ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠊᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠵᠢᠷᠭᠤᠭᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 6
561ᠪᠠᠭᠰᠢ ᠶᠢᠨ ᠠᠢᠯᠠᠳᠬᠠᠪᠤᠷᠢ
— ᠥᠨᠥᠬᠢ ᠡᠪᠡᠳᠴᠢᠲᠡᠨ ᠬᠥᠮᠦᠨ ᠮᠠᠨᠢ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠪᠢᠯᠡ ᠳᠠ᠂ ᠭᠡᠬᠦ ᠳ᠋ᠦ᠍ ᠨᠢ᠄
— ᠪᠠᠭᠰᠢ ᠠ᠋᠂ ᠥᠴᠥᠭᠡᠳᠦᠷ ᠣᠷᠣᠢ ᠪᠣᠯᠲᠠᠯᠠ ᠠᠮᠢᠰᠬᠤᠯ ᠨᠢ ᠰᠤᠯᠠ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠪᠠᠢᠭᠰᠠᠨ ᠳᠠ ᠭᠡᠳ ᠨᠠᠮᠰᠠᠷᠠᠢ᠄
— ᠲᠠ ᠨᠣᠮ ᠵᠢᠭᠠᠬᠤ ᠤᠤ? ᠭᠡᠳᠡᠭ ᠦᠭᠡ ᠶ᠋ᠢ ᠠᠮᠠᠨ ᠠ᠋ᠴᠠ ᠪᠠᠨ ᠠᠷᠠᠢ ᠭᠡᠵᠦ ᠭᠠᠷᠭᠠᠵᠤ ᠬᠡᠯᠡᠪᠡ᠃ ᠪᠠᠯᠳᠠᠨᠴᠢᠷᠢᠩ ᠳᠤᠭᠤᠯᠠᠭᠠ ᠦᠭᠡᠢ ᠮᠡᠲᠦ ᠠᠶᠠᠭᠠ ᠲᠠᠢ ᠴᠠᠢ ᠤᠷᠤᠭᠤ ᠪᠠᠨ ᠭᠥᠯᠢᠷᠡᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂ ᠰᠠᠨᠠᠭᠠ ᠠᠯᠳᠠᠭᠠᠳ᠄
— ᠦᠭᠡᠢ ᠠ᠋᠂ ᠵᠢᠭᠠᠬᠤ ᠦᠭᠡᠢ᠂ ᠶᠡᠷᠦ ᠨᠢ ᠨᠣᠮ ᠰᠤᠷᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠢᠯᠡ?
ᠨᠠᠮᠰᠠᠷᠠᠢ ᠶ᠋ᠢᠨ ᠰᠡᠳᠬᠢᠯ ᠲᠤᠩ ᠠᠶᠠ ᠦᠭᠡᠢ ᠪᠣᠯᠪᠠ᠃ ᠶᠠᠭᠤᠨ ᠤ᠋ ᠤᠷᠢᠳ ᠥᠪᠡᠷ ᠢ᠋ ᠪᠡᠨ ᠶᠠᠮᠠᠷ ᠨᠢᠭᠡᠨ ᠪᠤᠷᠤᠭᠤ ᠲᠠᠢ ᠶᠠᠭᠤᠮᠠ ᠬᠢᠭᠰᠡᠨ ᠡᠴᠡ ᠡᠢᠮᠦ ᠪᠣᠯᠪᠠ ᠤᠤ ᠭᠡᠵᠦ ᠰᠡᠳᠬᠢᠯ ᠲᠦᠭᠰᠢᠨᠡ᠃ ᠥᠩᠭᠡᠷᠡᠭᠰᠡᠨ ᠬᠡᠷᠡᠭ ᠦ᠋ᠳ ᠢ᠋ ᠡᠷᠭᠢᠴᠡᠭᠦᠯᠦᠨ ᠦᠵᠡᠬᠦ ᠳ᠋ᠦ᠍ ᠨᠢᠭᠡ ᠤᠳᠠᠭᠠ ᠪᠤᠤᠵᠠᠨ ᠤ᠋ ᠮᠢᠬᠠᠨ ᠳ᠋ᠤ᠌ ᠳᠠᠪᠤᠰᠤ ᠮᠠᠷᠲᠠᠭᠰᠠᠨ ᠠ᠋ᠴᠠ ᠥᠭᠡᠷᠡ ᠣᠰᠣᠯ ᠡᠨᠳᠡᠯ ᠭᠠᠷᠤᠭᠠ ᠦᠭᠡᠢ ᠪᠠᠢᠬᠤ ᠪᠥᠭᠡᠳ ᠶᠡᠷᠦ ᠲᠡᠭᠦᠨ ᠡᠴᠡ ᠡᠢᠮᠦ ᠬᠡᠷᠡᠭ ᠪᠣᠯᠤᠮᠠᠷ ᠦᠭᠡᠢ ᠭᠡᠵᠦ ᠪᠣᠳᠣᠪᠠ᠃
— ᠪᠣᠳᠣᠪᠠᠯ ᠴᠢ ᠶᠠᠭᠠᠬᠢᠭᠠᠳ ᠨᠣᠮ ᠦᠵᠡᠬᠦ ᠬᠡᠷᠡᠭ ᠦᠭᠡᠢ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠠ ᠪᠢᠵᠡ ᠳᠡ!
