ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠳᠣᠯᠣᠭᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 7
506ᠵᠢᠷᠦᠬᠡᠨ ᠦ᠌ ᠴᠣᠬᠢᠯᠲᠠ ᠥᠭᠡᠷᠡᠴᠢᠯᠡᠭᠳᠡᠯᠡ
— ᠥᠨᠥᠬᠢ ᠡᠪᠡᠳᠴᠢᠲᠡᠢ ᠬᠥᠮᠦᠨ ᠶᠠᠮᠠᠷ ᠪᠠᠢᠨᠠ ᠪᠢᠯᠡ? ᠭᠡᠵᠦ ᠴᠣᠩᠬᠢᠭᠠᠷ ᠴᠠᠭᠠᠨ ᠪᠣᠯᠤᠭᠰᠠᠨ ᠴᠢᠷᠠᠢ ᠪᠠᠨ ᠬᠥᠳᠡᠯᠭᠡᠯ ᠦᠭᠡᠢ ᠪᠡᠷ ᠠᠰᠠᠭᠤᠪᠠ᠃
— ᠵᠠ ᠪᠠᠭᠰᠢ ᠠ᠋! ᠭᠠᠢᠭᠤᠢ ᠪᠣᠯᠵᠤ ᠪᠠᠢᠨᠠ ᠰᠢᠦ᠂ ᠮᠠᠷᠠᠮᠪᠠ ᠭᠤᠸᠠᠢ ᠴᠦ᠍ ᠣᠳᠣ ᠢᠩᠭᠢᠭᠡᠳ ᠬᠣᠭᠣᠯᠠ ᠤᠮᠳᠠ ᠪᠠᠷ ᠨᠢ ᠲᠣᠷᠳᠠᠭᠠᠳ ᠪᠠᠢᠪᠠᠯ ᠤᠳᠠᠬᠤ ᠦᠭᠡᠢ ᠵᠦᠭᠡᠷ ᠪᠣᠯᠤᠨᠠ ᠭᠡᠵᠦ ᠠᠢᠯᠠᠳᠤᠭᠰᠠᠨ᠃
— ᠠᠰᠢᠭᠦᠢ ᠳᠡ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠢᠨᠢᠶᠡᠮᠰᠦᠭᠯᠡᠨ ᠥᠨᠳᠡᠢᠵᠦ ᠪᠢᠴᠢᠬᠠᠨ ᠱᠦᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠳᠦ ᠶ᠋ᠢ ᠲᠡᠳᠡᠨ ᠭᠤᠷᠪᠠᠨ ᠶᠠᠩᠴᠢᠶᠠᠨ ᠭᠠᠷᠭᠠᠪᠠ᠃ ᠡᠭᠦᠨ ᠦ᠌ ᠤᠷᠢᠳ ᠪᠠᠯᠳᠠᠨᠴᠡᠷᠢᠩ ᠲᠡᠷᠡ ᠡᠪᠡᠳᠴᠢᠲᠡᠨ ᠳ᠋ᠦ᠍ ᠭᠤᠷᠪᠠᠨ ᠬᠣᠨᠣᠭ ᠳᠣᠳᠣᠮ ᠬᠣᠶᠠᠷ ᠶᠠᠩᠴᠢᠶᠠᠨ ᠵᠠᠷᠤᠴᠠᠭᠤᠯᠳᠠᠭ ᠪᠠᠢᠭᠰᠠᠨ ᠪᠣᠯ ᠣᠳᠣ ᠥᠭᠡᠷᠡᠴᠢᠯᠡᠨ ᠭᠤᠷᠪᠠ ᠶ᠋ᠢ ᠵᠠᠷᠤᠴᠠᠭᠤᠯᠤᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠠᠵᠢ᠃
— ᠮᠠᠢ! ᠡᠭᠦᠨ ᠢ᠋ ᠡᠮᠡᠭᠡᠨ ᠳ᠋ᠦ᠍ ᠠᠪᠠᠴᠢᠵᠤ ᠥᠭ!
ᠨᠠᠮᠰᠠᠷᠠᠢ ᠶᠠᠩᠴᠢᠶᠠᠨ ᠢ᠋ ᠬᠦᠯᠢᠶᠡᠨ ᠠᠪᠤᠩᠭᠤᠲᠠ ᠪᠠᠨ ᠪᠣᠰᠤᠨ ᠬᠠᠷᠠᠢᠨ ᠭᠦᠶᠦᠵᠦ ᠭᠠᠷᠪᠠ᠃ ᠲᠡᠭᠦᠨ ᠳ᠋ᠦ᠍ ᠪᠣᠯ ᠡᠪᠡᠳᠴᠢᠲᠡᠨ ᠦ᠌ ᠡᠳᠡᠭᠡᠷᠡᠬᠦ᠂ ᠡᠰᠡᠬᠦ ᠣᠨᠴᠠ ᠶ᠋ᠢᠨ ᠬᠣᠯᠪᠣᠭᠳᠠᠯ ᠲᠠᠢ ᠪᠢᠰᠢ᠂ ᠬᠠᠷᠢᠨ ᠪᠠᠭᠰᠢ ᠨᠢ ᠯᠡ ᠶᠠᠮᠠᠷ ᠨᠢᠭᠡᠨ ᠦᠢᠯᠡ ᠬᠡᠷᠡᠭ ᠲᠦ᠍ ᠶᠠᠪᠤᠭᠤᠯᠤᠨ ᠭᠠᠳᠠᠭᠰᠢ ᠭᠠᠷᠭᠠᠵᠤ ᠪᠠᠢᠬᠤ ᠨᠢ ᠴᠢᠬᠤᠯᠠ ᠪᠠᠢᠳᠠᠭ ᠪᠢᠯᠡ᠃ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠪᠣᠯ ᠲᠡᠷᠡ ᠬᠥᠮᠦᠨ ᠦ᠌ ᠡᠳᠡᠭᠡᠷᠡᠬᠦ ᠦᠨᠡᠬᠡᠷ ᠶᠡᠬᠡ ᠪᠠᠶᠠᠷ《ᠡᠪᠡᠳᠴᠢᠨ ᠦᠭᠡᠢᠷᠡᠯ ᠬᠣᠶᠠᠷ ᠲᠤ᠌ ᠨᠡᠷᠪᠡᠭᠳᠡᠭᠰᠡᠨ ᠬᠥᠭᠡᠷᠦᠬᠦᠢ ᠬᠥᠮᠦᠨ ᠢ᠋ ᠲᠡᠳᠬᠦᠨ ᠲᠡᠩᠬᠡᠷᠡᠭᠦᠯᠬᠦ ᠰᠢᠭ ᠰᠠᠢᠬᠠᠨ ᠶᠠᠭᠤᠮᠠ ᠶᠠᠭᠤ ᠪᠠᠢᠬᠤ ᠪᠢᠯᠡ》 ᠭᠡᠵᠦ ᠪᠣᠳᠣᠨᠠ᠃ ᠭᠡᠲᠡᠯᠡ ᠰᠡᠳᠬᠢᠯ ᠳ᠋ᠦ᠍ᠨᠢ《ᠡᠪᠡᠳᠴᠢᠨ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠂ ᠢᠩᠭᠢᠭᠡᠳ ᠡᠮ ᠢ᠋ᠶ᠋ᠡᠷ ᠡᠳᠡᠭᠡᠷᠡᠳᠡᠭ ᠪᠠᠢᠵᠠᠢ᠃ ᠬᠠᠷᠢᠨ ᠮᠠᠨ ᠤ᠋ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠭᠤᠲᠤᠷᠠᠯ ᠢ᠋ ᠬᠡᠨ ᠶᠠᠭᠤ ᠪᠠᠷ ᠡᠳᠡᠭᠡᠷᠡᠭᠦᠯᠬᠦ ᠶᠦᠮ ᠪᠣᠢ?》 ᠭᠡᠵᠦ ᠥᠪᠡᠷᠲᠡᠭᠡᠨ ᠠᠰᠠᠭᠤᠳᠠᠯ ᠲᠠᠯᠪᠢᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠡᠳᠡᠭᠡᠷᠡᠭᠦᠯᠬᠦ ᠡᠮ ᠬᠠᠮᠢᠭᠠ ᠴᠦ᠍ ᠦᠭᠡᠢ᠃ ᠵᠥᠪᠬᠡᠨ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ ᠪᠡᠨ ᠠᠷᠭᠠᠯᠠᠪᠠᠯ ᠵᠣᠬᠢᠬᠤ ᠭᠠᠭᠴᠠᠬᠠᠨ ᠬᠠᠷᠢᠭᠤᠯᠲᠠ ᠪᠠᠢᠬᠤ ᠪᠥᠭᠡᠳ ᠡᠨᠡ ᠨᠢ ᠭᠡᠪᠡᠯ ᠬᠡᠪᠲᠡᠭᠡᠳ ᠪᠠᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠠᠳᠠᠭᠤᠷ ᠳᠣᠲᠣᠭᠤᠷ ᠶᠠᠪᠤᠨ ᠡᠨᠡ ᠲᠡᠷᠡ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠵᠤ ᠤᠢᠳᠬᠠᠷ ᠭᠤᠨᠢᠭ ᠢ᠋ᠶ᠋ᠠᠨ ᠮᠠᠷᠲᠠᠬᠤ ᠯᠠ ᠪᠠᠢᠯᠠ᠃ ᠡᠢᠮᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠵᠠᠮᠢᠶᠠᠨ ᠬᠦᠩ ᠭᠡᠭᠴᠢ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ ᠪᠠᠷ ᠰᠢᠢᠳᠦᠯᠡ᠃ ᠤᠭ ᠨᠢ ᠡᠨᠡ ᠬᠣᠶᠠᠷ ᠣᠢᠷᠠ ᠳᠣᠲᠣᠨᠣ ᠶ᠋ᠢᠨ ᠲᠠᠨᠢᠯ ᠤ᠋ᠳ ᠪᠢᠰᠢ᠂ ᠠᠦ᠋ᠲ᠋ᠣᠨᠣᠮᠢᠲᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠬᠦᠩ ᠵᠡᠷᠭᠡ ᠱᠠᠩᠨᠠᠭᠳᠠᠬᠤ ᠳ᠋ᠠᠭᠠᠨ ᠥᠭᠡᠷᠡ ᠨᠢᠭᠡᠨ ᠡᠷᠳᠡᠮ ᠦ᠋ᠨ ᠬᠦᠩ ᠱᠠᠩᠨᠠᠭᠳᠠᠬᠤ ᠬᠥᠮᠦᠨ ᠲᠡᠢ ᠨᠢᠭᠡᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠱᠠᠩᠨᠠᠭᠳᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠨᠢ ᠡᠨᠡ ᠵᠠᠮᠢᠶᠠᠨ ᠭᠡᠭᠴᠢ ᠪᠠᠢᠵᠠᠢ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠪᠠᠯᠳᠠᠨᠴᠡᠷᠢᠩ᠂ ᠵᠠᠮᠢᠶᠠᠨ ᠢ᠋ ᠳᠣᠲᠣᠷᠠ ᠪᠠᠨ ᠳᠣᠲᠣᠨᠣᠴᠢᠯᠠᠨ ᠬᠦᠨᠳᠦᠳᠬᠡᠬᠦ ᠪᠣᠯᠤᠭᠰᠠᠨ ᠠᠵᠢ᠃ ᠭᠡᠪᠡᠴᠦ ᠵᠠᠮᠢᠶᠠᠨ ᠨᠠᠰᠤ ᠥᠨᠳᠥᠷ ᠤᠴᠢᠷ ᠦᠶᠡᠷᠬᠡᠨ ᠨᠠᠢᠵᠠᠷᠬᠠᠵᠤ ᠪᠣᠯᠳᠠᠭ ᠦᠭᠡᠢ ᠪᠠᠢᠵᠠᠢ᠃ ᠵᠠᠮᠢᠶᠠᠨ ᠭᠤᠸᠠᠢ ᠶ᠋ᠢᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠪᠠᠯᠳᠠᠨᠴᠡᠷᠢᠩ ᠵᠥᠪᠬᠡᠨ ᠠᠮᠤᠷ ᠮᠡᠳᠡᠬᠦ ᠡᠴᠡ ᠥᠭᠡᠷᠡ ᠶ᠋ᠢ ᠪᠣᠳᠣᠬᠤ ᠦᠭᠡᠢ ᠪᠠᠢᠯᠠ᠃
ᠬᠠᠰᠢᠶᠠᠨ ᠤ᠋ ᠳᠣᠲᠣᠷᠠ ᠪᠠᠨ ᠬᠣᠶᠠᠷ ᠭᠡᠷ ᠲᠡᠢ᠃ ᠵᠡᠭᠦᠨᠲᠡᠢ ᠪᠠᠭᠠᠪᠲᠤᠷ ᠢ᠋ ᠭᠠᠯ ᠲᠣᠭᠣᠭᠠᠨ ᠤ᠋ ᠭᠡᠷ ᠭᠡᠵᠦ ᠨᠡᠷᠡᠯᠡᠨᠡ᠃ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠲᠣᠮᠣ ᠳ᠋ᠤ᠌ ᠨᠢᠭᠤᠷ ᠨᠡᠯᠢᠶᠡᠳ ᠦᠷᠴᠢᠭᠢᠷ ᠳᠡᠭᠡᠳᠦ ᠤᠷᠤᠭᠤᠯ ᠤ᠋ᠨ ᠢ᠋ᠶ᠋ᠠᠨ ᠬᠣᠶᠠᠷ ᠵᠠᠪᠠᠵᠢᠨ ᠳ᠋ᠤ᠌ ᠰᠢᠩᠭᠡᠨ ᠪᠤᠭᠤᠷᠤᠯ ᠰᠠᠬᠠᠯ ᠲᠠᠢ᠂ ᠲᠣᠯᠣᠭᠠᠢ ᠳ᠋ᠠᠭᠠᠨ ᠬᠥᠳᠡᠭᠡ ᠶ᠋ᠢᠨ ᠮᠠᠯᠴᠢᠳ ᠤ᠋ᠨ ᠡᠮᠦᠰᠳᠡᠭ ᠴᠠᠭᠠᠨ ᠢᠰᠡᠭᠡᠢ ᠲᠣᠭᠣᠷᠴᠣᠭ ᠲᠠᠢ᠂ ᠠᠷᠤ ᠤᠷᠤᠭᠤ ᠪᠠᠨ ᠱᠣᠳᠣᠩ ᠪᠤᠭᠤᠷᠤᠯ ᠭᠡᠵᠢᠭᠡ ᠤᠨᠵᠢᠭᠤᠯᠤᠭᠰᠠᠨ ᠬᠠᠭᠤᠴᠢᠨ ᠳᠠᠯᠢᠩᠪᠤ ᠳᠡᠪᠡᠯ ᠲᠡᠢ ᠬᠣᠷᠴᠢᠭᠢᠷ ᠡᠪᠦᠭᠡᠨ ᠵᠤᠤᠬᠠᠨ ᠤ᠋ ᠠᠮᠠᠨ ᠳᠡᠭᠡᠷᠡ ᠰᠠᠭᠤᠨᠠ᠃ ᠡᠨᠡ ᠪᠣᠯ ᠵᠠᠮᠢᠶᠠᠨ᠃ ᠵᠤᠤᠬᠠᠨ ᠤ᠋ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠲᠠᠪᠤ ᠵᠢᠷᠭᠤᠭᠠᠨ ᠬᠡᠦᠬᠡᠳ ᠨᠣᠮ ᠪᠠᠷᠢᠨ ᠴᠣᠮᠴᠣᠢᠨ ᠰᠠᠭᠤᠨᠠ᠃
ᠪᠦᠬᠦ ᠱᠠᠪᠢ ᠨᠠᠷ ᠤ᠋ᠨ ᠲᠣᠭᠠ ᠨᠢ ᠬᠣᠷᠢ ᠭᠠᠷᠤᠢ ᠪᠠᠢᠬᠤ ᠪᠥᠭᠡᠳ ᠲᠡᠳᠡᠨ ᠦ᠌ ᠨᠠᠰᠤ ᠪᠡᠶᠡ ᠪᠡᠨ ᠵᠢᠭᠠᠯᠭᠠᠬᠤ ᠵᠦᠢᠯ ᠲᠤᠰ ᠲᠤᠰ ᠲᠠᠭᠠᠨ ᠢᠯᠭᠠᠪᠤᠷᠢ ᠲᠠᠢ ᠪᠠᠢᠬᠤ ᠤᠴᠢᠷ ᠵᠠᠮᠢᠶᠠᠨ ᠡᠳᠦᠷ ᠪᠦᠷᠢ ᠥᠷᠯᠥᠭᠡ ᠡᠴᠡ ᠠᠪᠤᠭᠠᠳ ᠦᠳᠡᠰᠢ ᠪᠣᠯᠲᠠᠯᠠ ᠬᠡᠦᠬᠡᠳ ᠪᠠᠭᠠᠴᠤᠳ ᠠ᠋ᠴᠠ ᠦᠯᠦ ᠰᠠᠯᠤᠨᠠ᠃ ᠲᠡᠷᠡ ᠵᠠᠭᠤᠷᠠ ᠪᠠᠨ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠳᠤᠯᠠᠭᠠᠨ ᠪᠠᠢᠯᠭᠠᠬᠤ ᠭᠡᠵᠦ ᠴᠠᠭ ᠢᠮᠠᠭᠲᠠ ᠵᠤᠤᠬᠠᠨ ᠤ᠋ ᠪᠠᠨ ᠤᠷᠲᠤ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠣᠷᠣᠬᠤ ᠳ᠋ᠤ᠌ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠪᠣᠯᠤᠨ ᠤᠭᠲᠤᠪᠠ᠃ ᠠᠮᠤᠷ ᠮᠡᠨᠳᠦ ᠮᠡᠳᠡᠨ᠂ ᠳᠡᠭᠡᠭᠰᠢ ᠪᠡᠨ ᠰᠠᠭᠤᠯᠭᠠᠨ᠂ ᠴᠠᠢ ᠢᠳᠡᠭᠡ ᠪᠡᠷ ᠵᠣᠴᠢᠯᠠᠭᠰᠠᠨ ᠢ᠋ᠶ᠋ᠠᠨ᠄
— ᠪᠢ ᠭᠡᠳᠡᠭ ᠴᠢᠨᠢ ᠬᠡᠦᠬᠡᠳ ᠪᠠᠭᠠᠴᠤᠳ ᠳᠤ ᠳᠠᠷᠤᠭᠳᠠᠭᠰᠠᠨ ᠬᠥᠮᠦᠨ ᠰᠢᠦ ᠳᠡ᠃ ᠲᠠ ᠪᠠᠢᠵᠠᠨᠡ᠃ ᠪᠢ ᠤᠳᠠᠬᠤ ᠦᠭᠡᠢ ᠳᠠᠭᠤᠰᠤᠨᠠ ᠭᠡᠳ ᠵᠢᠭᠠᠬᠤ ᠠᠵᠢᠯ ᠳ᠋ᠠᠭᠠᠨ ᠣᠷᠣᠪᠠ᠃
— ᠠᠯᠢ ᠪᠣᠢ᠂ ᠳᠣᠷᠵᠢ ᠨᠠᠭᠠᠰᠢ ᠪᠠᠨ!
