ᠤᠴᠢᠷ ᠲᠠᠢ ᠭᠤᠷᠪᠠᠨ ᠲᠣᠯᠣᠭᠠᠢ- ᠳ ᠨᠠᠴᠤᠭᠳᠣᠷᠵᠢ- ᠵᠦᠴᠦᠭᠡУчиртай гурван толгой
713ᠤᠴᠢᠷ ᠲᠠᠢ ᠭᠤᠷᠪᠠᠨ ᠲᠤᠯᠤᠭᠠᠢ- ᠳ ᠨᠠᠴᠤᠭᠳᠣᠷᠵᠢ 1943 ᠤᠨ ᠳᠤ
ᠨᠢᠭᠡᠳᠤᠭᠡᠷ ᠦᠵᠡᠭᠳᠡᠯ
ᠲᠠᠢᠰᠠᠨ ᠤ ᠪᠠᠢᠳᠠᠯ ᠨᠢ ᠢᠵᠢᠯ ᠭᠤᠷᠪᠠᠨ ᠠᠭᠤᠯᠠ ᠪᠠᠢᠬᠤ ᠪᠠ
ᠡᠨᠡ ᠠᠭᠤᠯᠠ ᠪᠤᠯ ᠮᠤᠳᠤ ᠤᠰᠤ ᠴᠡᠴᠡᠭ ᠨᠠᠪᠴᠢ ᠦᠵᠡᠰᠬᠦᠯᠡᠩ ᠲᠡᠭᠦᠯᠳᠡᠷ ᠭᠠᠵᠠᠷ ᠪᠠᠢᠬᠤ ᠪᠦᠭᠡᠳ
ᠳᠡᠭᠡᠷᠡᠬᠢ ᠠᠭᠤᠯᠠ ᠶᠢᠨ ᠲᠦᠪ ᠳᠤᠮᠳᠠ ᠠᠭᠤᠳᠠᠮ ᠲᠠᠯᠠ ᠬᠦᠨᠳᠡᠢ ᠳᠤ ᠠᠩ ᠳᠤ ᠶᠠᠪᠤᠭᠰᠠᠨ ᠬᠦᠮᠦᠰ ᠤᠨ ᠠᠷᠤ ᠭᠡᠷ ᠤᠨ ᠬᠦᠮᠦᠰ ᠢᠳᠡᠭᠡ ᠴᠠᠢ
ᠠᠢᠷᠠᠭ ᠲᠠᠷᠠᠭ᠂ ᠠᠷᠢᠬᠢ ᠵᠡᠷᠭᠡ ᠶᠢ ᠪᠡᠯᠡᠳᠬᠡᠨ ᠢᠷᠡᠭᠡᠳ ᠬᠥᠭᠵᠢᠯᠲᠡ ᠪᠠᠶᠠᠰᠬᠤᠯᠠᠩᠲᠠᠢ ᠪᠠᠷ
ᠠᠩᠴᠢᠳ ᠢᠶᠠᠨ ᠮᠠᠭᠲᠠᠨ ᠳᠠᠭᠤᠯᠠᠬᠤ ᠨᠢ᠄ (
ᠬᠠᠮᠲᠤ ᠪᠠᠷ ᠳᠠᠭᠤᠯᠠᠬᠤ）
ᠪᠠᠷᠰ ᠢᠷᠪᠢᠰ ᠢ ᠰᠦᠷᠳᠡᠭᠦᠯᠦᠭᠰᠡᠨ
ᠪᠠᠭᠠᠲᠤᠷ ᠮᠠᠨ ᠤ ᠡᠷᠡᠴᠦᠳ
ᠪᠠᠶᠠᠷ ᠤᠨ ᠴᠤᠭ ᠢ ᠪᠠᠳᠠᠷᠠᠭᠤᠯᠤᠭᠰᠠᠭᠠᠷ
ᠪᠠᠶᠠᠯᠢᠭ ᠤᠯᠵᠠ ᠲᠠᠢ ᠢᠷᠡᠨᠡ᠃
ᠠᠷᠤ ᠶᠢᠨ ᠠᠭᠤᠯᠠᠨ ᠳᠤ ᠭᠠᠷᠴᠤ
ᠠᠷᠰᠯᠠᠨ ᠪᠠᠷᠰ ᠢ ᠨᠠᠮᠨᠠᠭᠰᠠᠨ
ᠠᠩᠴᠢᠨ ᠡᠷᠡᠴᠦᠳ ᠲᠠ ᠨᠠᠷ ᠤᠨ
ᠠᠯᠳᠠᠷ ᠨᠡᠷᠡ ᠶᠢ ᠮᠠᠭᠲᠠᠶᠠ᠃
ᠬᠦᠬᠡ ᠴᠢᠨ᠋ᠸᠠ ᠶᠢ ᠠᠶᠤᠯᠭᠠᠭᠰᠠᠨ
ᠬᠦᠯᠦᠭ ᠮᠤᠷᠢᠳ ᠢ ᠮᠠᠭᠲᠠᠯᠠ᠃
ᠬᠦᠨᠳᠡᠢ ᠶᠢᠨ ᠠᠷᠢᠶᠠᠲᠠᠨ ᠢ ᠴᠤᠴᠢᠭᠠᠭᠰᠠᠨ
ᠬᠦᠴᠦᠲᠦ ᠡᠷᠡᠰ ᠢ ᠮᠠᠭᠲᠠᠨᠠ᠃
(ᠭᠡᠵᠦ
ᠳᠠᠭᠤᠯᠠᠵᠤ ᠳᠠᠭᠤᠰᠲᠠᠯᠠ ᠠᠯᠤᠰ ᠠᠴᠠ ᠢᠷᠡᠵᠦ ᠶᠠᠪᠤᠭᠠ ᠮᠤᠷᠢᠨ ᠤ ᠲᠤᠭᠤᠷᠠᠢ ᠶᠢᠨ ᠳᠠᠭᠤ ᠬᠤᠯᠠ ᠠᠴᠠ ᠰᠤᠨᠤᠰᠲᠠᠭᠰᠠᠭᠠᠷ
ᠢᠷᠡᠬᠦ ᠳᠤ᠂ ᠬᠦᠯᠢᠶᠡᠭᠰᠡᠨ ᠬᠦᠮᠦᠰ ᠤᠭᠳᠤᠨ ᠠᠭᠤᠯᠵᠠᠵᠤ᠂ ᠶᠦᠨᠳᠡᠩ ᠨᠠᠩᠰᠠᠯᠮᠠ ᠬᠤᠶᠠᠷ ᠪᠡᠶᠡ
ᠪᠡᠶᠡ ᠪᠠᠨ ᠲᠡᠪᠡᠷᠢᠨ ᠰᠡᠳᠬᠢᠯ ᠲᠠᠢᠪᠤᠰᠢᠷᠠᠨ ᠴᠦᠮ ᠢᠶᠠᠷ ᠢᠶᠠᠨ ᠳᠠᠭᠤᠯᠠᠬᠤ ᠨᠢ᠄）
(ᠾᠤᠷ） ᠠᠷᠤ ᠶᠢᠨ ᠠᠭᠤᠯᠠᠨ ᠳᠤ ᠤᠷᠭᠤᠭᠰᠠᠨ
ᠠᠯᠠᠭ ᠴᠡᠴᠡᠭ ᠰᠠᠢᠬᠠᠨ᠂
ᠠᠮᠠᠷᠠᠭ ᠬᠦᠭᠡᠷᠦᠬᠦᠨ ᠪᠦᠰᠡᠭᠦᠢ ᠮᠢᠨᠢ
ᠠᠯᠠᠭ ᠴᠡᠴᠡᠭ ᠠᠴᠠ ᠰᠠᠢᠬᠠᠨ᠃
ᠦᠪᠦᠷ ᠤᠨ ᠠᠭᠤᠯᠠᠨ ᠳᠤ ᠤᠷᠭᠤᠭᠰᠠᠨ
ᠦᠩᠭᠡ ᠶᠢᠨ ᠴᠡᠴᠡᠭ ᠰᠠᠢᠬᠠᠨ᠂
ᠦᠪᠡᠷ ᠤᠨ ᠢᠨᠠᠭ ᠪᠦᠰᠡᠭᠦᠢ ᠮᠢᠨᠢ
ᠦᠩᠭᠡ ᠶᠢᠨ ᠴᠡᠴᠡᠭ ᠠᠴᠠ ᠰᠠᠢᠬᠠᠨ᠃
(ᠭᠡᠵᠦ ᠳᠠᠭᠤᠯᠠᠭᠰᠠᠨ ᠤ
ᠳᠠᠷᠠᠭᠠ ᠪᠠᠷ ᠪᠦᠭᠦᠳᠡᠭᠡᠷ ᠢᠶᠠᠨ ᠲᠤᠭᠤᠷᠢᠨ ᠰᠠᠭᠤᠵᠠᠭᠠᠵᠤ ᠶᠦᠨᠳᠡᠩ ᠳᠠᠭᠤᠯᠠᠨᠠ）
ᠶᠦᠨᠳᠡᠩ᠄
ᠠᠷᠢᠶᠠᠲᠠᠨ ᠤ ᠵᠢᠷᠦᠬᠡ ᠶᠢ ᠴᠡᠴᠡᠷᠡᠭᠦᠯᠦᠭᠰᠡᠨ
ᠠᠯᠳᠠᠷᠲᠤ ᠪᠠᠭᠠᠳᠤᠷ ᠨᠦᠬᠦᠳ ᠮᠢᠨᠢ
ᠠᠶᠠᠲᠠᠢ ᠮᠤᠷᠢᠯᠠᠨ ᠰᠠᠭᠤᠵᠠᠭᠠᠵᠤ
ᠠᠮᠲᠠᠲᠠᠢ ᠢᠳᠡᠭᠡ ᠪᠠᠨ ᠪᠠᠷᠢᠵᠠᠭᠠᠶᠠ᠃
ᠳᠠᠭᠤᠴᠢᠨ᠄
ᠠᠩ ᠭᠦᠷᠦᠭᠡᠰᠦ ᠠᠭᠤᠯᠠ ᠪᠠᠷ ᠳᠦᠭᠦᠷᠡᠩ
ᠠᠳᠤᠭᠤ ᠮᠠᠯ ᠲᠠᠯᠠ ᠪᠠᠷ ᠳᠦᠭᠦᠷᠡᠩ
ᠠᠢᠷᠠᠭ ᠲᠠᠷᠠᠭ ᠭᠡᠷ ᠢᠶᠠᠷ ᠳᠦᠭᠦᠷᠡᠩ
ᠠᠷᠠᠳ ᠤᠯᠠᠨ ᠵᠢᠷᠭᠠᠯ ᠢᠶᠠᠷ ᠳᠦᠭᠦᠷᠴᠦ
ᠠᠰᠢᠳᠠ ᠶᠢᠨ ᠴᠡᠩᠭᠡᠯ ᠪᠦᠷᠢᠳᠦᠭᠰᠡᠨ ᠤ ᠲᠤᠯᠠ᠂᠂᠂᠂᠂
ᠲᠠᠯᠠ ᠨᠤᠲᠤᠭ ᠴᠡᠴᠡᠭ ᠢᠶᠠᠷ ᠳᠦᠭᠦᠷᠴᠦ
ᠲᠠᠩᠰᠤᠭ ᠢᠳᠡᠭᠡ ᠲᠠᠪᠰᠢ ᠪᠠᠷ ᠳᠦᠭᠦᠷᠴᠦ
ᠲᠠᠷᠠᠭ ᠠᠢᠷᠠᠭ ᠬᠤᠪᠢᠩ ᠢᠶᠠᠷ ᠪᠢᠯᠬᠠᠵᠤ
ᠲᠠᠨᠢᠯ ᠨᠦᠬᠦᠳ ᠬᠤᠷᠠᠯᠳᠤᠨ ᠢᠷᠡᠵᠦ
ᠲᠠᠪᠠ ᠲᠠᠢ ᠴᠡᠩᠭᠡᠯ ᠪᠦᠷᠢᠳᠦᠭᠰᠡᠨ ᠤ ᠲᠤᠯᠠ᠂᠂᠂᠂᠂᠂
(ᠭᠡᠵᠦ
ᠳᠠᠭᠤᠯᠠᠭᠰᠠᠨ ᠤ ᠳᠠᠷᠠᠭᠠ ᠪᠠᠷ ᠨᠡᠢᠲᠡ ᠪᠠᠷ ᠲᠦᠷᠢᠯᠭᠡ ᠪᠤᠯᠵᠤ ᠳᠠᠭᠤᠯᠠᠨᠠ）
(ᠾᠤᠷ） ᠠᠩᠴᠢᠨ ᠠᠷᠠᠳ ᠢ ᠲᠤᠯᠤᠭᠠᠢᠯᠠᠭᠰᠠᠨ
ᠠᠯᠳᠠᠷᠲᠤ ᠡᠷᠡ ᠶᠦᠨᠳᠡᠩ ᠮᠢᠨᠢ᠂
ᠠᠭᠤᠤ ᠵᠤᠷᠢᠭ ᠢ ᠬᠦᠭᠵᠢᠭᠡᠭᠰᠡᠨ
ᠰᠢᠯᠢᠳᠡᠭ ᠠᠩᠴᠢᠨ ᠶᠦᠨᠳᠡᠩ ᠮᠢᠨᠢ᠂
ᠪᠠᠭᠠᠲᠤᠷ ᠴᠢᠨᠦ ᠬᠠᠮᠲᠤ ᠪᠠᠷ
ᠪᠠᠭ᠋ᠠᠨ ᠨᠠᠭᠠᠳᠴᠤ ᠴᠡᠩᠭᠡᠬᠦ ᠶᠢ
ᠪᠠᠰᠠ ᠪᠢᠳᠡ ᠬᠦᠰᠡᠬᠦ ᠲᠤᠯᠠ
ᠪᠠᠶᠠᠷᠯᠠᠨ ᠤᠭᠲᠤᠵᠤ ᠬᠦᠯᠢᠶᠡᠨᠡ᠃
ᠳᠠᠭᠤᠴᠢᠨ᠄
ᠰᠠᠷᠠᠭᠤᠯ ᠲᠠᠯᠠ ᠶᠢᠨ ᠴᠢᠯᠦᠭᠡᠲᠦ ᠠᠷᠠᠳ ᠤᠳ
ᠰᠠᠢᠬᠠᠨ ᠬᠤᠷᠢᠮ ᠢ ᠦᠢᠯᠡᠳᠬᠦ ᠪᠠᠷ ᠴᠤᠭᠯᠠᠵᠤ
ᠰᠠᠷᠬᠤᠳ ᠤᠨ ᠬᠤᠨᠳᠠᠭᠠ ᠶᠢ ᠡᠷᠭᠦᠨ ᠳᠡᠪᠰᠢᠭᠦᠯᠵᠦ
ᠰᠠᠨᠠᠭᠰᠠᠨ ᠦᠭᠡ ᠪᠠᠨ ᠬᠠᠷᠠᠮ ᠦᠭᠡᠢ ᠶᠠᠷᠢᠬᠤ
ᠰᠠᠢᠬᠠᠨ ᠵᠠᠪᠰᠢᠶᠠᠨ ᠤᠯᠳᠠᠭᠰᠠᠨ ᠤ ᠲᠤᠯᠠ᠂᠂᠂᠂᠂᠂
ᠲᠠᠯᠠ ᠨᠤᠲᠤᠭ ᠴᠡᠴᠡᠭ ᠢᠶᠠᠷ ᠪᠦᠷᠬᠦᠵᠦ
ᠲᠠᠩᠰᠤᠭ ᠢᠳᠡᠭᠡ ᠳᠡᠪᠰᠢ ᠪᠠᠷ ᠳᠦᠭᠦᠷᠴᠦ
ᠲᠠᠷᠠᠭ ᠠᠢᠷᠠᠭ ᠬᠤᠪᠢᠩ ᠢᠶᠠᠷ ᠪᠢᠯᠬᠠᠵᠤ
ᠲᠠᠨᠢᠯ ᠨᠦᠬᠦᠳ ᠬᠤᠷᠠᠯᠳᠤᠨ ᠢᠷᠡᠵᠦ
ᠲᠠᠪᠠ ᠲᠠᠢ ᠴᠡᠩᠭᠡᠯ ᠪᠦᠷᠢᠳᠬᠦ ᠶᠢᠨ ᠲᠤᠯᠠ᠂᠂᠂᠂᠂᠂
(ᠾᠤᠷ） ᠠᠮᠠᠷᠠᠭ ᠨᠦᠬᠦᠳ ᠪᠦᠭᠦᠳᠡᠭᠡᠷ ᠢᠶᠠᠨ ᠵᠡᠷᠭᠡᠴᠡᠵᠦ
ᠠᠯᠲᠠᠨ ᠰᠢᠷᠡᠭᠡ ᠶᠢ ᠲᠤᠭᠤᠷᠢᠨ ᠰᠠᠭᠤᠭᠠᠳ
ᠠᠮᠲᠠᠲᠤ ᠢᠳᠡᠭᠡ ᠪᠠᠨ ᠠᠮᠰᠠᠵᠤ ᠢᠳᠡᠭᠡᠳ
ᠠᠭᠤᠤ ᠨᠠᠢᠷ ᠢᠶᠠᠨ ᠡᠭᠦᠰᠭᠡᠨ ᠵᠢᠷᠭᠠᠶᠠ᠃
ᠬᠤᠰᠢᠭᠤᠴᠢ ᠪᠠᠭᠠᠲᠤᠷ ᠤᠳ ᠮᠤᠷᠢᠯᠠᠨ ᠢᠷᠡᠵᠦ
ᠭᠤᠸᠠ ᠬᠡᠦᠬᠡᠨ ᠨᠦᠭᠦᠳ ᠤᠭᠲᠤᠨ ᠠᠭᠤᠯᠵᠠᠵᠤ
ᠬᠤᠪᠢ ᠲᠠᠢ ᠴᠡᠩᠭᠡᠯ ᠪᠦᠷᠢᠳᠬᠦ ᠶᠢᠨ ᠲᠤᠯᠠᠳᠠ
ᠬᠤᠷᠠᠭᠰᠠᠨ ᠪᠦᠭᠦᠳᠡ ᠲᠡᠭᠦᠰ ᠵᠢᠷᠭᠠᠯᠲᠠᠢ᠃
(ᠳᠠᠷᠠᠭᠠ ᠨᠢ
ᠡᠷᠡᠭᠲᠡᠢᠴᠦᠳ ᠪᠠ ᠡᠮᠡᠭᠲᠡᠢᠴᠦᠳ ᠲᠠᠨᠼ ᠬᠢᠨᠡ᠃ ᠨᠠᠰᠤᠲᠠᠢ ᠠᠷᠠᠳ ᠨᠠᠩᠰᠠᠯᠮᠠ ᠳᠤ ᠴᠡᠴᠡᠭ ᠪᠡᠯᠡᠭᠯᠡᠨ
ᠪᠦᠬᠦ ᠴᠤᠭᠯᠠᠷᠠᠭᠰᠠᠳ ᠲᠤ ᠶᠤᠰᠤᠯᠠᠨ ᠶᠠᠪᠤᠨᠠ᠃ ᠬᠡᠳᠦᠨ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠦᠮᠦᠰ ᠦᠯᠡᠳᠡᠵᠦ ᠨᠢᠭᠡᠨ ᠲᠠᠯᠠ ᠠᠴᠠ
ᠨᠢᠭᠡ ᠬᠡᠦᠬᠡᠨ ᠬᠡᠦᠬᠡᠳ ᠪᠦᠦᠪᠡᠢᠯᠡᠭᠰᠡᠭᠡᠷ ᠭᠠᠷᠴᠦ
ᠢᠷᠡᠨᠡ）
ᠨᠢᠭᠡ ᠬᠡᠦᠬᠡᠨ᠄
ᠪᠦᠬᠡᠬᠡᠨ ᠭᠡᠭᠡ ᠲᠠᠰᠤᠷᠠᠵᠤ
ᠪᠦᠷᠦᠩᠭᠦᠢ ᠦᠳᠡᠰᠢ ᠪᠤᠯᠵᠤ
ᠪᠦᠭᠦᠳᠡ ᠠᠮᠢᠲᠠᠨ ᠠᠮᠠᠷᠠᠵᠤ
ᠪᠦᠷᠢᠨ ᠲᠡᠭᠦᠰ ᠤᠨᠲᠠᠵᠠᠢ᠂
ᠪᠦᠯᠲᠡᠭᠡᠷ ᠬᠦᠦ ᠮᠢᠨᠢ ᠤᠨᠲᠠ ᠳ᠋ᠡ᠃
ᠪᠦᠦᠪᠡᠢ᠂ ᠪᠦᠦᠪᠡᠢ᠂ ᠪᠦᠦᠪᠡᠢ᠃
ᠬᠠᠶᠠᠭᠠᠨ ᠳᠤ ᠪᠠᠢᠭᠠ ᠬᠠᠰᠢᠶᠠᠨ ᠳᠤ
ᠬᠠᠯᠵᠠᠨ ᠬᠤᠷᠠᠭᠠ ᠬᠡᠪᠲᠡᠵᠦ ᠪᠠᠢᠨᠠ᠂
ᠬᠠᠷᠠ ᠰᠠᠢᠬᠠᠨ ᠨᠢᠳᠦ ᠪᠠᠨ ᠬᠠᠮᠬᠢᠵᠦ ᠠᠨᠢᠭᠠᠳ ᠤᠨᠲᠠᠵᠠᠢ᠂
ᠬᠠᠢᠷᠠᠲᠠᠢ ᠬᠦᠦ ᠮᠢᠨᠢ ᠤᠨᠲᠠ ᠳ᠋ᠠ᠃
ᠪᠦᠦᠪᠡᠢ᠂ ᠪᠦᠦᠪᠡᠢ᠂ ᠪᠦᠦᠪᠡᠢ᠃
ᠢᠷᠲᠦ ᠰᠡᠯᠡᠮᠡ ᠪᠠᠨ ᠳᠠᠯᠠᠢᠭᠴᠢ
ᠢᠳᠡᠮᠡᠬᠡᠢ ᠳᠠᠢᠰᠤᠨ ᠢ ᠳᠠᠷᠤᠵᠤ
ᠶᠡᠭᠡ ᠬᠡᠷᠡᠭ ᠢ ᠪᠦᠲᠦᠭᠡᠭᠴᠢ
ᠢᠷᠡᠭᠡᠳᠦᠢ ᠶᠢᠨ ᠪᠠᠭᠠᠲᠤᠷ ᠮᠢᠨᠢ
ᠡᠵᠢ ᠶᠢᠨ ᠢᠶᠠᠨ ᠭᠠᠷ ᠳᠡᠭᠡᠷᠡ ᠤᠨᠲᠠ ᠳ᠋ᠠ᠃
ᠪᠦᠦᠪᠡᠢ᠂ ᠪᠦᠦᠪᠡᠢ᠂ ᠪᠦᠦᠪᠡᠢ᠃
(ᠬᠡᠦᠬᠡᠨ ᠢ
ᠰᠤᠨᠢᠷᠬᠠᠨ ᠪᠠᠢᠭᠰᠠᠨ ᠠᠷᠠᠳ ᠤᠳ ᠲᠠᠯᠠ ᠲᠠᠯᠠ ᠲᠡᠰᠢ ᠪᠠᠨ ᠶᠠᠪᠤᠨᠠ᠃ ᠶᠦᠨᠳᠡᠩ ᠨᠠᠩᠰᠠᠯᠮᠠ ᠬᠤᠶᠠᠷ
ᠳᠠᠭᠤᠯᠠᠨᠠ） ᠶᠦᠨᠳᠡᠩ᠄
ᠬᠠᠳᠠ ᠲᠠᠢ ᠦᠨᠳᠦᠷ ᠠᠭᠤᠯᠠ ᠨᠢ
ᠬᠠᠩᠭᠠᠢ ᠳᠡᠯᠡᠬᠡᠢ ᠶᠢᠨ ᠦᠵᠡᠰᠬᠦᠯᠡᠩ᠃
ᠬᠠᠵᠠᠭᠤ ᠳᠤ ᠪᠠᠢᠭᠠ ᠬᠦᠦ ᠮᠢᠨᠢ
ᠬᠠᠮᠤᠭ ᠤᠯᠠᠨ ᠤ ᠪᠠᠶᠠᠰᠬᠤᠯᠠᠩ᠃
ᠬᠠᠢᠯᠠᠰᠤ ᠮᠤᠳᠤᠨ ᠤ ᠮᠦᠴᠢᠷ ᠳᠡᠭᠡᠷᠡ
ᠬᠠᠷᠴᠠᠭᠠᠢ ᠰᠢᠪᠠᠭᠤ ᠵᠢᠷᠭᠢᠵᠦ ᠪᠠᠢᠨᠠ᠃
ᠬᠠᠷᠢᠯᠴᠠᠨ ᠬᠠᠨᠢᠯᠠᠭᠰᠠᠨ ᠪᠢᠳᠡ ᠬᠤᠶᠠᠷ
ᠬᠠᠮᠲᠤᠷᠠᠬᠤ ᠶᠢᠨ ᠦᠭᠡ ᠶᠢ ᠶᠠᠷᠢᠬᠤ ᠦᠦ ᠳ᠋ᠠ᠃
ᠨᠠᠩᠰᠠᠯᠮᠠ᠄
ᠮᠤᠳᠤ ᠲᠠᠢ ᠰᠠᠢᠬᠠᠨ ᠠᠭᠤᠯᠠ ᠨᠢ
ᠮᠤᠩᠭᠤᠯ ᠭᠠᠵᠠᠷ ᠤᠨ ᠴᠢᠮᠡᠭ᠃
ᠢᠷᠦᠭᠡᠯ ᠲᠠᠢ ᠤᠴᠠᠷᠠᠭᠰᠠᠨ ᠬᠦᠦ ᠮᠢᠨᠢ
ᠶᠤᠰᠤ ᠲᠠᠢ ᠮᠢᠨᠦ ᠠᠮᠠᠷᠠᠭ ᠡ᠃
