ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠨᠠᠢ᠍ᠮᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 8
150ᠠᠶᠠᠨ ᠤ ᠶᠡᠬᠡ ᠵᠠᠮ
ᠨᠢᠭᠡ ᠥᠷᠯᠥᠭᠡ ᠳ᠋ᠠᠨᠽᠠᠨ ᠴᠡᠩᠬᠡᠷ ᠬᠥᠬᠡ ᠠᠭᠠᠷ ᠤ᠋ᠨ ᠳᠤᠮᠳᠠ ᠲᠩᠷᠢ ᠳ᠋ᠦ᠍ ᠲᠤᠯᠤᠮᠠ ᠱᠣᠪᠬᠣ ᠠᠭᠤᠯᠠ ᠰᠦᠮᠡᠯᠵᠡᠬᠦ ᠶ᠋ᠢ ᠣᠯᠵᠤ ᠬᠠᠷᠠᠯᠠ᠃ ᠡᠨᠡ ᠶᠠᠭᠤ ᠭᠡᠳᠡᠭ ᠠᠭᠤᠯᠠ ᠪᠣᠢ ᠭᠡᠵᠦ ᠬᠦᠷᠡᠯ ᠠᠰᠠᠭᠤᠬᠤ ᠳ᠋ᠤ᠌᠄
— ᠠᠯᠳᠠᠷᠲᠤ ᠵᠠᠩᠵᠤᠨ— ᠴᠣᠢᠷ ᠭᠡᠵᠦ ᠬᠠᠷᠢᠭᠤᠯᠪᠠ᠃
ᠠᠯᠳᠠᠷᠲᠤ ᠵᠠᠩᠵᠤᠨ ᠴᠣᠢᠷ ᠲᠤ ᠲᠡᠷᠡ ᠡᠳᠦᠷ ᠲᠡᠭᠡᠨ ᠬᠦᠷᠦᠭᠰᠡᠨ ᠦᠭᠡᠢ᠃ ᠮᠠᠷᠭᠠᠰᠢ ᠨᠢ ᠲᠡᠷᠡ ᠠᠭᠤᠯᠠ ᠲᠡᠢᠰᠢ ᠤᠷᠤᠭᠰᠢᠯᠠᠬᠤ ᠳᠣᠳᠣᠮ ᠵᠢᠵᠢᠭᠷᠡᠬᠦ ᠨᠢ ᠭᠠᠢᠬᠠᠯᠲᠠᠢ᠃ ᠣᠷᠣᠢ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠳᠡᠷᠭᠡᠳᠡ ᠨᠢ ᠢᠷᠡᠬᠦ ᠳ᠋ᠦ᠍ ᠪᠦᠷ ᠠᠭᠤᠯᠠ ᠴᠦ᠍ ᠭᠡᠵᠦ ᠨᠢᠭᠡ ᠶᠡᠬᠡ ᠰᠦᠷ ᠪᠠᠳᠠᠷᠠᠭᠤᠯᠬᠤ ᠪᠠᠷ ᠴᠦ᠍ ᠶᠠᠭᠤᠮᠠ ᠪᠢᠰᠢ᠂ ᠶᠡᠷᠦ ᠶ᠋ᠢᠨ ᠨᠢᠭᠡᠨ ᠬᠠᠳᠠ ᠴᠢᠯᠠᠭᠤᠨ ᠣᠷᠣᠢ ᠲᠠᠢ ᠲᠣᠯᠣᠭᠠᠢ ᠪᠠᠢᠬᠤ ᠲᠤᠯᠠ ᠳ᠋ᠠᠨᠽᠠᠨ《ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠢᠯᠡ?》 