ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠠᠷᠪᠠᠨ ᠨᠢᠭᠡ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 11
201ᠬᠠᠯᠭᠤᠭᠠᠲᠤ ᠬᠠᠨᠢ
ᠨᠠᠷᠢᠨ ᠨᠣᠣᠰᠣᠨ ᠬᠠᠷᠠ ᠺᠣᠰᠲ᠋ᠢᠶᠣᠮ ᠪᠣᠷᠣ ᠢᠰᠡᠭᠡᠢ ᠮᠠᠯᠠᠭᠠᠢ᠂ ᠬᠦᠷᠡᠩ ᠠᠷᠠᠰᠤᠨ ᠱᠠᠬᠠᠢ ᠵᠡᠷᠭᠡ ᠶᠠᠭᠤᠮᠠ ᠪᠦᠬᠦᠨ ᠢ᠋ᠶ᠋ᠡᠷ ᠭᠠᠳᠠᠭᠠᠳᠤᠴᠢᠯᠠᠭᠰᠠᠨ ᠭᠤᠴᠢᠨ ᠲᠠᠪᠤ ᠣᠷᠴᠢᠮ ᠨᠠᠰᠤᠨ ᠤ᠋ ᠳᠤᠭᠤᠢ ᠴᠠᠭᠠᠨ ᠴᠢᠷᠠᠢ ᠲᠠᠢ ᠰᠠᠢᠬᠠᠨ ᠡᠷᠡ᠂ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠠᠷ ᠣᠷᠣᠵᠤ ᠢᠷᠡᠪᠡ᠃ ᠡᠨᠡ ᠬᠥᠮᠦᠨ ᠪᠣᠯ ᠤᠭ ᠨᠢ ᠱᠠᠩᠬᠠᠢ ᠬᠣᠲᠠ ᠶ᠋ᠢᠨ ᠨᠢᠭᠡᠨ ᠪᠠᠭᠠᠪᠲᠤᠷ ᠫᠦᠰᠡᠨ ᠦ᠌ ᠡᠵᠡᠨ ᠦ᠌ ᠬᠦᠦ᠂ ᠨᠡᠷᠡ ᠸᠠᠩ ᠬᠠᠢ ᠲᠤᠤ᠃ ᠡᠴᠢᠭᠡ ᠨᠢ ᠠᠷᠪᠠᠨ ᠨᠢᠭᠡᠨ ᠵᠢᠯ ᠦ᠋ᠨ ᠡᠮᠦᠨᠡ ᠨᠠᠰᠤ ᠪᠠᠷᠠᠭᠰᠠᠨ ᠪᠠᠢᠯᠠ᠃
ᠸᠠᠩ ᠬᠠᠢ ᠲᠤᠤ ᠶ᠋ᠢᠨ ᠡᠴᠢᠭᠡ ᠶ᠋ᠢᠨ ᠦᠯᠡᠳᠡᠭᠡᠭᠰᠡᠨ ᠬᠥᠷᠥᠩᠭᠡ ᠶ᠋ᠢ ᠴᠠᠭᠠᠰᠢ ᠬᠥᠳᠡᠯᠭᠡᠬᠦ ᠭᠡᠲᠡᠯᠡ᠂ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠲᠣᠮᠣ ᠲᠣᠮᠣ ᠫᠦᠰᠡ ᠨᠦ᠍ᠭᠦᠳ ᠲᠦ᠍ ᠴᠣᠬᠢᠭᠳᠠᠨ᠂ ᠬᠡᠴᠢᠨᠡᠭᠡᠨ᠂ ᠣᠷᠣᠯᠳᠣᠪᠠᠴᠤ ᠰᠡᠬᠡᠯ ᠠᠪᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤ᠌᠂ ᠬᠠᠯᠬᠠ ᠶ᠋ᠢᠨ ᠲᠦᠭᠦᠬᠡᠢ ᠡᠳ᠋ ᠦ᠋ᠨ ᠪᠠᠶᠠᠯᠢᠭ ᠢ᠋ ᠲᠦᠰᠢᠭᠯᠡᠨ ᠠᠵᠠ ᠪᠠᠨ ᠨᠢᠭᠡ ᠦᠵᠡᠶᠡ ᠭᠡᠵᠦ ᠪᠣᠳᠣᠵᠠᠢ᠃ ᠪᠦᠬᠦ ᠬᠥᠷᠥᠩᠭᠡ᠂ ᠵᠣᠭᠣᠷᠢ ᠪᠠᠨ ᠶᠠᠭᠤᠲᠠᠢ ᠬᠦᠦᠲᠡᠢ ᠨᠢ ᠬᠤᠳᠠᠯᠳᠤᠭᠠᠳ᠂ ᠵᠠᠩᠴᠢᠬᠦᠦ ᠬᠣᠲᠠᠨᠠ ᠭᠡᠷ ᠪᠦᠯᠢ ᠪᠡᠷ ᠢ᠋ᠶ᠋ᠡᠨ ᠨᠡᠭᠦᠨ ᠢᠷᠡᠭᠰᠡᠨ ᠠᠵᠢ᠃ ᠲᠡᠭᠡᠭᠡᠳ ᠮᠣᠩᠭᠣᠯ ᠬᠡᠯᠡ ᠪᠠ ᠵᠠᠩ ᠰᠤᠷᠲᠠᠬᠤᠨ ᠠᠯᠢᠪᠠ ᠨᠢᠭᠡᠨ ᠲᠠᠯᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠶᠠᠭᠠᠬᠢᠵᠤ ᠴᠦ᠍ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠶᠡᠬᠡ ᠶ᠋ᠢ ᠬᠥᠳᠡᠯᠭᠡᠬᠦ ᠪᠸᠠᠴᠢᠶᠠᠨ ᠦᠭᠡᠢ ᠳ᠋ᠦ᠍ ᠪᠣᠭᠣᠭᠳᠠᠭᠰᠠᠨ ᠲᠤᠯᠠ ᠠᠷᠭᠠ ᠪᠤᠶᠤ ᠴᠠᠭᠠᠨᠳᠠᠯᠠᠢ ᠶ᠋ᠢᠨ ᠫᠦᠰᠡ ᠲᠡᠢ ᠬᠤᠪᠢ ᠨᠡᠢᠯᠡᠭᠦᠯᠦᠭᠰᠡᠨ ᠪᠥᠭᠡᠳ ᠬᠠᠮᠲᠤᠷᠠᠨ ᠠᠵᠢᠯᠯᠠᠵᠤ ᠡᠬᠢᠯᠡᠵᠡᠢ᠃