ᠵᠦᠭᠡᠯᠡᠨ ᠰᠠᠯᠬᠢ ᠨᠠᠢᠭᠤᠬᠤ ᠳᠤ
ᠴᠡᠴᠡᠭ ᠨᠠᠪᠴᠢ ᠨᠢ ᠭᠠᠩᠬᠤᠨᠠ᠃
ᠴᠡᠭᠡᠵᠢᠨ ᠳᠠᠬᠢ ᠦᠭᠡ ᠪᠠᠨ ᠬᠡᠯᠡᠬᠦ ᠳᠤ
ᠴᠢᠬᠢᠨ ᠳᠤ ᠮᠢᠨᠢ ᠠᠶᠠᠲᠠᠢᠬᠠᠨ ᠰᠤᠨᠤᠰᠲᠠᠨᠠ᠃
ᠶᠦᠨᠳᠡᠩ᠄
ᠰᠡᠳᠬᠢᠯ ᠤᠨ ᠠᠮᠠᠷᠠᠭ ᠭᠡᠳᠡᠭ ᠴᠢᠨᠢ
ᠰᠢᠵᠢᠷ ᠠᠯᠲᠠ ᠠᠴᠠ ᠦᠨᠡ ᠲᠠᠢ᠃
ᠰᠢᠯᠢᠵᠦ ᠲᠡᠭᠦᠨ ᠢ ᠤᠯᠬᠤ ᠳᠤ
ᠰᠢᠢᠳᠪᠦᠷᠢ ᠵᠤᠷᠢᠭ ᠬᠡᠷᠡᠭ ᠲᠠᠢ᠃
(ᠬᠤᠶᠠᠭᠤᠯᠠ ᠳᠠᠭᠤᠯᠠᠨᠠ）
(ᠳᠦᠨ᠋ᠧᠲ） ᠢᠵᠢᠯᠢ ᠬᠤᠶᠠᠷ ᠰᠢᠪᠠᠭᠤ ᠰᠢᠭ᠋
ᠢᠵᠢᠯᠢᠲᠦᠭᠡᠳ ᠬᠤᠶᠠᠭᠤᠯᠠ ᠰᠠᠭᠤᠶᠠ᠃
ᠢᠩᠭᠢᠵᠦ ᠨᠡᠢᠯᠡᠬᠦ ᠠᠴᠠ
ᠢᠯᠡᠭᠦᠦ ᠵᠢᠷᠭᠠᠯ ᠬᠠᠮᠢᠭᠠ ᠠᠴᠠ ᠪᠠᠢᠬᠤ ᠪᠤᠢ︖
ᠶᠦᠨᠳᠡᠩ :
ᠠᠪᠤ ᠡᠵᠢ ᠳᠤ ᠴᠢᠨᠢ ᠬᠡᠯᠡᠬᠦ ᠦᠦ ᠳ᠋ᠠ
ᠠᠬᠠ ᠳᠡᠭᠦᠦ ᠴᠢᠨᠢ ᠶᠠᠭᠤ ᠭᠡᠬᠦ ᠪᠤᠯ︖
ᠠᠶᠠᠨ ᠵᠢᠩ ᠳᠤ ᠶᠠᠪᠤᠵᠤ
ᠠᠪᠬᠤ ᠶᠠᠭᠤᠮᠠ ᠪᠠᠨ ᠲᠦᠬᠦᠭᠡᠷᠬᠦ ᠦᠦ ᠳ᠋ᠠ᠃
ᠡᠴᠢᠭᠡ ᠡᠬᠡ ᠳᠡᠭᠡᠨ ᠬᠡᠯᠡᠭᠡᠷᠡᠢ ᠦᠮᠴᠢ ᠬᠦᠷᠦᠩᠭᠡ ᠠᠪᠤᠶᠠ᠃
ᠬᠤᠲᠠ ᠭᠠᠵᠠᠷ ᠤᠷᠤᠭᠠᠳ ᠬᠤᠷᠢᠮ ᠤᠨ ᠶᠠᠭᠤᠮᠠ ᠪᠠᠨ
ᠪᠡᠯᠡᠳᠬᠡᠶᠡ᠃
ᠨᠠᠩᠰᠠᠯᠮᠠ᠄
ᠲᠦᠷᠦᠯ ᠰᠠᠲᠤᠨ ᠴᠤ᠌ ᠶᠠᠭᠠᠬᠢᠬᠤ ᠪᠤᠢ ᠳ᠋ᠠ
ᠮᠢᠨᠦ ᠵᠢᠷᠭᠠᠯ ᠢ ᠬᠤᠷᠢᠬᠤ ᠦᠭᠡᠢ᠃
ᠲᠦᠪᠯᠡᠭᠰᠡᠨ ᠰᠡᠳᠬᠢᠯ ᠴᠢᠮᠠ ᠳᠡᠭᠡᠷᠡ ᠰᠢᠦ
ᠲᠡᠳᠡ ᠠᠶᠠᠨᠳᠠᠭᠠᠨ ᠵᠦᠪᠰᠢᠶᠡᠷᠡᠨᠡ᠃
ᠠᠮᠠᠷᠠᠭ ᠰᠡᠳᠬᠢᠯ ᠭᠡᠳᠡᠭ ᠴᠢᠨᠢ
ᠠᠷᠢᠯᠭᠠᠵᠤ ᠪᠤᠯᠳᠠᠭ ᠦᠭᠡᠢ ᠶᠤᠮ ᠪᠠᠢᠨᠠ᠃
ᠠᠶᠠᠨ ᠳᠠᠭᠠᠨ ᠲᠦᠷᠭᠡᠨ ᠶᠠᠪᠤᠬᠤ ᠶᠢ
ᠡᠳᠦᠷ ᠰᠦᠨᠢ ᠦᠭᠡᠢ ᠬᠦᠯᠢᠶᠡᠶᠡ᠃
ᠶᠦᠨᠳᠡᠩ᠄
ᠬᠠᠢᠷᠠᠲᠠᠢ ᠰᠡᠳᠬᠢᠯ ᠨᠡᠢᠯᠡᠭᠰᠡᠨ
ᠬᠤᠢᠨᠠ ᠬᠠᠷᠢᠭᠠᠳ ᠪᠤᠰᠢᠭᠤᠬᠠᠨ ᠢᠷᠡ᠃
ᠬᠠᠮᠤᠭ ᠶᠠᠷᠢᠶᠠ ᠲᠤᠬᠢᠷᠠᠭᠰᠠᠨ
ᠬᠤᠢᠨᠠ ᠭᠠᠷᠬᠤ ᠠᠴᠠ ᠡᠮᠦᠨᠡ ᠠᠭᠤᠯᠵᠠᠶᠠ᠃
(ᠶᠦᠨᠳᠡᠩ ᠨᠠᠩᠰᠠᠯᠮᠠ ᠬᠤᠶᠠᠷ ᠳᠠᠭᠤᠯᠠᠬᠤ ᠨᠢ）
(ᠳᠦᠨ᠋ᠧᠲ） ᠢᠵᠢᠯᠢ ᠬᠤᠶᠠᠷ ᠰᠢᠪᠠᠭᠤ ᠰᠢᠭ᠋
ᠢᠵᠢᠯᠢᠲᠦᠭᠡᠳ ᠬᠤᠶᠠᠭᠤᠯᠠ ᠰᠠᠭᠤᠶᠠ᠃
ᠢᠩᠭᠢᠵᠦ ᠨᠡᠢᠯᠡᠬᠦ ᠠᠴᠠ ᠢᠯᠡᠭᠦᠦ
ᠵᠢᠷᠭᠠᠯ ᠬᠠᠮᠢᠭᠠ ᠠᠴᠠ ᠪᠠᠢᠬᠤ ᠪᠤᠢ᠃
(ᠶᠦᠨᠳᠡᠩ ᠨᠠᠩᠰᠠᠯᠮᠠ ᠬᠤᠶᠠᠷ ᠶᠠᠪᠤᠵᠤ ᠳᠠᠯᠳᠠ ᠤᠷᠤᠨᠠ᠃ ᠦᠷ
ᠴᠠᠢᠵᠤ ᠲᠠᠯᠠ ᠲᠠᠯᠠ ᠠᠴᠠ ᠬᠦᠮᠦᠰ ᠴᠤᠪᠤᠷᠠᠨ ᠭᠠᠷᠴᠤ ᠢᠷᠡᠨᠡ᠃）
ᠨᠢᠭᠡ ᠬᠦᠮᠦᠨ᠄
ᠠᠯᠲᠠᠨ ᠦᠩᠭᠡᠲᠦ ᠨᠠᠷᠠᠨ
ᠠᠮᠢᠳᠤᠷᠠᠯ ᠵᠢᠷᠭᠠᠯ ᠢ ᠲᠤᠩᠬᠠᠭᠯᠠᠨ
ᠠᠯᠤᠰ ᠤᠨ ᠠᠭᠤᠯᠠ ᠶᠢᠨ ᠬᠦᠲᠦᠯ ᠢᠶᠠᠷ
ᠠᠷᠠᠢᠬᠠᠨ ᠴᠤᠬᠤᠢᠵᠤ ᠢᠷᠡᠯᠡ᠃
ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠃
(ᠾᠤᠷ） ᠪᠠᠯᠠᠷ ᠨᠤᠶᠠᠨ ᠬᠠᠷᠠᠩᠭᠤᠢ
ᠪᠠᠢᠬᠤ ᠭᠠᠵᠠᠷ ᠦᠭᠡᠢ ᠪᠤᠯᠵᠤ
ᠪᠠᠷᠤᠭ ᠤᠬᠠᠭᠠᠨ ᠦᠭᠡᠢ ᠬᠦᠳᠡᠯᠵᠦ
ᠪᠠᠴᠢᠮᠳᠠᠨ ᠵᠢᠭᠤᠳᠠᠵᠤ ᠤᠳᠤᠯᠠ᠃
ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠃
ᠦᠨᠳᠦᠷ ᠠᠭᠤᠯᠠ ᠶᠢᠨ ᠠᠷᠤ ᠳᠤ
ᠡᠮᠦᠰᠦᠭᠰᠡᠨ ᠳᠡᠪᠡᠯ ᠢᠶᠠᠨ ᠬᠠᠶᠠᠭᠠᠳ
ᠦᠯᠦᠨ ᠴᠢᠨ᠋ᠸᠠ ᠶᠢᠨ ᠨᠦᠬᠡᠨ ᠳᠤ
ᠦᠷᠦᠭᠡᠰᠦᠨ ᠭᠤᠲᠤᠯ ᠢᠶᠠᠨ ᠮᠠᠷᠲᠠᠵᠠᠢ᠃
ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠃
ᠬᠠᠷᠠᠩᠭᠤᠢ ᠡᠵᠡᠨ ᠪᠠᠯᠠᠷ
ᠬᠠᠢᠬᠤ ᠮᠦᠷ ᠦᠭᠡᠢ ᠠᠷᠢᠯᠤᠯᠠ᠃
ᠬᠠᠢᠷᠠ ᠦᠷᠦᠰᠢᠶᠡᠯᠲᠦ ᠨᠠᠷᠠᠨ
ᠬᠠᠮᠤᠭ ᠶᠢᠷᠲᠢᠨᠴᠦ ᠶᠢ ᠭᠡᠢᠭᠦᠯᠦᠯᠡ᠃
ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠃
ᠠᠯᠲᠠᠨ ᠭᠡᠷᠡᠯᠲᠦ ᠨᠠᠷᠠ ᠨᠢ
ᠠᠮᠢᠲᠠᠨ ᠪᠦᠬᠦᠨ ᠢ ᠳᠡᠳᠬᠦᠭᠰᠡᠭᠡᠷ
ᠠᠯᠢᠪᠠ ᠵᠢᠷᠭᠠᠯ ᠢ ᠰᠤᠶᠤᠷᠬᠠᠭᠰᠠᠭᠠᠷ
ᠠᠰᠢᠳᠠ ᠮᠦᠩᠬᠡ ᠮᠠᠨᠳᠤᠲᠤᠭᠠᠢ᠃
ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠂ ᠨᠠᠷᠠᠨ ᠤ᠃
(ᠨᠠᠷᠠ ᠪᠦᠷ ᠭᠠᠷᠴᠤ᠂ ᠠᠩᠴᠢᠳ ᠠᠩ ᠳᠠᠭᠠᠨ ᠮᠤᠷᠳᠠᠬᠤ ᠪᠠᠷ
ᠪᠡᠯᠡᠳᠬᠡᠨᠡ᠃ ᠡᠮᠡᠭᠲᠡᠢᠴᠦᠳ ᠡᠬᠢᠯᠡᠵᠦ ᠳᠠᠭᠤᠯᠠᠨᠠ）
(ᠾᠤᠷ） ᠠᠯᠲᠠᠨ ᠨᠠᠷᠠᠨ ᠤᠷᠭᠤᠯᠠ᠂
ᠠᠩᠴᠢᠨ ᠤᠯᠠᠨ ᠨᠦᠬᠦᠳ ᠮᠢᠨᠢ
ᠠᠷᠤ ᠶᠢᠨ ᠠᠭᠤᠯᠠᠨ ᠳᠤ ᠭᠠᠷᠴᠤ
ᠠᠷᠢᠶᠠᠲᠠᠨ ᠭᠦᠷᠦᠭᠡᠰᠦ ᠶᠢ ᠠᠩᠨᠠᠶᠠ᠃
ᠬᠤᠷᠴᠠ ᠵᠡᠪᠰᠡᠭ ᠢᠶᠠᠨ ᠪᠠᠷᠢᠵᠤ
ᠬᠤᠷᠳᠤᠨ ᠮᠤᠷᠢᠨ ᠳᠠᠭᠠᠨ ᠮᠤᠷᠳᠠᠭᠠᠳ
ᠬᠠᠩᠭᠠᠢ ᠶᠢᠨ ᠠᠭᠤᠯᠠᠨ ᠳᠤ ᠭᠠᠷᠴᠤ
ᠬᠠᠨᠳᠠᠭᠠᠢ ᠪᠤᠭᠤ ᠶᠢ ᠨᠠᠮᠨᠠᠶᠠ᠃
(ᠡᠮᠡᠭᠲᠡᠢᠴᠦᠳ ᠳᠠᠭᠤᠯᠠᠨᠠ）
(ᠾᠤᠷ） ᠠᠷᠠᠳ ᠤᠨ ᠰᠢᠯᠢᠳᠡᠭ ᠬᠦᠪᠡᠭᠦᠨ
ᠠᠩᠴᠢᠨ ᠡᠷᠬᠢᠮ ᠡᠷᠡᠴᠦᠳ ᠮᠢᠨᠢ
ᠠᠩ ᠤᠨ ᠦᠰᠦᠯᠢᠭ ᠢ ᠤᠯᠵᠤ
ᠠᠷᠢᠶᠠᠲᠠᠨ ᠤ ᠰᠤᠷᠯᠢᠭ ᠢ ᠠᠪᠠᠯᠠᠭᠠᠷᠠᠢ᠃
ᠭᠠᠨᠵᠤᠭᠠ ᠳᠦᠭᠦᠷᠡᠩ ᠶᠠᠭᠤᠮᠠ ᠲᠠᠢ
ᠭᠠᠷ ᠳᠦᠭᠦᠷᠡᠩ ᠠᠰᠢᠭ ᠲᠠᠢ
ᠤᠯᠵᠠ ᠲᠠᠢ ᠰᠠᠢᠨ ᠶᠠᠪᠤᠬᠤ ᠶᠢ ᠴᠢᠨᠢ
ᠤᠯᠠᠨ ᠪᠦᠭᠦᠳᠡᠭᠡᠷ ᠢᠶᠠᠨ ᠬᠦᠰᠡᠨᠡ᠃
(ᠡᠷᠡᠭᠲᠡᠢ ᠡᠮᠡᠭᠲᠡᠢᠴᠦᠳ ᠪᠦᠭᠦᠳᠡᠭᠡᠷ ᠢᠶᠠᠨ ᠳᠠᠭᠤᠯᠠᠨᠠ）
ᠠᠯᠲᠠᠨ ᠨᠠᠷᠠᠨ ᠤᠷᠭᠤᠯᠠ᠂
ᠠᠩᠴᠢᠨ ᠤᠯᠠᠨ ᠨᠦᠬᠦᠳ ᠮᠢᠨᠢ
ᠠᠷᠤ ᠶᠢᠨ ᠠᠭᠤᠯᠠᠨ ᠳᠤ ᠭᠠᠷᠴᠤ
ᠠᠷᠢᠶᠠᠲᠠᠨ ᠭᠦᠷᠦᠭᠡᠰᠦ ᠶᠢ ᠨᠠᠮᠨᠠᠶᠠ᠃
ᠬᠤᠷᠴᠠ ᠵᠡᠪᠰᠡᠭ ᠢᠶᠠᠨ ᠪᠠᠷᠢᠵᠦ
ᠬᠤᠷᠳᠤᠨ ᠮᠤᠷᠢᠨ ᠳᠠᠭᠠᠨ ᠮᠤᠷᠳᠠᠭᠠᠳ
ᠬᠠᠩᠭᠠᠢ ᠶᠢᠨ ᠠᠭᠤᠯᠠᠨ ᠳᠤ ᠭᠠᠷᠴᠤ᠂
ᠬᠠᠨᠳᠠᠭᠠᠢ ᠪᠤᠭᠤ ᠶᠢ ᠨᠠᠮᠨᠠᠶᠠ᠃
(ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠦᠮᠦᠰ ᠶᠠᠪᠤᠨᠠ᠃ ᠶᠦᠨᠳᠡᠩ ᠨᠠᠩᠰᠠᠯᠮᠠ
ᠬᠤᠶᠠᠷ ᠦᠯᠡᠳᠡᠨᠡ）
ᠨᠠᠩᠰᠠᠯᠮᠠ᠄
ᠠᠶᠠᠨ ᠳᠠᠭᠠᠨ ᠮᠡᠨᠳᠦ ᠶᠠᠪᠤᠭᠠᠷᠠᠢ
ᠠᠯᠤᠰ ᠠᠴᠠ ᠲᠦᠷᠭᠡᠨ ᠢᠷᠡᠭᠡᠷᠡᠢ᠃
ᠠᠯᠠᠭᠯᠠᠵᠤ ᠤᠶᠤᠭᠰᠠᠨ ᠠᠯᠴᠢᠭᠤᠷ ᠲᠤ ᠮᠢᠨᠢ
ᠠᠶᠠᠭᠠ ᠪᠠᠨ ᠬᠢᠭᠡᠳ ᠵᠡᠭᠦᠭᠡᠷᠡᠢ᠃
ᠬᠤᠢᠰᠢ ᠪᠠᠨ ᠵᠤᠪᠠᠭ᠋ᠤ ᠬᠡᠷᠡᠭ ᠦᠭᠡᠢ
ᠬᠤᠷᠳᠤᠨ ᠢᠷᠡᠬᠦ ᠬᠡᠷᠡᠭᠲᠡᠢ᠃
ᠬᠦᠷᠴᠦ ᠢᠷᠡᠭᠰᠡᠨ ᠤ ᠴᠢᠨᠢ ᠳᠠᠷᠠᠭᠠ ᠪᠠᠷ
ᠬᠤᠶᠠᠭᠤᠯᠠ ᠪᠠᠨ ᠨᠡᠢᠯᠡᠭᠡᠳ ᠰᠠᠭᠤᠶᠠ᠃
ᠶᠦᠨᠳᠡᠩ᠄
ᠤᠷᠠᠯᠠᠭᠠᠳ ᠦᠭᠭᠦᠭᠰᠡᠨ ᠠᠯᠴᠢᠭᠤᠷ ᠲᠤ ᠴᠢᠨᠢ
ᠠᠶᠠᠭᠠ ᠪᠠᠨ ᠬᠢᠭᠡᠳ ᠵᠡᠭᠦᠶᠡ᠃
ᠦᠵᠡᠵᠦ ᠬᠠᠷᠠᠬᠤ ᠪᠦᠷᠢ ᠳᠡᠭᠡᠨ
ᠡᠩᠬᠦᠷᠡᠢ ᠴᠢᠮᠠᠶ᠋ᠢ ᠪᠠᠨ ᠳᠤᠷᠠᠰᠤᠨᠠ᠃
ᠠᠮᠠᠷᠠᠭ ᠭᠡᠳᠡᠭ ᠭᠡᠴᠡᠭᠦᠦ ᠶᠤᠮ
ᠠᠯᠴᠢᠭᠤᠷ ᠳᠦᠭᠦᠷᠡᠩ ᠨᠢᠯᠪᠤᠰᠤ ᠲᠠᠢ᠂
ᠠᠯᠤᠰ ᠵᠠᠮ ᠳᠠᠭᠠᠨ ᠵᠦᠭᠯᠡᠶᠡ ᠳ᠋ᠡ᠂
ᠠᠯᠢ ᠪᠤᠢ ᠬᠦᠦ ᠪᠠᠨ ᠦᠨᠦᠰᠦᠶᠡ᠃
(ᠨᠠᠩᠰᠠᠯᠮᠠ ᠶᠢ ᠦᠨᠦᠰᠴᠦ ᠶᠠᠪᠤᠨᠠ᠃ ᠨᠠᠩᠰᠠᠯᠮᠠ ᠬᠤᠢᠨᠠ ᠠᠴᠠ ᠨᠢ
ᠰᠢᠷᠲᠡᠨ ᠬᠠᠷᠠᠵᠤ ᠦᠯᠡᠳᠡᠨᠡ）
ᠨᠠᠩᠰᠠᠯᠮᠠ᠄
ᠬᠦᠷᠴᠦ ᠢᠷᠡᠭᠰᠡᠨ ᠤ ᠴᠢᠨᠢ ᠳᠠᠷᠠᠭᠠ ᠳᠤ
ᠬᠤᠶᠠᠭᠤᠯᠠ ᠪᠠᠨ ᠨᠡᠢᠯᠡᠭᠡᠳ ᠰᠠᠭᠤᠶᠠ᠃
ᠪᠠᠯᠭᠠᠨ᠄
ᠦᠨᠡᠭᠡ ᠴᠢᠨ᠋ᠸᠠ ᠤᠯᠠᠨ ᠰᠠᠨ
ᠡᠳᠦᠷ ᠪᠦᠷᠢ ᠠᠩ ᠲᠠᠢ ᠰᠠᠨ
ᠦᠷᠯᠦᠭᠡ ᠡᠷᠲᠡ ᠭᠠᠷᠤᠭᠰᠠᠨ ᠶᠤᠮᠰᠠᠨ
ᠦᠨᠦᠳᠦᠷ ᠶᠠᠭᠠᠬᠢᠭᠰᠠᠨ ᠡᠳᠦᠷ ᠪᠤᠢ᠃
ᠭᠦᠷᠦᠭᠡᠰᠦ ᠮᠦᠷᠦᠭᠡᠰᠦ ᠴᠤ᠌
ᠦᠵᠡᠭᠳᠡᠬᠦ ᠦᠭᠡᠢ
ᠬᠤᠯᠤᠭᠠᠨᠠ ᠵᠤᠷᠠᠮᠠ ᠴᠤ᠌
ᠲᠠᠭᠠᠷᠠᠯᠳᠤᠬᠤ ᠦᠭᠡᠢ᠃
ᠬᠦᠯ ᠤᠨ ᠭᠠᠷᠤᠵᠠ ᠪᠤᠯᠤᠭᠰᠠᠨ
ᠬᠠᠮᠢᠭᠠᠰᠢ ᠪᠠᠨ ᠤᠢᠳᠬᠠᠷ ᠲᠠᠢ ᠡᠳᠦᠷ ᠪᠤᠢ᠃
ᠪᠦᠬᠦᠯᠢ ᠡᠳᠦᠷ ᠶᠠᠪᠤᠭᠠᠳ
ᠫᠤᠤ ᠪᠠᠨ ᠳᠤᠤᠭᠠᠷᠭᠠᠬᠤ ᠦᠭᠡᠢ ᠪᠤᠴᠠᠪᠠᠯ
ᠪᠤᠯᠠᠢ ᠢᠷᠸᠠ ᠪᠠᠢᠭᠠ ᠳ᠋ᠠ
ᠪᠤᠷᠭᠠᠰᠤ ᠮᠤᠳᠤ ᠫᠤᠤᠳᠠᠬᠤ ᠦᠦ ᠳ᠋ᠠ᠃