ᠬᠡᠦᠬᠡᠳ ᠦ᠋ᠳ ᠦ᠋ᠨ ᠳᠡᠭᠡᠳᠦ ᠲᠠᠯᠠ ᠠ᠋ᠴᠠ ᠠᠷᠪᠠᠭᠠᠳ ᠨᠠᠰᠤᠲᠠᠢ ᠵᠢᠭᠠᠯ ᠪᠣᠰᠤᠨ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤ᠌ ᠰᠠᠭᠤᠭᠠᠳ ᠨᠣᠮ ᠢ᠋ᠶ᠋ᠠᠨ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠢᠭᠤᠯᠤᠭᠠᠳ ᠴᠡᠭᠡᠵᠢ ᠪᠡᠷ《ᠡᠷᠬᠡ ᠶ᠋ᠢ ᠰᠤᠷᠬᠤ ᠪᠠᠷ ᠪᠡᠷᠬᠡ ᠶ᠋ᠢ ᠰᠤᠷ! ᠦᠯᠢᠭᠡᠷ ᠲᠣᠭᠣᠵᠢ ᠶ᠋ᠢ ᠣᠯᠠᠨᠲᠠ ᠤᠩᠰᠢ! ᠦᠰᠦᠭ ᠪᠦᠷᠢ ᠶ᠋ᠢ ᠰᠠᠢᠲᠤᠷ ᠠᠵᠢᠭᠯᠠ᠃ ᠦᠭᠡ ᠪᠦᠷᠢ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠰᠤᠳᠤᠯ! ᠦᠨᠡᠨ ᠦᠭᠡ ᠦᠨᠡᠲᠡᠢ᠂ ᠬᠠᠭᠤᠷᠮᠠᠭ ᠦᠭᠡ ᠬᠣᠣᠷᠲᠠᠢ᠁ 》ᠭᠡᠵᠦ ᠡᠬᠢᠯᠡᠭᠡᠳ ᠴᠠᠭᠠᠰᠢ ᠨᠢ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠲᠠᠢ ᠤᠷᠤᠯᠳᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠲᠣᠷᠴᠢᠭᠢᠨᠠᠭᠤᠯᠬᠤ ᠪᠥᠭᠡᠳ ᠬᠠᠮᠠᠷ ᠨᠢ ᠴᠡᠪᠡᠷ ᠪᠠᠢᠭᠠ ᠪᠣᠯᠪᠠᠴᠤ ᠦᠶᠡ ᠦᠶᠡ ᠲᠦᠭᠳᠡᠷᠡᠬᠦ ᠳ᠋ᠡᠭᠡᠨ ᠨᠢᠰᠦ ᠪᠡᠨ ᠲᠠᠲᠠᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠭᠠᠷ ᠲᠠᠲᠠᠨᠠ᠃ ᠪᠦᠬᠦ ᠴᠡᠭᠡᠵᠢᠯᠡᠭᠰᠡᠨ ᠢ᠋ᠶ᠋ᠡᠨ ᠤᠩᠰᠢᠵᠤ ᠭᠦᠢᠴᠡᠭᠰᠡᠨ ᠦ᠌ ᠪᠡᠨ ᠳᠠᠷᠠᠭᠠ ᠨᠢᠭᠡ ᠬᠡᠰᠡᠭ ᠢ᠋ ᠬᠠᠭᠤᠯᠤᠨ ᠪᠢᠴᠢᠭᠡᠳ ᠮᠥᠨ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠢᠨ ᠰᠢᠭᠦᠯᠭᠡᠨᠡ᠃ ᠡᠨᠡ ᠵᠢᠭᠠᠯ ᠤᠩᠰᠢᠬᠤ᠂ ᠪᠢᠴᠢᠬᠦ ᠬᠣᠶᠠᠷ ᠳᠡᠭᠡᠷᠡ ᠪᠡᠨ ᠠᠯᠳᠠᠭᠠ ᠦᠭᠡᠢ ᠤᠴᠢᠷ ᠴᠠᠭᠠᠰᠢ ᠪᠠᠨ ᠪᠠᠰᠠ ᠴᠡᠭᠡᠵᠢᠯᠡᠬᠦ ᠪᠠ ᠪᠢᠴᠢᠬᠦ ᠳᠠᠭᠠᠭᠠᠯᠭᠠᠪᠤᠷᠢ ᠠᠪᠤᠨ ᠪᠤᠰᠤᠳ ᠲᠠᠭᠠᠨ ᠭᠠᠢᠬᠠᠭᠤᠯᠬᠤ ᠮᠡᠲᠦ ᠢᠨᠢᠶᠡᠮᠰᠦᠭᠯᠡᠨ ᠭᠠᠷᠴᠤ ᠣᠳᠪᠠ᠃
— ᠵᠠ ᠣᠳᠣ ᠪᠡᠯᠪᠡᠷ! ᠭᠡᠬᠦ ᠳ᠋ᠦ᠍ ᠡᠨᠡ ᠶᠡᠷᠦ ᠶᠠᠭᠠᠬᠢᠭᠰᠠᠨ ᠳᠦᠷᠰᠦ ᠦᠭᠡᠢ ᠪᠣᠯ ᠳᠠ ᠭᠡᠮᠡᠷ ᠱᠣᠳᠣᠭᠣᠷ ᠬᠠᠮᠠᠷ᠂ ᠳᠠᠩᠬᠠᠷ ᠲᠣᠯᠣᠭᠠᠢ ᠲᠠᠢ ᠠᠷᠪᠠᠨ ᠭᠤᠷᠪᠠ ᠣᠷᠴᠢᠮ ᠨᠠᠰᠤᠨ ᠤ᠋ ᠬᠦᠦ ᠢᠷᠡᠵᠦ ᠨᠣᠮ ᠢ᠋ᠶ᠋ᠠᠨ ᠮᠥᠨ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠢᠭᠤᠯᠤᠭᠠᠳ《ᠣᠶᠤᠨ ᠲᠦᠯᠬᠢᠭᠦᠷ》 ᠭᠡᠳᠡᠭ ᠨᠣᠮ ᠤ᠋ᠨ ᠬᠡᠰᠡᠭ ᠡᠴᠡ ᠤᠩᠰᠢᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠳ᠋ᠡᠭᠡᠨ ᠭᠤᠷᠪᠠ ᠠᠯᠲᠠᠨ ᠪᠠᠭᠰᠢ ᠪᠠᠷ ᠢ᠋ᠶ᠋ᠠᠨ ᠵᠢᠭᠠᠯᠠᠭᠠᠭᠤᠯᠤᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠬᠠᠭᠤᠯᠤᠨ ᠪᠢᠴᠢᠭᠰᠡᠨ ᠳᠡᠭᠡᠷᠡ ᠪᠡᠨ ᠲᠠᠪᠤ ᠠᠯᠳᠠᠭᠰᠠᠨ ᠤᠴᠢᠷ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠱᠤᠭᠤᠮ ᠢ᠋ᠶ᠋ᠠᠷ ᠨᠠᠢ᠍ᠮᠠ ᠴᠣᠬᠢᠭᠤᠯᠤᠨ ᠰᠢᠳᠬᠡᠭᠦᠯᠵᠦ᠂ ᠥᠨᠥᠬᠢ ᠪᠡᠨ ᠳᠠᠬᠢᠨ ᠳᠠᠪᠲᠠᠬᠤ ᠳᠠᠭᠠᠭᠠᠯᠭᠠᠪᠤᠷᠢ ᠠᠪᠤᠨ ᠭᠠᠷᠤᠯᠠ᠃
ᠡᠭᠦᠨᠴᠢᠯᠡᠨ ᠵᠠᠮᠢᠶᠠᠨ᠂ ᠬᠡᠦᠬᠡᠳ ᠪᠦᠷᠢ ᠳᠡᠭᠡᠷᠡ ᠠᠵᠢᠯᠯᠠᠬᠤ ᠶ᠋ᠢ ᠪᠠᠯᠳᠠᠨᠴᠡᠷᠢᠩ ᠰᠣᠨᠢᠷᠬᠠᠨ ᠠᠵᠢᠬᠤ ᠵᠠᠭᠤᠷᠠ ᠪᠠᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠳᠣᠳᠠᠭ ᠢ᠋ᠶ᠋ᠠᠷ ᠲᠡᠳᠡᠨ ᠢ᠋ ᠰᠤᠷᠭᠠᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠢᠯᠡ? ᠭᠡᠵᠦ ᠪᠣᠳᠣᠨ ᠰᠠᠭᠤᠪᠠ᠃ ᠡᠴᠦᠰ ᠦ᠋ᠨ ᠬᠡᠦᠬᠡᠳ ᠭᠡᠷ ᠡᠴᠡ ᠭᠠᠷᠤᠮᠠᠭᠴᠠ ᠵᠠᠮᠢᠶᠠᠨ᠄