ᠡᠨᠡ ᠪᠣᠯ ᠲᠠᠪᠤᠨ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠬᠡᠷᠡᠭ᠃ ᠤᠭ ᠨᠡᠢᠯᠡᠭᠦᠯᠦᠭᠰᠡᠨ ᠬᠥᠷᠥᠩᠭᠡ᠂ ᠪᠦᠬᠦ ᠫᠦᠰᠡᠨ ᠦ᠌ ᠳᠥᠩᠭᠡᠵᠦ ᠠᠷᠪᠠᠨ ᠬᠤᠪᠢ ᠨᠢ ᠪᠣᠯᠬᠤ ᠪᠣᠯᠪᠠᠴᠤ ᠠᠩᠬᠠ ᠬᠣᠷᠰᠢᠭᠰᠠᠨ ᠠ᠋ᠴᠠ ᠠᠪᠤᠨ ᠥᠨᠥ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠨ ᠬᠥᠭᠵᠢᠭᠰᠡᠭᠡᠷ ᠪᠠᠢᠭᠠ ᠠᠵᠢ᠃
ᠡᠪᠦᠭᠡᠨ ᠳᠠᠩᠵᠢᠶᠠᠳ ᠬᠡᠳᠦᠢᠪᠡᠷ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ ᠶ᠋ᠢᠨ ᠰᠢᠨᠡ ᠰᠢᠨᠡ ᠠᠷᠭᠠ ᠨᠤᠭᠤᠳ ᠢ᠋ ᠦᠯᠦ ᠣᠢᠰᠢᠶᠠᠨ ᠳᠠᠩ ᠥᠪᠡᠷ ᠦ᠋ᠨ ᠬᠣᠴᠣᠷᠤᠭᠳᠠᠮᠠᠯ ᠬᠠᠭᠤᠴᠢᠨ ᠠᠷᠭᠠ ᠶ᠋ᠢ ᠪᠠᠷᠢᠮᠲᠠᠯᠠᠨ ᠶᠡᠬᠡ ᠶ᠋ᠢ ᠬᠣᠨᠵᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠪᠠᠭᠠ ᠶ᠋ᠢ ᠬᠣᠨᠵᠢᠬᠤ᠂ ᠬᠤᠷᠳᠤᠨ ᠭᠦᠢᠯᠭᠡᠭᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠤᠳᠠᠭᠠᠨ ᠭᠦᠢᠯᠭᠡᠭᠡᠬᠦ ᠪᠣᠯᠪᠠᠴᠤ ᠸᠠᠩ ᠬᠠᠢ ᠲᠤᠤ᠄
— ᠠᠢ ᠮᠠᠨ ᠤ᠋ ᠶᠡᠬᠡ ᠠᠬᠠ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠤᠬᠠᠭᠠᠨ ᠲᠠᠢ ᠪᠣᠢ? ᠬᠡᠷᠪᠡ ᠲᠠᠨ ᠤ᠋ ᠬᠢ ᠦᠭᠡᠢ ᠰᠠᠨ ᠪᠣᠯ ᠳᠣᠣᠷᠠᠲᠤ ᠳᠡᠭᠦᠦ ᠴᠢᠨᠢ ᠬᠠᠳᠠ ᠮᠥᠷᠭᠥᠵᠦ ᠦᠬᠦᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠠᠯᠠᠭᠠ ᠭᠡᠵᠦ ᠴᠠᠭ ᠢᠮᠠᠭᠲᠠ ᠪᠢᠯᠳᠠᠤᠴᠢᠯᠠᠨᠠ᠃ ᠳᠣᠲᠣᠭᠠᠳᠤ ᠳ᠋ᠠᠭᠠᠨ ᠭᠡᠪᠡᠯ᠄ ᠮᠠᠩᠭᠤᠷᠠᠳᠠᠯᠠ ᠨᠢ ᠪᠢᠯᠳᠠᠤᠴᠢᠯᠠᠬᠤ᠂ ᠪᠢᠯᠳᠠᠤᠴᠢᠯᠠᠨ ᠪᠠᠢᠵᠤ ᠦᠬᠦᠭᠦᠯᠵᠦ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠦᠬᠦ ᠬᠥᠷᠥᠩᠭᠡ ᠶ᠋ᠢ ᠡᠵᠡᠮᠰᠢᠬᠦ ᠭᠡᠰᠡᠨ ᠪᠣᠳᠣᠯ ᠴᠠᠭ ᠦᠷᠭᠦᠯᠵᠢ ᠡᠷᠭᠢᠯᠳᠦᠨᠡ᠃ ᠭᠡᠲᠡᠯᠡ ᠡᠨᠡ ᠨᠢᠭᠦᠯᠲᠦ ᠰᠠᠨᠠᠭᠠ ᠶ᠋ᠢ ᠨᠢ ᠡᠪᠦᠭᠡᠨ ᠳᠠᠩᠵᠢᠶᠠᠳ ᠠᠯᠢ ᠬᠡᠳᠦᠢᠨ ᠦ᠌ ᠲᠠᠭᠠᠪᠤᠷᠢᠯᠠᠨ ᠪᠠᠢᠭᠠ ᠪᠢᠯᠡ᠃ ᠭᠡᠨᠡᠳᠲᠡ ᠨᠢᠭᠡᠨ ᠡᠳᠦᠷ ᠳᠠᠩᠰᠠ ᠪᠣᠳᠣᠨ ᠵᠣᠬᠢᠬᠤ ᠬᠥᠷᠥᠩᠭᠡ ᠶ᠋ᠢ ᠨᠢ ᠰᠠᠯᠠᠭᠠᠨ ᠥᠭᠴᠦ ᠪᠡᠶᠡ ᠪᠡᠨ ᠬᠣᠯᠠᠳᠠᠭᠤᠯᠬᠤ ᠶᠤᠮ ᠪᠢᠯᠡ ᠤᠤ? ᠭᠡᠵᠦ ᠪᠣᠳᠣᠨᠠ᠃ ᠭᠡᠪᠡᠴᠦ ᠸᠠᠩ ᠬᠠᠢ ᠲᠤᠤ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠲᠠᠢ᠂ ᠪᠣᠳᠣᠬᠤ ᠪᠢᠴᠢᠬᠦ ᠳ᠋ᠡᠭᠡᠨ ᠰᠠᠢᠨ᠂ ᠠᠩᠭ᠌ᠯᠢ ᠶᠠᠫᠣᠨ ᠬᠣᠶᠠᠷ ᠤᠯᠤᠰ ᠤ᠋ᠨ ᠬᠡᠯᠡ ᠮᠡᠳᠡᠬᠦ ᠪᠥᠭᠡᠳ ᠲᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠩᠬᠠ ᠨᠡᠢᠯᠡᠭᠰᠡᠨ ᠡᠳᠦᠷ ᠡᠴᠡ ᠪᠡᠨ ᠭᠠᠳᠠᠭᠠᠳᠤ ᠣᠷᠣᠨ ᠤ᠋ ᠬᠤᠳᠠᠯᠳᠤᠭᠠᠴᠢᠨ ᠲᠠᠢ ᠰᠢᠭᠤᠳ ᠬᠠᠷᠢᠯᠴᠠᠬᠤ ᠮᠠᠰᠢ ᠴᠢᠬᠤᠯᠠ ᠵᠠᠮ ᠢ᠋ ᠨᠡᠭᠡᠭᠡᠵᠡᠢ᠃ ᠡᠢᠮᠦ ᠳ᠋ᠦ᠍ ᠳᠠᠩᠵᠢᠶᠠᠳ ᠥᠪᠡᠷ ᠡᠴᠡ ᠪᠡᠨ ᠬᠣᠯᠠᠳᠠᠭᠤᠯᠬᠤ ᠭᠡᠰᠡᠨ ᠪᠣᠳᠣᠯ ᠢ᠋ᠶ᠋ᠠᠨ ᠭᠤᠷᠪᠠᠨ ᠵᠢᠯ ᠳᠠᠷᠠᠭᠠᠯᠠᠨ ᠬᠣᠢᠰᠢ ᠲᠠᠯᠪᠢᠭᠠᠳ ᠣᠷᠣᠨ ᠳ᠋ᠤᠨᠢ ᠡᠭᠦᠷᠢᠳᠡ ᠢᠲᠡᠭᠡᠮᠵᠢᠯᠡᠭᠰᠡᠨ ᠳᠦᠷᠢ ᠦᠵᠡᠭᠦᠯᠳᠡᠭ ᠪᠠᠢᠨᠠ᠃
ᠡᠨᠡ ᠤᠳᠠᠭᠠ ᠸᠠᠩ ᠬᠠᠢ ᠲᠤᠤ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠣᠷᠣᠵᠤ ᠢᠷᠡᠭᠰᠡᠨ ᠶᠠᠪᠤᠳᠠᠯ ᠪᠣᠯ ᠰᠠᠶᠢ ᠶ᠋ᠢᠨ ᠬᠠᠯᠬᠠ ᠵᠢᠩᠴᠢᠳ ᠦ᠋ᠨ ᠠᠪᠴᠢᠷᠠᠭᠰᠠᠨ ᠲᠠᠪᠢᠨ ᠲᠡᠮᠡᠭᠡ ᠲᠦᠭᠦᠬᠡᠢ ᠡᠳ᠋ ᠢ᠋ ᠱᠠᠩᠬᠠᠢ ᠠ᠋ᠴᠠ ᠵᠠᠩᠴᠢᠬᠦᠦ ᠳ᠋ᠦ᠍ ᠰᠠᠭᠤᠭᠠ ᠠᠮᠧᠷᠢᠺᠠ᠂ ᠠᠩᠭ᠌ᠯᠢ᠂ ᠶᠠᠫᠣᠨ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠠᠯᠳᠠᠷᠲᠤ ᠲᠣᠮᠣ ᠫᠦᠰᠡ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢᠳ ᠢ᠋ ᠨᠢᠭᠡᠨ ᠵᠡᠷᠭᠡ ᠨᠢᠭᠡ ᠳᠣᠣᠷᠠ ᠤᠷᠢᠨ ᠳᠠᠭᠤᠳᠠᠵᠤ ᠠᠪᠴᠢᠷᠠᠭᠠᠳ᠂ ᠶᠣᠰᠣᠲᠠᠢ ᠶᠠᠰᠤ ᠪᠤᠯᠢᠶᠠᠯᠴᠠᠯᠳᠤᠭᠰᠠᠨ ᠨᠣᠬᠠᠳ ᠰᠢᠭ᠋ ᠦᠨᠡ ᠬᠠᠶᠠᠭᠤᠯᠤᠨ ᠲᠡᠮᠡᠴᠡᠯᠳᠦᠭᠦᠯᠵᠦ ᠪᠠᠢᠭᠠᠳ ᠠᠮᠧᠷᠢᠺᠠ ᠶ᠋ᠢᠨ ᠮᠠᠰᠲ᠋ᠧᠷ ᠭᠸᠨ᠋ᠷᠩ ᠮᠠᠭᠠᠨ ᠭᠡᠭᠴᠢ ᠳ᠋ᠦ᠍ ᠭᠤᠷᠪᠠᠨ ᠵᠠᠭᠤᠨ ᠶᠡᠷᠡᠨ ᠨᠠᠢ᠍ᠮᠠᠨ ᠬᠤᠪᠢ ᠶ᠋ᠢᠨ ᠬᠣᠨᠵᠢᠶᠠᠳᠠᠢ ᠵᠠᠷᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠳᠡᠬᠦ ᠶᠠᠪᠤᠳᠠᠯ ᠪᠠᠢᠪᠠ᠃ ᠬᠡᠨ ᠲᠡᠢ ᠬᠡᠷᠬᠢᠨ ᠮᠠᠢᠮᠠᠢᠯᠠᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠬᠤ ᠵᠠᠭᠤᠷᠠ ᠸᠠᠩ ᠬᠠᠢ ᠲᠤᠤ ᠬᠠᠷᠠ ᠺᠣᠰᠲ᠋ᠢᠶᠣᠮ ᠤ᠋ᠨ ᠢ᠋ᠶ᠋ᠠᠨ ᠵᠡᠭᠦᠨ ᠡᠩᠭᠡᠷ ᠳᠣᠲᠣᠭᠤᠷ ᠡᠪᠦᠷ ᠲᠦ᠍ ᠬᠢᠭᠰᠡᠨ ᠴᠠᠭᠠᠨ ᠶᠠᠰᠤᠨ ᠡᠷᠢᠭᠡ ᠨᠦ᠍ᠭᠦᠳ᠂ ᠪᠢᠴᠢᠬᠠᠨ ᠰᠤᠸᠠᠮᠫᠠᠨ ᠢ᠋ᠶ᠋ᠠᠨ ᠰᠦᠷᠲᠡᠬᠢᠯᠭᠡᠨ ᠲᠡᠳᠡᠨ ᠭᠠᠷᠭᠠᠵᠤ᠂ ᠰᠢᠭᠡᠵᠢ ᠬᠤᠷᠤᠭᠤᠨ ᠤ᠋ ᠪᠠᠨ ᠤᠷᠲᠤ ᠬᠢᠮᠤᠰᠤ ᠪᠠᠷ ᠱᠠᠵᠢᠭᠢᠨᠠᠭᠤᠯᠤᠨ ᠴᠣᠬᠢᠵᠤ ᠦᠵᠡᠭᠦᠯᠦᠭᠡᠳ ᠠᠪᠬᠤ ᠵᠦᠢᠯ ᠳ᠋ᠡᠭᠡᠨ ᠪᠠᠭᠠ ᠵᠡᠷᠭᠡ ᠡᠳ᠋ᠯᠡᠭᠳᠡᠭᠰᠡᠨ ᠫᠣᠷᠲ ᠮᠠᠷᠺᠡ ᠶ᠋ᠢᠨ ᠠᠴᠢᠶᠠᠨ ᠤ᠋ ᠮᠠᠰᠢᠨ ᠭᠤᠷᠪᠠ ᠶ᠋ᠢ ᠲᠤᠢᠯ ᠤ᠋ᠨ ᠬᠢᠮᠳᠠ ᠦᠨᠡ ᠪᠡᠷ ᠣᠷᠣᠯᠴᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠪᠠᠬᠠᠷᠬᠠᠨ ᠮᠡᠳᠡᠭᠳᠡᠪᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠳᠠᠩᠵᠢᠶᠠᠳ ᠦᠷᠴᠢᠭᠢᠷ ᠨᠢᠭᠤᠷ ᠢ᠋ᠶ᠋ᠠᠨ ᠴᠦ᠍ ᠬᠤᠪᠢᠷᠠᠭᠠᠭᠰᠠᠨ ᠦᠭᠡᠢ᠂ ᠰᠠᠯᠠᠭᠠᠪᠴᠢᠯᠠᠨ ᠪᠠᠷᠢᠭᠰᠠᠨ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷ ᠲᠠᠯᠪᠢᠨ᠂ ᠱᠦᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠳᠦ ᠶ᠋ᠢ ᠰᠠᠮ ᠲᠡᠳᠡᠨ ᠠᠷᠤ ᠬᠠᠯᠬᠠ ᠠ᠋ᠴᠠ ᠢᠷᠡᠭᠰᠡᠨ ᠴᠠᠬᠢᠯᠭᠠᠨ ᠮᠡᠳᠡᠭᠡ ᠶ᠋ᠢ ᠡᠮᠦᠨᠡ ᠨᠢ ᠪᠠᠷᠢᠨ《ᠤᠩᠰᠢ!》 ᠭᠡᠵᠦ ᠰᠤᠯᠠᠷᠠᠭᠰᠠᠨ ᠬᠡᠯᠡ ᠪᠡᠨ ᠡᠭᠡᠳᠡᠷᠡᠭᠦᠯᠦᠨ ᠬᠡᠯᠡᠪᠡ᠃ ᠸᠠᠩ ᠬᠠᠢ ᠲᠤᠤ᠂ ᠠᠯᠢ ᠨᠢᠭᠡᠨ ᠰᠠᠯᠪᠤᠷᠢ ᠳ᠋ᠤ᠌ ᠠᠶᠤᠯ ᠲᠣᠬᠢᠶᠠᠯᠳᠤᠭᠰᠠᠨ ᠮᠠᠭᠤᠬᠠᠢ ᠮᠡᠳᠡᠭᠡ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠨ ᠳᠣᠲᠣᠷ ᠨᠢ ᠫᠠᠯᠬᠢᠪᠠ᠃ ᠶᠠᠭᠠᠷᠠᠨ ᠠᠪᠴᠤ ᠵᠠᠳᠠᠯᠬᠤ ᠲᠠᠢ ᠪᠠᠨ ᠵᠡᠷᠭᠡ ᠲᠠᠪᠤᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠳᠠᠩᠵᠢᠶᠠᠳ ᠲᠤ᠌ ᠬᠡᠳᠦ ᠳᠠᠬᠢᠨ ᠤᠩᠰᠢᠵᠤ ᠮᠤᠩᠳᠠᠬᠤ ᠦᠭᠡᠢ ᠶᠡᠬᠡ ᠳ᠋ᠦᠩ ᠰᠢᠨᠵᠢᠯᠡᠭᠡ ᠭᠠᠷᠭᠠᠨ ᠬᠣᠢᠰᠢ ᠲᠠᠯᠪᠢᠭᠰᠠᠨ ᠵᠦᠢᠯ ᠪᠣᠯᠬᠤ ᠶ᠋ᠢ ᠲᠠᠨᠢᠪᠠ᠃《ᠠ᠋ ᠲᠡᠨᠡᠭ ᠮᠠᠩᠭᠣ ᠵᠥᠨᠥᠭ ᠠ᠋᠂ ᠡᠭᠦᠨ ᠢ᠋ ᠳᠠᠬᠢᠨ ᠳᠠᠪᠲᠠᠨ ᠤᠩᠰᠢᠵᠤ ᠴᠠᠭ ᠤ᠋ᠨ ᠭᠠᠷᠤᠵᠠ ᠪᠣᠯᠭᠠᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠣᠢ?》 ᠭᠡᠵᠦ ᠬᠡᠯᠡᠮᠡᠷ ᠰᠠᠨᠠᠭᠳᠠᠨᠠ᠃ ᠭᠡᠪᠡᠴᠦ ᠶᠠᠭᠠᠬᠢᠨ ᠪᠣᠯᠬᠤ ᠪᠢᠯᠡ᠃ ᠬᠣᠭᠣᠯᠠᠢ ᠵᠠᠰᠠᠨ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠦᠭᠡ ᠨᠢᠭᠡ ᠪᠦᠷᠢ ᠶ᠋ᠢ ᠲᠣᠳᠣᠬᠠᠨ ᠬᠡᠯᠡᠨ ᠤᠩᠰᠢᠪᠠ᠃《 ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠶᠡᠬᠡ ᠨᠣᠶᠠᠨ ᠱᠤ᠌ ᠰᠢᠦ ᠵᠧᠩ ᠢ᠋ ᠡᠰᠡᠷᠭᠦᠴᠡᠭᠰᠡᠨ ᠬᠥᠳᠡᠯᠭᠡᠭᠡᠨ ᠬᠠ ᠶᠠ ᠦᠭᠡᠢ ᠭᠠᠷᠴᠤ ᠪᠠᠢᠨᠠ᠃ ᠤᠯᠠᠭᠠᠨ ᠣᠷᠣᠰ ᠠ᠋ᠴᠠ ᠲᠤᠰᠠᠯᠠᠮᠵᠢ ᠠᠪᠤᠨ ᠲᠡᠢᠨ ᠳᠡᠩᠳᠡᠭᠦᠦ ᠮᠠᠭᠠᠳ ᠦᠭᠡᠢ᠂ ᠡᠭᠦᠨ ᠢ᠋ ᠪᠠᠷᠠᠭᠠ ᠶᠠᠪᠤᠭᠤᠯᠬᠤ ᠳ᠋ᠠᠭᠠᠨ ᠪᠣᠳᠣᠯᠴᠠᠬᠤ?》 ᠭᠡᠵᠡᠢ᠃
ᠳᠠᠩᠵᠢᠶᠠᠳ ᠡᠨᠡ ᠮᠡᠳᠡᠭᠡ ᠶ᠋ᠢ ᠬᠦᠷᠡᠯ ᠦ᠋ᠨ ᠶᠠᠷᠢᠭᠰᠠᠨ ᠶᠠᠷᠢᠶᠠ ᠲᠠᠢ ᠬᠠᠷᠢᠯᠴᠠᠭᠤᠯᠤᠨ ᠳ᠋ᠦᠩᠨᠡᠵᠦ᠂ ᠢᠷᠡᠭᠡᠳᠦᠢ ᠳ᠋ᠡᠭᠡᠨ ᠮᠣᠩᠭᠣᠯ ᠤ᠋ᠨ ᠲᠦᠭᠦᠬᠡᠢ ᠡᠳ᠋ ᠦ᠋ᠨ ᠪᠠᠶᠠᠯᠢᠭ ᠠ᠋ᠴᠠ ᠰᠠᠯᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠰᠠᠨᠳᠤᠷᠤᠨ ᠬᠡᠯᠡᠪᠡ᠃(ᠦᠨᠡᠨ ᠳ᠋ᠡᠭᠡᠨ ᠳᠠᠩᠵᠢᠶᠠᠳ ᠲᠦᠭᠦᠬᠡᠢ ᠡᠳ᠋ ᠦ᠋ᠨ ᠪᠠᠶᠠᠯᠢᠭ ᠠ᠋ᠴᠠ ᠬᠠᠭᠠᠴᠠᠬᠤ ᠪᠣᠯᠪᠠ ᠤᠤ ᠭᠡᠵᠦ ᠢᠩᠭᠢᠵᠦ ᠴᠦ᠍ ᠰᠠᠨᠳᠤᠷᠤᠭᠠᠳ ᠪᠠᠢᠭᠠ ᠶᠤᠮ ᠪᠢᠰᠢ᠂ ᠥᠨᠥᠬᠢ ᠭᠤᠷᠪᠠᠨ ᠲᠦᠮᠡᠨ ᠶᠠᠩᠴᠢᠶᠠᠨ ᠤ᠋ ᠲᠤᠬᠠᠢ ᠯᠠ ᠶᠤᠮ ᠪᠠᠢᠵᠢ) ᠭᠡᠲᠡᠯᠡ ᠸᠠᠩ ᠬᠠᠢ ᠲᠤᠤ ᠲᠡᠷᠡ ᠶᠠᠩᠴᠢᠶᠠᠨ ᠤ᠋ ᠲᠤᠬᠠᠢ ᠣᠭᠲᠣ ᠮᠡᠳᠡᠭᠡ ᠦᠭᠡᠢ ᠪᠠᠢᠭᠠ ᠲᠤᠯᠠ ᠵᠥᠪᠬᠡᠨ ᠰᠠᠶᠢ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠨᠢ ᠪᠠᠷᠢᠮᠲᠠᠯᠠᠬᠤ ᠪᠥᠭᠡᠳ ᠪᠣᠳᠣᠪᠠᠰᠤ ᠶᠡᠷᠦ ᠲᠡᠢᠮᠦ ᠪᠢᠰᠢ᠂ ᠠᠷᠪᠠᠨ ᠮᠢᠩᠭᠠᠨ ᠰᠢᠯᠢᠳᠡᠭ ᠴᠡᠷᠢᠭ ᠲᠡᠢ ᠱᠤ᠌ ᠰᠢᠦ ᠵᠧᠩ ᠦ᠋ᠨ ᠭᠠᠷ ᠲᠤ ᠪᠠᠢᠭᠠ ᠲᠤᠬᠠᠢ ᠣᠭᠲᠣ ᠮᠡᠳᠡᠭᠡ ᠦᠭᠡᠢ ᠪᠠᠢᠭᠠ ᠲᠠᠷᠠᠬᠠᠢ ᠪᠤᠲᠠᠷᠬᠠᠢ ᠨᠡᠭᠦᠳᠡᠯᠴᠢᠨ ᠮᠣᠩᠭᠣᠯ ᠶᠡᠷᠦ ᠶᠠᠭᠠᠬᠢᠬᠤ ᠪᠢᠯᠡ ᠳᠠ ᠭᠡᠵᠦ ᠰᠠᠨᠠᠭᠳᠠᠬᠤ ᠠ᠋ᠴᠠ ᠭᠠᠳᠠᠨᠠ᠂ ᠳᠥᠷᠪᠡᠨ ᠵᠠᠭᠤᠨ ᠰᠠᠶᠠ ᠬᠥᠮᠦᠨ ᠢ᠋ᠶ᠋ᠡᠷ ᠪᠦᠷᠢᠯᠳᠦᠭᠰᠡᠨ ᠳᠤᠮᠳᠠᠳᠤ ᠢᠷᠭᠡᠨ ᠤᠯᠤᠰ ᠪᠣᠯ ᠮᠠᠨᠵᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠠᠢᠭᠠ ᠪᠢᠰᠢ᠂ ᠮᠠᠨᠵᠤ ᠶ᠋ᠢᠨ ᠲᠥᠷᠥ ᠶ᠋ᠢ ᠤᠰᠠᠳᠬᠠᠨ᠂ ᠠᠩᠭ᠌ᠯᠢ᠂ ᠠᠮᠧᠷᠢᠺᠠ ᠶ᠋ᠢᠨ ᠠᠳᠠᠯᠢ ᠬᠥᠷᠥᠩᠭᠡᠲᠡᠨ ᠦ᠌ ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ ᠵᠠᠰᠠᠭ ᠲᠥᠷᠥ ᠶ᠋ᠢ ᠲᠣᠭᠲᠠᠭᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠨᠲᠠᠭᠰᠠᠨ ᠪᠠᠷᠰ ᠰᠡᠷᠭᠦᠨ ᠪᠣᠰᠤᠭᠰᠠᠨ ᠤ᠋ ᠠᠳᠠᠯᠢ ᠬᠡᠨ ᠶᠠᠭᠤᠨ ᠳ᠋ᠤ᠌ ᠴᠦ᠍ ᠢᠯᠠᠭᠳᠠᠰᠢ ᠦᠭᠡᠢ ᠭᠡᠵᠦ ᠪᠣᠳᠣᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠣᠳᠣᠬᠤ ᠲᠤᠯᠠ ᠵᠣᠪᠠᠬᠤ ᠶᠠᠭᠤᠮᠠ ᠳᠠᠩᠴᠤ ᠠᠯᠠᠭᠠ᠃ ᠬᠠᠷᠢᠨ ᠮᠣᠩᠭᠣᠯ ᠤ᠋ᠳ ᠬᠥᠳᠡᠯᠪᠡᠯ ᠴᠦ᠍ ᠬᠥᠳᠡᠯᠦᠭ! ᠠᠯᠢᠪᠠ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠳᠡᠯᠵᠦ ᠬᠡᠮᠡᠨᠡ ᠶᠠᠳᠠᠷᠠᠯ ᠳ᠋ᠤ᠌ ᠤᠨᠠᠨ ᠬᠦᠴᠦᠨ ᠪᠠᠭᠤᠷᠠᠵᠤ ᠨᠣᠮᠣᠬᠠᠷᠠᠨᠠ᠃ ᠲᠡᠷᠡ ᠴᠠᠭ ᠲᠤ ᠥᠪᠡᠷ ᠦ᠋ᠨ ᠠᠵᠢᠯᠯᠠᠭᠠ ᠶ᠋ᠢ ᠲᠡᠷᠢᠭᠦᠨ ᠦ᠌ ᠰᠢᠨᠡ ᠠᠷᠭᠠ ᠪᠠᠷ ᠬᠥᠳᠡᠯᠭᠡᠨ ᠪᠤᠰᠤᠳ ᠲᠠᠢ ᠣᠷᠣᠯᠳᠣᠬᠤ ᠪᠠ ᠪᠤᠰᠤᠳ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠣᠷᠣᠬᠤ ᠶᠤᠮ ᠰᠢᠦ ᠳᠡ ᠭᠡᠵᠦ ᠪᠣᠳᠣᠨᠠ᠃ ᠡᠢᠮᠦ ᠳ᠋ᠦ᠍ ᠵᠢᠩ ᠦ᠋ᠨ ᠭᠤᠷᠪᠠᠨ ᠮᠣᠩᠭᠣᠯ ᠳ᠋ᠤ᠌ ᠪᠠᠢᠲᠤᠭᠠᠢ ᠪᠦᠬᠦ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠴᠦ᠍ ᠬᠣᠷᠣᠰᠬᠤ ᠬᠣᠷᠣᠰᠤᠯ ᠲᠥᠷᠥᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠮᠠᠰᠲ᠋ᠧᠷ ᠭᠸᠨ᠋ᠷᠩ ᠮᠠᠭᠠᠨ ᠠ᠋ᠴᠠ ᠠᠪᠬᠤ ᠴᠢᠴᠧ ᠶ᠋ᠢ ᠲᠤᠩ ᠳᠠᠷᠤᠢ ᠭᠠᠷ ᠲᠠᠭᠠᠨ ᠣᠷᠣᠭᠤᠯᠵᠤ ᠠᠪᠤᠭᠠᠳ ᠪᠤᠰᠤᠳ ᠫᠦᠰᠡ ᠶ᠋ᠢᠨ ᠬᠢᠨ ᠲᠡᠢ ᠴᠣᠬᠢᠯᠳᠤᠬᠤ ᠨᠢ ᠴᠢᠬᠤᠯᠠ ᠭᠡᠵᠦ ᠦᠵᠡᠨᠡ᠃
— ᠠᠢ ᠶᠡᠬᠡ ᠠᠬᠠ ᠪᠢᠲᠡᠭᠡᠢ ᠵᠣᠪᠠ! ᠣᠳᠣᠬᠠᠨ ᠳ᠋ᠠᠭᠠᠨ ᠠᠷᠤ ᠮᠣᠩᠭᠣᠯ ᠶᠠᠮᠠᠷ ᠴᠦ᠍ ᠪᠠᠢᠭᠰᠠᠨ ᠬᠠᠮᠢᠶᠠ ᠦᠭᠡᠢ᠃ ᠲᠡᠳᠡ ᠦᠢᠮᠡᠬᠦ ᠶᠣᠰᠣᠲᠠᠢ᠃ ᠡᠨᠡ ᠮᠠᠨ ᠤ᠋ ᠠᠵᠢᠯ ᠳ᠋ᠤ᠌ ᠨᠢᠭᠡ ᠤᠳᠠᠭᠠ ᠰᠠᠭᠠᠳ ᠪᠣᠯᠬᠤ ᠪᠣᠯᠪᠠᠴᠤ ᠡᠴᠦᠰ ᠲᠡᠭᠡᠨ ᠰᠠᠢᠨ ᠪᠣᠯᠤᠨᠠ᠃
— ᠠᠢ ᠰᠠᠢᠨ ᠳᠡᠭᠦᠦ ᠮᠢᠨᠢ᠂ ᠲᠡᠢᠮᠦ ᠪᠢᠰᠢ᠃ ᠮᠣᠩᠭᠣᠯ ᠬᠥᠮᠦᠨ ᠨᠢᠭᠡ ᠬᠥᠳᠡᠯᠪᠡᠰᠦ ᠬᠡᠴᠢᠨᠡᠭᠡᠨ ᠬᠡᠴᠡᠭᠦᠦ ᠶ᠋ᠢ ᠴᠢ ᠮᠡᠳᠡᠬᠦ ᠦᠭᠡᠢ᠂ ᠪᠢ ᠮᠡᠳᠡᠨᠡ᠃ ᠨᠠᠳᠠ ᠠ᠋ᠴᠠ ᠭᠠᠳᠠᠨᠠ ᠲᠡᠦᠬᠡ ᠮᠡᠳᠡᠨᠡ᠃ ᠲᠡᠦᠬᠡ ᠪᠣᠯ ᠥᠩᠭᠡᠷᠡᠭᠰᠡᠨ ᠢ᠋ ᠬᠡᠯᠡᠬᠦ ᠪᠣᠯᠪᠠᠴᠤ ᠲᠡᠷᠡ ᠤᠯᠤᠰ ᠤ᠋ᠨ ᠵᠠᠩ ᠴᠢᠨᠠᠷ ᠢ᠋ ᠢᠯᠡᠴᠢᠯᠡᠨᠡ᠃ ᠢᠷᠡᠭᠡᠳᠦᠢ ᠶ᠋ᠢᠨ ᠵᠠᠮ ᠮᠥᠷ ᠢ᠋ ᠴᠦ᠍ ᠵᠢᠭᠠᠨᠠ᠃ ᠠᠶᠠ᠂ ᠪᠣᠳᠣᠬᠤ ᠬᠡᠷᠡᠭᠲᠡᠢ! ᠵᠣᠣ ᠴᠢ ᠮᠢᠨ ᠨᠣᠶᠠᠨ ᠢ᠋ ᠪᠤᠳᠠᠭᠠ ᠵᠣᠭᠣᠭᠯᠠ ᠭᠡᠵᠦ ᠵᠠᠯᠠᠨ ᠠᠪᠴᠢᠷᠠ! ᠡᠨᠡ ᠬᠥᠮᠦᠨ ᠪᠢᠳᠡᠨ ᠳ᠋ᠦ᠍ ᠯᠠᠪ ᠰᠠᠢᠨ ᠢ᠋ ᠬᠡᠯᠡᠨᠡ ᠪᠠᠢᠬᠠ᠃
ᠵᠣᠣ ᠴᠢ ᠮᠢᠨ ᠨᠣᠶᠠᠨ ᠭᠡᠭᠴᠢ ᠨᠢ ᠡᠮᠦᠨᠡ ᠵᠦᠭ ᠦ᠋ᠨ ᠨᠢᠭᠡᠨ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠨᠦ᠍ᠭᠦᠳ ᠦ᠋ᠨ ᠨᠢᠭᠡᠨ ᠳ᠋ᠢᠸᠢᠽᠢ ᠶ᠋ᠢᠨ ᠳᠠᠷᠤᠭᠠ ᠪᠥᠭᠡᠳ ᠬᠡᠳᠦᠨ ᠰᠠᠷᠠ ᠪᠠᠢᠯᠳᠤᠭᠰᠠᠨ ᠤ᠋ ᠪᠠᠨ ᠡᠴᠦᠰ ᠲᠦ᠍ ᠵᠠᠩᠴᠢᠬᠦᠦ ᠬᠣᠲᠠᠨᠠ ᠴᠡᠷᠢᠭ ᠦ᠋ᠳ ᠲᠡᠢ ᠪᠡᠨ ᠢᠷᠡᠨ ᠠᠮᠠᠷᠠᠵᠤ ᠪᠠᠢᠭᠠ ᠠᠵᠢ᠃ ᠣᠳᠣ ᠠᠮᠠᠷᠠᠬᠤ ᠬᠤᠭᠤᠴᠠᠭᠠ ᠨᠢ ᠳᠠᠭᠤᠰᠤᠨ ᠬᠡᠵᠢᠶᠡ ᠬᠡᠵᠢᠶᠡ ᠦᠭᠡᠢ ᠳᠠᠬᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠮᠣᠷᠳᠠᠬᠤ ᠳᠥᠭᠥᠭᠡᠳ ᠪᠠᠢᠭᠠ ᠶᠤᠮ ᠪᠠᠢᠵᠠᠢ᠃
