠠ ᠦᠭᠡᠢ ᠪᠠᠢᠯᠠ᠃ ᠢᠢᠨ ᠬᠦ᠌ ᠪᠦᠬᠦ ᠶᠠᠭᠤᠮᠠ ᠪᠦᠷᠢᠨ ᠪᠦᠲᠦᠨ ᠵᠢᠩ ᠳᠠᠩ ᠪᠡᠯᠡᠨ ᠪᠣᠯᠤᠭᠰᠠᠨ ᠤ᠋ ᠳᠡᠭᠡᠷᠡ ᠫᠦᠰᠡᠨ ᠦ᠌ ᠵᠦᠭ ᠡᠴᠡ ᠢᠷᠡᠬᠦ ᠲᠡᠮᠡᠭᠡᠨ ᠦ᠌ ᠬᠥᠯᠥᠰᠥ ᠨᠢᠭᠡ ᠵᠠᠭᠤ ᠭᠤᠴᠢᠨ ᠶᠠᠩᠴᠢᠶᠠᠨ ᠢ᠋ ᠬᠦᠯᠢᠶᠡᠵᠦ ᠪᠠᠢᠭᠠ ᠪᠢᠯᠡ᠃ ᠳ᠋ᠠᠨᠽᠠᠨ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠡᠳᠦᠢ ᠶᠡᠬᠡ ᠣᠯᠵᠠ ᠶ᠋ᠢ ᠣᠯᠵᠤ ᠶᠠᠪᠤᠭᠠ ᠦᠭᠡᠢ ᠲᠤᠯᠠ ᠣᠳᠣ ᠣᠷᠴᠢᠯᠠᠩ ᠳ᠋ᠤ᠌ ᠣᠭᠲᠣ ᠥᠭᠡᠷᠡ ᠬᠥᠮᠦᠨ ᠪᠣᠯᠴᠢᠬᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠣᠯᠤᠭᠰᠠᠨ ᠣᠯᠵᠠ ᠪᠠᠷ ᠠᠪᠤᠭᠰᠠᠨ ᠶᠠᠭᠤᠮᠠ ᠪᠦᠬᠦᠨ ᠦ᠌ ᠦᠵᠡᠰᠬᠦᠯᠡᠩ ᠴᠠᠭ ᠢᠮᠠᠭᠲᠠ ᠰᠡᠳᠬᠢᠯ ᠳ᠋ᠦ᠍ ᠡᠷᠭᠢᠯᠳᠦᠨ᠂ ᠳᠠᠬᠢᠨ ᠳᠠᠬᠢᠨ ᠦᠵᠡᠭᠦᠰᠢᠲᠡᠢ ᠰᠠᠨᠠᠭᠳᠠᠨᠠ᠃ ᠬᠣᠢᠰᠢᠳᠠ ᠵᠢᠯ ᠦ᠋ᠨ ᠵᠢᠯ ᠳ᠋ᠦ᠍ ᠵᠠᠩᠴᠢᠬᠦᠦ ᠣᠷᠣᠵᠤ ᠢᠷᠡᠨ ᠣᠯᠵᠠ ᠣᠯᠵᠤ ᠪᠠᠶᠠᠵᠢᠬᠤ ᠲᠤᠬᠠᠢ ᠴᠦ᠍ ᠪᠣᠳᠣᠭᠳᠠᠨᠠ᠃ ᠠᠷᠭᠠ ᠪᠤᠶᠤ ᠨᠣᠢᠷᠣᠨ ᠳ᠋ᠤ᠌ ᠳᠠᠷᠤᠭᠳᠠᠨ ᠤᠨᠲᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠡᠭᠦᠳᠦ ᠮᠥᠨ ᠯᠡ ᠰᠠᠢᠬᠠᠨ᠃ ᠨᠥᠭᠦᠭᠡ ᠬᠡᠨ ᠦ᠌ ᠬᠡᠨ ᠪᠣᠯᠬᠤ ᠶ᠋ᠢ ᠬᠡᠨ ᠪᠦᠬᠦᠨ ᠳ᠋ᠦ᠍ ᠬᠡᠯᠡᠵᠦ ᠪᠣᠯᠳᠠᠭ ᠦᠭᠡᠢ ᠬᠡᠦᠬᠡᠨ ᠨᠢ ᠳ᠋ᠠᠨᠽᠠᠨ ᠤ᠋ ᠪᠡᠯᠡᠭᠯᠡᠭᠰᠡᠨ ᠭᠤᠷᠪᠠᠨ ᠲᠣᠮᠣ ᠰᠢᠷᠠ ᠬᠤᠪᠠ ᠶ᠋ᠢ ᠬᠦᠵᠦᠭᠦᠨ ᠳ᠋ᠡᠭᠡᠨ ᠵᠡᠭᠦᠭᠡᠳ᠂ ᠠᠯᠲᠠᠨ ᠰᠢᠷᠠᠮᠠᠯ ᠡᠭᠡᠮᠦᠭ ᠢ᠋ ᠮᠥᠨ ᠴᠢᠬᠢᠨ ᠳ᠋ᠡᠭᠡᠨ ᠵᠡᠭᠦᠭᠡᠳ ᠪᠠᠶᠠᠰᠤᠩᠭᠤᠢ ᠪᠠᠷ ᠢᠴᠢᠩᠭᠦᠷᠬᠡᠨ ᠢᠨᠢᠶᠡᠵᠦ ᠪᠠᠢᠭᠠ ᠨᠢ ᠤᠷᠢᠳᠤ ᠤᠷᠢᠳᠤ ᠶ᠋ᠢᠨ ᠬᠢ ᠡᠴᠡ ᠣᠨᠴᠠ ᠰᠠᠢᠬᠠᠨ ᠬᠠᠷᠠᠭᠳᠠᠪᠠ᠃ ᠳ᠋ᠠᠨᠽᠠᠨ ᠣᠳᠣ ᠳᠤᠷᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠯᠡᠷᠬᠡᠢᠯᠡᠬᠦ ᠰᠠᠨ ᠭᠡᠵᠦ ᠵᠣᠷᠢᠭᠯᠠᠨ ᠭᠠᠷ ᠢ᠋ ᠨᠢ ᠰᠢᠭᠦᠷᠡᠨ ᠠᠪᠬᠤ ᠳ᠋ᠤ᠌ ᠬᠡᠦᠬᠡᠨ ᠭᠠᠷ ᠢ᠋ᠶ᠋ᠠᠨ ᠤᠭᠵᠠ ᠲᠡᠳᠡᠨ ᠠᠪᠤᠭᠠᠳ ᠳᠠᠬᠢᠨ ᠪᠠᠷᠢᠵᠤ ᠠᠪᠬᠤ ᠭᠡᠬᠦ ᠳ᠋ᠦ᠍ ᠲᠡᠷᠡ ᠨᠢ᠄ ᠪᠢ ᠬᠠᠰᠬᠢᠷᠤᠯᠠ ᠰᠢᠦ! ᠭᠡᠳ ᠬᠠᠰᠬᠢᠷᠪᠠ᠃ ᠳ᠋ᠠᠨᠽᠠᠨ ᠬᠥᠮᠦᠨ ᠮᠡᠳᠡᠨ ᠣᠷᠣᠵᠤ ᠢᠷᠡᠨᠡ ᠭᠡᠵᠦ ᠤᠬᠠᠭᠠᠨ ᠦᠭᠡᠢ ᠠᠶᠤᠬᠤ ᠳ᠋ᠠᠭᠠᠨ ᠥᠨᠥᠬᠢ ᠬᠡᠦᠬᠡᠨ ᠢ᠋ ᠪᠠᠷᠢᠨ ᠠᠪᠴᠤ ᠠᠮᠠ ᠶ᠋ᠢ ᠨᠢ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠲᠠᠭᠯᠠᠪᠠ᠃
ᠭᠡᠲᠡᠯᠡ ᠤᠨᠲᠠᠭᠰᠠᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠦᠨᠡᠬᠡᠷ ᠬᠥᠮᠦᠰ ᠣᠷᠣᠵᠤ ᠢᠷᠡᠭᠰᠡᠨ ᠪᠠᠢᠵᠠᠢ᠃ ᠤᠴᠢᠷ ᠨᠢ ᠦᠯᠦ ᠣᠢᠯᠠᠭᠠᠭᠳᠠᠬᠤ ᠬᠡᠯᠡ ᠪᠡᠷ ᠬᠠᠰᠬᠢᠷᠤᠯᠳᠤᠬᠤ ᠳ᠋ᠤᠨᠢ ᠳ᠋ᠠᠨᠽᠠᠨ ᠰᠣᠴᠢᠨ ᠰᠡᠷᠢᠵᠦ ᠥᠨᠳᠡᠰᠬᠢᠪᠡ᠃ ᠬᠣᠢᠲᠤ ᠲᠠᠯᠠ ᠶ᠋ᠢᠨ ᠬᠠᠨᠵᠤᠨ ᠳᠡᠭᠡᠷᠡ ᠤᠨᠲᠠᠭᠰᠠᠨ ᠬᠦᠷᠡᠯ᠂ ᠳᠣᠷᠵᠢ ᠨᠠᠷ ᠤ᠋ᠨ ᠤᠷᠢᠳᠤ ᠡᠮᠦᠨᠡ ᠦᠵᠡᠭᠳᠡᠭᠡ ᠦᠭᠡᠢ ᠬᠤᠪᠴᠠᠰᠤ ᠲᠠᠢ ᠬᠥᠮᠦᠰ ᠴᠠᠭᠠᠰᠢ ᠬᠠᠷᠠᠨ ᠵᠣᠭᠰᠣᠵᠤ ᠬᠤᠴᠢᠯᠭᠠ ᠶ᠋ᠢ ᠨᠢ ᠬᠠᠭᠤᠯᠤᠨ ᠬᠠᠶᠠᠵᠤ ᠪᠠᠢᠯᠠ᠃ ᠲᠡᠳᠡᠨ ᠦ᠌ ᠳᠤᠮᠳᠠ ᠲᠠᠰᠢᠶᠠᠨ ᠳ᠋ᠠᠭᠠᠨ ᠮᠣᠳᠣᠨ ᠬᠤᠢ ᠲᠠᠢ ᠰᠸᠯᠸᠳᠢ ᠫᠤᠤ ᠵᠡᠭᠦᠭᠰᠡᠨ ᠨᠢᠭᠡ ᠬᠥᠮᠦᠨ ᠣᠯᠠᠨ ᠠ᠋ᠴᠠ ᠣᠨᠴᠠᠭᠠᠢ ᠦᠵᠡᠭᠳᠡᠨᠡ᠃ ᠪᠤᠰᠤᠳ ᠨᠢ ᠬᠢᠲᠤᠭᠠᠨ ᠵᠢᠳᠠ ᠲᠠᠢ ᠰᠧ ᠰᠠᠨ ᠯᠢ ᠫᠤᠤ ᠤᠷᠲᠤ ᠪᠠᠨ ᠪᠠᠷᠢᠭᠰᠠᠨ᠂ ᠥᠩᠭᠡ ᠰᠣᠯᠢᠭᠳᠠᠨ ᠭᠠᠩᠳᠠᠭᠰᠠᠨ ᠴᠤᠪᠠ ᠮᠡᠲᠦ ᠶ᠋ᠢ ᠡᠮᠦᠰᠦᠭᠰᠡᠨ ᠤᠯᠤᠰ ᠪᠠᠢᠪᠠ᠃ ᠵᠢᠩᠴᠢᠳ ᠲᠡᠳᠡᠨ ᠢ᠋ ᠭᠠᠮᠢᠩ ᠤ᠋ᠳ ᠪᠣᠯᠬᠤ ᠶ᠋ᠢ ᠲᠠᠨᠢᠯᠠ᠃ ᠴᠣᠬᠣᠮ ᠶᠠᠭᠠᠬᠢᠬᠤ ᠵᠣᠷᠢᠯᠭᠠ ᠲᠠᠢ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠨᠢ ᠮᠡᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠫᠤᠤ ᠲᠤᠯᠭᠠᠨ ᠬᠠᠰᠬᠢᠷᠤᠯᠳᠤᠵᠤ ᠬᠤᠪᠴᠠᠰᠤ ᠬᠤᠨᠠᠷ ᠤᠷᠤᠭᠤ ᠵᠢᠭᠠᠨ ᠱᠤᠤᠭᠢᠯᠳᠤᠭᠰᠠᠨ ᠤ᠋ ᠬᠣᠪᠢᠨ ᠳ᠋ᠤ᠌ ᠶᠠᠭᠠᠷᠠᠨ ᠬᠤᠪᠴᠠᠯᠠᠪᠠ᠃ ᠳᠠᠷᠠᠭᠠ ᠳ᠋ᠤᠨᠢ ᠭᠠᠳᠠᠭᠰᠢ ᠭᠠᠷᠬᠤ ᠶ᠋ᠢ ᠲᠣᠬᠢᠬᠤ ᠳ᠋ᠤᠨᠢ ᠮᠥᠨ ᠯᠡ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠭᠠᠷᠴᠠᠭᠠᠪᠠ᠃ ᠭᠠᠳᠠᠭᠠ ᠦᠦᠷ ᠴᠠᠢᠭᠰᠠᠨ ᠪᠣᠯᠪᠠ ᠤᠤ ᠭᠡᠯᠲᠡᠢ ᠪᠣᠯᠪᠠᠴᠤ ᠨᠡᠪᠰᠢᠷᠡᠭᠰᠡᠨ ᠬᠠᠷᠠ ᠡᠭᠦᠯᠡ ᠲᠩᠷᠢ ᠶ᠋ᠢ ᠪᠢᠲᠡᠭᠦᠦ ᠪᠦᠷᠬᠦᠨ ᠰᠥᠨᠢ ᠮᠡᠲᠦ ᠪᠠᠢᠭᠠ ᠪᠥᠭᠡᠳ ᠬᠠᠰᠢᠶᠠ ᠳᠦᠭᠦᠷᠡᠩ ᠭᠠᠮᠢᠩ ᠪᠠᠢᠭᠠ ᠨᠢ ᠯᠡ ᠲᠣᠳᠣᠬᠠᠨ ᠦᠵᠡᠭᠳᠡᠨᠡ᠃ ᠲᠠᠰᠢᠶᠠᠨ ᠳ᠋ᠠᠭᠠᠨ ᠰᠸᠯᠸᠳᠢ ᠫᠤᠤ ᠵᠡᠭᠦᠭᠰᠡᠨ ᠬᠥᠮᠦᠨ᠂ ᠪᠦᠭᠦᠳᠡ ᠶ᠋ᠢ ᠵᠠᠬᠢᠷᠬᠤ ᠨᠣᠶᠠᠨ ᠪᠣᠯᠤᠯᠲᠠᠢ᠃ ᠡᠮᠦᠨᠡ ᠨᠢ ᠢᠷᠡᠨ ᠦᠭᠡ ᠬᠡᠯᠡᠬᠦ ᠳᠦ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠭᠠᠷᠠᠨ ᠭᠠᠷ ᠡᠷᠭᠦᠵᠦ ᠰᠢᠨᠠᠨ ᠳ᠋ᠠᠭᠠᠨ ᠨᠠᠮᠠᠨᠴᠢᠯᠠᠨᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠲᠡᠷᠡ ᠬᠥᠮᠦᠨ ᠨᠢᠭᠡ ᠬᠣᠶᠠᠷᠬᠠᠨ ᠦᠭᠡ ᠬᠡᠯᠡᠵᠦ ᠪᠠᠢᠯᠠ᠃ ᠲᠡᠭᠡᠭᠡᠳ ᠭᠡᠨᠡᠳᠲᠡ ᠬᠡᠳᠦᠨ ᠦᠭᠡ ᠬᠠᠰᠬᠢᠷᠤᠨ ᠬᠡᠯᠡᠬᠦ ᠳ᠋ᠦ᠍ᠨᠢ ᠭᠠᠮᠢᠩ ᠤ᠋ᠳ ᠲᠡᠮᠡᠭᠡ ᠤᠷᠤᠭᠤ ᠭᠦᠶᠦᠯᠳᠦᠨ ᠪᠤᠷᠠᠨᠲᠠᠭ ᠢ᠋ ᠳᠡᠢᠯᠦᠯᠡ᠃ ᠬᠦᠦᠭᠢᠯᠡᠬᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠳᠡᠮᠡᠢ ᠬᠠᠰᠬᠢᠷᠤᠯᠳᠤᠨ ᠲᠣᠯᠣᠭᠠᠢ ᠲᠦᠷᠦᠭᠦᠦ ᠤᠷᠤᠭᠤ ᠨᠢ ᠴᠣᠬᠢᠯᠠᠵᠠᠢ᠃ ᠵᠠᠷᠢᠮ ᠲᠡᠮᠡᠭᠡᠨ ᠦ᠌ ᠶᠠᠷᠳᠠᠭᠯᠠᠨ ᠬᠡᠪᠢᠳᠡᠰᠦ ᠪᠡᠷ ᠢ᠋ᠶ᠋ᠡᠨ ᠪᠤᠯᠠᠬᠤ ᠳ᠋ᠤ᠌ ᠠᠶᠤᠨ ᠰᠦᠷᠳᠡᠵᠦ ᠵᠢᠭᠤᠲᠠᠨᠠ᠃ ᠶᠠᠮᠠᠷ ᠪᠣᠯᠪᠠᠴᠤ ᠵᠢᠩᠴᠢᠳ ᠳᠡᠭᠡᠷᠡᠮᠳᠡᠭᠳᠡᠨ ᠲᠣᠨᠣᠭᠳᠠᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠯᠡ᠃ ᠭᠠᠭᠴᠠ ᠬᠦ᠌ ᠳᠠᠩᠵᠢᠶᠠᠳ ᠢ᠋ ᠠᠪᠤᠷᠠᠵᠤ ᠮᠠᠭᠠᠳ ᠦᠭᠡᠢ ᠭᠡᠰᠡᠨ ᠳ᠋ᠡᠭᠡᠨ ᠪᠠᠢᠰᠢᠩ ᠤ᠋ᠨ ᠬᠢᠨᠢ ᠵᠦᠭ ᠪᠠᠢᠨ ᠪᠠᠢᠨ ᠰᠢᠷᠳᠡᠨᠡ᠃ ᠭᠡᠲᠡᠯᠡ ᠲᠡᠨᠳᠡ ᠡᠴᠡ ᠳᠠᠩᠵᠢᠶᠠᠳ ᠪᠠᠢᠲᠤᠭᠠᠢ ᠨᠣᠬᠠᠢ ᠴᠦ᠍ ᠠᠯᠠᠭᠠ᠃ ᠪᠦᠬᠦ ᠲᠡᠮᠡᠭᠡ ᠬᠥᠲᠥᠯᠦᠭᠳᠡᠨ ᠶᠡᠬᠡ ᠬᠠᠭᠠᠯᠭᠠ ᠪᠠᠷ ᠴᠤᠪᠤᠷᠠᠯᠳᠤᠨ ᠭᠠᠷᠬᠤ ᠳ᠋ᠤ᠌ ᠳᠣᠷᠵᠢ᠄
— ᠠ᠋ ᠬᠥᠭᠡᠷᠦᠬᠦᠢ ᠲᠡᠮᠡᠭᠡ ᠬᠥᠮᠦᠨ ᠦ᠌ ᠬᠢ ᠪᠣᠯᠪᠠ ᠭᠡᠵᠦ ᠲᠠᠢᠪᠤᠩ ᠮᠥᠷᠲᠡᠭᠡᠨ ᠭᠤᠨᠢᠭᠲᠠᠢᠬᠠᠨ ᠬᠡᠯᠡᠪᠡ᠃ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠠᠩᠬᠠ ᠤᠳᠠᠭᠠ ᠪᠠᠨ ᠭᠤᠨᠢᠨ ᠭᠤᠲᠤᠷᠠᠵᠤ ᠪᠠᠢᠭᠠ ᠨᠢ ᠯᠡ ᠡᠨᠡ ᠪᠠᠢᠵᠠᠢ᠃ ᠡᠳᠡ ᠶᠠᠮᠠᠷ ᠮᠢᠬᠠᠴᠢᠨ ᠪᠢᠰᠢ᠂ ᠪᠢᠳᠡ ᠨᠠᠷ ᠢ᠋ᠶ᠋ᠠᠷ ᠶᠠᠭᠠᠬᠢᠬᠤ ᠴᠦ᠍ ᠶᠤᠮ ᠪᠢᠯᠡ? ᠡᠨᠡ ᠳᠠᠷᠤᠢ ᠠᠷᠤ ᠳ᠋ᠤᠨᠢ ᠭᠠᠮᠢᠩ ᠳᠤᠤᠭᠠᠷᠴᠤ ᠣᠷᠣᠭᠰᠢ ᠲᠦᠯᠬᠢᠨ ᠲᠡᠮᠡᠭᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠵᠢᠭᠠᠪᠠ᠃ ᠲᠡᠨᠳᠡ ᠡᠴᠡ ᠭᠠᠷᠤᠭᠰᠠᠭᠠᠷ ᠵᠡᠭᠦᠨ ᠣᠷᠣᠭᠰᠢ ᠴᠢᠭᠯᠡᠪᠡ᠃ ᠬᠣᠲᠠ ᠶ᠋ᠢᠨ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠳᠠᠭᠠᠷᠢᠯᠳᠤᠭᠰᠠᠨ ᠪᠦᠬᠦᠨ ᠠᠶᠤᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ ᠠᠯᠤᠰ ᠢ᠋ᠶ᠋ᠠᠷ ᠲᠤᠭᠤᠷᠠᠨ ᠥᠩᠭᠡᠷᠡᠨᠡ᠃ ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠠᠬᠢ ᠨᠦᠬᠡᠨ ᠭᠡᠷ ᠦ᠋ᠳ ᠦ᠋ᠨ ᠳᠤᠮᠳᠠᠭᠤᠷ ᠶᠠᠪᠤᠬᠤ ᠪᠣᠯᠤᠯᠠ᠃ ᠡᠨᠳᠡ ᠨᠥᠭᠦᠭᠡ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠵᠤᠯᠭᠠᠭᠠᠳᠠᠭ ᠠᠢᠬᠤᠪᠲᠤᠷ ᠪᠠᠭᠠᠴᠤᠳ ᠪᠠᠢᠳᠠᠭ ᠪᠠᠢᠵᠠᠢ᠃ ᠥᠷᠯᠥᠭᠡᠨ ᠦ᠌ ᠲᠠᠷᠪᠠᠭᠠ ᠰᠢᠭ᠋ ᠡᠨᠳᠡ ᠲᠡᠨᠳᠡ ᠦᠭᠡᠢ ᠪᠤᠯᠲᠠᠢᠨ ᠴᠤᠬᠤᠢᠬᠤ ᠪᠣᠯᠪᠠᠴᠤ ᠭᠠᠮᠢᠩ ᠤ᠋ᠳ ᠠ᠋ᠴᠠ ᠠᠶᠤᠨ ᠦᠯᠦ ᠢᠷᠡᠨᠡ᠃ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠪᠡᠨ ᠫᠤᠤ ᠲᠠᠢ ᠮᠠᠨᠠᠭᠠ ᠵᠣᠭᠰᠣᠭᠠᠭᠰᠠᠨ ᠲᠣᠮᠣ ᠰᠢᠪᠠᠷ ᠬᠡᠷᠡᠮ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠵᠠᠢ᠃ ᠡᠨᠡ ᠪᠣᠯ ᠵᠣᠣ ᠴᠢ ᠮᠢᠨ ᠦ᠌ ᠳ᠋ᠢᠸᠢᠽᠢ ᠶ᠋ᠢᠨ ᠵᠡᠪᠰᠡᠭ ᠬᠠᠳᠠᠭᠠᠯᠠᠮᠵᠢ ᠶ᠋ᠢᠨ ᠭᠠᠵᠠᠷ ᠪᠠᠢᠯᠠ᠃ ᠭᠠᠮᠢᠩ ᠤ᠋ᠳ ᠲᠤᠰ ᠪᠦᠷᠢ ᠶ᠋ᠢᠨ ᠬᠥᠲᠥᠯᠦᠭᠰᠡᠨ ᠲᠡᠮᠡᠭᠡ ᠶ᠋ᠢ ᠬᠡᠪᠲᠡᠭᠦᠯᠦᠨ᠂ ᠪᠠᠢᠰᠢᠩ ᠠ᠋ᠴᠠ ᠨᠢᠭᠡᠨ ᠵᠢᠭᠳᠡ ᠶ᠋ᠢᠨ ᠬᠠᠪᠴᠢᠭᠠᠷ ᠬᠠᠢᠷᠴᠠᠭ ᠲᠠᠢ ᠵᠦᠢᠯᠡᠰ ᠢ᠋ ᠳᠠᠮᠵᠢᠯᠠᠨ ᠭᠠᠷᠭᠠᠨᠠ᠃ ᠲᠡᠳᠡ ᠲᠡᠮᠡᠭᠡ ᠠᠴᠢᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠳᠡᠭᠡᠷᠡ ᠨᠢ ᠣᠪᠣᠭᠠᠯᠠᠬᠤ ᠪᠤᠶᠤ ᠬᠣᠮ ᠪᠠᠮᠪᠠᠢ᠂ ᠱᠠᠲᠤ ᠡᠨᠡ ᠲᠡᠷᠡ ᠡᠴᠡ ᠨᠢ ᠳᠡᠭᠦᠵᠢᠯᠡᠵᠦ᠂ ᠱᠠᠭᠰᠢᠶᠠᠨ ᠱᠤᠤᠭᠢᠶᠠᠨ ᠪᠣᠯᠤᠨᠠ᠃ ᠨᠢᠭᠡ ᠨᠢ ᠭᠦᠶᠦᠨ ᠢᠷᠡᠵᠦ᠂ ᠭᠠᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠪᠠᠬᠠᠨ ᠲᠣᠬᠢᠬᠤ ᠳ᠋ᠤᠨᠢ ᠲᠡᠮᠡᠭᠡ ᠬᠡᠷᠬᠢᠨ ᠠᠴᠢᠬᠤ ᠶ᠋ᠢ ᠵᠢᠭᠠᠯᠭᠠᠬᠤ ᠭᠡᠰᠡᠨ ᠢ᠋ ᠨᠢ ᠮᠡᠳᠡᠪᠡ᠃ ᠬᠦᠷᠡᠯ ᠨᠥᠬᠥᠳ ᠲᠡᠢ ᠪᠡᠨ ᠨᠢᠭᠡ ᠲᠡᠮᠡᠭᠡ ᠠᠴᠢᠯᠠ᠃ ᠬᠣᠶᠠᠳᠠᠬᠢ ᠶ᠋ᠢ ᠴᠦ᠍ ᠠᠴᠢᠪᠠ᠃ ᠬᠠᠢᠷᠴᠠᠭ ᠤ᠋ᠳ ᠤ᠋ᠨ ᠬᠡᠮᠵᠢᠶᠡ ᠪᠠᠭᠠ ᠪᠣᠯᠪᠠᠴᠤ᠂ ᠬᠦᠨᠳᠦ ᠫᠤᠤ ᠶ᠋ᠢᠨ ᠰᠤᠮᠤ ᠪᠣᠯᠬᠤ ᠨᠢ ᠢᠯᠡᠷᠬᠡᠢ᠃ ᠪᠤᠰᠤᠳ ᠲᠡᠮᠡᠭᠡ ᠨᠦ᠍ᠭᠦᠳ ᠢ᠋ ᠳᠡᠰ ᠳᠠᠷᠠᠭᠠ ᠪᠠᠷ ᠨᠢ ᠠᠴᠢᠵᠤ ᠪᠠᠢᠬᠤ ᠳ᠋ᠤ᠌ ᠰᠸᠯᠸᠳᠢ ᠲᠡᠢ ᠨᠣᠶᠠᠨ ᠳᠡᠷᠭᠡᠳᠡ ᠢᠷᠡᠨ《ᠬᠣᠣ》 ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠲᠠᠯᠠᠷᠬᠠᠪᠠ᠃《ᠬᠣᠣ》 ᠭᠡᠳᠡᠭ ᠪᠣᠯ ᠮᠠᠨ ᠤ᠋ ᠵᠢᠩᠴᠢᠳ ᠭᠠᠭᠴᠠ ᠮᠡᠳᠡᠬᠦ ᠦᠭᠡ ᠪᠢᠯᠡ᠃ ᠠᠯᠢ ᠲᠦᠷᠦᠭᠦᠴᠢ ᠡᠴᠡ ᠠᠪᠤᠨ ᠬᠠᠷᠠᠭᠰᠠᠭᠠᠷ ᠪᠠᠢᠲᠠᠯᠠ ᠬᠡᠨ ᠪᠦᠬᠦᠨ ᠢ᠋ ᠵᠠᠩᠳᠤᠴᠢᠨ ᠪᠠᠢᠭᠰᠠᠨ ᠬᠦᠢᠲᠡᠨ ᠴᠢᠷᠠᠢ ᠲᠠᠢ ᠨᠣᠶᠠᠨ ᠨᠢᠭᠡᠨ ᠤᠳᠠᠭᠠ ᠲᠠᠯᠠᠷᠬᠠᠭᠰᠠᠨ ᠲᠤᠬᠠᠢ ᠳ᠋ᠤ᠌ ᠵᠢᠩᠴᠢᠳ ᠦ᠋ᠨ ᠰᠡᠳᠬᠢᠯ ᠪᠠᠭᠠ ᠵᠡᠷᠭᠡ ᠲᠠᠢᠪᠤᠰᠢᠷᠠᠨᠠ᠃