— ᠵᠠ ᠪᠠᠭᠰᠢ ᠠ᠋᠂ ᠲᠡᠢᠮᠦ᠃
— ᠡᠨᠳᠡ ᠰᠤᠭᠤ᠂ ᠤᠴᠢᠷ ᠢ᠋ ᠨᠢ ᠪᠢ ᠶᠠᠷᠢᠶᠠ᠃ ᠨᠠᠮᠰᠠᠷᠠᠢ《ᠵᠠ》 ᠭᠡᠳ ᠳᠣᠣᠷᠠᠬᠠᠨ ᠲᠠᠯᠠ ᠳ᠋ᠤᠨᠢ ᠣᠴᠢᠨ ᠡᠭᠡᠭᠡ ᠯᠡ ᠥᠴᠥᠭᠡᠳᠦᠷ ᠦ᠋ᠨ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠭᠰᠡᠨ ᠰᠢᠭ ᠪᠥᠬᠥᠢᠨ ᠠᠯᠠᠭᠠ ᠬᠠᠪᠰᠤᠷᠤᠨ ᠰᠠᠭᠤᠨᠠ᠃ ᠪᠠᠯᠳᠠᠨᠴᠢᠷᠢᠩ ᠠᠶᠠᠭᠠ ᠲᠠᠢ ᠴᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠢᠪᠬᠠᠷᠤᠤ ᠶ᠋ᠢ ᠶᠡᠬᠡ ᠪᠡᠷ ᠪᠠᠯᠭᠤᠨ《ᠠᠢ ᠰᠢᠭ᠋》 ᠭᠡᠵᠦ ᠠᠶᠠᠭᠠ ᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠨ ᠰᠠᠢᠬᠠᠨ ᠬᠠᠷᠠ ᠰᠠᠬᠠᠯ ᠢ᠋ᠶ᠋ᠠᠨ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠢᠰᠢ ᠨᠢ ᠰᠡᠯᠡᠭᠦᠯᠦᠨ ᠲᠠᠢᠪᠤᠩ ᠢ᠋ᠶ᠋ᠠᠷ ᠢᠯᠢᠭᠡᠳ ᠦᠭᠡ ᠪᠡᠨ ᠬᠡᠯᠡᠪᠡ᠃
— ᠪᠢ ᠠᠷᠪᠠᠨ ᠨᠠᠰᠤᠲᠠᠢ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠡᠭᠡᠭᠡ ᠯᠡ ᠴᠢᠮᠠ ᠰᠢᠭ᠋ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠡᠷᠢᠶᠡᠨ ᠴᠠᠭᠠᠰᠤ ᠨᠤᠭᠤᠳ ᠢ᠋ ᠶᠡᠬᠡ ᠶᠠᠭᠤᠮᠠᠨ ᠳ᠋ᠤ᠌ ᠪᠣᠳᠣᠨ ᠡᠷᠭᠢᠭᠦᠯᠵᠦ ᠡᠬᠢᠯᠡᠭᠰᠡᠨ ᠶᠦᠮ᠃
— ᠵᠠ ᠠ᠋᠃
— ᠪᠠᠭᠰᠢ ᠮᠢᠨᠢ ᠴᠦ᠍ ᠮᠥᠨ ᠣᠳᠣ ᠪᠢ ᠴᠢᠮᠠᠢ᠍ᠢ ᠶᠠᠭᠠᠬᠢᠵᠤ ᠰᠤᠷᠭᠠᠬᠤ ᠭᠡᠵᠦ ᠪᠠᠢᠭᠠ ᠰᠢᠭ᠋ ᠬᠠᠮᠤᠭ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠠᠯᠪᠢᠳᠠᠭ ᠪᠠᠢᠯᠠ᠃
