ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠊᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠳᠤ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠨᠢᠭᠡ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 1
592ᠠᠩᠬᠠᠨ ᠤ ᠡᠳᠦᠷ
ᠡᠪᠦᠯ ᠦ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠦᠦᠷ ᠰᠥᠨᠢ᠂ ᠵᠢᠪᠠᠷ ᠶᠠᠭ ᠦᠭᠡᠢ ᠵᠢᠩᠳᠡᠭᠦᠨ ᠪᠠᠢᠪᠠᠴᠤ᠂ ᠲᠥᠷᠥᠯᠬᠢ ᠶ᠋ᠢᠨ ᠴᠢᠭᠢᠷᠠᠭ ᠪᠣᠯᠤᠭᠠᠳ ᠲᠠᠭᠠᠷᠠᠬᠤ ᠬᠠᠯᠠᠭᠤᠴᠠᠬᠤ ᠬᠣᠶᠠᠷ ᠢ᠋ ᠳᠠᠩᠴᠤ ᠶᠡᠬᠡ ᠶᠠᠭᠤᠮᠠᠨ ᠳ᠋ᠤ᠌ ᠪᠣᠳᠣᠳᠠᠭ ᠦᠭᠡᠢ ᠲᠡᠷᠡ ᠵᠢᠩ ᠦ᠋ᠨ ᠬᠥᠮᠦᠰ ᠴᠡᠭᠡᠵᠢᠨ ᠳ᠋ᠡᠭᠡᠨ ᠳᠠᠩ ᠴᠠᠮᠴᠠ ᠪᠠᠷ ᠪᠤᠶᠤ ᠪᠣᠰᠢᠨᠵᠠ ᠲᠡᠳᠦᠢᠬᠡᠨ ᠢ᠋ ᠡᠮᠦᠰᠦᠭᠰᠡᠨ ᠠᠵᠢ᠃ ᠭᠡᠲᠡᠯᠡ ᠲᠡᠳᠡᠨ ᠦ᠌ ᠨᠢᠭᠡ ᠨᠢ ᠪᠦᠷ ᠴᠡᠭᠡᠵᠢ ᠨᠢᠴᠦᠭᠦᠨ ᠪᠥᠭᠡᠳ᠂ ᠨᠢᠴᠦᠭᠦᠨ ᠴᠡᠭᠡᠵᠢ ᠪᠡᠨ ᠭᠢᠯᠠᠯᠵᠠᠭᠤᠯᠬᠤ ᠠᠲᠠᠯᠠ᠂ ᠨᠥᠭᠦᠭᠡ ᠬᠣᠶᠠᠷ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠲᠡᠢ ᠬᠠᠯᠠᠭᠤᠴᠠᠬᠤ ᠤᠴᠢᠷ ᠬᠥᠯᠥᠷᠡᠭᠰᠡᠨ ᠪᠡᠶᠡ ᠡᠴᠡ ᠨᠢ ᠠᠭᠤᠷ ᠰᠠᠪᠰᠠᠬᠤ ᠪᠥᠭᠡᠳ ᠬᠥᠮᠦᠨ ᠬᠥᠮᠦᠨ ᠡᠴᠡ ᠭᠠᠵᠢᠭᠤᠳᠠ ᠶᠠᠭᠤᠮᠠ ᠰᠢᠭ᠋ ᠦᠵᠡᠭᠳᠡᠨᠡ᠃ ᠡᠨᠡ ᠡᠷᠡ ᠪᠣᠯ ᠨᠥᠭᠦᠭᠡ ᠬᠣᠶᠠᠷ ᠡᠷᠡ ᠶ᠋ᠢᠨ ᠳᠤᠮᠳᠠ ᠶ᠋ᠢᠨ ᠵᠠᠷᠤᠴᠠ ᠳ᠋ᠠᠨᠽᠠᠨ ᠭᠡᠭᠴᠢ ᠪᠠᠢᠯᠠ᠃
ᠠᠲᠠᠷ ᠲᠠᠷᠭᠤᠨ ᠲᠡᠮᠡᠭᠡ ᠨᠦ᠍ᠭᠦᠳ ᠠᠨᠢᠷ ᠴᠢᠮᠡᠭᠡᠨ ᠦ᠌ ᠳᠤᠮᠳᠠ ᠬᠠᠮᠠᠷ ᠱᠤᠤᠬᠢᠲᠤᠨᠠᠭᠤᠯᠤᠨ ᠬᠠᠶᠠ ᠨᠢᠭᠡ ᠨᠢ ᠲᠠᠲᠠᠯᠭᠠ ᠴᠢᠩᠭᠠᠯᠠᠬᠤ ᠳ᠋ᠤ᠌ ᠶᠠᠷᠳᠠᠭᠯᠠᠨ《ᠭᠠᠪ᠂ ᠭᠤᠪ》 ᠳᠤᠤᠭᠠᠷᠤᠨ᠂ ᠠᠮᠠᠨ ᠠ᠋ᠴᠠ ᠪᠠᠨ ᠬᠡᠪᠢᠳᠡᠰᠦ ᠭᠠᠷᠭᠠᠨ ᠬᠠᠶᠠᠨᠠ᠃ ᠪᠦᠬᠦ ᠲᠡᠮᠡᠭᠡ ᠲᠠᠪᠢ ᠭᠠᠷᠤᠢ ᠪᠣᠯᠪᠠᠴᠤ ᠭᠤᠷᠪᠠᠨ ᠵᠢᠩᠴᠢᠳ ᠦ᠋ᠨ ᠠᠵᠢᠯᠯᠠᠭᠠ ᠠᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠳᠠᠭᠤᠰᠴᠤ᠂ ᠲᠡᠷᠢᠭᠦᠴᠢ ᠶ᠋ᠢᠨ ᠲᠡᠮᠡᠭᠡ ᠶᠠᠭ ᠦᠦᠷ ᠦ᠋ᠨ ᠰᠢᠷᠠ ᠭᠡᠭᠡ ᠶ᠋ᠢ ᠤᠭᠲᠤᠨ ᠭᠠᠷᠪᠠ᠃
ᠠᠬᠠᠮᠠᠳ ᠬᠥᠮᠦᠨ ᠬᠦᠷᠡᠯ ᠭᠡᠭᠴᠢ ᠥᠨᠳᠥᠷ ᠲᠤᠷᠠᠩᠬᠠᠢ ᠪᠡᠶᠡ ᠲᠡᠢ᠂ ᠰᠢᠷᠦᠭᠦᠨ ᠬᠤᠤᠵᠠ ᠰᠠᠬᠠᠯ ᠲᠠᠢ᠂ ᠴᠡᠯᠡᠭᠡᠷ ᠨᠣᠭᠣᠭᠠᠨ ᠨᠢᠳᠦ ᠲᠡᠢ᠂ ᠳᠥᠴᠢᠨ ᠲᠠᠪᠤ᠂ ᠵᠢᠷᠭᠤᠭᠠ ᠣᠷᠴᠢᠮ ᠨᠠᠰᠤᠨ ᠤ᠋ ᠡᠷᠡ᠂ ᠵᠢᠩ ᠦ᠋ᠨ ᠲᠦᠷᠦᠭᠦᠦ ᠶ᠋ᠢ ᠪᠠᠷᠢᠨ ᠶᠠᠪᠤᠨᠠ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠳᠣᠷᠵᠢ᠂ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠬᠦᠷᠡᠩ ᠪᠣᠷᠣ᠂ ᠰᠢᠨᠠᠨ ᠤ᠋ ᠶᠠᠰᠤ ᠥᠷᠭᠡᠨ᠂ ᠨᠢᠳᠦ ᠲᠣᠮᠣ ᠲᠠᠢ᠂ ᠰᠢᠲᠦ ᠨᠢ ᠠᠳᠤᠭᠤᠨ ᠤ᠋ ᠬᠢ ᠰᠢᠭ ᠲᠡᠭᠵᠢᠭᠡᠷ ᠪᠥᠭᠡᠳ ᠪᠡᠶᠡ ᠲᠠᠭᠳᠠᠭᠠᠷ ᠡᠢᠮᠦ ᠡᠷᠡ ᠵᠢᠩ ᠦ᠋ᠨ ᠴᠤᠪᠤᠭᠠᠨ ᠤ᠋ ᠳᠤᠮᠳᠠ ᠶ᠋ᠢ ᠪᠠᠷᠢᠨ ᠬᠥᠳᠡᠯᠵᠡᠢ᠃ ᠬᠠᠮᠤᠭ ᠤ᠋ᠨ ᠡᠴᠦᠰ ᠲᠦ᠍ ᠥᠨᠥᠬᠢ ᠬᠡᠨ ᠪᠦᠬᠦᠨ ᠡᠴᠡ ᠢᠯᠡᠭᠦᠦ ᠬᠠᠯᠠᠭᠤᠴᠠᠭᠴᠢ ᠬᠥᠲᠥᠴᠢ ᠶᠠᠪᠤᠨᠠ᠃ ᠠᠵᠢᠯ ᠬᠡᠷᠡᠭ ᠢ᠋ᠶ᠋ᠡᠨ ᠲᠡᠳᠡ ᠣᠳᠣ ᠴᠡᠭᠴᠡᠯᠡᠵᠦ ᠠᠪᠤᠭᠠᠳ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠭᠠᠷᠴᠤ ᠪᠠᠢᠭᠠ ᠲᠤᠯᠠ ᠠᠯᠢ ᠪᠣᠯᠬᠣᠷ ᠰᠢᠯᠤᠭᠤᠨ ᠰᠢᠭᠤᠷᠬᠠᠢ ᠶᠠᠪᠤᠬᠤ ᠶ᠋ᠢ ᠬᠦᠰᠡᠬᠦ ᠪᠢᠯᠡ᠃ ᠠᠶᠠᠨ ᠵᠢᠩ ᠳ᠋ᠦ᠍ ᠣᠯᠠᠨᠲᠠ ᠶᠠᠪᠤᠨ᠂ ᠲᠡᠭᠦᠨ ᠳ᠋ᠡᠭᠡᠨ ᠢᠵᠢᠯᠢ ᠳᠠᠰᠤᠯ ᠪᠣᠯᠤᠭᠰᠠᠨ ᠲᠡᠮᠡᠭᠡ ᠨᠦ᠍ᠭᠦᠳ ᠨᠢ ᠴᠦ᠍ ᠰᠠᠨᠠᠭᠠ ᠰᠡᠳᠬᠢᠯ ᠰᠢᠭᠤᠳᠤᠷᠠᠭᠰᠠᠨ ᠮᠡᠲᠦ ᠬᠦᠨᠳᠦ ᠠᠴᠢᠶᠠ ᠪᠠᠨ ᠳᠡᠩᠬᠡᠯᠵᠡᠭᠦᠯᠦᠨ ᠠᠯᠬᠤᠵᠤ ᠡᠪᠡᠰᠦᠨ ᠲᠣᠯᠣᠭᠠᠢ ᠶ᠋ᠢ ᠪᠦᠷᠬᠦᠭᠰᠡᠨ ᠴᠠᠭᠠᠨ ᠬᠢᠷᠠᠭᠤ ᠶ᠋ᠢ ᠡᠮᠬᠦᠯᠡᠨ᠂ ᠥᠷᠭᠡᠨ ᠰᠢᠷᠭᠠᠯ ᠵᠠᠮ ᠢ᠋ ᠬᠣᠢᠨᠠ ᠪᠠᠨ ᠬᠠᠶᠠᠨ ᠵᠢᠷᠢᠢᠯᠭᠡᠨᠡ᠃
ᠬᠥᠲᠥᠯ ᠳ᠋ᠠᠨᠽᠠᠨ ᠳ᠋ᠤ᠌ ᠠᠴᠢᠶᠠ ᠪᠠᠨ ᠠᠴᠢᠵᠤ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠪᠡᠶᠡ ᠵᠢᠬᠡᠭᠦᠷᠬᠡᠨ ᠲᠠᠭᠠᠷᠠᠬᠤ ᠮᠠᠶᠢᠭ ᠲᠠᠢ ᠪᠣᠯᠤᠭᠰᠠᠨ ᠤᠴᠢᠷ ᠴᠠᠭᠠᠨ ᠨᠡᠬᠡᠢ ᠦᠵᠦᠭᠦᠷᠰᠡᠭ ᠳᠡᠪᠡᠯ ᠡᠮᠦᠰᠴᠡᠢ᠃ ᠡᠨᠡ ᠳᠡᠪᠡᠯ ᠪᠣᠯ᠂ ᠶᠡᠷᠦ ᠵᠢᠷ ᠦ᠋ᠨ ᠨᠢᠭᠡ ᠳᠡᠪᠡᠯ ᠪᠢᠰᠢ᠂ ᠨᠡᠬᠡᠢ ᠶ᠋ᠢ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠶᠣᠰᠣᠲᠠᠢ ᠨᠣᠬᠠᠢ ᠳᠠᠭᠠᠭᠠᠵᠤ ᠤᠷᠮᠠ ᠦᠭᠡᠢ ᠪᠣᠯᠲᠠᠯᠠ ᠨᠢ ᠡᠯᠳᠡᠭᠰᠡᠨ ᠢ᠋ ᠬᠡᠯᠡᠬᠦ ᠤᠤ᠂ ᠣᠶᠣᠳᠠᠯ ᠢ᠋ ᠨᠢ ᠪᠠᠰᠠ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠠᠭᠠᠨ᠂ ᠦᠢᠯᠡ ᠤᠲᠠᠰᠤᠨ ᠳ᠋ᠤ᠌ ᠰᠦᠷᠡᠬᠡᠢ ᠭᠡᠭᠳᠡᠭᠰᠡᠨ ᠡᠬᠡ ᠨᠢ ᠦᠬᠡᠷ ᠦ᠋ᠨ ᠨᠠᠷᠢᠨ ᠰᠢᠷᠪᠥᠰᠥ ᠪᠡᠷ ᠬᠦᠪᠦᠷᠢᠳᠦᠨ ᠣᠶᠣᠵᠠᠢ᠃ ᠡᠨᠡ ᠳᠡᠪᠡᠯ ᠢ᠋ ᠳ᠋ᠠᠨᠽᠠᠨ ᠭᠡᠷ ᠡᠴᠡ ᠠᠩᠬᠠ ᠭᠠᠷᠬᠤ ᠳ᠋ᠠᠭᠠᠨ ᠡᠮᠦᠰᠦᠭᠰᠡᠨ ᠪᠥᠭᠡᠳ ᠡᠳᠦᠭᠡ ᠬᠠᠯᠠᠭᠤᠨ ᠢᠯᠴᠢ ᠨᠢ ᠵᠦᠭ ᠪᠦᠷᠢ ᠡᠴᠡ ᠲᠥᠭᠡᠨᠡᠨ ᠵᠥᠭᠡᠯᠡᠨ ᠡᠯᠳᠡᠭᠦᠷ ᠨᠢ ᠨᠣᠢᠲᠠᠨ ᠶᠤᠮ ᠰᠢᠭ᠋ ᠨᠠᠮᠢᠯᠵᠠᠭᠠᠳ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠠᠯᠲᠠᠨ ᠬᠡᠯᠬᠢᠶᠡ ᠪᠣᠯᠤᠭᠰᠠᠨ ᠦᠷᠡ ᠬᠡᠦᠬᠡᠳ ᠭᠡᠭᠴᠢ ᠯᠡ ᠶᠣᠰᠣᠲᠠᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠢᠭᠤᠨ ᠬᠡᠪᠡᠯᠢ ᠳ᠋ᠦ᠍ ᠯᠡ ᠡᠢᠮᠦ ᠪᠠᠢᠳᠠᠭ ᠪᠣᠯᠪᠠ ᠤᠤ ᠭᠡᠮᠡᠷ ᠪᠣᠳᠣᠭᠳᠠᠨᠠ᠃ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠤᠯᠠᠭᠠᠨ ᠦᠨᠡᠭᠡᠨ ᠯᠣᠪᠤᠤᠵᠠ ᠪᠠᠰᠠ ᠰᠢᠨᠡ ᠤᠴᠢᠷ ᠭᠠᠯ ᠬᠠᠯᠠᠭᠤᠨ ᠢᠯᠴᠢ ᠨᠢ ᠬᠦᠷᠦᠭᠰᠡᠨ ᠭᠠᠵᠠᠷ ᠪᠦᠬᠦᠨ ᠢ᠋ᠶ᠋ᠡᠨ ᠬᠥᠯᠥᠷᠡᠭᠡᠬᠦ ᠲᠤᠯᠠ ᠶᠠᠭᠠᠨ ᠲᠣᠷᠭᠠᠨ ᠪᠦᠴᠢᠨ ᠦ᠌ ᠬᠢᠨᠢ ᠦᠵᠦᠭᠦᠷ ᠢ᠋ ᠭᠣᠭᠴᠣᠭᠠᠷᠠᠭᠤᠯᠤᠨ ᠵᠠᠩᠭᠢᠳᠤᠭᠠᠳ᠂ ᠤᠭ ᠯᠣᠪᠤᠤᠵᠠ ᠶ᠋ᠢ ᠠᠷᠤ ᠰᠢᠯᠢ ᠤᠷᠤᠭᠤ ᠪᠠᠨ ᠬᠠᠶᠠᠯᠠ᠃ ᠭᠡᠲᠡᠯᠡ ᠪᠠᠰᠠ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠤ᠌ ᠴᠠᠯᠢᠩ ᠴᠠᠭᠠᠨ ᠮᠥᠩᠭᠥᠨ ᠲᠣᠨᠣᠭ ᠲᠠᠢ ᠤᠢᠰᠤᠨ ᠪᠠᠷᠢᠭᠤᠯᠲᠤ ᠬᠢᠲᠤᠭᠠ᠂ ᠬᠠᠷᠠ ᠰᠠᠭᠠᠷᠢᠨ ᠪᠥᠷᠢᠶᠡᠰᠦᠳᠦ ᠬᠤᠢ ᠳ᠋ᠠᠭᠠᠨ ᠲᠦᠷᠦᠭᠡᠰᠦᠲᠡᠢ᠂ ᠳᠣᠷᠣᠭᠰᠢ ᠤᠨᠵᠢᠭᠢᠨᠠᠨ ᠶᠠᠪᠤᠭᠠ ᠶ᠋ᠢ ᠶᠠᠭᠠᠬᠢᠨᠠ? ᠲᠡᠭᠡᠭᠯᠡᠭᠦᠷ ᠨᠢ ᠳᠣᠯᠣᠭᠠᠨ ᠴᠢᠨ ᠦ᠌ ᠶᠤᠸᠠᠨ ᠱᠢ ᠺᠠᠢ ᠲᠣᠯᠣᠭᠠᠢᠲᠤ ᠶᠠᠩᠴᠢᠶᠠᠨ᠂ ᠤᠭ ᠬᠢᠲᠤᠭᠠ ᠡᠴᠢᠭᠡ ᠨᠢ ᠳ᠋ᠠᠨᠽᠠᠨ ᠢ᠋ ᠳᠥᠩᠭᠡᠵᠦ ᠮᠡᠳᠡᠭᠡ ᠣᠷᠣᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷ ᠠ᠋ᠴᠠ ᠣᠷᠣᠰ ᠰᠡᠯᠡᠮᠡ ᠶ᠋ᠢᠨ ᠬᠤᠭᠤᠷᠬᠠᠢ ᠶ᠋ᠢ ᠣᠯᠵᠤ ᠠᠪᠴᠢᠷᠠᠭᠠᠳ ᠠᠯᠤᠬᠠ ᠲᠦᠰᠢ ᠬᠣᠶᠠᠷ ᠢ᠋ᠶ᠋ᠠᠨ ᠣᠯᠠᠨ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠬᠠᠩᠭᠢᠨᠠᠭᠤᠯᠤᠨ ᠪᠠᠢᠵᠤ ᠦᠢᠯᠡᠳᠦᠭᠰᠡᠨ ᠪᠠᠢᠪᠠ᠃《ᠦᠭᠡᠢ ᠶᠡᠷᠦ ᠲᠡᠮᠦᠷ ᠨᠢ ᠪᠠᠰᠠ ᠭᠠᠢᠬᠠᠯᠲᠠᠶᠠ! ᠶᠣᠰᠣᠲᠠᠢ ᠭᠦᠢᠴᠡᠳ ᠬᠠᠲᠠᠭᠠᠭᠳᠠᠭᠰᠠᠨ ᠭᠠᠩ ᠪᠠᠢᠵᠤ ᠰᠢᠦ》 ᠭᠡᠵᠦ ᠡᠳ᠋ ᠦ᠋ᠨ ᠶᠠᠰᠤ ᠴᠢᠨᠠᠷ ᠢ᠋ ᠮᠡᠳᠡᠳᠡᠭ ᠪᠦᠬᠦᠨ ᠱᠠᠭᠰᠢᠨ ᠬᠡᠯᠡᠯᠴᠡᠳᠡᠭ ᠪᠠᠢᠯᠠ᠃ ᠡᠴᠢᠭᠡ ᠶ᠋ᠢ ᠨᠠᠰᠤ ᠪᠠᠷᠠᠭᠰᠠᠨ ᠳᠠᠷᠠᠭᠠ ᠳ᠋ᠠᠨᠽᠠᠨ ᠤ᠋ ᠡᠬᠡ ᠡᠨᠡ ᠬᠢᠲᠤᠭᠠ ᠶ᠋ᠢ ᠳᠠᠯᠳᠠ ᠶ᠋ᠢᠨ ᠳᠠᠯᠳᠠ ᠬᠢᠵᠦ ᠬᠠᠳᠠᠭᠠᠯᠠᠭᠠᠳ ᠳᠥᠩᠭᠡᠵᠦ ᠥᠴᠥᠭᠡᠳᠦᠷ ᠣᠷᠣᠢ ᠭᠠᠷᠭᠠᠵᠤ ᠬᠦᠦ ᠳ᠋ᠡᠭᠡᠨ ᠵᠡᠭᠦᠯᠭᠡᠭᠰᠡᠨ ᠶᠦᠮ ᠰᠠᠨᠵᠢ᠃ ᠡᠭᠦᠨᠴᠢᠯᠡᠨ ᠬᠥᠯ ᠳ᠋ᠦ᠍ ᠡᠮᠦᠰᠦᠭᠰᠡᠨ ᠭᠤᠲᠤᠯ ᠭᠠᠷ ᠲᠤ ᠪᠠᠷᠢᠭᠰᠠᠨ ᠲᠠᠰᠢᠭᠤᠷ ᠴᠥᠮ ᠰᠢᠨᠡ᠂ ᠴᠥᠮ ᠪᠡᠬᠢ ᠪᠠᠲᠤ᠂ ᠥᠭᠡᠷᠡ ᠪᠡᠷ ᠬᠡᠯᠡᠬᠦ ᠳ᠋ᠦ᠍ ᠳ᠋ᠠᠨᠽᠠᠨ ᠶᠣᠰᠣᠲᠠᠢ ᠰᠠᠢᠨ ᠡᠷᠡ ᠶ᠋ᠢᠨ ᠬᠡᠷᠡᠭᠯᠡᠳᠡᠭ ᠪᠦᠬᠦᠨ ᠢ᠋ ᠬᠡᠷᠡᠭᠯᠡᠭᠰᠡᠨ ᠪᠥᠭᠡᠳ ᠡᠭᠦᠨ ᠢ᠋ᠶ᠋ᠡᠨ ᠰᠠᠨᠠᠬᠤ ᠳ᠋ᠤ᠌ ᠥᠪᠡᠷ ᠲᠦ᠍ ᠨᠢ ᠨᠢᠭᠡ ᠵᠡᠷᠭᠡ ᠥᠨᠳᠥᠷ ᠶᠠᠭᠤᠮᠠ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠵᠣᠷᠢᠭᠰᠠᠨ ᠭᠠᠵᠠᠷ ᠤ᠋ᠨ ᠵᠦᠭ ᠡᠴᠡ ᠠᠯᠲᠠᠨ ᠰᠢᠷᠭᠠᠯ ᠨᠠᠷᠠᠨ ᠮᠡᠯᠲᠡᠭᠡᠨᠡᠨ ᠭᠠᠷᠴᠤ ᠬᠣᠯᠠ ᠣᠢᠷᠠ ᠶ᠋ᠢᠨ ᠪᠠᠷᠠ ᠲᠣᠳᠣᠳᠬᠠᠬᠤ ᠳ᠋ᠠᠨᠽᠠᠨ ᠤ᠋ ᠰᠠᠨᠠᠨ ᠰᠡᠳᠬᠢᠬᠦ ᠥᠭᠡᠷᠡᠴᠢᠯᠡᠭᠳᠡᠪᠡ᠃