ᠭᠠᠮᠢᠩ ᠤ᠋ᠳ ᠲᠡᠮᠡᠭᠡ ᠨᠦ᠍ᠭᠦᠳ ᠢ᠋ ᠪᠣᠰᠬᠠᠨ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠬᠥᠲᠥᠯᠦᠨ ᠵᠡᠭᠦᠨ ᠬᠣᠢᠰᠢ ᠭᠠᠷᠪᠠ᠃ ᠵᠢᠩᠴᠢᠳ ᠢ᠋ ᠮᠥᠨ ᠫᠤᠤ ᠲᠠᠢ ᠬᠥᠮᠦᠰ ᠲᠠᠭᠤᠭᠠᠳ ᠶᠠᠪᠤᠨᠠ᠃ ᠠᠷᠤ ᠠ᠋ᠴᠠ ᠨᠢ ᠰᠸᠯᠸᠳᠢ ᠲᠡᠢ ᠨᠣᠶᠠᠨ ᠡᠷᠡ ᠰᠠᠭᠠᠷᠠᠯ ᠡᠯᠵᠢᠭᠡ ᠤᠨᠤᠨ ᠴᠦᠷᠦᠩ ᠰᠠᠢᠪᠤᠷᠯᠠᠭᠤᠯᠤᠨ ᠭᠦᠢᠴᠡᠨ ᠢᠷᠡᠭᠡᠳ ᠥᠩᠭᠡᠷᠡᠨ ᠭᠠᠷᠪᠠ᠃ ᠡᠨᠡ ᠬᠥᠮᠦᠨ ᠡᠯᠵᠢᠭᠡᠨ ᠦ᠌ ᠨᠢᠷᠤᠭᠤᠨ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠲᠩᠷᠢ ᠶ᠋ᠢᠨ ᠡᠭᠦᠯᠡ ᠬᠥᠯᠭᠡᠯᠡᠭᠰᠡᠨ ᠰᠢᠭ ᠰᠠᠨᠠᠬᠤ ᠠᠵᠢ᠃ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠰᠢᠶᠠ ᠪᠠᠨ ᠲᠤᠯᠵᠤ᠂ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠤᠷᠲᠤ ᠬᠤᠪᠢᠩ ᠰᠣᠷᠣᠭᠤᠯ ᠲᠠᠢ ᠶᠠᠩᠵᠤᠤᠷ ᠬᠥᠨᠳᠡᠯᠢᠳᠦᠨ ᠪᠠᠷᠢᠵᠤ᠂ ᠳᠣᠷᠣᠭᠰᠢ ᠤᠨᠵᠢᠭᠰᠠᠨ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠰᠡᠯᠭᠦᠭᠦᠯᠦᠨ ᠰᠠᠨᠵᠭᠨᠠᠭᠤᠯᠤᠨᠠ᠃ ᠡᠭᠦᠨ ᠢ᠋ ᠳ᠋ᠠᠨᠽᠠᠨ ᠯᠠ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠱᠣᠬᠣᠭᠣᠷᠬᠠᠨ ᠰᠣᠨᠢᠷᠬᠠᠵᠤ ᠶᠠᠪᠤᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠵᠢᠭᠯᠠᠪᠠ᠃ ᠭᠡᠪᠡᠴᠦ ᠰᠡᠳᠬᠢᠯ ᠰᠡᠷᠭᠦᠨ ᠬᠥᠭᠵᠢᠬᠦ ᠶᠠᠭᠤ ᠪᠠᠢᠬᠤ ᠪᠢᠯᠡ᠃ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠠᠳᠠᠯᠢ ᠢᠷᠡᠭᠡᠳᠦᠢ ᠳ᠋ᠦ᠍ ᠶᠠᠭᠤ ᠪᠣᠯᠬᠤ ᠪᠣᠯ ᠭᠡᠵᠦ ᠰᠡᠳᠬᠢᠯ ᠲᠦᠭᠰᠢᠨᠡ᠃ ᠬᠡᠯᠡ ᠪᠤᠷᠤᠭᠤᠲᠠᠨ ᠤ᠋ ᠭᠠᠷ ᠲᠤ ᠡᠢᠮᠦᠷᠬᠦᠦ ᠶᠠᠪᠤᠵᠤ ᠪᠠᠢᠭᠠᠳ ᠪᠠᠰᠠ ᠡᠨᠳᠡᠬᠢ ᠶ᠋ᠢᠨ ᠯᠤᠤᠰ ᠰᠠᠪᠳᠠᠭ ᠮᠥᠨ ᠠᠭᠤᠷᠯᠠᠨ ᠬᠢᠯᠢᠭᠨᠡᠬᠦ ᠮᠡᠲᠦ ᠲᠣᠮᠣ ᠰᠢᠷᠬᠡᠭᠲᠦ ᠴᠠᠰᠤ ᠶ᠋ᠢ ᠵᠠᠢ ᠦᠭᠡᠢ ᠬᠠᠶᠠᠯᠠᠵᠤ ᠡᠬᠢᠯᠡᠯᠡ᠃ ᠣᠳᠣ ᠪᠣᠯ ᠬᠠᠯᠬᠠ ᠣᠷᠣᠨ ᠳ᠋ᠤ᠌ ᠲᠡᠰᠬᠢᠮᠡ ᠵᠢᠪᠠᠷᠲᠦ ᠳ᠋ᠦᠩ ᠡᠪᠦᠯ ᠦ᠋ᠨ ᠴᠠᠭ ᠰᠠᠨ᠃ ᠭᠡᠲᠡᠯᠡ ᠡᠨᠳᠡ ᠲᠡᠢᠮᠦ ᠪᠢᠰᠢ᠂ ᠣᠷᠣᠭᠰᠠᠨ ᠴᠠᠰᠤ ᠭᠠᠵᠠᠷ ᠲᠤ ᠪᠠᠭᠤᠬᠤ ᠲᠠᠢ ᠪᠠᠨ ᠵᠡᠷᠭᠡ ᠬᠠᠢᠯᠤᠨ ᠨᠤᠨᠲᠠᠭ ᠬᠠᠷᠠ ᠰᠢᠷᠣᠢ ᠶ᠋ᠢ ᠯᠠᠭᠤᠯᠳᠤᠭᠤᠯᠤᠨᠠ᠃ ᠡᠢᠮᠦ ᠳ᠋ᠦ᠍ ᠵᠢᠩᠴᠢᠳ ᠦ᠋ᠨ ᠡᠮᠦᠰᠦᠭᠰᠡᠨ ᠦᠰᠦ ᠲᠡᠢ ᠳᠡᠪᠡᠯ᠂ ᠮᠠᠯᠠᠭᠠᠢ᠂ ᠢᠰᠡᠭᠡᠢ ᠣᠢᠮᠤᠰᠤᠲᠦ ᠭᠤᠲᠤᠯ ᠴᠥᠮ ᠨᠡᠪᠲᠡ ᠰᠢᠪᠲᠤ ᠣᠷᠣᠨ ᠪᠡᠶᠡ ᠲᠡᠢ ᠣᠷᠢᠶᠠᠯᠳᠤᠨ ᠨᠠᠭᠠᠯᠳᠤᠨᠠ᠃ ᠶᠡᠷᠦ ᠡᠳᠡ ᠶᠠᠭᠤ ᠵᠣᠷᠢᠨ ᠬᠠᠮᠢᠭᠠ ᠬᠦᠷᠬᠦ ᠤᠯᠤᠰ ᠪᠣᠢ? ᠡᠭᠦᠨ ᠢ᠋ ᠵᠢᠩᠴᠢᠳ ᠦᠯᠦ ᠮᠡᠳᠡᠨᠡ᠃ ᠥᠪᠡᠷᠰᠡᠳ ᠢ᠋ ᠨᠢ ᠴᠣᠬᠣᠮ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠷᠢᠪᠴᠢᠯᠠᠭᠰᠠᠨ ᠬᠡᠷᠡᠭ ᠪᠣᠢ? ᠮᠥᠨ ᠯᠡ ᠦᠯᠦ ᠮᠡᠳᠡᠨᠡ᠃ ᠡᠰᠢ ᠮᠤᠬᠤᠷ ᠦᠭᠡᠢ ᠠᠶᠤᠨ ᠡᠯᠳᠡᠪ ᠣᠯᠠᠨ ᠶᠠᠩᠵᠤ ᠪᠠᠷ ᠪᠣᠳᠣᠭᠰᠠᠨ ᠤ᠋ ᠪᠠᠨ ᠡᠴᠦᠰ ᠲᠤ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠲᠡᠭᠡᠭᠡᠪᠦᠷᠢ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠭᠡᠰᠡᠨ ᠪᠣᠯᠪᠠ ᠤᠤ ᠭᠡᠵᠦ ᠲᠤᠰ ᠪᠦᠷᠢ ᠪᠡᠨ ᠲᠠᠭᠠᠪᠤᠷᠢᠯᠠᠨ ᠰᠡᠳᠬᠢᠯ ᠨᠢ ᠲᠠᠢᠪᠤᠰᠢᠷᠠᠵᠠᠢ᠃
ᠴᠠᠰᠤᠨ ᠤ᠋ ᠣᠷᠣᠯᠲᠠ ᠨᠠᠮᠵᠢᠵᠤ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠵᠡᠭᠦᠨ ᠡᠴᠡ ᠪᠡᠨ ᠴᠠᠢᠷᠠᠨ ᠠᠯᠤᠰ ᠤ᠋ᠨ ᠪᠠᠷᠠ ᠲᠣᠳᠣᠷᠠᠪᠠ᠃ ᠨᠢᠭᠡᠨ ᠤᠷᠲᠤ ᠬᠣᠭᠣᠯᠠᠢ ᠥᠭᠰᠥᠨ ᠶᠠᠪᠤᠭᠠ ᠨᠢ ᠮᠡᠳᠡᠭᠳᠡᠨᠡ᠃ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠪᠢᠴᠢᠬᠠᠨ ᠳᠣᠪᠣᠴᠠᠭ ᠤ᠋ᠨ ᠠᠷᠤ ᠢᠷᠣᠭᠠᠷ ᠢ᠋ ᠲᠣᠭᠣᠷᠢᠨ ᠥᠷᠭᠡᠨ ᠵᠠᠮ ᠢ᠋ᠶ᠋ᠠᠷ ᠴᠢᠭᠴᠢᠢᠯᠳᠦᠨ ᠶᠠᠪᠤᠭᠠ ᠴᠡᠷᠢᠭ ᠦ᠋ᠨ ᠴᠤᠪᠤᠭᠠ ᠲᠠᠢ ᠨᠡᠢᠯᠡᠯᠡ᠃ ᠲᠡᠳᠡᠨ ᠦ᠌ ᠬᠡᠳᠦ ᠬᠡᠴᠢᠨᠡᠭᠡᠨ ᠪᠣᠯᠬᠤ ᠶ᠋ᠢ ᠪᠠᠷᠤᠭᠴᠠᠭᠠᠯᠠᠬᠤ ᠳ᠋ᠤ᠌ ᠪᠡᠷᠬᠡ᠃ ᠲᠦᠷᠦᠭᠦᠴᠢ ᠨᠢ ᠲᠡᠷᠲᠡᠭᠡᠬᠢ ᠱᠣᠪᠬᠣ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠢ᠋ ᠣᠷᠢᠶᠠᠵᠤ᠂ ᠡᠴᠦᠰ ᠨᠢ ᠲᠡᠷᠡ ᠭᠡᠬᠦ ᠲᠡᠮᠳᠡᠭ ᠦᠭᠡᠢ ᠦᠷᠭᠦᠯᠵᠢᠯᠡᠨᠡ᠃ ᠥᠷᠭᠡᠴᠢᠭᠡ ᠪᠡᠷ ᠢ᠋ᠶ᠋ᠡᠨ ᠬᠠ ᠶᠠ ᠦᠭᠡᠢ ᠳᠥᠷᠪᠡᠨ ᠮᠥᠷ ᠵᠡᠷᠭᠡᠴᠡᠵᠦ᠂ ᠬᠢᠲᠤᠭᠠᠨ ᠵᠢᠳᠠᠲᠤ ᠫᠤᠤ ᠪᠠᠨ ᠳᠡᠭᠡᠭᠰᠢ ᠰᠡᠷᠡᠢᠯᠭᠡᠨ ᠨᠢᠭᠡᠨ ᠵᠡᠷᠭᠡ ᠭᠠᠷ ᠬᠠᠶᠠᠯᠠᠨ ᠠᠯᠬᠤᠬᠤ ᠨᠢ ᠭᠠᠵᠠᠷ ᠳᠡᠯᠡᠬᠡᠢ ᠴᠣᠭᠣᠷᠠᠨ ᠠᠩᠭᠠᠯᠵᠠᠵᠤ ᠪᠠᠢᠭᠠ ᠰᠢᠭ᠋ ᠦᠵᠡᠭᠳᠡᠨᠡ᠃ ᠳᠣᠷᠵᠢ ᠪᠤᠰᠤᠳ ᠤ᠋ᠨ ᠡᠷᠬᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠨ᠂
— ᠫᠦᠬᠦ᠂ ᠡᠢᠮᠦ ᠣᠯᠠᠨ ᠠᠮᠢᠲᠠᠨ ᠪᠠᠢᠳᠠᠭ ᠠ᠋ ᠭᠡᠵᠦ ᠳᠠᠭᠤ ᠠᠯᠳᠠᠪᠠ᠃