ᠸᠠᠩ ᠬᠠᠢ ᠲᠤᠤ᠂ ᠳᠠᠩᠵᠢᠶᠠᠳ ᠤ᠋ᠨ ᠦᠭᠡ ᠶ᠋ᠢ ᠣᠭᠲᠣ ᠲᠣᠭᠣᠮᠰᠠᠷᠯᠠᠭᠰᠠᠨ ᠦᠭᠡᠢ ᠪᠢᠯᠡ᠃ ᠲᠡᠦᠬᠡ ᠪᠣᠯ ᠤᠯᠤᠰ ᠤ᠋ᠨ ᠢᠷᠡᠭᠡᠳᠦᠢ ᠶ᠋ᠢᠨ ᠵᠠᠮ ᠮᠥᠷ ᠢ᠋ ᠵᠢᠭᠠᠨᠠ ᠭᠡᠭᠴᠢ ᠨᠢ ᠶᠠᠭᠤ ᠪᠣᠢ? ᠳᠣᠯᠣᠭᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠡᠮᠦᠨᠡ ᠪᠥᠭᠡᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠡᠴᠡ ᠡᠰᠡᠷᠭᠦᠴᠡᠭᠰᠡᠨ ᠪᠦᠬᠦᠨ ᠢ᠋ ᠬᠡᠮᠬᠡ ᠴᠣᠬᠢᠨ ᠳᠣᠣᠷᠠ ᠪᠠᠨ ᠰᠥᠭᠥᠳᠬᠡᠭᠰᠡᠨ ᠴᠢᠩᠭᠢᠰ ᠬᠠᠭᠠᠨ ᠳᠠᠬᠢᠨ ᠪᠣᠰᠬᠤ ᠬᠡᠷᠡᠭ ᠤᠤ? ᠶᠠᠭᠠᠬᠢᠯᠠ ᠴᠦ᠍ ᠭᠡᠰᠡᠨ ᠲᠡᠷᠲᠡᠭᠡᠬᠢ ᠬᠣᠯᠠ ᠶ᠋ᠢᠨ ᠬᠡᠷᠡᠭ ᠲᠦ᠍ ᠥᠭᠡᠷᠡ ᠵᠦᠭ᠂ ᠥᠭᠡᠷᠡ ᠬᠡᠷᠡᠭ ᠢ᠋ᠶ᠋ᠡᠷ ᠥᠨᠥ ᠮᠠᠷᠭᠠᠰᠢ ᠶ᠋ᠢᠨ ᠨᠢᠭᠡᠨ ᠳ᠋ᠦ᠍ ᠶᠠᠪᠤᠬᠤ ᠬᠥᠮᠦᠨ ᠢ᠋ ᠪᠢᠯᠳᠠᠤᠴᠢᠯᠠᠬᠤ ᠶ᠋ᠢᠨ ᠬᠡᠷᠡᠭ ᠠᠯᠠᠭᠠ᠃ ᠡᠨᠡ ᠨᠢ ᠶᠠᠳᠠᠵᠤ ᠨᠢᠭᠡ ᠭᠸᠨ᠋ᠷᠡᠯ ᠰᠠᠨ ᠪᠣᠯ ᠴᠤ᠌ ᠪᠠᠰᠠ ᠶᠠᠭᠠᠬᠢᠬᠤᠪ᠃ ᠤᠷᠲᠤ ᠠ᠋ᠴᠠ ᠪᠠᠨ ᠳ᠋ᠢᠸᠢᠽᠢ ᠶ᠋ᠢᠨ ᠳᠠᠷᠤᠭᠠ ᠪᠥᠭᠡᠳ ᠲᠡᠭᠡᠬᠦ ᠪᠡᠷ ᠲᠡᠷᠡ ᠨᠢ ᠨᠢᠭᠡ ᠶᠡᠬᠡ ᠪᠦᠬᠦᠨ ᠢ᠋ ᠢᠯᠠᠨ ᠪᠠᠢᠯᠳᠤᠭᠴᠢ ᠴᠤ᠌ ᠪᠢᠰᠢ᠂ ᠥᠪᠡᠷ ᠢ᠋ᠶ᠋ᠡᠨ ᠳᠠᠢᠰᠤᠨ ᠳ᠋ᠤ᠌ ᠪᠠᠢᠨ ᠪᠠᠢᠨ ᠴᠣᠬᠢᠭᠳᠠᠭᠰᠠᠭᠠᠷ ᠳ᠋ᠢᠸᠢᠽᠢ ᠴᠦ᠍ ᠪᠢᠰᠢ ᠳ᠋ᠢᠸᠢᠽᠢ ᠶ᠋ᠢᠨ ᠨᠡᠷᠡ ᠵᠡᠭᠦᠭᠰᠡᠨ ᠬᠣᠷᠢᠶᠠ᠂ ᠴᠡᠷᠢᠭ ᠦ᠋ᠳ ᠨᠢ ᠪᠣᠯ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠡᠩ ᠦ᠋ᠨ ᠨᠣᠮᠣᠬᠠᠨ ᠠᠷᠠᠳ ᠢᠷᠭᠡᠳ ᠦ᠋ᠨ ᠡᠪᠦᠷ ᠲᠦᠷᠡᠢ ᠶ᠋ᠢ ᠨᠡᠩᠵᠢᠨ ᠠᠷᠪᠠ ᠲᠠᠪᠤᠨ ᠵᠣᠭᠣᠰ ᠢ᠋ ᠨᠢ ᠪᠤᠯᠢᠶᠠᠨᠠ᠃ ᠪᠠᠢᠯᠳᠤᠬᠤ ᠳ᠋ᠠᠭᠠᠨ ᠪᠡᠶᠡ ᠪᠠᠶᠠᠨ ᠤ᠋ ᠪᠠᠨ ᠠᠷᠤ ᠳ᠋ᠤ᠌ ᠣᠷᠣᠵᠤ ᠪᠠᠢᠭᠠᠳ ᠵᠢᠭᠤᠲᠠᠬᠤ ᠳ᠋ᠠᠭᠠᠨ ᠯᠠ ᠰᠠᠢᠨ᠃ ᠡᠢᠮᠦ ᠨᠢᠭᠡᠨ ᠰᠠᠨᠳᠤᠷᠤᠭᠰᠠᠨ ᠳᠠᠷᠤᠭᠠ ᠶ᠋ᠢ ᠨᠣᠶᠠᠨ ᠭᠡᠵᠦ ᠨᠡᠷᠡᠯᠡᠭᠡᠳ᠂ ᠵᠠᠯᠠᠨ ᠠᠪᠴᠢᠷᠠ ᠭᠡᠬᠦ ᠪᠣᠯ ᠶᠣᠰᠣᠲᠠᠢ ᠲᠡᠨᠡᠭ ᠮᠠᠩᠬᠤᠤ ᠴᠤ᠌ ᠦᠵᠡᠭᠡ ᠦᠭᠡᠢ ᠵᠥᠨᠥᠭ ᠦ᠋ᠨ ᠠᠵᠢᠯ᠃ ᠠᠷᠢᠬᠢ ᠳᠠᠷᠠᠰᠤ᠂ ᠬᠣᠭᠣᠯᠠ ᠴᠠᠢ᠂ ᠴᠠᠭ ᠭᠤᠷᠪᠠ ᠶ᠋ᠢᠨ ᠭᠠᠷᠤᠵᠠ ᠭᠡᠵᠦ ᠸᠠᠩ ᠬᠠᠢ ᠲᠤᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠤᠬᠤ ᠪᠣᠯᠪᠠᠴᠤ ᠭᠠᠳᠠᠨᠠ ᠪᠠᠨ ᠪᠠᠬᠠᠳᠤᠨ ᠰᠠᠢᠰᠢᠶᠠᠨᠠ᠃
