ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠠᠷᠪᠠᠨ ᠬᠣᠶᠠᠷ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 12
327ᠠᠶᠤᠮᠰᠢᠭ
ᠡᠪᠦᠭᠡᠨ ᠳᠠᠩᠵᠢᠶᠠᠳ ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠦᠶᠡ ᠶ᠋ᠢᠨ ᠶᠡᠬᠡ ᠬᠠᠭᠠᠨ ᠴᠢᠩᠭᠢᠰ ᠡᠴᠡ ᠠᠶᠤᠭᠰᠠᠨ ᠦᠭᠡᠢ᠃ ᠣᠳᠣ ᠲᠡᠭᠦᠨ ᠦ᠌ ᠣᠷᠣ ᠰᠠᠭᠤᠷᠢ ᠪᠣᠯᠤᠭᠰᠠᠨ ᠮᠣᠩᠭᠣᠯᠴᠤᠳ ᠢ᠋ ᠪᠣᠰᠤᠨ ᠢᠷᠡᠵᠦ ᠰᠠᠭᠤᠷᠢᠰᠢᠨ ᠲᠣᠭᠲᠠᠭᠠᠭᠰᠠᠨ ᠭᠠᠵᠠᠷ ᠠ᠋ᠴᠠ ᠪᠠᠨ ᠬᠠᠯᠢᠨ ᠭᠠᠷᠴᠤ ᠰᠦᠢᠳᠬᠡᠨᠡ ᠭᠡᠵᠦ ᠴᠦ᠍ ᠪᠣᠳᠣᠬᠤ ᠶᠠᠭᠤ ᠪᠢᠯᠡ᠃ ᠭᠠᠭᠴᠠ ᠬᠦ᠌ ᠣᠳᠣ ᠦᠶᠡ ᠶ᠋ᠢᠨ ᠪᠠᠭᠠ ᠪᠠᠭᠤᠷᠠᠢ ᠤᠯᠤᠰ ᠤ᠋ᠨ ᠠᠷᠠᠳ ᠲᠦᠮᠡᠨ ᠪᠣᠯᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠷᠬᠡ ᠴᠢᠯᠥᠭᠡ᠂ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠤ᠋ᠨ ᠲᠥᠯᠥᠭᠡ ᠲᠡᠮᠡᠴᠡᠨ ᠪᠣᠰᠬᠤ ᠪᠣᠯᠤᠭᠰᠠᠨ ᠨᠢ ᠯᠡ ᠪᠣᠳᠣᠭᠤᠰᠢᠲᠠᠢ ᠪᠣᠯᠵᠠᠢ᠃ ᠸᠠᠩ ᠬᠠᠢ ᠲᠤᠤ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠶᠡᠬᠡ ᠪᠤᠬᠢᠨᠢᠳᠤᠯ ᠪᠠᠭᠠ ᠵᠡᠷᠭᠡ ᠨᠠᠮᠵᠢᠭᠠᠳ᠂ ᠬᠠᠯᠬᠠ ᠣᠷᠣᠨ ᠭᠡᠳᠡᠭ ᠮᠠᠨᠢ ᠴᠣᠬᠣᠮ ᠶᠠᠭᠤ ᠪᠠᠢᠳᠠᠭ ᠪᠢᠯᠡ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠤᠲᠤᠭᠠᠲᠤ ᠢᠰᠡᠭᠡᠢ ᠭᠡᠷ ᠪᠣᠯᠭᠠᠨ ᠤ᠋ ᠬᠣᠢᠮᠣᠷ ᠳᠠᠯᠪᠠᠭᠠᠷ ᠨᠢᠳᠤᠷᠭᠠ ᠲᠠᠢ ᠬᠠᠯᠬᠠᠭᠠᠷ ᠳᠡᠪᠡᠯ ᠢ᠋ ᠪᠦᠳᠦᠭᠦᠨ ᠡᠳ᠋ᠯᠡᠯ ᠢ᠋ᠶ᠋ᠡᠷ ᠣᠷᠢᠶᠠᠨ ᠪᠦᠰᠡᠯᠡᠭᠰᠡᠨ ᠥᠷᠭᠡᠨ ᠴᠡᠭᠡᠵᠢᠲᠡᠢ ᠬᠦᠳᠡᠷ ᠡᠷᠡ ᠬᠥᠨᠳᠡᠯᠡᠨ ᠰᠠᠭᠤᠨ ᠣᠷᠣᠬᠤ ᠪᠦᠷᠢ ᠳ᠋ᠦ᠍ ᠠᠭᠤᠯᠠ᠂ ᠤᠰᠤ᠂ ᠭᠠᠵᠠᠷ ᠰᠢᠷᠣᠢ᠂ ᠮᠠᠯ ᠬᠥᠷᠥᠩᠭᠡ ᠶᠦ᠍ᠭᠡᠨ ᠨᠢᠭᠡ ᠬᠠᠷᠠᠬᠤ ᠳ᠋ᠤ᠌ ᠬᠠᠷᠠᠮᠯᠠᠭᠰᠠᠨ ᠰᠢᠭ᠋ ᠨᠢᠭᠡ ᠬᠠᠷᠠᠬᠤ ᠳ᠋ᠤ᠌ ᠪᠠᠬᠠᠷᠬᠠᠬᠤ ᠰᠢᠭ᠋ ᠴᠢᠷᠠᠢ ᠪᠠᠷ ᠨᠢᠭᠤᠷ ᠰᠢᠷᠳᠡᠨ ᠰᠠᠭᠤᠳᠠᠭ ᠨᠢ ᠨᠢᠳᠦᠨ ᠳ᠋ᠦ᠍ ᠲᠤᠰᠤᠨᠠ᠃ ᠭᠡᠲᠡᠯᠡ ᠣᠳᠣ ᠲᠡᠳᠡ ᠵᠥᠪᠬᠡᠨ ᠰᠢᠷᠳᠡᠬᠦ ᠪᠢᠰᠢ ᠬᠢᠯᠠᠢᠵᠤ᠂ ᠲᠡᠷᠡ ᠮᠥᠷᠲᠡᠭᠡᠨ ᠪᠣᠰᠤᠨ ᠬᠠᠷᠠᠢᠵᠤ ᠪᠣᠷᠣᠣᠬᠠᠢ ᠰᠢᠳᠠᠮ᠂ ᠰᠡᠯᠡᠮᠡ ᠵᠢᠳᠠ ᠵᠦᠢᠯ ᠪᠦᠷᠢ ᠶ᠋ᠢᠨ ᠶᠠᠭᠤᠮᠠᠰ ᠢ᠋ ᠪᠠᠷᠢᠨ ᠰᠠᠯᠬᠢ ᠰᠢᠭ᠋ ᠬᠤᠷᠳᠤᠨ ᠮᠣᠷᠢᠳ ᠤᠨᠤᠨ᠂ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠡᠰᠡᠷᠭᠦ ᠪᠠᠢᠯᠳᠤᠨ ᠲᠤᠯᠤᠯᠳᠤᠬᠤ ᠭᠡᠵᠦ ᠪᠠᠢᠭᠠ ᠰᠢᠦ ᠳᠡ ᠭᠡᠬᠦ ᠡᠴᠡ ᠰᠠᠯᠪᠤᠷᠢ ᠫᠦᠰᠡ ᠨᠦ᠍ᠭᠦᠳ ᠠᠶᠠᠨ ᠳ᠋ᠠᠭᠠᠨ ᠰᠦᠢᠳᠬᠡᠭᠳᠡᠨ ᠭᠠᠯ ᠲᠦᠢᠮᠡᠷ ᠲᠦ᠍ ᠠᠪᠲᠠᠭᠳᠠᠬᠤ ᠨᠢ ᠵᠠᠢᠯᠠᠰᠢ ᠦᠭᠡᠢ ᠠᠵᠢ᠃ ᠡᠢᠮᠦ ᠳ᠋ᠦ᠍ ᠥᠪᠡᠷ ᠢ᠋ᠶ᠋ᠡᠨ ᠵᠠᠩᠴᠢᠬᠦᠦ ᠶ᠋ᠢᠨ ᠪᠦᠬᠦ ᠢᠷᠭᠡᠳ ᠢ᠋ ᠣᠳᠣᠬᠠᠨ ᠬᠡᠳᠦ ᠬᠡᠴᠢᠨᠡᠭᠡᠨ ᠶᠠᠩᠴᠢᠶᠠᠨ ᠢᠶᠠᠷ ᠪᠣᠯᠪᠠᠴᠤ ᠬᠠᠮᠢᠶᠠ ᠦᠭᠡᠢ ᠬᠥᠯᠥᠰᠥᠯᠡᠨ ᠬᠥᠳᠡᠯᠭᠡᠵᠦ ᠢᠷᠡᠭᠰᠡᠨ ᠭᠤᠷᠪᠠᠨ ᠵᠢᠩᠴᠢᠳ ᠡᠴᠡ ᠠᠪᠤᠭᠠᠳ ᠪᠦᠬᠦ ᠬᠠᠯᠬᠠ ᠶ᠋ᠢ ᠪᠠᠷᠢᠨ ᠶᠠᠩᠭᠢᠨᠠᠲᠠᠯᠠ ᠬᠦᠯᠢᠨ ᠬᠠᠶᠠᠭᠤᠰᠢᠲᠠᠢ ᠰᠠᠨᠠᠭᠳᠠᠨᠠ᠃ ᠭᠡᠲᠡᠯᠡ ᠨᠥᠬᠥᠴᠡᠯ ᠠᠯᠠᠭᠠ᠃ ᠳᠠᠩᠴᠤ ᠨᠥᠬᠥᠴᠡᠯ ᠦᠭᠡᠢ ᠲᠤᠯᠠ ᠳᠠᠬᠢᠨ ᠪᠤᠬᠢᠨᠢᠳᠤᠵᠤ ᠪᠣᠰᠤᠨ ᠬᠠᠷᠠᠢᠨ ᠨᠠᠭᠠᠰᠢ ᠴᠠᠭᠠᠰᠢ ᠠᠯᠬᠤᠯᠠᠨᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠡᠪᠰᠢᠶᠡᠯᠭᠡᠵᠦ ᠪᠠᠢᠪᠠ᠃ ᠨᠢᠳᠦ ᠡᠷᠢᠶᠡᠯᠵᠢᠯᠡᠨ᠂ ᠨᠢᠳᠦᠨ ᠦ᠌ ᠨᠢᠯᠪᠤᠰᠤ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠠᠰᠬᠠᠷᠠᠵᠤ᠂ ᠲᠠᠰᠤᠯᠭᠠᠨ ᠤ᠋ ᠳᠥᠷᠪᠡᠨ ᠲᠠᠯᠠ ᠶ᠋ᠢᠨ ᠬᠠᠨᠠ ᠬᠠᠨᠵᠤ ᠪᠠ ᠰᠢᠷᠡᠭᠡ ᠰᠠᠨᠳᠠᠯᠢ ᠪᠦᠭᠦᠳᠡ ᠶ᠋ᠢᠨ ᠬᠠᠮᠲᠤ ᠳᠠᠢᠪᠠᠯᠵᠠᠨ ᠰᠦᠢᠳ ᠪᠣᠯᠤᠯᠠ᠃ ᠡᠴᠦᠰ ᠦ᠋ᠨ ᠢ᠋ᠶ᠋ᠡᠨ ᠴᠢᠳᠠᠯ ᠢ᠋ ᠳᠠᠢᠴᠢᠯᠠᠨ ᠬᠠᠵᠠᠭᠤ ᠳ᠋ᠠᠬᠢ ᠬᠠᠨᠵᠤ ᠪᠠᠨ ᠳᠥᠰᠢᠨ ᠤᠨᠠᠵᠤ᠂ ᠠᠶᠠᠭᠠ ᠱᠠᠵᠠᠩ ᠶᠠᠭᠤ ᠲᠠᠭᠠᠷᠠᠯᠳᠤᠭᠰᠠᠨ ᠪᠦᠬᠦᠨ ᠢ᠋ ᠡᠭᠦᠳᠡ ᠤᠷᠤᠭᠤ ᠰᠢᠲᠠᠪᠠ᠃ ᠪᠢᠴᠢᠭᠡᠴᠢ ᠬᠦᠦ ᠤᠬᠠᠭᠠᠨ ᠦᠭᠡᠢ ᠰᠠᠨᠳᠤᠷᠤᠨ ᠭᠦᠶᠦᠨ ᠣᠷᠣᠵᠤ ᠢᠷᠡᠪᠡ᠃ ᠵᠥᠭᠡᠯᠡᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠩᠵᠢᠶᠠᠳ ᠶᠤᠭᠠᠨ ᠳᠥᠰᠢᠨ ᠠᠪᠴᠤ ᠬᠠᠨᠵᠤᠨ ᠳᠡᠭᠡᠷᠡ ᠬᠡᠪᠲᠡᠭᠦᠯᠦᠨ ᠲᠣᠰᠣ ᠰᠢᠷᠭᠢᠨ ᠤᠨᠲᠠᠷᠠᠭᠰᠠᠨ ᠳ᠋ᠧᠩ ᠦ᠋ᠨ ᠴᠥᠭᠥᠴᠡ ᠶ᠋ᠢ ᠰᠢᠨᠡ ᠪᠡᠷ ᠰᠡᠷᠭᠦᠭᠡᠨ ᠠᠰᠠᠭᠠᠪᠠ᠃ ᠡᠪᠦᠭᠡᠨ ᠳᠠᠩᠵᠢᠶᠠᠳ ᠠᠰᠤᠷᠤ ᠶᠡᠬᠡ ᠬᠡᠷᠡᠭ ᠦ᠋ᠨ ᠲᠥᠯᠥᠭᠡ ᠤᠬᠠᠭᠠᠨ ᠮᠡᠳᠡᠷᠡᠯ ᠢ᠋ᠶ᠋ᠡᠨ ᠬᠡᠲᠦᠷᠬᠡᠢ ᠳᠠᠢᠴᠢᠯᠠᠭᠰᠠᠨ ᠠ᠋ᠴᠠ ᠭᠤᠷᠪᠠᠨ ᠴᠠᠭ ᠳᠣᠳᠣᠮ ᠲᠠᠲᠠᠳᠠᠭ ᠦᠨᠡᠲᠦ ᠲᠠᠮᠠᠬᠢ ᠪᠠᠨ ᠬᠣᠶᠠᠷ ᠴᠠᠭ ᠭᠠᠷᠤᠢ ᠬᠣᠵᠢᠮᠳᠠᠭᠤᠯᠤᠭᠰᠠᠨ ᠠ᠋ᠴᠠ ᠶᠣᠰᠣᠲᠠᠢ ᠠᠶᠤᠯ ᠳ᠋ᠤ᠌ ᠤᠴᠠᠷᠠᠵᠤ ᠪᠠᠢᠭᠠ ᠨᠢ ᠡᠨᠡ ᠪᠠᠢᠯᠠ᠃