ᠡᠷᠡ ᠡᠮᠡ ᠶᠢᠨ ᠶᠣᠰᠣᠨ – ᠳ ᠂ ᠪᠤᠯᠤᠳᠴᠡᠷᠢᠩ <ᠨᠢᠭᠡᠳᠦᠭᠡᠷ ᠪᠦᠯᠦᠭ>– ᠲᠠᠪᠤ᠂ ᠬᠥᠮᠦᠨ ᠵᠠᠶᠠᠭᠠᠪᠠᠯ ᠬᠦᠨᠡᠰᠦ ᠵᠠᠶᠠᠭᠠᠨᠠ Эр эмийн ёсон – Д᠂ Болдцэрэн <Нэгдүгээр бүлэг>– тав᠂ Хүн заяавал хүнс заяана
210ᠲᠠᠪᠤ᠂ ᠬᠥᠮᠥᠨ ᠵᠠᠶᠠᠭᠠᠪᠠᠯ ᠬᠦᠨᠡᠰᠦ ᠵᠠᠶᠠᠭᠠᠨᠠ
ᠡᠢᠨᠬᠦ ᠪᠤᠷᠠᠮ ᠤ᠋ᠨ ᠰᠠᠷᠠ ᠥᠩᠭᠡᠷᠡᠵᠦ᠂ ᠵᠠᠯᠠᠭᠤ ᠭᠡᠷᠭᠡᠢ ᠶ᠋ᠢᠨ ᠬᠥᠯ ᠬᠦᠨᠳᠦᠷᠡᠵᠦ ᠡᠬᠢᠯᠡᠨᠡ᠃ ᠤᠳᠠᠬᠤ ᠦᠭᠡᠢ ᠰᠢᠨᠡ ᠬᠥᠮᠦᠨ ᠲᠡᠢ ᠪᠣᠯᠵᠤ᠂ ᠡᠴᠢᠭᠡ᠂ ᠡᠬᠡ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠵᠠᠯᠠᠭᠤ ᠬᠣᠣᠰ ᠤ᠋ᠳ ᠤ᠋ᠨ ᠮᠠᠩᠨᠠᠢ ᠲᠡᠨᠢᠢᠨ ᠪᠠᠶᠠᠷᠯᠠᠵᠤ᠂ ᠬᠠᠢᠷᠠ ᠨᠢ ᠤᠯᠠᠮ ᠪᠠᠳᠠᠷᠠᠨᠠ᠃ ᠠᠷᠭᠠ ᠴᠦ᠍ ᠦᠭᠡᠢ ᠪᠢᠵᠡ᠃ ᠠᠮᠠᠷᠠᠭ ᠬᠣᠣᠰ ᠤ᠋ᠳ ᠪᠡᠶᠡ ᠳ᠋ᠡᠭᠡᠨ ᠬᠡᠴᠢᠨᠡᠨ ᠬᠠᠢᠷᠠᠲᠠᠢ ᠪᠠᠢᠯᠠ ᠴᠦ᠍ ᠭᠡᠰᠡᠨ ᠦᠷᠡ ᠬᠡᠦᠬᠡᠳ ᠵᠠᠶᠠᠭᠠᠬᠤ ᠦᠭᠡᠢ ᠪᠣᠯ ᠶᠠᠮᠠᠷ ᠠᠵᠠ ᠵᠢᠷᠭᠠᠯ ᠪᠠᠢᠬᠤ ᠪᠢᠯᠡ᠃
ᠬᠡᠦᠬᠡᠳ ᠪᠣᠯ ᠠᠢᠯ ᠭᠡᠷ ᠦ᠋ᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ᠃ ᠲᠡᠢᠮᠦ ᠡᠴᠡ ᠮᠠᠨ ᠤ᠋ ᠥᠲᠡᠭᠦᠰ ᠳᠡᠭᠡᠳᠦᠰ《ᠬᠥᠮᠦᠨ ᠵᠠᠶᠠᠭᠠᠪᠠᠯ ᠬᠦᠨᠡᠰᠦ ᠵᠠᠶᠠᠭᠠᠨᠠ》 ᠭᠡᠵᠦ ᠠᠰᠢᠳᠠ ᠶ᠋ᠢᠨ ᠪᠢᠯᠢᠭ ᠢ᠋ᠶ᠋ᠡᠷ ᠢᠷᠦᠭᠡᠳᠡᠭ᠃ ᠡᠮᠡᠭᠲᠡᠢ ᠬᠥᠮᠦᠨ ᠠᠩᠬᠠ《ᠬᠣᠷᠮᠣᠢ ᠶ᠋ᠢᠨ ᠶᠠᠭᠤᠮᠠ》 ᠢᠷᠡᠭᠰᠡᠨ ᠴᠠᠭ ᠠ᠋ᠴᠠ ᠠᠪᠤᠭᠠᠳ 40-50 ᠨᠠᠰᠤ ᠬᠦᠷᠲᠡᠯᠡ ᠪᠡᠨ ᠵᠢᠷᠮᠦᠰᠦᠯᠡᠵᠦ ᠪᠣᠯᠤᠨᠠ᠃ ᠭᠡᠪᠡᠴᠦ ᠠᠮᠢᠳᠤᠷᠠᠯ ᠨᠢᠭᠡ ᠬᠡᠪ ᠦ᠋ᠨ ᠪᠢᠰᠢ ᠬᠣᠢᠨᠠ ᠪᠦᠷ ᠬᠥᠭᠰᠢᠷᠡᠭᠰᠡᠨ ᠬᠣᠢᠨᠠ᠂ ᠡᠰᠡᠪᠡᠯ ᠬᠠᠷᠠ ᠨᠢᠯᠬᠠ ᠪᠠᠷ ᠢ᠋ᠶ᠋ᠠᠨ ᠵᠢᠷᠮᠦᠰᠦᠨ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠮᠡᠷ ᠰᠡᠷ ᠪᠣᠢ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠬᠦᠨᠳᠦᠷᠡᠯ ᠲᠡᠢ ᠲᠥᠷᠥᠵᠦ ᠬᠡᠦᠬᠡᠳ ᠨᠢ ᠶᠠᠮᠠᠷ ᠨᠢᠭᠡ ᠡᠪᠡᠳᠴᠢᠨ ᠡᠮᠭᠡᠭ ᠲᠡᠢ ᠲᠥᠷᠥᠳᠡᠭ᠃ ᠵᠢᠷᠮᠦᠰᠦᠯᠡᠬᠦ ᠬᠠᠮᠤᠭ ᠤ᠋ᠨ ᠲᠣᠬᠢᠷᠠᠮᠵᠢ ᠲᠠᠢ ᠬᠤᠭᠤᠴᠠᠭᠠ ᠪᠣᠯ 22-29 ᠨᠠᠰᠤ ᠭᠡᠵᠦ ᠡᠮᠴᠢ ᠨᠠᠷ ᠦᠵᠡᠳᠡᠭ᠃ ᠵᠢᠷᠮᠦᠰᠦᠨ ᠪᠣᠯᠬᠤ ᠳ᠋ᠤ᠌ ᠨᠢᠭᠡ ᠲᠠᠯᠠ ᠪᠠᠷ ᠡᠮᠡᠭᠲᠡᠢ ᠶ᠋ᠢᠨ ᠥᠨᠳᠡᠭᠡᠨ ᠡᠰ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠡᠷᠡᠭᠲᠡᠢ ᠶ᠋ᠢᠨ ᠪᠡᠯᠭᠡ ᠶ᠋ᠢᠨ ᠡᠰ ᠬᠡᠷᠡᠭᠲᠡᠢ᠃ ᠡᠳᠡᠭᠡᠷ ᠦ᠋ᠨ ᠠᠯᠢ ᠨᠢᠭᠡ ᠨᠢ ᠦᠭᠡᠢ ᠪᠣᠯ ᠵᠢᠷᠮᠦᠰᠦᠯᠡᠨᠡ ᠭᠡᠵᠦ ᠪᠠᠢᠬᠤ ᠦᠭᠡᠢ᠃ ᠡᠨᠳᠡ ᠡᠴᠡ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠶᠠᠭᠠᠬᠢᠵᠤ ᠤᠮᠠᠢ ᠶ᠋ᠢᠨ ᠬᠣᠭᠣᠯᠠᠢ ᠳ᠋ᠤ᠌ ᠬᠦᠷᠴᠦ ᠥᠨᠳᠡᠭᠡᠨ ᠡᠰ ᠲᠡᠢ《ᠤᠴᠠᠷᠠᠬᠤ》 ᠪᠣᠢ? ᠭᠡᠰᠡᠨ ᠠᠰᠠᠭᠤᠯᠲᠠ ᠭᠠᠷᠴᠤ ᠢᠷᠡᠨᠡ᠃ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠨᠢ ᠰᠢᠯᠪᠢᠭᠦᠷ ᠦ᠋ᠨ ᠲᠤᠰᠠᠯᠠᠮᠵᠢ ᠲᠠᠢ ᠪᠠᠷ ᠨᠢᠭᠡ ᠮᠢᠨᠦ᠋ᠲ ᠳᠣᠳᠣᠮ ᠳ᠋ᠤ᠌ ᠳᠤᠮᠳᠠᠴᠢ ᠪᠠᠷ 2-3 ᠮᠢᠯᠯᠢᠮᠧᠲ᠋ᠷ ᠬᠤᠷᠳᠤ ᠲᠠᠢ ᠤᠷᠤᠭᠰᠢᠯᠠᠨ ᠬᠥᠳᠡᠯᠳᠡᠭ ᠪᠥᠭᠡᠳ ᠬᠤᠷᠢᠴᠠᠯ ᠦᠢᠯᠡᠳᠦᠭᠰᠡᠨ ᠡᠴᠡ ᠬᠣᠢᠰᠢ 30-40 ᠮᠢᠨᠦ᠋ᠲ ᠥᠩᠭᠡᠷᠡᠬᠦ ᠳ᠋ᠦ᠍ ᠤᠮᠠᠢ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ ᠬᠦᠷᠴᠦ ᠬᠠᠭᠠᠰ ᠴᠠᠭ ᠤ᠋ᠨ ᠳᠠᠷᠠᠭᠠ ᠤᠮᠠᠢ ᠶ᠋ᠢᠨ ᠬᠣᠭᠣᠯᠠᠢ ᠳ᠋ᠤ᠌ ᠣᠷᠣᠨᠠ᠃ ᠡᠢᠮᠦ ᠳ᠋ᠦ᠍ ᠡᠮᠡᠭᠲᠡᠢ ᠬᠥᠮᠦᠨ ᠬᠡᠦᠬᠡᠳ ᠣᠯᠬᠤ ᠶ᠋ᠢ ᠬᠦᠰᠡᠪᠡᠯ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠤᠮᠠᠢ ᠳ᠋ᠤ᠌ ᠨᠡᠪᠲᠡᠷᠡᠨ ᠣᠷᠣᠵᠤ ᠦᠷᠡ ᠲᠣᠭᠲᠠᠭᠠᠬᠤ ᠳ᠋ᠤ᠌ ᠳᠠᠮ ᠪᠣᠯᠬᠤ ᠶ᠋ᠢᠨ ᠲᠤᠯᠠᠳᠠ ᠬᠤᠷᠢᠴᠠᠯ ᠤ᠋ᠨ ᠳᠠᠷᠠᠭᠠ ᠬᠠᠭᠠᠰ ᠴᠠᠭ ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠬᠤᠭᠤᠴᠠᠭᠠ ᠪᠠᠷ ᠠᠭᠠᠷᠴᠠᠭ ᠢ᠋ᠶ᠋ᠠᠨ ᠡᠷᠭᠦᠵᠦ ᠭᠡᠳᠡᠷᠭᠦ ᠬᠠᠷᠠᠨ ᠬᠡᠪᠲᠡᠬᠦ ᠬᠡᠷᠡᠭᠲᠡᠢ᠃ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠨᠢ ᠦᠷᠡ ᠲᠣᠭᠲᠠᠭᠠᠬᠤ ᠴᠢᠳᠠᠪᠤᠷᠢ ᠪᠠᠨ 2-3 ᠬᠣᠨᠣᠭ ᠬᠠᠳᠠᠭᠠᠯᠠᠳᠠᠭ ᠪᠣᠯ ᠡᠮᠡᠭᠲᠡᠢ ᠶ᠋ᠢᠨ ᠥᠨᠳᠡᠭᠡᠨ ᠡᠰ ᠡᠨᠡ ᠴᠢᠳᠠᠪᠤᠷᠢ ᠪᠠᠨ1-2 ᠬᠣᠨᠣᠭ ᠬᠠᠳᠠᠭᠠᠯᠠᠨᠠ᠃ ᠥᠨᠳᠡᠭᠡᠨ ᠡᠰ ᠰᠠᠷᠠ ᠳ᠋ᠤ᠌ ᠨᠢᠭᠡ ᠤᠳᠠᠭᠠ ᠪᠣᠯᠪᠠᠰᠤᠷᠠᠳᠠᠭ ᠪᠣᠯ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠰᠢᠨᠡ ᠪᠡᠷ 3-4 ᠬᠣᠨᠣᠭ ᠲᠤ᠌ ᠯᠠ ᠪᠣᠢ ᠪᠣᠯᠤᠨᠠ᠃ ᠡᠢᠮᠦ ᠳ᠋ᠦ᠍ ᠡᠭᠦᠨ ᠡᠴᠡ ᠣᠢᠷᠠᠬᠠᠨ ᠵᠠᠢ ᠲᠠᠢ ᠣᠯᠠᠨ ᠳᠠᠬᠢᠨ ᠬᠤᠷᠢᠴᠠᠯ ᠦᠢᠯᠡᠳᠪᠡᠯ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠰᠢᠨᠡ ᠪᠡᠷ ᠪᠦᠷᠢᠨ ᠪᠣᠯᠪᠠᠰᠤᠷᠠᠵᠤ ᠠᠮᠵᠢᠬᠤ ᠦᠭᠡᠢ ᠤᠴᠢᠷ ᠠ᠋ᠴᠠ ᠵᠢᠷᠮᠦᠰᠦᠨ ᠪᠣᠯᠬᠤ ᠤᠴᠠᠷᠠᠯ ᠭᠠᠷᠭᠠᠬᠤ ᠦᠭᠡᠢ ᠶ᠋ᠢ ᠠᠩᠬᠠᠷ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠬᠤᠷᠢᠴᠠᠯ ᠦᠢᠯᠡᠳᠬᠦ ᠪᠦᠷᠢ ᠳ᠋ᠦ᠍ ᠵᠢᠷᠮᠦᠰᠦᠨ ᠪᠣᠯᠳᠠᠭ ᠶᠤᠮ ᠪᠢᠰᠢ᠃ ᠥᠨᠳᠡᠭᠡᠨ ᠡᠰ ᠤᠮᠠᠢ ᠶ᠋ᠢᠨ ᠬᠣᠭᠣᠯᠠᠢ ᠠ᠋ᠴᠠ ᠤᠮᠠᠢ ᠶ᠋ᠢᠨ ᠬᠥᠨᠳᠡᠢ ᠬᠦᠷᠬᠦ ᠳ᠋ᠦ᠍ 6-8 ᠡᠳᠦᠷ ᠦ᠋ᠨ 《ᠵᠠᠮ》 ᠲᠤᠭᠤᠯᠤᠨᠠ᠃ ᠢᠩᠭᠢᠬᠦ ᠵᠠᠮ ᠳ᠋ᠠᠭᠠᠨ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠲᠡᠢ ᠲᠠᠭᠠᠷᠠᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠨ ᠦᠷᠡ ᠲᠣᠭᠲᠠᠬᠤ ᠪᠢᠯᠡ᠃ ᠬᠡᠷᠪᠡ ᠤᠮᠠᠢ ᠶ᠋ᠢᠨ ᠬᠣᠭᠣᠯᠠᠢ ᠳ᠋ᠤ᠌ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ᠂ ᠥᠨᠳᠡᠭᠡᠨ ᠡᠰ ᠲᠡᠢ《ᠤᠴᠠᠷᠠᠪᠠᠯ》 ᠦᠷᠡ ᠲᠣᠭᠲᠠᠵᠤ ᠰᠢᠨᠡ ᠠᠮᠢᠳᠤᠷᠠᠯ ᠪᠦᠷᠢᠯᠳᠦᠨ ᠪᠣᠢ ᠪᠣᠯᠤᠨᠠ᠃ ᠨᠢᠭᠡ ᠤᠳᠠᠭᠠᠨ ᠤ᠋ ᠬᠤᠷᠢᠴᠠᠯ ᠤ᠋ᠨ ᠦᠢᠯᠡᠳᠦᠯ ᠳ᠋ᠦ᠍ 200-300 ᠣᠷᠴᠢᠮ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠢᠯᠭᠠᠷᠠᠳᠠᠭ ᠪᠥᠭᠡᠳ ᠲᠡᠭᠦᠨ ᠡᠴᠡ ᠵᠥᠪᠬᠡᠨ ᠨᠢᠭᠡ ᠨᠢ ᠥᠨᠳᠡᠭᠡᠨ ᠡᠰ ᠤᠷᠤᠭᠤ ᠨᠡᠪᠲᠡᠷᠡᠨ ᠣᠷᠣᠵᠤ ᠪᠤᠰᠤᠳ ᠨᠢ ᠲᠡᠭᠦᠨ ᠳ᠋ᠦ᠍ ᠵᠠᠮ ᠲᠠᠯᠪᠢᠵᠤ ᠥᠨᠳᠡᠭᠡᠨ ᠡᠰ ᠦ᠋ᠨ ᠭᠠᠳᠠᠨᠠ ᠲᠠᠯᠠ ᠪᠦᠷᠬᠦᠭᠦᠯ ᠢ᠋ ᠠᠭᠤᠰᠬᠠᠬᠤ ᠡᠭᠦᠷᠭᠡ ᠲᠡᠢ᠃
ᠡᠢᠨᠬᠦ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ ᠥᠨᠳᠡᠭᠡᠨ ᠡᠰ ᠤᠷᠤᠭᠤ ᠨᠡᠪᠲᠡᠷᠡᠨ ᠣᠷᠣᠭᠰᠠᠨ ᠴᠠᠭ ᠠ᠋ᠴᠠ ᠦᠷᠡ ᠲᠣᠭᠲᠠᠭᠰᠠᠨ ᠥᠨᠳᠡᠭᠡᠨ ᠡᠰ ᠬᠤᠪᠢᠶᠠᠭᠳᠠᠵᠤ ᠦᠷᠡ ᠬᠥᠪᠦᠷᠡᠯ ᠪᠣᠢ ᠪᠣᠯᠤᠨᠠ᠃ ᠦᠷᠡ ᠲᠣᠭᠲᠠᠭᠰᠠᠨ ᠥᠨᠳᠡᠭᠡᠨ ᠡᠰ ᠨᠢ ᠨᠠᠮᠢᠷᠠᠭᠠ ᠬᠤᠴᠢᠭᠤᠷ ᠡᠰ ᠪᠠ ᠤᠮᠠᠢ ᠶ᠋ᠢᠨ ᠬᠣᠭᠣᠯᠠᠢ ᠶ᠋ᠢᠨ ᠪᠤᠯᠴᠢᠩ ᠤ᠋ᠨ ᠰᠢᠷᠬᠡᠭ ᠦ᠋ᠨ ᠠᠭᠰᠢᠯᠲᠠ ᠪᠠᠷ 6-8 ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠤᠮᠠᠢ ᠶ᠋ᠢᠨ ᠬᠣᠭᠣᠯᠠᠢ ᠳ᠋ᠤ᠌ ᠬᠦᠷᠴᠦ ᠲᠡᠭᠦᠨ ᠦ᠌ ᠰᠠᠯᠢᠰᠤᠲᠤ ᠪᠦᠷᠬᠦᠭᠦᠯ ᠳ᠋ᠦ᠍ ᠰᠢᠭᠢᠳᠦᠨ ᠪᠡᠬᠢᠯᠡᠭᠳᠡᠵᠦ ᠦᠷᠡ ᠬᠥᠪᠦᠷᠡᠯ ᠬᠥᠭᠵᠢᠨᠡ᠃ ᠣᠢᠷᠠᠯᠴᠠᠭᠠ ᠪᠠᠷ ᠳᠥᠷᠪᠡᠳᠡᠬᠢ ᠰᠠᠷᠠ ᠠ᠋ᠴᠠ ᠡᠬᠡᠰ ᠡᠭᠦᠰᠴᠦ ᠡᠨᠡ ᠡᠬᠡ ᠪᠠ ᠤᠷᠤᠭ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠪᠣᠳᠠᠰ ᠤ᠋ᠨ ᠰᠣᠯᠢᠯᠴᠠᠭᠠ ᠶ᠋ᠢ ᠬᠠᠩᠭᠠᠵᠤ ᠥᠭᠳᠡᠭ᠃ ᠬᠡᠳᠦᠢᠪᠡᠷ ᠡᠬᠡ ᠪᠠ ᠤᠷᠤᠭ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠴᠢᠰᠤ ᠬᠠᠷᠢᠯᠴᠠᠨ ᠬᠣᠯᠢᠯᠳᠤᠳᠠᠭ ᠦᠭᠡᠢ ᠴᠦ᠍ ᠭᠡᠰᠡᠨ ᠡᠬᠡ ᠶ᠋ᠢᠨ ᠴᠢᠰᠤᠨ ᠳ᠋ᠤ᠌ ᠪᠠᠢᠭᠠ ᠵᠠᠷᠢᠮ ᠬᠣᠣᠷ ᠲᠠᠢ ᠪᠣᠳᠠᠰ(ᠠᠷᠢᠬᠢ ᠲᠠᠮᠠᠬᠢᠨ ᠤ᠋ ᠬᠣᠣᠷ᠂ ᠡᠮ ᠦ᠋ᠨ ᠪᠣᠳᠠᠰ) ᠡᠬᠡᠰ ᠢ᠋ᠶ᠋ᠡᠷ ᠳᠠᠮᠵᠢᠨ ᠤᠷᠤᠭ ᠲᠤ᠌ ᠨᠡᠪᠲᠡᠷᠡᠨ ᠣᠷᠣᠵᠤ ᠪᠣᠯᠵᠣᠰᠢ ᠦᠭᠡᠢ᠃ ᠡᠢᠮᠦ ᠡᠴᠡ ᠵᠢᠷᠮᠦᠰᠦᠨ ᠦᠶᠡ ᠳ᠋ᠦ᠍ ᠠᠷᠢᠬᠢ ᠲᠠᠮᠠᠬᠢ ᠬᠡᠷᠡᠭᠯᠡᠬᠦ᠂ ᠳᠤᠷᠠ ᠮᠡᠳᠡᠨ ᠡᠮ ᠬᠡᠷᠡᠭᠯᠡᠬᠦ ᠶ᠋ᠢ ᠬᠠᠲᠠᠭᠤ ᠬᠣᠷᠢᠭᠯᠠᠬᠤ ᠶᠣᠰᠣᠲᠠᠢ᠃ ᠡᠬᠡ ᠬᠥᠮᠦᠨ ᠦᠷᠡ ᠪᠡᠨ ᠬᠡᠪᠡᠯᠢ ᠳ᠋ᠡᠭᠡᠨ10 ᠰᠠᠷᠠ ᠲᠡᠭᠡᠭᠡᠵᠦ ᠲᠥᠷᠥᠭᠦᠯᠳᠡᠭ᠃ ᠡᠨᠡ ᠬᠤᠭᠤᠴᠠᠭᠠ ᠪᠣᠯ ᠬᠥᠮᠦᠨ ᠳ᠋ᠦ᠍ ᠠᠰᠤᠷᠤ ᠶᠡᠬᠡ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ᠃ ᠡᠨᠡ ᠶᠠᠮᠠᠷ ᠤᠴᠢᠷ ᠲᠠᠢ ᠶᠤᠮ ᠪᠣᠢ ᠭᠡᠪᠡᠯ ᠬᠡᠷᠪᠡ ᠡᠬᠡ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠬᠥᠮᠦᠨ ᠬᠡᠪᠡᠯᠢ ᠳ᠋ᠡᠭᠡᠨ ᠲᠡᠭᠡᠭᠡᠬᠦ10 ᠰᠠᠷᠠ ᠪᠤᠶᠤ 280 ᠬᠣᠨᠣᠭ ᠵᠢᠷᠮᠦᠰᠦᠨ ᠦᠶᠡ ᠶ᠋ᠢᠨ ᠡᠷᠡᠭᠦᠯ ᠠᠬᠤᠢ ᠶ᠋ᠢᠨ ᠱᠠᠭᠠᠷᠳᠠᠯᠭᠠ ᠶ᠋ᠢ ᠣᠨᠴᠠᠭᠠᠢ ᠰᠠᠬᠢᠬᠤ ᠦᠭᠡᠢ ᠪᠣᠯ ᠬᠡᠦᠬᠡᠳ ᠦ᠋ᠨ ᠴᠢᠨᠠᠭᠰᠢᠳᠠ ᠶ᠋ᠢᠨ ᠪᠦᠬᠦᠯᠢ ᠠᠮᠢᠳᠤᠷᠠᠯ ᠤ᠋ᠨ ᠲᠤᠷᠰᠢ ᠳ᠋ᠤ᠌ ᠬᠣᠣᠷᠲᠠᠢ ᠨᠥᠯᠥᠭᠡ ᠦᠵᠡᠭᠦᠯᠦᠨᠡ᠃ ᠵᠢᠷᠮᠦᠰᠦᠨ ᠦᠶᠡ ᠳ᠋ᠦ᠍ ᠲᠠᠯᠪᠢᠭᠳᠠᠳᠠᠭ ᠣᠯᠠᠨ ᠱᠠᠭᠠᠷᠳᠠᠭᠳᠠᠬᠤ ᠨᠢᠭᠡ ᠬᠡᠰᠡᠭ ᠨᠢ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠤ᠋ ᠠᠮᠢᠳᠤᠷᠠᠯ ᠲᠠᠢ᠂ ᠨᠥᠭᠦᠭᠡ ᠬᠡᠰᠡᠭ ᠨᠢ ᠴᠥᠭᠡᠨ ᠲᠣᠭᠠᠨ ᠤ᠋ ᠵᠠᠷᠢᠮ 《ᠮᠠᠶᠢᠭ》 ᠤ᠋ᠨ ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ ᠳᠤᠮᠳᠠ ᠭᠠᠵᠠᠷ ᠠᠪᠤᠭᠰᠠᠨ ᠬᠣᠣᠷᠲᠤ ᠵᠠᠷᠢᠮ ᠵᠤᠷᠰᠢᠯ ᠲᠠᠢ ᠬᠣᠯᠪᠣᠭᠠ ᠲᠠᠢ᠃ ᠲᠣᠯᠣᠭᠠᠢ ᠬᠣᠯᠪᠣᠭᠠᠳ ᠲᠡᠳᠦᠢ ᠯᠡ ᠤᠳᠠᠭᠠ ᠦᠭᠡᠢ ᠪᠤᠷᠠᠮ ᠰᠠᠷᠠ ᠳᠡᠭᠡᠷᠡ ᠪᠡᠨ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠭᠣᠣᠯᠳᠠᠭᠤ ᠵᠢᠷᠮᠦᠰᠦᠨ ᠪᠣᠯᠴᠢᠬᠠᠳᠠᠭ ᠲᠤᠬᠠᠢ ᠳᠡᠭᠡᠷᠡ ᠥᠭᠦᠯᠡᠭᠰᠡᠨ᠃ ᠭᠡᠲᠡᠯᠡ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠵᠠᠯᠠᠭᠤ ᠬᠣᠣᠰ ᠤ᠋ᠨ ᠪᠡᠯᠭᠡ ᠶ᠋ᠢᠨ ᠢᠳᠡᠪᠬᠢ ᠢᠯᠠᠩᠭᠤᠶᠠ ᠡᠷᠡ ᠨᠥᠬᠥᠷ ᠦ᠋ᠨ ᠬᠢᠨᠢ ᠲᠤᠢᠯ ᠤ᠋ᠨ ᠥᠨᠳᠥᠷ᠃ ᠡᠳᠦᠷ ᠥᠨᠵᠢᠬᠦ ᠦᠭᠡᠢ ᠣᠢᠷᠠᠲᠤᠵᠤ ᠪᠠᠢᠭᠠ ᠬᠢᠷᠢ ᠨᠢ ᠰᠠᠯᠤᠮᠠᠷ ᠦᠭᠡᠢ᠂ ᠲᠡᠢᠮᠦ ᠶᠡᠬᠡ ᠬᠦᠰᠡᠯᠡᠩ ᠲᠡᠢ ᠪᠠᠢᠬᠤ ᠦᠶᠡ ᠳ᠋ᠦ᠍ ᠵᠢᠷᠮᠦᠰᠦᠨ ᠪᠣᠯᠴᠢᠬᠠᠳᠠᠭ᠃
ᠵᠢᠷᠮᠦᠰᠦᠯᠡᠭᠰᠡᠨ ᠦ᠌ ᠡᠬᠢᠨ ᠦ᠌ 2-3 ᠰᠠᠷᠠ ᠣᠢᠷᠠᠲᠤᠬᠤ ᠶ᠋ᠢ ᠬᠠᠲᠠᠭᠤ ᠬᠣᠷᠢᠭᠯᠠᠳᠠᠭ᠃ ᠬᠣᠷᠢᠬᠤ ᠨᠢ ᠬᠡᠴᠡᠭᠦᠦ᠂ ᠬᠣᠷᠢᠬᠤ ᠦᠭᠡᠢ ᠪᠠᠢᠬᠤ ᠴᠦ᠍ ᠬᠡᠴᠡᠭᠦᠦ᠃ ᠢᠩᠭᠢᠵᠦ ᠬᠦᠰᠡᠯ ᠢ᠋ ᠬᠢᠰᠠᠳᠠᠭ ᠬᠣᠷᠸᠠ ᠬᠣᠢᠨᠠ ᠲᠡᠪᠴᠢᠬᠦ ᠡᠴᠡ ᠠᠷᠭᠠ ᠦᠭᠡᠢ ᠪᠣᠯᠤᠨᠠ᠃ ᠢᠩᠭᠢᠭᠡᠳ ᠡᠨᠡ ᠬᠤᠭᠤᠴᠠᠭᠠ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠵᠢᠷᠮᠦᠰᠦᠯᠡᠯᠲᠡ ᠶᠠᠮᠠᠷ ᠨᠢᠭᠡ ᠬᠦᠨᠳᠦᠷᠡᠯ ᠦᠭᠡᠢ ᠬᠡᠪ ᠦ᠋ᠨ ᠶᠠᠪᠤᠭᠳᠠᠵᠤ ᠪᠠᠢᠪᠠᠯ ᠣᠢᠷᠠᠲᠤᠬᠤ ᠶ᠋ᠢ ᠬᠣᠷᠢᠬᠤ ᠦᠭᠡᠢ᠃ ᠲᠡᠭᠦᠨ ᠢ᠋ ᠬᠢᠵᠠᠭᠠᠷᠯᠠᠬᠤ ᠯᠠ ᠬᠡᠷᠡᠭᠲᠡᠢ ᠪᠣᠯᠤᠨᠠ᠃ ᠡᠨᠡ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠭᠡᠪᠡᠯ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠢ᠋ ᠵᠢᠷᠮᠦᠰᠦᠨ ᠪᠣᠯᠤᠭᠠ ᠦᠭᠡᠢ ᠦᠶᠡ ᠶ᠋ᠢᠨ ᠬᠢ ᠰᠢᠭ ᠲᠡᠢᠮᠦ《ᠬᠠᠮᠢᠶᠠ ᠦᠭᠡᠢ》 ᠦᠢᠯᠡᠳᠴᠦ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠦᠭᠡ᠃ ᠵᠢᠷᠮᠦᠰᠦᠨ ᠦᠶᠡ ᠶ᠋ᠢᠨ ᠬᠤᠷᠢᠴᠠᠯ ᠢ᠋ ᠪᠣᠯᠭᠣᠮᠵᠢ ᠲᠠᠢ᠂ ᠣᠭᠵᠣᠮ ᠬᠥᠳᠡᠯᠬᠦ ᠦᠭᠡᠢ ᠪᠡᠷ ᠦᠢᠯᠡᠳᠪᠡᠯ ᠵᠣᠬᠢᠨᠠ᠃ ᠮᠥᠨ ᠬᠤᠷᠢᠴᠠᠯ ᠤ᠋ᠨ ᠳᠠᠷᠠᠭᠠ ᠪᠡᠯᠭᠡ ᠡᠷᠬᠡᠲᠡᠨ ᠢ᠋ᠶ᠋ᠡᠨ ᠤᠬᠢᠶᠠᠵᠤ᠂ ᠪᠡᠯᠭᠡ ᠶ᠋ᠢᠨ ᠠᠷᠢᠭᠤᠨ ᠴᠡᠪᠡᠷ ᠢ᠋ ᠮᠠᠰᠢ ᠰᠠᠢᠨ ᠰᠠᠬᠢᠬᠤ ᠬᠡᠷᠡᠭᠲᠡᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ ᠡᠳᠦᠷ ᠡᠴᠡ ᠡᠳᠦᠷ ᠲᠦ᠍ ᠥᠰᠴᠦ ᠲᠣᠮᠣᠷᠠᠵᠤ ᠪᠠᠢᠭᠠ ᠤᠷᠤᠭ ᠢ᠋ ᠳᠠᠷᠤᠬᠤ ᠦᠭᠡᠢ ᠲᠡᠢᠮᠦ ᠯᠡ ᠪᠠᠢᠷᠢᠯᠠᠯ ᠢ᠋ ᠰᠣᠩᠭᠣᠨ ᠠᠪᠬᠤ ᠬᠡᠷᠡᠭᠲᠡᠢ᠃ ᠡᠭᠦᠨ ᠦ᠌ ᠲᠤᠯᠠᠳᠠ 《ᠠᠷᠤ ᠠ᠋ᠴᠠ》᠂ 《ᠡᠮᠡᠭᠲᠡᠢ ᠨᠢ ᠳᠡᠭᠡᠷᠡ ᠪᠡᠨ》(ᠭᠡᠬᠦ ᠳ᠋ᠡᠭᠡᠨ ᠭᠡᠳᠡᠷᠭᠦ ᠪᠡᠨ ᠬᠠᠷᠠᠵᠤ) 《ᠬᠠᠵᠠᠭᠤ ᠠ᠋ᠴᠠ》 ᠵᠡᠷᠭᠡ ᠪᠠᠢᠷᠢᠯᠠᠯ ᠳ᠋ᠤ᠌ ᠡᠩᠭᠡᠷ ᠵᠥᠷᠢᠭᠦᠯᠬᠦ ᠨᠢ ᠲᠣᠬᠢᠷᠠᠮᠵᠢ ᠲᠠᠢ᠃ ᠮᠠᠨ ᠤ᠋ ᠨᠠᠰᠤᠲᠠᠢᠴᠤᠳ ᠤ᠋ᠨ ᠳᠣᠲᠣᠷᠠ《ᠬᠡᠭᠡᠷᠡ ᠶ᠋ᠢᠨ ᠭᠠᠯ ᠢ᠋ ᠬᠠᠵᠠᠭᠤ ᠠ᠋ᠴᠠ ᠨᠢ᠂ ᠬᠡᠭᠡᠯᠢ ᠲᠡᠢ ᠪᠦᠰᠡᠭᠦᠢ ᠶ᠋ᠢ ᠠᠷᠤ ᠠ᠋ᠴᠠ ᠨᠢ》 ᠭᠡᠰᠡᠨ ᠶᠠᠷᠢᠶᠠ ᠴᠦ᠍ ᠪᠠᠢᠳᠠᠭ ᠰᠢᠦ ᠳᠡ᠃ ᠵᠢᠷᠮᠦᠰᠦᠨ ᠦᠶᠡ ᠳ᠋ᠦ᠍ ᠡᠮᠡᠭᠲᠡᠢ ᠶ᠋ᠢᠨ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠬᠦᠰᠡᠯ ᠶᠡᠬᠡᠪᠴᠢᠯᠡᠨ ᠪᠠᠭᠤᠷᠠᠳᠠᠭ᠃ ᠲᠡᠢᠮᠦ ᠡᠴᠡ ᠬᠠᠭᠤᠴᠢᠨ ᠰᠢᠭ᠋ ᠢ᠋ᠶ᠋ᠡᠨ ᠡᠷᠡ ᠨᠥᠬᠥᠷ ᠲᠡᠭᠡᠨ ᠬᠠᠨᠳᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ᠃ ᠡᠭᠦᠨ ᠢ᠋ ᠡᠷᠡᠭᠲᠡᠢ ᠬᠥᠮᠦᠨ ᠵᠥᠪ ᠣᠢᠯᠠᠭᠠᠬᠤ ᠬᠡᠷᠡᠭᠲᠡᠢ᠃ ᠮᠠᠭᠠᠳ ᠦᠭᠡᠢ᠂ ᠡᠭᠦᠨ ᠳ᠋ᠡᠭᠡᠨ ᠡᠬᠡᠨᠡᠷ ᠴᠢᠨᠢ ᠥᠪᠡᠷ ᠲᠡᠭᠡᠨ ᠴᠦ᠍ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠵᠤ ᠪᠣᠯᠬᠤ᠃ ᠲᠡᠭᠡᠪᠡᠯ ᠲᠠᠢᠪᠤᠰᠢᠷᠠᠭᠤᠯᠵᠤ᠂ ᠰᠡᠳᠬᠢᠯ ᠢ᠋ ᠨᠢ ᠠᠮᠠᠷᠠᠭᠠᠬᠤ ᠬᠡᠷᠡᠭᠲᠡᠢ᠃ ᠭᠡᠪᠡᠴᠦ ᠵᠠᠷᠢᠮ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠬᠤᠷᠢᠴᠠᠬᠤ ᠳᠤᠷᠠ ᠬᠦᠰᠡᠯ ᠨᠢ ᠵᠢᠷᠮᠦᠰᠦᠨ ᠦᠶᠡ ᠳ᠋ᠡᠭᠡᠨ ᠤᠯᠠᠮ ᠶᠡᠬᠡᠰᠴᠦ ᠬᠠᠨᠤᠮᠵᠢ ᠠᠪᠬᠤ ᠨᠢ ᠨᠡᠮᠡᠭᠳᠡᠵᠦ ᠪᠣᠯᠤᠨᠠ᠃ ᠡᠨᠡ ᠨᠢ ᠭᠣᠣᠯᠴᠠᠭᠤ ᠬᠡᠦᠬᠡᠳ ᠬᠦᠰᠡᠵᠦ ᠪᠠᠢᠭᠠᠳ ᠵᠢᠷᠮᠦᠰᠦᠨ ᠪᠣᠯᠬᠤ ᠲᠠᠢ ᠬᠣᠯᠪᠣᠭᠠ ᠲᠠᠢ ᠪᠠᠢᠳᠠᠭ᠃ ᠵᠢᠷᠮᠦᠰᠦᠨ ᠦ᠌ ᠰᠡᠭᠦᠯ ᠦ᠋ᠨ ᠬᠣᠶᠠᠷ ᠰᠠᠷᠠ ᠬᠤᠷᠢᠴᠠᠯ ᠦᠢᠯᠡᠳᠬᠦ ᠶ᠋ᠢ ᠮᠥᠨ ᠯᠡ ᠬᠣᠷᠢᠭᠯᠠᠨᠠ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠡᠨᠡ ᠦᠶᠡ ᠳ᠋ᠦ᠍ ᠬᠤᠷᠢᠴᠠᠯ ᠦᠢᠯᠡᠳᠪᠡᠯ ᠡᠬᠡᠰ ᠬᠣᠪᠬᠣᠷᠠᠬᠤ᠂ ᠤᠰᠤ ᠡᠷᠲᠡ ᠭᠠᠷᠬᠤ ᠵᠡᠷᠭᠡ ᠠᠶᠤᠯᠲᠠᠢ᠃ ᠡᠳᠡᠭᠡᠷ ᠨᠢ ᠬᠡᠦᠬᠡᠳ ᠲᠡᠳᠦᠢ ᠦᠭᠡᠢ ᠡᠬᠡ ᠶ᠋ᠢᠨ ᠠᠮᠢ ᠨᠠᠰᠤᠨ ᠳ᠋ᠤ᠌ ᠴᠦ᠍ ᠭᠡᠰᠡᠨ ᠲᠤᠢᠯ ᠤ᠋ᠨ ᠶᠡᠬᠡ ᠠᠶᠤᠯ ᠲᠠᠢ᠂ ᠡᠢᠮᠦ ᠡᠴᠡ ᠲᠣᠭᠣᠭᠠ ᠰᠢᠭ᠋ ᠲᠣᠮᠣ ᠭᠡᠳᠡᠰᠦ ᠲᠡᠢ ᠬᠠᠨᠢ ᠪᠠᠨ ᠠᠮᠤᠷ ᠵᠠᠶᠠᠭᠠ ᠦᠵᠡᠭᠦᠯᠬᠦ ᠦᠭᠡᠢ ᠵᠣᠪᠠᠭᠠᠭᠠᠳ ᠪᠠᠢᠬᠤ ᠬᠡᠷᠡᠭ ᠦᠭᠡᠢ᠃ ᠵᠢᠷᠮᠦᠰᠦᠨ ᠦᠶᠡ ᠳ᠋ᠦ᠍ ᠠᠵᠢᠯ ᠠᠮᠠᠷᠠᠯᠲᠠ ᠶ᠋ᠢᠨ ᠳᠢᠭᠯᠢᠮ ᠢ᠋ ᠰᠠᠢᠲᠤᠷ ᠰᠠᠬᠢᠬᠤ ᠬᠡᠷᠡᠭᠲᠡᠢ᠃ ᠡᠨᠡ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ ᠭᠡᠪᠡᠯ ᠵᠢᠷᠮᠦᠰᠦᠨ ᠭᠡᠳ ᠶᠠᠮᠠᠷ ᠴᠦ᠍ ᠠᠵᠢᠯ ᠬᠢᠬᠦ ᠦᠭᠡᠢ ᠣᠭᠲᠣ ᠬᠥᠳᠡᠯᠬᠦ ᠪᠡᠨ ᠪᠣᠯᠢᠬᠤ᠂ ᠡᠰᠡᠪᠡᠯ ᠬᠥᠳᠡᠯᠵᠦ ᠪᠠᠷᠢᠬᠤ ᠬᠡᠷᠡᠭᠲᠡᠢ ᠭᠡᠳ ᠭᠡᠷ ᠣᠷᠣᠨ ᠤ᠋ ᠬᠠᠷᠠ ᠪᠣᠷᠣ ᠬᠠᠮᠤᠭ ᠠᠵᠢᠯ ᠢ᠋ ᠨᠤᠭᠤᠯᠬᠤ ᠶ᠋ᠢᠨ ᠠᠯᠢ ᠠᠯᠢ ᠨᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠦᠭᠡ᠃ ᠬᠢᠷᠢ ᠳ᠋ᠡᠭᠡᠨ ᠲᠠᠭᠠᠷᠠᠭᠰᠠᠨ ᠠᠵᠢᠯ ᠬᠢᠬᠦ ᠨᠢ ᠴᠢᠰᠤᠨ ᠡᠷᠭᠢᠯᠲᠡ ᠶ᠋ᠢ ᠰᠠᠢᠵᠢᠷᠠᠭᠤᠯᠵᠤ ᠡᠬᠡ ᠬᠡᠦᠬᠡᠳ ᠦ᠋ᠨ ᠠᠯᠢ ᠠᠯᠢᠨ ᠳ᠋ᠤᠨᠢ ᠰᠠᠢᠨ ᠢ᠋ᠶ᠋ᠠᠷ ᠨᠥᠯᠥᠭᠡᠯᠡᠨᠡ᠃
ᠵᠢᠷᠮᠦᠰᠦᠨ ᠦᠶᠡ ᠳ᠋ᠡᠭᠡᠨ ᠠᠷᠢᠬᠢ ᠲᠠᠮᠠᠬᠢ ᠬᠡᠷᠡᠭᠯᠡᠬᠦ᠂ ᠡᠮᠴᠢ ᠶ᠋ᠢᠨ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠡᠷ ᠡᠰᠡᠨ ᠪᠣᠰᠤᠨ ᠡᠮ ᠢ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠤᠤᠭᠤᠬᠤ ᠶ᠋ᠢᠨ ᠬᠣᠣᠷ ᠬᠣᠯᠪᠣᠭᠳᠠᠯ ᠢ᠋ ᠣᠳᠣ ᠪᠠᠷᠤᠭ ᠪᠦᠬᠦ ᠬᠥᠮᠦᠨ ᠮᠡᠳᠡᠳᠡᠭ ᠪᠣᠯᠤᠭᠰᠠᠨ ᠤᠴᠢᠷ ᠠ᠋ᠴᠠ ᠡᠨᠳᠡ ᠨᠤᠷᠱᠤᠭᠠᠳ ᠶᠠᠭᠠᠬᠢᠬᠤᠪ᠃ ᠡᠢᠨᠬᠦ ᠡᠷᠡᠭᠦᠯ ᠴᠢᠬᠢᠷᠠᠭ ᠬᠡᠦᠬᠡᠳ ᠲᠥᠷᠥᠭᠦᠯᠬᠦ ᠳ᠋ᠦ᠍ ᠡᠬᠡ ᠬᠥᠮᠦᠨ ᠡᠴᠡ ᠶᠡᠬᠡ ᠵᠦᠢᠯ ᠰᠢᠯᠲᠠᠭᠠᠯᠠᠨᠠ ᠭᠡᠳᠡᠭ ᠢ᠋ ᠬᠡᠯᠡᠬᠦ ᠭᠡᠰᠡᠨ ᠶᠦᠮ᠃ ᠵᠢᠷᠮᠦᠰᠦᠨ ᠦᠶᠡ ᠳ᠋ᠦ᠍ ᠰᠦ᠂ ᠲᠠᠷᠠᠭ᠂ ᠠᠭᠠᠷᠤᠤᠯ᠂ ᠡᠭᠡᠵᠡᠭᠡᠢ᠂ ᠬᠣᠭᠣᠷᠮᠠᠭ᠂ ᠥᠨᠳᠡᠭᠡ᠂ ᠮᠢᠬᠠ᠂ ᠤᠷᠭᠤᠮᠠᠯ ᠤ᠋ᠨ ᠲᠣᠰᠣ᠂ ᠰᠢᠨᠡ ᠨᠣᠭᠣᠭᠠ᠂ ᠵᠢᠮᠢᠰ᠂ ᠵᠢᠮᠢᠰᠬᠡᠨᠡ ᠶ᠋ᠢ ᠬᠣᠭᠣᠯᠠᠨ ᠳ᠋ᠠᠭᠠᠨ ᠥᠷᠭᠡᠨ ᠬᠡᠷᠡᠭᠯᠡᠬᠦ ᠨᠢ ᠠᠰᠢᠭᠲᠠᠢ᠃ ᠬᠠᠷᠢᠨ ᠴᠠᠷᠳᠠᠭᠤᠯ ᠶᠡᠬᠡᠲᠡᠢ ᠬᠣᠭᠣᠯᠠ ᠬᠦᠨᠡᠰᠦ( ᠲᠥᠮᠥᠰᠥ᠂ ᠲᠠᠯᠬᠠ ᠭᠡᠬᠦ ᠮᠡᠲᠦ) ᠬᠡᠳᠦ ᠶᠡᠬᠡ ᠬᠡᠷᠡᠭᠯᠡᠬᠦ ᠡᠴᠡ ᠵᠠᠢᠯᠠᠰᠬᠢ᠃ ᠡᠪᠦᠯ ᠬᠠᠪᠤᠷ ᠤ᠋ᠨ ᠤᠯᠠᠷᠢᠯ ᠳ᠋ᠤ᠌ ᠸᠢᠲ᠋ᠠᠮᠢᠨ ᠳᠤᠲᠠᠭᠳᠠᠳᠠᠭ ᠤᠴᠢᠷ ᠠ᠋ᠴᠠгендевит.суммавит.декамевит ᠵᠡᠷᠭᠡ ᠸᠢᠲ᠋ᠠᠮᠢᠨ ᠢ᠋ ᠡᠳᠦᠷ ᠲᠦ᠍3-4 ᠶ᠋ᠢ ᠤᠤᠭᠤᠬᠤ ᠨᠢ ᠠᠰᠢᠭᠲᠠᠢ᠃ ᠬᠠᠯᠠᠭᠤᠨ ᠨᠣᠭᠣᠭᠠ᠂ ᠳᠠᠪᠤᠰᠤ᠂ ᠽᠣᠤ ᠵᠡᠷᠭᠡ ᠶ᠋ᠢ ᠬᠣᠭᠣᠯᠠᠨ ᠳ᠋ᠠᠭᠠᠨ ᠪᠠᠭᠠ ᠬᠡᠷᠡᠭᠯᠡᠬᠦ ᠬᠡᠷᠡᠭᠲᠡᠢ᠃ ᠡᠳᠡᠭᠡᠷ ᠨᠢ ᠵᠢᠷᠮᠦᠰᠦᠨ ᠡᠮᠡᠭᠲᠡᠢ ᠶ᠋ᠢᠨ ᠪᠥᠭᠡᠷᠡ᠂ ᠡᠯᠢᠭᠡᠨ ᠳ᠋ᠦ᠍ ᠠᠴᠢᠶᠠᠯᠠᠯ ᠢ᠋ ᠨᠡᠮᠡᠭᠳᠡᠭᠦᠯᠵᠦ ᠬᠠᠪᠤᠩ ᠡᠭᠦᠰᠬᠡᠵᠦ ᠪᠣᠯᠤᠨᠠ᠃ ᠵᠢᠷᠮᠦᠰᠦᠨ ᠦᠶᠡ ᠳ᠋ᠦ᠍ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠬᠦᠴᠦᠨ ᠦ᠌ ᠳᠠᠰᠬᠠᠯ ᠰᠤᠷᠭᠠᠭᠤᠯᠢ ᠬᠢᠬᠦ ᠨᠢ ᠪᠡᠶᠡ ᠮᠠᠬᠠᠪᠣᠳ ᠢ᠋ ᠪᠡᠬᠢᠵᠢᠭᠦᠯᠵᠦ ᠲᠥᠷᠥᠬᠦ ᠦᠶᠡ ᠳ᠋ᠦ᠍ ᠬᠢᠷᠵᠠᠩ ᠤᠷᠠᠭᠳᠠᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠬᠦ ᠲᠤᠰᠠᠲᠠᠢ᠃ ᠡᠳᠦᠷ ᠪᠣᠯᠭᠠᠨ ᠬᠣᠶᠠᠷ ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠴᠠᠭ ᠶᠠᠪᠠᠭᠠᠨ ᠶᠠᠪᠤᠬᠤ ᠳ᠋ᠤ᠌ ᠬᠠᠩᠭᠠᠯᠲᠠᠲᠠᠢ ᠪᠡᠶᠡ ᠶ᠋ᠢᠨ ᠬᠦᠴᠦᠨ ᠦ᠌ ᠳᠠᠰᠬᠠᠯ ᠪᠣᠯᠤᠨᠠ᠃ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠰᠠᠨᠠᠭᠠ ᠵᠢᠷᠮᠦᠰᠦᠨ ᠦᠶᠡ ᠳ᠋ᠡᠭᠡᠨ ᠶᠠᠮᠠᠷ ᠪᠠᠢᠬᠤ ᠠ᠋ᠴᠠ ᠭᠠᠷᠬᠤ ᠬᠡᠦᠬᠡᠳ ᠦ᠋ᠨ ᠡᠷᠡᠭᠦᠯ ᠮᠡᠨᠳᠦ ᠪᠠᠰᠠ ᠶᠡᠬᠡ ᠰᠢᠯᠲᠠᠭᠠᠯᠠᠨᠠ᠃ ᠦᠷᠭᠦᠯᠵᠢ ᠶ᠋ᠢᠨ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠳᠠᠷᠤᠯᠲᠠ ᠲᠠᠢ ᠪᠠᠢᠬᠤ ᠳ᠋ᠤ᠌᠂ ᠭᠠᠷᠤᠭᠰᠠᠨ ᠬᠡᠦᠬᠡᠳ ᠡᠪᠡᠳᠬᠦ ᠨᠢ ᠶᠡᠬᠡ᠂ ᠥᠰᠦᠯᠲᠡ ᠪᠣᠢᠵᠢᠯᠲᠠ ᠨᠢ ᠰᠤᠯᠠ ᠳᠣᠷᠣᠢ ᠪᠠᠢᠳᠠᠭ᠃ ᠬᠡᠦᠬᠡᠳ ᠢ᠋ᠶ᠋ᠡᠨ ᠭᠠᠷᠭᠠᠬᠤ ᠶ᠋ᠢ ᠳᠠᠰᠤᠨ ᠶᠠᠳᠠᠨ ᠬᠦᠯᠢᠶᠡᠵᠦ᠂ ᠳᠥᠷᠥᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤᠨᠢ ᠬᠠᠢᠷᠠ ᠬᠦᠷᠴᠦ ᠲᠥᠷᠥᠭᠰᠡᠨ ᠡᠬᠡ ᠡᠴᠡ ᠡᠷᠡᠭᠦᠯ ᠰᠠᠷᠠᠭᠤᠯ ᠪᠡᠶᠡ ᠰᠠᠢᠲᠠᠢ ᠬᠡᠦᠬᠡᠳ ᠲᠥᠷᠥᠬᠦ ᠨᠢ ᠣᠯᠠᠨᠲᠠᠢ᠃ ᠬᠡᠦᠬᠡᠳ ᠲᠥᠷᠥᠭᠰᠡᠨ ᠢ᠋ᠶ᠋ᠡᠷ ᠡᠬᠡ ᠬᠡᠦᠬᠡᠳ ᠦ᠋ᠨ ᠰᠡᠳᠬᠢᠯ ᠦ᠋ᠨ ᠬᠣᠯᠪᠣᠭᠠ ᠤᠯᠠᠮ ᠪᠡᠬᠢᠵᠢᠵᠦ ᠬᠥᠭᠵᠢᠨᠡ᠃ ᠵᠢᠷᠮᠦᠰᠦᠨ ᠡᠮᠡᠭᠲᠡᠢ ᠶ᠋ᠢᠨ ᠰᠣᠨᠢᠷᠬᠠᠳᠠᠭ ᠨᠢᠭᠡ ᠠᠰᠠᠭᠤᠯᠲᠠ ᠪᠣᠯ《 ᠬᠡᠵᠢᠶᠡ ᠲᠥᠷᠥᠬᠦ ᠪᠣᠯ》 ᠭᠡᠰᠡᠨ ᠠᠰᠠᠭᠤᠯᠲᠠ ᠪᠢᠯᠡ᠃ ᠶᠠᠭ ᠬᠡᠳᠦᠢ ᠳ᠋ᠦ᠍ ᠲᠥᠷᠥᠬᠦ ᠶ᠋ᠢ ᠲᠣᠭᠲᠠᠭᠠᠨ ᠬᠡᠯᠡᠬᠦ ᠳ᠋ᠦ᠍ ᠠᠮᠠᠷ ᠦᠭᠡᠢ ᠪᠠᠢᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠲᠥᠷᠥᠬᠦ ᠬᠤᠭᠤᠴᠠᠭᠠ ᠡᠮᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠡᠴᠡ ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭ ᠨᠠᠭᠠᠨᠠ ᠴᠠᠭᠠᠨᠠ ᠪᠠᠢᠬᠤ ᠪᠣᠯ ᠬᠡᠪ ᠦ᠋ᠨ ᠦᠵᠡᠭᠳᠡᠯ᠃ ᠲᠥᠷᠥᠬᠦ ᠬᠤᠭᠤᠴᠠᠭᠠ ᠶ᠋ᠢ ᠲᠣᠭᠲᠠᠭᠠᠬᠤ ᠳ᠋ᠠᠭᠠᠨ ᠦᠷᠡ ᠲᠣᠭᠲᠠᠭᠰᠠᠨ ᠪᠠᠢᠵᠤ ᠪᠣᠯᠵᠣᠰᠢ ᠦᠭᠡᠢ ᠡᠳᠦᠷ ᠡᠴᠡ ᠤᠷᠤᠭᠰᠢ 3 ᠰᠠᠷᠠ ᠲᠣᠭᠠᠯᠠᠳᠠᠭ᠃ ᠬᠡᠷᠪᠡ ᠰᠡᠭᠦᠯ ᠦ᠋ᠨ ᠰᠠᠷᠠ ᠶ᠋ᠢᠨ ᠲᠡᠮᠳᠡᠭ ᠢᠷᠡᠭᠰᠡᠨ ᠡᠬᠢᠨ ᠦ᠌ ᠡᠳᠦᠷ ᠡᠴᠡ ᠲᠣᠭᠠᠯᠠᠪᠠᠯ ᠲᠡᠭᠦᠨ ᠡᠴᠡ ᠤᠷᠤᠭᠰᠢ3 ᠰᠠᠷᠠ ᠲᠣᠭᠠᠯᠠᠵᠤ7 ᠶ᠋ᠢ ᠨᠡᠮᠡᠨᠡ᠃ ᠢᠩᠭᠢᠬᠦ ᠳ᠋ᠦ᠍ ᠬᠡᠳᠦᠢ ᠳ᠋ᠦ᠍ ᠲᠥᠷᠥᠬᠦ ᠪᠣᠢ ᠭᠡᠳᠡᠭ ᠬᠤᠭᠤᠴᠠᠭᠠ ᠭᠠᠷᠤᠨᠠ᠃ ᠵᠢᠰᠢᠶᠠ ᠨᠢ᠄ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠲᠡᠮᠳᠡᠭ7 ᠳ᠋ᠤᠭᠠᠷ ᠰᠠᠷᠠ ᠶ᠋ᠢᠨ ᠭᠤᠷᠪᠠᠨ ᠳ᠋ᠤ᠌ ᠢᠷᠡᠭᠰᠡᠨ ᠪᠣᠯ ᠣᠷᠣᠭᠰᠢ ᠪᠠᠨ3 ᠰᠠᠷᠠ ᠲᠣᠭᠠᠯᠠᠬᠤ ᠳ᠋ᠤ᠌4 ᠳ᠋ᠦ᠍ᠭᠡᠷ ᠰᠠᠷᠠ ᠶ᠋ᠢᠨ3 ᠪᠣᠯᠤᠨᠠ᠃ ᠡᠭᠦᠨ ᠳᠡᠭᠡᠷᠡ7 ᠶ᠋ᠢ ᠨᠡᠮᠡᠬᠦ ᠳ᠋ᠦ᠍4 ᠳ᠋ᠦ᠍ᠭᠡᠷ ᠰᠠᠷᠠ ᠶ᠋ᠢᠨ10 ᠪᠣᠯᠤᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠄4 ᠳ᠋ᠦ᠍ᠭᠡᠷ ᠰᠠᠷᠠ ᠶ᠋ᠢᠨ10 ᠤ᠋ ᠬᠠᠪᠢᠴᠠᠭᠠ ᠲᠠ ᠲᠥᠷᠥᠬᠦ ᠨᠢ ᠭᠡᠰᠡᠨ ᠦᠭᠡ᠃ ᠢᠷᠡᠭᠡᠳᠦᠢ ᠶ᠋ᠢᠨ ᠡᠴᠢᠭᠡ ᠡᠬᠡᠴᠦᠳ ᠦ᠋ᠨ ᠰᠡᠳᠬᠢᠯ ᠢ᠋ ᠬᠥᠳᠡᠯᠭᠡᠳᠡᠭ ᠥᠭᠡᠷᠡ ᠨᠢᠭᠡ ᠠᠰᠠᠭᠤᠯᠲᠠ ᠪᠣᠯ ᠭᠠᠷᠬᠤ ᠬᠡᠦᠬᠡᠳ ᠦ᠋ᠨ ᠬᠦᠢᠰᠦ ᠶᠦᠮ᠃ ᠡᠨᠡ ᠨᠢ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠬᠦᠦ᠂ ᠥᠬᠢᠨ ᠦ᠌ ᠠᠯᠢ ᠨᠢ ᠭᠠᠷᠬᠤ ᠨᠢ ᠡᠬᠡ ᠶ᠋ᠢᠨХ ᠬᠣᠷᠣᠮᠣᠰᠤᠮ ᠲᠠᠢ ᠥᠨᠳᠡᠭᠡᠨ ᠡᠰ ᠡᠴᠢᠭᠡ ᠶ᠋ᠢᠨ ᠶᠠᠮᠠᠷ ᠬᠣᠷᠣᠮᠣᠰᠤᠮ ᠲᠠᠢ ᠤᠴᠠᠷᠠᠭᠰᠠᠨ ᠠ᠋ᠴᠠ ᠰᠢᠯᠲᠠᠭᠠᠯᠠᠨᠠ᠃ ᠬᠡᠷᠪᠡ ᠡᠬᠡ ᠶ᠋ᠢᠨХ ᠬᠣᠷᠣᠮᠣᠰᠤᠮ ᠲᠠᠢ ᠥᠨᠳᠡᠭᠡᠨ ᠡᠰ ᠡᠴᠢᠭᠡ ᠶ᠋ᠢᠨ ᠮᠥᠨХ ᠬᠣᠷᠣᠮᠣᠰᠤᠮ ᠲᠠᠢ ᠨᠡᠢᠯᠡᠭᠰᠡᠨ ᠪᠣᠯ ᠥᠬᠢᠨ ᠭᠠᠷᠤᠨᠠ᠃ ᠬᠠᠷᠢᠨ ᠡᠴᠢᠭᠡ ᠶ᠋ᠢᠨУ ᠬᠣᠷᠣᠮᠣᠰᠤᠮ ᠲᠠᠢ ᠨᠡᠢᠯᠡᠪᠡᠯ ᠬᠦᠦ ᠭᠠᠷᠤᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠡᠷᠡ ᠬᠦᠢᠰᠦ ᠲᠣᠳᠣᠷᠬᠠᠢᠯᠠᠳᠠᠭУ ᠬᠣᠷᠣᠮᠣᠰᠤᠮ ᠭᠠᠭᠴᠠᠬᠦ ᠡᠷᠡ ᠬᠥᠮᠦᠨ ᠳ᠋ᠦ᠍ ᠯᠡ ᠪᠠᠢᠨᠠ᠃ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠡᠰ ᠬᠣᠶᠠᠷ ᠢᠵᠢᠯХ ᠬᠣᠷᠣᠮᠣᠰᠤᠮ ᠲᠠᠢ ᠪᠠᠢᠳᠠᠭ᠃ ᠵᠠᠷᠢᠮ ᠠᠢᠯ ᠠ᠋ᠴᠠ ᠲᠠᠩᠳᠠ ᠬᠦᠦ ᠭᠠᠷᠤᠭᠠᠳ ᠪᠠᠢᠬᠤ ᠳ᠋ᠤ᠌ ᠵᠠᠷᠢᠮ ᠠᠢᠯ ᠠ᠋ᠴᠠ ᠲᠠᠩᠳᠠ ᠥᠬᠢᠨ ᠴᠤᠪᠤᠳᠠᠭ᠃ ᠡᠭᠦᠨ ᠦ᠌ ᠨᠢᠭᠤᠴᠠ ᠶᠠᠭᠤᠨ ᠳ᠋ᠤ᠌ ᠣᠷᠣᠰᠢᠨᠠ ᠪᠣᠢ? ᠭᠡᠵᠦ ᠬᠥᠮᠦᠨ ᠪᠦᠬᠦᠨ ᠠᠰᠠᠭᠤᠬᠤ ᠨᠢ ᠯᠠᠪᠲᠠᠢ᠃ ᠡᠭᠦᠨ ᠢ᠋ ᠲᠠᠢᠯᠪᠤᠷᠢᠯᠠᠭᠰᠠᠨ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠲᠠᠭᠠᠮᠠᠭᠯᠠᠯ ᠳ᠋ᠦᠩᠨᠡᠯᠲᠡ ᠪᠣᠢ᠃ ᠡᠴᠢᠭᠡ ᠡᠬᠡ ᠨᠢ ᠵᠠᠯᠠᠭᠤ ᠪᠠᠢᠬᠤ ᠲᠣᠰᠤᠮ ᠬᠦᠦ ᠣᠯᠠᠨ ᠲᠥᠷᠥᠨᠡ᠃ ᠡᠬᠡ ᠨᠢ ᠴᠥᠭᠡᠨ ᠤᠳᠠᠭᠠ ᠠᠮᠤᠷᠵᠢᠪᠠᠯ ᠭᠣᠣᠯᠳᠠᠭᠤ ᠬᠦᠦ ᠣᠯᠠᠨ ᠤᠳᠠᠭᠠ ᠠᠮᠤᠷᠵᠢᠪᠠᠯ ᠭᠣᠣᠯᠳᠠᠭᠤ ᠥᠬᠢᠨ ᠲᠥᠷᠥᠨᠡ᠃ ᠲᠡᠭᠦᠨᠴᠢᠯᠡᠨ ᠳᠠᠪᠤᠰᠤ ᠶᠡᠬᠡᠲᠡᠢ ᠬᠣᠭᠣᠯᠠ ᠤᠮᠳᠠ᠂ ᠳᠠᠪᠤᠰᠤᠯᠠᠭᠰᠠᠨ ᠪᠢᠰᠢᠯᠠᠭ᠂ ᠬᠢᠮᠠ᠂ ᠵᠠᠢᠳᠠᠰᠤ᠂ ᠭᠠᠬᠠᠢ ᠶ᠋ᠢᠨ ᠱᠣᠷᠪᠣᠭ ᠮᠢᠬᠠ᠂ ᠺᠣᠹᠧ᠂ ᠴᠠᠢ ᠶᠡᠬᠡ ᠬᠡᠷᠡᠭᠯᠡᠭᠰᠡᠨ ᠡᠬᠡ ᠡᠴᠡ ᠭᠣᠣᠯᠳᠠᠭᠤ ᠬᠦᠦ ᠲᠥᠷᠥᠨᠡ᠂ ᠬᠠᠷᠢᠨ ᠳᠠᠪᠤᠰᠤ ᠪᠠᠭᠠᠲᠠᠢ ᠬᠣᠭᠣᠯᠠ ᠤᠮᠳᠠ᠂ ᠥᠨᠳᠡᠭᠡ᠂ ᠰᠦ ᠵᠡᠷᠭᠡ ᠺᠠᠯᠼ ᠶᠡᠬᠡᠲᠡᠢ ᠬᠣᠭᠣᠯᠠ ᠶᠡᠬᠡ ᠬᠡᠷᠡᠭᠯᠡᠪᠡᠯ ᠭᠣᠣᠯᠳᠠᠭᠤ ᠥᠬᠢᠨ ᠲᠥᠷᠥᠨᠡ ᠭᠡᠵᠡᠭᠡᠳᠡᠭ᠃ ᠮᠥᠨ ᠬᠥᠮᠦᠨ ᠦ᠌ ᠴᠢᠰᠤ ᠳᠥᠷᠪᠡᠨ4 ᠵᠢᠯ ᠳᠣᠳᠣᠮ ᠳ᠋ᠤ᠌ ᠰᠢᠨᠡᠴᠢᠯᠡᠭᠳᠡᠳᠡᠭ ᠪᠥᠭᠡᠳ ᠡᠴᠢᠭᠡ ᠶ᠋ᠢᠨ ᠴᠢᠰᠤ ᠰᠢᠨᠡᠴᠢᠯᠡᠭᠳᠡᠵᠦ ᠪᠠᠢᠭᠠ ᠦᠶᠡ ᠳ᠋ᠦ᠍ ᠣᠯᠳᠠᠭᠰᠠᠨ ᠬᠡᠦᠬᠡᠳ ᠬᠦᠦ᠂ ᠡᠬᠡ ᠶ᠋ᠢᠨ ᠴᠢᠰᠤ ᠰᠢᠨᠡ ᠪᠡᠷ ᠰᠣᠯᠢᠭᠳᠠᠭᠰᠠᠨ ᠦᠶᠡ ᠳ᠋ᠦ᠍ ᠣᠯᠳᠠᠭᠰᠠᠨ ᠬᠡᠦᠬᠡᠳ ᠥᠬᠢᠨ ᠪᠠᠢᠨᠠ ᠭᠡᠰᠡᠨ ᠶᠠᠷᠢᠶᠠ ᠴᠦ᠍ ᠪᠣᠢ᠃ ᠪᠠᠰᠠ ᠪᠡᠯᠭᠡ ᠶ᠋ᠢᠨ ᠴᠢᠯᠬᠠ ᠰᠠᠢᠲᠠᠢ ᠡᠷᠡᠴᠦᠳ ᠡᠴᠡ ᠭᠣᠣᠯᠳᠠᠭᠤ ᠬᠦᠦ ᠭᠠᠷᠳᠠᠭ ᠭᠡᠨᠡᠮ᠃ ᠬᠠᠯᠵᠠᠨ ᠡᠷᠡ ᠡᠴᠡ ᠬᠦᠦ ᠭᠠᠷᠬᠤ ᠳᠤᠷᠠᠲᠠᠢ ᠭᠡᠨᠡ᠃ ᠭᠡᠪᠡᠴᠦ ᠡᠳᠡᠭᠡᠷ ᠨᠢ ᠦᠨᠡᠨ ᠬᠤᠳᠠᠯ ᠢ᠋ ᠬᠡᠨ ᠮᠡᠳᠡᠯᠡ᠃ ᠳᠠᠭᠠᠪᠤᠷᠢ ᠪᠣᠯᠭᠠᠨ ᠲᠠᠢᠯᠤᠭᠳᠠᠬᠤ ᠦᠭᠡᠢ᠃ ᠲᠡᠭᠡᠬᠦ ᠪᠡᠷ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠨᠢᠭᠤᠴᠠ ᠶ᠋ᠢ ᠨᠢ ᠲᠠᠢᠯᠵᠤ ᠴᠢᠳᠠᠭᠠ ᠦᠭᠡᠢ ᠪᠣᠯ ᠬᠤᠳᠠᠯ ᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠪᠠᠰᠠ ᠲᠡᠭᠦᠨ ᠳ᠋ᠦ᠍ ᠰᠣᠬᠣᠷ ᠢ᠋ᠶ᠋ᠠᠷ ᠪᠦᠷᠢᠨ ᠢᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠪᠠᠢᠬᠤ᠃ ᠶᠠᠮᠠᠷ ᠴᠦ᠍ ᠠᠲᠤᠭᠠᠢ ᠦᠨᠡᠨ ᠦ᠌ ᠬᠤᠪᠢ ᠶᠠᠮᠠᠷ ᠨᠢᠭᠡᠨ ᠬᠡᠮᠵᠢᠶᠡ ᠪᠡᠷ ᠪᠣᠢ ᠶ᠋ᠢ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠬᠦ ᠬᠡᠷᠡᠭᠲᠡᠢ᠃
ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠥᠷᠪᠡᠨ ᠦᠨᠳᠦᠰᠦᠨ ᠳᠡᠳ᠋ ᠳᠡᠪᠲᠡᠷ ᠦ᠋ᠨ《ᠲᠣᠭᠲᠠᠬᠤ ᠶᠣᠰᠣᠨ》 ᠤ᠋ ᠪᠦᠯᠦᠭ ᠲᠦ᠍᠄《᠁ ᠰᠠᠷᠠ ᠶ᠋ᠢᠨ ᠭᠬᠢᠷ ᠲᠡᠭᠦᠰᠪᠡᠰᠦ ᠬᠤᠷᠢᠴᠠᠯ ᠤ᠋ᠨ ᠰᠡᠳᠬᠢᠯ ᠡᠭᠦᠰᠦᠨᠡ᠃ ᠤᠮᠠᠢ ᠶ᠋ᠢᠨ ᠡᠭᠦᠳᠡ ᠨᠡᠭᠡᠭᠡᠭᠳᠡᠵᠦ12 ᠬᠣᠨᠣᠭ ᠬᠦᠷᠲᠡᠯᠡᠬᠢ ᠠᠩᠬᠠᠨ ᠤ᠋ 3 ᠬᠣᠨᠣᠭ ᠪᠠ11ᠳᠠᠬᠢ ᠡᠳᠦᠷ ᠲᠦ᠍ ᠬᠥᠪᠡᠭᠦᠨ ᠦᠯᠦ ᠲᠣᠭᠲᠠᠨᠠ᠃ ᠥᠬᠢᠨ ᠲᠣᠭᠲᠠᠬᠤ ᠪᠣᠯᠪᠠᠴᠤ ᠲᠡᠷᠡ ᠦᠶᠡ ᠶ᠋ᠢᠨ ᠡᠷᠡ ᠡᠮᠡ ᠶ᠋ᠢᠨ ᠬᠠᠷᠢᠴᠠᠭᠠ ᠦᠢᠯᠡᠳᠬᠦ ᠶ᠋ᠢ ᠴᠡᠭᠡᠷᠯᠡᠬᠦ ᠬᠡᠷᠡᠭᠲᠡᠢ ᠭᠡᠳ1᠂3᠂5᠂7᠂9ᠳᠠᠬᠢ ᠡᠳᠦᠷ ᠲᠦ᠍ ᠬᠥᠪᠡᠭᠦᠨ ᠲᠣᠭᠲᠠᠮᠤᠢ᠃ 2᠂4᠂6᠂8 ᠳ᠋ᠠᠬᠢ ᠡᠳᠦᠷ ᠲᠦ᠍ ᠥᠬᠢᠨ ᠲᠣᠭᠲᠠᠮᠤᠢ᠃ ᠨᠠᠷᠠ ᠰᠢᠩᠭᠡᠪᠡᠯ ᠯᠢᠩᠬᠤᠠ ᠶ᠋ᠢᠨ ᠴᠣᠮᠣᠷᠯᠢᠭ ᠬᠤᠮᠢᠬᠤ ᠮᠡᠲᠦ ᠪᠡᠷ12 ᠳ᠋ᠤᠭᠠᠷ ᠡᠳᠦᠷ ᠢ᠋ ᠥᠩᠭᠡᠷᠡᠪᠡᠰᠦ ᠤᠮᠠᠢ ᠳ᠋ᠤ᠌ ᠳᠤᠰᠤᠯ ᠦᠯᠦ ᠲᠣᠭᠲᠠᠮᠤᠢ᠃》 ᠭᠡᠰᠡᠨ ᠪᠠᠢᠳᠠᠭ᠃ ᠢᠩᠭᠢᠭᠡᠳ ᠡᠴᠦᠰ ᠲᠦ᠋ᠨᠢ ᠭᠠᠷᠬᠤ ᠬᠡᠦᠬᠡᠳ ᠦ᠋ᠨ ᠬᠦᠢᠰᠦ ᠶ᠋ᠢ ᠡᠬᠡ ᠶ᠋ᠢᠨ ᠨᠠᠰᠤ ᠪᠠ ᠬᠡᠦᠬᠡᠳ ᠣᠯᠤᠭᠰᠠᠨ ᠰᠠᠷᠠ ᠪᠠᠷ ᠲᠣᠳᠣᠷᠬᠠᠢᠯᠠᠳᠠᠭ ᠨᠢᠭᠡᠨ ᠡᠩ ᠦ᠋ᠨ ᠬᠢᠯᠪᠠᠷ ᠠᠷᠭᠠ ᠶ᠋ᠢ 54 ᠳ᠋ᠤᠭᠡᠷ ᠬᠠᠭᠤᠳᠠᠰᠤᠨ ᠤ᠋ ᠬᠦᠰᠦᠨᠦᠭᠲᠦ ᠡᠴᠡ ᠦᠵᠡᠨᠡ ᠤᠤ᠃ ᠬᠡᠷᠪᠡ ᠲᠠ32 ᠨᠠᠰᠤ ᠲᠠᠢ᠂ ᠲᠠᠩᠳᠠ ᠥᠬᠢᠨ ᠲᠡᠢ ᠪᠣᠯ ᠲᠡᠷᠡ ᠣᠨ ᠳ᠋ᠠᠭᠠᠨ1᠂3᠂11᠂12 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌ ᠬᠡᠦᠬᠡᠳ ᠣᠯᠪᠠᠯ ᠬᠦᠦ ᠲᠡᠢ ᠪᠣᠯᠬᠤ ᠰᠠᠨ ᠭᠡᠰᠡᠨ ᠬᠦᠰᠡᠯ ᠴᠢᠨᠢ ᠪᠡᠶᠡᠯᠡᠬᠦ ᠪᠣᠯᠤᠮᠵᠢ ᠲᠠᠢ᠃ ᠭᠡᠪᠡᠴᠦ ᠡᠨᠡ ᠠᠷᠭᠠ ᠨᠢ ᠪᠦᠬᠦ ᠲᠣᠬᠢᠶᠠᠯᠳᠤᠯ ᠤ᠋ᠨ20 ᠭᠠᠷᠤᠢ ᠬᠤᠪᠢ ᠳ᠋ᠤ᠌ ᠵᠥᠷᠢᠳᠡᠭ ᠢ᠋ ᠠᠩᠬᠠᠷ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠡᠭᠦᠨ ᠳ᠋ᠦ᠍ ᠪᠠᠰᠠ ᠪᠦᠷᠢᠨ ᠨᠠᠢᠳᠠᠵᠤ ᠪᠣᠯᠬᠤ ᠦᠭᠡᠢ᠃ ᠲᠠᠰᠢᠷᠠᠮ ᠳ᠋ᠤ᠌ ᠬᠡᠯᠡᠬᠦ ᠳ᠋ᠦ᠍ ᠬᠦᠦ ᠴᠦ᠍ ᠪᠠᠢ᠂ ᠥᠬᠢᠨ ᠴᠦ᠍ ᠪᠠᠢ ᠦᠷᠡ ᠲᠡᠢ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠢ᠋ ᠠᠮᠰᠠᠬᠤ ᠰᠢᠭ᠋ ᠰᠠᠢᠬᠠᠨ ᠶᠠᠭᠤᠮᠠ ᠬᠠᠮᠢᠭᠠ ᠪᠠᠢᠬᠤᠪ᠃ ᠬᠠᠮᠤᠭ ᠤ᠋ᠨ ᠭᠣᠣᠯ ᠨᠢ ᠲᠡᠳᠡᠨ ᠢ᠋ ᠬᠥᠮᠦᠵᠢᠭᠦᠯᠬᠦ ᠳ᠋ᠦ᠍ ᠯᠡ ᠣᠷᠣᠰᠢᠨᠠ᠃ ᠢᠩᠭᠢᠵᠦ ᠵᠠᠯᠠᠭᠤ ᠬᠣᠣᠰ ᠤ᠋ᠳ ᠬᠤᠷᠢᠮᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠲᠦᠳᠡᠯ ᠦᠭᠡᠢ ᠰᠢᠨᠡ ᠬᠥᠮᠦᠨ ᠮᠡᠨᠳᠦᠯᠡᠨᠡ᠃ ᠲᠡᠭᠦᠨ ᠢ᠋ ᠥᠯᠥᠭᠡᠢᠳᠡᠬᠦ᠂ ᠬᠠᠭᠤᠷᠠᠢᠯᠠᠬᠤ᠂ ᠬᠥᠬᠥᠭᠦᠯᠬᠦ᠂ ᠠᠷᠠᠴᠢᠯᠠᠬᠤ᠂ ᠳᠠᠪᠤᠤ ᠤᠬᠢᠶᠠᠬᠤ ᠭᠡᠳ ᠦᠢ ᠲᠦᠮᠡᠨ ᠠᠵᠢᠯ ᠳᠣᠣᠷᠠ ᠠ᠋ᠴᠠ ᠤᠨᠳᠤᠷᠤᠨᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠠᠨᠢ ᠶ᠋ᠢᠨ ᠲᠤᠰᠠ ᠳᠠᠮ ᠬᠡᠷᠡᠭᠲᠡᠢ ᠪᠣᠯᠤᠨᠠ᠃ ᠬᠡᠷᠪᠡ ᠲᠦᠷᠦᠯᠲᠡ ᠶᠠᠮᠠᠷ ᠨᠢᠭᠡ ᠬᠦᠨᠳᠦᠷᠡᠯ ᠦᠭᠡᠢ ᠬᠡᠪ ᠦ᠋ᠨ ᠪᠠᠢᠭᠰᠠᠨ ᠪᠣᠯ ᠲᠥᠷᠥᠭᠰᠡᠨ ᠡᠴᠡ ᠬᠣᠢᠰᠢ ᠬᠣᠶᠠᠷ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠣᠢᠷᠠᠲᠤᠵᠤ ᠪᠣᠯᠤᠨᠠ᠃ ᠤᠷᠠᠭᠳᠠᠯ ᠡᠭᠦᠰᠴᠦ᠂ ᠣᠶᠣᠭᠠ ᠲᠠᠯᠪᠢᠭᠤᠯᠤᠭᠰᠠᠨ ᠪᠣᠯ ᠵᠠᠪᠠᠯ ᠡᠮᠡᠭᠲᠡᠢᠴᠦᠳ ᠦ᠋ᠨ ᠡᠮᠴᠢ ᠳ᠋ᠦ᠍ ᠦᠵᠡᠭᠦᠯᠵᠦ ᠵᠥᠪᠯᠡᠯᠭᠡ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠣᠢᠷᠠᠲᠤᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠨᠡ᠃
ᠬᠥᠬᠥᠭᠦᠯ ᠦᠶᠡ ᠳ᠋ᠦ᠍ ᠵᠢᠷᠮᠦᠰᠦᠨ ᠪᠣᠯᠳᠠᠭ ᠦᠭᠡᠢ ᠭᠡᠳᠡᠭ ᠦᠨᠡᠨ ᠤᠤ ᠭᠡᠳᠡᠭ ᠠᠰᠠᠭᠤᠯᠲᠠ ᠶ᠋ᠢ ᠡᠮᠡᠭᠲᠡᠢᠴᠦᠳ ᠡᠨᠳᠡ ᠲᠡᠨᠳᠡ ᠦᠭᠡᠢ ᠵᠥᠩᠳᠡᠭᠡᠨ ᠲᠠᠯᠪᠢᠳᠠᠭ᠃ ᠡᠨᠡ ᠨᠢ ᠦᠨᠡᠨ ᠦ᠌ ᠬᠤᠪᠢ ᠲᠠᠢ ᠪᠣᠯᠪᠠᠴᠤ ᠪᠠᠰᠠ ᠠᠩᠬᠠᠷᠬᠤ ᠵᠦᠢᠯ ᠪᠣᠢ᠃ ᠵᠠᠷᠢᠮ ᠡᠮᠡᠭᠲᠡᠢ ᠶ᠋ᠢᠨ《ᠬᠣᠷᠮᠣᠢ ᠶ᠋ᠢᠨ ᠶᠠᠭᠤᠮᠠ》 ᠨᠢ ᠲᠥᠷᠥᠭᠰᠡᠨ ᠡᠴᠡ ᠬᠣᠢᠰᠢ ᠨᠢᠭᠡ ᠬᠣᠶᠠᠷᠬᠠᠨ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠢᠷᠡᠳᠡᠭ᠃ ᠢᠩᠭᠢᠵᠦ ᠲᠥᠷᠥᠭᠰᠡᠨ ᠦ᠌ ᠳᠠᠷᠠᠭᠠ《ᠬᠣᠷᠮᠣᠢ ᠶ᠋ᠢᠨ ᠶᠠᠭᠤᠮᠠ》 ᠬᠡᠳᠦᠢ ᠡᠷᠲᠡ ᠢᠷᠡᠨᠡ᠂ ᠲᠡᠳᠦᠢ ᠴᠢᠨᠡᠭᠡ ᠠᠬᠢᠭᠠᠳ ᠬᠤᠷᠳᠤᠨ ᠵᠢᠷᠮᠦᠰᠦᠯᠡᠬᠦ ᠲᠠᠯᠠ ᠲᠠᠢ ᠪᠠᠢᠳᠠᠭ᠃ ᠡᠢᠮᠦ ᠡᠴᠡ ᠬᠥᠬᠥᠭᠦᠯ ᠦᠶᠡ ᠳ᠋ᠦ᠍ ᠵᠢᠷᠮᠦᠰᠦᠨ ᠪᠣᠯᠳᠠᠭ ᠦᠭᠡᠢ ᠭᠡᠵᠦ ᠪᠦᠷᠢᠨ ᠨᠠᠢᠳᠠᠵᠤ ᠪᠣᠯᠬᠤ ᠦᠭᠡᠢ᠃ ᠭᠡᠪᠡᠴᠦ ᠶᠡᠬᠡᠩᠬᠢ ᠡᠮᠡᠭᠲᠡᠢᠴᠦᠳ ᠦ᠋ᠨ《ᠬᠣᠷᠮᠣᠢ ᠶ᠋ᠢᠨ ᠶᠠᠭᠤᠮᠠ》 ᠬᠥᠬᠥᠭᠦᠯ ᠦᠶᠡ ᠳ᠋ᠦ᠍ ᠢᠷᠡᠳᠡᠭ ᠦᠭᠡᠢ ᠪᠥᠭᠡᠳ ᠴᠣᠬᠣᠮ ᠬᠡᠵᠢᠶᠡ ᠢᠷᠡᠬᠦ ᠶ᠋ᠢ ᠬᠡᠨ ᠴᠦ᠍ ᠤᠷᠢᠳᠠ ᠠ᠋ᠴᠠ ᠳᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠣᠯᠠᠨ ᠳᠠᠬᠢᠨ ᠣᠢᠷᠠ ᠣᠢᠷᠠᠬᠠᠨ ᠲᠥᠷᠥᠬᠦ ᠨᠢ ᠭᠠᠷᠬᠤ ᠬᠡᠦᠬᠡᠳ ᠦ᠋ᠨ ᠡᠷᠡᠭᠦᠯ ᠮᠡᠨᠳᠦ ᠳ᠋ᠦ᠍ ᠮᠠᠭᠤ ᠪᠠᠷ ᠨᠥᠯᠥᠭᠡᠯᠡᠨᠡ᠃ ᠡᠨᠳᠡ ᠡᠴᠡ ᠳᠠᠷᠠᠭᠠ ᠶ᠋ᠢᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠡᠵᠢᠶᠡ ᠲᠥᠷᠥᠭᠦᠯᠬᠦ ᠪᠣᠢ? ᠭᠡᠰᠡᠨ ᠠᠰᠠᠭᠤᠯᠲᠠ ᠭᠠᠷᠤᠨᠠ᠃ ᠡᠮᠴᠢ ᠨᠠᠷ2-3 ᠨᠠᠰᠤᠨ ᠤ᠋ ᠵᠠᠢᠲᠠᠢ ᠳᠠᠷᠠᠭᠠ ᠶ᠋ᠢᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠭᠠᠷᠭᠠᠬᠤ ᠶ᠋ᠢ ᠵᠥᠪᠯᠡᠳᠡᠭ᠃ ᠡᠭᠦᠨ ᠦ᠌ ᠲᠤᠯᠠᠳᠠ ᠵᠢᠷᠮᠦᠰᠦᠯᠡᠯᠲᠡ ᠡᠴᠡ ᠰᠡᠷᠭᠡᠢᠯᠡᠬᠦ ᠠᠷᠭᠠ ᠨᠤᠭᠤᠳ ᠢ᠋ ᠰᠠᠢᠲᠤᠷ ᠮᠡᠳᠡᠬᠦ ᠬᠡᠷᠡᠭᠲᠡᠢ ᠪᠣᠯᠤᠨᠠ᠃ ᠡᠨᠡ ᠲᠤᠬᠠᠢ ᠪᠢᠳᠡ ᠥᠭᠦᠯᠡᠬᠦ ᠪᠣᠯᠤᠨᠠ᠃ ᠵᠢᠷᠮᠦᠰᠦᠯᠡᠭᠰᠡᠨ ᠡᠬᠢᠨ ᠦ᠌8-10 ᠳᠣᠯᠣᠭᠠ ᠬᠣᠨᠣᠭ ᠲᠤ᠌ ᠪᠣᠯ ᠤᠷᠤᠭ ᠤ᠋ᠨ ᠪᠦᠬᠦ ᠡᠷᠬᠡᠲᠡᠨ ᠰᠢᠰᠲ᠋ᠧᠮ ᠪᠦᠷᠢᠯᠳᠦᠨ ᠲᠣᠭᠲᠠᠳᠠᠭ ᠬᠠᠮᠤᠭ ᠤ᠋ᠨ ᠡᠮᠵᠡᠭ ᠦᠶᠡ ᠶᠦᠮ᠃ ᠡᠨᠡ ᠦᠶᠡ ᠳ᠋ᠦ᠍ ᠡᠮᠡᠭᠲᠡᠢ ᠬᠥᠮᠦᠨ ᠬᠠᠮᠠᠷ ᠤ᠋ᠨ ᠱᠤᠤᠬᠢᠲᠤᠨᠠᠭᠠ᠂ ᠬᠠᠨᠢᠶᠠᠳᠤ᠂ ᠲᠣᠮᠣᠭᠣ ᠵᠡᠷᠭᠡ ᠬᠠᠮ ᠰᠢᠨᠵᠢ ᠶ᠋ᠢᠨ ᠬᠠᠯᠳᠠᠪᠤᠷᠢ ᠪᠠᠷ ᠡᠪᠡᠳᠴᠢᠯᠡᠬᠦ ᠨᠢ ᠤᠷᠤᠭ ᠲᠤ᠌ ᠮᠠᠭᠤ ᠪᠠᠷ ᠨᠥᠯᠥᠭᠡᠯᠡᠵᠦ ᠨᠣᠴᠢᠲᠠᠢ ᠭᠠᠵᠢᠭ ᠡᠭᠦᠰᠬᠡᠵᠦ ᠪᠣᠯᠤᠨᠠ᠃ ᠡᠳᠡᠭᠡᠷ ᠡᠪᠡᠳᠴᠢᠨ ᠨᠢ ᠨᠠᠮᠤᠷ ᠤ᠋ᠨ ᠰᠡᠭᠦᠯ᠂ ᠡᠪᠦᠯ ᠦ᠋ᠨ ᠤᠯᠠᠷᠢᠯ ᠤ᠋ᠨ ᠡᠬᠢ ᠪᠡᠷ ᠶᠡᠬᠡᠰᠳᠡᠭ ᠤᠴᠢᠷ ᠠ᠋ᠴᠠ ᠬᠡᠦᠬᠡᠳ ᠠᠪᠬᠤ ᠳ᠋ᠤ᠌ ᠤᠯᠠᠷᠢᠯ ᠢ᠋ ᠴᠦ᠍ ᠪᠤᠳᠤᠯᠴᠠᠬᠤ ᠤᠴᠢᠷ ᠲᠠᠢ᠃ ᠮᠥᠨ ᠬᠡᠦᠬᠡᠳ ᠭᠠᠷᠬᠤ ᠤᠯᠠᠷᠢᠯ ᠢ᠋ ᠴᠦ᠍ ᠪᠠᠰᠠ ᠬᠠᠷᠠᠭᠠᠯᠵᠠᠬᠤ ᠨᠢ ᠵᠦᠭᠡᠷ᠃ ᠬᠦᠢᠲᠡᠨ ᠦ᠌ ᠠᠮᠠ ᠴᠢᠨᠠᠭᠰᠢ ᠬᠠᠷᠠᠵᠤ ᠬᠦᠬᠦᠷ ᠦ᠋ᠨ ᠠᠮᠠ ᠨᠠᠰᠢᠯᠠᠭᠰᠠᠨ3᠂4᠂5᠂ ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌ ᠲᠥᠷᠥᠭᠰᠡᠨ ᠬᠡᠦᠬᠡᠳ ᠠᠯᠵᠠᠬᠤ ᠦᠭᠡᠢ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠡᠷᠡᠭᠦᠯ ᠠᠭᠠᠷ ᠲᠤ᠌ ᠭᠠᠷᠴᠤ ᠡᠬᠡ ᠨᠢ ᠰᠢᠨᠡ ᠨᠣᠭᠣᠭᠠ᠂ ᠵᠢᠮᠢᠰ ᠲᠡᠢ ᠵᠣᠯᠭᠠᠨᠠ᠃ ᠨᠠᠷᠠᠨ ᠤ᠋ ᠰᠠᠴᠤᠷᠠᠭ ᠪᠣᠯ ᠬᠡᠦᠬᠡᠳ ᠢ᠋ ᠰᠤᠯᠢᠳᠠᠭᠠ ᠡᠪᠡᠳᠴᠢᠨ ᠡᠴᠡ ᠰᠡᠷᠭᠡᠢᠯᠡᠬᠦ ᠬᠠᠮᠤᠭ ᠤ᠋ᠨ ᠰᠠᠢᠨ ᠨᠠᠢᠳᠠᠪᠤᠷᠢᠲᠠᠢ《ᠡᠮ》 ᠪᠢᠯᠡ ᠲᠡᠭᠡᠪᠡᠯ ᠰᠡᠷᠢᠭᠦᠨ ᠦ᠌ ᠤᠯᠠᠷᠢᠯ ᠳ᠋ᠤ᠌(10᠂11᠂12 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌) ᠲᠥᠷᠥᠭᠰᠡᠨ ᠬᠡᠦᠬᠡᠳ ᠪᠠᠷᠤᠭ ᠬᠠᠭᠠᠰ ᠵᠢᠯ ᠰᠢᠬᠠᠮ ᠠᠯᠲᠠᠨ ᠨᠠᠷᠠᠨ ᠤ᠋ ᠰᠠᠴᠤᠷᠠᠭ ᠢ᠋ ᠦᠵᠡᠬᠦ ᠦᠭᠡᠢ᠂ ᠵᠥᠪᠬᠡᠨ ᠡᠬᠡ ᠶ᠋ᠢᠨ ᠬᠥᠬᠥ ᠪᠡᠷ ᠬᠣᠭᠣᠯᠠᠯᠠᠨᠠ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠸᠢᠲ᠋ᠠᠮᠢᠨ ᠤ᠋ ᠳᠤᠲᠠᠭᠳᠠᠯ ᠳ᠋ᠤ᠌ ᠣᠷᠣᠬᠤ ᠨᠢ ᠴᠥᠭᠡᠨ ᠦᠭᠡᠢ᠃
ᠢᠩᠭᠢᠬᠦᠯᠡᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠠᠪᠤᠷ ᠲᠥᠷᠥᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠲᠡᠭᠦᠨ ᠢ᠋ ᠵᠤᠨ ᠣᠯᠬᠤ ᠬᠡᠷᠡᠭᠲᠡᠢ᠃ ᠵᠤᠨ ᠤ᠋ ᠴᠠᠭ ᠲᠤ᠌ ᠡᠮᠡᠭᠲᠡᠢ ᠬᠥᠮᠦᠨ ᠪᠡᠶᠡ ᠪᠡᠨ ᠡᠷᠡᠭᠦᠯᠵᠢᠭᠦᠯᠵᠦ᠂ ᠠᠯᠵᠢᠶᠠᠯ ᠲᠠᠢᠯᠤᠨ ᠠᠮᠠᠷᠠᠵᠤ ᠴᠢᠳᠠᠳᠠᠭ᠃
ᠬᠡᠷᠪᠡ ᠡᠨᠡ ᠦᠶᠡ ᠬᠡᠦᠬᠡᠳ ᠣᠯᠵᠤ ᠴᠢᠳᠠᠭᠠ ᠦᠭᠡᠢ ᠪᠣᠯ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠷᠡᠭᠦᠯ ᠴᠢᠬᠢᠷᠡᠭ ᠥᠰᠬᠡᠬᠦ ᠶ᠋ᠢᠨ ᠲᠤᠯᠠᠳᠠ ᠬᠠᠨᠢᠶᠠᠳᠤ ᠲᠣᠮᠣᠭᠣ ᠲᠤᠰᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠵᠦ ᠴᠢᠨᠠᠷ ᠰᠠᠢᠲᠠᠢ ᠬᠣᠭᠣᠯᠠ ᠲᠡᠵᠢᠭᠡᠯ ᠬᠡᠷᠡᠭᠯᠡᠬᠦ ᠬᠡᠷᠡᠭᠲᠡᠢ᠃ ᠮᠠᠭᠠᠳ ᠦᠭᠡᠢ ᠡᠨᠡ ᠪᠦᠬᠦᠨ ᠢ᠋ ᠡᠴᠢᠭᠡ᠂ ᠡᠬᠡᠴᠦᠳ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠮᠡᠳᠡᠳᠡᠭ ᠪᠠᠢᠬᠤ ᠶ᠋ᠢ ᠬᠡᠨ ᠴᠦ᠍ ᠦᠭᠡᠢᠰᠬᠡᠬᠦ ᠦᠭᠡᠢ᠃ ᠬᠠᠷᠢᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠪᠠᠯᠴᠢᠷ ᠪᠠᠭᠠ ᠠ᠋ᠴᠠ ᠨᠢ ᠪᠡᠯᠭᠡ ᠶ᠋ᠢᠨ ᠬᠥᠮᠦᠵᠢᠯ ᠣᠯᠭᠣᠵᠤ ᠡᠬᠢᠯᠡᠬᠦ ᠶᠣᠰᠣᠲᠠᠢ ᠶ᠋ᠢ ᠬᠥᠮᠦᠨ ᠪᠦᠬᠦᠨ ᠲᠡᠷᠡ ᠪᠦᠷᠢ ᠮᠡᠳᠡᠳᠡᠭ ᠪᠣᠯᠪᠠᠤ!
ᠪᠡᠯᠭᠡ ᠶ᠋ᠢᠨ ᠬᠥᠮᠦᠵᠢᠯ ᠬᠡᠮᠡᠬᠦ ᠡᠨᠡ ᠣᠢᠯᠠᠭᠠᠯᠲᠠ ᠪᠣᠯ《ᠬᠡᠦᠬᠡᠳ ᠬᠠᠮᠢᠭᠠ ᠠ᠋ᠴᠠ ᠭᠠᠷᠳᠠᠭ ᠪᠣᠢ?》 ᠭᠡᠳᠡᠭ ᠠᠰᠠᠭᠤᠯᠲᠠ ᠠ᠋ᠴᠠ ᠬᠠᠪᠢ ᠦᠭᠡᠢ ᠥᠷᠭᠡᠨ ᠬᠦᠷᠢᠶᠡ ᠲᠡᠢ ᠶᠦᠮ᠃
ᠬᠡᠦᠬᠡᠳ ᠡᠴᠢᠭᠡ ᠡᠬᠡ ᠡᠴᠡ ᠪᠡᠨ ᠶᠠᠭᠤ ᠴᠦ᠍ ᠠᠰᠠᠭᠤᠵᠤ ᠰᠣᠨᠢᠷᠬᠠᠵᠤ ᠪᠣᠯᠤᠨᠠ᠃ ᠬᠡᠦᠬᠡᠳ ᠦ᠋ᠨ ᠠᠰᠠᠭᠤᠵᠤ ᠪᠠᠢᠭᠠ ᠠᠰᠠᠭᠤᠯᠲᠠ ᠪᠣᠯᠭᠠᠨ ᠴᠠᠭᠠᠨᠠ ᠪᠠᠨ ᠪᠡᠯᠭᠡ ᠶ᠋ᠢᠨ ᠰᠣᠨᠢᠷᠬᠠᠯ ᠠᠭᠤᠯᠳᠠᠭ ᠦᠭᠡᠢ᠃ ᠲᠡᠳᠡ ᠵᠥᠪᠬᠡᠨ ᠰᠣᠨᠢᠭᠤᠴᠢ ᠵᠠᠩ ᠠ᠋ᠴᠠ ᠪᠠᠨ ᠯᠠ ᠢᠨᠢᠶᠡᠳᠦᠮᠲᠡᠢ ᠠᠰᠠᠭᠤᠯᠲᠠ ᠠᠰᠠᠭᠤᠳᠠᠭ᠃ ᠪᠠᠭᠠ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠦ᠋ᠨ ᠲᠠᠯᠪᠢᠳᠠᠭ ᠠᠰᠠᠭᠤᠯᠲᠠ ᠳ᠋ᠤ᠌(ᠪᠢ ᠬᠠᠮᠢᠭᠠ ᠠ᠋ᠴᠠ ᠭᠠᠷᠤᠭᠰᠠᠨ ᠶᠤᠮ ᠪᠣᠢ? ᠪᠢ ᠬᠠᠮᠢᠭᠠ ᠪᠠᠢᠵᠤ ᠪᠠᠢᠭᠠᠳ ᠭᠠᠷᠤᠭᠰᠠᠨ ᠶᠤᠮ ᠪᠣᠢ? ᠪᠢ ᠶᠠᠭᠠᠬᠢᠭᠠᠳ ᠠᠪᠤ ᠰᠢᠭ᠋ ᠰᠠᠬᠠᠯ ᠦᠭᠡᠢ ᠶᠦᠮ ᠪᠣᠢ ᠭᠡᠬᠦ ᠮᠡᠲᠦ) ᠲᠣᠬᠢᠷᠠᠭᠰᠠᠨ ᠬᠠᠷᠢᠭᠤᠯᠲᠠ ᠥᠭᠬᠦ ᠦᠭᠡᠢ ᠪᠣᠯ ᠬᠡᠦᠬᠡᠳ ᠦ᠋ᠨ ᠰᠣᠨᠢᠭᠤᠴᠢ ᠵᠠᠩ ᠢ᠋ ᠤᠯᠠᠮ ᠭᠡᠵᠢᠭᠡᠳᠡᠵᠦ ᠡᠨᠡ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠡᠦᠬᠡᠳ ᠦ᠋ᠨ ᠬᠠᠮᠤᠭ ᠠᠩᠬᠠᠷᠤᠯ ᠲᠥᠪᠯᠡᠷᠡᠵᠦ ᠮᠡᠳᠡᠨᠡ᠃
ᠵᠠᠷᠢᠮ ᠡᠴᠢᠭᠡ ᠡᠬᠡ《ᠴᠢ ᠶᠠᠭᠠᠬᠢᠭᠰᠠᠨ ᠬᠡᠷᠡᠭ ᠲᠦ᠍ ᠳᠤᠷᠠᠲᠠᠢ ᠬᠡᠦᠬᠡᠳ ᠪᠣᠢ? ᠴᠢ ᠡᠨᠡ ᠲᠤᠬᠠᠢ ᠮᠡᠳᠡᠬᠦ ᠪᠣᠯᠤᠭᠠ ᠦᠭᠡᠢ!》 ᠭᠡᠵᠦ ᠬᠠᠷᠢᠭᠤᠯᠬᠤ ᠨᠢ ᠪᠣᠢ᠃ ᠢᠩᠭᠢᠵᠦ ᠬᠡᠷᠬᠢᠪᠡᠴᠦ ᠪᠣᠯᠬᠤ ᠦᠭᠡᠢ᠃ ᠬᠡᠦᠬᠡᠳ ᠲᠦ᠍ ᠶᠠᠭᠤᠮᠠ ᠪᠣᠯᠭᠠᠨ ᠰᠣᠨᠢᠨ ᠬᠠᠴᠢᠨ᠃ ᠡᠭᠦᠯᠡ ᠶᠠᠭᠠᠬᠢᠭᠠᠳ ᠭᠠᠷᠳᠠᠭ᠂ ᠰᠢᠬᠢᠷ ᠶᠠᠭᠠᠬᠢᠭᠠᠳ ᠭᠣᠶᠣ ᠠᠮᠲᠠᠲᠠᠢ ᠪᠠᠢᠳᠠᠭ ᠶᠤᠮ ᠭᠡᠬᠦ ᠮᠡᠲᠦ ᠪᠡᠷ ᠠᠰᠠᠭᠤᠯᠲᠠ ᠪᠣᠯᠭᠠᠨ ᠵᠥᠪᠬᠡᠨ ᠰᠣᠨᠢᠷᠬᠠᠯ ᠤ᠋ᠨ ᠲᠡᠳᠦᠢ ᠵᠣᠷᠢᠯᠭᠠ ᠲᠠᠢ ᠪᠠᠢᠳᠠᠭ᠃
ᠬᠠᠷᠢᠭᠤᠯᠲᠠ ᠬᠠᠮᠤᠭ ᠤ᠋ᠨ ᠡᠩ ᠦ᠋ᠨ ᠲᠣᠪᠴᠢ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠵᠢᠰᠢᠶᠠ ᠨᠢ᠄《ᠪᠢ ᠬᠦᠦ ᠪᠡᠨ ᠲᠡᠷᠡ ᠪᠠᠢᠰᠢᠩ ᠳ᠋ᠤ᠌ ᠠᠮᠤᠷᠵᠢᠬᠤ ᠭᠠᠵᠠᠷ ᠲᠤ᠌ ᠲᠦᠷᠦᠭᠦᠯᠦᠭᠡᠳ ᠢᠷᠡᠭᠰᠡᠨ》 ᠭᠡᠬᠦ ᠳ᠋ᠦ᠍ ᠬᠡᠦᠬᠡᠳ ᠲᠦ᠍ ᠬᠠᠩᠭᠠᠯᠲᠠᠢ ᠬᠠᠷᠢᠭᠤᠯᠲᠠ ᠪᠣᠯᠬᠤ ᠵᠢᠰᠢᠶᠠ ᠲᠠᠢ᠃ ᠡᠴᠢᠭᠡ ᠡᠬᠡᠴᠦᠳ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠰᠡᠷᠭᠦ ᠬᠦᠢᠰᠦ ᠶ᠋ᠢᠨ ᠬᠥᠮᠦᠨ ᠢ᠋ᠶ᠋ᠡᠨ ᠬᠦᠨᠳᠦᠳᠬᠡᠬᠦ ᠦᠵᠡᠯ ᠢ᠋ᠶ᠋ᠡᠷ ᠬᠥᠮᠦᠵᠢᠭᠦᠯᠬᠦ ᠶᠣᠰᠣᠲᠠᠢ᠃ ᠢᠯᠠᠩᠭᠤᠶᠠ ᠡᠷᠡᠭᠲᠡᠢ ᠬᠡᠦᠬᠡᠳ ᠢ᠋ ᠪᠦᠷ ᠪᠠᠭᠠ ᠠ᠋ᠴᠠ ᠨᠢ ᠥᠬᠢᠳ ᠢ᠋ ᠬᠦᠨᠳᠦᠳᠬᠡᠵᠦ ᠰᠤᠷᠭᠠᠬᠤ ᠨᠢ ᠴᠢᠬᠤᠯᠠ᠃
ᠡᠴᠢᠭᠡ ᠡᠬᠡᠴᠦᠳ ᠦ᠋ᠨ ᠪᠠᠰᠠ ᠨᠢᠭᠡ ᠠᠩᠬᠠᠷᠬᠤ ᠵᠦᠢᠯ ᠪᠣᠯ ᠪᠢᠴᠢᠬᠠᠨ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠤᠨᠲᠠᠭᠠ ᠰᠡᠷᠡᠭᠦᠨ ᠦ᠌ ᠵᠠᠪᠰᠠᠷ ᠡᠭᠦᠯᠡ ᠪᠣᠷᠣᠭᠠᠨ ᠤ᠋ ᠠᠵᠢᠯ ᠢᠯᠡ ᠵᠠᠳᠠᠭᠠᠢ ᠬᠢᠬᠦ ᠶ᠋ᠢ ᠴᠡᠭᠡᠷᠯᠡᠬᠦ ᠶᠠᠪᠤᠳᠠᠯ ᠶᠤᠮ᠃ ᠡᠴᠢᠭᠡ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠢᠮᠦ ᠶᠠᠪᠤᠳᠠᠯ ᠢ᠋ ᠬᠡᠦᠬᠡᠳ ᠬᠥᠮᠦᠨ ᠬᠡᠵᠢᠶᠡ ᠴᠦ᠍ ᠬᠠᠷᠠᠬᠤ ᠶᠣᠰᠣ ᠦᠭᠡᠢ᠃ ᠬᠠᠷᠢᠨ ᠲᠡᠳᠡ ᠡᠴᠢᠭᠡ ᠡᠬᠡ ᠪᠡᠨ ᠬᠣᠭᠣᠷᠣᠨᠳᠣ ᠪᠠᠨ ᠰᠠᠢᠨ ᠪᠠᠢᠳᠠᠭ ᠢ᠋ ᠮᠡᠳᠡᠬᠦ ᠳ᠋ᠦ᠍ ᠪᠣᠯᠤᠭᠠ᠃ ᠥᠬᠢᠳ ᠬᠥᠪᠡᠭᠦᠳ ᠢ᠋ ᠲᠤᠰ ᠲᠤᠰ ᠲᠤᠨᠢ ᠪᠡᠶᠡ ᠵᠠᠰᠠᠭᠤᠯᠵᠤ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠬᠡᠦᠬᠡᠳ ᠦ᠋ᠳ ᠲᠣᠭᠯᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠴᠦ᠍ ᠶᠤᠮ ᠤᠤ᠂ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠪᠠᠢᠬᠤ ᠳ᠋ᠠᠭᠠᠨ ᠬᠦᠢᠰᠦᠨ ᠦ᠌ ᠪᠡᠨ ᠢᠯᠭᠠᠪᠤᠷᠢ ᠶ᠋ᠢ ᠠᠩᠵᠠᠭᠠᠷᠠᠭ ᠦᠭᠡᠢ ᠪᠣᠯ ᠶᠠᠭ ᠰᠢᠭᠡᠬᠦ ᠳ᠋ᠡᠭᠡᠨ ᠬᠦᠷᠬᠦ ᠳ᠋ᠦ᠍《ᠳᠠᠯᠳᠠ ᠡᠷᠬᠡᠲᠡᠨ》 ᠢ᠋ᠶ᠋ᠡᠨ ᠬᠠᠷᠠᠨᠠ᠃ ᠡᠨᠡ ᠨᠢ ᠬᠡᠦᠬᠡᠳ ᠲᠦ᠍ ᠪᠤᠷᠤᠭᠤ ᠰᠣᠨᠢᠷᠬᠠᠯ ᠲᠦᠷᠦᠭᠦᠯᠡᠵᠦ ᠮᠡᠳᠡᠬᠦ ᠶ᠋ᠢ ᠠᠩᠬᠠᠷ᠃ ᠬᠡᠦᠬᠡᠳ ᠥᠰᠴᠦ ᠲᠣᠮᠣᠷᠠᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠥᠭᠡᠷᠡ ᠣᠯᠠᠨ ᠠᠰᠠᠭᠤᠳᠠᠯ ᠲᠤᠯᠭᠠᠷᠠᠨᠠ᠃ ᠲᠡᠢᠮᠦ ᠡᠴᠡ ᠥᠬᠢᠳ ᠬᠥᠪᠡᠭᠦᠳ ᠲᠦ᠍ ᠲᠡᠳᠡᠨ ᠦ᠌ ᠪᠡᠶᠡ ᠮᠠᠬᠠᠪᠣᠳ ᠲᠤ᠌ ᠭᠠᠷᠬᠤ ᠬᠤᠪᠢᠷᠠᠯ ᠥᠭᠡᠷᠡᠴᠢᠯᠡᠯᠲᠡ ᠶ᠋ᠢᠨ ᠲᠠᠯᠠ ᠪᠠᠷ ᠤᠷᠢᠳᠤ ᠠ᠋ᠴᠠ ᠨᠢ ᠬᠡᠯᠡᠵᠦ ᠶᠠᠷᠢᠬᠤ ᠬᠡᠷᠡᠭᠲᠡᠢ᠃
ᠤᠳᠠᠬᠤ ᠦᠭᠡᠢ ᠮᠥᠮᠥ ᠨᠢ ᠲᠣᠮᠣᠷᠠᠵᠤ᠂ ᠪᠡᠶᠡ ᠪᠡᠷ ᠨᠢ ᠦᠰᠦ ᠤᠷᠭᠤᠵᠤ᠂ ᠰᠠᠷᠠ ᠶ᠋ᠢᠨ ᠲᠡᠮᠳᠡᠭ ᠦᠵᠡᠭᠳᠡᠬᠦ ᠶ᠋ᠢ ᠥᠬᠢᠳ ᠮᠡᠳᠡᠭᠰᠡᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠬᠥᠪᠡᠭᠦᠳ ᠲᠦ᠍ ᠵᠡᠭᠦᠳᠦ ᠨᠣᠢᠷ ᠤ᠋ᠨ ᠳᠤᠮᠳᠠ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠠᠶᠠᠨᠳᠠᠭᠠᠨ ᠤᠷᠤᠰᠤᠨ ᠭᠠᠷᠬᠤ ᠨᠢ ᠬᠡᠪ ᠦ᠋ᠨ ᠦᠵᠡᠭᠳᠡᠯ᠂ ᠡᠷᠡᠭᠦᠯ ᠥᠰᠴᠦ ᠲᠣᠷᠨᠢᠵᠤ ᠪᠠᠢᠭᠠ ᠶ᠋ᠢᠨ ᠨᠢᠭᠡ ᠢᠯᠡᠷᠡᠯ ᠭᠡᠳᠡᠭ ᠢ᠋ ᠲᠠᠢᠯᠪᠤᠷᠢᠯᠠᠵᠤ ᠥᠭᠭᠦᠭᠰᠡᠨ ᠪᠠᠢᠬᠤ ᠬᠡᠷᠡᠭᠲᠡᠢ᠃᠃ ᠪᠡᠯᠭᠡ ᠶ᠋ᠢᠨ ᠪᠣᠢᠵᠢᠯᠲᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠡᠶᠡ ᠳ᠋ᠦ᠍ ᠭᠠᠷᠴᠤ ᠪᠣᠢ ᠬᠤᠪᠢᠷᠠᠯ ᠥᠭᠡᠷᠡᠴᠢᠯᠡᠯᠲᠡ᠂ ᠥᠬᠢᠳ ᠬᠥᠪᠡᠭᠦᠳ ᠦ᠋ᠨ ᠡᠷᠡᠭᠡᠯᠵᠡᠭᠡ ᠲᠡᠭᠡᠨᠡᠭᠡᠯᠵᠡᠯ᠂ ᠠᠢᠳᠠᠰ ᠲᠥᠷᠥᠭᠦᠯᠬᠦ ᠶᠣᠰᠣ ᠦᠭᠡᠢ᠃ ᠡᠵᠢ ᠨᠢ ᠥᠰᠴᠦ ᠪᠠᠢᠭᠠ ᠥᠬᠢᠨ ᠲᠡᠢ ᠪᠡᠨ᠂ ᠠᠪᠤ ᠨᠢ ᠬᠦᠦ ᠲᠡᠢ ᠪᠡᠨ ᠶᠠᠷᠢᠬᠤ ᠨᠢ ᠳᠡᠭᠡᠷᠡ᠃
ᠪᠡᠯᠭᠡ ᠶ᠋ᠢᠨ ᠪᠣᠢᠵᠢᠯᠲᠠ ᠶ᠋ᠢᠨ ᠦᠶᠡᠰ ᠪᠡᠯᠭᠡ ᠶ᠋ᠢᠨ ᠠᠷᠢᠭᠤᠨ ᠴᠡᠪᠡᠷ ᠢ᠋ ᠪᠠᠲᠤ ᠰᠠᠬᠢᠬᠤ ᠶ᠋ᠢᠨ ᠠᠴᠢ ᠬᠣᠯᠪᠣᠭᠳᠠᠯ ᠢ᠋ ᠲᠠᠢᠯᠪᠤᠷᠢᠯᠠᠨ ᠥᠭᠬᠦ ᠬᠡᠷᠡᠭ ᠲᠡᠢ᠃ ᠢᠩᠭᠢᠪᠡᠯ ᠪᠡᠯᠭᠡ ᠶ᠋ᠢᠨ ᠠᠷᠢᠭᠤᠨ ᠴᠡᠪᠡᠷ ᠢ᠋ ᠮᠠᠭᠤ ᠰᠠᠬᠢᠭᠰᠠᠨ ᠠ᠋ᠴᠠ ᠭᠠᠷᠬᠤ ᠡᠯᠳᠡᠪ ᠬᠦᠨᠳᠦᠷᠡᠯ ᠡᠴᠡ ᠰᠡᠷᠭᠡᠢᠯᠡᠬᠦ ᠲᠡᠳᠦᠢ ᠦᠭᠡᠢ ᠴᠢᠨᠠᠭᠰᠢ ᠴᠢᠨᠠᠭᠰᠢᠳᠠ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤᠨᠢ ᠶᠡᠬᠡ ᠬᠡᠷᠡᠭ ᠪᠣᠯᠤᠨᠠ᠃ ᠴᠡᠪᠡᠷ ᠴᠡᠮᠴᠡᠭᠡᠷ ᠪᠠᠢᠳᠠᠯ ᠳ᠋ᠤ᠌ ᠰᠤᠷᠴᠢᠬᠠᠭᠰᠠᠨ ᠥᠬᠢᠳ ᠬᠥᠪᠡᠭᠦᠳ ᠬᠥᠩᠭᠡᠮᠰᠦᠭ ᠵᠠᠩ ᠬᠡᠵᠢᠶᠡ ᠴᠦ᠍ ᠭᠠᠷᠭᠠᠬᠤ ᠦᠭᠡᠢ᠃ ᠢᠩᠭᠢᠬᠦᠯᠡᠷ ᠪᠡᠯᠭᠡ ᠡᠷᠬᠡᠲᠡᠨ ᠦ᠌ ᠠᠷᠢᠭᠤᠨ ᠴᠡᠪᠡᠷ ᠢ᠋ ᠰᠠᠬᠢᠵᠤ ᠰᠤᠷᠭᠠᠬᠤ ᠨᠢ ᠵᠠᠩ ᠰᠤᠷᠲᠠᠬᠤᠨ ᠤ᠋ ᠴᠦ᠍ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ᠃ ᠥᠰᠪᠥᠷᠢ ᠨᠠᠰᠤᠨ ᠤ᠋ ᠥᠬᠢᠳ ᠬᠥᠪᠡᠭᠦᠳ ᠮᠠᠰᠢ ᠡᠮᠵᠡᠭᠬᠡᠨ ᠤᠯᠤᠰ ᠪᠠᠢᠳᠠᠭ᠃ ᠡᠭᠡᠴᠢ ᠨᠢ ᠨᠢᠭᠡ ᠬᠥᠪᠡᠭᠦᠨ ᠳ᠋ᠦ᠍ ᠰᠠᠢᠨ ᠪᠣᠯᠵᠤ ᠲᠡᠭᠦᠨ ᠳ᠋ᠦ᠍ ᠪᠢᠴᠢᠭ᠍ᠰᠡᠨ ᠵᠠᠬᠢᠶᠠ ᠶ᠋ᠢ ᠳᠡᠭᠦᠦ ᠨᠢ ᠰᠠᠨᠠᠮᠰᠠᠷ ᠦᠭᠡᠢ ᠣᠯᠵᠤ ᠠᠪᠤᠭᠠᠳ ᠤᠴᠢᠷ ᠦᠭᠡᠢ ᠡᠯᠡᠭᠯᠡᠨ ᠱᠣᠣᠯᠠᠵᠤ ᠬᠡᠦᠬᠡᠳ ᠦ᠋ᠳ ᠲᠦ᠍ ᠲᠠᠷᠠᠭᠠᠨᠠ ᠭᠡᠰᠡᠨ ᠡᠴᠡ ᠪᠣᠯᠵᠤ5 ᠳᠠᠪᠬᠤᠷ ᠲᠠᠭᠲᠤᠨ ᠠ᠋ᠴᠠ ᠦᠰᠦᠷᠴᠦ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠡᠷᠡᠮᠳᠡᠭ ᠵᠡᠷᠡᠮᠳᠡᠭ ᠪᠣᠯᠤᠭᠰᠠᠨ ᠭᠠᠰᠢᠭᠤᠨ ᠰᠤᠷᠭᠠᠮᠵᠢ ᠲᠠᠢ ᠶᠠᠪᠤᠳᠠᠯ ᠪᠣᠢ᠃ ᠡᠢᠮᠦ ᠡᠴᠡ ᠥᠬᠢᠳ ᠬᠥᠪᠡᠭᠦᠳ ᠦ᠋ᠨ ᠦᠶᠡᠷᠬᠡᠯ᠂ ᠨᠥᠬᠥᠷᠯᠡᠯ ᠢ᠋ ᠭᠤᠲᠤᠭᠠᠵᠤ ᠬᠡᠷᠬᠢᠪᠡᠴᠦ ᠪᠣᠯᠬᠤ ᠦᠭᠡᠢ᠃ ᠢᠩᠭᠢᠪᠡᠯ ᠲᠡᠳᠡᠨ ᠦ᠌ ᠰᠡᠳᠬᠢᠯ ᠢ᠋ ᠶᠠᠭᠤ ᠶᠠᠭᠤᠨ ᠠ᠋ᠴᠠ ᠴᠦ᠍ ᠬᠦᠴᠦᠲᠡᠢ ᠨᠥᠯᠥᠭᠡᠯᠡᠵᠦ ᠶᠠᠭᠤᠨ ᠳ᠋ᠤ᠌ ᠴᠦ᠍ ᠬᠦᠷᠭᠡᠵᠦ ᠮᠡᠳᠡᠨᠡ᠃ ᠥᠰᠪᠥᠷᠢ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠲᠣᠮᠣᠴᠤᠳ ᠬᠣᠭᠣᠷᠣᠨᠳᠣᠬᠢ ᠨᠠᠨᠳᠢᠨ ᠬᠠᠷᠢᠴᠠᠭᠠ ᠶ᠋ᠢ ᠬᠡᠲᠦᠷᠬᠡᠢ ᠢᠯᠠᠨ ᠳᠠᠯᠠᠨ ᠦᠭᠡᠢ ᠦᠵᠡᠭᠦᠯᠦᠭᠰᠡᠨ ᠺᠢᠨᠣ᠋ ᠦᠵᠡᠬᠦ᠂ ᠨᠣᠮ ᠤᠩᠰᠢᠬᠤ ᠶ᠋ᠢ ᠬᠣᠷᠢᠭᠯᠠᠪᠠᠯ ᠵᠣᠬᠢᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠡᠳᠡᠭᠡᠷ ᠦ᠋ᠨ ᠤᠴᠠᠷᠠᠭᠤᠯᠬᠤ ᠬᠣᠣᠷ ᠤᠷᠰᠢᠭ ᠨᠢ ᠶᠠᠭᠤ ᠦᠵᠡᠭᠦᠯᠵᠦ ᠪᠠᠢᠭᠠ ᠠ᠋ᠴᠠ ᠪᠤᠰᠤ᠂ ᠬᠠᠷᠢᠨ ᠶᠠᠭᠠᠬᠢᠵᠤ᠂ ᠶᠠᠮᠠᠷ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠦᠯᠢᠶᠡᠨ ᠠᠪᠴᠤ ᠪᠠᠢᠭᠠ ᠠ᠋ᠴᠠ ᠯᠠ ᠰᠢᠯᠲᠠᠭᠠᠯᠠᠨᠠ᠃ ᠡᠨᠡ ᠨᠢ ᠶᠠᠭᠤᠨ ᠤ᠋ ᠲᠡᠷᠢᠭᠦᠨ ᠬᠥᠮᠦᠵᠢᠯ ᠡᠴᠡ ᠯᠡ ᠪᠣᠯᠤᠨᠠ ᠭᠡᠰᠡᠨ ᠦᠭᠡ᠃ ᠬᠡᠷᠪᠡ ᠥᠬᠢᠳ ᠬᠥᠪᠡᠭᠦᠳ ᠲᠦ᠍ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠤ᠋ ᠵᠣᠬᠢᠬᠤ ᠵᠥᠪ ᠬᠥᠮᠦᠵᠢᠯ ᠣᠯᠭᠣᠵᠤ ᠴᠢᠳᠠᠭᠰᠠᠨ ᠪᠣᠯ ᠲᠡᠢᠮᠦ ᠴᠦ᠍ ᠶᠡᠬᠡ ᠰᠦᠢᠳ ᠲᠡᠢ ᠶᠠᠭᠤᠮᠠ ᠪᠣᠯᠬᠤ ᠦᠭᠡᠢ᠃
ᠬᠡᠷᠪᠡ ᠢᠩᠭᠢᠵᠦ ᠴᠢᠳᠠᠭᠠ ᠦᠭᠡᠢ ᠪᠣᠯ ᠬᠡᠦᠬᠡᠳ ᠲᠦ᠍ ᠬᠦᠴᠦᠲᠡᠢ ᠨᠥᠯᠥᠭᠡᠯᠡᠵᠦ᠂ ᠪᠤᠷᠤᠭᠤ ᠵᠠᠮ ᠳ᠋ᠤ᠌ ᠲᠡᠳᠡᠨ ᠣᠷᠣᠭᠤᠯᠵᠤ ᠮᠡᠳᠡᠨᠡ᠃ ᠬᠥᠮᠦᠨ ᠪᠣᠯᠭᠠᠨ ᠪᠠᠭᠰᠢ ᠪᠣᠯᠬᠤ ᠦᠭᠡᠢ᠂ ᠬᠠᠷᠢᠨ ᠬᠥᠮᠦᠨ ᠪᠣᠯᠭᠠᠨ ᠡᠴᠢᠭᠡ ᠡᠬᠡ ᠪᠣᠯᠤᠨᠠ ᠰᠢᠦ ᠳᠡ᠃ ᠡᠢᠮᠦ ᠡᠴᠡ ᠬᠥᠮᠦᠨ ᠪᠣᠯᠭᠠᠨ ᠤ᠋ ᠡᠵᠡᠮᠰᠢᠪᠡᠯ ᠵᠣᠬᠢᠬᠤ ᠴᠢᠬᠤᠯᠠ ᠬᠥᠮᠦᠵᠢᠯ ᠪᠣᠯ ᠪᠡᠯᠭᠡ ᠶ᠋ᠢᠨ ᠬᠥᠮᠦᠵᠢᠯ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠮᠥᠨ᠃ ᠪᠢᠳᠡᠨ ᠦ᠌ ᠦᠶᠡ ᠬᠡᠦᠬᠡᠳ ᠡᠳᠦᠷ ᠬᠣᠨᠣᠭ ᠢ᠋ᠶ᠋ᠠᠷ ᠥᠰᠴᠦ ᠥᠨᠳᠡᠢᠵᠦ ᠪᠠᠢᠨᠠ᠃ ᠥᠰᠴᠦ ᠲᠣᠷᠨᠢᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠪᠡᠶᠡ ᠣᠷᠭᠠᠨᠢᠰᠮ ᠳ᠋ᠤᠨᠢ ᠥᠭᠡᠷᠡᠴᠢᠯᠡᠯᠲᠡ ᠣᠷᠣᠵᠤ ᠬᠥᠮᠦᠨ ᠳ᠋ᠦ᠍ ᠶᠠᠭᠤ ᠪᠠᠢᠬᠤ ᠶᠣᠰᠣᠲᠠᠢ ᠪᠣᠢ ᠲᠡᠷᠡ ᠪᠦᠭᠦᠳᠡ ᠶ᠋ᠢ ᠪᠠᠢᠭᠠᠯᠢ ᠡᠬᠡ ᠬᠠᠷᠠᠮ ᠦᠭᠡᠢ ᠬᠠᠢᠷᠠᠯᠠᠨᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠠᠮᠢᠳᠤᠷᠠᠯ ᠤ᠋ᠨ ᠠᠯᠬᠤᠮ ᠪᠦᠷᠢ ᠳ᠋ᠦ᠍ ᠦᠯᠦ ᠮᠡᠳᠡᠬᠦ ᠠᠰᠠᠭᠤᠯᠲᠠ ᠪᠣᠯᠤᠨ ᠡᠮᠦᠨᠡ ᠨᠢ ᠲᠤᠯᠭᠠᠷᠠᠬᠤ ᠪᠣᠢ᠃ ᠭᠡᠲᠡᠯᠡ ᠬᠠᠷᠢᠭᠤᠯᠲᠠ ᠪᠣᠯᠭᠠᠨ ᠢ᠋ ᠭᠤᠳᠤᠮᠵᠢᠨ ᠠ᠋ᠴᠠ᠂ ᠳᠠᠮ ᠶᠠᠷᠢᠶᠠᠨ ᠠ᠋ᠴᠠ᠂ ᠥᠪᠡᠷ ᠦ᠋ᠨ ᠢᠵᠢᠯᠢ ᠨᠥᠬᠥᠳ ᠡᠴᠡ ᠪᠡᠨ ᠡᠷᠢᠵᠦ ᠶᠠᠪᠤᠬᠤ ᠶᠤᠮ ᠭᠡᠵᠦ ᠤᠤ! ᠢᠩᠭᠢᠭᠡᠳ ᠬᠠᠷᠢᠭᠤᠯᠲᠠ ᠣᠯᠳᠠᠬᠤ ᠦᠭᠡᠢ ᠪᠡᠷ ᠮᠤᠬᠤᠷᠳᠠᠮᠠᠯ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠭᠠᠳ ᠢᠷᠡᠬᠦ ᠪᠡᠷ ᠶᠣᠰᠣᠲᠠᠢ ᠯᠠ ᠥᠨᠥᠬᠢ《ᠪᠣᠷᠣ ᠵᠢᠷᠦᠬᠡ ᠪᠡᠷ ᠢ᠋ᠶ᠋ᠡᠨ》 ᠠᠮᠢᠳᠤᠷᠠᠨᠠ ᠭᠡᠳᠡᠭ ᠪᠣᠯᠤᠨᠠ ᠳᠠ᠃ ᠡᠨᠡ《ᠪᠣᠷᠣ ᠵᠢᠷᠦᠬᠡ》 ᠡᠴᠦᠰ ᠲᠡᠭᠡᠨ ᠶᠠᠭᠤᠨ ᠳ᠋ᠤ᠌ ᠬᠦᠷᠭᠡᠳᠡᠭ ᠢ᠋ ᠨᠤᠲᠠᠯᠠᠭᠰᠠᠨ ᠭᠠᠰᠢᠭᠤᠨ ᠲᠤᠷᠰᠢᠯᠭᠠ ᠪᠢᠳᠡᠨ ᠳ᠋ᠦ᠍ ᠪᠠᠭᠠᠳᠠᠭᠠ ᠦᠭᠡᠢ᠃ ᠪᠢᠳᠡ1990 ᠣᠨ ᠤ᠋4 ᠳ᠋ᠦ᠍ᠭᠡᠷ ᠰᠠᠷᠠ ᠳ᠋ᠤ᠌ ᠲᠠᠷᠢᠳᠤ ᠳ᠋ᠠᠬᠢ ᠬᠥᠮᠦᠵᠢᠯ ᠬᠥᠳᠡᠯᠮᠦᠷᠢ ᠶ᠋ᠢᠨ ᠬᠡᠦᠬᠡᠳ ᠦ᠋ᠨ ᠺᠣᠯᠣᠨᠢ ᠶ᠋ᠢᠨ ᠶᠠᠯᠠ ᠡᠳ᠋ᠯᠡᠵᠦ ᠪᠠᠢᠭᠠ ᠬᠡᠦᠬᠡᠳ ᠦ᠋ᠳ ᠢ᠋ ᠰᠤᠳᠤᠯᠵᠤ ᠦᠵᠡᠬᠦ ᠳ᠋ᠦ᠍ ᠲᠡᠳᠡᠨ ᠦ᠌1/3 ᠨᠢ ᠬᠦᠴᠦᠨ ᠦ᠌ ᠬᠡᠷᠡᠭᠲᠡᠨ ᠪᠠᠢᠭᠰᠠᠨ ᠶᠤᠮ᠃ ᠲᠡᠳᠡ ᠶᠡᠬᠡᠪᠴᠢᠯᠡᠨ《ᠶᠠᠮᠠᠷ ᠬᠦ᠌ ᠶᠠᠭᠤᠮᠠ》 ᠪᠠᠢᠳᠠᠭ ᠢ᠋ ᠦᠵᠡᠬᠦ ᠪᠡᠷ ᠱᠣᠬᠣᠭᠣᠷᠠᠭᠰᠠᠨ ᠭᠡᠵᠦ ᠥᠪᠡᠷᠰᠡᠳ ᠦ᠋ᠨ ᠦᠢᠯᠡᠳᠦᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠨ ᠲᠠᠢᠯᠪᠤᠷᠢᠯᠠᠵᠤ ᠪᠠᠢᠪᠠ᠃ ᠦᠨᠡᠨ ᠪᠠᠢᠳᠠᠯ ᠡᠢᠮᠦ ᠯᠡ ᠪᠠᠢᠭᠠ ᠶ᠋ᠢ ᠪᠢᠳᠡ ᠮᠡᠳᠡᠭᠰᠡᠨ᠃ ᠡᠭᠦᠨ ᠡᠴᠡ ᠦᠵᠡᠪᠡᠯ᠂ ᠲᠡᠳᠡ ᠰᠢᠭᠦᠭᠴᠢ ᠶ᠋ᠢᠨ ᠶᠠᠯᠠᠳᠠᠯᠭᠠ ᠪᠠᠷ ᠬᠠᠤᠯᠢ ᠡᠷᠬᠡ ᠶ᠋ᠢᠨ ᠮᠡᠳᠡᠯᠭᠡ ᠨᠢᠮᠭᠡᠨ ᠳ᠋ᠡᠭᠡᠨ ᠪᠢᠰᠢ᠂ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠤ᠋ ᠬᠥᠮᠦᠵᠢᠯ ᠮᠠᠭᠤ ᠠ᠋ᠴᠠ ᠭᠡᠮᠲᠦ ᠬᠡᠷᠡᠭ ᠦᠢᠯᠡᠳᠬᠦ ᠦᠨᠳᠦᠰᠦᠨ ᠨᠥᠬᠥᠴᠡᠯ ᠰᠢᠯᠲᠠᠭᠠᠨ ᠨᠢ ᠪᠣᠯᠳᠠᠭ ᠶᠤᠮ ᠪᠢᠰᠢ ᠪᠠᠢᠭᠠ ᠭᠡᠰᠡᠨ ᠪᠣᠳᠣᠯ ᠲᠥᠷᠥᠭᠰᠡᠨ ᠶᠦᠮ᠃ ᠬᠡᠷᠪᠡ ᠡᠨᠡ ᠲᠤᠬᠠᠢ ᠮᠡᠳᠡᠵᠦ ᠪᠠᠢᠭᠰᠠᠨ᠂ ᠵᠢᠭᠠᠯᠭᠠᠭᠰᠠᠨ ᠪᠣᠯ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ— ᠡᠷᠬᠢᠮ ᠶᠣᠰᠣ ᠭᠡᠳᠡᠭ ᠢ᠋ ᠣᠢᠯᠠᠭᠠᠬᠤ ᠪᠠᠢᠭᠰᠠᠨ ᠪᠣᠯ ᠪᠡᠯᠭᠡ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠨᠠᠭᠠᠳᠤ ᠵᠠᠬᠠ ᠶ᠋ᠢᠨ ᠭᠡᠮ ᠬᠡᠮᠵᠢᠶᠡ ᠶ᠋ᠢ ᠬᠡᠳᠦᠢᠨ ᠮᠡᠳᠡᠵᠦ᠂ ᠥᠪᠡᠷ ᠢ᠋ ᠪᠡᠨ ᠵᠠᠬᠢᠷᠴᠤ᠂ ᠤᠳᠤᠷᠢᠳᠬᠤ ᠴᠢᠳᠠᠪᠤᠷᠢ ᠲᠠᠢ ᠢᠷᠭᠡᠨ ᠪᠣᠯᠬᠤ ᠪᠠᠢᠭᠰᠠᠨ ᠪᠤᠰᠤ ᠤᠤ᠃ ᠢᠩᠭᠢᠬᠦᠯᠡᠷ ᠪᠢᠳᠡ ᠣᠯᠠᠨᠲᠠ ᠰᠣᠨᠣᠰᠴᠤ᠂ ᠪᠠᠷᠤᠭ ᠴᠢᠬᠢ ᠲᠦᠭᠵᠢᠷᠡᠵᠦ ᠣᠯᠢᠭ ᠪᠣᠯᠤᠭᠰᠠᠨ ᠶᠣᠰᠣ ᠰᠤᠷᠲᠠᠬᠤᠨ ᠤ᠋᠂ ᠪᠡᠶᠡ ᠪᠢᠯᠳᠠᠷ ᠤ᠋ᠨ᠂ ᠬᠥᠳᠡᠯᠮᠦᠷᠢ ᠶ᠋ᠢᠨ᠂ ᠭᠤᠸᠠ ᠵᠦᠢ ᠶ᠋ᠢᠨ ᠬᠥᠮᠦᠵᠢᠯ ᠡᠴᠡ ᠢᠯᠡᠭᠦᠦ ᠴᠦ᠍ ᠪᠢᠰᠢ ᠶᠦᠮ ᠭᠡᠬᠦ ᠳ᠋ᠦ᠍ ᠶᠠᠭᠠᠬᠢᠪᠠᠴᠤ ᠳᠤᠲᠠᠭᠤ ᠦᠭᠡᠢ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠪᠡᠯᠭᠡ ᠶ᠋ᠢᠨ ᠬᠥᠮᠦᠵᠢᠯ ᠢ᠋ ᠦᠷᠡ ᠬᠡᠦᠬᠡᠳ ᠲᠡᠭᠡᠨ ᠣᠯᠭᠣᠭᠠᠳ ᠵᠣᠭᠰᠣᠬᠤ ᠦᠭᠡᠢ ᠡᠴᠢᠭᠡ ᠡᠬᠡᠴᠦᠳ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠴᠦ᠍ ᠰᠠᠢᠨ ᠮᠡᠳᠡᠬᠦ ᠬᠡᠷᠡᠭᠲᠡᠢ ᠶ᠋ᠢ ᠬᠠᠷᠠᠭᠤᠯᠵᠤ ᠪᠠᠢᠭᠠ ᠶᠤᠮ᠃