— ᠵᠠ ᠪᠠᠯᠳᠠᠨᠴᠡᠷᠢᠩ ᠮᠢᠨᠢ ᠰᠣᠨᠢᠨ ᠰᠠᠢᠬᠠᠨ ᠶᠠᠭᠤ ᠪᠠᠢᠨᠠ ᠳᠠ? ᠴᠢᠷᠠᠢ ᠴᠢᠨᠢ ᠶᠠᠭᠠᠬᠢᠭᠠᠳ ᠴᠣᠩᠬᠢᠭᠠᠷ ᠪᠠᠢᠨᠠ ᠪᠣᠢ? ᠠᠵᠢᠯ ᠰᠠᠭᠤᠳᠠᠯ ᠶᠡᠬᠡ ᠲᠡᠢ ᠪᠠᠢᠨᠠ ᠤᠤ? ᠭᠡᠵᠦ ᠶᠡᠬᠡᠬᠡᠨ ᠶᠠᠷᠢᠶᠠ ᠳᠡᠯᠭᠡᠮᠡᠷ ᠣᠷᠣᠭᠰᠢ ᠳᠥᠭᠥᠨ ᠰᠠᠭᠤᠪᠠ᠃ ᠭᠡᠲᠡᠯᠡ ᠥᠨᠳᠥᠷ ᠭᠤᠸᠠᠯᠢᠭ ᠪᠡᠶᠡ ᠲᠡᠢ ᠬᠦᠷᠡᠩ ᠪᠣᠷᠣ ᠴᠢᠷᠠᠢ ᠲᠠᠢ ᠬᠣᠷᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠡᠷᠡ ᠣᠷᠣᠵᠤ ᠢᠷᠡᠨ ᠲᠡᠳᠡᠨ ᠦ᠌ ᠶᠠᠷᠢᠶᠠ ᠶ᠋ᠢ ᠲᠠᠰᠤᠯᠪᠠ᠃ ᠲᠡᠷᠡ ᠡᠷᠡ ᠵᠠᠮᠢᠶᠠᠨ ᠢ᠋《ᠪᠠᠭᠰᠢ》 ᠭᠡᠵᠦ ᠳᠠᠭᠤᠳᠠᠨ ᠠᠮᠤᠷ ᠡᠷᠢᠪᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠵᠠᠮᠢᠶᠠᠨ《ᠰᠦᠬᠡ》 ᠭᠡᠵᠦ ᠳᠠᠭᠤᠳᠠᠨ ᠮᠡᠨᠳᠦ ᠮᠡᠳᠡᠭᠡᠳ᠂ ᠴᠠᠢ ᠢᠳᠡᠭᠡ ᠪᠡᠷ ᠵᠣᠴᠢᠯᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠩᠵᠤᠤᠷ ᠥᠭᠪᠡ᠂ ᠰᠦᠬᠡ ᠲᠡᠭᠦᠨ ᠢ᠋ ᠨᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠲᠣᠰᠣᠨ ᠠᠪᠤᠭᠠᠳ ᠲᠠᠲᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠡᠪᠦᠷ ᠲᠡᠭᠡᠨ ᠬᠢᠪᠡ᠃
— ᠲᠡᠳᠡ ᠰᠦᠬᠡ ᠠ᠋᠂ ᠡᠮᠢᠶᠡᠬᠦ ᠶᠠᠭᠤ ᠪᠠᠢᠬᠤ ᠪᠣᠢ? ᠨᠠᠰᠤ ᠴᠢᠨᠢ ᠡᠷᠡ ᠶ᠋ᠢᠨ ᠴᠢᠨᠡᠭᠡᠨ ᠳ᠋ᠦ᠍ ᠬᠦᠷᠦᠭᠰᠡᠨ ᠲᠡᠳᠦᠢ ᠦᠭᠡᠢ ᠨᠡᠷᠡ ᠠᠯᠳᠠᠷ ᠴᠢᠨᠢ ᠣᠯᠠᠨ ᠳ᠋ᠤ᠌ ᠲᠣᠳᠣᠷᠠᠭᠰᠠᠨ ᠪᠢᠰᠢ ᠤᠤ? ᠭᠡᠵᠦ ᠵᠠᠮᠢᠶᠠᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠰᠦᠬᠡ《ᠵᠠ》 ᠭᠡᠳ ᠶᠠᠩᠵᠤᠤᠷ ᠢ᠋ᠶ᠋ᠠᠨ ᠪᠤᠴᠠᠭᠠᠨ ᠭᠠᠷᠭᠠᠵᠤ ᠲᠠᠲᠠᠪᠠ᠃ ᠭᠡᠪᠡᠴᠦ ᠠᠮᠠ ᠨᠢ ᠲᠡᠳᠦᠢ ᠯᠡ ᠡᠪᠯᠢᠭ ᠦᠭᠡᠢ ᠪᠠᠢᠭᠠ ᠶ᠋ᠢ ᠦᠵᠡᠬᠦ ᠳ᠋ᠦ᠍ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠠᠩᠬᠠ ᠤᠳᠠᠭᠠ ᠲᠠᠲᠠᠵᠤ ᠪᠠᠢᠭᠠ ᠨᠢ ᠢᠯᠡᠷᠬᠡᠢ ᠪᠠᠢᠯᠠ᠃
— ᠵᠠ ᠲᠡᠭᠡᠭᠡᠳ ᠪᠠᠭᠠᠲᠤᠷ ᠨᠠᠳᠠ ᠲᠠᠢ ᠠᠭᠤᠯᠵᠠᠬᠤ ᠣᠨᠴᠠ ᠬᠡᠷᠡᠭ ᠲᠡᠢ ᠶᠠᠪᠤᠨᠠ ᠤᠤ? ᠭᠡᠬᠦ ᠳ᠋ᠦ᠍ᠨᠢ ᠪᠠᠯᠳᠠᠨᠴᠡᠷᠢᠩ᠂ ᠬᠠᠯᠬᠠ ᠭᠣᠣᠯ ᠤ᠋ᠨ ᠪᠠᠢᠯᠳᠤᠭᠠᠨ ᠢ᠋ᠶ᠋ᠠᠷ ᠰᠦᠬᠡ ᠭᠡᠳᠡᠭ ᠬᠥᠮᠦᠨ ᠭᠠᠷᠮᠠᠭᠠᠢ ᠪᠠᠢᠯᠳᠤᠨ ᠪᠠᠭᠠᠲᠤᠷ ᠪᠣᠯᠤᠭᠰᠠᠨ ᠢ᠋ ᠰᠠᠨᠠᠪᠠ᠃
ᠰᠦᠬᠡᠪᠠᠭᠠᠲᠤᠷ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢᠨ ᠬᠠᠷᠢᠭᠤ ᠳ᠋ᠤ᠌᠄
— ᠣᠨᠴᠠ ᠶ᠋ᠢᠨ ᠶᠠᠭᠤᠮᠠ ᠦᠭᠡᠢ᠂ ᠵᠦᠭᠡᠷ ᠪᠠᠭᠰᠢ ᠳ᠋ᠤ᠌ ᠨᠢᠭᠡ ᠪᠠᠷᠠᠯᠬᠠᠶᠠ ᠯᠠ ᠭᠡᠵᠦ᠁ ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠪᠠ᠃ ᠵᠠᠮᠢᠶᠠᠨ᠂ ᠰᠦᠬᠡ ᠶ᠋ᠢᠨ ᠦᠭᠡ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ《ᠵᠠ᠂ ᠤᠤᠬᠠᠢ》 ᠭᠡᠵᠦ ᠨᠢᠭᠤᠷ ᠢ᠋ ᠨᠢ ᠠᠵᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠣᠨᠴᠠ ᠶ᠋ᠢᠨ ᠶᠠᠭᠤᠮᠠ ᠦᠭᠡᠢ ᠪᠣᠯ ᠴᠢ ᠮᠠᠷᠭᠠᠰᠢ ᠢᠷᠡᠨᠡ ᠤᠤ ᠳᠠ?
— ᠵᠠ᠂ ᠰᠦᠬᠡᠪᠠᠭᠠᠲᠤᠷ ᠪᠣᠰᠤᠭᠰᠠᠨ ᠢ᠋ᠶ᠋ᠠᠨ
— ᠦᠭᠡᠢ ᠥᠨᠥ ᠣᠷᠣᠢ ᠪᠣᠯᠬᠤ ᠪᠣᠯᠪᠠ ᠤᠤ?
— ᠪᠣᠯᠤᠨᠠ ᠪᠣᠯᠤᠨᠠ᠃
ᠪᠠᠯᠳᠠᠨᠴᠡᠷᠢᠩ ᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠶᠠᠮᠠᠷ ᠨᠢᠭᠡᠨ ᠴᠢᠬᠤᠯᠠ ᠬᠡᠷᠡᠭ ᠪᠠᠢᠨᠠ ᠭᠡᠳᠡᠭ ᠢ᠋ ᠮᠡᠳᠡᠪᠡ᠃ ᠭᠡᠪᠡᠴᠦ ᠪᠤᠰᠤᠳ ᠤ᠋ᠨ ᠬᠡᠷᠡᠭ ᠨᠠᠳᠠ ᠳ᠋ᠤ᠌ ᠶᠠᠭᠤᠨ ᠬᠠᠮᠢᠶᠠ ᠭᠡᠵᠦ ᠪᠣᠳᠣᠨᠠ᠃
— ᠢᠩᠭᠢᠬᠦ ᠳ᠋ᠦ᠍ ᠲᠠ ᠵᠦᠭᠡᠷ ᠴᠦ᠍ ᠦᠭᠡᠢ ᠨᠢᠭᠡ ᠪᠠᠭᠠᠲᠤᠷ ᠱᠠᠪᠢ ᠲᠠᠢ ᠬᠥᠮᠦᠨ ᠪᠠᠢᠬᠤ ᠨᠢ ᠠ᠋?
— ᠲᠡᠢᠮᠦ ᠠ᠋᠃ ᠪᠠᠭᠠᠲᠤᠷ᠂ ᠭᠡᠪᠡᠴᠦ᠁ ᠭᠡᠳ ᠭᠤᠨᠢᠭ ᠲᠠᠢ ᠴᠢᠷᠠᠢ ᠭᠠᠷᠭᠠᠨ᠂ ᠦᠭᠡ ᠪᠡᠨ ᠲᠠᠰᠤᠯᠪᠠ᠃
— ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠪᠠᠭᠠᠲᠤᠷ ᠱᠠᠪᠢ ᠲᠠᠢ ᠪᠠᠢᠬᠤ ᠪᠣᠯ ᠶᠡᠷᠦ ᠪᠠᠬᠠᠳᠤᠯᠲᠠᠢ ᠯᠠ ᠬᠡᠷᠡᠭ ᠭᠡᠬᠦ ᠳ᠋ᠦ᠍᠄
— ᠬᠠᠵᠠᠭᠤ ᠠ᠋ᠴᠠ ᠬᠠᠷᠠᠬᠤ ᠬᠥᠮᠦᠨ ᠳ᠋ᠦ᠍ ᠲᠡᠢᠮᠦ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ᠃ ᠴᠣᠬᠣᠮ ᠮᠢᠨᠦ ᠬᠤᠪᠢ ᠳ᠋ᠤ᠌ ᠭᠡᠪᠡᠯ ᠦᠬᠡᠷ ᠫᠤᠤ ᠶ᠋ᠢᠨ ᠳᠡᠯᠪᠡᠷᠡᠬᠦ ᠰᠤᠮᠤᠨ ᠳ᠋ᠤ᠌ ᠪᠣᠯ ᠤᠤ? ᠠᠯᠢ ᠡᠷᠴᠢᠯᠡᠭᠰᠡᠨ ᠰᠤᠮᠤᠨ ᠤ᠋ ᠦᠵᠦᠭᠦᠷ ᠲᠦ᠍ ᠪᠣᠯ ᠤᠤ? ᠴᠠᠭ ᠦᠷᠭᠦᠯᠵᠢ ᠰᠡᠳᠬᠢᠯ ᠵᠣᠪᠠᠬᠤ ᠶ᠋ᠢᠨ ᠯᠡ ᠨᠡᠮᠡᠭᠦᠷᠢ ᠪᠠᠢᠳᠠᠭ ᠶᠤᠮ ᠭᠡᠯᠡ᠃
— ᠬᠠᠷᠢᠨ ᠯᠠ ᠳᠠ᠂ ᠵᠠᠪᠠᠯ ᠲᠡᠭᠡᠵᠦ ᠭᠤᠨᠢᠭ ᠲᠠᠢ ᠪᠠᠷ ᠲᠡᠭᠦᠰᠬᠦ ᠨᠢ ᠬᠠᠤᠯᠢ ᠪᠢᠰᠢ᠃ ᠢᠯᠠᠨ ᠲᠠᠢᠯᠵᠤ ᠶᠠᠪᠤᠬᠤ ᠬᠤᠪᠢ ᠲᠠᠢ ᠬᠦᠦ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ ᠵᠠᠮᠢᠶᠠᠨ ᠡᠨᠡ ᠲᠤᠬᠠᠢ ᠶᠠᠷᠢᠬᠤ ᠶ᠋ᠢ ᠡᠷᠡᠰ ᠲᠠᠲᠠᠭᠠᠯᠵᠠᠬᠤ ᠮᠡᠲᠦ ᠳᠠᠬᠢᠨ ᠡᠰᠡ ᠳᠤᠤᠭᠠᠷᠪᠠ᠃ ᠬᠠᠭᠠᠯᠭᠠ ᠨᠢ ᠴᠦ᠍ ᠨᠡᠭᠡᠭᠡᠭᠳᠡᠨ ᠨᠢᠭᠡ ᠡᠮᠡᠭᠲᠡᠢ ᠣᠷᠣᠵᠤ ᠢᠷᠡᠯᠡ᠃ ᠲᠡᠭᠦᠨ ᠦ᠌ ᠨᠠᠰᠤ ᠵᠠᠯᠠᠭᠤ᠂ ᠵᠢᠰᠦ ᠴᠢᠷᠠᠢ ᠭᠤᠸᠠ ᠰᠠᠢᠬᠠᠨ᠂ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠨᠢ ᠭᠣᠢᠳᠠ ᠳᠡᠭᠵᠢᠨ᠂ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠱᠤᠳᠤᠷᠭᠤ ᠬᠥᠭᠵᠢᠮ ᠰᠤᠭᠤᠪᠴᠢᠯᠠᠵᠤ᠂ ᠵᠡᠭᠦᠨ ᠳᠡᠭᠡᠷᠡ ᠪᠡᠨ ᠬᠥᠬᠡ ᠲᠣᠷᠭᠠᠨ ᠪᠠᠷᠢᠨᠲᠠᠭ ᠲᠠᠢ ᠵᠤᠵᠠᠭᠠᠨ ᠳᠡᠪᠲᠡᠷ ᠵᠠᠯᠠᠭᠰᠠᠨ ᠪᠥᠭᠡᠳ ᠪᠣᠱᠣᠭᠠ ᠳᠠᠪᠠᠩᠭᠤᠲᠠ ᠪᠠᠨ ᠡᠪᠦᠳᠦᠭ ᠨᠠᠬᠢᠰᠬᠢᠯᠭᠡᠨ ᠵᠠᠮᠢᠶᠠᠨ ᠳ᠋ᠤ᠌ ᠰᠥᠭᠥᠳᠦᠭᠡᠳ ᠲᠡᠨᠳᠡ ᠡᠴᠡ ᠬᠣᠢᠰᠢ ᠬᠠᠨᠳᠤᠨ ᠵᠤᠤᠬᠠᠨ ᠤ᠋ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠰᠠᠭᠤᠬᠤ ᠭᠡᠬᠦ ᠳ᠋ᠦ᠍ᠨᠢ ᠵᠠᠮᠢᠶᠠᠨ᠄
— ᠦᠭᠡᠢ ᠬᠡᠦᠬᠡᠳ ᠡᠨᠳᠡ ᠰᠠᠭᠤ! ᠭᠡᠵᠦ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠡᠭᠡᠳᠦ ᠲᠠᠯᠠ ᠲᠠᠢᠰᠢ ᠭᠠᠵᠠᠷ ᠵᠢᠭᠠᠪᠠ᠃ ᠬᠡᠦᠬᠡᠨ᠄《ᠵᠠ》 ᠭᠡᠵᠦ ᠳᠠᠬᠢᠨ ᠮᠡᠬᠦᠰᠬᠢᠭᠡᠳ ᠵᠤᠤᠬᠠᠨ ᠤ᠋ ᠤᠷᠳᠤᠭᠤᠷ ᠲᠣᠭᠣᠷᠢᠨ ᠥᠨᠥᠬᠢ ᠵᠢᠭᠠᠭᠰᠠᠨ ᠭᠠᠵᠠᠷ ᠲᠤᠨᠢ ᠰᠥᠬᠥᠷᠡᠨ ᠰᠠᠭᠤᠯᠠ᠃ ᠵᠠᠮᠢᠶᠠᠨ ᠳ᠋ᠤ᠌ ᠡᠨᠡ ᠡᠮᠡᠭᠲᠡᠢ ᠣᠨᠴᠠ ᠡᠷᠬᠢᠮᠯᠡᠭᠳᠡᠳᠡᠭ ᠢ᠋ ᠪᠠᠯᠳᠠᠨᠴᠡᠷᠢᠩ ᠮᠡᠳᠡᠪᠡ᠃ ᠡᠮᠡᠭᠲᠡᠢ ᠨᠣᠮ ᠤ᠋ᠨ ᠢ᠋ᠶ᠋ᠠᠨ ᠪᠠᠷᠢᠨᠲᠠᠭ ᠢ᠋ ᠲᠠᠢᠯᠤᠨ ᠬᠡᠳᠦᠨ ᠳᠡᠪᠲᠡᠷ ᠭᠠᠷᠭᠠᠨ ᠵᠠᠮᠢᠶᠠᠨ ᠳ᠋ᠤ᠌ ᠳᠡᠪᠰᠢᠭᠦᠯᠬᠦ ᠨᠢ ᠦᠨᠡᠬᠡᠷ ᠭᠠᠢᠬᠠᠯᠲᠠᠢ ᠪᠠᠢᠬᠤ ᠪᠥᠭᠡᠳ ᠠᠩᠬᠠ ᠰᠠᠭᠤᠬᠤ ᠳ᠋ᠠᠭᠠᠨ ᠪᠡᠶᠡ ᠪᠡᠨ ᠪᠠᠷᠢᠨ ᠴᠣᠮᠴᠣᠢᠭᠰᠠᠨ ᠠ᠋ᠴᠠ ᠪᠠᠨ ᠬᠠᠵᠠᠭᠤ ᠲᠡᠢᠰᠢ ᠬᠡᠯᠪᠡᠢᠨ ᠱᠤᠳᠤᠷᠭᠤ ᠪᠠᠨ ᠬᠥᠭᠯᠡᠪᠡ᠃
— ᠵᠠ ᠡᠬᠢᠯᠡ ᠳᠡ ᠭᠡᠵᠦ ᠵᠠᠮᠢᠶᠠᠨ ᠭᠤᠸᠠᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍᠄ ᠬᠠᠷᠠᠭᠠ ᠪᠠᠨ ᠲᠡᠭᠰᠢ ᠪᠣᠯᠭᠠᠨ ᠱᠤᠳᠤᠷᠭᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠰᠢ ᠶ᠋ᠢ ᠠᠳᠬᠤᠭᠰᠠᠨ ᠭᠠᠷ ᠳᠡᠭᠡᠷᠡ ᠪᠡᠨ ᠲᠤᠰᠬᠠᠨ ᠬᠡᠰᠡᠭᠬᠡᠨ ᠵᠠᠭᠤᠷᠠ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠳᠠᠷᠤᠵᠤ ᠡᠬᠢᠯᠡᠪᠡ᠃ ᠴᠣᠬᠢᠬᠤ ᠨᠢ ᠴᠡᠪᠡᠷ᠂ ᠳ᠋ᠠᠩ ᠶᠠᠩ ᠭᠡᠰᠡᠨ ᠲᠤᠩᠭᠠᠯᠠᠭ ᠠᠪᠢᠶᠠ ᠪᠣᠷᠣᠭᠠᠨ ᠤ᠋ ᠠᠩᠬᠠᠨ ᠤ᠋ ᠳᠤᠰᠤᠯ ᠤ᠋ᠳ ᠰᠢᠭ᠋ ᠨᠢᠭᠡ ᠨᠢᠭᠡ ᠪᠡᠷ ᠢ᠋ᠶ᠋ᠡᠨ ᠴᠤᠤᠷᠢᠶᠠᠳᠠᠵᠤ ᠡᠬᠢᠯᠡᠭᠰᠡᠨ ᠢ᠋ᠶ᠋ᠡᠨ ᠴᠠᠭᠠᠰᠢ ᠪᠠᠨ ᠰᠢᠷᠦᠭᠦᠰᠦᠨ ᠬᠤᠷᠳᠤᠰᠪᠠ᠂ ᠱᠤᠳᠤᠷᠭᠤ ᠶ᠋ᠢᠨ ᠤᠷᠲᠤ ᠡᠰᠢ ᠶ᠋ᠢᠨ ᠳᠠᠭᠠᠤ ᠳᠠᠰᠢᠭᠤᠯᠳᠠᠰᠬᠢᠬᠰᠠᠨ ᠪᠡᠶᠡ ᠨᠢ ᠤᠶᠠᠩᠭᠠᠯᠠᠬᠤ ᠠᠶᠠ ᠪᠠᠨ ᠳ᠋ᠠᠭᠠᠨ ᠬᠥᠳᠡᠯᠦᠨᠡ᠃
ᠪᠠᠯᠳᠠᠨᠴᠡᠷᠢᠩ ᠠᠯᠮᠠᠢᠷᠠᠨ ᠭᠠᠢᠬᠠᠯᠠ᠃ ᠤᠷᠢᠳ ᠡᠮᠦᠨᠡ ᠡᠢᠮᠦ ᠡᠮᠡᠭᠲᠡᠢ ᠶ᠋ᠢ ᠦᠵᠡᠭᠡ ᠦᠭᠡᠢ ᠳ᠋ᠡᠭᠡᠨ᠂ ᠢᠩᠭᠢᠵᠦ ᠬᠥᠭᠵᠢᠮᠳᠡᠨᠡ ᠭᠡᠵᠦ ᠣᠭᠲᠣ ᠰᠠᠨᠠᠭᠠ ᠦᠭᠡᠢ ᠳ᠋ᠡᠭᠡᠨ ᠲᠡᠷᠡ ᠪᠢᠯᠡ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠡᠮᠡᠭᠲᠡᠢ ᠶ᠋ᠢ ᠡᠭᠴᠡᠯᠡᠨ ᠬᠠᠷᠠᠬᠤ ᠠ᠋ᠴᠠ ᠪᠠᠨ ᠵᠣᠪᠠᠨ ᠳᠣᠷᠣᠭᠰᠢ ᠰᠢᠷᠲᠡᠵᠦ ᠵᠥᠪᠬᠡᠨ ᠨᠢᠳᠦᠨ ᠦ᠌ ᠪᠡᠨ ᠥᠨᠴᠥᠭ ᠪᠤᠯᠤᠩ ᠲᠡᠳᠦᠢᠬᠡᠨ ᠢ᠋ᠶ᠋ᠡᠷ ᠯᠡ ᠠᠵᠢᠭᠯᠠᠨᠠ᠃ ᠡᠮᠡᠭᠲᠡᠢ ᠶ᠋ᠢᠨ ᠭᠠᠷ ᠬᠤᠷᠤᠭᠤ ᠤᠯᠠᠮ ᠢ᠋ᠶ᠋ᠠᠷ ᠬᠤᠷᠳᠤᠰᠤᠨ ᠭᠢᠯᠠᠯᠵᠠᠵᠤ ᠱᠤᠳᠤᠷᠭᠤ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠤ᠋ ᠱᠠᠭᠢᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠲᠡᠳᠦᠢ ᠦᠭᠡᠢ ᠵᠥᠭᠡᠯᠡᠨ ᠬᠠᠷᠠᠴᠠᠲᠤ ᠲᠤᠩᠭᠠᠯᠠᠭ ᠨᠢᠳᠦᠨ ᠳ᠋ᠦ᠍ᠨᠢ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠨ ᠰᠢᠭᠤᠳ ᠬᠢᠲᠠᠳ ᠬᠡᠯᠡ ᠪᠡᠷ ᠰᠢᠯᠦᠭᠯᠡᠨ ᠳᠠᠭᠤᠯᠠᠵᠤ ᠡᠬᠢᠯᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠡᠮᠡᠭᠲᠡᠢ ᠶ᠋ᠢᠨ ᠨᠢᠭᠤᠷ ᠢ᠋ ᠡᠭᠴᠡᠯᠡᠨ ᠰᠢᠷᠳᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠭᠰᠡᠨ ᠢ᠋ᠶ᠋ᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠵᠢᠯᠣᠭᠣ ᠠᠯᠲᠠᠨ ᠡᠮᠡᠭᠲᠡᠢ ᠶ᠋ᠢ ᠬᠠᠷᠠᠭᠰᠠᠨ ᠪᠥᠭᠡᠳ ᠨᠢᠳᠦᠨ ᠳ᠋ᠦ᠍ᠨᠢ ᠬᠠᠴᠠᠷ ᠳᠡᠭᠡᠷᠡ ᠪᠡᠨ ᠤᠯᠠᠭᠠᠪᠲᠤᠷ ᠲᠤᠶᠠᠭᠠ ᠲᠠᠢ ᠳᠤᠭᠤᠢ ᠴᠠᠭᠠᠨ ᠴᠢᠷᠠᠢ᠂ ᠲᠠᠯᠪᠢᠭᠤᠨ ᠪᠣᠯᠤᠭᠠᠳ ᠲᠤᠩᠭᠠᠯᠠᠭ ᠬᠠᠷᠠ ᠨᠢᠳᠦ᠂ ᠤᠬᠠᠭᠠᠯᠢᠭ ᠪᠠᠢᠷᠢ ᠶ᠋ᠢᠨ ᠲᠡᠨᠢᠭᠡᠷ ᠮᠠᠩᠨᠠᠢ ᠪᠠ ᠬᠡᠵᠢᠶᠡ ᠪᠣᠯᠪᠠᠴᠤ ᠠᠭᠤᠷ ᠬᠢᠯᠢᠩᠨᠡᠯ ᠦ᠋ᠨ ᠮᠠᠭᠤᠬᠠᠢ ᠦᠭᠡᠰ ᠭᠠᠷᠤᠮᠠ ᠦᠭᠡᠢ ᠵᠤᠵᠠᠭᠠᠪᠲᠤᠷ ᠤᠯᠠᠭᠠᠨ ᠤᠷᠤᠭᠤᠯ ᠲᠤᠰᠬᠤ ᠪᠥᠭᠡᠳ ᠴᠠᠭᠠᠰᠢ ᠪᠠᠨ ᠪᠠᠰᠠ ᠲᠥᠷᠥᠭᠦᠯᠬᠦ ᠦᠷᠡ ᠬᠡᠦᠬᠡᠳ ᠶᠦ᠍ᠭᠡᠨ ᠡᠰᠡᠨ ᠮᠡᠨᠳᠦ ᠪᠡᠷ ᠪᠣᠢᠵᠢᠭᠤᠯᠬᠤ ᠶ᠋ᠢᠨ ᠪᠡᠯᠭᠡ ᠲᠡᠮᠳᠡᠭ ᠪᠣᠯᠤᠭᠰᠠᠨ ᠴᠡᠭᠡᠵᠢᠨ ᠪᠡᠶᠡ ᠶ᠋ᠢᠨ ᠬᠢᠨᠢ ᠣᠷᠣᠭᠰᠢ ᠲᠦᠷᠢᠨ ᠳᠣᠪᠣᠢᠭᠰᠠᠨ ᠬᠣᠶᠠᠷ ᠬᠡᠰᠡᠭ ᠤᠭ ᠪᠡᠶᠡ ᠨᠢ ᠭᠤᠸᠠ ᠰᠠᠢᠬᠠᠨ ᠢ᠋ ᠤᠯᠠᠮ ᠢ᠋ᠶ᠋ᠠᠷ ᠦᠵᠡᠰᠬᠦᠯᠡᠩ ᠲᠡᠭᠦᠯᠳᠡᠷ ᠪᠣᠯᠭᠠᠭᠰᠠᠨ ᠠᠵᠢ᠃ ᠨᠢᠭᠡ ᠦᠶᠡ ᠰᠢᠯᠦᠭ ᠳᠠᠭᠤᠯᠠᠯ ᠱᠤᠳᠤᠷᠭᠤ ᠶ᠋ᠢᠨ ᠴᠢᠪᠬᠠᠳᠠᠰᠤ ᠲᠠᠢ ᠶᠠᠪ ᠴᠠᠪ ᠨᠠᠢᠷᠠᠨ ᠶᠠᠪᠤᠭᠳᠠᠬᠤ ᠶ᠋ᠢ ᠨᠢ ᠰᠣᠨᠣᠰᠬᠤ ᠳ᠋ᠤ᠌᠄