ᠭᠡᠵᠦ ᠪᠣᠳᠣᠪᠠ᠃ ᠬᠥᠪᠴᠢ ᠬᠠᠩᠭᠠᠢ ᠶ᠋ᠢᠨ ᠥᠨᠳᠥᠷ ᠥᠨᠳᠥᠷ ᠠᠭᠤᠯᠠᠰ ᠤ᠋ᠨ ᠳᠡᠷᠭᠡᠳᠡ ᠦᠰᠦᠨ ᠲᠥᠷᠥᠭᠰᠡᠨ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠭᠣᠪᠢᠷᠬᠠᠭ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠡᠢᠮᠦᠷᠬᠦᠦ ᠯᠡ ᠬᠠᠴᠢᠨ ᠪᠠᠢᠳᠠᠭ ᠠᠵᠢ᠃ ᠵᠠᠩᠵᠤᠨ ᠴᠣᠢᠷ ᠠ᠋ᠴᠠ ᠴᠠᠭᠠᠰᠢ ᠶᠠᠪᠤᠬᠤ ᠳ᠋ᠤ᠌ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠤᠯᠠᠮ ᠢ᠋ᠶ᠋ᠠᠷ ᠲᠡᠭᠰᠢᠷᠡᠵᠦ ᠲᠣᠯᠢ ᠮᠡᠲᠦ ᠴᠠᠭᠠᠨ ᠲᠠᠯᠠ ᠨᠤᠭᠤᠳ ᠲᠠᠭᠠᠷᠠᠯᠳᠤᠨᠠ᠃ ᠢᠯᠠᠩᠭᠤᠶᠠ ᠬᠠᠯᠬᠠ ᠣᠷᠣᠨ ᠤ᠋ ᠵᠠᠬᠠ ᠪᠣᠯᠬᠤ ᠲᠡᠢᠨ ᠲᠠᠪᠠᠭ ᠤ᠋ᠨ ᠲᠠᠯᠠ ᠪᠣᠯ ᠶᠠᠭᠤᠲᠠᠢ ᠴᠦ᠍ ᠵᠢᠱ᠌ᠢᠶᠡᠯᠡᠰᠢ ᠦᠭᠡᠢ ᠦᠵᠡᠭᠳᠡᠭᠰᠡᠨ ᠪᠥᠭᠡᠳ ᠳ᠋ᠠᠨᠽᠠᠨ ᠬᠡᠷᠪᠡ ᠡᠨᠡ ᠲᠠᠯᠠ ᠳ᠋ᠤ᠌ ᠵᠦᠭ ᠴᠢᠭ ᠠᠯᠲᠠᠨ ᠲᠥᠭᠡᠷᠢᠪᠡᠰᠦ ᠬᠠᠲᠠᠵᠤ ᠦᠬᠦᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠠᠯᠠᠭᠠ ᠭᠡᠵᠦ ᠪᠣᠳᠣᠪᠠ᠃ ᠭᠡᠪᠡᠴᠦ ᠡᠳᠡᠭᠡᠷ ᠲᠠᠯᠠ ᠨᠤᠭᠤᠳ ᠤ᠋ᠨ ᠠᠯᠢᠨ ᠳ᠋ᠤᠨᠢ ᠪᠣᠯᠪᠠᠴᠤ ᠠᠳᠤᠭᠤ᠂ ᠲᠡᠮᠡᠭᠡ᠂ ᠬᠣᠨᠢ ᠦᠢ ᠣᠯᠠᠨ ᠢ᠋ᠶ᠋ᠠᠷ ᠲᠠᠰᠤᠷᠠᠯᠲᠠ ᠦᠭᠡᠢ ᠦᠵᠡᠭᠳᠡᠬᠦ ᠨᠢ ᠮᠣᠩᠭᠣᠯ ᠣᠷᠣᠨ ᠤ᠋ ᠬᠡᠴᠢᠨᠡᠨ ᠪᠠᠶᠠᠯᠢᠭ ᠪᠣᠯᠬᠤ ᠶ᠋ᠢ ᠲᠠᠨᠢᠭᠤᠯᠬᠤ ᠠᠵᠢ᠃ ᠭᠡᠲᠡᠯᠡ ᠪᠠᠰᠠ ᠬᠤᠷᠳᠤᠨ ᠬᠥᠯᠲᠦ ᠴᠠᠭᠠᠨ ᠵᠡᠭᠡᠷᠡ ᠨᠦ᠍ᠭᠦᠳ ᠬᠡᠳᠦ ᠬᠡᠳᠦᠨ ᠵᠠᠭᠤ ᠪᠠᠷ ᠢ᠋ᠶ᠋ᠠᠨ ᠰᠦᠷᠦᠭᠯᠡᠨ ᠤᠷᠢᠳᠤᠬᠢ ᠵᠠᠮ ᠢ᠋ ᠬᠥᠨᠳᠡᠯᠡᠨ ᠰᠦᠯᠵᠢᠬᠦ ᠨᠢ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠶᠡᠬᠡᠳᠡ ᠪᠠᠶᠠᠰᠬᠠᠨᠠ᠃
