ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ – (ᠠᠷᠪᠠᠨ ᠨᠢᠭᠡ) Монгол эм эмнэлэг (11)
290ᠪᠥᠭᠡᠷᠡᠨ ᠨᠢᠭᠤᠭᠳᠠᠭᠰᠠᠨ ᠬᠠᠯᠠᠭᠤᠨ ᠢ᠋ ᠡᠮᠨᠡᠭᠰᠡᠨ 118 ᠵᠢᠱ᠌ᠢᠶᠡ ᠶ᠋ᠢᠨ ᠠᠵᠢᠭᠯᠠᠯᠲᠠ
ᠡᠷᠳᠡᠨᠢᠴᠤᠭᠲᠤ
ᠲᠤᠰ ᠡᠪᠡᠳᠴᠢᠨ ᠨᠢ ᠨᠢᠶᠠᠨ᠂ ᠴᠢᠰᠤ ᠰᠢᠷᠠ ᠶ᠋ᠢᠨ ᠬᠠᠯᠠᠭᠤᠨ ᠠ᠋ᠴᠠ ᠰᠢᠯᠲᠠᠭᠠᠯᠠᠨ ᠡᠭᠦᠰᠴᠦ᠂ ᠨᠢᠷᠤᠭᠤ ᠡᠪᠡᠳᠬᠦ᠂ ᠨᠢᠭᠤᠷ ᠪᠡᠶᠡ ᠰᠡᠯᠬᠦᠷᠡᠬᠦ᠂ ᠴᠢᠰᠤ ᠪᠠᠷ ᠰᠢᠭᠡᠬᠦ᠂ ᠴᠢᠰᠤᠨ ᠳᠠᠷᠤᠯᠲᠠ ᠥᠨᠳᠥᠷᠵᠢᠬᠦ ᠪᠡᠷ ᠭᠣᠣᠯᠳᠠᠭᠰᠠᠨ ᠠᠷᠬᠠᠭ ᠡᠪᠡᠳᠴᠢᠨ ᠪᠣᠯᠤᠨᠠ᠃ ᠬᠤᠪᠢ ᠬᠥᠮᠦᠨ ᠬᠠᠪᠤᠳᠠᠷ ᠤ᠋ᠨ - 9 ᠶ᠋ᠢ ᠭᠠᠳᠠᠨᠠ ᠠ᠋ᠴᠠ ᠪᠥᠭᠡᠷᠡᠨ ᠪᠠᠯᠴᠢᠷ ᠨᠢᠷᠤᠭᠤᠨ ᠤ᠋ 14 ᠳ᠋ᠦ᠍ᠭᠡᠷ ᠦᠶᠡ ᠳ᠋ᠦ᠍ᠨᠢ ᠨᠠᠭᠠᠯᠲᠠ ᠬᠢᠬᠦ ᠪᠡᠷ ᠭᠣᠣᠯᠳᠠᠵᠤ᠂ ᠤᠤᠭᠤᠬᠤ ᠡᠮ ᠲᠡᠢ ᠬᠠᠪᠰᠤᠷᠤᠭᠤᠯᠤᠨ ᠡᠮᠨᠡᠭᠰᠡᠨ ᠦᠷᠡ ᠳ᠋ᠦᠩ ᠢ᠋ ᠳᠣᠣᠷᠠ ᠲᠠᠨᠢᠯᠴᠠᠭᠤᠯᠤᠶᠠ᠃
ᠨᠢᠭᠡ ᠂ ᠮᠠᠲ᠋ᠧᠷᠢᠶᠠᠯ
118 ᠵᠢᠱ᠌ᠢᠶᠡ ᠡᠪᠡᠳᠴᠢᠲᠡᠨ ᠳ᠋ᠦ᠍ ᠺᠠᠳ᠋ᠷ 19᠂ ᠪᠠᠭᠰᠢ 17᠂ ᠠᠵᠢᠯᠴᠢᠨ 21᠂ ᠮᠠᠯᠴᠢᠨ 32᠂ ᠲᠠᠷᠢᠶᠠᠴᠢᠨ 29 ᠨᠡᠷᠡᠰ ᠪᠣᠢ᠃ ᠡᠭᠦᠨ ᠳ᠋ᠦ᠍ ᠡᠮᠨᠡᠯᠭᠡ ᠳ᠋ᠦ᠍ ᠰᠠᠭᠤᠵᠤ ᠡᠮᠴᠢᠯᠡᠭᠰᠡᠨ 62᠂ ᠡᠭᠦᠳᠡᠨ ᠡᠮᠨᠡᠯᠭᠡ ᠳ᠋ᠦ᠍ ᠡᠮᠨᠡᠭᠦᠯᠦᠭᠰᠡᠨ 56 ᠵᠢᠱ᠌ᠢᠶᠡ ᠪᠠᠢᠪᠠ᠃ ᠡᠷᠡᠭᠲᠡᠢ 65᠂ ᠡᠮᠡᠭᠲᠡᠢ 53 ᠨᠡᠷᠡᠰ; ᠬᠠᠮᠤᠭ ᠪᠠᠭᠠ ᠨᠢ 7 ᠨᠠᠰᠤᠲᠠᠢ᠂ ᠬᠠᠮᠤᠭ ᠦᠳᠡᠯᠡᠭᠰᠡᠨ ᠨᠢ 58 ᠨᠠᠰᠤᠲᠠᠢ ; ᠡᠪᠡᠳᠴᠢᠯᠡᠭᠰᠡᠨ ᠬᠤᠭᠤᠴᠠᠭᠠ ᠬᠠᠮᠤᠭ ᠣᠬᠣᠷ ᠨᠢ 5 ᠡᠳᠦᠷ᠂ ᠣᠵᠢᠭᠰᠢᠷᠠᠭᠰᠠᠨ ᠨᠢ 11 ᠵᠢᠯ; ᠡᠪᠡᠳᠴᠢᠯᠡᠭᠡᠳ 5 ᠡᠳᠦᠷ ᠡᠴᠡ 3 ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣᠬᠢ 81%᠂ 3 ᠵᠢᠯ ᠡᠴᠡ ᠳᠡᠭᠡᠭᠰᠢ 19% ᠶ᠋ᠢ ᠡᠵᠡᠯᠡᠨᠡ ᠃