— ᠠᠢ ᠠᠬᠠ ᠶ᠋ᠢᠨ ᠰᠠᠨᠠᠭᠠ ᠲᠤᠢᠯ ᠤ᠋ᠨ ᠵᠥᠪ᠃ ᠪᠢ ᠣᠳᠣᠬᠠᠨ ᠤᠷᠢᠶᠠ ᠭᠡᠳ ᠬᠠᠭᠠᠯᠭᠠ ᠶ᠋ᠢ ᠨᠢ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠬᠠᠭᠠᠭᠠ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ᠄《ᠪᠢ ᠰᠢᠨᠡ ᠦᠶᠡ ᠶ᠋ᠢᠨ ᠪᠣᠯᠪᠠᠰᠤᠷᠠᠯ ᠲᠠᠢ ᠱᠠᠩᠬᠠᠢ ᠬᠣᠲᠠ ᠶ᠋ᠢᠨ ᠬᠥᠮᠦᠨ ᠠᠲᠠᠯᠠ ᠪᠠᠨ ᠡᠨᠡ ᠮᠠᠭᠤ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠪᠣᠬᠢᠷ ᠤᠲᠤᠭᠠ᠂ ᠭᠠᠰᠢᠭᠤᠨ ᠰᠠᠷᠢᠮᠰᠠᠭ ᠤ᠋ᠨ ᠬᠤᠷᠴᠠ ᠦᠨᠦᠷ ᠬᠣᠶᠠᠷ ᠲᠤ ᠨᠡᠪᠲᠡᠷᠡᠭᠰᠡᠨ ᠵᠥᠨᠥᠭ ᠦ᠋ᠨ ᠡᠮᠦᠨᠡ ᠶᠠᠭᠤᠨ ᠳ᠋ᠤ᠌ ᠪᠥᠬᠥᠯᠵᠡᠨᠡ ᠪᠢᠯᠡ?》 ᠭᠡᠵᠦ ᠪᠣᠳᠣᠪᠠ᠃ ᠲᠣᠮᠣ ᠲᠡᠩᠬᠡᠬᠡᠷ ᠠᠰᠠᠷ ᠲᠠᠢ ᠬᠠᠭᠠᠯᠭᠠᠨ ᠤ᠋ ᠪᠦᠳᠦᠭᠦᠨ ᠭᠣᠶᠣ ᠮᠣᠳᠣ ᠶ᠋ᠢ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠲᠦᠰᠢᠨ ᠵᠣᠭᠰᠣᠬᠤ ᠶ᠋ᠢᠨ ᠤᠴᠢᠷ ᠲᠡᠷᠡ ᠪᠠᠢᠯᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠮᠥᠩᠭᠥ! ᠮᠥᠩᠭᠥᠨ ᠦ᠌ ᠲᠥᠯᠥᠭᠡ! ᠴᠢ ᠲᠡᠭᠦᠨ ᠡᠴᠡ ᠬᠡᠳᠦᠨ ᠠᠷᠪᠠᠨ ᠬᠤᠪᠢ ᠪᠠᠭᠠ ᠮᠥᠩᠭᠥ ᠲᠠᠢ ᠠ᠋ᠴᠠ ᠯᠠ ᠡᠨᠡ ᠰᠢᠦ ᠳᠡ ᠭᠡᠵᠦ ᠲᠩᠷᠢ ᠳᠡᠭᠡᠷᠡ ᠡᠴᠡ ᠬᠡᠯᠡᠬᠦ ᠰᠢᠭ ᠪᠣᠯᠬᠤ ᠳ᠋ᠤᠨᠢ᠂ ᠵᠠ ᠶᠠᠭᠠᠬᠢᠬᠤᠪ᠂ ᠪᠢ ᠲᠡᠭᠦᠨ ᠦ᠌ ᠡᠮᠦᠨᠡ ᠪᠥᠬᠥᠯᠵᠡᠬᠦ ᠬᠡᠷᠡᠭᠲᠡᠢ᠃ ᠢᠩᠭᠢᠬᠦ ᠴᠦ᠍ ᠬᠡᠷᠡᠭᠲᠡᠢ᠃ ᠪᠡᠶᠡ ᠶ᠋ᠢ ᠨᠢ ᠮᠠᠭᠤᠳᠠᠬᠤ ᠪᠠᠷ《ᠠᠢ ᠠᠬᠠ ᠮᠢᠨᠢ ᠬᠡᠷᠪᠡ ᠲᠠᠨ ᠢ᠋ ᠨᠠᠰᠤ ᠪᠠᠷᠠᠪᠠᠰᠤ ᠳᠡᠭᠦᠦ ᠨᠠᠳᠠ ᠳ᠋ᠤ᠌ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢᠨ ᠬᠡᠷᠡᠭ ᠠᠯᠠᠭᠠ ᠭᠡᠵᠦ ᠥᠨᠥᠴᠢᠨ ᠰᠠᠷᠢᠮᠰᠠᠭ ᠤ᠋ᠨ ᠰᠢᠭᠦᠰᠦ ᠶ᠋ᠢ ᠠᠯᠴᠢᠭᠤᠷ ᠲᠠᠭᠠᠨ ᠰᠢᠩᠭᠡᠭᠡᠨ ᠨᠢᠳᠦ ᠪᠡᠨ ᠠᠷᠴᠢᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠬᠤ ᠶᠤᠮ ᠰᠢᠦ᠃ ᠢᠩᠭᠢᠵᠦ ᠬᠡᠮᠡᠨᠡ ᠡᠴᠦᠰ ᠦ᠋ᠨ ᠴᠠᠭ ᠮᠢᠨᠦᠬᠢ ᠪᠣᠯᠤᠨᠠ》 ᠭᠡᠵᠦ ᠪᠣᠳᠣᠨ ᠰᠡᠳᠬᠢᠯ ᠲᠠᠢᠳᠬᠤᠷᠠᠨᠠ᠃
ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠣᠣ ᠴᠢ ᠮᠢᠨ ᠨᠣᠶᠠᠨ ᠤ᠋ ᠵᠦᠭ ᠢᠨᠢᠶᠡᠮᠰᠦᠭᠯᠡᠨ ᠠᠯᠬᠤᠬᠤ ᠪᠣᠯᠪᠠ᠃