ᠬᠤᠷᠯᠤᠮᠠ᠄
(ᠭᠦᠶᠦᠨ
ᠢᠷᠡᠵᠦ） ᠠᠭᠤᠯᠠ ᠶᠢᠨ ᠭᠦᠷᠦᠭᠡᠰᠦ ᠶᠢ ᠠᠪᠠᠯᠠᠬᠤ ᠳᠤ
ᠤᠷᠮᠠ ᠵᠤᠷᠢᠭ ᠬᠤᠭᠤᠷᠠᠪᠠᠯ
ᠲᠠᠯᠠ ᠶᠢᠨ ᠴᠡᠴᠡᠭ ᠢ ᠲᠡᠭᠦᠬᠦ ᠨᠢ
ᠲᠠᠪᠠ ᠲᠠᠢ ᠰᠠᠢᠬᠠᠨ ᠪᠠᠢᠳᠠᠭ ᠰᠢᠦ᠃
ᠴᠡᠴᠡᠭ ᠨᠠᠪᠴᠢ ᠰᠢᠭ᠋ ᠰᠠᠢᠬᠠᠨ
ᠴᠡᠪᠡᠷᠬᠡᠨ ᠬᠡᠦᠬᠡᠨ ᠨᠠᠩᠰᠠᠯᠮᠠ
ᠴᠡᠩᠭᠡᠯ ᠲᠠᠢ ᠰᠠᠢᠬᠠᠨ ᠡᠷᠡ ᠶᠢ
ᠴᠡᠭᠡᠵᠢᠨ ᠳᠡᠭᠡᠨ ᠬᠦᠰᠡᠭᠡᠳ ᠰᠠᠭᠤᠵᠤ ᠪᠠᠢᠨᠠ᠃
ᠬᠠᠷᠢᠶᠠᠲᠤ ᠨᠤᠶᠠᠨ ᠲᠠᠭᠠᠯᠠᠪᠠᠯ
ᠬᠠᠷᠢᠨ ᠲᠡᠭᠦᠨ ᠢ ᠠᠪᠴᠢᠷᠠᠨᠠ ᠦᠦ᠃
ᠬᠠᠢᠷᠠ ᠦᠷᠦᠰᠢᠶᠡᠯ ᠢ ᠬᠦᠷᠲᠡᠭᠡᠬᠦ ᠳᠤ
ᠬᠠᠷᠢᠨ ᠴᠤ᠌ ᠰᠠᠢᠬᠠᠨ ᠬᠡᠦᠬᠡᠨ ᠳ᠋ᠠ᠃
(ᠨᠤᠶᠠᠨ ᠤ
ᠵᠠᠷᠤᠴᠠ ᠨᠤᠭᠤᠳ ᠨᠠᠩᠰᠠᠯᠮᠠ ᠶᠢ ᠳᠠᠭᠠᠭᠤᠯᠵᠤ ᠠᠪᠴᠢᠷᠠᠨᠠ）
ᠪᠠᠯᠭᠠᠨ᠄
ᠬᠦᠮᠦᠨ ᠶᠠᠪᠤᠳᠠᠭ ᠦᠭᠡᠢ ᠭᠠᠵᠠᠷ ᠢᠶᠠᠷ
ᠬᠠᠮᠢᠭᠠ ᠠᠴᠠ ᠶᠠᠪᠤᠭᠠ ᠬᠡᠦᠬᠡᠨ ᠪᠤᠢ
ᠭᠤᠸᠠ ᠦᠵᠡᠰᠬᠦᠯᠡᠩ ᠢ ᠴᠢᠨᠢ ᠦᠵᠡᠪᠡᠯ
ᠬᠤᠷᠮᠤᠰᠲᠠ ᠲᠡᠭᠷᠢ ᠶᠢᠨ ᠳᠠᠭᠢᠨᠢ ᠦᠦ ᠳ᠋ᠠ᠃
ᠠᠭᠤᠯᠠ ᠶᠢᠨ ᠭᠦᠷᠦᠭᠡᠰᠦ ᠤᠯᠳᠠᠬᠤ ᠦᠭᠡᠢ ᠳᠤ
ᠤᠷᠮᠠ ᠵᠤᠷᠢᠭ ᠦᠭᠡᠢ ᠶᠠᠪᠤᠭᠰᠠᠨ ᠶᠤᠮᠰᠠᠨ᠃
ᠵᠤᠯ ᠵᠢᠷᠭᠠᠯ ᠮᠢᠨᠢ ᠢᠷᠡᠬᠦ ᠳᠤ
ᠯᠤᠤᠰ ᠤᠨ ᠦᠬᠢᠨ ᠢᠶᠠᠨ ᠬᠠᠢᠷᠠᠯᠠᠪᠠ ᠦᠦ᠃
ᠨᠠᠩᠰᠠᠯᠮᠠ᠄
ᠡᠷᠬᠢᠮ ᠵᠠᠯᠠᠭᠤ ᠪᠠᠭᠠᠳᠤᠷ ᠮᠢᠨᠢ
ᠠᠳᠡᠭᠦᠷᠡᠵᠦ ᠲᠠᠰᠢᠶᠠᠷᠠᠵᠤ ᠪᠠᠢᠨᠠ ᠦᠦ ᠳ᠋ᠠ᠃
ᠡᠩ ᠤᠨ ᠨᠢᠭᠡᠨ ᠪᠦᠰᠡᠭᠦᠢ ᠪᠠᠢᠨᠠ
ᠡᠨᠡᠭᠦᠷ ᠶᠠᠪᠤᠬᠤ ᠳᠤ ᠶᠠᠭᠠᠬᠢᠳᠠᠭ ᠶᠤᠮ᠃
ᠭᠦᠷᠦᠭᠡᠴᠢᠨ ᠠᠩᠴᠢᠨ ᠡᠷᠬᠢᠮ ᠮᠢᠨᠢ
ᠬᠦᠨᠳᠡᠯᠢᠳᠴᠦ ᠵᠤᠭᠰᠤᠭᠰᠠᠨ ᠤ ᠬᠡᠷᠡᠭ ᠦᠭᠡᠢ᠂
ᠬᠦᠳᠡᠭᠡ ᠶᠢᠨ ᠨᠢᠭᠡᠨ ᠪᠦᠰᠡᠭᠦᠢ ᠪᠠᠢᠨᠠ
ᠭᠦᠷᠦᠭᠡᠰᠦ ᠠᠩ ᠢᠶᠠᠨ ᠠᠩᠨᠠ ᠳ᠋ᠠ᠃
ᠪᠠᠯᠭᠠᠨ᠄
ᠨᠠᠷᠠᠨ ᠭᠡᠷᠡᠯᠲᠦ ᠬᠡᠦᠬᠡᠨ ᠮᠢᠨᠢ
ᠨᠠᠮᠠᠶ᠋ᠢ ᠶᠠᠭᠤᠨ ᠳᠤ ᠲᠤᠷᠰᠢᠭᠠ ᠪᠤᠢ᠂
ᠡᠷᠲᠡᠨ ᠤ ᠬᠤᠪᠢ ᠵᠤᠬᠢᠶᠠᠯ ᠢᠶᠠᠷ
ᠠᠳᠡ ᠤᠴᠠᠷᠠᠬᠤ ᠢᠷᠦᠭᠡᠯ ᠲᠠᠢ ᠪᠠᠢᠵᠤ᠃
ᠰᠠᠷᠠ ᠰᠢᠭ᠋ ᠭᠡᠷᠡᠯ ᠳᠤ ᠴᠢᠨᠢ ᠭᠢᠯᠪᠠᠵᠤ ᠪᠠᠢᠨᠠ
ᠰᠠᠢᠬᠠᠨ ᠦᠩᠭᠡᠨ ᠳᠤ ᠴᠢᠨᠢ ᠳᠤᠷᠠᠯᠠᠵᠤ ᠪᠠᠢᠨᠠ᠃
ᠰᠠᠭᠠᠲᠠᠵᠤ ᠠᠳᠡ ᠰᠠᠭᠤᠭᠠᠳ
ᠰᠠᠨᠠᠭᠠ ᠰᠡᠳᠬᠢᠯ ᠢ ᠮᠢᠨᠢ ᠬᠠᠩᠭᠠᠨᠠ ᠦᠦ᠃
ᠨᠠᠩᠰᠠᠯᠮᠠ᠄
ᠬᠦᠮᠦᠨ ᠤ
ᠠᠷᠠᠰᠤ ᠶᠢ ᠨᠦᠮᠦᠷᠦᠭᠰᠡᠨ
ᠬᠡᠭᠡᠷᠡ ᠶᠢᠨ
ᠭᠠᠯᠵᠠᠭᠤ ᠴᠢᠨ᠋ᠸᠠ ᠴᠢ
ᠬᠦᠵᠦᠭᠦᠦ
ᠲᠤᠯᠤᠭᠠᠢ ᠮᠦᠷᠦᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠴᠠᠭ ᠲᠤ
ᠴᠢ
ᠨᠠᠮᠠᠶ᠋ᠢ ᠪᠤᠭᠤᠯᠴᠢᠯᠠᠬᠤ ᠦᠭᠡᠢ᠃
ᠤᠮᠤᠭ
ᠵᠠᠩ ᠴᠢᠨᠢ ᠶᠡᠭᠡ ᠪᠤᠯᠪᠠᠴᠤ
ᠤᠢᠷᠠᠳᠤᠭᠤᠯᠵᠤ
ᠨᠠᠮᠠᠶ᠋ᠢ ᠴᠢᠳᠠᠬᠤ ᠦᠭᠡᠢ᠃
ᠬᠡᠯᠡᠯᠴᠡᠭᠡ
ᠰᠦᠢᠲᠡᠢ ᠨᠦᠬᠦᠷᠰᠡᠭ ᠲᠠᠢ ᠪᠢ᠂
ᠬᠡᠴᠢᠨᠡᠨ
ᠤᠷᠤᠯᠳᠤᠪᠠᠴᠤ ᠲᠤᠰᠠ ᠦᠭᠡᠢ᠃
ᠪᠠᠯᠭᠠᠨ᠄
ᠪᠠᠭᠠ
ᠵᠢᠭᠠᠬᠠᠨ ᠦᠬᠢᠨ ᠮᠢᠨᠢ
ᠪᠠᠯᠭᠠᠨ ᠤ
ᠭᠠᠷ ᠠᠴᠠ ᠭᠠᠷᠬᠤ ᠦᠭᠡᠢ᠂
ᠭᠡᠷ ᠲᠡᠭᠡᠨ
ᠴᠢᠮᠠᠶ᠋ᠢ ᠠᠪᠠᠴᠢᠭᠠᠳ
ᠭᠡᠷᠭᠡᠢ ᠪᠠᠨ
ᠪᠤᠯᠭᠠᠵᠤ ᠰᠠᠭᠤᠨᠠ ᠳ᠋ᠠ᠂
ᠡᠳ᠋
ᠬᠦᠷᠦᠩᠭᠡ ᠪᠠᠷ ᠡᠯᠪᠡᠭ ᠪᠢ
ᠡᠬᠡᠨᠡᠷ
ᠠᠪᠬᠤ ᠶᠢ ᠪᠤᠳᠤᠭᠰᠠᠨ ᠶᠤᠮ᠃
ᠡᠪ ᠢᠶᠠᠷ
ᠡᠰᠡ ᠪᠤᠯᠪᠠᠯ
ᠡᠵᠡᠨ ᠤ
ᠵᠠᠷᠯᠢᠭ ᠢᠶᠠᠷ ᠬᠦᠷᠭᠡᠨᠡ ᠳ᠋ᠡ᠃
(ᠨᠠᠩᠰᠠᠯᠮᠠ ᠶᠢ ᠪᠠᠷᠢᠨ
ᠠᠪᠲᠠᠯᠠ᠂ ᠨᠠᠩᠰᠠᠯᠮᠠ ᠪᠠᠯᠭᠠᠨ ᠢ ᠲᠦᠯᠬᠢᠵᠦ ᠤᠨᠠᠭᠠᠬᠤ ᠪᠠ ᠵᠠᠷᠤᠴᠠ ᠨᠤᠭᠤᠳ ᠨᠠᠩᠰᠠᠯᠮᠠ ᠶᠢ ᠪᠠᠷᠢᠵᠤ
ᠠᠪᠤᠨᠠ᠃ ᠬᠤᠷᠯᠤᠮᠠ ᠳᠠᠯᠳᠠ ᠠᠴᠠ ᠭᠦᠶᠦᠨ ᠢᠷᠡᠨᠡ）
ᠬᠤᠷᠯᠤᠮᠠ᠄
ᠬᠠᠷᠢᠶᠠᠲᠦ
ᠨᠤᠶᠠᠨ ᠢᠶᠠᠨ ᠲᠠᠨᠢᠬᠤ ᠦᠭᠡᠢ ᠴᠢ
ᠬᠠᠷᠠ
ᠨᠢᠳᠦ ᠴᠢᠨᠢ ᠰᠤᠬᠤᠷᠤᠭᠠ ᠦᠦ᠂
ᠬᠠᠷᠢᠶᠠᠵᠤ
ᠶᠡᠭᠡ ᠪᠠᠷ ᠳᠤᠷᠤᠮᠵᠢᠯᠠᠪᠠᠯ
ᠬᠠᠷᠠ
ᠲᠤᠯᠤᠭᠠᠢ ᠴᠢᠨᠢ ᠬᠠᠭᠠᠷᠠᠨᠠ ᠳ᠋ᠠ᠃
ᠬᠠᠨᠢᠯᠠᠭᠰᠠᠨ
ᠨᠦᠬᠦᠷ ᠶᠦᠨᠳᠡᠩ ᠴᠢᠨᠢ
ᠬᠠᠯᠠᠮᠵᠢᠲᠠᠢ
ᠰᠠᠶᠢᠨ ᠪᠤᠯᠪᠠᠴᠤ
ᠬᠠᠭᠠᠨ
ᠢᠵᠠᠭᠤᠷᠲᠦ ᠬᠦᠮᠦᠨ ᠲᠠᠢ
ᠬᠠᠮᠢᠭᠠ ᠠᠴᠠ
ᠵᠦᠢᠷᠯᠡᠭᠦᠯᠵᠦ ᠪᠤᠯᠬᠤ ᠪᠤᠢ᠃
ᠨᠠᠩᠰᠠᠯᠮᠠ᠄
ᠢᠨᠠᠭ
ᠰᠡᠳᠬᠢᠯ ᠭᠡᠳᠡᠭ ᠨᠢ
ᠶᠠᠩᠪᠠ ᠪᠠᠷ
ᠰᠤᠯᠢᠵᠤ ᠪᠤᠯᠳᠠᠭ ᠦᠭᠡᠢ ᠶᠤᠮ᠃
ᠶᠠᠮᠠᠷ
ᠴᠤ᠌ ᠡᠳᠡᠭᠡᠳ ᠲᠠᠢ ᠨᠠᠭᠠᠯᠳᠤᠳᠠᠭ
ᠶᠠᠩᠬᠠᠨ
ᠬᠡᠦᠬᠡᠨ ᠪᠢ ᠪᠢᠰᠢ᠃
ᠵᠠᠯᠢᠬᠠᠢ
ᠨᠤᠶᠠᠨ ᠪᠠᠯᠭᠠᠨ ᠤ
ᠵᠠᠩᠳᠤᠷᠴᠦ
ᠳᠤᠰᠢᠶᠠᠬᠤ ᠶᠢ ᠬᠦᠯᠢᠶᠡᠬᠦ ᠦᠭᠡᠢ᠃
ᠵᠠᠪᠬᠠᠢ
ᠬᠡᠦᠬᠡᠨ ᠬᠤᠷᠯᠤᠮᠠ ᠶᠢᠨ
ᠵᠢᠭᠠᠬᠤ
ᠦᠭᠡ ᠶᠢ ᠳᠠᠭᠠᠬᠤ ᠦᠭᠡᠢ᠃
ᠬᠤᠷᠯᠤᠮᠠ᠄
(ᠪᠢᠯᠳᠠᠤᠴᠢᠯᠠᠨ）ᠡᠵᠡᠨ
ᠲᠡᠭᠷᠢ ᠨᠤᠶᠠᠨ ᠮᠢᠨᠢ
ᠡᠮᠡᠭᠲᠡᠢ
ᠬᠦᠮᠦᠨ ᠤ ᠵᠠᠩ ᠢ
ᠡᠷᠬᠡᠪᠰᠢ
ᠲᠤᠯᠢᠯᠠᠵᠤ ᠮᠡᠳᠡᠬᠦ ᠪᠢᠵᠡ
ᠡᠳᠡᠨ ᠤ
ᠦᠭᠡ ᠢᠲᠡᠭᠡᠮᠵᠢ ᠦᠭᠡᠢ ᠰᠢᠦ᠃
ᠦᠨᠡᠨ
ᠰᠠᠨᠠᠭᠠᠨ ᠠᠴᠠ ᠪᠠᠨ ᠳᠤᠷᠠᠯᠠᠪᠠᠴᠤ
ᠦᠭᠡᠢ
ᠭᠡᠵᠦ ᠬᠡᠯᠡᠳᠡᠭ ᠰᠢᠦ᠃
ᠲᠡᠭᠦᠨ ᠲᠠᠢ
ᠶᠠᠷᠢᠬᠤ ᠶᠢᠨ ᠤᠷᠤᠨ ᠳᠤ
ᠠᠪᠤᠭᠠᠳ
ᠶᠠᠪᠤᠪᠠᠯ ᠳᠡᠭᠡᠷᠡ ᠰᠢᠦ᠃
(ᠳᠦᠷᠪᠡᠨ ᠵᠠᠷᠤᠴᠠ
ᠨᠠᠩᠰᠠᠯᠮᠠ ᠶᠢ ᠠᠪᠴᠤ ᠶᠠᠪᠤᠨᠠ᠃ ᠪᠠᠯᠭᠠᠨ ᠬᠤᠷᠯᠤᠮᠠ ᠦᠯᠡᠳᠡᠵᠦ᠂ ᠪᠠᠯᠭᠠᠨ ᠬᠤᠷᠯᠤᠮᠠ ᠶᠢ ᠦᠨᠡ ᠲᠠᠢ
ᠪᠠᠭᠤᠪᠴᠢ ᠪᠠᠷ ᠱᠠᠩᠨᠠᠨᠠ）
ᠬᠦᠰᠢᠭᠡ
ᠬᠤᠶᠠᠳᠤᠭᠠᠷ ᠦᠵᠡᠭᠳᠡᠯ
ᠲᠠᠢᠰᠠᠨ ᠤ ᠪᠠᠢᠳᠠᠯ ᠨᠢ᠄
ᠪᠠᠯᠭᠠᠨ ᠨᠤᠶᠠᠨ ᠤ ᠤᠷᠳᠤᠨ ᠤ ᠲᠤᠲᠤᠭᠠᠲᠤ ᠪᠠᠢᠳᠠᠯ᠂ ᠦᠩᠭᠡ ᠨᠢ ᠬᠠᠷᠠᠪᠲᠤᠷ ᠪᠦᠭᠡᠳ
ᠬᠦᠮᠦᠨ ᠠᠶᠤᠮᠠᠷ ᠪᠠᠢᠳᠠᠯ ᠲᠠᠢ᠃ ᠤᠷᠳᠤᠨ ᠤ ᠲᠤᠰᠬᠠᠢ ᠤᠷᠤ ᠪᠠ ᠤᠯᠪᠤᠭ ᠪᠠᠢᠨᠠ᠃ ᠤᠯᠠᠨ ᠡᠬᠡᠨᠡᠷ ᠨᠠᠩᠰᠠᠯᠮᠠ ᠶᠢᠨ
ᠰᠡᠳᠬᠢᠯ ᠢ ᠳᠠᠢᠳᠬᠤᠷᠠᠭᠤᠯᠬᠤ ᠪᠠᠷ ᠵᠦᠢᠯ ᠪᠦᠷᠢ ᠶᠢᠨ ᠦᠨᠡ ᠲᠠᠢ ᠪᠦᠰ ᠪᠠᠷᠠᠭᠠ ᠵᠡᠷᠭᠡ ᠪᠡᠯᠡᠭᠯᠡᠯ ᠤᠨ
ᠵᠦᠢᠯ ᠢ ᠪᠠᠷᠢᠵᠠᠢ᠃
ᠨᠠᠩᠰᠠᠯᠮᠠ᠄
ᠠᠶᠠᠨ ᠤ ᠵᠠᠮ ᠢ ᠰᠢᠷᠲᠡᠪᠡᠴᠦ
ᠠᠯᠤᠰ ᠤᠨ ᠪᠠᠷᠠ ᠬᠠᠷᠠᠭᠳᠠᠬᠤ ᠦᠭᠡᠢ᠃
ᠪᠤᠯᠵᠤᠮᠤᠷ ᠰᠢᠪᠠᠭᠤ ᠰᠢᠭ᠋
ᠪᠤᠯᠤᠭᠠᠰᠠᠢ ᠬᠤᠶᠠᠷ ᠵᠢᠭᠦᠷ ᠤᠷᠭᠤᠭᠠᠰᠠᠢ
ᠬᠤᠢᠨᠠ ᠠᠴᠠ ᠨᠢ ᠨᠢᠰᠴᠦ ᠤᠴᠢᠭᠠᠳ
ᠬᠠᠮᠤᠭ ᠵᠤᠪᠠᠯᠠᠩ ᠢᠶᠠᠨ ᠲᠤᠭᠠᠴᠢᠬᠤ ᠰᠠᠨ᠃
(ᠴᠤᠭᠯᠠᠷᠠᠭᠰᠠᠨ ᠡᠬᠡᠨᠡᠷ ᠤᠳ ᠳᠠᠭᠤᠯᠠᠨᠠ）
(ᠾᠤᠷ） ᠦᠨᠡᠲᠦ ᠡᠨᠡ ᠶᠠᠭᠤᠮᠠ ᠨᠤᠭᠤᠳ
ᠡᠭᠦᠷᠢᠳᠡ ᠴᠢᠨᠦᠬᠢ ᠪᠤᠯᠤᠨᠠ ᠰᠢᠦ᠃
ᠦᠵᠡᠰᠬᠦᠯᠡᠩᠲᠦ ᠤᠷᠳᠤᠨ ᠳᠤ ᠰᠠᠭᠤᠭᠠᠳ
ᠦᠷᠭᠦᠯᠵᠢ ᠵᠢᠷᠭᠠᠬᠤ ᠪᠤᠯᠤᠨᠠ ᠰᠢᠦ᠃
ᠡᠷᠳᠡᠨᠢ ᠶᠢᠨ ᠴᠢᠮᠡᠭ ᠢ ᠵᠡᠭᠦᠭᠡᠳ
ᠡᠵᠡᠨ ᠤ ᠬᠠᠲᠤᠨ ᠪᠤᠯᠬᠤ ᠠᠴᠠ
ᠡᠷᠬᠢᠮ ᠵᠢᠷᠭᠠᠯ ᠪᠠᠢᠬᠤ ᠦᠭᠡᠢ᠂
ᠡᠷᠭᠢᠴᠡᠭᠦᠯᠵᠦ ᠵᠢᠭᠠᠬᠠᠨ ᠪᠤᠳᠤ ᠳ᠋ᠠ᠃
(ᠨᠠᠩᠰᠠᠯᠮᠠ ᠶᠢᠨ ᠲᠤᠲᠤᠷᠠ ᠨᠢ ᠡᠪ ᠦᠭᠡᠢ ᠪᠤᠯᠵᠤ ᠨᠢᠯᠪᠤᠰᠤ ᠨᠢ ᠭᠠᠷᠤᠨᠠ）
ᠨᠠᠩᠰᠠᠯᠮᠠ᠄
ᠠᠭᠠᠷ ᠲᠤ ᠳᠤᠷᠠ ᠪᠠᠷ ᠢᠶᠠᠨ ᠴᠡᠩᠭᠡᠭᠴᠢ
ᠠᠩᠭᠢᠷ ᠰᠢᠪᠠᠭᠤᠨ ᠤ ᠳᠡᠭᠳᠡᠭᠡᠬᠡᠢ ᠶᠢ
ᠠᠯᠲᠠᠨ ᠲᠤᠤᠷ ᠲᠤ ᠰᠠᠭᠤᠯᠭᠠᠪᠠᠴᠤ
ᠠᠮᠤᠷᠴᠤ ᠶᠡᠷᠦ ᠳᠡᠭᠡᠨ ᠵᠢᠷᠭᠠᠬᠤ ᠦᠭᠡᠢ᠃
ᠬᠠᠷᠢᠨ ᠲᠡᠭᠦᠨ ᠢ ᠲᠠᠯᠪᠢᠪᠠᠯ
ᠬᠠᠨᠳᠤᠭᠰᠠᠨ ᠵᠦᠭ ᠲᠡᠭᠡᠨ ᠨᠢᠰᠴᠦ
ᠴᠡᠭᠡᠯ ᠤᠨ ᠤᠰᠤᠨ ᠳᠤ ᠱᠤᠩᠪᠠᠭᠠᠳ
ᠴᠡᠩᠭᠡᠨ ᠵᠢᠷᠭᠠᠵᠤ ᠶᠠᠪᠤᠳᠠᠭ ᠰᠠᠨ᠃
(ᠭᠠᠳᠠᠨᠠ ᠠᠴᠠ ᠶᠠᠮᠠᠷ ᠨᠢᠭᠡ ᠲᠠᠨᠢᠬᠤ ᠬᠦᠮᠦᠨ ᠤ ᠳᠠᠭᠤ
ᠰᠤᠨᠤᠰᠲᠠᠨᠠ）
ᠨᠠᠩᠰᠠᠯᠮᠠ᠄
ᠶᠠᠮᠠᠷ ᠬᠦᠮᠦᠨ ᠤ ᠳᠠᠭᠤ ᠪᠤᠢ
ᠶᠠᠭᠠᠬᠢᠭᠰᠠᠨ ᠲᠠᠨᠢᠯ ᠳᠠᠭᠤ ᠪᠤᠢ
ᠠᠮᠠᠷᠠᠭ ᠶᠦᠨᠳᠡᠩ ᠤᠨ ᠮᠢᠨᠢ ᠳᠠᠭᠤ ᠲᠠᠢ
ᠠᠳᠠᠯᠢᠬᠠᠨ ᠶᠤᠮ ᠰᠢᠭ᠋ ᠰᠤᠨᠤᠰᠲᠠᠨᠠ᠃
ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠬᠦᠮᠦᠨ ᠪᠤᠢ︖
ᠬᠠᠷᠠᠵᠤ ᠦᠵᠡᠬᠦ ᠶᠤᠮᠰᠠᠨ
ᠬᠠᠭᠠᠯᠭᠠ ᠡᠭᠦᠳᠡ ᠪᠠᠨ ᠨᠡᠭᠡᠭᠡᠭᠡᠳ
ᠢᠨᠠᠭᠰᠢ ᠨᠢ ᠲᠡᠭᠦᠨ ᠢ ᠤᠷᠤᠭᠤᠯ᠃
ᠮᠠᠭᠠᠳ ᠬᠦᠦ ᠮᠢᠨᠢ ᠢᠷᠡᠪᠡ ᠦᠦ ᠳ᠋ᠠ
ᠮᠠᠨᠳᠤᠬᠤ ᠨᠠᠷᠠ ᠴᠤ᠌ ᠭᠠᠷᠤᠯᠠ ᠰᠢᠦ᠃
ᠮᠢᠨᠦ ᠵᠢᠷᠭᠠᠯ ᠡᠬᠢᠯᠡᠭᠰᠡᠨ ᠰᠢᠦ
ᠮᠡᠨᠳᠦ ᠠᠭᠤᠯᠵᠠᠬᠤ ᠶᠢᠨ ᠢᠷᠦᠭᠡᠯ ᠪᠠᠢᠵᠤ᠃
(ᠨᠠᠩᠰᠠᠯᠮᠠ ᠪᠠᠶᠠᠷᠯᠠᠪᠠ᠃ ᠭᠡᠲᠡᠯᠡ ᠶᠠᠩᠵᠤ ᠪᠦᠷᠢ ᠶᠢᠨ
ᠭᠤᠶᠤᠮᠰᠤᠭ ᠡᠳ᠋ ᠲᠠᠸᠠᠷ ᠪᠠᠷᠢᠭᠰᠠᠨ ᠨᠢᠭᠡ ᠲᠦᠪᠡᠳ ᠬᠤᠳᠠᠯᠳᠤᠭᠠᠴᠢᠨ ᠤᠷᠤᠵᠤ ᠢᠷᠡᠨᠡ）
ᠬᠤᠳᠠᠯᠳᠤᠭᠠᠴᠢᠨ᠄
ᠬᠤᠲᠠ ᠭᠠᠵᠠᠷ ᠠᠴᠠ ᠢᠷᠡᠭᠰᠡᠨ ᠪᠢ
ᠬᠤᠷᠭᠤᠢ ᠲᠤᠷᠭᠠᠨ ᠤ ᠮᠠᠢᠮᠠᠢᠴᠢᠨ
ᠬᠤᠯᠠ ᠤᠢᠷᠠ ᠪᠠᠷ ᠬᠡᠰᠦᠵᠦ
ᠬᠤᠨᠵᠢᠶᠠ ᠠᠰᠢᠭ ᠢ ᠤᠯᠳᠠᠭ ᠪᠢ᠃
ᠤᠭᠲᠠᠷᠭᠤᠢ ᠳᠤ ᠲᠠᠲᠠᠭᠰᠠᠨ ᠰᠤᠯᠤᠩᠭᠠ ᠰᠢᠭ᠋
ᠤᠨᠴᠠ ᠶᠢᠨ ᠰᠠᠢᠬᠠᠨ ᠲᠤᠷᠭᠠ ᠰᠢᠦ
ᠤᠯᠬᠤ ᠳᠤ ᠪᠡᠷᠬᠡ ᠡᠳ᠋ ᠰᠢᠦ
ᠤᠨᠳᠤᠤ ᠬᠦᠮᠦᠨ ᠳᠤ ᠪᠠᠢᠬᠤ ᠦᠭᠡᠢ᠃
ᠲᠠᠯᠠ ᠳᠤ ᠤᠷᠭᠤᠭᠰᠠᠨ ᠴᠡᠴᠡᠭ ᠰᠢᠭ
ᠲᠠᠪᠤᠨ ᠦᠩᠭᠡ ᠶᠢᠨ ᠳᠤᠷᠳᠤᠩ ᠰᠢᠦ
ᠲᠠ ᠡᠭᠦᠨ ᠢ ᠠᠪᠤᠶᠠ ᠭᠡᠪᠡᠯ
ᠲᠠᠭᠠᠯᠠᠵᠤ ᠦᠵᠡᠭᠡᠳ ᠠᠪ ᠳ᠋ᠠ᠃
ᠡᠭᠦᠯᠡᠨ ᠤ ᠠᠳᠠᠯᠢ ᠬᠡ ᠲᠠᠢ
ᠦᠨᠡᠬᠡᠷ ᠰᠠᠢᠬᠠᠨ ᠬᠤᠷᠭᠤᠢ ᠰᠢᠦ
ᠡᠭᠦᠨ ᠠᠴᠠ ᠬᠡᠷᠡᠭᠯᠡᠶᠡ ᠭᠡᠪᠡᠯ
ᠦᠵᠡᠵᠦ ᠬᠠᠷᠠᠭᠠᠳ ᠠᠪ ᠳ᠋ᠠ᠃
(ᠡᠬᠡᠨᠡᠷ ᠤᠳ ᠪᠠᠶᠠᠷᠯᠠᠨ ᠳᠠᠭᠤᠯᠠᠨ ᠪᠦᠵᠢᠭᠯᠡᠵᠦ ᠳᠠᠯᠳᠠ
ᠤᠷᠤᠨᠠ᠃ ᠨᠠᠩᠰᠠᠯᠮᠠ ᠬᠤᠳᠠᠯᠳᠤᠭᠠᠴᠢᠨ ᠠᠴᠠ ᠶᠦᠨᠳᠡᠩ ᠤᠨ ᠰᠤᠷᠠᠭ ᠳᠤᠭᠤᠯᠳᠠᠬᠤ ᠪᠤᠯᠪᠠ ᠦᠦ ᠭᠡᠰᠡᠨ ᠪᠠᠢᠳᠠᠯ ᠲᠠᠢ
ᠳᠠᠭᠤᠯᠠᠨᠠ）
ᠨᠠᠩᠰᠠᠯᠮᠠ᠄
ᠬᠤᠲᠠ ᠠᠴᠠ ᠢᠷᠡᠭᠰᠡᠨ ᠭᠡᠳᠡᠭ ᠴᠢᠨᠢ
ᠬᠤᠷᠭᠤᠢ ᠠᠴᠠ ᠢᠯᠡᠭᠦᠦ ᠰᠤᠨᠢᠨ ᠪᠠᠢᠨᠠ᠃
ᠬᠤᠯᠠ ᠶᠢᠨ ᠬᠦᠮᠦᠨ ᠢ ᠬᠦᠯᠢᠶᠡᠭᠰᠡᠭᠡᠷ
ᠬᠤᠶᠠᠷ ᠨᠢᠳᠦ ᠮᠢᠨᠢ ᠬᠦᠬᠡᠷᠡᠯᠡ᠃
ᠬᠤᠳᠠᠯᠳᠤᠭᠠᠴᠢᠨ᠄
ᠢᠯᠳᠠᠮ ᠰᠠᠢᠬᠠᠨ ᠠᠪᠠᠭᠠᠢ ᠮᠢᠨᠢ
ᠶᠠᠮᠠᠷ ᠬᠦᠮᠦᠨ ᠢ ᠬᠦᠯᠢᠶᠡᠭᠰᠡᠨ ᠪᠤᠢ︖
ᠶᠠᠪᠤᠳᠠᠯ ᠠᠶᠠᠨ ᠤ ᠪᠢ ᠴᠢᠨᠢ
ᠮᠡᠳᠡᠬᠦ ᠴᠤ᠌ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃
ᠨᠠᠩᠰᠠᠯᠮᠠ᠄
ᠬᠠᠢᠷᠠᠲᠠᠢ ᠢᠨᠠᠭ ᠬᠦᠦ ᠮᠢᠨᠢ
ᠬᠤᠲᠠ ᠤᠷᠤᠬᠤ ᠪᠠᠷ ᠶᠠᠪᠤᠭᠠᠳ
ᠬᠤᠶᠠᠷ ᠰᠠᠷᠠ ᠪᠤᠯᠵᠤ ᠪᠠᠢᠨᠠ᠃
ᠲᠡᠭᠦᠨ ᠤ ᠨᠡᠷᠡ ᠶᠢ ᠠᠰᠠᠭᠤᠪᠠᠯ
ᠶᠦᠨᠳᠡᠩ ᠭᠡᠳᠡᠭ ᠬᠦᠮᠦᠨ ᠰᠢᠦ᠃
ᠬᠠᠷᠢᠨ ᠲᠠ ᠮᠡᠳᠡᠬᠦ ᠪᠤᠯ
ᠬᠠᠷᠠᠮ ᠦᠭᠡᠢ ᠬᠡᠯᠡᠬᠦ ᠶᠢ ᠭᠤᠶᠤᠨᠠ᠃
ᠬᠤᠳᠠᠯᠳᠤᠭᠠᠴᠢᠨ ᠰᠤᠷᠠᠭ ᠰᠤᠨᠤᠰᠬᠤ ᠪᠠᠢᠳᠤᠭᠠᠢ
ᠰᠠᠭᠤᠳᠠᠯ ᠵᠡᠷᠭᠡᠴᠡᠨ ᠰᠠᠭᠤᠭᠠᠳ
ᠦᠭᠡ ᠪᠠᠨ ᠬᠠᠷᠢᠯᠴᠠᠨ ᠶᠠᠷᠢᠯᠴᠠᠵᠤ
ᠦᠨᠡᠬᠡᠷ ᠲᠡᠭᠦᠨ ᠲᠠᠢ ᠲᠠᠨᠢᠯᠴᠠᠭᠰᠠᠨ ᠪᠢ᠃
ᠬᠡᠵᠢᠶᠡ ᠢᠷᠡᠬᠦ ᠶᠢ ᠮᠡᠳᠡᠬᠦ ᠦᠭᠡᠢ
ᠬᠡᠷᠡᠭ ᠴᠢᠬᠤᠯᠠ ᠪᠤᠯᠪᠠᠯ
ᠬᠤᠲᠠ ᠵᠠᠪᠠᠯ ᠤᠷᠤᠭᠠᠳ
ᠬᠡᠯᠡ ᠬᠦᠷᠭᠡᠵᠦ ᠴᠢᠳᠠᠨᠠ᠃
ᠨᠠᠩᠰᠠᠯᠮᠠ᠄
ᠬᠤᠳᠠᠯᠳᠤᠭᠠᠴᠢᠨ ᠡᠷᠬᠢᠮ ᠨᠦᠬᠦᠷ ᠮᠢᠨᠢ
ᠬᠤᠪᠢ ᠶᠢᠨ ᠬᠠᠢᠷᠠᠲᠠᠢ ᠶᠦᠨᠳᠡᠩ ᠳᠤ ᠮᠢᠨᠢ
ᠬᠤᠷᠳᠤᠨ ᠬᠡᠯᠡ ᠬᠦᠷᠭᠡᠬᠦ ᠶᠢ
ᠬᠤᠰᠢᠭᠤ ᠴᠤᠷᠪᠤᠢᠵᠤ ᠭᠤᠶᠤᠶᠠ᠃
ᠬᠠᠷᠭᠢᠰ ᠪᠠᠯᠭᠠᠨ ᠪᠠᠷᠢᠭᠠᠳ
ᠬᠠᠲᠤᠨ ᠪᠤᠯᠭᠠᠬᠤ ᠪᠠᠷ ᠰᠢᠢᠳᠴᠦ ᠪᠠᠢᠨᠠ᠃
ᠬᠠᠢᠷᠠᠲᠠᠢ ᠲᠡᠷᠡ ᠮᠢᠨᠢ ᠢᠷᠡᠵᠦ
ᠬᠠᠮᠠᠭᠠᠯᠠᠵᠤ ᠠᠪᠬᠤ ᠨᠢ ᠴᠢᠬᠤᠯᠠ ᠪᠠᠢᠨᠠ᠃
ᠬᠤᠳᠠᠯᠳᠤᠭᠠᠴᠢᠨ᠄
ᠠᠮᠠᠷᠠᠭ ᠲᠡᠭᠦᠨ ᠳᠤ ᠴᠢᠨᠢ ᠬᠡᠯᠡᠶᠡ ᠳ᠋ᠠ
ᠠᠷᠭᠠ ᠤᠯᠳᠠᠪᠠᠯ ᠲᠤᠰᠠᠯᠠᠶᠠ ᠳ᠋ᠠ᠃
ᠠᠮᠵᠢᠭᠤᠯᠵᠤ ᠬᠡᠯᠡ ᠬᠦᠷᠭᠡᠶᠡ ᠳ᠋ᠡ᠂
ᠠᠬᠠ ᠴᠢᠨᠢ ᠢᠩᠭᠢᠭᠡᠳ ᠶᠠᠪᠤᠶᠠ ᠳ᠋ᠠ᠃
(ᠬᠠᠲᠤᠳ ᠤᠨ ᠦᠭᠭᠦᠭᠰᠡᠨ ᠶᠠᠭᠤᠮᠠᠨ ᠠᠴᠠ ᠨᠠᠩᠰᠠᠯᠮᠠ ᠨᠢᠭᠡ
ᠶᠤᠸᠠᠮᠪᠤᠤ ᠶᠢ ᠦᠭᠬᠦ ᠪᠠ ᠬᠤᠳᠠᠯᠳᠤᠭᠠᠴᠢᠨ ᠶᠤᠰᠤᠯᠠᠨ ᠭᠠᠷᠴᠤ ᠶᠠᠪᠤᠨᠠ᠃ ᠭᠡᠲᠡᠯᠡ ᠪᠠᠯᠭᠠᠨ ᠢᠷᠡᠵᠦ
ᠨᠠᠩᠰᠠᠯᠮᠠ ᠳᠤ ᠪᠡᠯᠡᠭ ᠦᠭᠬᠦ ᠳᠤ ᠨᠠᠩᠰᠠᠯᠮᠠ ᠲᠡᠭᠦᠨ ᠢ ᠠᠪᠬᠤ ᠦᠭᠡᠢ᠃ ᠪᠠᠯᠭᠠᠨ ᠵᠠᠷᠤᠴᠠ ᠨᠤᠭᠤᠳ ᠢ
ᠬᠦᠭᠡᠭᠡᠵᠦ ᠭᠠᠷᠭᠠᠭᠠᠳ ᠡᠭᠦᠳᠡ ᠪᠠᠨ ᠲᠦᠭᠵᠢᠵᠦ ᠬᠦᠷᠮᠡ ᠮᠠᠯᠠᠭᠠᠢ ᠪᠠᠨ ᠲᠠᠢᠯᠤᠨᠠ）
ᠪᠠᠯᠭᠠᠨ᠄
ᠴᠠᠪ ᠴᠠᠭᠠᠨ ᠴᠢᠷᠠᠢ ᠴᠢᠨᠢ
ᠴᠠᠰᠤᠨ ᠤ ᠰᠢᠷᠬᠡᠭ ᠠᠴᠠ ᠦᠩᠭᠡ ᠲᠠᠢ ᠬᠦ᠋᠃
ᠴᠠᠭᠠᠷᠢᠭ ᠬᠠᠷᠠ ᠨᠢᠳᠦ ᠴᠢᠨᠢ
ᠴᠠᠯᠭᠢᠬᠤ ᠤᠰᠤᠨ ᠠᠴᠠ ᠲᠤᠩᠭᠠᠯᠠᠭ ᠬᠦ᠋᠃
ᠦᠵᠡᠭᠡᠳ ᠦᠩᠭᠡᠷᠡᠬᠦ ᠶᠢᠨ ᠵᠠᠪᠰᠠᠷ
ᠦᠷᠭᠦᠯᠵᠢ ᠰᠡᠳᠬᠢᠯ ᠳᠤ ᠦᠯᠡᠳᠡᠨᠡ ᠬᠦ᠋᠃
ᠡᠭᠦᠷᠢᠳᠡ ᠶᠢᠨ ᠬᠠᠨᠢ ᠬᠠᠨᠢ ᠪᠤᠯᠬᠤ ᠶᠢ ᠴᠢᠨᠢ
ᠦᠨᠡᠨ ᠵᠢᠷᠦᠬᠡᠨ ᠠᠴᠠ ᠭᠤᠶᠤᠶᠠ᠃
(ᠪᠠᠯᠭᠠᠨ ᠨᠠᠩᠰᠠᠯᠮᠠ ᠲᠠᠢ ᠨᠤᠴᠤᠯᠳᠤᠵᠤ᠂ ᠨᠠᠩᠰᠠᠯᠮᠠ
ᠬᠢᠲᠤᠭᠠ ᠶᠢ ᠨᠢ ᠰᠢᠭᠦᠷᠡᠨ ᠠᠪᠴᠤ ᠳᠠᠭᠤᠯᠠᠨᠠ）
ᠨᠠᠩᠰᠠᠯᠮᠠ᠄
ᠤᠬᠠᠭᠠᠨ ᠲᠠᠢ ᠲᠦᠷᠦᠭᠰᠡᠨ ᠨᠤᠶᠠᠨ ᠮᠢᠨᠢ︕
ᠤᠴᠢᠷ ᠲᠠᠢ ᠦᠭᠡ ᠶᠢ ᠬᠡᠯᠡᠶᠡ᠃
ᠤᠤᠯ ᠤᠨ ᠬᠠᠢᠷᠠᠲᠠᠢ ᠲᠡᠭᠦᠨ ᠠᠴᠠ ᠪᠠᠨ
ᠤᠷᠪᠠᠵᠤ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ᠃
ᠦᠨᠳᠦᠷ ᠳᠡᠭᠡᠳᠦ ᠨᠤᠶᠠᠨ ᠮᠢᠨᠢ︕
ᠦᠷᠦᠰᠢᠶᠡᠵᠦ ᠨᠠᠮᠠᠶ᠋ᠢ ᠤᠷᠬᠢᠨᠠ ᠦᠦ︖
ᠦᠭᠡᠳᠡ ᠦᠭᠡᠢ ᠲᠤᠤᠷᠠᠳᠤ ᠪᠢ ᠴᠢᠨᠢ
ᠦᠪᠡᠷ ᠤᠨ ᠢᠶᠠᠨ ᠢᠵᠢᠯᠢ ᠳᠡᠭᠡᠨ ᠶᠠᠪᠤᠶᠠ᠃
(ᠪᠠᠯᠭᠠᠨ ᠨᠤᠶᠠᠨ ᠨᠠᠩᠰᠠᠯᠮᠠ ᠤᠷᠤᠭᠤ ᠤᠬᠤᠰᠬᠢᠨᠠ）
ᠨᠠᠩᠰᠠᠯᠮᠠ᠄
ᠬᠡᠷᠪᠡ ᠨᠠᠳᠠ ᠬᠠᠯᠳᠠᠪᠠᠯ
ᠠᠮᠢ ᠪᠠᠨ ᠪᠢ ᠬᠤᠤᠷᠯᠠᠨᠠ᠃
ᠴᠢᠨᠦ ᠭᠠᠷ ᠠᠴᠠ ᠡᠮᠦᠨᠡ
ᠮᠢᠨᠦ ᠬᠢᠲᠤᠭᠠ ᠠᠮᠵᠢᠨᠠ᠃
ᠭᠤᠷᠪᠠᠳᠤᠭᠠᠷ ᠦᠵᠡᠭᠳᠡᠯ
ᠲᠠᠢᠰᠠᠨ ᠤ ᠪᠠᠢᠳᠠᠯ ᠨᠢ᠄ ᠬᠤᠶᠠᠷ ᠠᠭᠤᠯᠠ ᠶᠢᠨ ᠬᠤᠭᠤᠷᠤᠨᠲᠤ
ᠬᠤᠷᠯᠤᠮᠠ ᠶᠢᠨ ᠭᠡᠷ᠂ ᠭᠡᠷ ᠤᠨ ᠡᠷᠭᠢᠨ ᠲᠤᠭᠤᠷᠢᠨ ᠨᠤᠭᠤᠭᠠᠨ ᠤᠷᠭᠤᠮᠠᠯ ᠮᠤᠳᠤ ᠪᠠᠢᠨᠠ᠃ ᠭᠡᠷ ᠤᠨ
ᠭᠠᠳᠠᠨᠠ ᠮᠤᠳᠤᠨ ᠲᠡᠷᠭᠡᠨ ᠳᠡᠭᠡᠷᠡ ᠨᠢᠭᠡ ᠬᠤᠶᠠᠷ ᠬᠦᠮᠦᠨ ᠨᠤᠢᠷᠮᠤᠭᠯᠠᠨ ᠰᠠᠭᠤᠬᠤ ᠪᠠ ᠨᠢᠭᠡᠳᠦᠭᠡᠷ
ᠬᠦᠮᠦᠨ ᠡᠪᠰᠢᠶᠡᠭᠰᠡᠭᠡᠷ ᠰᠡᠷᠢᠵᠤ ᠨᠦᠭᠦᠭᠡ ᠪᠠᠨ ᠳᠠᠭᠤᠳᠠᠬᠤ ᠳᠤ ᠬᠤᠶᠠᠳᠤᠭᠠᠷ ᠬᠦᠮᠦᠨ ᠴᠤᠴᠢᠨ ᠪᠤᠰᠴᠤ᠂
ᠨᠢᠭᠡᠳᠦᠭᠡᠷ ᠬᠦᠮᠦᠨ ᠲᠡᠷᠭᠡᠨ ᠠᠴᠠ ᠤᠩᠬᠤᠯᠢᠳᠤᠨ ᠤᠨᠠᠨᠠ᠃ ᠡᠭᠦᠨ ᠤ ᠳᠠᠷᠠᠭᠠ ᠪᠠᠷ ᠨᠢᠭᠡᠳᠦᠭᠡᠷ ᠬᠦᠮᠦᠨ
ᠠᠯᠤᠰ ᠢ ᠰᠢᠷᠲᠡᠵᠦ ᠳᠠᠭᠤᠯᠠᠨᠠ᠃
ᠨᠢᠭᠡᠳᠦᠭᠡᠷ ᠬᠦᠮᠦᠨ᠄
ᠲᠡᠭᠷᠢ ᠭᠠᠵᠠᠷ ᠤᠨ ᠵᠠᠪᠰᠠᠷ ᠢᠶᠠᠷ
ᠲᠡᠷᠡ ᠰᠦᠮᠡᠯᠵᠡᠳᠡᠭ ᠴᠢᠨᠢ ᠶᠠᠭᠤ ᠪᠤᠢ︖
ᠦᠨᠦ ᠭᠠᠢᠬᠠᠯ ᠶᠦᠨᠳᠡᠩ ᠴᠢᠨᠢ
ᠦᠭᠡᠳᠡ ᠠᠴᠠ ᠴᠢᠭᠯᠡᠭᠡᠳ ᠡᠷᠡᠪᠡ ᠦᠦ ᠬᠦ᠋︖
ᠬᠤᠶᠠᠳᠤᠭᠠᠷ ᠬᠦᠮᠦᠨ᠄
ᠬᠦᠶ᠋ᠢ ᠴᠢ ᠪᠠᠢᠵᠠ ᠭᠡᠮ ᠳ᠋ᠠ
ᠬᠦᠮᠦᠨ ᠪᠢᠰᠢ ᠮᠤᠳᠤ ᠪᠠᠢᠨᠠ᠃
ᠬᠦᠢᠲᠡᠨ ᠬᠦᠨᠲᠡᠢ ᠶᠢᠨ ᠡᠬᠢᠨ ᠤ
ᠦᠯ ᠤᠨ ᠤᠪᠤᠭᠠ ᠴᠤᠬᠤᠢᠵᠤ ᠪᠠᠢᠨᠠ᠃
ᠨᠢᠭᠡᠳᠦᠭᠡᠷ ᠬᠦᠮᠦᠨ᠄
ᠦᠯ ᠤᠨ ᠤᠪᠤᠭᠠ ᠭᠡᠵᠦ ᠦᠦ ᠬᠦ᠋︖
ᠡᠪᠤᠭᠡᠨ ᠴᠢᠨᠢ ᠪᠠᠭ᠋ᠠᠨ ᠠᠶᠤᠵᠤ ᠪᠠᠢᠨᠠ᠃
ᠦᠨᠦ ᠭᠠᠢᠬᠠᠯ ᠶᠦᠨᠳᠡᠩ ᠴᠢᠨᠢ
ᠦᠭᠡᠳᠡ ᠠᠴᠠ ᠬᠦᠷᠦᠭᠡᠳ ᠢᠷᠡᠪᠡᠯ ᠶᠠᠭᠠᠬᠢᠬᠤ ᠶᠤᠮ ᠪᠤᠢ︖
ᠬᠤᠶᠠᠳᠤᠭᠠᠷ ᠬᠦᠮᠦᠨ᠄
ᠠᠷᠠᠳ ᠶᠦᠨᠳᠡᠩ ᠢᠷᠡᠬᠦ ᠳᠤ
ᠠᠯᠠᠵᠤ ᠡᠰᠡ ᠴᠢᠳᠠᠪᠠᠯ
ᠠᠮᠢ ᠪᠠᠷ ᠢᠶᠠᠨ ᠲᠦᠯᠦᠬᠦ ᠶᠢ
ᠠᠩᠬᠠᠷᠴᠤ ᠮᠠᠳᠠᠵᠤ ᠪᠠᠢᠨᠠ ᠦᠦ︖
ᠶᠠᠭᠠᠬᠢᠬᠤ ᠶᠤᠮ ᠪᠤᠢ ᠭᠡᠨᠡ ᠰᠢᠦ︖
ᠶᠠᠭᠠᠬᠢ ᠭᠡᠰᠡᠨ ᠪᠤᠢ᠂ ᠪᠠᠯᠭᠠᠨ︖
ᠵᠠ ᠭᠡᠵᠦ ᠬᠡᠯᠡᠭᠡᠳ ᠤᠳᠤ ᠪᠤᠴᠠᠵᠤ ᠪᠠᠢᠨᠠ ᠦᠦ︖
(ᠶᠦᠨᠳᠡᠩ ᠤᠨ ᠢᠷᠡᠵᠦ ᠶᠠᠪᠤᠭᠠ ᠶᠢ ᠬᠠᠷᠠᠮᠠᠭᠴᠠ ᠨᠢᠭᠡᠳᠦᠭᠡᠷ
ᠬᠦᠮᠦᠨ ᠠᠶᠤᠨ ᠵᠢᠭᠤᠳᠠᠬᠤ ᠳᠤ ᠬᠤᠶᠠᠳᠤᠭᠠᠷ ᠬᠦᠮᠦᠨ ᠲᠡᠭᠦᠨ ᠢ ᠪᠠᠷᠢᠨ ᠭᠡᠷ ᠤᠨ ᠬᠠᠵᠠᠭᠤ ᠲᠠᠯᠠ ᠳᠤ
ᠰᠠᠭᠤᠨᠠ᠃ ᠭᠡᠷ ᠠᠴᠠ ᠴᠠᠢ ᠢᠳᠡᠭᠡ ᠠᠪᠴᠢᠷᠠᠵᠤ ᠪᠡᠯᠡᠳᠬᠡᠨᠡ᠃ ᠶᠦᠨᠳᠡᠩ ᠳᠠᠯᠳᠠ ᠠᠴᠠ ᠳᠠᠭᠤᠯᠠᠬᠤ
ᠴᠢᠮᠡᠭᠡ ᠰᠤᠨᠤᠰᠲᠠᠨᠠ）
ᠶᠦᠨᠳᠡᠩ᠄
ᠠᠭᠤᠯᠠ ᠤᠰᠤ ᠮᠢᠨᠢ ᠤᠢᠷᠠᠲᠤᠯᠠ
ᠤᠷᠢᠳᠤ ᠶᠢᠨ ᠲᠠᠨᠢᠯ ᠲᠠᠭᠠᠷᠠᠯᠳᠤᠯᠠ᠃
ᠤᠭ ᠨᠤᠲᠤᠭ ᠤᠨ ᠰᠤᠨᠢᠨ ᠢ
ᠤᠷᠢᠳᠠ ᠪᠠᠷ ᠠᠳᠡ ᠠᠴᠠ ᠰᠤᠨᠤᠰᠤᠶᠠ᠃
ᠬᠤᠶᠠᠳᠤᠭᠠᠷ ᠬᠦᠮᠦᠨ᠄
ᠠᠯᠤᠰ ᠤᠨ ᠵᠠᠮ ᠳᠤ ᠶᠠᠪᠤᠭᠰᠠᠨ
ᠠᠩᠴᠢᠨ ᠨᠦᠬᠦᠷ ᠶᠦᠨᠳᠡᠩ ᠮᠢᠨᠢ
ᠠᠮᠤᠷ ᠮᠡᠨᠳᠦ ᠶᠠᠪᠤᠪᠠ ᠦᠦ︖
ᠠᠵᠢᠯ ᠬᠡᠷᠡᠭ ᠴᠢᠨᠢ ᠪᠦᠲᠦᠪᠡ ᠦᠦ︖
ᠲᠠᠨ ᠤ ᠨᠤᠲᠤᠭ ᠤᠢᠷᠠᠲᠤᠯᠠ᠂
ᠲᠠᠨᠢᠯ ᠰᠠᠢᠨ ᠳᠡᠭᠦᠦ ᠮᠢᠨᠢ
ᠲᠠᠪᠠ ᠲᠠᠢ ᠰᠠᠭᠤᠵᠤ ᠶᠠᠷᠢᠯᠴᠠᠶᠠ᠃
ᠲᠠᠮᠠᠬᠢ ᠪᠠᠨ ᠬᠠᠷᠢᠯᠴᠠᠨ ᠲᠠᠲᠠᠶᠠ᠃
(ᠶᠦᠨᠳᠡᠩ ᠠᠪᠴᠤ ᠶᠠᠪᠤᠭᠰᠠᠨ ᠪᠤᠭᠴᠤ ᠤᠷᠤᠭᠤ ᠪᠠᠨ ᠶᠠᠪᠤᠲᠠᠯᠠ
ᠬᠤᠶᠠᠳᠤᠭᠠᠷ ᠬᠦᠮᠦᠨ ᠲᠦᠷᠡᠢ ᠠᠴᠠ ᠪᠠᠨ ᠬᠢᠲᠤᠭᠠ ᠠᠪᠴᠤ ᠶᠦᠨᠳᠡᠩ ᠢ ᠬᠢᠳᠤᠭᠠᠯᠠᠬᠤ ᠭᠡᠨᠡ᠃ ᠶᠦᠨᠳᠡᠩ ᠬᠢᠲᠤᠭᠠ ᠶᠢ ᠨᠢ
ᠪᠤᠯᠢᠶᠠᠵᠤ ᠲᠦᠯᠬᠢᠨ ᠤᠨᠠᠭᠠᠲᠠᠯᠠ ᠨᠢᠭᠡᠳᠤᠭᠡᠷ ᠬᠦᠮᠦᠨ ᠶᠦᠨᠳᠡᠩ ᠢ ᠪᠦᠲᠦᠭᠦᠨ ᠮᠤᠳᠤ ᠪᠠᠷ ᠴᠤᠬᠢᠵᠤ
ᠤᠨᠠᠭᠠᠭᠠᠳ᠂ ᠬᠤᠶᠠᠳᠤᠭᠠᠷ ᠬᠦᠮᠦᠨ ᠢ ᠲᠡᠷᠭᠡᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠵᠢᠭᠤᠳᠠᠨ ᠶᠠᠪᠤᠨᠠ᠃ ᠬᠤᠷᠯᠤᠮᠠ
ᠬᠤᠪᠢᠩ ᠲᠠᠢ ᠤᠰᠤ ᠪᠠᠷᠢᠨ ᠢᠷᠡᠵᠦᠶᠦᠨᠳᠡᠩ ᠢ ᠬᠠᠷᠠᠵᠤ ᠴᠤᠴᠢᠨ᠂ ᠭᠡᠷ ᠠᠴᠠ ᠪᠠᠨ ᠠᠯᠴᠢᠭᠤᠷ ᠠᠪᠴᠢᠷᠠᠵᠤ ᠶᠦᠨᠳᠡᠩ ᠤᠨ
ᠲᠤᠯᠤᠭᠠᠢ ᠶᠢ ᠪᠤᠭᠤᠨᠠ）
ᠬᠤᠷᠯᠤᠮᠠ᠄ ᠡᠷᠲᠡᠨ ᠠᠴᠠ ᠴᠢᠮᠠᠶ᠋ᠢ ᠬᠦᠰᠡᠭᠰᠡᠨ ᠰᠠᠨ
ᠡᠷᠬᠡᠪᠰᠢ ᠤᠴᠠᠷᠠᠬᠤ ᠶᠢ ᠪᠤᠳᠤᠭᠰᠠᠨ ᠰᠠᠨ
ᠢᠩᠭᠢᠵᠦ ᠠᠭᠤᠯᠵᠠᠬᠤ ᠶᠢ ᠦᠵᠡᠪᠡᠯ
ᠢᠷᠦᠭᠡᠯ ᠵᠠᠶᠠᠭᠠᠲᠠᠢ ᠶᠤᠮᠰᠠᠨᠵᠠᠢ᠃
ᠵᠢᠪᠬᠤᠯᠠᠩᠲᠤ ᠰᠠᠢᠬᠠᠨ ᠡᠷᠡ ᠯᠡ ᠭᠡᠵᠦ
ᠵᠠᠰᠠᠭ ᠬᠤᠰᠢᠭᠤ ᠪᠠᠷ ᠬᠡᠯᠡᠯᠴᠡᠳᠡᠭ ᠶᠤᠮ᠃
ᠴᠢᠷᠠᠢ ᠵᠢᠰᠦ ᠶᠢ ᠴᠢᠨᠢ ᠦᠵᠡᠪᠡᠯ
ᠳᠠᠮᠵᠢᠭ ᠦᠭᠡᠢ ᠦᠨᠡᠨ ᠯᠡ ᠶᠤᠮ ᠳ᠋ᠠ᠃
ᠳᠠᠪᠬᠤᠷᠠ ᠲᠠᠢ ᠠᠯᠠᠭ ᠨᠢᠳᠦ ᠲᠠᠢ
ᠲᠤᠩ ᠴᠠᠭᠠᠨ ᠰᠢᠳᠦ ᠲᠠᠢ ᠬᠦ᠋
ᠳᠠᠷᠬᠠᠨ ᠴᠡᠩᠲᠡ ᠶᠢᠨ ᠶᠦᠨᠳᠡᠩ ᠴᠢᠨᠢ
ᠳᠠᠪᠠᠭᠤ ᠴᠡᠪᠡᠷᠬᠡᠨ ᠲᠦᠷᠦᠵᠡᠢ᠃
ᠪᠡᠶᠡ ᠶᠢ ᠴᠢᠨᠢ ᠬᠠᠷᠠᠭᠠᠳ ᠪᠠᠭ᠋ᠠᠳᠤᠭᠰᠠᠨ ᠶᠤᠮ᠂
ᠴᠢᠷᠠᠢ ᠶᠢ ᠴᠢᠨᠢ ᠦᠵᠡᠭᠡᠳ ᠳᠤᠷᠠᠯᠠᠭᠰᠠᠨ ᠶᠤᠮ᠃
ᠤᠬᠠᠭᠠᠨ ᠤᠷᠤᠵᠤ ᠰᠡᠷᠭᠦᠭᠡᠴᠢ
ᠤᠭ ᠰᠠᠨᠠᠭᠠ ᠪᠠᠨ ᠬᠡᠯᠡᠶᠡ᠃
ᠲᠠᠪᠢᠯᠠᠩ ᠢᠷᠦᠭᠡᠯ ᠪᠠᠢᠭᠰᠠᠨ ᠠᠴᠠ
ᠲᠠᠪᠠ ᠲᠠᠢ ᠰᠠᠢᠬᠠᠨ ᠠᠭᠤᠯᠵᠠᠯᠠ ᠳ᠋ᠠ᠃
ᠳᠡᠭᠡᠭᠰᠢ ᠪᠠᠨ ᠰᠡᠷᠭᠦᠵᠦ ᠪᠤᠰᠤᠭᠠᠴᠢ᠂
ᠳᠤᠷᠠᠯᠠᠭᠰᠠᠨ ᠰᠡᠳᠬᠢᠯ ᠢᠶᠠᠨ ᠰᠤᠨᠤᠰᠬᠠᠶᠠ᠃
(ᠶᠦᠨᠳᠡᠩ ᠳᠦᠩᠭᠡᠵᠦ ᠰᠡᠷᠭᠦᠭᠡᠳ ᠬᠤᠷᠯᠤᠮᠠ ᠶᠢᠨ ᠭᠠᠷ ᠢ
ᠢᠯᠢᠵᠦ 《 ᠨᠠᠩᠰᠠᠯᠮᠠ 》 ᠭᠡᠵᠦ ᠳᠠᠭᠤᠳᠠᠨᠠ᠃
ᠬᠤᠷᠯᠤᠮᠠ 《 ᠵᠦᠭᠡᠷ ᠵᠦᠭᠡᠷ 》 ᠭᠡᠵᠦ ᠬᠠᠷᠢᠭᠤᠯᠤᠨᠠ᠃
ᠶᠦᠨᠳᠡᠩ
ᠨᠢᠳᠦ ᠪᠠᠨ ᠨᠡᠭᠡᠭᠡᠵᠦ ᠬᠤᠷᠯᠤᠮᠠ ᠶᠢ ᠲᠠᠨᠢᠭᠠᠳ ᠭᠡᠨᠡᠳᠲᠡ ᠪᠤᠰᠲᠠᠯᠠ ᠲᠤᠯᠤᠭᠠᠢ ᠨᠢ ᠡᠷᠭᠢᠵᠦ
ᠤᠨᠠᠬᠤ ᠳᠤ ᠲᠦᠬᠦᠨᠡ᠃ ᠲᠡᠭᠦᠨ ᠢ ᠬᠤᠷᠯᠤᠮᠠ ᠲᠡᠪᠡᠷᠢᠨᠠᠪᠴᠤ ᠵᠤᠭᠰᠤᠨᠠ᠃ ᠶᠦᠨᠳᠡᠩ᠄ 《 ᠲᠠ ᠶᠠᠭᠤᠨ ᠤ ᠬᠦᠮᠦᠨ ᠪᠤᠢ︖ ᠨᠠᠩᠰᠠᠯᠮᠠ
ᠶᠠᠭᠠᠬᠢᠭᠰᠠᠨ ᠪᠤᠢ︖ 》ᠭᠡᠬᠦ ᠳᠤ ᠬᠤᠷᠯᠤᠮᠠ᠄ 《 ᠪᠢ ᠮᠡᠳᠡᠬᠦ
ᠦᠭᠡᠢ 》 ᠭᠡᠵᠦ ᠢᠴᠢᠨ
ᠵᠦᠷᠢᠭᠦᠦ ᠬᠠᠷᠠᠨᠠ᠃ ᠶᠦᠨᠳᠡᠩ ᠤᠢᠳᠬᠠᠷ ᠲᠠᠢ ᠪᠠᠷ ᠭᠠᠵᠠᠷ ᠠᠴᠠ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠶᠠᠪᠤᠬᠤ
ᠭᠡᠲᠡᠯᠡ ᠬᠤᠷᠯᠤᠮᠠ᠄ 《 ᠪᠢ ᠮᠡᠳᠡᠨᠡ 》 ᠭᠡᠵᠦ ᠬᠠᠷᠢᠭᠤᠯᠤᠨᠠ᠃ ᠲᠡᠭᠦᠨ ᠢ ᠶᠦᠨᠳᠡᠩ ᠰᠤᠨᠤᠰᠴᠤ ᠡᠷᠭᠢᠵᠦ ᠵᠤᠭᠰᠤᠨᠠ᠃）
ᠬᠤᠷᠯᠤᠮᠠ᠄
ᠲᠠᠨ ᠢ ᠬᠡᠳᠦᠢᠨᠡᠢ ᠠᠴᠠ ᠲᠠᠨᠢᠬᠤ ᠪᠤᠯᠪᠠᠴᠤ
ᠨᠢᠭᠤᠷ ᠢ ᠴᠢᠨᠢ ᠦᠵᠡᠵᠦ ᠶᠠᠪᠤᠭᠰᠠᠨ ᠦᠭᠡᠢ᠂
ᠲᠠ ᠮᠤᠷᠢᠨ ᠠᠴᠠ ᠤᠨᠠᠭᠰᠠᠨ ᠶᠤᠮ ᠦᠦ︖
ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠰᠢᠷᠬᠠᠳᠤᠪᠠ︖
ᠲᠠᠨ ᠢ ᠠᠳᠡ ᠬᠡᠪᠲᠡᠵᠦ ᠪᠠᠢᠬᠤ ᠳᠤ
ᠲᠡᠩᠬᠡᠷᠡᠭᠦᠯᠦᠨ ᠰᠤᠪᠢᠯᠠᠵᠤ ᠰᠡᠷᠭᠦᠭᠡᠪᠡ᠃
ᠬᠡᠷᠪᠡ ᠲᠠ ᠵᠢᠭᠰᠢᠬᠦ ᠦᠭᠡᠢ ᠪᠤᠯ
ᠦᠴᠦᠬᠡᠨ ᠨᠠᠳᠠ ᠲᠠᠢ ᠲᠠᠨᠢᠯᠴᠠᠨᠠ ᠦᠦ︖
ᠶᠦᠨᠳᠡᠩ᠄
ᠲᠠ ᠶᠠᠭᠠᠬᠢᠭᠰᠠᠨ ᠰᠠᠢᠨ ᠬᠦᠮᠦᠨ ᠪᠤᠢ︕
ᠲᠠᠯᠠ ᠳᠤ ᠬᠡᠪᠲᠡᠭᠰᠡᠨ ᠨᠠᠮᠠᠶ᠋ᠢ
ᠲᠠ ᠰᠡᠷᠭᠦᠭᠡᠵᠦ ᠠᠪᠤᠭᠠ ᠦᠭᠡᠢ ᠪᠤᠯ
ᠡᠨᠡ ᠪᠡᠶᠡ ᠮᠢᠨᠢ ᠦᠷᠡᠭᠳᠡᠨᠡ᠃
ᠬᠠᠢᠷᠠᠲᠠᠢ ᠢᠨᠠᠭ ᠲᠡᠭᠦᠨ ᠳᠡᠭᠡᠨ
ᠬᠠᠷᠢᠵᠤ ᠤᠴᠢᠬᠤ ᠪᠠᠷ ᠶᠠᠪᠤᠲᠠᠯᠠ
ᠬᠠᠷᠭᠤᠢ ᠵᠠᠮ ᠳᠤ ᠭᠡᠨᠡᠳᠲᠡ
ᠬᠠᠷᠠ ᠰᠠᠨᠠᠭᠠᠲᠠᠨ ᠳᠤ ᠬᠤᠤᠷᠯᠠᠭᠳᠠᠯᠠ᠃
ᠡᠷᠬᠢᠮ ᠪᠦᠰᠡᠭᠦᠢ ᠶᠢᠨ ᠨᠡᠷᠡ ᠬᠡᠨ ᠪᠤᠢ︖
ᠭᠡᠷ ᠤᠷᠤᠨ ᠴᠢᠨᠢ ᠬᠠᠮᠢᠭᠠ ᠪᠤᠢ︖
ᠬᠠᠷᠠᠮ ᠦᠭᠡᠢ ᠨᠠᠳᠠ ᠬᠡᠯᠡᠨᠡ ᠦᠦ︖
ᠬᠤᠵᠢᠮ ᠠᠴᠢ ᠶᠢ ᠴᠢᠨᠢ ᠬᠠᠷᠢᠭᠤᠯᠤᠨᠠ᠃
ᠬᠤᠷᠯᠤᠮᠠ᠄
ᠤᠴᠠᠷᠠᠯ ᠢᠷᠦᠭᠡᠯ ᠪᠠᠢᠭᠰᠠᠨ ᠠᠴᠠ
ᠠᠭᠤᠯᠵᠠᠵᠤ ᠲᠤᠬᠢᠶᠠᠯᠳᠤᠭᠰᠠᠨ ᠨᠢ ᠡᠨᠡ ᠪᠢᠵᠡ᠂
ᠮᠠᠭᠤᠵᠢᠷᠠᠭᠰᠠᠨ ᠲᠠᠨ ᠢ ᠰᠡᠷᠭᠦᠭᠡᠬᠦ ᠨᠢ
ᠮᠡᠬᠦᠰ ᠮᠢᠨᠦ ᠰᠡᠳᠬᠢᠯ ᠡ᠃
ᠡᠷᠬᠢᠮ ᠬᠦᠮᠦᠨ ᠲᠠᠨ ᠲᠠᠢ
ᠢᠩᠭᠢᠵᠦ ᠲᠠᠨᠢᠯᠴᠠᠬᠤ ᠶᠢᠨ ᠬᠡᠰᠢᠭ ᠪᠠᠢᠵᠤ
ᠲᠤᠤᠷᠠᠲᠤ ᠭᠡᠷ ᠲᠤ ᠮᠢᠨᠢ ᠰᠠᠭᠠᠲᠠᠵᠤ
ᠲᠡᠩᠬᠡᠭᠡ ᠲᠠᠮᠢᠷ ᠢᠶᠠᠨ ᠰᠤᠪᠢᠯᠠᠨᠠ ᠦᠦ︖
ᠶᠦᠨᠳᠡᠩ᠄
ᠡᠶᠡᠯᠳᠡᠭ ᠰᠡᠳᠬᠢᠯ ᠲᠠᠢ ᠦᠬᠢᠨ ᠲᠠᠨ ᠤ
ᠡᠨᠡᠷᠢᠵᠦ ᠦᠵᠡᠭᠰᠡᠨ ᠳᠤ ᠪᠠᠶᠠᠷᠯᠠᠯᠠ᠃
ᠠᠯᠳᠠᠷ ᠨᠡᠷᠡ ᠪᠠᠨ ᠬᠡᠯᠡᠨᠡ ᠦᠦ︖
ᠬᠤᠵᠢᠮ ᠠᠢᠯᠴᠢᠯᠠᠨ ᠤᠴᠢᠶᠠ᠃
ᠵᠦᠭᠡᠯᠡᠨ ᠬᠦᠩᠭᠡᠨ ᠭᠠᠷ ᠢᠶᠠᠷ ᠢᠶᠠᠨ
ᠢᠯᠢᠵᠦ ᠰᠤᠪᠢᠯᠠᠭᠰᠠᠨ ᠳᠤ ᠲᠠᠯᠠᠷᠬᠠᠨᠠ᠃
ᠠᠬᠠ ᠳᠡᠭᠦᠦ ᠮᠡᠲᠦ ᠦᠵᠡᠭᠰᠡᠨ
ᠠᠴᠢ ᠲᠤᠰᠠ ᠶᠢ ᠴᠢᠨᠢ ᠬᠠᠷᠢᠭᠤᠯᠤᠨᠠ᠃
ᠲᠠᠨ ᠢ ᠳᠠᠭᠠᠭᠠᠳ ᠶᠠᠪᠤᠬᠤ ᠶᠤᠮᠰᠠᠨ
ᠲᠠᠨᠢᠯᠴᠠᠵᠤ ᠮᠡᠳᠡᠯᠴᠡᠵᠦ ᠠᠪᠬᠤ ᠶᠤᠮᠰᠠᠨ
ᠡᠬᠡᠨᠡᠷ ᠢᠶᠠᠨ ᠤᠯᠵᠤ ᠤᠴᠢᠬᠤ ᠶᠤᠮᠰᠠᠨ
ᠡᠭᠡᠴᠢ ᠮᠢᠨᠢ ᠲᠠ ᠬᠠᠷᠠᠭᠠ ᠦᠭᠡᠢ ᠦᠦ︖
ᠬᠤᠷᠯᠤᠮᠠ᠄
ᠵᠠᠯᠢᠬᠠᠢ ᠡᠲᠡᠭᠡᠳ ᠲᠠᠢ ᠬᠠᠨᠢᠯᠠᠵᠤ
ᠵᠠᠯᠠᠭᠤ ᠴᠢᠮᠠᠶ᠋ᠢ ᠮᠠᠷᠲᠠᠭᠰᠠᠨ ᠰᠢᠦ᠃
ᠪᠤᠭᠲᠤᠯᠠᠵᠤ ᠠᠪᠬᠤ ᠭᠡᠰᠡᠨ ᠬᠡᠦᠬᠡᠨ ᠴᠢᠨᠢ
ᠪᠠᠯᠭᠠᠨ ᠲᠠᠢ ᠨᠦᠬᠦᠴᠡᠭᠡᠳ ᠶᠠᠪᠤᠭᠰᠠᠨ ᠰᠢᠦ᠃
(ᠶᠦᠨᠳᠡᠩ ᠬᠤᠳᠠᠯ ᠭᠡᠵᠦ ᠬᠤᠷᠯᠤᠮᠠ ᠶᠢ ᠪᠠᠭᠠᠯᠵᠤᠷᠳᠠᠭᠠᠳ
ᠠᠪᠤᠭᠰᠠᠨ ᠢᠶᠠᠨ ᠪᠤᠯᠢᠵᠤ ᠳᠠᠭᠤᠯᠠᠨᠠ）
ᠶᠦᠨᠳᠡᠩ᠄
ᠵᠠᠯᠢᠬᠠᠢ ᠬᠦᠮᠦᠨ ᠤ ᠬᠦᠴᠦ ᠪᠢᠵᠡ
ᠵᠠᠩ ᠠᠭᠠᠰᠢ ᠨᠢ ᠬᠤᠪᠢᠷᠠᠭᠠ ᠦᠭᠡᠢ ᠪᠢᠵᠡ
ᠲᠠᠨ ᠤ ᠦᠭᠡ ᠶᠢ ᠳᠤᠭᠤᠯᠬᠤ ᠳᠤ
ᠲᠤᠲᠤᠷᠠ ᠬᠠᠷᠠᠩᠭᠤᠢᠯᠠᠨ ᠲᠡᠪᠴᠢᠳᠠᠨᠠ᠃
ᠬᠤᠷᠯᠤᠮᠠ᠄
ᠡᠢᠮᠦ ᠰᠠᠢᠬᠠᠨ ᠡᠷᠡ ᠳᠤ