ᠣᠨᠣᠰᠢᠯᠠᠯ ᠤ᠋ᠨ ᠪᠠᠷᠢᠮᠵᠢᠶᠠ᠄ ᠧᠦ᠋ᠷᠣᠫᠠ ᠡᠮᠨᠡᠯᠭᠡ ᠶ᠋ᠢᠨ ᠳᠣᠲᠣᠷ ᠰᠠᠯᠠᠭᠠᠨ ᠤ᠋ (1985 ᠣᠨ ᠳ᠋ᠤ᠌ ᠲᠣᠭᠲᠠᠭᠰᠠᠨ) ᠪᠠᠷᠢᠮᠵᠢᠶᠠ ᠪᠠ 《ᠳᠥᠷᠪᠡᠨ ᠦᠨᠳᠦᠰᠦ》᠂《ᠳᠣᠲᠣᠷ ᠡᠪᠡᠠᠳᠴᠢᠨ ᠤ᠋ ᠰᠤᠳᠤᠯᠤᠯ》 ᠢ᠋ ᠬᠠᠪᠰᠤᠷᠭᠠᠵᠠᠢ ᠃
ᠭᠣᠣᠯ ᠡᠮ ᠦ᠋ᠨ ᠵᠣᠷ ᠄ ᠬᠠᠪᠤᠳᠠᠷ ᠤ᠋ᠨ ᠨᠠᠭᠠᠯᠲᠠ — 9 (ᠲᠦᠩᠯᠢᠶᠣᠣ ᠳ᠋ᠠᠬᠢ ᠮᠣᠩᠭᠣᠯ ᠡᠮ ᠦ᠋ᠨ ᠦᠢᠯᠡᠳᠪᠦᠷᠢ) ᠶ᠋ᠢᠨ ᠨᠠᠢᠷᠠᠯᠭᠠ᠄ ᠰᠢᠷᠠ ᠭᠠ᠂ ᠪᠣᠩ ᠠ᠂ ᠭᠢᠰᠢᠭᠦᠨᠡ᠂ ᠬᠤᠷᠠᠭᠠᠨ ᠴᠢᠬᠢ᠂ ᠴᠠᠭᠠᠨ ᠬᠤᠷᠠ᠂ ᠬᠡᠷᠢᠶᠡᠨ ᠨᠢᠳᠦ᠂ ᠦᠮᠡᠬᠡᠢ ᠵᠡᠭᠡᠰᠦ᠂ ᠳᠠᠯᠠᠨ ᠲᠦᠷᠦᠭᠦᠦ᠂ ᠵᠢᠭᠠᠷ ᠵᠡᠷᠭᠡ ᠬᠥᠯ ᠡᠮ ᠢ᠋ᠶ᠋ᠡᠷ ᠪᠦᠷᠢᠯᠳᠦᠵᠡᠢ᠃
ᠵᠣᠷ ᠤ᠋ᠨ ᠵᠠᠳᠠᠯᠤᠯᠲᠠ᠄ ᠲᠤᠰ ᠨᠠᠢᠷᠠᠯᠭᠠ ᠶ᠋ᠢ ᠡᠷᠲᠡᠨ ᠦ᠌ ᠨᠣᠮ ᠰᠤᠳᠤᠷ ᠲᠤ᠌ ᠬᠡᠳᠦᠢᠪᠡᠷ ᠬᠠᠪᠤᠳᠠᠷ ᠢ᠋ ᠬᠠᠷᠢᠭᠤᠯᠬᠤ ᠪᠠᠷ ᠨᠣᠮᠯᠠᠭᠰᠠᠨ ᠪᠣᠯᠪᠠᠴᠤ ᠵᠣᠷ ᠳᠠᠬᠢ ᠵᠢᠭᠠᠷ᠂ ᠪᠣᠩ ᠠ᠂ ᠴᠠᠭᠠᠨ ᠬᠤᠷᠠ᠂ ᠬᠡᠷᠢᠶᠡᠨ ᠨᠢᠳᠦ ᠵᠡᠷᠭᠡ ᠨᠢ ᠨᠢᠶᠠᠨ ᠢ᠋ ᠨᠢᠲᠤᠯᠵᠤ᠂ ᠡᠯᠢᠭᠡ ᠪᠥᠭᠡᠷᠡᠨ ᠦ᠌ ᠬᠠᠯᠠᠭᠤᠨ ᠢ᠋ ᠠᠷᠢᠯᠭᠠᠬᠤ᠂ ᠪᠥᠭᠡᠷᠡᠨ ᠲᠠᠮᠢᠷ ᠢ᠋ ᠰᠠᠢᠵᠢᠷᠠᠭᠤᠯᠬᠤ ; ᠬᠤᠷᠠᠭᠠᠨ ᠴᠢᠬᠢ᠂ ᠭᠢᠰᠢᠭᠦᠨᠡ᠂ ᠳᠠᠯᠠᠨ ᠲᠦᠷᠦᠭᠦᠦ᠂ ᠵᠢᠭᠠᠷ ᠵᠡᠷᠭᠡ ᠨᠢ ᠨᠢᠶᠠᠨ ᠢ᠋ ᠨᠢᠲᠤᠯᠵᠤ᠂ ᠬᠠᠪᠤᠳᠠᠷ ᠢ᠋ ᠬᠠᠷᠢᠭᠤᠯᠬᠤ; ᠭᠢᠰᠢᠭᠦᠨᠡ ᠨᠢ ᠥᠳᠬᠡᠨ ᠮᠥᠷ ᠦ᠋ᠨ ᠵᠠᠮ ᠢ᠋ᠶ᠋ᠠᠷ ᠤᠰᠤ ᠶ᠋ᠢ ᠤᠳᠤᠷᠢᠳᠬᠤ ; ᠰᠢᠷᠠ ᠭᠠ ᠨᠢ ᠰᠢᠭᠡᠰᠦᠨ ᠵᠠᠮ ᠢ᠋ᠶ᠋ᠠᠷ ᠤᠰᠤ ᠶ᠋ᠢ ᠤᠳᠤᠷᠢᠳᠬᠤ ;ᠦᠮᠡᠬᠡᠢ ᠵᠡᠭᠡᠰᠦ ᠨᠢ ᠬᠡᠢ ᠶ᠋ᠢᠨ ᠬᠢᠮᠤᠷᠠᠯ ᠢ᠋ ᠲᠡᠭᠰᠢᠳᠬᠡᠵᠦ᠂ ᠮᠠᠬᠠᠪᠣᠳ ᠢ ᠰᠢᠮᠡᠵᠢᠭᠦᠯᠦᠨᠡ᠃ ᠲᠡᠢᠮᠦ ᠡᠴᠡ ᠲᠤᠰ ᠨᠠᠢᠷᠠᠯᠭᠠ ᠨᠢ ᠪᠥᠭᠡᠷᠡᠨ ᠦ᠌ ᠤᠰᠤ ᠠᠯᠳᠠᠭᠰᠠᠨ ᠬᠠᠪᠤᠩ᠂ ᠨᠢᠭᠤᠭᠳᠠᠭᠰᠠᠨ ᠬᠠᠯᠠᠭᠤᠨ ᠵᠡᠷᠭᠡ ᠶ᠋ᠢ ᠤᠰᠤᠨ ᠵᠠᠮ ᠢ᠋ᠶ᠋ᠠᠷ ᠤᠳᠤᠷᠢᠳᠴᠤ ᠴᠢᠳᠠᠬᠤ ᠲᠤᠯᠠ ᠬᠠᠪᠤᠩ ᠢ᠋ ᠬᠠᠲᠠᠭᠠᠵᠤ᠂ ᠰᠢᠭᠡᠯᠭᠡᠬᠦ ᠦᠢᠯᠡᠳᠦᠯ ᠢᠯᠡᠳᠲᠡ ᠪᠠᠢᠳᠠᠭ᠃
ᠬᠡᠷᠡᠭᠯᠡᠬᠦ ᠠᠷᠭᠠ᠄ ᠨᠢᠷᠤᠭᠤᠨ ᠤ᠋ 14 ᠳ᠋ᠦ᠍ᠭᠡᠷ ᠦᠶᠡ (ᠪᠥᠭᠡᠷᠡᠨ ᠪᠠᠯᠴᠢᠷ) ᠲᠤ᠌ ᠲᠠᠯᠬᠠ ᠡᠮ ᠢ᠋ᠶ᠋ᠡᠨ ᠤᠰᠤ ᠪᠠᠷ ᠵᠢᠭᠤᠷᠠᠵᠤ ᠨᠠᠭᠠᠨᠠ᠃ 24 ᠴᠠᠭ ᠲᠤ᠌ ᠨᠢᠭᠡ ᠤᠳᠠᠭᠠ ᠰᠣᠯᠢᠵᠤ᠂ ᠡᠳᠡᠭᠡᠷᠡᠲᠡᠯᠡ ᠨᠠᠭᠠᠵᠤ ᠪᠣᠯᠤᠨᠠ᠃
ᠬᠣᠶᠠᠷ ᠂ ᠡᠮᠴᠢᠯᠡᠭᠡ ᠵᠠᠰᠠᠬᠤ
ᠵᠠᠷᠴᠢᠮ᠄ ᠬᠠᠯᠠᠭᠤᠨ ᠢ᠋ ᠠᠷᠢᠯᠭᠠᠵᠤ᠂ ᠨᠢᠶᠠᠨ ᠢ᠋ ᠨᠢᠲᠤᠯᠵᠤ᠂ ᠤᠰᠤᠨ ᠵᠠᠮ ᠢ᠋ ᠨᠡᠭᠡᠭᠡᠬᠦ᠂ ᠮᠠᠬᠠᠪᠣᠳ ᠢ᠋ ᠲᠡᠭᠰᠢᠳᠬᠡᠬᠦ ᠪᠠ ᠲᠤᠬᠠᠢ ᠶ᠋ᠢᠨ ᠪᠠᠢᠳᠠᠯ ᠳ᠋ᠤ᠌ ᠤᠶᠠᠯᠳᠤᠭᠤᠯᠵᠤ ᠵᠠᠰᠠᠨᠠ᠃ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠨᠠᠭᠠᠯᠲᠠ ᠬᠢᠬᠦ ᠶ᠋ᠢᠨ ᠬᠠᠮᠲᠤ ᠭᠤᠷᠪᠠᠨ ᠤᠯᠠᠭᠠᠨ ᠳᠠᠩ᠂ ᠪᠥᠭᠡᠷᠡᠨ ᠠᠷᠤᠷᠠ — 10 ᠂ ᠰᠠᠷᠢ ᠭᠠᠷᠤᠳᠢ ᠭᠦᠷᠭᠦᠮ —7 ᠶ᠋ᠢ ᠤᠤᠭᠤᠯᠭᠠᠨᠠ᠃ ᠬᠡᠢ ᠳᠡᠢᠯᠦᠩᠭᠦᠢ ᠳ᠋ᠦ᠍ ᠠᠭᠠᠷᠤ 8 — ᠠᠭᠠᠷᠤ —35 ᠶ᠋ᠢ ᠥᠭᠬᠦ ; ᠰᠢᠷᠠ ᠳᠡᠢᠯᠦᠩᠭᠦᠢ ᠳ᠋ᠦ᠍ ᠶᠡᠬᠡ ᠬᠠᠷᠠ— 12 ᠢ᠋ ᠥᠭᠬᠦ ; ᠪᠠᠳᠬᠠᠨ ᠳᠡᠢᠯᠦᠩᠭᠦᠢ ᠳ᠋ᠦ᠍ ᠲᠤᠩᠭᠠᠯᠠᠭ— 5 ᠬᠠᠷᠠᠪᠤᠷ — 1 6 ᠶ᠋ᠢ ᠥᠭᠬᠦ; ᠮᠠᠬᠠᠪᠣᠳ ᠢ᠋ ᠲᠡᠭᠰᠢᠳᠬᠡᠬᠦ ᠳ᠋ᠦ᠍ ᠶᠡᠬᠡ ᠳᠠᠩ ᠢ᠋ ᠥᠭᠬᠦ; ᠰᠠᠪᠠ ᠶ᠋ᠢᠨ ᠢᠯᠴᠢ ᠶ᠋ᠢ ᠰᠠᠢᠵᠢᠷᠠᠭᠤᠯᠬᠤ ᠳ᠋ᠤ᠌ ᠷᠦᠳᠠ — 6 ᠶ᠋ᠢ ᠥᠭᠬᠦ; ᠴᠢᠰᠤᠨ ᠳᠠᠷᠤᠯᠲᠠ ᠶ᠋ᠢ ᠪᠠᠭᠤᠷᠠᠭᠤᠯᠵᠤ᠂ ᠴᠢᠰᠤᠨ ᠬᠠᠯᠠᠭᠤᠨ ᠢ ᠠᠷᠢᠯᠭᠠᠬᠤ ᠳ᠋ᠤ᠌ ᠶᠡᠬᠡ ᠤᠯᠠᠭᠠᠨ —13 ᠳᠠᠩ ᠢ᠋ ᠥᠭᠬᠦ ; ᠬᠠᠪᠤᠩ ᠢ᠋ ᠬᠠᠲᠠᠭᠠᠬᠤ ᠳ᠋ᠤ᠌ ᠠᠯᠲᠠᠨ ᠡᠯᠡᠰᠦ —8 ᠶ᠋ᠢ ᠥᠭᠴᠦ ᠤᠤᠭᠤᠯᠭᠠᠨᠠ᠃
ᠡᠮ ᠤᠤᠭᠤᠬᠤ ᠬᠤᠭᠤᠴᠠᠭᠠ᠄ 6 ᠡᠳᠦᠷ ᠢ᠋ ᠨᠢᠭᠡ ᠡᠮᠴᠢᠯᠡᠭᠡᠨ ᠦ᠌ ᠬᠤᠭᠤᠴᠠᠭᠠ ᠪᠣᠯᠭᠠᠵᠤ᠂ ᠬᠤᠭᠤᠴᠠᠭᠠ ᠪᠦᠷᠢ ᠳ᠋ᠦ᠍ ᠪᠦᠬᠦ ᠲᠠᠯᠠ ᠶ᠋ᠢᠨ ᠪᠠᠢᠴᠠᠭᠠᠯᠲᠠ ᠶ᠋ᠢ 1 — 2 ᠤᠳᠠᠭᠠ ᠬᠢᠨᠡ᠃ ᠣᠯᠠᠩᠬᠢ ᠡᠪᠡᠳᠴᠢᠲᠡᠨ 2 — 3 ᠬᠤᠭᠤᠴᠠᠭᠠ ᠶ᠋ᠢᠨ ᠡᠮᠴᠢᠯᠡᠭᠡᠨ ᠳ᠋ᠦ᠍ ᠡᠳᠡᠭᠡᠷᠡᠵᠦ᠂ ᠤᠵᠢᠭᠰᠢᠷᠠᠭᠰᠠᠨ ᠴᠤ᠌ 5 — 8 ᠡᠮᠴᠢᠯᠡᠭᠡᠨ ᠦ᠌ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠡᠳᠡᠭᠡᠷᠡᠵᠦ ᠴᠢᠳᠠᠳᠠᠭ᠃
