ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠊᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠲᠠᠪᠤ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 5
287ᠨᠠᠢᠷ ᠴᠡᠩᠬᠡᠯ
ᠠᠮᠠᠷᠠᠭ ᠤ᠋ᠳ ᠨᠢ ᠭᠣᠣᠯ ᠲᠥᠯᠥᠪ ᠸᠠᠩ᠂ ᠬᠦᠩ᠂ ᠨᠣᠶᠠᠳ᠂ ᠲᠦᠰᠢᠮᠡᠳ ᠦ᠋ᠨ ᠥᠬᠢᠳ᠂ ᠡᠮᠦᠰᠦᠨ ᠴᠢᠮᠡᠭᠯᠡᠭᠰᠡᠨ ᠢ᠋ᠶ᠋ᠡᠷ ᠮᠠᠰᠢ ᠰᠠᠢᠬᠠᠨ᠂ ᠶᠠᠭᠠᠨ ᠪᠣᠷᠣ ᠴᠡᠩᠬᠡᠷ᠂ ᠡᠰᠡ ᠪᠣᠯ ᠴᠢᠰ ᠤᠯᠠᠭᠠᠨ᠂ ᠬᠠᠮᠤᠭ ᠤ᠋ᠨ ᠬᠤᠷᠴᠠ ᠥᠩᠭᠡ ᠶ᠋ᠢᠨ ᠲᠣᠷᠭᠠᠨ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠦ᠌ ᠪᠡᠨ ᠳᠣᠣᠷᠠ ᠤᠲᠠᠰᠤ ᠬᠠᠳᠬᠤᠮᠠᠯ ᠤᠭᠠᠯᠵᠠ ᠲᠠᠢ ᠭᠤᠲᠤᠯ ᠲᠠᠢ ᠪᠥᠭᠡᠳ ᠱᠠᠩᠬᠤ ᠳᠠᠷᠤᠭᠤᠯᠤᠭᠰᠠᠨ ᠰᠤᠪᠤᠳ ᠤ᠋ᠨ ᠳᠠᠷᠤᠭᠤᠯᠭᠠ ᠨᠢ ᠴᠠᠭ ᠢᠮᠠᠭᠲᠠ ᠯᠠ ᠶ᠋ᠢᠨ ᠭᠡᠷᠡᠯ ᠢ᠋ ᠥᠪᠡᠷ ᠲᠡᠭᠡᠨ ᠲᠠᠲᠠᠬᠤ ᠤᠴᠢᠷ ᠬᠠᠴᠠᠷ ᠢ᠋ ᠨᠢ ᠶᠠᠭᠠᠨ᠂ ᠨᠢᠳᠦ ᠶ᠋ᠢ ᠨᠢ ᠲᠤᠩᠭᠠᠯᠠᠭ ᠂ ᠰᠢᠲᠦ ᠶ᠋ᠢ ᠨᠢ ᠴᠠᠭᠠᠨ᠂ ᠤᠷᠤᠭᠤᠯ ᠢ᠋ ᠨᠢ ᠤᠯᠠᠭᠠᠨ ᠲᠡᠷᠡ ᠪᠦᠭᠦᠳᠡ ᠶ᠋ᠢ ᠲᠣᠳᠣᠳᠬᠠᠨ ᠦᠯᠢᠭᠡᠷ ᠳᠣᠮᠣᠭ ᠲᠤ᠌ ᠭᠠᠷᠳᠠᠭ ᠯᠤᠤᠰ ᠤ᠋ᠨ ᠳᠠᠭᠢᠨᠢᠰ ᠢ᠋ ᠰᠠᠨᠠᠭᠳᠠᠭᠤᠯᠤᠨᠠ᠃ ᠠᠷᠢᠬᠢ ᠳᠡᠷᠡᠰᠦᠨ ᠳ᠋ᠦ᠍ ᠲᠡᠳᠡ ᠦᠨᠡᠬᠡᠷ ᠠᠪᠢᠶᠠᠰ ᠦᠭᠡᠢ᠂ ᠪᠢᠴᠢᠬᠠᠨ ᠵᠦᠩᠵᠡ ᠶ᠋ᠢ ᠤᠷᠤᠭᠤᠯ ᠳ᠋ᠠᠭᠠᠨ ᠳᠥᠩᠭᠡᠵᠦ ᠬᠦᠷᠭᠡᠭᠰᠡᠭᠡᠷ ᠫᠡᠩᠰᠡ ᠪᠤᠶᠤ ᠳᠤᠷᠳᠤᠩ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠶᠠᠭᠠᠷᠠᠨ ᠠᠮᠠ ᠪᠠᠨ ᠠᠷᠴᠢᠨ᠂ ᠲᠤᠩᠭᠠᠯᠠᠭ ᠬᠠᠷᠠ ᠨᠢᠳᠦ ᠪᠡᠷ ᠢᠨᠢᠶᠡᠮᠰᠦᠭᠯᠡᠬᠦ ᠨᠢ ᠤᠳᠤᠮ ᠠ᠋ᠴᠠ ᠪᠠᠨ ᠳᠠᠷᠤᠤ ᠮᠣᠩᠭᠣᠯ ᠠᠬᠠᠢᠲᠠᠨ ᠨᠤᠭᠤᠳ ᠤ᠋ᠨ ᠰᠢᠨᠵᠢ ᠲᠥᠯᠥᠪ ᠢ᠋ ᠯᠡ ᠦᠵᠡᠭᠦᠯᠬᠦ ᠰᠢᠭ ᠪᠣᠯᠤᠨᠠ᠃ ᠨᠠᠢᠷ ᠴᠡᠩᠭᠡᠯ ᠢ᠋ ᠬᠥᠭᠵᠢᠭᠡᠨ᠂ ᠢᠨᠠᠭ ᠡᠷᠡᠰ ᠢ᠋ᠶ᠋ᠡᠨ ᠪᠠᠶᠠᠰᠬᠠᠬᠤ ᠪᠠᠷ ᠲᠡᠳᠡᠨ ᠢ᠋ ᠪᠡᠨ ᠲᠦᠰᠢᠨ ᠰᠠᠭᠤᠭᠰᠠᠨ ᠠ᠋ᠴᠠ ᠪᠠᠨ ᠬᠣᠢᠰᠢ ᠶᠣᠰᠣᠲᠠᠢ ᠠᠷᠢᠯᠭᠠᠭᠰᠠᠨ ᠰᠣᠩᠭᠢᠨᠠ ᠰᠢᠭ᠋ ᠠᠷᠪᠠᠨ ᠴᠠᠭᠠᠨ ᠬᠤᠷᠤᠭᠤ ᠪᠠᠨ ᠨᠠᠬᠢᠯᠵᠠᠭᠤᠯᠤᠨ᠂ ᠤᠶᠠᠬᠠᠨ ᠵᠥᠭᠡᠯᠡᠨ ᠬᠣᠭᠣᠯᠠᠢ ᠪᠠᠷ ᠬᠤᠸᠠᠯᠠᠬᠤ ᠪᠠᠷ ᠢ᠋ᠶ᠋ᠠᠨ ᠲᠡᠳᠡᠨ ᠬᠠᠢᠷᠠ ᠳᠤᠷᠠᠯᠠᠯ ᠢ᠋ᠶ᠋ᠠᠨ ᠢᠯᠡᠴᠢᠯᠡᠬᠦ ᠡᠴᠡ ᠪᠢᠰᠢ᠂ ᠳᠡᠮᠡᠢ ᠪᠠᠯᠠᠢ ᠶ᠋ᠢ ᠠᠮᠠᠨ ᠤ᠋ ᠪᠠᠨ ᠵᠣᠷᠢᠭ ᠢ᠋ᠶ᠋ᠠᠷ ᠴᠠᠯᠴᠢᠨ᠂ ᠳᠡᠭᠡᠷᠡ ᠳᠣᠣᠷᠠ ᠣᠷᠣᠨ ᠵᠠᠪᠬᠠᠢᠷᠠᠬᠤ ᠶ᠋ᠢ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠮᠠᠭᠤᠬᠠᠢ ᠶᠠᠭᠤᠮᠠᠨ ᠳ᠋ᠤ᠌ ᠦᠵᠡᠨ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠵᠢᠭᠰᠢᠨᠡ᠃ ᠤᠳᠠᠭᠠ ᠳᠠᠷᠠᠭᠠ ᠠᠮᠰᠠᠭᠰᠠᠨ ᠠᠷᠢᠬᠢᠨ ᠤ᠋ ᠪᠠᠨ ᠠᠭᠤᠷ ᠢ᠋ ᠮᠡᠳᠡᠷᠡᠯ ᠳ᠋ᠦ᠍ ᠬᠦᠷᠦᠮᠡᠭᠴᠡ ᠲᠡᠷᠡ ᠥᠬᠢᠳ《ᠲᠡᠳᠡᠨ ᠦ᠌ ᠬᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠡᠢᠮᠦ ᠬᠥᠮᠦᠨ ᠳ᠋ᠦ᠍ ᠪᠣᠭᠲᠣᠯᠠᠨ ᠥᠭᠴᠡᠢ᠃ ᠥᠨᠥᠬᠢ ᠡᠴᠡ ᠨᠢ ᠰᠠᠯᠭᠠᠭᠰᠠᠨ ᠭᠡᠨᠡ᠃ ᠭᠡᠲᠡᠯᠡ ᠪᠠᠰᠠ ᠪᠣᠭᠳᠠ ᠭᠡᠭᠡᠨᠲᠡᠨ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠬᠣᠶᠠᠷ ᠠᠮᠠᠷᠠᠭ ᠢ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠰᠠᠯᠠᠭᠠᠨ ᠡᠮᠡᠭᠲᠡᠢ ᠶ᠋ᠢ ᠨᠢ ᠲᠡᠷᠡ ᠨᠣᠶᠠᠨ ᠤ᠋ ᠬᠦᠦ ᠳ᠋ᠦ᠍ ᠥᠭᠭᠦᠭᠰᠡᠨ ᠭᠡᠳᠡᠭ ᠰᠢᠦ》 ᠭᠡᠵᠦ ᠶᠠᠷᠢᠬᠤ ᠶ᠋ᠢ ᠵᠦᠭᠡᠷ ᠰᠣᠨᠢᠷᠬᠠᠯ ᠪᠣᠯᠭᠠᠬᠤ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠪᠢᠰᠢ᠂ ᠬᠠᠷᠢᠨ ᠥᠨᠥ ᠮᠠᠷᠭᠠᠰᠢ ᠶ᠋ᠢᠨ ᠨᠢᠭᠡᠨ ᠳ᠋ᠦ᠍ ᠥᠪᠡᠷ ᠳᠡᠭᠡᠷᠡ ᠪᠡᠨ ᠲᠤᠰᠬᠤ ᠭᠡᠵᠦ ᠪᠠᠢᠭᠠ ᠭᠠᠢ ᠭᠠᠮᠰᠢᠭ ᠢ᠋ ᠦᠨᠡᠨ ᠬᠦ᠌ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠠᠮᠠᠷᠠᠭ ᠳᠤ ᠮᠡᠳᠡᠭᠳᠡᠵᠦ ᠪᠠᠢᠭᠠ ᠨᠢ ᠲᠡᠷᠡ ᠪᠠᠢᠯᠠ᠃ ᠡᠢᠨ ᠬᠦ᠌ ᠨᠢᠭᠡ ᠦᠶᠡ ᠣᠪᠣᠭᠠ ᠶᠠᠷᠢᠶᠠ ᠳᠡᠯᠭᠡᠵᠦ ᠢᠷᠡᠮᠡᠷ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠵᠣᠭᠰᠣᠨ᠂ ᠳᠠᠭᠤᠯᠠᠬᠤ ᠪᠥᠭᠡᠳ ᠳᠠᠭᠤᠨ ᠳ᠋ᠤ᠌᠄
ᠰᠠᠯᠠᠭᠠ ᠽᠠᠨᠳᠠᠨ ᠮᠣᠳᠣᠨ ᠳ᠋ᠤᠨᠢ
ᠰᠠᠷᠠᠨ ᠤ᠋ ᠲᠤᠶᠠᠭᠠ ᠲᠤᠰᠤᠨᠠ ᠳᠠ᠂
ᠰᠠᠢᠨ ᠤ᠋ ᠢᠷᠦᠭᠡᠯ ᠪᠠᠢᠪᠠᠯ ᠳᠠ
ᠰᠠᠷᠠ ᠳ᠋ᠠᠭᠠᠨ ᠭᠠᠭᠴᠠ ᠴᠣ ᠶᠠᠭᠠᠮᠠᠢ ᠳᠠ᠃
ᠤᠷᠭᠤᠭᠠ ᠽᠠᠨᠳᠠᠨ ᠮᠣᠳᠣᠨ ᠳ᠋ᠤᠨᠢ
ᠠᠭᠤᠯᠠ ᠶ᠋ᠢᠨ ᠰᠡᠭᠦᠳᠡᠷ ᠲᠤᠰᠤᠨᠠ ᠳᠠ᠂
ᠤᠴᠠᠷᠠᠬᠤ ᠶ᠋ᠢᠨ ᠢᠷᠦᠭᠡᠯ ᠪᠠᠢᠪᠠᠯ ᠳᠠ
ᠤᠳᠠᠭᠠᠨ ᠲᠦᠷᠭᠡᠨ ᠴᠦ᠍ ᠶᠠᠭᠠᠮᠠᠢ ᠳᠠ᠃
ᠭᠡᠵᠦ ᠳᠠᠭᠤᠯᠠᠬᠤ ᠳᠤᠷᠠ ᠲᠠᠢ ᠠᠵᠢ᠃ ᠬᠠᠷᠢᠭᠤ ᠳ᠋ᠤᠨᠢ ᠡᠷᠡᠭᠲᠡᠢᠴᠦᠳ᠄
ᠤᠯᠢᠶᠠᠰᠤᠲᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠭᠣᠣᠯ ᠢ᠋ ᠪᠡᠨ ᠬᠦ ᠬᠦ
ᠶᠠᠭᠠᠰᠬᠢᠭᠠᠳ ᠲᠤᠭᠤᠯᠤᠨᠠ ᠪᠣᠢ ᠬᠦ ᠬᠦ᠂
ᠤᠯᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠴᠠᠷᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠦᠭᠡᠯ ᠢ᠋ ᠪᠡᠨ ᠬᠦ ᠬᠦ
ᠠᠮᠠᠷᠠᠭ ᠴᠢᠮᠠ ᠳ᠋ᠠᠭᠠᠨ ᠲᠠᠯᠪᠢᠭᠠᠳ ᠮᠣᠷᠳᠠᠶᠠ ᠬᠦ ᠬᠦ᠃
ᠵᠡᠭᠡᠰᠦᠲᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠭᠣᠣᠯ ᠢ᠋ ᠪᠡᠨ ᠬᠦ ᠬᠦ
ᠶᠠᠭᠠᠰᠬᠢᠭᠠᠳ ᠲᠤᠭᠤᠯᠤᠨᠠ ᠳᠠ ᠬᠦ ᠬᠦ᠂
ᠴᠢᠨᠦ ᠮᠢᠨᠦ ᠦᠨᠦᠷ ᠰᠢᠩᠭᠡᠭᠰᠡᠨ ᠠᠯᠴᠢᠭᠤᠷ ᠪᠠᠢᠪᠠᠯ
ᠠᠪᠤᠭᠠᠳ ᠯᠠ ᠮᠣᠷᠳᠠᠨᠠ ᠳᠠ ᠬᠦ ᠬᠦ—