ᠡᠬᠡᠨᠡᠷ ᠬᠠᠮᠢᠭᠠ ᠠᠴᠠ ᠮᠤᠩᠳᠠᠬᠤ ᠪᠤᠢ︖
ᠭᠠᠭᠴᠠ ᠨᠢᠭᠡ ᠶᠢᠨ ᠬᠤᠢᠨᠠ ᠠᠴᠠ
ᠭᠠᠨᠢᠬᠠᠷᠠᠵᠤ ᠭᠤᠨᠢᠬᠠᠷᠠᠭᠠᠳ ᠶᠠᠭᠠᠬᠢᠳᠠᠭ ᠶᠤᠮ᠃
ᠶᠦᠨᠳᠡᠩ᠄
ᠬᠠᠲᠠᠭᠰᠠᠨ ᠭᠠᠵᠠᠷ ᠤᠨ ᠬᠦᠷᠦᠰᠦᠨ ᠳᠡᠭᠡᠷᠡ
ᠴᠡᠴᠡᠭ ᠲᠠᠷᠢᠭᠰᠠᠨ ᠴᠤ᠌ ᠤᠷᠭᠤᠬᠤ ᠦᠭᠡᠢ᠃
ᠬᠠᠷᠠᠯᠠᠭᠰᠠᠨ ᠰᠡᠳᠬᠢᠯ ᠤᠨ ᠲᠤᠲᠤᠷᠠ
ᠠᠯᠲᠠ ᠴᠢᠳᠬᠤᠭᠰᠠᠨ ᠴᠤ᠌ ᠴᠠᠢᠷᠠᠳᠠᠭ ᠦᠭᠡᠢ᠃
ᠬᠤᠷᠯᠤᠮᠠ᠄
ᠠᠶᠠᠨ ᠳᠤ ᠶᠠᠪᠤᠭᠰᠠᠨ ᠡᠳᠦᠷ ᠠᠴᠠ ᠴᠢᠨᠢ
ᠠᠮᠠᠷᠠᠭ ᠤᠨ ᠰᠡᠳᠬᠢᠯ ᠬᠤᠪᠢᠷᠠᠭᠰᠠᠨ ᠰᠢᠦ᠃
ᠦᠨᠵᠢᠵᠦ ᠬᠤᠨᠤᠬᠤ ᠪᠦᠷᠢ ᠳᠡᠭᠡᠨ
ᠦᠭᠡᠷᠡ ᠬᠦᠮᠦᠨ ᠳᠤ ᠲᠠᠰᠤᠭᠰᠠᠨ ᠰᠢᠦ᠃
ᠢᠨᠠᠭ ᠰᠡᠳᠬᠢᠯ ᠬᠤᠪᠤᠷ ᠶᠤᠮ
ᠦᠩᠭᠡ ᠮᠦᠩᠭᠦᠨ ᠳᠤ ᠴᠤ᠌ ᠪᠤᠯᠳᠠᠭ ᠰᠢᠦ᠃
ᠦᠢᠯᠡ ᠵᠠᠶᠠᠭᠠ ᠭᠡᠴᠡᠭᠦᠦ ᠰᠢᠦ
ᠦᠪᠡᠷ ᠤᠨ ᠰᠠᠨᠠᠭᠠ ᠪᠠᠷ ᠪᠤᠯᠳᠠᠭ ᠦᠭᠡᠢ ᠶᠤᠮ᠃
ᠤᠷᠴᠢᠯᠠᠩ ᠭᠡᠳᠡᠭ ᠪᠦᠭᠡᠷᠡᠩᠬᠡᠢ
ᠡᠷᠭᠢᠵᠦ ᠬᠤᠪᠢᠷᠠᠵᠤ ᠪᠠᠢᠳᠠᠭ ᠰᠢᠦ᠃
ᠤᠶᠠᠷᠠᠨ ᠭᠠᠰᠢᠭᠤᠳᠠᠭᠠᠳ ᠬᠡᠷᠡᠭ ᠦᠭᠡᠢ
ᠤᠨᠳᠤᠤ ᠵᠠᠮ ᠪᠠᠢᠳᠠᠭ ᠶᠤᠮ ᠰᠢᠦ᠃
ᠡᠷᠬᠢᠮ ᠬᠦᠮᠦᠨ ᠤ ᠦᠷᠡ ᠮᠢᠨᠢ
ᠤᠳᠤ ᠮᠠᠨ ᠤ ᠳᠤ ᠤᠷᠤ ᠯᠠ ᠳ᠋ᠠ᠃
ᠬᠡᠵᠢᠶᠡᠨ ᠤ ᠢᠷᠦᠭᠡᠯ ᠪᠠᠢᠭᠰᠠᠨ ᠠᠴᠠ
ᠬᠤᠶᠠᠭᠤᠯᠠ ᠪᠠᠨ ᠠᠭᠤᠯᠵᠠᠬᠤ ᠨᠢ ᠡᠨᠡ ᠦᠦ ᠳ᠋ᠠ᠃
(ᠬᠤᠷᠯᠤᠮᠠ ᠶᠦᠨᠳᠡᠩ ᠢ ᠭᠡᠷ ᠲᠡᠭᠡᠨ ᠤᠷᠤᠭᠤᠯᠵᠤ ᠡᠭᠦᠳᠡ ᠪᠠᠨ
ᠬᠠᠭᠠᠭᠠᠳ ᠡᠷᠭᠢᠵᠦ ᠬᠠᠶᠠᠭᠠᠨ ᠳᠤ ᠲᠠᠯᠪᠢᠭᠰᠠᠨ ᠪᠤᠭᠴᠤ ᠲᠠᠢ ᠶᠠᠭᠤᠮᠠ ᠶᠢ ᠠᠪᠴᠤ ᠭᠡᠷ ᠤᠨ ᠡᠭᠦᠳᠡ ᠶᠢ
ᠨᠡᠭᠡᠭᠡᠵᠦ ᠳᠠᠭᠤᠯᠠᠨᠠ）
ᠬᠤᠷᠯᠤᠮᠠ᠄
ᠤᠳᠤ ᠮᠢᠨᠦ ᠪᠤᠯᠤᠯᠠ᠃
ᠳᠦᠷᠪᠡᠳᠦᠭᠡᠷ ᠦᠵᠡᠭᠳᠡᠯ
ᠲᠠᠢᠰᠠᠨ ᠤ ᠪᠠᠢᠳᠠᠯ ᠨᠢ᠄ ᠬᠡᠷᠡᠮ ᠬᠠᠰᠢᠶᠠ ᠲᠠᠢ᠂ ᠰᠦᠮᠡ ᠶᠢᠨ ᠪᠠᠢᠳᠠᠯ ᠲᠠᠢ ᠳᠠᠪᠬᠤᠷ
ᠪᠠᠢᠰᠢᠩᠪᠠᠢᠨᠠ᠃ ᠬᠡᠷᠡᠮ ᠤᠨ ᠳᠡᠭᠡᠭᠦᠷ ᠰᠦᠮᠡ ᠶᠢᠨ ᠤᠷᠤᠢ ᠴᠤᠬᠤᠢᠨ ᠬᠠᠷᠠᠭᠳᠠᠬᠤ ᠪᠠ ᠬᠡᠷᠡᠮ ᠤᠨ
ᠬᠠᠭᠠᠯᠭᠠᠨ ᠤ ᠪᠠᠷᠠᠭᠤᠨ ᠲᠠᠯᠠ ᠳᠤ ᠲᠤᠮᠤ ᠠᠯᠲᠠᠨ ᠠᠷᠰᠯᠠᠨ ᠪᠠᠢᠬᠤ ᠪᠠ ᠲᠡᠷᠭᠡᠳᠡ ᠨᠢ ᠰᠢᠷᠠ᠂ ᠴᠠᠭᠠᠨ᠂
ᠬᠦᠬᠡ ᠦᠩᠭᠡ ᠶᠢᠨ ᠭᠤᠷᠪᠠᠯᠵᠢᠨ ᠲᠤᠭ ᠪᠠᠢᠨᠠ᠂ ᠮᠦᠨ ᠬᠠᠨᠳᠠᠭᠠᠵᠠ ᠲᠠᠢ᠂ ᠫᠤᠤ ᠪᠠᠷᠢᠭᠰᠠᠨ ᠮᠠᠨᠠᠭᠠᠴᠢ
ᠨᠠᠷ ᠢᠨᠠᠭᠰᠢ ᠴᠢᠨᠠᠭᠰᠢ ᠪᠠᠨᠵᠦᠷᠢᠨ ᠶᠠᠪᠤᠨᠠ᠃ ᠭᠡᠲᠡᠯᠡ ᠪᠠᠯᠭᠠᠨ ᠨᠤᠶᠠᠨ ᠤ ᠬᠤᠷᠢᠮ ᠳᠤ ᠢᠷᠡᠵᠦ ᠪᠠᠢᠭᠠ
ᠯᠠᠮᠠ ᠨᠠᠷ᠂ ᠨᠤᠶᠠᠳ᠂ ᠬᠠᠲᠤᠳ᠂ ᠫᠦᠰᠡᠨ ᠤ ᠳ᠋ᠠᠩᠵᠢᠶᠠᠳ ᠵᠡᠷᠭᠡ ᠤᠯᠠᠨ ᠬᠦᠮᠦᠨ ᠪᠡᠯᠡᠭ ᠤᠨ ᠵᠦᠢᠯᠡᠰ ᠢ
ᠠᠪᠴᠢᠷᠠᠵᠤ ᠳᠠᠭᠤᠯᠠᠨᠠ᠃
(ᠾᠤᠷ） ᠰᠠᠷᠠᠭᠤᠯ ᠠᠭᠤᠳᠠᠮ ᠤᠷᠳᠤᠨ ᠳᠤ
ᠰᠠᠳᠤᠨ ᠨᠦᠬᠦᠳ ᠨᠢ ᠴᠤᠭᠯᠠᠷᠠᠵᠤ
ᠰᠠᠢᠬᠠᠨ ᠬᠠᠲᠤᠨ ᠢ ᠠᠪᠤᠭᠰᠠᠨ ᠳᠤ
ᠰᠠᠭᠠᠲᠠᠵᠤ ᠬᠤᠷᠢᠮ ᠢ ᠬᠢᠨᠡ ᠳ᠋ᠡ᠃
ᠠᠯᠳᠠᠷᠲᠤ ᠨᠤᠶᠠᠨ ᠤ ᠬᠤᠷᠢᠮ ᠳᠤ
ᠠᠢᠯᠴᠢᠨ ᠤᠯᠠᠨ ᠢᠶᠠᠷ ᠢᠷᠡᠵᠦ
ᠠᠢᠷᠠᠭ ᠠᠷᠢᠬᠢ ᠶᠢ ᠤᠤᠭᠤᠵᠤ
ᠠᠮᠲᠠᠲᠠᠢ ᠰᠠᠢᠬᠠᠨ ᠵᠢᠷᠭᠠᠶᠠ᠃
ᠠᠭᠤᠯᠠ ᠰᠢᠭ᠋ ᠠᠷᠪᠢᠨ ᠢᠳᠡᠭᠡ
ᠤᠰᠤ ᠰᠢᠭ᠋ ᠡᠯᠪᠡᠭ ᠠᠷᠢᠬᠢ ᠶᠢ
ᠤᠭᠰᠠᠭᠠ ᠳᠡᠭᠡᠳᠦ ᠶᠢᠨ ᠬᠦᠮᠦᠰ
ᠤᠤᠭᠤᠵᠤ ᠢᠳᠡᠨ ᠴᠡᠩᠭᠡᠶᠡ᠃(ᠨᠡᠢᠲᠡ ᠪᠠᠷ ᠢᠶᠠᠨ
ᠡᠷᠭᠢᠨ ᠲᠤᠭᠤᠷᠢᠵᠤ ᠳᠠᠬᠢᠨ ᠳᠠᠭᠤᠯᠠᠯᠠ）
(ᠾᠤᠷ） ᠰᠠᠷᠠᠭᠤᠯ ᠠᠭᠤᠳᠠᠮ
ᠤᠷᠳᠤᠨ ᠳᠠᠭᠠᠨ
ᠰᠠᠳᠤᠨ ᠨᠦᠬᠦᠳ ᠤᠳ ᠨᠢ ᠴᠤᠭᠯᠠᠷᠠᠵᠤ
ᠰᠠᠢᠬᠠᠨ ᠬᠠᠲᠤᠨ ᠢ ᠠᠪᠤᠭᠰᠠᠨ ᠳᠤ
ᠰᠠᠭᠠᠲᠠᠵᠤ ᠬᠤᠷᠢᠮ ᠢ ᠬᠢᠵᠡᠭᠡᠶᠡ᠃
(ᠲᠡᠨᠳᠡ ᠬᠦᠮᠦᠰ ᠤᠷᠳᠤᠨ ᠤ ᠬᠠᠭᠠᠯᠭᠠ ᠪᠠᠷ ᠴᠤᠪᠤᠷᠠᠨ ᠤᠷᠤᠵᠠᠭᠠᠨᠠ᠃ ᠭᠡᠲᠡᠯᠡ ᠬᠤᠶᠠᠷ
ᠡᠬᠡᠨᠡᠷ ᠨᠠᠩᠰᠠᠯᠮᠠ ᠶᠢ ᠠᠪᠴᠢᠷᠠᠨᠠ）
ᠨᠠᠩᠰᠠᠯᠮᠠ᠄
ᠬᠦᠰᠡᠭᠰᠡᠨ ᠬᠦᠮᠦᠨ ᠮᠢᠨᠢ ᠢᠷᠡᠬᠦ ᠦᠭᠡᠢ
ᠬᠦᠷᠴᠦ ᠢᠷᠡᠬᠦ ᠰᠤᠷᠠᠭ ᠦᠭᠡᠢ᠃
ᠬᠤᠢᠨᠠ ᠠᠴᠠ ᠴᠢᠨᠢ ᠤᠴᠢᠬᠤ ᠴᠢᠳᠠᠯ ᠦᠭᠡᠢ
ᠬᠤᠤᠷᠲᠠᠨ ᠤ ᠭᠠᠷ ᠲᠤ ᠤᠷᠤᠯᠠ᠃(ᠭᠡᠲᠡᠯᠡ ᠤᠷᠳᠤᠨ ᠤ ᠬᠠᠭᠠᠯᠭᠠ ᠪᠠᠷ ᠤᠯᠠᠨ ᠬᠠᠲᠤᠳ ᠭᠠᠷᠴᠤ ᠢᠷᠡᠨ ᠳᠠᠭᠤᠯᠠᠨᠠ）
(ᠾᠤᠷ） ᠬᠠᠳᠠᠮ ᠳᠤ ᠤᠴᠢᠳᠠᠭ ᠨᠠᠰᠤ ᠰᠢᠦ
ᠬᠠᠢᠯᠠᠵᠤ ᠤᠭᠢᠯᠠᠭᠠᠳ ᠶᠠᠭᠠᠬᠢᠬᠤ ᠪᠤᠢ᠃
ᠬᠠᠭᠠᠨ ᠬᠦᠮᠦᠨ ᠤ ᠦᠷᠡ ᠰᠢᠦ ᠳ᠋ᠠ
ᠬᠠᠲᠤᠨ ᠪᠤᠯᠳᠠᠭ ᠨᠢ ᠲᠠ ᠰᠢᠦ᠃
ᠰᠠᠢᠨ ᠬᠦᠮᠦᠨ ᠤ ᠦᠷᠡ ᠰᠢᠦ ᠳ᠋ᠠ
ᠰᠠᠢᠬᠠᠨ ᠲᠦᠷᠦᠭᠰᠡᠨ ᠡᠷᠡ ᠰᠢᠦ ᠳ᠋ᠠ᠃
ᠰᠠᠨᠠᠭᠠ ᠰᠡᠳᠬᠢᠯ ᠬᠤᠶᠠᠷ ᠨᠢ
ᠭᠠᠭᠴᠠ ᠬᠦ ᠴᠢᠮᠠ ᠳᠡᠭᠡᠷᠡ ᠪᠤᠯᠤᠭᠰᠠᠨ ᠶᠤᠮ ᠰᠢᠦ᠃
ᠵᠦᠪ ᠬᠠᠷᠠᠵᠤ ᠢᠨᠢᠶᠡᠭᠡᠷᠡᠢ
ᠪᠤᠷᠤᠭᠤ ᠬᠠᠷᠠᠵᠤ ᠤᠭᠢᠯᠠᠭᠠᠷᠠᠢ᠃
ᠡᠷᠡ ᠳᠤ ᠤᠴᠢᠨᠠ ᠭᠡᠳᠡᠭ ᠴᠢᠨᠢ
ᠡᠨᠡ ᠨᠠᠰᠤᠨ ᠤ ᠵᠢᠷᠭᠠᠯ ᠰᠢᠦ᠃
ᠤᠭᠰᠠᠭᠠᠲᠤ ᠬᠦᠮᠦᠨ ᠤ ᠦᠷᠡ ᠰᠢᠦ
ᠤᠷᠢᠳᠦ ᠠᠴᠠ ᠴᠢᠮᠠᠶ᠋ᠢ ᠬᠦᠰᠡᠭᠰᠡᠨ ᠶᠤᠮ᠃
ᠤᠴᠠᠷᠠᠭᠰᠠᠨ ᠨᠦᠬᠦᠷ ᠢᠶᠠᠨ ᠭᠡᠪᠡᠯ
ᠤᠬᠠᠭᠠᠨ ᠰᠠᠨᠠᠭᠠᠨ ᠳᠠᠭᠠᠨ ᠪᠤᠳᠤᠭᠠᠷᠠᠢ᠃
(ᠬᠠᠲᠤᠳ ᠤᠳ ᠨᠠᠩᠰᠠᠯᠮᠠ ᠶᠢ ᠬᠠᠭᠠᠯᠭᠠ ᠪᠠᠷ ᠤᠷᠤᠭᠤᠯᠵᠤ᠂ ᠳᠠᠷᠠᠭᠠ ᠪᠠᠷ ᠨᠢ
ᠦᠪᠡᠷᠰᠡᠳ ᠢᠶᠠᠨ ᠴᠤᠪᠤᠷᠠᠨ ᠤᠷᠤᠯᠠ᠃ ᠭᠡᠲᠡᠯᠡ ᠶᠦᠨᠳᠡᠩ ᠬᠡᠷᠡᠮ ᠤᠨ ᠬᠠᠭᠠᠯᠭᠠᠨ ᠳᠡᠭᠡᠭᠦᠷ ᠳᠠᠪᠠᠵᠤ
ᠮᠠᠨᠠᠭᠠᠴᠢ ᠨᠠᠷ ᠤᠨ ᠤᠨᠲᠠᠭᠰᠠᠨ ᠢ ᠮᠡᠳᠡᠵᠦ ᠬᠠᠷᠠᠭᠠᠳ ᠪᠠᠭᠤᠵᠤ ᠢᠷᠡᠨᠡ）
ᠶᠦᠨᠳᠡᠩ᠄
ᠠᠶᠠᠨ ᠠᠴᠠ ᠪᠤᠴᠠᠭᠠᠳ ᠢᠷᠡᠬᠦ ᠳᠤ
ᠠᠮᠠᠷᠠᠭ ᠬᠦᠦ ᠮᠢᠨᠢ ᠦᠭᠡᠶᠡ᠃
ᠠᠬᠠ ᠳᠡᠭᠦᠦ ᠠᠴᠠ ᠨᠢ ᠰᠤᠨᠤᠰᠪᠠᠯ
ᠠᠮᠠᠷᠠᠭ ᠤᠨ ᠰᠡᠳᠬᠢᠯ ᠬᠤᠪᠢᠷᠠᠭᠰᠠᠨ ᠭᠡᠨᠡ᠃
ᠦᠨᠡᠨ ᠰᠡᠳᠬᠢᠯ ᠬᠤᠪᠢᠷᠠᠭᠰᠠᠨ ᠪᠤᠯ
ᠦᠭᠡ ᠶᠢ ᠨᠢ ᠠᠰᠠᠭᠤᠭᠠᠳ ᠮᠡᠳᠡᠬᠦ ᠶᠤᠮᠰᠠᠨ᠃
ᠬᠦᠮᠦᠨ ᠳᠤ ᠬᠡᠷᠪᠡ ᠳᠠᠷᠤᠯᠠᠭᠳᠠᠭᠰᠠᠨ ᠪᠤᠯ
ᠬᠦᠴᠦ ᠴᠢᠳᠠᠯ ᠢᠶᠠᠷ ᠲᠡᠮᠡᠴᠡᠬᠦ ᠶᠤᠮᠰᠠᠨ᠃
ᠠᠯᠠᠭ ᠨᠢᠳᠦᠨ ᠤ ᠨᠢᠯᠪᠤᠰᠤ ᠶᠢ
ᠠᠷᠴᠢᠨ ᠪᠠᠢᠵᠤ ᠰᠠᠯᠤᠭᠰᠠᠨ ᠶᠤᠮᠰᠠᠨ᠃
ᠠᠭᠠᠰᠢ ᠵᠠᠩ ᠨᠢ ᠬᠤᠪᠢᠷᠠᠭᠰᠠᠨ ᠪᠤᠯ
ᠠᠯᠢᠪᠠ ᠤᠴᠢᠷ ᠢ ᠮᠡᠳᠡᠬᠦ ᠶᠤᠮᠰᠠᠨ᠃
ᠬᠤᠯᠠ ᠭᠠᠵᠠᠷ ᠶᠠᠪᠤᠬᠤ ᠳᠤ
ᠬᠦᠢᠲᠡᠨ ᠬᠠᠯᠠᠭᠤᠨ ᠳᠤ ᠵᠦᠳᠡᠷᠡᠭᠰᠡᠨ ᠶᠤᠮᠰᠠᠨ᠃
ᠬᠤᠷᠢᠮ ᠨᠠᠢᠷ ᠢ ᠬᠢᠭᠡᠳ
ᠬᠦᠦ ᠲᠠᠢ ᠪᠠᠨ ᠵᠢᠷᠭᠠᠬᠤ ᠶᠢ ᠪᠤᠳᠤᠭᠰᠠᠨ ᠶᠤᠮ᠃
ᠬᠤᠤᠰ ᠦᠭᠡᠢ ᠬᠤᠶᠠᠷ ᠠᠮᠠᠷᠠᠭ
ᠬᠤᠯᠠᠳᠴᠤ ᠰᠠᠯᠬᠤ ᠶᠢᠨ ᠤᠴᠢᠷ ᠦᠭᠡᠢ᠂
ᠬᠤᠪᠢ ᠵᠠᠶᠠᠭᠠ ᠮᠢᠨᠢ ᠲᠤᠲᠠᠭᠤ ᠳᠤ
ᠡᠢᠮᠦ ᠬᠡᠷᠡᠭ ᠪᠤᠯᠤᠯᠠ ᠳ᠋ᠠ᠃(ᠭᠡᠲᠡᠯᠡ ᠪᠠᠢᠰᠢᠩ ᠤᠨ ᠳᠠᠪᠬᠤᠷ ᠤᠨ ᠬᠠᠭᠠᠯᠭᠠᠨ ᠤ ᠳᠡᠷᠭᠡᠳᠡ ᠨᠠᠩᠰᠠᠯᠮᠠ ᠢᠯᠡ ᠭᠠᠷᠴᠤ
ᠳᠠᠭᠤᠯᠠᠨᠠ）
ᠨᠠᠩᠰᠠᠯᠮᠠ᠄
ᠪᠠᠯᠠᠮᠠᠳ ᠨᠤᠶᠠᠨ ᠪᠠᠯᠭᠠᠨ ᠳᠤ
ᠪᠠᠷᠢᠭᠳᠠᠭᠠᠳ ᠪᠠᠢᠨᠠ ᠪᠢ ᠴᠢᠨᠢ᠂
ᠲᠤᠤᠷ ᠲᠤ ᠤᠷᠤᠭᠰᠠᠨ ᠪᠤᠯᠵᠤᠮᠤᠷ ᠰᠢᠭ᠋
ᠤᠳᠤ ᠪᠢ ᠶᠠᠭᠠᠬᠢᠬᠤ ᠪᠢᠯᠡ︖
ᠬᠤᠶᠠᠷ ᠰᠠᠷᠠ ᠪᠤᠯᠤᠯᠠ ᠳ᠋ᠠ
ᠬᠤᠩᠭᠤᠷ ᠬᠦᠦ ᠮᠢᠨᠢ ᠶᠠᠭᠠᠬᠢᠪᠠ ᠳ᠋ᠠ︖
ᠬᠦᠮᠦᠨ ᠤ ᠭᠠᠷ ᠲᠤ ᠤᠷᠤᠯᠠ ᠰᠢᠦ
ᠬᠤᠷᠳᠤᠨ ᠢᠷᠡᠵᠦ ᠠᠪᠤᠭᠠᠰᠠᠢ᠃
ᠶᠦᠨᠳᠡᠩ (ᠠᠩᠬᠠᠷᠤᠨ ᠤᠢᠷᠠᠳᠤᠵᠤ）᠄
ᠠᠯᠠᠭᠠ ᠪᠤᠯᠤᠭᠠᠳ ᠤᠯᠳᠠᠬᠤ ᠦᠭᠡᠢ ᠳᠤ ᠴᠢᠨᠢ
ᠠᠷᠭᠠ ᠲᠠᠰᠤᠷᠠᠵᠤ ᠶᠠᠪᠤᠯᠠ ᠪᠢ᠃
ᠠᠮᠠᠷᠠᠭ ᠬᠦᠦ ᠮᠢᠨᠢ ᠮᠦᠨ ᠪᠤᠯ
ᠠᠯᠢᠪᠠ ᠤᠴᠢᠷ ᠢᠶᠠᠨ ᠬᠡᠯᠡᠨᠡ ᠦᠦ︖
ᠬᠠᠷᠢ ᠶᠢᠨ ᠡᠲᠡᠭᠡᠳ ᠵᠤᠪᠠᠭᠠᠭᠰᠠᠨ ᠪᠤᠯ
ᠬᠠᠮᠠᠭᠠᠯᠠᠵᠤ ᠠᠪᠤᠷᠠᠵᠤ ᠴᠢᠳᠠᠨᠠ ᠪᠢ᠃
ᠬᠠᠢᠷᠠᠲᠠᠢ ᠰᠡᠳᠬᠢᠯ ᠴᠢᠨᠢ ᠬᠡᠪ ᠢᠶᠠᠷ ᠢᠶᠠᠨ ᠪᠤᠯ
ᠬᠠᠳᠠ ᠴᠢᠯᠠᠭᠤ ᠶᠢ ᠴᠤ᠌ ᠬᠠᠭᠠᠯᠤᠨᠠ᠃
ᠨᠠᠩᠰᠠᠯᠮᠠ᠄
ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠪᠤᠯᠬᠤᠷ ᠴᠢᠨᠢ
ᠡᠯᠳᠡᠪ ᠤᠨ ᠶᠠᠭᠤᠮᠠ ᠶᠢ ᠪᠤᠳᠤᠯᠠ᠃
ᠡᠨᠡᠯᠵᠤ ᠰᠢᠨᠠᠯᠵᠤ ᠬᠠᠪᠴᠢᠭᠳᠠᠭᠰᠠᠭᠠᠷ
ᠠᠳᠡ ᠪᠠᠷᠢᠭᠳᠠᠭᠠᠳ ᠪᠠᠢᠨᠠ᠃
ᠴᠢᠨ᠋ᠸᠠ ᠶᠢᠨ ᠠᠮᠠᠨ ᠠᠴᠠ ᠭᠠᠷᠬᠤ ᠶᠢ
ᠴᠢ ᠮᠢᠨᠢ ᠮᠡᠳᠡᠬᠦ ᠬᠡᠷᠡᠭᠲᠡᠢ ᠰᠢᠦ᠃
ᠬᠦᠰᠡᠯᠲᠦ ᠰᠡᠳᠬᠢᠯ ᠴᠢᠮᠠ ᠳᠡᠭᠡᠷᠡ
ᠬᠦᠢᠲᠡᠨ ᠬᠠᠯᠠᠭᠤᠨ ᠢ ᠴᠤ᠌ ᠳᠠᠭᠠᠭᠠᠨᠠ᠃
ᠶᠦᠨᠳᠡᠩ᠄
ᠬᠤᠶᠠᠷ ᠪᠡᠶᠡ ᠮᠢᠨᠢ ᠤᠴᠠᠷᠠᠯᠠ
ᠬᠤᠢᠰᠢᠳᠠ ᠶᠢᠨ ᠵᠤᠪᠠᠯᠠᠩ ᠭᠠᠢᠭᠤᠢ ᠪᠢᠵᠡ᠃
ᠡᠨᠡ ᠤᠴᠠᠷᠠᠭᠰᠠᠨ ᠰᠠᠭᠠᠳ ᠢ
ᠡᠷᠡ ᠴᠢᠳᠠᠯ ᠢᠶᠠᠷ ᠳᠠᠪᠠᠶᠠ᠃
ᠠᠮᠠᠷᠠᠭ ᠰᠡᠳᠬᠢᠯ ᠪᠠᠢᠪᠠᠯ
ᠠᠭᠤᠰᠬᠢ ᠵᠢᠷᠦᠬᠡ ᠨᠢᠭᠡ ᠰᠢᠦ ᠳ᠋ᠠ᠃
ᠠᠭᠤᠵᠢᠮ ᠲᠠᠢᠪᠤᠩ ᠪᠠᠢᠭᠠᠳ
ᠤᠷᠤᠭ ᠤᠨ ᠬᠡᠷᠡᠭ ᠢ ᠭᠦᠢᠴᠡᠳᠬᠡᠶᠡ᠃
(ᠶᠦᠨᠳᠡᠩ ᠨᠠᠩᠰᠠᠯᠮᠠ ᠬᠤᠶᠠᠭᠤᠯᠠ ᠪᠠᠨ ᠳᠠᠭᠤᠯᠠᠬᠤ ᠨᠢ）
(ᠳ᠋ᠦᠨ᠋ᠧᠲ） ᠨᠡᠢᠯᠡᠭᠰᠡᠨ ᠬᠤᠶᠠᠷ ᠰᠡᠳᠬᠢᠯ
ᠮᠢᠩᠭᠠᠨ ᠯᠠᠩ ᠤᠨ ᠠᠯᠲᠠ ᠰᠢᠭ᠋
ᠵᠠᠢ ᠦᠭᠡᠢ ᠬᠠᠲᠠᠭᠤ ᠨᠢᠭᠲᠠ ᠳᠤ
ᠵᠡᠭᠦᠦ ᠶᠢᠨ ᠦᠵᠦᠭᠦᠷ ᠤᠷᠤᠬᠤ ᠦᠭᠡᠢ᠃
ᠠᠯᠲᠠᠨ ᠨᠠᠷᠠᠨ ᠮᠠᠨᠳᠤᠬᠤ ᠳᠤ
ᠠᠭᠠᠷ ᠲᠡᠭᠷᠢ ᠶᠢᠨ ᠳ᠋ᠧᠩᠯᠦ᠃
ᠠᠮᠠᠷᠠᠭ ᠬᠤᠩᠭᠤᠷ ᠬᠦᠦ ᠮᠢᠨᠢ
ᠶᠤᠰᠤ ᠲᠠᠢ ᠮᠢᠨᠦ ᠳ᠋ᠧᠩᠯᠦ᠃
ᠶᠦᠨᠳᠡᠩ᠄
ᠦᠢᠮᠡᠬᠦ ᠬᠤᠷᠢᠮ ᠤᠨ ᠵᠠᠪᠰᠠᠷ
ᠦᠳᠡᠰᠢ ᠪᠦᠷᠦᠩᠭᠦᠢ ᠶᠢᠨ ᠦᠶᠡ
ᠦᠶᠡ ᠶᠢᠨ ᠬᠡᠳᠦᠨ ᠨᠦᠬᠦᠳ ᠲᠠᠢ
ᠦᠨᠡᠨᠴᠢ ᠬᠦᠦ ᠴᠢᠨᠢ ᠢᠷᠡᠨᠡ᠃
(ᠶᠦᠨᠳᠡᠩ ᠭᠠᠷᠴᠤ ᠶᠠᠪᠤᠨᠠ᠃ ᠲᠠᠯᠠ ᠲᠠᠯᠠ ᠠᠴᠠ ᠬᠦᠮᠦᠰ ᠴᠤᠭᠯᠠᠷᠠᠬᠤ ᠪᠠ ᠬᠤᠷᠯᠤᠮᠠ
ᠪᠠᠯᠭᠠᠨ ᠢ ᠪᠢᠯᠳᠠᠤᠴᠢᠯᠠᠨ ᠳᠠᠭᠤᠯᠠᠨᠠ）
ᠬᠤᠷᠯᠤᠮᠠ᠄
ᠬᠠᠭᠠᠨ ᠢᠵᠠᠭᠤᠷᠲᠤ ᠨᠤᠶᠠᠨ ᠲᠠ
ᠬᠠᠮᠤᠭ ᠤᠯᠠᠨ ᠢ ᠴᠤᠭᠯᠠᠭᠠᠭᠠᠳ
ᠬᠠᠢᠷᠠ ᠦᠷᠦᠰᠢᠶᠡᠯᠲᠦ ᠬᠤᠷᠢᠮ ᠢᠶᠠᠨ
ᠬᠠᠨᠲᠠᠯᠠ ᠪᠠᠨ ᠬᠢᠬᠦ ᠪᠠᠷ ᠪᠡᠯᠡᠳᠬᠡᠵᠡᠢ᠃
ᠭᠡᠲᠡᠯᠡ ᠲᠠᠨ ᠤ ᠬᠠᠲᠤᠨ ᠴᠢᠨᠢ
ᠭᠡᠨᠡᠳᠲᠡ ᠤᠷᠭᠤᠬᠤ ᠪᠠᠷ ᠰᠢᠢᠳᠦᠯᠡ᠃
ᠰᠠᠶ᠋ᠢᠬᠠᠨ ᠪᠢ ᠢᠷᠡᠭᠡᠳ
ᠰᠠᠢᠬᠠᠨ ᠮᠡᠳᠡᠭᠡᠳ ᠠᠪᠤᠯᠠ ᠳ᠋ᠠ᠃
ᠶᠦᠨᠳᠡᠩ ᠭᠡᠳᠡᠭ ᠬᠦᠮᠦᠨᠨ
ᠦᠬᠦᠳ ᠤᠨ ᠬᠠᠮᠲᠤ ᠪᠠᠷ ᠢᠷᠡᠭᠡᠳ
ᠦᠳᠡᠰᠢ ᠲᠡᠭᠦᠨ ᠢ ᠤᠷᠭᠤᠭᠤᠯᠬᠤ ᠪᠠᠷ
ᠴᠤᠩᠬᠤ ᠪᠠᠷ ᠬᠡᠯᠡᠯᠴᠡᠭᠡᠳ ᠲᠤᠭᠲᠠᠯᠠ᠃
(ᠬᠤᠷᠯᠤᠮᠠ ᠶᠠᠪᠤᠵᠤ ᠤᠳᠤᠨᠠ᠃ ᠪᠠᠯᠭᠠᠨ ᠳᠠᠭᠠᠭᠤᠯ ᠤᠳ ᠢᠶᠠᠨ
ᠠᠪᠴᠢᠷᠠᠵᠤ ᠪᠤᠯᠤᠩ ᠲᠤᠬᠤᠢ ᠨᠤᠭᠤᠳ ᠲᠤᠨᠢᠭᠤᠵᠤ ᠬᠡᠪᠲᠡᠭᠦᠯᠦᠨᠡ᠃ ᠶᠦᠨᠳᠡᠩ ᠨᠦᠬᠦᠳ ᠤᠨ ᠢᠶᠠᠨ ᠬᠠᠮᠲᠤ
ᠢᠷᠡᠵᠦ ᠨᠠᠩᠰᠠᠯᠮᠠ ᠶᠢ ᠤᠷᠭᠤᠭᠤᠯᠬᠤ ᠪᠠᠷ ᠵᠠᠪᠳᠤᠲᠠᠯᠠ ᠪᠠᠯᠭᠠᠨ ᠪᠠ ᠵᠠᠷᠤᠴᠠ ᠨᠠᠷ ᠨᠢ ᠵᠦᠭ
ᠪᠦᠬᠦᠨ ᠠᠴᠠ ᠪᠤᠰᠴᠤ ᠢᠷᠡᠨᠡ）
ᠪᠠᠯᠭᠠᠨ᠄
ᠬᠠᠭᠠᠨ ᠲᠦᠷᠦ ᠳᠤ ᠳᠡᠷᠰᠯᠡᠭᠰᠡᠨ
ᠬᠠᠷᠠᠴᠤ ᠪᠤᠭᠤᠯ ᠢ ᠪᠠᠷᠢᠭᠠᠳ ᠠᠪ᠃
ᠬᠠᠷᠠᠩᠭᠤᠢ ᠭᠢᠨᠳᠠᠨ ᠳᠤ ᠲᠦᠭᠵᠢᠭᠡᠳ
ᠬᠠᠲᠠᠲᠠᠯᠠ ᠨᠢ ᠬᠤᠷᠢᠵᠤ ᠰᠢᠢᠳᠬᠡ ᠬᠦ᠋᠃
(ᠵᠠᠷᠤᠴᠠ ᠨᠠᠷ ᠶᠦᠨᠳᠡᠩ ᠲᠠᠢ ᠨᠤᠴᠤᠯᠳᠤᠵᠤ ᠶᠦᠨᠳᠡᠩ ᠢ
ᠱᠤᠷᠤᠩ ᠳᠤ ᠬᠢᠨᠡ᠃ ᠨᠠᠩᠰᠠᠯᠮᠠ ᠲᠡᠭᠦᠨ ᠢ ᠬᠠᠷᠠᠵᠤ ᠤᠬᠠᠭᠠᠨ ᠪᠠᠯᠠᠷᠳᠤᠨ ᠳᠠᠯᠳᠠ ᠤᠷᠤᠨᠠ᠃ ᠪᠠᠯᠭᠠᠨ
ᠵᠠᠷᠤᠴᠠ ᠨᠠᠷ ᠤᠨ ᠬᠠᠮᠲᠤ ᠶᠠᠪᠤᠨᠠ᠃ ᠬᠤᠶᠠᠷ ᠵᠠᠷᠤᠴᠠ ᠦᠯᠡᠳᠡᠵᠦ ᠠᠢᠷᠠᠭ ᠠᠷᠢᠬᠢ ᠶᠢ ᠰᠤᠭᠲᠤᠲᠠᠯᠠ ᠪᠠᠨ
ᠤᠤᠭᠤᠨᠠ᠃ ᠭᠡᠲᠡᠯᠡ ᠬᠤᠷᠯᠤᠮᠠ ᠪᠠᠢᠰᠢᠩ ᠤᠨ ᠬᠠᠭᠠᠯᠭᠠ ᠪᠠᠷ ᠰᠤᠭᠲᠤᠭᠤ ᠭᠠᠷᠴᠤ ᠢᠷᠡᠭᠡᠳ ᠡᠪᠦᠭᠡᠨ ᠤ
ᠠᠢᠷᠠᠭ ᠢ ᠠᠪᠴᠤ ᠤᠤᠭᠤᠬᠤ ᠶᠢᠨ ᠢᠶᠠᠨ ᠵᠡᠷᠭᠡᠴᠡᠭᠡ ᠪᠠᠷ ᠠᠢᠷᠠᠭ ᠲᠤ ᠬᠤᠤᠷᠠ ᠬᠢᠨᠡ᠃ ᠲᠡᠭᠦᠨ ᠢ
ᠵᠠᠷᠤᠴᠠ ᠡᠪᠦᠭᠡᠨ ᠮᠡᠳᠡᠭᠰᠡᠨ ᠦᠭᠡᠢ ᠤᠤᠭᠤᠵᠤ ᠬᠤᠷᠯᠤᠮᠠ ᠶᠠᠪᠤᠵᠤ ᠳᠠᠯᠳᠠ ᠤᠷᠤᠨᠠ᠃ ᠵᠠᠷᠤᠴᠠ ᠡᠪᠦᠭᠡᠨ
ᠦᠬᠦᠭᠰᠡᠨ ᠤ ᠳᠠᠷᠠᠭᠠ ᠬᠤᠷᠯᠤᠮᠠ ᠢᠷᠡᠵᠦ ᠡᠪᠦᠷ ᠠᠴᠠ ᠨᠢ ᠱᠤᠷᠤᠩ ᠤᠨ ᠳᠦᠯᠬᠢᠭᠦᠷ ᠢ ᠠᠪᠴᠤ ᠶᠦᠨᠳᠡᠩ ᠪᠠ
ᠪᠤᠰᠤᠳ ᠬᠦᠮᠦᠰ ᠢ ᠰᠤᠯᠠᠯᠠᠨᠭᠠᠷᠭᠠᠨᠠ᠃ ᠶᠦᠨᠳᠡᠩ ᠡᠪᠦᠭᠡᠨ ᠢ ᠵᠠᠢᠯᠠᠭᠤᠯᠬᠤ ᠵᠠᠪᠰᠠᠷ᠂ ᠬᠤᠷᠯᠤᠮᠠ
ᠶᠦᠨᠳᠡᠩ ᠢ ᠪᠠᠷᠢᠵᠤ ᠳᠠᠭᠤᠯᠠᠨᠠ）
ᠬᠤᠷᠯᠤᠮᠠ᠄
ᠬᠠᠰ ᠤᠨ ᠴᠢᠯᠠᠭᠤ ᠶᠢ ᠬᠠᠭᠠᠯᠪᠠᠯ
ᠬᠠᠮᠤᠭ ᠦᠨᠡ ᠪᠠᠨ ᠠᠯᠳᠠᠳᠠᠭ ᠶᠤᠮ᠃
ᠬᠠᠢᠷᠠᠯᠠᠭᠰᠠᠨ ᠬᠦᠮᠦᠨ ᠢ ᠢᠲᠡᠭᠡᠬᠦ ᠦᠭᠡᠢ ᠪᠤᠯ
ᠬᠠᠷᠠ ᠲᠤᠯᠤᠭᠠᠢ ᠴᠢᠨᠢ ᠬᠠᠭᠠᠷᠠᠲᠠᠭ ᠶᠤᠮ᠃
ᠡᠨᠡᠷᠢᠵᠤ ᠬᠠᠢᠷᠠᠯᠠᠭᠰᠠᠨ ᠰᠡᠳᠬᠢᠯ ᠠᠴᠠ ᠪᠠᠨ
ᠡᠷᠭᠢᠵᠦ ᠴᠢᠮᠠ ᠳᠡᠭᠡᠷᠡ ᠢᠷᠡᠭᠰᠡᠨ ᠶᠤᠮ᠃
ᠨᠠᠩᠰᠠᠯᠮᠠ ᠶᠢ ᠠᠪᠬᠤ ᠴᠢᠨᠢ ᠦᠩᠭᠡᠷᠡᠭᠰᠡᠨ ᠰᠢᠦ
ᠨᠠᠳᠠ ᠲᠠᠢ ᠰᠠᠭᠤᠪᠠᠯ ᠳᠡᠭᠡᠷᠡ ᠦᠭᠡᠢ ᠦᠦ᠃
ᠶᠦᠨᠳᠡᠩ᠄
ᠠᠯᠲᠠᠨ ᠨᠠᠷᠠᠨ ᠤ ᠭᠡᠷᠡᠯ
ᠠᠷᠪᠠᠨ ᠵᠦᠭ ᠲᠤ ᠰᠠᠴᠤᠷᠠᠨᠠ᠃
ᠠᠭᠤᠤ ᠰᠠᠢᠬᠠᠨ ᠲᠤᠶᠠᠭᠠᠨ ᠳᠤᠨᠢ
ᠠᠮᠠᠷᠠᠭ ᠬᠦᠦ ᠮᠢᠨᠢ ᠦᠵᠡᠭᠳᠡᠬᠦ ᠦᠭᠡᠢ᠃
ᠠᠯᠤᠰ ᠠᠴᠠ ᠬᠠᠷᠠᠭᠤᠯᠳᠠᠬᠤ ᠦᠭᠡᠢ ᠳᠤ ᠠᠭᠤᠵᠢᠮᠬᠠᠨ᠂
ᠠᠮᠢᠰᠬᠤᠯ ᠤᠨ ᠲᠤᠲᠤᠷᠠ ᠴᠢᠬᠤᠯ᠂
ᠠᠮᠢᠳᠤ ᠮᠡᠨᠳᠦ ᠶᠠᠪᠤᠪᠠᠯ
ᠤᠴᠠᠷᠠᠬᠤ ᠶᠢᠨ ᠢᠷᠦᠭᠡᠯ ᠪᠤᠢ ᠪᠤᠯᠪᠠ ᠦᠦ᠃
ᠬᠤᠷᠯᠤᠮᠠ᠄
ᠡᠭᠦᠯᠡ ᠪᠠᠷ ᠨᠢᠰᠴᠦ ᠡᠷᠢᠪᠡᠴᠦ
ᠠᠮᠠᠷᠠᠭ ᠴᠢᠮᠠ ᠳᠠᠭᠠᠨ ᠤᠯᠳᠠᠬᠤ ᠦᠭᠡᠢ᠂
ᠡᠳᠦᠷ ᠰᠦᠨᠢ ᠦᠭᠡᠢ ᠬᠦᠯᠢᠶᠡᠪᠡᠴᠦ
ᠰᠡᠳᠬᠢᠯ ᠰᠠᠨᠠᠭᠠᠨ ᠳᠤ ᠴᠢᠨᠢ ᠭᠠᠷᠤᠵᠠ ᠰᠢᠦ᠃
ᠶᠦᠨᠳᠡᠩ᠄
ᠠᠯᠤᠰ ᠠᠴᠠ ᠬᠠᠷᠠᠭᠤᠯᠳᠠᠬᠤ ᠶᠢ ᠮᠢᠨᠢ ᠬᠤᠷᠢᠨᠠ ᠪᠢᠵᠡ
ᠠᠮᠠᠷᠠᠭ ᠰᠡᠳᠬᠢᠯ ᠢ ᠮᠢᠨᠢ ᠬᠤᠷᠢᠬᠤ ᠦᠭᠡᠢ᠃
ᠡᠷᠭᠢᠭᠦᠯᠵᠦ ᠰᠠᠭᠠᠲᠤᠭᠤᠯᠵᠤ ᠴᠢᠳᠠᠪᠠᠴᠤ
ᠡᠭᠦᠷᠢᠳᠡ ᠬᠤᠪᠢᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ᠃
ᠬᠤᠷᠯᠤᠮᠠ᠄
ᠮᠡᠷᠭᠡᠨ ᠤᠬᠠᠭᠠᠨ ᠴᠢᠨᠢ ᠰᠠᠮᠠᠭᠤᠷᠠᠭᠰᠠᠨ ᠪᠢᠵᠡ
ᠮᠡᠳᠡᠯ ᠰᠠᠨᠠᠭᠠ ᠴᠢᠨᠢ ᠲᠦᠭᠡᠷᠡᠭᠰᠡᠨ ᠪᠢᠵᠡ᠃
ᠦᠢᠯᠡ ᠵᠤᠪᠠᠯᠠᠩ ᠢᠶᠠᠨ ᠡᠳ᠋ᠯᠡᠭᠰᠡᠨ ᠰᠢᠦ
ᠦᠷᠦ ᠡᠪᠡᠳᠴᠦ ᠴᠢᠮᠠ ᠪᠠᠨ ᠬᠠᠢᠷᠠᠯᠠᠭᠰᠠᠨ ᠶᠤᠮ᠃
ᠶᠦᠨᠳᠡᠩ᠄
ᠤᠯᠤᠰᠤ ᠳᠡᠭᠡᠰᠦ ᠪᠠᠷ ᠬᠤᠯᠪᠤᠭᠰᠠᠨ ᠢ
ᠬᠢᠲᠤᠭᠠ ᠬᠠᠢᠴᠢ ᠪᠠᠷ ᠲᠠᠰᠤᠯᠳᠠᠭ ᠶᠤᠮ᠃
ᠨᠡᠢᠯᠡᠭᠰᠡᠨ ᠬᠤᠶᠠᠷ ᠰᠡᠳᠬᠢᠯ ᠢ
ᠢᠯᠳᠦ ᠵᠢᠳᠠ ᠪᠠᠷ ᠰᠠᠯᠭᠠᠬᠤ ᠦᠭᠡᠢ᠃
ᠬᠤᠷᠯᠤᠮᠠ᠄
ᠬᠢᠲᠤᠭᠠ ᠮᠡᠰᠡ ᠶᠢ ᠭᠠᠷᠭᠠᠭᠰᠠᠨ ᠦᠭᠡᠢ
ᠬᠠᠷᠠ ᠰᠠᠨᠠᠭᠠ ᠶᠢ ᠠᠭᠤᠯᠤᠭᠰᠠᠨ ᠦᠭᠡᠢ᠃
ᠬᠠᠢᠷᠠᠯᠠᠵᠤ ᠡᠨᠡᠷᠢᠬᠦ ᠳᠡᠭᠡᠨ ᠬᠡᠯᠡᠭᠰᠡᠨ ᠶᠤᠮ
ᠬᠠᠷᠠᠵᠤ ᠰᠠᠭᠤᠪᠠᠯ ᠳᠡᠭᠡᠷᠡ ᠦᠭᠡᠢ ᠦᠦ᠃
ᠶᠦᠨᠳᠡᠩ (ᠠᠭᠤᠷ ᠲᠠᠢ ᠪᠠᠷ）᠄
ᠬᠠᠭᠠᠨ ᠬᠠᠭᠠᠨ ᠭᠡᠪᠡᠴᠦ
ᠬᠠᠷᠠᠴᠤ ᠶᠢᠨ ᠬᠦᠴᠦ ᠪᠠᠷ ᠠᠮᠢᠳᠤᠷᠠᠨᠠ᠃
ᠬᠠᠷᠠᠴᠤ ᠶᠢ ᠶᠡᠭᠡ ᠪᠠᠷ ᠳᠠᠷᠤᠯᠠᠪᠠᠯ
ᠬᠠᠭᠠᠨ ᠤ ᠲᠤᠯᠤᠭᠠᠢ ᠬᠠᠭᠠᠷᠠᠨᠠ᠃
ᠨᠤᠶᠠᠨ ᠨᠤᠶᠠᠨ ᠭᠡᠪᠡᠴᠦ
ᠨᠤᠲᠤᠭ ᠤᠨ ᠠᠷᠠᠳ ᠢ ᠳᠤᠯᠳᠤᠢᠯᠠᠨᠠ᠃
ᠨᠤᠲᠤᠭ ᠤᠨ ᠠᠷᠠᠳ ᠢ ᠳᠠᠷᠤᠯᠠᠪᠠᠯ
ᠨᠤᠶᠠᠨ ᠤ ᠲᠤᠯᠤᠭᠠᠢ ᠬᠤᠪᠠᠭ᠋ᠠᠢᠷᠠᠨᠠ᠃
ᠢᠨᠠᠭ ᠬᠡᠦᠬᠡᠨ ᠢ ᠮᠢᠨᠢ ᠪᠤᠯᠢᠶᠠᠭᠰᠠᠨ
ᠶᠠᠯᠠ ᠶᠢ ᠴᠢᠮᠠ ᠳᠤ ᠲᠤᠯᠭᠠᠨᠠ᠃
ᠦᠨᠦ ᠬᠡᠦᠬᠡᠨ ᠢᠶᠠᠨ ᠠᠯᠳᠠᠪᠠᠴᠤ
ᠮᠠᠷᠭᠠᠰᠢ ᠲᠤᠯᠤᠭᠠᠢ ᠶᠢ ᠴᠢᠨᠢ ᠠᠪᠤᠨᠠ᠃
ᠲᠠᠪᠤᠳᠤᠭᠠᠷ ᠦᠵᠡᠭᠳᠡᠯ
(ᠲᠠᠢᠰᠠᠨ ᠤ ᠪᠠᠢᠳᠠᠯ ᠨᠢ᠄ ᠨᠢᠭᠡᠳᠦᠭᠡᠷ ᠪᠦᠯᠦᠭ ᠤᠨ ᠲᠠᠢᠰᠠᠨ ᠤ