— ᠵᠠ ᠠ᠋᠃ ᠲᠡᠷᠡ ᠪᠣᠯ ᠮᠠᠨᠵᠤ ᠶ᠋ᠢᠨ ᠦᠶᠡ᠃ ᠪᠠᠭᠰᠢ ᠮᠢᠨᠢ ᠳᠠᠯᠠ ᠭᠠᠷᠤᠭᠰᠠᠨ ᠡᠪᠦᠭᠡᠨ᠃ ᠵᠠᠯᠠᠭᠤ ᠳ᠋ᠠᠭᠠᠨ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠪᠠᠢᠭᠠᠳ ᠮᠠᠨᠵᠤ ᠶ᠋ᠢᠨ ᠲᠥᠷᠥ ᠳ᠋ᠦ᠍ ᠬᠡᠷᠡᠭ ᠪᠤᠷᠤᠭᠤᠲᠠᠨ ᠵᠡᠷᠭᠡ ᠵᠢᠩᠰᠡ ᠪᠡᠨ ᠠᠯᠳᠠᠭᠰᠠᠨ ᠬᠥᠮᠦᠨ᠃
— ᠵᠠ ᠠ᠋᠃ ᠮᠠᠨᠵᠤ ᠂ ᠬᠢᠲᠠᠳ᠂ ᠲᠥᠪᠡᠳ᠂ ᠮᠣᠩᠭᠣᠯ ᠳᠥᠷᠪᠡᠨ ᠤᠯᠤᠰ ᠤ᠋ᠨ ᠬᠡᠯᠡ ᠪᠢᠴᠢᠭ ᠲᠦ᠍ ᠨᠡᠪᠲᠡᠷᠬᠡᠢ ᠪᠣᠯᠤᠭᠠᠳ ᠲᠡᠷᠡ ᠤᠯᠤᠰ ᠪᠣᠯᠭᠠᠨ ᠤ᠋ ᠲᠡᠦᠬᠡ ᠱᠠᠰᠲᠢᠷ᠂ ᠭᠦᠨ ᠤᠬᠠᠭᠠᠨ᠂ ᠤᠳᠬᠠ ᠵᠣᠬᠢᠶᠠᠯ ᠤ᠋ᠳ ᠢ᠋ ᠮᠡᠳᠡᠬᠦ ᠶ᠋ᠢᠨ ᠳᠡᠭᠡᠷᠡ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠲᠡᠦᠬᠡ ᠶ᠋ᠢ ᠰᠤᠳᠤᠯᠤᠭᠰᠠᠨ ᠨᠢ ᠭᠣᠴᠣ᠂ ᠬᠣᠶᠠᠷ ᠮᠢᠩᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠾᠦᠩᠨᠦ᠂ ᠳᠦᠩᠬᠣ᠂ ᠰᠢᠶᠠᠨᠪᠢ ᠠ᠋ᠴᠠ ᠠᠪᠤᠭᠠᠳ ᠬᠥᠬᠡ ᠮᠣᠩᠭᠣᠯ ᠤ᠋ᠨ ᠴᠢᠩᠭᠢᠰ ᠬᠠᠭᠠᠨ᠂ ᠲᠡᠭᠦᠨ ᠦ᠌ ᠬᠣᠢᠴᠢ ᠥᠭᠡᠳᠡᠢ ᠬᠤᠪᠢᠯᠠᠢ᠃ ᠲᠣᠭᠣᠭᠠᠨᠲᠡᠮᠦᠷ ᠡᠳᠡᠭᠡᠷ ᠦ᠋ᠨ ᠶᠠᠪᠤᠳᠠᠯ ᠢ᠋ ᠮᠡᠳᠡᠬᠦ ᠲᠡᠳᠦᠢ ᠦᠭᠡᠢ᠂ ᠲᠡᠷᠡ ᠦᠶᠡ ᠶ᠋ᠢᠨ ᠶᠠᠪᠤᠳᠠᠯ ᠤ᠋ᠳ ᠢ᠋ ᠨᠢᠳᠦ ᠪᠡᠷ ᠦᠵᠡᠭᠰᠡᠨ ᠶᠦᠮ ᠰᠢᠭ ᠲᠣᠭᠠᠴᠢᠵᠤ ᠴᠢᠳᠠᠳᠠᠭ ᠰᠠᠨ᠃ ᠳᠠᠷᠠᠭᠠ ᠨᠢ ᠮᠠᠨᠵᠤ ᠶ᠋ᠢᠨ ᠬᠠᠭᠠᠳ ᠤ᠋ᠳ ᠤ᠋ᠨ ᠲᠤᠬᠠᠢ ᠲᠡᠳᠡᠨ ᠦ᠌ ᠮᠣᠩᠭᠣᠯ ᠤᠷᠤᠭᠤ ᠶᠠᠪᠤᠭᠤᠯᠵᠤ ᠪᠠᠢᠭᠰᠠᠨ ᠪᠣᠳᠣᠯᠭᠠ ᠨᠤᠭᠤᠳ ᠢ᠋ ᠠᠭᠤᠳᠠᠯᠤᠨ ᠶᠠᠷᠢᠬᠤ ᠶ᠋ᠢ ᠨᠢ ᠰᠣᠨᠣᠰᠪᠠᠯ ᠬᠡᠨ ᠪᠣᠯᠪᠠᠴᠤ ᠤᠯᠤᠰ ᠣᠷᠣᠨ ᠤ᠋ ᠪᠠᠨ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠲᠤᠬᠠᠢ ᠳ᠋ᠤ᠌ ᠡᠷᠬᠡ ᠦᠭᠡᠢ ᠨᠢᠭᠡ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠬᠦᠷᠦᠨᠡ᠃ ᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠢᠨᠦ ᠪᠠᠭᠰᠢ ᠣᠯᠠᠨ ᠲᠦᠮᠡᠨ ᠳ᠋ᠦ᠍ ᠡᠷᠳᠡᠮᠲᠡᠨ ᠭᠡᠭᠳᠡᠭᠰᠡᠨ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ᠃
— ᠵᠠ ᠠ᠋᠃
— ᠪᠢ ᠠᠷᠪᠠᠨ ᠵᠢᠯ ᠳᠡᠷᠭᠡᠳᠡ ᠨᠢ ᠰᠠᠭᠤᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠮᠥᠨ ᠪᠠᠭᠰᠢ ᠶ᠋ᠢᠨ ᠵᠠᠷᠯᠢᠭ ᠢ᠋ ᠲᠠᠭᠠᠨ ᠮᠠᠨᠵᠤ ᠶ᠋ᠢ ᠡᠰᠡᠷᠭᠦᠴᠡᠬᠦ ᠦᠢᠯᠡᠰ ᠲᠦ᠍ ᠣᠷᠣᠯᠴᠠᠭᠰᠠᠨ ᠶᠤᠮ᠃ ᠠᠦ᠋ᠲ᠋ᠣᠨᠣᠮᠢᠲᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠥᠷᠥ ᠶ᠋ᠢᠨ ᠳᠡᠭᠡᠳᠦ ᠡᠷᠬᠡᠨ ᠳ᠋ᠦ᠍ ᠭᠠᠷᠤᠭᠠ ᠦᠭᠡᠢ ᠪᠣᠯᠪᠠᠴᠤ ᠳᠡᠳ᠋ ᠲᠦᠰᠢᠮᠡᠯ᠂ ᠡᠷᠬᠢᠯᠡᠭᠰᠡᠨ ᠲᠦᠰᠢᠮᠡᠯ᠂ ᠬᠢᠯᠢ ᠬᠢᠵᠠᠭᠠᠷ ᠢ᠋ ᠬᠢᠨᠠᠨ ᠲᠣᠬᠣᠨᠢᠭᠤᠯᠬᠤ ᠰᠠᠢᠳ ᠭᠡᠬᠦ ᠵᠡᠷᠭᠡ ᠠᠯᠪᠠᠨ ᠳ᠋ᠤ᠌ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠲᠣᠮᠢᠯᠠᠭᠳᠠᠵᠤ ᠶᠠᠪᠤᠭᠰᠠᠭᠠᠷ ᠬᠦᠩ ᠵᠡᠷᠭᠡ ᠱᠠᠩᠨᠠᠭᠳᠠᠭᠰᠠᠨ ᠶᠤᠮ ᠭᠡᠳ ᠪᠠᠯᠳᠠᠨᠴᠢᠷᠢᠩ᠂ ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ ᠦ᠌ ᠳᠥᠷᠪᠡᠳᠦᠭᠡᠷ ᠣᠨ ᠤ᠋ ᠬᠢᠶᠠᠭᠲᠤ ᠬᠣᠲᠠ ᠳ᠋ᠤ᠌ ᠪᠣᠯᠤᠭᠰᠠᠨ ᠣᠷᠣᠰ᠂ ᠬᠢᠲᠠᠳ ᠮᠣᠩᠭᠣᠯ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠬᠡᠯᠡᠯᠴᠡᠭᠡᠷ ᠲᠦ᠍ ᠨᠢᠭᠤᠨ ᠵᠥᠪᠯᠡᠬᠦ ᠶ᠋ᠢᠨ ᠡᠭᠦᠷᠭᠡ ᠶ᠋ᠢ ᠬᠦᠯᠢᠶᠡᠭᠰᠡᠨ ᠪᠢᠴᠢᠭᠡᠴᠢ ᠪᠡᠷ ᠣᠴᠢᠭᠰᠠᠨ ᠲᠤᠬᠠᠢ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠯᠠ᠃ ᠡᠨᠡ ᠪᠣᠯ ᠪᠠᠯᠳᠠᠨᠴᠢᠷᠢᠩ ᠤ᠋ᠨ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠬᠢᠭᠰᠡᠨ ᠠᠵᠢᠯ ᠤ᠋ᠳ ᠤ᠋ᠨ ᠬᠠᠮᠤᠭ ᠤ᠋ᠨ ᠬᠦᠨᠳᠦ ᠨᠢ ᠪᠠᠢᠵᠠᠢ᠃
ᠠᠩᠬᠠ ᠣᠷᠣᠰ ᠤ᠋ᠨ ᠬᠠᠭᠠᠨᠲᠤ ᠵᠠᠰᠠᠭ ᠪᠦᠬᠦ ᠮᠣᠩᠭᠣᠯ ᠣᠷᠣᠨ ᠢ᠋ ᠬᠢᠲᠠᠳ ᠠ᠋ᠴᠠ ᠲᠠᠰᠤᠷᠠᠨ ᠲᠤᠰᠬᠠᠢ ᠤᠯᠤᠰ ᠪᠣᠯᠬᠤ ᠡᠷᠡᠮᠡᠯᠵᠡᠯᠡᠯ ᠢ᠋ ᠪᠦᠷᠢᠨ ᠳᠦᠭᠦᠷᠡᠩ ᠰᠠᠢᠰᠢᠶᠠᠨ ᠡᠢᠮᠦ ᠴᠦ᠍ ᠶᠠᠭᠤᠮᠠ᠂ ᠲᠡᠢᠮᠦ ᠴᠦ᠍ ᠶᠠᠭᠤᠮᠠ ᠪᠠᠷ ᠲᠤᠰᠠᠯᠠᠨᠠ᠂ ᠭᠢᠯᠠᠢᠯᠭᠠᠨᠠ ᠭᠡᠵᠦ ᠨᠢᠭᠤᠴᠠ ᠭᠡᠷᠡ ᠲᠣᠭᠲᠠᠭᠠᠨ᠂ ᠥᠳᠥᠭᠡᠨ ᠬᠠᠳᠬᠤᠵᠤ ᠪᠠᠢᠭᠰᠠᠨ ᠨᠢ ᠲᠡᠷᠡ ᠬᠤᠷᠠᠯ ᠳᠡᠭᠡᠷᠡ ᠭᠡᠨᠡᠳᠲᠡ ᠥᠭᠡᠷᠡᠴᠢᠯᠡᠭᠳᠡᠨ ᠬᠢᠲᠠᠳ ᠤᠯᠤᠰ ᠲᠤ ᠬᠤᠪᠢᠶᠠᠨ ᠠᠰᠢᠭᠯᠠᠬᠤ ᠪᠣᠳᠣᠯᠭᠠ ᠶᠠᠪᠤᠭᠤᠯᠤᠭᠰᠠᠨ ᠪᠠᠢᠵᠠᠢ᠃ ᠡᠨᠡ ᠨᠢ ᠣᠷᠣᠰ᠂ ᠭᠧᠷᠮᠠᠨ ᠲᠠᠢ ᠪᠠᠢᠯᠳᠤᠬᠤ ᠴᠠᠭ ᠲᠤᠯᠭᠠᠷᠠᠭᠰᠠᠨ ᠠ᠋ᠴᠠ ᠪᠣᠯᠤᠨ ᠮᠣᠩᠭᠣᠯ ᠢ᠋ ᠡᠵᠡᠮᠰᠢᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠲᠦᠷ ᠬᠣᠢᠰᠢᠯᠠᠭᠤᠯᠤᠭᠰᠠᠨ ᠢ᠋ ᠪᠠᠯᠳᠠᠨᠴᠢᠷᠢᠩ ᠤᠭ ᠬᠡᠯᠡᠯᠴᠡᠭᠡᠷ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠣᠯᠵᠤ ᠮᠡᠳᠡᠭᠰᠡᠨ ᠪᠠᠢᠨᠠ᠃ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠬᠡᠯᠡᠯᠴᠡᠭᠡᠷ ᠳᠡᠭᠡᠷᠡ ᠮᠣᠩᠭᠣᠯ ᠤ᠋ᠨ ᠲᠥᠯᠥᠭᠡᠯᠡᠭᠴᠢᠳ᠂ ᠡᠷᠡᠭᠴᠢᠨ ᠡᠮᠡᠭᠴᠢᠨ ᠪᠠᠷᠰ ᠮᠡᠲᠦ ᠡᠪᠯᠡᠷᠡᠭᠰᠡᠨ ᠬᠣᠶᠠᠷ ᠶᠡᠬᠡ ᠭᠦᠷᠦᠨ ᠦ᠌ ᠲᠥᠯᠥᠭᠡᠯᠡᠭᠴᠢᠳ ᠦ᠋ᠨ ᠡᠮᠦᠨᠡ ᠭᠠᠭᠴᠠᠭᠠᠷᠳᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠳᠤᠮᠳᠠ ᠪᠠᠯᠳᠠᠨᠴᠢᠷᠢᠩ ᠬᠠᠷᠢᠭᠤᠴᠠᠨ ᠲᠤᠯᠤᠯᠳᠤᠬᠤ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠬᠤ ᠭᠡᠵᠦ ᠣᠶᠤᠨ ᠤᠬᠠᠭᠠᠨ ᠢ᠋ᠶ᠋ᠠᠨ ᠵᠠᠷᠤᠴᠠᠭᠤᠯᠤᠭᠰᠠᠨ ᠨᠢ ᠲᠤᠩ ᠶᠡᠬᠡ᠂ ᠦᠨᠡᠨ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠨᠢᠭᠡᠨᠲᠡ ᠭᠠᠭᠴᠠᠭᠠᠷᠳᠠᠭᠰᠠᠨ ᠮᠣᠩᠭᠣᠯ ᠤ᠋ᠨ ᠲᠥᠯᠥᠭᠡᠯᠡᠭᠴᠢᠳ ᠶᠠᠮᠠᠷ ᠴᠦ᠍ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠪᠠᠴᠤ ᠨᠡᠮᠡᠭᠦᠷᠢ ᠦᠭᠡᠢ ᠪᠠᠢᠭᠰᠠᠨ ᠪᠥᠭᠡᠳ ᠡᠴᠦᠰ ᠲᠦ᠋ᠨᠢ ᠲᠡᠳᠡ ᠡᠯᠳᠡᠪ ᠶᠠᠩᠵᠤ ᠶ᠋ᠢᠨ ᠵᠦᠢ ᠵᠣᠬᠢᠰ ᠦᠭᠡᠢ ᠰᠢᠬᠠᠯᠲᠠ ᠱᠠᠭᠠᠷᠳᠠᠯᠭᠠ ᠨᠤᠭᠤᠳ ᠳᠡᠭᠡᠷᠡ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠭᠰᠠᠨ ᠠᠵᠢ᠃ ᠡᠢᠮᠦ ᠬᠡᠷᠡᠭ ᠢ᠋ ᠪᠠᠯᠳᠠᠨᠴᠢᠷᠢᠩ ᠪᠡᠶᠡ ᠪᠡᠷ ᠦᠵᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠳᠠᠭᠠᠳᠤ ᠶ᠋ᠢᠨ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠤᠯᠤᠰ ᠤ᠋ᠳ ᠤ᠋ᠨ ᠰᠢᠨᠵᠢ ᠴᠢᠨᠠᠷ ᠢ᠋ ᠪᠦᠷᠢᠨ ᠮᠡᠳᠡᠭᠰᠡᠨ ᠪᠠᠢᠪᠠ᠃ ᠥᠩᠭᠡᠨ ᠲᠠᠯᠠ ᠪᠠᠨ ᠡᠨᠡᠷᠢᠨ ᠲᠡᠳᠬᠦᠭᠴᠢ ᠶ᠋ᠢᠨ ᠳᠦᠷᠢ ᠪᠠᠷᠢᠨ ᠡᠯᠳᠡᠪ ᠰᠠᠢᠬᠠᠨ ᠢ᠋ ᠬᠦᠵᠦᠭᠦᠦ ᠪᠣᠷᠪᠢ ᠪᠠᠨ ᠨᠠᠬᠢᠯᠵᠠᠭᠤᠯᠤᠨ ᠬᠡᠯᠡᠬᠦ ᠨᠢ ᠳᠠᠩ ᠡᠵᠡᠯᠡᠨ ᠵᠠᠯᠭᠢᠬᠤ ᠶ᠋ᠢᠨ ᠠᠷᠭᠠ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠨᠢ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠴᠠᠭᠠᠨᠠ ᠠ᠋ᠴᠠ ᠨᠢ ᠲᠤᠯᠭᠠᠨ ᠱᠠᠭᠠᠷᠳᠠᠬᠤ᠂ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠬᠦ ᠬᠣᠶᠠᠷ ᠢ᠋ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠳᠡᠭᠡᠷᠡ ᠠᠪᠴᠢᠷᠠᠳᠠᠭ ᠶᠤᠮ ᠪᠠᠢᠨᠠ ᠭᠡᠵᠦ ᠪᠠᠯᠳ᠋ᠠᠨᠴᠢᠷᠢᠩ ᠣᠢᠯᠠᠭᠠᠭᠰᠠᠨ ᠪᠠᠢᠯᠠ᠃ ᠡᠴᠦᠰ ᠲᠦ᠋ᠨᠢ ᠪᠠᠯᠳᠠᠨᠴᠢᠷᠢᠩ᠄ ᠶᠡᠷᠦ ᠪᠠᠭᠠ ᠪᠠᠭᠤᠷᠠᠢ ᠤᠯᠤᠰ ᠣᠷᠣᠨ᠂ ᠶᠡᠬᠡ ᠭᠦᠷᠦᠨ ᠢ᠋ ᠡᠢᠨ ᠬᠦ᠌ ᠠᠷᠤ ᠪᠠᠷ ᠨᠢ ᠲᠠᠯᠪᠢᠵᠤ᠂ ᠥᠪᠥᠷ ᠡᠴᠡ ᠨᠢ ᠭᠣᠬᠠᠳᠠᠨ ᠬᠣᠬᠢᠷᠠᠭᠠᠭᠴᠢ ᠪᠠᠢᠭᠰᠠᠨ ᠤᠳᠠᠭᠠ ᠪᠠᠢᠨᠠ ᠤᠤ? ᠦᠭᠡᠢ ᠤᠤ? ᠭᠡᠳᠡᠭ ᠢ᠋ ᠥᠪᠡᠷ ᠦ᠋ᠨ ᠮᠡᠳᠡᠬᠦ ᠡᠷᠢᠶᠡᠨ ᠴᠠᠭᠠᠰᠤ ᠪᠣᠯᠭᠠᠨ ᠢ᠋ ᠡᠷᠭᠢᠭᠦᠯᠦᠨ ᠡᠷᠭᠢᠭᠦᠯᠦᠭᠡᠳ ᠣᠯᠤᠭᠰᠠᠨ ᠵᠦᠢᠯ ᠦᠭᠡᠢ᠂ ᠬᠠᠷᠢᠨ ᠶᠡᠬᠡ ᠭᠦᠷᠦᠨ ᠨᠦ᠍ᠭᠦᠳ ᠪᠠᠭᠠ ᠪᠠᠭᠤᠷᠠᠢ ᠣᠷᠣᠨ ᠢ᠋ ᠪᠤᠯᠢᠶᠠᠨ ᠵᠠᠯᠭᠢᠬᠤ ᠯᠠ ᠭᠡᠵᠦ ᠪᠠᠢᠳᠠᠭ ᠨᠢ ᠣᠳᠣ ᠧᠦ᠋ᠷᠣᠫᠠ ᠳᠠᠶᠠᠭᠠᠷ ᠣᠯᠠᠨᠲᠠ ᠭᠠᠷᠴᠤ ᠪᠠᠢᠭᠠ ᠬᠡᠷᠡᠭ ᠶᠠᠪᠤᠳᠠᠯ ᠠ᠋ᠴᠠ ᠢᠯᠡᠬᠡᠨ ᠪᠠᠢᠨᠠ ᠳᠠ ᠭᠡᠪᠡ᠃ ᠲᠡᠭᠡᠭᠡᠳ ᠪᠠᠯᠳᠠᠨᠴᠢᠷᠢᠩ ᠪᠠᠭᠠ ᠪᠠᠭᠤᠷᠠᠢ ᠤᠯᠤᠰ ᠬᠥᠯ ᠳᠡᠭᠡᠷᠡ ᠪᠡᠨ ᠵᠣᠭᠰᠣᠵᠤ ᠲᠡᠩᠴᠡᠭᠦᠷᠢ ᠪᠡᠨ ᠣᠯᠤᠶᠠ ᠭᠡᠪᠡᠯ᠄ ᠬᠠᠵᠠᠭᠤ ᠬᠠᠪᠢᠷᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠶᠡᠬᠡ ᠭᠦᠷᠦᠨ ᠨᠦ᠍ᠭᠦᠳ ᠦ᠋ᠨ ᠬᠣᠭᠣᠷᠣᠨᠳᠣ ᠴᠠᠭ ᠦᠷᠭᠦᠯᠵᠢ ᠶᠠᠰᠤ ᠬᠠᠶᠠᠨ ᠮᠥᠷᠭᠦᠯᠳᠦᠭᠦᠯᠵᠦ ᠪᠠᠢᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠠᠯᠠᠭᠠ ᠭᠡᠵᠦ ᠪᠣᠳᠣᠬᠤ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠶᠡᠷᠦ ᠨᠢ ᠪᠠᠯᠳᠠᠨᠴᠢᠷᠢᠩ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠬᠡᠯᠡᠯᠴᠡᠭᠡᠷ ᠲᠦ᠍ ᠶᠠᠪᠤᠭᠰᠠᠨ ᠠ᠋ᠴᠠ ᠪᠠᠨ ᠬᠣᠢᠰᠢ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠠᠵᠢᠭᠯᠠᠨ ᠰᠤᠳᠤᠯᠬᠤ ᠪᠣᠯᠤᠭᠰᠠᠨ ᠠᠵᠢ᠃