ᠭᠡᠵᠦ ᠳᠠᠭᠤᠯᠠᠨᠠ᠃
ᠡᠳᠡᠭᠡᠷ ᠳᠠᠭᠤᠨ ᠤ᠋ ᠠᠶᠠ ᠮᠣᠩᠭᠣᠯ ᠣᠷᠣᠨ ᠤ᠋ ᠠᠭᠤᠳᠠᠮ ᠲᠠᠯᠠ᠂ ᠠᠯᠤᠰ ᠲᠡᠷᠲᠡᠭᠡ ᠳ᠋ᠦ᠍ ᠴᠡᠩᠬᠡᠷᠯᠡᠨ ᠰᠦᠮᠡᠯᠵᠡᠬᠦ ᠥᠨᠳᠥᠷ ᠠᠭᠤᠯᠠᠰ᠂ ᠲᠡᠷᠡ ᠠᠭᠤᠯᠠᠰ ᠤ᠋ᠨ ᠵᠦᠭ ᠲᠡᠮᠡᠦᠯᠦᠨ ᠶᠠᠪᠤᠭᠠ ᠮᠣᠷᠢᠨ ᠤ᠋ ᠬᠥᠩᠭᠡᠨ ᠠᠯᠬᠤᠯᠲᠠ ᠪᠤᠶᠤ ᠵᠠᠳᠠᠭᠠᠢ ᠬᠠᠲᠤᠷᠢᠯᠲᠡ ᠶ᠋ᠢ ᠰᠠᠭᠠᠲᠠᠭᠤᠯᠬᠤ ᠪᠣᠯᠪᠠᠴᠤ ᠦᠭᠡ ᠥᠭᠦᠯᠡᠪᠦᠷᠢ ᠨᠢ ᠳᠠᠩᠴᠤ ᠲᠡᠢᠮᠦ ᠪᠢᠰᠢ ᠠ᠋᠃ ᠡᠷᠬᠡ ᠦᠭᠡᠢ ᠶ᠋ᠢᠨ ᠡᠷᠬᠡ ᠪᠡᠷ ᠬᠠᠢᠷᠠᠲᠤ ᠠᠮᠠᠷᠠᠭ ᠠ᠋ᠴᠠ ᠪᠠᠨ ᠬᠠᠭᠠᠴᠠᠬᠤ ᠭᠠᠰᠠᠯᠤᠯ ᠵᠣᠪᠠᠯᠠᠩ ᠡᠳ᠋ᠯᠡᠬᠦ ᠶ᠋ᠢ ᠯᠡ ᠢᠯᠡᠷᠬᠡᠢᠯᠡᠨᠡ᠃ ᠢᠩᠭᠢᠬᠦ ᠳ᠋ᠦ᠍ ᠲᠡᠳᠡ ᠣᠳᠣ ᠡᠢᠮᠦ ᠠᠶᠤᠯ ᠢ᠋ ᠬᠦᠯᠢᠶᠡᠵᠦ ᠪᠠᠢᠭᠠ ᠳ᠋ᠠᠭᠠᠨ ᠡᠨᠡ ᠳᠠᠭᠤᠤ ᠨᠤᠭᠤᠳ ᠢ᠋ ᠳᠠᠭᠤᠯᠠᠬᠤ ᠳᠤᠷᠠ ᠲᠠᠢ ᠪᠠᠢᠯᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠬᠦ ᠳ᠋ᠦ᠍ ᠲᠡᠳᠡ᠂ ᠵᠦᠢ ᠶᠣᠰᠣᠨ ᠤ᠋ ᠨᠠᠢᠷ ᠨᠠᠷᠭᠢᠶᠠᠨ ᠪᠣᠯᠵᠤ ᠪᠠᠢᠭᠠ ᠪᠢᠰᠢ ᠵᠢᠷᠦᠬᠡ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠪᠠᠴᠢᠮᠳᠠᠯ ᠢ᠋ ᠬᠠᠷᠢᠯᠴᠠᠨ ᠬᠡᠯᠡᠯᠴᠡᠵᠦ ᠪᠠᠢᠭᠠ ᠨᠢ ᠡᠨᠡ ᠠᠵᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠰᠥᠨᠢ ᠳᠤᠮᠳᠠ ᠪᠣᠯᠵᠤ ᠬᠢᠲᠠᠳ ᠰᠦᠮᠡ ᠶ᠋ᠢᠨ ᠬᠠᠷᠠᠩᠭᠠ ᠴᠤᠤᠷᠢᠶᠠᠳᠠᠪᠠ᠃ ᠡᠴᠢᠭᠡ ᠡᠬᠡ ᠨᠦ᠍ᠭᠦᠳ ᠥᠬᠢᠳ ᠢ᠋ᠶ᠋ᠡᠨ ᠰᠥᠨᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠭᠠᠳᠠᠭᠰᠢ ᠭᠠᠷᠬᠤ ᠶ᠋ᠢ ᠴᠢᠩᠳᠠᠯᠠᠨ ᠬᠣᠷᠢᠳᠠᠭ ᠲᠤᠯᠠ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠰᠡᠷ ᠬᠢᠨ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠨᠠ᠃ ᠡᠭᠦᠨ ᠡᠴᠡ ᠴᠠᠭᠠᠰᠢ ᠶᠠᠭᠤ ᠪᠣᠯᠬᠤ ᠪᠣᠢ? ᠭᠡᠪᠡᠯ᠄ ᠡᠷᠡᠭᠲᠡᠢᠴᠦᠳ ᠬᠤᠪᠢ ᠬᠤᠪᠢ ᠶ᠋ᠢᠨ ᠠᠮᠠᠷᠠᠭ ᠢ᠋ ᠬᠦᠷᠭᠡᠵᠦ ᠥᠭᠬᠦ ᠪᠡᠷ ᠤᠪᠤᠨ ᠴᠤᠪᠤᠨ ᠭᠠᠷᠤᠯᠠ᠃ ᠬᠡᠷᠪᠡ ᠭᠠᠳᠠᠨᠠ ᠰᠠᠷᠠ ᠰᠠᠷᠠᠭᠤᠯ ᠪᠠᠢᠪᠠᠴᠤ ᠬᠥᠮᠦᠨ ᠠᠮᠢᠲᠠᠨ ᠳ᠋ᠤ᠌ ᠦᠵᠡᠭᠳᠡᠬᠦ ᠡᠴᠡ ᠠᠶᠤᠨ ᠬᠣᠶᠠᠷ ᠪᠡᠶᠡ ᠴᠤᠪᠤᠨ ᠵᠥᠪᠬᠡᠨ ᠪᠠᠷᠠ ᠪᠠᠷᠠ ᠪᠠᠨ ᠬᠠᠷᠠᠨ ᠶᠠᠪᠤᠨᠠ᠃ ᠬᠡᠷᠪᠡ ᠲᠠᠭ ᠬᠠᠷᠠᠩᠭᠤᠢ ᠠᠪᠠᠰᠤ ᠮᠥᠷᠥ ᠵᠡᠷᠭᠡᠴᠡᠨ ᠭᠠᠷ ᠤ᠋ᠨ ᠦᠵᠦᠭᠦᠷ ᠲᠡᠳᠦᠢ ᠡᠴᠡ ᠪᠠᠷᠢᠯᠴᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠠᠶᠠᠰᠬᠠᠨᠠ᠃ ᠭᠡᠪᠡᠴᠦ ᠬᠦᠷᠬᠦ ᠭᠠᠵᠠᠷ ᠢ᠋ᠶ᠋ᠠᠨ ᠣᠢᠷᠠᠲᠤᠬᠤ ᠶ᠋ᠢᠨ ᠴᠠᠭ ᠳᠤ ᠬᠣᠶᠠᠭᠤᠯᠠ ᠶ᠋ᠢᠨ ᠬᠢᠨᠢ ᠵᠢᠷᠦᠬᠡ ᠬᠦᠴᠦᠲᠡᠢ ᠴᠣᠬᠢᠯᠠᠨ ᠬᠥᠯ ᠦ᠋ᠨ ᠬᠢᠨᠢ ᠭᠢᠰᠬᠢᠯᠲᠡ ᠤᠳᠠᠭᠠᠰᠢᠷᠠᠬᠤ ᠪᠥᠭᠡᠳ ᠨᠢᠭᠡ ᠪᠤᠯᠤᠩ ᠳ᠋ᠤ᠌ ᠲᠦᠷ ᠵᠣᠭᠰᠣᠨ ᠬᠡᠳᠦᠨ ᠦᠭᠡ ᠰᠢᠪᠡᠨᠡᠨ ᠬᠡᠯᠡᠯᠴᠡᠨᠡ᠃ ᠲᠡᠭᠦᠨ ᠳ᠋ᠦ᠍ᠨᠢ ᠬᠠᠢᠷᠠᠲᠠᠢ ᠳᠤᠷᠠᠲᠠᠢ ᠭᠡᠳᠡᠭ ᠦᠭᠡ ᠣᠷᠣᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌《ᠶᠠᠭᠠᠬᠢᠬᠤ ᠪᠢᠯᠡ? ᠠᠪᠤ ᠡᠵᠢ ᠮᠠᠨᠢ ᠨᠠᠮᠠᠶ᠋ᠢ ᠣᠷᠣᠢ ᠪᠣᠯᠲᠠᠯᠠ ᠬᠠᠮᠢᠭᠠ ᠶᠠᠪᠤᠪᠠ ᠭᠡᠵᠦ ᠠᠭᠠᠰᠢᠯᠠᠨ ᠰᠦᠢᠳ ᠪᠣᠯᠤᠨᠠ ᠪᠣᠢ》《ᠬᠠᠷᠢᠨ ᠠ᠋᠂ ᠦᠶᠡᠷᠬᠡᠳᠡᠭ ᠡᠮᠡᠭᠲᠡᠢ ᠶ᠋ᠢᠨ ᠳ᠋ᠦ᠍ ᠦᠯᠢᠭᠡᠷᠴᠢᠨ ᠢᠷᠡᠨ᠂ ᠬᠤᠭᠤᠷᠳᠠᠨ ᠳᠠᠭᠤᠯᠠᠬᠤ ᠶ᠋ᠢ ᠨᠢ ᠴᠢᠩᠨᠠᠭᠰᠠᠭᠠᠷ ᠰᠠᠭᠤᠭᠠᠳ ᠡᠢᠮᠦ ᠪᠣᠯᠪᠠ ᠭᠡᠵᠦ ᠬᠡᠯᠡᠪᠡᠯ ᠶᠠᠭᠠᠬᠢᠬᠤ ᠪᠣᠯ?》 ᠭᠡᠬᠦ ᠮᠡᠲᠦ ᠶ᠋ᠢ ᠯᠡ ᠬᠡᠯᠡᠯᠴᠡᠨᠡ᠃ ᠴᠣᠬᠣᠮ ᠰᠠᠯᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠦᠶᠡ ᠳ᠋ᠦ᠍ ᠡᠷᠡᠭᠲᠡᠢ ᠨᠢ ᠶᠡᠬᠡ ᠵᠣᠷᠢᠭ ᠭᠠᠷᠭᠠᠨ ᠡᠮᠡᠭᠲᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠴᠠᠷ ᠳᠡᠭᠡᠷᠡ ᠶᠦᠮ ᠤᠤ᠂ ᠮᠠᠩᠨᠠᠢ ᠳ᠋ᠤᠨᠢ ᠬᠣᠰᠢᠭᠤ ᠬᠦᠷᠭᠡᠨ ᠦᠨᠦᠰᠬᠦ ᠲᠡᠳᠦᠢᠬᠡᠨ ᠪᠣᠯᠤᠨᠠ᠃ ᠭᠡᠲᠡᠯᠡ ᠡᠨᠡ ᠨᠢ ᠮᠠᠰᠢ ᠲᠣᠮᠣ ᠬᠡᠷᠡᠭ ᠠᠵᠢ᠃ ᠦᠨᠦᠰᠦᠭᠰᠡᠨ ᠡᠷᠡ《ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠢᠯᠡ? ᠠᠮᠠᠷᠠᠭ ᠪᠣᠯᠪᠠᠴᠤ ᠠᠪᠤᠭᠠ ᠦᠭᠡᠢ ᠪᠠᠢᠵᠤ ᠦᠨᠦᠰᠬᠦ ᠮᠠᠨᠢ ᠶᠠᠭᠤᠲᠠᠢ ᠵᠢᠷᠤᠮ ᠦᠭᠡᠢ ᠬᠡᠷᠡᠭ ᠪᠢᠯᠡ?》 ᠭᠡᠵᠦ ᠰᠠᠨᠳᠤᠷᠤᠨᠠ᠃ ᠦᠨᠦᠰᠦᠭᠦᠯᠦᠭᠰᠡᠨ ᠡᠮᠡᠭᠲᠡᠢ ᠨᠢ《ᠦᠭᠡ ᠳᠠᠭᠤᠨ ᠦᠭᠡᠢ ᠦᠨᠦᠰᠦᠭᠦᠯᠬᠦ ᠮᠠᠨᠢ ᠶᠠᠭᠤ ᠪᠣᠢ? ᠡᠨᠡ ᠮᠠᠨᠢ ᠨᠠᠮᠠᠶ᠋ᠢ ᠯᠠᠪ ᠵᠢᠷᠤᠮ ᠦᠭᠡᠢ ᠡᠮᠡ ᠭᠡᠵᠦ ᠦᠵᠡᠨ ᠵᠢᠭᠰᠢᠬᠦ ᠪᠠᠢᠬᠠ?》 ᠭᠡᠵᠦ ᠢᠴᠢᠬᠦ ᠵᠣᠪᠠᠬᠤ ᠬᠣᠶᠠᠷ ᠢ᠋ ᠬᠣᠣᠰᠯᠠᠭᠤᠯᠤᠨᠠ᠃ ᠡᠢᠮᠦ ᠨᠢᠭᠡᠨ ᠬᠡᠷᠡᠭ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠡᠷᠡᠭᠲᠡᠢ ᠨᠢ ᠥᠨᠥᠬᠢ ᠪᠤᠯᠤᠩ ᠳ᠋ᠠᠭᠠᠨ ᠬᠣᠴᠣᠷᠴᠤ᠂ ᠢᠨᠠᠭ ᠤ᠋ᠨ ᠢ᠋ᠶ᠋ᠠᠨ ᠭᠡᠷ ᠲᠡᠭᠡᠨ ᠣᠷᠣᠭᠰᠠᠨ ᠬᠣᠢᠨᠠ ᠭᠠᠳᠠᠨᠠᠬᠢ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠭᠡᠲᠡᠨ ᠣᠴᠢᠵᠤ ᠠᠪᠤ᠂ ᠡᠵᠢ ᠨᠠᠷ ᠲᠠᠭᠠᠨ ᠠᠭᠠᠰᠢᠯᠠᠭᠤᠯᠵᠤ ᠪᠠᠢᠭᠠ ᠡᠰᠡᠬᠦ ᠶ᠋ᠢ ᠵᠢᠷᠦᠬᠡ ᠪᠡᠨ ᠳᠣᠭᠳᠣᠯᠤᠭᠤᠯᠤᠨ ᠨᠢᠭᠡᠨ ᠬᠡᠰᠡᠭ ᠴᠢᠩᠨᠠᠨ ᠵᠣᠭᠰᠣᠨᠠ᠃
ᠡᠭᠦᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠥᠪᠡᠷ ᠦ᠋ᠨ ᠠᠮᠢᠳᠤᠷᠠᠯ ᠳᠡᠭᠡᠷᠡ ᠠᠷᠠᠢᠬᠠᠨ ᠦᠵᠡᠭᠡ ᠦᠭᠡᠢ ᠪᠠᠢᠭᠠ ᠪᠣᠯᠪᠠᠴᠤ ᠨᠥᠬᠥᠳ ᠦ᠋ᠨ ᠠᠮᠢᠳᠤᠷᠠᠯ ᠠ᠋ᠴᠠ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠪᠠᠢᠯᠠ᠃ ᠭᠡᠷ ᠡᠴᠡ ᠬᠥᠮᠦᠰ ᠭᠠᠷᠴᠤ ᠭᠦᠢᠴᠡᠭᠰᠡᠨ ᠦ᠌ ᠳᠠᠷᠠᠭᠠ ᠪᠠᠯᠳᠠᠨᠴᠡᠷᠢᠩ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠭᠠᠷᠪᠠ᠃ ᠨᠠᠢᠷ ᠴᠡᠩᠭᠡᠯ ᠳ᠋ᠦ᠍ ᠣᠷᠣᠯᠴᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠰᠠᠨᠠᠭᠠ ᠰᠡᠳᠬᠢᠯ ᠰᠡᠷᠭᠦᠭᠰᠡᠨ ᠶᠠᠭᠤᠮᠠ ᠦᠭᠡᠢ᠃ ᠡᠷᠡ ᠨᠥᠬᠥᠳ ᠪᠠ ᠲᠡᠳᠡᠨ ᠲᠡᠢ ᠴᠢᠩ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠣᠯᠪᠣᠭᠰᠠᠨ ᠠᠷᠢᠭᠤᠨ ᠥᠬᠢᠳ ᠦ᠋ᠨ ᠡᠷᠬᠡ ᠮᠠᠲᠠᠯ ᠦᠭᠡᠢ ᠶ᠋ᠢᠨ ᠣᠢ ᠭᠠᠰᠢᠭᠤᠨ ᠨᠢ ᠰᠡᠳᠬᠢᠯ ᠳ᠋ᠦ᠍ᠨᠢ ᠡᠷᠭᠢᠯᠳᠦᠨᠡ᠃ ᠭᠡᠲᠡᠯᠡ ᠡᠭᠦᠨ ᠳ᠋ᠦ᠍ ᠪᠠᠰᠠ ᠪᠣᠭᠳᠠ ᠶ᠋ᠢᠨ ᠵᠦᠢ ᠪᠤᠰᠤ ᠶ᠋ᠢᠨ ᠵᠠᠷᠯᠢᠭ ᠮᠥᠨ ᠯᠡ ᠬᠣᠯᠪᠣᠭᠳᠠᠯ ᠲᠠᠢ ᠪᠠᠢᠬᠤ ᠲᠤᠯᠠ ᠪᠠᠯᠳᠠᠨᠴᠡᠷᠢᠩ《ᠲᠦᠮᠡᠨ ᠣᠯᠠᠨ ᠳ᠋ᠤ᠌ ᠡᠷᠬᠡ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠬᠦ ᠬᠤᠪᠢ ᠵᠠᠶᠠᠭᠠ ᠬᠡᠵᠢᠶᠡ ᠴᠦ᠍ ᠢᠷᠡᠬᠦ ᠦᠭᠡᠢ ᠨᠢ!》 ᠭᠡᠵᠦ ᠭᠤᠲᠤᠷᠠᠨᠠ᠃
ᠭᠡᠷ ᠲᠡᠭᠡᠨ ᠢᠷᠡᠬᠦ ᠳ᠋ᠦ᠍ ᠬᠠᠨᠢ ᠪᠠᠷᠠ ᠪᠣᠯᠤᠭᠴᠢ ᠭᠠᠭᠴᠠ ᠱᠠᠪᠢ ᠨᠢ ᠶᠡᠬᠡᠳᠡ ᠬᠦᠯᠢᠶᠡᠭᠰᠡᠨ ᠪᠣᠯᠤᠯᠲᠠᠢ᠃ ᠣᠷᠣᠢ ᠶ᠋ᠢᠨ ᠬᠢᠨᠢ ᠬᠣᠭᠣᠯᠠ ᠶ᠋ᠢ ᠰᠠᠪᠬᠠᠨ ᠬᠤᠪᠢᠩ ᠳ᠋ᠤ᠌ ᠠᠭᠤᠳᠠᠯᠤᠨ ᠲᠠᠯᠪᠢᠭᠠᠳ᠂ ᠬᠠᠵᠠᠭᠤ ᠳ᠋ᠤᠨᠢ ᠪᠦᠬᠦᠯᠢ ᠪᠡᠷ ᠬᠠᠵᠠᠭᠤᠯᠠᠨ ᠤᠨᠲᠠᠵᠤ ᠣᠷᠬᠢᠭᠰᠠᠨ ᠪᠠᠢᠪᠠ᠃ ᠪᠠᠯᠳᠠᠨᠴᠡᠷᠢᠩ ᠲᠡᠭᠦᠨ ᠢ᠋ ᠰᠡᠷᠭᠦᠭᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠣᠷᠣᠨ ᠳᠡᠭᠡᠷᠡ ᠪᠡᠨ ᠰᠠᠮ ᠭᠠᠷᠤᠨ᠂ ᠮᠥᠨ ᠬᠤᠪᠴᠠᠰᠤ ᠲᠠᠢᠯᠤᠯ ᠦᠭᠡᠢ ᠬᠡᠪᠲᠡᠪᠡ᠃ ᠣᠯᠠᠨ ᠬᠣᠨᠣᠭ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠨ᠂ ᠲᠤᠩ ᠳᠠᠷᠤᠢᠬᠠᠨ ᠢ᠋ᠶ᠋ᠠᠨ ᠤᠨᠲᠠᠬᠤ ᠶ᠋ᠢ ᠬᠢᠴᠢᠶᠡᠨᠡ᠃ ᠭᠡᠲᠡᠯᠡ ᠡᠳᠦᠷ ᠦ᠋ᠨ ᠬᠢᠨᠢ ᠦᠵᠡᠭᠰᠡᠨ ᠶᠠᠭᠤᠮᠠᠰ ᠰᠡᠳᠬᠢᠯ ᠳ᠋ᠦ᠍ᠨᠢ ᠣᠷᠣᠵᠤ ᠢᠷᠡᠨ ᠪᠠᠰᠠ ᠯᠠ ᠨᠣᠢᠷ ᠢ᠋ ᠨᠢ ᠬᠤᠯᠵᠢᠭᠤᠯᠤᠨᠠ᠃ ᠡᠴᠦᠰ ᠲᠦ᠋ᠨᠢ ᠪᠠᠯᠳᠠᠨᠴᠡᠷᠢᠩ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠭᠠᠬᠢᠭᠠᠳ ᠪᠤᠰᠤᠳ ᠤ᠋ᠨ ᠠᠳᠠᠯᠢ ᠡᠨᠡ ᠲᠡᠷᠡ ᠶ᠋ᠢ ᠪᠣᠳᠣᠬᠤ ᠦᠭᠡᠢ ᠪᠠᠢᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠡᠨ ᠰᠤᠳᠤᠯᠤᠨ ᠰᠢᠨᠵᠢᠯᠡᠵᠦ ᠭᠠᠷᠤᠯᠠ᠃ ᠢᠩᠭᠢᠬᠦ ᠳ᠋ᠦ᠍ ᠬᠠᠮᠤᠭ ᠭᠠᠢ ᠭᠠᠭᠴᠠ ᠬᠦ᠌ ᠨᠣᠮ ᠡᠷᠳᠡᠮ ᠮᠡᠷ ᠰᠡᠷ ᠰᠤᠷᠴᠤ ᠰᠤᠳᠤᠯᠤᠭᠰᠠᠨ ᠳ᠋ᠤ᠌ ᠯᠠ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠡᠬᠢᠯᠡᠭᠡᠳ ᠳ᠋ᠦᠩᠨᠡᠪᠡ᠃ ᠲᠡᠭᠡᠬᠦ ᠲᠡᠢ ᠵᠡᠷᠭᠡ ᠡᠷᠳᠡᠮ ᠰᠤᠷᠭᠠᠭᠰᠠᠨ ᠪᠠᠭᠰᠢ ᠨᠢ ᠲᠥᠷᠥ ᠭᠡᠵᠦ ᠶᠠᠭᠤ ᠪᠣᠢ? ᠲᠡᠭᠦᠨ ᠦ᠌ ᠳᠣᠣᠷᠠᠬᠢ ᠲᠦᠮᠡᠨ ᠠᠷᠠᠳ ᠤ᠋ᠨ ᠬᠤᠪᠢ ᠵᠠᠶᠠᠭᠠ ᠭᠡᠵᠦ ᠶᠠᠭᠤ ᠪᠣᠢ? ᠭᠡᠳᠡᠭ ᠢ᠋ ᠶᠠᠭᠤᠮᠠ ᠪᠦᠬᠦᠨ ᠲᠡᠢ ᠨᠢᠭᠲᠠ ᠬᠣᠯᠪᠣᠨ ᠰᠤᠷᠭᠠᠨ ᠬᠥᠮᠦᠵᠢᠭᠦᠯᠦᠭᠰᠡᠨ ᠡᠴᠡ ᠪᠠᠢᠯᠠ᠃ ᠡᠢᠮᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠪᠦᠬᠦ ᠰᠤᠷᠤᠭᠰᠠᠨ ᠮᠡᠳᠡᠭᠰᠡᠨ ᠢ᠋ᠶ᠋ᠡᠨ ᠵᠢᠭᠰᠢᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠷᠡ ᠪᠤᠰᠤᠳ ᠢ᠋ ᠪᠠᠰᠠ ᠰᠤᠷᠭᠠᠨ ᠪᠣᠯᠪᠠᠰᠤᠷᠠᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠪᠠᠨ ᠪᠦᠷ ᠬᠡᠷᠡᠭ ᠠᠯᠠᠭᠠ ᠭᠡᠵᠦ ᠦᠵᠡᠪᠡ᠃
ᠴᠤᠤᠷᠢᠶᠠᠲᠤᠪᠠ—— ᠭᠡᠰᠡᠨ ᠢ᠋ ᠴᠤᠤᠷᠢᠶᠠᠳᠠᠪᠠ᠃
ᠰᠠᠪᠠᠬᠠᠨ ᠬᠤᠪᠢᠩ—— ᠭᠡᠰᠡᠨ ᠢ᠋ ᠰᠠᠪᠬᠠᠨ ᠭᠡᠵᠦ ᠪᠢᠴᠢᠯᠡ᠃
ᠵᠥᠪ ᠡᠰᠡᠬᠦ ᠶ᠋ᠢ ᠲᠤᠩᠭᠠᠬᠤ ᠪᠣᠯᠪᠠ ᠤᠤ⁈