ᠡᠮᠴᠢᠯᠡᠭᠡᠨ ᠦ᠌ ᠦᠷᠡ ᠳ᠋ᠦᠩ ᠦ᠋ᠨ ᠪᠠᠷᠢᠮᠵᠢᠶᠠ᠄
ᠡᠳᠡᠭᠡᠷᠡᠭᠰᠡᠨ ᠨᠢ᠄ ᠰᠢᠨᠵᠢ ᠲᠡᠮᠳᠡᠭ ᠨᠢ ᠪᠦᠷᠢᠮᠦᠰᠦᠨ ᠠᠷᠢᠯᠵᠤ᠂ ᠪᠡᠶᠡ ᠨᠢ ᠡᠷᠡᠭᠦᠯ ᠬᠡᠪ ᠲᠡᠭᠡᠨ ᠣᠷᠣᠬᠤ ;
ᠰᠠᠢᠵᠢᠷᠠᠭᠰᠠᠨ ᠨᠢ᠄ ᠪᠡᠶᠡ ᠨᠢ ᠡᠷᠡᠭᠦᠯᠰᠢᠭᠰᠡᠨ ᠴᠦ᠍ ᠥᠳᠥᠭᠡᠬᠦ ᠨᠥᠬᠥᠴᠡᠯ ᠤᠴᠠᠷᠠᠪᠠᠯ ᠪᠡᠶᠡ ᠠᠯᠵᠢᠶᠠᠬᠤ᠂ ᠳᠤᠷᠠᠰᠢᠯ ᠠᠮᠤᠷ ᠦᠭᠡᠢ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠳᠡᠭ᠃
ᠡᠭᠦᠨ ᠳ᠋ᠦ᠍ ᠡᠳᠡᠭᠡᠷᠡᠭᠰᠡᠨ ᠨᠢ 115 ᠵᠢᠱ᠌ᠢᠶᠡ ᠪᠠᠢᠵᠤ ᠂ 97.4% ᠶ᠋ᠢ ᠡᠵᠡᠯᠡᠨᠡ ᠃ ᠰᠠᠢᠵᠢᠷᠠᠭᠰᠠᠨ ᠨᠢ 3 ᠵᠢᠱ᠌ᠢᠶᠡ ᠪᠠᠢᠵᠤ᠂ 26% ᠶ᠋ᠢ ᠡᠵᠡᠯᠡᠨᠡ ᠃
ᠭᠤᠷᠪᠠ ᠂ ᠨᠡᠢᠲᠡᠯᠢᠭ ᠵᠢᠱ᠌ᠢᠶᠡ
ᠡᠪᠡᠳᠴᠢᠲᠡᠨ ᠴᠢ *** ᠡᠷᠡᠭᠲᠡᠢ᠂ 26 ᠨᠠᠰᠤᠲᠠᠢ᠂ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ᠃ ᠵᠠᠷᠤᠳ ᠬᠤᠰᠢᠭᠤᠨ ᠤ᠋ ᠳᠣᠯᠣᠳᠣ ᠰᠤᠮᠤ ᠶ᠋ᠢᠨ ᠮᠠᠯᠴᠢᠨ᠂ ᠡᠪᠡᠳᠴᠢᠲᠡᠨ 1991 ᠣᠨ ᠤ᠋ 6 ᠰᠠᠷᠠ ᠶ᠋ᠢᠨ 3 ᠤ᠋ ᠡᠳᠦᠷ ᠡᠴᠡ ᠪᠡᠶᠡ ᠨᠢ ᠵᠢᠭᠠᠬᠠᠨ ᠬᠠᠯᠠᠭᠤᠷᠠᠵᠤ᠂ ᠬᠣᠭᠣᠯᠠᠢ ᠡᠪᠡᠳᠴᠦ ᠪᠠᠭᠠ ᠬᠠᠨᠢᠶᠠᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠡᠮ ᠤᠤᠭᠤᠵᠤ ᠨᠠᠮᠳᠠᠭᠰᠠᠨ ᠪᠣᠯᠪᠠᠴᠤ 6 ᠰᠠᠷᠠ ᠶ᠋ᠢᠨ 10 ᠤ᠋ ᠡᠳᠦᠷ ᠡᠴᠡ ᠡᠬᠢᠯᠡᠵᠦ ᠶᠡᠬᠡ ᠤᠮᠳᠠᠭᠠᠰᠬᠤ᠂ ᠳᠤᠷᠠ ᠪᠤᠯᠭᠢᠬᠤ᠂ ᠣᠭᠰᠢᠵᠤ ᠪᠥᠭᠡᠯᠵᠢᠬᠦ ᠪᠠ ᠨᠢᠭᠤᠷ᠂ ᠨᠢᠳᠦᠨ ᠵᠣᠪᠬᠢ ᠬᠠᠪᠤᠩᠨᠠᠵᠤ᠂ ᠳᠠᠷᠠᠭᠠ ᠡᠳᠦᠷ ᠡᠴᠡ ᠨᠢ ᠪᠦᠬᠦ ᠪᠡᠶᠡ ᠬᠠᠪᠤᠩᠨᠠᠪᠠ᠃ ᠰᠢᠭᠡᠰᠦᠨ ᠦ᠌ ᠬᠡᠮᠵᠢᠶᠡ 24 ᠴᠠᠭ ᠲᠤ᠌ 500ml ᠡᠴᠡ ᠬᠡᠲᠦᠷᠡᠬᠦ ᠦᠭᠡᠢ᠂ ᠥᠳᠬᠡᠨ ᠴᠠᠢ ᠶ᠋ᠢᠨ ᠥᠩᠭᠡ ᠲᠡᠢ᠂ ᠦᠮᠡᠬᠡᠢ ᠦᠨᠦᠷᠲᠡᠢ᠃ ᠲᠣᠯᠣᠭᠠᠢ ᠡᠪᠡᠳᠬᠦ᠂ ᠨᠢᠳᠦᠨ ᠤᠬᠤᠷᠬᠠᠢ ᠴᠢᠨᠦᠷᠡᠵᠦ ᠡᠪᠡᠳᠬᠦ᠂ ᠠᠮᠢᠰᠬᠤᠯ ᠳᠠᠪᠬᠤᠴᠠᠬᠤ᠂ ᠬᠣᠳᠣᠭᠣᠳᠣ ᠠᠶᠤᠤᠯᠢᠬᠠᠢ ᠬᠥᠭᠡᠭᠡᠵᠦ ᠬᠠᠪᠤᠩᠨᠠᠨ᠂ ᠳᠤᠷᠠᠰᠢᠯ ᠬᠠᠭᠠᠭᠳᠠᠪᠠ᠃ ᠭᠠᠵᠠᠷ ᠣᠷᠣᠨ ᠳ᠋ᠠᠭᠠᠨ ᠦᠷᠪᠢᠰᠦᠯ ᠢ᠋ ᠳᠠᠷᠤᠬᠤ ᠡᠮ ᠤᠤᠭᠤᠭᠰᠠᠨ ᠴᠤ᠌ ᠲᠣᠰᠠᠨ ᠪᠣᠯᠤᠭᠰᠠᠨ ᠦᠭᠡᠢ 1991ᠣᠨ ᠤ᠋ 6 ᠰᠠᠷᠠ ᠶ᠋ᠢᠨ 15 ᠤ᠋ ᠡᠳᠦᠷ ᠮᠠᠨ ᠤ᠋ ᠡᠭᠦᠳᠡᠨ ᠡᠮᠨᠡᠯᠭᠡ ᠳ᠋ᠦ᠍ ᠢᠷᠡᠵᠦ ᠦᠵᠡᠭᠦᠯᠪᠡ᠃
ᠪᠠᠢᠴᠠᠭᠠᠯᠲᠠ᠄ ᠮᠡᠳᠡᠷᠡᠯ ᠲᠣᠳᠣᠷᠬᠠᠢ ᠴᠣᠭ ᠵᠢᠪᠬᠤᠭᠠ ᠵᠦᠭᠡᠷ᠂ ᠬᠡᠯᠡ ᠰᠢᠷᠠᠪᠲᠤᠷ ᠵᠤᠵᠠᠭᠠᠨ ᠥᠩᠭᠥᠷ ᠲᠡᠢ ᠬᠥᠪᠡᠭᠡ ᠨᠢ ᠣᠷᠣ ᠲᠠᠢ᠃ ᠰᠤᠳᠠᠯ ᠨᠠᠷᠢᠨ ᠡᠷᠴᠢᠮᠲᠡᠢ᠂ ᠴᠠᠭ ᠤ᠋ᠨ ᠰᠤᠳᠠᠯ ᠪᠣᠯᠭᠢᠯᠵᠠᠵᠤ ᠴᠡᠴᠡᠷᠡᠨᠡ᠃ ᠬᠠᠪᠤᠩ ᠤ᠋ᠨ ᠨᠠᠢ᠍ᠮᠠᠨ ᠬᠣᠲᠠ ᠳ᠋ᠤ᠌ ᠰᠡᠯᠬᠦᠷᠡᠭᠰᠡᠨ ᠪᠥᠭᠡᠳ ᠬᠢᠩᠭᠠᠷ ᠰᠢᠯᠪᠢ ᠶ᠋ᠢ ᠳᠠᠷᠤᠬᠤ ᠳ᠋ᠤ᠌ ᠪᠠᠷᠤᠭ 0.5cm ᠭᠦᠨ ᠣᠷᠣᠮ ᠦᠯᠡᠳᠡᠨᠡ᠂ ᠪᠡᠶᠡ ᠶ᠋ᠢᠨ ᠬᠠᠯᠠᠭᠤᠨ ᠨᠢ 38.1℃᠂ ᠴᠢᠰᠤᠨ ᠳᠠᠷᠤᠯᠲᠠ 160 /110mmHg᠂ ᠵᠢᠷᠦᠬᠡᠨ ᠴᠣᠬᠢᠯᠭᠠ 92 ᠤᠳᠠᠭᠠ /ᠮᠢᠨᠦ᠋ᠲ᠂ ᠲᠡᠭᠰᠢ ᠬᠡᠮᠨᠡᠯ ᠲᠡᠢ᠂ ᠬᠣᠯᠢᠮᠠᠭ ᠠᠪᠢᠶᠠ ᠦᠭᠡᠢ᠂ ᠠᠭᠤᠰᠬᠢᠨ ᠤ᠋ ᠪᠠᠷᠠᠭᠤᠨ ᠳᠣᠣᠷᠠ ᠨᠠᠪᠴᠢ ᠳ᠋ᠤ᠌ ᠨᠠᠷᠢᠨ ᠬᠡᠷᠴᠢᠭᠢᠨᠡᠬᠦ ᠠᠪᠢᠶᠠ ᠲᠠᠢ᠃ ᠡᠯᠢᠭᠡ ᠳᠡᠯᠢᠭᠦᠦ ᠲᠡᠮᠲᠡᠷᠢᠭᠳᠡᠬᠦ ᠦᠭᠡᠢ᠃ ᠰᠢᠭᠡᠰᠦ ᠶ᠋ᠢᠨ ᠬᠢᠮᠢ ᠶ᠋ᠢᠨ ᠪᠠᠢᠴᠠᠭᠠᠯᠲᠠ ᠳ᠋ᠤ᠌ ᠤᠭᠤᠷᠠᠭ(+++) ᠤᠯᠠᠭᠠᠨ ᠡᠰ 7 — 9 /mm3 ᠴᠠᠭᠠᠨ ᠡᠰ 3 — 5 /mm3 ᠤᠭᠤᠷᠠᠭ ᠮᠥᠬᠥᠯᠢᠭᠲᠦ ᠭᠤᠤᠷᠰᠤᠨ ᠬᠡᠯᠪᠡᠷᠢ 2 — 3 /mm3 ᠪᠠᠢᠨᠠ᠃ ᠴᠢᠰᠤᠨ ᠴᠠᠭᠠᠨ ᠡᠰ 18. 000 /mm3 ᠰᠠᠭᠠᠷᠮᠠᠭ ᠡᠰ ᠨᠢ 87% ᠴᠢᠰᠤᠨ ᠲᠤᠨᠤᠯᠲᠠ 85/ mmh᠃
ᠣᠨᠣᠰᠢᠯᠠᠯ᠄ 1 ᠪᠥᠭᠡᠷᠡᠨ ᠨᠢᠭᠤᠭᠳᠠᠭᠰᠠᠨ ᠬᠠᠯᠭᠤᠨ
2 ᠪᠥᠭᠡᠷᠡᠨ ᠤᠰᠤᠨ ᠬᠠᠪᠤᠩ
ᠵᠠᠰᠠᠬᠤ ᠵᠠᠷᠴᠢᠮ᠄ ᠬᠠᠯᠠᠭᠤᠨ ᠢ᠋ ᠠᠷᠢᠯᠭᠠᠵᠤ《ᠨᠢᠶᠠᠨ ᠢ᠋ ᠨᠢᠲᠤᠯᠵᠤ ᠂ ᠤᠰᠤᠨ ᠵᠠᠮ ᠢ᠋ ᠨᠡᠭᠡᠭᠡᠵᠦ ᠲᠤᠬᠠᠢ ᠶ᠋ᠢᠨ ᠪᠠᠢᠳᠠᠯ ᠳ᠋ᠤ᠌ ᠤᠶᠠᠯᠳᠤᠭᠤᠯᠵᠤ ᠵᠠᠰᠠᠪᠠ᠃ ᠡᠮ᠄ ᠠᠩᠬᠠ ᠬᠠᠪᠤᠳᠠᠷ ᠤ᠋ᠨ ᠨᠠᠭᠠᠯᠲᠠ ᠶ᠋ᠢ 14 ᠳ᠋ᠦ᠍ᠭᠡᠷ ᠦᠶᠡ ᠳ᠋ᠦ᠍ ᠨᠠᠭᠠᠵᠤ ᠥᠭᠪᠡ᠃ ᠥᠷᠯᠥᠭᠡ ᠳ᠋ᠦ᠍ ᠶᠡᠬᠡ ᠬᠠᠷᠠ — 12 ᠭᠦᠷᠭᠦᠮ—7 ᠲᠣᠰᠪᠣᠷᠢ 3 g ᠢ᠋ ᠵᠠᠮᠪᠠ ᠶ᠋ᠢᠨ ᠦᠷᠡ ᠪᠡᠷ ᠳᠠᠷᠤᠭᠤᠯᠤᠨ ᠥᠭᠴᠦ ᠦᠳᠡ ᠳ᠋ᠦ᠍ ᠠᠯᠲᠠᠨ ᠡᠯᠡᠰᠦ᠂ ᠪᠥᠭᠡᠷᠡᠨ ᠠᠷᠤᠷᠠ — 10 ᠶ᠋ᠢ ᠲᠣᠰᠪᠣᠷᠢ 41 ᠪᠡᠷ ᠳᠠᠷᠤᠭᠤᠯᠤᠨ ᠥᠭᠴᠦ᠂ ᠣᠷᠣᠢ ᠳ᠋ᠤ᠌ ᠰᠡᠷᠢ ᠭᠠᠷᠤᠳᠢ ᠶ᠋ᠢᠨ 15 ᠦᠷᠢᠯ ᠢ᠋ ᠪᠠᠯᠢᠭᠠ ᠶ᠋ᠢᠨ ᠱᠦᠭᠦᠰᠦ ᠪᠡᠷ ᠳᠠᠷᠤᠭᠤᠯᠤᠨ᠂ 6 ᠡᠳᠦᠷ ᠦ᠋ᠨ ᠡᠮ ᠤᠤᠭᠤᠯᠭᠠᠪᠠ᠃ ᠬᠣᠶᠠᠳᠤᠭᠠᠷ ᠡᠮᠨᠡᠯᠲᠡ1991 ᠣᠨ ᠤ᠋ 6 ᠰᠠᠷᠠ ᠶ᠋ᠢᠨ 22 ᠤ᠋ ᠡᠳᠦᠷ᠃ ᠡᠮ ᠤᠤᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠢᠭᠡᠰᠦᠨ ᠬᠡᠮᠵᠢᠶᠡ ᠠᠷᠪᠢᠳᠴᠤ 24 ᠴᠠᠭ ᠲᠤ᠌ 3 .000ml ᠰᠢᠬᠠᠮ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠤᠮᠳᠠᠭᠠᠰᠬᠤ ᠲᠣᠯᠣᠭᠠᠢ ᠡᠪᠡᠳᠬᠦ ᠨᠠᠮᠵᠢᠵᠤ, ᠳᠤᠷᠠᠰᠢᠯ ᠨᠡᠭᠡᠭᠡᠭᠳᠡᠵᠦ ᠬᠠᠪᠤᠩ ᠴᠤ᠌ ᠠᠭᠠᠵᠢᠮ ᠢ᠋ᠶ᠋ᠠᠷ ᠠᠷᠢᠯᠪᠠ᠃ ᠭᠡᠪᠡᠴᠦ ᠬᠠᠶᠠ ᠲᠣᠯᠣᠭᠠᠢ ᠡᠷᠭᠢᠨᠡ᠃ ᠬᠡᠯᠡ᠂ ᠰᠢᠷᠠᠪᠲᠤᠷ ᠨᠢᠮᠭᠡᠨ ᠥᠩᠭᠥᠷ ᠲᠡᠢ᠂ ᠬᠥᠪᠡᠭᠡ ᠨᠢ ᠣᠷᠣ ᠲᠠᠢ᠃ ᠭᠠᠨ ᠤ᠋ ᠰᠤᠳᠠᠯ ᠡᠷᠴᠢᠮᠲᠡᠢ᠂ ᠴᠠᠭ ᠤ᠋ᠨ ᠰᠤᠳᠠᠯ ᠳᠡᠯᠭᠡᠷᠡᠩᠭᠦᠢ ᠯᠤᠭᠰᠢᠨᠠ᠃ ᠴᠢᠰᠤᠨ ᠳᠠᠷᠤᠯᠲᠠ 130/ 85 mmHg᠃ ᠬᠢᠩᠭᠠᠷ ᠰᠢᠯᠪᠢ ᠶ᠋ᠢ ᠳᠠᠷᠤᠬᠤ ᠳ᠋ᠤ᠌ 0.1 cm ᠤ᠋ᠨ ᠣᠷᠣᠮ ᠲᠠᠢ᠂ ᠪᠡᠶᠡ ᠶ᠋ᠢᠨ ᠬᠠᠯᠠᠭᠤᠨ ᠨᠢ 38 .5℃᠂ ᠵᠢᠷᠦᠬᠡᠨ ᠴᠣᠬᠢᠯᠭᠠ 87 ᠤᠳᠠᠭᠠ / ᠮᠢᠨᠦ᠋ᠲ᠂ ᠰᠢᠭᠡᠰᠦᠨ ᠤᠭᠤᠷᠠᠭ(+) ᠤᠯᠠᠭᠠᠨ ᠡᠰ 0 — 2 / mm3 ᠴᠠᠭᠠᠨ ᠡᠰ 3 — 5 /mm3 ᠴᠢᠰᠤᠨ ᠲᠤᠨᠤᠳᠠᠰᠤ ᠡᠷᠡᠭᠦᠯ᠂ ᠴᠢᠰᠤᠨ ᠤ᠋ ᠴᠠᠭᠠᠨ ᠡᠰ 11.000 / mm3 ᠰᠠᠭᠠᠷᠮᠠᠭ ᠡᠰ 75% ᠃