ᠵᠠᠮ ᠤ᠋ᠨ— ᠡᠭᠦᠳᠡ ᠶ᠋ᠢ ᠲᠣᠭᠣᠷᠢᠨ ᠭᠠᠷᠤᠭᠠᠳ ᠬᠢᠯᠢ ᠶ᠋ᠢᠨ ᠴᠠᠭᠠᠨ ᠣᠪᠣᠭᠠ᠂ ᠥᠪᠥᠷ ᠮᠣᠩᠭᠣᠯ᠂ ᠵᠡᠭᠦᠨ ᠰᠥᠨᠢᠳ᠂ ᠸᠠᠩ ᠤ᠋ᠨ ᠬᠦᠷᠢᠶᠡ ᠣᠷᠣᠨᠠ᠃ ᠡᠢᠨ ᠬᠦ᠌ ᠳ᠋ᠠᠨᠽᠠᠨ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ ᠣᠷᠣᠬᠤ ᠲᠠᠢ ᠵᠡᠷᠭᠡ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠠᠵᠢᠭᠯᠠᠨ ᠰᠣᠨᠢᠷᠬᠠᠨᠠ᠃ ᠬᠡᠳᠦᠨ ᠬᠣᠨᠣᠭ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠠᠯᠠ ᠴᠦᠯ ᠦ᠋ᠳ ᠥᠭᠡᠷᠡᠴᠢᠯᠡᠭᠳᠡᠨ ᠬᠠᠳᠠ ᠴᠢᠯᠠᠭᠤ ᠣᠷᠣᠢ ᠲᠠᠢ ᠠᠭᠤᠯᠠᠰ᠂ ᠶᠡᠬᠡ ᠪᠠᠭᠠ ᠲᠤᠯᠤᠭᠠᠳ᠂ ᠳᠠᠪᠠᠭᠠ ᠬᠥᠪᠡᠭᠡ ᠡᠯᠪᠡᠭᠰᠢᠨᠡ᠃
ᠲᠡᠭᠦᠨ ᠦ᠌ ᠠᠶᠠᠰ ᠢ᠋ᠶ᠋ᠠᠷ ᠤᠷᠭᠤᠮᠠᠯ ᠤ᠋ᠨ ᠪᠠᠢᠳᠠᠯ ᠥᠭᠡᠷᠡᠴᠢᠯᠡᠭᠳᠡᠨ ᠰᠠᠬᠤᠯᠠᠭ ᠰᠠᠢᠬᠠᠨ ᠡᠪᠡᠰᠦ ᠦᠷᠭᠦᠯᠵᠢᠯᠡᠨᠡ᠃ ᠵᠠᠷᠢᠮ ᠨᠢᠭᠡᠨ ᠭᠣᠣ ᠵᠢᠯᠠᠭᠠ ᠶ᠋ᠢᠨ ᠳᠠᠭᠠᠤ ᠳ᠋ᠤ᠌ ᠤᠯᠢᠶᠠᠰᠤ ᠦᠵᠡᠭᠳᠡᠨᠡ᠃ ᠴᠠᠭᠠᠰᠢᠯᠠᠬᠤ ᠳᠣᠳᠣᠮ ᠠᠭᠤᠷ ᠠᠮᠢᠰᠬᠤᠯ ᠵᠥᠭᠡᠯᠡᠷᠡᠵᠦ ᠪᠤᠯᠠᠭ ᠱᠠᠩᠳᠠ᠂ ᠭᠣᠣᠯ ᠭᠣᠷᠣᠬᠠ ᠣᠯᠠᠰᠢᠷᠠᠵᠤ ᠬᠤᠷᠠ ᠴᠢᠭᠢᠭ ᠡᠯᠪᠡᠭ ᠣᠷᠣᠳᠠᠭ ᠤ᠋ᠨ ᠰᠢᠨᠵᠢ ᠮᠡᠳᠡᠭᠳᠡᠵᠦ ᠪᠠᠢᠯᠠ᠃ ᠡᠢᠮᠦ ᠭᠠᠵᠠᠷ ᠢ᠋ᠶ᠋ᠠᠷ ᠬᠡᠳᠦᠨ ᠬᠣᠨᠣᠭ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠠᠷᠢᠶᠠᠨ ᠤ᠋ ᠲᠠᠯᠠᠪᠤᠷ ᠬᠢᠲᠠᠳ ᠲᠣᠰᠬᠣᠨ ᠡᠭᠡᠯᠵᠢᠯᠡᠨ ᠳᠠᠭᠠᠷᠢᠯᠳᠤᠬᠤ ᠪᠣᠯᠤᠯᠠ᠃ ᠥᠷᠯᠥᠭᠡ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠭᠠᠳᠠᠭᠤᠷ ᠨᠢ ᠭᠠᠷᠬᠤ ᠳ᠋ᠤ᠌ ᠳᠠᠯᠠᠨ ᠨᠥᠬᠥᠭᠡᠰᠦ ᠪᠣᠯᠤᠭᠰᠠᠨ ᠪᠠᠭᠯᠠᠭᠠᠷ ᠥᠮᠥᠳᠥ᠂ ᠤᠷᠠᠩᠬᠠᠢ ᠨᠣᠣᠷᠠᠩᠬᠠᠢ ᠪᠣᠰᠢᠨᠵᠠ᠂ ᠫᠢᠩᠲᠢᠭᠡᠷ ᠢᠰᠡᠭᠡᠢ ᠱᠠᠬᠠᠢ ᠮᠡᠲᠦ ᠶ᠋ᠢ ᠡᠮᠦᠰᠦᠭᠰᠡᠨ ᠬᠢᠲᠠᠳ ᠲᠠᠷᠢᠶᠠᠴᠢᠨ ᠬᠥᠮᠦᠰ᠂ ᠬᠦᠷᠵᠡ᠂ ᠴᠠᠷᠢᠯ᠂ ᠵᠡᠭᠡᠲᠦᠦ ᠬᠡᠷᠡᠭᠯᠡᠯ ᠪᠠᠷᠢᠨ ᠲᠠᠷᠢᠶᠠᠨ ᠤ᠋ ᠪᠠᠨ ᠲᠠᠯᠠᠪᠤᠷ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠭᠠ ᠳᠠᠭᠠᠷᠢᠯᠳᠤᠨᠠ᠃ ᠵᠠᠷᠢᠮ ᠡᠳᠦᠷ ᠦ᠋ᠳ ᠲᠤ ᠬᠦᠨᠳᠦ ᠠᠴᠢᠶᠠ ᠪᠦᠬᠦᠢ ᠡᠳᠦᠢ ᠲᠡᠳᠦᠢ ᠲᠡᠮᠡᠭᠡᠨ ᠵᠢᠩ ᠬᠥᠪᠥᠷᠡᠳᠦᠬᠥᠯᠥᠭᠰᠡᠨ ᠬᠠᠯᠬᠠ ᠠᠶᠠᠨᠴᠢᠳ ᠤᠭᠲᠤᠨ ᠭᠠᠷᠴᠤ ᠢᠷᠡᠵᠦ《ᠵᠠ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ ᠤᠤ? ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ》 ᠭᠡᠵᠦ ᠡᠶᠡᠬᠡᠨ ᠳᠠᠭᠤ ᠪᠠᠷ ᠮᠡᠨᠳᠦᠯᠡᠬᠦ ᠨᠢ ᠴᠦ᠍ ᠳᠠᠭᠠᠷᠢᠯᠳᠤᠯᠠ᠃ ᠨᠢᠭᠤᠷ ᠴᠢᠷᠠᠢ ᠨᠢ ᠠᠶᠠᠨ ᠵᠠᠮ ᠤ᠋ᠨ ᠠᠭᠠᠷ ᠲᠤ ᠪᠣᠷᠣᠯᠠᠨ᠂ ᠵᠦᠯᠭᠦᠭᠦᠷᠳᠡᠭᠰᠡᠨ᠂ ᠽᠠᠨᠳᠠᠨ ᠤ᠋ ᠥᠩᠭᠡ ᠪᠡᠷ ᠭᠡᠷᠡᠯᠲᠦᠨ᠂ ᠬᠣᠶᠠᠷ ᠨᠢᠳᠦ ᠨᠢ ᠪᠦᠷᠭᠦᠳ ᠦ᠋ᠨ ᠬᠢ ᠰᠢᠭ ᠭᠢᠯᠠᠯᠵᠠᠨᠠ᠁