《ᠢᠨᠠᠭ ᠠᠮᠠᠷᠠᠭ ᠭᠡᠳᠡᠭ
ᠶᠢᠷᠲᠢᠨᠴᠦ ᠶ᠋ᠢᠨ ᠦᠭᠡ ᠬᠡᠮᠡᠪᠡᠴᠦ
ᠢᠮᠠᠭᠲᠠ ᠵᠢᠷᠤᠮ ᠢ᠋ ᠬᠠᠮᠲᠤᠳᠬᠠᠪᠠᠰᠤ
ᠰᠠᠶᠢ ᠠᠮᠤᠭᠤᠯᠠᠩ ᠢ᠋ ᠣᠯᠤᠨᠠ᠂
ᠢᠷᠡᠬᠦ ᠵᠠᠮ ᠰᠢᠳᠤᠷᠭᠤ ᠠᠬᠤᠢ ᠯᠠ
ᠬᠠᠷᠢᠬᠤ ᠠᠶᠠᠨ ᠰᠢᠯᠤᠭᠤᠨ
ᠶᠢᠯᠸᠢ ᠶ᠋ᠢᠨ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠪᠦᠷᠬᠦᠭᠰᠡᠨ ᠢ᠋
ᠢᠯᠭᠠᠵᠤ ᠲᠠᠨᠢᠬᠤ ᠦᠭᠡᠢ ᠨᠢ ᠭᠣᠮᠣᠳᠠᠯᠲᠠᠢ᠁》
(ᠳᠦ ᠱᠢ ᠨᠢᠶᠠᠩ ᠬᠡᠮᠡᠬᠦ ᠥᠬᠢᠨ ᠬᠢᠯᠢᠩᠨᠡᠵᠦ ᠵᠠᠭᠤᠨ ᠡᠷᠳᠡᠨᠢᠲᠦ ᠠᠪᠳᠠᠷᠠ ᠶ᠋ᠢ
ᠣᠰᠤᠨᠠ ᠲᠤᠩᠭᠠᠭᠠᠭᠰᠠᠨ ᠨᠢ ᠬᠡᠮᠡᠬᠦ ᠵᠣᠬᠢᠶᠠᠯ ᠤ᠋ᠨ ᠰᠢᠯᠦᠭ ᠡᠴᠡ)
ᠭᠡᠬᠦ ᠮᠡᠲᠦ ᠶ᠋ᠢᠨ ᠦᠭᠡᠰ ᠴᠢᠬᠢᠨ ᠳ᠋ᠦ᠍ ᠪᠠᠷᠢᠭᠳᠠᠨ ᠰᠠᠨᠠᠭᠠ ᠰᠡᠳᠬᠢᠬᠦᠢ ᠶ᠋ᠢ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠤ᠋ᠨ ᠣᠷᠣᠨ ᠳ᠋ᠤ᠌ ᠠᠪᠠᠴᠢᠨᠠ᠃ ᠳᠠᠭᠤᠯᠠᠯ ᠵᠣᠭᠰᠣᠨ ᠱᠤᠳᠤᠷᠭᠤ ᠭᠠᠭᠴᠠᠭᠠᠷ ᠬᠠᠩᠭᠢᠨᠠᠬᠤ ᠨᠢ ᠲᠤᠩᠭᠠᠯᠠᠭ ᠤᠰᠤ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠤ᠋ ᠲᠤᠰᠬᠠᠯ ᠢ᠋ ᠤᠭᠲᠤᠨ ᠮᠢᠷᠠᠯᠵᠠᠬᠤ ᠪᠤᠶᠤ ᠴᠡᠴᠡᠭ ᠦ᠋ᠨ ᠶᠡᠬᠡ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠠᠯᠲᠠᠨ ᠡᠷᠪᠡᠬᠡᠢ ᠨᠦ᠍ᠭᠦᠳ ᠬᠥᠭᠡᠭᠡᠴᠡᠯᠳᠦᠨ ᠨᠠᠭᠠᠳᠬᠤ ᠶ᠋ᠢ ᠰᠠᠨᠠᠭᠳᠠᠭᠤᠯᠤᠨᠠ᠃ ᠲᠡᠭᠡᠭᠡᠳ ᠳᠠᠭᠤᠤ ᠬᠥᠭᠵᠢᠮ ᠬᠣᠶᠠᠷ ᠳᠠᠬᠢᠨ ᠨᠠᠢᠷᠯᠠᠯᠳᠤᠬᠤ ᠳ᠋ᠠᠭᠠᠨ᠄ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠬᠥᠮᠦᠨ ᠠᠮᠢᠲᠠᠳ ᠤ᠋ᠨ ᠬᠠᠷᠢᠯᠴᠠᠨ ᠳᠤᠷᠠᠯᠠᠯᠴᠠᠬᠤ ᠭᠡᠳᠡᠭ ᠬᠡᠴᠢᠨᠡᠨ ᠶᠡᠬᠡ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠬᠡᠷᠡᠭ ᠪᠣᠯᠬᠤ ᠶ᠋ᠢ ᠰᠡᠳᠬᠢᠯ ᠦ᠋ᠨ ᠭᠦᠨ ᠳ᠋ᠦ᠍ ᠪᠠᠭᠤᠯᠭᠠᠨᠠ᠃
ᠢᠩᠭᠢᠬᠦ ᠳ᠋ᠦ᠍᠂ ᠨᠣᠮ ᠢ᠋ ᠨᠢ ᠪᠠᠷᠢᠨ ᠰᠢᠭᠦᠵᠦ ᠰᠠᠭᠤᠭᠠ ᠪᠠᠭᠰᠢ ᠨᠢ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ ᠰᠡᠳᠬᠢᠯ ᠬᠥᠳᠡᠯᠦᠨ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠡᠴᠦᠰ ᠲᠦ᠋ᠨᠢ ᠪᠠᠭᠰᠢ ᠨᠢ ᠲᠡᠷᠡ ᠡᠮᠡᠭᠲᠡᠢ ᠱᠠᠪᠢ ᠳ᠋ᠠᠭᠠᠨ ᠪᠦᠲᠦᠨ ᠬᠣᠶᠠᠷ ᠬᠠᠭᠤᠳᠠᠰᠤ ᠴᠡᠭᠡᠵᠢᠯᠡᠬᠦ ᠶ᠋ᠢ ᠳᠠᠭᠠᠭᠠᠯᠭᠠᠪᠠ᠃ ᠡᠮᠡᠭᠲᠡᠢ ᠨᠣᠮ ᠢ᠋ᠶ᠋ᠠᠨ ᠪᠠᠷᠢᠨᠲᠠᠭᠯᠠᠭᠠᠳ ᠪᠣᠰᠬᠤ ᠳ᠋ᠤ᠌ ᠪᠠᠭᠰᠢ ᠨᠢ ᠦᠳᠡᠨ ᠭᠠᠷᠭᠠᠬᠤ ᠪᠣᠯᠪᠠ᠃ ᠪᠠᠯᠳᠠᠨᠴᠡᠷᠢᠩ ᠴᠦ᠍ ᠲᠡᠳᠡᠨ ᠦ᠌ ᠬᠠᠮᠲᠤ ᠭᠠᠷᠤᠯᠠ᠃
ᠭᠠᠳᠠᠭᠠ ᠠᠯᠢ ᠬᠡᠳᠦᠢᠨ ᠨᠠᠷᠠ ᠵᠢᠷᠭᠠᠵᠤ ᠬᠠᠷᠠᠩᠭᠤᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠᠨ ᠤ᠋ ᠡᠮᠦᠨᠡ ᠳᠥᠷᠪᠡᠨ ᠳᠤᠭᠤᠢ ᠲᠠᠢ ᠰᠡᠦᠬᠡ ᠲᠡᠷᠭᠡ ᠵᠣᠭᠰᠣᠨᠠ᠃ ᠡᠨᠡ ᠲᠡᠷᠭᠡ ᠡᠮᠡᠭᠲᠡᠢ ᠶ᠋ᠢᠨ ᠲᠡᠷᠭᠡ ᠠᠵᠢ᠃ ᠪᠠᠯᠳᠠᠨᠴᠡᠷᠢᠩ ᠲᠡᠭᠦᠨ ᠢ᠋ ᠲᠣᠩ ᠳᠡᠭᠡᠭᠦᠷ ᠬᠥᠮᠦᠨ ᠦ᠌ ᠡᠷᠬᠡ ᠲᠠᠩᠬᠢ ᠥᠬᠢᠨ ᠪᠣᠯᠬᠤ ᠶ᠋ᠢ ᠨᠢ ᠮᠡᠳᠡᠪᠡ᠃ ᠡᠮᠡᠭᠲᠡᠢ ᠲᠡᠷᠭᠡᠨ ᠳ᠋ᠡᠭᠡᠨ ᠰᠠᠭᠤᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠪᠠᠭᠰᠢ ᠳ᠋ᠠᠭᠠᠨ ᠡᠪᠦᠳᠦᠭ ᠳᠠᠷᠤᠨ ᠮᠡᠬᠦᠰᠬᠢᠨ ᠶᠣᠰᠣ ᠭᠦᠢᠴᠡᠳᠬᠡᠭᠡᠳ ᠳᠠᠷᠠᠭᠠ ᠨᠢ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠮᠥᠨ ᠶᠣᠰᠣ ᠭᠦᠢᠴᠡᠳᠬᠡᠪᠡ᠃