ᠪᠠᠢᠳᠠᠯ ᠬᠡᠪ ᠢᠶᠠᠷ ᠪᠠᠢᠨᠠ᠃ᠶᠦᠨᠳᠡᠩ ᠠᠴᠠ ᠲᠡᠮᠡᠴᠡᠯ ᠳᠡᠭᠡᠨ ᠠᠷᠠᠳ ᠢ ᠲᠠᠲᠠᠨ ᠠᠪᠴᠤ ᠪᠠᠯᠭᠠᠨ ᠲᠠᠢ
ᠲᠡᠮᠡᠴᠡᠬᠦ ᠪᠡᠯᠡᠳᠬᠡᠯ ᠢ ᠬᠢᠵᠦᠵᠡᠪᠰᠡᠭ ᠢᠶᠠᠨ ᠬᠡᠷᠬᠢᠨ ᠬᠡᠷᠡᠭᠯᠡᠬᠦ ᠰᠤᠷᠭᠠᠭᠤᠯᠢᠯᠠᠯ ᠬᠢᠯᠭᠡᠵᠦ᠂
ᠡᠯᠳᠡᠪ ᠵᠦᠢᠯ ᠢ ᠰᠢᠯᠭᠠᠨ ᠦᠵᠡᠵᠡᠭᠡᠵᠦ ᠪᠠᠢᠨᠠ᠂ᠡᠨᠡ ᠦᠶᠡ ᠳᠤ ᠬᠡᠳᠦᠨ ᠬᠦᠮᠦᠨ ᠰᠡᠯᠡᠮᠡ ᠶᠢ
ᠶᠠᠭᠠᠬᠢᠵᠤ ᠠᠰᠢᠭᠯᠠᠬᠤ ᠲᠤᠬᠠᠢ ᠲᠠᠨᠼ ᠤᠨ ᠮᠠᠶ᠋ᠢᠭ ᠲᠠᠢ ᠰᠤᠷᠭᠠᠭᠤᠯᠢᠯᠠᠯ ᠬᠢᠵᠦ ᠪᠠᠢᠨᠠ᠃） ᠶᠦᠨᠳᠡᠩ ᠤᠨ ᠨᠦᠬᠦᠳ ᠤᠨ ᠳᠠᠭᠤᠯᠠᠬᠤ ᠨᠢ᠄
(ᠾᠤᠷ） ᠬᠠᠷᠠᠴᠤ ᠪᠢᠳᠡᠨ ᠤ ᠬᠢᠯᠢᠩ
ᠬᠠᠯᠠᠭᠤᠨ ᠭᠠᠯ ᠰᠢᠭ᠋ ᠪᠠᠳᠠᠷᠠᠵᠤ ᠪᠠᠢᠨᠠ᠃
ᠬᠠᠳᠠᠨ ᠲᠡᠮᠦᠷ ᠵᠡᠪᠰᠡᠭ ᠤᠳ
ᠭᠠᠯ ᠤᠨ ᠠᠳᠠᠯᠢ ᠤᠯᠠᠯᠵᠠᠵᠤ ᠪᠠᠢᠨᠠ᠃
ᠬᠠᠭᠠᠨ ᠪᠠᠯᠭᠠᠨ ᠭᠡᠳᠡᠭ ᠴᠢᠨᠢ
ᠬᠠᠷᠭᠢᠰ ᠲᠦᠷᠦᠯ ᠤᠨ ᠠᠮᠢᠲᠠᠨ᠃
ᠬᠠᠷᠢᠶᠠᠲᠤ ᠪᠢᠳᠡᠨ ᠢ ᠳᠠᠷᠤᠯᠠᠭᠰᠠᠭᠠᠷ
ᠬᠠᠷᠢᠭᠤ ᠦᠭᠡᠢ ᠬᠤᠭᠤᠰᠤᠨ ᠪᠤᠯᠭᠠᠯᠠ᠃
ᠶᠦᠨᠳᠡᠩ (ᠭᠤᠨᠢᠭᠲᠠᠢ ᠪᠠᠷ）᠄
ᠠᠯᠲᠠᠨ ᠨᠠᠷᠠ ᠮᠠᠨᠳᠤᠵᠤ
ᠠᠭᠠᠷ ᠲᠡᠭᠷᠢ ᠶᠢ ᠭᠡᠢᠭᠦᠯᠦᠭᠰᠡᠭᠡᠷ
ᠬᠠᠷᠢᠶᠠᠲᠤ ᠪᠢᠳᠡᠨ ᠤ ᠠᠷᠠᠳ ᠤᠳ
ᠲᠡᠭᠦᠨ ᠤ ᠲᠤᠲᠤᠷᠠ ᠵᠤᠪᠠᠭᠰᠠᠭᠠᠷ ᠡ᠃
ᠬᠠᠷᠭᠢᠰ ᠬᠦᠮᠦᠨ ᠬᠠᠪᠴᠢᠪᠠᠴᠤ
ᠬᠠᠯᠠᠭᠤᠨ ᠰᠡᠳᠬᠢᠯ ᠬᠦᠷᠦᠬᠦ ᠦᠭᠡᠢ᠃
ᠬᠠᠯᠳᠠᠵᠤ ᠳᠦᠷᠢᠮᠡᠬᠡᠢᠯᠡᠬᠦ ᠨᠢ ᠪᠡᠷᠬᠡ ᠲᠠᠢ ᠴᠤ᠌
ᠬᠠᠢᠷᠠᠲᠤ ᠬᠦᠦ ᠮᠢᠨᠢ ᠬᠤᠪᠢᠷᠠᠬᠤ ᠦᠭᠡᠢ᠃
(ᠳᠠᠰᠢᠭᠤᠷ ᠪᠠᠷᠢᠭᠰᠠᠨ ᠨᠢᠭᠡᠨ ᠡᠪᠦᠭᠡᠨ ᠠᠮᠢᠰᠬᠤᠭᠠᠳᠠᠨ
ᠭᠦᠶᠦᠵᠦ ᠢᠷᠡᠭᠡᠳ ᠳᠠᠭᠤᠯᠠᠬᠤ ᠨᠢ）
ᠬᠦᠭᠡᠷᠦᠬᠦᠢ ᠨᠢᠭᠡ ᠭᠦᠷᠦᠭᠡᠰᠦ ᠶᠢ
ᠬᠦᠬᠡ ᠴᠢᠨ᠋ᠸᠠ ᠬᠦᠭᠡᠭᠡᠬᠦ ᠮᠡᠲᠦ
ᠬᠦᠭᠡᠷᠦᠬᠦᠢ ᠨᠢᠭᠡ ᠪᠦᠰᠡᠭᠦᠢ ᠶᠢ
ᠤᠯᠠᠨ ᠬᠦᠮᠦᠨ ᠬᠦᠭᠡᠭᠡᠵᠦ ᠪᠠᠢᠨᠠ᠃
ᠠᠶᠤᠭᠰᠠᠨ ᠭᠦᠷᠦᠭᠡᠰᠦ ᠰᠢᠭ ᠲᠡᠷᠡ
ᠠᠢᠰᠤᠢ ᠶᠠᠪᠤᠨᠠ ᠨᠠᠰᠢ ᠪᠠᠨ᠃
ᠠᠮᠠᠷᠠᠭ ᠨᠦᠬᠦᠳ ᠮᠢᠨᠢ ᠲᠡᠭᠦᠨ ᠢ
ᠠᠪᠤᠷᠠᠵᠤ ᠬᠠᠮᠠᠭᠠᠯᠠᠬᠤ ᠬᠡᠷᠡᠭᠲᠡᠢ᠃
ᠬᠤᠯᠠ ᠠᠴᠠ ᠪᠠᠷᠠ ᠶᠢ ᠬᠠᠷᠠᠬᠤ ᠳᠤ
ᠬᠤᠩᠭᠤᠷ ᠨᠠᠩᠰᠠᠯᠮᠠ ᠮᠦᠨ ᠰᠢᠭ ᠪᠠᠢᠨᠠ᠃
ᠬᠤᠷᠲᠤᠨ ᠮᠤᠷᠢᠨ ᠤ ᠭᠦᠶᠦᠬᠦ ᠪᠠᠷ
ᠬᠥᠭᠡᠷᠦᠬᠦᠢ ᠲᠡᠷᠡ ᠢᠷᠡᠯᠡ᠃
ᠶᠦᠨᠳᠡᠩ (ᠰᠢᠢᠳᠪᠦᠷᠢ ᠲᠠᠢ）᠄
ᠪᠠᠭᠠᠵᠢ ᠵᠡᠪᠰᠡᠭ ᠢᠶᠠᠨ ᠪᠠᠷᠢᠭᠠᠳ
ᠪᠠᠢᠯᠳᠤᠨ ᠲᠤᠯᠤᠯᠳᠤᠬᠤ ᠳᠤ ᠪᠡᠯᠡᠳᠬᠡᠶᠡ᠃
ᠪᠠᠯᠠᠮᠠᠳ ᠳᠠᠢᠰᠤᠨ ᠢᠷᠡᠪᠡᠯ
ᠬᠠᠢᠷᠠ ᠨᠠᠢᠷ ᠦᠭᠡᠢ ᠴᠤᠬᠢᠵᠠᠭᠠᠶᠠ᠃ᠪ
ᠠᠯᠭᠠᠨ ᠬᠡᠷᠪᠡ ᠢᠷᠡᠪᠡᠯ
ᠪᠠᠭᠠᠲᠤᠷ ᠴᠢᠳᠠᠯ ᠢᠶᠠᠷ ᠤᠰᠠᠳᠬᠠᠶᠠ᠃
ᠲᠡᠭᠦᠨ ᠤ ᠭᠠᠷ ᠠᠴᠠ ᠭᠠᠷᠴᠠᠭᠠᠵᠤ
ᠴᠢᠯᠦᠭᠡ ᠵᠢᠷᠭᠠᠯ ᠢᠶᠠᠨ ᠤᠯᠵᠠᠭᠠᠶᠠ᠃
(ᠠᠯᠤᠰ ᠠᠴᠠ ᠮᠤᠷᠢ ᠲᠠᠢ ᠬᠦᠮᠦᠨ ᠤ ᠢᠷᠡᠵᠦ ᠪᠠᠢᠭᠠ ᠮᠤᠷᠢᠨ ᠤ
ᠲᠦᠪᠡᠷᠭᠡᠨ ᠰᠤᠨᠤᠰᠲᠠᠨᠠ᠃ ᠭᠡᠲᠡᠯᠡ ᠤᠭᠲᠤᠨ ᠤᠴᠢᠭᠰᠠᠨ ᠬᠦᠮᠦᠰ ᠨᠠᠩᠰᠠᠯᠮᠠ ᠶᠢ ᠳᠠᠮᠨᠠᠨ ᠭᠠᠷᠴᠤ
ᠢᠷᠡᠨᠡ᠃ ᠨᠠᠩᠰᠠᠯᠮᠠ ᠰᠠᠶ᠋ᠢ ᠤᠬᠠᠭᠠᠨ ᠤᠷᠤᠵᠤ ᠰᠡᠷᠭᠦᠭᠡᠳ ᠳᠠᠭᠤᠯᠠᠨᠠ）
ᠨᠠᠩᠰᠠᠯᠮᠠ᠄
ᠬᠦᠯᠦᠭ ᠮᠤᠷᠢᠨ ᠤ ᠬᠦᠴᠦ ᠪᠠᠷ
ᠬᠦᠷᠴᠦ ᠢᠷᠡᠯᠡ ᠪᠢ ᠴᠢᠨᠢ᠂
ᠬᠦᠨᠦᠭᠡᠬᠦ ᠳᠠᠢᠰᠤᠨ ᠪᠠᠯᠭᠠᠨ ᠴᠢᠨᠢ
ᠬᠦᠭᠡᠭᠡᠭᠰᠡᠭᠡᠷ ᠢᠷᠡᠵᠦ ᠶᠠᠪᠤᠨᠠ ᠰᠢᠦ᠃
ᠦᠬᠦᠬᠦ ᠴᠠᠭ ᠢᠷᠡᠪᠡᠯ ᠴᠢᠨᠦ ᠳᠡᠷᠭᠡᠳᠡ ᠦᠬᠦᠶᠡ᠃
ᠠᠮᠢᠳᠤᠷᠠᠬᠤ ᠠᠵᠠ ᠪᠠᠢᠪᠠᠯ
ᠴᠢᠨᠦ ᠳᠡᠷᠭᠡᠳᠡ ᠠᠮᠢᠳᠤᠷᠠᠶᠠ᠃
ᠠᠶᠤᠯᠲᠤ ᠳᠠᠢᠰᠤᠨ ᠠᠴᠠ ᠬᠠᠮᠠᠭᠠᠯᠠᠬᠤ ᠶᠢ
ᠠᠮᠠᠷᠠᠭ ᠬᠦᠦ ᠮᠢᠨᠢ ᠮᠡᠳᠡ ᠳ᠋ᠠ᠃
ᠠᠮᠠᠷᠠᠭ ᠴᠢᠮᠠᠶ᠋ᠢ ᠪᠠᠨ ᠬᠠᠷᠠᠭᠰᠠᠭᠠᠷ
ᠠᠮᠢᠰᠬᠤᠯ ᠲᠠᠰᠤᠷᠠᠪᠠᠴᠤ ᠭᠤᠮᠤᠳᠠᠯ ᠦᠭᠡᠢ᠃
(ᠪᠠᠯᠭᠠᠨ ᠬᠡᠰᠡᠭ ᠬᠢᠶᠡ ᠵᠠᠷᠤᠴᠠ ᠨᠠᠷ ᠢ ᠳᠠᠭᠠᠭᠤᠯᠤᠨ ᠢᠷᠡᠵᠦ
ᠳᠤᠰᠢᠶᠠᠬᠤ ᠮᠠᠶ᠋ᠢᠭ ᠲᠠᠢ ᠳᠠᠭᠤᠯᠠᠨᠠ）
ᠪᠠᠯᠭᠠᠨ᠄
ᠳᠤᠷᠠ ᠰᠠᠨᠠᠯ ᠢ ᠬᠠᠢᠬᠤᠷᠬᠤ ᠦᠭᠡᠢ ᠪᠤᠯ
ᠳᠤᠰᠢᠶᠠᠯ ᠢᠶᠠᠷ ᠰᠢᠢᠳᠬᠡᠨᠡ ᠪᠢ᠃
ᠪᠠᠯᠠᠮᠠᠳ ᠬᠡᠦᠬᠡᠨ ᠨᠠᠩᠰᠠᠯᠮᠠ ᠶᠢ
ᠪᠠᠷᠢᠭᠠᠳ ᠠᠪ ᠤᠳᠤᠬᠠᠨ᠃
ᠲᠡᠵᠢᠭᠡᠵᠦ ᠦᠰᠬᠡᠭᠰᠡᠨ ᠪᠢᠷᠠᠭᠤ
ᠲᠡᠷᠭᠡ ᠡᠪᠳᠡᠯᠡᠬᠦ ᠶᠢᠨ ᠠᠳᠠᠯᠢ᠂
ᠲᠡᠨᠡᠭ ᠮᠤᠤᠰᠠᠢᠨ ᠠᠷᠠᠳ ᠤᠳ
ᠲᠤᠯᠤᠭᠠᠢ ᠳᠡᠭᠡᠷᠡ ᠭᠠᠷᠬᠤ ᠨᠢ᠃
ᠶᠦᠨᠳᠡᠩ᠄
ᠨᠤᠶᠠᠨ ᠬᠦᠮᠦᠨ ᠤ ᠦᠷᠦᠰᠢᠶᠡᠯ
ᠨᠤᠬᠠᠢ ᠶᠢᠨ ᠲᠠᠷᠭᠤ ᠲᠠᠢ ᠠᠳᠠᠯᠢ
ᠨᠤᠬᠠᠢ ᠬᠡᠳᠦᠢ ᠲᠠᠷᠭᠤᠨ ᠴᠤ᠌
ᠬᠦᠮᠦᠨ ᠲᠡᠭᠦᠨ ᠢ ᠢᠳᠡᠬᠦ ᠦᠭᠡᠢ᠃
ᠨᠤᠶᠠᠨ ᠬᠡᠳᠦᠢ ᠦᠷᠦᠰᠢᠶᠡᠪᠡᠴᠦ
ᠠᠷᠠᠳ ᠲᠤ ᠤᠭᠲᠤ ᠬᠦᠷᠲᠡᠬᠦ ᠦᠭᠡᠢ᠃
ᠦᠷᠦᠰᠢᠶᠡᠬᠦ ᠦᠭᠡ ᠶᠢ ᠬᠡᠯᠡᠪᠡᠴᠦ
ᠦᠰᠢᠶᠡᠯᠡᠬᠦ ᠦᠢᠯᠡ ᠶᠢ ᠬᠢᠳᠡᠭ᠃
ᠪᠠᠭᠠᠲᠤᠷ ᠭᠠᠷ ᠤᠨ ᠬᠦᠴᠦ ᠪᠠᠷ
ᠪᠠᠯᠲᠠ ᠲᠡᠮᠦᠷ ᠤᠨ ᠬᠦᠴᠦ ᠪᠠᠷ
ᠪᠠᠯᠠᠮᠠᠳ ᠳᠠᠢᠰᠤᠨ ᠢ ᠳᠠᠷᠤᠭᠠᠳ
ᠪᠠᠭ᠋ᠠᠲᠠᠢ ᠵᠢᠷᠭᠠᠯ ᠢᠶᠠᠨ ᠤᠯᠵᠠᠭᠠᠶᠠ᠃
(ᠭᠡᠵᠦ ᠳᠠᠭᠤᠯᠠᠵᠤ ᠳᠠᠭᠤᠰᠬᠤ ᠲᠠᠢ ᠵᠡᠷᠭᠡ ᠲᠤᠰ ᠲᠤᠰ ᠤᠨ
ᠪᠡᠶᠡ ᠳᠤ ᠠᠪᠴᠤ ᠶᠠᠪᠤᠭᠰᠠᠨ ᠰᠡᠯᠡᠮᠡ ᠪᠠ ᠰᠢᠳᠠᠮᠵᠡᠷᠭᠡ ᠪᠠᠷ ᠭᠠᠷᠳᠠᠨ ᠪᠠᠢᠯᠳᠤᠬᠤ ᠳᠤ ᠶᠦᠨᠳᠡᠩ ᠤᠨ
ᠲᠠᠯᠠ ᠨᠢ ᠢᠯᠠᠵᠤ ᠳᠠᠢᠰᠤᠨ ᠵᠢᠭᠤᠳᠠᠯᠠ᠃）(ᠨᠠᠩᠰᠠᠯᠮᠠ ᠪᠠᠢᠯᠳᠤᠭᠠᠨ ᠢ ᠠᠵᠢᠭᠯᠠᠨ ᠬᠠᠷᠠᠵᠤ ᠦᠯᠡᠳᠡᠨᠡ᠃ ᠬᠤᠷᠯᠤᠮᠠ ᠰᠡᠮ ᠭᠠᠷᠴᠤ
ᠢᠷᠡᠭᠡᠳ ᠳᠠᠭᠤᠯᠠᠬᠤ ᠨᠢ）
ᠬᠤᠷᠯᠤᠮᠠ᠄
ᠵᠢᠷᠭᠠᠬᠤ ᠵᠠᠮ ᠤᠨ ᠪᠤᠭᠤᠮᠳᠠ ᠪᠤᠯᠤᠭᠰᠠᠨ
ᠵᠢᠷᠪᠠᠭᠠᠷ ᠡᠮᠡ ᠶᠢ ᠳᠠᠷᠤᠶᠠ᠃
ᠬᠠᠷᠢᠯᠴᠠᠬᠤ ᠵᠠᠮ ᠤᠨ ᠬᠠᠭᠠᠯᠲᠠ ᠪᠤᠯᠤᠭᠰᠠᠨ
ᠬᠠᠷᠠ ᠦᠯᠦᠭᠴᠢᠨ ᠢ ᠰᠦᠨᠦᠭᠡᠶᠡ᠃
(ᠬᠢᠲᠤᠭᠠᠯᠠᠬᠤ ᠭᠡᠲᠡᠯᠡ ᠶᠦᠨᠳᠡᠩ ᠵᠡᠷᠭᠡ ᠬᠦᠮᠦᠰ ᠭᠠᠷᠴᠤ
ᠢᠷᠡᠨ᠂ ᠬᠤᠷᠯᠤᠮᠠ ᠶᠢ ᠬᠦᠭᠡᠭᠡᠵᠦ ᠶᠠᠪᠤᠭᠤᠯᠤᠨᠠ᠃ᠳᠠᠢᠰᠤᠨ ᠢᠶᠠᠨ ᠳᠠᠷᠤᠭᠰᠠᠨ ᠪᠤᠰᠤᠳ ᠠᠷᠠᠳ ᠤᠳ
ᠪᠦᠭᠦᠳᠡ ᠭᠠᠷᠴᠤ ᠢᠷᠡᠨ ᠳᠠᠭᠤᠯᠠᠬᠤ ᠨᠢ）
(ᠾᠤᠷ） ᠨᠠᠷᠠ ᠰᠠᠷᠠ ᠰᠢᠭ᠋ ᠬᠤᠤᠰᠯᠠᠭᠤᠯᠵᠤ
ᠨᠠᠪᠴᠢ ᠴᠡᠴᠡᠭ ᠰᠢᠭ ᠨᠦᠬᠦᠷᠯᠡᠵᠦ
ᠨᠠᠢᠷ ᠤᠨ ᠳᠡᠭᠡᠳᠦ ᠶᠢ ᠬᠢᠭᠡᠳ
ᠨᠠᠭᠠᠳᠤᠮ ᠤᠨ ᠳᠡᠭᠡᠳᠦ ᠶᠢ ᠦᠢᠯᠡᠳᠴᠡᠭᠡᠶᠡ᠃
ᠠᠭᠲᠠ ᠮᠤᠷᠢ ᠪᠠᠨ ᠤᠷᠤᠯᠳᠤᠭᠤᠯᠵᠤ
ᠠᠷᠠᠳ ᠤᠯᠠᠨ ᠳᠠᠭᠠᠨ ᠨᠡᠷᠡ ᠲᠠᠢ
ᠠᠯᠳᠠᠷᠲᠤ ᠬᠠᠷᠪᠤᠭᠠᠴᠢᠳ ᠢ ᠪᠠᠷᠢᠯᠳᠤᠭᠤᠯᠤᠶᠠ᠃
ᠠᠶᠤᠯ ᠬᠦᠨᠦᠭᠡᠯ ᠢ ᠡᠭᠦᠰᠬᠡᠭᠴᠢ
ᠠᠪᠯᠢᠭᠠᠴᠢ ᠪᠠᠯᠭᠠᠨ ᠢ ᠳᠠᠷᠤᠭᠠᠳ
ᠮᠢᠩᠭᠠᠨ ᠤ ᠨᠢᠳᠦᠨ ᠳᠤ ᠲᠤᠯᠢᠯᠠᠭᠤᠯᠵᠤ
ᠲᠦᠮᠡᠨ ᠤ ᠴᠢᠬᠢᠨ ᠳᠤ ᠰᠤᠨᠤᠰᠬᠠᠶᠠ᠃
ᠨᠠᠷᠠ ᠰᠠᠷᠠ ᠰᠢᠭ᠋ ᠬᠤᠤᠰᠯᠠᠭᠤᠯᠵᠤ
ᠨᠠᠪᠴᠢ ᠴᠡᠴᠡᠭ ᠰᠢᠭ ᠨᠦᠬᠦᠷᠯᠡᠵᠦ
ᠨᠠᠢᠷ ᠤᠨ ᠳᠡᠭᠡᠳᠦ ᠶᠢ ᠬᠢᠭᠡᠳ
ᠨᠠᠭᠠᠳᠤᠮ ᠤᠨ ᠳᠡᠭᠡᠳᠦ ᠶᠢ ᠦᠢᠯᠡᠳᠴᠡᠭᠡᠶᠡ᠃(ᠪᠦᠭᠦᠳᠡᠭᠡᠷ ᠢᠶᠠᠨ ᠲᠤᠭᠤᠷᠢᠨ ᠰᠠᠭᠤᠵᠠᠭᠠᠨᠠ）
(ᠾᠤᠷ） ᠠᠮᠠᠷᠠᠭ ᠨᠦᠬᠦᠳ ᠪᠦᠭᠦᠳᠡᠭᠡᠷ ᠴᠤᠭᠯᠠᠷᠠᠵᠤ
ᠠᠯᠲᠠᠨ ᠰᠢᠷᠡᠭᠡ ᠪᠠᠨ ᠲᠤᠭᠤᠷᠢᠨ ᠰᠠᠭᠤᠭᠠᠳ
ᠠᠮᠲᠠᠲᠤ ᠢᠳᠡᠭᠡ ᠪᠠᠨ ᠠᠮᠰᠠᠵᠤ
ᠠᠭᠤᠤ ᠨᠠᠢᠷ ᠢ ᠡᠭᠦᠰᠬᠡᠨ ᠵᠢᠷᠭᠠᠶᠠ᠃
ᠬᠤᠰᠢᠭᠤᠴᠢ ᠪᠠᠭᠠᠲᠤᠷ ᠤᠳ ᠮᠤᠷᠢᠯᠠᠨ ᠢᠷᠡᠵᠦ
ᠭᠤᠸᠠ ᠬᠡᠦᠬᠡᠨ ᠨᠦᠭᠦᠳ ᠤᠭᠲᠤᠨ ᠠᠭᠤᠯᠵᠠᠵᠤ
ᠬᠤᠪᠢ ᠲᠠᠢ ᠴᠡᠩᠭᠡᠯ ᠪᠦᠷᠢᠳᠦᠭᠰᠡᠨ ᠲᠤᠯᠠ
ᠬᠤᠷᠢᠮᠯᠠᠭᠰᠠᠨ ᠪᠦᠭᠦᠳᠡᠭᠡᠷ ᠲᠡᠭᠦᠰ ᠵᠢᠷᠭᠠᠯ ᠲᠠᠢ᠃
ᠡᠬᠢ ᠰᠤᠷᠪᠤᠯᠵᠢ
http://mgl.hongshanqu.gov.cn/am/2016/5/11/U_14672_183727.html?pid=2366