ᠣᠷᠣᠨ ᠨᠤᠲᠤᠭ ᠢ᠋ ᠨᠢ ᠠᠰᠠᠭᠤᠬᠤ ᠳ᠋ᠤ᠌ ᠭᠤᠨᠠ᠂ ᠭᠣᠷᠨᠠᠢ᠂ ᠭᠣᠪᠢ ᠭᠤᠷᠪᠠᠨ— ᠰᠠᠢᠬᠠᠨ᠂ ᠠᠷᠴᠠ ᠪᠣᠭᠳᠠ᠂ ᠠᠯᠲᠠᠨ ᠪᠣᠭᠳᠠ ᠶ᠋ᠢᠨ ᠰᠢᠯᠢ᠂ ᠵᠠᠮ ᠤ᠋ᠨ— ᠡᠭᠦᠳᠡ ᠪᠤᠶᠤ ᠵᠠᠩᠵᠤᠨ— ᠴᠣᠢᠷ ᠭᠡᠬᠦᠴᠢᠯᠡᠨ ᠴᠤᠤᠲᠤ ᠭᠠᠵᠠᠷ ᠤ᠋ᠳ ᠤ᠋ᠨ ᠨᠢᠭᠡ ᠶ᠋ᠢ ᠪᠠᠷᠢᠨ ᠬᠡᠯᠡᠬᠦ ᠠᠵᠢ᠃
ᠲᠡᠷᠡ ᠨᠢ ᠴᠣᠬᠣᠮ ᠳ᠋ᠠᠭᠠᠨ ᠦᠨᠡᠨ ᠲᠡᠢ ᠬᠤᠳᠠᠯ ᠲᠠᠢ ᠪᠠᠢᠬᠤ ᠪᠣᠯᠪᠠᠴᠤ ᠠᠷᠭᠠ ᠪᠤᠶᠤ ᠣᠷᠣᠨ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠪᠣᠯᠬᠤ ᠲᠤᠯᠠ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠠᠭᠤᠯᠵᠠᠭᠰᠠᠨ ᠠᠳᠠᠯᠢ ᠰᠡᠳᠬᠢᠯ ᠰᠡᠷᠭᠦᠭᠡᠨ ᠪᠠᠶᠠᠰᠬᠠᠨᠠ᠃ ᠳ᠋ᠠᠨᠽᠠᠨ ᠲᠡᠳᠡᠨ ᠢ᠋ ᠶᠡᠬᠡᠳᠡ ᠪᠠᠬᠠᠳᠤᠨ ᠦᠵᠡᠳᠡᠭ ᠪᠥᠭᠡᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠡᠶᠡ ᠶ᠋ᠢ ᠮᠥᠨ ᠲᠡᠳᠡᠨ ᠦ᠌ ᠠᠳᠠᠯᠢ ᠴᠣᠭ ᠵᠢᠪᠬᠤᠯᠠᠩ ᠲᠠᠢ ᠬᠠᠷᠠᠭᠳᠠᠬᠤ ᠪᠣᠯᠤᠭᠰᠠᠨ ᠪᠣᠯᠪᠠ ᠤᠤ ᠭᠡᠵᠦ ᠭᠣᠷᠢᠳᠠᠬᠤ ᠳ᠋ᠠᠭᠠᠨ ᠬᠣᠭᠣᠯᠠᠢ ᠵᠠᠰᠠᠨ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠦᠩᠭᠢᠨᠡᠭᠦᠯᠦᠨ ᠶᠠᠷᠢᠬᠤ ᠶ᠋ᠢ ᠣᠷᠣᠯᠳᠣᠨᠠ᠃