— ᠲᠡᠢᠮᠦ ᠠ᠋᠂ ᠳᠡᠯᠡᠬᠡᠢ ᠳ᠋ᠦ᠍ ᠬᠢᠲᠠᠳ ᠣᠯᠠᠨ ᠤᠤ? ᠰᠢᠷᠭᠤᠯᠵᠢ ᠣᠯᠠᠨ ᠤᠤ? ᠭᠡᠵᠦ ᠦᠭᠡ ᠪᠣᠢ ᠰᠠᠨ ᠳᠠ ᠭᠡᠵᠦ ᠬᠦᠷᠡᠯ ᠬᠡᠯᠡᠪᠡ ᠳ᠋ᠠᠨᠽᠠᠨ ᠦᠨᠡᠬᠡᠷ ᠡᠨᠳᠡ ᠲᠡᠨᠳᠡ ᠰᠢᠷᠭᠤᠯᠵᠢ ᠶ᠋ᠢᠨ ᠲᠣᠮᠣ ᠲᠣᠮᠣ ᠡᠭᠦᠷ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠨᠢᠭᠡ ᠡᠭᠦᠷ ᠦ᠋ᠨ ᠰᠢᠷᠭᠤᠯᠵᠢ ᠶ᠋ᠢ ᠲᠣᠭᠠᠯᠠᠪᠠᠯ ᠯᠠᠪ ᠡᠳᠦᠢ ᠣᠯᠠᠨ ᠪᠠᠢᠬᠤ ᠦᠭᠡᠢ ᠪᠢᠵᠡ ᠠ᠋ ᠭᠡᠵᠦ ᠪᠣᠳᠣᠪᠠ᠃ ᠨᠢᠭᠡ ᠬᠡᠰᠡᠭ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠦᠷᠡᠯ᠄
— ᠨᠥᠬᠥᠳ ᠮᠢᠨᠢ᠂ ᠬᠠᠮᠤᠭ ᠮᠠᠭᠤ ᠶᠠᠭᠤᠮᠠ ᠶ᠋ᠢ ᠡᠪᠦᠭᠡᠨ ᠴᠢᠳᠬᠥᠷ ᠳᠠᠩᠵᠢᠶᠠᠳ ᠯᠠ ᠬᠢᠵᠦ ᠣᠷᠬᠢᠪᠠ ᠪᠣᠯᠤᠯᠲᠠᠢ ᠭᠡᠬᠦ ᠳ᠋ᠦ᠍ ᠳᠣᠷᠵᠢ ᠰᠣᠴᠢᠨ ᠬᠦᠷᠡᠯ ᠢ᠋ ᠬᠠᠷᠠᠨ᠄
— ᠬᠠᠮᠢᠭᠠ ᠠ᠋ᠴᠠ!
— ᠶᠡᠷᠦ ᠲᠡᠢᠮᠦ ᠪᠣᠯᠤᠯᠠ ᠭᠡᠵᠦ ᠮᠡᠳᠡ! ᠲᠡᠭᠡᠭᠡᠪᠦᠷᠢᠯᠡᠬᠦ ᠪᠠᠷᠠᠭᠠ᠂ ᠲᠡᠮᠡᠭᠡᠨ ᠦ᠌ ᠬᠥᠯᠥᠰᠥ ᠬᠣᠶᠠᠷ ᠢ᠋ ᠮᠠᠷᠭᠠᠰᠢ ᠮᠠᠷᠭᠠᠰᠢ ᠭᠡᠵᠦ ᠬᠣᠢᠰᠢ ᠲᠠᠲᠠᠭᠠᠳ ᠪᠠᠢᠭᠰᠠᠨ ᠨᠢ ᠪᠢᠳᠡᠨ ᠢ᠋ ᠡᠢᠮᠦ ᠠᠶᠤᠯ ᠳ᠋ᠤ᠌ ᠤᠨᠠᠭᠠᠬᠤ ᠭᠡᠵᠦ ᠪᠠᠢᠭᠰᠠᠨ ᠠ᠋ᠴᠠ ᠪᠣᠯᠤᠯᠠ ᠭᠡᠬᠦ ᠳ᠋ᠦ᠍᠄
— ᠦᠭᠡᠢ᠂ ᠪᠢᠳᠡ ᠲᠡᠷᠡ ᠳᠠᠩᠵᠢᠶᠠᠳ ᠲᠤ ᠮᠠᠭᠤ ᠶᠠᠭᠤᠮᠠ ᠬᠢᠭᠡ ᠦᠭᠡᠢ᠃ ᠬᠠᠷᠢᠨ ᠥᠪᠡᠷ ᠦ᠋ᠨ ᠬᠢᠨᠢ ᠵᠢᠩ ᠦ᠋ᠨ ᠤᠯᠤᠰ ᠰᠢᠦ ᠳᠡ ᠭᠡᠵᠦ ᠳ᠋ᠠᠨᠽᠠᠨ ᠬᠡᠯᠡᠪᠡ᠃
— ᠲᠡᠷᠡ ᠲᠡᠢᠮᠦ ᠭᠡᠰᠡᠨ ᠢ᠋ᠶ᠋ᠡᠨ ᠬᠦᠷᠡᠯ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ᠄
— ᠲᠡᠭᠦᠨ ᠳ᠋ᠦ᠍ ᠥᠰᠢᠭᠳᠡᠬᠦ ᠶᠠᠭᠤᠮᠠ ᠶ᠋ᠢ ᠪᠢ ᠡᠨᠡ ᠮᠠᠭᠤ ᠵᠥᠨᠥᠭ ᠲᠣᠯᠣᠭᠠᠢ᠂ ᠡᠨᠡ ᠳᠠᠷᠪᠠᠭᠠᠷ ᠠᠮᠠ! ᠠᠢ ᠴᠠᠪᠠᠰᠤ! ᠳᠣᠷᠵᠢ ᠬᠦᠷᠡᠯ ᠦ᠋ᠨ ᠪᠡᠶᠡ ᠪᠡᠨ ᠵᠢᠮᠡᠯᠡᠨ ᠪᠤᠬᠢᠨᠢᠳᠤᠬᠤ ᠶ᠋ᠢ ᠭᠠᠢᠬᠠᠯᠠ᠃ ᠵᠢᠩ ᠦ᠋ᠨ ᠬᠥᠯᠥᠰᠥ᠂ ᠲᠡᠭᠡᠭᠡᠪᠦᠷᠢᠯᠡᠬᠦ ᠪᠠᠷᠠᠭᠠ ᠬᠣᠶᠠᠷ ᠢ᠋ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠨᠡᠬᠡᠮᠵᠢᠯᠡᠬᠦ ᠳ᠋ᠡᠭᠡᠨ ᠬᠡᠷᠡᠭᠦᠯ ᠮᠠᠷᠭᠤᠭᠠᠨ ᠬᠢᠭᠰᠡᠨ ᠶᠦᠮ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠪᠠ᠃
— ᠬᠦᠷᠡᠯ ᠭᠤᠸᠠᠢ ᠮᠢᠨᠢ᠂ ᠲᠠ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠪᠡᠶᠡ ᠪᠡᠨ ᠵᠢᠮᠡᠯᠡᠨᠡ ᠪᠣᠢ?
