ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠠᠷᠪᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 10
233ᠶᠡᠬᠡ ᠳᠠᠩᠵᠢᠶᠠᠳ
ᠳᠠᠩᠵᠢᠶᠠᠳ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠶᠠᠪᠤᠭᠠ ᠬᠥᠮᠦᠨ ᠵᠡᠭᠦᠨ ᠬᠣᠢᠲᠤ ᠪᠤᠯᠤᠩ ᠤ᠋ᠨ ᠰᠢᠯ ᠴᠣᠩᠬᠣ ᠨᠤᠭᠤᠳ ᠲᠠᠢ ᠬᠥᠬᠡ ᠲᠤᠢᠫᠤᠤ ᠶ᠋ᠢᠨ ᠪᠠᠢᠰᠢᠩ ᠴᠢᠭᠯᠡᠨ ᠶᠠᠪᠤᠯᠠ᠃ ᠣᠢᠷᠠᠲᠤᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠲᠡᠷᠡ ᠬᠥᠮᠦᠨ ᠦ᠌ ᠭᠢᠰᠬᠢᠯᠲᠡ ᠤᠳᠠᠭᠠᠰᠢᠷᠠᠨ ᠴᠢᠷᠠᠢ ᠨᠢ ᠲᠥᠪ ᠪᠣᠯᠪᠠ᠃ ᠤᠭ ᠪᠠᠢᠰᠢᠩ ᠤ᠋ᠨ ᠳᠡᠷᠭᠡᠳᠡ ᠢᠷᠡᠭᠡᠳ ᠬᠠᠭᠠᠯᠭᠠ ᠶ᠋ᠢ ᠵᠥᠭᠡᠯᠡᠨ ᠲᠡᠳᠡᠨ᠄
— ᠵᠠ ᠡᠢᠰᠢ ᠪᠡᠨ ᠣᠷᠣᠪᠠᠢ ᠭᠡᠵᠦ ᠰᠢᠪᠡᠨᠡᠪᠡ᠃
ᠲᠡᠷᠡ ᠲᠠᠰᠤᠯᠭᠠ ᠬᠥᠮᠦᠨ ᠦᠭᠡᠢ᠂ ᠵᠥᠪᠬᠡᠨ ᠰᠢᠷᠡᠭᠡ ᠰᠠᠨᠳᠠᠯᠢ ᠬᠣᠶᠠᠷᠬᠠᠨ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠨᠥᠭᠦᠭᠡ ᠬᠥᠮᠦᠨ ᠬᠣᠢᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠭᠡᠳ ᠵᠡᠭᠦᠨ ᠲᠠᠢᠰᠢ ᠬᠠᠷᠠᠭᠰᠠᠨ ᠬᠣᠶᠠᠳᠠᠬᠢ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠣᠴᠢᠨ ᠲᠠᠲᠠᠭᠠᠳ ᠦᠭᠡ ᠳᠤᠤᠭᠠᠷᠤᠯ ᠦᠭᠡᠢ ᠬᠥᠳᠡᠯᠭᠡᠪᠡ᠃ ᠡᠭᠦᠨ ᠢ᠋ ᠨᠢ ᠵᠢᠩᠴᠢᠳ ᠮᠥᠨ ᠡᠢᠰᠢ ᠣᠷᠣ ᠭᠡᠵᠦ ᠪᠠᠢᠨᠠ ᠭᠡᠵᠦ ᠣᠢᠯᠠᠭᠠᠪᠠ᠃ ᠡᠨᠳᠡ ᠮᠥᠨ ᠬᠥᠮᠦᠨ ᠦᠭᠡᠢ᠂ ᠳᠤᠭᠤᠢ ᠰᠢᠷᠡᠭᠡ ᠲᠣᠭᠣᠷᠢᠭᠤᠯᠤᠨ ᠬᠡᠳᠦᠨ ᠰᠠᠨᠳᠠᠯᠢ ᠲᠠᠯᠪᠢᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠬᠠᠨᠵᠤ ᠪᠣᠢ ᠦᠵᠡᠭᠳᠡᠨᠡ᠃ ᠭᠡᠲᠡᠯᠡ ᠣᠳᠣ ᠳᠠᠭᠠᠭᠤᠯᠵᠤ ᠶᠠᠪᠤᠭᠠ ᠬᠥᠮᠦᠨ ᠭᠤᠷᠪᠠᠳᠠᠬᠢ ᠬᠠᠭᠠᠯᠭᠠ ᠤᠷᠤᠭᠤ ᠥᠯᠮᠡᠢ ᠪᠡᠷ ᠢ᠋ᠶ᠋ᠡᠨ ᠭᠢᠰᠬᠢᠯᠡᠨ ᠬᠦᠷᠦᠭᠡᠳ᠂ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠨ ᠵᠣᠭᠰᠣᠪᠠ᠃ ᠦᠵᠡᠲᠡᠯᠡ ᠵᠢᠷᠦᠬᠡ ᠨᠢ ᠬᠦᠴᠦᠲᠡᠢ ᠴᠣᠬᠢᠯᠠᠨ ᠠᠮᠢᠰᠬᠤᠯ ᠨᠢ ᠳᠡᠭᠡᠷᠡ ᠬᠥᠭᠡᠷᠪᠡ᠃
ᠬᠠᠭᠠᠯᠭᠠᠨ ᠤ᠋ ᠴᠢᠨᠠᠳᠤ ᠲᠠᠯᠠ ᠳ᠋ᠤ᠌ ᠳᠠᠩᠵᠢᠶᠠᠳ᠂ ᠲᠣᠯᠣᠭᠠᠢ ᠪᠤᠭᠤᠷᠤᠯ᠂ ᠴᠢᠷᠠᠢ ᠦᠷᠴᠢᠭᠢᠷ᠂ ᠨᠢᠳᠦ ᠭᠤᠷᠪᠠᠯᠵᠢᠨ᠂ ᠬᠣᠶᠠᠷ ᠵᠠᠪᠠᠵᠢ ᠤᠷᠤᠭᠤ ᠪᠠᠨ ᠤᠯᠠᠭᠠᠨ᠂ ᠴᠠᠭᠠᠨ᠂ ᠬᠥᠬᠡ ᠭᠤᠷᠪᠠᠨ ᠥᠩᠭᠡ ᠶ᠋ᠢᠨ ᠪᠣᠯᠪᠠᠴᠤ ᠲᠠᠪᠤ ᠠᠷᠪᠠᠬᠠᠨ ᠬᠢᠯᠭᠠᠰᠤ ᠪᠠᠷ ᠪᠦᠷᠢᠳᠦᠭᠰᠡᠨ ᠰᠢᠩᠭᠡᠨ ᠰᠠᠬᠠᠯ ᠤᠨᠵᠢᠭᠤᠯᠤᠭᠰᠠᠨ ᠡᠪᠦᠭᠡᠨ᠂ ᠬᠦᠷᠡᠩ ᠽᠠᠨᠳᠠᠨ ᠨᠢᠭᠤᠷ ᠲᠠᠢ ᠬᠠᠨᠵᠤᠨ ᠳᠡᠭᠡᠷᠡ ᠲᠣᠮᠣ ᠬᠠᠷᠠ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠷᠠᠰᠤ ᠳᠡᠯᠭᠡᠭᠰᠡᠨ ᠳᠡᠭᠡᠷᠡ ᠪᠡᠨ ᠬᠥᠯ ᠠᠴᠢᠨ ᠬᠠᠭᠠᠰ ᠵᠠᠪᠢᠯᠠᠨ ᠰᠠᠭᠤᠬᠤ ᠠᠵᠢ᠃ ᠤᠭ ᠨᠢ ᠡᠨᠡ ᠬᠥᠮᠦᠨ ᠢᠳᠡᠷ ᠵᠠᠯᠠᠭᠤ ᠳ᠋ᠠᠭᠠᠨ ᠳᠠᠩᠵᠢᠶᠠᠳ ᠪᠢᠰᠢ᠂ ᠶᠠᠳᠠᠵᠤ ᠠᠮᠢ ᠬᠤᠪᠢ ᠶ᠋ᠢᠨ ᠠᠮᠢᠳᠤᠷᠠᠯᠭᠠᠨ ᠳ᠋ᠤ᠌ ᠪᠢᠰᠢ᠂ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠵᠢᠳᠬᠦᠭᠰᠡᠨ ᠢ᠋ᠶ᠋ᠡᠷ ᠰᠥᠨᠢ ᠶ᠋ᠢᠨ ᠪᠣᠷᠣ ᠬᠣᠨᠣᠭ ᠵᠠᠯᠭᠠᠳᠠᠭ ᠪᠥᠭᠡᠳ ᠰᠥᠨᠢ ᠶ᠋ᠢᠨ ᠪᠣᠳᠣᠵᠤ ᠬᠣᠨᠣᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠷᠭᠠᠰᠢ ᠨᠢ ᠠᠵᠢᠯ ᠳ᠋ᠤ᠌ ᠵᠢᠳᠬᠦᠳᠡᠭ ᠶᠠᠳᠠᠭᠤᠰ ᠤ᠋ᠨ ᠨᠢᠭᠡ ᠪᠠᠢᠯᠠ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠭᠠᠳᠠᠭᠰᠢ ᠭᠠᠷᠴᠤ ᠪᠣᠯᠣᠰᠢ ᠦᠭᠡᠢ ᠲᠩᠷᠢ ᠮᠠᠭᠤᠬᠠᠢ ᠳ᠋ᠤ᠌ ᠡᠷᠭᠢ ᠨᠦᠬᠡᠯᠡᠨ ᠪᠠᠢᠭᠤᠯᠤᠭᠰᠠᠨ ᠣᠷᠣᠨ ᠳ᠋ᠠᠭᠠᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠶ᠋ᠢᠨ ᠲᠦᠮᠡᠨ ᠵᠣᠪᠠᠯᠠᠩ᠂ ᠮᠢᠩᠭᠠᠨ ᠭᠠᠰᠢᠭᠤᠨ ᠢ᠋ ᠪᠣᠳᠣᠨ ᠬᠡᠪᠲᠡᠵᠦ ᠪᠠᠢᠬᠤ ᠳ᠋ᠤᠨᠢ ᠭᠡᠨᠡᠳᠲᠡ ᠨᠢᠭᠡ ᠰᠠᠢᠬᠠᠨ ᠤᠬᠠᠭᠠᠨ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠠᠭᠤᠭᠰᠠᠨ ᠠᠵᠢ᠃ ᠲᠡᠷᠡ ᠨᠢ ᠶᠠᠭᠤ ᠪᠣᠢ ᠭᠡᠪᠡᠯ᠄ ᠰᠢᠯ ᠲᠣᠯᠢ᠂ ᠵᠡᠭᠦᠦ ᠬᠤᠷᠤᠭᠤᠪᠴᠢ᠂ ᠬᠣᠰᠢᠶᠠ ᠲᠤᠤᠵᠠ ᠪᠠ ᠪᠠᠰᠠ ᠪᠤᠰᠤᠳ ᠪᠦᠬᠦ ᠵᠠᠩᠴᠢᠬᠦᠦ ᠬᠣᠲᠠ ᠶ᠋ᠢᠨ ᠬᠡᠮᠵᠢᠶᠡ ᠪᠡᠷ ᠦᠯᠦ ᠵᠠᠷᠤᠭᠳᠠᠬᠤ ᠶᠠᠭᠤᠮᠠᠰ ᠶᠠᠭᠤ ᠪᠠᠢᠳᠠᠭ ᠢ᠋ ᠴᠤᠭᠯᠠᠷᠠᠭᠤᠯᠤᠨ ᠠᠪᠴᠤ ᠬᠣᠶᠠᠷ ᠲᠣᠮᠣ ᠰᠠᠭᠰᠤᠨ ᠳ᠋ᠤ᠌ ᠬᠢᠵᠦ ᠤᠷᠲᠤ ᠮᠣᠳᠣ ᠪᠠᠷ ᠳᠠᠮᠨᠠᠭᠤᠷᠳᠠᠨ ᠡᠭᠦᠷᠭᠡᠯᠡᠵᠦ᠂ ᠬᠠᠯᠬᠠ ᠨᠤᠲᠤᠭ ᠲᠤ᠌ ᠠᠪᠠᠴᠢᠭᠠᠳ ᠮᠣᠷᠢ ᠤᠨᠤᠵᠤ᠂ ᠮᠠᠯ ᠢ᠋ᠶ᠋ᠠᠨ ᠮᠠᠯᠯᠠᠭᠰᠠᠨ ᠮᠣᠩᠭᠣᠯ ᠲᠤᠭᠤᠷᠭᠠᠲᠠᠨ ᠨᠤᠭᠤᠳ ᠤ᠋ᠨ ᠡᠬᠡᠨᠡᠷ ᠬᠡᠦᠬᠡᠨ ᠳ᠋ᠦ᠍ ᠮᠠᠢᠮᠠᠢᠯᠠᠶᠠ ᠭᠡᠵᠦ ᠪᠣᠳᠣᠵᠠᠢ᠃ ᠢᠩᠭᠢᠭᠡᠳ ᠨᠢᠭᠡ ᠤᠳᠠᠭᠠ ᠲᠤᠷᠰᠢᠵᠤ ᠦᠵᠡᠭᠡᠳ ᠶᠡᠬᠡᠬᠡᠨ ᠠᠮᠵᠢᠯᠲᠠ ᠣᠯᠤᠭᠰᠠᠨ ᠤᠴᠢᠷ ᠬᠠᠯᠬᠠ ᠵᠠᠩᠴᠢᠬᠦᠦ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠷᠤᠭ ᠲᠡᠮᠡᠭᠡᠨ ᠳ᠋ᠦ᠍ ᠳᠠᠩᠨᠠᠪᠠᠯ ᠵᠣᠬᠢᠬᠤ ᠬᠦᠨᠳᠦ ᠶ᠋ᠢ ᠡᠭᠦᠷᠭᠡᠯᠡᠨ ᠭᠤᠴᠢᠨ ᠬᠣᠶᠠᠷ ᠤᠳᠠᠭᠠ ᠶᠠᠪᠤᠯᠠ᠃ ᠡᠢᠨ ᠬᠦ᠌ ᠶᠠᠪᠤᠬᠤ ᠳ᠋ᠠᠭᠠᠨ ᠲᠣᠮᠣ ᠲᠣᠮᠣ ᠲᠣᠪᠣᠷᠤᠤᠲᠤ ᠬᠠᠳᠠᠭᠠᠰᠤ ᠪᠠᠷ ᠪᠡᠬᠢᠯᠡᠭᠳᠡᠭᠰᠡᠨ ᠤᠯᠠ ᠲᠠᠢ ᠵᠤᠵᠠᠭᠠᠨ ᠱᠠᠬᠠᠢ ᠭᠤᠲᠤᠯ ᠵᠢᠷᠠ ᠶ᠋ᠢ ᠡᠯᠡᠭᠡᠨ ᠬᠠᠶᠠᠭᠰᠠᠨ ᠤᠴᠢᠷ ᠡᠨᠡ ᠬᠥᠮᠦᠨ ᠢ᠋ ᠬᠡᠨ ᠶᠠᠭᠠᠬᠢᠨ ᠵᠦᠭᠡᠷ ᠰᠠᠭᠤᠵᠤ ᠪᠠᠶᠠᠵᠢᠭᠰᠠᠨ ᠭᠡᠵᠦ ᠬᠡᠯᠡᠵᠦ ᠪᠣᠯᠬᠤ ᠪᠢᠯᠡ᠃ ᠲᠡᠷᠡ ᠪᠠᠢᠲᠤᠭᠠᠢ ᠡᠨᠡ ᠬᠥᠮᠦᠨ ᠦ᠌ ᠳᠠᠯᠤ ᠪᠠ ᠰᠡᠷᠪᠡᠭᠡᠨ ᠦ᠌ ᠬᠢᠨᠢ ᠶᠠᠰᠤ ᠳᠠᠮᠨᠠᠭᠤᠷᠭᠠ ᠶ᠋ᠢᠨ ᠮᠣᠳᠣᠨ ᠳ᠋ᠤ᠌ ᠡᠪᠳᠡᠷᠡᠨ ᠪᠥᠭᠲᠥᠷ ᠪᠥᠭᠡᠷᠡᠩᠬᠡᠢ ᠪᠣᠯᠤᠭᠰᠠᠨ ᠲᠡᠳᠦᠢ ᠦᠭᠡᠢ ᠬᠦᠵᠦᠭᠦᠦ ᠨᠢ ᠣᠷᠣᠭᠰᠢ ᠪᠤᠯᠭᠤᠷᠠᠭᠰᠠᠨ ᠮᠡᠲᠦ ᠨᠤᠭᠳᠤᠢᠨ ᠨᠤᠭᠤᠯᠤᠷᠠᠵᠤ ᠲᠡᠮᠡᠭᠡᠨ ᠦ᠌ ᠬᠢ ᠰᠢᠭ ᠪᠣᠯᠤᠭᠰᠠᠨ ᠲᠤᠯᠠ ᠵᠣᠪᠠᠯᠠᠩ ᠵᠦᠳᠡᠭᠦᠷᠢᠯᠡᠯ ᠢ᠋ ᠦᠵᠡᠭᠡ ᠦᠭᠡᠢ ᠬᠥᠮᠦᠨ ᠴᠦ᠍ ᠭᠡᠵᠦ ᠬᠡᠯᠡᠵᠦ ᠦᠯᠦ ᠪᠣᠯᠤᠨᠠ᠃ ᠢᠳᠡᠷ ᠵᠠᠯᠠᠭᠤ ᠳ᠋ᠠᠭᠠᠨ ᠡᠨᠡ ᠬᠥᠮᠦᠨ ᠡᠳᠦᠢ ᠶᠡᠬᠡ ᠵᠢᠳᠬᠦᠯ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠮᠡᠲᠦ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥᠨ ᠳ᠋ᠦ᠍ ᠰᠠᠴᠤᠭᠳᠠᠭᠰᠠᠨ ᠦᠷᠡ ᠲᠠᠷᠢᠶᠠᠨ ᠤ ᠠᠳᠠᠯᠢ ᠳᠡᠭᠵᠢᠨ ᠬᠥᠭᠵᠢᠭᠰᠡᠭᠡᠷ ᠵᠡᠩᠴᠢᠬᠦᠦ ᠬᠣᠲᠠ ᠶ᠋ᠢᠨ ᠵᠢᠯ ᠳ᠋ᠡᠭᠡᠨ ᠬᠡᠳᠦᠨ ᠲᠦᠮᠡᠨ ᠯᠠᠩ ᠮᠥᠩᠭᠥᠨ ᠦ᠌ ᠭᠦᠢᠯᠭᠡᠭᠡ ᠲᠡᠢ ᠬᠡᠳᠦᠬᠡᠨ ᠲᠣᠭᠠᠨ ᠤ᠋ ᠪᠠᠶᠠᠴᠤᠳ ᠤ᠋ᠨ ᠨᠢᠭᠡᠨ ᠳ᠋ᠦ᠍ ᠪᠠᠭᠲᠠᠨ ᠣᠷᠣᠵᠤ 《ᠴᠠᠭᠠᠨ ᠳᠠᠯᠠᠢ》 ᠭᠡᠳᠡᠭ ᠮᠠᠨᠳᠤᠮᠠᠯ ᠶᠡᠬᠡ ᠠᠯᠳᠠᠷ ᠢ᠋ ᠬᠢᠲᠠᠳ᠂ ᠮᠠᠨᠵᠤ᠂ ᠮᠣᠩᠭᠣᠯ ᠭᠤᠷᠪᠠᠨ ᠦᠰᠦᠭ ᠢ᠋ᠶ᠋ᠡᠷ ᠠᠯᠲᠠ ᠪᠠᠷ ᠪᠢᠴᠢᠨ᠂ ᠡᠭᠦᠳᠡᠨ ᠳᠡᠭᠡᠷᠡ ᠪᠡᠨ ᠬᠠᠳᠠᠨ ᠮᠠᠨᠳᠤᠭᠤᠯᠵᠠᠢ᠃ ᠡᠳᠦᠭᠡ ᠤᠭ ᠠ᠋ᠴᠠ ᠤᠬᠠᠭᠠᠯᠢᠭ ᠰᠦᠷᠡᠬᠡᠢ ᠬᠥᠮᠦᠨ ᠪᠣᠯᠬᠤ ᠲᠤᠯᠠ ᠥᠩᠭᠡᠷᠡᠭᠰᠡᠨ ᠶᠠᠪᠤᠳᠠᠯ ᠤ᠋ᠳ ᠢ᠋ ᠦᠷᠭᠦᠯᠵᠢ ᠰᠠᠨᠠᠨ ᠰᠠᠨᠠᠨᠠ᠃ ᠥᠷᠯᠥᠭᠡ ᠪᠦᠷᠢ ᠪᠣᠰᠤᠮᠠᠭᠴᠠ ᠬᠠᠯᠬᠠ ᠣᠷᠣᠨ ᠤ᠋ ᠵᠦᠭ ᠨᠢᠷᠤᠭᠤ ᠡᠭᠦᠷᠭᠡᠯᠡᠨ ᠨᠢᠭᠡ ᠬᠡᠰᠡᠭ ᠰᠢᠷᠲᠡᠨ ᠵᠣᠭᠰᠣᠨᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠬᠠᠯᠬᠠ ᠣᠷᠣᠨ ᠤ᠋ ᠭᠠᠵᠠᠷ ᠲᠡᠭᠷᠢ᠂ ᠯᠤᠤᠰ ᠰᠠᠪᠳᠠᠭ ᠢ᠋ ᠬᠦᠨᠳᠦᠳᠬᠡᠬᠦ ᠳ᠋ᠡᠭᠡᠨ ᠪᠢᠰᠢ᠂ ᠲᠡᠭᠦᠨ ᠦ᠌ ᠬᠡᠮᠵᠢᠶᠡ ᠦᠭᠡᠢ ᠶᠡᠬᠡ ᠪᠠᠶᠠᠯᠢᠭ ᠪᠠ ᠬᠠᠯᠬᠠ ᠬᠥᠮᠦᠨ ᠦ᠌ ᠡᠮᠦᠨᠡ ᠶᠠᠮᠠᠷ ᠨᠢᠭᠡᠨ ᠥᠩᠭᠡ ᠭᠢᠯᠠᠭᠠᠷ ᠵᠢᠭᠠᠬᠠᠨ ᠶᠠᠭᠤᠮᠠ ᠶ᠋ᠢ ᠪᠠᠷᠢᠨ ᠬᠡᠳᠦᠨ ᠰᠠᠢᠬᠠᠨ ᠦᠭᠡ ᠪᠡᠷ ᠮᠠᠭᠲᠠᠮᠠᠭᠴᠠ ᠪᠠᠭᠠ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠰᠠᠯᠭᠠᠨ ᠠᠪᠴᠤ ᠪᠣᠯᠳᠠᠭ ᠢ᠋ ᠯᠡ ᠰᠠᠨᠠᠨᠠ᠃ ᠭᠡᠪᠡᠴᠦ ᠨᠣᠬᠠᠢ ᠵᠤᠯᠠᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠰᠡᠭᠦᠯ ᠠᠭᠰᠠᠬᠤ᠂ ᠬᠥᠮᠦᠨ ᠪᠠᠶᠠᠵᠢᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠬᠠᠮᠠᠷ ᠰᠢᠨᠲᠠᠢᠯᠭᠠᠬᠤ ᠭᠡᠭᠴᠢ ᠪᠡᠷ ᠡᠨᠡ ᠬᠥᠮᠦᠨ ᠳᠥᠴᠢᠨ ᠲᠠᠪᠤᠨ ᠨᠠᠰᠤᠨ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠳᠠᠩᠵᠢᠶᠠᠳ ᠰᠠᠭᠤᠵᠤ ᠶᠣᠰᠣᠲᠠᠢ ᠪᠠᠶᠠᠨ ᠬᠥᠮᠦᠨ ᠦ᠌ ᠠᠳᠠᠯᠢ ᠪᠤᠰᠤᠳ ᠢ᠋ ᠵᠠᠷᠤᠴᠠᠯᠠᠨ᠂ ᠪᠤᠰᠤᠳ ᠲᠤ᠌ ᠬᠦᠨᠳᠦᠯᠡᠭᠳᠡᠬᠦ ᠪᠣᠯᠤᠭᠰᠠᠨ ᠠ᠋ᠴᠠ ᠪᠠᠨ ᠬᠣᠢᠰᠢ ᠡᠷᠬᠡ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠨ ᠶᠠᠩᠪᠠᠯᠠᠬᠤ ᠶ᠋ᠢ ᠡᠷᠡᠮᠡᠯᠵᠡᠭᠰᠡᠭᠡᠷ ᠡᠳᠦᠭᠡ ᠵᠢᠷᠠᠨ ᠵᠢᠷᠭᠤᠭᠠᠨ ᠨᠠᠰᠤᠨ ᠳᠡᠭᠡᠷᠡ ᠪᠡᠨ ᠴᠢᠩᠭᠠ ᠴᠦ᠍ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠵᠠᠢ᠃
ᠠᠵᠢᠯ ᠬᠥᠳᠡᠯᠮᠦᠷᠢ ᠳ᠋ᠦ᠍ ᠥᠴᠦᠬᠡᠨ ᠴᠦ᠍ ᠦᠯᠦ ᠬᠥᠳᠡᠯᠦᠨ ᠳᠠᠩ ᠬᠣᠭᠣᠯᠠᠨ ᠤ᠋ ᠳᠡᠭᠡᠳᠦ ᠶ᠋ᠢ ᠢᠳᠡᠬᠦ ᠪᠣᠯᠪᠠᠴᠤ ᠨᠢᠭᠡᠨᠲᠡ ᠬᠤᠷᠢᠶᠠᠭᠳᠠᠭᠰᠠᠨ ᠠᠷᠪᠢᠨ ᠪᠤᠶᠠᠨ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠳᠣᠣᠷᠠᠲᠤ ᠬᠥᠮᠦᠰ ᠦ᠋ᠨ ᠨᠢᠭᠡ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠬᠥᠯᠥᠰᠥ ᠲᠣᠰᠣᠯᠠᠭᠤᠯᠪᠠᠴᠤ ᠣᠯᠤᠮᠠ ᠦᠭᠡᠢ ᠶᠡᠬᠡ ᠶ᠋ᠢ ᠬᠡᠳᠦᠨ ᠮᠥᠴᠡ ᠶ᠋ᠢᠨ ᠳᠣᠲᠣᠷᠠ ᠣᠯᠵᠤ ᠴᠢᠳᠠᠳᠠᠭ ᠲᠤᠯᠠ ᠡᠨᠡ ᠬᠥᠮᠦᠨ ᠦᠨᠡᠬᠡᠷ ᠠᠮᠠᠨ ᠤ᠋ ᠶᠡᠬᠡ ᠬᠡᠰᠢᠭ ᠲᠡᠢ ᠥᠨᠳᠥᠷ ᠵᠠᠶᠠᠭᠠᠲᠠᠨ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤᠪ ᠳᠠ᠃ ᠭᠡᠲᠡᠯᠡ ᠡᠢᠮᠦ ᠬᠥᠮᠦᠨ ᠢ᠋ ᠬᠠᠯᠬᠠ ᠶ᠋ᠢᠨ ᠭᠤᠷᠪᠠᠨ ᠵᠢᠩᠴᠢᠳ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠠᠭᠤᠮᠠᠨ ᠳ᠋ᠤ᠌ ᠴᠦ᠍ ᠪᠣᠳᠣᠭᠰᠠᠨ ᠦᠭᠡᠢ᠃ ᠵᠥᠪᠬᠡᠨ ᠲᠦᠩᠱ᠌ᠢ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ ᠶ᠋ᠢᠨ ᠬᠣᠯᠪᠣᠭᠠᠲᠠᠨ ᠭᠡᠵᠦ ᠳᠣᠲᠣᠨᠣᠴᠢᠯᠠᠬᠤ ᠳ᠋ᠠᠭᠠᠨ ᠭᠠᠭᠴᠠᠬᠠᠨ ᠤᠳᠠᠭᠠ ᠮᠡᠬᠦᠢᠨ ᠠᠮᠤᠷ ᠡᠷᠢᠪᠡ᠃ ᠡᠨᠡ ᠶᠠᠪᠤᠳᠠᠯ ᠳᠠᠩᠵᠢᠶᠠᠳ ᠤ᠋ᠨ ᠵᠢᠪᠡᠭᠦᠦ ᠶ᠋ᠢ ᠪᠠᠭᠠ ᠦᠭᠡᠢ ᠬᠦᠷᠭᠡᠯᠡ᠃ ᠭᠡᠪᠡᠴᠦ ᠳᠠᠩᠵᠢᠶᠠᠳ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ《ᠡᠳᠡ ᠪᠣᠯ ᠬᠥᠮᠦᠨ ᠪᠢᠰᠢ᠂ ᠮᠣᠩᠭᠣᠯᠴᠤᠳ᠃ ᠮᠣᠩᠭᠣᠯᠴᠤᠳ ᠭᠡᠳᠡᠭ ᠪᠣᠯ ᠶᠣᠰᠣ ᠵᠢᠷᠤᠮ᠂ ᠵᠢᠷᠭᠠᠯ ᠴᠡᠩᠭᠡᠯ᠂ ᠠᠯᠢᠨ ᠢ᠋ ᠴᠦ᠍ ᠮᠡᠳᠡᠳᠡᠭ ᠦᠭᠡᠢ ᠵᠣᠯᠢᠭ ᠤ᠋ᠳ》 ᠭᠡᠵᠦ ᠪᠣᠳᠣᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠬᠠᠯᠬᠠ ᠶ᠋ᠢᠨ ᠶᠡᠬᠡ ᠪᠤᠶᠠᠨ ᠢ᠋ ᠰᠠᠨᠠᠬᠤ ᠠᠵᠢ᠃ ᠭᠤᠷᠪᠠᠯᠵᠢᠨ ᠨᠢᠳᠦ ᠨᠢ ᠠᠶᠠᠨᠳᠠᠭᠠᠨ ᠵᠢᠷᠪᠠᠢᠨ ᠢᠨᠢᠶᠡᠮᠰᠦᠭᠯᠡᠵᠦ ᠬᠠᠷᠢᠭᠤ ᠮᠡᠨᠳᠦᠯᠡᠭᠡᠳ ᠰᠠᠭᠤᠬᠤ ᠶ᠋ᠢ ᠤᠷᠢᠨᠠ᠃ ᠳᠠᠩᠵᠢᠶᠠᠳ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠭᠠᠷ ᠬᠥᠯ ᠦ᠋ᠨ ᠬᠢᠨᠢ ᠦᠵᠦᠭᠦᠷ ᠪᠣᠯᠤᠭᠰᠠᠨ ᠪᠢᠴᠢᠭᠡᠴᠢ ᠬᠦᠦ ᠴᠠᠭ ᠦᠷᠭᠦᠯᠵᠢ ᠪᠠᠢᠳᠠᠭ ᠪᠠᠢᠯᠠ᠃ ᠲᠡᠷᠡ ᠨᠢ ᠵᠢᠩᠴᠢᠳ ᠲᠦ᠍ ᠴᠠᠢ ᠬᠢᠵᠦ ᠶᠠᠩᠵᠤᠤᠷ ᠵᠠᠳᠠᠯᠤᠨ ᠵᠣᠴᠢᠯᠠᠪᠠ᠃
ᠬᠦᠷᠡᠯ᠂ ᠳᠠᠩᠵᠢᠶᠠᠳ ᠤ᠋ᠨ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ ᠠᠯᠢ ᠬᠢᠷᠢ ᠭᠦᠢᠯᠭᠡᠭᠡᠨ ᠲᠡᠢ ᠪᠠᠢᠭᠠ ᠶ᠋ᠢ ᠠᠰᠠᠭᠤᠯᠠ᠃ ᠳᠠᠩᠵᠢᠶᠠᠳ ᠠᠩᠬᠠ ᠳᠠᠮᠨᠠᠭᠤᠷ ᠮᠥᠷᠥᠯᠡᠭᠰᠡᠨ ᠡᠴᠡ ᠠᠪᠤᠭᠠᠳ ᠣᠳᠣ ᠬᠦᠷᠲᠡᠯᠡ ᠮᠠᠢᠮᠠᠢ ᠰᠠᠢᠨ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ ᠤᠳᠠᠭᠠ ᠦᠭᠡᠢ ᠪᠥᠭᠡᠳ ᠡᠨᠡ ᠤᠳᠠᠭᠠ ᠪᠦᠷ ᠲᠣᠯᠣᠭᠠᠢ ᠪᠠᠨ ᠪᠠᠷᠢᠨ᠄
— ᠬᠠᠢ ᠶᠠ! ᠶᠡᠬᠡ ᠮᠠᠭᠤ ᠭᠡᠵᠦ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠠᠷᠤ ᠬᠠᠯᠬᠠ ᠶ᠋ᠢᠨ ᠴᠠᠭ ᠲᠥᠷᠥ ᠶ᠋ᠢᠨ ᠪᠠᠢᠳᠠᠯ ᠡᠳ᠋ ᠪᠠᠷᠠᠭᠠᠨ ᠤ᠋ ᠠᠯᠢ ᠬᠢᠷᠢ ᠡᠯᠪᠡᠭ ᠪᠠᠢᠭᠠ ᠶ᠋ᠢ ᠰᠣᠨᠢᠷᠬᠠᠨ ᠰᠤᠷᠠᠭᠯᠠᠵᠤ ᠡᠬᠢᠯᠡᠪᠡ᠃ ᠬᠦᠷᠡᠯ ᠬᠠᠯᠬᠠ ᠣᠷᠣᠨ ᠢ᠋ ᠭᠠᠮᠢᠩ ᠡᠵᠡᠯᠡᠵᠦ ᠡᠳ᠋ ᠪᠠᠷᠠᠭᠠ ᠬᠣᠪᠣᠷᠳᠠᠨ ᠭᠠᠴᠢᠭᠳᠠᠵᠤ ᠪᠠᠢᠭᠠ ᠦᠨᠡᠨ ᠢ᠋ ᠲᠣᠭᠠᠴᠢᠨ ᠶᠠᠷᠢᠵᠤ ᠭᠠᠷᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠳᠣᠷᠵᠢ ᠪᠦᠬᠦ ᠶᠠᠷᠢᠶᠠ ᠶ᠋ᠢ ᠭᠠᠭᠴᠠᠭᠠᠷ ᠮᠡᠳᠡ ᠭᠡᠰᠡᠨ ᠶᠦᠮ ᠰᠢᠭ ᠠᠵᠢᠭ ᠦᠭᠡᠢ ᠨᠢᠭᠤᠷ ᠦᠭᠡᠢ ᠰᠠᠭᠤᠨ《ᠬᠠ ᠳᠧ ᠮᠸᠨ》 ᠬᠡᠮᠡᠬᠦ ᠠᠩᠭ᠌ᠯᠢ ᠬᠢᠲᠠᠳ ᠬᠣᠶᠠᠷ ᠦᠰᠦᠭ ᠢ᠋ ᠠᠷᠤ ᠥᠪᠥᠷ ᠲᠦ᠋ᠨᠢ ᠡᠷᠢᠶᠡᠯᠡᠭᠦᠯᠵᠦ ᠪᠢᠴᠢᠭᠰᠡᠨ ᠬᠠᠢᠷᠴᠠᠭ ᠲᠠᠢ ᠶᠠᠩᠵᠤᠤᠷ ᠠ᠋ᠴᠠ ᠨᠢᠭᠡ ᠶ᠋ᠢ ᠰᠤᠭᠤᠯᠤᠨ ᠠᠪᠴᠤ ᠵᠠᠭᠤᠭᠠᠳ ᠬᠠᠢᠷᠴᠠᠭ ᠤ᠋ᠨ ᠳᠣᠲᠣᠷᠠᠬᠢ ᠬᠢᠲᠠᠳ ᠬᠡᠦᠬᠡᠨ ᠦ᠌ ᠵᠢᠷᠤᠭ ᠲᠠᠢ ᠬᠠᠲᠠᠭᠤ ᠴᠠᠭᠠᠰᠤ ᠶ᠋ᠢ ᠰᠤᠭᠤᠯᠤᠨ ᠭᠠᠷᠭᠠᠵᠤ ᠰᠣᠨᠢᠷᠬᠠᠵᠠᠢ᠃ ᠳ᠋ᠠᠨᠽᠠᠨ ᠲᠠᠮᠠᠬᠢ ᠲᠠᠲᠠᠬᠤ ᠪᠠᠢᠲᠤᠭᠠᠢ ᠰᠣᠨᠢᠷᠬᠠᠬᠤ ᠴᠦ᠍ ᠬᠦᠰᠡᠯ ᠦᠭᠡᠢ ᠲᠤᠯᠠ ᠨᠠᠷᠢᠨ ᠱᠠᠭᠠᠵᠠᠩᠲᠤ ᠴᠠᠢ ᠶ᠋ᠢ ᠠᠪᠤᠨ ᠨᠢᠭᠡ ᠬᠣᠶᠠᠷ ᠪᠤᠯᠭᠤᠨ ᠴᠠᠭ ᠨᠥᠭᠴᠢᠭᠡᠬᠦ ᠵᠠᠭᠤᠷᠠ ᠪᠠᠨ ᠡᠪᠦᠭᠡᠨ ᠳᠠᠩᠵᠢᠶᠠᠳ ᠢ᠋ ᠠᠵᠢᠭᠯᠠᠵᠠᠢ᠃ ᠪᠤᠰᠤᠳ ᠤ᠋ᠨ ᠠᠮᠠᠨ ᠠ᠋ᠴᠠ ᠪᠤᠶᠠᠨᠲᠠᠨ ᠵᠠᠶᠠᠭᠠᠳᠠᠨ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠤ᠋ ᠪᠠᠨ ᠬᠤᠪᠢ ᠪᠠᠷ ᠪᠢᠰᠢᠷᠡᠨ ᠰᠦᠰᠦᠭᠯᠡᠬᠦ ᠶ᠋ᠢ ᠬᠢᠴᠢᠶᠡᠪᠡᠴᠦ ᠥᠨᠥᠬᠢ ᠳᠠᠩᠵᠦᠶᠠᠳ ᠬᠥᠯ ᠡᠴᠡ ᠪᠡᠨ ᠠᠪᠤᠭᠠᠳ ᠬᠥᠬᠡ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠪᠠᠨ ᠬᠦᠷᠲᠡᠯᠡ ᠬᠥᠮᠦᠨ ᠡᠴᠡ ᠭᠠᠵᠢᠭᠤ ᠬᠡᠨ ᠡᠴᠡ ᠴᠦ᠍ ᠲᠤᠷᠠᠩᠬᠠᠢ ᠦᠵᠡᠭᠳᠡᠬᠦ ᠲᠤᠯᠠ 《ᠡᠨᠡ ᠬᠥᠮᠦᠨ ᠶᠠᠭᠠᠬᠢᠭᠠᠳ ᠡᠢᠮᠦ ᠬᠠᠴᠢᠨ ᠥᠲᠡᠯᠪᠡ? ᠢᠳᠡᠭᠰᠡᠨ ᠤᠭᠤᠭᠰᠠᠨ ᠨᠢ ᠬᠠᠮᠢᠭᠠᠭᠤᠷ ᠨᠢ ᠣᠷᠣᠬᠤ ᠪᠠᠷ ᠢ᠋ᠶ᠋ᠠᠨ ᠡᠢᠮᠦ ᠪᠣᠯᠤᠨᠠ ᠪᠣᠢ ?》 ᠭᠡᠵᠦ ᠪᠣᠳᠣᠪᠠ᠃ ᠲᠡᠭᠡᠭᠡᠳ ᠰᠢᠷᠡᠭᠡᠨ ᠳᠡᠭᠡᠷᠡ ᠨᠢ ᠳᠦᠯᠡᠢ ᠨᠣᠭᠣᠭᠠᠨ ᠴᠢᠯᠠᠭᠤᠨ ᠰᠣᠷᠣᠭᠤᠯ ᠲᠠᠢ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠪᠦᠳᠦᠭᠦᠨ ᠭᠠᠩᠰᠠ᠂ ᠰᠢᠷᠡᠮᠦᠨ ᠴᠥᠭᠥᠴᠡ ᠲᠡᠢ ᠳ᠋ᠧᠩ ᠠᠰᠠᠭᠠᠰᠤᠲᠠᠢ ᠪᠠᠢᠬᠤ ᠨᠢ ᠦᠵᠡᠬᠦ ᠲᠡᠢ ᠪᠡᠨ ᠵᠡᠷᠭᠡ ᠪᠣᠷᠣᠣ ᠬᠡᠮᠡᠬᠦ ᠭᠠᠵᠠᠷ ᠤ᠋ᠨ ᠨᠢᠭᠡᠨ ᠲᠣᠮᠣ ᠫᠦᠰᠡᠨ ᠦ᠌ ᠳᠠᠩᠵᠢᠶᠠᠳ ᠢ᠋ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠬᠠᠷᠠ ᠲᠠᠮᠠᠬᠢᠨ ᠠ᠋ᠴᠠ ᠪᠤᠵᠠᠷᠲᠤᠨ ᠲᠤᠷᠠᠭᠠᠯ ᠤ᠋ᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠭᠰᠡᠨ ᠬᠥᠮᠦᠨ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠢ᠋ ᠰᠠᠨᠠᠵᠤ ᠡᠨᠡ ᠳᠠᠩᠵᠢᠶᠠᠳ ᠢ᠋ ᠵᠢᠭᠰᠢᠨ ᠰᠡᠵᠢᠭᠯᠡᠬᠦ ᠰᠡᠳᠬᠢᠯ ᠲᠥᠷᠥᠪᠡ ᠃
ᠳᠠᠩᠵᠢᠶᠠᠳ ᠪᠣᠯ ᠭᠠᠮᠢᠩ᠂ ᠮᠣᠩᠭᠣᠯ ᠢ᠋ ᠡᠵᠡᠯᠡᠭᠰᠡᠨ ᠢ᠋ ᠶᠠᠭᠠᠬᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠬᠤ ᠪᠢᠯᠡ᠃ ᠬᠠᠷᠢᠨ ᠬᠡᠨ ᠡᠴᠡ ᠴᠦ᠍ ᠢᠯᠡᠭᠦᠦ ᠮᠡᠳᠡᠨᠡ᠃ ᠲᠡᠳᠡᠨ ᠢ᠋ ᠵᠠᠩᠴᠢᠬᠦᠦ ᠳᠠᠭᠠᠷᠢᠨ ᠭᠠᠷᠬᠤ ᠳ᠋ᠤᠨᠢ ᠡᠳᠡᠨ ᠢ᠋ ᠡᠨᠡ ᠤᠳᠠᠭᠠ ᠲᠡᠳᠬᠦᠪᠡᠯ ᠡᠴᠦᠰ ᠦ᠋ᠨ ᠴᠠᠭ ᠲᠤ ᠠᠭᠤᠯᠠ ᠲᠦᠰᠢᠭᠰᠡᠨ ᠦ᠌ ᠠᠳᠠᠯᠢ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠬᠸᠨᠢᠷᠡᠯ ᠱᠤ᠌ ᠰᠢᠦ ᠵᠧᠩ ᠳ᠋ᠦ᠍ ᠪᠤᠰᠤᠳ ᠲᠤ᠌ ᠮᠡᠳᠡᠭᠳᠡᠯ ᠦᠭᠡᠢ ᠭᠠᠪ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠷᠠᠯᠬᠠᠨ ᠭᠤᠷᠪᠠᠨ ᠲᠦᠮᠡᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠥᠭᠭᠦᠭᠰᠡᠨ ᠪᠣᠢ ᠠᠵᠢ᠃ ᠤᠭ ᠶᠠᠪᠤᠳᠠᠯ ᠨᠢ ᠬᠠᠯᠬᠠ ᠶ᠋ᠢᠨ ᠪᠦᠬᠦ ᠪᠠᠷᠠᠭᠠ ᠲᠠᠸᠠᠷ ᠤ᠋ᠨ ᠭᠦᠢᠯᠭᠡᠭᠡ ᠶ᠋ᠢ ᠭᠠᠭᠴᠠ ᠪᠡᠶᠡ ᠳ᠋ᠡᠭᠡᠨ ᠡᠵᠡᠮᠰᠢᠬᠦ ᠶ᠋ᠢᠨ ᠨᠢᠭᠡ ᠠᠷᠭᠠ ᠪᠠᠢᠯᠠ᠃ ᠭᠡᠪᠡᠴᠦ ᠣᠰᠣᠯ ᠲᠠᠢ᠂ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠭᠡ ᠦᠭᠡᠢ ᠨᠢᠭᠤᠴᠠ ᠨᠢ ᠠᠯᠢ ᠬᠡᠳᠦᠢᠨ ᠦ᠌ ᠲᠠᠷᠬᠠᠭᠠᠳ ᠬᠤᠪᠢ ᠲᠡᠩᠴᠡᠭᠦᠦ ᠫᠦᠰᠡᠨ ᠦ᠌ ᠳᠠᠩᠵᠢᠶᠠᠳ ᠤ᠋ᠳ ᠨᠢ ᠶᠠᠭᠠᠬᠢᠭᠰᠠᠨ ᠴᠦ᠍ ᠪᠦᠲᠦᠬᠦ ᠦᠭᠡᠢ ᠬᠡᠷᠡᠭ ᠭᠡᠵᠦ ᠱᠤᠤᠭᠢᠯᠳᠤᠨ ᠰᠡᠳᠬᠢᠯ ᠢ᠋ ᠨᠢ ᠵᠣᠪᠠᠭᠠᠭᠰᠠᠨ ᠠ᠋ᠴᠠ ᠭᠠᠳᠠᠨᠠ《ᠮᠣᠩᠭᠣᠯᠴᠤᠳ ᠭᠠᠮᠢᠩ ᠤ᠋ᠨ ᠡᠰᠡᠷᠭᠦ ᠬᠥᠳᠡᠯᠬᠦ ᠰᠢᠨᠵᠢ ᠲᠡᠢ ᠪᠠᠢᠨᠠ 》 ᠭᠡᠰᠡᠨ ᠴᠠᠬᠢᠯᠭᠠᠨ ᠤᠲᠠᠰᠤ ᠶ᠋ᠢ ᠬᠦᠷᠢᠶᠡᠨ ᠳ᠋ᠡᠬᠢ ᠰᠠᠯᠪᠤᠷᠢ ᠫᠦᠰᠡᠨ ᠡᠴᠡ ᠪᠡᠨ ᠰᠠᠶᠢᠬᠠᠨ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠪᠠᠢᠪᠠ᠃
ᠣᠳᠣ ᠭᠡᠪᠡᠯ ᠳᠠᠩᠵᠢᠶᠠᠳ᠂ ᠮᠣᠩᠭᠣᠯ ᠤ᠋ᠨ ᠴᠢᠩ ᠦᠨᠡᠨ ᠪᠠᠢᠳᠠᠯ ᠢ᠋ ᠵᠢᠩᠬᠢᠨᠢ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠠᠮᠠᠨ ᠠ᠋ᠴᠠ ᠰᠣᠨᠣᠰᠬᠤ ᠶ᠋ᠢ ᠬᠦᠰᠡᠵᠦ ᠰᠠᠭᠤᠭᠠ ᠲᠤᠯᠠ《ᠠᠶᠠ ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠴᠠᠭ ᠯᠠ》 ᠭᠡᠵᠦ ᠪᠠᠢᠨ ᠪᠠᠢᠨ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠱᠣᠭᠰᠢᠷᠠᠨᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠴᠠᠢᠯᠭᠠᠨ ᠴᠠᠭᠠᠨ ᠰᠡᠳᠬᠢᠯ ᠲᠡᠢ ᠬᠦᠷᠡᠯ᠂ ᠭᠠᠮᠢᠩ ᠤ᠋ᠳ ᠠᠷᠠᠳ ᠣᠯᠠᠨ ᠤ᠋ ᠬᠥᠷᠥᠩᠭᠡ᠂ ᠮᠠᠯ ᠢ᠋ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠬᠦ᠂ ᠪᠤᠷᠬᠠᠨ ᠰᠢᠲᠦᠭᠡᠨ ᠢ᠋ ᠳᠣᠷᠣᠮᠵᠢᠯᠠᠬᠤ᠂ ᠡᠬᠡᠨᠡᠷ ᠣᠬᠢᠳ ᠢ᠋ ᠬᠦᠴᠦᠷᠬᠡᠭᠯᠡᠬᠦ ᠵᠡᠷᠭᠡ ᠡᠴᠢᠨᠡᠭᠡᠨ ᠪᠤᠷᠤᠩᠬᠤᠢ ᠶᠠᠭᠤᠮᠠ ᠦᠢᠯᠡᠳᠴᠦ ᠪᠠᠢᠭᠠ ᠶ᠋ᠢ ᠨᠡᠮᠡᠨ ᠨᠡᠮᠡᠨ ᠲᠣᠭᠠᠴᠢᠨ᠂ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠵᠠᠯᠪᠠᠷᠢᠨ ᠰᠠᠭᠤᠨᠠ᠃ ᠳᠠᠩᠵᠢᠶᠠᠳ ᠬᠦᠷᠡᠯ ᠦ᠋ᠨ ᠦᠭᠡ ᠪᠦᠷᠢ ᠳ᠋ᠦ᠍ ᠠᠭᠤᠷ ᠭᠦᠷᠦᠨ ᠠᠮᠢ ᠲᠡᠮᠡᠴᠡᠨᠡ᠃ ᠲᠡᠭᠦᠨ ᠢ᠋ᠶ᠋ᠡᠨ ᠮᠡᠳᠡᠭᠳᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠪᠡᠶᠡ ᠪᠡᠨ ᠪᠠᠷᠢᠨ ᠶᠠᠳᠠᠬᠤ ᠳ᠋ᠠᠭᠠᠨ ᠤᠷᠲᠤ ᠭᠠᠤᠯᠢᠨ ᠭᠠᠩᠰᠠ ᠪᠠᠨ ᠰᠢᠭᠦᠷᠡᠨ ᠠᠪᠴᠤ ᠪᠢᠴᠢᠬᠠᠨ ᠲᠡᠮᠦᠷ ᠯᠠᠵᠠ ᠲᠠᠢ ᠳ᠋ᠦᠩᠵᠡᠨ ᠲᠠᠮᠠᠬᠢ ᠠ᠋ᠴᠠ ᠪᠠᠨ ᠬᠤᠳᠬᠤᠨ ᠨᠠᠷᠢᠬᠠᠨ ᠶᠠᠰᠤᠨ ᠡᠰᠢᠲᠦ ᠪᠢᠴᠢᠬᠠᠨ ᠲᠡᠮᠦᠷ ᠲᠣᠷᠴᠢᠭᠢᠨᠠᠭᠤᠯᠤᠨ ᠳᠤᠤᠭᠠᠷᠭᠠᠪᠠ᠃ ᠡᠨᠡ ᠳᠠᠷᠤᠢ ᠪᠢᠴᠢᠭᠡᠴᠢ ᠬᠦᠦ ᠪᠤᠯᠲᠠᠰᠬᠢᠨ ᠣᠷᠣᠵᠤ ᠢᠷᠡᠪᠡ᠃ ᠳᠠᠩᠵᠢᠶᠠᠳ ᠵᠠᠨᠤᠯ ᠲᠠᠢ ᠪᠠᠷ ᠬᠠᠷᠠᠨ ᠴᠦᠳᠡᠨᠵᠡ! ᠭᠡᠬᠦ ᠳ᠋ᠦ᠍ ᠪᠢᠴᠢᠭᠡᠴᠢ ᠶ᠋ᠢᠨ ᠭᠠᠷ ᠴᠡᠴᠡᠷᠡᠨ ᠴᠦᠳᠡᠨᠵᠡ ᠵᠢᠷᠤᠵᠤ ᠭᠠᠩᠰᠠᠨ ᠳ᠋ᠤᠨᠢ ᠪᠠᠷᠢᠯᠠ᠃ ᠳᠠᠩᠵᠢᠶᠠᠳ ᠤᠷᠲᠤ ᠭᠠᠩᠰᠠᠨ ᠤ᠋ ᠪᠠᠨ ᠰᠡᠷᠢᠭᠦᠨ ᠤᠲᠤᠭᠠ ᠶ᠋ᠢ ᠠᠭᠤᠰᠬᠢ ᠪᠡᠨ ᠲᠡᠯᠡᠭᠳᠡᠲᠡᠯᠡ ᠰᠣᠷᠣᠨ᠂ ᠠᠭᠤᠷ ᠠᠮᠢᠰᠬᠤᠯ ᠬᠣᠶᠠᠷ ᠢ᠋ᠶ᠋ᠠᠨ ᠳᠠᠷᠤᠪᠠ᠃
— ᠠᠶᠠ᠂ ᠬᠠ ᠶᠠ ᠦᠭᠡᠢ ᠮᠠᠭᠤᠬᠠᠢ ᠴᠠᠭ ᠪᠣᠯᠤᠭᠰᠠᠨ ᠰᠢᠦ᠃ ᠲᠡᠷᠡ ᠳᠣᠲᠣᠷᠠ ᠠ᠋ᠴᠠ ᠮᠣᠩᠭᠣᠯ ᠬᠡᠴᠡᠭᠦᠦ ᠪᠣᠯᠤᠭᠰᠠᠨ ᠯᠠ᠃ ᠪᠢ ᠮᠣᠩᠭᠣᠯ ᠬᠥᠮᠦᠨ ᠰᠠᠢᠨ᠂ ᠲᠠ ᠨᠠᠷ ᠪᠣᠯ ᠮᠠᠨ ᠤ᠋ ᠠᠬᠠ ᠳᠡᠭᠦᠦ ᠨᠢᠭᠡ ᠶᠠᠩ᠂ ᠲᠡᠷᠡ ᠭᠠᠮᠢᠩ ᠶᠠᠭᠠᠬᠢᠭᠰᠠᠨ ᠮᠠᠭᠤ ᠵᠣᠯᠢᠭ ᠠ᠋᠃ ᠣᠳᠣ ᠶᠠᠭᠠᠬᠢᠪᠠᠯ ᠰᠠᠢᠨ ᠪᠣᠢ! ᠭᠡᠬᠦ ᠳ᠋ᠦ᠍ᠨᠢ ᠬᠦᠷᠡᠯ ᠳᠠᠩᠵᠢᠶᠠᠳ ᠢ᠋ ᠤᠯᠠᠮ ᠢ᠋ᠶ᠋ᠠᠷ ᠢᠲᠡᠭᠡᠪᠡ᠃
— ᠠᠢ ᠳᠠᠩᠵᠢᠶᠠᠳ ᠮᠢᠨᠢ! ᠮᠣᠩᠭᠣᠯ ᠬᠥᠮᠦᠨ ᠳ᠋ᠦ᠍ ᠫᠤᠤ ᠵᠡᠪᠰᠡᠭ ᠪᠠᠢᠳᠠᠭ ᠰᠠᠨ ᠪᠣᠯ ᠭᠠᠮᠢᠩ ᠢ᠋ ᠦᠭᠡᠢ ᠬᠢᠬᠦ ᠯᠡ ᠪᠠᠢᠨᠠ᠃ ᠭᠠᠭᠴᠠᠬᠠᠨ ᠲᠡᠢᠮᠦ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠨᠢ ᠯᠡ ᠬᠡᠴᠡᠭᠦᠦ ᠪᠠᠢᠨᠠ ᠭᠡᠪᠡ᠃ ᠳᠠᠩᠵᠢᠶᠠᠳ ᠡᠨᠡ ᠦᠭᠡᠨ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠣᠴᠢᠨ ᠥᠨᠳᠡᠢᠰᠬᠢᠵᠥ᠄
— ᠬᠠᠢ ᠴᠤᠤ᠂ ᠶᠣᠰᠣᠲᠠᠢ ᠦᠨᠡᠨ ᠦᠭᠡ! ᠭᠡᠯᠡ᠃ ᠭᠡᠪᠡᠴᠦ ᠵᠠᠨᠤᠯ ᠬᠣᠷᠣᠰᠤᠯ ᠨᠢ ᠨᠢᠭᠤᠷ ᠤ᠋ᠨ ᠬᠢᠨᠢ ᠵᠢᠷᠤᠭᠠᠰᠤ ᠪᠣᠯᠭᠠᠨ ᠳ᠋ᠤ᠌ ᠲᠣᠳᠣᠷᠠᠨ᠂ ᠨᠢᠳᠦ ᠪᠠᠰᠠ ᠭᠢᠯᠤᠢᠭᠰᠠᠨ ᠲᠤᠯᠠ ᠬᠦᠷᠡᠯ ᠰᠠᠶᠢ ᠰᠡᠵᠢᠭ ᠠᠪᠤᠯᠠ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠭᠤ ᠶᠠᠭᠤ ᠶᠠᠷᠢᠭᠰᠠᠨ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠭᠠᠳ᠂ ᠦᠨᠡᠬᠡᠷ ᠬᠡᠨ ᠪᠦᠬᠦᠨ ᠦ᠌ ᠡᠮᠦᠨᠡ ᠬᠠᠮᠢᠶᠠ ᠨᠠᠮᠢᠶᠠ ᠦᠭᠡᠢ ᠶᠠᠷᠢᠵᠤ ᠦᠯᠦ ᠪᠣᠯᠬᠤ ᠶ᠋ᠢ ᠳᠡᠮᠡᠢ ᠴᠠᠯᠴᠢᠵᠤ ᠣᠷᠬᠢᠭᠰᠠᠨ ᠢ᠋ᠶ᠋ᠠᠨ ᠣᠢᠯᠠᠭᠠᠨ ᠭᠡᠮᠰᠢᠪᠡ᠃ ᠡᠨᠡ ᠬᠡᠷᠡᠭ ᠢ᠋ ᠬᠡᠷᠬᠢᠨ ᠡᠷᠭᠢᠭᠦᠯᠬᠦ ᠪᠢᠯᠡ ᠭᠡᠵᠦ ᠳᠡᠮᠡᠢ ᠭᠠᠢᠬᠠᠬᠤ ᠳ᠋ᠠᠭᠠᠨ᠄
— ᠦᠭᠡᠢ ᠳᠠᠩᠵᠢᠶᠠᠳ ᠡᠨᠡ ᠳᠡᠮᠡᠢ ᠶᠠᠷᠢᠶᠠ ᠴᠦ᠍ ᠶᠠᠭᠠᠬᠢᠬᠤᠪ᠃ ᠪᠢᠳᠡᠨ ᠳ᠋ᠦ᠍ ᠣᠭᠲᠣ ᠬᠠᠮᠢᠶᠠ ᠦᠭᠡᠢ ᠬᠡᠷᠡᠭ᠃ ᠵᠦᠭᠡᠷ ᠠᠮᠢ ᠬᠣᠪᠢᠨ ᠤ᠋ ᠪᠠᠨ ᠬᠡᠷᠡᠭ ᠢ᠋ ᠶᠠᠷᠢᠯᠴᠠᠶᠠ᠃ ᠢᠩᠭᠢᠬᠦ ᠳ᠋ᠦ᠍ ᠪᠢᠳᠡ ᠭᠤᠷᠪᠠ ᠬᠣᠨᠣᠭᠠᠳ ᠭᠠᠷᠬᠤ ᠪᠣᠯᠤᠨᠠ᠃ ᠵᠢᠩ ᠦ᠋ᠨ ᠡᠬᠢᠨ ᠦ᠌ ᠬᠠᠭᠠᠰ ᠮᠥᠩᠭᠥ ᠶ᠋ᠢ ᠠᠳᠠ ᠠ᠋ᠴᠠ ᠠᠪᠤᠨᠠ ᠭᠡᠵᠦ ᠫᠠᠳᠠᠩ ᠬᠠᠢᠴᠢᠯᠠᠭᠰᠠᠨ ᠰᠢᠦ ᠳᠡ᠃ ᠲᠡᠭᠦᠨ ᠢ᠋ ᠥᠨᠥᠳᠥᠷ ᠠᠪᠤᠭᠤᠰᠢᠲᠠᠢ ᠪᠠᠢᠨᠠ᠃
ᠳᠠᠩᠵᠢᠶᠠᠳ ᠮᠣᠩᠭᠣᠯᠴᠤᠳ ᠤ᠋ᠨ ᠰᠠᠨᠠᠭᠠ ᠶ᠋ᠢ ᠪᠦᠷᠢᠨ ᠣᠢᠯᠠᠭᠠᠭᠰᠠᠨ ᠲᠤᠯᠠ ᠴᠠᠭᠠᠰᠢ ᠪᠠᠰᠠ ᠶᠠᠷᠢᠯᠴᠠᠬᠤ ᠶ᠋ᠢ ᠬᠦᠰᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠪᠠᠢᠪᠠ᠃
— ᠲᠡᠢᠮᠦ ᠠ᠋ ᠬᠥᠯᠥᠰᠥ ᠮᠥᠩᠭᠥᠨ ᠦ᠌ ᠲᠤᠬᠠᠢ ᠪᠢ ᠮᠡᠳᠡᠨᠡ᠃ ᠮᠥᠩᠭᠥ ᠪᠡᠨ ᠮᠠᠷᠭᠠᠰᠢ ᠠᠪ ᠪᠠ᠃ ᠵᠢᠩᠴᠢᠳ᠂ ᠳᠠᠩᠵᠢᠶᠠᠳ ᠬᠣᠶᠠᠷ ᠤ᠋ᠨ ᠶᠠᠷᠢᠶᠠ ᠡᠭᠦᠨ ᠢ᠋ᠶ᠋ᠡᠷ ᠳᠠᠭᠤᠰᠪᠠ᠃
ᠳᠠᠩᠵᠢᠶᠠᠳ ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠶ᠋ᠢᠨ ᠳᠤᠮᠳᠠ ᠭᠠᠭᠴᠠᠭᠠᠷ ᠦᠯᠡᠳᠡᠨ ᠢᠷᠡᠭᠡᠳᠦᠢ ᠶ᠋ᠢᠨ ᠬᠡᠷᠡᠭ ᠲᠦ᠍ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠬᠤ ᠭᠡᠵᠦ ᠪᠦᠬᠦ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠠᠷᠴᠢᠯᠠᠭᠠᠨᠠ᠃ ᠭᠡᠲᠡᠯᠡ ᠤᠭ ᠬᠡᠷᠡᠭ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ ᠶ᠋ᠢᠨ ᠪᠢᠰᠢ᠂ ᠤᠯᠤᠰ ᠲᠥᠷᠥ ᠠᠶᠠ ᠦᠭᠡᠢ ᠪᠣᠯ ᠴᠡᠷᠢᠭ ᠲᠡᠢᠨ ᠦ᠌ ᠪᠣᠯᠬᠤ ᠲᠤᠯᠠ ᠡᠪᠦᠭᠡᠨ ᠳᠠᠩᠵᠢᠶᠠᠳ ᠤ᠋ᠨ ᠬᠢᠷᠢ ᠬᠡᠮᠵᠢᠶᠡ ᠡᠴᠡ ᠬᠡᠲᠦᠷᠡᠭᠰᠡᠨ ᠠᠵᠢ᠃ ᠭᠡᠯᠡ ᠴᠦ᠍ ᠪᠣᠳᠣᠨᠠ᠃ ᠭᠤᠷᠪᠠᠨ ᠲᠦᠮᠡᠨ ᠶᠠᠩᠴᠢᠶᠠᠨ ᠤ᠋ ᠪᠠᠨ ᠲᠥᠯᠥᠭᠡ ᠪᠣᠳᠣ ᠪᠣᠳᠣᠭᠰᠠᠭᠠᠷ ᠪᠥᠭᠡᠳ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠲᠠᠢ ᠣᠷᠣᠯᠳᠣᠬᠤ ᠮᠡᠲᠦ ᠨᠠᠭᠠᠰᠢ ᠴᠠᠭᠠᠰᠢ ᠠᠯᠬᠤᠯᠠᠨᠠ᠃ ᠵᠢᠷᠦᠬᠡᠨ ᠦ᠌ ᠴᠣᠬᠢᠯᠲᠠ ᠲᠤᠢᠯ ᠳ᠋ᠠᠭᠠᠨ ᠬᠦᠷᠴᠦ᠂ ᠬᠣᠶᠠᠷ ᠬᠥᠯ ᠰᠣᠯᠪᠢᠵᠤ ᠴᠢᠳᠠᠬᠤ ᠪᠢᠨ ᠪᠣᠯᠢᠬᠤ ᠳ᠋ᠤ᠌ ᠰᠠᠶᠢ ᠰᠠᠨᠠᠭᠠ ᠠᠪᠤᠨ《ᠠᠶᠠ》ᠭᠡᠵᠦ ᠳᠠᠭᠤ ᠠᠯᠲᠠᠨ ᠰᠠᠭᠤᠵᠤ ᠲᠣᠯᠣᠭᠠᠢ ᠪᠠᠨ ᠰᠠᠯᠠᠭᠠᠪᠴᠢᠯᠠᠨᠠ᠃ ᠭᠡᠲᠡᠯᠡ ᠪᠠᠰᠠ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠪᠤᠤ ᠮᠡᠳᠡ᠃ ᠭᠠᠷ ᠠ᠋ᠴᠠ ᠨᠢ ᠨᠢᠭᠡᠨ ᠬᠦᠨᠳᠦ ᠶᠠᠭᠤᠮᠠ ᠮᠤᠯᠲᠤᠷᠠᠨ ᠱᠠᠯᠠᠨ ᠳᠡᠭᠡᠷᠡ ᠲᠦᠰ ᠪᠠᠭᠤᠨ ᠤᠨᠠᠪᠠ᠃ ᠰᠣᠴᠢᠨ ᠬᠠᠷᠠᠪᠠᠰᠤ᠂ ᠵᠢᠷᠭᠠᠯᠲᠤ ᠴᠠᠭ ᠤ᠋ᠨ ᠵᠤᠭᠠᠨ ᠳ᠋ᠤ᠌ ᠭᠠᠷ ᠤ᠋ᠨ ᠠᠯᠠᠭᠠᠨ ᠳ᠋ᠤ᠌ ᠥᠩᠬᠥᠷᠢᠭᠦᠯᠳᠡᠭ ᠭᠤᠷᠪᠠᠨ ᠪᠥᠭᠡᠷᠡᠩᠬᠡᠢ ᠲᠡᠮᠦᠷ ᠦ᠋ᠨ ᠨᠢᠭᠡ ᠪᠠᠢᠯᠠ᠃ ᠲᠡᠭᠦᠨ ᠢ᠋ ᠬᠡᠵᠢᠶᠡ ᠬᠡᠳᠦᠢ ᠳ᠋ᠦ᠍᠂ ᠬᠡᠷᠬᠢᠨ ᠠᠪᠤᠭᠰᠠᠨ ᠢ᠋ ᠪᠤᠤ ᠮᠡᠳᠡ᠃ ᠲᠡᠳᠡ ᠨᠢ ᠭᠠᠷ ᠤ᠋ᠨ ᠠᠯᠠᠭᠠᠨ ᠳ᠋ᠤ᠌ ᠬᠠᠩᠭᠢᠷ ᠵᠢᠩᠭᠡᠷ ᠳᠤᠤᠭᠠᠷᠤᠨ᠂ ᠡᠷᠭᠢᠯᠳᠦᠨ ᠡᠷᠭᠢᠯᠳᠦᠭᠰᠡᠭᠡᠷ ᠡᠷᠭᠢᠯᠲᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠷᠴᠢᠨ ᠳ᠋ᠦ᠍ ᠨᠢᠭᠡ ᠨᠢ ᠪᠤᠯᠲᠠ ᠦᠰᠦᠷᠦᠨ ᠤᠨᠠᠭᠠᠳ᠂ ᠨᠥᠭᠦᠭᠡ ᠬᠣᠶᠠᠷ ᠨᠢ ᠬᠡᠮᠬᠡ ᠪᠤᠲᠠ ᠦᠰᠦᠷᠦᠭᠰᠡᠨ ᠮᠡᠲᠦ ᠭᠠᠷ ᠲᠤ᠌ ᠵᠢᠭᠤᠷᠠᠯᠳᠤᠨ ᠠᠳᠬᠤᠭᠳᠠᠵᠠᠢ᠃ ᠡᠨᠡ ᠲᠣᠬᠢᠶᠠᠯ ᠳᠠᠩᠵᠢᠶᠠᠳ ᠲᠤ᠌ ᠦᠢᠯᠡ ᠬᠡᠷᠡᠭ ᠡᠰᠡ ᠪᠦᠲᠦᠨ ᠭᠠᠢ ᠭᠠᠷᠤᠵᠠᠨ ᠳ᠋ᠤ᠌ ᠤᠨᠠᠬᠤ ᠶ᠋ᠢᠨ ᠳᠣᠬᠢᠶᠠ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠭᠠᠷ ᠳᠠᠬᠢ ᠬᠣᠶᠠᠷ ᠪᠥᠭᠡᠷᠡᠩᠬᠡᠢ ᠶ᠋ᠢ ᠭᠠᠵᠠᠷ ᠰᠢᠲᠠᠯᠠ᠃ 《ᠬᠠᠢ ᠶᠠ》 ᠭᠡᠵᠦ ᠳᠠᠭᠤ ᠠᠯᠲᠠᠨ ᠠᠮᠢᠰᠬᠤᠭᠠ ᠠᠪᠬᠤ ᠠ᠋ᠴᠠ ᠥᠭᠡᠷᠡ ᠶᠠᠮᠠᠷ ᠴᠦ᠍ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠣᠯᠤᠨ ᠰᠠᠭᠤᠪᠠ᠃