ᠨᠢᠭᠡᠨ ᠰᠥᠨᠢ ᠶ᠋ᠢᠨ ᠪᠠᠭᠤᠳᠠᠯ ᠳᠡᠭᠡᠷᠡ ᠬᠦᠷᠡᠯ᠄
— ᠵᠠ ᠬᠡᠦᠬᠡᠳ ᠦ᠋ᠳ ᠮᠢᠨᠢ᠂ ᠮᠠᠷᠭᠠᠰᠢ ᠵᠠᠩᠴᠢᠬᠦᠦ ᠬᠣᠲᠠ ᠣᠷᠣᠨᠠ ᠰᠢᠦ ᠳᠡ ᠭᠡᠯᠡ᠃
ᠡᠨᠡ ᠰᠥᠨᠢ ᠳ᠋ᠠᠨᠽᠠᠨ ᠡᠯᠳᠡᠪ ᠲᠥᠷᠥᠯ ᠦ᠋ᠨ ᠶᠠᠭᠤᠮᠠ ᠪᠣᠳᠣᠨ ᠪᠠᠷᠤᠭ ᠨᠣᠢᠷ ᠦᠭᠡᠢ ᠬᠣᠨᠣᠯᠠ᠃ ᠭᠣᠣᠯ ᠲᠥᠯᠥᠪ ᠣᠯᠵᠠ ᠣᠮᠣᠭ᠂ ᠢᠷᠡᠭᠡᠳᠦᠢ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠪᠠᠨ ᠲᠤᠬᠠᠢ ᠪᠥᠭᠡᠳ ᠳᠠᠩ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠶᠠᠭᠤᠮᠠᠰ ᠢ᠋ ᠪᠣᠳᠣᠭᠰᠠᠨ ᠪᠢᠯᠡ᠃ ᠥᠷᠯᠥᠭᠡ ᠨᠢ ᠠᠴᠢᠶᠠᠯᠠᠨ ᠳᠠᠭᠤᠰᠴᠤ ᠬᠥᠳᠡᠯᠬᠦ ᠲᠡᠢ ᠪᠡᠨ ᠵᠡᠷᠭᠡ ᠬᠦᠷᠡᠯ ᠲᠤᠩ ᠰᠢᠷᠦᠭᠦᠨ ᠶᠠᠪᠤᠯᠠ᠃ ᠲᠡᠮᠡᠭᠡ ᠪᠦᠷᠢ ᠪᠤᠷᠠᠨᠲᠠᠭ ᠴᠢᠩᠭᠠᠭᠠᠨ ᠬᠦᠵᠦᠭᠦᠦ ᠰᠣᠩᠭᠣᠨ ᠠᠯᠬᠤᠯᠠᠨᠠ᠃ ᠴᠢᠭᠯᠡᠭᠰᠡᠨ ᠵᠦᠭ ᠲᠤ ᠠᠶᠠᠨ ᠤ᠋ ᠵᠠᠮ ᠱᠤᠭᠤᠮᠳᠠᠮᠠᠯ ᠮᠡᠲᠦ ᠵᠤᠷᠠᠢᠵᠤ᠂ ᠠᠯᠤᠰ ᠲᠡᠷᠲᠡᠭᠡ ᠳ᠋ᠦ᠍ ᠶᠡᠬᠡ ᠨᠢᠷᠤᠭᠤ ᠬᠥᠨᠳᠡᠯᠢᠳᠦᠨ ᠬᠦᠯᠢᠶᠡᠵᠦ ᠪᠠᠢ ᠦᠵᠡᠭᠳᠡᠨᠡ᠃ ᠲᠡᠭᠦᠨ ᠦ᠌ ᠨᠠᠭᠠᠨᠠ ᠠᠢᠯ ᠠᠮᠢᠲᠠᠨ ᠬᠣᠪᠣᠷ᠂ ᠵᠠᠮ ᠤ᠋ᠨ ᠳᠤᠮᠳᠠ ᠬᠠᠪᠢ ᠳ᠋ᠤ᠌ ᠬᠡᠰᠡᠭ ᠪᠠᠷᠠᠭᠠᠨ ᠶᠠᠭᠤᠮᠠ ᠪᠥᠷᠲᠥᠢᠨ ᠬᠠᠷᠠᠭᠳᠠᠭᠰᠠᠨ ᠳ᠋ᠠᠨᠽᠠᠨ ᠣᠯᠵᠠᠭᠤᠷᠬᠠᠨ ᠰᠣᠨᠢᠷᠬᠠᠨᠠ᠃ ᠣᠢᠷᠠᠲᠤᠨ ᠦᠵᠡᠪᠡᠰᠦ ᠴᠠᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠭᠠ ᠯᠤᠤᠭᠠᠷ ᠬᠡᠮᠡᠬᠦ ᠬᠢᠲᠠᠳ ᠬᠥᠮᠦᠰ ᠦ᠋ᠨ ᠦᠬᠡᠷ ᠲᠡᠷᠭᠡᠨ ᠦ᠌ ᠵᠢᠩ ᠪᠠᠢᠵᠠᠢ᠃ ᠰᠡᠭᠦᠯᠴᠢ ᠶ᠋ᠢᠨ ᠲᠡᠷᠭᠡᠨ ᠦ᠌ ᠦᠬᠡᠷ ᠦ᠋ᠨ ᠬᠦᠵᠦᠭᠦᠨ ᠳ᠋ᠡᠬᠢ ᠲᠣᠮᠣ ᠲᠡᠮᠦᠷ ᠬᠣᠩᠬᠣ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠲᠦᠩ ᠲᠦᠩ ᠴᠣᠬᠢᠯᠠᠬᠤ ᠪᠣᠯᠪᠠᠴᠤ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠴᠤᠪᠤᠭᠠᠨ ᠳ᠋ᠤ᠌ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠭᠦᠢᠴᠡᠭᠳᠡᠬᠦ ᠠᠵᠢ᠃ ᠪᠦᠬᠦ ᠦᠬᠡᠷ ᠦ᠋ᠨ ᠲᠣᠭᠠ ᠠᠷᠪᠠᠭᠠᠳᠬᠠᠨ ᠪᠠᠢᠬᠤ ᠠᠲᠠᠯᠠ ᠬᠠᠵᠠᠭᠤ ᠳ᠋ᠤᠨᠢ ᠳᠥᠷᠪᠡᠨ ᠲᠣᠮᠣ ᠬᠥᠮᠦᠨ᠂ ᠨᠢᠭᠡ ᠬᠡᠦᠬᠡᠳ᠂ ᠬᠣᠶᠠᠷ ᠨᠣᠬᠠᠢ ᠶᠠᠪᠤᠬᠤ ᠨᠢ ᠮᠣᠩᠭᠣᠯ ᠠᠶᠠᠨᠴᠢᠳ ᠲᠤ ᠬᠠᠪᠬᠠ ᠠ᠋ᠴᠠ ᠪᠠᠨ ᠭᠢᠨᠵᠢ ᠨᠢ ᠭᠡᠭᠴᠢ ᠶ᠋ᠢ ᠪᠣᠳᠣᠭᠳᠠᠭᠤᠯᠤᠨᠠ᠃ ᠢᠯᠠᠩᠭᠤᠶᠠ ᠳ᠋ᠠᠨᠽᠠᠨ ᠳ᠋ᠤ᠌ ᠲᠡᠳᠡᠨ ᠦ᠌ ᠳᠡᠷᠭᠡᠳᠡᠭᠦᠷ ᠭᠤᠷᠪᠠᠨ ᠪᠡᠶᠡ ᠬᠦᠨᠳᠦ ᠭᠡᠭᠴᠢ ᠠᠴᠢᠶᠠ ᠪᠦᠬᠦᠢ ᠲᠠᠪᠢ ᠭᠠᠷᠤᠢ ᠲᠡᠮᠡᠭᠡ ᠲᠡᠢ ᠥᠩᠭᠡᠷᠡᠬᠦ ᠳ᠋ᠦ᠍᠂ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠠᠭᠤᠯᠠ ᠤᠰᠤ᠂ ᠠᠳᠤᠭᠤᠰᠤ ᠠᠮᠢᠲᠠᠨ ᠪᠦᠭᠦᠳᠡ ᠶ᠋ᠢᠨ ᠳᠡᠭᠡᠭᠦᠷ ᠰᠡᠭᠦᠳᠡᠷ ᠲᠤᠰᠬᠠᠨ ᠥᠩᠭᠡᠷᠡᠳᠡᠭ ᠡᠭᠦᠯᠡ ᠲᠡᠢ ᠠᠳᠠᠯᠢᠬᠠᠨ ᠪᠠᠬᠠᠳᠤᠭᠤᠰᠢᠲᠠᠢ ᠪᠠᠢᠯᠠ᠃