— ᠪᠢ ᠳᠠᠩᠵᠢᠶᠠᠳ ᠲᠠᠢ ᠠᠩᠬᠠ ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠶᠠᠭᠤ ᠶᠠᠭᠤ ᠶᠠᠷᠢᠭᠰᠠᠨ ᠪᠢᠯᠡ?
— ᠮᠣᠩᠭᠣᠯ ᠣᠷᠣᠨ ᠢ᠋ ᠭᠠᠮᠢᠩ ᠡᠵᠡᠯᠡᠭᠰᠡᠨ ᠲᠤᠬᠠᠢ ᠪᠠᠢᠬᠠ ᠠ᠋᠃
— ᠲᠡᠢᠮᠦ᠃ ᠲᠡᠷᠡ ᠴᠢᠨᠢ ᠬᠠᠮᠤᠭ ᠭᠠᠢ ᠲᠠᠷᠢᠪᠠ᠃ ᠲᠡᠷᠡ ᠶᠠᠪᠤᠳᠠᠯ ᠳᠠᠩᠵᠢᠶᠠᠳ ᠲᠤ ᠶᠠᠭᠤᠨ ᠤ᠋ ᠬᠠᠮᠢᠶᠠ ᠲᠠᠢ ᠪᠢᠯᠡ?
— ᠬᠠᠮᠢᠶᠠ ᠲᠠᠢ ᠶ᠋ᠢᠨ ᠴᠠᠭᠠᠭᠤᠷ ᠬᠠᠮᠢᠶᠠ ᠲᠠᠢ ᠶ᠋ᠢ ᠪᠢ ᠣᠳᠣ ᠤᠬᠠᠭᠠᠷᠠᠵᠤ ᠪᠠᠢᠨᠠ᠃ ᠶᠠᠭᠠᠬᠢᠭᠠᠳ ᠪᠣᠢ? ᠭᠡᠪᠡᠯ ᠭᠡᠰᠡᠨ ᠢ᠋ᠶ᠋ᠡᠨ ᠬᠦᠷᠡᠯ ᠨᠣᠮᠢᠨ ᠨᠣᠭᠣᠭᠠᠨ ᠨᠢᠳᠦ ᠡᠷᠭᠢᠯᠳᠦᠭᠦᠯᠦᠨ ᠭᠡᠳᠡᠷᠭᠦ ᠬᠠᠷᠠᠪᠠᠯ᠂ ᠠᠷᠤ ᠳ᠋ᠤᠨᠢ ᠶᠠᠪᠤᠭᠠ ᠭᠠᠮᠢᠩ ᠤ᠋ᠳ ᠠᠩᠬᠠᠷᠤᠯ ᠲᠠᠯᠪᠢᠭᠰᠠᠨ ᠵᠦᠢᠯ ᠦᠭᠡᠢ᠃ ᠫᠤᠤ ᠪᠠᠨ ᠮᠥᠷᠡᠨ ᠳ᠋ᠡᠭᠡᠨ ᠡᠯᠭᠦᠵᠦ ᠰᠠᠶᠢᠬᠠᠨ ᠣᠷᠣᠭᠰᠠᠨ ᠶᠡᠬᠡ ᠴᠠᠰᠤᠨ ᠤ᠋ ᠨᠣᠢᠲᠠᠨ ᠠᠭᠠᠷ ᠲᠤ ᠶᠠᠳᠠᠷᠠᠭᠰᠠᠨ ᠪᠣᠯᠤᠯᠲᠠᠢ ᠰᠤᠯᠠᠬᠠᠨ ᠭᠢᠰᠬᠢᠯᠡᠨ ᠶᠠᠪᠤᠨᠠ᠃ ᠭᠡᠪᠡᠴᠦ ᠬᠦᠷᠡᠯ ᠰᠦᠨ ᠳ᠋ᠦ᠍ ᠬᠠᠯᠠᠭᠰᠠᠨ ᠬᠥᠮᠦᠨ ᠲᠠᠷᠠᠭ ᠳᠣᠯᠢᠶᠠᠨᠠ ᠭᠡᠭᠴᠢ ᠪᠡᠷ ᠪᠢᠳᠡᠨ ᠦ᠌ ᠠᠷᠤ ᠳ᠋ᠤ᠌ ᠮᠣᠩᠭᠣᠯ ᠬᠡᠯᠡ ᠲᠡᠢ ᠬᠥᠮᠦᠨ ᠲᠠᠯᠪᠢᠨ ᠳᠠᠩᠨᠠᠭᠤᠯᠵᠤ ᠪᠠᠢᠬᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠳᠣᠪᠠ᠃ ᠨᠥᠬᠥᠳ ᠮᠢᠨᠢ ᠰᠡᠭᠦᠯ ᠳ᠋ᠦ᠍ ᠶᠠᠷᠢᠶᠠ᠃ ᠣᠳᠣ ᠵᠦᠭᠡᠷ ᠲᠣᠪ ᠳᠤᠭᠤᠢ ᠯᠠ ᠶᠠᠪᠤᠵᠤ ᠪᠠᠢᠶᠠ ᠭᠡᠳ ᠠᠮᠠ ᠪᠠᠨ ᠲᠠᠰᠤ ᠬᠠᠮᠬᠢᠪᠠ᠃