ᠡᠮ᠄ ᠬᠠᠪᠤᠳᠠᠷ ᠤ᠋ᠨ ᠨᠠᠭᠠᠯᠲᠠ ᠪᠠᠨ ᠨᠠᠭᠠᠬᠤ ᠶ᠋ᠢᠨ ᠳᠠᠭᠠᠤ ᠳᠡᠭᠡᠷᠡᠬᠢ ᠡᠮ ᠡᠴᠡ ᠰᠣᠩᠭᠣᠵᠤ 6 ᠡᠳᠦᠷ ᠤᠤᠭᠤᠯᠭᠠᠪᠠ᠃ ᠭᠤᠷᠪᠠᠳᠤᠭᠠᠷ ᠡᠮᠨᠡᠯᠲᠡ᠄ 1991 ᠦ ᠶ᠋ᠢᠨ 6 ᠰᠠᠷᠠ ᠶ᠋ᠢᠨ 28 ᠤ᠋ ᠡᠳᠦᠷ᠃ ᠪᠠᠢᠴᠠᠭᠠᠬᠤ ᠳ᠋ᠤ᠌ ᠡᠪᠡᠳᠴᠢᠨ ᠦ᠌ ᠰᠢᠨᠵᠢ ᠲᠡᠮᠳᠡᠭ ᠠᠷᠢᠯᠪᠠ᠃ ᠰᠤᠳᠠᠯ ᠨᠠᠷᠢᠨ ᠲᠦᠷᠭᠡᠨ᠃ ᠬᠡᠯᠡ ᠰᠢᠷᠠᠪᠲᠤᠷ ᠨᠢᠮᠭᠡᠨ ᠥᠩᠭᠥᠷ ᠲᠡᠢ᠃ ᠴᠢᠰᠤᠨ ᠳᠠᠷᠤᠯᠲᠠ 120 / 75mmHg᠂ ᠰᠢᠭᠡᠰᠦᠨ ᠦ᠌ ᠬᠢᠮᠢ ᠶ᠋ᠢᠨ ᠪᠠᠢᠴᠠᠭᠠᠯᠲᠠ ᠡᠷᠡᠭᠦᠯ ᠪᠣᠯᠪᠠ᠃ ᠭᠡᠪᠡᠴᠦ ᠡᠮᠴᠢᠯᠡᠭᠡᠨ ᠦ᠌ ᠪᠦᠲᠦᠮᠵᠢ ᠶ᠋ᠢ ᠪᠠᠲᠤᠳᠬᠠᠬᠤ ᠪᠠᠷ ᠭᠤᠷᠪᠠᠨ ᠤᠯᠠᠭᠠᠨ ᠳᠠᠩ ᠰᠠᠷᠢ ᠭᠠᠷᠤᠳᠢ ᠶᠡᠬᠡ ᠳᠠᠩ ᠢ 6 ᠡᠳᠦᠷ ᠦ᠋ᠨ ᠥᠭᠪᠡ᠃ ᠡᠨᠡ ᠮᠡᠲᠦ18 ᠡᠳᠦᠷ ᠲᠦ᠍ ᠪᠦᠷᠢᠨ ᠡᠳᠡᠭᠡᠷᠡᠵᠡᠢ᠃ ᠨᠡᠬᠡᠮᠵᠢᠯᠡᠨ ᠰᠤᠷᠠᠭᠯᠠᠬᠤ ᠳ᠋ᠤ᠌ ᠡᠪᠡᠳᠴᠢᠨ ᠨᠢ ᠳᠠᠬᠢᠭᠰᠠᠨ ᠦᠭᠡᠢ᠃
ᠳᠥᠷᠪᠡ᠂ ᠣᠢᠯᠠᠭᠠᠯᠲᠠ
ᠡᠮᠴᠢᠯᠡᠭᠡᠨ ᠦ᠌ 《ᠠᠵᠢᠭᠯᠠᠯᠲᠠ ᠪᠠᠨ ᠡᠮᠬᠢᠳᠬᠡᠭᠰᠡᠨ ᠦ᠌ ᠳ᠋ᠦᠩ ᠳ᠋ᠦ᠍ ᠲᠦᠷᠭᠡᠨ ᠤᠳᠠᠭᠠᠨ᠂ ᠬᠦᠨᠳᠦ ᠬᠥᠩᠭᠡᠨ ᠢ᠋ ᠦᠨᠳᠦᠰᠦᠯᠡᠨ ᠡᠬᠢᠨ᠂ ᠳᠤᠮᠳᠠ᠂ ᠡᠴᠦᠰ ᠭᠡᠵᠦ ᠭᠤᠷᠪᠠᠨ ᠱᠠᠲᠤ ᠬᠤᠪᠢᠶᠠᠵᠤ ᠪᠣᠯᠤᠨᠠ ᠡᠬᠢᠨ ᠦ᠌ ᠬᠤᠭᠤᠴᠠᠭᠠ ᠨᠢ ᠪᠥᠭᠡᠷᠡᠨ ᠦ᠌ ᠤᠰᠤ ᠠᠯᠳᠠᠭᠰᠠᠨ ᠲᠠᠢ ᠲᠥᠰᠦᠭᠡᠲᠡᠢ᠃ 《ᠳᠥᠷᠪᠡᠨ ᠦᠨᠳᠦᠰᠦᠨ》 ᠳ᠋ᠦ᠍ 《ᠤᠰᠤ ᠠᠯᠳᠠᠭᠰᠠᠨ ᠨᠢ ᠪᠥᠭᠡᠷᠡᠨ ᠦ᠌ ᠰᠤᠳᠠᠯ ᠳ᠋ᠤ᠌ ᠲᠠᠷᠬᠠᠭᠰᠠᠨ ᠪᠠ ᠡᠯᠢᠭᠡᠨ ᠦ᠌ ᠴᠢᠰᠤᠨ ᠢ᠋ᠶ᠋ᠠᠷ ᠤᠰᠤᠨ (ᠰᠢᠭᠡᠰᠦᠨ) ᠠᠨᠤ ᠴᠢᠰᠤᠨ ᠭᠠᠷᠤᠮᠤᠢ 》ᠭᠡᠵᠡᠢ᠃ ᠳᠤᠮᠳᠠ ᠱᠠᠲᠤ ᠨᠢ ᠪᠥᠭᠡᠷᠡᠨ ᠦ᠌ ᠨᠢᠭᠤᠭᠳᠠᠭᠰᠠᠨ ᠬᠠᠯᠠᠭᠤᠨ ᠲᠠᠢ ᠲᠥᠰᠦᠭᠡᠲᠡᠢ᠃ 《ᠳᠥᠷᠪᠡᠨ ᠦᠨᠳᠦᠰᠦᠨ》 ᠳ᠋ᠦ᠍ 《ᠨᠢᠭᠤᠭᠳᠠᠭᠰᠠᠨ ᠬᠠᠯᠠᠭᠤᠨ ᠠᠨᠤ ᠰᠢᠭᠡᠰᠦ ᠲᠣᠰᠤᠯᠤᠨ ᠴᠢᠰᠤ ᠭᠠᠷᠬᠤ᠂ ᠠᠷᠢᠬᠢ ᠤᠤᠭᠤᠬᠤ᠂ ᠶᠠᠪᠤᠵᠤ ᠰᠠᠭᠤᠬᠤ ᠶ᠋ᠢᠨ ᠬᠣᠢᠨᠠ ᠬᠥᠯ ᠬᠦᠨᠳᠦ᠂ ᠪᠥᠭᠡᠷᠡᠨ ᠰᠤᠳᠠᠯ ᠬᠠᠮᠢᠭᠠ ᠪᠠᠭᠤᠪᠠᠰᠤ ᠬᠠᠳᠬᠤᠯᠠᠬᠤ ᠪᠠ ᠡᠪᠡᠳᠬᠦ ᠪᠣᠢ 》 ᠭᠡᠵᠡᠢ᠃ ᠡᠴᠦᠰ ᠦ᠋ᠨ ᠱᠠᠲᠤ᠂ ᠪᠥᠭᠡᠷᠡ ᠶ᠋ᠢᠨ ᠤᠰᠤᠨ ᠬᠠᠪᠤᠩ ᠲᠠᠢ ᠲᠥᠰᠦᠭᠡᠲᠡᠢ᠃ 《ᠳᠣᠲᠣᠷ ᠡᠪᠡᠳᠴᠢᠨ ᠦ᠌ ᠰᠤᠳᠤᠯᠤᠯ 》 ᠳ᠋ᠤ᠌ 《ᠪᠥᠭᠡᠷᠡᠨ ᠦ᠌ ᠤᠰᠤᠨ ᠬᠠᠪᠤᠩ — ᠰᠢᠭᠡᠰᠦ ᠴᠤᠭᠯᠠᠷᠠᠭᠰᠠᠨ ᠤᠰᠤᠨ ᠬᠠᠪᠤᠩ ᠪᠣᠯ ᠰᠢᠷᠠ ᠤᠰᠤᠨ ᠤ᠋ ᠴᠢᠨᠠᠷ ᠳᠡᠢᠯᠦᠩᠭᠦᠢ ᠳᠣᠣᠷᠠᠲᠤ ᠬᠡᠢ ᠤᠷᠪᠠᠬᠤ ᠶ᠋ᠢᠨ ᠬᠠᠮᠲᠤ ᠬᠣᠳᠣᠭᠣᠳᠣ ᠬᠥᠭᠡᠭᠡᠵᠦ ᠬᠤᠷᠴᠢᠭᠢᠨᠠᠨ᠂ ᠬᠠᠪᠤᠩ ᠤ᠋ᠨ ᠤᠰᠤᠯᠢᠭ ᠤ᠋ᠨ ᠬᠤᠷᠠᠯᠲᠠ ᠮᠠᠰᠢ ᠲᠦᠷᠭᠡᠨ᠂ ᠵᠣᠪᠬᠢ ᠠ᠋ᠴᠠ ᠡᠬᠢᠯᠡᠵᠦ ᠬᠠᠪᠤᠩᠨᠠᠬᠤ᠂ ᠥᠷᠯᠥᠭᠡ ᠪᠣᠰᠤᠭᠰᠠᠨ ᠳᠠᠷᠤᠢ ᠨᠡᠩ ᠲᠣᠳᠣᠷᠬᠠᠢ᠃ ᠨᠢᠭᠤᠷ᠂ ᠥᠯᠮᠡᠢ᠂ ᠰᠢᠯᠪᠢ ᠪᠡᠷ ᠰᠡᠯᠬᠦᠷᠡᠵᠦ᠂ ᠰᠢᠭᠡᠰᠦᠨ ᠦ᠌ ᠥᠩᠭᠡ ᠬᠦᠷᠡᠩ ᠤᠯᠠᠭᠠᠨ ᠪᠣᠯᠵᠤ ᠪᠤᠯᠠᠩᠭᠢᠷᠲᠤᠨᠠ᠃ ᠡᠨᠡ ᠨᠢ ᠪᠥᠭᠡᠷᠡᠨ ᠦ᠌ ᠰᠤᠳᠠᠯ ᠤ᠋ᠨ ᠠᠮᠠ ᠤᠷᠪᠠᠭᠰᠠᠨ ᠠ᠋ᠴᠠ ᠪᠣᠯᠵᠤ ᠪᠠᠢᠳᠠᠭ᠃ ᠰᠢᠭᠡᠰᠦᠨ ᠬᠡᠮᠵᠢᠶᠡ ᠪᠠᠭᠠᠰᠬᠤ ᠪᠤᠶᠤ ᠪᠠᠷᠤᠭ ᠰᠢᠭᠡᠰᠦ ᠦᠭᠡᠢ ᠪᠣᠯᠬᠤ ᠴᠤ᠌ ᠪᠣᠢ᠃ ᠴᠢᠰᠤᠨ ᠳᠠᠷᠤᠯᠲᠠ ᠥᠨᠳᠥᠷᠵᠢᠬᠦ ᠪᠤᠶᠤ ᠡᠳᠦᠷ ᠪᠦᠷᠢ ᠥᠭᠡᠷᠡᠳᠡᠬᠦ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠨᠠ 》ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠪᠠᠢᠳᠠᠭ᠃ ᠭᠡᠪᠡᠴᠦ ᠡᠪᠡᠳᠴᠢᠨ ᠦ᠌ ᠭᠤᠷᠪᠠᠨ ᠱᠠᠲᠤ ᠨᠢ ᠲᠡᠢᠮᠦ ᠰᠠᠯᠤᠩᠭᠢᠳᠠ ᠪᠢᠰᠢ ᠬᠠᠷᠢᠯᠴᠠᠨ ᠤᠯᠠᠷᠢᠨ ᠰᠢᠯᠵᠢᠬᠦ ᠵᠠᠷᠢᠮ ᠳ᠋ᠠᠭᠠᠨ ᠠᠯᠬᠤᠮ ᠳᠠᠷᠠᠭᠠ ᠪᠠᠷ ᠢᠯᠡᠷᠡᠬᠦ ᠵᠠᠷᠢᠮ ᠳ᠋ᠠᠭᠠᠨ ᠬᠠᠮᠲᠤᠪᠠᠷ ᠢᠯᠡᠷᠡᠬᠦ ᠴᠦ᠍ ᠪᠣᠢ᠃ ᠡᠨᠡ ᠨᠢ ᠡᠪᠡᠳᠴᠢᠨ ᠦ᠌ ᠬᠦᠴᠦᠨ᠂ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠠ᠋ᠴᠠ ᠰᠢᠢᠳᠪᠦᠷᠢᠯᠡᠭᠳᠡᠨᠡ ᠭᠡᠵᠦ ᠦᠵᠡᠵᠦ ᠪᠣᠢ ᠃
ᠢᠷᠡᠯᠲᠡ᠄《 ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ 》ᠰᠡᠳᠬᠦᠯ 1993 ᠣᠨ ᠤ᠋ 2 ᠳ᠋ᠤᠭᠠᠷ ᠬᠤᠭᠤᠴᠠᠭᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠭᠠᠸᠠ
ᠦᠰᠦᠭ ᠵᠠᠰᠠᠬᠤ ᠵᠠᠰᠠᠯᠲᠠ ᠶ᠋ᠢᠨ ᠰᠢᠰᠲ᠋ᠧᠮ ᠢ᠋ᠶ᠋ᠡᠷ ᠬᠢᠨᠠᠪᠠ᠃