ᠪᠠᠯᠳᠠᠨᠴᠡᠷᠢᠩ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠳᠠᠩ ᠰᠠᠶᠢ ᠶ᠋ᠢᠨ ᠡᠮᠡᠭᠲᠡᠢ᠂ ᠲᠡᠭᠦᠨ ᠦ᠌ ᠣᠯᠠᠨ ᠲᠠᠯᠠ ᠶ᠋ᠢᠨ ᠣᠨᠴᠠᠭᠠᠢ ᠪᠠᠢᠳᠠᠯ᠂ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠭᠠᠰᠢ ᠦᠭᠡᠢ ᠤᠷᠠᠨ ᠴᠢᠳᠠᠪᠤᠷᠢ ᠶ᠋ᠢ ᠪᠠᠬᠠᠳᠤᠪᠠ᠃ ᠣᠭᠲᠠᠷᠭᠤᠢ ᠳ᠋ᠤ᠌ ᠦᠢ ᠲᠦᠮᠡᠨ ᠣᠳᠣᠨ ᠭᠢᠯᠠᠯᠵᠠᠬᠤ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠦᠳᠡᠰᠢ ᠶ᠋ᠢᠨ ᠭᠢᠯᠤᠭᠠᠨ ᠬᠡᠮᠡᠬᠦ ᠪᠢᠮᠪᠠ ᠭᠠᠷᠠᠭ ᠨᠢᠳᠦᠨ ᠦ᠌ ᠡᠮᠦᠨᠡ ᠣᠯᠠᠨ ᠠ᠋ᠴᠠ ᠣᠨᠴᠠᠭᠠᠢ ᠲᠤᠰᠬᠤ ᠨᠢ ᠶᠡᠷᠦ ᠰᠠᠶᠢ ᠶ᠋ᠢᠨ ᠡᠮᠡᠭᠲᠡᠢ ᠰᠢᠭ ᠰᠣᠳᠣ ᠠᠵᠢ᠃《ᠲᠡᠢᠮᠦ ᠠ᠋᠂ ᠲᠡᠷᠡ ᠣᠳᠣᠨ ᠭᠠᠵᠠᠷ ᠪᠠᠭᠤᠭᠰᠠᠨ ᠤ᠋ ᠠᠳᠠᠯᠢ ᠶᠤᠮ ᠪᠠᠢᠨᠠ ᠳᠠ》 ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠥᠪᠡᠷ ᠲᠡᠭᠡᠨ ᠥᠭᠦᠯᠡᠪᠡ᠃ ᠬᠠᠷᠢᠭᠠᠳ ᠱᠠᠪᠢ ᠶ᠋ᠢᠨ ᠭᠠᠷ ᠢ᠋ᠶ᠋ᠠᠷ ᠬᠢᠭᠳᠡᠭᠰᠡᠨ ᠬᠣᠭᠣᠯᠠ ᠶ᠋ᠢ ᠢᠳᠡᠵᠦ ᠪᠠᠢᠬᠤ ᠳ᠋ᠤ᠌ ᠮᠥᠨ ᠯᠡ ᠪᠣᠳᠣᠭᠰᠠᠭᠠᠷ᠂ ᠳᠠᠷᠠᠭᠠ ᠨᠢ ᠣᠷᠣᠨ ᠳ᠋ᠠᠭᠠᠨ ᠣᠷᠣᠨ ᠤᠨᠲᠠᠬᠤ ᠭᠡᠬᠦ ᠳ᠋ᠦ᠍ ᠪᠠᠰᠠ ᠡᠷᠭᠢᠯᠳᠦᠭᠰᠡᠭᠡᠷ ᠪᠥᠭᠡᠳ ᠭᠡᠲᠡᠯᠡ ᠬᠠᠵᠠᠭᠤ ᠪᠠᠷ ᠨᠢ ᠰᠦᠬᠡᠪᠠᠭᠠᠲᠤᠷ ᠣᠷᠣᠵᠤ ᠢᠷᠡᠯᠡ᠃《ᠲᠡᠷᠡ ᠡᠷᠡ ᠳᠠᠩᠴᠤ ᠵᠠᠯᠠᠭᠤ ᠶᠤᠮ ᠳᠠ᠃ ᠭᠡᠪᠡᠴᠦ ᠦᠵᠡᠲᠡᠯᠡ ᠤᠬᠠᠭᠠᠨ ᠲᠠᠢ ᠪᠣᠯᠣᠳ ᠵᠣᠷᠢᠭ ᠲᠠᠢ ᠨᠢ ᠥᠪᠡᠷ ᠦ᠋ᠨ ᠬᠢᠨᠢ ᠥᠷᠭᠡᠨ ᠮᠠᠩᠨᠠᠢ᠂ ᠡᠷᠡᠰᠯᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠰᠢᠷᠳᠡᠬᠦ ᠰᠡᠷᠭᠦᠯᠡᠩ ᠨᠢᠳᠦ᠂ ᠤᠷᠤᠭᠤᠯ ᠤ᠋ᠨ ᠬᠢᠨᠢ ᠴᠢᠮᠪᠠᠢ ᠵᠢᠮ ᠡᠴᠡ ᠲᠡᠷᠡ ᠪᠣᠯᠭᠠᠨ ᠠ᠋ᠴᠠ ᠨᠢ ᠲᠣᠳᠣᠷᠬᠠᠢ ᠪᠠᠢᠭᠰᠠᠨ ᠠ᠋ᠴᠠ ᠭᠠᠳᠠᠨᠠ᠂ ᠰᠦᠷᠡᠬᠡᠢ ᠬᠥᠮᠦᠨ ᠦ᠌ ᠱᠠᠪᠢ ᠪᠣᠯᠬᠤ ᠤᠴᠢᠷ ᠥᠨᠥ ᠦᠶᠡ ᠶ᠋ᠢᠨ ᠣᠷᠣᠰ ᠣᠷᠣᠨ ᠤ᠋ ᠲᠤᠬᠠᠢ ᠵᠠᠪᠠᠯ ᠪᠣᠳᠣᠳᠠᠭ ᠪᠠᠢᠬᠤ ᠶᠣᠰᠣᠲᠠᠢ ᠰᠢᠦ ᠳᠡ》 ᠭᠡᠰᠡᠨ ᠪᠣᠳᠣᠯ ᠪᠣᠢ ᠪᠣᠯᠤᠨ ᠦᠷᠭᠦᠯᠵᠢᠯᠡᠨᠡ᠃ ᠭᠡᠪᠡᠴᠦ ᠥᠨᠥᠬᠢ ᠡᠮᠡᠭᠲᠡᠢ ᠬᠠᠢᠷᠠ ᠢᠨᠠᠭ ᠤ᠋ᠨ ᠲᠠᠯᠠ ᠪᠠᠷ ᠪᠢᠰᠢ ᠪᠣᠯᠪᠠᠴᠤ ᠰᠡᠳᠬᠢᠯ ᠦ᠋ᠨ ᠭᠦᠨ ᠳ᠋ᠦ᠍ ᠬᠠᠳᠠᠭᠠᠰᠤ ᠲᠠᠢ ᠪᠠᠢᠯᠠ᠃ ᠥᠪᠡᠷ ᠦ᠋ᠨ ᠪᠣᠳᠣᠯ ᠴᠣᠬᠣᠮ ᠶᠠᠭᠤ ᠬᠦᠰᠡᠨ ᠮᠥᠷᠥᠭᠡᠳᠴᠦ ᠪᠠᠢᠭᠠ ᠶ᠋ᠢ ᠡᠷᠭᠢᠴᠡᠭᠦᠯᠦᠨ ᠦᠵᠡᠬᠦ ᠳ᠋ᠦ᠍ ᠬᠠᠮᠤᠭ ᠲᠡᠷᠢᠭᠦᠨ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠠᠭᠤᠯᠵᠠᠨ ᠲᠠᠨᠢᠯᠴᠠᠬᠤ ᠨᠢᠭᠡ ᠵᠦᠢᠯ᠂ ᠬᠣᠶᠠᠷ ᠲᠤᠨᠢ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢᠨ ᠪᠠᠷᠠ ᠶ᠋ᠢ ᠳᠠᠬᠢᠨ ᠨᠢᠭᠡ ᠬᠠᠷᠠᠬᠤ᠂ ᠡᠢᠮᠦ ᠬᠣᠶᠠᠷ ᠬᠦᠰᠡᠯ ᠳ᠋ᠦ᠍ ᠬᠠᠮᠤᠭ ᠵᠢᠷᠦᠬᠡ ᠮᠡᠳᠡᠷᠡᠯ ᠨᠢ ᠡᠵᠡᠯᠡᠭᠳᠡᠭᠡᠳ᠂ ᠤᠷᠢᠳ ᠡᠮᠦᠨᠡ ᠰᠠᠨᠠᠭᠳᠠᠵᠤ ᠰᠡᠳᠬᠢᠭᠳᠡᠭᠡ ᠦᠭᠡᠢ ᠣᠭᠲᠣ ᠥᠭᠡᠷᠡ ᠡᠢᠮᠦ ᠨᠢᠭᠡ ᠰᠢᠨᠡ ᠮᠠᠶᠢᠭ ᠤ᠋ᠨ ᠴᠣᠬᠢᠯᠲᠠ ᠴᠣᠬᠢᠵᠤ ᠡᠬᠢᠯᠡᠳᠡᠭ ᠪᠠᠢᠵᠠᠢ᠃