《ᠲᠡᠷᠲᠡᠭᠡ ᠲᠡᠷᠡ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠨᠠᠷᠠᠨ ᠤ᠋ ᠨᠠᠭᠠᠬᠠᠨᠲᠠᠢ ᠪᠣᠯᠪᠠ ᠤᠤ᠂ ᠵᠠᠩᠴᠢᠬᠦᠦ ᠬᠣᠲᠠ ᠪᠣᠢ᠂ ᠲᠡᠷᠡ ᠬᠣᠲᠠ ᠨᠠᠳᠠ ᠳ᠋ᠤ᠌ ᠣᠯᠵᠠᠨ ᠤ᠋ ᠶᠡᠬᠡ ᠶ᠋ᠢ ᠣᠯᠭᠣᠨ᠂ ᠵᠢᠪᠬᠤᠯᠠᠩᠲᠤ ᠠᠶᠠᠯᠭᠤ ᠰᠣᠨᠣᠰᠳᠠᠬᠤ ᠳ᠋ᠠᠨᠽᠠᠨ ᠬᠡᠮᠡᠬᠦ ᠨᠡᠷᠡ ᠳ᠋ᠦ᠍ ᠣᠷᠣᠰᠢᠯ ᠪᠣᠯᠤᠨ ᠬᠠᠳᠠᠭᠳᠠᠭᠰᠠᠨ ᠵᠠᠷᠤᠴᠠ ᠭᠡᠳᠡᠭ ᠭᠤᠲᠤᠮᠰᠢᠭᠲᠤ ᠦᠭᠡ ᠶ᠋ᠢ ᠬᠡᠯᠡᠨᠡ ᠳᠡ》 ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠰᠡᠳᠬᠢᠯ ᠬᠥᠭᠡᠷᠦᠨ ᠶᠠᠭᠠᠷᠠᠭᠰᠠᠨ ᠪᠥᠭᠡᠳ ᠤᠨᠤᠭᠠ ᠲᠡᠮᠡᠭᠡ ᠲᠠᠢᠯᠤᠭ ᠢ᠋ᠶ᠋ᠠᠨ《ᠴᠥᠬᠥ》 ᠭᠡᠵᠦ ᠳᠠᠪᠢᠷᠠᠭᠰᠠᠨ ᠠᠵᠢ᠃ ᠲᠤᠭᠤᠯᠪᠦᠷᠢᠲᠦ ᠲᠡᠷᠡ ᠳᠡᠢᠯᠦᠭ ᠨᠢ ᠤᠷᠤᠭᠰᠢ ᠭᠦᠶᠦᠨ ᠵᠢᠩ ᠦ᠋ᠨ ᠳᠤᠮᠳᠠ ᠶᠠᠪᠤᠭᠠ ᠳᠣᠷᠵᠢ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠬᠦ ᠳ᠋ᠦ᠍ ᠳ᠋ᠠᠨᠽᠠᠨ ᠪᠤᠷᠠᠨᠲᠠᠭ ᠢ᠋ ᠬᠣᠢᠰᠢ ᠲᠡᠳᠡᠨ ᠵᠣᠭᠰᠣᠭᠠᠵᠤ᠂ ᠵᠣᠬᠢᠬᠤ ᠪᠠᠢᠷᠢᠨ ᠳ᠋ᠠᠭᠠᠨ ᠣᠷᠣᠪᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠳᠠᠭ ᠥᠷᠭᠡᠨ ᠶᠡᠬᠡ ᠵᠠᠮ ᠳ᠋ᠤ᠌ ᠣᠷᠣᠭᠰᠠᠨ ᠪᠠᠢᠯᠠ᠃ ᠵᠢᠯ ᠦ᠋ᠨ ᠵᠢᠯ ᠳ᠋ᠦ᠍ ᠠᠯᠤᠰ ᠬᠣᠯᠠ ᠶ᠋ᠢᠨ ᠠᠶᠠᠨ ᠳ᠋ᠤ᠌ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠪᠠᠷᠤᠭᠲᠠᠢ ᠪᠣᠯᠬᠢ ᠡᠷᠡ ᠡᠴᠡ ᠢᠯᠡᠭᠦᠦ ᠠᠶᠠᠨᠰᠢᠵᠤ ᠳᠠᠰᠤᠭᠰᠠᠨ ᠲᠡᠮᠡᠭᠡ ᠤᠷᠮᠠ ᠵᠣᠷᠢᠭ ᠣᠷᠣᠬᠤ ᠮᠡᠲᠦ ᠲᠠᠪᠠᠬᠠᠢ ᠪᠠᠨ ᠭᠢᠯᠠᠯᠵᠠᠭᠤᠯᠤᠨ ᠠᠯᠬᠤᠯᠠᠨᠠ᠃ ᠰᠠᠨᠠᠮᠰᠠᠷ ᠦᠭᠡᠢ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠰᠠᠶᠢᠬᠠᠨ ᠣᠷᠬᠢᠭᠰᠠᠨ ᠬᠢᠲᠠᠳ ᠫᠦᠰᠡᠨ ᠦ᠌ ᠣᠷᠣᠨ ᠪᠠᠢᠰᠢᠩ ᠬᠡᠳᠦ ᠬᠡᠳᠦᠨ ᠠᠭᠤᠯᠠ ᠶ᠋ᠢᠨ ᠴᠠᠭᠠᠲᠠᠢ ᠬᠣᠴᠣᠷᠤᠭᠳᠠᠭᠰᠠᠨ ᠪᠠᠢᠪᠠ᠃ ᠤᠷᠢᠳᠤ ᠵᠦᠭ ᠢ᠋ ᠣᠨᠴᠠᠯᠠᠨ ᠠᠵᠢᠬᠤ ᠳ᠋ᠤ᠌ ᠠᠯᠤᠰ ᠤ᠋ᠨ ᠠᠭᠤᠯᠠᠰ ᠴᠡᠩᠬᠡᠷ ᠤᠨᠢᠶᠠᠷ ᠲᠤ ᠨᠥᠮᠥᠷᠥᠭᠳᠡᠨ ᠰᠦᠮᠡᠯᠵᠡᠵᠦ ᠣᠢᠷᠠ ᠣᠷᠴᠢᠮ ᠤ᠋ᠨ ᠲᠠᠯᠠ ᠬᠥᠨᠳᠡᠢ ᠨᠦ᠍ᠭᠦᠳ ᠴᠠᠭᠠᠨ ᠥᠩᠭᠡ ᠪᠡᠷ ᠵᠢᠷᠪᠢᠭᠢᠨᠡᠨᠡ᠃
ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍᠂ ᠪᠥᠭᠡᠮ ᠰᠡᠭᠦᠯᠲᠦ ᠤᠯᠠᠭᠠᠨ ᠬᠠᠯᠲᠠᠷ ᠨᠣᠬᠠᠢ ᠬᠥᠯ ᠦ᠋ᠨ ᠤᠯᠠ ᠳᠣᠣᠷᠠ ᠠ᠋ᠴᠠ ᠭᠡᠨᠡᠳᠲᠡ ᠭᠠᠷᠴᠤ ᠢᠷᠡᠨ ᠲᠣᠮᠣ ᠭᠠᠤᠯᠢᠨ ᠬᠣᠩᠬᠣ ᠨᠤᠭᠤᠳ ᠢ᠋ᠶ᠋ᠠᠨ ᠬᠠᠩᠭᠢᠨᠠᠭᠤᠯᠤᠨ᠂ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠪᠤᠷᠭᠤᠭᠠᠪᠠ᠃ ᠮᠠᠨ ᠤ᠋ ᠵᠢᠩᠴᠢᠳ ᠡᠢᠨ ᠬᠦ᠌ ᠳᠥᠷᠪᠡᠨ ᠭᠡᠷ ᠨᠢᠭᠡᠨ ᠠᠢᠯ ᠤ᠋ᠨ ᠭᠠᠳᠠᠭᠤᠷ ᠭᠠᠷᠴᠤ ᠶᠠᠪᠤᠭᠠ ᠠᠵᠢ᠃ ᠲᠡᠷᠡ ᠠᠢᠯ ᠤ᠋ᠨ ᠬᠣᠨᠢ ᠨᠢ ᠬᠣᠲᠠᠨ ᠳ᠋ᠠᠭᠠᠨ᠂ ᠦᠬᠡᠷ ᠨᠢ ᠵᠡᠯᠡ ᠳᠡᠭᠡᠷᠡ ᠪᠡᠨ᠂ ᠲᠣᠭᠣᠨᠣ ᠪᠦᠷᠢ ᠡᠴᠡ ᠠᠭᠤᠷ ᠤᠲᠤᠭᠠ ᠰᠠᠪᠰᠠᠨᠠ᠃ ᠡᠭᠦᠨ ᠢ᠋ ᠬᠣᠢᠨᠠ ᠪᠠᠨ ᠣᠷᠬᠢᠨ ᠥᠩᠭᠡᠷᠡᠭᠡᠬᠦ ᠳ᠋ᠦ᠍ ᠲᠡᠷᠲᠡᠭᠡ ᠨᠢᠭᠡᠨ ᠬᠥᠪᠡᠭᠡ ᠪᠡᠷ ᠬᠡᠰᠡᠭ ᠠᠳᠤᠭᠤ ᠬᠤᠢᠯᠠᠷᠠᠨ ᠭᠠᠷᠴᠤ ᠢᠷᠡᠯᠡ᠃ ᠬᠥᠭᠡᠭᠡᠵᠦ ᠶᠠᠪᠤᠭᠠ ᠡᠵᠡᠨ ᠨᠢ ᠪᠠᠷᠠ ᠦᠭᠡᠢ ᠪᠣᠯᠪᠠᠴᠤ《ᠬᠠᠶᠢ ᠬᠥᠶᠢ》 ᠬᠠᠰᠬᠢᠷᠬᠤ ᠳᠠᠭᠤᠨ ᠨᠢ ᠡᠷᠭᠢᠨ ᠲᠣᠭᠣᠷᠢᠨ ᠤ᠋ ᠬᠥᠨᠳᠡᠢ ᠶ᠋ᠢ ᠲᠤᠭᠤᠯᠤᠨ ᠠᠯᠤᠰ ᠤ᠋ᠨ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠶ᠋ᠢ ᠬᠦᠷᠦᠭᠡᠳ ᠡᠷᠭᠢᠨ ᠴᠤᠤᠷᠢᠶᠠᠳᠤᠨᠠ᠃
ᠡᠨᠡ ᠪᠦᠬᠦ ᠪᠠᠢᠳᠠᠯ ᠤ᠋ᠳ ᠳ᠋ᠠᠨᠽᠠᠨ ᠤ᠋ ᠰᠡᠳᠬᠢᠯ ᠢ᠋ ᠤᠯᠠᠮ ᠢ᠋ᠶ᠋ᠠᠷ ᠲᠡᠨᠢᠢᠯᠭᠡᠨ ᠪᠠᠶᠠᠰᠬᠠᠨᠠ᠃《ᠡᠷᠡ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠡᠵᠡᠭᠦᠢ ᠬᠡᠭᠡᠷᠡ ᠭᠡᠳᠡᠭ ᠶᠠᠭᠤᠲᠠᠢ ᠦᠨᠡᠨ ᠪᠣᠢ!》 ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠣᠯᠬᠤ ᠣᠯᠵᠠ ᠣᠮᠣᠭ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠳ᠋ᠤ᠌ ᠰᠢᠯᠵᠢᠨ ᠣᠷᠣᠪᠠ᠃ ᠡᠨᠡ ᠪᠣᠯ ᠦᠨᠡᠨ ᠳ᠋ᠡᠭᠡᠨ ᠴᠤ᠌ ᠳ᠋ᠠᠨᠽᠠᠨ ᠳ᠋ᠤ᠌ ᠡᠢᠨ ᠬᠦ᠌ ᠵᠠᠭᠤᠨ ᠠᠭᠤᠯᠠ᠂ ᠮᠢᠩᠭᠠᠨ ᠵᠠᠮ ᠢ᠋ ᠠᠯᠤᠰᠯᠠᠨ ᠵᠣᠷᠢᠵᠤ ᠶᠠᠪᠤᠭᠠ ᠬᠡᠷᠡᠭ ᠦ᠋ᠨ ᠬᠢᠨᠢ ᠬᠠᠮᠤᠭ ᠤ᠋ᠨ ᠴᠢᠬᠤᠯᠠ ᠨᠢ ᠪᠠᠢᠵᠠᠢ᠃ ᠭᠠᠭᠴᠠ ᠬᠦ᠌ ᠬᠠᠷᠠᠮᠰᠠᠯᠲᠠᠢ ᠨᠢ ᠬᠡᠴᠢᠨᠡᠭᠡᠨ ᠳᠠᠬᠢᠨ ᠪᠣᠳᠣᠪᠠᠴᠤ ᠣᠷᠣᠯᠭᠠ ᠵᠠᠷᠤᠯᠭᠠ ᠶ᠋ᠢᠨ ᠲᠣᠭᠠᠴᠠᠭᠠ ᠡᠯᠳᠡᠪ ᠶᠠᠩᠵᠤ ᠪᠠᠷ ᠪᠤᠳᠤᠯᠢᠬᠤ ᠠ᠋ᠴᠠ ᠪᠢᠰᠢ ᠦᠨᠡᠨ ᠵᠥᠪ ᠢ᠋ᠶ᠋ᠡᠷ ᠭᠠᠷᠴᠤ ᠪᠠᠢᠭᠰᠠᠨ ᠤᠳᠠᠭᠠ ᠦᠭᠡᠢ ᠪᠥᠭᠡᠳ᠂ ᠡᠨᠡ ᠨᠢ ᠲᠡᠷᠡ ᠪᠦᠷᠢ ᠶ᠋ᠢ ᠪᠦᠷᠢᠳᠬᠡᠨ ᠲᠡᠮᠳᠡᠭᠯᠡᠬᠦ ᠨᠣᠮ ᠡᠷᠳᠡᠮ ᠦᠭᠡᠢ ᠡᠴᠡ ᠭᠠᠳᠠᠨᠠ ᠰᠤᠸᠠᠮᠹᠠᠨ ᠭᠡᠭᠴᠢ ᠶ᠋ᠢ ᠴᠣᠬᠢᠬᠤ ᠪᠠᠢᠲᠤᠭᠠᠢ ᠭᠠᠷ ᠲᠠᠭᠠᠨ ᠴᠤ᠌ ᠪᠠᠷᠢᠵᠤ ᠦᠵᠡᠭᠡᠳᠦᠢ ᠲᠡᠢ ᠬᠣᠯᠪᠣᠭᠳᠠᠯ ᠲᠠᠢ ᠪᠠᠢᠯᠠ᠃ ᠲᠡᠭᠡᠭᠡᠳ ᠣᠳᠣ ᠳ᠋ᠠᠨᠽᠠᠨ ᠡᠨᠡ ᠠᠭᠤᠳᠠᠮ ᠲᠡᠨᠢᠭᠡᠷ ᠨᠠᠮ ᠭᠦᠮ ᠦ᠋ᠨ ᠳᠣᠲᠣᠷᠠ ᠪᠣᠳᠣᠪᠠᠰᠤ ᠯᠠᠪ ᠤᠴᠢᠷ ᠣᠯᠳᠠᠨᠠ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠭᠠᠳᠠᠨᠠ ᠲᠡᠭᠦᠨ ᠢ᠋ᠶ᠋ᠡᠨ ᠪᠣᠳᠣᠬᠤ ᠦᠭᠡᠢ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠢᠩᠭᠢᠭᠡᠳ ᠶᠠᠭᠤᠮᠠ ᠪᠦᠬᠦᠨ ᠢ᠋ᠶ᠋ᠡᠨ ᠬᠤᠷᠤᠭᠤ ᠳᠠᠷᠤᠨ ᠲᠡᠮᠳᠡᠭᠯᠡᠭᠡᠳ ᠪᠣᠳᠣᠬᠤ ᠳ᠋ᠤ᠌ ᠴᠣᠬᠣᠮ ᠶᠠᠭᠤ ᠨᠢ ᠮᠠᠷᠲᠠᠭᠳᠠᠨ ᠶᠠᠮᠠᠷ ᠶᠠᠭᠤᠮᠠ ᠪᠠᠨ ᠬᠡᠳᠦᠨ ᠳᠠᠪᠬᠤᠷ ᠨᠡᠮᠡᠭᠰᠡᠨ ᠢ᠋ ᠬᠡᠨ ᠮᠡᠳᠡᠯᠡ᠃ ᠣᠯᠵᠠ ᠣᠯᠬᠤ ᠪᠠᠢᠲᠤᠭᠠᠢ ᠥᠷᠢ ᠰᠢᠷᠢᠨ ᠳ᠋ᠦ᠍ ᠤᠨᠠᠬᠤ ᠮᠠᠰᠢ ᠮᠠᠭᠤᠬᠠᠢ ᠲᠣᠭᠠᠴᠠᠭᠠ ᠭᠠᠷᠪᠠ᠃ ᠡᠭᠦᠨ ᠳ᠋ᠡᠭᠡᠨ ᠭᠣᠣᠯ ᠨᠢ ᠬᠠᠷᠠᠯᠠᠨ ᠴᠢᠷᠠᠢ ᠨᠢ ᠰᠢᠷᠠᠩᠭᠤᠢᠯᠠᠪᠠ᠃ ᠳᠡᠮᠡᠢ ᠭᠠᠢᠬᠠᠬᠤ ᠳ᠋ᠠᠭᠠᠨ ᠳ᠋ᠠᠨᠽᠠᠨ ᠥᠭᠡᠷᠡ ᠨᠢᠭᠡᠨ ᠠᠷᠭᠠ ᠭᠠᠷᠭᠠᠨ ᠳᠠᠬᠢᠨ ᠪᠣᠳᠣᠪᠠ᠃ ᠡᠨᠡ ᠨᠢ ᠶᠠᠭᠤᠨ ᠤ᠋ ᠤᠷᠢᠳ ᠪᠤᠰᠤᠳ ᠠ᠋ᠴᠠ ᠭᠤᠷᠪᠠᠨ ᠰᠠᠢᠬᠠᠨ ᠠᠳᠠ ᠬᠥᠯᠥᠰᠥᠯᠡᠭᠰᠡᠨ ᠦ᠌ ᠪᠡᠨ ᠬᠥᠯᠥᠰᠥ ᠶ᠋ᠢ ᠥᠭᠴᠦ ᠴᠢᠳᠠᠬᠤ ᠡᠰᠡᠬᠦ ᠪᠡᠨ ᠪᠣᠳᠣᠭᠰᠠᠨ ᠬᠡᠷᠡᠭ ᠪᠥᠭᠡᠳ ᠢᠩᠭᠢᠬᠦ ᠳ᠋ᠦ᠍ ᠤᠭ ᠬᠥᠯᠥᠰᠥ ᠶ᠋ᠢ ᠥᠭᠴᠦ ᠴᠢᠳᠠᠬᠤ ᠪᠠᠷ ᠦᠯᠦ ᠪᠠᠷᠠᠮ ᠲᠡᠮᠡᠭᠡ ᠪᠦᠷᠢ ᠡᠴᠡ ᠭᠤᠷᠪᠠ ᠭᠤᠷᠪᠠᠨ ᠶᠠᠩᠴᠢᠶᠠᠨ ᠣᠯᠬᠤ ᠶ᠋ᠢ ᠵᠢᠩ ᠦ᠋ᠨ ᠳᠠᠭᠠᠭᠠᠮᠠᠯ ᠬᠦᠷᠡᠯ ᠪᠠᠲᠤᠯᠠᠨ ᠬᠡᠯᠡᠭᠰᠡᠨ ᠪᠠᠢᠪᠠ᠃ ᠬᠣᠶᠠᠷ ᠲᠤᠨᠢ ᠥᠪᠡᠷ ᠦ᠋ᠨ ᠪᠡᠶᠡ ᠬᠦᠷᠡᠯ᠂ ᠳᠣᠷᠵᠢ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠠᠷᠪᠠᠨ ᠲᠠᠪᠤᠨ ᠶᠠᠩᠴᠢᠶᠠᠨ ᠤ᠋ ᠬᠥᠯᠥᠰᠥ ᠬᠡᠯᠡᠯᠴᠡᠨ ᠵᠢᠳᠬᠦᠵᠦ ᠶᠠᠪᠤᠭᠠ ᠪᠠᠢᠯᠠ᠃ ᠭᠤᠷᠪᠠ ᠳ᠋ᠤᠨᠢ ᠠᠮᠢ ᠬᠤᠪᠢ ᠶ᠋ᠢᠨ ᠲᠠᠪᠤᠨ ᠨᠡᠬᠡᠢ᠂ ᠨᠢᠭᠡ ᠰᠢᠭᠤᠳᠠᠢ ᠮᠥᠭᠥ᠂ ᠳᠣᠯᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ᠂ ᠪᠠᠰᠠ ᠪᠤᠰᠤ ᠠᠷᠰᠠᠷ ᠵᠦᠢᠯᠡᠰ ᠪᠣᠢ ᠶ᠋ᠢ ᠵᠡᠩᠴᠢᠬᠦᠦ ᠣᠷᠣᠭᠤᠯᠤᠨ ᠵᠠᠷᠤᠬᠤ ᠳ᠋ᠤ᠌ ᠪᠠᠭᠠ ᠦᠭᠡᠢ ᠦᠨᠡ ᠬᠦᠷᠬᠦ ᠶᠣᠰᠣᠲᠠᠢ ᠪᠠᠢᠯᠠ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠠᠨ ᠨᠢᠳᠦ ᠰᠡᠷᠭᠦᠨ ᠪᠠᠶᠠᠷᠯᠠᠵᠤ ᠴᠣᠬᠣᠮ ᠶᠠᠭᠤ ᠶᠠᠭᠤ ᠠᠪᠬᠤ ᠪᠠᠨ ᠪᠣᠳᠣᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠶᠠᠭᠤᠨ ᠤ᠋ ᠤᠷᠢᠳ ᠠᠬᠠ ᠡᠭᠡᠴᠢ ᠬᠣᠶᠠᠷ ᠲᠠᠭᠠᠨ ᠨᠢᠭᠡ ᠨᠢᠭᠡ ᠭᠤᠲᠤᠯ ᠳᠡᠪᠡᠯ ᠦ᠋ᠨ ᠥᠩᠭᠡ᠂ ᠥᠪᠡᠷ ᠲᠡᠭᠡᠨ ᠭᠡᠪᠡᠯ ᠮᠥᠨ ᠯᠡ ᠭᠤᠲᠤᠯ᠂ ᠶᠠᠭᠠᠬᠢᠭᠠᠳ ᠵᠠᠪᠠᠯ ᠭᠤᠲᠤᠯ ᠬᠡᠷᠡᠭᠲᠡᠢ ᠪᠣᠢ ᠭᠡᠪᠡᠯ᠄ ᠡᠷᠡ ᠬᠥᠮᠦᠨ ᠭᠤᠲᠤᠯ ᠮᠠᠭᠤᠲᠠᠢ ᠶᠠᠪᠤᠬᠤ ᠰᠢᠭ᠋ ᠠᠳᠠᠭ ᠶᠠᠭᠤᠮᠠ ᠶᠠᠭᠤ ᠪᠠᠢᠬᠤ ᠪᠢᠯᠡ ᠭᠡᠵᠦ ᠪᠣᠳᠣᠭᠳᠠᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠬᠡᠷᠪᠡ ᠣᠯᠠᠨ ᠤᠭᠠᠯᠵᠠ ᠲᠠᠢ ᠪᠣᠯ ᠬᠡᠪᠡᠷᠡᠭ ᠪᠠᠢᠳᠠᠭ ᠭᠡᠵᠦ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠬᠡᠯᠡᠳᠡᠭ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠡᠭᠦᠨ ᠡᠴᠡ ᠴᠠᠭᠠᠰᠢ ᠨᠢᠭᠡ ᠭᠠᠢᠭᠤᠢ ᠰᠠᠢᠨ ᠮᠣᠷᠢ ᠲᠠᠢ ᠪᠣᠯᠬᠤ ᠶ᠋ᠢ ᠪᠣᠳᠣᠨᠠ᠃ ᠰᠠᠭᠠᠯᠢ ᠶ᠋ᠢᠨ ᠬᠣᠶᠠᠷ ᠦᠨᠢᠶᠡ ᠴᠤ᠌ ᠬᠡᠷᠡᠭᠲᠡᠢ ᠪᠣᠯᠪᠠ᠃ ᠪᠠᠰᠠ ᠣᠳᠣ ᠪᠠᠢᠭᠠ ᠲᠠᠪᠢᠭᠠᠳ ᠬᠣᠨᠢᠨ ᠳᠡᠭᠡᠷᠡ ᠪᠡᠨ ᠨᠡᠮᠡᠭᠦᠰᠢᠲᠡᠢ ᠪᠣᠯᠤᠨᠠ᠃ ᠭᠡᠲᠡᠯᠡ ᠢᠮᠠᠭᠠ ᠬᠡᠳᠦᠢᠪᠡᠷ ᠮᠠᠭᠤ ᠨᠡᠷᠡ ᠲᠡᠢ ᠬᠠᠵᠠᠭᠤ ᠬᠠᠪᠢᠷᠭᠠ ᠶ᠋ᠢᠨ ᠠᠢᠯ ᠤ᠋ᠳ ᠤ᠋ᠨ ᠭᠡᠷ ᠪᠠᠷᠠᠭᠠ ᠥᠭᠡᠳᠡ ᠠᠪᠠᠷᠢᠬᠤ᠂ ᠬᠣᠨᠢ ᠳᠠᠭᠠᠭᠤᠯᠤᠨ ᠭᠦᠶᠦᠬᠦ᠂ ᠡᠨᠡ ᠲᠡᠷᠡ ᠪᠡᠷ ᠢ᠋ᠶ᠋ᠡᠨ ᠦᠨᠡ ᠬᠦᠨᠳᠦ ᠦᠭᠡᠢ ᠠᠮᠢᠲᠠᠨ ᠪᠣᠯᠪᠠᠴᠤ ᠦᠷᠡᠵᠢᠬᠦ ᠨᠢ ᠬᠤᠷᠳᠤᠨ᠂ ᠰᠠᠭᠠᠯᠢ ᠰᠦ ᠶᠡᠬᠡᠲᠡᠢ ᠮᠥᠨ ᠯᠡ ᠰᠠᠢᠬᠠᠨ ᠮᠠᠯ ᠰᠢᠦ ᠳᠡ ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠤᠷᠢᠳ ᠡᠮᠦᠨᠡ ᠳ᠋ᠠᠨᠽᠠᠨ ᠡᠢᠮᠦ ᠰᠠᠢᠨ ᠶᠠᠭᠤᠮᠠ ᠶ᠋ᠢ ᠶᠡᠷᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠦᠭᠡᠢ᠂ ᠵᠥᠪᠬᠡᠨ ᠣᠳᠣ ᠯᠠ ᠠᠶᠠᠨ ᠵᠠᠮ ᠳ᠋ᠤ᠌ ᠭᠠᠷᠤᠭᠰᠠᠨ ᠬᠣᠢᠨᠠ ᠪᠠᠨ ᠯᠠ ᠪᠣᠳᠣᠭᠠᠳ ᠢᠷᠡᠬᠦ ᠳ᠋ᠦ᠍ ᠦᠨᠡᠬᠡᠷ ᠰᠡᠳᠬᠢᠯ ᠬᠥᠳᠡᠯᠦᠨ ᠲᠠᠰᠢᠶᠠ ᠲᠤᠯᠵᠤ᠂ ᠬᠡᠵᠢᠶᠡ ᠢᠮᠠᠭᠲᠠ ᠭᠢᠩᠰᠢᠨ ᠶᠠᠪᠤᠳᠠᠭ《ᠠᠯᠢᠶᠠᠬᠠᠨ ᠰᠠᠭᠠᠷᠠᠯ》 ᠭᠡᠳᠡᠭ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠪᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠶᠠᠯᠤᠨ ᠡᠬᠢᠯᠡᠪᠡ᠃ ᠬᠥᠮᠦᠨ ᠦ᠌ ᠬᠦᠦ ᠶ᠋ᠢᠨ ᠪᠣᠳᠣᠯ ᠬᠤᠪᠢ ᠬᠣᠪᠢᠨ ᠳ᠋ᠠᠭᠠᠨ ᠬᠥᠷᠥᠩᠭᠡ ᠴᠢᠨᠡᠭᠡᠨ ᠦ᠌ ᠪᠡᠨ ᠬᠢᠷᠢ ᠬᠡᠮᠵᠢᠶᠡ ᠪᠠ ᠦᠰᠦᠨ ᠪᠣᠢᠵᠢᠭᠰᠠᠨ ᠨᠢ ᠶᠠᠮᠠᠷ ᠪᠣᠯᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠢᠷᠢ ᠪᠡᠷ ᠲᠠᠰᠤ ᠣᠨᠳᠣᠣ ᠴᠤ᠌ ᠪᠠᠢᠵᠤ ᠪᠣᠯᠬᠤ ᠬᠡᠷᠡᠭ᠃
ᠡᠨᠡ ᠶᠣᠰᠣᠭᠠᠷ ᠥᠭᠦᠯᠡᠬᠦ ᠳ᠋ᠦ᠍ ᠵᠢᠩ ᠳᠤᠮᠳᠠ ᠶᠠᠪᠤᠭᠠ ᠳᠣᠷᠵᠢ ᠳ᠋ᠤ᠌ ᠳ᠋ᠠᠨᠽᠠᠨ ᠤ᠋ ᠰᠠᠨᠠᠵᠤ ᠪᠣᠳᠣᠵᠤ ᠶᠠᠪᠤᠭᠠ ᠲᠠᠢ ᠲᠥᠰᠦᠭᠡᠲᠡᠢ ᠶᠠᠭᠤᠮᠠ ᠣᠭᠲᠣ ᠦᠭᠡᠢ᠃ ᠤᠭ ᠨᠢ ᠡᠨᠡ ᠡᠷᠡ ᠵᠠᠩᠴᠢᠬᠦᠦ ᠬᠣᠲᠠ ᠶ᠋ᠢ ᠦᠵᠡᠬᠦ ᠰᠣᠨᠢᠷᠬᠠᠯ ᠪᠠᠭᠠ ᠦᠭᠡᠢ ᠪᠠᠢᠭᠠ ᠪᠣᠯᠪᠠᠴᠤ ᠣᠳᠣ ᠤᠨᠤᠭᠠ ᠲᠡᠮᠡᠭᠡᠨ ᠳᠡᠭᠡᠷᠡ ᠪᠡᠶᠡ ᠲᠠᠰᠤᠷᠠᠯᠲᠠ ᠦᠭᠡᠢ ᠵᠠᠢᠯᠤᠭᠳᠠᠨ ᠶᠠᠪᠤᠭᠠ ᠳ᠋ᠠᠭᠠᠨ ᠲᠡᠰᠬᠡᠯ ᠦᠭᠡᠢ ᠤᠢᠳᠬᠠᠷᠯᠠᠨᠠ᠃《ᠬᠦᠷᠬᠦ ᠭᠠᠵᠠᠷ ᠬᠣᠯᠠ᠂ ᠠᠶᠠ ᠦᠭᠡᠢ ᠪᠣᠯ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠠᠶᠠᠨ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠳᠣᠲᠣᠷᠠ ᠠᠭᠵᠠᠢᠨ ᠬᠥᠯᠥᠰᠥ ᠴᠢᠬᠠᠷᠠᠬᠤ ᠰᠢᠭ᠋ ᠪᠣᠯᠤᠨᠠ᠃ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠯᠠᠮᠵᠢᠲᠠᠢ ᠪᠠᠢᠭᠠ ᠠ᠋ᠴᠠ ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠢᠭᠡ ᠶ᠋ᠢᠨ ᠰᠦᠢ ᠪᠡᠯᠡᠭ ᠪᠣᠯᠤᠨ ᠠᠪᠴᠤ ᠥᠭᠭᠦᠭᠰᠡᠨ ᠡᠬᠡᠨᠡᠷ ᠡᠴᠡ ᠨᠢᠳᠦ ᠳᠠᠯᠳᠠ ᠣᠷᠣᠨ ᠬᠣᠯᠠᠳᠠᠵᠤ ᠪᠠᠢᠭᠠ ᠶᠠᠪᠤᠳᠠᠯ ᠪᠠᠢᠯᠠ᠃ ᠡᠭᠦᠨ ᠦ᠌ ᠨᠥᠭᠦᠭᠡ ᠲᠠᠯᠠ ᠪᠠᠷ ᠮᠥᠨ ᠡᠴᠢᠭᠡ ᠶ᠋ᠢᠨ《ᠨᠠᠰᠤᠨ ᠤ᠋ ᠴᠢᠨᠢ ᠵᠠᠯᠠᠭᠤ᠂ ᠪᠡᠶᠡ ᠶ᠋ᠢᠨ ᠴᠢᠨᠢ ᠴᠢᠭᠢᠷᠠᠭ ᠳᠡᠭᠡᠷᠡ ᠪᠢ ᠴᠢᠮᠠᠢ᠍ᠢ ᠬᠠᠯᠠ ᠦᠵᠡᠭᠦᠯᠦᠨ᠂ ᠬᠠᠰᠢᠷ ᠲᠠᠨᠢᠭᠤᠯᠤᠨᠠ》 ᠭᠡᠵᠦ ᠠᠶᠠᠨ ᠵᠢᠩ ᠳ᠋ᠦ᠍ ᠬᠥᠭᠡᠭᠡᠨ ᠶᠠᠪᠤᠭᠤᠯᠤᠭᠰᠠᠨ ᠢ᠋ ᠰᠠᠨᠠᠬᠤ ᠳ᠋ᠤ᠌ ᠮᠥᠨ ᠨᠢᠭᠡ ᠬᠡᠴᠡᠭᠦᠦ᠂ ᠶᠡᠷᠦ ᠨᠢ ᠡᠨᠡ ᠬᠣᠷᠸᠠ ᠳ᠋ᠤ᠌ ᠡᠴᠢᠭᠡ ᠰᠢᠭ ᠨᠢ ᠭᠠᠢ ᠲᠠᠢ ᠠᠮᠢᠲᠠᠨ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠨᠠ᠃ ᠲᠡᠭᠡᠭᠡᠳ ᠡᠨᠡ ᠡᠴᠢᠭᠡ ᠶ᠋ᠢ ᠴᠣᠬᠣᠮ ᠬᠡᠷᠬᠢᠨ ᠬᠣᠬᠢᠷᠠᠭᠠᠬᠤ ᠪᠢᠯᠡ ᠳᠠ ᠭᠡᠬᠦ ᠡᠴᠡ ᠡᠨᠡ ᠭᠠᠷᠤᠭᠰᠠᠨ ᠵᠢᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠳᠦᠨ ᠲᠡᠮᠡᠭᠡ ᠶ᠋ᠢ ᠬᠠᠮᠢᠭᠠ ᠨᠢᠭᠡ ᠬᠠᠶᠠᠭᠠᠳ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠤᠭᠤᠰᠢᠲᠠᠢ ᠪᠣᠳᠣᠭᠳᠠᠬᠤ ᠠᠵᠢ᠃
ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠶᠠᠪᠤᠭᠠ ᠬᠦᠷᠡᠯ ᠤᠨ ᠪᠣᠳᠣᠯ ᠭᠡᠪᠡᠯ᠂ ᠨᠥᠭᠦᠭᠡ ᠬᠣᠶᠠᠷ ᠠ᠋ᠴᠠ ᠪᠠᠨ ᠱᠠᠯ ᠥᠭᠡᠷᠡ᠂ ᠠᠷᠤ ᠳ᠋ᠠᠭᠠᠨ ᠣᠷᠬᠢᠭᠰᠠᠨ ᠨᠢᠯᠬᠠ ᠨᠣᠢᠲᠠᠨ ᠬᠡᠦᠬᠡᠳ ᠦ᠋ᠳ ᠲᠡᠢ ᠡᠬᠡᠨᠡᠷ᠂ ᠠᠶᠠᠨ ᠵᠠᠮ ᠤ᠋ᠨ ᠬᠣᠯᠠ ᠣᠢᠷᠠ ᠣᠯᠵᠠ ᠣᠮᠣᠭ ᠣᠯᠬᠤ ᠴᠥᠮ ᠢ᠋ ᠮᠠᠷᠲᠠᠭᠠᠳ ᠣᠷᠣᠨ ᠳ᠋ᠤᠨᠢ ᠠᠶᠠᠨ ᠵᠢᠩ ᠳ᠋ᠦ᠍ ᠠᠷᠪᠠ ᠰᠢᠬᠠᠮ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠂ ᠠᠯᠲᠠᠨ ᠰᠢᠷᠭᠠᠯ ᠵᠠᠮ ᠤ᠋ᠨ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠥᠯᠵᠡᠢ ᠪᠣᠯᠤᠭᠰᠠᠨ ᠢ᠋ ᠲᠡᠭᠦᠨ ᠦ᠌ ᠪᠡᠨ ᠳᠡᠭᠡᠷᠡ ᠠᠩᠬᠠ ᠮᠣᠷᠳᠠᠭᠰᠠᠨ ᠡᠳᠦᠷ ᠦ᠋ᠨ ᠲᠩᠷᠢ ᠶ᠋ᠢᠨ ᠰᠠᠢᠬᠠᠨ ᠪᠠᠢᠭᠠ ᠶ᠋ᠢ ᠪᠣᠳᠣᠨ ᠰᠡᠳᠬᠢᠯ ᠠᠮᠤᠷ ᠶᠠᠪᠤᠨᠠ᠃